قـــلـــوب تـــحـــت الـــمــجـــهــــر**
 

مساء الانوار

عدت لكم بروايه جديده

قلوب تحت المجهر للكاتبتان

""عاشقه الشمال : المزيونه""

أتمنى تعجبكم

البارت الاول




******************
(السبت) 3 يوليو 2004
******************

"واخيرا خلصت .. الحمدالله مابغيت "

كانت هاي كلمات ريم من عقب ماخلصت ترتيب اغراضها في غرفتها اليديده في بيت الشخص اللي صارلها سنين ومشاعرها متجمده من صوبه..من عرفت الواقع على حقيقته وهي تجز حتى طاريه..ماخلى فقلبها أي ذرة حب له..الافكار توديها وتردها..يا ترى هل بتقدر تستقر فها المكان!! هل بتقدر تتعامل وياااه!!بيقدر يذوب مشاعرها من جديد ويخلي قلبها يحن عليه!

يلست على سريرها الفضي وهيه تتامل الغرفه البنفسجيه.. ها لونها المفضل معقول يذكر ها الشي للحين! المكان غرييب وايد عليها ومب متخيله اللي بيصير الها من عقب ها اللحظه..
وفوسط ها الافكار انتبهت لصوت قطع حبل افكارها وبلا ارادي رجفت ..

مها: ريماان
ريم قامت من سريرها وهيه تطالع مها
مها: شو بلاج؟ دقيت الباب ومارديتي قلت ادش احسلي بدال ما اخيس من الوقفه
ريم: دقيتي الباب؟؟؟
مها: والله والله دقيت..اعرف انج ماتحبين حد يدش بدون استئذان..الله يخليج لا تعصبين مب وقته
ريم غصبن عنها بالرغم من انه مزاجها معكر ع الاخر ابتسمت لمها وقالتلها:
خلاص انزين .. شو تبين؟
مها: جاسم توه يا يزقرنا حق العشا
ريم : خلولي عقب بتعشى .. بتسبح و بصلي .. تعبانه
مها وهيه تتطالع ريم اللي لفت عنها وسارت صوب الكبت وقالت بتملل: اوكيه.

طلعت مها من غرفه ريم و مرت على غرفه مي وساره .. اللي كان بابها مفتوح .. حصلتهن مطولات على الاغاني .. ومي تعلق ثيابها في الكبت ..
اما ساره كانت يالسه على الكرسي مجابله التسريحه و ترتب عليها اغراضهن ..
مها تمت تتطالع الاجواء اللي فها الغرفه .. حست بالفرق الكبير لما دشت عند ريم والحين لما دشت غرفة مي وساره..تمت تتطالعهن وحياتها مقوسه ومرتفعه من العجب اللي تشوفه ..طنشت الموضوع وزقرت ع البنات..
مها: ايه يالله العشا
محد سمعها بسبب صوت الاغاني العالي ..
ورجعت صرخت :الـعـشـــــــــــــــــــــاا اااااااااااااااااااا اااااااااا
صدتلها مي من ورا باب الكبت : بلاج تصارخين؟؟
مها حطت ايدها على خصرها: لانكن ماتسمعن يالله بسرعه يدوه تترياكن
ساره حاست بوزها وهي تشوف مي من الجامه اللي جدامها : وشو نبابها يدتج..خلها تاكل
مها: يا انسااات اليده تترياكن ع العشا..يلا نسير لانها تقول بترقد
مي: خلها تتعشى وترقد انزين.. جيه ثرنا ميلسات على غطي الطوس!
ضحكن البنات ع اخر تعليق بس بدون نفس..
مها: ماادري.. هم يتريون.. اونه نعوم قالت لجاسم موعد العشا احين و ازقر خواتك عسب يدوه بترقد..
ساره: عشتوا .. بناكل بمواعيد يدتج ونعوم احين
مي: انا مابا انزل واشوف أي حد فيهم .. اتم يوعانه ولا اجابل يدتج والساحره اللي وياها..
ساره: يالله بطني اهم .
مي: اخ يا برودج.
مها ردت ع مي بسرعه وقالت الكلام اللي فخاطرها من اول ما دشت الحجره: انا اشوف انه ثنتيناتكم عادي عندكم
مي اطالعت مها بس لفت ع طول اما ساره..
ساره: ليش يعني ؟
مها: لو تشوفن ريم كيف..احس غير مول مالها خاطر لشي
ساره: ريم معيشه عمرها فمأساه..ماعرف ليش مكبره الموضوع!
مي تطالع ساره: يعني انتي مب مأثره فيج السالفه؟
ساره: امبلا مأثره واحس اني مقهوره صح لكن لازم نتعايش ويا الواقع
مي: ريم غير.. لو نحن تعودنا عمرها ريم ما بتتعود ع السالفه
مها: يلا انزين خلاص الرمسه ما تفيد احينه.. يلا خلنا نسير نتعشى
ساره: ها ميوه بتسيرين؟
مي: ماااحس متشجعه
ساره: ولا انا .. بس بموت من اليووووع
مها: يلا عااد شو تخلنا بروحنا ننزل..ريم ما تبى وانتن ماتبن!!
مي صدت لساره: ننزل ؟
ساره :يالله..

نزلن ساره و مي و معاهن خواتهن التوأم مها ومهره ..مي تم فكرها شاغلنها بريم .. تدري انه اختها مب متحمله الموضوع ومن درت انهم بيردون بيت ابوهم وهيه دوم تصيح وضايجه والحين من عقب ما ستوت السالفه صدق الله يعلم بحالة ريم! ساره اختها من البدايه تقبلت الفكره بسرعه ولا عارضت لانها انسانه الها قدره على التحكم بعواطفها.. التوم وجاسم مدام خواتهم وياهم خفت عليهم السالفه..
" وأنااا..انا شو موقفي او شو احاسيسي او مشاعري؟ مب عارفه انا بشو احس! انا مابا ها الحياه اللي بنعيشها ولا اتصور فيوم اعيش اهنه بعيد عنهم! ضيجتيه فقلبي وليتني اطلعها نفس الباقين عسب ارتاح..لكن لازم ااقلم عمري وارضى بقسمة ربي..الله رايد ها الشي يصير النا واكيد ان شاااااء الله بيكون فيه الخير لي ولخواني.."
هاي خوالج روح مي اللي من يت وهيه ترمس ويا نفسها وتتصنع القوه جدام اخوانها..

وتعشن البنات ويا ها الوجوه اللي يحسون انها غريبه عنهم..كلن بكل هدوء ولا نطقن البنات بالرغم من تحريش ناعمه فيهن وأسئلة يدتهن اللي ماتحصل منهن جواب غير هيه , لا, ماندري..
وردن عقب فوق وتمن يستكشفن القسم اللي كان مخصص الهن ..

كان سيف عايش مع حرمته الثانيه "ناعمه" في بيت امه القديم .. ولكن بنى فله يديده وهدم البيت القديم .. فلتهم اليديده كانت عباره عن دورين .. الدور الثاني مقسوم قسمين .. كل قسم عباره عن 3 غرف .. البنات في قسم و سيف و ناعمه وعيالهم في قسم .. اما ام سيف غرفتها تحت مع الميالس..البيت بعد التعديل كان فخم .. الحوي ماله كبير والزرع فكل البيت جدام الفله كان فيه دوار صغير و نافوره رخاميه.. منظرها جميل في الليل ..


****

كانت يالسه في الغرفة تتأمل مكانهم الخالي .. من سنين من سكنوا هاي الغرفه .. ولا مره حست بالهدوء الا يوم يرقدن.. كانن بالفعل مالين عليها حياتها .. ضحكاتهم وسوالفهم .. صراخهم و ظرابتهم .. كانت مسويه لحياتها طعم ثاني ..مب بس هيه ..كل اللي فالبيت حاسس بها الشي..حاسس بهدوء الجو وخلو المكان..لكن هيه اكثر بيأثر عليها .. شي طبيعي بما انها امهــم!
قامت من على السرير و يلست تتأمل في التسريحه .. كانن البنات ملزقات عليها صورهن يوم هن صغار وكل وحده كاتبه تعليق على صوره الثانيه .. قعدت تحسس كل صوره وعينها غصب عنها تدمع وزوايا ثمها تقوست للاعلى وهيه تشوف التعليقات المكتوبه..
شلت برواز محطوط على التسريحه .. كانت الصوره لبناتها الخمس .. واحلام ومديه بنات اخوها في رحله للبر ..
مب صورهن بس اللي كانت ويا بعض .. اصلا كل شي كانوا يسوونه مع بعض ..
البيت اللي كانوا فيه هو بيت محمد اخو عليا..قبل 12 سنه كان توه مبناي وكبير بالنسبه لعايله مكونه من ريال وحرمته وابوه وامه واخوه .. البيت عباره عن صاله ويتفرع منها قسمين. كان قسم لمحمد فيه غرفتين وصاله والقسم الثاني غرفتين وغرفة طعام..

لكن الاحداث اللي استوت غيرت من مجريات التخطيط واصبح ها البيت الكبير لعايله صغيره هو البيت الصغيرللعايله الكبيره! ..
وعلى الرغم من ضيج المكان الا انه البيت كفاهم ..غرفة الطعام اتعدلت وصارت غرفة لعليا اللي كانت حامل بجاسم والتوم اللي بعدهن ماكملن سنه فهاذيج الفتره وغرفة خالهم مانع للبنات ..اما مانع فظهر من البيت وسكن فالملحق مؤقت لين بناله بيت حذال بيت محمد فنفس الحوي و ع قد ريال عزوبي مكون من صاله وغرفتين..
صح المكان كان ضيق عليهم .. بس كانوا مرتاحين وكأنهم في قصر ..
متعاونين ويا بعض وقلوبهم ع بعض وها كان مصدر راحتهم...

وبعد ماتأملت عليا فها الغرفه رجعتبها ذاكرتها لذاك اليوم التعيس ....

يوم شافته داخل الغرفه دخلت ايدها في واحد من ادراج خزانه الثياب وكانها اتدور ع شي بس عسب تتهرب من نظراته .. لكن يوم تقرب منها التفتت صوبه و ويها بدل مايعبر عن التهجم عبر عن الارتباك والمعاناه بس ..
"عليا" قالها بصوت جبان .. و نزل راسه وهو يتمنى انه شكله ايبين خاضع و مثير للشفقه .. لكنها بسرعه استوعبت شكله المكار ..
فكرت شوي .. تكره طبيعته اللي يحبها ويحترمها الناس تكره تهاونه وياها..
تكره اطباعه واسلوبه..كل شي فيه كرهها فيه من بعد ما كنّت له كل مشاعر الود والاحترام ..
وضغطت على شفايفها وقالت بصوت مخالف لنبرتها المعتاده ( شو تبى؟؟؟)..
سيف: عليا شو اللي تبغيني اسويه .. انتي تعرفين اني
وقبل مايكمل كلامه قالتله عليا وهي تصرخ: روح عني رووووح
سيف: عليا فكري ..عشرت ثمان سنين ماتكفرلي !!
عليا ودموعها فعينها: لاااا..مستحيل..
سيف بصوت جبان: لكن....عليــ..علياااا

"عليااااا"

طاحن دمووعها اكثر من قبل .. وتلفتت بعينها من غير ما تحرك جسمها..
ادور مصدر الصوت ودها لو تفره بالبرواز اللي باديها ..
بش شافت هيئه غير الهيئه اللي كانت فمخيلتها..وركزت فالصوت مره ثانيه
"عليا"
صوت قوي مب جبان..صوت حنون مافيه قساوه ومكر..
منو ها اللي قطع مخيلتها وردها لارض الواقع؟

التفت عليا لورا و بطريقه لا شعوريه ضمت الصوره لصدرها ورمست وهيه مندهشه: محمــــــــد!!
اتقرب محمد وشل الصوره منها ورجعها مكانها وخذها من ايدها ويلسوا على السرير..
محمد: ليش ها الدموع يا ختيه؟
عليا مسحت ادموعها : غصبن عني .. ماقدرت اتحمل..
محمد: عليا كوني اقوى من جذيه.. خليه يحس بمسؤوليتهم شوي .. هو طلبهم وباجر بيرجعهم صدقيني سيف مابيقدر يتاقلم على مسؤوليه 5 بنات و ولد مريض
عليا: انا مب مقطع قلبي الا هالولد المريض .. ماعرف عطوه ابرته ..تعشوا ولا.
محمد: شو هالكلام ياعليا ؟ اكيد بيتعشون مابيوعونهم .. عليا لاتحملين نفسج فوق طاقتها ان شاء الله في نهايه الاسبوع بيونج و بيزورونج..
عليا: كله من راشد اخويه.. يوم قلتله بنرفع قضيه ماطاع
محمد: عليا الله يهداج نترافع في قضيه حكمها معروف ؟؟ تربيتهم من حق ابوهم من يوم كان عمرهم 7 سنين .. ولو ماهو تنازل عنهم جان ماتربوا عندج اصلا
عليا: سيف عمره مافتكر فعياله شو اللي خلاه يطالب ابهم..راشد قالي انه سيف
مايبى بناته يتربن فبيت العايله.. اونه مايخلى من ييات عيال راشد وعيال شيخه.. شفت المنكر ها انته ..
محمد: بعد شقى جيه .. كلهم خوان وبناتي ترا هنه عايشات
عليا: انته ماتعرف كيف راشد قام يلومبي .. ادري سيف غاسل مخه.. وام سيف غاسله مخ سيف.. ادري والله ادري
محمد: لا تظنين يا عليا
عليا: مب سالفة ظن.. بس سيف عقب ها العمر كله يا يطالب بالعيال وين كان قبل؟ ليش الحينه بغاهم .. من بعد ما كبرن البنات يعني يا يطالب ؟ انا كبرتهن وربيتهن وهو ما فتكر فيهن ولا فأخوهن واحين بكل بساطه يا يطاالب بعيالي!!
محمد: وعياله بعد يا عليا..يمكن حس بتقصيره الحين ويبى يعوض عليهم اللي فات
عليا: لااا ماصدق..
محمد: ربج بعد يا عليا .. ربج يغير لكن ما يتغير ..
عليا: والاكثر من جيه .. اخووويه راشد واقف ويا سيف! كييف جي!!
محمد: عليا لاتنسين انه سيف ربيع راشد ..
عليا: وانا اخته
محمد: عليا بعد انتي تعرفينه راشد..لا تمين شاله على اخوج ها الكثر بيتم اخونا العود واكيد له حكمه فها الموضوع فوقف ويا سيف!
عليا: انزين يرجعولي جاسم .. الولد يقدر ايي عندي
محمد: جاسم ما بيعرف بليا خواته
عليا: بيعرف بيعرف .. هو بروحه مريض .. خلوه عندي
محمد: جاسم مابيقدر يتاقلم بدون خواته صدقيني .. متعود عليهن وهنه مايلقى حد يتم وياه خليه يسير وياهم اخوهم ولازم يتابع خواته ومايخليهم بروحهم.. ولاتقنعين عمرج انه هو مريض .. بتمين دوم تفكرين فها السالفه .. ماعليه خواته بيديرن بالهن عليه ..
عليا: ياربي والله اني ماصبر بلا عيالي
محمد بغى يطلع عليا من ها الموضوع ..
محمد: والبنات اللي هنه مب بناتج..مايعوضنج ولو ربع مايعوضنج فيه بناتج
ابتسمت عليا بحنان برغم هموم الدنيا اللي شايلتنها فقلبها
عليا: فديتهم والله ..
محمد: يالله تراهن متصلاتلي عشان ارد ونتعشى رباعه..
عليا: انزين محمد بناتي ماتصلن لي..وانا ماقدرت ادق لريم ولا لساره..كل ما اقبض التيلفون بدق شي يردني..اخاف انه سيف عندهن وانا مابا اسمع حتى صوته
محمد: بيتصلن بس تلقينهن مشغولات بالترتيب وسيف ماظنتي بييلس وياهن ها اليومين اكيد ما بيرمسن جدامه .. انتي لاتحاتين ..ولا تتصلين حتى
عليا: لييش.. لا بدقلهن خلاف..ابا اطمن عليهم
محمد: يا عليا هن سايرات بيت ابوهن ما بيضرونهن فشي..واحسن شي غلقي تيلفونج اليوم..ادريبج جان رمستيهن بتصيحين وبتصيحينهن..لاتزيدينهن عذاب
عليا: لكن
محمد: لا لكن ولا شي.. تعوذي من بليس وغلقي التيلفون عشان خاطريه..
ووقف محمد عند الباب:يالله نترياج
عليا: ان شاء الله الغالي..

ابتسملها محمد وظهر من الحجره..
ويلست عليا بروحها تفكر فكلام اخوها.. وقلبها مقبوض وودها لو تشوف بناتها هاالوقت وتيلس وياهن ترمسهن .. تسولف ويا ريم..تضحك ع مي وساروه..ادلع مها ومهره..تعتني بجااسم وتحضنه.. تهتم فيه ..
جاسم مريض بالسكري من صغره وعنده تأخر دراسي عشان جيه تحاتيه وايد ويحتاج لرعايه واهتمام اكثر.. لكن وينه عنها عسب تهتم فيه وترعاه.. وينهم عنها الحين؟.. خذهم ابوهم .. طالب بانه يرجعوله ونفس ماقالت عليا مب من تخطيط الابو كان من تخطيط امه بس ليش.. ماتدري! حرقوا قلبها قبل والحين ناوين يكملون عليها بعد من عقب 13 سنه من الطلاق ..من عقب ما افتكت من ظلمهم وجورهم .. يايين اليوم يسلبونها سعادتها وراحتها!
هيه مب مرتاحه وهم بعيد عنها كيف هم ! وكيف بيرتاحون فبيت غريب بالنسبه الهم..بيت ما رقدوا فيه من 13 سنه..ويا ناس ما كانوا مفتكرين فيهم .. ويا ابو لاهي فالدنيا عنهم ..حاتت عيالها لكن اكثر شي ريييم.. ريم كيف بترمس ابوها وهيه تخاف منه ومن التعامل وياه؟ كون الها انطبااااع من هيه عمرها سبع سنين..خلاها تجزه ..تكرهه.. شافت بعيونها كل شي لكن مافهمت.. مازالت مب فاهمه..ومازالت تجز التعامل ويا ابوها..ونادر ما تخالط ويا الرياييل .. بس خوالها الي كانت تتعامل وياهم .. وشباب عايلتها .. بالنادر ..
انتبهت عليا للساعه .. وتذكرت صلاتها .. تعوذت من بليس وقامت تصلي العشى..

****

فليل من بعد ما استكشفن البنات قسمهن..تيمعوا كلهم فالصاله عسب يدقون لامهم يطمنون عليها..دقت ريم ع تيلفون امها بس حصلته مغلق..
ساره: ليش غالقتنه؟؟
ريم: احس اميه ماتبانا نرمسها اليوم.. فديتها ماتبانا نتضايج اكثر
مي: شو ماتبانا نرمسها..ريموه دقي ع تيلفون خالي اكيد موجود فالبيت احينه
ريم: لاا شو ادق احين .. شوفن الساعه .. عنبوه حد يدق نص الليل
مي: هاتي تيلفونج انا بدقله
ريم: فضييحه ميووه
ساره: اندوج ميوه هاذوه تيلفوني
مي: اووه ماحييد ساره تتكرم علينا بتيلفونها..مخلتنه الرصيد بس حق بنات الجامعه..
ساره: ميوه هب وقته.. يلا دقي لخالي..
وفها الوقت دش جاسم ع الخط وهو قابض تيلفون البيت ويطالع خواته..
جاسم: ليش .. ها شسمه..ابراهيم بيل ما خترعلكم تيلفون حق البيت
مهره: منوو هاا ابراهيم بيل
مي: هههههههههه اونه جراهام بيل..
مها: وانته منو قالك انه هاا مخترع التيلفون.. انا ومهروه مانعرف!
ريم: بسم الله عليه بتااكلنه..بروحه متبهدل بصحته
ساره: ها لاقطنه من البرنامج المساعي شكله
مي: فديت جسوم والله.. بس ماعرف ليش مب فالح وايد فالمدرسه
جاسم: اييه انا شاااطر فالمدرسه
ريم تطالع جاسم وزقرته خلته ييلس حذالها: انته شاطر حبيبي لا تاخذ ع رمستهن هاذيل .. انزين التيلفون شو تبانا نسويبه
جاسم: دقوولهم ع البيت بعد شوووه
مي: اندووكم ليش مافكرنا اندق ع البيت.. حلاامي ومدوي بيتراكضن يشلنه
ريم: ميوه اقولكن الوقت متأخر .. بيزيغون عنبوه حد يدق ها الوقت
ساره: يالله يا ريموه كل شي معقدتنه..
مي: لا ساره صدقها ريم تحيدينها كيف امايه خوافه.. خلاص باجر اول ما نقوم
ان شاء لله بندقلها..
اقتنعن البنات باقتراح مي.. وتمن يالسات فمكانهن وصاخات..ريم تلعب بشعر جاسم اللي طايح ومحطي راسه ع ريولها..مها ومهره يالسات نفس اليلسه كل وحده ع طرف غنفه والايد ع الخد..مي وساره متسلقيات وحده ع الغنفه والثانيه ع الارض منبطحه
وعقب دقايق قامت ريم وخذت جاسم عسب يرقدون .. وشوي شوي انفض الاجتماع الصامت وكلن سار غرفته عسب يرقد..

******************
(الاثنين) 5 يوليو 2004
******************

مرن يومين ع تواجد البنات فبيت ابوهن سيف .. وخلال ها اليومين مازالن البنات ملتزمات الصمت والتعامل سطحي للغايه ما بينهن وبين الموجودين فالبيت..استوت مشادات فالكلام والراس طبعا مي وساره ويتلنهن مها ومهره مع اليده او مرت الابو ناعمه..لكن كانت المشادات خفيفه..اما ابوهم كل ما يدش مكان يطلعون منه..وريم للحين مايلست ويا اي شخص منهم ..حتى طاولة الاكل ما يمعت امبينهم ولا مره..
وامهم عليا من بعد اول يوم قاموا يتصلولها كل عصر وهيه ترد تتصللهم فليل..

ها الوقت كانن ساره ومي يالسات فصالتهم .. وياهن جاسم اللي كانت ناعمه مطرشتنه عسب يزقر البنات..

مي: ليش شو تبى مناا؟؟
جاسم: انا مادري..انا كنت يالس برع فالحوي وياني ميود يقولي انه امه تباكم
ساره: خير شو عندها!
مي: شكلها ملانه وتبى تتلاسن ويا حد
جاسم: ما بتنزلن؟
ساره: لا مافينا.. بننزل مره وحده ع العشى..موعده عقب نص ساعه..بس انا لي سوالف ثانيه اليوم ع العشى
وغمزت لمي اللي فهمت حركاتها وضحكت..بس ماعلقت عليها..وانتبهت لجاسم اللي كان بيظهر
مي: جسوم وين بتسير..تعال يلس ويانا انته شله تيلس بروحك برع
جاسم:ملل داخل.. اوني طلعت برع عسب اتسبح فالحوض..نسيت انه نحن مب فبيتنا القبلاني..بقول حق ميود يخلي امه تشتريلنا نفسه
ساره : نشااده عنك هيه تشريلك..مانتريا لا منها ولا من ريلها شي نحن
مي: جسوم حبيبي امايه بتاخذلك..وبعدين ساروه ريلها ترا بيتم ابونا وولي عنا..غصبن عنه بياخذلنا اللي نباه ..ونفس مايعطي عياله هاذيلاك بيعطينا
ساره: انزين قولي ها الرمسه جدامه
مي: لو شفت منه قصيره بقول..بس بيني وبينج من يينا وهو دومه يسألنا قبل لا يظهر اذ نبى شي
ساره: الا عشان يبري نفسه جدام امه وحرمته..
مي: ساروه جنه هو ظالم نحن ما بنكون ظالمين..
ساره: ماعرف يا ميوه..ساعات اقول ابويه يبى يتقرب منا .. حتى اخر فتره كان ايي بيت خالي راشد عسب يشوفنا..بس منا نحن ماكنا نسيرله..لكن ارد واقول الغلط راكبنه راكبنه
مي: صح انزين .. نحن مانعرف لابويه ولنواياه..يمكن كان يتقرب عسب يسهل عليه عقب يوم يطالببنا..ويمكن كان صدق يبى يتقرب لقلوبنا!

" مستحيييييل.."

لفن ساره ومي ع اللي ترمس..
ريم: مستحيل ابوكن يبى يتقرب لقلوبكن..
مي: ريم..ليش مستحيل بيتم ابونا!
ريم: بيتم الريال اللي نبذنا بسبة الولد..بيتم الريال اللي بهدل اميه وذوقها المر
مي: بس بيتم ابونا..مالنا مفر من واقعنا..
ريم: بيتم ابونا..لكن قلوبنا مب ساكننها..هجر قلوبنا من كنا يهال..ويتوقع بكل بساطه نحبه! عقب كل ها السنين من الاهمال !!
جاسم كان يسمع كل اللي يدور حوله..ويشوف ملامح خواته .. من الحيره والتردد والشوق للابو..لملامح الكره والبغض ..
وقال بكل براءه..
جاسم: بس انا ابا ابو صدقي..
البنات اطالعن جاسم .. نسن وجوده واحين انتبهن..المفروض ها الرمسه ما تدور جدامه..مها ومهره وجاسم مايعرفون عن ماضي ابوهم وامهم وايد..كانوا متصورين الطلاق برضا الطرفين.. ويوم يشوفون خواتهم كيف يرمسن يستغربون.. اليهال كبروا ومصيرهم يعرفون ظلم ابوهم ع امهم قبل! بس
اللي شلوه فقلوبهم ع ابوهم ما ايي شي حذال اللي فقلب مي وساره..اما اللي فقلب ريم كان اكبر بواايد ..
سكرن البنات ع الموضوع .. ونزلوا كلهم ماعدا ريم طبعا عسب يتعشون ..

يلسن البنات على العشا .. ويا يدتهن و مرت ابوهن .. طبعا خلال العشا وكعادتهن البنات ياكلن وهن ساكتات ويرمسن بعض ع الخفيف.. بس ها المره ساره قامت ترمس ميوه وتتطالع ناعمه ع كل ساعه .. مي كملت الحركه وقامت تصاصر مها وتتطالع ناعمه ووقت ما اطيح عيون ناعمه فعيونهن يسون عمرهن مرتبكات وينزلن بسرعه..ويتناغزن بريولهن من تحت الطاوله ويضحكن ع الخفيف .. خبلن بناعمه وقامت متشككه بعمرها .. كل ساعه تشوف لبسها وتلف ع ورا تطالع عمرها بالمنظره..وتوقف تعدل من يلستها وترد تيلس.. انقهرت من ها الحركات بس حقرتهن..

ام سيف: عيل ريم ويين؟
مهره: ماتبى عشى .. خلاف بتتعشى
ام سيف: شعنه خلاف بعد .. خلها تي تاكل احين مره وحده.. عنبوه محاربتنا من يت .. ماتذوق الاكل ويانا .. كله بروحها تاكل
مها: ماتبى مب غصب ..
مهره: لا مهوه لازم بالغصب انتي ماتعرفين
ام سيف: بس بس اسكتن عن ها الرمسه الماصخه اللي تقولنها
(وصدت صوب ناعمه) وانتي ليش ماتتعشين ؟
ناعمه قالت بدلع مصطنع: عموه ما يهنالي الاكل بدون ريلي .. كلوا انتوا بالعافيه انا بتريا سيف..عقب شوي بيي ..
حاست ساره بوزها واتقربت من مي : ماتعرف تاكل الا وهي مجابله عريس الغفله ابوج..
مي حاولت تكتم ابتسامتها بس ماقدرت و اضحكت بصوت عالي ..
ام سيف: شو عندكن تتصاصرن ؟
جاسم: ايه انتي يالعيوز تراج حشره كلي وانتي ساكته.. عنبوه مانروم ناكللنا لقمه
ام سيف عصبت ويت بتنشله..
مي وقفت: اييه وين تبين؟ جاسم مريض لاتمين تاخذين عليه ع كل كلمه يقولها
ام سيف: عن العياره عاد الا كل ماقلناله كلمه قلتلنا مريض
ساره: يعني بنتفاول على اخونا نحن بالمرض ..
اطالعت ساره يدتها وقامت من على الاكل وسحبت وياها جسوم اخوها ..
ام سيف: هاذا هو يوم رمسنا الوحده منكن مدتلنا بوز .. ماتربيتن انتن يبالكن تربيه من اول ويديد
مي بادلت يدتها نظره حقد : بس عااااااد.. لهنيه وبس..لاتمسين امايه باي كلمه.. امايه ربتنا احسن تربيه.. ربتنا التربيه اللي مارام ولدج يربينا اياها.. علمتنا وفهمتنا من عقب مافرنا ولدج ولا افتكر فينا.. فالح الا كل شهر يطرشلنا فلوس وها ان افتكر اصلا.. يتحرا بالفلوس ادى واجبه علينا .. اصلـن امــ..
وكانت مي بتكمل رمستها لكن صوت ابوها وهو يسلم منعها..
سيف: شو ها الحشره اللي مستويه.. ميوه بلاج تصارخين..
مي اطالعت ابوها بغت تعق رمسه اكثر لكن ماقدرت لانها ماتعرف تتعامل وياه.. مب بس هيه كل خواتها .. شي طبيعي لانهن بالاساس مب متعودات عليه..جلبت مي بويها وصعدت فوق

ناعمه: الحق يا سيف بناتك كلنا بالسنتهن..قامن يراددن امك ..
انته وايد تراك متساهل وياهن..

مها ومهره اللي كانن يالسات تمن يطالعن ناعمه السوسه بشرر وقامن من السفره وهن محرجات ولحقن خواتهن..

دخلت ساره قسمهم و شافت ريم يالسه في الصاله .. اللي كانت ارضيتها مثل الشطرنج .. وكراسيها سودا مع بعض الكراسي الحمرا و الخداديات ..

جاسم: ايي ايه ايدي تعورني ليش تيريني جيه ؟
ريم صدتلهم تشوف على شو محتشرين: شو مستوي ؟
جاسم: هاي العيوز الدبه حشره بس انا سويت طااف
ريم: جاسم عيب حبيبي
وفها الوقت دشت مي وهيه معصبه حدها ووراها مها ومهره.. يلست مي ع الغنفه ومحطيه أيدها ع ويها وهو محمر من كثر مب محرجه..
ريم: بلاااكن شو مستوي..؟
مها: ميوه تهازبت ويا يدوه
مهره: جان تقول ها العيوز اونه نحن مب مربايين
ساره بحلقت بعيونها: متى قاالت!
مهره: يوم روحتي
ريم:انزين وشو استوى..رمسن
مي اطالعتهن ونفخت بضجر وسارت غرفتها.. استغبنت وخافت تصيح جدامهن..مي مول ماتحب تظهر ضعفها جدام حد.. قفلت عليها الحجره وعبرت عن شعورها بروحها..
اما برع عند البنات..
مها ومهره حكن السالفه كلها …
ريم: هاي ميوه تبى تيبلنا مشاكل..
ساره: ريمان انا لو مكانها بسوي اكثر من جيه
ريم: معلوم انتن الثنتين ماتيوزن..
ساره: ريم انتي ماتنزلين وتشوفين بعينج اللي يستوي تحت..مرت ابوج سوسه تقهر..ويدوه وايد تتدخل فامورنا تغصص بالواحد
ريم: شو بنسوي عااد..
جاسم: انزييين انااااااا يوووعان
ريم: وانتوا ماتعشيتو ثركم؟
جاسم: لا .. يدتج حشره ماخلتنا ناكل
ريم: جااسم
مها: صدقه والله انها حشره بغينا ناكل مثل الناس مارمنا.. ماتسكت موول..
ساره: هههه ازيدكم بعد نعمة الله مب طايعه تاكل .. تتريا عريس الغفله
ريم معقده بالحيات: منو نعمة الله بعد هااي
ساره: ناعمه هههههه تتريا المحرووس ابوج
ريم: حسبي الله على بليسج سكتي عن حد يسمعج
مهره:اقووول تبوون كاكاو..
مها:بسير ايييب جيس الكاكاو.. ماشي غيره يسد يوعنا
ريم: هيه ها السم بيسد يوعكم..انا بنزل بتعشى خلاف تعالوا ويايه
ساره: شكلنا جي بنسوي..
وها الوقت دق تيلفون ساره وكانت المتصله امهم..كعادتها تتصل ها الوقت..
ساره: امايه داقه
ريم: غريبه ليش مادقت ع تيلفوني..اوه تيلفوني فالحجره ناستنه
ساره: ياااسلام بس ادقلج انتي يعني..
ريم: انزين ردي ردي
ساره: هلااا وغلااا باحلى وارق واجمل ام فالكون كله
عليا: هلا سوييره.. شو ها الاستقبال العجيب
ساره: ها شويه يا امايه
عليا: ههههه خل عنج المساحل انتي..شخباركم
ساره: والله تمام الحمدلله..كلنا بخير ومانشكي شي غير غيابج عنا
عليا: فديتكم والله.. عيل ريم شله ماترد ع تيلفونها
ساره اطالعت ريم : هيه امايه يعني ما بدقيلي الا اذا ريم ماردت..مشكوووره عليا خانوم ايي منج اكثر..ادري ما تولهين عليه .. بس ادقين لريم
عليا: هههههه فديتج والله كلكم واحد واوله عليكم كلكم..(وبنبره حزينه)لاتقولين ها الرمسه..
ساره عضت ع شفايفها ..حست بتغير نبرة صوت امها..
ساره: يالله يا امايه الا اسولف ويااااج انا ..

وقام يتنقل التيلفون بين ايدي البنات وكل حد يرمس امه وهو مستانس لسماع صوتها..


مي كانت فالحجره متربعه ع الشبريه ومحطيه المخده ع ريولها وسرحانه بفكرها..
"مارمت ايود عمري..ليش يقولون جيه عن امايه والله انها شيختهم..يغلطون عليه بسوي طاف بس ع امايه ها اللي مابرضاه..ساد معذبينها وماخذينا عنها بعد يغلطون عليها لاوالله .. اف بس اول مره ارفع حسي على حد كبير.. يا ربي ادري انها يدتيه والمفروض احترمها بس هيه كله منهااا .. والله ها العيووز دقاات .. "

قطع على افكارها دق الباب.. قامت تتطالع ويها فالمنظره متنفخ وله.. شافت انه اوكي لانها ما اسرفت فالصياح..
فتحت الباب..وردت تيلس ع شبريتها ولحقتها ساروه ويلست حذالها
ساره: ميوه ميوه ميوه ميوه
مي: وسم تقولج ميوه..شو تبيييين..
ساره: ميووووه ميووه.. انزين ميووه
مي: سارووووه بس عاااد
ساره: هيهيهي اوكي .. انزين ميوه
مي: اللهم صبرج يااارووح..هااا سااروه شو تبين حبيبتي شوو بلااج..
ساره وهيه تضحك:انزين.. ميوه ميوه..اوكي سوري.. (وتضحك ع الخفيف ) اقوول كنتي تصيحين هااا
مي: ساروه عن السخافه شو تبين!
ساره: تعالي برع كلنا يالسين نسولف
مي: متفيجين ..
ووقفت ساره عند الباب وردت تلف على مي..
ساره: لا تين اووكي وانتي الخسرانه لانه امايه عقب شوي بتسكر عن خواني

وطلعت ساره .. ومي من بعد ما ستوعبت الرمسه نطت من الشبريه وركضت للصاله عند خواتها.

مي: عطوني برمس امايه
مهره: صبري انا مارمستها .. ابوي بالدور ..

و آخر شي وصل التيلفون لمي : الووو علايه اشحالج ؟
عليا: هههه انتي ماتيوزين ؟
مي: هههه اميه فديتج والله تولهت عليج
عليا: انا بعد ولهانه عليكم .. البيت هنه مايسوى شي والله
مي وتحس انها ضعييييفه وطلعت منها ها الرمسه فغمرة ضيجتها ..
مي: اميه تعالي خذينا .. بس طفرنا من ها البيت ..
ريم دقت ايد مي عساس ماترمس ها الرمسه جدام امها..كفايه اللي فيها ماتباهم يزيدونها برمستهم .. مي فهمت تعابير ويه ريم وتنهدت وخلت اللي بخاطرها فخاطرها..
عليا: ليش غناتي شو استوا؟
مي: ماشي اميه.. ماستوى شي..بس متولهين علييج واايد
عليا حست من صوت مي الواهن انه فيه شي .. بس مي ماخبرتها باللي استوى قبل اشوي.. حاولت ترد ع طبيعتها عسب امها ماتحاتي وقامت تنكت شوي .. وفالاخير دايما توصيات عليا ع البنات..

عليا: انزين ميوه حبيبتي.. تحملوا من عماركم .. و هالله هالله في السنع .. ماباهم يقولون عليا ماعرفت تربي ..
مي فخاطرها ماقالو يعني هم..
مي: خل حد يقول لراويه شغل الله من الزين ..
ساره اللي لاصقه بالسماعه : والله لو تدري امايه باللي سويته اليوم
ميوه ضربت ساروه بكوع ايدها …
عليا: مي ودري عنج المغايظ انتي و ساروه ادريبكن ماتيوزن
مي: ان شاء الله امايه .. لاتحاتين
عليا: خلاص عيل امايه .. انا بسير اوطي راسي

سكرت عليا التلفون وكعادتها دمعتها طاحت تواسي قلبها المهموم بفرقى الضنى..

اما مي من سكرت التلفون يلست ويا خواتها .. كلهم ضايجين .. بس كانوا يحاولون يصبرون عمارهم .. ومايبينون حق بعض ضيجتهم..

ريم: ميوه وساروه قالتلكن امايه شو تبى منكن
مي: اقولج ريموه من الحين لازم تعرفين.. صح امايه مربتنا احسن تربيه..بس فسالفة ناعمه ويدتج اسمحيلنا يعني بتلقين تصرفات مابتيوزلج مثل اليوم يعني فخلينا حلوين من البدايه ولاتخبرين امايه كل شي
ساره: هيه والله صدقها ميوه.. وانتي بعد ريم..ماتتعاملين وياهم بس تتطالعينهم بنص عين !!
ريم: بس ماارفعت حسي
مي: نحن مارفعنا حسنا بس نتطنز وردودنا تحرق شويه..اما عن سالفة اليوم انا بروحي احس بتأنيب الضمير..وعادي عندي اتأسف ليدوه..
ريم اطالعتهن بياس: كيفكن والله.. بس لاتزودنها وايد
مها: ريم اذ حد غلط علينا نحن بنغلط عليه تراانا
ريم اطالعت صوب التوأم: بعد انتن
جاسم: شو تقولون تبون تتضاربون ويا حرمت ابويه الطويله.. انا في الاستعدااااد
ريم: هيه شطيتوا بجسوم الحينه


البنات كلهن طالعن صوب جسوم وتمن يضحكن و فجاه اندق باب القسم وتوجه للباب 6 ازواج من العيون.. ودخل مايد راسه وهو يبتسم ابتسامه واسعه .. كانت ابتسامته بريئه وايد .. وفي نفس الوقت شيطانه ..

مايد: ادخل ؟
جاسم: دخلت خلاص
دخل مايد وهو معصب من جاسم: انته ليش دفش ؟
مي: ايه مالك خص اتسب اخويه
مايد: وانا مب اخوج ؟
مهره: والله يقولون بحكم القانون انته اخونا .. هذا والله اعلم
مايد وقف مستغرب من كلامهم .. بس ماعطاه اهميه كبيره ويلس على الارض حذال جاسم
جاسم: افف يعني ماشي مكان الا حذالي
مايد: ليش يعني؟؟ ماتباني ايلس حذالك
جاسم: لااا ماباك..
مايد:لييش ؟
جاسم تم يفكر وقال بسرعه: لانك ولد نعوم الهبله
مايد ضحك عليه..
جاسم: ايييييه ليش تضحك انته شو مينون.. انا اسب امك وانته تضحك
مايد: ماشي ماشي
ساره: ميود.. انته الحينه صف كم؟
مايد: انا بسير صف ثاني اعدادي
ساره: صح هو كبر جسووم ..
مي: انزين وعفروه؟
مايد: بتسير خامس ابتدائي
ريم: انزين انتن شو تبن تتخبرن.. يلا مايد سر حجرتك نحن بنرقد
مايد: انزين مافيني رقاد
مهره: شو مسؤولين عنك نحن نرقدك!
مها: بروحه المكان يدوبه يكفينا بعد انته تزيد علينا
مايد اطالعهن وتم موخي...
مي: ايي بلاكن ع الولد .. هو ماله ذنب فكل شي
مها: ذنبه انه امه سرقت ابونا عنا
ساره: مهاا .. شو سرقت بعد هاي.. نحن عمرنا ماهتمينا لابويه
مها: انتن ماهتميتن نحن اهتمينا.. ع الاقل انتن كبرتن وتقولن كلمة ابويه وتزقرنه وتشوفنه .. نحن كبرنا بعيد عن ابويه حتى المرات اللي زقرته فيها بـ ابويه شويه
مايد: انزين انا نفسكم..
ريم: كيف نفسنا بعد!
مايد: انا وعفرا عايشين عند امنا وابونا ولكن مانحس بوجودهم..ابويه كله مشغول..واميه كله تهتم لعمرها وماتسأل عنا ودوم ظاهره..امي عفرا هيه اللي مهتمه فينا..
وتم موخي وهو مغتبن .. مي وساره تمن يطالعن خواتهن بنظرات..
مي: انزين مايد خلاص.. الحينه نحن هنه ووقت ما بتحتاجنا نحن موجودين
مها: يعني انته حالتك من حالنا !
مهره: حرااام ونحن طايحين فيه
جاسم: انته نفسنا عيل ماتحب امك نعوووم
مي: جاااسم
مايد: انا احب اميه نفس ما انته تحب امك

مايد ماحب جو الشفقه ها.. وبغى يغير الموضوع..
مايد: جاسم تعرف تلعب بلي ستيشن؟
جاسم: هيه اعرف
مايد: بتلعب ويايه ؟
جاسم وهو متشقق: يالله

ركبوا البلاي ستشين على تلفزيون صغير في طرف الصاله.. غير التلفزيون اللي موصله عليه باقي القنوات ..

ريم: انا بنزل اتعشى احس اني يوعانه طول اليوم مب ماكله شي
ساره: انا بنزل وياج .. يالله قوموا كلكم
مي: انا انسدت نفسي مابا اكل ..
ريم: جسووم توك يووعان .. يالله قم وخل عنك ها اللعبه
جاسم: لا ماابا خلاص شبعت
ريم: كيفكم .. انا بنزل واللي يبى ايي..

ونزلن ريم وساره والتوم .. وجاسم ومايد يلعبون .. وميوه دشت حجرتها .. وعقب ربع ساعه سمعت حس خواتها وظهرت .. ويلسن يتابعن فيلم لحد ماصارت الساعه
12 ..دخل ابوهم في هالوقت .. وحصل الصاله مظلمه و البنات كل وحده منسدحه تشوف الفيلم .. مها طايحه على ريول ريم .. و مهره على الغنفه وساروه ع نفس الغنفه طايحه .. ومي طايحه جدام التلفزيون على الارض و معلقه ريولها على الطاوله ..
دخل ابوهم .. و شغل الليت .. والتفتن البنات للشخص اللي قطع عليهم اندماجهم ..

سيف: السلام عليكم
ردوا البنات بدون نفس السلام و هن ماغيرن من يلستهن..
اتجدم ابوهن ويلس على كرسي احمر على طرف الصاله ..
سيف: شو تسون ؟
ساره: نشوف فيلم
سيف: انزين ابا ارمسكم وطوا على الصوت شوي ..
مي اللي كانت معلقه ريولها على الطاوله .. قصرت على الصوت بصبع ريولها
وقامت من طيحتها ويلست وهيه متاكيه ع الغنفه ..والكل عدل من يلسته..
سيف: احم .. ان شا الله الغرف عيبتكم ؟
مي: هيه حلوه
سيف صد على مي وساره: حطيت الكمبيوتر في غرفتكم انتوا اما ريم على حد علمي عندها لابتوب
سكتوا البنات ولا ردوا عليه ..
سيف:انا ماحبيت اييكم من اول يوم..أخرت لاني ادري انكم متضايجين و اعرف انه وجودكم اهنه يمكن يكون صعب بس ان شا الله بتتأقلمون مع الوضع .. وترى ناعمه حرمه طيبه و تعزكم وعدوها اختكم الكبيره ..
محد علق .. والكل تم صااخ
سيف وخى ورجع رفع راسه يكمل كلامه: ممكن يخطر في بالكم انه انا كنت مقصر وياكم في الفتره اللي طافت لكن هذا الشي مب صحيح .. امكم هي اللي اصرت على الطلاق وجنت عليكم وحرمتكم من الابو
ريم: نحن ما انحرمنا من شي .. اميه كانت النا الام والابو .. وخالي محمد بعد ماقصر ويانا كان نعم الابو ..
مي: وليش تركب الغلط ع اميه؟ انته اللي بايدك الطلاق
سيف: امج اصرت ع الطلاق يا مي
ساره: انتوا اتطلقتوا من عقب ما عرست انته بسنه..يعني مب عرسك هو سبب الطلاق..خبرونا ليش اطلقتوا؟؟ لييش
مي: نحن عيزنا من التفكير بجواب ها السؤال.. اميه ماكانت تطريكم الا بالخير..شو سويت انته عسب تتطلقون؟؟
سيف اللي كان موخي براسه رفعه واطالعهم .. ريم كانت لافه بويها صوب ثاني وتفكر فرمسة خواتها..مي وساره يطالعنه يترين اجوبه لاسئلتهم..مها ومهره وضعيتهن كانت نفس الطالب اللي مب فاهم مسأله رياضيه معقده ويحاول يحلها..

ساره: يالله خبرنا ..
ريم: مي وساره..لاترمسن فالماضي مادام اصحابه مب راضين يفهمونا اياه

سكت سيف .. يعرف انه التعامل معاهم صعب بس ان شاء الله يقدر خصوصا مع ريم اللي يعرف انها ماتواطنه موول! من اول يلسه وياهن وامطرن عليه بالاسئله اللي محيرتنهن.. عقب شو بيشوف منهن؟

سيف: ماباكم تاخذون الموقف بحساسيه ..انتوا عيال اليوم .. حاولوا تتاقلمون مع وضعكم هذا و امايه و ناعمه موجودين ومابيقصرون عليكم
مهره: ومتى بنبات عند امنا؟
سيف: مايحتاي اتباتون متى ماتبون زوروها وارجعوا
مها: لا نبى انبات عندها في اخر الاسبوع..
سيف: همم .. خلاص اللي يريحكم ..
ريم حست انها مب مرتاحه من اليلسه ويا ابوها .. و بغت اتسير الحجره ..
ريم: جاسم تعال الحجره بعطيك الدوا
سيف: ريم ايلسي بعدني ماخلصت كلامي
ريم: اصلا انته ماعندك شي اتقوله ..
ودشت الغرفه على طول والبنات يطالعنها وخايفات من ردت فعل ابوهم بس احمدوا ربهم انه هادي ..
سيف: خلاص بنات .. انا بسير ارقد.. تصبحون على خير
البنات: وانته من اهله ..

طلع سيف من القسم وسكر الباب وراه.. تم يلوم نفسه..
"كانت اموري مستقره..عليا كانت مقتنعه بحالها و سعيده مع عيالها .. و لا مره ادخلت في امورها.. اخليها تسوي اللي تباه ولا ادخل .. ليش استوى هذا كله احين ؟ امايه الله يهديها لو ما اصرت جان انا مايبتهم بس شو نسوي الحين لازم انتبهلهم اكثر واحاول اني مافرق فمعاملتي بينهم وبين اخوانهم.. صح عيالي واحبهم بس نظراتهم ما تطمن.. لو كسبت حبهم ما بقدر اخليهم يحبوني مثل ما يحبون امهم..اااه والله يبتلي هم.."

" ماتطريكم الا بالخير.." صدى ها الكلمات فاذنه..من يومها عليا طيبه..وكل ها ما غيّر فيها!! يمكن بس جدام البنات جي تقول عسب ما تهتز صورة الابو.. صورة سيف!
شل سيف الفكره هاي من باله .. يعرف عليا ويعرف نواياها الطيبه..



اما مي وساره ركضن غرفه ريم وشافنها يالسه على السرير و شكلها معصبه ..
ساره: مقواج يا ريموه شقى ترمسين جيه ؟؟
مي: صدقها ريم اصلا ابويه ماعنده شي يقوله.. كله خريط..اونه اميه جنت علينا..شو وين يالسين نحن
ريم: ابوويه مايدري وين الله حاطنه ..
ساره: انا احس جيه بعد ابويه ساذج واي حد يمشيه .. ماعنده شخصيه خالي محمد..امايه كانت طيبه ومتساهله وياه.. بس نعوم عرفت كيف تتعامل وياه احس..
مي: اووف خالي محمد واحد مامنه اثنين .. ماشا الله عليه .. صدق مثال للأبو الحنون و الاخو و كل شي ..
ريم: يالله انزين اطلعن .. انا برقد .. وطلعوا ميود يسير عند امه .. وخلوا جاسم ايي ..
ساره: اوكي تصبحين ع خير
ريم: وانتوا من اهله

طلعن مي وساره من الغرفه وشافوا مايد بعده يلعب ويا جاسم .. ومها ومهره وياهم ..

ساره: جسوم يالله سير هاكيه ريم تترياك بترقد
جاسم: انزين
مهره توجه الكلام لمايد: سمعت جاسم بيرقد ..
مايد: انزين عادي بيلس وياكن
مها: كلنا بنرقد .. يالله سير انته ارقد ..
مايد: انزين يالله تصبحون على خير
البنات: وانته من اهله ..

طلع مايد من عندهم منكسر خاطره .. بس في داخله شي يدفعه صوبهم .. يمكن احساسه بالوحده طول هالفتره و خصوصا انه على خلاف دايما مع اخته اللي اصغر عنه بسبب دلعها المفرط .. ما زعل من تعاملهم وياه لانه يدري انهم مب متعودين عليه ويشوفونه ولد حرمت ابوهم..

دخل جاسم عند ريم .. عطته ابره الانسلين .. و طاح يرقد..
اما مها ومهره .. دخلن غرفتهن و طفوا الليتات و خلوا الابجوره بس تشتغل .. وطاحن على السرير .. مها يلست تقرا قصه .. اما مهره على طول رقدت ..

ريم كانت طايحه في غرفتها وعيونها تدمع .. تعرف انها مهما حاولت مابتقدر تتأقلم مع الوضع هذا .. ولا بتقدر تتقبل ابوها مهما صار .. تعقدت منه وايد .. وعرفت انه امها ياما عانت من ابوها و من ظيم يدتها .. و شهدت هاي الاشيا كلها.. ماكانت وايد صغيره .. يعني تذكر ولو شي بسيط ..عمرها كان سبع سنين.. ذاكرتها ممكن تخزن ولو اشيا بسيطه ..
تشوف ابوها ريال معدوم الضمير اتخلى عن حرمته وعياله فأمس حاجتهم له .. والحينه بتعيش وياه فبيت واحد.. كيف!!

وفالاخير .. تعوذت من الشيطان و قرت المعوذات وحاولت انها ترقد ولو انه النوم مجافنها..

اما ساره ومي فبعد مادخلن غرفتهن .. ساره شغلت الكمبيوتر و يلست تسمع اغاني ترفه عن عمرها من عقب الغصه اللي شافتها اليوم من يدتها وفالاخير من ابوها.. اما مي طاحت على سريرها تبى ترقد .. قلبها كان وايد مقبوض ومتضايجه بعد من موقفها ويا يدتها وتفكر في ابوها .. الاناره كانت خفيفه في الغرفه بس صوت الاغاني كان عالي.. ومي تحاول ترقد مب قادره ..

مي: ساروه خافي الله ابا ارقد ..
ساره ترمس بدون ماتلتفت لمي: ارقدي محد ميودنج
مي: عن السخافه ساروه حطي سماعات
ساره: انتي سدي اذنج
مي: والله سخيفه مول ماتحترمين ولاتحشمين حد.. لو مب اميه موصتني جان راويتج شغل الله .. جان جيه بتميلي ما بدور وياج فالحجره يوم بسير الجامعه
ساره: هه بنشوف .. ما بلقاج تقوليلي مابا ويا وحده غريبه وخليني وياج..
مي: ماااااالت عاد بربعلج ثرني.. انتي هنه وماتستغنين عني وين هناك .. اظني من ايي بتفرشيلي السجاد الاحمر
ساره: طاااعوا الخقه.. ويا ها الراس شو ابا فيج..
مي: بس طبي حلجج
ساره: طبي حلجج انتي .. يلا سكتي صدعتيبي..ابا احفظ كلمات هاي الاغنيه .. حلوه وهاديه وايد .. بحفظها عشان اغنيها حق احلام ..
مي: افف يا السخااافه

مي اتلحفت وهي تتحلفلها .. حطت المخده فوق راسها عل وعسى تخف من الازعاج وترقد.. اما ساره تمت طول الوقت تسمع الاغاني وتردد وراها .. ساره ايميزها انها انسانه عايشه حياتها وبارده .. مايهمها شو حواليها المهم هي تكون مرتاحه .. الله انعم عليها بصوت وايد حلو.. ودايما يوم يتيمعون تيلس اتغني .. واكثر وحده كانت تسمعها هي بنت خالها محمد .. احلام ..

****

محمد فها الوقت كان يالس في غرفته .. وزوجته تحطله الدوا على ريوله .. وتلتفت تشوفه .. تذكر مشهد مر عليه اكثر من 12 سنه .. كانت عبير في نفس الوضعيه اللي هي فيها احين وتنظرله بخوف وهي تحاول تطلع الرصاصه اللي كانت في ريوله ..
انصاب فيها لما كان بالكويت يكمل دراسته واللي هي الاعلام.. طبعا فثاني سنه له وهو فالكويت خطب عبير من اهلها وتزوجها هناك.. حملت ويابت منه احلام اللي كانت بعدها مب مكمله السنتين في هالسنه.. سنة الغزو وبالتحديد وقت الغارات العراقيه على الكويت اللي انصاب فيها محمد.. كان نازل يصلي الظهر في المسيد القريب من بيت عمه بو بشار أبو زوجته عبير.. واثناء صلاتهم .. دخلوا عليهم جنود الاحتلال وانصاب محمد برصاصه في ريوله .. ساعده بوبشار وشله لبيتهم .. عشان تسعفه بنته اللي كانت ماخذه محمد وهي بعدها في سنواتها الاولى بكليه الطب ..

بوبشار: افتح الباب يابشار بسرعه ..
دخل محمد ونام على اول كنبه ..وهو ماسك ريوله ويتالم ..
في هاللحظه دخلت ام بشار وبنتها عبير ..
عبير: يبه شصاير ..
ولفت على محمد اللي كان طايح ويتأوه ..صرخت عبير وهي تشوف ها المنظر والدم ملطخ محمد ..
عبير: محمد شفيك .. يبه شفيه.. شنو صااير
بوبشار: الله ينتقم منهم ها المجرمين..كنا نصلي ودخلو المسيد وطلقوا النار..
ام بشار: عبير ساعديه
عبير كانن دموعها منهمرات على خدودها وقابضه ايد محمد ..
عبير: انا .. تبوني اطلع الرصاصه أنا!
محمد التفت لعبير وهو يطالعها ..
محمد بصوت يكاد ينسمع وهو متقطع: يالله يا عبير انا تعبان شليها
عبير: يابعد جبدي يا محمد .. راح اطلعها بسرعه ..تماسك
وطى راسه ببطئ وغمض عينه.. ركضت عبير اتييب الشنطه ورجعت على طول .. محمد كان يتالم وايد .. ويحاول يمسك ريوله بس بوبشار يمنعه ..
وعلى صريخ محمد وتأوهاته .. كانت عبير تحاول انها تنزع الرصاصه من ريوله .. وكل شوي توقف وتطالعه وهو يتالم دموعها ماوقفن ..
بوبشار: بسرعه ياعبير مو وقته ها البجي..ركزي فشغلج و شيلي الرصاصه وبيرتاح بدل ماتوقفين كل شوي وتخلينه يتالم ..
محمد كان يتأوه من الألم ويتصبب عرق .. وعبير كل ماتشوفه ايدها ترجف وتوقف.. وترد تكمل اللي تسويه .. وكل ما تنزع عبير الرصاصه يحس بقلبه ينزع..
محمد طلع تأويه من خااطره تدل ع التعب والألم ..
عبير: تعورك ريلك؟؟ اسفه شكلي ظغطت عليها وايد ؟!
محمد: .....
عبير: محمد محمد
محمد: هاه .. نعم ؟!
عبير: ريولك تعورك ؟!

محمد انتبه لواقعه ولوجود عبير وياه بس مب وقت الحادث .. لا وياه في الامارات بعد ماصارت زوجته وام بناته
محمد: لا..ماتعورني.. بس اشوي احس بحروره فيها
عبير: الله يعينك ..ليش ما تسويلك موعد فالمستشفى انزين
محمد: شو بيسوولي يا عبير.. بيقولولي يبالها علاج طبيعي .. وانا اسوي علاج تراني واحط من ها المراهم ..
عبير: انزين مايخالف .. من زمان ماسويت كشفيه لريلك.. احس اخر فتره تعورك اكثر عن قبل..لازم من فتره لفتره تراجع
محمد: ماعليه بشوف ان شاء الله ..
قامت عبير من على الارض من بعد ماخلصت وحطت الدوا على ريول محمد ويلست على السرير حذاله..وتذكرت اتصال اخوها .. وقالت بتخبر محمد عن اللي دار امبينهم ..

عبير: أيه تذكرت.. اليوم بشار اتصل تلفون
محمد: هييه .. زين وشو اخبارهم ؟
عبير: الحمدالله ..
محمد: مافي اخبار عن ابوج ؟!
عبير: لا ابدا .. والله خايفه عليه
محمد: لاتخافين ان شاء الله خير .. الله يفج اسره يارب
عبير: آمين .. ويفج جميع اسرى المسلمين
محمد: فجر شومسويه ؟
عبير: آخ يافجر .. ها البنت مادري ليش جذي.. الحين متمشكله ويا زوجه بشار
محمد: لييش شو مستوي؟
عبير: محمد انا مو هاينه علي اختي..صح تصرفاتها تنرفز .. لكن بتظل اختي
محمد: انزين عبور رمسي بدون الغاز.. شو مشكلتها ويا حرمت بشار بعد؟
عبير: والله مادري.. بشار كان يكلمني وهو معصب منها..وبعدين كلمتها قالتلي انها تبي تكمل دراستها عندنا هنه فالامارات مو قادره تتأقلم ويا مرت بشار..والله مو هاينه علي .. بس ماعرف كيف ها البنت جيه..
محمد: انزين عادي خليها اتي هنه.. هناك اهلها وهنه اهلها بعد
عبير: اهي محطيه فبالها تبى تكمل فامريكية الشارجه
محمد: هاي مب خلط ؟
عبير: ايه
محمد: انزين بس كيف ياعبير بتخلونها تدرس فالامريكيه..
عبير: ايه مو اهي تراها بتدرس فجامعه خلط فالكويت..عادي يا محمد..
محمد: والله مادري اللي يريحكم .. وين بتيلس في سكن الطالبات ؟
عبير: والله مادري .. بس الارجح بتكون فالسكن والويكند بتنزل عندنا
محمد: حياها الله ولو حبت تيلس على طول البيت بيتها
عبير: شكلي برجع اكلمها فالموضوع.. يمكن هونت عن اللي فبالها
محمد: خليها ع راحتها..ودام فكرت اتي عندنا بنحطها فوق روسنا
عبير: تسلم والله يا محمد.. ماقصرت ويانا فشي من عرفناك
محمد: شو ها الرمسه اللي اسمعها.. عبير انتي حرمتي وفجر حسبة بنتي..شو خانتي لو ما صنتكم وراعيتكم..
عبير: الله يخليك النا وما يحرمنا منك..
محمد: ويخليكم كلكم لي ..

ابتسم محمد وهو يشوف زوجته عبير .. اللي استشهدت امها وخذوا ابوها الاسر في الغزو.. اما اخوانها بشار وفجر اللي كانت ام ثمان سنوات .. رجعوا وعاشوا في الكويت من بعد ماظهروا منها بعد الغزو .. بشار بعد الغزو تزوج من البنت اللي كان خاطبنها وفجر كانت وياهم فالبيت لكن من بدت تفهم وتستوعب الحياه بدت شخصيتها تظهر وبدى تذمر مرت بشار منها.. اما عبير طبعا استقرت ويا ريلها فبلاده..استقبلوهم اهل محمد احسن استقبال وهم يشوفون بنتهم اللي ماجد شافوها من انولدت وزوجة محمد اللي يبين من عيونها حبها الكبير لولدهم محمد ..
ومع الأيام قدرت عبير تسلب قلوب الكل بطيبتها.. تخلت عن دراستها فالطب لانها صدق حبت محمد من خاطرها وما بغت تفترق عنه..لان شخصية محمد تخلي الكل يحترمه ويحب اسلوبه الحلو وحنانه الدافي..وحبه للكل ونصحه الدايم الهم .. صدره يوسعهم كلهم وعمره ما تذمر من حد ..انسان مثقف وعنده خلفيه عن كل الأمور..صحفي يطلع ع كل مستجدات الأحداث..وكاتب مفعم بالحيويه..
كان عند الكل هو الريال المثالي..وبالفعل كان مثالي

في انتظار ارائكم وانتقاداتكم ..




جودي:dancegirl2gv7:

رد: قـــلـــوب تـــحـــت الـــمــجـــهــــر**
 

مشكوره ياعسل كملي بانتظارك

رد: قـــلـــوب تـــحـــت الـــمــجـــهــــر**
 

مساء الورد

أهلين قلوب دافئه

نورتي ياقلبي


وهذي تكمله


..
الجزء الثاني ..


***************
(الثلاثا) 6 يوليو 2004..
***************

الساعه تسع الصبح فبيت سيف.. كانت ريم يالسه فالصاله بروحها .. الكل كان راقد وهي متعوده تنش من وقت ..انتبهت لصوت جاسم يزقرها ..
جاسم: ريماان
ريم: ها حبيبي .. شو بلاك .. متى قمت؟
جاسم: قبل شويه .. ريمان انا يوعان ..
ريم: لازم يوعان يوم اقولك امس تعال تعشى قلت شبعت
جاسم: انزين تعالي نسير نتريق
ريم: يالله انزين..
ونزلوا تحت .. شافوا يدتهم يالسه و مايد يشرب حليب..
ريم: السلام عليكم
ام سيف: هلا وعليكم السلام ..
ريم: تعال جسوم بسويلك شي تاكله
ام سيف: وجيه اكلنا مب عايبنج.. يا امايه قاربي الناس شله محاربتنا ع الاكل بعد
ريم: انا ماحاربت حد
ام سيف: عيل ليش ماتاكلين ويانا..مابنحطلج سم نحن فالاكل..
جاسم: تعالي ريمان ..
وسحب جسوم اخته صوب طاولة الاكل.. يلست ريم ويلس جاسم احذال مايد اللي من شافهم وهو شاق حلجه..
ريم صبت لأخوها حليب وحطتله الكورن فليكس .. ويلست تاكل وياهم
ام سيف تبى تقول شي بس ماعرفت كيف اتيب الرمسه
ام سيف: وخواتج وين عيل؟
ريم: كلهن رقود
ام سيف: هييه .. وامج شحالها؟
ريم استغربت السؤال بس ردت ببرود: بخير الحمدلله
ام سيف: واهلج هناك ..؟
ريم: الحمدلله كلهم بخير ..
ام سيف: ريم امايه بخبرج .. تراج انتي الكبيره فخواتج..وانتي قدوتهن..ليش يا امايه ماترمسينا .. يوم انتي جيه مقاطعتنا خواتج الا بيسون شراتج
ريم: انا ماقاطعت حد
ام سيف: شقى بعد ما قاطعتي حد .. انتي حتى الرمسه ماترمسينها ويانا..اليوم اول مره تيلسين
ريم: انزين يعني ماقاطعت ولا حاربت حد
ام سيف: ما بتيلسين لو ما زقرتج

ريم وطت كوب الحليب اللي فايدها واطالعت يدتها .. هاي شو تبى منها .. ماتبى تسمع رمسه زياده خلاص.. هيه يوم بترمس بترمس بكيفها.. ويوم بتعامل وياهم بتعامل بكيفها.. بس حست بنبرة حس يدتها غير.. فيه شي غريب .. وتذكرت رمسة مايد امس يوم يقولهم انها هيه الوحيده اللي تيلس وياهم .. معقوله رق قلبها يوم كبرت!! معقوله حنت النا عسب جي دخلت فكرت رجعتنا للبيت فراس ابويه!!

ام سيف: شله سكتي..
ريم: لا ماشي ..
ام سيف: خبرنج خواتج شو سون امس؟
ريم: هيه قالولي.. اسمحيلهن هن ما يقصدن
ام سيف: كل وحده لسانها اطول عن الثانيه عليه .. لو بيرادن نعوم ماعليه بس عليه انا يدتهن .. شله عااد ..
ريم فخاطرها شو قصدها يعني يرادن نعوم !! شكلها ها النعوم مراوتنها الويل
ريم: يا.. يدووه .. خـواتــ
ام سيف قاطعت ريم ع طول: شو يدوه بعد .. زقرني امايه عنبوه يدووه عااد!..
ريم ابتسمت ووخت ع طول ..
ريم: المهم .. خواتي مب قليلات ادب .. اميه ماقصرت فتربيتنا
ام سيف: انزين انا ماقلت قليلات ادب.. واعرف عليا وتربيتها..بس تصرفاتهن امس حرقتني وايد .. ورمست عاد بها الرمسه..

ريم سكتت .. بس ماتبى تتجادل وايد .. الكل غلطان امس وهيه ما بتبري خواتها ..
ام سيف: انا بقوم اسير اتسلقي شويه لين الضحى.. الرمسه ماتفيد وياكن..
وطلعت ام سيف وهي تحرطم ..
ريم: بلااها مب عايبنها شي !!
مايد: امايه عفرا دومها جذه تنازع ع كل شي وما يعيبها شي.. بس هيه اطيب عن اميه وابويه..صدق والله
جاسم: عيل ليش نازعتنا امس؟
مايد: ترا اقولك دومها جذه تتنازع.. اذا حد ما سوالها سالفه اتم محتشره..لكن يوم بتيلسون اتسولفون وياها غيير تكون ..
ريم تمت رافعه حواجبها وسرحانه.. معقول الشيب يرقق القلب ! معقوله هيبتها الاوليه راحت!! معقوله تسلطها رااح!
احس شي استوى فها السنين كان السبب.. والاكيد انه ناعمه الها دور فالموضوع!

ريم: ماايد ..
ومايد التفت للريم وابتسملها ..: هلا ..
ريم: امك كيف ويا امايه عفرا؟
مايد: كيف يعني؟
ريم: ممم يعني امك تيلس ويا امايه؟ ترمس وتسولف وياها؟
مايد: قلتلكم امايه ويانا نحن ماتيلس كيف بتيلس ويا امايه عفرا!
ريم: اهاا.. انزين .. هم يتنازعون يوم يرمسون ويا بعض؟
مايد كان بيرمس بس سكت
ريم: ها شو؟
مايد: لا مادري..
ريم:ارمس عادي ميود .. ما بقول لامك ولا ليدتك ..
مايد كان يشوف بيأس..وريم تترياه يرمس ويقول شي..
ريم: ها ميود
مايد تذكر موقف تام فمخيلته حتى انه طاحن دموعه فذاك اليوم..
مايد: مره اميه جان تصرخ ع امايه عفرا جدام ابويه.. امايه حتى صاحت .. وابويه ماقاال شي موول ..
ريم: لييش.. ليش صرخت عليها؟
مايد: كم مره اميه تتنازع ويا امايه عفرا.. بس امايه تسكت عنها .. لانه ابويه ما يقول شي لاميه..
ريم سكتت .. توقعت ها الشي .. والله توقعت !! .. صدق انه ابويه ضعييييف واايد وقلتها من قبل .. أي حد بيمشيه!
اخ يا اميه كنتي وايد طيبه وياه .. لو كنتي متسلطه بيكون خاتم فايدج .. بس شو الفايده ..
ويدتهم اليوم ضاعت سلطتها يعني .. المفروض يتسامحن وياها .. حتى لو كانت محتفظه بشخصيتها القبلانيه..


ريم اطالعت مايد وابتسمتله تبى تخفف عليه .. كان شكله متضايج .. وحبت تغير الموضوع.. ورجعت شافت جاسم وجنها تذكرت شي
ريم: جاسم انته صليت الفير؟؟
جاسم: اوه ريمان نسيت احين بتريق وعقب بصلي
ريم: وانته مايد؟
مايد: هاه .. لا
ريم: ليش؟
مايد: اا ريم انا ماتعودت اصلي
ريم: شوووو؟؟ ماتصلي ؟ ليش كافر والا يهودي
مايد: ماتعودت اصلي الا يوم الجمعه يوم اسير ويا ابويه
ريم: وهذا ومابين البيت والمسيد الا شارع واحد؟ جيه وينها امك عنك
مايد: امي ولا مره قالتلي قوم صل .. ولا حتى ابويه .. بس امايه عفرا تنازعني وتروح عني..
ريم: استغفر الله .. اسمع مايد انته عود وتتحاسب على كل شي تسويه مب ياهل انته .. من اليوم ورايح انته وجاسم مابا اشوفكم تصلون الا في المسيد وانا مستعده كل يوم اوقفلكم عند البلكونه اشوفكم لين تروحون وتردون .. فاهمين؟
جاسم+مايد: ان شاء الله ..

استغربت ريم..
" يالله يالدنيا ابويه ومرته وينهم من عقاب رب العالمين .. عنبو مايعلمون عيالهم الصلاه .. هذا اصلا اذا كانوا هم ايصلون من اساس .. استغفر الله ماقدر احط في ذمتيه بعد بس صدق غلط اللي يسووونه .."

مايد بغى يغير الجو اللي تعكر وقال: انزين شو رايكم نتحوط برع فالحوي؟؟
ريم: شمس احين وين نظهر..
مايد: بنسير ورا البيت بنيلس ع الند شويه..ماشي شمس

ريم سكتت وكانها تتذكر شي .. ياما لعبوا ع ها الند يوم كانوا صغار..وقت ما تستوي زوبعه ومشاكل فالبيت كانت ريم تاخذ بايد خواتها مي وساره ويسيرون يلعبون ورا.. عيال عمتها كانوا فالفريج اللي وراهم بس كانوا دايما العصر اييونهم يركضون ويلعبون ع الند وينسون مشاكل الكبار وهمومهم ..
وفي غمرة ذكرياتها ماحست الا بصوت ناعمه ياينها من على الدري ..

ناعمه: صباح الخير
ريم: صباح النور
ناعمه: وينهن خواتج ؟
ريم: رقود
ناعمه: انزين اخبرج..عمتج وبناتها بيونكم على الغدى ..
ريم: والله
ناعمه: هيه اتصلت توها ..
ريم: انزين.. شي طيب ..
وابتسمت ريم .. سبحان الله توهم فبالها..
ناعمه: سيري وعي خواتج..
ريم: بسيرلهم خلاف بعده وقت..
ناعمه: لا قومي الحينه..عمتج بتي الظحى ..
ريم: اقولج ماروم الحينه سيري انتي وعيهم جان تبين انا بيلس ويا جاسم لين يتريق
ناعمه: يالله ها اول مره نرمسها وجي..الله يعينا عليج
ريم عقدت بحياتها واطالعت جاسم: شبلاهم هاذيل كل مارمسوني قالوا اول مره واول مره..
ناعمه: شوو
ريم: مااااااشي
ناعمه: اخ يا بنات سيف.. بنشوف شو اخرتها وياكن.. انا بسير اوعي خواتج تراني..
ريم: سيري انزين ثرني حلفت عليج ماتسيرين ؟

ردت ناعمه فوق .. دخلت القسم و دقت على غرفه مها ومهره .. بس محد رد عليها.. فتحت الباب شوي شوي .. وحصلت مهره راقده اما مها مب بالفراش .. طلعت مها من الحمام تمسح ويها بالفوطه وشافت ناعمه بويها ..

ناعمه: انتي واعيه ؟
مها من ورا خاطرها: لا راقده ..
ناعمه انقهرت من اسلوبها الاستفزازي: وعي اختج واتلبسوا عمتكم بتي على الغدى
طلعت ناعمه من الغرفه تتحرطم.. يهال ولسانهم طويل عيل يوم بيكبرن شو بيسون..
سارت وهي معصبه ادق الباب على غرفه مي وساره .. تمت ادق شوي ودخلت الغرفه..
تقربت من سرير ساره اللي كانت راقده بالجلب .. راسها مكان ريولها وريولها مكان راسها .. وماينشاف منها شي لانها متغطيه بالكامل ..
وقفت ناعمه توعيهم : ايه انتن قومن
مي تحركت بسرعه وشلت اللحاف عن ويها : نعم
ناعمه: عمتكم بتي على الغدى نشوا اتلبسوا
مي: انزين اطلعي وسكري الباب ..(وتحرطمت بصوت واطي) حشى اذيه من الصبح نوعى على حسج
ناعمه: شو تقوولين؟
مي: ها .. ماشي اقول وناسه قوم عموه بيون بنفتك من مجابلكم شويه
ناعمه: يا مسودة الويه ان ماخبرت ابوج
مي فخاطرها( ويه بسير اجحلها وعميتها): افا عليج عموه انا اقصد انتوا اللي بتفتكون من مجابلنا صح
ناعمه: هيه قصي عليه بكلمة عموه هاي.. بس صدقتي بنفتك من حشرتكن شويه..
مي: انزين طلعي يلاااا وفكيينا
ناعمه تغصصت وسكرت الباب وراها .. وهي مقهوره حدها من هذيل البنات .. بعدها مب قادره تتخيل انهن بيتمن وياها في البيت .. بتقولهن كلمه لقت الف رد وجواب .. يغلبنها فالرمسه وماتروم ترد عليهن ..

****

اما فبيت بو راشد ..عليا في هالوقت كانت يالسه تتريق ويا احلام ..الجو هادي .. مب متعودين على ها الصباح .. ع الاقل لو يكونن بعضهن راقدات ها الوقت ..الباجيات يونسن امهن فاليلسه ..

عليا: اختج وين ؟
احلام:راقده
عليا: لين متى سهرانات امس؟
احلام: والله مادري انا امس راقده من وقت..
عليا تمت ساكته .. واحلام اطالعها .. وكالعاده فتحت سالفة بنات عمتها..اللي دايما تطريهن وقت ماتيلس ويا عمتها..
احلام: شخباار البنات؟
عليا: الحمدلله.. رمستهن امس فليل..
احلام: فديتهم والله .. هيه صح عموه.. انا ابا اشتري هدية لنجاح ميوه..
عليا ابتسمت: لين احين ماخذتيلها انتي.. المفروض انتي اول وحده تعطينها هدية النجاح ههه
احلام: ترا ابويه ماودانا ناخذلها شي..
عليا: وشو بتاخذيلها؟
احلام: باخذلها تيلفون حق الجامعه بدون كيمرا .. انا قايلتلها من قبل التيلفون انا باخذه الها..وباخذلها سلسله ذهب خفيفه عسب اتم دوم فرقبتها وتذكرني..ووو باخذلها بعد اغراض للجامعه
عليا: هههههه فديتج والله .. واايد ها
احلام: عني وعن مدوي.. تستاااهل ميووه فديتها ونسبتها تبيض الويه
عليا اطالعت احلام وابتسمتلها ..
عليا: عاد ما يندرى يظهرلها ابوها رقم ولا اخلي ابوج ايطلعلها
احلام: ليش يعني ما يظهرلها؟
عليا: والله مادري.. اخافهن ما يقولن له يوم يبن شي
احلام: لا ماعليج .. جان بناتج بيسكتن.. ميوه وساروه ما بيسكتن عن حقهن..
عليا: هههههه .. احسن شي انزين ..
احلام: انزين عموه.. هن خلااص بيتمن على طوول هنااك.. انا بعدني مب قادره اتخيل الفكره هاي.. مب مستوعبه انهن ما بيكونن ويانا
عليا: الله كريم.. البنات بيكبرن ومصيرهن بيت رياييلهن انا ماحد قاص ظهري غير جسوم ..
احلام:صدق بعدني مب مستوعبه الامر .. والله ساعات ازقر ميوه بالغلط .. احس اني تخبلت.. ايلس فالحجره بروحي واندمج وحاله.. وفجأه ازقر ميوه براويها شي.. وعقب اتذكر انهم محد هههههه
عليا: ههههه بسم الله عليج.. عن تتخبلين علينا
احلام: تخيلي عااد عموه..
عليا ضحكت ع احلام ..
عليا: قومي شغليلنا التلفزيون بنشوف شو محطين..

شغلت احلام التلفزيون ويلست حذال عمتها.. تحس بفرااغ من عقب بنات عمتها اللي مونسات عليهم الجو بسوالفهن وضرابتهن..احلام ماكانت ترتاح لحد كثر ما ترتاح لمي .. كل شي فخاطرها كانت تخبره مي ..بالرغم انه بينهم 3 سنوات تقريبا.. الا انها تعزها وايد ودايماً كانت وياها..والحين مالها من يونسها ويفتحلها قلبه لو كانت متكدره..
احلام تفكريها من تفكير اللي فسن مي .. اسلوبها وطريقة كلامها ادل على انها اكبر من سنها .. يمكن السبب لانها تربت ويا بنات عليا وكانت كله وياهن وعليا تعاملها دايما كأنها وحده كبيره وعاقله..
أما مديه اختها فكانت دلوعتهم هي من سنين جاسم واللي فسنها مايحاتي لا هموم ولا تفكير ..

****

مي كانت توها طالعه من الحمام متسبحه .. سارت عند ليت الغرفه وفتحته اما ساره كانت بعدها راقده .. شغلت مي المسجل على اذاعه الاف ام ويلست جدام التسريحه .. شلت الفوطه عن شعرها الاسود القصير ..

ساره تحركت وهي منزعجه: ميووووووووه بندي الليتات ابا ارقد
مي طنشت ولا جنه ساره ترمس .. وبدت تنشف شعرها بالسشوار..
وهي مشغله كل مصادر الازعاج لساره..
نشت ساره معصبه ويلست على السرير متربعه: والله انج سخيفه انزين.. شو هالنذاله اللي فيج ؟
مي: نفس النذاله اللي كانت فيج امس ولا نسيتي امس شو مسوتبي ؟.
ساره: بايخه والله ..
مي: برااااااايني
ساره انقهرت وفرت المخده على مي : سخيييييييييييييفه
مي: محد غيرج ..

دخلت ريم الغرفه عليهن .. وشافتهن محتشرات ..
ريم: بلاكن ؟؟
ساره: هاي السخيفه ميوه ..
ريم: انزين قومي ساروه ماشي وقت حق الضرايب الحين
مي: صدق قوم عموه بيوون!
ريم: هيه ماوعتكن ناعمه
مي : امبلا يت وعقيت عليها كمن كلمه وعصبت
ساره نطت من الشبريه: شو قلتيلها
مي: ماعرف اصلن كنت بدون حاسيه نص واعيه ونص راقده
ريم: سولنا سالفه انتن يلا قومن بسرعه

طلعت ريم سايره غرفه مها ومهره .. تشوفهن اذا تلبسن والا .. وعقب فتره نزلن كل البنات تحت .. شافن يدتهن يالسه .. وتذكرن ع طول السالفه الامسيه .. دشن الصاله من غير حتى ما يسلمن .. وتمن واقفات حذال بعض من الكبيره للصغيره..
ريم اطالعتهن بنظره .. ومن غير ما تحس يدتها وقفت ورا يدتها وأأشرت على خواتها يسون حركه ..
كلهن استغربن ليش يعني ..
وحاست ساره البوز وتجدمت صوب يدتها وباستها ع راسها ..
واتالن البنات .. كل وحده تحب يدتها ع راسهاويلسن كلهن حواليها..
وباين من شكل اليده انها كانت مستانسه وايد ..
ريم: ها امايه .. خواتي اليوم يايات يستسمحن منج .. ويوعدنج ما يكررن اللي استوا..
ساره اطالع ريم: متى هذا !..
ريم كانت يالسه حذال يدتها .. حطت صبعها ع شفايفها تبى ساره تسكت وما تسوي مشاكل اكثر ويا اليده ..
ريم وهيه متلعثمه : امايه .. ماعليج منها ساروه .. تراج ما عرفتي اطباعنا زين بعدج.. ولا بتقولين انها ما تقصد ..
مي: هيه يدوه أنـ
ريم تسعل تبى تنبه مي : امااايه ..
مي كانت يالسه ع حد الغنفه..بس ردت ع ورا بعمرها وضحكت ..
"اوييه بعد ما تحق اليده نكبرها .. هههههه .. والله حاله .."
وردت تصلب بعمرها .. ورمست بجديه .
مي: امايه .. انا اصلا كنت بييج فليل بستسمح منج ع اللي استوى .. بس تراه صدق مب قصدي.. وانا ما ارضى حد يمس اميه باي كلمه
ام سيف كانت تتطالع بناتها وتبتسم : معلووم بناتي انكن ما بترضن على امكن .. بس بعد لا ترضن عليه .. يعيبكن حد يرفع حسه عليه
صخن البنات ..
ام سيف: خلاص انسن السالفه البارحيه.. انا يا امايه خلاص مابا شي من ها الدنيا غير انه عيالي يلتمون حولي .. واشوفهم وافرحبهم قبل لا اموت
مي: بعيد الشر عنج ..
ريم: بعد عمر طويل يا امايه ..

وتمن البنات يهذربن ويا يدتهن ومي يا فبالها تتصل بيت يدها ..ردت عليها مديه وقامت تخربط وياها..

