 |
  |
|
|
|
|
|||||||
| قصص و روايات يوميات زوج عبقرى يوجد هنا يوميات زوج عبقرى روايات Novels و تحميل روايات و قصص روايات حب سعودية روايات احلام و عبير رومانسية عربية روايات عالمية كاملة للتحميل روايات رومانسيه احلام و عبير و قصص مضحكه قصص حزينه قصص رومانسيه حكايات عربية و قصص الانبياء افضل قصص مفيدة قصص سعودية خليجية |
|
|
|
#6 |
|
|
رد: يوميات زوج عبقرى
البارت السادس
المدام حامل انهاردة الجو حر جدا و كمان مفيش مواصلات وشكلنا هنروحو موتورجل ... يا بركة دعاكى يا حماتى حتى التكاسى بتتنطط ع الواحد السواقين اتغنوا خلاص و عيشيتهم ارتاحت .. تقولوش بنركبوا ببلاش ياللا أمرنا لله هنروحوا مشى ... و بما ان الطريق ممل فقررت اتصل بالمدام و نحبوا ف بعض شوية .. ياه و الله زمان يا خطوبة ... المهم .. اتصلت بالمدام ... الوووووو ..... روح قلبى ... مبروك ... كسبتى 100 بوسة ... طبعا هى سمعت كدا ... انفجرت ف الضحك وضيعتلى 4 دقايق ... بس مش مهم انا حاططها على خاصية أعز الناس ... و بعد الضحك دا كله ... قالتلى حبيبى اتأخرت ليه .. و حشتنى مووووووت .. انا عملت الغدا و مستنياك بفارغ الصبر ... قولتلها ... انا أكتر منك يا حياتى عايز أسلمك الهدية قالتلى .... أسكت بقى بتكسف ... قولتلها .. نعم ! يا بنت أحنا أتجوزنا خلاص أنتى نسيتى و لا أيه قالتلى .. و انا أقدر أنسى جوزى حبيبى .. دا انا لو فقدت الذاكرة مش هنساك ... قولتلها .. ياسلاااام بعد م سمعت الكلمتين الحلوين دول منك يا حبيبتى حاسس ان الجو بقى تراوة ... قالتلى ... حبيبى انا قلقت عليك أوى اما اتأخرت ... قولتلها ... حبيبتى مفيش مواصلات ... قالتلى .. امال انت جاى أزاى ... قولتلها ... موتورجل .... قالتلى ... أكيد انت بتهزر .. حد يجى من سموحة لـ محرم بك فـ الحر دا ... حبيبى انت مجنون ... قولتلها ... طبعا مجنون بيكى و الا مكنتش اجى المسافة دى ف الحر دا ماشى ... عرفتى بقى انا بحبك أد أيه ؟ قالتلى ... ربنا يخليك ليا و ميحرمنيش منك أبدا ... قولتلها .. أيه دا أنا مش مصدق نفسى ... قالتلى ... فى أيه يا حبيى قولتلها .. فى مشروع جاى اخيرا هركب ... حضريلى الحمام على م اوصل سلام مؤقت .. قفلت معاها و ركبت المشروع ( الميكروباص) ووصلت و دا بعد م أخدتها من سموحة للأبراهيمية مشى بس الحمد لله ... أخيرا وصلت البيت .. قولتلها .. حبيبتى حضرى الغدا وروحت دخلت ع الحمام عدل ... أخدت شاور و خرجت م الحمام أنسان جديد . .. أديتها جزء من الهدية و قعدنا نتغدا .. و فنص الغدا .. قامت جرى ع الحمام ... جريت وراها أشوفها لقيتها .. بترجع .. قولتلها ... خير يا حبيبتى فى أيه مالك .. قالتلى ... م الصبح نفسى غمه عليا .. قولتلها .. و عايزة ترجعى و حاسة بدوخان ... مبروك يا روح قلبى .. تقريبا و الله أعلم أنتى حامل انا كنت أدبى بس عندى فكرة عن الموضوع ... بس زيادة ف التأكيد البسى و ياللا بينا حالا نروح للدكتورة و اطمن عليكى ... قالتلى طب اصبر بعد م نتغدا ... قولتلها ... الاكل مش هيطير ياللا يا روح قلبى بسرعة ... لبسنا و نزلنا روحنا للدكتورة و كشفت عليها و .. قالت .. مبروك المدام حامل ف شهرين .... طبعا كنت طاير م الفرحة و لى العهد على وصول .... روحت انا و المدام البيت ... و كان هناك الاحتفال ... حيث تم