رد: قـــلـــوب تـــحـــت الـــمــجـــهــــر**
 

الجـــــــــــزء الخامس عشر

*****************
(الجمعه) 10 سبتمبر 2004
******************

الساعه 11 نش نايف من نومه .. تسبح وطلع من غرفته .. توجه لغرفه خواته لقاها مفتوحه.. اسما كانت تحط ثيابهم في الشنط عشان يسيرون الجامعه .. اما لطيفه كانت يالسه ترمس في التلفون ..

نايف: هلا صباح الخير
اسما: صباح النور
نايف: هاي منو ترمس؟
اسما: ساروه بنت خالي
نايف: لطوووف
لطيفه: هاه
نايف: سكري شوي وتعالي الحجره اباج
لطيفه: اوكي
اسما: شو عندكم؟
نايف: ماشي ..
رجع نايف حجرته يتريا اخته تي .. دقايق واندق الباب ودخلت لطيفه ..
لطيفه: ها نايف بلاك ؟
نايف كان يالس ع كرسي الكمبيوتر: مابلايه شي .. اخبارهم بنات خالي
لطيفه ابتسمت ويلست على كرسي التسريحه: بنات خالك والا بنت خالك
نايف: لا بنات خالي
لطيفه: بخييير
نايف: انزين لطوف .. ريم أي لون تحب؟
لطيفه: بنفسجي ليش؟
نايف: عشان يوم اغير الغرف اعرف أي لون اسوي .. بيلس ادور ديكورات من احين
لطيفه: لا لاتسويلها بنفسجي
نايف: ليش؟
لطيفه: لانه غرفتها في بيت ابوها بنفسجي .. احسن لو تغير اللون
نايف: امم عيل شو رايج بعنابي وزيتي ؟
لطيفه: حلووو ..
نايف: انزين شاوريها ؟
لطيفه: مب احين .. بعده وقت وعقب الملجه شاورها انته ع راحتك ..
نايف: مارمستج هي متى تبى الملجه؟
لطيفه: لا .. بس انته متى تباها ؟
نايف: مادري ذاك اليوم نرمس ويا امايه عفرا وقالو نملج قبل العيد بيومين لان تعرفين مكروه عقد القران بين العيدين
لطيفه: هي
ماف: والحفله عقب العيد ؟
لطيفه: والله مادريبك ..
نايف: انزين لطوف ترا انا اشتريت الكتب لريم
لطيفه: والله ؟ متى سرت ؟
نايف: يعني خلال هالاسبوعين .. اشيا اشتريتها من اهنه واشيا من دبي
لطيفه: زين راوني اياهن
نايف: غلفتهن خلاص
لطيفه: منو غلفلك اياهن؟
نايف: وديتهن محل يغلف الهدايا
لطيفه: وينها احين؟
نايف: لحظه ..
قام نايف من مكانه وفتح الكبت .. طلع منه هديه مغلفه بلون ذهبي وملفوف بشريطه كبيره من فووق .. كان نازل من هاي الشريطه .. شرايط رفيعه مربوط طرفها باشرطه كاسيت .. كان شكل الهديه حلوو وفكرته غريبه ..
لطيفه: الـــله وايد حلوه
نايف: صدق؟
لطيفه: هيه .. شو هاي اشرطه ؟
نايف: هيه .. اشرط منوعه مال البيوت السعيده وفهم النفسيات وفن احتواء المشاكل الزوجيه .. يعني شغلات جاسم المطوع
لطيفه: روووعه الحركه وايد .. كم كتاب داخل؟
نايف: تقريبا 5 كتب ..
لطيفه: حلوو
نايف: انزين لطوف احين كيف بتودينها ؟
لطيفه: انا اوديها؟
نايف: هيه عيل انا
لطيفه: امم انزين انا اليوم بسير كيف بوديهن
نايف: شوفي انتي طريشها ويا امايه يوم بتسير العصر وقوليلها هاي منج لريم
لطيفه: انزين
نايف: وبس عاد .. ريم بتبطل الهديه وبتشوف
لطيفه: بتتحراها مني انا
نايف: لا .. انا كاتب داخل انها مني
لطيفه: شو كاتب؟
نايف: كاتب ورا كل كتاب كلمات وموقع تحتها
لطيفه: حركاااااات
نايف: حركات في عينج .. يالله بتعطينها امايه والا ؟ خلصيني ورايه صلاه الجمعه
لطيفه: انزين امايه بتقول متى سرت اشتريتها وغلفتها .. تحيد انه ماطلع الا وياها
نايف: تراني امس مودنج السوق .. قوليلها امس خذتها وبس
لطيفه: انزين انزين .. خلاص عطني اياها وبوديها لامايه
نايف: تعالي خذيها عقب بدون ماتشوفج اسموه
لطيفه: اوكي .. يالله بنزل انا تحت
نايف: ماباجي شي ع الصلاه بتلبس وبنزل ..
لطيفه: اوكي
وطلعت لطيفه من الغرفه اما نايف دخل الهديه الكبت وبدل ملابسه ونزل ساير المسيد ..

****

فالباص كانت ساره يالسه حذال الدريشه وحذالها مي .. ساره كانت سرحانه اما مي ترمس احلام بالتيلفون ويسولفن..

مي: بعدنا توناا ظاهرين من راس الخيمه .. درب ورانا
احلام: الله يعينكم .. ها الخطوط مادانيها انا
مي: انا درب العييين مول ما احبه .. بس شو بنسوي حكم القوي ع الضعيف
احلام: ماعليه بتتعودين عليه ..
مي: الله كريم ..

لفت ساره صوب مي ..

ساره: يلا بسكن من الرمسه .. انا ملانه
مي: ادقلج معلايه يعني ؟!
ساره: خايسه
مي: خاااايسه انتي .. يا ترمسوني ولا بتضارب وياكم
ساره: افف بس بس سكتي وجلبي ويهج
مي: اوكي .. بس على اي صفحه
ساره : سخيييفه
احلام: ايييه انتن فضحتنا شو تضااربن فالباص
مي: هاي ساروه اللي تضارب ..

طلعت ساره الهتفون من شنطتها وحطت السماعات فاذنها وسوت حركه لمي انها زعلت .. ميوه ضحكت عليها .. دايما هاي حركاتهن وعبطهن ..
ردت ساره لسرحانها وهي ادندن ويا الاغنيه اللي تسمعها .. رن مسج تيلفونها هي مااسمعته لكن تذبذب صوت الاغنيه وحست بالمسج .. فتحته وتمت تقراه مره .. مرتين.. ثلاث .. مافهمت المقصود .. أو ليش ها الحركه يعني ! ..

بالأول اتصال .. والحين مسج ..

مي لاحظت ع ساره ارتباكها .. واطالعتها ..

مي: شو بلاج؟؟؟
ساره: ماشي ..
مي: لا في شي ..
لفت ساره على مي ..
ساره: سكري وبخبرج ..
شوي وسكرت مي التيلفون .. ولفت صوب ساره ..
ساره: ميوه
مي: ها بلاج؟
ساره: ماعرف ها شو يبى؟
مي: مسود الويه منوووو هووو؟؟
ساره: سود ويهج .. ايي سمعي السالفه اول
مي: شو السالفه انزين ؟؟؟
ساره: اندوج اقري ها المسج ..
خذت مي وفتحت المسج من غير ماتنتبه للمرسل
مي وهي تقرى المسج : مركون بين البحر والبيت وحداني..ابني لروحي امل وجروحي تهده..وأمر قبل الغروب أرتب أحزاني..أطوي شراع الهوى وأمده..ألا يابحر منهو اللي ناسي الثاني..أنا أو اللي هجر شاطيك ومده..

ورجعت مي تقرى فيه مره ثانيه بصمت وساره تتطالعها تباها تعلق او تقول أي شي .. أما مي تمت تردد آخر المسج ..
مي: أنا أو اللي هجر شاطيك ومده .. ساروه وايد عيبني بطرشه لي ..
ساره : اندووكم انا اتريااها تعلق ترمس وتقولي ابا اطرشه .. اييه شووفي منو مطرشنه ..
مي رصت بعيونها وفجأه بطلتها ع الاخر .. شو يعني !
مرواااان مطرش ها المسج ؟ كيف وليش ومن متى!

مي: ساروه .. من متى امبينكم مسجات؟
ساره: والله ها اول مسج ..
مي: اول مسج وجي عنيف عن الغياب ..
ساره : وانا شدراني
مي: بس خطير .. يمكن لان ماسرنالهم ها الاسبوع افتقدج؟
ساره: يالله عاد انتي ..
مي: بس غريبه جي فجأه يطرشلج مسج
ساره: ممم ميوه .. هو رمسني مره بالتيلفون
مي: متـــــى!
ساره: اسبوع المستجدات .. اذكره يوم الاثنين.. كان داق يتخبر عن رقم اميه ..
مي: يالله ومارام يسأل حد عن الرقم الا انتي
ساره: وانا شدراني عنه
مي: اوب اوب شكله طاح في الغرام ولد الخال ..
ساره: جب ميوه .. اخر شي افكر فيه ..
مي: بس لاه من الله مرموس عنا
ساره: كيف؟
مي: ممم شوفي ها الرمسه قايلتلي اياها حلامي..
ساره : أي رمسه؟!
مي:اونه خالي محيرنا لعياله على حد علمي
ساره: كيــف!
مي: شو كيف بعد .. يعني انا وانتي استوينا محظورين ع الغير..
ساره: شو ها مب ع كيفهم
مي: ليش ساروه .. ماتبين مروان؟!
ساره: ليش يعني ع طول قلتي مروان
مي: ساره لا تستعبطين من كثرهم عيال خالي تراهم .. اكيد خالي يباج لمروان .. وكمل العدد وقال يباني لفارس ..
ساره: من متى هاا؟
مي: من فتره .. ماعرف متى بالضبط.. بس حلام اول ما درت على طول خبرتني ..
ساره: منو يعرف بعد؟
مي: حلام ومدوي .. والحين انا وانتي ..
ساره: مروان يدري؟
مي: مادري والله .. شكله يدري..
ساره: كيف؟
مي: ساروه لا تمين هبله ها الكثر.. يعني من الله توج مراوتني مسج هو مطرشنه.. احس هو مرمس ابوه عشان يخطبونج ..
ساره: ماادري.. واذ كان خالي بروحه رامس؟
مي: انزين فشو الاشكال يعني بيكون .. دام خالي رمس هم ما بيعارضونه .. وبعدين فديتنا أي شخص يتمنى قربنا بعد شوو
ساره: يالله يا انتي .. مادري منو الأميره ديانا..
مي: لا مي بنت سيف ..
ساره: بس عيل ..
مي: جب جب ..
ساره: انزين فكينا الحين من ها السالفه .. الحين شو اسوي
مي: فشو؟
ساره: مروااان؟؟؟
مي: ممم مادري والله .. ردي عليه بمسج عادي
ساره: لا مافيني
مي: انزين .. ممم .. مادري والله .. ردي عليه شوفي شو فخاطره.. سايريه يعني
ساره: هزرج؟!
مي: مادري والله .. بس يعني مب غريب من الله ولد خالج ..
ساره: انزين انتي لو فارس قام يطرشلج وجي .. شو بتكون ردت فعلج؟

مي صخت فجأه .. ما تتخيل فيوم تكون علاقتها بفارس بها الجديه .. بدى خافقها يعزف سيمفونيته.. نزلت عينها وتمت تفكر فها السؤال الصعب .. ما لقتله جواب .. لانها مب مستوعبه السؤال ولا حطته فالحسبان..
بس شي وحيد طلع منها ..

مي: فاارس غير!
ساره عقدت الحيات: كيف غير بعد ..
مي: فارس مب نفس طبع مروان ..
ساره: يعني
مي: يعني ما ظن فيوم انه بياخذ رقمي .. ولا بيطرشلي .. ولا بيدقلي..
ساره: انزين يا العبيطه انا قلتلج تخيلي .. تخيلي انه مطرش انتي شو بتسوين
مي: ساروه ماعرف.. بس اللي ابا اقولج اياه .. تمي ويا مروان جي لين ما تأكدين من مشاعره وعقب لكل حادث حديث ..


سكتت ساره وردت تشوف المسج .. شو بتسوي الحين .. اطنشه ولا ترد بمسج عادي ولا تتبع نصيحة مي ولا شو بالضبط ماتعرف..
اما مي ردت الافكار تغزيها .. أحلام مازالت كل ماترمسها اتيبلها طاري فارس.. والحين ساره درت وما بترحمها من التعليق .. غصبا عنها بتفكر فيه.. أو بالأحرى بالسالفه بكبرها .. اللي يدور فبالها ومحيرنها واايد .. هو يدري ولا.!
هي تحس انه لا .. مب مبين شي .. مروان ممكن تقدر تحكم ع تصرفاته لصالح ساره.. بس هيه ما شي لصالحها ..


****

العصر يلست ريم ويا ناعمه في الصاله يطالعن التلفزيون وناعمه ترمس في التلفون ويا امها .. اما ام سيف كانت سايره صوب الزرب ويا جاسم ومايد..

استملت ريم من اليلسه وقالت بتتصل لأمها .. سولفت شويه ويا امها عليا واطمنت على احوالها وسكرت عنها ..

و في هالوقت نزلت عفرا من فوق وشاله في ايدها كتاب وكراس ..
تقربت من امها ويلست حذالها

عفرا: اميه .. اميه
ناعمه يلست ترمس في التلفون ومطنشتنها
عفرا: امييه
ريم: بلاج ؟ تشوفينها ترمس في التلفون اكيد مابتسمعج اصبري لين تخلص
عفرا: ابا اقولها اني مب فاهمه الرياضيات وماعرف احل الواجب والابله قالت اذا ماحلينا الواجب بتظربنا وبتنقص من علاماتنا
ريم: هاتي بشوفه لج
شلت عفرا كتابها وسارت يلست حذال ريم .. اللي خذته ويلست تقرا وتشوف شو ياخذون ..
ريم: هذا سهل عفروه ليش ماعرفتي تحلينه؟
عفرا: ماعرف
ريم: انزين هاتي ورقه فاظيه بشرحلج
عفرا ابتسمت وامسحت دموع الخوف اللي كانت نازله وعطت ريم ورقه وقلم وبدت ريم تشرحلها المسائل وكيف تحلها ..
في هالاثناء دخلت مريم عمتها وبنتها نواري..
مريم: السلام عليكم
ريم استحت لانها كانت لابسه بجامه .. وقامت تسلم على عمتها وهي تحاول ترتب من ثيابها ..
سلمت مريم على ريم وناعمه ويلست نواري كعادتها حذال ريم ..
مريم: امايه ريم اهناك عند الباب اغراض يايبتلج اياهن لطيفه
ريم: اغراض شو عموه؟
مريم: مادري امايه . جيه مغلف .. يلسته حذال الباب
ريم: برايه بشوفه عقب شوي
مريم: عيل وين امايه ؟
ريم: سارت صوب الزرب
مريم: وانتوا شو تسوون؟
ريم: اشرح حق عفروه مب فاهمه
مريم: هيه .. زين .. اخبارها امج؟
ريم: الحمدالله يتخبرون عنكم
مريم: حليلها من زمان والله مارمستها .. برايج كملي لعفاري اشرحيلها انا هب غريبه
رجعت ريم تيلس على الارض عطت نواري ورقه وقلم تلعب وتشخبط .. ويلست هي تشرح لعفرا اللي استانست انها بدت تستوعب وحلت واجبها بروحها وصححته لها ريم ..
بعد ماوصلت يدتها .. قامت ريم عشان تبدل ثيابها .. لكنها خطفت عند الباب تشوف لطيفه شو مطرشه .. لقت هديه شكلها وايد ملفت .. خذتها وروحت غرفتها ..
دخلت الغرفه وحطت الهديه ع السرير ويلست تشوفها .. بدت تشوف الاشرطه اللي كانت مثبته فيها .. لقتها اشرطه تخص الحياه الزوجيه ..
فتحت الهديه ولقتها مجموعه كتب فوق بعضها .. بدت تشلهم كتاب كتاب وتقرا عناوينهم ..
عقدت حياتها وهي مستغربه من عناوين الكتب .. فتحت واحد منهم تجلب صفحاته وتقرا المقدمه .. لكن في نهايه الكتاب لفتهاا شي مكتوب بخط اليد .. فتحت الصفحه تقرا اللي مكتوب ..
بدت دقات قلبها تتسارع وايدها تنتفظ لدرجه انها عجزت عن حمل الكتاب و وطته ع السرير ..
معقوله؟ تكون الهديه هاي من نايف ؟! .. عيل ليش عموه قالت من لطيفه ؟ يمكن انها ماتبى تبين جدام نعوم .. او انه عموه نفسها ماتدري وقالولها من لطيفه ؟
يعني لطيفه تعرف بها الشي؟ والا كان من تدبير نايف بروحه ؟!

