رد: قـــلـــوب تـــحـــت الـــمــجـــهــــر**
 

الجزء السابع عشر

******************
(الخميس)30 سبتمبر 2004
******************

بعد مرور أسبوع ..الظحى في بيت سيف ..
نزلت ناعمه من السياره وبطلت الدبه .. وساره نزلت من الصوب الثاني وفتحت باب السياره الوراني ..

ساره: نعوم زقري ع البشاكير وايد أكياس
ناعمه : دقيلهن هرن

ضربتلهن سارة كمن هرن وتوجهت عقب صوب ناعمة وساعدتها فتنزيل بعض الأكياس لين ما يت نجمه ..

نجمه: الله ماما شو هذا كله
ناعمة: شو شو هذا .. حق الله ترا اليوم
ساره: هذا كله يباله تقرطيس وعباله .. متى بنخلص!
ناعمه: ماعليه بنتساعد كلنا .. نجموه شلو ها الاكياس وودوها الصاله ..
نجمه: جين ..

ودخلن البيت ..ناعمه توجهت للصاله عسب تراوي نجمه وين تحط الأغراض. أما ساره على طول سارت فوق تشوف خواتها شو يسون .. كانت ريم يالسه ويا مها وترمسها عن ذكرياتها ومها تسمعها مستمتعة باللي كان يصير قبل ما تنولد هي ومهره .. ويوم انتبهن لساره اللي كانت واقفه وراهم سكتت ريم ..

مها: انتي وين سرتي؟
ساره: سرت ويا نعوم السوق .. ناخذ مال الليله.. الباجيات وين؟
ريم: فحجرهن
ساره: اها .. كملي القصه ريم .. ولا تنسين تقوليلها شو كنتوا تسووبنا انتي ونايف

ريم احمرن خدودها على ها الطاري وساره ابتسمت بخبث وروحت عنهم ..

مها: هااا شو كنتوا تسووبهم
ريم: ههههه خس الله الهوش ... ساروه الا تسوي سوالف
مها: لا عااد رمسي
ريم: ماشي مهوه .. عادي كنا نلعبهم ونقص عليهم
مها: هههه يا الشر .. وبعد

سكتت ريم عن مها وما ردت على أسئلتها .. مسحت ع شعر مها وهي تغمزلها.. ردت حجرتها ويلست على طرف السرير .. فتحت لعمرها باب للذكريات .. مرت عليها أحداث صارلها دهر .. كانوا صغار يلعبون يركضون يضحكون .. دار عليهم الزمن وفرقهم ..
السبب كله كان هو ها الشخص اللي كبرت وهي تتجنبه .. والحين ..
تعيش وياه تحت سقف واحد .. تتعامل وياه ..
معقوله المياه ردت لمجاريها .. لكن ريم مستحيل تنسى اللي سواه قبل..
غمضت عينها وطاحت ع السرير .. حطت ايدها ع راسها كأنه شي متعوده عليه ..
تعودت ع الصداع لو أنه ما قام يزورها الا من فتره لفتره ..
خاطبت عمرها أنها أقوى من جي .. صارتلها أمور وايده خلال ها الاشهر خلتها تكون أقوى.. تتغلب على آلام الصداع وآلام الذكريات .. الا ها الايد الي ما لقتلها تفسير.. رصت بعيونها وهي تتخيل ها الايد .. حطت ايدها على ويها تخبي النور اللي تتهيئ انه سطع عليها ودمعت عينها .. قامت تتأوه ع الخفيف .. ويلست وهي تحاول انه تتغلب ع الصداع وما يهزمها ..
صوت فمخيلتها قام يهمس .. تعرفه زين .. ميزته ..
بطلت عينها بسرعه وشافت كل شي هادي فحجرتها .. كل شي ساكن وفمكانه .. قامت من على الشبريه وسارت صوب الدريشه .. وتمت تتأمل بيت عمتها .. مشاعر فداخلها متضاربه والآم فراسها ..
الملجه تحدد موعدها .. والمواجهه يايه لا مفر منها .. لكن هي شو بيكون حالها فذاك الوقت ..
مسحت دمعتها اللي نزلت غصب عنها وعاهدت عمرها انها من اليوم ماتكون بها الضعف اللي يخلي ألمها يتغلب عليها..
طلعت من الحجره تبى تبدد احاسيسها المتداخله وسارت الصاله.. ها المره حصلت مي يالسه تشوف التلفزيون ..

مي: ريموه قومي ننزل نسوي اكياس الليله .. الحين 12 الساعه واليهال من الظهر يهجمون
ريم اطالعتها وتحس انها تبى أي شي يغير تعكيرة مزاجها..
ريم: يلا انزين خلينا ننزل
مي: اوكي .. بشوف مهوه ومهره

وطت مي الريموت من ايدها وركضت لحجرة التوم تزقرهن .. ونزلن كلهن الصاله وشافن يدتهن هناك ويا نجمه يرتبن الاكياس .. ويلسن وياهن يساعدنهن ..


****

الظهر كانت بدريه طايحه في سريرها .. تحس بأرق وتعب ها الأيام وماتعرف شو سببها .. ماكان الها خاطر لشي..
اندق عليها الباب وانفتح ع طول .. كانت ام ريلها داشه تتطمن عليها ..تقربت من سريرها ويلست ع طرفه ..

ام عدنان: بدريه .. امي شو يعورج ؟
بدريه تحركت وصدت صوب عمتها واعتدلت في يلستها: تعبانه عموه راسي يعورني
ام عدنان: مايتي تاكلين ويانا اميه عشان اعطيج بندول
بدريه: لا ما اشتهي بطني يعورني
ام عدنان: من شو يعورج ؟
بدريه: ماعرف عموه
ام عدنان: ويهج مصفر وحالج مب عايبني موول .. مايكون انتي حامل وماتدرين بعمرج ؟

بدريه فتحت عيونها على آخرها وبدت دقات قلبها تزيد.. معقوله تكون هذي اعراض حمل .. وطت راسها وهي مرتبكه وتفكر
ام عدنان: ههه بلاج امي استحيتي .. جان هالشي طلع صدق عليه نذر لاذبج الذبايح واجسمها ع الفريج .. يالله جانه نحن من سنتين نتريا هالحمال ..

بدريه بدت ايدها تتنافض وتحس بتعب فظيع .. شو بتسوي لو هالشي صار صدق؟
ام عدنان: انا بقوم اسويلج شوربه .. اشربي لو طشونه عشان تخفين وترومين تسيرين ويايه العياده خلاف
بدريه: عياده ؟ ليش؟
ام عدنان: عشان نتاكد انه اللي فيج حمل
بدريه: ها لا عموه مب حمل ماظن ..
ام عدنان: لا لا انا بوديج وبتاكد وان شا الله بنتصل بعدنان وهوفالجزيره واكيد انه بيفرح ..
بدريه: عموه!
ام عدنان:لا عموه ولاغيره انتي طيحي ارتاحي فديتج..وانا بقوم بييبلج شوربه وشي خفيف تاكلينه والعصر ان شا الله بنطلع رباعه صوب العياده ..

طلعت ام عدنان ويلست بدريه مكانها تفكر في حالها شو هاللي صارلها .. الأعراض الي اتيها خلال ها الأيام كانت تخوفها وايد .. ومب لاقيه الها غير تفسير واحد .. والحين عمتها يتها تأكدلها ها الشي .. خافت وايد .. ماقدرت تركز فأي شي.. تتمنى بس ما تكون ها الافتراضات صحيحه ..

****

العصر كانوا البنات متيمعات ويا يدتهن فالمنامه يشاركونها فرحة الليله لأول مره وصينيه الحلويات والاكياس جدامهم .. يوزعون منها لليهال اللي ايونهم ... وياكلون منها في نفس الوقت .. وكانت معاهم ام خالد يارتهم وصديقه ام سيف..
ام خالد تاكل من اللوز وتسولف وياهم ..

ام خالد: وريم طالعه تشبه منو ؟ انا اشوفها تشبهكم يا ام سيف
ام سيف: لا لا ريم تشبه امها ويدتها سلامه اكثر..
ام خالد: عيل ماخذه المتن منج
ساره : وين ياها ريموه متينه
ام خالد : هب متينه يعني لكن مغززه و ويها مدور

كانت ريم قابظه الحصاه وتضرب فيها اللوز عشان تكسره وتطالع ام خالد وهي محتره من رمستها .. ومن غير ما تنتبه ضربت الحصاه صبعها بقوو وصرخت..

ريم: آآآآآآآآآآآآآآي
مي: حشى صاروخ ارض جوو هذا

ام سيف قرصت مي اللي يالسه عدالها عسب تسكت
ام سيف:بسم الله عليج امايه حطي ايديج في الغسول البارد اكوه..
ريم: هب بارد ها .. بقوم اييبلي ثلج مافيني يتورم عليه
ام خالد: هي عاد وراها ملجه .. تلاحقي عمرج اميه..

مي وساره كانن يطالعن ام خالد ويتاهمسن ويضحكن

ساره: سيري ورا ريموه شوفيها عن تدربح خاري
مي: خخخ وياويهج .. شوفي امايه كيف تطالعنا بنظرات حست ابنا شو نرمس
ساره: والله صدق عليها صوااريخ ..

وعلى سوالفهم دخلت سياره البيت .. ونزلوا الكل منها .. كانت مريم يايه ويا بناتها طلعتلهم مي من المنامه عسب اييون عندهم ..
وبعد السلام واخذ الاخبار .. يلسن الحريم يتقهوين .. ومها ومهره متكفلات فتوزيع اكياس الليله لليهال اللي اييونهم ومتيلسات عند دري المنامه .. اما البنات فيالسات مجابلات اكياس الليله ويقرضن منه ويسولفن ..

لطيفه: وينها ريموه؟
ساره اطالعت مي وضحكت..
مي: سارت ادورها ثلج تحطه ع صبعها
اسما: ليش بلاها..
مها: ضربت صبعها بالحصاه وهي تكسر اللوز
لطيفه: حليلها
اسما: وانتن شحقه تضحكن!!
مي: لا ماشي ماشي..
لطيفه: ساروه يبتوا فساتينكم؟
ساره: باجر بيخلصون تعديلهن
اسما: ليش شو عدلوا فيهن؟؟
مي: عريانات تراهن الشال اللي وياهن عدلو فيه وخلوه ايد للفستان
اسما: اها
ساره: وانتو؟
لطيفه: اليوم الصبح يبناهن..حلو تفصيلهن
ساره: هي زين ..
مي: احس بحماس خخخ ماشي باقي عن الملجه غير اسبوع
اسما: عاد اول عرس فبيتنا وبيتكم .. ونااسه

وهاذي كانت سوالفهن البنات لين ما يت ريم .. وبدن يرمسن عن تجهيزات البيت كيف بتكون والترتيب كيف تباه ريم ..

****

المغرب طلعت بدريه من العياده ويا عمتها وهي متغشيه ودموعها تنزل من تحت غشوتها .. ونفس الشي عمتها .. لكن الفرق بينهم كبير .. عمتها تصيح من الفرحه بالحفيد المنتظر .. اما بدريه تصيح من الضيج والخوف اللي فيها .. كيف صار هالشي.. كيف يفرحون ويستانسون وهي تاكل بعمرها من القهر ..
كيف يفرحون بها الحفيد وهي على قناعه انه ها الشي مب فصالحهم..

ام عدنان: بدريه بلاج امايه صاخه اكيد انج مب مصدقه شراتي
بدريه مانتبهت لكلام عمتها وكانت سرحانه ..
ام عدنان شلت تلفونها واتصلت بولدها وبدت ترمسه وتزف له خبر حمل بدريه..

ام عدنان: بدريه اميه هذا عدنان يبى يكلمج
انتبهت بدريه لعمتها .. زادت دقات قلبها وخافت اكثر ..
بدريه بصوت متقطع: الوه
عدنان: هلا يا احلى زوجه في الدنيا .. بدور صدق اللي تقوله امي؟ انتي حامل حبيبتي
بدريه وهي متأسفه على ها الشي: هيه
عدنان: ليش تقولينها وانتي زعلانه ؟ والا هالزعل عشان انا محد وقت هالخبر المفرح ..
بدريه: هيه
عدنان: خلاص ولا يهمج نهايه الاسبوع الياي برجع صوبكم .. وانتي تحملي على عمرج وعن الحركه الزايده .. ولاتطلعين وايد .. ارتاحي وكل شي تبينه قولي لامي بتيبه لج
بدريه: ان شاء الله
عدنان: بكلمكم انا عقب .. وكلي زين ما اوصيج .. مع السلامه
بدريه: مع السلامه ..

سكرت عنه بدريه و هيه يأسانه ..وصلوا البيت ونزلت عمتها من السياره..أما بدريه كانت تحس بعتب شديد كانها شايله جبال على جتوفها ماتقدر تنزل من السياره الا بصعوبه .. ظايجه عليها الدنيا .. لكن لازم تتصرف لازم تخبر سلطان ..
أول ما نزلت على طول صعدت حجرتها.. الوضع ماينسكت عنه .. وماتقدر تتحمل مسؤوليه هالشي بروحها..


فتح سلطان باب سيارته ولقى تلفونه يرن .. كانت المتصله بدريه ..

سلطان: الوووه
بدريه: انته وينك انا اتصل من الصبح ماترد
سلطان: بلاج محتشره انتي ؟ كنت في الصاله العب حديد
بدريه: اوكي انته وين احين ؟
سلطان: اهنه في السياره بعدني ماتحركت
بدريه:سلطان بقولك شي
سلطان: شو
بدريه: انا حامل ياسلطان
سلطان بتعجب: حامل ؟! زين مبروك
بدريه: شو مبروك ؟ سلطان انا حامل منك
سلطان وهو مصدوم: شو حامل منك بعد هاي ؟ يايه تبلين عليه انتي!
بدريه: والله منك يا سلطان
سلطان: لاتحلفين يا بنت الحلال .. سويتيها ورديتيها ع راسي انا
بدريه: انته اللي سويتها وتبريت
سلطان: شو تبريت .. حرمه معرسه تراج
بدريه: سلطان انا على حسابي حملت منك انته لانه عدنان كان مسافر قبل باسبوع
سلطان: لاحسابات ولا غيره .. انتي شعرفج
بدريه: سلطان قلتلك انا اعرف .. وانته تدري انه ريلي عنده ضعف ولو اني بحمل جاني حملت منه من سنتين .. شمعنى يعني يوم ظهرت وياك حملت
سلطان: ربج رايد عاد شو اسوي انا لاتعقينها ع راسي
بدريه: سلطااااااااان سويت فعايلك وتبريت مني
سلطان: جان خذتي حذرج يوم انج كنتي خايفه .. وبعدين قلتلج هاللي في بطنج هب مني ولاتتبلين عليه زياده .. انا الغلطان اللي عاطنج ويه
بدريه وهي تصيح: سلطان
سلطان: قولي لريلج انه ربج كتب وصار هالياهل منه وخلصت السالفه .. لاتصدعيبي يا بدور.. و تصرفي بروحج وحلي مشاكلج ومصايبج وانتي بعيد عني
بدريه: حرام عليك يا سلطان .. هذاك شو ذنبه اقص عليه و اللي في بطني شو ذنبه يربيه واحد غير ابوه
سلطان: وان شا الله تبيني اربيلج اياه ؟! واحين افتكرتي في ريلج شو ذنبه ؟ ذنبه انه خذ وحده شراتج خاينه ولاتتحمل المسؤوليه الزوجيه ..
بدريه وهي تزيد فالصياح وصوتها يقطع القلب: خذت اللي تباه وقلت عني خاينه ؟
سلطان: ماخذت شي ولا ابا منج شي .. ولاتزيدين الرمسه ويايه وتسويلي ها الافلام الهنديه .. يالله باي

سكر سلطان تلفونه وهو متظايج من اللي صار لكنه بكل قوه حاول يسكر الموضوع ويطلع منه.. اما بدريه الله يعينها ع اللي بيصير ..


*****************
(الأربعا) 6اكتوبر 2004
*****************

قامت ساره من رقادها وهي متضيجه من الحشره والصدعه اللي فالبيت .. سيايير داخله طالعه .. هرنات .. ومي مسوتلها ازعاج فالحجره وهي تناقز وتسوي تمارينها الصباحيه .. تمت طايحه وهي توها تستوعب انها فالبيت ..

ساره: ها الحشره كله والهرنات وانا فالرقاد عبالي انها اصوات الباصات وانه اليوم النزله ..
مي: هههههههههه مالت عليج .. والله راحه يوم تنزلين بسياره ..
ساره: حراام طوفنا علينا ها الثلاثا ..
مي: شوف شو حااتت ..قومي بسج منخمده ها الكثر .. بتي 12 الحين ..
ساره: بس فكينا..
مي: واحد ثنين واحد ثنين .. والله الرياضه حلوه .. نشاط ..

وبعد ما خلصت مي تمارينها الخفيفه .. خذت الروب من على الشماعه ودشت الحمام تتسبح .. وساره قامت من على الشبريه وهي متضايجه من مي ومن حشرتها .. وايقت فالصاله شافت ريم واقفه تستعد انها تطلع ..

