 |
  |
|
|
|
|
#31 |
|
|
رد: يمسح الدمعه بشكوى للمبدعه هدوئي
* الجــزء الثالـــث والعشــرون * اخذنا ربع ساعة وحنا نفرر بشوارع الرياض بدون هدف ورايد كل ماشاف شي .. شهق بشوق وقعد يكلمني عنه فجأة سألني متردد رايد = عمر .. وش رايك ازور خوالي ؟ كتمت انفاسي وانا اسوق و بدون مالتفت له .... يزور خواله .. اخاف ( من شاف احبابه نسى اصحابه يارايد) اخاف يزورهم وبعدها يقنعونه يجلس عندهم ويتركني ... ورايد اتفه سبب ممكن يتركني مثل ماتركني قبل .. الصراحة مابي يزورهم .. رديت عليه بدون نفس .. مابي ابين له موقفي عمر = كيفك رايد بألم = بس انا شايل بخاطري منهم قطبت حواجبي مستغرب والتفتت له عمر = ليه ؟ رايد وهو يطالع قدام = ماهتموا فينا .. ماحاولوا ياخذونا من عمي .. على الاقل اخواتي .. انا مابيهم اصلا .. بس اخواتي ( وتنهد وسكت) عمر = عمك وليهن والحق بهذا مع عمك مو مع خوالك .. رايد بألم = امحق ولي .. اختي تقول ان خالي جا يدور علي بس انا مابيه ياخذني ويخلي اخواتي مابي اصير بديرة واخواتي بديرة .. ( والتفت لي ) انت مالك اخوان يمكن ماتفهم علي كللللللللل تبن .. مالك عليك حتى هالمفعوص هذا يعايرني ان ما عندي اخوان .. رديت عليه بغيرة واصحح له معلوماته .. هذا قبل ماعندي اخوان الحين عندي ندوري حبيبي عمر = هيه يالحبيب .. صحح معلوماتك قريب بيصير عندي اخو رفع رايد حواجبه مستغرب رايد = هاه ( وابتسم بفرح ) صدق ؟( وكأنه تذكر ) اييييه صح امك متزوجة عمك .. ماشاء الله الحين صار عندك اخو ؟ .. طيب وينه ماعمري شفته ؟ رفعت صدري بفخر عمر = توه ماشرف .. ضحك رايد وهو يطالعني رايد = هههههههه بعد ؟ اول مرة ادري ان بيصير لك اخو .. كم عمرك.. ابشوف كم بينك وبينه ؟ عمر = 21 ... بس اذا جا ان شاء الله بالسلامة بدخل على 22 ضحك رايد يتطنز علي رايد = شاااااااايب عنده هههههههههههههههههه طالعته وانا ابتسم عمر = انت تشوف ؟ اللي بعمري يفرحون بعيالهم وانا توني افرح باخوي ههههههههه ضحك رايد التفتت اشوف الطريق ما احس فرحان فيه .. احسه اخو بالاسم بس والا هو ببيت وانا ببيت .. وضيقت عيوني بألم ( لا .. حتى بالاسم ماهو اخوي ) رفعت صوتي افضفض لرايد عمر بحزن = بالاوراق الرسمية يعتبر ولد عمي ماهو اخوي .. ما احس فرحان فيه ( وتنهدت ) الله يرحمك يبه رايد = امك متزوجة عمك ابو مصعب نفسه والا متزوجة عم لك ثاني ؟ عمر = لا .. عمي ابو مصعب رايد = يعني بيصير اخو مصعب من الاب وانت اخوه من الام .. طيب عادي حلو لما يصير اخوك وولد عمك بنفس الوقت ( وكمل بمزح ) 2 في واحد ههههههههه ابتسمت بدون نفس .. ماحد فاهم علي ... انا ودي اخوان يعيشون معي بنفس البيت .. ودي احس ولو مرة بجو الاسرة .. بيت جدي ما احسه يعطيني اللي ابيه واتمناه .. اتمنى اخوان واخوات مجموعة مثل مشعل اخوانه تسع ماشاء الله وهو العاشر ابي مثل مصعب اخوانه اربعه وهو الخامس والحين ندوري انظم معهم مو معي .. ابي مثل منصور وعبد الله وغيره وغيره ليش انا لحالي من يوم طلعت على الدنيا = هاه عمر ماقلتلي .. وش رايك انتبهت على رايد والتفتت له مستغرب عمر مستغرب = هاه .. رايي بأيش ؟ رايد = ازور خوالي ؟ اذّانا هذا بخواله... طالعت قدام وابتسمت ابتسامة سخرية على حالي اضحك على نفسي ... ياناااااااس مافيه مثل الاخوان بسقف واحد .. مايتركونك .. واذا طلعوا تصير متأكد انهم راح يرجعون لك .. اضحك على نفسي و احاول اعوض الحرمان اللي احس فيه بواحد ممكن يبيعني برخيص رايد مصيره يرجع لاهله ... ليه متمسك فيه .. لا نادر ولا رايد راح يعاملوني اخو لهم مالي الا عيالي ... الاخوان خلاص غاسل يدي منهم رايد = عمر وش فيك ؟ انتبهت عليه.. وشفته بطرف عيني .. يميل وجهه قدام و يطالعني مستغرب رايد = وش فيك عمر ؟ اسألك ولا ترد رديت عليه بعصبية وانا اطالع قدام واسوق عمر = رح لخوالك وش تبيني اسويلك يعني .. ارقص ؟ ماسمعت رد منه وماني ملتفت له .. يزعل والا يرضى سمعت المساجد اللي نمر من عندها تأذن لصلاة الظهر رايد = وش فيك عصبت .. ( وكأنه زعل ) آآآآ .. ادري اني مثقل عليك .. ومانت ملزوم توصلني لخوالي ولا غيرهم .. آآآآ ... كثر خيرك انك وديتني الرياض اجيب شهادتي وهذا اهم شي .. خلاص مب لازم ازورهم عمر بألم = ماني بحاجتك لا انت ولا نادر .. رايد مستغرب = نادر !!! مين نادر ؟ ابتسمت بسخرية عمر = خيال التفتت لرايد وانا احس منتفخ .. شوي وتطلع دموعي منقهر من نفسي ومن غبائي .. اضحك على نفسي .. عمر بعصبية = رح لخوالك ... تبيني اوصلك وصلتك .. عطني عنوانهم بس ؟ فاتح فمه ويطالعني مستغرب رايد = وش فيك عمر ومين نادر هذا اول مرة اسمع اسمه التفتت اطالع الطريق وصارخت فيه عمر = خيااااااااااااال اقولك خياااااال مثلك رايد مستغرب = خيال مثلي ( وشفته بطرف عيني يطالع الدريشة بجنبه ويرجع يطالعني منهبل وهو يشر على نفسه ) انا خيال ؟ سكتت وسكت رايد وهو يعقد يديه قدام صدره ويطالع قدام بصمت * رايد * انا خيال .. قدامه ويقول عني خيال .. وبعدين وش نادر هذا .. لا يكون خيال ثاني معنا بالسيارة وش فيه تغير وجهه .. وليه يصارخ علي .. ادري اني عاله عليه .. بس وش اسوي مالي غيره .. ثلاث اسابيع حاولت اعتمد على نفسي بس ذقت المر ذقت الجوع ذقت الخوف ذقت الاهانة .. كله عشان ماثقل عليه يكفيه اللي جاه بسببي وفوق هذا شرالي ملابس جديدة ووصلني الرياض بس شكلي مسختها معه .. كان المفروض احترم نفسي من البداية وابلع لساني .. هو ماهو ملزوم بي .. كثر خيره انه ضفني من الشارع بس شكلي شفت طيبه معي وتماديت بس والله ماقصدت شي .. أبي ازور خوالي واقولهم عن مريم يشوفون حل لها ... انا اكتشفت ان مافيني خير شهور وانا بعيد عن اخواتي يقالي ابعتمد على نفسي وارجعلهم .. ابي خوالي يشوفون حل بس وشلون اروح لهم .. اخذت نفس اهدي نفسي احس عيوني تتحارق احس تبي تنزل دموعي الا شوي .. مابي ابكي قدام عمر ويحسب اني زعلان انه عيا يوديني هو له حق يعيي .. انا اللي مالي حق اطلب قعدت اطالع المباني واللوحات واتلفت وكل شوي اخذ نفس احاول دموعي ماتنزل .. لين اخيرا قدرت اسيطر عليها سمعت عمر يتنهد .. وبعدها مسح شعره بيده بضيق فجأة سمعته يسألني بهمس عمر = وين عنوان .. خوالك ؟ التفتت للدريشة اللي بجنبي وهمست رايد = خلاص مابي اروح فجأة ما حسيت الا بعمر يضربني على راسي من ورا بمزح عمر = لا يكون زعلت بس .. ما اسمع الا شهاقك .. التفتت له بسرعة ادافع عن نفسي رايد = مابكيت طالع عمر الطريق شوي وبعدها التفت لي مبتسم عمر = الله اعلم .. انت مايمر يوم الا تصيح .. ابي اعرف انت ليه ماتقوي قلبك .. خلك رجال انقهرت منه وطالعت قدام بصمت ... ظروفي اقوى مني .. عمر = وش رايك نرجع لبريدة ؟ ابي خوالي شوي بس ما اقدر اقول له الا رايد = طيب المشكلة تلفونهم ماعرفه .. مالي الا اشوف مريم واخذ الرقم منها .. وان شاء الله اقدر اشوفها .. ذاك اليوم .. يوم كان عمر بالمستشفى حاولت ازورها بس ماقدرت .. ابد ماقدرت .. حتى دانه ماشفتها تغدينا باحد المطالعم وبعدها طلعنا من الرياض وانا ساكت طوال الوقت افكر باخواتي .. ماطرا علي الحل اني اكلم خوالي عشان مريم الا يوم دخلت الرياض .. حسيت بأمل يوم شفت ديرتي .. اشتقت لها .. اشتقت لها مرة ... بالرياض ماكان عندي هموم .. ماتفرقنا مثل الحين ودي نرجع للرياض ونعيش حياتنا براحة وبكرامة التفتت لعمر ولقيته يسوق وهو سرحان .. تنهدت ومديت يدي وطفيت عن الاغنية اللي مشغلها عمر طوال الطريق .. ابي اكلمه يمكن يلقالي حل انتبه عمر من سرحانه على سكوت الاغنية والتفتت لي مستغرب عمر = ليش طفيته ؟ جلست على جنب ملتفت باتجاهه رايد = عمر ... آآآ .. تتوقع لو اطلب من خوالي ياخذون اخواتي عندهم يوافق عمي ؟ شهق عمر وطير عيونه فيني عمر = انت تبي تزور خوالك عشان هالغرض نزلت راسي بحزن رايد = ماطرا علي اكلمهم عشان اخواتي الا يوم دخلت الرياض ( ورفعت راسي له ) بس خلاص اكلمهم بالتلفون ابتسم عمر ابتسامة جانبية وعيونه على الطريق وهمس عمر = هه حسبتك بتروح تزورهم وقلت يمكن .. آآآآ ( وتنهد ) .. ماكنت ادري انك تبي شي منهم ( والتفت لي ) المهم حتى لو كلمتهم عشان خواتك وش تبيهم يسوون مثلا ؟ طالعته مستغرب رايد = ياخذونهم عندهم بالرياض عمر = اخواتك بنات لا شرعا ولا قانونا يسمح لهم تألمت رايد = ليه ؟ عمر = عمك هو الوصي عليهن بعد ابوك مب خوالك طالعت قدام متحطم وتنهدت بيأس رايد = عمي ماكان كذا معنا .. وادري ان خوالي مثله .. كم شهر طيبين وبعدين ينقلبون علينا مثل عمي ... ادري مد عمر يده ومسك يدي وبيده الثانية ماسك الدركسون ويسوق عمر = اختك الكبيرة بتتزوج بس المشكلة دانة التفتت لعمر بقهر رايد = انت تقهرني الحين عمر بابتسامة = انا ابيك تعتمد على نفسك بلا خوال بلا هم .. ابيك من الحين تدور على وظيفة وتوقف على رجلك .. ابيك تصير رجال .. مابيك تصيح على كل شي اذا مو عشانك عشان دانة ( ورفع يده ومسح على شعري) انا معك وبجنبك ... خل خوالك على جنب وش تبي فيهم .. ( وابعد يده عن راسي ) اذا رجعنا البيت ادخل مواقع الشركات وسجل .. انا ابعلمك كل شي .. وابخلي الشباب يدورون لك وظيفة بطريقتهم .. وش تبي بعد ( وابتسم ) طالعته ساكت وفضفضت له بحزن رايد بحزن = بس آآآ ... بس انا من زمان ماشفت اخواتي .. ثلاث اسابيع او اكثر ماشفتهم ( وسكتت شوي اهدي نفسي عن اصيح ) عمر ابي نطلع انا واخواتي بسيارتك مثل ذيك المرة ( ونزلت راسي ) هو صح ضربها وضربني بس والله ماني قادر اصبر ويوم ماسمعت من عمر رد رفعت راسي اطالعه ولقيته يفكر وهو يطالع قدام ويده على ذقنه .. استغربت بس فوق هذا سألته استاذنه رايد مستغرب = عمر .. ابي سيارتك اذا رجعنا بريدة ... اذا ماعندك مانع يعني ؟ التفت لي بملامح جادة عمر = ريّود طلعت مشكلة ثانية شهقت بخوف .. مشكلة .. انا ناقص مشاكل رايد بخوف = وش ؟ عمر = لا تروح لاخواتك .. الحارة كلها بكبرها لا تطبها طيرت عيوني بصدمة رايد = لييييييييه .. وشلون اشوف اخواتي اجل ؟ عمر = اسمع ... اذا شافك عمك بياخذ الاثبات منك .. تصدق انه مطلع ريحة جدي على هالكرت .. من يوم اخذناه منه وهو بس ناشب بحلق جدي .. هاه وين الكرت .. رايد لقى وظيفة .. تراني ماعرف الا ولد ولدك اذا ضاع الكرت ومن هالكلام .. وانت عاد ماقصرت ضيعت على نفسك ثلاث اسابيع على الفاضي .. لو ماختفيت عنا كان يمديك متوظف الحين ومرجعين الكرت لعمك الخايس رايد بألم = وهو وش يبي فيه .. ليه مايخليه معي ؟ عمر بسخرية = مستفيد طبعا .. كل شوي اهدي جدي اذا جا معصب منه .. انا مخلي جدي يكذب على عمك ويقوله ان الكرت معك وهو اصلا معي وجدي يعرف انه معي بس بعض الاحيان جدي يعصب علي طفشان من عمك .. فكنا منه ولا تروح للحارة اخاف يشوفك عمك هناك انحنيت و نزلت راسي بين يدي بقهر ابي اشوف مريم .. واتطمن ... حسيت بيد عمر يمسح على ظهري عمر = دانه اقدر اجيبها لك .. عادتها تلعب بالشارع المغرب وملاحظ لو تغيب ساعات ماحد سأل عنها .. سكت ومارديت .. ومريم .. كيف اشوفها .. اذكرها تعبانه .. ويشغلونها .. واكيد بالها مشغول علي .. طلعت دموعي غصب عني من القهر .. ودي افجر بعمي ودي افجر بالناس كلهم كلهم الا عمر دخلنا بريدة العصر وانا وعمر كل واحد ساكت وسرحان بافكاره .. مافيه الا صوت الاغنية العالي التفتت لعمر لما تذكرت اننا ماصلينا الظهر والعصر انا ناويها جمع تقصير لاننا مسافرين .. هذا اللي تعلمته من امي وابوي اذا كنا مسافرين رايد = عمر ماصلينا قطبت عمر حواجبه وهمس عمر بضيق = اصلا نسيتها رايد = لا انا مانسيتها بس لاننا مسافرين قلت اصلي الظهر مع العصر ( والتفتت قدام اطالع الطريق ) وفاجأني عمر بطلبه عمر بهمس = رايد ادع لي بالهداية .. على الاقل ادعلي احافظ على صلاتي .. دايم انساها وبعض الاحيان ما انساها بس مااهتم لها .. مدري كأن احد يمسكني طالعته بصمت .. ايه اشوفه عمر من يوم عرفته اذا قومته للصلاة يعصب علي واضطر اخليه لين يروح وقتها .. واحيان حتى لو ماهو نايم اروح انا للمسجد وهو الى الحين جالس .. مو بس هو حتى خوياه عبد الله ومشعل ومنصور نفس الطينة .. من يوم كنت عندهم بالاستراحة شفت كل انواع المعاصي نزلت راسي لما تذكرت امي وابوي ... كانوا محافظين .. الاغنية مااسمعها ببيتنا .. ابوي دايم مايطلع للمسجد الا وانا وريان قدامه .. واذا كنا مسافرين مانبدأ سفرنا الا بعمرة وطوال الطريق مانسمع الا احاديث واناشيد الحين لا .. حفظت الاغاني من كثر ما اسمعها ببيت عمر وسيارته ومع الشباب بالاستراحة .. الدخان تعودت على ريحته .. عرفت كيف يغازلون وكيف يجيبون ارقام البنات .. الكلام الوسخ تعلمته منهم علموني اللي امي وابوي جاهدوا عشان يبعدوني عنه التفتت لعمر رايد = تبي تحافظ على صلاتك عمر .. طف عن الاغاني ( واشرت على مسجل السيارة ) الاغاني حرام تنهد عمر ومد يده وطفى المسجل وهمس عمر = اصلا وصلنا التفتت وشفت اننا ندخل حارة عمر ورجعت التفتت له رايد = انتم عودتوني على اشياء امي وابوي ابعدوني عنها وسكتت انتظر رده بس مارد .. يسوق وساكت رايد = والله انا ماكنت اعرف الاغاني .. عمر يمكن انت تنسى الصلاة لانك داااااايم تسمع اغاني .. مرة قالت لي امي ان الاغاني تميت القلب .. ( والتفتت اطالع الطريق لما حسيت عمر وقف السيارة قدام بيته ورجعت التفت له اكمل كلامي ) قبل انا ما اعرف وش معنى كلام امي وماهتميت لاني اصلا ما اسمع اغاني .. كنت اقول بيني وبين نفسي تميته والا تحييه وش علي انا .. بس يوم عرفتكم وحفظت الاغاني من كثر ماسمعها عندكم احس انا بعد مثلك بديت اهمل صلاتي التفت عمر لي مقطب حواجبه وساكت رايد = امي وابوي كانوا ملتزمين .. اذكر ابوي كان بعض الاحيان يأم المصلين بمسجدنا ... وامي بعد اذكرها كانت دايم تعلمني وتعلم اخواني لما كنا صغار ( وحسيت بحرارة بعيوني وسكتت اهد نفسي ) كانت تبعدنا عن كل شي حرام ... نزلت راسي وسكتت .. بعدك يمه كل اللي ابعدتيني عنه عرفته .. عرفت كل انواع الحرام .. اخذت ملفي و نزلت من السيارة وانا اجاهد دمعتي على ذكرى امي ووقفت احتري عمر يفتح باب بيته نزل عمر وجا عندي عند الباب .. طلع المفتاح من جيب بنطلونه وهمس لي بدون مايطالعني عمر = الله يرحم امك وابوك .. محظوظ يارايد انك تتذكر كلام ابوك ( وفتح الباب والتفت لي ) انا ما اعرف ابوي وماعمري شفته ولقرادة حظي ماله صورة عندي دخلنا البيت وعلى طول دخلت الصاله ولقيتها حوسه .. على حوستها يوم الشباب موجودين .. الاكواب والاكياس وعلب البباسي وغيره دخل عمر بعدي وشاف الوضع وتأفف متضايق عمر بضيق = اففففففف مالي نفس انظف هالحوسة ( وتمدد على الكنبة الطويلة بتعب ) التفتت لعمر وملفي بيدي رايد = ماعليك انا ابنظفه .. بس عمر وين احط ملفي عمر = رح حطه بغرفتي فوق رايد = اهاا طيب يله قم ترانا ماصلينا لا الظهر ولا العصر وطلعت من الصاله .. حطيت ملفي بغرفة عمر ونزلت اصلي بالمجلس وبعد ماخلصت وانا جالس جا عمر وبدا يصلي المغرب جالس بالصاله وكل شوي انعس وانا جالس وعمر يكلم مشعل بالجوال واسمعه يسأله عن جامعته والدكاترة وخرابيطهم = نايم ؟ رفعت راسي بعد ماغفيت بدون ما احس والتفتت لعمر ببلاهه رايد = هاه .. لا عمر = طيب وش رايك نروح لحارة عمك .. يمدي اختك دانه تلعب بالشارع الحين تنهدت على حظي وحظ اخواتي النحس .. انا ودي اشوف مريم رايد بحزن = يعني بتجيب دانه هنا عمر = لا ويييين .. نص ساعة من هنا لهناك .. ابيك انت توقف عند الشارع العام وانا اسرق دانه واطلعها من الحارة واجيبها لك عن عيون عمك هزيت راسي بايه وقمنا وطلعنا من البيت نص ساعة ووصلنا قريب الحارة .. وقف عمر السيارة على الشارع العام .. وصار بيننا وبين بداية الحارة شارع تمشي فيه السيارات عمر = خلك هنا .. الحين اجي ونزل .. قطع الشارع ودخل الحارة تنهدت بحزن .. الى متى اشوفهم بالدس .. متى اتوظف واعتمد على نفسي وارجع لاخواتي .. ابي نرجع مثل قبل .. اخذت عشر دقايق افكر بحالي و احس بيأس واحباط شفت عمر يطلع من الحارة وابتسمت لما شفت دانه معه .. لافه رجليها حولين خصر عمر ويديها حولين رقبته و اشوف عمر يتكلم معها قطعوا الشارع و قربوا عند السيارة .. نزلت بسرعة ووقفت قدام عمر قبل تنتبه لي دانه .. عمر بابتسامة = هاه شوفي من فيه حطيت يدي على ظهرها وانا الى الحين احس بقهر من عمايل عمي ... حسبي الله عليه التفتت دانة لي وشهقت بقوة و بشوق وصاحت دانة = لااااايد وتركت عمر وارتمت علي .. شلتها وضميتها بقوة وانا اجاهد دموعي رايد بصوت باكي = دانة لفت رجليها على خصري ويديها على رقبتي وهي تضمني بقوة وتسألني وينك .. مدري ليه احسها تلومني خذلتها وخذلت مريم ... شهوووووور شهور وانا الى الحين على حالي غطيت وجهي برقبتها اغطي دموعي عن عمر وراس دانة الصغير على كتفي حسيت بيد عمر على ظهري ويده الثانية يمسح على ظهر دانه عمر = اركبوا السيارة احسن ركبت السيارة بمكان الراكب ودانة بحظني .. وكل ماحبيتها على خدها تسوي مثلي وتحبني على خدي وعمر مدخل راسه مع دريشة السواق ويطالعنا مبتسم طالعت دااانه بقهر رايد = دانة وشلونك ؟ بس دانة تعلمني متحمسة وش سوت ووش لعبت وما اسمع الا اسم ليان على لسانها تأملتها وانا مااقدر اشوفها بوضوح من الدموع المتجمعه بعيوني .. مابي ابكي .. بس ما اقدر امسك اعصابي .. منقهر .. مغبوووون ... حسيت دانة تتكلم بسرعة كأنها تبي تسرد لي سوالفها سريع سريع قبل اروح انتبهت على بنطلونها وهالمرة مو البني .. كأنه لبس جديد اول مرة اشوفه عليها صح ليه ما ارسل رساله لمريم اطمنها علي .. مسحت عيوني بذراعي بقوة والتفتت لعمر .. تنحنحت اعدل صوتي رايد بحزن = احم .. عمر عندك ورقة وقلم ابكتب رساله لاختي الكبيرة وارسله من دانة طالعني عمر شوي وبعدها رد علي وهو يشر بعيونه على المرتبة اللي ورا عمر = على خبري فيه دفتر ورا ... مدري عنه .. لي شهر مارحت الجامعة .. ومادري الدفتر باقي حي والا لا وطلع راسه واعتدل واقف وفتح الباب الخلفي التفتت ورا بس دانه مسكت وجهي بيديها الثنتين تبيني اعطيها وجه وانتبهلها وعيت تسكت بعض كلامها فهمته وبعضه ما افهمه عطاني عمر دفتره وقلم عمر = رايد .. آآآ .. يوم كنت مختفي .. آآآآ .. عمتي قالت لاختك اننا ندور عليك طالعته مستغرب عمر = آآآ .. اقصد يعني لو تذكر لها انك رجعت لبيتي .. لان عمتي قالت ان اختك شالت همك وخايفة عليك .( وطلع جواله من جيب بنطلونه وكمل ) انا ابروح اكلم شوي وراح قدام السيارة وجللس على الكبوت وهو يضغط جواله تنهدت و التفتت لدانة اعلمها رايد = دانة ابعطيك ورقة تعطينها مريم .. عطيها مريم بس .. لا تعطينها احد ثاني .. خلاص دانة = ايه حلاث .. ليان لاحت ..... وقعدت تبربر تكمل سوالفها جلست دانة بين المرتبين وهي كأنها بالعه مسجل عيت تسكت وقعدت اكتب ( مريم انا رايد انا عند بيت خويي عمر اللي قلت لك عليه قبل مريم ابشرك جبت ملفي من مدرستي بالرياض ادري اني تأخرت بس ماكان عندي كرت العايلة .. ماوصلني كرت العايلة الا من يومين بس ملفك ماقدرت اجيبه .. مريم تكفين انا ماقدر اجي بيت عمي عشان عمي ماياخذ مني الكرت .. ابيك تتصلين على الرقم هذا ( وكتبت رقم بيت عمر ) اتصلي الساعة 2 او 3 اخر الليل .. اظنه وقت مناسب لك ومناسب لي انا بعد تكفين حاولي تتصلين ابي اكلمك واخذ اخبارك حاولي تتصلين اليوم ) قريت الورقة عدة مرات احاول اشوف لا يكون شي ناسيه ماذكرته .. ثنيت الورقة عدة ثنيات وحشرتها بجيب بنطلون دانة وسديت فمها بيدي اسكتها عشان تسمعني رايد = دانة الورقة عطيها مريم .. على طول تدخلين البيت وتعطينها مريم .. خلاص ردت علي ويدي على فمها دانة = حلاث ابعدت يدي عن فمها وضميتها .. الله اعلم متى اشوفها مرة ثانية ... احس بيأس واحباط .. اخاف مالقى وظيفة .. قهر .. طردني من البيت وحرمني من اخواتي وسكتت والحين حتى الحارة ما اقدر ادخلها .. كله خوف ياخذ الكرت مني ... الى متى ابخاف منه انا خواف .. مادافعت عن مريم لما كان عمي يضربها قدامي واكيد ما راح اخذ الكرت منه مرة ثانية اذا سحبه مني .. عمر معه حق .. عمر يعرف اني خواف .. ياليتني مت بدل ريان .. يمكن ريان يصير احسن مني نزلت من السيارة وانا شايل دانة ورحت لعمر اللي جالس على الكبوت ويتفرج على السيارات وقفت قدامه عمر باستهبال = انتهت الزيارة ؟ ( ونزل عن الكبوت ) عطيته دانه وانا كاره نفسي .. ودي افجر بالعالم كلها تشبثت دانه بطريقتها المعروفة على عمر .. وكل ماحبها رجعت له الحبه على خده قطع عمر الشارع وهو يكلم دانة ودخل الحارة وعيني عليهم لين اختفوا عن نظري قهر الغريب يجيب لك اختك يارايد ... فوق ما انت مطرود تخاف منه هين ياعمي هين .. خلني اتوظف واوقف على رجلي .. ان ماحرقت قلبك مثل ماحرت قلبي ما اكون رايد ركبت السيارة وبكيت افرغ شوي من القهر اللي احس فيه قبل يجي عمر ويهاوشني عمر مو فاهم علي .. مو حاس فيني .. انا مقهور مقهور شفت عمر يطلع من الحارة راجع .. مسحت وجهي بسرعة شوي و ركب عمر السيارة وهو يضحك عمر = ياحليلها دانة .. احسها اذا كبرت بتصير مرجوجه ههههههه .. اقولها وش اسمك تقول سيارة .. اقول لا وش اسمك تقول كورة ... الحمارة تعرف اسمها بس تستهبل هههههههههه منزل راسي وساكت ومارديت عليه حسيت بيد عمر على كتفي وهو يتنهد عمر = هونها وتهون رايد بقهر = ابي اتوظف بسرعة .. ابي اتوظف الحين عمر = خلنا نرجع البيت الحين ونسجل بمواقع الشركات وبكرة الخميس الشركات الاهلية تصير فاتحة ... مر عليهم كلهم سكت ولا رديت حرك عمر السيارة وعلى اذان العشا وحنا بالطريق رن جواله عمر = هلااااااا عبادي ... وش وش وش ... حلا هو ... مهبل انت واياه على بالكم بيتي استراحة .. هههههههههه الشرهة مب عليكم الشرهة على اللي سمح يدخلكم بيته اول مرة ... ماتنعطون وجه الصراحة وسكر بوجهه وهو يضحك ويكلمني عمر = شف المهابيل يبون يسهرون عندي الليلة .. التفتت لعمر وانا مالي نفس ارد عليه بس مجاملة رديت عليه.. ماله ذنب اعكر مزاجه معي ... تأملته شوي .. ياحظه ماعنده هموم .. ماعنده اخوات واخوان يشيل همهم رايد بدون نفس = من المهابيل ؟ .. عبد الله ومشعل و منصور والا حتى عيال عمك واحمد ويوسف يبون يسهرون الليلة ؟ عمر بابتسامة = لا بس المجانين الثلاثة ورجع يرن جواله .. طالع عمر شاشة الجوال ورفعه لاذنه عمر = توني مسكر عن عبد الله تجي انت ... لا لا لا ... لا تحاولون مافيه .. هههههههه العب غيرها ... هاه رايد .. معي .. تبيه ؟ .. اهاا طيب بس ولو لا تحاولون ومد علي جواله وهمس لي عشان مايسمعه اللي بالتلفون عمر بابتسامة = أي شي يطلبه منك قل لا ابتسمت واخذت الجوال منه وانا مدري مين رايد بهدوء = الوووو شوي وجاني صوت مشعل مشعل = رااااااااايد .... قل للخبل اللي عندك يفتح بيته .. ياخي علمه احترام الضيوف ابتسمت وسكتت ماعندي رد مشعل = ياخي قله مانبي منه شي .. بس نبي نسهر يااااخي رديت عليه بدون نفس .. مهموم ومالي نفس لهبالهم رايد = يقول بيته ماهو استراحة سكتت مشعل شوي وصارخ على اذني مشعل = بععععععععععد انت .. شكله محفظك كم كلمة ... ياخي فهمنا ان بيته بيت مب استراحة .. عاد كلش من زين بيته .. ياااخي ماندري وين نروح .. والله كأننا مشردين .. ابتسمت وسألته بمزح مجاملة رايد = طيب كم تعطونه اجار سمعت ضحكة عمر وهو يسوق عمر = هههههههه حلوة مشعل = اطلبوا كل شي الا الفلوس والله اني مطفر .. جوالي ماسدده الا اخوي الصغير .. تخيل انا بطولي وعرضي اللي اصغر مني يتصدق علي و يسدد جوالي ( وكمل باستهبال ) ياخي ماقد صارت بس الشكوى لهه وش نقول ضحكت ولا رديت مشعل = هاااااااه ماكسرت خاطرك الى الحين قل للخبل اللي عندك يدخلنا بيته ولك عمولة هههههههههه ضحكت والتفتت لعمر .. الصراحة كسروا خاطري سألت عمر والجوال باذني رايد = شوي ويبكي مشعل .. ارحمه ودخله بيتك سمعت مشعل يرد علي بالجوال .. مشعل = نبكي اذا بغا بس يدخلنا بيته وتوني ادري ان الشباب حوله سمعت صوت منصور يكلم مشعل بصوت عالي منصور = مايخالف خلنا نتمسكن حتى نتمكن ونوريك فيه اذا دخلنا طالعت عمر احتري رده رايد = بتدخلهم بيتك ؟ عمر = مافيه .. قله عمر يقول البيت يتعذركم وصلت كلمة عمر لمشعل رايد = عمر يقول البيت يتعذركم مشعل = هههههههههه اجل يتعذرنا بسيطة بسيطة .. يالله باااي ياحلو رايد = مع السلامة عطيت الجوال عمر وانا احس الشباب طلعوني شوي من الجو الكئيب اللي مدخل نفسي فيه ... مرينا مطعم واخذنا عشانا حق نفرين ولما دخلنا الحارة انفجرت ضحك لقيت الشباب مشعل ومنصور وعبد الله واقفين عند بيت عمر .. اللي يشوفهم يقول هذولي حراس ضحك عمر وهو يمشي بالسيارة على شوي شوي قبل نوصلهم عمر = والله النشبة هههههههههههههههههه رايد = هههههههههه دخلهم ساعة ساعتين عشان تسكتهم وبعدين اطردهم مثل امس عمر = مافيه الا كذا دخلنا البيت كلنا الخمسه و طوال الوقت يعلقون على بعضهم وضحك وماتخلوا من شتائم وضرب بعض الاحيان .. صحيح يمزحون مع بعض بس اشوفهم ضربهم قوي وكلماتهم قوية على بعض .. لو يقولونها لواحد مو متعود عليهم بيزعل على طول وحنا جالسين بالصاله .. جاب عمر عشانا قدام الشباب عمر = هذا لي ولرايد بس .. اللي يمد يده ياويله ( وجلس بالارض ونزل الصحن قدامه والتفت لي ) تعال رايد تراني جوعااااااااان .. لحق قبل اكله عنك منصور = ليه ماجبت عشا لنا معكم مشعل = ماشفت ابخل منه حنا ضيوفك ياخبل جلست قبال عمر بالارض وصحن عشانا الصغير بيننا قرب عمر وجهه من وجهي وهمس عمر = كل كل ماعليك منهم واخذ لقمة كبيرة واكلها بتلذذ وهو يطالعهم بطرف عينه يحاول يعاندهم ويشهيهم بمزح ويده شغاله ضرب على أي يد تنمد مشعل = هههههههه والله لنشبها بحلقك ياعميران وقام عن الكنبة اللي جالس عليها وجا ورا عمر ومسك بطنه من ورا وسحبه ... قام منصور يساعده ومسك رجلين عمر ورفعوه وعمر يصارخ عليهم ويشتم عمر بصراخ = بطنيييييي عورتونيييي بطنييييي بعده مابراااااااااا ياحمييييير نزلونيييي استغل عبد الله الوضع وجلس بمكان عمر وقعد ياكل بسرعة وانا عجزت امسك نفسي عن الضحك رجعوا مشعل ومنصور يركضون بعد ماطلعوا عمر برا الصاله وجلسوا ياكلون كم لقمة بسرعة قبل يجيهم عمر .. قمت مبتعد عنهم وجلست على الكنبة وانا اضحك على خبالهم .. عافت نفسي عن العشا نشبوا اللقمة بحلقي وحلق عمر دخل عمر ينافخ وهو ماسك بطنه بألم ويصارخ عليهم عمر بعصبية = روحوووا اشتروا لكم عشاااا .. وش تبون بحقنا .. مشعل وهو ياكل = مطفررررررر جا عمر ووقف وراه وسوى مثل ماسوى فيه مسك بطنه من ورا وحاول يسحبه بس تركه على طول بدون مايحركه .. واعتدل واقف وهو ماسك بطنه عمر بألم = آآآه عورتوني ببطني ( ورفع التيشيرت عن بطنه يشوف مكان الخياطة البارز ) مشعل وهو ياكل = احسسسسسسسسسن انحنى عمر وقعد ينغزه مع خصره ويدغدغه فجأة سمعنا جرس الباب سكتنا كلنا وقعدنا نطالع بعض مستغربين شوي ورفع منصور راسه واللقمة بفمه يسأل عمر مستغرب منصور = تحتري احد ؟ اعتدل عمر واقف مستغرب عمر = لا .. ابروح اشوف وطلع من الصاله خمس دقايق عشر دقايق طالعت الشباب اللي جالسين بالارض ويتعشون مستغرب .. من هذا اللي جا وطول عمر عنده شوي ورجع عمر عمر = يوم اقولكم لا تجون .. ماتسمعون الكلام ... دبروها الحين منصور مستغرب = وش ؟ رد عليه عمر وهو يمسكه مع ياقة ثوبه من ورا ويقومه عن الارض عمر = قم اشوف ... ابو احمد جا يلومني على تجمعكم ببيتي و بحارة كلها عوايل عبد الله بعصبية = يوووووووه قسم بالله مب حاله ذي .. وين يبونا نروح .. كل مارحنا مكان قالوا عوايل عوايل .. ( وقعد يعدد باصابعه معصب ) اذا رحنا مولات طردونا واذا بغينا نستاجر استراحة يتعذرون انها استراحات عوايل .. وين نرووووح وين نطسسسسسس مشعل بضيق = أي والله وانت الصادق الود ودهم حتى الشوارع يطردوننا عنها .. وين يبوننا نجتمع مثلا .. صدق حاله وقف عمر قدام مشعل اللي جالس بالارض وركله برجله عمر = قم قم .. ابو احمد هزأني يقول جمعت الشباب امس وسكتنا الحين اسمحلنا مانبي تجمع شباب عزاب بالحارة عبد الله بعصبية = ايه عشان عياله معنا امس سكت عمر = اهاا بس ياهدر انت واياه قوموا ابتسمت على مشعل يوم شفته يلف يديه حولين رجل الطاولة الصغيرة باستهبال مشعل = لااااا لاااااا مافيه قوة تطلعني عمر = خذ الطاولة معك اذا تبيها بس اطلع انفجرت ضحك عليهم وعلى استهبالهم وتعليقاتهم وعبد الله الى الحين معصب بجد واخيرا وبصعوبة طلعهم عمر من البيت .. ورجع للصاله وهو ماسك بطنه بالم عمر = اخخخ بطني ( وجلس على الكنبة قبالي وعينه على الصحن الملحوس وكمل بزعل ) مشفح ماخلوا لنا شي ضحكت بقوة التفت عمر وسند ظهره على الكنبة عمر = وانت من اليوم تضحك .. كان شلته عنهم اخذت نفس انظم تنفسي عن الضحك القوي وقمت واقف رايد = خلاص انا ابروح اسوي عشا لنا اشر عمر بيده عمر = لا لا .. اذا كنت على خبري .. طبخك مثل وجهك ( وكمل بسخرية ) وفوق هذا اخذت اسبوعين ساكن مع هنود عز الله تعشينا ( وطلع مفتاح السيارة وفلوس من جيب بنطلونه) رح هات لنا من المطعم اخذت المفتاح والفلوس منه وطلعت من البيت ... ماراح ازعل منه ومن استهزائه علي ... هو والشباب قبل شوي ضرب وشتم على بعضهم .. شكل هذا طبعهم ومازعلوا على بعض نص ساعة ورجعت بالعشا اخر الليل .. الساعة 3 جالس على اعصابي بالصاله وبحطني التلفون .. احتري اتصال مريم .... وين راحت هذي ليه ماتتصل .. لا يكون دانة ماوصلت لها الورقة نعسااااااان مرة ودي انام .. من امس المغرب مانمت .. حطيت راسي على يد الكنبة بتعب .. الصاله ظلام الا من نور خافت جاي من الممر والمطبخ .. طالعت بعيوني عمر اللي نايم قبالي على الكنبة ومعطيني ظهره .. بعد ماتعشينا على طول حط راسه و نااام .. ومن التعب غفيت بدون ما احس قمت بفزع على رنين التلفون .. وعلى طول رفعت السماعة اخيييييييييرا اتصلت ... رايد بفرح = الووووووووو جاني صوت مريم بصوت خفيف وهمس مريم = رايد ؟ رايد بلهفة = اييييييه انا رايد ( وتوني انتبه ان صوتي شوي عالي من تحرك عمر وهو نايم وهمست ) مريم وشلونك ؟ سمعت شهقتها وبكت رايد بحزن = انا رحت للرياض اليوم وجبت ملفي .. ان شاء الله قريب ابتوظف وارجع لكم ( وتغير صوتي اجاهد دمعتي ) ادري انك تحتريني مريم وهي تبكي وبصوت خفيف كأن ماتبي احد يسمعها مريم = خوفتني عليك .. وين كنت .. قلتلي كل مابغيتك اتصل على هالرقم رنة ومن بكرة تجي ( وبكت اكثر ) ويييينك .. لا ليلي ليل ولا نهاري نهار .. اخذت نفس عشان ماابكي وخفضت صوتي اكثر عشان ما ازعج عمر النايم رايد = طلعت من بيت خويي كم اسبوع والحين رجعت مريم = ليه ( وسكتت فجأة وهمست بسرعة ) لحظة رايد لحظة وسمعت صوت السماعة وهي تنزلها .. تنهدت اكيد راحت تستطلع اذا احد يسمعها او لا .. ادري انها ماهي مرتاحة ... اخخخ يالقهر .. شهور وهي تحتريني ارجع واطلعها من بيت عمي .. يارب اتوظف يااااارب رجعت مريم وعادت سؤالها بصوت باكي مريم بهمس = ليه طلعت من بيت خويك ووين رحت ؟ مادري وش ارد عليها رايد بحزن = صارت مشكلة ( وقلت اغير الموضوع ) المهم انتي وشلونك معاهم ؟ مريم = الحمد الله .. اذا انت ودانة بخير انا بخير رايد = لا تخبين عني شي وشلونهم معك ؟ مريم بتنهيدة = عمتي معاملتها خفت معي شوي .. هي الى الحين تشغلني بس الحمد الله خفت شوي عن اول .. بنات عمي حليلات صح ماهيشن ولا ينشن بس يعني نجلس مع بعض احيان ونسولف وسكتت احتريتها تقول عن عمي بس ماقالت شي عنه رايد = وعمي ؟ مريم = عمي مايكلمني ولا يعترف فيني بشي ولا حتى يصرف علي ... احتياجاتي الخاصة ما اخذها الا من بنات عمي والهدايا اللي تجيني مخصصة لي من الجيران الله يجزاهم خير انقهرت ... يعني مو بس انا اللي اكل على الصدقات طلعت دموعي بصمت وانا اسمعها مريم بهمس = عمي من ذاك اليوم وهو معصب منك لانك ماخذ الكرت سألتها مستغرب رايد بصوت باكي = وش ذاك اليوم .. أي يوم ؟ مريم بهمس = قبل شهر على ما اظن جا واحد شايب يقاله ابو فهد عندنا بالبيت ويقولن بنات عمي ان ابو فهد هذا اخذ الكرت من عمي وبيعطيك اياه .. الصراحة فرحت بس بعدها قالوا لي انك اختفيت .. وذبحتني الافكار توديني وتجيبني سكتت وانا اطالع ظهر عمر وهو نايم .. وتنهدت كملت مريم تحذرني مريم = رايد لا ترجع الكرت له مهما كان .. خله معك لا ترجعه .. انت تحتاجه اكثر منه وانت اولى .. لا ترجعه لعمي رايد بهمس = انا ابدور وظيفة الحين واذا لقيت ان شاء الله ... مضطر ارجعها له مريم = لييييه رايد = انتي ودانه اكيد تحتاجونها مريم = وش بنحتاجها فيه .. عمي لا انا ولا دانه يودينا للمستشفيات .. ولا أي مكان .. احرمه من الكرت زي ماحرمني من اشياء كثيره .. تراك بتقهرني اذا رجعته له نزلت راسي وقربت السماعة لفمي اهمس لها عشان مازعج عمر بعد ماشفته تحرك مرة ثانية رايد = مريم بس خويي يقول ان عمي كل شوي يزعج جده ابو فهد عشان هالكرت .. هم كثر خيرهم جابوه لي .. اذا خلص غرضي منه مضطر ارجعه موعشان عمك .. لا .. عشان خويي وجده بس سكتت مريم شوي وبعدها بكت سكتت احتريها تهدا .. شوي وجلست توصيني مريم بصوت باكي = حسبي الله ونعم الوكيل .. طيب خلك ببيت خويك هذا عشان اقدر اكلمك واتطمن عليك .. ورد علي لا تطنشني .. مثل ذيك المرة اتصل رنة .. ولا تجيني من بكرة رايد = ماقدر اجي عند حارتكم عشان عمي مايشوفني وياخذ الكرت مني مريم = ايه صح رايد = بيصير بيننا تلفون بس .. ولا تتصلين الا بالوقت هذا ( وكملت بغيره وانا اطالع ظهر عمر ) واذا رد عليك واحد غيري لا تردين وسكري على طول مريم = ان شاء الله .. الحمد الله اول ماعطتني دانة الورقة بالمطبخ بغى يغمى علي من الفرحة ( وضحكت بهدوء ) ابتسمت رايد = دانة مراسل البريد بيني وبينك تنهدت مريم من قلب وسكتت رايد = طيب الحين ابسكر .. ومتى مابغيتيني اتصلي بهالوقت مريم = تونا والله احس ماشبعت منك احس ابي اخذ علومك اكثر .. علمني وين كنت يوم يقولون اختفيت ؟ رايد = اعلمك بعدين ( وابتسمت ) خلاص الحين صار بيننا تلفون وطرا علي سؤال مهم رايد = صح مريم .. انت الحين عادي تقدرين تكلمين و الا تخافين منهم مريم = عمي وعمتي نايمين وبهالوقت هذا دايم يصيرون نايمين .. وبنات عمي واعيات الحين وسهرانات ويدرن اني اكلمك استغربت رايد = اجل ليه احسك خايفة مريم = اخاف عمي والا عمتي يقومون فجأة والتلفون مشكلته بالممر وفيه تلفون بعد بغرفة عمي اخاف اذا رفعه يسمعنا .. رايد = لا توسوسين .. مو تقولين نايمين ؟ مريم بهمس = من الخوف والله اوسوس .. ومو كل مرة تسلم الجرة .. خاصه وان عمي معصب منك وحاط حرته فيني انقهرت بس بلعتها مابيدي حيلة رايد = طيب مع السلامة مريم = مع السلامة و انتبه لنفسك وابعد عن عيال الحرام سكرت عنها وجلست بحزن افكر بحالها .. مايصرف عليها .. ويحط حرته فيها .. حسبي الله عليك ... حسبي الله عليك .. الله يحرق قلبك زي ماحرقت قلبي بس ريحتني ان فيه احد معطيها وجه بالبيت تنهدت وقمت بتعب وانسدحت على كنبتي اللي دايم انام عليها وتلحفت ونمت * عمر * تنهدت بألم على وضع رايد .. منسدح على جنبي ومعطيه ظهري واسمعه اول ما رن التلفون ماعطيته اهميه على بالي واحد فاضي متصل بهالوقت بس يوم سمعت صوت رايد بـ ( الوووووو ) استغربت وحاولت التفت بس كلمته ( ايه انا رايد ) شدتني وخلتني اتظاهر بالنوم واتسمع له يكلم اخته بانصاص الليالي وبالدس .. واضح انه متفق هو واخته يكلمون بعض بالرساله اليوم صوته خفيف ماسمعت كل كلامه ان شاء الله قريب ابتوظف وارجع لكم ماقدر اجي عند حارتكم عشان عمي مايشوفني وياخذ الكرت مني دانة مراسل البريد بيني وبينك هذا اللي سمعت من كلامه .. سرحت بعد كلمته الاولى .. جرحني .. رايد قالها بعظمة لسانه .. بيرجع .. ويتركني .. كل اللي اسويه واتعب عشانه ماهو شي بعينه .. ادري اني اضحك على نفسي .. هم اخواته اكيد بيرجع لهم .. بس انا يارايد .. ماتشوفني قدام عينك وحيد .. ساعة وسمعته ياذن لصلاة الفجر عجزت ارجع انام .. جلست وطاحت عيني على رايد النايم .. قمت وجلست على الطاولة الصغيرة قدامه وقعدت اطالعه وهو غاط بالنوم ووجهه ناحيتي .. ادري ان اخواتك يحتاجونك .. وهذا واضح من حال دانة واهمالهم لها بس قبل ترجع لهم عطني حل لوحدتي .. ليتني مادخلتك بيتي .. عرفتني بشي ما كنت اعرفه وكنت غافل عنه .. عرفتني بمعنى الاخ الصغير .. كنت اتمنى يصير لي اخوان بس ماكنت اعرف شعور الاخوة الا منك ابتسمت بحزن لما تذكرت كلمته ( ان شاء الله قريب ابتوظف وارجع لكم ) مديت يدي ومسحت على شعره وعدتك اوقف معك وانا عند وعدي .. بيتي مفتوح لك حتى بعد ما ترجع لاخواتك قمت ولأول مرة اطلع اصلي الفجر بالمسجد الخميس ... الساعة 9 صباحا بعد صلاة الفجر رجعت انام وتوني قايم .. ناوي اروح لعنيزة منها ازور امي ومنها اشوف راي مها بخطيبها الابكم رحت فوق اغير ملابسي بس كالعادة مالقيت لي ثوب نظيف تنهدت وانا اشوف دولابي الحوسة .. الله يازين ايامك يمه .. ماني شي بدونك واخذت ساعة ادور بالدولاب بنطلون وتيشيرت واخيرا لقيت جنز اسود وتيشيرت كحلي نظاف ويصلحون للبس دايما اتعيجز اخذ ملابسي للمغسلة ... الحين عاد جا وقت الجد ... اليوم الخميس وبعده الجمعه وبعده السبت .. الجاااااااااااامعة .. ياحياة الشقا لازم اغسل ثيابي واصور المذكرات .. شهر كامل وانا غايب .. انا الغبي كان اخذت شهرين اجازة افففففففففففف غيرت ملابسي ونزلت تحت للصاله ورايد الى الحين نايم قومته اليوم الفجر للصلاة بس مايرد .. اخذت اغراضي ( البوك والمفاتيح والجوال ) والتفتت لرايد النايم ووجهه ناحيتي ولحافه طايح بالارض ... غااااط بالنوم مايحس بشي حطيت خمس ريال على الطاولة .. عشان اذا قام يروح يشتري لنفسه فطور من البوفيه القريبه من حارتنا هذا اذا قام طلعت من البيت وعلى عنيزة وصلت بيت عمي ولقيت سعود يلعب بالشارع كورة مع عيال كبره وقفت سيارتي قدام بيت عمي وانا اضرب بوري لسعود .. التفتوا العيال كلهم لي .. شوي وجاني سعود ودخل راسه مع دريشتي سعود = هلا عمر عمر = هلا بك .. جدي وعمي هنا سعود = جدي لا مو هنا .. وابوي فوق عند خالتي ( وابتسم ) امك عمر = اهااا .. طيب واخوانك وين ؟ سعود = نايمين .. تبيني اقومهم ؟ عمر = لا مايحتاج خلهم نايمين ( وكملت اتطنز ) نوم الظالم عبادة اقصد معاذ بس الاخ سعيدان كأنه زعل .. قعد يطالعني شوي وبعدها كرر كلامي بضيق كأنه يسأل سعود بضيق = نوم الظالم عبادة ؟ ( وطلع راسه بصمت من الدريشة وعطاني ظهره وراح للعيال يكمل لعبه ) والله هذا اللي ناقص بزارين يزعلون .. نزلت من السيارة ورحت فوق عند امي وفعلا لقيت عمي وامي جالسين بالارض بالصاله وبعد ماسلمت واخذ مكاني فاجأني عمي وتوني انتبه ان أمي فرحانه .. جالسه بجنبي وتقرب كل الفطور اللي كان عند عمي عندي عمي بابتسامة = عمر وانا عمك اليوم اتصل علي الضابط يقول انهم مسكوا نايف طيرت عيوني ماني مصدق شوي شوي ابتسمت بفرح عمر = والله ؟ متى مسكوه ووين ؟ عمي = مسكوه على حدود الكويت .. كان ناوي يدخل الكويت على طريق الحفر امي بفرح = ياربي لك الحمد .. الحين بس ارتحت ( والتفتت لي ومسكت يدي ) والله دايم اهوجس بك اخاف يرجعلك .. الحمد الله الله اكرمني وامسكوه عمي = ابروح بعد شوي للشرطة تبي تروح معي نشوف هاللي مايخاف الله تنهدت و نزلت كوبي على الارض .. مالي نفس اشوفه عمر = مايحتاج .. مابي اشوفه .. انت تكفي ياعم عمي = ايه انا اكفي .. بس انا اشوف اذا كنت تبي تروح والا لا ... طيب واللي اسمه سعد قطبت حواجبي مستغرب عمر = سعد ؟ عمي = ايه علمني مصعب ان معه واحد اسمه سعد تراجعت وسندت ظهري على الكنبة اللي وراي .. ومصعب وش عرفه بسعد .. مصعب لا هو من شلتي بالاستراحة عشان نقول يعرف عن سوالفهم قبل ولا بيني وبينه ميانة عشان اعلمه بالتفاصيل .. وبعدين سعد كان وقتها ممسوك عند الهيئة .. و الحين تغير طالعت عمي عمر = لا .. سعد انساه ماله دخل عمي = اكيد ياوليدي ؟ عمر = ايه اكيد عمي = خلاص اجل .. انا ابتابع عنك اجراءات الشرطة ابتسمت .. احسن بعد ريحني من غثا الشرطة عمر بابتسامة = مشكور .. جلس عمي شوي وطلع .. التفتت لامي اتأكد منها عن مها عمر = يمه صحيح انخطبت عمتي ؟ امي بابتسامة = ايه وانا امك .. كنت ناوية اعلمك بس هالحمل متعبني ونسيت عمر = يعني صحيح اللي خطبها واحد اطرم ؟ امي = ياوليدي الرجال مايعيبه شي .. خلوا عمتك تفكر براحتها وهي الله يعوض صبرها كبيرة .. ماهي صغيره ترفضه عمر بضيق = بس وعيالهم بعدين امي = الرجال ولد جار عمك .. رجال ماعليه كلام .. متعلم ومتوظف وعاقل اعاقته ماتمنعه عن شي ان شاء الله عمر = وعمتي وش رايها ؟ امي = الى الحين تفكر .. بس ان شاء الله توافق لمصلحتها .. جدك وجدتك موافقين طيرت عيوني عمر = موافقين ؟ امي = ايه هم ماهم دايمين لها سكتت ولا رديت .. وكملت شربي بصمت .. شوي ورجعت اسألها عمر = طيب اشوفهم طولوا بعنيزة .. مالهم نيه يرجعون لبيتهم ضحكت امي امي = عمك وعياله معيين عليهم .. والحمد الله جدك وجدتك اشوفهم مرتاحين هزيت راسي بايه ولا علقت بس فجأة ماحسيت الا بيد امي على فخذي وفاجأتني بطلبها امي = وانت ياوليدي ماتبي تسكن معي .. وش يجلسك لحالك .. فرح قليبي وتعال عندي نزلت كوبي والتفتت لامي افهمها عمر = يمه وش يجلسني هنا .. ماني بزر .. رجال طول وعرض اضايقكم ببيتكم .. وبعدين عمي يمكن ماياخذ راحته مني امي بضيق = بس انا ماني مرتاحة وانت بعيد عني .. من يغسل ملابسك من يطبخلك من يشوف احتياجاتك تنهدت بهذي خليها على الله .. البيت حوسه وغرفتي وملابسي .. كل شي محتاس بس ضحكت مجاملة لامي عمر = هههههه ماعليك مسيطر على الوضع امي = علمني مصعب ان خويك اللي كان ساكن معك رجع ؟ ياذا مصعب اللي لسانه منفلت منه عمر = ايه رجع ( وقلت اغير الموضوع ) طيب انا ابنزل تحت واشوف مها امي = وش تبي فيها لا ماتضغطون عليها .. خلوها تفكر براحتها قطبت حواجبي مستغرب عمر = احسها صعبة تاخذ واحد ابكم امي = لا خلها براحتها .. تاخذ قرارها بكيفها عمر = ايه بس انــ وقاطعتني امي تنهي الموضوع امي = قلتلك خلها .. انا كلمتها وام معاذ كلمتها وجدتك وجدك وعمك و معاذ كلهم كلموها .. خلاص كل واحد عطاها رايه خلوها براحتها اخذت شوي وبعدها نزلت رايح لجدي وامي نزلت معي صارت حركات امي ثقيلة .. وبطيئة .. اخذنا نص ساعة وانا اسعد امي على النزول دخلت امي داخل وانا رحت للمجلس دخلت المجلس ولقيته فاضي مافيه احد .. جلست على الكنبة انتظر جدي او أي احد يعطيني وجه ربع ساعة وجا جدي وسعود من برا فرح جدي اول ماشافني جدي = هلا بالغالي و لد الغالي قمت وسلمت على جدي عمر بابتسامة = هلا بك زود ... وين كنت اشوفك جاي من برا جدي = أي والله كنت عند احد الجيران ( وجلس على الارض ) وسعود جلس على الكنبة .. جلست بجنب جدي على الارض وانا اضحك عمر = ماشاء الله عليك تعرفت عليهم بسرعة التفت جدي لي جدي = جيران عمك اعرفهم ويعرفوني من زمان ( وتلفت كأنه يدور شي ) وين ماجابوا الفطور لك ( والتفت لسعود يهاوشه ) تلعب بالشارع ومخلي ولد عمك لحاله .. قم هات القهوة عمر = ماعليك جدي افطرت عند امي بس كمل جدي هواشه لسعود جدي = وين اخوانك ؟ سعود = نايمين جدي بعصبية = رح قومهم سعود = وشوله ( والتفت لي ) هو مايبيهم يقول عنهم نوم الظالم عبادة شبكت اصابعي ببعض وحطيت نفسي برئ جدي مستغرب = وش .. وش تقول انت ( وصارخ عليه ) قم هات القهوة وقوم اخوانك قام سعود وهو يتأفف سعود = اففففف طيب وطلع من المجلس معصب همست لجدي باستهبال وانا اهز راسي بأسف عمر = الله يهديه وكتمت ضحكتي على رد جدي وهو معصب جدي = هالجيل منفلت مايحترم احد شوي وجا سعود ومعه القهوة وقعد يصب بدون نفس جيت ابسأل جدي عن ياسر هذا بس هونت .. خلاص اخذت كل المعلومات من امي ماله داعي اعيد وازيد .. نشوف راي مها اول وبعدين يصير خير وبعدين خلاص جدي وجدتي موافقين واشوف امي بعد راضيه الله يوفقها بعد ربع ساعة جا مصعب وهو مكسل ونعسان ماشبع نوم .. وكل شوي يتحكحك سأله جدي وهو يشرب قهوته جدي = وين معاذ ؟ مصعب وهو يتثاوب = عيا يقوم اخذت ساعة وانا اسولف مع جدي ومصعب نام جالس وهو مايدري عن نفسه وسعود يصب شوي شوي هدا من عصبيته ودخل معنا سوالف اخذت شوي و تعذرت لجدي باي شي عشان يخليني اروح ركبت سيارتي وعلى الساعة 11 ونص وصلت البيت دخلت الصاله ولقيت رايد الى الحين نايم العصر جالس انا ورايد بالصاله والاب توب بحظني ورايد بجنبي لاصق فيني وعيونه على الشاشة اول ماصلينا العصر جلسنا ندور ونسجل بمواقع الشركات ونقدم السيرة الذاتية لرايد سألني رايد وهو يشر على شاشة الابتوب رايد = الشركة هذي وين مكانهم ببريدة ؟ اليوم راحت علي نومة ولا رحت اقدم عمر = عندك السبت .. ابكتب لك العناوين وخذ سيارتي ورح قدم رايد = وانت مانت رايح للجامعة يوم السبت ؟ عمر = الا ابخلي احد الشباب يمرني او يمكن اخلي احمد يوصلني بطريقه دخلت موقع قوقل وقعدت اطقطق باسم احد الشركات فجأة وقفت عن الكتابة وسرحت اول ما جا ببالي مكالمة رايد الفجر استغرب رايد وقوفي المفاجئ وطل بوجهه يشوفني رايد = وش فيك عمر ؟ طالعته وتنهدت عمر بهمس = لا و لا شي ( ورجعت اطقطق ) (ان شاء الله قريب ابتوظف وارجع لكم ) ادري اني ما اهمك .. وادري اني العب على نفسي .. ادري اول ماتتوظف وتعتمد على نفسك بتطلع وترميني ورا ظهرك .. لاني باختصار ماني اخوك .. ادري ان اخواتك محتاجينك بس انا مابي ارجع لوحدتي وهواجيسي .. ليه ماحد يحس فيني ليتني اقدر اسكن عند امي .. بس اشوفها صعبه .. صعبه وانا بهالعمر .. رجال وعندي بيت .. اقوم اضايق زوجين بشقتهم الصغيرة نفضت الافكار عن راسي وضغطت على زر التقديم بالموقع |
|
|
#32 |
|
|
رد: يمسح الدمعه بشكوى للمبدعه هدوئي
* الجــزء الرابــع والعشــرون *