رجعت فتحت كل الكتب تدور في نهايه كل كتاب كلمات .. كتبها نايف بخطه لها..

ماعرفت ريم كيف تتصرف حزتها .. لكنها نشت تتوضا لصلاه المغرب ..
بعد ماصلت قامت من على سيادتها وتوجهت بشكل لا ارادي لدريشه غرفتها وفتحت الستاره .. كانت تشوف دريشه نايف اللي راوتها اياها لطيفه من بعيد
ابتسمت يوم شافت ليت الغرفه المقصوده مفتوح ..
سكرت ستارتها ورجعت على سريرها تجلب في الكتب اللي وصلتها وماتعرف شو ممكن تكون ردت فعلها وهي ترمس لطيفه..

****

كان طايح ع سريره وهو يناظر السقف وسرحاان .. خواطر تغزي افكاره..اغلبها عتب على نفسه .. كيف تجرأ وطرش المسج لساره ..الحين شو ردت فعلها شو قالت عنه! ماردت عليه ولا بمسج بسيط .. شو ها الانسانه ليش ماتحس ..

قبض تيلفونه وبغى يكتب مسج لكنه تراجع .. مايعرف شو يسوي وكيف يتصرف..
قام من سريره وخذ سفرته اللي موطايه ع التسريحه وطلع من الحجره .. توجه لحجرة اخته عزه .. دق عليها الباب ودش على طول ..

مروان: عزوووه
عزه: شوو عندك غازي مره وحده
مروان: ماشي ملان ابا اسولف وياج
عزه: انزين حياك ..

تجدم مروان ويلس حذال عزه اللي كانت يالسه ع غنفه وتشوف التلفزيون ..خذ عنها الريموت وبند التلفزيون..
عزه: شحقه
مروان: بس ما مليتي منه؟ يا تيلفون يا تلفزيون يا سوق ..
عزه: شو اسوي انزين ..
مروان: استغلي آخر شهرين لج فالبيت..
عزه:هههههه وليش آخر شهرين ..ثرني يوم بعرس ما بيي ابات هنه مووول!!
مروان: هي خلاص لاتين .. بس تعالي سلمي وروحي
عزه: ع كيفك هوه
مروان: وينه هو ريلج؟
عزه: مادري..مارمسته من أمس
مروان: غريييبه
عزه: هي خلاص ما نرمس وايد .. وحليله الفقير والله قاصه عليه .. لا واقوله مابرمسك لين العرس خلاص
مروان: لا عاد بالغتي .. بعده العرس شهرين وزياده بعد
عزه: ههههههه انزين انا بروحي ماروم اصبر عنه..
مروان: يحيج والله..

وسكت مروان وهو مركز بنظره على مجموعة المجلات اللي مجابلتنه ع الطاوله..وعزه قبضت الريموت تجلب في القنوات.. وردت تطالع مروان ..

عزه: شو بلاك سكت مره وحده؟
مروان: هاا
عزه: شو سرحان؟
مروان: لا عادي
عزه: شكله شاااغلنك موضوع جايد
مروان: والله؟!
عزه: هي صدق
مروان: ماعرف والله .. عادي ماشي شاغلني
عزه: تقص ع بتاني انته.. عاد انته الوحيد اللي عيونك تفضحك..ماتروم تخلي شي فخاطرك .
مروان عقد بحياته وهو يطالعها .. ابتسم وقام ..
عزه: وين ساير .. تعال خبرني باللي مكدر بالك
مروان: لاماشي مكدرني.. بس كنت ملان
عزه: خل عنك
مروان: يمكن عشان بنفتقدج يوم بتعرسين
عزه: يالله يالله من وين ظهر كل ها الحب
مروان: هههههههه ماعليج يظهر مره وحده هو.. يلا انا بسير بيت ابويه سلطان بسلم عليهم ..مابلحق امر عليهم قبل ما اسير الدوام
عزه: خلاص اوكي .. الله يحفظك ..

طلع مروان من عند عزه وهو حاس بشوية ضيجه ..
صدق عيوني تفضحني! معقول مابروم اتحكم بنفسي وقت ما اشوف ساره!
لا .. يمكن اليوم بس لان ها البدايه ..


******************
(الثلاثاء) 14 سبتمبر 2004
******************

"لاحول ولا قوه الا بالله .. إنا لله وانا إليه لراجعون"

فرك محمد يبهته وهو يتكلم بالتلفون مع بشار اخو زوجته .. وهو يستقبل ها الخبر الي أكيد وبلا شك بيكدر عليهم جوهم ..

محمد: متاكدين انزين انتوا؟
بشار: فحص الـdna اكدلنا ..
محمد: لا حول ولا قوه الا بالله .. عظم الله اجرك ياخويه
بشار: اجرنا واجرك .. والله كان عندنا امل بسيط انه ابونا يرجع لكن شو نقول حسبي الله ونعم الوكيل.. الله يرحمه ان شاء الله
محمد: الله يرحمه برحمته
بشار: المهم محمد انا ماقدر اطول عليك العزا بيكون عندي في بيتي وبروح الحين دير بالك على عبير وعلى فجر ..
محمد: انا احين شقى اقولها
بشار: والله ماعرف يامحمد انا اتصلت فيك عشان تقولها .. ولاتفكرون تيون الكويت خلاص مافي فايده .. اقعدوا مع بناتكم واشغالكم
محمد: مايصير يابشار لازم نكون موجودين
بشار: يا اخوي صدقني ماله داعي تيون قعدوا مكانكم وانا ان صار مجال احتمال اييكم الامارات اشوف عبير وفجر ..
محمد: على خير ان شاء الله .. شد حيلك يا بشار
بشار: ان شاء الله مع السلامه
محمد: مع السلامه

سكر محمد التلفون وهو متظايج .. عمه بوبشار اللي كان احد الاسرى الكويتين وصلت جثته وتاكدوا من الفحص والبطاقه اللي كانت مع الجثه انه هو نفسه .. الخبر ياه فجأه ومحد كان عامل حساب لها الخبر.. كيف يتصرف احين وكيف يقدر يخبر عبير وغير عبير اختها فجر اللي في الشارجه .. مايا في باله غير عليا اخته
رفع سماعه التلفون واتصل فيها .. تاخرت لين ردت عليه ..

عليا: السلام عليكم
محمد: وعليكم السلام .. عليا وين انتي؟
عليا: في المدرسه شوفيك محمد شي صاير ؟
محمد: اباج في خدمه
عليا: آمر
محمد: استاذني من المديره وبمر بخذج لان ابو عبير رجعوه الكويت وكان متوفي من فتره
عليا: لاحول ولاقوه الا بالله متى صار هالشي ؟
محمد: مادري يا عليا.. توه اخوها اتصلبي وقالي
عليا: وعبير فديتها شو حالها ؟
محمد: عبير ماتعرف شي عشان جيه ابا اشلج ويايه البيت بخبرها ع الاقل تكونين انتي ويانا فالبيت ..
عليا: انزين ماعليه انا عندي حصه وحده بس بعطيها أي معلمه ثانيه اصبر علي بكلم الاداره وبرجع اتصلبك
محمد: يالله بترياج
عليا: انزين مديه وايمان بنت راشد اردهن ويايه تراهن لو روحت عنهن بيتروعن
محمد: مري ع مدوي وقوليلها عندج موعد أي شي وبيردهن الدريول رواحهن
عليا: ان شاء الله يالله عيل برد ارمسك
محمد: مع السلامه

اتوجه محمد للمدرسه ومر على عليا وروحت وياه ..
دخلوا البيت وكانت ام راشد يالسه مع شيخه بنتها وميره حرمة راشد يسولفون..

عليا: السلام عليكم
ام راشد: عليا ؟ شو يايبنج فيج شي امايه
عليا تجدمت ودخل وراها محمد
شيخه: شوفيكم؟ شو مستوي
عليا: مافي شي مستوي .. بلاكم
ام راشد: عليا طيرتوا حمامة فوادي شوبلاااكم
محمد: عبير وين؟
ميره: في حجرتها قالت بتسير تصلي الظحى ..
توجه محمد لغرفته بينما عليا يلست ويا قوم امها تخبرهم عن وفاه ابو عبير ..
دخل محمد غرفته ولقى عبير تصلي الظحى ..
يلس وراها على الكرسي .. لين سلمت من صلاتها والتفتت تشوف منو داخل عليها الغرفه ..
عبير: محمد ..
محمد: هلا عبير
قامت من مكانها: شوفيك ؟ شي يعورك؟
محمد: لا مافيني شي خلصت شغل وطلعت ..
عبير: ايه زين ..
محمد: خلصتي صلاتج؟
عبير: لا بعدني ركعتين
محمد محتار يفاتحها احين بالموضوع والا يخليها تصلي وعقب يقولها ..
محمد: عبير
عبير: نعم
محمد: تعالي ايلسي برمسج
يلست عبير حذال محمد وهي بعدها لابسه شيله صلاتها
عبير: خير
محمد: عبير انتي عارفه انه الانسان مايصيبه الا اللي الله كاتبنه وانتي انسانه مؤمنه بقضاء الله وقدره
عبير: محمد شصاير وقفت قلبي
محمد: بشار اخوج اتصل فيني ويقول انه جثة ابوج وصلت الكويت
عبير وهي مجدمه ويها ناحيه محمد: شوو شو تقول ؟ جثه ابوي ؟ ابوي رجع من الاسر ميت .. اهم متاكدين؟
محمد: تأكدوا من بطاقته وفحص الـdna
عبير وطت راسها وظمت ايديها الثنتين لبعض وهي ترتجف ومازالت ساكته
محمد مسح بايده على ظهرها : عبير هذا امر الله ادعيله واحتسبي الاجر عند رب العالمين
عبير بدت دموعها اللي تيمعت في عينها تنزل بس بهدوء
عبير: نطرته كل هالسنين وانا على امل يرجعلنا ولو كان امل بسيط .. ابوي عشت انطره 14 سنه يرجع لنا لكن رجع متوفي ..

وبدت تصيح وهي مازالت محافظه على هدوئها اما محمد بدت دموعه هو بعد تنزل ماقدر يتمالك نفسه .. بوبشار ماقصر فيه وكانت له مكانه في قلبه وفوق هذا زوجته مب هاينه عليه.. يعرف شكثر كانت تحب ابوها وكانت على امل تشوفه بيوم او تعرف عنه خصوصا انه لفترات مب قريبه وايد كانت توصلهم اخبار عنه

محمد: قومي بارك الله فيج صلي اللي باجي من صلاتج وادعيله ماشي بيخفف عنج الا هالشي قومي عبير
هزت عبير راسها وقامت تكمل صلاتها وطلع محمد من الغرفه .. حب يخليها بروحها شوي تناجي ربها بينها وبين نفسها ..

طلع وراح الصاله عند خواته
ام راشد: احسن الله عزااكم يا وليدي
محمد: الدوام لله يا اميه..
يلس على كرسي في الزاويه
عليا: خبرت عبير ؟
محمد: هيه خبرتها وقامت تصلي احين
شيخه: الله يصبرها ان شاء الله
محمد: امين يارب والله انها كاسره خاطريه
ام راشد: حتى انا يامحمد عاد خصه عبير فقيره وايد وماتهون عليه
ميره: انزين احين هي بتسير الكويت والا كيف ؟
محمد: لا لا خلاص اخوها يقول بييهم اهنه زياره ان سمحت الظروف
ميره: هي صح ترا اختها بعد تدرس اهنه
محمد: انا نسيت سالفتها فجر .. احين منو بيخبرها وهي هناك
عليا: لاتقولولها شي لين توصل باجر مب زين بعد
محمد: والله مادري بسأل عبير
شيخه: انزين انته قوم سيرلها لاتخليها بروحها
محمد: لا لا خلوها شوي بروحها وعقب انتوا سيرولها رمسوها شوي هدوها
شيخه: انته وين بتسير عيل ؟
محمد: ماعرف بس سيرولها انتوا ايلسوا شوي وياها وهدوها انا بطلع شوي وبرد خلاف..
عليا: ان شاء الله

طلع محمد من البيت وهو متضايج ومب عارف وين بيسير .. توجه للمسيد مشي .. دخل يتوضى وبعدين دخل داخل المسيد قبضله مصحف وتوجه لزوايه ويلس فيها يقرى كلام الله .. يبا الهموم اللي شايلنها من المسؤووليه ومن الأحداث اللي صايرتلهم تنزاح عن حمله شويه ..

****

في كليه التقنيه للطالبات .. كانت ريم يالسه ويا مجموعه من البنات اللي وياها في الكلاس ..
معظمهم تعرفهم بس ماحتكت فيهم وايد ..
يلست ريم تجلب الورقه اللي في ايدها .. كان مشروع كلفهم فيه الاستاذ كل بنتين مع بعض .. والمشكله انه كلفها بالمشروع مع وحده ماتعرفها زين .. مجرد زماله كلاس بينهم .. يلست هذي البنت حذال ريم يناقشون كيف بيكون البروجيكت في هالوقت البنت هذي رن تلفونها وردت عليه .. ويلست ترمس وريم تلعب في تلفونها وتسمعها ..

سميه: الوه .. هاه .. في الكليه ؟ شو تبين ؟ مادري ... لا ماعندي انزين خلاص شو تبين احين انا مشغوله ؟ بس عاد فكينا احين من هالسالفه .. يالله باي ..

ريم استغربت من الاسلوب اللي ترمس فيه البنت..وايد جافه ويا الطرف الثاني اللي بالخط .. حركت حواجبها باستنكار وقبضت اوراق البروجيكت وتقول فخاطرها مالها شغل ..

