ازياء, فساتين سهرة

العودة   ازياء - فساتين سهرة و مكياج و طبخ > أقسام عامة > قصص و روايات
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
قصص و روايات قصة الحب واقعية يوجد هنا قصة الحب واقعية روايات Novels و تحميل روايات و قصص روايات حب سعودية روايات احلام و عبير رومانسية عربية روايات عالمية كاملة للتحميل روايات رومانسيه احلام و عبير و قصص مضحكه قصص حزينه قصص رومانسيه حكايات عربية و قصص الانبياء افضل قصص مفيدة قصص سعودية خليجية


 
قديم 06-08-2011, 09:59 PM   #1

عاشقة الماضي

:: كاتبة محترفة ::

الملف الشخصي
رقم العضوية: 97445
تاريخ التسجيـل: Jan 2010
مجموع المشاركات: 1,897 
رصيد النقاط : 0

صورة قلبين قصة الحب واقعية


قصة الحب واقعية

انقل اليكم قصة واقعيه تحمل في طياتها فتاه من الامارات ... وقعت في طامة الفتيات ... الا وهي الحب الزائف



اترك لكم القصة كما وردتني بالعاميه الدارجه بالامارات ...



اسمي (............) عمري 19 سنه وهاي القصة كانت بدايتها يوم كان عمري 18 سنه أنا بنت من الإمارات العربية المتحدة من مدينة الفجيرة .



عندي من الاخوة 2 ومن الأخوات 1 يعني إحنا 4 إخوان . أبوي وأمي مطلقين من إحنا صغار من أول ما انولدت بالتحديد أبوي خذ اخوي وأختي .. وأمي خذتني أنا وخذت اخوي جاسم وما شفنا بعض أبدا لأني كنت صغيره وايد .(هذي القصة والله والله والله حقيقية).



أمي رجعت عند أهلها في الشارقة وأبوي ظل في الفجيرة بعدها انتقل ليعيش في أبوظبي .....وأنا سرت ادرس في أبوظبي في جامعة زايد .. ما درست في جامعة زايد اللي في دبي لأن بغيت أغير جو .. وسكنت عند خالتي في أبوظبي وأمي ما كان عندها مانع لأنها كانت شوي فري .



بعد ما دخلت الجامعة لقيت وحده اسمها مشابه لاسمي الاسم الأب واسم الجد واسم العايله أنا انصعقت !! (يعني هي أختي!!) بس أنا ما قلتلها لأنها ما عرفت ولا لاحظت .



وكانت اكبر مني بسنه وحده ومرت ثلاثة شهور وأنا ما خبريتها إن هي أختي .. وكل مره أشوفها يالسه بروحها في الكافتيريا وكل مره أطوف من جدامها وابتسم لها تميت على هذي الحالة أسبوعين كل ما أطوف من جدامها ابتسم لها . بس يوم من الأيام وأنا طايفه من جدامها ابتسم لها زقرتني !



هي : لو سمحتي
أنا : نعم خير (وأنا مبتسمة)
هي: ممكن اسألج أنتي ليش دوم تبتسمي لي؟
أنا: لا والله ما في شي .. بس أنا من النوع اللي وايد ابتسم و وايد أجامل.
هي: هي هي هي هي ..جان تبين قعدي
أنا: لا عادي والله .. أنا مستعيله شوي علي امتحان وما ذاكرت
هي: قعدي أنا بدرسج
أنا: لا لا ما أبا اعطلج ويايه
هي لا والله عادي بسي لالالالالالالالاه
أنا: اوكيك



تمينا نتكلم.. وتعرفت عليها وتعرفت علي بس أنا غيرت اسمي .. غيرت اسم العايله واسم يدي وأبوي يعني هي ما عرفتني.
عقب تمت امبينا اتصالات شوي شوي ...... وفي يوم من الأيام كنا واقفين عند باب الجامعة نتريا السواقين فمرت سياره مخفي كامل استيشن رقم ابوظبي احمر ... لون الاستيشن اسود .....فأنا صديت الصوب الثاني على أساس إني ما اجابلهم بس هي ..تمت تطالعني عقب سارت اتجاه السيارة انفتحت الدريشه بس أنا ما رمت أشوف منو داخل السيارة , تمت ترمس شوي عقب اطالعتني و ابتسمت .. بعدين ردت..! أنا تميت امبطله حلجي . قلت منو هايل جان اتقولي والله هذا ولد عمي ياي يمر علي يردني البيت فأنا قلتله بيلس اتريا ربيعتي لين ما تروح .. عقب جان اتقولي أنا مب صايعه (وهي مبتسمة) أنا صديقتها .



بعد أسبوعين اتعلقنا في بعض وايد وايد .. وعزمتني على عرس عمتها .. أنا سألت أمي إذا اقدر أسير العرس فقالت لي اوكي .. (بس محد كان يعرف إن إحنا خوات ) فمرت علي وسرنا بيتهم أول .



