|
#17
|
|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
أسمهان وعبدالرحمن قصة أسرية هادفة بكل اجزاءها متتابعة روآية سعودية
دخلت اسمهان الغرفة وجاء عبدالرحمن أخذ كم صورة وأمه وخالته وجوهرة وأخته أحلام وأم اسمهان وأخواتها واقفين معاهم ولبسها الشبكة وباركوا لهم..
أحلام:ألف مبروك ياعروستنا الله يوفقكم ويحفظكم لبعض
أبلة جوهرة قربت من اسمهان شوي وقرصتها بإذنها وقالت:مبروك وان شاء الله الجاي أحلى!الله يعينني المدارس عقب أسبوع!!!!
عبدالرحمن:وش تقصدين ياخالة؟!
جوهرة:هذي شفرة بيني وبين اسمهان وهي أدرى بقصدي!!!!!
أم عبدالرحمن:مبروك ياأحلى عروس بالدنيا الله لايضرك ويحفظك لأهلك ولزوجك وعقبال مانشوفك ببيتك ان شاء الله....
أم اسمهان:جزاك الله خير...
وخرج الجميع من الغرفة وتركوا المعاريس لحالهم!!
(وشفيكم ابتسمتوا ياعضوات؟؟؟أدري هذا اللي تبونه من أول القصة!هههه)
ساد الصمت واسمهان رايحة فيها من الخجل وتناظر الأرض!! وعبدالرحمن بياكلها بنظراته!!
عبدالرحمن:شلونك؟
اسمهان:بخير
عبدالرحمن:بنظل ساكتين على طول؟؟؟
اسمهان:اش أقول؟؟
عبدالرحمن:كلميني عن نفسك..
اسمهان:مايحتاج!كل شي تعرفه عني!
عبدالرحمن:بس انتي ماتعرفين شي عني!
اسمهان:طيب قول..
عبدالرحمن:بأسألك سؤال يمكن غيري سبقني وسألك اياه؟اش شعورك اليوم؟؟؟
اسمهان(بغرور):عادي مثل شعور أي مواطنة سعودية زفوها لعريس المستقبل!!
عبدالرحمن:ههههه لااا تعرفين تعبرين!
اسمهان:طيب اوصف لي انت شعورك!
عبدالرحمن:أنا مثل اللي احبسوه 30 سنة بسرداب تحت الأرض من غير زاد ولانور ولاهواء وفجأة اطلقوا سراحه!!!!تتوقعين كثر ايش بتكون فرحته؟؟؟
اسمهان:ليه سجين سياسي؟!
عبدالرحمن:هههههههه..عسل يااخواني عسل!إلا سجين العزوبية ياسمهونتي! تسمحي لي أناديك بسمهونتي؟؟
اسمهان(بخجل):أكيد!
عبدالرحمن:الكل يدري وش كثر كنت مخنوق أيام العزوبية وأحلم بالاستقرار..والحمدلله تحقق حلمي!
اسمهان(ببكش!):الصراحة أنا آخر أحلامي الزواج لسه قدامي أكمل الثانوي وبعده الجامعة ويمكن ماجستير بس اش أسوي ؟النصيب!
عبدالرحمن:مغصوبة يعني؟!!!!!!
اسمهان:لا بس حبيت أفرح أمي وأبوي!!!
عبدالرحمن:أقول ياشين التغلي!!ماكأنك رحتي تشرين لبس جديد مخصوص لي يوم الشوفة عشان تلفتين انتباهي!!!!!
اسمهان(بكل سذاجة)قالت:يوووووه مين قال لك؟؟؟
عبدالرحمن:ههههههههههه يعني صدقت البنت الصغيرة؟!أظنها بنت وحدة من خواتك!!
اسمهان بنفسها حست بفشلة وقالت يابنت بلاها تمثيل!!
وجلس عبدالرحمن يتأمل شكل اسمهان بصمت وقال:تصدقين؟كنت زمان أقول أروع عروس قد شفتها بحياتي أختي أحلام..بس انتي اليوم خليتيني أغير رأيي!!كل شي فيكي حلوومبهر..
اسمهان:شكراً هذا من ذوقك!
عبدالرحمن:طيب وأنا اش رايك فيني؟؟؟
اسمهان:من أي ناحية؟؟
عبدالرحمن:بمظهري!
اسمهان:ثوب وبشت وشماغ..مثلك مثل أبوي!
عبدالرحمن:أفااااااا..يعني....
إلا قطع حديثهم صوت الباب وقامت اسمهان تفتح باب الجناح اللي جالسين فيه ولقت أخوها محمد وجايب لهم عشاء عروسين فاخر..وعاد اسمهان قام بطنها يقرقر بس مستحية تاكل ونظرات العريس مسلطة عليها!!
وجلس محمد معاهم شوي يسولف..
محمد:هاه..ياعريسنا..اش رايك بالعروس؟؟؟
عبدالرحمن:بدر ليلة تمامه ماشاء الله تبارك الله!
