 |
  |
|
|
|
|
|||||||
| قصص و روايات تكملة رواية قلوب تنزف عشق يوجد هنا تكملة رواية قلوب تنزف عشق روايات Novels و تحميل روايات و قصص روايات حب سعودية روايات احلام و عبير رومانسية عربية روايات عالمية كاملة للتحميل روايات رومانسيه احلام و عبير و قصص مضحكه قصص حزينه قصص رومانسيه حكايات عربية و قصص الانبياء افضل قصص مفيدة قصص سعودية خليجية |
|
|
|
#11 |
|
|
رد: تكملة رواية قلوب تنزف عشق
في إستراحة الشباب/
كانوا الشباب مجتمعين كالعاده و معهم بعض أصدقائهم..لكن المره هاذي تأخر الوقت..و لا جاء غير فارس و عمر و طلال اللي كان يعرف سبب تغيب إخوانه.. عمر: وينهم الشباب شكلهم مو ناوين يجون؟ فارس: دقيت عليهم؟ عمر: كسرت جوالاتهم و لا واحد فيهم رد شكلهم مسوين إضراب فارس: هذا سيف جاء عمر: بدري! وينك؟ سيف مكشر: هذا أنا قدامك عمر: بسم الله لا تأكلنا فارس: وينه فيصل؟ سيف بقهر: مادري رد سيف من غير نفس..وهو يفكر بفيصل..اللي كان أقرب واحد له..الكل يشوفهم دائما مع بعض..و أخبار كل واحد عند الثاني..لكن فيصل خذله..خانه قبل يخون أسيل..هو الوحيد اللي إأتمنه عليها..عطاه الحق يبين لها حبه..يعلقها فيه..كل هذا لأنه واثق بفيصل..لكن بالأخير فيصل رمى كل هذا وراه.. عمر: بدري أخ فيصل فيصل استغرب وجود سيف ما توقع يكون موجود لأنه أكيد ما يبي يشوفه..أما سيف فكان منزل راسه في الأرض وهو يحس بالقهر..فيصل كان يسلم على الشباب و وصل عند سيف..رفع سيف راسه يطالعه بقهر..كيف يجي بهالبرود و يوقف قدامه و لا كأنه سوى شي..تذكر أسيل وحالتها..تذكر دموعها..و حزنها..وقف قباله و عطاه بوكس على وجهه بكل قوته خلاه يطيح على الأرض..تركهم و راح و الكل مصدوم من اللي سواه..تجمعوا على فيصل اللي قام عن الأرض وهو يمسح الدم اللي سال من فمه..سألوه وش فيهم..لكنه ما رد و تركهم هو بعد و راح.. عمر انصدم: وش فيهم؟ انجنوا! فارس بإستغراب: طلال ليه ساكت تعرف شي؟ طلال: لا..بس يمكن متهاوشين في سيارة فيصل/ كان جالس في سيارته بعد ما طلع من الإستراحه وهو معصب..ما تخيل في يوم يصير هالموقف بينه و بين سيف..كان عاذره على قهره..و متوقع منه أكثر..بس بعد حز في خاطره هوشتهم..(أنا غلطان كان لازم أكلم سيف أول..مو يتفاجأ باللي صار..بس لأني عرفت إنه مستحيل يفهمني أو يعذرني) تذكر الأيام اللي راحن في بيت خواله..خلته يسمع عن سهى أكثر..يكلمها أكثر..شافها صدفه بالعيد..و صارت له مواقف معها..خلته يعرفها أكثر..و يحبها..عكس أسيل اللي بحياته ما شافها..أو وضحت له حبها..حس إنها متقبلته كأمر تعودت عليه..(اللي يحب يبين عليه..مثل سهى باين حتى من سلامها..من كلامها معي..لكن أسيل تتهرب من أي فرصه تجمعني فيها..و بحياتها ما هتمت فيني) تذكر عند خواله كيف كانت تهتم فيه..كل شي يطلبه..أو بس يحتاجه بدون يطلبه..يلقاها جابته له..هذا دليل على إهتمامها..على إنها تفكر فيه كل وقت.. شغل سيارته و مالقى مكان يروح له إلا البيت..لأنه كان طفشان و ماله خلق يشوف أحد.. دخل البيت و شاف رنا اللي أول ما شافته كشرت في وجهه..و رجعت تكمل كلامها بالتليفون..طنشها و طلع لغرفته..و قبل يدخل شاف رغد بتطلع من غرفتها..و أول ما شافته وقفت لحظه قبل تصد عنه و تدخل غرفتها..عصب أكثر و دخل غرفته و ضرب الباب بقوه..كان يدور في غرفته بقهر..لكنه ما استحمل..و راح لغرفتها..فتح الباب بقوه خلاها تفز.. فيصل: و بعدين يعني! ماراح تكلموني أبدا؟ رغد اتفاجأت: أكيد لا..أنت اخوي يا فيصل مهما سويت فيصل: يعني زعلانه مني؟ رغد بقهر: أكيد زعلانه و مقهوره بعد.. فيصل أنت متوقع إن اللي سويته سهل! فيصل: ما قلت إنه سهل بس....كنت أبيك تقدرين شعوري أنا بعد رغد: شعورك! هذا اللي قهرني أكثر..من متى عندك شعور اتجاه سهى ؟ و مشاعرك اللي من سنين لأسيل وين راحت؟ فيصل: اللي صار صار يا رغد ما يفيد اللحين اتكلم عن الماضي مع أسيل..لا تنسين انها اللحين خطيبة نادر..يعني لازم تنسى و أنا انسى اللي كان بيننا..وهو أصلا ما فيه شي كثير نتذكره رغد انصدمت: ماضي!! لحق يكون ماضي..و كل هالسنين نسيتها..كل هالسنين تشوفها ما تسوى تتذكرها!! مو قادره افهمك يا فيصل؟ وش غيرك؟ من متى حبيت سهى ؟ فيصل: هالوقت القصير مع سهى و صلني منها أكثر من اللي وصلني من أسيل كل هالسنين رغد بسخريه: هذا الحب بنظرك يا فيصل؟ شي لازم تشوفه..و كيف وصلت لك حبها ؟ فيصل: رغد..هاذي بنت خالتك و بتكون خطيبتي ماراح اسمحلك تتكلمين عنها كذا رغد: خلاص يا فيصل أصلا ما فيه شي نتكلم عنه..و تبي الصراحه أسيل كانت خساره فيك دامك تغيرت بهالسرعه فيصل: صدقيني بتنسى لانها تعودت علي لا أكثر مو كل هذا حب رغد: هذا اللي اقنعت فيه نفسك عشان تبرر اللي سويته فيصل: افهميه مثل ما تبين تركها و طلع لغرفته..و نادر اللي كان طالع من غرفته و سمع كلامهم..أول ماسمعه طالع رجع لغرفته..وهو يفكر..(ماراح يرجع لها..بعد كلامه أكيد انه يبي بنت خالته..مادري وين الحب اللي اسمع عنه من جيت..شكلها هي اللي كانت تحبه..وهو لا..لو كان يحبها ما نساها بهالسرعه) احتار ما يدري وش يسوي اللحين..حس انها كاسره خاطره بعد اللي سواه فيها فيصل..لكن ما بيده حل يساعدها فيه..يدري انها ما تبيه..أكيد هو بالذات..لأنه أخو فيصل..بس كيف يقول لأبوه و عمه لا.. في بيت أم راكان/ دقت سهى على مرام و الدنيا مو سايعتها من الفرحه.. سهى: باركي لي يا مرام و أخيرا..مو قادره أصدق! مرام: وش صاير؟ سهى: خطتنا نجحت مو عارفه كيف اشكرك يا مرام مرام فرحت: أي خطه؟ سهى: خالتي كلمت أمي و قريبا جدا بيجي فيصل يخطبني مرام تشهق: والله! فيصل ترك أسيل سهى: إيه بعد كل اللي صار عند خوالي دخلت قلبه يا مرام و ما بقى مكان لها مرام: قلت لك خليك أقرب له منها خليه يشوفك و يعرفك..شفتي صارت أسيل مجرد ماضي كان متعلق فيه..ألف مبروك سهى: الله يبارك فيك سكرت مرام و هي تضحك..تحس بلذة الإنتصار..و تتمنى تشوف حالة أسيل اللحين..طلعت من غرفتها و شافت ريهام شكلها كانت جايه لها.. مرام: وش عندك؟ كأنك جايه بتقولين شي ريهام: سمعتي الأخبار الغريبه؟ مرام بغرور: قصدك خطبة فيصل؟ ريهام: لا مو فيصل..اللي خطبها نادر مرام ماستوعبت: أنت عن إيش تتكلمين؟ ريهام: كلنا نعرف إن أسيل مخطوبه لواحد من عيال خالي بس توقعته فيصل باين من كلامهم لكن اللي خطبها نادر مرام بصدمه شلت تفكيرها: نادر..خطب أسيل..(تصرخ)كيف عرفتي؟ ريهام: أمي كلمت أم فارس و قالت لها و..... لكن مرام ما سمعتها..دخلت الغرفه و سكرت الباب بكل قوه..و قهر..قفلته عشان ما تدخل وراها ريهام..سمعتها تطق و تتكلم لكنها ما هتمت..كانت مصدومه من اللي سمعته و لا تبي تصدق..(لااااا مستحيل هالشي يصير..أسيل تآخذ نادر مني!!و الله أموتها قبل يجي هاليوم) راحت تتأكد من الخبر..من أمها بنفسها..و رجعت لغرفتها..بعد ما تأكدت من أمها..إن خبر هالخطبه صحيح..حست انها بتنجن..ما صدقت انها بعد مارتاحت من أسيل..تأخذ منها نادر مره وحده..(لو تموتين يا أسيل..ما تاخذينه) دقت على سهى.. سهى: هلا بأحلى مرام مرام بقهر: سهى بأموت من القهر سهى خافت: مرام خوفتيني وش فيك؟ مرام: نادر خطب أسيل سهى تشهق: وشو؟؟!! مرام بحقد: اللي سمعتيه..الظاهر يوم فيصل رفضها خالي خطبها لنادر سهى انصدمت: لاااا و أسيل كيف وافقت عليه؟! وهو كيف رضى فيها؟ يعني ما يدري انها تحب فيصل! مرام: مادري يمكن غصبوها سهى: وش بنسوي؟ مرام: طبعا ما راح اتركها تاخذه سهى: وش بتسوين؟ مرام: لازم ألقى حل سكرت سهى من مرام..و الفرحه اللي كانت طايره فيها..تبددت..خافت يتم زواج نادر و أسيل..حست ان مرام يمكن تحاول تخرب بينها و بين فيصل عشان يرجع يأخذ أسيل..(لا مرام هي اللي ساعدتني في هالشي..و ما قالت انها لو كانت مع فيصل احسن..هي ما تبيها قريبه منها أبدا...يارب تلقى حل..و تتفركش هالخطبه و تتزوج نادر عشان ارتاح) *يوم السبت* في كلية اللغة الانجليزيه/ قبل تبدأ المحاضره الأولى..وصلت رغد و سلمت على بسمه و طيف..و التفتت على حلا..اللي كانت هي بعد توها واصله.. رغد: ما جت أسيل؟ حلا: ما أظن انها بتجي بسمه استغربت من تكشيرهم: ليه لا يكون تعبانه؟ رغد: فيصل خطب بنت خالتي طيف و بسمه: و أسيل؟!! رغد: خطبها اخوي نادر طيف: ليه صار كل هذا؟ مو هم يحبون بعض؟ قالت لهم رغد اللي صار..و قالت لحلا اللي قاله فيصل.. طيف: يا عمري يا أسيل رغد: بس يا بنات لاتفتحون معها السالفه لأنه باين انها مو حابه تتكلم فيها..و ما تبي أحد يشفق عليها أخاف تتضايق زياده بسمه: الله يعينها..أجل كيف بتتحمل لو قابلت سهى رغد: والله مو عارفه وش اسوي لا معها و لا مع نادر اللي ساكت و ما تكلم بأي شي في المستشفى=المغرب/ كانت ياسمين طالعه من غرفة الملفات..و شافت ماجد واقف يكلم حنان..تأففت من خاطرها..كانت تظن انه خلاص ماراح يرجع مره ثانيه..و اللي قهرها زياده ابتسامته الواثقه..و كأنه يحس انها المفروض تفرح بشوفته..قررت تسفهه و لا كأنه موجود..و راحت للمراجع اللي شافته جاي عندهم..و كان نفس المراجع اللي يشبه أبوها..حاولت انها ما تطالع فيه كثير..بعد ما تأكدت ان ماله أي صله فيهم..لكنها ما قدرت الا انها تسرق نظرات له بين لحظه و الثانيه..و نست وجود ماجد..اللي كان يراقبها بقهر..و تفاجأت يوم سحب منها الملف و رماه على المراجع..طالعته بقهر..و طالعه المراجع بإستغراب.. المراجع: خير أخوي! فيه شي؟ ماجد: ايه..خذ ملفك و لا أشوفك بهالمستشفى مره ثانيه المراجع بقهر: و بأي صفه تطلب هالطلب؟ ياسمين بقهر: ممكن تروح للي أنت جاي لها و تتركني اشوف شغلي ماجد و لا كأنه سمعها: ان كنت ماتبي تتورط بمشاكل أنت مو قدها اطلع اللحين أحسن المراجع عصب: وين المدير؟ ماجد: حنان..اطلبي خالي أبوفايز و قولي ان فيه مراجع متحرش بموظفه هنا ياسمين عصبت: أنت وش جالس تقول؟! هو ما سوى شي ماجد بعناد: حنان تحرش أو لا؟ حنان تجاريه: ايه تحرش و مو أول مره بعد دائما كل ما جاء يضايقنا ماجد: تشهدين يا فاتن؟ ياسمين كانت تحس ان الدم بدأ يغلي بعروقها..و طالعت فاتن..اللي بنظرات خايفه و معتذره..نزلت راسها.. فاتن: ايه اشهد ماجد يلتفت للمراجع: هاه للحين تبي المدير..و الا تروح و بلا فضايح؟ أخذ المراجع ملفه بقهر و تركهم..و التفت ماجد لياسمين يطالعها بنظرة انتصار.. ماجد: معليش حلوتي اعرف انه معجبك بس بهالمستشفى يا أنا يا ما فيه أي جو غيري ياسمين تصارخ عليه: أنت واحد حقير..حقير و تافه و الأفكار القذره اللي تفكر فيها تحسب الكل يفكر مثلها لكن لا إن كنت راضي على نفسك تكون واطي فيه ناس للحين عندها أخلاق و محترمه نفسها وقف ماجد يطالعها بنظرات عجزت تحدد معناها..لكنها طالعته بإستحقار يأكد له كل كلمه سمعها منها..تركها و راح..فاتن كانت ترتجف من الخوف..ما تخيلت من أول ما شتغلت ان فيه وحده تقدر تقول لماجد هالكلام و بوجهه..أما حنان فراحت ورى ماجد..لكنها رجعت بعد لحظات.. حنان تطالعها بفرح: راح لمكتب المدير كانت ياسمين للحين واقفه وهي تتنفس بقوه مقهوره منه كانت تتمنى تخنقه بيدينها..قطعت أفكارها فاتن وهي تمسك يدها اللي كانت ترتجف من كثر غيضها.. فاتن: ياسمين ليه سويتي كذا؟ أنت ماتدرين إنه يقرب للمدير أكيد راح يطردك من شغلك! ياسمين بعصبيه: مايهمني لكنها تذكرت إنها ماشتغلت هنا إلا عشان تتعود تعتمد على نفسها..