سميه: اسمحيلي ريم
ريم: لا عادي افا عليج .. بس لحظه شوي بتصل البيت
سميه: اوكي
ريم شلت تلفونها واتصلت بيدتها ترمسهاا ..
ريم: السلام عليكم
نجمه: وعليكم سلام منو هادا ؟
ريم: انا ريمان
نجمه: هااااا ريمان شنو يريد ؟
ريم: امايه وين؟
نجمه: سوي كلام ويا هذا حرمه مني
ريم: أي حرمه؟ عمو مريم؟
نجمه: لا لا
ريم:انزين.. عطيني اياها
ودت نجمه التلفون عند ام سيف: الوووه
ريم: هلا امايه اشحالج ؟
ام سيف: بخير امايه
ريم: شو صحتج؟
ام سيف: بخير فديتج
ريم: منو عندج ماشا الله ؟
ام سيف: هذي يارتنا ام خالد اللي كانت مسافره تتعالج وراده من اسبوع
ريم: هييه حليلها .. عاد ما جد شفناها هاي ..
ام سيف: لا هاي ما تقطع مول.. بتشوفنها
ريم: هيه زين .. شو طبختيلنا ع الغدى اليوم ؟

كانت هالمره سميه تشوف ريم ويخالجها شعور غريب ..
كانت تحس انه علاقه ريم بامها حلوه وايد .. وفرحانه وهي تشوفها تسولف وياها

ام سيف: سوينالكم صالونه .. نجمه سوتها انا مارمت ادخل المطبخ لانه ام خالد عندي ..انتي متى بتين ؟
ريم: البنات عقب مايطلعن بيمرن عليه
ام سيف: انزين عيل امايه برايج
ريم: اوكي مع السلامه
ام سيف: مع السلامه ..

سكرت ريم وهي تبتسم لسميه .. اللي كانت سرحانه فيها ..
ريم: اتطمن على غدانا
سميه: ههه .. اخبارها امج
ريم: الحمدالله بخير .. هاي يدتيه بس نزقرها امايه
سميه: اهاا ..وليش ما دقيتي لامج عيل
ريم: اميه مدرسه .. عندها حصصها مب فايجتلي ههههه
سميه: يا حليلها ..



بدت ريم تتكلم عن البروجيكت ويا سميه اللي بالها ماكان وياها ..
تحس انه مكالمه ريم ويا امها وايد اثرت فيها .. تمنت لو انها مكانها.. أو انها تقدر تغير مجرى الأمور أو تبدل الأدوار

رد: قـــلـــوب تـــحـــت الـــمــجـــهــــر**
 

في الجامعه الامريكيه كانت فجر يالسه على واحد من كراسي الكافتيريا بروحها تتريا ربيعاتها يوصلن .. وتجلب في واحد من كتبها .. سمعت صوت شخص يناديها..

احمد: فجر
التفتت فجر وسكرت كتابها اللي في ايدها ووقفت: نعم
احمد: بعد اذنج بغيت الاوراق اللي عطاكم اياها الدكتور امس لاني كنت مب حاضر
فجر: أيه صج .. انزين انا ابي ادرس منهم باجر عندنا كوز
احمد: لا انا بصورهن وبرجعلج اياهن مابتاخر
فجر: خلاص جيه تمام ..
فتحت فجر ملفها وطلعت الاوراق لاحمد وعطته اياهن ..
احمد: وين بلقاج عشان اعطيج اياهن
فجر: ماعرف انا عندي محاظرات بعد نص ساعه ..
احمد: انزين ماعليه تعطيني رقمج عشان اعرف انتي وين ؟ اخاف مالقاج واكون سبب انج مادرستي للكوز باجر

فجر سكتت شوي تفكر .. كانت منحرجه ومب عارفه كيف تتصرف وغير هالشي مستغربه انه احمد اللي كلموها عنه مايعطي حد ويه هو اللي طالب رقمها .. بس ماتبى تعشم عمرها وايد .. هو ماخذ الرقم الا عشان مصلحته الشخصيه ..

احمد: اسف يمكن احرجتج
فجر: لا عادي ..
قبضت فجر ورقه وكتبت رقمها ع طرف ونزعت الورقه وعطته وهي تحس بايدها ترجف.. ماعرفت أصلا شو تسوي .. خذ أحمد الورقه من ايدها وهو يبتسم.. ما حب يحرجها ويقولها مليني الرقم لانه شافها مرتبكه..
احمد: خلاص ان شا الله بصورهم وبتصل عشان اعرفج انتي وين وبعطيج اياهن
فجر: صار
احمد: مع السلامه

ابتسملها وروح عنها ويلست فجر في مكانها تفكر .. وتذكرت انها ما خذت رقمه من الربكه اللي سرت فيها..
الحين شلون بعرف رقمه!!..
.. شي طبيعي يعني أول رقم غريب بيوصلني بيكون منه هو.. بس احسن ما سألته عن رقمه عشان مايفتكر اني ماصدقت يطلب رقمي واني قاطه نفسي عليه ..
ابيه فجر اشفيج مو مركزه ..انسي انسي خلاص..

****

الظهر طلعن مديه وايمان بنت راشد من المدرسه ومروا على مدرسة احلام اللي استفسرت عن عدم وجود عمتها وياهم .. وبعد ما وصلوا ايمان بيتهم .. نزلن احلام ومديه من السياره ودخلن الفله وهن يسولفن وينكتن على ابلواتهم والمواقف اللي صارت اليوم..

احلام: والله مدوي ماشفتي الابله شقى استوى ويها من القفطه بس احسن تستاهل افتشلت جدام الموجه عسب يعرف انها ماتشرح زين ..
مديه: هههه والله انكن ..

دخلن الصاله وشافوا عمتهم شيخه ويدهم ويدتهم يالسين
سلموا عليهم ويلسن واحلام على طول يلست ع الارض تصبلها جاهي

بوراشد: احلام توج يايه وبطنج خالي وبتشربين جاهي .. تغدي قبل
احلام: ماعليه ابويه مايعول فيني .. ههه
سكتت شوي احلام وهي تشوف يدتها لاول مره ساكته عنها ونفس الشي عمتها شيخه
مديه: هي صح عموه عليا وين ؟
ام راشد: شو تبينها ؟
مديه: شحقه روحت عني؟ يوم سرنا الصبح ماقالت انها بتطلع
سكتوا عنها ماعرفوا شو يقولون كيف يخبرونهم..
احلام: اميه وين؟
ام راشد: ويدي احلام بلاج قومي سيري غرفه امج والا عمتج بتلقينهن اهناك يوم انهن مب في الصاله
احلام: انزين
نشت احلام و شلت شنطتها .. مديه راحت غرفتها على طول .. اما احلام مرت غرفه امها ولقت الباب ملايم ..
دقته ودخلت .. وطت شنطتها عند الباب وتجدمت شافت امها يالسه على السرير ومجابلتنها عليا عمتها ..
تقربت منهم احلام كانت تتحراهم يسولفون وكعادتها استهبلت ..
احلام : سلاااام مربع
تجدمت اكثر وشافت ويه امها احمر وايد ودموعها ع خدها .. اما عمتها ارتبكت اول ماشافتها احلام
احلام: اميه شو فيج؟ شي يعورج ؟
عبير استمرت دموعها بالنزول اما احلام تمت تمسح لها اياهن
احلام: اميه شو فيج (والتفتت لعمتها) عموه شو فيها امايه ؟
عليا: مافيها شي احلام روحي غرفتج
احلام: لا مابروح اول قولولي شو فيها اميه ؟
عليا تمت شوي ساكته ماتعرف كيف تقولها الخبر الي تلقوه اليوم ... وتشجعت وقالتلها
عليا: احلام يدج توفى
عبير اهنه اشهقت ويلست تصيح بصوت مسموع شوي
عليا: عبير اذكري الله ماصدقتج تسكتين يابنت الحلال آمني واحتسبي الاجر عند الله
احلام تمت واقفه تشوف امها وعيونها تحرقها .. صح ماتعرف يدها بس كانت تبى تعرفه تبى تشوفه وتتعامل وياه .. امها دوم تسولفلها عنه وعن مواقفه وياها
كان هو اللي مسمنها هو اللي طلب يكون اسمها احلام ..
سماها احلام لين اصبح هو احد احلامها هذي ..
ماعرفت كيف تتصرف .. لكنها بحركه لا اراديه تجدمت ولوت على امها .. ويلست اتصيح وياها
عليا: احلام يا اميه هذا بدال ماتهدين امج
احلام تمت لاويه على امها وعقب قامت عنها حبتها على راسها وطلعت من الغرفه بدون ماتنطق ولاتقول شي ..
دخلت غرفتهم ويلست على السرير تصيح
مديه كانت توها طالعه من الحمام وتمسح ايدها بالفوطه
مديه: بسم الله احلام شو فيج؟
تجدمت مديه منها ويلست حذالها تحاول ترفع راسها
مديه: حلامي بلاج؟
احلام: يدي توفى
مديه خافت: ابويه توه ويانا فالصاااله!!!
احلام: لاااا مدووي ..يدي عبدالله
مديه تمت ساكته مب مستوعبه الفكره .. ماتعرف يدها فكيف تصيح عليه
مديه: الله يرحمه بس مب هو كان في العراق؟
احلام: هيه
مديه: عيل كيف عرفوا انه توفى؟
احلام: مادري بس اميه تصيح وايد وعموه عليا قالتلي انه توفى
مديه: الله يرحمه.. انزين احلام ليش تصيحين؟
احلام: ماعرف بس اميه غامظتني وايد تصيح

مديه وخت وتمت ساكته وبشكل لا ارادي فكرت بفقدان ابوها وحطت نفسها مكان امها .. هالشي خلى دموعها هي بعد تنزل ..
يلسن في غرفتهن وماطاعن يسيرن يتغدن .. وبعد مايلست كل وحده فتره على سريرها تفكر .. استسلمن للنوم ورقدن ..

****

كانت فجر في محاظرتها وقت ما رن تلفونها وكان الرقم غريب وعلى طول حست انه اكيد هذا رقم احمد .. لكنها ماقدرت ترد عليه ..
بعدها وصلتها رساله انه بيترياها في "ستاربكس" عشان يعطيها اوراقها
اما فجر قرت المسج وماردت عليه ..
بعد المحاظره مرت صوب ستاربكس وقفت تدور بعينها ولقته ياشرلها
توجهت صوبه ..

فجر: قوه
احمد: الله يقويج .. تفضلي ايلسي
فجر: لا شكرا انا تعبانه بروح ارتاح
احمد: انزين ايلسي اشربيلج شي وبعدين روحي
فجر: ماتقصر بس صدق انا تعبانه ابي اروح انام عشان اقعد وادرس
احمد: اوكي تفظلي هاي الاوراق ومشكوره ماقصرتي
فجر مدت ايدها وخذت الاوراق: العفو .. يالله انا رايحه مع السلامه
احمد: مع السلامه ..

روحت فجر وهي محتاره ومستغربه من تصرفات أحمد.. اللي لها تفسير من اثنين يا إما الكلام اللي وصلها من ربيعاتها مب صح وماينطبق ع الكل
يا إما احمد يعاملها هي معامله خاصه ..
حاولت تشل أحمد من تفكيرها لكنها مب قادره
زادت من سرعة مشيتها تحاول تقاوم ها الأفكار.. لكنها سمعت حد يناديها .. لفت على ورى..

دلال: فجر اشفيج تمشين بسرعه
فجر: ها
دلال: وين رايحه
فجر: راجعه السكن
دلال: ليش.. قعدي ويانا
فجر: انتو وين قاعدين؟
دلال: فالكافيتريا.. تعالي ويانا
فجر: لا دلول ما بي .. راسي يعورني
دلال: من شنو
فجر: والله ماعرف.. من شوي طالعه من المحاظره ومالي خلق أي شي .. ابي اروح انام وارتاح
دلال: خلاص ع راحتج..
فجر: يلا باي
دلال: باي

ركبت فجر سيارتها وتوجهت للسكن .. تبى تطرد من بالها أي فكره مينونه ممكن تصير..


******************
(الاربعا) 15 سبتمبر 2004
******************

فكلية تقنية الطالبات .. كانت ريم طالعه من كلاسها وبتسير المكتبه وين متواعده ويا سميه .. دخلت المكتبه وهي تتلفت وشافت سميه يالسه على واحد من الكمبيوترات .. وسارت عندها وتمت واقفه ..

ريم: مرحبا
سميه رفعت راسها وابتسمت يوم شافت ريم..
سميه: مرحبتيين .. تعالي يلسي..
ريم: الصراحه انا يوعانه خلينا نسير الكانتين ناكللنا شي
سميه: خلاص اوكي ..

شلت سميه شنطتها وقامت ويا ريم وتوجهوا للكانتين .. خذولهم طاوله ع طرف وسارت ريم تطلب الهم اكل .. ويوم ردت شافت سميه تعابل بتيلفونها

ريم: منو تمسجين!
سميه: لا محد .. بس توه حد داق من البيت وبند
ريم: بيردون يدقولج جان يبونج فشي

رد تيلفون سميه يرن وردت عليه .. كان باين عليها الضجر من المتصل.. ريم لاحظت ها الشي بس ما علقت .. هاي ثاني مره تشوفها جي .. لكن ماتحب تقحم عمرها فمشاكل غيرها دام هم من نفسهم ما خبروها ..

ويوم سكرت سميه .. تأففت .. رفعت راسها وشافت ريم .. بادرتها ريم بابتسامه ..
ريم: يلا الاكل بيبرد ..

بدن ياكلن البنات ويتبادلن اطراف أحاديث مختلفه .. لين ما سألت سميه سؤالها..

سميه: ريم انتي مخطوبه!
ريم اطالعتها: ليش يعني ها السؤال؟؟
سميه: لا . بس يعني انتي ماشاء الله قمر وماظني مافي حد بالأجواء
وضحكتلها سميه وغمزت بعينها يوم شافت ريم توردن خدودها ..
سميه: ها يلا اعترفي..
ريم: مم مخطوبه لولد عمتيه
سميه: هي ما شالله .. الله يتمم عليكم بالخير
ريم وخت براسها : امين

امين.. قالتها من خاطرها ..

ابتسمت ريم وهي تتذكر هدية نايف الها ها الاسبوع ..اول هديه توصلها منه .. اسبوع كامل وهي تحاول تقنع عمرها انه خلاص المفروض تتقبل أي شي من نايف.. قريب بيصير حلالها .. ومن الحين لازم تتأقلم على ها الشي .. وها الايام اقتنعت ريم بانه العشره ويا نايف بتخليها تنسى مخاوفها وتنسى آلامها وتواجه العالم من يديد وتتجاهل الماضي اللي ابعدهم وخلاهم يعيشون فها الدنيا أغراب ..

سميه: هاا ريم وين سرحتي .. مايكوون؟!
ورفعت ريم راسها وابتسمت بخجل..

ريم: لا لا مب جي ..
سميه: خل عنج .. امبين على ويهج .. طاعي طاعي كيف محمره..
ريم: اييه سمووي ..
سميه: اويه استحت البنت .. خلاص انزين .. وشخبار البروجيكت ريم.؟

ضحكت ريم على اسلوب سميه وهي تحاول تجلب موجة الحديث .. وسميه بادلتها الضحكه.. وبالفعل .. انجلبت موجة الحديث وبدن يتكلمن عن حياتهن العائليه وكان فالكلام شوي من التحفظ من قبل ريم .. وكثير منه في كلام سميه ..
شو السبب !! ريم بروحها مب عارفه ..