ساره: وين سايره؟
ريم: وعيتي انتي.. بسير تحت بشوف شو يسوون
ساره: هي زين ..

طلعت ريم من الجناح ومرت ع جناح قوم ابوها تشوف ناعمه رمست الحنايه ولا لا.. ماحصلت ناعمه وخمنت انها تحت ..
نزلت ريم وهي تشوف البيت كيف معدل .. ووقفت عند باب الفله وشافت ياييبن الطاولات ويرتبونها فالحوي .. رجعت الصاله .. وماحصلت حد .. يلست ويت فبالها امها .. قبضت التيلفون واتصلت بها ..

عليا: هلا بالعروس
ريم: اهلين بـ ام العروس
عليا: فديتج والله .. شهباتج اليوم
ريم: مم يعني .. عادي
عليا: ماعليه .. بتحسين بالعادي باجر
ريم: هههههه حليلي.. اميه عاد مب تخونين فيني وما اتين
عليا: لا فديتج كلنا بني ان شاء الله.. بس انتي الله الله فعمرج باجر ما اوصيج قري على عمرج قبل ما تظهرين ع الحريم .. ولا تخافين مول.. وها الصداع يا ويله ان ياج
ريم: ههههههه لا يهبي .. خلاص نقاومه الحينه
عليا: هي زين .. الله يهنيج يا امايه ويبارك لج فنايف ان شاء الله
ريم: امين ان شاء الله
عليا: وين الناس عيل عنج
ريم: مادري يا اميه .. لاهين شكلهم .. الحين ابا نعوم ماعرفها وين سارت
عليا: ليش سو تبيبها
ريم: رقم الحنايه عندها ابا اشوفها رمستها ولا .. ماعرف متى بتي
عليا: هي .. قومي عيل فديتج رمسي حرمة ابوج.. الحنايه ما بتلحق عقب .. كم وحده انتن ماشالله ..
ريم: بدقلها ع تيلفونها بشوفها
عليا: خلاص عيل فديتج ..
ريم: سلمي ع الاهل
عليا: ان شاء الله يوصل فمان الله..

سكرت ريم عن امها واتصلت بناعمه تشوفها وين هيه .. وطلعت ناعمه طالعه ادل الحنايه ع بيتهم .. سكرت عنها ريم وسارت فوق تشوف خواتها اذ قامن ولا عسب يكونن جاهزات اول ماتي الحنايه وما يتأخرون .. وبما انه خواتها بيبدون قبلها في الحنا رجعت مره ثانيه تحت تشوف يدتها ولقتها يالسه في المطبخ التحضيري اللي داخل الفله ..
ريم: امايه انتي اهنه ؟
ام سيف: ها امي .. يالسه اتريا نجموه من الصبح مادريبها شو تعابل برع
ريم: شو تبينها ؟
ام سيف: اباها تحنيلي راسي
ريم: انا بحنيلج اياه
ام سيف: لا لالاتحنين ولا تعنين انتي عرووس بتوصخين ايديج
ريم: امايه عنبو مابحني بديه انا بحنيلج اياه بالقفاز
ام سيف: لا تعبلين عمرج خليه نجموه بتي
ريم: عاد انا في خاطريه انا احنيه بترديني ؟ اعرف احني لاتحاتين متعوده احني امايه سلامه
ام سيف: انزين برايج حنيلي اياه
لبست ريم القفازات وهي مستانسه وبدت تحني شعر يدتها ..
ام سيف: تشوفينه هذا شعري .. يوم ياخذني يدج .. حرمتين يسحولي اياه من طوله والا انا بروحي ماروم له لكن طاح كله ماتم منه شي
ريم: خساره ماكانت عندكم صور والا جان شفناه احين .. عيل انا شعري الا شراتج
ام سيف: لا ولا طشه شعرج هالنتفه بعد تسمينه شعر
ريم: حرام عليج امايه شعري طويل انا .. بعدني ارحم عن ميوه وساروه
ام سيف: هذيلاك عاد خليهن في صوب.. بنقول ساروه زوين طوله الحين نص ظهرها الا ميوه شعر صبيان .. ها اتحملي عن يوصل الحنا ع يبهتي ويوصخها
ريم: لا لا اشوفه لاتخافين ..

ويلست ريم تحني شعر يدتها وتسولف وياها سوالف امتزجت بين ماضي يدتها وحاظر البنات ..

****

دخل نايف البيت الظهر ويا امه راجعين من السوق و وياهم عمار .. اما اسما ولطيفه كانن يالسات في البيت ..

عمار: اخ يا راسي هلكنا هلكنا
نايف: عدال عاد ماجنه انا اللي اسوق
يلست مريم ع الغنفه وفصخت شيلتها : صبيلي قهوه اسموه راسي يعورني
لطيفه: بسم الله بلاكم ؟
عمار: هلكتنا امج ماخلينا محل مواعين ماسرناله .. الا هالدله مب زينه لا هذي مب غاويه .. لا هذي تبرد .. لا ماشي من هذي درزن ابا كلهم شكل واحد .. ذبحتناااا
مريم: اوص انته مسود الويه .. يزاتي ابالكم الزين والعدال
نايف: فديتج والله يا ام نايف ماتقصرين انتي الخير والبركه
اسما: انزين واحين خذتوا الدلال ؟
عمار: هيه خذناهن
مريم: وييييه اندوج
اسما: شووووو
مريم: ماخذت مداخن
عمار : السموحه انا ساير حجرتي
نايف: شو مداخنه امايه بعد ؟
مريم: مداخن حق الدخون بعد شووو
لطيفه: خذيهن طقم كامل ويا العطور بتلقينهن
مريم: قومي البسي عباتج بنسير نطالعهن
نايف: وين احين القايله ؟
مريم: تبى الحين قوم ماتبى هب لازم نسير.. ملجتي والا ملجتك
نايف: انزين ماقلت شي انا لكن ارتاحي امايه وتغدي وبنظهر خلاف بروحه راسج يعورج ..
مريم: ماعليه .. بقوم بسير اصلي انا وبطيح شوي لكن لاتخلوني وايد تعالوا وعوني يالله يمدينا نخلص
نايف: اسميها سالفه
لطيفه: منك انته مستعيل ماعطيتنا وقت نسوي شي لو عندنا وقت مابننكظ جيه
نايف: لاحول انزين خلاص احين حصل خير وتراني وياكم احين افازعكم وحاول ما اقصر بعد شو..
مريم: قصورك بعد تقصر في عرسك
اسما: افا هزأوا المعرس
نايف: تأبى المرؤه ان يتهزأ المعرس ولكن بعتبرها مداعبات خفيفه من الوالده قبل ماستوي ريال ع ذمه حرمه
لطيفه: ههههه احين الحرمه ع ذمه الريال هب الريال ع ذمه الحرمه
نايف: كله واحد
مريم: الله يوفقكم يالله بقوم انا
نايف: لطوف وعيني انا بعد بسير ارتاح
لطيفه: اوكي

وطلع نايف حجرته .. مرتاح ع الاخر ها الايام وخصوصا وهم يراكضون ويجهزون للملجه .. يحس انه ملك الدنيا كلها .. ووده بسرعه ايي يوم الملجه عسب يرتاح من همه وياخذ ويعطي ويا ريم ..

****

كانت نايمه ع سريرها وقت مانفتح الباب .. حست بالنور اللي داخل من الباب منعكس ع الجدار اللي مجابلنها وصاحب النور انعكاس ظل ..
بحركه بطيئه التفتت لوراها ولقته يتقرب منها .. لا اراديا ارتفعت من طيحتها وبدت علامات الخوف تجتاح ملامحها ..
تقرب منها ويلس حذالها ولما قرب ايده من راسها حست بالخوف يسري في اطرافها

عدنان: هلا حبيبتي
بدريه مب قادره ترفع نظرها وتركزه في زوجها : اهلين الحمدلله ع السلامه
عدنان: الله يسلمج .. وعدتج اكون موجود نهايه هالاسبوع وييت
بدريه وهي مازلت تتحاشى نظرات ريلها: حياك الله ماكنت اعرف انك بتوصل الحين
عدنان: من جيه بعدج راقده؟ ماعليه عاذرنج اهم شي راحتج وراحت ولدي
بدريه حطت ايدها ع بطنها وبدون سابق انذار بدت دموعها تتخاطر ..
عدنان: افا ليش تصيحين ؟ ييتي ظايقتج
بدريه مب عارفه شو تقوله .. يحز في خاطرها وايد اللي تسويه لكن ماباليد حيله ..
شي مؤلم تشوف ريلها فرحان بولده اللي في بطنها ورغم هذا مب ولده ..
لكن لازم تحاول تتاقلم عشان تستمر حياتها بدون فضايح او مشاكل ..
عدنان: بدريه
بدريه رجعت لارض الواقع وحاولت ترجع بدريه الاوليه اللي تقدر تتصنع في تعاملها: لا الغالي انا اصيح من فرحتي بشوفتك وفرحتي بولدنا ..
عدنان ابتسم لها وتقرب منها .. ولازم على بدريه من اليوم ورايح ترسخ في بالها قبل بال غيرها انه اللي بطنها ولد عدنــــــــــــان ..

****

فليل ع الساعة 11 .. كانوا عيال سيف كلهم يالسين فصالة البنات فوق من عقب ما رقدوا الكبار .. حتى عفرا اللي بعدها ما تعودت فها الأشهر على خواتها .. قامت وايد خلال ها الايام تكثر من يلساتها وياهم ..

ريم: يلا عاد ابا اسير ارقد .. مافيني باجر ويهي يتم مصفع.. ابا اعق ها الحنا تعالن ساعدني
مي: لا بعده ريموه ما جف تمي ..
ساره: اللي فريولج بعده لين .. لاتستعيلين
ريم: اف مليت ..
جاسم وهو يشوف الحنا: افف بااجر .. ريموه بتكسر كل حد
ريم: ههههههه ليش تراني ضعفت شو اكسرهم بعد
جاسم: لا لا بتكسرينهم بحلاتج..
مي:الله الله .. آآآويلي ويييلااه عليك يا جاسم
ساره: يا الهرم يا جسوم وجي انا ما بكسر
مايد: الحين عاد جسوم بيساحل كل وحده منكن ههههه
جاسم: جب جب انته جي مصلحجي تحراني
مها: ريموه كيف بيكون شعورج باجر يوم بيدخل نايف

ريم اطالعت مها وابتسمت ع رمستها .. ماردت عليها لانها هي بروحها ماتعرف شو بيكون موقفها ها الوقت .. حست بقشعريره وهي تتخيل بس كيف بيشوفها نايف وهي بكامل زينتها باجر ..

ساره: اوه ستحت ريموه ما بتجاوبكم
مي: قومي قومي ساروه بنمثل دور ريم ونايف
ريم: ايه اصطلبن
مي: يلا ساروه انا عاد نايف .. وانتي يلسي ع الغنفه اونج ريم ..
مهره: يلا ونحن يهال العرس ههههه

ارتبشوا الكل وريم مفتشله ع الاخر ..

مي: جسوم عطني وحده من غترك بسرعه
ساره: انا بسير شوي ارتب عمري واتعدل ..

سار جاسم ويابلها غتره شال لونها بيج .. شافت الغتره واطالعت جاسم ومايد .. بنية مايد اكبر من جاسم .. فيه طول ماشالله وعرض شوي .. وقفت حذاله مي وشافت انها اطول عنه بشوي .. وسحبته وياها برع جناحهم وساروا حجرة مايد ..

مي: ميود طلعلي وحده من كناديرك
مايد: ليش؟
مي: تراني نايف بعد شو ..
مايد: هههههه الله يغشج .. انزين

فتح مايد الكبت وطلعلها كندوره بيج تناسب الغتره اللي يابها جاسم .. وطلعت مايد من الحجره وبدلت .. وقفت عند التسريحه وردت شعرها القصير على ورا وتغترت . طلعت شوي من شعرها ع الطرف وتمت تتطالع عمرها وهي تضحك..

طلعت من الحجره وشافت مايد فويها .. اللي تم مبطل عيونه وفاج حلجه ..

مايد: الله يغربلج طلعتي ولد حلوو
مي: هههههه هي شرااايك
مايد: لفي لفي .. ييه الشعر لين تحت الرقبه ..
مي: تروم انته .. يلا بسير اشوف عروسي
مايد: بس الكندوره شوي قصيره
مي: ماعليه برايها..

دخل مايد جناح البنات وتم يزعج ويقولهم المعرس بيدش .. ودشت عاد مي وهي موخيه براسها .. ويوم رفعته شافت ساروه يالسه ع وحده من الغنفات ولابسه فستان وناشله شعرها ومتمكيجه .. ضحكت مي وخواتها منبهرات فيها ..

مي: الله يسقمج ما صدقت خبر وسارت تتعدل
ساره: يلا انتي تعالي انزين .. ابا اشووفج
مي: وابووك يا الابو .. خل الحق عيل الحرمه تزقرني

الكل فطس من الضحك عليهم .. وريم من كثر الحركه وهي تضحك خربت حنى ريولها وتمن مها ومهره ينازعنها ويعدلنه .. جاسم ومايد يالسين ع الطرف ويشوفون مي شو تسوي .. صدق اتقنت الدور .. وعفرا تطالعهم وهي مستغربه.. وتقول فخاطرها شو ها الميانين..
ماعليه ماتنلام ما عاشرتهم..

مهره: يعلج يا ميوه .. مستويه حلوه .. اول مره اكتشف جمالج
مها: هي ما بنكتشفه الا لانها لاعبه دور الولد الحين هههه

تجدمت مي.. وساره وقفت عاد تتريا المعرس لين يوصل.. ويوم جابلتها مي.. مدت ايدها بتسلم
ساره: شو واحد من الشباب جدامج تسلمين عليه بالايد ..
سحبت ساره مي تخليها توايها وتبوسها ع راسها..

ريم: ايه عاد ساروه مصختيها.. يوم بتقلديني قلديني زين
مي: هههههه هاي مب شايفه خير خوفاتي عقب تسوي جي يوم بتعرس
ساره: جب جب يلا .. يلسي حذالي ..

ويلسن ساره ومي حذال بعض .. وتمن يسون حركات .. ساره كله تقرب من مي ومي تسوي عمرها طفرانه وتلز عنها .. ساره تحط ايدها ع ايد مي ومي تسحب ايدها .. وتم ها حالهم .. وكل حد يصرخ من صوب ويضحك من صوب .. ماحسوا بالوقت حتى .. لين شافت ريم انه حناها يبس وتقدر انها تبطله .. وتمن مها ومهره يساعدنها ..
******************
(الخميس) 7 اكتوبر 2004
******************

الساعه 12 الظهر نشت ريم على دق باب حجرتها .. تمت طايحه ع الشبريه ومالها خاطر تقوم .. رفعت ايدها تبى تعدل شعرها وانتبهت للحنى اللي فايدها .. وتمت تتأمله .. وسمعت بعدها الدق مره ثانيه ..

قالت بكسل: منووه

ردت عليها اللي كانت ادق الباب وكانت لطيفه بنت عمتها .. ابتسمت ريم يوم سمعت حسها ..
ريم: دخلي الباب مفتوح ..

دشت لطيفه وشافت ريم بعدها طايحه..

ريم: ماشالله ييتوا !
لطيفه:انتي بعدج راقده ريموه ؟ قومي راعيه الصالون بتي احين عنبو ماجنه عندكم ملجه كلكن مرقدات
ريم وهي تصلب عمرها: تعب والله امس ما قرينا .. من ترتيبات برع وديكورات للحنايه لليلسه مادري كم ساعه .. وغير ها سهرونا خواني ..
لطيفه: يحيكم عاد مرتبشين..
ريم: هي يبوج .. خبلوبي امس ..
لطيفه: والحنى شخباره
ريم: شو تشوفينه؟
لطيفه : وايد حلو ماشا الله .. نقشاته وايد حلوه .. والبيت بعد وايد مرتب وحلو
ريم: صدق؟
لطيفه: هيه ..يالله قومي عشان راعيه الصالون بتوصل احين بتبدابج مافينا نتأخر..
ريم: اوكي خواتي نشن ؟
لطيفه: اسوم سارت توعيهم ..
ريم: عموه تحت ؟
لطيفه: لا بتي خلاف يالسه تزهب طوس الحلوى .. وماعرف شو بعد
ريم: هيه فديتها اوكي بقوم اتسبح انا وبييكم ..
لطيفه : اوكي .. يالله اترياج بيلس فالصاله ..

طلعت لطيفه عن ريم .. وقامت ريم تتسبح وطلعت لخواتها لقت عافسين الصاله كلها عشان راعيه الصالون وصلت من دبي .. بدت في ريم .. سشورت لها شعرها ولفته وخلته .. وبعدين بدوا الباقين يتعدلون .. خلصوا كلهم ع الساعه 6 المغرب..

