هذا ما جنتة نفسى {الجزء السابع}

في بيت قوم بو احمد .. كالعاده كلهم متيمعين في الصاله يشربون جاهي ..
اسماء: هااا شيوم شو الجامعه ؟؟
شيماء: ما كان حلووو اففف محد من ربعي وياي كنت بروحي يالسه واشوف كل وحده ويا ربيعتها الا انا والله لو بيدي ما كنت بروح مب شي
ام احمد: هي على كيفج ماتروحين .. وبعدين قوليلي انتي سايره تدرسين والا تقرقرين ويا البنات
احمد: هههههه امي شو تقرقرين بعد
اسماء: اشفيج انتي اليوم كان اول يوم تريي انتي بتتعرفين عليهن وتسوينلج شله بعد انا كنت شراتج
احمد: لاا عاااد انتي غيييييييييييييير
شيماء: اونه عااد في شو غير هي باالله
احمد: هي غير لانها زوجتي وحبيبتي
اسماء: هههههههه ما عليج منه شيوم المهم قوليلي درستوا شي؟
شيوم: ههههه هي درسونا الله ياخذهم
ام احمد: بس شيوووم لا تدعين عليهم مب زيين
شيوم: هههه اشفيج امي عادي كلهم انجليز
بو احمد: يالله عاد متى بتتخرجين واشوفج دكتورة اسنان
ام احمد: هي والله يا راشد الله يخلينا لين ذاك اليوم وانسويلها حفله ماصارت ولا استوت
اسماء: هي والله وتعالجين ضرس ريلي الي بين كل ضرس وضرس نصف ساعه مشي
احمد: تخسيييين اخليها هاي تعالجهم مافيني بعد يصير فيني شي
شيماء: ههههههه اصلاا لين هاك اليوم انت روحك بتي تترجاني
ام احمد: وييي خلو عنكم هالسوالف .. بدر وينه ؟؟
اسماء: بدر راقد عمتي
شيماء: هيييه فديته وانا الي رقدته
وهم قاعدين يسولفون يرن تلفون بيتهم ..
ام احمد: شيوم قومي امي شوفي منو عالتلفون
شيماء: ان شاء الله
وتسير شيماء تشوف من عالتلفوون وهم يكملون رمستهم .. بعد مرور ثواني اتيهم شيماء ..
ام احمد: هاا امنوا
شيماء: هاي ميثه ربيعت عفراء اتقول تتصلها ماترد عليها فمتصله تسأل عنها قلتلها طالعه
بو احمد: هي صج يا مريم عفراء وينها
ام احمد: ماادري قالتلي انها بتطلع ويا ربيعتها
اسماء: انا مااحيد عفراء تطلع مع غير ميثه
احمد:امي وانتي شقايل تخلينها تروح من غير ماتعرفين هي ويا منو طالعه
بو احمد: قومي يا ام احمد اتصلي فيها
اسماء: يلسي عمتي انا بسير اتصل
وتسير اسماء تتصل فيها وكلهم بانتظارها .........
اسماء: تلفونها مغلق
ام احمد: ما عليكم يوم بتي بنسألها بنتي عفراء ما ينخاف عليها

.............................. .......

في ستار بكس ...
خالد: اشفيك انته..اقولك انا متفق وياها على كل شي اقعد انت بس ..
سعيد: بس اتصدق خلووود .. والله انها قمر
خالد: هي والله قطعه .. بتبادلني ؟؟
سعيد: هههههه لاا عاد بدينا بالخيانات من الحين
خالد: شو اسوي ياخي والله مليت من موزوووه ... يطالعها ويبتسم

.....

