ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > المواضيع المتشابهة للاقسام العامة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
المواضيع المتشابهة للاقسام العامة قصه حب غلا وزايد والله احلى قصه قريته يوجد هنا قصه حب غلا وزايد والله احلى قصه قريته هنا توضع المواضيع المتشابهة


 
قديم   #1

بـــــســـــومـــــة

:: كاتبة محترفة ::

الملف الشخصي
رقم العضوية: 128259
تاريخ التسجيـل: Jul 2010
مجموع المشاركات: 1,986 
رصيد النقاط : 0

قصه حب غلا وزايد والله احلى قصه قريته


قصه حب غلا وزايد والله احلى قصه قريته

بسم الله الرحمن الرحيم

جبتلكم اليوم قصه جنان بمعنى الكلمه
تراها اجزاء
ان مارديتو ماحكملها لكم ****************>>>تحطيم من البدايه
اخليكم مع القصه بعدين نتفاهم

< غلا مايصير كذا لك يومين ماأكلتي شئ >
قالتها مضاوي بنت عم غلا لغلا
وكملت مضاوي بعد ماشافت مافيه تجاوب من غلا/ حرام عليك عيونك تعبت من كثر البكاء أنا بنادي أبوي يمكن يقدر فيك
وطلعت مضاوي تاركه غلا بحاله تقطع القلب كان واضح عليها التعب وجهها ذبلان ومسحه حزن تغطي وجهها
أول ماطلعت مضاوي جلست غلا تفكر بنفسها صح أنها عمياء لكن عيونها زادت بالألم من شده البكاء وطول عمرها مؤمنة بقدرها لكن كانت تتمنى يرجع لها نظرها لثواني عشان تشوف زايد
وأول ماتذكرت زايد غطت رأسها بالبطانيه عشان تنسى لكن الذكريات تدفقت بعقلها بحلوها ومرها


@@@@@@@@@@@@




< أجيك يسلم رأسك وشلون ماأجيك وياك أنا بالذات صعب أتغلا والله لوتدري........ >
ضحكت غلا أول ماسمعت الأغنيه وقاطعت الأغنيه/ خلاص درينا أنك جيت وألا لازم تصك رأسي بصوتك النشاز
قال زايد/ أفا عليك ياغلايه صوتي نشاز
< كان زايد متملك على غلا وكل ماجاء لبيت غلا كان يغني الأغنيه هذي وبكذا غلا تدري أنه جاء >
غلا/ ياحرام حطمت قلبك ؟
زايد بصوت مسرحي/ ياه كم أتمنى لو قدرتي موهبتي يوما أيتها الفتاة الحمقاء
قلدته غلا بنفس الأسلوب/ ماذا أنا حمقاء ويحك يارجل هيا طلقني وأرحم نفسك من حماقتي
زايد/ أطلقك!!!!! فعلا أنتي حمقاء و عوباء
ضحكت غلا من قلب
قال زايد/ أروح وطي من الضحكه وراعيتها
غلا/ يله عاد لايسمعك أبوي
زايد بتنهيده/ أيه متى الله يرحمني ونسوي العرس يله ماعلينا أنتي وش تسوين
غلا/ شوفت عينك بسوي قهوه
زايد/ أقعد تعرفين تسوين قهوه
غلا/ ليه عشاني عمياء ماعرف أسوي قهوه
ضربها زايد بكتفه على كتفها/ يله عاد بلا دلع بس أنتي ماتشربين قهوة فوشوله تسوينها
غلا/ بس أبوي يشربها عشان كذا أسويها له
زايد/ يالله ياعمي عليه مزاج بالله فيه أحد يشرب القهوه الظهر
غلا/ أيه فيه أبوي
بعدين رح أجلس عند أبوي بدال ماأنت مقابلني وماخليتني أكمل شغلي
قرب زايد منها وقال بأذنها بهمس ناعم/ أنا عارف أنك ماتركزين وأنا جنبك بس هذا قدرك تحمليني
غلا وهي تدفه/ روح زين

طلع زايد وهو يضحك وجلست غلا تكمل القهوه


أول ماشاف زايد غلا جايه تشيل القهوه فز على طول وأخذ منها القهوه ومسكها بيدها وجلسها جنبه
ضحك أبو غلا وقال/ أنا ماأدري ماتستحي على وجهك تسوي حركاتك قدامي
قال زايد وهو يصب القهوه/ مايستحي إلا الغلطان وهذي زوجتي وأنت بنفسك مزوجنيها ولا نسيت
الأب/ أنسي!!!! وشلون أنسى وأنت مرتز عندي
أربع وعشرين ساعه
زايد بهزه رأس/ لاحول ولاقوة إلا بالله البنت تكرشني والأبو طفشان مني أنا ماأدري من الي دعا علي
ضربته غلا وقالت/ وش قصدك دعا عليك حنا بلوه
زايد وهو يشرب القهوه/
أي والله بلوه بلاني الله بحبكم
ضحكت غلا وأبوها
قام الأب وقال/ يله بروح أنسدح شوي قبل أذان العصر والبيت بيتك مع أني عارف أنك حافظ هالعباره
زايد/ دامني غاثك لها الدرجه خلنا نسوي العرس وأرتاح
الأب/ العرس لاجاء وليد من البعثه
وراح وخلاهم وأول ماطلع الأب كان يطمر زايد ويزين جلسته بقبال غلا
قال/ أخوك ماعنده نيه يجي ؟
غلا/ والله ماأدري بعثته أربع سنين وباقيله سنه
زايد/ أوف سنه بعد أنا يالله تحملت سنه بعد باقي سنه الله يعين بس
وضحكت غلا وسكت شوي ثم قال بصوت رومنسي/ غلا
غلا/ هاه
زايد بضربه خفيفه على يدها/ وهواه أنا كم مره أقولك قولي لبيه
غلا/ أقعد يالبيه إذا عدلت أسلوبك قلت لك لبيه
< وكان ذا طبع غلا إذا حست أن زايد بيتغزل فيها قالت له هاه >
قال زايد/ ماسألتيني عن برنامجي أمس
غلا/ صح نسيت وش سويت أمس ؟
مسك يدها وقام يعد بأصابعها وقال/ واحد_أول ماقمت من النوم جلست شوي ثم تغديت
أثنين_طلعت مع الشباب لكشته بسيطه جلسنا للمغرب ثم رجعنا
ثلاثه_رجعت البيت ولقيت خالتي وبناتها عندنا
أربعه_ جلست أسولف معهم شوي ثم قمت أخذ شاور
خمسه_طلعت بال..............وش فيك ؟
سحبت غلا يدها وقالت بصوت متكدر/ مافيني شئ
زايد/ غلايه أنا عارفك زين وش فيك
غلا/ مافيني شئ
وسكت شوي ثم قالت بصوت حاولت يكون غير مبالي/ تقولي جلست مع خالتك وبناتها
عرف زايد أنها غارت فحب يرفع ضغطها شوي وقال بحماس/ أي جلست وقعدت أسولف مع البنات خصوصا مها تصدقين طلعت فله
< كانوا أهله بيخطبوله مها بس هو رفض أول ماشاف غلا >
غلا/ أها
كمل زايد / فله ومزيونه بسم الله عليها
سمع شهقه من غلا حاولت تكتمها
ومسك نفسه مايضحك
غلا بأرتباك/ بسم الله عليها....المهم ماودك تروح عشان أنا ودي أنام شوي
زايد وهو مستانس/ بس ماكملت لك وش سولفت فيه مع مها
غلا/ ياحليلكم أحتفظ بسواليفكم السامجه لنفسك
زايد بأبتسامه/ سامجه الله يسامحك أغلطي علي عادي بس مها ماآذتك بنت الناس وشكلها محترمه
عصبت غلا وفقدت تماسكها وقالت/ ياسلام دامها جايزتلك هالكثر ورى ماتأخذها وتريح نفسك بدال ماأنت قاعد تمدح وتجزل في الثناء لسيده الحسن و ت............
مات زايد من الضحك لأن صار الي يبيه
قالت غلا بصوت مقهور/ وش يضحك إنشالله
زايد/ ياقلبي كل هذا حب لي
غلا/ وشو
زايد/ دامك تحبيني لدرجه تغارين علي هالكثر ليش ماتقولين
غلا بأرتباك/ أي حب وأي غيره شكلك حششت
زايد/ يله عاد أنا حبيت أرفع ضغطك ولا لاجلست مع مها ولاشئ بس سلمت على خالتي وطلعت فوق
غلا وهي تضربه/ ليش تلعب بأعصابي كذا
زايد/ أثرك طلعتي تحبيني وأنا ماأدري ومخليتني أهوجس أنتي تحبيني ولا لا
غلا/ يله عاد بلا قله أدب
زايد/ ياأخي لو مره قولي أحبك لو مجامله بس شكلي بأبطي عظم وماسمعتها
جلست غلا تضحك قال زايد/ أقول غلا وش رأيك اليوم نطلع نتعشى برى
غلا/ أنت عارف أن أبوي مايرضى
زايد/ ياحول طيب نروح نتمشى لو بالسوق
غلا/ الله يالسوق أصلن مادخلته عقب أول مره شفتك فيها
وكملت بصوت واطي/ وهزئتني
ضحك زايد وقال/ لاتلوميني تنرفزت من الي جايه صقعتني وكبت علي الكابتشينو ولا بعد كان حار أحرق أصابعي
ضحكت غلا وهي تتذكر الموقف
< كانت أول مره تروح للسوق مع مضاوي وكانت مضاوي بتحاسب وقفت غلا بمكانها وحست غلا أن جنبها شباب فبعدت عنهم شوي ومادرت إلا هي صاكه واحد وعصب عليها وصارخ وقال/ وجع إنشالله ماتشوفين عمياء أنتي
وحس أن البنت دمعت عيونها واستغرب ومادرى إلا بوحده جايه تركض وتقول/ آسفه ماعليش
ومسكت البنت بيدها عرف زايد أنها عمياء وراح لأخوياه وهو مصدوم وقالهم السالفه وعصبوا عليهم وقالهم أنه مادرى قالوا له كان تعذرت فطمر مع شلته يدورونها بالسوق لحد مالقاها طالعه تركب السياره لحقوهم وعرف بيتهم في البداية كان السالفه أعتذار وبس
لكن أول مارجع البيت لقى أهله يبون يخطبوله مها بس هو تردد وماعطاهم الجواب
وصار يتردد كثير على بيت غلا وعرف أنها وحيده مع أبوها وحس أنه يميلها بس ضحك على نفسه وقال متأثر بالأفلام أنا وجهي
وأول ماسألته أمه عن مها رد بسرعه أنه بيخطب بنت وأول مادروا أنها عمياء رفضوا بالبدايه بس يوم شافوا ألحاحه وأصراره وافقوا وتقدمولها
في البدايه غلا رفضت لأنها حست أنه شفقان عليها بس أبوها أقنعها أنه ونعم الرجال وماراح يأمن أحد كثره عليها فاضطرت أنها توافق لكن بعد ماجلست معه بعد الملكه حست أنه فعلا رجال ويحبها حتى هو أول ماشاف جمالها وأدبها عرف أنه ماراح يندم على أختياره >