بعد صلاه المغرب وصلوا الريايل وتيمعوا فالخيمه اللي كانت مسوايه جدام البيت..واغلب اللي وصلوا خوال ريم وعيال خالها .. الاهل بس يعني ..
في هالوقت وصل المليج .. وريم كانت يالسه في الصاله اللي فوق ويا بنات عمتها بس اما اهل امها محد منهم وصل ..
انفتح باب الصاله وكان جاسم داخل وهو كاشخ ..
جاسم: هود يابنات
لطيفه: شوفن اخوكن انتن .. دخل وعقب هود
جاسم: براااايه .. المهم ترا ابويه وصل
ريم: انزين
جاسم: شو انزين قومي بتوقعين
لطيفه: وين تقوم خل خالي يدخل عادي
جاسم: انزين تلحفوا
ساره : ايييييييييه شو يتلحفون هذا خالهم
جاسم: اوف شدارني انا سوي طااف.. ابوووويه تعال سويت لك درب
دخل ابوهم سيف وسلم على ريم
سيف: ريم تعالي عند الباب بيسالج المليج
ريم: ليش يسال مايستوي اوكلك
سيف: رمسناه ماطاع يالله تعالي عشان الشهود بعد يسمعونج
ريم: منو الشهود؟
سيف: خالج محمد وبطي عم نايف
ريم : انزين شو اقول
سيف: بلاج زايغه بيقولج موافقه جان موافقه قولي هيه
مي: قصورها تقول لا بعد وهي ميلسه بالفستان والناس تحت
سيف ظحك ع تعليق بنته
ريم وهي تلعب بخاتمها ومتوتره: انزين
ساره: ريموه جان ماترومين تقولي موافقه انا بقول
سيف: لا مايستوي قري انتي محلج ..
طلع سيف برع وقرب بالريايل صوب الباب وريم منخشه ورا باب الصاله ..
المليج: ريم تقبلين بنايف زوج لج ؟
ريم: هيه نعم
المليج: ماعندج أي شروط
ريم: لا ماعندي
المليج: خلاص مبروك
دخل ابوهم سيف وفي ايده الدفتر ومي بعدعا قابظه كميرا الفيديو تصور من اول مادخل ابوها لين يلس حذال ريم ..
ساره: مقواج ياريموه وتقولين خايفه .. قابظه للمليج هيه نعم
ريم: عيل شو اقول
سيف: ماعليج منها .. وقعي اهنه وين مكتوب الزوجه
ريم كانت ايدها تتنافض .. وتوها بتوقع الا صرخت مي
مي: لاااااا صبري
سيف: شوو
مي: صبروا خلوني اصور الورقه عدل كامله واصورها يوم توقع
سيف: قفزتينا حسبي الله ونعم الوكيل
وقفت مي ع راس ريم وهي توقع وبعد ماخلصت توقيع حصلت على طول قرصه على ركبها من ساره
ريم: ايييي
ساره: اسفه بس عشان اعرس عقبج على طول
اضحكت ريم ع تعليق ساره..
سيف حب بنته ع راسها وزغرطت لطيفه وقاموا البنات يسلمون على ريم وطلع ابوهم ونزل تحت ..
وشغلوا البنات الاغاني وارتبشوا .. واهنه يوهم بنات خالهم محمد وعزه بنت خالهم.. وتيمعوا البنات فوووق والامهات تحت ..
ويت عقب المصوره واستلموا ريم يصورونها .. وكل شوي وحده من خواتها تصور وياها وبنات عمتها وبنات محمد .. وعقب خلوها ونزلوا عنها تحت يشوفون الربشه كيف.. وبعد اذان العشا بدوا الحريم يتيمعون اكثر .. كل اهلهم وصلوا الا امهم .. بعدها مايت ..

كانت ام سيف لابسه مخوره زيتيه ومطرزه وفوقها عباتها وتحوط بين الطاولات ومعاها بنات ولدها تراويهم ربعها اللي ماشافوهم وتعرفهم عليهن .. وفرحتها ماتوسع بلد ..
ساره: اوهووووو ميوه
مي: شو ؟
ساره: هاكيه الصاروخ
مي: ام خالد ؟
ساره: هيه
مي: اقري على عمرج
ساره :هههه انزين طوفي

سلموا البنات على الحريم ويلسوا شوي ويا اهل امهم ورجعوا فووق عند اختهم وكانوا يتنقلون بين فوق وتحت ..
صارت الساعه 9 وكان لازم ريم تنزل الحين ..

مريم : يالله حبيبتي قومي بتنزلين على الحريم عشان يتعشون
ريم: مب نازله قبل ماتوصل اميه
مريم: وينها هيه ؟
ريم: الحين يايه في الدرب
مريم: ليش متاخره هي .. ام العروس يحتاي اول وحده تكون موجوده
ريم: يوم بيكون بيتها يا عموه هب بيت طليقها

مريم سكتت ماعرفت شو تقول ويلسوا يتريون عليا ..
دخلت عليا بيت طلقيها سيف اللي رفضت فالبدايه انها تحضر ها الملجه ورفضت تدخل ها البيت مره ثانيه .. لكن يية ام سيف كان الها الأثر الايجابي فنفس عليا وكل اهلها .. وكلهم ساروا وهم خواطرهم طيبه ..
واستقبلتها شيخه اختها عند الباب .. مشت ولقت ناعمه وام سيف يالسين على كراسي في الجهه اليمنى عند الباب .. والجهه اليسرى عليها ميره وامها .. اما فجر وعبير فضلوا يكونون فالبيت وما ايون الملجه والكل قدر تصرفهم لانه عبير بعدها فقلبها حزن على وفاة ابوها اللي كانت عايشه على امل انها تشوفه ..

تقربت عليا من ام سيف وسلمت عليها .. ام سيف اول ماشافتها تدخل البيت وهي عينها عليها .. لين يت بنفسها عليا وتقربت صوب ام سيف وسلمت عليها..
عليا: اشحالج ام سيف؟
ام سيف: الحمدلله بخير ونعمه.. نورتي يا ام جاسم..
عليا ابتسمتلها: بالبركه عليج ملجه عيالج ريم ونايف .. وربي يبارك لهم ان شاء الله
ام سيف وهي مغتبنه: يبارج في عمرج يالغاليه .. سيري لبنتج فووق تترياج
عليا : ان شاء الله

سلمت عليا على ناعمه بشكل سطحي وتوجهت مع اختها شيخه فوق عند ريم وباقي البنات ..
اول مافتحت باب الصاله الكل انتبه لكن اشرت لهم ماينبهون ريم اللي عاطتنها الظهر ويالسه على الكرسي ..
وخت عليا وحبت بنتها ع راسها .. التفتت ريم ولقت امها وراها ووقفت الها على طول.. سلمت عليها عليا وغصبا عنها صاحت .. اما ريم ميوده عمرها وتقاوم دموعها اللي تيمعت فعيونها..
لطيفه : ريمان لاتصيحين بيخترب الميكب
ريم وهي تحاول تيود عمرها: انزين ..
يلست امها عدالها وتيمعوا البنات وتصوروا كلهم صوره جماعيه .. عليا وبناتها ..
الحين كان لازم تنزل ريم .. نزلوا كل البنات تحت .. وتمت ريم وامها فوووق ..
ريم: امايه بطني يعورني
عليا: يالله قوي عمرج وافردي ظهرج وارفعي راسج ماباج توطينه وخلي الدنيا كلها تشوف بنت عليا .. فديتج والله ياريم كبرتي وغديتي عروس ..
ابتسمت ريم
ريم: امايه تمي ويايه راويني وين اسير ..
عليا : ان شاالله .. بنزل جدامج وبترياج عن حافه الدري انزين ..
ريم: انزين

رد: قـــلـــوب تـــحـــت الـــمــجـــهــــر**
 

بدت موسيقى الزفه تدق لحنها الهادي في البدايه .. وريم نزلت من فوق بفستانها الليموني .. كان شكلها وايد متغير خصوصا انها مب متعوده تحط مكياج ..
في ايدها مسكتها الخفيفه اللي كانت على شكل طوق حوالين ايدها ونازله منها سلسلتين ورود .. وشعرها كان مرفوع ونازل شوي منه ملولو ..
نزلت شوي شوي على الدري وتحاول تركز نظرها على امها عشان تقدر تكمل مشيها .. وتعرف وين تسير ..
ارتفعت الزغاريط اول مانزلت وكانن اسما وساره هن اللي مرتبشات ..

نزلت ريم تمشي في الصاله وطلعت برع باب الفله .. وقفت شوي وهي رافعه راسها تشوف الناس وتحس نفسها مرتبكه وتشوف امها وين تاشرلها عشان تمشي .. بدت تمشي بين الطاوله وتتبع امها بخطوات متهاونه ومتزنه ..
مها يلست على وحده من الطاولات وعيونها تدمع .. شافتها عزه وسارت صوبها
عزه: مها شو فيج ؟
مها: ماشي بس غامظتني ريمان
عزه: ليش؟
مها: ماعرف
عزه: حبيبتي هي مابتروح بعيد عنكم الا بتسكن حذالكم .. ولازم تفرحيلها انتي يالله قومي مسحي دموعج ولاتخلينها تشوفج ولاتخربين شكلج يالله حبيبتي قومي ..

بعد مالفت ريم على الحريم دخلت الميلس.. وكان فآخره كوشه صغيره عباره عن كرسي ذهبي ومن فوقها طوووق ورد بلون فستانها .. وعلى طرف باب الميلس كان فيه ستاند محطوط عليه مناديس فيها الحاظر اللي يايبينه لريم مغلف بعد بنفس الوان الطاولات اللي كلها متناسقه مع الوان فستانها ..

بعد مايلست ريم بساعه .. قالوا انه نايف بيدخل .. اهنه ارتبكت وايد وكانت تتعوذ من بليس وتكبر عشان ماييها الصداع وتتعب في وقت غير وقته .. وقفت ريم تتريا دخلة نايف ..

وقف نايف عند باب الميلس ووياه خواته وامه.. وشوي ودخل الميلس.. ريم من انتبهت انه دخل وطت راسها وهو يمشي شوي شوي عشان التصوير لحد ماتقرب من ريم اللي وقفت اول ما حست انه قرب منها.. وقف مجابلنها وتقرب منها ..
وطى راسه وحبها على راسها واطالعها بنظرة استحسان رهيب من غير ماتشوف ها النظره ..وعقب وقف حذالها .. وسلموا عليها ويلسوا يتصورون مع بعض ..
عقبها يابوا العقد عشان يلبسونها .. فصخولها العقد اللي هي كانت لابستنه وعطوا نايف العقد عشان يلبسها اياه
نايف وهو يلبس ريم : هذا كيف بسكره اخاف امجع لها شعرها
لطيفه: انته سو عمرك تسكره من ورا حق التصوير وانا بسكرلها اياه
نايف: اذا جيه اوكي
سوا اللي قالوا عليه وريم موطيه راسها مستحيه وايد .. ولما عطوه الحلق عشان يلبسها اياه
نايف: هذا بعد كيف
لطيفه: لاتلبسها انته بس حق التصوير ونحن بنسوي كل شي .. اسميك سالفه..

اهنه ابتسمت ريم وهي موطيه راسها ..
وبعد ماخلصوا لبس الشبكه .. قاموا خواته عنهم ويلسوا ريم ونايف حذال بعض يتصورون .. واهل نايف من ابوه يوا يسلمون عليه وكل من يا من عماته قاله عرفت تختار ..

حاول نايف يكسر حاجز الصمت اللي بينهم وتقرب من ريم وقالها
نايف: شوفي العيايز شقى فظوليات .. على طول من يدخلن الميلس يسيرن صوب الصناديق يوايقن فيهن ..
ابتسمت ريم على تعليق نايف من بعد ما ركزت النظر في الحريم اللي يدخلن الميلس.. بعد شوي دخلوا خوال ريم وابوها .. خالها راشد ومحمد ومانع و وياهم سيف وخلفان ابو نايف وسلموا كلهم عليها وتصوروا وياها وطلعوا ..

يت عليا اللي كانت مريم ساحبتنها وياها وحالفه عليها تي تسلم على بنتها ونايف وتتصور وياهم .. سلمت عليا على نايف وحبها على راسها

عليا: مبروك وليدي الله يجعل قدمها قدم خير عليك ان شاء الله
نايف صد صوب ريم وشافتها تطالع امها وتبتسم ..
نايف: امين ان شا الله عمتي
سلمت عليا على بنتها ولوت عليها ووقفت وياهم تصورت وبعدها ترخصت منهم وروحت عنهم على طول بيتها ..


طلعوا كل الموجودين في الميلس عشان يفضون المكان للتصوير .. يلست شوي لطيفه تسولف ويا اخوها وتحاول تلطف الجو بينهم .. ونواري يالسه تلعب في سله الحلويات المحطوطه على الطاوله ويابت معاها مجموعه كاكاو ويلست حذال ريم ..
ريم خذت عنها باقي الحلويات عن توصخ فستانها الابيض وعطتها وحده بس ..والباجي حطته ع الطاوله اللي حذالها ونوره طلعت كاكاو ثاني داستنه وعطه ريم وهي تضحك .. ضحكتلها ريم اللي تمت تمسح ع شعر نواري ..
تمت تلعب بالكاكاو اللي في ايدها ونايف يسولف ويا لطيفه اللي كانت بتطلع خلاص.. ومالقت نفسها الا فاتحه قرطاسه الكاكاو اللي عندها
ماعرفت شو تسوي او كيف تتصرف ..
ان كلتها بيقول شو هاي المفجوعه من الصبح ساكته عني واحين تاكل كاكاو
من الفشله ماعرفت شو تسوي قامت مدت ايدها وعطته الكاكاو
اهنه ماقدر نايف يمسك نفسه وظحك عليها وخرب الدنيا ..
يت اسما تاخذ نواري عنهم وشافتهم يظحكون ظحكت وياهم بدون ماتدري شو السالفه وخذتها وطلعت عنهم وسكروا عليهم الباب عشان ياخذون راحتهم ويتصورون ..

كانت المصوره تسويلهم حركات .. وتخليهم قراب من بعض وريم مستحيه ومب طايعه تتقرب اكثر ..
المصوره : naif come closer to ur wife
ريم: وين اكثر عن جيه بعد
نايف ابتسم وتقرب أكثر من ريم..
المصوره: reem look to ur hasband
ريم رفعت راسها لكن موطيه عيونها
المصوره : reem look to his eyes
ريم: انزين صوري بسرعه عاد
رفعت ريم عيونها ومجرد صورتهم رجعت نزلتها
المصوره: ok reem kiss ur hasband
ريم اطالعت المصوره على طول : لااا ايه وين تبين
نايف ميت من الضحك ويطالع ريم وهي منفعله ..
نايف: يالله ريمان الا بوسه.. دفاعة بلى..
ريم اطالعت نايف من طرف عينها وهي معقده الحيات.. ضيجتبها ها المصوره قربتها منه .. خلتها تتطالع عيونه .. والحين شو تبوسه .. واللي قهرها اكثر انه نايف مكيف ع الوضع ومستانس..
وبعد مشادات في الرمسه المصوره قامت ادز ريم ع نايف وهي تنازعها تقولها انه ها ريلها عادي وشلت ايد ريم وخلتها ع جتف نايف والايد الثانيه فايد نايف مشابكين اصابعهم .. لفت ريم وجابلت نايف وخت على طول ونايف يشوفها مبتسم..
نايف: شو تبانا نرقص هاي ..
ريم تنتفض وقلبها يدق بقو .. واايد وايد قريبه من نايف تحس بانفاسه تلفح ويها..
نايف مستانس ع الوضع اما ريم بروحها فدنياها .. ماستحملت ها المشاعر وها القرب من نايف .. بغت المصوره تخلص شغلها بسرعه .. قلبها بينفطر وهي واقفه ها الوقفه جدامه..صورتهم اخر صوره بها الوضعيه.. وطلعت عنهم المصوره بعد عناء وياهم الساعه 12:30 ..

طلعت ريم من الميلس على اساس تيب عشا لنايف وكانوا اهناك كلهم يالسين
ام سيف: هاه امايه خلصتوا ؟
ريم: هي امايه بس شي تام من البوفيه !!
ام سيف: هيه فديتج دخلي انتي بطرشلكم ويا نجمه
ريم: ان شاء الله
دخلت ريم الميلس ويابت نجمه الاكل في صينيه تندز وحطت لهم الاكل
نجمه: مبروووك نايف مبروك ريم
نايف: الله يبارك فيج نجمه ..
نجمه: ها متى عروسه ؟ مايسوي عروس يوم انا بيسافر صبر انته انتظر انا
نايف: احين نحن نترياج .. انتي تريي لين نعرس عقب سافري
نجمه: ان شا الله بيشوف انا
نايف: زين .. ماقصرتي ..
طلعت عنهم نجمه وقامت ريم بتغرف لنايف
نايف: افصخي الكعب عنج ريحي ريولج .. ادريبج مب طويله شايفنج بدونه لاتعذبين عمرج وياه ..
ابتسمت له ريم مفتشله وعطته يتعشى واكتفت هي بشرب العصير ..
وبعد العشا التفت لها وابتسم ..