****

الساعه 1 الظهر طلع محمد من داومه وسار ويا عبير زوجته الشارجه اييبون فجر .. كان محمد طول الدرب يرمس عبير ويباها تتماسك وماتبين شي جدام اختها.. ع الاقل لين يوصلون البيت .. وصلوا عند فجر وخذوها وطول الدرب في السياره كان الصمت هو السائد ..
محمد كان متعمد يحط شريط ااسمه (وبشر الصابرين)..
كانت فجر تسمع قصص عن الصبر وتحمل الفراق والاجر والثواب من ورا هالشي.
قلبها قبظها على اللي تسمعه لكنها ماستغربت لانه محمد دايما يسمع الخطب والمحاظرات ..
اما عبير كانت دموعها تنزل وفي نفس الوقت تحس انه الكلام اللي ينقال يخفف من حدت ألمها ..
وصلوا البيت الظهر ودخلت فجر غرفتها .. اما عبير دخلت هي الثانيه غرفتها بدون ماترمسها ..
بعد مابدلت ثيابها طلعت وسارت غرفه فجر لقتها مشغله التلفزيون على قناه الاغاني ويالسه تفرغ شنطتها من الثياب اللي تحتاج غسيل ..
عبير بندت التلفزيون ويلست على الكرسي ..

عبير: شلون الدراسه ؟
فجر: تمام .. عبير شفيه ويهج ؟
عبير: ويهي ؟ ليش
فجر: امم ماعرف احس صايرتلج هالات تحت عيونج انتي ماتنامين زين !
عبير: صارلي كم يوم اسهر عشان جيه
فجر: اوكي حطي كريمات احسن
عبير: فجر ماتحاجين بشار؟
فجر: اتصلت فيه من اسبوعين يمكن
عبير: ايه .. انزين فجر تعالي قعدي بحاجيج
فجر: شنو صاير ؟ ماسالتي عن بشار الا في شي
عبير: تعالي قعدي يمي
يلست فجر حذال عبير وتمت تطالع ملامحها : فجر ابوي توفى
فجر تمت تطالع عبير وهي مب مستوعبه عدل شو قالتلها
فجر: شنوو؟
عبير: كلمني بشار وقال انه ابوي توفى
فجر: شلون عرف؟
عبير وطت راسها: وصلت جثته ومعاها هويته واوراقه ..

سكتت فجر ونزلت راسها وهي تلعب باظافرها .. ومب قادره تستوعب عدل اللي انقال لها .. مصدومه ومب عارفه كيف تتصرف ..
حست بايد تمسح على شعرها ونزلت لين ظهرها ..
التفتت لها فجر وعلى طول طاحت في حظنها .. واطلقت العنان لدموعها تنزل وهي في حظن اختها ..
وعبير كذلك .. يلست تصيح ويا اختها ويظهرن مابخواطرهن ..

****

فالمنامه كانت مها يالسه ويايدتها وتسولفلها عن المدرسه وشو سوت اليوم .. يتهم مهره وهي شاله فايدها صينيه وفيها ثلاث اكواب عصير.. ويلسوا يشربون ..

ام سيف: ماجنهن خواتكن تأخرن فالييه؟
مهره: قبل شويه سايرين ايبونهن ماوحالهم..
ام سيف: كم الساعه الحينه؟
مها: خمس ونص
ام سيف: ها الوقت ضاريات يوصلن ..
مهره: ياالله امره حاسبتلهن بالدقايق
ام سيف: صه صه انتي ..
مها وهي تطالع صوب الباب: ها ما جنه عمااار؟!
مهره: هيه هو
ام سيف: جي ماسار اييب خواته هو بعد !

تجدم عمار لين المنامه وسلم ع يدته ..

ام سيف: جي ابويه ماسرت اتيب خواتك؟
عمار: سرت ويبتهن وخليتهم يخطفوني هنه .. ليش ما يوا الفروخ
ام سيف: لا يابويه ابطوا اليوم ..
مهره: ماعليه بيوصلون الحين
ام سيف: هيه.. يلس انزين ..انا بقوم اسير اشوف نجموه شو بتسوي ع العشى بناتي اكيد يايات يواعى..
مها: اسميج ما ادجينهن ها البنات .. بسهن بيستون دحابل
ام سيف: عنبوووج جي بياكلن من جيستج هن ..

قبل ما تقوم ام سيف قرصت مها من اذنها ع الخفيف .. وقامت تسير تشوف نجمه..تموا عمار ومهره يضحكون ع مها اللي قابضه اذنها تحكها..

عمار: اسميها امايه عفرا سوالف
مها: خخخخ حليلها .. الا تقرصنا يوم تتعب منا
مهره: تستاهلين انتي .. مستوتلنا ساروه الثانيه ..

وشوي سمعوا صوت سياره داخله البيت .. ويوم وقفت السياره جدام الفله قاموا كلهم وساروا صوب السياره .. وبعد ماسلموا دخلوا كلهم الفله ..

مي: ويينها عيووووزنا
مها: عيوزكن عيزت من كثر ما تترياكن .. وآخر شي سارت المطبخ
مي: بسير اسلم عليهاااا
ساره: انا بسير بعد .. بسلم عليها وبسير انطبن راسي بينفجر

وسارن البنات يسلمن على يدتهن .. ميوه تمت يالسه وياها شوي اما ساروه على طول سلمت وحبتها ع راسها وترخصت منها لانها تبى ترقد ..
سارت حجرتها وبدلت ولبست بجامتها .. شافت الوقت قريب المغرب وقالت بتتريا صلاة المغرب ..
طلعت من حجرتها فالوقت اللي كانت توها مي يايه بتدخل ..
مي: وين سايره ؟ مب قايله بترقدين؟
ساره: الحين بيأذن مافيني ارقد عن الصلاه
مي: اها ..
ساره: بسير اسلم ع ريموه ..

دقت باب حجرة ريم ودخلت .. ماشافت ريم موجوده .. زقرت عليها وماتوايبت .. تجدمت من الشبريه وطاحت .. حست بشي تحت ظهرها .. قامت شوي وبطلت اللحاف .. شافت كتاب شلته وتمت تتصفحه وهيه طايحه ..

ساره:فن التعامل بين الزوجين! وحليلج يا ريموه..

تمت تجلب الكتاب وانتبهت لآخر صفحه .. خط ايد ..
قرت المكتوب وضحكت ..
طلعت ريم من الحمام وهي قابضة فوطه صغيره تمش بها ويها .. ابتسمت لساروه اللي قامت وسلمت على اختها .. ويلسن ثنتيناهن ع السرير

ساره: خييبه شكلج مصفع
ريم: مب من شي توي واعيه
ساره: يحضج رقدتي .. انا بموت من الرقاااااد ..
ريم: هاي سالفتكن انتن اتن مواصلات وترقدن من المغرب لباجر.. عنبوكن ماتولهن علينا .. يلسن ويانا بدال ها الرقاد
ساره: شو نسوي مانرقد هناك ..
ريم: ترا باجر العصر بنسير عند اميه
ساره: ليش مب الصبح؟
ريم: ساره عن الهبل .. امايه عفرا مايلست وياكن بعد .. شو ماتولهين عليها انتي وحليلها هي تهاذيبكن طول الاسبوع ويوم اتن تبن تروحن
ساره: ياويلي انا .. فديتها والله العيوز ..
ريم: تعاالي ..ماخبرناكن عن ابو عبير؟
ساره: بلاه؟ لقوووه
ريم: لا ..هيه..
ساره: شو لا هيه
ريم: حصلو جثته ..
ساره: ماااات؟!!
ريم بأسى: هيه .. استشهد ..الله يرحمه ..
ساره: الله يرحمه..بس كان اغلب الظن انه متوفي من زمان ..
ريم: انزين ساره ولو ..عبير من متى تتريا اليوم اللي بيرد فيه
ساره: بعد ها الظلاّم وين بيردون حد حي.. الله ياخذهم.. انزين والبنات شو حالهن؟
ريم: يعني ..ماعرف يوم ارمسهن مب مصدومات كثر امهن لانهن بالاساس مايعرفنه..
ساره: ومتى ياي الخبر؟
ريم: امس الصبح
ساره: اهااا

وسادت دقايق صمت .. ساره قبضت الكتاب اللي حذالها .. وريم ماكانت منتبهه ..

ساره: احم احم
لفت عليها ريم وطاحت عينها على الكتاب اللي بايد ساره ..

ساره: عادي عادي لاتستحين عرفت انه من نايف
ريم: قريتي؟؟؟
ساره: هيه .. بس يايبلج ها؟
ريم: لا مجموعة كتب
ساره: يحيه .. اظن كلهن نفس ها الموضوع .. عن الحياة الزوجيه
ريم ابتسمت: هيه
ساره: يلا عاااد اونها .. اييبولها هدايا ..

وقامت ساره وتوجهت لمكتبة ريم ودورت ع الكتب وتمت تصفحهن وريم كانت واقفه مجابله التسريحه وتعدل شعرها ..

ساره: يالله يا ريموه .. خطيبج شكله يعاني من تعاملج وياه ههههه
ريم: شوو
ساره: شوفي كله كتب عن التعامل بين الزوجين .. وعن كيف تكسبين الريال .. خخخخ شكلها نغزه ها الكتب ..
ريم: شو قصدج ..
ساره: قصده يباج تعدلين اسلوبج وياه

ريم وطت المشط من ايدها ولفت ع ساره وتحس بحرقه فصدرها .. اما ساره وطت الكتب من ايدها ..

ساره: شكله اذن الاذان .. بسير اصلي وارقد .. والله تعباااانه

طلعت من الحجره وهي تثاوب وتتمغط .. بكل برود .. من عقب ما عقت الرمسه وماعملتلها حساب .. او ممكن كانت تسولف ..
لكن ريم من بيقنعها !
حزت فخاطرها ها الرمسه .. وتمت توسوس وتفكر .. معقوله نايف يبى يوصللها ها المفهوم .. حست بغصه فحلجها .. وقبضت كل الكتب وردتهم مثل ما كانو..
وعلى طول قبضت التيلفون واتصلت بلطيفه وقالتلها الدريول بييبلها اغراض خلها تنزل تاخذهم ..
دقت ريم للدريول ونزلتله وعطته الكيس .. تبى تتصرف بسرعه وماتبى تأجل شي . الكلام وايد كان حارقنها .. ومافكرت فاللي قاعده تسويه .. كل اللي فبالها مستحيل تخلي ها الكتب عندها خلاص..
رجعت حجرتها وخواتها مها ومهره ومي اللي كانن فالصاله يشوفنها باستغراب ..

مي: شو بلاها .. حتى ما خطفت علينا نسلم عليها
مها: شي عكر مزاجها ..
مي: الله يعينها .. من انخطبت وهي معتفسه
مهره: يالله انتي ما لحقتي عليها وهي مستجلبه علينا .. ع كل شي كانت تنازعنا
مي: والله
مها: هي والله .. بس ها الاسبوع الحمدلله خفت علينا شوي .. ورد حالها
مهره: هاي ريموه مريضه نفسيا..
مي: مهره عيب.. اختج الكبيره لاتقولين جي عنها
مها: بس صدق ميوه .. ريم حالها غريب.. ماتعرفيلها مره تضحك وياج ومره تعصب.. من اييها الصداع لاتقربون صوبها..كل شي عيب لاتسونه..
مي: ماعليه تحيدنها انتن ريموه من اول مايت هنه وهي مب طايقه ها البيت ..لكن الحمدلله تبدل حالها شوي وتقبلت امايه عفرا ..
مهره: الله يعين ..
مي: نعوم ويين؟
مها: ماندريبها طالعه من العصر ولا ردت ..
مي: بقوم ادقلها ..

قامت مي وقبضت تيلفون البيت ودقت لناعمه وتمت تتغيلس عليها وتقولها ترد بسرعه البيت .

رد: قـــلـــوب تـــحـــت الـــمــجـــهــــر**
 

أما ريم اللي ردت حجرتها .. تمت طايحه ع السرير.. تفكر فاللي سوته .. صح ولا غلط .. ليش الحينه جي سوت من عقب ماتقبلت الهديه .. شو ممكن يقول نايف.. شو بيكون انطباعه ..
صح هي طول الاسبوع مارمست لطيفه وكانت كله تتهرب لانها ماتعرف كيف كانت بتقولها رايها بالهديه .. لكن الحين شو بتقولها وهي ردت الهديه ؟!

خمس دقايق وقطع تفكيرها رنة التيلفون .. شافت المتصله لطيفه .. ردت عليها بكل هدوء .. ماكملت وايد .. وتحججت انها بتنزل عند ام سيف تباها .. سكرت عنها لطيفه ..

لطيفه من بعد ماسكرت عن ريم تمت ع يلستها فحجرتها و تشوف الكيس اللي ردته ريم.. مب عارفه ليش موقف ريم كان بها السلبيه .. ماله داعي ترد الهديه .. حجتها مب مقنعه .. وهي مب عارفه شو بتقول لنايف .. من اسبوع وهو يتريا يعرف شو انطباع ريم من الهديه .. وآخر صبره يشوف الهديه مردوده!

قبضت التيلفون واتصلت بنايف ..

نايف: هلا لطوف ..
لطيفه: اهلين .. انته وين؟
نايف: الحين ببركن السياره وبنزل القهوه .. شي تبين؟
لطيفه: لا بس كنت بسولف وياك.. متى بترد البيت؟
نايف: ماعرف على حسب ..
لطيفه: خلاص اوكي ..
نايف: فمان الله ..
لطيفه: مع السلامه..

سكرت لطيفه من اخوها وتمت تحاتي .. تقوله والا لا ! ماتعرف كيف بتصرف .. قامت من محلها ونزلت عند امها ..


****

سلطان كان يتحوط في الفريج ويرمس ويا بدريه وهو يتصنع الرمسه .. لكن بينه وبين نفسه مل .. طفر.. خلاص ماعاد له خاطر يرمس بدريه..

سلطان: بلاج انتي ؟ شو فيه حسج ؟
بدريه: ماشي راسي بس يعورني شوي ..
سلطان: هيي بسم الله عليج ماتشوفين شر
بدريه: الشر ما اييك فديتك .. وين ساير انته احين ؟
سلطان: البيت بعد وين بسير.. ببدل ثيابي ويمكن ارقد ..انتي ريلج متى بيي؟؟
بدريه: ماعرف يمكن عقب 10 ايام
سلطان: هي ..

خطف في هالوقت صوب بيتهم ولقى مجموعه سياير عند بيت يده .. التفت لهن ومانتبه لبدريه شو كانت تقول ..
بدريه: سلطاني وينك ارمسك انا
سلطان: لحظه لحظه.. سياير وايد عند بيت يدي
بدريه: يمكن عزيمه عندهم
سلطان: هزرج؟
بدريه: هيه يمكن لانه لو شي مب زين لاقدر الله بيقولولك ..
سلطان: برايج انتي برمسج عقب .. بنزل احين البيت
بدريه: اوكي اذا مارديت عليك يمكن اكون رقدت راسي وايد يعورني
سلطان: اوكي.. يالله مع السلامه
سكر سلطان ونزل من سيارته ودخل الفله .. عند باب البيت لقى امه توها لابسه عباتها بتطلع ..
سلطان: السلام عليكم
شيخه: وعليكم السلام
سلطان: وين سايره امايه ؟ وشو مستوي فبيت ابويه سلطان..عزيمه شو؟
شيخه: ابو حرمه خالك محمد متوفى وعاد هذيل ربعها واللي يعرفونها ياين يتخلفولها ..
سلطان: ليش هو اصلا كان عايش؟
شيخه: كان في الاسر مسكين ..
سلطان: كان في الاسر وبعدها عندها امل يرد حي
شيخه: لا حول ولاقوه.. قول انا لله وانا اليه راجعون وترحم عليه بدال هالرمسه
سلطان: الله يرحمه ويرحمنا كلنا ..
شيخه اطالعته بنظره: يالله بسيرلهم انا فمان الله
سلطان: الله وياج
تم يطالع امه وهي طالعه..
سلطان: ها النظره هاي ما بسلم منها انا .. خلني اسير اوطي راسي وارقد اخيرلي..