زايد/ يله عاد أنا بروح قبل لايقوم عمي ويلقاني ويقول يامن شراله من حلاله عله
ضحكت غلا وقالت/ متى أشوفك
زايد/ يمكن أشوي أمرك قبل لأرجع البيت
وطلع وجلست غلا تفكر أنها فعلا محظوظه فيه


غلا/ من عند الباب ؟
< أفتح باب ياخلا أنا ريشاب جيب مقاضي >
فتحت غلا الباب وكان ريشاب هندي البقاله تموت فيه غلا لأنه يعاملها مثل بنته وكان بعمر أبوها وماكان ينطق أسمها زين يناديها خلا >
غلا/ هات ياريشاب
ومدت يدها
ريشاب/ وقف وقف ياخلا فيه رزال يفحط عند باب أصبر أبغى سوف أيس فيه
< ضحكت غلا كان هذا طبع ريشاب يخاف عليها لأنها عمياء ويجنن شباب الحاره حتى زايد جننه في البداية بس بعدين حبه >

رجع ريشاب وقال/ هذا واحد مضيع يبغى حاره تاني يله سكر باب
وراح

وبعد العشاء جلست غلا تسولف مع أبوها
الأب/ ألا أقول متى راح زايد
غلا/ قبل العصر بشوي
ضحك الأب وقال/ ياحليله والله له وحشه
غلا/ دامك تفقده وراك تكسحه
الأب/ لاياشيخه تبيني كل شوي أمدحه ثم يشوف نفسه علينا
غلا/ حرام عليك زايد موب كذا
الأب بضحكه/ أيه موب كذا المهم أخوك مادق اليوم
غلا/ لامادق بس.............
<أجيك يسلم رأسك وشلون ماأجيك...> سمعت غلا صوت سياره مشغله الأغنيه بصوت عالي بالشارع وضحكت
الأب/ هه جاء قيس قومي أفتحي الباب
فتحت غلا الباب ونزل زايد ودخل وقال/ مساء الخير ياوجه الخير
غلا بخجل/ هلا
زايد بهمس/ أشتقتيلي
سكت غلا من الحياء ضحك زايد
قال الأب/ ورى ماتدخل يازايد
جلس زايد وسلم على عمه
الأب/ هذا وش الي معك
زايد/ هدية لغلا
الأب/ وش هي
زايد/ أقول عمي وش فيك صاير فضولي
الأب بضحكه/ يعني هونت ماتبي تقول لي
زايد بضحكه/ ليه أنا كنت ناوي أقولك أصلن عشان أهون
ياحليلك ياعمي واثق من نفسك
ضحكت غلا وأبوها
قام الأب/ يله بروح أنام وأنت لاتبلط هنا
زايد/ حاضر طال عمرك
وأول ماراح أبو غلا طمر زايد كالعاده لغلا وقال/ تفضلي ياأغلى غلا بالعالم
غلا بضحكه/ الله يستر لاتكون ملغمه
زايد/ لاتخافين ماراح أفجرك إلا إذا خنتيني عشان تصير قصه العاشق الي فجر حبيبته
غلا/ لاياشيخ عاشق وتفجر هذا عاشق أرهابي بعدين ياخوفي أنت الي تخون
زايد/ أفا ياغلايه الي يحب مايخون ويله بسرعه أفتحي الهديه
فتحتها غلا مع مساعده من زايد وطلعت الهدية جوال
غلا/ وش أسويبه
زايد/ سويبه كيكه وش تسوين به بعد أكلمك وتكلميني فيه
غلا/ بس ماأعرف له
زايد/ أنا أعلمك أول شئ إذا سمعتيه يدق أضغطي ذا وإذا بغيتي تدقين علي أنا مخزن رقمي بالأتصال السريع أضغطي رقم أثنين هذا ثم السماعه الخضراء هذي
وإذا بغيتي تدقين على الشرطه دقي تسعه ثلاث مرات
مات غلا من الضحك وقالت/ أجل خلاص بسولف مع الشرطه وأطنشك
زايد/ أي هين هذا إذا عطوك وجه وبعدين مافيه أحد يعرف رقمك غيري يعني ماأحد معبرك غيري
غلا/ لاياشيخ
زايد/ وإذا أرسلت رساله أضغطي ذا
غلا/ لاياشيخ وشلون بقرأ رسالتك
زايد/ العالم تطور أبرسلك مقطع صوت والحين بدق عليك وأشوف فهمتي ولالا
غلا/ ليه شايفني بقره ؟
ودق عليها وعطته رفض
زايد/ تبيني أجاوبك عن سؤالك ؟
مات غلا من الضحك وقامت تضحك من قلب
زايد/ ياويل حالي أذوب أنا
زادت غلا بالضحك
زايد/ خلاص عاد ترى من جد أذوب
سكت غلا بعد ضحك طويل
وجلس زايد يدق عليها وهي مره رفض ومره صامت إلى حد ماتعلمت ثم أرسلها رساله وتعلمت وشلون تفتحها
زايد/ بعدي والله صدق ذكيه
ويله أنا بروح لأن بكره عندي سفره
غلا برعب/ وين ؟
زايد/ بروح مع الشباب للشرقيه
غلا/ ليه ؟
زايد/ عرس خوينا بكره
غلا/ وكم بتقعدون ؟
زايد/ ثلاث أيام
غلا/ ليه ناوين تروحون معه شهر العسل ؟
ضحك زايد وقال/ لا بس عندي شغل
غلا/ وشو ؟
زايد/ أشك أنك في المباحث بس ماعلينا بروح أشوف وش صار بشهادتي حقت الدكتوراه
غلا بضحكه/ أيوه وش تخصصك إنشالله
زايد/ طب عيون
ضحكت غلا لأنها عارفه أنه يمزح
زايد/ وش يضحك أنا مو قلت لك أني راح ادرس طب
غلا/ أيه تدرس وأنتي مقابلني أربع وعشرين ساعه
بعدين وش حدك على طب العيون
زايد بهمس ناعم/ عشانك
غلا أنفجرت من الضحك وزايد ضحك منها وقال/ شكلك مكذبتني
غلا/ أكذب على قدك موب طب مره وحده
زايد/ ماعلينا تبين شئ
غلا/ سلامتك بس أتصل فيني إذا مشيت
زايد/ أقعد الحين أتصل فيني ولا قبل ناسيتني
ضحك وطلع وراحت غلا تنام