نايف: الله يقدرني ان شا الله واسعدج وماخلي عليج قصيره ..
ريم وطت راسها وردت عليه: وان شا الله ربي يقدرني بعد و اوفوي بواجبي على اكمل وجه ..
نايف: بارك الله فيج .. اسمحيلي انا بقوم احين .. مافيني اثجل عليج ..
وقام من مكانه ..
نايف: قوليلهم اتريا قوم امايه في السياره ..
ريم: ان شاء الله
وصلته لين باب الميلس ..
نايف: ماتامرينا على شي ..؟
ريم: مايامر عليك ظالم
نايف: يالله عيل فداعه الرحمن
ريم: الله يحفظك ..

وطلعت لهم من باب الميلس الداخلي وخبرتهم انه يترياهم برع .. وطلعوله عمتها وبناتها ..
اما هي يلست شوي ويا يدتها وسارت فووق تبدل ثيابها وترتاح ..
لقت خواتها مبدلين ثيابهم وطايحين ع السراير .. كلهم رقدوا الا مي وساره كانن بعدهن واعيات ..
ريم: بعدكن واعيات؟
ساره: نترياج
ريم: شو تتريون ؟
ساره: نبى العلوم
ريم : شو علومه ؟
ساره: قومي سيري حجرج عشان تبدلين ثيابج ونحن ياينج احين
تجدمتهم ريم لغرفتها وسارلوها خواتها ويلسوا يسولفن وياها
ريم: شو كنت طالعه اوكي؟
مي: هيه فديتج قمر 14 كنتي ربي يحفظج
ريم ابتسمت وهي تمسح المكياج من ويها ..
ساره: يالله قوليلنا شو قالج شو قلتيله
ريم: ليش شفتني انا ارمس وياه ؟
ساره: لا بس اسوم دخلت عليكم لقتكم تظحكون
ريم: هههه .. هيه بخبركم ليش
وخبرتهم ريم السالفه وتموا يتظاحكون عليها
مي: فشلتينا بيقول مفجوعه
ريم: ههه اسكتي هذا كله ما ايي شي عند المصوره الغبيه
ساره: ليش بلاها
ريم: وايد تسوي حركات مايعه حق التصوير .. اذتنا ..
مي: حركات مثل شو
ريم: الا لزي حذاله والا حطي راسج ع صدره .. وين تبى
ساره: ايووووووه يا واد هذي العلوم الطيبه
ريم: لاتفرحين ماعطيتها كل اللي تباه .. الهرمه تباني ابوسه بعد.. وين تبى
مي: هههههههاي .. لو هو اللي يبوسج بنقول..
ريم: ليش ما سواها يعني .. تتأمر علينا الا هي .. وهو كله يضحك عايبنه
مي: هههه احس فشله
ساره: ماشي فشله ويدي .. ريلها حلاله
مي: اسكتي انتي بنشوفج عقب ..

سكتت ساره وهي تطالع مي اللي تغمزلها وساره حايسه البوز ..
ريم: فديت امايه سارت من وقت
ساره: هيه روحت هي ومرت خالي راشد وخالوه شويخ ويدوه سلامه من اول ما بديتوا تصوير..
ريم: واعليه عنهم
سمعوا صوت مسج
وانتبهوا كلهم انه المسج لتلفون ريم
مي: وييييه هذا اكيد المعرس مطرش مسج
ريم: ليش يطرش ؟
ساره: هيه صح المفروض يتصل
ريم : شو يتصل ؟ برقد انا
ساره: ياربي شو ترقدين هاي ليله ملجتج رمسي فيها ريلج انتي كم مره بتملجين فيها بحياتج ..
ريم: هو قال ..بيخليني عشان ارتاح .. مب عشان ارمس وياه
ساره: يقصد تبدلين ثيابج وتتسبحين .. مب ترقدين
ريم سارت وشلت تلفونها وقرت المسج .. واول ماقرته ابتسمت
مي: شو مطرش
ريم: مسج عادي
ساره: راوينا
ريم: مسحته
مي صرخت: ليـــــــــش ..
ساره:حرام عليج لازم تحتفظين فيه هذا اول مسج يطرشه لج
ريم تحسفت: شدراني انزين
ساره: انزين شو مطرش؟
ريم: ماشي مسج يبارك فيه وكاتب اسمه فقلب وحذاله اسمي فقلب صغير
مي: ايوه يا عم شكله مزهب ها المسج من قبل.. قومي تسبحي بسرعه شكله بيتصل عقب شوي ..
ريم : انزين يالله طلعن بتسبح
طلعن ساره ومي وسارن يرقدن اما ريم دخلت تتسبح وصلت .. واثناء صلاتها كان التلفون يرن .. لكنها مالحقت عليه ..
بعدها وصلها مسج .. بعد ماخلصت الصلاه شافت المتصل نايف والمسج منه
( شكلج رقدتي الشيخه .. السموحه على الازعاج وتصبحين على خير)

ردت عليه ريم بمسج .. ( لا مارقدت كنت اصلي .. واانته من اهل الخير)

لكن شكله نايف ماصدق يحصل منها مسج على طول اتصل ..

نايف: السلام عليكم
ريم: وعليكم السلام
نايف: اشحالج ؟
ريم: الحمدلله
نايف: تحريتج رقدتي ..
ريم: لا بس كنت اصلي العشا
نايف: هيه .. تقبل الله
ريم: منا ومنك صالح الاعمال ان شاء الله ..
نايف: اجمعين .. واشحالكم بعد ؟
ريم: الحمدلله انتوا اشحالكم ؟
نايف: الحمدلله ..

سادت فتره من الهدوء .. ورجع نايف يرمس
نايف: واخباركم الطيبه ؟
ريم: الحمدلله
نايف: شو الدراسه وياج عساج مرتاحه ؟ وماشيه اوكي ؟
ريم: كل شي تمام ولله الحمد
نايف: زين زين ماشاء الله
ملت ريم قالت بتكسر روتين الاسئله عن الاحوال
ريم: ان شا الله ترتيب الملجه والتنسيق والاختيار عيبك ؟
نايف: كل شي كان مرتب ماشاء الله .. ذوقج فنان .. حتى فستانج وايد حلو كان
ريم ابتسمت بحياء : تسلم
نايف: الله يسلمج .. اسمحيلي الشيخه مابطول عليج شكلج ناشه من وقت وتعبانه سلمي ع خواتج وان شاء الله برمسج وقت ثاني ..
ريم : مسموح .. تصبحين على خير
نايف: وانتي من اهله .. مع السلامه
ريم : مع السلامه ..

سكرت ريم عنه.. تحس بمشاعر رضا وسرور من نايف.. وتمت تدعي من ربها انه يوفق امبينهم ويكون الها نعم الزوج وما يكون مصيرها نفس مصير امها اللي كان حاجز مانعنها من تقبل أي ريال فحياتها .. بس مازالت ريم تعاني من الصداع ولكن مب بالشكل المستمر اللي كان اييها قبل .. تسخير من رب العالمين ..


اما نايف اللي كان طايح ع سريره من بعد ما سكر عنها.. تم مغمض عينه وهو يتذكر تفاصيل اليوم بأدقها .. وصورة ريم ماتفارق عيونه .. ويحمد ربه ويشكره انه الله يسرله امرهم .


****************
(الجمعه) 8 اكتوبر 2004
****************

الساعة 11 الظحى فتحت ريم عيونها من بعد ما هدت حيلها الأحداث الأمسيه .. سرحت فعالم الخيال وهي تحت الفراش.. قطع عليها سرحانها صوت تيلفونها اللي كان يرن.. التفتت له قبضته بايدها تشوف المتصل .. وابتسمت ..

ريم: الوه
عليا: هلا بنتي.. راقده ؟
ريم: هيه كنت راقده بس احين بقوم.. تاخرت في النشه
عليا: هيه ما تنلامين ..اشحالج من عقب الملجه؟
ريم: الحمدلله اميه انتي اشحالج ؟
عليا: الحمدلله .. هاه متى خلصت الملجه امس ؟
ريم: عقب ال 12 جيه
عليا: ويلستي ويا نايف والا؟
ريم: لا مايلس وايد عقب التصوير تعشى وروح لانه قوم عموه كانوا يالسين وعقب وروحوا رباعه
عليا: هيه ماشاء الله.. بس وايد حلوه كانت الملجه كل شي مرتب وانتي فديتج كنتي قمر..
ريم: صدق امايه ؟
عليا: هيه غناتي .. مايهم هذا كله المهم راحتج وسعادتج ..
ريم: ان شا الله خير .. امايه انتي ليش روحتي من وقت ؟
عليا: كم بنيلس بعد .. روحنا يوم بدوا يروحون المعازيم ..
ريم: مايلست وياج ابا اشوفج
عليا: تعالولي اليوم العصر وبتردون ع العشا انا بعد ابا اشوفكم واسولف وياكم
ريم: عاد حرام ساروه وميوه بيسيرن
عليا: هيه فديتهن .. اتصلت بوعيهن ماردن عليه ..
ريم: بقوم بطالعهن .. وبنزل عند
ماكملت ريم كلامها .. شلت تلفونها من على اذنها تشوف منو متصل ع الخط الثاني

عليا: عند منو ؟..الو..
ريم: ها امايه
عليا: وين سرتي ؟
ريم: لا بس كنت اطالع منو متصل ع الخط الثاني ..
عليا: منو متصل ؟
ريم بتلعثم: اا نايف
عليا: ههههه ردي عليه وعقب رمسيني
ريم: ان شا الله مع السلامه
عليا: مع السلامه
ردت ريم ع الخط الثاني ..: الوه
نايف: صباح الخير
ريم: صباح النور
نايف: توني كنت بسكر التلفون قلت اكيد بعدها راقده
ريم: لا بس كانت اميه ع الخط
نايف: سكرتي عنها والا ؟
ريم: هيه سكرت
نايف: جان رمستيها عادي
ريم: لا ماعليه برد ارمسها خلاف..
نايف: حليلها عموه
ريم ابتسمت وتمت ساكته
ونايف بعد تم ساكت .. مب عارف شو يقول
نايف: شخبارج بعد
ريم: الحمدلله انته اشحالك؟
نايف: طيب الحمدلله .. شكلج توج كنتي واعيه
ريم: هيه نشيت ع تلفون اميه
نايف: ياحيج انا بعد توني ناش بس ياليت ع تلفون اميه .. ناش ع دق لطوف
ريم: ههه حليلها
نايف: هذا كله عشان توعيني حق الصلاه
ريم: هييه صح اليوم صلاه الجمعه .. ماقمت اشوف جاسم ومايد جان نشوا
نايف: خلاص قومي شوفيهم وانا بقوم بعد
ريم: اوكي
نايف: تامريني على شي
ريم: مايامر عليك عدو..
نايف: لا صدق
ريم: لا والله تسلم ..
نايف: اوكي عيل.. يلا قومي تنشطي ووعي خوانج .. مع السلامه
ريم: ان شاء الله .. الله يحفظك..

سكرت ريم التلفون ودخلت ع المكالمات المستلمه .. خزنت الرقم باسم نايف .. وغمظت عيونها شوي تحس انها ماشبعت نووم .. لكن لازم تقوم تطالع اخوانها جان نشوا للصلاه ..

وفي الغرفه اللي حذال غرفتها كانت مي توها ناشه ولفت ع ساره لقتها متلحفه بكبرها .. خوزت اللحاف عنها .. تضجرت منها ساره ولفت الصوب الثاني وانتبهت مي لتلفون ساره يولع .. قبضته وشافت انه امها تتصل وردت عليها ..

عليا: للحين رقوود!
مي: توي نااشه انا ..
عليا: يا الكسلانات .. قومن وراكن درب .. وميوه وين
مي: انا ميووه .. وساروه بعدها منجلبه
عليا: هيي فديتج .. عيل دقيت كم مره محد يرد
مي: تراه ع السايلنت .. وهاي الثور محطتنه تحت المخده شكلها ..
عليا: هيه .. انزين فديتج وعي اختج بسها رقاد ..يدوبكن تلملمن اغراضكن
مي: ان شاء الله
عليا: يلا عيل فمان الله
مي: مع السلامه ..

بندت مي عن امها ووطت التيلفون محله .. وقامت تتمتح وتحس انها منهده من عقب ركيض الملجه امس .. سحبت اللحاف عن ساره عسب تقوم وشغلت الليتات وبندت المكيف .. وعقب دخلت الحمام تتغسل وتتسبح بالمره ..


****

من بعد صلاة الجمعه فبيت بو راشد .. نزل راشد من سيارته ووياه مروان وفارس وهود قبل ما يدخل البيت .. اللي كانوا فالصاله ام راشد وبوراشد وعبير وعليا .. قربوبهم ودخلوا وسلموا ع اللي يالسين.. وقعدوا كلهم يسولفون يتريون الكل يتجمع عسب يتغدون رباعه ..

راشد: جي بعدها العايله ما التمت ..
عليا: انتوا اول الحضور..
مروان: هاتوا دفتر الغياب عيل مره ثانيه وحطوه ع الباب
عليا: ههههه يبالكم والله .. بناتي عيل اكثر حد بيغيب

ابتسم مروان وهو يطالع عمته .. عليا انتبهت لابتسامته وبادلته بمثلها ..

ام راشد: فديت مانع شو نسيتوه!
عليا: فديته والله اخويه .. تولهنا ع سوالفه
ام راشد: مادري متى بيعطونهم اجازه .. بسهم كرفوهم
مروان: امس فليل انا مرمسنه .. شو الانجليزي يا امايه .. مانع الثور فالانجليزي استوى احسن عنا الحين
ام راشد: ولد رشوود هب تغلط ع وليدي
مروان: ههههههههه صدق انزين .. امبونه امفشلنا مايروم يركب جمله بالانجليزي.. الحين وييين اتطور الريال
بوراشد: ههههه احيده فالمدرسه دومه راسب فالانجليزي هب فالح فيه موول
ام راشد: المهم خلص دراسه وخذله رتبه فالجيش بعد شو تبون
مروان: عاد العيوز بدافع.. ماتحق
ام راشد: غربلات بليسك انته ..

وضحك مروان على يدته وهو يسمعها كيف محتشره كل ما يطيحون فمانع.. الكل مفتقد مانع اللي كمل شهرين تقريبا بعيد عنهم ..
ها الوقت .. طلعت أحلام من حجرتها ع الضجه اللي مستويه فالصاله .. وشافت الموجودين سلمت ع الكل ويلست حذال امها ومديه اختها ..

احلام: اميه
عبير التفت لبنتها ..
احلام: وين ابويه؟
عبير: الحين بيي .. كان ساير عند واحد من ربعه اللي وياه فالجريده مادري شو يبى يعطيه والحين ياي فالدرب

احلام تذكرت شو كان شاغل ابوها امس وابتسمت.. أكيد خلصها اليوم وبيقدمها لرئيس التحرير يقراها وياخذ رايه.. تريت ابوها على أحر من اليمر عسب تسأله شو سوى فالنهايه للراويه الي كان يقرا لهم الي كتبه من فتره لفتره..

وشوي دخل سلطان البيت اللي يوم شافته امه استانست وايد .. اول مره ايي من غير ما ينقال له .. سلم ع الجميع ويلس حذال خاله راشد .. مروان استغص انه يلس حذاله .. بعده حاز فخاطره اخر موقف سواله اياه سلطان .. وتعامله وياه خلال كل ها الايام كان وايد سطحي .. فارس كان ع جنب ويا منصور ولد عمته ويسولفون رباعه ع الخفيف ..

منصور: والله شي اخويه
فارس: غريبه هو ياي
منصور: والله الكل مستغرب .. شوف علامات التعجب ع ويووه الكل
فارس: هههه هي والله .. انته شوف مروان اخويه كيف معتفس
منصور: اندووك مروان بعده ما يرمسه من عقب ضرابتهم ذاك اليوم
فارس: هيه .. حليله مروان حاز فخاطره من اخوك وسلطان ولا عليه ولا مفتكر حتى ..
منصور: تحيدونه انزين سلطان كيف..
فارس: خبز ايدنا وين ما نحيده ..
منصور: لا بس بيني وبينك .. انا احسه بدى يعتدل حاله..
فارس: ماعليك بوطبيع مايوز عن طبعه
منصور: لاوالله يا فارس يتلاحظ عليه .. شوف اليوم عندك ها بشارة خير
فارس: اخوك لوتي ماعليك ياي اليوم عسب مصلحه
منصور: ههههههه وياويهك .. ايه حرام لاتقول عنه جذه
فارس: اخوك لازم ما بيهون عليك ..

مروان التفت لمنصور وفارس ..

مروان: بلاكم تصاصرون ..
فارس: لا ماشي ..
منصور: انكت عليك .
مروان: هروم تراكم ..

سلطان اللي الكل مستغرب من ييته اليوم ومن نفسه .. كان قاعد يسولف ويا خاله عن الشغل وعن اخر المشاريع اللي ناوين عليها .. طبعا راشد مستانس وايد ع التطور الايجابي الحاصل فسلطان من فتره ..وسلطان وهو يحاور خاله كان كل شوي عينه تلف ع الموجوودين .. كان على أمل انه يدخل البيت ويشوف اللي فخاطره يشوفها .. قبض تيلفونه وطرشلها مسج يسألها هي وين ..