كيف تتنازل عن هالشغل بهالسهوله..مو كل يوم بتلقى أحد يجيب لها شغل..(هذا اللي كنت أبي أثبته لنفسي وللناس! هذي هي قوتي واعتمادي على نفسي! أضعف من أول مشكله تواجهني! واحد مايسوى يهد كل اللي أبيه! لاااا لازم أتعود اتحمل وأمسك أعصابي إذا كنت أبي اثبت إني قادره على تحمل مسئوليتي و لا بيكون خوفهم علي بمحله وصادقين إني لازم أكون تحت رعاية أحد أو أضيع؟ وهذا اللي ماأبيه..أنا أقدر اهتم في نفسي بعيد عن الكل وهالشي اللي المفروض أتعود عليه من اليوم) مشت عن البنات و وصلها صوت فاتن.. فاتن: ياسمين وين رايحه؟ لا تكبرين المشكله! ياسمين تلتفت عليها: لاتخافين بأحاول أحلها فاتن: الله يوفقك راحت ياسمين وفاتن التفتت على حنان بقلق.. فاتن: تتوقعين يطردها؟ حنان: يسويها..ماجد مو متعود أحد يعارضه كيف لما وحده مثل هاذي تهزأه! زين إن اكتفى بطردها بس..أنت ماتعرفين ماجد إذا كره أحد وش يسوي فيه فاتن بخوف: مسكينه ياسمين حنان: و أنت ليه مهتمه فيها؟ من متى عرفتيها؟ خليها تتأدب من يوم جت وهي شايفه نفسها ماأدري على ايش وتتصرف كأنها بنت عز يكفي إنها ماكلمتنا عن نفسها أو أهلها! مسويتلي فيها الفتاة الغامضه فاتن: حرام عليك والله ياسمين محترمه وطيبه حنان: وهالمحترمه حنا بنظرها مو محترمات وما نستاهل تتكلم معنا ماتشوفينها كيف تطالعنا بإستحقار وكأننا ما نسوى؟ فاتن: معها حق كيف تبينها تحترمنا وهي شايفتنا وش نسوي؟ حنان بقهر: لا والله مو عاجبك اللي نسويه! خليني أذكرك إن هاللي نسويه هو اللي جايبلك هالجوال اللي معك وهو اللي يصرف عليك ولا كان جلستي على راتب هالوظيفه اللي ياله يكفي حاجة أهلك فاتن تتنهد وتغير الموضوع اللي كل يوم يضايقها أكثر.. فاتن بترجي: حنان أنت تعرفين ماجد دقي عليه قولي له يسامحها حنان: وأنت على بالك بيسمع مني! ماجد مايسمع غير نفسه وإذا عصب مثله قبل شوي اللي يحب نفسه مايجي يمه يعني من اللحين ترحمي عليها في ممر مكتب المدير_ وقفت ياسمين في آخر الممر وهي تشوفه جالس عند السكرتير وللحين ما دخل عند المدير..يعني الفرصه مافاتت ويمكن تقدر تصلح اللي سوته..حاولت من مكانها تشوف ملامحه وتعرف لو كان معصب للحين..لكنها ماشافت شي من ملامحه..كان جالس بهدؤ وشموخ ولا هو حاس بشي في الدنيا اللي حوله..كرهته أكثر وحقدت عليه..بعدت عن الممر وتسندت على الجدار مغمضه عيونها تحاول ترتب كلام تقوله بسرعه قبل يدخل للمدير..لكنها كانت تستخسر فيه أي كلمة اعتذار..لأنه آخر واحد يستاهل تتنازل و تكلمه كيف تعتذر منه..بس لازم ماتخسر شغلها..وتحديها لنفسها..تنهدت بقوه وعزمت تروح له والكلام يطلع في وقته..لكنها أول مافتحت عيونها شهقت مفزوعه..كان واقف قريب منها ويطالعها..كانت بتهزأه لكنها مسكت نفسها وتذكرت اللي هي جايه عشانه..بس مع كذا وقفت جامده تطالعه و مو قادره تتكلم..هي اللي ماعمرها ترددت في قراراتها راح منها كل الكلام..طالعها وانرسمت على شفايفه ابتسامة استهزاء.. ماجد بغرور: ليه جايه وراي؟ ياسمين: أناا... ماجد: خايفه تنطردين صح؟ ياسمين هزت رأسها بمعنى إيه لأنها ماتبي تتكلم حست لو بتفتح فمها بكلمه بتقول كل اللي في خاطرها..وكل اللي يستاهله هالحقير..لكنها ماتبي تخسر تحديها.. ماجد: فعلا أنا ناوي اطردك،، يله سمعيني كيف بتخليني أغير رأيي،،مو هذا اللي تبينه؟ هزت ياسمين رأسها مره ثانيه..و هي ما تتخيل كيف تعتذر لهالإنسان وهو يستاهل كل اللي قالته له.. وهو بيقبل هالإعتذار أو لا.. ماجد تكتف و وقف بكل غرور وغطرسه وهو يطالعها من فوق لتحت.. ماجد: اعتذري ياسمين بقهر وبدون ماتطالعه بصوت ياله سمعه: آسفه حست إن قلبها يوجعها من القهر اللي كابتته..ما كانت تبي ترفع عيونها عشان ماتشوف ضحكته وإنتصاره عليها..كانت تخاف تنفجر في وجهه وتخرب كل اللي سوته..لكنها رفعت رأسها له لا إراديا..وانصدمت من نظرته..ماشافت نظرة الاستهزاء ولا الإبتسامه الساخره..كان يطالعها بإستحقار وخيبة أمل..ما صدقت اللي تشوفه..لكنها رجعت تشوف الإستهزاء في نظراته..كانت تحس إن الزمن واقف على هاللحظه اللي ذاقت الذل فيها..وقطعها الدكتور اللي مر من عندهم واللي كان عند المدير..حست بنفسها وبوقفتها اللي مالها داعي مع هالإنسان..كانت بتروح لكنها سمعت السكرتير اللي جاء يسأل ماجد.. السكرتير: المدير خلص إجتماعه ما راح تقابله؟ ماجد: لا بأقابله راح ماجد مع السكرتير وياسمين واقفه مصدومه..(يعني بس كان يبي يذلني!!وهو ناوي يطردني!أنا الغبيه ليه اعتذرت له؟كيف توقعت إن واحد مثله بيحس في غيره أو يهتم حتى؟ بس أنا ماراح انتظرهم لين يطردوني أنا اللحين بأترك الشغل) وراحت وهي تحس إن القهر بيذبحها..و بتندم على هالإعتذار العمر كله..حست انها صارت ما تعرف تفكر..و لا تعرف وش تسوي..وصلت عند البنات وأول ماشافتها فاتن ركضت لها.. فاتن: ياسمين طمنيني وش صار؟ مشت ياسمين لدرجها وأخذت شنطتها.. ياسمين: معليش يا فاتن مو قادره أتكلم اللحين وتركتهم وراحت.. حنان بقهر: والله شايفه حالها هالبنت! تستاهل اللي جاها فاتن: يعني انطردت؟! حنان: أكيد ولا وين راحت والدوام للحين ما خلص ياسمين كانت تطلع جوالها من الشنطه عشان تدق على السواق..لكنها غيرت رأيها..(لا ليه أروح وقهري فيني؟أنا مو خلاص انطردت لازم اسمعه رأيي فيه وأطلع كل اللي كنت كاتمته في نفسي) وراحت تنتظره تحت عند مصعد المدير الخاص..أكيد بينزل فيه..وقفت بالممر الفخم لحالها تنتظره عشان تنهي أيام شغلها في هالمكان وهي مرتاحه..و بعد عشر دقايق طلع من المصعد..شافته لكنه ماشافها كان معطيها ظهره ويمشي..لكنها لحقته بسرعه.. ياسمين: اسمع ماجد التفت وتفاجأ يوم شافها.. ياسمين: دامك إنسان ما تحس وما عندك دم و لاتهتم إذا دست على غيرك ليه طلبت مني اعتذر؟ دام هالشي ماراح يرضي غرورك وعقلك المريض! أكيد ارتحت اللحين يوم طردتني من شغلي بس خلني أقول لك إني تاركه الشغل من اللحين ومدام تركته أبي أقولك أنك إنسان تافه و سخيف صدقني أنت مسكين وكل هاللي تسويه من النقص اللي فيك ماجد ببرود: خلصتي؟ ياسمين تتنفس بصوت مسموع كانت مقهوره منه..و من كل اللي صار لها بسببه..حتى يوم طلعت كل مافي قلبها..كرهت تصرفها..من متى كان أحد ما يسوى يخليها تفقد أعصابها..من متى وهي توقف تتكلم مع واحد ماتعرفه في مكان لحالهم..حست إنها مو عارفه وش تسوي..عشان كذا تركته ومشت بدون ما ترد عليه..لكنها فجأه شافته قدامها وسد عليها الطريق..رفعت رأسها تطالعه بقهر..و شافت قهر مثله في عيونه.. ماجد: اسمعيني مو ماجد اللي يقطع رزق أحد و لو كنت أبي أذلك مثل ماتقولين صدقيني كنت بتتمنين لو طردتك من شغلك ولا سويت اللي أقدر اسويه فيك..أنا مو مهتم بالخرابيط اللي قلتيها وما حركت فيني شعره عشان أرد عليك لأني رأيك فيني ما يهمني وعشان أريحك من هالقهر اللي مسوي فيك كذا أنا كنت أبي المدير في موضوع عائلي خاص ولا كنتي طاريه في بالي بس يوم شفتك جايه تعتذرين ما حبيت أرجعك خايبه لكن في المستقبل إن شفتك في هالمستشفى مره ثانيه ماأبي أسمع منك كلمه وحده تخصني لا من قريب ولا من بعيد،، فهمتي؟ تركها هالمره هو ومشى بكل غرور عنها..مشت ياسمين مو عارفه وين..ما تدري ترجع لشغلها أو تتركه..شافت كرسي وجلست في واحد من ممرات المستشفى تفكر..(أترك الشغل؟ بس كذا بأكون جبانه وكأني خايفه منه،،ولو ماتركته احتمال أشوفه مره ثانيه؟ كيف بأتصرف معه؟ وأنا ليه أكلمه من الأساس خلاص بأصير في حالي وهو عنده خويته حنان يطلب منها اللي يبي أنا مو مضطره أتعامل معه،،صح لأني من اليوم وعدت نفسي إني أتعود على كل شي أو اجلس في البيت أحسن) اتصلت على السواق وقالت له يجي يأخذها..و بعده اتصلت على فاتن.. ياسمين: أهلين فاتن فاتن: هلا ياسمين وش صار عليك؟ ياسمين: لاتخافين ماصار شي بكره بأداوم بس اليوم أبيك تأخذين لي إجازه فاتن بفرحه: من عيوني ياسمين: تسلمين يافاتن مع السلامه فاتن: مع السلامه وأشوفك بكره قالت جملتها وسكرت وهي تطالع حنان اللي باين إنها منصدمه.. حنان: ياسمين بتداوم؟! فاتن: إيه حنان: كيف يعني ماطردها! أجل ليش راحت؟ فاتن: ما أدري أهم شي إنها بتجي بكره تركتها فاتن وراحت تكمل شغلها..وحنان مقهوره دقت على ماجد بتسأله لكنه ما رد عليها..وزاد حقدها على ياسمين اللي كانت تتوقع إنها ارتاحت منها.. في بيت أم فارس/ طلعت أسيل من غرفتها..اللي ما طلعت منها طول اليوم..كانت بتنزل..لكنها وقفت بأول الدرج..و هي تسمع كلام فارس و سيف..اللي كانوا في الصاله.. فارس: يعني تضربه كذا قدامنا كلنا بدون سبب!! سيف: إكتشفت إنه ما يسوى فارس بإستغراب: سيف وش صار لك! مهما كان هذا ولد عمك..هاذي مو من عوايدك! سيف: و الطعنات ما تجي إلا من الناس القراب فارس: عساه سبب يسوى اللي مختلفين عليه سيف: أكيد يسوى لدرجة يمكن ما أكلمه بعد هاليوم فارس انصدم: سيف!..... سيف يقاطعه: أنا لازم اطلع اللحين مع السلامه طلع سيف..و أسيل رجعت لغرفتها..سكرت بابها و تسندت عليه..(احس إن كل شي بحياتي تغير فجأه..و لا أدري ليه؟ وش اخطيت فيه؟ كيف أعيش بعد اليوم؟ و الإنسان اللي عطيته من سنين قلبي..و عقلي..و أيامي..يخوني فجأه و بدون أي عذر أو ذنب! وش بقى لي بعدك يا فيصل؟ كل شي اخذته) فزت يوم حست بأحد يطق الباب..بعدت و فتحته.. أسيل: فارس! فارس: وش رأيك؟ ابتسمت أسيل: تفضل فارس يدخل: من أمس ما شفتك ليه ساكنه في غرفتك؟ أسيل: زهقانه و ما عندي شي اسويه فارس: أسيل وش فيك؟ حتى صوتك متغير أسيل: من قل ما ألقى أحد أكلمه في هالبيت..وش رأيك توافق على مها و تسكنون عندنا فارس: مابي مها عندك وحده غيرها؟ أسيل تفكر: إيه صديقاتي بسمه أو طيف فارس: أنا اقول تتزوجين و تروحين أنتي احسن أسيل كشرت من هالطاري و رجعت لهمها اللي ما يبي تنساه..أما فارس فكان سرحان..ما يدري ليه خطر في باله إنها يمكن ترشح جوري.. فارس: أنا طالع تبين شي؟ أسيل: إيه أبي توديني معك أمي طالعه بالسواق فارس: وين؟ أسيل: عند جوري فارس بإستغراب: ليه؟ أسيل: من العيد ما شفتها و ذاك اليوم تعرف كيف كانت تعبانه فارس: وش كان فيها ذاك اليوم؟ أسيل: أمي و خالتي يقولون يمكن أحد نضلها..بس أنا عارفه وش فيها؟ فارس بإهتمام: وش فيها؟ أسيل: كانت فاقده أمها بالحيل و تحس إنها تضايق خالي ناصر إذا كلمته لأنها تذكره بأمها لدرجة تتمنى لو ما شافها سرح فارس يفكر..كان ناسيها كل هالأسبوع و لاهي بشغله..لدرجة شك إنه نساها..لكنه أول ما يسمع أي شي عنها..يبدأ يفكر و يهتم فيها..ما عرف هذا حب..أو هي شي يرتاح فيه من شغله..يمكن هذا اللي يجذبه لها..إنه يفكر بشي غير الشغل..و الصفقات..و الحسابات.. أسيل: فارس وين رحت؟ فارس: تذكرت شي في الشركه أسيل بإحباط: لا تقول ماراح تآخذني معك فارس رحمها: لا و لا يهمك بآخذك بس بسرعه اجهزي أسيل: دقايق و الحقك في سيارة سيف/ كان يدور في الشوارع بملل..كان أغلب وقته يقضيه مع فيصل..لكن اللحين مو طايق يشوف وجهه..حس و كأنهم بدلوه..مو فيصل اللي يعرفه من هالسنين..اللي كان لا يمكن يسوي فيهم كذا..خاف يروح لشلتهم و يشوفه هناك عندهم..كان يتمنى يسأله..كيف قدر يسوي كذا..بس فكر إن أسيل معها حق..السؤال هذا بيقلل من قيمتها..(بس اللحين فيه نادر اللي مادري وش ناوي يسوي بالوضع اللي انحط فيه؟ بس هذا نادر يعني مستحيل يعارض عمي بشي صغير..