المشاركة الأصلية كتبت بواسطة غيمة عطر

حبيبة قلبي اول شي الله يرحم أمك ويسكنها فسيح جناته يا رب

وتاني شي يا قلبي انت حكيتي عن مرض نفسي عندك يا ترى هالشخيص من عندك ولا تشخيص دكتور

وتالت شي هالاحاسيس الي بتحسيها من فقدان مؤقت للذاكرة واضطراب حياتك واحباطك وانعدام ارادتك كله رد فعل عكسي لوفاة والدتك الي كنتي متعلقة فيها كتير

وبدي اسالك انت البنت الوحيدة بين اخواتك وما عندك حدا من خالاتك او عماتك حاول يساعدك بهالفترة؟

انا بدي منك شي مهم ، أول شي لازم تكون ثقتك بربك كتير كبيرة ولازم تعرفي انو الموت مو نهاية العالم ومهما كان الانسان الي راح من حياتنا عزيز على قلوبنا لازم حياتنا ما توقف عند موته الام غالية كتير بس صدقي لو شافتك امك بهالحالة ما حتكون مبسوطة ابدا دائما فكري بالاشياء الي بتخلي امك سعيدة منك واعمليها مشان ترفعي راسها حتى وهي ميتة قوي صلتك بربك مو بس تعملي الفروض وانما صلي النوافل وادعي من قلبك باوقات السحر وبسجودك انو الله يساعدك ويقويك على اجتياز هالمرحلة الصعبة من حياتك

حاولي دائما تنظمي دراستك مثلا اكتبي الواجبات أول وبعدين ابتدي بحفظ المواد السهلة بالنسبة الك وهيك حتى توصلي للاصعب ولما بتلاقي نفسك اتعبتي خدي فترة راحة ولا تضغطي على نفسك

وحطي ببالك الانسان دائما بيتصرف وبعيش على حسب تفكيرو يعني لو بقيتي عم تقولي انا محبطة وانا ما بقدر معناها رح تضلي ما بتقدري ومحبطة دائما لازم دائما تفكري انو انت بتقدري تعملي المستحيل وانو انت بتقدري تصيري احسن دكتورة وانا برايي لو ما كنت انسانة عندك ارادة وحابة انك تكوني احسن واحدة بين صاحباتك ما كنت كتبتي هاد الكلام وما كنت طلبتي المشورة والنصح

أنا برايي كمان اطلبي المساعدة من حدا اكبر منك عمتك او خالتك مثلا او حتى جدتك لو كانت على قيد الحياة

بتمنى كون فدتك ولو بشيء بسيط وبتمنى منك تتواصلي معنا

موفقة