عفراء: اوييي موزوه انا وايد خايفه منو هاذيلا انتي تعرفينهم؟؟
موزه: وشقاا مااعرفهم اتعرفين انه هذيلا صورهم دوم بالجرايد .. اصحاب شركات وعندهم خيير وانا اعرف واحد منهم ريلي يتعامل معاه
عفراء: وشو يعني ؟!!!.. الحمدالله انا بعد ابوي عنده شركات وعنده خير ومعيشني احسن عيشه
موزه: طع هاااي شو تقول .. وانتي طول عمرج بتعيشين في بيت ابوج!!!!!
ينشون خالد وسعيد واييون صوب طاولة عفراء وموزه ..
خالد((يبتسم)): هلا موزه اشحالج؟؟
موزه: تماام الحمدالله اشحالك انته
خالد: الحمدالله زين .. ممكن نقعد معاكم
اهني عفراء ماتت من الزيغه وتأشر لموزه عشان تقوله ل ا..
موزه: هي اكيد حياكم الله
خالد: الله يحييج .. خالد يقعد مجابل موزه وسعيد مجابل عفراء .. اعرفكم على ربيعي سعيد
موزه: هلا والله حياك الله اخوي وانا بعد اعرفكم على ربيعتي عفراء .. عفراء كله منزله راسها تحت
خالد: هلا والله اختي عفراء
عفراء: ..................
موزه: ما عليه ربيعتي عفراء وايد خجوله
خالد: هي مبين عليها .. وشخبار ريلج خليفه عساه بخير
موزه: الحمدالله بخير دووم يرمسني عن مشاريعك انت وياه
خالد: هي عاد نحن مشاريعنا ما تخلص
موزه: عيل اشرايك اخوي خالد نحن نسير عطاوله ثانيه ونخليهم ياخذون راحتهم
عفراء((تطالع موزه وهي محرجه)): ...................
خالد: والله فكره حلوه يالله خلنا نسير
وساروا خالد وموزه وقعدوا على طاوله ثانيه .. وهاي خطه مسويتنها موزه عشان عفراء وسعيد يتعرفون على بعض ..
عفراء مغيضه على موزه ومااتعرف شو تسوي .. حطت الشيله على راسها وسكرت عبايتها وتمت يالسه ومنزله راسها تحت ..
سعيد: ليش حلو شعرج
عفراء: ...................
سعيد: اممممم حاسه فيج يا عفراء وادري انج مستحيه والي خلااني تكبرين في عيني هو يوم سكرتي عبايتج وحطيتي شيلتج .. اثبتيلي انج وحده محترمه وتخافين على عمرج .. امم انا الصراحه ماادري شو اقولج .. اول ماشفتج حسيت بشعور غريب ماابغي استعيل واقول انه حــــــــــــب .. امممم يمكن اعجاب .. انا وايد بنات حاولوا يتقربون مني في الشركه الي انا صاحبها بس حسيت انهم طمعانين فيني وما دشوا قلبي ابدا الا يوم شفتج انتي في لحظه حسيت اني صحيت من الكابوس الي كنت فيه والحياه اصبحت حلوه وفيها امل اني احلم احلام حلوه .. انتي يمكن في البدايه صعب انج تصدقيني لانه هذااول لقاء بينا .. من حقج والله واي وحده في مكانج اتسوي جيه واذا ماسوت ها معناته انها وحده متعوده على هالرمسه وانها تعرف وايد شباب .. وانتي لج حرية الاختيار .. وبس هالي عندي .........
عفراء كانت تسمع ومنزله راسها تحت .. ماتدري شو الشعور الي انتابها وسعيد يرمس حست بشي غريب يمكن لانها اول مره تسمع هالكلام ومن واحد .. حست انه الدنيا بدت تحلى في نظرها .. عفراء وحده جريئه وشخصيتها قويه ومغروره شوي بس ماتقدر تقاوم شي اسمه حب ضعيفه جدا.. حست انه هالشي صار بسرعه من كلام كان يقولها سعيد بس لا اكثر .. عيبها طريقة كلامه واسلوبه واكثر شي جذبها هو انه وايدين حاولوا يتقربون منه بس هو ماسوالهن سالفه وانه مستواه نفس مستواها .. وسعيد ماشاءالله يعني عليه جمااال كل البنات يتخبلون عليه واظاهر انه عفراء انظمت لهالبنات .. اول ما خلص سعيد كلامه رفعت راسها فوق وتمت تطالع سعيد وهي مبتسمه ..
سعيد((مبتسم)): افهم من هذا انج موافقه
عفراء: امممم هي بس ........
سعيد: بس شو...؟؟؟ .. ارجوج يا عفراء قولي الي بخاطرج ولا تستحين اعتبري انج قاعده بروحج وترمسين عمرج وقوليلي شو الي حسيتي فيه ..
