ازياء, فساتين سهرة
ازياء مول

العودة   ازياء - فساتين سهرة و مكياج و طبخ > أقسام عامة > قصص و روايات > روايات مكتملة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
روايات مكتملة لجل الوعد كامله يوجد هنا لجل الوعد كامله هنا تنقل الروايات المكتملة فقط


الكلمات الدلالية (Tags)
لجلب الحبيب, لجلب الرزق, الوعد, الوعد الحق, الوعد باكر, روايات كامله, مباريات كامله, العاب كاملة

 
قديم 07-13-2010, 08:33 AM   #6

انا البنوتة


رد: لجل الوعد كامله


لجل الوعد كامله

فتون باستهبال : مثلي
مرام : انتي اص لا تتكلمين بس
حنان : لا فتون هذي غير
فتون : يلا اشرحيني
حنان : ههههههه حلوة أشرحك .. ام طبعا سواد شعرك مطلعك تهبلين يعني لايق عليك مره ولايق على بياضك ماشاء الله .. جسمك روعة ومافي كلام ان جسمك احلانا كلنا
فتون : احلى .. أشوى تعب الرياضة فادني أجل
حنان : اي ماشاء الله وشفايفك حمارها طبيعي وطولك زين وكلك على بعضك جنان
فتون : يسعدلي هالخالة يارب .. طيب والحين دورك انتي
حنان باستهبال : مايحتاج أدري اني ملكة جمال
عبير : وانتي صادقة ماشاء الله ياحنان شعرك طولك جسمك عيونك خدودك كل شي فيك يهبل ماشاء الله

سمعوا هالحظة صوت سيارة توقف عند الباب ولبسوا طرحهم بسرعه .. وشوي الا دخل فيصل وخالد وكل واحد منهم بشورت وبلوزة كت وخدودهم حمرا من السباحة والشمس .. وأشكالهم طالعة تهوس..

شافوا البنات متجمعين بالحديقة ومعاهم حنان ومشولهم وهم يقولون : السلام عليكم
البنات : عليكم السلام
منى : هاه بشروا كيف الطلعة اليوم
فيصل : تعب بس حلوة والله
عبير : صدتوا سمك ؟؟
خالد : أسماك مو بس سمك .. لا وصدنا سمكة كبيرة وتركي الحمار أصر الا ياخذها بيته
عبير تلخبطت من سمعت اسم تركي وفتون ضحكت عليها ..

نادى فيصل على ساره : سويرة
ساره وهي تلعب : نعام
فيصل : جيبي بيبسي من الثلاجة
خالد وهو لازال واقف : أمي موجودة ؟
عبير : ايه داخل ..
حنان وهي تنقل بصرها بينهم : متعشين ؟
فيصل : اي الحمدلله
خالد : بس عادي نتعشى مره ثانية
حنان :ههههههه بالعافية
منى : اي وبعد وش سويتوا حكونا مغامراتكم ..
فيصل قعد يسولف عليهم
وخالد انتبه لمرام الي تطالع فيه ويوم التقت عيونهم أبعدت عيونها بسرعه لكنه لاحظها وابتسم ابتسامة جانبية وهو يقول : من متى وانتوا هنا عبير ؟
عبير : من الصبح ..
خالد : أوكي أنا بادخل أشوف أمي
ومشى لناحية البيت الا ساره الصغيرة طلعت بسرعه تركض ومعها علبتين بيبسي .. ضحكلها خالد وهو يقول : لي واحد مو ؟
ساره بدلع : واحد لك واحد لفيصل
خالد انحنى قدامها لين صار قدام وجهها وقال : طيب انا عطشان ساره ابيهم كلهم
ساره بحيا : طيب ..
خالد : وفيصل وش يشرب ؟
ساره : يشرب موية
خالد :هههههههههههههههههههه لا بعدين يهاوشك
ساره : بقوله خالد أخذهم مني
خالد : بعدين يهاوشني أنا
ساره برائة وهي تضحك : لا مايقدر يهاوشك انت صديقه
ضحك خالد وهو يقرص خدها وقال : عطيني واحد بس
مدت ساره البيبسي له وأخذه وهو يقول : يلا وانا باعطيك ريال
ساره :هههههه يعني تشريه مني ؟
خالد : ايوا اشريه منك .. بس أول عطيني بوسه
ضحكت ساره بحيا وباسته من خده
خالد : عسل .. وحد ثانية هنا (( وأشر على خده الثاني .. وباسته ساره وهو قال : يلا باعطيك ريالين بس مو الحين لأن محفظتي بالسيارة .. ذكريني قبل ما أطلع أعطيك
ساره بفرح : طيب ..

وركضت لأخوها .. وخالد فورا التفت لمرام وشافها تراقبه بابتسامة خفيفة وهو كان حاس بنظراتها من البداية .. وأول مالتفتلها انحرجت ودارت وجهها .. قعد يطالع فيها لحظات لين سمع صوت أمه وخالته طالعين وقف واهو يبتسم لهم لين اقربوا وأمه تقول : هلا ياعمري شف شلون وجهك صاير !!
خالد بضحك : لزوم البطولة ..
وباس راس امه .. وباس راس خالته .. ومشوا لوين مالبنات هناك ..
وقعدوا كلهم سوى وفورا ضجت السوالف بينهم

وخالد قعد جمب أمه .. وعلى يساره جمب عبير كانت مرام تراقب حركاته وقلبها يضرب طبول بين ضلوعها .. فتح خالد البيبسي بملامح جامده و رفعه لفمه يبي يشرب .. وأول ماجا يشرب انتبه لمرام تطالعه .. أبعد البيبسي عنه وقال بهمس مايسمعه الا هي : تبين ؟؟
ارتبكت مرام وقالت : ... هاه وشو ؟
خالد : البيبسي !
مرام : لا مابي عليك بالعافية
خالد بنفس الهمس والجمود : شفتك تطالعيني من أول قلت يمكن نفسك فيه
ورفع البيبسي لفمه وشربه كلله ورى بعض .
مرام حست دمها يفور منه ومن حركاته وكلامه .. ياويلي بيجنني هالولد .. لا ماقدر أقعد خلاص والله أحس صوت دقات قلبي بينسمع !

فيصل مندمج بالسوالف : ومسكناه أنا وخالد ورميناه من فوق القارب بوسط البحر
فتون بحمق : وانت ماتعرف تستقوي الا على عمي حرام عليك
فيصل : والله عاد كيفي قاهرني وبانتقم منه
فتون : اعوذ بالله عاد انت اذا انتقمت ماترحم
فيصل متونس عليها : ايه وتراي حاطك بالستة
فتون : وأنا وش مسويتلك ؟؟؟؟؟؟؟
فيصل بخاطره .. معذبة قلبي وروحي : .... ناسية شمسويه ؟ ناسية سرقات السنكرز والباسي من غرفتي انتي ومرام !
فتون : انا اسرق منك انت ..؟؟ (( والتفت لمرام وهي تقول : متى يامرام سرقنا من فيصل ؟
مرام انتبهت لهم وهي الي كانت بعالم ثاني : وشو أي سرقة ؟
فتون : هذا يقول سارقين من عنده سنكرز وباسي
فيصل بابتسامة : حلوة منك .. " هذا " !! .. بس ترا انا اسمي فيصل !
فتون باستهبال : احلف !!
فيصل يكمل على استهبالها : والله اسمي فيصل
فتون : واذا كان اسمك فيصل مب عاجبني
فيصل : هاه شالي يعجبك ؟
فتون : ولا شي فيك يعجبني خلاص؟؟

أم سعود : هَو يافتون شفيك على الولد؟

فيصل :ههههههههه خليها خالتي خليها .. والله ما أزعل .
أم سعود طالعت بنتها بنظرة وعيد .. وفتون كشرت وهي تدير وجهها عنهم .. فيصل كان للحين ماسك البيبسي مافتحه .. ويوم شاف ان فتون مكشرة ودايرة وجهها بزعل .. قام لعندها وقرب إيده بالبيبسي لاذنها .. و .. " طش << فتح البيبسي بوجهها !!!
طار رذاذ البيبسي بوجهها وهي اخترعت ونطت من مكانها تصارخ : وجع ياحمار
وشافت البيبسي بإيد خالد ركضت تسحبه منه الا خالد قالها : فاضي فاضي
فتون : أدري هات ..
وأخذته منه وراحت لحنفية كانت بالحديقة قريب منهم .. وبسرعه عبة العلبة موية ودرات مسرعه لفيصل الي كان يراقبها ويضحك
فتون : والله لا أكبه عليك
أم سعود : فتون اعقلي !!!
فتون : ياسلام وهو عادي يرش البيبسي على وجهي ؟؟؟
أم سعود : يمزح معاك شفيك انتي ؟
فتون : طيب وأنا برد المزحة كيفي ..
أم سعود وهي تهز راسها : الحمدلله والشكر !!