تتويجها و حصلت على لقب ام عتريس ... كلقب مبدأى لحين اختيار الاسم المناسب لـ ولى العهد ..... و بعد الاحتفال .... قولتلها ... حبيبتى روح قلبى حياتى ... فات من الحمل شهرين فاضل 7 شهور ... وظيفتك تاكلى و تشربى و تستريحى .. انا عايزك تولدى الواد بعضلات قالتلى .. و انت يا حبيبى مين اللى هيعملك طلباتك و يراعيك و يهتم بيك قولتلها ... واحدة واحدة و هنساعد بعض لحد م تولدى هانت دول 7 شهور قالتلى .. انا بحبك أوى أنت أحسن راجل ف الكون كله قولتلها ... ربنا يخليكى ليا .. يا أم عتريس ..... و هكذا تكون الحياة سعيدة .. بالحب ... بالتفاهم .. بالمشاركة .. بالتعاون |
|
|
#7 |
|
|
رد: يوميات زوج عبقرى
البارت السابع
عتريس مجاش لوحدة اول يوم هبقى فيه 2*1 لكن كله يهون عشان المدام وولى العهد... و أهو الموضوع مش هيفرق كتير عن الجيش الواحد ف الجيش كان بيبقى 6*1 ..... ياللا ربنا يقدرنى .... اللهم وسع خلقى ع الأيام اللى جاية .... ووسع خلقى على حماتى لو جاية ... طبعا انا معاد شغلى 8.30 صحيت الساعة 6 و أخدت الشاور بتاعى وحضرت الفطار .. بس مش عايز أقولكم بقى وسخت كمية مواعين ف المطبخ أحتمال حبيبتى لو شافتها ترفع عليا قضية خلع ... و بعد كدا رحت أصحى حبيبتى و روح قلبى و أم العيال م النوم .. صباح الفل يا ام عتريس أحلى صباح ع الحلال و الحتة اللى ف الشمال ... على فكرة عتريس ادانى ميسد و قالى ماما جعانة أصحى بقى يا روح قلبى انا حضرت الفطار .... قالتلى ... صباح الفل يا حبيبى انا تعبتك أوى انهاردة .... قولتلها تعبك راحة يا قمر ... ياللا بقى نفطر ... و قعدنا ع السفرة ناكل .. لقيتها أكلت نص رغيف و قالتلى شبعت ... قولتلها .. شبعتى ؟! الكلمة دى مش عايز أسمعها منك لحد م تولدى ... حبيبتى .... انتى بتاكلى لفردين و يمكن تلاتة ... و بعدين انا عارف أن أبنى طفس ف لو هتاكلى رغيف لنفسك ... اعملى حسابهم ف 3 ....ضحكت و قالتلى ... حبيبى .. انا كدا هنفجر من كتر الأكل .. قولتلها بعد الشر عليكى يا روح قلبى .. أخ ... انا أتأخرت ع الشغل .. و زى كل يوم بوستها .. و نزلت جرى ع الشغل .. و كل ساعة أتصل بيها أطمن عليها ... لحد م رجعت م الشغل .. لقيتها محضرالى الغدا و مستنيانى ... قولتلها حبيبتى تعبتى نفسك ليه بس ... قالتلى حبيبى عنيا ليك ... و بعدين مينفعش أقعد كدا و أسيبك تحضر الأكل ... عيب ... قولتلها ... ربنا يخليكى ليا و يقومك بالسلامة ... و بعدين قومت اغسل أيدى و انا معدى ع المطبخ ببص كدا ... لقيت المطبخ بيلمع م النظافة و المواعين كلها اتغسلت .... قولت لنفسى و الله فيها الخير ... وبعدين قولتلها ... برده حبيبتى مش عايزة تسمع الكلام ليه بس ؟؟ ... قالتلى فى أيه يا حبيبى بس؟ .. قولتلها ياحبيبتى غسلتى المواعين ليه مش تريحى نفسك ؟! .. قالتلى امال مين اللى هيغسلها يا ابو عتريس ... قولتلها .. أنا كنت عامل حسابى هغسلها اما أرجع .... قالتلى .... الكلام دا لايمكن يحصل طول م انا عايشة ... قولتلها .. أصيلة يا أم العيال .. أنا كنت بقول كدا برده ... و ضحكنا احنا الأتنين و بعدين قعدنا نتفرج ع التلفزيون شوية ... و نتكلم شوية و نهزر شوية ... انا أسمع ان نفسية الأم بتنعكس ع الجنين و انا مش عايز العيال يطلعوا مكشريين . ومرت الأيام و الشهور ... و ف ليلة من الليالى