كيف اللحين بيصغره عند أبوي....يعني معقول هالخطبه تستمر و يتزوجون!) عجز يتخيل هالشي..صعب يجمع أسيل و نادر مع بعض..طول عمره مايشوفها إلا لفيصل..كيف إحساسها هي.. في بيت أم العنود/ كانت جوري جالسه في البيت لحالها..ياسمين في الدوام..و أم العنود عند جارتهم..ملت و هي لحالها..و دقت على ساره لكنها ما ردت على جوالها..فدقت على البيت.. مازن: مرحبا جوري استحت أول مره يرد عليها.. جوري: السلام عليكم مازن: و عليكم السلام..هلا و غلا وش أخبارك؟ جوري انصدمت و ما عرفت ترد.. مازن: وش فيك ما تردين؟ سكرت جوري و هي مصدومه..(معقوله هذا مازن! لا مازن محترم لايمكن يتكلم كذا..يمكن أحد عندهم) مازن استغرب..ليه سكرت..شاف الكاشف بيعرف هي داقه من البيت أو الجوال..لكنه انصدم وهو يشوف رقم غريب..مو رقم خالته..تذكر صوتها كان يحس إنه متغير..(شكلها مو أمل! والله إحراج لا تكون من بنات جيراننا) قام بسرعه لغرفة ساره..و دخل عندها.. مازن: سااااره ساره تفز: بسم الله! وش فيك؟ مازن بإحراج: وحده دقت تسأل عنك صوتها يشبه صوت أمل كلمتها على بالي هي بس البنت سكرت في وجهي و يوم شفت الرقم ما طلع رقم بيت خالتي ساره تضحك: زين ما تسوى السالفه كل هالخوف مازن عصب: كيف ما تسوى! وش بتقول عني البنت؟ ساره: كم الرقم؟ مازن: آخره ٦٦٢ ساره: هذا رقم بيت جوري..حرام عليك عاد ما لقيت إلا جوري تسوي فيها هالمقلب تلقاها اللحين ترتجف مازن: صوتها يشبه أمل ساره تفكر: صح بس جوري أنعم شوي مازن: زين دقي قولي لها ساره: إن شاء الله أخذت جوالها اللي كان على الصامت..و شافته مليان مكالمات منها..و دقت عليها.. ساره: مرحبا جوري: هلا ساره وينك؟ ساره: كنت حاطته على الصامت من يوم صحيت..أنت دقيتي على البيت؟ جوري بإحراج: إيه كيف عرفتي؟ ساره تضحك: مازن اللي رد عليك على باله إنك بنت خالتي أمل جوري: أنا انحرجت يوم بدأ يكلمني عادي و سكرت بوجهه توقعت أحد عندكم ساره: ليه؟ جوري: مادري بس ما صدقت إن أخوك مازن يسوي كذا ساره: صادقه هذا هو منحرج منك بالحيل جوري: حصل خير بدت تسولف معها..و مازن أشر لها إنه بيطلع..راح عنها وهو يفكر باللي صار..(ما شاء الله عليها سكرت على طول حتى ما قالت إني غلطان..شكل البنت أخلاقها عاليه) بعد نص ساعه..سكرت جوري من ساره..و استغربت و هي تسمع الباب يتسكر..(غريبه أمي رجعت بسرعه!) لكنها انصدمت و هي تشوف ياسمين.. جوري: ياسمين! ياسمين تدخل: أمي مو هنا؟ جوري: لا عند الجيران..ليه رجعتي بدري؟ تعبانه؟ ياسمين: لا بس اعتذرت عن باقي اليوم جوري: ليه؟ ياسمين: ما شبعت نوم و حسيت إني مكسله بأروح أبدل و أجي راحت ياسمين و جوري قامت تسويلها قهوه تصحصحها..و راحت ياسمين لغرفتها و هي تحاول تنسى اللي صار لها اليوم.. نزلت ياسمين: الله يا ريحة القهوه جوري: قلت خليها تصحيك ياسمين..(لا تخافين يا جوري عندي اللي مطير النوم من عيوني..مادري وش بيصر بعد اليوم مع هالماجد؟) سمعوا جرس الباب..و راحت الخدامه تفتح..بعدها دخلت عليهم أسيل.. أسيل: مساء الخير اتفاجأوا بجيتها..و كل وحده تطالع الثانيه..و تحمد ربها إن ياسمين قررت اليوم تطلع بدري..سلموا عليها و جلسوا.. أسيل: مليت في البيت لحالي قلت أجي عندكم ياسمين: حياك الله..أسيل آسفه على اللي صار معك كنت بأدق عليك بس ما أدري وش اقولك و حسيت إنك مليتي تسمعين عن السالفه أسيل تتنهد: معك حق أنا مابي افكر فيها بعد..أبي ارتاح ياسمين: بأقولك شي أنا متأكده إنه ماراح يقنعك بس مع كذا بأقوله أسيل تبتسم: قولي ياسمين: فيصل ما كان يحبك مثل ما تحبينه أنا ما أقول إنه كان يتسلى فيك بس يمكن كنتي مجرد حب طفوله تعود عليه و الدليل إنه ما فكر يخطبك لكن سهى شوفيه بسرعه نوى يخطبها و كأنه مل من الحب البعيد معك صار يبي شي رسمي و يمكن سهى بينت له قربها منه أكثر..أنا اتوقع حتى لو كنتم تزوجتوا ماراح تعيشين الحب اللي أنتي تخيلتيه كانت بعد فتره بتبين مشاعر فيصل الحقيقيه عشان كذا زين إنها بانت من اللحين سكتت أسيل و هي تفكر في كلام ياسمين..معقول يكون صدق..و تكون كل هالسنين عايشه بوهم..تمنت تكون غلطانه..عندها أحسن لو كان فيصل حبها و خانها..و لا تكون كل عمرها اللي راح مثل اللي كاذب على نفسه و مصدق كذبته.. ياسمين: ضايقتك؟ أسيل: لا ياسمين: أنا ما افهم بهالسوالف مادري ليه تكلمت...أقوم أكلم عبير احسن و اخليك مع جوري تركتهم و راحت.. جوري: ما أعجبك تحليل ياسمين؟ أسيل: لا جوري: ما تبين تكون سهى الحب الحقيقي و الوحيد في حياته أسيل: ما أحد فاهمني غيرك يا جوري جلست أسيل مع جوري يتكلمون..و يتناقشون..في هالسالفه..كانت أسيل مخنوقه و تبي تكلم أحد..ما قدرت تكلم رغد و تجلس تلوم أخوها قدامها..لأنها تعرف إنها بتتضايق و تتأثر من كلامها..و حلا ماراح تفهم اللي تحس فيه..لكن الكلام مع جوري كان و كأنه بينها و بين نفسها.. جوري: صار لك ساعه تتكلمين عن فيصل..زين و نادر؟ أسيل: تصدقين طول هالوقت ما طرى على بالي كل ما فكرت وش أسوي معه ارجع و أقول لو فيصل ما سوى كذا..يمكن لأني مو قادره استوعب إني مخطوبه له..كنا نخطط كيف نخليه يحب ياسمين فجأه اشوف نفسي أنا مخطوبه له....(سكتت لحظه) جوري أنتي يوم كنتي مخطوبه لفارس و أنت مو عارفه عنه شي وش كنتي تحسين فيه؟ جوري اتفاجأت بالسؤال: أنا غير وضعك يا أسيل..أنا شفت في فارس نجاتي من بيت عمي الله يرحمه و بعد ما كنت أحب أحد أسيل: ياليتكم تزوجتوا كان اللحين أنتي معي في البيت ابتسمت جوري و هي تقول في خاطرها..(ما تنفع ياليت يا أسيل) يتبع |
|
|
#12 |
|
|
رد: تكملة رواية قلوب تنزف عشق
في سيارة ماجد/
دخل ماجد في سيارته من البوابه الخارجيه..و وقف عند المدخل الرئيسي للفيلا..نزل ودخل للصاله الواسعه..وكالعاده الفيلا فاضيه..وكأن ما أحد يسكنها غير الخدم..أبوه دائما في الشركه أو مسافر..وأمه متوفيه من سنين..و له أخوين..واحد كل حياته شغل و سفر مثل أبوه..وللحين متزوج ثلاث ومطلقهن..و الثاني توفى هو وزوجته من سنتين..و تركوا له ورد..طفله صغيره بعمر ست سنين..يتيمة أب وأم..مثل ماكانت أمها..اللي تكون بنت عم ماجد..و تربت معهم في البيت مثل اختهم..والكل تفاجأ بزواجها من اخوه..لكن أخوه كان يحبها من أول ماسكنت عندهم بصمت..دارت عيونه في الصاله يتذكر ذيك الأيام..ذاك الوقت كان يحس إن هذا بيت..و إن اللي يسكنون فيه عائله..لكن من راحوا..وهو مايطيق يجلس فيه..خاصه يوم كانوا زوجات أخوه فيه..يكفي آخر وحده نظراتها له..و حركاتها..كانت تخليه بالأيام مايجلس في البيت..كان بيخسر اخوه الوحيد بسببها..لكن الحمدلله إن اخوه عرف حقيقتها و طلقها..من بعد بنت عمه سماح أم ورد..مافيه ولا بنت قدرت تخليه يحترمها..كلهم في عينه مثل بعض..بس كل وحده و لها طريقتها..(حتى هي..ياسمين..مثل الباقيات..مادري ليه في لحظه حسيت انها تفرق عنهم..بس مثل ما قالت حنان كل هذا تمثيل عشان تزيد من قيمة نفسها..و اللي صار اليوم أكبر دليل..كيف تجي و تعتذر و هي ما أخطت في شي بالعكس أنا اللي استفزيتها..لو كانت مثل ما تحب انها تبين انسانه محافظه على نفسها و كرامتها..كان وقفت على موقفها ولا غيرته...خلاص انتهيت منك يا ياسمين صرتي ماتسوين حتى وقتي الضايع) طلع فوق للإنسانه الوحيده اللي تسوى حياته..و دخل غرفتها..شافها على كرسيها الرمادي..اللي مقيد خطواتها..و حارمها تعيش طفولتها مثل باقي الأطفال..راح فيها كل مكان في العالم..يبي يرجع الحياة لخطواتها..لكن هالشيء كان مستحيل..و من يومها و هو يحاول يعوضها عن عجزها..يحاول يجيب لها كل الدنيا اللي مو قادره تروح لها.. التفتت له المدرسه الخاصه اللي كانت تجي تعلمها..و اعتذرت و طلعت..أما ورد فمن يوم شافته و النور اشرق في ملامحها..كانت متعلقه فيه و تحبه حيل..لانها اصلا ماتشوف غيره يهتم فيها و يحبها.. ورد: بابا ماجد ماجد يدخل و يشيلها من كرسيها..و يطلع فيها للبلكونه.. ماجد: يا روح بابا ماجد ورد: اليوم تعلمت أشياء كثيره..ما رضيت المس تروح خليتها تعلمني زياده(كملت وهي تضحك) شكلي تعبتها ما صدقت شافتك راحت بسرعه ماجد يضحك لضحكتها: و لا يهمك حبيبتي ادرسي الوقت اللي تحبينه و اذا مليتي من المس هاذي نجيب غيرها ورد: لا أنا أحبها ماجد: هاه راح تعلميني اللي تعلمتيه اليوم؟ ورد بفرح: ايه ماجد: خلاص أول نطلع نآكل آيس كريم و نتمشى و بعدين نرجع ندرس ورد تضمه بقوه: هيييه أنا احبك مره بابا ماجد في بيت نجود/ كانت تحس بملل فضيع..بعد رمضان و أجواءه..كانت تشتغل كل يوم..لأنها رجعت تساعد جارتها في عمل المعجنات و بيعهن..صح ما كانت محتاجه فلوس..بس هي تشجعت للشغل أكثر..عناد في سيف اللي ما كان يبيها تشتغل..حست بالراحه و هي تخالف رأيه..حتى لو كان هو ما يعرف بهالشي..لكن اللحين خلص الشغل..و صارت فاضيه..طالعت بدبلتها اللي في أصبعها..ليه للحين لابستها..مسكت جوالها..تقرأ الثلاث مسجات الوحيده اللي فيه..و اللي كانت منه..عمرها ما فكرت تكلمه..لكن في هاللحظه حست بفضول تعرف ردة فعله على إتصالها..وش بيقول لها..لكنها بسرعه تراجعت عن هالفكره..(و الله مو عارفه وش نهايتي معك ياسيف؟ وش ناوي عليه؟) راحت تدور لها شي تشغل نفسها فيه..لكنها سمعت جرس الباب يدق..شافت ساعتها عشر و نص..(مين اللي جاي هالوقت؟...يمكن أحد من الجيران محتاج شي) طلعت برى..و فتحت باب الشارع..للحظات ما شافت أي أحد..كانت بتسكر لكنه دخل..ما صدقت و هي تشوف سيف قدامها..انصدمت لأنها ما حضرت لو تشوفه وش بتقول له..أو كيف بتتصرف.. سيف كان يطالعها..بجلابيتها القطن اللي بنص كم و مقلمه أبيض برمادي..و رافعه شعرها الطويل ذيل حصان..كانت بسيطه بالحيل..لكن الشعور اللي تحركه داخله مو بسيط بالمره..أول ما شافها حس براحه ما حسها من شهر..من يوم تركها..كان مشتاق لها..و خايف عليها لانه تركها لحالها..كان يبي يتأكد..يمكن يقدر ينساها..لكنه تأكد ميه بالميه انه يحبها.. سيف: ليه ساكته؟ نجود: و أنت ليه ما تتكلم؟ سيف: أنا آسف على اللي صار مني آخر مره نجود: و أنا آسفه على اللي قلته لك سيف بإهتمام: يعني ما كنتي تقصدينه؟ نجود بصراحه: سيف أنا مو عارفه معك أي شي..أعرف انك تكذب علي و المشكله احس اني أصدقك..أعرف ان كل اللي تسويه تمثيل علي لكنه يأثر فيني بعد سيف مسك يدها و سحبها..و جلسوا عند الدرج.. سيف ما ترك يدها: نجود يمكن غلطتي من البدايه اني ما كلمتك بصراحه نجود كملت: و ما قلت لي انك متزوج سيف انصدم: متزوج! أنا؟ نجود: ايه و لا تنكر كانك تبي نتكلم بصراحه سيف: مين اللي قال لك اني متزوج؟ نجود: ما أحد قال لي أنا عرفت سيف يضحك: و كيف عرفتي؟ نجود: هي اللي دقت عليك يوم كنا في السطح و ما قدرت ترد عليها قدامي و ارسلت تطلبك و رحت لها...أنا دقيت عليك وقتها و لا رديت علي أكيد كنت معها سيف يبتسم: حلو! كل هالقصه ألفتيها و صدقتيها..الظاهر مليتي من تأليف القصص على السيارت و اللي فيها قلتي تألفين علي هالمره نجود: طبعا بتنكر سيف: وش أنكر؟ كل اللي قلتيه مو صح..اللي دقت علي ذاك اليوم أسيل أختي..و ماقدرت ارد عليك لآني كنت اوصلها هي و أمي لخالتي..تبيني ادق عليها تتأكدين يتبع |
|
|
#13 |
|
|
رد: تكملة رواية قلوب تنزف عشق
نجود حست انه يكذب عليها..و يحاول يغطي على نفسه..لكنها تذكرت انها شافت لقب اللي دقت عليه..و حبت تتأكد..
