 |
  |
|
|
|
|
#6 |
|
|
رد: روآآية "ماكل من يضحك مع الناس مبسوط " كآآملة..
الفصل الخامس بعد مرور اسبوع (يوم اختبار القبول ) الصبح ع الفطور العائلة باكملها مجتمعه للفطور ماعدا ليلى ابو نور : وين ليلى يانور نور : ليلى يبه جالسة تتجهز للجامعه ابو نور : الله يوفقها ان شاء الله ها حنان بتروحين معاها الجامعه حنان : تبيهم يطردوني ام نور : ليش ؟ حنان : يمه الله يسلمك الحين ليلى بتروح تختبر بقسم الكليات الصحيه وهم اقسامهم منفصله بمبانيها عن اقسام بقية الكليات وبطاقه الدخول حقتي مكتبوب عليه ان تخصصي قانون السكيورتي مارح تخليني اشبر شبر بتقول انتي شجايبك مكان مو مكانك احتفظ بكرامتي احسن عن يطردوني ام نور : ياقلبي على بنيتي اخاف تضيع ابور نور : الله يهداك شتضيع بعد بزر هي ماشاء الله عليها البنات: خخخخخخخخخخ ام نور : برضو يارجال بتكون بمكان جديد عليها مريم : ترى يمه يحطون لهم ارشادات وناس تدلهم ع الطريق تطمني وترى مابتكون لحالها احلام معاها وشوي ويشوفون ليلى نازله ع الدرج ولابسه العبايه وماسكه كتاب بيدها وتذاكر حتى ماكلفت خاطرها تناظر الطريق حنان : اقول يالمجتهده شوي شوي على عمرك لاتعنقلين ليلى مسكينه واصله حدها من التوتر : حنانوه ترى مو ناقصتك واصله حدي حنان : والله مايسوى عليك هالامتحان ليلى : احتفظي برايك لنفسك مو انتي الي رح تختبر ولا انتي الي حلمها رح يكون على كف عفريت حنان بمغايضه : قصدك غبائك المستدق ابو نور مو عاجبه اسلوب حنان : حنان بس ولتفت الى ليلى : ها بنتي ان شاء الله مذاكره زين ومعنوياتك عاليه حنان رزت وجها : ابشرك ماكله الكتب اكل ابونور : وبعدين معاك يعني ليه ماتنكتمين لما اسألك جاوبي بطلي اسلوب الرزه حنان انحرجت وايد وبان هالشي عليهاوكان ودها تترك السفره وتقوم لكن طبعا عزت نفسها ماسمحتلها تسوي هالشي وجلست براس مرفوع ع السفره ولاكأن صار شي مريم : تستاهلين جبتي لنفسك الكلام حنان :....................... ليلى ولاكأن شي صار : الحمد الله يبه ذاكرت زين انتو ادعولي الله يوفقني ام نور : ان شاء الله يابنتي ربي يكون معاك وتوفقين واشوفك دكتوره ياليلى ابو نور : ابغى ارفع راسي فيك ياليلى واقول عندي بنت دكتوره (وهو يوقف بيطلع) مريم :يعني الحين مافي غير ليلى ترفع راسك واحنا وين رحنا ابو نور : اشوفك انعديتي من طولة لسان ناس حنان (شرقت بالعصير عرفت انها المقصوده ) : كح كح ام نور : بسم الله اشربي شوي شوي لاتصيرين مفجوعه حنان : ان شا ءالله مريم : يبه المثل يقول من عاشر قوم اربعين يوما صار منهم وانا ماعشرتهم سنين شلون مارح اصير زيهم ابو نور : خخخخخخخخ يالله في امان الله ليلى جالسه ع السفره وحاطه الكتاب جنبها وطبقها مالمسته لان نظرها وانتباهها كله ع الكتاب ام نور : ليلى قفلي هالكتاب واكلي فطورك ليلى : هاه ما ابي يمه شبعت خلاص ام نور : المسي الاكل اول وبعدين اشبعي ليلى : لاخلاص بطلع الحين الجامعه ام نور : تو الناس ترى ماشبرتي شبر برا الباب اذ ا ماكلتي ليلى اظطرت تقعد عصب عنها عشان تفطر اكلت بسرعه حنان : عن اذنكم ام نور: وين ياحنان حنان : بطلع انام يمه ام نور : زين وطلعت حنان غرفتها ليلى : يللا ياجماعه انا بروح الحين ادعولي الكل : موفقه ان اشاء الله طلعت ليلى الى الشارع وشافت السياره موقفه لكن السواق مو موجود ليلى : اوف هذا وين راح ليلى دقت على جوال السواق: اكبر وينك فيه اكبر : سوي سلام اول ليلى ليلى : الله ماطولك ياروح سلام عليكم اكبر شلونك شخبارك (بصوت عالي ) انت وينك فيه اكبر : وألكيم السلام حال انا تمام انت كيف حالك انا اند طوني سواق بابا راشد (واحد ساكن بالحي بس بيته شوي بعيد عن بنت ابو نور ) ليلى : وانا شكو فيه ياللا تعال الان بسرعه اكبر : ان شاء الله مرت خمس دقايق على ليلى وهي ملطوعه ياحرام في الشارع وشوي الا تشوف اكبر جاي وهو يمشي على اقل من مهله ليلى بخاطرها (ويتمخطر بمشيته بعد ) : اكبر يسرعه يللا شغل السياره اكبر وهو يفتح باب السياره : شوي شوي سرعه من شيطان ليلى : يارب صبر من صبر ايوب وطلعوا السياره حاول اكبر يشغل السياره لكن معصي دور المفتاح مره مرتين السياره تحن ومو راضيه تشتغل ابدا ليلى : شفيه اكبر اكبر : هذا سياره مو راضي يشتغل ليلى : وشو اكبر : مادري مكينه مو راضي يشتغل ليلى : طيب انزل شوف ايش فيها هز اكبر راسه يمين وشمال ونزل فتح كبوت السياره واول مانفتح الغطا السياره دخنت اكبر : ليلى انا مايعرف ايس في هذا سياره لازم يروح ورشه ليلى : اكمللت الان انا كيف بروح وتنزل ليلى من السياره وتدخل الى البيت وتشوف نور جالسه في الصاله وحدها نور : بسم الله علامك رجعتي ليلى : السياره خربانه وابوي وراح الحين شلون بروح الاختبار نور : طيب اتصلي بابوي يجي ياخذك ليلى : وين يجي الين مايوصل البيت بيروح علي الموعد نور : طيب شوفي امي لو ترضى بوديك بالتاكسي ليلى تطالعها بنص عين : عشان تقصب رقبتي نور: اجل اقعدي وحطي يدك على خدك ليلى وهي تنقز : احلام نور : شفيها ؟ ليلى : اكيد ماراحت بدق عليها تمرني نور : زين اجل دقيلها ليلى والسماعه باذنها : ترن ترن واول ماسمعت ان السماعه انرفعت ومن غير ماتعطي مجال للي راد عليها يفتح فمه بكلمه قالت وبسرعه : الو كونان بسرعه عطيني اختك ولاتكثرين اسئله قوليلها ليلى تبيها ضروري صوت رجالي ومبين عليه انه كاتم الضحكه : لحظه اختي بعطيها خبر ليلى بخاطرها "مالت على ذا الوجه الحين ماعندهم احد يرد الا اخوها شبيقول علي هاليوم نحس من بدايته ..استغفر الله العظيم " احلام : الو شتبين داقه بهالوقت ليلى : مالت على ذا الاسلوب سلمي بالاول احلام : مافي سلام مقومتني من ع الفطور ليلى : عشان تنحفين احلام : ومن قال ابي انحف تكفين ليلوه قول شتبين قبل مايمسح ريانوه الاطباق ليلى : ههههههههه اجل بمط المكامله خليه ياكل براحته احلام : وقسم بالله ان ماقلتي شعندك لاقفل السماعه ليلى : طيب خلاص اسمعي يعني اذا ماعليك امر ممكن تمريني اروح معاك الجامعه لان السياره عطلانه والوالد راح الدوام احلام : افكر ليلى : اقول بتمرين ورجلك فوق رقبتك بعد احلام: لا والله من يقول ليلى : العيش والملح الي بينا يقول احلام : اخخخخ مسكتيني من ايدي الي توجعني خلاص بمرك ليلى : اوكي انا انتظرك احلام : ترى كلها 10 دقايق وانا عندك خليك جنب الباب بدق لك بوري ليلى : حاظر عمتي احلام : يللا ضفي وجهك بعد ماقفت ليلى من السماعه نور : بيمرونك ؟ ليلى : ايه نور : اجل بطلع اقول لاومي ليلى : مشكوره وفرتي علي المشوار وطلعت ليلى للحوش تنتظر احلام + + + + في بيت احلام + + + + احلام : اقول دحمي ترى بنمر بيت صحبتي بناخذها معانا عبد الرحمن : انا كم مره اقول بطلي دحمي هذا ياشيخه استحي رجال طول بعرض وتناديني دحمي دحمي احلام : جزاتي اني ادلعك عبد الرحمن : دلعك ومستغنين عنه وبعدين من قال اني بمر بيت صحبتك المخفه سواقك عندك انتي وجهك احلام : لا كله ولا لولو مارضى عليها هاذي ست العاقلين عبد الرحمن : دامها صحبتك الموضوع مشكوك فيه بصراحه ريان : خخخخخخخخخخخخ حلوه احلام : انت انكتم (لريان ) ريان : يعني عشان ماقدرتي عليه تجين علي انا الغلبان احلام : ريانو ام عبد الرحمن : بس عاد احشموني احلام : محشومه يمه عبد الرحمن : بس خلاص يللا انا بالسياره وانتي بسرعه اطلعي البسي عباتك وانت امشي قدامي (لريان ) تامرين على شي يم ام عبد الرحمن : سلامتك ياوليدي لا تسرع عبد الرحمن: من عيوني خلونا نعطيكم معلومات عن عائلة احلام <<صح النوم احلام : 18 سنه حبوبه وفرفوشه صديقة ليلى من ايام المتوسطه ومقدمه معاها بامتحان القبول للطب عبد الرحمن : 26 سنه من مات ابوه قبل 6 سنين وهو صاير رجال البيت وهم الشغل والشركه كله فوق راسه كشكل مملوح وماعليه كلام والكل يشيد باخلاقه العاليه روان : 10 سنين البنت هذي ملقوفه لقافه مو طبيعيه ومسميتها ليلى المحقق كونان ريان : 8 سنين اخر العنقود مات ابوه وعمره سنتين متعلق بعبد الرحمن وايد لانه الي مربيه ريان يعز الاكل مره وتختوخ شوي ولسانه يبيله قص شوي ام عبد الرحمن : مره طيبه وحنونه نرجع للاحداث ++++ في السيارة ++++ عبد الرحمن : احلام وين بيت صحبتك احلام : هذا البيت البني والبيج الي جنب المسجد عبد الرحمن : اها عرفته وصلو البيت ودق بوري وطلعت ليلى ليلى اول مادخلت سلمت بصوت واطي يادوب ينسمع ريان : الناس تدخل تسلم ليلى انحرجت من ريان احلام : ريان البنيه سلمت ريان : وانا ماسمعتها احلام : ياخي مو ضروري ريان يتكلم لكن لمح نظره من عين عبد الرحمن كفيله بانها تسكته عشرين سنه قدام وساد الصمت بينهم رفع عينه لاول مره يناظر المرايا وشاف عيونها التقت النظرات لمده ماتجاوز بضع لحظات الا انها كانت كفيله تذوب عبد الرحمن وتغرق ليلى عبد الرحمن في خاطره الله اكبر كيف يجرحن العيون كيف مايبرى صويب العين ابد احسب ان الرمش لاسلهم حنون اثر رمش العين ما ياوي لاحد يوم روح لي نظر عينه بهون فزّ له قلبي وصفقّ وارتعد لفّني مثل السحايب والمزون في عيوني برق وبقلبي رعد نقّض جروحي وجدد بي طعون قلت : يكفي قالت عيونه بعد وانعطف هاك الشّعر فوق المتون وانثنى عودة وقفى وابتعد اشغلتني نظرة العين الفتون حيّرتني بالتوعد والوعد هي تمون العين والاّ ما تمون لي خذت قلبي وقفتّ ياسعد وصلو الجامعه كل وحده راحت باتجاه قاعتها ع الساعه 12 خلصو البنات ليلى : السلام عليكم احلام هلا وعليكم السلام ها بشري ليلى : مالت عليهم جايبين اسئله من برى المناهج مره صعبه احلام : والله الي من جوى والي من برى كلها صعبه الله يستر ونعديها ليلى : احلام ترى انا بروح مع السواق احلام : ليه ليلى : ايش ليه السياره صلحها والحين جاي ........وبعدين والله فشله من اخوك شيقول علي احلام: مارح يقول شي والله وناسه معاك ليلى : تسلمين والله ماتقصرون يللا هذا السواق يدق في امان الله احلام : مع السلامه بعد يومين كانت ليلى في غرفتها ونور نايمه وفجأه ليلى تصرخ ليلى : لا |
|
|
#7 |
|
|
رد: روآآية "ماكل من يضحك مع الناس مبسوط " كآآملة..
الفصل السادس أأُنكر دمع عيني إن تداعي؟ ... وأصطنع ابتساماتي اصطناعا ليلى : لا نور قامت مفزوعه من النوم :خير شصار ؟ ليلى وهي ماسكةضحكتها على شكل نور : ولا شي وترجع تكلم احلام الي ع التلفون : احلام دقيقه شوي اوكي نور واصلة حدها : ودام مافي شي ليه تصارخينحرام عليك روحي احسها طلعت من الخوف ليلى متفشله : سوري مو القصد بس عاد تحمست مع الموضوع بعدين بقولك عليه الان نامي نور: شلون بنام وانتي طيرتي النوم من عيني وقامت شايلة لحافها ومخدتها ومتجهه للبا ليلى : على وين ؟ نور : مايخصك وطلعت من الحجره ليلى رجعت تكلم احلام : باكو احلام : تو الناس كان تأخرتي شوي ليلى : خخخخخخخ سوريكنت اكلم النوري مسكينه قامت خايفه من صوت الصرخه احلام : اكيد بتخاف اذا انا احس طبلة اذني انفجرت وانتي ماتقصرين تموتين على رقعة الصوت (الصراخ ) ليلى : يؤ يؤيؤ انا تحمست للموضع احلام : عسى بس مازعلت ليلى : الا هجت من الغرفه بكبرها احلام : ياويلي حرام ليلو راضيها ليلى : افكورس براضيها هاذي النوري ماستغنى عنها ابدا احلام : ياعيني ياعيني ليلى : اوكي ياللا ضفي وجهك بروح اشوف اختي وينها وبراضيها احلام : اوكي يالدعله لاتنسين تشيكين ع الموقع الجامعه ليلى : دعله انا اقول حتى بالديره بطلوها احلام : خخخ كيفي انا احب اتمسك بالتراث ليلى : ونعم التراث احلام : خخخخخ يللا في امان الله ليلى : في امان الكريم نور خرجت من الغرفه معصبه واصله حدها الدنيا كانت ظلام مافي غير اضاءات الجدار الصغيرونه الا وفجأه يوم وصلت للدرج الي ينزل ع الدور الارضي تسمع هاي اخ اه هيهاي نور : بسم الله الرحمن الرحيم انا اكيد اتخيل نور جاء الصوت من وراها ينادي بسمها نور : اه ليلوه فجعتيني ليلى : ايش موقفك هنا نور : سمعت صوت من الصاله تحت ليلى : من الصاله من فيها الان الكل نايم نور : اقولك والله سمعت ليلى : يابنتي يتهيألك وما ان خلصت ليلى عبارتها الا ورجع الصوت لكن هالمره صوت مره صوت ضحكات بشكل هستيري يقطعها صراخ مره معذبه ليلى : يممه نور : يتهيألي مو ليلى ويقال انها شجاعه : صدقيني هذا التلفزيون تلاقين حنان نامت من غير لا تطفيه نور : هقوتك ؟ ليلى : ايه نعم تعالي معاي نور : وين ؟ ليلى : وين بعد بنزل الصاله تحت نور : ليش؟ ليلى : شنو ليش تعالي بنقل التلفزيون نور : مابي روحي لحالك ليلى : لا والله من فينا الكبيره تعالي معاي انا اخاف اروح لحالي بالليل ومن غير ماتعطيها مجال للرد سحبتها ع الصاله التحتيه وصلو لمكان التلفزيون ما شافو شي التفزيون كان مو شغال ومافي اثر ان أي شخص موجود لكن فجأه تكرر الاصوات وهالمره بشكل مره اعلى ليلى ونور لصقو بعض نور : ليلىىىىىىىىى قومي نطلع من هني ليلى : مو قادره احرك رجلي وربي وشوي الا ونور (اضاء ه )على الدرج يظهر ويختفي ونفس الوقت حاجه تتحرك نور : قل اعوذ برب الفلق ويجيهم صوت لاشياء تتكسر وابواب تنظرب بعضها وريح قويه ليلى: لا ابي حجرتي ليلى ونور ماتشوفون الا غباره مسرعين باتجاه الدرج لكن طلعلهم شي ماكان بالحسبان جالس ينزل من الدرج شي ابيض مو باين منه ولا شي غير عيونه ليلى ونور بصوت واحد : ا ا ورجعو ركض للصاله لكن طلعلهم نفس الشي ليلى ونور : يممه يبا وحظنو بعض يبكون وفجأه تولعت الانوار وبانت الاشكال وصوت الضحك تغير نور