و أحنا نايمين ف أمان الله ... صحيت س 3 الفجر على صواتها .... الحقنى يا ممدوح بطنى وجعانى أوى و شكلى هولد أنهارده .. أتصل بأمى ... طبعا أنا قومت نطيت من ع السرير لبست و أخدتها و نزلنا المستشفى ... و أنا ف العربية اتصلت بحماتى .. قولتلها ... بنتك تعبانة و بطنها وجعاها.. وبتقول أنها هتولد ... قالتلى بجد ... قولتلها ... لا يا حماتى بنشتغلك الكاميرا الخفية تحبى نذيع ... و أديت التليفون للمدام قولتلها صويتلها شوية ... يمكن تصدق !! ... خدت التليفون و كلمتها ... المهم على م وصلنا المستشفى .... لقيت حماتى ساحبة العيلة وراها و جاية .... و بعد مدخلنا للدكتورة ... و كشفت عليها .... قالت لا عادى دول شوية تعب صغيرين ..شكل المدام بتدلع عليك بس ... مفيش و لادة و لا حاجة و بعدين عمركم شوفتم واحدة تولد ع 6 شهور ... قولت أخ تصدقى يا دكتورة لسة واخد بالى دلوقتى ... و أخدت حبيبتى و روحنا البيت فى صحبة حماتى ... و حماتى تقريبا ... بتدعى علينا عشان صحيناها م النوم ... ما علينا .. الدعوة بتلف و ترجع لصاحبها .... و ف الطرق قعدت أهزر مع حبيبتى ... و بقولها ... خضتينى عليكى ياقمر و بعدين و لادة أيه دى اللى بعد 6 شهور دى ... هو أنتى حامل ف كتكوت ... و ضحكنا كلنا .. حتى حماتى ضحكت ... وصلنا البيت وحماتى جت قعدت معانا كام يوم لحد م أطمنت عليها... و بعدين روحت ... بعد كام أسبوع أخدت المدام و روحنا المتابعة مع الدكتورة ... و عملتلها سونار ... و اذ بالمفاجأة .. المدام حامل ف تؤام ( ولد و بنت) ... قولت خير الحمد لله ... و أول م روحت أتوضيت و صليت و شكرت ربنا و فـ يوم قاعد انا و حبيبتى بنتكلم و بنفكر ف أسمين للتوأم لحد م أستقرينا على ( جاسر و روميساء) ... و بعدين قالتلى حبيبى ... انا نفسى ف كابورايا ... شكلى كدا بتوحم عليها ... قولتلها بس كدا يا روح قلبى انا نازل أجيبهالك حالا ... و نتعشوا الليلة كابوريا بس كدا .... روحت الميدان .. أشتريت الكابوريا ... و روحت عملتها ... و قعدنا نضرب ... لما قولنا يا بس .... و بعد كام يوم ... كنا دخلنا ف الشهر التاسع ... و صحيت على نفس الصوات و لقيتها بتقولى ... انا هولد ... أتصل بأمى ... قولتلها حبيبتى .. انتى متأكده م الخبر دا ... قالتلى بطل هزار بتكلم بجد .... قولتلها .. جواب نهائى ... قالتلى يخربيتك هولدلك هنا ... قولتلها طيب يا حبيبتى .. أولدى وأما تخلصى صحينى .... و هى مش عارفة تضحك و لا تعيط من كتر الوجع و راحت راقعة بالصوت ...... رحت واخدها و جرى ع المستشفى ... و تمت الولادة بحمد الله .. طبيعية بدون أى مشاكل و أتى الى الدنيا أولياء العهد .. الأمير جاسر و الأميرة روميساء ... فى جو ملئ بالسعادة و البهجة و السرور ... وفى أسرة يجمعها الحب و تستظل بالمودة ..... و من هنا .. أعلن الرجل العبقرى فرمان السعادة الدائم .... و نسى كل هموم الدنيا و مشاكلها بعد رؤية زوجته و طفليه بخير ... فعجز لسانه عن الكلام و خر ساجدا الى الله حامدا له حمدا كثيرا .. و شاكرا له على كل هذه النعم التى لا تحصى و لا تعد و أتفق هو و زوجته على أحياء السبوع بالقراَن بدلا من الأغانى ... ليبارك الله لهما فيما رزق ... و لتبدأ حياة الأبناء بـ بسم الله الرحمن الرحيم .... الحمد لله رب العالمين .... |
|
|
#8 |
|
|