نجود: ايه دق عليها سيف طلع جواله..و بحث في الأسماء..و وقف عند اسم غلاي..كان بيدق..لكن نجود وقفته.. نجود: خلاص ماله داعي سيف: ليه مو تبين تتأكدين؟ نجود: تأكدت..أنا لمحت اللقب ذاك اليوم توقعتك بتسكتني و تدق على رقم غير سيف: هاذي سالفة زواجي و عرفتي انها مو صح..وش كذبت عليك بعد فيه؟ نجود بصراحه: سيف أنت تكلم بنات صح؟ سيف استغرب: أنا!! ليه توقعتي هالشي؟ نجود: طريقة كلامك و طيبتك معي من أول يوم من قبل حتى تعرف عني أي شي..كلها تحسسني انك متعود على هالأشياء...أنت ما قد تزوجت مسيار من قبل؟ سيف بعتب: هذا رأيك فيني يا نجود؟ نجود: مو أبي افهم كيف واحد يوافق بهالسرعه يتزوج وحده طلبت منه هالشي في الشارع و يعاملها بكل هالطيبه...لازم يكون فيه سبب سيف: دامك كنتي مقتنعه ان ما فيه أحد بيوافق على هالشي..ليه وقفتي و كلمتيني؟ نجود: الفكره خطرت في بالي فجأه و كنت خايفه من خالي يقنع أمي و تبيع البيت قلت اسوي كل اللي اقدر عليه..بس ما جاء في بالي انك توافق...و لو كنت فكرت دقيقه زياده قبل اسوي هالشي كنت تراجعت عنه سيف: يمكن حتى أنا ما فكرت كثير في هالشي..حسيت انك محتاجه لأحد و حبيت اساعدك..أو تبين الصدق ما اعجبتني فكرة انك تطلبين هالشي من أحد غيري و يوافق نجود تعترف: ما كان فيه أحد غيرك..أنا مادري ليه قلت لك كذا؟! سيف: لانه مكتوب لنا نتزوج..و دام هالزواج تم المفروض نكون واثقين من بعض نجود: يعني أنت واثق فيني؟ سيف: مع اني مو عارف عنك كثير..لكن من يوم شفتك حسيت انك لا يمكن تكونين الا الصوره اللي رسمتها لك في بالي لمح سيف الدمع اللي تجمع في عيونها..و كأنه أول مره أحد يعطيها هالثقه.. نجود: سيف أنا جربت اصدقك مره و صدمتني يوم تغيرت و هددتني آخر مره أخاف اصدقك اللحين و.... سيف يقاطعها: صدقيني كان كلام قلته بوقته عشان أرد لك اللي قلتيه لدرجة اني ما فكرت فيه بعدها أبدا نجود كأنها تكلم نفسها: ليه تطلع طيب كذا يا سيف؟ دنيتي ما عودتني اشوف أحد مثلك..طول عمري تعودت ان اللي عندي يبي شي مني..و دائما احاول اني احافظ على اللي لي..لكن أنت مادري كيف اتصرف معك؟ سيف: تصرفي باللي تحسينه نجود: ما تعودت الا احسب كل شي و اتوقع خسارتي و ربحي بالنهايه...و ما دري معك وش بتكون النهايه اخسر أو اربح سيف: نجود أنا مو عارف الأيام الجايه وش بيصير فيها..لكني اوعدك انك ماراح تنجرحين مني أبدا..بأحاول على قد ما أقدر اني أكون دائما معك نجود سرحت تفكر في كلامه..مو عارفه ليه تصدقه بسرعه..معقوله لانه صادق فعلا..أو هي ملت من التعب و تبي لو مره ترتاح لأحد.. سيف كان يطالعها بحنان..حس ان اللي عاشته أكبر من عمرها..حس انها مرت بأشياء كثيره خلت عندها هالترقب و الخوف..لكنه دامه معها..و لا يدري لمتى..يبيها تحس بالفرحه و الأمان.. في الشرقيه/ سكرت أسماء من أمها و هي مصدومه بالخبر اللي سمعته..لو كانت في الرياض كان طارت على بيت أهلها تشوف أسيل..(معقول أسيل توافق على نادر! زين و فيصل؟) دقت عليها و قالت لها أسيل اللي صار.. أسماء: النذل! عمري ما توقعت فيصل يكون كذا أسيل: احس إن تفكيري انشل يا أسماء و مو عارفه وش أسوي؟ أسماء: تبيني أكلم عمي أنا بأقنعه..... أسيل تقاطعها: لا أسماء: ليه؟ أسيل: عمي بيزعل و أبوي بعد مابي أصير مثل فيصل ما فكر إلا في نفسه و لا همه زعل عمي...بعدين بصراحه مابي فيصل يعرف إني تركت نادر عشاني للحين أحبه..ما أبيه يحس إني مو قادره أنساه..خطبتي لنادر هي اللي بتخليني أقدر على الأقل أواجه نظرات الشماته بعيون مرام و سهى أسماء: ما أصدق إنك تفكرين كذا يا أسيل! أسيل: الجرح يعلم يا أسماء..أنا بعد فيصل ماراح أعطي قلبي لأحد بأبدأ افكر بعقلي مو قلبي عشان كذا تزوجت نادر أو غيره ما تفرق معي..بالعكس نادر احسن عشان فيصل و سهى ما يرتاحون مني أسماء: يعني انتقام من فيصل؟ أسيل: يمكن أسماء: أسيل لا تخوفيني عليك أسيل: لا تخافين يا أسماء أسيل اللي ينخاف عليها راحت اللحين أسيل بينخاف منها..معليش أسماء بأسكر اسمع أمي تناديني سلمي على تركي و بوسيلي إياد..مع السلامه أسماء: مع السلامه سكرت أسماء و هي تحاول تستوعب اللي قالته أسيل..(معقوله اللي صار يغير أسيل؟ ليه لا..مين يصدق إن الكلام اللي تو تقوله أسيل) دخل تركي و شافها سرحانه..جاء من وراها و غطى عيونها.. تركي: أنا مين؟ أسماء: امم مادري أول مره اسمع صوتك تركي: و صوتي حلو؟ أسماء: لا تركي: عاد توي مكلم وحده تمدح صوتي الشرهه علي تركتها و جيت لك أسماء تفك يدينه و تلتفت له: صدق! تركي: ماراح أقولك أسماء عصبت: تركي! تركي يستهبل: أنتي مو مقدره صوتي خلي غيرك يقدره أسماء: و مين هاذي إن شاءالله؟ تركي: وحده لي نص ساعه أدق عليها بأسمعها صوتي و جوالها مشغول أسماء تستوعب: إيه إذا على هاذي روح لها متى ما بغيت..أقولك اترك شغلك و اجلس عندها *من بكره* في بيت أبونادر/ نزلت رغد من غرفتها بتروح لكليتها..و شافت تحت نادر يفطر لحاله.. رغد: صباح الخير نادر: صباح النور رغد تتلفت: ما أحد فيه؟ نادر: أبوي كان فيه بس طلع جلست رغد تفطر..وبين لحظه و الثانيه تلتفت لنادر..صعبه تتخيله مع أسيل..ما تدري ليه..بس خطر في بالها شي..و فرحت..بعدها حست بالذنب..لانها فكرت ان نادر اللحين بيكون قريب منهم أكثر..و ماراح يتركهم و يروح.. نادر: وش أخبار أسيل؟ رغد تفاجأت: مادري كلمتها أمس ما ردت نادر: أمس ما شفتيها بالكليه؟ رغد: لا ما جت نادر يتنهد: اسمعي يا رغد قولي لها ان كانت تنتظر حل مني لهالمشكله أنا مابيدي شي..لكن هي تقدر تقولهم انها رافضه هالخطبه..هي توها صغيره و لا أحد راح يلومها على تراجعها رغد: أنت ما تعرف أسيل يا نادر..أسيل تحب أبوي بالحيل و مستحيل تزعله لو على حساب نفسها نادر: حتى لو كان الثمن زواجها مني؟ رغد:....... نادر: أجل مالها الا تتحمل تركها و راح..و رجعت رغد تفكر..(معقوله هالزواج يتم..ليه لا..نادر مو صعب يحب أسيل..لأني متأكده انها تنحب بسرعه..بس المشكله في أسيل و قلبها المتعلق من سنين بفيصل..معقول جرحه لها يخليها تقدر تنساه) في كلية اللغه الإنجليزيه/ وصلت أسيل عند البنات..و سلمت عليهم.. أسيل: وش أخباركم طيف و بسمه؟ بسمه: الحمدلله طيف: أنتي وش أخبارك؟ أسيل: تمام يله نروح لمحاظرتنا مشوا البنات و رغد و حلا يتهامسون.. رغد: أسيل تتصرف و لا كأن شي صار..بس أبي اعرف وش شعورها الداخلي؟ حلا: مادري أسيل كانت طول عمرها ما تعرف تخبي مشاعرها و اللي تحس فيه تقوله..بس هالمره صارت غير أسيل تلتفت لهم: وش عندكم؟ رغد: آآ كنا.... أسيل تقاطعها: أنا عارفه عن إيش تتكلمون بس ياليت ننسى هالسالفه خلاص..ضاع عمري اللي راح أحب فيصل ماراح يضيع الباقي أصيح عليه...و اعتقد إني اللحين مخطوبه لنادر و مو زين في حقه نجلس نحلل شعوري اتجاه فيصل و اللي سواه مشوا و لا وحده من البنات ردت على اللي قالته أسيل..و من بعدها مثل ما قالت ما أحد فتح هالسالفه..و كأنهم نسوها..لكن الكل استغرب ردة هالفعل من أسيل.. في بيت نجود/ صحى سيف..و التفت لنجود اللي نايمه جنبه..يتأمل ملامحها الجميله..بعد خصله من شعرها كانت على وجهها..فتحت عيونها فجأه..و شهقت و هي تشوفه قريب منها..غطت وجهها بيدينها.. نجود: ليه تطالعني؟ سيف يضحك: كيفي مو زوجتي..أبي اتصبح بوجهك نجود: أجل أنت المسئول عن اللي بيصير في يومك سيف: بيكون أحلى يوم نجود تفز تجلس و تطالعه و بجديه: سيف خلنا نتفق على شي سيف: أنتي تآمرين نجود: لا تكلمني كذا بعد هاليوم سيف بإستغراب: كيف كذا؟ نجود: يعني وصلات الغزل هاذي مابيها بعد اليوم سيف كان يتأملها..نظراتها الناعسه..و شعرها اللي نازل بنعومه على أكتافها..حتى طريقة كلامها و صوتها..كل شي فيها..يموت فيه.. نجود بعصبيه: سيييييف سيف ينتبه: هاه نجود: لا تطالعني كذا سيف: ليه؟ نجود ما عرفت وش تقول له..ماراح تقول انها تحس ان قلبها بينط من مكانه اذا شافها بهالنظرات.. نجود: كذا كيفي..أنا ما أبي ضحك سيف: و أنا بعد كيفي ما أبي نجود تشهق: سيف المدرسه و نطت من سريرها تركض..أمس ماناموا الا بعد الفجر..و لا تدري كيف صحت اللحين..أو يمكن هي اخذت غفوه ما نامت..دخلت الحمام تسبحت..و طلعت وشافته للحين جالس.. نجود: للحين جالس! ما عندك جامعه اليوم؟ سيف: الا بس ماراح يمديني على المحاضره الأولى..و لا راح يمديك على المدرسه الساعه تسع نجود تطالع ساعتها: ليه ما قلت لي؟! سيف: و أنت عطيتيني فرصه؟!عندك شي مهم اليوم؟ نجود: ايه سيف: امتحان؟ نجود: لا..اليوم المفتوح سيف: أنا استغربت كل هالفزه عشان الدراسه..و أنت مو طايقتها! نجود: أخاف اقولك تضحك علي سيف: قولي ماراح أضحك نجود: كنت مسويه اكسسوارات بسيطه أبيعها هاليوم سيف يتنهد: نجود اسمعي أنا بأصرف عليك أنتي زوجتي و أنا مسئول عنك ما أبيك تشتغلين بعد هاليوم نجود: لا سيف: ليه؟ نجود: سيف أنت تدري انه بيجي يوم نترك بعض فيه..بيجي يوم يطلبون اهلك تتزوج و أكيد بعدها بتتركني..أو ناوي تتزوج و تكذب على زوجتك..وقتها بأكون نسيت الشغل حتى اللي متعودين انهم يطلبون مني شي بينسوني اذا رفضت اشتغل لهم اللحين..عشان كذا شغلي أو أي شي اسويه لا تطلب مني اني اتركه سيف سرح..يتركها..معقول يجي يوم يتركها فيه..لكن هي كانت صادقه اذا تخرج و طلبت أمه يتزوج..و تذكر مين العروس اللي مرشحتها أمه..ياسمين..كيف بيقدر يرفض..ولو رفض..بيقدر يقول لأمه و أبوه..هو بدل ياسمين بمين..مستحيل يشوفون نجود مثل ما هو شايفها..حالتها..ماضيها..حالة خالها و أبوها اللي بالسجن..كل هذا بيقارنونه بياسمين.. نجود كانت تطالعه..و استغربت كيف طاري الفراق قلب حاله بهالشكل..كان باين انه ما قد جاء في باله..و استغربت لهالدرجه هي مهمه عنده..معقول يكون يحبها صدق.. نجود: وش فيك؟ سيف: عادي عندك لو تفارقنا؟ نجود: مادري! سيف: ماراح تزعلين على فراقي؟ مارح تفقديني؟ نجود: بأتعود سيف: بس أنا ما أقدر اتعود ما أشوفك نجود: و هالشهر كيف قدرت تتعود؟ سيف: و هالشهر كنت عايش؟ حتى انك ما غبتي عن بالي نجود: سيف لا تحبني لأن هالحب ماله أمل سيف يطالعها بحزن وهو يبتسم: نصيحتك متأخره يا نجود نجود طيرت عيونها: يعني أنت تحبني؟! سيف يقوم: تذكرت ان في سيارتي ملابس لي بأروح اجيبها..أبي اتسبح طلع عنها و هي متأكده انه يتهرب بعد اللي قاله لها..(يحبني!) ما تدري فرحت أو زعلت بهالشي..لكنها بدت تهتم..و هي المفروض ما تهتم فيه..