توجه سلطان لحجرته.. عق الكاب من راسه وفصخ الكندوره .. يت فباله الرمسه اللي قالتها امه.. وعلى طول تخيل فجر..
هذا سبب يا لين عنده ولازم يستغله .. يا الوقت اللي بيبدل فيه اللعبه اللي فايده..

****

ساره.. أسبوع كامل وهي من فتره لفتره تجيك على مسج مروان .. تقراه .. تقرى كل حرف .. تحاول تتخيل انها طرشت له مسج واستقبله مروان.. شو بيستوي بعدين .. ادور مسج .. تحاول اطرشه .. وفالأخير تهون ..

ومروان طول الاسبوع يحاتي .. يمكن ما وصلها المسج .. يمكن ما قرته .. يمكن حد مسحه عنها .. يقول بيرد يطرشلها .. لكن عزة نفسه تمنعه .. ويرد يقول الغايب عذره معه ..

من بعد ما قامت ساره من النوم .. تمت طايحه تفكر فالحلم اللي ياها .. اطالعت الساعه لقتها وصلت 11 .. لفت ع شبرية مي وما حصلتها .. دقايق شافتها ظاهره من الحمام وهي تمسح ويها بفوطه صغيره ..

مي: زين يوم قمتي بروحج .. يلا قومي صلي العشى
ساره: انتي رقدتي؟
مي: لا .. ابا ارقد مره وحده .. امس الا سهر وسوالف تعبت والله من قلة الرقاد وصوتي انبح من كثر الزعيج

ساره وهي تثاوب وتتمتح ..

ساره: ميوه حلمت انه مروان زعلان!
مي وهي تطالعها: هاا
ساره: هي والله .. ميوه يمكن عشان لبسته ما رديت عليه بمسج؟!
مي: مادريبج والله .. انزين طرشيله الحين أي مسج عااادي
ساره: شو يعني .. مثل شو ..

مي تجدمت عند ساره ويلست ع طرف الشبريه .. وهي تحاول تفكر شو ممكن ساره اطرش لمروان ..
وولعت اللمبه فوق راسها وع طول قبضت تيلفون ساره وكتبت ها المسج ..

" ويا نسمات المسا .. احملك احلى سلام.. يالله عساك بهنا..وتشوف احلى احلام"

وراوته ساره ..
ساره: شو خص احلام ..
مي: ههه أي احلام .. فقدتج .. يعني الحين المسى وانتي مطرشتله سلام وفنفس الوقت تقوليله احلام سعيده .. افهمي ..
ساره: هيه .. وين يبتيه المسج .. حافظتنه
مي: لا فديتج توني ارتجلته خخخخ ..
ساره: بس عليج اللي يقول امره مكسر مسكت..
مي: يلا طرشيه وقومي صلي ..
ساره: انزين .. بنشوف نحن اخرتها .. ان صار شي ترا كله من ورا راااسج يا ميوه
مي: شو بيصير يعني .. الحياه عندكم .. حبوا بعض وعيشوا حكايه من حكايات الف ليله وليله خخخ .. وخلج من برودج وبرود ها المشاعر اللي فداخلج واهتمي بالطرف الاخر مثل ما تهتمين بعمرج ..
ساره: شوو قصدج يعني هااا
مي وهي تضحك: لا ماااشي ..

وقامت مي من محلها وطلعت من الحجره قبل ما تفتح لساره باب للسوالف .. اما ساره قرت المسج اللي كاتبتنه مي .. وتوكلت على الله وطرشته .. وتمت قابضه التيلفون تتريى التقرير لين ما يوصل .. واول ما وصل ابتسمت وقامت من الشبريه عسب تتيدد واتصلي ..

اما مروان .. وهو يقرى المسج .. مب مستوعب .. تشقق من الوناسه .. بس اللي فباله ليش يعني تأخرت عليه ها الكثر!
تباه يتعذب يعني ..والا تتغلى عليه .. وتم يضحك على عمره وهو يفكر ها التفكير.. انشرح صدره للسوالف ورجع له مزاجه المرح اللي افتقده طول ها الاسبوع .. ويتمنى باجر بسرعه ايي بس عسب يشوفها .. النظرات هي نفسها البارده ولا ممكن تتغير !
وايد متحمس لها اللقاء اللي بيجمعهم ..ويفكر كيف ممكن بيكلمها عادي وبيتعامل ويااها عادي..هي ما تدري باللي فخاطره .. وهو على امل انه اللي فخاطرها يكون مروان..مروان وبس..

رد: قـــلـــوب تـــحـــت الـــمــجـــهــــر**
 

******************
(الجمعه) 17 سبتمبر 2004
******************

كان واقف مصدوم من ردة فعلها .. حركته كانت وايد بسيطه ومعناها حلو .. لكن هي ليش ما قدرت ها الشي!

"انزين لييش هيه سوت جيي ؟؟"

تمتم بها الكلمات بكل يأس يبى حد يجاوبه ..يفهمه ..

لطيفه: ماعرف يا نايف.. يوم الاربعا ردت الهديه .. ويوم رمستها قالت ماتقدر تقبل الهديه .. مافي شي رسمي يجمعكم اونه
نايف: كيف جي بعد .. من الله مخطوبين
لطيفه: شدراني عنها
نايف: وليش ما قلتيلي من قبل
لطيفه: ماعرف .. ماتشجعت
نايف: لطوف مب حاله هاي .. الرمسه ماروم ارمسها وياها .. والشوفه ماروم اشوفها .. حتى هداياي ماتباهن .. البنت مغصوبه عليه عيل ..الا هديه هيه شحقه تردها ماتعرف انه ها الشي مب زين!!
لطيفه: نايف قصر حسك ولاتكبر المسأله دخيلك ..
نايف: دقيلها برمسها
لطيفه: شو تخبلت انته .. تقولك ماشي شي رسمي وتبى ترمسها
نايف : عوقها الرسمي هيه يعني..
لطيفه مب عارفه شو بتقول وكيف بتخفف على اخوها.. اول مره تشوفه متنرفز بها الشكل ..
نايف: اوكي انا بتصرف ..
لطيفه بحيره: شو بتسوي؟!

طلع نايف من حجرة لطيفه وهو معصب .. لحقته لطيفه تزقر عليه بس طنشها .. نزل تحت ولطيفه وراه وتم يزاقر على امه اللي ماردت عليه ..

نايف: اميييييييه ..
لطيفه: نايف شو بتقوللها
نايف: امااااااايه انتي وين ؟؟!!

دخل الصاله وشاف عمار يلعب بلاي ستيشن ..
نايف: عمار وينها امايه؟
عمار: اظن سارت عند البشاكير تقولهن شو يسون غدى
لطيفه: نايف هد عمرك شوي .. بتزيغ عليها الدنيا امايه وهي تشوفك جي.. عمار قم زقر امايه .. قولها نايف يباج فالصاله
عمار: مااروم..يالس العب
نايف: عمااااار قوم ..

لف عمار على نايف .. حس بجدية الموضوع من أشكالهم وقام على طول ..زقر امه ورد وياها .. يلسوا كلهم فالصاله .. بس نايف طلب منهم يخلونه بروحه ويا أمه .. طلعوا الكل من الصاله .. ولطيفه فخاطرها تيلس وتسمع شو اللي بيدور .. بس نظرة نايف كانت صارمه .. خلتها تروح من غير ولا كلمه ..

مريم: ها ابويه بلاك حاشر البقعه ..
نايف: اميه .. ابا املج
مريم: ويدي ها الحشره كلها عشان تبى تملج
نايف: اميه ارمس جد انا .. عطيهم علم الاسبوع الياي بملج
مريم: مسرع .. وشو اللي خلاك تعيل امبونه عادي عندك
نايف: خلاني اللي خلاني .. رمسيهم وقوليلهم اني مستعيل .. ابا املج الاسبوع الياي..كيفهم يدبرون عمارهم
مريم: بعد وين يمدينا نجهز فاسبوع .. وبعدين ريم ع الخطبه ذلتنا لين وافقت .. تباني اقولهم عن الملجه .. ابوي انا مايخصني .. بروحك انته سير عند يدتك ورمسها .. شور ريم عند امايه ومتى ماقالت كلمتها ريم ماتردلها طلب .. تبى ها الشي عليك بامايه تقنعها ..
نايف: يعني انتي مابتقولين
مريم: انا مالي شغل .. سير انته وقولها
نايف قام من مكانه : خلاص بصلي الجمعه وعلى طول بسيرلها

طلع من الصاله من غير مايتكلم أي كلمه زياده .. استغربت امه من حاله ..من وين يته ها الجرأه مره وحده .. زين ها اللي تباه من قبل هي .. تباه هو اللي يتحرك ويرمس .. خله يعتمد على قراره ها المره..


****

فحجرة أحلام .. كانت مي يالسه تسولف وياها .. وتخبرها أحلام عن حالة أمها من تلقت خبر وفاة أبوها لين اليوم .. الكل كان زعلان لزعل عبير.. لكن هذا قضاء الله وقدره ومحد يعترض عليه ..

أحلام: البيت يوم الثلاثا والاربعا كان واايد كئيب.. زين انكم ييتوا .. خففتوا عليه شويه .. اميه تصيح من صوب وفجر من صوب ..
مي: الله يعينهن .. ها اللي مكتوب ولازم بيصير.. والله يصبرهن
احلام: امين ان شاء الله
مي وهي تطالع الساعه فتيلفونها : بتي الساعه 11 .. لازم نروح احين
احلام: لاااا صبروا .. بعدهن الباصات ثنتين ونص
مي: انزين بنسير نجهز الشنط وشوي بنيلس ويا امايه عفرا
احلام: لاحقه ع امج عفرا.. حرام عليج من اسبوعين مايلست وياج
مي: فديتج والله .. بيلس وياج نص ساعه زياده ولايهمج.. بس قومي خلنا نيلس فالصاله .. عن يقولنا كله منخشات داخل ..
احلام: خلاص اوكي ..

قامن ثنتيناتهن وتوجهن للصاله .. حصلن ام راشد وشيخه يالسات ..

مي: اماايه وين اميه وخواتي؟
ام راشد: امج اظني عند عبير.. وخواتج مادريبهن وين .. توهن هنه وقامن كلهن مره وحده
شيخه: طالعيهن عند فجر
احلام: هاي تروغ كل اللي يدش عندها .. ماظنتي سارلها
مي: بدق لريموه بشوفهن وين

اتصلت بريم ..

مي: ريموه انتوا وين؟
ريم: عند عبير
مي: واميه وياكم
ريم: هيه
مي: والبقيه؟
ريم: ماعرف .. نحن بس هنه
مي: اها .. انزين ريم دقي للدريول خليه ايي بنروح نجهز ثيابنا
ريم: منو بيروح؟
مي: كلنا بعد منو
ريم: لا انا مابسير الحينه .. فليل بخلي حد ايينا
مي: ونحن
ريم: دقن للدريول خلنه اييكن انتي وساروه .. الصراحه بعدنا ماجنعنا من اليلسه
مي حاست بوزها بتملل: خلاص اوكي..باي

سكرت مي التلفون ويلست حذال يدتها واتصلت بالدريول.. واحلام يلست عدال عمتها شيخه .. وتموا شوي يسولفون وياهم ..

ام راشد: ليش تروحون اميه؟
مي: بنسير نرتب اغراضنا .. مافينا نتأخر
شيخه: الله يعينكن يا بنياتي ..
مي: انا بقوم ازقر ساروه ..

قامت مي من مكانها وتمت احلام يالسه تترياها ..

ام راشد: يييه يا ميوه غدت حرمه

لفت شيخه على ورا .. بس ميوه اختفت من الانظار.. وشيخه ابتسمت ابتسامة رضا ولفت على امها .. كانت بتقول شي بس شافت احلام يالسه فسكتت ..
احلام كعادتها لمحت ها الشي .. ورفعت حايب..

احلام: شو بتقولون اسرار
شيخه: شو اسراره بعد
احلام: شدراني عنكم ..

سكتوا الكل .. وقامت احلام من مكانها لحقت ميوه .. اللي كانت ويا ساروه فحجرة امهم يرتبن اغراضهن ويلبسن عبيهن ..

احلام: ايه لاتروحون
ساره: شو بنسوي .. ها ميوه اقولها من امس لو مرتبين اغراضنا وشالين قشنا
مي: اييه حرام وامايه عفراا
ساره: هيي صح عيوزنا ..
احلام لفت ع الدريشه وهي تسمع هرن ..
احلام: هاكو يا ويه النحس دريولكم
مي: خخخخ خس الله بليسج .. يلا قومي ساروه .. يدوبنا نسلم ونروح
ساره: يلا انزين

طلعوا البنات من الحجره وساروا سلمن على امهن وعبير وخواتهم .. وع اللي يالسين فالصاله .. ووصلتهم احلام لين السياره ..

احلام: يلا ركبن يا الخايسات ..
مي وهي تركب السياره: خاست ريحتج يا الهرمه
احلام: ههههههه وياويهج
ساره: يلاا باي
احلام وهي تسكر باب السياره ..
احلام: باااي ..

طلعوا البنات من البيت .. فوقت صادف انه مروان ووياه وحده ظاهرين من باب بيتهم ..

مي: احم احم ..
ساره: منو وياه؟
مي: احس عزوه .. وقف شوي بشير ..
بشير: ليس ؟
مي: انته وقف شووي.. وقف عند ها ريال
بشير: منو هزا ريال ؟!
ساره: هههههههه انته شو خصك ..
وقف مروان ووياه عزه يشوفون السياره اللي بتوقف جدام باب البيت .. نزلت ميوه الجامه ..
مي: سلاموو عليكو ..
مراون: هلااا والله وعليكو السلااام
عزه: اندوكم انا اقول منو هاي .. عبالي ام الخير طلعت ميوه
مي: احم ام الخير هاا .. يلا جدمي بسرعه بنسلم عليج .. بنروح
تجدمت عزه وسلمت ع مي ووايقت فالسياره وشافت ساره وسلمت عليها ساره ..
عزه: شحالكن؟
ساره: الحمدلله تمام
عزه: يالله ما شفناكن امس مول والحين بتروحن!
مروان: ليش مروحين ؟ وبس انتن؟
مي: هيه .. يدوبنا نلملم اغراضنا ..وبعدين يا انسه عزه ادلينه بيت ابويه سلطان ..
عزه: ههههه والله امس ماكنت متفجيه اظهر .. كله فالحجره ..
مي: مشكله بعد اللي كله فالحجره ..

ضحكوا هم الثلاثه .. وفها الوقت رفع مروان من نظرته عسب يشوف ساره .. شافها وهي موخيه تلعب بتيلفونها .. ماقدر يقولها شي .. يبين عليها متجاهله وجودهم .. او ما همها .. وها اللي مروان ما يبى يحسه .. ضربته غصه شوي .. ويوم طاحت عينه بعين مي ابتسملها ع الخفيف.. مي ما بينت انها تدري بأي شي .. وابتسمت لمروان وعزه ..
مروان: يلا بالسلامه ..
مي: الله يسلمك .. فمان الله ..