كانت فجر ها الوقت توها ناشه من النوم وهي متضجره بسبت الازعاج اللي فالصاله .. انتبهت انه وصلها مسج بس طنشته وما فتحته لأنها كانت تبى تدخل تتغسل عسب تروح الجامعه العصر ..و سلطان انقهر من الحركه لانها ما ردت عليه .. بس طوفها وكمل سوالفه ويا خاله

وبعد نص ساعه يا اخر شخص متأخر ع اللمه واللي هو محمد .. وتغدوا الجماعه وعقب الغدى اللي قام يرقد واللي ركب سيارته وروح واللي كمل القعده ..


****

مي كانت شاله اللابتوب وفايدها كيس وتتريا ساره اطوف عسب المشرفه اتمملهم فالباص وينزلون .. وقفت مي مجابله المشرفه وضحكت فويها ..

المشرفه: مي .. بطاقتج وين ..
مي: هيهي مدام نسيتها فالبييييت ..
المشرفه : وليش تنسينها تبينهم يمشكلونج ..
مي: والله مدام مرتبشين ها الاسبوع .. نسيت كل شي ..
المشرفه: خلاص خلج يالسه ويايه عيل..
ساره: خخخ خيسي ميوه ..
المشرفه : وانتي ساره ناسيه البطاقه
ساره: لا فديتني ..

وجيكت المدام على اسم ساره اللي خذت اللابتوب عن ميوه ونزلت من الباص ..

المشرفه: يلسي حذالي مي ..
مي رفعت حايب وابتسمت .. ويلست حذال المدام و هي تمم لباقي بنات الباص ..

مي: مدام عطيني الورقه انا بشخط
المشرفه: هههه شو تشخطين
مي: اقصد بسوي تيك .. انتي شوفي البطايق ..
المشرفه: زين اندوج الورقه ..

وبعد ما نزلن كل البنات .. ركب السايق وحرك الباص ..ومي كانت يالسه حذال المشرفه تسولف وياها وتقولها اطوفلها السالفه وتنزلها عند مبناها ماتروم تسير الاستقبال وتتريا .. لكن المشرفه ماطاعتلها ..

مي: مدام شوها القوانين.. لعوزه
المشرفه: ماعليه انزين بنقزر وقت وياج ..
مي: هيهيهي انزين انا ابا ارد الحجره بسرعه هلكانه من الدرب
المشرفه: ماعليه حبيبتي الحين فالاستقبال بيتممولج وبتردين ..
مي: والله لازم اتعبونا ..

نزلت مي الاستقبال ويا المشرفه ..
مي: مدام اذ حد هزبني داخل تراني بطول لساني
المشرفه: خييبه .. ما عندج واحد ثنين
مي: ههههه فديتني اسولف .. بس والله مدام مب متفيجه ..

ابتسمت المشرفه لمي وقبضتها من ايدها .. مي استغربت من الحركه .. ها المشرفه صح تعرفها لكن ماتعرف ليش جي تعاملها ..

مي: مدام شو صار الحين ..
المشرفه: صبري شويه بكلم الاداره ..
مي: يلا انزين ابا اسيير
المشرفه: انزين ميوه يالسه ويانا ومرتاحه تراج
مي: لا بسير ابدل الصراحه هلكت حر ..
المشرفه: ماعليج .. صبري شويه ..

يلست مي على واحد من الكراسي وتمت ادق ريلها بالأرض وهي مستغصه..
ياها اتصال من احلام وردت على طول ..

احلام: بلااااااج عاايفه عمرج
مي: ابدن .. ناسيه بطاقة السكن فالبيت والحين ميلسيني فالاستقبال.. هلكوني والله من الله المدام تعرفني لا لازم ايلس تشوفني مدام مبنايه .. والله مكر
احلام: اسميها مذله ها الجامعه ..
مي: شو بنسوي بغيناها ترانا..
احلام: يلا ماعليه .. المهم شخباركم
مي: والله الحمدلله
احلام: ميووووووه .. خواتج هنه .. نااقصه انتي وسااروه
مي: متى يو؟
احلام: قبل ساعه جي ..
مي: عاد ها الاسبوع التهينا فالملجه مايينا عندكم .. تولهت ع البيت والحواطه فالفريج
احلام: هههه عنز الفريج تراج ..
مي: جب جب
احلام: فديت عنز الفريج يا ربي
مي: طاعوا هاي .. الحين ماعرف اعصب عليج ولا استانس
احلام: هيهيهي انتي ماترومين اصلا تعصبين عليه
مي: وايد واثقه يا الكبشه
احلام: يحقلي.. مب ربيعتي وحبيبتي وبنت عمتيه ميووه
مي: ههههههه هيه اذ جي وايد اوكي ..

انتبهت مي للمشرفه وهي تزقرها ..

مي: حلامي فديتج بخليج الحين المدام تباني
احلام: انزين بدقلج خلاف
مي: اوكيك
احلام: باي ..

سكرت مي التيلفون وسارت عند المشرفه اللي طوفتلها الموضوع وخلتها ترد مبناها.. استغربت مي وايد من ها المشرفه .. شو سالفتها .. يعني اوكي طوفت الموضوع الحين ..لكن ليش اذا كان بأمكانها ها الشي ما تسويه من البدايه .. طنشت السالفه ورجعت المبنى..

ساره: هاا ردووج
مي: والله ها المدامات حركات
ساره: توج تدرين!
مي: وراها شي مس خوله صدقيني
ساره: هاي امبونها راعية حركات ويا البنات.. وايد تسابر
مي: خخخخ .. انا مب مفتكه من البنات واتيني المدام الحين بعد
ساره: طاع الخقاقه.. بس خلج خلج كول وياها .. تراها بتمشيلج اموور وايده بتستفيدين من مصلحة المدامات
مي: هزرج
ساره: هي هي
مي: هههههه ويا ويهج.. عيل بتمصلح وياها عسب انيب حلامي شرده ويانا
ساره: يبالج والله..

دخلت مي حجرتها من بعد ما روحت عن ساره اللي كانت فالصاله .. عقت عباتها وبدلت كندورتها وطلعت تيشيرت من الكبت ولبسته .. بطلت شنطتها ويلست ترتب ثيابها فالكبت ما تقدر تأخر ها الشغله ولا عقب بتتعايز ..

رد: قـــلـــوب تـــحـــت الـــمــجـــهــــر**
 

****************
(الثلاثا) 12 اكتوبر2004
****************

في الجامعه الامريكيه طلعت فجر من اخر كلاساتها سايره صوب سيارتها عشان ترجع السكن .. لمحت احمد عند المواقف
فجر: قوووه احمد
احمد التفت لها وابتسم وهو يقفل سيارته ويتجدم صوبها: هلا اشحالج فجر؟
فجر: تمام انت شلونك ؟
احمد : الحمدلله .. وين ماتنشافين الحين الا في الكلاس
فجر: ابد والله موجودين ..
احمد: شو خلصتي دوامج والا بريك؟
فجر: لا خلصت
احمد: اها.. سايره السكن ؟
فجر: ايه
احمد: تمام عيل ..
فجر: ااوكي سي يوو
تجدمت فجر صوب سيارتها لكن سرعان مارجعت تلتفت لاحمد وتناديه
فجر: احمد
احمد اللي كان متوجه صوب الكليه رجع : نعم
فجر: طالع .. (قالتها وهي تاشر على تاير السياره اللي كان مفسد )
احمد: اوووه شو صاير هذا مفسد
فجر: شلون اتصرف معاه الحين ؟
احمد: ماعليج خليه انتي عليه وانا بتصرف
فجر: شلون يعني ؟
احمد: عطيني سويج سيارتج وخذي سيارتي وانا بصلحه لج
فجر: لا مايصير جيه قولي شنو راح تسوي
احمد: ماعليج انتي خذي سويجي وسيري السكن وانا بصلحها وبتصل بج اول ماخلص
فجر: مشكوور احمد
احمد: افا عليج انتي بس .. روحي خذي موتري الابيض اخر بارك ع اليسار رقم دبي
فجر: اوكي تسلم
احمد: الله يسلمج ..

خذ منها مفتاح سيارتها وهي ركبت سيارة أحمد أشرتله وهي فالسياره و تبتسمله وشوي شوي اختفى أحمد من ناظرها .. تمت تسوق بكل هدواه وبالها مشغول وعينها ماتشوف جدامها غير طيف أحمد .. مب عارفه شو اللي يصيرلها من تشوف ها الأحمد.. مب عارفه هو ليش يتعامل وياها جذه.. لو تفسر حركاته ماتظهر غير بنتيجه وحده .. ودايما ها النتيجه تونسها .. تخليها رايقه .. تعيش لحظات حلوه بها .. لكن كل ها بالنسبه لها احلام سابقه اوانها..

وصلت السكن ونزلت من السياره وهي تفكر فاللي صار .. رن تيلفونها وشافت المتصل سلطان .. طنشت وماردت .. وفنفس الوقت سمعت صوت يزقرها من موقف السيارات .. التفت..

لولوه: قوه
فجر: اهليين ..
لولوه: شفيج مختبصه!
فجر: لا ماكو .. بس الشمس حاره خلينا ندخل
لولوه: فجر
فجر: هلا
لولوه: سيارة منو هاذي
فجر ابتسمت .. وماعلقت
لولوه: مو غريبه علي
فجر: سيارة أحمد
لولوه: احمد ماغيره
فجر: ايه ..
لولوه: وليش السياره معاج .. تطورت علاقتكم والا شنو!
فجر: هههه يالييت ..
لولو: اووه فيها ياليت
فجر: لا لا اتغشمر والله .. بس لقيت تاير سيارتي فاش وماعرفت شنو اسوي وبالصدفه شفت احمد وقالي انه بيصلحها وراح يرجعها .. وخذت سيارته عشان ارجع فيها السكن
لولوه: ايووه ..

قطع حديثهم الاتصال الثاني لسلطان .. فجر شافت التيلفون ونفخت بضجر ..

لولوه: شفيج
فجر: ولا شي بس ناس فاضيه .. يلا خلينا ندخل تعبت من الحر
لولوه: زيين يلا امشي


ودخلن السكن وفجر مطنشه اتصالات سلطان اللي كان متغصص من حركاتها ها الاسبوع .. مب عارف كيف اييب راسها ها البنت ..وكيف يعلقها فيه مثلها مثل غيرها..

****


فكلية التقنيه .. كانت ريم تتريا السياره اتيها .. اطالعت ساعتها اللي قاربت من الثنتين .. اليوم مراجعة يدتها فالمستشفى .. مب معقول تأخروا لين الحين .. دقت ع الدريول .. رد عليها وقالها انهم دقايق وبيوصلون .. وتمت ريم فغرفة الانتظار واقفه تتطالع السيارات لين لمحت سيارتهم وظهرت على طول ..

ريم وهي تركب السياره: السلام عليكم
ام سيف: وعليكم السلام امايه
ريم:ها ليش تأخرتوا؟
ام سيف: ماشي فديتج كنت سايره الجمعيه اشتري موونه رمضان وخلاف عاد مريت المستشفى ..
ريم: هيه .. وشو قالولج!
ام سيف: لا لا يتمدح الدكتور .. يقول الصحه مافيها كحه
ريم: ههههه يحيج يا امايه ..
ام سيف: بنخطف على خواتج عيل ..
ريم: لا خواتي مابين البيت احين
ام سيف: ليش بلاهن ؟
ريم: بيردن ويا امايه بيتنا اهناك .. عندهن امتحان عربي وامي بتدرسهن
ام سيف: وبين فليل والا بيباتن ؟
ريم: لا لا عقب المغرب بتيبهم اميه
ام سيف: هيه زين .. جسوم وصل البيت واتصل بي يقول يوعان وماروم اترياكم بتغدى
ريم: ههههه من استوى جسوم يتغدى قبلنا احين اونه مؤدب ويستاذن ..
في هاللحظه رن تلفون ريم .. طلعته من الشنطه ولقت اللي متصل نايف ..
ريم: الوه
نايف: الوه السلام عليكم
ريم: وعليكم السلام ..
نايف: اشحالج ريمان؟
ريم: الحمدلله انته اشحالك؟
نايف: الحمدلله . ها خلصتي دوام ؟
ريم: هيه امايه توه خاطفه عليه الكليه والحين راجعين البيت
نايف: امج منو ؟
ريم: هاه
نايف: ههه اقصد منو منهن امايه عفرا والا عموه ؟
ريم: لا امايه عفرا
نايف: عطيني بسلم عليها
ريم: ان شاء الله .. امايه اندوج نايف يباج
ام سيف: شو يباني .. امره ماباه انا
ريم: افا ليش؟ اندوج انزين رمسي
عطتها السماعه وشلته ام سيف: الووه
نايف: افا الغاليه ماتبى ترمسني
ام سيف: هيه امره ماباك
نايف: حرام انا ولدج
ام سيف: لا هب ولدي .. الا انته ولد المصلحه .. يوم بغيت تملج كل يوم طاب عندي ومتخشش ويوم ملجت ولقيت مرادك بسك حتى سماعه التلفون ماتشلها عليه
نايف: افا منو يقول انا كل يوم اتخبر عنج ريمان
ام سيف: لا لا مايسدني انا .. شعنه ماتشل التلفون بروحك وتتصلبي والا وانته طالع من بيتكم تخطف عليه عنبوو هذا ونحن ماشي بين البيت والثاني الا سكه .. لو بعده البيت بعيد مايندرى متى بنشوفك
نايف: لا لا افا عليج ان شا الله ناوي اييكم انا اليوم ..كله ولا ام سيف
ام سيف: هيه قص عليه الا انته .. يالله اندوك هذي ريمان وصلنا جريب البيت
نايف: برايه بتصل بها خلاف انا
ام سيف: يالله عيل فمان الله
نايف: فمان الكريم

سكرت ام سيف التلفون وعطته ريمان اللي كانت تظحك على الهزبه اللي لقاها نايف من يدته .. وفالوقت اللي سكرت فيه التلفون ياها اتصال ع طول ..

ام سيف: هاا نايف رد يتصل شوو
ريم وهي تضحك: لا اامايه هاي ميوه ..
ام سيف: هي تحسبت ما يصبر بعد
ريم ولمحة حيا فويها .. ضحكت عليها يدتها وهي تشوفها ترمس مي وهي متلعثمه..
مي: شو بلاج ريموه ..
ريم: هههه لا ماشي .. شحالكم انتو
مي: والله الحمدلله عايشين .. شخباركم انتوا .. اخبار عيايزيه وريلج شحاله
ريم: هههههه سألي عن شخص شخص انزين ..
مي: المهم العيايز ..
ريم: امايه عفرا الحمدلله بخير ونعمه .. واميه عليا طيبه الحمدلله ..
مي: وام رشود
ريم: ياللي ماتستحين ..
مي: هههههههه فديتها والله شحالها
ريم: الحمدلله .. ليش ماترمسين امايه؟
مي: من امس مارمستهم .. ماعرف اخبارهم
ريم: هيه ..
مي:انزين ناااايف شحاله؟
ريم: ههه زين الحمدلله ..
مي: ابا اعرف التطورات مايخصني
ريم: غربلات بليسج انتي .. ماروم الحينه
مي: شو امايه عندج!
ريم: هيه ..
مي: اووه عيل مغيم الجو من الزين ..صاد عين صاد..
ريم: ههههه هي والله صاكين علينا صكه .. والله انج يا ميوه حركات.. ساروه ما تشغل بالها فها السوالف .. انتي مادري ليش متحرقصه كل ما ترمسيني تبين تعرفين كل شي
مي: ههههههه عاد تحيديني انا .. كله ولا الرومانسيه ..
ريم: يا حماره
مي: افف انتي مامنج فايده .. عطيني امايه برمسها ..
ريم: ههههه طفسه .. هاذيه ها رمسيها..

وعطت ريم يدتها التيلفون ..وهي تضحك على ميوه وسوالفها .. ومي تمت تسولف ويا يدتها ويلسن هن الثنتين يعلقن على ريم ونايف..

****

فجر كانت متسلقيه ع سريرها وكل شوي تطالع تيلفونها كأنها تتريا اتصال مهم .. حاولت ترقد بس غفلت شوي الظهر ومن قامت وهي ترقب تيلفونها .. وأول ما رن التيلفون ع طول مسكته تشوف المتصل .. استانست وايد انه هو المتصل.. من متى تترياه ..

فجر: الووه
احمد: مرحبا فجر
فجر وهي تحاول تعدل صوتها : مرحبتين احمد
احمد: شو للحين نايمه ؟
فجر: لا كاني قاعده .. انتظر سيارتي بفارغ الصبر
احمد: هههه قلتلج برد عليج خبر العصر
فجر: وانا قعدت انتظر العصر ..
احمد ابتسم: اوكي تعالي خذي سويج السياره يبتها لج
فجر: خلاص دقايق وبنزل

نشت فجر بسرعه من ع السرير.. تغسلت ولفت شعرها .. لبست لها برمودا بيضا مع قميص اخضر وصندل ابيض.. ونزلت بسرعه ..