عفراء: امممم ماادري شو اقولك .. صدقني وانت يالس ترمس حسيت انك غير عن كل الشباب بس انا الي يبيني ايي يتقدم لي رسمي من بيت اهلي
سعيد: امممم خليني اقولج شي عفراء .. نحن الحين عايشين في زمن ماينفع فيه الكلام الي يالسه اتقولينه .. اوكي انا ييت وتقدمت لج ووافقتي وتزوجنا هل تعتقدين انه ممكن ننجح في حياتنا ونحن بالاساس مب فاهمين بعض!!!!!.. يمكن انتي بعد ماقعدتي وياي اتشوفين اني انا ماانفعلج خلااص انتي بطريج وانا بطريج لانه مافي شي رسمي بينا اما اذا ارتبطنا رسمي ونحن مب فاهمين بعض خلااص ماتقدرين تنفصلين ويقولون عنج مطلقه فالاحسن اننا نفهم بعضنا اول شي والزواج لاحقين علييه ..
عفراء: اممم ماادري ليش حسيت اني اقتنعت بكلامك بسرعه بس عطني فرصه افكر
سعيد: خذي راحتج حبيبيتي ..اووو انا آسف .. اسمحيلي والله ماقدرت ايود عمري وانا اشوف هالملاك جدامي
عفراء ((مستحيه)): …………….
سعيد: عالعموم انتي خذي راحتج ولا تستعيلين وهذا كرتي اي وقت حسيتي انج خلااص اقتنعتي في كلامي اتصلي بي
عفراء: خلااص اوكي ..
سيف ... اي شي حاول حمد يخفف عنه بس ما قدر .. كان طول الدرب ينكت ويضحك بس مايحصل جواب من سيف غير الابتسامه .. بس الشي الوحيد الي قدر عليه حمد انه يقنعه يداوم باجر والحمدالله نجح في هالشي والحين نزله حمد ووداه لين باب حجرته وراح عنه ومن وصل هالحجره والي يعتقد انه المكان الوحيد الي يقدر ياخذ راحته فيه ويقعد مع نفسه .. تدش عليه اخته عايشه ..
عايشه: هلا والله
سيف: اهلين
عايشه: يالله يا اخوي العزيز العشا زاهب
سيف: ماابغي شي ولا مشتهي آكل شي
عايشه: حرام عليك يا اخوي الي تسويه بنفسك مب زين جييه وامي قايله اذا سيف ماكل هي بعد مابتاكل يالله فديتك على شان خاطر الوالده
سيف: اوووه انتوا شو تبون مني قلتلكم ماابغي .. ماابغي
ام سيف: حتى لو انا ييتك بنفسي وقلتلك تعال كل معانا
سيف: ...............
عايشه: يالله يا سيف علشان خاطر هالييه
سيف: خلااص انتو سيروا وانا بلحقكم
ويسيرون عايشه وام سيف ويقعدون يتريون سيف
عايشه: اميي مايستوي انخليه بهالحاله لا راضي ياكل مثل الناس وكله معصب وحالته حاله
ام سيف: شو اسوي يا بنيتي انا مابيدي شي اسويه ان شاءالله باجر روحه بيعقل وبيعرف انه هالشي الي يسويه غلط
عايشه: هي بس اذا انتي مابيدج شي تسوينه انا بيدي يا امي
ام سيف: وانتي شو بيدج يا بنيتي اتسوينه؟؟
عايشه: بسير اكلم عفراء مره ثانيه
ام سيف: انتي شو تقولين عويييش .. نسيتي الي سوتها فينا
عايشه: يمكن اذا عرفت الحاله الي قاعد يمر فيها سيف بسببها توافق وانا باخذ وياي ميثه اتحيدين يوم قالتلنا انها ربيعتها من زمان وعفراء شرات اختها وتعزها وايد
ام سيف: متى امي مااتذكر
عايشه: اشفيج امي مسرع مانسيتي .. هاك اليوم يوم سرنا خطبناها ولحقتنا برع حليلها اتخيلي هي الي كانت يايه تعتذر عن ربيعتها وعطتني رقم تلفونها بعد
ام سيف: هي والله اشهد انها بنت مافي شراتها الله يسعدها يا بنيتي .. خلااص سوي الي تبينه يا عويش وبنشوف شو بيصير
عايشه: افا عليج امي ان شاء الله بنخليها توافق ..
ويدش عليهم سيف ..
ام سيف: هلا امي تعال فديتك اقعد حذالي
سيف: ان شاء الله امي
عايشه: ياااااالله اشرايج تلقمينه بعد
ام سيف: هي فديته بلقمه ليش لا بعده في عيني صغير
عايشه: وانا؟؟؟
سيف: وانتي دومج جي حاشرتنا كلي وانتي ساكته خلااص
ام سيف: هي والله وهو صاج ولدي
عايشه: ان شاءالله امي بسكت .. وهي تقول في خاطرها ان شاء الله يا عفراء توافقين وتنقذين اخوي من الي هو فييه ..
.............................. ......