مي: انزين مدوويه .. شو اخر الاخبار بعد ..
مديه: اممم .. ماشي اخبار البيت بايخ من عقب ما روحتوا.. انا وحلامي دومنا نتضارب ..
مي: يااحيكن .. عيل احلام وينها
مديه: اظني فالحجره .. صبري بزقرلج اياها ..
مي: اوووكي ..
وعقب شوي يت احلام وشلت التيلفون ..
احلام: كلوولوووش كلوولوووش .. واخيرا تكرمت احد النساء الصغيرات واتصلتلنا
مي: هههههههههه شحاااااااالج ؟
احلام:هههههه انا تماام شحالج انتي..يا الخايسه يا الكريهه والله لج وحشه
مي ترمس بصيغه صبيانيه : افففف بعدنا امس مغادرينكم .. ها الكثر تحبيني حلااامي ..اعترفي يلا..
احلام: ههههههه ويارااسج يا الهرمه .. ردوا ميوه والله اني ضايعه بدونها .. متلتهه تقولين عنز ضايعه عنها صخلتها
مي: عفوااا.. هههههههههه الله ينطب بليسج يا العنز الحين انا صخله
احلام: يوم اني رضيت اني عنز فبرضى انج تكونين صخلتيه ..
مي: لااااوالله
احلام ابتسمت : ويااحيكم..
مي: حيج الحياااه ..
احلام: اشحالها مرت ابوكم وياكم؟
مي: نعمة الله ؟
احلام: مااحيد اسمها نعمة الله !!
مي: لا ناعمه .. بس تشبه نعمه الله مرت الحاج متولي .. طويله وهبلى .. اسكتي ماخبرتج شو سويت فيها الصبح يوم يت توعيني
احلام:هههههههههه ليكون خربطتي عليها مثل عادتج يوم ترمسين وانتي راقده
مي: هيييييييييييه واخر شي رغتها من الحجره ..
احلام:ههههههه خبله والله انج خبله .. انا بسير اشور على عموه يردونج مستشفى الامل شكلج شارده من عندهم ..
مي شهقت : احلامووه شدرااج .. حراام علييج لا تخبرين حد.. بيضيع مستقبليه .. حراام ..دخيلج خليه سر امبينا ..

احلام وهيه ميته من الضحك على ميوه ومب رايمه تقبض عمرها ومي تزيد فسوالفها واحلام تزيد فالضحك والدموع تسيل من كثرة الضحك .. مدووي يت وضحكت على حال احلام.. ها الثنتين دومهن جذه وقت ما يستخفن دمهن.. ودايما فيلستهن ويا شلة البنات يكونن هن مصدر السوالف لدرجه انهم مسميات عمارهن السخيفات ويعتزن وايد بها اللقب اللي في مفهومهن يدل على المرح وخفة الدم .. والمشكله سخافتهن ماتظهر الا لما يكونن ويابعض..

قطع حديث مي واحلام وصول عمتهم وبناتها لطيفه واسما واختهم الصغير نوره .. فسكرت مي عن احلام وقامت تسلم على عمتها وبناتها ويا خواتها ويلسوا كلهم فالصاله..وبعد السلام واخذ الاخبار وبعد ما تطمنت عمتهم عليهم وعلى احوال امهم التهت ويا امها بالسوالف .. والبنات توالفن ويا بعض وقامن يسولفن..

لطيفه ترمس ريم: ولهاانين عليكم واايد
ريم ابتسمتلها: والله انا بعد ولهانه عليكم .. حتى اليوم اتذكر لعبنا قبل ونحن يهال
لطيفه: ههههه ايام اول عجيبه.. ليتها ترد.. امبونا دوم ويا بعض والحينه مانشوف بعض الا فالسنه حسنه
ريم: شو نسوي .. هاي ارادة ربج
ساره: لا عاد انا مليتوا من كثر ماتشوفوني فالسكن
اسما: عداال عاد .. اللي يقول مقطعه عمرج دووم اتينا
لطيفه: انتن الثنتين اصلا فالجامعه ماتنشافن .. وهاي اسموه وياي فالحجره ولا جنها وياي .. ماتي الا ويه الصبح وتبخ رقاد لين دوامها الظهر..
ريم: حتى ساروه انزين.. لو هن محطوطات دوام صباحي احسلهن
لطيفه: شعليهن تعليم اساسي الا .. ماعليه بتكرفن الكورس الياي ودرنه عنكن ها اللعبان
نطت مي ودشت فالخط: اللعبان كله حقي الكوورس الياي هيهيهي
لطيفه: ابوي لا تقولين بتلعبين..قوانينهم الحينه مول ماترحم .. هاكيه اسموه الانجليزي ما فلحت فيه وها هيه اونها شاطره
اسما: سكتي يالمفظوحه
ساره: ليش اسووم مايكون طحتي فيه؟
اسما: رسبت فـ level 3
ريم: ليييش ؟
اسما: والله بهدله .. ها المس متوعده النا ورسبت كل الشله
ساره: اكيد ملعوزاتنها فالكلاس.. نحن الحمدلله نجحنا كلنا.. مصطلبين ويا السير مالنا ..
اسما: الله ياخذهم من اجانب ..
ريم: عاد شدي حيلج الكورس الياي وخلصيه ..
اسما: يالله مابا اعيش فرعب المحاوله الاخيره .. الحينه محاوله ثانيه واحس اني زايغه من ها الانجليزي.. ساروه كم يبتي فالتوفل ..
ساره: يبت 5 .. الحمدلله يبوج المهم مشيت الحال من دشيت الجامعه .. والله اشوف ها البنات متغربلات ويا الليفل وويا التوفل ..
لطيفه: اصلا من يت دفعتكم انتوا يبتوا القرارات السم .. و ع دفعه 2001 بعد يت الانذارات ..
ريم: ثالث انذار وفصل من الجامعه..
لطيفه: هيه اذا قل المعدل الحين عن 2 يوصل الانذار .. اما ع دفعتنا والدفعه اللي قبلنا اذ كان اقل عن 1.75
ريم: يالله خير ان شاء الله .. اللي بتشد حيلها ما بتزيغ لا من معدل ولا من شي ..
مي: بس احس صدق مذله مستويه الجامعه .. انا فخاطريه بس اسيرلها ولا عن الدراسه عادي عندي .. مها ومهروه يخسن يسيرن العين
ساره: بس خلاص انزين الحينه محد ايسيرلها .. كل سنه يقلن المستجدات فالجامعه..
لطيفه: يالله كرفوا شو غادي عليكم .. انا سنتين ان شاء الله وبتخرج عنكم ..
ريم: ماشالله اربع سنين بس بتكملين
لطيفه: الحمدلله انا اداب انجليزي ومشيت فالتعليم ودخلت التخصص بسرعه ..
ريم: هيه صح اذكر مخبرتني ..
ساره:شي طيب والله ..
اسما: وانتي ريموه
ريم: انا دبلوم .. خلاص ها السنه وبخلص كليه ان شاء الله
لطيفه: حلو بتفتكين .. يبوج الاغلب احين يدرس انجليزي
ساره: انا كنت ابا انجلييزي بس والله عقب الغصه اللي راوونا اياها فالتعليم مول ما افكر .. خلاص حولت اداره انا ..
اسما: والله .. يعني شراتي
مي: وانا مسجله اداره .. احلى والله بنتوالف كلنا ههههه
ساره: انزين سابقينج بسنه
مي: ماعليه انزين بطيح وياكن فشي من المساقات..
لطيفه: ابوي جان ماتخمس عليكن ميوه .. نسبتها ماشالله فالتسعين .. وعادي تاخذ مستويات اخيره فالتعليم و تخلص التعليم فكورس وتبدى وياكن ..
مي : كح كح .. الله يسمع منج ان شااااء الله ..
ساره: يالله عاد بتخق علينا اونها ..

وضحكن البنات كلهن ..



مريم: فديت الضحكه لاخليت منكن .. ها شوو عندكن ؟
مي: والله ماشي عموه .. الا نرمس عن الجامعه والدراسه
مريم: هييه .. غير الله اسموه .. يقوولج يا امايه ارسبت فالانجليزي
اسما: يووهو بس بس فضحتيينا يا امايه كل حد قلتيله
مريم: احسن عشان تشدين حيلج وتدرسين ..
ام سيف: وشله هيه ماتدرس.. خلها تقبض الكتاب وتذاكر..امكن وابوكن ماطروشكن هناك عشان تلعبن.. ذاكرن شدن حيلكن
مي تصاصر ساروه واسوم: اسمعن الموعظه الحسنه .. تفهمن..
اسما بصوت واطي: طلاب مدرسه نحن ترانا..(وعلت من حسها) ان شاء الله امايه بنذاكر وبنقبض الكتب..ادعيلنا بس انتي
ام سيف: الله يوفجكن ان شااء الله ..
مريم: بناات.. عمار وينه عيل؟؟
لطيفه: مادريبه وين؟
مي: شفته ساير ويا ميود وجسوم فحجرة العاب مايد
مريم: هيه زين يوم انهم داخل عن ضربة الشمس ..

ووقت ما اذن الظهر .. تفرقت اللمه .. دشت مريم ويا امها حجرتها ايصلن.. والبنات سارن فوق يصلن وبالمره شافن قسم البنات وعيبتهن غرفهم والديكور ..
وعقب نزلوا يتغدون..

****

العصر في بيت بو راشد .. كانت احلام يالسه على النت من الملل اللي صايبنها .. وتنزل برامج تصاميم واغاني تعيبها .. يتها مديه واللي يبين عليها هيه بعد انها ملانه.. ووقفت حذال احلام ..

مديه: شو تسوين؟
احلام: شو تشوفين ..
مديه: .. انزين .. اقولج قوومي بسج ابا النت
احلام: ليل نهاار يالسه عليه .. عابدتنه عباده خليني شوي..
مديه: قومي عاااد انا اباه الحينه
احلام: يعني حبكت احينه يوم انا يالسه عليه
مديه: قوومي والله اخبر عليج اميه
احلام: هاكوه الدرب
مديه: اووهووو قووووومي..ابا ادش المنتدى بسرعه
احلام: ياسلام الواحد ما يلس .. على حساابج هو
مديه: هيه على حسابي ..
احلام: ويا ها الراس.. خبرج عند ابويه
مديه: عادي ما بيقولي شي
احلام: بس بس انزين .. خايسه
مديه: انتي الا

وقامت احلام وهي تتحرطم ومتغصصه من مدوي.. كل اللي تباه تحصله بحنتها وزنتها .. لقتها عمتها عليا واستغربت حالتها .. بس متعودين ع ضرابتهن ها الثنتين .. وخصه الحينه من روحن البنات زادن فالضرايب .. سكتت عليا وما قالت شي .. بيكبرن وبيضحكن على عمارهن .. فها السن لازم بتكون امبينهن خلافات.. ياما عانت من ساروه وميوه .. والحينه ما يصبرن عن بعض..
طلعت احلام من بيتهم وسارت البيت اللي حذالهم .. واللي هو بيت عمها راشد ..
لقت مروان ولد عمها فالصاله يالس يقرا الجريده ..وتمت واقفه..

احلام: السلاام علييكم
مروان: وعليكم السلااام ..
احلام: عزووه وين عيل؟
مروان يطالع احلام: انزين عنبوه اسالينا عن احوالي واخباري..جيه نحن كلنا عيال عمج مب الا عزوه
احلام: ههههه سوري انزين ..
وسارت صوبه ويلست ..
احلام: شحاالك ولد عمي وشخبااارك وشو مسوي .. عساك طيب ان شااء الله .. وشخبار دوامك .. ومبروك ع التخرج مؤخرا .. وشو بعد
مروان: والخيييبه مره وحده .. والتهنئه مب مقبوله ..
احلام: لييش؟
مروان: الحينه بكمل شهر من تخرجت ولا افتكرتي تباركين
احلام: انا شدراني بها السوالف والرسميات والواجب.. واصلا مالقيتك من تخرجت..
مروان: يالله ماعليه .. ياهل ماتعرف الواجب شو بنسوي بعد
احلام: لاوالله انا مب ياااهل.. خلاص زعلت انا .. ماشي لاتحاول.. جان بتراضيني .. مااابسمح بأقل من جوله فالطياره .. ما يقولون متخرج من كلية الطيران .. يله راونا شطارتك..
مروان نقع من الضحك على احلام ..
مروان: شو ها الانسانه .. كوبي بيست من ميووه .. الحينه نحن افتكينا من حلجها يانا حلج اكبر
احلام: حوو لا تغلط ع ميوه .. كله ولا ميووه عااد
مروان: بعد ماترضى عليها ..
احلام: هيه عيل شو .. اغلط ع الكل الا ميوه..

اطلعها مروان وابتسم .. ابتسامته الها مغزى بس شكلها طافت على احلام ..

كانت تصرفات احلام وميوه عفويه وايد خصوصا ويا مروان .. اكثر واحد يندمجن وياه.. بيت راشد وبيت محمد وبيت شيخه اختهم كانوا حذال بعض وعيالهم رابين ويا بعض عشان جي مافي وايد تحفظ فالتعامل امبينهم لكن طبعا في حدود ..

احلام دار فبالها شي وحبت تسأل مروان ..

احلام:تعرف مروان ..بسالك شي بس لاتخبره حد
مروان: شوو ها الشي
احلام: ابوك كان ورا سالفة انه البنات يردن لابوهن؟
مروان عقد حياته وتم يطالع احلام: وانتي منو قالج؟!
احلام: انا اسالك .. انته جاوب
مروان: ليش يعني بيكون ابويه ورا السالفه؟
احلام: شوف انا مب ياهل .. تراني اشوف بعيوني وافهم واسمع اللي ينقال.. بس اسكت ما القى اللي اقوله هناك ..
مروان : وشو فهمتي..وشو شفتي ..وشو سمعتي !!
احلام: عموه عليا ماترمس ويا عمي راشد نفس قبل..ماشوفهم يسولفون..عيون عموه فيها لووم ع عمي .. وسمعت مره ابويه يرمس امايه سلامه.. انه عموه عليا ماخذه بخاطرها من ابوك بسبة سالفة البنات .. وتأكدت هاذيج الساعه انه عمي راشد كان واقف ويا سيف..مادري شو يباه وهو مطلق اخته ..ولا عسب الشغل يعني!
مروان: حلااامي انتي كم عمرج؟
احلام: الحينه انته شو تبى فعمري؟؟
مروان: قولي كم؟
احلام: شهر 12 بكمل 15 سنه باذن الله
مروان فخاطره..ها كله يطلع من وحده بها العمر..تحلييلات ومخابرات واستنتاجات .. والله حاله ..
احلام: يالله جاااوبني انزين
مروان: انزين سمعي احلام ابويه سواء وقف ويا عموه او ماوقف البنات من حق ابوهن تراهن
احلام: بس عمي غلطان المفروض يواسي عموه ع الاقل.. تبى الصحيح عمي راشد قهرني.. وتبى الاصح مابرمس عمي مول
مروان: هههههههه مشكله انتي.. حرام.. والله انه ابويه مب هاينات عليه البنات منو قالج انه مارمس وياسيف.. انا بروحي كنت وياهم .. كان يقول لسيف انه البنات مرتاحات اهنه وكل شي يبنه يوصللهن ومب مقصرين عليهن فشي.. بس سيف معاند ومصر انه البنات يردن.. ويوم ابويه رمس عموه عليا ماكان يبى يبينلها انه وياها عسب ماتم متحطمه وتشوف انه سيف ظالمنها.. كان يباها تشوف انه حد من اهلها ويا سيف عشان يخفف عليها شوي
احلام: يعني الشغل ماله دخل فالسالفه
مروان: شو يخص الشغل.. شوفي ابويه وسيف وخلفان ريل عمة البنات تراهم ربع من صغرهم ..حتى انه سيف يوز اخته لخلفان وابويه بعد يوز اخته لسيف .. شفتي كيف الصداقه ههههه
احلام: انزين مروان كمل .. وبعدين ..
مروان: ماشي .. بس يعني ابينلج انه هم ربع والشغل ما يخصه ..صح ابويه قلبه عوره عليهم يوم اطلقوا وتم يلوم عمره وتم فتره هو مقاطع فيها سيف لكنهم بيتمون ربع وابويه وايد يعز سيف بالرغم من اخطاءه..اتصالحوا ومشت امورهم عادي.. واذا انتي تشوفين الشغل يلعب دور..تراج تعرفين انه ابويه مضمر رجاب وسيف مايخصه فها السوالف.. وشركة المقاولات مال ابويه بروحه يديرها وعنده نائب..يعني جي ولا جي سيف مايخصه بتاتا بشغل ابويه..يا احلام انا فاهمنه ابوويه .. صدقيني مافكر فسيف كثر ما فكر فعموه عليا

احلام تمت ساكته .. تفكر .. عمتها ماخذه فكره عن اخوها حاليا وتعاني بسبة ها الشي..بس بيي يوم وبتعرف عليا انه راشد بالاساس وياها..

احلام: انزين .. (وقامت من مكانها..)
مروان: وين تبين..؟
احلام: بسير عند عزوه
مروان: انزين انتي مارمستي بنات عموه؟
احلام: امبلا .. قبل شوي مرمسه ميوه ..
مروان: وشحالهن؟؟
احلام: الحمدلله .. ميوه وساروه تحف لو هن متضايجات يتمن يعلقن ع كل شي ..يقولك دوم يتلاسنن ويا مرت ابوهن
مروان: ههههه ميوه ايي منها واكثر .. بس حرام ساروه ما يخصها
احلام: يالله اسكت عنها هاي السوسه .. ماتعرفها كثرنا انا وميوه.. شغلها من تحت لتحت ..

مروان سكت وماعلق ..

احلام: انزين يلا بسير .. باي
مروان: باي

وسارت احلام عند عزه بنت عمها تقضي وياها العصر.. ع الاقل تكسر روتينها اللي بدت تأقلم عمرها عليه من بعد ما روحت عنها مي وخواتها ..
..
البنات فها الوقت كانن مستانسات وايد فاليلسه ويا بنات عمتهن .. والسوالف طبعا ما تخلص .. وقبل المغرب بنص ساعه وقت ما برد الجو شويه وطلعن يتمشن فالحوي وقالن عقب بيسيرن ورا البيت صوب الند ..

لطيفه: يلا عاد احين رديتوا بيت خالي وبيوتنا قراب من بعض مب تقطعون شرات اول..
ساره: لا ان شاء بنييكم ..
مي: هيه عاده ساره مول ماتحب الطلعه والهياته..
ساره: ميووووه
ريم: وين لطوف امبونا نتراكض من بيتكم لبيتنا عادي .. الحينه الشوارع خاطه الشعبيات .. ان ظهرنا بيقولون بنت فلان وبنت علان اتحاوط
لطيفه: نحن ماني هنه الا بسياره نادر ان بنمشي
مي: ونحن مادري منو بيدوينا وبيردنا
اسما: جي والدريوليه وين
ريم: مانروم نتأمر على حد نحن .. بعدنا ماتعودنا ع جو البيت..
لطيفه: يالله يا ريم.. بيت ابوكن ها ليش ما تأمرن .. شعليكن انتن ..
ساره: لا ماعلينا ابوي.. يوم نبى الدريوليه بندقلهم .. ويوم نبى من الشغالات شي بنأمر عليهن.. جيه الا فخدمة نعوم هم
لطيفه: ههههههه هاي اللي ما ينأكل حقها موول

وهاي سوالفهن لين وصلن ورا البيت .. تمن يطالعن المكان وهن يبتسمن لبعض .. الند تغير عن قبل.. قل ارتفاعه .. لكنه الذكريات بعدها محفوره فيه..
وهناك لقن خوانهم يالسين ..
جاسم ومايد وعمار ..

ريم: ها عماار ماشالله ..
لطيفه: هيه كبروا الشباب ..
ريم: من زماان مب شايفتنه ..
مي: هو كبر مها ومهروه اظن صح!
اسما: ممم اظن بيسير اول ثنوي..
ساره: اكبر عنهن بسنه عيل..

سارن البنات صوبهم ويلسوا كلهم ويا بعض..

ريم: عمار شحاالك ؟
عمار ابتسم : بخير الحمدلله
واستحى من الموجودين وتم يسولف ويا جاسم ومايد.. والتوم شويه يسمعن للكبار وشوي للاولاد..
وبما انه الاولاد من سنهن تقريبا اندمجن فسوالفهم وقامن يسمعن الهم بس ما يرمسن بسبب وجود عمار .. سمعنهم يرمسون عن افلام كرتون دي في دي.. وعيبتهن السالفه .. وبغن يسألن اذ بيعطيهن الافلام اللي عنده وبيعطنه هن بعد اللي عندهن.. استحن ماعرفن كيف يسألنه وتمن يتناغزن وقالن لميود بصوت واطي ..
مايد: انزين قولن لـه هو ما بياكلكن
مها ترمس بصوت واطي ويا مهره: اساليه انتي مهروه
مهره: استحي انتي اساليه
مها: انا بساله بس (والتفتت لعمار) عمار
اطالعها عمار وهو مركز : منو زقرني؟
مهره تاشر على مها ومها فنفس الوقت اشرت على مهره..
عمار: تتمصخرن ..!!
مهره: لا لا.. هيه زقرتك
مها تطالع اختها بنظره: ماعليه انزين
عمار ضحك عليهن..
مها: انزين شوف ابا اسألك..
عمار:اوكي اسالي بس اول انتي منو؟..
مها: انا مهره
مهره: مهوه لاتقصين عليه
عمار يطالع مها : الحينه منو الصادقه منكن ؟
مها: اووكي انا مها..
عمار: كيف يفرقون امبينكن انتن.؟ واايد تشابهن ..
مايد دش ع الخط: مها تحت عيونها حبه خال
مهره: خيبه متى لاحظت؟
مايد: هههههههه امس
عمار: انزين ماقلتلي شو تبن؟
مها: اممم نبغي افلام..
مهره: افلام دي في دي. عندك؟؟
عمار:هيييه عندي .. تبوون؟
مهره: ممكن تيبلنا ؟
عمار: هيه عادي .. متى تبنها؟
مها: باجر ولو اليوم احسن .. بس يلا ماعليه باجر
عمار:ههههههه انزين ماعليه بشوف يا بطرشهن فليل ولا باجر
مها: يااي حلو .. شكريا شكريا
عمار ابتسم: عفوياا
وتموا يضحكون على بعض ..وفها الوقت يتهم عفرا ونوره يزقرنهن : لطيفه عموووه تباكم بتسيرون
لطيفه: انزين بني الحين ..

قامن البنات ينفضن التراب عن ثيابهن ودخلوا كلهم داخل البيت.. دخلوا على طول الصاله بس ريم ولطيفه تمن واقفات برع يكملن سالفتهن ..
البنات داخل تفاجأن بريال يالس ويا عمتهن ويدتهن وخمنن على طول انه نايف ولد عمتهن "البجر" .. تلومن منه لانهن مايعرفنه وطلعن على طول من الصاله وتراكضن فوق ..يدتهن زقرتهن بس ماسولها سالفه .. ولحقتهن اسما فوق وهيه تضحك عليهن..
اما برع مازالن لطيفه وريم يسولفن عن امورهن الشخصيه .. واللي وقف سوالفهن طلعة ها الريال من البيت .. وها المره ريم هيه اللي قفطت وردت على ورى.. ونايف انصدم بوجودهم برع .. ماعرف يتصرف ما يعرف منو هاي اللي ويا لطيفه.. عق السلام وروح ع طول .. اما ريم ردت داخل البيت.. ولطيفه واقفه مره تشوف نايف وترد تصد ع ريم ..
وردت عقب داخل البيت ولقت ريم عند الباب..
لطيفه: بلاج زغتي جنج شايفتلج يني ..
ريم: ها نااايف احيين؟
لطيفه: هيه ها نايف .. كم مره بنقولج كبروا الشباب

وضحكت لطيفه وهيه تشوف ريم اللي امبين ع شكلها انها كانت زايغه ..

ريم: بلاج تضحكين؟
لطيفه: لا ماشي ماشي ..
ريم: لطوف عاد ..
لطيفه اتطالع ريم بنظره متسائله ...
ريم: بلااااج؟
لطيفه: ليش تغيرتي يا ريم؟
ريم: كيف يعني!
لطيفه: اتعرفين انتي انا شو اقصد ..
ريم سكتت عنها .. ولفت تبى تسير فوق ..
لطيفه: ريموه .. صح ما كنا نيلس ويا بعض ولا نتشاوف .. بس تعرفين اني ارمسج بالتلفون من فتره لفتره .. واحس من صوتج انه وايد تغيرت شخصيتج
ريم لفت ع لطيفه وماقدرت اتطالع فويها ..
ريم: لطيفه .. اللي استوالنا مب شويه
لطيفه: ليش انتي بالذات تأثرتي ها الكثر خبرييني..
وعادت بريم ذكرى ذاك اليوم .. لكنها مب قادره اتركز فالموقف ..
ايد منو هااي .. وليش تبى تخنقني .. ااااه الصدااع رد ..

حست بضعف فريلها .. وحاولت تمسك باي شي حذالها .. لطيفه تفاجأتبها لما مسكت جتفها ..
لطيفه: ريييموه بلااج؟
ريم: وديني فوق لطوف.. راسي يعورني ..

صعدن البنات فوق .. بس قبل ما تدش ريم قسمهم ..

ريم: لطوف لا تقولين للبنات اللي دار امبينا..
لطيفه: قولي شو اللي خلاج بها الشكل .. شوفي ويهج كيف ذبلان ومصفر
ريم: لطييفه!!
لطيفه: اوكي خلاص..

ودخلن البنات القسم .. وريم فبالها .. ياربي شو ها الشي اللي مب لاقتله تفسير..شو ها الايد اللي دايما اشوفها تخنقني .. وشو ها الرييحه..
وراسي ردله الصداع .. ياربي انا مفتكه من ها الهواجيس من مده.. شو اللي ردها..
معقوله سؤال لطوف!!
"ليش تغيرتي يا ريم"
وصدى السؤال يتردد لمسامعها ..
انا ليش تغيرت .. الظروف غيرتني .. اللي استوالنا مب شويه ..
بس شو خص ها الرمسه فاللي استوالي توه ..

ساره: ريموه ف شو سرحانه ؟
لطيفه: مب سرحانه .. شكلها قافطه من نايف اخويه..
ريم انتبهت انهم يرمسون عنها ..
ريم: ها .. شو ؟
مي: سلامتج ..
ساره: يالله حتى نحن قفطنا .. دشينا الصاله ونحن نسولف ونضحك.. تفاجأنابه يالس ..
مي: وعاد الحق ما تلحق طلعنا من الصاله وركضنا فوق..
اسما: اشكالكن والله تضحك ..
لطيفه: يالله شو بيستوي لو دخلتن وسلمتن عادي..
مي: يالله نستحي منه ..
لطيفه: عيل عيال خوالكم عاادي تيلسون وياهم
ساره: يالله يا لطوف هاذيلاك رابين وياهم وعادي

وسكتن البنات وقت ما انفتح الباب .. واللي كان ياي التوم .. يزقرن البنات لانهم بيروحون..

تيمعوا كلهم جدام الفله يسلمون ع بعض وعقب ما روحت العمه وبناتها ردن بنات سيف فوكرهن فوق .. بس ناعمه وقفتهن..

ناعمه:امره ردن فوق .. عنبووكن يلسن شويه ويانا ..
ريم: المغرب الحين بيأذن .. بنسير نذكر ربنا بدال مجابلج
ناعمه قفطت : مب منكن انتن .. من اللي يبى يتقرب منكن ..
ودشت داخل اما البنات واقفات عند الدري ويطالعن بعض ويبتسمن..واطالعن يدتهن اللي كانت واقفه بتسير حجرتها.. توقعن منها تنازعهن بس اضحكن كلهن يوم شافن بوادر ابتسامه من قبل يدتهن ..

وعقب صلاة المغرب تيمعن فصالتهن يسولفن..وتذكرن موقفهن يوم شافن نايف ..

مي: تعرفن ماشالله غاوي الريال.. ما توقعته جي شكله ..
ريم: وين لحقتي تشوفينه وانتن تقولن تشاردتن؟
مي: لاماعليج نحن يوم شفناه وانصدمنا به انه يالس هاذيج الساعه تشاردنا.. ولا الشوفه ترانا شفناااه
ساره: ميوه انتي كنتي جدامي الله يخس عدوج ماخليتيني اركز زين
ريم: واابويييه صدق باهسااات ها الثنتين ..
مهره: اقولكم الحين نايف شكبره؟
مي: اكبر عن ريم
مها: انزين كم يعني؟
ريم: اممم اكبر عني باربع سنين..يعني اربع وعشرين عمره احين..
وبما انه ريم تدري انه خواتها مابيسكتن عن سالفتهن هاي كملت رمستها.. اقولكن ريم: قومن يلا ننزل تحت ..
ساره: وييين ريمووه .. قبل ما تبين تنزلين واليوم مادري شياج..صالحتينا ويا يدوه..
مي: لو سمحتي ساره .. اسمها .. امااايه
ريم: هههههه خس الله عدوكن .. تراها هيه الصبح رمستني .. وتفاهمت وياها .. وبيني وبينكن انا اشوف امايه تغيرت عن قبل.. ونحن بما انه هنه ع قولتها محاربين كل حد .. خلنا نكسبها فصفنا..
ساره: ايوه يا وااد انته .. بتكتك وبتخطط ونحنا ناايمين ف العسل
ريم: هههههه ساروه شو ها التخربيط
مي: لا ماعليج ساروه .. هاي ريموه العقل المدبر.. مالت علينا الا انا وانتي.. نتسرع فكل شي ولا نعرف ندبر شي .. الا نبى نتضارب ونتلاسن..
ريم: فهاي صدقتن ..
مهره: ريم احين يعني ما نتضارب ويا يدوه
مها: انتي بلاج ما تفهمين .. يقولوج نبى نكسبها فصفنا
البنات تناقعن من الضحك ع تفكير التوم ..
ريم: والله مرات احس اني فحرب ..
مي: هيه والله انزين .. نهجم ونرد هنه نخطط للهجمه الثانيه .. ها كله من ساروه
هيه اللي تحرض
ساره: هيه الخايسه رديه عليه .. تراج انتي بعد تشجعين
ريم: لا ساروه بس كلمة الحق تنقال .. انتي الدينمو تراج لها السالفه كلها
ساره: اووه
ريم: خلاص خلاص انزين .. قومن يلا ننزل ..

ونزلن البنات وسارن صوب الصاله .. اما مها ومهره سارن حجرة مايد اللي تحت .. كانت فيها تلفزيون كبير ووياه فيديو والعاب صبيانيه والبلاي ستيشن والاشرطه مازره ارفف المكتبه ..

****

عقب مارجعت مريم وعيالها البيت ..
التموا كلهم مع بعض عقب العشى.. نايف كان طايح ع الغنفه وميلس اخته الصغيره نواري ع بطنه ويلاعبها .. اسما ميلسه حذال ابوها وتغصصبه بطلباتها .. ولطوف وعمار يالسين هادين يشوفون المسلسل..

مريم وهيه تتطالع نايف: الله يرزقك يا ولدي بالحرمه والعيال ..
نايف: ها اماايه ما سمعتج ..
وتم يضحك ع نواري وهيه تسولف له .. ونص كلامها مب مفهوم ..
خلفان: ههههههه ولا فبالج ها الريال ..

وسكتت مريم بس صفقت بايدها وهيه يأسانه منه ..

وعقب ما روحوا العيال كلن ساير غرفته .. تمت مريم ويا ريلها وبنتهم الصغيره راقده ع الغنفه ..

جدمت كوب الحليب من خلفان: ما قلتلك امايه تسلم عليك..
خلفان: الله يسلمها من الشر.. سرتيلها اليوم عيل
مريم: هيه .. من ين بنات سيف ما سرت.. وقلت بودي البنات مره وحده..
خلفان : هيه زين زين .. و اخبارهم؟
مريم: يالله يا خلفان لو تشوف البنات غدن حريم ماشا الله
خلفان: ماشا الله عليهن .. احيدهن يوم يهال اوديهن واردهن ويا العيال والله عمر..
مريم: هيه ماشا الله .. محد يتم صغير .. منو يقول احين ماشا الله نايف درس برع وتغرب وردلنا بشهاده ترفع الراس..
خلفان: الحمدلله يا مريم .. البركه فيهم ان شاء الله..
مريم: الحمدلله ..
خلفان: ييها الايام تركض ونحن نكبر..
مريم: انته بس تكبر انا بعدني صغيره
خلفان: هههههه والله انتن يالحريم سالفه
مريم: هاه يوم تاخذي انته عمرك 24 وانا 15
خلفان: انزين ماقلنا شي ياحرمه انتي بعدج شباب ..
مريم: ههههه .. انزين خلفان ..
خلفان: امري..
مريم: ما يامر عليك عدو.. بس يعني .. بغيت اقولك .. ما ودك تفرح بعيالك
خلفان: يالله منو ما وده يفرح بعياله.. الحمدلله عيالي مفرحيني شو ابى من الدنيا اكثر
مريم: عاد انته فاهمني شو اقصد
خلفان: شو تقصدين.. مافهمتج
مريم: انا ارمس عن نايف
خلفان: بلاه نايف بعد
مريم: انا عاد ودي افرحبه ..
خلفان: كيف يعني
مريم: خلفان اباه يعرس واشوف عياله..
خلفان: هههههه عياله بيسوونج يده وبيكبروونج يااحرمه
مريم: خلفاااااان عاد .. خل عنك السوالف .. ارمسك انا
خلفان: انزين يامريم انتي شاوري الولد وهاتي البنت الزينه وانا بسويله احسن عرس في البلاد..
مريم: مب مشكلة البنت الحين .. ابغيك انته ترمس ولدك وتجس نبضه اذ هو باله بال عرس هاذيج الساعه بنرمس عن البنت ..
خلفان: والله مادري يا ام نايف..
مريم: رمسه يا خلفان .. انا كم مره بغيت ارمسه فالموضوع .. وانته تشوف كيف رده .. شفته بعينك مساعه ..
خلفان: يمكن ولدج ما يبى الحينه ومب مستعيل
مريم: ع كيفه هوو
خلفان: وابويه عليج .. عيل ع كيف منو..
مريم: يالله يا خلفان .. انا ودي افرحبه واباه يكمل نص دينه بالعرس ..
خلفان: يبوج من زنتج برمسه .. لكنه ان مارد مالي خص انا ..
مريم: ماعليه انته المهم تجس نبضه ..
خلفان: شايفتلج شوفه انتي ولا ما بتستعيلين جذه ..
مريم: لا شايفه ولا شي ..

ابتسمت مريم لريلها لمجرد انها فكرت انه ولدها الكبير بيعرس وبتفرح فيه..من سنه تقريبا وقت ما خلص دراسته ورد يستقر فالبلاد اقترحت عليه تخطبله بنت ييرانهم بس نايف رفض .. لأنه مب فباله العرس ولا يفكر يعرس فالوقت الراهن.. وامه من فتره لفتره تحن عليه .. تبا بس يقتنع بسالفه العرس.. وها المره بغت بس تجس النبض وتشوف رده بيتغير عن كل مره ولا ..


اما عند البنات .. فكانن لطيفه واسما يالسات يسولفن عن سيرتهن لبيت خالهن وكيف استانسن ع اللمه من يديد ..

اسما: تعرفين لطوف .. انا كله فبالي انه ريم وغده
لطيفه: حرام عليج .. وين ياها وغده
اسما: تعرفين عاد انتي مانشوفهن الا من مناسبه لمناسبه وكانت مول ماتخالط
لطيفه: ريم جيه طبعها صعب تندمج.. يعني انا ويايه تيلفونات ودنيا واحس بعدها ماتطلعلي اللي فخاطرها
اسما: مادري والله .. بس بنات خالي الباجيات من يومهن شرحات ومال سوالف..
لطيفه: حتى ريم والله .. بس الظروف هيه اللي خلتها جيه .. احس كبرت وهيه مسؤوله عشان جيه ماتلقينها خريشه شرات خواتها
اسما: العقل زيين يبوج .. هب ميوه وساروه ههههه والله انهن نكته
لطيفه: فديتهن والله ..ولا مها ومهره حسيتهن متلومات منا
اسما: خليهن هاذيل مستانسات على عماار
لطيفه: حتى هوه انزين .. الا من يا وهو طرشوا ها للتوم .. وبراوي ها للتوم ..
اسما:ههههههههههه حليله ..

وها الحال كان من بعد ذاك اليوم عند مريم وعيالها .. الكل حاس بتغيير فها اليوم
يمكن تواجد البنات وياهم خلاهن يستانسون اكثر مب مثل يياتهم قبل اللي يلسون فيها ساعه ساعتين ويروحون..

****

رد: قـــلـــوب تـــحـــت الـــمــجـــهــــر**
 

فليل بعد ماخلصوا البنات عشاهم .. و يلسن في قسمهن كالعاده يشوفن التلفزيون .. يلست ناعمه في جناحها ملانه عقب مارقد عنها سيف ..
كانت يالسه ببجامتها البيج على كرسي صالتها الفستقيه تجلب في التلفزيون ..
ومب محصله شي حلو اتابعه..
قامت دخلت غرفة عفرا بنتها و حصلتها تتجلب على السرير
وقفت عند الباب: عفروه انتي راقده ؟
عفرا: لا بس احين برقد
ناعمه: انزين تصبحين على خير
عفرا: وانتي من اهله ..

سكرت باب الغرفه و سارت غرفه مايد .. لكن ماحصلته في فراشه ..

"اكيد مييلس عند خواته .. مادري شو اسوي من الملل .. بسير بطالعهن شو يسون"
وترددت للحظه ..
"يلا بسير وبشوفهم .. ولدي عندهن بسير اشوف كيف يعاملنه .. اخافهن قاصات عليه ويتأمرن عليه .. بصيدهن شو يسون وبخبر عليهن ابوهن"

طلعت من قسمها وسارت قسم البنات .. حصلتهن يالسات على الارض يلعبن .. مها ومهره ومي وساره .. يلعبن ورقه .. اما ريم طايحه اتابع برنامج و مايد و جاسم يلعبون بلاي ستيشن ومستانسين ع بعض..

ناعمه: السلام عليكم
البنات: وعليكم السلام
ناعمه اتجدمت وتمت واقفه: شو تسون ؟
ساره: شو تشوفين .. لفي بعيونج فالصاله وبتعرفين كل حد شو يسوي..

ريم تمت تتطالع ناعمه ومستغربه من ها الزياره المفاجأه ..

ناعمه: ميوود .. شوو تسوي ؟
مايد: ها اميه .. العب ويا جسوم بعد شو تشوفيني اسوي
ناعمه رافعه حاجب وتتطالع ولدها: قمت تعلي صوتك بعد
مي: يالله هو شو قال ثره ..
ناعمه: بس بس سكتن انتن .. ما وراكن الا الخراب.. قوم يلا ميود ويايه
مايد: ماابا .. مب يايني رقاد .. بلعب ويا جسوم لين يرقد
ريم: انزين خليه شو تبينه
ناعمه: اباه ييلس ويايه .. من ييتن وهو مول ما ينشاف .. كله زابن عندكن
ساره: عدااال عاد اللي يسمع يقول اربعه وعشرين ساعه ميلسه وياه كنتي
ناعمه تمت تعض ع شفايفها مب عارفه ترد .. وتلعثمت ..

مها: انتي مب ياينج رقاد ويايه تضاربين ويانا..
مهره: سيري وعي بنتج وتضاربي وياها
ساره: لا شكلها هيه مب ياينها رقاد وقالت بتمر علينا ..
مي: هههههه ملانه عيل
ناعمه: بس عااد ..
ريم: عيل يلسي وشوفي البنات وهن يلعبن دامج ملانه ..
ناعمه: شو يلعبن؟
مي: نلعب حكم
ناعمه: شو ها اللعبه بعد؟!
مي: اا.. اقول ما بتلعبين ويانا ؟؟
البنات كلهم التفتوا لمي .. بس هي ابتسمت ابتسامه غيرت نظرتهم لها
ساره: هيه هيه تعالي العبي ويانا.. والله فن اللعبه
ناعمه وهيه متردده: انا ماعرف العبها .. لعبن انتن انا بشوفكن مابا العب..
مها: الله يخليج لعبي وياانا.. بنستانس ويااج.. نحن بنعلمج..
مهره: هييه يلاا يلسي لعبي
ناعمه: لا لا شو العب ويا يهال .. مابا
ساره: ذليتي بو خامسنا تراج .. عطيناج ويه
مي تقرص ساره تباها تسكت: تعااالي لاه
ناعمه وهيه تبتسم بخقه: ياللله حشرتووني .. انزين يلا بلعب وياكم.. دوور واحد بس تفهمون..
مي تضحك ضحكه خبيثه وتطالع ساروه وتغمزلها.. يلست ناعمه مستانسه بتلعب وياهم .. وهي متحمسه و البنات يتظاحكن و يتغامزن .. علموها اللعبه وفهموها العكس ..و بدوا يلعبون .. وريم ودرت التلفزيون ويلست تراقبهم ..

ساره: خلصت اللعبه
مي: الجوكر عندج؟؟
ناعمه: هيه عندي
مها: يعني انتي خسرتي ؟
ناعمه: كيف جيه
ساره: قلنالج اللي يتم عنده الجوكر هو الخسران
ناعمه: اوووف انزين انعيدها من اول
ريم: لا شو يعيدونها خلاص الحكم عليج انتي
ناعمه: يعني انا احكم..صح!
مهره: اندوكم شو تحكمين .. مدام الجوكر عندج نحن اللي نحكم عليج
ناعمه: لا لا انتوا قلتوا فالبدايه غير
ساره: لا ماقلنا غير .. عنبو نحن اربع انتي الا وحده..نعرف شو قلنالج
ناعمه: بس انا متأكده فهمتوني شي ثاني
مي: رووحي لاه.. نظفي اذنج اوول..
ساره: لا ماشي خلاص الحكم عليج .. وبتنفذينه جنج حرمه
ناعمه: غصبن عنج
مي: انزين المهم تنفذينه
ناعمه حاست بوزها : انزين شو حكمكم ..؟؟
ريم: لازم نتشاور قبل ..
تيمعن البنات حذال بعض ويلسن يتصاصرن .. وعقب ماخلصوا التفتوا لناعمه اللي اطالعهن وهيه مول مب متأمله خير من وراهن ..
مي: حكمنااااا هوو
مها: استعدي للحكم ..
مهره: ماشي احلى عنه
ناعمه: افف قولن خلصني .. اللي ما بيتوتر منكن انتن بيتوتر وبينجلط بعد
ريم: والخيبه ..
ناعمه: هيه عيل شو..
ساره: اوكي اوكي سمعي الحكم ..الحكم هو انج تودينا السينما..
ناعمه: شووووووووو سينما .. لا لا مايستوي..
مي: شو مايستوي امايه محد قالج تلعبين .. بتنفذين الحكم غصبن عنج
ساره: و بعدين لو وحده منا اللي خسرت بتنفذ أي امر ونحن من قبل قايليلج ها الشي..
ناعمه: اطلبوا أي شي الا السينما.. شو تبن ابوكن يذبحنا
ساره: نحن ماااااايخصنا.. سينما يعني سينما..
مي: نفذي احسلج ولا بنضطر انا نغير الحكم لحكم اقوى منه
ناعمه حاست بوزها وهيه متندمه انها لعبت وياهن: انزين بشوف
ريم:لا ماتشوفين.. نبى الاعتماد من الحين.
ناعمه: اف حشرتوني .. انا اللي قاله عليه المونه يالسه العب ويا يهال
وقامت من مكانها ووصلت عند باب القسم..
ناعمه: بطالع ابوكن وبقوله اني بحوطكن بس مابقوله السينما.. واياني واياكم وحده منكن تطريله شي والله لخليه يحرم عليكن الطلعه..
مي وساره يطالعن بعض ويحسن بالتوتر..
ريم: اخبرج انتي اتصرفي مايهمنا لا ابويه ولاغيره ومابنطري السالفه لحد .. المهم نحن نلبس ونركب ونسير مايخصنا..
ناعمه: انزين انزين والله انكم قصيتوا عليه بس ماعليه .. انا بتصرف .. يالله احين بسير برقد ..
البنات: تصبحين على خير
وطلعت ناعمه وهيه تتحرطم : أي خير بيي من وراكم ..
ومن اطلعت ناعمه .. تعالت ظحكات البنات ..
ساره: صدق انها عجييييييبه.. لا وينقص عليها..
مي: هيه والله
ريم: يالله عاد بنشوفها احين شقى بتودينا.. مسويه عمرها شي (وتقلدها) والله لخليه يحرم عليكن الطلعه.. مالت عليها..
مها: ابويه يمكن مايطيع يخليها تحوطنا
مهره: هاي ابويه ما يرفضلها شي

وتمن البنات يخططن للسيره وعايبتنهن السالفه ..وشوي تناقزوا مايد وجاسم عقب ماسمعوا تخطيطات لسيره وطلعه ..

****

مديه واحلام اللي كانن ثنتيناتهن طايحات على اسرتهم ويتابعون فيلم .. دخلت عليهم امهم وافتحت النور .. وتقربت من اسرتهم ..
مديه: ايييي اميه ليش فتحتي النور ؟
عبير: ابي اكلمكم .. سكروا هذا اللي تشوفونه
احلام: اميه هذا في التلفزيون مب فيديو .. مانقدر نسكره ..
عبير: انزين وطوا على الصوت ابي اقولكم شي
مديه: انزين امييييه عقب

عبير قامت من مكانها وراحت بندت التلفزيون وهي واقفه جدامه: الاحترام حلوو

مديه التفتت لاحلام وكذلك احلام وهن متلومات من امهن
احلام: اسفين ..
عبير: ما يخاالف ..
يلست عبير على طرف طاوله الكمبيوتر وبدت ترمس : خالتكم فجر بتي تعيش عندنا ..
احلام: شوووووه ؟ شو اييبها هاي
عبير: احلام احترمي شوي اذا مابتحترمينها لانها خالتج احترميها لانها اختي ممكن ؟!
احلام صخت ..
عبير: فجر بتدرس في امريكية الشارجه وبتقعد بسكن الجامعه اهناك .. يعني بس نهايه الاسبوع بتيي ..
مديه: انزين بنات عموه بيون من بيت ابوهم اخر الاسبوع وين شي مكان بعد حقها
عبير: مدووي
احلام: انزين صدق اميه .. وين تسكن .. أي حجره.. هيه بتستحي تكون فقسمنا لانه مسكر واصلا مافيه غير حجرنا والصاله.. والصوب الثاني ماشي غير ثلاث حجر..
عبير: ماعليه.. هيه كل اغراضها بتكون فالسكن وبتي ليلتين الا هنه .. بتكون ويا ساره ومي فالغرفه..
احلام: و مها ومهره؟؟
عبير: الغرفه فيها سريرين بو طابقين .. مو مشكله تدبر و لا تعقدون بالامور.. هيه فالاجازات بترد الكويت ..
احلام: ها ان ارتاحت وما تذمرت كعادتها
عبير: احلام ومديه ..كل اللي ابيه منكم انكم تحترمونها وتعاملونها زين مابي مشاكل وظرايب بينكم
احلام: اصلا فجر هي اللي ماتواطنا ودومها شايفه عمرها علينا ماجنا بنات اختها
مديه: هيه صح .. عشان جيه كل ماتسيرين انتي الكويت نحن مانحب انسير وياج
عبير: وليش ماتواطنكم بالله ؟ شنو مسويات لها انتوا ؟ لاتقعدون تتوهمون انها ماتحبكم .. اهي تحبكم بس انتوا ماتتقربون منها .. المهم مابي كلام زايد .. ابيكم تحترمون وجودها ومب من تيي تخلونها وتروحون لبنات عمتكم .. قعدوا معاها وونسوها ..
احلام بصوت واطي: هذا اذا هي قعدت ويانا ..
عبير: المهم .. الرمسه مابيها تظهر .. لان ها للحين مو أكيده ..
احلام: يعني في احتمال انها ما اتي؟
عبير: قالت بتتصل وبتأكد ييتها ..يالله بروح انام تبون شي؟
مديه: ابويه وين ؟!
عبير: ابوكم نايم .. تصبحون على خير
البنات: وانتي من اهله

سكرت عبير النور وطلعت من الغرفه وهي تحس بقلبها مقبوض .. مب مرتاحه من موضوع فجر ودراستها عندها .. تحسه موضوع صعب خصوصا مع فجر الدلوعه وعدم تقبل بناتها فكرة انه فجر اتي هنه وتعيش وياهم .. فجر مزاجها صعب وماتحب تتعامل ويا اللي اصغر عنها .. تشوف عمرها اكبر بوايد .. وها اللي يخلي البنات يطفرن منها ..
محد يعرف بيية فجر اللي أكدت لاختها عبير انها خلاص ما تقدر تكمل فالكويت وبتي الامارات .. محمد على علم بكل الموضوع والحين خبرت بناتها ... ما باقي غير عمها وعمتها .. وبعدين الكل بيدري ..
بانتظار رايكم اكيد..

*****************
(الأربعا) 7 يوليو 2004
*****************

" يالله يابناااااااات بســـــــرعه تاخرناااا "

كانت ناعمه واقفه عند باب قسم البنات وتزقر عليهن .. ظهرتلها ريم .. ولحقنها البنات..

ريم: هاه هاه يينا
ناعمه: يالله بسرعه ماشي وقت.. يدوبنا نرد قبل المغرب..
ساره: انزييييييين عنبوه مب سيره هاي من اولها اكلة فواد

نزلوا البنات من الدري و هن كاشخات .. و لحقوا ناعمه للسياره ..
ناعمه قالت لزوجها انها بتسير وياهم الشارجه .. يغيرون جوو .. وطبعا سيف ماعارض ورحب بالفكره ..
ركبت ناعمه سيارتها اللكزس فورويل .. و ركبت ساره جدام وعلى طول شغلت الاف ام وارتبشوا كل اللي وياها ..
وصلوا الشارجه قريب الظهر و نزلوا فصحارى و ساروا صوب السينما .. ناعمه كانت تمشي قبلهم .. لابسه عباتها المفتوحه و الشيله محطوطه على راسها والتحجيبه كشفه .. وطبعا محطيه فل ميكب .. والبنات وراها ..
ساره وهي تحاول توازي ناعمه في المشي
ساره: اقولج انتي وين تبين طايره؟؟
ناعمه: لاتمشون حذالي
ساره: عيل نمشي وراج .. جنج بطه وعيالها ..
ناعمه: ماتشوفون انتوا شكثر .. 8 جنكم طلاب مدرسه
ساره: بسم الله من عيونج بتاكلينا ..
ناعمه: ساروه كفي شرج خليني افتك من حكمج هذا وهاي آخر مره العب وياكم هاللعبه السخيفه
ساره: انزين انزين فكينا ..
كملت ناعمه مشي ومشن البنات وراها .. وقصوا تذاكر السينما ودخلوا كلهم ..

مايد: ماشوف شي بطييح
جاسم بدى يصارخ: وينه هذا بابو شغل الليت
ناعمه وهي راصه على اسنانها: سكتن اخووووكن
ريم: جاسم حبيبي اسكت
جاسم: اووف يعني اطيح
ساره: جسوم حبيبي مابطيح اسكت
سمعوا تهامس الحضور وشوشه تنبهم على الحفاظ ع السكوت والهدوء
ناعمه: فظحتونا اسكتوا تعالوا ورايه نيلس اخر شي
مشن البنات ورا ناعمه وكانت عفرا تمشي جدام جاسم ..
مد جاسم ايده ونشعها من راسها
عفرا: اييييييي
ريم: جاسم بلاك
جاسم: تدلع يوم تمشي بتعقني
عفرا: يعل ايدك الكسر ياحمار
ناعمه يرت عفرا جدامها: اسكتي الله ياخذج فظحتونا
مها: ايدج انتي ان شا الله ..

واخيرا يلسوا عقب ماعفسوا المكان .. واستقروا في آخر سطر ..
طبعا الفيلم كان اكشن و جاسم طول الوقت واقف على الكرسي ويصفق
وناعمه من الفشله خازت عنهم وغيرت مكانها ...

مي: ريمان يلسي جسوم
ريم: شو اسويبه خليه مرتبش
مي: نعمة الله سارت بعيد اونها متلومه منا
ساره: مالت عليها .. المهم نحن اللي بغيناه سويناه ..
مي: هيه والله ..

بعد ماخلصوا من الفيلم .. طلعوا ع طول البيت عشان يوصلون قبل المغرب
طبعا طول الدرب جاسم ومايد مسوين حزب ويتحرشون بعفرا اللي ع كل وقت صرخت

ناعمه: بس اسكتوا راسي دار منكم
ساره: مابجى شي ونوصل خلاص
جاسم: بنااااات يالله غنوا .. دريولنا عاش عاش .. دريولنا طيط طيط
ظحكوا البنات وقاموا يغنون وياه ومايد وعفرا وياهم بعد ..

ناعمه انقهرت ووقفت السياره : والله اذا ماسكتوا بتشوفون
ساره: انزين سوقي سوقي عن تتاخرين وابويه يهزبج تراه بطايق السينما عندي وابويه مايدري نحن وين سايرين ..
ريم ترمس خواتها: بنات .. ترا اميه بتطرش الدريول عقب المغرب.. كونن جاهزات
ساره لفت ع ورا : متى رمستيها؟
ريم: يوم انتوا محتشرين
ناعمه: هيه وسمعتوها التطنيز عليه .. ادريبكن انتن تبى امكن تضحك عليه..
ريم: منو اتطنز عليج ثره ..
وابتسمت ع الخفيف ..
مي: انزين ابويه يدري؟
ريم: نحن مايخصنا .. قايليله انه فالويكند بنسير عند اميه
ناعمه ابتسمت بخبث: بس انا اروم اقنعه ما يخليكن تسيرن
ساره تتطالعها بنظره: ونحن نروم نراويه البطايق اللي فايدي
ناعمه: ويعني .. اقدر اقوله انكن انتن اللي لزمتن ..
مايد تم يصاصر ريم : اميه بسرعه تقنع ابويه .. لا تمون تغايضونها..
ريم: ناعمه.. بنعطيج بطايق السينما .. بس اكرمينا بسكوتج وطبي ها الحلج..
ناعمه: يالله هاتوهن ..
وفرتهن ساره عليها وهيه منقهره منها .. ولفت ع جسوم ..
ساره: يالله جسوم.. عليه .. دريولنا ...
ويلس جسوم يكمل الاغنيه وكلهم ميتين من الظحك .. وساره تتطالع حرمت ابوها بنص عين وتضحك ..

وصلوا البيت ووقفت ناعمه سيارتها ونزلوا العيال وطبعا هي قفلتها ودخلت معصبه
ام سيف: يالله شو ها الهياته لين احين ..
ساره: هاي ناعمه الله يهديها نقولها بنرد امايه بروحها في البيت وتقول لا لا بعده فيه وقت
ناعمه هنيه طنجرت اكثر .. وساره ضحكت من خاطرها وركضت فوق ..
ام سيف: ناعمه بلاج ؟
ناعمه:بلاااني.. الله بلاني بعيال ولدج ..
وصعدت غرفتها معصبه ..
ام سيف: ويدييه شو مسويات بها ؟
مها: ماسوينا شي امايه ..
مي: اماايه حرمت ولدج يوم تبى بتضحك ويوم تبى بتعصب
ام سيف: ميووه بس عن ها اللسان ..
مي حاست بوزها وسكتت ..
ريم: امايه ترانا عقب المغرب بنسير
ام سيف: وين بعد بتسيرون عقب هياتة اليوم..
ريم: بنسير عند امايه..
ام سيف: هييه .. انزين ما يلسنا وياكن اليوم ..
ريم اطالعت خواتها مستغربه شوي ..
ريم: بنرد انزين الجمعه فليل ..
ام سيف: لين يوم الجمعه ..
ساره: هيه عيل ان شاء الله يوم ونرد.. نبى نتم يومين ع الاقل
ام سيف: انزين .. ع هواكن ..
ريم: امايه انتي خبري ابويه انزين
ام سيف: وليش انتن ما تقولن له؟
ريم: قايليه قبل يومين انه بنسير.. بس انتي اليوم أكدي عليه..
ام سيف: زين .. توكلن ..
وسارن البنات فوق .. بس وقفهن حس ام سيف ..
ام سيف: مهووه مساعه عمار يا ويابلكن قوطي يقول فيه اشرطه
مها : هيييييه وينه ؟
ام سيف: اهناك محطاي فوق المكتبه ..
مهره: ميوب بس حق مهوه يعني
ام سيف: انا مادري .. هو قال عطيه مهوه..
مهره: لا قال التوم..
ام سيف : ما عندي حياد جان قال التوم ولا مهوه
مها: انتي ليش متغايضه .. هههههه
ام سيف: هي هي صدقها مهره .. هو قال عطوه التوم
مهره: هاا ما قلت .. لانه هو من امس ما يزقرنا غير التوم ..

وتراكضن مها ومهره يشوفن شو من الافلام يابلهن ولحقن خواتهن فوق..اما ريم وكل حد عقب قام يرتب اغراض يكفن ليومين بيقضونها فبيت امهم ..

وعقب المغرب سلمن البنات على يدتهن .. ومايد كان يطالعهم وهو متضايج يت نجمه "رئيسة الخدم" ع قولة البنات وساعدت البنات في شل الاغراض ومايد وياهم بعد.. ويوم ياهم الدريول رد مايد ع طول داخل البيت وهو مستغبن ..البنات تمن يحاتنه ويحاتن يدتهن ..بس يوم ركبن السياره وشافن دريول خالهن استانسن وقامن ياخذن اخباره واخبار شعبيتهم هناك..وسارن بيت ابو راشد وكل وحده منهم متحمسه ومستاانسه انها بتشوفهم مره ثانيه ..

يوم دخلن البيت لقن امهن يالسه ع دري البيت تترياهن .. ونزلن من السياره ع طول عند امهن كل وحده تسلم ع امها وتحضنها من كثر الوله ..
ودخلن داخل وشافوا ام راشد وبو راشد يالسين فالصاله وسلموا عليهم .. تموا مستانسين ع السوالف ..

وعليا تتطالع بناتها وهن يالسات دور ماداير عليها .. كانت مستانسه وايد انهن بيباتن عندها ها اليومين .. وبدن البنات يحكن لامهن خراريفهن طيلة ها الاسبوع والام واليده يضحكن اكثر شي على سوالف جسووم ..
ودخلن ها الوقت احلام ومديه اللي من برع وهن يسمعن الربشه فالبيت وتراكضن يسلمن على بنات عمتهن .. ودخل عقب محمد وحرمته اللي كانوا سايرين الجمعيه ياخذون اغراض للبيت.. وارتبشن والصريخ شل المكان .. احلام من كثر الفرحه دمعت عيونها وقابضه ميوه قبضه ..الكل استانس على يية بنات عليا وتموا سوالف لين كل حد من الكبار سار يرقد ..

عليا: ريم حبيبتي يوم بتدخلين الحجره بشوي شوي .. انا بسير ارقد ..
ريم: ان شاء الله اميه .. بيي عقب شويه انا لانه واعين من وقت اليوم..
عليا: زين عيل .. وهاتي جاسم وياج ..
ريم: ان شاء الله ..


قامت ريم ويا امها .. وفالحجره ..
ريم: اميه ابا اخبرج شي؟
عليا: ها الغاليه .. شو فيج؟
ريم: الصداع ردلي اول امس
عليا اطالعت ريم وقبضتها من ايدها ويلست وياها ع السرير ..
ريم: اميه شو الحل ..
عليا: تم وايد يعورج راسج؟
ريم: لا .. ضربتني دوره وتم يعورني .. خذتلي الدوا وخف شوي
عليا: الله يعينج يا بنتي
ريم: اميه شو ها التخيلات اللي اتيني .. مالها تفسير غير انه فيني حاله نفسيه
عليا: بسم الله عليج شو مينونه .. غناتي ها صداع الا
ريم: اميه دايما اتخيل ها الايد تخنقني ..
وكملت ريم رمستها وهيه كلها يأس ..
ريم: اميه ملييت والله مليت من فتره لفتره اتخيل ها الايد وهيه تخنقني .. يعني شي كان مستولي وانا ياهل !
عليا بطلت بعيونها ولفت الصوب الثاني بسرعه .. تلعثمت .. وردت ع ريم
عليا: حبيبتي .. هاي حالة خوف يمكن .. انتي كبرتي وانتي تخافين من ابوج خاصه والرياييل عامه .. عشان جي
ريم: امايه احين انا اخف عن قبل.. تربيتي ويا عيال خالي وخالوه .. خلاني اخف شويه .. كنت قبل ما اشوف غير ابويه وتصرفاته .. اما عقب شفت بعيوني كيف خالي محمد .. كبرت فبيئه الناس فيها كلهم ويا بعض .. بس بعدها التخيلات اتيني اذ اتسببتلها
عليا: كيف تسببيلها؟
ريم: ماعرف .. يوم اتذكر شي معين عن قبل .. اتيني ها التخيلات .. اميه ابا اعرف شو استوالي ؟
عليا بتردد: ماشي يا ريم .. بس ها يمكن من اللي مرينا فيه قبل .. يعني انتي اكثر وحده شافت اللي استوا ..
ريم: حتى ساروه وميوه .. اعمارنا متقاربه
عليا: يوم تطلقت كنتي انتي ام سبع سنين
ريم: وساروه ست سنين وميوه خمس
عليا: بس ما يذكرن كثرج .. وغير ها شخصياتكن تختلف..
سكتت ريم .. وتمت تطالع امها عليا تشوف الجواب فعيونها ..
بس عليا تجاهلت ريم .. وطاحت ع الشبريه عشان ترقد ..
اما ريم يلست تفكر فاللي انقال توه .. ضمت ريولها باديها وحطت راسها ع ركبها .. ومن غير سابق انذار دمعت عينها .. وتمت فتره ع ها الوضعيه ..

عليا: رييم بعدج يالسه فمكانج .. تعالي رقدي
ريم: ان شاء الله
وقامت ريم من مكانها ودخلت الحمام تغسل ويها .. وعليا تتطالعها وتحس بوخزه فقلبها .. غامظنها حال بنتها .. ولكن دايما تصبر عمرها وتقول بتنسى ويا الايام


أنتظرووني قريب أن شاء الله



جودي

رد: قـــلـــوب تـــحـــت الـــمــجـــهــــر**
 

كتير روعه تقبلي لامرور

رد: قـــلـــوب تـــحـــت الـــمــجـــهــــر**
 

مساء الورد جميعا

أحلا البنات

نورتي ياقلبي

راح نكمل الروايه




*****************
(الخميس) 8 يوليو 2004
*****************

فجر ها اليوم .. البناات كلهن كانن متيمعات فحجرة مي وساروه بالاضافه للتوم..
وعلى سوالفهن هاذي ما حسن بالوقت موول..و اذن الفير وقامن يتيددن ..

مي: اوووه الحينه عااد ازمة الحمام ..
احلام: هههههههههه والله ايام تذكرين ميوه .. دومج يوم تبين تسبحين يخلونج اخر وحده وتين بثيابج وتتسبحين عندنا
مي: هههههههه مزحومين كنا هنه.. بس والله كانت ايااام حلوه
ساره: انا بقوم اتيدد .. مهوه لادشين الحمااام انا قبلج ايييه
ربعت ساره بس مها سبقتها وتمت ادز الباب لين دشت
مها: ساااروه انا قبلج
ساره: ابا اتيدد نوودانه حرام عليج برقد

وثنتيناتهن تمن ع المغسله يتيددن وطلعن وهن يضحكن على عمارهن ..
وعقب ما صلن البنات.. تأزمن الحينه فالرقده وهن يبن كلهن يرقدن فحجره وحده..
احلام: ميوه برقد وياج ع الشبريه.. ومدوي ويا ساروه.. ومهوه ومهروه رواحهن مافينا نركب فوق وننجلب فالليل
البنات: ههههه
مديه: اوووكي خلنا نرقد والله عيووني تسكر بروحها

وطاحن البنات ع شباريهن..كانت ها الغرفه فيها سريرين بو طابقين .. لان الحجره مب واسعه وايد ويدوبها تكفي .. ويوم كبرن التوم بغن يرقدن ويا خواتهن وردت ريم ترقد عند امها ..

ساره تذكرت شي ونقزت من الشبريه
ساره: احلام احلام احلام
احلام: بسم الله بلااج
ساره: انزين احلام احلام ..
احلام فرت المخده على ساره
احلام: ياربي منج .. اذيه .. (وترمس مي) بعدها تزاقر جيه هيه
مي: هههههه دومها جيه.. يالله يا احلام بعدنا ماكملنا اسبوع نحن من ودرناكم .. ماوحالها اطباعنا تتبدل
ساره: احلام
احلام: بس دخيلج لاتكملين .. ها شو تبين؟
ساره: هيهيهي نسيت اقولج.. حفظت اغنيه حلوه . اغنيلج اياها؟
مي: متفييييييييييجه ساااروه توج مصليه الفير.. رقدي يعل بليسج السم
ساره: افف.. انزين ذكريني اسمعج اياها باجر
تمن البنات كلهن يضحكن ع ساروه ..وشويه خفت الضحكات ورقدن البنات.. بس مي تمت تجلب ومب ياينها رقاد..

مي: حلامي رقدتي
احلام صوتها من تحت اللحاف: بعدني
مي: مب ياييني رقاد
احلام: ولا انا.. (وبطلت اللحاف ويلست اما مي فكانت متلحفه ومتسانده ع الشبريه..) تعرفين من وناستيه مب قادره ارقد
مي اطالعت احلام وهيه تبتسم..
احلام: الحينه بتي الساعه ست..
مي اطالعت الدريشه..: وييه الدنيا نورت .. حلامي العصافير نشن .. ااه يحظهن رقدن وشبعن ونشن.. مب نحن مواصلين لين احين
احلام: ههههههههه ... والله انج حاله
مي: اخبرج قومي نسويلنا حلييب ..
احلام: اووكي يلا
وطلعن مي واحلام من الحجره.. وسارن صوب المطبخ اللي يكون فالملحق..
احلام دخلت المطبخ بس مي التفتت لبيت خالها مانع .
دخلت مي الصاله .. كان المكان كله عفسه .. ضحكت على حال العزوبيه.. ودشت حجرته بعد لقتها لووث.. طلعت من البيت وسارت عند احلام..
مي: اقول احلام.. خالي مانع وين؟ مب موجود
احلام: تلقينه طالع من الفير
مي: اكيد ساير العزبه
احلام: شي اكيد .. تلقين عندهم ركض ولا شي..
مي: انزين ماخلصتي.. بناخذ الحليب وبنسير بيت مانع انرتبه وانظفه.. والله صدق الصاله والحجره مايتشااهدن من كثر اللوث
احلام: مادري شو يسوون ها العزوبيين .. البيت يوميا يتنظف والله البشكاره تعبت حليلها
مي: انزين يلا سرنا نحن
احلام : يلا
مي: انا ماعرف ليش ها الريال مضرب عن العرس.. اللي كبره عرسوا ويابوا ولدين ثلاث ..
احلام: ها مب مال التزامات وحرمه وبيت .. وبعدين انتي ناسيه انه من عقب المرحومه مديه مايبى حد
مي: حلييله خالي.. بس بعد الواحد مايعيش اسير الماضي
احلام: ها مايسمونه اسر ها وفاااء
مي: حليلك انته يا بو الوفاء..
احلام: ههه عيل شو عبالج ..
مي: بس تصدقين ها الحب ولا بلاش.. مب جيلنا نحن .. محد يحس بالطرف الثاني
احلام اطالعت مي اللي كانت تنظف الطاوله بالفوطه..
مي كملت: انا لو كنت مكان مديه فهاذيج الأيام احس صدق بستانس انه شخص يحبني ويرخص الغالي عشاني..
التفت مي لاحلام اللي كانت واقفه مسمره فمكانها واطالع مي ..
مي: اييي بلااج
احلام: هذا الكلام كبير يا ميووه
مي: اي كلام!
احلام: اللي اسمعه منج
مي: وشو يعني
احلام:هههههههههه مغروررومه يا بنت
مي سكتت واطالعت احلام بسخريه واتبعت نظراتها ضحكات سخريه وفرت احلام بالمخده .. وقامن يتفاررن هن الثنتين ويضحكن وعفسن الصاله من اول ويديد.
احلام: ههههه خلاص اسحب كلامي .. المغرومه يبوج ما بتسوي سواياج هاي
مي: هههههههه احسن .. ولا انا شلي فالحب .. قلتلج جيلنا ها ما يسااعد.. ويوم قلتلج محد يحس بالطرف الثاني تراني ما جذبت ويوم بيحسون بخبرج
احلام: اووهو انتي ماعرفنالج .. بس والله يا ميوه ان عرفت اخر الناس عن قصة ساندريلا بتنظربين
مي:ههههه وليش ساندريلا
احلام: تراها كانت تحب الامير من غير مايعرف..وهو يحبها من غير ماتعرف بعد ههههه
مي:هههههههه ع كيفج .. انا احيدهم حبوا بعض من يوم الحفله
احلام: لااا انا اقصد المسلسل مب الفيلم..كانت دوم ساندريلا ويا ريتشارد اونهم ربع قاصين على عمارهم وهم اصلا يحبون بعض ههههههه
مي: والله انج انتي .. صدق عبط ..

ورتبن البنات الصاله وعدلنها وعفدن عقب ع الحجره وخلنها تلامع.. دورن ورقه وقلم وكتبله ورقه وحطنها ع الطاوله فالصاله وعقب ردن البيت ويلسن ع الشبريه ..
احلام: صح ميوه ماخبرتج
مي: شوو
احلام: بقولج بس لاتخبرين حد ..
مي: شو انزين
احلام: فجر..بتي هنه
مي: فجر!!
احلام: هيه خالتي فجر .. بتي تدرس هنه ..
مي: اخيرا بشوفها ها الفجر
احلام: انا متضايجه.. ما برتاح وياها.. صح بتكون فسكن لكن الويكند عندنا بتكون مي: أي جامعه؟؟؟
احلام: امريكية الشارجه
مي: قو الصراحه .. عادي بيخلونها؟
احلام: ميوه عاادي ترا هناك تدرس فجامعة مختلطه..وانا لو بغيت اسير الامريكيه ابويه ما بيعارض بس انا مابا
مي: ههههه ابوج فديته فااهم.. لكن القياده العليا اللي فوقه.. ابويه سلطان وخالي راشد.. حتى ماانع صااك علينا شوي..
احلام: ماعليه منهم كلهم.. فديت ابوويه والله .. بس تعرفين واايد افكر في سالفة فجر..
مي: ماعليج حلاامي لاتاخذين الامور بحساسيه انتي ..
احلام: انتي بروحج بتشوفين كيف هي
مي: من رمستج عنها متخيله الوضع.. لكن ماعليج.. العشره تغير الناس.. انتوا قبل ما تشوفونها ولا تخالطونها وايد.. بس دامها بتي هنه .. وايد بتكون وياكم
احلام: الله يعيين.. لا تخبرين حد انتي.. امسات اميه خبرتنا عن ها السالفه..يوم ييتن نسيت المحاتاه والحين تذكرت
مي: ماعليج انتي..وفالويكيند نحن وياج بنكون .. لاتحاتين
احلام اطالعت مي وابتسملتها .. وسولفن شوي لين رقدن..

والظهر البنات كلهن نشن يصلن .. الا مي واحلام اللي تمن مرقدات..
نطتلهن ساروه وقامت توعيهن..
ساره: ميوووه قوومي.. حلااااامي..قومن يلا عن اييكن ملك الموت الحينه ويقبض رواحكن وانتن مب مصلياات..قووومن يلاا
مي تتأفف بضجر وتحط اللحاف على ويها واحلام تحط المخده عليها .
ساره: قووومن ايييه .. قومن عن اييكن ملك المووووت
مي: يعل ملك المووت ياخذج .. قوومي جذه عنا.. افف
ساره: ميوه قومي.. يلا حلامي ...
مي: خوووزي عنا يعلج..
ساره: يلا قومن .. الكل يالس برع ..
احلام: منو الكل بعد ..
ساره: الكل.. العايله الكريمه كلها متيمعه
مي ابتسمت وهيه فبالها شخص: وو.. مروان برع!
ساره سكتت.. واطالعت مي وهيه رافعه حاجب..
احلام: ميوه بلاج انتي يقولون الكل برع.. يعني عيال خالج كلهم وعيال خالوه كلهم عدااا الهايت سلطون ..
ساره: ههههههه معروف ها الشي ..بيتغدون كلهم اليوم هنه
مي: اليوم الخميس.. !! مب الجمعه ..
ساره: يقولج ابويه ذابح بمناسبه ييتنا ههههه تقولين كنا مسافرين
احلام: ابويه سلطان ذابح؟
مي: عيل منو ابونا هنه نحن ..
احلام: انزييين نسييت ..
ساره: قومن يلا انزين ..قوومن والله وناسه برع..
احلام: انزين بنقوم نصلي قوومي عنا باركه علينا ..
ساره: اوكي انا بسير وان ييت مره ثانيه وما قمتن بخبر عليكن امايه
مي: انزين يلا طلعي..

ساره من طلعت ردت تيلس فالصاله ويا الاهل.. كانت يالسه حذال خالها مانع ع الارض وتسولف وياه .. ويساره كان مروان وخليفه ومنصور وفارس يالسين ع الغنفه حذال يدهم ..
وكملن الحريم النص حلقه .. حد ع الكراسي وحد ع الارض لين وصلت اليلسه حذال ساره ..

وجه مانع الكلام لساره وبصوت شبه مسموع للي يالسين .. بس ما انتبهوا له من كثر الضجه ورمسة الشياب..
مانع: سويره كنتي ويا حلامي وميوه اليوم يوم ينظفن حجرتيه؟
ساره: لاا .. ليش متى نظفنها؟
مانع: مادري كاتبات الساعه ست ونص.. والله انهن .. رتبن الصاله والحجره ونظفن البيت تنظيف وكتبلي ورقه..
مروان دش ع الخط: شو كاتبات..
طلع مانع الورقه وقامت تتنقل عندهم . والكل فاطس من الضحك .. مي تحب الرسم الكاركتيري وايد..كانت راسمه خالها بشكل يضحك وراسمه عمرها وراسمه احلام وهن لابسات نفس لبس الخدم نفنوف اسود وعليه مريله بيضا مربوطه عند الخصر وشريطه بيضا ع الشعر.. ومعلقه تحت على خالها وموقعات هيه واحلام وكاتبات الوقت والتاريخ..
ويود مانع عقب الورقه يبى يحتفظبها ..
وانحط الغدى للرياييل .. وردت ساره لحجرتهم ولقت احلام ومي يالسات يسولفن ويرتبن الحجره ..
ساره: توكن قاايمات؟
مي: من روحتي ع طول قمنا وصلينا .. ويلسنا نسولف
احلام: واحين افتكرنا نرتب الشباري ..
مي: انا يعت .. ما حطوا الغدى؟
ساره: احين الرياييل يتغدون ..

وبعد الغدى كلهم ردوا يلسوا فالصاله .. ومي سلمت على خوالها وخالتها .. وردت تيلس حذال مانع وكانت متاجيه ع ريله وهومتربع .. و احلام وساره بعد حذالهم يالسات ..
مانع: شكرا..
مي: لا شكر على واجب .. بس ماعليه .. حسابك عقب مب جدام الرياييل ..
مروان كان يسمع الحوار وضحك ع تعليق ميوه ..
مي: شحقه تضحك انته
مروان: والخييبه .. هههههه
مي اطالعته بنص عين ..
مروان: بل بل خلاص اسفين ما بنضحك .. بنطم وبسكت
مي: يكوون احسن .. (واطالعت خالها مانع وابتسمت بمكر..) مارضى على خالي حد يضحك عليه..
مانع ضحك وحط ايده ورا ظهرها وباسها ع راسها ..
مروان: محد مطوللها ها البنت غيرك انته .. اكثر وحده تدلعها..
مانع: برايه .. انا ها البنت متبننها من هيه صغيره .. والا عليا
عليا: ها فديتك ..
مانع: يقولولي اني مدلع ميوه .. وانا اقولهم انها بنتي
عليا: هههههه هيه من صغرها متعلقتنك يبوك .. لازم بتشوفها بنتك دامك ما تبى العرس والعيال
مانع: اووه ردينا لها السالفه
مي: امييه دومكم الا تحشرونه بها السالفه.. يوم يبى يعرس بروحه بيقولكم
مانع: هيه والله .. فهميهم مايفهمون

ضحكوا كل اللي كانوا منتبهين للحوار اللي داير امبينهم ..
ساره واحلام يطالعن مي ويضحكن عليها .. ما يقدرن يكونن كوول شراتها جدام راشد وعياله وعيال شيخه.. اما مي عادي عندها ..
وشوي ظهروا فارس ومنصور من البيت .. وساره واحلام يطالعنهم لين ظهروا ...
وتصاصرن..
ساره: ليش هاذيلا ماييلسون وايد
احلام: شدراني..بس منصور عادي ييلس هو وخليفه اخوه.. بس ها ولد خالج
ساره: يبوج ها من صغره جي يستحي..
احلام: ماخذا من مروان .. شوفي مروان والله ما يسكت كله يلعلع هههه
ساره: استحي ويا راسج
احلام: عااادي

مي اطالعتهن بنظره ..
مي: شووو ترمسن ؟
احلام: ماشي مانقول شي
مي: سمعت اسم مـ
ساره قاطعتها: سكتي الله يغربلج صوتج عالي

اما فارس ومنصور فتوجهوا بيت سالم بن خليفه ريل شيخه..
ولقوا سلطان توه ياي بيظهر من البيت وبيركب سيارته ويوم شافهم ترياهم لين يوصولن صوبه ..

سلطان يطالعهم : من وين يايين؟
فارس: من بيت ابويه سلطان
منصور: شحقه ماييت تتغدى .. تحيد الغدى هناك اليوم
سلطان يرمس من غير نفس: مابا غدى
وركب سيارته وطلع من البيت متوجه لمكان محد يعلمبه الا هو ..
اما فارس ومنصور دخلوا البيت وساروا حجرة منصور ..
فارس: اخوك شو مشكلته ..
منصور: الله يهديه ان شاء الله
فارس: صدق ترا ملعوزنا .. انا ربعي يوم يشوفونه يقولولي شوف ولد عمتك الشليتي ..
منصور: انته ماتعرف كيف هو ملعوز بامايه ..حتى الدوام مايسيرله ..
فارس: والله انه رافس النعمه بريوله ها الانسان..
منصور: بس عاد فكنا من سيرته . انته متى بتسير بوظبي؟.
فارس: الاسبوع الياي المقابله بتكون
منصور: ووين فبالك تسير؟
فارس: والله مادري يا منصور .. قلت بقدم كل مكان احتياط..
منصور: وانته مول مب محطي فبالك شي؟؟
فارس: ماعرف .. انا عايبتني دراسة خليفه اخوك
منصور: هندسة اتصالات؟؟؟؟
فارس: هيه ..
منصور: كرااف والله ..
فارس: برايه مب مشكلة الكراف دامني بحصل ع شهاده عاليه .. وغير الشغل من عقب .. بس بعدني مب مستقر ع راي ..
منصور: ياحيك والله ..
فارس: شغل اللعبه بلعب وياك مباراه برشك فيها
منصور: هه بترشني! فالاحلام
فارس: خل احلام فحالها ويالله شغل اللعبه
منصور: ههههه خس الله بليسك .. يالله انزين ..


اما فبيت بو راشد تفرقوا تقريبا من لمة عقب الغدى .. وتم مانع يالس ويا البنات فالصاله والباجين كلهم ساروا يرقدون ..

****

فبيت سيف .. فها الوقت كان مايد يالس بروحه فحجرته ويلعب بالقيم بوي.. وعفرا كانت يالسه وياه ومغصصه عليه بأسئلتها وبخقتها المعتاده ..
مايد: أيه العووده ظهري برع يلا
عفرا: اييه بخبر عليك اميه
مايد: هاكوه الدرب يا الدبه
عفرا: انته ليش ما تحبني .. ليش تقولي العوده والدبه ..
مايد: كيفي ماحبج ..
عفرا: بس عيل .. هيه تحب جسوم وهاذيلاك البنات اللي لسانهن طويل
مايد: سكتي سكتي ..
عفرا: بخبر اميه
مايد : اوووهوو سيري خبري امج ويا ها الراس.. الا كل وقت بخبر اميه وبخبر اميه
عيبت عليه عفرا وهيه منقهره منه .. وفر ميود اللعبه من ايده وقبضها من شعرها وظهرها برع الحجره ..
ورد يتحرطم وهو ميت من الضيجه ..
مايد: الحينه انا شو بسوي .. اف ملل .. ليش روحوا خواني عني .. ماعرف متى بييون .. ابدق لريمان ..
وقبض تيلفونه ودق لريم.. بس ماردت عليه ..
مايد: ليش ماترد.. يمكن راقده ..
ورد يدق لساروه ..
ساره: هلا ميوووود
مايد: بسم الله خليه يرن اول
ساره: هههه لا تيلفوني ما يرن بس يهز ..
مايد: راعي ربشه شراتج هههه .. شخباركم؟
ساره: الحمدلله تمام.. اخبارك انته واخبار امايه
مايد: الحمدلله تمام وامايه بخير
ساره: بروحك عيل يالس هاا
مايد: هيه ملل ..متى بتون؟
ساره: باجر فليل
مايد تم سااكت ..
ساره: عفروه وين عنك؟
مايد: توها هنه غصصتبي ونشعتها من شعرها ورغتها من الحجره
ساره: ههههههه احلى ..
مايد: غير مره بسير وياكم انا
ساره: انزين عادي .. لو قلت انك بتسير محد بيقولك شي
مايد: مادري.. جسوم عيل وين ؟ وخواتي وين؟
ساره ابتسمت يوم سمعته يقول خواتي ..
ساره: جسوم ويا اميه وريم .. اظني رقدوا .. اما نحن كلنا هنه ملتمين فالصاله ويا خالي
مايد: اهاا.. والتوم وين؟
ساره: تبى ترمسهن؟
مايد : هيه ..
وعطت التوم التيلفون وتمن يسولفن وياه وعقب ما سكر عنهم ..
شاف الساعه قربت ع الاربع العصر وباقي عن الصلاه ربع ساعه .. وطلع من البيت ساير صوب المسيد ..

اما التوم عقب ما سكرن يلسن يخبرن البنات شو سولفن ويا اخوهن..

مانع: كم كبره هااا؟
مي: كبر جسوم
مانع: عيل يدقلكن ويتخبر عنكن
ساره: حليله والله يا خالي انه طيب.. طالع عليه امره .. من نأمره ينقز اييبلنا اللي نباه والله انه خدووم يا خالي
انتبهت عقب للكل يطالعها ومبطل عيونه ..
مانع: الله واكبر الحين تبين تقنعينا انج انتي خدوومه وطيبه
مي: ههههههههه والله احلى نكته تقولها ساروه اليوم
مانع: ع الاقل قولي يشابه ميوه بنتقبل شوي
مي: احم احم فديييت خالي والله .. يعيش مانع
احلام والتوم: يعيش يعيش يعيش
مانع حط ايده ع صدره والايد الثانيه مرفوعه يحي بها الموجودين
ساره: اونكم عاااااد.. وانته بعد مسولنا فيها صدام
مي: شو بعد اونا.. خالي ما يقول الا الصحيح ههههه
مانع: هههه حرام قطعناها الفقيره.. ساروه خلاص انتي طيبه بس وغده
ساره: شوو شوو .. وغده بعد .. ماعليه انتوا اللي بييلس وياكم
وقامت اونها بتروح الحجره.. اختفت عن الانظار دقيقتين وردت تتحرطم
ساره: اف ماروم ايلس روحي.. بزعل عقب
مانع: قولي ماترومين تزعلين مني
مي: هههه واثق اونك ..