لقته واقف برع بوابه السكن .. ابتسمت وهي تتجدم صوبه وتحاول انها تعدل عمرها
احمد ابتسم لشكلها اللي يبين الكسل ..
احمد: هاه الرقاده
فجر: حرام ما نمت وايد..
احمد: المهم مريحه
فجر: شنو نسوي بعد ماكو شغل ..
احمد: ليش ماعندج شي لباجر؟
فجر: نووو
احمد: اها زين.. هذا الفتاح والسياره اكيه تمام التمام وغسلتها لج بعد
فجر: اوووه ثانكس والله ماتقصر احمد
احمد: افا عليج لا شكر على واجب .. مدام ماعندج شي شرايج اعزمج ؟
فجر: وين ؟
احمد: اهنه في الجامعه مب بعيد .. في ستار بكس
فجر: اووكي .. بس (وهي توخي على لبسها)
احمد: شو فيج؟
فجر: شكلي مو مبهدل؟
احمد: لا بس مصفع
فجر: شنو؟
احمد: ههههههه اسولف وياج ..
فجر ويمت
احمد: بلاج اسولف وياج يالله طوفي
فجر: لا انته روح قبلي انا ببدل هدومي وبرجع
احمد: اوكي ع راحتج اترياج
فجر: اوكي

رجعت فجر السكن .. مابدلت ملابسها ولكن اظافت للبسها حزام على البرمودا .. ولبست اكسسوراتها وساعتها .. وشلت معاها تلفونها ونزلت لأحمد ..

كان كل حوار يدور امبينهم يبدابه احمد .. فجر مب قادره تتحكم بنفسها .. تخاف لسانها يزل بكلمه .. هي بعدها ما تعرف شو هيه تبى .. او شو هو يبى .. بس اللي تعرفه انها ماتبى ها اللحظات تمر بسرعه ..



****

بعد صلاه المغرب كانت ريم تظيف لمساتها الاخيره على لبسها ..
تنورتها السودا الفخمه مع القميص الاحمر الدانتيل .. مشطت شعرها وهي لامه نص الشعر بورده حمرا .. وتعطرت و ابتعدت شوي عن المرايه تشوف شكلها كيف من بعيد ..

اندق الباب وردت
ريم: ادخل
دخلت ناعمه وشافت ريم : الله وايد حلوه
ريم: صدق ؟
ناعمه: هييييه اشوف
وتقربت منها ناعمه تشوف ريم كيف متعدله ؟
ناعمه: وايد حلوه بدلتج من وين ؟
ريم: من دبي
ناعمه: متى خذتيها؟
ريم: يوم سرت ويا امايه اييب فستاني .. المهم شو تشوفيني نعوم مرتبه ؟
ناعمه: هيه هيه اذيتيني كم مره تسالين
ريم يلست ع السرير تسكر سير الكعب : اقولج ناعمه
ناعمه وهي يالسه تطالع شو على تسريحه ريم: شوو
ريم: ابا اسير نادي رياضي .. يبالي شوي اخف
ناعمه: والله ؟ انا من متى ابا اسير بس امل ربيعتي ماتطيع تسير ويايه فما اتشجع
ريم: انزين انا ابا اسير شو رايج نسجل انا وانتي
ناعمه: اوكي أي وقت يوالمج ؟
ريم: عقب المغرب احسن اكون رجعت من الكليه ارتحت شوي
ناعمه: هيه احسن.. انزين انا اعرف نادي وايد اوكي .. عطيني فلوسج بسير اسجل لي ولج
ريم: حلوه هاي عطيني فلوسج .. خذي عن ابويه وادفعيلي ..
ناعمه: مهرج وينه ؟ ليش ماتدفعين منه ؟.
ريم: يالله مناك .. هذا اللي قاصر بعد اخذ من مهريه .. هذا بس حق اغراضي اللي بشتريها.. خلي ريلج يدفع شو وراه هو
ناعمه: اوف انزين قومي انزلي ريلج تحت
ريم وقفت مكانها زايغه : هاااااااه وليش ماترمسين ؟
ناعمه: هاا رمست تراني
ريم: ماتصل بي ..
دورت ريم تلفونها ولقت 3 مسد كول بس هي ماسمعتها
ريم: ياويلي ياويلي اتصل وماشفته يالفشله
ناعمه: لا فشله ولا شي قومي انزلي هو يالس ويا يدته تحت
ريم: انزين
طلعت ريم عند الباب ورجعت مره ثانيه تعطرت ورجعت نزلت وناعمه تشوف ريم مستغربه .. سارت صوب حجره خواتها مهره ومها لقتهن ميلسات يحلن واجباتهن

ريم: اقووول
مهره: اوب اوب قوموا عنها شو هالزين
ريم ابتسمت ورمست ملامح الجديه بسرعه على ويها
ريم: مب متفيجتلكن ..اسمعن .. انا بحاول اخذ سويج سيارة نايف ويوم بطلع بييبه الكم .. حطن البوكس ع الثلاجه مالت السياره هاي اللي بين السيتين .. اوكي..
مها: اوكي انتي لاتحاتين ..
ريم: انزين لاتسوون حشره عشان مايحس .. دخلوا الهديه واظهروا ولاتخبرون جسوم عن يفضحنا
مهره: اوكي اوكي
ريم: خلاص الاغراض في حجرتيه .. ع السرير .. يالله باي
مها: باي
روحت عنهم ريم وهي تحس عمرها مرتبكه ..

وهي نازله على الدري وقفت شوي .. حست بالم بسيط في راسها
ريم( ياربي مب احين مب احين مب وقته .. )
حطت ايدها على راسها وهي تقول (سبحان الذي لايضر مع اسمه شي في الارض و لا في السماء وهو السميع العليم )
كررتها سبع مرات على منطقه الالم .. وتعوذت من الشيطان ونزلت بخطوات هاديه وهي تسمع صوت نايف يتكلم مع يدته في الصاله ..
خطواتها بالكعب كانت تصدر صوت على الدري الرخامي .. الشي اللي خلى نايف ينتبه له ويلتفت لها ..
ابتسم اول ماشافها تقترب منه وقام من مكانه
ام سيف: ياحيا الله بنت سيف
ابتسمت ريم في الوقت اللي تلاقت به نظراتها بنظره نايف ..
مدت ايدها وسلم عليها ..
نايف: هلا ريم اشحالج؟
ريم وهي تحاول تسحب ايدها بهدوء: الحمدلله اسمحلي ماشفت التلفون يوم اتصلت
نايف: لا عادي افا عليج
يت ريم تيلس لكن ام سيف منعتها: قومي قومي شو ييلسج اهنه
ريم: ليش؟
ام سيف: قوموا دخلوا الميلس
ريم اطالعت نايف وهو قام مبتسم لها ..
ريم: ان شاء الله
مشت ريم متوجهه للميلس وهي تحاول توازي نايف في مشيتها وموطيه راسها ..
وقفت عند باب الميلس واشرت له يدخل لكنه رفض وجدمها وهو يلامس جتفها الشي اللي خلاها تسرع خطوتها قبله عشان تدخل ..
يلس نايف واترخصت منه ريم ..
سارت المطبخ ويابت له صينيه العصير .. وقدمتها له ويلست بعيد شوي منه ..
نايف: ليش يالسه بعيد؟
ريم: لا مب بعيد عادي ..
نايف: تقربي شوي
ريم شلت المخده اللي عدالها ويلست شوي اقرب وهي بعدها موطيه راسها..
نايف: شو الدراسه وياج ؟ ان شاء الله كل شي تمام
ريم: الحمدلله ..
نايف: تبين مساعده او شي تراني موجود
ريم: ماتقصر
نايف: شدي الحيل ماباهم يقولون عرست وتكسلت
ريم: لا ان شاء الله .. شاده الحيل ..
سكتوا شوي عقب رجع نايف بدى الكلام
نايف: ريم بسألج شي في خاطري وابا منج الصراحه
ريم: ان شاء الله
نايف: شو اللي خلاج ترجعين الكتب اللي طرشتها لج ؟
ريم تسارعت دقات قلبها وحست بلووم ترددت لكنها رمست: انا اسفه على الحركه بس ماكان في بينا شي رسمي
نايف: كيف مافي شي رسمي وانا خاطبنج .. انا ماتصلت والا سويت شي غلط .. انا طرشت كتب بناء على اللي عرفته عنج انج تحبين القرايه.. وهاي هديه والهديه ما تنرد ..
ريم تمت ساكته وهي موطيه راسها وتلعب بدبلتها..
نايف تقرب شوي بحيث يلس حذالها وهي مازالت موطيه راسها
نايف: قوليلي الصدق ريم انتي مغصوبه عليه ؟؟
ريم رفعت راسها وهي تهزه: لااا
نايف: عيل
ريم: ولا شي نايف
نايف: اوكي انا مابسألج اذا انتي مرتاحه ويايه لانه بعده ماصار بينا شي لكن انتي مرتاحتلي ؟ تحسين بتقبل يعني ؟؟
ريم هزت راسها بالموافقه : هيه ..
نايف: عسى خير يارب .. بس بعدني مب مقتنع ليش رجعتي الكتب !
ريم مافكرت باللي بتقوله لكنها رمست ع طول : ماباهم يعايروني
نايف: يعايرونج ؟ منووو يعايرج
ريم: خواتي
نايف: ليش شو يقولوج !
ريم حست بغبنه لكنها قالتها ببراءه : يقولون اني ماعرف اتعامل وياك وانته شكلك تعاني من هالشي من جيه مطرش لي كتب عشان اتعلم منها
نايف مد ايده ورفع قصتها اللي نازله على طرف وحاجبه على شكلها وريم وطت راسها زياده
نايف: والله العظيم انه يوم طرشت الكتب ماكانت هذي نيتي والله .. بس عرفت من لطوف انج تحبين الروايات قلت بييب لها هديه كتب شي تحبه وبتستفيد منه
ريم رفعت نظرها وهي تبتسم له .. حست براحه كبيره ..
ريم: والله انك ريحتني الحين
نايف: شوفي ريمان من البدايه احسن شي لاتخلين كلام حد ياثر على علاقتنا .. ولا تخلين الظنون تجتاحج بدون أي دليل .. تاكدي ولا تفتحين مجال للشيطان وانا اكيد مابجذب عليج لو سالتيني عن شي .. بقولج الصراحه ماله داعي نخبي شي على بعض
ريم: ان شاء الله ..
نايف: تمام
ريم: انزين تم خاطري في الكتب ابا اقراها
نايف ابتسم ابتسامه أسف: بتلقينهن في مكتبه دبي للتوزيع .. الهديه مدامها انردت خلاص مابييبها مره ثانيه
ريم تلومت وايد وحست بفشله .. استاذنت من نايف عشان تيب العشا وهي تحس انها ندمت ع اللي سوته .. نايف بعد ماينلام .. ريال ومابيذل عمره ..
وهي طالعه كانت تتلفت ع الطاوله ادور على سويج نايف يمكن انه ويا التلفون .. بس ما حصلته لا السويج ولا التلفون.. خابت آمالها حطت فبالها انه محطنه فجيب كندورته..

طلعت برع فالصاله شافت يدتها يالسه وتلعب بشي بايدها وهي سرحانه .. هوت عليها ريم وشافت سويج بايدها ..
ريم: امايه سويج منو ها
ام سيف: هي حق .. اندوج سويج ريلج وتيلفونه فوق الطاوله .. تخادى الريال شكله يوم شافج ونساهم ..
ابتسمت ريم لامها .. وارتاحت يوم خذت السويج .. زقرت على خواتها من فوق عسب يسون اللي وصتهن عليه..وقالتلهن يوطن السويج حذال التيلفون فالصاله..

سارت ريم تيب العشا ورجعت حطته على طاوله الطعام اللي كانت مزينه بمفرش بيج مطرز بذهبي وفي الوسط شمعدان الشموع اللي فيه مولعه .. وطقم الصحون نفس الالوان محطوط على الطاوله ..
نايف: ياسلام شو هالزين ..
ابتسمت له ريم وبدت تغرف له من الاكل وهي ايدها تتنافض ..
نايف: اساعدج ؟
ريم : لا عادي ..
شلت المعكرونه بالبشميل لكن رجعت القطعه طاحت من ايدها
نايف: صبري صبري انا بيود الصحن
يود نايف الصحن وريم غرفت له ..
نايف: منو طابخ ؟
ريم: انا طابخه الا السلطه نعوم مسوتنها
نايف: منووو
ريم: ااا ناعمه
نايف: ههههه زين زين
يلس نايف ياكل: ياسلام انا جان تميت اكل هالاكل بغدي درام
ريم: بالعافيه عليك ..
بدى نايف يسولف وياها سوالف عاديه وريم كانت ترد عليه بجمل بسيطه وابتسامات ..

لحد ماصارت الساعه 10 .. دق جاسم الباب عليهم ..
جاسم : السلام عليكم
نايف: هلااااا وعليكم السلام
سلم عليه نايف ويلسه عداله وريم تشوفه وتبتسم
نايف: اشحالك ؟
جاسم: بخير اشحالك انته ؟
نايف: يسرك الحال شو المدرسه
جاسم: تسلم عليك
نايف: ههههه تسلم عليه هاه؟ شد حيلك عاد
جاسم: البركه في ريمان
نايف اطالع ريم ورد صد لجاسم: ليش عاد؟
جاسم: هي تحفظني والا انا بروحي مافهم
نايف: لا لا شد حيلك احين يوم ريمان بتعرس انته شو بتسوي
جاسم: بييكم كل يوم تذاكر لي شو تباني ارسب ؟
نايف: ههههههههه مرتب امورك هاه .. حياك الله البيت بيتك
جاسم: شكرا شكرا .. انزين ريمان انا بسير فووق بترياج عشان الابره
ريم: خل مها تطلع لك اياه
جاسم: مهوه راقده ومهروه بعد
ريم: شو مرقدنهن من احين ؟ خلاص سير ..بييك عقب شويه
جاسم: اوكي يالله مع السلامه
قام جاسم وطلع ..
ريم: انا موصيه ناعمه تعطيه الدوا من بعد ماطلع من البيت
نايف: اها زين والله .. فيها الخير
ريم: تعرف ترا ساروه وميوه محد .. مها ومهره احس ما اقدر أأمن علي ايدهن .. ناعمه متعوده كانت تعطي ابوها ابر السكر
نايف: اها زين عيل .. ما بتحاتين دواه عقب
ريم: ههههه انا اكبر وسواس ماعليك مني.. بتلقاني دوم داقه لناعمه أأكد عليها عطته الدوا ولا ..
نايف: ههههههه يالله
اطالعته ريم وابتسمت
ريم: اسمحلي بسير اعطيه دواه وابرته وبرجع
نايف: لا لا خلاص انا بروح احين لانه انتي وراج دوام وانا بعد

ريم سكتت .. نايف قام من مكانه وريم بعدها يالسه .. اطالعته وهو واقف وابتسمت ونشت وياه .. ساروا لين عند الباب ..

ريم: اوه لحظه سويجك وتلفونك نيستهم عند امايه
نايف: هيه صح وانا اقول وين التلفون واتحراني مخلنه في السياره
سارت ريم برع الميلس وحصلت السويج والتلفون ع الطاوله اللي صوب الميلس ورجعت يابتهم لنايف..
نايف: يوم بتخلصين من جاسم اتصلي فيني .. بسج عاد من اسبوع كله انا اللي اتصل وانتي ماتتصلين
ريم: ان شاء الله
نايف: بترياج .. يالله فمان الله
ريم: فمان الكريم ..