أمس كانت تكرهه و مو مصدقه كلامه..كيف اليوم تهتم فيه كذا..ليه بسرعه يغير أفكارها..كيف خلاها تصدقه..بدون تتأكد..الدليل الوحيد اللي بين يديها..كان كلامه..و يمكن يكون كذب..يمكن يكون تمثيل..لكنها ما صارت تقتنع بهالشي..(لا تلعبين على نفسك يا نجود..أنتي مصدقته..و متأثره فيه) قامت تسرح شعرها..و تطالع نفسها بالمرايا..(ليه يحبني؟ وش حب فيني؟ شكلي؟ أو حب نجود كلها) سيف كان واقف يطالعها عند باب الغرفه..و هي سرحانه مو يمه..كان يتمنى يخليها تحبه..بس اللحين خاف تحبه..و في يوم ينجبر يتركها..معقوله يقدر يتركها..اذا وقف بينها و بين اهله..مين بيختار.. سيف: نجود نجود تلتفت له و تعترف: الصراحه ما كانت أريح يا سيف..ليتك ما كلمتني بصراحه..و ليتني ما بديت أصدقك..بس هاذي بتكون آخر مره نتكلم فيها عن هالشي..و من اللحين كل واحد مننا يحط في باله يوم الفراق و يستعد له سيف: و تقدرين؟ نجود بشموخ: ايه أقدر..و أنت بتقدر...بأروح اجهز الفطور مرت من عنده لكنه مسكها..و لفها له..رفعت راسها تطالعه..ضمها بقوه..جلست بين يديه لحظات..ثم بعدته عنها..و راحت المطبخ..و هي تحاول من هاللحظه و بعدها..ما تتأثر فيه..و تقوي نفسها مثل ما كانت..بوجود سيف..أو بروحته..هي لازم تكون نجود القويه.. بعد ربع ساعه كانوا يفطرون..مع أمها..و يتكلمون بشكل عادي..و نسوا ذاك الكلام اللي قالوه لبعض..أو كل واحد تظاهر انه نساه.. في بيت أم عمر=العصر/ كانت حلا و لينا جالسين في الصاله..و دخلت عليهم أمهم.. أم عمر: مساء الخير لينا: مساء النور حلا: أنا شايفتك قبل شوي ما يحتاج أرد صح أم عمر: لا مابي منك شي مشكوره حلا تضحك: أجل ليه زعلتي؟؟ و لايهمك مامي مساء الورد و العطر يا حلو أم عمر تطنشها و تلتفت على لينا: أم طلال اتصلت لينا ببرود: صدق أم عمر: ايه و حددنا الملكه بعد اسبوعين لينا طارت عيونها من الصدمه..ما تخيلت انهم بيستعجلون لهالدرجه..بس ما كانت تبي ترفض قدام أمها..بدون سبب..خافت تزعل.. لينا: بدري يمه ما يمديني أم عمر: أقولك بعد اسبوعين يعني يمديك تسوين كل شي..أنت جهزي نفسك بس و ما عليك من الباقي أنا بأرتب كل شي لينا: و ليه الاستعجال؟؟ قولي لها تخليه.... أم عمر تقاطعها: ما يمدي اقولها تلقين اللحين أبونادر عند خالك يرتب معه كل شي لينا تقوم عنهم: على راحتك أم عمر: و أنت آنسه حلا ما سمعنا رأيك؟ حلا: ههههه قولي تبين رايي و يهمك أم عمر: اقول لايكثر كلامك ساعدي لينا تجهز كل شي تعرفينها اختك تنسى نفسها حلا: زين..بس ليه ما شاورتي لينا؟ ليه تقولين لها بعد ما تفقتوا؟ أم عمر: يعني ما تعرفين اختك بتطلع لي بألف حجه عشان تأخر الملكه يتبع |
|
|
#14 |
|
|
رد: تكملة رواية قلوب تنزف عشق
في غرفة لينا-جلست على سريرها..ما تدري تحس بقهر..أو حزن..كانت تعرف ان هاليوم بيجي..لكن انها تتخيله شي..و انها تعيشه شي ثاني..توها ما ستعدت انها تقابله..تقابل اللي قتل يوسف وجها لوجه..تذكرت يوم تشوفه بالمزرعه..الخوف اللي حست فيه..خوف..و قهر..و حزن..كيف بتتحمل كل هذا..كل ما تشوفه..
اتصلت على عمر..تشوف ليه ما قال لها..و تحاول يمكن يقدر يأجل هالملكه شوي.. عمر: هلا لينا طلال كان معه في السياره..و أول ما سمع اسمها..تنهد بحزن.. لينا: هلا عمر..وينك؟ عمر: في السياره..رايح للشباب لينا: تدري انهم بيخلون ملكتي بعد اسبوعين؟ عمر تفاجأ: طلال أنت بتملك بعد اسبوعين؟ لينا انقهرت يوم عرفت انه معه..و تمنت تسكر..ما كانت تبي تسمع صوته..لا من قريب..و لا من بعيد.. طلال انصدم: الملكه!! مين قال بعد اسبوعين؟ عمر: لحظه..لينا مين قال لك؟ لينا: أمي كلمت أمه و تقول ان أبونادر عند خالي اللحين عمر يضحك: و العرسان آخر من يعلم..(التفت لطلال)أبوك عند خالي اللحين يرتبون كل شي طلال: لو كان ما يمديها اكلمهم يأجلونها طلال كان يقول كذا بس قدام عمر..و لا هو متأكد انها ما تبيه هو..لينا سمعته..و كرهت انه يساعدها بأي شي..حتى لو كان هالشي بيخليها تأخر هالملكه..لكن منه مستحيل تقبل أي شي.. عمر: لينا تبين نكلمهم يأجلونها؟ لينا: لا عادي أنا بس بتأكد أنت عرفت أو لا عمر: على راحتك..خلاص حنا بنروح لخالي اللحين و اقولك وش يصير لينا: زين مع السلامه عمر: مع السلامه طلال: و الشباب؟ عمر: عادي نتأخر ساعه..و لا ما تبي تدري وش بيقررون في ملكتك؟ طلال سكت وهو يفكر..(أنا كل اللي يهمني من كل هذا..اعرفه..و ياليتني ما أعرفه..قرب لقانا يا لينا) حس بخوف من ردة فعلها اذا شافته..كيف بيكون شكل حزنها و قهرها المره هاذي.. لينا بعد ما سكرت من عمر..دقت على مساهير.. مساهير: هلا ليونه لينا: مساهير ملكتي بعد اسبوعين مساهير: يعني اقول مبروك؟ أو اواسيك؟ لينا: صعب يا مساهير صدقيني صعب اني اتقبل..خايفه..و احس اني بأموت قبل ذاك اليوم مساهير عصبت: لينا! وش هالكلام؟ استغفري ربك..أنا عارفه وش كثر كنتي تحبين يوسف و ما قلنا لك انسيه بس لازم بعد تعيشين حياتك لينا تصيح: مابي..ليه ما تركوني في حالي؟ ليه لازم اتزوج؟ مساهير: لينا طول ما أنتي تفكرين كذا ماراح ترتاحين أبدا..اذكري يوسف بخير..اذكريه و أنتي فرحانه..عشان تقدرين تستوعبين حياتك من بعده اللي لازم تعيشينها لينا حست ان حتى مساهير لايمكن توقف معها في هالشي..عشان كذا انهت هالمكالمه.. لينا: اكلمك بعدين أمي تناديني مساهير: ايه سكري مني و كملي صياحك..حرام عليك يا لينا ارحمي نفسك..يوسف ما كان بيرضى لك هالشي لينا: مع السلامه يا مساهير مساهير: مع السلامه سكرت منها مساهير و هي تتخيل كيف حالتها اللحين..(يمكن كان خطأ من الاساس زواجها و هي بهالحال؟ بس وش بيطلعها من هالحال غير انها تحاول تنسى يوسف الله يرحمه مع أحد ثاني...بس زواجها من طلال بالذات احسن أو بيذكرها بيوسف دائما؟...مادري وش الحل معك يا لينا؟ مو قادره اساعدك بشي..أنتي مو راضيه تنسين..و لا تحاولين تنسين..و كأنك تعودتي تعيشين هالحال..ان سكت عنك ما ارتحت و ان كلمتك احس اني أفتح جروحك من جديد..وش اسوي.....يا رب يكون عند طلال الحل اللي أنا ما لقيته) *بعد أيام* في بيت ماجد/ كان جالس في غرفته..يفكر فيها..له أيام ما راح المستشفى..ما كان يبي يشوفها..تمنى انها تطلع غير عن البنات اللي عرفهم..حس بأوقات انها غير..و للحين يحس فيها شي غامض..بس خلاص هو قرر ينساها..دامها مثل غيرها..شاف رقمها في جواله من بين الأرقام..كان بيمسحه..لكنه تردد..و قرر أخيرا يمسحه و ينساها..لكنه شاف ورد داخله لغرفته..و ما صدق سكر جواله و لا مسح الرقم..راح لها و شالها من كرسيها.. ماجد: الله على الحلوه اللي جايه تدورني ورد: بابا ما طلعت؟ ماجد: لا كنت بأطلع اللحين..و أنتي وش بتسوين؟ ورد: بأروح ارسم رسمه حلوه واذا رجعت تشوفها ماجد: خلاص حياتي لو طلعت حلوه مثلك اجيب لك هديه ورد: وش تبي ارسم لك؟ ماجد: اممم ارسمي عروسه حلوه و طويله و عيونها بنيه ورد تضحك: مين هاذي بابا؟حبيبتك اللي خلتك من امس زعلان؟ ماجد طالعها و ضحك..البنت من كثر ما جلست معه..صار تفكيرها مثله..و صارت تفهم عليه بسرعه.. ماجد: و أنتي وش عرفك بهالسوالف؟ ورد: اعرف كل شي عنك أنا...بابا مين هاذي اللي تحبها..أكيد أنا بأحبها بعد ماجد في نفسه..(طلعت ما تسوى الاهتمام..كيف مره وحده احبها؟) لكنه ما حب يكسر بخاطر ورد..شاف ان الفكره اعجبتها و تحمست لها.. ماجد: اقولك عنها بعدين..اذا طلعت الرسمه تشبهها..اتفقنا؟ ورد بحماس: اتفقنا شالها و وداها لغرفتها..و تركها هناك مع مرافقتها..و طلع..كان يبي يروح للشركه..لأعماله اللي متراكمه ما يعرف عنها شي..لو ما كان أعز اصدقائه هو اللي ينوب عنه في كل شي..كان من زمان ضيع كل شي..فجأه غير طريقه للمستشفى..يبي يعرف هي للحين تداوم..أو خافت من تهديده..ما كان يبي يسأل حنان..ما يبي يبين حتى لنفسه ان هالشي يهمه لهالدرجه.. وصل المستشفى و دخل..وقف بعيد عنهم..و شافها..و كأن كلامه ما هز فيها شعره..(زين يا يا سمين..صح أنا خلصت منك لكن لازم اهز هالثقه و القوه اللي فيك..لازم تحمدين ربك كل يوم اني من نفسي تركتك في حالك) جاء عندهم و لا التفت يمها.. حنان: هلا ماجد ماجد: هلا حنو أخبارك؟ حنان: تمام جلس يتكلم معها..و ياسمين على الكمبيوتر تسجل بيانات المراجع اللي قدامها..ماتدري ليه التفتت عليه..لكنه كان ما يطالعها..و لا كأنها موجوده..(معقول بيتركني في حالي خلاص؟ مادري ليه مو حاسه بكذا..الله يستر من آخرتها) راح..و لا التفت عليها أبدا..و ياسمين تطالعه بإستغراب.. حنان بغرور: سبحان الله فيه ناس تحب تركض ورى اللي ما يبيها ياسمين طالعتها بإستحقار: طبعا عقلك التافه لايمكن يفكر الا بهالشي هذا حده حنان: لا..يعني مو كذا تفكيرك؟ اجل ليه مطيره عيونك فيه؟! ياسمين: أنتي آخر وحده افكر اني ابرر لها تصرفاتي عطتها ظهرها و كملت شغلها..(هذا اللي ناقص! وحده مثل حنان تحاسبني..بس أنا الغبيه وش أبي فيه؟ خلاص شي و راح في حاله و انتهيت منه) *يوم الخميس* في بيت أم عمر/ دقت حلا على مساهير.. حلا: مرحبااا مساهير: أهلين حلا وينك من زمان ما سمعت صوتك؟ حلا: أنتي ليه ما تنشافين؟ مساهير تمزح: ما عزمتيني و لا كان جيتك حلا: خلاص اللحين عازمتك مساهير تستهبل: لا وش بعده اللحين أنا اللي عزمت نفسي حلا: لا صدق تعالي خلينا نقنع لينا تروح السوق..تخيلي تقول بتلبس لملكتها من الفساتين اللي عندها..بتفضحنا البنت مساهير تضحك: خلاص اللحين أجي...انتظري عمر فيه؟ حلا: و اذا فيه؟ مساهير: ماراح أجي بأكلمها حلا: لا تطمني مو فيه..و ترى عمر ما يأكل مساهير: خلاص جايه سكرت حلا و هي تفكر..(كانوا يحبون بعض..معقول نسوا بعض خلاص؟ أجل ليه و لا واحد يطيق الثاني! كأن بينهم حرب) في بيت أم راشد/ نزلت مساهير و شافت أمها في الصاله.. مساهير: يمه حبيبتي أم راشد: ادخلي بالموضوع مساهير: بأروح للبنات و احتمال نروح السوق عشان لينا بتبدأ تتجهز للملكه أم راشد: زين يمه بس لا تتأخرون مو لازم كل شي تخلصونه اليوم مساهير: ان شاء الله يمه أم راشد: الله يوفقها..و عقبالك مشت مساهير و هي مكشره..تذكرت ولد عمها يوم كانت مخطوبه له..ما حست لا بفرح..و لا بزعل..ما كان فيه شي يخليها تكرهه..بس بعد ما كانت تحبه..مع ان بنات عمتها كلهم معجبات فيه..هي الوحيده اللي ما هتمت فيه..يمكن عشان كذا لفتت انتباهه و تعلق فيها و خطبها.. طلعت من البيت و هي تدق بجوالها على حلا.. مساهير: افتحيلي الباب حلا: أوكيه دخلت مساهير و سلمت عليها..