 |
  |
|
|
|
|
|||||||
| قصص و روايات تكملة رواية قلوب تنزف عشق يوجد هنا تكملة رواية قلوب تنزف عشق روايات Novels و تحميل روايات و قصص روايات حب سعودية روايات احلام و عبير رومانسية عربية روايات عالمية كاملة للتحميل روايات رومانسيه احلام و عبير و قصص مضحكه قصص حزينه قصص رومانسيه حكايات عربية و قصص الانبياء افضل قصص مفيدة قصص سعودية خليجية |
|
|
|
#51 |
|
|
رد: تكملة رواية قلوب تنزف عشق
في بيت أم فارس/
وصل فارس..و شاف أمه و أبوه و أسماء في الصاله..جلس عندهم و هو مو عارف كيف يقولهم.. أم فارس بخوف: خير يا فارس وش فيك..سيف فيه شي؟ فارس: لا يمه تطمني أسماء: شكلك يقول ان عندك شي بتقوله فارس: زوجة سيف كلهم طالعوه بصدمه..و كأنها توها تجي على بالهم.. أم فارس: وش فيها؟ فارس: سيف كان ساكن معها في شقه..و مثل ما تعرفون هي ما عندها أي أحد..و لين يقوم سيف بالسلامه مو معقول بتجلس لحالها(سكتوا و كمل) ياسمين راحت لها و اخذتها لبيت أمي حصه..هناك تاخذ راحتها لأن ما فيه رجال في البيت..بس أنا حبيت انكم تعرفون بهالشي..و المفروض تروحون تتطمنون عليها لأنها يوم شافت حالة سيف طاحت علينا..و كانت تعبانه بالحيل بس ياسمين قالت انهم بيهتمون فيها في البيت احسن من المستشفى عشان ما تكون لحالها سكتوا فتره..كل واحد يفكر فيها.. أبوفارس: بكره روحوا تطمنوا عليها..و أي شي تحتاجه نجيبه لها..مو حنا اللي بنقصر بزوجة سيف أم فارس: ان شاء الله في بيت أم العنود/ وصلت ياسمين و نجود..أول ما دخلت الصاله..شافتهم جالسين.. أم العنود: ياسمين وين كنــ... قطعت كلامها و هي تشوف البنت اللي معها..و اللي التعب و الخوف كان باين عليها..و كأنها بأي لحظه ممكن تموت.. ياسمين: لحظه يمه اللحين ارجع لك و طلعت فوق مع نجود..و نومتها على سريرها..و خلتها ترتاح..و نجود نامت على طول لأنها من اليوم كانت تمشي و كأنها مو حاسه بنفسها.. نزلت ياسمين تحت..و راحت لهم.. أم العنود: هاذي زوجة سيف؟؟ ياسمين: ايه يمه أم العنود بقهر: ليه جايبتها؟ ياسمين: يمه جبتها لأني واثقه من قلبك الطيب..شوفيها على صغرها يتيمه مثلي و مثل جوري..حنا عندنا أهلنا..لكن هي مالها الا سيف و أهله..تبينا نتخلى عنها أم العنود تتنهد: ......وش فيها؟ شكلها تعبانه؟ ياسمين ابتسمت: كنت متأكده انها ماراح تهون عليك..تعبانه شوي شكلها ما نامت و لا أكلت شي من يوم راح عنها سيف أم العنود: الله يقومه بالسلامه جوري فرحت: الله يخليك لنا يمه ياسمين: و فيه شي ما أحد يعرفه الا أنا أم العنود و جوري: وشو؟؟ ياسمين: الدكتور قال انها حامل..عشان كذا ما تحملت التعب أم العنود فرحت و نست كل شي: والله! الله يقومك بالسلامه يا سيف و تفرح بولدك ان شاء الله جوري: حتى هي ما تعرف؟ ياسمين: لا لأن الدكتور يوم يكشف عليها ما قالت له شي *من بكره* في بيت أم العنود/ صحت نجود و عيونها تدور بالغرفه اللي هي فيها..للحظات ما قدرت تستوعب هي وين..تذكرت اللي صار..تذكرت شكل سيف بين الأجهزه..نزلت دموعها..و الخوف ملأ قلبها عليه.. دخلت عليها ياسمين..و كسرت خاطرها و هي تشوفها بهالحال..جلست جنبها.. ياسمين: نجود ما يصير اللي تسوينه بنفسك..لازم تهدين و ترتاحين..سيف ما فيه الا الخير..و بنتطمن عليه قريب ان شاء الله نجود تصيح: مالي غيره..هو كل حياتي..ما أقدر اشوفه بهالحال؟؟ ياسمين: الله يطمنك عليه..و يجمعكم مع بعض..يله عاد امسحي دموعك اللحين بيجيبون لك الفطور نجود: مابي شي..أبي اشوفه ياسمين: ماراح تشوفينه اذا ما أكلتي و تحسنت صحتك..أنتي مو قادره تمشين خطوتين على بعض نجود: والله مالي نفس..مو قادره آكل شي ياسمين: لازم تآكلين..أنتي مو مسئوله عن نفسك و بس..أنتي اللحين مسئوله عن اللي في بطنك طالعتها نجود بصدمه..و ياسمين اضطرت تقول هالشي اللحين..عشان تشجعها تأكل و تهتم بصحتها.. ياسمين: الدكتور قال انك حامل سكتت نجود..ما تدري تفرح أو تزعل..كل اللي كان يهمها و تتمناه في هاللحظه..ان سيف يدري بهالشي..و أول ما تذكرته..رجع لها خوفها..خافت يتركها..هي و اللي في بطنها..ما راح تستحمل هالشي..و صارت تصيح أكثر..لكن ياسمين جلست تهديها.. و دخلت عندهم أم العنود..و طالعتها نجود بترقب..كانت دائما كل ما تتخيل انها ممكن تشوفها تخاف..لأنها تتخيل ردة فعلها بعد اللي صار لياسمين بسببها..لكنها لقتها غير كل توقعاتها..كانت طيبه معها..و خايفه عليها مثل أمها و أكثر.. *من بكره* في المستشفى/ صحت أسيل و شافت نادر جالس جنبها..ابتسمت.. أسيل: كل ما صحيت اشوفك..أنت ما تروح للبيت؟ نادر: مليتي مني أسيل: لا بس أبيك ترتاح نادر: أنا اذا شفتك ارتاح..عازمك على الفطور أسيل فرحت: والله..الحمدلله مليت من أكل المستشفى نادر: يعني فرحتي بالفطور أكثر مني!! أسيل تضحك: وش دعوه بتغار من الفطور! نادر: ايه أسيل: خلاص و لا يهمك أنت اغلى منه بشوي نادر يبتسم: زين اشوف بكره اذا صحيتي و ما شفتيني وش بتسوين؟ أسيل: ليه؟ ماراح تجي؟؟! نادر: يهمك؟ أسيل: نادر قول ليه ماراح تجي؟ نادر: لا تخافين كل يوم ماراح تفتحين عيونك الا و أنا قدامك أسيل بدلع: أخاف اتعود نادر: تعودي أسيل: و اذا طلعت من المستشفى؟ نادر: نتزوج أسيل انحرجت: ...... جلس جنبها نادر.. و صار يوكلها بيده..لأن يدها اليمين هي المكسوره..و كانوا مجبرينها..و هي كانت منحرجه منه..وهو يضحك عليها..لكنها فجأه كشرت..و تجمعت الدموع في عيونها.. نادر: أسيل وش فيك؟ أسيل: خايفه على سيف نادر يتنهد: الله يقومه بالسلامه أسيل: يا رب..ما اتحمل يصير له شي..و أنا السبب فيه نادر: أسيل وش هالكلام..اللي صار قدر أنت مالك دخل فيه *بعد أسبوعين* طلعت أسيل و فيصل من المستشفى..تحسنت حالتهم..لكن الكل كانت فرحته فيهم ناقصه..الكل خايف على سيف..اللي للحين ما فاق.. سمحوا لهم بزيارته..شخص واحد بس يشوفه كل مره..لكنه كان مو حاس بأي أحد فيهم.. أما نجود..فكانت كل يوم تزورها أم فارس و أسماء..و أبو فارس..كانوا يعاملونها مثل بنتهم و أكثر..كل هالشي كانت دائما تتمنى لو يصير..لكنه اللحين..ماله أي معنى عندها..و سيف مو موجود جنبها..كل الأمان اللي بيحسسونها فيه..كل الحب..و الاهتمام..ما كان له أي اهميه عندها.. كان كل تفكيرها..و احساسها..و روحها..مع سيف و جاء اليوم اللي تحسنت فيه نجود..و زارته..جمعت كل قوتها عشان تشوفه..دخلت عليه..و شافته بنفس حالته ما تغيرت..تقدمت منه..لين صارت جنبه..نزلن دموعها و هي تشوف ملامحه..الكدمات مغطيه نصها..و جسمه بين الأجهزه و الأسلاك..و نصه مغطى بالشاش.. حست ان قلبها بيوقف..حست انه بعيد عنها..مع انه هنا جنبها..بس اللي كان ممدد قدامها جسد بدون روح.. مدت يدها المرتجفه..تلمس يده بخوف..ما كانت قادره حتى تمسكها..خافت تأذيه.. نجود تصيح و برجاء: سيف تسمعني؟..سيف أنا نجود...لا تتركني لحالي يا سيف..أنا أموت لو رحت عني..ما أعرف أعيش بدونك..و لمين بأعيش؟....سيف أنا حامل..ولدك بيجي للدنيا لا تخليه..لا تتركنا..(بدت تصيح)سيف أنت وعدتني..و عدتني كانت واقفه تصيح و تترجاه و كأنه يسمعها..تمنت انه يسمعها..و هي متأكده انه لو سمعها..بيصحى..و ماراح يخليها.. طولت عنده..و دخلت الممرضه و طلعتها..و طلعت و قلبها و روحها عنده.. كل أيامها..و أفكارها..و احساسها تجمدن..كل شي واقف عنده..تنتظر اللحظه اللي بيصحى فيها.. لكن لو ما صحى؟؟؟؟؟ |
|
|
#52 |
|
|
رد: تكملة رواية قلوب تنزف عشق
@،،الـنـزف الثـــانــي و الـثــلاثـــون-ما قبل الأخيــر،،@