كانت قاعده في حجرتها بعد ماخلصت من التحقيق الي كان من ام احمد تحت تسألها مع امنوا كانت سايره ووين وليش قالتلها انها وحده طيبه وحبوبه وتعرفت عليها من الانترنت وانها ارتاحت لها وايد طبعا ام احمد على نياتها صدقتها على طول ومستحيل اتشك بلحظه انه عفراء ممكن انها تخون ثقة اهلها فيها وواثقه من تربيتها لعيالها ونفس الشي من صوب بو احمد ..
قاعده على سريرها وكانت اتحس انها عايشه في حلم وماتبغي تصحى منه وكلامه لين الحين في بالها ((انا وايد بنات حاولوا يتقربون مني في الشركه الي انا صاحبها بس حسيت انهم طمعانين فيني وما دشوا قلبي ابدا الا يوم شفتج انتي في لحظه حسيت اني صحيت من الكابوس الي كنت فيه والحياه اصبحت حلوه وفيها امل اني احلم احلام حلوه)) .. ((خذي راحتج حبيبيتي .. اووو انا آسف .. اسمحيلي والله ماقدرت ايود عمري وانا اشوف هالملاك جدامي)) .. لاول مره حست انها مستانسه من الخاطر فكرت تاخذ التلفون وتتصل له حسب ماقالتلها موزه بس هي قالت انها ماتستعيل وانها تصبر لين باجر ..
اليوم الثاني وبعد ماردت عايشه من الكليه كان العصر .. طبعا اتصلت في ميثه واتفقت معاها على كل شي انه يروحون اليوم ويزورون عفراء .. واتفقت عايشه مع ميثه انها من توصل عند باب بيت بو احمد تتصل في عايشه عشان تطلع ويدخلون مع بعض..عايشه كانت متزهبه ويالسه في الصاله تتريا ميثه تدقلها ..
ام سيف: هااا امي متى بتسيرين
عايشه: اتريا ميثه اتدق علي اميي ..عاد تعرفيني استحي ادخل بروحي ..الا سيف وينه
ام سيف: كالعاده رد من الدوام ويلس في حجرته حتى مااتغدى يا بنتي ان شاء الله عاد يكون ماكل شي في الدوام
عايشه: ان شاء الله امي توافق عفراء قولي ان شاء الله
ام سيف: ان شاااااااااااء الله يا بنتي الله يسمع منج
يرن تلفون عايشه ...
عايشه: هلا ميثه
ميثه: اهلين عواش .. يالله طلعي
عايشه: ان شاء الله
وطلعت عايشه وشافت ميثه .. سلمت عليها ودشوا البيت مع بعض دقوا الجرس البشكاره يتهم ودخلتهم الصاله ..ويشوفون ام احمد قاعده في الصاله ..
ميثه + عايشه: السلام عليكم
ام احمد: وعليكم السلاام هلا والله هلا بنيات اشحالكم؟؟
ميثه + عايشه: الحمدالله بخير
ميثه: اشحالج انتي خالوه؟؟
ام احمد: تماام الحمدالله اتفضلوا
ميثه: خالوه نحن يايين نشوف عفراء امم بس لاتقولينلها انه نحن نبا نسويلها مفاجأه
ام احمد: ههههه انتن يالبنات مشاكل ياحبكن حق المفاجآت .. ان شاء الله الحين بسير
وتسير ام احمد وتزقر لهم عفراء
عايشه: ميثوو انا وايد خايفه ..
ميثه: اشفيج انتي لاتخافين وانا كله برمس
تنزل لهم عفراء من تحت ..

يا ترى شو بيكون ردة فعل عفراء يوم بتشوفهم..

شكرا ليكى

	#2
lola lola	رد: هذا ما جنتة نفسى {الجزء السابع} هذا ما جنتة نفسى {الجزء السابع} شكرا ليكى