محمد(وقام يغلس على اسمهان بمزحه الثقيل!):لايغرك!ترى لو غسلت وجهها مابتعرفها!بلاك ماتدري عن هذول النسوان تروح الوحدة الصالون وتعطي الكوافيرة كل فلس بجيبها وتقول لاأوصيك كل علب البوية اللي عندك كبيها على وجهي!!والكوافيرات مايقصرون!تصدق؟قبل شوي قابلت زوجتي ماعرفتها!!!
عبدالرحمن:هههههه..حرام عليك والله الحلو حلو ولو قام من النوم!
اسمهان(بغيظ):مقبولة منك ياأبوسعيد!!
محمد:وعاد الله يعينك ياعبدالرحمن على هالسمهونة !يوم الزواج بأعطيك فاتورة وانت ماخذ اسمهان مكتوب فيها البضاعة المباعة لاترد ولاتستبدل!!
عبدالرحمن:هههههههه..ياشيخ اتقي الله والله انت ظالم هالقمر بكلامك!
محمد:أي ظالم؟هذي ملسونة ياولد الناس..تراك كسبت فينا جميل يوم خذيتها! بلاويها بتنتقل من عندنا لك!وعليك بالعافية!
اسمهان(بعصبية):جاي تبارك؟ولا تتشمت؟
محمد:لا جاي أستفزك عشان يشوفك عبدالرحمن وانتي مكشرة عن أنيابك!ويحرِّم بيوم من الأيام يزعلك!!
واستأذن محمد من العرسان وتركهم يتعشون وخرج
وشوي ودق الباب إلا هو أبواسمهان وأمها ومعاهم بنات ابتسام(سارة وهيفاء)...
الأب:مبروك..مبروك..ماشاء الله وش هالزين كله؟؟الله يوفقك ويحفظك يابنتي..
الأم:عاد أبوك جاي مخصوص هو وبنات ابتسام عشان يتصورون معاك...
اسمهان:هلا فيك...
ووقفوا جنب بعض والأم تصورهم بكاميرا الفيديو..وجلسوا يسولفون..
وقال عبدالرحمن:يازينهم هالبنيات!انتوا اللي شفتكم بيوم الشوفة؟؟
سارة:إيوه إنت اللي شفناك اليوم اللي طاحت فيه خالة اسمهان..!!
عبدالرحمن:ههههههه
وناظرت فيه اسمهان بنظرات حاقدة خلته يسكت!
هيفاء:شوفوا خالة اسمهان كيف تشمق..تحسب نفسها حلوة!!!!!!!!!
أما الأب قام يتنحنح وقال:تعشوا ليه مخليين عشاكم؟
الأم:طيب خلنا نعطيهم فرصة يتعشون ونطلع إحنا..
وخرج الجميع من الغرفة وبقي العروسين..وكانت اسمهان ودها تنط بالصحون من الجوع!بس الحيا مانعها تحط لقمة بحلقها قدام خطيبها!!
عبدالرحمن:يلا..مدي يدك وقولي بسم الله...
اسمهان:لااااا..كل إنت أنا مالي نفس!
عبدالرحمن:وليش مالك نفس؟..الأكل شكله لذيذ وريحته تشهي..
اسمهان:صحيح..بس أنا متعودة على الأكل الخفيف..وماأحب آكل بالليل..
عبدالرحمن:طيب لو أكلتك أنا بيدي مابتنفتح نفسك؟؟
اسمهان:لا...لأني فعلاً حاسة بشبع...
عبدالرحمن:براحتك..بس الصراحة أنا ميت من الجوع وقام ياكل..
واسمهان تتابعه ولعابها يسيل بس تكابر!!وبنفسها تدعي إن الأكل مايخلص!!
وقام عبدالرحمن يحكي له قصصه القديمة وطفولته ودراسته وحياته وهي تسمع والجوع ذابحها!ومر الوقت....وأخيراً دق الجوال..أجرى عبدالرحمن مكالمته وقفل السماعة وقال:هذي الوالدة..الوقت تأخر ولازم أوصلها هي وخالتي جوهرة البيت!
اسمهان:وأحلام؟وينها؟
عبدالرحمن:أحلام سبقتهم على البيت مع زوجها وعيالها
وراح عبدالرحمن دورة المياه اللي بنفس الجناح يغسل يدينه..وماصدقت اسمهان انه يروح وانقضَّت على الصحون تاكل بسرعة قبل مايرجع عبدالرحمن ويشوفها!
لكن المفاجأة انه عبدالرحمن غسل يدينه ورجع بهدوء ومن غير ماتحس وقف وراها وظل يراقبها وأختنا في الله منهمكة تحشي فمها وتجهز اللقمة اللي وراها!
عبدالرحمن(وبداخله ضحكة!):على هونك على هونك لاتشرقين يابنت الناس!!ماوراك َطرَّادة!!
اسمهان بخرعة:بسم الله!انت من متى ورايا؟؟(وفمها مليان واللقمة تتطاير منه!!)