في بيت أم عمر=الصبح/ صحى عمر من النوم..شاف ساعته عشر الصبح..استغرب انه نام يوم كامل..أمس الظهر جاء من المستشفى..بعد ما قال لهم أبوفارس إن جلستهم مالها داعي..و انها ماراح تفيد سيف بشي..بس تتعبهم و تعطلهم عن أشغالهم..طولت غيبوبة سيف و الكل خايف انه ما يصحى منها..قام و صلى الأوقات اللي فاتته..و نزل بيشوف أهله..لكنه سمع صوت حلا تتكلم في غرفتها..دخل عندها.. حلا: صح النوم عمر: صح بدنك..مين تكلمين على هالصبح؟ حلا: مساهير أخذ عمر منها الجوال..و جلس على الأريكه اللي بغرفتها.. عمر يطالعها: روحي سوي لي فطور طالعته حلا بإعتراض..و راحت عن الغرفه و هي تتحلطم.. عمر يكلم بعصبيه: أنتي وينك؟! مساهير: صباح الخير عمر: صباح النور..وينك؟ مساهير: أنا موجوده عمر: ليه ما كلمتيني كل هالوقت؟ مساهير: أنت ليه ما كلمت؟ عمر: يا سلام يعني اذا ما دقيت أنا ما تسألين عني؟ مساهير: أنا اعرف كل أخبارك من حلا عمر: و ليه تسألين حلا ما تسأليني أنا؟! مساهير: أدري انك في المستشفى مع ولد خالتك..و ما حبيت ازعجك عمر: أنتي ما تزعجيني بالعكس كنت اتمنى اسمع صوتك مساهير: ليه ما دقيت أجل؟ عمر: كان كل تفكيري عند سيف..و للحين خايف انه ما يصحى مساهير: لا تقول كذا تفائل بالخير..و ان شاء الله يقوم بالسلامه عمر: يا رب مساهير: صوتك تعبان؟ عمر: لا بس عشان توي صاحي من النوم..وش أخبار تحضيراتك للزواج؟ مساهير: يعني عمر: كيف يعني؟ مساهير: مادري بس ما تبي نأجله لين تتطمن على ولد خالتك؟ عمر: الزواج توه باقي عليه شهرين..الى ذاك الوقت ان شاء الله بيكون سيف تعافى مساهير: ان شاء الله..يله روح افطر عمر: والله طرده! مساهير تضحك: لا والله مو قصدي عمر: زين بأسكر اللحين..و اشوف متى بتشتاقين لي و تدقين سكر منها و نزل تحت..و جلس يفطر مع حلا.. في بيت أم فارس/ كان فارس و نادر في المكتب..يخلصون بعض الأوراق في شغل بينهم..لكن نادر كان يتكلم..و فارس سرحان..خايف على سيف..و في نفس الوقت يفكر بجوري..(أهلنا رجعوا مثل أول..لكن اللحين ما أقدر اخطبها لين نتطمن على سيف..مادري ليه كل ما أحاول املكك تضيعين مني..دائم نضيع بعض..يا منك يا مني..أو من الظروف..يا خوفي مو مكتوب لنا نتجمع مع بعض) نادر: فااارس فارس ينتبه: نعم نادر: وينك مو معي؟ فارس يتنهد: سرحت شوي نادر: الله يطمننا عليه ان شاء الله..أنا رايح الشركه اللحين فارس: الله معك طلع نادر و ترك فارس يرجع لأفكاره.. وهو في الصاله شاف أسيل تنزل من الدرج..لابسه بجامه كحليه و رافعه شعرها ذيل حصان..وقف ينتظرها..و هي أول ما شافته فزت.. نادر يضحك: ليه خفتي؟ أسيل: من وين طلعت؟! نادر: كنت مع فارس في المكتب..بغيت اشوفك بس قالوا نايمه(يطالع يدها المجبسه)وش أخبار يدك؟ أسيل: الحمد لله نادر: متى بتروحين تكشفين عليها؟ أسيل: بعد أسبوع نادر: خلاص بأروح معك أسيل: زين..افطرت أو اعزمك على الفطور؟ نادر: ودي بس لازم اروح الشركه اللحين أسيل: امم بدينا في الشغل من اللحين..(وكملت بدلع)زين لو قلت لك لا تروح و افطر معي تروح؟ نادر ضحك عليها..و صار يتأملها..مد يده و بعد الخصله اللي طايحه من شعرها على وجهها.. نادر: فيه شغل متراكم أسيل تتنهد بحسره: خساره كنت أظن بأكون أهم من الشغل عندك نادر: لا تقارنين نفسك بالشغل أسيل: مين أغلى؟ نادر يضحك: قولي إنك فقدتيني..و تبين تجلسين معي أسيل: اممم بصراحه... نادر: ايه أسيل:اشتقت لك ابتسم لها نادر بحب.. نادر: بس أنا لازم اروح اللحين أسيل تبرطم: زين بس تذكر كانت عندك فرصه تجلس معي و ضيعتها وقف نادر يطالعها بنظرات إعجاب و حب..و كأنه يبي يشبع من شوفتها..رفع يدها و باسها..و راح بدون لا يقول أي كلمه..و هي وقفت تطالعه..تحب هدؤه..تحب نظرة الحب في عيونه..حتى لو كان ما يعبر عنها بالكلام.. في بيت أم العنود/ كانت نجود و ياسمين في الغرفه..ياسمين تتلكم و نجود مو يمها..من يوم جت عندهم و هي بس سرحانه و مو قادره تفكر بأي شي و لا مهتمه بأي شي..كل احساسها كان عنده..كل تفكيرها عنده..الخوف عليه مع الأيام يزيد..و شوقها يزيد..و صبرها و قوتها تقل.. دق جوال ياسمين..و طالعت الرقم..و تأففت..و كملت كلامها.. نجود تقاطعها: ماراح تردين؟ ياسمين: لا هذا ماجد ما عليك منه نجود: يمكن يبي شي ياسمين: أنا عارفه وش يبي..وش بيقول سرحت نجود مره ثانيه..و رجع جوال ياسمين يدق..و قفلته..و التفتت لنجود.. ياسمين: نجود توكلي على الله نجود: لا اله إلا الله..تعبت يا ياسمين أبي اشوفه..قلبي يتقطع عليه ياسمين: الله كريم سكتت نجود فتره: ياسمين أنا مو عارفه كيف اشكرك على كل اللي سويتيه لي..أنا عارفه اني ما أستاهل...جيت و خربت حياتك و .... ياسمين تقاطعها: لا تكملين يا نجود..صدقيني أنا اعتبرك مثل اختي و مو زعلانه من اللي صار..أنا طول عمري اعتبر سيف أخو لي و هم اللي كانوا يصرون على زواجي منه...و ما صار الا المكتوب نجود بتردد: أنا عارفه اني اتدخل بشي ما يخصني..بس أنا.. ياسمين: تدخلي و لا يهمك نجود بإحراج: سمعتك كيف تكلمين ماجد و دائما تتأففين منه..أنتي ما تحبينه؟ ياسمين: بصراحه لا نجود حست بالذنب: تزوجتيه بس عشان يرضون على سيف؟ ياسمين: ايه...بس ما أبيك تحسين بالذنب هو أو غيره أنا مو مهتمه و فيه سبب ثاني وافقت عشانه نجود: وشو؟ ياسمين: عشان بنت اخوه ورد قالت لها ياسمين عن ورد..و صاروا يتكلمون بكل شي..ياسمين تحاول تطلع نجود من حالة الكآبه اللي هي فيها..و نجود اعجبتها ياسمين..اعجبتها طيبتها معها..و أكثر شي صراحتها.. دخلت عليهم جوري.. جوري: ياسمين خالي ناصر تحت نزلت ياسمين تسلم عليه..و جلست جوري مع نجود يسولفون..لكنهم سمعوا صوت ياسمين العالي جاي من برى..دخلت عندهم و هي تضحك.. ياسمين: نجود..نجود سيف صحى طالعتها نجود بعيون مفتوحه على آخرها..و حست برجفه بكل جسمها..ودها تصدق اللي سمعته..تخاف تصدق.. ياسمين تطالعها بفرح: ايه يا نجود اللي سمعتيه صح سيف صحى ضحكت نجود..و بعدها صارت تصيح..ضمتها ياسمين..و صارت هي و جوري يصيحون معها.. |
|
|
#53 |
|
|
رد: تكملة رواية قلوب تنزف عشق
في المستشفى/
صحى سيف و شاف نفسه في غرفه عاديه..و شاف فارس عنده.. فارس: حمدالله على السلامه..خوفتنا عليك سيف: الله يسلمك و قبل يسأل عن حالته اللي مو عارف عنها أي شي..و لا عن جسمه اللي متغطي نصه بالشاش.. سيف بتعب: أسيل؟وش صار فيها؟ فارس: لا تخاف أسيل بخير و طلعت من المستشفى من أيام سيف بقلق: نجود تركتها لحالها فارس: نجود عندنا و أكيد اللحين تلقاها جايه لك بالطريق..هالبنت تحبك بالحيل يا سيف أول ما عرفت ما رضت تتحرك من المستشفى و سوت مشكله لين اقنعنا الدكتور يخليها تدخل تشوفك سيف يتنهد: مالها غيري يا فارس...أهلي كيف اخذوها عندهم فارس: ياسمين هي اللي جابتها..و هي اللحين جالسه في بيت أمي حصه..عشان هناك تاخذ راحتها سيف ارتاح على نجود..لكنه انحرج أكثر من ياسمين..و من أمه حصه.. فارس: وش فيك يا سيف..تحس بشي؟ سيف: لا..بس احس إني مو قادر اشوف خالي و أمي حصه..و منحرج من ياسمين بالحيل...مو هاين علي اللي سويته فيها..و شوف هي كيف قابلته فارس: خلاص يا سيف الكل نسى..حنا مهما صار بنتم أهل..و بعدين هذا ياسمين اللحين متزوجه من واحد يستاهلها....اللحين أنت تسأل عن الكل و لا سألت عن حالك!! سيف يطالع نفسه: صح أنا وش فيني؟ قال له فارس كل شي عن حالته..عملية نقل الكلى..و انسجة جسمه اللي تمزقت..حتى رجله كانت عظامها متكسره و سوو لها أكثر من عمليه.. سيف: الحمدلله على كل حال...بس مين اللي تبرع بالكليه؟ فارس: فيصل سيف انصدم: ......... فارس: أول ما قال لنا الدكتور..قال هو بيتبرع بدون أي تردد سيف سكت ما عرف وش يرد..و لا عرف وش يفكر فيه..فيصل كان أقرب له من فارس..كان أخوه..بس قهره عليه كبير..لكنه شاف الموت بعيونه..و هان في عينه كل شي..و فيصل ضحى بنفسه عشانه.. دخل خاله ناصر و سلم عليه..و أول ما شافه سيف راضي عليه حس انه نسى التعب كله..بعدين طلع هو و فارس..عشان تدخل تشوفه نجود.. سيف كانت عيونه معلقه في الباب..ينتظرها..و دخلت.. مشت بخطوات مرتجفه..تسبقها شهقاتها..لكنها هالمره تصيح من فرحتها فيه..وقفت عنده تطالعه بشوق..وهو يطالعها بحب..مدت يدها تلمس وجهه..تبي تصدق انها مو في حلم..مسك يدها و باسها.. سيف: نجود لا تصيحين ما أحب اشوفك بهالحال نجود تجلس جنبه و عيونها مركزه عليه: خفت عليك..خفت ما أشوفك..أنا مالي غيرك يا سيف..ما اتخيل نفسي من دونك..ما أعرف اعيش بدونك..أنت كل شي يا سيف..كل شي لي سيف يبتسم: لا تخافين يا نجود هذا أنا جنبك و ماراح اتركك أبدا..مين قال اني حتى أنا اعيش من دونك..أنتي حياتي كلها نجود تطالعه: سيف مو تعبان؟ فيه شي يوجعك؟ سيف: اللحين يوم شفتك بس ارتحت نجود تضحك بفرح: أهلك رضوا عليك يا سيف..دائما كنت اشوف غلاك بعيوني..لكن اللحين صرت اشوف غلاك بعيون كل الناس..الكل كان خايف عليك و يدعيلك..الكل يحبك يا سيف..حتى اني حسدت نفسي عليك حسيت اني ما أستاهلك سيف بعتب: نجود لا تقولين هالكلام..لا تقللين من قدر نفسك..أنتي ما فيه أحد مثلك و ما أحد يسواك عندي نجود: الله يخليك لي...سيف أبي اقولك شي سيف: قولي اللي تبين..لا تسكتين أنا أبي اسمع صوتك لبكره نجود: أنا حامل سيف طالعها بعدم تصديق..لكن هي ابتسمت له تأكد اللي سمعه..مسك يدينها بين يديه..بكل قوته..نفسه يضمها بقوه..لكنه ما كان قادر يرفع نفسه.. *بعد أيام * عرف الكل ان سيف صحى..و فرحوا له..و زاروه..إلا فيصل..مع انه طار من الفرح يوم عرف..بس ما كانت عنده الشجاعه انه يزوره..يدري إنه يكرهه..و لا يلومه..بس كانت يتمنى يشوفه و يتطمن عليه..(المفروض أروح..حتى لو طردني..مع إني أعرف ان سيف ماراح يسويها..بس يمكن ما يهتم لوجودي..و هذا اللي يقهرني أكثر..أنا و سيف نصير مثل الأغراب..عشان كذا ما كنت أحب اشوفه....لا بأشوفه و أهم شي اتطمن عليه) راح للمستشفى..وقف عند الغرفه..مو متجرأ يدخل..تردد كثير..لكنه في الأخير قرر يرجع..هو بنفسه خسر مكانه بينهم..ما يحق له اللحين يرجع يطلبه..ما يحق له يفرض نفسه عليهم.. راح لكنه حس بأحد يمسكه..التفت و شاف عمر اللي كان طالع من عند سيف.. عمر: ليه ما دخلت؟ فيصل: وش أخباره؟ عمر: ادخل و أنت تعرف فيصل: ما أقدر عمر: أجل ليه كنت جاي؟ فيصل: ......... عمر: فيصل أنت أدرى الناس بقلب سيف الطيب..انسوا اللي صار..و خلونا نرجع مثل أول...ادخل له هو اللحين لحاله وقف فيصل متردد..لكن عمر أصر عليه..و أخيرا دخل عنده.. لكنه ما قدر يتعدى الباب..شافه من بعيد..و التفت له سيف على باله انه عمر رجع..كان مبتسم لكن أول ما شاف إنه فيصل اختفت الإبتسامه من وجهه..تقدم فيصل خطوتين..لكن نظرة سيف ما شجعته.. فيصل بندم: أنا عارف إنك ما تبي تشوفني..بس حبيت اتطمن عليك و أقولك حمد الله على السلامه...و..و لا تظن عشاني تبرعت لك أنت ملزوم تكلمني بالعكس أنا مهما عطيتك بأظل مقصر فيك..و لك حق ما تسامحني..لأني أنا ماراح اسامح نفسي قال اللي كان يبي يقوله..و الندم ماليه..كان بيطلع.. سيف: فيصل التفت له فيصل: ..... سيف: أنا بعد ما تخيلت اني بأسامحك بيوم...ما أقول اني بأعذرك على اللي سويته..لكن..يوم فكرت أنا نفسي سويت غلط كبير بحق ناس احبهم بس كنت مجبور على هالشي..طلقت ياسمين عشان نجود...و كنت عارف انه بعد هالشي أكيد بتصير مشاكل بين أهلنا...لكني ما قدرت اسوي غير كذا..و بعد كل هذا ياسمين سامحتني و هي بنفسها اللي اهتمت بنجود و أنا هنا...كلنا اخطينا يا فيصل..و مالي حق ألومك..خاصه و إن أسيل لقت نفسها و راحتها مع نادر و تطمنت عليها...و حتى لو حاولت اتجاهلك فيه شي منك بيظل طول العمر فيني و بيذكرني فيك...خلنا نحاول ننسى اللي صار و نرجع مثل أول ما صدق فيصل اللي يسمعه..حس إن الدمع تجمع في عيونه..يدري انه خان ثقة سيف..و لا كان بيلومه على اللي يسويه..لكنه سامحه.. راح له و سلم عليه..و بدأوا صفحه جديده..رجعت لفيصل كل اللي خسره..أو بعض اللي خسره..لأن فيه شي كبير راح منه..و لا يمكن يرجع.. في بيت أم عمر=المغرب/ دخل عمر البيت بعد ما رجع من المستشفى..كان بيدخل الصاله لكنه سمع أحد فيها..لكن بعد ما انتبه طلع صوت مساهير..و دخل..شافها جالسه مع شوق تلعب بلاي ستيشن..كان مقهور منها..راح و سكر التلفزيون..و فزوا كلهم.. شوق: عمر لييييه كذا..كنت فايزه عليها!! عمر يطالع مساهير: عسى رايقه الأخت يوم جالسه تلعب! مساهير بإستغراب: عمر وش فيك؟! عمر: شوق روحي جيبي لي ماء شوق تروح: الله من التصريف مساهير ضحكت عليها..لكن يوم التفت عليها عمر سكتت..كانت جالسه بس وقفت..و التفتت تدور عبايتها..هي جت عشان عمر في المستشفى و ما توقعت انه بيرجع بدري.. عمر بقهر: وين؟ مساهير: لبيتنا عمر: هاذي اللي اقول لها اذا اشتقتيلي دقي! كل هذا ما جيت في بالك؟ مساهير استحت: طبعا جيت في بالي.. عمر يكمل بتريقه: بس سألت عليك حلا مساهير: صح..قالت لك؟ عمر: مساهير أنتي بتذبحيني؟ ليه كل هاللفه تدقين على حلا تأخذين أخباري؟ ليه ما تدقين علي أنا؟؟ و الا مضيعه رقمي؟ مساهير: ....... عمر: ليه ساكته؟ مساهير: بصراحه عمر: ايه مساهير: استحي اكلمك عمر انصدم: نعم!! مساهير: وش اسوي فيك أنت عودتني انك كل ما كلمتني تهاوشني أو تعاندني و أنا كنت اقدر أرد عليك....بس اللحين اذا كلمتني...تقول لي شي..ما أدري كيف ارد عليه عمر يضحك: و عشان كذا ما تكلمين؟ مساهير عصبت: لا تضحك..الخبله أنا اللي اقولك الصدق عمر: والله انك خبله صدق مساهير: لا والله انبسطت عليها..لا تسبني أنا بس اللي أسب نفسي عمر يمسكها مع يدها: لا تنامين اليوم بأدق عليك..لازم اعلمك كيف تقولين كلام حلو...مابي اتزوج وحده دفشه مساهير تسحب يدها انقهرت منه: ماراح أرد عمر بخبث: ترى أخلي الدروس وجها لوجه..خليها بالتليفون احسن دخلت عليهم حلا.. حلا: عمر!! متى جيت؟ عمر: واضح انكم آخذين راحتكم على بالكم ماراح أجي(يلتفت لمساهير)بس الحمدلله اني جيت مساهير: أنا رايحه للبيت عمر: خلاص أوصلك حلا تتريق: من بعده البيت؟! عمر: و أنتي وش دخلك؟ راحت مساهير مع عمر..و عند الباب وقفها.. عمر: حبيبتي مساهير شهقت: ..... عمر: وش فيك؟ مساهير انحرجت: لا لا ما فيني شي...عمر لازم اروح أمي لو عرفت انك في البيت بتهاوشني مع السلامه و طلعت بسرعه..قبل يقولها اللي يبي..(زين يا مساهير..فاضي لك الليله أنا..و بأشوف آخرة حياك اللي توه يطرأ عليك) في بيت أم العنود/ كانت جوري و ياسمين و نجود و أسيل جالسين في الصاله مع أم العنود.. ياسمين: أسيل وش عندك كل يومين زايرتنا؟ أسيل: اتطمن على مرة أخوي..مو جايه لسواد عيونك ياسمين: بس أنا عيوني بنيه أسيل: مو لسواد عيون جوري أم العنود: اللحين جوري وش دخلها؟ أسيل: أحلى على الفزعه..ضاعت عليك يا ياسمين ياسمين: يمه ليه ما دافعتي عني؟ أم العنود: أنتي تاخذين حقك و زياده..لكن جوري ما ترد على أحد جوري تبتسم: الله يخليك لي يمه أسيل: واااو بسم الله علي أكلتوني تراها مزحه..أقول نجود مشينا مشينا مالنا مكان هنا أم العنود: لا تبين روحي لحالك نجود أمانه عندي لين يطلع سيف بالسلامه أسيل: يعني أنا الوحيده اللي ما تبيني! هذا و أنا تعبانه و يدي مكسوره أم العنود تضحك: لا أنتي الغاليه بس قصي لسانك شوي..أو اعدتك حلا أسيل: صح بأدق عليها تجي عندنا..عشان تكتمل جمعتنا دقت عليها و عزمتها..و نجود كانت جالسه تسولف معهم و تضحك..تحس إنها تعرفهم من سنين..و عمرها ما تخيلت بتكون علاقتها بأهل سيف أحسن من كذا..و لا تخيلت انهم بيحبونها..و يهتمون فيها..و يعوضونها عن اللي فقدته..(الحمدلله على كل حال..و الله يقومك بالسلامه يا سيف..و تكمل فرحتي و أنت جنبي) و هم جالسين يسولفون..سمعوا جرس الباب.. جوري تشهق: لحقت تجي حلا؟ أسيل تضحك: مو معقول و لحظات و شافوا ورد جايبتها الخدامه..ركضت لها ياسمين تضمها.. ياسمين: وينك من زمان ما جيتي؟ ورد: بابا ماجد يقول كنتي مشغوله ياسمين: مو أقولك ما عليك منه بابا ماجد هذا..متى ما بغيتي دقي و أنا أجي آخذك أسيل تهمس للبنات: شكل ياسمين بتخرب البنت على عمها جوري تضحك: تخيلي ورد بعناد و قوة ياسمين..ما تركب نجود: ما تأثرت جوري فيها..كيف تبين ورد تتأثر بهالسرعه أسيل: لاااا أحس جوري ما تنفع إلا كذا طيبه و على نياتها(تقصر صوتها)لا تسمعني أمي حصه تذبحني سمعوا الخدامه و هي تكلم ياسمين..تقولها إن ماجد ينتظرها في المجلس.. أسيل تصفر: و حان اللقاء ياسمين تكلم الخدامه: قولي له عندها البنات بعدين... أم العنود تقاطعها: ياسمين روحي شوفيه ياسمين بإعتراض: يمه و البنات..و ورد أم العنود: مو طايرين البنات و ورد هاذي هي عندنا..اللي يسمعك يقول بتروح تسكن عنده ضحكوا عليها البنات..خاصه و هم يشوفون ملامح وجهها المعصبه..و أول ما لتفتت عليهم سكتوا.. و تركتهم و راحت..