أكيد كلنا بنخاف من تجهيزات المصيف علشان بتاخد وقت وجهد كبير ده غير إننا ساعات بننسى حاجات وساعات تانية بنحط حاجات مالهاش لازمة وبتاخد مكان على الفاضي في شنطة السفر...

ده غير إنك بتلاقي البيت كله واقف على رجْل والكل عصبي وعمال يزعّق كأنكم داخلين معركة حربية.. الكل على أعصابه خايف ينسى حاجة.

وعلشان كل الحاجات دي ما تحصلش هنقولك دلوقتي على الخطوات اللي إنت تعمليها علشان تجهزي كل حاجة هتاخديها معاكي في هدوء شديد جدّاً من غير ما حد يحس...

نشوف مع بعض الخطوات دي..

أولا: هاتِ ورقة وقلم



قبل موعد المصيف بأسبوع هاتِ ورقة وقلم واعملي كوباية شاي كبيرة، واقعدي بينك وبين نفسك وفكّري في الحاجات اللي أنت هتحتاجي لها في المصيف واكتبيها...
وخدي بالك وإنت بتكتبي إنك تقسمي الورقة دي إلى قمسين:

القسم الأول سمّيه: احتياجات أساسية للبيت" ودي حاجات بسيطة بس لازم تاخديها معاكي؛ لأن ببساطة شديدة الحاجات دي مفيش بيت في أي مكان يقدر إنه يستغنى عنها والحاجات دي زي "قصافة"، مجموعة الإسعافات الأولية "قطن، شاش، والأدوية اللي بتحتاجي لها"، "مقص"، "إبرة"، "خيط"، "مشط"، "ملقاط"، "فوط كبيرة"، "فوط صغيرة"، "ملايات سرير"، "كوفرتة"، "ليفة"، "فرشة أسنان"، و"معجون أسنان".

: "احتياجات شخصية"، وده تكتبي فيه كل الحاجات الشخصية اللي إنت محتاجة لها في المصيف وعلشان ما تاخديش وقت في التفكير هنقول لك عليها وهي: "صن بلوك"، "كريم مرطب"، "كريم ملطف"، "كريم أو زيت للشعر"، "شامبو"، "بلسم"، "مزيل العرق"، "شنطة مكياجك العادية"، "زبدة كاكاو"، "بونيه للشعر"، "كاب للحماية من الشمس"، "مراية صغيرة"، و"نضارة شمس".

ثانيا: جهزي الملابس المناسبة

فيه حاجة لازم تاخدي بالك منها وإنت بتجهزي ملابس المصيف وهي إنك ما تخديش هدوم كتيرة واكتفي فقط بالملابس اللي هتحتاجي لها في الكام يوم اللي إنت قاعدة فيهم طبعا هتقولي: آخد إيه؟ وأسيب إيه؟..

حالا هأقول لك دلوقتي على الملابس اللي إنت محتاجة لها وهي:

-1-
هدوم خروج



ودي بتكون عبارة عن جوب وبلوزة وبنطلون علشان الفسح بالليل أو بالنهار واوعي تنسي إنك تختاري الألوان الفاتحة علشان تحسي بجمال المصيف..

-2-
هدوم للبلاج



شوفي يا قمر كل اللي هتحتاجيه بنطلون وتي شيرت أو تي شيرت وجوب علشان تلبسيهم وإنت قاعدة على البلاج ولازم تاخدي بالك إن الهدوم اللي هتلبسيها على البحر تكون هدوم ألوانها فاتحة؛ لأن زي ما إنت عارفة إن الهدوم الغامقة بتمتص أشعة الشمس ويا ريت كمان تكون الهدوم دي قطن أو كتان على قطن علشان تمتص العرق.

-3-
هدوم للنوم



حاولي ما تكتريش من هدوم النوم؛ لأنك مش هتحتاجيها كتير؛ لأن عادة مفيش حد بينام في المصيف غير كام ساعة على بعض، وبرضه خدي بالك إنك تجيبي هدوم قطن ويا ريت يكون فيهم حاجة بكم علشان ساعات الجو بيكون ساقعة في المصيف.

-4-
أحذية المصيف






حاولي تاخدي حاجات عملية علشان تساعدك على الحركة بسهولة سواء على الشاطئ أو وإنت خارجة بالليل.

-5-
شنطة للبلاج



يا ريت تاخدي معاكي شنطة كبيرة علشان تاخديها معاكي على البلاج وتحطي فيها كل احتياجاتك اللي إنت عايزاها زي "السندويتشات"، "فوطة البلاج"، والاحتياجات الشخصية التانية زي "كريم الوقاية من أشعة الشمس" و"بونيه للشعر" علشان لو هتنزلي البحر.

ثالثا: افحصي كل حاجة موجودة



بعد كده ابدأي في فحص كل الحاجات دي وشوفي إذا كانت الحاجات دي موجودة عندك في البيت ولا لأ علشان لو موجودة يبقى هتبدأي في حطّها في الشنطة ولو مش موجودة يبقى انزلي اشتريها وإنت لسه عندك وقت.

رابعا: جهزي سندويشات



يا ريت ليلة المصيف تجهزي السندويشات اللي إنت هتاخديها معاكي تاني يوم وإنت مسافرة.
أو ممكن تعملي وجبة كاملة وتاخديها معاكي علشان أول لما توصلي بالسلامة تسخنيها وتاكليها بدل ما تشتري أكل من برة..

أعتقد بكده تكوني جهّزتي كل حاجة في المصيف..

ودلوقتي تعالي نشوف تعملي إيه علشان تحافظي على جمالك وإنت في المصيف..

نشوف مع بعض...



علشان تحافظي على جمالك وعلى بشرتك وإنت في المصيف..

أضغطي هنا
https://fashion.azyya.com/13720.html#post201182