عبدالرحمن:من اللحظة اللي أعلنتي فيها الهجوم على محتويات الصحون!!ههههه..كلي كلي بالعافية!
وشوي واسمهان من خرعتها إلا شرقت بذيك اللقمة وصارت مختنقة وتكح وصار عبدالرحمن مو عارف اش يسوي وقام يخبطها بأقوى ماعنده على ظهرها!! ومحمد وأمه كانوا يطقون الباب وماسمعوهم العروسين اللي كانوا مشغولين بزحلقة اللقمة المحشورة بحلق اسمهان!
محمد:يمه أنا قامت تراودني الشكوك!
الأم:توكل على الله وافتح عليهم الباب!
وماكذب محمد خبر وفتح الباب ولقى اسمهان واقفة ووراها عبدالرحمن اللي جالس يخبطها بقوته على ظهرها والبنت وجهها أحمر وعيونها تدمع!!
محمد(بعصبية):هييييه إنت! وشفيك تضرب أختي؟؟مامداك تشوف خيرها من شرها ..وقمت تمد إيدك عليها؟؟؟؟
الأم:يمه بنتي وش سويت فيها؟؟؟
عبدالرحمن:البنت مختنقة حرام عليكم..قاعد أساعدها!
إلا الأم مسكت البنت من وراها ولفت ايدها حول خصر اسمهان وضغطت عليها للأمام وتفلت اسمهان اللقمة ورجعت الحياة لوجهها!!
عبدالرحمن:واااويلي ويلاه..آثاري حالتك صعبة لاصرتي جوعانة!!!
الأم:بسم الله عليك يابنتي..ياشين طفاقتك دايم أوصيك كِلِش ولاالعجلة بس ماتسمعين!
محمد:لاإله إلا الله..أحد قايل لك إن الأكل بينقرض من الأسواق؟!!
عبدالرحمن:ياجماعة الخير قولوا لها الحمدلله على سلامتك..أزمة وعدَّت!!
الأم:ياولدي ترانا طلعنا نقول لك إن أمك وخالتك بانتظارك في مدخل الفندق..وجينا نلم أغراض اسمهان عشان نسري!
عبدالرحمن:يعني طردة؟؟؟
محمد:ياشيخ لاتستعجل بكرة بتزهق منا وبنزهق منك!
ودخلت الأم الغرفة اللي بالجناح تجمع أغراض اسمهان وأغراضهم الثانية اللي جابوها معاهم وتعطيها محمد اللي كان قاعد ينزلها...
واستغل العريس الموقف وقام يودعها بطريقته الخاصة!!!!!!!!!!!!!!!!!!
ثم قال:اسمهان أبيك تعطيني رقم جوالك!
اسمهان:بس أنا ماعندي جوال!
عبدالرحمن:معقوووووله؟؟في بنت بهالزمن ماعندها جوال؟؟؟
اسمهان:إيه..أنا!
عبدالرحمن:أجل شلون نتواصل؟؟
اسمهان:على تليفون البيت الثابت!
عبدالرحمن:صعبة!كذا ماراح يكون في خصوصية وبتكلميني والعيلة كلها جنبك!
اسمهان:اش أسوي أجل؟؟
عبدالرحمن:ولايهمك بأحلها بطريقتي.....
........وتوادعوا وراح عبدالرحمن وطلعوا اخوات اسمهان وساعدوها في تبديل فستانها ولم الأغراض ورجعوا بيتهم......
وأما عبدالرحمن طول ماهم في السيارة هو وأمه وخالته وهم يتبادلون أخبار الملكة.....واش صار ودار..
وكملوا السوالف بالبيت..ورجعت خالته جوهرة معاهم..
وأما اخوان عبدالرحمن خرجوا من الملكة بدري عقب عشا الرجال مباشرة وواحد سافرلأشغاله..والثاني رجع نام......
ودخل عبدالرحمن يبدل هدومه.....
أبلة جوهرة:أما أهل العروس ماشاء الله ماقصروا كل شي فخم وراقي سووه بملكتهم..من جميع النواحي من القاعة للضيافة لكل الترتيبات...
أحلام:أنا استانست مرة..والله زمان عن أعراس السعودية..كل شي بالملكة كان يهبل وخصوصاً العروس!ماتوقعت ذوقكم بيطلع حلو لهاالدرجة!!
أم عبدالرحمن:الله يخليهم لبعض..العروس الله يحميها طلع لها طلعة بالفستان والتسريحة والمكياج..
جوهرة:فعلاً..ماتخيلتها أبداً بتكون بذا الحلا كله..
أم عبدالرحمن:أما أنا ياجماعة خقيت عند لابسات الوردي!!!اسمهان حلوة وقرايبها حلوين مثلها!
جوهرة:ومين قال لك إن لابسات الوردي قرايبها؟؟هذول صاحباتها بالمدرسة!