وكثرت السوالف وكثرت تعليقات مانع ع البنات .. وكل شوي يطيح فوحده منهن وهن عاد عايبتنهن اليلسه والسوالف وياه .. خصه انه مانع من النوع النكيت وكله يحب يعلق ويطنز.. احلام وايد عايبتنها اليلسه وتتمنى دوم انهم يتيمعون جيه ..
احلام: عمي
مانع: ها احلام
احلام: متى بيعطونك اجازه .. ؟؟
مانع: شدراني يا بنت اخويه .. انا بروحي ابا الاجازه اليوم قبل باجر
مي: ليش يعني؟
مانع: منو ما يبى الاجازه بالله عليج .. وبعدين ابا اجابل اشغالي هنه
مديه: عمي شو اشغال هنه بعد! انتوا كله تتيلسون فميلس العزبه
مها: هي صدق..
مانع: ههههه انزين العزبه شغل ..
ساره: ماعليه انزين انتوا .. بيي يوم وبتودرون البوش والرجاب
مانع: فال الله ولا فالج.. عنبو كيف بنعيش عيل
مي: عاد خالي راشد بنقول يعني نوقاته يايباتله خير .. بس انته شو من خير وراهن.. فالركض ما يقبضن مركز موول
مانع: ماعليج انتي انا بعدني توني فاول الطريق..وبعدين ترا ها الشي فدمنا مانروم نستغني عنه ان كان وراه خير ولا لا..
مي: خخخخ شي والله خالي محافظ ع التراث
مانع: عيل شو عبالج..


وشوي أذن الاذان .. والبنات راغن خالهن عسب يسير يصلي.. وبعد ما روح يلسن يسولفن مع بعض عن مانع .. اللي شكله ناوي يكمل عمره بدون حرمه وبدون عيال.. من بعد مدية بنت عمه شل فكرة العرس من باله..
وفاة مديه كانت مصاحبه وفاة امها وابوها .. كان حادث مرور مروع راح ضحيته هم الثلاثه قبل ست سنين .. عاش مانع فتره منعزل عن الدنيا واللي فيها .. كان يتم فبوظبي بالأسابيع ولا يرد بس عشان مايشوف المكان اللي ضم مديه من صغرها لين كبرت ..ولا يشوف المكان اللي كان فيه الحادث .. كيف ما بيشوفه.. مكتوب له كل مره يطلع فيها من راس الخيمه او يدخلها يشوف مكان الحادث.. وقلبه يعوره لمجرد انه يتخيل السياره وهي منجلبه وفيها حبيبته وعمه وحرمته ..
مانع من سنتين قدر يتقبل الفكره .. ويأس من انعزاله اللي ماوراه فايده ورد طبيعي بنسبة 60% ع الاقل .. لكن للحين شايل فكرة العرس من باله .. وها كان موضوع نقاش البنات ..

*****************
(الجمعه) 9 يوليو 2004
*****************

بالأحرى نقول .. فجر يوم الجمعه ..
نزل من سيارته بكل هدوء ودخل البيت بعد بكل هدووء .. حمد ربه انه مافي حد يترياه نفس كل مره ويهازبه .. لانه ها المره صدق طول لين مارد البيت .. ركض غرفته وقفل الباب ودخل الحمام ياخذله دش ..
وبعدين طاح ع سريره .. قبض التيلفون وشاف عشر مكالمات.. جيك عليهن وابتسم ابتسامه جذاابه.. وطى التيلفون وتم يخلل ايده فشعره المبلل وفكره كان مب ويااه .. بس اللي قطع تفكيره صوت التيلفون.. رد عليه ورحب باللي متصل..

بدريه: متى وااصل؟
سلطان: من ساعه تقريبا واصل البيت..
بدريه: ليش كنت ادقلك وماترد
سلطان: كنت اتسبح
بدريه: نعييييماً
سلطان: الله ينعم علييييج ..
بدريه ضحكت ع النبره اللي رد فيها سلطان وهو بعد تبعها بالضحك ..
بدريه: يعيبني اسلوبك فالكلام ..
سلطان: افا .. بس اسلوبي يعني
بدريه: تصدق .. ماعرفتك الا من جريب بس كل يوم والثاني اكتشف ميزه فيك ..
سلطان: لا لا لا قوموا عني ماروم انا ع المدح.. شو الميز هاي
بدريه: ههههههه يالله امدحوني عاد
سلطان: هيه عيل شو عبالج .. خقاق من يومي
بدريه: ادريبك..
سلطان: بداري ..
بدريه: عيون بداري
سلطان: اخ قلبي..بدااااري..
بدريه: عيوووون بدااري
سلطان: بداري
بدريه: هههه سلطون جنك مصختها
سلطان: شو اسوي ماتحمل انا مااتحمل
بدريه: هههههههه
سلطان: انزين بداري شو كنت بقولج
بدريه: مادريبك
بدريه سكتت ..
سلطان: متى بشوفج؟
بدريه: سلطان مب وقته
سلطان: عيل متى وقته؟؟
بدريه: يوم بيي وقته بقولك
سلطان: يعني بهون عليج لين ايي وقته
بدريه: سلطان لاتحن عليه الله يخليك ..
سلطان: خلااص انزين .. انا تعبان برقد
بدريه: شو زعلت؟
سلطان: والله مادري.. الموضوع عادي مايحتاي ليش ازعل
بدريه: عفيه علييك حبوب .. الناس ما يزعلون من حبايبهم
سلطان: اوكي يلا انا برقد
بدريه: اوكي .. تصبح ع خير
سلطان: وانتي من اهله.. باي
بدريه بكل دلع: ومن غير كلمه حلوه
سلطان: يوم بيي وقته
بدريه حاست بوزها: ومتى بيي وقته
سلطان: يوم بيي الوقت بقولج
بدريه: اها يعني تردها فيني
سلطان: ما اردها ولا شي .. يلاا بااي
وسكر سلطان التيلفون قبل ماترد عليه بدريه .. وحطاه ع جنب .. وطاح يبى يرقد
لكنه فز يوم سمع دق ع الباب .. فتح الباب وكانت امه واقفه..
سلطان يوم شاف امه مثل انه يتثاوب ويفرك عينه ..
شيخه: لاتقولي كنت راقد
سلطان: لا كنت ع الكمبيوتر ..
شيخه: متى راد البيت؟
سلطان: ييهاا من متى راااد
شيخه: سلطون عن الجذب
سلطان: وليش اجذب .. لو بتم لين الفير برع البيت عادي مابزيغ اني اقول
شيخه: هيه لو كنت تام فشغل لكنك هايت بلا حسيب ولارقيب.. تتحرى محد يروم يردك عن سواياك
سلطان ( لايكون سمعت الخريط المساعي!!!): أي سوايا
شيخه: من يومين مب مداوم لييش!!!
سلطان: اووهو منو مخبرنج .. اكيد اخوج
شيخه: مب مهم منو مخبرني ..
سلطان: ادري انه راشد بعد ليش ادسين يعني
شيخه: الغلط على خالك اللي مشغل واحد مثلك وياه ولا انته مب ويه حد يشغله .. احمد ربك انه حد مشغلنك وانته حتى دراسه مب مكملنها
سلطان: بدينا بالتعيير يعني .. تراج وايد عاطيه شغلتيه عند خالي سالفه .. الف واحد غيره بيشغلني عنده ..
شيخه: منووو؟؟ البلديه؟؟
سلطان: امااااااايه
شيخه: اقبضلك مذهب ياسلطون .. لاتلعوزني ويا خالك تعبت من كثر الرمسه عنبوك انته ماتشوف اخوانك .. خليفه مهندس و منصور اللي اصغر عنك ما شاء الله عليه من الشطار فالمدرسه .. وهاكم عيال خالك رافعين الراس.. مروان متخرج ماشالله وفارس بها النسبه العاليه بيحصله شغل فكل مكان وحتى لو يبى يكمل دراسه بيكمل..الا انته لااهي فا الدنيا ومستولنا رغيد
سلطان يطالعها وهو محرج: بعد قمتي تعايرني بعيال اخووج !! ولا واحشرتني بخليفه ومنصور.. جنهم عيالج وانا لا
شيخه: يااابويه كلكم عيالي وابالكم الخير .. مابا حد يقول أي كلمه عنكم ..
سلطان:امااايه.. كنت تعبان
شيخه: شو متعبنك هاا ..متعباتنك ها المرغد اللي تلاحقهن !! يا سلطـــ
وقاطعها سلطان: ولييه عليينا .. امايه انتي يايتني ها الوقت تهازبين
شيخه: متى بتبرد فوادي انته .. قم قم سير صل .. ادري الرمسه وياك مالها فايده

روحت عنه شيخه وهيه تستغفر ربها وتدعي لها الولد بالهدايه .. كل اهل ها البيت عيزوا منه ومن النصايح اللي يقدمونها له .. اخوانه تعاملهم وياه سطحي .. ابوه مايعتمد عليه في شي .. محد غير امه اللي على الرغم من انه راسها شاب من كثر ماترمسه وبعدها صامده ..
سلطان طلع من المدرسه وهو فثاني ثانوي .. حول ع الثانويه الصناعيه خلص ثاني ثنوي ومارام يكمل.. التهى بدنيته ويا ربعه اللي بالتدريج قام كل واحد منهم يخرب ع الثاني .. دخل عالم الكمبيوتر من بعد ما ودر الدراسه .. ومن غير ما ياخذ دورات عرف لوايد شغلات فالكمبيوتر .. من يخترب أي كمبيوتر قام هو وصلحه .. عرف للبرامج ودخل عالم النت وعالم الهكرز ..
خاله بامكانه انه يصرفه من الشغل ويستغني عنه لكن خوفا ع مشاعر اخته شيخه ..لأنه سلطان وبكل مصداقيه محد من الأهل يتحمل اسلوبه الاستفزازي.. بس بيتم ولدهم اللي يدعوله بالهدايه دوووم..

****

رد: قـــلـــوب تـــحـــت الـــمــجـــهــــر**
 

عقب صلاة الجمعه فبيت سيف .. كان سيف يالس ويا امه ويسولف وياها ..ويابت ام سيف طاري البنات وسألته عنهن..


ام سيف: سير هات بناتك يا سيف
سيف: امهن بتيبهن
ام سيف: وليش انته ما تيبهن.. رمستهن .. دقيتلهن
سيف: لا .. بس احيدهن يبن يتمن لين فليل ..
ام سيف: هييه .. خلن الدنيا خلا علينا
سيف: شو اميه اشوفج تعلقتيهن؟
ام سيف: تراهن بناتي بعد شو
ابتسم سيف ..
ام سيف: انتوا احيدكم ناوين تسافرون ها الصيف
سيف: هيه بنسير انا وناعمه بس
ام سيف: وين تبون؟
سيف: بنسير النمسا ..
ام سيف: والعيال؟
سيف: بيتمون عندج
ام سيف: يالله بالستر بتسير تشرغ بحرمتك الا .. وبناتك شله ما توديهن.. اكيد هيه شايره عليك ها الشور ..
سيف: مادري يا اميه .. بس البنات ماروم اوديهن .. مسؤوليه ومحد بيسير غيري
ام سيف: شو مسؤوليه بعد .. عنبوك زاد .. هاذيل بناتك .. شوف جان مرادك من سفره ود بناتك اولى من حرمتك اللي كل صيف شردتبها عن الحر..وانا عني مابا سفر .. جان الا بسير العمره ويا مريم عقب ما تردون ..
سيف: يا امييه
ام سيف: صه ولا كلمه ..
سيف: عاد انا واعد ناعمه بها السيره
ام سيف: شوف .. حرام ان ما وديت بناتك تحوطهن يا لساني مايطيح ع لسانك ..

وقامت ام سيف من مكانها وسارت حجرتها مخليه سيف يالس بروحه اللي كان قابض الجريده وعقاها من ايده .. ودخلت ناعمه ها الوقت ..

ناعمه : بلاها امك سايره محرجه ..
سيف: لا ماشي.. تبى البنات ايين
ناعمه: انزين بسهن هياته خلهن اين
سيف: شارطات تراهن يبن يتمن لين فليل
ناعمه : هو بيني وبينك ارتحت منهن ها اليومين ..
سيف: العيال عيل وين ؟
ناعمه : عفروه تشوف الرسوم
سيف: ومايد وينه؟.
ناعمه: مادريبه من ظهر وياك ما شفته ..
سيف: سرنا نصلي الجمعه وقال بيرد ويا عمار ولد عمته
ناعمه: يمكن سار بيتهم
سيف: يمكن .. انزين حطولنا الغدى ..
ناعمه: بقوم اقول للبشاكير ..

وسارت عند التحويله اللي مركبه ع الييدار وزقرت ع نجمه ..
نجمه: ها ماما
ناعمه: يلا حطوا الغدى ..
نجمه: ان شاء الله ماما
ناعمه: يلا بسرعه..

وردت نجمه وهيه تتحرطم من اسلوب ناعمه ...
اما ناعمه ردت تيلس ويا ريلها..


****

العصر البنات كانن يالسات فالحوي ويا لمة العايله .. كان مانع موقف البيك اب ماله حذالهم ويلس يشرب قهوه عسب يقوم ويسير العزبه ..
ساره فخاطرها شي تسويه .. بس مارامت تقول جدام الموجودين..
يلست حذال خالها وصاصرته..

مانع: ها بلاج
ساره: خالي انته واعدني اسوق
مانع: شوو
ساره: هييه ... ماتحيد.. مايخصني خلني اخذ لفه وياك فالفريج الحين
مانع: بيهزبونج الشواب
ساره: انزين انته اركب وطلع الموتر برع وانا بركب وياك وعقب بنبادل
مانع ضحكلها : انزين خليني اخلص الفنيان..
عليا: شو تصاصرون انتو
مي: اميه وراهم شي
مانع: ما وراانا شي .. نسولف شويه

قام مانع وركب الموتر ولحقته ساره وركبت وياه ..
مي: يوم اقولج اميه وراهم شي
عليا: وين تبون
ساره: شويه بس بيحوطني

طلعوا مانع وساره من البيت وهم يضحكون .. فالسكه نزلوا وبدلو الاماكن .. ومانع يحذرها تاخذ الحذر فالسواقه نفس ماكان معلمنها قبل ..

ساره: خالي ماعليك . حرييفه انا
مانع: الا طمه
وبدت ساره تعطي ريس ومانع يضحك عليها .. كان ملعمنها من قبل ودايما تظهر وياه بالدس الظهر وتحوط وياه فالفريج .. ساروه واايد تحب انها تسوي اللي فراسها وتعاند الكل المهم تسوي اللي تباه.. ومانع مايبى يكسر فخاطرها وعلمها..
خذ وياها لفتين فالفريج وعقب ردت ساره البيت وهي ميته من الوناسه..


وفليل يلسن البنات يلمن اغراضهن عسب يردن البيت .. حد ضايج انه بيرد وحد عادي عنده .. احلام كانت يالسه ويا ميوه ويبين من شكلها انها متضايجه ومستغبنه بسبة ردة البنات بيت ابوهن..

احلام: لازم يعني تسيرين .. تمي انتي بس
مي: لا ماروم حلامي.. اولا امايه ما بتطيع..
احلام: عموه عادي ما بتقول شي
مي ابتسمت: لا انا اقصد امايه عفرا
احلام: اها .. وثانيا شوو؟
مي: ابويه .. اكيد ما بيخليني ..
احلام: افف
مي: يلا ماعليه .. عشان ماتعافيني

احلام تمت موخيه تفكر .. ومي ترتب الاغراض وتطنش النظر لاحلام لانها تدري انها بتستغبن وعادي تصيح..

وعقب يت ساره اتخبرهن انهم بيروحون .. ويوم ظهروا برع تفاجؤوا بمروان انه بيوديهم ..وسلمن ع امهن ويدتهن ويدهن .. وع حرمت خالهن وبناتها ..
مي ركبت ويا جاسم جدام لانه السيت اللي ورا مابيضم البنات كلهم ..
.. وعقب ركبن خواتها ..

مروان: هلا والله
مي اطالعته بنظره: اهليين ..
مروان: بسم الله بلااج؟
مي: ماشي .. يلا انته سوق ..
ريم اللي كانت ورا ميوه تجدمت وقرصتها .. مي لفت ع ورا
مي: شوو بلاج؟
ريم بصوت واطي: خفي ع الريال ..
مي: بس لاه ..
جاسم: ميوه عادي انا مب راص عليج ؟
مي: من متنك عاد .. لو بتيلس ع ريولي عادي


وساروه تطالع ميوه وهيه تحيس بوزها .. وتمت تتطالع ريم اللي كانت تبتسم على اسلوب ميوه ..

مي: عيل خالي مانع وينه ماشفناه
مروان: فالعزبه .. عموه دقتله عسب أي يشلكن وسار تأمر عليه انا
مي: خخخ تستاهل ..
مروان: يالله مب مشكله ..
مي: قصورك بعد تسويها مشكله
مروان: هههههه افا عليج انتي بس..
مي ترمس بصوت واطي: خواتي صاخات مادري بلاهن..
مروان: يبن يتمن
مي: شدرااني .. ع الاقل الحينه حالنا احسن عن اول الاسبوع
مروان: يعني متأقلمين؟
مي: مادري.. ماعتقد تأقلمنا .. لكن ع الاقل ارتحنا شوي عن اول يومين
مروان: يلا الحمدلله ..
ساره: شو تصاصرون انتو؟
مروان ابتسم وميوه لفت على ورا ..
مي: اشياء خاصه ..
ساره: يالله عاد اونج ..
ويوم وصلوا ..
مروان: ادخل السياره؟؟
ريم: هيه عادي ..
مي: انا قررت انتوا كلكم نزلوا وانا برد ويا مروان ..
ساره: ريلي ع ريلج يا الهرمه
مي: اف الواحد ما يسوي شي يعني
ريم: يلا انزلن انتن .. عطلتن مروان ..
مروان: لا عادي .. ما ورايه شي ..
وهم ينزلون ونزل وياهم مروان ونزلوا الاغراض ,,
مي: شو من شغله عنده .. تسريح الدبش مب الحينه ..
مروان: هههههههه خليت تسريح الدبش لج انتي
ساره: لا هو ارقى عنج .. يرعى البوش ..
مروان : هيه وانتي شو بالله
ساره: انا ..
مي: مروان هاي المرجبي هههههههه
ساره: يا الخايسه .. محد غيرج ..
مروان: هههههه والله انكن سوالف ..
ريم: مشكوور مروان ..
مي: العفو ..
اطالعتها ريم ورفعت بحياتها وضحكت عليها .. ودشت داخل البيت هيه وخواتها وجسوم .. اما مي وساره تمن على وقفتهن ومروان يناولهن الشنط ..
مروان: فيه كيس داخل ..
ساره: ها مالي عطني اياه ..
مي: مشكور مرواان .. يلا فمان الله ..
مروان: واجبنا بنت العمه ..
وشخطت عنهم داخل البيت .. وساره تطالعها بينما مروان يطلع الكيس ..
مروان: ها اندوج ..
ساره: مشكور ..
مروان: هاتي بشل وياج ..
ساره: لاعادي .. بروحي بشله
مروان: هاتي عنج شكل الكيس ثجيل..
ساره: ناسيه الستيريو مالي .. ويبته ويايه ..
مروان: وانا اقول ثجيل ..
وخذ الكيس من ايدها ..ووصلوا لين جدام الفله وحطه عند الباب ..
مروان: ماشالله البيت غاوي .. اذكره غير كان
ساره: ترا ابويه عدله ..
مروان: ماكانت موجوده ها النافوره ..
ساره: البيت بكبره يبوك ماكان موجود..
مروان: ههههه هيه .. تفنتك فيه ابوج عيل..
ساره: من يت نعوم فها البيت غيرته فوق تحت ..
مروان: حرمت ابوج؟
ساره: هيه منو غيرها ها البومه
مروان: هههههه
وتموا واقفين شويه يسولفون .. وترخص منها مروان وقبل ما يركب السياره ضربلها تحيه عسكريه .. ساره ابتسمت ولوحتله .. تمت واقفه لين طلع من البيت.. وعقب دشت الفله..


فليل ع الساعه 12 دخل سيف قسم البنات عساس يسلم عليهن بس ماحصل حد في الصاله الا مها ومهره اللي كانن يشوفن فيلم و وياهن مايد ..قامن سلمن على ابوهن وردن يطيحن ..
سيف: عيل خواتكن وين؟
مها: قبل شويه سارن يرقدن
سيف: وانتوا ليش سهرانين ؟ يالله بندوا هذا و سيروا ارقدوا وميود انته يالله قوم ارقد
مهره: احين بيخلص وبنرقد
سيف: انزين تصبحون على خير
البنات: وانته من اهله..

طلع سيف عنهم و دخل قسمه و ماحصل ناعمه في الصاله ..
دخل غرفته وحصلها يالسه جدام تسريحتها .. والتفتت له وقامت بدلع
ناعمه: هلا والله حبيبي حي من يا ..
سيف: هلا ام مايد اشحالج ؟
ناعمه: بخير ..تعشيت ؟؟؟
سيف: هيه تعشيت في ميلس بيت مريم ويا خلفان ريلها
ناعمه: هني وعافيه ..
سيف: الله يعافيج .. ناعمه تعرفين ليش ساير لخلفان ؟
ناعمه يلست على الكرسي مجابله التسريحه وتسحي شعرها : ليش؟
سيف:اسأله عن استراليا .. هو سايرلها العام و قلت بسأله عن الحجوزات
ناعمه صدتله وهي شاقه الحلج : بتسفرني استراليا؟
سيف: هيه قلت بنودي البنات نغيرلهم جو
ناعمه: ياســــــلام .. يعني السفره مب حقي انا .. حق بنااتك يعني السفره ..
سيف اتقرب منها ويلس مجابلنها : ناعمه يالغاليه انتي اكبر من هاي السوالف .. وتعرفين البنات توهن ياياتنا وبعدهن مب متأقلمات ويانا..تراها فرصه عشان يتقربن منا ..
ناعمه: هيه اتعلث الا وبناتك الا مكارات..يوم فبالهن شي بيسونه..يعني لاسفره ولا شي بيغير اسلوبهن..
سيف: يلا مااعليه ..
ناعمه: الحيينه يبت بناتك هنه وبتنسااني انا ..
سيف: ناعمه شو هاي الرمسه تدرين انج الخير والبركه وان شا الله يوم بنرجع بسافر مره انا وانتي رواحنا وعفروه وميود بنخليهم ويا خواتهم
ناعمه ابتسمت بدلع : انزين وين بتوديني ؟
سيف: أي مكان تبينه يالله كم ناعمه انا عندي
ناعمه : وحده
سيف: هههههه خقاقه بعد
ناعمه: من حقي والا انا غلطانه ؟
سيف: لا لا منو يقول.. من حقج ونص ..
ناعمه: هييه على بالي بعد .. المهم شوف متى الحجز وخبرني عشان اقدم على اجازه ..
سيف: بسير باجر بشوف .. انا رمست مريم وقالت بتقنع امايه اذ ماطاعت تسير ويانا انها اتم فبيت مريم .. هم مابيسافرون ها السنه ..
ناعمه: زين تسوي .. المهم باجر عيد ميلاد بنتك .. عطني فلوس بشتري اغراض حق الحفله
سيف: هاكوه البوك خذي اللي تبينه ..

قامت ناعمه بدلعها المصطنع وفتحت البوك وخذتلها اللي تباه وزياده بعد ..وردت تيلس حذال سيف .. وتمت تسولف وياه .. وطبعا فتحت سالفة البنات .. وتقول لسيف انها مب مطمنه الهن مول

رد: قـــلـــوب تـــحـــت الـــمــجـــهــــر**
 

(السبت) 10 يوليو 2004
*****************



الصبح الساعه 7:30 نشت مي وتغسلت كانت تحس بنشاط لانها راقده من وقت .. بعد ماتغسلت نزلت الصاله تحت ببجامتها البيضا اللي عليها قلوب حمرا و سليبر ابيض.. كان شعرها الاسود مفتوح واللي كان ع شكل طبقات واطول طبقه توصل لدون رقبتها وكثيف ..مي بطبيعتها خدودها مليانه و مورده رغم سمارة بشرتها شوي.. اللي يشوف ملامحها هاي يقول انها بعدها توها ام عشر سنين .. بعكس ساره اللي ملامحها كلها انوثه ونعومه بيضا و شعرها بني طويل..
بس الغريب انه أي حد يشوفهن يقول انهن وايد يتشابهن..

بعد ما نزلت حصلت يدتها وابوها وناعمه يتريقون .. سلمت وسارت اول شي صوب يدتها وباستها ع راسها .. وسلمت ع ابوها بما انهم ماشافوه من يومين ..وردت تيلس حذال يدتها ..وناعمه تتطالعها بنظره لانها ما سلمت عليها .. محد علق ع الحركه لانها كانت تلقائيه ..

سيف: هاه ماشا الله ناشه من وقت!
مي: تراني راقده من وقت
سيف: ايلسي تريقي انزين.. يالله انا ساير تامرون ع شي ؟
ام سيف: سلامتك ابويه
ناعمه: الله وياك
يلست مي على السفره .. وصبتلها كوب حليب ..
ناعمه: انا بترخص من الدوام اليوم بسير الجمعيه .. بخذ اغراض
ام سيف: شو بتاخذين ؟
ناعمه: عيد ميلاد عفاري اليوم وربعها بيون
مي: مشكله بعد ..
ناعمه: ليش يعني
مي: لا ماشي ..
ناعمه: المهم ميوه خبري خواتج ..
مي:وشو خصهن خواتي اخبرهن
ناعمه: اوهو .. خلاص مب لازم تخبرينهن .. يالله انا مروحه
مي: الله يحفظج يا ناعمه ويكتبلج فكل خطوه سلامه بس عن خاطريه اباج عند الباب تندبقين ع ويهج ..
ناعمه: بسم الله عليييه .. الله و اكبر علييج
مي: هههههااي عيوني حاره تراها تحملي على عمرج
ام سيف: ههههههه اسميج يا ميوه .. خفي ع الحرمه
مي: خلها دواها .. عيل حد يسوي ها البدع..نبارك وبس مب لازم حفله
ام سيف: شدراني يا بنتي عن هالمنكر بعد اعياد ميلاد ومادري شو
مي: هاي امبطره بنتها الا
ام سيف: والله الا معبله على عمرها هاي ولا نحن شلنا فها السوالف..
مي: تصطفل..
ام سيف: اهلج هناك شحالهم؟
مي: الحمدلله عايشين
ام سيف: وعليا اخبارها؟
مي: الحمدلله .. يسلمون عليكم ..
ام سيف: الله يسلمهم من الشر ..
ام سيف: امايه عقب ما تريقين شغليلي التلفزيون .. ايبون شحفان احيدهم ها الوقت
مي: هههههه ان شاء الله ..

وقامت ميوه تشغل التيلفزيون وردت لصحنها .. وعقب سارت تغسل ايدها ويلست حذال يدتها ع الغنفه يتابعن المسلسل..

****

مريم كانت يالسه على الريوق ويا خلفان ونايف .. قبل مايسيرون دواماتهم .. وفبالها السالفه اللي مرمسه فيها ريلها .. كملت كم يوم وريلها مارمس ولده .. تبى يتحرك ويرمس .. قامت تنغزله بس مافهم .. وقالت هيه بتبدى السالفه

مريم: نايف
نايف: عونج ام نايف
مريم:عانك الرحمن.. تراه ابوك عنده رمسه لك.. من يومين قاييلي يبى يشاورك ف شي ..
خلفان: انا .. متى هااا
مريم: ذاك اليووووم .. شو نسيت
وهنه تذكر خلفان الموضوع .. شكلها حرمته ملزمه ها المره وما نست السالفه .. وبعد ما حطته فالامر الواقع قال..
خلفان: هيه .. بغيتك فسويلفه صغيرونه يا بويه
نايف: بلاكم انزين ارمسوا ..
مريم: انا الحمدلله شبعت.. بخليكم انته وولدك تفاهموا بروحكم
وطلعت مريم من صالة الاكل بس تمت واقفه ورا الباب تبى تسمع الرمسه ..
نايف: ها بويه .. شو مستوي؟
خلفان: مب مستوي شي .. بلاك جيه متروع
نايف: انزين شو السالفه؟
خلفان: شووف ابويه.. امك تباك تعرس
نايف: اعررس؟؟؟
خلفان: هيه شو غادي عليك .. هكم اللي كبرك عرسوا .. ماشالله متخرج من احسن الجامعات وتشتغل ومب ناقصنك شي..
نايف: انزين ابويه انا مافكر فالعرس الحين..
خلفان:فكر فيه انزين .. لين متى يعني بتم ماتفكر ..جيه ولا جيه بتعرس تراك ..
نايف: ماعرف والله
خلفان: حليلها امك تبى تفرحبك ..
نايف: انزيييين وهيه عينها على منو هاا المره
خلفان: والله مادري
نايف: لا شكلها محطيه حد فبالها .. ادريبها ما بترمس منيه والدرب
خلفان: ههههههه عاد امك وانته تدريبها..
نايف سكت وكمل ريوقه بهدوء..
خلفان: يعني بتعارض امك فها السالفه!
نايف بعد مافكر زين: كل شي يعتمد ع العروس اللي مختارتنها هيه
خلفان: لاماعليك امك تعرف اللي يصلحلك والا محطي حد في بالك انته
نايف:لا لا مب محطي حد ولاشي .. انزين ابويه انا تأخرت ع الدوام .. بترخص منك الحينه ..
خلفان:فكر زين فالسالفه واباك انته اللي تبدى ترمس امك .. مب هيه تراكض وراك وتقنعك ..
نايف: ان شالله ابويه .. اول ماقتنع بروحي برمس .. فمان الله
خلفان: موافج خير..

طبعا مريم سمعت كل شي ويوم حست بولدها بيروح ردت المطبخ بسرعه .. وعقب شوي ردت عند ريلها وتناقشوا فالسالفه وشكله نايف مب معارض الفكره ..

****

في دوام ناعمه .. كانت امل ربيعتها وهي يالسات يشربن نسكافيه .. ويسولفن عن امور حياتهن مثل كل مره ..

ناعمه: امول انا بطلع عقب شوي
امل: بتترخصين ؟
ناعمه: هيه استاذنت من المدير
امل: وين بتسيرين ؟
ناعمه: بسير كارفور.. اليوم عيد ميلاد عفاري وانا مازهبت للحفله لين احين.. وطبعا بتين انتي وبنت اختج
امل ابتسمت: اكييد ان شاء الله ..اقوول ناعمه ماقلتيلي شو بنات ريلج وياج؟
ناعمه: ويييييه اسكتي لاتتخبرين عنهن .. شياطين وملسوووونااات وايد
امل: طالعات على امهن
ناعمه: لا الصراحه الحق ينقال .. امهن وايد هاديه كانت .. هذيل على منو ماعرف!
امل: الله يعينج
ناعمه: بس فكوني من ضرابه ميود وعفروه .. ميود طول الوقت يالس عندهم ومفتكه من صدعته .. لا واقولج احين بنسافر وهم ويانا .. الله يعييني عااد
امل: والله ! وين؟
ناعمه: سيف امس خبرني وقال بنسير استراليا .. بس اتريا يقولي متى الحجز عشان اقدم اجازه
امل: ياحظج ..
ناعمه: هيه وقالي بعد انه عقب مانرجع بنسافر انا وهو رواحنا
امل: ياحافظ عليج شو تبين احسن عن جيه ..
ناعمه: الله واكبر عليج بتحسدينا .. يالله المهم انا طالعه احين .. اشوفج العصر لا تتاخرين .. منها بعد تشوفين البنات ..
امل: ان شاء الله ولا ايهمج .. مع السلامه
ناعمه: مع السلامه

وشلت شنطتها وسويجها واطلعت من الدوام وركبت سيارتها وسارت صوب الكارفور .. نزلت وحطت الغشاه على ويها .. طبعا هنيه ما تتجرأ تتكشف لانها ممكن تشوف حد من اخوانها ولا من طرف ريلها.. ولا ريلها نفسه.. دشت الكارفور وخذت مستلزمات الحفله ورجعت البيت..

****

مي كانت ها الوقت تحوووص في البيت مب عارفه شو تسوي.. سارت عند ساره لقتها راقده.. وريم تقرا روايه .. اما مها ومهره لقتهن يطالعن فيلم كرتون..
قامت تتحوط فالبيت ودخلت وحده من الغرف اللي تحت..
من الكم الكبير من الكتب ومن ارضيتها الخشب والمكتب المحطوط فالنص عرفت انه ها الغرفة مكتب ابوها ..
قربت عند المكتب ويلست على الكرسي الاسود الكبير .. حصلت نظاره ابوها على الطاوله ولبستها عشان تحسس نفسها اكثر بجو القراءه بس عينها عورتها ورجعت فصختها .. لقت مجموعه من الاوراق جدامها .. خذتلها قلم ويلست تكتب
شي كان في خاطرها ..

رساله حائره

الى خليل لم يحظى به قلبي بعد!!

اسطر إاليك كلماتي البسيطه .. لعلك ستقرأها يوماً .. وتفهم أن هناك في هذا الوجود .. فتاة حالمة تنتظر أن يفتح قلب لها ..
عزيزي
أني لاكتب وقلبي ينبض بكل قوته .. وأحاول ضبط نبضاته ولكن هيهات لأن يهدأ بركان قلبي الثائر ..
لا أعرف ما الذي يتملكني من شعور .. امتزجت عواطفي فما عدت أعرف ما الذي في قلبي ..
أيكون الحب قد غير رونق حياتي .. أيكون هو من يأخذني إلى عالم الاحلام ؟!!
ولكن أي حب هذا وأنا لا أعرفك بعد ؟!
هل تراني سوف أحظى بك؟!
هل تراك سوف تصون حبي لك ؟!
هل سأجد سعادتي الضالة معك ؟!
هل وهل آلاف منها تهل على فكري ..
ولكني سأصبر وانتظر قدومك ...

يلست دقايق تتأمل في اللي كتبته..

"ليش يعني اكتب ها الخواطر.. شو فبالي بالضبط! ولا بس احب اكتب جي!
شي فخاطريه واتجاهله! معقوله يكون هو الحب!
بس منو !
لا لا يامي .. انا ابا اكتب شي يسليني .. واكتب ..هذا هو"

شلت الورقه وربعتها .. وحطتها في جيب البجامه.. تبى تشرد من ها الافكار..
وقامت تشوف الكتب .. وصلت لكتب الشعر .. شلتلها واحد وتصفحته .. عيبها فخذته وطلعت من المكتب وخطر فبالها انها تيلس ورا البيت .. خذتلها كوب عصير بارد من مطبخ الفله التحضيري ..ويلست عند الطاوله وتمت تقرى..
بعد فتره وطت الكتاب وسارت المطبخ عند نجمه.. شغالتهم اللي شهدت كل الاحداث اللي استوت فالماضي هيه ربت البنات ويا امهن وكانت الها ذكريات وياهن
دخلت مي المطبخ وحصلت نجمه تقطع الخضره ويلست وياها..

مي: نجمه
نجمه: هاه مي شنو يريد ؟
مي: مافي شي بس انا يريد سوي كلام ويا انتي.. نفر داخل بيت كولش مشغول
نجمه: مي انا في واجد استقل .. سيري بعدين ريحه انتي يجي طبخ
مي: مافي مشكله انا وانتي سوا سوا سوي شقل ..
نجمه: انا فكر يوم انتي صغيره واجد فيه شيتانه .. اهين مافي تغير.. سيم سيم قبل
مي: شو يسوي انا نجمه .. الله خلي انا جذيه
نجمه: ماما عليا جين ؟؟؟ انا من زمان والله مايشوف ..
مي: هيه ماما عليا زين .. ليش انتي مايسير سوي سلم على ماما عليا
نجمه: انتي معلوم هذا ماما كبيره واجد مشكله اذا انا روح مكان.. وماما ناأمه واااجد واجد مشكله
مي خطر فبالها ها السؤال:الله يعينج .. اا..اقول نجموتي
نجمه: امري ..
مي: هههه والله مب سهله امري بعد مب منج خلصتي عيش راس الخيمه كله وين مابتعرفين ترمسين شراتنا..
نجمه: هاه
مي : ماشي .. انزين بسالج .. انتي مافي معلوم ليش ماما عليا سوي طلاق؟؟
نجمه: مي.. انا كيف معلوم هااا كبر انا كيف معلووم ؟
مي: تراج سوسه نجموه تعرفين كل شي
نجمه: هرام مي انا مافي جذيه .. انا والله مافي معلوم .. هذا ماما عليا فلييل يزقر انا يشيل مها ومهره .. بعدين هي سوي وقف تاكسي ويسير بيت مالهم .. بعدين انا رجع بيت بابا سيف وماما كبير واجد جنجال ليش ماما عليا روح.. شنو في؟ شنو مشكل ؟ انا مايعرف..
مي: حتى انا نجمه .. مايعرف شنو في مشكل .. انا تبى معلوم ليش ماما سوي طلاق ؟
نجمه: احسن ماما عليا سوي طلاق .. ميشان ماما كبير وماما ناأمه واجد حشره هذا اتنين ,, وماما عليا واجد زين .. مايمشي هذا زين ومشكل في مكان واحد سوا سوا.. بس ماما كبير الهين يستوي عجوزه هليلها .. شوي زين مافي سيم سيم قبل..
مي: ايوه يا افلاطون عطينا من فلسفتج بعد
نجمه: مي انا مافي معلوم انتي شو يقول بس هذا يمكن كلام مسخره
مي: لا نجمه شو مسخره انا يقول انتي سيم هذا واحد كله يقول كلام زين.. انزين نجمه .. انتي احين معرسه والا مطلقه والا شو
نجمه: هذا ريال مال انا من زمان موت ..
مي: ويييييه وحليله .. ليش شو ياه؟
نجمه: هذا يسوي بنايه بعدين هو يطيح تحت يسوي موت ..
مي: وحليله عظم الله اجرج .. انزين نجمه انتي ليش مايسوي شادي مره ثاني؟
نجمه: ليش سوي شادي . هذا ريال واجد قرقر .. انا يجلس هني زين
مي: والله انج افتكيتي ..

نجمه حاست بوزها وتمت تكمل شغل .. ومي يلست اتقطع وياها وحاشرتنها بالسوالف لين طفح الكيل عند نجمه وراغت ميوه من المطبخ وقفلت عنها الباب.. ضحكت عليها ميوه وردت ورا البيت وشلت الكتاب ودخلت الفله..

****

الظهر عليا يالسه مع امها وابوها ومانع ومحمد وزوجته واحلام في الصاله عقب الغدى يشربون جاهي ويطالعون التلفزيون .. محمد كان يطالع ااحلام اللي راقده على ريول امها وهن يشوفن التلفزيون وتم يركز فملامحهن .. عبير كان اللي يشوفها يقول انها اجنبيه .. كانت بيضا وايد وشعرها اشقر وعيونها خضرا ملامحها هاديه وجميله .. اما احلام كان شعرها بني غامج وعيونها خضرا وبيضا لكن مب نفس بياض امها.. وهذا كان يرجع لاصل ام بشار الروسيه .. اما مديه كانت طالعه على ابوها ..
رمست ها الوقت عليا ويا امها اللي خلى محمد يرد لارض الواقع ..
وانتبه انه عبير كانت تتطالعه بنظره .. كانت فبالها رمسه قايلتنها لمحمد الصبح .. وتباه يفتتح الموضوع .. محمد فهملها وبدى يرمس ..

محمد: اقول ما خبرناكم .. فجر اخت عبير بتي عندنا
عليا: والله؟!
عبير: أي مو اهي تبي تكمل دراستها ف الامارات ..اليوم الصبح كلمتها واكدت الموضوع ..
ام راشد: ماشا الله حياهاااا الله ..
عليا: ماشا الله وين بتكمل ؟
عبير تشوف محمد وترجع تطالعهم : في الشارجه .. الجامعه الامريكيه
ام راشد: وين ييلسون فيها هاي بعد ؟ مثل قوم ساره يوم بيسيرون العين ؟
عبير: ايه عمتي .. اكو عندهم سكن طالبات
ام راشد: يالله بالتوفيج
عبير: عمتي تعارضون لو انها تنزل عندنا في اخر الاسبوع ؟
محمد: عبير انا رمستج في هالموضوع .. فجر البيت بيتها وحياها الله في أي وقت
عبير: لا محمد انا ابي راي عمتي اخاف انه هالشي يظايقها
ام راشد: يالله يا عبير .. بغيتها هالرمسه تظهر من غيرج مب منج .. هذا الا بيتج وبيت محمد ونحن اللي يالسين وياكم فيه .. افا عليج بس
محمد: تسلمين يا امايه .. والله ماتقصرين
عبير: مشكوره عمتي
ابتسمت الهم ام راشد وهي تتطالعهم ..
عليا: ومتى بتي ان شاء الله ؟
عبير: ماعرف.. بعدني ماكلمتها..
عليا: يالله خير ان شاء الله ..

هالمحادثه كلها كانت تدور واحلام لاويه بوزها ومستاءه من الموضوع .. انتبهت الها عليا لكن طنشت لازم تأقلم احلام عمرها ع الوضع اليديد ..

****

رد: قـــلـــوب تـــحـــت الـــمــجـــهــــر**
 

سوووري

هذا اللي قدرت أنزله

أنتظروني قريب

وراح أنزل كذا بارت


شكري لكل اللي يتابعون خلف الكواليس



جودي

رد: قـــلـــوب تـــحـــت الـــمــجـــهــــر**
 

مساء الورد


العصر في بيت سيف وقت ما الكل مرتبش ع الحفله اللي بتسويها ناعمه لبنتها.. البنات كلهن ويا بنات عمتهن مريم متيمعات في الصاله ويسولفن .. ومايد وجاسم يالسين وياهم ..و مريم يالسه ع طرف ويا امها.. فها الوقت انزلت ناعمه من فوق وهي لابسه تنوره وقميص .. حصلت الكل فالصاله..

ناعمه: هلا ومرحبا..حيا الله من يا ..
جاسم رد بدال عمته: هلا هلا الله ياخذج الله يخليج هلا
قالها بسرعه لدرجه انه ناعمه مانتبهت لها اما البنات انتبهوا و ظحكوا مره وحده
مريم: هلا بام مايد اشحالج ؟
ناعمه حاولت تطنش اللي ظحكوا لانها ماتعرف على شو ظحكوا: بخير الله يسلمج وانتي شخبارج ؟
مريم: بخير يعلج الخير ..
ناعمه: عن اذنج الغاليه بسير اشوف ربيعتي امل عند الباب .. اتفضلي البيت بيتج
مريم: دام فضلج ..
طلعت ناعمه تستقبل ربيعتها .. ومريم صدت سيده حق جاسم: حبيبي جاسم ليش جيه تسوي زين انها ماسمعتك
ساره: عادي عموه جسوم متعود يقولها ..
مي: يقولها حق أي حد ..
مريم: شيطان طالع عليكن
ساره: حرااام عموه انا البراءه كلها.. قولي طالع على ميوه .. مهوه ولا مهروه.. بس انا لااا.. فديتني والله
مريم: اااه منج انتي مكااره..
البنات كلهن اضحكن على ساره..
دخلت ناعمه و وياها امل ربيعتها وسلمت على البنات .. و يلست وياهم وبدوا ربع عفرا ايون وتيمعوا في الغرفه الزجاجيه اللي موجوده برع عند الحديقه ..


وسط الحفله وعقب ماطفوا الشموع .. خواتها البنات كانن في الحديقه مادخلن الغرفه يالسات على الطاوله و يسولفن ويا بنات عمتهم ..

اما جاسم دق عليها الباب الزجاجي وهو محطي ايده وراه
عفرا فتحت الباب: نعم شو تبى ؟ حفله بنات هاي مب اولاد
جاسم طلع اللي خاشنه من ورا ظهره و راوها اياه: يايب هديتج كل سنه وانتي طيبه
عفرا: الـــلــــــه جاسم انته وايد طيب .. شكرا
جاسم بابتسامه عريضه: عفوا .. يالله باي ..

وسار صوب خواته ..
ريم: جسوم شو يايبنك من عند البنات
جاسم: ماشي ..
مي: ليكون تدور حرمه
جاسم: كلهم مب حلوات متان مثل عفروه ..
ضحكن البنات ع تعليق جاسم ..
لطيفه: مب سهل انته بعد ..

دخلت عفرا عند ربعها وهي شاله في ايدها الهديه وتروايهم اياها: هذي هديه جسوم اخويه ..
وحده من البنات: افتحيها بنشوف شو فيها ..
فتحت عفرا الهديه وكانت عباره عن شنطه بيج صغيره ومطرزه بخرز وردي ..
عفرا: شوفوا البخيل شو يايب هالشنطه الصغيرونه بس
عنود: عفراااااااااااا هذي الهديه اللي انا يايبتنها وحطيتها عند الباب ويا هديه ثانيه نفسها بس كبيره شوي

عفرا تمت فاتحه عيونها وماعرفت شو تسوي .. انقهرت منه وااااااااااااااايد و تحلفلته يوم بتخلص الحفله .. كملت حفلتها وهي مرتبكه صدق وماتدري وين تودي ويها من البنت .. وبعد ماروحوا البنات .. دخلت الفله وهي معصبه .. وكانوا خواتها وبنات عمتها بعدهم موجودين
عفرا: وين هذا الحيوان
ناعمه: منو ؟
عفرا: الخايس جسووووووووووم
مي: ايه بلاج انتي تسبينه ؟ محد حيوان وخايس غييرج
ناعمه: عفاري شو مستوي
عفرا: الخايس شل هديه وحده من البنات ويابلي اياها الصاله اللي برع وقال انها منه .. وانا فتحته وقلت انه بخيل ماياب الا هاي .. البنت زعلت مني ..

اهنه سادت ثانيه صمت وتبعتها ظحكااااات عاليه ..
الموقف صدق مايحتمل غير ردة الفعل هاي ..
اما عفرا من شافتهم يضحكون قامت بتركب فوق وهي تصيح وتحتشر: ماحبكم ماحبكم .. اكرهكم كلكم ..
وضحكاتهم تتبعها لحد مادخلت غرفتها وسكرت الباب ..

ناعمه ما ابدت أي اهتمام للموضوع ويلست وياهم عادي .. وبعدها روحت مريم وبناتها و يلست ناعمه ويا البنات وابوهم ..
سيف: هاه شو الحفله اليوم استانستوا ؟
مي: عادي يعني حفله يهال
سيف: انزين انا بقولكم شي .. ترا انا قررت اسافر وياكم تغيرون جو وتستانسون
ساره: والله ؟ وين بنسير ؟
سيف: ان شاء الله بنسير استراليا ..
ناعمه: انته حجزت خلاص ؟
سيف: هيه اليوم العصر سرت وقصيت التذاكر ويوم الأحد ان شاء الله السفره..
ناعمه: انزين ليش ماخبرتني عشان اطلب اجازه؟
سيف: حصل خير سيري باجر و قدمي على الاجازه
مي: انزين كيف انسير ونحن ماخبرنا امنا ولا شاورناها
سيف اطالع مي بنظره: مافيها شي .. اتصلبوها وخبروها .. المهم يالله انا بسير ارقد تعبان وانتوا يالله سيروا غرفكم ..تصبحون ع خير
الكل: وانته من اهله ..
ساره:ياااي احس ونااسه .. ابا اسير اتشرى للسفر
ناعمه: انا باجر بسير اتشرى
مها: فالويكند بنخلي اميه تودينا دبي
مي: هييه ..
ساره: يا سلام كشخه والله بتزهب للجامعه من استراليا.. عجيب
ام سيف: زين بعد بتستانسن
مي: امايه مابتسيرين ويانا؟
ام سيف: له شوو يوديني انا قايله لسيف ما بسير.. ماروم ع سفرهم يا امايه..
ساره: يالله امايه بتسيرين ويانا .. بنونسج
ام سيف: لا مابا ماروم للطياره انا
ناعمه: عمتي ما بتسيرين بيت مريم تيلسين عندهم؟
ام سيف: لاا شو يوديني .. بتم فبيتي
مهره: امايه تعالي ويانا ..
ناعمه: شو تي ماتروم امكن للطياره

ام سيف فخاطرها
" يالله يا الدنيا الحين هاذيل اللي ماكملن اسبوع ويانا جيه ونعوم ما جد عزمتني على شي .. "
ام سيف: سيروا واستانسوا انتوا انا مب مال سفر.. ماروم للطياره.. بتم فالبيت ماعليه شر..
ساره: شو تمين بروحج؟
ام سيف: ضاريه اتم بروحي .. واتيني مريم الصبح والعصر .. عادي
مي: امايه نحن مابنخليج بروحج فالبيت
ام سيف صخت من ردت فعل بنات ولدها .. حست بشي يرف فقلبها .. مارامت ترمس بس حست ان عينها بدمع ..
ام سيف: انا بقوم ارقد ..
ساره: بس ما قلتيلنا رايج
ام سيف: ماعليه من اصبح افلح ..
وروحت ام سيف عنهم ..
ناعمه: يدتكن عيوز وين تبنها تتحمل الطياره فوق عشر ساعات شو ماتفهمن
مي: الا يلسه هيه بعد شو .. بروحج انتي مكاره
ساره: عنبو شراتج اخلي ام ريلي اللي بدتني ع الغير مرتاحه واشلها ع كفوف الراحه
ناعمه: شو قصدج يعني؟
ساره: ماقصدت شي .. يلا انا بسير فوق ..
مي: انا بعد بسير

وقامن البنات كلهن فوق وخلن ناعمه تتحرطم بروحها
*****************
(الأحد)11 يوليو 2004
*****************



بعد صلاة العصر ..البنات يالسات ويا يدتهن يسولفن ويتقهوين وياكلن رطب ..
مها ومهره قابضات تيلفون البيت ويرمسن عمار.. مايد وجاسم قابضين تيلفون الميلس الداخلي وشابكين وياهم ع الخط وكلهم يسولفون ..
وعلى الاصوات المتعاليه فالصاله .. اسمعوا صوت اعلى وصوت صراخ ياي من فوق.. والصوت يدل ع ظرابه بين اثنين

ام سيف: بسم الله شو مستوي منو هذا يزاعج ؟
ريم: ها صوت نعوم .. بسم الله ليكون تتواجع ويا ميوه .. هي سايره تيب كاكاو من فوق
ام سيف: سيري اطالعيها اميه مافينا ع الحشره.. ميوه لسانها طويل ونعوم اطول
قامت ريم وكانت في نفس اللحظه مي داخله وشاله في ايدها كيسة الكاكاو
ريم: ميوه بلاج ويا نعوم؟
مي عقدت بحياتها: مابلايه وياها شي
ام سيف: عيل تتواجع ويا منو ؟
مي : هييه .. ويا الشغاله ..
ام سيف: مايكون نيمه ؟
مي: لا ايتوه شغالتها
ساره: الله وناسه بقوم اطاع شو السالفه
ام سيف: يلسي ساروه شو تبينها خليها عنج بتخلص في هذيج و بتبدى فيج
ساره:تخسي الا هي
ريم: ساروه ايلسي مالج حايه تسيرين
مي: الشغاله حارقه فستان نعوم اللي كانت بتلبسه حق المعاريس اليوم
ساره: وشقى حرقته؟؟
مي: ظنتي عاطيتنها ادخنه وشبت الضو تحت الفستان
ريم: انزين وكيف يا الحرق
مي: ماعرف .. بس سمعتها تتحرطم وتقول عن البطانه .. احس البطانه بس احترقت. بس شكل الحرق يبين شوي
ام سيف: دواها عيل .. مسوتلي فستان فوق 6000 .. وين تبى تتبطربه زين يوم حرقوه عنها
ريم: هي غبيه .. حد يفصل فستان بها السعر ويعطيه الشغاله تدخنه مارامت ادخنه هيه .. الا تعالي ميوه انتي وين سمعتي ها التفاصيل كلها
مي: انتن هنه وسمعتن الصريخ .. وانا اللي فوق ما بسمع شي
ساره: بس ماعرف ليش عندي احساس انج كنتي حاطه اذنج ع باب قسمها
مي ضحكت: جيه قالولج ساره الديايه .. انا دخلت داخل اشوف شو مستوي .. هههه بس شو ناعمه غادي ويها احمر من التحميق
ريم: والله انج انتي .. شي قالتلج؟
مي: تهبي الا هيه .. فايجتلي هيه .. قابضه البشكاره من كشتها .. حرام والله غمظتني ايتا ..
ام سيف: خلها تولي عنكن دومها تتواجع ويا الشغالات ماشي الا كل سنه تيب شغاله .. مايتحملن حشرتها ماتسكت عنهن ..
مي: حتى انتي امايه حاره ويا نجموه
ام سيف: نجموه شغالتي من قبل ماتنولدون انتوا .. عاشت ويانا وتعودت .. لو اني ساعات اهزبها .. وحتى اظاربها ساعات يوم تغصصبي بس أحين تعرف شغلي كله تعلمت
ريم: زين الحمدالله ..
ام سيف: انتوا اهناك في بيت امكم عندكم شغاله بروحكم ؟
مي: هيه امايه يايبتنها لنا
ام سيف: هيه وقوم خالج ؟
مي: شي 3 شغالات .. وحده لنا و وحده لقوم خالي محمد وحده للطبخ
ام سيف: وشغالتكم منو يسلم معاشها ؟
ريم: اميه منو بيدفع بعد ..
ساره: فقيره امايه معاشها بروحه ع قدها وكله تصرفه علينا وتدخلبه جمعيات عشان تسفرنا في الصيف .. لو امايه ماكانت تشتغل وتمينا على تجلى معاش ابويه اللي كان يطرشه .. بنتم فقارى حتى الزكاه بتيوز علينا ..
ام سيف: لاحول ولا قوه الا بالله .. ساروه انتي من وين ماخذه هاللسان ؟
ساره: مادري امايه .. بس ابويه يقول انتي تشبهين امايه عفرا الخالق الناطق ..
ام سيف شلت العصا اللي تظرب بها الذباب بتظرببها ساره بس ساره نشت عنها وتمن يظحكن عليها
بدت يدتهن تتعود على ملاسنهن .. تعرف انه مب من خاطرهن بس غصبن عنهن اللي شافوه بعد مب شويه ..
اما ناعمه يلست في حجرتها متغمظه على فستانها اللي احترق .. لا وتفكر بعد شو بتلبس للعرس اللي بتسيرله

****

سلطان كان يحوط في سيارته قبل مايوصل القهوه .. رن تلفونه .. رفع يشوف الرقم وابتسم .. صارله كم يوم مايرد ع مكالماتها ولا رسايلها ..احسن..
عشان تعرف تحدد اوقاتها صح وياه .. ما يأست ها المره حرقت تيلفونه من كثر ما تتصل .. وفالاخير تكرم سلطان ورد ع التلفون وخلاه ع السبيكر
سلطان: نعم
بدريه : سلطااااااااان ؟ وينك
سلطان: هونولولو.. ويني بعد موجود
بدريه: حرام عليك ياسلطان .. اهون عليك جيه تسويبي ..
سلطان: ليش شو سويت
بدريه: سلطان لا تستغبى عليه
سلطان: بعد غبي..
بدريه بتوتر: انا ماقلت غبي..
سلطان: قلتي تستغبي.. نفس الشي
بدريه تأففت من الغصه اللي فيها: سلطان عاد..حرام اللي تسويه فيني
سلطان: ياسلام احين انا طلعت الشرير والقاسي ؟ نعم اخت بدريه ؟ ناويه تسوين قصه جميله والوحش علينا
بدريه: سلطان عاد والله مايسوى عليه تحقرني جيه
سلطان: لا يسوى .. عطيتج كم يوم تفكرين فيهن وتراجعين ثقتج واحاسيسج صوبي
بدريه: فكرت صدقني وحرمت اقولك شي .. صدقني سلطان انا احبك والمساله مب مسأله ثقه .. لو ما اثق فيك مابرمسك وانا متزوجه
سلطان: بس انزين كل مره لازم تيبين طاري هالريل
بدريه: ماقصد شي صدقني .. حبيبي سلطان انا لك من ايدك اليمنى لين ايدك اليسرى انته تامر امر
ابتسم سلطان بخبث : مابرضى باي كلمه قبل ماشوفج
بدريه بتردد: انزين اتريا شوي عليه
سلطان: عيل تريي انتي لين ارضى بعد
بدريه: سلطان .. ريلي باجر بيرجع من الجزيره .. وتعرف انته هو يتم عشر ايام اهنه ويروح 14 يوم ..
سلطان: ماباج تشرحيلي طبيعه شغله.. انا اعرف كل شي .. بس ابا افهم احين متى بشوفج ؟
بدريه : بعد مايروح ..يعني عقب عشر ايام ..
سلطان: عيل لاتتصلين وتفكرين اني ارضى لين عقب عشر ايام .. يالله باي

وسكر تلفونه .. وبالمره غلقه ونزل القهوه ..

لازم تعرف بدريه كيف تتعامل ويا سلطان .. موضوع انها متزوجه غيره مايهمه .. يهمه نفسه وبس ..
صارله متعرف عليها فتره .. قدر باسلوبه انها ترمسه بالتيلفون من عقب ماكانت علاقته بها بس ع النت .. والحين يبى شي اكثر من الرمسه.. يبى يشوفها..
*****************
(الأثنين)12 يوليو 2004
*****************



نشت ام سيف على فتحة باب الحجره .. كانت نجمه اللي تبات عندها طالعه من الفجر سايره تسوي الريوق حق ام سيف والي سايرين دواماتهم ..
ووقت الريوق يلست ام سيف تتريا سيف وحرمته لانهم ضارين يتريقون وياها قبل مايسيرون الدوام
نزل سيف وحرمته وياه .. و حب امه ع راسها وسلمت عليها ناعمه ويلسوا يتريقون ..
دخلت نجمه يايبه دله الحليب ..
ناعمه: نجمه ازقري ها الخايسه ايتوه اباها
نجمه: جين مدام
نجمه سارت تشوف الشغاله الثانيه ورجعت متاخره في فتره ساد فيها الهدوء بين سيف وامه وزوجته وهم يتريقون ..

رجعت نجمه وهي تناهي: مدام ناعمه هذا ايتا مافي داخل غرفه
ناعمه: انزين دوريها في الصاله اللي برع ولا يمكن انها في الحمام
نجمه: لا ماما .. هذا نعال في عند باب .. لكن ايتا مافي موول .. هذا اغراض مال هو مافي موجود بعد
سيف: الاغراض بعد !! ابشروا شردت عاشر بشكاره
ناعمه: لاتبالغ مب عاشر عاد..
ام سيف: وانتي شله بارده جي .. قومي شوفي شغالتج
سيف: نجمه انتي في اكيد اغراض مالها شنط كلش ما في موجود
نجمه: والله بابا مافي حد مناك هي شيل كل اغراض مالها مافي شي مناك
ام سيف: حسبي الله ونعم الوكيل فيها .. زين جيه واجعتيها البارحه لين قلتي بس واشردت عنج .. يا اميه لاتيبين انتي شغالات الا بس تخسرون عليهن ومايتمن
ناعمه: فكاك منها .. حارقتلي فستاني خلها تولي خساره فيها المعاش
ام سيف: مب خساره ولا شي حليلها شاله البيت فوق راسها..الا انتي بطرانه
ناعمه نشت من ع الريوق منقهره وخذت بشنطتها وركبت سيارتها سايره الدوام..
سيف: ياربي شو سالفتي انا ماتوفق بشغاله زينه .. الا يشردن والا يسرقن.. وهاي ناعمه الله يهديها ماتيوزلها الرمسه بعد
ام سيف: لو حرمتك زينه وياهم مابيشردن .. لكنها ماترحمهم .. احين عاد خلها تقوم هي تعابل لين تيها شغاله .. منو يقهر الشغل في ها القيض والحر .. اسميه ماياكم خير..
سيف: الله يعين .. انا بقوم بسير الدوام وبطرش حد الجوازات ابلغ عليها وبشوف شو بيصير ..
ام سيف : يابويه لاتضايج بعمرك .. بدال الشغاله عشر .. بس لاتم تتظايج لكن رمس حرمتك لاتشد عليهم .. ترا الا حايتها عندهم .. احين الدنيا قيض والواحد مب قاهر عمره وين يروملها الشغله .. وزين انكم بتسافرون عقب كم يوم .. لين تردون بتوصل اليديده ..
سيف: خير ان شاء الله.. يلا فمان الله امايه
ام سيف: الله يحفظك ابويه..

وطلع سيف من البيت وهو متضيج من سالفة ها البشاكير .. اما ام سيف فيلست اطالع التيلفزيون..
وخلاف غفت شوي .. لين حست بصوت رمسه حذالها .. كانت تقريبا الساعه عشر .. ريم ومها ومهره يالسات يتريقن من عقب ما يابتلهن نجمه ريوقهن .. وصبلهن حليب ويلسن حذال يدتهن ..

وها الوقت كانن مي وساره نازلات ودشن الصاله ..

ريم: ومتى شردت؟؟!
مي شهقت : منو شرد!!
مها: ايتووه
ساره: لازم بتشرد مب منها من نعوم مستجلبه عليها امس
ام سيف: ماعليه .. عاد الشغل بيطيح ع روسكم بعد انتو
ريم: عادي امايه.. ايتا ماكانت الا تغسل وتكوي ثيابنا.. بسيطه
ام سيف: وها البيت منو بينظفه ..
مي: خلها نعوم تعابله محد قالها.. نحن حجرنا بروحنا انظفهن متعودين ع ها الشي عادي..
ساره: هيه وبعدين ايتا امبونها ماتدش قسمنا الا جان قلنالها خمي الحجر والصاله
ام سيف: زين هابات ريح ..
ريم: ماعليه اليوم بنتعاون ع ثيابنا وباجر واللي عقبه ترانا فبيت قوم امايه بنكون
مي: وحليلها نعوم اسميها بتبتلش
ام سيف: خلها يومين ثلاثه تشتغل ما بيظرنها لين اييبون شغاله يديده

وتمن البنات ينكتن ع نعوم ويتخيلنها وهي تشتغل ويتضاحكن .. حتى اليده تمت تضحك من خاطرها على سوالفهن..

****

عبير كانت يالسه تتصفح الجريده وطاحت عينها على اعلان .. قرته بتمعن .. قبضت تيلفونها ودقت لمحمد ..

محمد: هلا وغلا بام بناتي
عبير: هلا فيك الغالي
محمد: توني طالع من البيت ما وحالج تتولهين عليه
عبير: ههههههه ايه مو ريلي ومن حقي اوله عليه
محمد: ايه من حقج
عبير: محمد عاد اونك تقلدني
محمد: اشدعوه عااد اقلدج هههه
عبير: محمد عااد
محمد: هههههههه خلاص انزين ما برمس شراتج.. ياخي رمستكم تعيبني شو اسوي يعني ..
عبير: بس رمستنا تعيبك يعني
محمد ابتسم ورمس بحنان: كل شي فيكم يعيبني
عبير: اييه هذا هو الكلام
محمد: ههههه .. انزين الغاليه ..
عبير: ممم محمد .. وانا اقرى الجريده شفت امريكية الشارجه منزله اعلان عن التسجيل
محمد: انزين.. وشو مكتوب؟
عبير: يعني شروط التسجيل وهالامور .. لازم فجر من احين وجدامها اسبوعين عشان تسجل
محمد: انزين هيه متى بتي؟
عبير: ع بداية الدراسه اعتقد.. بس هم يبون صورة جواز وصور شخصيه وخلاصة القيد.. يعني عادي اتطرش اوراقها بالفاكس والصور الشخصيه عندي مو مشكله .. ماخذه صورتها من جريب فاجازة نص السنه وبسويلها نسخ
محمد: خلاص ما يهمج .. انا بدق وبسأل ان شاء الله .. وانتي رمسي فجر وخليها تطرش ع فاكس مكتبيه ..
عبير: خلاص اوكي.. الحين بتصللهم وبرمسها
محمد: اوامر ثانيه
عبير: ههههه تسلم بوجاسم.. دير بالك ع نفسك
محمد: ان شاااء الله ..
عبير: يلا عيل مع السلامه
محمد: فمان الله

ومن سكرت عبير عن محمد على طول اتصلت الكويت ورمست اختها فجر عن التسجيل .. وقالتلها شو المطلوب منها ..

****

العصر.. كانن البنات متكفلات حد يغسل الثياب وحد يكوي وحد ينظف القسم .. مي وساره لقطن كل الثياب وسارن صوب الغسالات فغرفه فالفله حذال الستور وفيها طاولة الكوي وحدايد تعليق الثياب جنه دوبي..
وريم تكفلت بالكواي.. ومها ومهره ينظفن قسمهم ..

اما ناعمه.. كان عليها ثيابها وثياب ريلها وعيالها والكوي بعد .. والتنظيف سوتله طاف ..

وعند الغسالات..

ناعمه: ايه يلا خوزن ثيابكن
مي: فكينا من الصدعه نحن يايين قبلج ..
ناعمه: عنبوه حاطات الثياب فالغسالتين
ساره: جي نحن وحده ولا ثنتين
ناعمه: اووهوو .. ومتى بتخلصن يعني ..

ساره تمت تتهازب ويا ناعمه .. اما مي كانت تلعب بالرغوه وتشلها بايدها وتنفخ ويتطاير فالهوى .. وبالعماله لفت صوب ساره اللي عاطتنها ظهرها وناعمه اللي كانت مجابلتها. ونفخت بقو طارت الرغوه ع ويه نعوم .. ونقعن مي وساره من الضحك ع شكلها..
طلعت ساره ثيابهم من الغساله وحطتنهن فالطش تغسلهن بالماي قبل ما تحطهن فالعصاره ويلست ع الارض والطش جدامها وهيه اتغط الثياب
ميوه كانت تضحك عليها ..
وناعمه تحط الثياب فالغساله و طربانه ع صوت ساره اللي متخيله عمرها نانسي عجرم جدام طش الثياب ويالسه تغني اه ونص ..
ناعمه: بعد مب هينه سويره ..
ساره زعجت: بلااني بعد
ناعمه: بسم الله سكنهم في مساكنهم..قلت مب هينه ... صوتج حلو
مي: هههاااي اول مره نعوم تقول شي زين عنا
ساره: مايهمني رايها .. واثقه من صوتي
ناعمه: ماالت عااد ..
مي: اووهو بيبدى الزعيج .. ساروه غني انتي وطنشي..

وكملت ساروه غناها .. ونعوم تغسل وتحاول قد ما تقدر انه الفودر ما يصك ايدها .. وكساعه تمسحها بمنشفه ..
ومي تطالعها بنظرات استهزاء وتطالع ايدها اللي مبلله كلها بالرغوه ..

مها ومهره .. كانن فالصاله يرتبنها ويمشن الزجاج .. ودشن الحجر يخمنها..
وريم كانت ويا يدتها ومايد وجاسم وينكتون على اللي مستوي فالبيت ..
*****************
(الأربعا) 14 يوليو 2004
*****************



الصبح كانن البنات لابسات وجاهزات عشان يسيرن عند امهم كعادة كل ويكيند.. يلسن في الصاله ويا يدتهن .. وفي هالوقت نزل مايد اللي كان توه ناش من النوم..

مايد: السلام علييكم ..
وردوا كلهم السلام ..

مايد تم يطالعهم ويطالع الاغراض اللي حذالهم..

مايد وهو مثل المغتبن: وين بتسيرون ؟؟
مي: عند امنا
مايد: سرتوا الاسبوع اللي طاف تراكم
ساره: وكل اسبوع بنسير ..
مايد بنبره حزينه: بتخلوني بروحي
ام سيف: ويدي ميود تراك امبونك كنت اروحك اهنه..ونحن ترانا وياك..
مايد وهو يطالع خواته ويرمس وهو متردد: عادي اسير وياكم
جاسم: هيه والله ليش ما تي ويانا
مها: حرام جسوم محد عنده اهناك نحن كلنا بنات خله ايي ويانا
ام سيف: لا لا .. لا يسير ولاغيره ماله حايه
ريم: سير شاور امك ماعليك
نش مايد يربع صوب التلفون يتصل بامه ..
ساره: وين بتحطونه روحه البيت مافيه مكان..
ريم: ماعليه مابيرقد في سريرج اخت ساره لاتخافين .. بيي عندنا في الحجره

مايد كان يتصل بامه ماترد .. وعقب اتصلبها على تلفون الدوام
امل: ناعمه اندوج هذا مايد يباج
ناعمه: منو مايد ؟
امل: ولدج
ناعمه وهي تشل سماعه التلفون: غريبه شو يبى
ناعمه: الوه
مايد: هلا اميه
ناعمه: هاه .. بلاك
مايد: ابا اسير ويا خواتي
ناعمه: وين تسير وياهن ؟
مايد: بيتهم
ناعمه: ميود استخفيت انته شو يوديك بيتهم
مايد: عيل اتم في البيت اجابل عفروه الوغده ..
ناعمه: ميود عن حركات اليهال وايلس في البيت وتادب
مايد: انا ابا اسير وياااااااهم
ناعمه: اوووف اسميك حشره انجلع وياهن فكه منكم كلكم ..
وسكرت السماعه في ويهه ..

مايد: اميه قالت اسير ..
ام سيف: وابوك؟
ساره: ما بيقول شي يوم نعوم موافقه
مي: ميود بعدك وااقف.. سيير بسرعه حطلك ثياب ليومين.. الدريول احين بيي.

هز مايد راسه بالايجاب وركض فووق ولحقه جاسم..توجه لغرفته وقام يطلع ثيابه من الكبت وفازعه جاسم وهم يايين بيطلعون شافتهم عفرا اللي واقفه عند باب غرفتها...
عفرا: ميود وين بتسير؟
مايد: مب شغلج
جاسم عيب عليها : حلييلج تمي رووحج يا الشريره.. مايد بيي ويانا بيت امايه..
عفرا: صدق ميود
مايد: هيه صدق.. شي يعورج
عفرا: وشو بيعورني يعني.. فكه من حشرتك .. يلا روحوا

اطالعوها مايد وجاسم وهم رافعين حياتهم.. ونزلوا تحت على صوت الهرن.. سلموا كلهم على يدتهم وروحوا..

****

وفي بيت بو راشد .. كانت عليا وامها يالسين فالصاله وقت ما وصلن البنات.. وظهرت عبير وبناتها يوم سمعوا الربشه ..
وتموا يسولفون .. ويوم فتحت ريم سالفة السفر ..

عليا: شوووووو؟؟ بتساافروون؟؟ متــى؟؟؟
ريم: بسم الله بلاج امايه صرختي جيه.. زيغتيني
عليا: ووين بتسيرون؟
مي: اميه هدي شوي .. السفر بيكون بالاحد.. وبنسير استراليا ان شاء الله
عليا: متى هالكلام وليش ماخبرتوني ؟
ساره: ابويه خبرنا اول الاسبوع .. وقلنا احسن نقولج فيس تو فيس ونقنعج..
عليا: اذا بتسيرون انتوا كيفكم بس جاسم مايسير
جاسم: شو ماسير انا ابا اسافر .. انتوا كله تودونا العمره ولا صلاله .. بس مليينا
مي: اميه كيف جاسم مايسير.. خليه ايي يستانس بدال حكرة البيت..
عليا: هذا مريض وين بتودونه وانا ومب وياكم منو بيراعيه وبيتحمل عليه
جاسم: انا ريال ومب مريض واقدر اسير كل مكان
ريم: امايه انا ماقصرت بجسوم من صغري وانا اهتم فيه .. وطول اسبوعين هو تحت عيني .. احين يعني انا مابرعاه وما بتحمل عليه
عليا: حتى ولو انا اعرف جاسم مايتحمل
جاسم: اوووووه انا قلت انا بسير وانا ريال واتحمل
عليا: جسوم لاتغصصبي
جاسم اطالع امه وهو معصب وزقر على مايد وطلعوا من الصاله..
ام راشد: عليا .. ولدج ماعليه شر ريمان وخواته وياه وابوه وياه هن هب بروحهن
عليا: قلبي مايهنالي..
ريم: امايه تراه هو اهنه بعد بعيد عنج وانا اشوفه واتابعه.. وبعدين لا تمين ترمسين جيه عنه .. الولد بيتعقد من كثر ماتطرون انه مريض..
عليا: رييم من هنيه لاستراليا فوق 12 ساعه .. هو ساعتين فالطايره مايحتلمها وييين هالكثر بعد.. والله خايفه عليه
ريم: اماايه كل شي ع وكل الله
عليا: ونعم بالله.. بس..
مي: لا بس ولا شياته .. اماايه عااد.. نحن ريم يوم واحد تمينا ع راسها لين اقنعناها .. لا تمين انتي معاندتنا ..
عليا: كييفكن انزين خلاص لا تحنن ..
ام راشد: وثرها ريم ليش ماكانت طايعه؟
ريم: ماعرف امايه.. امبوني ماعرف كيف بسير ويا ابويه وحرمته وبنتحملهم .. بس خواتي فخاطرهن السيره وجسوم استانس واايد.. مابا اخرب عليهم .. وعقب بروحي قلت احسن عسب نغير جو ..
ام راشد: هيه زين انزين .. تحوطوا .. كم بتحبسون عماركم عن ابوكم انتو..

عليا رمقت امها بنظره .. وتنهدت وسكتت .. وعقب تذكرت شي ورمست بجديه

عليا: المهم مايد ليش ياي وياكم مارمت انشدكم جدامه
ريم: بيتم عندنا .. امايه ميود طيب والله على نياته اول ظلمناه بس اكتشفنا انه غير.. احسنهم هناك ..
مي: ريمان لاتغلطين فيه حد زين في هذاك البيت بعد
عليا: منو بعد
مي: نجمه
الكل: ههههههههههههههه
عليا: الا ع طاري نجمه اشحالها ؟
مي: بخير هذيج المره تتخبر عنج ..
عليا: حليلها نجمه عمر والله .. من متى وهيه تخدم عند ام سيف..
مي: نسينا يدوه حليلها.. خلاص شكلها هدنه مستويه امبينا ..
عليا: هههههه ليش يعني ..
ساره: اول الايام كنا نتلاسن وياها .. بس عقب يومين غمظتنا.. احس انه يدوه ضاعت هيبتها .. عيزت خلاص واحسها متندمه على اللي سوته
مي: انا بعد اشوف جييه.. تعاملها ويانا غير .. تراعينا فكل شي
وقامن البنات يحكن لامهن ويدتهن عن مواقف ام سيف وياهن ..
عليا: حليلها ام سيف
ام راشد: عقب كل اللي سوته وياج!
عليا: يا امايه كان ماضي وانتهى.. اناا مابتم شاله فقلبي طوول عمري على الناس اللي اذوني..
ريم: فديتج يا امايه والله انه قلبج كبير
عليا: المهم اني ماباكن تغلطن على حد .. حتى ناعمه مالكن حايه فيها ..
ساره: لأه لأه .. دي نعمة الله محدش هايربيها غيري انا يا امه
عليا: ههههه الله ياخذ عدوج .. ساروه عيب
مي: ماعليج انتي يا اميه.. نحن نرتب امورنا هناك .. مره نوددها فينا وعقب نصدها ههههه
ام راشد: شو كوره هيه
تمن البنات يضحكن ..
عليا: والله يا بناتي انكن سوالف .. خلاص سكتن هاكوا مايد ياي ويا اخوكن .. لاتغلطن ع امه جدامه..
مها: ماعليج منه ها .. بروحه مستوي يطنز ع امه
ريم: والله يا امايه انه مؤدب ولا يرفع حسه على حد .. بس مرات اتيه هفه ويرد على امه هذاك الرد .. خربنه خواتي هههه
ساره: انا مالي شغل
مي: الا كل الشغل من وراج انتي..
عليا: هيه يا انتن الثنتين عاينتكن وخابزتنكن .. كل شي من وراكن ..
ساره ومي يطالعن امهن ومبطلات عيونهم ع الآخر كأنه مصدومات .. وردن يطالعن بعض ..
ساره: ميوه .. شفتي كيف امج تغيرت علينا
مي: هيه اشوفها .. الله يا الدنيا .. استوينا نحن الخراب الوحيد .. وينكم يا ناس تعالوا سمعوا اميه شو تقول عنا .. واخزياااه واخزيااه..
ساره: واخبزتاه واخبزتاه

واشتل المكان من الضحك على ميوه وساروه .. ودارت امبينهم وايد سوالف وحكن الهم عن شردة البشكاره وكيف انكرفن امس بالشغل وحمدن ربهن انهن ين بيت امهن وطاح عنهن الشغل.. وجي لحد ما يا مانع ومحمد وبدت سوالفهم تكثر وتزيد لين يا وقت الغدى .. وبعد الغدى .. استغل مانع لمتهم كلهم وقال بيخبرهم الخبر اللي اتلقاه من يومين ..


ام راشد: والقعتيه متى بيودونك
مانع: هههه بلاج جي زغتي .. نص ثمانيه ظنتي تبدى الدوره..
عليا: يا ويلي يا مانع .. مانروم نصبر عنك
مانع: يالله الا ست شهور هن
محمد: ماعليه زينه الدورات ترقي الواحد بسرعه .. عاد شد حيلك ..
مانع: ان شاءالله خير
محمد: اسميهم ادبوك عسب ما تحط فبالك التقاعد مره ثانيه .. بعدك فاول الطريج
مانع: هههههه تغربلنا فالدرب من هنه لبوظبي كل اسبوع والحلال منو بيجابله..
محمد: خل عنك ها المكر .. ابويه الله يطول فعمره مب مقصر وراشد اخويه ترا بعد مب مقصر لا فعزبته ولا عزبتك انته وابويه والضواحي بعد دوم يخطف عليهن..
عليا: حليله راشد
مانع: انزين وايد عليه راشد ها كله .. لازم اساعده
محمد: مايا واشتكالك هوه .. انته عندك شغلك والتزم به ..
مانع وهو يطالع اخوه وفيه ضحكه .. دوم محمد ينقهر يوم يسمع من مانع انه يبى يتقاعد من الجيش .. مانع كل تفكيره فالعزبه والرجاب والركض..مايقدر يستغني عن البوش .. والحين كيف بيصبر ست شهور كاملات..

احلام: يالله ست شهور مده طويله
مانع: الله كريم ..
ام راشد وهي تحسب: يعني شهر واحد انته بتخلص الدوره
مانع: عاد مادري ما حسبت
مي: هي لين واحد ست شهور بتخطف ..
ام راشد: بيعطونك اجازات والا؟
مانع وهو يحط ايده على جتف امه: عاد مادري والله ..
ام راشد حطت ايدها ع راسه وقربته منها وحبته ع راسه ..
ام راشد: فديتك يا وليدي .. ماروم اصبر عنك .. كيف جي يشلونك عني
مانع: ام رشود مااعليج ست شهور بيخطفن مره وحده
محمد: لو سمعك راشد ..
عليا: ههههه ماعليه هو من حد ..
ام راشد: برايه خلوه يقول اللي يباه .. بيروح عنا ..
مانع تم يضحك على اخوانه .. والبنات يشوفن مانع ويبتسمن ع تصرفاته.. وام راشدغصب عنها دمعت عينها ..ومانع تم يستعبط على امه عسب تغير من مودها الحزين .. وعليا تشوفهم وتخفف على امها .. ومحمد يعطي مانع عبارات التشجيع ويحثه على ها الدوره ..
والبنات قامن يتهامسن رباعه .. هن بعد ما يصبرن عن مانع .. كيف بيغيب عنهم ست شهور وما بيلسن وياه ويستعبطون رباعه مثل كل مره ..
وبعد ما تفرقت اللمه تمن البنات ويا مانع ..
ساره: زين انه الدوره فنص ثمانيه .. يعني بنلحق نشوفكم قبل ما تسير
مانع: هي انتوا بتسافرون وبتردون وأنا بعدني فالبلاد
مديه: يالله عنك يا عمي بتخلينا ..
مانع حط ايده ع راس مدوي وتم يلعب بشعرها ويبتسملها..
مي: عااد تأمر وتدلل علينا ها الشهر انته .. ويوم نحن محد بنات خالي محمد تحت امرك ..
احلام: هي تكرفنا وانتن مرتاحات
مانع: ههههههه برايه شو بيستوي عليكن .. عمكن لازم تخدمني
احلام: لأ لأ لاتبدى تقطعني بليز
ساره: ههههه احسن الدور عليج .. اخر مره طحتو فيني انا ..
مي: لا ها المره بنخلي اليلسه وديه ..

وتموا يسولفون .. ويخبرهم مانع عن مغامراته فالكليه وشرداته عسب يرد راس الخيمه .. وكيف يدبلونه فالميدان والبنات مستانسات ع سوالف مانع وربعه ويضحكن عليهم ..


****

رد: قـــلـــوب تـــحـــت الـــمــجـــهــــر**
 

بعد مارجع نايف من دوامه يلس يتغدى ويا امه وخواته .. لكنه كان مشغول البال وابدا ماشارك خواته سوالفهم وظحكهم .. وخلص اكله بسرعه وصعد غرفته .. ولما كان على الدري زقرته امه ..

مريم: نايف
نايف: نعم امايه
مريم: بلاك ماكلت ؟
نايف: بسني الحمدالله وعوني لصلاه العصر ..

ركب الدري وكملت مريم كلام ويا بناتها
مريم: من رمسته عن ريم وهو متخادي
لطيفه: أي ريم؟
مريم: بنت خالكم
اسما: شو بلاها؟؟
مريم: ابا اخطبها لنايف ورمسته عنها
لطيفه: صدق ؟؟ وليش ماخبرتينا
مريم: احين تراني اخبركم
اسما: وانتي متى مخبرتنه؟
مريم: اليوم الصبح .. مادري بلاه الحين.. ياخوفي يقول مايباها ومحطي حد غير فباله
لطيفه: لا عاد منو الغبي اللي يضيع منه ريم ..
مريم: بعد ماندري باللي فخاطره.. اخوكن يتلوم ومابيقولنا ادريبه
اسما: خله شو يعني بيبدي بنات الغرب على بنت خاله
لطيفه: امايه انتي شو قلتيله بالضبط .. كيف اتلقى السالفه؟؟
مريم وهيه تتذكر ملامح ولدها الصبح وخبرت بناتها بالحوار اللي دار امبينهم وقت ما قالتله عن ريم ..

نايف: ريـــم!!
مريم: هيه بنت خالك ..
نايف تغير شكله .. مايتذكر ملامح ريم ولا يعرف أي شي عنها..يتذكرها يوم كانت صغيره لانها كانت اقرب وحده له ويتذكر كيف كانوا ويا بعض بس ها من زماان الحين كل شي تغير .. تذكر ملامح البنت اللي واقفه كانت ويا لطيفه اخته .. هو ماسأل منو منهن هاي بس من طرتله امه ومن غير سابق انذار عن ريم على طول تخيل شكل البنت اللي كانت واقفه ويا لطيفه .. ماعرف شو يقول لكنه تم ساكت..
مريم: ها نايف شو قلت
نايف: ماعرف اميه.. خليني افكر
مريم: شو تفكر بعد..
نايف: شو شو افكر.. لازم اعرف اذ انا مرتاح من السالفه او لا ..
مريم: من اسبوع وانته بس على فكرة العرس مارديت .. الحين يوم قلنالك العروس مادري شكثره بتلطعنا
نايف:يا اميه
مريم: لا اميه ولا ابويه .. مابتحصلك شرات ريم تراك..

