قصة أم المواجع

هذه القصه مستوحاه من التراث القديم بالاصح قصه كانت تحكيها لي خالتي وهي قي معزة الوالده رحمهم الله تعالى كنت اذا صار الليل وحبيت انام اروح لامي فلانه من الناس واقول لها يمه ابيج تقصين علي قصه اليوم لين ما ارقد ، وتقول لي انشاء الله والغنيمه من اعيوني الثنتين وكانت رحمها الله كفيفه ولكن ما اتصورون اشكثر اهيه احسن من ناس كثيرين مفتحين تقضي كل حوايجها بنفسها وما تتكل على احد بس على رب العالمين ومنها تعلمت الكثير الكثير وما ابي اطول عليكم نبتدي القصه ،،،،،،،،كان يا ما كان في قديم الزمان كان فيه بنت اتعيش مع ابوها ومرته طبعا البنيه يتيمه الام متوفيه وكانت مرت ابوها وايد مغربلتها اتقول لها غسلي الثياب وخمي الحوش وحلبي البقره ونقي العيش وطبخي الغده وهي ابد ما ترفض كله اتقول لها انشاء الله وفي يو م يا حلوين قالت لها مرت ابوها روحي يا حمده بيت وحده اسمها أم المواجع ويبي من عندها دهن قالت حمده اشلون اروح وانه مادل البيت ولا اعرف المره قالت لها صوتي وقولي وانتي تمشين وين بيت ام المواجع واكيد اهي بتسمعج وبتناديج ، يالله روحي وعن اللواسه المهم طلعت البنيه وراحت تمشي وتقول وين بيت ام المواجع وين بيت ام المواجع واهنيه لاقتها مره عيوز وقالت لها سمعيني زين لاتقولين وين بيت ام المواجع قولي وين بيت ام سعد ولين وصلتي بيتها بتقول لج اشياء جثيره وانتي حطي باج لي قالت لج خربي بيتي انتي سوي العكس يعني عدلي ولين قالت لج اي شي سوي العكس والله يحفظج يا بنيتي ، واهيه ما شيه وتقول وتنادي وين بيت ام سعد وين بيت ام سعد الا تطلع لها مره عيوز وتقول لها تعالي اسعدج ربج وعطاج القوة في اركبج، ودخلتها البيت وتمت اتقول لها نفس الحجي الي قالته لها المره الي لاقتها قبل في الطريج و قالت لها روحي المطبخ وكسري الصحون وقامت حمده وراحت المطبخ وغسلت الصحون ونا دتها وقالت لها روحي السكه وجيبي الوصخ وكبيه في الحوش وخذت الخمام من امطبخ وطلعته برع وقالت لها قومي شككي الحصير وارميه برع فراحت وطوت الحصير وسندته عند الليوان وخمت الحوش وحلبت البقره والمره اتقول لها طكي البقره واهيه احلبتها ونظفتها وىخر شيئ قالت لها تعالي انا بانام على ريلج وانتي مجعي شعري فتمت حمده تمشطها وهي شوي بتنام قالت لها المره العيوز اذا مرت الغيمه السوده لاتخافين ولين مرت الغيمه البيضه وقظيني من الوم المهم ما ابي اطول عليكم مرت الغيمه السوده وحمده ما خافت ومرت الغيمه البيضه وتمت توقظ المره من نومها وتقول لها يا ام سعد قعدي ياتج الغيمه البيضه وقعدت المره من نومها وطالعت في السمى الا بذاك الكلب الابيض نازل منها وقالت لها المره لاتخافين هذا حظك وروحي بيت ابوج وراحت حمده لبيت ابوها ومعاها الكلب الابيض ودخلت وشافتها خاتها المهم استانست وقالت اكيد بياكلها وقالت لها روحي لدار التبن وتمي اهناك لين الصبح وانتي وحظج المهم المسكينه استسلمت لامر ربها وامر الي ما تخاف الله ودخلت الدار ويا ت الخاله وصكت الباب وتمت يم الباب وهي تسمع حمده تصرخ وتقول اه يايمه ريلي والخاله تقول عندك اياها اكلها وخل لي العظامه ومرمشها يا بعد عيني وفي الصبح يات الخاله ومعاها العسو علشان اتنظف المكان من اعظامت بنت ريلها وهي مبطله الباب شافت العجب شافت البنت حمده مزينه وجالس جنبها شاب مزيون جالس على السرير ويقرى القرآن وقالت يا ريتني طرشت بنتي بدالها وفي اليوم التالي طرشت بنتها لنفس الكان وشوفوا النتيجه لانه كانت نيتها شينه ما فيه احد دلاها البيت وكانت اتقول وين بيت ام الواجع وين بيت ام المواجع وطلعت لها مره عجوز وقالت لها تعالي امقع الله قلبج ونتف الكلب لج اعظامج ودخلتها البيت وهناك صار العكس اذا قالت لها كسري الصحون كسرتهم ويبي الخمام وحطيه في الوش راحت وكبته في الحوش وقالت لها طكي البقره راحت وطكتها والمهم قالت لها تعالي مجعي شعري فراحت تمجعه وقالت لها انا بنا وانتي لين ياتج الغيمه البيضه لا اتخافين ولين ياتج الغيمه السوده وقضيني يات الغيمه البيضه وما خافت يات الغيمه السوده خافت وايد ووقظتها وقالت لها العيوز يا الله اخذي نصيبج واتوكلي على الله ومشت البنت ووصلت لبيت ابوها وهناك استقبلتها الام بالزغاريد ودخلتها نفس الغرفه وفي الليل قالت البنت يمه لحقي علي الكلب اكلني قالت الام عندك اياها مرمشها ولما صار الصبح فتحت الام الباب والا شافت الكلب يركض ودفر الباب بقوه وطلع ودخلت ويا عيني عليها وش شافت شافت بنتها منتفه وتمت اتصرخ وتقول خبز خبزتيه يا الظالمه اكليه وهذي القصه خياليه من خيال امهاتنا القديمات لكن فيها عبر وارجوا ان تستمتعون بقرائتها والمعذره اذا جرحت احدكم بكلامي لاني فقط نققلت لكم قصه ما حبيت ان الزمان يمحيها ولكم مني التحيه:rmadeat-712c2fb95b:

السلاام عليكم

يعطيج العافيه على هالقصه الحلوه

صحيح القصص القديمه حلوه ومعبره , وبعض المرات فيها شي من الخرافه بس بتضل حلوه وممتعه

ليش ؟

لانها من قصص امهاتنا وجداتنا الله يرحمهم , ويتناقلونها من جيل الى جيل والمفروض هم حنا بعد لازم نحافظ عليها ولا نخليها تندثر مع الزمن .

تشكراتي لج خيتوو وتقبلي مروري

شكر ا لج يا خيوه انشاء الله اكون عند حسن ضنكم

	#2
عطر المساء	ردي .... قصة أم المواجع السلاام عليكم يعطيج العافيه على هالقصه الحلوه صحيح القصص القديمه حلوه ومعبره , وبعض المرات فيها شي من الخرافه بس بتضل حلوه وممتعه ليش ؟ لانها من قصص امهاتنا وجداتنا الله يرحمهم , ويتناقلونها من جيل الى جيل والمفروض هم حنا بعد لازم نحافظ عليها ولا نخليها تندثر مع الزمن . تشكراتي لج خيتوو وتقبلي مروري

	#3
عيون السهارى	رد: قصة أم المواجع قصة أم المواجع شكر ا لج يا خيوه انشاء الله اكون عند حسن ضنكم