قام فيصل يوم شافها قربت وابتعد على ورى وهو يضحك وهي ركضت عليه وهو يبتعد ودار عنها وصار يركض وهي وراه معصبة من جد .. لين لف ورى البيت وهي لازالت تركض ومعصبة وفاجأة وقف والتفت لها وقال : تدرين عاد يافتون انا مو هارب عشان لاتكبين علي الموية ..
فتون : لا تسوي نفسك مو خايف وتراها باردة زي الثلج (( ورجعت ايدها على ورى ودفت العلبة وهي ماسكتها وانرشت كل الموية عليه وهو يضحك !
فتون بعصبية : وتضحك بعد ؟؟
فيصل : كل شي منك حلو
فتون ماستوعبت الي بخاطر فيصل وقالت : طبعا وغصب عليك حلو ..

ورمت العلبة ودارت مبتعدة عنه واهو يراقبها بكل حب .. واتنهد من كل قلبه واهو يحس انه بيضطر يحارب ويعارك لحتى يلقى قبول من فتون .. الي ماعاد يحس بطعم السعادة والفرح الا بوجودها .. ودخل للبيت يبدل ملابسه .. وهي رجعت تقعد بعد ماحست انها بردت قلبها منه !

**********

مرت الأيام الي بعدها والكل مستعد لسفر سعود وكل ماقرب اليوم عصر الألم قلوب الكل لأنهم محد منهم الا ويحب سعود الي عمره ما آذى أحد وحنانه وطيبه غامر فيه الصغير والكبير خاصة فتون الي متعلقة فيه بشكل كبير ..
كان سعود بالصالة يرتب آخر أوراقه .. دخل خالد عليه وقعد جمبه وهو يقول : الحين انت متى مسافر بالضبط ؟
سعود بهدوء وهو يرتب الاوراق : بعد اربع ايام
خالد : طيب ياخي ليه ما تأجلها شوي؟؟
سعود : وليه أأجلها ؟
خالد : توك ماكملت سنة راجع من أمريكا .. والحين بتروح ابريطانيا وسنتين بعد
طالع سعود فيه وقال : الحين انا ماصدقت أخلص من امي وخواتي تجيني انت الثاني بعد؟ يعني وش تبوني أسوي والله مو بايدي !
خالد بهمس : طيب ليه مو أبوي الي يسافر ؟
سعود بدهشة : تبي ابوي يسافر وانا موجود ؟؟ صاحي انت !
خالد : ياخي والله انت محسوب علي اخو .. ولا من كبرت انا وانت كل سنينك برا
سعود : والله انت مخك يبيله إعادة تعمير
خالد :هههههههههههههههاي زين اسمع ..
سعود : شتبي بعد ؟
خالد : قوم اطلع معاي امانة خليني اذكر آخر ايامي معك كانت فلة وناسة
سعود بأسف : خالد صدقني ماعندي وقت !
خالد : بتقوم يعني بتقوم ! و طلعة وحدة يعني بتأثر بشغلك الله أكبر ؟
سعود بتنهيدة : والله ياخالد محسوبة علي الدقيقة قبل الساعه
خالد : مو شغلي عاد محد قالك تصير اخوي يالله قوم
سعود الطيب : والله انك قلق
خالد : عسل على قلبك
سعود : أجل خلني بكلم صالح هو من أول يبيني أطلع معه ولا فيني من كم طلعة خلاص كلكم مره وحده
خالد : أوكي كلمه وأنا بروح ألبس
طلع خالد .. وسعود لم أوراقه ورجعهم للملف .. هو صحيح مشغول لكن ماحب يكسر خاطر أخوه ومشى للتلفون واتصل على بيت جده وين ماعمه الصغير هناك

رن التلفون بيت الجد والصدفة كانت ان منال وأهلها هناك يزرون جدهم
ردت على التلفون الي كان جمبها : الو
سعود استغرب الصوت : مرحبا
منال : أهلين
سعود : هلا كيف الحال
منال عرفته وخفق قلبها وهي تقول بحيا : بخير الحمدلله .. انت شلونك سعود
سعود : تمام الحمدلله .. مين معاي !
انحمقت منال ليش ماعرفها وقالت وهي تحاول تخفي قهرها : انا منال !
انحرج سعود بس مو منها !! من الموقف وهو الي ماعرف صوت خطيبته وقال : هلا منال هلا والله سامحيني ماعرفتك ماتوقعت انتي تردين
منال : لا عادي احنا مرينا بس نسلم عليهم
سعود : ايه .. وش أخباركم ان شاء الله بخير
كان نفسها يسألها عن أخبارها هي مو أخبارهم كلهم وقالت : والله طيبين الحمدلله
سعود : وعمي ان شاء الله طيب ؟
منال : بخير يسأل عنك
سعود : سألت عنه العافية .. اجل صالح عندك ؟
منال تضايقت تبي يسأل عنها ويحس فيها ومن حسن حظها كان صالح طالع مع تركي وقالت : لا والله طالع اهو وتركي
سعود : ام .. خلاص اوكي بدق على جواله
منال ماعرفت وش ترد وقالت : براحتك
سعود : اوكي منال نشوفك على خير
قال هالكلمة بساطة وماقصد منها شي .. لكن منال المتولعة فيه رقص قلبها واهي تتخيل تشوفه مره ثانية ولاقدرت تنهي هالمكالمة من غير ماتقول شي وقالت : سعود باسألك ..
سعود : آمري منال
منال : مايامر عليك عدو ... ام انت متى مسافر؟
سعود : بعد اربع ايام ان شاء الله
منال : اها و ....
سعود : و .. ؟؟
منال بحيا : لاكنت باسأل بنشوفك قبلها ؟
سعود : أكيد لازم أجي بيت جدي اسلم على عماني وعماتي قبل اسافر
منال ضاق صدرها ليه مايخصها اهي بالحكي وقالت بضيق : اوكي سعود نشوفك على خير
سعود : ان شاء الله .. مع السلامة
منال بهمس : مع السلامة

سكر سعود منها وهو مايحس بأي شعور !! حاول يبتسم عشان يبين لنفسه انه فرحان بهالمكالمة .. لكن يكذب على نفسه .. أوهم نفسه انه فرحان واهو بالنسبة له كل شي يصير بينه وبينها عادي !! اتضايق من هالبرود الي يحسه لكن حط السبب ان توه ماصار شي يقرب بينهم أكثر وانه يمكن اذا سافر وابتعد يشتاق ! وقام وهو يحاول يطرد من باله هالأفكار ودق على جوال صالح واتواعد معاه أهو وتركي يطلعون سوى طلعة حلوة قبل سفر سعود لابريطانيا
::

أتوقع بهالجزء بانت أمور أكثر .. اذا عرفتوها قولوها
حنان تعيش بصدمات وجروح .. ياترى وشهي ؟؟؟
صالح ليه مهتم بأمر حنان ؟؟

وباقي الأمور
تعليقاتكم تهمني عليها

::

شاهد زبد البحر
وصية حكيم تستحق أن تكتب بماء الذهب
أثنين ستات اتقابلوا في الاخره
(ماكل من يضحك مع الناس مبسوط ياكثر من يضحك ونفسه حزينه)
نصائح مهمة
امسك الخشب
يا رب تخليه وتبقيه لعنين ترجيه كامله
شــــي غريب
نبض قلبي رواية خياليه رومانسيه احداث مشوقه كامله
قصــه حــب حــزينه جـدا...انتهــت بـ.......؟شوفوا
روآيـه قـلـوب تـنـزف عـشـق / لـ الكآتـبـه : أغآني الشتآء . . كـآمله .
اجمل ايميل ستقراه بحياتك
فوائـــد الطباشيــــر
ابي انام بحضنك واصحيك بنص الليل واقول ما كفاني حضنك ضمني لك حيل كاملة
أنشر الموقع للعالم


 
قديم 07-13-2010, 08:34 AM   #7

انا البنوتة


رد: لجل الوعد كامله


لجل الوعد كامله

الجزء الثالث

في بيت أبو فيصل
مرام طفشانة بالبيت وحنان بغرفتها كالعادة .. ومنى بشغلها .. راحت لأمها لقتها بالصالة قعدت بضيق جمبها وقالت : يمه والله زهق قومي نطلع !
أم فيصل : وين نطلع ياحظي بهالحر !
مرام : أي مكان حتى لو كفي المهم نطلع
أم فيصل : لا ماحب أروح أي مكان انا لايطلع فيه موسيقى وبلاوي
مرام : لا باختارلك مكان حلو ويناسبك بعد امانة خلينا نطلع الحين
أم فيصل : وانتي شجايك على الطلعة بسم الله اركدي بس بلا دلع
مرام : يايمه ياحبيبتي انتي الي يسمعك يقول عجوز وباليالله تمشي والله أمهات صديقاتي مايقعدون بالبيت دقيقة وحده
أم فيصل : لاياعمري انا مو من الحريم الي ماغير أكبع عبايتي وأدور بالشوارع .. أنا أقضب أرضي وصلي لربي عسى الله يحسن خاتمتنا
مرام وهي شوي وتبكي : لا تقولين كذا يمه كنك عجوز
أم فيصل : الحين الي تخاف ربها وتمسك بيتها صارت عجوز ؟؟
مرام : اي كلنا نخاف ربنا بس نعيش حياتنا بعد !
أم فيصل : مابي أعيش حياتي بالهجهجة عاد
مرام : يعني شلون مافي طلعة ؟
أم فيصل : إي مافيه روحي ذاكري دروسك بس
مرام : ماعندي دروس والله ماعندي .. ياربي شهالحالة خلاص بكلم عبير وفتون ونطلع
أم فيصل : وانتي على بالك الكل منهبل وبيطلع مثلك
مرام وهي توقف : اي عبير وفتون مثلي فديتهم ..