 
قديم   #2

بـــــســـــومـــــة


رد: قصه حب غلا وزايد والله احلى قصه قريته


قصه حب غلا وزايد والله احلى قصه قريته


< أجيك يسلم رأسك وشلون ماأجيك >
فزت غلا من النوم تحسب زايد جاء بس طلع جوالها يدق وكان زايد حاط لها النغمه هذي
غلا بصوت نعسان/ ألو
زايد/ أشوى ماعطيتني رفض
غلا/ الساعه كم ؟
زايد/ سبع الصبح
غلا/ أوف وش مصحيك هالحزه
زايد/ أنتي ماقلتي لي دق علي إذا مشيت
غلا/ لامطيع والله
زايد/ شفتي زوج مطواع مثلي
غلا/ بس وش موديكم هالحزه
زايد/ عشان نلحق العرس ونساعد خوينا إذا يبي شئ يله عاد روحي نامي وبدق عليك بعدين
غلا/ أنتبهه والسرعه
زايد بأدب مصطنع/ حاضر ماما مع السلامه
غلا/ مع السلامه
ورجعت نامت


أول ماقامت غلا دقت على زايد
زايد بضحكه/ أقعد ياجوال
غلا بضحكه/ شفت شلون أقول وينكم ؟
زايد/ جالسين نتمشى بشوارع الشرقيه
غلا/ أها
زايد بنعومه/ أقول فقدوتنا ؟
غلا بتنهيده/ أي والله
زايد بصرخه/ آآآآآآآآآآآآه
أخيرا أعترفتوا
مات غلا من الضحك
زايد بصوت ناعم/ ياأخي مابغيتوا تجبرون خاطرنا
غلا/ وراك تهرج كذا
زايد/ لابس عندي الشباب
عاد الشباب عرفوا أنها غلا من صوت خويهم
كان يزاعقون
غلا
ضحكت غلا
قال خويه/ أنا أقول الرجال وراه ذايب
قال الثاني/ هذي غلا ياشيخ وماتبيه يخق
زايد/ يله عاد بلا لقافه
ضحكوا الشباب
زايد/ أكلمك شوي
غلا/ زين مع السلامه
زايد/ مع السلامه
وسكرت غلا
قال خويه/ ياعيني على الرومنسيه
زايد بتنهيده/ أيه والله أني أشتقتلها
كان يزاعقون الشباب ويصفقون
قال خويه/ سبحان الله شفت وشلون أجتمعتوا
زايد/ ماأدري وش كان حالي بدونها
قال الثاني/ الفضل لنا بعد الله حنا الي خليناك تعتذر لها
زايد/ أقول سق وأنت ساكت
وضحكوا الشباب
وجلس زايد يفكر بغلا أول مره تقوله أنها فاقدته وهذا يدل على تحسن وجلس يضحك وهو يتذكر وجهها وشلون يتغير إذا تغزل فيها


