... ندمت
... ندمت
جرحتيني
وخدت جرحي ف قلبي
و سكِت
بعتيني
ومن شدة الصدمه
سهمت
رحلتي وبعد غياب
إتقابلنا
وطلبتي نعود أحباب
وبعتاب
ليكي أنا بكِّت
كان ردك ننسى الماضي
قولتي بلاش أعمل قاضي
إتهيئتي ح أكون أنا راضي
وكأن بكل بساطه
أحيا بعد ما مِت
**
جرحك مش راضي يلم
ف نومي ألمك ف الحلم
حزني شديد
ألمي بيزيد
لمّا تطلّي
ف قصه ف أغنيه ف فيلم
ويا ريتك حاسه
باللي إنتِ عملتيه
ياريتك نادمه
على قلب مزعتيه
خلاص م الحب ولياليه
أنا ياحبيبتي زهدت
** للدنيا كنت مصاحب
جه حبك زي القارب
خدني من دنيتي
غير لي سكّتي
سافرت معاه ف عمرك
سلمت قدري لقدرك
إتوحدت معاكي
إتصوفت ف هواكي
و في الآخر ألقاكي
خدعتيني
دبحتيني
فندمت
على إني بيكي
آمنت
**
|