 |
  |
|
|
|
|
|||||||
| قصص و روايات أسمهان وعبدالرحمن قصة أسرية هادفة بكل اجزاءها متتابعة روآية سعودية يوجد هنا أسمهان وعبدالرحمن قصة أسرية هادفة بكل اجزاءها متتابعة روآية سعودية روايات Novels و تحميل روايات و قصص روايات حب سعودية روايات احلام و عبير رومانسية عربية روايات عالمية كاملة للتحميل روايات رومانسيه احلام و عبير و قصص مضحكه قصص حزينه قصص رومانسيه حكايات عربية و قصص الانبياء افضل قصص مفيدة قصص سعودية خليجية |
|
|
|
#6 |
|
|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
الجزء العاشر..... طال الشد والجذب بين أم عبدالرحمن وأختها أبلة جوهرة حول موضوع الورد!!وكان من ضمن كلامهم:: أم عبدالرحمن: لاتكثرين حكي ياجوهرة..انتي تقولين الكرت اللي قرأتيه مكتوب فيه..يسلم بيد رانية!!صح؟! جوهرة:صح! أم عبدالرحمن: زين..يعني قصدك بعد تقولين إن عبدالرحمن متعرف على رانية؟! جوهرة:لا بس استخدم اسمها عشان يضللنا!! أم عبدالرحمن:أنا واثقة بولدي وواثقة ببنت الناس...وانتي تقولين إنك ماسألتي البنات عن السالفة إذن بأي وجه قمتي ترمين تُهم؟!! جوهرة: ومين قال لك إني بأعديها لهم؟! بكرة من الصبح بأستلمهم تحقيق!! أم عبدالرحمن:أهم شي بنت الناس لايوصلها علم عن هرجك ذا!! أنا ماصدقت ألقى لولدي عروس!! وبعد الأخذ والعطا انتهت المكالمة.. طبعاً في الجانب الآخر اسمهان كانت راجعة لبيتها والفرحة غامرتها وعايشة بعالم وردي وشايلة باقتها وبينها وبين نفسها تقول:يسلم لي ذوقه! إذا كان يسوي كذا من أولها أجل كيف بتاليها!!!!! شافتها أمها وقالت:ماشاء الله اش هالورد كله؟!! اسمهان تلعثمت وفكرت تكذب وقالت:أبد صاحباتي يوم عرفوا بسالفة الخطبة من أول الأسبوع ..جابوا لي اليوم الورد هدية! الأم: وانتي على طول نشرتي الخبر ماقضبتي لسانك؟!! اسمهان (قامت تبكش!!!):لا أنا ماقلت لأحد شي أبلة جوهرة قالت لصاحباتها وانتشر الخبر بكل المدرسة وسألوني صاحباتي فأكدت لهم الخبر.. الأم: تنشر الخبر؟؟والله واثقين من ولدهم هالناس!! على العموم إحنا مازلنا نسأل عنه..والله يكتب اللي فيه الخير وعدى الثلاثاء.....وجاء بعده يوم الأربعاء.. وقبل جية اسمهان على المدرسة سحبت أبلة جوهرة شلة الصاعقة واشتغلت تحقيقات!!! أبلة جوهرة:بأبدأ فيك يامرام بما إنك أهداهم!! اش سالفة الورد؟؟؟؟ مرام:أي ورد؟؟ أبلة جوهرة:لاتعابطين! الورد اللي عطيته رانية أمس! مرام: هذا انتي قلتيها بنفسك مادامك عطيتيه رانية إذن اسألي رانية عنه! أبلة جوهرة: تفضلي ياآنسة رانية اشرحي لي القصة! رانية:أبد.. ورد وجاني هدية..أخطيت؟؟! أبلة جوهرة: لا سلامتك! أنا اللي أخطيت وجيت أعطيتك إياه...مع إنه من الواجب علي إني ماأسلمك إياه!! رانية: ليش؟؟ ماعندك أمانة؟؟ أبلة جوهرة: احترمي نفسك!! وخلك واقفة على جنب ماودي أسمع صوتك!....تعالي يانجلاء.. وتقدمت نجلاء خطوتين....وسألتها أبلة جوهرة: وش تعرفين عن سالفة الورد؟؟ نجلاء(باستهبال): نفس اللي تعرفينه انتي بالضبط!! ورد ووصل وسلم واستلم!! أبلة جوهرة:يعني متفقة مع صاحباتك ماتتكلمين؟ زين تعالي ياأفنان وأفيديني بشي! أفنان: مدري عن شي شفتك تعطينه رانية وبس! أبلة جوهرة: واش جاب الورد بيد اسمهان مادامه لرانية؟؟؟؟؟ نجلاء:عجبتها ريحته وشالته..عادي يعني!! أبلة جوهرة:عموما إنتم كالعادة محد ياخذ منكم حق ولاباطل..بس أنا بأروح للحارس وأسأله عن اللي عطاه الورد وبأحقق مع كل اللي بالادارة اشلون وصل هالورد على مكتبي؟؟؟؟؟؟ رانية: وليش هاللفة العريضة؟؟ انسي السالفة أحسن! أبلة جوهرة: انتي بالذات انطمي!! ماأستبعد إن هالورد جاك من معجب!! لذا بس استدعاء خاص لأمك اليوم ونشوف اش سالفتك!! تدخلت مرام بالموضوع وقالت: مدام السالفة فيها أمها وسمعتها ومعجب إحنا بنقول لك القصة من أولها!!!! وبالفعل حكوا لها كل شي عن مقلبهم السخيف فقالت: وبعدين اش استفدتوا من هالمقلب؟؟؟؟؟ رانية: أبد..ضحكنا على اسمهان.. أبلة جوهرة: أنا اللي المدرسة كلها ضحكت علي بسببكم! عموما لاتقولون لاسمهان شي!! ولاتجيبون لها طاري خليها عايشة بجوها وأحلامها!! أما إنتم لو تكرر منكم بلوة عقب اليوم فاعرفوا إن عقابكم عسير!! وانصرفت الشلة من الغرفة...وتنفست أبلة جوهرة الصعداء لأن اسمهان وعبدالرحمن طلعوا براءة!!هههه ومشى اليوم طبيعي ومحد قال لاسمهان أي شيء.. ودارت دردشة بينهم: أفنان: الله ماني مصدقة اليوم ربوع يعني بأطقها نومة لين ماأشبع!! نجلاء:وليش النوم؟؟ إلا قولي بأهج من البيت وأطيح تفرفر بهالمولات! مرام:أنا عن نفسي رايحة لبيت خالتي..يعني اليوم بأقضيه فلة ووناسة..كل بنات العيلة بيجون.. رانية: أنا أحسنكم كل أبوكم!! رايحة لعرس ومو أي عرس بفندق يجنن..من هالحين شامة رايحة الطرب والدجة!! أفنان: مدري ليه ماتستهويني الأعراس؟؟ رانية:أكيد لأنك ماتنعزمين إلا بأعراس أبو فقسة!! مال استراحات وقرنبع!! وجه فقر أعرفك!! أفنان:لاياحبيبتي! تحسبيني مثلك أروح أطامر بالأعراس كأن فيني زار...عبالك الناس بيعجبون بــ رجتك!! رانية:اسكتي واللي يسلم عمرك! أنا أشوف روحتي للأعراس فيها فوائد ثقافية عظيمة!! نجلاء:ههههه...وش هي ياحسرة؟؟؟؟ رانية: أتثقف في موضة الملابس+الماكياج+التسريحات+روا يح العطور+ديكورات القصر+الضيافة+الطقاقة!!+الكوشة !!!! يعني كل شي كل شي! اسمهان(بصوت عالي):بـــــــــــــــــــــــ ــــــــــس تكفون تكفون طاري العرس لاتطرونه!! رانية: عساك هونتي؟! ماتبينه دزيه لي!! نجلاء: انتي عاد بالذات أبلة جوهرة ماتواطنك ولاتداني ريحتك كل بلوة بالمدرسة انتي سببها! وكل فضيحة إلا مايكون لك يد فيها!!لكن أنا غير! اسمهان: الله يقلعكم تتعازمون على خطيبي قدامي؟! ماهونت ولاشي...بس بإذن الله لو الله كتب أتزوج.. راح تكونون أول ناس بأحطهم في القائمة السوداء وأمنعهم من حضور عرسي!!!!!! رانية: انتي الخسرانة!! محد بيجمل عليك ويرقص من أول الزواج لآخره إلا أنا!! اسمهان: إلا قصدك محد بيجي عشان يبقق عيونه ويتشمت بالزواج من أوله لآخره إلا انتي!! وضحكت الشلة على رانية الخفيفة وكملوا دردشتهم وانقضى اليوم الدراسي وكلن رجع بيته... وصلت اسمهان بيتها..ودخلت على أمها وسلمت.. إلا وأمها تقول:روحي يابنتي خذي لك راحة ساعتين أختك ابتسام جاية اليوم من السفر وأبوك بيسوي عشا وبيعزم أخوك محمد وزوجته وأختك أسماء وزوجها.. وراحت اسمهان تطق النومة... الجزء الحادي عشر... قامت تشخر بعالي الصوت طلعت أمها تصحيها العصر ماصحت...أرسلت كاتيا الشغاله تصحيها هم بعد ماصحت ووصلوا الضيوف كلهم(أخوها وأخواتها) وهي ماصحت! راحت ابتسام جمعت كل البزارين وقالت:هجووووووم على خالتكم لاتنزلون إلا وهي معكم!! وبالفعل طلعوا بزورة محمد(سعيد ووليد)وناقزوا فوق سريرها!!وهي نايمة تشخر وولد ابتسام يحوس بالغرفة..