@@@@@@@@@@@@

< أقول غلا ترى البنات مسويات حفله وتراك بتروحين معي >
غلا/ لا يامضاوي ماأبي أروح
مضاوي/ غصب طيب بتروحين
غلا/ هاه وشوله أروح
مضاوي/ تغيرين جو
غلا/ معجبني جوي ومالي خلق للأحراج من البنات
مضاوي/ وش أحراجه أنتي لك سنين ماطلعتي ولازم تشوفين العالم وبعدين أول مره أشوفك تنحرجين من عماك مع أنك عارفه انه مقدر من ربك
غلا/ أنا عارفه هالشئ بالعكس الوضع عندي عادي بس ماأبي أحرج البنات
مضاوي/ مالي شغل رايحه معي رايحه وقومي جيبلي قهوه يله
ضحكت غلا وقامت تجيب لبنت عمها القهوه
بعد ماراحت مضاوي دق زايد
زايد/ هلا وغلا
غلا بضحكه/ أهلين
زايد/ أقعد رديتي بسرعه
غلا/ خلاص تعودت المهم أنت وين
زايد/ والله ياطويله العمر تونا زفينا المعرس
غلا متحمسه/ وش لون زفيتوه ؟
زايد/ ركبناه حمار
غلا/ يله عاد
زايد/ يعني بالله وشلون زفيناه سويناله صف سيارات ومشينا فيه لبيت العروسه
وصورنا الزفه بس صراحه فليناها الله يوفقه إنشالله
غلا/ أها
زايد يقلدها/ أها خير وش فيك
غلا/ مافيني شئ بس بستشيرك بشئ
زايد/ فلوس ماعندي
وضحك
غلا/ من أولها كذا
زايد/ تفداك عيوني ياعيوني
غلا/ خل عيونك لك وأسمع مضاوي تبيني أروح معها لحفله
زايد/ مضاوي من ؟
غلا/ بنت عمي
زايد/ أها وأنتي تبين تستأذنين مني
غلا/ لاياشيخ أبوي حي أستأذنه هو موب أنت
بس المشكله أنا رافضه أروح ومضاوي ملزمه علي أروح معها وأنا ماودي
زايد/ وليش ماودك ؟
غلا/ ماأدري ماأبي أحرج البنات هم أكيد ماراح ياخذون راحتهم زين وراح ينحرجون مني وأنا..........
زايد/ بس بس تدرين عاد أنا مع مضاوي وبتروحين غصب وأنا الي بوديك
غلا/ ياسلام الدعوه عناد
زايد/ أيه عناد أنتي لمتى بتحرمين نفسك من الناس
غلا بهمس/ وش أبي بالناس تكفيني أنت
زايد/ لالابس................ وش قلتي تو
غلا بضحكه/ ماقلت شئ
زايد/ إلا قلتي يالله مشاعرك ماتدفق غير وأنا بعيد
ضحكت غلا
زايد/ عموما أنا راجع بعد بكره وبنشوف موضوع الحفله وبشوف إذا أنتي مشتاقتلي صدق ولا بس فرحه الجوال
وسكر وراحت غلا تنام
@@@@@@@@@@@@
< زايد أنت صاحي ولامجنون مالقيت ألبس إلا ذا >
زايد/ أوف وش فيه شكله حلو
غلا/ بس قديم والحفله فيها بنات من الرياض كلها
زايد بتفكير/ أمم أجل قومي ألبس عبايتك
غلا/ ليه
زايد/ بلا لقافه وقومي ألبسي عبايتك وأنا بروح أقول لعمي بسرعه
طلعت غلا مع زايد وهي ماتدري وش السالفه نزلوا من السياره ومسكها زايد بيدها
غلا/ أنت وين موديني ؟
زايد/ كازينو
غلا/ لاياشيخ
زايد/ ماأدري عنك
حنا هالحين داخلين السوق
غلا/ السوق!!!! ليه
زايد/ نصور فيه
غلا/ يوه زايد
زايد/ يعني الناس وشوله تروح السوق بنشتري أحلى فستان لأحلى غلا
غلا/ قل قسم
زايد بضحكه/ ليه داخل العسكريه
بس حاضر قسم ياطويله العمر
غلا/ ليه ؟
زايد/ عشان الحفله
غلا/ وأنت تعرف تشتري فستان
زايد/ ليه بخترع نوي ترى حده فستان
غلا/ عارفه بس وش دراني عن ذوقك
زايد/ يكفي أني أخترتك وهذا أكبر دليل على حسن ذوقي وأنتي ماعليك أنا بضبطك وأخليك جرح وأزين وحده في الحفله
غلا/ بس...............
سحبها زايد وحط يدها تحت يده وصار يمشي بسرعه
غلا/ زايد هدي السرعه شوي
ضحك زايد ومشى بهدوء وصاروا يدخلون من محل في محل وزايد مايعجبه شئ
زايد/ تصدقين تعبت خل نجلس ونشرب شئ بعدين نكمل
وفك يدها من يده وحطها على كتفها
غلا/ زايد عيب فشلتنا الناس وش بتقول
زايد/ تصدقين عاد شوفيهم يناظرون فينا منهم الناقد ومنهم المعجب
غلا/ ومن المعجب ؟
زايد/ البنات طبعا
ضحكت غلا وجلسوا يشربون كابتشينو
زايد/ حمدالله والشكر
غلا/ وش فيك ؟
زايد/ هاه لا مافيني شئ
< وكانت فيه بنتين يتميلحون عند زايد وحده منهم مرت ورمت عليه الرقم >
زايد بضحكه/ قومي غلا خل نكمل جولتنا
وقامت ورجع زايد يحط يده على كتفها وهالمره قربها منه بزياده لعانه في البنات
وقاموا يدورون بالمحلات وزايد يقول لغلا وش الي يشوفه وبالأخير لقى فستان ناعم أحمر وكان فعلا زين لكن غلا خافت يكون لونه مب ذاك الزين
زايد/ غلا لاتجنيني والله لونه روعه ويأخذ العقل حتى بيطلع يجنن عليك
غلا بتردد/ طيب يمكن موب مقاسي
زايد/ ليه شايفتني حمار ماأعرف مقاسك
يله عاد بلادلع وخلينا نأخذه
غلا/ كيفك
وطلع سعره غالي ورفضت غلا يشتريه لها
زايد/ أقول ترى والله لاأرتكب جريمه اليوم عادي أنتي زوجتي وأشتريلك كل شئ وبأي سعر
غلا/ لكن............
زايد/ لالكن ولاشئ وخلينا نروح نكمل الباقي
غلا/ أي باقي
زايد/ الي أعرفه أن الفستان لازمه جزمه وخرابيط كثيره
غلا/ ماشاءالله موسوعه في عالم المرأه
زايد بضحكه/ ماشفتي شئ
وراح يدورون جزمه وبوقت قصير لقوا جزمه
قال زايد/ أجلسي بالكرسي
غلا/ ليه ؟
زايد/ ماتبين تقيسين الجزمه
غلا/ موب لازم دامها مقاس 36 يعني كبري
زايد/ أقول أجلسي
وجلسها على الكرسي
وجاء بيلبسها الجزمه بس وقف وناظر في الهندي الي عطاه الجزمه وقال/ أقول ورى ماتطس يابو الشباب
الهندي/ نعم ؟
زايد/ الحرمه بتقيس الجزمه ولا وش رأيك أتكي جنبها
الهندي مافهمه وغلا مات من الضحك
زايد/ توم جاو جاو
ضحك الهندي وراح بعيد وقاس زايد الجزمه وطلعت مقاسها
زايد/ طيب وش باقي
غلا/ ماباقي شئ العقد وعندي
زايد/ أجل يله خل نروح نتعشى في مطعم
غلا/ لالالا عشان أبوي يهزئني
زايد/ ماعليك من عمي خليه علي
@@@@@@@@@@@@
بعد العشاء رجعت وطبعا أخذت موشح من أبوها بس زايد أخذ النصيب الأكبر
في اليوم الثاني جت مضاوي تشوف وش ناقص غلا عشان الحفله
مضاوي/ ماشالله ماعاد تحتاجيني عندك سبع البرومبه
زايد
غلا/ كلش ولا زايد ترى مارضى فيه
مضاوي/ تعلميني
بس بصراحه لو وحده غيرك كان قلت تكذب هذا موب ذوق رجال
غلا/ صدق يامضاوي زين أنا شايله الهم
مضاوي/ أي والله يجنن حتى ملبوسه عليك روعه وخصوصا لونه ويكفي أنه أحمر فنيسيا
غلا/ أشوى
مضاوي/ أجل أنا بروح الحين وبكره بمرك عشان نروح سوا
غلا/ لا زايد يقول أنا بوديك
مضاوي/ الله لنا أجل يله مع السلامه
@@@@@@@@@@@@
< أأوتش بشويش فقعت عيني >
قالتها غلا لزايد لأن زايد حلف هو الي يحط لها كحل وأبوها جالس يضحك على أشكالهم
زايد/ أنتي أعقلي ويمشي الوضع موب كل شوي تطامرين
غلا/ هات هات أنا بزين نفسي شكرا ماأبي خدماتك
زايد/ أقول أنثبري أنتي الحين واجهتي في المجتمع وصعبه أخليك تلعبين بشكلك وأصير مسخره للناس
غلا/ لاياشيخ من الي يلعب فينا يوه يابوي قل شئ
الأب/ والله كيفكم أهم شئ ماأبي مصايب في بيتي
غلا/ المص.................
زايد/ أنتي ورى ماتسكتين وتخليني أشوف شغلي
غلا/ هه بسكت وأشوف
وقام زايد يتفن في وجهها وبالأخير طلع ماسوى غير كحل لعيونها
غلا/ لاياشيخ ساعه وأخر شئ كحل ولا بعد داخلي
زايد/ أصل الجمال بالعين والحين مابقى غير الروج
غلا/ أنا أحطه
وبعد ماخلصت قال زايد/ أوكي مابقى غير شعرك وبس
غلا/ أقدر جهودك بس أنا أبخص بشعري
زايد/ كيفك بس تراني في الخدمه
وبعد ماخلصت غلا زينتها طلعت لزايد وأبوها
أول ماشافها زايد صفر بأعجاب
وقال/ ياولد يازايد أثرك حريف
الأب/ تكفى عاد وش سويت كله كحل
زايد/ هذي أصولها ياعمي بعدين أنا ماأحب البنت تحط مكياج مافيه أزين من الجمال الطبيعي
غلا/ أقول خلنا نروح تأخرت على مضاوي

