 |
  |
|
|
|
|
#36 |
|
|
رد: يمسح الدمعه بشكوى للمبدعه هدوئي
* الجــزء الثــامن والعشــرون * * رايد * الخميس .. بعد صلاة العشا طلعت من المسجد واخذت سيارة عمر ورحت اشتري لي سندويش بسيط من البوفية ورجعت على طول للبيت ودخلت الصاله ووقفت عند المدخل... تنهدت والتفتت اطالع الدرج متضايق عمر مانزل من فوق ابد .. من يوم جا ابو فهد واخذ نادر وهو حابس نفسه فوق وماحبيت ازعجه بس عاد ماصارت من يوم جيت من الدوام الظهر وهو الى الحين فوق رحت للمطبخ اسوي لي شاهي وانا افكر كيف اخلي عمر ينزل .. على الاقل ياكل شي .. اليوم تغديت لحالي مع انه موجود بالبيت .. خفت ادخل عليه الغرفة ويعصب علي ماتوقعت انه بيزعل لهالدرجة عشان رضيع توه جاي .. المشكلة ان الولد بين اهله وناسه مو بين اغراب بس عمر مدري وشلون يفكر انتبهت على الشاهي يغلي وطفيت عنه بتفكير سارح .. جهزت لي كوب وطلعت من المطبخ وبيدي كوب الشاهي وبيدي الثانية السندويشة واول مادخلت الصاله رن جوالي ... نزلت الشاهي على الطاولة الصغيرة وطلعت الجوال من جيب ثوبي والقيت نظره عليه عبد الله يتصل بك رديت رايد = هلا جاني صوت عبد الله بهمس ومستعجل عبد الله = افتح الباب بسررررررررعه لا يشوفونا جاركم بسرررررررعة افتح سكرت بوجهه وانا اكلم نفسي متضايق رايد = اوووووهووووو .. مايجون الا بوقت العشا طلعت من الصاله وانا اكل سندويشتي وفتحت الباب لهم وعلى طول دخلوا مشعل وعبد الله ومنصور منصور وعينه على سنديشتي ويشر علي باصبعه منصور = اكييييييد شريت لنا معك ابتسمت هذولي اللي يونّسون مو مثل الكئيب اللي فوق .. لاطعني لحالي كأننا متزاعلين رايد باستهبال = ولا جا ببالي .. البوفيه قريبه رح اشتر لنفسك وسكرت الباب ودخلنا الصاله نزل منصور ومشعل ملابسهم وبقوا على ملابسهم الداخليه .. اخذ منصور الاب توب حق عمر وجلس بمكاني المغرب يوم كنت العب فيه بس خليته يوم رحت اصلي العشا ومشعل شغل التلفزيون ويدور بين هالقنوات عن الكليبات الغنائية والرقص .. كعادته اخذ عبد الله كوبي وجلس على الكنبة وهو يسألني عن عمر بتطنز عبد الله = وين نادر وامه ( وشرب من كوبي ) برطمت وانا اشوف شاهيي راح لغيري رايد = هييييه حقي من سمحلك تشربه ياخي .. على الاقل استاذن عبد الله = ضيوفك حنا .. المهم بس وين عمر جلست على الكنبة المنفردة رايد = اليوم الظهر جا ابو فهد واخذ نادر ومن وقتها وعمر حابس نفسه فوق التفتوا كلهم لي بصدمة مشعل والريموت بيده وواقف قدام التلفزيون مشعل = كيف ؟ من الظهر ؟ التفتت لمشعل متضايق رايد بضيق = أي والله ... عصب وطلع فوق وعليها الى الحين منصور = وليه ماعلمتنا طيب رايد = ماحبيت ازعجه والله ... اكيد هو متضايق الحين .. وبعدين لو ابكلمه بيعصب علي .. وترا عمر غلطان يوم جاب اخوه واللي سواه ابو فهد صح .. بس عمر وش يفهمه عبد الله = هو صح غلطان بس معقول من الظهر وهو فوق يمكن طلع والا شي وانت ماتدري رايد = لا والله ماطلع .. ( والتفتت لثوبه الطايح على احد الكنبات واشرت عليه ) شف هذا ثوبه نام امس متأخر بعد ماطلعتوا من عندنا وعليها الى الحين مالبسه ( واشرت على بوكه وجواله عند التلفزيون ) وبوكه وجواله هنا ومفتاح سيارته معي توني جاي من البوفيه التفت مشعل لعبد الله ومنصور مشعل = عيال خلونا نروح فوق منصور = برايي تخلونه احسن .. يمكن عرف غلطته قام عبد الله واقف وشرب شوي من الكوب ونزله على الطاولة ... عبد الله = انا ابروح اللي بيجي معي حياه الله وطلع من الصاله نزل مشعل الريموت فوق التلفزيون وطلع ورا عبد الله قام منصور وطلع معهم ... مالي قعده بعد انا قمت وطلعت معهم وانا اكل اخر لقمه من سندويشتي شفت الشباب يدخلون غرفة عمر وطلعوا على طول منصور = مافيه احد اشرت على غرفة ام عمر وانا امشي قدامهم رايد = هنا وطليت براسي على الغرفة وجاني ريحة عطر قوية .. اعتدلت واقف وانا اشوف عمر نايم على السرير تجمعوا الشباب عند الباب وراي وحنا نشوف عمر عليه ملابسه الداخليه ومستلقي على ظهره ووجهه ناحية الباب ونايم بدون لحاف ولا شي .. ولاحظت العطر الصغير حق امه بكف يده الممده على السرير بجنبه ويده الثانية على صدره تنهدت شكله نام وهو مايدري طلعنا عن الغرفة والشباب يسألوني عبد الله = من متى نايم رايد = والله مدري ... انا ماجيته من الظهر .. ماحبيت ازعجه ( وابتسمت لما تذكرت شكله مع اخوه اليوم الفجر ) على فكرة امس مسهره اخوه للصبح ( وابتسمت اكثر ماحد علق ونزلنا تحت .. منصور دخل المطبخ ودخل البقية الصاله وقبل اجلس صاح فيني مشعل مشعل = رح هات عشا رايد = اوووووه دايم اروح انا .. ( وجلست ) وبعدين توني متعشي .. روحوا انتوا عبد الله = حنا يالله دخلنا .. تبينا نطلع الحين بيشوفنا جاركم النحيس ابو احمد تأففت من هالعذر .. ادري مايبون يروحون ويحطون هالسبب عذر لهم رايد = افففففففففففف حاطين ابو احمد عذر انتم عبد الله = اهاا بس يالله رح ( ودخل يده بجيبه وطلع بوكه ومد علي فلوس ) خذ قمت واخذت الفلوس منه وطلعت ربع ساعة و رجعت للبيت ومعي العشا وطبعا مانسيت نفسي وشريت لعمر بعد يمكن يهديه الله وينزل اخر الليل يبي عشا دخلت الصاله وكملنا سهرتنا ومشعل ادوخنا بالتلفزيون من اغنيه لاغنية .. احس بضيق كل ماشفت اننا نقضي ليلنا على هالاغاني اتذكر امي وكيف كانت حريصه انها تبعدني عن كل محرم .. بس شكلي خذلتها مثل ما خذلت مريم ودانه ... شهور وهن يحترني اطلعهن من بيت عمي .. بس صدق من قال عني بزر طلعت جوالي اشوف كم الساعة ولقيتها وحده اخر الليل .. رفعت راسي بضيق لمشعل المنسدح قدام التلفزيون وصارخت فيه وصورة امي قدامي رايد بألم = ياااااخي اقصر على التلفزيون ادوختناااااااااااا التفت مشعل لي مستغرب وهو منسدح ويديه ورا راسه مشعل = ماهو طويل .. لا تقول بتنام بعد .. تراك امس انت وعميران طاردينا وبكرة جمعه مافيه دوامات ( ورجع التفت على التلفزيون ) منصور وعينه على الاب توب ويطقطق منصور = ومشعل صادق التفتت لمنصور متضايق ورجعت التفت لمشعل رايد بضيق = هذا انت قلتها بكرة جمعه .. وشوله فاتح هالاغاني .. ولا اخر الليل بعد رد علي عبد الله يتطنز وهو منسدح على الكنبة وماعليه الا ملابسه الداخليه ويدخن عبد الله = جانا سعد الثاني ( ونفث الدخان من فمه ) تساندت على الكنبة وراي وعقدت يدي قدام صدري متضايق ... ماراح يسمعون مني نزلت راسي وتنهدت ... الله يرحمك يمه كملوا الشباب السهرة لين اذن الفجر .. وعمر الى الحين مانزل ولا شفناه قمت واقف وانا اكلم الشباب المتسدحين .. منصور شبة منسدح على الارض وساند راسه على المركى والاب توب على صدره ويطقطق .. ومشعل منسدح على الارض على جنبه قدام التلفزيون وشكله ينعس يبي ينام وعبد الله منسدح على الكنبة اللي ينام عليها عمر ونايم بسابع نومه رايد = يله اذن قوموا صلووووووووا انقلب مشعل على جنبه الثاني معطيني ظهره ومطنشني التفت منصور لي متفاجئ والسماعات على اذنه منصور منصدم = اذن الفجر ؟ مسرع الوقت ( والتفت لعبد الله متفاجئ ) متى نام هذا اشرت على مشعل بتطنز رايد = عندك مشيعيل بينام هو الثاني جلس منصور وهو الى الحين متفاجئ انه مادرى عن الوقت طالعهم شوي وبعدها رفع راسه لي منصور = خلاص اجل بننام هنا وبكرة كل واحد يروح لبيته رفعت حواجبي رايد = ياخبل هذا حنا بكرة .. وبعدين اقول قوموا صلوا وتقول بننام مارد علي وطفى الاب توب واخذ بطانيتي وجمعها مثل المخده و حط راسه عليها ونام ووجهه ناحيتي رايد = اقوووووووول قم صل .. اذن الفجر منصور بكسل = شوي شوي بس واقوم ( وغمض عيونه مطنشني ) تأففت .. مافيه فايده منهم هذولي .. وطلعت من الصاله .. ورحت فوق اشوف عمر وقفت عند باب الغرفة وتنهدت وانا اشوفه منسدح على جنبه ويده تحت خده ونايم .. دخلت الغرفة ووقفت عند السرير ومنزل نظري واطالعه .. وتوني الاحظ على العطر عند بطنه .. مديت يدي وهزيت كتفه رايد = عمر قم صل مارد ولا تحرك حتى رايد = عمرررر ( وهزيته اكثر ) تحرك وانقلب على ظهره وهو الى الحين نايم .. وكل ماتحرك تحرك العطر معه مديت يدي واخذت العطر ... احسدك الصراحة ياعمر .. عندك شي يذكرك بامك .. ياليتني سويت مثلك واحتفظت بشي لامي .. انا خسرت كل شي بعدها .. البيت والاهل والدراسه والاصدقاء وكل شي حطيت العطر فوق صدر عمر وطلعت اصلي الجمعة ... الساعة 10 الصباح قمت من النوم وجلست وانا احك راسي بكسل .. طالعت الشباب واحد واحد وهم نايمين استغربت هذولي الى الحين ماراحوا لبيوتهم عبد الله نايم على بطنه على الكنبة بمكان عمر .. ومنصور نايم على وضعه الفجر ... ومشعل نايم على الارض بنص الصاله وراسه شوي ويدخل تحت الطاولة الصغيرة .. قمت وانا اتثاوب وطلعت من الصاله ابروح للمطبخ اسوي لنفسي فطور قبل اروح اصلي .. وقفت بنص الطريق اول ما تذكرت عمر صح هذا وينه غيرت وجهتي ورحت فوق .. دخلت غرفة ام عمر ولا لقيته طلعت ورحت لغرفة عمر ووقفت عند الباب مستغرب وانا اشوفه واقف عند السرير ومعطيني ظهره العاري وشعره مبلل شكله توه متروش وماعليه الا بنطلون اسود وشكله ناوي يطلع رايد مستغرب = وين بتروح ؟ التفت عمر لي وهو يربط حزامه .. طالعني شوي متفاجئ مني ومن دخولي عليه عمر متفاجئ = رايد دخلت الغرفة ووقفت بجنبه وانا ابتسم وعدت سؤالي رايد بابتسامة = وين بتروح ؟ نزل عمر راسه يكمل ربط حزامه عمر = لعنيزة طيرت عيوني بصدمه رايد = عنييييييييييزة ... ليه ؟ انحنى عمر واخذ فنيلته السودا اللي على السرير واعتدل واقف والتفت لي بتحدي عمر = ابروح انشب بحلقهم واشوف نادر .. مو هذا اللي يبونه .. خلاص يتحملون وطلع من الغرفة وهو يلبس فنيلته تبعته رايد = ايه بس امس ماخذينه منك .. مسرع تبي تشوفه على الاقل خل يمر يومين وبعدين رح شفه وقف عمر عند بداية الدرج والتفت لي معصب عمر بعصبية = وليش ان شاء الله لازم اخذ يومين عشان اشوف اخوي صادق عبد الله يوم قال .. صار له اخو وبلشنا فيه رايد = ايه بس كذا بتطفّش الناس منك .. كل شوي وانت راز وجهك عندهم ابتسم عمر بنذاله وهو يشر بصبعه لي عمر بابتسامة = وصلت خيييييييييييييير هذا اللي ابيه وعطاني ظهره ونزل الدرج .. تبعته رايد = ايه بس انت ومعاذ ماتتدانون .. اخاف يصير بينكم هوشه اشر عمر بيده بدون مايلتفت لي عمر = خل يطق راسه بالجدار .. ماعلي منه ودخل عمر الصاله ووقف عند المدخل متفاجئ وعيونه على المتسدحين وقفت بجنبه وابتسمت على شكل عمر التفت عمر لي وهو يشر عليهم عمر مستغرب = وش هذا .. رايد بابتسامة = زي ماتشوف تنهد عمر وراح للتلفزيون واخذ جواله وبوكه وهو يكلمني عمر = خلهم يروحون قبل صلاة الجمعه .. مابي مشاكل مع الجيران ( والتفت لي ) وين مفتاح سيارتي ؟ رحت لثوبي الطايح على الطاولة الصغيرة وطلعت مفتاح السيارة وحذفته على عمر طلع عمر من الصاله وهو يعيد علي الكلام عمر = خل العيال يطلعون قبل الصلاة وراح * عمر * اخذت طريق عنيزة وانا اتذكر كلام جدي امس هو بنفسه قال .. جدي = اذا بغيت تشوفه ياعمر تقدر تشوفه ومااحد يقدر يقولك شي وهذا انا ابروح اشوفه واتحدى احد يقولي شي .. واللي بيوقف بوجهي انسفه والله انسفه اخذوه مني بالقوة .. وراح اسوي مثلهم و اشوفه بالقوة ... جدي امس جاي فازع ياخذه مني .. والله لولا تعبه وتعنيه ويترجاني عشان اعطيه نادر .. كان ماسمحت لنادر يرجع لهم ... بس والله عشان جدي وافقت ياخذه عشان جدي بس .. صح نادر امس تعبني وبهذلني بس مع الوقت ابتعود صدقوني مع الوقت ابتعود بس ابي نادر عندي .. ليش يحرموني منه وصلت بيت عمي وماشفت الا سيارة معاذ وسيارة عمي الله يرحمه .. اما سيارة مصعب مااشوفها اخذت نفس .. ياليت يطلع لي سعود .. مالي نفس اشوف معاذ .. ركنت سيارتي ورا سيارة معاذ ونزلت وضربت جرس الباب .. شوي وطلع لي سعود وكأنه تفاجئ مني سعود بصدمه = عمر مديت يدي وصافحته عمر = ايه عمر وش فيك كأنك انخرعت سلمت عليه وبعدها سألته عمر = وين مصعب ؟ سعود = مصعب راح لجداني ابتسمت بفرح .. اجل اكيد معاذ معه عمر بفرح = هو ومعاذ ؟ سعود = لا معاذ نايم .. كشرت بوجهي .. مالت كمل سعود سعود = تبيني اقومه والا بعد بتقول نوم الظالم عبادة مالت عليه .. هذا مانسى عمر = زين عرفت من كيفك .. خله منخمد .. دخلني المجلس ابي اشوف نادر عقد سعود يديه قدام صدره سعود = ماعندنا واحد اسمه نادر عمر = اقول بس لا يكثر ودخلني المجلس .. تعرف انت من اقصد سعود = طيب صبر شوي ابقول لمعاذ اول وعطاني ظهره يبي يروح .. بس مسكته مع ذراعه على طول عمر = تعال تعال تعال .. وليش ان شاء الله بتقول لمعاذ اول .. لا يكون لازم اخذ الاذن منه وانا مادري سحب سعود ذراعه مني سعود = اخاف اعطيك فارس وبعدين تطلع فيه غصب عنا .. مصعب ومعاذ علموني وش سويت انت ببيت جدي يوم تاخذ فارس ذاك اليوم .. تذكر ( وعقد يديه قدام صدره ) عصبت منه ودفعته على ورا وصارخت بوجهه عمر = انقلع اشوف وهات ناااااادر سعود بقهر = لا تدف طيب عمر بعصبية = انقلععععععععع طالعني سعود بقهر وبعدها راح وهو يهاوش ويصارخ سعود = والله لاعلم معاااااااذ تنهدت بضيق .. كان ودي اشوف نادر بدون مشاكل مع معاذ .. بس ولو ماعلي منهم .. هم يبغونها كذا خلاص يصير اللي يبون واليوم يا انا يا انت يامعاذ التفتت للشارع وتساندت على حافة الباب اتفرج و احتري معاذ = اووووووه يالله صباح خير التفت وراي لمصدر الصوت وشفت معاذ جاي وماعليه الا ملابسه الداخليه وشكله توه قايم من النوم وسعود يمشي وراه وقفوا قبالي عند مدخل الباب معاذ = خير ان شاء الله جاينا على هالصبح عمر = جاي اشوف نادر واروح سكتت معاذ وهو يطالعني وبعدها ابتسم ابتسامة جانبيه وغز اصبعه على صدري معاذ = اول شي يالحبيب اسمه فارس .. والاسبوع الجاي او اللي بعده ابسجل اسمه فاااااارس ( وكمل يتطنز ) وش اسمه .. اسمه فااااارس انقهرت من اسلوبه بس بلعتها وكتمتها بصدري عمر = ابي اشوفه معاذ = توه جاي من عندك .. يقالك اشتقتله الحين عمر بعصبية = اشتقتله والا ما اشتقتله مالك دخل .. رح هاته معاذ بتحدي = لأ .. ماني جايبه واعلى مابخيلك اركبه طيرت عيوني بصدمة عمر = وش اللي لا .. على كيفك هو ... مو انتوا قلتوا متى مابغيت تشوفه تعال معاذ = هذا يالحبيب كلام جدي مب كلامي انا .. خبل انا اعطيك فارس عشان على طول تحط رجلك وتاخذه كنك مهبول حسيت دمي يغلي منه عمر ماسك نفسي = معاااااااذ اكسر الشر وهاته سكت معاذ وهو يطالعني وبعدها همس بتعالي معاذ = تذكر ياعمر وش كنت تسوي فيني .. الحين جا الوقت اللي اردها لك قطبت حواجبي مستغرب عمر مستغرب = نعم ؟ وش سويت ... اللي يسمعك الحين يقول اني ماكل حلالك معاذ = تخسي تاكل حلالي .. تذكر وش كنت تسوي ... اخذت مكافأتي شهور واخذت مكافأة مصعب وهو ماله ذنب وفوق مكافأتي اخذت سيارتي .. واذيتني واذيت مصعب .. ضربته يوم زواج ابوي و كسرت نظارته .. وفشيت كفرات سيارته وهو بالجامعة تذكر والا ناااااسي سكتت ماعندي تعليق .. اذكر .. كل هذا اذكره .. بس وش دخله الحين بالسالفة .. همست عمر بهمس = لا تدخل نادر بمشاكلنا ( ورفعت صوتي بألم ) تبي تاخذ حقك مني خذه ماعندي مانع ( واشرت على سيارته الواقفة قدامه ) هذي هي سيارتي قدامك نسم كفراتها ( واشرت على نفسي ) وهذا انا قدامك اضربني .. بس كل شي الا نادر لا تدخله بيننا ابتسم معاذ باستهزاء معاذ = هه يوم شفت المصلحة عندي جاي تتمسكن .. دايم تعاندنا وتمشي كلامك علينا .. وين عنادك الحين ؟ اخذت نفس احاول امسك اعصابي عمر = ادخل وهات نادر واكسر الشر واذا براسك عفاريت نتفاهم بعدين عقد معاذ يديه قدام صدره بتحدي معاذ = اليوم مانت شايف فارس .. تعال بعد اسبوع ... واعتبر هذا وقتك .. من اسبوع لاسبوع تشوفه فار دمي وصارخت معصب عمر = معاااااااااااااااااااذ ولا تحرك شعره من راسه يطالعني بغرور وساكت وعليه ابتسامة تقهر تدخل سعود وهو يكلمني وانا عيوني على معاذ منقهر سعود = اصلا انت اخذت فارس يوم ومرض علينا .. وش مسويبه انت ؟ شهقت والتفتت بسرعة لسعود منصدم عمر بصدمة = ووووششش .. مرض !!!! معاذ = انت مااحد يتحملك ( وابتسم ابتسامة جانبية ) ابوك مات اول ماطلعت انت على الدنيا .. امك عشان تفتك من وجهك هجت من البيت وتزوجت ابوي .. انت الرضيع وهو رضيع ماتحملك مرض على طول يوم شاف خشتك نزلت راسي بألم .. جرحني بكلامه ابوي وامي والحين نادر معاذ = يالله الحين فارق .. ماحنا فاضيلك رفعت راسي لمعاذ وانا احاول اتذكر .. لا يكون ماعرفت اعطي نادر الحليب صح اخذت نفس وسألت معاذ بخوف عمر = وش فيه نادر ؟ معاذ بعصبية = فااااارس اسمه فاااااارس ماتفهم انت عمر بنفاذ صبر = وش فيه ناااادر معاذ بعناد وتحدي = اسمه فاااااارس ( وضرب حافة الباب الحديدي ) واذا مو عاجبك عندك هذا طق راسك فيه عمر بنفاذ صبر = رح هات ناااادر يامعاذ ... لا تخليني اروح الحين واعلم جدي معاذ بتحدي = علمه .. انت اصلا مايهمك احد .. لو يهمك جدي وتعبه كان ماخليته يجيك للبيت وهو مايمشي الا بعصا .. يله رح الحين وخله يجي عضيت على شفتي السفليه وانفاسي سريعه من القهر وغصب عني رفعت يدي ولكمته بقوه صرخ معاذ بألم وتراجع على ورا وحط يده على فمه مسكت فنيلته وانا ادفعه على ورا و دخلت الحوش متعمد عشان الناس ما يشوفونا عمر بصراخ = يااااااااانا ياااااعفاريتك اليوووووووووم ( ورصيته على الجدار وضغطت جسمي عليه ارصه اكثر ) مسك معاذ حلقي وقعد يخنقني ويغز اضافره رفعت يدي فوق ابي اجمل خده بكف .. بس حسيت بواحد جر شعري من ورا بقوة .. تراجعت على ورا غصب عني وانفلتت اظافر معاذ وهو ماسك حلقي بقوة .. وصرخت بألم بعد ماحسيت بلسعة اضافره وحطيت يدي على حلقي بمكان يده التفتت على ورا اشوف سعود اللي جر شعري عمر بعصبية = يااااكلب ( ومسكت ذراعه ورفعت يدي الثانية ابي اضربه ) بس على طول مسكني معاذ مع كتفي ودفعني بعنف خلاني التفت له وبحركة سريعة منه فاجأتني عطاني بكس قوي على بطني ركعت ماسك بطني بألم ... حسيت بألم الجرح القديم رجعلي تساندت على الجدار اللي لصقت معاذ فيه مسك معاذ ذراعي وخلاني اعتدل واقف .. ورصني على الجدار وهو ماسك فنيلتي ويصارخ علي معاذ بصراخ = بعد لك حاجة عندنا وتضرب ... والله ماكبر راسك علينا الا جديييييييييييي ( وسحبني مع فنيلتي وطلعني برا الشارع ) اذلف اذا شفتك امراض الدنيا كلها تجيني اذلف ( وسكر الباب بوجهي ) طالعت الباب وانفاسي سريعة ويدي على بطني احس بالاهانة .. نزلت راسي وانا احس شوي ودموعي تطلع اول مرة انهان .. غمضت عيوني بألم ابوي مات اول ماجيت على الدنيا امي تزوجت وخلتني نادر مرض اول مااخذته عندي ليه مالي حظ بالاهل .. ليه مالي حظ بالاسرة بطني يعووووورني .. رفعت التي شيرت وكشفت عن بطني اشوف الجرح القديم مكان العملية وحطيت يدي على مكان الخياطة رفعت راسي للباب .. نادر صدق مريض والا يكذبون علي اكيد يكذبون .. انا متأكد عطيته الحليب صح رجعت لسيارتي وانا اجر رجولي جر .. اكيد نادر بخير ركبت سيارتي وسندت راسي على الدركسون ويدي على بطني وش اسوي الحين .. اعلم جدي .. اجره معي لعنيزة .. جدي جاني امس وهو تعبان ويالله يمشي .. مابي ادخله بمشاكلي بس هو قال بنفسه ماحد يقدر يمنعك .. وهذا هو معاذ منعني .. اروح الحين وادوخه بمشاكلي واقول تعال شف معاذ تساندت على المرتبه وراي .. وعدلت المراية الامامية قدامي عشان اشوف مكان اضافر معاذ على حلقي حسبي الله عليه .. مخشني .. اخذت منديل ومسحت الدم عن حلقي وشغلت السيارة وحركت وش اسوي ... اخوي وماقدر اشوفه الا من اسبوع لاسبوع ليه طيب .. ماعندي الا هالنتفه ويحرموني منه طلعت من عنيزة وانا مادري وين اروح .. مابي اشوف احد .. ابي اصير لحالي .. مالي نفس اكلم احد شفت طريق الرياض قدامي وانا واقف عند الاشارة تنهدت و غيرت وجهتي وبدل ماادخل بريدة .. اخذت المخرج اللي يطلع على طريق الرياض ورحت للجبال اللي بين عنيزة وبريدة اللي على طريق الرياض مافيه افضل من هالمكان اختلي بنفسي و افكر بهمي بدون ازعاج احد وقفت سيارتي تحت الجبل .. ونزلت وقفلتها بعد ماخليت جوالي بالسيارة وركبت الجبل لين القمة .. ووقفت على حافة الجبل اتفرج على طريق الرياض البعيد شوي والسيارات القليلة الرايحة والجاية الشمس حارة ... بس الهواء فوق الجبل منعش .. تلفتت بعيوني وانا اناظر الارض تحت واشوف المكان حولي فاااااااااضي احس مافيه الا انا بهالدنيا جلست على حافة الجبل ورجولي تتدلى بالهواء معاذ = واعتبر هذا وقتك .. من اسبوع لاسبوع تشوفه تنهدت وانا اتذكر كلام معاذ .. ماراح اسكت.. ومب على كيفك اخوي ماشوفه الا من اسبوع لاسبوع .. المشكلة لو كل يوم بتصير معركة مثل اللي قبل شوي ماراح اتحمل والله ماراح اتحمل وشلون اقول لجدي وهو شايب يالله يمشي .. المفروض نريحه.. بس معاذ شكله ماهو ناوي على خير وانا ماراح اسكت ماراح اسكت يامعاذ نزلت راسي وكلام معاذ يتكرر ببالي معاذ = تذكر وش كنت تسوي ... اخذت مكافأتي شهور واخذت مكافأة مصعب وهو ماله ذنب وفوق مكافأتي اخذت سيارتي .. واذيتني واذيت مصعب .. ضربته يوم زواج ابوي و كسرت نظارته .. وفشيت كفرات سيارته وهو بالجامعة تذكر والا ناااااسي اذكر يامعاذ .. واعترف اني شري واحب أأذيكم .. واعترف لو كانت اخلاقي زينه ماصار هذا حالي رفعت راسي اطالع الطريق البعيد وعلى طول جا ببالي كلام مصعب ورايه فيني مصعب = اترك لنا فرصه نذكرك بخير بعد موتك ... ولو مرة بس ياعمر ولو مرة هزيت راسي بايه ... صح .. معاهم حق .. ماعمري مزحت معهم .. ماعمري ساعدتهم بشي .. ماعمري سولفت معهم مثل أي عيال عم .. دايما كل ماشفتهم احاول ارفع ضغطهم باسلوبي معهم ومع غيرهم انسدحت على ظهري ومددت يدي وغمضت عيوني .. واحس الهواء المنعش يبرد شوي من حرارة صدري ليش اخلاقي زفت ... ليه مااحسن اخلاقي عشان الناس يذكروني بخير لو كانت نفسي طيبه معهم ومع معاذ بالذات كان ماعاندني بهالشكل رفعت يدي وغطيت وجهي ادعي يااااااارب حسسسسسن اخلاقي يااااااااارب ابعد عني الكره والحقد يااااارب حـــ تذكرت صلاتي فجأة وقطعت دعوتي رجعت امدد يديّ على الارض بيأس من حالي وانا الى الحين مغمض عيوني احاول اتذكر متى اخر مرة صليت .. امس طوال اليوم حابس نفسي بغرفة امي ولا صليت لا بالمسجد ولا على الاقل بالغرفة .. ولا جا ببالي اصلا حتى صلاتك تشتكي منك ياعمر ... اخر مرة صليت متى ؟؟؟ مدري .. مدري كيف ادعي ربي وانا اعصيه كيف ادعي ربي وانا حتى صلاة مااصلي انا بالدنيا وحيد وراح اظل وحيييييد قطبت حواجبي وانا مغمض عيوني لما طرا على بالي موضوع كنت افكر فيه من زماااااان بعد زواج امي ونسيته من فترة ابي اتزوج كنت دايم اردد هالكلمة بعد زواج امي ... ابي اتزوج ... ابي اتزوج .. وبعد مادخل رايد بيتي نسيييييييت موضوع الزواج بكبره جلست بسرعة وعيني على الطريق البعيد وانا احس رجعلي الامل بعد ماكنت يائس الزواج بيحل كل مشاكلي بيحل مشكلة وحدتي بيحل مشكلة نادر الزواج بيعطيني الاسرة اللي اتمناها من يوم كنت صغير ضحكت وانا اطالع الطريق وبديت احلم احلام يقظة بيتي بيصير فيه زوجه تهتم فيني وتغسل ملابسي و تطبخ لي اكل بيت وبيصير عندي عيال .. هذا يصارخ وهذا يبكي وهذا يركض وبيصير نادر عندي ببيتي .... حبيبي نادر بيصير عمهم هههههههههههههههههههههههههههههه هه ضحكت مستانس ايه ابتزوج .. ليه لا راتب ابوي كأنه راتب موظف ومع مكافأتي يكفي افتح بيت واسره هههههههههههههههه ايه بيصير عندي اسره كبييييييييرة يوسف وش احسن مني فيه .. هذا هو متزوج ومرتاح .. انا محتاج للزواج .. وش يمنعني مااتزوج هاااااه فجأة طرا ببالي رايد وماتت ابتسامتي على طول بس .. صح ... رايد وين يروح .. مشكلته ماعنده بيت وهو يكره عمه واكيد بيرفض يرجع له ... حركت يدي بالهواء وانا اكلم نفسي رايد يستاجر بيت مو مشكلة ... اصلا رايد بنفسه يبي يطلع عشان اخواته ... رايد واضح انه مستعد يبيعني برخيص اهم شي عندي نادر .. هو اخوي .. رايد مب اخوي ومصيرنا نتفرق بس نادر لا .. متطمن انه ماراح يبيعني مثل رايد اذكره يوم كان يكلم اخته ويقول ابرجع لكم .. ايه رايد همه نفسه وبس .. انا بعد همي نفسي وبس قطبت حواجبي .. وحطيت يدي على ذقني افكر صح ... رايد له اخت كبيرة ... مدري تصلح للزواج والا لا ؟؟ اذكر اول ماتعرفت على رايد .. كأنه قال انها مجنونة او حاجة زي كذا نسييييييييييت ايه .. رايد عدة مرات كان يبي يوديها المستشفى .. شكلها ماتصلح للزواج هذي حتى نسيت اسمها .. ياربي وش كان اسمها بالكرت ... نزلت راسي وانا احاول اتذكر الكرت .. اذكر تاريخ عمرها لما حسبته طلع عمرها اصغر مني بسنتين .. اذكر يوم احسب .. بس المشكلة نسيت اسمها الحين اسمها عادي بس نسيته .. مـ .. مــ .. منيرة ... ايه صح منيرة .. ان ماخاب ظني اسمها منيرة لو اتزوجها بتحل مشاكلي ومشكلة رايد .. ابتسمت بفرح وااااااااو ... هذه اللي يتزوجها بيصير عنده اسره على طول .. دانه ورايد يجون هديه مجانيه معها ضحكت مستانس على تفكيري هههههههههههههههههههه تزوج واربح رايد ودانه مجانا ههههههههههههههههه والله شي حلوووووو بس لحظة .. هذي مريضة مدري مجنونة .. تصلح للزواج ؟ وانا اهم شي عندي ناااادر .. تصلح تربي نادر وتصلح تعطيني حقي كزوج ؟ حركت يدي بالهواء ... اووووووووووه مو مهم اخت رايد بنفسها .. فيه غيرها مليون عندي شرطين بالزواج لايمكن اتنازل عنهم وماراح اتزوج الا بهالشرطين شرط على جدي وشرط على الزوجة رفعت راسي وقمت على طول واقف اضرب الحديد وهو حامي ياعمر ورح كلم جدك نزلت من الجبل وانا الى الحين اكلم نفسي من زمان افكر بالزواج بس ماعمري صارحت احد وكنت خايف من مسألة الزواج ... والحين جا الوقت.. يوسف متزوج .. ومامنعه الزواج عن الدراسه ركبت السيارة واخذت جوالي اشوف الساعة ولقيت 4 مكالمات لم يرد عليها الساعة 12 ونص الظهر فتحت المكالمات ولقيت كلها من رايد تنهدت وعيني على الجوال .. والله مادري عنك وعن اختك يارايد .. شغلت السيارة وحركت وانا اتذكر كلامه بالاستراحة عن اخته رايد = هي تخرجت من الثانوي ... بس ماخلوها تدخل الكلية .. حتى الوظيفة عمي مايبيها تتوظف اختي الكبيرة تغيرت واجد ... صارت ماتفهم اذكر كلامه عنها واذكر عدة مرات يبي يوديها المستشفى شكلها و الله اعلم انها متخلفة عقليا رفعت حواجبي .. كيف بتربي نادر ذي .. لا لا .. شكلي غير اسأل رايد بشكل غير مباشر عنها واذا طلعت صدق متخلفة عقليا .. فيه غيرها مليون اهم شي الشرطين يوافقون عليها والحين ابكلم جدي دخلت بريدة .. نص ساعة وانا موقف سيارتي عن باب جدي ضربت الجرس .. شوي وفتح لي مصعب وهو يعدل شماغه .. تنهدت اول ماشفته وعلى طول رجعلي الم بطني كأني شايف معاذ قدامي مصعب = هلا عمر ( ومد يده يصافحني ) عمر بدون نفس = هلا بك ( وحطيت يدي على صدره ووخرته عن طريقي ودخلت الحوش متعديه بدون ما اصافحه .. كارهه وكاره اخوانه ) وقفت بنص الطريق .. وغمضت عيوني بألم .. توني اعاتب نفسي واعاتب اخلاقي الشينة .. ماتترك طبعك ياعمر .. اخذت نفس .. لازم ابدأ من الحين اغير من طبعي التفتت على مصعب وهو الى الحين واقف عند الباب وشكله زعل لاني طنشت يده الممدودة .. وحاولت ابتسم كمحاولة تعديل اخلاق عمر بابتسامة = آآآآآ ... وشلونك مصعب ؟ رفع مصعب حاجب واحد وهو ينزل يده مستغرب من تغير مزاجي فجأة ومارد علي .. يطالعني وساكت مدري وش اجيب عذر على الحركة البايخة اللي سويتها فيه عمر = آآآ .. وش فيك .. اسالك وشلونك ؟ مصعب مستغرب = طيب .. وش فيك واقف .. ادخل ( واشر على الباب الداخلي ) ابتسمت اكثر ورحت له ووقفت بجنبه وحطيت يدي على كتفه عمر = وشلون نادر ( وتذكرت كلام سعود ) هو صدق مريض ؟ قطبت مصعب حواجبه والتفت لي مصعب = وش دراك ؟ طيرت عيوني بخوف .. عمر = يعني صدق مريض ؟ مصعب = لا يارجال طيب .. بس امس طوال الليل ماندري وش فيه كله يصيح ومايرضع .. واليوم الفجر وديته للطواري وقالوا عنده برد .. وطمنونا .. الحمد الله طيب نزلت يدي وسرحت اهاا شكلي مالحفته زين يوم كان نايم جنبي .. زفرت بضيق .. وفوق هذا يوم غسلته طلعت للمطبخ اسوي رضاعته وهو عاري بدون ما الحفه ياحبيبي ياندوري .. شكلي اخو فاااشل .. مصعب = انت رحت لعنيزة والا كيف ؟ وش دراك ان فارس .. آآآ .. اقصد نادر .. وش دراك انه مريض .. من قالك ؟ ابتسمت يوم صحح اسمه .. والله مصعب طيب .. بس قلبي الاسود اعماني عمر بابتسامة = توني جاي من عندكم ( وماتت ابتسامتي ) بس اخوك عطاني المقسوم مصعب مستغرب = تهاوشتوا ؟ ( ونزل نظره لحلقي يوم انتبه للجروح .. رفع يده وحط ثنتين من اصابعه على ذقني ورفع راسي عشان يشوف حلقي اكثر ) هذا تو ؟ هزيت راسي بايه .. وابعدت يده عني عمر = ايه .. منعني اشوف نادر .. يقول من اسبوع لاسبوع تشوفه ... يرضيك هالكلام ؟ لف مصعب وجهه عني وسكتت عمر = وش فيك .. ليه ماترد .. راضي باللي يسويه معاذ والا لا ؟ مصعب بضيق = وش تبيني اسوي .. انت ومعاذ كل واحد راكب راسه وانا تعبت معكم ومشى يبي يدخل البيت بس مسكته على طول مع كتفه عمر بعصبية = مصعب يعني راضي باللي يسويه معااااذ التفت مصعب لي متضايق مصعب = ماني راضي بس وش تبيني اسوي عمر = مالك كلمه انت مصعب بضيق = معاذ هو المسؤول عن اخواني الحين ( وطالعني ووجهه قريب من وجهي ) وتبي الصراحة معاذ معذور باي شي يسويه معك طيرت عيوني بمصعب منصدم وهمست عمر بهمس = معذور ؟ لف وجهه عني وكمل مصعب = معاذ كارهك .. وانا بعد كل ماحاولت اتقرب لك ابتعدت عني ... ( ومد يده قدامي ) يدي قبل شوي مديتها لك ورديتني .. من يوم كنا صغار وانت ومعاذ بس تتهاوشون كيف تبيه يحترمك والا يسوي أي شي تبيه .. معاذ تراه طيب اخوي واعرفه سكتت وانا اطالعه .. تنهدت و تركته وانا منقهر من مصعب ومن دفاعه عن معاذ صدق لقالوا .. انا واخوي على ولد عمي .. انا وولد عمي على الغريب مشيت ودخلت البيت بدون ماارد عليه مالي الا الزواج يحل مشكلتي .. يارب يسر اموري دخلت الصاله ولقيت جدي جالس على الارض وممدد رجوله و متركي وجدتي جالسة بجنبه على الارض ومتركيه بنفس مركى جدي .. ومها جالسة قدامهم وتقهويهم اول ماشافني جدي نور وجهه وابتسم بفرح جدي بابتسامة = هلا بولدي .. هلا بعمر .. هلا بالغالي ولد الغالي ونفس الشي جدتي .. فرحت فيني وتهلي جدتي = هلا بوليدي .. حاولت ابتسم عشانهم رغم الجرح اللي بقلبي وهمست عمر = السلام عليكم ( ورحت لجدي وانحنيت عليه اسلم على راسه ودرت ورا مها وانحنيت على جدتي وسلمت على راسها ) ورجعت وجلست متربع بجنب جدي وانا محتار كيف اكلمه بموضوعي شوي ودخل مصعب وجلس بجنب مها طالعنا بعض انا ومصعب بصمت .. شوي وقطع علينا صوت جدي يسألني وهو يحط يده على فخذي جدي = لا تكون زعلان مني ياولدي .. انا مااخذت اخوك منك الا عشانك وعشانه التفتت لجدي وهزيت راسي بلا وهمست عمر بهمس = لا عادي جدي .. لا تشيل هم وكملت بيني وبين نفسي .. انا اعرف كيف ارجعه مها = هااااااااااه شكله طاح اللي براسك يوم شفت كيف البزارين يتعبون ههههههههههههههه طالعت مها وسكتت .. احتري مصعب بس يروح وبعدها ادخل بالموضوع واعلمكم بطريقتي كيف ارجع اخوي بعد الغدا وحنا جالسين بالارض و نشرب الشاهي .. تمللت وانا احتري مصعب يروح بس شكله راعي طويله .. جالس بجنب جدتي ويسولف عليهم فجأة رن جوالي .. طلعته من جيب بنطلوني والقيت نظره عليه ابو دمعه يتصل بك تنهدت وانا اشوف اسم رايد.. حتى الاسماء بجوالي يحتاج تغيير .. كل الناس عندي اسميهم بغير اسمائهم .. جدي الراس الكبير .. رايد ابو دمعه .. وغيرهم كثير رفعت الجوال لاذني وانا ارد على رايد عمر = هلا رايد = عمر وينك ؟ عمر = لا تحتريني على الغدا .. انا عند جدي رايد بضيق = اوووووه كان قلتلي طيب .. ماتغديت حسبتك بتجي .. يله يله مع السلامة وسكر بوجهي رفعت راسي وفرحت وانا اشوف مصعب يقوم واقف مصعب = يالله انا ابروح .. تامرون على شي وكلهم ردوا عليه سلامتك وراح .. اخييييييييييرا .. التفتت على طول لجدي وجدتي اللي جالسين بالارض قبالي ومها بجنبي تنحنحت وانا مدري وشلون ادخل بالموضوع .. احس مستحي عمر = احم ... آآآآآآ ... تبون الصراحة .. آآآآآ .. من اليوم وانا احتري مصعب يروح التفتوا كلهم لي مستغربين جدتي مستغربة = ليه وانا جدتك ؟ سكتت شوي وانا اطالعهم ومرتبك ... احاول ادور كلمات مناسبة عمر مرتبك = آآآآ ... ( وسكت شوي وبعدها اخذت نفس ) ابي اتزوج شهقت مها .. وضحكت مها = ههههههههههههههههههههههههههههه التفتت لها منحرج .. واحس وجهي احمر عمر بحرج = ليه تضحكين .. آآآ .. مافيه شي يضحك ( والتفتت لجدتي وجدتي ولقيتهم مبتسمين ويطالعوني بفرح ) جدتي بابتسامة = والله هذي الساعة المباركة ياولدي ( والتفتت لجدي فرحانه ) ولدنا كبر يابو فهد ابتسمت منحرج جدي بفرح = اللي تامر فيه ياعمر يصير .. والله وش كثر فرحتني .. وعمك وعيال عمك ماهم مقصرين نعين ونعاون ياولدي .. تفاجأت بضربة قوية على كتفي مها = احلىىىىىىىىىىىىىىىىىىىىى التفتت لهالدفشة وانا احط يدي على كتفي بمكان ضربتها .. عمر باحراج = شوي شوي .. هذا وانتي بعد ثلاث شهور بتصيرين عروس والى الحين دفشه مها = هههههههههههههههه والله فرحاااااانه ( فجأة تغير ملامحها والتفتت لجدتي تسألها ) يمه بس عبد العزيز وليلى وام عمر الله يرحمهم توهم متوفين سكتنا كلنا .. انا محتاج للزواج .. وحزني على امي مايمنع اني اشوف اللي يناسبني ويناسب اخوي .. وزواجي كله عشان نادر اولا وعشاني انا ثانيا واذا كانت الزوجة اخت رايد بيصير رايد بعد مستفيد انا محتاج للزواج وبقوة تنحنحت ورديت على مها عمر = الحزن بالقلب .. وبعدين الي يسمعك يقول ابتزوج الليلة .. يبيلي شهور على مااجمع المهر .. وانا الصراحة ماني قادر اصبر .. مليت من حياتي .. جاني اخو واخذتوه مني والحين ماتبوني اتزوج وبعدين الحي ابقى من الميت ( والتفتت لمها ) وتعالي انتي هيييييه .. نسيتي نفسك انتي تراك بتتزوجين بعد ثلاث شهور جدي بابتسامة = يابوك ماقلنا شي .. هذا حقك مها = انا زواجي محدد قبل الحادث .. بس صار اللي صار وتأجل .. وبعدين انا فرحانة مرررررة لك ومعك حق الحي ابقى من الميت ( والتفتت لجداني وهي تصفق بيديها بحماس ) انا ابدورله يمه ابتسمت ورفعت يدي بمزح عمر باستهبال = لاااااا .. تكفين الا انتي ضحكوا كلهم وانا اشوف الفرح بعيونهم ... الحمد الله ماعارضوا الفكرة .. الحين عاد جا شرطي في الزواج التفتت لجدي بجدية عمر = بس عندي شرطين فهمت مها غلط مها = هههههههههههه بدينا بالشروط ... هااه قل وش تبي المواصفات .. ممشوقة وعينان زرقاوان هههههههههه عيني على جدي احتريه يقول وش شروطك جدي مستغرب = آمر ياولدي ؟ رفعت راسي وكأني مستعد للهواش عمر = شرطي الاول عليك انت ياجدي .. ابيك توعدني اذا تزوجت تلزّم على عيال عمي يخلون نادر معي ( وكملت ارص على الكلمة ) ببيتي سكتوا كلهم يطالعوني وعيني على جدي احتريه يقول ابشر عمر بترجي = هاه جدي ابي منك كلمة جدتي مستغرب = انت تبي تتزوج عشان اخوك ؟ التفتت لجدتي عمر = عشان نادر وعشاني انا بعد .. انا بصراحة قبل يجي نادر كنت افكر بالزواج بس كنت ساكت مها بنص عين = ايهيييييييي عليييينا ( ولفت يدها على ذراعي ) اجل انت يصلحلك ليان بنت عمك ( وتركتني على طول وهي تضم يديها على صدرها متحمسة ) واااااااااااااو ونااااااااااااااسة .. عاد فارس ياعمري عليه اذا كبر بينهبل .. بيقول لخوياه اختي واخوي متزوجين بعض ... هههههههههههههههه ( وكملت تمزح وهي تشر علي باصبعها ) بيصير شاذ هالولد بسببكم ههههههههههههههههه التفتت لمها وانا افكر ... ليان نزلت راسي .. صح ليان .. تصير اخت نادر .. هذي مناسبة لظروفي واكيد بتخاف على نادر لانه اخوها .. بس وش كبرها هذي حطيت يدي على ذقني افكر .. اللي اعرفه انها اكبر من سعود بس كم عمرها وبسنة كم مدري ؟ اللي ماتت بالثانوي وهي اكبر من اللي اسمها ليان ... اذا كانت الكبيرة بالثانوي اجل هذي باي سنة تصير .. لاتكون بزر بس وكشرت بوجهي .. وبعدين هذي اخت معاذ .. معقول معاذ بيوافق يزوجني اخته وتذكرت كلامه على طول ورايه فيني معاذ = اذلف اذا شفتك امراض الدنيا كلها تجيني اذلف اذا شافني جته الامراض اجل اذا جيته اخطب اخته وش بيجيه يله مو مهم هو .. المهم موافقة جدي .. واذا رفض معاذ يزوجنياها فيه غيرها مليون جدتي = ووش شرطك الثاني ؟ انتبهت على جدتي و رفعت راسي لها عمر = اول شي يعطيني جدي كلمه على شرطي الاول ( والتفتت لجدي ) هاه جدي .. ابي نادر يصير عندي .. مو انتوا اخذتوا نادر مني عشاني وحيد وماعندي احد .. هذا انا ابتزوج والحين مالكم عذر سكت جدي شوي وهو يطالعني وبعدها هز راسه بايه جدي = خلاص ابكلم عيال عمك واقنعهم .. بس ماتاخذه الا بعد ماتصير الحرمة ببيتك ابتسمت بفرح عمر = ايه اكيد .. يعني خلاص توعدني ؟ جدي = خلني اكلم عيال عمك ومايصير خاطرك الا طيب ياعمر ( وابتسم لي ) هاه وش شرطك الثاني ؟ التفتت لمها وبعدها التفتت لجدي عمر = شرطي الثاني عاد على العروس .. شرطي انها تعتني باخوي كأنها ولدها .. واللي ماتوافق على شرطي مابيها مها بفرح = والله عمر ليان مناسبة لك ( والتفتت لجداني متحمسة ) يمه يبه وش رايكم بليااااااااان التفتت لمها اسأل عمر = وليان هذي كم عمرها ؟ مها = بثاني ثانوي رفعت حواجبي .. ثاني ثانوي !!!! جدي بتفكير = يامها الله يصلحك وش فيك مستعجله .. ( والتفت لي ) والله ياولدي انت فاجأتنا .. خلنا اول شي نشوف وضعك .. وخلني اول اكلم عيال عمك بنادر .. واذا وافقوا انك تاخذه .. خطبت لك ليان عمر = شرطي الاول مابيك تقنعهم وبس ابيك تلزّم عليهم بعد .. انا اخوه مثلي مثلهم ( وكملت اترجاه ) جدي تكفى لزّم عليهم .. هم يسمعون منك .. ومايعصونك امر جدتي بابتسامة = وانا لك علي ياوليدي اكلم ام معاذ تقنع عيالها يعطونك اخوك .. انت الغالي ولد الغالي ارتحت لكلام جدتي وتساندت على الكنبة اللي وراي مها = عمور مااعتقد انهم بيرفضون اذا اخذت ليان التفتت لمها وهمست لها منحرج عمر بهمس = تهقين معاذ يوافق اخذ اخته ؟ بس مها ردت علي بصوت عالي وهي تحط يدها على خصرها مها = وليه ان شاء الله مايوافقون ( وكملت بمزح وهي تحرك يدها قدامها ) صح انك دفش و عنيد ومافيك شي ينحب .. بس عاد الشكوى لله .. مصيبة وطاحت على راس ليان ضحكت وانا ادفها بكوعي .. خبالها يخفف شوي من حرجي مها = بس هاه بنتنا ماتاخذها الا بعد ماتخلص من الثانوي ههههههههههههه قطبت حواجبي .. بس انا ابي اتزوج هالسنة .. ماعندي صبر وجيت ابرد عليها بس سبقني جدي جدي = انا لله .. يامها وش فيك انتي .. هالاشياء بعدين .. خلينا نشوف الولد وعيال عمه .. وبعدين نشوف الاشياء الثانية ( والتفت لي ) كم راتب ابوك الله يرحمه .. ولا تشيل هم المهر والزواج .. انا وراتبي كله لك .. بس ابي اشوف تقدر تفتح بيت والا لا ؟ جاوبت بسرعة وانا احس وجهي احمر .. اجاوب كأني جالس قدام عمي ابو زوجتي عمر بابتسامة = راتب ابوي 4 الاف وخمس مية ومكافأتي الف يعني كله على بعضه 5500 وان شاء الله اذا تخرجت اتــ قاطعتني مها وهي تضحك علي مها = خلاص خلاص .. وش فيك انهليت هههههههههههههههههههههههههههههه ه سكتت على طول وانا افرك يدي ببعضها منحرج طالعني جدي بحنان وابتسم اكثر جدي = الحمدالله .. راتبك زين .. وانا وعمك فهد ماحنا مقصرين واذا تبي راتبي كله خذه حلالك .. مافيه اغلى منك ياولدي .. خلاص ان شاء الله اليوم اكلم عيال عمك عن نادر واخليهم يعطونك اخوك اذا تزوجت ( والتفت لجدتي ) وانتي اليوم كلمي ام معاذ وشوفي رايها .. وام معاذ عاقلة وان شاء الله بتتفهم عدت كلامي اذكرهم والزّم على شروطي عمر = بس هاه مثل ماقلت ... ابيك تلززززم عليهم اذا تزوجت اخذ نادر عندي .. سواء اخذت اختهم والا لأ ( والتفت لمها ) وبعدين انا ابي اتزوج هالسنة وش يصبرني احتريها تخلص من الدراسة طيرت مها عيونها فيني ... مها = حرام عليك .. كيف تبي البنت تجمع بين البيت والدراسة و فوقهم تبيها تربي فارس .. هييييه انت تراها بشر سكتت معها حق .. بس ولو ماعلي وحركت يدي بلا مباله عمر = خلاص اجل فيه غيرها مليون مها بقهر = طالع ( والتفتت لجدي وجدتي وهي تشر علي ) يمه يبه تسمعون هذا وش يقول ؟ جدتي = يامها خلي هالامور بعدين .. وان شاء الله ماهو ماخذ الا ليان ابتسمت ابتسامة جانبية بغرور اذا ما ناسبت ليان فيه منيرة اخت رايد .. بعد هذي مناسبة وزيادة عليها تحل مشكلة رايد ليان لو اخذها رايد لازم يطلع .. اما اذا اخذت اخته تحمد ربها اني جمعت شملها باخوها واكيد لازم توافق على شرطي = شف ويضحك بعد .. مستانس انت ووجهك .. ضحكت على مها اللي فهمت ابتسامتي غلط عمر = هههههههههه كملت مها تهاوش ومعصبة علي على غير سنع مها = وش قال .. قال .. غيرها مليون .. ليان ماراح تلقى احسن منها .. بس تاخذها وهي توها تدرس صعبه .. ياخي بس سنة اصبر .. وش فيها لو تصبر سنه هاااه ؟ حطت جدتي يدها على راسها وهي تهز راسها بأسى متضايقة من رجة مها والمشكلة يقالها عروس .. الله يعين ياسر المسكين .. رحمته الصراحة اذن العصر وطلعت انا وجدي للمسجد وانا اسانده واساعده على المشي بعد الصلاة طلعنا من المسجد وساندت جدي لين وصلته عند الباب وحنا واقفين .. عدت عليه اوصيه قبل اروح عمر = يله جدي انا ابروح للبيت .. بس هاه لا تنسى لزم عليهم بشرطي .. ابيك تغصبهم يخلون نادر عندي ( وسلمت على راسه ) يله تامر على شي رفع جدي راسه لي و حط يده على صدري يطمني جدي = مايصير خاطرك الا طيب .. انا والله مابي الا راحتك وماتدري وش كثر فرحتني والله يتمم لك على خير ابتسمت عمر = آمين ( وسلمت على راسه مرة ثانية ) وركبت سيارتي وانا ادور بعيوني دانه بس ماشفتها حركت السيارة وعلى البيت على طول .. و طوال الطريق اكلم نفسي و احلم احلام يقظة ... ليت جدي يمشي كلمته على معاذ ويكسر خشمه ويصير ندوري عندي ودي اسأل رايد عن اخته بشكل غير مباشر واشوف هي تصلح للزواج والا صدق مريضه و اذا طلعت مريضة .. عندي ليان .. بس هذي بيوافق معاذ اخذها ؟ .. اشوفها هي المناسبة الصراحة بس المشكلة بمعاذ .. لا .. فيه مشكلة ثانية .. هذي بثاني ثانوي .. توها تدرس .. فاضي لها احتريها تتخرج .. ماني قادر اصبر سنة .. مليت من حياتي .. ودي بعيال ودي اكون اسره وصلت البيت .. ونزلت من السيارة وانا اشوف رايد جاي من اخر الحارة ووقفت عند الباب احتريه يوصل عندي واول ماوقف قبالي سألته عمر = وين كنت ؟ ( وفتحت الباب له وخليته يدخل قدامي) رايد = رحت اتمشى شوي بعد الصلاة ( وانتبه على حلقي وقطب حواجبه ) متهاوش معاهم كالعادة صح ( واشر على حلقي باصبعه ) هزيت راسي بايه .. سكت رايد وماعلق ومشى قدامي .. دخلنا الصاله وانا افكر كيف ابدأ واسأله عن اخته .. ابي سالفة عشان ادخل فيها بسؤال عابر عنها جلس رايد على الكنبة قبال التلفزيون والريموت بيده جلست على الكنبة المنفردة وعيوني على رايد و افرك يدي ومحتار عمر = احم .. آآآآآ .. توني جاي من حارة جدي هز رايد راسه بايه وعيونه على التلفزيون . رايد = ادري توني متصل عليك بالجوال ايه صح .. حكيت ذقني وانا افكر عمر = آآآآ .. دانة ماشفتها بالشارع .. بالعادة القاها تلعب التفت رايد لي رايد = هي اكثر الاحيان تطلع المغرب .. عمر = متى اخر مرة شفتها سكت رايد يفكر رايد = تعرف انت بعد ماتوظفت صار وقتي ضيق مرة .. اخر مرة شفتها قبل اسبوع مدري اسبوعين .. ( والتفت للتلفزيون ) مشكلة وظيفتي فترتين ومالقى وقت عضيت على شفتي السفلية وانا عيني على رايد .. و ادور سؤال مناسب عن اخته الكبيرة عمر = آآآآآ .. اقول ... آآآآ ... دانة مالها احد يهتم فيها (واول ماشفته التفت لي ارتبكت اكثر ) لا .. اقصد يعني دايم اشوفها شكلها ماحد يهتم فيها تنهد رايد بضيق رايد = اول خل عمي يدري انها عايشة وبعدين اسأل احد يهتم فيها والا لا .. اصلا عمي مايدري هي عايشة والا لا .. همه هالفلوس اللي تجيه من ورانا وبس لفيت وجهي عنه بخيبة امل ابي تصير دانه وسيلة يتكلم عن اخته الكبيرة .. قام وكلمني عن عمه .. وش ابي بعمه انا التفتت له وانا احك راسي .. وعدت المحاولة عمر = لا .. شف .. اقصد يعني دانه صغيرة .. يعني مافيه احد يهتم متى تطلع ومتى تدخل .. هي اكلت هي ماكلت .. يعني كذا .. خل عمك على جنب ( وكملت امثل البراءة ) لكم اخت كبيرة صح ؟ رايد = ايه .. بس مرة عمي دايم تشغلها .. وعمي مايعترف فيها بشي ( ونزلت الريموت على الطاولة الصغيرة قدامه وكمل وعينه علي ) تصدق انه مايصرف عليها بشي .. ( وكمل بحزن وبقهر ) يعني فوق ماهو ماخذ حلالنا .. مايصرف على اخواتي بشي .. وليته كذا .. لو اروح عشان اشوفهم والا اطلع معهن يطردني تنهدت ... رجع وكلمني عن عمه عمر = اذكر مرة طلبت مني سيارتي عشان تودي اختك المستشفى .. تذكر ؟ .. آآآ .. ليه هي وش فيها ؟ نزل رايد راسه وسكت شوي وهز اكتافه رايد بحزن = مدري رفعت حواجب واحد عمر مستغرب = وش اللي ماتدري .. ماتذكر يوم طلبت سيارتي وقلت انك تبي تودي اخــ رفع رايد راسه وقاطعني رايد = الا اذكر .. بس انا مدري وش فيها .. عمر مستغرب = اجل وشلون تبي توديها للمستشفى وانت ماتدري وش فيها رايد بضيق = هي تشتكي من ظهرها ( وكمل بقهر ) والى الحين ماقدرت اوديها ولا عمي راضي يوديها ( ولف وجهي عني وهو شوي ويبكي ) والله اني منقهر من عمي الكلب .. انا مدري وش سويناله عشان يسوي فينا كذا ابتسمت بفرح .. ظهرها بس .. يعني مب مجنونة عمر لا شعوريا = حلو .. يعني بس ظهرها ؟ وتوني انتبه لنفسي .. التفت رايد لي بسرعة وكأنه عصب رايد بعصبية = نعم ؟ حلو ؟ بعد صلاة العشا بفترة كنت جالس بغرفة امي واقلب بالدواليب وبملابسها .. اخذت جلابيتها وجلست على السرير محتاج دعواتك يمه ادعيلي يرزقني الله بالذرية الصالحة يملون علي حياتي .. واوعدك اول ماتجيني بنت راح اسميها على اسمك .. ساره ولا تخافين على ولدك نادر .. انا ابربيه واعتني فيه كأنك موجودة وماراح اقصر عليه بشي فجأة .. سمعت ازعاج الشباب تحت .. وابتسمت خليني اطلع يمه قبل يدخلون علي بغرفتك خلاص كلها ان شاء الله كم شهر واستمتع بالخصوصية رجعت جلابية امي للدولاب وسكرت الغرفة ونزلت تحت ولقيت الشباب عبد الله و منصور ومشعل ورايد جالسين بالصاله وصوت التلفزيون عالي على مسلسل واول ماشافوني قاموا يسلمون علي عبد الله = اووووووووووه عاااااااش من شاااااافك ياحلو سلمت عليهم وجلسنا عبد الله ومنصور جالسين على الكنبة قبال التلفزيون ومشعل بكنبة منفردة ومعه الريموت وانا ورايد على كنبة وقعدنا نتفرج على المسلسل وانا بالي ماهو معه ... خلص المسلسل وجت الشارة النهائية باغنية .. وعلى طول تذكرت اني لازم اغير من حالي واخلاقي .. التفتت على مشعل بما ان الريموت معه عمر = اقصر عليه التفت مشعل لي مستغرب مشعل = ليه ؟ عمر = وش اللي ليه اغنية .. اقصر عليه يله ضحكوا كلهم الا رايد منصور = هههههههههههههههههههههههههه عمر خل عنك بس .. ماتركب عليك الطواعه عبد الله = هههههههههههههههه ماتصلحلك .. دور غيرها ابتسمت وانا اطالعهم .. معليش هذي البداية ... عمر بابتسامة = والله تضحكون والا ماتضحكون ( والتفتت على مشعل ) اقصر عليه والا قمت وطفيته الحين .. وخل واحد منكم يولعه مشعل = احلىىىىىىى ياشديد اشرت له براسي على الريموت اتحداه.. يعني يله نفذ عبد لله = مشعل اقصر اقصر .. يوم يومين ويرجع يقولك طوله ههههههههههه قصر مشعل على التلفزيون .. وانا اتساند على الكنبة وراي كلها كم شهر واتزوج وينصلح حالي وافتك من حياة العزوبية حسيت بيد رايد على فخذي وهو يقرب وجهه لوجهي رايد بفرح = والله فرحت يوم خليتهم يقصرون عليه .. انا مايسمعون مني لفيت يدي على اكتافه وقربته مني وابتسمت له بصمت .. ماعندي رد |
|
|
#37 |
|
|
رد: يمسح الدمعه بشكوى للمبدعه هدوئي
* الجــزء التــاسع والعشــرون * * عمر * السبت ... العصر جالس بالصاله على اعصابي وكل شوي اطالع الجوال ... احتري جدي يرد علي وش سوا مع معاذ اليوم ماشفت معاذ بالجامعة شكله غايب .. اتمنى بس جدي كلمه اليوم الصباح مع اني مااتوقع .. اصلا وش درا جدي ان معاذ اليوم بيصير غايب وماحبيت اتصل على جدي واقوله ترا معاذ غايب اليوم اتصل عليه .. ابي اصير ثقل شوي يارب يارب انهم الحين قاعدين يتكلمون ويارب يوافق المروح معاذوووه ويهديه الله يخلي نادر عندي على طووووول ... يااااااااااااااارب طالعت الجوال للمرة الالف ..... وزفرت بضيق اففففففففففففف .. اخذت الريموت وقعدت اقلب بهالقنوات بتفكير سارح ... رايد بالدوام الحين .. مليت وانا جالس لحالي بالبيت والمشكلة مافيه مكان اروحله اكسر هالملل ورايد مطول مايخلص دوامهم بالسوبرماركت الا على الساعة 11 بالليل .. بس اكثر الاحيان رايد يطلع الساعة 8 واحيان مادري الا وهو جاي المغرب .. وظيفته اصلا ماهي شي .. ياخذ المشتريات ويحطها بالاكياس وصلى الله وبارك واكثر الاحيان رايد يطلب من احد هالعمال اللي وظيفتهم مثل وظيفته ويستغل الفرصة ويطلع وادارة السوبرماركت متساهلين يااااااربي ... وين راااااااااح جدي ليه مايتصل بعد صلاة العشا طلعت من المسجد وانا خلاص وصل حدي .. ماعندي صبر .. المغرب كله وانا احتري ولا اتصال من جدي ولا شي .. حتى رايد ماجا على الاقل احد يونسني .. وعجزت انام الظهر او العصرمن التفكير ركبت سيارتي وعلى طول على حارة جدي .. ماعندي صبر خلاص .. ابروح اسأل جدي وش سوا وصلت الحارة بس تفاجأت بسيارة معاذ واقفة عند باب بيت جدي وقفت سيارتي بنص الحارة ورفعت راسي اطالع البيت وابتسمت .. اكيد مناديه جدي يجي عشان يكلمه بالموضوع الاحسن ماادخل البيت الحين .. خلهم يتكلمون على راحتهم .. حركت السيارة بس توني انتبه على دانه بالشارع تلعب مع مجموعة بنيات مشيت بسيارتي مسافة بسيطة لين قربت عندهن وناديت دانة بصوت عالي عشان تنتبه لي التفتت دانه ببراءة وابتسمت اول ماشافتني وجت على طول ووقفت عند بابي .. وضحكت يوم نطقت اسمي دانة = عمل هههههههههه هذه ماتعدل لسانها الى الحين .. فتحت بابي لها وخليتها تركب وجلستها بحظني وانحنيت عليها اوزع قلبلات على خدها الناعم ... شفت بنت عمها اللي اكبر منها اللي سبق وعطيتها كف حلو .. واقفة وتطالعنا بعكس البنيات الثانيات اللي رجعن يلعبن يوم قطعت عليهن بصوتي التفتت لدانة اسألها عمر = وش اسم هذي ( واشرت على بنت عمها ) دانة = شهوده عمر مستغرب = شهد ؟ دانة = لا .. شهوده ابتسمت على براءتها وانحنيت وحبيتها عى خدها .. والتفتت على شهد وانا آآشر لها بيدي عمر = هييه انتي تعالي تراجعت شهد شوي بخوف وعيونها علي .. فجأة ركضت وراحت بيتهم ودخلت ضحكت .. خافت مني نزلت نظري لدانه ومسحت على شعرها دانة فيها شبه من رايد خاصة بالعيون .. مدري اختهم تشبهم والا لا .. ورفعت حاجب واحد وصورة رايد قدامي .. معصلك .. عظام شوي ويتقطع .. طالعت دانة وتحسست جسمها بيدي .. هذي بعد معصلكه .. برطمت ... شكلهم عايلة معصلكين ... مشكله لو اختهم الكبيرة تشبهم .. مابي زوجتي تصير معصلكه مثلهم .. انتبهت من سرحاني وضحكت على نفسي .. من الحين ياعمر ... انت شيل هم المهر الحين وكيف تجمعه وبعدين فكر بشكل العروس ... عطيت دانة عشرة ريال اشجعها و نزلتها عن حظني وراحت تلعب مع البنات .. لازم اروح قبل يطلع معاذ ويشوفني .. مدري من متى وهو عند جدي .. خلني اروح الحين احسن حركت السيارة وطلعت من الحارة ورجعت بيتي .. وانا داخل حارتي شفت الشلة من بعيد كل واحد واقف لحاله .. عشان ماحد من الجيران يشك فيهم عبد الله يضرب جرس الباب وهو متلثم .. ومنصور واقف عند احد السيارات البعيدة ومشعل واقف عند الدكان القريب من بيتي وتوني متعديه بالسيارة احس الجيران بدوا يشكون بزيارات خوياي المكررة .. احمد واخوه محمد .. عارفين بس الشباب مسكوا احمد على جنب وهددوه اذا علم ابوه ركنت سيارتي عند البيت وفتحت الباب لعبد الله وعلى طول دخل .. ووقفت احتري مشعل ومنصور دخلت الصاله مع اخر واحد .. ولقيت عبد الله جالس على الكنبة ومشعل جالس على الارض اول ماشافني عبد الله داخل مع منصور سألني عبد الله = وين رايد .. من اليوم نطق ماحد فتح لنا .. واتصل عليه بالجوال ومايرد رديت عليه وانا انزل شماغي على يد الكنبة وجلست وجلس منصور بجنبي عمر = رايد بالدوام مايخلصون الا الساعة 11 ماحد علق وجلسنا نسولف عن الجامعة بما ان اليوم اول دوام لي بعد غياب اسبوع عنها .. شوي شوي نسيت موضوع معاذ وجدي وعلى الساعة 8 ونص جا رايد وعلى طول المسكين ارسلوه الشباب يجيب عشا وكالعادة راح معصب وينافخ فجأة جتني رساله على جوالي .. ولأن اللي ببطنه ريح .. على طول كأني مقروص طلعت الجوال اشوف يمكن جدي عرف كيف يرسل او مها مرسله لي تعلمني وش سوا جدي ( تبطي عظم ) قطبت حواجبي وانا اقرا هالرساله والمرسل معاذ ابطي عظم !!!!! تضايقت .. من الكلمة شكله يقصد ابطي عظم يخلي نادر عندي بعد الزواج تنهدت .. ياااااربي ... قلت لجدي يلزم عليه بس ولو ماراح اسكت .. ابروح الحين لجدي واتأكد يمكن معاذ يقصد شي ثاني .. قمت على طول واقف وانا ادخل الجوال بجيب ثوبي .. واخذت شماغي اللي على يد الكنبة رفعوا الشباب روسهم لي مستغربين منصور = على وين ؟ عمر =معليش شباب مشوار بسيط وجاي .. تعشوا لا تحتروني وطلعت من الصاله وانا البس شماغي ... ياليتني فاهم غلط من الرسالة مع اني مااتوقع فتحت باب الشارع بس طلع بوجهي رايد ومعه كيس العشا رايد مستغرب = وين بتروح ( ورفع الكيس قدامي ) العشا ؟ عمر = تعشوا لا تحتروني وركبت سيارتي بسرعة وحركت ورايد واقف عند الباب و يطالعني مستغرب وصلت حارة جدي .. سيارة معاذ مب موجودة بمكانها .. اكيد رجع لعنيزة نزلت من سيارتي ولقيت باب بيت جدي مفتوح وعلى طول دخلت ملهوف دخلت الصاله ومالقيت احد .. رحت للمطبخ ونفس الشي مافيه احد .. قطبت حواجبي وطلعت سمعت اصواتهم بغرفة جدي وجدتي وعلى طول رحت عندهم ودخلت الغرفة ووقفت عند الباب اطالعهم ولقيت جدي منسدح على السرير ومها منحنيه عليه وتلحفه مها = خلاص يبه راااح ... لاتتعب نفسك والتفتت لي واعتدلت واقفة وعيونها علي وصارخت بوجهي مها بعصبية = راح واحد جا الثاني .. وش تبي انت بعد .. جاي تكمل على ابوي .. قطبت حواجبي مستغرب ودخلت وعيني على جدي شكله تعبان حاط يده على راسه وكل شوي يكح عمر مستغرب = عسى ماشر جدي .. تعبان ؟ مها بعصبية = رفعتوا ضغط ابوووووووووي .. حرك جدي يده لمها جدي بتعب = بس يامها ( ونزل يده بجنبه وضرب على السرير ) تعال ياولدي هنا تعال درت حولين السرير بسرعة وجلست على السرير من الجهه الثانية حط جدي يده على ذراعي جدي بتعب = عمر ياولدي .. والله اني اتمنى تاخذ بنت عمك .. مافيه احد يصون البنت اكثر من ولد عمها بس حسبي الله ونعم الوكيل الله العالم انه مافيه نصيب بينكم .. افااا .. لا يكون جدي كلمه عن ليان وماكلمه عن نادر .. وش ابي فيها ليان بدون نادر .. فيه غيرها المهم نادر عندي حطيت يدي على راس جدي وانحنيت عليه شوي عمر = المهم نادر .. وش قال معاذ عنه حاول جدي يجلس .. بس منعناه انا ومها مها = خلك يبه انت تعبان رفع جدي نظره لي وكمل بتعب جدي = عيا .. حلف اخوه مايطلع من عنده طيرت عيوني بصدمة عمر بترجي = لييييييييه مالزّمت عليه .. ابيك تغصبه مب تشاوره وبس .. جدي تكفى ابي ناااادر ردت مها بصوتها العالي مها = عجزناله .. معيي وبقوه .. حاول فيه ابوي ( واشرت على جدي ) هه شف لين ارتفع ضغطه .. حسبي الله عليك انت واياه رفعت راسي لمها بضيق ومارديت كملت مها تهاوش مها = لا تطالعني كذا ... كل واحد همه نفسه .. ماهمكم ابوي .. واحد رفع ضغطه وراح و الثاني ناوي يفقع المرارة .. جدي بضيق وبتعب = بس يامها بسسسس نزلت نظري لجدي ومسكت يده اللي ماسكه ذراعي وحطيتها بين يدي عمر = خلاص جدي ارتاح الحين ضغط جدي يدي وكمل جدي = انا ابيك تتزوج وتستقر .. ماتدري وش كثر فرحت امس .. وباذن الله كل شي تبيه بيصير .. وابرجع اكلم معاذ لك .. انت الغالي .. كل اللي ابيه بهالدنيا سعادتك ابتسمت له وهزيت راسي بايه وانا ودي اسأله وش قال معاذ بالضبط بس المشكلة جدي تعبان الحين وماودي اتعبه اكثر انحنيت عليه وحبيت راسه وقمت لحفته مها وطلعنا عنه عشان ينام مسكت مها على جنب عمر = وين جدتي ؟ مها = امي راحت تكلم فهد تبيه يجي طيرت عيوني عمر = عمي فهد ؟ مها تتنطز = اجل عمي انا مسكت ذراعها وجريتها للصاله عمر = تعالي تعالي علميني بكل شي وجلسنا على الكنبة مها = ماعندي شي اعلمك عليه .. ابوي خلا معاذ يجينا عشان يكلمه بشروطك الاول اللي مدري وش يبي .. ياخي يعني لازم فارس يصير عندك اذا تزوجت .. خله عند اخوانه وش تبي فيه عمر بطفش = افففففففففف ياهو انتي ثرثارة .. المهم معاذ وش قال مها = قال معصي عمر = معصي عن وش .. اللي فهمته من جدي تو انه كلمه عن ليان .. صح ؟ قطبت مها حواجبها مستغرب مها = لا ماكلمناه عن ليان الى الحين ... انا عندهم وماجبنا طاري ليان ابد عمر مستغرب = اجل ليه جدي قبل شوي يقول شكله مافيه نصيب اخذها مها = بلاه والله من اللي نشوفه .. انت ومعاذ ماتتدانون .. كيف بيوافق يعطيك اخته .. والمشكلة كل واحد يعاند الثاني .. انت تبي فارس عندك وهذاك يبي فارس عنده ... ويله اللي يتعب بينكم ابوي تنهدت وسكتت شوي عمر = طيب ماخطبتولي ليان منه يمكن اذا اخذتها يوافق يخلي نادر عندي مها = وانت ماهمك الا نادر .. حتى اسمه ما انت راضي تعترف فيه .. شكلك تبي تاخذ ليان شغاله عندك وعند اخوك ... هييييه وقف عند حدك عاد .. ترا ليان وراها رجااااال ( ونفخت صدرها ) حركت يدي بلا مبالاه عمر = المهم مافيه امل هذا يوافق يخلي نادر عندي على طول .. قبل معيين لاني وحيد وعذركم ان مافيه احد عندي يعتني بنادر .. هذا انا ابتزوج الحين .. ليه معيين وش يبي بعد معاذووووه ؟ مها = والله عاد مادري عنك انت واياه .. اليوم حاول فيه ابوي ومير مااااش معند لين تهاوش هو وابوي .. قلت لامي تتصل على فهد احسن .. ابوي تعبان وماله حيل انت لك واياه هزيت راسي بايه .. احسن بعد .. جدي شكله ماهو شديد .. انا على بالي معاذ بيطيع جدي بس خاب ظني فجأة دخلت جدتي علينا الصاله .. قمت وسلمت عليها وجلسنا مها = هاه يمه كلمتي فهد جدتي = ايه .. يقول بكرة عنده شغيل و بعد بكرة بيسافر ان شاء الله ( والتفتت لي ) وانت الله يهديك لازم تبي اخوك عندك عمر = ايه لازم ضربتني مها على كتفي مها = وبعدين هيييه انت تعال .. مين هالعروس اللي بترضى تعتني بولد مو ولدها .. لا تقول ليان لان فارس وهو اخوك عيا معاذ يعطيك اياه ( ومطت الكلمة ) هذا وهو اخووووك .. كيف عاد يعطيك اخته ؟ ( والتفتت لجدتي مبرطمة ) يمه وش السوات الحين ابي الدفش هذا ياخذ الخبلة هذيك ابتسمت عمر = لا فيه امل ان شاء الله .. ماندري يمكن اذا خطبتولي اخته يتغير رايه جدتي = ياجعله ياربي ... والله ما نلقى لليان احسن منك مها باستهبال = ايه كثري منها ابتسمت اكثر .. حتى لو مو ليان فيه ان شاء الله غيرها .. الاحد جالس بكفتريا الجامعة اشرب قهوتي واحتري عبد الله .. مشعل ومنصور راحوا للادارة مدري وش عندهم هناك اليوم شفت معاذ اليوم مع خويه تركي .. احاول قد مااقدر اتحاشاه.. لاني باختصار مااضمن نفسي .. اخاف اذا كلمته اعصب وازيد الطين بله .. اخلي الموضوع على عمي يقنعه بدون ما اتدخل = عمر رفعت راسي لمصدر الصوت وشفت مصعب واقف قدامي ويبتسم عمر = هلا مصعب ( واشرت على الكرسي اللي قبالي ) جلس مصعب وركز يديه على الطاولة اللي بيننا وحاول يقرب وجهه مني وهمس مصعب بابتسامة = اجل ناوي تطلق العزوبية ( وسند ظهره على الكرسي وراه ) الصراحة فرحت لك .. الزواج احسن للي مثل حالتك طالعته بصمت .. مدري كان مع معاذ امس والا معاذ قايل له ابتسمت وسألته عمر = من علمك ؟ مصعب = معاذ .. بس آآآ ( وسكت) عمر مستغرب = بس وش ؟ مصعب = بس علمني بعد انك تبي فارس عندك اذا تزوجت .. صح ؟ عمر = ايه .. بس علمتني مها ان معاذ معيي .. خلاص اظن مافيه شي يخليكم تعييون .. والا هو بس عناد ؟ مصعب = وانت وش تبي فيه .. حنا مانرضى حرمة غريبة تعتني باخونا وحنا موجودين طيرت عيوني بصدمة واعتدلت جالس .. طلعوا بعذر جديد .. عصبت وصارخت عليه عمر بصراخ = وش حرمة غريبة .. اشوف طلع كلام جديد تلفت مصعب منحرج مصعب = قصر صوتك ( وطالعني ) حنا بالجامعة ضربت الطاولة بيدي الثنتين وقربت وجهي منه وقرب مصعب مني عمر بهمس = اذا كنتوا ماترضون زوجتي تعتني باخوي لانها حرمة غريبة على قولتك .. انا بعد ماارضى امك تعتني باخوي لانها مرة ابوه .. اظن تسمع بجرايم حريم الاباء عصب مصعب ورد علي بعصبية وبهمس يحاول يمسك اعصابه مصعب = عمر احترم نفسك .. امي ماهي من هالنوع سندت ظهري على الكرسي وراي ورديت مثله عمر = خلاص اجل وانا زوجتي بعد ماهي من هالنوع مصعب = زوجتك غريبة عنه سكتت اطالعه وانا متردد .. اخطب اخته منه الحين والا انتظر جدي وعمي يخطبونها لي اخذت كوبي وقعدت اشرب بصمت .. لا لا .. انتظر احسن .. نزلت كوبي على الطاولة وسألته اغير الموضوع عمر = وش عندك اليوم محاضرات ؟ وبدينا نسولف بامور ثانية لين جا عبد الله وانضم معنا الاثنين .. العصر جالس بالصاله على اعصابي .. ارسلتلي مها وانا بالجامعة تعلمني ان عمي وصل عندهم اليوم الصباح .. عاد متى يتلحلح عمي ويكلم معاذ .. اخاف مايكلمه الا بكرة ... الله يصبرني بس .. وماحبيت اروح لهم العصر خفت ان مها مرسله نفس الرساله لمصعب ومعاذ .. ومابي اشوفهم هناك دخل رايد علي الصاله وهو ينشف شعره .. توه متروش وماعليه الا ملابسه الداخليه رفعت راسي له اسأله عمر = ليه مارحت اليوم لشغلك ؟ رايد = مافيه شغل واجد واتصلت عليهم استاذنهم اغيب ( وجلس على الكنبة المنفردة ) هزيت راسي وسكتت بعد صلاة المغرب بفترة .. جالسين انا ورايد بالارض و قاعد رايد يقص علي موقف صار له يوم كانوا بالرياض رايد = والله ما انساه هذاك اليوم ... اخذت سيارة ابوي وهو مايدري قلت ابي اتعلم السواقة بس ماااااااش ضعت بالرياض ومارجعني الا ابوي هههههههههههههههه عاد لا تسأل ابوي كيف رجعني .. عطاني ذاك الكف اللي ماانساه هههههههههههههههههههههههههههههه ه ضحكت عليه عمر = هههههههههههه تستاهل من قالك تاخذ سيارة ابوك وهو مايدري فجأة رن جوالي .. تناولت ثوبي الطايح على الكنبة وراي .. وطلعت منه الجوال والقيت نظره عليه وتفاجأت باسم عمي على الشاشة عمي ابو سامي يتصل بك اعتدلت جالس ورديت عمر = هلا عمي عمي = السلام عليكم عمر = هلا وعليكم السلام عمي = وشلونك عمر .. انا ببريدة ماتجي تسلم علي ولا شي انحرجت .. المفروض العصر وانا عندهم بس وش اسوي قلت يمكن يبون يكلمون معاذ بدون ما اتدخل كمل عمي يوم شافني مارديت عمي = بعد صلاة العشا ابيك تجي عند جدك .. مفهوم عمر = ان شاء الله .. الحين جاي واصلي العشا معكم سكرت عن عمي وقمت ولبست ثوبي رفع رايد راسه يطالعني رايد مستغرب = وش فيك عمر .. وين بتروح ؟ رديت عليه وانا البس شماغي عمر = مشوار بسيط وراجع رايد مستغرب = عمر مدري احس هاليومين مانت على بعضك .. وكله سرحان وتفكر نزلت نظري لرايد وابتسمت بصمت .. سرحان وافكر !!! صادق اللي يقول الزواج هم شايل هم الزواج .. اخاف معاذ مايوافق يعطيني نادر .. اخاف اللي اباخذها تصير من النوع اللي مااحب .. اخاف مااصير سعيد معها ... هذا غير المستلزمات الثانية .. ومدري اصلا بيوافقون علي .. مدري احس خايف تنهدت وطلعت وانا ارد عليه عمر = مافيه شي .. بس عمي جاي من جده وطلعت .. وصلت بيت جدي وضربت الجرس .. شوي وفتح لي عمار ( بالثانوي ) .. ابتسمت وسلمت عليه عمر = هلا عمار سلمنا على بعض ودخلنا الصاله ولقيت عمي وجدي جالسين بالارض وظهورهم على الكنبة .. وجدتي جالسة بالارض بجنبهم بمسافة بسيطة ومها جالسة على الكنبة جلس عمار عند الصينيه قبال عمي وجدي شافني عمي وقام يسلم علي عمي = هلا والله عمر سلمت عليه وجلست بجنب جدتي على الارض التفت عمي وابتسم عمي = والله وكبرت ياولدي .. الله يتمم لك على خير .. وابد لا تشيل هم شي .. نعين ونعاون يابوك ابتسمت بفرح .. الله يخليلي عمي وجدي مافيه هم بوجودهم شكلهم ناوين يتكفلون بكل شي عمر بفرح = تسلم ياعم عمي = بس وش قصة هالشروط ؟ ( وابتسم اكثر ) التفتت لجدي ورجعت التفت لعمي عمر = ماعلموك ؟ عمي = ابي اسمعها منك عمر = ابد مافيه شروط تعجيزية بس معاذ يكبرها وهي صغيره .. كل اللي ابيه نادر يصير عندي بعد ما اتزوج بس .. وصلى الله وبارك قطب عمي حواجبه مستغرب عمي = مين نادر ؟ جدي = فارس .. مايقوله عمر الا نادر ضحك عمي عمي = ههههههههه انا لله هالولد ما استقريتوا حتى باسمه تنهدت جدتي من قلب جدتي = والله شايلة هم هاليتيم .. الله يصلحه ويبعد عنه كل من فيه شر ابتسم عمي وهو يطالعني عمي بابتسامة = طيب على خير ان شاء الله .. توني متصل على عيال عمك وقلت لهم يجون ارتحت وانا اشوفه واثق من نفسه بعد صلاة العشا .. طلعنا انا وعمار من المسجد وحنا نسولف وناخذ اخبار بعض وعمي وجدي يمشون ورانا دخلت انا وعمار البيت وعلى طول على الصاله ووقفنا عند المدخل مستغربين .. لقينا مها واقفة بنص الصاله ومعطيتنا ظهرها ومعها بيد قدر وباليد الثانية دله قهوة فاضية وجدتي جالسة و تهاوشها والغريب مها واقفة وتضحك جدتي بعصبية = ياحبك للفتنه .. رجعي اللي معك قبل يجون .. ( والتفتت لي ولعمار ورجعت تلتفتت لمها ) هه جوا فضحتينا التفتت مها لنا وضحكت اكثر .. وعلى طول جت ووقفت قدامي مها باستهبال = الحين يجي معاذ وبتصير هوشة و جالسة اجهز المعدات.. ( ومدت القدر لي ) خذ هذي لك .. ( ورفعت الدله قدامي ) وهذي ابعطيها معاذ ههههههههههههههه ضحكت عليها وضربت راسها على خفيف ودخلت الصاله وجلست على الكنبة مافهم عمار شي وسألها مستغرب عمار = ليه ؟ صارخت جدتي على مها معصبة جدتي = يالهبلة صليتي بدل خبالك هذا ؟ التفتت مها بمرح لجدتي مها = ايه صليت بدري ... مابي شي يفوتني ههههههههههههه ابتسمت وانا اطالع مها .. المشكلة زوجها اطرم وشلون بتعيش معه هذي .. اظنها بتهبل فيه لين يطلع من طوره ويتكلم رديت على مها احاول احرجها عمر بمزح = مها عز الله بتهبلين بياسر .. بتخلينه يطلع من طوره وماتدرين يمكن ينطق على يدك ههههههههههه انحرجت مها شوي بس وجهها لوح على طول رجعت عادي ورديت علي مها = زين بعد عشان افتح عيادة للبكم واكسب من وراهم ( ونفخت صدرها ) واصير اول سعودية تكتشف علاج للنطق واصير غنية فجأة دخلوا عمي وجدي الصاله .. سكتت مها وشكلها استحت من عمي .. وطلعت من الصاله ترجع معداتها ربع ساعة ودخلوا معاذ ومصعب علينا الصاله وبعد سلامهم على عمي .. جلسوا عمي وجدي وعمارعلى الكنبة بجنب بعض .. وجدتي بكنبة منفردة وانا ومها على كنبة وقبالنا مصعب ومعاذ طالعنا بعض انا ومعاذ بصمت .. تنهدت والتفتت لجدتي عشان ابعد نظري عنه نطق عمي موجه كلامه لمعاذ ومصعب عمي = انا الصراحة جيت من جده بعد ماعلمتني امي عن مشكلة اخوكم فارس .. انتم الى الحين تتهاوشون عليه ؟ .. تراكم عيال عم ماهو زين كل واحد يعاند الثاني .. وفارس معكم والا مع عمر كلكم اخوان .. الله يهديكم بس مصعب = ماقلنا شي عمي ... ( والتفت لي وابتسم ) عمر حيا الله باي وقت يجي ويشوفه عمر = كيف باي وقت .. وهذا ( واشرت على معاذ ) يقول ماتشوفه الا من اسبوع لاسبوع ( والتفتت لعمي وجدي ) خلاص انا قررت اتزوج قولوا لهم يخلون نادر معي على طول بعد مااستقر معاذ = مب على كيفك والله التفتت لمعاذ وجيت ابرد بس سبقني عمي عمي = وليه ماتبيه مع عمر .. يوم عمر اخذه رجعناه لكم لانه مو متزوج ومايصلح ياخذه .. بس اذا تزوج خلاص وش يمنع معاذ = انتوا همكم رضى عمر وبس .. انا واخواني مايهم وش نبي ( والتفت لي وصارخ ) وبعدين انت تزوج احد مانعك .. بالطقاق انت واللي بتاخذها .. بس فارس مش خشمك .. والله ماتاخذه عمي = معاذ وش فيك انت عصبت حنا نكلمك بالهداوة التفت معاذ بعصبية ورد عليه وهو يشر على جدي معاذ = جدي قبل امس مكلمني بالموضوع والحين جاي انت من جده بس عشان عمر ( وكمل بقهر وهو يرفع اصبعه فوق ) انا ابي افهم شي واحد بس .. ليه دايم تمشون كلام عمر علينا .. لو انا واخواني نبي شي وعمر يبي شي ثاني .. مشيتوا كلام عمر علينا ... ( واشر على الموجودين) كلكم حتى ابوي الله يرحمه .. دايم عمر هو اللي رايه اهم سكتوا كلهم وماحد رد طالعتهم واحد واحد احتري احد يرد عليه بالتالي التفتت له ورديت انا عمر = ماعندي الا هالاخو هذا ومستكثره علي ... ياخي انت عندك اخوانك كلهم وش معنى نادر معاذ = والله عاد كيفي اخوي وانا المسؤول عنه فار دمي وصارخت فيه عمر بعصبية = ياخي مانبي مسؤوليتك .. هات نادر عندي وشيل يدك عنه .. حتى المصروف لا تصرف عليه .. ارتحت الحين عمي بصراخ = بس انت واياه سكتنا انا ومعاذ وحنا الى الحين نطالع بعض عمي بتنهيدة = معاذ .. عمر ان شاء الله بيتزوج وهو حاط شرط على حرمته انها تعتني باخوه .. يعني مافيه شي تخاف على فارس منه .. خله ياخذ اخوه واذا شفت انه قصر عليه بشي .. ذيك الساعة تاخذه منه وحنا معك بعد .. هاه وش قلت وانا عمك التفت معاذ لعمي ورفع راسه بتحدي معاذ = لأ طير عمي عيونه منصدم من الرفض الصريح بوجهه كمل معاذ بتحدي وهو يطالعني معاذ = ابي مرة بس تمشون كلامي على عمر .. من يوم حنا صغار وطلبات عمر مجابة .. والحين شفتوا عمر حط طلبات عشان يتزوج وقلتوا خلاص سمعا وطاعة خذ فارس عندك ( والتفت لعمي وجدي ) سألتوا عن رايي .. سألتوا عن راي مصعب .. شاورتوا امي .. حنا بعد اخوانه .. والا لان عمر بغا شي .. قلتوا خلاص الباقي بالطقاق نزلت مها راسها وتدخلت بالكلام مها = كلامه صحيح .. من يوم حنا صغار وابوي وامي يطيعون عمر بكل شي ( ورفعت راسها تطالع جدي وجدتي ) حتى وانا بنتهم الوحيدة ينفذون طلبات عمر اكثر مني ملت على مها وهمست لها بصوت خفيف عشان ماحد يسمعنا عمر = مها وش فيك قلبتي علي مالت مها علي وهمست مها بهمس = ماقلبت عليك .. بس انا حاسة بمعاذ الصراحة تكلمت جدتي تترجى معاذ جدتي بترجي = ياولدي الله يصلحك .. انتم كلكم عيالنا .. بس عمر يمكن لانه يتيم نعامله غيركم بس عمي = اسمع يامعاذ .. انتم ماشاء الله تبارك الله عندك اخوانك وعندك امك الله يخليكم لبعض .. بس عمر ماعنده الا اخوه .. خلك انت الطيب وعطه فارس .. ولا تعطيه الا اذا تزوج .. هاه وش قلت معاذ بعناد = قلت لا سكتنا كلنا وحنا نطالعه مستغربين من عناده .. طفش عمي وبدا يعصب عمي بعصبية = ليه لا ؟ .. اسمع عاد .. تراك زودتها .. جدك يطلبك وترده وانا جاي من جده اطلبك وتردني .. ماعندك احترام لاحد انت معاذ بعصبية = انت وجدي على عيني وراسي بس طلبكم هذا لأ .. ( والتفت لي ) فارس مايطلع من البيت ابد نرفزني عناده ورفعت صوتي معصب واول مرة اشوف واحد يخطب وهو معصب عمر بصراخ = طيب يالتيس ابي اخذ اختك شهقوا مصعب ومعاذ والتفتوا لبعض بصدمة ورجعوا التفتوا لي شوي شوي شفت مصعب يبتسم ومعاذ الى الحين يطالعني متفاجئ ارتحت شوي وانا اشوف ابتسامة مصعب .. بس ذهلني رد معاذ معاذ = تخسي والله تاخذ اختي التفت مصعب بسرعة لمعاذ وماتت ابتسامته بعدها نزل راسه وسكت رفع جدي العصا اللي معه باتجاهه معصب على كلمة معاذ جدي = والله ما يخسي الا انت .. ليه ماتبي اختك ياخذها ولد عمها .. البنت ماحد يصونها اكثر من ولد عمكم جدتي بزعل = ليه الله يصلحك .. مانلقى لبنتنا احسن من ولدنا .. فرح قليبي ياولدي ووافق معاذ = اختنا توها صغيرة .. وهذا ( واشر علي ) ماحد يعرفه كثري .. واحد اناني ومايهمه الا نفسه .. مها بترجي = طيب شاور البنت يمكن توافق .. تكفى معاذ وافق احسهم لايقين على بعض لف معاذ وجهه عنها معند وراكب راسه تنهدت وانا اطالعه .. واضح مافيه امل يعطيني اخته .. مو مهم من زينها عاد اكيد بتصير مثل اخوها عمر = طيب وش قلت بخصوص نادر .. اذا تزوجت تخليه عندي ؟ التفت معاذ بعناد = لأ عصب عمي عليه ووصلت معه عمي بعصبية = وبعدين معك انت .... تراني عمه .. لا تحدني اسوي شي ما ابيه التفت معاذ لعمي وشكله واثق من نفسه معاذ = هذا لو ان اخوه الكبير بزر .. صح .. لك حق الوصاية عليه وتقدر تاخذه مااحد يقولك شي ... بس انا اخوه الكبير وموجود .. قانونا مايسمح لك تاخذه .. لا انت ولا عمر ( وابتسم رافع خشمه وكمل ) انا احمل نفس الاسم والنسب لفارس اما عمر اسمه يختلف عنه ويعتبر نظاما ولد عمه مب اخوه .. ولو نجيها بالشرع ترتيب العصبة هو الارث وعمر وانت ماتدخلون في ورث ابوي .. ( وسند ظهره على الكنبة وراه بانتصار ) فتحت فمي مذهول .. من وين له كل هالكلام وكأنه واثق التفت عمي لي ورجع التفت لمعاذ وسكت ماعنده رد عصبت ورديت عليه منقهر عمر بعصبية = صح اسمي مختلف بس ماتقدر تمنعني عنه واذا بغيت اخذه اخذه غصب عنك معاذ بغرور = خذه وبيننا المحاكم شهقت جدتي وبعدها ضربت فخذها تتحسب جدتي = حسبي الله ونعم الوكيل حسبي الله ونعم الوكيل عصب عمي فاير دمه عمي بعصبية وصراخ = تبي تجرجر ولد عمك للمحاكم ياللي ماتستحي .. تبي تفضحنا انت اخذت نفس منقهر والتفتت لجدي ولقيته يطالع معاذ وساكت رجعت التفت للعنيد والكل ساكت ويطالعه مستغربين من عناده فجأة تكلم جدي معصب جدي بعصبية = اذا ماعطيت عمر اخوه بعد مايتزوج لا انت ولدي ولا اعرفك التفتت مطير عيوني متفاجئ من جدي وسمعت شهقة مها بجنبي التفتت على طول لمعاذ اشوف ردة فعله .. ولقيته مطير عيونه بجدي ومنصدم ومها حاطه يدها على فمها ومتضايقة .. وعمار ومصعب متفاجئين وساكتين وكلنا عيونا على معاذ نحتري ردة فعله الصراحة اول مرة جدي يقول لاحد منا هالكلام .. على كثر هوشاتنا ماعمره عصب علينا لهالدرجة اللي تخليه يقول هالكلام معاذ الى الحين مطير عيونه على جدي منصدم .. التفت لي ببطئ منقهر وهو الى الحين ساكت وانفاسه سريعه من القهر ويطالعني بنظرات معصبة وكأنه يقولي انت السبب .. ومايدري وش يرد على جدي نزل مصعب راسه وبعدها رفع راسه لاخوه وحط يده على كتف معاذ ومعاذ الى الحين يطالعني وساكت حسيت انه وده يذبحني ويرتاح مني هديت شوي وانا اشوفه مايدري وشلون يتصرف .. سندت ظهري على الكنبة وراي براحة وانا اشوفه بهالحال .. ان شاء الله هالكلمة تجيب نتيجة معه ... هذا اللي ابيه .. يحجرله جدي و يغصبه يوافق مب بس يشاوره كمل جدي يترجاه وكأنه حس بغلطته وبكبر الكلمة .. ماتوصل يتبرا من احد جدي = معاذ وانا جدك .. انت غالي عندي بس عنادك الله يهديك خلاني ازعل منك .. يابوك حنا نبي نرضيكم كلكم .. انتم كلكم عيالي .. وبعدين انت الحمد الله عندك اهلك حولك ... عمر المسيكين ماعنده بالبيت احد .. يابوك ماتشوف انه من حقه ياخذ اخوه ؟.. خلك انت العاقل الفاهم عضيت على شفتي السفلية وانا اطالع معاذ اللي مسلط نظره علي .. احاول ما اضحك من اسلوب جدي وكلامه عني .. قاعد كأنه يكلم واحد بزر حاولت ماابتسم وانا اشوف معاذ محشور بزاوية و عيا يرفع نظراته عني .. اخاف يفهم ابتسامتي غلط ويعصب ومابي ازيد النار حطب .. مليت ابي افتك من هالسالفة ويوافق عاد بس معاذ ساكت ومانطق بكلمه والصراحة خفت من نظراته كأنه يهدد بصمت تكلم عمي يحاول ينهي المشكلة ويلطف الجو شوي عمي = لا يبه ... معاذ رجال ويعجبك .. ان شاء الله الموضوع منتهي وهو موافق .. صح معاذ ؟ بس ساكت ومارد عليه .. وقطبت حواجبي مستغرب يوم شفته زودها وهو يناظرني .. وش يشوف بوجهي هذا .. و الكل ساكت ننتظر رد معاذ نزل مصعب يده على فخذ معاذ متضايق عشان اخوه مصعب = معاذ اخيرا اخذ معاذ نفس وهو يطالعني وبعدها التفت لعمي ورفع راسه فوق بغرور وسند ظهره على ورا وحط رجل على رجل معاذ = طيب .. موافق ابتسمت فرحاااان والتفتت لمها على طول .. وضحكت غصب عني عمر بفرح = مها وااااااافق ( والتفتت لمعاذ ) مشكوووووووور معاذ .. اخيرا وافقت ياشيخ ( وابتسمت اكثر ) طالعني معاذ باستحقار وهو الى الحين حاط رجل على رجل ورجع التفت لعمي وجدي معاذ = بس عندي شروط .. وزي مامشيتوا كلام عمر علي وخليتوني اوافق .. ابيكم تمشون كلامي عليه ( والتفت لي ) وهو مايشوف الدرب قطبت حواجبي وسكتت جدي = آمر ياولدي باللي تبيه .. انتم كلكم عيالي و معزتكم وحده همست مها تتطنز بصوت خفيف بصعوبة سمعته مها = شباب اخر زمن .. هذا مايتزوج الا بشروط وهذا ما يطيع الا بشروط .. عمي = وش اللي تبيه يامعاذ .. قل ومايصير خاطرك الا طيب التفت معاذ لي وسكت وهو يطالعني .. حسيت من نظراته انه الى الحين منقهر ومصعب ينقل نظراته بيني وبين اخوه تكلمت جدتي تحثه على الكلام جدتي = قل ياوليدي وش عندك تكلم معاذ وعيونه علي يسألني معاذ = انت تبي فارس عندك على طول بعد ماتتزوج .. صح ؟ هزيت راسي بايه ابتسم معاذ ابتسامة جانبية ورفع خشمه فوق معاذ = اجل اسمع .. من هنا لين تدخل على حرمتك ماتشوف فارس ابد .. لو ماتتزوج الا بعد سنة سنتين شهقت وطيرت عيوني فيه وسمعت مها بجنبي مها بشهقة = اوووووب جدتي بصدمة = اعوذ بالله هز جدي راسه وقعد يتحوقل يحاول يمسك اعصابه جدي = لا حول ولا قوة الا بالله ( وتنهد ) حسبي الله ونعم الوكيل ( ورفع راسه يطالعني وبعدها رجع يلتفت لمعاذ ) خلاص .. ان شاء الله .. لك اللي تبي التفتت لجدي بزعل عمر بضيق = بس جدي على بال ما اتزوج اباخذ شهور ... اكيد ماني متزوج بين يوم وليلة ( والتفتت لمعاذ منقهر ) وبعدين وش تستفيد انت من هالشرط اللي مدري وش يبي .. مارد علي يطالعني ويبتسم وهو الى الحين على جلسته التفتت لمصعب واول ماطاحت عيني عليه لف وجهه عني متضايق جدي بضيق = خلاص ياعمر .. ان شاء الله كم شهر وانت داخلـ(ن) على حرمتك وتشوف اخوك .. اصبر يابوك وش تبينا نسوي بعد سندت ظهري على الكنبة وراي والتفتت لمعاذ ورديت عليه منقهر عمر بقهر = طيب .. ان شاء الله .. مع اني مدري وش الفايدة بس طيب مثل ماتبي .. ارتحت الحين معاذ بابتسامة = ماخلصت عمي بطفش = هات قل ... شكلي ماني راجع جده الا والضغط مرتفع التفت معاذ لاخوه وبعدها التفت لي وهو يعقد يديه قدام صدره وحاط رجل على رجل معاذ = تعطيني بطاقاتك .. بطاقة الراتب اللي يجيك من معاش عمي سعود الله يرحمه وبطاقة مكافأة الجامعة وماتصرف منهم ريال واحد ( وابتسم اكثر ) وسيارتك بعد ياحلو فتحت فمي منصدم ... فار دم جدي وصرخ فيه جدي = ووووشوووو كمل عمي مصدوم عمي = تاخذ رواتبه ( والتفت لي ورجع يلتفت لمعاذ وهو يشر علي ) ووو ( ورفع يديه منهبل مايدري وش يقول ) تكلم عمار يسأل مها عمار مستغرب = عمه .. ماني فاهم ليه يسووا عيال عمي ببعضهم كذا ؟ ردت مها وهي تحرك يدها قدامها مها = توهم طالعين من مستشفى شهار وانا عمتك .. اسمع واحمد ربك على العافية نزلت راسي .. هذا انت تجني حصاد عملك ياعمر .. معاذ يسوي نفس اللي سويت فيه .. معاذ يرد لك الصاع صاعين ماجاب شي جديد من عنده ( وغمضت عيوني بندم ) هذا ثمرة اخلاقك السيئة .. ذوقها .. توني احس بحقارة اللي سويته بمعاذ .( وتنهدت بألم ) مو بس معاذ حتى مصعب اذيته واخذت مكافأته ظلم رفعت يدي ونزلت شماغي بحظني وعصرتها بين يدي .. احس مخنوق ... ندمان .. توني احس بغبائي ... توني اذوق طعم الاهانة اللي جرعتها لمعاذ ومصعب ذوق ياعمر ذوق سمعت صراخ جدي يهاوش ومعصب جدي = هذا ماني موافق علييييييه يالهيس ... هذا ولا عمل نصرانييييييي رفعت راسي بألم وشفت جدي رافع عصاه فوق باتجاه معاذ ويطالب ويهاوش جدي بعصبية = بدال ماتعاون ولد عمك بالزواج تاخذ فلووووووووووسه وعمي ماسك ذراعه يهديه عمي متنرفز = يايبه الزم ماعلينا صحتك .. ( والتفت لمعاذ معصب ) هذا اللي حصلناه من عيالنا .. التفتت لمصعب وطالعنا بعض بصمت .. ليه احس من نظراته يقولي ( تذكر ياعمر ؟) التفتت لمعاذ ولقيته يطالعني ومبتسم وماعليه من جدي اللي يهاوش نزلت راسي وعصرت شماغي بين يدي منقهر .. لازم استر على نفسي قبل انفضح قدامهم ويعرفون ان بداية هالحركة مني ... والله بيعصب جدي اكثر اذا عرف رفعت راسي لمعاذ وبصعوبة رفعت صوتي اسمّع كل الموجودين عمر = طيب موافق مثل ماتبي .. كلهم التفتوا لي بسرعة مستغربين .. الا معاذ ابتسم اكثر وهو يطالعني بغرور وشفت مصعب يبتسم ابتسامة صغيرة وعينه علي اكيد هم عارفين ليش وافقت بهالسهولة جدي بضيق = كيف وانا جدك .. هذا راتبك .. انت وراك عرس مارديت عليه .. الكل مستغرب .. نزلت راسي وسكت ماعندي رد مها بحسرة ومستغربة = حسافة ليتني طلبته اجل قبل معاذ .. على الاقل ادلع نفسي كم شهر بهالراتب تكلم جدي موجه كلامه لي بعصبية جدي بعصبية = انت كيف تبي تصرف على الحرمة وتفتح بيت وانت فلوسك ماتجودها .. على طول احد يقولك عطني قلوسك تعطيه رفعت يدي ورجعت شعري على ورا منحرج ... تنهدت بألم .. غروري اعماني عن حقارة تصرافاتي مع عيال عمي .. وليته على معاذ بس اللي صدمني بسيارته وقتها .. لا .. من زود نذالتي وحقدي حشرت مصعب معه وهو ماله ذنب سمعت عمي يكلم معاذ معصب عمي = المفروض لو فيك نخوة تعطيه وتعاونه على الزواج مو تاخذ منه .. انتم بتجننونا .. سمعت معاذ يكلمني باستهزاء معاذ بسخرية = عمر وش فيهم معصبين .. علمهم مين اقلد رفعت راسي على طول لجدي احاول اسكر عن الموضوع هذا قبل انفضح عمر بندم = آآآآ ... خلاص .. آآآآ ... ( والتفتت على معاذ يوم تذكرت المدة وسألته منحرج ) ومتى ترجعها لي ؟ رد علي معاذ بنفس وضعية جلوسه ويحرك رجله بغرور معاذ بابتسامة = لين تدخل على حرمتك ياحلو ( وكمل يضحك ) هذا اذا تزوجت اصلا ههههههههه صارخ جدي عليه معصب جدي = انــ بس قاطعته بسرعة اهديه واسكر على الموضوع عمر = خلاص جدي خلااااااااص .. انا راااااضي معليش ... كم شهر ويرجع كل شي سكتوا كلهم يطالعوني مستغربين الا معاذ ومصعب يطالعوني مبتسمين معاذ بابتسامة = ماخلصت افففففف .. وش بعد غير .. والله مايسوى علينا نادر .. كل هالذل عشانه .. عصب جدي جدي = وش اللي ماخلصت .. وش فيك انت على اخوك حط مصعب يده على فخذ اخوه وهمس مصعب = خلاص معاذ .. يكفي التفت معاذ لاخوه معاذ = لا مايكفي ( والتفت لي بتحدي ) صارخ عمي مرتفع ضغطه عمي = حدك عااااااد زودتها تراك التفت معاذ لعمي بجديه معاذ = لا معليش ياعم مازودتها .. جدي قبل شوي مستعد يتبرا مني كله عشان حبيب قلبه عمر تضايق جدي جدي بضيق = ياوليدي انت خليتني احمق عليك .. وماقلت هالكلام الا من الزعل والا انت الغالي ولد الغالي .. انا اذا مر اسبوع مااشوفكم فيه امرض .. الله يصلحك بس .. ادري ياوليدي اني غلطت بـ وقاطعه عمي وهو الى الحين معصب على معاذ عمي = هالجيل مايقاله ازحف وراك التفت معاذ لي بلعت ريقي وسألت معاذ خايف من اللي بيقوله عمر = كل هذا بس عشان طلبت اخوي منك ( وتنهدت بضيق ) وش عندك بعد ؟ التفت معاذ لجدي وسكت شوي يطالعهم وكأنه متردد معاذ = ادري ياجدي انك تحب عمر اكثر منا والدليل انك مستعد تطردني ولا تشوف رقعة وجهي عشانه ( والتفت لعمي ) وانت ياعم ماشاء الله عليك جاي من جدة بس عشان تمشون اوامر السيد عمر علي وعلى اخواني ... انا مابي شي و تبون تساعدون عمر بالزواج كيفكم ... تبون تتكفلون بالمعازيم بعد كيفكم .. تبون تأثثون بيته انتم احرار كيفكم .. بس ( ورفع اصبعه بشرط وسكت شوي وعينه على جدي وكمل ) بس ماتساعده ياجدي على المهر ( وناظر عمي ) ولا انت ياعم ( والتفت لي ) خلوه هو يدبر نفسه قطبت حواجبي معصب .. هذا زودها علقت مها وهي تضحك مها = معاذووووه شكلك حاقد على حرمته هههههههههههههههههه عاااااد تخيل يتزوج اختك ( ورفعت يديها ) ياااااااااارب التفت معاذ لها وكمل معاذ = قلتلك ياعمه .. ماني موافق ياخذ اختي همست مها بصوت واطي مها = مالت عليك التفت جدي وعمي لبعض منهبلين جدي بألم وبضيق = يابو سامي عيالي وش فيهم على بعضهم ( والتفت لمعاذ معصب ) حسبي الله ونعم الوكيل فيك ( وكمل بصوت مخنوق ) اذا ماعاونت ولد سعود وهو محتاجني من اعاون ؟( وحرك يده بعصبية ) انت وش فيك على اخوك .. وش سوالك هو ؟ صارخ عمي معصب عمي = ماحنا مسوين اللي تبيه .. زين ؟.. هذا ولدنا والله لو انه عدوك ماسويت فيه كذا ... نزل معاذ رجله ورد على عمي بتحدي معاذ = خلاص كيفكم مابي شي .. بس فارس مايطلع من بيتي صارخ عمي واصل حده عمي = لاااااا .. عناد فيك يامعاذ يااااخذه معاذ بعناد وبعصبية = اجل بيننا المحاكم عضيت على شفتي السفلية بقوة منقهر منه ... هذا ماعلى لسانه الا المحاكم .. لفيت وجهي افكر .. اتحمل نذالته وانحرم من نادر كم شهر ولا انحرم منه طول العمر .. فرق بين يكبر قدامي وببيتي ويشكيلي همومه و متعود علي وبين انه يكبر وانا ازوره كضيف .. هذا اذا خلاني معاذ ازوره فجأة قام عمي معصب واخذ عصا جدي لا شعوريا يبي يضرب معاذ وفاير دمه على الاخر قام معاذ بخوف وقمت انا و مصعب لا شعوريا معه وطاح شماغي اللي كان بحظني بالارض ومصعب حال بينه وبين معاذ عمي بصراخ = وش فيك انت فيييييييك .. مصعب بخوف = عمي اعصابك اعصابك عمي بعصبية = وهذا خلّى فيها اعصااااب رحت لعمي احاول اهديه ومسكت العصا ووقفت قدام عمي ومصعب وراي عمر = عمي حصل خير .. هد شوي والتفتت لمصعب وحطيت يدي على صدره عمر = مصعب خلاص خذ اخوك واطلعوا .. اللي يبيه معاذ بيصبر .. بس اطلعوا روحوا ( ودفعته على ورا على خفيف احثه ) صاح معاذ فيني معاذ = وش شايف نفسـ بس قاطعه مصعب والتفت عليه ومسك ذراعه مصعب = بس انت امش .. امشششش وجره وطلعوا من الصاله تنهدت متضايق وانا اشوفهم يطلعون .. انا اللي جبته لنفسي بغروري ونذالتي واخلاقي خليت معاذ يكرهني هالكثر لو عاملته بالطيب .. عاملني بالطيب توني افهم .. ..( عامل الناس كما تحب ان يعاملوك ).. بس فهمت الحديث متأخر سمعت عمي يهاوش عمي = هذا ادمي هذا .. يبي يدخلنا المحاكم التفتت اطالعه وسكتت رفع جدي راسه يسأل عمي بتعب جدي = ليه يكره ولد عمه كذا .. ماعمرنا قصرنا عليه بشي .. حسبي الله ونعم الوكيل ابي اطلع من هالجو .. احس مخنوق التفتت ادور شماغي ولقيته مع مها حاطته بحظنها توجهت لها وانحنيت واخذت شماغي منها وانا اسمعها تكلم جدي مرتبكة مها = آآآآ .. تبي الصراحة يبه .. انت فرقت بينهم .. وشف هذي النتيجة و طلعت من الصاله بدون مااسمع الباقي .. متضايق .. مالي خلق اسمع تحليلات مها لنفسية معاذ طلعت من البيت وسكرت الباب وانا ماسك شماغي بيدي ... وتفاجأت بسيارة معاذ واقفة ورا سيارتي ومعاذ بمكان الراكب ومصعب بمكان السواق وملتفتين لبعض ويتكلمون وشكلهم يتهاشون وماانتبهوا لي مع اني انا وسيارتي قبالهم اخذت نفس واتجهت لسيارتي وشفت بطرف عيني وانا افتح السيارة انهم سكتوا اول ماشافوني نزل مصعب بسرعة وهو يناديني مصعب = عمر .. عمر لحظة شوي فتحت باب سيارتي وتركيت على حافة بابي وزفرت بضيق احتريه .. و معاذ يطالعنا داخل سيارته جاني مصعب ووقف بجنبي مصعب بضيق = عمر ... آآآآ .. الصراحة مدري وش اقولك اعتدلت واقف وواجهته عمر بعصبية = مصعب تكفى خلني الحين .. قسم بالله واصل حدي من معاذوه .. لا تخليني احط حرتي فيك وركبت سيارتي وحركت وطلعت من الحارة ياربي وش اسوي الحين .. ضيقها علي معاذوه من كل الجهات .. وش هالحقد .. كل هذا عشان طلبت نادر رجعت شعري على ورا وانا اسوق ... احس بحرارة بعيوني .. شوي وتطلع دموعي كل شي يهون الا يمنع عمي وجدي يساعدوني بالمهر انا الغبي .. كان بديت اجمع المهر من زمان ... وشلون بتزوج الحين .. كل شي يهون الا هذي يامعاذ .. تاخذ راتبي استاهل انا اللي جبته لنفسي .. يمنعني عن نادر شهور نقول يسهلها الله وتعدي الشهور على خير بس يمنع جدي وعمي يساعدوني واذا فرضا ساعدوني وماعليهم منه وعرف بعدين اكيد بيحرمني من نادر .. ومصعب واضح شخصيته ضعيفة قدام اخوه ... واضح انه ماهو راضي بعمايل معاذ بس مايواجهه بشي ولا يقول كلمة حق اذا كانت ضده مالي سند بهالدنيا مالي اخوان .. سند لي بوقت الشدة مالي اب يوقف الناس عند حدها .. مالي ام تغرقني بحنانها اللي تسوى الدنيا ومافيها عيال العم الجد والعم كل هذولي ولا شي عند الاب والام والاخوان طلعت دموعي غصب عني وانا اسوق وش اسوي .. اكنسل فكرة الزواج بكبره ... زفرت بضيق .. اففففففف بس انا مليت من حياتي ... ابي اتزوج وارتاح ... شســ فجأة قطع علي رنين جوالي .. اخذت نفس اهدي نفس وطلعت الجوال من جيبي وانا اسوق .. والقيت نظره عليه عمي ابوي يتصل بك تنهدت ورديت عليه عمر بضيق = هلا عمي عمي = وينك وانا عمك طلعت عمر بهمس = راجع للبيت .. ( وكملت اجيب عذر ) ودي انام بكرة عندي جامعة سكت عمي شوي عمي = اسمع ياعمر .. ماعليك من ولد عمك قليل الخاتمة .. قل لجدتك تدور لك بنت الحلال وتخطبلك وابد مهرها لا تشيل همه .. انا اتكفل فيه كله .. وخلني اشوف معاذ وش يسوي .. وقفت عند الاشارة وانا احس مخنوق عمر = لا ياعم فكني من معاذ .. ماتسمعه وش يقول بيوصلها المحكمة اذا اخذت نادر منه وانا ابيه .. تسلم ياعم .. يحلها الله ان شاء الله ( وتذكرت شلتي المنتفة وكملت ) ابتسلف من هنا ومن هنا وتنحل على خير وكملت بيني وبين نفسي وصورة الشباب قدامي .. كل واحد افقر من الثاني .. اكثر الاحيان هم اللي يتسلفون مني عمي = يابوك ارسل فلوس الحرمة وكل شي اللي تحتاجه على حساب عمتك وهو مايدري عمر = واذا درا وش يفكني منه ( وابتسمت بدون نفس وانا احرك السيارة ) تطمن ياعم أي شي ينقصني ابطلبه منك الا المهر ابحاول ادبرها بنفسي سكت عمي عمي = حسبي الله ونعم الوكيل صاروا العيال هم اللي يتحكمون فينا وصلت البيت ووقفت وانا اسكر الجوال عن عمي نزلت من السيارة ودخلت .. وانا عند الباب الداخلي سمعت ازعاج الشباب بالصاله زفرت بضيق مالي نفس اكلم احد الحين .. ودي اروح فوق بس المشكلة لازم امر الصاله .. تنهدت وسكرت الباب الداخلي ومشيت بسرعة وانا امر الصاله متعديها بس للاسف لاحظوني الشباب وقعد عبد الله ورايد ينادوني عبد الله = عمر .. عمر طنشتهم وانا امشي بسرعة وطلعت فوق ودخلت غرفة امي وقفلت على نفسي شغلت الانوار .. وجلست على السرير وانا الافكار توديني وتجيبني .. اكنسل والا ما اكنسل اذا كنسلت يقعد راتبي لي وسيارتي بس راح اظل على حالي وقت اطول ومايتغير شي وانا مليت والله مليت ويمكن فوقها ماشوف نادر ابد .. واذا اشفق علي معاذ اشوفه من اسبوع لاسبوع .. هذا اذا ظليت عزوبي انسدحت على السرير ممدد يدي بتعب وانا اطالع السقف واذا ماكنسلت وصارت الخطبة اخاف اتورط مع اهل البنت .. وانا ماجمعت شي الى الحين وفوقهم نادر ماشوفه ابد ابد لين يتم الزواج بس بالاخير ارتاح .. لا .. لا .. شكلي ماني مكنسل واتحمل ضغوط الشهور اللي بتجي يارب تصير زوجة صالحة وتريحني بحياتي .. بس هي اخت رايد .. اعرف رايد زين بس هي ما اعرف عنها شي .. ولا شي .. ومو شرط تكون مثل اخوها .. اخاف تصير من النوع المهمل ( شهقت ) الا صح .. هي مهملة والدليل دانة مااحد يهتم فيها واللي ماتهتم باختها ماراح تهتم بغيره .. زفرت بضيق .. ياربي وش اسوي .. مدري احس متلخبط قطع تفكيري الضرب القوي على الباب والشباب وراه وينادون رايد = عووووومررر افتح الباب .. وش فيك عمر ؟ عبد الله = عميران وش مسوي اطلع وعليك الامان .. رايد وهو يضرب الباب بقوة = عمر ليه ماترد علينا .. افتححححح فجأة تذكرت شي مهم وجلست بسرعة صح تعااااال .. معاذوووه اذا اخذ راتب ابوي ومكافأتي من وين اصرف على نفسي بالشهور الجاية .. يبي تسديد كهرب يبي تسديد جوال يبي اغراض .. هذا غير اللي انا احتاجه كمعرس .. مالت عليك مانت وجه عرس ياعمر .. قمت وفتحت دولاب امي واخذت احد جلابياتها ورجعت اجلس على السرير .. بس يمة اخاف الخطبة تطول .. ومعاذ اخذ مني كل شي .. صعبة اطلب من جدي يصرف علي وعلى جوالي وانا رجال طول وعرض تذكرت كلام معاذ وهو يترجاني يوم اسوي فيه نفس الحركة معاذ بترجي = طيب خذ نص المكافاة ... ماهي حلوة امد يدي لبوي يصرف علي وعلى سيارتي توني احس فيه .. توني اعرف معنى امد يدي .. انا طوال عمري من يوم كنت صغير ولي راتب ابوي غطيت وجهي بثوب امي .. وينك يمه احتاجك .. قعدوا الشباب ينادون ويضربون الباب لين ملوا وراحوا الفجر .. الساعة 4 قبل الاذان بفترة بسيطة فتحت باب غرفة امي وطلعت طوال الليل احاول انام عجزت من هالتفكير .. جوعان .. اروح اسوي لي شي اكله واشغل نفسي عن هالافكار احسن نزلت ومريت الصاله اشوف الشباب اذا موجودين والا لا الصاله مظلمة الا من نور جاي من الممر والمطبخ ومالقيت بالصاله الا رايد نايم على الكنبة بملابسه الداخليه وبدون لحاف طلعت ورحت للمطبخ وبديت اسوي لي شاهي وسندويشة المشكلة الحين كيف اباخذ قرض على راتبي .. والراتب بكبره مع معاذ .. ماعندي الا حلين .. اما اذل نفسي واترجى معاذ يسمح اخذ قرض وياخذ الباقي من الراتب من اللي مايسحبه البنك او اطلب من البنك يعطوني قرض و بعد كم شهر يسحبون حقهم تلقائي من راتبي .. بس المشكلة البنوك همها الفلوس ماراح يتهاونون بحقهم استثنائي عشان سواد عيوني تنهدت وطلعت من المطبخ وانا افكر .. اليوم ماني رايح للجامعة وابروح للبنك واستفسر واسحب فلوسي قبل اسلم معاذ بطاقاتي ( وزفرت بضيق وكملت ) وسيارتي دخلت الصاله المظلمة وجلست على الكنبة بجنب رايد النايم وبديت اتعشى شوي وسمعته يذن الفجر .. التفتت لرايد وابتسمت .. صح انا الى الحين ماكلمته اخطب اخته منه .. واذا شفته ماعنده مانع اكلم جدي يروح يخطب رسمي من عمهم وبغيت اغص .. عمهم .... صح .. عمهم ابو بندر الطماع .. الكلب الشايب هذاك .. اللي اخذ ضمان عيال اخوه وراتب ابوهم وباع بيتهم بدون مايدرون انسدت نفسي عن باقي الاكل ونزلته على الطاولة الصغيرة .. اخاف الحين يطلب مهر غالي وليه مايطلب اللي اكل مال حرام مايمنعه يستغل هالفرصة اللي جته لحد عنده طالعت رايد .. لو اخلي التفاهم بالامور الثانية مع رايد احسن من عمهم .. بس يجي نظاما ؟ هذا بزر ومتشرد مب عندها ومب ولي امرها والمأذون راح يزوجها بموافقة عمها مو موافقة هالبزر اللي ماتعدى 16 سنة انتبهت على جوال رايد على الطاولة الصغيرة يرن على المنبه شوي وتحرك رايد ومد يده بكسل وطفى المنبه اخذ شوي وتمغط وجلس .. وقعد يحك شعره بكسل وهو مغمض عيونه من النوم وشكله مانتبه لي قام واقف والتفت لي لا شعوريا وشهق بخوف وتراجع على ورا رايد = بسم الله ( ولما استوعب ) عمر .. خرعتني رفعت راسي وطالعته بصمت رايد = وبعدين وش فيك جالس بالظلام ( وراح وشغل الانوار ورجع جلس بجنبي على نفس الكنبة ) وش فيك عمر امس كأنك ملحوق وطلعت فوق طالعته متردد عمر = احم .. رايد فيه موضوع ابي اكلمك فيه .. بس خلنا نصلي وبعدها اكلمك طالعني رايد مستغرب رايد = طيب ابتسمت وطلعنا للمسجد نصلي .. وطوال الصلاة وانا اكلم نفسي .. اقول لرايد عن ظروفي وبعدها اخطب اخته والا اخطب اخته وبعدها اعلمه عن ظروفي مع معاذ مابيه يشفق علي بكل الحالتين |
