 |
  |
|
|
|
|
#1 |
|
عضوة شرفية |
تقسيم وتنظيم الوقت هو أكبر مشكلات بتقابلك في شهر رمضان، وخصوصا لو كنت بتشتغلي..
دايما بتحسّي في رمضان إن الوقت بيجري منك وعلى آخر اليوم تلاقي نفسك تعبانة ومرهقة جدا، ودايما حاسة بالذنب؛ لأن شغل البيت والمطبخ خلّاكي تقصّري في العبادات اللي المفروض إنك تزوديها في رمضان.. علشان كده عملنا لكم اللقاء ده مع أ/ شيرين عز الدين -مدربة المنزل الحديث- واللي هتكلّمنا عن القواعد الأساسية لإدارة البيت بشكل عام ونصايح خاصة بشهر رمضان؛ علشان تقدري تستمتعي أكتر بالشهر الكريم، وتنظّمي وقتك بين العبادات والمسئوليات اللي عليك. إزاي ممكن ننظّم وقتنا في رمضان؟ لازم في الأول نعرف كويس فضل شهر رمضان، وسيدنا محمد (ص) بيقول: "لو علمتم ما في رمضان من خير؛ لتمنيتم أن تكون السنة كلها رمضان"؛ وأهم حاجة خلال شهر رمضان إننا نعرف نستغل يومنا صح؛ وأول حاجة نعملها إننا نحدد الجدول اللي هنمشّي به يومنا في رمضان، ونحدد فيه كل حاجة بداية من هتصحى الساعة كام. وطبعا مش هاقدر أقول جدول ثابت، لكن كل سيدة تقدر ترتّب الجدول على حسب أولوياتها؛ لكن لازم الجدول يوّفر لك وقت مش أقل من 8 ساعات للنوم؛ لأن دي الفترة اللي بيحتاج لها الجسم علشان يرتاح ويستعيد نشاطه بعد يوم طويل. قلة النوم في رمضان من الحاجات اللي بتأثر على ست البيت وعلى كفاءتها في أداء المهمات المطلوبة منها، تنصحينا بإيه علشان نتغلّب على المشكلة دي؟ لازم نراعي بقدر الإمكان إن ربنا أمرنا بالتبكير، يعني بلاش ننام لغاية الظهر؛ علشان كده الهدف من الصيام مش هيبقى اتحقق. ممكن بعد صلاة التراويح ننام شوية، ونصحى على السحور، ونقّعد لغاية الفجر؛ علشان نصلّيه وبعد كده ننام 3 أو 4 ساعات، ونصحى الساعة 8 مثلا، ونكمّل يومنا عادي. وبكده هنبقى حصلنا على ساعات النوم اللي جسمنا محتاج لها، ومش هنحسّ إننا تعبانين أو مرهقين خلال اليوم، أهم حاجة إن الجسم يحصل على 8 ساعات نوم خلال اليوم. لو عندنا أطفال لسه مش بيصوموا، إزاي نوازن بين نظامهم العادي في الأكل ونظامنا في الصيام، من غير ما نبذل مجهودا إضافيا؟ لو عندنا أطفال في البيت مش بيصوموا، مش هنحتاج خالص إننا نعمل مجهودا إضافيا علشانهم، يعني لو هيصحوا معانا الصبح، ببحضّر لهم وجبة الفطار العادية اللي بنعملها كل يوم. وعلى الضهر أدّيهم وجبة خفيفة وممكن ياكلوا فاكهة، وعلى فكرة أحدث حاجة وصل لها العلماء إن الفاكهة بتتاكل قبل الأكل؛ علشان ناخد الفايدة بتاعتها، وبعد كده ممكن يشربوا عصير، ويناموا شوية وبعد كده يصحوا على الفطار معانا، وتبقى هي دي الوجبة الأساسية واللي هتعتبر بالنسبة لهم وجبة العشاء، ولو عندنا في البيت أطفال بيصوموا نصف يوم، يومهم هيمشي عادي برده زيّنا، المهم بس إننا نراعي إننا مانسيبهمش ياكلوا أي حاجة وخلاص. دايما أكتر حاجة بتوتّر ست البيت هي عزومات رمضان؛ وممكن تحسّ إنها مش عارفة تعمل إيه وتحضّر للعزومة إزاي؟ فيه خطوات بسيطة ممكن ست البيت تمشي عليها وهي بتحضّر للعزومة، ولازم يكون عندها دايما نظام بتمشي عليه علشان تحضّر لأي عزومة سواء في رمضان أو في الأيام العادية، وساعتها هتلاقي إن الموضوع هيمشي عادي جداً وسهل وبسيط.. ودلوقتي تعالي نشوف مع بعض إزاي نحضّر قائمة بالأكل اللي هنعمله في العزومة.. - أولا لازم نكتب في الورقة، إيه الأصناف اللي هنقرّر نعملها يوم العزومة، وعلشان نختار الأصناف الصحيحة لازم نمشي تبعا لخريطة فيها 6 عناصر أساسية؛ وهما: الطبق الرئيسي، وطبق الخضار، والسلطة، والنشويات، والطبق الجانبي، والشوربة، لو أنا عملت طبق واحد من الـ 6 حاجات دول، يبقى أنا كده عندي سفرة متكاملة. - الطبق الرئيسي.. بيبقى اللحوم بأنواعها، وطبعاً باختار الخضراوات اللي تناسبها، والسلطة ممكن اعمل منها نوع أو اثنين على حسب وقتي وعلى حسب إمكانياتي. - الطبق الجانبي ممكن تعمليه لو عندك وقت؛ علشان تزوّدي شكل السفرة وتبقى منوّعة أكتر، وممكن تعملي مثلا سمبوسك أو مومبار، أو فطائر محشية. - طبق الشوربة من الأطباق الأساسية على السفرة وخصوصا في رمضان، وبيبقى الطبق الافتتاحي، وفيه منها أصناف كتيرة جدا ممكن تختاري منها؛ زي: شوربة الكوسة، وشوربة البطاطس، وشوربة الطماطم. - طبق السلطة وده بيبقى طبق مهم جدا على السفرة الرمضانية، وتقدري تنوّعي فيه زي ما أنت عايزة، وكمان يُفضّل إنك تعملي أكتر من نوع سلطة. - الحلويات هي طبعاً العنصر الأخير في العزومة ، وبعد ما نكون خلّصنا تفكير في الأصناف اللي هنعملها كلها، نبدأ نفكّر في إيه الحلو اللي هنعمله، إنما لمّا نيجي ننفّذ يُستحسن إننا نعمل الحلو الأول؛ علشان لو فيه صنف محتاج إنه يسقع أو يتجمّد زي الجيلي مثلاً، وبعد كده نبتدي نركّز في العزومة اللي بنعملها. إمتى نبدأ نحضّر للعزومة؟ يُفضّل إنك تبدئي في التحضير للعزومة من قبلها بيومين، علشان أعصابك تهدى وتحسي إنك مستعدة كويس. ولازم تكوني عارفة كويس إيه الأصناف اللي هتعمليها في يوم العزومة؛ علشان تتأكدي إن كل الحاجات اللي هتحتاجي ليها موجودة عندك، وما تتفاجئيش في يوم العزومة إن فيه حاجة ناقصة عندك. ولازم تعرفي إن اليوم السابق ليوم العزومة بيكون في نفس أهمية يوم العزومة؛ لإنك ممكن تحضّري فيه الحاجات الأساسية اللي ينفع إنك تحضّريها وتشيليها في الثلاجة من غير ما يحصل لها حاجة. يعني ممكن تعصجي اللحمة المفرومة اللي هتستخدميها في صواني الجلاش والمكرونة بالبشاميل، وتتبلي الفراخ واللحمة اللي هتعمليها في الصواني، وكمان ممكن تحشي السمبوسك وتشيليها في الثلاجة، ولو هتعملي محشي ممكن إنك تحشيه وتشيليه في الثلاجة. تنظيم المطبخ بعد العزومة، بيكون مُتعب أكتر من التحضير للعزومة نفسها، وخصوصا إننا بنكون مرهقين بعد يوم طويل من التحضير.. إزاي نتعامل مع المشكلة دي؟ لو كنّا اتّبعنا الخطوات اللي قلنا عليها، من ترتيب المطبخ، وتنظيم الحاجات اللي هنستعملها فيه أثناء التحضير للعزومة، أكيد هيبقى الموضوع أسهل بكتير. بس لازم نراعي وإحنا بنجهّز الأكل، إننا نرتّب المطبخ أول بأول ونخلّيه زي ما كان، يعني بعد ما نخلص تحضير الأكل، لازم نغسل الحلل والأطباق اللي استخدمناها في التحضير، وننظّف المطبخ، بحيث إن المطبخ يبقى نضيف وفاضي؛ علشان يستقبل الأطباق بعد ما نخلّص الأكل، وبكده هتقدري تخلصي بسرعة وترتاحي بعد الفطار، والموضوع ده لازم نعمله سواء عندنا عزومة أو لأ. مواضيع ذات صلة |
نظّمي وقتك.. واستفيدي من كل دقيقة في رمضان