من حكايات جدتي 1 الأخوات الثلاث0

وفجأة...
تسمع .......
صوت خطوات جاية نحوها ..في البداية حست بفرحة على بالها وحدة من اخواتها سمعت صوتها وجاية تدورها ...لكن سرعان ما تبدلت الفرحة الى شعور بالخوف والقشعريرة لان الخطى الي سمعتها كانت ثقيلة وكأنها تسحب شي معها 00وناظرت يمين ...ثم يسار...و لفت راسها للخلف ولكن الظلام كفيل انه يحجب الرؤيا ... تصلبت اعضائها ..اكلها الرعب بدأ العرق يتصب ...وصابها الدوار والغثيان .و تجمدت دموعها في محاجرها ..ساعتها .تيقنت ان الموت جاي لامحالة وان هذي نهايتها ... في زحمة المخاطر الي تحيط بها من كل جهه ...حاولت بكل ما تستطيع مدافعة احساسها بالرعب ..حاولت مقاومة هذا الوضع المأساوي الي تعيشه ... بعدما فهمت ان الي قاعد يصير مدبر و مخط له وان اخواتها لو ضيعوها اكيد حيدورونها ولكن الموضوع اكبر بكثير ... حاولت ..وحاولت ... وحاولت ..دعت الله ..وسألته العون والطف والنجاة ...وقررت انها تسير بعكس الاتجاه يمكن تلاقي حل00
اخيرا قدرت تستجمع ما تبقى لها من قوة وتوقف على حيلها وحملت حزمة الحطب على ظهرها .. ويا دوب حملتها ...إلا وهاليد البشعة ذات المخالب الطويلة تمسكها مع كتفها وكنها تستوقفها ....البنت شهقت شهقة قوية وتصلبت مكانها ... اصفرت ونشف ريقها وصابتها رعبة فضيعة ما تتخيلونها ...(شي طبيعي تموت من الرعبة ...ظلام و وحدة وكمان يد غريبة تمسكها من وراها )!!!!
-قالها :وش فيك يابنتي ؟؟؟
البنت سمعت الصوت المبحوح وكنها تقيس عمر الي يتكلم !! ....
-قالت: من انت؟؟
قال : انا واحد من أهل الوادي ...سمعت صوتك وانا عمك وجيت اساعدك .
قامت البنت تبكي بحرقة وتعلمة بالسالفة ...من فرحتها ما صدقت تسمع احد يتكلم معها ... طبعا المسكينة ما تدري أن الي يكلمها سعلي ..وانه ناوي عليها هوالثاني ...
- قال : وش رايك اساعدك تحملين الحطب ؟؟
-قالت أي والله ياعم شل علي الحطب 0
وشال عليها الحطب ولكن كلما شاله قطع الحبل الي يجمع العيدان مع بعض بأظافرة ويتناثر الحطب ..وترجع البنت تلمة وتربطة من ثاني .. ويشيله لها ثم يقطعه بأظافرة ويتناثر الحطب وترجع البنت المسكينه تلمه ... وكذا سوى الحركة لها ثلاث مرات بهدف انه يأخرها ويطفشها عشان يعرض عليها تجي معه ...
وبالفعل تعبها وبهدلها وصار الي يبغاه ...
راحت معه البيت ... وعرف حرمته عليها وكانو في قمة السعادة ان بنت قمر أو بالأصح (فريسة) ...دخلت بيتهم بدون مقاومة...البنت لما شافت السعلية وزوجها بالنور ارتعبت من أشكالهم الغير مألوفة..وماأرتاحت لهم ..عاد واضح فيهم الجشع والنهم والوحشية...وان نياتهم خبيثة..
البنت قاعدة تفكر وش ذا الحظ النحس الي ساقها لهالوحوش؟؟ كيف بترتاح؟؟ الى متى بتجلس عندهم ؟؟؟وهل اذا بغت تروح بيسمحون لها ؟؟ اصلا تخاف يقتلونها اليلة !وش السواة ؟؟؟...أفكار كثيرة دارت في نفسها ودموعها مو راضية توقف من هول الصدمة ....
و في وقت تفكيرها قطعت عليها زوجة السعلي وقالت :وش اسمك ؟؟ قالت اسمي عايشة .
قالت السعلية: ليش انتي نحيفة كذا ؟؟ ليش ما تاكلين زين ؟؟؟
ساعتها حست البنت ان المقصد فيه أن. وسكت ما قالت شي .
قالت السعلية بتنامين في هذي الغرفة .. والغرفة الثانية اصحي تفتحيها ولو فتحتيها مايصير لك طيب .
قالت البنت : طيب ماراح افتحها.
قامت السعلية تنام .. والبنت بسرعة راحت فكت الغرفة وشافت منظر بشع ومخيف .. جثث أوادم ...جماجم مكسرة... اجسام مسلوخة ...ناس مشنوقة ومازال فيها حياة ...عظام هنا وهنا..والجدران ملطخة بالدم ...شافت المنظر الرهيب وكانت بتصيح لولا افتكرت تهديد السعلية ...مسكت أعصابها غصب ..وهي راجعة لفت والا وجهها بوجه السعلية وضربتها وحبستها في السجن ضيق ومظلم والباب فيه فتحة صغيرة بس ..بكت البت وقالت الى متى وانا كذا مقدر ادافع عن نفسيلازم اسوي شي...قعدت تفكر في مصيرها وكيف ممكن تساعد الي بقيوا بالغرفة وتفك اسرهم وكيف تنجومن هالسعلية وزوجها ...اليوم الثاني في الصباح دخل الرجال عليها ومعاه أكل يبغاها تاكل علشان تسمن وبعدين ياكلونها .قالها كلي ولازم تكملين هالموجود بالصحن واذا ما اكلتيه كله اوريك شغلك ..وبعده دخلت الحرمة وقالت نفس الكلام وانها لو ماأكلت بتفتن عليها ..طبعا الحرمة هي الي تحرض الزوج دايم وصارت البنت تاكل الأكل الي يجي كله ولما يخلص اسبوع يجون يشوفون سمنت والا لأ كيف ؟؟يقولون لها مدي يدك من الفتحة الي بالباب وهي تخرج لهم عظمة الدجاجة ويقولون ليش ما تاكلين وكل مرة يجيبون اكل احسن واحسن عشان خاطر تسمن وياكلونها البنت زانت صحتها وصارت مليانة ..وبعد شهر فتحت عمتها السجن وشافت انها متينة وتصلح للأكل .. وراحت تبشر زوجها ان البنت زانت وتحرضة انهم خلاص يذبحونها ... والبنت تسمع كلامهم الي دار كله ودبرت حيلة لطيفة عشان تتخلص منهم ..فلما جا عمها قال اخرجي تعالي وانا عمك ساعدي عمتك بالعجينة وسوي الخبز لنا...وانا بروح الوادي واجي وقت المغرب . فرحت البنت لأن الفرصة الحين قدامها..ولازم تبدأ تنتقم من الحرمة قبل الزوج ما يجي من الوادي ولأنها المحرضة وهي الي تفتن وكلمتها مسموعة..
قالت ابشر (طبعا اضمرت الإنتقام بنفسها )..جت الحرمة بالعجين .. والبنت شبت النار وحطت الصفيحة (زي الصاج) على النار لين صار حامي ..قالت البنت : ياعمة .. امي كانت قبل ما تسوي الخبز تحط صدرها على الصاجة وهي حامية عشان تطلع عجينتها حلوه اذا انخبزت .. الحرمة صدقت البنت وفردت صدرها على الصاج ولزق جلدها فيه واحترقت وتآكل صدرها وهي تصيح وتصرخ وتبكي ...ساعديني فكيني ..قالت هذا جزاك تستاهلين واكلتها النار لين مات .. سحبتها وخرجتها من البيت.. وتخلصت من الحرمة بسهوله ..
وراحت بعدها للمأسورين وفكتهم من السجنوخرجتهم كلهم وشكروها وسألوها اذا تبغى مساعده ؟؟
قالت : ايوه ابغا انتقم من الشايب ذا ..وابغاكم تقعدون بغرفة التعذيب الي كنتو فيها ولا تصدرو أي صوت حتى اصوت لكم .. واتفقو على كذا..بعد المغرب دخل السعلي البيت ونادى حرمته ..قالت البنت .: اهلا ياعم ... عمتي خرجت شوي وبترجع ..فكت القيد مني وقالت اذا جاء عمك استقبليه واعطيه الي يحتاجه...قال : لا انا بنفسي بسوي القهوة . فراحت له : ابوي لما كان يسوي القهوة ياخذ الهاون ويضرب العضو حقه وعشانه كان قوي وبطل يضرب بقوته كلها .. ضحك السعلي قال حتى انا بطل .. وقام يضرب بقوته ومن الألم ابيضت عيونه ومات .. قالت الله لايردك ولا يرد زوجتك من وراك.انتهى الشر كله وفتحت الغرفة عن المساجين وطلعوا من حياة الجحيم الي كانوا عايشينها ...ونظفوا لها البيت من الأوساخ وجددوه وصار بيتها لوحدها ...ولكن في جلد بشري لونة اسود احتفظت فيه عايشة .. ياترى برأيكم ايش السبب ؟؟ وش الي براسها ؟؟ خاصة انها لوحدها في هالبيت .. و لا حولها بيوت في هالوادي ؟؟؟