|
|
#38 |
|
|
رد: يمسح الدمعه بشكوى للمبدعه هدوئي
* الجزء الثلاثون *
* عمر * عمر = احم .. رايد فيه موضوع ابي اكلمك فيه .. بس خلنا نصلي وبعدها اكلمك طالعني رايد مستغرب رايد = طيب ابتسمت وطلعنا للمسجد نصلي .. وطوال الصلاة وانا اكلم نفسي .. اقول لرايد عن ظروفي وبعدها اخطب اخته والا اخطب اخته وبعدها اعلمه عن ظروفي مع معاذ مابيه يشفق علي بكل الحالتين طلعنا انا ورايد من المسجد وعلى طول التفت رايد لي وحنا نمشي رايد بفضول = هاه عمر وش تبي تقولي ؟ التفتت له بصمت .. شكله طوال الصلاة وهو يهوجس وش الموضوع اللي ابي اكلمه فيه واكيد مانتبه مع الامام .. ابتسمت وانا اطالعه وجيت ابستهزي عليه وافشله بس غيرت رايي اخر لحظة .. ماله داعي استهزي فيه الحين وازعله وانا ابي منه مصلحة .. رديت عليه وانا احس فيني شي يحكني من زمان ماتطنزت ورفعت ضغط احد عمر بابتسامة = يارجال خلنا نوصل البيت ويصير خير ( وتنهدت مرتبك ) دخلنا البيت وانا مدري وش فيني مع رايد صاير مؤدب معه .. افتح له البيبان واقدمه علي وحركات وتأكدت ان 3 اشياء يعطي الانسان هيبة عند الناس صاحب المال .. وولي البنت اذا كانت في سن الزواج وصاحب الايمان الحقيقي على مذهب اهل السنة والجماعة دخلنا الصاله وجلست على كنبة منفردة وانا مرتبك مدري وشلون ادخل معه بالموضوع .. التفتت لرايد ولقيته الى الحين واقف عند مدخل الصاله ويطالعني مستغرب اشرت له بأدب على الكنبة عمر مرتبك = تفضل رايد .. آآآ ابي اكلمك بموضوع قبل تروح لدوامك جلس رايد على الكنبة وسكت وهو يطالعني يحتريني اتكلم شبكت اصابعي ببعض.. مابي ابين ظروفي اللي تغيرت فجأة الا بعد مااخطب اخته بس الحين وشلون ابدأ .. ماني عارف .. دايم بينهم مكالمات اخر الليل .. بس ولا مرة سألته ليه مايكلمون بعض الا بهالوقت .. صح اتسمع لرايد احيان وهو يكلمها .. بس ماعمري تدخلت انتبهت من سرحاني على سؤال رايد رايد مستغرب = وش فيك عمر ؟ رفعت راسي لرايد وانا ارجع شعري ورا مرتبك وتنحنحت عمر = احم مـ مــ .. ماشاء الله لك اخت ( وانتبهت لنفسي ) آآآ اقصد ماشاء الله تكلم اختك ؟ قطب رايد حواجبه مستغرب وهو يطالعني طالعته شوي وشفته كأنه ماعجبه السؤال احم نغير السؤال كلش الا زعله عمر = لا اقصد يعني .. وشلون هذا شسمه ( ولفيت وجهي عنه وتنهدت ما اعرف اجيب مقدمات ) رايد بنفاذ صبر = عمر حيرتني وش فيك ؟ التفتت له بسرعة خربانه خربانه .. انهي الموضوع وارتاح بلا مقدمات بلا هم عمر = رايد من الاخر ابي اخطب اختك الكبيرة شهق رايد بقوة وطير عيونه فيني وتصنم وهو فاتح فمه بصدمه لفيت وجهي و مسحت جبهتي منحرج .. احس حر والمكيف شغال رجعت التفت له ولقيته الى الحين الفم فاتح .. طقطقت اصابعي مرتبك .. احتريه يرد علي شوي شوي وجه رايد نظره لمدخل الصاله و سرح بفكره تحركت يقالي اعدل جلستي .. احم طالعته وكملت اطلعه من صمته عمر منحرج = احم خذ يومين فكر ووو وشاور البنـ آآآ .. اختك .. وو ( وسكتت مدري وش اقول ) انتبه رايد والتفت لي وهو الى الحين منصدم رايد = آآآ الصراحة فاجأتني .. مــ مــ ( ونزل نظره للارض وسكت ) طالعته احاول ادور بوجهه ابتسامه .. فرح .. تكشيرة .. زعل لو معصب المهم نعرف اذا موافق مبدئيا والا لا بس ماشوفه الا سرحان .. مدري وشلون ادخل معه بموضوع شرطي وتربية نادر وموضوعي مع معاذ .. احس مو وقته الحين قمت واقف مدري وين اروح عمر = آآآ طيب .. اخليك الحين وطلعت من الصاله على طول واخذت نفس اهدي نفسي .. هذا وانا اخطب من بزر ضاعت علومي كيف لو اروح لعمها العود .. طلعت فوق ودخلت غرفتي ونزلت ثوبي وانسدحت على السرير .. اليوم ماني رايح للجامعة ابروح اول شي للبنك واستفسر عن القروض وبعدها اروح للزفت معاذوه واعطيه بطاقتي وسيارتي اخذت جوالي ووقته على الساعة 10 ونمت الثلاثاء .. الساعة 10 الصباح قمت على ازعاج المنبه وسكرته بكسل وبصعوبة جلست وانا احس راسي ثقيل من النعاس .. ودي انام بس لازم اطس للبنك الحين يارب يوافقون ويعطوني قرض بتسديد مؤجل ويريحوني من هالهم خمس دقايق ونزلت تحت وانا احط شماغي على كتفي بكسل واحس فمي بينشق من كثر مااتثاوب مريت الصاله ولقيتها فاضية .. فجأة تذكرت خطبة الفجر وصحصحت على طول وتنهدت من قلب متىىىى اتزوووج ماني قادر اصبر .. ودي حياتي تتغير ياربي وش راي رايد فيني .. تنهدت وطلعت من البيت وركبت السيارة وحركتها وانا اتذكر معاملتي مع رايد طوال بقائه عندي وخاصة اول ماتعرفت عليه ياما ضربته .. ياما لفيت وجهه بكف .. ياما تطنزت عليه .. الحسنة الوحيدة اللي سويته له اني سكنته عندي بالبيت .. ومو مني من الشباب بعد ما اقنعوني وصلت البنك ودخلت اكلم الموظف عن القرض عمر = طيب اذا سلمتوني القرض متى تبدون و تسحبون التسديد من راتبي ؟ الموظف = اذا سلمناك القرض الشهر هذا من الشهر اللي بعده ينسحب السداد من راتبك تلقائي تضايقت .. معاذ ياخذ بطاقتي واكيد بيلاحظ النقص فيه وعاد وش يفكني منه عمر بضيق = طيب ليه تسحبون على طول ليه ماتصبرون كم شهر ( وسكتت احاول اقدر المدة اللي راح اتزوج فيها ) يعني كذا تصبرون خمس شهور ست شهور وبعدها عاد تسحبون من الراتب هز الموظف راسه بلا وبحزم الموظف = السداد تلقائي ومن الشهر الي بعده على طول مايسمح ابدا بتأجيل السداد عمر بترجي = طيب اعتبرها حاله استثنائية الموظف = بمسألة السداد عندنا مافيه حالات استثنائية سكتت وانا اطالع الموظف .. زفرت بضيق وطلعت من البنك ركبت سيارتي ونزلت راسي على الدركسون متضايق كيف اتصرف الحين .. حسبي الله عليك يامعاذ سديت كل شي بوجهي .. حتى عمي وجدي اللي كنت معتمد عليهم منعتهم عني رفعت راسي وحركت السيارة وصورة امي ببالي .. آآآآه يمه لو انك موجودة كان ساعدتيني ولا معاذ ولا غيره يتجرأ يمنعك وقفت عند الاشارة وعلى طول جا ببالي خالي ابو سعد بالدمام صح خالي مايتجرأ معاذ يمنعه لانه مو قريبه مو مثل جدي وعمي نزلت شماغي بضيق بس وشلون اطلب من خالي .. مستحي منه .. من يوم كنت صغير وهو بالدمام ومو مثل جدي امون عليه اذا عطاني من كيفه خير وبركه بس اطلب منه صعبه حركت السيارة وانا اتنهد .. وش فيني شايل هم المهر وانا اصلا مدري كم بيصير ومادري بيوافقون اخذ اخت رايد والا لا يمكن تطول مسألة البحث عن عروس .. يارب يسر اموري والله مصيبة اذا طولت المسأله .. اقعد بدون راتب وبدون سيارة لين اتزوج .. لا لا ان شاء الله يوافقون اتزوج اخت رايد مريت الصرافة وسحبت كل الموجود بالبطاقتين قبل اعطيهم معاذ ابتسمت بقناعة وانا اقلب الفلوس بيدي .. 3100 الحمد الله يكفون الشهور الجاية .. لازم اقتصد بكل شي .. باكلي وشربي ولبسي وكل شي حركت السيارة متجه للجامعة .. ايام العز كل ماجوا الشباب عندي رحت اشتري من المطاعم ماكدونالدز وهرفي وطقته واكثر الاحيان على حسابي راتب ابوي من يوم كنت صغير وانا العب فيه الجوالات ما اشتري الا اخر موديل والقديم احيان ابيعه باي سعر واحيان من البطره اهديه لاي احد هذا غير الابتوبات والاشتراكات واستأجار الاستراحات مع الشباب واللبس والسيارات الحين هذا كله لازم انساه لازم اصير بخيل من الحين وصلت الجامعة ونزلت من السيارة وانا اتصل على معاذ بس مارد اتصلت مرة ثانية ولا رد اكيد عنده محاضرة الحين .. ياليت بس الدكتور يمسكهم لين اتزوج وبعدين يطلقهم وضحكت على نفسي وعلى خيالاتي اللي زي وجه معاذ اتصلت على مصعب شوي وجاني صوته مصعب = هلا عمر عمر يتنهيدة = هلا بك وين معاذ ؟ مصعب = مدري بس اظن عنده محاضرة عمر = طيب هات اخوك وقابلوني بالكفتيريا مصعب = انا بالكفتيريا الحين وينك انت ؟ طنشت سؤاله عمر = اذا جا معاذ للكفتيريا اتصل علي واجيكم يله مع السلامة وسكرت عنه على طول واتصلت على عبد الله اشوف وينه .. ابجلس مع عبد الله والشباب لين يطلع معاذ رحت لعبد الله ولقيت الشباب منصور وعبد الله ومشعل و3 من زملاء الجامعة جالسين وساحبين على المحاضرات وفالينها ومايحتاج قطعوني بالاسئلة على حركة امس وبصعوبة عطيتهم أي جواب انا ناوي اقول للعيال كل شي يمكن يلقون لي حل بس مااقدر اقولهم الحين قدام زملائنا الثلاثة نص ساعة واتصل علي مصعب يعلمني ان معاذ بالكفتيريا تركت العيال ورحت لمعاذ ومصعب ولقيتهم جالسين على احد الطاولات ومامعهم أي احد ثاني .. اول ماشافني معاذ داخل من عند الباب حط رجل على رجل وعقد يديه قدام صدره وابتسم ابتسامة جانبية وهو يطالعني .. اسلوبه يستفزني يناظرني بغرور .. ومصعب معطي الباب ظهره توجهت لهم واخذت كرسي من الطاولة الثانية وجلست معهم .. معاذ قبالي ومصعب بجنبي وعلى طول سألني معاذ بابتسامة معاذ بغرور= هاه جبت بطاقاتك ؟ اخذت نفس احاول اهدي نفسي من استفزازه واسلوبه معي القرض ومااقدر اخذ وجدي وعمي حرمني من معاونتهم لي مالي الا اترجاه يخف علي شوي عمر = معاذ ادري اني غلطت يوم اخذت مكافأتك وندمت اكثر اني اخذت مكافأة مصعب وهو ماله ذنب بس لا تنسى انت اللي لفيت علي بالسيارة وخليتني اصدم معاذ بغرور = وشوله هالمقدمة هذي كلها .. هات بطاقاتك وانت ساكت عضيت على شفتي والتفتت لمصعب ماسك نفسي ورجعت التفت لمعاذ عمر = لا مقدمة ولا شي انا ابرر لك اسبابي بس ( وتنهدت ) المهم ( وطالعت معاذ اترجاه ) معاذ خذ راتب ابوي ومكافاتي ماعندي مانع بس خل جدي وعمي يعاونوني على الزواج صعب اتكفل به لحالي وبدون راتب بعد ضحك معاذ معاذ = وانا مانعهم خلهم يدورون لك تعيسة الحظ ويأثثون بيتك و يتكفلون بالمعازيم قايل شي انا ؟ عمر بضيق = لا اقصد .. آآ المهر والله ماجمّعت شي .. ماكنت متوقع اني ما القى حولي احد من اهلي مد مصعب يده فجأة وحطه على كتفي مصعب = افااا عمر وحنا وين رحنا حنا اهلك وناسك التفتت له وهمست عمر بهمس = انت مــ وقاطعني معاذ بصوت عالي وبعصبية يرد على اخوه معاذ = مصعب التفت مصعب لمعاذ مصعب = ولد عمنا مافيها شــ وقاطعه بصرخة ثانية معاذ = انت ماتفهم كم مرة تبيني اذكرك .. ناسي وش سوا وخاصة معك انت بلع مصعب لسانه وسكت طالعت مصعب بصمت وتنهدت .. مصعب طيب ومستعد ينسى ويسامح بس معاذ واقف له علقم كل شوي يذكره بعمايلي التفتت لمعاذ عمر = معاذ لا تقارن وضعك بوضعي انا يوم اخذت مكافأتك ومكافأة مصعب كان وقتها عمي الله يرحمه موجود يصرف عليك انت وقتها ماكنت مسؤول عن أي شي .. لا كهرب تشيل همه واكلك وشربك مع اخوانك .. وسيارة مصعب وابوك عندك بأي وقت تقدر تاخذ سياراتهم .. انا غير عنك لا أب ولا ام ولا حتى اخوان .. اذا انت اخذت راتبي من وين تبيني اصرف على نفسي .. البيت يبي تسديد كهرب وتلفون .. انا ماني مثلك ماعندي ام تطبخلي .. غداي وعشاي كله من المطاعم .. وماعندي احد اخذ سيارته باي وقت قعد معاذ يطالعني وساكت وسكتت احتريه يرد بس الصراحة ارتحت يوم شفته ساكت كأنه بدا يلين حط مصعب يده على فخذي ورد يكلم اخوه مصعب = معاذ خلاص سامحه المسامح كريم التفت معاذ لمصعب معاذ = الا مع هذا ( واشر علي ) المسامح لئيم تضايقت احساسي طلع خطأ حسبته بدا يلين .. راسه يابس عمر = تكفى معاذ خل راتبي لي .. او على الاقل لا تتدخل بيني وبين عمي و جدي وخلهم يريحوني ويتكفلون بكل شي .. تكفى وخذ راتبي زي ماتبي لف معاذ نظره عني بغرور وقعد يطالع مدخل الكفتيريا وراي وسكتنا معاذ يطالع الرايح والجاي بصمت ومصعب منزل راسه وساكت وانا اطالع معاذ بضيق ياربي راكب راسه عيا يلين .. سد كل شي بوجهي .. انا اقدر اسحب عليه واطلب من عمي وجدي كل اللي ابيه خاصة ان عمي من كلامه معي امس بالجوال ماعليه من معاذ ومستعد يكتفل بكل شي .. بس اذا ساعدني عمي راح اخسر نادر .. ومعاذ مابلسانه الا المحاكم اخذنا خمس دقايق ساكتين .. فجأة التفت معاذ لي بملل معاذ = هييييه انت .. عندي محاضرة الحين بتعطيني بطاقاتك والا خلاص طالعته وسألته بيأس عمر = واذا قلت خلاص ماني معطيك شي وش بتسوي يعني؟ حرك معاذ اكتافه بلا مبالاه معاذ = كيفك بس فارس احلم تاخذه نزل راسي منقهر ودي اعطيه بكس الصقه بالجدار .. اخذت نفس احاول اهدي نفسي .. وطلعت بطاقاتي ومفتاح سيارتي من جيبي وحذفتهم على الطاولة عمر = تدري يامعاذ ماراح يتغير شي معي .. طول عمري وانا احس نفسي وحيد لا أب ولا سند لي بهالدنيا ( وقمت واقف وكملت) ونادر ماراح اتنازل عنه وطلعت من الكفتيريا مخنوق مادري وش فيني احس شوي وتطلع دموعي طلعت جوالي واتصلت على عبدالله وطلبت سيارته منه ووافق وبصعوبة تهربت من اسئلته وطلعت من الجامعة وعلى الساعة 11 وصلت بيتي وطلعت فوق لغرفة امي وقفلت على نفسي اخذت عطر امي ورميت نفسي على سريرها .. انقلبت على ظهري ورفعت العطر فوق اقلبه بين يدي آآآآه يمه ليتك موجودة .. مايحس بقيمة النعمة يايمه الا من فقدها فجأة رن جوالي .. نزلت العطر على بطني وطلعت الجوال من جيبي والقيت نظره عليه مها يتصل بك رديت عمر = هلا مها = عمر اليوم الساعة كم تطلع من الجامعة ؟ عمر = ليه وش تبين ؟ مها = ابوي اللي يبيك قطبت حواجبي مستغرب عمر = ليه وش يبي ؟ مها = ابوي من امس متضايق منك ومن معاذ ومافيه حل الا يعطيك معاشه والحين يبيك تعال خذ معاش ابوي لين تتزوج عمر = جدي عندك الحين ؟ مها = لا .. انا بالمطبخ وهو بالصاله عمر =عطيني اياه ابكلمه مها = لحظة وانتظرت لين جاني صوت جدي جدي = هلا عمر = هلا بك جدي = والله ياولدي كلام معاذ مايمشي علينا .. انا وعمك ماحنا مخلينك وزواجك والله مايقوم فيه الا حنا ابتسمت عمر = ادري والله ماتقصرون جدي = قلت لعمتك تتصل عليك عشان تمرني اذا طلعت من الجامعة تعال تغدا عندنا ابي اعطيك بطاقة معاشي تنهدت عمر = جدي الله يطول بعمرك معاشك خله معك الحمد الله معي اللي يكفيني الحين .. بس مابيكم تعاندون معاذ على حسابي انت سامع وش يقول .. اخاف اذا عرف يعيي يعطيني نادر وبعدين عاد كيف ارقعها والله يوصلها المحاكم جدي بحزن = بس يابــ وقاطعته عمر = معليش أي شي احتاجه ابطلبه منك الا اللي قاله معاذ راتبي ومهر العروس وشوفة نادر لا تعاندون معاذ فيه .. خلوها تعدي على خير ( وابتسمت احاول امزح مع جدي ) وترا اثاث بيتي عليك جدي بحزن = انا كلي لك بس معاذ خلى لك شي ياوليدي ؟( وزفر بضيق ) حسبي الله على هالولد تنهدت وغيرت الموضوع وقعدنا نتكلم عن اشياء جانبية عرفت من جدي ان عمي الى الحين ببريدة بس فوق هذا اعتذرت عن اتغدا عندهم .. ودي اختلي بنفسي شوي مالي نفس اشوف او اكلم احد ابي انام وبس وانسى الهم شوي .. امس مانمت ابد من كثر التفكير طالعت الجوال بيدي وحطيته على اسم رايد وتنهدت مارد علي وش رايه فيني .. راح للدوام بدون مايرد علي .. على الاقل تلميح .. من اليوم لازم اعلمه واعلم الشباب عن وضعي الجديد نزلت الجوال على الكومدينة ونزلت ثوبي ونمت وعطر امي بيدي * رايد * واقف عند نقطة البيع واحط مشتريات الزبون بالكيس وبالي مو معي معقول .. عمر يبي يتزوج مريم اختي ماني مصدق رجع لي كلام عمر للمرة الالف عمر = رايد من الاخر ابي اخطب اختك الكبيرة من الفجر وكلامه يزن براسي كيف ؟ ماعمري حسيت انه يبي مريم .. اصلا ماعمري حسيت انه يبي يتزوج خير شر وبعدين ليه مريم بالذات .. اللي اعرفه ان له بنات عم كيف اختار اختي وحنا مانقرب لهم ولا شي = هيييي انت اخلص علي نقزت على صرخة الرجال الزبون وقمت من سرحاني .. ولقيت نفسي ماسك كيس اغراضه وسرحان ومادخلت كل الاغراض انحرجت منه رايد بعجلة = ان شاء الله وحطيت باقي الاغراض بالاكياس ومديته عليه تنهدت .. ورحت اجلس باي مكان بالسوبرماركت نص ساعة وخلص الدوام الصباحي وطلعت واخذت لموزين راجع للبيت وانا بدون فكر جت من الله .. دايم شايل هم مريم وكيف اطلعها من بيت عمي وانا ماجمّعت من راتبي الا 3300 بس من يوم توظفت قبل 3 شهور الى الحين هذا اللي جمعته بس .. راتبي كله على بعضه 1200 ريال واخذ مية لي مصروف والباقي اشيله .. ابد راتبي مايساعد اجمع بسرعة والحين الله حلها من عنده ابتسمت بفرح .. الحمد الله .. مريم صبرت ونالت وعمر اعرفه طيب صح دفش وعليه غرور شوي بس والله طيب .. ساعدني ووقف معي بأحلك الظروف ومريم وعمر يستاهلون كل خير وضحكت مستانس ماني مصدق .. بنرجع انا واخواتي نعيش ببيت واحد مثل قبل التفتت لسائق اللموزين وطلبت منه يغير الوجهه ويروح لحارة عمي خلاص عمي طاح كرته .. اقدر اشوف مريم وانا رافع راسي .. مب خايف منه راتب وعندي ماني محتاجه بشي ومريم قريب بتتزوج وترتاح من وجهه يارب لك الحمد ماني قادر اصبر لين تتصل علي اخر الليل واعلمها عن عمر .. خاصة هي تبطي ماتتصل يمر الاسبوعين والثلاث مااتصلت .. دايم تقولي انها عند عمي صعب تاخذ التلفون بدون ماتدري مرة عمها احس الحين وراي احد يوقّف عمي عند حده ومايقدر يلمس شعره من مريم ( وكملت مستانس ) زوجة عمر .. وضحكت فرحان ماني صابر ابروح الحين لمريم واكلمها عن عمر عشان توافق عليه اذا جوا يخطبون وماعلي من عمي .. اخر مرة ضربني وضربها بس لانها طلعت .. مر اكثر من عشر شهور ماعمري دخلت بيته وشفت اخواتي بكرامه مرة بس شفت مريم بالدس وهو مايدري .. ودانه مااشوفها الا بالشارع كأني غريب قبل اخاف منه .. الحين خلاص ( ورفعت راسي ) ايه خلاص ياعمي وعلى الساعة 12 وصلت بيت عمي ضربت الجرس وانا اشوف سيارته واقفة .. شوي وطلع لي بندر وابتسم بفرح يوم شافني ومد يده يسلم بندر بفرح = راااايد صافحته بدون نفس .. رفع بندر نفسه يبي يسلم علي بالوجه بس ماعطيته وجه وسألته مطنشه كرهي له من كره ابوه رايد = عمي هنا ؟ اعتدل بندر واقف وكأنه تفشل بندر = ايه هنا ( وفسح الطريق لي ) تبي تدخل عندنا ؟ دخلت الحوش والتفتت لبندر رايد = دخلني المجلس ورح ناد مريم خلها تجي بندر = طيب فتح المجلس لي وراح يركض يعلم مريم عشر دقايق وتفاجأت بعمي يدخل علي ووقف عند الباب يطالعني .. قمت واقف وانا مستعد لأي شي منه عمي باستهزاء = جيت راجع لي نفخت صدري احاول اعطي نفسي القوة رايد = انا مارجعت لك انت اللي مصيرك تلجألي يالشيبة سكت شوي وهو يطالعني .. وحبست انفاسي وانا اطالعه احتري يجي يضرب بس مارد علي وجلس على الكنبة عمي = لا بارك الله فيكم ولا في الساعة اللي جبتكم فيها .. انتم هم على القلب وش جاي تبي عندي .. يكفوني اخواتك تنهدت براحة و جلست وانا ارد عليه رايد = منك انت مابي شي .. الله بياخذ حقي منك انا جاي اشوف مريم وارجع عمي = وش تبي فيها ماعندي بنات يطلعن معك قطبت حواجبي بقهر .. الى الحين مانسيت يالشيبة طلوعها الوحيد معي لكن باذن الله اللي بيطلعها هالمرة من بيتك عمر مو انا رفعت راسي احاول اصير هادي قدامه وانا احس دمي يغلي رايد = ماني طالع فيها .. ابي اشوفها واكلمها ومالك حق تمنعني ( وكملت منقهر ) سكتنا عنك واجد اخذت حلالنا ومشيتها .. اكثر من عشر شهور وانا متشرد ومشيتها .. ويوم اخذت اخواتي ضربتني وضربتهن مع ان ماسوينا شي غلط ومشيتها.. لكن هالمرة ان منعتني اشوفها قسم بالله ماراح اسكت ( وتذكرت انه هو المسؤول عن تزويج مريم .. ورفعت اصبعي اقسم ) وقسم بالله ياعم ان وقفت بطريق مريم والله لتشوف هالبيت رماد قطب عمي حواجبه مستغرب ومو فاهم علي لفيت وجهي عنه متضايق من تهوري .. لو مسكتت لساني مو احسن ؟ وشوله المح الحين .. والتفتت له بسرعة اغير الموضوع رايد = آآآ .. ابي اشوف مريم عصب عمي وصارخ علي عمي بصراخ = ناوي تحرق بيتي ياللي ماتستحي ( وكمل يستهزي ) ايه تربية شوارع الاول كسرت سيارتي والحين ناويها على بيتي اعتدلت جالس وحاولت ارقع رايد بخوف = لا .. اقصد آآآ .. لا توقف بطريق مريم وهي جايه للمجلس ( وبلعت ريقي .. والله علي قريع مدري وش يبي بس ان شاء الله ماينتبه ) انا ابي اشوف مريم واطلع ماني مسوي شي والله سكت عمي وهو يخزني بعينه وقام واقف عمي = ابروح انادي اختك نص ساعة وتفارق للشارع .. تفهم وطلع .. زفرت بقهر الله ياخذك بس ويريحنا منك وتنهدت .. الحمد الله هانت يامريم وان شاء الله يوافق على عمر .. انا للاسف صفر على الشمال قانونيا بسبب صغر سني وعمي هو الكل بالكل نظاميا خمس دقايق ودخلت مريم علي ودانه وراها ابتسمت بفرح وقمت ومشيت لها وانا اشوف مريم تمشي منحنية مساكة ظهرها وبنص المجلس .. ضمتني مريم لصدرها وتعلقت فيني وبكت مريم بصوت باكي = ياعمري ياخوي لفيت يدي حوليها مشتاق لصدر حنون اكثر من عشر شهور وانا محروم ومتشرد ابتعدت مريم عني وهي حاطه يدها على ظهرها مريم = ماصدقت يوم قالي عمي تعالي شوفي رايد ( ورفعت راسها لي وابتسمت والدموع بعيونها ) رايد كل مرة اشوفك تغيرت .. صرت رجال ماشاء الله ابتسمت بصمت وانحنيت وشلت دانة وضميتها وجلسنا على الكنبة وانا اسمعه يذن لصلاة الظهر حسيت مريم فرحانه بشوفتي لاصقه فيني وماسكه ذراعي و بحظني دانه مريم = معليش رايد لي اسبوعين ماتصلت عليك بالبيت .. مرة عمي كأنها حست قبل تروح تنام تتصل على أي رقم ومن بكرة اذا قامت تشوف اخر رقم هو تغير والا لا والله يارايد لولا بنات عمي كان كشفتني التفتت لها وانا شوي وابكي منقهر من حالها بس حاولت ابتسم ابشرها رايد بفرح = مريم هانت .. جت من الله يامريم .. خلاص راح تطلعين من هنا باذن الله بس انتي وافقي شهقت مريم بفرح فاهمة علي غلط مريم بفرح = استاجرت بييت ( وضحكت بوناسة ) ههههه اخيييرا طالعتها بصمت .. مابي اكسر فرحتها بس هي اللي تسرعت وفهمت غلط .. وابتسمت افهمها على قد فرحتها بالبيت رايد بابتسامة = خلاص انتي صار عندك بيت ( وحطيت يدي على فخذها وكملت ارغبها ) بيت كبير له دورين خلاص مايحتاج انا استاجر بيت قطبت مريم حواجبها مستغربة مريم = وشلون يعني صار عندي بيت وما يحتاج تستاجر بيت رايد = مريم تعرفين خويي اللي ساكن معه بالبيت اللي تتصلين علي برقم بيته هزت مريم راسها مستغربة مريم = ايه ابتسمت اكثر وكملت رايد = اسمه عمر واليوم خطبك مني ( وضحكت مستانس ) ههههه والله شهقت مريم وحطت يدها على فمها مريم = انا ( شوي شوي حمر وجهها ) طالعتها بفرح يارب بس يوافق عمي يارب سألتني مريم وهي الى الحين مستحية ومستغربة مريم بهمس = بس رايد هذا واحد مانعرفه رايد = انا اعرفه .. تعرفت عليه من يوم طلعت من هنا .. كنا انا وهو ننام بالاستراحة وبعدين ببيته .. اكثر من عشر شهور وانا واياه ننام بمكان واحد .. مايكفيك معرفتي فيه ؟ لا تخافين والله انه طيب ( وسكتت وحطيت يدي على ذقني احاول اتذكر أي شي بعمر امدحه لها .. مشكلته دفش وعليه غرور شوي ويتطنز باي احد وفوق هذا لا صلاة زي الناس ومايمتنع عن سماع الاغاني .. التفتت لمريم وتنحنحت .. مااش مافيه شي محسوس امدحه قدامها ) احم هو طيب سرحت مريم منزله راسها وساكته رايد = مريم انا على طول جيتك عشان اذا جوا يخطبون رسمي وشاورك عمي هذا اذا شاورك .. لا ترفضين وتقولين مابي الزواج ومادري ايش .. عمر اعرفه والله طيب ومتأكد انه بيعزك .. ومنها بعد نرجع نعيش انا وانتي ودانة ببيت واحد مثل قبل ( وكملت احمسها ) ماتبينا نرجع ونطلع وندخل مع بعض على كيفنا التفتت مريم لي وهي الى الحين مستغربة مريم = بس رايد .. مابي اتزوج بهالطريقة ؟ قطبت حواجبي مستغرب رايد = أي طريقة مريم بحزن = انت تبغاني اخذ واحد ما اعرفه عشان بيته .. صح ؟ تضايقت من كلامها رايد = تراه هو اللي بدا وخطب مو انا اللي قلت له تعال خذ اختي .. وبعدين انا اعرفه زي اخوي واكثر ما اكفي ؟ وبعدين تاخذين واحد ماتعرفينه ويحترمك احسن من انك تعيشين مع واحد تعرفينه ويهينك زي عمي ( وكملت اقنعها ) صدقيني عمر وهو مايعرفني ولاني قريبه ولا شي وفوق هذا دخلني بيته ولا عمره اهانني بشي .. صح عليه اسلوب ينرفز بس هذا طبعه مع الكل حتى مع عيال عمه شهقت مريم بخوف زيادة على خوفها مريم = يعني طبعه اقشر ( وكملت تسأل ) هو يصلي ؟ تضايقت .. انا وش اللي خلاني اجيب طاري دفاشته الحين وهي من الاساس خايفة .. لساني متبري مني يبغاله قص رايد بضيق = مريم يعني انا ابخدعك مثلا .. لو اعرف انه ماهو كفو لك كان ماكلمتك عنه .. عمر اعرفه زين طيب عادت مريم سؤالها مريم بخوف = يصلي ؟ لفيت وجهي عنها بضيق .. الحين وشلون ارد عليها .. عمر حافظ على الصلاة قبل وفاة امه بفترة وبعد وفاتها رجع وتركتها اسبوع وبعدين رجع وداوم على صلاته .. هذا غير اذا كان نايم لا يمكن يقوم للصلاة خصيصا .. متى ماقام من النوم صلى .. باختصار عمر يصلي بس مهمل والاغاني نفس الشي صح صار مايسمع من كيفه بس اذا جوا الشباب احيان يمنعهم واحيان يسكت عنهم ويخليهم على كيفهم التفتت لمريم وجاوبتها بشكل مختصر عشان ماتخاف رايد = ايه يصلي .. المهم ادري اني انا وانتي مالنا كلمه على عمي ويمكن مايصير شي بس انا من الفرحة جيت وعلمتك والله فرحان .. عمر زي اخوي واعرفه .. لا تخافين منه ولا ترفضين اذا جاك عمي .. وترا جده يصير جار عمي .. هنا بيت جده قريب ( واشرت باتجاه الشارع ) سكتت مريم وهي الى الحين خايفة وسرحت بفكرها بعيد عني ضميت دانة لصدري وانا اسمعه يقوم لصلاة الظهر .. وقمت واقف ودانه معي والتفتت لمريم الجالسة رايد بابتسامة = يله مريم ابروح الحين ( وكملت مستانس على التطورات ) مريم شفتي عمك ماطردني مثل ذيك المرة عادي خلاني اشوفك .. قبل اخاف منه عشانك وعشان دانه .. الحين خلاص بتتزوجين عمر وماعلينا منه ماردت مريم علي سرحانه وتلعب باصابعها متوترة ابتسمت اكثر ونزلت دانه بالارض فجأة سألتني مريم تتأكد مريم بخوف = هو راعي البيت اللي اتصل على رقمه تكلمني فيه ؟ رايد = ايه هو .. اسمه عمر حمر وجه مريم اكثر وقامت واقفة وهي ماسكه ظهره مريم بحياء = فشيلة .. رايد خلاص ماني متصله ابد على البيت نرجع على الرسايل احسن ضحكت مستانس رايد = وش له رسايل .. ان شاء الله كم شهر وتصيرين عندنا بالبيت ( وضحكت اتخيل ومستانس ) واااااو وناسة مريم حمر وجهها اكثر وسكتت مترددة وخايفة تنهدت بألم وانا اطالعها وهي ماسكة ظهرها رايد = مريم وشلون ظهرك الحين ؟ مريم بحزن = والله ظهري كل يوم يعورني رايد بقهر = والكلب ليه مايوديك او يخليني انا اوديك .. تسمعينه قبل شوي وش يقول .. يقول ماعندي بنات يطلعن .. والله يقهر عمك هذا ؟ مريم بتنهيدة = مابيهم يودوني للمستشفى ابي بس يخلوني ارتاح .. والله كل الشغل على راسي وظهري يعورني ما اقدر اوقف بالمطبخ اغسل واكنس لفيت وجهي عنها منقهر ودمي يغلي من هالعم ودعت اخواتي وطلعت واخذت لموزين راجع لبيت عمر .. وهناك قطبت حواجبي مستغرب وانا اشوف سيارة عبد الله واقفة قدام البيت طالع وش جابه عبد الله الحين بهالظهر .. وبعدين الغبي موقف سيارته قدام البيت .. بيشك جارنا ابو احمد وعاد بعدين وش يفكنا منه دخلت البيت وعلى طول رحت على الصاله اشوف عبد الله .. واستغربت اكثر يوم شفت الصاله فاضية طلعت من الصاله ودخلت المطبخ وانا انادي عبد الله بصوت عالي وادوره ولا لقيته بالمطبخ .. رحت للغرفة الثانية ولا لقيته رحت للحمامات ولا لقيته .. استغربت .. رحت فوق ومريت غرفة عمر وانا الى الحين انادي عبد الله بصوت عالي ولا لقيته بغرفة عمر .. مريت غرفة ام عمر ولقيتها مقفلة .. رفعت حواجبي مستغرب معقول عبد الله يدخل غرفة ام عمر وعمر بالجامعة حسيت ببرودة الهواء يجيني من تحت الباب .. اكيد عبد الله داخل طلعت جوالي من جيب ثوبي واتصلت على رقم عبد الله ولصقت اذني بالباب احاول اسمع رنين جواله .. شوي وجاني صوت عبد الله بالجوال بدون اسمع أي رنين رايد مستغرب = عبد الله وينك ؟ عبد الله = بالجامعة يعني وين بلعت ريقي وانا ابتعد عن الباب واطالعه بخوف .. لا يكون جني حب يقيّل ويلين ظهره شوي بهالغرفة بسم الله الرحمن الرحيم رايد بخوف = عبد الله وشلون تقول انت بالجامعة وسيارتك شايفها واقفة عند باب البيت ؟ عبد الله = اييييه تقصد سيارتي عمر اليوم اخذها مني تنهدت براحة الحمد الله يقيّل عمر ولا يقيّل الجني رايد بابتسامة = طيب .. مع السلامة وسكرت عنه ضربت باب الغرفة على خفيف .. اذا كان مو نايم بيفتح ضربت عدة مرات ولا فتح تنهدت ونزلت تحت ورحت للمطعم اشتري غدا رجعت البيت واتصلت على جوال عمر عشان ينزل ويتغدا معي بس ماجاني رد .. اتصلت عدة مرات ولا رد .. رحت فوق وضربت الباب عدة مرات ولا فتح بالتالي نزلت اتغدى لحالي وبعدها نمت اقيّل الساعة 9 بالليل جالس بالصاله والشباب عندي جايين لهم نص ساعة وطاقينها سوالف وضحك وتعليق على المسلسل وعمر مانزل من فوق من الظهر وشكله الى الحين نايم .. ما اسمع له حس .. سألوا العيال عنه وعلمتهم انه فوق بغرفة امه منصور قاعد على الكنبة ويطقطق ويكلمني عن الممثلين ونعلق عليهم ونضحك وعبد الله ومشعل جالسين بالارض ومعهم دفتر مشعل وقاعدين يتكملون عن امور الجامعة .. ومايخلون تعليقاتنا تفوتهم يردون علينا وبعدين ينزلون نظرهم للدفتر و يكملون شرح لبعضهم فجأة رن جوالي .. قمت واخذت ثوبي المحشور باحد الكنبات مع ثياب الشباب وطلعت جوالي والقيت نظره عليه عمر يتصل بك قطبت حواجبي مستغرب .. يتصل علي وهو فوق بنفس البيت رايد مستغرب = هلا وجاني صوته متغير من النوم عمر = رايد اسمع صوت الشباب .. هم عندك ؟ رايد مستغرب = ايه بالصاله عمر = طيب تعال فوق ابيك شوي .. تلقاني بغرفة امي تعال ولا يدرون العيال عنك رايد بهمس = يله سكرت الجوال عنه وابتسمت شكله يبي يكلمني عن نفس الموضوع بعيد عن الشباب التفتت للعيال .. منصور يطقطق بالاب توب ومشعل وعبد الله منزلين نظرهم للدفتر اخذت جوالي وطلعت احط نفسي رايح للمطبخ .. وبعد ماتأكدت انهم مانتبهوا ركبت الدرج ورحت فوق ولقيت عمر واقف عند نهاية الدرج ويحتريني وماعليه الا ملابسه الداخليه واول ماوصلته مسك يدي ودخلني بغرفته وقفل الباب علينا عمر = رايد مارديت علي بخصوص الموضوع اللي كلمتك عنه ( وسكتت شوي وكمل ) ووو .. وترا عادي ماراح اخذ بخاطري منك اذا .. آآآ شفــ ( وسكت على طول اول ماشاف ابتسامتي العريضة ) يضحكني عمر .. اليوم الفجر قال خذ يومين فكر وشاور .. مامر يوم على الاقل ورجع كلمني مرة ثانية رديت عليه وانا اضحك واستهبل عليه شوي رايد = وش فيك مطفوق .. مو قلت خذ يومين فكر ههههه حمر وجه عمر شوي وابتسم بحرج عمر منحرج = آآآآ ( ورفع يده يمسح جبهته وسكت ) ضحكت مستانس ورديت عليه بفرح وبجديه رايد = والله ماراح القى لاختي احسن منك نزل عمر يده وطالعني بصمت شوي شوي ابتسم بفرح عمر = والله ؟ فجأة ضمني ولف يديه على ظهري وراسه على كتفي عمر بفرح = مشكووور رايد .. والله فرحتني ( وابتعد عني وكمل وهو حاط يديه على اكتافي ) ابتصل على جدي الحين عشان يروح بكرة ويخطب رسمي رفعت حواجبي مستغرب رايد = الحين ؟ عمر بفرح = اييييه مدام ان عمي ببريدة وانا مستعجل ابي كل شي بسرعة ( وابتسم اكثر ) ضحكت رايد = هههههههه اقولك مطفوق ضحك عمر ومسك يدي وجرني عمر = تعال اجلس فيه شي ابي اقوله لك قبل اتصل على جدي وجلسنا على السرير حط عمر يده على فخذي وقرب وجهه من وجهي وكمل بملامح جاده عمر بجديه = رايد فيه شرط بسيط مصر عليه ولا يمكن اتنازل عنه .. ابيك توصله لاختك ومن حقها ترفض شرطي قطبت حواجبي مستغرب رايد = وش ؟ عمر = نادر اخوي توافق اختك تعتني فيه وتعتبره زي ولدها سكتت شوي رايد = وبيرضى جدك تاخذه مرة ثانية .. ذيك المرة جا واخذه منك ابتعد عمر واعتدل بجلسته عمر = ايه عادي عندهم اخذه اذا تزوجت .. رايد ترا هذه شرطي الوحيد على اختك نادر اهم شي عندي .. اذا كانت ماهي مستعدة والا ماتبي ببداية حياتها وهي عروس تعتني ببزر هالشي من حقها بس تقوله من الحين ابتسمت رايد = اختي طيبة مااعتقد بتعترض عمر = بس ولو علمها بشرطي وعطني خبر بردها هزيت راسي بايه رايد بابتسامة = ان شاء الله عمر = طيب متى تعطيني ردها عشان اكلم جدي يروح يخطب بكرة رايد = وش فيك مستعجل هههههههههههه عمر = هههههههه ملينا من العزوبية ياخي .. هاه متى بتقولها ؟ نزلت راسي افكر .. اليوم يالله يالله شفتها مافيه الا اكتب رساله لها مع دانة واقولها عن شرط عمر .. رفعت راسي له رايد = خلاص بكرة العصر ابروح للحارة واقولها ابتسم عمر ومسك يدي وقام عمر = طيب .. خلنا الحين ننزل للعيال فيه اشياء صارت ابي اقولها لكم قمت مستغرب وسألته رايد = وش ؟ عمر = خلنا ننزل وتعرف نزلنا تحت عند الشباب .. جلست انا على الكنبة وعمر وقف عند مدخل الصاله رفع عبد الله راسه عن الدفتر اللي بيده والتفت لعمر عبد الله = وين مختفي انت ؟ بس مارد عليه عمر ورفع يديه كأنه يبي ينبه الشباب عليه عمر = عياااال اسمعوني شوي ( والتفت لمنصور عشان يقصر على صوت التلفزيون العالي ) هييييه انت اقصر على التلفزيون شوي منصور = وش عندك انت اليوم ( واخذ الريموت وقصر عليه ونزل الاب توب والريموت على الطاولة وعقد يديه قدام صدره ) هاه قل نسمعك وابتسمت وانا اشوف العيال يطالعون عمر مستغربين عمر = باركولي قررت اتزوج ياعيال وكلها كم شهر واطلق العزوبية ضحكت بصمت على اشكال الشباب وهم منصدمين .. التفت عبد الله ومشعل لبعض بصدمة .. ومنصور مطير عيونه بعمر منصور بصدمة = كم شهر وتطلق العزوبية .. يارجال صادق والا تمزح ؟ مشى عمر وجلس بجنبي على الكنبة وهو يرد على منصور بجدية عمر = أي والله صادق وهذي فيها مزح التفت عبد الله لعمر وابتسم عبد الله = ياخاين مشعل = سبقتنا منصور = يارجال تعوذ من ابليس وخلك على العزوبية اصرفلك .. وش تبي بالزواج وعوار الراس التفت مشعل لمنصور وهو يضحك مشعل = اقرا عليه قصص المتزوجين يمكن يتعظ هههههههه عبد الله مستغرب = طيب تعال كيف كم شهر و تطلق العزوبية .. متى قررت انت .. كذا بس بدون مقدمات ماعمرك لمحت لنا ياخي منصور مستغرب = يعني خلاص خطبتوا وحددوا العرس وكل شي سند عمر ظهره على الكنبة وراه عمر = لا الى الحين ماخطبلي جدي .. بس بكرة ان شاء الله التفت عبد الله ومشعل لبعض مستغربين ورجعوا التفتوا لعمر مشعل = اثرك مانت هين ( وابتسم ابتسامة عريضة ) طيب نقدر نعرف من بنته ابتسمت بصمت ودي اسمع تعليقاتهم اذا عرفوا انها اختي عمر = هههههههه كل شي بوقته حلو مشعل = امششش ياولد مانت سهل هههههههه وانا اقووول .. اكيد وحدة من بنات عمك صح ؟ تنهد عمر عمر = شباب خلونا من هذا الحين فيه شي ابي اقوله لكم التفتت له بصمت مستغرب واحتري يقول اللي عنده علق مشعل باستهبال يمزح مشعل = انا اعرفه اكيد خطبت الثانية ههههههههه ضحكنا كلنا على مشعل عمر = ههههههههه لا ياخبل ( وسكت شوي وكمل بجديه ) شباب امر بازمة وابي مساعدتكم تكفون مالي غيركم سند سكتنا كلنا والتفتنا لبعض وكل واحد فوق راسه اكبر استفهام .. رجعت التفت لعمر وسألته رايد مستغرب = عمر عسى ماشر عمر بتنيهده = اكيد تعرفون علاقتي مع معاذ ولد عمي .................... وقعد يعلمنا عمر عن شروط معاذ التعجيزية معه مقابل يعطيه اخوه عمر = والحين انا على الحديدة ماعندي شي .. لا راتب ابوي ولا مكافأتي وفوق هذا علي بعض تكاليف زواجي ولا عندي حتى سيارة رحت للبنك اليوم ابيهم يعطوني قرض بتسديد مؤجل وعيوا سكتنا كلنا شوي مشعل = وانت يعني لازم تاخذ اخوك هو تراه عند اخوانه ماهو عند ناس غرب واذا كبر ذيك الساعة طالب فيه منصور مستغرب = معقول طيب جدك وعمك ليه يطيعون معاذ بكل شي ؟ عمر = عمي وجدي ماعليهم منه وعمي بنفسه مستعد يتكفل بكل شي حتى المهر بس انا يامنصور مابيهم يعاندون معاذ على حسابي والله لو يدري معاذ انهم عاونوني كان على طول اول مااخذ نادر منه يروح للمحكمة مشعل = تبي الصراحة عمر معاذ معذور .. لو انا بمكانه يمكن سويت اكثر انت تخلي الواحد يكرهك حتى لو مايبي تنهد عمر وسكت نزلت راسي ورطة يمكن مايعرفها عمر .. عمي والله مااحد يعرفه كثري .. وعمر الحين مايقدر .. اكيد الكلب عمي بيطلب على عمر مهر غالي .. اعرفه وخابزه زين طماع مستعد يبيع عياله عشان الريال .. هزيت راسي بضيق والله ياعمر طحت بيدين عمي ومااحد سمى عليك .. اخاف عمر يطول وهو ماجمّع شي .. وانا ابي مريم ودانة يجون بسرعة .. تنهدت يافرحة ماتمت .. رفعت راسي وانا اسمع عبد الله يكلم عمر عبد الله بتفكير = والله ياعمر ماندري وش نقولك بس انت تعرف ماعندنا الا مكافأتنا ( وسكت شوي ) تدري وشلون خذ سيارتي لين سيارتك ترجعلك وانا اخذ وحدة من سيارات اخواني ابتسم عمر بامتنان لعبد الله عمر بابتسامة = مشكور ماتقصر ابتسمت على مبادرة عبد الله وحطيت اللي اقدر عليه رايد = وانا اتقاسم مع عمر راتبي ( والتفتت له بابتسامة ) يستاهل عمر التفت عمر لي وحط يده على فخذي عمر بابتسامة = تسلم والله يارايد ( وكمل يمزح ) انت يكفيني اللي بالي بالك هو اهم شي هههههههه ضحكت فاهم عليه ر ايد = هههههههههه مشعل = انت ابد ابد ماجمّعت شي ؟ التفت عمر لمشعل يرد عليه عمر = أي والله ماجمعت شي ماكنت ادري ان معاذ بيوقف بحلقي ( وتنهد ) الله يعين بس عبد الله = يحلها الله اخذنا ربع ساعة وقمت رايح للمطعم اجيب عشا .. ربع ساعة ورجعت ولقيت عمر بالمطبخ يسوي شاهي والشباب بالصاله .. استغليت الفرصة ونزلت كيس العشا بالمطبخ والتفتت لعمر وهو مشغول بغسل الكاسات رايد = آآآ عمر التفت عمر لي بصمت قربت عنده ووقفت بجنبه رايد بتردد = عمر .. آآآآ اخاف اذا وافق عمي عليك يطلب مهر غالي .. مااحد يعرفه كثري عمر = ادري رفعت راسي له متفاجأ رايد = تدري ؟ لف عمر يده على كتفي وقربني منه عمر = اعرف عمك .. وما استبعد منه شي اللي اكل حلالك وطردك ما استبعد منه شي رايد بزعل = طيب وش بتسوي ؟ ابتسم عمر عمر = خل عمك يوافق علي ويصير خير ( والتفت للمغسلة يكمل شغله ) نزت راسي افكر وانا اتحسس بوكي اللي بمخباتي جمعت 3300 عشان مريم والحين ابي اعطيها عمر اساعده وكله طبعا عشان مريم السبب اللي اجمع الفلوس عشانها خلاص .. الله حل مشكلتها من عنده طلعت بوكي وطلعت منها بطاقة الصراف اللي عطانياها عمر اجمع فيها الفلوس .. ورفعت راسي لعمر رايد = عمر خذ البطاقة هذي واللي فيها خلاص ما احتاجها التفت عمر لي مستغرب وعينه على البطاقة .. مسح يديه بفنيلته واخذ البطاقة يشوفها عمر مستغرب = وش هذا ( وبعد ماقرا الاسم اللي عليها تذكر وطالعني ) هذا بطاقة حسابي اللي فتحته لك ؟ رايد بابتسامة = ايه .. كنت اجمع عشان استاجر بيت لاختي ( وابتسمت اكثر ) الحين مايحتاج .. خذ اللي فيها يساعدك .. مافيها الا 3300 بس .. ادري انه شوي بس شسوي هذا اللي جمعت حط عمر البطاقة بيدي وهو يهز راسه بلا عمر = لا يارايد خله لك يجي يوم تحتاجه وبعد اخذ وعطى بيني وبينه حلفت عليه ياخذه عمر متفشل = رايد والله متفشل منك .. يكفي راتبك اللي اتقاسمه معك وانت تشقى وتتعب عشان هالراتب وانا جالس ومرتاح ابتسمت بفرح مستانس اني قدرت اقدم شي لعمر وارد له الجميل رايد = انت تدرس وكلها فترة بسيطة ومعاذ يرجّع راتبك وسيارتك طالع عمر البطاقة بيده ورجع يطالعني وابتسم بامتنان عمر بابتسامة = مشكور رايد ( ورفع البطاقة يهزها) اليوم سحبت من حسابي 3000 قبل اعطيها معاذ وهذي 3000 يعني صاروا 6000 .. الله يعين واجمّع على الاقل 40 الف ابتسمت له مجاملة وسكتت .. ما اتوقع عمي يسد فمه40 الف بس الاربعاء .. المغرب رحت لحارة عمي واخترت هالوقت افضل لان بالعادة دانة تلعب بالشارع المغرب وزي ماتوقعت لقيت دانة تركض تلحق لها بنت كبرها مسكت دانة على جنب وحطيت بمخباتها الرسالة اللي مجهزها لمريم واطلقت دانة بعد مافهمتها وراحت تركض ودخلت البيت وبعد نص ساعة مرت ثقيلة علي وانا انتظر واقف .. طلعت دانة وجتني وعلى طول اخذت الرساله منها وقعدت اقرا كلام مريم ( رايد احس خايفة عمر هذا واحد مانعرفه وماعندي احد اشاوره وبعدين من بدايتها يقعد يتشرط علينا تكفى اتصل على خوالي وشاورهم انا مااقدر اتصل وبعدين عمي وعمتي يمكن يرفضون الفكرة كلها مثل مارفض عمي ادرس اكيد بيرفض هالفكرة هم يبوني خدامة عندهم رايد احس متلخبطة وخايفة اتصل على خوالي شاورهم) تنهدت وطلعت القلم من جيبي الامامي وقلبت الورقة وقعدت اكتب فوق كبوت احد السيارات الواقفة ( وش خايفة منه انتي اقولك عمر اعرفه وطيب وخوالي مالهم حق اشاورهم ومايستاهلون احد يشاورهم اصلا وماحد يعرف عمر كثري ساكن معه اكثر من عشر شهور وماشفت منه الا كل طيب وشرطه الوحيد اللي شرطه عليك عشان ظروفه ماهو تكبر ولا شي هو يبي اخوه عنده وماعنده احد يعتني فيه الا اللي يبي يتزوجها وشي عادي يحط هالشرط لا تصيرين حساسة وتكفين وافقي لا تفوتين واحد مثل عمر والصراحة نبي نرجع انا وانتي ودانة ببيت واحد مثل قبل وماحد يقدر يحقق هالامنية الحين الا انتي لا تفوتينها علينا وعمر لو مااعرفه كان ماكلمتك عنه ) قريت الرساله مرة ثانية وسفطتها عدة مرات والتفتت ادور دانة وبصعوبة مسكتها وهي تركض من مكان لمكان وقعدت احتري رد مريم شوي وجاني ردها ( الله يستر مدام انك واثق فيه لهالدرجة ماعندي شي اقوله بس ماادري عن عمي وعمتي هم يوافقون والا لا ) حتى انا مادري .. تنهدت ورجعت للبيت ولقيت عمر جالس بالصاله ويتفرج واول ماشاف خشتي عمر = هاااه بشر ابتسمت وجلست على الكنبة وانا اعلق عليه رايد = هههههه ياخي خلني اجلس اول عمر بابتسامة = من اليوم احتريك رايد بابتسامة = قلت لك اختي طيبة فرح عمر عمر = والله يعني وافقت على شرطي ؟ هزيت راسي بايه .. وعلى طول قام عمر وراح للتلفون وجلس عنده عمر بفرح = خلاص ابتصل على جدي الحين اقوله يروح لعمك بكرة ضحكت بقوة عليه وعلى استعجاله رايد = هههههههه مطفووووق حط عمر السماعة على اذنه وقعد يضغّط وهو يرد علي عمر بابتسامة = سريع سريع ماعندي وقت ههههههههه ( وجاه الرد من الطرف الثاني ) الووو هلا.. اقول جدتي ماعليك امر ابي جدي بسررررعه تراجعت على ورا وماقدرت امسك نفسي عن الضحك وانا اشوف عمر يكلم جده بخفة عقل مادريت ان الزواج يسوي بالواحد كذا سمعت عمر يكمل وهو يكلم جده عمر = لا جدي .. ابي نروح لبو بندر بكرة ... الود ودي اليوم وتقول خله بعد يومين ؟ لا لا .. جدي ابي بكرة .. لازم بكرة .. اول شي مدام عمي هنا ببريدة ومنها بعد عشان يمديني اجمّع المهر .. خلاص اتفقنا بكرة ؟.. هاه قل تم ... هههههه أي والله مستعجل .. آمييين .. خلاص ترا بكرة قبل يذن العصر وانا عندك ولو نروح لهم الظهر بعد احسن ههههههه .. طيب مع السلامة ضحكت عليه وطوال الوقت اعلق عليه واقلده وهو يكلم جده .. وماسكتت عنه الا يوم جوا الشباب الخميس .. العصر طلعنا انا وعمر ورحنا لحارة عمي .. ماكنت ابي اروح بس عمر اصر علي ونشب بحلقي الا اروح معه المفروض عمر يروح لجده قبل اذان العصر بس طوال الظهر وهو يتكشخ وانا اعلق عليه كل مامر من عندي بالصاله .. حتى الغدا ماتغدا زين .. ياما راح ياما جا .. ياما اخذ شماغ ولبسه ياما نزله وجرب غيره وصلنا الحارة ونزل عمر ودخل بيت جده وانا قعدت احتري بالسيارة شوي شفت حرمتين وحدة عجوز والثانية شكلها بنت يطلعون من بيت جد عمر ودخلوا بيت عمي .. فرحت اكيد هذي جدته رايحه تشوف اختي .. لحظات وشفت عمه وجده يطلعون من البيت باخر شياكه وابتسمت اكثر وانا اشوف عمه وجده عليهم بشوت وحركات .. وعمر واقف قدامهم ويكلمهم حسيت من حركات يده يعطيهم الاوامر اشر علي عمر يعلمهم بوجودي و التفتوا لي يشوفوني .. نزلت من السيارة ورحت لهم اسلم عليهم وبعد السلام والكلام جدي بابتسامة = زين ماخترت ياعمر اذا كان هذا اخوها رايد بابتسامة = تسلم ياعم ورحنا لبيت عمي كلنا وانا حاط يدي على قلبي خايف عمي يردهم دخلنا المجلس وجلسنا .. ابو فهد وبجنبه ابو سامي وبجنبهم عمر مرتبك وكل شوي يعدل المرزام وانا جالس قبالهم وبجنبي عمي .. وبندر واقف ويصب القهوة وانا عيني على عمر و ماسك ضحكتي على شكله .. اعرفه عمور مو هذي جلسته دايم اذا جلس على الكنبة يإما يجلس مسترخي او يحط رجل على رجل او يجلس متركي هالمرة لا .. جالس كأنه طالب مؤدب وبعد ساعة من السلام والكلام والترحيب و السوالف قال ابو فهد لعمي غرضهم من الزيارة وبعد ماقال اللي عنده سكت عمي شوي والتفت لي ورجع التفت لهم بصمت وحنا نطالعه بترقب وعمر كل شوي يفرك يديه من الارتباك وانا ادعي بيني وبين نفسي ان عمي يوافق ويعتق مريم وبعد لحظات من صمت عمي حسيتها سنة عمي = والله يابو فهد جيتكم على راسي وهذي بنتكم وهذا ولدنا ومانلقى احسن من عمر لبنتنا .. ما عندي مانع انا موافق بس عطوني دقايق اشاور عمة البنت ( وقام ) ابو سامي بفرح = ايه من حقها يابو بندر وعلى طول طلع عمي من المجلس .. التفتنا كلنا لعمر نباركله مبدئيا ابو فهد بفرح وهو يطالع عمر بحنان ابو فهد = الله يتمم لك على خير الرجال وافق حط ابو سامي يده على فخذ عمر ابو سامي بابتسامة = مبروك وانا عمك ( وكمل يطمن عمر ) عطانا كلمة وماعليك مشاورته الحين للحريم شكل ههههههه بس طلع الاخ مفهي عمر = قولوا قسم ضحكت بصمت بس على طول ماتت ضحكتي و نزلت راسي منقهر من عمي .. ماقال ابشاور اخوها .. عمي مو معبرني ابد واللي يقهر قال يشاور مرته ليته قال اشاور البنت .. لا .. قال بيشاور مرته .. وليت على هذا و بس اللي يقهر انه ماسأل عن عمر .. عطاهم الموافقة على طول .. لو بنته اللي بتتزوج بيعطيهم الموافقة بهالشكل هذا ؟ فشلني قدامهم وافق بسرعة بدون مايسأل عن الشاب هو صالح والا طالح كأنه هم وماصدق يتخلص منه غمضت عيوني احمد الله واشكره ان اللي خطبها اول واحد عمر .. لو واحد ثاني كان ماسأل عمي عنه ولا شي وبتروح مريم بخرايطها .. انا فرحان انه وافق على عمر بس مابيه يوافق بهالشكل تنهدت .. الحمد الله على كل حال المهم الخوف الاول زال ووافق على عمر الحين باقي الخوف الثاني .. اخاف يرهق عمر بمبلغ كبير واخاف عمر يطول على بال مايجمّع وانا مستعجل اكثر من عمر .. ودي اخواتي يطلعن من هنا اليوم قبل بكرة انتبهت على مباركة ابو فهد لي .. ورفعت راسي له وابتسمت وانا احس دمي يغلي منقهر من عمي وحقرانه لي رايد = الله يبارك فيك ( والتفتت لعمر وابتسمت اكثر ) مبروك والله وصرنا نسايب يابو سعود ضحك عمر مستانس وهو يفرك يديه فرحان ودقايق عمي صارت نص ساعة .. طوّل وحنا نحتريه ابو فهد وابو سامي جالسين ويسولفون بسوالف جانبية وبندر كل شوي يقوم ويصب القهوة وانا جالس اضحك بصمت على عمر .. اذّى عمهكل شوي يجيب اقتراح مثل وجهه عمر = اقول عمي مدام انه موافق .. انا اباخذ البنت وامشي وانتوا كملوا الباقي حاولت امسك نفسي عن اضحك بصوت عالي وانا اطالع عمر التفت ابو سامي له ابو سامي = اثقل شوي الحين يجي الرجال ( ورجع يلتفت لابو فهد يكمل سواليف ) سرح عمر شوي وبعدها جاب اقتراح ثاني عمر = طيب عمي وش رايك نعطيه عربون الحين ونكمل الباقي بعدين التفت ابو سامي بسرعة معصب عليه ابو سامي بعصبية = ياولد اركد ضحكت بقو ة وانا اطالعه .. سكت عمر وهو يمسح جبهته بارتباك وسرح .. ضحكت حسيت من شكله يدور حل ثاني .. عمر مااااش من امس وعقله خف فجأة دخل عمي علينا وفرحت يوم عطاهم الموافقة الكاملة بس احس الى الحين منقهر منه ومن استهانته بي وبأختي .. ماقال ابسأل عن الشاب ولا شي على الاقل قدامهم .. حسيت مريم عنده ولا شي وكأنها هم ويبي يتخلص منها ويزوجها حي الله واحد ودخلوا بالتفاصيل اكثر .. شوي شوي لين جا طاري المهر عمي = والله يابو فهد البنت غالية عندنا والحريم يبون المهر 60 الف ولعمتها 10 الاف شهق عمر والتفت لجده وعمه منصدم .. ضربت فخذي بقبضة يدي بقهر غالية عندك يالكذاب وانت ماسألت عن عمر هو كفو والا لا .. حسيت بحرارة بعيوني شوي وابكي من القهر بس ماسك نفسي قدام الناس حسبي الله عليك الله يوريني فيك يوم سكتوا ابو فهد وابو سامي متفاجأين من المبلغ بس على طول حطوا نفسهم عادي وتكلم ابو سامي موافق ابو سامي = تستاهل العروس وعمتها هذا وجهي يابو سامي اذا اخذت العروس منه شي بس بالع لساني مااقدر اقول شي .. التفتت لعمر اشوف ردة فعله وانا متفشل من تصرف عمي بالاولى والثانية.. عمر عارف الوضع زين ولقيت عمر مقطب حواجبه متضايق وساكت ربع ساعة والكبار يتكلمون بامور ثانية تخص الخطبة وانا وعمر ساكتين لين اذن المغرب وطلعنا كلنا نصلي عمي وابو فهد يمشون قدامنا وابو سامي وعمر يمشون قدامي واسمع كلامهم واضح بما اني قريب منهم وواضح على عمر معصب عمر = عمي وش 70 الف من وين ادبرها هذي عمي بعصبية = اششش لا يسمعك الرجال فضحتنا عمر = ماعلي منه خله يسمع .. وش قال .. قال عمتها لها 10 الاف .. انا ابتزوج البنت والا ابتزوج عمتها .. وبعدين اللي اعرفه الام هي اللي تطلب .. هذي مالها ام .. وش دخل العمة تطلب عشر الاف .. اصرف عليها انا دز ابو سامي عمر بمرفقه معصب ابو سامي = بس ياولد اسكت .. اسكت الرجال يمشي قدامنا لا يسمعك ( والتفت لي يطالعني وعلى طول التفت لعمر يهمس ) واخوها ورانا فضحتنا اسكت .. عندي الحين خمسين الف .. اذا كنت تبيها خذها بس اسكت فضحتنا عمر = ودي اخذها بس معاذ ناشب بحلقي عمي بعصبية = اوووه هذا اللي اخذناه منكم ( وراح معصب لابو فهد وعمي وانضم معهم ) وقف عمر وحط يديه على خواصره وهو يطالع عمه معصب .. وصلت عنده ووقفت بجنبه وسكتت وانا اطالعه ماعندي شي اقوله التفت لي عمر وهو الى الحين حاط يديه على خواصره وكمل بعصبية عمر بعصبية = من عذرك والله يوم هجيت من البيت اذا كان هذا عمك لفيت وجهي عنه متفشل وكملت طريقي للمسجد بدون مارد عليه عمر انقهر عشان هالعشر الاف تروح لمرة عمي وشلون لو يدري ان الستين الف كلها بتروح ببطن عمي وعياله وماراح تحصل العروس منها ريال واحد .. عمي واعرفه طلعنا من المسجد وعطاني عمر مفتاح سيارة عبد الله عشان ارجع البيت وهو قال يبي يجلس مع اهله شوي ويرجع اخذت سيارة عبد الله و رجعت البيت وانا افكر بمريم كان ودي اشوفها واسألها شاورها عمي واخذ رايها والا سفهها زي ماسفهني المشكلة الحين مافيه طريقة اكلم فيها مريم قبل كانت تكلمني بتلفون بيت عمر الحين صارت تستحي تتصل على البيت والمشكلة ماعندها جوال نكلم بعضنا براحة ابتسمت .. صح الحين هي تقريبا زوجة عمر .. عمي ماله كلمة عليها الحين ابطلع لها جوال واتحداه عمي يعيي .. ابتسمت اكثر على الفكرة .. الحمد الله هانت الله يوفقها مع عمر ويعوض صبرها خير بعد يومين الاحد ... الساعة 2 الظهر عرفوا الشباب من مشعل ان خطيبة عمر هي اختي .. وكل ماجوا استلمونا تعليقات علي وعلى عمر دخلت البيت بعد ماشريت الغدا من المطعم .. وانا عند الباب الداخلي سمعت عمر يكلم بالصاله .. واللي شد انتباهي كلمته عمر = والله مادري ابسأل اخوها واشوف سكرت الباب بشويش ومشيت بخفة وقربت عند الصاله عشان اتسمع بوضوح عمر = ايه هذا عارفه بس مدري وش مشكلتها بالضبط .. طيب انتي شفتيها يوم الخميس اللي راح وقلتي انك ارتحتي لها .. والله مها مدري ابسأل اخوها واشوف قطبت حواجبي مستغرب شكلهم يتكملون عن مريم بس وش يبي يسألني عنه .. تنهدت وقربت اذني احاول اسمع باقي الكلام عمر = صادقة والا تمزحين مهرك هذا كيف تبيني اخذه .... حتى لو كان الباقي .... جد والله 20 .. أي والله ياعمة اني متورط .. ومعاذ راسه يابس تصدقين توني مكلمه بس ماش ... خلاص غسلت يدي منه ... طيب اباخذ العشرين بس تراه دين ... هههههه ادري انتي مايضيع لك حق تنشبين بالواحد هههههه .. خلاص امرك بكرة مع السلامة ابتعدت عن مدخل الصاله ورجعت للباب الداخلي احط نفسي توني جاي .. فتحت الباب وسكرته بقوة عشان يطلع صوت ومريت الصاله ببراءة ورحت للمطبخ ورجعت للصاله عند عمر ولقيته جالس على الكنبة وقاعد يكتب بدفتر رفع عمر راسه يشوفني ورجع يكتب جلست على كنبة منفردة بصمت وانا احتري عمر يسألني .. ودي اعرف وش كانوا يقولون عن مريم رفع عمر راسه مرة ثانية يطالعني وابتسم بفرح عمر = رايد قدرت ادبر 20 الف من عمتي ومع الست الاف صاروا 26 الف ابتسمت بفرح على المعلومة الجديدة سمعت طاري العشرين بس مافهمت شي منها رايد = والله يعني عمر تتوقع كم شهر وتكمل الباقي ؟ رفع عمر يده وحطها على ذقنه يفكر عمر بتفكير = والله مادري تعرف ماعندي شي الحين حتى بنزين سيارة ماعندي .. وكل اللي ادبرهم دين ( وزفر بضيق ) الشي الوحيد اللي اعرفه ماراح اتزوج الا وانا محمل ديون على ظهري .. حسبي الله على معاذ بس ( وطالعني متضايق ) تصدق عمي مستعد يدفع كاش والحين .. بس معاذ واقف لي بلعوم رايد بتنهيدة = طيب انت ليه ماتصلح اللي بينك وبين معاذ تراكم عيال عم ماله داعي اللي تسونه ببعض طالعني عمر شوي ساكت ونزل راسه يكمل كتابه يله عمر اسألني وش كنتوا تقولون عن مريم قمت ورحت للمطبخ اجيب الغدا وحنا نتغدا بالارض سألني عمر فجأة عمر = اقول رايد .. آآآ اختك تعاني من مرض وراثي رفعت راسي له متفاجئ رايد مستغرب = مرض وراثي ؟ لا .. عائلتنا سليمة ليش تسأل هالسؤال عمر = آآآآ لا .. امممم ( وسكت شوي وكمل ) تبي الصراحة عمتي تقول ان اختك من يوم عرفتها وهي تشكي ظهرها .. ليه اختك وش فيها ؟ طالعته بصمت ماادري وش اقول .. انا بنفسي مادري وش فيها مريم .. عدة مرات ابي اودها المستشفى وعمي يمنعها تطلع معي .. كل اللي اعرفه انها تتألم من ظهرها بس وش منه مادري تضايقت من سؤال عمر واضطريت اقوله كل اللي بخاطري واللي اعرفه رايد = اختي من يوم كنا بالرياض الين جينا هنا وهي مافيها شي وسليمة .. مادري اذا كان هذا من اثر الحادث عليها والا لا .. بس تأكد انها سليمة وراثيا ( وسكت شوي ) ويكون بعلمك عمي وعمتي يكرفونها بالبيت كرررف عمر بابتسامة = طيب وش فيك عصبت لفيت وجهي عنه وسكتت متضايق .. مادري ليه زعلت من سؤاله مر 3 شهور واول ماتملك عمر على مريم وهو يجمع الريال على الريال والى الان ماقدر يجمّع الا 57,500 صار الدفتر مايفارقه .. كل يوم يحسب .. كل يوم يتصل يدور احد يسلفه غير عمه وجده كل يوم اقوم اخر الليل من النوم والقاه جالس على الكنبة ويفكر والدفتر بين يديه صار قليل النوم من هم الديون على ظهره وراتبي حق 3 شهور يادوب جاب 2500 .. اصلا هو كله على بعضه 1200 بالشهر وناخذ منها انا وعمر 400 ريال مصروفات لي وله ولجوالتنا وكهرب البيت والباقي اعطيه عمر يحطه مع مهر مريم بنزين السيارة يشحده عمر من العيال احيان عبد الله يعبي سيارته واحيان مشعل يشتري له مذكرات الجامعة واحيان منصور هو اللي يشتري فطور عمر بالجامعة بالمختصر عمر صار مزنوق على الاخر وعدة مرات يشكيلي وحنا نتغدا انه متفشل من العيال ويحس نفسه انه صار عاله عليهم .. وفوق هذا يستحي يطلب من جده يصرف عليه خاصة ان عمر ماعنده حتى ريال واحد وصعبه كل شوي يمد يده لجده عطني وعطني الصراحة حاس فيه ومريت بنفس ظروفه ( الفقر وقلة المادة ) عدة مرات كان يبي يأجل الدراسة عشان مايضايق الشباب بشراء المذكرات والبنزين وغيره بس اقنعته يصبر ويكمل دراسته اهم شي الشهادة ومايصير مثلي حتى شهادة ثانوي ماعندي .. وكلها ازمة وتعدي وتصير ذكرى .. والحمد الله اقتنع بكلامي مع انه الى الحين متفشل من العيال وصرفهم عليه واللي يقهر ان ولد عمه يلعب بفلوسه لعب طاح مرة دفتر عمر بيدي وشفت اللي دايم يكتبه فيه وكسر خاطري الصراحة شفت مكتوب بالدفتر بخط يده 6500 ريال >>> دين من رايد 20 الف ريال >>> دين من عمتي ×× 5000 ريال >>> دين من يوسف 10 الاف ريال >>> دين من ابو احمد 13 الف ريال >>> دين من ابو مشعل = وش تسوي رفعت راسي عن الدفتر لمصدر الصوت وشفت عمر واقف عند مدخل الصاله بملابسه الداخليه ويطالعني ابتسمت وسألته وانا ارفع الدفتر قدامه رايد بابتسامة = اشوف الديون اللي عليك زفر عمر وجلس على كنبة منفردة قبالي عمر بضيق = لا تذكرني المشكلة خلاص مااعرف احد امون عليه يسلفني نزلت نظري للدفتر وقعدت احسب ولقيت المجموع يساوي 54500 رفعت راسي لعمر اصحح له الحساب رايد = عمر حسبت اللي هنا طلع 54500 وانت تقول بحسابك الثاني فيه 57000 انت حاسب غلط عمر = 3000 من راتبي قبل اعطيه معاذ ماتسلفته من احد ( وزفر ) افففف يازين اللي لك بس ابتسمت ونزلت نظري للدفتر مرة ثانية رايد = انت حاط اشارة خطأ وش يعني ؟ ابتسم عمر وبعدها ضحك عمر = ههههههه اللي مو مهم ارجع له فلوسه احط اكس اكس عليه .. مافيه الا عمتي ابتسمت له رايد = طيب انا بعد حط اكس عند اسمي .. مو مهم ترجع فلوسي عمر = لا وش دعوة انا بنفسي مستغرب كيف تعطيني وهو لاختك ماتت ابتسامتي على طول و سكتت .. مب لاختي هذا وجهي اذا عطوها ريال واحد .. حقها هذا زيه زي بيتنا .. بيضيع زي ماضاع غيره بس بلعت لساني وسكتت عشان ماينقهر عمر على الفاضي عمر = رايد يوم الخميس الجاي عرس عمتي تراك معزوم ابتسمت .. دايم يعيدها علي رايد = طبعا اكيد ابجي .. صرنا اهل اعتدل عمر بجلسته ورجعتله خفة العقل عمر = يعني تتوقع اختك بتجي للعرس ترا عمك النحيس عيا يخليني اشوفها النظرة الشرعية .. وجدي بعد يقهر ماأيد الفكرة.. مدري متى يتعلمون هالشيبان ابتسمت ابتسامة واسعة وانا اطالع عمر من مكالماتي مع مريم بجوالها اللي طلعته لها عرفت منها ان عمتي وعمي يبونها تروح للزواج .. طبعا ما احد فاهمهم الا انا ومريم اكيد سمحوا لها تروح هالمرة عشان يحسنون صورتهم قدام الناس بس مريم رافضة تروح لسببين الاول عناد بعمي ومرته ومن قهرها تبي أي شي تعاندهم فيه حتى لو على حساب وناستها والسبب الثاني على حد كلامها انها مستحية تروح لزواج الناس وهي تعتبر عروس طالعت عمر وضحكت وقلت اعانده رايد = والحين بعد مانت شايفها حتى لو جت هالمرة انا بصير نحيس مثل عمي ههههههه عمر بزعل = ايه الله يصبرنا عليكم ضحكت اكثر على كلمته حسيتها طلعت منه من قلب سمعته يذن العشا وابتسمت .. الحين يجون الشباب متفقين انا و منصور ومشعل وعبد الله ومعنا مصعب نحاول نقرب عمر ومعاذ لبعض بيوم زواج عمتهم وعلموني العيال ان الفكرة فكرة مصعب وهو بنفسه طلب منهم وهم بالجامعة انهم يلقون له حل يقرب العلاقة بين عمر ومعاذ انا من زمان ماشفت مصعب الا مرة بملكة عمر وشفنا كيف عمر ومعاذ مايكلمون بعض واذا صار و تكلموا مايتكلمون الا باسلوب عدائي وعلى حد كلام العيال ان مصعب تعب معهم وهذا اللي خلاه يلجأ للشباب بما انهم اصدقاء عمر المقربين والى الحين ماندري وشلون نقربهم لبعض .. هذا عنيد وهذاك اعند منه |
|
|
#39 |
|
|
رد: يمسح الدمعه بشكوى للمبدعه هدوئي