بوسط معمعة البكا انتبهت للاصوات وعرفتها والتفت وشافت مصدر الصوت نور : حنان حنان الي فاطسه على روحها من الضحك وماسكة الشف الابيض بيدها : وربي انكم مقصات خخخخخخخخخخخخخخخ نور : كيف مريم الي تنزل من ع الدرج : ههههههههههه جبانات ليلى استوعبت الموضوع اخيرا : انتو وتقوم تلحق ورى حنان ونور ورى ليلى الين مامسكت كل وحده طريدتها وقامو ينتقمون منهم ليلى تشد شعر حنان : ان مانتفت شعر ك شعره شعره يالتيسه حنان : حرام عليك كل هذا غيره من شعري نور : خل يكون عندك شعر بالاول مريم : لا خخخخخخخخخخ بس ماقدر نور : واهي تكركر مريم بطنها : تستاهلين اعرفك ماتتحملين مريم : خخخخخخخخ لا نور حرام خصري ههههههههههههههههه واخيرا توقفت الحرب بين البنات وجلسو كل وحده مقابلة الثانيه نور : ممكن تفهموني ليه سوتو كذا وفكرت مين حنان : خخخ انا كنت مرتبه لك المقلب من فتره ومنتظره الفرصه المناسبه ويوم كنت طالعه من المطبخ مريت من جنبل غرفتكم سمعت هوشتك انتي وليلى قلت والله وجاتك الفرصه وطبعا مريوم ساعدتني نور تناظر مريم : والله ويطلع منك يامرايمو مريم تضحك : خخخخخخ وازيدك من الشعر بيت انا مصممة الازياء البنات : ههههههههههههه ليلى : طيب والاصوات حنان :هههههههههههههههه الاصوات هاذي انا محملتها من النت وبعضها خذتها من cd للمؤثرات الصوتيه نزلتها ع اللاب توب وشغلتها وقت ماحضراتكم جيتو ليلى بتشكيك : شلون ينسمع اللاب توب من حجرتكم مريم : يابنت اللاب ورى الكنبه الي جنب الشباك ليلى : اها نور : المهم لا تعيدونها سامعين والله حسيت قلبي بيوقف مريم : سلامة قلبك حنان : طيب ليلوه لليه انتي كنت تصارخين نور: ايه تذكرت وتجر ليلى من اذنها ليلى : اي نور اذني نور : بلا اذنك بلا نيله اعترفي ليه الصراخ ليلى : زين بقول مريم : ناس ماتمشي الا بالعين الحمرا الكل : هههههههههههه ليلى : احلام صديقتي انخطبت نور: وهذا الي خلاك تصرخين ليلى : ايه نعم تفاجأت بصراحه نور : وليه يعني اهي بنت زي كل البنات لازم بيوم تنخطب وتزوج حنان : اها نور : حنان شعندك حنان : ابد سلامة راسك بس كل بنت لام تتزوج مو نور : حنان لا تبدأين حنان : ابدأ بشنو مريم وهي تحاول تخف من حدة التوتر : بنات ترى بكره السفر جهزتو الشنط ليلى على نفس المنوال : ايه نعم حنان عسى حطيتي بناطيل ترى امي بتذبحك حنان وعيونها بعيون نور وكلام بالعيون ينقال محد فاهمة غيرهم الثنتين : تطمني ماحطيت اعرف جدتي بتفتح لي محاظره مالها اول من تالي وبتقلب الموجه على امي نور وقفت واهي بحالة انفعال مو قادره تتحمل نظرات حنان : انا بطلع انام اذا اذن الفجر صحوني حنان : هروب موفق ليلى وهي تضفط على ايد حنان : بس حنان نور طنشت وكملت طريقها مريم لحنان بعد طلوع نور : انتي اكيد جنيتي حنان : nooooooooo ليلى : حنان حرام عليك تعرفين حساسيتها تجين انتي تزيدينها يكفي انها شايله هم السفر على راسها حنان : لو اهي فعلا عاقله تنسى الي راح شوفي شلون صارت من يصدق ان هاذي نور الي كانت ضحكتها ترن بالبيت رن الخلاخل بالفراغ هاذي نور الي كل من يشوفها يقول سبحان الي خلقها وين نور العاقله نور المتفائله انا مو شايفه قدامي الا حطام مريم : حنان حنان : شنو حنان انتي بعد هذا الواقع ولا شي من نسج الخيال مريم : .................. حنان : ها ليلى ؟ ليلى : ................. حنان : اجل لا تلوموني هاذي اختي وقلبي يوجعني عليها يوم اشوفها بهالمنظر ليلى : بس كلامك نظراتك تجرحها حنان : احيان الجرح يكون الدوا مريم : شقصدك حنان : زي العمليات الجراحيه يجروح الجسم وبعدين يخيطونه ليلى : لا والله ومن بيخيط جرح نور حنان : نور وحدها ليلى : صعب حنان : لو تقر صدقيني رح تقدر بعيد بغرفه نور جافى عينها النوم تناظر لسقف غرفتها : اه ليه ياحنان ادري كل الي بتقولينه صح لكن صعب والله صعب ونزلت من عينها دموع حاره فيها من الالم مايفت الحجر مسحت دمعتها واخذت دفترها الخاص وكتبت : اواه لو تغيير الزمان باستطاعتي لبدلت ايام الحزن فرحا لا ينقض له مضجعي اواه يازمن حطت القلم ونامت |
|
|
#8 |
|
|
رد: روآآية "ماكل من يضحك مع الناس مبسوط " كآآملة..
الفصل السابع ودي ابكي لين مايبقى دموع ودي اشكي لين مايبقى كلام من جروح صارت بقلبي تلوع ومن هموم احرمت عيني المنام انطفت في دنيتي كل الشموع والهنا مايوم في دنياي دام ان شكيت الحال محدن لي سموع وان سكت الناس زادوني ملام ++++++++++++++++++++++ حنان مدري ليه اصحى بدري حتى لو نايمة عقب الفجر برضو اصحى بدري اعتقد ان جسمي خلاص تبرمج على هالشي بعكس خواتي النوم عندهم شي مايمكن يتعوض يطقونها 10 او 12 ساعه ماتفرق اليوم هو الخميس موعد سفرنا للرياض تدرون ابدا ماحس بالحماس لهالسفره ماعتقد ان في احد متحمس لها غير ابوي وامي الرياض لنا فيها ذكريات حلوه وسعيده لكنا بنفس الوقت تعيد ذكريات كلها الم وحسره نزلت للدور الارضي لقيت الوالد والوالده جالسين يتقهون ماتغيرت ابد عاداتهم رغم مرور خمس وعشرين سنه الا ان هذي هي عادتهم كل خميس وجمعه يقعدون سوى قدامهم القهوة والتمر ويتكلمون لما اشوفهم احس دوم ان امي محظوظه بابوي حتى هو محظوظ فيها تدرون بيني وبين نفسي ادعي ان الله يرزقني بالرجال الي يكون شرات ابوي بكل شي حتى التجاعيد الي عند عينه يوم تظهر وهو يبتسم اول مما انتبه اني جايه عليهم بدأ يرحب فيني هاذي عادته كل ماشاف وحده منا يحب يسمعها احلى كلام الترحيب والحب عمرنا ماحسينا ان ناقص حنان ابو رغم كل مشاغله وضغوط عمله الا ان كل هذي الاشياء يكبها ورا ظهره اول مايدخل البيت ابوي : هلا والله هلا بشيخة البنات هلا بالغلا كله عاد شقت الابتسامه وجهي : هلا فيك يبه شلونك يالغالي اليوم قالي : الحمد الله انتي شلونك قلت له : ازقح ولله الحمد قربت من امي وسلمت ع راسها : شلونك يمه امي: الحمد الله يابنتي وقالت لابوي بلهجة عتب : اللحين حنان الغلا كله اجل انا شتطلع يابو نور بيني وبينكم حسيت نفسي رح افطس من الضحك لكن عاد احترمت نفسي لا تجيني كلمه من هني ولامناك رد ابوي بذكاء رجال الاعمال: امنتي الاصل يا ام نور وغلا بناتك ماهي الا جزء بسيط من غلاك بقلبي انصبغ وجه امي باللون الاحمر يالله ماتوقعت ان بعد كل هالعمر تستحي من كلمة غزل طبعا اهني ماقدرت امسك نفسي قمت اصفر واقول : احلا علي يستحون ومعاه ذيك الصفقه العربجيه ماحسيت الا وامي ساحبة اذني : انا كم مره اقول بطلي هالحركات مره شتطولك شعرضك تسوين هالحركات قلت وانا اتوجع : اي زين زين ماعيدها ابوي كام يضحك علي ويقول لامي : اتركيها حرام عليك امي تعاتب ابوي : ايه اتركها دلتها وكبرت راسها الي يشوفها ما يقول انها بنيه فتحت عيني على الاخير : اجل شنو يمه امي : أي شي الا انك بنيه بيني وبينكم حسيت بغصه معقول انا لهالدرجة مايبين علي اني بنيه معقول ان كل تصرفاتي تصرفات صبيان شرات ماتقول امي طيب شسوي اذا كانت ميولي للسيارت واحب الاكشن والملابس العمليه وماحب الطخ وجهي كأني مهرج سيرك والشعر الطويل اوف يضايقني احس نفسي امشي وشي يشدني لورى ابوي حس اني زعلت من كلام امي دوم اهو الي يحس فيني وبمشاعري لاني الاقرب له من كل خواتي ضمني وباسني على راسي وقال : بسم الله على بنتي الا شيخه البنات كلهم من اولهم لاخرهم بكرة بتركد وتصيري شحلوها وشزينها امي كملت : من هي صغيره وانت تقول هالكلام تعبت ونا اوقلك حنان بنيه ياعبد الله والي تعلمه اياها مو للبناات لكن ماكو فايده ابوي بصدمه مفتعله : انا امي : ايه نعم انت اجل احد عنده بنيه عمرها 8 سنين ياخذها المقناص ولا يعلمها ركوب الخيل خواتها بسنها يلعبون بالعرايس والالعاب المطبخ واهي ماتاخذ الا السيارات والاسلحه حاولت ادافع عن نفسي : يمه كل شخص له ميوله امي : وانيت تشوفين ميولك شي طبيعي حنان يمه انا امك واخاف عليك وعلى مصلحتك اليوم انتي عندنا بكره بيت رجلك وبين ناس غير الناس شيقولون يوم يشوفون تصرفاتك مزوجين ولدنا رجال بشكل حرمه قلت لها : والله ألي يبيني ياخذني شرات مانا مارح اغير نفسي عشان رجال مو عاجبه بالطقاق الي يطق راسه ابوي عاتبني : حنان يابنتي ثمني الكلام قبل لا تقولينه الي تتكلمين عنه ولد عمك تعرفون يوم تنكب عليكم مويه بارده او تصعقكم الكهربا هذا نفس شعوري يوم قال ابوي هالكلمه ولد عمك قلت وانا كلي صدمه : أي ولد عم يبه ؟!!!!!! امي : وانتي كم عم عندك ابوك يتكلم عن بندر انتي محجوزه له من صغرك قلت وانا اناظر ابوي اتمنى يكذب الي اسمعه : يبه صحيح هالكلام ؟!! انا محجوزه له ؟ ابوي مسح على راسي: ايه نعم وعمك كلمني قبل يومين وخطبك رسمي مني وانا عطيته موافقتي المبدأيه استغربت من رد ابوي عطاه الموافقه انزين وانا شخانتي كمالت عدد انسانه بلا راي قلت له : انزين ورأي ماله اهميه ماله قيمه امي جاوبتني : بتكسرين كلمة ابوك ياحنان رديت بسرعه : ماعاش ولا كان الي بيكسر كلمت ابوي بس انا ابوي : حنان سمعيني زين انا ماوفقت على بندر الا لاني اعرف انه بيحافظ عليك ويصونك ويابنتي البنت مايعزها احد اكثر من ولد عمها ولد عمي ذاك المغرور انا مكنت اطيقه واحنا صغار اجي اخذه اللحين بعد ماكبرنا ابوي قالي : شوفي يابنتي صلي واستخيري اذا ماتبينه انا مارح اغصبك وبقول لعمك ماللك نصيب عندنا قلت له اذكره : بس انت عطيته كلمتك قال وهو يتنهد : اخوي رجال عاقل وعادي بقوله اني وافقت من غير ماستشيرك ويوم سألتك ماوافقتي قلت له : بهالسهوله قال : تأكدي اني مارح اغصبك على شي ومستحيل اجبرك على شي انتي ماتبينه اهم شي سعادتك عندي وقف بيطلع : ياللا توصون على شي سألته امي : وين بتروح قال : ابد شويت اوراق بروح اجيبها من المكتب يحتاجها ابو تركي امي: زين الله يحفظك قال : مارح اتاخر ارجع القاكم جاهزين امي : ان شاء الله ابوي : مع السلامه وطلع من البيت وتركني سط حيرتي وسط ضياعي عمره ابوي مايسوي شي من غير لا يشاورنا طول عمره يسألنا ويعرف ارائنا ليه بموضوع زي هذا اعطى كلمته وجاء يشاور بعد ماتخذ القرار ليه ؟مل كذا ليه ؟!!!!!!! كأن امي حست بتفكيري : حنان اعرف بشنو تفكرين يابنتي لكن ابوك ماسوى الا الي بمصلحتك قلت لها وانا شوي بنفجر من القهر : مصلحتي مصلحتي اخذ هذا الي ما يحترم ولا يحشم الناس مغرور ويكلم خلق الله من طرف خشمه تقولين جالسين يطرون من عنده امي انصدمت : بندر فيه كل هذا قلت لها باصرار : ايه امي : وانتي شدراك اخر مره شفتي وقعدتي معاه كان عمرك 12 سنه وبعد كذا تحجبتي وين بتشوفينه وهو اول ماغلق الثانوي سافر يدرس بره وعمري ماسمعت ابوك يذمه ولا أي احد الا الكل يشكر فيه ويقولون محمد جاب رجال ينشد فيه الظهر قلت وانا احاول ادافع عن رأي : يمه هذا طبعه مارح يتغير من يوم كنا صغار وهذاك طبعه شبيغيره الان جاوبتني : يابنتي الناس تتغير بيوم وليله مارح تغيره السنين قلت لها : يمه طبيعه بالبدن ماتروح الا بالما والكفن قالت بعد ماتعبت من الكلام معي : حنان هذا مستقبلك وانتي حره فيه ولا تنسي ان ابوك عطى عمك كلمه وهو ماقال قولته الا وهو متأكد ان بندر رح يعزك ويحافظ عليك قلت لها : شمعنى انا ليه مو نور او ليلى او مريم ؟ امي بحزن : مو معقول ياخذ وحده رفضت اخوه ومريم تعرفين وضعها زين وليلى صغيره عليه وبعدين قلت لك انتي محجوزه له من يوم كنتي صغيره قلت بعصبيه : شنو محجوزه له قطعت اثاث انا ؟ يمه هذا زواج مو لعبه ؟ وانا يحق لي اختار شريك حياتي ؟ ودام نور ارفضت انا بعد برفض امي وصلت حدها : لا تقارنين نفسك بنور نور غير وانتي غير وبعدين شتبن عمك يقول عنا مايبون عيالي شعيبهم شقاصرهم ولا شايفين لهم شوفه او ان عبدالله ماله كلمه على بناته ترضين ينقال على ابوك ان شوره بيد نسوانه ترضينها عل ابوك هني ماقدرت اقول شي كله ولا ابوي مستحيل اتحمل شي يمسه او يقل من قيمته قلت وانا كلي حسره : زين يمه قولي لابوي اني موافقه امي فرحت وكانها ماصدقت قامت تزغرط (تيب ) :هذا الكلام السنع الف مبروك ضمتني لصدرها ومسحت ع راسي وباستني وقالت : صدقيني يمه هذا كله لمصلحتك ناظرتها وقلت : الله كريم من سمعوا صوت الزغاريد نزلو جري ع الصاله نور : خير يمه شصاير امي وهي فرحانه : باركو لحنان تراها خطبها بندر ولد عمكم وافقت تجمعو حولي خواتي وكلهم يباركولي وفرحانين لمحت بعيون نور الف سؤال وسؤال تجنبت احط عيني بعينها لا تفضحني وتفضح شعوري تنبهت لمريم وهي تقول : من يصدق ان حنان تتزوج قلت لها وانا احاول اهرب : ليه عمتي مريم مو بنت زي كل البنات نور قالت : اشك بصراحه وقامت تجري لحقتها : هين اراويك شايفتني بشنب كنا متجهين للبا بنطلع نتراكض بالحديقه وقفنا صوت امي يوم تنادينا امي : حنان نور عن شغل البزران روحو جهز شنطكم قالت لها نور وهي ماسكتني من ايدي : يمه كلها اغراضنا جاهزه بنطلع بره نلعب شوي ليلى مريم تجون معانا ؟!! مريم : انا ماقدر ع الركض وبعدين الجو بارد قامت ليلى : وانا بروح اشوف نتيجتي اكيد طلعت نور طلعت انا حنان الحديقه ماكنت ابي العب زي ماقلت لامي كنت ابي اعرف شنو يدور براسها هذي مو حنان الي اعرفها زين ناظرتني وابتسمت ابتسامه جافه وقالت : نور شتبين تعرفين ؟ لا تقعدين ساكته ماطلعتيني الحديقه الا تبين تعرفين الي صار مو ؟ قلت لها : يعني في شي صار شي مو قادره تخفينه بابتسامتك المزيفه حنان انتي ماتبين بندر صح ؟ قالتلي : شالفرق ابيه او مابيه اولا واخير رح اتزوج سواء اهو او غيره فشخص اعرفه احسن من الغريب قالت لي : من متى تفكرين بهاطريقه كأني اكلم شخص ثاني مو حنان اختي الي اعرفها قالت لي والغصه بحلقها : نور اليوم حسيت اني مسلوبت الاراده كاني اداءة بيد امي وابوي تخيلي هالشعور ماقدرت اقول لا ماقدرت ابوي عطى عمي الموافقه يعني راي مارح يقدم ولا ياخر قلت لها : ابوي لا قلتي ماتبين بندر مارح يغصبك قالت لي :ماقدر انتي ماشفتي شلون كان فرحان وهو يقولي ع الخبر انتي تدرين شكثر ابوي يعز عمي وعياله تبينه يقوله بكل بساطه بنتي ماتبي ولدك لاتنسين انك رفضتي تركي وصعب ينرفض اللحين بندر قلت لها وانا حاسه بلوم اني مسؤوله ولو بشكل جزئي عن الي تمر فيه : حنان انتي مالك علاقه برفضي لتركي وبعدين هالسالفه من سنين اذا ماتبين تقولي لابوي انا رح اقوله انك ماتبين بندر جاوبتني : مافي داعي انا خلاص قلت لامي اني موافقه وبعدين امي تمدح فيه وابوي وعاجبهم قلت لها : مو مهم يعجبهم المهم يعجبك ردت علي : انا ماطلع من شور ابوي تصدقون مافاجأني ردهاهذي هي حنان ماتحب تكسر كلام ابوي ولا امي بقدم الكل على نفسها تقطع قلبي عليها وانا اشوف شرودها كرهت نفسي لاني اشوفها تتألم وانا عاجزه اني اساعدها جات الشغاله تنادينا ندخل عشان نبدل هدومنا ابوي على وصول ولازم نجهز طلعنا حجرنا وبدلنا هدومنا طبعا البناطيل كانت ممنوعه فالكل لبس تنانير وصل ابوي وبلغته امي بقرار حنان وكان مستانس وايد لان بنته المفضله رح تاخذ ولد اخوه المفضل وصلنا مطار الملك خالد بالرياض اتوقعنا لاقي عمي باستقبالنا لكن كانت صدمتي يوم شفته هذا هو ماتغير بنفس الهيبه والشموخ كبر صح قريب ويصك الثلاثين كان مبتسم قرب الين ابوي وحب راسه وحب راس امي تركي : شلونك عمي شلونك عمتي عشاكم بخير تو مانورت الرياض ابوي : الرياض منوره بأهلها امي : انت شلونك ياتركي وينك ماتزورنا تركي: الله اشغلتنا الدنيا ياعمه التفت لنا وسلم علينا من باب الادب وسال عن احوالنا اتجهنا للسياره كان جايب الجمس ركب ابوي جنبه واحنا ورى وصلنا اخيرا للبيت بيني وبينكم حسيت بالرهبه رجعت لي الذكريات اشياء كثير تمنيت انساها انقذني من هالوضع صوت ابوي واهو يطلب منا نزل دخلنا الصاله اما ابوي اتجه للمقلط مع تركي وبدأ السلام والسؤال عن الاحوال مع خالتي سمعنا صوت طق طق صوت نقر كلنا رفعنا النظر باتجاه القادم سمعت ليلى وهي تهمس لحنان : الله يستر وصل هتلر مريم كتمت ضحكتها عن تنفجر اما حنان تبان كانها رايحه معركه علامات التاهب باينه عليها واضحه وضوح الشمس اما انا كنت بداخلي خايفه جدتي مو ممكن الواحد يتوقع شنو رح تقول او كيف يكون استقبالها جدتي : هلا بام البنات امي راحت وحبت على راسه ويدينها على : فيك ياخالتي شلونك شخبارك جدتي : وين رجلك ابو البنات رديت عليها وانا اسلم عليها : ابوي بالمقلط مع عمي وبدن خواتي يسلمون عليها كانت اخر وحده حنان لمحت بعين جدتي نظره غريبه مدري شلون افسرها بس نظراتها لحنان غير جلسنا كلنا بالصاله وقمنا نخلع العبايات والطرح مادرينا الا وجدتي تناظر باستنكار لحنان وقالت : حنين (استصغار) شنو هالشعر حنان وهي تحاول تمسك اعصابها : شفيه شعري جدتي : شنو مافيه هذا شعر بنيه استحي على نفسك تقولين صبي وناظرت امي وقالت : ونعم التربية ياحصيص |
|
|
#9 |
|
|
رد: روآآية "ماكل من يضحك مع الناس مبسوط " كآآملة..
الفصل الثامن لاجيت انا باسامحك تبكي الجراح ماودها مشتاق ودي اصافحك وعيت يدي لامدها ++++++++++++++++ حنان ماتحملت وقالت : وشفيها تربيتنا ياجدتي في ايش مو عاجبينك ماشوفنا صايعات ولا قليلات ادب ومحج يقدر يقول كلمة على تربية امي لنا جدتي جاوبتها : وهاللسان شيطلع حنان كانت رح ترد على جدتي لكن امي منعتها ماتبي الدنيا تشعل بينهم اكثر مما هي شعلانه *حنان * ياربي احس بداخلي نار مشتعله هذي هي جدتي ماتغيرت لازم تسمعنا كلام يسم البدن الله يستر ويعدي هالزيارة على خير سمعنا صوت ابوي وهو يتنحن بيدخل يسلم على جدتي جدتي : هلا بوليدي هلا بالغالي ابوي وهو يحب راسها : هلا يمه شلونك شخبارك عساك بخير جدتي : اخباري مو بزينه وزعلانه عليك ابوي : افا يمه كله ولا زعلك انا ماقدر عليه جدتي : ودامك ماتقدر على زعلي ليه مقصر فيني ماشوفك ولا اشوف بنات الا بالاعياد والاجازات وكل كلامك معي بالتلفونات ابوي متلوم : يمه اعترف اني مقصر بس لازم تعذريني البنات عندهم دراسه وانا ماقدر افارقهم مالنا احد بجده ممكن ينتبه لهم جدتي وصلت لمبتغاها : اجل خلاص اترك من جده وارجع لرياض واقعد هني بين اهلك وناس هني عاد وجوهنا كلنا تلونت بالوان قوس قزح مستحيل نرجع الرياض ونعيش فيها نترك جده نو واي اكيد جدتي تبي تذبحنا ابوي ينهي النقاش : يمه هذا الموضوع كل مره نعيد ونزيد فيه البنيات وراهم جامعات ومدارس وغير كذا حلالنا نخليه لمنو المال السايب يعلم السرقه جدتي : كيفك حمدت ربي ان ابوي ماطاعها ولا رحنا وطي طلع ابوي للمقلط عشان يتغدا مع عمي وتركي وطبعا انحط لنا الغذا احنا بعد الغدا كان ع الارض وكله بصحن واحد كبير ومافي شي اسمه ملاعق وصحون جانبيه لا حطوهابتصير فضيحتنا بجلاجل جلسنا ع السفره الشغالات كانو حاطين ملاعق للسلطه ومزودين كم لعقه اذاحتاج احد ما ان لمحت جدتنا المصون الملاعق حتى بدت محاضره جدتي بنقمة : ليش هالملاعق عمتي ام تركي: هذي للسلطه ياخاله جدتي واهي تناظرنا بطرف عينها : احسب بعد على يدينهم نقش الحنا ولا المدارس كبرت روسهم على عاداتنا وتقلدون الكفره عمتي ناظرتنا بعيون كلها اسف ابتسمنا بوجهها دلاله اننا عارفين جدتنا وطبعها الغريبه ان جدتنا بكل القسوه علينا الا انها كانت تهتم بمريم تطمن عليها وعن احوالها حتى بالعيديه تعطيها فلوس اكثر منا جدتي بعد الغدا طلعت تقيل شوي احنا هني تنفسنا الصعداء اخيرا بنقعد شوي من غير هوشه وصياح قدمت لنا عمتي الشاي وجلسنا نتكلم عمتي : معليه ياحصه تعرفين خالتك وطبايعها لا تاخذين في بالك من كلامها امي ابتسمت : تعلميني عليها مهما كان هي مره كبيره ولازم مانعاندها قالت كلمتها وهي تناظرني فغصيت بالشاي الي اشربه الكل ضحك علي عمتي : حنان يابنتي طولي بالك عليها لا تندين معاها بكره رح تعيشين معانا بنفس البيت اذا ماكسبتي جدتك بصفك رح تتعبين خصوصا ان بندر حبيب قلبها مدري ليه سرت رعشه بجسمي من انذكر اسمه ناظرت الارض احسها تتحرك من تحتي الكل فسره خجل الا اني مدري يمكن كنت ادور على شق بالارض ارمي نفسي فيه بس اخلص من هذا الي اسمه بندر امي تسأل عمتي : متى جاي ان شاء الله عمتي : امس كلمنا وان اشاء الله رح يجي بعد شهرين امي : ليه مايخلي الاجازه ع رمضان عمتي: ياريت قلنا له قال مايقدر ماعنده الا الان ومارح يقدر يجي الا عقب سنه عاد ابو تركي قال خلاص يملك على حنان وياخذهامعه مايقعد بالغربه لحاله امي : قلي ابو نور والله مدري كيف بصبر على فراق بنتي عمتي : هذا حال الدنيا ماقدرت استوعب الكلام اللحين هذا الي رح يصير زوي بيجي بعد شهرين لا ويبغاني اترك ديرتي هذا اكيد مجنون كيف اتركها اروح مع واحد غريب مكان ماعرفه مايربطني فيه شي اترك خواتي امي اترك ابوي شلون اقدر اقعد من غير ابوي من غير حنان امي وهوشات ليلى! اذا تضايقت وين رح تكون نور؟ من رح يكتم اسرارها لمن رح تفضفض غيري؟ مريم من رح يونسها من رح يروح معاها مواعيدها لمن رح تشكي غير ي مستحيل اترك كل هذا ورى ظهر يواروح مع هذا الي مفروض يصير زوجي شلون ما نبهني من شرودي الا صوت ليلى وهي تصارخ علي يكلمها ليلى : قولي والله .........انتي متأكده لا تكوني غلطانه ....ايه ادري انا كنت حاطتها رغبة ثانيه والحمد الله طحت فيها ....خخخ يابنتي ريح ابو علي ولا عدمه سلمي ع الوالده ..... زين يوصل ان شاء الله ...في امان الكريم امي سالتها على طول : شفيه ليلى شصار ليلى : ماصار الا الخير هذي ليلى تبشرني طلعت نتايج الامتحان وما انقبلت في الطب البشري امي بحسره : واحسرتي عليك يابنيتي ها وانيت ذبحتي عمرك بالمذاكره ليلى : ههههه يمه لا تهتمين انا والله مو زعلانه بالمره تصدقون انا قلت اني لو مانقبلت رح استخف لكن بالعكس انا احس نفسي مبسوطه امس صليت بالليل ودعيت ربنا ان لو لي خير بالبشري يسره لي وشكلوه ان مافيه خير فتيسرت التقنيه امي : شنو هذي التقنيه ليلى : يمه هذي كليه جديده فتحوها مالها سنتين بعد محد تخرج منها عمتي : زين يعني لا تخرجتي بتصيري شنو ردت ليلى : بصير دكتوره زي زي الي تخرجو من الطب البشري لكن عدد السنين اقل امي : خلاص درسي عظام عشان تعالجين رجولي ليلى : خخخ يمه هذا يخرج دكاترة اشعه وتخدير ودكاترة متخصصين بامراض الدم والعلاج الطبيعي امي بصدمه : يعني انتي بتصيرين تصورين رجول الناس وتاخذين تحاليلهم هذا الي تسويه الممرضات ليلى : يعني زيهم بعدين هذول يمه اغلبهم الا دكاتره عمتي : مابقي الا تشتغلين هالشغله ياكثر الي يسونها من غير دكتره كله نناديهم بمرضه ولا ستر ليلى تدافع عن تخصصها : لاننا محتاجين توعيه احنا نستصغر هالوظايف مع انها اهم من وظيفة الدكتور نفسه الدكتور مايقدر يعطيك علاج الا لما يشوف هالتحاليل اشطالع فيها مايقدري سوي عملية اذا دكتور التخدير مو موجود رجلك ماتجبس من غير اشاعة مانعرف الامراض السرطانيه حمى الله السامعين من غيرها وبدل مايجي الاجنبي بهاوظايف نكون احنا فيها احنا الاقدر نراعي مرضانا ونراعي عاداتنا وتعاليم دينا والوطن يمه مايبنيه الا عياله وبناته الين متى رح نعتمد ع الاجنبي عمتي وامي بان عليهم الاقتناع من كلام ليلى : والله انك صادقه هذي هي ليلى دوم تاخذ الامور بتفائل وتاخذ الاشياء بموضوعيه رغم صغر سنها الا انها عاقله وهذا الي يخليني ماخاف ابد عليها * نور * بعد ماصلينا قررت اطلع اتمشى بالحديقه امي وعمتي راحو المطبخ يجهزون القهوه وياخذون الاخبار والعلوم اما خواتي طلعو الجناح الخاص فيهم وابوي وعمي طلعو يزورون واحد من اصدقئهم القدامى اما تركي نايم بحجرته اخذت الشيله معاي من باب الاحتياط خفت لايطلع سواق بوجهي الجو اليوم حلو وشوي مغيم هذي هي الرياض جوها ماينعرف له متقلب يوم حر يوم برد نزلت اتمشى الحديقه وايد كبيره بحكم مساحة الارض الكبيره جدا عمي زرع فيها نخل زياده اكيد هذا من شور جدتي تموت ع الرطب اتذكر كان في مسبح بوجه المقلط لكن عمي ردمه بعد ماطاحت فيه حنان وهي صغيره وبغت تموت غرقى الحمد الله كان يومتها اكبر السواق موجود وطلعها بعد مانادته ليلى وقفت فجأه مردي شلون رجولي خذتني لذاك المكان ماتوقعت بيوم ارجع لهذي المنطقه عمي غير بالحوش كله ماقدر يهدم هالمكان ليه الى الان قائم ماتغير ليه بعده موجود يبيه تذكار لكل الالم لكل العذاب بسرعه درت راسي ورجعت بخطى سريعه اقرب ماتكون للركض منها للمشي وانا ماشيه والتفت حولي خفت يكون احد يحقني يمكن الماضي مادري المهم حسيت احد يلحقني ماحسيت بنفسي الا وانا مصطدمه بشي قدامي رفعت نظري اطالع شنو هذا كان تركي قدامي بسرعه وخر عني وخرت عنه وبحركه سريعه رفعت الشيله على راسي وغطيت وجهي نزل اعيونه بالارض عشان لا يحرجني وقال : السموحه منك يابنت العم قلت له بارتباك : ماصار شي انا الي مانتبه جيبت ابي امشي ناداني : شلونك يانور شخبارك رديت عليه : الحمد الله رد علي : نور انا ابيك بموضوع قلت له باستنكار : ماعتقد ان بينا مواضيع رد علي : الا في يانور قلت له : الي اهو ؟ جاوبني : نور انا بعدني ابيك على سنة الله ورسوله حسيت بارتباك بخوف مابغيت ابينها : وانت تعرف راي بالموضوع هذا جاوبتك ع طلبك من سنين رد علي بحزم : تلوميني على شي انا مو مسؤول عنه وانتي تدرين اني احبك رديت عليه بانفعال : تركي ماعتقد اني جالس تقوله يصير وهذي الوقفه مالها داعي جيت بمشي ماحسيت الا ويده ماسكه ايدي استغربت من تصرفه ماعمره تجرا وسوى هالحركه قلت له : انت جنيت اترك ايدي لا اجمع عليك امه لا اله الا الله قال : صرخي ولا هامني انتي أي قلب عندك تعرفين اني احبك من زمان من يوم ماكنا صغار من يوم ماكانو يقولون نور لتركي وتركي لنور تذكرين عشت احلم باليوم الي يجمعني انا وياك بيت واحد اليوم الي تنزفين فيه لي وجا اليوم لكن ماكنتي انتي العروس كانت غيرك وحده ماقدرت احبها ماقدرت اكمل حياتي معاها عشت انا وياها بتعاسه ماتفقنا ابدا كنت اتخيل شلون بتكون حياتي معاك شلون رح تعيش بسعاده لكنك حرمتيني من حلمي ليه رديتيني ليه يانور لا تحمليني ذنب غيري حرام عليك تظلميني وتظلمين نفسك نور انا ابي ارجع اخطبك من عمي شقلتي ؟ قلت له وانا خلاص وصلت حدي وجريت اي من ايده : لو انت اخر رجال بهالكون ماخذتك سامعني ياتركي ماخذتك تدري ليه لان كل شي صار لي من تحت راسك انت تقدر تقولي من الي دخله بيتنا من الي رحب فيه وقال صديقي ومافي مثله من غيرك تركي : نور انا مستعد اسوي الي يرضيك رديت عليه : تقدر ترجع الي راح ياتركي ؟ تقدر ترجعه ؟ جاوبني ؟ ليه ساكت تقدر تمحي النظره الي البنات كانو يطالعوني فيها بالجامعه تقدر ترجع كرامتي الي انجرحت بالجامعه من وحده ماتسوى؟ تقدر ياتركي ؟ تركته قبل لا يجاوب رحت اركض لداخل البيت بغيت اهرب منه مابغى اسمع ولاكلمه منه مابغى اسمع دفاع ولا مبرات مابغى ذكرى الماضي تعود وتجرحني ماصد قت لملمت جراحي ليه ترجع تنفتح ليه ؟ وصلت لحجرتي حمدت الله ان محد فيها اكيد انهم بالمجلس دخلت على طول لحمام ( اكرمكم الله ) غسلت وجهي مره واثنين وعشر يمكن يطلع كل الي صار مع تركي وهم بوهم يمكن احلم اتخيل المهم مايكون صدق للاسف كان واقع مو خيال تمدت ع السرير غمضت عيوني رجعت اتذكر ذاك اليوم عمري مانسيته وماعتقد اني ممكن انساه ابد آآآآآآآآه كنا عايشين لسى بالرياض واحنا وعمي ساكنين بيت واحد وقتها كان عمري تسع سنين ابوي طلع البر واخذ معاه حنان طبعاوراح معاه عمي ولده بندر اما ليلى كانت مريضه وعندها حمى فما تقدر تنزل تلعب معاي ومريوم كانت صغيره اربع سنين تقريبا فجلس الكل بالبيت وانا طلعت العب بالحديقه طبعا طلعت من باب المطبخه الي يودي ع الحديقه الخلفيه من غير لحد يحس فيني قلت العب شوي قبل لا يرد تركي ويعملها سالفه لي شلون طلعت والدنيا تمطر كان يخاف علي وايد ويهتم فيني وايد لكن عمره ماتجاوز حدوده معاي المهم نزلت العب بالحديقه قدام الغرفه الي بناها عمي لتركي عشان يستقبل فيها اصدقائه اذا جو عنده منها ياخذون راحتهم ومنها مايكون في مضايقة لنسوان البيت او حد لحريتهن وانا العب بالحوش انفتح الباب حق الغرفه اتوقعت بيكون تركي رجع من برى لكن اتفاجاة انه خالد صديقه اذكر ان عمري مارتحت له ولا هضمته ناداني وقال :شتسوين ياحلوه قلت له وانا مشغوله باللعب بالمطر : جالسه العب شوف المطره كيف حلوه قال : ايه وناظرني بنظرات بذاك اليوم مافهمتها اما اليوم لما اتذكرها احس بحرقه بجسمي كله كأنه كان يجردني من هدومي بهالنظرات جلس يراقبني وانا العب اكثر من نص ساعه وبعدين دخل الغرفه قلت بنفسي وقتها فكه اخيرا ذلف لكن بعد عشر دقايق ناداني خالد : نور نور تعالي اقفلي المكيف مره برد جاوبته : وانت ليه ماتقفله بنفسك خالد : ماني لاقي المفتاح تعالي انتي ادرى رحت وانا اتأفأف من طلبه دخلت الغرفه اتجهت للمفتاح ايل خلف الستاره عشان اطفيه الا وسمعت باب الغرفه ينقفل التفت له وسالته : ليه قفلت الباب قالي : اسمعي خليك ساكته وانا اعطيك عشرة اريال قلت : مابي فلوس وخر عني جيت اب ياطلع سحبني من كم الفستان عصبت عليه : كذا قطعت الفستان ان ماقلت لتركي ماجاوبني ابتسم ابتسامه كلها خبث ورماني ع الارض جردني من اهدومي و .... صرخت وصرخت ناديت ابوي امي عمتي تركي ناديته وناديت محد رد ع صوتي محد جا وانقذني منه قبل لا يسلبني اعز ماملك قبل لايجردني من طفولتي وبعد ماخلص وشبع مد يدينه لرقبتي يبي يخنقني عشان اموت وتموت معاي جريمته البشعه صخرته حاولت ادفعه بعيد عني ماقدرت فرق الجسم فرق العمر مو بصالحي واخيرا على صوت صرخاتي المكتومه جاء تركي كسر الباب وانصدم يوم شاف صديقه اذكر انه هجم عليه وضربه الين ماغمى عليه من كثر الضرب كنت بالركن متكوره على نفسي بلا ملابس شعري هو الي ساترني خلع ثوبه ولبسني اياه اخذني لداخل البيت كل الي اذكره اني ارتميت بحظن امي وماصحيت الا وانا بالمستشفى عقبها صرت اعاني من حاله نفسيه كرهت كل الرجال ماقدرت اتحمل أي رجل غير ابوي يقرب مني حتى الاطباء ماقدرت اتحمل قربهم وجلست على هالحال لمدة عشر سنين ماكنا نزل الرياض الا بالاعياد وماخرج من البيت ابدا الحديقه ماعتبها لاجل كذا بعد الحادث انتقلنا طبعا لجده عشان ابتعد عن مكان الذكرى الاليمه اما خالد انحكم عليه ثمانين جلده حد الزنا بالاضافة الى ثمانين جلده حد الشرب لانه ماكان بوعيه وقت ماعتدى علي عمري مارح اسامح تركي اهو السبب لو مارافق هالي اسمه خالد ماصار الي صار هو الي دخله البيت لا وجا يبي يعمل فيها راعي نخوه ويتزوجني يبي يستر على بنت عمه الي كان السبب في توسيخ اسمها ترن ترن ترن <<التلفون الداخلي رفعت السماعه : هلا مريم : اهلين اقول انزلي ترى حطو القهوه بسرعه لاتنزل جدتك وتفضحنا جاوبتها : خلاص الان نازله |
|
|
#10 |
|
|
رد: روآآية "ماكل من يضحك مع الناس مبسوط " كآآملة..
الفصل التاسع امريكا (شيكاغو ) اخيرا جلس ع الكرسي ليرتاح صارله وقت وهو يركض * بن در * معقول لي ساعتين اركض ولا حسيت بالوقت لهالدرجه احساسي بالزمان توقف ماتوقعت اني رح اعطي هالموضوع أي اهتمام ..!!! رجعت فيه ذاكرته لوقت مو بعيد قبل يومين تحديد بالضبط الساعه 12 الظهر كان راجع من الجامعه مخلص المحاضرات بدري شوي ما ان دخل شقته الفخمه حتى رن التلفون ركض له بسرعه بندر: hello تركي : السلام عليكم بندر بفرح : وعليكم السلام والرحمه هلا والله بابو محمد تركي : خخخخ شكلك انت الي رح تصير ابو محمد قبلي بندر : ليه ناوي تعنس تركي : خخخخ لا بس انت الي خنتني وخليتهم يخطبولك كذا يابندر من غير ماتقول لتركي اخوك حبيبك صديقك بندر كان متفاجأ : هاي انت يالحبيب اشفيك مخرف أي خطوبه أي بطيخ ؟ تركي : علينا هالحركات يابابا كل شي بان بندر : اقول تركي انعدل بالطيب عن أي خطوبه تتكلم ؟ تركي بجديه : خطوبتك من حنان بنت عمي بندر: ومن قال اخطبوها ؟ تركي : بندر اشفيك الوالد خطبها لك مو انت قايله هالشي ؟ بندر : لا انا اصلا وين كلمته لي اسبوعين ماسمعت صوته تركي: شلون امس ابوي مكلم عمي قدامي وقاله ترى بندر يبي حنان بندر : تركي لو هذا مقلب تراه بايخ سامع تركي : بندر هالمواضيع مافيها مزح بندر معصب : شلون ابوي يسوي كذا ؟ ليه يخطبلي من غير لا يسألني عن راي شنو قدامه بزر يمشيه على كيفه ؟ تركي : بندر هدي اعصابك ياخوي مايسوى عليك ؟ بندر : ايش اهدي اعصابي انت بعد تستهبل تركي : بندر لا يكون ناسي اني اخوك الكبير تكلم معي باحترام بندر : تركي انا اسف بس الموضوع مو هين هذا زواج عشرة عمر تركي : انت معترض ع الزواج او ع البنت بندر : ع الاثنين تركي : اعتراضك ع الزواج وفهمناه ماتبي تفقد حريتك ومسؤوليه ودراستك وهالشغلات لكن اعتراضك على حنان شسببه ؟شايف عليها شي سامع عنها شي لا سمح الله ؟ بندر : انا لو سامع او شايف كان ذبحتها من زمان لا تنسى هذي تربية عمك عبد الله بس ...... تركي : ياخي طفرتني بس شنو بندر بضجر : اوف منك ياخي اتذكرها من كنا صغار عربجية وماكانت بنت ابدا تذكر يوم ماكانت تروح معانا المقناص بالله في بنت تحب القنص يارجال تركي : ايه في عروس المستقبل بندر : ياثقل دمك تركي : بتكلم ابوي ؟ بندر : ابوك ماكلف عمره يشاورني تبيني اروح له بكل بساطه اقوله بنت اخوك مابيها ؟ مو عاجبتني ؟ تركي : تبيني اكلمه ؟ بندر : لا والي يعافيك خله راضي عنك لا يغضب عليك والسبب انا تركي : بعده زعلان منك ؟ بندر : اجل ليش يبيني اتزوج ؟ تركي : وهذيك الملقوفه كان لازم ترد بندر : حظ اخوك الاقشر تركي : ايش يدريك يمكن البنت ترفض ؟ بندر : ماعتقد مع اني اتمنى تركي : اقول بندر ترى اخرتي والمكالمات غاليه ياللا مع السلامه بندر : خخخ مع السلامه رفعت راسي صحاني من حلم يقظتي صوت احمد صديقي وانيسي في غربتي احمد اماراتي يدرس معاي تعرفت عليه بيوم التسجيل في الجامعه من خمس سنين وندرس الماجستر سوىسكنا بنفس الشقه لمدة ثلاث سنين بعدها الحبيب تركني وسكن بالعمارة الي جنبي لانه تزوج وصار عنده بندر صغيرون احمد : شتسوي هني كسرت الباب وانا ادق عليك جاوبته : تعرفني ماستغنى عن رياضة الصبح قالي : بس اليوم مبكر مو عادتك ...