و ورد جلست جنب أم العنود تسولف معها.. أسيل تهمس بقهر: و لا بدلت..و لا كشخت تقهرني هالبنت جوري: تبي تعانده و بس نجود: ليه ما تحبه؟ مع إن سيف دائما يمدحه أسيل: صح هي من زمان حاقده عليه مادري ليه و صاروا يسولفون مع ورد.. في المجلس-كان ماجد يروح و يجي ينتظرها..من أيام يدق عليها و ما ترد..و فكر يجيب ورد و يجي عشان ما تلقى عذر و ما تطلع له..تقهره باللي تسويه فيه..بس هو كان مخليها على راحتها..ما يبي يضغط عليها..لأن همه اللحين تقرب منه و تصدقه..و إلا كان يقدر يعاندها و يجيبها بالغصب.. شافها تدخل عليه و ملامحها تدل على اللي بقلبها من قهر..و كره..كانت بلبس البيت و شعرها رافعته ذيل حصان و خصل طايحه منه دليل على انها ما كلفت تمر على مرايه قبل تشوفه.. ابتسم وهو يشوفها.. ياسمين بقهر: وش فيه يضحك؟ ماجد: ليه تبيني أمد البوز شبرين مثل حضرتك..أنا فرحان إني شفتك..لأنها نادرا ما تصير ياسمين بإستهزاء: و دامك شفتني..و فرحت..ممكن أروح لأن البنات كلهم هنا و أبي اجلس معهم ماجد: خلاص روحي و أنا رايح لناصر اللحين ياسمين: و ليه تقول لي؟ روح للمكان اللي تبي ماجد: كنت اعتقد يهمك تعرفين وش بأقوله؟ ياسمين فهمت شي من نظرته: وش بتقوله؟ ماجد: مو توك تقولين ما يهمك! ياسمين: لا يتعلق فيني هالموضوع..ساعتها ماراح أهتم ماجد: بس هو يتعلق فيك ياسمين بقهر: وش تقصد؟ ماجد يطلع و يتركها: اللي فهمتيه لحقته و هي تصرخ: وش تقصد؟ لكنه فتح الباب و طلع بدون لا يرد عليها..و هي وقفت مقهوره منه..(لا مو معقول يقصد اللي فهمته؟ معقول يحدد معه يوم الزواج!...أكيد يبي يقهرني مثل ما قهرته...بس كيف؟ كيف اعيش مع واحد اكرهه؟ مو واثقه فيه؟) *بعد ثلاثة أسابيع* في بيت أم فارس/ طلع سيف من أيام من المستشفى لكنه كان على كرسي متحرك..لأن رجله تحتاج لوقت و علاج طبيعي لين يقدر يمشي عليها من جديد..و نجود جت تجلس معه في واحد من الملاحق الخارجيه..لأن سيف ما كان يقدر يطلع الدرج..لين يجهزون بيتهم..سيف كان ما يقدر يطلع و لا يروح..عشان كذا..أسيل و نجود و أم فارس..هم اللي اهتموا في اختيار الاثاث..عشان يخلص بسرعه.. كان سيف جالس في الصاله لحاله..و دخل عليه فارس.. فارس بقهر: وين أمي؟ لا تقول طالعه بعد! يوم بغيتها ما عمرها جلست في البيت!! سيف: بسم الله وش فيك؟ تسأل و تهاوش و ترد على روحك! فارس يجلس و يتأفف: أنت ما خلص بيتك للحين؟ سيف: لا حول..أنت أول تصارخ على أمي..اللحين تصارخ على بيتي! وش زعلك فيه بيتي بعد؟ فارس يسمعهم: زين هذا هم رجعوا سيف يضحك: الحمدلله عشان ما تأكلني دخلت أم فارس و أسيل الصاله..و أول ما شافوا سيف صاروا يسولفون عليه..وش اختاروا..و يتناقشون بالألوان..و فارس يطالعهم بقهر..ينتظر متى بيخلصون.. أم فارس: نجود دخلت الملحق يوم شافت سيارة فارس..ماراح تروح لها؟ سيف: بأروح بس أول أعرف وش يبي فيك فارس..عندي فضول أم فارس تلف لفارس: فارس أنت تبي شي؟ فارس: الحمدلله على السلامه يمه..توك تشوفيني! أسيل تضحك: ايه جرب تكون أنت المسفوه لو مره..دائما أمي تسفهنا عشانك أم فارس: وش تبي يا فارس؟ فارس: أبي اتزوج أم فارس: والله احسب عندك سالفه فارس عصب: و هاذي مو سالفه؟ أم فارس تفرح: يعني أنت تتكلم صدق؟ أسيل: والله؟ فارس: ايه ليه مستغربين لهالدرجه؟ سيف: ما دري عنك لك سنين منشف ريقهم على هالسالفه..اللحين من حالك تطلب و لا تبيهم يستغربون؟ أم فارس بفرحه: ما طلبت يا يمه من بكره ادور لك احسن بنت فارس بتردد: لا..أنا محدد البنت اللي أبيها أم فارس بإستغراب: مين؟ نعرفها؟ فارس: ايه أسيل بحماس: فااارس يله قول عاد مين؟ فارس: جوري سكتوا منصدمين..و أسيل جاء في بالها كلام رغد لها يوم كانت في المستشفى..ذاك الوقت استبعدت هالشي..بس اللحين بدت تشك..(معقول جوري تحبه صدق؟ وهو يحبها أو خطبها كذا؟ أو خالي ناصر قال له؟؟) فارس: وش فيكم؟ أم فارس: مبروك يا ولدي..والله اني كنت خايفه على هالبنت بس دامك بتاخذها أكيد بأرتاح عليها سيف بخبث: انتظروا هي للحين ما وافقت فارس انصدم من كلام سيف..مع انه عرف من كلامها انها موافقه..بس ما يدري ليه خاف..معقول يصير شي يخليها ترفض.. سيف يضحك: لا تخاف لا تخاف ان شاء الله توافق..وين تلقى احسن منك؟ فارس يطالع أمه: يمه متى تكلمينهم؟ أم فارس: بكره ان شاء الله دق جوال أسيل..و ابتسمت و هي تشوف رقم نادر اللي من أمس في الشرقيه..و راحت عنهم.. أسيل: مرحبا نادر: أهلين أسيل وش أخبارك؟ أسيل: الحمدلله تمام..و أنت؟ نادر: تمام أسيل: و أخبار خالتي أم جاسم و مشاعل؟ نادر: يسلمون عليك أسيل: الله يسلمهم نادر: يقولون المره الجايه لا تجي إلا و هي معك أسيل فهمت وش يقصد و ابتسمت.. نادر: وش رأيك؟ أسيل: بإيش؟ نادر: نحدد موعد زواجنا..و يكون قريب أسيل: متى يعني؟ نادر: بعد شهر أسيل تشهق: لاااا حرام عليك نادر ما يمدي! نادر يتنهد: خلاص شهرين؟ أسيل: اممم نادر: يله أسيل وش أكثر من شهرين؟ أسيل: خلاص عشان خاطرك نادر: بكره إذا رجعت بأكلم عمي...امم أسيل أسيل: نعم نادر بتردد: فيه شي كنت أبي اتناقش معك فيه أسيل حست إن صوت نادر تغير..و عرفت إن اللي بيقوله شي مو سهل..و خافت.. أسيل: بإيش؟ نادر يتنهد: أنا كنت أبي اترك الشغل مع أبوي و افتح لي شركه خاصه فيني أسيل استغربت إنه يتناقش معها بشي عن الشغل..وهو متأكد إنها ما تفهم فيه.. أسيل: و عمي بيوافق؟ نادر: أنا بأقنعه أسيل: زين الله يوفقك و تكون خير علينا نادر بتردد: بس الشركه أبيها تكون في الشرقيه سكتت أسيل تحاول تفهم اللي قاله.. أسيل: يعني بتسكن في الشرقيه؟ نادر: بنسكن..وش رأيك؟ أسيل بضيق: و ليه مو في الرياض؟ نادر: أسيل أنا حياتي أغلبها عشتها هنا..أهلي هنا..و أصدقائي هنا أسيل بعتب: و الرياض؟ أهلك مو فيها نادر: أكيد فيها اخواني و أبوي و أنتم...بس أنا اتعودت على العيشه هنا أسيل: ....... نادر: المسافه قريبه يا أسيل كل يوم بنجي للرياض..فكري يا أسيل لا تردين اللحين سكتت أسيل مو عارفه وش تقول..وش ترد عليه..و لا تدري هو يأخذ رأيها ولو رفضت بيشيل الفكره من باله..أو هو مقرر و بس حب يقولها تستعد.. ما تتخيل نفسها تعيش بعيده عن أهلها..و لا عن رغد و حلا اللي تعودت تدرس معهم كل سنينها.. هو هناك بيكون قريب من أهله..بس هي بتبعد عن أهلها..و تمنت عمها ما يوافق على هالشي..و ما عرفت لو وافق..هي وش بيكون ردها..توافق أو لا..ولو رفضت وش بيصير.. |
|
|
#54 |
|
|
رد: تكملة رواية قلوب تنزف عشق
في بيت أبونادر/
دخلت لينا و رغد للبيت..كانت رغد عندها في بيتها و اتصل طلال على لينا..و قال لها انه بيسافر لجده بشغل للشركه..و طلب منها تروح لأهلها..لكنها قالت لرغد تنام عندها..بس رغد أصرت عليها تجي هي معها للبيت خاصه ان فيصل و نادر بعد مسافرين..و لأنها ما جابت لها لبس..و خايفه يجلسون لحالهم.. لينا: أول مره اعرف انك خوافه رغد: لا مو خوف..بس هنا عندنا أحد يسلينا لينا: ايه صرفي جلسوا مع أم طلال و رنا..يتعشون و يسولفون..و بعد العشاء طلعت لينا لغرفة طلال القديمه تنام فيها..لأنها ما حبت تضايق رغد..و لفضولها إنها تشوف غرفة طلال اللي ما عمرها دخلتها.. أول ما دخلت..دارت عيونها على كل الغرفه..صارت تتمشى فيها و تتفحص كل شي..أخيرا جلست على مكتبه..و صارت تقرأ كتبه..و تطالع الأوراق اللي فيها خطه..دق جوالها و كان طلال.. لينا: مرحبا طلال: هلا لينا وش أخبارك؟ لينا: الحمدلله..وصلت؟ طلال: ايه توي أدخل الغرفه قلت اتطمن عليك..أنتي عند أهلك؟ لينا: لا طلال: في بيتنا!! لينا: لا طلال: لينا! أجل أنتي وين؟ لينا: عند أهلك و اللحين أنا في غرفتك و تحديدا على مكتبك طلال بإستغراب: ليه رحتي عند أهلي؟ لينا: رغد قالت أجي معها...و جلست في غرفتك...مو خايف افتش؟ طلال يضحك: ما اتوقع إنك ملقوفه(أو تهتمين من الأساس) لينا: مو لقافه بس من الفراغ..مو خايف ألقى شي ما تبيني اشوفه؟ طلال: لا أنا واثق من نفسي لينا: يعني ما كنت تلعب بذيلك منا و إلا منا طلال يضحك بإستغراب: هاذي غيره متأخره! لينا تفتح الدرج الأخير: آها لقيت شي...