أم عبدالرحمن:ياحليلاتهم..شكلهم يحبونها مرة..مطقمات ملابسهم مثلها..وغنوا لها ورقصوا لها..ماقصروا
أحلام:فعلاً سووا أجواء غير عادية بالقاعة حتى الطيران خذوها وطقوا فيها..ونسونا الصراحة...
إلا عبدالرحمن جاء وقعد معاهم......
جوهرة:مبروك ياعريس..إلا اش أخبار العروس؟
عبدالرحمن:اسكتوا مادريتوا اش صار! بغت تفطس علي وتروح بغمضة عين!
أم عبدالرحمن:ليش؟واش سويت فيها ياالمهبول؟
عبدالرحمن:أنا برررررررريء!ماسويت شي!بس يظهرإن الجوع ألح عليها إنها تسكته بأي وسيلة!وماقصرت شرقت شرقة قوية!!!!وأهلها دخلوا علي وحسبوني أطق بنتهم!
أم عبدالرحمن:ياحليلك ماقد قابلتها إلا مرتين وبكل مرة تواجهك معها مواقف!هالحين شرقة وأمس طيحة هههه!
أحلام:وش سالفة الطيحة هذي بعد؟علموني!
وقعدوا يتكلمون طول الليل ويضحكون على المواقف وعلى مواقف ثانية حصلت لكل واحد منهم بالماضي...
طبعاً يوم الملكة كان مُرهق للعروسة وأهلها اللي ماصدقوا يوصلون البيت ويحطون رووسهم وينامون..
وطبعاً أبواسمهان كان عازم كل الأقارب اللي حضروا ملكة اسمهان اليوم الثاني يعني أخوالها وأعمامها وزوجاتهم وعيالهم.....والجدات..
وثاني يوم صحيت اسمهان بعد الظهر..ونزلت تحت بالصالة وكانوا أهلها مجتمعين أمها وأبوها وأختها ابتسام...
أبواسمهان:أهلاً وسهلاً بالأميرة النائمة!
اسمهان:أدري مصختها بالنومة بس لاتلوموني من التعب اللي فيني..
أم اسمهان:من التعب اللي فيك؟والا من الطق اللي خذيتيه البارح؟؟؟؟
الجميع:هههههههههههههه
اسمهان:ماشاء الله علمتيهم يمه؟!!
ابتسام:و دي حاجة تستخبى يختي؟! البارح قلت سالفتك لزوجي وقعدنا طول الليل نضحك!
اسمهان:ماشاء الله صرت سالفة الموسم!
أبو اسمهان:مايخالف يابنتي!أهم شي صار عندك مناعة من الطق..احتياطاً لو طقك عقب العرس!!
الجميع:ههههههههههه
وقام الأب يجلس بالمجلس مع زوج ابتسام...الا التلفون يرن راحت اسمهان ترد وطلعت المتصلة رانية..
رانية:السلام عليكم..
اسمهان:وعليكم السلام..ياهلا
رانية:لللللللوش(تغطرف على السماعة!) هلا وغلا بأحلى عروس شلونك يابنت؟؟
اسمهان:الحمدلله...تمام وقبل ماتقولين لي أي شي حابة أشكركم من كل قلبي انتي والشلة..الناس سابت العرس وصرتوا انتوا محور الحديث!ولسه اليوم عندنا عشا بالليل أكيد الكل بيسألني عنكم مثل أمس!!يعني ماتفكونها هالمقالب..
رانية:الحمدلله,,أهم شي إنك انبسطتي واستانستي.
اسمهان:بس أموت وأعرف ليش لبستوا وردي؟وش دراكم إني بألبس هااللون؟؟
رانية:الحاسة السادسة!
اسمهان:ماظنتي! قد ماقلَّبت السالفة براسي مو راضية تجي معي!
رانية:وأنا بعد عندي سؤال حاشرني بحلقي من أمس وودي أسألك إياه!ياترى عبير ليش عزمتيها؟
اسمهان:أعوذبالله ومين قال إني عزمتها؟أخوي محمد عزمهم بصفتهم جيرانه ومن جماعة أم زوجته وقريباً الله لايقدِّر بتسير عروسة ولدهم تركي!!!!!
رانية:وعععع..وزوجة أخوك مالقت غير عبيروه تخطبها حق أخوها؟
اسمهان:هذا نفس سؤالي لها..بس عاجبتهم..الناس أذواق!
رانية:وتدرين بهالسالفة من زمان؟
اسمهان:تقريباً من كم أسبوع!
رانية:غريبة ماعلمتينا؟
اسمهان:لأني دارية انكم بتتشمتون فيني..وتظنوني بأبدأ أغير نظرتي لها عقب ماتسير زوجة أخو زوجة أخوي!
رانية:وش دعوى سمهونتي؟انتي مالك علاقة..وموب انتي اللي خطبتيها..الله ياهي رفعت ضغطنا أمس بسخافتها وتعليقاتها اللي مالها داعي...بس الله لايبلانا!