تحركت السياره ورفعت مي الجامه ولفت ساره ع ورا تشوف .. كانوا مروان واخته مروحين بيت يدهم ..

بشير: مي
مي: خير
بشير: هزا منو ريال؟
مي: هذا ولد خال مال انا
بشير: هييه .. انا قول هذا فيه يشبه انتي شوي
مي: يالله يالله يشبهني
ساره: ولا يخصه
مي: خخخخخخخ خلاص ساروه بشيروه قال يشبهني
ساره: بس عيل .. شوفي انا اول مابوصل بدخل اتسبح .. وانتي قولي لنجموه خليها تسوي مدخن ودخني الثياب
مي: يالله كيف تغير السالفه ..
ساره: جب
مي: يجبج .. انزين المهم ليش مب العكس يعني .. انا بتسبح وانتي دخني
ساره: يلا مناك ..
مي: انزين بنشووف ..

وصخن البنات وهم فالسياره .. وكمل بشير الدرب لبيت سيف ..


****

بعد صلاة الظهر .. توجه نايف لبيت يدته .. مب عارف كيف يجمع الكلمات والجمل.. شو بيقوللها .. وكيف بتقتنع ريم بها الشي .. يلس ويا يدته فالصاله .. محد كان وياهم .. مع ذلك ماقدر يفتح السالفه.. شويه يا سيف من المسيد ووياه ولده مايد ..

سيف: ماشالله نايف هنه
نايف: هي قبل شويه ياي
سيف: يحيك .. زين عيل غداك عندنا اليوم
نايف: لا لا .. بسير البيت بتغدى عند عيوزنا
ام سيف: خل عنك عيوزك اليوم .. غداك عندنا تراه ..
ابتسم نايف ليدته وماحب يعارضها ..
سيف: البنات ماين ؟
ام سيف: بين فليل .. الا ساروه وميوه يايات مساعه
سيف: هيه حليلهن عاد وراهن جامعه هاذيل
ام سيف: ميوود فديتك سر زقرهن خلهن ينقفضن ما بيمديهن الوقت عقب عسب يتغدن
نايف: باصاتهم تتحرك ثنتين ونص .. بعدها الساعه وحده الحين
ام سيف: انزين نباهن شويه يلسن ويانا بعد
مايد: بسيرلهن بشوفهن ..

طلع مايد من الصاله وسار فوق عند خواته .. دخل صالتهم وما حصل حد وعلى طول توجه لغرفة مي وساره ودخل ..

مايد: ميوه
مي: هااه
مايد: امايه عفرا تباكن تحت
مي: انا بنزل الحين .. الا هاي ساروه توها داخله الحمام تتسبح
مايد: ترا نايف ولد عموه هنه
مي: غرييبه شو يدور
مايد: ليش يعني
مي: اول مره ايي بروحه ..
مايد: عاد خلاص نسيبنا خخخخ لازم بيزيد زياراته
مي: اندووكم انتو .. ايه لاترمس ها الرمسه جدام ريموه بتهزأك
مايد: لا لا الا جدامكن انتن ..
مي: خس الله بليسك .. يالله انزين خلنا ننزل ..

طلعوا مي ومايد من الحجره وتوجهوا للصاله تحت .. شافوا الكل يالس .. يلسوا وياهم ونظرات مي تتنقل من نايف ليدتها لأبوها .. ماحست فيه موضوع مفتوح فها اليلسه ..

ام سيف: ميووه
مي: هلا امايه
ام سيف: ساروه وينها
مي: بعدها ساروه الحينه لاحقنها الصايح تتسبح
ام سيف: ويديي .. وجي الغدى ماتباه .. ماشي وقت عقب
مي: ماعليه بتزط أي شي فالباص
ام سيف: شو ها الاي شي بعد .. خلها تاكل من ها الغدى وابويه عليها انا.

مي تنهدت واطالعت يدتها وهي مبتسمه بالغصب ..

مي: بسير اعيلها ..
ام سيف: لا انتي يلسي بتسيرين ومابتردين .. ميود قوم ابويه زقر اختك
سيف: انتي بلاج حارقه اعصابج يا امايه!
ناعمه:عاد عمووه لازم تسوي ها الحفله عشان البنات ياكلن .. انا بسير اخلي البشاكير يحطن الغدى عيل احسن
ام سيف: زين تسوين ..
مايد: بسير ازقر ساروه ..
ام سيف: ركض يلا

وبعد الغدى .. قامن مي وساره وسلمن على يدتهن وابوهن وناعمه وركبن السياره ومايد وياهن .. وتوجهوا لموقف الباصات..

اما ناعمه وريلها صعدوا فوق ..

مابقى فالصاله غير ام سيف ونايف.. اللي معزم ها الوقت يرمس بالسالفه ومايقدر أبدا انه يأجلها .. هدى الجو واليده شكلها رايقه من بعد الجاهي..

نايف: امايه..
ام سيف وهي تتعبل بالدلال اللي جدامها : عونك ابويه ..
نايف: ابا ارمسج فسالفه
ام سيف: ها ابويه شو عندك!
نايف: انزين وطي ها الدلال من ايدج وشوفيني
ام سيف: الله يغربل عدو نجموه كم مره قايلتلها تفرك الغطي من داخل .. شوف كيف مستوي لونها ..
نايف رفع حوايبه وبدى يعض على شفايفه ..
نايف: امايه عاد من مساعه انا هنه ومارمست فاللي اباه خلي عنج الدلال وانتبهيلي
ام سيف وطت الدله وشافته ..
نايف: ااماايه تراني ابى املج
ام سيف: شووو؟
نايف: هي ابى املج
ام سيف : ابركها من ساااااااعه
نايف خف توتره .. وتم يطالع فيدته اللي الابتسامه شاقه حلجها
ام سيف: انزين ابويه شو عزم بك .. امبونك ماتبى الحين
نايف: هاا.. والله ماشي .. فكرت فالوضع وشفت انه الملجه اصلحلنا .. انتي بروحج تشوفينها ريم كيف
ام سيف: عاد ريموه شو نسويبها .. تستحي
نايف: ماعليه انزين .. بنملج وبنشوف المستحى عقب.. انا ماروم اتريا وايد لين تتعود عليه .. من الله العرس شهر واحد .. شو يعني تبونا نملج قبل العرس باسبوع..
ام سيف: شوف اللي بتسويه وانا وياك .. وماعليك من ريم
نايف: خلاص نحدد الملجه قبل رمضان ..
ام سيف: خلاص وليدي .. بس عاد منو يدري بهاي السالفه
نايف: محد .. بس انا وانتي
ام سيف: زين .. ريم رضاها على ايدي بيكون ماعليك

نايف ابتسم ابتسامه عريضه ليدته .. وقام وحبها ع راسها ..

نايف: الله يطوللنا بعمرج يا امايه
ام سيف: فديتك يا وليدي يعلني ما اخلى منكم .. انا شو ابى من الدنيا غير ان عيالي يكونون مرتاحين ..

وتم يالس وياها نايف لين حست انها تبى تغفي وخلاها .. ركب سيارته ومن وناسته مب عارف وين يتوجه ولاي مكان يسير .. الحين بيقدر يشوف ريم بيقدر يرمسها من غير أي موانع .. وما بتقدر تحجج بأي شي .. وبيحاول قد ما يقدر انها تاخذ وتعطي وياه فها المده ..

****

الساعه 7 المغرب .. بعد ماوصلوا محمد وعبير فجر للجامعه .. رجعوا عنها .. وهي شاله اغراضها اهتز تلفونها في شنطتها اللي كان يدل انه وصلها مسج .. لكنها مافتحته لين وصلت غرفتها ووطت الاغراض .. فتحت شنطتها وطلعت التيلفون ..

شافت مسج واصلنها ..

"عظم الله اجرج وجبر خاطرج"

استغربت .. الرقم ماتعرفه .. منو بيكون المرسل!

"اجرنا واجركم .. منو ؟"

تم تسليم المسج وهي تطالع فالرقم .. ممكن مار عليها ومب قادره تذكره .. دقيقتين وياها اتصال من نفس الرقم .. زاد استغرابها وردت بحيره..

فجر: الوووه
سلطان: الوه السلام عليكم
فجر: وعليكم السلام .. منو وياي ؟
سلطان: انا سلطان بن سالم ..
فجر صخت.. سلطان ! هو نفسه ولا غيره!
فجر: ولد شيخه
سلطان: هههه تذكرتي ..
فجر ابتسمت: أيه ..
سلطان: من مده ماشفناج
فجر: ماكو غير ها الجامعه شاغلتنا ..
سلطان: اها. عاد انا خبرتني امايه عن ابوج وقلت اقوم بالواجب..
سكتت فجر شوي وبعدين ردت عليه
فجر: ماقصرت فيك الخير .. بس شلون عرفت رقمي ؟
سلطان: انا مطلعلج الرقم
فجر: كيف..ااقصد ليش انت؟
سلطان: خالي محمد كان مشغول ذاك اليوم وطرشني انا ..
فجر: ماشالله وحفظته
سلطان: ترتيب الرقم ينحفظ بسرعه
فجر: ايه .. زين
سلطان: انتي روحتي صح ؟ كنت ياي بيت يدي وقالوا انه مرت خالي سارت توديج
فجر: ايه انا في الشارجه الحين
سلطان: صوتج تعبان ؟
فجر: ماكو .. بس ضايقه وعندي اسايمنت لازم اسلمه خلال هالاسبوع وانا ماسويت شي ابدا ومالي خلق لشي
سلطان: تبين اساعدج ؟
فجر: لا لا عادي
سلطان: صدق والله انا ماعندي شغل وماعليج مني لو مب دارس بس شاطر واعرف اسوي كل شي ..
فجر: امم والله مادري
سلطان: يلا خل عنج .. بسويلج عادي
فجر بوناسه وثجل بنفس الوقت: انزين انا بطرش لك الاسايمنت عن شنو في مسج وانته شوف اذا تقدر تسويه لي والا لا .. او عطني فكره كيف اسويه اذا ماتقدر
سلطان:لا ان شاء الله بقدر طرشيه بتريا
فجر: اوكي .. امم سلطان مابي حد يعرف عن ...
سلطان: لاتحاتين .. يالله مع السلامه
فجر: مع السلامه ..

سكر سلطان وهو يبتسم .. فريسه يديده هاي .. بس عايبتنه من اول ماشافها وما وده تروح عليه ..


اما فجر ماكان لها خاطر تفكر اذا اللي تسويه زين والا لا .. كتبت له الاسايمنت واستسلمت للنوم بدون ماتبدل حتى ملابسها من التعب

رد: قـــلـــوب تـــحـــت الـــمــجـــهــــر**
 

*******************
(الإثنين) 20 سبتمبر 2004
*******************

طلعت ريم من كليتها الساعه 4 العصر وركبت معاها ربيعتها سميه لانها ماحصلت حد يوصلها .. يلسن يسولفن في الدرب لين يوصلون ..
سميه: ريم متى ناوين تعرسون..؟؟
ريم التفت لها وهي مستغربه سؤالها: ماعرف يمكن الكورس الياي
سميه: ماشا الله زين بالتوفيق
ريم ابتسمت: عقبالج
اتقلب ويه سميه: هه عقبالي؟ انا منو يباني
ريم: افا ليش هالرمسه انتي حلوه وان شا الله بييج نصيبج

سميه سكتت .. ولكن كان يبين من نظرتها انه في شي في الموضوع .. وريم ماحبت تصر ع الموضوع اكثر ع قوله المثل ياخبر اليوم بفلوس باجر ببلاش..
بعد تقريبا ربع ساعه في الطريق وصلوا لبيت قوم سميه اللي كانت مب وايد بعيد من بيت ريم ..

شافت وحده عند الباب تسقي الزرع .. اللي برع ..
ريم: وحليلها هاي شغالتكم تسقي من احين ؟ شمس بعدها الدنيا مابردت

سميه تلون ويها وماعرفت شو تقول التزمت الصمت وحاولت تنزل بسرعه من السياره يوم شافت اللي كانت تسقي تتقرب من السياره شكلها يايه تسلم وتشوف منو اللي يايب سميه .. اهنه اضطرت ترمس سميه
سميه: ريم هذي امي
ريم استحت وايد وماعرفت شو بتقول وقبل ماترمس تقربت ام سميه منهم
ام سميه: سلام عليكم ماشا الله اهين يتوا من كليه مالكم ؟ هليلكم والله .. تعالي قربي داكل عندنا فديتج
سميه: مستعيله امي هي بتسير متاخره مره ثانيه بتي ان شاء الله
ريم مرتبكه كانت ومب عارفه شو تقول: مره ثانيه ان شا الله خالوه اسمحولي احين
سكرت سميه الباب بسرعه: الله يحفظج وطمنيني يوم بتوصلين ..

تحرك الدريول وتمت ريم متلومه مب عارفه شو بتقول حق سميه .. طرشت لها مسج تستسمح منها .. وفي نفس الوقت عرفت كل الاجوبه للالغاز اللي كانت تحيط في سميه .. اللي كانت ترمسها باسلوب مب اوكي في التلفون كانت امها ..
واستهزائها في موضوع انها تتزوج بعد كان عشان امها ..
باختصار سميه تستعر وتستحي كون امها هنديــه !!..

وصلت ريم البيت ولقت يدتها يالسه ع المنامه تتقهوي

ام سيف: هلا ريمان
ريم: اهلين .. شحاالكم؟
ام سيف: الحمدلله .. واعليه عنج توج يايه
ريم: هي.. والله تعب ها الدراسه
ام سيف: يالله ماعليه هانت .. حليلهن خواتج عيل شو يقولن
ريم: يالله الله كريم ..
ام سيف: يلسي امايه شوي بتتقهويين وبتسيرين عقب تبدلين ثيابج
ريم: ان شاء الله ..

يلسن وتقهوين .. بعد فتره يتهن ناعمه .. وقالتلهم انها بتطلع السوق وبتسير الصالون لانها بتسير ملجة وحده من معارفها فليل..