(وهيفاء وسارة)بنات ابتسام يلعبون على التسريحة! واسمهان طاقة النومة!!! راحوا هيفاء وسارة وأخذوا اصبع روج ورسموا بوجه خالتهم اسمهان وهي موب دارية عن الدنيا تهشهم مثل هش الذبان!! وهم مسويين حفلة تنكرية بوجهها!! وفككوا البكلات من شعرها وسعيد ماقصر كب بودرة على شعرها!! لما زهقوا البزران ان خالتهم ماتصحى كمل وليد الناقص وحذفها بقزازة عطر على جبهتها خلتها تنقز نقزة وتزأر زئير فاخترعوا البزران ونزلوا بالصالة عند أمهاتهم!!! واسمهان وراهم تهدد وتتوعد!!وهي نازلة من الدرج قامت ابتسام ترحب:ياهلا بعروستنا وياغلا! وأسماء وسماح زوجة أخوهم يبحلقون في منظر اسمهان باستغراب شديد الشوشة منفووووشة وعليها كيلو بودرة!! ووجهها من أوله لآخره مشخبط بروج لونه أحمر!!وجبهتها وارمة من أثر قزازة العطر!!!!! قالت أسماء:أي عروس ياابتسام؟سألتك بالله هذا منظر عروس؟ هذه مومياء خارجة من تابوت!!!! وسماح تقهقه وتقول: ياحليل العيال راسمين بوجهك خرايط!!ناقصك وشاح على راسك ونكتب عليه(مصاصة الدماء!!!)... أسماء:تكفين تكفين ضفي وجهك عني أنا حامل وماأبي أتوحم على هالشيفة!! اسمهان:لابارك الله فيكم ولافي عيالكم المجانين..قوموا نظفوا غرفتي اللي تقولون ضاربها إعصار!! ....إلا بهاللحظة دخل الأب وقال: الله يحي هالوجوه الطيبة..وأحب أقول لكم إني طول هالأسبوع وأنا أسأل عن ولد الناس ..وماسمعت عنه إلا كل خير..وبكرة بإذن الله بأناديه أتعرف عليه! وش قلتي ياأم محمد؟!! الأم: أبركها من ساعة... سماح: ولو تخلون اليوم اللي بعده الشوفة يكون أحلى!! اسمهان: وشهو؟؟ على كيفكم والله!! يبي يجي بكرة بكيفه أما شوفة.. انسوا الموضوع!! انتي بالذات ياسماحوه مالك وجه تتكلمين! بعد ماولدك فقشني براسي تبين تكملين الناقص وتخلين شوفتي بعد بكرة؟!!! قام أبوها انتبه ذيك الساعة لشكلها وفز ثم قال:يالله تسكنهم مساكنهم!! ياحليلك !عفستي وجهك هاللون عشان تضحكين البزران؟!! اسمهان:إلا هم اللي ضحكوا علي ولعبوا في حسبتي!!! الأب:عموما...مثل ماقلت لكم بأكلمه يجي بكرة نتعرف عليه أنا ومحمد وأزواج البنات..وبعدين نحدد يوم الشوفة..... الأم:على خير... وقرصت الأم اسمهان من أذنها وقالت:بالله استحي وروحي سنعي نفسك..هذا وجه تقابلين فيه خواتك وزوجة أخوك؟!! وطلعت اسمهان تتهندم ويوم شافت شكلها بالمراية اخترعت!!!!!!!!وبعد كم ساعة الورم اللي بجبهتها زاد!! ومرت السهرة على خير.... وكان مما دار فيها:ابتسام:أخيرا تقابلنا!! مابغينا! أسماء: إحنا دوم مجتمعين انتي الوحيدة اللي ساكنة بديرة ثانية..وفوق ذا كله زياراتك قليلة.. ابتسام: وهي عجوز النار..تخلي أحد يتنفس؟!! تتنقل من بيتنا لبيت ولدها الثاني ولبيوت بناتها ثم ترجع لنا وياويل تسمع إنا سافرنا تجينا بعد مانرجع وتلبد مدة وقدرها!!! أسماء: الحمدلله أم زوجي متوفية وإلا كان شاب راسي منها!!! الأم:والله ربي رحمها ماتشوفك!! ولا انتي تشيبين راس قبيلة ولاشبتي!! سماح:والله لو ألف الكون كله ماألقى أحسن من خالتي! الله يحفظك لنا ياأم محمد... ابتسام:معلوم الطيب يسحر الناس بطيبه..وأمي ماتغلط على أحد حتى يغلط عليها...بس بلاكم ماشفتوا أم أربع وأربعين كيف تحرش أولادها على نسوانهم وتفاتن بينهم!!بس عزاي إن زوجي يسمع من إذن ويطلع من الثانية!!!!!! الأم: يابنتي عيب عليك تتكلمين عن مره كبيره بهالشكل ولو سوت معك ماسوت!! اسماء: خلها تفك عن صدرها شوي يايمة! لاتكونين انتي والزمن عليها! ابتسام:إيه صدقتي..أحس اني مخنوقة..عجوزنا هذي كم بغوا عيالها فيها يشرون لها بيت أو شقة تسكن فيها وحنا اللي نزورها بدل ماهي تتنقل كل يوم..بس حالفة يمين ماتحقق مرادهم...عاجبتها حياة التنقل كأنها من البدو الرحل!!!!! الأم:يابنتي الله لايبلاك وتسيرين بيوم من الأيام مثلها يمكن مسيكينة تخاف لاسكنت ببيت بروحها محد يتذكرها ويزورها وكلن بينشغل عنها!! اسمهان: الحمدلله أنا أم زوجي ساكنة معي بنفس العمارة هي بدور وأنا بدور..يعني ماتحتاج تقعد عندي بالأسابيع والشهور!! اسماء:طالعوا هذي وشتقول!! صار اسمه زوجك خلاص؟ربطتيه يالعقرب وبعده ماشافك؟!! سماح قامت تضحك هي وابتسام.... واسمهان تقول:اطلعي منها وهي تعمر!!! |
|
|
#7 |
|
|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
الجزء الثاني عشر....... ومرت سهرة الأربعاء....وجاء يوم الخميس وجاء العريس..اللي مافات اسمهان انها تطلع تشوفه من الشباك العلوي شافت هيئته العامة لكن ملامح وجهه مابينت معها!! وكانوا أمها وخواتها وسماح زوجة أخوها مجتمعين.....ينتظرون على أحر من الجمر انطباع الرجال عنه! ودخل محمد ياخذ القهوة فاجتمعوا كلهم عليه يسألونه..وقال:والله ماشاء الله عليه وسيم وخلوق وباين إنه مثقف.. اسماء(قالت بقصد تستفز اسمهان!): خسارة هالصفات الزينة بهالمرجوجة اسمهان! اسمهان:يالطيف على الحسد! ابتسام:ماعليك منها ودها تغيظك..الله يتمم لك حبيبتي على خير..طيبة وتستاهلين!! اسماء:أي طيبة؟؟ماشفتيها لاكشرت عن أنيابها! سماح:والله سمهونة قد ماتسوي حركتات بس قلبها أبيض بالحيل.. الأم:أنا عندي احساس بأن هالموضوع بيتم بإذن الله وإن عبدالرحمن بيطلع ولد حلال.. اسمهان:الله لايخيب ظنك يايمة!! أسماء:أذبحك ياهالبنت؟؟؟وش عليه مستعجلة ياحظي؟؟..تحسبين الزواج سعادة وأنس؟؟إلا بالعكس هم ماينلم!!اسأليني عن الرجال بس! الأم:الله وأكبر عليك يامكفرة العشير...هذا وزوجك من أحسن الرجال! سماح:ماعرفتي له..ولا كان ضبطت أمورك ياأسماء!! اسماء:اسكتي واللي يرحم والديك!عاد اللي يسمعك يقول انتي عرفتي لمحمد!!خذيتيه طيب جاهز وتحسبين لك دور بنجاح حياتك الزوجية!!!!! الأم:انتي مايعيبك الا لسانك!! ولا كان توفقتي بكل شي وجتك الدنيا على هواك! ابتسام:صادقة أمي..الله قال(ولئن شكرتم لأزيدنكم) لو شاكرة ربك كان حسيتي بالرضا دايم بدل هالتذمر!! اسماء:عشتوا!!نسيتي نفسك يامدام شكاوي؟؟ورا ماشكرتي انتي ربك؟؟؟ اسمهان(وهي رافعة يدها للسماء):يالله تعجل بفرجي وتفكني من هالغثا!!! الجزء الثالث عشر...... طبعاً عبدالرحمن كان جالس بالمجلس مع أبو اسمهان وأخوها محمد وأزواج أخواتها ابتسام واسماء...وكلمهم عن نفسه..ووظيفته وإنه موظف بشركة للمواد البترولية..دخله ممتاز..وساكن بدور مستقل في بيت أبوه.. لكن أبو اسمهان فاجأه بسؤال:طيب ياولدي مادام ربي فاتحها عليك وأوضاعك ممتازة اش اللي خلاك تتأخر بزواجك للحين؟!!!! عبدالرحمن:الحقيقة كنت ناوي ماأتزوج إلا لما أبني نفسي من غير اعتماد كلي على الوالد...وقبل 3 سنوات نويت الزواج فعلا لكن الوالد تعب فجأة واكتشفنا إنه عنده جلطة واضطريت أرافقه باستمرار في رحلته العلاجية وفي كل مستشفى ومر وقت لين مادخل بغيبوبة..ساعتها حسيت إنه كل مسئولية عائلتي بيدي ففضلت إني أؤجل موضوع الزواج شوي..وبعدها توفى الوالد وبقيت بجنب أمي بصفتي الولد الكبير..لأن أخواني الاثنين كل واحد متوظف بديرة مختلفة وبعيدين عنا وأمي مالها أحد غيري..فشفت إن راحتها بوجودي جنبها..بس حاليا نقل واحد من اخواني هنا..وقالت الوالدة جاء الوقت اللي تشوف نفسك فيه...