اسمهان:ماعلينا من سوالفها..أهم شي انتم اش رايكم بليلة أمس من جميع النواحي؟
رانية:ماشاء الله تهبل ومن غير مجاملة من أحلى المناسبات اللي حضرتها حتى أمي استانست..ليلة مرتبة ومنظمة وراقية بكل شي..صراحة ماطلعنا منها إلا وحِنا راضيين وماودنا تنتهي..بس انتي هاتي أخبار المعرس واش صار معكم؟!!!!
اسمهان جلست تحكي بالتفصيل وبصوت منخفض وش صار معاها ورانية بس تضحك...
رانية:صدق إنك مفجوعة وموب وجه نعمة!أجل تحشين كرشك والرجال بعده ماطلع؟!هههههههه وافشيلتاه!والله لو إنك رحتي فيها كان نزل الخبر بالجرايد (عروس تختنق بلقمة في ليلة عقد قرانها بعد محاولات فشل في انقاذها)!!!ههههههههههه الله يقطع سوالفك يااسمهان!
اسمهان:يلا عاد عن هرجك الماصخ على طاري الأكل بطني قام يصوصو!ترى بعدي ماذقت شي من عشا البارح!وعن إذنك بأروح آآكل..
رانية:روحي بالعافية..بس انتبهي تشرقين..ترى عبدالرحمن بن سوبرمان هالمرة موب جنبك!!!!هههه
اسمهان:مع السلامة
رانية:مع السلامة...
**الجزء التاسع والعشرون**
نستكمل الأحداث السابقة اللي كانت ثاني يوم الملكة توالت الاتصالات على اسمهان من الشلة بالأول رانية وعقبها نجلاء وبعدين مرام ويليها أفنان والكل كان مبهور بجمال الملكة ويثني على اسمهان وأهلها إلا أسماء.....
نجلاء:تصدقين ياسوسو؟؟أهلك كلهم عسل بالذات أختك ابتسام وزوجة أخوك..أما أسماء عالم آخر من النكد والعصبية!!يمكن ليش إنها حامل!
اسمهان:إلا وانتي الصادقة المثل يقول:زيح جبل..ولاتزيح طبع!!!!!
نجلاء:فاتك ياسوسو نظرات أبلة جوهرة لنا يوم ملكتك وتعليقاتها..ياحليلها شكلها خفيفة دم بالواقع مو مثل شخصيتها الجدية بالمدرسة!!!!!!!
اسمهان:ليش؟وش قالت لكم؟
نجلاء:قالت آثاريكم من زمان يبي لكم عرس تطلعون طاقتكم فيه؟!!!!!!!! بدال ماتطلعونها على غير سنع بالمدرسة!!!!!!! ومسكت رانية من إذنها وقالت:أخيراً صار شكلك أنثى؟؟عساه دايم!
اسمهان:هههههههههه...حتى أنا مسكتني من إذني وقالت الله يعينني المدارس عقب أسبوع!!!
نجلاء:الجاي أحلى إن شاء الله..مادام وحدة فينا انخطبت..فإن شاء الله تعقل وتنتقل العدوى بين البقية!!!
اسمهان:وش دعوى؟الزين عندنا والشين حوالينا!على الأقل حِنا مانغلط على أحد إلا إذا غلط علينا..مو مثل شلة المنشار اللي كانت معانا العام وكل يوم والثاني مسويين فضايح وكل فضيحة وفضيحة أكبر من اللي قبلها!!!
نجلاء:الحمدلله ربنا فكنا منهم وكل وحدة نقلت بمكان..بس كنت أموت وأعرف ليش مسميين نفسهم شلة المنشار؟؟أبائهم نجَّارين؟؟؟؟
اسمهان:هاهاها..لا مآخذين الحرف الأول من اسم كل وحدة فيهم..منشار
م:مها,,,,,,,ن:ندى......ش:شهد,, ,,ا:أريام.....ر:رشا!!!
نجلاء:الحمدلله على نعمة العقل!!!
اسمهان:يعني من زين اسمنا هالحين؟ بدل مانختار لأنفسنا اسم رومانسي وهقتنا رانية بإسم الصاعقة اللي يفشل!!مابقي إلا نلبس ربطات سوداء ونعلق جماجم!!!
نجلاء:هههه..ياحليلك ياسوسو..بغض النظر عن الاسم جمعتنا ذكريات حلوة مع بعض.. ويكفي إن اسمنا يهز!!
ودخلوا الصديقتين من سالفة لسالفة ووصلوا لعبير..
نجلاء:أما عبير هذي عبيطة بشكل !فاتك يااسمهان يوم رحتي لخطيبك طلعت هي ترقص..والله لايوريك من رقص مابقى أحد بالقاعة إلا وتفقع من الضحك!تصنع ومياعة مو طبيعية..أما ذاك اليوم ماكانت هالبنت صاحية سوت شغلات غريبة!لكني قلت بنفسي يابختها شكلها جمعت حسنات كثر جبال!!!!!
اسمهان:وانتي اش دراك؟؟؟
نجلاء:لإنه مابقى أحد ماتكلم فيها..أكيد أخذت حسناتهم وقطت عليهم سيئاتها!!!!