وأول ماوصلت غلا للحفله أستقبلتها مضاوي
مضاوي/ وش القمر الي جاينا اليوم
غلا بضحكه/ قمر مره وحده
مضاوي/ وهل في ذلك شك بس وراك ماحطيتي مكياج
غلا/ زايد رفض
مضاوي/ ياسلام وش دخله
غلا/ يقول ماأبي تحطين مكياج وأعتمدي على الجمال الرباني
مضاوي/ بهذي معاه حق أنتي ماناقصك جمال
بس يله خل ندخل وأعرفك على البنات
ودخلت غلا والكل أنفتن فيها وأعجب بشخصيتها وطلتها بالحفله
وبالبداية غلا مارتاحت بالحفله بس بعدين أعجبوها صديقات مضاوي لأنهن زاحفات مثل مضاوي وتعاملوا معها كأنها وحده منهم
وبعد فتره دق زايد على غلا وقالها تطلع عند الباب
في السياره قال زايد/ هاه وش أخبار الحفله
ماردت غلا لأنها زعلانه لأنه طلعها بدري
زايد/ غلايه قاعد أكلمك
غلا برود/ وش تبي
زايد/ لاياشيخه كل هالزعل عشان طلعتك بدري
غلا بحده/ زين أنك عارف أنه بدري
زايد بأبتسامه/ أقعد ياحمش
ماردت عليه وكانت واصله حدها لأنها أول مره بحياتها تستأنس كذا وجاء هو ونكد عليها
زايد/ يله غلايه ماتسوى علي هالتكشيره
ماردت عليه
زايد/ يوه غلايه ماأحب أشوفك زعلانه
بعد ماردت عليه
زايد بهمس ناعم/ والله طلعتك عشاني أشتقتلك
غلا بحده/ لاتميلح عندي تراي واصله حدي
زايد/ أخيرا تكلمتي
غلا بعصبيه/ أنصحك أني ماأتكلم
زايد بضحكه/ أقعد ياعصبي
ماردت عليه
زايد/ طيب أنتي ليش معصبه ترى كلها حفله
هنا أرتفع ضغط غلا والتفت لجهته وقالت بصوت عالي/ أيه انت وش هامك تطلع وتروح وتسافر وتمشى وأنا منطقه بالبيت عمري ماطلعت ولاقابلت العالم وأول ماأطلع وأقابل بنات مثلي وأستانس تستخسروني فيني الوناسه يعني مو كافي 20 سنه من عمري منطقه بالبيت
زايد بضحكه/ عمرك 20 سنه توني أدري
أنصدمت غلا كانت مقهوره وهو جالس ينكت فرجعت بكرسيها وقامت عيونها تدمع وجلست تبكي بصمت
أخر شئ تتوقعه أن ماأحد يفهمها حتى زايد أخذ الموضوع بسخريه وماحس فيها
زايد/ غلايه وش فيك سكتي
ماردت عليه وماكان يدري أنها تبكي
زايد بضحكه/ خلاص ولايهمك بكره أعزملك بنات الرياض كلهم وش تبين بعد
بس ماشاف من غلا غير السكوت
زايد/ طيب بنات السعوديه كلها بس لاتزعلين
وزادت دموع غلا كان ماأخذ الموضوع مزح ومادرى أنها تعاني من الوحده واليوم بالذات حست انها منعزله عن الناس
زايد/ يعني ماراح تكلميني
ماردت عليه
زايد/ براحتك
وصلوا البيت ونزل زايد يفتح لغلا وأول مامسك يدها لمس بل بأيدينها وشاف الكحل بأصابعها وعرف أنها تبكي وأنصدم وقال/ غلا أنتي تبكين ؟
ماردت عليه وبعدت عنه وراحت للبا بتدخل
مسكها بيدها وقال/ لحظه أنا ماتوقعت الموضوع بيزعلك كذا وماكنت أعرف أنك حساسه لهالدرجه
قالت غلا وهي تسحب يدها/ ماعرفت ولاراح تعرف عني شئ
ودخلت البيت وسكرت عليها الباب وتركت زايد منصدم منها ومو قادر يستوعب الموضوع كله
وأرتاحت غلا لأنها لقت أبوها نايم فدخلت غرفتها بهدوء

 
قديم   #3

بـــــســـــومـــــة


رد: قصه حب غلا وزايد والله احلى قصه قريته


قصه حب غلا وزايد والله احلى قصه قريته

رجع زايد لسيارته وهو يفكر كان أخر شئ يتوقعه أن غلا تزعل منه وقال/ الله لايلوم البنية مقهوره من وحدتها وأنا قاعد أنكت أنا وجهي
يالله أنا وش سويت دمعتها غالية عندي
وجلس يفكر وشلون يرضيها

أول ماصحت غلا من النوم جلست تفكر بالي صار البارح وندمت أنها زعلت على زايد وماكان له داعي الدموع الي نزلت البارح
بس كانت معصبه في حزتها
وجلست تضحك على موقف البارح أول مره تزعل من زايد

قامت غلا ولقت أبوها صاحي وقال لها أنه بيروح لجارهم بيسولف عنده شوي
وقامت غلا تطلب أغراض من البقاله
غلا/ ريشاب جب الأغراض ولاتنسى البيبسي
ريشاب/ ياخلا ياخلا بيبسي مافيه كويس خذ ميرندا
ضحكت غلا وقالت/ موب لي ياريشاب لأبوي
ريشاب/ هي الله بابا يشرب بيبسي لالالا أنت أكيد يجذب علي
غلا بضحكه/ من وين جبتها يجذب
ضحك ريشاب وقال/ من مسلسل كويتي أنا واجد حبي هذا كلمه
وسكت وكمل/ بس أنت لايلعب بعقل أنا مافي بيبسي يعني مافي بيبسي يبغى ميرندا
غلا/ خلاص جب ميرندا حمضيات
وسكرت وهي تضحك كان ريشاب يحب المسلسلات ومن كثر مايتابعها حفظ هرجها بجميع اللغات

جاء العصر وبعده المغرب وزايد ماجاهم جلست غلا تفكر يمكن يكون زعلان منها
وجاء العشاء وزايد ماله أثر قامت غلا تأخذ جوالها بس ترددت تكلمه ولا لا وفي الأخير دقت عليه ورد بسرعه وهو يزاعق/ غلا
غلا بأبتسامه/ يعني ماشفتك اليوم
زايد بصوت مهموم/ يوه ياغلا والله أني جالس بالبيت ضايقن صدري ماأدري وشلون أراضيك
غلا بضحكه/ لاياشيخ
زايد بهمس ناعم/ أنتي ماتدرين وش كثر غلاك عندي
غلا بهمس/ صدق والله
زايد بتنهيده/ آآآآه ياغلا والله يادمعتك ماراحت عن بالي أنا ماأحب أشوفك زعلانه عاد فمابالك بدمع من عيونك
أستحت غلا وماقدرت تكلم
زايد بصوت رومنسي/ غلا
غلا/ لبيه
زايد بهمس/ يالبى قلب زايد
تكفين قوليها
غلا/ وش هي
زايد/ أحبك
غلا بضحكه/ بس
زايد/ والله تكفيني حتى لوماعنيتيها
غلا/ أفا يازايد وش قصدك بلوماعنيتيها
زايد/ يعني ساعات أحس أنك ماتحسين تجاهي بشئ لاحب ولاكره مجرد زوج مفروض عليك
شهقت غلا ونزلت دموعها وسمع زايد شهقتها
قال/ وش فيك
غلا تحاول ماتبين الحزن بصوتها/ لابس الجوال يصرف
زايد/ خليه يصرف أنا حاطه بأسمي وأنا الي بسده لك أهم شئ أكلمك وماأنحرم من صوتك
غلا/ لا بس أسمع أبوي يناديني بروح أشوف وش يبي
زايد/ مع أني عارف أنك تهربين بس ماعليه أهم شئ أنك تدرين أني أحبك
غلا/ مع السلامه
زايد بضحكه حزينه/ مع السلامه
وسكر وأول ماسكر زايد جلست غلا تبكي وتصيح
ودموعها نزلت من عيونها بغزاره وقالت بحزن/ آآآخ لو تدري وش كثر أحبك أصلن ماحبيت أحد غيرك لكن وش توقع من بنت عاشت وحيده ماعرفت شعور الحب والكره وأول ماحبت ماعرفت وشلون توصل مشاعرها الله يعين القلب على كتم المشاعر
وتعذيب الأحباب

اليوم الثاني جلس أبوها وقال/ أقول غلا غريبه زايد ماجاء من أمس أنتم متزاعلين
غلا/ لاحول الله لايجيب الزعل بس على كلامه بيجي اليوم