والحمدلله ربي هداني أخطب عند ناس طيبين شرواكم... أبواسمهان:بارك الله فيك.... ودخلوا الرجال بعدها بسواليف كثيرة..وأهم شي إنهم حددوا موعد الشوفة!!! وبعد ماراح عبدالرحمن بيته دخل أبوها وأخوها عند الحريم... إلا أم اسمهان قالت:هاه..بشروا واش انطباعاتكم؟؟ أبواسمهان:الحق ينقال..الرجال عقل وثقل..ومابنلقى أحسن منه... أم اسمهان:الحمدلله...يعني واش اتفقتوا عليه؟؟ الأب:حددنا الشوفة الأسبوع الجاي يوم الخميس! اسمهان:ليـــــــــــــــــــــ ــــــش؟؟؟؟ الفقشة اللي بجبهتي مابتروح شلون أطلع قدامه كذا؟!!!! اسماء:يختي على الكشخة!! في اختراع اسمه لصق جروح!أو نزلي قصتك على جبهتك وريحي نفسك!! ابتسام:وياترى ياأبوي كيف شكل المعرس؟؟ الأب: ماشاء الله وسيم ورزة...لكنه طويـــــــــــــل! اسمهان:أطول مني؟؟؟؟؟؟؟ الأب: بكثيــــــــــر!!!! اسمهان:أفففففففففففف! ...............وراحوا الرجال يكملون قعدتهم مع ازواج البنات.. وقالت اسمهان:شوفي يمة دامكم حددتوا شوفتي الخميس الجاي فأنا عندي شروط!! اسماء: بدينا؟؟؟خير ان شاء الله تبينه يبني لك فيلا عالبحر؟؟؟؟؟؟ اسمهان:لا!! بس الشوفة مو بتكون الخميس؟؟ إذن الأربعاء لازم أروح السوق!!! الأم:ليه؟؟ اسمهان:ودي أشتري لبس أكشخ فيه! اسماء:الله يقطع ابليسك! دولابك يصيح من الزحمة اللي فيه...وباقي لك نفس تحشينه بخروق ثانية؟؟؟ وش هالفقعة؟؟؟؟؟ الأم:في هذي معاها حق!! نسيتي يوم فتشنا بدولابها يوم جت أم المعرس مالقينا شي يستر ويحشم..ودك يعني تفشلنا قدام ولد الناس؟؟؟ خلاص يااسمهان ولايهمك ننزل السوق يوم الأربعاء الجاي.. اسمهان:وبعد عندي شرط! ابتسام:بعد؟؟؟؟ اسمهان:إيه ..مادام إن العريس طويل بالحيل ..فالصراحة فشلة إني أطلع قدامه بكعب قصيرأبي أشري صندل كعبه طويـــــــل!!! اسماء:وأحد قال لك بنزفه جنبك؟؟؟ حبيبتي ترى هذي شوفة كلها دقيقتين تدخلين قدامه يبقق عيونه فيك وتعطينه مقفاك وتمشين!!!!! اسمهان:ولو! أحب أكون مميزة بكل شي!! وأفكر بعد اللبس اللي أشريه يكون لونه أحمر!!!! أسماء: ليه ياحلوة؟؟بتتزوجين ثور؟؟؟ اسمهان:أجل أسود! اسماء: ليه رايحة عزاء؟؟؟؟ سماح:الصراحة أنا أقترح عليك يااسمهان تلبسين لون بنَّاتي ناعم..وردي مثلاً! اسماء:صادقة سماح,,ولو تفرقين شعرك بالنص وتلبسين شباصتين وتاخذين معك حلوة مصاص تطلعين كشخة!!! اسمهان:استغفر الله!! تراني تخرجت من الروضة من زمــــــــان! ابتسام:طيب اش رايك بالتركواز؟؟ اسمهان:وعععع...بيسمرني مرة! الأم:اقتراحاتكم كلها فاشلة! ومابأستفيد منها غير وجع القلب!اسمهان ماقد نزلت معها سوق إلا وأحلف ماعد أعيدها!!!!وبعدين أول مرة أشوف أحد يختار اللون وهو باقي ماشاف الموديلات! اللي يسمعكم يقول بنروح نفصل!!إحنا رايحين ندور على اللبس المناسب وعقبه نطالع للون!! سماح:كلام أم محمد صح...ومو ضروري اللبس كله لون واحد..البلوزة لون والتنورة لون ثاني.. **الجزء الرابع عشر** طبعاً بعد ما يوم الخميس انقضى جاء عقبه الجمعة...مامن جديد إلا إنه الآنسة اسمهان شاغلتها الفقشة اللي براسها وهي متوصية شوي تحط عليها ثلج ..وشوي كمادة حارة! جاء يوم السبت وراحت اسمهان كعادتها للمدرسة واستقبلتها شلة الأنس.. مرام:سلامــــــــات وشفيها جبهتك وارمة؟؟ جاك طقة؟؟ أفنان:يمكن أهلها رفضوا المعرس وراحت تطق براسها ودها تنتحر وصار اللي صار!! نجلاء:إلا يمكن وهي ماشية بالشارع كانت تفكر في عبدالرحمن لين ماخبطت بعمود!! حليله العمود رحمته!! اسمهان:موب صاحيين!! هذي يالحبايب طريقة عيال خواتي وأخوي في التعبير عن مشاعرهم تجاهي!!!وحكت لهم القصة...وقالت: شوروا علي بوصفة تخفف من شكلها شوي.. رانية:أحيانا يكون الدواء بنفس طريقة حدوث الداء!!! اسمهان: وشلون يعني مافهمت! رانية:يعني اخبطي براسك بقوة في جدار والورم اللي طالع لبرة بيرد يدخل لجوة!!!! اسمهان:ماشاء الله على الحل! متأثرة بحركات توم وجيري!!تراني أكلمكم بجد..شوفتي الخميس الجاي! نجلاء:بسيطة ..طلعيني بدالك قدام المعرس!! اسمهان: يامابك!! رانية:وش بتلبسين؟؟ اسمهان:لسة مو عارفة.. رانية:لاأوصيك! خلك كشخة على الآخر..لو حصل نصيب بيظل يتذكر كشختك طول عمره!...وإن ماحصل نصيب بيبقى يتذكركشختك ويقول حصل لي كذا وكذا أيام بنت فلان الكشخة!!! اسمهان:يوم الأربعاء بأنزل السوق وأجرب حظي.. نجلاء:خلك اتكيت وناظريه بثقة....لاتسوين نفسك مستحية بعدين يقول هالهبلة ميتة علي!!! أفنان:وإذا سألك أي سؤال جاوبيه إجابات مبهمة وغير مفهومة..عشان يقول هالبنت مثقفة!! مرام:وأكيد يوم الشوفة بيجيب معاه هدية طقم أو إسورة أو أي شي ذهب..لاأعطاكي إياها خذيها منه وارمي بها على أقرب كنبة بقلة اهتمام! عشان يعرف إنك بنت عز ومو ميتة على الهدايا!!!!! نجلاء: وانتبهي لاتسوين مثل أختي ندى أصرت تدخل على خاطبها وهي شايلة بيدها شي..وأخذت عصير ومن الارتباك كبته فوق ولد الناس!!والأدهى إنه ماحصل بينهم نصيب!!!...يمديه إلى الآن يذكر هالموقف!!! أفنان:واحمدي ربك عندك أهل يرضون بمبدأ الشوفة ويعطونك خبر تتسنعين!! حنا بعيلتنا يخلون الشوفة تصير على غفلة والعروس موب دارية...وذوقي من الفشايل!! اللي شافها عريسها وهي تناقز بالحوش تقولون فيها مس!! واللي شافها خطيبها وهي ببيجامة مهرية ومبلحة من كثر الغسيل وبنطلون البيجامة موب طقم مع البلوزة!!!واللي كانت تصلي العشا بشرشف صلاتها وخلوا العريس يشوفها من عند الباب!! اسمهان:ياحليلهم..وبالذات هذي اللي قاعدة تصلي ..واش شاف منها وهي لابسة شرشف صالة ماينشاف منه شي؟!!!!! أفنان: لا هو الصراحة ماشافها زين...لكن أعجبته صلاتها وتزوجها!!! رانية:وإش هالتخلف بعيلتكم ياأفنانوه؟؟؟ الرسول حث الصحابة على الشوفة الشرعية..والمفروض تكون برضا بين الطرفين..مثل ماهو له نفس يشوفها هي بعد لها نفس تشوفه!!!!!وبعدها يسير الارتياح! أفنان:مو الله يسلمك باعتقادهم انهم لاعطونا خبر بنتزين ونطلع بشكل مخالف للواقع!! ........إلا دق الجرس وبدأت الطوابير |
|
|
#8 |
|
