ازياء - فساتين سهرة و مكياج و طبخ - كل ما هو جديد فى كرت العمر

http://www.boswtol.com/mastaba/images/205/Kamar_01.JPG

أجمل لحظة في حياة أي بنت هي لحظة الإعلان عن ميعاد فرحها وخطوبتها، وأكيد أي بنت بتكون فرحانة جدا وهي بتقدّم دعوة الفرح لأصدقائها وأقاربها...

وطبعا كلنا عارفين كروت الدعوة الكرتون المنتشرة بأشكالها الجميلة وتصميماتها الكثيرة لكن الجديد النهارده إننا نقدم كارت دعوة الفرح باستايل جديد جدا جدا..

ده بعض افكار مصممة الكروت المعروفة "هناء الشريف" اللي هتقول لنا على إيه الجديد في أحدث خامات كروت الأفراح..

ليه فكّرتِ في خامة الستان بالذات؟

كل الناس متعوّدة على شكل الكارت الكرتون، ففكّرت إني أقدم حاجة جديدة جداً ومختلفة وأهم حاجة أجدد فيها هي "الخامة" ووجدت إن أقرب شيء للفرح هو "الستان" وأكثر لون مستخدم في كروت الفرح الستان هو "الأوف وايت" أو "الروز"..

http://www.boswtol.com/mastaba/images/205/Kamar_02.JPG

أما التصميم الخارجي بيكون على ذوقي وإلهام من الله سبحانه وتعالى، فأنا أرسم تصميم كروكي على ورقة في الأول وأحيانا العروسة بتختار وتقترح معايا التصميم ونجمّله في الآخر ونصممه بالإكسسوار والورود، وممكن نضع وردة أو شريطة و(الدرابية) على الحرف عشان الشيكولاتة.

http://www.boswtol.com/mastaba/images/205/Kamar_03.JPG

وليه ماختارتيش الستان الأبيض؟

لقيت إن اللون الأبيض في الستان بالذات لازم يكون غالي جداً وإلا هيظهر شكله مش حلو ويقلل من قيمته.

وليه اخترت الدانتيل بشكل ثابت مع كل ستان؟

الدانتيل أنسب حاجة لشياكة الستان، وحرصت أن أشتريه من أمريكا وأوربا أثناء سفرياتي؛ لأنه أهم حاجة تميز قطعة الستان والناس بتعرف بسرعة الدانتيل الغالي من الرخيص.

أما الستان في مصر فأسعاره معروفة ومناسبة، وبجانب الدانتيل أعمل البرودريه وهو نوع من أنواع التطريز اليدوي، وأصبح له ماكينة خاصة وعبارة عن خيوط وألوان ورسومات متداخلة مع بعضها، وفي صورة ثانية استغنيت عن الدانتيل ووضعت الدراي فلاور ودرابيه ذهبي.

http://www.boswtol.com/mastaba/images/205/Kamar_04.JPG

وهل وجدت صعوبة في كتابة محتويات الكارت على القماش الستان؟

طبعا فيه صعوبة؛ لأن مش أي قماش يقبل ويناسب كتابة "السلك سكرين" وده كان بيضايقني جداً؛ لأن فيه قماش كان بيعجبني جداً لكن خامته لا تقبل كتابة "السلك سكرين"؛ لأنه ممكن يظهر مش شيك أو يشرب اللون، وبالتالي يفقد شكله، ولأن التصميم بيكون "هاند ميد" فمن اللازم أن أعتني بكل صغيرة وكبيرة.

إيه هو السلك سكرين؟

هو نوع من أنواع الطباعة اليدوية الخاصة بالأقمشة ومن أدق أنواع الطباعة القديمة وتعطي قيمة ورُقيّ.

http://www.boswtol.com/mastaba/images/205/Kamar_05.JPG

وإيه نوعية الخطوط التي تمشي مع القماش الستان؟

أنا أتركها للعروسة؛ لأن فيه بنات بتفهم يعني إيه "هاند ميد" يعني فيه مثلا بنت تقول لي عاوزة الكلام يتكتب على يد خطاط وده بيكون غالي شوية وبياخد وقت، وفيه بنت تقول عاوزة خط زي الرقعة أو النسخ وأحيانا فيه بنات تجيب خط مش عارفة اسمه وأنفذه معاها أما "السلك سكرين" بالذات عاوز خطوط شيك عشان يظهر جمال الكارت..

معنى كده إن العروسة بتهتم بالكارت الستان زي اهتمامها بالكوشة والماكياج؟

العروسة تعتبر الكارت هو عنوان للفرح كله؛ فمن خلال الكارت نعرف ذوق العريس والعروسة ومستواهم الاجتماعي وشكل الفرح هيكون عامل إزاي ومن أصول الإيتيكيت والذوق إننا ندعو الناس على الفرح عن طريق الكارت وخصوصا المعازيم الـVIP، وعلى فكرة فيه ناس ما بتروحش الفرح إلا لو أخذت الكارت من العروسين.