وطال الهرج إلى أن جاها تلفون ثاني من أفنان ومرام..
ولما اقترب المغرب قامت اسمهان تتكشخ استعداداً لحضور أقاربها(أهل الأم وأهل الأب)لعزيمة العشاء والمباركة لاسمهان...
و حضروا الضيوف عقب المغرب والكل كان مبسوط ويمدح العروس والملكة...والأسئلة انهالت على اسمهان من كل حدب وصوب..
ومن ضمن الحضور كانت هناك شريفة عمة اسمهان تتذكرونها؟؟اللي كانت تبي اسمهان لولدها فيصل!!!ومقهورة إنه محد شاورها وتبي تطلع أي عيب بعريس اسمهان وأهله!
العمة شريفة:ماأحد كسر خاطري بالملكة إلا أهل المعرس يحزنون!!شكلهم ماعندهم أهل ولاعزوة!كلهم كم نفر بس!
أم اسمهان:الملكة ملكتنا حِنا ياأهل العروس ومعازيمنا كثير وهم ضيوف فيها ومو معقول بيعزمون كل قرايبهم طبيعي إن عددهم محدود..وبالزواج بتشوفين الزحمة شلون بتكون!وماشاء الله هم كانوا 22 حرمة و18 رجِّال يعني نعمة..ماهم بذيك القلة اللي تقولين عنها!
العمة شريفة:مدري مابلعت أم المعرس!حسيتها متكبرة!الله يعينك عليها يااسمهان!
اسمهان:بالعكس جداً ذوق...وحالها بشانها!
العمة شريفة:هذا لأنك ماجربتي خيرها من شرها يا الفطينة!!
أسماء(بعصبية):يعني اللي بتاخذ واحد من أولادك هي اللي بتعيش في جنة؟!!!!!!
فهم الجميع قصد اسماء وقاموا يضحكون..وانحرجت العمة وسكتت!!!!
وقاموا بنات العائلة يتكلمون مع اسمهان ويسألونها عن العريس وعن صاحباتها ...و..و..الخ
شوي إلا قام عبدالرحمن يتصل بجوال أبو اسمهان لكنه مارد عليه لأنه منشغل بضيوفه!!
رجع عبدالرحمن واتصل على محمد...أخو اسمهان
محمد:هلا..
عبدالرحمن:ياهلا فيك..معاك عبدالرحمن.
محمد(بكل ترحيب):أهليــــــــن بأبو نسب!شلونك عقب أمس ياشيخ؟؟ماجاك كوابيس من منظر اسمهان المرعب؟!!!
عبدالرحمن:استغفر ربك..أحلى نومة بحياتي نمتها البارح..وأنا مرتاح..وشلون عروستي؟؟؟
محمد:زينة...اللهم ظهرها يوجعها شوي!
عبدالرحمن:سلامات؟؟
محمد: ماتنلام!!الضعيفة جاها طق موب طبيعي أمس!
عبدالرحمن:هههههههه..الله يقطع ابليسك..وش تبيني أسوي؟كنت تبيني أخليها تروح من بين إيديني؟؟
محمد:عاد لو راحت من بين إيدينك كنت بتمتحنَّا وتنشب بحلوقنا وتقول:ردوا لي مهري وشبكتي..صح؟!!!
عبدالرحمن:ههههه...الله يوسع صدرك يامحمد مافي سالفة تاخذها جد؟؟المهم العروس بالبيت؟؟
محمد:إيه..ليش؟؟
عبدالرحمن:بعد إذنكم ..أنا قريب من البيت وكنت بأمر ثواني أعطي اسمهان شي..!!بس أبوك مارد على اتصالي..
محمد:مو الله يسلمك عندنا عشاء عائلي الليلة..تفضل!
عبدالرحمن:زاد الله فضلك..بس أنا مستعجل قلت أمر على السريع وأسلم على اسمهان وأعطيها غرض وأمشي....
محمد:ياحليلك..على طول من ثاني يوم رحت تجيب لها شي؟؟؟باقي قدامك سنة! يعني لاحق على الفَلَسْ!!!مابيجي الزواج إلا وإنت تشحت على أبواب المساجد!!
عبدالرحمن:ههههه..أنا راضي مو خسارة في سمهونتي!المهم مابأطول عليك عطها خبر وخلها تقابلني بالحوش ماودي أدخل على أبوك وأحرجه قدام ضيوفه!!!!
محمد:إذن تعال من الباب الخلفي ولاتدق جرس أنا بأنتظرك وأفتح لك الباب...
عبدالرحمن:ان شاء الله..وهذا أنا قريب منكم...
وراح محمد ينادي اسمهان وقال لها اطلعي لي بالحوش الخلفي..خرجت اسمهان لحديقة الحوش وكان عبدالرحمن قد وصل وجلس على كرسي بحديقة البيت بس اسمهان مو منتبهة ومحمد يبي يفاجأها وليته مافاجأها!!!!(كالعادة فشااااااااااايل!!!)