|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزءالخامس العشر** ومر اليوم الدراسي....ولما جاء وقت الفسحة خرجوا الشلة من فصلهم يتفسحون.....وماشيين يناظرون بالرايح والجاي وكان في وحدة من الطالبات بينها وبين الشلة عداوات قديمة فحصل هذا الحوار: رانية:يوووووووه...شفتوا عبير هالكريهة ياناس ماأدانيها..طالعوا التسريحة بس! يارب لك الحمد على نعمة العقل! اسمهان:كريهة وبس؟! أتعب أقول إن هالبنت غثيثة وماتنطاق.....غـــــــرور فظيـــــــع على وشهو ياحسرة مانيب دارية!!! نجلاء:تحسب إن فلوس أبوها التاجر بتحبب الناس فيها! بعد مافحطت يمين ويسار عشان تسوي صداقات يالله لقت لها اثنين يتنازلون يتصاحبون معها!! أفنان:يانا طاقتن كبدي منها ومن تسريحتها تقولون هضبة نجد وحولها عرفج؟!!!! مرام:بالله تجنبوها..كل مرة نتهاوش فيها توصل هواشتنا الادارة...ومحد يفك لسانه علينا إلا أبلة جوهرة!!! اسمهان:صادقة مرام ياجماعة...لاتنسون أنا وضعي حرِج الآن وماأبي أحتك بأبلة جوهرة!! رانية:تكفين يالكشخة!! خايفة المعرس يروح من يدينك؟؟ مالت عليه وعلى خالته!إش رايك إن العفاريت تلعب براسي وودي أنكد على هالعبير؟؟؟!! اسمهان:وجع! صدق إنك حقود مادام ماغلطت علينا..ليش حنا نغلط؟؟ رانية:انظروا ياجماعة الخير..الآنسة اسمهان قامت ترفرف في عالم المثاليات!! شوفي حبيبتي صح ماسوت لي شي اليوم بس ماأنساها لها الأسبوع اللي فات يوم إني ماشية بالساحة لقيتها ماشية وراي وتقلد مشيتي على الصامت والبنات يضحكون!!ويوم انتبهت قامت تقط علي حكي.... اسمهان:قلعتك...إحنا بنقعد في الكافتيريا نفطر.. عاد رانية راعية شَكَل تحب المهاوش والأكشن وقامت تدور حول عبير وصاحباتها...إلا عبير طالعت فيها باستحقار وقالت:خير؟؟ طردوك شلتك؟؟ رانية:لا تطمني! هذا المستحيل بعينه! بس أنا قلت بمناسبة فوز فريق(..؟..) اللي أشجعه حبيت أعزمكم وكل المشاريب هذي على حسابي..وقدمت لعبير وصاحباتها الثنتين 3 علب بيبسي مخضوضة خض موب صاحي...وأخذوها حطوها قدامهم...بس رانية أصرت على عبير تشرب وقالت:عبير الكل عارف الحزازيات اللي بيني وبينك...وأنا ودي نتصالح..وننسى كل مامضى! عبير:أنا ماعندي مشكلة...بس انتي اللي تحبين تبدين بالمشاكل دايما. رانية:زين طلبتك عشان أعرف إنك راضية علي اشربي البيبسي! فكت عبير البيبسي بحماس وطرطش على شعرها ووجهها... وراحت رانية المستهترة تضحك وتقول:ماعليه حبيبتي تعيشين وتاكلين غيرها..وعلى فكرة أول الغيث قطرة! لو غلطتي علي بنظرة..بأحوسك حوس!! ورجعت رانية لشلتها...مرام:الله لايسامحك شوفي شلون عدمتي شعرها دبق!! رانية:أحسن خلي تسريحتها الرائعة تنحاس!!ههههه نجلاء:ياتفاهتك! كان خليتي هالطاقة على شي يستاهل! ومامر لحظات إلا والادارة ينادون شلة الصاعقة! اسمهان:يلا..استلموا..هذا وأنا موصيتك ياست رانية !!لابد من الفشايل لابد!! وتوجهوا الشلة للإدارة... ومسكتهم أبلة جوهرة وقالت:للمرة الألف أقول لكم ماأبي أشوف رقعة وجيهكم بالإدارة!! وش جابكم علموني؟؟ رانية:مدري انتم استدعيتونا! جوهرة:العبي غيرها..استحوا على وجيهكم قدر ايش اعماركم ومازلتوا تلعبون بالأكل والشرب وتقطونه على صاحباتكم؟؟؟ اسمهان وهي ترتجف من الخوف:أبلة جوهرة...تراني ماكنت معاهم!!!!!! وماشفت شي! التفتوا كل الشلة لها باستغراب.... أبلة جوهرة:كان قلبي حاس..إن وحدة بأخلاقك ماتتنزل لهالمستوى السخيف!! ارجعي فصلك يااسمهان!!! وانتم كلكم بتكتبون تعهد وتعتذرون لصاحبتكم اللي عدمتوا شعرها وملابسها!!! رانية:تخسي إلا هي!!! أبلة جوهرة:وبعد تطولين لسانك؟!! وبعد شد وجذب تنازلوا يعتذرون لعبير.. ورجعوا لفصلهم وهم يلومون رانية... أفنان:شوفي سخافتك وين ودتنا!آخر شي كنت أتوقعه إني أعتذر عن شي ماسويته!! ولمين لعبير؟؟؟ مرام:وكل بلوة تسوينها يارانية لازم تجرينا كلنا معك! ترى لسة حارقتني بقلبي الحركة اللي سويتيها قبل مدة وتعاقبنا كلنا بسببك! رانية:أي حركة؟؟ نجلاء:يحق لك ماتتذكرين! من كثر ماتسوين يالعاقلة!!أكيد يامرام تقصدين يوم كذبت على أم سالم الفراشة وسحبت منها المبخرة يوم جية الموجهات وقالت هاتي المبخرة ياأم سالم أبلة حصة تبيها وخذتها وحطتها تحت جهاز إنذار الحرايق..وأطلق الجهاز إنذار كاذب وصفرت الصفارة وكل المدرسة خرجوا يركضون في الساحة...يومها سويتي لنا رعب وكتبنا كلنا تعهد بسببك...لو هلي دروا كان ذبحوني!!! أفنان:لا وكله كوم ويوم جابت طراطيع وطرطعتها داخل الفصل واحترق الموكيت!! وفجأة التفتوا لاسمهان اللي كاتمة الضحكة..وقالت أفنان:ماتلاحظون الواسطات شغالة هاليومين؟!! نجلاء:إلا ملاحظين وبقوة...وحطي معاها الكذب بعد..قال إيش(وتقلد اسمهان!) أنا ماكنت معاهم وماشفت شي!! رانية:هذا اتفاقنا يارئيسة الشلة؟؟؟ اللي يجري علي يجري عليكم؟؟؟ اسمهان:دا كان زمان ياحبايبي!! من اليوم ورايح أنا حرة نفسي ومو مسئولة عن أحد! رانية: عجيب أمرك!! بتبيعينا عشان بريستجك قدام جوهرة؟؟؟زين يالكشخة اسمعي هذي مني!! ترى الورد اللي كنتي فرحانة فيه من مخططاتي ومحد افتكرك وجوهرة هزأتنا يوم درت إنه مقلب وقالت لاتعلمون اسمهان!!! اسمهان(وهي متفاجئة):شلون؟؟ صاروا الشلة يغمزون لرانية يبونها تسكت لكن أبد قاعدة تحكي بالتفصيل!!! **الجزء السادس عشر** طبعاً بعد ما الأخت رانية قالت لاسمهان عن مقلب الورد وكانت لهجتها جافة...... اسمهان انصدمت وزعلت جداً لأن موقفها صار بايخ جداً قدام جوهرة..والشلة اللي لعبوا بمشاعرها...ودمعت دمعتين.. وقالت نجلاء:اسمهان ترى مانقصد.. لكن اسمهان أشرت بيدها لنجلاء بعدم رغبتها بالكلام وشوي ودخلت معلمة التاريخ وبدأت الحصة.. وطول الحصة واسمهان متضايقة وتفكر بنفسها:ليش هالنذالة من شلتي؟؟؟ يعني أنا اللي جمعتهم وضميتهم لي من أيام المتوسط وتاليتها ينقلب السحر على الساحر؟؟؟؟؟؟؟ بعد ماكنا نسوي مقالب بالبنات..رجعوا هم يسوون مقالبهم فيني؟؟ هين!! أوريكم أنا الزعل على أصوله! بس ياربي أنا تعودت عليهم وماأمشي مع أحد غيرهم..أروح لمين؟؟؟؟ .....ومرت حصة ورا الثانية وبنهاية الدوام حاول الكل يكلمها ورفضت ورجعت للبيت.. ومر يوم السبت.واتصلوا صاحباتها لكن بكل مرة كانت اسمهان تطلب من ابتسام تصرفهم!!! وثاني يوم اللي هو الأحد راحت اسمهان من بدري للمدرسة وتوجهت إلى عبير غريمة الشلة!!! وقامت تتودد لها وكل همها تكيد الشلة!! ولا مو من حبها في عبير!! بس عبير قالت:خير ان شاء الله مقلب جديد من شلة حسب الله؟؟؟!!! اسمهان: لاتفهميني غلط..أنا مالي ذنب باللي حصل أمس!! شفتيني معاهم؟؟ لاوقعت تعهد ولااعتذرت لك أمس لأنه مالي علاقة بالموضوع......لا وأبشرك تركتهم بعد مشكلة أمس..حسيت إنهم سخيفات وحركاتهم صبيانية!!!! عبير: هذا من زمان رأيي فيهم! اسمهان: ترى قمة قهرهم يشوفوني معك!! عشان كذا بالطقاق عليهم مايهموني أبد!! ودي أكون معك ومع صاحباتك نادية وهالة...انتم أهدى وأذوق!!!! عبير:ولو اكتشفت إنك تلعبين علي....؟؟؟؟؟ اسمهان:أي لعب وأي خرابيط؟أنا عصاك اللي ماتعصاك!!!(والحقيقة ان اسمهان قاعدة تقول بقلبها الله ياخذك ياعبيروه! كريهة عن قرب وعن بعد!!!!) ومشت معاها بالصبح ووقفت معاها بالطابور ونقلت جنبها بالصف.....ونظرات الشلة ماتفارقها!! في الحصة الأولى...جلسوا الشلة يتهامسون رانية: هالحين خلصوا البنات يوم تفارقنا وتروح لعبير؟؟؟؟؟؟ نجلاء: يمكن كلام عبير عندها أحسن من كلامك اللي ينقط سم!!! أفنان:ويمكن عبير شافتنا يوم تخاصمنا واستغلت الموقف لصالحها وسحبت اسمهان لناحيتها!! مرام:أقدر أحلف إنها مو مندمجة معاها بس ودها تغيظنا!! رانية:حريمتها هالعبير تسرق مننا اسمهان والله لأسحبها من شوشتها وأمسح بها مكتب المديرة!! نجلاء: تكفين ياسوبر مان!! كلها يومين ومردها تزهق منها وترجع لنا!! *** الجزء السابع عشر** جاء يوم الاثنين والحال على ماهو عليه اسمهان مطيحة عند عبير وصاحباتها نادية وهالة! ولما جاء وقت الفسحة قالت رانية: ودي أتحرش فيهم وأنكد عليهم!! نجلاء: تكفين انثبري! على بالك ماحد يحب اسمهان غيرك؟! كلنا نحبها..