يعني لازم العروسة تسلّم الكارت بنفسها وتسلمه للمعازيم قبل الفرح؟

الفرحة هي التي تجعل العريس والعروسة يقدموا الكارت بأنفسهم وبيكونوا حريصين على كده ولكن ممكن الأم أو الأب يرسلوا الكارت إلى الشخصيات الـVIP ويسلم قبل الفرح بحوالي 17 أو 18 يوم.

http://www.boswtol.com/mastaba/images/205/Kamar_06.JPG

هل فيه صعوبة في توصيل الكارت الستان عن طريق البريد؟

في حالة إرساله بالبريد فكّرت أن أعملّه غلاف كرتون شيك عشان يوصل في البريد أما في حالة تسليمه باليد فكرت أعمل كارت صغير جدا على طرف الستان أكتب عليه فلان وحرمه وفلان وحرمه.

وإيه صدى الستان عند الناس وردّ فعلهم إيه لحد دلوقتي؟

معجبين بيه جداً، وعارفين إنه حاجة جديدة ويكفيني أن أهل العريس والعروسة بعد الفرح يكلموني ويشكروني ويقولولي آراء المعازيم عن الكارت.

http://www.boswtol.com/mastaba/images/205/Kamar_07.JPG

وإيه اللي يميز الكارت الستان عن الكارتون؟

يكفيني أن أقول إن الكارت الستان بيعيش ويستمر مدة أطول ولا يتعرض للبلل ولا يوضع في الأدراج وممكن الكارت المفرش الموجود في الصورة مثلاً يتعمل له (فريم) والعروسة تضعه في الصالون أو غرفة المعيشة والأشكال التانية ممكن توضع على تابلوه أو تستخدميه كإكسسوار أو ديكور في المنزل.

وطريقة تنظيفه ازاي؟

ممكن نحميه بوضعه في الظرف الخاص به وهو عبارة عن تول أو ستان أو أورجانزا وممكن نجيب فوطة بيضاء ونضع عليها شامبو أو أي مواد تنظيف ونمسح قطعة الستان بالدانتيل كلها بالإضافة إلى أن "السلك سكرين" عمره ما يختفي أو يبهت أو يغير لونه.

هل فكرتِ تتعرفي على استايل الكروت في الدول العربية والأوربية؟

بالنسبة لأوربا أنا اتعاملت مع عرب عايشين في لندن ومصريين عايشين في كندا وعرفت إن الدول الأوربية بتعشق وتنبهر بـ "الهاند ميد"، وكل الكروت في أوربا عبارة عن "كارتون" ولكن غاية في الدقة والشياكة، وعندهم عادة حلوة جدا إنهم يكونوا حريصين إن الأب والأم يدعوا المعازيم يعني يكتبوا السفير الفلاني وحرمه والدكتور فلان وحرمه يدعوان....

على عكس الدول العربية وجدت أن الكروت عندهم من أساسيات الفرح والأم هي التي تدعو الناس يعني يكتبوا السيدة فلانة والسيدة فلانة تدعوان ............... ولا يكتب اسم الأب هذه عادات وتقاليد عندهم ويهتموا ويفتخروا بكل شيء مبتكر وغير مألوف.

الكروت الستان شكلها حلو وفخمة جدا هل سعرها غالي؟

أنا بقول لأي بنت ممكن أصمم لها الكارت الستان على حسب إمكانياتها المادية وممكن أقلل في خامة الدانتيل أو خامة الإكسسوار أو الديكور الخارجي وعلى فكرة تَمَن الكارت الكرتون بيكون بحوالي 10 جنيه وأنا بصمّم كروت ستان بنفس السعر ده لأني بحب أرضي كل البنات.

وأخيراً ما هو أغرب كارت ستان عملتيه؟

هو كان كارت دعوة لفرح بنت فلسطينية ولما طلبت منها أعرف التاريخ والمكان فوجئت إنها طلبت مني أن أصممه من غير ما أكتب التاريخ أو المكان وأنا سألتها ليه، قالت لي: عشان ظروف الحروب في فلسطين نحن نعيش في فلسطين ولا نعلم متى وأين؟

ودي إستايلات تانية من الكروت
http://www.boswtol.com/mastaba/images/205/Kamar_14.JPG
http://www.boswtol.com/mastaba/images/205/Kamar_08.JPG
http://www.boswtol.com/mastaba/images/205/Kamar_15.JPG
http://www.boswtol.com/mastaba/images/205/Kamar_09.JPG
http://www.boswtol.com/mastaba/images/205/Kamar_17.JPG
http://www.boswtol.com/mastaba/images/205/Kamar_10.JPG
http://www.boswtol.com/mastaba/images/205/Kamar_19.JPG

منقول