(( وأسرعت تدق على جوال عبير ماردت .. جوال فتون وبرضو ماردت .. !! وراحت على التلفون واتصلت وكان خالد الي راد : مرحبا
مرام بلعثمة : الس .. السلام عليكم !
خالد وهو يضحك : وعليكم السلام ..
مرام : شفيك تضحك ؟
خالد : مدري شعندك نازل عليك سلام الله ..
مرام : الحين الناس اذا سلمت صارت تضحك ؟ ..
خالد : لا مو الناس .. بس مرام
مرام بحمق : طيب عطني عبير
خالد : وأنا ماتبين تكلميني؟
مرام وهي ميته عليه : إي مابيك وليه أبيك !
خالد : قد هالكلمة مرام
مرام : أقول تراك ماخذ بنفسك مقلاب !
خالد بمكر : أجل ليش تلخبطتي يوم سمعتي صوتي !
مرام وهي تمسك نفسها بقوة لاتبكي : ماتلخبطت ولاشي وتراك ماتهمني .. وعطني عبير بسرعه ..
خالد : عبير نايمة
مرام : وفتون !
خالد : فتون ام .. الحين اشوفها ..
وغاب لحظات ورجع وقال : تقولك فتون شتبين علميني وأنا أقولها !
مرام بصدمة : الحين من جدها هذي ليه ماتكلمني ؟
خالد : مشغولة اختي تحسبين الكل فاضي مثلك بلا مهمة !
مرام : بس ياخالد تراك ذبحتني
خالد: شسويلك انتي عنيدة وراسك يابس !
مرام : اوكي مشكور وقول لفتون مابي شي خلاص
خالد : لهالدرجة ماتبيني أعرف !
مرام : وليه تعرف شي خاص بيني وبين خواتك !
خالد : أفا مروم أنا خالد تخبين علي !
مرام حاولت تمسك نفسها لا تطلع منها " أحبك ياخالد " وقالت : بغيت أطلع أنا وياهم نتمشى
خالد : على وين !
مرام : مدري ماقرت
خالد : زين اذا قرتي دقي عشان أشوف اذا مناسب تروحون هالمكان ولا لاء !!
مرام : وانت شدخلك ؟
خالد : خواتي وبكيفي

دق جوال مرام ويوم طالعت لقت فتون المتصلة وقالت لخالد : خلاص الظاهر فتون فضت الحين وكلمتني ..
خالد : هي الي داقة على جوالك ؟
مرام : إيه
خالد :ههههههههههههههههههههههههههههه ههههههه
مرام وهي منهوسة من ضحكته : شفيك
خالد وهو يضحك : لا أبد مافيني شي .. يالله أخليك مع فتون
مرام باستغراب : اوكي .. باي
خالد : باي

وردت مرام على فتون وهي معصبة : الحين فضيتي ياهانم !
فتون باستغراب: بسم الله شهالكلام !
مرام : ليه ماتكلميني وتقولين لخالد مشغوله !
فتون : أنا قلت لخالد مشغوله .. متى ؟؟
مرام : بسم الله عليك تو قبل دقايق !
فتون : مرام حبيبتي .. أنا نايمة وتوي مابعد قمت من السرير ولا شفت خالد من البارح !
انبهت مرام وعرفت ان هذا مقلب خالد ليظل يتكلم معها ومزيج من الغضب من مقلبه مع فرحتها يوم درت انه سوى كذا ليكلمها وضحكت من خاطر ..

فتون : شعندك تضحكين فهميني شسالفة !
مرام : لا مافي سالفة ولا شي والحين قومي صحصحي خلينا نطلع
فتون وهي تتثاوب : يالمزعجة داقة عل جوالي بعز نومي تبينا نطلع وين نطلع ؟
مرام : أي مكان يافتون زهقانة حدي وباطلع .. صحي عبير بسرعه وبمرك بعد شوي ..
فتون : أنا أوكي بس مادري عن عبير
مرام : ماعندها شي ان شاء الله صحيها وساعه بالكثير امر عليكم
فتون بكسل : أوكي
مرام : باي
فتون : باي

قامت فتون وصحت عبير واتحمسوا للطلعة ومامرت الساعة الا وهم بالسوق ..

مرام وهي تمشي مسرعه : تعالي بسرعه بوريك محل طحت في قبل كم يوم عنده بلايز تجنن !
فتون : وش اسمه ؟
مرام : خربطيشن ..
فتون : وشو ؟؟؟؟؟
مرام : هههههه مادري وش اسمه تعرفين هالمحلات اساميها انجيلزية ومعقدة وصعب تحفظينها
فتون : هذا انتي ياحلوة الحين من يوم ما ألمح المحل بحفظ اسمه على طول
مرام : ايه طيب خليت الذكاء لك .. المهم شوفي هذا هو بآخر السيب

فتون وهي تلتفت وراها : اصبري وين عبير
مرام : مادري وين دخلت تعرفين اختك هذي كل محل جديد لازم تشوفه
مشوا بسرعه للمحل ودخلوه وداروا فيه وفتون تقول : الاه يجنن كل بلوزة أحلى من الثانية ..
مرام : قلتلك مب صاحي هالمحل .. تعالي شوفي هالبلوزة الألوان فيها روعه .. بس الله يقطعهم ناعمة وب 199
فتون : يقهروني ب 199 يقولون 200 وبس
مرام : هذا اسلوب تسويقي وش فهمك انتي ..
فتون : ايه طيب طيب يعني بتاخذينها ولا لاء؟
مرام : باخذها والله مع اني دارية ان امي بتهاوش
فتون : معها حق اصبري للتخفيضا صدقيني بيطيح سعرها مره وحده
مرام : لا حبيبتي بعدين ألاقي بنات الجامعة كلهم مطقمين معاي الزينة والشينة
فتون : أوه انتي وهالجامعة بزحمة ..
مرام : خليني اشوفك اذا دخلتي وش بتسوين
فتون : لا انا لايمكن أغير مبادئي
مرام بازدراء : اقول وخري انتي ومبادئك خليني احاسب

حاسبت على البلوزة وطلعوا ودقوا على عبير وتلاقوا وكملوا دورانهم .. وبعد فترة بسيطة قرصهم الجوع وطلعوا فوق يتعشون ..
تخيرت كل وحده من المطعم الي تبي وقعدوا ينتظرون طلبهم الا دق جوال مرام ..

مرام : هلا
منى : هلا مرام وينك ؟
مرام : بالسوق أنا مع بنات الخالة
منى : ماشاء الله عليكم فلة وناسة وانا الي خمجت بهالبنك !
مرام : وش اسويلك انت وهالشغل الي ليل نهار
منى : والسواق قاعد ينتظركم أجل ؟؟
مرام : اي قاعد ينتظرنا
منى : ومتى ان شاء الله تخلصون ؟
مرام : اصبري يامنى الحين طالبين عشا .. نتعشى ونخلص ونطلع وأوصل فتون وعبير بيتهم وأروح البيت بعدين يجيك !
منى بحمق : لا والله احلفي بس ! اقول مو منتظرتكم انا الحين يجيني السواق
مرام : ياربي يامنى والله انتي قلق ..