ياه وش هالشريط القديم! طلال انصدم..ما طرى عليه ذاك الدرج أبدا..و كان يذكر إنه يقفله دائما..كيف نساه.. شغلت لينا الشريط في المسجل الصغير اللي لقته بنفس الدرج.. لينا: خلنا نسمع طلال: ...... ما قدر يتكلم..حس إن لسانه انعقد..كان يتذكر اللي في الدرج..وش اللي ممكن تشوفه..و تعرف كل شي..كان يبي يقولها تسكره..يترجاها إنه تسكره..لكن صوته ما طاوعه..خاصه وهو يسمع الأغنيه اللي مسجلها من سنين على كل الشريط..و جروحه تصحى و تذكره بلحظات الحزن..و الجرح..و العذاب.. قالوا ترى مالك امل في قربها لو يوم ابعد وجنّب دربهاهذا هو المقسوم قلت اتركوني واسكتوا خلو العتب واللوم قدني غرقت في بحرها ولاعاد يفيد العوم قالوا ترى في حبها ويل وأسى و هموم قلت ان قتلني حبها حسبي تقول مرحوم قالوا انسى ذكرها منت بها ملزوم قلت ابشروا ياعذلين بنسى لذيذ النوم قالوا بتلقى غيرهاواترك هواها اليوم قلت العفو ياحسدين ما ابدل قمر بنجوم قالوا لغيرك حبها قلت الجواب مفهوم دام انها متهنيه وشلون اصير محروم بقضي الليالي انتظر صابر على المقسوم متعلق بطرف الأمل يمكن يجيني نوم طلال كان ناسي نفسه بعد ما سمع هالكلمات.. أما لينا فكانت مصدومه باللي تشوفه بين يديها..صور كثيره لها بطفولتها..صور لها هي و طلال و عمر..و صور لها هي و طلال بس..كانوا يضحكون من قلب..و كانت آخر ضحكه حقيقيه لهم..بعدها ما عرفوا إلا الجروح..راجعت كلمات الأغنيه و هي تشوف كل شي في هالدرج يخصها..و أسمها اللي مكتوب بكل ورقه..همست بصدمه مو قادره تتخيل اللي عرفته..و صوتها طلع طلال من اللي هو فيه.. لينا بإرتجاف: طلال..أنت..أنت...تحبني...من كل هالسنين!!! طلال حس ان قلبه وقف: ....... سكت طلال..أو بالأحرى ما لقى صوته..ما تخيل إنها في يوم بتعرف إنه يحبها..و بهالطريقه..ما كان يعرف وش بيقول..بنفس الحال كانت لينا..مصدومه و مذهوله.. لينا بصدمه: طلال!! طلال كان يبي يتكلم بس ما قدر: ..... لينا تصارخ: تكلم يا طلال..إلى متى ناوي تسكت..إلى متى ناوي تتحمل مني أكثر..كنت تحبني و لا قلت..تركتني ليوسف و ما شكيت..و ظلمتك و حملتك سبب موته و أنت مالك أي ذنب و سكت..كرهتك كل هالسنين و تحملت..و بعد كل هذا تتزوجني و تخليني أكمل ظلمك..الحادث أنا السبب فيه..حزنك أنا السبب فيه..جروحك أنا السبب فيها...(ترفع صوتها و تصيح)كل هذا و تحبني؟ ليه يا طلال؟ ليه؟ صارت تصيح..وهو الدمع نزل من عيونه بألم..انصدم انها تعرف بحقيقة الحادث..و ما يدري من وين..انصدم انها تلوم نفسها على كل اللي هو فيه..أخيرا حست فيه.. طلال بصوت حزين: لينا لا تصيحين الله يخليك لا تصيحين لينا تصيح:..... طلال: لينا ردي علي لينا: ليه كل هذا يا طلال؟ أنا ما أستاهل هالحب طلال: تستاهلينه يا لينا..أنتي ملكتي قلبي من سنين..ملكتيه لأنك تستاهلينه..لأنك الوحيده اللي دخلتي فيه و ما قدرت اطلعك منه..و لا أبي تطلعين منه..لينا حياتي بدونك مالها طعم أيا كان وجودك فيها لينا بشرود: ليه ما حاولت تقول لي؟ طلال: كان صعب يا لينا..تعرفين انه كان صعب تسمعين مني أي شي لينا: صح..صح..أنا الغلطانه أنا اللي ظلمتك طلال: لينا لا تقولين هالكلام..أنتي كنتي معذوره و أنا ما ألومك لينا: عارفه انك ما تلومني مهما أسوي..لكن أنا ألوم نفسي على كل اللي سويته فيك..عذبتك يا طلال عذبتك سنين طلال: و أنتي تعذبتي بعد..مو ذنبك يا لينا لينا: آه يا طلال مادري وش اسوي في نفسي..أشوف كل اللي سويته عشاني..و أنا..و أنا دائما ظالمتك معي..كنت راميه عليك كل حزني..و قهري..و كرهي..و حتى يوم عرفت إنك مالك أي دخل..ما قدرت اصارحك بهالشي خليتك بعذابك..بس عشان ما تتركني..خفت ارجع مره ثانيه لحالي..لحزني..و وحدتي..و هالمره بدون أحد أرمي عليه الذنب..خفت اخسر حتى كرهي لك..و اعيش عمري كله بدون احساس....ما راح أسامح نفسي على هالشي.. طلال: لينا لا تقولين هالكلام..أنتي مالك ذنب باللي صار.. لينا برجاء: يعني بتسامحني؟ طلال: كل عمري مسامحك لينا تصيح: و أنا كيف اقدر اسامح نفسي طلال: هذا قدر يا لينا مالك ذنب فيه..نامي يا لينا..نامي و ارتاحي..لا تفكرين بأي شي..العمر و الحياة قدامنا...بكره اذا جيت بنتكلم لينا: تعال بدري طلال: أول ما اخلص شغلي اطلع على طول لينا: طلال..خل بالك على نفسك طلال: ان شاء الله..تصبحين على خير لينا: تصبح على خير سكروا..و كل واحد يستوعب اللي صار..لكن كل واحد منهم ما قدر ينام..كل واحد يفكر باللي قاله..و اللي سمعه..كل واحد يفكر ببكره..و كيف بيشوف الثاني.. في بيت أم العنود/ كانت أسيل في غرفتها تفكر بكلام نادر اللي للحين ما استوعبته..كلمت رغد لكنها ما قالت لها شي..و كأنها خايفه يصير هالأمر واقع.. طلعت من أفكارها..تعبت و هي تفكر بهالشي و تذكرت اللي طلبه فارس و حماسه للموضوع..ما قدرت تمسك نفسها..راحت تدق على جوري.. جوري: هلا أسوله وش أخبارك؟ أسيل: اهلين جوري..أنا تمام و أنتي؟ جوري: الحمدلله أسيل: اممم جوري جوري: نعم أسيل: عندي شي أبي اقوله لك و اعرف رأيك؟ جوري: وشو؟ أسيل: لو فيه أحد خطبك اللحين توافقين؟ جوري خافت: مين اللي بيخطبني يعني؟ أسيل: أنا اسألك توافقين أو لا؟ جوري: أسيل وش عندك؟ أسيل: أبي اعرف أنتي تفكرين بمازن أو لا؟ جوري: لا ما أفكر فيه...أسيل قولي وش فيه؟ أسيل: بصراحه..فارس بيخطبك جوري شهقت بصدمه..مع انه طلب منها هالشي من قبل..لكنها تفاجأت.. أسيل: وش فيك؟ جوري: لا بس فاجأتيني أسيل: زين بتوافقين أو لا؟ و لا تقولين لي أبي فرصه أفكر..مالي دخل أبيك توافقين جوري تضحك: أنتي تسألين أو تقررين؟ أسيل: جوري قولي انك بتوافقين جوري: خلاص و لا يهمك موافقه أسيل بفرح: والله!صدق أو تلعبين علي؟ جوري: مو أنتي تبيني اوفق! أسيل: يا سلام و هاذي حجتك! يعني أنتي ما تبينه؟ جوري بحياء: ماراح ألقى احسن فارس أسيل بحماس: الف مبروك حبيبتي...بس اقولك لا توافقين على طول اطلبي مهله تفكرين فيها اسبوعين...عذبيه شوي ضحكت جوري عليها..ما تدري إنها تتمنى طول عمرها هاللحظه..و لا تتجرأ بعد ما رفضته مرتين..تخليه ينتظر..كان هاين عليها تدق اللحين عليه و تقوله إنها موافقه.. *من بكره* في بيت أبونادر/ دخلت رغد غرفة طلال..تنادي لينا للفطور..شافتها جالسه على السرير و بين يدينها صورة طلال..أول ما شافتها نزلت الصوره..و رغد ابتسمت لها.. رغد: صباح الخير لينا: صباح النور رغد: نمتي زين؟ لينا تتنهد: ما نمت رغد: ليه؟ فيك شي؟ لينا: لا بس ما جاني نوم رغد: يمكن لأنك غيرتي مكانك لينا بشرود: يمكن حست رغد إن فيها شي متغير..غير عيونها الحمراء..كانت تكلمها و هي مو يمها..كانت بتقول لها تجي تفطر..لكنها شافت نظرة لينا متجمده على الباب..التفتت رغد و شافت طلال واقف..و يطالع لينا بنظره غريبه ما فهمتها..لكنها تأثرت فيها..كانوا يطالعون بعض و لا هم حاسين بوجودها..تقدم طلال للينا..و هي نزلت راسها وصارت تصيح..ضمها طلال..و رغد طلعت لأنها حست إنه صاير بينهم شي..لدرجة إنهم نسوا وجودها معهم..صارت لينا تصيح أكثر.. طلال بحنان: خلاص يا لينا ما أحب اشوف دموعك لينا تصيح: أنا ما استاهلك يا طلال..ما استاهل الحب هذا كله..من أمس افكر..اتذكر اللي صار..و اللي سويته فيك...كرهت نفسي طلال يضمها أكثر: لا يا لينا لا تكرهين أكثر شي أحبه بحياتي لا تكرهين حياتي كلها..لينا انسي اللي صار..أنا ما يهمني شي دامك معي..ما يهمني شي دامك متهنيه لينا تضمه بقوه: طلال أنا..أنا حبيتك..حبيت اهتمامك فيني..حبيت تضحيتك و طيبتك..حبيت نظرتك صوتك..حبيت وجودك بحياتي...بس ماكنت قادره أقول..كنت أحسب إني مجرد وصيه من يوسف..و مابي افرض نفسي عليك طلال غمض عيونه بألم..و فرح..و لا بأحلامه تخيل انها في يوم بترضى عنه..كيف وهو يسمعها تقول انها تحبه..حس ان صبر السنين و جروحه انتهت.. طلال: هذا كل اللي أبيه من دنيتي يا لينا بعدها عنه و مسح دموعها..صار يتأمل ملامح وجهها اللي يعشقها..و نظرة عيونها..و الحب اللي فيها..نسى كل جروحه..نسى الآمه..الجرح هو نفسه صار له دواء.. سحبها من يدها و جلسها على سريره و جلس معها..