* الجــزء الأخيـر * * عمر * الاربعاء ... الظهر جالسين انا ورايد بالارض ونتغدا رفعت نظري لرايد بصمت ولقيته ياكل بشفاحه كعادته وليته يبين فيه احم .. من يوم تزوجت اخته مريم ماعادت تتصل اخته على البيت .. وش معنى يوم تزوجتها انقطعت اتصالاتها على اخوها .. واللي يقهر هالمعصلك اللي قدامي ماطلّع لها جوال الا يوم تزوجتها .. يقهرون قبل اتسمع وش يقولون لبعض اخر الليل وانا حاط نفسي نايم .. الحين كيف اسمعهم وكل واحد معه جوال .. والمشكلة مااقدر اسأله او اطلب منه رقم جوالها .. اخاف شي منقود عندهم .. جدي وهو جدي وقف مع عمهم الخايس وعيا يخلوني اشوفها النظرة الشرعية .. الحين اقوم اطلب جوالها اففففف والمشكلة شكلي مطول .. عجزت القى احد يسلفني مبلغ كبير يساعد .. كل زملائي بالجامعة اللي امون عليهم مايقدرون يدبرون الا 3000 وتحت بس مر 3 شهور على الفاضي .. وانا تعبت ابي سيارتي وراتبي .. وووو .. وابتسمت و ابي نادر .. من زمان ماشفته .. احسه كبر .. ابتسمت اكثر اتذكره يوم كان عندي اتذكر ريحته المميزة .. .. اتذكر وجهه الصغير .. حتى اتذكر يوم يوسخ واغسله .. اتذكر يوم اغير له .. = بسم الله على وش تضحك منه انت ؟ انتبهت على رايد يسألني ورفعت نظره له ولقيته يطالعني مستغرب تنهدت وشكيتله همي عمر = ودي اشوف نادر .. من زمان عنه وانا شكلي مطول عجزت اجمّع باقي المهر هز رايد اكتافه بلا اهتمام رايد = بلاه اخوانه عمر ومعاذ ( وحط اللقمة بفمه وكمل ) الله يعينه اخذت لقمتي واكلتها بدون نفس .. مليت من الشحاذة من العيال .. امس تجرأت وطلبت من جدي يعطيني اعبي السيارة عشان اروح الجامعة اشوى ان جدي عطاني 500 .. المشكلة ا ذا خلص اللي معي استحي اطلب منه مرة ثانية خاصة جدي مايخلي محاضراته .. يوم عطاني الخمسمية عطاني محاضرة طويلة عريضة ماهو راضي باللي يصير بيني وبين معاذ وصدع راسي بكلامه.. انتم اخوان وانتم اخوان ومايصلح اللي تسونه ببعض ومادري ايش فجاة رن جوالي .. مد رايد يده للطاولة الصغيرة واخذ جوالي ومده علي بصمت القيت نظره عليه مها يتصل بك قمت مبتعد عن رايد وانا متضايق .. اففففففففف اكيد تبي السوق .. اعرفها مها ماتتصل الظهر الا اذا بغت تحجزني العصر اوديها رحت للمطبخ ورديت عليها وانا اغسل يدي عن بقايا الرز عمر بضيق = الوووووو مها = السلام عليكم عمر بدون نفس = وعليكم السلام مها = عمر تذكرت شي كنت ناسيته قاطعتها على طول .. مالي نفس اطلع العصر عمر بضيق = اففففففففف مها عرسك بكرة وانتي الى الحين ماخلصتي من السوق .. وش نسيتي بعد ؟ سكتت مها شوي مها = احد جاب طاري السوق الحين ... عمر بضيق = مدري عنك .. وش نسيتي ؟ مها = انا اقول تذكرت شي كنت ناسيته وابي اسألك عنه ؟ قطبت حواجبيي عمر مستغرب = عن وش ؟ مها = ذهب امك اخذته انت والا لا ... انت ونادر الوحيدين اللي تورثونها .. طيرت عيوني .. كأن واحد ضربني على راسي .. صح امي مالها شي اورثه ؟ كملت مها كلامها مها = انا اقول ليه ماتبيع ذهب امك يساعدك .. وشوله مخزنه عندك ؟ او على الاقل تصدق بذهبها لا تخزنه عندك .. حرام عليك سألت مها بألم .. ناسي ان امي لها شي .. اصلا مادري اذا فعلا عندها ذهب والا لا عمر = انتي متأكدة ا ن امي عندها ذهب .. غرفتها دايم ادخلها ماعمري شفت شي بدروجها .. كلها ملابسها واغراض مو مهمة قبل تتزوج عمي مها = انت غبي والا تستغبي .. امك الله يرحمها ماتت وهي مالها الا سنة متزوجة واكيد ماهي متزوجه بدون ذهب ومو معقول باعت ذهبها والا تصرفت فيهم خلال سنة بس .. طيرت عيوني .. أي والله صح .. وشلون ماجا ببالي اللي للغالية ... على الاقل اخذهم عندي .. مو اخليه ببيت عمي بعنيزة الى الحين نسييييييييت كلش ماطرا علي عمر بألم = مها .. يعني هو بشقتها بعنيزة الى الحين ؟ مها = انا وش دراني .. انا حسبتك اخذت ذهبها واغراضها من زمان واتصلت عليك الحين اذكرك تبيع ذهبها يساعدك بزواجك .. مادريت انك على عماها وماتدري وين الله حاطك غمضت عيوني بألم ... آآآآه يمه حتى بعد موتك ناسيك ... ياما طلعت لاستراحة الشباب استانس واخليك بالبيت لحالك بدون ونيس وبعد ماتزوجتي عمي .. كبريائي وغروري منعني ازورك باستمرار.. اروح لخوياي وانتي يوميا تتصلين علي وتطلبيني اجيك واجيب اعذار تافهه اسكتك فيها والحين بعد موتك نسيتك ونسيت اهتم باغراضك .. مها معها حق .. ليه ما اتصدق باغراضها .. ملابسها الى الحين مهملة بغرفتها مها = الوووووووووووو انتبهت لمها .. وتنحنحت اعدل صوتي من العبرة عمر = احم .. مـ .. مها ابمرك العصر نروح لبيت عمي .. ابي اروح لشقتها فوق سكتت مها شوي مها = يعني انت ابد ابد مااخذت اغراضها من هناك ؟ عمر = والله ماخذت شي مها بعصبية = خبل انت .. ( وكملت تتطنز ) وانا على بالي عمر يمديه تصدق باغراضها من زمان .. طلع ماحد حولها الله يرحمها .. مالك عليك عمر بضيق = مها ابمرك العصر سكتت شوي وبعدها ردت مها = عمر استحي اروح لبيت عيال عبد العزيز .. لا تنسى بيت ياسر جيرانهم الجدار بالجدار .. وبكرة عرسي استحي يشوفني احد منهم .. وش بيقولون عني ... فشلة عمر = مها تكفين .. تدخلين على طول البيت ماحد شايفك .. والله العظيم ماخذت شي من اغراض امي .. وابي اروح فوق لشقتها وابيك معي تكلمين ام معاذ يفتحون لي الشقة مها = اكلم ام معاذ لك الحين مو مشكلة .. وشوله اروح انا سكتت .. اخاف يطلعلي معاذ .. مالي خلقه عمر بضيق = طيب كلمي ام معاذ خليهم يفتحون لي الشقة .. ابجيهم العصر مها = طيب سكرت عن مها ورجعت شعري على ورا .. ندمان ندمان على اهمالي لامي بحياتها نزلت راسي وصورتها ببالي ارجع من الاستراحة والوناسة اخر الليل والقاها جالسة بالصاله لحالها تحتريني جالسة لحالها بهالبيت الكبير .. جالسة تنتظر ولدها الوحيد يعطيها وجه .. دايم اذا شافتني داخل تعاتبني بهدوءها وينك ياوليدي تأخرت علي وينك ماتعشيت معي ليه ماتجلس معي ومع اني مهملها وتاركها وراي وحيده تقوم اول ماتشوفني و تسألني هاه ياعمر تعشيت ؟ هاه ياوليدي احطلك الاكل ؟ ليت الزمن يرجع ورا .. اجلس معها .. اسولف عليها من اخباري .. اضحكها .. ليتني عطيتها ساعة من الساعات الطوال اللي اقضيها مع اصحابي رفعت يدي وغطيت وجهي ودمعة حاره سالت على خدي ندمان آآآآآه يايمه ... سامحيني حتى يوم وافقتي على عمي .. كبريائي وغروري منعني اباركلك وافرحلك حتى فرحك يايمه ماحضرته = عمر التفت على ورا لمصدر الصوت وشفت رايد واقف عند باب المطبخ واول ماشاف وجهي ودموعي طير عيونه وجا عندي رايد بخوف = عمر وش فييييك .. عسى ماشر .. وش الاتصال اللي جاك .. لا يكون اهلك فيهم شي ؟ لفيت وجهي عنه بصمت ومسحت دمعتي عنه مسك رايد ذراعي يسألني رايد = ياشيخ خوفتني قل وش فييييييك سحبت ذراعي منه ومشيت عنه طالع من المطبخ عمر بصوت باكي = رايد خلني بحالي وطلعت من المطبخ ودخلت الصاله وانا احس بضيق .. هنا امي كانت تجلس لحالها هنا كانت تحتريني العصر والمغرب والعشا الى اخر الليل .. لحالها مثلي تماما لحالي .. ولغبائي وتفاهتي لما وافقت هي على عمي لمتها وعصبت عليها وقومت الدنيا وماقعدتها جلست على الكنبة وحطيت راسي بين يدي كانت تبي تتخلص من الوحدة بأي طريقة.. مثلي الحين ادور أي طريقة اتخلص من الوحدة حسيت بيد رايد على كتفي وجلس بجنبي على الكنبة رايد = عمر وش فيك ؟ رفعت راسي وتساندت على الكنبة وراي عمر بندم = ياليت امي موجودة واجلس معها واخدمها ( التفتت لرايد وانا احس دموعي سالت مرة ثانية غصب عني ) ماكنت الولد البار لها .. عقيتها يارايد واهملتها ( ورفعت يدي ومسحت دموعي بندم ) انا عاق يارايد عااااااااق لف رايد ذراعه على كتفي رايد = بالعكس ما اتوقع انك من هالنوع ( وابتسم وهو يطالعني ويخفف علي ) وبعدين الله يهديك وش هالاتصال اللي خلاك تتذكرها بهالوقت لفيت وجهي عنه بضيق وتنهدت عمر = عمتي اتصلت وذكرتني بذهب امي وحاجاتها المهمة ... نسيت اغراضها زي مانسيتها قبل .. كنت احسب كل اللي تملكه امي ملابس واغراض ماهي مهمة .. عطورات وخرابيط الحريم ( وانحنيت وحطيت راسي بين يدي ) رايد = طيب حلو جا بوقته .. بيع ذهبها سكتت وبكيت بصمت ماهو فاهمني رايد العصر رحت لعنيزة عشان اخذ ذهب امي واتصدق فيه .. ماخدمتها بحياتها على الاقل اخدمها بعد موتها وقفت سيارة عبدالله قدام بيت عمي ونزلت وضربت الجرس وانا اطلع الجوال من جيب بنطلوني ابي اتصل على مصعب يطلعلي اسرع من ضرب الجرس .. بس طلع لي مصعب عليه ثوب وشماغه على كتفه باهمال مصعب بابتسامة = هلا عمر صافحته وانا ارجع الجوال لجيب البنطلون عمر = هلا بك مصعب = المفروض اكون بالمحل الحين بس الظهر اتصلت مها وعلمتنا انك تبي تروح لشقة خالتي الله يرحمها هزيت راسي بايه بصمت ورفعت نظري لدرايش شقة امي مصعب = تفضل حياك الله .. الشقة فاتحينها .. وترا مالمسنا شي من اغراض خالتي .. بس قبل شهرين اختي نظفت الشقة ( ومسك يدي ودخلني الحوش وكمل ) تعرف امي واختي كرهوا يتصرفون باغراض امك بدون علمك بس شالوا الاغراض الثمينة وهي الحين عند امي لين تجي تاخذهم بس انشغلن بفارس .. وامي بعد .. الله يشفيها تعبانه ونسن يعلمون مها او يعلموني انا عنهم عشان نعلمك تجي تاخذهم .. التفت لمصعب بصمت .. ماسرد اللي عنده مرة وحدة مع اني ماسألته الا انه داري بالضبط عن سبب جيتي مصعب = حياك ياولد العم وجا بيدخلني المجلس .. بس سحبت يدي منه وحنا الى الحين بالحوش عمر = لا معليش ابي اروح فوق مصعب = يارجال .. خلنا ندخل المجلس ونتقوى ونعين خير وبعدين رح فوق كيفك ( وابتسم ) رفعت راسي لدرايش شقة امي .. مادري ليه .. من الظهر وانا متضايق ومالي نفس لأي شي .. نزلت نظري لمصعب عمر = معليش مرة ثانية .. الحين ابي اروح فوق سكت مصعب شوي مصعب = طيب مثل ما تبي ... الشقة مفتوحة الحين .. رح فوق وانا الحين اجيب الاغراض من امي واجيك هزيت راسي بايه ورحت باتجاه الشقة وطلعت فوق ولقيت الباب مفتوح .. دخلت ببطئ وانا اتذكر امي .. )))((( امي = ابيك تصير عندي بالبيت بعنيزة .. ابي انتبهلك بنفسي واشوف احتياجاتك )))((( امي = خلاص خلاص .. خلوه .. انا ماصدقت اشوفه )))((( امي = وانت ياوليدي ماتبي تسكن معي .. وش يجلسك لحالك .. فرح قليبي وتعال عندي )))((( حسيت بحرارة بعيوني وانا اتذكر كلمات امي وعرضها علي مليون مرة اسكن عندها بس غروري وكبريائي ارفض طلبها ياليت ترجع وأبر فيها واخدمها بعيوني التفتت لجهة المطبخ ومشيت متوجه له بألم ووقفت عند باب المطبخ اتأمله واتخيل امي واقفة.. اذكرها يوم دخلت عليها المطبخ .. اول ماشافتني فتحت الثلاجة هذي .. وطلعت حلى مجهزته لي التفتت وراي لغرفة التلفزيون ومشيت متوجه له ودموعي على خدي .. اذكرها يوم تجرني للغرفة هذي ومعها صحن الحلى دخلت الغرفة وانا ابكي بصمت واتأمل الكنبات الجديدة الاثاث ماله الا سنة وراحوا اهله .. اذكر امي هنا جلستني على الكنبة هذي جلست على نفس الكنبة واتخيل امي ماسكة يدي الحين وتجلسني .. هنا بهالمكان هذا اذكر يوم سألتها عن اللي ببطنها ولد والا بنت وهنا سميت نادر .. هنا اقترحت عليها باسم نادر ووافقت على طول شهقت بألم و انحنيت وحطيت راسي بين يدي وبكيت بقوة عمر = آآآآآآآه يماااااااا انحنيت اكثر ودموعي على خدي عمر = سامحيني يماااااا قصرت معك واجد وماعرفت قيمتك وبكيت اكثر بألم وبندم حسيت بحركة ورفعت راسي .. وشفت مصعب واقف عند مدخل غرفة التلفزيون ومعه شنطة ووراه سعود واقفين ويطالعوني بصمت لفيت وجهي عنهم وانا امسح دموعي بيدي .. مديت رجلي ودخلت يدي بجيوب بنطلوني ادور مناديل وماحصلت .. ورجعت امسح دموعي بيدي جلس مصعب بجنبي على الكنبة بالمكان اللي تخيلت امي جالسة فيه ونزل الشنطة اللي معه عند رجوله ولف ذراعه على كتفي وقربني منه .. لفيت وجهي عنه اكثر ومنزل نظري للارض مصعب = مر 3 شهور على وفاتهم ادعلهم بالرحمة تنهدت وهمست بحزن عمر = الله يرحمهم ( سكتت شوي اجاهد دموعي عن تطلع مرة ثانية بس شهقت غصب عني ورفعت يدي و مسحت على شعري بندم وكملت افضفض لمصعب لا شعوريا ) كانت تطلبني اجي عندها ( وغمضت عيوني بقوة وسالت دمعة حارة على خدي ) ياليتني طعتها يامصعب ( وانحنيت اغطي دموعي بيدي الثنتين عن مصعب وسعود وكملت بصوت باكي ) ياليتني بريت فيهااااااااا .. كانت تحتري مني اجلس معها لو ساعة .. وبدل مااجلس معها اروح لخوياي واستانس عندهم وهي بالبيت لحالها وبكيت اكثر حسيت بيد مصعب يمسح على ظهري ويواسيني مصعب = ياعمر تقدر تنفع امك بعد موتها وتبر فيها .. اما بدعوة منك او بصدقة تتصدق عنها .. وش فيك يارجال اعتدلت جالس وسندت ظهري على الكنبة وراي ورفعت التيشيرت عن بطني ورفعته لحد وجهي امسح دموعي واحاول اهدي نفسي .. مصعب ماهو فاهم باللي احس فيه ماحد فاهم علي انا ندمان على تقصيري معها اكثر من أي شي ثاني .. من يوم راحت وانا احس بضميري يأنبني ناحيتها سمعت مصعب يكلم اخوه مصعب = سعود هات الطاولة هذي رفعت راسي اشوف سعود وانا اعدل التيشيرت علي .. شال سعود طاولة جانبية صغيرة وحطها قدامنا انا ومصعب وجلس على يد الكنبة اللي جالسين عليها بجنبي حط مصعب شنطة مربعة مثل الصندوق على الطاولة مصعب = اللي فيها لقوه بغرفة خالتي الله يرحمها ( والتفت لي وكمل ) جمعت امي واختي كل الاشياء الثمينة بهالشنطة اخذت نفس وانا اطالع الشنطة شوي و فتحتها ببطئ وانا اجاهد دموعي ولقيت بالشنطة ثلاث علب اطقم ذهب .. وعلبه كبيرة كرتونية مثل الهدايا و2 علب خواتم صغيرة .. وكيسه ملفوفة بشي مررت اصابعي بصمت على العلب اتحسسهم لين طاحت يدي على الكيسة واخذتها وفتحتها وطلعت اللي فيها و طيرت عيوني وتصنمت وانا اشوف اللي بيدي وبأقل من الثانية انفجرت ابكي هذي محفظة الفلوس النسائية حقت امي اللي تاخذه معها دائما للسوق ولاي مكان غطيت عيوني بيدي وانا اضم محفظتها لصدري بيدي الثانية سمعت مصعب يكلمني وهو يحط يده على كتفي مصعب بتنهيدة = عمر .. وش قلنا بكيت وانا اضم محفظتها عمر بصوت باكي = هذي محفظة امي مصعب = ادري ادعلها بالرحمة وش قلت تو تنهدت ورجعت المحفظة للشنطة بدون الكيس ورفعت التيشيرت عن بطني للمرة الثانية ومسحت وجهي ودموعي واخذ نفس اهدي نفسي عدلت التيشيرت وانا احس بكتمه مخنوق .. سكرت الشنطة وسكتت افكر وانا اطالعها لازم اتصدق فيهم كيف يقولون اخذ ذهبها وابيعهم كيف .. احس اني نذل لو استفيد منهم وانا العاق فيها مقصر معها واتركها الساعات لحالها وماخدمتها ولا طعتها واخر شي اخذ ذهبها باردة مبرده بأي وجه حق نادر يمكن هو احق مني .. على الاقل يمكن لو يعرفها ماسوا فيها اللي سويته انا بأي حق بس بأي حق بس المشكلة ما اعرف ابيع الذهب عشان اتصدق بفلوسه مديت يدي وشلت الشنطة وحطيتها بحظن مصعب بصمت استغرب مصعب وطالع الشنطة بحظنه يستوعب وبعدها رفع راسه لي يسألني مصعب مستغرب = وش ؟ اخذت نفس وقلت له اللي بخاطري عمر بحزن = مااقدر اخذهم مالي حق ابيعهم واستفيد منهم .. خل عمتي ام معاذ تتصدق فيهم .. او احتفظوا فيها لنادر لين يكبر ( ولفيت وجهي لسعود عنه ) مصعب مستغرب = وشلون مالك حق ؟.. اجل من اللي له حق .. مالها عيال الله يرحمها الا انت .. وفارس توه بالمهاد قمت واقف وانا احس مخنوق .. ابي اطلع اشم هوا قام مصعب ومسك كتفي ولفني غصب اطالعه ولصق الشنطة على صدري بعنف مصعب بعصبية = خذ امسك وخل عني الكلام الفاضي منزل راسي بحزن وساكت .. ما اهتميت لكلامه و ماتحركت ولا رفعت يدي امسك هالشنطة.. ليه ماحد فاهمني .. مااقدر اخذ اللي لامي وانا اللي كنت اتكبر عليها عن اسكن عندها .. اجي الحين واخذ شي لها .. دفعني مصعب على ورا بالشنطه على صدري بنفاذ صبر مصعب = خذها لا تصير خبل عاد التفتت لمصعب وقلت اصرفه عشان يسكت عني عمر بحزن = عطه امك تبيعهم انا مااعرف ابيع ذهب مصعب = امي توها بالحداد .. خذ عمتي مها ورح انت واياها للسوق وبيعه عمر = مها بكرة زواجها وبعدها اكيد بيروحون شهر عسل هذا غير عمي فهد واهله عندهم بالبيت الحين ... صعب ادخل بيت جدي واهل عمي فيه .. خله عندكم .. مايحتاج اخذه ولفيت ابي اعطيه ظهري واطلع بس رجع مصعب ومسكني مع كتفي بعنف ولفني اطالعه مصعب بعصبية = انت شارب شي والا وش قصتك .. ياخبل خذ حق امك وبيعه .. مو انت محتاج تجمع مهر زوجتك .. صح انا ماني راضي باللي يسويه معاذ .. بس هالذهب تقدر تستفيد منه الحين .. صح والا انا غلطان ؟ رجعت شعري على ورا والشعور بالندم يزيد فيني اكثر واكثر واكثر كأن امي حاسة فيني .. كأن قلبها معي .. كأنها شرت هالذهب عشان استفيد منه انا التفتت لمصعب وغصب عني سألت دمعه بخدي .. مشيت خطوة بتعب نفسي وضميت مصعب اشكيله وليته يفهمني عمر بصوت باكي = مصعب امي حاسة فيني .. احسها معي الحين .. انا ماستاهلها والله مااستاهلها .. انت ماتعرفني يامصعب .. ماتعرف وش كنت اسوي فيها ... كيف تبيني اخذ حقها الحين كييييييييييييييييف وسندت راسي على كتفه وضميته اكثر .. احس اني محتاجها .. محتاج امي تنهد مصعب ولف يده حولي وضرب ظهري بخفه مصعب = وش فيك عمر اليوم .. والله حيرتني معك .. صاير حساس بزيادة ( وحط يده على راسي ودخل اصابعه بشعري ومسكه بخفه ) يالله عاد شوي وتصيحني معك ومسك كتفي وابعدني عنه .. لفيت وجهي عنه ومسحت دموعي .. والله غصب عني تطلع هالدموع .. مابي ابكي قدامهم كأني بزر .. بس الاحساس بالندم يحرقني حط مصعب الشنطة على صدري مرة ثانية مصعب = يالله عاد خذها اخذت الشنطة منه وانا منزل راسي وتنهدت كمل مصعب كلامه مصعب = اذا كنت تبيني اروح معك للسوق عادي ماعندي مانع هزيت راسي بايه بصمت ورفعت راسي له اسأله عن نادر .. من زمان ماشفته عمر = وشلون نادر ( وحاولت ابتسم بس فشلت ) اكيد كبر شوي ضحك مصعب وهو يحط يده على كتفي مصعب = يعني شوي ( وسكت شوي وكمل ) صح عمر على طاري نادر .. ترا معاذ سجل اسمه فارس .. الحين رسمي صار اسمه فارس سكتت ماعندي تعليق .. حكم القوي على الضعيف شنقول بعد .. انا بالنسبة لنادر اخوه من امه .. يعني نظاميا صفر على الشمال .. معاذ اخوه من ابوه ويعتبر له الكل بالكل بس ولو انا وامي اتفقنا نسميه نادر .. يعني نادر .. حتى لو كان نظاميا فارس عمر = الصراحة مشتاق اشوفه مصعب بزعل = ادري والله ... تصدق امي من يوم عرفت بالسالفة وهي متزاعله مع معاذ ودايما تهاوشه اذا جبنا طاريك .. والله ياعمر امي ماهي راضيه باللي يصير تخاف يكون قطيعة رحم بينك وبين فارس بس عاد معاذ اذن من طين واذن من عجين .. والله ياعمر وانت ماحلفتني ان امي قبل شوي وانا اخذ منها الشنطة تقول ارجع وخذ فارس لعمر .. اخبرها تلبسه وتجهزه تبيني اجيبه لك الحين وتشوف اخوك ... ومعاذ بالطقاق سكتت وانا اطالع مصعب امه بعد ماهي راضية باللي يصير .. قطبت حواجبي .. ملاحظ على الكبار ماهم معطين معاذ اهمية عمي وجدي والحين ام معاذ عمي عدة مرات عرض علي يتكفل بمهر زوجتي .. وجدي نفس الشي والحين ام معاذ تبيني اشوف نادر وكلهم ماعليهم من معاذ وشروطه .. لا يكون المشكلة من عندي ومعطي معاذ اكبر من حجمه بس معاذ وش يفكني منه بعدين والله خوفي كله من المحكمة اذا لجأ لها معاذ وقتها كلهم ماهم نافعيني .. لا عمي ولا جدي ولا حتى ام معاذ ... ماحد ينفعني الا اكمل اتفاقي معه اللي صبرني 3 شهور يصبرني الباقي عمر = وصل لامك سلامي و استسمحلي منها مااقدر اشوف نادر الحين .. معليش ناخذ معاذ على قد عقله ونصبر .. وبعدين صبرت 3 شهور .. الله يعيني واصبر لين اتزوج واخذه ( وابتسمت وكملت بهمس ) هانت مصعب = دايم اقول لامي كذا .. بس هي تخاف من الله ان اللي يسويه معاذ قطيعة رحم .. وووو ( وسكت شوي والتفت لسعود اللي وراي ورجع التفت لي ) والصراحة نخاف اذا اخذت فارس منا .. آآآآ ... تقطعنا عنه ومانشوفه قطبت حواجبي عمر = مافكرت بهالشي ولا جا ببالي فجأة تكلم سعود يتأكد سعود = صدق ؟ التفتت لسعود معطي مصعب ظهري عمر = ايه .. ليه شاك اني بقطعكم عنه .. عمري قلته لك سعود = لا بس نعرفك شري واناني صارخ مصعب على سعود يسكته مصعب = سعوووووووود سكتت وانا اطالع سعود .. ماجاب شي جديد .. صادق انا شري واناني حتى مع امي التفتت لمصعب وانا اتنحنح منحرج من صراحة سعود عمر = احم .. آآآ .. يله مصعب ابنزل .. سلملي على امك ومشكورين ماقصرتوا وطلعنا من غرفة التلفزيون ومصعب يمشي بجنبي مصعب = بالعكس والله مقصرين المفروض معلمينك من زمان عن اغراض امك تجي تاخذهم بس تعرف امي واختي انشغلن الفترة الي راحت بين وفاة ابوي واختي وبين حداد امي ومرضها وبين فارس .. ولا علموني الا بعد اتصال عمتي مها وانت بعد لا سألت عن الاغراض ولا شي تنهدت وسكتت .. بلاه والله من تقصيري مع امي ركبت سيارتي ونزلت الشنطة بمكان الراكب ومصعب وسعود واقفين عن الدريشة ويطالعوني .. التفتت لهم ونزلت الدريشة عشان اكلمهم ولأول مرة انصح نصيحة من قلب طالعة من نار الفقد والندم عمر = مصعب ..سعود .. طيعوا امكم بكل شي ولا تخلونها لحالها على حساب وناستكم اخدموها بعيونكم .. صدقوني مافيه اغلى من الأم رفع سعود نظره لمصعب بصمت.. طالعني مصعب شوي و ابتسم مصعب بابتسامة = جزاك الله خير رجعت لبريدة .. وعلى اذان المغرب دخلت بيتي وعلى طول دخلت الصاله ولقيت رايد جالس على الكنبة المنفردة وعليه ملابسه الداخليه و يكلم بالجوال واول مادخلت انهى المكالمة رايد = يله اكلمك بعدين وانتبهي لدانة التفتت له اول مافهمت من كلمته انه كان يكلم مريم بس ماعلقت .. مزاجي متعكر ومالي نفس لشي مع اني زعلان منهم ماخلوني اشوفها النظرة الشرعية وقلنا معليش تفكير الشيبان وش نسوي بعد .. ومها ماقصرت وصفت مريم لي .. بس لما سألت مها عن طبيعتها يعني من أي نوع من البنات .. ردت مها انها ماعمرها احتكت فيها ولا تعرف طبعها .. هذي ببيت وهذي ببيت ولانهن كلهن بنات مو متزوجات مايزورن بعض .. هذا عذر مها ... لكن متطمن شوي لانها اخت رايد واعرف اخوها زين .. قلت يمكن هي مثله باخلاقه بس ان شاء الله ماتصير مثله بكايه ومشكلتي الى الان ماسلمتهم المهر عشان يخلصوني ويحددون العرس واتزوج عاد .. مليت وتعبت من عزوبيتي جلست على الكنبة ونزلت الشنطة على الطاولة الصغيرة قدامي ورجعلي الألم .. مافيه احد حاس فيني الا امي امي وبس = وش هذا ؟ انتبهت على صوت رايد يسألني ورفعت راسي له ولقيته يطالع الشنطة باستغراب وقام وجلس بجنبي وهو يشر على الشنطة رايد = وش هذا عمر ؟ فتحت الشنطة بصمت وعلى طول تذكر رايد = ايييييه صح .. انت رايح تجيب ذهب امك .. نسييييييييييت من عذرك تنسى مكلم زوجتي .. الله يصبرني بس حط رايد يده على فخذي رايد بابتسامة = ماشاء الله عمر جا بوقته .. كم باقي على اللي طلبه عمي ؟ اخذت احد علب اطقم الذهب وانا ارد عليه عمر = ماتغير شي .. الى الحين بالحساب سبع وخمسين الف وخمسمية ( وكملت وانا فاهم على سؤاله ) وهالذهب ماني بايعه شهق رايد مستغرب رايد = لييييييييه ... عمر باقي بس امممم ( وسكت شوي يحسب ) اممم باقي 12500 .. ليه ماتبيعه وتكمل الباقي ؟ فتحت علبة الطقم ومارديت عليه وشفت طقم ذهب ناعم ابتسمت وانا اتخيل امي .. ماعمري شفت هالطقم هذا عليها بس مدري ليه ابتسمت اول ماشفته سكرت العلبة ورجعتها ورايد يعيد سؤاله رايد = ليه ماتبيعه ( وكمل يتطنز ) لا يكون بتلبسه هههههههه عمر = لو اقولك ماراح تفهمني واخذت العلبة الكرتونية الكبيرة وفتحتها ومالقيت فيها الا اكسسورات رخيصة للتجميل مب اصلية رايد = طيب فهمني ابتسمت وانا امرر اصابعي على الاكسسوارات .. الله يرحمك يمه .. طلعتي حركات .. حسيت بحرارة بعيوني وغمضت عيوني اجاهد الدمعة واخذت نفس اهدي نفسي سمعت رايد يكلمني رايد = وش فيك اكلمك انا رجعت العلبة الكرتونية وانا ارد عليه بحزن عمر = ابعطيهم عمتي تتصدق فيهم او نحتفظ فيها لنادر يتصرف فيهم زي مايبي .. انا مالي حق .. ( واخذت احدى علب الخواتم وكملت ) انا عاق فيها .. مالي حق استفيد منه فتحت العلبة وطيرت عيوني بالخاتم هالخاتم دايم اشوفه باصبع امي قبل زواجها بعمي وحتى بعد زواجها .. كنت دايم اشوفه باصبعها وهي تطبخ وهي تاكل وهي تسولف ... (خاتم كله ذهب بدون فصوص ولا شي .. رايح لمعته من كثر الاستعمال ) رفعت الخاتم لفمي وانا اتخيله يد امي .. وقبّلت الخاتم لا شعوريا = عمر فتحت عيوني على صوت رايد وتوني احس للدموع على خدي ابعدت الخاتم اتأمله مسح رايد على فخذي يواسيني رايد = وتقول عاق فيها وانت هذا شكلك ؟.. تتوقع هي بترضى تشوفك محتاج و تتسلف من الناس وذهبها عندك ؟.. لو هي موجودة اكيد بتعطيك هالذهب بنفسها وعن طيب نفس التفتت لرايد اطالعه وافكر بكلامه اتسلف من الناس وذهب امي عندي .. رجعت التفت للشنطة متردد .. رايد ومصعب رايهم واحد وقبلهم مها رايها من نفس رايهم تبيني ابيع الذهب عمر = بس .. آآآ .. احس نذل رايد = انت طول عمرك نذل جت على هذي ( وسكت شوي وضحك ) ههههههههههههه امزح معك ههههههههههههه سكتت ومارديت وطوال اليوم وانا افكر ومتردد العشا .. الساعة 10 جالس مع الشباب بالصاله بصمت وافكر ابيعه واستفيد منه واغتني عن الناس والا مالي حق فيه ... معقول كلهم غلط وانا صح .. والا انا غلط وهم صح التفتت للشباب بصمت وانا احس تعبت من التفكير وبكرة زواج عمتي ودي انام رايد يطقطق بالاب توب حقي ومنصور ومشعل يتبادلون المقاطع وكلهم عليهم ملابسهم الداخليه وعبد الله منسدح على الارض ويدخن بتلذذ وهو يتفرج على التفزيون وعليه ثوبه مانزله انتبهت على جو الصاله و الدخان المتصاعد من سجارة عبد الله وتذكرت كلام عمتي مها وابتسمت مها تبي تغير اثاث بيتي بمناسبة زواجي وتقول ماحد يختار الاثاث غيرها والفلوس عمي هو متكفل فيه من .. الى .. هي عليها تختار ومن 3 شهور وهي مزعجتني ومزعجه عمي وجدي .. تحتري يعطونها الضوء الاخضر وتروح تشتري الاثاث على ذوقها الكل جاهز .. الكل مستعد بس التأخير مني .. كل شي يعتمد على المهر وتحديد العرس .. وانا الى الحين ماكملت الباقي عجزت القى احد امون عليه يسلفني نزلت راسي افكر .. ادور احد يسلفني وذهب امي عندي الحين وشلون تجي هذي = عمر وش فيك من يوم جينا وانت بس ساكت رفعت راسي لمنصور .. ولقيته هو ومشعل يطالعوني مستغربين التفت عبد الله لي ومد سجارته لي بمزح عبد الله = يبي سجارة ومستحي يطلب .. خذ دخّن رفع رايد راسه على كلامهم وقعد يطالعني بصمت تنهدت وقمت واقف عمر = معليش شباب .. تعبان وابي اروح انام .. تعرفون بكرة عندنا زواج عمتي وابصير مشغول .. عن اذنكم وطلعت من الصاله وانا اسمع عبد الله يسأل رايد عبد الله = رايد وش فيه عمر طلعت فوق لغرفتي .. مالي نفس لشي .. احس ماحد فاهمني نزلت التيشرت وبقيت على بنطلوني وانسدحت على ظهري على السرير اطالع السقف وبدون ما اتلحف حقدت على معاذ .. هو سبب الحيرة اللي انا فيها .. هو اللي خلاني احتاج لذهب امي وانا ماني محتاج ادري اني غلطت معه واجد بس هو زودها معي .. ودي اصفي النية معه .. بس كيف وهو سبب كل المشاكل اللي انا فيها = عمر والله ماعندك سالفة انتبهت من سرحاني على عبد الله ولقيته واقف عند باب غرفتي ومتساند على حافة الباب قال كلمته ودخل وجلس على السرير بجنبي عبد الله = علمني رايد قبل شوي .. ساكت ولا تسولف معنا ولا تضحك كأن احد طاقك واخر شي محتار انت تبيع اللي عندك والا لا .. صدق صدق يعني ماعندك سالفة سكتت اطالعه وانا الى الحين منسدح .. حتى عبد الله لو اعيد عليه اللي بخاطري ماراح يفهمني حط عبد الله يده على صدري عبد الله = وش فيها اذا بعت الذهب .. خل عنك ثقالة الدم .. وقم استانس معنا وفرفش .. الساعة توها ماجت 11 بدري تنام الحين عمر = معليش عبد الله تعبان ابي انام سكتت عبد الله يطالعني وتنهد وهو مو عاجبه الكلام عبد الله = طيب زي ماتبي و ضغط على صدري بيده يتساند علي وقام وبمزح عطاني بكس على بطني واعتدل واقف وكمل عبد الله = ياشينك ياعمر وانت حاط نفسك عاقل هههههههه حطيت يدي على بطني بمكان ضربته وابتسمت بصمت مجاملة له وطلع تنهدت .. كلهم رايهم واحد .. انقلبت على جنبي افكر .. شكلي اببيعه وبنص المبلغ اتصدق فيه لامي .. الا خاتمها بيظل عندي مع عطرها ونمت بعد هالقرار -------------------------------------------------------------------------------- الخميس ... بعد صلاة العشا واقفين عند بوابة قصر الافراح انا وعيال عمي واخوان ياسر ونستقبل عمار من الظهر وهو مشغول وتوه بس ارتاح من مها واخواته .. مسكين من الظهر وهو يودي اخواته للمشغل مع عمتي مها .. واخت مصعب ومعاذ معهن قاطه وجهها مع بنات عمها .. وعمار ياحبة عيني متكفل بمها من ناحية توصيلها من البيت للمشغل ومن المشغل للفندق ويوصل اخواته من المشغل للقصر وكل شوي يجيه اتصال من اخواته ناسين شي بالبيت وكل شوي اشوف عمار شغل السيارة و رايح لهن ... وعلى العشا بس ارتاح منهن وتفرغ لنفسه اما انا ومصعب ومعاذ وسامي وسعود ماعندنا شي .. لأن العرس والمعازيم وتكاليفه كله على اهل ياسر واخوانه .. بس جدي يعننه ابو العروس ومتشطط علينا انا وعيال عمي وكل ماشافنا جالسين خزنا بعينه يعني قوموا واشرفوا على خدم القصر .. وهو جالس بصدر القصر مع ابو ياسر هالشيبان حيلهم حيل و ياسر المعرس جالس بينهم ويوزع ابتسامات وفرحان وعمي فهد بعد ماهو مقصر .. كل ماشافنا قعد يسأل يعنني اشرف عليكم وهو مناك .. مافيه شي نسويه .. القهوة على الخدم والعشاء بالمطابخ والاشياء الثانوية على اهل ياسر شفت الشباب من بعيد ( رايد وعبد الله ومنصور ومشعل ) توهم يجون للقصر استقبلوهم اخوان ياسر لين وصلوا عندي عمر بابتسامة = وشفيكم جيتوا متأخرين رايد = انا بعد ماجيت من الدوام نمت الظهر وراحت علي نومة مادريت عن نفسي الا والعيال يتصلون علي العشا .. انا اللي اخرتهم حطيت يدي على كتفه احيه واحي الشباب عمر = حياكم حياكم ولأن ماله داعي اوقف عند البوابة استقبل وعيال عمي واخوان ياسر يكفون وزيادة رحت مع الشباب نجلس بس طلبت منهم نجلس بمكان مايشوفني جدي فيه ويزعجني جلسنا وفتحنا فمنا بالشباب اللي قدامنا مجموعة شباب جالسين قبالنا كلهم يتكلمون بالاشارات .. مانشوف الا اليدين تتحرك بسرعة مشعل مستغرب = كيف يفهمون على بعض ؟ سكتت وانا اطالعهم واضح انهم اصدقاء ياسر او زملاءه بالعمل عمر = زوج عمتي مدرس بمعهد الصم والبكم .. شكل هذولي اخوياه وقعدنا نتفرج عليهم مستغربين من سرعتهم بالاشارة .. والغريب يسوون حركات باليدين شوي ويضحكون فاهمين على بعض تنهدت وانا اطالعهم .. كيف مها بتفهم على ياسر .. وكيف بتتعامل معه فجأة قاموا منصور وعبد الله رفعت راسي لهم عمر مستغرب = وين ؟ منصور = آآ .. شوي بس وراحوا باتجاه مصعب الواقف بعيد عنا ... وشفتهم وقفوا عنده شوي يتكلمون ومشوا واختفوا بين الناس التفتت لمشعل ورايد وقعدنا نسولف ربع ساعة ورجع منصور لحاله وانحنى لي يكلمني وانا جالس منصور = عمر معليش شوي جوالك رفعت راسي له مستغرب عمر = وش تبي بجوالي وجوالك وينه ؟ منصور = مافيه رصيد وابي اكلم .. شوي ياخي ماني مطول عمر بمزح = طيب لا تدف ( وطلعت جوالي من جيب ثوبي وعطيته ) وراح على طول فجأة قام مشعل مشعل = شوي وراجع رفعت راسي للثاني عمر مستغرب = وين بتروح انت الثاني بعد ؟ مشعل باستعجال = شوي شوي وراح بنفس اتجاه منصور التفتت لرايد مستغرب عمر = وشفيهم هذولي اليوم التفت رايد وابتسم رايد = وانت وش تبي فيهم خلهم براحتهم سكتت .. ماعندي تعليق عشر دقايق ورجع عبد الله ومنصور ومشعل وجلسوا معنا بنفس الكنبة الطويلة منصور ثم انا ثم رايد ثم عبد الله ثم مشعل مد منصور جوالي علي منصور بابتسامة = مشكور هزيت راسي بايه وانا ادخل الجوال لجيب ثوبي .. وشفت عبد الله يضغّط جواله وهو جالس بجنب رايد كأنه يكتب رساله خمس دقايق وحنا نسولف فجأة جت رساله على جوالي طلعت الجوال من جيب ثوبي القي نظرة عليه وفتحت الرساله اقراها ( خلنا ننسى هالجفاء ونفتح صفحة جديدة مايسوى علينا البعد والكره ) ورفعت حاجب واحد مستغرب وانا اشوف اسم المرسل معاذ معاذ مرسل رساله مثل هذي لي انا .. رفعت راسي اطالع قدام وماني مصدق نفسي .. وش صاير بالدنيا تلفتت يمين ويسار ادور معاذ مستغرب ورجعت نزلت نظري للجوال .. اكيد ماني محصله بهالقصر الكبير وبين هالحاضرين معقول معاذ مرسل لي هالرساله .. اكيد غلطان ويبي يرسلها لاحد غيري معاااااااذ .. مو معقول التفتت لرايد وانا ماني مصدق ولقيته يطالعني بابتسامة واول ماطاحت عيني عليه ابعد وجهه عني رجعت اقرا الرساله مستغرب .. ياناس مو معقول ... معااااذ تنهدت ورجعت الجوال لجيبي وانا افكر معقول معاذ يبينا نتقرب من بعض .. وش غيره وابتسمت معقول يطلب مني نفتح صفحة جديدة وننسى ابتسمت اكثر .. والله الصراحة ماعندي مانع يامعاذ ... ادري اني انا الغلطان وياما رفعت ضغطك بغروري ونذالتي معك ومع مصعب وليته معك انت بس .. انا نذل مع الكل المفروض انا اللي ابادر واتسامح منك صادق معاذ مايسوى علينا هالجفاء الى متى تلفتت ادوره مرة ثانية ولا لقيته بين الموجودين .. الصراحة فرحت بهالتغير عبد الله = عمر تدور احد ؟ التفتت لعبد الله ورديت عليه عمر = ادور معاذ بس عبد الله مااهتم عبد الله = اهاا وسند ظهره على الكنبة يطالع الناس وكأني شفت شبح ابتسامة منه نزلت راسي افكر .. اروح لمعاذ الحين .. والا اخليه لين يخلص العرس .. وبعدين اخاف جدي يشوفني فاضي ويشغلني لا لا اخليه بعدين احسن .. مرت ساعة وانشغلت ونسيت موضوع معاذ بين مزح الشباب واستهبالهم وبين اوامر عمي اللي كل شوي يقومني ويطلعلي شغل من تحت الارض .. فجأة وانا طالع من غرفة الخدم شفت معاذ من بعيد واقف ويسولف مع احد اخوان ياسر .. ابتسمت اول ماشفته ورحت متوجه له ناوي افتح هالصفحة الجديدة بيني وبينه ... انتبه لي معاذ قبل اوصلهم وشفته يستاذن من اللي معه وجا يمشي متوجه لي ابتسمت وقبل افتح فمي بكلمة صدمني بابتسامته باستهزاء معاذ بابتسامة جانبية = جايني تتبسم يقالك تبي تصفي القلوب الحين .. ادري انه مو لله رفعت حواجبي مستغرب عمر = هاااه ضحك معاذ وكمل معاذ = هههههه تبيني اعطيك راتبك وسيارتك وبعدين تقلب علي ... اعرفك ياولد العم قطبت حواجبي وعصبت من اسلوبه معي عمر = هيييه انت وش فيك علي .. قبل شوي رسالتك وش زينها مسرع قلبت .. لكن مقيوله ذيل الكلب مايتعدل قطب معاذ حواجبه مستغرب معاذ = وش تقول انت .. ما ارسلت شي انا .. انت اللي مرسل عمر = انا اللي مرسل والا انت .. تو تقول خلنا نفتح صفحة جديدة ومادري ايش والحين تقول ماهو لله عشان اخذ راتبي منك ومادري ايش سكت معاذ شوي مستغرب واشر على نفسه معاذ مستغرب = انا مرسل عليك ( وطلع جواله من جيب ثوبه ) انت اللي مرسل انا ماارسلت شي ( وقعد يضغط جواله ) طلعت جوالي من جيب ثوبي اوريه رسالته واثبتله وفتحت له على الرساله ومديتها عليه قدام وجهه عمر بعصبية = شف هذي رسالتك .. وبنفس الوقت مد معاذ جواله قدام وجهي يوريني رساله بجواله والمرسل ( عمر ) قطبت حواجبي مستغرب واخذت جواله منه وهو اخذ جوالي مني مستغرب وكل واحد قعد يقرا رسالته للثاني ( الى متى هالبعد .. الدنيا ماتسوى ياولد عمي متى نصفي القلوب ) والمرسل ( عمر ) فتحت فمي منلحس مخي انا مرسل هالرساله .. رفعت راسي لمعاذ وطالعنا بعض مستغربين عمر مستغرب = متى جتك هالرساله مني ؟ .. ما ارسلت لك شي معاذ مستغرب = قبل ساعة تقريبا جتني .. وبعدين انا ما ارسلت لك شي .. وشلون جتك هالرساله ؟ وبتفكير بسيط مني وبتفكير بسيط منه عرفنا السالفة عمر = لحظة لحظة .. اذكر منصور اخذ جوالي .. بس قال بيكلم فيه معاذ بتفكير = انا بعد مصعب اخذ جوالي وراح فيه وسكتنا وحنا نتلفت ندور مصعب ومنصور ورجعنا نلتفت لبعض بعداوة معاذ = المهم اسمع اعتبر ما ارسلت لك شي ورسالتي احذفها من جوالك .. انا ماتنازل لواحد مثلك مغرور ومتكبر ومصلحجي عمر = عاد كلش ميت فيك .. مايهمني واحد حقود مثلك ... و يكون بعلمك راتبي اقدر اخذه منك بس انا من كيفي معطيك قيمة معاذ = انقلع بس وراح .. تنهدت .. يافرحة ماتمت .. حسبته هو اللي مرسل صدق بس بسيطة يامنصور انا تاخذ جوالي وترسل لمعاذ كلام انا ماقلته الحين يحسب اني مرسل له اصفي القلوب عشان يشفق علي ويرجعلي راتبي مثل ماقال مالك عليك انا اوريك يامنصورووووووه ورحت ادور هالتيس بين الموجودين وعلى الساعة 11 ونص زفينا ياسر لعمتي مها بالفندق |
|
|
#40 |
|
|
رد: يمسح الدمعه بشكوى للمبدعه هدوئي
الخميس ... بعد صلاة العشا
واقفين عند بوابة قصر الافراح انا وعيال عمي واخوان ياسر ونستقبل عمار من الظهر وهو مشغول وتوه بس ارتاح من مها واخواته .. مسكين من الظهر وهو يودي اخواته للمشغل مع عمتي مها .. واخت مصعب ومعاذ معهن قاطه وجهها مع بنات عمها .. وعمار ياحبة عيني متكفل بمها من ناحية توصيلها من البيت للمشغل ومن المشغل للفندق ويوصل اخواته من المشغل للقصر وكل شوي يجيه اتصال من اخواته ناسين شي بالبيت وكل شوي اشوف عمار شغل السيارة و رايح لهن ... وعلى العشا بس ارتاح منهن وتفرغ لنفسه اما انا ومصعب ومعاذ وسامي وسعود ماعندنا شي .. لأن العرس والمعازيم وتكاليفه كله على اهل ياسر واخوانه .. بس جدي يعننه ابو العروس ومتشطط علينا انا وعيال عمي وكل ماشافنا جالسين خزنا بعينه يعني قوموا واشرفوا على خدم القصر .. وهو جالس بصدر القصر مع ابو ياسر هالشيبان حيلهم حيل و ياسر المعرس جالس بينهم ويوزع ابتسامات وفرحان وعمي فهد بعد ماهو مقصر .. كل ماشافنا قعد يسأل يعنني اشرف عليكم وهو مناك .. مافيه شي نسويه .. القهوة على الخدم والعشاء بالمطابخ والاشياء الثانوية على اهل ياسر شفت الشباب من بعيد ( رايد وعبد الله ومنصور ومشعل ) توهم يجون للقصر استقبلوهم اخوان ياسر لين وصلوا عندي عمر بابتسامة = وشفيكم جيتوا متأخرين رايد = انا بعد ماجيت من الدوام نمت الظهر وراحت علي نومة مادريت عن نفسي الا والعيال يتصلون علي العشا .. انا اللي اخرتهم حطيت يدي على كتفه احيه واحي الشباب عمر = حياكم حياكم ولأن ماله داعي اوقف عند البوابة استقبل وعيال عمي واخوان ياسر يكفون وزيادة رحت مع الشباب نجلس بس طلبت منهم نجلس بمكان مايشوفني جدي فيه ويزعجني جلسنا وفتحنا فمنا بالشباب اللي قدامنا مجموعة شباب جالسين قبالنا كلهم يتكلمون بالاشارات .. مانشوف الا اليدين تتحرك بسرعة مشعل مستغرب = كيف يفهمون على بعض ؟ سكتت وانا اطالعهم واضح انهم اصدقاء ياسر او زملاءه بالعمل عمر = زوج عمتي مدرس بمعهد الصم والبكم .. شكل هذولي اخوياه وقعدنا نتفرج عليهم مستغربين من سرعتهم بالاشارة .. والغريب يسوون حركات باليدين شوي ويضحكون فاهمين على بعض تنهدت وانا اطالعهم .. كيف مها بتفهم على ياسر .. وكيف بتتعامل معه فجأة قاموا منصور وعبد الله رفعت راسي لهم عمر مستغرب = وين ؟ منصور = آآ .. شوي بس وراحوا باتجاه مصعب الواقف بعيد عنا ... وشفتهم وقفوا عنده شوي يتكلمون ومشوا واختفوا بين الناس التفتت لمشعل ورايد وقعدنا نسولف ربع ساعة ورجع منصور لحاله وانحنى لي يكلمني وانا جالس منصور = عمر معليش شوي جوالك رفعت راسي له مستغرب عمر = وش تبي بجوالي وجوالك وينه ؟ منصور = مافيه رصيد وابي اكلم .. شوي ياخي ماني مطول عمر بمزح = طيب لا تدف ( وطلعت جوالي من جيب ثوبي وعطيته ) وراح على طول فجأة قام مشعل مشعل = شوي وراجع رفعت راسي للثاني عمر مستغرب = وين بتروح انت الثاني بعد ؟ مشعل باستعجال = شوي شوي وراح بنفس اتجاه منصور التفتت لرايد مستغرب عمر = وشفيهم هذولي اليوم التفت رايد وابتسم رايد = وانت وش تبي فيهم خلهم براحتهم سكتت .. ماعندي تعليق عشر دقايق ورجع عبد الله ومنصور ومشعل وجلسوا معنا بنفس الكنبة الطويلة منصور ثم انا ثم رايد ثم عبد الله ثم مشعل مد منصور جوالي علي منصور بابتسامة = مشكور هزيت راسي بايه وانا ادخل الجوال لجيب ثوبي .. وشفت عبد الله يضغّط جواله وهو جالس بجنب رايد كأنه يكتب رساله خمس دقايق وحنا نسولف فجأة جت رساله على جوالي طلعت الجوال من جيب ثوبي القي نظرة عليه وفتحت الرساله اقراها ( خلنا ننسى هالجفاء ونفتح صفحة جديدة مايسوى علينا البعد والكره ) ورفعت حاجب واحد مستغرب وانا اشوف اسم المرسل معاذ معاذ مرسل رساله مثل هذي لي انا .. رفعت راسي اطالع قدام وماني مصدق نفسي .. وش صاير بالدنيا تلفتت يمين ويسار ادور معاذ مستغرب ورجعت نزلت نظري للجوال .. اكيد ماني محصله بهالقصر الكبير وبين هالحاضرين معقول معاذ مرسل لي هالرساله .. اكيد غلطان ويبي يرسلها لاحد غيري معاااااااذ .. مو معقول التفتت لرايد وانا ماني مصدق ولقيته يطالعني بابتسامة واول ماطاحت عيني عليه ابعد وجهه عني رجعت اقرا الرساله مستغرب .. ياناس مو معقول ... معااااذ تنهدت ورجعت الجوال لجيبي وانا افكر معقول معاذ يبينا نتقرب من بعض .. وش غيره وابتسمت معقول يطلب مني نفتح صفحة جديدة وننسى ابتسمت اكثر .. والله الصراحة ماعندي مانع يامعاذ ... ادري اني انا الغلطان وياما رفعت ضغطك بغروري ونذالتي معك ومع مصعب وليته معك انت بس .. انا نذل مع الكل المفروض انا اللي ابادر واتسامح منك صادق معاذ مايسوى علينا هالجفاء الى متى تلفتت ادوره مرة ثانية ولا لقيته بين الموجودين .. الصراحة فرحت بهالتغير عبد الله = عمر تدور احد ؟ التفتت لعبد الله ورديت عليه عمر = ادور معاذ بس عبد الله مااهتم عبد الله = اهاا وسند ظهره على الكنبة يطالع الناس وكأني شفت شبح ابتسامة منه نزلت راسي افكر .. اروح لمعاذ الحين .. والا اخليه لين يخلص العرس .. وبعدين اخاف جدي يشوفني فاضي ويشغلني لا لا اخليه بعدين احسن .. مرت ساعة وانشغلت ونسيت موضوع معاذ بين مزح الشباب واستهبالهم وبين اوامر عمي اللي كل شوي يقومني ويطلعلي شغل من تحت الارض .. فجأة وانا طالع من غرفة الخدم شفت معاذ من بعيد واقف ويسولف مع احد اخوان ياسر .. ابتسمت اول ماشفته ورحت متوجه له ناوي افتح هالصفحة الجديدة بيني وبينه ... انتبه لي معاذ قبل اوصلهم وشفته يستاذن من اللي معه وجا يمشي متوجه لي ابتسمت وقبل افتح فمي بكلمة صدمني بابتسامته باستهزاء معاذ بابتسامة جانبية = جايني تتبسم يقالك تبي تصفي القلوب الحين .. ادري انه مو لله رفعت حواجبي مستغرب عمر = هاااه ضحك معاذ وكمل معاذ = هههههه تبيني اعطيك راتبك وسيارتك وبعدين تقلب علي ... اعرفك ياولد العم قطبت حواجبي وعصبت من اسلوبه معي عمر = هيييه انت وش فيك علي .. قبل شوي رسالتك وش زينها مسرع قلبت .. لكن مقيوله ذيل الكلب مايتعدل قطب معاذ حواجبه مستغرب معاذ = وش تقول انت .. ما ارسلت شي انا .. انت اللي مرسل عمر = انا اللي مرسل والا انت .. تو تقول خلنا نفتح صفحة جديدة ومادري ايش والحين تقول ماهو لله عشان اخذ راتبي منك ومادري ايش سكت معاذ شوي مستغرب واشر على نفسه معاذ مستغرب = انا مرسل عليك ( وطلع جواله من جيب ثوبه ) انت اللي مرسل انا ماارسلت شي ( وقعد يضغط جواله ) طلعت جوالي من جيب ثوبي اوريه رسالته واثبتله وفتحت له على الرساله ومديتها عليه قدام وجهه عمر بعصبية = شف هذي رسالتك .. وبنفس الوقت مد معاذ جواله قدام وجهي يوريني رساله بجواله والمرسل ( عمر ) قطبت حواجبي مستغرب واخذت جواله منه وهو اخذ جوالي مني مستغرب وكل واحد قعد يقرا رسالته للثاني ( الى متى هالبعد .. الدنيا ماتسوى ياولد عمي متى نصفي القلوب ) والمرسل ( عمر ) فتحت فمي منلحس مخي انا مرسل هالرساله .. رفعت راسي لمعاذ وطالعنا بعض مستغربين عمر مستغرب = متى جتك هالرساله مني ؟ .. ما ارسلت لك شي معاذ مستغرب = قبل ساعة تقريبا جتني .. وبعدين انا ما ارسلت لك شي .. وشلون جتك هالرساله ؟ وبتفكير بسيط مني وبتفكير بسيط منه عرفنا السالفة عمر = لحظة لحظة .. اذكر منصور اخذ جوالي .. بس قال بيكلم فيه معاذ بتفكير = انا بعد مصعب اخذ جوالي وراح فيه وسكتنا وحنا نتلفت ندور مصعب ومنصور ورجعنا نلتفت لبعض بعداوة معاذ = المهم اسمع اعتبر ما ارسلت لك شي ورسالتي احذفها من جوالك .. انا ماتنازل لواحد مثلك مغرور ومتكبر ومصلحجي عمر = عاد كلش ميت فيك .. مايهمني واحد حقود مثلك ... و يكون بعلمك راتبي اقدر اخذه منك بس انا من كيفي معطيك قيمة معاذ = انقلع بس وراح .. تنهدت .. يافرحة ماتمت .. حسبته هو اللي مرسل صدق بس بسيطة يامنصور انا تاخذ جوالي وترسل لمعاذ كلام انا ماقلته الحين يحسب اني مرسل له اصفي القلوب عشان يشفق علي ويرجعلي راتبي مثل ماقال مالك عليك انا اوريك يامنصورووووووه ورحت ادور هالتيس بين الموجودين وعلى الساعة 11 ونص زفينا ياسر لعمتي مها بالفندق وكلـ(ن) رجع بيته بعد 3 ايام ماعنده وقت ياسر على طول سافر بعمتي مها يتمشون بالطايف وابها وهالاماكن ولهم 3 ايام الحين اما انا استغليت وجود عمي فهد واهله ببريدة .. قررت ابيع ذهب امي افضل من تخزينه .. اتصدق بنص المبلغ للغالية واكمل بالباقي المهر .. واتزوج عاد مها والشباب معاهم حق .. مو معقول اروح اتسلف 12500 وعندي ذهب امي مخزّن وفرصة بما ان عمي هنا .. اعطيه المهر يعطيه عم رايد ويكملون باقي الامور ويحددون الزواج وقبل امس اخذت سامي بما انه فاضي اربع وعشرين ساعة ورحنا للسوق نبيع الذهب وكعادة البائعين يبخسون السعر اقل من قيمته بواجد واذا شريت منهم نفس الجرام غلّوه .. مع ان الذهب واحد والجرام واحد 15400 ريال 3 اطقم و خاتم واحد ذهب جابوا 15400 ريال بس وخاتم امي القديم احتفظت فيه مع عطرها زاد حيرتي حيره وانا ادخلهم بحسابي الباقي من المهر 12500 وذهب امي ماجاب الا 15400 ... كنت اظن بيجبون اكثر واتصدق لامي اكثر تنهدت وانا تحسب على معاذ حسبي الله عليك يامعاذ بهذلتني مايسوى علي مكافأتك وسيارتك اللي اخذتها عرف كيف يطلعها من عيني واليوم سلمت عمي فهد المهر كامل وانا فرحان وطاير من الوناسة .. ماني مصدق اني اخيييييييييييرا كملت هالمهر ... 3 شهور وانا شايل همه واهوجس كيف ادبره والحمد الله هونها الله ... والله يعيني اسدد الديون والحين جالس مع عمي وجدي بالمجلس ومزعجهم الا يريحون لعم رايد الحين جدي = ياعمر الله يصلحك .. حنا اخر العصر وين تبينا نروح للرجال الحين ... خله بكرة نكلمه ونعطيه المهر التفتت لجدي وانا اتحرقص بمكاني .. مستعجل ابي اتزوج يانااااااااااس عمر بزعل = وليه بكره ( والتفتت لعمي ) طيب عمي انت رح .. جدي شكله رجيلاته تعوره وعاجز .. رح انت الحين تكفى عمي وعمار وسامي جالسين عندنا بالمجلس وكل شوي يعلقون علي سامي = مشفووووووووح هههههههههههههههههههههه عمار وهو يضحك = مانت قادر تصبر لبكرة بس ... والا شفت ياسر وغرت منه ههههههههههه طنشتهم وانا اترجى عمي عمر = تكفى عمي رح الحيييييييييين بس عمي يقهر يرتشف قهوته ببرود وجالس متركي عمي ببرود = قالك ابوي بكرة يعني بكرة عمر بزعل = اووووووووووووووه ولأننا ببريدة .. الزواجات فيها كل ليلة حتى بايام الدراسة تشوف وانت بالطريق قصر الافراح الفلاني مفتوح .. ايام الاختبارات مفتوح .. ايام العيد مفتوح وكل يوم مفتوح وبما ان الزواج مايتحدد الا على حسب قصر الافراح والحجوزات فيه ولأن عمي هو اللي متكفل بالحجز والكروت والتوزيع وكل شي رحت معه على هالصبح ادور القصر ورجلي على رجله وكلـ(ن) على همه سرا .. عمي يدور القصر اللي شكله مناسب وواسع وانا ادور القصر اللي يعطي موعد قريب وطرت من الفرحة يوم شفنا هالقصر فيه ليله فاضيه بعد اسبوع عمر بفرح = عمي شف هذا فاضي بعد اسبوع ... خلنا نحجزه بسررررررعه التفت عمي لي مطير عيونه عمي = انهبلت انت .. تبي زواجك بعد اسبوع ؟.. بيتك ما أثثناه والعروس تبي تتقضى والكروت ماطبعناه ولا وزعناه والحريم يبن يفصلن .. وش فيك انت مطيور ( والتفت لموظف ادارة القصر يسأله اذا كان فيه موعد ابعد شوي ) وطلعت زعلان بعد ماحجز عمي ليله بهالقصر بعد شهرين ونص من الحين ويوافق اليوم يوم الاثنين ورجعت الظهر طاير ابشر رايد بموعد زواجي وزواج اخته ودخلت البيت فرحان وانا انادي رايد بصوت عالي عمر = رااااااااااااااااااااااااااايد ( ودخلت الصاله ولقيته جالس وسرحان وماعليه الا ملابسه الداخليه كالعادة وتوه انتبه من سرحانه على دخلتي ) رايد رايد ابشرك خلاااااص حددنا الموعد قام رايد واقف وفاهي رايد = هااااه عمر بفرح = خلاص حددنا .. بعد شهرين ونص زواجي ابتسم رايد بفرح رايد = والله .. اخيرا ( وضحك من الوناسة ) ههههههههههه ماني مصدق اخواتي بعد شهرين بيصيرون هنا معنا واااااااااااااااااااااو ( وطلع بسرعة من الصاله وكمل ) ابروح اقول لاختي مابيك تسمع ههههههههههههههههه ضحكت مستانس .. فجأة جت مها على بالي .. صح هي الى الحين مسافرة شهر عسل خلني اتصل عليها منها اقولها عن موعد زواجي ومنها اسأل عنها ومنها اعطيها الضوء الاخضر تأثث بيتي على ذوقها طلعت لغرفة امي فوق وسكرت على نفسي واتصلت على مها وبعد السلام والسؤال عمر بفرح = هاه مها وشلون ياسر معك ؟ وقطبت حواجبي يوم سمعتها تنهدت بألم مها بتنهيدة = والله مدري وش اقولك عمر مستغرب = عسى ماشر مها خوفتيني .. لا يكون شفتي شي من ياسر ؟ مها = لا لا .. ياسر والله طيب وحنون بس .. آآآ ( وتنهدت ) عمر مستغرب = بس وش ؟ مها = مادري وشلون.. ماعندي احد اتكلم معه .. نجلس بالمطعم والا بغرفة الفندق وكل واحد مقابل الثاني وساكت .. هو يحاول يسولف بس .. آآ .. بس كله بالاشارات ما افهم عليه .. واذا شافني مافهمت طلع النوته حقته تنهدت عمر = خوفتيني ياشيخة .. طيب انتي عارفة هالشي من قبل ووافقتي عليه مها = انا ماني ندمانه .. بس مدري مليت احس من زمان ماتكلمت مع احد عمر = مها لا تصيرين دلوعة .. اهم شي انه طيب معك مها = والله طيب وماهو مقصر بشي ( وتنهدت وسكتت ) سكتت ماعندي تعليق .. وقلت اغير من جوها شوي عمر بابتسامة = مها مو انتي من زمان تحترين تشترين اثاث بيتي على ذوقك .. يله الحين ورينا همتك شهقت مها بفرح مها = والله .. اخيرا مابغيت انت ووجهك .. عمر = ايه خلاص تحدد زواجي يوم الاثنين بعد شهرين ونص ان شاء الله شهقت مها بقوة وصاحت مها = احححححححححححححححللف وناااااااااااااااااااااااااسه وضحكت مستانس هذي مها اللي اعرفها وانتشر الخبر بين الشباب ان زواجي بعد شهرين ونص * رايد * جالس انا ومريم بصمت بمجلس عمي .. توني طالع من دوامي وقلت ازور مريم واشوف احتياجاتها للزواج والحين جالسة تبكي بصمت وانا ساكت ومنقهر زي ماكنت متوقع ... مر شهرين الحين وماشروا لمريم الا طقمين ذهب وكم لبس على عين اهل عمر وباقي مهرها الهفوه ببطونهم 60 الف ومااخذت مريم منه الا طقمين وكم لبس .. حسيت مرارتي انفقعت من القهر .. فيه عاقل يرضى بهالشي ياناااااااااس التفتت لمريم بصمت وهي تمسح دموعها بعد ما اشتكلي واللي زاد بكاها اني صارخت عليها من القهر لفيت وجهي عنها منغبن .. هذا اللي كنت خايف منه انهم مايعطون مريم شي من مهرها .. وغريبه منهم انهم شروا لها طقمين كملت مريم كلامها بقهر وهي تبكي مريم = عمي مايصرف علي ( ورفعت راسها تطالعني ودموعها على خدها ) ناقصتني اشياء كثيرة استحي اطلبها وعمتي ماتخليني اروح للسوق براحتي كل شي تشتريه هي على ذوقها .. مارحت للسوق الا 3 مرات بس ( ومسحت دموعها بالمنديل اللي معها ) من يوم جيت لبريدة مارحت للسوق الا هالمرات بس .. كل شي اخذه من اغراض بنات عمي مالي شي خاااااااص رايد بصراخ = طيب ليه ماتتصلين علي .. ماتعرفين رقمي والا مالك لسان تقولين تعاااال .. دايم الاتصالات بيننا مافيها شي اذا اتصلتي اجيك اخذك للسوق وعمي ماعلينا منه خلاص انتي ما انتي على ذمته مريم = من وييييين ومهري عنده ( وبكت ) ياما تهاوشت معه وكل مرة يضربني .. انا تعبت خلاص .. وعمتي كل شوي رايحة للسوق وكل شي تشتري اللي يخصني على ذوقها رايد = مب على كيفه ياخذ مهرك .. والله لأشهر فيه قدام الجيران وافضحه مريم = لا اسكت .. تفشلنا عند العايلة اللي ابروح لهم .. مابيهم يشفقون علي ومابي عمر هذا بعد يشفق علي .. حرام عليك يكفيني اللي فيني وبعدين ماحد مصدقك .. عمتي شرت لي كم طقم والناس بيشوفونه علي ويكذبونك .. الناس مالهم الا الظاهر مالهم الا الظاااااااااهر يارااايد لفيت وجهي عنها و سكتت .. معها حق الناس مالهم الا الظاهر وهم شروا لها اللي تتجمل فيه قدام زوجها كملت مريم كلامها منقهره مريم = حتى فستاني الابيض استئجار .. فساتين بنات عمي لو تشوفه احسن منه مليون مرة وغطت وجهها بيديها تبكي التفتت لها وانا مغبون ومنقهر رايد = طيب بكرة خليني اوديك للسوق وتشترين اللي ينقصك وبراحتك بدون عمتك هذي اللي قاطه وجهها رفعت مريم راسها لي وقالت بتردد مرم = بس .. آآآ .. مامعي شي سكتت وانا اطالعها بعد ما انتهى عمر من مشكلة المهر صار راتبي لي .. وعمر الى الحين يتسلف احتياجاته الخاصة حتى ثوبه الجديد مفصله سلف مني والله بلشت فيهم هالاثنين .. زوجتهم وطاحوا على كبدي .. صرت اصرف عليهم رايد بابتسامة = انا معي لا تشيلين هم .. والا ناسية اني اشتغل مريم = بس قهر انت تشتري لي ومــ قاطعتها رايد = شنسوي بعد .. المهم تتزوجين وتطلعين من هنا ونرتاح سكتت مريم وهي تمسح دموعها بالمنديل وتفكر وبعدها التفتت لي مرة ثانية بخوف مريم = طيب اخاف عمي اذا عرف اني طلعت معك يضربني رايد = هذا قبل كنتي على مسؤوليته الحين انتي على ذمة عمر .. شفت شبح ابتسامة على وجهها وبين دموعها كأنها تشجعت شوي وقلت افرحها رايد = تدرين بعد .. عمر كل شوي يطردني من البيت عشان عمته تأثث .... والله لو تشوفين البيت الحين صار يفتح النفس .. قبل يوم انا وعمر فيه لحالنا صاير كأنه حظيرة حيوانات هههههههههه ابتسمت مريم ونزلت راسها بخجل قمت واقف وقامت مريم معي وهي ماسكه ظهرها رايد = خلاص اجل بكرة اباخذ سيارة احد الشباب ونروح انا وانتي ودانة ( وسكت شوي ) صح على طاري دانة .. ترانا اذا انتقلتي لبيت عمر بناخذ دانة معنا لا يمكن نخليها عند عمي لحالها مريم = طبعا اكيد .. بس الى الحين ماكلمت عمي بهالخصوص رايد = بعد ناخذ رايه !!!.. انا اخوها مب على كيفه هزت مريم راسها بايه مريم = ايه مب على كيفه كل شي الا دانه .. خاصة انها متعلقه فيني .. ماتنام الا عندي طلعت وانا احسب اليوم اللي احتريه من زماااااااان باقي اسبوعين بس ونجتمع انا واخواتي ببيت واحد وبدون تسلط عمي وزوجته ياسلاااااااااااااااااااااااااا ام مريت المطعم اشتري غدا كالعادة ودخلت بيت عمر ودخلت الصاله ولقيت الاخ نايم على الكنبة الجديدة .. الكسلان .. حمل مادتين معه بالجامعة .. والحين معطل وطايح لا شغل ولا مشغله عرفت منه بعد زواج عمته ان جده ابو فهد وجدته انتقلوا لعنيزة عند مصعب ومعاذ طلعت من الصاله ورحت للمطبخ احط الكيس واجهز الغدا .. عمر من يوم اثثوا بيته وهو يراقب الشباب بكل صغيرة وكبيرة اذا جوا يسهرون عندنا لا احد يدخن لا احد ينثر لا احد يخرب لا توسخون شوي شوي على الاثاث لا تلمسون شي والشباب يعلقون عليه وبنفس الوقت زعلانين انهم خلاص مافيه مكان يسهرون فيه مثل بيت عمر والله يعينهم يدورون استراحة وابتسمت .. فرحتي ماتوصف وانا اشوف عمر خصص غرفتين مأثثهم غرف نوم وقال لي وحنا فوق يوريني احدى الغرف عمر بابتسامة = هالغرفة لك يارايد .. بغيت اطير من الفرحة .. انا لي غرفة نوووووووم من زمااااااان ماصارت لي غرفة خاصة بسريرها وبدواليبها سنة كاملة معاناة .. سنة وانا متشرد .. ياما نمت بملحق بحوش عمي .. يمر علي الساعة والساعتين وانا احتري غداي والا عشاي تجيبه مريم بعد ماتفضى من خدمتهم ياما نمت على كنبة وسخة باستراحة مادري وش مصيري فيها ياما نمت مع عمال وياما نمت بالشوارع ليلة بحديقة وليله بمزرعة ميتة وليلة بالطعوس بجنب المباني وياما عانيت من هالتشرد بين جوع وظلام و خوف وقهر .. والحين بعد سنة يصير لي غرفة بأثاث جديد لحالي وداخل البيت وبكرامة وقتها ماقدرت امسك دموعي وضميت عمر اشكره وحنا عند باب غرفتي ما انسى وقفته معي .. ما انسى احسانه علي .. وبعمر راح اجتمع باخواتي اثث البيت اثاث جديد ومانساني .. اثث البيت كله الا غرفة امه .. خلاها على حالها يقول ريحتها فيه واشوفه كل ماتضايق والا حب يجلس لحاله قفل على نفسه بغرفة امه ولما سألته عن غرفة النوم الثانية لمين .. قال هذي للبزارين نادر ودانة فرحت اكثر .. انا قلت له وعطيته علم اني اباخذ دانة ولا يمكن اخليها عند عمي بعد ماتطلع مريم من عندهم تنهدت يوم تذكرت علاقته بولد عمه الصراحة عمر ومعاذ علاقتهم الى الحين على حالها .. ذاك اليوم .. بيوم زواج عمته .. تضارب هو ومنصور على الحركة اللي سويناها فيه برسائل الجوال ويوم عرف اننا كلنا كنا متفقين كفخنا واحد واحد وكسرنا كانت الفكرة من مصعب بس باءت بالفشل ولا استفدنا شي بس حسيت من عمر انه وده يتقرب من معاذ بس احس كبرياءه يمنعه ومرة صارحته وحنا نتغدا لحالنا رايد = انت الحين ليش ماتطيّح الحطب مع ولد عمك .. عاد تصدق معاذ شكله يعطي طيّب احسه مثل اخوه مصعب تنهد عمر وحط اللقمة بفمه عمر = ماقلت شي بس لو اتصالح معه الحين بيظن اني تصالحت معه عشان راتبي وسيارتي عشان يرجعهم لي .. ابي اثبت له انه ماهزمني و اني اقدر ادبر نفسي واحرّه رايد باستهزاء = وش اهزمه واحره ومادري ايش .. بحرب انت واياه حرك عمر يده بضيق وكمل اكله طلعت من المطبخ بعد ماجهزت الغدا ورحت للصاله لعمر الكسلان النايم وقومته يتغدا معي * عمر * السبت .. بعد صلاة المغرب اخذت سيارة منصور ورحت لعنيزة ازور جدي وجدتي و عمتي اللي ساكنه مع اهل ياسر وصارت جاره لعيال عمي والله حاله صاروا اهلي كلهم بعنيزة .. جدي وجدتي وعمتي صرت انا الوحيد ببريدة .. كالعادة وحيد بكل شي واشوف جدي وجدتي مرتاحين هناك بين عيال عمي وامهم وخاصة ان بنتهم بيتها بجنبهم ومرتاحين هناك نفسيا خلااااااااااااااااااص هانت باقي يومين على زواجي وارتاح انا بعد ويرجع لي راتبي وسيارتي ونادر وبيصير عندي اسره ويارب اجيب درزن عيال .. وضحكت مستانس اتخيل اسرتي وانا اسوق وصلت بيت عيال عمي ووقفت السيارة وضربت الجرس شوي وطلعلي معاذ واول ماشفت خشة معاذ قلت بفرح على قرب انتهاء معاناتي عمر بابتسامة = خلاااااااااص يومين وترجعلي حقي ... هاااااه ارتحت الحين نقدر نقول وحدة بوحدة سكت معاذ وهو يطالعني وكمل باستهزاء معاذ = خسارة ارجع لك راتب ابوك .. شهور وانا العب لعب باربع الاف وخمسمية ريال سكتت .. مدري ليه حسيت بآلم من كلمته شهوووور يلعب بفلوس ابوي وانا ماخليت احد ماتسلفت منه .. بس كتمتها بصدري هالحركة انا اللي علمته عليها واخذت فلوسه العب فيها وهو كان محتاج ويمد يده لبوه معاذ = ادخل عند جداني وش فيك واقف انتبهت انه فاسح الطريق لي يبيني ادخل نزلت راسي .. بس الصراحة معاذ عطاني درس ما انساه علمني اللي ماعلمنياه المدارس والجامعات وفتح عيني على احاديث وآيات كنت غافل عنها و عن معانيها ( عامل الناس كما تحب ان يعاملوك ) ( الابتسامة في وجه اخيك صدقة ) (وَقُل لِّعِبَادِي يَقُولُواْ الَّتِي هِيَ أَحْسَنُ إِنَّ الشَّيْطَانَ يَنزَغُ بَيْنَهُمْ ) ماقلت الكلام الحسن لمعاذ ونزغ الشيطان بيني وبينه معاملتي مع اخوياي والشباب احسن من معاملتي بمعاذ وهذا هم الشباب عاملوني مثل ماعملتهم صحيح اني كنت نذل معهم شوي بس معاملتي معهم احسن بكثير من معاملتي مع معاذ معاذ كل ماشفته كلمته بغرور وتكبر وصار هو بنفس الاسلوب يكلمني معاذ اذيته بماله وبمال اخوه واذاني بنفس الطريقة وياما تشابكنا بالايدي انا واياه معاذ = الى متى تبينا نصير واقفين عن الباب .. فاضيلك انا .. يإما ادخل والا رح فارق رفعت راسي لمعاذ وتنهدت طالعته شوي ساكت ورفعت يدي وحطيتها على كتفه عمر بندم = معاذ ادري اني قبل زودتها معك واعترف اني كنت نذل معك ومع غيرك .. انت الوحيد اللي غيرتني ( وابتسمت ) قطب معاذ حواجبه مستغرب مني بصمت .. وعشان ما اخلي له فرصة يظن اني جاي هالوقت اتسامح منه عشان سيارتي وراتب ابوي دخلت لحوشهم وتركته عند الباب وراي .. ودخلت المجلس عند جدي بعد مرور يومين الاثنين .. بعد صلاة العشاء كل شوي اجلس واقوم اجلس وارجع اقوم اجلس وارجع اقوم مشكلة المهمين والمشهورين امثالي كل ماجلست جا واحد يسلم ويبارك جالس على الكنبة المخصصة للمعرس بقصر الافراح وجدي بجنبي على اليمين وعم رايد بجنبي من الطرف الثاني وانا كل شوي اعدل البشت واوزع ابتسامات فرحان .. ماني مصدق اني ساعات بس وادخل على زوجتي ( مريوم ) جلست بعد ماسلمت على واحد ما اعرفه وانا ابتسم .. بدينا ادلعها من الحين رايد طوال اليوم ماشفته الا بعد صلاة العشا .. من العصر و كل واحد مشغول بنفسه انا مشغول اهتم بنفسي عند الحلاق وعبد الله ومنصور معي و مانسوا نفسهم بعد ماخلصت انا رفعت راسي وانا اشوف من بعيد عيال عمي سامي وعمار ومصعب ومعاذ وسعود واقفين و يستقبلون مساكين رحمتهم وابتسمت اكثر وانا اشوف رايد رايح جاي .. يقاله اخو العروس والفرحة ماليه وجهه واخيييييييييييرا قام عمي ابو سامي من مكانه وجا عندي يوصلوني للفندق وعم رايد معنا واشوف الشباب من بعيد يسون لي حركات يستهبلون يالله يالله يمشووووون عمي وابو بندر .. ودي اركض واشغل سيارة مصعب اللي جهزها لي وامشي للفندق واخليهم بس لازم نحافظ على الرزانة شوي وهناك شفت مريم زوجتي بغرفة لحالنا ضاعت علومي وانا اطالعها اول مرة بحياتي اشوف بنت شابة بكامل زينتها قدامي على الطبيعة غير مها مالي اخوات .. دايم دايم مااشوف الا مها بخشتي بس مها .. مالي احد غيرها من محارمي بنت شابة كل اللي اشوفهم ويكشفون لي حريم كبار جدتي وامي وبس قلبي يضرب باعجاااااااب وانا اشوفها بفستانها الابيض هذي لي انا ؟ زوجتي ماني مصدق التفتت للباب وراي وقفلته ما ابي احد يزعجنا الثلاثاء ... يوم الصباحية المميز جالس بغرفتي بالفندق واطالع مريم وهي تتجهز جت الساعة 10 وهي ماخلصت احلى ساعة انتظار مرت بحياتي .. ساعة وانا انتظرها تخلص واطالعها بابتسامة كل مامرت من عندي و مامليت وانا انتظر جدي و عمي ابو سامي ينتظرونا ببيت جدي ببريدة بحارة عم مريم والكل مجتمع هناك وينتظرونا طلعت مريم بعد ماخلصت وتجهزت وراحت للشماعة تاخذ عباتها والتفتت لي بخجل وهي منزلها راسها ونطقت بهمس بصعوبة سمعتها مريم = خلصت مارديت شوي ورفعت راسها لي وعادت كلمتها وانا اشوف وجهها يحمر اكثر واكثر وهي تعيد كلمتها وضامه عباتها لصدرها بخجل مريم بهمس = خلاص خلصت وتوني انتبه اني مفهي فيها وناسي عمري عمر = هاااه .. آآآ .. ايه ( وقمت واقف ) وطلعنا من الفندق وانا ملاحظ الانحناء بظهرها وحنا بالسيارة ( سيارة مصعب ) لا حظت عليها تفرك يديها مرتبكه .. التفتت لها وانا اسوق .. بس متغطية بالكامل وما اشوف الا بياض يديها بحظنها وتفركهم ببعض طالعت قدام مستغرب .. مدري هذي عادتها والا من زود حياها تفرك يديها والا وش القصه ؟ شوي وسمعت همهمات منها التفتت لها مستغرب عمر مستغرب = تكلميني ؟ تفرك يديها بقوة وكأنها خايفة مريم بهمس = فيه شي مهم ابي اقوله .. آآآ .. اذا سمحت عمر مستغرب = ايه .. تفضلي ياشين الذرابة .. اذا سمحت وتفضلي وماادري ايش ... لكن شنسوي هذه الجدّة .. ان شاء الله كم يوم وكل واحد يعطي الثانية بوجهه بدون هالرسميا ت سمعت همهات مرة ثانية من مريم ورجعت التفت لها عمر مستغرب = نعم ؟ وطالعت قدام اشوف الطريق ورجعت التفت لها مستغرب مريم بصوت خفيف = ابي نمر بيت ... آآآ .. بيت عمي ووو وناخذ اختي الصغيرة عمرها 5 سنوات الحين ومافيه احد يعتني فيها الا .. آآآ .. الا انا يالله اسمع صوتها .. غير اركز معها بقوة ومايل شوي ناحيتهاعشان اسمع وانا اسوق التفتت لها عمر = تقصدين دانة ... تبين ناخذ دانة الحين ؟ التفتت لي وهي متغطية وعلى طول رجعت ونزلت راسها مريم = انا خايفة عليها ووو .. وابي اخذها عند رايد اليوم عمر = طيب خلي رايد يروح ياخذها .. رايد اخوها صعب اخذها انا من عمها رفعت راسها والتفتت لي مريم = بس ابيك تطلبها من عمي لان البيت بيتك وعشان يعرف عمي ان صاحب البيت ماعنده مانع .. ( سكتت شوي وكملت وهي تفرك يديها ) اقصد يعني اذا كان ماعندك مانع طالعت قدام اشوف الطريق ... كلامها منطقي .. انا قبل قالي رايد انه يبي ياخذ دانة عندنا وانه ماعليه من عمه رايد كان يتكلم عن موضوع دانة بعدائية وتحدي لعمه اما مريم جابت موضوع دانة بمنطقية صح .. لازم نبين لابو بندر اني راضي تسكن دانة مع اخوانها ببيتي .. ماجا ببالي ولا ببال رايد هالنقطه ابتسمت والتفتت باعجاب لمريم .. اشوى ماطلعت مثل اخوها غبي عمر = ماطلبتي شي ... من عيوني ( وكملت ذايب ) ياعيوني وابتسمت اكثر وانا اشوف مريم ترفع يدها لمكان فمها بحياء والتفتت اطالع قدام وشهقت لما انتبهت اني ملت بالسيارة عن الطريق وبسرعة عدلت السيارة .. وتنهدت بارتياح وصلنا الحارة ووقفت السيارة وانا اشوف السيارات واقفة عند بيت جدي سيارة معاذ وسيارة عمي ابو معاذ العائلية وسيارة سامي وسيارة ابوه الجيب العائلية وسيارة ياسر كلها واقفة صف قدام البيت .. وواضح ان كل اهل عنيزة مجتمعين طفيت السيارة .. عمي ابو سامي من يوم جا من جدة استحل هو وعائلته بيت جدي بما ان مافيه احد التفتت لمريم اللي منزله راسها وشكلها مادرت اننا وصلنا عمر بفرح = وصلنا ياعمري .. خلينا ننزل لجدي وبعدين نروح لبيت عمك ونكلمه بموضوع دانة هزت مريم راسها بايه بصمت نزلنا ودخلنا بيت جدي ودخلت مريم بتردد لداخل البيت وهي تقدم رجل وتأخرها وانا دخلت المجلس و بلشت باستهبال عيال عمي اول ماشافوني مشكلة العزابية ماشافوا خير جلست بجنب جدي على الكنبة بعد ما سلمت على راسه وعمي جالس بجنبه من الطرف الثاني وياسر بجنبه وكعادته جالس بصمت ومصعب ومعاذ وعمار جالسين قبالنا وسعود جالس بالارض ومكسل وسامي واقف ويصب القهوة لي سامي = محلو ياولد العم ههههههههههههه ( ومد القهوة لي ) مصعب = هاااااااااه عموووووور تنصحناااا ؟ وقبل ارد عليه .. التفت سامي لمصعب اللي جالس وراه ورد عليه باستهبال سامي = سوها يامصعب وانا معااااااااك حسيت بيد جدي على فخذي يسألني بجدية جدي = هاه ان شاء الله مرتاح ياولدي وبدينا نسولف ونضحك وعرفت منهم ان عم مريم وبعض الجيران جايين بعد صلاة الظهر معزومين نزلت راسي وسكتت .. مدري كيف اكلم ابو بندر عن دانة او اخليه بوقت ثاني وبعدين صح .. رايد وينه .. من امس وانا ناسيه كلش .. اكيد جالس بالبيت لحاله الحين .. وشكله مااحد عزمه يجي تنهدت محتار .. انا مقرر ماني ماخذ نادر لين اسافر ونتمشى .. بس موضوع دانة كيف ؟... انا قبل على بالي رايد يتصرف مع عمه وبكيفهم بس بعد كلام مريم حسيت معها حق ولازم انا اكلمه وعلى اذان الظهر قام جدي وعمي وطلعوا للمسجد شفت معاذ ينزل شماغه على الكنبة وقام وطلع للمغاسل استغليت الفرصة وقمت وراه وقفت عند مدخل المغاسل وشفت معاذ منحني على المغسلة ويغسل عمر = معاذ التفت معاذ لي واعتدل واقف وهو يسكر الصنبور مشيت ووقفت بجنبه عمر بابتسامة = اظن جا الوقت ترجع اللي معك ( ومديت يدي ) عطني مفتاح سيارتي والبطايق سكت معاذ وهو يطالعني شوي وابتسم ابتسامة جانبية ودخل يدي بجيب ثوبه معاذ = ايه جا ( وطلع مفتاح سيارتي وفتح بوكه وطلع بطاقة مكافأة الجامعة وبطاقة راتب ابوي ومدهم علي ) اخذتهم منه وانا اتنهد براحة .. رفعت راسي لمعاذ وحطيت يدي على كتفه عمر بابتسامة = طيب وماجا الوقت ننسى اللي بينا ؟ سكت معاذ شوي وسأل وانا متأكد انه عارف الجواب معاذ = ووش اللي بينا ؟ عمر = العداوة .. مايسوى علينا .. كبرنا وحنا الى الحين نتهاوش معاذ = انت اسلوبك ينرفز .. تشوف الناس كأنهم عبيد عندك تنهدت معه حق .. اسلوبي ونذالتي هي سبب العداوة قربت منه ولفيت ذراعي على كتفه عمر = ادري والله ومو معك بس .. شسوي هذا اسلوبي بس اوعدك رح اعدل من اسلوبي (وبيدي الثانية عطيته بكس خفيف على بطنه بمزح ) هاه وش قلت ننسى رفعت معاذ راسه والتفت لي وجهه قريب من وجهي مستغرب معاذ = غريبة وش اللي غيرك ؟ عمر = انت .. قلت لك قبل يومين انت عطيتني درس ماانساه معاذ = ايه اذكر بس مافهمت عليك .. وش هالدرس ضحكت وانا الى الحين لاف ذراعي على كتفه وقربته مني عمر = ههههههههههه خلنا الحين نوضي ونروح نصلي وابتعدت عنه وعطيته ظهري وفتحت الصنبور سكت معاذ مستغرب وهو يطالعني من المراية شوي وابتسم معاذ = سبحان مغير الاحوال شكل الحرمة لحست مخك ضحكت بقوة عليه وضينا وطلعنا مع بعض متوجهين للمجلس وانا اسأله عن نادر عمر = ماقلتلي وشلون نادر ياهو انا مشتاااااااااق له مرررررررررة ضحك معاذ وحنا ندخل المجلس معاذ = ياهو انا جتني كم علقة من جدي وامي وعمي ومافيه احد ماهاوشني والسبة انت واخوك .. بس وش اسوي كنت اعاند عشان اقهرك هههههههههههه عمر = زين يسوون فيك هههههههههههه والتفتت للجالسين ولقيت مصعب فاتح فمه فينا ومطير عيونه منهبل مصعب مستغرب = وش هالحركة الشاذة هذي ( واشر علينا باصبعه ) عمر ومعاذ مع بعض ويضحكون .. آآآآ ... عسى ماشر آآآ.. خوفتوني ضحكت بدون تعليق وانا الى الحين واقف عند مدخل المجلس كمل معاذ طريقه واخذ شماغه من على الكنبة وضرب بشماغه سعود المكسل معاذ = قم انت صحصح ( والتفت لمصعب ) والله مدري عن ولد عمك انا شاك ان زوجته مسويتله شي قبل صلاة العصر بفترة بسيطة ركبنا انا ومريم السيارة وعلى طول سألتها اتطمن عمر = هاه كيف لقيتي اهلي ؟ مريم = ارتحتلهم .. طيبين الصراحة حسيت من صوتها انها خف خجلها شوي شغلت السيارة بس وقفتي مريم بطلبها مريم = ابي اشوف دانة ما انت مكلم عمي عنها ؟ التفتت لها .. الصراحة نسيت الموضوع عمر = آآآ .. ماشفتي دانة انتي .. عمك وولده شفتهم قبل شوي تغدوا وراحوا مريم = مرة عمي جت بس دانة جلست مع البنات بالبيت ( وضمت يديها لصدرها تترجاني ) الله يخليك عمر ابي اشوف دانة .. شايلة همها الله يخليك كلم عمي عنها اليوم تنهدت وطفيت السيارة عمر = طيب يله ونزلنا ورحنا لبيت ابو بندر وضربت الجرس شوي وطلع لنا بندر ووراه اخته شهد الصغيرة دخلنا للحوش ومريم تكشف عن وجهها و تكلم بندر مريم بلهفة = بندر وين دانة ابي اشوفها خلها تجي وناد ابوك لعمر .. حنا بالمجلس هز بندر راسه بايه وراح يركض هو واخته مسكت مريم يدي وفتحت لي المجلس جلست مستغرب وانا اشوفها تجلس بجنبي بالمجلس ليش ماتدخل داخل وتشوف دانه زي ماتقول .. بس سكتت ولا علقت .. هي اعرف ببيت عمها مني شوي وشفنا دانة وبندر وشهد يدخلون .. بندر وشهد وقفوا عند باب المجلس ودانة اول ماشافت مريم .. بكت على طول وجت تركض وهي تصيح باسمها دانة = مليااااااااااام ( وارتمت بحظنها تبكي ) وين لحتي ضمتها مريم وهي جالسة وحطتها بحظنها وقعدت تضمها وتحبحبها ابتسمت وانا اطالعهم شوي ودخل ابو بندر ... ولأني خلاص توني شايف خشته ماقمت قامت مريم ونزلت دانة على الارض وراحت تسلم على عمها ودانة وراها و ماسكه عباتها ورجعت مريم وجلست بجنبي على الكنبة ودانة بحظنها التفتنا انا ومريم لبعض وبعدها التفتت لابو بندر اللي جلس قبالنا عمر = آآآ .. عندي طلب يابو بندر وان شاء الله ماتردني قطب ابو بندر حواجبه مستغرب ابو بندر = آمر ياولدي عمر بتنهيدة = مايامر عليك عدو بس آآآ .. ( والتفتت لمريم ودانة ورجعت التفت له ) نبي دانة تصير مع اخوانها .. مريم ورايد ساكنين معي بالبيت وقلنا تصير دانة مع اخوانها وانت الله يجزاك خير ويكثر من امثالك ماقصرت معاهم وعضيت على شفتي السفلية على كلامي اللي مو بمحله وانا عارف سوالفه مع رايد بس شنسوي .. ندهن سيره شوي ابو بندر مستغرب = وش .. تبي تاخذ هالبنية عندك ( واشر على دانة ).. انت مانت محرم لها هنا تكلمت مريم تترجاه مريم = رايد مع عمر بالبيت من زمان .. ودانة توها صغيره ماتتغطى .. تكفى عمي خلني اخذها عندي ... رايد موجود معنا تكفى ياعمي طلبتك .. دانة متعلقة فيني ومااقدر اخليها ابو بندر بعصبية = انتي خلاص رحتي لبيت زوجك .. تبين دانة تروح معك لبيت واحد غريب ؟ واذن العصر وحنا ناخذ ونعطي معه ولا فيه فايدة راسه يابس ماخلينا كلمة ماقلناها .. مريم قامت وحبت راسه تترجاه ولا فيه فايدة .. بكت قدمه ولا فيه فايدة قمت معصب وفاير دمي منه ..و التفتت لمريم وانا واقف بعصبية عمر = خلاص مريم قومي ضمت مريم دانة بقوة وهن يبكن الثنتين والى الحين جالسات ومريم تترجى عمي الى الحين مريم = الى يخليك ياعمي الله يخليك ... بس قاطعها ابو بندر وهو يقوم وسحب دانة من مريم وشالها والتفت لي ودانة تتلوى بين يديه وتمد يديها لمريم ابو بندر = خلاص خذ حرمتك وتيسروا طالعته وانا انفاسي سريعة من القهر والتفتت لمريم ومسكت يدها وقومتها عمر = امشي يامريم امشي ..( وهمست لها منقهر ) من عذر رايد يوم يترك البيت وراعيه وبصعوبة طلعنا للحوش و انا اسند مريم اللي ميته صياح وتبكي وانا احاول اهديها واوعدها اجي مرة ثانية واحاول معه وطلعنا من البيت بكبره وحنا نسمع صياح دانة اللي يقطع القلب وهي تنادي مريم بصوت عالي ركبنا السيارة وانا اعيد عليها الوعد مرة ثانية عمر = خلاص يامريم .. اوعدك اجي انا ورايد ونحاول معه ... يمكن اذا شاف رايد اخوها يوافق ناخذها مغطيه وجهها بيديها وتبكي شغلت السيارة وحركت الله يعكر مزاجه زي ماعكر مزاجنا وصلنا بيتي .. ودخلنا ومريم كأنها هدت شوي بعد وعودي طوال الطريق لها تنهدت وانا افتح الباب لمريم انا نظاميا صفر على الشمال لنادر وهو اخوي كيف عاد لدانة .. وهي بنت غريبة بالنسبة لي نزلت مها عباتها والوجه متنفخ من البكا ابتسمت لها وانا اطالعها وقلت امزح واحاول اعدل المزاج شوي عمر = له له له .. مايستاهل واحد مثل عمك يخرب وجهك الحلو ( ولفيت ذراعي على كتفها وانحنيت لمستواها اطل على وجهها ) وش ذنبي انا شوي شوي نزلت مريم راسها بقوة مستحية وهي تضم عباتها لصدرها وكأني شفت شبح ابتسامة ضحكت ومسكت اكتافها ومشينا اوريها البيت على غرفة غرفة لين وصلنا عند غرفة رايد ووقفنا عند بابها ولقيناها مظلمة والمكيف شغال .. وابتسمت وانا اشوف رايد مغطي نفسه بالكامل ونايم على السرير التفتت لمريم وهي تدقق بالنظر على السرير مستغربة عمر = هذا اخوك الكسلان ودخلت الغرفة وشغلت الانوار وكشفت اللحاف عن رايد ولقيته عليه ملابسه الداخلية ونايم نغزته باصبعي على خصره عشان يقوم .. تحرك رايد وطالعني شوي يستوعب وبعدها فز جالس رايد = عمر ( وعلى طول التفت للي واقفة عند الباب وشهق ) مريم ( وقام بسرعة وراح عند اخته ونسى عمر واللي جاب عمر ) شفت رايد يضم مريم ويسلم عليها ويباركلها ولما شاف وجهها واضح عليه البكى سألها بخوف رايد = شكلك باكية وعلى طول التفت لي معصب رايد بعصبية = هيييييه وش مسوي باختي انت عمر = اهااا بس خل عنك مسكت مريم يد رايد مريم = مو هو ياخوي .. بس كنت مشتاقة لدانة التفت رايد لمريم بصمت ما ابي اجيب سيرة دانة ومشكلتها الحين وقلت اغير الموضوع عمر = هييييه تعال انت ووجهك ليه ماجيت الظهر عند بيت جدي .. الكل كان هناك التفت رايد لي وحط يده على كتف اخته يدخلها الغرفة وهو يرد علي رايد = عزمني مصعب بس رحت للدوام مواصل وتعبان وماقدرت اجي طلب رايد من مريم تجلس على سريره وجلست وانا جلست بجنبها ورايد جلس على الارض قبالنا رايد بفرح = والله انا فرحان يامريم وانا اشوفك معنا الحين ابتسمت مريم بخجل وسكتت شوي وبعدها رفعت راسها لرايد وعلمته عن دانة وعمي مريم = رايد انا وعمر قبل شوي رحنا لعمي عشان نطلب منه دانة بس عيا قطب رايد حواجبه مستغرب رايد = ليش عيا ( وهز اكتافه ) مب على كيفه .. الحين انا وانتي هنا وش يمنعه ؟ تنهدت وقلت لرايد عن اسباب عمه عمر = انا ماني محرم لاختكم التفت رايد لي وهو الى الحين جالس بالارض قبالنا رايد = انا موجود وهي اصلا توها صغيره ( وقام واقف ) خلاص انا الحين ابروح واجيبها .. عمي زودها معنا واجد التفتت مريم لي على طول مريم = تكفى عمر رح معه بس رايد عارض رايد = لا مريم خلي عمر يرتاح من مشاكلنا شوي ( والتفت لي ) انا ابطلع الحين خذوا راحتكم وراح للحمام يتجهز عشان يطلع التفتت انا ومريم لبعض وقمنا وطلعنا عنه ورحنا لغرفتنا نرتاح بعد صلاة العشا بفترة قمت من النوم ودخلت الحمام اغسل وانا مكسل لبست بنطلون وتيشيرت وقضيت الصلوات وطلعت من غرفتي ادور مريم وانا توني اتذكر ان اغراضها وملابسها بالفندق شكلي غير ارسل رايد يجيبهم دخلت الصاله ولقيت مريم جالسة وسرحانه واول ماشافتني قامت واقفة وهي مستحية مني الى الحين وملاحظ الانحناء البسيط بظهرها من اول ليلة شفتها قربت منها وجلسنا بجنب بعض على الكنبة وحنا ساكتين .. وانا افكر كيف اسألها عن سبب الانحناء وساكت وهي تفرك يديها وساكته وشكلها مرتبكه التفتت لها وسألتها عمر = وش فيك مريوم ؟ همست مريم وهي منزلها راسها مريم بهمس = رايد تأخر مدري وش سوا مع عمي عمر = يمكن راح لدوامه وبعدين يروح لعمك ماردت علي وسكتنا واخذنا شوي وحنا ساكتين رجعت التفت لها وانا اتنحنح عمر = احم .. مريم آآآ .. وش فيه ظهرك ؟ وقفت مريم عن فرك يديها فجأة .. شوي ولفت وجهها عني وهي الى الحين منزله راسها وردت بهمس مريم بهمس = ظهري دايم يعورني عمر = وش منه ؟ مريم = مدري ماراجعت المستشفى عمر = ليه ؟ سكتت مريم شوي وبعدها ردت مريم = عمي دايم مو فاضيلي عمر = طيب رايد دايم يكلمك ليه ماتطلبين منه يوديك مريم = ايه ... آآآ ... بس عمي شوي شديد على طلعاتي ( وسكتت شوي وكملت ) مايخليني اطلع من البيت واجد سكتت شوي وانا اطالعها عمر = طيب هذا مستشفى وضروري وانتي ما انتي رايحة تتمشين .. وش عذره عمك مايوديك سكت مريم شوي وطولت وهي ساكتها انحنيت اطل على وجهها يوم شفتها طولت منزله راسها وانفاسها سريعة وتجاهد الدمعة عمر مستغرب = اذا كان سؤالي يضايقك .. آآآ فجأة انفجرت تبكي مريم = ليته على المستشفى وبس .. انا مكاني عندهم المطبخ وبس واذا جلست عندهم اتبرد والا اتفرج على التلفزيون تسمّعني عمتي كلام يسم البدن .. صرت اتحاشاها .. صرت اكره اجلس عندها ( وبكت اكثر وهي تمسح دموعها بيدها ) اشوف مرة عمي وبناتها يطلعون للسوق ويرجعون محملات بالاكياس وانا الاشياء الضرورية يالله تجيني .. المستشفى يقول عذره مو فاضي .. بس فاضي لمرته وعياله .. يكرفوني بالشغل حتى لو تعبانة .. عمتي ماترتاح لين تشوفني اشتغل .. نفسي تشتهي اشياء حرمتني منها .. تراكمت علي الهموم .. بين معاملتهم معي وبين حزني على امي وابوي وفوق هذا تعبانة وزاد علي لما طردوا رايد .. صارت نفسيتي دماااااااار وانا مدري وينه وهو توه صغير .. حرااااااااااام عليه عمي ليه يطرده وهو صغييييييير .. خفت عليه من عيال السوء .. مدري عنه هو حي والا ميت هو ياكل والا يشرب ( وشهقت بقوة تبكي ) والله لولا بنات عمي .. يصبروني ويعطوني اللي احتاجه بالدس وامهم ماتدري ( وبكت اكثر ) كرهت الحياة كلها .. كرهت نفسي .. حطيت يدي امسح على راسها ورصيتها على صدري اضمها عمر بألم = خلاص مريم .. انا من زمان اعرف عن معاناة رايد مع عمه .. خلاص يكفي حاولوا تنسون غطت مريم وجهها بصدري وتبكي بحرقة مريم = مابي دانة تصير عندهم يوم واحد .. خايفة يعاملونها مثل ماعملوني .. والله ابنجن اذا ماخذتها من عمتي رصيت راسها اكثر على صدري عمر = لا تخافين .. الحين رايد يجيبها .. وتنهدت وانا اضم مريم اللي تبكي ما اتوقع رايد يقدر على عمه .. وسكتت افكر بطريقة نحل مشكلة دانة وقعدنا نحتري رايد وحنا ساكتين مريم تدعي بخوف .. وانا ساكت وافكر و بعد ساعة من الانتظار.. شرف الاخ ويد قدام ويد ورا شهقت مريم وقامت واقفة لما شافته دخل علينا بدون دانة مريم = وين داااااااااااااانة ؟ طالعت رايد اللي منزل راسه وشكله هو الاخر توه باكي وبصعوبة نطق رايد بقهر = عيا .. تهاوشت معه بس عيا راسه يابس ( ورفع راسه لمريم ) عذره عمر مو محرم لها مريم بخوف = لاااا لاااا .. ابي دانة .. ماارتاح و دانة بعيد عنيييييي .. خايفة عليها من عمتييييي نزلت راسي بصمت اكمل تفكير ومريم تبكي ورايد يحاول يهديها قمت وطلعت من الصاله ودخلت غرفة امي وقفلت على نفسي واتصلت على عمي ابو سامي شوي وجاني صوته وبعد السلام عمر = عمي فيه موضوع ابي اكلمك فيه وابي مساعدك سكت عمي مستغرب وحسيته يحتريني اقول اللي عندي عمر = عمي انت تعرف ان اخو زوجتي ساكن معي عمي مستغرب = ايه ادري ياولدي تنهدت ودخلت بالموضوع عمر = والحين زوجتي واخوها يبون اختهم الصغيرة تصير معهم بالبيت .. عمي انا ماعندي مانع بس كلمنا عمهم اليوم وراكب راسه عيا يخلي اختهم معهم بنفس البيت سكت عمي ومارد وكملت كلامي عمر = عمي ابيك تكلمه بالعقل عمي = والعقل تصير مع عمها .. الله يهديك بس سكتت وانا فاهم مقصدهم بس هذا اذا كان عمهم الكلب صدق همه الحرام و الحلال .. وين مافكر بالحرام يوم ياكل حلالهم عمر = عم انت ماتدري وش سوا ابو بندر مع زوجتي واخوها .. والله ياعم انه ماكل حلالهم وباع بيتهم وحارمهم من كل شي .. اخوانها الحين خايفين على اختهم الصغيرة سكت عمي حسيته تورط معي .. توه مزوجني ومن اول يوم ازعجه بمشاكلي عمر = انا فكرت وقلت نجيه من طرف زوجته عمي = كيف يعني نجيه من طرف زوجته ؟ عمر = ابي عمتي ام سامي وجدتي يكلمون الحرمة ... وتراهم عايلة همها الفلوس .. انت شايف كيف طلبت 10 الاف لها وهي لا هي ام زوجتي ولا شي .. عمي تكفى قل لعمتي ام سامي تروح لها وتكلمها وقعدت اقنع عمي لين وافق بالفكرة ووعدني خير نزلت لرايد ومريم وعلمتهم وبصعوبة هدت مريم وهي تدعي نجاح الفكرة وكل شوي تسأل بخوف بينها وبين نفسها ياربي هي تعشت والا لا .. هي ماتنام الا عندي اكيد مانامت الى الحين وانا ورايد شغالين نطمنها الاربعاء قررت اخذ مريم للمستشفى ونشوف سبب مرض ظهرها ورايد طلع لدوامه له ساعتين اخذت مريم وطلعنا من البيت ورحنا للمستشفى وهي الى الحين مهمومة على دانة .. وهناك وبعد الكشف جلسنا قبال مكتب الدكتورة ومريم جالسة قبالي سكتت الدكتورة شوي وهي تقلب التقارير بين يديها وهمست الدكتورة بهمس = عندها الديسك قطبت حواجبي ماني فاهم اول مرة اسمع الديسك .. اللي اعرفه انه اكيد اسم مرض بس وش مادري التفتت لمريم بمزح ومنها احاول اضحكها واطلعها من همها عمر = الدكتورة تسأل تسوين الديسكو ؟ رفعت مريم حواجبها ضحكت الدكتورة ورفعت راسها لي على طول الدكتورة = لأ ايه ديسكو ههههههههههههه ( وضحكت اكثر ) ابتسمت وانا اطالع مريم .. اللي ابيها تضحك ماضحكت .. التفتت للدكتورة تطالعها بصمت التفتت للدكتورة وسألتها بجدية عمر = وش الديسك دكتورة ؟ الدكتورة = ماتخافوش ده مرض بسيط وان شاء الله علاجو سهل وحتى لو اضطر المريض للعملية ماتخافوش عمليتو كمان بسيطة .. والحمد الله المرض مش قديم عندها .. الاستمرار على الاعلاج ان شاء الله بيكفي ارتحنا لكلامها وقمنا راجعين و مر يوم كامل وحنا نحتري عمي وعمتي ام سامي يردون علينا وش سووا الخميس بعد صلاة العشا جالسين انا ومريم بالصاله ومريم ملت وهي تحتري وش صار بالموضوع مع عمي وانا ورايد بعد ملينا الانتظار و اخر شي قررت اتصلت على عمي .. ورايد ومريم عندي جالسين قبالي بالصاله عمي = هلا عمر عمر = هلا بك .. هاه عمي مارديتلي وش سوت عمتي ؟ عمي = ام سامي كلمت ام بندر وتقول الحرمة بتقنع زوجها وعلى الله ياولدي وانا وجدك بعد ترانا كلمنا ابو بندر ابتسمت عمر = صدق عمي .. هاه وش قال ؟ عمي = والله يابوك الرجال معه حق بكلامه .. بس جيناه باللين وحسيت انه لان التفتت لمريم ورايد اللي جالسين بجنب بعض ويطالعوني بصمت وبلهفة وابتسمت وانا اتذكر ابو بندر يوم كنا بمجلس جدي يوم يحجّرون عليه الرياجيل عشان مايبلغ على رايد يوم يكسر سيارته .. وشفت كيف تنازل بسرعة عشان يبين للناس انه طيّب ومافه منه واذكر يوم وافق يعطي كرت العايلة لرايد عشان نفس السبب قدام الجيران .. يبي يبين للناس انه طيب انتبهت على عمي يسألني عمي = هاه انت مانت مسافر تتمشى انت وزوجتك والا تبي تتمشى ببريدة هههههههه عمر = هههههههههه لا عمي ان شاء الله ناوي سولفت مع عمي شوي وسكرت عنه واول مانزلت الجوال عن اذني سألوني مريم واخوها بصوت واحد مريم ورايد = هااااااه وش قاااااااال ضحكت عليهم وعلمتهم عمر بابتسامة = عمي وجدي كلموه و يقول عمي حس ان عمكم لان شوي التفتت مريم لرايد وهي ضامها يديها لصدره بخوف مريم = يااااارب عمر = نبي ناخذ يوم كذا ونروح انا ورايد ونكلمه مرة ثانية وعمي معنا ( وقمت واقف ) يله عاد خلونا نغير جو ونتعشى برا ارتبك رايد وتلعثم رايد = لا لا .. آآآ انتوا روحوا التفتت مريم لرايد مستغربة مريم = ليه .. تعال معنا رايد منحرج = لا مريم مابي اضيق عليكم .. وين تبيني اروح قاط وجهي .. احس نفسي غلط .. لا لا مابي اروح زين انه فاهم .. الصراحة ابي استمتع بالخصوصية شوي ولاحقين على الجمعه .. وان شاء الله نادر قريب اجيبه .. ودانة يوافق عليها عمها مريم بزعل = بس رايد انا ماســ وقاطعتها ومسكت يدها اقومها عمر = يابنت الحلال خلاص خليه ( ونزلت نظري لرايد الجالس وكملت بمزح ) امشي ولاحقين على البزارين ابتسم رايد وماعلق وطلعنا .. ياخي فرق بين تطلع تتعشى مع شباب جلف وخشنين وبين تطلع مع وحدة مثل النسمة و ناعمة الجمعة ركبنا انا ورايد سيارتي اللي جابها لي مصعب واخذ سيارته ورحنا لحارة عم رايد مرينا عمي ورحنا لبيت ابو بندر وبدا عمي ياخذ ويعطي مع ابو بندر وانا ورايد متفقين نسكت ونصير مؤدبين ونخلي كل الكلام لعمي وبعد مانشف حلق عمي وهو يقنع فيه .. اخيرا اقتنع وجه العنز شهق رايد بفرح يوم وافق والتفت لي فرحان .. حطيت يدي على فخذه وانا ابتسم شفت عمي يشر لي على رايد بعيونه .. شوي وفهمت على عمي انه يبي رايد يقوم ويحب راس عمه ويدهن سيره شوي همست لرايد وقلت له يقوم يحب راس عمه ونفذ بدون نفس ومعذور طلع بندر يجيب دانة شوي ورجع للمجلس ودانة معه وقفت عند الباب بجسمها الصغير والنحيل تستوعب الموجودين ويوم شافت رايد شهقت وجت تركض وارتمت بحضن اخوها وهي تبكي تنهدت وانا اشوف دانة متغيرة .. شكلها من كثر ماتبكي وتصيح على اختها تغيرت طلعنا انا ورايد ومعنا دانة ورحنا نفرح مريم ونبشرها ومافيه فايدة مع مريم .. باكية باكية سواء خايفة والا فرحانة التفتت لرايد وحنا واقفين عند مدخل الباب الداخلي ونشوف مريم ضامة دانة وتبكي عمر باستهزاء = الحين ليه انت واخواتك دايم تبكون .. ماتخلص دموعكم ياخي رفع رايد راسه لي رايد = الحين تشوفني بكيت ؟ عمر = ايه انت بالذات دايم تبكي .. تذكر والا اذكرك رايد = يله بس خل عنك .. ودخل الصاله معصب يوم وقررنا نسافرنا انا ومريم للشرقية نتمشى ورايد ودانة يدبرون نفسهم ورايد يعتمد عليه .. اكيد يقدر يعتني باخته وانطلقنا للشرقية وانا فرحان وطاير من الوناسة بس فرحتي صارت ناقصة لاحظت على مريم يتعب ظهرها من كثر الجلوس على السيارة والسفر لمسافات طويلة واسبوع ورجعنا عشان ترتاح بعد يومين من سفرنا رحت لعنيزة العصر وانا مشتاق لنادر .. مشتاق للي ريحته من ريحة امي .. واخذت رايد معي عشان يمسك نادر بالرجعة وطوال الطريق وانا اتخيله... اكيد كبر .. اكيد تغير .. كيف صار شكله التفتت لرايد اللي جالس بمكان الراكب وسألته عمر = تتوقع تغير شكله ؟ التفت رايد لي رايد مستغرب = مين ( وكأنه تذكر ) آآه تقصد نادر .. اكيد تغير الحين صار عمره تقريبا امممم 5 شهور ونص .. صح ؟ طالعت الطريق قدام وانا اهز راسي وتنهدت عمر = ايه وصلنا بيت عمي وضربنا الجرس شوي وطلع لنا معاذ معاذ = هلا عمر عمر = هلا بك ( وابتسمت بألم ) جاي اشوف نادر واخذه .. ياهو انا مشتاق له ابتسم معاذ وقال يصحح لي بنذاله معاذ = اسمه فارس .. اعرف اسمه اول عمر بضيق = اوووه معاذ .. كل واحد يسميه باللي يريحه .. دخلنا عاد ابي اشوفه معاذ = طيب طيب لا تاكلنا ودخلنا المجلس وراح معاذ يجيب نادر شوي و دخل سعود وسلم وجلس سمعت رايد يسأل سعود رايد = وين مصعب ؟ سعود = راح يشرف على المحل .. يمكن المغرب يجي .. حتى جدي مب هنا بعد وقعدوا يسولفون وانا عيني على الباب احتري نادر بنفاذ صبر فجأة دخل معاذ المجلس ومعه طفل صغير شايله بيده قمت ببطئ وانا عيني على الطفل مستغرب هذا نادر .. اخبره بالمهاد ملفوف .. هذا عليه بنطلون جنز وفنيلة حمرا وبين يديه لعبة صغيرة حاطها بفمه ويطالعنا ببراءة جا معاذ عندي ووقف قدامي اشرت على الطفل ماني مصدق عمر = هذا آآآ.. نادر ؟ معاذ = لا فارس .. تشوفه تغير عليك صح ابتسمت بألم وانا عيني على نادر الى الحين عمر بألم = والله ماسويت خير يامعاذ حرمتني منه شهور بشروطك اللي مدري وش تبي واخذت نادر منه وضميته لصدري وانا اسمع معاذ يرد علي معاذ = هههههههه وش اسوي بك .. تستاهل المهم بردت حرتي فيك جلست على الكنبة وانا اضم نادر وغطيت وجهي بوجهه تذكرت الليلة السودا اللي جا فيها تذكرت امي تذكرت يوم اخذه عندي وانا نفسيتي دمار كان بالمهاد ابعدت وجهي عنه وانا اشوف نادر يتحرك وهو متضاق مني وطاحت لعبته بالارض عند رجولي وبرطم قرب يبكي رجعت وغطيت وجهي بوجهه وحبيت فمه الصغير هذا نادر يمه كبر .. ليتك موجودة تشوفينه فجأة بكى نادر متضايق من رصتي له ابعدت عنه وانا اهزه ابيه يسكت عمر بحزن = بس نادر بس .. انا اخوك ليش تصيح قرب رايد مني ولصق فيني يطالع نادر عن قرب رايد = تغير واجد قام معاذ وجلس بجنبي من الطرف الثاني واخذ نادر مني وحطه بحظنه .. واللي يقهر سكت على طول او ماخذه معاذ معاذ = شوي شوي عليه .. توه مو متعود عليك اخذت اللعبة الصغيرة من الارض .. وقربت من معاذ ولصقت فيه وانا احرك اللعبة قدام نادر الاعبه واحاول اخليه يتعود على شكلي فجأة دخل جدي وقمت اسلم عليه انا ورايد وجلسنا وانا رجعت وجلست بجنب معاذ واكمل الاعب نادر التفت جدي لمعاذ يوم عرف سبب جيتي جدي بعصبية = هاااه قلي الحين وش استفدت من اللي سويته .. لا بارك الله فيك لف معاذ وجهه وهمس متضايق معاذ بضيق = اوهووووه علينا .. جدي كل يوم يهاوش ( ومال علي وقرب راسه من راسي يهمس باذني) هم هاوشوك كثر ماهاوشوني يوم تاخذ سيارتي و مكافأتي ومكافأة مصعب ؟ ضربته بكوعي اسكته وهمست عمر = اسكت تبيه يعصب اكثر معاذ بهمس = جدي كل يوم لازم يهاوش عمر بهمس = ادري تعلمني عن محاضرات جدي ... صرت اعرفه وفيه نظرة يخزك فيها اعرف ان بعدها محاضرة التفت معاذ يطالعني وراسه قريب من راسي وصار وجهه قريب مني معاذ = جد والله ؟ كيف يسوي ؟ عمر = يسوي كذا ( وعطيت معاذ نظرة اقلد جدي ) بعدها استعد لهواشه قطع علينا جدي مستغرب من همساتنا بصوت خفيف جدي = وش تقولون انتم اعتدل معاذ جالس ونادر بحظنه معاذ = ابد سلامتك جدي بعد صلاة المغرب اخذت نادر بعد ماودعوه اخوانه ورجعنا لبريدة رايد يسوق وانا بمكان الراكب ونادر بحظني والاعبه والاخ مفهي باللي حوله وبالسيارات وماعليه مني دخلت البيت قبل رايد وفتحت الباب الداخلي وانا اكلم نادر بفرح كأنه يفهم وشفت دانة بالممر تقفز وتلعب على مربعات البلاط التفتت لي ولما شافت نادر الصغير بيدي وقفت تطالعه ببراءة مستغربة وجت عندي ترفع يديها تبي تشيله رفعت راسي وشفت مريم تطلع من المطبخ وطيرت عيونها مريم = هذا اخوووووك ؟ وجت عندي .. عطيتها نادر وعينه على دانة يشوفها من فوق ( الطيور على اشكالها تقع ) عمر بابتسامة = تشوفينه ؟ هذا نادر ( وكملت بفرح ) اخوي مريم = ياحليله يهبل وراحت للصاله وهي شايلته ودانة تقفز قدامها تبي تاخذه دخل رايد وسكر الباب الداخلي رايد = بسم الله خطفوه منك على طول ههههههه وراح للصاله رحت وراهم فرحان .. فجأة وقفت عند مدخل الصاله وعيني على اللي قدامي مريم جالسة على الكنبة وبحظنها نادر ورايد جالس بنفس الكنبة بجنب مريم ولاصق فيها ويلعب بلسانه لنادر ودانة واقفة قدامهم وماسكه يدين نادر تبي تاخذه من مريم ابتسمت وانا اطالعهم جالسين كلهم قبالي واناظرهم واحد واحد صارت عندي عايلة ... فرق بين اول والحين ياما جلست بهالبيت وحيد ... ياما جلست امي بهالبيت لحالها وحيدة ياما شكيت لامي وحدتي .. ياما صار هالبيت مظلم يمه تحققت امنيتي وصارت عندي اسره .. ليتك يايمه ترجعين وتشوفين فرحتي * رايد * بعد مرور 6 شهور رجعت البيت الظهر ومعاي كتبي .. اخيرا رجعت لمقاعد الدراسة اولى ثانوي ... غصبتني مريم اترك شغلي وارجع ادرس .. بالبداية كنت متردد خايف اثقل على عمر ماكنت ابي اترك الشغل و يقوم عمر يصرف علي وعلى دانة بس مريم اصرّت الا اترك الشغل وارجع للدراسة و ما اقتنعت الا بعد ماشفت عمر مأيد الفكرة سكرت الباب الداخلي وابتسمت وانا اشوف دانة تلعب بالسيكل حقها داخل غرف البيت ونادر جالس وراها بالمقعد الخلفي والخدامة ماسكته لا يطيح دخلت الصاله وشفت مريم جالسة على الكنبة وتتفرج على التلفزيون من يوم حملت مريم وهي ممنوعه عن الحركة بسبب مرض ظهرها وعمر من فرحته طار وجاب على طول خدامة مؤقته لين يقدم على خدامة دائمة وحلف على مريم ماتتحرك ومن شهرين ونص كل ماتحركت مريم عصب عمر عليها ماتتحرك والحين لها شهرين ونص حامل فرحتي ماتوصف .. انا ابصير خال ** تـمـت ** ** رواية يمسح الدمعة بشكوى ** ** للكاتبة هـدوئي ** |