بس بنخليها على راحتها ها الكم يوم! رانية: ماأقدر فيني غيظ..موب قادرة أستحمل! أفنان: صادقة....الشلة ماتسوى من غيرها! مرام: ليش مانكتب لها رسالة؟! رانية: لا رومانسية حضرتك!! ليش مانهديها باقة ورد أحسن؟؟؟؟ اسمعوا بأروح جنبهم وهم ياكلون على الطاولة! نجلاء:ليـــــــــــــــــش؟؟؟ معاك بيبسي وودك تصرفينه؟؟؟؟؟؟؟ رانية: لا بأروح أغني لها! نجلاء: من زين صوتك يا العرة!! مرام:وش بتغنين؟؟ والله لأوريك شي مابعد شفته؟؟؟؟؟؟؟؟ أفنان: مو ناقصين مسخرة واللي يعافيك تعالي واقعدي... رانية:بأروح يعني بأروح وماني مآذية أحد!! بأغني بس! نجلاء: مو أكبر أذية بالدنيا إنك تجبرين الناس يسمعون صوتك العذب...لأنه بيكون أشد عليهم من مية طراق!!!! الشلة:هههههههههههههههههه وراحت رانية الهبلة جنب طاولة اسمهان اللي كان قاعد معاها عبير وهالة ونادية وقامت تغني: حســــــــافة هالصداقة يابايـــــــــعة الرفـــاقة والسبب وردٍ ببـاقة!!! ناظرتها اسمهان بسخرية وأعطتها تشميقة قوية! قالت عبير بهمس:ردي على هالخبلة!! وقامت اسمهان ترد: ياشين هالطفــــــــــــاقة تفاهة ومـــــــــــــــلاقة بفرقاكم رواقـــــــــــــــة! رانية: مردود كلامك يالزينة ومنقود تبدلينا حنا بشلة كلها قرود؟؟ قامت عبير بوجه رانية وقالت: احترمي نفسك!! أشرت اسمهان لعبير بالسكوت وقالت لرانية: صحبة هالشلة تنشرى عندي بنقود والقردة انتي! وشلتك كلها قرود!!! صاحت رانية وقالت:لاااااااااا مصختيها عاد! وش سوت لك هالجنية أخاف دنبشتك؟؟؟؟ اسمهان: رانية حبيبتي..شفتي ذاك الجدار اللي جنب باب المقصف؟؟ رانية ( بفرحة مو مصدقة ان اسمهان تكلمها):إيه شايفته حبيبتي! اسمهان: كلمة وحدة تقولينها...وبقدرة قادر بتلاقين نفسك منسدحة جنبه!! فهمتي؟؟؟ يلا توكلي !شلة المقاريد بانتظارك!! وراحوا شلة عبير يضحكون..ورجعت رانية مكسورة الخاطر!! |
|
|
#9 |
|
|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزء الثامن عشر** طبعا رجعت رانية للشلة اللي كانوا يراقبونها من بعيد وسألوها اش صار؟؟ رانية:أبشركم اسمهان شكرتني على أغنيتي وقالت إن كلماتها معبرة وبترجع لنا بأقرب وقت!!!!!! وقامت نجلاء تناظر رانية بنص عين وقالت:علينا؟؟؟ هالحين اسمهان قالت لك هالكلام؟؟؟ رانية:إيه ليش منتو مصدقين؟؟؟ أفنان: لأني كنت وراك وسمعت كل هرجك ياروح أمك!! مرام:صااااااااادوه!!!هههههه رانية: ايه ماأخبي عليكم زفتني بكم كلمة!!بس براحتها هي اللي خسرانة!! الوجيه اللي مثل هالعبيروه ماتثمر فيهم العِشرة! بكرة تبيع اسمهان بنص ريال!! ......وعدى الاثنين وعقبه الثلاثاء ومكايدات الشلتين تزيد...وكانوا واقفين بالسيب قريب من بعض وكل شلة تقط على الثانية حكي على نظام(إياك أعني واسمعي ياجارة!!)...وفجأة مرت أبلة جوهرة ولاحظت الموقف وقالت لاسمهان: هلا حبيبتي أخيراً تركتي شلة المافيا هذي؟الصراحة زين ماسويتي!! مبروك!! اسمهان: الله يبارك فيك!!! عاد رانية طرطعت وبغت ترتكب جريمة!!! دمها حامي هالبنت!! وراحت ابلة جوهرة وقامت اسمهان تناظر لشلتها السابقة وترقص لهم حواجبها! وعطتهم مقفاها ودخلت الفصل!!! ومر اليوم بــ روتينه ...وعقبه جاء الأربعاء!! عاد من الصباح واسمهان منتعشة بتروح السوق في الليل وتشتري ملابس الشوفة لأن بكرة الخميس!!! وقالت لعبير سر انبساطها! بس عبير ردت بكل برود: غريبة أهلك موافقين على الخطبة!!لسة بدري عليك! ولا ودهم يفتكون منك؟؟؟ ردت اسمهان بغيظ:نصيبي وجاني! ليش أرده؟؟وفيه ميزات حلوة...ممكن ماتنلقى بغيره!! عبير:بس أنا سمعت انه كبير وعمره30 سنة....لا وأمه ساكنة معه بنفس العمارة!!أي ميزات فيه بس؟؟؟ اسمهان: يعني ماودك تغلطين وتقولين مبروك؟؟ عبير:ياحليلك مرة خفيفة! ماصدقتي يجيك عريس؟؟ بصراحة هذي بيعة مو زواجة محترمة!!!!!! اسمهان:صدق إنك ماتستحين!! حسد هذا ولاغرور؟! عبير:أنا أحسدك انتي يالغثيثة؟؟؟ وعلى ايش ياحسرة؟ تراني ضميتك لشلتي حزناً عليك مو محبة فيك!!! اسمهان والدمع بعينها قالت:أما صحيح وقحة وقليلة أدب! ومين قال لك إني طايحة عندك...كل سواليفك سخيفة وتدور عنك وعن جمالك اللي ماحد شايفه إلا انتي يا الشينة!!!!! عبير:صحيح إن ذيل الكلب عمره مايتعدل!!! وقامت اسمهان من زود مازعلت وانقهرت وهي أساساً من البداية ماتواطن عبير...صفقت عبير كف على وجهها!!!!!!! وكانوا شلة الصاعقة قريبين وشافوا الموقف لأنه حصل بالطوابير قبل ماتبدأ!!! صاحت رانية بصوت عالي:أحلــــــــــــــــــــى يابنت ياسمهونة!! تسلم لي إيدك ليتني صكيتها بكف بدالك! هذي عين جوهرة وصابتكم!!!ههههههههه واسمهان كانت تبكي وراحت تجري على الحمام دخلت ولحقتها نجلاء وضمتها لصدرها بقوة! نجلاء:لايضيق صدرك! عبير وحدة ماتستاهل إن أحد يزعل نفسه علشانها!! اسمهان:بس كلامها مثل الخنجر بصدري!!بدل ماتفرح لفرحتي قاعدة تستهزأ فيني؟؟؟؟ نجلاء:وليش يااسمهان؟؟تحسبين كل الشلل مثل شلتنا؟؟؟ من أيام ماكنا بالمتوسط وحنا قلب واحد نحب بعض ونواسي بعض ونشارك بعض بالأفراح والأعياد والمناسبات!!ولا نسيتي؟؟ اسمهان:لا مانسيت!يلا عطلتك عن الطابور روحي وأنا بأقعد هنا لين ماتبدأ الحصة الأولى!!!! نجلاء:معقول؟؟؟ ماأروح عنك إلا ويدي بيدك والبسمة على شفاهك!! اسمهان:مالي نفس أضحك ولا أبتسم!! نجلاء:طيب اش رايك أذكرك بموقف كنا دايما لما نتذكره نضحك عليه؟؟ تتذكرين لما حضرنا زمان زواج أخت أفنان وكان اسلامي والمنشدة ماتبي أحد يرقص رقص مايع وشلون كانت رانية ترقص؟؟ونزلتها المنشدة من المسرح لأن فستانها مكشوف؟ اسمهان:ههه أذكر.. نجلاء: ومن كثر مابراسها رجة نزلت من المنصة ولبست عباتها وطلعت ترقص وطردتها المنشدة عشان رقصها المتمايل؟؟ورجعت نزلت وغطت وجهها وطلعت ترقص مرة ثانية!! وشوي إلا الفرقة ال****دية هددوها بالميكرفون إنها لو مانزلت من المنصة بيوقفون أناشيدهم!!! ومدت رانية لسانها وهي نازلة من المسرح زلت قدمها وتقلبت في الدرج مثل الكورة!!! اسمهان:هههههههه كأن الموقف كان أمس!!رانية من الشخصيات اللي ماتيأس! تذكرين عقب طيحتها يوم شلناها أصرت إن سبب الطيحة عين من المنشدة!!ماكأن الطيحة بسبب سمنتها وكعب أمها اللي لابسته!!!ههه نجلاء:ههههههههههههه وآثاري أبلة جوهرة واقفة تسمعهم من أول عند باب الحمام!!!!!لأنها كانت تسوي جولة تفتيشية لجمع البنات كلهم بالطابور!!! وقالت:الله لايحرمكم من بعض!!!يلا على الطوابير قبل ماأسحبكم على الادارة.. **الجزء التاسع عشر** بعد الجزء اللي فات والموقف اللي سار بين اسمهان وعبير ثم الحوار اللي دار بين اسمهان ونجلاء بالحمام... راحوا البنتين للطوابير وكانت قد بدأت ووقفوا نجلاء واسمهان آخر الطابور وضحكوا الثنتين لما لقوا عبير مازالت ماسكة خدها عقب الكف!!!