و طلعوا فوق لغرفة لينا..فتحوا عليها الباب..و شافوها واقفه عند شباكها..و التفتت لهم مبتسمه.. مساهير: لاااا خربتي المفجأه! أكيد شفتيني لينا تبتسم: ايه مساهير: يله حلا روحي البسي عبايتك حلا تروح: بس من بيودينا أمي طالعه بالسواق مساهير: و لا يهمك أنا دقيت على راشد اللحين جاي لينا بإستغراب: وين بتروحون؟ مساهير: قصدك وين بنروح..يله البسي عبايتك لينا: ليه؟ مساهير تتريق: و الله ملكتي بعد أسبوع و أنا نايمه للحين ما تجهزت قلت أصحى احسن و أبدأ استعد لينا: مساهير أنا... مساهير تقاطعها: ما شاورتك أنا..يله بسرعه أنا بعد أبي اتجهز لملكتك لينا بعناد: ماراح اتكشخ مساهير تجاريها: خلاص و لايهمك ندور لك من جلابيات العجز و لفي على راسك طرحه...أو اقولك تبرقعي احسن لينا بقهر: مساهير!! مساهير بإصرار: مو تقولين اللي تقولينه أنا وحده متعقده كان نفسي اسوي ملكه و اكشخ و حركات لكن خطيبي تركني و تحطمت..يرضيك اللحين تكسرين بخاطري...لااا أنا بأسوي بملكتك كل اللي كنت ناويه اسويه بملكتي عشان ما يروح تخطيطي على الفاضي ابتسمت لينا..لانها تعرف ان مساهير ما هتمت بفسخ خطبتها..بس هي تقول كذا عشانه تشجعها..استسلمت و راحت تلبس عبايتها..و هي تحمد ربها..لرجعة مساهير اللي خففت عنها كثير..و لا بتكون اللحين بحال ثاني.. عند الباب وقف عمر مصدوم باللي سمعه..كان توه داخل البيت..و شافه فاضي و راح يدور على لينا..لانها الوحيده اللي ما تطلع من البيت..لكن اللي سمعه خلاه ينزل بسرعة البرق..و يطلع من البيت كله..ركب سيارته و راح..وهو مقهور منها..حس لو جلس بالبيت دقيقه وحده..كان دخل و ذبحها..و ارتاح منها..(ليه اذا تعلق الأمر فيها دائما اطلع غبي..كيف سمحت لنفسي انسى اللي هي سوته؟ كيف رجعت افكر فيها؟...كله من كلام لينا عنها خلتني اصدق انها مهتمه.....بس يمكن هي مهتمه فعلا بأهلها..بلينا..بس أكيد مو فيني..هي حبت ولد عمها و كانت تحلم بملكتهم لكنهم اختلفوا..و من المسجات اللي قريتها باين ان هالاختلاف ماراح يطول..و بين يوم و ليله بألقاها راحت من جديد...و أنا ليه اهتم؟ تروح احسن..أنا أبي ارتاح منها) لكنه كان مهتم..مهتم و مو راضي يعترف انه للحين يحبها..رفض هالاعتراف حتى بينه و بين نفسه..لانها نسته.. *يوم السبت* في كلية اللغه الإنجليزيه/ كانوا البنات طالعين من أول إمتحانات أعمال السنه اللي بدت هالأسبوع..جلسوا و هم يتناقشون بالأسئله..بعدين قامت طيف و بسمه يجيبون لهم فطور.. أسيل: أخبار ليونه خلصت؟ حلا: قبل أمس رحت معهم للسوق بس أمس راحت هي و مساهير و لا شفت وش سوت..أمي الله يهديها ضاقت تحط الملكه بأسبوع الإمتحانات! رغد: أنا بعد أقول لأمي كذا..تقول عروسنا ما تدرس و أنتم ما علينا منكم حلا: أنتي خلصتي؟ رغد: للحين ما شريت و لا شي حلا: وش رأيك بكره نروح مع بعض لأن بعده امتحاننا سهل رغد: و الله فكره..وش رأيك أسيل؟ أسيل مو يمهم: أكيد خالتك و عمتي بيحضرون الملكه رغد تطالع حلا: أكيد أسيل: يعني بأشوف سهى و مرام حلا تتنهد: كنتي وش حلوك هالأيام ناسيه..وش ذكرك؟ أسيل بسخريه: أنسى؟ رغد بعتب: أسيل أنتي وش فيك؟ تغيرتي..إن ما طلعتي اللي في قلبك لنا لمين تطلعينه؟ أسيل: ما يفيد الكلام يا رغد أنا حتى بيني و بين نفسي مابي اتكلم..بس هذا مايعني إني نسيت أو ما أحس بالحزن و القهر رغد: و نادر؟ أسيل: وش فيه؟ رغد: بعد كم أسبوع بتلقينهم يجهزون لملكتكم أسيل طالعتها لحظه..و قامت: بأروح أعطي البنت مذكرتها نسيتها معي تركتهم و راحت.. رغد: بتذبحني هالبنت مادري كيف صايره تفكر! حلا: مهما كانت هي اللحين أحسن من اللي تخيلت إنها بتصير عليه رغد: وش تقصدين؟ حلا: يعني لو أحد قال لي قبل إن فيصل بيترك أسيل كان قلت إنها أكيد بتنجن أو بتقاطع الناس و الدنيا بعده..أنتي كنتي تتخيلين إنها ممكن تكون بهالهدؤ و العقل رغد: صح أسيل تغيرت كثير أسيل كانت تمشي و تفكر بكلام رغد..(نادر! أنا حتى ما اتذكر شكله..ما أعرف شخصيته..و مادري كيف بنتصرف مع بعض..و إلى متى بنستحمل هالوضع..أنا متأكده انه حتى هو ما يبيني..انفرضت عليه مثل ما كنت مفروضه على فيصل..رغد قالت انه يبي من بنات خاله..و مو بعيد يكون يحب أحد و أنا وقفت في طريقه..بس يدفع ثمن غلطة أخوه..مو هاذي بعد أنا بأدفع ثمنها..ليه افسخ الخطبه أنا و يزعل مني أبوي و عمي..وهو و أخوه مرتاحين كل واحد مع اللي يبيها....أه يا فيصل ما ظنيت يجي هاليوم اللي تكون فيه بعيد عني..و أفكر فيك مثل عدو أتمنى له الشر..و مابي له الخير) في كلية إقتصاد و إدارة أعمال/ شافت سهى مرام اللي من أسبوع و نفسيتها زفت..كانت تخاف تفتح معها موضوع نادر..تحس إنها بتلومها هي على اللي صار.. سهى: مرام وش سويتي في الإمتحان؟ مرام بملل: مو هامني الإمتحان بكبره..أنا شاغله تفكيري هالخطبه اللي مادري كيف خطرت على بال خالي سهى: لقيتي حل؟ مرام: أنا متأكده إنهم بيفسخونها أسيل مستحيل تنسى فيصل و مستحيل أكثر تأخذ اخوه زياده على كذا نادر ما يبيها...بأشوف وش بيصير و إن استمروا فيها أنا بنفسي بأفركشها لهم..قدرت أفرق بين أسيل و فيصل بعد كل هالحب و السنين مو صعب اللحين افرق اثنين مو طايقين بعض في بيت أم عمر/ كانت لينا بغرفتها..جالسه على سريرها و تطالع الأكياس اللي من جابتها و هي في مكانها..ما فتحتهن..و لا رضت حتى تخلي أحد يشوفهن..بحجة إنها تبي تسويها مفاجأه لهم..لكن هي ما كانت طايقه كل اللي فيهن..و لا طايقه اليوم اللي بتلبسهن فيه..تنهدت و هي تشوف الساعه..اللحين بتجي مساهير..و يروحون للسوق مره ثانيه..(مادري ليه تأخذني و هي تسوي كل اللي تبي و لا تأخذ رأيي) في الصاله..كان عمر بيطلع للمصنع و شاف الخدامه بتطلع تفتح الباب..و قال لها إنه طالع و بيفتحه هو..وصل عند الباب و أول ما فتحه شاف مساهير قدامه..عرفها من عيونها..لكنها أول ما شافته غطتهن بسرعه..و رجعت خطوه لوراء..و نزلت راسها..انتظرته يبعد عن طريقها..لكنه وقف بمكانه ما تحرك.. مساهير بإرتباك: أنا جايه للينا تنتظرني عمر كان يطالعها بقهر..وهو يتذكر كلامها عن ملكتها..كان بيسألها كيف نسته..و ليه تحب ولد عمها..انصدم من اللي يفكر فيه..بدون شعور سكر الباب في وجهها..يبي يرتاح منها..من الضيقه اللي سكنت نفسه من رجعت.. مساهير انصدمت من اللي سواه..و وصلت معها منه..رجعت للبيت و هي تتحلطم..(هذا وش فيه؟! يوم يكون عادي..و يوم شوي و إلا يذبحني!....لعب في راسي..حتى أنا مو عارفه إن كنت أحبه أو لا..ليه يعاملني كذا؟ للحين مقهور مني؟ معناته يحبني..أو يمكن يكرهني و مو طايقني؟ يعني مانسى اللي سويته و حاقد علي...أو يمكن انه يشوفني و لا شي و مو من مستواهم) رمت نفسها على أول كنب قدامها في الصاله..(زين يا عمر أنا تطردني من بيتك كذا..ماراح أنساها لك..و من اليوم أنا اللي خلاص كرهتك صدق..و لا عاد يهمني رأيك فيني) عمر كان واقف وتوه استوعب اللي سواه..فتح الباب بسرعه..لكنه ما شافها..(ياليتك تختفين من حياتي بهالسهوله و ارتاح منك..بس أنا فضحت نفسي أكثر من اللازم..اخاف تحس اني مقهور منها لأني ما نسيتها..من اليوم و رايح بأعاملها عادي..أو ماراح احتك فيها لا من قريب و لا من بعيد احسن..كذا ماراح اهتم فيها لين انساها..و يصير وجودها عندي و عدمه واحد..و لا القى شي يصير بيني و بينها يخليني أفكر فيها) مساهير كانت للحين جالسه و تهز رجلينها بعصبيه..دق جوالها و شافت رقم لينا.. مساهير: هلا لينا لينا: وينك تأخرتي؟! مساهير: مو كل يوم أمرك أنا هالمره تعالي أنتي بأضيفك و نتناقش وش بنسوي اليوم ثم نروح لينا: خلاص أنا جايه عندك سكرت لينا منها..و اخذت عبايتها و نزلت..و شافت عمر في الصاله.. لينا: عمر ما طلعت؟ عمر: اللحين بأطلع..و أنت على وين؟ لينا: بأروح أنا و مساهير السوق اكمل باقي أغراضي عمر: هي بتمر عليك؟ لينا: لا تبيني أنا أمر عليها اليوم..مع السلامه عمر: مع السلامه ارتاح انها ما قالت للينا شي عن طردته لها..ابتسم وهو يتخيل ردة فعلها على اللي سواه..أكيد ماتت قهر..لكنه تنهد وهو يتذكر انه لازم من اليوم خلاص ينساها..للأبد.. في بيت ماجد/ دخل البيت توه واصل من المطار..من أسبوع سافر في شغل..و راح على طول لغرفتها..و شافها جالسه على مكتبها الصغير.. ماجد: اشتقت لك يا أحلى بنوته بالكون ورد تلتفت و تشهق بفرح: مجووودي مدت له يدينها..وهو شالها و ضمها بقوه.. ورد: طولت كثير ماجد: كلها أسبوع ورد: كثير جلسها و جلس معها.. ماجد: يله قولي لي وش سويتي من يوم تركتك لحد اللحين ورد: روح ارتاح بعدين نسولف ماجد: أنا ارتاح اذا شفتك ورد: امم عندي لك مفاجأه ماجد يبتسم: وش هالمفاجأه؟ ورد: خلصت الرسمه ماجد يتذكر الرسمه اللي قال لها عنها..ما توقع انها للحين تذكرها..أما ورد فطلعت له لوحتها الفنيه و مدتها له بكل فخر.. ورد: وش رأيك؟ أخذ ماجد الرسمه و صار يتأملها..بنت طويله و عيونها بنيه..مثل ما قال لها..كانت راسمتها بفستان أبيض و طرحه..لكنها كانت تضحك..ما تخيل كيف ممكن تكون ياسمين و هي تضحك..أو بس رايقه..كان كل ما يشوفها معصبه و متنرفزه من وجوده.. ورد: حلوه؟ ماجد بشرود: حلوه..مشكلتها انها حلوه ورد: بابا وش اسمها؟ ماجد: ياسمين ورد: الله حلو اسمها ماجد انتبه لنفسه.. ماجد: أنت وش لك بهالسوالف انتبهي لدروسك عشان المس ما تزعل منك ورد تبتسم له..و تاخذ الرسمه و تطويها و تمدها له.. ورد: هاذي رسمتك وين هديتي؟ ماجد أخذها و شال ورد: تعالي نروح الغرفه و تتفرجين على الهدايا اللي جبتها لك في بيت أم مازن/ كانت ساره و أمها جالسين يسولفون..و مازن كالعاده جالس و مندمج مع الأخبار..لكنه من أيام وهو متغير..يحس ان أي سالفه يسمعها من ساره عن جوري..تشد انتباهه..من بعد الموقف اللي صار له معها..كل يوم يسمع عنها شي يخليها تعجبه أكثر..استغرب انه للحين فيه بنات بهالطيبه..و الخجل..و دامها من معارف ناصر..فهذا شي يخليه يتعلق فيها أكثر..كان يعرفه معرفه سطحيه من وقت بعيد..بس يعرف ان الكل يتمنى يناسبه..عشان سمعته..و طيبته.. |
|
|
#15 |
|
|
رد: تكملة رواية قلوب تنزف عشق
@،،النــزف الخـــامـس عشــــر،،@