ريم: محد عايش حياته كثر ناعمه .. من عرس لملجه لسوق لصالون
ام سيف: ههههههه الله يهنيها .. شو بنقول نحن بعد ..
ريم: قولي الله يعينها .. يالله راسها ما يصدع من ها المشاوير..
ام سيف: ماعليه بعد الحرمه المعرسه تشوف ها اللي تسويه واجب .. لازم تسير اعراس وفرح الغير عسب ايونها الناس عقب
ريم اطالعت يدتها وهزت راسها بتملل ..
ام سيف: الا عطاري الملجه والعرس..
ريم رفعت راسها بسرعه..
ام سيف: مستعده انتي لها الامور؟
ريم: كييف يعني؟
ام سيف: ريم امايه .. انتي تعرفين انه عرسج بيكون شهر واحد
ريم وخت براسها وتمت تفكر ..
ام سيف: بلاج سكتي اميه
ريم: لا ماشي .. انزين ليش تفتحين السالفه الحين؟
ام سيف: انزين انتي قوليلي ..
ريم: شو اقول
ام سيف: ترا العرس شهر واحد .. شو رايج
ريم: شو رايي بعد يا امايه .. انتوا تفصلون وتخيطون وانا البس
ام سيف: امي انتي يوم رضيتي رضيتي من نفسج.. لاتقولين ها الرمسه جنج مغصوبه ع الريال.. ولد عمتج ريال زين
ريم: ادري ادري يا امايه .. بس انتوا ليش مستعيلين جييي
ام سيف: ليش ما نستعيل .. خير البر عاجله يا امايه
ريم: ماعرف ..
ام سيف: انتي فها الاشهر ما ارتحتي لولد عمتج؟
ريم بدون تفكير: امبلا ..
وسكتت فجأه
ام سيف: ها امايه بلاج!
ريم: ماعرف .. يعني مب اني ماباااه .. لكن ماعرف كيف اتصرف وياه
ام سيف: انزين فديتج شو رايج نجدم الملجه وتقومين ترمسينه بالتلفون وتعرفينه اكثر..
ريم ماكانت مستوعبه ها الكلام..
ام سيف: ريم انا اشوف ها الشي اصلحلكم .. والعرس ماشي باقي عنه.. فصالحج انج تتعودين ع نايف..
ريم: سوو اللي يريحكم
ام سيف: يا ريم اللي يريحنا هو اللي يريحج
ريم تمت ساكته ..
ام سيف: اليوم فليل رديلي خبر الغاليه ..
ريم: اليوم
ام سيف: هي اليوم.. عسب ابشر نايف
ريم: ليش نايف؟
ام سيف: لان نايف من يومين ياييني وهو اللي قالي يبى يملج.. ومحد يدري بها السالفه مول..

ريم دارت فبالها افكار.. ليش يعني نايف يبى يملج!
معقوله يعني ها الخطاب اللي قالته امايه من تأليف نايف!
ويعني لو كان من تأليف نايف .. يعني هاي رساله غير مباشره منه؟
نايف يفكر فيني .. يباني .. يبى يعرفني اكثر.. وانا اصده! ليش ما اجرب ادخل ها المواقف وانا راضيه .. اوافق!
خلاص يا ريم .. الموقف مايبى هي او لا .. ان ماكان اليوم بيكون باجر .. وان ماكان باجر .. ترا شهر واحد العرس لامحال..

ريم: امايه.. قولي لنايف اني موافقه ..
اطالعتها يدتها اللي كانت تحس انها اجبرت ريم على الموافقه بعد ها المره .. بس ريم بادلتها بابتسامه ..
ريم: اميه .. موافقه عن طيب خاطر .. لا تحاتين ..بس هو متى ناوي؟
ام سيف:والله مادريبكم.. يبى قبل رمضان هو ..
ريم اطالعت تيلفونها ع التقويم .. ورفعت راسها ليدتها ..
ريم: رمضان نص عشره .. يعني عقب فوق الثلاث اسابيع
ام سيف: يعني الملجه عقب اسبوعين؟
ريم: مادري والله
ام سيف: هي قبل رمضان باسبوع.. جي زين ..
ريم: خلاص... اللي تشوفينه يا امايه..
ابتسمت ريم لامها وهي تشوفها..ولمحة حيا تملكتها وهي تقول ليدتها..
ريم: بشري نايف

ام سيف دمعت عينها وهي تسمع رد ريم هذا .. جربت منها وحضنتها .. ريم غصبن عنها دمعت عينها .. وحضت يدتها بقو ..
ما تسوى ها الموافقه جان بتخلي يدتها جذه فرحانه ومستانسه وراضيه عليها ..
ترخصت ريم من يدتها وسارت غرفتها بدلت ثيابها وطاحت ع سريرها
شلت تلفونها بتتصل بامها تخبرها لكن اجلت الموضوع وفضلت انها ترقد ترتاح ويوم بتنش بتفكر في كل شي خصوصا انه مخها مقفل من الكليه والتعب..

****
رن تلفون سلطان وهو يالس ويا امه العصر في الصاله قبل مايطلع .. وشاف اللي متصل فجر .. سكر صوت التلفون ورجع يكمل الشاي اللي كان يشربه

شيخه: المرغد متصلين بك ؟
سلطان نزل الاستكانه : لا اله الا الله .. امايه شو تبيني انتي احين ؟ شغل و واظبنا عليه .. واخوج مستانس وبروحه قايل لي اياها بلسانه .. وبيت يدي تراني اسير اسلم وماقصر .. شو بعد تبين ؟
شيخه: اباك تصطلب وتودر عنك هذيل البنات .. مابينفعنك .. جان الا في خاطرك حريم.. نحن بندور لك وحده عفيفه تزوجها وبتكون حلالك بدال هاللعبه اللي تلعبها ترا يابويه صدقني مردك الا تنحط في مشكله من وراهن هذيل ولا منهن الا عوار الراس
سلطان: ان شاء الله بتشوفيني معرس لاتحاتين .. يالله اترخص انا بسير صاله الحديد .. مع السلامه
نش حب امه ع راسها وطلع عنها .. ورجع يتصل بفجر ..
وقفت شيخه تطالعه من الجامه وشافت التلفون على اذنه قبل مايركب السياره وهزت راسها ورجعت يلست مكانها
سلطان: الوووه مرحبا
فجر: مراحب هلا سلطان ..
سلطان: اهلين اشحالج ؟
فجر: الحمدلله وانت ؟
سلطان: الحمدلله ..
فجر: سلطان مايامر عليك عدو بس شصار مع الاسايمنت
سلطان: لاتحاتين ان شاء الله الليله بيوصلج .. انا شغال عليه وكل شي تمام
فجر: صج والله ؟
سلطان: هيه وايد استانست وانا اشتغل عليه بس ان شاء الله يعيبج عاد
فجر: ماتقصر والله ان شاء الله بيعجبني ليش لا
سلطان: خلاص تمام انا يوم بخلصه بتصل عشان تمليني ايميلج واطرشه لج
فجر: بطرشه لك الحين
سلطان: لا لا اخاف اكون ابا اسالج عن شي قبل التشطيبات الاخيره بتصل احسن واذا مافي شي باخذ الايميل وبطرشه
فجر: خلاص صار
سلطان: اوكي عيل بالتوفيق مع السلامه
فجر: مع السلامه ..

سكر سلطان التلفون وهو مستانس حده على فجر.. ويتريا اتصاله الثاني لها بفارغ الصبر

****

عليا يالسه ويا امها وتخبرها عن سالفة الملجه واللي قالته لها ريم .. عليا وايد استانست لها الخبر وفرحتها مب واسعتنها لملجة بجرها .. ريم ..
الكل درى فبيت محمد والكل استانس على ها الخبر الحلو ..
وأحلام ما صدقت خبر على طول قبضت التيلفون تبى تعرف ردود افعال بنات عمتها واتصلت لـ مي ..

مي: ااالوووه
احلام: ايوااا يا مصر
مي: الووو
احلام: ايوا تكلمي دنا سمعاكي
مي: يا بت انتي مالك بتزعأي كده ليه.. تكلمي بالراحه
احلام: طيب يا الدلعادي ماتشخطيش فياا ..
مي: طيب طيب
احلام: هاا عاوزين زغروطه
مي: اسكتي ياختي دنا الفرحه مش سيعاني.. يلا خلينا نزغرط ..

ومن الهباله كل وحده فصوب تحاول انها تزغرط .. البنات اللي ويا مي تمن يتضاحكن عليها .. مب عارفات شبلاها هاي استخفت عليهم ترمس مصري وقامت تزغرط .. بس اللي يعرفنه انها مستانسه لملجة اختها ..

احلام: منو خبركم انتو؟
مي: دقن مهوه ومهور مساعه العصر يبشرن
احلام: اسميه الخبر انتشر.. والبيت هنه الكل مرتبش على الخبر
مي: عاد ها الخميس لازم نسير ناخذلنا فساتين ما بنلحق نفصل
احلام: ايه انا بعد ابا .. بسير وياكم باخذلي ماعندي شي البسه
مي: بنسير ان شااء الله ها الخميس لان ماشي وقت .. عقب اسبوعين الملجه يالله يالله نقفض عمارنا ..
احلام: هي والله ..
مي: وانزيين
احلام: شو كنتي تسوين قبل ما ادق
مي: ماشي يالسه ويا بنات الجناح .. عاد رابشينهن انا وساروه من خبرونا عن الملجه ..
احلام: اسميكم .. خلاص عيل ميوه بسكر عنج الحين .. بسير اشوف شو يرمسون هناك الحريم
مي: ههههه زين زين ماتيوزين عن رمسه الحريم انتي ..
احلام: شفتي عاده .. فها الجلسات يتحدد مصير كل وحده منا.. لازم نيلس
مي: ههههههه ويا ويهج .. سيري حددي مصيرج فديت روحج ..
احلام: انزين .. يلا بباي وسلمي ع ساروه
مي: يوصل .. فمان الله

سكرت احلام عن مي وردت تيلس فالصاله .. وطبعا كل الرمسه كانت عن الملجه .. واستعدادات الملجه .. واطرقوا لفستان ريم كيف بتلحق تفصله .. وحطت عليا فبالها بناتها هن بعد يبالهن فساتين .. ولازم تفضالهن ها الاسبوع عسب تسير وياهن ..
*******************
(الخميس) 23 سبتمبر 2004
*******************

الصبح دخلت سيارة سيف بيت بوراشد ونزلن منها البنات ووياهن وحده صارلها دهر ما دخلت ها البيت ولا شافت اهله .. تمت واقفه وريم حذالها ميوده ايدها .. ساره على طول دخلت البيت تشوف منو يالس فالصاله .. اما مي فساعدت خواتها في شل الأغراض ..

ريم: يلا امايه تعالي
ام سيف: يا ريم يا بنتي .. انتي مب مخبره اهلج ولا امج.. انا كيف جي بدخل مايستوي
ريم: امايه فديتج خلاص اللي راح راح ..
ام سيف: والحين يعني الوقت اللي بيتعدل فيه الوضع..
ريم: امايه مب مهم يعتدل والا لا .. المهم انتي تصفين النوايا خلاص وتكونين سويتي اللي عليج جدام الله ..

ام سيف تنهدت بيأس .. ريم بالأمس كانت ترمس أمها وحست انها مستحيل تحضر الملجه فبيت سيف وتعذرت من بنتها .. لكن ريم مول ما يأست واقنعت فيدتها انها توصل لين بيت اهل امها وتعزمهم ع الملجه وكل شي ان شاء الله بيتحسن من بعد ها المبادره من يدتها .. لكن ام سيف ماكانت مقتنعه وماسوت ها الشي الا عشان خاطر ريم اول شي وثاني شي فخاطرها تعرف اذ عليا مسامحتنها والا لا..

مي تجدمت صوبهم .. وشافتهم يرمسون ع الخفيف ..

مي: يلاااا ريموه شو موقفه امايه ها الكثر في الشمس
ريم: يلا انزين يايين

وتجدمن البنات ولحقنهم ريم ويدتها ..
وفداخل البيت كانت ساره توها ظاهره من الحجره وهي ساحبه امها من ايدها ..

ساره: انتو شو غادي عليكم كل ما نيكم نشوف الدنيا صخه
عليا: شدراني يا اميه .. كلن فدنياه لاهي وانا ميلسه فها الحجره
سارة: وامايه وين عنج؟ واختج وحريم خوانج ؟؟
عليا: امايه ها الوقت فعزبتها ويا شيبتها والحريم ع الظحى يتيمعن.. انتي انزين بلاج قايدتني جيه.. اعرفه درب الصاله ..

وتوها عليا طلعت الصاله شافت بناتها كلهن هناك واقفات وابتسمت من خاطرها .. وتجدمت صوبهن .. لكن ازاحن لمتهن وتفرقن شوي .. انتبهت لوجود شخص زياده وياهن .. تمت تتطالع بناتها وحده وحده وهن يبتسمن لها ..
ما حطت فبالها يوم انها تواجه ام سيف ابدا ..
واليوم .. وفصالة بيتهم .. تشوف ام سيف واقفه ..
وحوالينها بناتها ونظراتهن مزيج من الحب والترقب ..

مفاجأة غير متوقعه .. تجدمت عليا بكل رزانة ورجاحة عقل وسلمت على أم سيف وحبتها ع رأسها اللي خلى أم سيف تلمع عينها ويخفق قلبها..

عليا: زارتنا البركه ام سيف .. قربي حياج ..
ام سيف: تسلمين يا ام جاسم..

ويلست ريم يدتها فأقرب غنفه .. وبعد ما سلمن البنات على امهن يلسن كلهن ..

ام سيف: شحالج ام جاسم ؟
عليا: الحمدلله .. انا بخير وسهاله.. شحالج انتي وشو هباتج؟
ام سيف: الحمدلله بخير ونعمه
عليا ابتسمت لبناتها..
عليا: واخبار البنات وياج؟
ام سيف: عرفتي تربين بنات يا عليا.. بناتج ينحطن ع الجرح يبرى ..

عليا رف قلبها من ها الكلام وحست بدموعها تتجمع فعينها .. حطت ايدها ع شعر مها اللي كانت يالسه حذالها ومسحت عليه.. ومهره ع الينب الثاني اطالعتها وابتسمت وباستها امها ع راسها ..

ويلسوا وشوي قامت عليا تبى اتيب الفواله لكن حلفت عليها ام سيف انها ماتبى شي يسدها فنيان قهوه .. وعن الحلاف صبتلها علياه فنيان قهوه ويلست ع غنفه طويله قريبه لام سيف..
وبدوا يسولفون وناسين أي شي كان فالماضي مستوي ..
ام سيف ارتاحت وايد لردة فعل عليا اللي ابدن ما فتحتلها المواجع ..
وحست ها الوقت شكبر قلب ها الانسانه وشكثر هيه طيبتها ..

ام سيف: عاد البنات كبرن يا عليا .. وها بجرج ملجتها قريب ان شاء الله
عليا: هي والله .. الله يتمم عليهم بالخير ويسعدهم..
ام سيف: امين ان شاء الله .. وعاد سعادتهم تراها بحضورج لملجتهم فبيت ريم وخواتها ..
عليا وخت براسها .. كانت حاسه انه ام سيف بتفتح ها الموضوع وخصوصا انه ريم امس مكلمتنها عن الملجه .. تمت ساكته وما عرفت شو ترد ..

مي: هي امييه والله تين .. ما بنستانس ولا بنحس اصلا بالملجه ان ماييتي
مها وهي رافعه راسها تشوف امها: ليش اميه ناويه ماتين!
مهره: لا ما يصير لازم بتي
مي: يلا عاد اميه

عليا بتردد: خير ان شاء الله
ريم: لا اميه خير عندج هاي يعني تسعه وتسعين بالميه لااا
عليا ابتسمت لريم..
ام سيف: يا ام جاسم .. ترا المليج ما بيملج الا يوم نشوفج يايتنا

عليا اطالعت ام سيف.. خلوها فموضع حرج .. يية ام سيف بروحها تشفعلها انه عليا ممكن تفكر فالسيره للملجه .. والحين ها الرمسه غصبا عنها بتخليها تسير وبعدين هي في خاطرها بعد تشارك بنتها فرحتها ..