شافت اسمهان محمد ووقفت قدامه وعبدالرحمن كان وراها قاعد على الكرسي تحت الشجرة وهي ماتدري!!!
اسمهان:خير يامحمد؟وش بغيت؟
محمد:أبد..عبدالرحمن يبي يزورك الحين..قلت أشوف رايك؟نستقبله والا أزحلقه لك؟؟؟؟
اسمهان:تتكلم بجد؟؟؟؟؟
محمد:إيييييييه ماأمزح!
قامت اسمهان تنط وتقول:هيييه هييييه دحومي بيجي عندي..ياحظي ومنهو قدي..(وتنط أختنا في الله موب دارية مين وراها)!!!
ارتبك محمد من خبال أخته وقال:يعني بتستقبلينه؟؟
اسمهان:مايبي لها كلام أكيد إيه!فرصة مادامي كاشخة!
لأني بكرة ودي أزيت شعري بعد ماخربته الكوافيرة أمس بالإسبريه!!!!
ساعتها عبدالرحمن ماقدر يتمالك نفسه من الضحك وقال:ههههههههه..ياشيخة انتي حلوة بزيت أو بزبدة!
اسمهان(بخرعة):عبدالرحمن؟؟؟؟؟؟
عبدالرحمن:بشحمي ولحمي!وجيت أسلم عليك وأتطمن على أخبارك...
محمد:بأعطيكم فرصة تقعدون مع بعض لمدة 5 دقائق وعقبها سأضطرلتوديعك..لأن أبوي لو درى بيغسل شراعي!!!!
عبدالرحمن:هههه..إبشر..
وراح محمد..وسلم عبدالرحمن على خطيبته..وقال لها:
مو معقول مايكون بيننا تواصل طول هالمدة عشان كذا جيت أشوفك اليوم وجايب معي هدية تتذكريني فيها وأتمنى تعجبك!
اسمهان:الله يعطيك العافية..بس ماله داعي أبداً هالكلفة تعبت نفسك!
عبدالرحمن:خلاص!مادام ماتبينها هاتيها أعطيها أختي أحلام!!!
اسمهان سحبت الكيس من عبدالرحمن بقوة وقالت:اشفيك انت الله يهديك؟على طول صدقتني!أبيها!
عبدالرحمن:خلاص لاتفكينها إلا إن رحت...ومابأقدر أجلس معك أكثر من كذا عشان ماأسبب لك إحراج..
وودعها.....وظلت نظرتها تتبعه لين ماخرج من الباب..ودخلت اسمهان البيت وراحت تركض على غرفتها فوق..وفتحت الكيس..لقيت جوال والشريحة بداخله في علبة أنيقة جداً ومعاها كرت كبير فتحته لقيت فيه صورة حلوة لعبدالرحمن وبالصفحة المقابلة كاتب هالكلمات:
إذا يهمِك أمري..اتصلي على هالرقم(0؟؟؟؟؟؟؟؟؟؟050)
من فرحة اسمهان بالهدية مسكت الجوال واتصلت على طول.....
عبدالرحمن:ياهلا وغلا.....
اسمهان:ياهلا فيك....ومشكور حيـــــل على الهدية الحلوة..
عبدالرحمن:اتصلتي بسرعة غير متوقعة!!كل هذا شوق؟؟؟
انحرجت اسمهان وحست نفسها خفيــــــــفة وقامت ترقع الموضوع وقالت:لا...بس بغيت أجرب الجوال!!!
عبدالرحمن:هههههه...فديت الثقيل اللي كان يطامر قبل شوي بالحوش..من فرحته بزيارتي!!
اسمهان(وصل فيها الاحراج للقمة وماعرفت اش تقول):كيف الوالدة وأختك أحلام؟
عبدالرحمن:بخير..ماعليهم..انتي قولي لي اش رايك بصورتي؟؟؟؟؟
اسمهان(ببكش!):عادية...مش بطالة!
عبدالرحمن:شفتك البارح ماحبيتي الثوب والبشت والشماغ...قلت خلك تشوفيني سبوربالبنطلون والتي شيرت!!
اسمهان(تبي تثقل شوي):امممم...طيب..هل عندك كلام ثاني؟؟لأني مشغولة بالضيوف!!!
عبدالرحمن:لا. . .ماأبي أعطلك عن ضيوفك.. في أمان الله...
اسمهان:في أمان الله....
وقفلت اسمهان الخط ومسكت الجوال وحضنته بلهفة مو مصدقة انه صار عندها هاتف خاص فيها!!!!
أما عبدالرحمن قعد يفكر بعد ماانتهت المكالمة!اشفيها هاالبنية ماتتجاوب معي بشكل كبير حيا ولا جفا؟؟؟؟؟مع انه الواقع يقول انها ببعض تصرفاتها خفيفة شوي!!بس يلا الثقل صنعة!!!!
واسمهان من فرحتها راحت تتصل من جوالها على تلفون رانية الثابت؟....
رانية:مرحبا....