* رايد * بعد مرور 3 شهــور الخميس .. الساعة 10 بالليل واقف عند باب بيت عمر واراقب الشارع .. احتري عبد الله اخر واحد من الشباب لنا 3 شهور اذا بغوا يسهرون الشباب عندنا يقفون سيارتهم برا الحارة ويدخلون بيت عمر على واحد واحد بفترات متباعدة .. دخل مشعل البيت وبعده بربع ساعة جا منصور والحين واقف احتري عبد الله اللي يجي وقته يمر بالشارع كأنه عابر عادي واذا قرب عند بيت عمر يدخلون بسرعة .. ولا من شاف ولا من دري ... واللي ساعدنا حارة عمر هادية مرة .. وقليل اللي يقفون بالشارع هذا حال الشباب اذا بغوا يجتمعون بالبيت بعد طردة ابو احمد لهم .. الفكرة فكرة عبد الله ... وهذي رابع او خامس مرة يجتمعون وماحد درا عنهم من الجيران الوحيد اللي يدري احمد .. مسكوه الشباب وهددوه اذا علم وشكله خاف ولا علم ابوه عنا ابتسمت واشرت بيدي لعبد الله بصمت لما شفته جاي من بعيد .. جا يمشي ويحط نفسه برئ .. وانا كل شوي اتلفت اذا كان فيه احد من الجيران يشوف وصل عبد الله عندي وعلى طول دخل البيت دخلنا انا وعبد الله الصاله والربع كلهم موجودين .. مشعل ومنصور وعمر مشعل جالس على الكنبة ومنصور جالس بجنبه ومعه لاب توبه جايبه معه وعمر جالس بكنبة قبالهم نزلت انا وعبد الله ثيابنا وحطيناها أي كلام مع ثياب الشباب على احد الكنبات ماناخذ راحتنا الا بملابسنا الداخليه وطوال الليل نفلها ضحك ولعب ووناسة جلس عبد الله بجنب عمر وانا جلست على الكنبة القريبة من الثياب براحة .. الحمد الله .. الله فرجها علي وتوظفت .. صحيح وظيفة ضعيفة واكثرها للهنود بس مرتاح فيها اشتغل بسوبرماركت معروف احط مشتريات الزباين بالاكياس .. هذي شغلتي بالسوبرماركت .. صحيح راتبي 1200 ريال فقط .. بس الحمد الله يكفي الراحة اللي احس فيها اصلا بصعوبة لقيتها ... بسبب صغر سني كل ماشافوني رفضوا يقبلوني بالاخير لقيت هالوظيفة بالصدفة لما راح عمر يشتري من السوبرماركت اغراض للمطبخ وجا وكلمني ومن بكرة رحنا انا وهو نقدم اوراقي عليهم والحمد الله قبلوني والراتب 1200 ريال اخذ من الراتب مية ريال واشيل الباقي ... لان عندي هدف مستعجل احققه باسرع وقت ما اخذ من راتبي الا 100 ريال بس ... كله عشان اجمع مبلغ محترم واستاجر شقة واطلع اخواتي من بيت عمي .. والحمد الله عمر ماهو مقصر علي بشي .. اكلي وشربي وسكني عنده ببلاش ... وماعندي مصاريف كثيره اللهم جوالي بس .. حتى المواصلات عمر يوصلني بطريقه اذا راح للجامعة والفترة المسائية اخذ سيارته او هو بعض الاحيان يوصلني ويروح لامه بعنيزة او لعمته مرة سألت عمر مستغرب من كثر روحاته وقت العصر .. سألته وين تروح العصر كل يوم وعلمني انه بيصير عندهم عرس .. ولما سألته مين .. قال عرس عمته .. وضحكت عليه لما شكالي طفشان من كثر روحات عمته للسوق عرفت منه خلال الثلاث الشهور اللي فاتت ان عمته انخطبت من احد جيران عمه بعنيزة ... قعدوا هناك شهر تقريبا ورجعوا لبريدة والحين عمر يشتكي طفشان ... على حد قوله انه تورط بعمته يوديها ويجيبها للسوق شبه يومي بما انه هو وهي ببريدة وعيال عمه بعنيزة ومرتاحين منها نزلت راسي بألم .. لما تذكرت همي الوحيد .. مريم ودانه .. دانه اشوفها احيان لما امر على الحارة و مريم اكلمها بالتلفون كل اسبوعين وبعض الاحيان يمر ثلاث اسابيع ماتتصل .. والى الحين مستمرين على نفس الوقت لما لقيت وظيفتي اضطريت ارجع الكرت لعمي مع عمر وعمر عطاه جده يوصله لعمي زعلت مني مريم بس رضت بالامر الواقع بسرعة .. اول مااخذت الراتب ارسلت مع دانة 500 ريال تعطيها مريم ولما اتصلت علي مريم اخر الليل طلبت مني اجمع وعلمتني انها ماتحتاج لانها ببساطة ماتطلع من البيت ابد و عمتها تمنعها تطلع للحريم اذا جوهم ... يعني تقريبا مريم ماتشوف احد ولا احد يشوفها وعلمتني مرة على التلفون مقهورة وهي تبكي انها احيان تشتهي اشياء تشوفها مع بنات عمها .. واذا جوا بنات عمها يشترولها معهم توقف بوجههم مرة عمي هذا غير عمي تعلمني مريم انه يضربها احيان واحيان يسمعها كلام .. تنهدت بألم حكم القوي على الضعيف .. بس هانت يامريم هانت .. ان شاء الله كم راتب ثاني ويصير جمعت مقدم لشقة بسيطة استاجرها لك ... تكفين اصبري علي شوي يارب حقق امنيتي باسرع وقت يارب مريم كل ماكلمتها تبكي وتعلمني انها ماهي قادرة تتحمل اكثر ... وانا مابيدي حيلة ... يكفي حارم نفسي اشياء عشان اجمع فلوس .. لولا عمر كان اختصرت حتى باكلي وشربي عشانهم .. الجوال اللي طلعه لي عمر قبل اتوظف ... ملابسي على اللي شراه لي عمر قبل شهور .. هو نفسه ماعندي الا هالثوب والبنطلون وماشريت غيرهم كله عشان اجمع فلوس عشانها وش تبيني اسوي اكثر من كذا ؟ اتصلت على خوالي بعد ماتوظفت مو عشان اقولهم عن مريم .. لا .. خلاص الحين صرت قوي و توظفت ووقفت على رجلي و ابطلع اخواتي وماحنا محتاجينهم الحين ... بس انا اتصلت عليهم لان بقلبي كره لهم وعلى اهمالهم لنا.. بقلبي كلام اوصله لهم .. بقلبي اشتمهم والومهم واحد واحد وماقدرت امنع نفسي وبكيت غصب عني وانا اكلم خالي ومن وقتها مارجعت اتصل عليه .. وبعدها علمتني مريم بالتلفون ان خالي جا لعمي وهاوشه وقتها سكتت وماعلمت مريم اني اتصلت على خالي خفت منها .. بس هي على طول عرفت اني اتصلت عليهم لانه اصلا هي اللي عطتني رقم خالي قبل اتصل عليهم وكالعادة هاوشتني ولامتني بس ماعلي منهم واذا كلمتهم مرة ثانية ماراح اخلي أي كلمه بالقاموس الا واقوله لهم تقول مريم بعد هوشة عمي وخالي عليها ان خالي طلع معصب لانه ماقدر ياخذ اخواتي من عمي وانا مايعرف مكاني واحسن انه مايعرفه لانه اكيد بيوريني شهر شهرين وجهه الطيب وبعدين يقلب علي مثل ماقلب علينا عمي ... كلهم نفس الطينة الحين خالي يحط نفسه طيب قدامي وقدام مريم .. بس انا عارفهم وفاهمهم وما راح انخدع فيهم .. خلاص انا اعتمدت على نفسي ... و صبرهم علي ... انا اوريهم منهو رايد انتبهت من سرحاني على صوت عبد الله العالي ورفعت راسي اطالعه مستغرب ولقيت عبد الله واقف قبال عمر ومعصب وعمر جالس وحاط رجل على رجل ويتكلم بهدوء بعكس عبد الله المعصب عبد الله معصب = بس انت راهنتني وتحديني على الفين والحين بتنكر عمر = والله عاد .. مادريت انك مخفة وبتروح تكتب على السيارة التفت عبد الله للشباب بعصبية عبد الله = مشعل منصور قولوا شي التفت مشعل لعمر الجالس مشعل = عمر تبي الصدق عبد الله معه حق ... انا سمعتك يوم تتحدانا وقلت اللي يكتب على سيارة الدكتور عبد الاله له الفين منصور وهو يطقطق = وانا اشهد عمر = كنت امزح عبد الله بقهر = لا والله ( ومد يده ) هات الالفين قاطعتهم اسأل وانا كأني فهمت السالفة من كلامهم رايد = وش السالفة التفت عمر لي يدافع عن نفسه عمر = امس الاربعاء وحنا بالجامعة قلت للمهابيل هذولي ( واشر على الشباب واحد واحد ) اللي يكتب على سيارة الدكتور عبد الاله له الفين .. قام هالمخفة ذا ( واشر على عبد الله الواقف ) وكتب على سيارة الدكتور ( ورفع راسه لعبد الله ) خبل انت تكتب على سيارة موظف بالجامعة .. ياخي خلك متحظر شوي انتفخ عبد الله معصب وحمر وجهه عبد الله = عمررررررر ناوي تجلطني انت نزل عمر رجله عن رجله الثانية واعتدل جالس وهو يطالع عبد الله .. وابتسمت من شكله كأنه خاف منه نزل منصور الاب توب عن حظنه منصور = ماحد يكره الدكتور عبد الاله كثرك ياعمر .. عطه الالفين التفت عمر لمنصور عمر = ويييين الفين واجد .. عبد الله بعصبية = ماعلي منك .. انت تحديتنا بالفين خلاص تعطينا الفين عمر بعناد = لا .. والله ماتشم مني الفين .. ما حد قالك صر مخفه وصدق على طول سكت عبد الله شوي وهو منقهر عبد الله = هذا اخر كلام عندك ؟ حرك عمر يده لا مبالاه عمر = ايه قعد عبد الله يطالع عمر بنظرات وهو حاط يديه على خصره مايدري وش يسوي بهالنذل اللي قدامه الصراحة عمر عليه طلعات يخلي الواحد يطلع من طوره ... ياما نرفزني حتى وانا نايم ما اسلم من نذالته فجأة طلع عبد الله بسرعة من الصاله وشفته وانا جالس يدخل المطبخ شهقت ووقفت خايف ... تذكرت نفسي قبل شهور يوم كنت منقهر من عمي وماني بعقلي .. نفس طريقة عبد الله الحين طلعت من الصاله بسرعة ودخلت المطبخ ادور سكينه لا يكون عبد الله بيسويها بلعت ريقي بخوف ... والتفتت لعمر رايد بخوف = عبد الله دخل المطبخ وهو معصب منك عمر = خله يطس وش قال قال الفين ... اصرف عليه انا التفتت لمنصور ومشعل واشوفهم ماهو مهتمين منصور رجع يطقطق ومشعل يتفرج عليه وقفت عند مدخل الصاله وقعدت اراقب باب المطبخ بخوف .. اخاف تصير مصيبة الحين .. تنهدت .. الله يهديه عمر .. لو يخفف شوي من اسلوبه معنا .. اجل يتحدى عبد الله وبعدين يجحد حقه وش فيه عبد الله تأخر بالمطبخ ... التفتت للشباب ورجعت اراقب باب المطبخ بخوف و احتري قطبت حواجبي وانا اشوف عبد الله يطلع من المطبخ ومعه قدر كبير يالله يشيله طالعت القدر مستغرب .. ابتسمت وبعدها ضحكت وانا اشوف الماء يتناثر من اطراف القدر رايد = هههههههههههههههههههههههه وش جايب انت عبد الله وهو يمر من عندي ويدخل الصاله عبد الله بعصبية = انا اوريه الكلب التفت عمر لنا وقبل يستوعب كب عبد الله على وجهه الماء قام عمر مفزوع وسحب نفس بقوة جلست بمكاني وانا فاطس ضحك عبد الله وهو ماسك القدر بيده بعد مافضاه بوجه عمر عبد الله = تستاهل عجزت امسك نفسي عن الضحك على شكلهم عمر واقف ومنزل راسه وشعره وملابسه الداخليه تتناقط ماء حاسوا الدنيا امتلى مكان عمر والكنبة كلها والارضيه صارت مليانه ماء رفع عمر راسه على شوي شوي لعبد الله وهو يتنفس بقوة ينضم تنفسه مسك فنيلته من عند الصدر وابعده عن جلده عمر = وش سويت عبد الله = ثاني مرة لا تهك علينا عصب عمر وشكلها بتبدا هوشه الحين وانا ومنصور ومشعل جالسين ونتفرج نزل عمر فنيلته المبلله بعصبية ولوح فيها فوق شوي وضرب وجه عبد الله فيها بقوة عصب عبد الله اكثر و رد له الضربة بالقدر اللي بيده .. والثاني يسد القدر بذراعه تساندت على الكنبة وراي وانا فاطس ضحك ويجيني رذاذ من فنيلة عمر وهو يلوح فيها على عبد الله وكل واحد يشتم الثاني .. عبد الله يضرب بالقدر اللي بيده على ذراع عمر والثاني يرد عليه الضربه بفنيلته المبلله بوجه عبد الله قام مشعل يفرقهم مشعل باستهبال = خلاص خلاص كل واحد يصلح سيارته فجأة سمعت جوال احد الشباب يرن .. التفتت لكومة الثياب على الكنبة اللي بجنبي .. وقمت ادور الجوال بينهم .. ومع استمرار رنين الجوال عرفت ان الجوال جوال عمر .. طلعت ثوبه من بين الثياب وطلعت الجوال من جيبه الراس الكبير يتصل بك لطول احتكاكي بعمر عرفت انه مسمي جده بالجوال الراس الكبير التفتت لعمر اللي يتهاوش مع عبد الله ومطنش رنين جواله مع انه اكيد يسمعه رايد = عمر جوالك مطنشني ... تنهدت عمر ولقى هوشه ... اخذت نفس وصارخت باعلى صوتي رايد بصراخ = عووووووومررررر جوااااااااالك التفتوا لي كلهم وكل واحد ماسك سلاحه بيده طالعت عمر بهدوء رايد = جدك التفت عمر لعبد الله وبعدها التفت لي و تناول الجوال مني .. والطاولة الصغيرة بيننا بس سكتت الجوال بيدي قبل ياخذه عمر عمر وهو يطالع جواله مستغرب عمر = غريبة جدي هالوقت نايم وش يبي الحين ( ونزل فنيلته المبلله على الطاولة الصغيرة ورجع شعره اللي يتناقط ماء على ورا والتفت للشباب وخاصة عبد الله ) ابتصل عليه الحين ولا واحد يطلع صوت .. ترا جدي خلقة مايدانيكم وضغط شوي بالجوال ورفعه لاذنه وانا رجعت لمكاني عمر = هلا جدي .. متصل علي تو ..... ( وطير عيونه بصدمة ) جدي وش فيه صوتك .... انا بالبيت وشفيك جدي عسى ماشر ؟ ..... ( وشهق بقوة ) عمي ؟ طالعنا انا ومشعل ومنصور وعبد الله بعض مستغربين ورجعنا نلتفت لعمر عمر بألم = مـ مـ متى ؟ ( وتغير صوته ) اليوم .... ( وتجمعت الدموع بعيونه ولف وجهه عنا وعطانا ظهره والجوال باذنه ) اليوم قمت بصدمه وانا اشوف عمر يحاول يمنع نفسه مايبكي قدامنا قام منصور وتجمعنا كلنا حول عمر بصدمه حط عبد الله يده على كتف عمر بخوف عبد الله بصدمة = عمر وش فيه جدك ؟ سمعنا عمر يبكى بصمت والجوال باذنه ويكلم جده بصوت باكي عمر = بأي مستشفى حطوه ( وبكى اكثر وكمل بحزن ) الحين اروح خلك مـ مرتاح ماتحمل عبد الله ولف عمر مع كتفه بعنف عشان يواجهنا .. عبد الله = ياخي وش فيكم ؟ شهقت بصدمه وانا اشوف دموع عمر على خده غطى عمر عيونه بيده والجوال الى الحين باذنه ويكلم عمر بصوت باكي = خلاص جدي اهدى شوي .. اهم شي صحتك والحين اروح لمصعب ومعاذ بالمستشفى شهقت والتفتنا كلنا ببعض بصدمة سأل مشعل بصوت هامس مشعل بهمس = لا يكون عيال عمه صار لهم حادث ؟ ماحد رد عليه ... عيوننا واذاننا كلها لعمر اخذ عمر نفس يهدي نفسه عمر بصوت باكي = وين تروح ياجدي بهالليل .. خلاص انا اروح لهم الحين ( زفر بضيق ورفع عمر راسه فوق بألم وهو يحاول يقنع جده ودموعه على خده ) بكرة اوديك له تسلم عليه .. الحين ليل وانت تعبان ... ( ونزل راسه ) مصعب ومعاذ انا اروح لهم الحين ( وكأن تذكر شي ) جدي انت قلت لي معه احد ... منهو اللي معه ؟ .... وش ماسمعت .. احد بناته ومين ؟ وشهق بقوة وطير عيونه بصدمة عمر = اميييييييي ( وصرخ بوجه جده ) وسااااااااكت ...... امي بالعناية وساااااكت وسكر الجوال بوجه جده ودفع عبد الله عن طريقه وطلع يركض من الصاله بس لحقه منصور و مسكه مع بطنه من ورا عند الباب الداخلي منصور = ياخبل بتطلع كذا تبعناه ووقفت انا عند مدخل الصاله واشوف عمر عند الباب الداخلي و يبكي بألم وناسي انه ماعليه فنيله تجمعنا حوله... غطى عمر وجهه بذراعه وبيده الثانية ماسك الجوال سأل عبد الله بمواساه وكأنه فهم السالفة عبد الله = عمر وش فيكم .. وش فيه جدك ؟ مشعل = عسى ماشر عمر وش فيهم عيال عمك ؟ عمر بصوت باكي وهو مغطي عيونه بذراعه عمر بصوت باكي = عمي وبنته ماتوا شهقت بألم وطالعنا بعض منصدمين ... كمل عمر كلامه بألم عمر بصوت باكي = وامي كانت معه والحين بالعناية ترك منصور بطن عمر وحط يديه على كتوفه يواسيه منصور = لا حول ولا قوة الا بالله .. امك ان شاء الله طيبة والله يرحم عمك وبنته فتح عمر الباب الداخلي بعصبية بس وقفوه الشباب مرة ثانية مشعل = عمر لحظة ماعليك شي .. البس على الاقل ثوبك ( والتفت لي ) رح هات ثوبه بسررررعة ركضت بسرعة ودخلت الصاله واخذت فنيلة عمر المبللة ولبست ثوبي بسرعة واخذت ثياب الشباب كلهم وطلعت بسرعة اركض سحب عمر فنيلته مني وقعد يلبسها رفعت راسي له و انا عارف انه ماهو معطيني وجه وهو بهالحاله رايد = عمر خلني اروح فوق واجيب لك فنيلة غيرها .. هذي مليانه ماء طنشني عمر وهو يكتم شهقاته ولبس ثوبه طالعته بألم .. شعره وفنيلته يتناقطون ماء .. لبسوا الشباب ثيابهم بسرعة وطلع عمر ركض للحوش طلعنا وراه نركض التفت عبد الله لنا وهو يركض ورا عمر ويكلمنا عبد الله = شباب انا ابروح معه وانتوا الحقونا بسيارة مشعل طنشت كلامه وركضت وانا مصر اروح مع عمر بسيارة وحدة فتح عمر باب الراكب بس منعه عبد الله وسحب المفتاح من يده عبد الله = اركب انا ابسوق عنك ماعارض عمر وركض حولين السيارة وركب بمكان الراكب وركبت انا معهم ورا وانا اشوف مشعل ومنصور من بعيد يركضون بالشارع رايحين لسيارتهم اللي واقفة برا الحارة وانطلق عبد الله بالسيارة بسرعة وتعدينا مشعل ومنصور وهم الى الحين يركضون بالشارع حطيت يدي على كتف عمر اواسيه وانا جالس وراه رايد = عمر ان شاء الله امك بخير منزل راسه ومغطي وجهه بيديه الثنتين عمر بصوت باكي = عمي ماااات سكتت بألم وانا اتذكر سعود ومصعب الطيب ... مصعب طوال الثلاث شهور اللي فاتوا يزورنا بالبيت .. ولطيبة نفسه متحمل غلاسة عمر معه ... طالعت عمر بأسى وانا اشوف ثوبه شوي شوي يتبلل من فنيلته ... وشعره الى الحين مبلل .... ساند راسه بين يديه ويتكلم بصوت خفيف كأنه يدعي عبد الله = عمر باي مستشفى هم ؟ رفع عمر راسه وسند ظهره على المرتبه يطالع الطريق عمر بصوت باكي = رح لعنيزة .. مستشفى الملك سعود .... ادعس بسرعة والا خلني اسوق عبد الله = لا لا خلاص الحين .. وزاد عبد الله بالسرعة كمل عمر كلامه بعد مازاد بكاه بألم عمر = امي بالعناية ... يارب سلمها ( وانحنى مرة ثانية وسند راسه بين يديه وبكى اكثر ) اول مرة عمر يبكي قدامي ... حطيت يدي على كتفه رايد = ان شاء الله امك تطلع بالسلامة انتبهت اننا طلعنا من بريدة ماسكين خط عنيزة .. وعبد الله كل شوي يزيد في السرعة فجأة رن جواله ... بس يدعي بصوت خفيف وهو مغطي وجهه بيديه و مطنش الجوال تنهدت واعتدلت جالس وسندت ظهري على ورا وانا ادعي الله يحفظ له امه الام غالية ... ذقت الامرين من بعدها .. نزلت راسي بحزن وانا اتذكر امي والحادث المشؤوم ... كنت اسمع صوتها وهي تأن .. وقتها الضرر كان برجلي وماقدرت اروح لها .. واقرب واحد عندي كان ريان ومن بعدها ماسمعت امي ... طلعت دموعي وانا اشوف وجه امي الغالي قدامي ... آآآه يمه = هاه وصلنا مسحت دموعي بسرعة ورفعت راسي وشفت انوار المستشفى الكبير قدامي ... نزل عمر من السيارة وعبد الله الى الحين مالبق صاح فيه عبد الله عبد الله بصراخ = لحظة عمر نزلت بسرعة الحق عمر وعمر يركض وانا اركض وراه واحاول الحقه دخلنا المستشفى وعمر مثل المجنون يتلفت يدور احد يسأله شاف عاملة نظافة وسد طريقها مثل المجنون عمر = امي وييييين شفت الاستقبال على يميني وشهقت وانا اشوف من بعيد مصعب واخوه معاذ قريب عند الاستقبال حطيت يدي على كتف عمر انبهه رايد = عمر شف مصعب ومعاذ هنااااك ( واشرت بيدي لهم ) التفت عمر للمكان اللي اشرت عليه وراح يركض لهم وركضت وراه .. وانا اشوف مصعب جالس بالارض على البلاط البارد قبال الاستقبال وظهره على الجدار ويبكي بصوت مسموع ومغطي عيونه بيده ومعاذ واقف و منحني وساند راسه على طاولة الاستقبال ويبكي بقوة وموظفات الاستقبال السعوديات وحدة واقفة باستحياء ومبتعده عن معاذ .. والثانية تواسي معاذ وهو جالسه بكرسيها رحنا انا و عمر لمصعب وجلسنا قدامه ... مسك عمر يد مصعب بعنف عشان يشوف عيونه عمر بصوت باكي = مصعب وش صاااار ... وين امي ؟ شهق مصعب شهقة قويه ونطق بصعوبة مصعب = ابوي ماااات ( وبكى اكثر ) ابوي وليلى ماتواااا مسك عمر كتف مصعب وهزه بقوة عمر بصراخ = اسألك عن امي وييييين ... رد علي تكفى ... امي وييييييين = امك هي الحرمة الحامل ؟ التفتنا كلنا لمصدر الصوت لموظفة الاستقبال الجالسة اللي قبالنا قام عمر بسرعة ووقف بجنب معاذ عمر بلهفة = ايه ... امي الحامل .... وينهي ؟ الموظفة = رح الدور الثاني وتدخلت الموظفة الواقفة تصحح لها الموظفة الثانية = لا .. اخذوها الحين لغرفة العمليات شهق عمر بقوة عمر بخوف = ليه .. وش فيها امي ؟ هنا جانا عبد الله بس على طول وقف عند معاذ يواسيه .. ومعاذ الى الحين مغطي وجهه بذراعه ومنحني على الطاولة ويبكي بحرقة وبصوت مسموع وغصب عني طلعت دموعي من صوت معاذ ... وكل شوي امسح دموعي بسرعة ردت الموظفة على سؤال عمر الموظفة الثانية = والله مادري .. بس انتظر شوي لين يطلع الدكتور من غرفة العمليات عمر بصراخ = وووششش انتظر ... ردت الموظفة تحاول تهديه الموظفة = ياخ لو سمحت امك بغرفة العمليات مافيه الا انك تنتظر شوي .. والحين يطلع الدكتور لف عمر دورة كاملة حول نفسه منقهر وهو حاط يديه على راسه رفع معاذ راسه والتفت لعمر ووجه احمر ودموعه على خده معاذ بصوت باكي وبصعوبة = عمتي تولد ... استعجل ابوي وهو ينقلها وصار الحادث عليهم ( وغمض عيونه بقوة وسالت دموعه اكثر على خده وقتح عيونه يطالع عمر وبكى اكثر ) ليلى راحت معهم .. ابوي وليلى راااااحوااا ( وغطى وجه بيده وبكى) جا عبد الله وضم معاذ لصدره ولف يديه حولين معاذ .. بكى عمر اكثر وجلس على الارض بضعف وظهره على طاولة الاستقبال وغطى وجهه بيديه الثنتين عمر = عميييي نزلت راسي وبكيت من شكلهم واسمع همسات الزوار و صوت الموظفتين يبكن مصعب وعمر جالسين على الارض متقابلين ويبكون ومعاذ يبكي على كتف عبد الله والثاني يحاول يواسيه جلست بجنب عمر ساند ركبتي على الارض .. وضميت راسه لصدري .. واسمع عمر يبكي بألم وبصوت مسموع وحاط يده على ظهري ويرصني ويغطي وجهه بصدري عمر بصوت باكي = عميييي شوي شوي تدخلوا بعض الزوار ومشعل ومنصور اللي جوا متأخرين قعدوا يحالون يهدون مصعب ومعاذ وعمر مشعل وبعض الرجال الزوار عند مصعب .. ومنصور واقف عند معاذ ويواسيه مع عبد الله وانا وبعض الزوار عند عمر واسمع احد الرجال الزوار عند مصعب يحدث عليه باحاديث عن الرضى بقضاء الله وقدره اخذنا شوي نحاول نهديهم ونواسيهم .. قدروا مشعل واللي معه يقومون مصعب عن الارض ويجلسونه على الكنب بصاله الانتظار اما منصور وعبد الله واللي معهم الى الحين على وضعهم وانا واللي معي نحاول نقوم عمر عن الارض ونجلسه على الكنب ... بس عمر قام واقف والتفت للموظفة وهو يتساند بحزن على طاوله الاستقبال عمر بصوت باكي = ابي اشوف امي ... اخذت الموظفة التلفون وسألت بصوت باكي متأثرة وبعدها التفتت لعمر الموظفة = لسى ماطلعوا احنى عمر راسه .. وهو ماهو قادر يصبر احد الرجال = تعال اجلس هنا وارتاح والحين مريضكم يطلع ان شاء الله .. وعظم الله اجركم في ميتكم مارد عليه عمر انحنى وسند راسه على طاولة الاستقبال وبكى جلسوا معاذ بجنب اخوه مصعب على الكنبة وهم ماهدوا الى الحين .. متأثرين ويبكون على ابوهم واختهم ... مصعب ساند راسه على يد الكنبة ومعاذ حاط راسه بين يديه اخذنا وقت وعمر رايح جاي ويدعي واحسه شوي و بينفجر وهو يحتري امه وانا ومنصور ومشعل وعبد الله واقفين طابور على الجدار .. ماندري وش نسوي فجأة قامت موظفة الاستقبال ونادت بصوت عالي والتلفون باذنها موظفة الاستقبال = وين اقرباء المريضة ساره ... نحتاج دم باسرع وقت طالعتها بعدم اهتمام على بالي ساره هذي حيا الله مريضه من هالناس بس تفاجأت بعمر يركض بجهه الموظفة ووقف عندها وهو شوي ويهجم عليها عمر بانفاس سريعة وخوف عمر = انا .. انا ولدها ... ويـ قاطعته الموظفة وهي تشر باتجاه اليمين الموظفة = روح بسرعة من هنا وتلقى مكتب استقبال هناك واسألهم عن الممرضة هناء ويدلوك وهي بتعمـ ما خلاها عمر تكمل كلامها و على طول انطلق يركض بالاتجاه اللي اشرت عليه ومع كل لفه يزحلق على البلاط ويصدم بهالناس وحنا نركض وراه ونعتذر بطريقنا على اللي صدمهم عمر تبعناه وانا توي ادري ان امه اسمها ساره رحنا لمكتب الاستقبال الثاني وفيها موظفين رجال وصلنا عند الاستقبال وعمر يسأل الموظف بلهفة عمر = امي بغرفة العمليات و قالوا لي تحتاج دم وين آآآ .. وين ( والتفت لنا معصب من نفسه ) وش قالوا اسمها الممرضة نسيت اسمها رايد = هناء واول ماسمعني الممرض اشر لعمر على الممر اللي قبالنا الموظف = رح من هنا اول غرفة على يدك اليمين ركض عمر وركضنا وراه ولقينا عند باب الغرفة ممرضة مصرية متنقبة واقفة وكأنها تحتري احد وكأنها مستعجلة او متوترة وقفنا عندها حنا الخمسه وسألها عمر بسرعة وبلهفة عمر بخوف = انا قريب المريضة ساره وش فيــ قاطعته الممرضة المصرية باستعجال الممرضة = اخيرا جه حد ... خلينا نعمل الفحوصات بسرعة ودخلت غرفتها ودخل عمر وراها وحنا وقفنا عند الباب ونسمع عمر وهو يسألها ويشمر عن ذراعه لها عمر = وش فيها امي .. ليه تحتاج دم طالعته الممرضة باستغراب وهي واقفه وعمر واقف قبالها الممرضة = ساره هيا امك ؟ عمر = ايه ردت عليه الممرضة وهي تجهز الابرة وواضح انها مستعجلة .. الممرضة = مفيش وقت خالص .. ( وسحبت دم قليل من عمر وهو الى الحين واقف وبعدها التفتت للممرضة الفلبينية اللي بجنبها وعطتها العينة وطلبت منها تروح تفحصها ورجعت التفتت لعمر ) هناء = امك جابت ولد وصحتو كويسة والحمد الله ابتسم عمر ابتسامة صغيره والتفت لنا بوجه شاحب طالعنا بعض فرحانين وبعدها التفتنا لعمر نباركله منصور = مبرووووووك عمور والله وصار لك اخو مشعل بفرح = مبروك مبروك يتربى بعزك سكتت وانا اطالع عمر بصمت واضح ان فرحته ماهي كاملة خوفه على امه ماخلته يفرح ... مارد على الشباب والتفت على طول للممرضة عمر = وامي وشلونها .. ماقلتيلي ليش تحتاج دم ؟ الممرضة = للاسف امك تعرضت لضربة جامدة اوي و بتعاني بعد الولادة من نزيف حاد لف عمر وجهه عنها بضيق جت الفلبينية وعطت هناء ورقة وعلى طول بدت بشغلها مع عمر مر وقت وحنا نحتري عمر منسدح على كرسي مثل كرسي الاسنان ومشمر عن يده ويسحبون منه الدم وانا واقف عند راسه واطالع كيسة الدم ... اووووف هذا ثاني كيسة دم يسحبونها منه نزلت راسي اطالعه ولقيته مغطي عيونه بذراعه ويضغط على الاسفنجة ضغطات سريعه التفتت لمشعل اللي واقف بجنبي وعاقد يديه قدام صدره و يطالع كيسة الدم مثلي .. تنهدت .. وطالعت الممرضة المصرية اللي تراقب سحب الدم من عمر .. عبد الله رجع لمعاذ ومصعب ومنصور راح يستفسر عن حالة المولود ابتسمت .. عمر صار له اخو ... تمنيت الظروف احسن من كذا ودي اشوف عمر وهو يفرح باخوه .... الله يحفظ له امه ان شاء الله ... عمر يستاهل كل خير ... صحيح عليها طلعات ونذاله بس اشوفه بدا يحافظ شوي على صلاته الا اذا كان نايم مافيه قوة تقومه للصلاة بس يظل احسن من قبل .. قبل كان وحتى وهو جالس مايقوم مايروح للمسجد ... الاغاني بعد نصيحتي له تركها بس مايمنع الشباب لما يشغلون على الاغاني ببيته انتبهت على هناء وهي تقوم فجأة ووقفت سحب الدم الممرضة = ماينفعش اخد منك اكتر ( وبدت تجهز الكيستين والتفتت لمشعل ) عاوزين شخص تاني رفع عمر ذراعه عن عيونه يطالع الممرضة عمر بتعب = ليه شخص ثاني ... اذا كانت امي تحتاج اكثر خذي مني ( ومد ذراعه لها ) اسحبي بعد نزلت هناء راسها تطالعه الممرضة = ماينفعش ( والتفتت لمشعل ومدت عليه ورقة ) روح شوف قريب للمريضة بسرعة وارجع ليا تاني ( وبدت تشيل اغراضها باستعجال ) جلس عمر بسرعة ومسك يدها بعنف و بعصبية عمر بصرخة = ليه تدورين واحد وانا موجود .. وشوله تطولينها وهي قصيرة عصبت الممرضة خاصة انه مسك يدها الممرضة بعصبية = الله ( وسحبت يدها منه ) ألت ماينفعش خالص .. ده مضر ليك ... ماتعطلنيش بئه وطلعت بسرعة وعمر يناديها ويصارخ عمر = تعااااااااااااااالي مشعل = عمر وش فيك ... خلها توصل الدم لامك لا تنسى امك محتاجة دم الحين وانت تعطلها .. وانا بروح لعيال عمك الحين وان شاء الله خير ( والتفت لي ) خلك معه وطلع يركض التفتت لعمر ولقيته حاط يده على راسه بتعب وكأنه داخ حطيت يدي على كتفه رايد بخوف = عمر وش فيك عمر بتعب = آآآآه راسي سدحته على الكرسي وحطيت يدي على راسه رايد = سحبوا منك واجد .. ارتاح جت الممرضة الفلبينيه ومدت على عمر عصير وقالت بعربية متكسرة الفلبينية = هذا لازم يشرب ابعد عمر يدها بعنف عمر بتعب = مابي ... ابطلع الحين ( وجلس يحاول يقوم بس ماقدر من الدوخة ) الممرضة = مافيه قوم . حطيت يدي على صدره ورجعته على وار ينسدح على الكرسي رايد = عمر ارتاح شوي على الاقل لين تروح الدوخة عنك مدت الممرضة عليه العصير وشرب منه شوي ورجعه لها رايد = ارتاح شوي وبعدين رح تطمن على امك ارتخى عمر بضعف على الكرسي وغمض عيونه بتعب طالعته شوي وبعدها طلعت عند باب الغرفة اشوف الرايح والجاي ربع ساعة وشفت منصور جاي من بعيد .. التفتت وراي اشوف عمر ولقيته على وضعه ويدلك راسه بألم جاني منصور ووجه مايبشر بخير طالع عمر من وراي وبعدها انحنى علي شوي وهمس منصور = المولود صحته تمام بس يقولون امه حالتها خطيرة .. عندها نزيف حاد وقبل الولادة تعرضت لضربة افقدتها الوعي ( واعتدل واقف وتنهد وهو يطالع عمر ) الله يستر التفت لعمر اطالعه بأسى فرحتهم بالمولود ماتمت ... ابوه واخته توفوا بنفس يوم ولادته قام عمر عن الكرسي بتعب وجانا عند الباب وهو ماسك راسه عمر بتعب = راسي يعورني واحس ببرد ومر متعدينا منصور = وين بتروح ؟ رد عمر عليه وهو معطينا ظهره و يترنح ويتساند على الجدار وماسك راسه بيد من الدوخة عمر = ابروح اتطمن على الوالدة اسرعت خطوتين وجيت بجنبه وحطيت يده على كتفي اساعده رايد = تساند علي ماعارض عمر ومشينا متوجهين لمكتب الاستقبال بس منصور وقفنا بصوته وهو يمشي ورانا منصور = عمر ... انا عرفت الدكتور اللي يتابع حالة امك .. اصلا توني جاي منه يوم اسأل عن المولود .. تعالوا معي ومشينا معه متوجهين للدكتور ولقيناه يتكلم مع احد الممرضين بالممر سأله عمر عن امه الدكتور = امك بالعناية ... دخلناها قبل الولادة بفترة بسيطة واضطرت دكتورة الولادة تجري لها عملية قيصرية مستعجلة ...... و بعد العملية صار عندها نزيف ... امك حالتها الى الحين ماهي مستقرة وبغيبوبة مانقدر نشخص حالتها الحين ... عن اذنك عندنا حاله ثانية وراح وهو والممرض اللي معه بخطوات سريعة مستعجلين جلس عمر على احد الكراسي متأثر وحط راسه بين يديه بحزن ويحاول يكتم شهقاته سندت ظهري على الجدار وواقف بجنب عمر ومنصور جالس على الكرسي بجنب عمر ويحاول يهديه منصور = ان شاء الله امك تقوم بالسلامة ( ورفع راسه لي مايدري وش يقول ورجع التفت لعمر وابتسم ) سألت عن اخوك وطمنونا عليه .. صحته تمام مارد عليه عمر منحني وحاط راسه بين يديه تنهد منصور واعتدل بجلسته وسكتنا عنه وجلسنا نحتري يطمنونا على ام عمر ومشعل وعبد الله ماندري وينهم مرت نص ساعة وحنا على حالنا ... انا جالس بمكان منصور ومنصور يمشي رايح جاي .. وعمر على وضعه ويدعي بصوت هامس مرت نص ساعة ثانية والوضع على ماهو فجأة سمعت نغمة رساله على جوال منصور ... شوي وجت رساله على جوالي طلعت جوالي ولقيتها من مشعل ( رايد تعال انت ومنصور عند غرفة هناء ولا يدري عمر ) التفتت بخوف لمنصور اللي واقف قدامي ولقيت الاخ يقرا ورقة معلقه وشكله ماقرا رسالته ولا اهتم فيها متأكد انها نفس المضمون من مشعل التفتت لعمر الجالس على الكرسي بجنبي ولقيته على وضعه ومنحني وحاط راسه بين يديه احم .. قمت ورحت لمنصور وهمست رايد بهمس = منصور التفت منصور لي بصمت طلعت جوالي ووريته الرساله واول ماقراها التفت لاشعوريا لعمر منصور = لحظة انا جتني رساله ابشوفها يمكن منه وطلع جواله من جيب ثوبه وفعلا من مشعل ( منصور تعال انت ورايد عند غرفة هناء ولا يدري عمر ) منصور بهمس = خلنا نروح ( وتنحنح شوي وهو يطالع عمر) ومشينا نحط نفسنا عاديين عشان مايشك عمر فينا لين اخيرا لفينا على اول لفة وعلى طول انطلقنا نركض ولقينا هناك مشعل واقف وحاط قطنه صغيره على ذراعه ويحترينا مشعل = نحتاج دم سووا فحصوات بسرعة ... يقولون امه النزيف مستمر عندها ويحاولون يوقفونه منصور = وعيال عمه وين ؟ طلع عبد الله من الغرفة وهو يعدل كم ثوبه عبد الله = فصيلتي غير ومشعل فصيلته غير .. سووا فحوصات بسرعة يمكن يطابق اجلنا الاسئلة ودخلت انا ومنصور نسوي فحوصات وطلعت فصيلتي مختلفة .. اما منصور فصيلته مناسبة وبدت تسحب منه الدم سأل منصور عبد الله وهو منسدح على الكرسي ويضغط على الاسفنجة بيده منصور = ليه ماتقولون لعيال عمه ؟ مشعل = حالتهم والله ماتساعد .. قلت لمصعب بس مارد علي والله كأني مااكلم احد ... والله العظيم شوي وابكي معهم ... الناس متأثرين مرة رايد بحزن = الله يعينهم .. والله صعبة يفقدون ثنين بيوم واحد ( وتغير صوتي لما تذكرت اهلي ) اسألوني تكلم عبد الله بجدية عبد الله = شباب .. معاذ ماهو ناوي على خير التفنا كلنا لعبد الله بسرعة عاقد يديه قدام صدره وكمل بملامح جاده عبد الله = وانا عندهم سمعت معاذ يحلف برب الكعبة ان يخلي هالولد بدل ابوه واخته اللي راحوا ... سمعته يحلف ان بياخذه من ام عمر شهقت بصدمة .. ياخذه من امه .. مشعل = طيب وين المشكلة ... معذور ... الرجال ابوه واخته راحوا وهالمولود يصير اخوه وين المشكلة يعني منصور يرد على مشعل منصور = وش معذور ( والتفت لعبد الله ) ماعليك منه اصلا الحضانة من حق الام ومايقدر ياخذه الا اذا تزوجت .. يمكن هو بس منهار ولا يدري وش يقول عبد الله = مدري اللي فهمته من كلامه غير كذا ... يقول بياخذه من ام عمر .. شكله منقهر على ابوه واخته مشعل = الصراحة انا معه .. هالولد من حقهم هم ..... يكفي المصيبة اللي جت على راسهم .. هذولي يحول فقدوا ثنين بيوم واحد .. وكله بسبب السرعة وعشانها هي بعد رايد = لازم نعلم عمر التفتوا لي كلهم عبد الله = لا .. عمر خله بحاله واصلا ما حنا متأكدين .. معاذ يمكن فعلا منهار ولا يدري وش يقول .. خلنا لين نتأكد منصور = انا اشوف انه ماتعطونه اكبر من حجمه .. الحضانة من حق الام ... والله مايقدر ياخذ الولد من امه .. عبد الله = بس ياذكي لا تنسى هو شكله كره ام عمر بعد اللي صار .. يعني الله اعلم بتصير هوشه بين العايلتين والسبب هالولد مشعل = معذور ... الصراحة اشوف لهم الحق جيت ابرد عليه بس فجأة قاطعنا رنين جوال هناء .. وردت على جوالها هناء = اهلين يادكتورة ... آآآه حالا حجيبوا دلــ ( وشهقت ) أيه ( بعدها التفت لمنصور والجوال باذنها ) انا لله وانا اليه راجعون .. حاضر يادكتورة حوقفه سكرت جوالها ووقفت سحب الدم من منصور ونطقت بصعوبة وبحزن هناء بألم = عظم الله اجركو في المريضة شهقنا كلنا بصدمة تهاوى عبد الله بصدمة على كرسي وراه و مطير عيونه بهناء ومصدوم منصور لف وجهه عنها وغمض عيونه بألم وهو جالس على وضعه مشعل انحنى وحط راسه على كتفي ... وانا مطير عيوني بهناء ماني مصدق رايد بصوت باكي = ام عمــ ر مــ مــ وماقدرت اكمل ونزلت راسي و بكيت بقوة وببالي صورة عمر هناك جالس ينتظر امه سمعنا هناء تكلمنا بأسى هناء = شويا وحينقلوها من العناية لغرفة تانية تسلموا عليها ماحد رد .. كل واحد على وضعه وساكت تمالكنا نفسنا شوي بعد ماهدينا ورجعنا لعمر وعند اللفه من بعيد شفناه جالس هناك بمكانه ومنزل راسه وسرحان صاح مشعل فينا مشعل = شباااااااب شكله مادرا رايد بحزن = ايه واضح من شكله ( والتفتت لهم ) شسوات .. واحد يعلمه وقفنا عند اللفه وكل شوي نطل على عمر من ورا الجدار وكل واحد يدف الثاني رح انت .. لا .. رح انت عبد الله = تدرون وشلون ... خلونا نحتري .. اكيد احد يجيه الحين ويعلمه .. الممرضة قالت شوي وينقلونها لغرفة ثانية عشان ولدها يسلم عليها .. اصبروا شوي الحين يجي واحد ويعلمه ووقفنا نحتري وعيوننا على عمر من بعيد اللي جالس على نار وهو مايدري باللي صار تكمت انفاسي وانا اشوف الدكتور اللي قبل شوي متوجه لعمر وهو يقدم رجل ويوخرها متردد .. وعمر جالس على الكرسي و الى الحين سرحان منصور وهو يشر = شبااااااااب هذا هو الدكتور عبد الله بترقب = اشششش وتكمنا انفاسنا نحتري ردة فعل عمر وهو يتلقى خبر امه |
|
|
#33 |
|
|
رد: يمسح الدمعه بشكوى للمبدعه هدوئي
* الجــزء الخامــس والعشــرون *
وعند اللفه من بعيد شفناه جالس هناك بمكانه ومنزل راسه وسرحان صاح مشعل فينا مشعل = شباااااااب شكله مادرا رايد بحزن = ايه واضح من شكله ( والتفتت لهم ) شسوات .. واحد يعلمه وقفنا عند اللفه وكل شوي نطل على عمر من ورا الجدار وكل واحد يدف الثاني رح انت .. لا .. رح انت عبد الله = تدرون وشلون ... خلونا نحتري .. اكيد احد يجيه الحين ويعلمه .. الممرضة قالت شوي وينقلونها لغرفة ثانية عشان ولدها يسلم عليها .. اصبروا شوي الحين يجي واحد ويعلمه ووقفنا نحتري وعيوننا على عمر من بعيد اللي جالس على نار وهو مايدري باللي صار تكمت انفاسي وانا اشوف الدكتور اللي قبل شوي متوجه لعمر وهو يقدم رجل ويوخرها متردد .. وعمر جالس على الكرسي و الى الحين سرحان منصور وهو يشر = شبااااااااب هذا هو الدكتور عبد الله بترقب = اشششش وتكمنا انفاسنا نحتري ردة فعل عمر وهو يتلقى خبر امه انتبه عمر للدكتور وقام فازع ووقف عنده معطينا ظهره لبعد المسافة مانسمعهم هذا غير الناس اللي يمشون وخطواتهم المزعجة خاصة الحريم وكعبهن استغربت اشوف الدكتور كأنه يشرح شي لعمر .. اعتدلت واقف وابتعدت عن الجدار اللي اطل عليهم من وراه .. والتفتت للشباب اللي وراي ويطلون من ورا الجدار رايد = وش يقولون ؟ مشعل مستغرب = مدري .. كل هذا يقوله عن امه ؟ منصور = مانسمع شي التفتت لعمر وشفت الدكتور الى الحين كأنه يشرح شي وعمر واقف عادي قباله ومعطينا ظهره تنهدت عجزت اصبر ابي اروح واسمعهم رايد = انا بروحلهم و ابحط نفسي مادريت ومشيت متوجه لهم وسمعت احد الشباب يأيدني = وانا بعد التفتت ورا وشفت مشعل ومنصور وعبدالله وراي ... وصلنا عند عمر والدكتور ووقفنا بجنبهم وانا احط نفسي قدام عمر ما ادري عن شي .. وشكل الشباب مثلي انتبه عمر لنا وعلى طول التفت لمشعل ورجع التفت للدكتور وهو يشر على مشعل عمر بضيق = هذا خويي اللي قلت لك عنه هو اللي راح يدور ( والتفت لمشعل يسأله ) مشعل لقيت دم ؟ ارتبكنا كلنا وخاصة مشعل مشعل مرتبك = آآآآ بس تدخل الدكتور قبل يرد مشعل و انا ملاحظ على الدكتور متلعثم ومايدري وش يقول الدكتور بتردد = حصلنا على الدم ياخ عمر ... بس ... بس اااا .. صارت مضاعفات ووو وسكت زفر عمر بضيق عمر = من اليوم وانت تعيد هالكلمة دكتور ... لا انت متكلم ولا انتم خليني اشوف امي .. اقدر اشوفها الحين والا لا ؟ طالعنا بعض انا وعبد الله بصمت تنحنح الدكتور شوي الدكتور = احم .. بنخليك تشوفها ان شاء الله .. آآآآآ ... بس حصـ قاطعه عمر بنفاذ صبر عمر بضيق = طيب ابي اشوفها .. انت مانت متكلم ولا انتم مخليني اشوفها نزل منصور راسه وتكلم بصوت يحاول يخليه طبيعي منصور بحزن = عمر خل الدكتور يكمل التفتت عمر لمنصور عمر بضيق = من قبل تجون وهو بس يعيد الكلام ( والتفت للدكتور بنفاذ صبر) تفضل اسمعك عدل الدكتور نظارته .. وشكل هالدكتور جديد وماهو متعود ينقل مثل هالاخبار هذي الدكتور بتلعثم = حاولنا مع دكتورة الولادة بكل جهدنا ... آآآآ ... نوقف النزيف .. وووو .... وللأسف حصلت عند .. آآآآ .. المريضه مضاعفات .. آآآ .. وسكت لف عبد الله وجهه عن الدكتور ومنصور منزل راسه وساكت ومشعل حاط يده على ذقنه ويحتري الدكتور يكمل .. وانا انقل نظري بين عمر المتلهف والدكتور المرتبك كمل الدكتور وهو ينزل راسه بحزن وكمل الدكتور = حصل مضاعفات في النزيف ادى لـ .. آآآآ قطب عمر حواجبه وانفاسه بدت تسرع وكأنه بدا يفهم تنهد الدكتور واخيرا كمل الدكتور = ادى لـ وفاة المريضة ... ( وكمل بسرعة ) عظم الله اجرك ) التفتنا كلنا بسرعة لوجه عمر حسيت نفسه توقف فجأه بعد شهقه صغيره طلعت منه وهو مطير عيونه بالدكتور كأنه يدور بوجه الدكتور الكذب كأنه ماهو مصدق .. يطالع الدكتور وكأنه مايطالعه حط عبد الله يده على كتف عمر بحزن يواسيه كأنه يبي يطلعه من تصنمه المفاجئ وعمر الى الحين واقف بدون نفس وبدون حركة وبدون صوت ونظره على الدكتور همست بصوت باكي احاول اطلع عمر من صدمته رايد بصوت باكي = عمر سالت دمعه حارة سريعة على خده وعيونه على الدكتور بصدمه شوي شوي حمر وجهه ونطق بشهقه عمر = يمه وشهق ثانية عمر = يمه رفع يديه الثنتين وحطها على راسه وبكى بصوت مسموع عمر = آآآآآه يمااااا فقد توازنه و مشى خطوة لا اراديه وصدم بعبد الله ويديه على راسه ضمه عبد الله لصدره وهو يهمس عبد الله بحزن = عظم الله اجرك ياغالي اصبر بكى عمر بقوة وغطى وجهه بكتف عبد الله ويبكى بصوت مسموع عمر بصعوبة = مااااالي غيرك يماااااااا لفيت وجهي عنه وبكيت .. شفت الدكتور يشر لاحد وراي .. شوي وجا ممرض فلبيني وسمعت الدكتور يأمره بالانجليزية وراح والممرض بقى يطالعنا التفتت لعمر ولقيت عبد الله لاف يديه حولين خصر عمر وكأنه شايله وواضح على عمر انه مو قادر يوقف على طوله ومو موقفه الا عبد الله ... ساند جسمه على عبد الله بالكامل ومغطي وجهه على كتفه وصوته وهو ينادي امه يبكيني غصب عني وقفت ورا عبد الله عشان اشوف عمر وحطيت يدي على يد عمر وهو حاطها على ظهر عبد الله رايد بصوت باكي = عمر ادعلها بالرحمة ( وماقدرت اكمل وبكيت ) جا مشعل بجنبي ودموعه على خده بصمت ومسح على راس عمر مشعل بصوت باكي = ياغالي امك بحاجتك الحين انتبهت على صوت عبد الله وواضح انه باذل جهد من ثقل عمر عليه عبد الله = عمر تمالك وادع لامك بالرحمة ( وسمعته يكمل) منصور خلنا نجلسه على الكرسي ... جا منصور ورا عمر ولف يديه على بطن عمر وابعده عن عبد الله ... اعتدل عمر واقف ووجهه احمر ودموعه بعزاره على خده ... حط عمر يديه على يدين منصور وهو يحاول يحرر نفسه منه بضعف عمر بألم = خلني .. ( وتلفت يدور الدكتور ) وين رااااااااااح ابي اشوفهااااااا دكتووووووور وسند ظهره على صدر منصور بضعف ورفع راسه بألم وغطى وجهه بيديه وبكى اكثر عمر = آآآآآه يماااااااا شفت منصور انفجر يبكي ورص يديه حولين بطن عمر وغطى وجهه على كتف عمر من ورا منصور وهو يبكي = بس ياعمر ... بكيتنا معك .. نزلت راسي وبكيت وانا اسمع عمر يتكلم بضعف ويبكي عمر = ابي اشوفهااااااااا ... آآآآآآه تجمعوا بعض مراجعين الطوارئ وحاولوا يهدون عمر مع الشباب وقدروا يجلسون عمر على الكرسي ... وعبد الله واقف بجنبه ومنصور جالس على الكرسي بجنبه الثاني واحد الرجال الزوار قدام عمر ويهديه احد الزوار = ياخوي الصبر عند الصدمة الاولى ... وش خليت للحريم .. وعمر منحني وحاط يديه على راسه ويبكي بصوت مسموع وعبد الله يمسح على ظهره عبد الله بألم = قم عمر ... انقلوها لغرفة عشان تشوفها .. قم ياغالي وسلم عليها زاد عمر بكاه ورفع راسه وهو يتلفت يدور الدكتور عمر يتلفت = دكتوووووور ابي اشوف امييييي سمعت الممرض الفلبيني يكلم عمر الممرض = قوم يجي معي التفتت لعمر بحزن وشفته ماسمع الممرض وواضح انه ماشافه اصلا من دموعه عمر وهو يمسح دموعه = وييييين الدكتوووووور تقدمت ووقفت بجنب الرجال قدام عمر رايد بصوت باكي = عمر رح مع الممرض هذا ( واشرت على الفلبيني ) التفتت عمر على طول للممرض وسأله بألم عمر وهو يبكي = وين الدكتووووووووور مشى الممرض وقام عمر بسرعة بس اختل توازنه ومسك راسه بألم مسكت يده على طول وعبد الله قام بسرعة ومسكه معي رايد بألم = عمر مغمض عيونه وحاط يده على راسه وشكله مصدع .. التفتت لعبد الله لما تذكرت كيستين الدم رايد = عبد الله توه متبرع وشكله الى الحين دايخ تنهد عبد الله وهو يطالع عمر بأسى عبد الله = لا حول ولا قوة الا بالله .. امش معي اوصلك مشينا ورا الممرض .. وعبد الله ماسك ذراع عمر ويساعده على المشي ومنصور وانا ومشعل وراهم .. ونشوف عمر مغطي عيونه بذراعه الثانية ويبكي بصوت مسموع ومايوجهه بالطريق الا عبد الله نزلت راسي بحزن وانا امشي وراهم .... تذكرت اهلي والحادث المشؤوم ... آآآآآه يمه ليتني شفتك وسلمت عليك بعد الحادث ... بعد الحادث فقدت المشي وانحرمت منك ومن شوفتك وبكيت وانا اتذكر صوت امي الاخير بالسيارة وصلنا الغرفة ودخل عمر يترنح وحنا وقفنا عند الباب من برا تساندت على حافة الباب المفتوح منزل راسي واسمع صوت عمر وهو يبكي ويكلم امه بس ما اميز من كلامه شي و عبد الله متساند على الجدار بجنب الباب .. ومنصور ومشعل متساندين على الجدار اللي قبالنا رفعت راسي للشباب واحد واحد ... وشفت كل واحد سرحان وساكت .. فجأة سمعت منصور يسألنا بصوت هامس وكأنه تذكر شي منصور = شباب المستشفى اخذ رقمي عشان المولود .. ماحد راح يسأل عنه واخذ الدكتور رقمي .. وش رايكم اقول لعمر يمر الولد الحين والا نخليه بعدين ؟ رفع عبد الله راسه لمنصور عبد الله بتنهيده = ليه انت رحت تشوف الولد ؟ منصور = ايه .. رحت يوم عمر يسحبون منه دم وانت رحت لعيال عمه مشعل = لا ... برايي انك تسكت عنهم مب فاضين للولد الحين .. الله يعينهم عبد الله = وانا رايي من راي مشعل هز منصور راسه وسكت وسكتنا ورجع كل واحد سرحان بافكاره الممر اللي حنا واقفين فيه مايمر من عنده زوار كثير ... ومانسمع الا صوت شهقات عمر وكلامه الغير مفهوم مر علينا وقت وحنا نحتري .. وصوت عمر يروح ويجي لمسامعي رفعت راسي للشباب رايد بحزن = عمر طول .. كيف ندخل ونطلعه ؟ رفعوا الشباب راسهم لي يطالعوني .. منصور = وشلون تبينا ندخل ؟ ... يمكن كاشفه امه تلفتت ادور الممرض اللي وصلنا بس ماشفته رايد = وين الممرض اللي قبل شوي ؟ مشعل = شفته راح .. ( واعتدل واقف مبعد ظهره عن الجدار ) ابروح انادي الممرضين يطلعونه وعطانا ظهره .. التفتت فجأة بالجهة المعاكسة لمشعل ... واعتدلت واقف متفاجئ وانا اشوف معاذ ومصعب من بعيد .. واشرت بيدي عليهم انبه الشباب رايد = هذا معاذ ومصعب جايين التفت مشعل يطالع وراه بعد ما سمعني .. ابتعدنا انا وعبد الله عن الباب نفسح الطريق لهم ووقفنا بجنب منصور عند الجدار المقابل وعيونا على معاذ ومصعب تنهدت بألم وانا اشوفهم ... مصعب مايل على اخوه و حاط راسه على كتف معاذ ومغطي وجهه بيده ويبكي بصوت مسموع ومعاذ لاف يده اليمنى حول ظهر مصعب وبيده الثانية يمسح دموعه بصمت ومنزل راسه بحزن والممرضة تمشي قدامهم تدلهم على الغرفة سمعت منصور يكلمنا بهمس منصور = شكلهم علموهم عن ام عمر وجايين يسلمون عليها .. لا حول ولا قوة الا بالله ( وتنهد بألم وعيونه عليهم ) وصلت الممرضة الفلبينية عند الغرفة والتفتت لمعاذ ومصعب وهي تشر على الباب الممرضة = هنا ( وكملت تواسي ) ادعي يدخل جنة دخلوا مصعب ومعاذ الغرفة وهم على وضعهم .. مصعب مغطي وجهه بيده ومايل على اخوه ومعاذ منزل راسه وشكله من الهم والمصيبة مانتبه لنا كنا نحتري عمر الحين نحتري الثلاثة تنهدت وتوجعت لباب الغرفة وسندت ظهري على حافة الباب .. واختلطت شهقات مصعب وعمر داخل الغرفة نزلت راسي وانا اسمع الاثنين يبكون واخذنا وقت ننتظر وقفت الممرضة شوي وبعدها راحت .. اخذت شوي ورجعت ومعها ثلاث ممرضات وممرض فلبيني ويسحبون سرير على كفرات اعتدلت واقف ورجعت اوقف بجنب الشباب على الجدار المقابل دخلوا الممرضين الغرفة وهم يسحبون السرير مسك منصور احد الممرضات منصور = روح غطي حرمة ( ويشر على وجهه يغني غطاء ) هزت الممرضة راسها بايه ودخلت بسرعة التفتنا كلنا لمنصور رايد = ناوي تدخل ؟ منصور = ايه .. اكيد منهارين واخذ شوي قيمة الوقت اللي يكفي تنفيذ الممرضة كلامه ودخل ودخلنا كلنا وراه .. ووقفنا كلنا بنص الغرفة معاذ جالس على الارض وظهره على السرير ومغطي وجهه على ركبته ويبكي بصوت مكتوم واحد الممرضات منحنيه عليه وتحاول تقومه رفعت نظري للسرير بألم وشفت عمر منحني ومنكب على المتمدده على السرير بكيت وانا اسمع صوت بكاه المبحوح ومصعب جالس عند رجلين ام عمر ومنحني ومغطي وجهه على رجليها التفتت للشباب ولقيت دموعهم على خدهم بصمت وعيونهم على الثلاثة احد االممرضات حاطه يدها على ظهر عمر وتواسيه الممرضة = خلاص بابا روحي تقدم عبد الله وابعد الممرضة اللي عند معاذ وانحنى يكلمه عبد الله = معاذ قم معي ... الله يصبركم ( ومسك ذراعه وجره يقومه ) الحين انت المسؤول عن اخوانك اصبر قام معاذ ودموعه على خده ووجهه احمر ومشى مع عبد الله نزلت راسي وتوجهت لعمر .. فسحت الممرضة المجال لي وابتعدت عن السرير شفت عمر مدخل يده تحت راس امه وضام راسها لصدره .. ويبكي بحرقة نزلت راسي وانا اشوف شعر امه .. تنهدت .. مانفذت الممرضة كلام منصور حطيت يدي على ظهر عمر المنحني رايد بصوت باكي = قم عمر ... الله يرحمها يبكي وشكله ماسمعني اصلا جا مشعل ووقف ورا عمر ومسك اكتافه وجره عشان يعدله يوقف بس عمر ماستجاب معه حاول مشعل مرة ثانية بس بطريقة اعنف شوي .. رفع عمر راسه يطالع وجهه امه ويبكي عمر = يمااااااااا جره مشعل عن امه وعمر يحاول يحرر نفسه عمر = خلوووووونييييي .. شفت وجه امه بالغلط ولفيت وجهي عنها وعطيتها ظهري .. غمضت عيوني بألم وصورة الدم اللي شفته على وجهها والشرشف على صدرها ببالي سالت دموعي وانا اتذكر الحادث المشؤوم .. وريان وصوت امي .... غمضت عيوني ... تعبت من الذكرى .. التفتت لاحد الممرضات وطلبت منها تغطيها التفتت لعمر وشهقت وانا اشوف دم امه ملطخ على صدره .. ومشعل ماسكه من عند بطنه من ورا ويحاول يطلعه من الغرفة وعمر يبكي بألم ويحاول يحرر نفسه ويرجع لها عمر = خلوووونيييي ماسلمت عليهاااا .. يماااااااااا شفت منصور ماسك مصعب المنهار ويساعده على المشي وطلعوا من الغرفة التفتت ورا وشفت الممرضين يشوفون شغلهم ويحاولون ينقلون ام عمر على السرير الثاني توجهت لمشعل اساعده على عمر رايد بصوت باكي = عمر امك ماتحب تشوفك بهالشكل ( وحطيت يدي على صدره ادفعه على ورا على خفيف عشان يطلع ) سحبه مشعل بس تمسك عمر على حافة الباب وعيونه على الممرضين وهم يشيلون امه قدامه وقعد يطالعهم .. ترك مشعل بطنه يوم شافه هدا وحط يديه على كتوفه مشعل باسى = خلنا نطلع عمر الى الحين ماسك حافة الباب ويطالع امه ويشاهق ويبكي ودموعه على خده التفتت ورا وشفتهم انقلوها على السرير الثاني ومغطيه بالكامل بالشرشف اللي نصه ملطخ بالدم ورجعت التفت لعمر اخذنا شوي يلقي نظره اخيره على امه وسحبناه برا الغرفة جلس عمر على الارض وكأنه انهد حيله من التعب وسند ظهره على الجدار منزل راسه تلفتت ادور كرسي .. بس شفت مجموعة كراسي بعيدة .. انتبهت على الممرضين يطلعون من الغرفة وهم يسحبون السرير رفع عمر راسه لهم وصارخ عمر = يمااااا ويحاول يقوم يلحق عليهم بس مشعل منعه لين راحوا ومصعب جالس على الارض ومدد رجليه بضعف ويبكي بصوت مسموع ومعاذ واقف ومنزل راسه ويبكي بصمت اعتدل مشعل واقف بعد ماهدا عمر والتفت لي مايدري وش يسوي اشر عبد الله لنا بيده يعني تعالوا تجمعنا عنده انا ومشعل ومنصور بعيد شوي عن عيال العم عبد الله = شباب الساعة الحين جت 3 خلونا نوصلهم لبيوتهم .. جلوسهم هنا مافيه فايدة وبكرة الله يعينهم بيتعبون .. تغسيل ودفن وتعازي منصور = ما اعتقد بكرة بيسوون شي .. لهم عم بجدة اكيد بيحترونه يجي تذكرت .. صح سبق عمر كلمني ان له عم بجدة بس مايتكلم عمر عنه واجد عبد الله = يابن الحلال الطيارة تقرب .. خلونا بس نوصلهم لبيوتهم الحين يرتاحون منصور = معك حق .. بس تراني مادل بيت معاذ ومصعب مشعل = ولا انا عبد الله = ولا انا .. خلاص خلوهم علي وانتم وصلوا عمر للبيت .. التفتت لعمر ولقيته على وضعه جالس بالارض وساند يديه على الارض ومنزل راسه ويبكي .. ورجعت التفت للشباب اذكرهم رايد = بس عمر ماسلم على عمه عبد الله = خله ناسي لا تذكره الحين .. بكرة ان شاء الله يسلم عليه منصور = عبد الله انا ابروح معك ( والتفت لمشعل ولي ) وانتوا خذوا عمر ووصلوه للبيت هزينا راسنا بايه وطلبت مفتاح سيارة عمر من عبد الله ورجعنا لعيال العم .. اخذ منصور وعبد الله مصعب ومعاذ وراحوا وانا ومشعل قومنا عمر وطلعنا من المستشفى وانا ملاحظ على عمر انه يالله يمشي ... مايل علي ويتوكأ بكتفي ومشعل ماسك ذراعه ويمشيه ولقرب راس عمر المايل لراسي .. اسمع شهقاته وانفاسه السريعة وصلنا عند السيارة واخذ مشعل المفتاح مني وفتح باب الراكب لعمر ركب عمر بتعب وانا ركبت ورا وركب مشعل بمكان السواق وطوال الطريق لبريدة وعمر ساند راسه بين يديه ويبكي تقدمت ودخلت راسي بين المرتبين وحطيت يدي على ظهر عمر رايد بحزن = عمر مايفيد الصياح بشي .. ادعلها بالرحمة رفع عمر راسه وسند ظهره على المرتبه وشهق بقوة قبل يتكلم عمر = دااااايم تطلب مني اسكن عندها ( وغطى وجهه بيديه الثنتين وكمل ) آآآآآه ... ياليتني سمعت كلامها .. ياااااااليتني طعتهاااا ( ومسح دموعه بيديه الثنتين ) اجلس معااااكم اكثر ماجلس معااااها ... آآآآآآه ... رااااااحت ... راحت وهي تطلبني اجلس عندها سااااااعه ... فضلت اخوياااااي عليهااااا نزلت راسي وبكيت على صوته وبكاه ... انفجر مشعل يبكي وهو يسوق و عمر يكمل بندم عمر = اول ماقوم من النووووم على طووووول اروح للشباب واخليها ورااااااي ... تحتريني ( وشهق ) تحتريني وانا رايح العب واسهر واضحك ... ياااما خليتها بالبيت لحاااالها ... مافكرت فيهاا يووووم ... آآآآآه يمااااااا وانحنى ونزل راسه بين يديه وبكى اكثر وبصوت مسموع رجعت على ورا .. وسندت ظهري على المرتبه ومسحت دموعي مسح مشعل دموعه بصمت وهو يسوق لين وصلنا البيت دخلت انا وعمر الصاله ولقيناها على حالها .. قدر عبد الله بالارض والكنبة اللي كان جالس عليها عمر يوم يكب عليه عبد الله الماء مانشفت مليانه ماء جلس عمر بدون تفكير على الكنبة المبللة بس قومته على طول رايد = عمر تعال اجلس هنا .. هذي فيها ماء قام عمر عن الكنبة يوم حس بالماء وجلس على الكنبة اللي انام عليها وانسدح على على ظهره بتعب .. ودموعه على خده مانشفت .. غطى عيونه بذراعه وهو يشاهق بألم اعتدلت واقف اتأمله وانا اشوف بقع الدم على صدره جا مشعل ووقف بجنبي وشكله توه انتبه للدم .. مد يده واشر على البقع والتفت لي وسألني مشعل مستغرب = من وين هذا ؟ وقفت على راس اصابعي عشان اوصل لمستوى راسه وقربت فمي من اذنه وهمست عشان عمر مايسمعنا رايد بهمس = هالدم من امه .. كان بوجهها دم يوم يسلم عليها شهق مشعل والتفت على طول لصدر عمر ... اعتدلت واقف .. اطالع عمر اخنا شوي نطالعه .. فجأة مسك مشعل يدي وجرني برا الصاله ووقفنا عند الباب الداخلي مشعل = انا ابروح للبيت الحين بس مامعي سيارة .. شف اباخذ سيارة عمر والصبح ارجعها هزيت راسي بايه وسكتت مشعل = خلك معه رايد .. هو الحين مب حول احد.. الله يعينه .. الصراحة ودنا نغير ثوبه ماودي يشوف دمها عليه تضااايقت رايد = وش تبينا نسوي .. نغير له مثلا ؟ .. خله الحين واذا قام هو يغير .. والله تعبان الحين مشعل = حتى انا تعبان والله .. انا بس اقولك اني ماودي يشوفه .. بس عاد الشكوى لله .. يله انا ابروح .. وارجع الصباح وفتح الباب الداخلي وطلع رجعت للصاله واخذت القدر ورجعته المطبخ ورجعت للصاله وطلعت جوالي وبوكي ونزلت ثوبي بتعب .. والتفتت لعمر ولقيته مستلقي على ظهره و يبكي بصمت وهو مغطي عيونه بذارعه تنهدت وجلست بالارض وسندت ظهري على الكنبة المنفردة قبال عمر و ممدد رجولي بتعب ... من يوم وصلنا المستشفى وانا واقف شوي وانسدحت بنعاس ونمت من غير شعور الجمعة تحركت متضايق من نومة الارض بدون شي .. جلست وانا ماسك كتفي بألم رايد بنعاس = اففففففف رفعت راسي لمكان عمر على الكنبة ومالقيته .. استغربت .. كم لي وانا نايم اخذت جوالي اشوف الساعة 9 طالعت الشاشة احاول استوعب شهقت ونقزت بسرعة .. ماصليييييييت الفجررررررررر طلعت بسرعة من الصاله ورحت للحمام وضيت ورجعت للصاله اصلي وانا مادري وين عمر واول ماسلمت طلعت من الصاله ادوره رحت للمطبخ ولا لقيته .. رحت للغرفة بجنب الصاله ولا لقيته .. رحت للحمام الثاني ولا لقيته رحت فوق لغرفته ومالقيته ... قطبت حواجبي مستغرب وين راح عمر مريت الحمام بالدور الثاني ولا لقيته .. مريت احد الغرف فوق ولا لقيته انتبهت على باب الغرفة اللي من اول ماجيت بيت عمر وهي مقفلة غريبة اول مرة اشوف بابها فاتح ... دايم اسأل عمر عنها ويقولي مالك دخل فيها ... اصلا ماعمري شفته يدخلها طوال الشهور وانا ببيت عمر وانا مستغرب من هالغرفة وليش مقفلة من بين كل الغرف مشيت بهدوء للغرفة وطليت براسي اشوف داخلها .. وعلى طول جاني ريحة عطر وشكله توه مرشوش ضيقت عيوني بألم وانا اشوف عمر جالس على السرير ومنزل راسه وسرحان وبيده شي ماميزته .. وعليه ثوبه الملطخ بالدم تلفتت بعيوني على الغرفة واضح ان الغرفة نسائية .. تنهدت اكيد غرفة امه .. السرير حق نفرين .. والتسريحة مغبرة وعليها بعض العطور وصندوق متوسط .. انتبهت على الشماعة .. فيها ثوب واحد نسائي ومغبررررر الغرفة كلها بشكل عام مغبرة .... اعتدلت واقف ووقفت عند حافة الباب عشان عمر ينتبه لي .. بس عمر مارفع راسه وشكلي مانتبه لي الغرفة لها شهور مقفلة وش اللي خلاه يفتحها الحين .. يزيد على نفسه بس على الفاضي دخلت الغرفة ووقفت قدام عمر وهو جالس على السرير وتوني ميزت اللي معه وبغيت ابكي معه عطر نسائي صغير ماسكه بين يديه وسرحان فيه تنحنحت اعدل صوتي رايد = عمر حرك راسه وكأنه انتبه من سرحانه ورفع راسه لي ببطئ عيونه حمر وتحتها سواد .. شكله مانام .. وواضح انه توه باكي رفع عمر العطر يوريني اياه وعيونه علي وهمس بصوت باكي عمر = هذا اللي بقى من امي ( وسالت دموعه بسرعة على خده وهو يطالعني ) امي ماتصور.. و ماعندي صورة لابوي... ( وشهق بألم ونزل راسه وطالع العطر بيده ) امي وابوي تركوني وحييييد .. ( وزاد بكاه ورفع العطر يشمه ) بكيت غصب عني ... الحمد الله انا اذكر ابوي .. مديت يدي وحطيتها على كتف عمر رايد بصوت باكي = انت ما انت وحيد .. امك جابت لك اخو .. نزل عمر العطر بعد ماشمه وطالع الدولاب بجنبه وسرح وعيونه غرقانه دموع تتهدت مدري وشلون اطلعه من حزنه .. فجأة نطق عمر بهمس وعيونه على الدولاب .. كأنه يشوف احد عمر = نادر شهقت وتراجعت على ورا بخوف .. طالعت الدولاب اللي يشوفه عمر بفزع نادر مرة ثانية .. الخيال اللي كان معنا بالسيارة وحنا بالرياض ... لا يكون رجع عمر لحالته ماشوف شي .. رجعت اطالع عمر ولقيته على وضعه سرحان وعيونه على الدولاب بلعت ريقي .. لا يكون عمر يشوف جني الحين اسمه نادر مديت يدي وهزيت تكفه رايد بخوف = عمر وش فيك .. وش تشوف ؟ حطيت يدي على جبهته ورفعت حواجبي منصدم حااااار .. ماخبره مريض ... امس مافيه شي .... والحين حرارته مرتفعه .. اكيد يهذي هزيت كتفه مرة ثانية رايد = عمر التفت لي ببطئ وطالعني بحزن سألته اشوف وش نادر هذا رايد = عمر مين نادر .. هذي ثاني مرة اسمعك تقول نادر غمض عيونه وسالت دمعه حارة وتنهد تنهيدة من قلب وفتح عيونه يطالعني عمر بصوت باكي = نادر اخوي ( وبكى اكثر وكمل ) جا هو وراحت امي .... خلتنا وراحت .. ( ورفع يدي اليسرى يغطي وجهه ) آآآآآه بس انا سمعته قبل تجيب امه المولود يقول نادر ... بس بحالته ذي كيف اسأله جلست بجنبه على السرير ولفيت يدي حوله وضميته اواسيه حط عمر راسه على كتفي ويديه على ظهري والعطر الصغير بيده سمعت عمر يكمل بألم عمر = رايد تعبان .. ليتني سمعت كلامها وسكنت عندها .. كنت اكاااااابر ( وغطى وجهه بكتفي ورصني اكثر وتأوه بألم وانفاسه الحارة تلفح رقبتي ) آآآآآه يماااااا فجأة سمعنا صوت جرس الباب .. ابعدت عمر عني ومسكت اكتافه وهو منزل راسه ويمسح دموعه بحزن طالعت بقع الدم اليابس على ثوبه من عند الصدر رايد = عمر .. انت ماصليت الفجر ؟ هز عمر راسه ايه تنهدت .. عمر بالفترة الاخيرة بدا يحافظ على صلاته لايكون بيرجع ويتركها رايد = عمر قم غير ثوبك وصل الفجر .. الشمس طالعه من زمااااان اعتدل جالس منزل راسه وهز راسه بايه وجرس الباب يلح قمت واقف رايد = ابروح افتح الباب وطلعت فتحت الباب ولقيت مشعل وعبد الله قدامي رايد = هلا دخلنا الصاله وحنا واقفين سألوني عن عمر عبد الله = عمر وينه ؟ رايد بحزن = بغرفة امه ( واشرت فوق ) هز عبد الله راسه بأسى ولا علق مشعل = رايد ابوي ودا جد عمر للمستشفى وهم هناك من الساعة 8 طالعت مشعل مستغرب رايد = توها صلاة الجمعة وبعدين هم لهم عم بجده اكيد بيحترونه وش اللي خلا ابو فهد يروح الحين للمستشفى مشعل = رايح يسلم عليهم ... الصراحة ابو فهد حالته ماتسر .. علمت ابوي الفجر وبعد صلاة الفجر زاروه ابوي والجيران تنهدت وسكتت عبد الله = وشلونه عمر الحين ؟ التفتت لعبد الله رايد = اليوم حسيت حرارته مرتفعه .. مدري وش فيه مع ان امس عادي ماكان مريض التفتت عبد الله للكنبة اللي بدت تنشف وراح لها وحط يده عليها و التفت لنا متحسف عبد الله = شكله مني .. امس طلع للهواء وهو مبلل كامل ... اظنه اخذ برد ماعلقت وطلبوا مني اوديهم فوق يشوفونه ركبنا فوق ورحت لغرفة امه وهم وراي ومالقيته والفتت للشباب رايد = لحظة يمكن بغرفته ورحنا لغرفة عمر وطلينا نشوف وفعلا لقيناه جالس يصلي ومعطينا ظهره ورافع يديه يدعي .. طالعنا بعض و طلعنا من الغرفة بهدوء وابتعدنا عن الباب عبد الله = بنجلس شوي وبعدين ناخذه للمستشفى .. انا مدري متى بيصلون عليهم ؟ مشعل = ابتصل على ابوي اشوف هو مع ابو فهد وابتعد عنا يكلم شوي ورجع مشعل = ابوي يقول عمهم فهد وولد عمهم اللي اسمه سامي على وصول جايهم الخبر امس من ابو فهد وجاهم خبر ام عمر من ابوي اليوم انا معلمه رجعنا للغرفة ولقينا عمر على وضعه جالس بوضعية التشهد ومنزل راسه ويديه وشكله سرحان دخلت اول شي وفعلا لقيته مخلص صلاة وسرحان .... وانتبهت انه مغير ثوبه التفتت للشباب الواقفين عند الباب واشرت لهم يعني تعالوا وجوا ووقفوا بجنب عمر ... انحنى عبد الله وسلم على راسه عبد الله = عظم الله اجرك بس عمر مارد سرحان وساكت تقدم مشعل وانحنى وسلم على راسه مشعل = عظم الله اجرك ونفس الشي مارد طالعنا بعض ساكتين حط عبد الله يده على جبهة عمر عبد الله = عمر قم ارتاح حرارتك مرتفعه ( ومسك ذراعه يقومه ) قم معي طاعه عمر بدون أي معارضه وسدحه عبد الله على سريره ولحفه وقفنا نتأمله .. مستلقي على ظهره ويطالع السقف وساكت اشر عبد الله لنا يعني خلونا نطلع وطلعنا الظهر .. بعد صلاة الجمعة طلعنا انا وعبد الله ومشعل من الجامع متضايقين .. قبل نروح للصلاة مرينا على عمر ولقينا حرارته ارتفعت اكثر .. والحين محتارين ماندري وش نسوي عشان يروح يصلي على امه العصر مشعل فادنا كثير .. يجيب لنا الاخبار من ابوه .. علمنا ان عمهم فهد وصل وهو عند ابوه الحين يحترون صلاة العصر بعد ماقرروا يخلون الصلاة عليهم العصر .. وعلمنا ان خال عمر اللي اسمه ابو سعد عند ابو فهد الحين جاي من الدمام دخلنا بيت عمر ومرينا عليه بغرفته فوق وقفنا عند سريره نطالعه مستلقي على ظهره وصدره يرتفع وينزل و انفاسه سريعة من الحرارة ومغمض عيونه بس واضح انه مب نايم حطيت يدي على جبهته ... حاااااار شاب ضو رفعت راسي لمشعل وعبد الله رايد = حرارته مرتفعه مرررررة وصلاة العصر ماباقي عليها شي عبد الله = اكل شي هو ؟ هزيت راسي بلا رايد = من له نفس ؟ لا انا ولا هو اكلنا شي .. حتى الفطور مافطرنا عبد الله = اجل خلني اروح اجيب غدا من المطعم و نحاول فيه .. وطلع اخذنا شوي وطلعنا انا ومشعل نخلي عمر يرتاح نص ساعة ورجع عبد الله معه الغدا ودخل علينا الصاله ورفع الكيس قدامنا .. عبد الله = ابروح احط لعمر شوي واحاول فيه وطلع للمطبخ وطلعنا وراه .. اخذ عبد الله صحن صغير فيه شوي رز وعصير وماء وحبوب بندول وطلعنا فوق لعمر ولقيناه على حاله انفاسه سريعه من الحرارة ومستلقي على ظهره ومتلحف كأنه بردان جلس مشعل بجنب عمر على السرير ودخل يده تحت راسه وجلسه مشعل = عمر قم تغدا .. مال راس عمر وهو مغمض عيونه على صدر مشعل بضعف عدل مشعل راسه واعتدل جالس ورا عمر وسند ظهر عمر عليه خلا عمر يجلس غصب مشعل = عمر تسمعني .. ماباقي شي على صلاة العصر جلس عبد الله قبال عمر على السرير وبحضنه الصحن عبد الله = عمر كل شوي عشان تقدر تطلع تصلي فتح عمر عيونه يطالع عبد الله بنظرات ناعسة وهالات سودا تحت عيونه وهمس عمر بتعب = ابي اروح المستشفى .. ابي اشوف امي ( وغمض عيونه بألم وكمل ) ابي اشوفها جلست على السرير من الجهة الثانية قبال عمر رايد = اجل كل شي عشان تقدر تروح تشوفها قبل الصلاة التفت عبد الله لي يسألني عبد الله = هو يدري كم الوقت الحين ؟ شكله يحسب اننا الصبح رايد = مدري عنه وش دراني التفت عبد الله لعمر يعلمه عبد الله = عمر ترانا الظهر الحين .. قرروا يصلون عليهم العصر .. قم الحين كل شي عشان يمدينا نروح لعنيزة فتح عمر عيونه بتعب وطالع عبد الله شوي واعتدل جالس ووخر اللحاف وحاول يقوم بس مانعناه رايد = وين .. تغدا اول عمر وهو يحاول يقوم = مابي شي مسك مشعل يد عمر يمنعه مشعل = عمر وين بتقوم ؟ سحب عمر يده من يد مشعل وقام بتعب عن السرير وهو ماسك راسه وانفاسه سريعه عمر = ابروح المستشفى عبد الله = عمــ وقاطعته عمر بألم = ابروح الحين ومشى يترنح وهو ماسك راسه .. قمت واقف وساندته اساعده ... توكأ عمر علي وسألني عمر بتعب = رايد وصلني عنيزة رايد = ان شاء الله .. مثل ماتبي عبد الله = طيب خذ بندول على الاقل بس مارد عليه عمر وطلع من الغرفة حاولت اخذ شماغي وشماغه لان اكيد بنحتاجها بس ماقدرت اخذهم .. عمر متوكأ علي و مستعجل يبي يطلع طلعنا انا واياه من البيت وعبد الله ومشعل ورانا وركبنا سيارة عمر كلنا الاربعة ... عمر قدام بمكان الراكب ومشعل يسوق وانا وعبد الله ورا انكمش عمر على نفسه بردان وهو يأن من الحرارة تقدم عبد الله وطل عليه بين المرتبتين وحط يده على جبهه عمر عبد الله = اعذرني عمور شكل من مزحي امس اخذت برد .. مارد عليه مكنمش على نفسه وساكت ونظراته منصبه على حظنه بصمت وحنا بالسيارة اتصل مشعل على ابوه ياخذ الاخبار منه وعلمه انهم انقلوهم للمغسلة والاستعداد للصلاة واول ماعلمنا مشعل عن كلام ابوه بكى عمر بقوة سكتنا عنه وطوال الطريق للجامع بعنيزة وهو يبكي وصلنا الجامع ونزلنا وعمر يتوكأ علي وعبد الله ماسكه مع ذراعه يساعده على المشي وشفنا هناك ابو فهد جالس على الكراسي بحزن وبجنبه رجال اول مرة اشوفه وواقف شاب طويل بجنبهم عليه ثوب وملتثم بشماغه اول ماشافنا الشاب جانا او بالاصح اول ماشاف عمر جانا بصوت باكي = عمر ( وفك اللطمة عنه وضمه ) عظم الله اجرك ياخوي ( وابتعد عنه يطالعه بعد ماحس بارتفاع حرارته ) عمر وش فيك تعبان ؟ رفع عمر راسه للشاب ودموعه على خده مانشفت وهمس عمر بتعب = سامي ( وسالت دموعه اكثر) وين عمي .. عمر يقصد عمه المتوفي بس سامي يقصد ابوه سامي = ابوي وجدي هناك جالس ( واشر عليهم ومسك كتفه ) تعال تنهد عمر بألم عمر بألم = وين عمي عبد العزيز ليه نقلتوهم هنا قبل اسلم عليهم طالعنا سامي شوي وبعدها التفت لعمر ومسك كتفه سامي = الحين تعال لبوي وجدي .. احنا ماسوينا شي ننتظر خالك ابو سعد مشى عمر بمساعدتي لمكان جده واول ماشافه جده متوجه له رفع يديه لعمر وهو جالس وواضح انه عاجز يقوم تركني عمر ووقف قدام جده وانحنى عليه وحط راسه على كتف جده يبكي عمر بصوت باكي = امي راااااحت لف ابو فهد يديه على ظهر عمر وغطى وجهه بكتف حفيده ابو فهد بصوت باكي = الله يرحمهم ياولدي ... الله يرحمهم ( وبكى ) قام الرجال اللي جالس بجنب ابو فهد وعرفت انه هو عم عمر الثاني ( ابو سامي ) قام وومسك ذراع عمر وابعده عن ابوه وضمه ابو سامي بحزن = اصبر ياولدي .. الله اذا احب عبدا ابتلاه ( وابتعد عن عمر يطالعه ) اذا امك وابوك راحوا عن الدنيا تراني موجود .. وغلاتك من غلا عيالي مارد عمر عليه منزل راسه ويمسح دموعه بيده وساكت جلس عمر بجنب جده على الكراسي وابو سامي بجنب ابو فهد من الجهه الثانية والبقية واقفين ننتظر الصلاة .. ويخلصون من التغسيل بالنسبة لي ولمشعل وعبد الله كل اللي نعرفه ان ابو سعد راح يجيب زوجته اللي جت معه من الدمام وتبرعت بتغسيل ام عمر ... ومعاذ ومصعب داخل عند ابوهم مع المغسل وعمة عمر داخل عند بنت عم عمر مع المغسلة شوي وطلعوا مصعب ومعاذ منهارين ويبكون مصعب وقف عند الباب وسند ظهره على الجدار وومغطي وجهه بشماغه جا معاذ اكثر تماسك من مصعب ووقف قدام جده وعمه وعمر الجالسين واشر بحزن على الغرفة اللي طلع منها ودموعه على خده معاذ = تقدرون تسلمون عليه الحـ ( وزاد بكاه اكثر ) قام ابو سامي سلم على راسه وضمه يعزيه قام ابو فهد بتعب ودخل .. قام عمر ودخل ورا جده وهو يترنح من الدوخة والحرارة ودخل وراهم ابو سامي وولده وهم داخل جا ابو سعد وسأل عن عمر بحزن .. وعلمناه انه داخل اخذوا شوي وطلعوا ابو سامي وابو فهد وعمر وسامي وهم منهارين كلهم و يبكون وشفت ابو سامي وابو فهد يدخلون غرفة ثانية عشان يسلمون على بنت عم عمر قام ابو سعد على طول اول ماشاف عمر وسلم على راسه يواسيه اعتدلت واقف وتوجهت انا ومشعل يوم انتبهنا على عمر انه ماهو قادر يتوازن بطوله وكل شوي يضعف مشعل = عمر تعال اجلس انت تعبان ( ومسك ذراعه ) بس عمر مطنشنا يطالع خاله يسأله ودموعه على خده بغزارة عمر = وين امي ابي اشوفها اشر ابو سعد بحزن على غرفة ثانية ومشى قدامه وعمر يمشي وراه يترنح مو قادر يثبت طوله طالعته من بعيد والتفت لمشعل رايد = عمر كاسر خاطري تعبان مرة .. والصياح يزيد عليه مشعل = الشكوى لله بعد صلاة العصر وبعد صلاة الجنازة وبعد التشييع وبعد الدفن وحنا واقفين بالمقبرة رحنا انا ومشعل وعبد الله ومنصور اللي جا بوقت الصلاة وسلمنا على ابو فهد نعزيه وهو واقف عن بوابة المقبرة .. بصعوبة وصلنا له من الناس وبعدها سلمنا على ابو سامي اللي ملازم ابوه بكل خطوه وبعدها رحنا لمعاذ وهو واقف بحزن ويتقبل التعازي من الناس سلمنا عليه الاربعه وعزيناه وبعدها توجهنا لمصعب اللي جالس عند قبر ابوه ويبكي وبعض الشباب اللي شكلهم يعرفونه يحاولون فيه يقومونه طالعت من بعيد عمر وشفته عند قبر امه وجالس على الارض متربع ورافع يديه ويدعي والناس يحترونه يخلص ويقدمون له واجب التعازي .. تنهدت وانا اطالعه ورحت لسعود اللي جالس عند قبر اخته وسرحان فيه بحزن عزيته وتوجهت للشباب نحتري عمر مرت عشر دقايق وهو على وضعه .. بعض الناس راحوا وبعض الشباب حول معاذ ومصعب .. شكلهم اخوياهم بالجامعة وابو سعد وابو فهد وابو سامي راحوا وسامي را لمعاذ لاحظت على معاذ اكثر تماسك من مصعب وعمر التفتت عبد الله لنا عبد الله = شباب عمر من اليوم وهو تحت الشمس .. الصراحة خايف عليه مب من صالحه وهو مسخن الحين التفت منصور له مستغرب منصور = عمر مسخن ؟ رديت على منصور وانا اطالع عمر من بعيد رايد بتنهيدة = ايه .. اليوم حرارته مرتفعه تعبنا وحنا واقفين وتوجهنا حنا الاربعة لعمر ومعنا سامي يوم شافنا رايحين لعمر ولقيناه جالس على وضعه وسرحان يطالع قبرها ودموعه على خده بصمت مشعل = عمر رفع راسه لنا ببطئ ووجهه احمر ويالله يفتح عينه من الدوخه ورفع يده وحطها على راسه توجهت له ووقفت بجنبه وانحنيت عليه و مسكت ذراعه رايد = قم عمر معنا .. انت تعبان جا عبد الله انحنى عليه وحط يده على شعر عمر .. والتفت لي ووجه قريب مني عبد الله = خلنا نقومه غصب .. راسه حار ... اخاف تصيبه ضربة شمس هزيت راسي بايه وقومنا عمر غصب وهو يتمايل بوقفته .. جا سامي وسانده وطلعنا من المقبرة ومعاذ ومصعب وسعود فيها الى الحين ومعهم بعض الشباب اللي مااعرفهم وصلنا عمر السيارة واول ماركبنا كلنا دخل سامي راسه من عند دريشة السواق ( منصور ) وكمل يكلم عمر اللي جالس ورا بجنبي سامي = عمر راح امرك قبل اسافر بس عمر مارد عليه .. مايل بضعف ناحية مشعل اللي جالس بجنبه من الجهه الثانية ومغمض عيونه وانفاسه سريعه من الحرارة .. التفت سامي لنا او بالاصح لعبد الله اللي جالس بمكان الراكب سامي بحزن = عمر مرا تعبان .. ماعطلكم ومشكورين شباب وابتعد عن السيارة وحركنا التفتت لعمر وحطيت يدي على جبهته حااااااار مرررررة .. طالعت مشعل اعلمه رايد = حااااار جلس مشعل بشكل مايل و سند ظهره على الباب عشان يفسح لعمر المجال يسند ظهره عليه ولف يده حول عمر وحطها على صدر عمر وهو جالس وراه مشعل = ماعليك يومين ثلاث ايام ويطيب وصلنا البيت ودخلنا الصاله وعمر شوي ونشيله معتمد بالكامل على عبد الله جلس عمر بتعب على الكنبه اللي انام عليها وعلى طول انسدح على ظهره لحفناه وخليناه يرتاح شوي وطلعنا من الصاله والتفتوا لي يوصوني مشعل = رايد لازم ارجع لاهلي من الصبح وانا برا .. حاول تعطيه شي اكيد هو جوعان حطيت يدي على بطني جوعان وكملت رايد = أي والله حتى انا جوعان .. ماكلت شي من امس عبد الله = حاول تعطيه البنادول تلقاه بغرفته فوق .. يله انا بعد ابروح تعبان وطلعوا الشباب كلهم رحت لمطبخ ولقيت الغدا اللي جابه عبد الله برا .. يالله الجود بالموجود حررته وغرفت لي ولعمر ورحت للصاله حاولت بعمر ياكل بس مايرد علي .. مغمض عيونه ويأن .. اكلمه وكأني مااكلمه تنهدت ورحت لغرفة ثانية وبديت اكل بعد صلاة العشا بساعه طوال اليوم جالس مع عمر واحاول فيه ومعيي يأما يأن من حرارته او اذا صحى سرح بحزن على ذكرى امه طالعته واقف وانا تعبان ومدري وش اسوي فيه مستلقي على جنبه على الكنبة ويرتعد من البرد .. رحت فوق وجبت له لحاف ثاني ولحفته وجلست على الارض وانا نعسان مرررررة ومن التعب نمت بدري على الارض بالصاله السبت .. الساعة 8 ونص قمت من النوم نشيط .. احس اخذت كفايتي من النوم .. نايم بدري امس نزلت جوالي بعد ماشفت الساعة و طالعت عمر ولقيته نايم على جنبه على الكنبة ويده تدلى قمت ووقفت قدامه وحطيت يدي على جبهته وتنهدت بعده حااااااار اخذت جوالي وطلعت من الصاله واتصلت على احد العمال الهنود بالسوبرماركت اللي اشتغل فيه وطلبت منه ياخذ مكاني اليوم .. ماقدر اخلي عمر وهو بهالحالة سكرت الجوال وسرحت افكر بحالي ... اكثر زملائي في الشغل هنود .. صحيح مرتاح بالشغل بس عب وانا اشوف اقراني يطلعون للمدرسة وانا اطلع للشغل ودي اكمل دراستي بس صعب وانا هذا ظروفي ومريم تحتريني .. يارب فرجها من عندك .. ودي اشوفها ... اكلمها صح .. بس من زمان ماشفتها ... مر اكثر من ثلاث شهور ماشفتها اشوف دانه بالشارع بس كل مارحت لقيت سيارة عمي واقفة عند الباب وانا وقتي ضيق بسبب شغلي مااقدر احتريه لين يطلع .. وكاره شوفته .. احس بغليان بصدري اذا شفت سيارته او شفت ولده بندر كيف عاد اذا شفته هو رجعت للصاله واخذت بوكي من فوق التلفزيون وجلست على الكنبة المنفردة وطلعت بطاقة الصراف وقعدت اطالعها بأمل اول راتب لي اخذته طلعت ورحت على البنك على طول عشان افتح حساب واجمع فيه الفلوس بس انصدمت يوم رفضوا يفتحون لي حساب لان عمري على بداية 16 وهم مايفتحون الحساب الا من 18 وفوق وزاد الطين بله .. كرت العايلة حقي مع عمي تحطمت وقتها ورجعت لبيت عمر منقهر .. وبعد ماسألني عمر وش فيني وعلمته .. تطنز علي كعادته بس جابلي حل مؤقت لين اكبر و اعقل على قولته فتح هو حساب جديد باسمه وعطاني بطاقة الصراف وقال اجمع فيه لين تعقل .. وافقت اجمع الفلوس باسمه كحل مؤقت اصلا ماعندي حل الا هو ... وعمر محل ثقة ان شاء الله ... ماراح يسرق تعبي اليوم كله انشغلت بالمعزين خاصة ان عمر مريض الظهر جانا ابو احمد و احمد يعزون عمر .. دخلتهم الصاله بس عمر كان وقتها نايم تعبان سلموا عليه وهو نايم وراحوا وبيرجعون وقت ثاني والعصر جا يوسف وبعده جا احد جيران عمر وكل شوي يجي احد من الشباب اللي اول مرة اشوفهم وكل مادخل احد يعلمني انه من زملاء عمر بالجامعة طلعت استقبل احد المعزين وتفاجأت بسعد قدامي بعد ماعرفته طالعته منصدم .. سعد متغييييييير ... صار ملتحي ومقصر ثوبه متغير 180 درجة سلمت عليه سلام عادي .. ذكرني بنايف وبمعاناتي قبل الوظيفة .. دخلته لعمر يعزيه بس عمر مب حول احد .. صاحي ويحس باللي حوله بس مايرد على احد وبعد سعد جانا المغرب شخص اول مرة اشوفه اول مافتحت له الباب تفاجأ مني وتراجع على ورا يتأكد اذا كان هذا بيت عمر والا لا ويوم تأكد نزل راسه لي وأشر بيده وانصدمت فيه يوم عرفت انه ابكم وماعرفت وش يبي .. بالاخير اضطر وطلع نوته صغيره بجيبه وقلم وكتب هذا بيت عمر ؟ وهزيت راسي له بأيه ودخلته على طول لعمر .. اكيد هذا جاي يعزي سلم على عمر المنسدح على ظهره وجلس مثل غيره كل من يسلم على عمر يتحسسون حرارته اذا عرفوا انه تعبان يسألوني كم سؤال عن صحته ويروحون الا هذا ماتفاهم معه الا عن طريق النوته الاحد .. العصر مر يومين على وفاة ام عمر عمر تحسنت صحته شوي .. بس الى الحين حزين وساكت ومن وفاة امه الى الحين مااكل الا لقمين غصبتهم عليه عشان بس اعطيه البنادول جوا الشباب مشعل وعبد الله ومنصور .. جلس مشعل عند عمر وانا رحت مع عبد الله ومنصور لعنيزة نشوف المولود ونعزي مصعب ومعاذ رحنا للمستشفى وسألنا عنه وعلمونا هناك ان عم المولود اخذه بالتالي طلعنا ورحنا لبيت مصعب ومعاذ .. دخلنا المجلس وسلمت على معاذ الهادي وبعدها سلمت على مصعب اللي الى الحين متأثر واول ماصافحته سألني بهمس وبحزن مصعب = عمر كيف حاله ؟ تنهدت رايد = تعبان له يومين حراراته مرتفعه طالعني مصعب متفاجأ وبعدها نزل راسه وهمس مصعب = كلنا تعبانين رحت لسعود وسلمت عليه ... اخذنا شوي وطلعنا ورجعنا بريدة ومرينا بيت جد عمر نعزيه واول مادخلنا الحارة شفت دانه تلعب بالشارع كالعادة .. تنهدت وانا اشوفها واول مانزلت من السيارة مع الشباب وهي تجيني سلمت عليها وسلموا عليها الشباب ودخلنا بيت جد عمر ولقينا ابو فهد وولده ابو سامي وسامي اول ماشافني ابو فهد وسلمت خلاني اجلس بجنبه وسألني عن عمر ابو فهد بحزن = عمر وشلونه .. قالي سامي انه مريض رايد = أي والله ياعم له يومين تعبان ( وكملت اطمنه ) بس الحين الحمد الله بدا يتحسن تتنهد ابو فهد وسكت اخذنا شوي عندهم وطلعنا للحوش وسامي معنا يوصلنا وقفنا عند باب الشارع وسأله منصور عن المولود منصور وهو يصافح سامي منصور = المولود عندكم عرفنا من المستشفى ان ابوك اخذه سامي = ايوا اليوم انا والوالد رحنا للمستشفى وطلعناه ووصلناه لاخوانه بعنيزة استغربنا وطالعنا بعض .. على بالنا عند جده التفت عبد الله له وسأله عبد الله = عند معاذ ؟ سامي = ايوا عبد الله = ماشاء الله ( وابتسم ) ووش سموه ؟ ابتسم سامي = فارس طيرت عيونه متفاجئ .. فارس !! منصور = ماشاء الله حلو تدخلت اصحح لهم رايد = بس عمر سماه نادر التفت لي سامي وهز اكتافه سامي = لا .. سموه فارس سألت معاذ اليوم وش بتسمونه قال فارس واشوف مصعب وسعود موافقينه التفت لي عبد الله عبد الله = وش دراك انت .. عمر ماجاب سيرة اخوه ابد وماعلمنا انه سماه رايد = بس علمني انا طالعوا بعض مشعل ومنصور وعبد الله وسكتوا بالتالي سكتت .. لازم اعلم عمر باسم اخوه عمر سماه نادر ومعاذ سماه فارس سلمنا على سامي ووادعناه وطلب منا نعتذر له من عمر انشغل مع جده ابو فهد وبكرة مضطر هو وابوه يسافرون على جده ركبنا السيارة وشفت من بعيد عمي ومعه واحد يمشون باتجاه الشارع العام ... ابتسمت بفرح وطالعت بيت عمي حلو اقدر اشوف مريم الحين .. وقبل يحرك مشعل السيارة صحت فيه رايد = لحظة لحظة التفتوا لي كلهم مستغربين مشعل = وش فيك رايد بفرح = معليش شباب .. خلاص انتوا روحوا وانا ادبر نفسي منصور مستغرب = طيب وش فيك علمنا نزلت من السيارة ودخلت راسي من عند السواق ( مشعل ) رايد = ابسلم على اختي الكبيرة سكتوا شوي وبعدها عبد الله = خلاص اجل نحتريك ابتسمت .. ورحت امشي بسرعة ومريت دانة اللي تلعب الشارع وجريتها معي مسرع وقفنا عند باب عمي ونزلت لمستوى دانه رايد = روحي نادي مريم خليها تطلع للحوش ... بسرررررعه مستعجل .. قبل يجي عمي دخلت دانه تركض وانا دخلت الحوش انتظر مريم على اعصابي من زمان عنها .. صح اكلمها كل فترة بس الحين ودي بشوفتها ... كل ماجيت لقيت عمي بالبيت سمعت صوت خطوات و التفتت وشفت مريم طيرت عيوني فيها منصدم نحفااااااانه ... هالات سودا مرة تحت عيونها .. وتمشي وهي منحنيه قربت عندي وضمتني وبكت مريم = رااااااايد لفيت يدي حول ظهرها ساكت منصدم من شكلها ومشيتها شوي وابتعدت عني تطالع وجهي ودموعها على خدها وضحكت بفرح مريم = تغيرت يارايد .. مشاء الله طولت ... صرت اطول مني ابتسمت بألم ونزت راسي اشوف نفسي .. توني ادري اني طولت رايد = صدق ؟ انا طولت ( ورفعت راسي اطالعها وكملت ) مريم متغيرة انتي .. ليه تمشين كذا ( ومسكت اكتفاها ) عدلي ظهرك ليه مسويه كذا ؟ حطت مريم يدها على ظهرها مريم = عندي مرض بظهري .. ظهري يعورني من تحت انقهرت هي الى الحين ... اكيد عميي مهملها رايد = طيب انا دايم اكلمك ليه ماعلمتيني ادبر نفسي اوديك مريم وهي تمسح دموها = ذيك المرة ضربني وضربك تبيني اطلع بعد مرة ثانية .. هو مطنشني ولا يكلمني ولا يصرف علي جت على هذي ( وابتسمت بألم ) المهم انت ودانه لفيت وجهي عنها منقهر من عمي سمعت صوت درايش تفتح والتفتت للدرايش رايد مستغرب = فيه احد يشوفنها التفتت مريم للدرايش وبعدها التفتت لي بخوف مريم = اخاف عمي يجي الحين ويشوفك .. ومرة عمي اكيد بتعلمه ماراح تفوت .. اعرفها رايد = انا شفته طالع على رجليه مو على سيارته يمكن رايح مشوار قريب ... بيننا تلفون مريم فجأة سألتني مريم مريم = رايد مليت ماتقدر تستاجر لنا شقة بغيت ابكي بس مسكت نفسي قدامها رايد = والله هذا انا اجمع ... اصبري علي شوي تنهدت مريم بحزن مريم = ماتقدر تاخذ قرض على راتبك .. والله ماني قادرة اصبر سكتت افكر .. قرض ... طالعتها بصمت ... يعني فيه امل اطلع اخواتي بسرعة رايد = ابسأل واعلمك بالتلفون بعدين ... يله مع السلامة قبل يجي عمي وطلعت ركبت السيارة مع الشباب وانا افكر بالقرض |
|
|
#34 |
|
|
رد: يمسح الدمعه بشكوى للمبدعه هدوئي
* الجــزء الســادس والعشــرون * * عمر * الاربعاء .. الظهر ابعدت اللحاف عني بضيق وانا احس بالحر وجلست احس حرارتي خفت اليوم .. التفت لي رايد اللي جالس على كنبة منفردة قبالي ويلعب بالاب توب حقي وابتسم وهو يطالعني رايد بابتسامة = ماشاء الله شكلك صحصحت .. لك اسبوع وانت بس طايح نزلت راسي ومارديت عليه .. مر أسبوع على وفاة الغالية ... مر أسبوع وانا بحال مايعلم فيه الا الله ... مر اسبوع وانا مصدوم ... ماتحملت الخبر .. آآآآه الانسانة الوحيدة بحياتي راااحت تنهدت بألم ... مر اسبوع ماشفت احد من اقاربي .. لا جدي ولا عمي ابو سامي ولا عيال عمي ولا احد ولا احد ... آخر مرة شفتهم يوم الدفن جدي ادري انه تعبان ... المفروض انا اروح ازوره بس الحمى منعتني كأني سمعت رايد يعلمني وانا تعبان ان جدي يتصل عليه يوميا يسأله عني .... اسمع رايد وهو يكلمني بس طوال الاسبوع اللي راح اسمعه وكأني مااسمعه لي اسبوع حي وبنفس الوقت ميت ... احس باللي حولي واحس باللي يزورون من الجيران ويعزون واحس بيديهم وهي تتحسس وجهي وجسمي يشوفون حرارتي واسمع اسألتهم لرايد واسمع تعازيهم لي بس بالي مو معهم ... بالي مع الغالية اللي دفنتها يوم الجمعة رفعت راسي لرايد اسأله اتأكد ولقيته يطالعني بصمت عمر بحزن = كأني سمعتك تقولي مرة ان جدي دايم يتصل عليك ؟ رايد = ايه دايم يتصل يسأل عنك عمر بحزن = اتصل عليك اليوم ؟ رايد بتنهيدة = ايه ... اتصل وانا برا البيت وقلتله انك بخير ( وسكت شوي ) دايم يقولي انه يبي يشوفك بس تعبان ولا قدر نزلت راسي عمر = ابحاول اروح له اليوم .. احس نفسي احسن ( رفعت راسي لرايد ) رحت انت اليوم للشغل ؟ اظن انك غايب عن شغلك لك اسبوع صح ؟ ابتسم رايد ابتسامة عريضة وهو يطالعني رايد = حلوة ذي اظن ... عندك تشوفني قدامك اسبوع مارحت وتقول اظن ؟ تنهدت ... وانا اصلا كنت حي الاسبوع اللي فات ؟ عمر بحزن = مدري .. اسمعكم انت والشباب واحس باللي حولي بس كأنه حلم رايد = الله يرحمها ( وكمل يجاوب على سؤالي ) لا .. مارحت لشغلي ماخذ اجازة عشانك ... عمر مستغرب = طيب قبل شوي تقول اتصل عليك جدي وانت برا البيت وين كنت اجل ؟ سكت رايد شوي وبعدها نزل راسه لشاشة الاب توب وهمس رايد = رحت للبنك اسأل عن شي ( ورفع راسه بمرح كأنه يغير الموضوع ) الشباب بيستانسون اذا عرفوا انك اخيرا صحصحت .. كل يوم يجون يسهرون عندنا ويتطمنون عليك ابتسمت مجاملة ... مالي نفس لشي ... مالي نفس لمرح الشباب .. مالي نفس اجامل احد نزلت راسي .. الحمى منعتني اشوف نادر ... ابد ماعمري شفته ... اسبوع لا زرته بالمستشفى ولا ادري وينه اصلا اكيد طلعوه تنهدت ... الله يرحمك يمه ... حققتي امنيتي بأخو بس رحتي انتي ... ادري انك تزوجتي عشان تجيبين لي هالاخو ... امنية كنت اتمناها من يوم كنت صغير ... دايم اجيك واشتكي لك .. يمه ليه انا مالي اخوان ... ويوم جالي اخو ... اختفيتي انتي ... ليه فرحتي دايم تصير ناقصه لييييييييه رفعت راسي لرايد وابتسمت ابتسامة صغيرة وانا اتخيل نادر اخوي عمر بابتسامة = ابروح اليوم ازور جدي واسأله عن نادر اخوي ... ماعمري شفته ارتبك رايد رايد = نادر !!! ابتسمت اكثر عمر = ايه .. لي اسبوع ماشفت احد اكيد طلعوه من المستشفى بس مدري ويــ وقاطعني رايد مرتبك رايد = عمر .. آآآآآ .. هم سموه بس ماسموه نادر سموه فارس طيرت عيوني برايد مستغرب عمر = فارس ؟ رايد = ايه ... يوم الاحد رحنا انا والشباب لبيت جدك نعزيه وعلمنا سامي انهم سموه فارس وجيت ابعلمك بس انت دايم اكلمك ولا ترد علي اطالع رايد بصدمه ... لا .. انا وامي اتفقنا نسميه نادر وراح يصير نادر كمل رايد كلامه رايد = عمر انت ماعلمت احد من اهلك انك بتسميه نادر ؟.. انت طولت ولا رحت لهم ابد ولا شفت الولد .. اكيد بيسمونه قبلك تنهدت ونزلت راسي عمر = انت تشوفني قدامك توني خفيت ( ورفعت راسي لرايد ) ابروح اشوف اليوم ( وقمت بتعب ) المهم ابروح اتروش العصر .. لبست ثوبي اخذت شماغي وطلعت من البيت ركبت سيارتي وانا اتلثم مالي نفس اكلم احد .. حركت السيارة وتوجهت لبيت جدي .. وطلعت جوالي وانا اسوق .. ولقيت مكالمات لم يرد عليها بالهبل ورسايل تنهدت وانا اطالع جوالي ... من زمان ماهتميت فيه ... لولا رايد كان خلص شحنه من زمان وحاطه رايد على الصامت فتحت المكالمات التي لم يرد عليها اكثرها من جدي ومها .. ومكالمتين من سامي ومكالمات من عمي ابو سامي ومكالمات من الزملاء بالجامعة فتحت الرسايل اقراها وانا كل شوي ارفع راسي للطريق وارجع انزل راسي اقرا اكثر الرسايل تعازي من الزملاء تنهدت ونزلت الجوال بالمرتبة بجنبي باهمال وكملت الطريق وصلت بيت جدي بس لقيت الباب مسكر .. ضربت الجرس وفتحت لي مها دخلت الحوش وفكيت اللطمة عني واول ماسكرت الباب وراي ... على طول تعلقت مها فيني وبكت وهي متعلقه برقبتي مها بصوت باكي = ويييينك اسبوع من صار الحادث ماشفناااااااك ( وبكت ) ندري انك زعلان على امك الله يرحمهااااااااا منحني شوي لمستواها ... حطيت يدي على ظهرها وانا احاول امسك نفسي عمر بحزن = كنت تعبان .. ابتعدت مها عني وانا اعتدلت واقف مها وهي تمسح دموعها = والله لولا الولد اللي عندك بالبيت كان رحت لك بس صعبة ندخل بيتك انا وامي وهو فيه .. وابوي تعبان ... هم يسألون عنك وااااجد وانت ماترد على اتصالاتنا ورفعت يدها وحطتها على جبهتي مها = الى الحين حااار عمر = لا الحين احسن .. كيفهم جدي وجدتي مسكت مها يدي تجرني مها = تعال .. لهم اسبوع بس يسألون عنك وابوي وده يروحلك بالبيت بس كل يوم ياما عنده رجال او تعبان ما يقدر يمشي جيت ابسألها عن اخوي الجديد بس مها ماسكتت وهي تجرني معها مها = دايم نتصل عليك ولا ترد .. كلنا زعلانين بس ما انعزلنا عن العالم مثلك وقبل ندخل البيت وحنا عند العتبه الداخليه .. وقفت مها وكأنها تذكرت شي والتفتت لي على طول مها = صح عمر ... فيه شي لي يومين افكر فيه .. عمر = وش ؟ مها بضيق = بعد زواجي مابي امي وابوي يبقون لحالهم بالبيت .. اخاف عليهم قطبت حواجبي .. صح جدي وجدتي مين بيهتم فيهم بعد مها عمر = طيب .. زواجك باقي له شهرين حـ وقاطعتني مها تصحح لي مها = لا اجلناه شهر .. بيصير بعد ثلاث شهور سكتت شوي عمر = المهم زواجك باقي له ثلاث شهور حاولتي تكلمينهم بالموضوع وتشوفين رايهم ؟ مها = لا استحيت ابيك انت تكلمهم وتشوف وش ناوين عليه بعد زواجي .. الصراحة مابيهم يجلسون لحالهم هنا .. اخاف ما ارتاح تنهدت وانا اهز راسي بايه عمر = ابكلم جدي واشوف مها = ايه اقنعهم تكفى لا يجلسون لحالهم دخلنا الصاله ولقيت جدي و جدتي جالسين بالارض وساندين ظهورهم على الكنبة الطويلة اللي وراهم والمركى بينهم وجدي ممدد رجوله اول ماشافوني قدامهم فرحوا .. جدي بفرح = هلااا والله بعمر هلا والله بالغااااالي ضربت جدتي بيدها على الارض بجنبها ( يعني تعال عندي ) هي وشوي وتبكي جدتي = هلا والله تعال ياعمر تعال عندي مشيت بسرعة وجدتي ماده يديها لي ... جلست قدامها على ركبي وانحنيت على جدتي وسلمت على راسها بس جدتي مسكت وجهي بين يديها وسلمت على خدي وضمتني لصدرها وكملت بصوت باكي وانا ساند راسي على كتفها جدتي بصوت باكي = اشغلت بالي عليك .. الله يعوضك ياوليدي.. الله يرحم امك وعمك ( وبكت ) الله يعوضك خير عن ابوك وامك غطيت وجهي بشيلتها احاول امنعي دموعي تنزل ... ابعدتني جدتي عنها تطالعني وتحسس وجهي بيديها جدتي بحزن = وجهك حار .. وشلونك الحين ... والله ياوليدي ودي اروح لك لبيتك واتطمن عليك بس هالولد اللي انت مسكنه عندك ( وكملت بقهر ) هو الى متى بيصير ببيتك ليه مايشوف له مكان ثاني .. مــ قاطعة جدتي قبل تكمل عمر = جده انا بخير ماتحسنت الا اليوم وعلى طول جيت ( والتفتت لجدي ولقيته يطالعني يحتريني اخلص من جدتي ابتسمت ) جدي وشلونك ؟ ومشيت على ركبي وانحنيت على جدي وسلمت على راسه مسكني جدي مع اكتافي يطالع وجهي بحنان جدي = علمني سامي انك مريض من يوم الجمعة والله ياوليدي اني تعبان من رجيلاتي كل ماحاولت اجيك يجون عندي رجال .. حتى عمك ابو سامي اشغلناه معنا هو وولده من يوم جوا من السفر مارتاحوا .. كل الشغل فوق راسهم ياوليدي سلمت على راس جدي مرة ثانية عمر = ماعليك جدي .. انا اللي مقصر المفروض انا اللي اجي عندك وجلست قدامهم مثل وضعية التشهد وقعدت اتلفت ادور بلهفة على نادر عمر بابتسامة = وين اخوي الجديد ؟ ابتسمت جدتي وحطت يدها على فخذي جدتي = اخوك قريب ياوليدي ( والتفتت لجدي ) اتصل عليهم خلهم يجيبونه لعمر قطبت حواجبي مستغرب ابتسم جدي بفرح والتفت لمها اللي وراي و الى الحين واقفة عند مدخل الصاله جدي = مها هاتي التلفون عمر مستغرب = ماهو عندكم ؟ التفت جدي لي جدي = لا عند اخوانه بعنيزة ... هم جابوه لنا وشفناه بس ماطولوا امهم بالحداد و مايقدرون يخلونها لحالها مدت مها التلفون لجدي وهي تكلمني بفرح مها = عمر سميناه فارس .. رفعت راسي لمها عمر = بس انا ابي اسمه نادر سكتوا كلهم يطالعوني مها = نادر !!! يع نادر ... فارس احلى ... نادر قديم .. فارس تحس كشخه عمر = كشخه والا مو كشخه انا وامي متفقين نسميه نادر ... انا ابي اسمه نادر طالعوا بعض جدي وجدتي ورجعوا التفتوا لي جدي = بس اخوانه قد سموه عمر = وانا بعد اخوه والا مالي حق اسميه جدتي مستغربة = لا والله لك حق ياوليدي بس كلنا يهالبيت ماهتمينا باسمه ... جا معاذ عندنا وقال ابسميه فارس وقلنا هذا اخوك سمه زي ماتبي جدي = وانت نتصل عليك ولا ترد علينا وانا انشغلت وتعبان ولا قدرت اجيك .. قلت لمعاذ يروح لك ويشاورك باسمه وقال طيب .. هو جا عندك معاذ ؟ عمر = لا ماجا عندي ولا شفته جدي = والله ياوليدي انا ماكنت بحاله .. وفاة ولدي خلتني مادري عن شي ( ورفع سماعة التلفون اللي بحظنه ) خلني الحين اتصل عليهم وتشوفه ويصير خير مها = عمر والله وش نادر .. نبي اسم فارس احلى .. يع ناااادر رفعت راسي لمها عمر = لا اسمه نادر ( والتفتت لجدتي اسألها ) اظنهم مايمديهم سووا تبليغ وسجلوا اسمه صح ؟ جدتي = مايسجل لين يطعم مها بزعل = يع نااادر طنشتها ولا رديت عليها وقعدت اطالع جدي اللي يكلم بالتلفون جدي = هلا معاذ ... وشلونك .. بخير كلنا بخير ياربي لك الحمد .. معاذ ابيك تجيب فارس عندنا المغرب ... نبي نشوفه .. زين زين نحتريك المغرب .. ياهلا وسكر السماعة ابتسمت اتخيل نادر .. متحمس متى يجي المغرب ... اول مرة يصير لي اخو .. اخيرا ابحس بطعم الاخوة والاسرة .. من يوم طلعت على الدنيا وانا محروم منها ... ابتسمت اكثر وانا اتخيله هالصغير ابيض والا اسمر بيشبهني والا لا = يع نادر قطعت علي تخيلاتي هالعمة المزعجة و رفعت راسي لمها بعصبية عمر بعصبية = من زين اسمك عاد .. والله لو تقولين يع من هنا لبكرة نادر يعني نادر مها وهي تجلس على الكنبة = بس حنا لنا يومين تعودنا نسميه فارس ... انت توك تنتبه .. وينك اسبوع ؟ عمر = اسبوع كنت تعبان مها = كلنا زعلانين على اللي صار بس ما انعزلنا عن العــ قاطعها جدي يسكتها جدي = مها خلاص .. هذا اخوه وله حق يسميه مها = المشكلة مايعرف يسمّي .. وش قال قال نادر نزلت راسي وابتسمت اتخيله ... اباخذه واربيه عندي .. اخيرا بيصير لي اخو يسكن عندي بالبيت .. ماراح اصير لحالي بالبيت .. لا .. ورايد عندنا بعد .. يعني اخيرا صرنا مجموعة مثل الاخوان بالضبط ... اباخذه عندي قامت مها وطلعت من الصاله .. شوي وجابت القهوة وجلست بجنبي قدام جدي وجدتي وهي الى الحين تتطنز علي وعلى اختياري بالاسم بس مطنش .. اول شي مالي نفس اخذ واعطي معها ثاني شي ماعلي من احد اسمه نادر يعني نادر .. سحبت الصينية من يد عمتي وقعدت اصب لهم ساعة ونص و سمعناه يذن لصلاة الغرب التفت لي جدي .. جدي = عمر لي يومين ما اصلي الا بالبيت ماعندي احد يوصلني .. ابيك ياوليدي تروح معي للمسجد و توصلني قطبت حواجبي مستغرب عمر مستغرب = اوصلك ؟؟ كيف يعني اوصلك .. المسجد قريب دايم تــ وقاطعني جدي جدي = رجيلاتي ماعادت تشيلني قامت مها وطلعّت عصا كانت مركوزة بجنب التلفزيون وعطته جدي وساندته يقوم عشان يروح يوضي توني انتبه للعصا .. رفعت راسي لجدي مستغرب وهو واقف عمر = العصا هذي لك ؟.. ماكنت تمشي بعصا مها = يقولك رجيلاته ماعادت تشيله .. قم وصل ابوي للمسجد عشر دقايق وطلعنا انا وجدي متوجهين للمسجد وانا اساند جدي واساعده على المشي فعلا كلام مها وخوفها بمحله .. لازم جدي وجدتي مايقعدون لحالهم بالبيت بعد زواج مها ... ( وابتسمت ) فرصة اطلب منهم يجون عندي بالبيت خــ لحظة .. صح .. نسيت رايد عندي بالبيت .. صعبه جدتي ورايد يصيرون ببيت واحد .. وصعبه اطلب منه يطلع .. ماله مكان يضفه غير بيتي التفتت لجدي اللي يمشي وهو منحني شوي .. خلني افتح معه الموضوع الحين عمر = اقول جدي .. آآآ .. اذا تزوجت مها وش بتسوي انت وجدتي .. رفع جدي راسه لي يطالعني جدي = الا ياوليدي فكرت .. قلت ابروح عند عيال عبد العزيز .. معاذ ومصعب الحين مسؤولين عن اخوانهم وامهم .. والمسؤولية كبيرة عليهم اساعدهم باللي اقدر عليه سكتت ... ماعندي رد .. كنت اتمنى يصيرون عندي خاصة اني اباخذ نادر عندي واكيد ابحتاج جدتي بس رايد مشكلة .. صعبة اخليهم هو وجدتي ببيت واحد وحل جدي لا بأس به .. اذكر جدي وجدتي كانوا مرتاحين يوم كانوا بعنيزة والحين فعلا مصعب ومعاذ يحتاجون خبرة جدي بهالمسؤولية اللي عليهم وانا الله يعوضني بنادر ورايد يحسسوني باللي اتمناه طلعنا من المسجد وانا اساند جدي اللي يالله يالله يمشي ناخذ ساعة عشان نوصل ... دخلنا الحارة وشفت من بعيد سيارة معاذ .. ابتسمت فرحان اول مرة افرح بجية معاذ .. مب له والله فرحان للي مع معاذ .. ودي اترك جدي واروح مسرع للبيت واشوف نادر .. بس جدي بطييييييييييييييئ متحممممممس .. ودي اشيل جدي واركض للبيت اخيرا دخلنا البيت .. ساندت جدي لين وصلنا الصاله وتركته ولقيت بالصاله معاذ ومصعب جالسين على الكنب وجدتي جالسة على الكنبة الطويلة قبالهم وكلهم ما بحظنهم شي ... طالعتهم مستغرب وانا اتلفت على الصاله كلها ادور شي ملفوف او أي شي صغير وينه قام مصعب يوم شافني واقف عند مدخل الصاله وجا يسلم علي تنهدت احاول اصير ثقيل شوي وسلمت على مصعب واعزيه في ابوه واخته ويعزيني في امي .. عمر = عظم الله اجرك مصعب = اجرنا واجرك جزاك الله خير .. وعظم الله اجرك في الوالدة عمر = اجرنا واجرك دخل جدي وجلس بكنبة منفردة التفتت لمعاذ اللي واقف عند مكانه يحتريني اجي عنده واسلم دخلت الصاله وتوجهت لمعاذ ومديت يدي اصافحه عمر = عظم الله اجرك معاذ = اجرنا واجرك ( وسلمنا على بعض بالوجه وجلس معاذ على الكنبة ) ورجع مصعب وجلس بجنب اخوه وهو يسألني مصعب = يقولون كنت تعبان ؟ رديت عليه وانا اجلس بجنب جدتي قبالهم عمر = ايه .. حمى ..والحمد الله راحت هز مصعب راسه بهدوء مصعب = انشغلت هالاسبوع سأل جدي عيال عمي جدي = وين اخوكم خلوا عمر يسلم عليه ابتسمت هذا اللي ابي اقوله اول مادخلت .. وين اخوي ردت جدتي معصبة جدتي = اخذته مها تقول بتصوره مدري وش بتسوي .. مدري متى بتعقل هالبنت على وجه زواج والى الحين مطفوقه اووووووه يعني ماتصور الا الحين صاح جدي باعلى صوته يناديها جدي = مهاااااااا يامهااااااااااا سندت ظهري على ورا واطالع مدخل الصاله مافيني صبر .. احتري هالعمة تشرّف شوي ودخلت مها ومعها شي ابيض ملفوف تشيله بين يديها ابتسمت فرحان وانا اطالع هالشي الملفوف اللي بين بيدها وقمت واقف وعيني عليه وغصب عني ضحكت بفرح عمر = ههههه هذا اخوي ؟ ( ومديت يدي ابي اخذه ) عطيني اياه وقفت مها قبالي وحطت بيدي هالشي الخفيف الملفوف مها = لا يطيح منك شيله زين تصلبت بمكاني وقلبي يضرب بفرح وانا اشوف وجهه الصغير .... اوووووول مرة اشيل رضيع ... ما اعرف ... خفيف مررررررة .. كأني ماني شايل شي اطالع وجهه بلهفة ... حسيت بيدين مها على اكتافي وتضغط اكتافي تبيني اجلس مها = اقعد وحطه بحظنك .. لا يطيح منك جلست وعيني مافارقت وجه نادر مغمض عيونه ونايم .. خشمه صغير مرة مدري وشلون يتنفس هذا .. ضحكت وانا اطالع اللهاية بفمه وهي تتحرك ... ضميت ركبي من بعضها وانحنيت اتركى على ركبي ويديني الثنتين تحت نادر ابيض ... احس بنعومته ... طلعت يدي اليمنى بشويش من تحت نادر وطلعت اللهاية من فمه ونزلت بجنبي باهمال ... وابتسمت ابتسامة عريضة وانا اشوفه فاتح فمه يحسب الى الحين اللهاية فيه فجأة تذكرت امي ... تنهدت بألم.. حسيت بحرارة بعيوني يوم تذكرت امي وامه ... كأني اشوف وجهها فيه الحين ليتها موجودة تفرح معي باخوي ... يمه تحققت امنيتي وصار عندي اخو بس فقدتك انتي سالت دموعي على خدي غصب عني ... انحنيت و حبيت خد نادر .. وغصب عني بكيت وانا اشم ريحته ... ماقدرت امنع نفسي حمدت الله ان شماغي طاح طرفه وانا منحني ... الحمد الله يغطي علي .. احاول اتكم صوتي واخفي دموعي عنهم آآآآه يانادر امنا رااااحت ... راحت وخلتنا ... حشرت خشمي برقبته مستمتع بريحته انا انولدت بدون اب وانت ياخوي انولدت بدون ام ولا اب ... حاولت اتكم صوتي اكثر بس غصب عني بكيت بصوت مسموع ... وحشرت خشمي اكثر برقبة نادر احاول اكتم صوتي بس حشرجت صوتي و شهقاتي تفضحني حسيت بيد جدتي على ظهري وهي تكلمني بصوت باكي جدتي = الله يعوضكم ... مات ولدي سعود وجيت انت والحين مات ولدي عبد العزيز وجا اخوك ... فرحتي دايم ناقصه ( وبكت) سمعت جدي يرد على جدتي بحزن جدي = احمدي ربك واشكريه .. اللي خلف مامات الى الحين مغطي وجهي بنادر احاول اهدي نفسي ... فعلا الحمد الله على كل حال رفعت راسي شوي وحبيت خد نادر وخده الثاني ورفعت راسي اطالع وجهه عن قرب .. ولا شعوريا حبيت فمه الصغير .. ورجعت احب خده .. وقعدت احبحبه واحاول اهدي نفسي بخفه دخلت يدي اليمنى وانا منحني على نادر و مسحت دموعي واحاول اغطي وجهي بشماغي اللي طايح طرفه .. مابي يشوفون دموعي قدامهم رفعت راسي واعتدلت جالس وطاحت عيني على معاذ اللي جالس قبالي وحاط رجل على رجل ويطالعني بصمت نزلت نظري عنه متفشل من دموعي اللي خانتني = وش رايك فيه من يشبه ؟ رفعت نظري لمصعب .. حسيته سأل هالسؤال يبي يلطف الجو على جدي وجدتي اللي تعكر مزاجهم بسببي ابتسسمت ابتسامة حزينة ونزلت نظري لنادر عمر بابتسامة = مادري ماشوفه يشبه احد مها = توه .. اذا كبر اكيد بيطلع علي رفعت راسي لمصعب ومعاذ اعلمهم بالاسم اللي سميته انا عمر = ابسميه نادر قطب مصعب حواجبه ومعاذ نزل رجله عن رجله الثاني مستنكر كلامي معاذ = وش ؟ مصعب مستغرب = نادر .. بس حنا خلاص سميناه فارس والكل وافق حتى جدي وجدتي تدخلت مها واقفة معهم مها = اصلا وش جاب فارس لنادر معاذ بحزم = خلاص الولد سميناه فارس عمر = بس انا وامي اتفقنا نسميه نادر ضحك معاذ بسخرية معاذ = هه حلوة ذي اتفقتوا .. شايفنا مخفات نصدقك عمر = وليه ما اسميه انا .. انا اخوه مثل مانتوا اخوانه معاذ = كلنا موافقين على فارس وش معنى انت .... والا بس تبي تمشي رايك علينا عمر = ما امــ وقاطعني معاذ معصب معاذ = هذا قبل كلامك يمشي علينا .. الحين انا المسؤول عنه وكلامي هو اللي يمشي عمر بعصبية = كلامك يمشي على غيري .. مايمشي علي وعلى اخوي معاذ = اخوك تراني انا اخوه الكبير عمر بسخرية = وانا وش قالوا لك .. ولد عمه ( وانتبهت اني فعلا اصير ولد عمه وبسرعة كملت منقهر ) آآآآ ... اقصد انا ولد عمه واخوه بعد ضحك معاذ بسخرية معاذ = هه .. لا يكثر بس اسمه فارس وانتهينا عمر = لا يــ وقاطعتنا صرخة جدي علينا جدي = بس انت واياه ... تتهاوشون قدامي بلعت لساني منقهر وعيني على معاذ ومعاذ نفس الشي سكت ونظراته المعصبة علي كمل جدي كلامه بعصبية جدي = فارس نادر .. اللي هو ... تتهاشون عشان اسم ؟ نزلت نظري لنادر النايم .. ومررت اصبعي على خده بحنان وابتسمت غصب عني وانا اطالعه سمعت جدي يقترح يحاول يحل المشكلة جدي = طيب لا فارس ولا نادر .. سموه اسم ثاني التفتت لجدي وقبل اتكلم تدخل مصعب مصعب = فارس حلو وتعودنا عليه عمر = انا من زمان ابي نادر من يوم امي حامل فيه سمعت معاذ يهمس بسخرية معاذ بهمس = هه ويكذب بعد التفتت له ارد عليه عمر = ما اكذب التفت جدي لمعاذ جدي = معاذ سموه نادر ... نادر زين ابتسمت بانتصار وطير معاذ ومصعب ومها عيونهم بجدي مها بصدمة = يبااااااااا .. اسبوع ماعارضت على اسم فارس والحين تقول نادر زين سأل مصعب جدي باستنكار مصعب = نسميه نادر بس عشان واحد وحنا كلنا نبيه فارس رد معاذ بحزم وقهر على جدي معاذ = لا ... فارس يعني فارس .. جدي انت دايم دايم تمشي راي عمر علينا ... مو بس انت حتى ابوي الله يرحمه .. عندكم كلام عمر هو اللي يمشي وحنا بالطقاق ( والتفت لي ) ماني مسميه نادر وورني وش بتسوي جدي بترجي يحاول يرضي الطرفين جدي = يامعاذ الله يهديك هذا اخـوه بعد التفت معاذ لجدي و رد بعصبية معاذ = الحين انا اللي مسؤول عنه وهذا اللي يسميه ( واشر علي ورفع يده يعدد باصابعه بعصبية ) انا اللي ابصرف عليه .. وانا اللي ابسجل اسمه وانا اللي ابطلع له وارباح دكان ابوي يوزع علينا كلنا ومنهم فارس واخر شي اسم مانقدر نسميه عمر بصعبية = قل بعد بتحرمه من ورث ابوه ... ومن ناحية الصرف مب انت اللي بتصرف عليه ... نادر اباخذه عندي ... من اليوم وطالع بيصير ببيتي انا التفتوا كلهم لي بصدمه وطيروا عيونهم فيني حتى جدي وسمعت شهقت جدتي مستنكرة كلامي سكتوا شوي يستوعبون جدي بصدمة = تاخذه عندك ؟ جدتي بخوف = ياعمر ياوليدي مايصلح .. هذا رضيع ييبيله مداراه مها بصدمة = عمر خبل انت .. هذا يبي اللي يرضعه واللي يغيرله ..هذا توه مولود يبي له عناية ومتابعه مو خذني جيتك ضحك معاذ بسخرية معاذ = ههههههههههههه دلخ ماعلي منهم ... قبل احسب امي بتعتني فيه وفوق هذا كنت زعلان لانه مب صاير عندي ... الحين انا احق فيه بعد امي وفرصة يصير معي بالبيت التفتت لجدتي عمر = مايبي له عناية واجد .. رضاعة وانتهينا ضحكت جدتي بحنان وهي تحط يدها على كتفي جدتي = لا الله يصلحك .. هــ وقاطعها معاذ يصارخ علي معاذ بعصبية = اسمع عاد .. ترانا عطيناك وجه .. عندك بالبيت انسى فااار دمي منه كل ماقلت شي قال لا صارخت عليه باعلى صوتي عمر بصراخ = والله اباخذه اباخذه غصب عليك حسيت بقمزة نادر من صوتي العالي وقعد يتحرك وكأنه يبي يقوم قامت مها و جت عندي و انحنت واخذته مني مها = ازعجتووووه ( وقعدت تهزه بين يديها وجلست بجنب جدي ) رجعت التفت لمعاذ بتحدي التفت معاذ على مصعب يسأله ويحرك يده عند راسه بحركة يعني مجنون معاذ = هذا مجنون والا وشسالفته ؟ عمر بعصبية = الحين ماعندي الا اخو واحد ومستكثرينه علي التفت معاذ بعصبية وصارخ علي معاذ بصراخ = والله لو عندك عشر .. فارس هذا والله ما تاخذه قمت منقهر وفاير دمي على الاخر عمر = لاااااا تحلف .. قلت لك اباخذه يعني اباخذه قام معاذ على قومتي معاذ = والله ماتشمه مشيت خطوتين بعصبية ووقفت قدامه ومسكت ياقته وانا احس دمي يغلي من معاذوه عمر = هو عنااااد بسسس معاذ = ايه عناااااد ( ودفعني على ورا و تركته ) عنااااد ياعمر ... فااااارس والله مايطلع من بيتي جدي = بس حسبي الله ونعم الوكيل بسسسسس ماهتميت لجدي ولا معاذ اهتم وكل واحد يطالع الثاني معصب مسكت ياقته وجريته ناحيتي عمر = اولا اسمه نااااادر .. وقلت لك اباخذه وانت طق راسك باقرب جدار مسك معاذ يدي اللي ماسكته ويضغط عليها معصب معاذ = انت اللي طق راسك بالجدار ... فاااارس ( ورص على الاسم ) ما يطلع من عنيزة وانت بلط البحر ( ودفعني على ورا ) قام مصعب وحال بيننا مصعب = على الاقل احترموا جداني اللي جالسين عندكم مسكت ذراع مصعب وجريته ابعده عنا وانا اطالع معاذ منقهر عمر = عندك اخوانك ... عندك امك ... وش معنى متمسك بنادر هالكثر معاذ = قل بعد اباخذ امك .. تراك مامن عقل التفتت لجدي ولقيته يطالعنا بألم وساكت رجعت التفت لمعاذوه واشرت على جدي عمر = جدي وجدتي ناوين يسكنون عندكم بعد زواج مها .. خل بس نادر عندي بس نااااادر ناااااااااادر مابي غيره قطب معاذ ومصعب حواجبهم على المعلومة الجديدة والتفت معاذ لجدي ورجع التفت لي معاذ = حياهم الله باي وقت بس هذا ماله دخل بفارس ... وانا فارس هذا بالذات مابيه يطلع من عندي جدي = بس خلاااااااص التفتت لجدي مستنكر صوته اللي تغير .. ولقيته يطالعنا بألم جدي وهو يطالعني = عمر ياولدي هذا رضيع .. اخوك مصلحته عند عيال عمك .. هناك عنده اخته ومرة ابوه .. انت تاخذه وشلون تدبره انقهرت اكثر .. ليه كلهم ضدي عمر = انا اخوه انا اقرب لنادر من معاذ مصعب = هو ماهو على القرب وعلى البعد .. هو على مصلحة الولد وين معاذ = والله اقنتعت والا ما اقتنعت ... ماعلينا منك التفتت لنادر اللي بين يدين مها وهي جالسه وتطالعنا بزعل من هواشنا سكتت وانا عيني على نادر و انفاسي سريعة من القهر ياما تمنيته وبعد ماجا وصار اخيرا عندي اخ ووفاة امي وابوه صار فيه امل يعيش معي ببيت واحد ... والحين يقولون مصلحته مايعيش معي ... بس لاني وحيد بس لاني وحيد وحييييييييد التفتت لمعاذ ورفعت راسي بتحدي .. لو يقولون مايقولون .. نادر عندي عمر = عنادك خله لك .. نادر معي .. تفهم .. نادر معي سكت معاذ شوي يطالعني وبعدها رفع راسه بتحدي يسوي مثلي ولجم لساني بكلمته معاذ = طيب بيننا المحاكم سمعت شهقة جدتي ومها ... و مصعب طير عيونه باخوه مصعب = ماتوصل لهالدرجة معاذ سمعت همسة جدي بألم وانا عيني على معاذ بصدمة جدي بالم = عيالي يوصلون المحاكم .. ( وتغير صوته ) حسبي الله ونعم الوكيل ومعاذ الى الحين يطالعني بتحدي لاااااا .. اذا وصلت المحاكم انا الخسران .. لييييييييييه مالي حق بنادر بس لاني وحيد بياخذونه مني ... هو وحدتي على كيفي ؟ ... سمعت جدتي وراي تقترح علي وعلى معاذ جدتي = حسبي الله ونعم الوكيل .. بتفشلونا انتم ... لا تحدوني اخلي عمه يجي ياخذه انحنى معاذ على جنب شوي يطالع جدتي من وراي وانا الى الحين عيني عليه وساكت .. مدري وش اسوي ... كل شي الا المحاكم معاذ = لا .. اسمحيلي جدتي .. انا الاخ الكبير وعنده اختي وامي ... ماني بزر عمي يصير وصي على اخواني .. ( واعتدل واقف يطالعني ) هاه وش قلت تبلع لساني وتنطم والا اوصلها للمحاكم قبضت يدي بقهر وغصب عني رفعت يدي وعطيته لكمه قويه طيرت وجهه صرخ معاذ بألم وطاح على الكنبة وراه وهو حاط يده قريب من فمه .. شهق مصعب وجلس بجنب اخوه على الكنبة وانحنى يشوف وجه معاذ بخوف مصعب = معاااااذ قامت مها بفزع وهي ترص نادر لصدرها قام جدي بضعف وهو يتساند على كتف مها جدي = عمــ ( ولا كمل ..سكت وهو يطالعنا بألم ) رفع مصعب راسه يطالعني معصب مصعب بصراخ = ماتعرف تتفاهم بدون ضرب قام معاذ وهو ماسك فمه وصرخ بوجهي معاذ = يااااااااكلب ( وابعد يده عن وجهه وبحركة سريعة رد لي اللكمة بقوة ) تراجعت على ورا وطاح شماغي ومسكت خدي من تحت عيني بألم فضييييع .. وتفاجأت بمعاذ يهجم علي ويمسكني مع ياقة ثوبي ويقرب وجهي لوجهه ... ااااهب ياهو عليه ضرب اخخخخ طالعته وانا حاط يدي على خدي واشوف الدم ينزف من خشم معاذ معاذ بصراااخ = ترااااني من زمااااان صاااابر علييييك جا مصعب وحال بيننا وبصعوبة فكني من يدين معاذ .. ودفعني على ورا ووقف قدامي ومعاذ وراه مصعب بعصبية = عمر تراك زودتها ... قلنالك مصلحة الولد معناااااا ... بقرة انت ما تفهم انصدمت وانا اطالع مصعب ... انا عارف من زمان انه لا يمكن يوقف معي ضد اخوه ... دايم يكذب علي وانه مهتم بمصاحبتي له احس مختنق ما اقدر اتكلم من القهر التفتت لمها وتوجهت على طول لها ومسكت نادر ابي اخذه منها بس هي رصته على صدرها مها بزعل = لااا عمر لا تاخذه .. انت حتى رضاعة ماتعرف تعطيه رفعت قبضة يدي .. كأني ابعطيها بكس .. ابي اخوفها وفعلا خافت تراجعت على ورا ومدت نادر علي اخذت نادر منها .. وجدي يكملني جدي = عمر وين بتاخذه هذا يبيله حرمة تراعيه .. لا تخليني اتصل على عمك ماهتميت ولاني مهتم ... المهم نادر معي وبس .. لا عمي ولا غيره يقدرون يمنعوني جيت ابطلع من الصاله بس معاذ سد طريقتي معاذ = وين وين وين .. هات الولد والله ماتاخذه بصعوبة طلع صوتي ارد عليه عمر بعصبية = تحلف والا ماتحلف .. ماعلي منك وطق راسك بالجدار ومريت من عنده بس معاذ مسك ذراعي بعنف مسكت مها يد معاذ تحاول تبعده عني مها = خله معاذ خله .. مو متحمله صدقني يوم و بجيبه بنفسه عندنا سحبت ذراعي وطلعت من الصاله وانا اسمع معاذ يصارخ ويسبني وطلعت وانا اسمع ازعاجهم معاذ يصارخ ومها ومصعب يردون عليه .. خله و مو متحمله وبيرجعه ومن هالكلام ركبت سيارتي وحطيت نادر بحظني بألم المحاكم لا .. لا ... اذا وصل الموضوع للمحكمة اكيد راح يكسبها معاذ ... وعمي ماله دخل يتدخل وماعلينا منه اصلا شغلت السيارة وعيني على نادر النايم بحظني ابتسمت بألم وانا اطالع برائته حركت السيارة ويد على الدركسون ويدي الثانية على صدر نادر اقدر اربيه .. ليه يقولون ماراح اتحمله .. كلها رضاعة احطها بفمه ويسكت .. نادر اخوي بيصير عندي .. وعندي وبس حسيت بالم فضيع تحت عيني .. حسبي الله عليك يامعاذ .. جعل يدك للكسر .. كل هذا عشان طلبت اخوي يصير عندي وصلت بيتي .. وطفيت السيارة ورفعت نادر لوجهي وحبيت فمه وخده وحشرت خشمي برقبته ... نادر هذا بيتي .. هنا بتسكن معي لين تكبر .. ماعليك من معاذ ولا من غيره نزلت وانا اسمعه يذن لصلاة العشا ودخلت البيت وسكرت الباب اللي برا والباب الداخلي اخاف العله معاذ يجي وراي دخلت الصاله ولقيت رايد جالس و يطقطق بالاب توب رفع راسه وشهق يوم شاف اللي معي ونزل الاب توب على جنب وقام متفاجئ رايد بصدمة = هذاااا اخووووك ؟ ابتسمت بألم .. هذا اخوي وتهديد معاذ لي بالمحكمة ماراح يخوفني جا رايد ووقف قدامي ومد يديه يبي ياخذ نادر رايد بفرح = شوي شوي خلني اشيله عطيته رايد وبصعوبة تكلمت عمر بحزن = نادر خلاص بيصير معي دايم رفع رايد راسه لي بصدمه رايد = وش ؟ عمر اكيد تمزح ؟ تنهدت بألم ... بيصير معي وبس عمر = خله معك واذا طق الباب احد لا تفتح وطلعت من الصاله مختنق .. ابي اصير لحالي شوي وافكر بتهديد معاذ ... ماراح يخوفني ماراح يخوفني .. انا احق بنادر منه * رايد * طالعت عمر وهو معطيني ظهره طالع من الصاله ... تبعته وشفته يركب الدرج بتعب رايح فوق وش يقول هذا ... صاحي .. وبعدين وش منه الكدمة الحمرا اللي تحت عينه .. لا يكون متهاوش مع احد كعادته نزلت نظري للمخلوق الصغير اللي شايله بين يدي هذا وشلون بيعيش عندنا .. لا انا ولا عمر ندبر شي .. وبعدين تعال ... انا اداوم وعمر يدرس وين بنحطه ذا بوقت دواماتنا رفعت راسي لأعلى الدرج .. للمكان اللي اختفى منه عمر مب صاحي .. ماعنده اهل يربونه وش معنى عمر دخلت الصاله ونظري على نادر .. وابتسمت غصب عني ... ياصغيره مب شي معقول عمر صادق بكلامه ... صعبه وشلون نخلي هالنتفه عندنا قمت ورحت فوق وانا اهز نادر بين يدي مع انه نايم رحت لغرفة عمر ولا لقيته .. رحت لاحد الغرف فوق ولا لقيته .. رحت لغرفة امه ولقيت عمر جالس على السرير ومنزل راسه وسرحان يفكر وقفت عند الباب رايد = عمر رفع راسه ببطئ وطالعني بصمت دخلت الغرفة ووقفت قدامه رايد = عمر صعبة تخلي اخوك عندنا .. هـ وقاطعني عمر بهمس عمر = رايد اطلع ابي اصير لحالي شوي سكتت .. وش فيه عمر طلعت من الغرفة ونزلت تحت .. وانا شايل هم الولد .. عمر مب صاحي كيف يجيبه عندنا وهو يعرف اننا مانقدرله طلعت جوالي واتصلت على عبد الله شوي ورد علي عبد الله = هلا رايد رايد بضيق = عبد الله ... تقدر تجي .. عبد الله مستغرب = ليه وش فيه ؟ رايد بضيق = تعال شف وش جايب عمر .. سكت عبد الله مستغرب عبد الله = وش جاب ؟ رايد = جاب اخوه نادر يقول يبيه يصير عندنا على طول شوي وسمعت ضحك عبد الله عبد الله = هههههههههههههههههههههههههههههه هههه تضايقت مافيه شي يضحك رايد = وش تضحك منه انت الحين ؟ عبد الله = ههههههههههه حلوة ذي على طول ... ومين بيحفظه انت والا عمر هههههههههه زفرت .. هذا وقته يتطنز .. وبعدين صح مين بيحفظه ويغسله ذا رايد = وانت الصادق مين بيحفظه ومين بيرضعه ومين بيقعد عنده اصلا .. انا اداوم وعمر يدرس ضحك عبد الله اكثر وبعدها سألني عبد الله = طيب عمر عنده جدته ليه مايوديه عندها واصلا الولد له اخت ومرة ابو ليه عطوه عمر ؟ رايد = انا ادري .. انا مستغرب مثلك ... عمر جا وواضح انه متضايق وراح فوق بدون مايعلمني السالفة ولا فهمت منه شي عبد الله = هههههههههههههه اقول شكل سهرتنا اليوم فله مع اخو عمر .. ابجمع الشباب واجيكم نستانس ههههههههههه عصبت رايد = وش وناسته انت .. ايه انتوا وش عليكم .. مابياكلها الا انا ... هذا هو عمر عطاني اخوه وراح فوق عبد الله = يله يله ماما رايد جايين الحين ... ههههههه وسكر بوجهي وهو يضحك اففففف وش ماما رايد ... من الحين تطنز .. جاي يبي يستانس ذا .. نزلت نظري لنادر اللي بحضني .. وش هالورطه .. هذا كيف يحفظونه وكيف يسون الرضاعة .. والله ما اعرف شي ورفعت راسي احاول اتذكر دانة وهي صغيرة وكيف كانت امي تسوي معها نص ساعة ونزل عمر واخذ اخوه من حظني وجلس على الكنبة وحط اخوه بحظنه .. كل هذا بصمت طالعته مستغرب .. وش فيه عمر .. شفت عمر يمرر اصابعه بحنان على خد نادر وسرحان بوجهه رايد = وش فيك عمر ؟ رفع راسه يطالعني سكت شوي وبعدها همس عمر = مافيني شي .. وش بيصير فيني يعني ... ( ونزل راسه لنادر ) انا الغبي معطيه اكبر من حجمه .. مب خايف منه ولا من احد ( ورفع راسه لي وابتسم ابتسامة صغيره كأنه يغير الموضوع ) وش رايك باخوي ؟ فتحت فمي مستغرب .. تنحنحت رايد = احم .. ( طنشت سؤاله ) طيب وش اللي بخدك ( واشرت بمكان تحت عيني اعلم عمر بمكانها ) متهاوش مع احد ؟ سكت شوي ورفع راسه بغرور عمر = ماعليك متهاوش مع بزر رفعت حاجب واحد .. مع بزر ؟ احيان ما افهم على عمر شي .. يكلمني بالالغاز فجأة سمعنا جرس الباب قمز عمر وقام واقف وهو شايل نادر والتفت لي وصارخ علي عمر = خلك لا تفتح الباب ( وجا عندي بسرعة وانحنى علي وعطاني نادر واعتدل واقف واشر علي باصبعه كأنه يهدد ) ابروح اتفاهم معه وياويلك اذا طلعت من الصاله .. خلك مع نادر رديت عليه بسرعة مستغرب من تصرفاته رايد مستغرب = تتفاهم مع مين .. هذا عبد الله يمديه وصل نزل عمر اصبعه مستغرب عمر = عبد الله ؟ وش جابه الحين ؟ نزلت نظري لنادر ولقيته يماغط عيونه يبي يقوم ورفعت راسي للمجنون اللي واقف رايد = تو متصل عليه ... بيسهر عندنا هو والشباب كالعادة ... وش فيك عمر ما انت طبيعي اليوم رجع عمر شعره على ورا وتنهد براحه .. وانحنى علي واخذ نادر مني عمر = رح افتح الباب لهم وجلس على الارض بوضعية التشهد ونزل نادر بالارض والتفت عمر لي فرحان وهو يشر على نادر عمر بفرح = شف شف قااااام ( وانحنى عليه يحبحبه ) ابتسمت وقمت وطلعت من الصاله وسمعت عمر يكلمني بصوت عالي وانا طالع عمر بصوت عالي = اذا دخلتوا لا تخلي الباب فاتح .. سكره معك وقفت عند الباب الداخلي بصدمة .. عمر اكيد خايف من احد بس مين مدري طلعت للحوش وفتحت الباب ولقيت الشباب عبد الله ومشعل ومنصور دخلتهم وعلى طول درعموا للصاله مسرعين .. سكرت الباب مثل ماقال عمر ودخلت الصاله ولقيت الشباب مجتمعين عند عمر الجالس بالارض ومنحنين مثل وضعيه الركوع ويتفرجون على نادر من فوق حشرت نفسي بينهم وضحكت وانا اشوف عيون نادر تدور بوجيه الشباب فوقه ومن ملامح وجهه كأنه يقول سبحان الخالق |
|
|
#35 |
|
|
رد: يمسح الدمعه بشكوى للمبدعه هدوئي
* الجــزء الســابع والعشــرون * * رايد * طلعت للحوش وفتحت الباب ولقيت الشباب عبد الله ومشعل ومنصور دخلتهم وعلى طول درعموا للصاله مسرعين .. سكرت الباب مثل ماقال عمر ودخلت الصاله ولقيت الشباب مجتمعين عند عمر الجالس بالارض ومنحنين مثل وضعيه الركوع ويتفرجون على نادر من فوق حشرت نفسي بينهم وضحكت وانا اشوف عيون نادر تدور بوجيه الشباب فوقه ومن ملامح وجهه كأنه يقول سبحان الخالق سأل مشعل وحنا الى الحين راكعين ونطالع الحلو الصغير وعمر جالس مشعل = وش سميتوه ؟ رفع عمر راسه لمشعل وجاوبه بفرح عمر بابتسامة = نادر استغرب عبد الله ومنصور اللي عارفين اسمه من سامي منصور مستغرب = نادر ؟ بس سامي علمنا انهم سـ و قاطعه عمر عمر = ماعليك من سامي .. اسمه نادر وبس ( واشر باصبعه لنا يهدد ) أي واحد منكم يقوله فارس ياويله تنهدت و جلست على الارض بجنب عمر وعيوني على نادر وابتسمت وانا اشوفه مقيد بربطة المهاد وكأني اذكر دانه كانت امي تقيدها كذا اشرت باصبعي على الرباط وسألت الشباب رايد = هم الحين ليش يربطون الرضيع ؟ رد مشعل وهو يجلس على الارض متربع عند راس نادر ومقابل عمر مشعل يستهبل = يخافون يهج هاهاهاها ورديت عليه باستهبال رايد = ههه بايخة عمر مستغرب وعيونه على نادر عمر = ايه والله جد ليش مربطينه ( ومد يده ) ابفكه وبدا يحل عنه الرباط وبعدها ابعد اطراف المهاد عنه .. وضحكنا كلنا وحنا نشوف نادر يتمغط بجمسه الصغير او ماتحرر من المهاد قطبت حواجبي وعيوني ببطن نادر الكاشف سأل عمر مستغرب عمر = هذا وش ؟ و قرب وجهه يتأمل شكل السر المخيف ضحك عبد الله وهو يجلس على الطاولة الصغيرة ورا مشعل ومتركي على اكتاف مشعل ويتفرج عبد الله = وين جايبه انت ياخبل هههههههه هذا حتى سره ماطاح ههههههههه التفتت لعبد الله وكملت متضايق من خبال عمر رايد = لا ويقول بيخليه على طول ( والتفتت لعمر اللي الى الحين منحني و يتأمل السر ) وش تطالع انت .. عمر رجعه ياخي لجدتك والله صعب تخليه هنا اعتدل عمر جالس وهو الى الحين كأنه مستغرب ورفع نظره لمشعل اللي جالس قباله عمر بذهول = تصدقون شباب اول مرة اشوف سر رضيع ( ونزل نظره لنادر وكمل ) وبعدين حاطين مشبك ملابس عليه ... مايعوره ؟ ضحكت بقوة على التشبية وضحكوا الشباب مثلي رايد = هههههههههههههههههههههههههههههه هههههههههههههههههههه هه حلوة مشبك ملابس جلس منصور على الارض بجنب عمر من الجهه الثانية ودخل اصبعه بيد نادر الصغيرة منصور مستغرب = صدق عمر هذا اول مرة تشوفه ؟ .. انا شفته باخواني الصغار رايد = وانا بعد عبد الله = حتى انا مشعل = انا شفته بعيال اخواتي طالعنا عمر واحد واحد عمر = ايه وش عليكم .. لكم اخوان .. انا والله هذا اول مرة اشوفه ( ونزل نظره لنادر ) طيب متى يطيح ذا ؟ استغل عبد الله هالنقطه وكمل باستهزاء عبد الله = مدام انك اول مرة تشوفه .. وشوله تجيبه عندك اجل ؟ رفع مشعل راسه لعمر وكمل يأيد عبد الله مشعل = الصراحة ماصدقت يوم علمنا عبد الله .. بصحوك انت تبي تعتني فيه .. كيف بترضعه وكيف تغسله طالعت عمر وكملت حسب اللي اذكره بدانه وامي رايد = ايه وبعدين اذكر امي الله يرحمها احيان اشوفها تجلس للفجر عشان تنوم اختي دانه .. وبعدين تعال انا اداوم وانت تدرس وشلون بتنعتيبه ذا ؟ عصب عمر علينا عمر = وش فيكم انتم علي ( والتفت لمشعل معصب ) رضاعه ماتحتاج شي .. احطها بفمه وخلاص ( والتفت لي ) وانت اذا كنت خايف على شغلك هالكثر لا تخاف ماني محتاجك بشي .. اخوي انا اعرف ادبره كمل منصور منصور = وتعرف تغسله ( وضحك مستهزي ) التفت عمر له وعصب اكثر عمر بعصبية = ايه اعرف ( وطالعنا واحد واحد وهو يشر علينا باصبعه يهدد) اسمعوا عاد نادر هو اللي داخل وانتم اللي برا شهقت وسكتنا كلنا وحنا نطالع عمر بصدمه لفيت وجهي بضيق ... اطلع برا وين .. انا مالي مكان .. الشباب لهم بيوت ماهم محتاجين .. بس انا وين اروح ... ابلع العافية واسكت احسن .. عمر عنيد وماهو سامع مني النصيحة سمعت منصور يرد على عمر منصور = وش فيك عصبت علينا .. شوي وتطردنا رجع عمر شعره على ورا بضيق وتساند على الكنبة اللي وراه عمر بضيق = انا ادري عنكم .. توني متهاوش مع عيال عمي ببيت جدي والحين تجون انتم وتزيدون علي .. طالعت وجه عمر مستغرب .. متهاوش مع عيال عمه ؟ .. اهاا اجل هالكدمة الحمرا اللي تحت عينه من احد اهله هناك مديت اصبعي واشرت على الكدمة بوجهه و سألته رايد = اجل هالضربة منهم ؟ حط عمر يده على الكدمة عمر = ايه تهاوشت مع معاذ طالعنا بعض انا والشباب بصمت وبعدها التفتنا لعمر منصور = انت ومعاذ خلقه تتهاشون .. الحين عاد صار عندكم سبب عمر = والله ماعلي منه ولا حرك شعره من راسي .. وماعلي من احد .. حتى جوالي خليته فوق .. ازعجوني .. كلهم يتصلون علي حتى معاذوه الخايس .. يبوني ارجعه لهم ... بس انا ماعلي من احد تنهد عبد لله وسأل الخبل اللي بجنبي عبد الله = طيب ياللي ماعليك من احد .. علمنا كيف بتروح للجامعة ؟ سكت عمر شوي وهو يطالع عبد الله ويفكر .. شوي وحرك يده بلا مبالاه عمر = هالاسبوع ماني رايح وبعدها يحلها الله منصور = هيه يكون بعلمك الاسبوع اللي راح يالله اخذت لك من الجامعة عذر .. يوم تدخل المستشفى عطوك اجازة مرضية شهر .. ويوم وفاة امك الله يرحمها قلتلهم انك تعبان ويالله وافقوا يعطونك اجازة اسبوع .. الحين عاد من وين اطلع لك عذر ؟ علق مشعل يتطنز مشعل = اطلب له اجازة امومة هههههههههههههههههههههههههههههه ه ضحكنا كلنا بقوة على تعليقه التفتت لعمر وانا اضحك ولقيته كأن وجهه حمّر من الفشلة ورد علينا معصب عمر معصب = الحين انتوا وش تبون .. انا راضي وش عليكم انتوا اخذت نفس احاول اسكت عن الضحك وسألته لما تذكرت اني ماشفت معه شي يوم دخل علي الصاله رايد = احم ... صح عمر .. انا مااشوف معك شي .. وين ملابسه .. رضاعته شهق عمر يوم تذكر والتفت لي عمر = صح تصدق نسيت ( وقام واقف كأنه مقروص) ابروح اشتري له رضاعه الحين وملابسه بكرة ... بس آآآآ ( وسكت ) رفع منصور راسه مستغرب منصور = بس وش ؟ عمر = بس من وين يشترون الرضاعة ماعمري شفتها بالبقالات ولا بالسوبرماركت ابتسمت ابتسامة وسيعة ورفعت راسي لعمر اطالعه اشوفه يمزح والا جاد هذا على هالسؤال الغبي اخذ منصور نادر وحطه بحظنه ورفع راسه لعمر وهو يضحك منصور = ههههههه وش بقالته الله يرحم امك .. رضاعته وحفايظه تلقاها بالصيدلية .. مر الصيدلية الحين واشتر عمر = اهاا ( وكمل بضيق ) وش دراني انا ( وبهمس ) ماتعرفون تجاوبون بدون ضحك .. تذكرت امي يوم كان ترسلني للصيدلية اشتري لدانه ... كانت امي تعطيني ورقة فيها رقم مدري حجم للحفايظ .. ناسي الحين بالضبط .. اللي اعرفه لهم احجام رايد = عمر تعرف حجم الحفاظة المناسبة لنادر ؟ قطب عمر حواجبه مستنكر عمر = لهم احجام بعد ؟ تضايقت وانا اطالعه .. طلع هذا ميييييييح .. كلش مايعرف شي والصراحة عصبت متنرفز رايد بعصبية = انت طلعت ماتعرف شي ابد .. وشوله ماخذه عندك اجل ؟ ياخي وده عند جدتك وريح عمرك عمر = وانا وش عرفني .. من يوم طلعت على الدنيا ماعمري شلت رضيع بيدي .. عبد الله = ياخي شيله ماقلنا شي .. بس لا تحطه عندك و انت عليمي بهالامور مشعل = رجعه لجدتك .. واذا كنت خايف على العجوز من التعب وده لاخوانه عمر بصراخ = انا اخوه بعد مو بس هم رد عبد الله ياستهزاء متنرفز من غباء عمر وعناده عبد الله بسخرية = يعني ما يصير اخوك الا اذا صار عندك بالبيت .. غيره مايصير اخوك مثلا ؟ ضحك مشعل ومنصور عليه باستهزاء حرك عمر يده متضايق عمر= يوووووووه .. ماعلي منكم ( والتفت لي ) امش معي رايد نروح نشتري ( وسكتت شوي يفكر ) طيب وش اقول للصيدلي عشان يعطيني حجم الحفايض اللي تناسبه توني ادري ان لهم احجام اصلا .. والا اخذ معي نادر يشوفه ؟ سكتت شوي افكر بس منصور رد قبلي منصور = خذه معك احسن هز عمر راسه بايه والتفت لي عمر = يله رايد قم وانحنى على منصور واخذ نادر منه واعتدل واقف وهو يكلمني عمر = يله انت ماقمت .. بسرعة تأففت وقمت واقف ورحت لثوبي الطايح على الكنبة ولبسته والتفتت لعمر ولقيته جالس على الكنبة وبحظنه نادر ويعدل عليه المهاد وبعد ماخلص تعديل اخوه قام وهو شايل نادر .. والرباط الى الحين طايح بالارض اخذ منصور الرباط ومده لعمر يتطنز منصور باستهزاء = تعرف تربطه هههههههههه طالعه عمر وهو واقف ... شوي وركل يد منصور برجله عمر = اخوي ما احد يربطه ( والتفت لي ) يله احتريك بالسيارة وطلع ضحك عبد الله وهو يعلق على عمر عبد الله = كأن مااحد صار له اخو غيره ههههههههههههه ... سأل مشعل بجديه مشعل = من صدقه هذا ؟ رديت وانا متنرفز ومعصب رايد = الله يعيني على عقليته ومشيت وطلعت من الصاله ورا عمر بس سمعت عبد الله يعلق علي بصوت عالي يسمعني عبد الله = ماما رااااايد البسي عباتك هههههههههههههههههه وقفت شوي .. مب كأنه اهانني .. عصبت اكثر و رجعت منقهر وطليت عليهم ولقيتهم كلهم يضحكون ومشعل مستلقي على ظهره من زود الضحك رايد بعصبية = عبد الله ابلع لساااااااانك لا اتوطى ببطنك الحين وطلعت وانا اسمع ضحكاتهم العالية طلعت للشارع معصب ولقيت عمر جالس بمكان السواق وبحظنه نادر ركبت بمكان الراكب وعلى طول عمر عطاني نادر يبيني امسكه اخذته وحطيته بحظني وانا اتأفف رايد = اففففف ... طيب وشريت اغراضه وبعدين .. وشلون بتدبره هذا .. حتى رضاعته مانعرف نسويها لا انا ولا انت حرك عمر السيارة ورد علي حكيم زمانه عمر = ياخي رضاعة ماتحتاج شي .. اشتري من البقاله حليب جاهز واصبه بالرضاعه واعطيه اياه ( والتفت لي ) شفت كيف سهله مايبيلها بغيت ابكي من غباءه المركب والتفتت له بطفش رايد بملل = بصدقك والا تمزح رد علي وشكله جاد بكلامه عمر مستغرب = أي والله .. ليه وش قلت بعد ؟ رايد = بتعطي رضيع توه مولود حليب مثل اللي نشربه حنا عمر = اجل وش اعطيه ؟ سكتت افكر .. مادري .. امي كانت تعطي دانه من صدرها.. بس عندي علم ان المولود له حليب خاص .. اصلا بالعقل بس مدري وش فيه عمر فاصل مخه بعد ماجاب اخوه عنده رايد بتفكير = مدري .. وش رايك تسأل الصيدلي وتشوف تنهد عمر وسكت فجأة رن جوالي .. طلعته من جيبي والقيت نظره عليه ابو فهد يتصل بك طيرت عيوني مستغرب .. ابو فهد يتصل علي بهالوقت .. ليه .. التفتت لعمر ولقيته يطالع قدام ويسوق .. اكيد متصل عشان موضوع نادر والا وش معنى اليوم يتصل ... بس مااقدر ارد عليه قدام عمر وبعدين صح ليه مايتصل على عمر بنفسه ليه يتصل علي انا سكت الجوال بيدي وحطيته على الصامت .. ونزلت نظري لنادر وابتسمت لبراءته يطالع السقف وكأنه يطالع اللاشي وصلنا الصيدلية القريبة وقبل ينزل عمر سألته رايد = عمر جوالك معك ؟ عمر = لا بالبيت .. رايد = ليه مااخذته معك .. غريبة يعني ؟ حرك عمر يده بلامبالاه عمر = يوم كنت جالس فوق بغرفة امي اهلي كل شوي يتصلون علي ازعجوني .. حولته للصامت وخليته فوق .. ( واشر على نفسه بغرور ) قلتلك انا ماعلي من احد ونادر بيصير معي انا وبس .. يله خلنا ننزل وفتح الباب ونزل تنهدت وانا افكر باتصال ابو فهد علي والا الحين الجوال بجيبي يهتز اكيد هو .. ودي ارد عليه واشوف وش يبي نزلت مع عمر ومعي نادر شايله وافكر بعذر ابعد عن عمر واكلم جده وهو مايدري دخلنا الصيدلية وماكان فيها زباين شرا عمر رضاعه ولهاية وحفايض بعد ماشاور الصيدلي عليه .. وقعدنا نسأل الصيدلي المصري وشلون يسوون الرضاعه بس مافهمنا شي من كلامه الصيدلي = تعمل ماء فاتر و ومعلئة الى معلئتين حليب لدي ( واشر على الرضاعه اللي شراها عمر ) التفت عمر لي شوي وبعدها التفت للصيدلي عمر = حليب وش ؟ مراعي ؟ طير المصري عيونه بعمر وكأنه عصب يحسب عمر يستهبل الصيدلي = ايه مراعي دي ( والتفت لي او بالاصح لنادر اللي بين يدي ) ماليه ام ده والا ايه ؟ رايد = امه الله يرحمها تنهد المصري واعتذر الصيدلي = متأسف ( والتفت لعمر ) لأه .. عن اذنك لحزة ( وراح شوي ورجع ومعه علبه مثل علبة النيدو بس صغيره ولونها ابيض ) الحليب ده .. اهاا .. عدت كلام الصيدلي اشوف انا فهمت والا لا رايد = يعني ماء فاتر وملعقة الى ملعقتين من الحليب هذا ( واشرت على علبة الحليب ) الصيدلي = آه رايد = زين بس وش معنى فاتر ؟ تضايق الصيدلي بس حاول يجاوب ماسك اعصابه المصري = فاتر يعني مويا مش باردة ولا حارة عمر = قل ماء دافي طيب .. لازم تتفلسف يعني أي والله يعني لازم يتفلسف .. التفتت لعمر رايد = يله انت خلنا نمشي عمر = اصبر شوي ( والتفت للصيدلي ) وش بعد ؟ الصيدلي = ايه هوا اللي وش بعد ؟ عمر = لا .. آآآآ .. اقصد متى نعطيه الرضاعة ؟ الصيدلي بملل وبتنطز = ازا شفتو يعيط اديه التفت عمر لنادر وتنهد ... نزلت نظري اشوفه ولقيت الاخ يديه طلعت من ورا المهاد اللي عليه سمعت عمر يسأل الصيدلي عمر = طيب و كم الحساب ؟ حاسبنا الصيدلي واخذنا اغراضنا وطلعنا انا معاي نادر شايله وعمر معه الاغراض ... وجوالي يهتز يجيبي همس عمر وهو يمشي بجنبي عمر = تبي الصراحة بغيت اسأله وشلون يحفظونه بس خفت يعصب علينا ههههه فجأة سمعنا صوت صغير يصيح يبكي نزلت نظري لنادر رافع حاجب رايد = ماصحت الا يوم شفتنا شرينالك وقف عمر قدامي خلاني اضطر اوقف .. وانحنى على نادر وهو يضحك على صوته الصغير عمر = هذا صوته هههههههههههه ياحليييييله اول مرة اسمعه ههههههه ( ومرر اصبعه على خد اخوه ) ومشى قدامي يفتح سيارته .. ركبنا ونادر الى الحين يصيح وانا اهزه ابيه يسكت رايد بضيق = مدري وش تبي بعوار الراس كان خليته عند اهله عمر = انا اهله ومااحد احق فيه غيري ( واخذ الكيس وطلع منها اللهاية وفك عنها القرطاس وحطها بفم نادر ) خذ ياحلو .. هذي بتلهيك لين اسوي حليبك التفتت لعمر بضيق رايد = الحين وشلون نسوي رضاعته احس مافهمت شي على المصري التفت عمر لي يطالعني بصمت .. فجأة حط يده على ركبتي يترجاني عمر = رايد يكفي الشباب كل شوي يضحكون علي .. اذا ماوقفت معي انت من بيوقف معي ؟ تكفى رايد ساعدني مابي يصير لهم عذر ياخذون اخوي مني تنهدت ولفيت وجهي عنه وش فيها اذا اخذوه منه ... هم اهله واهل عمر بعد ليش معتبر نفسه غير .... صعب نعتني فيه انا وهو بس .. انا ادوام وعمر يدرس بس وش يفهمه هذا ... عنيد ومو راضي يفهم ابعد عمر يده عن ركبتي وكمل عمر = تدري ان معاذ يبي يوصلها للمحكمة .. يبي ياخذ نادر مني بالقوة التفتت له بصدمة رايد بصدمة = المحكمة ؟ عمر = ايه المحكمة ( وكمل بتحدي ) بس والله ماعلي منه .. هو له اخوان وش معنى متمسك بنادر بالذات .. نادر اخوي انا تنهدت وطالعته احاول افهمه على قد عقله رايد = ياعمر من وين تفكر انت .. هو اخوك حتى لو كان عندهم .. واذا كنت تبي تشوفه تقدر تشوفه وهو عندهم مااحد يقدر يمنعك صدقني .. وبعدين ترا اهل نادر اهلك بعد شغل عمر السيارة وهو معصب مني عمر بعصبية = افففففف .. مااحد فاهمني ( والتفت لي يصارخ ) والله لو تقولون من هنا لبكرة نادر عندي وبسسسسسس نزلت نظري لنادر ولقيته يرضع اللهاية ويطالع السقف وكأنه مايطالعه هالولد جا وجاب معه المشاكل سبحان الله ... عيال عم وتوصل معهم للمحكمة وصلنا البيت ودخلنا الصاله .. انا شايل نادر وعمر شايل اغراضه ولقينا بالصاله الشباب ماعليهم الا ملابسهم الداخليه مشعل منسدح قدام التلفزيون ويتفرج .. ووراه عبد الله جالس على الكنبة ولاب توب عمر بحظنه ومنصور بجنبه اول مادخلنا عليهم فطسوا ضحك ومشعل يأشر على عمر او بالاصح على اللي مع عمر ( الحفايض بشكلها المميز ) مشعل وهو يشر = هههههههههههههههههههههههههههههه هههههههههه عصب عمر وحذفها على وجه مشعل بقهر عمر بصراخ = انت من أي شي تضحك واخذ الاغراض الباقية اللي معه ودخل المطبخ معصب تنهدت وجلست على كنبة منفردة ونادر معي يرضع اللهاية و ساكت التفت منصور لي بجديه منصور = احس عمر ذا فيه نفسيه .. واضح انه متفشل وهو يسوي شغل الحريم وفوق هذا معنّد رايد بضيق = خلاص شباب خلوه براحته .. الله يعيننا بس نعتني بهالبزر عبد الله وهو يطقطق = مااعتقد ان السالفة بتطول معه جيت ابقول لهم عن تهديد معاذ بس سكتت لاني ماادري عمر قاله لي كـ سر والا عادي عنده اعلم الشباب اهتز جوالي مرة ثانية وعلى طول تذكرت ابو فهد صح فرصة اكلمه قمت وعطيت منصور نادر وطلعت من الصاله ومريت المطبخ اشوف عمر وش يسوي .. مابيه يدري اني ابكلم جده دخلت المطبخ ولقيت عمر واقف بنص المطبخ وبيده كوب زجاجي فيه ماء ويتحسس برودته وكأنه محتار رايد = وش فيك ؟ رفع عمر نظره لي ورفع الكوب يوريني اياه عمر = صبيت ماء ابيه لنادر بس احسه بارد والصيدلي يقول لازم ماء دافي .. مشيت ووقفت قدامه واخذت الكوب منه اتحسسه .. بارد شوي كمل عمر يسأل عمر = عادي اعطيه الماء كذا ؟ رايد = اظن قصده لازم تحط ماء بارد وحار لين يصير دافي عمر = انت تقول انك تذكر دانه ... علمني وشلون كانت امك تسوي الحليب ؟ سكتت شوي رايد = اول شي امي كانت تعطي دانه حليب طبيعي .. ثاني شي متى قلت لك اني اذكر دانه ؟ عمر = انت قلته .. يوم شفنا سر نادر قلت انت والشباب انكم تذكرون اخوانكم الصغار ( وزفر ) شكلي مالي الا الشباب اسألهم يمكن احد يعرف كيف نسوي الحليب انا بعد مثلك احس مافهمت على الصيدلي رايد = طيب ليه ماتتصل على جدتك وتسألها ؟ عمر = اوووووه .... لااا .. توني متهاوش معهم ( واخذ الكوب مني ومشى وهو يكمل ) ابسأل الشباب وطلع من المطبخ طلعت وراه وشفت عمر يدخل الصاله وانا وقفت بالممر وسمعت عمر يكلم الشباب عمر = ابسأل واللي يضحك والله بهالكوب على راسه ابتسمت يوم سمعت الشباب ضحكوا قبل عمر يقول شي طلعت الدرج وانا اضغط الجوال على رقم ابو فهد ورفعته لاذني ... شوي وجاني صوته ابو فهد = الووو رايد = السلام عليكم ( دخلت غرفة عمر وغيرت رايي على طول وطلعت منها ووقفت بالممر) ابو فهد = وعليكم السلام ياهلا يارايد .. وشلونك رايد = الحمد الله بخير .. كيف صحتك ؟ ابو فهد = طيب .. انت ببيت عمر ؟ حسيته مستعجل رايد = ايه ابو فهد = اتصلت عليك ابي اسألك عمر بالبيت ؟ .. نتصل عليه ولا يرد مثل ماتوقعت متصل علي عشان نادر ... رايد = ايه عمر بالبيت ومعه اخوه المولود ( و مشيت متوجه لغرفة ام عمر بالمكان اللي جلس عمر فيه اول ماجا ) سمعت ابو فهد يتنهد وكمل متضايق ابو فهد = الله يصلحه ويهديه تهاوش مع عيال عمه واخذ هاليتيم وطلع ... لا حول ولا قوة و الا بالله دخلت غرفة ام عمر وشفت جوال عمر على السرير .. اخذته القي نظره عليه وانا ارد على ابو فهد رايد = بتخلون الولد معه ؟ ترا عمر يدرس وانا اداوم ياعم .. واللــ وقاطعني ابو فهد ابو فهد = لا لا .. اكيد ماحنا مخلينه معه .. حنا خايفين على الوليَد وعمر ماهو سامع منا .. تشاورنا وقلنا نخليه معه الليلة بس ابتسمت بفرح ... يعني مب جالس نادر عندنا مثل ماهو معنّد عمر .. حلو كذا حلو الصراحة ارتحت رايد براحة = يعني بكرة بتجون تاخذون المولود من عمر ؟ ابو فهد = ايه نبي لين عمر يطيب خاطره وبكرة ان شاء الله ابمركم واكلمه وعساه بس يسمع مني .. ابيك ياولدي تقنع عمر ان اللي سواه خطأ واخوه موجود متى مابغاه يشوفه اما يجلس عنده لا رايد = كلمته ياعم بس ماش عمر عنيد ابو فهد بتنهيده = الله يصلحه بس .. ( وهمس يكمل ) متعبني هالولد سكتت ماعندي رد .. شكل عمر هذا مطلع ريحة جده ابو فهد = المهم انتبهوا للولد .. حتى عمر الله يصلحه طلع من عندنا ما اخذ لاخوه شي .. شــ قاطعته اطمنه رايد = تو جاي عمر من الصيدليه وشرا اغراض لاخوه .. تطمن ياعم ابو فهد بتنهيدة = الله يطمنك ياولدي .. بكرة ابمركم واكلمه .. يله مع السلامة رايد = في امان الله وسكرت عنه ... حسيت ابو فهد من صوته مهموم .. المفروض على عمر يريحه مب يتعبه معه وبعناده تذكرت ان جوال عمر بيدي ... القيت نظره عليه ولقيت 145 مكالمات لم يرد عليها واااو شكله عمر مطنش ولا عليه .. وابتسمت لما تذكرت كلام ابو فهد .. زين والله اجل نادر مب مطول عندنا .. طلعت من الغرفة وانا مبتسم فرحان اثرهم يبون عمر لين يطيب خاطره .. هههههههههه ياحليله عمر يضحك نزلت تحت ودخلت الصاله ولقيت عمر جالس على الكنبه وبحظنه نادر يعطيه رضاعته و يتأمله.. ومشعل الى الحين بمكانه منسدح قدام التلفزيون ويتفرج .. وعبد الله يطقطق بالاب توب ومنصور بجنبه التفتت لعمر مستغرب رايد = عرفت تسوي الحليب ؟ رفع عمر راسه لي عمر = صبيت على الماء البارد ماء حار شوي لين صار دافي ( ونزل راسه يتأمل اخوه وهو يرضع ) شفت عبد الله يولع سجارته وعينه على الاب توب مندمج والمسكين اول ماسحب نفس منها صارخ عليه عمر يوم انتبه عليه عمر بصراخ = يااااويلك اذا جتني ريحتك ... طفهااااااااا رفع عبد الله نظره لعمر مستغرب وفمه فيه الدخان توه مانفثه ابتسمت ماامداه يولعها الا استلمه عمر كمل عمر هواشه لعبد الله وهو الى الحين ماسك الرضاعة لنادر عمر بعصبية = ابلع دخانك .. خلني اشوفك تطلع الدخان منك .. ابلعه ناوي تكتم اخوي برييييحتك .. خلك بس تطلع الدخان براااا .. ابلعه ضحكت انا ومنصور على شكل عبد الله اللي مسكر فمه ويطالع عمر ومتورط بالدخان اللي بفمه بس غصب عنه نفثه برا عبد الله = بسم الله خرعتني طيب ( وطفا السجارة بغطا الاب توب وعيونه على عمر وكمل معصب ) يااخي وشفيك ... دايم ندخن ببيتك ماقلت شي منصور وهو يضحك = عموووور خل نادر يتعلم من الحين هههههههههههه همس عبد الله يتطنز والى الحين متضايق عبد الله بضيق = صار عنده اخو وبلشنا جلست بجنب عمر على الكنبة وقبل اجلس ارسلني عمر عمر = وانت رح هااات عشا جوعاااااان اعتدلت واقف وزفرت رايد = اففففففف لازم انا ؟ عمر = مافيه غيرك يقدر يطلع ويدخل .. لو ابرسل هالمجانين الثلاثة شافهم ابو احمد .. رح بس هات عشا .. معك فلوس والا اعطيك ؟ رايد بضيق = اففففف معي ( وطلعت من الصاله وانا مالي نفس اروح ) اخذت سيارة عمر ورحت للمطعم وانا انتظر العشا وقفت بالشارع اشوف الرايح والجاي تحققت امنية عمر وصار له اخ .. متى تتحقق امنيتي واطلع انا واخواتي ببيت لحالنا .. احرار بدون تسلط عمي علينا متىىىىىىىى اليوم الصباح رحت للبنك اسأل عن القرض وياليتني مارحت .. ما استفدت الا القهر والغبن .. سألت الموظف عن القرض وقال البنك مايعطي الا الموظف الرسمي او موظف حكومي وانا موظف بسوبرماركت وبراتب ضعيف ويمكن استمر عندهم ويمكن مااستمر .. على حسب مزاجهم وفوق هذا يوم عرف الموظف عن عمري قال لا .. انت تحت السن القانوني كرهت هالكلمة .. انا مدري اللي تحت السن القانوني مالهم رب ؟ يبونه يموت مثلا والا وشسالفة .. أي واحد تحت السن القانوني يقولون له لا لا لا وطلعت من البنك وانا منقهر ... حتى الكرت العايلة مع عمي ... مااقدر اسوي شي مدري وش اسوي .. ودي استاجر باسرع وقت ... انتبهت على اللي يناديني وتنهدت واخذت طلبي ورجعت للشباب نكمل سهرتنا وعلى الساعة 1 اخر الليل رجعوا الشباب لبيوتهم .. بكرة خميس ماعندهم دوامات بس انا عندي دوام ولازم انام وعمر يقول تعبان الى الحين من اثر الحمى ويبي ينام هو الاخر .. وبعد ما انبح صوتي وصوت عمر وحنا نترجاهم يطلعون ويخلوننا ننام بسلام .. وبعد حب خشوم وترجي طلعوا الساعة 3 اخر الليل تحركت وانا نايم منزعج من صوت نادر وهو يبكي .. جلست بضيق وانا افرك عيني نعسان .. الصاله ظلام الا من نور خافت جاي من المطبخ والممر .. وبصعوبة فتحت عيني ادور على نادر هالمزعج .. ولقيته بالارض يبكي و المهاد اطرافه كاشفه عنه ولا عليه لا لحاف ولا شي .. وبجنبه عمر بملابسه الداخليه و منسدح على ظهره وغاط بالنوم وساحب اللحاف عن اخوه وهو مايدري انا نمت قبلهم .. اللي اذكره قبل انام ان عمر كان جالس بالارض و يعطي نادر رضاعته .. ولا ادري متى ناموا قمت عن الكنبة متضايق .. وراي دوام ابي انااااااااااام .. اففففففف وهذا وهو ليلة بس مزعجنا هالنادر وشلون لو استمر عندنا ... ولعت اللمبات ورجعت و جلست بالارض عند نادر وشلته وانا نعسان وانادي عمر ابيه يقوم يسكت اخوه رايد بضيق = عووووووومرررر قم نااااادر يصيح شميت ريحة خايسه ونزلت نادر بالارض على طول وسديت خشمي عن ريحته رايد = اففففففف بعد مديت يدي وحطيتها على صدر عمر اهزه رايد = عمرررر قم ( وصارخت ) ياخي قم سكت اخوك تحرك عمر وهو نايم وابعد يدي عنه وانقلب على جنبه معطيني ظهره نزلت نظري لنادر الى الحين يصيح وشكله من زمان وهو يبكي مديت يدي ومسكت كتف عمر ولفيته لي بقوة وخليته يرجع ينسدح على ظهره رايد بعصبية = عووووومممررر ماتسمع انت .. نااااااااااااااادر يصيييييييح اخيرا انتبه عمر ويالله يالله فتح عيونه يستوعب وجلس متربع وهو متضايق ونعسان عمر بكسل = افففففففففف ( واخذ نادر وحطه بحظنه وكمل وهو مغمض عيونه من النعاس ) توني مفرغ قارورة كاملة بفمه وش يبي بعد ( ورفع يده لشعره يتحكحك من الكسل ) رديت عليه وانا متنرفز .. هذا اللي كنت خايف منه رايد = وتراه موسخ ... يالله الحين ورني وشلون بتدبرها طالعني وعينه يالله يفتحها من النوم عمر بضيق = لا تقول ( ونزل نظره لنادر وبعدها رفع راسه لي متورط ) مااعرف.. تكفى رايد غسله انت .. والله توني نمت منه رايد = وانا وش عرفني وبعدين بكرة عندي دوام فترة وحدة الصباح ومانمت الا ساعتين بس ( واشرت على نادر اللي ازعجنا ) ياخي سكته عمر بكسل = والله توني نمت وتعبااااان ( وتلفت يدور شي ) وين لهايته دورت معه ولقيتها طايحة تحت الطاولة الصغيرة .. اخذتها و مديتها على عمر واخذها مني وحطها بفم اخوه .. شوي وشفنا نادر يلفظها وكمل صياااح عصب عمر وصارخ على نادر كأنه يفهم عمر بعصبية = تتشرط انت ووجهك ( وتلفت يدور رضاعته ) وين رضاعته كانت بجنبي قبل انام عصبت من الطفش قرب يذن الفجر وانا مانمت رايد بعصبية = وش فييييييك انت كل شوي مضيع اغرااااضك وقعدت ادور معه عن الرضاعة ولقيناها تحت البطانية فيها حليب شوي .. اخذها مني عمر يطالعها ماله نفس يسوي حليب جديد عمر = يوووووه لازم الحين اقوم اسوي ( ونزل نظره لاخوه وهو يبكي ) ماتعرف تصبر للصبح .. افففففف وقام وهو شايل نادر والرضاعة معه وطلع من الصاله تنهدت وانا اطالعه مثل ماقال عبد الله .. ماراح تطول السالفة معه .. هذا وهي ليلة وحدة وتعب معه .. الحمد الله ان وراي دوام بكرة عشان اتعذر ولا اساعده .. خله يعرف غلطته ويرجع الولد بمكانه الصحيح قمت بسرعة وانسدحت على الكنبة الحق على النوم قبل يذن ربع ساعة وشفت عمر يدخل وملابسه الداخليه مبلله ومعه نادر عاري بالكامل و مغسول .. نزله بالارض على البطانيه وهو كأنه يهاوش نادر عمر بعصبية = خلك تعيدها بس وطلع بسرعة من الصاله رفعت راسي اضحك على شكل عمر .. والتفت لنادر وهو الى الحين يبكي ورجعت انسدح احط نفسي نايم وفاتح نص عين احتري عمر يجي واشوف وشلون بيتصرف رجع عمر ومعه مهاد نادر ورضاعته ومر على طاولة التلفزيون واخذ وحدة من الحفايض مسكت نفسي لا اضحك وانا اشوف شكل عمر وهو يعتني باخوه ... شكله غلط وفوق هذا يكابر جلس عمر بوضعية التشهد عند رجلين نادر الصغيرة .. واخذ حفاضته وقعد يقلبها بين يديه متورط .. شوي ورفع راسه يشوفني نايم والا لا عمر = رايد نمت .؟ مارديت عليه حاط نفسي نايم تنهد ونزل نظره لنادر وسمعته يهمس وهو يحط يده على صدر نادر كأنه يواسيه عمر بحزن = الله يرحمك يمه وكمل شغله بصعوبة من جهه نعسان ومن جهه مايعرف ومن جهه نادر مستمر يبكي ويتحرك واجد جلس عمر متربع ساند ظهره على الكنبة اللي وراه وحط نادر بحظنه ولف عليه المهاد واخذ رضاعته وهو يتحسسها بيده .. عمر بضيق = اففففففففف بااارد ... نسيت احط عليه ماء حاااار ( ورفع راسه لي يطالعني ) راااااايد قم حرر ماء .. عاجز اقوم وبي نووووووووووم مارديت حاط نفسي نايم عمر = رااااااااااايد مارديت عمر بضيق = يووووووووه .. و قام وهو شايل نادر واخذ الرضاعة معه وطلع من الصاله طالعته وهو يطلع .. انت اللي جبته لنفسك ياعمر تحمل اللي يجيك و غمضت عيوني احاول انام قبل يذن ونمت وانا ماادري الخميس الساعة 6 صباحا طفيت المنبة وجلست على الكنبة وانا مكسل ... رفعت نظري لعمر ولقيته جالس بمكانه امس .. ماد رجوله وساند ظهره على الكنبة وراه وراسه مايل ونايم وهو مايدري عن نفسه و بحظنه نادر نايم وعليه مهاده ... ابتسمت غصب عني على شكلهم قمت وطلعت من الصاله بهدوء عشان اصلي وارجع انام قبل وقت دوامي الساعة 8 الظهر .. الساعة 11 ونص .. طلعت من الدوام وركبت سيارة عمر ورجعت للبيت .. وانا داخل الحارة شفت من بعيد سيارة مصعب واقفة عند باب بيت عمر وفيه واحد ماميزته من بعيد وقفت سيارة عمر قدام بيت ابو احمد وقبال سيارة مصعب ونزلت من السيارة وعيني على سعود اللي جالس بمكان السواق وشكله يحتري احد قطبت حواجبي مستغرب .. سعود !!! وش جايبه بهالوقت نزل سعود من السيارة يوم شافني .. وبعد السلام والسؤال رايد مستغرب = ليه جالس بالشارع ( واشرت على البيت ) تفضل حياك سعود = لا لا .. انا بس جاي اوصل جدي يبي عمر وقاعد احتريه يطلع التفتت اطالع للبيت محتار وشلون الحين ... ادخل والا اخليهم براحتهم يتكلمون .. التفتت لسعود اسأله رايد = عشان موضوع نادر ؟ قطب سعود حواجبه مستغرب سعود = نادر .. مين نادر ؟ رفعت حاجب واحد مستغرب رايد = اخو عمر ( وسألت اتأكد ) مو اسمه نادر ؟ سعود مستغرب = لا فارس .. مين قال ان اسمه نادر انلحس مخي الصراحة .. الحين النتفه اللي داخل وش قرروا اسمه .. نادر والا فارس ؟ رايد = عمر مسميه نادر حرك سعود اكتافه بلا مبالاه سعود = حنا نقوله فارس هزيت راسي بايه ولا علقت .. شكل هالولد بيصير مثل بعض الناس اللي لهم اسمين جلسنا انا وسعود على شنطة سيارة مصعب نسولف ونحتري ابو فهد وعمر يخلصون نص ساعة مرت وحنا الى الحين نحتري لين طفشنا واحترقنا من الحر فجأة شفت ابو فهد يطلع من بيت عمر ويالله يمشي ومعه نادر شايله بين يديه وعصاته معلقها على يده نزلت انا وسعود عن شنطة السيارة وتوجهت على طول اسلم على ابو فهد جا سعود واخذ نادر عن جده وهو يسأله سعود = هاه خلاص .. طاح اللي براسه تنهد ابو فهد بحزن ولا رد على سعود والتفت لي ابو فهد بحزن = متى مابغيتوا تشوفونه تلقونه عند عيال عبد العزيز ومايصير خاطر عمر الا طيب .. ومشى متوجه لسيارة مصعب وركب بمكان الراكب ... حط سعود المولود بحظن جده ودار حولين السيارة وركب بمكان السواق .. واشر لي بيده يعني مع السلامة وراحوا تنهدت ودخلت بيت عمر ... الله يعيني اكيد معصب الحين دخلت الصاله .. ووقفت عند مدخل الصاله وانا اشوف عمر قدامي جالس على الكنبة ومنحني وحاط راسه بين يديه و ماعليه الا ملابسه الداخليه تلفتت بعيوني على الصاله . ولقيتها على وضعها .. البطانية طايحة بالارض .. ورضاعة نادر طايحة عند البطانية وبجنبها اللهاية وعند التلفزيون حفايظه مااستخدم منها الا وحده الله يهديه عمر .. متهور و يعاند بدون تفكير .. رجعت التفت لعمر و تنهدت وانا اشوفه .. عمر مكبر السالفة .. اللي يشوفه الحين يقول كأن مصايب الدنيا كلها فوق راسه جلست على الكنبة قباله وعمر الى الحين مارفع راسه مع انه اكيد حاس بوجودي وشلون الحين اواسيه وهو مافيه مشكلة اصلا تنحنحت رايد = عمر ... ترا مـــ ورفع عمر راسه يقاطعني بصرخة عمر = بس خلااااااص مابي اسمع شي بلعت لساني وانا اطالعه ... التفت عمر لمكان الرضاعة وقعد يطالعها بنظرات معصبة فجأة قام منقهر ومشى خطوات وركل رضاعة نادر برجله وضربت الكنبة بقوة وكمل بصراخ عمر = شيل هالاغراض ما ابي اشوف شي بهالبيت.. ( والتفت لي منقهر ) ليش مالي حق بنااااادر ليش .. وش ذنبي اذا خلقني الله وحيد ... ابيه يصير عندي .. ليه مب راضين يفهمووووون لييييييه .. مابي اطل عليه من قترة لفترة .. ابيه يكبر عندي ... ابي احس آآآآ ( ولف وجهه عني وسكت ) طالعته بصمت وانا اشوف انفاسه سريعه من العصبية و ملامحه شوي ويبكي بس ماسك نفسه بالقوة عطاني عمر ظهره يبي يطلع وهو يكلمني عمر = خلني ابي اصير لحالي وطلع قمت ورحت اشوف وين يروح ... وشفته يركب الدرج رايح فوق .. تبعته ووقفت بنص الدرج وانا اشوفه يدخل غرفة امه .. تنهدت ورجعت للصاله وانا متضايق لزعل عمر .. مسكين امس كان فرحان باخوه مرة .. شوي ويصير امه من فرحته فيه والحين احسه يقول يافرحة ماتمت حاس فيه الصراحة |
