الممبار من الاكلات المصرية الصميمة
والتى لها مكانة خاصة تحترم بين الصغير و الكبير على حد سواء
يشاركها الكوارع و الكرشه و حلويات اللحم فى اقوال اخرى والتى تتمثل
فى الاعضاء الداخلية للماشية من امعاء ومعدة و طحال و رئة الخ
وبما انى كنت مقاطعة الممبار من مدة طويلة لان ما يباع فى السوق لونه ميسرش
و بما انى فضيت المقاطعة بعد ما لقيت جزار نضيف بيجيب الممبار ابيض من الفل
و بعد نجاح التجارب الاولية بنجاح ساحق ماحق
قررنا ننزلكم الطريقة المجربة لاحلى ممبار
المقادييييير
واحد كيلو ممبار نضيف زى الفل
و زيادة ضمان يغسل بماء و ملح و ليمون ينقع فيهم قليلا و يشطف و بعد كدا يستخدم
مقادير الخلطة
حوالى 3 الى اربع مج ارز
كيلو طماطم معصورة فى الخلاط
3 ملاعق صلصة
2 حزمة شبت 2 بقدونس 2 كسبرة
2 بصلة كبيرة مخروطة رفيع " انا بخرطها فى كبة الخلاط "
نص كوب زيت
ملح و فلفل و كمون و شطه و بهارات
وانا بعمل الخلطة نى فى نى
مش باجى ناحية النار خالص فى المرحلة دى
بنبتدى نحط مقادير الخلطة كلها على بعض
الطماطم مع الارز مع الصلصة مع الخضره مع البصلة
ونقلبهم كويس لغاية ما يختلطوا
ومننساش نضيف
ملح و فلفل و كمون و شطه و بهارات
وفى النهاية نضيف نص كوب زيت و نقلب بردو و خلاص كدا عملنا الخلطة
نجيب الممبار
نقطعه اطوال يعنى تقريبا حوالى متر بالنظر يعنى بتتعرف
المهم منقطعهوش صغير و الا الخلطه كلها هتتطلع منه اثناء السلق
فلازم يكون طويل شويه و بعد ما يتقلى نقطعه الاطوال اللى نحبها
بنجيب بعد كدا قمع ودى اسهل و اسرع طريقة
و ناخد طرف الممبار ندخل فيه القمع و نحط فى قلب القمع معلقتين خلطه و نجيب
معلقه عادية و نبتدى نزق بايدها الحشوة فى الممبار لغاية ما نملاه المهم
لازم يكون الممبار مبطط يعنى منحشيهوش جامد عشان ميفرقعش
و بنسيب حوالى اتنين سم فى كل طرف فاضيين عشان بيلموا على الخلطه و متطلعش برا
بعد كدا بنكون غلينا ميه فى حلة كبيرة شوية
و نحط فى الميه ملح و كمون
و نسقط فيها الممبار بحرص نمسكه من الطرفين و ننزله بالراحة
و بنلاحظ انه على طول بيبتدى يدور و ياخد الشكل الاسطوانى
بنحط الكميه على مرتين او مرة واحدة لو الحلة كبيرة و عادى مفيش مشاكل خالص
و بنسيبه لمدة تتراوح بين نص ساعة الى اربعين دقيقة
بعد كدا بنطلعه و نصفيه
و نبتدى نجهزه للتحمير
فى زيت غزير و يستحسن نغطى الطاسه
يدوب بس بنحمره و يبقى لونه دهبى محمر و نطلعه
و خلى بالكم من الزيت
يقدم الى جانب السلاطة وشوربة لسان عصفور زى منا عملت
03-20-2010, 12:09 AM