عبير مدت ايدها وهي تقول : هاتيها البايخة

عطتها الجوال وعبير قالت : منى يالقاطعة يالي ماعاد تنشافين
منى بضحك : هلا عبير هلا والله ..
عبير : وينك يابنت الناس من اشتغلتي لاعاد تطلعين معانا ولا نشوفك
منى بتنهيدة : آه بس خليها على ربك والله مليت وانا مالي الا كم اسبوع وأطلبهم اجازة رفضوا
عبير : هههههههههههه وهم صادقين شالي اجازة وانتي توك مداومة
منى : شسوي طيب تعبت والله وأبي أطلع معاكم أتونس واذا فضيت وبغيت اطلع لقيتكم انتوا مشغولين
عبير : لاماعليك ان شاء الله بندبر يوم نطلع كلنا سوى حنا بعد اشتقنا للطلعة معاك
منى : ياعمري خلاص ان شاء الله قريب والحين قولي لمرام تقول للسواق يجيني مخلصة دوامي من اول وقاعدة انتظره وهو معاكم ماشاء الله يتونس
عبير : هههههههههه اوكي حبيبتي بنقوله باي
منى : هههههه باي

وسكرت منها ومرام دقت على السواق وراح ياخذ منى ..
وتعشوا البنات وقامو يمشون بملل وهم ينتظرون السواق يرجع
وطال انتظارهم والسواق مارجع

فتون : يالله وين سواقكم يامرام تراني بديت أصدع
مرام : مادري عنها منى انا عارفة اذا طلعت ماتروح البيت الا ولازم تمر على أي مكان قبل
فتون : يعني شلون والله مافيني من هالطعة ..
مرام : تعالي نشوف هالأفلام لين يجي
ودخلوا محل أفلام واتفرجوا عليها وفتون ماعاد طاقت تقعد أكثر وقالت : دقي على سواقك ترا مليت !
مرام وهي تدق : طيب هذاني

رد السواق ومرام على طول انفعلت : آدم وينك ؟؟
آدم : انا في اشتري فول حق البيت !
مرام : فول وش فوله هذا !!
آدم: هذا بابا كلام بعد صلاة عشا روح اشتري فول
مرام : انت الحين وصلت منى البيت ورحت تشتري فول ؟؟؟
آدم : ايوا الحين انا عند فول بودي البيت بعدين اجي آخد انتا
مرام بانفعال : وجع لا تجي
وسكرت بوجهه
عبير وهي سانده راسها على أحد جدارن المحلات : وش صار يامرام ؟
مرام : هالسواق التبن راح يشري فول ومافول وبعد مايوديه البيت بيجينا
فتون ماردت لأنها كانت مصدعة ولافيها تجادل
عبير : اجل خليني أدق على سواقنا أشوفه

ما الذى ابكى الرسول (ص)بالله عليكم اقرؤه
ابي انام بحضنك واصحيك بنص الليل واقول ما كفاني حضنك ضمني لك حيل كاملة
امسك الخشب
فوائـــد الطباشيــــر
بشــرووه انـي بـرحل << قصه في غااايه الرووعه كامله
أنشر الموقع للعالم
شــــي غريب
عشـــرون مهــارة تجعلك محبوبــاً بين النــاس
قصه ( مجنــــون ســــاره ) قصه رومانسيه وحب لغايه
(ماكل من يضحك مع الناس مبسوط ياكثر من يضحك ونفسه حزينه)
هذه نتيجة السحاق
شاهد زبد البحر
يا رب تخليه وتبقيه لعنين ترجيه كامله
وصية حكيم تستحق أن تكتب بماء الذهب
روآيـه قـلـوب تـنـزف عـشـق / لـ الكآتـبـه : أغآني الشتآء . . كـآمله .


 
قديم 07-13-2010, 08:35 AM   #8

انا البنوتة


رد: لجل الوعد كامله


لجل الوعد كامله

دقت على السايق الي فاجئهم انه رايح ياخذ عمره !!
عبير بانفعال : يتصرف بكيفه هالسواق الحين والله لو درا ابوي ان يلعن ابو جده
فتون : وش سوا بعد !!
عبير : راح ياخذ عمره !
فتون : وجع الله لايقبلها منه
مرام : استغفر الله هههههههههههههه

عبير : والله بدق على خالد
فتون : اي والله بسرعه تراني مصدعة
مرام ومعالم الضيق بوجهها : الحين من جدك انتي وهي ؟؟
عبير : إي شفيك !
مرام : وش الي شفيني .. مابي أركب مع أخوك والله أتوتر طول الطريق
فتون باستهبال : بس مروم والله خالد يحبك شفيك انتي
مرام بعصبية واضحة : حبته العافية بس مابي أركب معاه
عبير : يعني وش نسوي ؟
مرام : نكلم فيصل
فتون : لا تكفين مابيه !!
عبير : ياويلي منكم انتوا كل وحده ماتبي تركب مع الثاني .. والله حلمي لو يجي تركي ونركب معاه !
فتون : روحي صارخي باسمه بالشوارع يمكن يكون مار ويسمعك ههههههههههههه
عبير : ياويل حالي أنا .. المهم بدق على خالد وبس ..

ودقت على خالد ومرام استسلمت لهالورطة والمضحك ان فيصل كان مع خالد بنفس السيارة وجوهم على السوق
فتون وهي تطالع السيارة وتهمس : ياحظي الخايس انا طالعوا فيصل معاه
عبير وهي تمشي للسيارة : كفوك يالشينة ..

وركبوا البنات ورى .. فيصل كان يكلم بالجوال وبصوت عالي ويضحك ..
وخالد مشى بالسيارة وقال بضحك : هلا مرام شلونك ؟
مرام تذكرت موقفه الي سواه بالتلفون وحست انه يضحك عليها وقالت بهمس : بخير
خالد طالع فيها من المراية وشاف وجهها منقلب وضحك بخفة ..
فتون انزعجت من صوت فيصل العالي وهمست بضيق : ياخي وطي صوتك تراني مصدعة
عبير : ك فيصل متسلط عليك
فتون بقهر : والله اني مصدعة وأبي هدوء وهذا كنه لحاله عشان يكلم بهالصوت العالي
مرام ضحكت على أخوها بس ماحبت تتكلم ولا كلمة لأنها تدري انها بتلخبط دام خالد موجود ورابكها

فيصل واهو يكلم : ياعمري والله فديتها أنا هههههههههههههههههههههههههههههه هههههههههه
خالد التفتله وضحك وكمل طريقه
فتون : وع بعد من الي تبيك تفداها
عبير : وانت شدخلك اتركيه
فتون : ابيه يهجد .. (( وماقدرت تسكت وقالت : فيصل ممكن توطي صوتك شوي ؟

فيصل يكلم الي معاه : ثواني بالله .. (( والتفت واهو يقول : فتون تكلميني ؟
فتون : اي أقول ياليت تقصر صوتك شوي لأني مصدعة
فيصل : آها ..
ورجع للجوال يقول : طيب يالحبيب بيننا اتصال ثاني
" لا أبد بس في ناس منزعجين مني "
"أوكي نشوفك على خير "
" سلام "

وسكر وفتون دايرة وجهها عشان لا يلتفت ويلمحها وهي تضحك عليه
وبعد ثواني قالت : خالد ارفع المكيف حرر
خالد : هذا أعلى شي فتون
فتون : يع شهالسيارة الخايسة حتى مكيفها مايشتغل زين
خالد : على الأقل منها فايدة مو مثل بعض الناس
فتون بحمق : شقصدك ؟؟

فيصل : بس ياخالد عاد لاتزعل فتون ..

توسعت عيون فتون باستغراب من فيصل الي يدافع عنها قدام خالد وليه يسوي معها كذا واهو مو لاقي منها الا الصد والكره .. لكنها اتجاهلت هالشي ودارت بينها وبين البنات سوالف بسيطة لين وصلوا البيت وفتون الي كانت ورى خالد .. فتحت الباب بسرعه ونطت وصكته وراها وعبير قالت : شوف البايخة ماتصبر لين أنزل !!
ضحكوا عليها وفتحت عبير الباب ونزلت ومرام يوم جت تنزل قالت تكلم أخوها : فيصل انت بترجع بيت خالتي ؟
فيصل : إي لازم أرجع سيارتي هنا ..
مرام : زين دق علي اذا وصلت عشان أروح معاك البيت
فيصل : اوكي ..
ونزلت مرام وخالد يطالعها بنص نظره .. ياويلي لو بنت ثانية الا وترمي كلمه ولا نظرة .. لكن والله هذه مو سهلة .. فديت هالثقل !

******

دخلوا البنات للبيت وعبير تنادي بالدرج : سولا
سولا : أيوا
عبير : صلحي قهوة تركية بسرعه
سولا : طيب
دخلوا الصالة ومرام تقول : انتِ للحين على هالادمان ؟
عبير وهي ترمي الاكياس بالصالة : والله ادمان واحلى ادمان
مرام : مادري شلون تذوقينها يع شلون تبلعينها مُره
فتون وهي ترمي عبايتها : انتِ أصلا عمرك ماذقتيها شلون تحكمين
مرام : من شكلها من ريحتها
عبير : هههههههههه لا حبيبتي لا تحكمين من الشكل ذوقيها بعدين احكمي
فتون : عبير وريني الكريمات الي شريتيهم
عبير : شوفيهم بالكيس

مسكت فتون أول كيس جمبها وطالعت فيه مالقت وقالت : وين ياعبير مافيه ؟
التفت عبير لها وقالت : وانتِ شوفي ماسكة كيس إيش ؟ .. زارا .. بالله هذا عنده كريمات ؟
فتون : هاه أجل وين
عبير وهي ترمي الكيس عليها : هنا بكيس مارك سبنسر
طلعت فتون الكريمات وصارت تدهن ايدينها منها وتشمها باعجاب وهي تقول : تجنن روايحها رايقة ..
عبير : قايلتلك كريمات هالمحل ماشفت زيها أبد
فتون ماغير تضغط من الكريم وتدهن ايدينها وذراعها وجهها .. وعبير صرخت وقالت : بس وجع مابقيتي فيه شي
فتون : والله مليان
عبير : بس الناس تحط نقطة مو تملين ايدك بهالشكل .. هاتي اشوف !