رد: يوميات زوج عبقرى
البارت الاخير
السبوع انهاردة يوم عصيب جدا ... و السبوع فاضل عليه يومين ... و بدأ القرايب و المعازيم يتهافتون بالأفواج من شتى أنحاء الجمهورية ... للتهنئة بقدوم أولياء العهد ... صحيت م النوم على جرس الباب .... بيرن بطريقة غير طبيعية ... أستغفر الله العظيم ع الصبح ... يا ترى مين أبن المطلقة اللى نايم ع الجرس دا ... دا انا هطلع انفخو .... و جريت ع الباب افتح لقيت عيل .. روحت معلقه من قفاه ... و لسة بقوله .. انت مين ياد يابن الـ .. و قبل م اكمل ... لقيت خالت مراتى ف وشى جاية م القاهرة بصحبة أبنها الرخم اللى انا معلقه من قفاه ؟؟؟ ... أهلا أهلا يا طنط دا أيه النور دا ... مش تقولى كنا نستنوكى ... اتفضلى أتفضلى ريحى م السلم ... قالتلى ... أهلا يا ممدوح أزيك و أزى أم عتريس و ازى عتريس ... قولتلها .. الحمد لله كويسين .. و عتريس دخل الجيش ... و بندورله على عروسة ... ضحكت ... و أثناء م هى بتضحك ... سمعت صوت حاجة اتكسرت ... روحت أشوف فى أيه و خالت مراتى جت ورايا ؟!! ... و إذا بأبنها الرخم بدأ فى تأدية مهامة الوظيفية فى تخريب البيت ... كسر الفاذة ... طبعا انا مسكت نفسى .. وقولتلها حصل الخير الحمد لله انها جت على أد كدا ... و هى أستلمته شتيمة و ضرب شوية ... قعد يعيط و صحى البيت كله ... حماتى و امى صحيوا م النوم ... و سلموا ع الضيوف ... و خالت مراتى قالت لحماتى ... معلش بقى حمادة كسر الفاذة ... حماتى قالتلها ... و لا يهمك فداه المهم انه بخير ... قولت أنا ف سرى ... ( صوتى يا للى م انتيش غرمانه .. م هى فلوس رقاصة مش فلوس واحد تعبان بيها ) ... ما علينا .... المهم .. دخلت صبحت على حبيبتى و مراتى و أم عيالى و بوستها هى و عيالى ... و بلغتها بقدوم خالتها ... فسألتنى ... حبيبى هو أيه اللى اتكسر بره دا ؟! ... قولتلها ... فاكرة يا حبيبتى الفاذة الشيك اللى جبتهالك هدية أيام الخطوبة ... قالتلى أيوه ..مالها الفاذة ؟! ... قولتلها .. ابن خالتك جابها 600 حته ... قالتلى ... ابن الموكسة المؤذى هو جه معاها ؟... قولتلها ... اه .. خير خير كويس انها جت ف الفاذة ... قالتلى .. الحمد لله .. قولتلها انا هدخل اخد شور و انزل اشترى الخروفين عشان الدبيحة بتاعة الولاد .... دخلت أخدت الشاور ولبست ... و نزلت أخدت واحد صاحبى معايا بيفهم ف الموضوع دا... و نزلنا على سوق الخرفان .. عند العمود ... أشترينا الخروفين ... و خليتهم عنده , و روحت ... لقيت الشقة بقى سوق .. تقريبا نص قرايبنا وصلوا ... المهم .. دخلت سلمت عليهم ... و امى و حماتى أستلمونى .... ياللا بينا نجيبو حاجة السبوع ..قولتلهم طب أستريح طيب ... قالولى مفيش وقت ياللا بسرعة ... خد حماتك و انزلوا و انا هقعد عشان الضيوف و أعملهم الغدا انا و أختك ... قولتلهم .. طب كوباية شاى ... قالولى ... الشاى مضر بالصحة خصوصا و انك لسة م فطرتش لحد دلوقتى .. قولتلهم طب حضرولى الفطار ... قالولى ... من اى مطعم هاتلك سندوتشين و انت ماشى .. احنا مش فاضيين ... قولتلهم .. ماشى أمرى لله ... و روحت واخد حماتى ... ونزلنا .. سوق الميدان اللى ف الجمرك ... ركنت العربية بره و روحنا طالعين على (ماضى) اشترينا المغات ... و بعدين دخلنا السوق نشتروا الحمص و السودانى و الشيكولاتة و الملبس و العلب و المنخول ... على كام كيلو جبن وشوية معلبات و كام كرتونة بيض .. عشان الفطار و العشا للقافلة اللى فـ الشقة عندى ... وطول م احنا ماشين حماتى تشترى .. و تقولى .. شيل يا ممدوح .. هى تشترى .. و انا أشيل ... و ماشية زى البطة تاتا .. تاتا على قلبها مراوح و أنا اللى طالع عين أهلى ف الشيل ...