قام نايف وترخص من امه لانه بيسير الدوام .. ماعلق على اخر جمله قالتها امه .. بس تم حاير بفكره ..

مريم: الله يهدي سرك يا وليدي وتفرح قلبي ..
لطيفه: اميين .. يا امايه قلوبنا كلنا بتفرحله جنه خذا ريم ..
اسما: يعني معقوله حد فباله ومايبى ريم بس متلوم يقولكم
لطيفه: لاماظنتي .. نايف مب جيه ..
اسما: ياما تحت السواهي دواهي
مريم: محد الداهيه غيرج انتي
اسما: حرااام انا بريئه
لطيفه وهيه تفكر: انا بسيرله وبشوفه
مريم: هيه امايه طالعيه .. حاولي تعرفين شو فخاطره
لطيفه: ان شاء الله امايه.. خبرتي امايه عفرا وخالي سيف؟
مريم: لا يا امايه وين اقولهم واخوج ما ردلي خبر
لطيفه: هيه .. خلاص انا بسيرله
اسما: انا بسير وياج
مريم: انتي انثبري محلج.. بتخربين كل شي .. تمي ولا لج حايه تسيرين
اسما سوت عمرها تمسح دموعها : مشكوره يابنت عفرا ايي منج اكثر ..
مريم: وييييه ع طاري امايه ماتصلت اتخبر عنها
اسما: مستحيل ماصدق .. لا لا مب معقول .. انتي مارمستي يدوه من اصبحتي لين احين؟
مريم: اتصلت فيها الصبح مالقيتها.. كانت ظاهره
اسما: هيه انا اقول والا انتوا لازم ترمسون 3 مرات في اليوم الصبح والظهر والعشا تقولون مضاد حيوي
مريم شلت كرتون الكلينكس اللي حذالها و فرت بنتها فيه .. اما اسوم كانت تظحك على امها ..

وفي الصوب الثاني من البيت كان نايف في حجرته و طايح على سريره .. سمع دق ع الباب ..

نايف: منوووو؟
لطيفه: انا لطوووف
نايف: تعالي لطيفه الباب مفتوح
دخلت لطيفه وحصلت الغرفه مظلمه و بااااارده ..
لطيفه : انا من دخلت ياني رقاد وانته مارقدت لين احين
نايف: لا مارقدت بلاج ؟
وقفت لطيفه عند مكتب الكمبيوتر وسندت ايدها عليه: اللي ماخذ عقلك
نايف ابتسم لها وقال: منو يعني؟؟
لطيفه: ريمان بنت خالي سيف
نايف: امايه خبرتكم!!
لطيفه: هيه توها ..
نايف ابتسم وعدل من طيحته وحط اديه ورا راسه وهو متاكي على الشبريه ..
نايف: مسرع ما نشرت الخبر امايه
لطيفه: حراام ماقالت لحد بس انا واسوم
نايف: البيت كله درى ..اخافها تخبر امايه عفرا
لطيفه: ما بتخبر حد فبيت خالي الا يوم انته بترد عليها ..
نايف: اهاا ... زين زين .. ماباها تخبرهم وتحطني فالامر الواقع
لطيفه: لا مب لها الدرجه عاااد.. اميه تباك تعرس صح لكن برضاك

سكت نايف .. وتنهد ع الخفيف ..

لطيفه: ها شو وراها ها الآآه
نايف: ماعرف
لطيفه: يعني في احتماليه انك ماتوافق على هاالسالفه
نايف: ماعرف والله يا لطوف (واتذكر شي) لطووف
لطيفه: هلا
نايف: كيف شكلها هيه؟؟
لطيفه: يالله يانايف شايفنها تراك ذاك اليوم .. يوم كنا بيت خالي
نايف: يعني هيه اللي كانت وياج واقفه
لطيفه: هييه
نايف: اهاا
لطيفه: شي من صوووبها (وغمزت لنايف اللي ضحك عليها..)
نايف: شو صوبها ما صوبها.. البنت حتى شكلها بعدني ماتذكره زين
لطيفه: مب مهم الشكل المهم الصفات وريمان ماشالله عليها مافي منها
نايف: هيه بعدها على حدتها وهيه ياهل
لطيفه: هههههه تتذكرها يعني يوم كنتوا يهال
نايف: يعني
لطيفه: مممم ماقولك انها مب حاده لكن مب فكل الاوقات.. احس ريم اكبر عن سنها .. شاله اخوانها شل .. يعني وحده مسؤوله رزين..صدقني تناسب طبعك
نايف: مادري والله عمري مافكرت اني باخذ وحده من اهلي.. ماكنت محطنها فبالي
لطيفه: خقاق تراك يعني هيه اللي محطتنك فبالها
نايف: ههههههه وياراسج ..
لطيفه: هاا شو الحين؟
نايف: شو شو الحين
لطيفه: اف ناايف تحرك قول شي عنبوك جنك انته اللي بتنخطب
نايف: وابويه شو انا اللي انخطب..
لطيفه: اشوفك .. شوف المفروض انته اللي ترمس وتقول ابا فلانه مب تتريا امك اتي تاخذ رايك
نايف: يعني الحين المطلوب اني احسم السالفه بهيه او لا
لطيفه: هيه
نايف: من غير حتى ما افكر
لطيفه: نايف طول اليوم وانته تفكر..
نايف وهو يبتسم : انزين لطوف رمسيني عنها اكثر
لطيفه: اااااه بصيص امل يعني ..
وضحكت لطيفه على اخوها اللي شكله بدى يرسم خطط فباله وتجدمت لين عنده وتربعت ع سريره وبدوا يسولفون فامور كثيره منها تخصهم وهم يهال ومنها تخص ريم ..و نايف ..
ساعه من الحوار والحديث وبعدها روحت لطيفه عن اخوها اللي تم سرحان فذكرياته وتخطيطاته لمستقبله لو كانت ريم من نصيبه.. بدى يفكر فالموضوع بشكل جدي .. وناوي يحسمه بسرعه..


******************
(الخميس) 15 يوليو 2004
******************

الصبح فبيت بوراشد .. بنات عليا قامن من وقت عسب يسيرن دبي ويا امهن ويتشرن للسفر ..مايد وجاسم ماساروا وياهم وتموا ويا مديه واحلام يالسين ويسولفون وياهن ..

احلام تمللت من سوالفهم اللي كلها كانت عن أيدد أشرطة البلاي ستيشن وافلام الكرتون .. قامت من عندهم وسارت عند امها وحصلتها فالمطبخ التحضيري تسوي عصير برتقال طازج ويلست تسوي وياها ..

احلام: اميه ما بتودونا مكان ها الصيف؟
عبير: مادري حبيبتي ..
احلام: شو ها .. كل صيف ما نسير مكان .. حتى العمره من سنتين ما وديتونا ..
عبير: ابوج عنده اشغال .. وغير ها محد قالكم السنه اللي طافت ماتروحون وياي الكويت .. كان وناسه ..
احلام: اميه نبى سفره عدله .. يعني جي نفس بنات عموه ..
عبير: انزين ابوج ما يقدر يسافر بروحه لازم حد ويانا .. عشان جي ما نقدر
احلام: انزين ما بنتعبه نحن .. فالسفر هو ما بيسوق بيأجر دريول عادي ..
عبير: قولي لابوج انزين ..
احلام: ادري قيس الا برمس .. محد بيسمعلنا .. ابويه بيتعذر بالشغل وبيقول ريوله تعوره ما يقدر ..
عبير: احلام .. ابوج صدق ريله تعوره ما يقص عليكم ولا ماشفتيه يروح ويرجع في الاغلب ويا الدريول .. وشغله فالجريده وايد وتعرفين انه مايقدر يخليه ..
احلام تنهدت: ادري انزين .. بس والله ملل فالاجازه
عبير: حمدي ربج انتي كل اسبوع رحتي يا الشارجه والا دبي .. وغيرج ما يظهر من البيت ..
احلام: الحمدلله انزين ما قلنا شي .. بس نبى نسافر نهج من ها الحر ..
عبير: اقترحوا ع ابوكم وشوفوا رايه ..
احلام: بخبر مدوي وبترس راسها عشان نقول لابويه ولو اني ادري انه محاولاتنا بتكون فاشله ..

ضحكت عبير ع رمسة بنتها .. وعقب ما خلصن من العصير حطنه فالثلاجه .. وسارن يلسن فالصاله ويا ام راشد ..

ام راشد: بلاج احلام ماكله فواد امج ..
احلام: امايه يرضيج انتي يرضيج
ام راشد: شو يرضيني بعد
عبير: هههه ماعليج منها عموه.. حاشرتني من يتني المطبخ ولين الحين .. تبى تظهر تحوط
ام راشد: هاكو الحوي انزين .. سيري خميه
احلام: اماايه شوو هاا .. اقولج ابا احوط تبشكروني
ام راشد: ههههه عيل شو نسويبج.. تريي على ابوج بروحه هو بيظهركن من غير ماتقولن له..
تنهدت احلام وهي تتطالع امها ..
ام راشد: وانتي شله ماسرتي ويا بنات عمتج اليوم..تراهن سايرات دبي
عبير: لا شو ادور تسير تزاحمهم.. ماعندهم مكان
احلام: الا عطاريهم .. عطيني اميه تيلفونج بدق اشوفهن شو سون ..
عبير: ما مداهم يسوون شي
مطت احلام التلفون من ثبان امها وهي تضحك ..
اتصلت ع تيلفون ساره اللي ردت عليها وهي تضحك ..

احلام: بلاج تضحكين ..
ساره: علايه فديت روحها نكته ..
احلام: مسودة الويه ..

في السياره .. لفت عليا على ساره اول ماسمعتها جي ترمس..
عليا: منو ترمسين
مي: اكيييد احلام .. اميه لاتخافين نحن ماناخذ راحتنا فالرمسه عنج جدام أي حد..
عليا: والله انكن ..
ساره ترمس اللي وياها فالسياره: هدوا شويه خلوني اسمعها شو تقول .. ها حلام..
احلام: وين وصلتوا ..
ساره: شوي وبنوصل دبي ..
احلام: زين زين .. وها قلتن لأمكن عن اللبس
ساره: سكتي يبوج .. ساعه لين اقتنعت ..
احلام: ههههه لازم .. استخفيتن مره وحده وماتبن تلبسن عبي فالسفر
ساره: ماعليج انتي نحن مسيطرين ع الوضع تمام
احلام: زين زين .. خلاص عيل وافوني بآخر مستجداتكم
ساره: اوكي مراسلتنا ..
احلام: يلا بباي
ساره: باي ..
سكرت ساره التيلفون وهي تضحك على احلام.. لفت على مي وقالتلها الي دار بينها وبين احلام ..

ربع ساعه ووصلوا لستي سنتر .. طبعا بعد ما نزل الكل .. بدوا يجولون رباعه .. وعقب انقسموا لفريقين ..
عليا تمت ويا التوم مها ومهره وادورلهم لبس..وفنفس الوقت تشوف لجاسم ..
اما البقيه .. ريم وساره ومي .. تجولن بروحهن يدورلهن ع اللبس الي راكبات فيه روسهن الا ياخذنه من بعد محاولات في سبيل اقناع امهن ..
وفي واحد من المحلات ..

ريم: اييه الحينه انتن صدق ما بتلبسن عبي فالسفر
ساره: ريموه امج وافقت بالزور لا تمين تغصصيبنا وبعدين نحن سايرين نستانس..
ريم: انزين تستانسين مب تفرين دينج
مي: رييم ترانا اللي خذناه شفتيه علينا مب ضيج .. وغير ها ماخذين بالطوات حق البناطلين ..
ريم: انا مادري جان ابويه بيخلينا نلبس ع هوانا.. ومادري جان بيطيع انه مانلبس عبي ..
ساره: بس لاه .. ماعليج انتي من ابوج .. يوم حرمته تنزل السوق فل ميك اب بيلس يتشرط ع لبسنا فالسفر..
مي: هيه والله صدقها .. وبعدين ساتر لبسنا احسه عادي ..
ريم: الله يخس عدوكن .. خربتني وياكن وخذت شراتكن ..
ساره: ماعليج ماعليج .. انا اشوف الجاكيتات هاي دورها دور العباه..عادي
ريم: ماعرف والله .. انزين مابا كله بناطلين .. باخذلي كم تنوره ..
مي: زين .. يلا خلنا نشوف ..

فها الوقت .. اتصلت عليا بريم تشوف وين هن .. واذ محتايات شي ..

ريم: يعني شوي بنشوف مني مناك ..
عليا: انزين .. اقولج ريمان .. لقيت بلوزات حلوه شتويه لجاسم.. اخذهم
ريم: همم اكيد برد هناك ها الوقت..هي خذيله ..
عليا: زين ..
ريم بتردد: امييه
عليا: ها
ريم: خذي بعد لمايد
عليا: ماايد !
ريم: هي امي .. مايد اخويه .. خذيله نفس جسوم .. متلعقنه وايد احس بيستانسون
عليا ابتمست لرمسة بنتها .. شكلهم خذوا على اخوهم وايد.. هي ماتقدر انها تمنع ها الشي .. عيال سيف مالهم أي ذنب باللي صار.. ولا حتى امهم ..
عليا: ان شاء الله.. بس كم سايزه؟
ريم: همم اكبر عن جسوم بقياس اعتقد ..
عليا: خلاص اوكي ..
ريم: تسلمين اميه ..
عليا: الله يسلمج غناتي..

سكرت عليا التيلفون .. تمت قابضه البلوزه وهي تتخيل جاسم وهو لابسنها .. رفعت راسها وشافت البلوزات اللي جدامها .. دورت قياس مايد وشلته ..
وريم من بعد ماسكرت .. فكرت انها تتصل على تيلفون مايد اخوها .. تشوفهم شو يسون .. واذ يبون شي ولا ..
رد عليها مايد وهو على عجل ..

ريم: ليش شوفيك ؟
مايد: ريمان ابويه واميه برع البيت يهرنون
ريم: ليش؟
مايد: يبون يودوني المنار وياهم يتشرون للسفر
ريم: اها .. زين وجاسم وين ..
مايد: هاذو ويايه .. بنسير رباعه .. قبل شويه اميه مسكره عني وتقولي اونهم بيمرون علينا .. والحينه وصلوا
ريم: زين والله افتكروا فيكم ..
مايد: هيه
ريم ضحكت على مايد اللي يرمس وهو مستعيل .. سكرت عنه وركضوا مايد وجاسم لبرع بيت بوراشد.. كان سيف موقف سيارته فالسكه .. يتريا مايد يظهر ..
ركبوا جاسم ومايد السياره ..

سيف: بعد جاسم يا ..
جاسم: هيه عيل شو مب ولدك .. خذلي ثياب نفس ميود ..
سيف: حاضرين ..
ناعمه: ييه يتأمر بعد ..
جاسم: ها شو قلتي انتي
ناعمه: شو شوقلتي انتي .. اسمع جسوم لا تقل ادبك ..
مايد: امييه شو ها وقت ضرابه احين
ناعمه: هيه انته .. تعلم وطول لسانك
سيف: عيب يا عيال
جاسم يقلد ابوه وهو يقول "عيب يا عيال"
ناعمه: ها يا سيف شوف بعينك قلة الادب
جاسم: انتي اسكتي يوم الرياييل بيرمسون..

سيف غصبن عنه ضحك .. واطالعته ناعمه بنظره خلته يوقف ضحك..

ناعمه: عاد مادري شو بنحصل فيه المنار..
سيف: يالله بتحصلين ..
ناعمه: بنشوف ..
سيف: بعد البنات يبالهن سيره يتشرن
ناعمه: ماعليك منهم سايرات دبي ويا امهن اليوم مب انا ..
سيف: منو خبرج انتي؟
ناعمه: ميود قالي..
جاسم لفت على مايد اخوه وعقد بحياته ..
جاسم: انا كم مره بعلمك لاتحجي عند امك شي
مايد: هههه مايخصني هيه سألتني مساعه فالتلفون قالت وين البنات قلتلها فدبي
ناعمه: والحين يعني انته بتحاسبه
جاسم: انا كم مره اقولج يوم يرمسون الريااييل الحريم يسكتن

سيف لف على ناعمه .. كان يحاول انه يقاوم ضحكته لكن بعد ها المره فشل .. وناعمه تغصصت من ريلها ..

ناعمه: ماعليه جسوم .. انا اراويك عقب ..
جاسم: يلاا سوو طاااف..


ونزلوا المنار وابتلشت ناعمه يوم تبى تقايس لعفرا لبس اييها جاسم وهو ماخذ كمن بدله لعفرا ويفرهن فويها ويروح.. ومايد يحوط يدورله شي يعيبه .. وعقب ما خلصت ناعمه مشاري لعفرا .. اتفرغت لمايد وجاسم .. وقامت اطلعلهم بدل وتقايس عليهم .. في منهن دشن مزاج جاسم وفي منهن قام يتحرطم وهو يلبسهن وناعمه بتموت من الغصه .. اما سيف كان فستار بوكس يتريا ناعمه تخلص من العيال ..


*****************
(الجمعه) 16 يوليو 2004
*****************

طبعا كعادة عائله بو راشد .. التجمع يكون بيت العايله .. وتغدوا ويلسوا يشربون شاي .. ووقت صلاة العصر .. ردت شيخه بيتها .. وتزامن دخولها البيت ويا ولدها سلطان .. نزل من السياره ودش البيت ..

شيخه: سلطاان ..
سلطان: هاااه ..
شيخه: يا وليدي متى بيعتدل حالك انته و
وقبل ما تكمل رمستها ..
سلطان: انك لاتهدي من احببت لكن الله يهدي من يشاء
شيخه: والنعم بالله لكنه ربك بين الحرام والحلال وانته تعرف زين انا شو اقصد.. وعنبوك اليوم الجمعه ع الاقل الناس يسيرون يسلمون على اهلهم وانته مول ما تنشاف .. ترد ويه الصبح وترقد وترد تظهر .. شو فندق البيت وانا مادري
سلطان: امايه الله يخليج مب وقته .. وتراني العصر اسير اسلم عليهم بعد شو
شيخه: جذاب يا الهرم .. الجمعه اللي طافت ماسرت
سلطان: كنت تعبان.. بسيرلهم ان شاء الله اليوم .. خلاص ارتحتي ..
شيخه: يا وليدي الصلاه .. هناااك المسيد هب فالبيت
سلطان طنشها وكمل دربه و اطالعته شيخه وهيه تصفق بايدها وتستغفر ربها ...

ها ولدها ومايهون عليها ابدا وماتحب تشوفه فها الحال اللي هو فيه وفها الدمار اللي بيضيعه .. تحب كل عيالها بنفس القدر بس سلطان عندها غير وماتباه يتم جذه.. وعقب صلاة العصر وع الساعه خمس تقريبا . نزل سلطان من حجرته .. ولقى امه يالسه فالصاله ..
تجدم سلطان وحب امه على راسها .. وضحكلها ..
شيخه: قم عني يا الخايس
سلطان: اووهو .. شو يرضيج انتي
شيخه: يرضيني يوم بتعرف ربك زين وبيعتدل حالك
سلطان: امايه انا بسير اسلم ع يدي خلاص مابا مواعظ

طلع من البيت بكل برود وركب سيارته وتوجه بيت يده ..
دش البيت ولقى يده ويدته يالسين.. سلم عليهم ويلس يتقهوي..
كان كل ما اايي يسلم يكتفي باليلسه العصر مره وحده فالاسبوع ويا يدته ويده فالحوي لانه يدريبهم انهم يلسون برع وهاجيه يفتك من الصدعه يسلم ويروح..

اما داخل البيت .. كانن احلام ومي وساره يلبسن وقيهن البيضا عسب يظهرن برع عند يدهن ويدتهن .. طلعن من الفله وعند الدري وقفن يشوفن الشخص الثالث اللي يالس ويا الشواب..

ساره: منو هذااك ؟؟
مي واحلام يطالعن بتركيز ..
احلام: مب مروان !
مي: لا .. ها الدااامر
ساره: اخييه .. انا برد عنكن
مي: ساروه ملينا من داخل .. خل يولي عنج
ساره: لا مابا .. برد داخل
احلام: وانا بعد
مي: جب حلامي يلا تعالي ويايه..
ساره: ازقرني يوم بيروح
مي: خلاص اوكي . يلا حلامي ..
احلام: ميوه هذا ماعرف كيف.. ماحب ايلس وياه فمكان واحد ينرفزني خقاق
مي: شعلينا نحن منه
احلام: اف منج
مي: حلام مليت من داخل وانتي تحيديني يلسة العصر ويا الشواب ماستغني عنها
احلام: هههه زين زين طوفي يلا ..

ووقت ما وصلن البنات صوب اليلسه .. سلمن ويلسن ..
سلطان قام بيروح .. ولا كلف على عمره انه يرد السلام حتى .. بس اطالع منو ها البنات اللي يلسن ..

سلطان: يلا عيل برخصتكم
مي باحتقار: شو حضرت الملائكه فرت الشياطين

سلطان اطالع مي فالوقت اللي هيه كانت معبسه بويها وتعيب ع سلطان .. رفع حياته وغصبن عنه ابتسم .. قفطت ميوه اللي وخت ع طول ويلست حذال يدتها عسب ماتشوف نظرات سلطان ..

احلام وهي تصاصرها: ماتستوين اذ ما مغطتي ها اللسان..تأدبي
مي: انسى انزين ..
سلطان:تامرونا على شي
ام راشد:مايامر عليك لا عدو ولاظالم ..
سلطان: يلا عيل فمان الله
بوراشد: الله يحفظك
ام راشد: سليطين عن الهياته والتغصيص بامك ..
سلطان يرمس وهو مروح: ان شاء الله ان شاء الله ..

وركب سلطان سيارته وطلع من البيت ..ومي تطالع يدها ويدتها ...

مي: عفانا الله .. شو مشكلته ها الريال!
بوراشد: شو تبينه يا امايه .. دومه جذه
ام راشد: زين بعد يوم نشوفه كل اسبوع.. والله يا ها الولد مغربل بامه .. مادري متى بيصلح حااله
احلام: اللي يشوف خوانه ما يقول ها اخوهم ..
بوراشد: خليفه ومنصور ماشالله عليهم رياييل ..
ام راشد: حتى هو يا ريال .. لكن لو يصطلح حاله
بوراشد: الله يهديه ان شاء الله ..
مي واحلام اطالعن بعض ورفعن ايدهن على طول : اميييييين ..

ام راشد وبوراشد اطالعوا البنتين وضحكوا عليهن .. واندمجوا عقب بسالفه ورا سالفه ..

بوراشد: وين عيل عليا والبنات
احلام:اوييه ميووه نسينا ساروه .. مازقرناها
مي: خلاص عيل.. بيلس ويا شوابي ..

وروحت احلام تشوف ساره شو تسوي وتزقرها عسب ايلسون برع.. وتمت مي تسولف ويا شوابها ع قولتها..

****

ام سيف كانت يالسه تسقي الزرع فالحوي وكانت وياها نجمه .. هلكتها ها اليومين .. من كثر ماهي تفتقد البنات تزقر نجمه تخليها تيلس وياها شوي وتشغلها أي شغله بس عسب تلقى حد يكون حذالها يالس ..

نجمه: ماما ..
ام سيف: ها بلاج ..
نجمه: ماما انا يريد ساافر
ام سيف: ويديييه وين تبين تسافرين ..
نجمه: بلاد ماما بعد وين بيسير اوستراليا ..
ام سيف: تنقم بعد .. بتسيرين بلا رده يعني
نجمه: لااا ماما .. بيسير شهرين بس
ام سيف: انزين نيموه مب وقته احين.. سيف وعياله بيسافرون..شو بتخليني بروحي
نجمه: زين ماما .. انا مافي قول اهين بيسافر ..خلاف بيسافر
ام سيف: انزين يصير خير .. هاتي الفوز انتي وحطيه ع ها الصرم..
نجمه: جيين جين ماما..
ام سيف: يالله وحده شردت والثانيه تبى تسافر .. عنبوه ما يقرن ها البشاكير..جنه الله جالعنهن جلعه ..
نجمه: شو
ام سيف: ماشي لمي ثمج واشتغلي ..

ويلست ام سيف ع العشب وتطالع نجمه وهيه تسقي النخل .. وتحس بضغط فايدها اليسار همزت على ايدها شوي لين ما خفت .. واتجاهلت الألم .. وردت مره ثانيه تعاون نجمه ..

فليل .. ردن بنات سيف البيت .. ويلسن شويه ويا يدتهن وعقب سارن فوق وتمن يطلعن ثيابهن عسب يعلقنهن فالكبت ويدخننهن كلهن بالمره وبالباجر يجهزن شنطهن استعدادا للسفر اللي ما بقاله غير يوم ..

فها الوقت دشت عليهن ناعمه والبنات كلهن فحجرة مي وساره .. والثياب مكومه ع السرير .. اول مادشت ناعمه انتبهت للسرير ع طول

ناعمه: هاا كله مشااريكن؟؟
مي: هيه عندج اعتراض!
ناعمه: بس ابوكن ماعطاكن فلوس
ريم: عندنا ام ولا نسيتي ها الشي يعني
ناعمه وهيه حاطه ايدها ع خصرها: لا مانسيت.. بس هيه تشتغل عشان تكد عليكم!
ريم: وليش تتطنزين .. الشغل بس حلال عليج! اميه الحمدلله تشتغل مدرسه واحسن مدرسه بعد وكم مره عرضوا عليها التوجيه بس هيه ماطاعت انزين

ناعمه تطالع ريم وهيه حاطه ايدها ع خدها وطلعت صوت يدل ع القهر..

ناعمه: يعني الحينه معاشها يكفيكن لها المشاري كلها .. لا وماركات بعد .. ليش ما طلبتن ابوكن ولا ما قلتلي اخذلكن فلوس منه!
ساره: يا طنطت مستووره والحمدلله.. ما تعمليلناش فيهاا شهمه ..
مي: اخبرج ريلج ايحيدنا بنسير نشتري ليش ابروحه ما ايي يعطينا البيزات.. لازم يعني نطلبه .. مايعرف واجبه بروحه
ريم: نحن مانتريا شي منج ولا من ريلج
ساره: ريم حبيبتي نحن عايشين فوسطهم غصبن عنهم بيصرفون علينا
ناعمه تشوف البنات وهيه حايسه بوزها ..
ناعمه: وليش يعني تشوفون ابوكن زطي ..ساد بيسفركن ويايه بعد شو تبن
ساره تطالعها ورافعه حاجب: ليش مب انتي اللي بيسفرج ويانا
ناعمه: لا عيووني .. السفره لي انا لكن غمظتن سيف قال برفه عنهن ..
ريم: وحليييله غمظناه .. والله وقلبه طلع طيب وحنوون
ناعمه: شو تطنزين انتي ..
مها: انتي الحينه تبين تضاربين .. دوم اتينا وتحتشرين ..
مهره: هيه والله شو بس هاي شغلتج
ناعمه: بس بس انتن التووم اسكتن ع اخر شي ينقزلنا ينازعن .. ها اللي قااصر بعد..
تمن مها ومهره يتحرشن فناعمه وهن مطفراتنها .. وقامت ساره وشلت ثيابها..

ساره: اقول ناعمه ما بتشوفيين شو خذنا..
ناعمه: ليش ماره عليكن يعني انا .. هاتن راوني اخرتني ويا حشرتكن
مي: تكفييين عااد..
ساره: انزين انتي شو خذتي؟
ناعمه: انا سيف خذلي بدل شحلاتهن .. وخذتلي بعد كمن بنطلون عيبني
مي وريم وساره تمن يطالعن بعض ..
مي: ها ريم وتقولين يمكن ابويه ما يخلينا ..
ساره: مخلي حرمته ع كيفها كيفنا بنسوي اللي نباه عيل
ناعمه: شو تقولن؟
مي: ماشي ماشي .. اف كل شي تبى تعرفه .. اندوج ها شوفي شو خذنا..
ناعمه: مغسولات هاذيل؟
ساره: هيه بشكارتنا هناك غسلتهن .. فكتنا والله ..
ناعمه: افف ها الغسيل خشن ايدي.. اخ يا القهر
مي: عشتوو
ساره: ماتعولين انزين .. عادي ..

وطنشتهن ناعمه ويلست تشوف .. وريم روحت عنهن .. وكل ماتشوف شي فخاطرها يعيبها لكن ترد وتقولهن انه جديم او مب يلين الاختيار وهن يطالعنها بنظرات .. بس واثقات من ذوقهن واختيارهن ..

رد: قـــلـــوب تـــحـــت الـــمــجـــهــــر**
 

*****************
(السبت) 17 يوليو 2004
*****************


فبيت خلفان .. مريم قابضه التيلفون كعادتها فها الوقت وترمس امها وتاخذ اخبارهم .. وطبعا حديث ها اليومين عن السفره .. والبشكاره الي شردت..

مريم: والبشكاره شو بيسوبها ؟
ام سيف: بيكنسلون ويزتها بعد شو..
مريم: وهم باجر سفرهم ..
ام سيف: باجر العصر طيارتهم بيطلعون من الظهر ..
مريم: انزين والبشكاره اليديده
ام سيف: مادلها يا امايه .. يقولون اليوم بتي المكتب ..
مريم: هييه .. انزين اامايه تعالي عندنا يلسي
ام سيف: يا مريم انا ماعرف ارقد فغير بيتي
مريم: امايه عاد كل صيف تسويلنا ها السالفه
ام سيف: بس يلا مريووم .. انا البيت هب ظاهره منه
مريم: خلاص خلاص انزين لا تحرجين .. جان بيخليني خلفان بيي ارقد عندج
ام سيف: شعنه ترقدين عندي بعد وتخلين بيتج .. قري محلج جان بتيني تعاليلي الضحيوه ولا العصر ..انا ماعليه شر نجمه ويايه
مريم: انزين ماعليه ..
ام سيف: عاد يوم بتين اليوم العصر هاتي بناتج وياج يسلمن ع بنات سيف قبل ما يسافرن
مريم: هيه ان شاء الله .. لطوف واسوم بروحهن حاشراتني يبن اين اليوم
ام سيف: انتي مقصره عاد .. شعنه ما تيبينهن دووم العصر انتي .. من بعدها المسافه
مريم: انزين شو اسوي يا اميه سحوبات بناتي لين يلبسن ولين يتعدلن طاف العصر كله .. يوم هن يبن اين ع بغيتهن يتزهبن من وقت واييبهن تراني
ام سيف: انزين ماعليه .. خلاص يالله نترياكم.. انا بقوم الحينه
مريم: خلاص عيل .. فمان الله

ويوم بندت مريم لفت ع بناتها اللي كانن يالسات حذالها ..

مريم: هب اقوم العصر والقاكن بعدكن هب جاهزات
لطيفه: لا ماعليج بنجهز بسرعه
مريم: عاد ما اوصيكن .. لا يزل لسانكن جدام حد وترمسن عن سالفة نايف وريم
لطيفه: يالله يا امايه تراني دوم ارمسها ريموه ولا جد زل لساني
مريم: الخوف منها هاي اسوم
اسما:جيه شو شايفيني وكالة انباء ولا ام هلال .. بس تعالو .. نايف ما قالكم رايه فريم..
مريم: الولد مطنشنا .. مادري بلاه
لطيفه: ماعليكم منه يا امايه يبى يلعوزكم شويه
مريم: مللبي انزين .. اخاف الا البنت تنخطب ونايف بعده ماتحرك
لطيفه: لا ان شاء الله ..
مريم: شدراكن انتن .. عيال خالها وخالتها ماشالله فسن عرس.. عادي يخطبونها

ونايف فها الوقت كان راد البيت وسمع الحوار قبل ما يدش الصاله ..

مريم: هيه ما خبرتكن جان حد خطبها ولا شي
اسما تطالع امها وتأشر ع لطوف
اسما: هاي كاتمة اسرارها .. انا مب وايد ويا ريم
لطيفه: انزين صح انا اوكي وياها بس ماتخبرني عن ها الامور الخاصه واايد.. بس احيد مره قالتلي انها ماتفكر تاخذ حد من اهلها صوب امها يعني .. رابيه وياهم وتعدهم اخوانها
مريم: شدراني يا امايه .. لو كل وحده بتقول عيال اهلي اخواني جان ماعرسن البنات
اسما: زين انه محد من اهلنا قدي ..
لطيفه: عدال عاد لو كان عندج بيموتون الا ويخطبونج
اسما: امييه شووفيها تتطنز
مريم: هههههه شو تبينها تبطلين حلجها ..

نايف مادش الصاله صعد على طول لحجرته .. وهو يفكر فالرمسه اللي سمعها .. مايعرف شو يسوي .. وشو القرار النهائي الي بيكون له .. احسن شي يسويه الاستخاره .. منها يرتاح باله .. ومنه يفتك من حنة امه على العرس.. واللي رايدنه ربه بيصير..

****

وفي بيت سيف الظهر من عقب الغدى.. البنات كانن مرتبشات بتجهيز اغراضهم .. وعطن ناعمه لسته اغراض اتيبلهن اياها من الجمعيه العصر يوم بتسير .. لانهن ما بيقدرن ايسيرن عسب بنات عمتهن بيين ..

مي كانت نازله من الدري تركض بسلة فيها ثيابهن بتوديهن تغسلهن.. وساره وراها تركض تبى تحط ثيابها ..

مي: يا الخايسه مابغسلج .. جي يوم ازاقرج اتيبين ثيابج ما اتوايبين
ساره: ميوه وقفي الله يغربلج.. انا غسلتلج يوم دوري
مي: جب يلا .. يوم دورج انا بروحي اييب ثيابي واحطهن فالسله

نزلت مي من الدري وتشوف ساره بعدها باقلها كم دريه ويوم لفت تكمل ركض
ما حايدت الا بحد يخبطها من ورا وطاحت ع الارض وسلة الثياب فوق راسهن وتنشحن الثياب..
كان سيف يالس فالصاله يقرى الجريده ويوم سمع الطيحه فز وقام يشوف شو السالفه .. ولقى مي يالسه وماده بريولها وساره منبطحه ع بطنها

مي: الله يغربلج كسرتي ريولي .. اااي .. والله لخبر عليج اماايه..مسويه عمرها طرزان وتنقز من فوق .. ااااخ
ساره: الحمدلله ماتعور فيني شي
مي تصرخ: حسبي الله ع بلييسج وين بتتعورين وانتي طايحه عليه ومتعلقه فرقبتيه تقول قرد.. يعلج ياا سااروه السم قوولي اميين

سيف كان امبهت والبنات مب منتبهاتله بس عقب انتبهن للضحك

ساره: ابوووويه!!!
مي: شحقه تضحك .. تعال قومني كسرت ريولي هاي بنتك
سيف: هههههه وانتن شو مسويات ثركن .. ميوه يالسه تقول نانسي عجرم فغنية اه ونص ههههههههههه
ساره: الحقي ع ابوج ميوه بعد اه ونص .. لا هاي انا يوم اغسل جني نانسي ههه
مي: فااايجين انتوو.. ريوولي تعورني مووووت
سيف يا حذال مي ..
سيف: شو يعورج؟
مي ترمس بانفعال: ركبيه يعورني الطيحه تركزت عليهن.. يعلج يا ساروه كسرتيني وانا فعز شبابي
سيف: هههه
مي: ابووووووويه مب وقته .. شلني ماروم اقوم
سيف: وين اشلج
ساره: شلها يلسها ع الكرسي..

وقامت ساروه تلقط الثياب .. وسيف شل مي .. اول ماشلها لفت بايدها ع رقبته
سيف: ميوه زغدتيني؟
مي: لا طيحني وتكسرني انته بعد
سيف: شو اطيحج .. جي رخو ما اروم اشل
مي: بس بس نزلني هنه ..
ويلسها ع الغنفه ويلس حذالها .. وساروه شلت السله ويلست وياهم ..

سيف: يالله انتن حريم وجي تناقزن ما تدارن على عماركن
مي: هااذي سااروه نقزت الخايسه
ساره: ههههههههه
مي:فالحه فاجتلنا ها اللغب وتضحكين
سيف: تعورج وايد؟ اوديج العياده
مي: لا مابا شو بيسولي ثرهم الا بيلفونها
ساره: يعني ماتعورج
مي: شوو ماتعورني اقول بمووت منها ..
ساره: ابويه جان مب مكسوره
سيف: لا بسم الله عليها.. لو مكسوره بتلقينها تولول وتصيح.. بس هاي رضه.. ساروه سيري فوق عند ناعمه خليها تعطيج مرهم الرضوض والشاش الضاغط
مي: اونه زين يعني
سيف: دوا تراه بعد شقى مب زين
مي: ساروه لفي ع ريم وخذي من عندها حبة بروفين
سيف: هيه زين عشان الالم ..

وسارت عنهم ساره وهيه ميوده الضحكه ومن وصلت الدري قامت اتطلع اللي فخاطرها من ضحك .. وميوه من الصاله تسمعها وتصرخ عليها ..

وعقب نزلن كل البنات يشوفن ميوه ويلسن وياها وقامت ريم تبى تلف ريل مي ..

ريم: ميوه رفعي بنطلون البجامه
مي تطالع خواتها وتطالع ابوها ..
ساره: يالله بعد تستحين من ابوج .. رفعي بنشوف الرضوض
ورفعت مي البنطلون لين ركبها .. وكانت بعدها الرضوض مب معلمه بس تحت ركبها كانن وايد يعورها .. حطتلها ريم المرهم ولفت ريولها ..

مي: ها الخايسه ساروه عليها تغسيل الثياب .. ولا بهبش شي منهن حتى فالسفر ما بغسل شي
ساره: ييه ييه
مي: جب يلا محد قالج
ريم: ساروه سيري غسلي الثياب انتي الحين
ساره اطالعت خواتها وحاست بوزها وشلت السله وطلعت .. اما سيف عقب ما ضحك على سوالف بناته وتحرطيم ميوه .. شل بعمره وسار يرقد شوي .. ومي ميلسه فمكانها ماتروم تقوم ولا تروم تثني ريولها ..

مها: بتخربين سفرتنا عيل انتي
مي: شو بخرب .. بقوم اناقز الحينه عادي
ريم: انزين قومي مشي شوي شوفي تعورج ريلج بالمشي

وقامت مي وتمت واقفه وتمشي بشوي شوي ..
ريم: شو ها المشيه ميووه .. جسفي ريلج..عنبو جنج رجل الي
مي: ماروم تعورني
مهره: لو تمت تعورج لين باجر بنيبلج عكاز هههه
مي: جب جب
ريم: لا ماعليه بتخف.. يلسي ومغطي ريلج مها تهمز ريل ومهروه الريل الثانيه
مي: شدراهن هاذيل بالتهميز
ريم: بالعكس معروف عن التوم والبجر انهم اوكي فالتهميز
مي: منو قالج؟
ريم: احيد قوم اميه يقولون جي.. حتى سألوا امايه عفرا
مي: ماعلينا ..
ومدت ميوه ريولها وقامن التوم يهمزنها
مي: وانتي يا البجر متى دورج فالتهميز
ريم: ههههههه لا انا ماروم .. بقوم افازع ساروه في الثياب

وقامت ريم .. وتمت مي متسلقيه جنها فمصحه ..ويوم اذن العصر قامت مي وهيه تأجب ع مها ومهره .. وسارت حجرت يدتها عسب تصلي .. وعقب ما صلت هزبتها يدتها عسب الطيحه..

ام سيف: بقوم احرلج كركم وملح وبحطه ع ريلج هب تبطلينه لين باجر.. وشلي وياج بعد يوم بتسافرون وعينيلج هناك وحطيه دوم فليل ع ريلج
مي مسويه عمرها بنت مطيعه ومنزله راسها: ان شاء الله امايه
ام سيف: قومي مشي خلي الدم يتحرك فريلج..
مي: تعوووورني
ام سيف: ماعليج امشي وبتخف

وروحت اليده .. وعقب طلعت مي من الحجره وهي تمشي وتتساند ع اليدار. ويوم طلعت فالصاله حصلت ساره ترحب بعمتها وبناتها .. وجاهدت مي تبى توصل للدري لانها ما لبست وبعدها ببجامتها .. لكن وقفها حس عمتها اللي انتبهتلها ..
وخبرتهن ساروه عن مي ويتها اسما تمشيها لين الصاله ويلسوا كلهم..
شوي يت ام سيف وخلت ساره اتيب ماي حار وكمادات وشاش .. وخوزت الشاش عن ريل مي وحطتلها الكمادات . وعقب حطت الكركم وهو حار ع ريل مي وتمت تصرخ والكل يضحك عليها .. و لفتلها اياها ..
وتمت مي تحكي الموقف لعمتها وبناتها ومره يضحكن ع ساره ومره يخففن عن مي ..

لطيفه: ريمان وين عيل؟
ساره: يوم دشيتوا انتوا كانت مخلصه تعليق الثياب وسارت تتسبح
مريم: يا حليلكن يا بنات سيف.. اسميها البشكاره ماسوت فيكن خير
مي: لا عادي عموه نحن متعاونين ع الغسيل والكواي..الا نعوم هههه مبتلشه ثيابها وثياب ابويه وعيالها كله ع راسها
مريم: حليلها .. محد يساعدها
ساره: شي توديه المصبغه وشي تغسله هنه.. مدبره عمرها هيه
ام سيف: برايه دواها خلها تعلم ما تهازب البشاكير

وهاي سوالفهم لين نزلت ريم وسلمت على عمتها وبناتها .. ونزلت ناعمه بعد سلمت ع الموجودين وطلعت سايره الجمعيه تاخذ اغراض السفره ..

****

عبير يالسه فحجرتها .. وتطالع الاوراق اللي مطرشتهن اختها فجر.. ويلست تتأمل صورتها .. باستها وضمتها لصدرها .. ومن غير ماتحس نزلن دموعها ع شريط الذكريات اللي مر فعيونها ..

اه يا فجر. بتي وبتيب وياها ريحة الغوالي .. ابوي وينك عنا .. الله ينتقم منكم يا مجرمين سلبتونا ابونا وجتلتوا امنا .. فديتك يا بوي ويينك احين.. الاسرى يابوهم وانته مو وياهم ..

اندق باب الحجره .. ونزلت عبير اللي فايدها وحطته فالدرج بسرعه .. ومسحت دموعها اللي انهمرت ..

عبير: منو؟
مديه: اميه فجي الباب
عبير: مدوي حبيبي روحي عند اختج..عقب شوي بييكم
مديه: انزين عطيني فلوس بطلب من الدكان
عبير: خلاص اطلبي وبييبلج يوم بيي
مديه: اووكي ..

وردت مديه عند احلام ودقن للدكان ..

احلام: الووو.. ها حمزه شخبارك
حمزه: الحمدلله تمام.. كيف حال بابا محمد
احلام: انزين اسأل عن حالي انا
حمزه: انا معلوم انتي فيه زين.. صوت مال انتي تمام
احلام: لاوالله..
حمزه: زين اهلام شو يريد
احلام: وياويهك.. هات بطاطس عمان اربعه
حمزه: حق منو اربعه .. بنات ماما عليا مافي موجود
احلام: انته شولك عليك خساره؟!
حمزه: زين زين شو يريد بعد
احلام: وثنين ديو .. وهات ثنين سنكرز
مديه: ابا أيسكريم
احلام: حمزه بعد هات ثنين أيسكريم
حمزه: شو أيسكريم
احلام: هذا .. ياربي شو فبالي.. هيه هذا مثلث مال ام اند امز
حمزه: زين خلاص دقيقه بيي
احلام: بحسبلك والله اذ تأخرت بترد اللي يبته
حمزه: زين زين

وسكرت احلام التيلفون وسارت عند امها تاخذ الفلوس.. ها المره لقن الباب مفتوح.. وعبير كانت يالسه ع شبريتها تقرى فأوراق قبول فجر في الجامعه الامريكيه ..
احلام: ماميتاا .. نبى بيزات
عبير وهيه موخيه براسها: بطلي الكبت بتحصلين شنطتي خذي اللي تبينه
وبعد ماخذت احلام البيزات .. يلست حذال امها ..
احلام: اميه
عبير: نعم
احلام: شوفيج؟
عبير: ماشي حبيبتي ..
احلام كانت تشوف الاوراق اللي فايد امها ..
احلام: متى بتي فجر!!
عبير: عقب اسبوع او اسبوعين ان شاء الله
احلام: اميه ع حساب منوه بتكمل دراستها هيه.؟
عبير: اكيد بشار ..
احلام: عادي عنده؟
عبير: عيل منو بيصرف عليها غيره؟ والحمدلله بشار عنده الخير ..
احلام: شي طيب .. انتي ضايجه اميه؟
عبير اطالعت احلام .. وسكتت
احلام: اميه رمسي قوليلي ..
عبير: مافيني شي حبيبتي.. بس احاتي ييت فجر .. وبس
احلام: اكيد؟
عبير: ايه اكيد
احلام: يلا انزين قومي نيلس فالصاله..
عبير: روحي انتي .. بيي وراج..بكلم ابوج بشوفه وينه فيه لها الحزه..
احلام: خلاص اوكي..

وابتسمت عبير لبنتها .. وقامت احلام من مكانها و سارت الصاله .. وكانت هناك ام راشد وعليا ويتهم شيخه .. وتموا لمه يسولفون .. واكثر شي يتناقشون عن سفرة البنات باجر..

وشوي كانت بدخله محمد.. اللي كان راد من الدوام .. يلس فالصاله حذال امه وعق الغتره من راسه ..

ام راشد: ليش اليوم ابطيت فالدوام لين العصر؟
محمد: كان عندنا شغل وايد اليوم ..
عليا: تغديت
محمد: لا .. بموت من اليوع
شيخه: يالله جي ما تطلبوبكم اكل مهلكين عماركم ..
عليا: مخليلك غدى يوم اتاخرت ..بقوم اييبه..
محمد: تسلمين ام جاسم .. وحرمتيه وين
احلام: اونك عاد ابويه .. تراك توك مرمسنها .. واكيد قالتلك انها فالحجره ماظهرت..
وغمزت احلام لابوها اللي بالرغم من تعبه ضحك على بنته ..
ام راشد: غيرج الله من بنت .. شو ها خليتي ابوج يتلوم
عليا: ههههههه قومي يلا حلامي ويايه بنحط غدى ابوج
احلام: لا لا خليه .. حرمته بتحطله الغدى وبيتغدى وياها.. من الله ماكلت شي تترياه ايي
محمد: ههههههه حسبي الله على بليسج من بنت .. بلاج اليوم علينا انا وامج..
ام راشد: ها قامت تغار من امها البنت ..
احلام: هيهيهي حليلي بس استهبل..
محمد:يلا عيل انا بسير ابدل ..

دخل محمد حجرته عسب يبدل .. وعبير سارت المطبخ تفازع عليا ويابوا الغدى .. واحلام يلست تسوي جاي لابوها وامها ..

****

وقبل المغرب قامت مريم تبى تروح .. البنات احتجن يبن يتمن .. لكن مريم كانت تبى تسير عزيمه عقب المغرب .. واتفقوا انه البنات ايتمن واييهن حد فليل .. وهاجي روحت مريم ويا ريلها .. وتمن البنات واخوهن عمار ويا مايد وجاسم..
وعقب المغرب صعدن البنات فوق وساره واسما كل وحده قابضه مي من ايد ..
ويلسن يرتبن الشنط وبنات عمتهن يساعدنهن ..

لطيفه: ريموه عيل ثياب جسوم وين؟
ريم: يبوج جسوم شارط علينا يحط ثيابه ويا ميود .. زهبنا شنطتهم هم الاثنينه الصبح..
لطيفه: حلو والله تعلقوا فبعض..
ريم: ميود ع نياته وغير ها ماكان محصل حد وياه.. ويوم يينا ونسوا بعض هو وجسوم.. حتى المبيت مستوي يباته عندنا .. ويوم ناعمه ماتخليه جسوم يسير يرقد فحجرته
لطيفه: غريبه تخلينه
ريم: شو اسويبه .. من اعطيه الدوا شرد عني ..
لطيفه: اهاا ..
سكتت لطيفه .. ويلست تتأمل ريم وهيه تقطب الثياب وتحطها فالشنطه.. ملامح ريم جذابه اكثر مما هيه حلوه .. كانت معقصه شعرها ولافتنه ع ينب وخصل طايحه ع ويها وهيه موخيه ..
تخيلت عقب نايف اخوها .. لاحظت شي محد كان ملاحظنه .. نايف وريم يتشابهون!
لطيفه: ريم
ريم: هلا ..
لطيفه اطالعتها وتنهدت وسكتت ..
ريم: شو بلاج لطوف؟
لطيفه: ههه لا ماشي كنت بقولج تاخذين شبه من نايف اخويه
ريم عقدت بحياتها وابتسمت ..
ريم: وين شياب لياب؟
لطيفه: يالله ولد عمتج عادي تشبهينه
ريم: هههههه اصلا نايف ماتذكر شكله
لطيفه فخاطرها " مالت عليكم انتوا الاثنينه ولا واحد يذكر الثاني على كثر ما كنتوا مع بعض وانتوا صغار"
لطيفه طلعت شنطتها وخذت من البوك صورة نايف ..
لطيفه: ها شووفي
ريم: شوو؟
لطيفه: صورة نايف
ريم: اها .. اشوف ..
شافت ريم الصوره .. ماركزت فملامحه .. لمحه بس وردتها على طول للطيفه
لطيفه: ماوحالج تركزين فالشبه؟
ريم: ههههه لا شفته .. ماعليج الا تتخيلين .. ما اشبهه ولا شي
لطيفه تطالعها بيأس .. مفقود الأمل من ريم .. لو نايف بغى ريم.. ريم هيه المطبه..

هاي عقده عندها من الرياييل كيف بتعرس مادري!

لطيفه: ريم كيف تعاملج ويا عيال خوالج هناك
ريم: ليش يعني السؤال!
لطيفه: بس جي
ريم: مادري.. انا مادق سالفه وياهم .. وايد سطحي
لطيفه: ليش مع انج دايما تقوليلي مثابة اخوانج؟
ريم: انزين لكن مب معناته اني لازم اسولف وياهم.. حتى خالي مانع ما ايلس وياه
لطيفه: ليش كل هااا عااد؟
ريم: ماعرف لطوف.. انا جي.. كبرت جي.. خلاص غيري السالفه
لطيفه: اوكي اوكي .. لا تضايجين انتي..
ريم: لا عادي.. انا خلصت تقريبا.. خلينا نسير عند البنات نشوفهن شو سون
لطيفه: اوكي ..

وطلعن من حجرة ريم لحجرة مي وساروه .. ومن قبل ما يدشن سمعن الضحك والصريخ يتعالى فالحجره.. كل وحده اطالعت الثانيه وضحكت.. عايشات حياتهن ها البنات ولا عليهن من شي ..
يلسن وياهن لين وقت العشى .. وعقب نزلوا يتعشون .. ويا نايف عشان يشل اخوانه .. البنات لبسن وقيهن ووصلن بنات عمتهن لين باب الفله وكان نايف مدخل سيارته وتوه بينزل عسب يسلم ..

ساره: ايه اخوكن نزل.. بنرد داخل
اسما: هب تشاردن عاد .. عادي الا ولد عمتكن

وردن البنات داخل الصاله وسارت ريم حجرة يدتها عسب تقولها تظهر لنايف..
نايف دش البيت من عقب ما هوّد وكانت وياه لطيفه .. توجهوا للصاله ونايف سلم ع البنات اللي ماعرفهن.. دور امبينهن على اللي شافها من قبل بس ماحصلها ..
لطيفه: ريم ويين؟
نايف يطالعها وهو مبطل عيونه .. شو بيقولن البنات احين.. حس بالفشله ..
ساره: سارت حجرة امايه عفرا عسب تقولها انه نايف هنه..

لطيفه هنه فكرت فمكيده بتسويها احين.. وزخت ايد نايف ..
لطيفه: وشحقه تعنيها لين الصاله .. نايف بروحه بيسيرلها لين حجرتها ..
وسارت هيه وساحبه ايد نايف ..
نايف: لطوف فجيني عنبوج خيلي ع ويهج ساحبتلج ريال

البنات يطالعن اللي مستوي ومب فاهمات شي واسما تضحك.. وعقب قالن راي لطيفه صح لانه اليده من مساعه سايره حجرتها عسب ترقد وما بتقوم بسرعه وتي الصاله..

دقت لطيفه الباب ودشت حجرة يدتها .. لقت ريم تيود ايد يدتها وتقومها من على الشبريه ..
لطيفه: تمي امايه محلج .. نايف هاذوه عند باب حجرتج
ام سيف: هيه زين عيل.. خليه يدش ..

ريم تمت تتطالع يدتها وتطالع لطيفه .. وتحس بتوتر فضيع .. وعلى دفوة حجرة ام سيف وتوترها خلاها تمووت من الحر والعرق يتصبب من يبهتها ..

دش نايف الحجره .. وريم تحس الثواني صارت ساعات .. كل شي صار بالحركه البطيئه.. تفكر كيف بتتصرف.. او كيف بتظهر من الحجره بسرعه ..

نايف سلم ع يدته ويلس حذالها وشاف ريم اللي كانت واقفه بعيد عن السرير ولاصقه بالكبت .. ولطيفه تجدمتلها ووقفت حذالها ..

نايف: شحالج ريم؟
ريم: انا.. الحمدلله ..

وخت براسها ولطيفه تتطالع نايف وتبتسم .. وبعدين ترخص نايف من يدته .. ووقف .. اطالع ريم لكنها كانت موخيه تتلعب بظفر ايدها ..
واشر ع لطيفه تظهر قبله ..

لطيفه: تعالي ريم وصلينا
ريم: اوكي .. (ورمست بصوت واطي) صبري خلي اخوج يظهر
لطيفه: تجدمني نايف
نايف: خلاص عيل بترياكن فالسياره..
وطلع نايف .. وطلعن وراه البنات .. ووصلن لين باب الفله ..

ريم ترمس لطيفه: ما بنسالج ها الحركه السخيفه
لطيفه: ريموه اتحريتج رديتي فوق انزيين
ريم: لاوالله
لطيفه: خلاص صخي البنات بيسمعن .. يلا فمان الله .. وتحملوا على عماركم و باجر دقيلي وانتوا فالمطار اوكي
ريم: ان شاء الله

وحضنت لطيفه ريم وهيه تسلم عليها اللي خلى ريم تبتسم .. وسلموا البنات ع بعض وروحن بنات مريم .. وردن البنات حجرهن .. وريم فبالها الموقف السخيف اللي انحطت فيه ..

رد: قـــلـــوب تـــحـــت الـــمــجـــهــــر**
 

*****************
(الأحد) 18 يوليو 2004
*****************

اليوم المرتقب عند بنات سيف ..ساروا البنات وابوهم ومرته وعياله المطار من عقب مامروا على امهم الصبح وسلموا عليها ..
كلهم رغم انه عيونهم حمرا من كثر ماصاحوا ويا امهم .. الا انهن متحمسات حق السفره هاي..
كانوا جماعتنا طالعين بسيارتين .. سيف ويا حرمته ويسوقبهم الدريول فسيارة سيف الرنج مع الشنط.. اما العيال كلهم فسيارة نايف اللي طلب منه سيف انه يوصلهم المطار..
ريم فحاله مايعلمبها حد غيرها هيه..طول الدرب كانت متوتره وخواتها عادي يسولفن .. مايد وجاسم يالسين جدام ويسولفون ويا نايف..ريم ملتزمه الصمت ومن داخلها مقهووره من ابوها ومن ناعمه.. لانها بغت تركب ويا ابوها بس ناعمه ماطاعت .. والحين هيه طول الدرب متضايجه مب عايبنها ها الوضع اليديد عليها .. كيف تتقبل ها الريال اللي يسوقبهم!!
تبى الوقت بسرعه يمر عسب تبتعد عنه ..

وصلوا المطار وعقب ماخلصوا اوراقهم و دخلوا الشنط .. ساروا يتحوطون في السوق الحره .. مشن ريم و ساره ومي ومهره ومها .. وجاسم ومايد وياهم .. اما عفرا تمت ويا امها.. و ريم ردت تتصرف ع طبيعتها من غير توتر ويا خواتها من عقب ماروح نايف عنهم ..


ريم: تعالوا بشتري كاميرا
ساره: ليش انتي مايبتي كاميرتج؟؟
ريم: لا عند خالي مانع الكيمرا .. مارديت اخذها عنه ..
ساره:انزين انسير لاني باخذ هتفون بعد
مايد: هييه شي اشرطه قيم بوي اهناك
جاسم: قووول والله ؟
ريم: هييييييه بدينا عاد ويا القيم بوي والاشرطه احين ..
مايد: سووو طااااااف ع قوله جسوم
ريم: هههههه يالله نسير انزين
ساره: ميووه
مي: بلاج؟
ساره: عدلي شوي مشيتج
مي اطالعتها بنظره: ماااقوول غير الله يجازي اللي كان السبب
ساره : كح كح كح ..
مي: وياويهج .. قومي عني صدق قاهرتني
ساره: تعورج انزين
مي: الركبه اليمنى لا .. بس اليسرى واايد
ساره: الطيحه تركزت ع شجج اليسار شكلها هههه
مي: سخييفه ..
ساره: ميوه حبيبي انتي سامحيني.. عقب شوي بنركب الطياره وبطيربنا وبنتعلق بين السما والارض مايعلم فهاذيج الساعات شو بيصير غير ربج..
فاانا ها هنا اطلب منك السماح ودعي قلبك ابيض نظيف نظافة تايد للغسيل مافيش مستحيل نحو جميع من اذوك عمدا او سهوا ..
مي ترص باسنانها: تعرفين ساروه .. فقدتج وياها من فصحه .. وفقدتج وياها من سخافه .. وجلبي ويهج عني
ساره: ههههههه وياراسج .. ادري انه مالج غنى عني .. تعالي يلا اختاري ويايه هتفون اووكي ..


بعد ماخلصوا البنات مشاري ياهن ابوهم يحاسب وعقب توجهوا لقاعه الطيران المتجهه لـ Hong Kong
وقبل ما ينادون لرحلتهم .. زخت ريم الموبايل ودقت للطيفه وبعد ما سكرت عنها دقت لامها تطمنها ..
وماهي الا دقايق .. وتوجهوا لممر الطياره..ركبوا الطياره وكلهم استقروا في اماكنهم .. ريم كانت حذال ساره ومي .. مهره ومها وعفرا حذال بعض .. اما جاسم ومايد كان حذالهم واحد صيني
وابوهم ومرته كانوا حاجزين على الدرجه الاولى .. وعيالهم على السياحيه..
وعند البنات كانت ساروه تتحرطم من اول ما ركبت الطياره ومي تزيد وياها وريم تضحك عليهن ..

ساره: هذا ابوج شحقه حاجزلها على الدرجه الاولى ونحن اهنه ناطرينا
مي: هيه ماخذ راحته يتحرا عمره في شهر العسل عافدبها جدام ونحن عادي تتكسر ظهورنا من هالكراسي 9 ساعات
ريم: الا قولوا مافيه يخسر علينا.. 10 كراسي بيحجز على الاولى بيفتقر .. قال احجز 2 وافر الباجين ورا .. شعليه هو ومرته مرتاحين
ساره: اوووف يقهرون والله .. يارب اييبولهم اكل مب حلوو مايرومون ياكلونه
ريم: هههههه هذا اللي ايهمج الاكل
مي: ليتها يت على الاكل اهنه لو تزقرين المضيفات الف مره ماينج وجدام بدون ماتزقرينهن تلاقينهن فوق راسج .. ههههههه
ساره: يلعن ابو الفلوس كل شي تسوي .. هههههه
ضحكن بثلاثتهن .. لف عليهن جاسم يشوفهن .. وزقر ع ريم ..

جاسم صد على ريم يزقرها: ريمان
ريم: هاه
جاسم: شوتقولون
ريم: ماشي .. نقول انه ابوك وحرمته ميلسين جدام عنا ..
جاسم: هييه .. تعرفين انا عرفت ليش ابوج سار جدام ويا نعوم
ريم: ليش .؟
جاسم: ادريبهم يبون يوصلون قبلنا
ضحكت ريم ع تعليق اخوها ولفت ع ساره ومي تخبرهن .. اما جاسم رد يرمس مايد اخوه ..
جاسم: شو اسمه اللي حذالك ؟
مايد: شدراني انا باسمه
جاسم: متفيزر حذالنا لازم نتعرف عليه ..
مايد: الانجليزي يالله نقول كملتين بنرمسه صيني ونتعرف عليه!!
جاسم: ماعليك منه ها ربيع جنكيز خان وهولاكو
مايد: هههههه حافظ المسلسل انته ..
جاسم صد على الصيني : شينق شانق شونق
الصيني اطالع جاسم مستغرب وصد عنه
مايد: شدراك بها الرمسه انته
جاسم: ها افلام جاكي شان كله فيها شانق و شونق
مايد: والله انك .. مره جنكيز ومره جاكي شان.. مرابعنهم شكلك
جاسم: هيهي .. اعجبك ..

وها الوقت مرت المظيفه وعطتهم وجباتهم .. وبعد ماكلوا ..
تلحفن مها ومهره وعفرا وكل وحده رقدت.. ومايد يلس يلعب بالقيم بوي اما جاسم غلبه النعاس وتلحف ورقد ..
و ساره كانت محطيه المسجل وتسمع اغاني ومتغطيه .. مي وريم يتابعون فيلم وكل ما يلتفتن لساره يلقنها تدندن ويا الاغاني وهيه تطالع الورقه مالت اغاني الشريط .. ماحست الا بدقه من ريم ..خوزت السماعات من اذنها..

ساره: شو بلاااج؟
ريم: خفي من ها الاغاني سويره
ساره: ليش يعني .. تراني اتسلى
مي: يلسي شوفي الفيلم انزين.. بسج دومج طربانه وياها الاغاني
ساره: انزين انتن شو يعوركن ..

ولفت عنهن الصوب الثاني وردت السماعات فاذنها ..
مي وريم اضحكن عليها .. وردن يتابعن الفيلم واندمجن فيه ع الاخر ..

كان جاسم راقد حذال مايد فتح عينه فجأه وبدى يحرك ايده يحاول ينبه مايد له .. مايد التفت له وشافه مصفر ومب قادره يتنفس.. الزبد ينزل من ثمه وعيونه مفتوحه ويرمش بها ..

مايد: جسوووووم بلااااك جسوووووم
وصد لريم وحاول ياشرلها عشان تنتبه له
مايد: ريماااااان ريمااااان..
بس ما انتبهن له .. ورد يزاقر لين التفتت ريم ..
بطلت ع طول السماعه وصدتله: شووو؟؟
مايد: جسوووم مايرد عليه
قامت ريم من مكانها ولحقتها مي
ريم كانت واقفه وتضرب جاسم على ويهه بالخفيف : جااااسم حبيبي جاااااسم .. ميوووه هاتي ماي وشكر بسرعه.. ميووود سير ازقر ابوك..

سار مايد يزقر ابوووه ولما وصل سيف .. شاف ريم منزله الكرسي وتسقي جاسم ماي ..

سيف: بلاكم ؟؟ بلاه جاسم
ريم: اظن هبووط في السكر
سيف: وشو تعطينه احين
ريم: ماي ويا شكر .. دوم اسويله جيه لانه ساعات تيه هاي الحالات وهو راقد .. ويهبط عنده السكر .. صدت عن ابوها ورجعت تكلم جاسم وهي تمسح على ويهه
ريم: جاسم انته بخير؟
جاسم قالها بصوت تعبان: ريمان كنت بموت
حظنته ريم وعيونها تدمع : فديتك حبيبي بسم الله عليك ..
مي: ابويه بتخلي جاسم اهنه ؟؟ ماتشوفه تعبان .. قول حق حرمتك ترد تيلس اهنه و ودوا جاسم جدام يرتاح
سيف: ها .. هيه هيه احين بقولها

ودوا جاسم مكان ناعمه ويلس ابوه حذاله .. و ريم تمت عنده لين نام واطمنت عليه.. و ناعمه اللي ارجعت ورا كانت منقهره وايد .. ويلست حذال مايد وهي تتحرطم

ناعمه: اووف من اولها جيه .. كان لازم هذا اييبونه ويانا ..

مايد طنشها يدري لو رد عليها بتطيح فيه ..

بعد ساعات طوال فالطياره وصلوا هونج كونج.. وتوجهوا لفندق (ماركوبولو) اللي كان حاجزنه سيف لهم .. يبعد هذا الفندق عن الميناء حوالي 500 متر .. ويحيط بالفندق من الجهتين مركزين تجاريين .. مداخلهم من الفندق .. هذا غير المراكز التجاريه الموجوده بين سلسه الفنادق اللي حذالهم ..
بعد ماوصلوا غرفهم .. كلن دخل غرفته ينام ..

****



فبيت بونايف.. يلسن لطيفه واسما ويا امهن فالصاله والوقت عندهم العصر.. دخل نايف عليهم اللي كان راد من برع .. صبتله امه فنيان قهوه وقربت له الرطب .. حب يفاتحها بالموضوع اللي هو حاس انه مرتاااح خلاص منه وخصوصا من عقب ما استخار..

وقبل ما يرمس سبقته أسما..
أسما: ها المعرس.. شو الهبات اليوم؟
نايف: اوه اوه معرس مره وحده .. خلوني اخطب اول
مريم: وانته حد ميودنك ثرك .. ترا شغلتنا ها الاسبوع الا التريي
نايف: ههههه مشكله والله
لطيفه:انزين نايف ..
نايف: انزين لطوف..
اسما: يالله يا برودك .. يشوف امه كيف تنغلي من الحره وهو يضحك وعادي عنده
نايف: انزين امايه شو حارنها ..
مريم: لا محتره ولا شي.. كييفك هاي حياتك ماتبى بنت خالك كيفك
نايف: انزين انا ماقلت ماباها
اسما: ولا قلت تباها
لطيفه: يالله كلتن الريال ..
نايف وهو يطالع لطيفه: اصلا محد مآزرني كثرج
لطيفه: ههههههه حليلك انته ..

تموا ساكتين.. يلس نايف وتم يطالع امه ويضحك عليها .. يت لطيفه ويلست حذاله .. ورمسته بهمس ..

لطيفه: عاد مصختها نيوف.. امس رتبتلك موقف عسب تشوفها و خليت امايه تقول لخالي انك توصلهم المطار شو بعد اكثر عن جي

نايف: اللي يسمعج يقول تأملت فيها ..
لطيفه: تأمل فيها عقب
نايف: لطيفه البنت ماتقااارب موول ..
لطيفه: ماعليك.. هيه مستحيه .. انته حاول تتقرب منها اكثر..نحن بنخلي السالفه سكوتيه .. يعني محد بيدريبها غير امها
نايف: ماعرف والله
لطيفه: يالله فرح امك وقولها تخطبها لك
نايف: انا اصلا ياي عسب ها الموضوع
لطيفه: شو يعني
مريم: انتوا بلاااكم تصاصرووون
لطيفه: ها .. ماشي
نايف وطى فنيان القهوه من ايده.. واطالع امه وهو يبتسملها
نايف:امايه
مريم: خييير
نايف: بسم الله بلاج محمقه يا الوالده
مريم: بس جي .. ارمس خلصنا
نايف وهو يبتسم: امايه توكلي على الله وخطبيلي بنت خالي..
مريم وهيه مب مستوعبه: صدق .. صدق والله!!
نايف: يعني ها الموضوع يتحمل سوالف

مريم من وناستها قامت من محلها و حضنت ولدها وعينها تدمع .. والبنات قامن يناقزن وهن مستانسات..

اسما: اف واخيرا يعني حد من بيتنا بيعرس يالله ما بغيتوا ..
نايف: اسمعوا انتوا هاي..خلو البنت واهلها يوافقون قبل
لطيفه: ان شاء الله ما بيردونك .. منو بيحصل نسيب شراتك هاا

وعلى وناستهم هاي .. يلست مريم اتدور رقم عليا .. دقت بس يعطيها انه الرقم غير مستعمل ..

نايف: ها بلاج اميه ؟
مريم: ادق لعليا بس يقولي الرقم مب مستعمل
نايفه: يمكن مقطوع ولا طلعت رقم ثاني
مريم: ايجوز .. خلاص بتصلبها ع البيت .. لطووف انتي تعرفينه رقمهم هناك
لطيفه: هي اميه .. هاتي بدقلج..

دقت لطيفه الرقم وعطت امها السماعه .. كانت تسمع رنة التيلفون تتريا حد يرفع السماعه .. لكن محد رد ..

مريم: محد يرد بيتهم
لطيفه: انزين دقي المغرب ..
مريم: يالله شو يصبرني لين المغرب انا .. ابا ارمسها احين
نايف: ول امايه الا تبى الفكاك مني ..
مريم: يالله شو الفكاك بعد انا ما صدقتك اتيني وتقول خطبيلي بعدني تباني اتريا اكثر!
لطيفه: حليلج يا امايه .. زين صبري شوي ربع ساعه وردي عقب دقي ..
مريم: بنشوف ..

و قاموا الكل يتخيلون عرس نايف وكيف بيكون البيت وريم فيه .. وكيف بيعدلون قسم نايف وكيف الديكور اللي بيحطونه ونايف مستانس على الرمسه وحس بحماس اكثر عن قبل..

****

شيخه كانت يالسه ويا عليا اختها ها الوقت في الصاله ويسولفن ..كان باين من سوالف شيخه انه شي مضايجبها وعليا حست بضيجتها.. وحاولت تخليها تفضفضلها باللي معكر مزاجها .. وفالاخير

شيخه : ياعليا ماعرف شو اسوي ويا سلطان معذبني والله
عليا: ليش شو ياه بعد ..
شيخه: دومه مفشلني جدام الناس .. شو اسويبه
عليا: انزين شو سوى
شيخه: قولي شو ما سوى
عليا: شيخه ولدج ريال وادرى بمصلحته .. جنج تشكين من سوالفه ويا ها البنات ترا اغلب الشباب جي .. الله يهديهم بس .. ولدج عنيد..
شيخه: لله خوانه ما سووها
عليا: وانتي شدراج .. سلطان طبعه صريح مايزيغ من حد ..
شيخه: مب الا ها .. الدوام بعد ما يداومه .. وجان داوم سار ساعتين وظهر.. شو ها الحاله وياه .. والله اني عيزت خلاص مالي بارض له.. راشد ايي يخبرني عنه والله اني اتلوم ..
عليا: انزين مارمستي سلطان عن دوامه ليش ما يداومه؟!
شيخه: يبوج مايحشم حد ترمسينه يودرج ويسير عنج
عليا: وابوه ما يقوله شي؟
شيخه: تحيدينه ابوه غاسل اديه منه من يوم ودر المدرسه
عليا: لاحول ولا قوه الا بالله ..
شيخه: اتصليبه ياعليا وازقريه رمسيه يمكن يتلوم منج و يسمعلج
عليا: شو بقوله انا
شيخه: رمسيه انتي .. ربج بعد
عليا: الله يهديه ان شاء الله .. برمسه وبشوفه .. بس سلطان عنيد من يوم يومه
شيخه: ادرييبه .. والله انه طلع الشيب من راسي..انتي طالعيه
عليا: بشوف ان شالله..وشوفي يا شيخه.. ترا ربج محطنج فاختبار وانتي المفروض ماتيأسين من رحمة ربج..حاولي ويا ولدج مره مرتين ثلاث بس مول لاتيأسين .. الا ما ايي اليوم اللي فيه يعتدل حاله
شيخه اطالع اختها : الله يسمع منج
عليا: ماعليج انتي .. بس هدي اعصابج وياه.. ولا تمين جي ضايجه
سادت فترة صمت امبينهم .. وشوي قطعت شيخه ها الصمت بسالفة ثانيه..
شيخه: عيالج اتصلوا ؟
عليا: هيه رمسوني اول ماوصلوا والحمدلله كلهم بخير وسهاله ..
شيخه: الحمدالله..

وعقب شوي طلعن شيخه وعليا .. قالت شيخه بتسير تيلس ويا امها وابوها فالحوي .. اما عليا قبضتها احلام وخلتها تيلس وياها فالصاله .. ويلسن يطالعن التلفزيون ..
ياهم ها الوقت راشد وسلم عليهم ويلس ..

راشد: عيل ليش ماطلعتوا برع تيلسون ويا الشواب
عليا: توه كنت بظهر ويا شيخه اختك بس احلام ظايجه وميلستني وياها
راشد التفت لبنت اخوه: هيه عاد هي ماتصبر بلا البنات واحين مب عارفه وين تدق براسها ..
احلام: هيه والله عمي يالسه جني سياره بدون بترول
راشد: ههه مب الا بترول انتي المكينه بكبرها شلوها عنج
عليا: ياويلي ياراشد لاتذكرني .. قلبي يعورني
راشد: اخبارهم هم ؟
عليا: الحمدالله ..

في هاللحظه رن تلفون البيت اللي ردت عليه احلام .. سمعت صوت وحده يشابه وايد صوت عزه بنت عمها ..

مريم: الوه ..السلام عليكم
احلام: وعليج السلام
مريم: منو انتي ؟!

احلام بغت تتسخف على اللي كانت تتحراها بنت عمها
احلام:انا المستقبل الآتي انا طفل الاماراتي يحدثني لسان البحر عن ماضي اجدادي
مريم اطالعت عيالها بعين مستغربه وردت سالتها : منوو انتي ؟!
احلام مسكت ظحكتها وردت قالت: انا المستقبل الآتي انا طفل الاماراتي يحدثني لسان البحر عن ماضي اجدادي
مريم: عليا موجوده ؟!
احلام سكتت شوي ورجعت بحلقت في شاشه التلفون وشافت انه الرقم مب رقم بيت عمها .. وربعت بالتلفون عند عمتها وهي مفتشله وماتعرف منو اللي متصل
عليا استغربت: منو ؟!
احلام: ماعرف بس لاتقولين انه احلام اللي ردت
عليا: ليش ؟
احلام: عقب عقب بقولج ردي احين

احلام ردت داخل حجرتها تشوف مدوي اختها .. وراشد قبض الجريده يتصفحها .. اما عليا ردت على التلفون ويلست ترمس ويا مريم اللي قررت ترمس عليا عن موضوع نايف وريم .. قبل ماترمس سيف لانه اخوها وتدري انه مابيرفض..فحبت تاخذ راي الام اول..

عليا تفاجأت بالخبر .. ماتوقعت ها الشي مول .. ريم قبل خطبتها شيخه لولدها خليفه بس رفضته .. وعليا طبعا ماتبى تغصب بنتها على شي مع انه كان الود ودها تفرح ببنتها وبولد اختها ..
والحين .. مريم يايه تخطب ..
كانت مريم ترمس عليا اللي فكرها حاير وهي فبالها مشاهد عاشتها ويا ها العايله .. ممكن انه تتكرر لريم بنتها !! وها الشي أبدا ما تأمل انه يستوي ..
تعوذت من بليس .. ورجعت تركز فالكلام ويا مريم ..
صوت فداخلها ينبها .. ها نايف مب سيف.. لا تتسرعين فالرفض ..
هي تعرف مريم زين.. عاشرتها وتعرف اطباعها.. وترد تقنع عمرها .. كل الي صار من ورا سيف نفسه.. محد كان له دووور فالطلاق غير سيف بنفسه..
ماتقدر تتحامل على الكل..

مريم: والله يا عليا مادري شو رايج عاد..
عليا: ها
مريم: بغيت رايج انتي فالسالفه
عليا وتحس بدقات قلبها تتسارع..تحاول تضبطه ..
عليا: والله يا مريم .. شوفي الشور هب عندي..
مريم: بس انا ماخبرت أي حد عن ها السالفه .. قلت أشاورج انتي اول حد
عليا ابتسمت وهي تسمع ها الرمسه ..
مريم: ماسرت اشاور لا اميه ولا سيف.. قلت ايي عند عليا اول .. ربيتي البنات وكبرتيهن .. ورايج ع ها الشي يهمنا ..
عليا: تسملين فديتج.. بس انا ماروم اوافق ولا ارفض.. يعني الامر راجع لريم بس..
مريم: ادري يا عليا.. بس بعد انا بحط فالحسبان اني اخت سيف.. صح اني على اتصال وياج من فتره لفتره.. بس بعد بتم اخت سيف ..
عليا: يا مريم كون انج اخت سيف ما يأثر على شي أبدا ..انتي اخت عزيزه وغاليه.. عمرج ما ضريتيني فشي .. بس اطمني .. انا لو وافقت بنتي مابكون مطبه فدربها .. بفرحلها ومن خاطريه بعد ..
مريم: الحمدلله .. ها الشي يفرحني يا اختيه ..

بعد ما انهت عليا المكالمه .. سكرت وهي تفكر بالخبر المفاجئ هذا .. راشد الي كان قابض الجريده وطاها ع جنب وهو يشوف عليا ..

راشد: ماشالله خطبه اسمع
عليا: هي .. هاي مريم اخت سيف..
راشد: هي حرمة خلفان ..وناويه تخطب لنايف شكلها
عليا: هيه ماعندها ولد كبير غيره
راشد: ومنو خطبت ما يكون مي ولا ساره
عليا ابتسمت : بتخطب الكبيره ..
راشد: ريمان .. زين يتياوزون نايف وريم
عليا: كيف يعني
راشد: نايف ماشالله الواحد يعتمد عليه .. وريم هابة ريح ..
عليا: عاد نحن مالنا شور.. بنتريا ريم لين ترد وبنخبرها
راشد: يعني بترفض
عليا: ما بنغصبها على شي .. مريم قالت انها ماخبرت لا امها ولا اخوها.. يت تخطب اول شي عندي ..
راشد: يا حيها .. وانتي شو
عليا: شو انا شو
راشد: موافقه على ها الشي
عليا: راشد .. اذا كان ها الشي بيسعد ريم ما برفضه
راشد: انزين .. من قناعه ترمسين؟
عليا: همم .. ماخبي عليك اني متخوفه من الموضوع.. بس ترا البنات ردن بيت ابوهن .. وريم منهم وفيهم .. انا كنت غريبه عليهم ..
راشد: خلاص يا عليا انسي الماضي .. الحين نحن فريم
عليا: ونايف .. شو اطباعه؟
راشد: قلتلج راعي مسؤوليه.. ريال والنعم والله .. ماشفت عليه شي ..
عليا: تراك مرابع سيف ونفس الشي ماتشوف عليه شي .. يوزتني اياه وصار اللي صار.. انا مابا بنتي يصيرلها نفس الشي ..
راشد: يا عليا خلج من سيف.. كلن منكم راح فدربه.. وانتي بروحج بغيتي ها الشي..
عليا: ماكنت بقدر اكمل وياه.. وعمري ماندمت ع ها الطلاق
راشد: شقيتي وكبرتي بنات .. وتحملتي مسؤووليه بروحج .. يزاج الله خير يا عليا.. بس يا الوقت الي بينخطبن فيه بناتج .. ونايف من الحين اقولج ريال ما يتعوظ .. فكري زين .. نايف تراه ولد خلفان .. خلفان غير عن سيف وانتي تعرفين ها الشي .. كلن له شخصيته ..
عليا: صدقك يا خويه .. المهم انه محد يدري بها الموضوع الحين .. ويوم بتي ريم بشاورها فالموضوع ..
راشد: عاد هب الا تشاورينها وبس .. حبيبها فالريال .. لاتخسرونه ..
عليا: ان شاء الله خير ..عاد هب يزل لسانك جدام سيف جان شفته
راشد: وين تراه مسافر ..
عليا: حتى يوم بيردون .. مانباه يعرف لاهو ولا امه
راشد: بدق لخلفان وبشوف سالفة ها الخطبه ماخبروني عنها ههههه ..
عليا ابتسمتله ...
راشد: يا حافظ على بنياتنا كبرن والله وانخطبن .. عاد ساره ومي من احين اقولج اللي بيي يخطبهن ايي يشاورني انا اول..

اطالعته عليا وابتسمت .. وهي تحس بقلبها يرف .. تحس بالطمأنينه ع بناتها .. وراهن ناس يحاتونهن ويحبونهن غيرها ..واطمنت اكثر من ناحية خطبة ريم من بعد ها الحوار ويا اخوها ..

اما مريم من بعد ما سكرت عن عليا.. ردت تيلس وياعيالها .. وخبرتهم باللي استوى واللي انقال.. واستانس الكل انه عليا ما اعترضت على الخطبه.. لانهم توقعوا انه عليا تحسس شوي وممكن انها ماتوافق ..

مريم: والله انه ها الحرمه زينة العقل فيها ..
لطيفه: فنانه عليا .. ليتهم بس ماطلقوا هيه وخالي
مريم: ربج كان رايد يابنتي ..
اسما: بس زين الحين بعد البنات قراب منا اكثر عن قبل ..
مريم: حليلها عليا.. الله يصبرها ع فراقهن ..
نايف: اذكرها والله عليا .. كانت وايد طيبه ..
لطيفه: ايه شو عليا بعد .. قول عمووه
نايف: هههه مب متعود ..
مريم: عاد هيه قالت مالها أي شور .. يعني راي ريم هو الاول والاخير ..
نايف: زين بعد .. انا ماباها توافق عليه بالغصب
مريم: ماعليك انته .. بتوافق ان شالله
اسما: انزين امايه لو صار واستوى.. متى بتحددون الملجه والعرس
مريم: مادري والله .. كل شي يعتمد عليهم .. ريم ونايف
نايف: انزين هيه بعدها تدرس
لطيفه: انزين الا هنه.. يعني عادي بتكمل..وبعدين ها السنه وبتخلص ..
نايف: زين زين ..
مريم: الله يتمم على خير.. انا بقوم اصلي المغرب..
لطيفه: دعواتج يا حجه

صلوا العيال ورجعوا يسولفون عن الخطبه وتوغلوا اكثر للعرس ورمسوا عن عقب العرس.. وين بيسكنون .. وتمن يعلقن ع نايف اللي كان يضحك عليهن..
وشوي يا عمار ووراه نوره واللي هيه اخر العنقود فها البيت .. نواري يوم شافت نايف ربعت ونقزت فثبانه .. هيه مكمله أربع سنين ومتعلقه بنايف اكثر حتى من خواتها..وطبعا نايف مايقدر يتفجج منها يوديها وين تبى ولا يشوفها تصيح..
*****************
(الاثنين) 19 يوليو 2004
*****************

الساعه 3 الفير كان مروان توه نازل من سيارته .. تاخر وايد برع لانه كان سهران ويا ربعه اللي رجعوا في اجازه من دراستهم خارج البلاد .. وعلى السهر والسوالف كلن نسى وقته .. سكر سيارته وحاول يفتح باب البيت لكنه لقاه مقفول

مروان:اوهو هاذييل ليش قافلين الباب ؟ انا بروحي ناسي ما اشل ويايه المفتاح..