عقب قالت بنسير الفندق واحنا نازلين عند الفندق إلا أشوف نفس السيارة اللي شفتها عند الجامعة طنشت ودخلنا جان يطلعون 2 شباب جدامنا أنا ما قدرت أميز أي واحد فيهم اخوي إلا يوم سألتها لما رجعنا وقالت لي اللي لابس كاب هو ولد عمي ولا متعصم هو اخوي وما شفتهم من بعدها .



بعد ثلاث أسابيع من العرس سرت بيتهم مره ثانيه وهناك شفت اخوي حمد و ولد عمي حمدان . سلمت عليهم من بعيد بس ما كنت ادري انهم كانو موجودين في البيت .وما بيظهرون .!



كان عندي بروجكت وهي قالت بتساعدني قعدنا في حجرتها وتمينا نسولف ..عن ولد عمها وأخوها وأبوها ..أنا من السوالف اللي سمعتها عن ولد عمي حمدان ...حبيته !!...بس ما قلت لها .. وتميت اكثر الزيارات اللي بينا وفي يوم من الأيام قالت لي إن ولد عمها بدا يحبني فرحت وايد وقلت لها إني أنا بعد بديت احبه .



في يوم كان الدريول ياي ياخذني من بيتهم سوى حادث وكان الوقت متأخر فطلبت منهم إن يوصلوني البيت فهي قالت حق ولد عمها إن يوصلني وركبت ويانا السيارة ..في السيارة تم يطالعني من المنظرة وأنا ويهي متكسر وقافطه وهي كانت تعرف وتطالعه وتبتسم وفي نص الدرب وقفت عند بيت وقلت أنا شوي وبرد وسكرت الباب وتمينا أنا وهو في السيارة بروحنا تمينا ساكتين فتره وفجأة جان يقول : شو أخبار الدراسة ؟ أنا سكت ويهي محمر وعقب وقلت الحمد الله امشين .



حمدان: زين زين سمعت إنها وايد صعبه والبنات يشتكون وايد منها ؟
أنا : والله .. لكل مجتهد نصيب (صح) بس إحنا نجتهد ونكرف وما نحصل شي .



حمدان : هههههههههه حليلكم والله .



مرت لحظة صمت



حمدان: ها شو بعد ؟
أنا : والله ولا شي .
حمدان : احبج
أنا : !!!!!!!!!!!!!!!!!!!! تميت صاخه وقافطه والله ما اعرف كيف اشرح موقفي !!!! أنا بعد كنت احبه .. بس ما قدرت أقول انبلع لساني .



فجأة حرك السيارة وطلع على الشارع الرئيسي !!!
أنا : وين ساير ؟؟؟؟!!!!!!!!!؟؟!؟!؟
حمدان: بتعرفين بعدين حبيبتي
أنا : لو سمحت اتأدب وخلك ريال وعن هاي الرمسه !
حمدان: حرام عليج حبيبي والله احبج وايد.. أنتي ليش اتعذبيني
أنا : ممكن توقف لو سمحت !! بنتريا بنت عمك (..........) !!!
حمدان: هههههههههههههههههههههههههههه
أنا : شو فيك ؟؟؟؟؟ ليش تضحك ما في شي يضحك !!!! وقف الحين والله ترا بتصللها الحين !! وفي عمتي وفي أمي !
حمدان: ههههههههههههه ترا بنت عمي ما بترجع !! اوكي أنا وهي متفقين .. شو انسوي .
أنا !!!!! متفقين !!
حمدان: هي ..والله أنا آسف بس أنا احبج وبغيت ارمسج على انفراد.
أنا: والله ترا بتصل..(خذيت الموبايل على أساس بتصل اكتشفت إن موبايلي مافيه رصيد
حمدان:ها اشوفج ما اتصلتي ههههههههههههه
أنا: جب .. الله يخليك لا تسوي فيني جذيه الله يخليك !!
حمدان: زين زين لا تصيحين عاد.
أنا: بترد؟!!!
حمدان: هي ما يهون علي اشوفج تصيحين



بس أنا اكتشفت انه مارد البيت سار مكان فيه خناخيش .. ما ادري أي فريج وقف السيارة ..قفل البيبان ..!!! أنا تميت ساكته !!!!!!! ما رمت أقول شي بس كنت أصيح .



حمدان: والله ما بسوي فيج شي .. بس بغيت اقولج أنا آسف .. و الله يخليج لا تقولين حق اهلج اللي استوى الله يخليج يلس



على السيت الي ورى وقام يسوي حركات انا ما عرفت شو اسوي يتني قشعريره ! تميت أصيح .. قلت إذا صفعته بيسوي



شي ألعن احسلي اتم ساكته ,, عقب عطاني رقمه وقالي: اتصليلي والله حبيتج من أول ماشفتج!!



وشغل السيارة و وصلني لين البيت .. واعتذر مره ثانيه !!.... بس طول الدرب تميت ساكته !!