وما زال للقصة بقية
...ولكن خمنو شوي وش تتوقعن سبب الاحتفاظ بالجلد الأسود؟؟؟؟
اذا جاوبتو اكمل القصة ؟؟؟

مادري والله بس
يمكن جلد احد يعز عليها

ههههههههههههههههه .لا..موجلد احد يعز عليها ...لاحظي ان البنت في مكان ماتعرف فيه احد ..و السعليات ياكلون كل وحدة حلوة ..و ما عندها احد بهالوادي غير الوحوش والسعليات ....قربت لك الحل .. فكري
..اشكرك د/امل عالرد السريع فديتك0

	#7
∫ ≈دلوعه وماتنصاد≈ ∫	رد: من حكايات جدتي 1 الأخوات الثلاث0 من حكايات جدتي 1 الأخوات الثلاث0

	#8
عندي أمل	رد: من حكايات جدتي 1 الأخوات الثلاث0 من حكايات جدتي 1 الأخوات الثلاث0 وما زال للقصة بقية ...ولكن خمنو شوي وش تتوقعن سبب الاحتفاظ بالجلد الأسود؟؟؟؟ اذا جاوبتو اكمل القصة ؟؟؟

	#9
د/أمل	رد: من حكايات جدتي 1 الأخوات الثلاث0 من حكايات جدتي 1 الأخوات الثلاث0 مادري والله بس يمكن جلد احد يعز عليها