شل تلفونه ويلس يتصل على رقم البيت بس محد يرد عليه .. ورجع اتصل على رقم امه مغلق وأبوه مايرد ..
مروان: ليش مايردون هذيل اوف مب رقاد ها ..

رجع واتصل على رقم اخوه فارس .. رن التلفون وايد وبعد فارس مارد

مروان: هذا ديايه يرقد من وقت شو اباه انا اتصل به ..
رجع يتصل على رقم اخته لكن هالمره خانته بطاريه التلفون .. اللي فضت وهو بعده ماتصل ..
مروان: مقيوله النحس طول عمره نحس ..
التفت لسيارته وفتحها يدور فيها جراجه تلفون لكنه مالقى .. سكر باب السياره بغيض واتسند عليها يفكر شو يسوي احين ..
مروان وهو يفرك لحيته ويطالع البيت بتمعن: جرس البيت خربان .. والتلفون مافيه بطاريه .. والباب مقفول والحل احين يامروان ؟ ماشي طبعا حل الا حل واحد ..انك يا مروان تحووم الييدار..
ركب سيارته وشغلها .. وجدمها مجابل الييدار .. نزل من السياره وركب عليها من جدام ..
مروان: احين حصلت شي اركب عليه لكن الله يعين النزله ..

رفع اول ريل ولكن مثل ماقال النحس طول عمره نحس .. زامن تسلقه اليدار مرور دوريه الشرطه .. اللي تجدموا منه وسطعوا عليه نور السياره وظربوله هرن وهو اول ماشافهم نزل ريله و صفق الايد بالثانيه..

مروان: انا ليش من يوم يومي منحوس ياناس .. شو اسوي احين ..
نزل مروان من فوق سيارته و الشرطه كانوا واقفيه تحت
وقبل مايرمس على طول قبضوا عليه

مروان: لحظه الطيب هذا بيتنا لحظه
لكنهم ما سمعوله وتموا ماسكينه
مروان: يا الطيب اسمعني انزين..
الشرطي: هاه شوعندك ؟
مروان: الشيخ هذا بيتنا والله
الشرطي: بيتكم راكب فوق اليدار
مروان:توني راجع من برع وقفلوا عني الباب وين ادخل ماشي الا اركب اليدار
الشرطي: شو اللي يثبت
مروان: انزين بطل ايدي شوي..
الشرطي: ما بهدك .. يالله تعال ويانا القسم ..
مروان: والله ما سرت وياكم .. قلتلك ها بيتنا .. لو انا حرامي جان اول ماشفتكم شردت .. (ويرمس وهو صدق متضيج منهم ..) اسمع والله انه بيت ابويه يعني بيتي شو بقص عليكم يعني..
الشرطي: انزين شو اسمك ؟
مروان: مروان راشد سلطان بن مانع
الشرطي: بطاقتك موجوده ؟
مروان: الهويه في سدة السياره اللي فوق
الشرطي: حاليا ماعندنا مجال انهدك الا في حاله وحده .. انه يطلع صاحب البيت ويقول انك ولده مثل ماتقول
مروان: انزين اتصلوا بابويه ..

عطاهم مروان الرقم وهو ميت من الحر من الوقفه ومتغصص اكثر لانه توهق ..
بعد عده محاولات رد ابوه على التلفون وطلعلهم برع وهو زايغ ..شو مستوي الشرطه داقيله ويقولوله انهم يتريونه برع البيت ..
طلع راشد برع وشاف مروان واقف ويا الشرطه .. واستغرب الوضع ..

راشد: مروان شو فيك.. شو مستوي !!
الشرطي: هذا ولدك ؟
راشد: هيه ولدي بلاه شو مسوي ؟
مروان: ابويه انا ييت متاخر وانتوا قافلين عني الباب .. ييت بحوم اليدار والا والدوريه ماره.. يتحروني حرامي..
راشد رغم خوفه من اللي صاير الا انه ضحك على الموقف : لو ادري عيل جان ماظهرت وخليتهم يشلونك تبات عندهم عشان ماترد مره ثانيه متاخر ..

ضحك الشرطي وهو كان بعده ماسك ايد مروان ..
مروان: ها الشيخ بعدك ماسكني
الشرطي: هههه اسمحلي .. بس شو نسوي ترا ها واجبنا ..
راشد: لاوالله هابين ريح.. يزاكم الله خير ..
وترخص الشرطي منهم وروحت دورية الشرطه اما مروان دخل البيت ويا ابوه ..

راشد: ليش ماتصلت تلفون ؟
مروان: ابويه اتصلت لكن محد رد عليه وعقب خلاص مات التيلفون فظى..
راشد: وانته ليش متاخر مب عوايدك
مروان:ترا عيال سعيد محمد ردوا من السفر اجازه عندهم وتعرف عاد سوالف وظحك وطاف علينا الوقت
راشد: هيه زين يالله عاد قوم لاترقد تيدد وانزل بنسير المسيد ماباجي شي عن صلاه الفجر
مروان: ان شا الله ..(ويقول بصوت واطي) انا الا ما بصلي الفجر بس.. بصلي بعد ركعتين شكر لله ..

ويوم ركبوا فوق .. لقوا ام مروان يالسه تترياهم ووياها عزه
كانت الام زايغه عليها الدنيا ماتعرف شو مستوي ويوم شافت مروان ويا ابوه يايين .. زخت مروان تهازبه عبالها مسوي شي والشرطه يايبينه .. وتموا يضحكون عليها .. راشد خبر حرمته بالسالفه كلها وهلكوا من الضحك ع مروان فارس طلع من حجرته بيسير يصلي وسمع الربشه والضحك استغرب الحال وتنشدهم شو السالفه وردوا يعيدوله السالفه وهو ناقع من الضحك ع مروان اللي ينكت ع عمره كيف كان بيشقح الييدار..


****

في هونج كونج تزهبوا العيال وقرر ابوهم يوديهم يمشيهم في السفينه اللي قريبه شوي من فندقهم يعني بالمشي يقدرون يوصلونها .. منها ياكلون فيها لانهم ماتريقوا الصبح و منها يتفرجون لانه هاي السفينه تمشي مده ساعتين .. وتحوطهم على جبال هونج كونج المنحووت عليها تماثيل للمشاهير..

كانت اسماك القرش تحيط بالسفينه وهي تمشي والعيال يراقبون ويتصورون
استانسوا في رحلتهم هاي .. بس المشكله كانت لما رجعوا الفندق ..

جاسم تعب عليهم وايد .. والظاهر انه البحر واليلسه في السفينه سببوله دوار في راسه وغثيان.. وبدت حرارته ترتفع .. بمساعده الفندق يابولهم طبيب .. وكشف عليه و عطاه ابره وادويه .. وروح سيف يوصل الطبيب .. ويلست ريم وخواتها متحاوطين على جاسم.. ريم يلست تمسح على شعره وهي ميوده الكماده البارده بايدها الثانيه على يبهته ..

مي: فديته جسوم والله غامظني
ريم: ساروه سكري تيلفونج انا سكرته.. اخاف امايه تتصل و تحس انه في شي
ساره: ليش انزين جي بتحاتينا اكثر
ريم: لا لا انا مرمستنها قبل مانطلع عادي بتقول ردوا ارقدوا
رجع سيف بعد مادفع فلوس الدكتور ..
سيف: ماخفت حرارته ؟
ريم: احس جسمه بدى يعرق ..
سيف: خلاص لحفوه وايد عشان يعرق وتفج عنه الحمى .. وانتن يالله روحن غرفكن .. لاتسون حشره ..
روحن مهره ومها و عفراغرفتهم اللي كان بينها وبين غرفه ابوهم باب ..
اما ساره ومي في غرفه بينها وبين غرفه ريم وجاسم ومايد باب ..
سيف: ريم اذا تعب او شي دقي 9 وعقب رقم غرفتنا انزين
ريم: ان شاء الله
سيف: يالله تصبحون على خير
البنات: وانته من اهله

سارت ساره ومي الغرفه و تمن طايحات على السرير المشترك وهن يسولفن ..
ساره: باجر من انش بسير السنتر اللي حذالنا .. ابا اخلص اغراض الجامعه من اهنه عشان اكون مميزه ومحد شراتي ..
مي: اندوكم نحن في حال وانتي في حال .. ساروه انتي شو هالبرود اللي فيج .. دومج جيه عايشه تفكرين في نفسج وبس .. وهذاك اللي طايح اهناك
ساره: بسم الله ميوه بلاج انجلبتي عليه .. ان شاء جسوم بيخف لاتسونها مأساه
مي بندت الابجوره وعطت ساره ظهرها: الكلام وياج ضايع .. صدق قالب ثلج
ساره: وياراسج ..
مي ردت تلف ع ساره: ساروه قومي همزي ريولي.. تعورني
ساره: لا توني قالب ثلج ولفيتي تبين ترقدين
مي: تذكرت اني كنت اباج تهمزيني
ساره: يا العيوز
مي: عيوز هاا.. منج انتي ويا ها الراس كسرتيني
ساره: جب جب ..
مي: حرام عليج صدق تعورني ..
ساره: ماحطيتي من المرهم الي عطتج اياه امايه عفرا
مي: امبلا احط ..
ساره: بسج عيل مب لازم تهميز ها المرهم وايد زين ميوب من الهند خخخ
مي: ويا ها الراس..ماعليه بتحتايين
ساره: بس لااه
مي: انزين .. هين ..

هذا الحال ويا مي وساره .. رغم انهم يحبون بعض وايد .. ولا وحده تصبر عن الثانيه الا انهن دوم يتناقرن على اقل شي .. لفت مي الصوب الثاني عشان ترقد وساره ضحكت عليها وماهانت عليها اختها عفدت تبى توطاها ومي تحرطم عليها..

مي: عنبووج كسرتييني .. الوطاب هب جذه
ساره: اوووهوو مايووزلج شي
مي: قلتلج همزي هب توطيني
ساره: انزين ..

همزت شوي ساره عن خاطر مي وتضغط على ريل مي بقو ومي تصارخ عليها ..
اما ريم كانت يالسه هالوقت حذال جاسم اللي كان جسمه شوي بدى يبرد وغفت وهي مب حاسه به.. كان السرير مشترك يكفي ريم ومايد وجاسم .. بس مايد رقد ها المره على الغنفه عشان جاسم ياخذ راحته اكثر..

مهره ومها كانوا مب حابين سالفه انه عفرا تكون وياهم في نفس الغرفه ويلسوا شوي يتابعون فيلم .. لين يرقدون .. بس عفرا ماخلتهم في حالهم من سوالفها اللي كلها جذب ..
عفرا: تدرون انه انا عندي بلووره صغيره الماس فيها وحده محبوسه
مها: خيبه مهروه عن يطيح السقف علينا
عفرا: شو تقصدين
مهره: عفروه عن الخريط
عفرا: صدق .. فيها وحده محبوسه ماترمس الا ويايه انا .. صديقتي بس
مها: ومنو يايبلج هالبلوره
عفرا: هديه من امي .. وبالحظ حصلت فيها وحده .. تدرين هاي البلوره وايد غاليه ماشي منها عند حد .. الماااااس
مها: انزين راوينا اياها
عفرا: لا لا مايستوي اذا راويتها حد بتختفي البنت اللي فيها
مهره ملت من سوالف عفرا اللي حشرتهم فيها من يوم كانوا امس في الطياره .. وكلها جذب في جذب .. وقررت هي بعد تسايرها : تصدقين عيل احنا امنا عندها مكياج ذهب
عفرا: أي ماركه
مها اظحكت وكملت الجذبه ويا اختها: يقولج ذهب يعني ماله ماركه .. يايبينه من برع مخصوص حق اميه بس .. تصدقين حتى فيه كريمات خاصه عشان تخوزه .. مب أي شي يخوزه
عفرا تمت ساكته ماعرفت شو ترد عليهم .. وقررت ترقد .. اما مها ومهره تمن يتابعن الفيلم ..
مها: اسميها اكبر خراطه
مهره: ههههه حتى نحن خرطنا عليها
مها: خلها تتادب عشان تحس انه نحن نجذب عليها و تعرف انه نحن فاهمين انها تجذب
مهره: ههههه محد ساروه وميوه والا جان صدق ادبوها على جذبها
مها: ما يبخلنها فحالها هههه والله تضّحك .. بلوره اونه فيها وحده .. وين يالسه .. عمة سنووايت ..
مهره: هههههه .. شكلها تصدق الرسوم هاي
مها: هيه صدقج
مهره: يلا مهوه خلينا نرقد اكيد باجر بيوعونا من وقت
مها: يلا عيل رقااد
مهره: مهوه ؟
مها: هاه
مهره: تدرين بقولج شي
مها: قولي
مهره: اتعرفين انا كنت متشجعه اعيش عند ابويه مب لاني مظايجه من اميه او شي بس كنت ابا احس كيف الابو يتعامل ويا عياله ..بس احس مرات اتندم .. اقول ليتنا تمينا عند امايه ..
مها: كنت افكر مثلج بس لاتندمين لانه نحن مايينا بكيفنا .. لو يينا بكيفنا بنندم انه يينا بس يينا عنده مغصوبين
مهره: عندي العيشه عند اميه يوم .. احلى من اني الف بلاد العالم كلها
مها: مهره الكلام في هالموضوع مافي منه فايده خلاص .. نامي انتي احين وخلينا نعيش الحلو في ايامنا هاي .. بعدنا صغار ع الهم ..
مهره: هي والله صدقج ..

وتلحفن مهره ومها بلحاف واحد وعفرا حذالهن بلحافها .. وشوي ساد الهدووء ورقدن التوم .. كان شكلهن وهن راقدات حذال بعض وايد كيوت .. روسهن حذال بعض وطايحات نفس الطيحه بس كل وحده مجابله الثانيه..

رد: قـــلـــوب تـــحـــت الـــمــجـــهــــر**
 

بعد يومين راح اكمل أن شاء الله

الحين وقت صلاه ولا كنت راح أكمل


جودي

رد: قـــلـــوب تـــحـــت الـــمــجـــهــــر**
 

مساء الورد

نكمل الروايه





*****************
(الثلاثا) 20 يوليو 2004
*****************

الصبح قامت ريم وانتبهت انه حراره جاسم خفت .. بس يخافون يظهرون ويتعب خصوصا انهم اليوم بيكملون رحلتهم لاستراليا

دخل سيف على ناعمه يخبرها عن هالشي
سيف: انا كنسلت سيره الحديقه
ناعمه: ليـــــــش ؟؟ من الله مابنيلس فها البلاد وايد ..ماشفنا فيها شي..
سيف:شونسوي.. الجو مايساعد ونخاف ترجع الحمى لجاسم ..
ناعمه: اوووووف هذا وقته
سيف: ناعمه
ناعمه: اوكي اوكي
سيف: البنات نزلوا يتريقون .. بنسير السناتر اللي حذالنا اهنه .. لين العصر وعقب بنسير المطار ..
ناعمه: انزين ببدل وبلحقك .. اتجدمني ..
سيف: انزين لاتتاخرين ..
وصل سيف عند الباب ورجع صدلها: اقولج لاتيلسين تصبغين ويهج وايد
وطلع
ناعمه: اووووف .. صدق انك مال اول .. تصبغين اونه

وقامت ناعمه ولبستلها بنطلون وجاكيت بطولها مفصمتنه فوق بس..وتحجبت ونزلت عند ريلها..

سيف: كان لازم تلبسين ها اللبس
ناعمه: يااسلام وشوفيه.. هاكن بناتك يلبسن
سيف: بناتي صغار بعدهن..انتي حرمه ام عيال .. حشميني ع الاقل
ناعمه: سيف عاد لاتفتحلنا موال..اللبس مب فاضح وها الجاكيت جنه عباه بعد شو..حتى مكياج ماحطيت
سيف: انزين خلاص خلصينا من ها الحشره..
ناعمه: يالله يا سيف الحينه انا حشره..انا مادري بلاك منجلب عليه من ين بناتك
سيف: نااعمه شو منجلب بعد.. وانا اروم انجلب على غناتي
ناعمه: هيه قص عليه انته..خلاص انا زعلت
سيف: افا نعووم الغاليه تزعل مني
ناعمه وهيه تضحك بدلع: ولو زعلت بشو بتراضيني
سيف: باللي تطلبينه.. دشي ها المحلات كلها وشلي اللي تبينه
ناعمه: يعلني ان شالله مانحرم من طيبك يا بومايد..

ابتسملها سيف ..وقبضوا بايد بعض وقاموا يدشون المحلات..البنات كلهن ماعدا ريم اللي كانت يالسه وجسوم كانن يحوطن بعد عند السناتر.. مي وساره انتبهن لابوهن وحرمته وتمن يضحكن عليهم .. وقامن يلاحقنهم كل مكان يبن يشوفن ابوهن شو بيشتريلها..ناعمه لاحظتهن وانقهرت واايد .. وكل ماتبى تسير صوبهن تنازعهن يتشاردن عنها وماتلحق عليهن.. وعقب ما خلصوا مشاري ردوا غرفهم يرتبون الاغراض وتوجهوا للمطار يكملون رحلتهم لاستراليا ..

****

سلطــــــان فها الوقت ..ومثل كل وقت .. وكعادته .. قابض تيلفون البيت ويرمس بدريه اللي ماوقفت من اتصالاتها له لين رد عليها .. دق موبايله اللي كان بعيد شوي عنه شاف الرقم بس مارد ..

بدريه: منو متصل
سلطان: ماعرف .. مارديت
بدريه: زين بعد مقدر مني ما رديت
سلطان: لا بس مب فايج ارد
بدريه: بلاك انته جاف جي
سلطان: ودنيني فماي عيل
بدريه: سلطاان لا تعاملني جي.. انا شو ذنبي .. ها وريلي موجود اخاطر وادقلك بعد شو تبى اكثر من جي اسويلك اياه
سلطان: بس ذليتينا بها الريل عاد ..
بدريه: فديتك لا تعصب انزين ..
ورد تيلفونه يرن ..
سلطان: اوهوووووو منو ها اللي يتصل..اقولج لحظه شوي برد ..

عليا: الوه
سلطان: الوه
عليا: هلا سلطان اشحالك ؟
سلطان: بخير منوو ؟؟
عليا: انا عليا خالتك
سلطان: هلا هلا خالتيه اسمحيلي ماعرفتج
عليا: مسموح انته وين ؟
سلطان: في البيت ..
عليا: انزين مر عليه البيت ابا اسلم عليك من زمان ماشفتك
سلطان: احين ؟؟
عليا: هيه اذا تروم
سلطان: اا.. اوكي ..ان شاء الله
عليا: يالله عيل اترياك .. مع السلامه
سلطان: مع السلامه ..
ورد على تلفون البيت : الوووه ..
بدريه: هلا منو متصل
سلطان: خالتيه متصله تباني اسيرلها ..
بدريه: شو تبى منك ؟
سلطان: والله العلم عند الله اول مره تطلبني .. مادري شو عندها ..بقوم اسير بيت يدي بطالعها ..
بدريه: بيت يدتك كله بنات صح .سلطان لا تتطالعهن..والله اخاف يتحرشبك
سلطان فخاطره"جي بنات اهلي شراتج تتحرين..اكرمن عنج.."
سلطان: يالله انزين باي ..
بدريه: انزين قول كلمه حلوه
سلطان: يوم بيي وقته
بدريه: اووهوو والله ذليتني والله ..
سلطان: باااي

وسكر سلطان التيلفون قبل ما يسمع أي رد من بدريه .. وقام يبدل ثيابه وسار بيت يده يشوف خالته شو تبى منه ..

****

في بيت مريم .. البيت كله طبعا مرتبش على سالفة خطبة نايف لريم على الرغم انهم مالقوا الرد من ريم بعدهم ولا خبروا ابوها ..بس موافقه عليا فاتحة خير الهم .. نايف كان يالس في غرفه خواته ويسولفون .. قامت اسما وطلعت البوم صور جديم ..

اسما: نايف يبتلك شي عجيب
نايف: شو ها
اسما: شوف بروحك
فتح نايف البوم الصور وبدى يشوف صورهم وهم صغار و التعليقات وكلهم يضحكون على اشكالهم .. بس بين الصور كانت صور ثانيه لبنات غير خواته
كانن بنات خاله ..
نايف: هذيل بنات خالي سيف
اسما : علييييك نور .. بس مب هذا اللي ابا اراويك اياه .. في صوره معينه عجيبه صدق
نايف: شوهي؟
اسما طلعتله صوره كانت اخر الالبوم .. كانت صوره نايف لابس بشت وغتره وعقال .. و واقفه حذاله ريم بنت خاله لابسه كندوره بيج مخوره بذهبي...
نايف من شاف الصور تم ماسكنها ويشوفها وهو ساكت ..
اسما: ههههه بلاك ؟ عجيبه صح
نايف: انتي عليج علوم وين لقيتيها هاي؟
اسما: امس كنت اجلب في الصور ولقيتها .. شو رايك نايف يوم تعرس ان شاء الله انته وهي تكبرون هاي الصوره وتحطونها في غرفتكم
نايف: خلها تواافق قبل
اسما: ان شاء الله بتوافق
نايف: ان وافقت بسوي بطايق العرس من هاي الصوره ..
اسما: احلف
نايف: صدق .. حد سواها من قبل ؟
اسما: لااا.. يا سلاام عجييب..
نايف: خلاص عيل انا بسويها .. وصوره صدقيه لا مركبه ولا شي
اسما: اما انته عليك افكار .. الصراحه اخويه انته رومنسي وايد
نايف: ههههههه ويا راسج انزين يالله انا بسير ورايه دوام برقد
قام نايف وشل الصوره وياه
اسما: تعال تعال وين مودنها ردها

نايف اشرلها بلامبالاه وشل الصوره وياه .. وهو يفكر
معقوله هاي الصوره اللي مصورينها وهم يهال ولا يحسون بشي تتحول واقع وهم كـــــــــــبار؟؟!!

****

سلطان نازل من الدري وهو يفصم عقب كندورته ويصفر ع لحن اغنيه.. مانتبه لخوانه اللي يالسين فالصاله لين زقروه ..

خليفه: بوو ميوود وين سااير
رد سلطان ع ورا ووقف عند باب الصاله
سلطان: خالتك تباني
منصور: ليش شو تبى فيك!
سلطان: مادري داقتلي مساعه والحين سايرلها
خليفه: هييه .. عاد هب تغلط فالبيت سلطان
منصور: بيتهم ع اليمين .. مب اول واحد الثاني
خليفه: هي الدروازه نحاسيه .. انتبه
سلطان كتف ايده واطالع خوانه وهو مكشر بويهه ..
سلطان: والله! زين خبرتوني انا عبالي البيت اللي مجابلنا
منصور: هههه لا لا ها بيت ام جمال هب تغلط
سلطان وصل حده ودش الصاله وقبض منصور من كندورته
منصور: ايه وين تبى خوز ايدك
سلطان: علموك تتطنز هاا..

قام خليفه وقبض سلطان من ورى وشله وعقه ع الغنفه الثانيه
خليفه: شو تخبلت انته زين ما خنقت اخووك
منصور: خس الله ها الويه
سلطان: ما عورته الا قابضنه من كندورته
منصور: هي ماتحس تراك
خليفه: سلطان سير ابوي وفكنا من صدعتك الواحد مول ما يروم يسولف وياك
سلطان اطالعهم بنظره ووقف وطلع من البيت وهو يلاعن ويشاتم ..
دشت شيخه الصاله ع طلعة سلطان ..

شيخه: بلاكم؟ شو مستوي
منصور: ها ولدج منو غيره
شيخه: بلاااه بعد
خليفه: ادافنو منصور وسلطان ..
شيخه: لاحوووول ولا قوه .. يا بويه كم مره قايلتلك لا تحرش به
منصور: امايه مب الا انا .. ترا خليفه بعد ويايه كان
خليفه: يهبي يمد ايده عليه
شيخه: منصور غناتي انته اصغر عنه بيموتك جان اتضاربتوا ما يخصك فيه
خليفه: اونه يعني محشم مني ها ولدج لا يحشم لا كبير ولاصغير الا انه مايروم يمد ايده عليه خشمه ها بكسره له
منصور: مساعدنكم انتو ها النادي اللي اتسيروله .. ودني وياك خلوف ابوي ابا جسمي يغدي شراتك
شيخه: يالله شو تباه .. بروحك انته يابس وين تروم تشل ها الاثقال
منصور: ماعليه ما اعول ..
خليفه: امايه خاليته شو تبى فسلطان
شيخه: عليا!
خليفه: هيه
شيخه: اا ماادري .. ليش هو سايرلها احين
خليفه: هيه يقول
شيخه: برمسها خلاف بشوفها شو تباه ..

وطلعت شيخه من عند عيالها وهي تفكر فسلطان وعليا وشو بتقوله.. بيسمعلها ولا لا.. بتروم عليه ولا لا!!

اما سلطان فتوجه بيت يده .. دخل الحوي وها الوقت كانت ام راشد طالعه من البيت .. يوم شافته استغربت سلمت عليه وقالها انه عليا تباه .. وقف جدام باب البيت وتم يطالع يمين شمال .. ها البيت من متى ما دشه.. كان يكتفي باليلسه فالحوي .. والحين بيدش ها البيت.. دق ع الباب ..
احلام كانت فالصاله ويا مدوي اختها ويوم حسن بصوت ريال دشت احلام داخل ومديه قامت تفتح الباب .. استغربت هيه الثانيه انه ها الشخص واقف جدام باب البيت ! شو يبى !!

قالها انه يبى عليا .. ودخل يلس فالصاله .. ومديه سارت تزقر عليا .. وفضولهم الجو فالصاله ..
عليا سولفت وياه شويه .. ماعرفت كيف تفاتحه فالموضوع ولا حبت تقوله انه شيخه شكتلها من سلطان .. تمت تسولف وياه وتاخذ اخباره ..

عليا: يالله يا سلطان من متى ما يلسنا وياك ..
سلطان: اشغال شو نسوي
عليا: يبوك سوالفك ماتنمل يوم لك بارض..اتذكر يوم صغير شقى كنت شيطان كل يوم تصيح وحده من بناتي
سلطان: ههههه حليلهم .. عاد احين روحن عنج
عليا: هيه فديتهن .. مسافرات بعد
سلطان: والله .. وين ومن متى
عليا: من يومين مسافرين احين هم فهونج كونج.. اليوم بيسيرون استراليا
سلطان: يحيهم .. زين زين
وتم سلطان يطالع خالته يباها تدش فصلب الموضوع .. يبى يروح وهي الا تسولف وياه .. حستبه عليا انه تملل ويبى يعرف هيه شو تبى منه .. يعني غريبه تزقره بس عسب تسولف وياه ..
تحنحنت عليا وبدت ترمس .. رمسته عن شغله وليش هو مهملنه .. سلطان تم ساكت وما رد عليها .. حاولت وياه انه يطلعلها اللي فخاطره .. او هو ليش جي يسوي!
بس هو ماعنده جواب .. يوم يطنش الدوام يكون راقد بس هذا هوو!
وفالاخير .. حست عليا انها وايد رمست وسلطان ما عنده أي رمسه ..

عليا: سلطان .. شو قلت
سلطان: شو بقول يعني .. خالي يتشكى وامايه تتشكى.. شو يعني بسوي غير اني اداوم
عليا: سلطان هم ما يبولك الا الخير .. وترا كله ها لمصلحتك
سلطان: ماعليه اذ هي ع سالفة الدوام خلاص من باجر ببدى اداوم زين .. وافتك من ها الصدعه
عليا: سلطااان
سلطان: اوكي اوكي ..
عليا: الحين نحن يوم نبى مصلحتك قلت عنا صدعه
سلطان: اسمحيلي خالتيه ما اقصد
عليا: تراك تسوي الغلط وتقول ما اقصد .. من صغرك جي
سلطان: خلاص خالتيه انا بسير الحين .. مواعد الشباب فالقهوه ..
عليا اطالعته ووقفت : الله يحفظك ..
قام سلطان من محله ووصلته خالته لين باب البيت
سلطان: مع السلامه
عليا: لا تنسى وعدك
سلطان: ان شاء الله .. فمان الله

وطلع سلطان من عند عليا وهو متضجر ركب سيارته وروح .. اما عليا ردت الصاله يلست تفكر فسلطان وفالحال الي هو وصل عمره له .. رفعت السماعه واتصلت فشيخه اختها اطمنها ع مجريات الاحداث
لكن شيخه ماقدرت تركز .. سكرت عن عليا التيلفون وسارت لاختها البيت .. ويلست عليا تخبرها بالي صار وبالرمسه الي دارت امبينهم .. وشيخه .. مالها غير دموعها اللي تواسيها ..


******************
(الجمعه) 23 يوليو 2004
******************

الساعه تسع الصبح بتوقيت استراليا.. نشت ريم من نومها .. و تغسلت و دخلت على خواتها توعيهم .. كانوا ساكنين في منطقة الساحل الذهبي .. وحاجزين شقتين في فندق
“Suncity”
شقه فيها 3 غرف نوم للبنات وصاله .. والشقه الثانيه فيها غرفه وصاله لسيف وحرمته..
وعتهم ريم كلهم .. و سارت المطبخ تسويلهم سندويشات الكاكاو ..ويلسوا ياكلون فالبلكونه ويشوفون الدنيا برع ..
كانوا مخططين انهم يزورون حديقة “movieworld”من بعد ماساروا الحديقه المائيه بالأمس واستانسوا فيها ..
تلبسوا البنات ونزلوا اللوبي يتريون ابوهم و حرمته ينزلون ..

ساره: ريمان ابا ايس كريم ..
ريم: حشى في هالبرد تبين ايس كريم
ساره: هيه والله في خاطري
ريم:هاكم يبيعون اهنه اسير اخذلج ؟
ساره: بسير وياج

مشن البنتين لين ثلاجه الايس كريم في طرف اللوبي .. و كانوا اهناك ثلاث شباب واقفين وشكلهم خليجيين .. ريم ما نتبهتلهم لكن ساره استغربت منهم .. كانوا يطالعون عايلة سيف ويبتسمون ما بينهم.. طنشتهم ساره وردت ويا ريم صوب اهلهم .. وساروا عقب الحديقه..
وفي الحديقه .. دخلوا العيال وايد عروض .. منها عرض باتمان .. و عروض ثانيه ويلسوا في واحد من المطاعم يتغدون ..

مهره: ابويه ابا فلوس
ناعمه: حق شوو؟
مهره:قلت ابويه انتي ابويه ؟!
سيف: مهره خلاص .. شو تبيبها الفلوس
مهره: بنسير محل اهنه حذال المطعم ايبيع اكسسوارات الشخصيات اللي في الحديقه
ناعمه: هيه انزين خذوا عفاري وياكم خل تاخذلها هي بعد
مها: اووووف مانسوي شي الا لحقتنا هاي
ناعمه: ان ماخذتنها ماشي سيره
مهره: انزين بناخذها عطونا يالله
سيف: ماما هاي اختكم الصغيره لازم تعاملونها زين ..
مها: ان شاء الله
سيف: اندوكم .. خذوا اللي تبونه يالله سيروا
مهره: مشكور ابويه .. يالله عفروه طوفي ..

ساره ومي وريم طلعن بعد وتمن يتمشن حذال المحلات وتوغلو بينها ..

ساره: الله ميووه شوفي هالمحل
مي: هذا مال التصوير القديم
ريم: حلوو طوفن نتصور ..
مي: ومهروه ومهوه ؟
ساره : يالله بنزقرهن وبندخل و بزقر ميود و جسوم بعد
ريم:وهاتن عفروه بعد..

تيمعوا العيال .. و لبسوا كلهم اللبس الفكتوري القديم .. و وقفن البنات ال 6 يتصورن ويا بعض .. و الولدين ويا بعض .. وصوره ثالثه جماعيه ..
ريم: بنتصور رواحنا بدون مايد وعفرا
مايد: ليش؟
ريم: حبيبي بنتصور هالصوره حق امايه .. ترانا تصورنا وياكم جماعيه
مايد: انزين

وتصوروا عيال عليا كلهم عشان يعطون امهم الصوره ..
وروحوا من الحديقه الساعه 5 العصر بعد ماخلصت جميع العروض وتصوروا العيال مع شخصيات الحديقه .. واستانسوا ..
في السياره وهم راجعين ..

عفرا: اميه وين شنطتي ؟
ناعمه: ماعرف وين يلستيها انتي ؟
عفرا: حطيتها عندج يوم سرت ويا مها ومهره المحل
ناعمه: ماشفتها
عفرا وبدت تصيح: اووف يعني انا خليتها عندج شقى ماشفتيها
ناعمه:اوووه عفروه انا شدراني انتي ماقلتي بتخلينها سرنا انا وابوج نتمشى
سيف: خلاص انزين لاتيلسين تصيحين .. الا شنطه هيه مب محطيه فيها كنز علي باباا.. باخذلج غيرها ..
عفرا تمت تصيح وخواتها مها ومهره يشوفنها وشمتانات فيها .. وهي كل ماشافتهن تصيح زياده ..
وصلوا الفندق و بعد ماتسبحوا وبدلوا ثيابهم .. يلسوا في الصاله مع ابوهم وحرمته ..

ساره: اوووف ملل خلونا نسير "البردايز"
مي: ساروه انتي ماتتعبين من الطلعه
ساره: انزين طلعنا ويينا استرحنا واحين شو نسوي
ناعمه: انزين سيروا
سيف: وين تبينهم يسيرون ؟
ناعمه: خل يسيرون البردايز شوي بيسيرون الجمعيه ياخذون اشيا حق المطبخ
سيف: ليش ناويه تسويلنا العشا
ناعمه: انا اسوي العشا !!
سيف: هيه .. البنات بييبن لج اللي تبينه
ناعمه: اا ماعرف انزين شو تبون
سيف: اطاعي انتي شو بتسوين
ناعمه: امم بسوي معكرونه
مي: بس عليج اسهل شي بتسويه .. زين ماقالت بسوي بيض وطماط
ناعمه: ميووووه
ساره:بس لاه .. المهم انا ابا اطلع ..يلا نسير ناخذ للعشا ..منو بيسير ويايه
مي: كلنا بنسير
عفرا: انا مابا اسير
جاسم: احسن
ريم: جسوم اسكت عنها .. يالله قومن اتلبسن .. انا مب سايره وياكن
مهره: ليش؟
ريم: عندي ثيابكن بيلس اكويها
مها: تعالي ويانا وخلاف كلنا بنكوي وياج
ريم: لا ماروم.. سيروا انتو ولا تتأخرون

طلعن البنات ومايد وجاسم وياهم للبردايز .. اللي كانت عباره عن ساحه فقط للجلوس ويمنع فيها مرور السيارات او الدراجات .. كانت بين مركزين تجاريين وفوقهم فنادق .. تبعد عن الفندق اللي ساكنين فيه حوالي 10 دقايق بالمشي ..
مشوا للساحه من ناحيه البحر لحد ماوصلوا و نزلوا للسنتر عشان يدخلون الجمعيه وياخذون اللي يبونه ..

مهره: ميووه ميووه
مي: بسم الله عادتج ساروه
مهره: ههههه اقولج شقى شكله البقدونس
مي: اممم هو واحد من هذيل الخضر اللي اهنه...يا ها ولا ها .. يبوج بقدونسهم غير بعد ..
مهره: انزين ماتعرفين ريحته
مي:جيه شو قالولج جلبه!
التفتت حرمه الهم شكلها خليجيه وقالت وهي تبتسم وتاشر على ثلاجه الخضره
الحرمه:هذا هوو
مهره التفتت لها مبتسمه : مشكوووره
الحرمه: العفو .. اا انتوا من الامارات
مي: هيه وانتي ؟
الحرمه: انا بعد ..
وفي هالوقت وصل ولد صغير ورا امه يناديها : اميه يالله بنسير
التفتت الحرمه لولدها ورجعت صدتلهم : اسمحولي بنسيرالحين
مي: لا عادي .. مسموحه
الحرمه: فرصه سعيده
مهره: ونحن اسعد ..

مشت عنهم الحرمه ويتهم ساره ..
ساره: منو هاي؟
مي: هيه عاااااد يالفضووول
ساره: جب لاه ميوه .. مهروه منو هاي
مهره: وحده من البلاد ..
ساره: شو قالتلكم ؟؟
مهره: ساروه خلاف بنقولج احين خلينا نلحق على مرت ابوج والا ماشي عشا اليوم
ساره: اوووف انزين .. بس في الدرب تخبروني
مي: اللهم طولج ياروح .. ان شاء الله ساره بس طوفي احين

وردن البنات للفندق وعطن ناعمه الاغراض وردن شقتهن .. بدلن لبسهن وعقب سارن يشوفن ناعمه شو سوت فالمطبخ..

****

الساعه 3 الظهر بتوقيت الامارات كانت عزه بنت راشد طايحه على سريرها .. للحين ماقامت من النوم .. كانت تتويع من ظرسها يعورها وايد .. وتحس بصداع
رن تلفونها في هالوقت .. تعرف هالرنه .. مميزه .. اغنيه يحبها المتصل وايد ..
شلت التلفون وردت عليه وهي بعدها مغمظه عيونها ..
عزه: الووو
فيصل: هلا السلام عليج
عزه: وعليكم السلام
فيصل: اشحالج حياتي ؟ بعدج مانشيتي
عزه: تعبانه
فيصل: شو فيج ؟
عزه: ماروم افج عيوني من عووق ضروسي
فيصل: من شوو تعورج ؟ امس مسكر عنج فليل مافيج شي
عزه: عقب ماسكرت عنك سهرت لين 4 مارمت ارقد من عووق ضرسي .. اسمحلي ماوعيتك للدوام مارمت انش
فيصل: لا ماعليج نشيت ..
عزه: ويهي وارم
فيصل: هههه
عزه: على شو تظحك ؟
فيصل: اتخيلج مثل جودي ابوت يوم ورم ويها
عزه: يزاك الله خير تطنز عليه هاه ؟!
فيصل: ههه لا فديتج اسولف وياج اباج تظحكين مب هاينه عليه
عزه بوزت: ماروم اظحك ويهي وارم
فيصل: انزين ليش محد وداج المستشفى
عزه: مارمت انش من الصداع الصبح واحين بعده الظهر وين شي عياده فاتحه احين
فيصل: خليهم يودونج والا انا بيي اوديج
عزه: ياسلام وايد واثق
في هاللحظه دق مروان اخوها الباب وفتحه لقاها طايحه ع السرير ترمس ..
مروان: صباح الليل
وعلى طول شغل الليتات .. وتجدم منها
عزه: مروااااااااااااااان حرام عيوني
مروان تجدم وفرها بمخده كانت ع طرف السرير .. يت ع ويها وتأوهت .. نزلت المخده.. و مروان انتبه لويها انه ورام..

مروان: بسم الله ظربتج بمخده انا مب طابوقه بلاه ويهج ورم جيه
عزه: يبوك وارم من امس
مروان: ههههههههههه جنه فيج خاز باز
عزه: مشكورين طايحين تطنزون عليه كلكم وانا حليلي ظرسي يعورني
مروان: منو ترمسين ؟
عزه: اغازل ..
مروان: منو اسود العين هذا اللي تغازلينه ؟
عزه: مزيون عيونه عسليات مب سود
وعطته سماعه التلفون ..
مروان: هلاااااا والله اشحالك ؟
فيصل: بخير اشحالكم انتوا ؟
مروان: تمام والله وينك ماشفناك في عزيمه عيال سعيد محمد
فيصل: كنت في بوظبي مارمت ايي.. هههه ولا قبضوك الدوريه هاا
مروان: ههههههه زين ما شلوني وياهم يبوك
فيصل: ههههه هلكت من الضحك يوم خبرتني عزوه
مروان: هيه الا اطنزوا عليه انتوا الهروم .. عيل تستاهل ها العوق اللي فيها
فيصل: حرااام عليك خاف ربك.. كله ولا عزه عااد..انته جيه دووم مغصص بها جيه.. حرام عليك بروحها ميهوده الحين..
مروان: منو عنزه ؟ هيه وحليلها ويها وارم .. لو تشوفها احين بتغير رايك فيها
فيصل: لا لا ماغير رايي فيها وانته ريال طيب وبتقوم تودي اختك العياده العصر
مروان: ياهل انا يالس تقص عليه بكلمتين
فيصل: لا افا بس ماعليه عشان خاطري ترا ان ماوديتها انا بيي اوديها
مروان: شبر عند الباب وشوف شو بسويبك .. لا لا ماعليك بوديها كله ولا عنزتنا .. ماصدقنا حصلنالها تيس يشلها عنا بعد نخليها جيه ويوم يشوفها يبدل رايه .. لا لا مافينا ..
فيصل: صدق انك ماتستحي احين انا تيس
مروان: انا مايخصني انته بتاخذ العنزه والعنزه منو تاخذ حصان ؟ اكيد تيس
فيصل: هههههههه الله يقطع سوالفك يالله عاد ودها حرام تكسر الخاطر
مروان: ان شا الله افا عليك .. كم عنزه عندنا ..
فيصل: وينها عيل ماسمع حسها ؟
مروان: سارت تتغسل
فيصل: زين سلم عليها عيل .. بتصلبها خلاف انا ..
مروان:عاد انته ماصدقت وافق ابويه ترمسها وقامت البنت كله يالسه في حجرتها ترمس في التلفون ..
فيصل: عادي ريلها حلال عليها
مروان: عقب العرس مب احين ياشاطر .. يادوبك ماملجت من شهرين وجيه خف ع البنت اثقل الثقل زين يمدحونه
فيصل: بنشوفك انته يوم بتملج .. اخاف تقول هاتوها بشلها من احين ..
مروان: يستوي ليش لا
فيصل: هههههههه ويا راسك .. يالله عيل بخليك .. فمان الله
مروان: مع السلامه

طلعت عزه من الحمام مغسله ويها وقابضه فوطتها في ايدها ..
عزه: سكر فيصل ؟
مروان: هيه سكر .. تعالي متى حددتوا العرس احين
عزه: بعده يتريا يحصل حجز مناسب
مروان: انزين عزوه ويهج وارم شو بلاج
عزه: ضرس العقل ملعوزني ابا اجلعه
مروان: انزين بوديج انا العياده العصر .. بس قومي اكلي شي احين
عزه: مالي خاطر مروان .. ماروم اكل عليه
مروان: انزلي انزين بيسولج شوربه
عزه: اوكي قولهم الله يخليك بصلي وبنزل
مروان: اوكي ..

ونزل مروان وقال للبشكاره تسوي لعزه شوربه .. رد الصاله شاف فارس طايح ع الغنفه وشكله سرحان ..

مروان: حوو بو الشباب فشو ساارح الفكر
فارس انتبهله ولف عليه ..
فارس: ها بلاك
مروان: شو بلاك
فارس: ماشي.. افكر
مروان: فالعيال..
فارس: سخيف والله انك .. افكر فالدراسه .. شو تشوف انته .. اتوكل واسجل فكلية اتصالات الشارجه؟
مروان: فيك هبه للدراسه؟
فارس: اذ عزمت ان شاء الله بتي الهبه
مروان: عزم عيل.. انته ولد مصريه ما ينخاف عليك
فارس: هب هباك الله..
مروان: ههههههه شو تباني اقول يعني
فارس: لا تقول شي.. خلني ارد لافكاري احسلي
مروان: الله يعطيك..

طنشه فارس .. ومروان كان بيظهر من البيت بس عزه ها الوقت كانت نازله وزخته..تدريبه ان ظهر ما بيرد وعقب محد بيوديها العياده .. وتيلسوا فالصاله كلهم يسولفون..

****

فاستراليا .. من عقب ما طبخوا جماعتنا عشاهم وتعشوا .. يلسوا يشربون لبن ويطالعون التلفزيون ..
سيف: تسلمين على هذا الاكل يا ام مايد
مي: اصلا هي ماسوت شي .. ريمان تعطيها وهي تخلط
ناعمه: جب ميوه .. انا اعرف اطبخ وريمان بس كانت تساعد
مي: نعم نعم .. لو مب شافتنج بعيني كنت بصدق .. بس المشكله جدامي .. حتى نسيتي انه المعكرونه يحطون فيها ملح لو مب مهوه الياهل ذكرتج
ناعمه: اووووه سيف شوف بناتك
سيف: ميوه عيب بس عاد لاتمين تراددين مرت ابوج
مي: انزين انزين خلاص
سيف يطالع مي وابتسامه خفيفه ع ويهه وقال: يالله باجر وين بتسيرون ؟
مايد: ابويه بنسير هذاك الباص اللي يمشي من البردايز و يدخل بالبحر ..
سيف: اوكي انا بنزل اتاكد من الرسبشن الساعه كم ينطلق الباص وبرجع
ناعمه: انا بسير شقتنا .. برقد..
سيف: انزين .. بطالعهم وبرجعلكم..

وبعد ماطلعوا التمن البنات مع بعض ويلسن يسولفن عن احداثهن ها اليوم..ساره شلت بعمرها عنهن وسارت تيلست فالبلكونه اللي كان فيها كرسيين وطاوله صغيره ومن غير كرسي طويل يطيحن عليه ..طاحت ساره عليه وفاذنها سماعة الهتفون وتدندن ويا الاغاني ..
ميوه لحقتها ويلست مجابلتنها .. وخوزت السماعات من اذن ساروه

ساره: اييه شو بلاج؟
مي: عنبوج فليل وها الاغاني فاذنج
ساره: ملل شو اسوي؟
مي: يالله مب مخليه مكان ما سرتيله وتصيحين الملل صدق انج
ساره: انزين ها الوقت ملل .. ليش ما نسير نسهر برع
مي: والله انتي عايشه حيااتج ليكون كنتي قبل تسهرين في الشانزلزيه وتصبحين في مادري وين
ساره: بس عااد ميوه
وها الوقت سمعن حركه من فوق .. ميوه وقفت تطالع شو السالفه .. وسمعت تصفير ..
مي: بسم الله شوها..
ساره تستخف دمها: ها يقولج ينون استراليين
مي: وعلموهم التصفير!!
ساره:هب هباهم ..
مي: ايه مافينا يلبسنا يني استرالي.. قومي ندش
ساره: لا شو يلبسنا .. اميه ..
وسمعن ضحك .. وكل وحده اطالعت الثانيه ودشن ع طول ..
مي: بسم الله .. والله زغت ساروه
ساره: لا لا .. ماعليج ميوه يمكن حد ظاهر من البلكونه وضحك
مي:ليش يضحكون
ساره: علينا ..
مي: يعني عرب.. فهمونا شو نقول!
ساره: خخ الله يخس بليسج.. يبوج عرب ولا ينون استراليا ..

وردن للمة خواتهن بس ما خبرن حد عن اللي استوى.. ويلسوا يلعبون ورقه والضجه ماليه المكان ..

****

الساعه 7 المغرب دخل محمد غرفه بناته يشوفهم شو يسوون .. لقى مديه يالسه تجلب في مجله واحلام طايحه على الارض محطيه ريل على ريل وتتامل السقف ..
ضحك محمد على شكل احلام.. انتبهت احلام على ابوها ولفت عليه..

احلام: ابويه بلاك تضحك ؟
تجدم محمد ويلس على الكرسي
محمد: والله خوفاتي تتخبلين يا احلام
احلام: شوف ابويه انا بقولك الصدق .. انا كنت اتحرى عمري خبله يوم كانوا قوم ميوه اهنه .. بس اتاكدت الف بالاميه اني كنت عاقله واحين تخبلت ..
محمد: ههههههههه ..
اعتدلت احلام في يلستها واتربعت مجابله ابوها وحطت المخده جدامها ..
احلام: ابويه عطني شي اسوييه بتخبل .. ترا من كثر ماجابل الصقف بحول
محمد: ههه بروحج محد قالج ..
مديه فرت المجله ودخلت في الموضوع
مديه: ابويه شو بروحها .. انا هالمجله هاي المره الالف اللي اقراها .. ملينا ابويه ليش مانسافر ؟
محمد: وين نسافر يابنات ؟ قالتلكم امكم بتروحون الكويت مارضيتن ..
مديه: انا عندي ايلس في البيت وماشوف حتى السكه ولا اروح الكويت
محمد: انتوا ليش ماتحبون تروحون شو السبب ابا اعرف
احلام:ابويه انا وايد استانس يوم اروح قبل .. واحب خالي بشار وحرمته وكلهم زينين بس محد يعيفنا في الكويت الا فجر .. عشان جيه لو هي يت الامارات انا بروح الكويت ..
مديه: صدق ابويه اميه ماطيع يوم نقولها انه فجر ماتعاملنا زين .. بس صدق هي وايد شايفه نفسها علينا على شو مادري ..
احلام: يوم ترمسنا ترمس من طرف خشمها وتحسسنا انه نحن اقل مستوى عنها وياويلها اللي منا تزخ شي من اغراضها .. مادري شو تشوفنا نحن نقدر نشتري اللي نباه واحسن عنها بعد..
محمد: اولا .. شي طبيعي امكن مابترضى على اختها مهما كان هاي اختها .. وثانيا مثل ماقلتي يا احلام انتوا مب قاصرنكن شي خلها تسوي اللي تباه اذا انتوا تشوفنها انها تتخقق عليكن .. لكن الواجب واجب .. كونها خالتكم من واجبكم تعاملونها زين .. ولو مب عشان شي عشان امكم وعشاني انا بعد
مديه: الله يعين احين يوم بتي ..
محمد: ماعليه ان شا الله خير لاتتشائمن ..
احلام: انزين ابويه احين مب ها المشكله
محمد: شو المشكله
احلام: بتخبل من الملل
محمد: ههههههههههههه .. شوفي انتي من زمان خبله لاتتعلثين بالملل
مديه ضحكت ع احلام..
احلام: ابويه دخيلك شوفلي شي اسويه ماعرف ايلس جيه
محمد: انزييين .. شو رايكم اقولكم سر ماتقولونه لامكم ؟
مديه نطت حذال ابوها : قول قول
احلام: لا صبر بتاكد من خلوو الجو برع
فتحت احلام باب الحجره ومالقت حد في الممر ورجعت يلست حذال ابوها
احلام: يلا الدار امان.. قول ..
محمد: ههههه والله انكن
مديه: يالله قول ابويه بطني يعورني
محمد: ليش يعورج ؟
مديه: فضوول جتل عيووز
محمد: هههههه
احلام: قول ابويه
محمد: وعد ماتقولولها ؟
البنات: وعد
محمد: انا يالس اكتب روايه عن قصتيه ويا اهل امكن في الكويت وشو استوالنا بالضبط لين عرسنا .. ويينا االامارات .. واول ماخلصها بقدمها حق رئيس التحرير في الجريده وبساله عن رايه واذا كانت وايد اوكي .. بنشرها كروايه ..وبتكون هديه لامكن..
احلام: اللـــــــه ونااااااسه
مديه: ابويه بتحط يعني انكم عرستوا ويبتونا وجي
محمد: هههههه ع حسب نهاية الروايه
احلام: حلوه الفكره والله..
محمد: وعشان نغيرلكن الجو شويه فالبيت شو رايكن اقرالكن اللي كتبته ؟
مديه: هييييييييييه هييييييه
احلام: هيه ابويه والله وناسه
محمد: اوكي خلاص صبرن بسير اييب الاوراق وبرد الكن
احلام: ابويه انته وين حاط الاوراق ؟
محمد: في الغرفه
احلام: ياذكي بتشوفهن اميه
محمد: نعم ؟
احلام: اوبس اسفه ماقصد .. بس يعني هاتهن عندنا نحن بنحطهن في الدرج وبندسهن عنها ..
محمد: ماشا الله عليكن .. زين بخليها عندكن ..
مديه: يالله باباه سير هاتها بنترياك

محمد قام وهو يبتسم لبناته اللي شجعنه على اللي يسويه .. وسار اييب الاوراق .. ورد وقرالهن الجزئيه اللي كتبها.. وشاف بناته وايد متحمسات لمعرفة التكمله.. وها اللي شجعه اكثر انه يكمل الكتابه.. ووعدهن كل يوم يقرالهن جزئيه من اللي كتبه ..وهن مستانسات على ها الشي .. غير انه يقضي وقتهن فهو يعرفهن لماضي ابوهن وامهن وكيف كان تعارفهم وعيشتهم قبل وكيف محمد انصاب برصاص العدو واللي تسبب له لين احين بألم فالرجل المصابه وكيف ردتهم للبلاد ..كلها حوادث فباله يكتب عنها ويقصها على بناته ..

****

رد: قـــلـــوب تـــحـــت الـــمــجـــهــــر**
 

ام سيف عقب ماصلت العشا .. يلست فالصاله ويابتلها نجمه عشاها.. بعد ما تعشت صدت صوب نجمه اللي كانت يالسه حذالها ..

ام سيف: نجموه قومي هاتي الورقه اللي فوق التلفزيون .. اتصليبي على رقم البنات ابا ارمسهن
نجمه: ماماه احين وقت في اخر مناك
ام سيف: لا انتي الا ماتعرفين امسات مرمسيني العصر
نجمه: ماماه احين فليل مناك هم في نوم
ام سيف: نيموه انتي مالج سنع هاتي الرقم واتصليبي على رقم ساروه
نجمه: اوهو ماما انتي مايسمع كلام .. انا بيسوي تلفون بس انتي مسؤول
ام سيف: سالت دموعج ان شا الله .. اوص يالله وهاتي الرقم اتصليلي
نجمه: جين جين

يابت نجمه الرقم واتصلت عليه .. كانوا البنات كاتبين ارقامهن لليده عشان تتصلبهن في أي وقت ..
اتصلت اليده .. وتم يرن التلفون .. ساره ماردت عليه كانت راقده بما انه الوقت عندهم 3 الفجر .. اتصلت مره ثانيه على رقم ريم وردت ع التلفون ..

ريم: الوه
ام سيف: ها امايه ريم اشحالكم ؟
ريم: هلا امايه شو فيكم ؟
ام سيف: مافيني شي انتوا رقود ؟
ريم: هيه امايه احين قريب الفجر عندنا
ام سيف: وييييه عيل وعيتكن ؟ وانا نجموه تقولي بس انا معاشتنها
ريم: فيج شي امايه ؟
ام سيف: لا فديتج مافيني شي .. الا ولهانه عليكن
ريم: فديتج امايه .. اخبارها عموه ؟
ام سيف: كلهم بخير انتي شحالج وخواتج شحالهم ؟ تولهت ع ضرايب ساروه ومي ريم: لاتحاتين هب مقصرات اهنه
ام سيف: مايكون يتنازعن ويا نعوم ؟
ريم: ع حالهن.. يتناقرن وياها تقول دياجه في كيسه
ام سيف: هههههه لاحوول ماعليه ضرن ع ها الشي..
ريم: شو بيسون ..
ام سيف: عيل انا غير الوديه متى اروم ادقلكم ؟
ريم: امايه لو تتصلين الظهر عندكم زين
ام سيف:هيه ان شا الله .. سلمي على خواتج امايه ولاتقولين حق قوم نعوم اني اتصلتبكم ..
ريم: ان شا الله امايه .. مع السلامه
ام سيف: فمان الله
وسكرت السماعه ..
نجمه: انا يقول هذا وقت اخر مناك
ام سيف: مايخصج هاكن رمسني وبردن فوادي .. فديتهن ونسن عليه وحدتي بدال مجابل ويهج .. الله يردهن بالسلامه ..

وتمت نجمه تهز الراس . شو بتسوي بام سيف.. عنيده ماتروم عليها .. بس موول ما تستغني عنها ولا ام سيف تقدر تستغني عن نجمه ..
****************
(الأحد)25 يوليو 2004
****************

الساعه 12 بتوقيت استراليا .. كانوا بناتنا يحوطن في حديقه
"Dream World"
لعبوا في الالعاب .. وعقب ساروا استيديو يتصورون فيه مع الكوالا..كل حد تصور وهو شال الكوالا فايده والصور اشكال وانواع اللي يضحك واللي يطالع الكوالا وخايف واللي مغمض عينه والي شاق الحلج..
.. تصورن البنات كلهن وابوهم ومرته .. واحين يا دور عفرا..

ناعمه: يالله عفاري قومي تصوري
عفرا: وع ماباه ريحته خايسه
جاسم: يعني انتي من زين ريحتج
ناعمه: جسوم اسكت انته مالك خص
سيف: يالله عفرا قومي بسرعه
عفرا: مابا مابا ..
ريم: خلاص يوم ماتبى لاتوقفونا خلونا نسير

تجدمت ريم وخواتها ودخلوا محميه الكنغر .. البنات يلسن يتصورن لكن جاسم ماخلاهم في حالهم كل مايشوف كنغر واقف يقوم يركض وراه .. واخر شي قام يناقز ورا الكنغر مثله .. ويقلده ..

ريم: هههههه ساروه صوريه بالفيديو بسرعه بنراويه امايه

ساره فتحت الكاميرا وقاموا يصورونه
ومايد يربع ورا جسوم يقلده .. كان المطر بادي يطيح هالوقت ..

ريم: يالله مايد وجاسم طوفوا مافينا نتوصخ

مشوا وركبوا التلفريك لين وصلوا الجهه الثانيه من الحديقه ..
لكن زاد عليهم المطر ويلسوا تحت المظله يتريونه يخف عشان يكملون جولتهم ...
بعد ماخف المطر كملوا العيال لعب الا مي .. يلست على واحد من الكراسي وقالتلهم بتترياهم .. في هالوقت يت ناعمه يلست وياها ..

ناعمه: ميوه ليش ماتلعبين وياهن ؟
مي: اولا اسمي مي .. واذا تحبين اقولج نعوم قوليلي ميوه
ناعمه: ياسلام يعني كلهم يقولولج ميوه ليش يعني انا غير
مي: مادري والله ليش انتي غير مخلوق فضائي والا شو بالضبط ماعرف.. بس المهم انتي غير..
ناعمه: انا غلطانه يالسه وياج
مي: يعني كنتي وين بتسيرين
ناعمه: اووف لاه بس اسكتي
مي يلست وتطالع ريولها : ريولي تعورني
ناعمه: من شو ؟
مي: ركبيه يعورني وايد .. احس وايد راكضت ومشيت اليوم وردلي العووق
ناعمه: مال شو انزين ؟
مي: اووف ماتفهمين .. ترا يوم طحت ذاك اليوم في البيت
ناعمه: يالله عاد اونه احين يعورج من ذاك اليوم لين احين
مي صدت صوب ناعمه بقهر: يعلج ان شا الله تطيحين نفس الطيحه عشان تحسين بالعوق
ناعمه: ويه شحقه تدعين عليه مالت على ويهج
مي: عليج انتي .. قومي قومي من اهنه فكيني

ناعمه نشت معصبه وهي تمشي بغت تخرطف بقوطي معقوق ع الارض بس اداركت الوضع ولفت على مي..

ناعمه: منج حسبي الله عليج

مي مارامت ترد عليها من الظحك .. اول مره تكتشف ان عينها قويه .. يمكن السر انه ناعمه اطنزت عليها وهي صدق ركبها يعورنها .. بس الله فوق ..
خطف عليهم الوقت وقارب عندهم الوقت ع العصر ..

****

الساعه 10 بتوقيت الامارات .. دخلت عبير الغرفه على بناتها .. فتحت الستاير وشغلت النوور .. مديه طلعت صوت انها منزعجه اما احلام نشت لامها

احلام: اميييه ليش؟
عبير: قوموا بسكم نوم
احلام : امايه حرام اجاااازه
عبير: اوكي ناموا انا بروح دبي مع ابوكم وانتوا تموا نايمين
احلام نطت من فراشها : صدق اميه ؟
مديه تتطالع امها وهيه تفرك عيونها
مديه: الحين بنسير؟
عبير: لا مو الحين ..
احلام: المهم نطلع .. بس كيف دقت فراسكم اليوم!
عبير: ايه مو توه فجر متصله وقالت بتي عقب يومين .. فقلت بروح اخذ اغراض لها وفراشات واشيا تحتاجها
احلام: اوهو شو اييبها من احين ؟
عبير: احلاااااام .. قايلتلج من قبل انها في غضون اسبوع اسبوعين بتكون امبينا!
احلام: ترااه سجلتلوها انتوا ؟ ليش ما تأخر ييتها!
عبير: بتي لان زادت هوشتها مع زوجه بشار ولانها بتقدم امتحانات القبول
احلام:ويايه تكمل هوشتها علينا .. الله يعيينا بس
عبير: المهم اذا تبون تسيرون معانا قوموا بعد الصلاه بنطلع
احلام: وين بتسيرون بالضبط ؟

لكن عبير كانت معصبه من احلام وطلعت بدون ماترد عليها ..وسارت عند محمد..

محمد: قامن البنات..
عبير: ايه ..
محمد: بلاج!
عبير: بنتك ما بتعديها ع خير
محمد: منووو
عبير: احلام .. وايد تتذمر من فجر .. خلاص تعبت يا محمد
محمد: بعدها ردت ترمس عن السالفه
عبير: ايه . قلتلها انه فجر بتوصل بعد يومين وحشرت الدنيا
محمد: ههههه والله احلام سالفه ..
عبير: ماكو شي يضحك فالسالفه
محمد: عبير غناتي لاتعصبين.. عاد انتي تعرفينها احلام اللي فقلبها ع لسانها.. معودينهن ع الصراحه من هن يهال .. ما بيين يجاملنج فشي ما يطيقنه
عبير: محمد بس احلام بنتي الكبيره اللي لازم تراعيني ع الاقل.. اختي فمحنه وانا لازم ما اخليها بروحها..يعني عايشه ويا مرت بشار اللي ما تواطنها.

محمد تقرب من عبير اللي كانت عينها تدمع وايدها ترجف وهيه كانت ترمس بانفعال.. قبض ايدها وتم ضاغط عليها .. يحاول يخفف من انفعالها هذا ..

****

في استراليا .. كانوا مايد وجاسم ومهره قابضين اوراق وقلامه ويلعبون فالبلكونه .. وساره متيلسه حذال جاسم وتعاونه ..

مايد: يالله حرف الميم
بدوا العيال يكتبون بسرعه
مهره: ستووووووووب
ساره: بسم الله مهروه بلاج تباغمين .. خفي حسج
مايد: جسوم غشاش مايستوي
ساره: لا لا جسوم مب غشاش .. انا يالسه اكتبله
مايد: انزين لانج انتي تكتبيله انتي اتعرفين اكثر عنا و النقاط تسير حقه هو
مهره: بسس اسكتوا يالله شوفوا النقاط
ساره: ويو انا الفايزه . يالله جسوم اختار حرف
جاسم: حرف .. حرف .. حرف الغين
مايد: مالت عليك ماتعرف تختار حروف سهله
جاسم: احسن عشان ماتعرف تلعب ..
ساره: اووووف شو بلد تبدى بحرف الغين
سمعوا صوت ياينهم من فوق : غينيا ..
ساره: هيه صح غينـــــ
والتفتت لاخوانها : منو قال غينيا؟

مهره اشرت على البلكونه اللي فوق وهي ساكته ..
ساره اطالعت فوق وبطلت عيونها ع الاخر وشهقت .. وردت داخل وزقرت خوانها وريم اللي كانت يالسه تقرا روايه انتبهت لليضه اللي مستويه ..

ريم: بلاكم شو مستوي!!
مهره: ريال فالبلكونه اللي فوق رد على ساروه
ريم: شووووو؟ ساروه شو قلتيله ؟
ساره: مارمسته والله ولا قلتله شي.. انا يالسه العب وياهم .. وقلت شو بلاد بحرف الغين
مهره: رد هو عليها وقالها غينيا
ريم: شفتوا الرياال؟
ساره: هيه هم فوق الشقه اللي حذالنا.. بلكونتهم تكشفنا
ريم: حسبي الله ع العدو ونحن اربعه وعشرين ساعه نجره وصريخ ولعب.. اكيد يسمعون حشرتنا.. ابوي من اليوم ورايح محد ييلس فالبلكوونه
ساره: ريمان عاد شو بتحبسينا
ريم: بس سكتي.. اللي اقوله يتنفذ فاهمه
جاسم: نحن ماعلينا بنيلس .. رياييل حالنا حالهم
ريم: انا اوجه الرمسه للبنات
مهره: ريموه نحن عادي بعد نيلس
ساره: هي يت علينا انا وميوه يعني

دشت مي الصاله ..
مي: ايه شو ها الحشره ..الواحد يبى يغفل شويه ما يروم من زعيجكن.. شومستوي
مهره: ميوه خلاص البلكونه محرمه عليكن انتي وساروه
مي مستغربه: ليش شو السالفه
ريم: هكم رياييل يطالعونا من بلكونتهم..مانبى رمسه والله لو درى ابويه بزوالنا
مي: ريم بلاج معصبه.. نحن ما سوينا منكر..يوم نظهر انا وساروه من البلكونه وقينا ع روسنا.. واللي فوق ما جد حتى حسينابهم
سكتت شوي مي وطالعت ساره وكأنها تتذكر شي .. فهمتها ساروه وضحكن ع طوول ..
مي: ساااارووه
ساره: الينون الاسترالين
مي: هههههههههههههه وانا اقوول بعد
ريم: شو السالفه
ساره: ماشي ماشي ..
ريم طنشتهن ..وكملت: المهم لو سمحتوا مانبى مشاكل ولا فضايح .. اللي يبى يلعب ويصرخ ييلس فالصاله .. حسوسكن انتن ماباها تعلى والبلكونه مفتوحه تفهمن..
مي: يصير خير

وسحبت مي ساروه اللي كانت يايه بتبطل حلجها وتتحرطم وودتها الحجره ..
ومهره سارت عند مها اللي كانت راقده ووعتها وخبرتها بالسالفه.. وريم ردت لروايتها والاولاد كل واحد قبضله القيم بوي مالته ويلسوا يلعبون بها..


****************
(الثلاثا) 27 يوليو 2004
****************

الصبح فمطار دبي .. كانت عبير سايره ويا محمد اييبون فجر من المطار ..وقفوا فوق وتموا يشوفون الواصلين من ورا الزجاج.. وما بين الناس قدرت عبير انها تميز اختها .. كانت واقفه اتدور ع شنطتها ..
وبعد ربع ساعه .. طلعت فجر فالصوره واضحه .. سلمت عليها عبير بحراره وفجر حست صدق انها متولهه على اختها ..
كانت فجر متحجبه ولابسه بنطلون جينز وبدي اخضر عليه قميص جنز يوصل لركبتها .. ملامحها نفس عبير بس هيه ابيض من اختها بواايد ..

ويوم ركبوا السياره .

محمد: فجر ما تبين شي ما شيات ..
فجر: مشكور محمد.. ما بي شي غير النوم .. من امس مو نايمه
عبير: ولييش عااد
فجر: مادري .. ميبي متحمسه للييه
محمد: هههههه زين والله .. حياج
فجر: عيل بناتكم وينهم ..
عبير: طلعنا من وقت وهن نايمات ..
محمد: الا المطار شو نبى نوديهن
فجر: اهاا .. وانا ها الشهر وين بقعده!
عبير: شدعوه وين بتقعدين .. فبيتنا بعد وين
فجر: جهزتولي غرفه بروحي
محمد اطالع عبير ..
محمد: جهزنالج غرفه لكن غير سريرج فيها سريرين زياده
فجر: كييف
عبير: فجر حبيبتي تعرفين انه البيت مو نحن بس اللي نسكنه .. بيكونن وياج فالغرفه مي وساره
فجر: مو عساس انهم ردوا بيت ابوهم؟
محمد: بس فالويكند البنات يكونن موجودات .. نحن شلنا الاسره اللي كانن فالغرفه وخذنا اثاث يديد الكم ..
عبير: محمد .. مها ومهره وين بينامون؟
محمد: ترا عليا خذت سرير وحطته فحجرتها بوطابقين عادي ماياخذ وسع فالحجره وايد..
عبير: والسرير الثاني
محمد: حطوه فالستور برع ..
عبير: متى هذا صار
محمد: امس يوم رقدتي يابو الاثاث ورتبت عليا الحجره
عبير: اهاا .. وحليلها عليا تعبناها

فجر تمت ساكته وهي تسمع الحوار الداير بين اختها وريلها .. ومتاففه من احين ومب عايبنها الوضع .. غير هالشي كان مظايجنها حجابها اللي اظطرت تلبسه عشان اختها بس ..

****

الدامر كما هو متعارف عليه عند مي واحلام ..
ها الوقت كان فسيارته متوجه للسينما .. قبض تيلفونه واتصل ع رقمها .. ردت عليه بكل رقه ..

سلطان: صبااااح العسل كله
بدريه: صبااح الورد كله
سلطان: ها بداري طلعتي من البيت
بدريه: هيه انا فالسياره الحين ..
سلطان: زين انا بنزل المنار احين ..
بدريه: انا احين بعد بوصل ..
سلطان: اخيرا بشوفج..الهرمه ريلج مروح من ست ايام وغطيتي غطه ولارديتي تتصلين
بدريه: اول شي ..بغيتك توله علي اكثر وبشوف بتسأل علي ولا لا .. وثانيا انا والله ما اقوى ع زعلك وشكله التغلي ما ينفع وياك فطرشتلك المسج اللي قلتلك فيه اني بشوفك اليوم..
سلطان: اهاا.. زين يوم ماتقوين ع زعليه .. بس تعالي بدريه كيف بعرفج؟
بدريه: ههههه انا بعرفك
سلطان: شايفه صوري تراج .. بس انتي شو لابسه كيف بعرفج
بدريه: يوم بتشوف وحده تضحلك ترا هاي انا
سلطان: اووه وايداات اللي يضحكلي
بدريه: شوو شوو
سلطان: هههههههه هي عيل شو عبالج
بدريه: والله يا سلطان ان شفتك تتلفت يمين يسار برد البيت ع طول
سلطان: انزين انزين يبوج ما بتلفت خلاص.. بس شوفي انا الحين بوصل السينما ما بدش قبلج بترياج وبندخل رباعه اوكي
بدريه: اووكي صار
سلطان: يلا باي حياتي
بدريه: باي حبيبي

ودقايق وصلت بدريه الموول .. ونزلت هي الثانيه سايره صوب السينما ..
شافته من بعيد وعرفته .. هو كان محطي ايده فجيبه ويطالع الساير والراد اختار عرض الساعه 11 وفي نص الاسبوع عشان الناس هالوقت يا مداومين او نايمين
قلبها تم يرف .. تشوف ها الشخص اللي خذ قلبها ونساها حتى وجود ريلها .. طول وعرض .. جذااااب لابعد حد .. وخصوصا حركاته تخلي الواحد غصبا عنه يشوفه..
مرت حذاله .. رمقته بنظره وهو انتبه لنظرتها وعرفها .. غير ها عرفها من ريحة العطر .. تستعمل نفس عطره ..
ابتسملها بكل جااذبيه .. عيبته بدريه .. دشت مزاجه .. حتى ماكان متخيلنها جذه .. دخلت السينما ودخل هو على طول وراها ..

****

وصلت فجــر البيت ..
كانن بنات اختها وعمتهن ويدتهن و شيخه وميره حرمت راشد يالسين فالصاله يتريون وصول اخت عبير اللي راسمه فويوهم علامة استفهام كبيره من كثر ما يتذمرن البنات منها.. واول ما وصلوا استقبلوهم و يلسوا فالصاله .. وهي ملتزمه الصمت .. كانت بس تنقل نظرها من زاويه لزاوية فها البيت الصغير.. وكل ملامحها تنم عن الاستياء..
احلام ومديه كانن يشوفنها ويتهامسن فيما بينهن .. فجأه قامت فجر وهي تشوفهن .. خافن البنتين وسكتن على طول ..

فجر: من رخصتكم .. ابي ارتاح شوي ..
عليا: مرخوصه الغاليه ..
عبير: تعالي بدلج على غرفتج..
وتجدمتها عبير .. ووصلوا القسم الثاني من البيت اللي كان مجابل قسم محمد وزوجته ..
فجر: اي غرفه من هاذولا؟
عبير أشرتلها على غرفة مي وساره ..
عبير: تعالي حياج .. وياج ساره ومي بيكونن فالغرفه .. بنات عليا اللي شفتيها توه فالصاله يالسه حذال عمتي..
فجر: ايه .. اذكر مورتني صورهم قبل ..
عبير: اللــه حلو الأثاث اليديد .. ماشفته البارحه يوم حطوه
فجر: الغرفه ظيقه وايد وبعد محطين ثلاث اسره ويم بعض ملزقينهم
عبير: قلتي الغرفه صغيره وبتكفيكم ان شا الله
فجر: عبيير ! انا ماعرفهم ها البنات كيف برتاح بالنوم وياهم
عبير: يا فجر هم فبيت ابوهم وما راح ايوون الا فالويكند ..
فجر: لما ايون بروح انام غرفة احلام ومديه
عبير: البنات طيوبات وبتستانسين معاهم

فجر سكتت .. راسها يعورها من السفره .. ومالها خلق ترمس أكثر ..
قالت لعبير انها بترقد شوي ..عبير طلعت من عندها وسارت هي الثانيه غرفتها ..

أما فالصاله ..

احلام: فجر ما بتعديلنا ايامنا على خير .. وبتشوفون
عليا: وابويه .. احلااام هاي خالتج
مديه: تخلخلت ظلوعها
ام راشد: بسم الله الرحمن .. بلاكن على خالتكن؟
احلام: انتوا ماتعرفونها .. والله انها عووفه

عليا تطالع احلام وهي رافعه حياتها .. والحريم مستغربات من رمسة البنات ..

شيخه: احلام من كثر ما تقرضين فخالتج تخيلت شكلها يخوف
ميره: حليلها ماشالله عليها حلووه
احلام: الحلاه مب بالشكل .. بتشوفون انتوا ويا الايام
عليا: احلام حبيبتي حتى لو الواحد اطباعه وايد سيئه .. نقدر نحن نغيره .. صح ولا
شيخه: لالا مب صح
عليا اطالعت اختها مستنكره الجواب
عليا: شو لا
شيخه: هي لا .. ولا جان تغيرت اطباع ولديه
مديه: عموه انتي ولدج غير شكل
احلام: هههه هيه والله عموه .. هذا نتريا معجزه تستوي عشان يتغير
عليا: مديه واحلام عيب
شيخه: خليهن يرمسن ماقالن غير الصح ..
عليا: شيخه بعد مب عدله طول الوقت تتشكين منه ها الولد .. الرمسه ورمستها وياه لكن ولدج يسوي اللي فراسه .. طبيه خليه على هواه
ميره: الله يعينج يا شيخه .. لكنه كلام عليا صح ..
شيخه: شو يعني ما انصحه ولا امره يسوي الخير لعمره
عليا: شوفي شيخه انتي ما قصرتي .. والرسول صلى الله عليه وسلم قال " من رأى منكم منكرا فليغيره بيده فان لم يستطع فبلسانه فان لم يستطع فبقلبه وهذا اضعف الايمان" .. قاطعيه وخليه يحس بغلطه .. كوني بارده وياه بيحترق اكثر
شيخه: الله يعيني .. بس ولديه ماصبر عنه لو يطوف يوم مارمسه فيه..
كيف اقاطعه
عليا: خليه يحس بالغلط اللي يسويه
ام راشد: تمي ادعيله بالهدايه .. يا امايه مالج غير ربج تراج
شيخه: الله كريم..

وغيرن الحريم من موضوع فجر وموضوع سلطان وقامن يرمسن عن السياسه اللي هي الثانيه تسد النفس خصوصا ها الايام

******************
(الخميس) 29 يوليو 2004
******************

فالامارات ها الوقت.. نشت ام سيف الساعه 6 من نومها متاخر .. شافت الوقت ولقت انه الصلاه طافتها وهي ماحستبها .. حاولت تقوم لكن ايدها اليسرى كانت تعورها وايد ومب قادره تحركها ..
تحركت تدور الجهاز اللي تظغط عليه عشان تيها نجمه .. ابطت نجمه لين وصلت وتمت ام سيف طايحه..

نجمه : نعم ماما
ام سيف: نجمه ليش ماوعيتيني حق الصلاه ؟
نجمه: انا يجي ماماه انتي مافي قوم
ام سيف: انزين تعالي اطاعيلي اديه تعورني وايد وآانس شجات في صدري

يت نجمه وبدت تهوس على ايد ام سيف لكن الالم كل شوي يزيد ..
تمت ام سيف طايحه ومب رايمه تنش ..

ام سيف: هاتيلي مااي في طااسه بتيدد مب رايمه انش ابا اصلي

تيددت ام سيف وصلت فرضها اللي طافها وتمت طايحه .. تحاول تتحرك لكن ايدها اليسرى تعورها وايد.. طبت سالفة ايدها ورقدت شوي لين يتها نجمه توعيها حق الريوق.. وعقب قامت ام سيف تاكللها كم لقمه بس ما قدرت تاكل زين .. حاولت ام سيف انها تقوم وتنشط عمرها عشان تنسى عوق ايدها .. نشت من فراشها وهي متاكيه بايدها اليمين وسارت يلست في الحوي.. سارتلها نجمه اللي كانت زايغه عليها..

نجمه: ماما انتي في تعبان ليش يجلس برع؟
ام سيف: فكيني نيموه .. يلسة برع اخيرلي من الطيحه
نجمه: راس مال انتي ياابس
ام سيف: صه ولا كلمه

وردت نجمه البيت وهيه تحاتي ام سيف.. ومافكرت الا بمريم .. قبضت تيلفون البيت ودقت لبيت مريم .. اللي من شافت رقم بيت امها استغربت.. امها ما تتصل ضاريه مريم اللي اتدق بس مب ها الوقت ..
ردت ع التيلفون وسمعت صوت نجمه فالطرف الثاني..

مريم: ها نجمه شو مستوي
نجمه: ماما مريم .. ها ماما كبير تعبااانه
مريم: بسم الله جي شو فيهااا؟
نجمه: ايد مال هو في وجع
مريم: ايدها .. هيه زيغتيني عبالي شي جايد
نجمه: ماما ايد في وجع وفي الم قول داخل صدر.. انا مافي معلوم شو ها
مريم: شو عوق فصدرها! اول مره تتشكى من ها الشي .. قبل الا تقولي ايدها تعن وتعورها يوم ترقد وتأجب عليها..
نجمه: مافي معلوم.. حتى ريوق ما في ياكل شي
مريم: عطيني اياها انتي
نجمه: ها مااما راس مال هو يابس.. الحين في برع يجلس انا قول حق هو مافي زين حر موت برع
مريم: عنيده من يومها امايه.. انزين سمعي انا بدقلها ع موبايلها وديلها اياه انزين
نجمه: جين ماما ..

وسكرت نجمه التيلفون وردت داخل حجرة ام سيف.. حصلت الموبايل مفرور فالسده.. العيوز ماتشله الا جان سارت مكان .. وها الوقت كانت مريم تتصل وردت عليها نجمه وودته عند ام سيف..


نجمه: ماما.. ها ماما مريم يريد كلام انتي
ام سيف: جي داقه احين
نجمه عطت ام سيف التيلفون .. وردت على بنتها بصوت باين عليه التعب
ام سيف: الوو
مريم: السلام عليج امايه
ام سيف: وعليكم السلام والرحمه
مريم: ها امايه شو يعورج؟
ام سيف: مااشي يعورني انا بخير وسهاله
مريم: امايه نجمه متصله وخبرتني عنج
ام سيف تتطالع نجمه: غربلها الله من سودا .. لله مافيني شي .. الا هاي ايدي عانه نفس كل مره..
مريم: امايه ابوي ها ما ينسكت عنه .. لا تعاشينا المستشفى اليوم الا نوديج اياه
ام سيف: لله مافيني شي ما بسير الدختر ولا شي
مريم: امااايه نجموه تقول تآنسين بعوق فصدرج
ام سيف: لا لا جذب
مريم: سمعي امايه مب عكيفج .. بتسيرين بتسيرين.. والحينه انا وخلفان يايينج تزهبي ..
ام سيف: لاا حوول ولا قوه
مريم: يلا فمان الله .
ام سيف: فمان الله..

وردت العيوز داخل البيت ويابتلها نجمه عباتها .. وماهي الا دقايق ومريم واصله بيت امها .. وساروا صوب المستشفى..

****

الساعه اربع فاستراليا .. ساروا ناعمه وسيف يرقدون شوي .. وريم طاحت بعد تبى ترقد من بعد طلعتهم الصبح لمتحف الشمع .. مي وساره تيلسن فالصاله يلعبن اونو ومها ومهره وعفرا يطالعنهن.. اما مايد وجاسم نزلوا تحت ..

مها ملت من اليلسه وطلعت البلكونه .. وتمت واقفه ع الحد تشوف .. وجذبها منظر الناس تحت وتمت توايق وهي موخيه براسها .. وما سمعت الا حد يزاقر

" أيـــــه .. عن اطيييحييين"

لفت مها ع فوق تلقائي وشافت واحد واقف يضحكلها .. من شكله يبين انه شاب صغير.. ينعطى من سن مها ومهره ..

مها: عنبووه انتو لازم تراقبونا شو نسوي يعني؟
سعيد: هههه شو نسوي متمللين وييتوا انتوا ونستونا بصريخكم
مها: لا والله وشحقه ما تنزلوون تحوطون
سعيد: ننزل ونرد .. جيه طول الوقت بنتم برع؟؟
مها: ياخي اذيتونا .. حتى خواتي الكبار حرمتوهن من الطلعه فالبلكونه ماقامن يظهرن.. فجوا عنا
سعيد: بل بل بل .. شوي شوي علينا انزين .. انزين خبريني انتي مها ولا مهره
مها: بعد حافظ اسامينا!!
سعيد: ههههه انتوا مسويلنا مسلسل خيماوي فاستراليا.. لازم بنحفظكم
مها: وشدراك انه نحن من راس الخيمه؟
سعيد: يبوج من الرمسه تنعرفون .. وغير ها سوالفكم كلها عن راس الخيمه
مها: يعلكم كل شي تسمعونه
سعيد: ههههه ترا ان ماكنت انا يالس يكون حمود ولا عبود.. ويخبرونا سوالفكم
مها مدت لسانها وهيه تعيب عليه ..
سعيد: ها اللي علموج اياه .. تعيبين ع الرياييل عن تخليني انطلج واضربج
مها: تهبي الا انته
سعيد: عنلاتج وياها رمسه.. عيب حشمي
مها: جان حشمتونا انتوا عيل.. كله تصنتون علينا
سعيد: نحن ما تصنتنا .. حسوسكم انتوا عاليه

دشت ها اللحظه مهره البلكونه وهيه تشوف اختها تتحرطم شو ينت البنت ترمس بروحها .. لكنها عقب انتبهت للي يالس يرمسها فوق ..