فتون وقفت وهي تضغط الكريم بسرعه بإيدها
وعبير قامت معصبة : ياحمارة بتخلصين كريمي هاتي
فتون ترجع على ورى وتضحك وتضغط أكثر
عبير ركضت عليها وهي تقول : والله لأوريك ياحماره
رمت فتون الكريم على مرام الي تلقفتها بسرعه وفهمت الحركة وصارت تضغط منه على ايدها وتدهن وتقول : واو يجنن ناعم .. وركضت

عبير وهي شوي وتبكي وبنعومة : وجع يوجعك انتِ وياها كريماتي هاتوها
مرام : مافيه خلاص هالكريم عجبني وباخذه
رن التلفون هالحظة وعبير كانت عنده ورفعت السماعة وهي ترد على مرام بكي : نجوم السما أقربلك .. الو

اي والله أنا مو أي أحد يقرب صوبي
عبير سكت لحظات لتستوعب الصوت وعرفت انه عمها صالح وقالت وهي تضحك :
هلا والله عمي شلونك
صالح : تمام الحمدلله انتِ شلونك عبير
عبير : بخير الحمدلله
صالح : شفيك زعلانة وتصارخين
عبير تبي تطلع غيضها : لأن عندي بنتنين هنا يبيلهم ذبح يبيلهم إعدام
صالح : يالطيف أكيد فتون وحدة منهم ..
عبير : طبعا فتون هي خراب السفينة والثانية مراموه الزفت
صالح : ههههههههه وانتي دايم المقالب عليك ماعمرك عكستي الأدوار
عبير بنعومتها : ماقدر عليهم ياعمي مو قد هالأشياء أنا ..

فتون سحبت السماعة وعبير مسكت اذنها بألم : آآآآي وجع بشويش
فتون : هلا بعمي صلوح هلا حبيبي
صالح من سمع فتون بنت أخوه وحبيبته ضحك واهو يقول : هلا بفاتنتنا هلا .. وش مسوية باختك انتِ ؟
فتون : عمي لا تصدقها هذي دلوعة تعبت أربي فيها مافيه فايدة
صالح : هههههههه انتي تربينها ؟ لا مشكورة ماقصرتي ربي نفسك بالاول
فتون : عمي صلوح شقصدك !!!!!!!!
صالح : ماقصدي شي بس لا تصيحين علينا وقوليلي ..

نصائح مهمة
قصــه حــب حــزينه جـدا...انتهــت بـ.......؟شوفوا
أثنين ستات اتقابلوا في الاخره
عشـــرون مهــارة تجعلك محبوبــاً بين النــاس
هذه نتيجة السحاق
ما الذى ابكى الرسول (ص)بالله عليكم اقرؤه
(ماكل من يضحك مع الناس مبسوط ياكثر من يضحك ونفسه حزينه)
شاهد زبد البحر
يا رب تخليه وتبقيه لعنين ترجيه كامله
وصية حكيم تستحق أن تكتب بماء الذهب
بشــرووه انـي بـرحل << قصه في غااايه الرووعه كامله
اجمل ايميل ستقراه بحياتك
أنشر الموقع للعالم
ابي انام بحضنك واصحيك بنص الليل واقول ما كفاني حضنك ضمني لك حيل كاملة
لجل الوعد كامله


 
قديم 07-13-2010, 08:36 AM   #9

انا البنوتة


رد: لجل الوعد كامله


لجل الوعد كامله

فتون : شتبي ؟
صالح : وين اخوك سعود أدق عليه مايرد
فتون : طالع مع خويه أنس عشان سفرته .. ((وكملت بحماس : دريت انه بيسافر ابريطانيا ؟
صالح : لا أول مره أعرف !
فتون بنفس الحماس : والله بيسافر بعد يومين وبيقعد سنتين هناك وبيشتغل بشركة عشان تفيده بمجال تخصص ويطور شركتنا ويبي ي ....
صالح : بس انت عطيتيني تقرير مفصل بدون ما أطلب خلاص
فتون : وليه ماتبي تعرف ؟
صالح : وانتِ صدقتي الحين اني ماعرف شي ؟ حبيبتي انا الي مستلم أوراق الشركة وعارف قبله هو بعد .. ههههههههههه
فتون بعصبية : وليش تستهبل علي أجل ..
صالح يبي يقهرها : كذا بس كيفي ..
فتون : طيب .. أنا أوريك .. ذيك السالفة الي تموت عشان تعرفها مو قايلتلك هي
صالح وهو فاهمها : لا فتون كلش الا ذيك السالفة ..
فتون : والله مو قايلتلك شي عنها
صالح : بس فتون لا تحلفين
فتون باصرار : والله العظيم
صالح : فتون .. خليك اقعدي أجل اذا اجتمنا بيت ابوي لافيه سوبرماركت ولا يحزنون .. باخذ البنات كلهم الا انتِ
فتون : هههههههههه ذاك اول ياعمو .. الي كنت أتلزق فيك اما الحين يسلملي سعودي حبيبي يوديني كل مكان أبيه ..
صالح : وسعود كلها يومين ورايح مين بيدلعك وقتها ؟
فتون بغرور : والله يدلعني الي مصلحته وحياته ودنيته كلها عن طريقي أنا
صالح : أنا مادري وش الحظ الي طيحني بوحده مالها طريق الا منك انتي
فتون : ههههههههه تستاهل ((وكملت بهمس : وتدري ان عبير مستحيل تمشي معاك وتسوي الي انت تبي لأن حنان صديقتها حيل وبتزعل منها لو درت .. فمالك الا أنا وبس
صالح : يلعن ام المذلة ياشيخة .. يصير خير يافتون يصير خير
فتون : ههههههههههههههههههههههههههههه
صالح بتنهيدة : اضحكي اضحكي .. والله عشان عيونها هي باتحمل منك كل هالمذلة يالتبن
فتون وهي مستانسة حدها : هههههههههههههههههههههههههههههه هههههههههههههههههههه هههههه
هالمره ضحك صالح : ههههههههه أوريك .. عساي أشوف فيك يوم تترجين وتبوسين ايدي عشان تبين شغلة وأذلك مثل ماتسوين ..
فتون رحمت عمها : ههههههه أفا عليك ياعمي والله ماذلك أنا الا أحبك
صالح : لا والله إلا خفتِ ربي يستجيب دعوتي ..
فتون : حبوه عمو أنا فتون أهون !
صالح : لا فتون ماتهون بس مو عشانها الا عشان الغالية ذيك عسى يومي قبل يومها
فتون بضحك : آمين وانا بعد
صالح : وشو الي انتي ؟
فتون : عسى يومك قبل يومي ..
صالح بقلة صبر : فتون مع السلامة
فتون : ههههههههههههههههههههه باي

وسكرت ومشت للبنات لقتهم يشربون القهوة ومرام مكشرة وبالقوة تشرب ضحكت فتون على شكلها وهي تقول : شفيك تتغصبينها خلاص ترا مو لازم تشربين
مرام : مو حضرتها عبير تحدتني أكمل الفنجال كله وأنا تعرفيني ما أنهزم لو وش يصير
عبير : والله لك ساعه وانتِ ماغير تذوقين بس والتحدي تشربينها وهي حارة مو اذا بردت تبلعينها بسرعه
مرام : يع قسم بالله انها خايسة مادري شلون تشربون
فتون وهي تشرب : والله انها تجنن ماعندك ذوق
مرام شربت شوي وقالت وهي مكشرة من الطعم : طيب على ايش التحدي والله ما أتجرع هالسم على الفاضي
عبير : وش تبين بعد مافي شي اساومك عليه !
مرام : كريماتك ..
عبير وهي تخبي الكيس ورى مسندة الكنب : اتركي كريماتي بحالها خلصتوا ربعها ياسخيفات
فتون باستهبال : وباقي واحد ماجربته بعد
عبير : انتِ قربي منهم وماتلومين الا نفسك !!
فتون : أجل ليه ماشريتيلي ؟؟
عبير : وليه أشريلك رايحة بنفسك للسوق وماغير تدورين على ملابس الرياضة أبعرف انتِ متى تشبعين منها؟؟؟
فتون : عمري ما أشبع منها وهم بعد كل شوي يطلعون ملابس رياضية تجنن

مرام بازداء وهي تطالع فتون من فوق لتحت : عاد ماشفنا تغيير يافتون !
فتون درت انها تقصد جسمها وقالت : والله من الغيرة الي مو قادرة تصيرين مثل رشاقتي
مرام : هههههههههههه من زين هالرشاقة عاد شوي وتطلعلك عضلات وتنافسين اخوي فيصل
فتون : يع تقارنيني باخوك ياحمارة ..
مرام : تنكرين ان اخوي جسمه رياضي ويهبل وعضلاته مفتولة تجنن !
فتون : ما انكر ان جسمه رياضي بس وش جابني له أنا مابي عضلات ابي بس جسم مشدود
عبير : وماشاء الله صار جسمك مثل ماتبين خلاص اتركي الرياضة
فتون : لا والله اترك انتي ولا اتركها
عبير طارت عيونها باختها وهي تشرب القهوة ومرام :هههههههههههههههههههههههه كذا الأخوة ولا بلاش

ضحكت فتون وكملوا سوالف وضحك لين رجع خالد وفيصل للبيت ..
دق فيصل على مرام وقالها انه ينتظرها برا ..