وجاء العصر وبعده المغرب وبعده العشاء وزايد ماجاهم
خافت غلا لايكون صاير فيه شئ ودقت عليه مارد وتعبت أصابعها من كثر ماتدق ومايرد عليها وفي الأخير راحت لأبوها قلقانه وأول ماشافها أبوها سألها بخوف/ وش فيك صاير شئ
غلا وهي ترتجف/ يابوي زايد مايرد
الأب/ الله يهداك روعتيني أحسبن فيك شئ والغايب عذره معه
غلا/ أنا حاسه أن فيه شئ
الأب/ يعني وش بيصير الله يهداك يمكن الجوال موب معه ولاناسيه في مكان
غلا/ لالا أنا................
ودق جوالها وردت بسرعه وقالت بصوت حاد/ زايد وش فيك ماترد خرعتني
< السلام عليكم >
أرتبكت غلا لأنه ماطلع زايد وقالت/ وعليكم السلام من أنت
قال/ معك مهند أخو زايد وزايد أرسلني عشان أطمنك عليه
غلا/ ليه وش فيه زايد
مهند/ تعبان شوي وهو الحين نايم بعد ماعطيناه العلاج
هنا أنهارت غلا وطاح من يدها الجوال وقالت وهي تبكي/ شفت يابوي كنت حاسه أن فيه شئ
أخذ أبوها الجوال وكلم مهند وجلس يسأله عن حاله زايد وبعد ماسكر مسك بنته وقعد يهديها وقال/ خلاص يابوك طلع عنده هبوط عشانه ماأكل شئ وبكره يجيك متعافي إنشالله
ودخلها غرفتها وخلاها تنام بس غلا ماقدرت تنام من خوفها على زايد

 
قديم   #4

بـــــســـــومـــــة


رد: قصه حب غلا وزايد والله احلى قصه قريته


قصه حب غلا وزايد والله احلى قصه قريته


< مايصير وأنا أبوك أوديك للرجال في بيته >
غلا/ بس يابوي هذا زوجي
الأب/ ولو عيب تروحين له وأنتم لسى ماسويتوا عرس
غلا بصوت حزين/ بس أنا خايفه ودي أشوفه
الأب بضحكه/ ماراح تقدرين تشوفينه إلا إذا دخل المستشفى
غلا بخوف/ بسم الله عليه لاتفاول عليه
ضحك الأب وقال/ أجل أسكتي وأدعيله يتعافى


جلست غلا العصر كله مهمومه ودقت على زايد ولقت جواله مقفل وصارت تنزل دموعها وهي ماتحس
بعد المغرب دق بابهم وكان أبوها عند جارهم
وقامت تفتح الباب
غلا/ من ?
قال واحد بصوت مبحوح
<أنا زايد>
غلا أنصدمت وافتحت الباب بسرعه وقالت/ زايد وش فيك طالع من البيت وأنت تعبان
جلس يكح ويكح وقال/ أنتي أسنديني وخليني أقعد بعدين أسألي الي تبين
نزلت دموع غلا من الفرحه وسندته على كتفها لحد ماجلس وجلست جنبه
زايد/ هالحين من التعبان فينا أنا ولاأنتي
<كان منظرها منظر التعبان عيونها دموع وجهها شاحب>
غلا بضحكه من بين دموعها/ لابس كنت خايفه عليك
زايد/ الله ياغلا مادريت أني غالي لهالدرجه عندك
وقعد يكح ويكح
غلا بأهتمام/ دامك تعبان ليش تطلع من البيت
زايد بصوت تعبان/ أنا مايكتمل يومي من غير ماأشوفك وبعدين قلت الحين أنتي قلقانه علي قلت أجيك
طبعا بعد ماتناشبت أنا وأهلي
حلفوا أني ماطلع بس شسوي أشتقتلك وطلعت غصب
رجعت غلا تبكي قال وهو يمسح دموعها بيده/ غلايه ليش الدموع
غلا/ ماأدري بس أتمنى أشوفك
زايد/ غريبه أول مره تتمني كذا
غلا/ هذي أمنيتي طول عمري أني أول من أشوف أنت
زايد بهمس بأذنها/ الله ياغلا كل هذا حب لي
غلا وهي تبكي/ كل يوم أدعي ربي أني يرزقني النظر عشان أشوفك
دمعت عيون زايد أول مره يسمع أمنيه غلا ولابعد تدعي ربها أنها تشوف علشان تشوفه هو
زايد/ وهذا حلمي في الحياه أنك تشوفين وعشانك لأكمل طب عيون
ضحكت غلا
زايد بنعومه/ بس ماتبين تشوفين غيري
غلا بأبتسامه من بين دموعها/ إلا ابي أشوف ريشاب
زايد/ أفا على الأقل كملي جميلك وقولي بس أنت
ضحكت غلا قال زايد بتعب/ أستوي زين بنسدح على رجلك وهمزي رأسي أحس بصداع
وأنسدح عليها وجلست غلا تهمز رأسه ولمست بيدها وجهه
قالت/ زايد أول مره أدري أن فيك ضربه بخدك
زايد بصوت نعسان/ أشوى ولاكان ماأخذتيني
ضحكت غلا قال زايد/ غلا وجع أعقلي لاتضحكين لأنك وأنتي تضحكين تهتزين ورأسي مصدع
وزادت غلا بالضحك قام زايد ومسك يدها وقال/ الدعوه عناد
غلا وهي تضحك/ لاوالله بس أنت تضحكني
زايد/ شايفتني مهرج
وضحكوا الأثنين


< يالله حي الفتى المريض >
كان صوت أبو غلا وهو داخل من الباب
زايد/ الله يحيك عمي
الأب/ أوف أنتي طالع من المقبره ولا وش
غلا/ ليه يابوي
الأب/ شكله واصل حده من التعب وراك جاي وأنا عمك دامك تعبان
زايد/ أشتقتلكم ياعمي
الأب بضحكه/ كثر منها عزالله ماجيت على بالك بس أترك عنك المهايط
ضحكوا زايد وغلا
الأب/ أقول ياغلا أخوك مادق
غلا/ إلا دق العصر وقال بيكلم بكره
زايد/ يله تصبحون على خير بروح للبيت
الأب/ أي والله رح أرتاح وجهك مايسوى
وطلع زايد وراحت غلا تنام


@@@@@@@@@@@@


أول ماصحت غلا من النوم راحت تصحي أبوها بس مارد عليها خلته ينام لأنه البارح مانام إلا متأخر وراحت تدق على زايد ومارد وبعد دقائق دق زايد
ردت عليه بضحكه/ أهلين
زايد بصوت تعب شديد/ هلا
غلا بقلق/ زايد وش فيك
زايد بكحه/ لا بس أنا متنوم في المستشفى وحبيت أطمنك
غلا بخوف/ مستشفى!!!!! ليه وش صاير
زايد بتعب أشد/ ماأدري بس أظاهر أني عندي زايده وعمليتي بكره
غلابأهتمام/ طيب تبيني أجيبلك شئ
زايد بأرهاق/ لا مشكوره بس الحين بنام لأني تعبان بالحيل ودقيت عليك عشان أطمنك
غلا/ ماتشوف شر
زايد/ الشر مايجيك مع السلامه
غلا/ مع السلامه
وأول ماسكرت نزلت دموعها
وبعد ماهدأت راحت تصحي أبوها
قال/ خليني أنام شوي وأنا أبوك أحس بتعب
غلا/ ياربي وش فيكم كل واحد تعبان
الأب بضحكه تعب/ ليه فيه أحد تعبان غيري
غلا بأبتسامه حزيه/ زايد بعد تعبان
الأب بضحكه/ ماعليك بيبقى معك واحد منا
ضحكت غلا وطلعت عن أبوها عشان ينام
وفي اليل جلس الأب يتعشى مع غلا وهو ساكت
غلا/ أقول يابوي غريبه ماطلعت اليوم لجارنا
الأب/ طفشت منه وأنا أبوك
وقام يروح ينام وجلست غلا وحيده تفكر بزايد وفي الأخير نامت