في بيت نجود/ وصل سيف للبيت و استغرب وهو يشوف بنات الحاره الصغيرات متجمعات يطالعونه و يتهامسون..استغرب منهم..لكنه ابتسم لهم و راح يطق الباب..لحظات و فتحت له نجود..دخل وهي مستقبلته بإبتسامتها الحلوه..ضمها بقوه لدقايق..نجود حست ان قلبها بدأ يدق بقوه..و انحرجت منه..بعدته عنها و قالت بمزح يغطي احراجها.. نجود: سيف كنت بأنام! سيف: نامي أنا عندي استعداد أوقف لين تصحين نجود: سيف مو قلنا بلاها وصلات الغزل هاذي سيف يبتسم: و أنا و عدتك احاول بس ما قدرت نجود: تعال نجلس احسن سيف يجلس معها: وش فيهم بنات الجيران؟ نجود تبتسم: وش فيهم؟ سيف: يوم جيت كلهم مجتمعين و يطالعوني و يتهامسون! نجود تضحك: هذا غير اللي تلقاهم على الشبابيك..صار لك معجبات كثير يا سيف يعني و أنت طالع و داخل تأكد ان فيه أحد يراقبك رز نفسك و وزع ابتسامات سيف بإستغراب: و ليه يراقبوني؟! نجود: معجبات فيك و ميتين عليك..توهم يشوفونك أول ما قلت لهم اني متزوجه على بالهم كبير مثل زوج بشاير بس وحده مره شافتك و نشرت الخبر في الحاره و الكل صار ينتظر جيتك و أول ما تروح يجون يأخذون أخبارك سيف كان يسمعها مو مصدق اللي تقوله..بس تذكر انها توها صغيره..و أكيد جاراتها صغار مثلها..ما يستغرب منهم هالتفكير..لكنه انقهر من شي.. سيف: و أنتي عندك عادي؟ ما تغارين علي منهم؟ نجود بدلع: و ليه أغار أحد قال لك اني أحبك؟ سيف بتحدي: مو ضروري تقولين أنا أعرف انك تحبيني نجود: والله واثق من نفسك..لا ما أحبك سيف يقرب منها..و يمسك وجهها بين يدينه..لكنها نزلت عيونها.. سيف: طالعيني لا تنزلين عيونك رفعت عيونها تطالعه..وهو يطالعها بحب و اعجاب..مرت لحظات.. سيف بهمس: خلي عينك في عيني و قولي انك ما تحبيني..قولي ان قلبك اللحين ما يدق بكل قوته لي طالعت فيه لحظات بنظرات غريبه ما فهمها..كانت دائما تحاول ما تسأل نفسها هالسؤال..و تتهرب انها تفكر له بإجابه..لكن اللحين عرفت إجابته..لأنها حست فيها..حست انها مالكه الدنيا كلها و هي بين يدينه..حست بشي عمرها ما حسته..و لا تخيلت انها في يوم بتحسه..عرفت انها تحبه..مهما حاولت تنكر..مهما حاولت تتناسى.. سيف..انسان ما تخيلت يمر في حياتها..انسان ما تجرأت حتى تحلم فيه..لكنه اللحين معها..و أحسن من أي حلم ممكن تحلمه..لكن هالحلم كلها أيام و ينتهي..و فجأه تلقى نفسها من غيره..ما تخيلت هالحياة بدونه.. نزلت دموعها..توها تعترف لنفسها بحبها له..توها تخاف تفقده..توها تعترف لنفسها انه غيرها..و بعده مستحيل ترجع نجود اللي قبله.. سيف انصدم من دموعها..مسحهن..لكنهن صارن ينزلن أكثر..بعدت يدينه..و دفنت وجهها على ركبها و صارت تصيح أكثر..ما تدري ليه..استغرب سيف من حالتها و ضمها له.. سيف: نجود وش فيك؟ قلت شي يضايقك؟ نجود:.......... سيف: نجود كلميني وش فيك؟ رفعت راسها تطالعه و تعترف: أنا أحبك يا سيف للحظه حس انه ما سمع وش تقول..لكنه استوعب..و ابتسم بعدين ضحك.. سيف: و ليه كل هالزعل؟ لهالدرجه ماتبين تحبيني؟ نجود بخوف: أنت تحبني؟ سيف يتنهد: من يوم شفتك إلى هاليوم و كل يوم حبك يزيد لين مو عارف وش بيسوي فيني؟ نجود بترجي لأول مره تتكلم فيه: يعني ماراح يجي يوم و تتركني؟ سيف بحزن: ماراح اتركك يا نجود مو عارف وش بأسوي..لكن اللي أنا متأكد منه اني مستحيل اتركك..لاني مو قادر اتركك ضمها أكثر له..وهو على قد فرحته انه عرف حبها له أخيرا..على قد ما كان خايف من اللي بيصير فيهم.. سيف: نجود لا تفكرين و لا تضايقين نفسك..أنا أبي حبك لي يفرحك مابي يزيد عذابك كانت منزله راسها..و حس سيف انها ما ستوعبت اللي صار..و اللي قالته..كان يبي يعطيها فرصه ترتب أفكارها..و مشاعرها.. سيف: أنا بأطلع اجيب لنا عشاء..و راح اجيبلك شي حلو عشان تروح هالتكشيره اللي على وجهك هزت راسها بمعنى ايه..و تركها و راح وهو يحس انها محتاجه لفترة هدؤ مع نفسها..طلع من البيت..و هي رفعت راسها تطالعه بعد ماراح..(وش صار فيني؟ كيف قلت اللي قلته؟....ليتني ما تكلمت! يمكن اذا استمريت انكر هالشي انساه...بس كيف أقدر انساك يا سيف..و أنت احلى شي صار لي بهالدنيا...ما كنت أبي احبك...ما كنت مخططه لهالشي..بس مع كل هذا ما قدرت الا اني أحبك) و لأول مره فكرت في أهله..لو كانوا كلهم نفس طيبته..معقول يقدر يعترف لهم بهالزواج في يوم..معقول يتقبلونها بينهم.. في بيت أم العنود=الساعه١٢ ليلا/ كانت جوري جالسه تذاكر..و ياسمين تشوف التليفزيون عندها لأن بكره ما عندها امتحان..و مو رايحه للجامعه.. جوري: بأروح اسوي قهوه تبين؟ ياسمين: صاحيه أنتي! قهوه هالوقت..المفروض تنامين جوري: ما خلصت ياسمين: كذا ماراح تستفيدين من هالمذاكره شي كلها بتطير جوري: بقى لي فصلين لازم اخلصهم ياسمين: خلاص اصحيك الفجر و تكملين جوري: لا لازم الخصهم أول..بعدين اذاكرهم ياسمين: اشوف عطتها جوري المذكره..و ياسمين مرت على صفحاتها بشكل سريع.. ياسمين: خلاص أنا الخصها لك و احدد لك المهم اللي فيها و أنتي اذا صحيتي الفجر تذاكرينها جوري: ماراح تنامين؟! ياسمين: لا ما صحيت الا المغرب بعدين بكره ما وراي شي جوري: بس.... قاطعتها ياسمين: يله لا تعاندين روحي نامي عشان اصحيك الفجر جوري تبتسم: مشكوره يا قلبي ياسمين: حنا بالخدمه في سيارة سيف/ رجع سيف..وهو طول الطريق يفكر..شعوره غريب..بين الحزن و الفرح..أحيانا يحس إنه أخيرا لقى روحه..و ارتاح..و أحيانا يحس إنه ضايع و مضيعها معه..(وش بيصير فينا يا نجود؟ وش مخبيه لنا الأيام؟؟) وصل لبيتها..و تنهد..تخيلها جالسه اللحين تنتظره..و هاللحظه كانت تسوى عنده عمره..نزل و دق الجرس..بعد ثواني فتحت له..دخل وهو يشوفها مبتسمه له و هاديه..باين إنها تمالكت نفسها..تعجبه قوتها..و تمنى تكون عنده نفس هالقوه.. نجود تأشر بيدها قدام وجهه: وين سرحت؟ سيف: وش أخبارك اللحين؟ نجود: الحمد لله سيف: للحين متضايقه؟ نجود: لا سيف: زين للحين تحبيني؟ نجود تبتسم: حسب سيف بإستغراب: حسب إيش؟ نجود: حسب الهديه اللي قلت انك بتجيبها لي..و إلا نسيت؟! سيف يبتسم: لا أنا لا يمكن انسى شي أوعدك فيه..تعالي ندخل دخلوا و اخذت العشاء منه و فتحته..مدته له.. سيف: ماراح تأكليني؟ نجود: لا..مو عاد قلت لك احبك بتستغلني سيف: اذا دلعتيني هذا يكون استغلال؟ نجود: ايه المفروض أنت تدلعني مو أنا اللي ادلعك سيف: بس..ما طلبتي من عيوني نجود تراجعت: لاااا أنت ما صدقت سحبت كلامي سيف يضحك: أنا أبي افهم فيه وحده ما تحب الدلع؟! نجود: ايه أنا سيف: و ليه؟ نجود: سيف اتعشى قبل يبرد الأكل احسن تعشوا بصمت و كل واحد سارح بخياله..نظراتهم لبعض فيها حب كبير..و حزن..و خوف..خلصوا عشاء..و طلعوا بعده للسطح..المكان المفضل لنجود..كان القمر مكتمل..و هالشي خلى ملامحها تكون واضحه لسيف..عكس المرات اللي كان يطلع فيها السطح قبل..و يكون الظلام منتشر.. جلست على البساط اللي كان مفروش.. نجود: يله ابي اشوف الهديه سيف يبتسم: متحمسه؟ نجود: ايه سيف: خلاص دامك تحبين الهدايا كل يوم بجيب لك هديه نجود: جيب أنت الخسران...يله عاد ابي اشوفها سيف: و اذا أعجبتك وش لي؟ نجود تستهبل: لك إني آخذها سيف: لا والله! دخل يده في جيبه..و طلع علبه صغيره..مسك يدها و حطها فيها..فتحت العلبه بحماس..و شافت السلسه الأنيقه اللي كانت فيها..رفعت السلسال اللي كان من الذهب الأبيض..و شافت التعليقه اللي فيه..كانت ثلاث نجوم مزخرفه باحجام مختلفه متعلقه في بعض.. نجود: الله حلو سيف: اعجبتك نجود: ايه اخذها منها..و لبسه لها.. سيف: ما أبيك تشيلينه أبدا نجود تبتسم: ماراح اشيله سيف بجديه: نجود اوعديني انك اذا احتجتي أي شي ما تخبين علي..من اليوم أنا مسئول عن أي شي يخصك نجود تبتسم له: أنت مو مخليني محتاجه شي يا سيف في بيت أبو نادر/ كان طلال في غرفته..حاله تغير بعد ما خطب لينا..صار الكلام ثقيل عليه..و الوقت طويل..كان ينتظر الخميس بفارغ الصبر..يخاف لينا تغير رأيها..لكنه مع هذا كان خايف يشوفها..خايف من اللي بتقوله..خايف من نظرتها اللي تعذبه..بدأ يشك انه سوى الصح يوم خطبها..(مو يمكن لو تزوجت أحد ثاني تقدر تحبه..و تنسى) طلع من غرفته يشوف مين صاحي في البيت..لأنه مل من نفسه..و من أفكاره..يبي يجلس مع أحد عشان يقدر يكذب على نفسه..و يقول انه فرحان..و ما فيه بداخله حزن سنين اثقل قلبه شيله..شاف غرفة رغد منوره و راح لها..دخل طلال لأن الباب كان مفتوح..و شافها مشغله الفيديو و تتفرج على فلم..و مذكراتها منشوره عندها..مشى بشويش و وقف فوق راسها.. طلال يصرخ: لا والله! رغد تفز و تلتفت عليه: طلال حرام عليك خوووفتني!! طلال: وش جالسه تسوين؟ رغد تضحك: آخذه بريك صغير طلال: ليه ما تخلصين مذاكره و تنامين احسن من هالأفلام اللي لاعبه في راسك رغد: ما تعودت أنام و عندي بكره امتحان طلال يقفل التليفزيون..و يقرب مذكراتها.. طلال: خلاص أنا بأسهر معك اذاكر لك رغد بإستغراب: شكلك فاضي! طلال..(الا قولي مليان هم و تعب) طلال: يله اشوف عطيني اللي يقالك مذاكرته..اشوف حفظك *من بكره* في بيت نجود/ صحت نجود بدري و سيف للحين نايم جنبها..قامت بهدؤ..و راحت تجهز ثيابه..كان جايب شنطة ثياب له مثل ما قالت له..عشان اذا صحى يروح لجامعته من هنا..و لايتأخر..بدت تفكر و هي ترتب أغراضه..لو ان زواجهم طبيعي..كيف بتصحى كل يوم وهو بجنبها..و تحضر ملابسه و فطوره..(من متى تفكرين بهالرومانسيه يا نجود؟ من متى هالاشياء تهمني؟...قلبت حالي يا سيف خليتني وحده ثانيه..حتى أنا مو قادره اعرف نفسي) نزلت تجهز له الفطور..و هي تفكر في اهله..معقول يقبلونها..(أكيد لا مهما كانوا طيبين..بس أكيد يبون لولدهم احسن البنات و سيف يستاهل و ألف بنت تتمناه..ليه بيرمونه على وحده مثلي؟) سيف: صباح الورد نجود تتلتفت له: صباح النور..كنت جايه اصحيك سيف: أنا صاحي قبلك نجود بإستغراب: و ليه مسوي نفسك نايم؟ سيف بخبث: أحب اتفرج عليك وش تسوين نجود تذكرت الأفكار اللي كانت في بالها و هي تجهز أغراضه..و دعت ربها ما يكون واضح على ملامحها شي من اللي كانت تفكر فيه.. نجود: زين المره الثانيه أول ما أصحى راح اصحيك غصب عشان اضمن انك مو مسوي لي فيها نايم سيف يلعب بشعرها: قولي لي وش كنتي سرحانه فيه و أنتي ترتبين أغراضي؟ نجود ارتبكت: سيف الوقت تأخر ان كنت مو ناوي تروح جامعتك أنا أبي اروح لمدرستي بدري سيف يتريق: من متى هالنشاط؟ نجود: من اليوم افطروا مع أمها..و بعد كذا طلعت نجود مع سيف.. سيف: بأوصلك نجود: لا ما يكفي المعجبات اللي لك في الحاره تبي معجبات من المدرسه بعد! سيف: كأنك بديتي تغارين؟ نجود تجاريه: ايه أغار بس أنت روح لجامعتك لا تتأخر طلعت معه نجود..