و عيونه مليانه مشاعر مو قادر يتكلم فيها..و هي كانت تطالعه بحب و شوق..حست ان قلبها مليان راحه و حب..لكن و هي تشوف غلاها بعيونه..و تتذكر اللي قاساه منها..رجعت تدمع عيونها.. لينا: أحبك يا طلال..االحب الي احسه لك قلبي مو قادر يشيله طلال يبتسم: لينا انسي اللي صار..انسي أي ضيق..خلينا نفكر باللي جاي و بس..و نعوض اللي راح من أيامنا لينا: الله يخليك لي يا طلال في بيت أم العنود=العصر/ كانت جوري في غرفتها..خلصت لبسها..و وقفت تطالع نفسها بالمرايا..كانت حلوه..بس الأحلى الفرحه اللي مرسومه على ملامحها..حست بيدينها ترتجف..من يوم قالت أم العنود إن أبوفارس و أمه بيجونهم اليوم و هي مو قادره تهدي دقات قلبها الثايره..تنهدت بفرحه..(اليوم يا فارس..اليوم..الكل بيعرف إني بأكون لك) سمعت أصوات..و ركضت لشباكها تبي تشوفه..وقفت تتأمله من بعيد..تضحك مع ضحكته..و تسكت مع سكونه..لين دخل و اختفى من قدامها.. جلست و سرحت بخيالها..و فزت و الباب ينفتح فجأه..و تدخل ياسمين و أسيل..و أسيل تركض لها و تضمها.. أسيل: مبروك يا قلبي جوري: الله يبارك فيك ياسمين: أنا أقول من أمس و البنت مو في الدنيا..أثاري الخبر متسرب و أنا آخر من يعلم..مبروك يا جوري جوري دمعت عيونها: الله يبارك فيك نزلت معهم..و هي تحس بفرحه كبيره..ما يوصفها أي كلام..و يعجز عنها أي تعبير.. في بيت نوال/ كانت هي و مرام جالسين.. نوال: و بعدين يعني الدموع ماراح تفيدك بشي؟! مرام: مقهوره يا نوال كل شي اسويه ما يفيد..ما يضرها شي..حتى الحادث طلعت منه بدون ضرر نوال: خلاص و لا يهمك أنا اقولك الحل الأخير..اللي غصب يجيب نتيجه معهم..و تترك نادر لو كانت تبيه و بترجع لفيصل حتى لو هي مو طايقته مرام فرحت: وش هالشي؟ نوال: أنتي مو تقولين قبل تتزوج نادر الكل كان يعرف إنها تحب فيصل وهو يحبها؟ مرام: ايه نوال: و مو ملكة قريبتها بعد أسبوعين؟ مرام بنفاذ صبر: ايه هاذي اللي اسمها جوري وش عندك نوال: نخطط زين و بحذر..و تورطينها مع فيصل بفضيحه كل أهلها يدرون عنها..الكل يشوفهم مع بعض..و يظن انهم للحين على علاقه ببعض أو على الأقل رجعوا لبعض..كذا أكيد بيتركها نادر و بيجبرونها ترجع لفيصل مرام خافت بس فرحت: بس كيف..اللي تقولينه مو سهل؟! نوال: عارفه إنه مو سهل عشان كذا لازم نفكر فيه برواق..و قدامنا أسبوعين بس..هاذي فرصتك الأخيره يا مرام مستعده تسوينها؟ مرام بعد لحظة تفكير: ايه..لأن اللحين مو مهتمه نادر يكون لي..المهم ما يكون لها |
|
|
#55 |
|
|
رد: تكملة رواية قلوب تنزف عشق
@،،آآآخـــــــــر نـــــــــــزف،،@
في سيارة سواق مرام/ كانت مرام راجعه من صديقتها..و تفكر باللي قالته لها..(لازم اسوي هالشي بسرعه..مستحيل أسيل تاخذ شي أنا كنت اتمناه) انتبهت إن السواق هدأ سرعته.. مرام بعصبيه: ليه هديت؟! السواق: شوف هازا هادس التفتت مرام و شافت الناس و السيارات و الزحمه اللي سادين الطريق..كان الكل باين إنه متأثر بالحادث..لكنها ما اهتمت..كل اللي في بالها..فكرة نوال و بس.. مرام صرخت عليه: دور لك طريق ثاني و بعدنا عن هالهم..أبي اوصل البيت بسرعه السواق صار يضرب بوري..و بعدوا الناس عنه و الضيقه على وجيههم من تصرفه اللي بدون احساس..و لف من عندهم ..و لمحت سيكل طايح في الطريق و أحد متمدد و مغطى وجهه بشماغ و الأرض حوله متغطيه بالدم..و صدت بقرف للجهه الثانيه ما تبي تحس بالرحمه عليه..(أنا ناقصه هالمناظر يا كرهي لهالمبزره و حركاتهم...ليتك مكانه يا أسيل..و الله لو بيدي ذبحتها و افتكيت منها) وصلت للبيت و راحت على طول لغرفتها..مع إنها سمعت صوت أمها لكنها ما مرت عليها..لين يصير اللي في بالها مالها خلق لأي شي..أو أي أحد..دخلت غرفتها و راحت تاخذ لها شاور يهديها و يخليها تفكر برواق..اللي تفكر فيه مو سهل و لازم ما تكون فيه أي غلطه تكشفها..طلعت و بعد ما لبست بجامتها حست إنها جوعانه مع كل اللي تفكر فيه نست تآكل.. نزلت تبي تاخذ لها شي خفيف..و كل تفكيرها باللي قالته نوال..(بتدفعين الثمن يا أسيل..مو أنا أخسر كل شي و أنتي دائما تكسبين).. لكن خطواتها وقفت و هي تسمع أمها تصارخ بشكل هستيري..ركضت و وقفت عند باب الصاله و هي تشوف أمها طايحه على الأرض و متمسكه بثوب خالها أبوفارس..اللي كانت ملامح الحزن طاغيه عليه.. أم راكان بترجي و دموعها تنزل: لاااا ولدي ما مات أنت أكيد غلطان...قبل ساعه كان عندي(كملت و هي تضرب وجهها) قبل ساعه و أنا مهاوشته و طاردته من البيت..قبل ساعه قلت له مابي اشوف وجهه..راكااان..أبي اشوفه اللحين..أبي اشوفه رجعت مرام و هي تهز راسها بقوه تحاول تستوعب اللي سمعته..نزلن دموعها..لكنها مسحتهن بسرعه و عصبيه..ما تبي تصيح..ما تبي تصدق إنه مات..تذكرت الحادث اللي شافته قبل شوي..تذكرت السيكل..و جاء في بالها سيكل راكان اللي دفته برجلها قبل كم يوم و رمته على الرمل..كان فرحان إنه ملمعه و مزينه..و هي كانت مقهوره منه و حبت تقهره..(نفسه! السيكل نفسه! اللي قبل شوي حادث راكان..مريت من عنده وهو يموت! مريت و لا اهتميت فيه..اخوي كان هناك يلفظ أنفاسه الأخيره..يودع هالحياه..و أنا ما حسيت فيه..ما عرفت سيكله) اخوها..أول مره تنطق هالكلمه..أول مره تحس فيها..لكنه إحساس متأخر جدا..احساس فات عليه الوقت..فاتت عليه الحياة..تمنت كل هذا يكون كابوس و تصحى منه..و تشوفه اللحين قدامها..لكنها ما قدرت حتى تتخيله..لأنها ما تذكر ملامحه زين..ما عمرها اهتمت تشوفه..حاولت..و حاولت بذاكرتها ترجع صورته..لكنها ما قدرت.. مرام تصرخ: راكاااان...راكاااان جاء لها خالها أبونادر اللي كان برا عند أبوها و خاف يوم سمعها تصرخ..شافها واقفه مثل الضايعه..بملامح مفجوعه..و عيون غرقانه دمع..راح و ضمها يحاول يهديها..لكن النار اللي بداخلها مستحيل كلام الدنيا يهديها..بالعكس كانت كل ما يمر الوقت و تستوعب هالخساره تثور أكثر..و أكثر.. مرام بصوت رايح: ناسيه شكله..مو قادره اتذكر ملامحه..اخوي مو قادره اتذكره اللحين! كيف بعدين؟ كيف بعد سنه؟.....راكان مات وهو يكرهني..و أنا كنت اكرهه قلتها له في وجهه أكثر من مره..قلتها له كل ما شفته! أبونادر تدمع عيونه_ اذكري الله يا بنتي مرام تصرخ: الله ياخذني..الله ياخذني و طاحت من بين يدين عمها..مغمى عليها.. في بيت أم العنود/ دخلت ياسمين على جوري الغرفه..التفتت لها جوري و استغربت و هي تشوف ملامحها الحزينه..و عيونها الدامعه..على طول دمعت عيون جوري معها..و صار قلبها يدق بخوف.. جوري: ياسمين وش فيك؟ ياسمين: راكان..ولد عم أسيل... جوري بخوف: وش فيه؟ ياسمين: توفى في حادث جوري سكتت..وقفت مصدومه باللي سمعته..طرت في بالها على طول ملامحه..ضحكته البريئه..و الحزن اللي تشوفه بعيونه من معاملة أهله..نزلت دموعها تصب على خدودها..قبل تبدأ تصيح بصوت عالي..ضمتها ياسمين و صارت تصيح معها.. في بيت أم فارس=المغرب/ كانت أسيل جالسه في غرفتها و مكتئبه..من يوم عرفت اللي صار لراكان..انصدمت بخبر وفاته.. دخلت عليها حلا و جوري..سلموا عليها و عزوها..مع ان جوري كانت تصيح أكثر منها.. حلا: ماراح تروحين تعزين عمتك و بناتها؟ أسيل: خايفه حلا: من ايش؟ أسيل: مادري؟ بس ما اتخيل اني أشوف عمتي و هي مكسوره لهالدرجه حلا: لا حول و لا قوة الا بالله..الله يعينهم...المهم حنا بنروح اللحين تجين؟ أسيل تتنهد: أكيد..لازم اروح...جوري اهدي شوي حنا رايحين نهديهم مو نزيدهم جوري: ان شاء الله في بيت أم راكان/ وصلوا أم فارس و أم عمر و أم العنود و بناتهم..شافوا أم راكان اللي كانت بحاله تصعب على الكافر..منهاره و مو حاسه بالناس اللي حواليها..كانت هاديه و كأنها ميته..شي واحد يحسس اللي يشوفها انها حيه..الدموع اللي ما توقف من عيونها.. ريهام كانت بجنب أمها..و هي مفزوعه من كل اللي يصير حواليها..ما كانت متعوده على هالأجواء..عمرها ماراحت لعزاء..و لا تخيلت ان أول عزاء بيكون عزاء اخوها.. كلهم كانوا فيه الا مرام.. أسيل: وين مرام؟ رغد: من يوم جينا ما شفناها..أبوي يقول انها أول ما عرفت انهارت و طاحت عليهم...أكيد بغرفتها وش رايكم نروح لها؟ أسيل: اخاف تتضايق رغد: ولو ما يصير نتركها لحالها بهالوقت طلعوا فوق..و راحوا لغرفتها..دخلوا و شافوها جالسه على سريرها..الغرفه ما كان فيها إلا نور خفيف من الأباجوره اللي جنب السرير..حست بأحد دخل عليها و رفعت راسها تشوف مين..تفاجأت بجيتهم لها..لكن هم تفاجأوا أكثر ..ما كانت مرام اللي يعرفونها أبدا..شعرها اللي دائما متسرح بأناقه..كان مربوط بإهمال و خصل كثير طايحه على وجهها..حتى ملامحها تبدلت و بالأخص نظرة عيونها..نزلت راسها..و صارت تطالع في الأرض..تقدمت منها رغد و مدت لها يدها.. رغد: عظم الله أجرك مرام صافحتها و هزت راسها بإشاره خفيفه لأنها حتى الكلام مو قادره عليه..بعدها سلمت عليها حلا..لكن يوم سلمت عليها أسيل..رفعت مرام راسها تطالعها بنظرات غريبه..ما فهمت أسيل هي ندم..أو اعتذار..أو تقدير لجيتها..كان صمت مرام خلاهم حتى هم مو قادرين ينطقون بأي شي..إلا بكلمة التعزيه البسيطه..لكن مرام قطعت هالصمت أول ما شافت جوري..انرسمت صوره ضبابيه لملامح راكان وهو دائما يضحك معها..لكنها اختفت من خيالها بسرعه..و هالشي اللي خلاها تنهار..و تعلقت يدينها بجوري.. مرام بحزن: جوري أنتي عرفتي قيمته اللي ما عرفتها..قدرتيه و اهتميتي فيه..حتى هو كان يحبك دائما يقول لي ليتها هي أختي مو أنتي...ليته كان أخوك يا جوري أكيد كان بيلقى الحب اللي ما عمره حسه بهالبيت البنات انصدموا من كلام مرام..كانوا يحسبون إنها في هالحال بس حزن على وفاته..ما توقعوا إنها تلوم نفسها على تقصيرها معه..أما جوري فكانت دموعها تنزل على خدها من يوم دخلت..لكنها اللحين ياله قادره تحبس شهقاتها.. مرام بندم و حسره: جوري أنا مو قادره اتذكر شكله! أبي اشوف ملامحه ما لقيت له عندنا و لا صوره..نسيت شكله..نسيت شكله!! جوري احتارت بالفكره اللي جت في بالها..مو عارفه صح اللي بتسويه أو خطأ..بس عورت قلبها مرام بكلامها.. جوري بصوت مرتجف: عندي له...صور بالجوال...تبين...تبين تشوفينهم رفعت راسها للبنات تراقب ردة فعلهم على اللي سوته..لكنها شافت نظرات رغد مأيدتها على اللي قالته..أما مرام فكانت مصدومه من اللي سمعته..ما قدرت تصدق إنها بتشوفه.. مرام بترجي: ايه أبي اشوفها...الله يخليك يا جوري أبي اشوفها اللحين طلعت جوري جوالها..و بيدين مرتجفه صارت تدور على صورته..و مرام تتابعها بنظرات كلها خوف..و أمل..و البنات مخيم عليهم السكوت.. مدت جوري الجوال لمرام اللي اخذته بلهفه..و طالعت الشاشه..حست برجفه تهزكل جسمها و هي تطالع بصورة راكان..كان يطالعها و يضحك..أول مره تشوفه يضحك..دققت في ملامحه..كأنها تشوفه لأول مره..و جهه نفس شكل و جهها..و خشمه كان مثل خشمها..عمرها ما انتبهت لهالشبه..أول مره تشوف إنه توه صغير..صغير انتهى عمره فجأه بعد شقاء عاشه معهم..نزلت دموعها حاره من ندمها عليه..حست إنها تحرق عيونها..زاد صياحها..و زادت شهقاتها..بدت ترتجف و يدها ضامه الجوال بقوه..حضنتها جوري و صاروا كلهم يصيحون.. *بعد أسبوعين* مرت الأيام كئيبه..و تأجلت ملكة فارس و جوري..الكل تأثر بوفاة راكان بهالعمر..و بحال أهله اللي انقلب بعده.. في بيت أم راكان/ كانت مرام واقفه عند باب غرفة راكان..اللي من يوم وفاته ما أحد تجرأ يدخلها..نزلن دموعها و هي تتخيل وش ممكن يكون شكلها..لأنها من يوم سكنوا هالبيت ما دخلتها..و لا فكرت تشوفها.. فتحت الباب بيد مرتجفه..دخلت بهدؤ..شغلت النور..و سكرت الباب وراها و تسندت عليه..دارت عيونها على الغرفه..أغراضه..ألعابه..ملابسه .. تقدمت و جلست على مكتبه..تفتش بدفاتره..و تصيح..(نجحت يا راكان؟ وش كان تقديرك؟...مبروك يا راكان..ما قلتها لك..سامحني..سامحني) نامت على مكتبه و هي تصيح..و تحضن أوراقه بين يديها.. و صارت تقضي كل وقتها بغرفته..تحاول تعرف عنه كل شي..وش يحب..وش يكره..وش يهمه.. في بيت أم فارس=الساعه العاشره مساء/ كانت أسماء من أسبوع و هي عندهم لأن هذا أسبوع ولادتها..و تركي جابها لأهلها عشان يتطمن عليها و ما تكون لحالها..و جت ساعة ولادتها..و من سوء حظها..ما كان فيه أحد في البيت إلا هي و أسيل..اللي كانت في المطبخ..و جت تركض و هي تسمع صراخها.. أسيل بخوف: أسمـــاء وش فيك؟؟ أسماء تصرخ: شكلي بأولد..اتصلي بأي أحد بسرررعه أسيل ارتبكت..و ما عرفت على مين تدق..سيف كانت عنده مراجعه في المستشفى..و دقت على فارس و لا رد..و أمها آخذه السواق..و أبوها مسافر.. بدت أسماء تصرخ عليها..و هي تشوفها واقفه ما تحركت.. أسماء: أسيل تحررركي راحت أسيل تركض..بتقول لنجود اللي كانت في الملحق..تبي أحد يقولها وش تسوي لأنها و هي مرتبكه وقف عقلها عن التفكير..لكن و هي طالعه في الحوش شافت نادر و سيف داخلين..كان جايبه نادر من المستشفى..و ركضت لهم و هي ترتجف..و هم أول ما شافوا حالتها خافوا.. أسيل: أسماء بتولد سيف يشهق: وشووو؟؟ أسيل: لازم نوديها المستشفى سيف: يله بسرعه طلعيها يوديكم نادر نادر ارتبك: أنا؟! لو كانت أسيل رايقه..كان ضحكت على شكله المفزوع..بس هي راحت بسرعه تلبس عبايتها و تلبس أسماء و تسندها لين وصلوا سيارة نادر..اللي كان مرتبك أكثر منها.. و سيف بعد ما تطمن إنهم راحوا..مشى بكرسيهه لين الملحق..دخل و شافها.. نجود تركض له: سيف..وش قال الدكتور؟ سيف يضحك: خليني ادخل أول نجود دفت الكرسي و دخلته و جلست جنبه: هاه وش قال الدكتور؟ تحسنت صح؟ سيف: قال أكيد عندك زوجه تهتم فيك و تدلعك عشان كذا خفيت بهالسرعه نجود بعتب: سيف طمني؟! سيف يضمها له: لا تخافين صرت احسن نجود: الحمدلله سيف: أسماء بتولد نجود شهقت: والله؟ سيف: ايه أول ما دخلت مع نادر شفنا أسيل اللي ما صدقت شافتنا نجود: راحوا مع نادر؟ سيف: ايه نجود: الله يقومها بالسلامه سيف يبتسم: اتخيلك يوم ولادتك نجود: ايه فرحان مو أنت اللي بتذوق الويل سيف: خايفه؟ نجود: مادري أخاف أو افرح سيف يرجع يضمها: افرحي يا نجود دائما افرحي في سيارة نادر/ كانت أسماء تصرخ عليه و على أسيل..و طلعت فيهم حرة الوجع..و زادت ارتباكهم..ما يدري كيف وصلوا للمستشفى..كان من خوفه مو شايف الطريق قدامه..و دخلوها غرفة الولاده..و جلس هو و أسيل ينتظرون.. التفت على أسيل و شاف يدها للحين ترتجف..مسكها و التفتت عليه.. نادر يبتسم: لا تخافين إن شاء الله تقوم بالسلامه أسيل: مادري وش كنت بأسوي لو ما شفتكم..الله يهديها أمي هذا وقت زيارات!! نادر: أنتي قدها و قدود أسيل: أي قدها أنا كنت مو عارفه وش اسوي لها؟ كنت طالعه لنجود تتصرف...اربكني صراخها و ما قدرت أفكر نادر يضحك: الله يهديها أسماء..أنا كنت مو شايف الطريق من صراخها اللي اربكني بعد تذكرت أسيل حالتهم في السياره و ضحكت..وهو ضحك معها.. نادر بهمس: الله لا يحرمني هالضحكه أسيل استحت: ..... نادر: أسيل أسيل: نعم نادر: من زمان ما سمعت صوتك أسيل تتنهد: تعرف الظروف اللي مرينا فيها..الله يرحمك يا راكان نادر: الله يرحمه..أسيل أسيل: نعم نادر: ما سمعت قرارك أسيل: كلمت عمي؟ نادر: ايه..و وافق أسيل تتنهد: و أنا معك بأي مكان تروح له يا نادر نادر يبتسم لها بحب: الله يخليك لي يا أسيل و جلسوا يتكلمون ساعتين..لين طلعت لهم الدكتوره..و قالت لهم ان أسماء جابت بنت..و طمنتهم عليها.. نقلوها للغرفه و جلست معها أسيل..و نادر رجع للبيت.. في بيت أم سامي/ كان فيصل يكلم سهى..لكن من بعد ما تبرع لسيف..من يوم رجعت علاقته فيه..و هي تحس بخوف و ضيق..تحس إنه يكلمها وهو مو يمها..حتى إذا شافته..ما تشوف أي اهتمام أو حب بنظرته.. فيصل: سهى وين رحتي؟ ليه ما تردين؟ سهى تنتبه: هاه لا معك بس سرحت شوي فيصل: شكلك مشغوله أخليك اللحين سهى عصبت: شكلك ما صدقت فيصل بإستغراب: سهى وش فيك؟ سهى: فيصل أنت مو حاس في نفسك كيف تعاملني؟ فيصل يتنهد: كيف أعاملك يعني؟ عادي سهى بإستهزاء: عادي..صح يا فيصل كل شي بيننا عادي فيصل انتبه لنفسه: سهى ليه هالكلام؟ سهى: فيصل أنت ندمت على زواجك مني؟ فيصل: لا..طبعا لا سهى: أجل ليه احسك بعيد عني؟ مو مهتم فيني؟ فيصل: تتوهمين يا سهى..أنا مثل ما أنا ما تغيرت سهى سكتت عن هالنقاش لأنه ما فيه منه فائده..إلا يبعد بينهم أكثر..