سكت شوي ....اعتقد انك تفكر بموضع العرس رديت : اه صدقني مانمت طول الليل وانا افكر قال : انت ليه تقدم الشر ياريال تفاول بالخير قلت : عمر يماتخيلت اني بتزوج بهالطريقه سألني بمزح : لا يكون الاخ كان ناوي يعيش قصة حب قبل الزواج قلت له : تعرف ان هذا عمره ماكان تفكيري قال : اجل شنو الطريقه الي كنت ناوي تتزوج فيها قلت له : ياخي اختار صفاتها اشوفها عجبتني قلت ايه ماعجبتني يفتح الله لكن مو وحده مفروضه علي فرض ماقدر اقول زينه ولا شينه ياخي انا شكلها حتى ماعرفه كل الي اذكره عنها طفله عمرها 12 سنه سالني : كانت مزيونه ناظرته بطرف عيني : هذا سؤال بربك جاوبني : الا هذا اهم سؤال بحوارنا قلت له بسخريه : ليه ان شاء الله رد : لانك بتعرف فيه مواصفات عروسك سالته باستغراب :شلون يعني جاوبني : شوف يالحبيب اذا كانت وهي صغيره شينه فاكيد بكبرها بتكون اشين او بنفس المستوى اما اذا كانت مزيونه فالزين يزيد يوم عن يوم ساعتها ضحكت بصوت عالي بصراحه احيان مادري شلون يفكر انقلبت ملامح احمد للجديه وقالي : اسمعها مني يابندر انا بحسبة اخوك ومابينا أي اسرار يوم خذت ام بندر ماكانت شرات مابي حتى المواصفات الي ابيها ماكانت فيها حتى التعليم مافيه تكافىء مثل ماتعرف اهي بنت عمي ومن صغيري محيره لي فشي طبيعي اكبر اخذها تقريبا كنت مهيأ نفسي للفكره بعد زواجي منها وعشرت الايام تعلمت شلون احبها تعلمت ان الي يحب بيتغاضى عن كل عيوب حبيبه وبيشوف حبيبه ياكثر ماكنت احاول اغايضها اطلعها عن طورها عاملتها بجفى وايد الا انها ماسوت مثلي كل ماصديت اقبلت وان اقبلت تغلت اللحين الان ماعندي احد يسواها ابد قلت له : الله يهنيكم ان شا ء الله ام بندر مره والنعم فيها انا اشهد انها بنت رجال قالي : مو كانك طايح غزل بحرمتيه رديت اغايضه : وناسي اني حسبت اخوها قال : لا مانسيت تعجبني يوم تهددني فيك خخخخخ شديت اذنه بخفه : ايه اعرف ان وراها ظهر ولا تغرك الغربه ترى ان اشتكت لي منك لنت صاحبي ولا اعرفك قالي : المهم الان اقتنعت قلت له : شوف يابو الشباب اعترف كلامك حلو ومقنع ونوعا ما تقبلت فكرة العرس لكن الحب اتوقع صعب خصوصا انها مو من النوع الي يعجبني شخصيتها قويه وايد وطبعها طباع رجال تصدق الوالد يوم كان يطريها قدامنا مايقول الا ولد عبد الله she`s not my type رد علي : زين و your type شيطلع ؟ جاوبته : ابي وحده تكون قدمي مره بمعنى الكلمه كلها رقه وانوثه وحده كذا مدري شلون بس انت اكيد فاهم رد علي: ياخي انت الكلام معك ضايع لكن تدري مارح يجيب راسك الا هالبنيه قلت له : ماجبتها امها الي بتجيب راسي قالي : انت موذابحك الا هالغرور سالته : وليه مو ثقه بالنفس ؟ قال : لان الثقه الزايده عبط قلت له : مالت عليك وعلى الي مصاحبك قوم بنتأخر ع الجامعه نرجع لارض السعوديه الرياض بمبنى الشركه العائليه بالرياض * تركي * كان جالس بمكتبه ولسى كلماتها ترن باذنه " لو انت اخر رجال بهالكون ماخذتك" معقول لهالدرجة مو طايقتي يانور وانا الي امني نفسي فيك قلت عقب مافكيتي خطبتك بتقبلين فيني لكن اها لو دريتي بغلاك عندي كان عذرتيني اتذكر يوم مانولدتي ورحنا لامك المستشفى يومتها حطوك بيدي بعد ماذبحتهم وانا اسأل وين النونو وينه كنتي صغيرونه وايد وجهك احمر عيونك صغار جلست اناظر فيك واتاملك سالتني جدتي عجبتك البنيه رديت عليها : ايه حلوه قالت : خلاص هذي لما تكبر بتصير حرمتك شرايك ابتسمت وهزيت راسي بالموافقه وعشت على هالحلم عمري كله لكن الصد واه من الصد حسبي الله على من كان السبب خخخخخ شكلي جنيت اكلم نفسي ترن ترن ترن ...........هلا ياسر ياسر : استاذ تركي عمي عبد الله بره يبي يقابلك تركي عمي دخله شتستنى ركضت الين الباب وفتحت بنفسي عمي شتسوي هني اقصد ليه مادخلت على طول رد علي : قلت لا تكون مشغول واعطلك رديت : افا ياعمي مافي شي اهم منك دخلنا مكتبي صبيت له فنجان قهوة وجلست قباله قالي : تركي انا ابيك بسالفه ياوليدي قلت له : امرك ياعمي صار شي بالشغل قالي : وانت كل تفكيرك بالشغل قلت له : وانا شعندي غيره قالي : شوف ياتركي انا حسبت ابوك وتعرف شكثر اغليك واعزك تفاجأت من كلام عمي عرفت ان الموضوع مهم ولا ماقال هالكلام كمل : شوف ياتركي انا الله مارزقني عيال ورزقني باربع بنات يسون عندي ملاين الرجال قلت : والنعم فيهم ياعمي بناتك ماعليهم زود قالي : ينعم بحالك ياوليدي شوف كل اب يحلم بانه يزوج بناته ويامن مستقبلهم انا الله عطاني المال والحمد الله اعرف لا غابت عيني بناتي مارح يكون قاصرهم شي لكن اعرف ان زي مافي ناس زسنه اعرف ان الشين مليان وانهن بيكونون مطمع للكل قلت له : عسى عمرك طويل ياعمي واحنا وين رحنا قالي : اسمع ياتركي ولا تقاطعني ياولدي حنان انا ماخاف عليها هذي الرجال الي مارزقني الله فيه ليلى عاقله والطب ماخذ فكرها مريم اعرف ان محد بيقصر معاها وحتى صغر سنها الانها قويه وماينخاف عليها هذي تربية حنان خوفي كله على نور اعرفها ضعيفه وماعندها القوه الي عند خواتها طيبتها سلاح ضدها واعرف انها مارح تلقى الرجل الي يستاهلها شفت جربنا فهد وكيف كانت النتيجه تركي الرجال مو عيب انه يخطب لبنته الي يستاهلها ويشوفه كفو لها ويشهد الله انه لو غيرك مافتحته بالموضع شرايك ياتركي تاخذ نور استغربت من كلامه ماتوقعت يوم ان عمي يسويها ويعرض علي نور نرو الي مو بس احبها الا اموت فيها قلت لعمي : عمي طلبك هذا على عيني وراسي لكن طلبك هذاماقدر اقبله مو نقيصه بنتك لا سمح الله لكن ياعمي انت ماترضاها علي اخذ وحده عايفتني قال: ومن قال انها عايفتنك قلت له : انت ناسي اني خطبتها وهي رفضت قالي : الي صار لها مو قليل خلاها تكره الرجال وانا ضامن لك موافقتها سالته : رح تغصبها ؟ قالي : رح اقنعها قلت له : بس ياعمي انا مارضى اخذها وهي ماتبيني قالي : وان ترجيتك قلت له : عمي شهالكلام شنو تترجاني انا عصاك الي ماتعصاك لكن هذا زواج ...... وقف من مكانه اتجه للشباك المطل عالرياض وقالي : اسمع ياتركي انا ايامي خلاص صارت معدوده بهذي الدنيا انت تعرف اني رجال عنده القلب وابي اطمن عليها قبل موتي وانا اعرف شكثر انت تغليها وتحبها ولا ياوليدي مافي رجال يخطب مره مرتين الا اذا شاريها قلت له : انا موافق ياعمي قولها اني ابيها على سنة الله ورسوله عمي ابتسم وقال : الله يريح قلبك ياتركي خرج عمي وتركني بحيرتي مدري ليه وافقت هل هو نزول لغربة عمي او رغبتي الحقيقية بقرب نور ؟ |