مهره: مهوه ها سعود!!
سعيد: ههههههه انتي مهره يعني واللي كانت ترمسني مها
مها: وانتي شدراج به بعد
مهره: امس كانوا ثنينه فالبلكونه يرمسون مايد وجاسم.. ها ماكان امبينهم.. وقالوا انه ربيعهم الثالث سعود
سعيد: زين زين فرصه سعيده
مها: أيه ابا من هالجبس اللي ع طاولتكم
سعيد: اسمي سعييد
مها: انزين سعود هاتلي جبس .. البارحه خلصنا كل الكاكاو اللي عندنا
سعيد: اسمي سعييد
مها: اففف انزين سعيد
سار سعيد وياب وياه كيسه كاكاو متروسه و حط داخله الجبس اللي كان ع الطاوله وفره عليهن وقبضته مها
مها: قلتلك جبس واحد مب كييس
سعيد: بالعافيه عليكم ..
مهره: انتوا من متى هنه
سعيد: قبلكم باسبوع
مها: ومتى بتروحون؟
سعيد: ماعرف بالكثير ع الاسبوع الياي.. وانتوا؟
مهره: ماندري بس بعدنا تونا مكملين اسبوع من يينا ..
سعيد: والله ونستونا ع اخر ايامنا فاستراليا ههههه
مها: شو قالولك طاش ما طاش
سعيد: يبوج اقوى من طاش ماطاش انتوا .. كم تسوى سوالف جسوم وينه هوو
مهره: نزلوا هو مايد تحت ..
سعيد: عيل بنزللهم .. محمد وعبيد تأخروا ماردوا وانا ملاان ..
مها: انزين يلا باي بنرد داخل نحن وبنطلق سراح السجناء عقب مغادرتك الكريمه
سعيد: هههههه زين

ونزل سعيد تحت .. اما مها ومهره ردن الشقه ولقن ساروه وميوه مندمجات فاللعبه .. ويوم شافن الكيس فايد مها استغربن .. وخبرتهن مها عن السالفه وضحكن البنات لكن مي هزبتهن شوي واتفقن انهن ما يخبرن ريم لانها بتسويلهن سالفه.. وعقب ماشافوا سعيد روح طلعن يتيلسن في البلكونه

****

رد: قـــلـــوب تـــحـــت الـــمــجـــهــــر**
 

فطواري المستشفى كانت ام سيف يالسه ويا مريم بنتها .. اما خلفان كان يكلم الدكتور اللي قاله انه يشك في انه ام سيف تحتاج لعملية قسطره شرايين .. لكنه مب اكيد وبيتريون النتايج لين ما تظهر يوم السبت .. ومخافة من انه يصير شي بحكم انه ام سيف حرمه كبيره بينومونها فالمستشفى ..
خلفان رد للحريم وخبر مريم باللي قاله الدكتور ..

مريم: قسطرة!!
خلفان: هيه .. بس بعده مب اكيد
مريم: وشله ينومونها
خلفان: يعني يخافون تتويع ولا شي.. خصوصا انه اليوم الخميس وباجر الجمعه واجازه ومحد اهنه بيسوي شي لين السبت .. تعرفين انتي هالمستشفيات
مريم: مادري والله .. بقولها بس ها ان طاعت

ورمسوا ام سيف انه بينومونها لكنها ماطاعت والا ترد البيت .. وماراموا يقنعونها.. خصوصا انه مابيسولها شي لين السبت
وفالاخير مشت ام سيف رايها .. وردت البيت .. ومريم شلتلها اغراض من البيت وقالت بتبات عند امها ..

وع الغدى خلفان خبر عياله بسالفة يدتهم ..

نايف: ومن متى هي تعبااانه!!
خلفان: امك تقول من فتره ايدها تعورها لكن اليوم زادبها العوق.. ويدتكم عنيده مب طايعه تتنوم ف المستشفى
نايف: شو بيسوولها هاذيل .. ابويه بننقلها مستشفى خليفه احسن
لطيفه: هيه ابويه.. هنه حتى نتايج الفحوصات تكون مرات مب اكيده
خلفان: تشوفون جي يعني؟
نايف: هي امره حتى لاتتريون نتايج هذيل شلوها سيده اهناك ويفحصون عليها من اول ويديد يمكن ماتحتاج وهذيل يخربطون
اسما: حليلج يا امايه .. انزين ابويه ان طلع صدق تحتاج قسطره خطره هالعمليه؟
خلفان: ع حسب .. الحين نحن مانعرف شو فيها بالضبط انسداد شريان ولا شو..
نايف: ان شاء الله خير.. وقوم خالي ما بتخبرونهم؟
لطيفه: تراهم فسفر شو بيسوون
نايف: يقطعون سفرتهم بعد شو .. امايه تعبانه وخالي يتم برع عنها
خلفان: عيل تدرون انا برمس امكم وباجر ان شا الله عقب صلاه الجمعه بنطلعبها بوظبي .. وسيده بنوديها الطواري اهناك وان طلعت نتايجها وكل شي وكان شي مايطمن الله لاقدربتصل بسيف وبخبره
نايف: انا بسير وياكم
خلفان: لا لا تم انته اهنه محد ويا خواتك واذا في شي خلاف بتون كلكم بوظبي
نايف: على خير ان شا الله

العصر سار نايف صوب بيت خاله سيف يبى يطمن على يدته .. كانت ام سيف ومريم يالسات فالصاله .. ودش عليهن نايف .. سلم ويلس حذال يدته .. مريم ها الوقت دشت المطبخ بتسوي قهوه ..

ام سيف: ابويه عطني التيلفون ودقلي لبنات سيف
نايف: ليش؟
ام سيف: يابويه متولهه عليهن من ثلاثت ايام ما رمستهن
نايف: مايعرفن عن عوقج
ام سيف: له ما قلتلهم ماباهن يحاتني وهن فسفر .. انا بخير الحمدلله مافيني شي
نايف:ماعلينا من رمستج ترا بنوديج مستشفى خليفه في بوظبي
ام سيف: يالله شله بعد تفزعوبي لين هناك .. قالكم الدختور انا بخير مافيني شي
نايف: ماعليه عشان نطمن اكثر ..
ام سيف: الا انتوا تكبرون السالفه .. قم قم هاتلي التيلفون بتحصل حذاله ورقه في ارقام البنات هاتها وياك ..

وقام نايف وياب التيلفون لين عند ام سيف والورقه فايده ..

نايف: ها امايه تفضلي
ام سيف: انزين دقلي ع واحد من ها الارقام.. دق على اللي فوق ها مال ريم
نايف تم يطالع الرقم ويطالع يدته ..
نايف: والثاني؟
ام سيف: مال الخبله
نايف: هاه ؟ منو الخبله
ام سيف: ساروه
نايف: ههههه (وسكت شوي يبى يجس نبظ يدته) شحقه ريم زقرتيها باسمها وهاي سميتيها الخبله
ام سيف: تراها صدق خبله خريش يالله ماتيلس والا ريم فديتها عاقل ماتقول بينهن الا سنه .. دق دق انته ع الرقم احين
نايف رجع يطالع الورقه: ورقم خالي عيل وين ولا ما دقيله؟
ام سيف: رقم خالك حافظتنه نيموه ادقلي عليه هيه
نايف: اهاا .. والحين ادقلج لريم؟
ام سيف: هيه ان ماردت بتصل بالخبله .. بس كم الوقت احين عندهم
نايف: ممم متأخر شوي ..الساعه 11 بتي عندهم احين
ام سيف: ماعليه دق ما يرقدن هن ..

وقبض نايف التيلفون واتصل ع رقم ريم .. خلى السماعه على اذنه ..
مايعرف هو ليش جي سوى بس اللي يعرفه انه كان يبى يسمع حسها ..
اول ما سمعها تقول " هلا وغلا بطويلة العمر.." عطى يدته السماعه ..

نايف: ها امايه ردت هاذي
ام سيف: السلام عليكم
ريم : وعليكم السلام والرحمه .. شحااالج اامايه؟
ام سيف: بخير وسهاله انتي اشحالج؟ واشحال خوانج؟
ريم: الحمدلله كلنا بخير .. تولهنا عليج يا امايه
ام سيف: فديتكم والله انا الي متولهه عليكم.. البيت تام فاضي عليه
ريم: فديتج والله .. ها امايه هاذن ساروه وميوه يبن يرمسنج كلني
ام سيف: ههههه هاتيهن انزين

ام سيف رمست مي وساره... ونايف يشوف يدته اللي كانت وايد مستانسه وهي ترمس عيالها .. طمنتهم عليها واطمنت عليهم .. ونايف ها الوقت يشوف الورقه وغصبن عنه خزن رقم ريم في ذاكرته وصوتها يتردد فاذنه..



********************
(السبت)31 يوليو 2004
********************

فاسترليا كان الوقت 12 فليل ..والجو بطبيعته بااارد خصوصا هالوقت .. طلعن مها ومهره البلكونه وياهن جسوم ومايد .. وتموا يسولفون ويصرخون .. بس عسب يسمعونهم اللي فوق ! صارلهم يومين ماشافوهم

بس محد ظهرلهم ..

وماهي الا دقايق وبطلعة سعيد فالبلكونه اللي كان قابض جدر فايده .. يوم شاف العيال فالبلكونه ضحكلهم ..

مايد: شو ها فاييدك؟
سعيد: شوفوا شو بسوي الحين

كان يطالع تحت بلكونتهم ضحك ضحكه خبيثه وماهي الا ثواني و انجب الماي البارد اللي في الجدر ..
اما نظرات العيال اللي كانت بين سعيد والجدر الي فايده اتوجهت للمكان اللي انصب فيه الماي وسمعوا صرييخ من تحت شال الدنيا..
كانوا ربع سعيد محمد وعبيد نازلين تحت بشورتات وتيشيرتات بلا كم فها الجو الباارد اما سعيد رفض ينزل وياهم عشان يسوي فيهم هالمقلب ..
العيال تموا يظحكون عليهم وهذيلاك محتشرين ويسبون سعيد عقب ماتجمدوا من البرد..
واللي زاد ظحكهم السيكيورتي اللي طلع من الفندق يزيد ربع سعيد فوق البرد هزاااب ..
مايد: زين سويت فيهم
جاسم: هههه احين تلاحق عمرك دورلك طاسه انخش فيهااا بيونك
سعيد: عادي اطب بلكونتكم ؟
مهره: هاللي قاصر بعد .. حط ريولك انته ان ماحشيتها لك
سعيد: خيبه خيبه انتي ليش جيه
مهره: احسن
سعيد: الحين عبود اخويه وحمود ربيعه بييووون وبيكفخووني
جاسم: ههههه عيل تصب عليهم ما بارد وماتباهم يكفخونك

سعيد كان ياي بيرد عليهم لكن سمع صوب الباب ينفتح وبدى الزعيج عندهم وعفدوا الشباب على سعيد فالبلكونه يضربونه وهو يضحك عليهم ..

كانت الاصوات فها البلكونتين واايد عاليه .. ظهرت ريم من حجرتها تشوف شو السالفه وحصلت خوانها فالبلكونه ووقفت عند الباب ..

ريم: شوو مستوي عندكم؟؟
مها: هههههه هاذيل سواالف
وشافت ريم مايد وجاسم وهم يطالعون الشباب ويرمسونهم وهاذيلاك يتمصخرون ع بعض
ريم: اللي فوووق؟
مهره: هيه سعيد جب ما بارد ع ربعه واحين يتضاربون داخل ويطلعون البلكونه ..
ريم: وانتن شو موقفنكن وياهم ؟
مها: شو نسوي ملل.. نتسمع ضرابتهم ونشوفهم يوم يظهرون البلكونه
ريم: وخواتكن وين؟
مها: داخل حجرتهن اظن

ردت ريم وسكرت باب البلكونه .. وسارت عند خواتها فالحجره .. ولقتهن منسدحات يسولفن ..

ريم: اسميييهم رابشين ها الشباب ..
ساره: جيه بلاهم
ريم: احسهم وايد يتمصخروون توه واحد منهم صاب ع ربعه ماي بارد من فوق
مي: اويه فها الجو .. اسميهم هلكوا
ساره:ههههههه مهابيل هاذيلا بس سواالف.. ميود يقول بيسافرون عقب كم يوم
ريم: زين يبوكن بنروم نظهر البلكونه ع راحتنا عقب
مي: حلييلهم
ريم: انا بسير اوطي راسي.. طالعن ع خوانكن ولااااتظهرن البلكونه
ساره: انزين انزين .. يلا تصبحين ع خير
ريم: وانتو من اهله

وسارت عنهن ريم عسب ترقد .. طاحت ع السرير وافكار توديها وتيبها .. اليوم يدتها ما تصلتلهم .. تحس انها افتقدت صوتها اليوم .. قبضت كتيب الاذكار اللي تحت مخدتها وقرته وغمضت عينها تبى ترقد..

****

بعد وصول فجر للبيت .. قامت عبير تسوي اي شي بس عسب ترضي اختها الوحيده .. ما ودها تتذمر من المعيشه هنه او انها تحس بالقصور ..
احلام ومديه كانن وايد ينقهرن .. خصوصا لما عبير تنازعهن والسبه فجر ..
كانن بس يتمنن اليوم اللي تبدى فيها الدوامات .. مب فرحانات بالدراسه لا.. بس عسب يفتكن من فجر .. ومن تسلطها ..

كانت احلام يالسه في حجرتها بسلام وماتبى تظهر الصاله لانها تحيد فجر يالسه هناك.. سمعت دق ع الباب .. ودشت البشكاره على طول صوب التلفزيون ..
قامت تمجع الوايرات وشلته واحلام تطالعها ..

احلام: اييه وين تبيبه ..
البشكاره: مدام يريد ودي حجرة مال هي اوختي
احلام: نععععم .. شو يعني ...
وخوزت احلام اللحاف عنها وطلعت حتى قبل ما تظهر البشكاره على طوول للصاله..
احلام كانت تتطالع فجر اللي محطيه ريل ع ريل وتلعب باظافرها .. واطالعت امها اللي تسولف ويا عليا .. انتبهت عبير لاحلام وهي واقفه ومكتفه باديها وتطالع بغيظ..
عبير: احلام يمه شفيج
احلام: مافيني شي .. بكامل صحتيه ولله الحمد ..
عبير: عيل شفيج معصبه..
ولفت احلام على ورا والبشكاره تشل التيلفزيون بتثاقل .. عبير فهمت السالفه .. اما فجر قامت من مكانها وقالت للبشكاره تلحقها ..
عبير: احلام حبيبتي تعالي ..
احلام: هي يايه عندنا ضيفه مب يايه تنقص علينا حياتنا ..
عليا: احلام غناتي بتم خالتج واكبر عنج .. ماعليه لو ضحينا بوناستنا شوي لغيرنا
احلام: لا علييه .. عنبوه .. من يت واميه كله دايره فصفها..
عبير: احلام شو ها الكلام
احلام: هاذي رمستيه .. والتلفزيون احين سايره اخذه
عبير قامت : احلام روحي غرفتج
احلام: امييه .. تلفزيونا ونباه .. نحن ويا التلفزيون بنموت من الملل بعد بتاخذونه عنا ..
عبير: احلام .. خالتج كله تقعد فالحجره .. انتي ع الاقل تظهرين وتردين من بيت عمج لبيت عمتج ..
احلام: امييه .. هاي ظهره تسمينها .. خل تاخذلها بروحها تلفزيون ..
عبير: احلام يوم تبين التلفزيون موجود فالصاله .. عادي ..
احلام: ابا فحجرتيه ..
عليا: احلام حبيبتي كلنا ماعندنا تيلفزيون فحجرنا ..
احلام: بس غير يوم يكون عندج ويشلونه غصب عنج
احلام حست بغصه فحلجها .. استغبنت وانقهرت .. طلعت من الصاله وسارت ع طول حجرتها وقفلت الباب .. وشوي حد دق عليها الباب ويوم فتحته ..

البشكاره: فجر يريد رسيفر مال دوش
احلام: اوووهوووو .. خذيه هاكوه وذلفي عن ويهي

وعقب رضت بالباب بالقو وطاحت ع شبريتها .. وهي بتموووت من القهر ..
لا وبكل بروود مطرشه البشكاره بعد تبى الرسيفر ..

ومن سمعت حد داش الحجره مشت دموعها ع طول وتمت ع طيحتها ..

مديه: شو بلاج ..؟
احلام لفت ع مديه.. وقامت من مكانها تبى تسير الحمام تغسل ويها ..
مديه: اكيد السالفه فيها فجر
احلام: منو غيرها هاي محراث النار.. انتي وين كنتي
مديه: بيت عمي ويا ايمانوه ..
احلام: مروان هناك؟
مديه: توه ظاهر .. ليش شو تبينه
احلام: بس اسال ..

ودشت احلام الحمام تغسل ويها .. ومديه يلست ع شبريتها وقبضت ريموت التلفزيون اللي نسوا يشلونه.. ويوم رفعت راسها ماشافت التلفزيون .. وعقب ما ظهرت احلام قالتلها انه فجر خذته حجرتها ..
مديه انقهرت أكثر .. وطلعت ع طول للصاله وتعالى حسها بعد هي وعبير هزبتها ..
اما احلام يوم شافت الريموت .. قهقهت بسخريه .. وطلعت من الحجره متوجهه لحجرة فجر .. دقت الباب ودشت ..

فجر: نعم .. شتبين!
احلام: نسيتي هاا الشي ..
فرته ع فجر من بعيد .. وطاح الريموت ع السرير ..
احلام: سهرات ممتعه ان شاء الله ويا.. تلفزيووني ..

وطلعت احلام من الحجره وهي تدعي ربها انه يخترب ها التيلفزيون .. اليوم قبل باجر ولا تتهنابه فجر ..

****

نزل سلطان من حجرته بعد صلاة العشى.. كان يتلفت فالبيت مب محصل حد .. وشكله يبين عليه انه معصب .. تم يزاقر على امه بس محد توايب له .. سمع حس ابوه فالصاله ودخل عنده يسأله عن امه وقاله انها في بيت بوراشد ..
طلع من الصاله وتم يزقر ع البشكاره وهو متنرفز ..
من سمعت البشكاره حس سلطان تبريدت وركضت الفله .. شافته واقف عند الباب

البشكاره: نعم .. شو يريد ..
سلطان وهو محرج : انا كم مره قايللج الغتره يوم بتكوينها حطيلها ماريتوو ها مال نشاا .. شوو ها انتي ماافي معلووم غبييه ..
البشكاره: بابا سلطان والله انا في حطي ..
سلطان: وين حطيتي .. مب واقفه هنه هاا تشوووفيين مب يابسه .. كيف تبيني اتغتر بها
البشكاره: زين بابا مافي جنجال.. انا بيسوي الحين ..
سلطان: يباالج ضرب انتي
البشكاره: بابا كله جنجال كله جنجال
سلطان: جب ولااااكلمه .. عنبو كل ما نسير الاسواق انييبلج واحد مستبخله على الغتره وراشه شويه شوو دوا عن الموت هو ..

وعلى ها الضجه اللي مسونها سلطان دخلت شيخه البيت .. ومن سمعت ها الحشره زاغت .. تمت تمشي فالحوي وهي عينها على سلطان .. ويوم وصلت عنده ..

شيخه: يالله يا سلطان زعيجك واصل اخر الفريج
سلطان: كله من بشكارتج الغبيه
شيخه: ليش شو سوتلك
سلطان: مالت على ها البشاكير ما يفهمن بقر ..
شيخه تشوف البشكاره وهي قابضه الغتره فايدها وشكلها كان وايد خايف ..
شيخه وهي ترمس البشكاره: سيري سوي اللي قالج اياه سلطان.. وانته ادخل داخل فضحتنا عنبووك .. ما تحشم حد .. حليلها الفقيره يزاتها تشتغللكم وانته جي تعاملها..
سلطان: هي تسبب لعمرها ..

فها اللحظه رن تيلفون سلطان اللي كان بايده .. شاف الرقم .. ورد يطالع امه .. روح عنها يبى يرد ع الاتصال .. وشيخه تطالعه وهي مستعجبه منه .. كان بركاااان مشتعل والحين كتلة جليد .. يمشي ويرمس بالتلفون ..

سلطان: ها شو مسويه اليوم ..
بدريه: والله ماشي .. ملل ..
سلطان: اها .. عيل يبالنا طلعه ثانيه وياج
بدريه: لا لا شووو تخبلت.. يكفي المره اللي طافت .. والله قلبي كان فبطني من كثر الخوف .. ماتعرف يعني حد يمر يعرفني ولا يعرفك ويشوفنا ..
سلطان: يالله عااد .. من الله كنا فالسينما .. منو بينتبه علينا..
بدريه: ربك بعد .. الصراحه خووف ..
سلطان: عدت على خير المهم ..
بدريه: انزين انته اخبارك .. ولهت عليك اليوم ماسمعت حسك
سلطان: ان شاءالله دووم تولهين عليه
بدريه: يالله عاد اللي يسمعك يقول امره مول ما اوله عليك وانته اللي مقطع عمرك
سلطان: عندج شك اني ما اوله عليج
بدريه: ماعرف
سلطان: لو كنت ما اوله عليج جان ما قلتلج ابا اشوفج

سكتت بدريه وهي تتأمل فكلامه اللي يمر جدام عينها وهي مغمضتنها .. ها الانسان ياخذها بكل احاسيسها ويوديها لعالم ثاني .. عالم ما درت عنه من قبل .. او يمكن ما قدرته .. تتناسى كل شخص فحياتها وهي تكلم سلطان.. كلامه حلو ع قلبها .. تستانس عليه وايد ..

وسلطان.. من بعد حالة الهياج والضجه اللي كان مسونها فالبيت .. روق على الاخر وهو يكلم بدريه .. وتم يسولف وياها لين ما يته البشكاره وهي يايبتله الغتره .. خذها عنها وهو يطالعها بنص عين .. كمل كشخته وظهر عند ربعه القهوه ..




*******************
(الأحد)1 اغسطس 2004
*******************

ام سيف في مستشفى خليفه رقدوها ونتايجها بالأمس اكدت انه عندها 3 شرايين منسده منها اللي توصل لايدها عشان جيه تحس بالم .. وقرروا اليوم يسولها القسطره خصوصا انه حالتها بدت تستاء وتحس بالام زياده .. في هالوقت كان نايف شال خواته ومتوجهين لبوظبي عشان يكونون موجودين مع يدتهم وقت القسطره..
اما خلفان بالأمس كان متصل بسيف يخبره .. اللي احتشر عليهم عشان ماخبروه اول ماتعبت واتريوا لين يزيد عوقها .. لكن مابيده يسوي شي الوقت كان عنده متاخر ومابيقدر يروح ايجدم الحجز لكن اليوم الصبح طلع من وقت صوب السفاره عسب يجدم الحجز .. تكتم على الموضوع وماخبر حد من عياله ولا حتى ناعمه .. لين رد من السفاره وخبر الجماعه بانه حاليا يدتهم فغرفة العمليات يسوولها عملية قسطره ..

ريم: ونحن شو ايلسنا هنه .. ابووويه خلنا نرد
سيف: انا سرت وجدمت الحجز.. اليوم المغرب تزهبوا بنرد البلاد.. طيارتنا الساعه 11 فليل
ناعمه: انزين ليش جي مستعيل .. امك ان شالله بتقوم بالسلامه وهناك مريم وريلها وياها والقسطره مايبالها شي
ساره: انزين نحن عادي عندنا جان بتمين بروحج هنه.. ولا اقول بنخلي عفروه وياج حرام اتمين بروحج..
مي: هي حلو الاقتراح.. اما عنا نحن نبى نشوف يدتنا ..
ساره ها المره رمست جد: عنبوج عمتج تعبانه وانتي تبين تستانسين هنه
مي اطالع خواتها ولافه بويها عن ناعمه: شعليها هيه عمرها ما حاتت امايه..اللهم نفسي ..
ناعمه وهي اطالع سيف: هيي بناتك محتشرات عليه وانته ساكت عنهن
سيف يطالع البنات وهو بدى عليه الضجر ..
سيف: بس عاد..مب وقته النجره
ريم: اووه فكونا من الصدعه الحين .. امايه متى بتظهر من غرفة العمليات.. انا لازم ادق لعموه .. ابا اطمن والله قلبي ناغزني ..
سيف: ان شا الله مامن شر انا كلمت الدكتور .. وطمني انها بسيطه لاتخافين
ريم بتعجب: كيف ماخاف ونحن بعيد عنها ..
ساره: كله من هالسوسه نعوم مابغتها تسير ويانا .. وخليناها بروحها

سيف يأس من عياله وتم ساكت ماله خلق نجرتهم .. اما ناعمه تمت تطالع ساره بغيض وساره من غيظها طلعتلها لسانها وصدت الصوب الثاني عنها ..
قامت ريم من مكانها وتمت تمشي بتوتر وهي مجتفه ايدها .. جنها واقفه جدام باب غرفة العمليات .. وساره ومي يطالعنها ويحسن هن بعد توترن وياها
وكل وحده يدور في ذهنها افكار وايده .. كيف هالانسانه اللي كان لها جبروووت على الكل ..اللي شتتت عيال ولدها وطالما فرقت فمعاملتها قبل .. طايحه في غرفه العمليات الحين لاحول لها ولا قوه !!
كيف الانسانه اللي يوم رجعوا البيت كانوا مب حابينها ويراددونها ويحملونها ذنب كل شي استوالهم الحين تاخذ نصيب كبير من قلوبهم ومرضها يشغل تفكيرهم! .. شو اللي يخليهم جيه ؟ اكيد تربيه امهم اللي علمتهم يسامحون ويتحابون .. فوق كل اللي استوى كانت تذكر ام سيف بالخير جدامهم وتأكد الهم انه يديتهم ع الرغم من انها يوزت ابوهم بس ماكان الها دور فالطلاق
ومادام صاحبه المشكله الاساسيه وهي امهم مسامحه الكل .. كيف هم!
في الاخير كانت محاولات ام سيف لتصليح الماضي تشفعلها عندهم وتقربهم منها..

ها اللحظات كان سيف متوتر بس يحاول يبين انه هادي جدام بناته ..
تم ساكت وكل شوي يدق لمريم يطمن على امه ظهرت من غرفة العمليات ولا لا ..
اما ناعمه سارت حجرتها ولبست تبى تظهر تغير جو بما انه اخر يوم الهم اهنه ..

ويوم نشوا باقي اخوانهم خبروهم عن يدتهم .. تم الكل مويم وزعلان ع اليده .. والكل ماتوقع ردت فعل جاسم اللي تم يصيح اول ماقالوله عن عملية يدته .. الكل استغبن وهو يشوف جاسم يصيح وريم حاظنتنه ..

ريم: جاسم حبيبي امايه بتكون بخير ان شاء الله خلاص لا تصيح
جاسم: ريمان ها العيوز انا احبها..ماباها تموت عنا
ابتسمت ريم وهزت براسها .. ها جسوم ما يوز عن سوالفه ع الرغم من انه يصيح..
ريم: بعيد الشر يا جاسم.. ان شاء الله امايه بتقوم وبتغدي بخير
مايد: جسوم بس لاتصيح .. قلبي عورني
جاسم ابتعد شوي من حظن ريم ودمعته ماجفت وهو يطالع مايد ..
جاسم: شو بلاه بعد قلبك .. لاتقول جيه الحين بيسولك قسطره نفس امايه
مايد: جان سوولي انته السبب .. خلاص لا تصيح
ريم: بسم الله عليك يا مايد .. لاترمسون جي الله يمن عليكم بالصحه دوم ان شاء الله ..
مي: ابويه رد دق لعموه شوفها طلعوها ولا والله بطني عورني من التفكير
ساره: ليش انتي عقلج في بطنج ؟
مي: سخيفه ياربي مول مب وقته

سيف واللي كان سرحان بالحوار اللي يدور بين عياله مانتبه لمي وهي ترمس.. بس تقربت منه ودقته ع جتفه وردت تقوله يدق لعمتها ..
وقبض التيلفون وعاد الرقم .. وها المره طمنتهم مريم انه ام سيف طلعوها من غرفة العمليات.. والعمليه الحمدلله كانت ناجحه .. وام سيف طبعا راقده بسبة المخدر..ومايعرفون بالضبط متى بتقوم..وحاليا هي في غرفه العنايه لين تقوم وبعدين بينقلونها لغرفه عاديه..


****

عليا كانت يالسه ومحطيه ايدها على خدها .. وام راشد تطالع بنتها اللي ذهنها كان شارد ومب مركزه وياها فالرمسه ..

ام راشد: عليا امايه شو بلاج؟

عليا وسط افكارها غرقانه ولا سمعت سؤال امها..

ام راشد: انزين بناتج متى بيوصلن.؟.. عليا بسج تفكير .. ردي عليه عنبوه شو ارمس الييدار انا
عليا: هاا اماايه .. شوو؟
ام راشد: سألتج متى بيوصلن بناتج؟
عليا: بيوصلون الصبح ان شاء الله
ام راشد: اتصلي لريم انزين اسأليها شو عفرا احين ؟
عليا: امايه مسكرات تلفوناتهن مادري جان سارن المطار.. ماقالتلي متى طيارتهم بالضبط بس قالت فليل
ام راشد: هييه .. انزين دقي لراشد تنشديه عن عفرا شخبارها احين.. يمكن رمس خلفان نسيبهم ..
عليا: انا بروحي احاتيها .. ما بدقله بسيرله بيته وبشوفه جان عنده خبر..
ام راشد: زين قومي عيل بسير وياج ..

وطلعن عليا وامها من البيت .. وسارن للبيت اللي حذالهم .. بيت راشد .. ويوم دخلن البيت .. زقرن على ام مروان .. بس محد توايبلهن ..

ام راشد: اندووج ميره يمكن سايره الشارجه قالت بتسير السوق..
عليا: جنه الا جيه.. عنبو الدار خلا ..

ويوم دشن الصاله شافن مروان منسدح ع الغنفه ومحطي الجريده فوق راسه .. شكله كان غافل .. تقربت منه عليا .. ويلست ع نفس الغنفه ع الطرف .. وقبضت الجريده وضربته بها ع راسه.. فز مروان وشاف عمته فويهه ..
تخيلها شخص ثاني كان زايرنه فالحلم.. ولأول مره يحس بالشبه الكبير بين اللي فالحلم والشخص اللي جدامه .. ابتسم وهو يتمنى يكون بالفعل ها الشخص مجابلنه حاليا ..

عليا: بلاك تبتسم
مروان: لا ماشي.. من متى انتي هنه عموه؟
عليا: توي ها داشه وشفتك راقد قلت بغصصبك
مروان قام من طيحته ويلس وهو حاط ايده ع ويهه وكان شعره منسدل ع يبهته
عليا: تعبان !
مروان: جسمي منهد ..
ام راشد: بسم الله وليدي بلاك؟
مروان: مضارب ..
ام راشد: ياكافي الشر .. ويا منوو؟
مروان: سلطان ولد عموه شيخه
عليا وهي مبطله عيونها : ليش شو استوا ؟
مروان: تحيدين عموه دوم تجات ويا بعض .. اليوم ماقهرته رفعلي الضغط
ام راشد: وشو سويتبه؟
مروان: هههه قولي شو سوابي
عليا: قول انزين شو استوى
مروان: ماشي .. ماذكر بالضبط شو الرمسه اللي خلتني اعصب .. وتسابيت وتفاتنت وياه وعاد هو شري دزني بكل قوته ع الييدار ..هههه ظهري راح
عليا: لا حووول ولا قوه .. شو تباه انته سلطان .. تحيده من يوم يومه مشكلجي
ام راشد: اخيه عليه من ولد .. اسميكم يا سالم وشيخه ماعرفتوا تربون
عليا: امايه هم شو ذنبهم .. طالعي تربية اخوانه .. ولا سلطان الله يهديه بروحه دمر اللي علموه اياه اهله
مروان: هذا اصلا خساره وياه الرمسه
عليا: الله يهديه ان شاء الله
ام راشد: يالله يا شيخه والله انها دومها تصيح منه وتتشكى .. لكن الواحد شو بايده
مروان: ماعليه .. بس الله يخليكم لا تخبرون حد باللي استوى .. بعد بيقول ها سار وشخل ..
عليا: لا ماعليك ..
مروان: الا انتوا غريبه يايين القايله
ام راشد: يالله حتى نسينا شله يايين
عليا: ابوك وين؟
مروان: مادله .. البيت كله فاضي امايه وبناتها سايرين الشارجه وفارس فالعزبه ..
ام راشد: هي قلت انا بعد .. انزين الغالي دق لابوك وتخبره عن ام سيف
مروان: يدت البنااات؟
عليا: هيي
مروان: ليش بلاها؟
عليا: ريم تقولنا انه تعبت وبيسوولها قسطره
مروان: حليلها .. بطالع ابويه

ودق مروان لابوه .. اللي خبرهم انه اللي يعرفه من خلفان ريل مريم انه ام سيف سوولها القسطره ونجحت العمليه بحمد الله وسيف راجع ويا العيال .. وبعد ما سكر مروان التيلفون طمن عمته ويدته انه ام سيف بخير ..

عليا: الحمدلله .. ربي يعافييهاا .. بدق لمريم عيل اتشكرلها سلامة امها
ام راشد: هي صدقج ..
عليا: يلا امايه قومي نرد البيت عيل
مروان: تموا ويايه انزين
عليا: هههه شو خايف اتم بروحك
مروان: ههههههههههه لا مب جي .. بس الدنيا صخه ماداني
ام راشد: تعال تغدنا عندنا انته وابوك .. امك وخواتك بيقلين فالشارجه شكلهن
عليا: بدق لراشد اقوله ..
مروان: خلاص عيل ..

وعقب طلعن عليا وامها من بيت راشد متوجهات لبيتهم ..
اما مروان رد يتسدح .. وهو يفكر بسالفته ويا سلطان .. نرفزه اليوم وايد فالمكتب.. ماقدر يتحمله ويتحمل غلاسته لا ويغلط على ابوه اللي صابر عليه ومشغلنه عنده ..

"الخايس كسرلي ظهري .. انته مب ولد عمه .. عنبو الشر بكبره فيك .. متبري منك ومن الدم اللي بينا يا سلطان .. لاعرفك ولاتعرفني ولساني حتى ما بيطيح فلسانك يا الخايس..
أعوذ بالله منك يا بليس .. ربي يهديه ان شاء الله .."

تمتم مروان بآخر جملتين كم مره .. وحاول انه ينسى سالفته ويا سلطان لأنها مب أول مره تستوي .. بس يأمل انها تكون آخر مره .. لأنه سلطان يباله اللي يطنشه ومايرد عليه

****

فالمستشفى .. من بعد ماطلعوا ام سيف من غرفة العمليات حطوها فغرفة العنايه .. كانت مريم يالسه فواحد من الكراسي اللي برع الغرفه وياها لطيفه واسما بناتها.. ونايف وخلفان يراكضون فالمستشفى يدورون غرفه خاصه لام سيف ..
ومن بعد ماحصلولها .. قالهم الدكتور انه مالهم لزمه يتمون لانه ام سيف فغرفة العنايه ومحد بيتم عندها .. رجعوا كلهم الفندق اللي كانوا حاجزين فيه شقه لهم .. و مريم رجعت وياهم عسب ترتاح ساعتين وبتاخذ اغراضها وبتسيرمره ثانيه للمستشفى .. بتيلس في غرفه امها اللي حجزوها لين اييبونها ..
في طريقهم للفندق كان خلفان يكلم زوجته مريم

خلفان: الحين سيف ع طول بيي هنه؟
مريم: هي سيف وعياله بيون
نايف: عيل يبالنا نحجزلهم شقه ويانا
لطيفه: انزين هم متى بيوصلون؟
مريم: هم اليوم طيارتهم لكن اكيد باجر الصبح بيوصلون
نايف: اسميهم بيهلكون
مريم: ماعليهم شر بيسلمون ع امايه اول مايوصلون وعقب بيردون الفندق يرتاحون
لطيفه: عاد امايه تحب اللمه حولها وفوق هذا متعلقتنهن وايد يعني حتى عادي يلزمن يتمن فالمستشفى ولا يرتاحن
اسما: يالله بيموتن من التعب .. بيسلمن وبيروحن يرتاحن
نايف: انزين انتن شحقى مشتطات..يوم بيين هن بيسون اللي يبنه
مريم: هههههه عاد خواتك الا يحللن الموقف..

وصلوا الفندق ونزل نايف يحجز لقوم خاله .. واهله ساروا شقتهم .. ومريم انعزلت عن عيالها تيددت ويلست ع سيادتها رافعه ايدها لربها تدعي انه يقوم امها بالسلامه..

****

اما في استراليا كانوا العيال يالسين في كافتيريا المطار ياكلولهم شي قبل موعد الطياره اللي كان قريب .. واهناك

جاسم: ميووود .. شووف منو هنااك
مايد: وين؟
جاسم: هاكم ع الطاوله هاذيج
مايد شهق ورد يشوف جاسم: قووم سعوود
انتبهن البنات لخوانهم وهم يتراكضون عنهن صوب الشباب ..
ساره: اندووكن هاذيل مب جنهم ربعنا
مي: هيي هم
مها: اكيييد فطيااارتنا
مهره: صح هم قايلين بيسافرون ها الاسبوع
ساره: سبحان الله.. الله رايد انكون وياهم يوم يردون ههههه
ريم: هي انتن هب اطالعن صوبهم ..
ساره: ريموه حليلهم حشام واظن انهم مب كبار يعني حد منهم يمكن اصغر عني .. وبعدين مب امبينين نحن لهم ..
مي: ريم غناتي اهم شي لا تعصبين انتي ..
ريم: من تصرفاتكن انتن الواحد لازم بيعصب..
مي: انزين ماسوينا شي نحن ريييم
ساره: ماعليج منها .. ريموه دايما تكبر السوالف
ريم: انا اكبر السواالف!! ساروه انتن ماتحاسبن تراكن .. تسون الشي وعقب يطيح ع راسي انا ..
ساره: ريم عاااد .. الحين نحن ماسرنا ودقينا سوالف وياهم .. من الله نشوفهم بس يوم اخوانا وياهم لاتمين تسويلنا سالفه ترا مب من كبرج عشان تتفلسفين عليه الا سنه بيني وبينج لاتنسين
مي: خلاص ساروه عن التحرطيم.. ريم هم ما يشوفنا ولا جان انتبهوا انه نحن يالسين هنه
ريم: كيفكن .. مايخصني لو ابويه يا وشافكن بها المنظر انا غاسله ايدي منكن
ساره حطت ايدها ع راسها: استغفر الله العلي العظيم أي منظر ها اللي بيشوفنا فيه ابويه ..يوم انتي مادانين الجنس الذكري نحن شو ذنبنا .. من الله يالسين بعيد ومايشوفونا .. شو نسوي يعني يوم عيونا تفتر صوبهم .. ياخي يضحكونا.. نبى نضحك بسنا هم وصياح من اصبحنا ..

ريم سكتت عنهن وقامت من الطاوله وسارت يلست بعيد عنهم وهي عاطتنهم الظهر .. تحسست من رمسه ساره .. لكن ما هتمت لانه ها الكلام صح ..اما مي سحبت ساره من ايدها ويلسن ع الكراسي بحيث يعطن الشباب ظهورهن . ماتبى حشره اكثر لا من ريم ولا من ساره ..
والتوم تمن يطالعن شو يستوي بين الشباب وقوم ميود وخاطرهن يعرفن شو يسولفون...

رد: قـــلـــوب تـــحـــت الـــمــجـــهــــر**
 

******************
(الاثنين)2 اغسطس 2004
******************

وصلت الطياره الصبح .. وع طول من طلعوا من المطار كان الدريول يترياهم وسارت وياه ناعمه وبنتها عفرا وشلوا كل الشنط ورجعوا البيت ماعدا شنطه كانن البنات عاملات حسابهن ومجهزاتنها لسيرة بوظبي وشنطه صغيره لسيف ومايد وجاسم.. اما سيف وعياله فكان ياينهم راشد خال البنات ومروان ولده .. سيف ومها ومهره ومايد ركبوا ويا راشد .. اما مروان شل مي وساره وريم وجاسم فسيارته وتوجهوا ع طول لبوظبي ..

فسيارة راشد ..

راشد: عيل حرمك شله ردت؟ ماتبى تسلم على امك؟
سيف: تعبانه اونها .. بييبها اخوها باجر اتسلم على امايه
راشد: هييه .. ولا بنياتك امره هلكانات
سيف: بعد لو بقولهن ردن راس الخيمه ما بيطيعن..قلت خلهن ع هواهن
راشد: عاد تعلقن بامك هن .. لازم بيحاتنها
سيف: حتى امايه والله متعلقتهن ..
راشد: ها الشهر وجي استوو .. عيل لو رابيات عندها شو بتسوي امك
سيف: ربك عاد ماراد
راشد: اسميها امك كانت متسلطه مابغتهن فالبدايه الا تيوزك عسب الولد
سيف: الله يهداك يا راشد.. خلاص لاتنبش فالماضي .. نحن عيال اليوم..
راشد: الله كريم يا خوك ..
سيف: الحمدلله العيال يحبون يدتهم .. ولو اني احسهم ما ينجذبون لي بس ان شاء الله ويا الايام يتعودون عليه
راشد: ان شاء الله يا سيف.. بس انته يوز
سيف: راشد واللي يسلمك لا تيب ها الطاري
راشد: والله لولا الربعه اللي امبينا جان من زمان انا متبري منك
سيف: رااشد الله يهداك العيال هنه لاتنسى ..
راشد وهو يطالع ع ورا : هههه حليلهم رقود ..

في سيارة مروان .. كان جاسم يالس جدام ومتاكي ع الكرسي وراقد .. مي وساره وريم يالسات ورا والكل باين عليه التعب من عقب اكثر من 14 ساعه بالطياره .. ساره كانت غافله اما ريم كانت متاكيه ع الباب وتظغط ع راسها اللي كان يعورها .. مي الي يالسه فالنص كانت واعيه ومتجدمه شوي عشان خواتها ياخذن راحتهن في اليلسه وتشوف مروان من المنظره الصغيره .. ومروان يبادلها النظرات ويسويلها حركات بعيونه ..

مي: سخيف مروان
مروان: ههههه بلاج!
مي: ليش جي تطالعني
مروان: هههه ابا ازيغج
مي: بسم الله .. انا عادي عندي ما ازيغ من ها النظرات .. زيّغ ابها غيري
مروان: الا ايي يوم وازيغج بشي ماعليه
ريم التفتت لمي : يالله يا ميوه انتي مب تعبانه
مي: امبلا
ريم: عيل ليش ماطبين حلجج .. من ركبتي وانتي تهذربين .. تعب منج مروان
مروان: ههههههه لا والله عادي.. انتوا امره كلكم مطيحين ابا حد يونسني بعد فالدرب
ريم: هي جان جي عيل برايج ميوه .. انا خفت تصدع من الهذربه وياها

ويوم وصلوا اول بوظبي .. قامت ساره وتمت تتمغط وتنقع مفاصل ايدها بتعب .. الكل صاخ وهي تتلفت عليهم .. كانت يالسه ورا جاسم.. ولفت صوب اللي يسوق .. جدمت راسها وحطته ع السيت الجدامي .. وعينها بعدها تتأمل مروان ..
مروان اصلا كان منتبه لساره اول مانشت .. ويحس بنظراتها .. يبى يلف لكن استحى .. يمكن هي صح تطالعه لكن يمكن تركيزها مب عليه .. بس تجرأ شوي ولف .. شافها وهي محطيه راسها ع السيت .. ابتسملها ..

مروان: نشيتي؟
ساره استحت ونزلت عينها: هيي نشيت
مروان: وليش جيه يالسه؟
ساره: ظهري يعورني
مروان: يلا ماعليه الحين بنوصل
ساره وهي تتطالع اللي حذالها باليسار : من متى رقود هاذيل؟
مروان: مادريبهم والله .. يرقدون شوي ويقومون.. بس ميوه قبل شوي غافله ولا امبونها مونستني فالدرب
ساره: اونه.. يـــالـله والله تعب ..
مروان: بتسلمون ع يدتكم وبنردكم الفندق
ساره: اي فندق؟
مروان: ابويه يقول نايف ولد عمتكن حجزلكن وياهم ففندق .. بتمون هنه لين تظهر يدتكن
ساره: اونــه
مروان ابتسم: انتي منو معلمنج ها الاونه
ساره: هاا..محد بروحي..
مروان: يا حيج ..

ورد الهدووء يسود السياره .. وساره ردت تتاكى ع ورا وتطالع الشارع من برع وهي متلومه من عمرها .. اكيد انتبه لنظراتها .. ولا ماكان بيلف ..
اما مروان حب يكسر ها الهدوء .. هو بروحه متملل من رقدت عنه مي..

مروان: انزين ..وشو السفره كانت؟
ساره رفعت راسها: ممم.. ونااسه.. وايد حلوه استراليا
مروان: هي .. زين زين
ساره:الحين انته بتوطينا الفندق وبترد راس الخيمه ع طول
مروان: هييه .. ليش شي بغيتي؟
ساره: لا لا .. بس مب تعب عليك قابضلك درب ساير راد
مروان:هههه عادي متعودين
ساره: بتوطينا المستشفى وبتم تتريانا
مروان: ليش ماتبيني اترياكم؟
ساره: لا ماقلت جي.. بس يعني كم بتتريانا انته!
مروان: ماعليه انا بيلس فالكافتيريا.. واول ماتبن تردن دقلي.. ولا قولن لابويه يدقلي لانه بيصعد هو بعد يسلم ع يدتكن وشكله بيتم ويا سيف..
ساره: لا اتلوم من ابوك .. وبعدين ماعندي رقمك انزين
مروان لف على ساره وابتسملها .. مسك تيلفونه
مروان:عطيني رقمج

ملته ساره الرقم وعطاها مروان رنه عسب تعرف رقمه وسيفته عندها.. وهو الثاني بعد خزن الرقم عنده ..
وشوي انتبهت ريم اللي رقادها كان متقطع.. وعقب قومت اللي فالسياره لانه ماشي باقي عن يوصلون المستشفى..


****

فالمستشفى الظهر من بعد ماردوا العيال الفندق ويا ولد خالهم تمت ريم ويا عمتها مريم .. وسيف نزل ويا راشد ياكلولهم شي .. وام سيف كانت راقده تحت تاثير المسكن..
ريم يالسه ع الكرسي وشكلها كان وايد تعبان .. من يوم قالولها عن يدتها وهي تحاتيها وايد وماترقد زين ..

مريم: امايه ريم انتي وايد تعبانه جي مارديتي ويا خوانج الفندق ترقدين؟
ريم: لا عموه مافيني شي .. بيلس وياج .. ابا اشوف امايه يوم بتوعى
مريم: اليوم قبل ماتوصلون نشت رمسناها الحمدلله بخير هيه ..بس ردوا عطوها ابرة مسكن..
ريم: فديتج يا امايه..صدق ماياها خير
مريم: قومي انزين طيحي ع الغنفه ريحي جسمج من عقب ها السفر ..
ريم: خلاص عيل عموه .. بطيح بس اذ حد يا وعيني فشله اتم طايحه
مريم: ماعليج طيحي محد بيي الحين..عيالي واخوهم فالفندق..وخلفان رد راس الخيمه..

وقامت ريم من على الكرسي وطاحت ع الغنفه وماهي الا دقايق وغطت فالنوم من كثر التعب اللي فيها .. مريم كانت تتطالعها وتبتسم .. عايبتنها ريم واايد وماتبى ولدها ياخذ غير ها البنت ..

سيف من عقب ما ودع راشد اللي كان بيرد بيته صعد غرفة امه .. انتبه لريم طايحه راقده ومريم يالسه ع الكرسي تشوف التيلفزيون ..

سيف: رقدت ريمان؟
مريم: هيه فديتها باين عليها وايد تعبانه
سيف: اظني حتى فالطياره ما رقدت .. تحاتي امايه وتحاتي جاسم تخاف عليه يتعب نفس يوم سرنا..
مريم: ليش شو ياه جاسم ؟
سيف: هبط السكر عنده وتم تعبان علينا لو كان ويايه بروحي مابعرف شو اسوي لكن هي ماشا الله عليها عرفتله
مريم: حليلها والله هاي من غيرها مادري شو بتسوون
سيف: شاله اخوانها شل عكس ساره مول ماتحب المسؤوليه..ولا ميوه ماخذه من ريم ومن ساروه ههههه
مريم: حليلهن.. ها الشهر خلاك تعرف اطباعهن
سيف: شفتي عاد كيف

ريم انتبهت على حسهم وبطلت عينها لقت ابوها يالس حذال عمتها .. قامت على الرغم من انه مريم قالتلها ترقد .. بس سارت الحمام تغسل ويها .. ويلست ع الكرسي بتعب .. يتريون امهم تقوم لكن بعدها ماقامت وقرر سيف انه يسير يرقد شوي ولين تقوم يتصلون يوعونه .. اما ريم رفضت انها تسير وياه وعاندت وتمت ورجعت تطيح ع الغنفه لين تنش يدتها بس عسب تريح جسمها ولا هي مب يايينها نوم ..

وعقب مامرت ساعه انتبهت ريم لحركه يدتها ونشت على طول صوبها .. وتمت ماسكه ايدها تحبها
ريم: الحمدالله ع سلامتج امايه شو تانسين ؟
ام سيف بتعب: فديتكم متى ييتوا
مريم: وصلوا قبل الظهر ..
ريم: شو انتي احين امايه؟
ام سيف: اهون امايه الحمدالله .. ليش قطعتوا وناستكم وييتوا انا ماعليه شر
ريم: وناستنا يوم نشوفج جدامنا صاحيه وبخير
ام سيف: فديتكم يالغاليين .. الا خواتج وينهم ؟
ريم: يوج وكنتي راقده وردوا الفندق يرتاحون عقب السفر .. بيون خلاف ان شاء الله..
ام سيف:وانتي امايه بلاه ويهج جيه غادي اصفر
مريم: امايه بنتج تراها مب راقده من امس .. وغير ها هلكانه من الطياره وما طاعت ترد الفندق ترقد
ام سيف: جي امايه
ريم: ابا اطمن عليج
ام سيف: انا بخير مافيني شي ..

وها الوقت سمعوا دق ع الباب .. ودخل نايف .. ريم عدلت تحجيبتها وقامت من ع سرير يدتها ووقفت .. سلم على يدته .. وشاف ريم اللي كانت موخيه ومد ايده يسلم ريم ماعرفت كيف تتصرف ولا ارادي غطت ايدها بكم عباتها وسلمت عليه من غير ماترفع راسها .. وابتعدت عنهم .. اما نايف شاف امه باستغراب ..ليش يعني تبتعد عنهم اول مادخل! هذا وهي ماتعرف اللي مستوي وجي تصرفها!
سكت ويلس حذال يدته .. اما امه حاولت ماتعطي المووضوع اهميه جدامه احين ..

مريم: جي ما يبت خواتك؟؟
نايف: فالفندق ويا بنات خالي ..
مريم: جي ما رقدواا؟
نايف: ماعرف الصغار كلهم راقدين .. بس سمعت اسوم تقول بتسير لمي وساره اون واعيات ..
مريم وهي تطالع ريم اللي يالسه بعيد وموطيه براسها تلعب بطرف شيلتها
مريم: بغينا ريم ترد بس ماطاعت ..
ريم لفت ع عمتها
ام سيف: نايف ابويه رد ريم عند خواتها .. وايد تعبانه
ريم ردت لفت ع طول ليدتها وهي متوتره
نايف: حاضرين ..
ريم قالت باندفاع : لا مابا
ام سيف: فديتج ريم عشان خاطريه ردي ارتاحي
ريم: انا مرتاحه هنه
ام سيف: والله تردين .. انا حلفت يلا قومي الغاليه دام نايف هنه بيردج
نايف قام ع طول عشان ما يسمع اعتراضات من ريم وقالها ..
نايف: انا بتريا عند اللفتات برع
طلع عنهم وماكان لريم أي حجه انها تيلس وغير ها يدتها حلفت ومابيدها تسوي شي .. اما مريم كان هالشي مونسنها وفي صالحهم ..
قامت ريم بضيج .. سلمت ع يدتها وطلعت ..

****

في الفندق.. ساره ومي ولطيفه واسما كانن متيمعات في الصاله .. ساره طايحه ومحطيه راسها ع ريل اسما وميوه متسلقيه ع بطنها ولطيفه يالسه ..

مي: جسمي متكسر خاطريه بحد يناقزعلى ظهري
لطيفه: ما طلبتي
مي: وين وين استريحي انتي.. قصدت حد ضعيف مب تريلا..
لطيفه: يا الخايسه التريلا محد غيرج .. ها يزاتي بسويلج خدمه
ساره: لطوف عيل يبالها حد يأدبها قومي انا وانتي بناقز ع ظهرها
أسما: اسمييج بتروحين يا مي
مي: تريلا وحده بتحطمني وين ثنتين بستوي عيين.. بقوم اسنفر بحياتي ع قولتهم
وضحك الكل ..
مي بيأس: بس والله متكسره
لطيفه: من هالدرب يبوكن لازم بتهلكن
ساره: اغلب الوقت انا كنت راقده .. ههه ماتشوفوني مصحصحه
لطيفه: ريموه فديتها يبين عليها انها مول مب راقده
مي: مووول مارقدت انزين هيه .. والحينه فالمستشفى ماتعايا انقولها نحن بنتم وانتي ردي ارتاحي ماطاعت
لطيفه: حليلها.. الدنيا صخه خوانكم كلهم مرقدين
مي: هي من روح مروان عنا طاحوا يرقدوون .. انا بعد رقدت ونشيت لانه الاخت ساره وايد هاديه وتخلي الواحد ياخذ راحته بالنوم .. خصوصا اذا كانت هي شبعانه
لطيفه تطالع ساروه وتضحك
اسما: عاد ساروه اللهم نفسي
ساره: جب جب جي قالولج نعوم ..
لطيفه: تعاالو ناعمه ليش ما يت
مي: اونها تعبانه عاد وردت البيت .. الا اقول اخوانكم وينهم عيل
لطيفه :عمار يالس ويانواري في السويت يشوفون التلفزيون
اسما: حليلهم اخواني مستوحدين.. ياخي ملل .. لو حد ايي يودينا المستشفى
ساره: ابويه راقد واخوج محد..منو عندنا بيودينا يعني
لطيفه: بدق لنايف بشوفه وين ..
اسما: ما بيطيع ايي توه مروح عنا ..
لطيفه: لا ماعليج ..

دقت لطيفه لنايف لكن شافته مغلق .. وتمت حايسه بوزها وهي متملله ..
ساره: اقوول بنات .. ماتشريتن للجامعه؟
لطيفه: امبلا شوي ..
اسما: باجي شهر .. بعده وقت
مي: انتوا باجلكم شهر .. انا 21 من الشهر بسير عنكم العين
ساره: ليش اسبوع المستجدات يوم 21
مي: هيي .. عاد طبعا ساره الحلوه بتسير ويايه
ساره: بفكر
اسما: يالله ساروه ما يبالها تفكير .. بنسير يبوج نقزر وقت ويا المستجدات
ساره: هزرج .. ممم بس لا بعد يبالها تفكير ..
وتطالع مي وتعيب عليها
مي: ترومين انتي ما تسيرين .. الخايسه انا وين اعرف الا بلطم بعمري هناااك
لطيفه: ميوه غناتي لازم تعتمدين ع عمرج هنااك
مي: انزين بعتمد بس بعد اول اسبوع غير..العام انتي سرتي وياهن عيل
لطيفه: انزين انا الفقيره بروحي سايره محد ويايه ..
مي: عاد شو نسويبج
اسما: لا ماعليج ميوه انا وساروه بنسير وياج .. هههه بنلعب ع المستجدات
مي: يالله يا نتن عاد يا القدامى .. دواهي تراكن ..

وبدن يتناقشن عن المشاري لانه مي وساره خذن نص اغراضهن تقريبا من استراليا .. وباجلهن شوي .. وفكرن يستغلن يلستهن هنه.. طبعا من بعد ماتقوم يدتهن بالسلامه و يسيرن يتسوقن..

وبعد ما عم الهدووء امبينهم .. كلن سرح فتفكيره .. وانتبهوا بعدين لضحك .. كان مصدره ساره ..اطالعنها البنات مستغربات ..

مي: سكنهم في مساكنهم شو بلاج ساروه
ساره: اتذكرت قوم سعيد..ههههه سبحان الله ردوا ويانا وبنفس الطياره
مي: هيه حليلهم .. يلسوا يسولفون ويا ابويه فالمطار وجسوم وميود متعلقينهم .. ساره: الا جسوم من شافهم فالكافتيريا شقت الابتسامه حلجه.. وميود ماقصر خذ ارقامهم..
اسما: يااا حاافظ .. ومنو هاذيلا
مي: هاذيل شباب عرفناهم فاستراليا
لطيفه: شقى عرفتوهم بعد
ساره:ههههه كانوا فالشقه اللي فوق ..

وبدن مي وساره يحكن للبنات قصة ها الشباب وتوغلوا اكثر لسوالفهم فالسفر ومواقفهم اللي تضحك .. لطيفه واسما يضحكن على سوالفهن ويتمنن لو كانن وياهن فها السفره ..

****

احلام كانت فبيت عمها راشد ويالسه ويا خالتها ميره وعزه بنتها.. اما مدوي كانت ويا ايمان يالسات ع ينب يرمسن .. نص ساعه من سوالفهم .. ودخل مروان البيت وهو محطي سفرته ع جتفه .. وشكله مرهق من الدرب ..

ميره: وصلت وليدي .. الحمدلله ع السلامه ..
مروان تجدم ويلس ع الغنفه: الله يسلمج امايه
ميره: عزوه قومي هاتي ماي لاخوج
مروان: لا لا مابا .. بقوم اتسبح انا
احلام: مروااان شحاالهن بنات عموه وشخبار يدتهن؟
مروان اطالعها وابتسملها بتعب: الحمدلله كلهم بخير .. وصلتهم عند يدتهم ورديتهم الفندق عسب يرتاحون..
ميره: وابوك وينه؟
مروان: فالدرب ياي
احلام: بسير عيل اطمن عموه
مروان: اكيد رمسنها بناتها .. بس صبري بتسبح وبسير وياج بالمره بشوف عموه..
احلام: خلاص يلا بسرعه
مروان: اوكي ..

وطلع عنهم مروان وصعد حجرته .. دش يتسبح يبى يعق كل التعب .. والتفكير .. طول اليوم يفكر .. ياترى تحس باللي يحسه ولا !
مايبى يتوهم باشياء .. او يتخيل النهايه السعيده .. لكن يبى يتحرك ويبوح للي بخاطره .. مب لاي انسان .. بس الها .. ويشوف ردت فعلها ..
كل شي سهل بالنسبه له .. متعودين ع بعض .. ويقدر يوصللها و يصارح فأي وقت .. لكن مايعرف متى الوقت المناسب!!

بعد ما خلص مروان سبوح .. نزل تحت وهو يحاول يفصم عقم كندورته .. ودش الصاله ..

مروان: عزوووه تعالي فصميهن
عزه: يووهو مروان متى بتروم تفصمهن انته..
مروان: مب لازم اروم انتي بتفصميلي
عزه: جي بتم عندك دوم انا
مروان: برايج عقب حرمتيه بتفصمهن
ميره: هههههه الله يسمع منك يا مروان واشوفك معرس
مروان: اااميين
احلام:ههههه ها يعرس .. ماتخيله معرس
مروان: بسم الله جي ياااهل تشوفيني
احلام: لا بس خبيل
مروان: طالعوا هاي انتو
عزه: ههههه صدقها
ميره: الله يسعدكم كلكم ان شاء الله واشوفكم ويا عيالكم
مروان: الا تعالي عزيكه
عزه: عزيكه فعينك
مروان: انزين عنزووه
عزه: اماايه شوفيه .. ماعليه انته والله لخبر عليك فيصل
مروان: بس عيل بخاف تراني .. انزيين متى حددتوا العرس؟
عزه: عقب رمضان ان شا الله
مروان: اها.. زين زين .. بالبركه ان شاء الله .. يلا احلام خلنا نسير عند عموه ..

وقامت احلام وركبت السياره ويا مروان لانه ناوي يسير العزبه عقب ما يطلع من عند عمته ولحقتهم مدوي وركبت ورا .. طلعوا من بيت راشد ودخلوا بيت محمد ..
ويوم نزلوا .. دخلوا الصاله ع طول مثل مامتعودين لانه مرت خالهم دوم تيلس بشيلتها في البيت .. كانت هناك فجر يالسه ببجامتها ويا اختها ..
عبير خزتها بعين عساس تدخل داخل .. وقامت فجر بتثاقل .. اما مروان من اول ماشاف فجر يالسه ع طول وطى راسه .. قفط جدام عبير انه يشوف اختها جيه.. وحس بالغلط انه ماتريى شوي قبل ما يدخل.. البيت ماعاد مثل قبل ..
احلام اطالعته .. ورمست بصوت واطي..

احلام: مروان هاي دوم جي .. لاتستحي
مروان: ها
احلام: ما اتحجب عادي عندها
مروان: فشله ..
احلام: دش تعال .. بزقر عموه عليا ..

ودخل مروان ويلس ويا عبير وآثار القفطه بعدها باينه ع ويهه .. وشوي يت عليا ويلست ويا مروان اللي حكالها كل شي من اول ما شل البنات لين وطاهن المستشفى وتفارق عنهن عقب ما ظهر من شقتهم فالفندق..

****

بعد ماطلعت ريم من عند يدتها مشت بضيجتها لين وصلت اللفتات لقت نايف واقف اهناك .. ماعرفها لانها متغشيه بس يوم تقربت عرفها .. ابتسملها .. لكن ماشاف أي تعبير بسبب الغشايه وكانت موطيه راسها ..

نايف: يالله روحنا
مشى قبلها وهي تلحقه .. وصل سيارته وفتح الباب الجدامي.. كان يفتكر انه ريم بتيلس جدام لكنه تفاجأ يوم شافها وراه تفتح الباب الخلفي .. ركب وهو ساكت اما هي كانت تحس انه قلبها بيطلع من صدرها من الخوف لكن تعوذت من الشيطان وركبت السياره ..

نايف: ريم الباب مب مسكر زين ..
فتحت الباب ورجعت سكرته مره ثانيه ..

نايف كان يسوق بهدوووء وببطء بنفس الوقت .. وده ما تمر ها اللحظات بسرعه ..كان يحاول يشوفها من الجامه جدامه لكن شكلها ماكان يساعد .. كانت لافه صوب الجامه ومتاكيه براسها عليها .. وانتبه نايف لصوت تأويه من ريم .. وشافها من الجامه ..

نايف: ريم شي فيج؟
ريم حطت ايدها ع راسها .. وتأوهت اكثر ..
ريم: لاا .. ياربي مب الحين ايي ها الويع .. اخ..
نايف: ريم شوو بلااج؟

غمضت ريم عينها .. ورجعت تخيلت الايد اللي تخنقهااا.. حطت اديها ع ويها ماتبى تشوف اكثر من ها اللي تشوفه وصرخت ..
نايف زاغ ماعرف شو يسوي ووقف عند محطه بترول لقاها ع دربه ..
نزل اشترى ماي .. وفتح الباب اللي من الجهه الثانيه عشان ريم كانت متسنده ع بابها .. عطاها الماي لكن ايدها كانت بعدها ع ويها وتصيح ..
.. نايف ماعرف شو يسويلها
نايف: ريم ؟ ريم شو فييج ؟ بطلي ايديج انزين اندوج اشربي الماي

لكنها ماترد عليه .. اضطر انه يمسك ايدها .. قبض ايدها وخوزها من ويها .. كانت محمره واايد .. فتح غطاة الدبه وعطاها الماي تشرب

نايف: ريم شو فيج.. خوفتيني عليج .. ريم .. انزين ردي عليه شو فيج؟

ريم بعد ما استوعبت انه ايدها فايده .. اطالعته .. وردت تشوف ايدها وسحبتها ع طول ..
نايف: اردج المستشفى ؟ تعبانه شي يعورج ؟؟
ريم: ردني وين بتردني .. المهم انت بعيد
نايف عقد بحياته شو بلاها هاي ..
نايف عدل بيلسته: اانا اسف .. بس والله شوفي شكلج كيف .. والله خفت انه صايرلج شي
ريم وخت براسها .. ورجعت تطيح دموعها وهيه تتنفس بسرعه ..
ماتدري ليش ها الوقت بالذات تذكرت الايد ..
ريم: ماشي .. بس راسي يعورني واايد
نايف: يبين عليج وايد تعبانه
ريم: ابا اروح ارتاح
نايف: خلاص انزين مسحي دموعج ..
ريم: ردني الفندق بسرعه
نايف : ان شاء الله ..

نزل من السياره وركب يسوق مره ثانيه وهو خايف ومستغرب في نفس الوقت .. تم يسوق وكل شوي يشوف ويها من الجامه ويسمع صوتها كل شوي وهي تصيح
الشي اللي خلاه يتوتر وايد وفي نفس الوقت قلبه عوره ع شكلها ...

وصلوا الفندق وريم نزلت قبله لكن تلاقى وياها عند اللفت لين فتح وركبوا وبعد كانت واقفه بخووف ومتسنده لين وصلوا .. ودموعها بعدها ماوقفت ..

دقت باب جناحهم اللي كان حذال جناح قوم نايف .. وفتحت لها الباب ساره ..
دخلت ريم وشافوا ويها احمر من الصياح .. ونايف وراها

ساره: بسم الله ريموه شو بلاج ؟
دخلت ريم الغرفه عنهم وهي تصيح
مي شهقت : لايكون امايه فيها شي ؟
ساره بطلت عيونها وهي تشوف البنات: لاااا ..لااا ..
لطيفه تجدمت لأخوها تبى تعرف شو صاير .. أما البنات ترابعن صوب حجره ريم وهن خايفات من اللي بتقوله ريم .. خايفات انه شكوكهن تكون صايبه وتقولهن انه يدتهن عطتهن عمرها ..
لكن حمدن ربهن انها بخير وكل وحده حاطه ايدها ع قلبها من كثر الزيغه ..

وبرع فالصاله .. بعد ما طمنت لطيفه على يدتها..

لطيفه : شو مستوي نايف ؟ دام امايه مافيها الا كل خير شحقه ريم جيه؟
نايف: مااشي
لطيفه: يلا عاد نايفه ها كله وماشي
نايف بتردد : ممم تعالي جناحنا بخبرج .. اسوم وين ؟
لطيفه: توها سايره اهناك تطالع نواري
نايف: طوفي انزين

ريم كانت طايحه ع السرير بعباتها وشيلتها ومتاكيه ع المخده ..وخوتها يالسات حذالها ومب عارفات شو فيها ..
ساره: انزين خبرينا شوووفيج
ريم بتعب: ماشي
مي: قولي ريم والله تقولين دام امايه بخير ليش شكلج جي.؟
ساره: مايكون تقصون علينا وفيها شي امايه!!!
ريم: والله مافيها شي نشت رمستني عادي
ساره: عيل ليش تصيحين ؟
ريم: لاني تعبانه ومصدعه
مي: قولي والله عشان هالشي بس وامايه مافيها شي
ريم: اوووف قلتلكم والله مافيها شي والله.. فكوني عاد
ساره: وليش يايه ويا نايف
ريم اهنه حست بالم مره ثانيه في راسها ورجعت تصيح
مي تقربت منها وشلت عنها وقايتها وساره يابتلها ماي وهم مايعرفون شو فيها
شربت ريم الماي وفصخت عباتها وطاحت .. لحفوها وعطتها مي مسكن وسكروا عنها الليتات عشان ترقد وترتاح


دخل نايف جناحهم ويلس ويا خواته في الصاله

لطيفه: انته يايب ريم ؟؟
نايف: هيه
اسما: ايواا يا وااد
لطيفه: اسوم سكتي ويا راسج خوانج بيسمعون
نايف: اسموه سيري هاتيلي كوب ماي
اسما: قولي اسموه روحي.. ادريبك تبى ترمس لطوف
نايف اطالعها وابتسم: انزين روحي وهاتيلي ماي بعد
وقامت اسما من عندهم ورد نايف يشوف لطيفه اخته وفعينه اسئله .. ورمسوا بصوت واطي ..
لطيفه: شو بلاك نايف .. وليش انته رادنها شو السالفه بلاها تصيح
نايف: ماشي .. امايه قالتلي اردها لانها كانت تعبانه .. بس
لطيفه: بس شوو
نايف: لطيفه .. ونحن فالسياره ..
لطيفه: شووو سويت
نايف: بسم الله شو بسوي يعني .. ماشي .. ريم ياها صداع احمر ويها وصرخت زغت عليها مادري شياها

يت اسما وهي فايدها كوب الماي عطته اخوها وردت الحجره والانظار عليها لين اختفت وبعدين لطيفه لفت ع نايف ..

لطيفه: ردلها ها الصداع؟؟!
نايف: ليش هي شو بلاها؟
لطيفه: ماعرف يا نايف.. مادري مرات ونادر ها الشي اتم ريم جي يعني اييها صداع هي بروحها ماتعرف من اشو ..
نايف: لطييفه كان شكلها غيير .. مثل وحده مرعوبه وتصيح ومحطيه ايدها ع ويها
لطيفه: اكيد لانها كانت بروحها وياك
نايف: وهذا شو يخصه ؟
لطيفه: ريم ماتقارب الرياييل وساعات تخاف منهم.. الا اللي تعودت عليهم
نايف: كيف يعني ؟!
لطيفه: اممم ريم من هي صغيره .. وخص من خالي وامها اطلقوا .. تكره الرياييل .. يعني ماتحب تقااربهم مووول
نايف: عشان جي يعني اييها ها الصداع؟
لطيفه: والله مادري يا نايف .. ماطاعت تخبرني ليش ها الصداع اييها ..
نايف: عيل كيف بتوافق عليه يوم هي ماتقاااارب موول
لطيفه: عاد انته وشطارتك .. اتقرب منها وبتكسبها .. ريم قلبها رهيف وايد .. بالطيبه صدقني بتكسبها
نايف: مادري والله .. بس لطوف بيني وبينج
لطيفه: شوو
نايف: ريم عايبتني ..
لطيفه ابتسمت: قلتلك بتعيبك
نايف: بس غامظني حالها .. والله خالي ما سوى خير فيهم .. انا اتذكره يوم طلق امهم .. احس ظلمهم وايد
لطيفه: وانا وريم بعد نتذكر ها السوالف .. عشان جي تلقاها هي متأثره وايد .. بس فديتها ع كل اللي شافته من ابوها .. الحين عادي وجنه شي ما ستوى.. صح ما ترمسه وايد .. بس احس قلبها مب حااقد
نايف: يوم ريم جي عيل مابالج بامهم ..
لطيفه: طالعه على امها هيه ..
نايف: حليلهم .. خلاص عيل انا بقوم ارد المستشفى .. محد هناك عندهم .. وخلوا ريم ترتاح وعقب يوم خالي بيي المستشفى تعالن انتن وياه
لطيفه: خلاص اوكي ..
نايف: طمنيني عليها انزين
لطيفه: خلاص صار..

وطلع نايف من الشقه .. ولطيفه ردت للبنات .. بس شافتهن في الصاله يالسات لانه ريم طاحت بترقد ..

********************
(الثلاثاء) 3 أغسطس 2004
********************

الساعه 12 الظهر دخلت عبير ويا بناتها الصاله .. القت التحيه على ام راشد وعليا اللي كانن يالسات فالصاله يسولفن ..
يلست عبير وحطت الاغراض حذالها.. احلام بعد فرت الاكياس وع طول طاحت ع الغنفه ومدوي تربعت تحت تبطل الجوتي..

ام راشد: ماشا الله شو متشرين هالكثر ؟
عبير: رحت خذت قطع المدارس للبنات وجواتي..
احلام:اففف يا الحر .. هلاك برع ..
عليا: هههه اشوفج منبطحه تحت ضربة المكيف..
احلام: سكتي يا عموووه هلكت من هالوقايه والعباه
عبير: وان شاء الله تبين تفصخين العباه
احلام: لا ماقلت انا امبوني من لبستها ميوه وأعزر عليكم تفصلولي عباه
عليا: هههه قنوعه حلامي.. فديتها والله..مها ومهره اباهن يلبسن الوقايه ومب طايعات..
عبير: انزين التوم بعدهن صغار
عليا: يالله وين صغار .. سايرات ثالث اعدادي بس دلعتهن وايد ..
عبير: هههههه فديتهن والله احجامهن صغيره اللي يشوفهن يقول انهن اصغر عن مدوي ..
عليا: ترا عشان جي يشوفن الناس معتبرينهن صغار .. بس انا شارطه عليهن خلاص من عقب ها الصيف يبدن يتعودن ع الشيل
احلام: مدوي والتوم مدلعات انا متحجبه من اول مادخلت ثاني اعدادي
عبير: انتي بروحج عزرتي تبين وقايه وعباه نفس ميوه
احلام: ههههههه حليلي ..

ونقزت احلام من بعد ما تبردت وشلت اكياسها ويلست حذال عمتها عليا عسب تراويها شو خذت ..
عليا: زين والله خلصتوا شي ع الاقل.. مها ومهره ماخذتلهن شي..
مديه: عموه يوم بيون بنسير نتشرى بعد كلنا .. اباهم ياخذون مثلي
عليا: ههههه لازم يعني
مديه: هي كل سنه نطقم نحن وعاد هاي اخر سنه الهن فمدرستنا عقب بيسيرن ثانويه ويا احلاموه..
احلام: هي بين عندي عقب.. يالله يا الدنيا انا كنت اطقم ويا ميوه حتى لو كنا مب نفس المدرسه.. عاد تخرجت محد عندي اطقم وياه
عبير: طقمي ويا اختج ومها ومهره
احلام: لا حشى عليه ماطقم ويا يهال
ام راشد: يالله مها ومهره اصغر منج بسنه .. وين يوا يهال
عبير: هيه الا هاي احلام تكبر عمرها
احلام: ههههه والله مب من شي .. اللي مرابعتنهن اكبر بثلاث واربع سنين عني ..
عليا: ههههه عاد منو مرابعه مي وساره المخبل
ام راشد: حليلهن تولهنا ع خراشتهن..
عليا: بيون ان شاء الله جريب..
ام راشد: زين زين ..عليا صبيلي فنيان قهوه .. بشربلي فنيان وبقوم اتيدد
عليا: ان شاء الله اميه ..
وعبير ها الوقت سألت عليا..
عبير: فجر مايت الصاله عندكم ؟
مديه: ليش تي ؟ تلفزيون وثلاجه في الحجره شو تبى تطلع منها بعد ..
عبير التفتت صوب مديه واطالعتها بنظره ومديه طنشت وقامت ترجع الاغراض اللي طلعتها من الاكياس ..
عليا: لا مول ماظهرت
عبير:اها.. انزين احلام قومي ودي هذا الكيس لفجر
ام راشد: ماشا الله شو شاريلها ؟
احلام: ستر
ام راشد: هاه ؟
عبير: عمتي هذي دراريع لفجر ..

عليا ابتسمت لاحلام.. عرفت شو تقصد بالستر .. تقصد شي طويل وواسع وساتر تلبسه فجر في البيت .. شلت احلام الكيس وسارت توديه وهي قاصده انها تنرفز فجر ..
دقت باب الحجره ودخلت لقت فجر واعيه وتوها طالعه من السبوح يالسه تنشف شعرها ..

احلام: سلملم
فجر: خير
احلام يلست ع الغنفه وشلت جهاز التلفزيون وشغلته
فجر التفت لها معصبه : خير اشعندج .. وليش قاعده ماقلتلج قعدي
احلام: اعرف .. بس الغرفه غرفه بنات عمتي والتلفزيون تلفزيوني
فجر: احلاموه توني قاعده من النوم مالي خلقج
احلام: وانا بعد يايه من السوق حرانه والشمس ظاربه في خمرت راسي ومب فاضتلج ..
فجر وطت السشوار من ايدها وتجدمت من احلام ..
فجر: شعندج في هذا الكيس ؟
احلام: هذي هديه شارينها لج لكن شكلج ماتبينها فاقوم اشلها واروح احسن
قامت احلام وفي ايدها اكياسها
فجر: شو فيج احلاموه زعلتي ؟ انا اتغشمر معاج
احلام: والله ؟ تعرفين اتغشمرين انتي ؟
فجر: احلامووه
احلام: خلاص خلاص طالعه ولا ايمهج
لحقتها فجر : خلاص عاد بلا ملاقه .. شنو بالكيس
احلام وهي تطالعها : هذا طال عمرج اسمه ستـــر
فجر: شنو؟ شنو هذا بعد ؟
احلام: انا بعد قلت اكيد انتي ماتعرفينه .. بس لازم تعرفينه مدام انج موجوده اهنه
فجر: انزين شنو هذا اكل اماراتي والا شنو بالضبط
احلام: تعالي يلسي بخبرج .. هذا طال عمرج مب بس في الامارات هذا منتشر في كل مكان للي يبى .. لكن يوم تين الامارات وخصوصا هالبيت تكونين غصبن عنج تبينه مب بكيفج
فجر يرت الكيس من ايد احلام اللي كانت تبين ملامحها عاديه وفي داخلها بتموت من الظحك ..
فتحت فجر الكيس ولقت فيه كنادير و شيل بيت
فجر: هذي دراريع ؟
احلام: وهذيج شيل بيت نفس لون الكنادير .. عشان تكشخين وتطقمين يا خالتي العزيزه
فجر: نعم ؟ هذي لي انا ؟
احلام: هيه نعم هذا الستر اللي الله امرنا فيه .. تستري مب بكيفج غصبن عنج مدامج انتي في هالبيت.. ويوم بتزولين بيتكم والا أي مكان سوي اللي تبينه نحن عندنا ريايل في البيت وحشام مب على اخر عمرهم تي وحده مثلج تفتنهم ويستاثمون من وراها .. واولهم ابويه ..
فجر من غيظها فرت احلام بالكيس اللي في ايدها و نشعتنها من شعرها وهيه تصارخ عليها
فجر: اذا اهلج ماعرفوا يربونج انا بربيج ياقليله الادب .. هذا الحجي تقولينه لغيري مو لي انا تسمعين
احلام: جب يالخااايسه فجي شعري الله ياخذج
وبدن فجر واحلام يتظاربن لين تعالت حسوسهن ووصلت للصاله
عبير: يمه شنو هذا الصوت ؟
عليا: تلاحقي بنتج مايكون تظاربت ويا خالتها

ركضن مديه وعليا وعبير صوب الغرفه وشافوا احلام تضرب فجر والعكس..
عبير حاولت تحايز بينهم ودزت احلام على عليا

عبير: شو فيكم شو صاير
فجر: هذي بنتج قليله ادب وماعرفتوا تربونها
عبير: فجر بنتي انا مربيتها زين لاتقولين هالكلام شنو سوت لج؟
فجر: خليها تقولج هاي اللي يبيلها قص لسان
عليا: استهدوا بالله ياجماعه الخير لاتمون جيه .. فجر فديتج شو مستوي شو مسويه احلام
فجر: مو شغلج ..

عليا اطالعت فجر وهي معقده حياتها من كثر ما هي مستغربه من رد فعلها.. ماحبت انها تقول اي كلمه لانها مب عوايدها تسب او تشتم

عليا: يزاج الله خير ..

رد: قـــلـــوب تـــحـــت الـــمــجـــهــــر**
 

وخذت بنت اخوها احلام اللي كانت تصيح في حظنها وودتها وياها الحجره وسارت وياهم مديه .. اما عبير تمت ويا اختها
وفجر سارت طلعتلها ماي من ثلاجتها وشربت تبى تبرد على عمرها .. وتمت يالسه على الكرسي

عبير : هذا رد تردينه على عليا يا فجر ؟
فجر: انا ماقلت شي غلط صج اهي مالها شغل تتدخل بينا ان شا الله اكسر راس بنتج اهي مالها دخل
عبير: لا ماتكسرين راس بنتي ..اهي شنو مسويتلج .. يا فجر انا تعبت خلاص .. دايما احاول اسوي اللي يرضيج واهملت بناتي بس عشانج ليش ماتحسين عاد وتخلينهم في حالهم ..
فجر: وليش اهما مايخلوني في حالي .. ليش يايبيلي هالدراريع والشيل اللي معاهم وتقولي بنتج والله نحن شرينالج ستر .. هذا كلام تقوله
عبير: فجر مابي ازيد في الكلام لاني صدعت لكن هذي الملابس لازم تلبسينها مدام انتي في هذا البيت لكن برع البيت سوي اللي تبينه والله يهديج

طلعت عبير ومافكرت حتى تمر تشوف احلام سارت غرفتها وتمت تصيح اللي كانت تخاف منه.. يستوي جدامها وماتعرف تتصرف فيه .. شلت تلفونها واتصلت بمحمد

محمد: الوووه ؟
عبير: وين انت ؟
محمد: انا في الدوام شو فيكم
عبير: تعال شوفلك صرفه انا تعبت وانته مشغول عنا ومالك شغل بشي
محمد: شو مستوي ؟
عبير: فجر واحلام متهاوشات
محمد: مب شي يديد
عبير: هالمره فيها طق يا محمد واحلام اللي انطقت
محمد: نعم ؟؟ وفجر ليش تضرب احلام ؟
عبير: لانه بنتك ماتسكت تتحرش فيها
محمد وهو مغيض: انا بنتي ما مديت عليها ايدي يوم صغيره.. ايي حد ايمد ايده عليها احين يوم كبرت!!
عبير: انا مو عارفه شسوي هذيج اختي وهذي بنتي وانا بنتي ماحب انه يصير فيها هالشي وفي نفس الوقت ماحبها تطول لسانها ع اللي اكبر منها
محمد: عبير حلي هالمشكله بعيد عني الله يخليج لاني والله ان تدخلت مابيصير خير وانا من احين اقولج .. الدنيا كلها في صوووب وبناتي في صوووب ثاني ..

وسكر التلفون ورجعت عبير تصيح
بغته عون صارلها فرعون .. محمد طيب فوق الحدود لكن طيبته توصل حدها اذا كانت ضد بناته .. كله ولا ها البنتين .. ما بغى يتدخل فالموضوع لانه مايبى يجرح عبير بأي فعل أو بأي قول بسبب اختها فجر ..

أما احلام من بعد ما طلعتها عليا من عنج خالتها يلستها عندها فحجرتها .. يتهم ام راشد الي كانت خايفه ومب عارفه شو مستوي .. طمنتها عليا انه مافي شي .. وسارت ام راشد تصلي فرضها .. وتمت عليا تربت على ظهر احلام اللي كانت تناهي من صياحها ..