لكن كل مره تكلم فيها فيصل..كل مره تشوفه فيها..تحس إنها كانت تتوهم إنه حبها في يوم من الأيام..لكنها ما كانت تبي تتأكد من هالشي..و حاولت تنسى كل اللي راح..و تحاول تخليه يحبها..و تمسح من باله أي طيف ممكن يبعده عنها.. *بعد يومين* في المستشفى/ وصل فارس..اللي كان مشغول و ما شاف أسماء..وقف عند الغرفه..وهو يسمع أصوات حريم في الداخل..تنحنح و دخل.. فارس: مساء الخير الكل: مساء النور سلم على أم العنود..و خالته أم عمر..و شاف وحده متغطيه جنب أسيل عرف إنها حلا..التفت على أسماء و بعصبيه مصطنعه.. فارس: و أنتي جالسه كل هالشهور و ما لقيتي تولدين إلا اللحين؟ اسمعي ترى ماراح أأجل ملكتي مره ثانيه الكل ضحك عليه.. أسماء: أنت قول أول حمد الله على سلامتك..شوف بنوتتي القمر..بعدين هاوشني! فارس: وش اسوي فيكم عقدوتني! مزعجيني تزوج و تزوج..يوم بغيت كل شوي يطلع لي شي أسماء بخبث تطالعهم: و الله ما عرفنا إنك مستعجل لهالدرجه..و إلا كان زوجناك بكره فارس يبتسم: يصير يمه؟ أم فارس تضحك: خلنا نسأل العروس أول فارس بثقه: أكيد بتوافق شاف أسيل تضرب حلا: يا عيني على الثقه! أسماء تعانده: بس جوري للحين ما جهزت نفسها فارس: أسوله تساعدها و يخلصون بكره و بعده نسوي الملكه أم عمر تضحك: والله مستعجل صدق فارس للحين مصدق فكرته: يمه حصه وش رأيك؟ أم العنود تضحك: لا فستاني ما يطلع إلا بعد أسبوعين كلهم ضحكوا عليها..و فارس برطم عليهم.. فارس: أنا الغلطان آخذ رأي الحريم أروح أكلم خالي ناصر احسن راح يشوف بنت أسماء اللي كانت معها..و سولف معهم شوي و طلع..لكنه ما تعدى الغرفه بخطوتين إلا وهو يشوف بنتين قباله.. ياسمين: مساء الخير فارس فارس عرفها: مساء النور كان مبتسم يوم شاف البنت اللي معها..أكيد إنها جوري..لكنه انصدم أول ما تكلمت.. حلا: مبروك ما جاكم فارس يلتفت عليهم: حلاااا؟! حلا بإستغراب: ايه فارس بحيره: أجل مين اللي داخل مع أسيل حلا: هاذي جوري انصدم فارس و تغيرت ملامحه..كان مقهور على أسماء و عليهم و هم يضحكون عليه..و تركهم و راح.. حلا تطالعه وهو رايح: بسم الله وش فيه؟ أول مره أحد يخاف مني كذا! ياسمين تضحك: شكله جاب العيد داخل تعالي نشوف وش صار في بيت طلال=الساعه العاشره مساء/ دخل الصاله و عيونه تدور فيها..يدور عليها..لكنه تفاجأ بخالته أم عمر و هي تنزل من الدرج.. طلال يبتسم: أنا أقول البيت منور أثاري خالتي فيه أم عمر: البيت منور بأهله طلال يسلم عليها: وش أخبارك خالتي؟ أم عمر: الحمدلله بخير طلال يتلفت: وينها لينا؟ أم عمر: في غرفتها طلال: ترى ما فيه عذر تتعشين معنا اليوم أم عمر: لا الله يسلمك يا ولدي..دقيت على عمر و اللحين جاي ياخذني..خل لينا ترتاح طلال بقلق: لينا! لينا فيها شي!! أم عمر: اليوم و حنا نزور أسماء داخت علينا و وديناها للعيادات طلال بخوف: وش فيها؟ أم عمر تبتسم بفرح: لا تخاف ما فيها إلا العافيه..بس هذا ولي العهد متعبها شوي بهت طلال للحظه يستوعب اللي سمعه..قبل لا يضحك و الفرح تغطي ملامحه.. طلال: لينا حـــامل؟! أم عمر: ايه طلال بفرح: الله يبشرك بالخير خالتي كانت أم عمر تسولف معه..و تتكلم..وهو يرد عليها بشرود..كل احساسه و أفكاره معها..مع لينا..يتمنى يطير لها فوق من بعد ما سمع هالخبر..لكنه ما قدر يترك خالته لين يجي عمر.. جلس معها ربع ساعه..و جاء عمر اللي جلس يسولف نص ساعه زياده..و أول ما راحوا دخل البيت يركض على فوق..لكن قبل يدخل الغرفه وقف..و خطرت على باله فكره خلته يضحك بخبث.. من ذاك اليوم اللي اعترفت فيه لينا بحبها..ما سمعها تقولها مره ثانيه..يعرف إنها تحبه..و هالشي باين عليها..و بكل تصرفاتها معه..لكنها ما تعبر عن اللي تحسه.. و اللحين سأل نفسه كيف بتقوله هالخبر..و هالشي خلاه يكتم فرحته داخله..و يدخل عليها عادي..شافها جالسه على السرير..و ابتسمت أول ما شافته..و لمح الفرحه اللي ترقص بعيونها..جلس جنبها و باسها على خدها.. طلال: مساء الخير يا قلبي لينا: مساء النور..وش أخبارك؟ طلال: تمام..و أنتي؟ لينا: الحمدلله..ليش تأخرت؟ طلال: شفت واحد من الشباب من زمان عنه و أخذتنا السوالف لينا: أروح اجهز لك عشاء طلال: لا عازمك على العشاء برا لينا تبتسم: وش المناسبه؟ طلال: اممم بمناسبة إني أحبك..و بمناسبة إن تحبيني..و بمناسبة إني أسعد واحد بهالعالم..و بمناسبة إن... لينا تقاطعه: يا كثر مناسباتك..ما بقيت لي شي أقوله طلال: ليه أنتي عندك مناسبه؟ هزت لينا راسها بمعنى ايه..و هي تطالع الأرض و مبتسمه..رفع طلال راسها بيده..لين حطت عينها بعينه.. طلال يبتسم: وش المناسبه اللي عند حبيبتي؟ لينا: طلال أنا..أنا حامل طلال يتنهد و يضمها لصدره: يا حلوها منك يا لينا لها طعم أحلى لينا للحين بحضنه: أنت تعرف هز راسه بمعنى ايه..و ضمها بقوه أكبر..و هي تعلقت فيه..مرت لحظه قبل تبعده عنها.. لينا: كيف عرفت؟ طلال: قابلت خالتي تحت و قالت لي لينا تبرطم: و ليه تلعب علي؟ طلال: أبي اسمعها منك..الله يقومك لي بالسلامه لينا تبتسم بفرح: فرحان يا طلال؟ طلال يقرصها مع خدها بلطف: هذا سؤال؟ لينا: زين تتمنى ولد أو بنت طلال: بنت شعرها بني مثل أمها..و حلوه مثل أمها..و تطالعني بنظراتها الخجلانه مثل أمها..و بأسميها لينا على أمها *بعد أسبوعين* في بيت أم العنود/ صحت جوري..و هي مبتسمه من حلمها اللي حلمته فيه..اليوم ملكتها على فارس..(الله بتكون الملكه مثل حلمي؟ مو مصدقه إني اليوم بأكون له) دخلت عليها ياسمين.. ياسمين: صباح الجوري يا جوري جوري تضحك: صباح الياسمين يا ياسمين ياسمين تجلس على سريرها: وش سر هالإبتسامه؟ أنا يوم ملكتي صحيت ودي اقتل أحد جوري تضحك: الحمد لله اللي سلم ماجد منك ياسمين تتأفف: لا تذكريني بأروح ادق عليه اللحين جوري: ليه؟ ياسمين: فستان ورد من يوم شريناه خليته عندي أبيها تجي عندنا من الصبح تجلس معنا و البسها و تنبسط مع البنات جوري: حلو ياسمين تقوم: الله يعيني طلعت من غرفة جوري..و راحت لغرفتها و دقت عليه.. ماجد: يا حلو صبحي..معقول الياسمين بنفسها تدق تصبح علي..صباح الورد حبيبتي ياسمين بملل: أبي تجيب ورد عندي اللحين ماجد: و أشوفك؟ ياسمين: لا ماجد: أجل ماراح اجيبها ياسمين عصبت: بلاها حركاتك هاذي..أنا وعدتها تجي عندي من الصبح ماجد: و أنا قلت لا؟!..بس أبي اشوفك ياسمين: بعد ساعه أبيها عندي..مع السلامه سكرت منه..و ماجد يتنهد..(كل ما أحاول اقرب منها تبعد أكثر..راسمه لي صوره مو راضيه تغيرها..بس أنا وراك وراك) في بيت أم راشد/ صحت مساهير و كالعاده نطت من سريرها لتحت على طول..لازم تسويلها كوب نسكافيه يصحيها..نزلت و هي ترفع شعرها المحيوس عن وجهها..دخلت الصاله و هي مفتحه عين و مغمضه الثانيه..ضربت في أحد و كانت بتطيح لكنه مسكها..رفعت راسها..و أول ما شافت عمر شهقت..كان كاشخ و متعدل..و تذكرت شكلها و هي للحين بقميص نومها الأبيض القطني و فيه رسمات صغيره بالموف..ارتجفت و بعدت عنه..وهو كان يطالعها بتأمل وهو مبتسم.. عمر: وش هالكشخه على الصبح..زين شفت الوجه اللي بأتصبح فيه كل يوم مساهير انحرجت و حاولت تلم شعرها بيدها و جابته على جنب.. مساهير: وش جابك؟! عمر: صباح الخير مساهير: صباح النور عمر: كنت جايب كروت الدعوه و راشد عزمني على الفطور..بس صراحه طلع الفطور يسوى مساهير: فطور في عينك! والله ما تعرف تتغزل عمر بخبث: كلها أسبوع و تجين عندي و أعلمك الغزل على أصوله مساهير تتذكر: صح المفروض ما تشوفني! عمر بتريقه: هذاي شفتك و على حقيقتك مساهير تتكتف: والله يمديك تهون عمر: بس أنا معجبني اللي شفته..الحلو حلو لو توه قايم من النوم مساهير انحرجت: بأروح اجهز لكم الفطور عمر: يا كسوله على بالك الكل مثلك حنا افطرنا و خلصنا..أنا انتظر راشد راح يبدل و بنطلع مساهير: أنت الخسران..يله أنا بأروح اسوي لي نسكافيه عمر: وين؟ انتظري شوي ما شبعت منك مساهير بإحراج: عمر خلاص اللحين راشد ينزل عمر: و خير يا طير! مساهير تكذب: راشد جاء فز عمر و التفت على الدرج..و هي ركضت للمطبخ..طالعها بقهر و كان ناوي يلحقها بس شاف راشد ينزل..و راح معه.. |