و شافوا بنات الحاره اللي مسوين نفسهم ينتظرونها..نجود قرصت سيف و بهمس.. نجود: الكل ناوي يتصبح فيك سيف حس بالإحراج وهو تحت كل هالعيون اللي تتفحصه.. سيف: مع السلامه نجود نجود تضحك عليه: مع السلامه في بيت أم العنود=الظهر/ كان فارس بيطلع من بيت أم العنود..مر عليها يعطيها أغراض من أمه..اللي ما لقت غيره في البيت و أصرت عليه يروح يوصلهن..لكنه شاف سياره واقفه قريب و بنت تنزل منها..حس انه لو بيطلع لسيارته بيمر من عندها و يحرجها..فرجع يدخل البيت..لكن اللي صدمه انه بعد ثواني انفتح الباب..و دخلت وحده ما نتبهت لوجوده..انحرج وهو يشوفها ترمي غطاها..كان بيصد لكن..أول ما بانت له ملامح جوري انصدم..بهاللحظه هي بعد حست بأحد واقف و التفتت عليه..شهقت و تغطت بسرعه..كانت بتروح لكنها سمعت صوته الآمر..و جمدت مكانها.. فارس بعصبيه: مين هذا اللي جايه معه؟! جوري انعقد لسانها: ......... فاري يصارخ: اقولك مين هذا؟؟ جوري ترتجف: هذا..أخو صديقتي...وصلتني.. فارس يقاطعها: و ليه ما جيتي مع السواق؟ جوري شوي و تصيح: السياره تعطلت و راح يصلحها..أنا دقيت على ياسمين و قالت لي عادي أجي مع صديقتي فارس بعصبيه: و مين ياسمين عشان تستأذنين منها! ليه ما دقيتي على أمي حصه و شفتي وش كانت بتقولك..مو تجين لي مع صديقتك و أخوها!! جوري دمعت عيونها:........... فارس بتهديد: عطيني جوالك جوري ما ستوعبت ليه يبيه..بس ما تجرأت تسأل و بيدين مرتجفه..صارت تدور في شنطتها..لحد ما لقته و مدته له..و هي مو قادره ترفع عيونها تشوفه..و صوت دقات قلبها القويه قربت تفجر أذانيها.. أخذ فارس الجوال..و صار يطقطق فيه..رفعت جوري عيونها بعد ما نزل دمعها له..بس ما عرفت وش جالس يسوي..ما تصورت تشوفه أبدا بحالة الغضب هاذي.. فارس بعصبيه: سجلت لك رقمي و رقم سيف..بعد المره لو بتحتاجين شي تدقين علينا حنا مو تجين مع كل من هب و دب..فاهمه؟ جوري و هي تكتم صياحها..ما قدرت الا انها تهز رأسها بمعنى ايه.. طلعت أم العنود على صوت فارس ..و شافته واقف معصب.. أم العنود: فارس! وش فيك يمه تصارخ...و مين هاذي..جوري؟! فارس يلتفت لها: يمه قولي لبناتك ما عندنا أحد يجي مع صديقاته و اخوانهم و أنا بأقول لخالي ناصر عن هاللي صار(يلتفت لجوري) و نشوف وش بيقول عطاها جوالها أو شبه رماه عليها..و طلع..و أول ماطلع بدت جوري تصيح بصوت عالي..وهو واقف عند الباب وصله صوت صياحها..حس ان قلبه عوره عليها..بس القهر اللي فيه..خلاه يتناسى رحمته لها..و ركب سيارته و راح.. أم العنود: بس يمه خلاص لا تصيحين..و ادخلي عن الشمس راحت معها جوري..و هي للحين تصيح..خافت منه وهو معصب..و هي سبب هالعصبيه..جلست في الصاله و أم العنود تحاول تهديها.. أم العنود: خلاص يمه ليه كل هالصياح؟ جوري: يمه أنا غلطت؟ أم العنود: لا يمه بس فارس الله يهديه مادري ليه عصب كذا..يمكن لأنه ما يعرف اننا نعرفهم زين على باله وحده من زميلاتك و أنتي جيتي معها جوري: أخاف خالي ناصر يعصب مثله أم العنود: لا تخافين أنا ادق عليه و أقول له اللي صار..و أنتي لا تزعلين يمه من فارس أنتم حسبة خواته و كل اللي سواه من خوفه عليك جوري صدمتها كلمة خواته أكثر من الموقف..معقول هو بعد يفكر كذا.. في بيت أم فارس/ دخل فارس وهو للحين معصب..كسرت خاطره يوم صرخ عليها..بس للحين مقهور عليها..كيف تركب مع أخو صديقتها..و طول هالطريق و هي معه.. شاف أهله يتغدون..لكن أبوه ما كان موجود.. أم فارس: زين يمه جيت..أنا قلت بيروح الشركه..تعال تغدى فارس من غير نفس: مو مشتهي يمه أم فارس: وش فيك كذا؟ خالتي فيها شي؟ فارس بقهر: لا بس بناتها فيهم أم فارس و أسيل: وش فيهم؟؟! فارس: أنا رايح أنام خليها هي تقولكم أم فارس: فااارس نادته لكنه راح و ما رد عليهم..كان مقهور للحين..و انقهر أكثر لأنه للحين مهتم بهالسالفه.. أم فارس: اتصلي يا أسيل شوفي وش هالسالفه؟ أكيد مو سهله اللي مخليه فارس معصب كذا! الله يستر قامت أسيل و دقت على أم العنود و قالت لها السالفه..و رجعت عند أمها و سيف و هي تضحك.. أم فارس: بسم الله وش فيك؟ أسيل: السالفه اللي معصب عليها ما تسوى أم فارس: وش صار؟ أسيل: كان طالع من عند أمي حصه و شاف جوري جايه مع صديقتها لأن ياسمين اليوم ما عندها امتحان و لا راحت الكليه و سواقهم يصلح السياره مادري وش فيها..و عصب على جوري و هاوشها..ليه تجي مع صديقتها و أخوها..و ما ترك البنت الا وهو مصيحها سيف يضحك: والله حمش أم فارس: وهو صادق جوري ليه تجي مع صديقتها؟ لا و بعد مع أخوها!! أسيل: يمه لا تفزعين عاد أنتي مع ولدك..البنت أهلها محترمين و خالتي أم عمر تعرفهم أم فارس: و خالتي ما زعلت من فارس؟ أسيل: لا..تدري انه ما سوى كذا إلا من حرصه عليهم..بس المفروض ما صرخ على المسكينه للحين جالسه تصيح ما قدرت أكلمها في بيت نجود/ طلعت من البيت رايحه لبشاير..سلمت عليها و على أمها..و سولفت معهم شوي..ثم اعتذرت أمها و طلعت لجارتهم..و يوم صاروا لحالهم..التفتت لها بشاير.. بشاير: نجود وش فيك؟ شكلك ما نمتي أو زعلانه نجود تتنهد: صار اللي ما تخيلت إنه بيصير بشاير بخوف: وش صار؟ نجود: سيف.... بشاير بترقب: وش فيه؟ نجود: حبيته يا بشاير و من اللحين خايفه يجي اليوم اللي بيتركني فيه بشاير: كنت حاسه إنك تحبينه بس أنتي ما رضيتي تعترفين بهالشي..أنتي تغيرتي يا نجود من يوم دخل سيف بحياتك نجود: بس أنا مابي يا بشاير..عارفه إنه في يوم بيتركني وقتها وش أسوي؟ بشاير: هالشي مو بيدك..بس ما قلتي لي هو وش شعوره؟ نجود: هو يحبني بعد بشاير: هذا أهم شي دامه يحبك أكيد ماراح يتركك نجود: و إذا جاء يوم و أهله طلبوا منه يتزوج؟ بشاير: لو كان يحبك صدق بيلقى طريقه يعرفك على أهله نجود بأمل: تتوقعين؟ بشاير تضحك: لهالدرجه تحبينه؟! نجود تتنهد: يارب أكون غلطانه بشاير: كل هاللي فيك و تطلعين غلطانه! ما ظنيت نجود: سيف إنسان ما تخيلت أقابله بحياتي..كيف لما أشوفه وهو يحبني كل هالحب..آه يا بشاير احس إن حالي انقلب فوق تحت بشاير: الله يكتب لك اللي فيه الخير في بيت أم العنود=العصر/ دخلت ياسمين على جوري في غرفتها..كانت توها صاحيه و قالت لها أم العنود اللي صار..شافتها جالسه على سريرها و عيونها حمراء.. ياسمين: لا تقولين انك لحد اللحين تصيحين؟ جوري: أنا اخطيت يا ياسمين؟ ياسمين: لا طبعا..أنا بنفسي قلت لك تجين معه لأني واثقه من ساره و أهلها..بعدين فارس مو من عادته يتدخل بهالأشياء حتى لو تعلقت بأسيل..مادري ليه هالمره سوى كل هالإزعاج و المشكله لدرجة يروح يقولها لخالتي أم فارس جوري: و خالي ناصر عرف؟ ياسمين: دقت عليه أمي و قالت له اللي سواه فارس و قال انه يعرف مازن و اخلاقه الكل يتكلم عنها..و قال هو بيكلم فارس جوري بخوف: ليه يكلمه؟ أخاف يهاوشه! ياسمين: يستاهل هو قليل يصرخ عليك؟ جوري: لا يا ياسمين تكفين قولي لخالي ينسى السالفه..صح على أمي حصه فارس ما سوى كذا إلا لأنه خايف علينا مو معقوله نجازيه كذا ياسمين: و الله انك طيبه يا جوري جوري: الله يخليك يا ياسمين مابي تصير مشكله بسببي كملت في نفسها..(خاصه لفارس..أخاف يكرهني) ياسمين: خلاص ندق على خالي و نقوله ان جوري سحبت الشكوى بس شيلي هالتكشيره عنك و انزلي معي نتقهوى جوري: زين كلمي خالي ناصر اللحين قولي له و أنا بأنزل اسويلك احلى قهوه نزلت جوري و شافت أم العنود في الصاله.. جوري: مساء الخير يمه أم العنود: مساء النور هلا يمه..وش أخبارك عسى مو زعلانه للحين؟ جوري: لا يمه أنا نسيت اللي صار..بأروح اسوي قهوه لنا أم العنود: انتظري يا بنتي قبل تروحين دقي لي على فارس بأشوف هو الثاني رضى أو للحين زعلان راحت جوري للتليفون و ضربت رقمه..و هي تبي تعرف أكثر من أم العنود ان كان للحين زعلان عليها..مدت السماعه بسرعه لأم العنود و كأنها خايفه منها.. أم العنود: السلام عليكم فارس: و عليكم السلام و الرحمه..هلا يمه أم العنود: وش أخبارك يا ولدي عسى للحين مو زعلان؟ فارس: لا يمه ان وعدتيني ان هالشي ما يتكرر مره ثانيه ماراح ازعل أم العنود: لا يمه و لا يهمك ماراح يتكرر بس أنت لا تعصب مو زين عليك التعصيب فارس يضحك: و الله آسف يمه يمكن زودتها اليوم أم العنود: ما عليه يا ولدي أنت مثل اخوها الكبير و لك حق عليها حنا من لنا غيركم تنهدت جوري و هي تسمع هالكلمه للمره الثانيه اليوم..راحت المطبخ و هي تفكر..(ياسمين تقول مو من عادته يتدخل في هالأشياء..أجل ليه عصب كذا؟ معقول يكون يغار علي؟ و الله اني مصدقه نفسي و أحلم!...الخوف يكون مثل ما تقول أمي عاد نفسه مثل اخونا..نفسي اعرف وش ردة فعله على هالكلمه يوم قالتها أمي؟) فتحت جوالها تتأمل رقمه اللي خزنه لها..(و كأنها بتجيني الجرأه في يوم و أدق عليك..و الله لو كنت بأموت ما أظن اقدر أدق هالرقم) فزت يوم شافت جوالها يدق..و شافت اسم أسيل.. جوري: هلا أسيل أسيل: مرحبا جوري وش أخبارك؟ جوري: تمام و أنتي؟ أسيل: الحمدلله..وش أخبارك بعد اللي صار اليوم؟ جوري: عادي أنا نسيت السالفه أسيل: زين بأمرك بعد ساعه تروحين معنا السوق أنا و البنات تجهزي جوري: زين أقول لأمي حصه و اشوف وش تقول أسيل تضحك: لا باين انك للحين متأثره بهواش فارس..أكيد أمي حصه ماراح تقول لا..خليك جاهزه بعد ساعه بأكون عندك جوري: ان شاء الله في سيارة فارس/ كان طالع من شركته رايح للبيت..و دق جواله..و شاف رقم خاله ناصر.. فارس: مرحبا ناصر: هلا فارس..وش أخبارك؟ فارس: الحمدلله..أنت وش أخبارك ما تنشاف من سفره للثانيه؟ ناصر يضحك: مو أنت اللي تلومني أنت حالك مثلي و أزيد...فارس أنا..كنت.. فارس يقاطعه: أدري يا خالي بتعاتبني على اللي سويته اليوم ناصر: لا توسطت لك جوري عندي..بس المره الثانيه يا فارس أي شي يتعلق بجوري و ياسمين تكلمني أنا فيه و أنا اتصرف معهم فارس: على أمرك يا خالي..و أنا من اليوم ماراح اتدخل في أي شي يخصهم ناصر: لا تزعل يا فارس بس... فارس: لا يا خالي أنا مو زعلان..أنت تعرف ان هالأشياء عمرها ما همتني و لا راح تهمني..اللي صار اليوم صدفه و ماراح يتكرر أبدا..و دامك المسئول عنهم ما أحد راح يخاف عليهم كثرك ناصر: مشكور يا فارس انك فهمتني..و خلني اشوفك و الا تبي أنا اجي لك فارس: لا الحق لك يا خالي و اليوم أنا عازمك على العشاء في احسن مطعم في الرياض وصل للبيت..وهو يفكر باللي سواه..و الكل عرف فيه..ما يبي أحد يقول انه مهتم فيها..هذا أكثر شي قهره.. يتبع |