قامت مرام لبست عبايتها والطرحة وشالت اغراضها ونزلت وأول ماطلعت الحوش شافت خالد يمشي ليدخل . . ولا شعوريا وقفت عند الدرج تطالع فيه
خالد وقف أول الدرج .. رجل على الدرج ورجل على الأرض وقال وهو يطالع عيونها : انبسطتي اليوم ؟
مرام وهي تهز راسها : الحمدلله
خالد بابتسامة جذابة : حلو
مرام : الله يحلي أيامك .. (( وسحبت نفس وهي تنزل الدرج وقالت : مع السلامة
خالد : حياك الله
وأول مامرت من جمبه شم ريحة عطرة منها وعقد حواجبه وهو يلتفت ويناديها : مرام !
دارت مرام لتطالعه باستفهام وردت : هلا
خالد : حاطة عطر وانتِ طالعة ؟
مرام : لا ماحطيت
خالد : بس أنا شام ريحة عطر
مرام اتذكرت : اه هذا مو عطر .. هذي كريمات شرتها عبير وجربناها
خالد : المهم انها ريحة عطرية
مرام : طيب ؟؟
خالد بنبرة قوية : شالي طيب ؟ تطلعين ال وانتِ بهالريحة ؟
مرام ماستوعبت موقفه وقالت : عاد وش اسوي؟؟ حطيت الكريم من أول والريحة مسكت فيني !
خالد : وانتِ متعودة دايم على هالحركات ؟
مرام مافهمت : اي حركات ياخالد انت وش تقصد ؟
خالد ماجاوب عليها وقال : هالمره زين ان فيصل اخوك هو الي بيوصلك ولا لو السواق كان خليتك تدخلين تغسلين قبل تطلعين ..
ودار عنها بسرعه ومشى لداخل البيت وسكر الباب وراه

ظلت مرام لحظات واقفة بمكانها مو قادرة تستوعب الموقف .. ليه عصب عليها بهالشكل وعاملها بهالطريقة .. وحست انه بيجي يوم تفقد عقلها بسبته !! وضاق صدرها وطلعت من البيت وبهدوء صامت ركبت السيارة مع فيصل ومشوا .


********

يوم سفر سعود في بيت الجد

الكل مجتمع العمان وحريمهم وعيالهم ليودعون أول حفيد ..
وصلت سيارة حاملة بس البنات وخالد .. وسعود وصل قبلهم مع أمه وأبوه
نزل خالد وسبقهم لداخل البيت .. وعبير وفتون من وراه .. وأول مادخلوا الحوش شافوا خالد واقف مع تركي و عمه صالح

صالح من مكانه : هلا بنات اخوي الغاليات هلا ..
فتون باستهبال : هلا بعمي حبيبي اشتقتلك .. وسلمت عليه بمرح
وبعدها اقتربت عبير بنعومة وسلمت على عمها وهي تقول : هلا والله عمي شلونك
صالح واهو يقلد عليها نعومتها ودلع صوتها : عمك بخير انتي شلونك ؟
عبير بضحك : الحمدلله .. وتلاقت عينها بعين تركي ومسرع مانزلتها واهي تقول : شلونك تركي ؟
تركي : الحمدلله .. أخبارك عبير !
عبير بهمس : تمام ..
فتون : شعندكم واقفين برا ..
صالح : بيننا سوالف مانبي أحد يسمعها عندك مانع ؟؟
فتون : أبد ماعندي مانع لأني باسمعها معاكم .. وانتي ياعبير رو ....
قطعت كلامها يوم شافت عبير تاركتهم وتمشي لداخل البيت وخالد يدف فتون من كتوفها ويقول : اذلفي يالله ورى اختك اشوف .. هذي العاقلة .. (( ويأشر على عبير .. مو انتي الي ماعندك غير التليقف
فتون : إي أزين عشان يصير مني فايدة بنظرك !
صالح : انتوا من عرفتكم ماعندكم غير المناجر ..
خالد : والله كله بسبة هالقرقورة من يوم احنا صغار تناشبنا وتركي يشهد بعد ..
تركي الي كانت عيونه معلقة بوين مادخلت عبير وماسمع كلامهم وهو يحس ان فيها شي غريب .. وقال بلعثمة : اي والله .. سعود غالي .. و فراقه مو سهل !

طالعوا فيه كلهم بذهول وفتون الي فهمت السالفة وعجبتها قالت وهي ترجع بخطواتها على ورى : فيه ناس واجد فراقهم صعب مو سهل ..
ضحكوا عليها وخالد رماها بنظرة غضب خلتها تضحك وتدور عنهم لداخل البيت


دخلت فتون الصالة الكبيرة الي تجمع كل العيلة .. ولقت عماتها وبنات عماتها وحريم عمانها وعيالهم كلهم بالصالة مجتمعين الي يسلم والي يباشر بالقهوة والي يسولف .. سلمت على الكل وبالآخر قعدت جمب بنات عمتها .. وجدان و بشاير .

وجدان تضرب فخد فتون : توك تجين انتي واختك يالبايخات
فتون كشرت وهي تفرك فخدها : عاد العزيمة لاخوي لازم يكون لنا طلة
بشاير : ايه هذا انتي قلتيها لاخوك يعني المفروض انتوا تجون بدري تصبون القهوة وتباشرون .. مو احنا الي من جينا ماقعدنا دقيقة وحدة
فتون :هههههههههه أجل هذا الي قاهركم ؟؟
وجدان : اي والله وكل ماقعدت خزتني امي بنظرة تخرع وأرجع اقوم مره ثانية
فتون :هههههههههه وناسة .. أوكي يالله انا توني جاية وماضيفتوني
بشاير : انقلعي والله انتِ بالذات مانضيفك

أم وجدان من بعيد : قومي ياوجدان صبي لمرة خالك

وجدان بحمق : هاه شفتي ؟
فتون استاسنت وصارت تضحك عليهم

بشاير قرصتها بقوة وقامت مع اختها تدور بالحلى

صبوا لأم سعود قهوة وضيفوها وبعدها رجعوا يدورون من جديد على الأهل ويوم وصلوا لفتون
بشاير : اتركيها ياوجدان لا تصبينلها
وجدان : اي والله لو تموت ما أصبلها
واتعدتها هي وبشاير

وفتون قالت : اوريكم يالنجسات .. (( والتفت لعمتها تقول : عمتي شوفي بناتك يضيفون الكل الا انا يتعدوني ولا كني آدمية قاعدة !!

أم وجدان تهاوش بناتها : هَو شهالحركات يابنات ؟؟

بشاير : محنا مضيفينها يمه وهي من جت تتريق علينا اننا نشتغل وهي قاعدة
وجدان : بعدين العزيمة لاخوها المفروض هي تدور مو احنا

أم سعود : والله انتوا فيكم الخير يابنات وعقبال ماشوف كل وحدة تدور بالقهوة بعرس اختها

البنات بصوت عالي : آآآآآآآآآآآآآآآآآآآآآآآآآمين

ضحكوا عليهم وعلى خبال بنات هالايام وهبالهم على الزواج

جا وقت العشا وقاموا كل الحريم يتعشون وفضت الصالة الا من البنات بس

وهم :

عبير وفتون

وجدان وبشاير بنات عمتهم سعاد
العمة سعاد ماعندها غير هالبنتين
وجدان 17 ثاني ثانوي .. وبشاير 16 أولى ثانوي

أنشر الموقع للعالم
ابي انام بحضنك واصحيك بنص الليل واقول ما كفاني حضنك ضمني لك حيل كاملة
شــــي غريب
امسك الخشب
فوائـــد الطباشيــــر
كلمات وألفاظ تخالف عقيدة
بشــرووه انـي بـرحل << قصه في غااايه الرووعه كامله
أثنين ستات اتقابلوا في الاخره
قصه ( مجنــــون ســــاره ) قصه رومانسيه وحب لغايه
(ماكل من يضحك مع الناس مبسوط ياكثر من يضحك ونفسه حزينه)
لجل الوعد كامله
يا رب تخليه وتبقيه لعنين ترجيه كامله
نصائح مهمة
وصية حكيم تستحق أن تكتب بماء الذهب
هذه نتيجة السحاق


