 |
  |
|
|
|
|
#1 |
|
:: كاتبة نشيطة :: |
السلام عليكم ورحمة الله وبركاته قمت من النوم فجأة في عيني نور غريب ، وقوي جدا أستغربت النور ده كله جاي منين وأندهشت لما لقيت الساعه بتشاور على 3 صباحا وأن نور الغرفه مطفي طيب النور ده كله جي منين وانفزعت لما لقيت نص إيدي جو الحيطه شديتها بسرعه خرجت وانا ببصلها بكل اندهاش رجعتها تانى لقيتها دخلت جوه الحيطه استغربت ايه اللى بيحصلي ده وسمعت صوت ضحك بصيت نحيته لقيت أختى نايمه جمبي ولقيتها بتحلم بتحلم إنها راكبه عربيه اخر موديل وإنها رايحه حفلة كبيره قوي لناس أغنيه قوي وإنها لابسه اغلى واشيك لبس عندها عشان تكون أحلى واحد ه في الحفلة وكانت بتضحك وفرحانه أبتسمت بعدين أتفزعت من اللى بيحصل وقمت من على السرير وجريت على غرفة بابا وماما قعدت أصحى فى ماما وأطبطب عليها وأناديها بس هى مش بتستجيب قعدت أناديها كتير وأطبطب كتير ولقيتها فجأه قامت كانت مخضوضه قوي وبتبص يمين وشمال قولتلها يا ماما أنت مش شيفانى لقيتها مش بترد ولا بتبصلي قعدت أنادى ماما......ماما كانت حاطة إيديها على قلبها وبتقول بسم الله الرحمن الرحيم ولقيتها بطبطب على بابا وبتصحيه وقام قالت له قوم نطمن على الاولاد ده وقته قالتله معلش قلبي مش مطمن في حاجه غريبه وأنا واقفه مستغربه قعدت أقولها يا ماما أنا أهو يا ماما انت مش شيفانى يا .......... ماما قامت ومشيت حاولت أمسك هدومها لكن الهدوم مش بتتمسك جريت وقفت قدمها عدت من جوايا ملقتش غير إنى أمشي وراها وبابا كان وريا محاولتش أبصله عشان ما يتجاهلنيش برده دخلت أمى الغرفه وفتحت النور مكنش عندى فرق لأن الدنيا كانت منورة اصلا أنفزعت لما لقيت نفسى نايمه على السرير وقعدت أبص لجسمى وإيدى وأنا مستغربه أنا إزاي بقيت إتنين أنا مين ومين اللى نايمه على السرير دى إن مكنتش أنا وقطع إستغرابي جملة بابا أستريحتى يا ستى أهم البنات نايمين اهو لكن هي قالتله معلش أنا عاوزه أطمن على حياه ولقيتهى بتقرب مني قصدى من الإنسانه اللى نايمه مكانى وبتطبطب عليها كانت بتقولها ياحياه لكن هى مش بترد وكانت بتطبط بشويش وبدأت تهزها جامد جريت عليها وقلتلها يا ماما أنا اهو رودي عليا لكن صوتها كان بيزيد خوف وكان بيعلى كانت بتنادي حياه ..... حياه وفجأة صرخت ولقيت الصرخة بتوجعنى قوي كأنها بتضربنى بكيت وقلتلها ما تصرخيش وهى بتقول حياه وبابا جرى علي وحط إيده على وشى وصرخ وبكى وحسيت بالوجع تانى حياه مش بترد والبكاء بيزيد وأنا مش عارفه أعمل إيه صحت أختى على الصوت وهى بتسأل في ايه ماما صرخت أختك ماتت يا دنيا ماتت وأنا بقولها ببكائي لأ والله ياماما أنا هو شوفيني شوفينى أنت مش سمعاني لكن ما فيش أمل بصيت للسما وقلت يارب إيه اللى بيحصل ده لكن ما لقتش سقف وشفت ناس ولما شوفتهم مشيوا وحسيت بطعنه غريبه وحجات بتقطعنى بصيت لدنيا لقيتها بتصرخ حياه ........ حياه قلتلها اسكتى إنت بتعذبيني لكنها كانت بتزيد فى الصراخ وماما بتبكي فى حضن بابا والنحيب بيزيد وقفت قدمهم عاجزه ومزهوله رفعت راسي تانى وقلت يارب إيه اللى بيحصل يارب فى إيه وسمعت صوت من كل حته كان جاى من بعيد ركزت معاه لقيته بيعلا وبيزيد كأنه قرآن أيوا قرآن والصوت بدأ يقوى يقوى قوي هزنى من شدته كان بيقول { لَقَدْ كُنتَ فِي غَفْلَةٍ مِّنْ هَذَا فَكَشَفْنَا عَنكَ غِطَاءكَ فَبَصَرُكَ الْيَوْمَ حَدِيدٌ } زهول الصوت لقيت إيدين بتطبق عليا إتنين شكلهم مش من البشر بيقولولى تعالى أنتم مين وعاوزين منى إيه شدونى صرخت سيبونى ما تخدونيش من أهلى ، أهلى فكرنى مت قالولى ما أنت متى فعلا قلتلهم إزاي ما أنا شايفه اهو وبتكلم وحاسه بكل حاجه إبتسموا وقالوا عجيب أمركم يا بشر كلكم فاكرين إن الموت نهايه الحياة وما تعرفوش إن حياتكم موت وحلم طويل هتصحو منه على اليوم ده على العالم ده سألتهم انا فين وأنتو واخدنى على فين قالولي إحنا حراسك لحد القبر إتفزعت قبر إيه انتوا هتدخلونى القبر ردو كل إنسان لازم يدخل القبر بس أنا عمرى ما دخلت القبر قالولى ده مكتوب على كل البشر طول عمرى كنت بكره الكلمه دي مبحبش أسمعها بستعيذ بالله منها بحاول أنسها مكنتش بقدر أتخيل نفسي فى المكان الصعب ده سألتهم بخوف هتسيبونى قالولي مع عملك قلت طيب وعملى ده كويس سكتم ولقيت واحد بيصرخ وبيبكي وواحد تانى سعيد قوي وكل واحد فيهم واقف معاه إتنين بردة زى اللى معايا سألتهم ده بيبكى ليه قالوا ده عارف مصيره طول عمره كان من أهل الضلال قلت يعنى رايح النار واللي بيضحك ده رايح الجنه طيب أنا رايحه على فين قولولي ردو عليا هما كانو عارفين هما إيه فى الدنيا ودلوقتى عارفين هما فين فى الأخره وأنت عشتى طول عمرك تايها متردده شويه تمشي صح وشويه تمشي غلط شويه تتوبى وترجعى تعصي تاني ما كنتش واضحه هتفضلى بردة إنهاردة تايه مش عارفه حاجه إتفزعت وقلت يعنى أنا رايحه النار قالولى رحمة ربنا واسعه ولسة الرحلة طويلة بصيت وريا لقيت عمي وأبويا ماشين ووراهم أمى أختى وأهلى بيبكوا شايلين صندوق جريت عليهم ناديت محدش بيرد ناديت على أمى قلتلها يا أمى ما تبكيش إدعيلى ناديت على بابا قلته يا بابا خلى بالك من أمى وأختى ناديت على أختى قلتلها يا دنيا خلى بالك من نفسك سيبك من الدنيا ومتاعها إلحقى إلبسى الحجاب وصونى نفسك من الشيطان أبعدى عن صاحبات السوء هما أتباع الشيطان فى الأرض يا دنيا .... الدنيا رخيصة قوي صدقينى مش هتنفعك ناديت عليهم كلهم بس كانوا مشغولين بالبكاء ومحدش سامعنى مكنتش بتمنى حاجه فى اللحظة دي الإ إنهم يسمعونى وشدنى الملكين ونزلونى القبر ونيمونى فوق الجسد عشان أشوف أبويا وهو بيرمى التراب عليا بنفسه علشان أشوفهم وهما بيودعونى وخوفى عليهم إنهم مش حاسين باللى أنا حاسه بيه وحسدى ليهم إنهم لسه فى الدنيا ممكن يصلحوا من نفسهم بس للأسف كنت ببكى وهما بيبكوا كنت خايفه عليهم من الدنيا قوى وأتمنى لو أصرخ ويسمعونى وخرجم كلهم وقفلوا الباب والنور تحول لسواد ( لا إله إلا الله محمد رسول الله ) الناس نيام ....... إذا ماتو إنتبهوا وكانت دى نهاية الرحله يا ترى أستعدينا ليها إزاى ؟؟؟؟؟؟؟؟ ( رب إغفر لي ولوالدي ، رب إرحمهما كما ربياني صغيرا ) ( اللهم أنت ربي لا إله إلا أنت خلقتني وأنا عبدك ، وأنا على عهدك ووعدك ما استطعت ، أعوذ بك من شر ما صنعت ، أبوء لك بنعمتك علي وأبوء لك بذنبي ، فاغفر لي فإنه لا يغفر الذنوب إلا أنت ) (أستغفر الله العظيم وأتوب اليه ) ( اللهم أغنني بحلالك عن حرامك وبفضلك عمن سواك ) ( اللهم صل وسلم على سيدنا محمد وعلى اله وأصحابه وسلم ) (اللهم أغفر لى ولوالدى وللمؤمنين والمؤمنات والمسلمين والمسلمات الأحياء منهم والأموات يوم يقوم الحساب ) |
|
|
#2 |
|
|
رد: نهايه الرحلة
|
|
|
#3 |
|
|
رد: نهايه الرحلة
 |
|
|
#4 |
|
|
رد: نهايه الرحلة
 |
نهايه الرحلة