@@@@@@@@@@@@


< يابوي يله قم ماصارت من البارح نايم >
جلست غلا تصحي أبوها وهو مايرد عليه
غلا بضحكه/ لاتحاول تمثل علي دور النايم اليوم ماراح أترك تنام مثل أمس
وسكت مارد عليها
غلا وهي تهزه/ يله عاد قوم طفشت لحالي
وأول مالمست صدره حست أن مافيه تنفس وخافت وسمعت تنفسه بس ماسمعت أي تنفس وجلست تهزه وتصيح / يابوي رد علي حرام عليك
يابوي لالالا تخليني لحالي ماعندي غيرك
وقامت تصيح وتبكي بحرقه وراحت تركض للتلفون ودقت على بيت عمها وردت مضاوي
قالت بصياح/ ألحقيني يامضاوي أبوي مايتنفس
وعلى طول مضاوي ركضت لأبوها وأخوانها وقالت لهم وبسرعه راحو لأبو غلا
وأول ماوصلوا كانت غلا منهاره وأخذتها مضاوي بعيد تهديها
وقام عمها والعيال ودوا أبوها للمستشفى
وجلست غلا تصيح وتبكي ومضاوي تحاول تهديها لكن مضاوي كانت تحاول تتماسك قدام غلا ودموعها تنزل بغزاره على عمها
وفي الأخير جاء عمها وحالته بالويل وجلس يبكي عندهم عرفت غلا أن أبوها راح كان تنهار ويغمى عليها


@@@@@@@@@@@@


- عظم الله أجرك
- الله يرزقه الجنه
- هذا مقدر ومكتوب يابنيتي
- الموت علينا حق
- إنا لله وإنا اليه راجعون
< كانت هذي عبارات تسمعها غلا من حريم جوا يعزونها في وفاه أبوها وماكانت تعرف منهم أحد لأن ماعمرها زارتهم أو زاروها >
مضاوي/ غلا جت أم زايد ومعها بنتين
قامت غلا وسلموا عليها وجلسوا وعرفت غلا أن ام زايد معها بنتها نوف وبنت أختها مها
وكانت حاله غلا تقطع القلب كان الكل يعزيها وهي كانت في عالم ثاني تفكر بحالها وش بيصير فيه من عقب أبوها أفقدت أمها من صغرها
بس كان أبوها الأب والأم مع بعض والحين صارت بدون أب وأم وزوج طايح بالمستشفى الله أعلم بحاله
وتذكرت عباره أبوها/
<بيبقى معك واحد منا>
ونزلت دموعها بغزاره كانت تتمنى يبقون معها الأثنين


مضاوي/ غلا ريشاب هندي البقاله يقول يبي يعزيك
حست غلا بشعور غريب كانت طول عمرها تعد ريشاب مثل أبوها وقامت بتروح
وهي تمشي أسمعت مها تقول لنوف أخت زايد بسخريه/ حمدالله والشكر حتى الهنود يعرفون يعزون
هنا غلا أفقدت أعصابها ومارضت أحد يتكلم في ريشاب القريب لقلبها الي تعده مثل أبوها
فالتفت بجهة مها وقالت بصوت حاد/ إذا أنتي صرتي تعزين جت على الهندي مايعزي
أنحرجت مها وقالت بصوت فيه كل الحقد لغلا/ وش قصدك تشبهيني بالهنود
قالت غلا/ لاطبعا
الهنود أشرف منك والحين قومي أطلعي برى بيتي
<وكانت تتكلم مع مها ونظراتها بجهة مها حتى إن الي يشوفها يقول هذي موب عمياء>
عصبت مها وطلعت ومرت من جنب غلا وقالت/ يصير خير
وراحت غلا لريشاب وكان الكل حاضر المجادله الي صارت وكيف طردت غلا مها برى بيتها
وأول ماجت غلا لريشاب كان يبكي بصوت يقطع القلب وحاول يتكلم بس ماقدر من شده بكائه وكل الي قاله الله يصبرك وراح


جلست غلا بعد العصر بغرفتها تبكي بلحالها وكانت مضاوي جالسه عند الحريم ودق باب غرفتها فمسحت دموعها وقامت تفتح
< غلا حبيبتي أنا آسف على عمي >
كان صوت زايد ماصدقت غلا في البدايه
غلا/ زايد ?
زايد بتعب/ أيه زايد والله ياغلا ماني مصدق الي صار
وكمل بصوت حزين/ طيب أنا شايفه قبل يومين مافيه إلا العافيه حتى كان يتمسخر علي
هنا أنهارت غلا ونزلت دموعها بغزاره ضمها زايد لصدره وقال وهو يمسح شعرها
بيده/ لا ياغلا مابي دموع هذا يومه وكلنا بنموت
ماقدرت غلا تكلم
قام وداها تجلس وحست غلا أنه يالله يمشي
غلا/ زايد سويت العمليه ?
زايد/ أيه اليوم الصبح
غلا برعب/ وطالع اليوم ليش ?
زايد/ وشلون ماتبيني أطلع وأنت بلحالك
غلا/ بس أنت تعبان
زايد/ لو فيني أمراض الدنيا ماخليتك لحالك
غلا/ بس.........
دق جوال زايد ورد
وكان الي يكلمه يزاعق ومعصب
زايد/ بشويش ياأخي ترى ماصار شئ
رد هذاك يزاعق< وش ماصار شئ فيه أحد يطلع العصر من يوم عمليته أنت مستهون بالموضوع ولا بايع نفسك>
زايد/ أنت عارف أن الأهل محتاجيني
رد عليه< بس أنت تعبان حتى الدكتور عصب علينا لأنك طلعت بدون ماتستشيره >
زايد/ خلاص ياأبن الناس ساعه وراجع للمستشفى
قال< أيه مستشفى أبوك هي بسرعه أرجع >
وسكر
قالت غلا/ مايصير كذا يازايد
زايد/ ماعليك منهم دلع دكاتره
وجلس عندها شوي ورجع للمستشفى
ونامت مضاوي وعمها عند غلا لحد مايخلص العزاء

 
قديم   #5

بـــــســـــومـــــة


رد: قصه حب غلا وزايد والله احلى قصه قريته


قصه حب غلا وزايد والله احلى قصه قريته


في اليوم الثاني جاء وليد أخو غلا وأول مادخل ضم غلا وجلس يبكي بحرقه على أبوه لأنه مات وماشافه وجلست غلا تبكي معه
وطلع وليد أخذ أجازه لمده شهر
ومرت الأيام وليد نفسيته تعبانه شايل هم أخته وفي الأخير أقترح أنه بيأخذها معه بس زايد قال له أنهم بيتزوجون ويرجع وليد لبعثته
وليد/ بس مايصير أبوي توه متوفي ونسوي عرس
زايد/ ياأخي عرس بدون طق وتكاليف المهم غلا تصير في بيتي وأنت تكمل البعثه بدال ماأنت شايل همها
وتردد وليد وشاور عمه وافق عمه وحددوا العرس بعد أسبوعين
جلست غلا حيرانه مابين كيف تتزوج وأبوها قريب ميت ومابين بعثة أخوها الي أخذ أجازه ثانيه عشان يتطمن عليها


@@@@@@@@@@@@


< عادي وأنا أخوك عارف أنك خاقه عنده فماله داعي القشعات الي تقولينها >
ضحكت غلا وصارت تمشي مع وليد جهة الباب لأنه كان بيطلع وقاعد يسألها عن زايد
غلا بضحكه/ دامك عارف أني أحبه وشوله تسأل
وليد/ يعني أنتي باغيته هالمره
غلا تضحك من سؤاله الي يشوفه يقول العرسان عند الباب
قالت/ طبعا وماراح أحب غيره
وليد/ حتى لو كنتي متملكه على غيره
غلا/ حتى لو متملكه على غيره ماراح أكون سعيده مع غيره
ضحك وليد وقال/ الله يوفقك أنا بروح تبين أجيب شئ وأنا راجع
غلا/ سلامتك
وطلع وجلست غلا تفكر أنها ماراح تحب غير زايد