عليا: بسج احلام قطعتي فوادي
احلام: يعلني بلاها ها الخايسه
عليا: احلام لاتمين تسوين جيه خبريني شو استوى
احلام : وديت لها الثياب اللي اشتريناها لها وقلتلها مدام انتي في البيت لازم تحترمين اللي فيه وتحتشمين بلبسج غصبن عنج
عليا: يعني انتي تحرشتي فيها
احلام: انا ماتحرشت فيها بس انا استحي من اهلي والسبه هي .. هاي فظيحه مروان والشباب كلهم قطعوا ييه البيت اهنه والسبه انها تيلس متكشفه تتحراها وكاله من غير بواب .. حتى عمي مانع اللي نترياه اربعا وخميس أيي عسب نشوفه وييلس ويانا خفف من يلساته ف البيت.. ايسير بيته ع طول ولا ييلس هنه ويانا.. شو تبى تحرمهم من اليلسه ويا اهلهم هيي..
عليا: مديه قومي هاتي لاختج ماي
مديه: ان شا الله
نشت مديه يابت ماي لاحلام وعطتها اياه .. رشفته احلام مره وحده من كثر عطشها ..
عليا: بس خلاص يا احلام .. هدي ..
احلام: شو بس عموه.. هاي اليوم مدت ايدها وظربتني .. باجر مادري شو بتسوي
عليا: احلام لو في خاطرج شي قولي لامج تقولها ولاتسيرين انتي الها ولا تسببيلها
احلام: اميه ؟ وين ثرها اميه تسمعلنا احين ؟ كله لفجر ولاتقولون لفجر وسوو لفجر..والله عفنا السالفه .. هذا وهي بعدها من اسبوع يايه ..
عليا: شو بنسوي .. ترا امج لازم تعتنيبها اهنه.. محد وياها..
احلام: و بعدين اميه قالت اوديلها الكيس
عليا: احلام هي قالت ودي الكيس ماقالت تحرشيبها
احلام: الله يغربلها الخايسه قطعت شعري ... بس وين بتسير والله لاراويها
عليا: احلاااام بس عاد
احلام: والله ياعموه هاي شو بتسوي يوم بيون بناتج بتفظحنا يعلها ان شا الله
عليا: تبين الصدق احلام انا بناتي ممكن اضمن انهن يطنشنها ومايردن عليها لكن الخوف من ساروه وميوه اللي بييلسن وياها في الحجره .. ادريبهن مايسكتن عن حد يوم يدتهم ما سلمت منهم اول ما نتقلوا عندهم .. ومرت ابوهم مب سالمه منهن.. وين فجر ..
مديه: احسن خل يروانها
عليا: هذا بدال ماتقولن بننصحهن مايخصن بها تقولن جيه انا هالحجره ماعاد فيها مكان من الاسره والا كنت بييبهم اهنه .. بس انتوا ادرى البيت صغير ومايكفي
مديه: لاتيبنهن ولا شي هذيج غرفتهن من طلعنا نحن ع الدنيا مابتي احين هاي تاخذها عنهن ع البراد
عليا: اخ يابنات محمد عنيدات ماينقدرلكن .. قومن تعوذن من بليس وتيددن للصلاه احين اذن الظهر .. ولاتقولن لابوكن شي من احين اقولكن.. مافينا يتم معصب ويعق حرته على امكن هالفقيره كم بتتحمل ..

سكتن البنات ونشن سارن غرفتهن وكملت احلام مناحتها اهناك من كثر ماهي مقهوره .. وقررت تلبس ثيابها وتسير بيت عمها راشد تيلس عندهم لانها عايفه يلست البيت ..

****

هالوقت كانوا الكل يالسين في المستشفى عند يدتهم .. ناموا البنات طول الليل لين الظحى وعوضوا التعب اللي ياهم من عقب اليلسه فالطياره .. واول ماقاموا كلهم يوا المستشفى عند يدتهم .. سيف ودى بناته ونايف لحقهم بخواته..


في غرفه اليده كانوا كلهم يالسين وياها ما عدى مهره ومها وجاسم ومايد اللي كانوا يالسين في الصاله يسولفون ويا عمار لانهم امس ما يلسوا وايد مع بعض ..

ساره يلست على سرير يدتها والباجين كانوا ع الكراسي ..
ساره: هاه امايه شو انتي احين ؟
ام سيف: مادامني اشوفكم انا بخير
لطيفه: يـيه يالدنيا .. اليديد حبه شديد .. ولينا نحن .. ولى زمن عيال مريم الغالين
ساره: لو سمحتي انسه لطيفه .. نحن عيال الولد .. في فرق .. خصوصا عند امايه عفرا .. الولد عندها اهم لو تنهد بلد ..
ريم: ساروه مب وقته هالرمسات احين ..
ساره صدت على يدتها وهي تظحك : امايه امايه ... امايه
ام سيف: ياويلي انا هالزقره مادانيها
ساره: انزين امايه .. ههه .. بسالج .. انتي فيج عرج من ايام الجاهليه ؟
مريم: هههه بس ساروه يوزي عنها حرام عليج
ساره ردت تشوف يدتها اللي كانت تظحك عليها : زعلتي العيوز ؟
مي: فقتج يا ساروه .. بالله عليكم قوموها .. عنبو من يينا وانتي موازره امايه .. خوزي خلينا نيلس نحن شوي نسولف وياها..

ام سيف ومريم يظحكون عليهم .. مريم ماتعرف طبايع بنات اخوها زين وكل يوم تكتشف فيهم الاشيا اللي خلت امها تتعلق بهم .. شفافات واللي في قلبهم على لسانهم .. وطيبات وايد .. هي نفسها تعلقت فيهم..
نشت ريم وسارت المطبخ اتييب الهم عصير .. ولحقتها على طول لطيفه ..

لطيفه: شو تسوين ؟
ريم: بودي عصير حقهم .. الثلاجه ممزوره عصاير
لطيفه : منو يايبنها ؟
ريم: المستشفى بروحهم ..
لطيفه: هيه ماشا الله .. انزين شو انتي احين؟.. اهون عنج الصداع الامسي ..

ريم كانت موخيه تطلع العصاير من الثلاجه وتحطهم في الصينيه .. لكن وقفت يوم سالتها لطيفه وعقدت حواجبها كأنها تذكرت شي ..
ريم: بخير
لطيفه: انزين ليش رجعلج الصداع
ريم: كنت تعبانه
لطيفه: بس عشان تعبانه !
ريم نشت وشلت الصينيه وحطتها ع الطاوله : هيه بس ..

وطلعت على طول من المطبخ وسارت تودي العصاير حق اخوانها اللي كانوا فالصاله ويسولفون .. وعقب ودت الباقي ليدتها وعمتها والبنات.. وفي نفس الوقت دخلت النيرس وهي يايبه غدى ام سيف ووجبتين زياده.. ويلست حذالها ريم ..

ام سيف: بسني امايه ريم شليه انا ماداني الدياي وايد ..
ساره: شو بسج امايه الله يهداج عاد من زود اللي يايبينه .. لقمه صغيره وقطعه ديايه .. قااصين عليج بها .. شو رايج انا اسير اييبلج مجبووس سمج من برع تاكلين صبوعج وراه
مي: من ويين بتيبينه ؟
ساره: من المطعم
ام سيف: لا لا اذا انتي بتطبخينه انا اباه والا غير جيه مابا
ساره: هاه ؟ اسوي مجبوس سمج .. تدرين امايه يقولون العيش والدياي هذا احسن لصحتج ..
مريم: هههه انتي لمنو طالعه جيه
اسما: مب بروحها هاي جيه .. (وتطالع مي ) هذيج لاحقتنها بس شكلها مسطله احين
مي اللي كانت متربعه ع الكرسي انتبهت انه الرمسه عنها وضحكت
مي: يبووج انا مب مسطله.. بس تبون الصدق يوعانه
لطيفه: ييتي ع العوق انا توني بقول ميته يوع
مريم: انزين سيروا تغدوا
اسما: وين نتغدى بعد
هالوقت دخل جااسم الغرفه على يدته وشافها تتغدى
جاسم: ايييه
ريم: بلاك ؟
جاسم: ليش تاكلون عني انا يوعان
ساره: هكوه ياكم هذا بعد
ريم: قوم سير كل فطاير بتلقاها في المطبخ صبر عمرك لين تسير الفندق وهناك بتاكل
جاسم: انزين نسيت اقولكم .. نايف برع بيدخل
مريم: خل يدخل محد اهنه ..

طلع جاسم يزقر نايف .. وكل الانظار من اسما ولطيفه ومريم كانت متوجهه على ريم .. اللي تمت عاطيه الباب ظهرها وتعطي يدتها الاكل .. بهدوء ..

نايف: السلام عليكم ..
تقرب من يدته بيسلم عليها.. بالعمد وقف حذال ريم وهوى على يدته وحبها ع راسها الشي اللي خلا ريم ترتبك وايد بسبب قرب نايف منها ..من توترها طاحت الشوكه من ايديها ..
نايف ماحاول يوخي واييب الشوكه بس قالها " سلمتي "
وابتعد عنها عشان تيبها بروحها وصد للبنات
نايف: اشحالكن بنات خالي ؟
مي: بخير الله يسلمك ..
ريم قامت تغسل الشوكه ورجعت تعطي يدتها الاكل وهي بعدها ملتزمه هدوءها
مريم: من وين ياي انته ؟
نايف: سرت شوي الاقي واحد من الشباب ..
اسما: عيل ابويه وين؟
نايف: ويا خالي سيف .. مادريبهم وين ..
مريم: انزين زين يوم انك ييت قوم شل خواتك وعيال خالك ودهم يتغدون يواعى
نايف: جان قلتولي انزين بييبلكم غدى
اسما: لا لا مانبى .. نبى نتغدى برع ..
نايف: هيه عاد انتي تبينها من الله..
مريم: قوم ودهم فديتك .. ماكلوا من اصبحوا حليلهم ..
نايف: انزين بتضمهم السياره ؟
مريم: هيه ماعليه بيرتصوون .. سيارتك عوده ..
نايف: وين اوديهم انزين ؟
لطيفه: نبى نسير قصر الهند
نايف: تتشرطين بعد ؟ لا ماشي بوديكم الفندق وبييبلكم انا غدى
ام سيف: ودهم شوي بيتفرجون عن خاطرهم ..
لطيفه: هيه حليلنا نحن ماسرنا مكان هالاجازه ..
بنات سيف كانن ملتزمات الصمت .. مستحيات من ولد عمتهم وما جد تعاملوا وياه على عكس عيال اهل امهم ..
نايف: انزين قوموا يالله .. يلا نواري تعالي
وربعت نواري لنايف ويلسها ع ريوله وتمت متعلقه برقبته وترمسه..
مريم: قومن ساره ومي وريم يالله قولوا لاخوانكم وسيروا كلكم..
ريم: انا مابا اسير بيلس اهنه
نايف اهنه رفع نظره لها .. وهي ماصدت صوبهم ابدن ..
مريم: بزعل منج ياريم ان ماسرتي
ريم: انا مب يوعانه خواتي بس خل يسيرن
لطيفه: شو كلتي بعد عشان تشبعين .. ماشي يالله قومي ويانا
ريم: مابا اسير انا مب يوعانه ..
مريم: ماعليه يعني انا ازعل ؟
ريم: عموه ماباج تزعلين بس والله مابا اسير
لطيفه: ان مانشيتي تسيرين ويانا نحن كلنا مب سايرين

ريم شلت الصينيه من عند يدتها عقب ماخلصت اكل وسارت توديها المطبخ وهي متضايجه .. لحقنها مي ولطيفه..

لطيفه: ريم تعالي ويانا ليش ماتين
ريم: انا مابا اسير هاكم يايبين اهنه وجبتين زياده لي ولعموه ..
مي: قومي عاد ريم ما بنتاخر بنتغدى وبنرجع لامايه ..وهي بخير الحمدلله ماعليها شر ..
دخلت مريم عليهم المطبخ هاللحظه: يالله قوموا هاكم طلعوا الباجين وانتي يالله وياهم يا ريم والا صدقيني بزعل منج ..
سكتت ريم وماقدرت تجادل اكثر .. طلعت من المطبخ قبلهم ولبست عباتها..لحقنها لطيفه ومي ولبسن هن بعد عبيهن ولحقوا الباجين اللي كانوا عند اللفتات يتريون..
و ركبوا كلهم في سياره نايف .. وتوجهوا للمطعم..
اسما: نايف طول .. طول على هاي الاغنيه احبها ..
نايف قام وقصر على الصوت ..
اسما: نااايف عاد
وغير نايف الاذاعه وطلعت اغنيه ثانيه ..
اسما: اووف بدل عنها هاي لوعه جبد
قام نايف وطول على الصوت زياده .. وتظاحكوا كل اللي في السياره على نايف وحركاته ويا اخته .. الا ريم اكتفت بابتسامه وهاي كانت بشاره خير بالنسبه للطيفه اللي كانت تراقبها بوجود نايف ..

****

هالوقت كانت احلام يالسه بيت عمها راشد .. فالصاله كانت ميره يالسه ويا عيالها.. مروان يقرى الجريده وفارس طايح ويلعب بتيلفونه.. كانوا يتريون ابوهم ايي عسب يحطون الغدى..
اما احلام فكانت فحجرة عزه .. وتشكي الحال لعزه عن السبب اللي خلاها تطفر من البيت..
عزه: انزين انتي شو تبين تحطين راسج براسها
احلام: ياربي شو احط راسي براسها حد يروم يحط راسه براس هاي .. والله انها تقهر..
عزه: مادري والله.. بس اتعرفين انا ماسرت بيتكم من يت هيه الا مرتين واشوفها عادي ساكته ماترمس.. اصلا ماتي تيلس ويانا!
احلام: ماعليج منها والله انها عقرب بس صدق انا ماتهمني هيه كثر ماهامتني اميه .. ماتعرفين كيف اميه مستويه .. نحن اللي دوم غلطانات .. نحن اللي لسانا طويل ونحن اللي مانحترم اللي اكبر منا.. لدرجه انها قامت تشوفني انظرب وماتقول شي ..
عزه: وعمي محمد مايدري بشي؟
احلام: اميه بتزعل منا اذ قلناله شي .. تدري انه ابويه مابيسكت عن الوضع
عزه: بس بعد عبير لازم ماتسوي جيه ..
احلام: شو بتسوي يعني.. ابسط شي اليوم كفختني فجر ولا قالت شي .. انا والله لو بنات عموه اهنه جان انا مافتكرت فيها مووول لكن شو اسوي يوم انهن محد
عزه: انزين انتي تعالي ايلسي عندنا ها اليومين لين اين بنات عموه.. وباتي عندنا
احلام: ماعرف.. اصلا هي ماترقد ويانا فالحجره عادي يعني .. بس انه وجودها في البيت يقهرني .. واللي يقهر اكثر انها تطلع جدام ابويه لا شيله ولا شي .. انا اغااار عليه ..
عزه: هههههه.. شو بعد تغارين على ابوج.. المفروض عبير اللي تغار
احلام: انا اغار على ابويه وعمامي وحتى على اخوانج وعيال عموه شيخه..هاي غيره اخويه
عزه: هههه عاشت والله احلام
احلام: هي والله صدق .. مابا هاي على اخر العمر تي تخرب شي في هالبيت
عزه: احلام شو هاي الافكار بعد..انتي شو فبالج بالضبط!
كانت احلام ناويه ترمس .. بس سكتت وتراجعت ..
احلام: ماشي انا من غيظي بروحي اخربط ..تعرفين يبالي ابات عندج اليوم عادي؟؟ ابا احسس اميه بالذنب شوي عالاقل..
عزه: هيه اكيد تعالي حياج الله انا بروحي تراني اتيلس ..
احلام رمست بخبث وهي تضحك: عاد يبالي اييب سدادات اذن ويايه
عزه: ليش بعد ؟
احلام:ههههه اكيد تهذربين طول الليل ويا ريلج..يعني اسد اذني وافتك من الصدعه احسلي ..
عزه: هههههه يا الهرمه .. اويه ذكرتيني الريال مرقد لين الحين وقايللي اوعيه حق الصلاه ونسيييت
احلام: ويين الحين بتي الساعه وحده .. الا هو شو مرقدنه ماعنده دوام ؟
عزه: لا اجازه كان قابض زام البارحه ..
احلام: تلاحقي عمرج عيل

وقامت عزه ادق لفيصل تشوفه وعى ولا .. ولقته واعي ومسوي عمره زعلان منها .. واحلام تشوف بنت عمها وهي ترمس ريلها وتضحك عليها .. مستوي لونها احمر من القفطه كيف انها نست ماتوعيه ومتلومه منه وايد ..
وردت فبالها سالفتها ويا فجر وردت ضيجتها اللي تحرتها بتفارقها وهي بعيد عن بيتهم .. وظهرت عن عزه وسارت الصاله .. ويلست ويا الموجودين..

مروان: انتن شله متخبيات داخل
احلام: حرام يعني نسولف
ميره: شتبابهن انته
مروان: هههه ماشي بس احب اغصص على احلاموه
احلام: هي ناقصتنك انا
ميره: جي بلاج
احلام: لا ماشي .. عمي مايا لين احين
مروان: بعده

ورد الهدوء فالصاله .. بس انفتح موضوع .. واللي فتحه ها المره فارس.. رمس فارس لكنه كلامه كان موجه لامه يرمسها عن سالفة الدراسه وانه الاسبوع الياي بيسير ويا خليفه يسجل فكلية الاتصالات..احلام كانت تسمع مناقشه فارس وامه ومداخلات مروان وهي ساكته ..
يلست تنقل نظرها من مروان لفارس .. ملامحهم مايخصها فبعض.. شخصياتهم بعد .. مروان اجتماعي وحبوب .. فارس مايخصه بالناس.. خجول .. حتى اليلسه ويا بنات اهله ما يلسها الا نادر ..
وردتلها الذاكره ليوم هم الصغار.. ماتذكر زين .. لكن اللي تذكره انه كانوا وايد يلعبون ويا فارس ومنصور ..
وتذكرت مروان كيف كان.. مايحب البنات يلعبن وياهم .. ودايما يتزعم الاولاد ..
يت فبالها مي .. متى تعلقت هيه فمي! من دشت مي الاعدادي ماقامت وايد تيلس ويا فارس ومنصور .. ها الفتره تمت فيها احلام متعلقه مي ..
ابتسمت على ها الذكريات اللي يت فبالها .. وتزامن رجوعها لارض الواقع ييت عمها راشد ..

****

في المطعم كانوا العيال في غرفه فيها طاوله دائريه كبيره تظم عدد كبير من الكراسي .. طلبوا الاكل وييلسوا ياكلون المقبلات لين توصل طلبيتهم .. ولطيفه في هالوقت كانت يالسه حذال نايف .. وتنغزه عشان يبدى يسولف ويا بنات خاله عشان ياخذون عليه ومنها يحاول يجذب ريم شوي ع الاقل بس عشان ترفع راسها صوبهم .. من يلست ونظرها كان بس ينتقل على اخونها وعلى الصحن اللي جدامها .. نايف رمس اخته بصوت واطي .. يقولها صبري عليه لين ما افتح سالفه ارمسهم فيها.. ماعرف شو يقول لكن دارت فباله كم نكته ..

نايف: جاسم
جاسم: هاه
نايف: بقولك .. واحد ميت ميت من اليوع شو سوى ؟
جاسم: شووو ؟
نايف: كلى ..
جاسم : ها ها ها بايخه ..
نايف: انزين انزين بقولكم نكته لين يوصل الاكل..
مايد: يالله قول ..
وارتبشن البنات ..
نايف: في مره واحد كان يالس ويا ابوه وهو يحتضر .. وصاه وعطاه ورقه وقاله لاتقراها الا يوم تحس نفسك بتموت ..
جاسم: انزين
نايف: المهم الولد وعد ابوه .. ومات ابوه .. وروح الولد عند حرمته ..
اسما: وعقب
نايف: قالها ابويه توفى وعطاني هالوصيه وقالي ماتقراها الا يوم تحس نفسك بتموت وانا وعدته لكن انا فيني فظول ابا اعرف شو فيها ..
قالتله زوجته انا بقراها وبقولك شو فيها .. وانته بجي تكون صدق ماقريتها
عمار: اوكي وعقب
وكمل نايف وهو يبتسم ويشوف انه شاد انتباه البنات كلهم حتى ريم ولو انها ماتشوفه لكن ترفع نظرها ع الاقل شوي صوبه ..
نايف: قرت حرمته الوصيه بروحها وعقب ماخلصت قالتله احين احين تطلقني
قالها ريلها شو فيها الوصيه قالت مايخصني اقولك الحين تطلقني ..
لطيفه: ليش شو السالفه
نايف: المهم يا اخو حرمته .. وقرا الورقه .. وقاله الحين الحين تطلق اختي اقولك بسرعه .. وطلق حرمته وروحت ..
مهره: شوفيها الورقه ؟
نايف وهو يبتسم بمكر: نزل الريال حزين عند راعي البقاله .. ساله قاله شو فيك ؟ قاله ابويه توفى وعطاني وصيه قالي لاتقراها الا يوم تحس نفسك بتموت .. وانا عطيتها زوجتي تقراها وطلبت الطلاق .. ابا اعرف شو في الورقه لكني وعدت ابويه ماقراها ..
عمار: انزين
نايف: قاله راعي البقاله .. انا صديقك من سنين واعرفك زين وبحفظ سرك .. عطني اقراها وبخبرك شو فيها .. عطاه الريال الورقه .. واول ماقراها راعي البقاله قاله الحين الحين تعطيني الفلوس اللي على حساب الدكان بسرعه
قاله الريال شو فيها قاله راعي البقاله مايخصني احين تعطيني الفلوس اقولك والا ببلغ عليك الشرطه ..
لطيفه بانفعال: خبلتبنا شو فيها الورقه ؟
نايف: صبري انزين .. المهم يا الشرطي وسلم الريال الفلوس اللي عليه حق راعي الدكان وساله الشرطي شو السالفه ؟ قاله ابويه توفى وعطاني وصيه قالي لاتقراها الا يوم تحس نفسك بتموت .. وانا عطيتها زوجتي تقراها وطلبت الطلاق وعطيتها راعي البقاله وطلب حسابه واشتكى عليه .. ابا اعرف شو في الورقه لكني وعدت ابويه ماقراها ..
مهره: اوووف انزين وعقب
نايف: قاله الشرطي انا بقرالك شو في الورقه وبخبرك .. اول ماقرا الشرطي شو في الورقه .. قاله انته ماتيلس دقيقه وحده اهنه .. لازم تتحول للنيابه الحين
اسما: ليــش ؟
نايف كان يظحك وكمل : حولوا الريال للنيابه .. وساله الضابط انته شو سالفتك ؟
مي وهي متغصصه: قاله انا ابويه توفى وعطاني وصيه قالي لاتقراها الا يوم تحس انك بتموت .. وعطيتها حرمتي تقراها وطلبت الطلاق وعطيتها راعي البقاله وطلب حسابه وعطيتها الشرطي وحولني النيابه وانا ابا اعرف شو في الورقه لكن وعدت ابويه ماقراها ..
نايف: هههههههههههه .. زين زين ماشا الله حفظتوا ..
اسما: يالله نايف عاد كمل
يابوا الاكل في هالوقت وحطوه .. وبدوا العيال ياكلون لكن بعدهم يتريون نايف يكمل .. كمل نايف في هالوقت ورفعت ريم راسها تطالع وكانها بدت تنشد اكثر للكلام لكنه ماحاول يلتفت لها ابدا عشان ماترجع تنزل راسها .. او ماتحس بشي
نايف: كلوا..بعدين بكمل
ساره: لااا حرام والله شبعت قبل ماكل بس ابا اعرف شو السالفه
مي: عاد هاي ام الفظوول ..يلا نايف كمل
ساره: جب انتي .. يلا كمل .. نبى نعرف شو استوى
نايف: ان شا الله .. المهم الظابط خذ الورقه وقراها .. واول ماقراها قال انته الحين الحين تتحول المحكمه ماتبات الليله اهنه ..
مايد: حشى مب نكته هاي لغز .. شو فيها الورقه
نايف وهو ميت من الظحك عليهم: حولوه المحكمه قاله القاضي انته شو سالفتك ؟ قاله انا ابويه توفى وقبل مايموت عطاني ورقه و وصاني اني ماقراها لين احس عمري بموت وانا عطيتها زوجتي تقراها واتطلقت مني .. وعطيتها راعي البقاله واشتكى عليه وخذ حسابه مني .. وعطيتها الشرطي حولني النيابه وعطيتها الضابط حولني المحكمه .. خلاص تعبت ابا اعرف شو في الورقه ؟
ساره: حتى انا تعبت ابا اعرف شو فيها
نايف: هههههه المهم خذها القاضي وقراها .. قال هذا الشخص ماييلس لحظه وحده في البلاد لازم الحين يتسفر ويبعدونه عن البلاد خلاص ..
شلوا الريال مسكين وابعدوه عن البلاد بمركب .. وتم يائس فقير ومظايج مب عارف شو يسوي .. وشو سر هالورقه .. ساله قبطان المركب وقاله شو فيك
مي: قاله انا ابويه مات وعطاني وصيه وكلهم رفضوه لين راغوه من البلاد المهم عقب ؟
نايف: هههههه انزين ماعليه هالمره سماح بطوفها لج.. لانه الاكل برد .. قاله قبطان السفينه هاتها انا بقراها لك وبقولك شو فيها .. خذها القبطان واول ماقراها قاله انته ماتم دقيقه على سطح السفينه هاي .. قاله شو قريت انزين قاله احين لازم تنزل قاله الريال وين انزل ونحن في نص البحر .. المهم فروه في الماي
اسما: وحليله وعقب ..
نايف: حصل لوح خشب صغير وتعلق فيه وركب عليه وتم في وسط البحر .. واحين خلاص حس انه بين الحياه والموت وبما انه ماعنده حد وفي عرض البحر يعني هالمرحله اللي يقدر يقرا شو في الورقه لانه قرب من الموت ..
(كان يقول هالكلام وانتبه انه ريم انشدت اكثر ويالسه تشوفه عشان تعرف شو في الورقه وهو يتحاشى يحط عينه بعينها)
جاسم: وشو طلع في الورقه ؟؟
نايف: فتح الريال الورقه عشان يقراها لكن يت رياااح وشلت الورقه وطارت عنه .. وخلاص ..
ريم كان انفعالها اسرع انفعااال على طول اظحكت بصوت عالي اما الباجين اللي شل السجين واللي شل الشوكه بيظربوبها نايف وهو يظحك عليهم .. اما ريم اللي ظحكها انفعالات اخوانها ويا النكته وتركيزهم وخيبه املهم اخر شي .. خصوصا ساره الفظوليه ..
مي: يالله عنبو مايسوى علينا برد الاكل ونحن نتريا شو في الورقه ولا عرفنا
لطيفه: هههههه كله صوب ونواري اختي صوب اطاعوها
التفتوا لنوره اختهم الصغيره ولقوها راقده ع الكرسي .. وظحكوا عليها ..
ريم رجعت استحت من نفسها ومن رده فعلها بس ماقاومت شكل خواتها اللي يلسن يتحرطمن .. خصوصا ساره اللي ماسكتت يلست بعدها تفكر شو ممكن يكون مكتوب في الورقه !! ..
****

المغرب عقب ماصلت عليا يلست ويا امها في الصاله .. البيت كان هادي من عقب ضرابه الظهر .. احلام سارت بيت عمها ومارجعت لين احين .. وفجر ماطلعت من غرفتها ولا حتى عبير .. اما محمد عشان يتحاشى المشاكل مارجع البيت طلع من الدوام على طول وسار العزبه ..

يلست عليا في الصاله وهي تفكر في ريم .. ومب عارفه كيف تفاتح امها بالموضوع .. لكن الوقت مناسب .. محد موجود عندهم احين ..

عليا: امايه
ام راشد: ها امايه
عليا: امايه ابا اخذ رايج في شي ..
ام راشد: سمي !
عليا:سم الله عدوينج.. شوفي امايه انا مب عارفه كيف اقولج.. بس ترا ريمان بنتي خطبها ولد عمتها
ام راشد: ولد مريم؟
عليا: هيه نايف
ام راشد: عنبو امهم مسويه عمليه وطايحه وهم يخطبون
عليا: لا امايه .. هم خطبوا يوم البنات سافرن قبل ماتتعب ام سيف
ام راشد: وليش ماقلتيلي ؟
عليا: قلت بتريا وبرمس ريم يوم بترجع وبشوف رايها .. ماقدر استعيل وارمس والبنت ما عرف رايها..
ام راشد: انا ماعرفهم عيال مريم لكنج انتي تعرفينهم زين
عليا: نايف ماعليه كلام يا امايه وهاللي خلاني اقتنع بالموضوع واتريا راي ريم ورايكم بعد
ام راشد: ماكفاج اللي ياج من هالعايله بعدج بتعقين بنتج عندهم
عليا: امايه ترا بناتي عندهم احين .. هذيل اهلهم مالهم بد منهم .. وعيال مريم غير .. مريم نفسها غير وتحيدينها انتي ..
ام راشد: ليش نسيتي يوم وقفت ويا امها وسارت تخطب لسيف
عليا: امايه مريم ماتقدر تقول لا لامها وحاولت تقنعها لكن ماتروملها وبعد ماتروم تعصي امرها وطلبها ان قالتلها سيري ويايه او سوي شي .. ام سيف تعرفينها وتعرفين تسلطها عليها ..
ام سيف: ويوم طلاقج مول ما دخلت فالموضوع
عليا: اماااايه .. اتحيدين اني انا اللي طالبه الطلاق..ومريم منو قالج ما حاولت تردني.. بس انا اللي تميت ع موقفي..ومريم مايخصها.. السالفه بيني وبين سيف وانا اللي طفرت من البيت..حتى حرمته الثانيه ما يخصها ولا ام سيف حتى لو كانوا هم السبب الاساسي لكن الطلاق سببه شي ثاني..
ام راشد: وها السبب الثاني لين احين مب رايمين لج تقولينه
عليا: اميه عااد .. مب حالفين انكم ماتحنون عليه اقولكم السبب!! خلاص ماضي وراح
ام راشد: خلاص انزين يا بنتي.. ع كيفج .. ماشي فايده اصلا نعرف الحين السبب


سرحت عليا بطلاقها وماضيها ويا سيف ورجعتبها ذاكرتها لليوم اللي طلعت فيه من بيت ريلها .. تذكرت كيف طلعت من البيت ويا عيالها ووقفت التاكسي وركبته وردت بيت اهلها ودموعها ماتوقف من كثر التعب والعنا اللي شافته ..تذكرت ردت فعل اهلها كيف كانت.. وتذكرت صباح اليوم اللي عقبه وييت سيف بيت اهلها عشان يتفاهم وياها ..

كانت عليا يالسه في غرفتها وشاله مهره اللي كانت مكمله سنه وتصيح ومب رايمتلها تسكت ..
دخل عليها راشد ولقاها واقفه وهي شاله بنتها تباها تسكت.. وشيخه اختها يالسه وياها ..
راشد: ها عليا
عليا: هلا راشد
راشد بانفعال: ليش شاله بنتج ؟ وين تروميلها بروحج انتي حامل .. عطيها شيخه تيودها عنج ..
عليا:تسمع صياحها كيف ..تعزيرتها غير شكل لازم تنشل عسب تسكت
راشد: ماعليه الثانيه ساكته وطيها عنج شيخه وشلي اللي تصيح
عليا:يالله ماتعرف هاي من هاي
شيخه: بالله عليج يوم انا ماعرف اميز امبينهن وين راشد
راشد:هههههه تعاتبيني انا عيل.. ماعليه يوم بيكبرن بنميز امبينهن..يلا انزين عليا الغاليه تعالي يلسي وخلي بالج عندي مب عند صياح بنتج
عليا عطت شيخه اختها البنت .. ويلست
راشد: ترا سيف برع ..
وقفت عليا من مكانها وصرخت : شو يبى ؟
راشد بكل هداوه: يبى حرمته وعياله
عليا: وحرمته وعياله مايبونه
راشد: عليا قومي شوفي ريلج يبى يرمسج
عليا: وانا ماباه .. مابا ارمسه
شيخه: اسمعيه انزين شو بيقولج يعني انتي لاطايعه تخبرينا شو بلاكم ولا طايعه ترمسينه!! ماصارت هاي يا عليا!
راشد بتوسل: عشان خاطريه يا عليا عشان هاليهال قومي شوفيه شو يبى

سكتت عليا..ماحبت انه اخوها يترجاها ويطلبها اكثر .. لبست شيلتها وطلعت الميلس اللي برع ..وقفت عند الباب.. لقته يالس وصاد ع الباب كأنه يترقب وصولها..دخلت الميلس وكانت تعابيرها حاده وجافه ..
تجدمت واول ماشافها سيف وقف لها .. مد ايده بالسلام لكنها طنشته ويلست على كرسي بعيد منه ..

عليا وهي تطالعه بكل قوه: خير ؟
سيف: عليا شو فيج !
عليا: مافيني شي .. عندك شي ياي تبى تقوله قوله وخلص
سيف: اباج تردين البيت ويايه
عليا: وانا مب راده هذاك البيت
سيف: ياعليا خلاص لاتكبرين الموضوع
عليا: سيف .. قلتلك مابا منك الا ورقه الطلاق وتخليني في حالي .. حتى المؤخر ماباه خله لك .. اباك تطلقني وتخليني انا وعيالي في حالنا
سيف: عليا انا ماطلقت قبل احين ياي بطلق! .. مابفرط فيج انتي حرمتي ..
عليا: اللي مايعرف يحترم حرمته وعياله .. مايستاهل ينعاش وياه دقيقه وحده
سيف: عليا تعوذي من ابليس لاتخلين الشيطان يدخل بينا
عليا: عاد انا اليوم بكون هذا الشيطان وقلتلك مابا شي الا الطلاق ..
سيف: وعيالنا ؟ عندنا 5 وياي في الدرب واحد مادري اثنين ..
عليا اطالعته بنظره تكسر الحجر من كثر حدتها: انا بربيهم .. انا وعيالي مب فلزمتك .. بسدهم ومابقصر عليهم بشي.. مانتريا ابدا منك شي..
سيف: يا بنت الحلال شو هالرمسه
عليا وقفت وهي معصبه : شوف سيف عشان تحافظ على سمعتك وتحافظ على ناعمه وولدها .. طلقني بهدوء لانه لو عاندت مابيحصلك خير ومب بس بتخسرني انا .. بتخسر حتى عايلتك الثانيه .. وانا اقولك اياها من احين ..
ورقتي اباها توصلني عقب ماربي ومب بس الطلاق .. ورقه التنازل عن تربيه العيال .. والا برفع عليك قضيه وانا اللي بكسبها اكيد ..
سيف: يا عليا تعوذي من بليس
عليا: عوذ بالله منك .. خلاص ماعندي رمسه ثانيه
سيف وهو كله يأسان: على هواج .. العيال بيتربون عندج من غير ورقة التنازل..
عليا: امبونك مب قد المسؤوليه
سيف: راجعي نفسج لين ما تربين .. يمكن تغيرين رايج
عليا: لين اندفن تحت التراب ما بغيره رايي ..


ام راشد: عليا عليا
عليا ردت على طول لارض الواقع .. امها لاحظت شرودها وماحبت تزعج ذكرياتها الأليمه من المرور فها الدقايق .. رفعت عليا راسها صوب امها وتوايبت الها ..

رد: قـــلـــوب تـــحـــت الـــمــجـــهــــر**
 

أنتظروني يومين

أن شاء الله وأكمل لكم الروايه


جودي

رد: قـــلـــوب تـــحـــت الـــمــجـــهــــر**
 

مساء الورد

سووري على التأخير

عموما راح أكمل لكم






ام راشد: بلاج امايه؟
عليا: ولاشي افكر فريم .. المهم ردينا ع السالفه الاساسيه.. شو رايج بنايف الحين!
ام راشد: والله مادريبج يا عليا.. لكن ريم بنتنا مب بنتج بروحج ومانبى نعقها على أي حد
عليا: امايه انا ييتج اباج توقفين ويايه وقفتي ضدي .. انا اقولج انا اعرف عيال مريم زين..نايف ماشا الله عليه ريال وراشد اخويه يشهدله باخلاقه وتربيته ..
ام راشد: ياخوفي الا يطلع على خاله
عليا: امايه نايف ومريم غير صدقيني .. والا جان انا لزمت ع الرفض أول ما يو يخطبون ..
ام راشد: مادري والله .. بس الله يجدم اللي فيه الخير
عليا: اميـــن .. المهم امايه انا مب عارفه شقى ارمس ريم في السالفه
ام راشد: ليش؟
سكتت عليا شوي .. المشكله محد يعرف باللي يستوي حق ريم غيرها ..
عليا: امايه تدريبها ريم اول رفضت ولد خالتها واحين اخافها ترد نايف وكلهم زينين وماينعابون
ام راشد: ولد خالتها وقالت مثل اخويه وماعرف شو ؟ نايف وين تعرفه عشان تتعلث انها ماتباه
عليا: ترا لانها ماتعرفه بترفض
ام راشد: عيل شو تبى تتعرف عليه وخلاف تشوف جان تباه والا
عليا: مب جيه السالفه امايه .. بس ريم تدريبها ماتقارب الرياييل خوالها يالله تيلس وياهم وتخالطهم وهي متعقده من اهل ابوها من يوم صغرها واحين شوي لانت ويا يدتها ولو انها بعدها مب لين اهناك ويا ابوها .. شقى احين اقولها ياينج ولد عمتج

ام راشد: والله مادري شو بقولج ياعليا لكن اذا الولد مثل ماتقولين انه زين وماينعاب رمسيها حتى لو تجبرينها ترا هالشي الا في مصلحتها هي كم بتيلس ترد الريايل الزينين .. عقب بتم ومابييها حد زين الا جان بيون هذيل المطلقين والمعرسين..

عليا سكتت .. امها صعب تفهم شو اللي تقصده عليا وصعب تفهم طبيعه ريم وصعوبه اقناعها والتعامل وياها .. وها الوقت طلعت مديه من غرفتها وهي ناويه تلحق احلام اختها بيت عمها .. طلعت من الجناح ولقت عمتها وام راشد يسولفن ومب منتبهات لوجودها .. تمت واقفه مكانها تسمعهم ..

عليا: على خير ان شاء الله بس انتي لاترمسين حد ترا محد يعرف وانا يوم بتي ريم برمسها في السالفه
ام راشد: جان مابتخبرينها انتي طرشيها عندي انا بقنعها
عليا: لا امايه دخيلج انا بروحي برمسها وبتفاهم وياها..
ام راشد: زين ع كيفج
وتذكرت عليا شي ثاني واطالعت امها وهي مبتسمه..
عليا: وراشد كمل بعد على بناتي الباجيات
اطالعتها امها: المخابيل!!
عليا:هههه حرام عليج امايه.. والله انهن يبردن الفواد لاتقولون جي عنهن
ام راشد: ههههه الا نسوي سوالف انزين .. فديتهم كلنا مانرضى عليهن اصلا
مديه: عليهم بس ماترضووون ها اماايه
التفت عليا لورا وشافت مديه محطيه اديها ع خواصرها واطالعهم
عليا: مدوووي!! من متى انتي هنه؟ ليش انتي مب فبيت عمج؟
مديه: عموه سؤال سؤال انزين.. انا توي طالعه من الحجره.. والحين بسير بيت عمي..
ام راشد: هي زين .. سيري عيل
مديه اطالعتهم وابتسمت وروحت .. ماستوعبت شو كانوا يرمسون بس حطت فبالها تسأل احلام عن قصد عمتها بها الرمسه ..

عليا: ياخوفي سمعت
ام راشد: يالله يا عليا هاي ياهل ماتعرف بشو نرمس
عليا: الله يستر بس.
ام راشد: لا لا ماعليج ..انزين .. حرمه اخوج وينها عيل ؟
عليا: منو ؟
ام راشد: عبير بعد منو عندج انتي حرمة اخو فالبيت غيرها
عليا: هيه ..مادري من الظهر مالها شوفه
ام راشد: واحلام ماردت من بيت راشد ؟
عليا: لاااا ..
ام راشد: ولا حتى محمد رد البيت
عليا: هيه طرشتله الغدى العزبه قال بييلس اهناك
ام راشد: طفروبه يا امايه حتى البيت ماقام ييلس فيه
عليا: الله يعينه ..

قامت عليا من مكانها وتوجهت قسم محمد .. دقت باب حجرة عبير .. ودخلت .. يلست ترمس وياها ليش منعزله فالحجره طول اليوم .. خففت عنها شوي وحاولت تغير من مزاجها المتعكر .. وعقب طلعت من عندها وخذت تيلفونها واتصلت لمحمد تلومه ع اللي سواه.. كيف حرمته وام بناته فامس الحاجه له وهو البيت ماطاحه موول.. محمد تعذر انه ما كان يبى يرد لين يهدون الامور.. لانه مايبى يدخل فالسالفه والشي اللي سوته فجر مول ما يرضيه.. لكن بعد اقناع من عليا قرر محمد انه يرد البيت وييلس ويا حرمته يتفاهمون ..

****

سلطان توه انتبه وقام من نومه .. سار الصبح يداوم عشان خاطر امه اللي ماقامت ترمسه مثل اول وتبين له زعلها وعدم اهتمامها .. هالشي خلاه يظايج لو انه حشرتها كانت تظايجه بس اهون عن حقرانها له .. وبرودها تجاهه .. رجع من دوامه ورقد لين هالوقت .. فتح ليت الابجوره اللي حذاله وانتبه للساعه انها صارت 8 فليل ..
مسك تلفونه وشاف بدريه متصله فيه قبل 10 دقايق .. وابتسم وهو يتذكر شكلها
وايد اللي عرفهن حلوات واحلى منها بوايد .. بس هاي جذبته .. يمكن مب شكلها اللي يجذب وايد لكن حركاتها ودلعها .. وفوق هذا اللي تسويه عشان تسعى لرضاه
..حقق مراده وشافها .. لكن بعده في باله شي ثاني ولازم يوصله ومايضيع هالبنت من ايده ..
رجع عاد على رقمها واتصل فيها طولت لين ردت عليه ..
بدريه: الووه
سلطان: هلا بداري
بدريه: اهلين ..
سلطان: ليش طولتي لين رديتي ع التلفون؟
بدريه: كان عندي خط ثاني
سلطان: منوو ؟
بدريه: امم ريلي
سلطان: افف .. يلا ماعلينا ..المهم اشحالها البدر اليوم ؟
بدريه: الحمدالله.. حياتي انته وين اتصلتبك مارديت ليكون توك ناش ؟
سلطان: هيه توني ناش راسي يعورني سرت اداوم اليوم وتميت وايد يالس ع الكمبيوتر ..
بدريه: قوم انزين تعشى وارتاح ..
سلطان: انا مرتاح يوم اسمع صوتج ..
بدريه: تسلم الغالي
سلطان: بدريه تدرين توه حلمت فيج ؟
بدريه: صدق والله ؟ شو حلمت
سلطان(خلصت الاحلام احلم فيج): حلمت اني وياج يالسين ع البحر وانتي كنتي محلوووه وايد .. يالسه حذالي وتكتبيلي ع الرمل احبك .. وكنا بروحنا انا وانتي والمكان حلووو والهواء يطير شعرج ..
بدريه: ههههه .. حلووو وبعدين ؟
سلطان: بعدين قمت من النوم وقلت لازم الحلم يكون واقع
بدريه: ههههه
سلطان: شو فيج تظحكين ؟
بدريه: كيف بتسوي الحلم واقع
سلطان: يعني صعب تحقيقه ؟
بدريه: اممم شو تقصد ؟
سلطان: ولا شي .. ايلس انا وياج ع البحر في مكان هادي بروحنا
بدريه: وين هذا عاد ؟
سلطان: هذا خليه عليه انا
بدريه: كيف يعني ؟
سلطان(اووف اغبى وحده عرفتها .. افهميها ع الطاير وفكيني): يعني ابا اشوفج
بدريه: تراك شفتني
سلطان: لا لا ابا اشوفج نفس يوم كنتي في الحلم ..ابا اطلع وياج نسير نيلس ع البحر..
بدريه: سلطان وين تطلع ويايه ونيلس ع البحر
سلطان: في هاواي .. وين يعني اهنه
بدريه: لا سلطان شو انته تخبلت
سلطان عصب: هيه تخبلت خبله انا خبله ..
بدريه: سلطان ماقصد صدقني
سلطان يرجع يلين ..همه يسوي اللي في باله احين : لا انا خبله اصلا ..من يوم شفتج وانا تخبلت .. ماشوف جدامي الا انتي ..
بدريه: ياويلي ياسلطان لو ادري جان من زمان خليتك تشوفني عشان تقولي شي حلو ..
سلطان: ولو شفتج اكثر واكثر بتشوفين الاحلى من هذا كله .. بعيشج في عالم خاص.. عالم مافيه الا انا وانتي بس ..
بدريه: ياريــــــت
سلطان: سوي اللي اباه وبتحصلين اللي تبينه
بدريه: وانته شو تبى ؟
سلطان: اباج تطلعين ويايه
بدريه: سرت وياك السينما انزين
سلطان: لا لا ابا اكون وياج بروحنا .. نحوط في سيارتي .. تركبين حذالي واحس اني انا سلطان اللي اسوق وحذالي حرمتي ان شا الله مستقبلا عقب ماتفتكين من هذا اللي عندج
بدريه: ان شا الله اليوم قبل باجر
سلطان: هاه شو قلتي ؟
بدريه: ماعرف خلني افكر
سلطان: افا وهذي يبالها تفكير .. انا لو يقولون تشوف بدريه احين اسيرلج ازحف لين اوصلج واشوفج وانتي ماتبين تشوفيني!!!
بدريه لانت وايد .. والكلام وايد اثر فيها .. اعماها .. وخلاها تصدق .. تفتكر انه صدق شوفتها غيرته وهاللي لاحظته انه صار اوكي وياها عقب ماشافها الشي اللي خلاها تفكر انه لو شافته اكثر هالشي بيخليه يحبها اكثر ويتعلق فيها وبجيه بتكون وصلت لهدفها اللي هو "قلب سلطان" ..

سلطان حس من نبره صوتها انها بدت تخضع لكنه مازاد عليها بالكلام .. سكر عنها وخلاها تفكر .. وبيرجع يرمسها باحسن عن جيه وشوي شوي لازم بتقتنع ..

****

البنات ها الوقت يالسات ويا يدتهن .. يسولفون وياخذون مابخاطرها .. اما نايف نزلهم وروح عنهم ..
مريم: استانستوا في السفر ؟
مي: الحمدالله استانسنا ..
ام سيف: ونعوم شو مسويه وياكن ؟ انا ريمان خبرتني انكن ماقصرتن فيها
ساره: ههههه ماخبرناكم .. هذاك اليوم توهقت قالها ابويه قومي سوي العشا وقالت بسوي معكرونه .. والله يا امايه لوشفتيها ماتعرف شو تسوي .. ريمان تعطيها تقولها سوي جيه وسوي جيه ..
مريم: ههههه من استوت مرت ابوكن ماتدل المطبخ وماتعرف شكله بعد
ام سيف: وانتن شحقه ماتطبخن لعماركن تامات على تجلاها
مي: نحن نسوي امايه لكن يوم هي تروح نحن نطبخ عشان ماتاكل ويانا
لطيفه: حشى شريرات
مي: هيه عيل نحن نطبخ وهي تاكل ع البراد هي وريلها ..
اسما: ويه ويه ريلها تراه ابوج
مي: كله واحد ..
ضحك الكل ع مي اللي بكل ثقه بعد ترمس!
ام سيف: وينها عيل هي مايت وياكن اهنه ؟
ساره: اونها تعبانه بترتاح وبتي اليوم .. لكن شكلها مابتي لين تطلعين اعرفها هاي جذابه ..
ام سيف: مب لازم تي .. انتن تسدن ..
ريم: ساره اتصلي حق ابويه خل ايي يشلكم الفندق لانه خلاص الوقت تاخر وامايه لازم ترقد ترتاح ..
ام سيف: خليهم يا ريم انا ارتاح يوم اشوفهم
ريم: لا لا امايه شوفي انتي كيف من الصبح يالسات يسولفن وياج وانتي مب رايمه ترتاحين .. بييونج باجر ان شاء الله
ساره: وانتي مب سايره ويانا ؟
ريم: انا مسويه حسابي ويايبتلي ثياب ببات اهنه عند امايه وعموه بترجع وياكن
مريم: لا لا انا مب راجعه .. وانتي سيري ويا خواتج وتعالي باجر الصبح انا برجع
ريم: لا عموه انا اللي بيلس اهنه
مريم: ماعليه باجر تعالي انتي سيري ويا خواتج اليوم و انا اوعدج اخليج باجر تباتين ..
ريم سكتت .. مدام انه عمتها وعدتها اكيد بتخليها اتم عند يدتها باجر ..
مر عليهم ابوهم وروحوا وياه ونايف خذ خواته وتيمعوا كلهم في جناح سيف وعياله يتعشووون ..
ريم كانت طول الوقت نواري بنت عمتها يالسه ع ريولها وتلاعبها وتسولف وياها.. من ردوا من طلعتهم للغدى ونوره تفججت من نايف وقبضت بريم..

لطيفه: ماشا الله نواري تعلقت فيج
ريم: فديتها امووره .. سوالف
اسما: عاد احين هاي شو بيففجها من عندج .. من تلزق بحد ماتهده ..
ريم: ماعليه خلوها .. نواري بتباتين عندي اليوم ؟
نوره: اممم بقول حق ماماه
ريم: لا لا ماماه مابتقول شي .. انتي تمي عندي فليل انا بيلس اقولج قصه وبنسولف
نوره: قصه شووو ؟ انا ابا قصه حسن والسمكه
ريم: منو حسن والسمكه ؟
نوره: اوف انتي ماتعرفين هذي باباه نايف كله يقولي اياها
ريم: باباه نايف؟
اسما: تسمي نايف باباه
ريم: ليش ؟
اسما: بروحها متعلقتنه وايد وهو مدلعنها ..
ريم: اها .. انزين نواري انا ماعرف هالقصه
نوره: خلاص انا بقولج اياها
مي: ناويه ترقدج وتشرد عنج
ريم: ههههه شكلها جيه بتسوي .. يالله قومي نواري البسي بجامتج انا بسير افرش اسناني.. عاد برقد قبلكم اسمحولي تعبانه
لطيفه: مسموحه .. نحن بعد بنقوم نرقد.. ناشين اليوم من وقت..
ساره : لا لطوف مب ع كيفج انتي .. نحن نبى نسهر
لطيفه: شو عندكن ؟
مي: بنطالع التلفزيون وبنسولف، عن المصاخه لاترقدن لاحقات ع الرقاد ..
ريم: كيفكن انتن انا بقوم ارقد .. ساروه شوفي جسوم يوم بيي من عند عمار وعطيه الابره انزين ..
ساره: انزين ..

قامت ريم وشلت بنت عمتها الصغيره وياها .. ويلست تسولف وياها وتقص لها القصص .. حبتها وايد .. في بيت يدها ماكان عندهم يهال صغار .. اصغر وحده كانن ايمان ومديه بنات خوالها ..
واخر شي نامت نوره بحظن ريم ويلست ريم تتامل ملامحها .. تبى تعرف نواري منو تشبه ؟ اسما ولا لطيفه؟ والا نايف ؟
ورجع نايف لذاكرتها .. لكن عشان تتحاشى الصداع والتفكير .. قرت اذاكر النوم ورقدت ..


******************
(الجمعه) 6 اغسطس 2004
******************

الساعه 8 الصبح قاموا البنات عشان يرجعون راس الخيمه .. قرر سيف يرجع بعياله وخلفان بعد .. اما مريم ونايف بيتمون عند اليده اللي قالهم الدكتور انه
ان شاء الله بيرخصونها باجر ..

ريم: ساروه قومي الله يخليج ماشي وقت ..
ساره: انزين دقيقه دقيقه
ريم: ساره عن المصاخه حد يرقد دقيقه
ساره: اووف ريمان الله يخليج صبري شوووي احين بيخلص
ريم: شوهووو ؟
ساره سكتت وماردت على ريم ..
ريم طنشتها وسارت توعي مي

ريم: ميووه
مي: همم
ريم: مي قومي يالله بنسير
مي: مابا ريوق
ريم: بنسير راس الخيمه مب الريوق قومي
مي: اوكي قوليلهم
ريم: اقووول شووو ميووووه قووومي لاتخرفييين عليه
مي: هاه هاه
ريم مطت اللحاف عن ويها: ميوه قومي عاد غصصتوبي ..
مي: وعي ساروه قبل
ريم: ميوه قوومي بسكن كملن رقاد في الدرب ابويه يترياا
مي : ساروه الاكبر وعيها هي قبل ..
ريم ردت لساره توعيها : ساروووه قومي عاااد
ساره اعتدلت في يلستها وهي معصبه : اوف منج قلتلج صبري شوي بكمله وبقوم
ريم: شو تكملين ؟
ساره: الحلم
ريم وقفت مستغربه: عنبو فيلم هووو توقفينه وتكملينه
ساره: هي عادي انا انش وارد اكمل الحلم
ريم: وماشا لله شو عاد هالحلم اللي كنتي حلمانتنه
ساره: كنت حلمانه .. شدراني نسيت
ريم: احسن .. قومي يالله ابويه يتريا كلهم نشوا وحتى بنات عموه..يلا بنظهر رباعه
ساره: وبنتج نشت ؟
ريم: منو.. هي نواري .. فديتها من الصبح يالسه برع
ساره: شو رايج تتبنينها .. ترا انا وميوه بنسير عنج وبينقص العدد عندج..
ريم: انزين قومي .. قومي وعن ها الرمسات ..

طلعت ريم من عند البنات ..اما ساره نشت من الفراش وشلت المخده فرتها على مي وسارت الحمام تتغسل ..
ريم توجهت لخوانها اللي كانوا يالسين يتريقون..

ريم: ليش تريقتوا قبل عيال عموه
مايد: عمار يا توه وقال ما يبى
جاسم: ونحن يوعانين مانروم نترياكن
ريم: ماعليه انزين نحن مانبى.. يلا كلوا وتغسلو ونزلو عند ابويه..نواري وين
مهره: توها هنه
مها: لا روحت .. يوم يا عمار سارت وياه اونه تبى بابا نايف

ريم ابتسمت.. قبضت تيلفونها واتصلت بلطيفه تسألها اذ نوره عندهم واذ يبن ياكلن شي .. وماهي الا نص ساعه ونزل الجميع للسيارات وتوجهوا لبيوتهم..

****

عليا كانت ناشه من الصبح مستانسه انه عيالها بيونها اليوم .. معدله غرفتها ومدخنتها .. وتتريا فجر تقوم عشان تنظف الغرفه هذيج بعد ..
اما اللي كانت مرتبشه اكثر احلام .. اللي اصلا مارقدت من امس .. يالسه ويا عمتها وتساعدها ..

عليا: احلام قومي ارقدي شوووي قبل ما ايون بعدهم عن يوصلون
احلام: مافيني رقاااد عموووه فرحاااانه اخيرا بيون
عليا: هههه اليوم بتستوي الحشره في البيت
ام راشد: نباها الحشره يوم انها بتي من بناتج .. يالله مغلاهم اسميه البيت مايسوى بدونهن
احلام: مابزعل من هالرمسه ترا صدق البيت مايسوى بدونهم وبوجود بعض الناس غيرهم بعد ..
ام راشد: احلام يوزي عن النجره
احلام: انا بسير اوعيها بسها رقاد نبى انظف الغرفه
عليا: بعده وقت
احلام: لا ماشي وقت ساعتين والا ثلاث وبيوصلن .. يالله يمدينا
عليا: مادري عن تعصب عليج تريي امج توعيها
احلام: خل تولي ..

وسارت صوب غرفه فجر ودقت الباب ..
تمت واقفه احلام وادق دق متواصل.. بس محد يرد .. سكتت ودقت ع الخفيف.. تريت فتره لين قامت فجر وفتحت الباب..

فجر: نعم
احلام بابتسامه مصطنعه: صباح الخير خالتيه

فجر مستغربه من طلة احلام عليها .. من صارت الضرابه وهي ما ترمسها..شو عندا اليوم يايتنها من الصبح.. معقول يايه تتأسف!
حاست فجر بوزها وردت ع احلام

فجر: صباح النور
احلام: عندج خبر انه بنات عموه بيون اليوم ؟
فجر: لا .. ومايهمني اعرف .. شنو بسوي يعني بزفهم انا
احلام: لا بس بتقومين احين عشان عموه عليا تبى تنظف حجرتهم لانهم ساعتين وبيوصلون
فجر: اوووف .. اوكي بروح انام بغرفتكم
احلام: لا لانه غرفتنا توني منظفتنها ..
فجر: مو بكيفج ..

وطلعت على طول وسارت غرفه قوم احلام لقت مديه راقده .. وكملت هي رقادها على سرير احلام .. اما احلام طنشت .. مايهمها انه فجر سارت غرفتهم لانها اصلا ماتيلس بغرفتهم وايد .. بس يهمها هالغرفه تفظى وترجع تلتم فيها ويا بنات عمتها .. من ظهرت فجر من الحجره .. استولن عليها احلام وعمتها والشغاله .. وتموا ينظفون الغرفه ويعدلونها ويدخنونها ..
دخلت عليهم عبير وشافتهم ..

عبير: صباح الخير
عليا: صباح النور

اما احلام تمت ملتزمه الصمت .. امها بعد من بعد الضرابه ماقامت احلام تكلمها وايد .. او تسولف وايد.. كانت شايله بخاطرها بس ما بغت تعكر مزاج امها أكثر..
عبير: ماشا الله بيون البنات ؟
عليا: هيه بيون ..
عبير: اشوفها احلام مرتبشه معاكم من الصبح قاعده
عليا: اصلا بنتج مارقدت من امس
عبير: ليش

احلام تمت ساكته ورغم محاولات امها في انها ترمس وياها الا انها مب راضيه تصد صوبها او ترد عليها .. عليا كانت تحاول تدارك الموضوع عشان مايكبر اكثر من جيه ..

عليا: مرتبشه اكثر من عمتها ..

عبير يأست من احلام من كم يوم وهي تحاول تتقرب منها او ترمسها بس احلام تتجنبها .. والي صار قبل شوي كان من ضمن محاولات عبير لارضاء بنتها واخذ ما بخاطرها .. لكنها عقب قررت انها تسكت لين ايون بنات عليا يمكن يتغير مزاجها وترجع وياها عادي واذا لا .. بتكلم مي اكيد بتقنعها وبتتفاهم وياها..
ماتبى تفاتح محمد في الموضوع مره ثانيه .. لانه بينجلب كل شي ضدها ..
وفالاخير انسحبت بهدوء وسارت المطبخ تسوي الكيك الي يحبونه البنات..

****

وصلوا الجماعه من بوظبي وكل سياره اتجهت لبيتها .. نزلوا عيال سيف من السياره وكل واحد منهم يمغط عمره وينقع مفاصله دليل على كثرة التعب من الجلوس .. صعدن البنات غرفهن ويلسن يرتبن اغراضهن ع السرير وخذوا الي يحتاجونه ورتبت ريم اغراض جاسم ..وخذوا بعد الهدايا اللي اشتروها لاهلهم اهناك ..
وتريوا ابوهم لين يرجع من الصلاه ويوديهم .. اما ناعمه كانت في البيت موجوده وتوها ناشه من النوم وسارت للبنات جناحهن ..

ناعمه: هاه ييتوا ؟
مهره: لا روحنا
ساره: هاي اللي بتي اليوم الثاني تسلم على عمتها
ناعمه يلست ع اول كرسي حصلته بدربها
ناعمه: قالولي انها بتطلع باجر
مي: وشعنه ماييتي قبل
ناعمه: مرضت وماقدرت اسير
ساره: وعليه عنج واحين خفيتي ؟
ناعمه: هيه احسن شوي
مي: ليش شو ياج ؟
ناعمه: احس بدوووخه وراسي كله يعورني
ساره تطالع ناعمه بنظره مكاره: اويه عن تكونين حامل؟
ناعمه اهنه تنرفزت: لااا مب حامل . فال الله ولا فالج
مي: ليش عاد ؟؟
ناعمه: بس انا عندي ميود وعفروه ومتغصصه وانتوا فوقهم .. بعد اييني ياهل
ساره: تحملي عاد عن تكونين مفتكره في هذيل الاثنين
ناعمه: ساره بس والله راسي يعورني
ساره: انزين بس بسكت ..

تسدحت ناعمه على الكرسي وتمت طايحه .. والبنات فاتحات الشنط في الصاله ويطلعون الاغراض اللي اشتروها لامهم وبنات خوالهم ..
طلعت ريم من غرفتها عقب مارتبت اغراضها واغراض جاسم ..

ريم: بلاها ناعمه ؟
مهره: تقول راسها يعورها
ريم تقربت منها ولقتها مغمظه عيونها
ريم: ناعمه ؟ ناعمه ؟
ناعمه فتحت عيونها وصدت صوب ريم
ناعمه: هاه
ريم: بلاج شو يعورج ؟
ناعمه: راسي يعورني .
ريم: انزين خذتيلج مسكن ؟
ناعمه: لااا
مي: اسير اييبلها ؟
ريم: مادري.. جنها مب ماكله شي .. ناعمه تريقتي ؟
ناعمه: لااا ماكلت شي
ريم: انزين عيل صبري بننزل نطالع جان نجمه خلصت الغدى بتاكليلج شي وعقب بتاخذين المسكن ..
ساره: ووويه هاي احين تعبانه ونحن بنسير عنها
ريم: ماعليه الصلاه بعدها شووي عن تخلص لين ايي ابويه بيوصلنا وبيرد يتم عندها..
تبرعت مي تسير تحت تسال نجمه عن الغدى اذا جهز ..
مي دخلت المطبخ بشكل سريع وقطعت على نجمه اندماجها
مي: سلامووو عليكووو
نجمه: مي انتي ليش صرخ
مي: حرام نجمه انا احين من متى محد عنج ماتولهتي على حشرتيه ؟
نجمه: مي مايسوي جيه مره ثانيه بعدين انا قلبي عورني انا يسوي مريض سيم سيم ماما كبير
مي: انزين انزين فكينا .. اقولج نجمه هذا كيس داخله هديتج اللي يبناها لج
نجمه : الله مشكوور واجد مي
فتحت نجمه الكيس ولقت البنات يايبات لها قميص صووف احمر للشتاء ..
نجمه: اووه مي قولي حق بنات مشكور واجد
مي: افا عليج .. يبتلج لون احمر عشان يوم تلبسينه تغدين جنج قوطي مالبورو ..ولا اقول احسن بابا نويل سيلاني ههههه
نجمه: شو يقوول؟
مي: ماشي .. انزين اقولج نجمه خلص الغدى؟
نجمه: ليش انتوا في سوي غدى منيه ؟
مي: لا بس حق ناعمه وحليلها شوي تعبانه .. تبى تتغدى عشان تاخذ دوا
نجمه: هي هذا مدام ناعمه مسكين من ثلاث يوم تعبان..
مي: اونه .. زين خلصتي الغدى انتي؟
نجمه: هيه انا في خلاص صبري انا يحطي داخل صحن ..

حطولها الغدى بصحن وشلت مي الصينيه وودتها فووق ..

مي: واحد عيش برياني وصلحووو
ريم: برياني مسوين ؟
مي: هيه .. وعيها بتاكل
ريم: ناعمه ايلسي عشان تاكلين
ناعمه: شوو ؟ ماروم ايلس خلوني طايحه
ساره: قومي تغدي عشان تاخذيلج دوا
ناعمه: مابا اكل
ساره: قومي عن الدلع نعووم .. كليلج شوي عشان تاخذين الدوا .. مافينا بعد انتي تموتين علينا تخربين وناستنا
ناعمه: اووف مابا
ساره: نعمة الله الغاليه اسولف وياج انا .. انتي مرت ابونا الغالي .. قومي اكلي يالله عاد

ناعمه فتحت عيونها شوي شوي ويلست وحطولها الصينيه وعطوها تاكل وسارن يتلبسن ويصلن لين تخلص غداها .. ورجعتلها مي تيلس عندها ..

مي: اييبلج عصير ؟
ناعمه: لا بس ابا ماي ..
سارت مي يابت ماي من ثلاجه الصاله وعطتها اياه ..

ناعمه: مشكوره ..

كلت ناعمه شوي من الغدى وردت يلست وهي متسنده ع الكرسي .. وشلت عنها مي الصينيه .. في هالوقت دخلوا مايد وجاسم الجناح واصلين من المسيد

جاسم: يالله ابويه يترياكم تحت ..
مايد: اميه بلاج ؟
مي: امك تعبانه
مايد تقرب من امه ويلس حذالها: شو فيج ؟
مي: راسها يعورها .. اقولج ناعمه قومي سيري طيحي في حجرتج وبييلج المسكن اهناك لانه نحن بنسير احين .. مايد وصل امك

نشت ناعمه ووصلها مايد لغرفتها .. والبنات كلهم نزلوا تحت الا مي سارت تودي المسكن حق مرت ابوها قبل ماتنزل .. دخلت الغرفه عندهم وسارت مكان ماطايحه ناعمه

مي: قومي ناعمه يبتلج الدوا
عطتها اياه وناولتها الماي .. شربت منه..
مي: اقولج ناعمه تلفونج وينه ؟
ناعمه: ماعرف ليش
مي: خليه حذالج عشان نتصلبج عقب
ناعمه: ليش
مي: نسال عنج.. مب تعبانه ؟
ناعمه: هيه .. انزين شوفيه يمكن في الشنطه فوق الطاوله هاتيه هالصوب
سارت مي طلعت التلفون وحطته حذال ناعمه
مي: انزين اقولج نحن مانعرف رقمج
ناعمه: خذوه عن ابوكم
مي: اوكيك بسجل ارقام خواتي في تلفونج .. ورقم بيتنا هناك بسجله باسمي.. يمكن ادقلج من البيت
ناعمه: انزين
سجلت مي ارقام خواتها ورقم البيت في تلفون مرت ابوهم .. وحطته حذالها ..
مي: سجلت رقم ريمان وساره اوكي
ناعمه: خلاص اوكي
مي: تبين شي ؟
ناعمه: لا مشكوره
مايد: ميوه .. انا قلت لجسوم اني بسير وياكم.. بس قوليله هونت خلاص
ناعمه: ليش!
مايد: اميه انتي تعبانه كيف تبيني اخليج

اطالعته مي ومسحت ع شعره وابتسمتله .. و بشكل لا ارادي وبدون تفكير .. تجدمت من مرت ابوها وحبتها على راسها وطلعت عنها وسكرت الباب ..
وقفت جدام الباب للحظه تفكر ..
انا ليش سويت جيه ؟؟ انا احب نعوم ؟ لا ماظن حب .. ولا اظن انه احترام .. هاي انسانيه .. مهما كان لو انها وغده بس نحن لازم نعاملها بالعكس عشان نكون احسن عنها و نكسبها في صفنا .. بس ليش نحتاج انها تكون في صفنا ؟ في شو بتنفع يعني ؟
ماعليه ع الاقل نفتك من المشاكل والصدعه .. ياترى ممكن انها تتغير ؟ مب لازم خلاص انا سويت اللي يملي عليه ضميري وهي كيفها ... ياخوفي تنش بخير وتطلع لسانها علينا .. الله يستر ..

اما ناعمه بعد يلست تفكر .. ليش هم جيه سووا وياها ؟ صح انه الكلام بينهم جاف ولازم يتخلله ظرابه .. بس بعد مافي شي يجبرهم انهم يوقفون وياها ..
صح خلوها وراحوا .. بس اهتموا لامرها ماطنشوها .. اقل شي خذوا رقمها عشان يسالون عنها .. ماقدرت تفكر زياده لانها تعبانه وطاحت رقدت ..

ومايد لحف امه زين وظهر من الحجره يحس بجدران البيت بتصح عليهم من كثر الصمت .. ويلس بروحه فغرفته يتأمل كل شي حواليه .. من الحين ظيجان كيف بيتحمل لين باجر..

****

رد: قـــلـــوب تـــحـــت الـــمــجـــهــــر**
 

ردوا محمد ومانع من الصلاه دخلوا البيت ماحصلوا حد فالصاله ويلسوا.. وشوي دش راشد عليهم الصاله ووياه نجليه مروان وفارس .. طلعت ام راشد من عقب ماصلت الجمعه وشافت عيالها فالصاله.. يلست وياهم وشوي شوي اكتملت العايله الكريمه .. يت ميره وبناتها عزه وايمان .. وخليفه ومنصور ويا امهم شيخه .. طلعت عبير وبناتها .. اما فجر كانت يالسه فحجرتها .. دخلت عليها عليا من بعد ما دقت الباب ..

عليا: شو فجر ماتبين تظهرين!!
فجر: شنو ها الصدعه كلها اللي برع؟
عليا ابتسمت: هاي عادة كل جمعه فبيتنا..العايله كلها تلتم فها الصاله الصغيره وتتعالى عاد الحسوس .
فجر: وانا كيف اطلعلهم .. ماعرفهم
عليا: بتعرفينهم ..
فجر: في شباب بعد برع!
عليا: هي مروان وفارس عيال راشد اخويه..وخليفه ومنصور عيال شيخه اختيه..ومانع اخويه ..
فجر: كيف بطلع جذي .. عبير بتزفني
عليا: ترا عبير مب يايبتلج كنادير!
فجر: ايه
عليا: انزين لبسي وحده ويلا تعالي
فجر: افف ماحب البس دراعه
عليا: ماعليه .. فها الاجواء حاولي تحبين

اطالعتها فجر وهي حايسه بوزها .. مب عايبنها الوضع بتاتا ..
حاولت تلطف من معاملتها شوي ويا عليا لانه محد افتكر ابها طول ها النهار غير عليا كل شوي يتها.. صح تنظف الحجره للبنات .. بس بعد يلست وياها شوي ..

فجر: خلاص ببدل الحين .. بس تعاليلي بعد شوي.. ماعرف اطلع بروحي
عليا: خلاص تم.. انا بسير احط الغدى للرياييل .. وبيي ان شاء الله
فجر: تقعدون وياهم ع الغدى؟
عليا: لا .. الرياييل بروحهم يتغدون..
فجر: وانتوا وين تقعدون؟
عليا: نيلس فحجرة اميه لانها تقريبا فاضيه.. ولين ما يخلصون الغدى وعقب نبدل الوضع نحن نتغدى وهم يشربون الجاي فغرفة اميه
فجر: اها .. عاداتكم غير عنا
عليا ابتسمت: لا ماعليج .. في وايد كويتيين نفسنا .. وفي وايد عايلات اماراتيه نفسكم.. يلا انزين انا بسير الحين
فجر: اوكي ..

طلعت عليا من الحجره .. توجهت للصاله وشافت العدد مكتمل .. بس ناقصات بناتها ليش تأخروا لين احين! .. سارت المطبخ ..
وتزامن الوقت اللي سارت فيه المطبخ يية البنات .. دخلن البيت ولقنه كعادته كل جمعه .. استحن صارلهم شهر ما شافوا ها الناس.. وطن اغراضهن وسلمن ع الجميع .. الكل استانس وهو يشوف البنات .. ودخلن داخل يعقن عبيهن وسارت وياهن احلام ومديه .. مي وساره فتحن باب حجرتهن لكن ماتبطل الباب وشافن احلام..

احلام: تعالن بدلن فحجرة عموه.. فجر شكلها قافله الحجره..
مي وساره اطالعن بعض ..
ساره: ييها من اولها عاد
احلام: يلا ساروه مافينا ع المشاكل

وتيمعن كلهن حجرة امهن .. ووصل خبر لعليا انه بناتها وصلن .. وطت اللي فايدها فالمطبخ وخلت شيخه وميره وعبير وردت البيت.. يوم ماحصلت البنات فالصاله خمنت انهن فالحجر .. وسارت ع طول حجرتها .. لقتهن كلهن يالسات .. غصبن عنها دمعت عينها .. وقامن بناتها يسلمن عليها .. ميوه من ولها ع امها تمت حاظنتنها وماتبى تتفجج وعليا تمسح ع شعرها وتحبها ع راسها..ومها ومهره كل وحده ميوده امها من صوب ويقوللها شكثر هن متولهات عليها.. ساره تمت مجتفه ايدها مب عايبنها الوضع وتنغز ميوه تباها تقوم .. وريم اطالعهن وتضحك عليهن.. دايما دورها ايي اخر الناس لكن تحصل الوقت الاكثر عشان جيه تمت هاديه..
اما احلام ومديه يطالعنهم وهن مستغبنات .. مب من شي .. الموقف كان صدق مؤثر وايد .. كيف الانسان يبعد عن امه مده ومايكون حاله جيه!!
احلام طلعت عطول من الحجره.. وهي تلوم نفسها .. كيف قدرت تكمل ها الايام وهي ماترمس امها .. ولو هاي بتظل امها .. ع الاقل بقولها كلمه .. كلمتين .. مابحرم عمري منها وانا اشوفها ليل نهار وغيرها مايتهنى بأمه الا كم يوم بالاسبوع..



العصر يلسن احلام ومي يسولفن في طرف الصاله عن كل شي استوى في هذي الفتره .. احلام رمست عن امها وفجر وبدت تطلع لمي اللي في خاطرها .. ومن الرمسه اللي سمعتها من احلام عن فجر قامت مي تقارن بين فجر وناعمه .. وتوازن بين الشخصيات وطلع ف الأخير لمعادلتها أنه ناعمه أرحم بوايد عن ها الفجر .. وفجأه شهقت مي وكأنها تذكرت شي ..

مي: ووووويه نسيت
احلام: شووو
مي: ماتصلت بنعوم
احلام: نعمه الله ..هههه
مي: هيه ترا قبل مانطلع كانت ميهوده ونسيت اسال عنها
احلام: تهمج يعني
مي: تبين الصدق ماعرف اذا تهمني والا مساعه كنت افكر في هالشي المهم قومي نشي خليني اتصلبها
نشن مي واحلام وسارن وين ماكانوا الحريم يالسين وشلت مي تلفون البيت..
عليا : منو بترمسين ؟
اشرت مي لامها بمعنى انها تصبر شوي واتصلت حق مرت ابوها
مي: الوووه
ناعمه: الوه
مي: هلا اشحالج ؟
ناعمه: الحمدلله
مي: شو تآنسين احين احسن عن مساعه ؟

ريم عرفت منو ترمس مي .. والتفتت تخبر امها ..
ريم: هاي ناعمه مرت ابويه
ام راشد: بلاها !
ريم: قبل مانظهر عنها كانت ميهوده ..
عليا: شو ياها ؟
ريم: مادري تقول راسها يعوورها تعبانه من كم يوم ..
مي كملت كلامها ويا مرت ابوها
مي: انزين ليش ماسرتي المستشفى
ناعمه: مايحتاي احس اني احسن شوي .. انتوا متى بتون ؟
مي: ليش تولهتي علينا .. ههه باجر بني اذا يت امايه عفرا
ناعمه: لا عادي البيت هادي وانا احتاج الهدوء
مي: بس عيل .. مب منج انتي من اللي يسأل
ناعمه: اووه بلاج ماتقهرين السوالف
مي: سوالفج ماصخه
ناعمه: حطيلها ملح عيل
مي: هههههههه والله عرفتي تنكتين بعد .. علمناج استخفاف الدم
ناعمه تقاوم ضحكتها: بس عيل علمتوني الفايده..
مي: والله ها الانسانه مادري شو يترس عينها من صوبنا ..
ناعمه: يالله عاد الواحد مايروم يسولف وياكن لازم يعني تعكرن عليه..خلاص ميوه لاترديلي عوقي
مي: هههههه بل عليج اذ انتي تسولفين ترا نحن اجداد السوالف .. انزين..يالله عيل بخليج اذا في شي دقيلنا اوكي
ناعمه: اوكي مع السلامه
مي: مع السلامه

الاغلب كان يسمع حس مي وهي ترمس لانه مرتفع نسبيا..وبعد ما سكرت مي التلفون .. يلست حذالها ريم اللي تبى تسأل عن الاتصال لكن بدون ماتسمع امهم الرمسه ..

ريم: هاه شو تقول احسن ؟
مي: هيه تقول احسن
ريم: عيل ليش قلتيلها تولهتي علينا وعقب تناقرتي وياها
مي: هههه تسالنا متى بتون والهرمه عقب قالت اونه البيت هادي زين حقها الهدوء.. وياراسها نسوي خير فيها ونطمن عليها وهي جي ههههههه
ريم: نعوم الا تعق رمسه جيه ..
مي: ادريبها.. ماتشوفين ما احرق دمي عليها..عيل ساروه وين ..
احلام: في الحجره
مي: خالتج اهناك ؟
احلام: اظن
مي : قومي قومي نطالعها اخاف يتناشبن..

نشن مي واحلام وسارن الحجره .. لقن فجر طايحه ع سريرها تجلب كتاب .. وساره منسدحه ع الغنفه ومحطيه التلفزيون ع قناه الاغاني وتدندن
يلسن وياهن مي واحلام ويوهم مديه ومهره ومها ..

اما ريم يلست ويا باجي اهلها يسولفون .. وبعد ماصلوا كلهم المغرب ريم يلست في الصاله كانت ترمس في التلفون ويتها امها يلست حذالها ..

وطت ريم سماعة التيلفون من بعد مارمست عمتها واطمنت ع يدتها .. ولفت ع صوب امها وويها منور ..

عليا: ها شخبارها ؟
ريم: الحمدلله .. تقول عموه باجر بيرخصونها
عليا: زين زين الحمدلله
ريم: على جيه لازم نقوم الصبح نسير اهناك
عليا: يالله بعدني ماشبعت من شوفكم توكم اليوم ياين
ريم: شو انسوي امايه عفرا تعبانه منو بيتم وياها .. بنسير ويوم بنشوفها استوت اوكي بنرجع اهنه
عليا : ع خير

سمعوا ضجه .. مصدرها كان من حجرة البنات .. حجرة مي وساره و..فجر..

عيا: بسم الله شو ها
ريم: يالله يا امايه ماتعرفينهن انتي بناتج دوم حشره
عليا: خس الله بليسهن بيأذن فجر
ريم: هههه صبري انتي عليهن هاذيل بيطفرنها من الحجره.. من ين يابن ربشتهن..
عليا: هههه فجيبهن ربشتهن هن ..
ريم: هههه عيل شو تتحرينهن.. بس تعرفين اميه نظرات فجر مول ماتطمن..شكلها قويه ما بيروملها خواتي .. ضاريات ع تسكيت نعوم الله يعين الحين جان ماتسكتهن ها الفجر..
عليا: يبوج يوم عبير ما تروملها .. واخوها مايروملها.. مافينا نحن ..
ريم: بسير اشوفهن وبيي
عليا: تسوين خير ..

قامت ريم من عند امها .. وتوجهت لغرفة البنات .. بطلت الباب بشوي شوي .. ودخلت بس راسها تشوف شو مستوي ..

شافت البنات اللي ع الشبريه واقف واللي فوق الكرسي واللي منسدحه تحت ويتفاررن بالخداديات.. دخلت الحجره وصرخت ..

ريم: شوووومستوي هنه.. الحرب العاالميه
ومن سكتت ريم ما شافت الا بخداديه مفروره صوبها وع طول دارت بويها ورا الباب ..
ريم: اييييييه انتن .. يعلكن ان شاااء الله
مها: هههههه ريموه فري فري المخده .. بسرعه
احلام: لا ريموه .. تعالي شوفيهن بيضربني ها التووم ومدوي

ريم تلفتت فالحجره وشافت فجر يالسه ع الغنفه اللي ع طرف ومن شكلها كاان امبين انها محرجه من اللي يستوي .. ومي وساره كانن متسلقيات ع الشبريه يتصفحن مجله كلها عن الازياء والميكاب ..
صرخت ريم وهدن البنات اللعب ..

ساره: بلاج ريموه؟
ريم: شو ها الصدعه؟
مي: تحيدينا دوم جيه
ها الوقت قامت فجر .. وتقربت من الشبريه.. واطالعت البنات بنظرات ..
فجر: كنتوا جي .. بس لازم تغيرون طبعكم وانتوا فغرفتي..احلام انا بروح عند عبير ولما برجع ابي اشوف الغرفه مرتبه ..

وطلعت فجر من عندهن وهي بتموت من الغصه .. ما قدرت من الاول تحتشر عليهم لانه توهن بنات عليا يايات يعني ما وحالها من يومين تقدر انها تاخذ وتعطي وياهن .. استغلت يية ريم وطلعت حرتها ولو شوي ..

اما البنات اتضايجن كلهن من رمسة فجر .. واحلام قالتلهن يطبنها لانهم وايد بيشوفن منها .. ماله داعي يحسسن من وحده شراتها .. بس مي وساره انقهرن أكثر.. هاي غرفتهن قبل ما تكون غرفتها .. كيف تتملكها بكل سهوله !!

وريم عقب طلعت من عندهن من بعد ماخففت على خواتها وسارت عند امها وخبرتها باللي استوى ..

عليا: هن قاللها شي
ريم: لا .. تمن ساكتات..
عليا: زين بعد .. ولا انه مب من عوايدهن يسكتن مي وساره
ريم: لا حليلهن كانن مصدومات هههه لو تشوفين ساروه كيف مطرطره بعيونها.. جنها تشوف جريمه جدامها..
عليا:هههههههه حليلهن..

وغيرن عقب الموضوع لانهن ما يبن يكبرن السالفه او انه عبير تدري عسب ما تضايج .. وطلعن عقب البنات من بعد مارتبن الغرفه .. ويلسن كلهن فالصاله ويا عليا .. ومي وساره امبين من شكلهن انهن امبوزات .. بس عليا طنشت .. ماتبى صدعة راس ويا فجر

وبما انه البنات باجر بيرجعن .. كان لازم عليا تفتح الموضوع ويا ريم خصوصا بعد ما تماثلت ام سيف للشفاء والحمدلله ..
قامت عليا من مكانها .. وزقرت ريم وقالتلها تباها فالحجره .. شوي وانسحبت ريم من اللمه ولحقت امها .. محد مستنكر الحركه لانه عليا دايما تحب تنفرد ويا ريم ..