طلع نايف وطلعت ريم من الميلس سايره غرفه يدتها
ريم : امايه
ام سيف: ها امايه .. روح نايف؟
ريم: هيه امايه روح
ام سيف: تعشى ؟
ريم: هيه
ام سيف: زين تعالي اباج
تجدمت ريم ويلست ع سرير يدتها : آمري امايه
ام سيف: اميه انتي مرتاحه ؟
ريم: الحمدلله رب العالمين
ا م سيف: اكيد؟
ريم: هيه امايه لاتحاتين
ام سيف: عسى دوم فديتج .. ريتي شو يايب نايف؟
ريم: لا شو يايب؟
ام سيف: يلس جيس عند الباب يوم دخل
ريم: ماشفته
ام سيف: عيل اكيد خواتج ودنه الحجره فوق .. سيري اطاعيه
ريم:ان شاء الله .. اسمحيلي امايه بسير بعد بعطي جسوم دواه
ام سيف: برايج امايه سكري الليت وراج ولايمي الباب
ريم حبت يدتها ع راسها وسكرت الليت وصعدت فووق ..
سارت على طول عطت جاسم دواه و وايقت ع خواتها لقتهن رقود .. ودخلت غرفتها .. شافت كيس باريس غاليري محطوط على السرير .. فتحته ولقت فيه بوكس ساعه .. مع بطاقه مكتوب عليها
(اللهم بارك لنا وبارك علينا واجمع بيننا في خير
نايف)
ابتسمت ريم ونشت وايقت من دريشتها على بيت عمتها لقت غرفه نايف مظلمه ..
" غريبه ليش ماسار غرفته لين احين ؟ يمكن سار مكان ثاني مارجع البيت "
بدلت ملابسها و طاحت على سريرها وهي تسترجع كلام نايف اليوم .. لين رن تلفونها وكانت مي متصله فيها .. سولفت وياها وتمت تسالها عن نايف عقب ماعرفت من ناعمه انه نايف عند ريم ...
وبعد ماسكرت مي .. اتصلت ريم بنايف .. فشله اسبوع هو بس اللي يتصل وهي ولا مره اتصلت ..
رد عليها على طول: هلا والله
ريم: اهلين .. مشكور ع الهديه
نايف: العفو ها اقل من قدرج .. عيبتج؟
ريم: هيه وايد ..
نايف:بس ماقلتيلي شو هالبوكس ؟
ريم: ها شي بسيط
نايف: كيف دخلتيه السياره ؟ اكيد يوم اني خليت السويج برع
ريم: انته سهلت عليه المهمه
نايف: انزين شو فيه ؟
ريم: افتحه وشوف
فتح نايف البوكس واندهش من اللي فيه وكان هذا باين على نبره صوته
نايف: الصراحه غلبتيني .. هديه مافي احلى منها
كانت الهديه عباره عن مصحف اسود بالمخمل مزخرف بالفضي مع صوره لباب الكعبه من المعدن في واجهته .. عليه بطاقه صغيره ..
فتحها نايف وقرا المكتوب ..
(اللهم اجعل القرآن العظيم ربيع قلوبنا ونور صدورنا وجلاء همومنا
ريمان
12/10/2004 )
نايف: مشكوره ريمان وايد حلوه الهديه ..
ريم: تستاهل كل خير .. بس ليش لين الحين مارجعت البيت ؟
نايف: توني واصل .. سرت المحطه اصب بترول عشان الصبح مابيمديني وانا ساير الدوام
ريم: اها انا قلت بعد
نايف: ليش؟؟
ريم: شفت ليت غرفتك مسكر قلت اكيد مارجع
نايف: كيف ؟ مافهمت
ريم: غرفتي تطل على غرفتك من بعيد .. لطيفه كانت مراوتني اياها
نايف: هههه وانتي تراقبيني من الدريشه متى ادخل واطلع ؟ عيل بخلي الليت على طول والع
ريم: هههه حرام
وكانت هذي بدايه سوالفهم اللي كملوها لين وقت رقادهم ورقدوا استعدادا لنشه الدوام باجر..

رد: قـــلـــوب تـــحـــت الـــمــجـــهــــر**
 

*****************
(الجمعه) 15 اكتوبر 2004
*****************

من بعد ما صلى صلاة الجمعه طلع هو وعياله الاثنينه من المسيد .. ركبوا السياره متوجهين للبيت.. نزل سيف وعياله ودخلوا البيت ..
كانت ام سيف يالسه فالصاله ومسباحها فايدها وتسبح ..

سيف: السلام عليج الوالده
ام سيف: هلا ابويه .. وعليك السلام والرحمه ..
تجدم سيف ويلس حذال امه .. اما مايد وجاسم صعدوا فوق عند خواتهم ..
جاسم على طول توجه حجرة ريم وطاح ع الشبريه ..
ريم ها الوقت كانت تقرى قران .. لفت ع جاسم .. وحست انه فيه شي مب طبيعي ..
قامت من على السياده عسب تشوف جاسم ..

ريم: جسوم حبيبي بلاك
جاسم: بطني يغر.. يوعان ..
ريم: انزين كلك شي ..
جاسم: ريموه انا ابا اصووم

يلست ريم ع طرف الشبريه وهي تشوف اخوها اللي كان طايح ع بطنه وداس ويهه فالموسده ..

ريم: جاسم حبيبي .. انته ما تروم تصوم
جاسم: شو ما اروم اصوم .. انا ريال
ريم: فديتك انته سيد الرياييل كلهم .. لكن صحتك

رفع جاسم راسه وهو يطالع اخته ..

جاسم: كله صحتيه كله صحتيه .. شو ها ما اروم اسوي شي انا .. كله تقولولي بتعب .. انزين برايني خلوني اتعب
ريم: جسوم حبيبي شو ها الرمسه
جاسم: حتى عفروه تعايرني تقولي ما اصوم .. شافتني اليوم يوم انتي غاصبتني اتريق عسب تعطيني الابره
ريم: انته شعليك من عفروه ..جسوم فديتك لا تقطعلي قلبي.. انته اخونا حبيبنا مانبالك المضره

قام جاسم من طيحته وتربع وهو مجابل ريم وانفعل فالموضوع ..

جاسم: الصوم ما بيضرني
ريم:جاسم انته ليش ما تفهم .. الدكتور شو قايللك شو مرمسنك؟؟ المريض ما عليه حرج لو فطر ..
جاسم: انا مب مريييض
ريم: اسفه غناتي.. انته مب مريض .. بس انت تتعب ..
جاسم: اففف
ريم: لا تتأفف
جاسم: انزين
ريم: شوف جاسم .. انته شو رايك من بعد الريوق تصوم لين العصر .. بس يكفيك
جاسم: ياهل الحينه انا جدامج تقصين عليه .. هذا ما يسمونه صيام.. نحن درسنا فالدين انه الصيام من الفير لين تغرب الشمس

ريم غصب عنها ابتسمت .. بس وايد غامظنها اخوها .. ماتقدر تسويله شي .. غير العنايه .. يا فبالها بعد ما تروح من ها البيت .. منو بيدير باله ع جاسم .. ما تأمن عليه أي حد .. تعودت على عنايته ..
تجدمت منه وحظنته بقو .. ما تتخيل تبعد عن خوانها .. لكن النصيب فرض نفسه ..

جاسم: ريموه فجيني ابا اتنفس.. بس عرفت انج تحبيني
ريم وهي تطالعه : هههه يا الحمار ..
جاسم: انزين صبيلي كوب ماي
ريم: وتوك محتشر تبى تصوم ..
جاسم: افف شو اسوي انزين ..

صبتله ريم كوب ماي وناولته اياه

ريم: شرب الهنا حبيبي ..

وفها الوقت دشت مي الحجره .. وشافت جاسم يشرب الماي ..

مي: الله انا عطشااانه ابا مااي
ريم: ياللي ما تستحين.. تجرحين صيامج جي يا الهبله ..
مي: استغفر الله استغفر الله .. الداعيه ريم المبجله سامحينا
ريم: خس الله عدو ها الويه ..
مي: هيهيهي اسولف اسولف ..
ريم: تعق قنابلها وعقب تقول اسولف
مي: عشان ما تزعلون مني .. فديتني ما اقصد غير السوالف..
ريم: انزين ماعلينا .. شو تبين
مي: شو ابا بعد .. يايه اشوفج .. بنسير الباصات
ريم: هيييه نسيت انكم بتروحون.. حرام ما بتفطرون اول يوم ويااانا
مي: بس الله يخليج لا تذكريني .. بروحي لايعه جبدي
ريم: يلا ماعليه ..
مي: انزين خشمج .. يلا انا تأخرت
ريم: الله يحفظج ..
مي: يلا حووبي جسوم .. بتودينا
جاسم: انزين يلا نزلن
ريم: ميووه
مي قبل لا تظهر من الحجره لفت ..
مي: شو!
ريم: ساره الهبله ليش ما مرت تسلم
مي: مادري.. يمكن تحراج تحت ..
ريم: مالت عليها هاي .. ولا تفتكر فحد
مي: هههههههه حليلها ساروه تحيدينها .. يلا بباي
ريم: فمان الله ..

نزلت مي بسرعه لانه ساره محتشره تحت انهم تأخروا .. وسلمت ع يدتها وابوها وسارت السياره .. وحصلتلها هزبه من ساره بسبة التأخير لكنها طنشتها وفتحتلها سالفه عسب تفتك من حشرتها ..

****

بعد الفطور بنص ساعه يلست بدريه فغرفتها وهي قابضه التيلفون .. تكتب الرقم وترجع تمسحه .. من اسبوعين وهي تتصل لسلطان بس ما يرد على اتصالاتها .. ما بينفع اللي تسويه الحين .. طلعت من الحجره وهي تتلفت .. ماتبى حد يشوفها .. توجهت لحجرة عمتها وحمدت ربها انها مب موجوده .. تمت تنبش فالتسريحه اتدور موبايل عمتها اللي دوم مخلاي فها المكان ..
حست بوخزه فبطنها ما قدرت تكمل اللي تسويه ويلست فأقرب كرسي .. خذت نفس عميق وتناست ألمها اللي فيها من يومين .. ورجعت للتسريحه لين حصلت الموبايل فواحد من الادراج.. خذته وظهرت من الحجره وردت لغرفتها ..

من غير تردد طلبت الرقم .. من كثر ما قلبها يدق من الخوف صوت التيلفون وهو يرن ماكنت تقدر تسمعه .. لين اخترق خوفها صوت رجولي .. صوت لطالما حبته وعشقته ..

سلطان: منو؟! .. الووو .. منو ويايه؟

بدريه بصوت وااهن: سلطان

سلطان استنكر الصوت .. اسبوعين وهو عايش رعب ها الصوت .. لازم ما بيضيع العنوان ..
سلطان بجفا: خييير
بدريه: ليش ماترد على اتصالاتي!
سلطان: بدريه قلتلج انا فصوووب وانتي فصووب خلاص
بدريه: والياهل اللي فبطني
سلطان: اييه لا تسوييلنا سواالف .. الياهل عنده ابو وهو ريلج
بدريه: ليييش تعاند الواقع انته؟
سلطان: الواقع اللي ترمسين عنه هو انج معرسه .. وشي طبيعي تحملين من ريلج
بدريه: سلطاااااان انا من متى معرسه وما حملت شمعنى الحين
سلطان: ارادة ربج
بدريه صرخت من حرتها اللي كابتنها في صدرها: ولله انك نذل وحقيييير
سلطان: اييه سمعيني زيين .. لسانج هب اطولينه عليه .. واذا كان في حقاره فها الدنيا ترااها منج انتي يا الخاينه .. رقمي ها لا تطلبينه مره ثانيه تفهميين .. واذا ما تفهمين ترا عادي يتكنسل الرقم واطلعلي غيره ..
بدريه بصوت يقطع القلب: سلطااان ..

ما رققت رمستها ولا هزت أي شعره من كيان سلطان .. سكر فويها بكل قسوه .. وتم طايح ع سريره .. غمض عينه والذكريات ادور فباله .. يلعن الساعه اللي طلع وياها .. كيف ما حط فباله أي شي ممكن يصير .. حط ايده ع راسه يحاول يطرد أي افكار تحتل عقله ..

اما بدريه .. من بعد ما سكر عنها سلطان .. مسحت رقمه بكل خوف ورجعت التيلفون محله .. ردت غرفتها وهي تحاول تغلب على دموعها وما تخليها تنزل .. فأي وقت حد بيطب عليها .. ما تباهم يشوفونها بحال ما يسر ..
من عرفت انها حامل وهي حالها منجلب .. والكل ملاحظ شرودها الدايم .. ماتباهم يظنون انها مب فرحانه عسب ما تفتح لنفسها ابواب لمشاكل ثانيه ..

مرت عليها عمتها تطمن عليها .. ونزلتها وياها عسب يسيرن يصلن التراويح .. كان كل ما فكرها يسرح تجبر نفسها انها ترد لارض الواقع..
خلاص بتقنع نفسها انه الياهل ولد عدنان .. وبتسكر السوالف كلها ..

و بعد الصلاه يلست بدريه ويا اهل زوجها يشربون جاهي ويسولفون .. وبدريه مازالت تشرد بذهنها .. لكن ها المره مصاحب لها الشي الم ووخز خفيف في بطنها..
ام عدنان: بدريه ؟ شو فيج اميه ؟ شي يعورج ؟
بدريه: لا بس الظاهر الصيام تعبني شوي
ام عدنان: هيه واعليه عنج الله يعطيج العافيه
بدريه: الله يعافيج .. عمووه بسالج متى يوقف الوحام عن الحرمه ؟
ام عدنان: والله يا امي على حسب في حريم مايوقف عنهن لين يربن وفي حد يوقف عنده من تخلص الشهور الاولى يمكن الرابع جيه
بدريه: هيه بس عموه انا ماحس بالوحام احين مع اني ماوصلت الشهر الرابع
ام عدنان: يمكن طبيعه جسمج ماتطولين في الوحام .. اخيرلج يا امي .. ولا هذيج الطيحه والتعب
بدريه: الحمدلله ..

يلست شوي وياهم واستأذنت من عندهم بحجة انها تبى تريح شوي فغرفتها..

****

فبيت راشد .. عزه كانت فالمطبخ وتظهر ابداعاتها فالأكل .. دخل عليها مروان من بعد ما ردوا من صلاة التراويح ..

مروان: حرمت فيصلوه شو تسوين
عزه: ما برد عليك
مروان: ولييش
عزه: تعرف شو قايل
مروان: ههههه اونها ماتحق ع الريل
عزه: هي عيل شو .. ريلي لازم ما بحق عليه
مروان: انزين خبريني شو تسوين
عزه: سويتات .. شو تشوف
مروان: يلا خلصي بسرعه بروح انا
عزه: مب لازم اتسير الدوام .. اغبش من باجر
مروان: لا مافيني ..
عزه: انزين اصبر نص ساعه وبخلص
مروان: ماعليه جدامج ساعه
عزه: اوكي
مروان: الا تعالي من متى ما شفنا ريلج نحن .. وينه هوه؟
عزه: موجوود
مروان: ما اييج؟
عزه: من اسبوعين ما يا ..
مروان: افاا لييش!
عزه: احسن احسن .. ماشي باقي عن العرس..
مروان: متى الحين حددتوه؟
عزه: ثالث العيد ..
مروان: هييه .. زين والله .. اخيرا بترتبش البقعه ..
عزه: يالله عاد تتخيلني انا عروس
مروان: هي عادي ..
عزه: اوييه .. احس غير
مروان: يلا ماعليه .. الحين فالعايله انتي بتفتحين الاعراس.. وعقبج ريم بنت عموه .. وعقب كح كح اناا
عزه اطالعت اخوها وهي تضحك: انته ..
مروان: هي ليش لا
عزه: ما اتخيلك .. وعاد منو تعيسة الحظ
مروان: تعيسه فعينج ..
عزه: له له .. انزين ومنو هيه
مروان يطالع اخته .. فلسانه كانت الكلمه بس سكت .. وابتسم..
مروان: شدراني .. بنت الحلال اللي بتخطبها امايه
عزه: هييه زين زين .. عيل شرايك نخطبلك فجر
مروان: أي فجر أي مغرب
عزه: هههه الله ينطب بليسك.. فجر اخت عبير
مروان: بسم الله عليه ..
عزه: ههههههههه هي لو نفس اختها ما بنخليها تضيع منا ..
مروان: حتى لو نفس اختها حد غيري يخطبها انا ماباها
عزه: عيل منوووو تبا
مروان وهو حاس انه عزه فاهمه عليه وبدت تنغزه ..
مروان: مابا حد .. يلا انتي خلصي شغلج انا بسير عند اميه

طلع مروان من المطبخ وعزه تضحك عليه وعلى تهربه الدايم .. وكمل طريجه لداخل البيت .. وسار غرفته عسب يزهب شنطته ..
وهو سرحان بفكره .. رن تيلفونه .. كانت المكالمه خارجيه .. على طول شق الحلج ورد ع المكالمه وهو مستانس..

مروان: هلااا والله ..
مانع: اهلييين .. شحااالك مروان!
مروان: الحمدلله تمام .. اخبارك انته .. وينك يا ريال ادقلك من اسبوع ما احصلك
مانع: انته كل ما تتصل نكون فجوله ميدانيه .. مايوحيلي عقب ارد اتصلك..
مروان: انزين شو علومك انته .. طمنا عليك
مانع: والله الحمدلله عايشين
مروان: ما بيردونكم اجازه؟
مانع: والله لين الحين مافي شي اكيد .. قالو بيردونا ع العيد بس بعده مب اكيد ..
مروان: كم كملت الحين انت؟
مانع: بعدني ما كملت شهرين ..
مروان: اسميك .. يلا بتخطف الايام .. الا اربع شهور بقن ..
مانع: هي يا خوك ..
مروان: خلاص عيل الغالي ما طول عليك ..
مانع: خلااص .. سلم على عربانك .. بتصل فالوالده الحين ..
مروان: زين عيل الله يحفظك
مانع: فمان الله ..

سكر مروان التيلفون وهو مستانس انه سمع صوت عمه .. الكل مفتقد ها الشخص ومفتقد تواجده امبينهم .. لكنهم مصبرين عمارهم .. والايام نفس ما قال مروان بتخطف ..


رايــــــــكم؟؟
الجــــــــــــــزء التاسع عشر

******************
(الاربعا) 20 اكتوبر 2004
******************

من بعد ما وصلن ساره ومي من الجامعه .. نزلن من الباص وكان اللي ياينهن ها المره خالهن محمد .. سلمن عليه وركبن السياره وتموا يسولفون..