في اليوم الثاني لما رجعت الجامعة قلت حق أختي كيف تودريني وتسيرين؟؟ كيف تسمحين حق عمرج انج تتفقين ويا ولد عمج علي؟؟
أختي تجاوب وهي تصيح ) والله انه مب متفقين ولا شي .ليش شو سوى فيج ؟؟؟؟؟!!!!
أنا : لا لا ماسوى شي والله .....بس وصلني لاتخافين .
أختي: والله إن سمعت انه سوابج شي والله لايلوم إلا نفسه ..أنا طلعت برع ماشفتكم مالقيت السيارة ما عرفت شو اسوي !! عقب قالي إن أنتي سلمتي علي وانج كنتي مستعيله لانج وايد متاخره وانج اتصلتيلي وأنا مارديت عليج .
أنا : لا ماسوى شي لاتخافين عقب نسينا السالفه .



وبعد ثلاث ايام رجعت البيت وماكان في حد .. واعوذ بالله من الشيطان اللي خلاني امسك الموبايل واتصل على رقم حمدان
رد حمدان : الو
أنا : تميت ساكته
حمدان : الو حول ..
أنا : بصوت خافت الو
حمدان : منو ؟
أنا : ماعرفيتني ؟
حمدان: لا
أنا : خلاص اوكي احسن.
حمدان: لحظه لحظه .. عرفتج منو
أنا : ساكته
حمدان: اخبارج؟
انا : تمام .. اخبارك؟
حمدان: بعد تسالين اكيد اوكي .....عقب ماسمعت صوتج
أنا: ساكته من القفطه
حمدان: شو ياج سكتي؟
أنا: شو أقول ؟
حمدان: أي شي !! اوكي شو أخبار الجامعة ؟
تمينا اندق سوالف لمدة ربع ساعه عقب سكرت لان قوم خالوه وصلو .



تمينا على التلفون لمدة 5 شهور ..



مرات نتشاوف كل ما أسير بيت أختي (بنت عمه) ومره طلعت وياه بدون مايدرون قوم خالوه يتحرون إني



طالعه ويا ربيعتي ماسوينا شي خطير وايد ... بس اعوذ بالله من الشيطان الرجيم بس ندمت على هذا الشي بشكل.



بس كنت احبه موت ادري إن هذا مب عذر !!



يسوى حياتي هذا الانسان !! ما اقدر استغنى عنه هذا حياتي ودنيتي هذا كل شي في حياتي وما اقدر استغنى عنه حتى وأنا وياه اشتاقله .. كل يوم لازم اكلمه .. قال انه بيخطبني وسواها اتقدم لي وخطبني ...



في الخطبه استوى اللي ما توقعته وما اصدق



بس اللي عرفته إن خالي لما ساله عن اسمه بالكامل طلع اسمه مثل اسمي يعني هذا اخوي



أختي كذبت علي وقالت انه ولد عمها .



ليش يا دنيا ليش؟



انا كنت اعاشر اخوي !!!!!!!!! أنا كنت اكلم اخوي على التلفون واقوله احبك مليون مره



اخوي يخطبني !!!!!!!!!!!!!!!!!!



ما اعرف الوم منو!!!!!!
الوم اهلي على اساس انهم فرقونا!!



الوم أمي لأنها خلتني أسير !!



الوم أختي لأنها كذبت علي !!



الوم البطاقه المدفوع لان ما كان عندي رصيد!!



الوم نفسي !!



الومه هو !!



شو اسوي ؟؟؟؟؟!!!!!!



والله العظيم كل اللي اقولكم اياه صدق .. بس خلوني اكمل قصتي



بعد ماعرف أبوي إن ياي يخطب بنته لولده وأختي عرفت إن أنا اختها !! قرو قوم أمي و أبوي انهم يرجعون لبعض !! بعد شو ؟؟!!!!!!!!!!!



نرجع نسكن في بيت واحد !! مستحيل !!!!!!



والله ياجماعه انتو مب حاسين فيني أنا أبا اموت !!!!



هو اللحين يكرهني لان ماقلت لاختي اسمي الصدقي وأنا سرت اكره أختي لأنها كذبت علي !!



وبعد يبونا نسكن ويا بعض عقب مادمر مستقبلي !!!



عقب ماطلعت من الجامعة !!]عقب ما كل حد عرف السالفه ]

 

أدوات الموضوع



الساعة الآن توقيت السعودية الرياض و الدمام و القصيم و جدة 08:23 PM.

 

Powered by vBulletin® Copyright ©2000 - 2017,
vBulletin Optimisation provided by vB Optimise (Pro) - vBulletin Mods & Addons Copyright © 2017 DragonByte Technologies Ltd. يمنع انتهاك أي حقوق فكرية علماً أن جميع مايكتب هنا يمثل كاتبه وباسماء مستعارة ولمراسلة الإدارة يمكنكم استخدام الإتصال بنا
Search Engine Optimization by vBSEO 3.6.0