و فحجرة عليا.. دشت ريم على امها ويلست حذالها وهي تطالعها..
ريم: ها امييه شو بغيتي
عليا: ماشي ابى اسولف وياج مثل كل مره
ريم: لاا بس احس ها المره ملامحج كانت غير يوم زقرتيني
عليا: لاا عادي
ريم: انزين عادي .. سولفي
عليا تمت ساكته .. ماعرفت شو بتقول .. مب مجهزه مقدمه للموضوع..
ريم: امييه
عليا: شوفي ريم .. بكل بساطه ومن غير لا لف ولا دوران ترا يايينج معرس
ريم:هاه
عليا: من قال هاه فقد سمع
ريم: اوكي سمعت .. بس عيدي
عليا: ريم يااينج معرس
لفت ريم بويها الصوب الثاني .. حست بحراره فضيعه تسري فجسمها

عليا: ريم
ريم: تعرفين رايي فها السالفه من قبل
عليا: بس رييم
ريم: اميه مابا اعرس .. ماابا .. مااابا .. تعرفين شو يعني ماابا
عليا: ريم عن المكر.. خلاص عاد دلعناج واايد .. ماله داعي عنادج هاا .. يا ريم الريال ستر للحرمه .. كم بتمين انتي اتردين اللي يخطبونج!
ريم اطالعت امها وعيونها تلامع من الدموع ورمست بصعوبه
ريم: امييه .. الله يخليج ماابا اعرس..
عليا: ليييش؟
ريم: بس ماابا
عليا: يا ريم خلي عنج ها العزله .. ادري انج ماتقاربين الرياييل .. لكن مب كل الريايل واحد .. اصابع ايدج مب وحده
ريم بحزم: بس الوصخ اللي تحتهن واحد
عليا: ريييم وغلااتي عندج يا ريم
ريم قامت من مكانها وحظنت عمرها بايدها .. ماتطيق ها السالفه .. امها ليش مصره على ها الشي يعني ..
ريم: ومنو ها اللي ياي احين!
عليا قامت من محلها ووقفت ورا بنتها ..
عليا: نايف
لفت ريم ع طول .. شافت امها .. وبدت دموعها تسيل
ريم: ولد عموه!
عليا: منو غيره يعني
ريم: رديييهم امييه .. ماباه مااباااه
عليا: الريال زين يا ريم
ريم: ادري .. بس انا مابا .. خلاص افهموني
عليا: فااهمينج يا ريم
ريم: حد يدري بالسالفه؟
عليا: لا .. امايه وامه بس
ريم:ولا تخبرون حد .. خلااص مابا ردييهم
عليا: يعني مالي خاطر عندج
ريم: اميييه.. لاتقولين جي.. الله يخليج سكري السالفه..
عليا: يا ريم
ريم: اميه مافي مجال لاتحاولين ..

وطلعت ريم من الحجره قبل ما تتفوه امها باي كلمه .. سارت ع طول الحمام عسب تغسل ويها .. تمت تشوف عمرها بالمنظره اللي ع المغسله ..
نايف.. يبوني لنايف.. ليش يا لطيفه ما قلتيلي لييش .. انتي تدرين!
اميه قالت محد يدري .. احسن لحد يدري .. مابا حد يصدعلي براسي ..
ياربي يا نايف .. اسبوع قضيته وياك ولا حسستني بها الشي.. ليش جي.. كنت تستغل وجودنا رباعه عسب تتقرب يعني .. عسب اوافق علييك ..
اناامابا اعرس .. مب بايدي .. انا ماطيق الطاري ها ..
مابا مصيري يكون نفس اميه .. ماابا ..
وردن دموعها ينهمرن ع ها التفكير .. وهي بس تتخيل انه ممكن يصيرلها اللي
صار لامها..

******************
(السبت) 7 اغسطس 2004
******************

الساعه ثمان الصبح .. كان فارس واقف مجابل المنظره الطويله اللي حذال باب الفله وهو يرتب تعصيمته .. رن تيلفونه وع طول رد " ها الحين بطلع.." سكر التيلفون .. ونادته امه ..

ميره: فارس ها اندوك الفلوس ..
فارس توجه لامه وخذ الفلوس..
فارس: مشكوره اميه .. ادعيلي بس انتي يقبلوني وادرس واخلص واكد على عمري
ميره: ان شاء الله يا وليدي.. الله ايسرلك امرك ..
فارس: يلا فمان الله .. خليفه واقف عند الباب
ميره: الله يحفظك الغالي.. وطمنا انزين
فارس: ان شاء الله ..
وطلع فارس من البيت بمشي سريع.. وبرع البيت حصل خليفه ولد عمته شيخه يترياه .. ركب وياه وتوجهوا للشارجه ..

خليفه: يبت كل اوراقك؟
فارس: هي هاذن ..
خليفه:زين عيل .. يلا ان شاء يطلع قبولك ..
فارس: الوظيفه مضمونه عاد؟
خليفه: شوف انا الحمدلله من تخرجت توظفت ع طول فالاتصالات .. الشهاده قويه .. ان شالله ما بيظيع تعبك ..
فارس: والدراسه شو؟
خليفه: يبالها يعني واحد يشد حيله.. لكن ماشالله عليك انته شاطر وبتمشي ..
فارس: ان شاء الله..

وعلى سوالفهم انقضى الوقت وهم فالدرب ووصلوا الكليه.. قدم فارس كل اوراقه وبيتريون المقابله وامتحانات تحديد المستوى ..

وبعد ماخلصوا كل شي .. نزلوا فارس وخليفه صحارى مول بما انه عندهم وقت .. وقالوا بياكللوهم شي.. ساروا فوق لمطعم وطلبولهم شي خفيف ياكلونه ع الصبح .. يلسوا ع وحده من الطاولات برع .. وقاموا يسولفون عن الدراسه أكثر والصعوبات اللي بيواجهها فارس .. وخليفه قام يخبره مواقف عنه وعن دراسته عل وعسى ياخذها فارس بعين الاعتبار .. يابولهم الطلبيه ويلسوا ياكلون ..

فارس: الا اقول .. ترا المقابله ورا باجر .. انته بتيبني ولا
خليفه: بييبك عادي شو ورايه من شغل
فارس: بعبل عليك عاد
خليفه: ما من عباله ..
فارس: يلا ان شاء الله بقدم لليسن الاسبوع الياي
خليفه: يحيك والله .. زين.. هاكم يابو الغدى .. بنتغدى وبندش السينما شو رايك
فارس: زين قلت تراك شو ورانا من شغل
خليفه: ههههه زين عيل ..

وعقب ما خلصوا أكل.. قرروا يدشون السينما يقضون وقت شوي قبل ما يردون راس الخيمه..


****


الظحى.. نشن بنات سيف ها الوقت عسب يردن البيت .. ريم كانت اول وحده ناشه ومن نشت وهي تتحاشى نظرات امها .. ماتبى حتى ترمس او تعطي نفسها فرصه انها تنفرد بها عشان ماترجع تكلمها بالموضوع .. كافي الصداع اللي رجعلها امس أما مي وساره من قامن من النوم وهن بعدهن مانشن من سرايرهن
طايحات متجابلات ..
فجر نايمه ع سريرها .. والبنات يسولفن بصوت واطي ..ساره قالت شي ضحك مي بصوت عالي ..

ساره : ميوووه اسكتي عن تنش احين هاي
مي: تولي .. هاللي قاصر .. امس اول مره نرقد بهدوء .. طلعنا ع الدنيا مارقدنا في هالحجره جيه الا جان حد فينا مريض .. عنبو حكم قرقوش .. سكرت عنا التلفزيون والليتات وطاحت ترقد لا وشو ماتبى صدعه ..
ساره: يعلني بلاها ..
مي: قومي قومي انتي عن نتأخر خلينا نتلبس ونسير برع .. تعرفين والله اني ماشبعت من اليلسه اهنه خاطريه اتم لكن حرام امايه عفرا بتي العصر
ساره: حليلها العيوز.. (وكأنها تذكرت شي) ويه تعالي نعوم اشحالها .. تدرين اول مره تكسر خاطريه امس
مي: حتى انا والله عقب ماعطيتها الدوا مادري شو ياني حبيتها ع راسها وظهرت
ساره: ههههه قوولي والله .. ومتى ها ؟
مي: والله تخاديت اظني من زود ما انا ولهانه ع امايه
ساره: عاد تشبهين نعوم بامايه
مي: لا بس حرام بعد تغمظني ساعات لو انها وغده وماتيوز عن لعانتها لكنها هبلى
ساره: وانا شو يعيبني فيها الا هالهبل
مي: هههه خسج الله ..قومي انزين انا بدش اتغسل وانتي طلعي الثياب
ساره: انزين ..

دخلت مي تتسبح لكن ساره كانت متعمده ترد الحركه لفجر بطريقه غير مباشره .. قاهرتنها من امس .. قامت تفتح الكبتات بصوت وتسكرنهن وتفتح الادراج كأنها تدور شي .. فجر بدت تتحرك وهي منزعجه من الصوت

فجر: اييه شنو ها الازعاااج
ساره: اسمحيلي ادور اغراضي لانه احين بنطلع بنروح بيت ابونا
فجر: زين لاتسوين صوت
ساره: ان شا الله فديتج .. اسمحيلي كلها نص ساعه او ساعه بالكثير وبنطلع
فجر تاففت وصدت الصوب الثاني ..
ساره في هالوقت يتها الظحكه ورجعت تكمل وتدور باجي اغراضها وهي تغني
فجر مارامت تتحمل ونشت من السرير طفرانه وتتحرطم بس ساره مب فاهمه عليها شو تقول وطلعت من الغرفه .. وسارت غرفه احلام ومديه ولقت احلام بعدها راقده ووعتها ..
فجر: هيه انتي قومي
احلام: شوووووو
فجر: قومي ابا انام
احلام: انا بعد ابا ارقد
فجر: قومي روحي اهناك انتي تعرفين تنامين بوجود بنات عمتج اما انا ماقدر وايد مزعجاااااات ..
احلام فتحت عيونها بتكاسل ونشت ماتبى تسويلها صدعه وياها خصوصا انه بنات عمتها اهنه .. نشت وسارت غرفه البنات ولقت ساره يالسه تجلب في قنوات التلفزيون ومي تنشف شعرها
ساره: اوه احلاموه نشيتي
احلام طاحت ع سرير مي وتلحفت: فجر وعتني شو مسويات بها
مي: هاي ساروه انا مايخصني كنت اتسبح
ساره: ههههههه ليش شو قالتلج
احلام: وعتني ورقدت بشبريتيه .. وقالت انكن مزعجات
ساره: ههههههههه تستاهل الازعاج الهرمه
احلام: انا بكمل رقادي اهنه ..
مي: قومي يالله ماشي رقاد .. نشي تريقي ويانا وعندج باقي اليوم رقدي فيه ع راحتج
احلام: اوف ليش بتروحون ماشبعنا منكم
مي: نحن 12 سنه ماشبعتي منا بتشبعين في يوم واحد
ساره: ياويلي ع الخقه ياربي
مي: الا اقولج حلامي
احلام: هاه
مي: ليش ماتين بيتنا ؟
احلام: بالمشمش
ساره: ليش؟
احلام : منو بيخليني ؟
مي: رمسي ابوج ما بيقولج شي .. ومنها تشوفين نعمه الله وامايه عفرا
ساره: هيه والله فكره
احلام: ماعرف والله.. بشوفه .. بس مب اليوم.. بشوف جي يوم يعم السلام فيه فالبيت وبرمسه ههههه
مي: المهم اتين وتشوفين كل شي فهاذاك البيت بعينج هههههه
احلام: يحتاي والله

عقب طلعن البنات من الحجره ويلسن ويا الحريم فالصاله.. وعقب البنات طلبن من امهن توصلهم البيت الحين لانه اليده بتي العصر ويبن يسيرن يجهزن البيت من ناحية التنظيف والاكل لان اكيد الناس بيون يتحمدولها بالسلامه.. طبعا وصلتهم عليا البيت .. ونزلن البنات الاغراض وسلمن ع امهم ودشن داخل .. وطن اغراضهن فالغرف ونزلن .. وقامت ريم تنظف غرفه يدتها وتدخنها وتعدلها .. وترتب البيت ويا الشغاله اليديده ونجمه .. وسارت عقب وياهن المطبخ ولحقتهن ساروه والتوم.. اما مي سارت عند نعوم فحجرتها واللي كانت صحتها شوي احسن اليوم..

ناعمه: ها ييتوا!
مي: لا مايينا مطرشيلج قرين كل واحد منا
ناعمه تأففت بس ماردت على ميوه: مابقولج شي لانج اكثر وحده اهتمت فيني
مي يلست حذالها ع الشبريه
مي: ومنو قالج انه اهتمام
ناعمه اطالعتها بنظره: عيل ليش اتيني؟
مي: بدافع الانسانيه
ناعمه: اوه خل عنج عاد يا ام الانسانيه
قامت ناعمه من الشبريه ويلست جدام التسريحه ..
ناعمه: يالله شقى غادي شكلي .. ميوه شوفي ويهي مب ضعفان ولونه باهت؟
مي: لا مب ضعفان غزوزج شكبرهن ..
ناعمه: سمي بالرحمن يا الهرمه
مي: يالله الحين انا عيني حاره
صدت ناعمه صوب مي وكأنها تذكرت شي
ناعمه: هي انتي عيونج حاره مب يايزلج.. ماتذكرين ذاك اليوم فاستراليا يوم كنا فالحديقه كنتي تقوليلي ركبج يعورنج ودعيتي عليه وتخرطفت!!!
هنه نقعت مي من الضحك تذكرت هاك الموقف ومارامت تيود عمرها وتمت تنكت ع ناعمه ..
ناعمه: هي اطنزي عليه
مي: والله شكلج شو كان قافط .. هو انتي صح ما طحتي بس يعني بغييتي اطيحيين هههههههههه ..
ناعمه: مالت عليج يا الماصخه
مي قامت من الشبريه ووقفت حذال ناعمه ومسويه عمرها محرجه
مي: اييه انتي بدال ماتقوليلي مشكوره طايحه فيني سب من ييت
ناعمه: بسم الله شو بلاج لبقتي
مي: هي لبقت .. جبريت تراني .. ان قلتيلي مالت عليج مره الثانيه ترا والله
ناعمه: شو والله .. بتظربيني يعني
مي تجدمت من نعوم وحطت ايدها ع جتفها..وكشرت بويها
مي: بشرب من دمج مب الا بظربج

صرخت ناعمه وبعدت مي عنها اللي يلست ع الارض وهي تضحك ع شكل ناعمه الغبي ويبين عليها الاحتراس من مي وكأنها كانت ترمس جد وخذت الرمسه بجديه وعقب ما هدت الحجره تمت مي متربعه فمكانها وهي تتحسس ركبها .. ذكرتها ناعمه بويع ركبها الي من خفت عنهن رضوض الطيحه خاز الالم عنها .. وسرحت وهي تذكر ذاك اليوم اللي طاحت فيه عليها ساروه وكسرتها تمت كم يوم تعري وابتسمت .. ناعمه كانت تشوفها وهي يالسه هاديه وسرحانه .. وتمت تتأمل ملامحها .. أول مره تحس انها تنجذب لوحده من بنات سيف .. غصبن عنها تمت تتطالع ميوه ويوم ابتسمت مي ع ذكرياتها ابتسمت نعوم ..

ناعمه: ها بلاج تتبسمين ..
مي انتبهت لناعمه
مي: شو؟
ناعمه: اشوفج تتبسمين
مي: لا ماشي .. انا بقوم الحين بسير افازع خواتي فالمطبخ
ناعمه: هيه .. زين سيري بلحقكم المطبخ
مي اطالعتها وهي رافعه حايب
مي: هه ماصدق نعمة الله بشحمها ولحمها تفكر تدخل المطبخ ..
ناعمه: ميووه عاد
مي: اوكي اوكي .. يلا انا بسير ونتريااج عاد

طلعت مي من عند ناعمه وهي تضحك عليها .. الحين نعوم بدش المطبخ لا ها الخبر لا يصدق .. ربعت عند خواتها تخبرهن .. لكن ناعمه أبطت عليهن ولا يت .. والكل تمصخر على ميوه يوم انها صدقت ناعمه .. وعقب ما رتبن الاكل سارن البنات حجرهن يتسبحن ..
اما ريم كانت طول الوقت تفكر في الموضوع اللي قالتلها اياه امها ووايد كانت مظايجه منه .. يلست تفكر وتفكر .. راسها عورها بس ما تتحمل اكثر ومالقت شي تفج حرتها وقهرها فيه غير التنظيف .. ونجلت حجرتها وتمت ترتبها وتنظفها..

****

رد: قـــلـــوب تـــحـــت الـــمــجـــهــــر**
 

ردت احلام لعزلتها من بعد ما روحن بنات عمتها .. ها الوقت من كل يوم اتم احلام ملانه بكل ما للكلمة من معنى .. ماتعرف شو تسوي الظهر.. الكل راقد .. ومدوي مجابله تيلفزيون الصاله .. وفجر مستحيل تسيرلها وتيلس وياها .. ماتعرف شو تسوي بالضبط.. يلست فحجرتها .. تذكرت اوراق ابوها .. من يت فجر وهو مول مايابلهم اوراق يديده ولا كمل الروايه الهم .. طلعت مفتاح الدرج من كبتها وخذت الاوراق وردت تقراها من اول ويديد ..

احلام: غريبه ابويه فها الاوراق ما ذكر فجر مول .. هين يا فجروه ان ماخليت ابويه يكتب عنج .. لا شوو ابويه .. انا بكتب الجزء الثاني من ها الروايه وبوصف شقى يوم نحن كبرنا وبنات عموه ويانا ويتنا ها الساحره فجر .. لازم اقول لابويه يكتب عنها .. يبين الجانب الشرير فيها ..

دشت مديه الحجره وهي تسمع احلام ترمس عمرها بكل قهر وتجلب فالاوراق .. ضحكت عليها ..

مديه: شو تخبلتي؟
احلام لفت ع مديه ورجفت ايدها ..
احلام: الله يغربلج زيغتيني قفلي الباب عن تنش امايه وتشوف سر ابويه
مديه ع طول قفلت الباب.. ويلست حذال اختها
مديه: تعالي ابويه من زمان ماقرالنا شي
احلام: ترا من يت ها البومه البيت طفر ابويه وماقام ييلس ويانا وايد.. يتحرانا بنيلس وياها ..
مديه: فديت ابويه صدق متولهه عليه ..
احلام: يوم بيقوم العصر بنذكره عن سالفة الروايه .. بس عاد هب ترمسين جدام اميه
مديه: انزين ادري شو قالولج غبيه..
احلام: يمكن ليش لا ..
مديه: جب غبيه انتي مب انا

طاحت احلام ع السرير والاوراق فايدها .. وتمت تقرى بسرها .. اما مديه طلعت بوكس العابها وتمت ادور شي تلعبه .. طلعت لعبة الثعبان والسلم ..

مديه: احلااام ماشفتي الزهر وين
احلام: اي زهر بعد
مديه: ها مال اللعبه اللي يفرونه
احلام: مادري .. دوريه فكرتونج

مديه تمت ادور بعدها لين حصلت وحده .. وسارت عند احلام
مديه: ماحصلت غير زهره وحده .. عادي .. يلا نلعب
اطالعتها احلام وردت تتطالع الاوراق المأساويه اللي فايدها ..
احلام: انزين صبري برد الاوراق فالدرج.. ماروم اقرى اكثر .. ها الجزئيه كلها فيها عن الحرب .. قلبي عورني ..
مديه: يلا انزين ..

وفرشت مديه اللعبه ع سرير احلام وتمت يالسه ع الارض واحلام طاحت ع بطنها فوق السرير وبدن يلعبن ويسولفن .. وهنه تذكرت مديه شي سامعتنه قبل كم يوم ..
مديه وهيه تفر الزهره: تعرفين احلام مره سمعت عموه عليا ترمس عن شي بس مافهمته زين
احلام: شو هو
مديه: ماعرف كانت ترمس امايه سلامه .. تقولها اون هي بتخبر ريم بروحها ومحد يعرف وامايه قالتلها خل اتي عندي بقنعها
احلام كان دور اللعب عندها .. وطت الزهره وتمت تشوف مديه بتركيز
احلام: انزين وعقب
مديه: ماشي عقب .. ماعرفت شو يرمسون
احلام: ماقالو شي بعد
مديه: امبلا.. بس ما عرف شو بالضبط لكن عموه عليا قالت انه عمي راشد شي سوا فبناتها الباجيات
احلام: شو بيسوي يعني؟؟؟؟
مديه: ماعرف والله .. هي قالت راشد كمل ع بناتي
احلام قامت من طيحتها ويلست ع السرير متربعه..
احلام: شو يعني؟
مديه: ماعرف
احلام عقدت حياتها .. وتمت تفكر ..
احلام: انزين يبون يقنعون ريم .. وعمي راشد بيكمل ع البنات .. شو لغز هوو
مديه: شدراني .. يلا انتي لعبي

قبضت احلام الزهر وفرته وحركت ع العدد اللي طلع فالزهر وبالها مب عندها .. تفكر فالرمسه اللي قالتها مديه .. شو ممكن تكون .. مديه صغيره مابتستوعب كل كلمه قالوها .. اكيد جزء من النص مفقود من بين اللي وصلته لاحلام .. بس احلام تبى تعرف شو ها المفقود .. وشو السالفه بالضبط ..

****

ع الساعه 5 العصر وصلت ام سيف البيت و اللي كان يايبنها نايف وامه ..
كل البنات طلعوا يستقبلونها الا ريم .. اللي اول ماشافت سياره نايف داخله ركبت على طول وسارت غرفتها .. تمت يالسه في الغرفه واقفه عند الدريشه وتشوف بيت عمتها .. اللي كانت غرفتها تطل عليه .. صح البيت بعيد نسبيا بالنسبه للي بيروحله مشي لكن البيت ينشاف لانه مافي بيوت تخبي الرؤيه ما بين البيتين اللهم ند مرتفع ومن بعده هيّل وهو مكان نازل شوي من الند يقطعه شارع ومن بعده بيت مريم .. تمت ريم تتطالع البيت ودموعها تطيح لا ارادي لمجرد فكره الخطبه بس ..
وطت عيونها ولقت تحت في الحوي سيارة نايف واقفة .. وأهنه بدت دموعها في التزايد ..

دخلت ام سيف البيت وطاحت في غرفتها والتمن البنات حواليها .. كان نايف واقف بعيد ويشوفهن وهن يسولفن وياها .. نزلت ناعمة هالوقت ودخلت عليها الغرفة تسلم ..
ناعمة: هلا والله عمتي اجر وعافيه ماتشوفين شر
ام سيف: الشر ماييج
كان ويه ام سيف وهي ترد على ناعمه زعلان .. عتبانه عليها انها ماسالت عنها ولافكرت فيها .. لكن في نفس الوقت ماتلومها .. مرت ولدها من استوت وهي جيه عيالها ماتسال عنهم بتسال عن عمتها!! ..
مريم: اشحالج ام مايد قالولي البنات انج تعبانه
ناعمة: هي والله يا مريم تعبانه من ييت كله احس بدووخه
مريم:يبين اصلا ويهج مصفر
ناعمة: هو اليوم انا شوي احسن الحمدلله بس من ييت وانا تعبانه
ام سيف: الله يعافيج ان شا الله .. عيل وين ريم ماشوفها؟
مهره: اكيد سارت تتسبح لانها من الصبح فالمطبخ وعقب يلست تنظف وتعابل في البيت وحجرتها ..
ام سيف: فديتها الغالية
ابتسم نايف ع طاريها وهالمره مي لاحظته .. بس ماعرفت تفسر هالشي ..
مريم: انزين نايف قوم سير البيت انته انا بيلس ويا امك
ام سيف: لا لا قومي سيري انتي وياه بس موازرتني فالدختر.. انا ماعليه شر ان شاء الله ..بناتي عندي
مريم: لا امايه مايستوي لازم اتم عندج
ام سيف: و بناتج مابيون ؟
مريم: لا لا انتي يايه بترتاحين باجر ان شا الله بيونج ..
ام سيف: عيل قومي انتي سيري ويا ولدج ولاتحاتيني
مريم: بس يا امايه
ساره: عموووه لاتحاتين خلاص .. انا بيلس عند راسها مابخليها تحتاج شي
مي: الا انتي بتيلسين عند راسها تصدعيبها من الرمسه

اضحكت مريم ع بنات سيف .. وضحكت اليده .. اما نايف ماكان منتبه للحوار كان يلعب بتيلفونه وذهنه شارد ..

ساره: امايه عفرا تحبني اصلا وماعورها قلبها ذاك اليوم الا لانها مارمستني
مي: يالله عاد انتي ..
مريم: هههه خلاص اطمنت عيل امايه .. بناتج بيونسنج اكثر مني ..خلاص عيل بقوم اسير ..
ام سيف ابتسمت: سيري بيتج وتوكلي على الله
مريم: يالله عيل نايف .. ان شا الله باجر بييج امايه
ام سيف: ع خير ان شا الله
مريم: يالله عيل في امان الله ..

طلع نايف يشغل السياره .. وطلعت مريم ووياها مي توصلها عند الباب ..
مريم: مي فديتج ردوا ع تلفون البيت يوم بتصل لاتخلونه يدق ومحد يرد عليه بتم احاتي
مي: ان شا الله عموه لاتحاتين ويوم محد بيرد خلي البنات يدقلج ع تيلفون وحده من خواتي
مريم: خلاص عيل ..
مي: عموه سلمي ع البنات
مريم: الله يسلمج .. فمان الله
مي: الله يحفظكم

طلعت سيارة نايف من البيت ويا الافراج لريم اللي بعد ماتاكدت انهم روحوا دشت تتسبح ع السريع ولبست ونزلت ع طول عند يدتها تسلم عليها وتتحمدلها بالسلامه وتمن البنات ملتمات ع يدتهن ويسولفلها وناعمه ها المره مشاركتنهن اليلسه .. ويا سيف قبل المغرب وكمل وياهم اليلسه والسوالف..

****

كان يتجول بسيارته فالحاره .. مب طايق ها الروتين اللي فحياته .. قبض التيلفون واتصل على شركة الطيران يشوف الحجوزات عندهم .. فكر فسفره للبحرين ويا ربعه يقضون فيها كم يوم دام عندهم كلهم اجازات ..
من غير ما يحس بعمره شاف انه بركن السياره فكراج البيت .. دش البيت ويلس شوي ويا امه وابوه .. مل من سوالفهم .. وقال بالمره بيمر على يده ويدته يسلم عليهم لانه حدد السفره بالثلاثا وما بيتفيج يخطف عليهم ..

سار بيت بوراشد .. مالقى حد فالحوي..اطالع ساعته اللي كانت تشير لثمان فليل .. طبيعي الكل داخل البيت .. وتجدم بخطوات رزينه وهاديه .. ويوم ياي بيركب الدري اللي جدام البيت .. انتبه لشخص عاطنه ظهره ..

تحنحن يبى يلفت نظر ها الشخص .. ولما التفتت .. رفع سلطان حياته ..

سطان: هيلوو
فجر اطالعته ومعقده بحياتها .. كانت يالسه ببجامتها وفاتحه شعرها الاشقر اللي يوصل لين جتوفها ..
سلطان تم اكثر مركز بعيونه: هاي
فجر ها المره رفعت حياتها باستغراب
سلطان: heah you..do u know speak arabic
فجر ابتسمت .. ودار فبالها شي يمكن يغير من مزاجها المتعكر شوي ..
فجر: ooh..no sir I don’t
سلطان قام يمسح ع يبهته : ولييه هاي شقى بفهمها .. انا بروحي يالله يالله اطلعلي كم جمله بالانجليزي .. شو بقولها الحين
فجر: sir can I help u?
سلطان يرمس عمره" وين لقوها هاي قوم خالي .. اسميها حلوه .. "
سلطان:I want my uncle
فجر: whose ur uncle?
سلطان: محمد .. ها محمد brother ماما
فجر:..so you are sheikha`s son
سلطان: مادري شو تخربطين .. بس قلتي اسم اميه .. yes yes شيخه my mother ..
فجر فطست من الضحك .. وسلطان يطالعها وهو مستغرب ..
سلطان: الله يغربلها قامت تضحك عليه .. قومي قومي عن ويهي .. سيري قوليلهم اني برع
فجر: هيي انت ليش تسب
سلطان تلفت على ورا ..
فجر: ايه شوفني لما اكلمك
سلطان رد يشوف فجر
سلطان: هاا
فجر: ليش تسب؟
سلطان: وانتي منوووو
فجر: موو شغلك
سلطان: وليش قاصه عليه؟
فجر: بس حبيت اغير جو شوي
سلطان: لاوالله .. انتي منوو.؟ شو تشتغلين عند قوم خالي ولا شو بالضبط؟
فجر ضحكت
سلطان: ما بتقولين؟
فجر: هههه اوكي انا فجر اخت عبير زوجة محمد ..
سلطان تم يطالعها من فوق لتحت .. مستغرب من حالها .. هي وين وعبير وين !
صح فيه شبه .. بس هاي انسانه كشفه لييش!!
فجر: شفييك اطالعني جذيه
سلطان: لاا ماشي ..
فجر: انت منو؟
سلطان: انا سلطان بن سالم
فجر: انزين وشعرفني بسالم
سلطان: هي صح .. سالم ابويه
فجر اطالعته وهي رافعه حايب: شو تستعبط
سلطان: هههه لا ..
فجر: الي فهمته منك انك ولد شيخه ..
سلطان: هيييه عليج نور .. ها سالم ريل شيخه .. ابويه وامايه .. تشرفنا ..
فجر بتملل: دمك خفيف ..
سلطان: ماعليه .. لزوم ترطيب الجو ..
فجر: شدعوه ..
سلطان: ماعليه .. ماتنلامين .. ماتعرفيني ..
فجر استغربت من جرأته ..
سلطان: انتي من متى هنه؟
فجر: يعني صارلي مده ..
ماعرفت فجر ليش حدسها نبهها من انها ما اطول أكثر ..
اطالعته وابتسمت: تشرفت بمعرفتك .. الحين بروح .. عن اذنك
سلطان تم يطالعها وهي مروحه : اذنج معااج ..
وردت توقف واطالعته: لا تقول لحد انك كلمتني
سلطان تم ساكت ..
فجر: اشفيييك!
سلطان: لا ماشي .. اوكي ما بقول لحد ..

وروحت عنه فجر .. وهو تم واقف عند الباب .. ورد يتشاور يدش ولا لا ..
لا .. ما بدش .. كافي اللي شفته اليوم .. قبل السفر بييهم ..
وطلع سلطان من البيت .. وركب سيارته وسار القهوه عند ربعه ..


******************
(الثلاثا) 10اغسطس 2004
******************

العيال كانوا كلهم ملتمين عند يدتهم يتريقون وياها.. تعودوا ينشون من وقت لانه خلال ها الايام العرب كانوا اييونهم حد الظحى وحد العصر وحد فليل فعشان جي ما كانن يطولن فرقادهن وراحتهن..حتى ناعمه قامت تشاركهم ها الايام فاليلسه بس عشان تستعطف اللي كانت طالعه من العمليه وراده البيت وهي شاله فخاطرها من ناعمه..صح عادي عند ناعمه بس شافت انه المديح كله يسير لبنات عليا وهي مالها شي مول.. فلازم كان تبين دورها خلال ها الايام لين ماتخف ييت الناس ..

ومن بين سوالفهم ..

جاسم: ريييموه انتي متى بتردين ترقدين فوق
ريم اطالعته: لييش؟
جاسم: بس انتي قولي
ريم: ماعرف .. يوم بتصح امايه
ام سيف: انزين ريم انا بخير الحين الحمدلله .. ردي رقدي ويا خوانج يبوج.. ونجمه بترد ترقد عندي ..
ريم: لا لا ماعليه خلها نجمه انا ابا اتم وياج ..
مايد: جسوم انته شو تباها ريمان .. تراك ترقد عندي
جاسم: انته تعفن رقاد وماتنش اذ انا عورني شي
ريم وهي زايغه: ليش شي عورك !!
ساره: جسوم ترانا نحن كنا وياك ..
ريم: ساروه شو بلاه جسوم
مي: ماشي بلاج جي منطره عيونج.. ياه هبوط سكر خفيف فليل ..يانا الحجره وعطيناه الدوا..
ريم حطت ايدها ع قلبها وهي متوتره .
مايد: متى ها
جاسم: قلتلك كنت منخمد
ام سيف: ريمان امايه ردي رقدي عند اخوج هو يحتاجلج اكثر عني
جاسم كان مطنش الرمسه ويلس ياكل ويسولف ويا مايد ويخبره كيف تعب وتم يوعيه وميود ما كان حتى يحس بأنه جاسم كان تعبان..
ام سيف: خلاص ريمان ردي رقدي عند خوانج
ريم: لا امايه.. برقد عندج .. لكن جاسم من اليوم بيرقد فالحجره وبترقد وياه ساره
ساره: هي امايه عادي عندي .. انتي بعد فحاية ريم
ناعمه: انزين عموه انا برقد وياج عادي
ام سيف: لا لا لا خل عنج .. انتي الا اشد من ولدج .. نجمه ابركلي منج
حاست ناعمه بوزها وهي منقهره .. وطنشوا الكل السالفه وتموا يسولفون فامور ثانيه..
ساره: الا اقول نعوم .. عفروه بنتج وين مالها شوف من امس
ناعمه: سارت تيلس عند بنات خالتها كبرها وتتونس وياهن
مايد: فكه
ناعمه: ميووود
ساره: بس بس انزين خلاص ..
ام سيف صدت ع مي اللي كانت قابضه بيضه بايدها وتقشرها
ام سيف: ميوه انتي متى بتسيرين الجامعه ؟
مي: ليش دار عبالج ها السؤال يعني
ام سيف: سمعت ابوج مساعه الصبح يقول انج طالبتنه فلوس تبين تتشرين للجامعه..
مي: هييه نسيت.. خلالي فلوس عاد؟
ام سيف: هي بتلقينهن فالسده هناك فحجرتيه
مي: هي زين يوم مانسانا.. امس فليل يلست وياه ويالله يالله رمت اطلبه فلوس
ام سيف: وشحقه بعد ماترومين .. مب ابوج هو والمفروض يكد عليكن
ساره: هيه والله .. المفرووض .. الا ميوه اونها تتلوم تطلبه.. انا كنت بقوله عادي بس انا مخلصه اغراضي ..
ريم: انتي ماتنسين عمرج تراج مول
مهره: عيل نحن بعد بنقوله يودينا نتشرى للمدرسه
ام سيف: زين قولن له ما بيردكن هو .. انزين ميوه ما رديتي متى بتروحين الجامعه؟
مي:عقب اسبوعين امايه
ساره: امايه ترا انا بسير وياها
ام سيف: ليش بعد تسيرين
ساره: بس جيه وحليلها ماتدل بسير وياها حرام اختيه الصغيره اخليها بروحها
ام سيف: يالله يا انتي .. ماعليها شر هيه بتيلس ويا ربايعها انتي يلسي هنه
طنشتها ساروه وتمت تطالع مي وتقولها بسير ماعليج.. بالنظرات طبعا..
ام سيف: انزين ميوه انتي شو بتدرسين
مي: انا باخذ اداره نفس ساروه
ام سيف: هيه زين الله يوفجكن
ساره: انا سنتين بالكثير وبخلص.. و ريمان بتفتك هالسنه اخر سنه وبتخلص..صدق الايام تربع
ناعمه اطالعت ريم: اقول ريم بتشتغلين عقب ؟
ريم: ماعرف بس انا كنت اتريا اللحظه اللي اخلص فيها عشان اشتغل واعاون امايه واردلها شي من اللي عطتنا اياه
ناعمه: وامج بتتقاعد ؟
مي: اميه بعدها ماوصلت سن التقاعد
ام سيف: هي في أي مدرسه تدرس
مهره: اللي انا ومها فيها ..
ام سيف: زين زين عيل بتلقنها كل يوم
مي: هي والله يا حظهن

حست ام سيف بنغزه ففوادها وهي تتطالع مي اللي كانت صدق ترمس من خاطرها.. ويبين من ويها شكثر هم يشتاقون لامهم.. اللي هي ام سيف حرمتهم منها .. ما تبى تحس بتأنيب الضمير لانه هي يدتهم ومن حقها بعد تحظابهم على اخر عمرها .. قامت من السفره تبى تسير حجرتها وريم قامت وياها تعاونها ع المشي .. اما البنات حد سار يشوف التيلفزيون وحد تم يالس يغصص بنعوم..

ومي .. ماعرفت ليش ها الوقت حست انه في داخلها شي .. اشتياق رهيب لامها ولاحلام .. كل ما تيها ها الاحاسيس تحب تنعزل بروحها .. سارت عنهم فوق ودخلت حجرتها ويلست ع السرير .. اطالعت الكوميدينو .. طلعت منه النوته مالتها .. تمت تجلب فيها وتقرى خواطرها اللي تكتبهن من فتره لفتره ..
قبضت القلم وطلعت شي فخاطرها..

في لحظة
بدت من ظلام وليل
بـ ريحة عطر وفوعة هيل
وهدوءٍ مسكنه في الطير
غرقت بين بحر وسيل

في لحظة
تناظر عيني القمره
سما ونجوم في السهره
وصوت أعيش على ذكره
وسود عيون فدى نظره

في لحظة
بدت سهرة أحلامي
من بقايا ذكرى أيامي
بديت أغمض أجفاني
تغطيني رموش العين
أراجع ذكريات أمسي

في لحظة
بين ذكريات ليلي واحزاني
بين دمع بلل أعياني واجفاني
ودمع سال من عيني على هـ الخد
وبين ذكرى مرّت على بالي ولمسة يد
وبين دمعة حسبت "في لحظة"
إنها ...... إنها .. حد*

ختمت مي خاطرتها بتنهيده .. في ها اللحظات ما فارقتها امها من بالها ولا احلام .. تمنت الأيام تردها لورى .. عاشت احلى الذكريات بين أهل أمها ..
لكن الحين .. فبيت ابوها .. ماتعرف شو المجهول يترياهم .. تمنت من الله انها تستانس فها البيت أكثر .. ع الاقل تقدر تتناسى ايامها القبليه ومرحها الدايم ويا أحلام ..اللي مالها غنى عنها ..


****

فجر كانت يالسه فحجرتها .. وطايحه ع السرير وتجلب فايدها مجله .. ويدور فبالها الموقف اللي كان ويا سلطان من ثلاث ايام.. شكله رايقلها وايد.. طبيعته وهيئته حلوه .. بس شخصيته كيف ! ..
الكل اهنه يشوفها بعدها غريبه .. وما يرمسون وياها .. شبابهم حتى من يشوفونها يروحون .. بس ها خذ وعطى وياها ..
يا ترى انته منو ..
غير انك سلطان .. انت منوووو!!
من ذاك اليوم ماطبيت ها البيت .. ليش انته بعد تتجنب اتي هنه مثل الباجين نفس ماتقول احلام!

وطت المجله اللي كانت بايدها .. ووقفت جدام التسريحه ترتب نفسها ولبسها .. وشعرها .. وطلعت من الحجره .. توجهت للصاله وشافت عبير اختها ويا عليا .. يلست وياهم ..

عبير: فجر محمد بعد شوي بيي
فجر: اوكي.. شنو اسوي
عبير: روحي لبسي حجابج وغيري ها اللبس..خلاص عاد..
فجر: عبير انتي تعرفين اني مو متحجبه .. ولزمتي علي البس الحجاب وانا فالمطار ولبسته .. خلاص خليني ع راحتي بلبسي ..
عليا: فجر حبيبتي .. نحن بعد نبغي نصونج ..

فجر اطالعت عليا بنص عين وقامت من مكانها وردت غرفتها ومبين ع شكلها انها معصبه.. اما عليا تلومت وعبير موطيه راسها ..

عليا: عبير .. انا ماقصدت شي .. شبالاها اختج ماتتحمل..مره زينه ويايه وعشره لا..
عبير: ماعليج منها يا عليا .. فجر غلطانه .. وانا خلاص مو قادره اتحمل اكثر
عليا: الصبر يا عبير مالج غير الصبر.. سيري طالعيها
عبير: لا .. خليها .. مو كل شي تبيه بتسويه ..
عليا: هي جي من صغرها! ها طبعها
عبير: اييه .. مشوبتلنا روسنا ها الفجر من هي ياهل
عليا: الله يعينكم ..
عبير: شو بنسوي .. بتظل اختنا الصغيره .. هي الحين عايشه ويانا وانا مابا اقصر عليها فشي .. والله حتى ابديها على بناتي بس عشان ماتحس بالتقصير
عليا: عبير بس بعد بناتج يبن اهتمامج .. لا تصرفينه كله لراحة فجر.. بناتج اشوف حالهن مايسر .. متمللات من الوضع .. وانتي جي بتكرهينهن خالتهن
عبير: زين انا شسوي .. فجر ماقدرلها .. واحلام الله يهديها ماتقدر اللي انا اسويه..
عليا: ترا يشوفن قمتي تفضلينها بكل شي وهي بعد ماتقصر فيهن ..
عبير: الله يعيني على ما بلاني .. ماعليه .. كلهن كم اسبوع وتروح الجامعه.. بس واللي يسلمج يا عليا رمسي احلام ومدوي .. قوليلهن لا يتحرشن بخالتهن .. هي يوم الواحد يطنشها يفتك من شرها.. طفروني والله من كثر مناجرهم من اسبوعين وانا اكبت فصدري .. بس خلاص ماقدر اتحمل..
عليا: ماعليج يا عبير.. لو اني دوم ارمسهن بس ها المره بحاول وياهن بشوفهن
عبير: مشكوره الغاليه
عليا: ولو .. هاذيل بناتي بعد

ابتسمت عبير لعليا .. ودها حد يشاركها الهم اللي هي فيه ويشل عنها شوي من الحمل .. ماتقدر توفق بين بناتها واختها .. كلهن متمردات عليها ومب عارفه شو تسوي ..يمكن عليا الها تأثير ع البنات .. وتقدر تخليهن يهدن شوي ..


****

سلطان راد البيت من العصر.. صعد ع طول حجرته .. السفره الساعه عشر وهو بعده ماجهز شنطته .. طلع شنطة السفر من الكبت وحطها ع الشبريه .. طلع كم كندوره وطلعله بناطلين وقمصان .. طلع من الحجره وسار يزاقر على امه

شيخه كانت فالصاله تحت وتسمع مزاقر حد من عيالها .. ووقت ماهي كانت بتقوم دش عليها سلطان الصاله

سلطان: يالله ماتسمعيني ازاقر
شيخه: امبلا وييت بقوم انته دشيت
سلطان: المهم اميه انا بسافر اليوم تراني
شيخه: بتسااافر!!
سلطان: هي بسير البحرين
شيخه: كم يوم
سلطان: اسبوع بالكثير .. المهم امايه.. بتلقين ثيابي محطوطه ع الشبريه.. رتبيلي الشنطه وحطيلي الاغراض اللي بحتايهن فالسفر
شيخه: خلاص وليدي ما يهمك.. متى طيارتك
سلطان: الساعه عشر
شيخه: والحين وين بتسير
سلطان: بسير اسلم على شوابج وعقب بسير عند ربيعي

شيخه ابتسمتله .. طلع سلطان من البيت .. اما شيخه صعدت فوق وهي مستانسه ع الاقل بدى سلطان شوي يفتكر بأهله ويخبرهم عن سفره ويسلم بعد .. شي طيب والله ..
اما سلطان ركب سيارته ووقف جدام بيت بو راشد .. نزل يشوف منو فالبيت .. حصل يدته وعليا يالسات فالحوي يتقهوين.. سلم عليهن وسأل عن يده بس مايدروبه وين .. وصى يسلمون على يده لانه بيسافر وشربله فنيان قهوه وطلع من البيت وركب سياته مره ثانيه ..
قبض تيلفونه واتصل ع رقم بدريه ..

بدريه: هلا والله
سلطان: اهلين عمري .. شخبارج
بدريه بصوت واطي: الحمدلله تمام .. انت شخبارك
سلطان: الحمدلله .. بلاج تصاصرين جي
بدريه:ممم ترا ريلي فالحمام
سلطان: ويوم ريلج عندج شله رديتي ع التيلفون
بدريه: ولهانه عليك كيف ماتباني ارد.. وبعدين هو داش يتسبح يعني مطول
سلطان: تخاطرين واايد تراج
بدريه: كل شي لاجلك يهون
سلطان: والله
بدريه: عندك شك ..
سلطان: ههههه لا ماعندي.. بس ريلج متى يا؟
بدريه بضجر: امس ياي ..
سلطان: اها.. الا نسيت اقولج اليوم تراني مسافر
بدريه: بتسااافر .. من متى ها الكلام؟
سلطان: من كم يوم
بدريه: والحين ياي تقولي
سلطان: يعني لو قلتلج من قبل شو بتسوين .. بتين تسلمين عليه
بدريه : هي ليش لا
سلطان: والله!
بدريه بتردد: مادري مادري
سلطان: ماعليه عقب اسبوعين برد من السفر وبشوفج عاد بتين تسلمين عليه ولا
بدريه: هاا..
سلطان: اللي سمعتيه
سمعت بدريه انه صوت الرشاش وقف .. واداركت عمرها

بدريه: حبيبي شكله عدنان خلص سبوح يلا بخليك
سلطان: خلاص يلا باي

سكر سلطان التيلفون وفره حذاله سار القهوه عند ربعه اللي كان متواعد وياهم ويلسوا شوي يسولفون .. وعقب رد البيت يلس شوي ويا امه ..

****

رد: قـــلـــوب تـــحـــت الـــمــجـــهــــر**
 

فليل في بيت بو راشد .. عليا كانت يالسه فحجرتها من بعد ما سكرت عن ساره ومي..

يلست تشوف صور عيالها .. وهي تبتسم .. وبعدين يلست تشوف الصوره اللي كانوا متصورينها جماعيه في استراليا وتمت تضحك ع حركاتهم فالصوره ..
وركزت على الكبيره امبينهم ..
ريم ها اليومين ماترمس امها وايد .. اللهم السلام وتسكر وتتعلث بيدتها والشغل..تتهرب من الرمسه ويا امها ..
عليا هامتنها وايد ها البنت وخصوصا عقب ما رفضت ولد عمتها .. ماقدرت عليا تقنعها .. ولا حد يقدر يقنعها الا هي نفسها تقدر تقنع عمرها بنايف .. للحين ما ردت خبر ع مريم .. والسالفه كملت شهر .. وعليا مستحيه وايد من مريم.. اللي ردت تتصللها وقالتها عليا انها ماحصلت الوقت المناسب تقول لبنتها..

تمت تفكر شو موقف مريم يوم بتقولها انه ماشي نصيب..شكلها شاريه بنتها وولدها يباها.. بس ريم ..
ليش يا ريم يا بنتي تقطعين نصيبج .. خليفه ولد اختيه رفضتيه من قبل وقلتي حسبة اخوج ومشيناها لج .. بس نايف ليش !
نايف مايخصه فسيف وانتي تدرين بها الشي ..
يالله يا رب تصلح حالها وترزقها الريل الصالح.. يالله يا رب..

طاحت دمعه محرووقه من عينها .. فيها كل اليأس والضيج على الحال اللي وصلتله ريم .. ريم بنتها البجر .. اللي عندها فالدنيا ..

" يا ريم نايف شارنج ويباج .. ليش مب مقتنعه به .. ولا اصلا العرس بكبره شايلتنه من بالها ها البنت .. يا ربي شو اسوي .. "

كانت كلمات عليا هاي تجول بينها وبين نفسها .. لكنها كانت بصوت مسموع .. بصوت سمعته أحلام الي كانت واقفه عند الباب ..

أحلام: عموووه ..
عليا بسرعه التفتت لاحلام ومشت دمعتها ..
قربت منها أحلام ويلست حذالها ..
أحلام: اوه هاذي صورة النساء الصغيرات ويا اخوهن المصون
عليا: ههههه هيه .. ها فاستراليا
أحلام: الخايسات ما راوني صورهن
عليا: حليلهن ردن ع طول للمستشفيات .. زين منهن ينا الجمعه اللي طافت..
أحلام: هي حليلهن .. بس زين يوم الله سلم عيوزهن ..
عليا: هيه حليلها ..
أحلام: عموه شو فيج مكتأبه؟
عليا: ها .. لا ماشي ..
أحلام: عموه ايبين ع شكلج
عليا: لا غناتي مافيني شي .. بس كنت احاتي ميوه
احلام: ليش بلاها ميووه؟
عليا: لا ماشي .. بس توها تقولي انه عقب اسبوعين بتسير الجامعه..مب اسبوعين بعد 11 يوم بالضبط
احلام: فديت ميوه .. بس ماعليج ساروه واسما بنت عمتهن وياها ..
عليا: هي .. ها اللي مريحني شوي
احلام: لا ماعليج هاي ميوه والاجر على الله .. بتمشي عمرها هناك حتى بدون ساروه
عليا: هههه فديتهن.. بس صدق زايغه عليهن من ها البني الخايسات..وايد نسمع رمسه عن بنات الجامعه ..
احلام: عموه الجامعه فيها الزين والشين .. فيها من امثال بناتج وفيها من امثال غيرهن .. لاتشلين هم انتي .. وشرا ما يقولون الطيور على اشكالها تقع ..

عليا اطالعت احلام ومسحت ع شعرها وضمتها الها بحنان .. واحلام وهي فحضن عمتها يتردد فبالها كلام عمتها أول ما دشت الحجره ..

السالفه مثل ما شكت فيها من اول ماقالتلها مدوي عن اللي سمعته .. وتأكدلها الخبر .. نايف ولد مريم يبى ريم .. واللي ماكانت تعرفه احلام انه ريم رافضه ها الخطبه ..
من متى ها السالفه ! والبنات يدرن والا؟ لا ماعتقد يدرن كانت مي ع الاقل لمحت او قالتلي شي ..! اسأل ميوه ولا ؟
بس ليش ريم مب طايعه .. من رمسة البنات عن ولد عمتهن .. الريال شكله وايد طيب واوكي ..
انا مابروم اسوي اي شي .. خواتها بيقدرن يقنعنها ! هاي ريم محد يقدر يأثر عليها.. بس لازم اخبر مي قبل ما عموه تردهم .. عموه شاله الهم بروحها.. لازم نريحها شوي ..

قطع عليها حبل ها الافكار صوت عليا ..

عليا: احلام قومي بنسير عند امايه
احلام: مم عموه صبري .. بغيت اقولج شي
عليا: شو الغاليه
احلام: عموه هدية ميوه خاست عندنا .. من متى شارينها وما وديناها
عليا: ههههه انزين يوم كانن هنه ليش ما عطيتيها
احلام: لا عموه انا حسبتها صح .. ميوه اقترحت عليه اسير عندهم .. وانا قلت ابويه يمكن ما بيخليني .. وتذكرت سالفة الهديه .. وجي بقول لابويه يوديني عند ميوه عسب الهديه
عليا: زين حلوه الفكره
احلام: هزرج بيطييع؟
عليا: متى ابوج ردكن فشي يعني
احلام:هههه عاد انا قلت يمكن ما يخليا نسير بيت سيف عسب جي
عليا: لا ماعليج وان ماطاع انا برمسه
احلام: اوووكي .. يلا عيل خلنا نقوم نسير عند امج
عليا: يا الشيطانه مب امج يعني
احلام: خخخ فديتها عيوزنا .. بناتج الحين عندهن عيوز غير عيوزنا .. يلا نسير

ضحكت عليا ع رمسة احلام وطلعن من الحجره وسارن عند ام راشد وتيلسن وياها..

****

مي وساره يالسات فالصاله تحت يلعبن ورقه.. يتهن ريم اللي كانت طالعه من حجرة يدتها من بعد ما عطتها ادويتها ولحفتها عسب ترقد ..
يلست شوي ويا خواتها وتمت تضحك عليهن وهن يجادلن بسبب الورقه .. يتهم نعوم وشافتهن يلعبن ويلست تشوفهن ..

مي: ها ناعمه ماتبين تلعبين؟
ناعمه: لااااحشى عليه .. مره لعبت وتبت من عقبها
ساره: جي قمار ثرج لعبتي عسب اتوبين
مي: هههههههه شكلها جي
ناعمه: لله مب قمار .. لعبتني غش والغش شرا القمار
ساره: الله واكبر ..
ريم: ياالله دوري نعوم بنلعب وياهن
ناعمه: مافيها حكم
ساره: لا مافيها تعالي.. نلعب كريزي..
ناعمه: شو ها كريزي بعد
ريم: الكرت العادي نعوم .. له عدت تسميات
مي: ههههه وحليلج يا ناعمه ..
ناعمه: حلج حلول.. يلا يلا انزين وزعن ..

ويلسن ثنينتهم ع الارض ووسعن مي وساره الدايره وقامن يلعبن .. نزلن مها ومهره وشافن البنات يلعبن ويلسن حذالهن مها يلست ورا نعوم تشوف اوراقها ومهره حذال مي .. تقوم مها وتخبر خواتها عن الاوراق اللي عند نعوم وبجي تعاونن ثلاثتهن وكله يغلبن ناعمه لانه ورقتها مكشوفه الهن ..

وعقب حطوا العشى ويلسوا البنات ع السفره يتعشون .. ريم شبعت بسرعه وترخصت من اليالسين وسارت حجرة يدتها .. يلست ع طرف الشبريه وهي تشوف يدتها .. ولهت على امها من متى مارمستها وايد .. قبضت تيلفونها وقالت بتتصل فيها واذ فتحت الموضوع ما بترمس عنه .. بس تبى تسمع سوالف امها ع الاقل ..

عليا: هلا والله بريمان..
ريم: اهلين اميه .. شحالج
عليا: الحمدلله بخير غناتي
ريم: شو مسوييين
عليا: والله ماشي .. يالسين.. انتوا اخباركم واخبار اخوانج ويدتج
ريم: الحمدلله كلنا بخير ..

ريم ماعرفت شو تسولف ويا امها .. بيظل الموضوع عالق امبينهن وغصبن عنها لازم تفتحه ويا امها .. ام سيف انتبهت وهي تسمع حس ريم .. لفت ع ينبها اليسار .. وردت تلف ع ينبها اليمين .. ريم كل شوي تطالع يدتها .. لكن ام سيف تمت هاديه وماصدرت اي صوت .. اللي خلى ريم تظن انها راقده ..

عليا: ليش ساكته ريمان؟
ريم: ها .. ماشي .. ولهانه عليج
عليا: وانا بعد فديتج..
ريم: انتي ليش ماتسولفين مثل عادتج!
عليا بتردد: مم ماعرف.. بيظل بينا موضوع
ريم: اميه
عليا: يا ريم يومين امهلتج فيهن تفكرين ع راحتج.. لازم ننهي الموضوع..
ريم: وانا نهيته وقلتلج مب موافقه
عليا: يا ريم .. الريال ما يعيبه شي
ريم: اميه خلاص الله يخليج ريحيني ..مابا الصداع يردلي..
عليا: شو يعني بتمين كل مره تتحججين بالصداع.. انتي لازم ارد اسويلج موعد ويا دكتورج ..
ريم: يوم تيبون طاري العرس اييني الصداع والا يوم تفكوني من ها السوالف ترا انا بخير
عليا: ريم.. حطي الرحمن بصدرج وانا مابا الا مصلحتج.. ولد عمتج شارنج.. وعمتج ماتبى غيرج حرمه لولدها.. ليش تضيعينهم؟؟
ريم: اميه الله يخليج خلاص قولي لعموه اني مابا ولدها لاتعشمينهم بموافقتيه..انا مابا العرس.. انا احاتي جسوم .. منو بيرعاه لو انا عرست .. وبعدين خواتي هنه انا مسؤوله عنهن.. خلاص لاترمسوني فالسالفه
عليا: الله يهديج يا ريم ..
ريم: خلاص اميه .. بخليج انا الحين.. ويليت مره ثانيه يوم برمسج ماتفتحيلي ها السالفه
عليا: كيفج .. يلا فمان الله
ريم: مع السلامه ..

سكرت ريم التيلفون .. وطاحت حذال يدتها اللي لين احين ماصدرت اي صوت يدل على انها مب راقده .. تمت تفكر فامها وفالسالفه .. طاحن دموعها .. خلاص مب قادره تتحمل اصرار امها .. هي ماتبى .. ماتبى تعذب نايف وياها ليش جي امها مصره .. ام سيف ما علقت بس هي الثانيه ادور فبالها رمسة ريم وشكلها فهمت الموضوع بكبره ..

الحين السالفه تستوي ومحد يعرف عنها.. ولا يعرفون وداسين .. افا يا ريم ماتخبرين يدتج .. ومريم .. سارت تخطب من غير ما تشاورني .. البنت شكلها مضايجه .. باجر برمسها .. ومن اصبح افلح ..


******************
(الأربعا) 11اغسطس 2004
******************

الصبح قامت عليا من نومها متكدره ..طول الوقت كانت يالسه مكتأبه.. مب عارفه كيف تتصرف ويا سالفه ريم لكن خلاص الظاهر ماشي فايده ولازم تحسم الموضوع .. كم بتخلي مريم تتريا وتعشمها .. شلت تلفونها ودخلت غرفتها .. ماتبى حد يسمعها ..
اتصلت ع رقم مريم .. وردت عليها نواري..

عليا: الووه
نوره: الووه منووو
عليا: منو انتي نوره ؟
نوره: هيه
عليا: اشحالج حبيبتي
نوره: زينه
عليا: وين ماماتج ؟
نوره: انتي منو
عليا: انا خالوه عليا
نوره: خالوه عليا منوو
عليا: ام جاسم .. تعرفينه
نوره: انزين منو جاسم
عليا ابتسمت على أسئلة ها الطفله ..
عليا: تعرفين ريمان
نوره وهي تضحك: عرفيييتهاا ريمان
عليا: انا مامات ريمان
نوره: انا احب ريمان..
عليا: فدييتج انا.. ريمان بعد تحبج.. يلا انزين وين ماماه مريم..
نوره: ممم صبري شوي ..
سارت نوره تزقر امها .. في هالوقت اسما شافت سماعه التلفون طايحه وشلتها
اسما: الوه
عليا: الوه منو؟
اسما: انا اسما
عليا: هلا امايه اشحالج ؟
اسما: بخير الحمدالله
عليا: امج وينها ؟ ردت عليه نواري وقالت بتزقرها
اسما: ان شا الله بسير اطالعها منو اقولها ؟
عليا: ماعرفتيني ؟ انا عليا ام بنات خالج
اسما: هلا والله خالوه اسمحيلي ماعرفتج ..
عليا: مسموحه فديتج
اسما: اكيه امي يت لحظه
يت مريم وشلت السماعه من عند اسما
اسما: هذي خالوه عليا
مريم ابتسمت حست انه اكيد عليا متصله ترد عليهم خبر ..
ونفس الشي كان احساس اسما عشان جيه تمت يالسه حذال امها ..
مريم: مرحبا
عليا: مرحبتين حيا الله ام نايف اشحالج ؟
مريم: بخير ربي يسلمج اشحالج انتي واشحال البنات؟
عليا: البنات انا اسالكم عن حالهم تراهم عندكم
مريم: هيه ههه فديتهم والله ياعليا بناتج حبوبات .. سوالف ولا ساره ومي فديتهن يونسن اليلسه ويقصرن الدوب وياك ..
عليا: وفي هالبيت منو يفتقدون الا هالثنتين ..
مريم: الله يخليهم لج ان شاء الله وتفرحين فيهم
عليا حست بنغزه في قلبها .. خصه من اسمعتها تقول تفرحين فيهم .. حست انه مريم تتريا الرد .. وعليا مب هاين عليها تردهم بس شو تسوي
مريم: عليا
عليا: آمري
مريم: مارمستي ريمان ؟
اسما تقربت من امها تبى تعرف الرد .. وفي هالوقت كانت لطيفه يايه ويا اختها نوره ويسولفون .. لكن اسما سكتتها وقالتلها انه امها ترمس ام ريم ..
عليا: والله يامريم رمستها .. لكن البنت ماطاعت
مريم: ليش ؟
عليا: تعرفين مريم .. ريمان تراعي خواتها وتخاف وايد ع جاسم .. وتحس انهم بيضيعون بلاها خصه انهم مب عندي انا احين ..
مريم: انزين ماعليهم شر والبيت الا هذوه حذال البيت .. متى ماتبى بتسير لو كل يوم عادي..
عليا: والله يا مريم ترا ريم عنيده وكل مارمستها طافت عني وروحت .. هي عندكم ورمسوها لو بتقدرون تقنعونها .. واخطبوها من ابوها اما عني انا تراني اتمنى القرب منكم والله اني ادعي ليل نهار انه الله يسخرها وترضى ..
مريم: يالله ان شا الله خير
عليا: رمسي يدتها انتي وهي بترمسها بتطمنها انه هي عند خواتها وماعليهم شر
مريم: اخاف تجبرها وانا مابا البنت تنغصب خصه اني رمستج انتي قبل
عليا: ماعرف يا مريم والله اني متلومه منج لكنج ادرى بالحال
مريم: لا تتلومين اختي افا عليج
عليا: خلاص عيل انا بخليج احين .. واسمحيلي الغاليه
مريم: مسموحه فديتج .. فمان الله
سكرت مريم تلفونها وصدت حذال اسما
اسما: شووو ؟
مريم: ماطاعت
اسما: ليــــــش ؟
مريم : تقول امها انها ماطاعت عشان اخوانها محد عندهم وجسوم مريض محد بيرعاه ..
اسما: علثه الا
لطيفه: حرام لاتخلين في ذمتج .. انتوا بروحكم تشوفون بعيونكم كيف ريم ويا اخوانها .. تخاف عليهم من الهوا.. وشي طبيعي ماتقدر تطمن اذا هم بعيد عنها وبعيد عن امها .. خصوصا انه ساره ومي بيسيرن الجامعه ومابيتمون الا الصغار .. مها ومهره ماعليه بيمشون امورهم لكن جاسم مريض ..

مريم سكتت .. كان الشك يسري بدمها من كلام عليا لكن كلام لطيفه اكدلها صدق نيه ريم .. هي تراها تشوفها بعينها شو تسوي يعني مب جذب ..

اسما: واخر شي شو قالتلج سمعتج ترمسينها زياده ؟
مريم: تقول انا موافقه واباكم لكن خطبوها من ابوها جان يدتها بتروم تقنعها
اسما: يوم امها مارامت لها امايه عفرا بتروم ؟
لطيفه: امايه عفرا بتقنع ريم انه اخوانها بيكونون في امان عندها
مريم: صح نفس الكلام اللي قالته عليا
لطيفه: امي صح نحن ابتعدنا عنهم وماربينا وياهم بس انا تمت علاقتي بريم اوكي وانتي تعرفين هالشي .. وكانت ويايه بالمدرسه واعرف كيف تفكيرهم .. انا مابا افرط في ريم ولازم نسوي أي شي نقنعها
اسما: لا فديتج اخونا مابنعقه ع وحده ماتباه
لطيفه: ريم ماتبى أي حد .. ماخصت اخوج .. لانها اصلا كانت رافضه ولد خالتها من قبل
مريم: منو قالج هالكلام
لطيفه سكتت .. حست انه لسانها زل .. ريم كانت مخبرتنها بس قايلتلها لاتقولين لحد ..
لطيفه: ريمان .. بس قالتلي ماقول لحد وانا زل لساني وقلتلكم .. بليز لاتسيرون ترمسون
اسما: يوم اقولج اميه هاي كاتم اسرار ريم ..
مريم: بس انتي عن التعليقات.. انزين لطوف وليش رفضته ؟
لطيفه: قلتلج امايه هي ماتبى حد شكلها ماتبى العرس امره .. تحاتي اخوانها
مريم: وحليلها ..
اسما: هاه الوالده اشوفج لنتي ؟؟ لاتنسين ولدج بعد
لطيفه: اسوووم لاتيلسين تخربين افكار امي .. قومي من اهنه خليني اتفاهم وياها ع راحتي
اسما: شو بتقوليلها سيري قولي لامايه عفرا عشان تجبرها ع اخونا ؟ ليش طايح حظه هوو ؟ نايف الف من يتمناه ولو بياشر لوحده من بنات عمي بتيه ركض
لطيفه: بس انتي تعرفين تربيه بنات عمي وتعرفين تربيه بنات خالي ؟ تبين اخوج ياخذ أي حد ؟
مريم: بسكم عاد راسي عورني منكم انا في حاله وانتوا في حاله
نشت عنهم مريم ودخلت غرفتها .. ولطيفه صدت صوب اسما بعصبيه
لطيفه: كله منج يالسوسه .. انا بدخل عند امي ارمسها لكن انتي ان تدخلتي في الموضوع او نايف وصله شي من هالكلام مابتلومين الا نفسج

ونشت لطيفه دخلت عند امها ترمسها .. اذا الله كاتب نصيب فها الزواج ان شاء الله بيصير ولو انهد بلد .. واذا مافي نصيب ترا حكمه من الله ..
حست مريم انه كلام بنتها لطيفه عين الصواب.. ودعت من الله انه ايسر السالفه ويكتب ها النصيب بين ولدها وبنت اخوها..

****
الظحى يلست ام سيف ويا البنات اللي كانن لابسات عبيهن ويالسات في الصاله يتريون ناعمه اللي تبرعت توديهن السوق .. الا ريم ماطاعت تسير لانه محد بيتم ويا يدتها .. وقالت انها باجر بتطلع تكمل اغراضها وبتخلي حد من البنات ييلس ويا يدتها ..

ريم: اقولج ساروه خذوا قياس عباتي وسولي عباه ساده وياكم
ساره: شليت عباه قياس حقج
ريم: زين سويتي ..
مي: ياربي هاي نعمه الله اخرتنا متى بنسير نحن ..انا وايد عندي شغل وابا ارجع عشان حلامي بتي
مها: قلتلج خل نقول حق اميه تودينا
ام سيف: نعوم بتوديكم شو غادي عليها .. وبترجعن قبل ماتي بنت خالكن .. وان يت قبلكن بتيلس ويا ريمان ..
ناعمه نزلت من فوق : يالله قومن
مي: مابغيتي
ناعمه: شو مابغيت بعد
ساره: ماشي ماشي يالله قومن ..
نشن البنات وطلعن ويا مرت ابوهن وتموا في البيت جاسم ومايد يلعبون بها السوني .. وريم ويدتها ..
يلست ام سيف تتامل ريم .. تبى تفاتحها بالموضوع اللي سمعته امس .. قبل ماترمس مريم .. جدمت ام سيف صينيه القهوه والجاهي منها .. وانتبهت لها ريم

ريم: امايه لاتسحبينها ماتروميلها شو تبين انا بصبلج
ام سيف: ابا قهوه
ريم: ان شا الله
صبت ريم القهوه ليدتها وعطتها اياها ورجعت اتسندت وشلت الروايه اللي يالسه تقراها ..
ام سيف: انتي شو ها اللي تقرينه هالكثر ؟ من ييتي هالبيت وانتي الا كله موازره هالورق .. وين ماتسيرين خاشه هالكتب في مخباج شو هاي
ريم: امايه هذي قصص
ام سيف: خرابيط الا .. لو تقريلج قران بدالها جان كل يومين ختمتي
ريم: امايه اقرا القران انا .. بس بعد اقرا هالقصص .. تعيبني
ام سيف: انزين ودري عنج هالخرابيط وتعالي ابا ارمسج
ريم سكرت روايتها وركزت نظرها في يدتها .. تبى تعرف شو تبى تقولها ..
ام سيف: ريم انتي ليش ماتبين نايف ؟
ريم: هاه ؟ كيف
ام سيف: سمعتج البارحه يوم كنتي تكلمين امج .. ماكنت متعمده اتسمعج بس انا نشيت ع صوتج .. وسمعتج وانتي ترمسينها وتقوليلها عن نايف وانج ماتبينه
ريم تمت مرتبكه مب عارفه شو تقول
ام سيف: ريم ترا عمتج ماخبرتني عن أي شي من هالموضوع .. وها الشي الثاني اللي زعلني .. لكن الشي الاول اللي زعلت منه انتي .. انا وايد احبج وانتي قريبه مني وتحريتج بتين تقوليلي وتشاوريني .. لكنج تدارين ع الموضوع وفوق هذا ترفضين ؟ ليش ؟ نايف مامدحه عشانه ولد بنتي لكن نايف فديته ريال والنعم فيه

ريم: امايه انا امي عليا فاتحتني بالموضوع عقب ماييت من السفر يوم رجعنا بيتنا يوم الجمعه وانا مابا اعرس .. وتميت مارمس اميه عليا والسبه انها تبى تجبرني ع هالسالفه .. وامي سمعتي كل شي يوم اني رمستها ورفضت ..
ام سيف: وانتي ليش رفضتي ؟!
ريم التفتت الصوب الثاني : مابا اعرس وخلاص
ام سيف: سمعت ساروه تقول باجتلج سنه وبتخلصين دراستج شو بعد تبين
ريم: اخواني يبوني
ام سيف: انتي مابتسيرين تسكنين بعيد انتي اهنه قريبه تراج ومتى ماتبين تعاليلهم وانا تراني عندهم ومابقصر..
ريم: امايه سمعتي انتي بعد يوم قالوا انه جاسم تعب واحين ساروه وميوه بيسيرن الجامعه .. منو بيتم عنده ؟
ام سيف: مرت ابوه اهنه وانا موجوده .. وبخليه ايي يبات عندي ..
ريم: امايه مابا اعرس مابا نايف والله يرزقه ببنت الحلال اللي تناسبه
ام سيف: نايف مابياخذ غيرج يا ريم
ريم: امايه لاتجبريني انا مابا اعرس
ام سيف: ريم يا امايه .. الخيره في ما اختاره الله .. انتي قومي احين تيددي وصليلج ركعتين واستخيري ربج
ريم: مابا
ام سيف: عشاني يا ريم .. قومي استخيري وماخاب من استخار .. انتي استخيري ربج لاتعاندين .. ولاتقطعين نصيبج

ريم سكتت وقامت من عند يدتها وهي تصيح ..

ياربي ليش يجبروني ليش ؟ انا شو اللي خلاني ارمس وهي موجوده زين جيه احين سمعت كل شي واعرف انه امايه عفرا مابتسكت عني .. ياربي شو هالحاله .. مابا العرس.. ومحد بيجبرني لا اليده ولا الوالده..

****

فبيت بوراشد.. بعد مالبسن احلام ومديه وتجهزن عسب يسيرن بيت سيف.. طلعت احلام من حجرتها وتوجهت للصاله وفايدها كيس كبير مصنوع من القش القوي وحاطه داخله الاغراض اللي ماخذتنهن لمي ومرتبتنهن بشكل حلو ..
لقت عماتها فالصاله وامها وخالتها فجر .. وطت الكيس عن باب البيت وردت تيلس وياهم ..

فجر: شنو ها اللي كان بايدج؟
احلام اطالعتها بنظره: هذي هدية شيخة البنات كلهن
عليا: هههههه يالله شيختي بنتيه..
فجر اطالعتهم وطلعت صوت استهزاء وسكتت عن السالفه اما احلام طنشتها ولفت صوب امها ..
احلام: امييه وينه ابويه تأخر علينا
عبير: توه مكلمني يقول فالدرب
احلام: يلا عاد ماشي وقت الحين الساعه 12 الا ربع
شيخه: مستعيله ها الكثر انتي
احلام: هي عيل شو.. ابا اتم وياهن واايد
ميره: هاكوه فارس فالبيت بدقله بخليه ايوديكن
عبير: لا لا محمد ياي مافي داعي اتعبينه
ميره: لا تعب ولا شي عادي
احلام: هي عموه دقيله خل ايي .. ابويه يقول فالدرب وبيوصل عقب ساعه
عليا: خلاص عيل ميره اتصليله طالعيه جان بيوديهن..

عبير اطالعت بنتها وضحكت عليها .. احلام ماتريت امها توافق.. عطول ركضت الحجره تزقر مديه .. ودقايق سمعوا هرن فالحوي.. طلعن احلام ومديه وهن شالات الكيس وتلاقفن ويا فارس عند باب البيت.. كان يبى يدش يسلم على عماته ويدته ..
لفت احلام ع طول صوب الحريم..

احلام: فجر سيري داخل فارس ولد عمي بيدش
فجر انتبهت لاحلام واطالعت الحريم .. بس تمت يالسه ولا قامت .. اما فارس من سمع رمسة احلام رد ع ورى على طول ..

مديه: تعال بترد داخل هيه
فارس: لا برايه .. هاتن الكيس ماترومله

وخذ عنهن الكيس وحطه جدام .. ورد يركب السياره .. ويحس بويهه حاار من كثر الاحراج .. مايحب ها المواقف ابدا ..

ركبن البنات ورا .. وهن مستانسات انهن بيسيرن عند بنات عمتهن .. وتمن يقرضن ففجر كيف كان تصرفها بايخ وقت ماكان فارس يبى يدش .. كان بامكانها تروح من الصاله لين يسلم ويظهر .. بس فجر شو مشكلتها .. شو يعني تبى تجبر الكل يشوفها كشفه !
فارس كان ملتزم الصمت طول الدرب .. لكن يوم كان بيدش المنطقه اللي فيها بيت سيف ضيّع فدخلات الشوارع .. ماعرف وين بالضبط بيتهم .. اتصل بأبوه يتخبره عن الدرب لين دلاه ووصل البنات ..
احلام يوم شافت البيت تمت تتأمله وهم بعدهم برع مادخلوا .. تشوف السور وعايبنها تصميم البوابه ..

فارس: عادي ادخل السياره؟!
احلام: ماعرف والله .. ممم اقولك عطني تيلفونك شوي بتصل بساروه اسالها

فارس عطاها التيلفون .. ودقت احلام ع الرقم واتصلت بساره.. ساره استغربت من الرقم الغريب وماردت .. لكن احلام عاودت الاتصال .. ها المره ردت ساره لكن تمت ساكته
احلام: ساروه انا حلااام .. اقولج وصلنا البيت ندش بالسياره داخل ولا شووو
ساره نقعت من الضحك مول ماعطتها احلام فرصه انها ترمس..
ساره: هي دشو .. هرنوا وبيفتحولكم الباب .. المسافه بعيده عليكن من الدروازه لباب الفله ..
احلام: خلاص اوكي . فارس هرن وبيفتحون الباب
ساره: فارس يايبنكن
مي اطالعتها .. لكن ماعلقت ..
ساره: نحن فالسياره عقب شوي بنرد من السوق .. بتلقن ريم داخل اوكي
احلام: خسكن الله انا يايتنكن وانتن شاردات يا الطفسات
ساره: الحين بني ..
احلام: خلاص انزين اتصلي بريم وقوليلها انه نحن عند الباب
ساره: اوكي بس دشوا انتوا عادي .. محد فالبيت
احلام: خلاص يلا باي .. هاذو فتحوا الباب
انفتح باب الدروازه .. ودخل فارس بالسياره داخل .. احلام ومديه تمن الا يطالعن البيت وعايبنهن واايد .. وفارس بعد ..
نزلن البنات من السياره وكانت ريم واقفه عند باب الفله تترياهن من بعد ما اتصلتلها ساره .. فتحت احلام الباب الجدامي وسحبت الكيس .. وساعدتها مديه ..

مديه: انزين ليش ماتشل وياانا
فارس: ماروم انزل .. يلا ماتعولن شلنه ثنتيناتكن
احلام: يالله مافيك خير
فارس تم يطالعها وميود ابتسامته ..
احلام: لو قلنا لمروان اييبنا احسن .. بس ماعليه .. المهم وصلنا عند بنات عموه مشكور..

وعقب ما سكرت احلام الباب طلع فارس ضحكته المكبوته .. وحرك سيارته وظهر من البيت .. اما البنات ركبن دري الفله وشافن ريم سلمن عليها ودخلوا كلهم البيت..

****

من بعد ما طلعن احلام ومديه من البيت .. وصل ابوهن .. دخل البيت وشاف لمة خواته تفرقت.. محد كان فالصاله غير حرمته تترياه ..

محمد: وين البنات يلا بوصلهن
عبير: راحن
محمد : منو وداااهن!!
عبير: فارس ولد راشد..
محمد: ليش .. تراني قاييلكم ياي
عبير: يالله يا محمد نحن مكلمينك من ساعه وتقول ياي فالدرب .. تعبن البنات من كثر ما يترين
محمد: والله شو اسوي راد من دبي ولازم بنتأخر فالزحمه والدريول بعد ما يسرع
عبير: ماعليه مو مشكله ..
محمد: بدش اتسبح
عبير: الحين؟
محمد: هي تعبان باخذلي دش ههه..ابا مااا بارد يصب عليه
عبير: تكفى عاد .. بتفتح الرشاش بيطلعلك نار مو ماي
محمد: هههههه يبوج ها الشمس تثور الما فالخزانات
عبير: هههههه ايه والله ..
محمد: باخذلي دبه ما بارده من الثلاجه بتبرد عليه ماعليج
عبير: نعيما مقدما
محمد: الله ينعم عليج غناتي ..
ابتسملها محمد وروح عنها الحجره .. اما عبير .. سارت بتسوي مدخن لريلها كعادتها كل صلاة ظهر.. وبعد ماخلصته .. لفت ع فجر .. دقت الباب ودخلت ..
عبير: شو تسوين
فجر: شو تشوفين .. اقرى مجله
عبير: بدال ماتروحين تتوضين وتستعدين للصلاه
فجر طنشت عبير وماسوت للموضوع اهميه ..
عبير: ما كان له داعي اليوم اطنشين احلام وهي تقولج انه ولد عمها بيدخل يسلم..فشلتيني فميره يا فجر.. خلاص يووزي ..
فجر: محد قاله ما يدخل

عبير اطالعت فجر بنظره وقلبها يدق بقو ماتعرف ليش بس اللي تعرفه انه مقهوووره وايد من فجر.. طلعت من الحجره وهي تضرب كفها اليمين بالشمال.. ماشي فايده ميأوس من ها البنت ..
تعوذت من بليس وردت ادخن ريلها فالحجره وبعد ماطلع صوب المسيد تمت بروحها فالغرفه والمدخن فايدها خوزت العود وحطت دخون للحجره وتمت ادخنها وهي بالها مب وياها .. ملعوزتنها فجر ومب عارفه شو بيصير فالايام اليايه

****

العصر فبيت سيف.. فقسم البنات بالتحديد .. وكعادتهن البنات يوم يتيمعن .. رابشات وسوالف وضحك .. احلام مستانسه ع اليلسه وياهن وايد .. وتوصفلهن كيف شعورها اول ما شافت ام سيف وناعمه ونجمه وكلهن يتضاحكن عليها

ريم: يالله حلامي الحين يتج الضحكه يوم شفتي نعوم
احلام: هي والله تذكرت الآنسه مينشن ع طول
ساره: ههههههههه الآنسه مينشن عصبيه نعوم هبلى
ريم: ساروه خس الله بليسج سكتي عن تسمعج
مي: هههههه وشعليها ساروه من نعوم.. ساروه بتسويلها سالفه ثرها
ساره: هي والله ما عليه منها
ريم: الله يعين منكن انتن
احلام: بس يدتكن وحليلها يبين عليها انها طيبه .. يعني مب شرات ماقلتن متسلطه
مي: يبوج يدوه غدابها الدهر وخلى تسلطها يخف شرا مايقولون اكل عليها الدهر وشرب ..
احلام: وحليلها ويها شكله تعبان
ريم: هي من عقب العمليه ضعفت وذبل ويها
مي: عندالله يا الدنيا يا عيوزنا .. انا بروحي ماتحمل اشوفها ضعيفه.. جبروتها غير كان قبل والحين طايحه فالسرير لاحول ولاقوه
ريم: ترا ها الدنيا شو بنسوي .. انتي وساروا الحين مخبل ويوم بتعيزن بيقولون عيالكن يالله يا الدنيا يداتنا كانن مخابيل والحين مطيحات فالشبريه لاحول ولاقوه
احلام: ههههههههههه ماتخيل
ساره: ايه عاد عن الغلط علينا ..
مي: ماعليج منهن ساروه متغايضات.. اصلن اللي ماخذ حياته سهله ما يعيز بسرعه لكن ها يدوه ع كثر ماكانت تعصب شوفوا حتى قلبها انسد
ريم: ميووه ههههه شو ها الرمسه بعد..
احلام: ماعليج هاي شوي من خراريف ميوه
ساره: وين البنات سارن؟
احلام: مدوي والتوم عند عفرا يغصصن عليها
ريم: ويه تحاسبن شو يبنها مافينا ع حلجها هاي بتربع ع طول عند نعوم
مي: مها ومهروه سحبن مدوي وقاللها تعالي بنوديج عند صخلة البيت اللي دوم فاجه حلجها ههههههه
ساره: صدقهن خواتي ما جذبن.. لا وبعد يسمنها مسيلمه الكذاب
احلام: هههههه ها كله عفرا ؟
مي: هيييه.. والله يوم نقولها مسيلمه الكذاب اتم تصرخ .. هي ماتعرف منو ها بس تعرف انه فيه سالفة جذب..
ريم: انزين وماشالله عليها ع طول عند امها تخبرها كل شي .. ذاك اليوم نعوم هزبت التوم بسبة ها التعيوره الي مظهراتنها ع عفرا
مي: هههههههه شو بيسوبها حليلهن كل ما تسولفلهن عن شي جذبت!!


وضحكن كلهن ع السوالف الي تسويها عفرا .. ريم قامت من عندهن لانها بتسير عند يدتها تحت .. وساروه سارت الحجره تبى ترتب اغراضها اللي خذتهن اليوم ع الرغم من انها مخلصه مشاري للجامعه ..

وهنه التفتت احلام لمي .. وفعينها كلام وايد .. مي كانت تشوف التيلفزيون ومب منتبه لنظرات احلام.. كيف بتبدى احلام موضوعها .. قالت بتمهد شوي ..

احلام: يااا ميه
مي التفت لاحلام وهي تزقرها بها الاسم اللي ينرفزها وتمت ساكته ولا ردت على احلام..
احلام: ميّـــه ..
مي: ويعه تقولج ميه ..
احلام: ههههههههه بلاج
مي: كم مره متضاربه وياج بسبة ها الميه ..
احلام: ادري ادري .. لان الميّه صغير القرد هههههه خلاص اسفين
لفت مي على احلام اللي كانت حذالها ع الغنفه وتقربت منها اكثر وقبضت احلام من شعرها ..
مي: يعني لازم تشرحين اكثر بعد
احلام:هههههههه فجي خسج الله بطلي شعري
مي: هههههههه يا الهرمه من زمان ما تضاربت وياج

فجت مي شعرها وهي تضحك عليها .. وتمت تتطالع ايدها وتسوي حركه انها تنزع بقايا شعر احلام من ايدها واحلام تطالعها وتضحك على ها الحركه..

احلام: انزين ميوه والله نسيتيني شو كنت بسألج
مي اطالعتها: شو عندج
احلام: ماشي .. متى بيظهرولج الرقم؟؟
مي: الرقم ! هيييه ماعرف التهينا يبوج ولا قلت لابويه
احلام: انزين متى بتقوليله؟
احلام: ماعرف والله .. مب محتايتنه احين قبل ما اسير الجامعه بقول لابويه يطلعلي رقم وياخذلي التيلفون
اطالعتها احلام وابتسمت وفخاطرها يا الهرمه ناسيه اني قايلتلج باخذلج التيلفون
مي: بلاج تتبسمين!
احلام: ماشي ..
سكتن مره ثانيه وهن يشوفن التيلفزيون..احلام للحين مب قادره كيف بتفاتحها..تمن ساكتات فتره لين بدت احلام ترمس ..