عليا وهي مبتسمه: ما يحتاي تأخرون الملاج .. باذن الله ما بفوت فرحة بنتي ريم
ام سيف: هذا العشم فيج يا عليا .. واهلج كلهم بعد ان شاء الله ايون
عليا: ان شاء الله
مي: ابويه وخلفان ريل عموه مريم بعد يايين هنه حق الرياييل يعزمونهم
ساره: والله؟!
ريم: هيه .. بخبرج عن جسوم اميه
عليا: شو فيه؟
ريم وهي تضحك: ماطاع يخلي الرياييل بروحهم يسيرون عزر عليهم يسير يعزم وياهم ..
عليا: فدييييت روحه وانا اقول وينه ..
مي: رياااال والله انه .. خله يخالط الكبار بيخف من خراشته شوي
ام سيف: خراشته الا تقصر الدوب علينا
عليا وهي تبتسم: فديييته فديته .. تولهت على سوالفه
ريم: بييج عقب شوي وبيخبلبج بسوالفه بعد شو تبين..
ام سيف: ريم فديتج دقي لابوج طالعيه جان خلص خله يخطف عليه
عليا: وين ام سيف .. يلسي توج يايه .. مابغيتي فوالتنا يلسي لغدانا
ام سيف: لا والله فديتج مافيني ..

وحاولت عليا تقنعها لكن ما قدرت .. وبعد نص ساعه مر سيف على امه وشلها وياه .. وجاسم نزل من السياره وعلى طول توجه لامه يسلم عليها..
جاسم : حيهم حيهم العربااان .. يااامرحباااابكم .. يا هلا يا هلا
عليا: هههههه الله يحيييك ويبجيك لي يا وليدي .. ها شو عندك
ريم: اميه تلقينه متأثر بحواطة الرياييل اليوم هههه
عليا: اشحالك ابوويه
جاسم وهو يحاول يفخم صوته : بخييير ونعمه طولي بعمرج.. شحالج انتي وشهبااتج ؟
عليا وهي تلف ع ريم: شو صايبنه الولد ..
جاسم: اووهوو .. شو بلاكم ..
عليا: مابلانا شي فديتك .. وين سرت انته
جاسم: سرنا نعزم الفريج هنه حق الملجه ..
عليا: زين زين ..

وتمت عليا ميلسه جاسم حذالها وتسولف وياه وكل شوي يضحكهم بسالفه من سوالفه .. انسحبت مي من اليلسه ودشت حجرة احلام ومديه .. شافت احلام راقده .. وسرير مديه فاضي .. تقربت من احلام وطاحت ع بطنها حذالها ..

مي: احلاااام وفرح .. فرح واحلااام.. هيااا لنغني مع فرح واحلااام..

بطلت احلام عينها وردت ترصهم بقو وهي تشوف مي .. وابتسمت وتمت مغمضه عينها ..

مي: امباع يلا قومي

تجلبت احلام وطاحت ع بطنها هي الثانيه وتمت دافنه ويها فالمخده

مي: حلوم يلا قومي.. وبعدين قولي ما يلست وياج
احلام: انزيييين بنش .. افف
مي: لا تأففين .. بضربج
احلام: انزين عمتيه .. بنش الحين ..

قامت احلام ودشت الحمام .. ومي بطلت عباتها وعقت وقايتها وتمت طايحه ع سرير احلام .. حست مي بخرخشه تحت المخده ويوم رفعتها حصلت كم ورقه تمت تجلبهم .. وها الوقت احلام ظهرت من الحمام وشافت الاوراق بايد مي .. ركضت صوبها وسحبتهم من ايدها..

مي: بسم الله شو فيج
احلام: هيهي ماشي
مي: شو ها الاوراق ..
احلام : ويييييييييه الحمدلله انتي اللي موعتني مب اميه
مي: ليش
احلام: هاتي هالاوراق بخشهن بسرعه
مي: مابعطيج اول قولي
احلام: والله بقولج بس هاتي

عطتها مي الاوراق ودخلتهم احلام في الكبت ورجعت لمي..

مي: ها شو السالفه
احلام: الله يسلمج هاي روايه
مي: رواية شو
احلام: شوفي ابويه يكتب روايه وبتكون اول نسخه اهداء منه لاميه .. ملخص الروايه قصة ابويه فالكويت ..
مي: يااااي.. احس وناسه
احلام: عاد هب يزل لسانج جدام حد .. محد يدري غيرنا انا ومدوي وابويه
مي: ياسلام ع خالي اونه راعي مفاجآت
احلام: هيهيي عيل شو عبالج ..الا تعالي
مي: شو
احلام: شو سويتي بالصور .. مايكون حذفتيهن
مي: ههههه ولو حذفتهم شو بيصير يعني
احلام: ياوييلج
مي: خخ ما حذفتهم .. بس ليش يعني متعبله ومطرشتلي الصور..
احلام: بس جي حركه..
مي: همم .. حلام متى بيخلص خالي الروايه
احلام: ليش تهربين من السالفه
مي: أي سالفه
احلام: ترفعين الضغط.. ميوه ليش ما تقوليلي شو فخاطرج من صوب فارس
مي: احلاااام شو يعني شو فخاطريه
احلام: جد ارمس..
مي: احلام بعدنا عن ها الرمسه نحن..
احلام: ميوه من الله خالي خطبكن خلاص
مي: الا رمسه
احلام: ماعليج .. حيركن خلاص
مي: حلام دخيلج لا تزيدين وتعيدين فالسالفه .. يوم بتستوي الامور جديه هاذيج الساعه تعالي سأليني انا شو فخاطريه..
احلام: اف منج .. انزين ما تبينه يعني؟؟
مي: ما قلت ماباه..
احلام: عيل
مي: بس شي مب فبالي فاهمه.. يعني ماعرف اذ فارس يعنيلي ولا لا.. يمكن يوم كنا صغار هي في شي حلو بينا.. لكن الحين فوق الخمس سنين انا ماتعاملت وياه شخصيا كيف تبيني ابني مشاعريه او اني اعطي الموضوع أي اهتمام
احلام: هممم والله مادريبج.. بس لو هو كان له راي وبغاج؟
مي: مادري مادري.. بس فارس
احلام: شو
مي: ماااعرف .. خلاص سوي طاف ع قولة جسوم
احلام: بس عليج..

وبدلت البنات الموضوع وتمن يسولفن شويه وظهرن عقب برع فالصاله وكملن اللمه ويا الاهل ..

****

نايف كان توه طالع من حجرته من بعد ما قام من نوومه مريحه واحلام حلوه .. مزاجه كان راايق ع الاخر .. نزل تحت وشاف امه ولطيفه ونواري يالسين يشوفون التلفزيون .. صبح ابهم ويلس وياهم ..

مريم: لطيفه قومي هاتي لاخوج ريوق
لطيفه وهي تطالع نايف: انزين بندلعك نحن ها الاشهر وعاد عقب انسانا
نايف: هههههه خلاص عقب عاد شو ابابكن .. عندي حرمتي
نوره وهي تطالع نايف وامبطله عيونها: انا بعد ماتباني!!
نايف: هي انتي بعد ماباج.. عقب بروحي بيكون عندي نونو
نوره وهي محرجه: حمار واحد .. بضربه النونو مالكم.. ماحبكم
نايف شل اخته فحضنه وقام يلاكشها وهي تصرخ ماتباه ..
نوره: مااابا ماابا
نايف: فديت نواري .. بشلها ويانا وبحوطها ويوم بيينا نونو هي بتكون ماماته الثانيه..
مريم تضحك عليهم وتدعي من ربها فخاطرها انه الله ما يحرمهم من ها الفرحه مول.. دخلت لطيفه وهي شاله وياها صينية ريوق نايف ..
لطيفه: وين احطلك اياه .. ع الطاوله ولا؟
نايف: لا هنه حطيه تحت ..

وحطت صينيه الريوق ويلس ياكله كم لقمه .. ويلقم نوره وياه ..
لطيفه وامها قامن يرمسن عن الملجه واستعداداتهن ..

لطيفه: انزين اميه الحين الفساتين ما دبرناهن
مريم: بنات خالكن احيدهن بيسيرن اليوم يشترلهن جاهزات
لطيفه: انزين عيل خلنا نسير وياهن
مريم: امايه تقولي سارن عند امهن بيسيرن وياها
لطيفه: ااهاا
نايف: انزين هن وين بياخذلهن؟
مريم: مادريبهن والله ..
لطيفه: انا بدق لريم وبشوفها ..
نايف: انزين ريم تزهبت؟!
مريم: امس ماكانت مداومه وسارت ويا ناعمه دبي يدورن فساتين عند هالمحلات اللي يبيعن في الشارجه.. شكلها ما عيبها شي .. وبيسيرن اليوم بعدهن يدورلها
نايف: اهااا
لطيفه: عيل برمس ريم بشوفها وين بيسيرن.. والمكان اللي بيشوفن فيه فساتين حلوه ع طول بنسيرله بدال ما نضيع وقت فالتدوير..
نايف: خلاص انتي تخبريهن وين بياخذن وبوديكن عقب الغدى
لطيفه: ياااسلام ع الطيبه .. ها كله عشان ملجتك يعني .. عسااك دووم
مريم: يالله يا انتن ماتشكرن وحليله نايف امبونه يوديكن ويردكن ما يقصر فيكن
لطيفه وهي تطالع نايف: واافديت اخويه انا .. بسير اقول لاسوم عيل

وطلعت لطيفه من عندهم وعلى طول سارت فوق عند اسما عسب تخبرها عن السيره .. وقامن يخططن شو الالوان اللي فخاطرهن يلبسنها وكيف اشكال الفساتين يبنها .. ودقت لطيفه لريم تسألها وين خواتها بياخذن فساتينهن وخبرتهم ريم انهم هم بعد عقب الظهر بيسيرون الشارجه ودبي عسب البنات يدورلهن فساتين .. واتفقن يخلن امبينهن اتصال ..

****

تجهزن البنات عقب الغدى عشان يسيرن دبي .. دخلت ساره غرفتهن ولقت فجر يالسه ع السرير وتدقدق على لابتوبها .. فكرت تعزمها وياهم دبي .. في هالفتره فجر وايد هاديه ومالها خص فالبنات خصوصا من عقب وفاه ابوها ..وفكرت ساره انهن يكسبنها بدال المغايض اللي بينهن ..
ساره: فجر انتي مشغوله ؟
فجر: لا ليش؟
ساره تقربت ويلست ع سرير فجر : نحن بنسير نشتري لملجة ريم ما بتين ويانا انتي بعد تاخذيلج شي للملجه!
فجر: هه ليش انا بحظر!
ساره: هيه كيف ماتحظرين لازم تين .. يلا تعالي ويانا ..
فجر:ماظن اني بحظر
ساره: انزين ماعليه تعالي بتتشرين للجامعه او أي شي
فجر: ماعرف

فجر سكتت هي ماعندها شغله وميلسه تكتب اسايمنت بس هذا لاحقه عليه شو بيستوي لو سارت وياهن وغيرت جو هي مب خسرانه شي .. ومب لازم تشتري للملجه لانه عبير ما بتسير فهي ماتبى تسير وبعدين توه خبر وفاة ابوها ما كمل فما بتقدر اتجامل وتسير لا هي ولا اختها ..لكن تقدر تستغل الوقت وتتشرى اشيا ثانيه وتستفيد من طلعة اليوم بدال اليلسه بروحها فالحجره..

فجر: في مكان؟
ساره: هي شي لانه بنطلع سيارتين نحن وبنات خالي راشد ومحمد فما بتكفينا اصلا سياره وحده
فجر: عبير بتروح بعد ؟
ساره: لا مالها بارض .. يالله قومي تلبسي عشان يمدينا ندور وان شاء الله نخلص اليوم كل شي
فجر: انزين بشوف عبير
ساره: انا مرمستنها .. يلا قومي ..

ابتسمت فجر ونشت تتلبس .. صح وايد اللي بيسيرون لكن هي تفكر في نفسها بس ولازم تستانس يوم الظهره يتها لين عندها ..
تلبسن البنات وظهرن وفي السياره يلست فجر حذال ساره وبدوا ياخذون اكثر ويعطون في السوالف ويا بعض .. وتنوعت سوالفهن بين اللبس اللي بياخذونه للملجه لسوالف الجامعه لين رن تلفون فجر اللي كان بحظنها وقطع سوالفهم ..
انتبهت فجر للتلفون وشافت الرقم اللي ظاهر عليه رقم سلطان .. ارتبكت ماعرفت شو تسوي .. خافت انه ساره شافت الرقم وعرفته .. سكرت صوت الرنه وحولته سايلنت وحطته في الشنطه ورجعت تحاول تكمل السالفه ويا ساره ..
ساره: ليش ماتردين؟
فجر: رقم غريب ما اعرفه .. خله يولي .. المهم كملي
ساره ماهتمت وايد للموضوع ورجعت كملت سالفتها ويا فجر .. لين وصلوا المكان اللي يبونه وبدوا يحوطون ويدورون لهم فساتين ..
فجر انعزلت شوي عنهم وبدت تمشي بروحها وشلت تلفونها واتصلت بسلطان ..
فجر: الوه
سلطان: يامرحبا الساع
فجر: مرحبتين
سلطان: اشحالج فجر
فجر: تمام انت شلونك
سلطان: الحمدلله .. اتصلت بج مساعه مارديتي
فجر: كنت بالسياره مع بنات خالتك رايحين دبي .. الله يهداك اتصلت والتلفون كان على ريولي مادري بعد شافوا الرقم والا لا
سلطان: منو بنات خالتي ؟ بنات خالوه عليا ؟ لا تحاتين مايعرفونه رقمي
فجر: اوكي بس يعني انا لمن اكون في البيت يعني شوي حاسب هذيل يمكن مايعرفون الرقم بس الباقين يعرفونه وانا ماحب تصير لي مشاكل
سلطان: اوكي انا اسف مب متصل مره ثانيه الا يوم تكونين في الشارجه .. تمام جيه
فجر: زعلت ؟
سلطان: لا افا ليش ازعل انا بعد مابا اسويلج مشاكل .. المهم بغيت اسالج عن الاسايمنت ؟
فجر: ايه سلمته
سلطان: ماعطوكم العلامات؟
فجر: لا ويه بعده الاسبوع اللي ياي يمكن
سلطان: يالله ان شا الله تاخذين علامه حلوه بشريني عاد
فجر: ان شا الله
سلطان: ماطول عليج عيل خذي راحتج
فجر: اوكي مشكور .. باي
سلطان: باي

ورجعت فجر تكمل حواطتها ويا البنات وهن يدورلهن فساتين للملجه.. بعد ما نهد حيلهم من الحواطه حصلت كل وحده منهن على فستان حلو ومناسب لملجه .. اما فجر كانت تحوط وتتشرى بدل حق الجامعه.. ساره ومي واحلام حصلن فساتين شوي فيها حركه لكن بعد بسيطه .. واللي تموا التوم ومديه وايمان بنت راشد .. شافن عليا وميره انهم ياخذون قطع ويفصلونها الهن وبيمديهم يخلصون لان جدامهم اسبوعين.. اما عزه وريم كانن بروحهن يتمشن ويشاورن فالفساتين اللي عايبه ريم ومب مستقره للحين لاي فستان بتاخذه وعزه كل شوي تتمدحلها فواحد .. لين شافن فالاخير فستان كان واايد راهي وحلو وفخم نست ريم كل الفساتين اللي كانت شايفتنها ودخل فخاطرها ها الفستان وعلى طول طلبت انها تقايسه..

وفليل .. ع الساعه 10 ونص وصلوا البيت وهم منهدين من التعب .. وتمن البنات يجربن فساتينهن ويراون يدتهم وعبير .. وعليا راوت عبير صورة قطع البنات اللي فصلوهن اليوم وتمت متلومه من عليا انها تحملت صدعة البنات اليوم بروحها ..