 
قديم 07-13-2010, 08:38 AM   #10

انا البنوتة


رد: لجل الوعد كامله


لجل الوعد كامله

ريما بنت عمتهم وفاء
العمة وفاء ماعندها الا بنت وحده وثلاث عيال متزوجين
ريما 25 متزوجة وعندها ولد صغير اسمه أسامة

منال ونهى
وذولا عرفناهم من قبل

" نرجع لقعدة البنات "


فتون تكلم نهى : وش الغدا يانهى ؟؟
نهى : مفطّحات !
فتون : يوه يعني لازم هالمفحات بكل عزيمة ؟؟
عبير : وش تبينهم يسون بعزيمة أخوك بيض وجبنة ؟؟
فتون : لا يجيبون خروف ماقلنا شي بس يسونه مشاوي مثلا مب لازم رز ولحم بهالشكل

وجدان : ويشون الراس بعد ههههههه
فتون : يوه وعاد لازم الراس يعني ؟
وجدان : طبعا الي مايحط الراس يبيله قص راس
فتون : والله منظرة وأتحدا أحد منهم ياكله

بشاير : الا والله مخ راس الخروف لذيذ
عبير +فتون : يع

نهى : هههههههههههههه عاد أمانه بشاير قيد أكلتوه ؟؟
بشاير وهي تضحك : اي والله مره امي طبخته بالفرن وفكت الراس وطلعت المخ وذوقتنا والله طعم

فتون وهي مكشرة : الحمدلله على النعمة !

ريما الي كانت حايسة بترضيع ولدها وتلبيسه : أقول نهى تعالي امسكي اسامة حبيبتي خليني اروح أتغدا

فتون : وش تتغدين ماتسمعينهم يقولون مفطّح !!
ريما : وخير ياطير والله هالمحل بالذات يهبل مسوين مندي يجنن

فتون التفت لمنال وشافتها ماسكة جوالها تحوس فيه ومهي معاهم .. تذكرت وصية سعود يوم يقولها حسني علاقتك بمنال وقالت : وانتي يامنال ليه ماتغدين ؟
رفعت منال راسها وقالت بهمس : مو مشتهية

نهى المرجوجة : أكيد ماراح تشتهين وحبيب القلب بعد ساعات بيسافر
ضحكوا عليها و منال قالت : انقلعي والله مو عشان كذا
نهى : هاه أجل وش عشانه ؟؟؟؟؟
منال : وانت شدخلك ان شاء الله يالله قوليلي انتي بعد ليش ماتغدين ؟؟
نهى : انا معاكم .. قمتوا قمت قعدتوا قعدت

ريما : أجل اقعدي بالله وامسكي ولدي وانا بروح آكل (( وحطت ولدها بحجر نهى وطلعت عنهم
نهى تموت بالاطفال وصارت تلاعب الصغير وتضحكه وتبوسه ومتونسة معاه

عبير ابتسمت لمنال وقالتلها : شفيك منال ؟؟
منال بادلتها الابتسامة وهي تقول : مافيني شي بس كذا مو مشتهية آكل
عبير : لا مو عشان الأكل بس شكلك من أول مو طبيعي
منال بخاطرها .. ومن وين بكون طبيعية وأخوك روحي فيه وهو مو حاس فيني

بشاير وهي تغمز لمنال : الظاهر صدقت نهى !
منال : ياشيخة انطمي انتي وهي ماعندكم سالفة

وقفت عبير ومسكت إيد منال وقالتلها : تعالي معاي

وقفت منال ومشت معها للبا وفتون من وراهم : على وين ؟؟؟
عبير : مو شغلك انتي يوه !

وطلعوا لبرا البيت وين مالحوش تزينه قعدة صغيرة حلوة وقعدوا فيها وعبير قالت : أمانة يامنال قوليلي شفيك ؟
منال وهي تحاول تبتسم وماتخلي ملامحها تفضحها : مافيني شي عبير انتي ليه حاسة ان فيني شي ؟؟
عبير : باين على شكلك وكلامك ونظراتك ان فيك شي كبير بعد
منال بتنهيدة : طيب وش تتوقعين ؟
عبير : شي متعلق بسعود مو ؟
منال : كان ودي أكتم هالشي بس الظاهر صدق ملامحي فضحتني
عبير : وشالي مضايقك منال ؟؟
منال : أشياء أنا الي أوهمت نفسي فيها بغبائي وقعدت أنتظرها تتحق ولا هي مالها وجود أبد
عبير : شقصدك مافهمت ؟؟
منال : ياعبير انا مني متصورة ان سعود بيبعد سنتين والعلاقة بيني وبينه باردة بهالشكل ورسمية لأبعد الحدود
عبير : بس انتي يامنال الي قلتي موافقة ولا سعود كان مو عاجبه سالفة انه يسافر واهو ماتم شي بينكم !
منال : وش تبيني اقول يعني !! أصر وألزم يصير شي قبل يروح ؟ صعبة تجي مني ياعبير ان ماجت منه هو صعبة انا الي أتكلم !
عبير بضيقة حيلة : والله مادري وش اقولك يامنال خصوص ان سعود خلاص بيسافر اليوم !
منال : لاتقولين شي ياعبير وبالعكس مابي يحس سعود بشي ويمكن يتضايق واهو خلاص رايح !
عبير : كان ودي أسوي أي شي عشانك
منال : ماتقصرين يابنت عمي ويكفي سؤالك الحين واهتمامك (( وقفت واهي تقول : قومي بس ندخل لايطلع واحد من الرجال ويشوفنا
عبير : تلقينهم غاطسين بالمفطحات ومو دارين عن أحد
منال :هههههههه والله ماظنيت تركي ياكل معاهم
عبير باهتمام : وليه ماياكل عسى ماشر !
منال : هو كذا مايحب الدسم ولا يستمتع فيه أبد
عبير : أجل وش يحب ياكل ؟
منال : يموت على السلطات لو ماياكل غيرها بحياته هو راضي
عبير ودها تعرف عن تركي أكثر : والحلويات يحبها ؟
منال : برضو على حسب اذا كريمة ودسمة مايكالها
عبير وهي تضحك : والله ولد عمي ذواق !
منال : هههههههه بس والله متعب امي شكلها بتزوجه وتفتك
عبير خفق قلبها من هالطاري وقالت : اوه ماشاء الله وهو وش رايه ؟
منال : ماخذ السالفة مزح واستهبال للحين مافكر بجدية
حست عبير بضيق من هالطاري .. ماتدري لمتى بتكبت مشاعرها بهالشكل ومتى يحس فيها ويحس بحبها له من هي صغيرة !

ومانتبهت الا على صوت فتون ونهى طالعين لهم ينادون عليهم
فتون : بالله ما فطستوا من الحر
منال : الا والله حرر
نهى : تعالوا بالله نشغل النافورة ونقعد هناك
منال : اما انتي يانهى عليك أوقات مادري شتبي ؟؟
نهى : ليه شفيك ؟
منال : أول شي حر ماينطاق سواء بنافورة ولا بغيرها .. ثانيا الرجال ممكن يطلعون بأي لحظة ولا تحسبينا كلنا مظيعين الحجاب مثلك ؟
نهى : كيفك انتي وفتون مدلعات وماتتحملون ولا شوية حر (( ومسكت ذراع عبير ومشت وهي تقول : أنا باقعد مع عبير
عبير : اي طيب نقعد داخل
نهى وهي تمشيها غصب : لا مابي داخل والله مليت امشي ندور شوي نتفقد أحوال الرعية
عبير بضحك : مب صاحية انتي .. اوكي اتركي ايدي اقدر امشي اتركيني
نهى : لا أخاف ترجعين مثل هالنذلات منال وفتون
عبير : لا مو راجعة بس اتركيني ..
نهى اتركتها : يالله ياويلك !!!

مشت نهى وعبير جمبها والتفت نهى تبي تشوف النافورة الا استغلت عبير وضعها ودارت عنها تبي ترجع بسرعه لكن وين تروح عن نهى الي من شافتها دايرة مسكتها وقرصت ذراعها وعبير تضحك وتصارخ : هههههههه آآآآآي ياحمارة إيدي .. آآآآي نهى ياهبلة اتركيني لا يطلعون الرجال علينا
نهى وهي عاصرة شفايفها بشكل وحشي مضحك وقابضة ذراع عبير بايدينها الاثنين وتسحبها وتقول : تستاهلين هذي جزاة الي يكذب على نهى
عبير : نهى اتركيني ياحمارة .. ( وقرصت إيدها وهي تقول : فكي ذراعي ياربي ماتحسين انتي ماتعورين ؟؟
نهى : هههههههههههه انتي قاعدة تدغدغين ايدي مو تقرصينها !
عبير : طيب اتركيني يانهى ترا بازعل منك والله عورتيني
نهى : أحسن عشان لاعاد تعيدين هالحركات
عبير : طيب خلاص مو عايدتها يالله فكيني ..