محمد: ميووه شو غادي عليج جي ضعفانه ومسمره
مي: لا تقووول .. مسمره؟؟!
محمد: هي والله
مي: مادري والله .. دوامي عز الظهر لازم بدقني الشمس وبسود
محمد: الله يعينج .. شخبار دراستكم انزين!
مي: الحمدلله
محمد: وانتي ساروه؟
ساره: الحمدلله خالي .. امشين ..
محمد: زين والله
مي: يلا خالي مش بسرعه ..
محمد: هههه ع شو لاحقه
مي: احس وناسه بنفطر عندكم .. احب ها الوقت قبل الفطور عندكم.. الكل يلتم..
محمد: ياوناسة بناتي عيل ..
ساره: يدرن انه بني؟
محمد: هي خواتكن من الظهر عندنا ..تلقن احلام الحين واقفه عند دروازة البيت تترياكن
مي: ههههههه تسويها الخبله ..

من بعد ما وصلوا واستقبلوهم الموجودين .. قامن البنات يساعدن الحريم في الفرش .. وتجهيز السفره .. وبعد الفطور .. تيمعن البنات فحجرة احلام ياخذن اخبار بعض ..

احلام: اقول ما بتسيرن تصلن فالمسيد؟
ساره: اانا مااروم
مي: ليش ساروه.. انا فخاطريه اسير
احلام: انزين خلينا نسير انا وانتي .. ترا ماشي وقت باجي نص ساعه
مي: انا ابا اسير .. بقوم اتسبح ..
احلام: عيل استعيلي انا بعد بقوم اتسبح ..
مي: اووكيك ..
ساره:انا بسير بطالع التلفزيون

وكل وحدة سارت تقضي حايتها .. ومن بعد ما خلصوا مي واحلام طلعوا ويا الحريم صوب المسيد ..
وعقب صلاه التراويح توالفوا كل الحريم برع وفرشوا فمكانهم المعتاد .. اما البنات تيمعوا ع صوب ويلسن يسولفن ..

مي: عن منو يرمسن الحريم.. منو تعبان؟
احلام: بابا زايد ترا تعبان ..
مي: هي صح .. فديت روحه الله يقومه بالسلامه ..
احلام: من طاح تعبان وانا قلبي يعورني عليه ..
مي: مأجور ان شاء الله ..
ساره: اقولكن قومن نيلس بعيد عن الحريم .. رمستهن تيب الكآبه
مي : وين تبين؟
ساره: نسير صوب الكراج.. مكاني المفضل
احلام: مالت عليج ..
مي: صبرن بييبلي كراميل .. فخاطريه ..
احلام: انا ابا جلي .. هاتيلي وياج
مي: وانتي ساره؟
ساره: مابا شي ..

سارن احلام وساره للمكان المقصود ولحقتهن مي وفايدها الكراميل والجلي ويلسن كلهن حذال بعض ..

مي: ابا اكمل رمضان هنه .. والله شوها فالجامعه تعب
ساره: بس بعد وناسه فالسكن..
احلام: لازم وناسه عند ساروه .. اقولج سويره اطربينا بصوتج الشجي شويه
ساره: كح كح .. اخجلتيني ..
احلام: ههههه غبيه ..
ساره: يلا ما يطلبه المشاهدون ..
مي: اييه رمضان خافن ربكن
احلام: يالله عاد انتي .. من الله تغني بدون لحن ..
مي: عاد المفتي يوم يفتي
احلام: يلا عااد .. ساروه اطربينا يالله ..
ساره: اليكم كوكب الشرق ..
مي: ههههههه كوكب الشرق قاالت
احلام: لا لا كوكب الشمال هاي
ساره: بس اص خلوني اندمج فاللحن ..
وقامت ساره تلحن .. لين بدى صوتها يظهر بكلمات حلوه ..

مروان في هالوقت يالس توه بيدخل البيت من باب الكراج لكنه سمع صوت حد يغني .. وقف وتم متذري بشيره الغافه اللي عند الباب ..

ساره: صغيره كنت وانته صغيرون ..
حبنا بدى بنظرات العيون ..
قالوا ترى ذولا يحبون ..
وبننتظر لمن يكبرون ..
احلام: بس بس لاتكملين عراقي عن تسمعج امي ويحل عليج غضب الاله
مي: هيهيهي تطلع حرتها في ساروه وتقوم تغتالها
ساره: لالا يابويه لاتغتالني احين بجلب الموجه
وطني حبيبي وطني الغالي وطني النجم العالي وطني
شعله مضيئه كلمه جريئه وطني وطني الغالي وطني
كملت وياها احلام: الله الله يانجم الحياه .. ياكويت ياكويت انتي الحياه
مي: هههههه والله انكن حاله ..

تراجع مروان بخطواته وقرر يأجل زيارته وروح بيتهم ..
وهو يمشي لين البيت ردد باقي كلمات الاغنيه اللي غنتها ساره .. وكتب تكملتها في مسج وطرشه لها ..

رن تلفون ساره يدل انه في مسج واصل

ساره وهي تحط ايدها في مخباها تطلع التلفون: وااا فديت اللي يذكرني اناا
فتحت المسج وانجلب ويها كامل .. لكن رحمها ضوء القمر الخافت اللي ساعد في اخفاء تعابير ويها
مي: منو اللي ذكرج ؟
ساره: هاه .. هاي وحده من بنات الجامعه ..
مي: وفي حد يذكرج غيرهم ..قومن نسير صوب الحريم باجر بنروح عنهم
قاموا كلهم وتمت ساره اخر وحده .. ريلها ماشلتها من الصدمه ..
كان المسج من مروان كاتب فيه
( مثل نجمه والقمر
كبر حبنا وازدهر
بعيونك حبيبي
تبتدي دروب السفر)
هاي تكمله الاغنيه اللي كانت تغنيها !!!
معقووووووله سمعها ؟!
ليش وين كان هوو؟
وكيف ماحستبه ؟

ماعرفت شو تسوي ؟ واذا زقرت مي بتحس احلام انه في شي..
خلت السالفه بينها وبين نفسها .. بس الافكار توديها وتيبها .. تحس بحراره تسري بجسمها كله ومب عارفه شو تسوي ..

****

هالويكند فجر قررت ما تنزل البيت .. بما انه الجامعه في رمضان لها طعم ثاني .. اقنوعها ربيعاتها انهم يتمون ويسهرون مع بعض ويطلعون رباعه ..
وعلى الساعه 10 بدت سهرة البنات وظهرت فجر بسيارتها ويا دلال ولولوه و كانت وياهم زهره ربيعتهم متعرفات عليها من فتره بسيطه..كانن وايد مستانسين على هاي الظهره .. وتوجهن لشاطي البحر وفرشن هناك ويلسن ..

فجر: اروح اطلبلنا عشا؟
دلال: لا فجر تو الناس ..
لولوه: انا احس شبعانه من الفطور .. مابي اكل شي ثاني اخاف انتفخ..
فجر: شدعوه عاد .. يا على اليوم تبين تحافظين فيه على رشاقتج
لولوه: اذا بناكل شي خفيف هي اوكي ..
فجر: خلاص .. كملوا سوالفكم وانا بروح اطلبلنا أي شي ..

قامت فجر من عندهم وركبت سيارتها وتوجهت لأقرب كافتيريا منهم .. مانزلت ولكنها كانت تنتظر شخص .. ويوم لمحته نزلت من سيارتها وتوجهت عنده ..

فجر: قوه أحمد
أحمد: هلا والله ..
فجر: تأخرت عليك؟
أحمد: لا عادي.. قايلين عشر ونص نكون فها المكان .. بس تأخرتي خمس دقايق
فجر: ههههه حاسبنهم ..
ابتسملها أحمد ..اما فجر حاولت تشتت نظرها فكل مكان بس عسب ما تتلاقى ويا نظراته اللي تذبحها ..
أحمد: وربيعاتج وين عيل؟
فجر: قاعدين ع الشاطي..مو فخاطرك تقعد معانا؟
أحمد: مم .. انتو شلة بنات كيف تبيني ايلس وياكم جي
فجر: عادي تعال .. لولوه رفيجتي بتنادي خطيبها واكيد هو بيي ويا رفيجه..
احمد: ماعرف
فجرتتوسله بكل رقه: الله يخليك..وناسه
أحمد ما قدر يقاوم ويمنع رغبته من انه ييلس وياهم .. ما يدري ليش بس فخاطره كان يكون ويا فجر ها الوقت .. يبى يسولف وياها ..
احمد: خلاص اوكي .. بس ..
فجر: آمر
احمد: ما يامر عليج عدو .. انا بتم هنيه ويوم خطيب ربيعتج بيي قوليلي عشان انا ايي
فجر: ممم .. وليش ما تي معاي الحين
احمد: لا احس فشله ..
فجر: خلاص اوكي .. انا بطلب للبنات شي بارد وبرجع ..
احمد: لا تطلبين شي .. انا يوم بيي بييب الكم كل شي
فجر: لا والله ما يصير
أحمد: يصير ونص .. خلاص ركبي سيارتج ولا ترديني
ناظرته فجر فعينه ونزلتها حيا وهي تبتسم ..
فجر: خلاص اوكي ..

أخرت على ورا وتوجهت لسيارتها وركبتها وهي تأشرله .. رجعت لربعها وهي فكرها أبدن مب وياها .. انسحرت .. انشلت اطرافها .. اتجمد تفكيرها .. ماتقدر تشيل احمد من بالها .. نزلت من السياره وانتبهت انه الشله زادت ..
عرفتهم لولوه على خطيبها اللي كان ياي ويا ربيعه ..
اتصلت فجر على طول بأحمد تقوله اييهم وخبرته بالمكان .. وبعد ربع ساعه وصل عندهم أحمد .. واتعرفوا كلهم على بعض وتسامروا فها الليل ..
فجر كانت وااايد مستانسه وفخاطرها الليل يطول أكثر..ويلسوا يلعبون ورقه وخذوا على بعض وايد فها اليلسه ..


*****************
(الثلاثا) 2 نوفمبر 2004
*****************

بعد ما خلصت مهره صلاه التراويح .. نزلت الصاله اللي تحت وشغلت التلفزيون تبى تشوف المسلسل لكنه بعده مابدى .. فبدت تجلب في باقي القنوات وصلت لقناة دبي
(وانا لله وانا اليه راجعون
صاحب السمو رئيس دولة الامارات طيب الله ثراه كان رجل بكل مابالكلمه من معنى
حياته في هذا التقرير)

مهره يلست مكانها وهي تبلع ريجها .. صحيح اللي تسمعه ..
ركضت غرفه يدتها اللي كانت توها واقفه بتكمل صلاتها ..

مهره: امايه امايه
ام سيف التفتت لها: خير
مهره: امايه بابا زايد توفى
ام سيف: شوووو ؟ منو يقولج ؟
مهره: هاكم مطلعين في قناه دبي
ام سيف: لاحوووول ولا قوه الا بالله
لاحول ولا قوه الا بالله

مشت لين الصاله وهي تكرر هالجمله .. ويلست وهي بعدها بوقايتها مال الصلاه جدام التلفزيون

ام سيف: طولي ع الصوت
مهره طولت ع الصوت وتمت ام سيف تطالع التلفزيون ودموعها على خدها
ام سيف: الله يرحمك يا بوخليفه الله يرحمك ويعفو عنك
في هالوقت دخل جاسم ومايد راجعين من المسيد ..
مايد: السلام عليكم
محد رد عليه .. مهره ويدتها عيونهم ع التلفزيون
مايد: بلاكم؟
جاسم تجدم من التلفزيون وهو ينقل نظره بين يدته والشاشه ويقرا الخبر اللي مكتوب عليها
جاسم: زايد في ذمه الله ..
مايد يلس ع الكرسي و جسوم يطالع يدته ويلس ع الارض..
ام سيف: الخلاف الله عقبك يا زايد .. ظعنا من وراك يا بوخليفه.. الله يرحمك ويغمد روحك الجنه يا شيخنا ..
ورفعت ايدها تدعي بصوت متقطع تصاحبه دموع حاره من عيونها تحرق قلبها على الوالد الغالي الي وافته المنيه .. وقع الخبر سبب الصدمه ومحد مستوعب الي صاير ..
ام سيف: يالله يارب تغفرله ونحن في هالايام المباركه وتعفو عنه .. يارب ارزقه الجنه بدون حساب امين يا رب العالمين ..

وكملت دموع ام سيف بالانهمار وهي حاطه طرف شيلتها على عيونها تمسح فيها دموعها الي ما وقفت ..
دشت مها الصاله وهي تشوف الاجواء من بعد ما سمعت الخبر من عند ناعمه الي كانت يالسه وياها فصالتها فوق .. تم قلبها قابضنها وهي تشوف يدتها تصيح بها الضعف .. وتجدمت ويلست حذال مهره وهي تطالعها بنظره مكسوره ..

مها: الله يرحمك يا ابونا.. مادري شو من عيشه بنعيشها من عقبك
مهره: خلف رياييل وراه .. بس ماظن حد فها الكون بيكون شرات بابا زايد
مها: الله يعيين .. الا ريمان وين .؟ تدري؟
مهره: مادلها
مها: بقوم اطالعها ..

وقبل ما تنش مها .. دخلت ريم الصاله من بعد ما نزلت من فوق بعد ماوصلها مسج عن الخبر .. ولقتهم متيمعين في الصاله ..
ريم وهي تحب يدتها ع راسها
ريم: عظم الله اجركم امايه
ام سيف : اجمعين فديتج

ريم من شافت حال يدتها ضعف قلبها أكثر بس يودت على عمرها ..
نشت ام سيف بخطوتها البطيئه تمشي لغرفتها

مهره: وين سايره اميه ؟
ام سيف: بكمل صلاتي ..

نشت ريم ورا يدتها توصلها للحجره وخذت لها وقايه من عندها وشلت مصحف وطلعت يلست في الحوي جداام باب الفله .. قلبها معورنها وبدت تنزل دموعها اللي ميودتنهن .. آثار الصدمه امبينه على ويوه الكل .. والاستيعاب صاير بطئ .. والدنا الغالي سلم روحه لباريه .. صدقج يا مها شو من حياة بنعيشها من بعدك يا زايد الخير..
فتحت ريم المصحف وبدت ترتل آيات قرآنيه ..
يت مهره ويلست عدالها ع الدري وهي تسمعها تقرى .. ولا ارادي نزلن دموعها ..
رفعت ريم راسها وهي تقاوم دموعها وتمسحهم وتشوف مهره ..

ريم: وين خوانج
مهره: كلهم داخل .. الفروخ يطالعون الاخبار ومهوه سارت تصلي وتقرا قرآن
ريم: زين ..
مهره: ريمان
ريم : ها؟
مهره: مارمستي قوم ميوه ؟ يعرفون ولا؟؟
ريم: مادري مارمستهم .. تلفوني فووق .. سيري دقيلهن شوفيهن..
مهره : ادق لميوه وماترد وساروه مغلق
ريم: اكيد عندهن خبر عيل
مهره: لازم .. من الله انتشر بسرعه فدقيقه بعد ..
ريم: الله يعين..

قامت مهره اما ريم تمت يالسه مكانها وكملت تلاوه .. بس وقفها صوت سياره داخله البيت ..
رفعت راسها وسارعت في مسح دموعها
نور اشعة السياره ماخلتها تميز نوعها لين تقربت أكثر.. انصدمت انه اللي ياي نايف .. اول ما نزلوا من السياره وقفت ريم على طول وعدلت تحجيبتها ..
تقربت منها عمتها..

مريم: مرحبا ريمان
ريم: مرحبتين.. اشحالج عموه؟
مريم: الحمدلله غناتي.. انتي اشحالج ؟
ريم: الحمدلله ..
تقرب نايف من ورا امه ومد ايده حق ريم
نايف: هلا ريمان اشحالج؟
ريم: الحمدلله ..
مريم: عيل امايه وينها ؟
ريم: داخل تصلي
مريم: زين عيل بدخل اطالعها
دخلت مريم وتم نايف واقف مجابل ريم اللي وطت راسها يوم شافته مركز نظره عليها
نايف: كوني اقوى عن جي ..
عظت ريم ع شفايفها وحاولت تتمالك نفسها ..
ريم: اتفضل مابتدخل ؟
نايف: لا .. بيلس مكان ماكنتي يالسه ..

تجدم ويلس ع الدري قبلها واشر لها عشان تيلس عداله .تجدمت ريم ويلست قريب منه .. وبدى شوي يرمسها يحاول يغير مزاجها مع انه هو الثاني اتعكر مزاجه وتموا الاثنين يالسين عدال بعض كل واحد متظايج .. ريم لامه ريولها ومسنده ويها على ركبها ونايف عدالها يلعب بسويجه وسرحان .. لين طلعت برع يدتهم ومريم ويلسوا كلهم برع ولكن الحزن مغيم عليهم ..

رد: قـــلـــوب تـــحـــت الـــمــجـــهــــر**
 

ان شاء الله يومين بالكثير

أكمل لكم الروايه

جودي