صباح الخير ياذكرى تراب الشاطي المنثور
صباح الشوق لأمواجك تكسَّر فوق راحاتي


صباح الشمس لاطلّت تغازل في سماك طيور
صباحك يابحر كنه صباح الظالم العاتي


صباح الغيم والأمطار صباح الملح والبلّور
صباح الحزن والقسوه صباحك ياجراحاتي


صباح الهم والضيقه صباح الخاطر المكسور
صباح الجرح والآلآم صباح الدمع وآهاتي


صباح الحب ياقلبي صباح إحساسك المغرور
صباحك غير يادنيا يفرق عن صباحاتي


صباحي غير يادنيا صباح العاشق المخمور
صحى من سكرة شعوره وجا ينشد عن الآتي


صباحي غير بحضورك صباح الحاضر المحظور
صباح الماضي المنسي هنا لعيون ساداتي


هنا كان الهوى يختال هنا كان الغلا محفور
هنا أهدتني الساعه هنا سمعتها أبياتي


هنا لبستها الغتره هنا ضميتها مسرور
هنا حسيت بالفرحه هنا عليّت ضحكاتي


هنا قالت لي أحبك هنا لعبت معاي الدور
هنا كان الطفل يلعب ولاهمه ولا يحاتي


هنا صار الفراق اللي على شط البحر مذكور
هنا صار الوداع اللي بدا مشوار عثراتي


هنا ونّيت من ضيمه هنا خلتني المقهور
هنا خلتني أتمتم أفا وأعض ع شفاتي


هنا ضاقت بي الدنيا هنا طاح الدمع معذور
هنا ناح الخفوق وصاح هنا طفّيت شمعاتي


رحلت مفارق أحبابي رحلت وساكنتني دور
رحلت وما لقيت الا عذابك يامسافاتي


رحلت أبعثر شعوري على الدنيا بدون شعور
رحلت أدور الراحه رحلت ألملم شتاتي


رحلت مكذب اللي صار وقلبي محترق مدمور
رحلت ورحلتي كانت الأصعب بين رحلاتي


رحلت الناسي المنسي رحلت بضافي الديجور
أغني للخطا شعري ولا أدري وين وجهاتي


أخبي الحزن في البسمه وعيني تكشف المستور
وأواصل ذا المسير وما وصلت إلا لمتاهاتي


صدق من قال ذا الدنيا تردك لو تلف وتدور
وأنا ردتني الدنيا هنا لأول بداياتي


صباح الخير ياذكرى زمانٍ قد مضى وعصور
صباح فراق مايكمل صباح وصال ماياتي


صباح أشواق ماتاصل صباح أشيا تجي بالدور
مثل منظومة جروح الزمان وكرهه لذاتي


صباح الخير ياذكرى تراب الشاطي المهجور
صـباح الخير يا ذكـــرى بداة كل نهـايـاتــي