وذاك اليوم ماجاهم زايد وأستغربت ودقت عليه ورد عليها وقال أنه مشغول وبيدق عليها وجلست تنتظره يدق عليها بس مادق


وقبل زاوجها بثلاث أيام أرسل لها زايد مقطع صوت لقصيده
< لاصرت بايعني أشوفك
على خير
مع السلامه دام مابه سلامه
قلت أنتهينا قلتلك خير ياطير!!!!
ماني بأول شخص يخسر غرامه!!!
محذرك من قبلها
ألف تحذير
لاعفتني بيعيف قلبي هيامه
مانيب ميت لا
ولا أحتاج تبرير
صح الله لسانك وفر كلامه بسمعك حبكه وفكره
وتصوير
وأفهم عدل يامدعي بالفهامه
وجه الشعر أبيض ويحتاج تغيير
ودي تزين هالقصيده علامه
ماضيك الأسود بذكره دون تقصير
كذا يكون بخد هالشعر شامه
يصدق معي تعبير ويخون تعبير
ياضيعه الشاعر بوقت
أنسجامه
يمكن خطأ أدونك بالشعر مير
لو ماأحترمتك للغرام
أحترامه
ماكان حبك غير بس طعنتك غير!!!?
علمتني معنى الندم والندامه
ماجاك مني أي زله
وتقصير
كل ماخطيت أعاتبك
بأبتسامه
حسبي على الذكرى إذا هبت عصير
ماعاد تنفع شرهتي والملامه
البال ظامي وقتها
والحزن بير
خسرتك وهمي كسبت أهتمامه
واليل فازع لك كذا جاني مغير
ظلمتني وأكثر ظلمني ظلامه
لأقبل علي أوحيت صوت المساير
وفزيت كل ضيفن أقوم بمقامه
وليا عزم هاليل ضيقه وتفكير
قلي بربك كيف بقدر أنامه
مافيه داعي للعتب والمعاذير
الغدر خال الجرح وأطيب عمامه
أما يجيب الله مطر تالي وخير
ولا السلامه ماش
مامن سلامه >
أول ماسمعت غلا القصيده أستغربت وظنت أنه يستهبل
وقالت أنها بتسأله إذا شافته
لكن ماتوقعت انه ماراح يقدر يجاوب على سؤالها


@@@@@@@@@@@@


دخل وليد على غلا قبل العرس بيوم وكان ضايق صدرها لأنها ماشافت زايد ثلاث أيام وجواله مقفل
قال بصوت مرتبك/ غلا
أنتبهت غلا لنبره صوته
وفزت واقفه
قالت/ سم
جلس يتنحنح ثم قال بصوت متقطع / غلا......أنتي عارفه أن.......الأنسان المؤمن.....
غلا بقلق/ وليد وش صاير
كمل بنفس الأسلوب/ الي صاير أبيك تحملينه......لأنك عارفه أن.....
غلا بخوف/ زايد فيه شئ ?
قال بصوت حزين/ يطلبك الرحمه زايد مات بحادث.........غلا ا طاحت غلا مغمى عليها


في المستشفى جاء عمه وعيال عمه
قال العم بصوت مرعوب/ غلا وش فيها
حكى له وليد الموضوع ضاق صدر عمه أول مادرى وأرسل ولده يجيب مضاوي عشان غلا أكيد بتحتاجها
دخلت مضاوي وأبوها على غلا
أول ماشافتها مضاوي أنهارت وجلست تبكي
ونزلت دموع عمها من حالة بنت أخوه كانت مثل الجسد بلا روح وجهها شاحب وماهب غلا الي يعرفها
وحاول يتمالك نفسه وقال لمضاوي بحده/ أنا ماجبتك عندها عشان تبكين أبيك تهدينها إذا صحت موب تزودينها
سكت مضاوي وراح أبوها يسأل الدكتور عن حاله غلا وأخذ معه وليد
قال الدكتور/ تعرضت لصدمه عصبيه أثرت عليها وكان واضح أنها كانت تعاني من ضغط نفسي الفتره الماضيه
العم/ أبوها مات قبل شهر
الدكتور/ هذا يفسر عدم تحملها لصدمه ثانيه عموما راح تجلس عندنا لفتره عشان نتأكد من أستقرار حالتها لأنه صعبه نطلعها وحالتها في خطر
وافق عمها ورجعوا لغلا وجلست غلا بالمستشفى شهر تحت العنايه
وطلب عمها من وليد أنه يرجع لبعثته عشانه تأخر أكثر من اللازم
وليد/ صعبه ياعمي أروح وأترك أختي
العم/ ليه أنا وين رحت أنا الحين الي أتحمل مسئوليتها لأنها بنت أخوي
وليد/ والنعم فيك ياعمي بس......
العم/ لابس ولاشئ أنت وجودك ماراح يزيد ولاينقص شئ فرح كمل البعثه وتطمن أختك بنتي الحين
سافر وليد بعد يومين وجلست غلا بعد سفرته شهر ثاني بالمستشفى
تحسنت صحتها لكنها صارت ماتكلم كثير
وبعد الشهرين طلعت غلا لبيت عمها الكل قام يحاول ينسيها زايد ويخليها تعيش حياتها
حتى عمها قام يسافربهم لمدن المملكه ومصر عشان بنت أخوه الحزينه
قدرت تتأقلم غلا مع الوضع لكنها مانست زايد حتى بعد مرور سنه على وفاته


@@@@@@@@@@@@


حست غلا بيد واحد تسحب البطانيه وترجعها من ذكرياتها للواقع
< أفا ياغلا تقول لي مضاوي أن لك يومين ماتأكلين >
غلا/ لا ياعمي أكل
مضاوي/ لاتصدقها يابوي ماتشرب غير الماء وبس
غلا/ لأني ماأشتهي ياعمي
العم/ من متى وأنا أبوك
مضاوي/ من يومين يوم قلتلها عن ولد صديقك الي خطبها
العم بضحكه/ أيه خطبها بس ماتزوجها
مضاوي/ والله أنت تعرف بنت أخوك ماتحب طاري العرس كله
العم/ غلا ياحبيبتي أنتي لازم تعيشين حياتك مايصير تعيشين على الماضي
غلا ودموعها تنزل بغزاره/ صعبه ياعمي أنساه
العم وهو يمسح شعرها
بيده/ بس هذا حكمه ربك وكلنا بنموت وأنتي لازم تنسين
أبوك لو كان عايش ماراح يرضى تسوين بنفسك كذا
غلا بصوت حزين/ أبوي قال أن واحد منهم بيبقى معي بس كلهم خلوني
نزلت دموع من عمها بس تمالك نفسه وقال بضحكه مصطنعه/ وأنا وين رحت أفا عليك بس
عموما الموضوع خطبه وإذا ماتبينه الحين أكلمه وأخليه يدور قمر غيرك
ضحكت غلا ومضاوي
العم/ أيه كذا خل نشوف الأبتسامه الغايبه من زمان
يله أنا بروح للشغل وأنتم أنزلوا عند أمكم تحت تراها طفشانه تدور أحد يسولف معها
وطلع الأب ونزلت مضاوي تحت على أساس غلا بتلحقها بعد ماتغسل وجهها
قامت غلا تغسل ورجعت تفتح درجها صقعت يدها صندوق ونزلت دموعها لأن الصندوق هذا فيه كل شئ أهديها زايد حتى الجوال قفلته وحطته بالصندوق
رجعت الصندوق ومسحت دموعها لأنها حست أنها تعبت عمها معها ولازم تنسى لو تظاهر بس قدام عمها لأنها مستحيل تنسى
ونزلت تحت عند مضاوي وأمها

 

أدوات الموضوع



الساعة الآن توقيت السعودية الرياض و الدمام و القصيم و جدة 04:08 AM.


 
Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.

Search Engine Optimization by vBSEO 3.6.0