فاجأة فلت نهى ذراع عبير ما خلى عبير تفقد توازنها وهي بالصندل الرفيع .. وطاحت على الأرض بالحظة الي انفتح فيها باب الرجال وطلع منه تركي !!!

شاف تركي عبير طايحة على الارض وتفرك ذراعها بألم وهو اتصنم يوم شافها !
كانت لابسة بنطلون أسود وبلوزة فستقي مخصرة كمها لتحت الكتف باصباعين ومع هالشكل حست عبير انه بيغمى عليها وهي تشوف تركي واقف قدامها يطالعها!!

نهى أخيرا هي الي اتحركت ومدت إيدها لعبير وهي تقول : آسفة عبير ماقصدت أطيحك والله آسفة
عبير اتجاهلت ايدها وقومت نفسها بنفسها ومشت مسرعه لداخل البيت وتركي لازال يتابعها بنظراته مايدري شالي صار فيه ويبسه بهالشكل !

نهى : تركي لا تطالع بالبنت عيب عليك غض البصر !
طالعها تركي بصرامة وقال : وش سويتيلها انتي ؟
نهى : كنت أمزح معها والله واسحبها وفاجأة تركتها الا هي طاحت !
تركي : انتي ماتبطلين حركات البزران هذي لا مع الصغار ولا مع الكبار
نهى خافت ورجعت على ورى وهي تقول : زين لا تعصب قلتلك كنت أمزح !
تركي : وهذا مكان تمزحين فيه قدام مدخل الرجال ؟؟
نهى : وانا وش دراني انك بتطلع المفروض انكم كلكم تتغدون !!
تركي : والله عاد ماجازلي الأكل وطلعت عندك مانع ؟؟؟
نهى : خلاص طيب لا تعصب ماصار شي
تركي : بنظرك انتي ماصار شي .. وحسابك بالبيت يالبزر .. (( وصرخ فيها : انقلعي على داخل يالله !
نهى بحمق : طيب ..
ودارت بسرعه وهي تخبط الارض بمشيها لين دخلت البيت

وتركي ظل واقف بمكانه لحظات بعدين رجع لداخل البيت واهو يحاول يطرد صورة عبير من باله !!

دخلت نهى ولقت عبير جالسة جمب فتون ومبين عليها متضايقة حيل من الموقف .. !! مشت نهى لها وهي تبتسم لكن عبير قالتلها بنبرة زعل : تدرين انك سخيفة ؟؟
نهى نطت وضمتها وهي تقول : آسفه يابعد عمري والله ماقصدت
عبير : وخري بس عني قال ماقصدت
نهى وهي تقعد جمبها : والله ماقصدت ياعبير خلاص لاتزعلين يكفي الي جاني من تركي !
فتون : وش سوالك ؟
نهى : هاوشني والله وتوعدني بالبيت
عبير : أحسن تستاهلين
نهى : اي أستاهل اذا كانك بترضين علي !
عبير : ...............
نهى : يالله عبير والله ماقدر على زعلك أمانة سامحيني
بشاير وجدان كانوا رايحين يجيبون لهم باسي ويوم رجعوا سمعوا نهى تترجى عبير ترضى
بشاير : خير مين مزعل عبورة ؟
وجدان : أكيد مافيه غير نهى ولا فتون
فتون : لا والله لاتظلموني هذي نهى الخبلة
بشاير : وش سويتيلها يانهى
نهى بضيق وهي تطالع بعبير : طيحتها بالحوش على طلعة أخوي تركي وشافها طايحة !!
وجدان : واه !!
بشاير : هههههههههههههههههههههههههههههه وش سوا بالله !
عبير : وش بيسوي بعد .. انفجع ويبس مكانه ماتحرك
وجدان معجبة بتركي وحست بالغيرة وقالت : اي أكيد بينفجع عاد من حلاة المنظر
نهى : يالله عاد عبير قوليلي وش اسوي عشان ترضين
عبير : لاتسوين شي
نهى : طيب خلاص لاتزعلين قلتلك آآآآآآسفة
عبير : طيب خلاص آسفة أسفة
نهى شافت فتون مكشرة وقالت : وانتِ فتون شفيك بعد شاركتي عبير الزعل
فتون وهي تطالع الساعه : مو عشان عبير
نهى : أجل ؟
فتون وخانقتها العبرة : سعود بعد ساعة بيطلع المطار !!!!!
وجدان : ياعمري يوصل بالسلامة ان شاء الله
البنات : آمين
بعد ساعه
كانوا كل الحريم بالصالة بعد الغدا
دخل وائل أخو منال يقول بصوت عالي : اسمعوا وعوا .. سعود بيدخل يسلم عليكم لانه بيطلع المطار

أم سعود : ياعمري ياوليدي .. وقامت تشوفه..
والبنات لبسوا حجاباتهم

وشوي الا دخل سعود لابس بدلة السفر ويسلم على عماته ويتوادع منهم ومنال فز قلبها واهي تشوفه وحست دموعها بتخونها وتطلع .. وبالقوة حبستها !!
وبعد ماسلم على العمات .. مشى للجدة الي لازالت بوعيها وصحتها نوعاما دام سعود أولى أحفادها ..
انحنى سعود لها وباس راسها وقال : يالله يمه انا مسافر الحين توصين على شي ؟؟؟
الجده : انتبه على نفسك يبه وانتبه من الطريق واذا جاك النوم جنّب السيارة وارتاحلك شوي
سعود :هههههههه ياعمري يمه انا مسافر بالطيارة مسافر ابريطانيا !
الجده : وينها ذي عسى مب بعيده ؟؟؟
سعود مايبي يقلقها وقال : لا قريبة لاتخافين بس اهم شي لاتنسينا من دعواتك الطيبة
الجده : الله يسهل دربك ويرجعك بالسلامة ياوليدي
باس سعود ايدها وقال : الله يسلمك يمه .. يالله مع السلامة
الجده : بحفظ الله

وقف سعود ودار لجهة البنات وأشر بإيده لهم واهو يقول : يالله بنات أشوفكم على خير
البنات : ان شاءالله .. توصل بالسلامة يارب
سعود : آمين تسلمون .. هاه ماوصيكم على خواتي ياويل ويلكم أسمع أحد مآذيهم ولا مزعلهم ترا بجي أذبحكم وأرجع
نهى : ههههههههههههههههههه زين نسوي عشان نجيبك تشوف أهلك مره وحده
سعود : لا مشكورة ماتقصرين بس اركدي اهم شي وخلي عنك خواتي
نهى المرجوجة : عبير ممكن لكن فتون خذها معاك
فتون : ياليت والله أمنيتي هذي
ابتسم لها سعود بحنان وبعدها اتلاقت عيونه بمنال الي كانت تراقبه من دخل ويتفجر بداخلها ألف شعور وشعور
وابتسم لها ابتسامة عذبة حاول يخصها فيها عشان يريح ضميره انه مو مسافر وتاركها ورى ظهره

وبعدها طلع عنهم ومشى للحوش وام سعود والبنات معاه .. ومايحتاج أوصفلكم شلون دموع أم سعود كانت .. ومعها فتون وعبير يبكون بشكل يشهد ان محبة سعود غامرة قلوبهم كلهم بشكل كبير

::


أخيرا ظهر تركي بالقصة .. شرايكم فيه ؟؟؟
منال ومشاعرها الي تحسها تجاه سعود .. وسعود الي يحاول يتصنع بهالمشاعر
كيف بتكون علاقتهم ؟؟؟

وبقية الحبابيب

تهمني آرائكم

::

نبض قلبي رواية خياليه رومانسيه احداث مشوقه كامله
ما الذى ابكى الرسول (ص)بالله عليكم اقرؤه
شــــي غريب
أثنين ستات اتقابلوا في الاخره
عشـــرون مهــارة تجعلك محبوبــاً بين النــاس
هذه نتيجة السحاق
يا رب تخليه وتبقيه لعنين ترجيه كامله
وصية حكيم تستحق أن تكتب بماء الذهب
قصه ( مجنــــون ســــاره ) قصه رومانسيه وحب لغايه
أنشر الموقع للعالم
ابي انام بحضنك واصحيك بنص الليل واقول ما كفاني حضنك ضمني لك حيل كاملة
(ماكل من يضحك مع الناس مبسوط ياكثر من يضحك ونفسه حزينه)
روآيـه قـلـوب تـنـزف عـشـق / لـ الكآتـبـه : أغآني الشتآء . . كـآمله .
بشــرووه انـي بـرحل << قصه في غااايه الرووعه كامله
شاهد زبد البحر


 

أدوات الموضوع


لجل الوعد كامله


الساعة الآن توقيت السعودية الرياض و الدمام و القصيم و جدة 11:56 PM.

 

Powered by vBulletin® Copyright ©2000 - 2014,
يمنع انتهاك أي حقوق فكرية علماً أن جميع مايكتب هنا يمثل كاتبه وباسماء مستعارة ولمراسلة الإدارة يمكنكم استخدام الإتصال بنا
Search Engine Optimization by vBSEO 3.6.0