(مسوية فيها حركات مسلسلات!!!) ورجعوا الفصل وسط فرحة باقي الشلة وبدأت الحصة تليها الحصة إلى أن جاء وقت الفسحة.. إلا وأفنان تقول:فيه ناس ياحظهم بيسير لهم أحداث جديدة بكرة! اسمهان:خلي الأحداث حقت اليوم تتم وعقبها يحلها ألف حلاَّل! مرام:وش هالألغاز؟؟؟ مافهمنا شي! رانية:واشفيكم نسيتوا؟ بيجي بكرة ولد أخت المطفوقة جوهرة عشان يقز اسمهان!! نجلاء: لاااا وصف دقيق! أي قزقزة يالخبلة؟؟بكرة النظرة الشرعية لاسمهان...عساك تتوفقين ياسوسو قولي آمين.. اسمهان:آآآآآآآآآآآآآآآآآآمين! مرام:طيب ماقلتي لنا وش بتلبسين ياترى؟ اسمهان:مو هو هذا الحدث اللي بيسير اليوم..بأروح السوق وأختار اللبس المناسب.. رانية:الله الله بالزبرقة والتكشخ.. أفنان:وخلك غامضة في حركاتك تزدادين جاذبية! مرام:ولاتنسين! سر الجمال يكمن خلف النظرات! نجلاء:الله يقطع أباليسكم! هذي نصايح ولا عناوين قاريينها من أغلفة المجلات!! اسمهان:خلهم يقولون اللي يبونه..هذا وجهي إن كان طبقوا شي منها لاانخطبوا!! بس الحبايب ماخذيني فار تجارب عندهم!!! ولا أنا بأنسى نصايحكم السابقة؟؟ واندمجوا الشلة بسوالف كثيرة ومر اليوم الدراسي اللي بنهايته توادعوا الشلة ووصوا اسمهان تتصل تخبرهم بكل جديد!!! رجعت اسمهان للبيت وقابلت أمها وابتسام أختها اللي مازالت جالسة عندهم... فقالت الأم:اسمهان الله يرضى عليك يابنتي لاتطولين النومة..ترى نبي نروح السوق عقب المغرب مباشرة..لأني أعرفك تمرضين القلب لانزلتي السوق وليلك طويل!! فبنروح بعد المغرب عشان يكون عندنا متسع كبير من الوقت. اسمهان:إن شاء الله......وراحت تنام ولما جاء المغرب جات سماح زوجة أخوهم محمد واسماء وقالت الأم:أنا واسمهان رايحين السوق مين منكم مستعدة تخاوينا؟؟؟ اسماء:لو تحلفون علي حلفان مانزلت معكم!!اسمهان مثل البزران لانزلت السوق كل شي تبيه وياويل من يطاوعها ونهايتها مايملا عينها غير التراب!!!!!! اسمهان:مشكورة من القلب على كلامك السكر اللي كان ممكن تختصرينه بكلمتين(ماني رايحة!) اسماء:وتدرون الحمل متعبني ومافيني أمشي وولدي بيجنني لذا بأجلس مع سماح هنا بالبيت. ابتسام:إذن خلاص أنا رايحة معاكم يايمة..وبناتي بأخليهم بالبيت مع اسماء وسماح.. وراحوا السوق.. ;**الجزء العشرين** وراحت اسمهان وأمها وأختها ابتسام إلى السوق ومحمد أخو اسمهان هو اللي وداهم...ولما وصلوا للمول الكبير نزلوا كلهم فقالت أم اسمهان:محمد؟؟ إنت ناوي تنزل معانا؟ محمد:إيه ليش؟؟ الأم:بلاك ماتدري عن أختك الفالحة لانزلت السوق مشت على مقولة ياليـــــــــل ماأطولك!!! محمد: كلها لبس واحد بتشرونه وترجعون..يبي لها هذي اختراع صاروخ؟؟؟ الأم:مع أختك كل شي بيسير مو بس بنخترع صاروخ إلا بنصنع مركبة فضائية!الله يعينني بس! محمد: أجل الله يرضى على سماح!!تدرون؟؟أنا راجع البيت متى ماانتهيتوا اتصلوا فيني.. وبالفعل نزلوا النسوان الثلاث وأول محل دخلوه راحت ابتسام تجري على بلوزة شيفون وقالت: شوفي يااسمهان مرة ألوانها حلوة بس يبغالنا نطقم معاها تنورة! اسمهان:خبلة انتي؟ ولا شكلك كذا؟؟ في حرمة صاحية بالدنيا من أول محل تدخله تروح تشتري على طول؟؟ ياماما التسوق هذا ثقافة!طالما بيدي أبحث وأبحث لين ماألقى أميز شي فليش العجلة؟! الأم:طبعا ياست اسمهان لاقية من يدلعك..ولا المفروض نخليك تاخذين الشي غصبن عنك ونريح رووسنا! ابتسام: بكيفك!بس صراحة أنا أشوف هالبلوزة جدا أنيقة وألوانها رايقة.. أعطتهم اسمهان مقفاها وطلعت من المحل وراحت اللي بجنبه ودخلوا وراها وتفرجوا على البضاعة وقالت ابتسام: شوفي اسمهان هالتنورة خامتها مرة حلوة لو تاخذين لك بعد فرة بالمحل أكيد بتلاقين بلوزة حلوة تناسبها.. اسمهان:رجاءً ياابتسام..لاتفرضين علي ذوقك!أنا لي نظرة خاصة وذوق معين باللبس! ابتسام:ماشاء الله..وأنا عاد اللي جاية من مضارب بني عبس وماأفهم شي!! الأم: قلت لكم من قبل.. أختكم متعبة بالتسوق ماتصدقوني!!الله يعين بس إن ربي كتب لها نصيب بهالزواجة كيف بتسوي فينا في تجهيزها! ابتسام:وان شاء الله يايمة بتتعبين عمرك عشانها أنا أقترح ماتنزلين معها أبد وكلي أمرها لأبوي عاد هو عصبي ويحب العجلة بكل شي ويعرف شلون يعلمها فن التسوق اللي تقول عليه!!! اسمهان:وانتم اش قاهركم كله لبس واحد بأشتريه المفروض يكون ماله مثيل ومميز جداً! ابتسام:كل بضايع المحلات متشابهة ماأظن فيه محل بيصنع لك لبس خاص فيك..فلاتقعدين تسوي لنا اختراعات وتاليتها مثل ماقالت أسماء بتلفين وتلفين وآخرتها مابيملى عينك إلا تراب!! اسمهان(بعصبية):قطيعة تقطعك إنتي واسماء كلكم حسودات..أشوفكم أخذتوا راحتكم بشوفاتكم وأنا مدري ليش نفسكم تخربونها علي!! الأم: لا تكاعشوا انتوا الثنتين أحسن!!! وفرجوا علينا خليقة الله وخلوا اللي مايشتري يتفرج!! اسمهان:خـــــــلاص خلوني بحالي.. ابتسام:أعوذ بالله أنا اش جابني؟لو انثبرت بالبيت كان أبرك! وراحت اسمهان قدامهم وسبقتهم تدخل من محل وتخرج من محل وعلى هالحال من بعد صلاة المغرب... ابتسام:ياربي!!! متى بنخلص من هالشقا؟؟؟ الأم:ياحليلك ياابتسام! باقي ماشفتي شي!! اسمهان بنتي وأعرفها زين..مابترتاح لين ماتدخل أغلب المحلات!!!!!! ابتسام:ايــــــــــــــــــــش ؟؟ بس هالمول فيه أكثر من 150 محل متى بيمدينا ندخلها كلها؟؟؟؟ الأم:الشكوى لله...وش اسوي لها لو أتضارب معها واخاصمها الحين بتصغر عقلها مثل العادة وتبطل تشتري شي!! وإحنا ماعندنا فرصة إلا اليوم...ولد الناس بكرة جاي! طبعا اسمهان ماقصرت دخلت أكثر من 50 محل وكل مرة تخرج خالية اليدين...لين ماأمها ارتفع ضغطها وصاحت بوجهها وهزأتها: تراك زهقتينا!لاتخليني أغضب عليك وأحرمك من السوق على طول!وأسير أسوي مثل أهالينا زمان يروحون السوق بروحهم ولاياخذونا معاهم ويجينا الشي لين حدنا وناخذه ونرضى!! اسمهان:وش اسوي لكم يعني؟؟ماعجبني شي! الأم:والزبدة؟؟ اسمهان:خلاص اعتذروا للآدمي عن الشوفة بكرة وخلوها الأسبوع الجاي!!!! الأم: أذبحها هالبنت؟ ولا اش أسوي فيها؟؟؟ ابتسام:صدق إنك هبلة! اش رايك نقول لولد الناس تكفى لاتجينا بكرة بنتنا ماعندها ملابس!عريانة ونايمة بالشارع؟؟!!!!!! اسمهان:طيب انتم شايفين الوضع..يعني لقيت شي زين وقلت لا؟؟؟؟ الأم:امشي قدامي وخل ليلتك ذي تعدي على خير! لأنك لو ماشريتي من هالمول شي فلاتحلمين نوديك غيره!!! وقامت اسمهان تمشي بزعل وضيق أمها كل مادخلت محل تخيرها....لييييييييييين مالقوا في الأخير تايير شيك جداً لونه غريب مموج رُماني على أرجواني على ليلكي!!! ونطت اسمهان من الفرح وقالت:الحمدلله هو هذا اللبس اللي أبيه بالضبط! الأم:والله أنا اللي نفسي أنط مثل نطتك هذي عشر مرات..أخيرا بنخلص وحنا لنا 3ساعات نفتر بالمجمع!!! ابتسام:أنا اللي من جد قرفانة من نفسي وودي أرجع البيت آخذ دش! واشتروا التاييروخرجوا من المحل وقامت الأم تتصل بمحمد... اسمهان:يمة اشفيك تدقين عليه؟؟لسة ماخلصنا! الأم:ليش؟؟وش بقى؟ اسمهان:ودي أشتري صندل واكسسوار يناسبون التايير!! الأم:يابنت إنتي ناوية تجيبن لي جلطة؟؟؟عندك صنادل بالبيت كثر مال قارون...والاكسسوارات اللهم ياكافي مافي صندوق يشيلها وبعد تبين تعذبينا باللف والدوران بهالمول؟؟؟ اسمهان:طيب الصندل ومحلول أمره بس اللبس لونه غريب ويبي له اكسسوار مناسب!! الأم:انطمي ولاكلمة!!ماني متحركة من مكاني لين يجي محمد! وقعدت الأم وبنتها ابتسام على كرسي..ولمايئست اسمهان جلست جنبهم..وجاء محمد وأخذهم للبيت! وهم بالسيارة قال محمد:ياساتر يارب 3ساعات عشان لبس واحد؟؟ليش؟؟ الأم:تعاتبني؟؟قول هالكلام لأختك!!اللي مااستحت على وجهها ولافكرت فيني إنه وراي رِجال ونسوان بالبيت ولازم أطبخ لهم عشا..ورجولي ماعاد تشيلني من كثر التفرفر!! محمد:ماعليك يمة ..لاتشيلين هم العشا نمر هالحين للمطعم وناخذ عشا... |