اقولها .. يا حماتى مدى شوية الله يكرمك انا شايل و الشيلة تقيلة ... ترد عليا تقولى .. استنى بس ببص على حاجة ... أقولها يا حاجة مدى شوية السوق مش هيطير ... هبقى أجيبك تانى ... تقولى ماشى ماشى ... فين و فين على م وصلنا للعربية .. كنت مت انا .. و أتقطع نفس أمى ... ركبنا و لسة هطلع ... لقيت حماتى بتقولى ... أخ خ خ ... احنا نسينا نجيبوا الشمع .. انا هنزل اجيبو ... قولتلها ... أبوس أيدك .. بلاش .. أنا اللى هنزل أجيبوا ... المهم .. نزلت جيبته و رجعت بسرعة ... و روحت طالع ع البيت عدل ... و طول الطريق بحلم بالسرير ... نفسى انام .... اول م وصلت البيت ... بفتح الشقة ... !! لقيتها ... كومبليت ... مفيهاش مكان الواحد يقف فيه ... قولت لنفسى ... ياللا معلش أهى ليلة و هتعدى ... و أنا واقف بحتضر من كتر التعب ... و مينفعش أنام و أسيب الناس اللى جاينلى ... و العيلة م صدقت تتلم على بعضها و طول الليل رغى و هاتك يا كلام ... فين و فين ع الساعة 4 الفجر ... على م فكروا يناموا ... و طبعا العدد دا كله مينفعش يناموا ف مكان واحد ... دا بالأضافة .. لأن المدام عندى لسة والده و المفروض انها ترتاح ... المهم أخدت الرجاله و نزلنا نصلو الفجر و بعدين بعتهم مع حمايا يباتوا عنده ف الشقة .... و الحريم بعيالهم وزعتهم ... شوية باتوا عندى ف الشقة .... و شوية عند امى .. و أنا رحت داخل عربيتى مريح الكرسى و نايم فيها و ظابط منبه الموبايل ع الساعة 10 .... صحيت م النوم ... رحت على صاحبى ... دبحنا الخروفين ... طلعت واحد لله ... و التانى ... أخدته للبيت ... للضيوف .. وبعدين ... روحت سلمته لأمى و حماتى عشان يعملوا العقيقة ... ( الفتة و اللحمة ... و كدا يعنى ) ....... و بعد الغدا ..... بدأت مراسم السبوع .... بحضور حبيبتى .. أقصد روح قلبى ... أقصد عيونى .. أقصد مراتى و ام عيالى ... مصطحبة الطفلين .. ( جاسر و روميساء ) ... ثم تبعتها .. حماتى مصطحبة ( الهون و المنخول ) .... و بدأ السبوع بالتلاوات القراَنية لما تيسر من القراَن الكريم .... فعندما خرجوا من بطن امهم ... كانت كلمة ( الله أكبر ) هى اول ما اطرب اذانهم ... و لتبدأ حياتهم .. بـ ( بسم الله الرحمن الرحيم ) ....... ثم بعد ذلك بدأت امى و حماتى ... فى القيام بمهامهم تجاه احفادهم و بدأوها .. بنصائحهم الغالية ... أسمع كلام أبوك ... و متسمعش كلام أمك ... أسمع كلام ستك ... و متسمعش كلام جدك ... ......... الخ و بهذا قد تحول الحبيبين الى أب و أم ليزيد الحب و تعم السعادة و لتبدأ رحلتهم فى تربية أطفالهم و مواجهة مصاعب الحياة المختلفة و من هنا قد أنتهيت من الجزء الأول من يوميات زوج عبقرى ... ( فى سنة أولى جواز ) أنتظرونا فى الجزء الثانى .... |
|
|
#9 |
|
|
رد: يوميات زوج عبقرى
قصهه رآاآائعهه مثلكك
تسلم آايديكك #♡~ |
|
|
#10 |
|
|
رد: يوميات زوج عبقرى
حلوة القصة
ياريت كمان تكملي قصة محبوبة بعد مااخذها عمها |