|
|
#10 |
|
|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
**الجزء الواحد والعشرون++ رجعوا الجماعة من السوق للبيت وأول مادخلوا قالت أسماء: الله أكبر عليكم 3ساعات ونص يامفتريين والحصيلة كيس واحد بس؟؟؟؟؟؟ الأم:مايبيلها سؤال!انتي نزلتي معانا السوق كثير وتدرين بطبع أختك.. سماح:أهم شي لقيتوا شي مناسب؟؟ ابتسام:أكيد! ماأحلانا بعد كل هالتفرفر نرجع وايادينا فاضية!عن إذنكم أنا ميتة من الحر وعرقانة بآخذ لي دش وأجيكم.. الأم:اش رايكم نتعشى هالحين؟؟وعقبها نشوف اللبس؟ الكل قالوا:طيب,,,,,,,وجهزوا عشاهم وأكلوا.. وبعد العشا لبست اسمهان اللبس ونال استحسان الجميع وطقمت صندل من صنادلها عليه بس كلهم قالوا مايناسب!! اسمهان:كله من أمي..رفضت تخليني أشتري! اسماء:ياشيخة اسكتي واللي يرحم والديك الرجاَّل جاي يشوف وجهك موب رجلينك! سماح:طيب اش رايك ياسمهونة بصندلي هذا لونه قريب من لبسك شوي صح؟؟؟ طالعت اسمهان في رجل سماح بفرح وقالت:جبتيها!!فعلا مناسب للبس..وش رايك أستلفه؟؟؟ سماح:عليك بالعافية أهم شي لاتطلعيني اليوم من بيتكم حافيه!!! اسمهان:والاكسسوار يايمة؟كنت أتمنى أجيب اكسسوار مطابق لاتقولين لي البسي ذهبي او فضي أبي نفس لونه!! الأم:احمدي ربك إنها تيسرت وشرينا التايير..هذا أهم شي!! وفجأة واسمهان واقفة تطالع في القاعدين إلا طاحت عينها على سلسلة ابتسام اللي كانت عقب الدش متلبسة لبس مرتب وعليه قلادة طويلة دورين ناعمة وفيها أحجار صغيرة ارجوانية.. إلا اسمهان صارت تصارخ وتأشر على ابتسام مو مصدقة انها لقت شي مناسب للبسها وتقول:شوفوا شوفوا... اخترعت ابتسام ونطت من مكانها وقالت:لااااااااااااااا لاتقولين على كتفي صرصار!! اسمهان:أي صرصار؟سلسلتك عجبتني!! اسماء:حسبي الله على عدوك طيرتي عقل البنت عشان سلسلة؟؟؟ ابتسام:واذا أعجبتك..بتصادرينها؟؟ اسمهان:بس بكرة!!تكفييييييين! ابتسام:تفضليها.. سماح موب أحسن مني عطتك نعالها! اسماء:أحرجتوني ياجماعة!مابقى إلا أنا ماعطيتها شي..الود ودي أعطيك طراق لين ماتقولين الله حق!! طبعاً الأشقياء بنات ابتسام التوأمتين(سارة وهيفاء)قالوا:ليش ياماما تعطين سلسلتك لخالة اسمهان مو حقتها!!! ابتسام:عشان ماعندها!بعدين ترجعها.. التوأمتين:ياويلك ياخالة ماترجعينها ماما شرتها بفلوس بابا ماهي حقتك!! اسمهان:ماشاء الله طول اللسان وراثة من خالتكم اسماء! اسماء:خلهم يطلعون قويات..يامال الضعفة! قالت الأم:ترى كلمت أم العريس على الشوفة بس حسيت انها تبي تطلع في الشوفة مع ولدها يعني ماتبي رِجال! بس أبوك ماوافق أصر إنه انتي اللي تدخلين عليهم المجلس!!يقول ليش بس الأم وولدها عشان يتمقل على كيفه؟؟؟لايمكن! اسمهان:ومحمد بيكون فيه؟؟ الأم:أكيد! اسمهان:شرطي انه مايكون موجود يكفي وجود أبوي! سماح:وليش ماتبين زوجي قاعد على راسك؟؟عطيني عطيني نعالي ماتستاهلينه!! اسمهان:استحي من محمد!!تعليقاته كثيرة!يكفي أبوي والعريس وبس! الأم:مو مشكلة...على هواك. وعدى الليل.. وكلن راح بيته واسمهان مانامت بس ذابحها التفكير طبعاً أهلها كلموا المعرس وأمه وقالوا بيجون هم الاثنين وطلع النهار وهي مانامت زين ومن صباح الله وهي طايحة خلطات وكريمات وماسكات لا ومنادية أختها ابتسام تنتف لها سيقانها!!! شافتها أمها وقالت:هيييييه هيييييييه يابنت ترى الدخلة ماهي الليلة!!!!!!!! اسمهان:الاحتياط واجب!! الأم:أي احتياط ؟عيب عليك ملابسك ساترة مايحتاج هاللي تسوينه! ابتسام:يمة خلها على راحتها.. ومر اليوم وكل ماقربت الساعة يخفق قلب اسمهان وتدور براسها أسئلة:ياترى كيف شكله؟هل بيعجبني؟هل بأعجبه؟كيف بتجيني جراءة؟اش بيسألني؟اش أرد عليه؟ وكيف بأدخل؟وكيف بتكون مشيتي؟؟ وتلفون البيت كل شوي يرن!شلتها بس يتطمنون هل الوضع مستتب ولا لا؟؟ واتصلت رانية تسولف ومن ضمن كلامها:سوسو إذا محتاجة أي فزعة ترانا موجودين! اسمهان:مشكورة يابعد عمري ماتقصرين! رانية:ترى أكلمك بجد لو الفشلة قاتلتك والحيا ذابحك ترى ماعندي مانع أطلع بدالك قدام المعرس!! اسمهان:صكي السماعة ولا بأقفل بوجهك!! وأصدرت اسمهان قراراتها لأهلها إنهم يصرفون صاحباتها اللي كل شوي يتصلون ومسووين قلق!!! وجات الساعة الموعودة واجتمعوا اسماء وابتسام و سماح وأم المعرس أما أزواج اسماء وابتسام أخذهم محمد يعشيهم برة... وكان شرط العريس وأمه إنها تكون شوفة خفيفة مافيها تكلف او عشا.. وطبعاً دخلت اسمهان وكانت قمة في الروعة كل شي فيها حلو بس الكعب طويــــــــــــل ...إلى مجلس الحريم واخواتها وأمها وزوجة أخوها قاعدين وبس شافتها أم المعرس فزت تسلم وصارت تقول:ماشاء الله كل مرة أشوفك فيها ألقاك أحلى من اللي قبلها!! وقعدت اسمهان جنبها بخجل..وصارت اسماء تناظرها بحركات فيها سخرية واستهبال تبي ترفع ضغطها!!! وبعد الأخذ والعطا بين النسوان إلا الأب نادى أم اسمهان وقال:بأروح المجلس وخلي اسمهان تجي بعد ثواني ومعاها الشاي! وراحت الأم ونادت اسمهان اللي قلبها صار يرجف وريقها نشف وشوي وتبكي!وسماح وابتسام يهدونها ويقولون مافي شي يستاهل تخافين توكلي على الله وروحي.. أما اسماء كالعادة تحب تناقر في جميع الأوقات فقالت:ياحليلك قطعتي قلبي!!!ماكأنك ذيك المطفوقة اللي كنت بتطيرين على الزواج!! اسمهان بقهر:حسابك عندي خلني أرجع بس!!! وبالفعل توجهت إلى المجلس ولحقوها بنات ابتسام(سارة وهيفاء التوأم راعيات الفشايل!!!)ووقفوا عند الباب يطالعون المعرس! ودخلت اسمهان تتمايل الكعب طويــــــــــــــل وصينية الشاي تتراقص مابين ايديها وحطتها على الطاولة وعدت على خير كل شي سليم مافي شي طاح!! بس عين العريس طاحت عليها ووقف من غير شعور يمد يده لها يصافحها! ورفضت اسمهان تصافحه!قال أبوها:سلمي يابنت! ردت اسمهان بكل براءة:مصافحة الرجل الأجنبي حرام! وبغى عبدالرحمن يضحك بس مسك نفسه وجلس..وجلست هي بالكنبة اللي بجنبه... قال لها:ماشاء الله تبارك الله..قد ماوصفت لي الوالدة جمالك ماتخيلتك بهالحلا!!!!!(جريء صح؟؟؟؟؟) عاد أبو اسمهان سمع هالكلام وبغت تطلع عيونه وقام يتنحنح!!!فانتبه عبدالرحمن انه حبكها شوي وقال لاسمهان:كيف حالك؟ ردت اسمهان بارتباك:وإنت بخير..!!!!!! عبدالرحمن:بأي صف تدرسين؟؟ اسمهان بارتباك:أدرس بالمدرسة!!! حس عبدالرحمن انها مرتبكة وقاعدة تخبص بالحكي فقال:طيب لاتخرجتي بإذن الله اش طموحاتك؟؟؟ اسمهان:أحب القراءة وتصفح النت!!!! وبغى عبدالرحمن يضحك لكن أبوها يبي يلطف الجو وقال:اسمهان هذا طبعها خجولة وتستحي!! إلا دخلت سارة الصغيرة بنت ابتسام وقالت:لا خالتي اسمهان قليلة أدب ماتستحي تحب تقعد مع الرجال!!!!! تفشل أبواسمهان وقال:عيب يابنت روحي لأمك وش هالكلام؟ سارة:إلا دايما أشوفها قاعدة معاك ومع خالي محمد!! أبواسمهان قام يضحك وقال:مافيها شي يابنتي خالك أخوها وأنا أبوها!! إلا تنفس عبدالرحمن الهواء لأن مخه راح بعيد شوي!! وهيفاء توأم سارة قالت:ياعريس خالة اسمهان اشترت لبس جديد عشان انت تشوفه وترضى تتزوجها!!! قامت اسمهان سحبت البنت ومن غيظها قرصت البنت بظهرها من غير ماأحد يلاحظ بس البنت فضحتها وقالت:آآآآآآآآآآه ليش عورتيني ياشريرة ماأحبك فصخي سلسلة أمي ياحرامية!!! ساعتها ابواسمهان اشتد غيظه!!وناظرباسمهان وعينه تتطاير شرر وقال:قومي يابنت وادخلي داخل!! وقامت اسمهان تبي تلحق البنتين الصغار قبل مايروحون لأمهم عشان تلطشهم بس خانتها رجولها ونشب الكعب بطرف السجادة المفروشة على السيراميك وطاحت طيحة تكشفت فيها من جميع الجهات لدرجة إنها قالت بقلبها:أشوى اني نتفت سيقاني!!!!!!!! التكملة فيما بعد!!!!!!! تكملة##الجزء الحادي والعشرين## طبعاً بعد مااسمهان طاحت الطيحة التاريخية هذي قدام المعرس...هو ماصدق وبقق عيونه يخاف لايفوته شي!! أبوها انحرج جداً وصاح فيها تقوم وعبدالرحمن العريس طقته النخوة والشهامة وقام قال إيش بيساعدها بس أبوها قال بعصبية :خلها!! ووقفت اسمهان مرة ثانية لكن خيوط السجادة مازالت ملتفة على الكعبة فصارت اسمهان كأنها راكعة وتتأرجح بالهواء مو عارفة تتحرك وأبوها يناظر هالمسخرة وصاح فيها بأعلى صوته وكأنه يزأر:يابنت الكلـ؟! ادخلي داخل وخلي نعالك!!!! ومن الخرعة تركت فردة من الصندل لأنها ناشبة بالسجاد وراحت تركض لداخل والحق ينقال كأن منظرها مثل زرافة عرجاء لأنه الكعب جداًطويل والرجل الثانية حافية فصارت مشيتها مو متوازنة تطلع وتنزل وعبدالرحمن متابع والضحك مشقق بطنه من الداخل ومن فلاحته نسى يعطيها طقم الشوفة الذهب اللي كان جايبه لها!!!!!! طبعاً من المتعارف عليه بمجتمعنا انه عند بعض القبائل عِرف معين إنه العريس إذا أعجبته العروسة عطاها الهدية اللي جايبها وإن ماأعجبته مايعطيها وبكذا يفهمون الناس إن العريس ماناسبته العروس!!!!! بس عبدالرحمن أعجبته اسمهان بقوة لكن من كثر الفشايل نسى يعطيها الطقم وهي خارجة من الباب.. ودخلت اسمهان الصالة وخواتها وزوجة أخوها ينتظرونها بشوق...وإلا هي داخلة عليهم بفردة فريدة فردة من الصندل لابستها والثانية خلتها بالمجلس بناءً على طلب أبوها المنحرج! وعيونها محشية دموع وخشمها أحمر وتمشي وهي تعرج كأنها خالتي قماشة لأنه ماعاد فيه توازن بفقدان الكعب الثاني وزعلانة وتسب وتلعن!! طالعت اسماء فيها باستغراب وقالت:هو اش اللي صار داخل بالضبط؟؟ نفسي أفهم!! سماح:صندلي وينه؟؟ووين الفردة الثانية؟أخاف تجاوزتي حدودك وخذاه أبوك وسطرك فيه قدام المعرس!!! ابتسام:خلاص لاتحرجونها!واضح من شكلها ودموعها إنه مافي نصيب!! انفجرت اسمهان وقالت:انتي بالذات ياابتساموه نفسي أمسك بناتك وأرميهم من الشباك على الغثاثة اللي سووها!!وينهم بس؟قسماً لا أفش غلي فيهم!! ابتسام:بسم الله عليهم..جزاء المعروف سبع كفوف؟من الصباح وأنا أنتف ذراعك وسيقانك اللي تقولون فرع من غابات الأمازون!! ولا شعرك اللي قعدت ساعتين أفرد فيه بالاستشوار وتاليتها تبين تطقين بناتي؟؟ اسماء:الله أكبر يالفشلة!ولاعطاك طقم ولااسورة ولا شي؟؟يعني واضحة مثل الشمس ياإنه بخيل! يا ماعجبتيه ومافيه نصيب!! الصراحة محد بيتحسف إلا أمي المسكينة اللي 3 ساعات قاعدة تفتر معك بالسوق!!وتاليتها مامليتي عين المعرس!! وشوي وجات أمهم وشافت اسمهان تتبكبك وقالت:خير يايمة؟؟ ارتحتي له؟ولا ماعجبك؟؟ اسمهان:تطمنوا كلكم!أعجبته وقال إني أحلى من وصف أمه!!!بس بنات ابتسام النذلات فشلوني!! وفكتها منـــــــــاحة!! وحكت لهم كل السالفة وقعدوا يضحكون عليها ودقايق إلا والعريس اتصل بأمه تطلع واستأذنوا وراحوا.. ودخل أبواسمهان الصالة حيث كان الجميع مجتمعين ومعاه كيس شيك وعطاه أم اسمهان اللي فتحته ولقت فيه طقم ذهب أبيض ومفصص وياخذ العقل!! وقامت أم اسمهان تغطرف والكل يغطرف معاها...والأب يطالع باسمهان بنظرات حادة...ثم قال: أمووووت وأعرف...طيحتك قدامنا كانت عفوية ولا متعمدة؟؟؟؟ وقام الكل يضحكون عليها.... اسمهان:بالله هذا سؤال يبه؟؟في أحد يخطط يفشل نفسه؟ الأب:لا ومسوية فيها فاهمة! الرجال يصافحها وهي رافضة تقول له مصافحة الرجل الأجنبي حرام!! الأم:وهي صادقة يازين الثقل!! الأب: لا ومضيعة..ولد الناس يسألها سؤال وهي تعطيه أجوبة ثانية... واكتمل الناقص ببناتك ياابتسام ملقوفات كأنهم أبوهم!!!! قامت ابتسام تقلب عيونها ماعجبها الكلام!! الأب:أهم شي إن الولد خرج مبسوط وعطاني الطقم وهو يتعذر إنه ماعطاه اسمهان بيدها..وقال بإذن الله بيننا لقاء ثاني نتفق فيه على التفاصيل..بس أنا قلت له لاتستعجل لين أشوف رآي البنت... اسماء:أي رآي؟؟أكيد بتوافق غصب عنها!شافها من راسها لكرياسها ولسة تبي تشاورها؟؟ وتوجهت أنظار الأم والأب لاسمهان اللي قالت بخجل: موافــــــــــــــــــــــــــ ــــــــــــــقة!!!!! +++ طبعاً في الجانب الآخر دار حوار بين عبدالرحمن وأمه بالسيارة.. أم عبدالرحمن:هااه بشِّر ياعريس؟؟نقول مبروك؟؟ عبدالرحمن:أكيييييييييد!ماتوقعت إن ذوقك حلو لهالدرجة يمة!! أم عبدالرحمن:الحمدلله يعني أعجبتك...بس علمني وش صار بالشوفة... عبدالرحمن: الحقيقة يايمة أهلها طلعوا بقمة الكرم معي! أم عبدالرحمن:وشلون؟ عبدالرحمن وهو يضحك:يعني كنت أحلم أشوف وجهها بس..لكن ماقصروا معي عطوني فوق ماأتمنى خلوني أشوفها من فوق وتحت ومن داخل وخارج!!! أم عبدالرحمن:حسبي الله على ابليسك وش هاالهرج؟؟؟ عبدالرحمن:يايمة شفتها مو بمزاجها مسكينة طاحت طيحة موب صاحية ولو شفتي أبوها كيف خزها بعيونه! أم عبدالرحمن:رُبَّ ضارةٍ نافعة!!يعني طلعت انت الوحيد المستفيد من هالطيحة.. وقاموا الاثنين يضحكون... عبدالرحمن:حسيت يمة وأنا أناظرها اني شايف سندريلا أم عبدالرحمن:يحق لك البنت مزيونة حيل! عبدالرحمن:لااااا قصدت يوم راحت وخلت فردة من نعالها!!حسيت إن ودي آخذها وأحطها برجولها!!! أم عبدالرحمن: مالت عليك يالخفيف!!! باقي ماعرفت خيرها من شرها وبتحط نفسك عند نعالها؟؟؟ قام عبدالرحمن يضحك ويقهقه وقال:يايمة دشت قلبي هالبنية عفويــــــــــة لأبعد درجة وبريــــــــئة مرة!! يازينها زيناه!!! ام عبدالرحمن:زين ناظر قدامك وإنت تسوق لاتسوي بنا حادث!!!!!!!! |