اسمهان:مراحب..رنون شلونك؟؟؟
رانية:طيبة..بس خير وش عندك؟؟قبل كم ساعة كنا نكلم بعض!هل استجد شي؟؟
اسمهان:إيه..باركي لي!
رانية:مبررررروك بتتزوجين بكرة؟؟
اسمهان:يادمك!! أملك أمس وأتزوج بكرة؟لا ياعيوني الدنيا لسه بخير!!
رانية:أجل أبارك على وشهو؟؟
اسمهان:صار عندي جوال!!!!!!!
رانية:مسرع!!! مو كنتي أمس حافية ومنتفة وماعندك غير تلفون العيلة الثابت؟!من وين جاك جوال؟؟؟
اسمهان:مايبي لها سؤال ياذكية!خطيبي أهداني اياه اليوم!
رانية:ماشاء الله ماعنده وقت!على طول زارك اليوم؟؟صدق إنه خفيف وطاح باللي أخف منه!!
اسمهان:مالت عليك!بدل ماتباركين لي تتريقين علي.....
رانية:مبروووووك...هاتي رقمك أخزنه بجوالي!
وعاد رانية عندها جوال شاريه أبوها من السنة الماضية هدية لها!!
وشوي وافتقدوا الكل اسمهان وقاموا ينادونها وراحت لهم....
رجعت اسمهان لضيوف العزيمة ولاقالت لأحد نهائياً بزيارة عبدالرحمن وهديته...ومحمد كذلك ماقال لأحد شيء.....
وبعد ماراحوا الضيوف جلست أسماء وابتسام وأمهم وسماح يسولفون عن أحداث الملكة اللي صارت الليلة السابقة وكانت يوم الأربعاء...
اسماء:أما صاحباتك يااسمهان مسخرة!!رفعوا ضغطي برجتهم..ماتقولين إلا المناسبة مناسبتهم!
سماح:بالعكس أحلى شي بالملكة كان وجودهم فاجأونا بحركة الزفة والفرفشة اللي سووها طول الملكة....بس لي عتب عليك يااسمهان خليتي الغُرب يلبسون مثلك ويطقمون معك؟؟لو قلتي لنا أنا وابتسام وأسماء نطقم معك كان طلع أحلى!!!
اسمهان:أنا ماقلت لأحد شيء الأمر كان مصادفة!
أسماء:الله أكبر على البكش!
سماح:إلا تعالي يااسمهان..أمس محمد قال لي سالفة قعدت أضحك منها طول الليل!بس محمد أخوك مزحه واجد ومرات ماأصدقه!صحيح إن العريس طقك أمس؟؟؟؟؟ههههههه
ابتسام:إيه صحيح...تصدقون؟؟هههههه
سماح:الله ياخذ ابليسه!وليش ياحافظ؟يتدرب عليك قبل العرس؟؟هههههههههه
أسماء:علمتني أمي بالسالفة...إلا من زود الطفاقة بوجه الفقر هذي ماانتظرت تملأ بطنها إلا بوجوده وتستاهل خذت على راسها!!
اسمهان:أقول تصبحون على خير..ماعندكم سالفة ياحبكم للتطمش والتمسخر..مافي سالفة بالملكة كلها إلا سالفة شرقتي؟؟!
وطلعت اسمهان..مو من زود النوم إلا عشان تجرب الجوال الجديد..وأعطت عبدالرحمن رنة واتصل على طول..وقضوا الليل بسواليف وماحست اسمهان بالوقت وكانت اسماء وسماح قد رجعوا بيوتهم وابتسام راحت تنام والأب طالع غرفته ينام إلا طالع بغرفة اسمهان لقى الباب مصكوك والزجاج المعشق اللي عليه يوضح إنه في نور بالغرفة!واقترب من الباب وسمع صوت ضحك اسمهان..وفتح الباب عليها إلا أختنا في الله مبطوحة على السرير على بطنها وتلعب بشعرها الطويل وتسولف بالجوال وتضحك!!!
صاح أبوها بصوت عالي:بنـــــــت!مين تكلمين؟
اسمهان من خرعتها قفلت الخط وقامت وقالت:أكلم خطيبي!!
أبواسمهان:ومن وين لك جوال؟؟
اسمهان:عبدالرحمن أهداني إياه!
أبواسمهان:متى؟؟
اسمهان:اليوم!
أبواسمهان:ايشششششش؟!شلون اليوم وأنا وين كنت؟؟
اسمهان:إنت كنت مع ضيوفك بالمجلس وهو اتصل عليك بس إنت مارديت..
أبواسمهان:ويعني مارديت..يجي بيتي غصب عني؟؟؟؟وإش دراك انه بيجي؟وكيف؟
ووين؟تستغفلوني حضرتكم؟؟
اسمهان:صدقني يبه ماكنت أدري عن شيء..محمد هو اللي ناداني وقال لي إن عبدالرحمن اتصل فيه ويبيني دقايق بالحوش..سلم علي وعطاني الجوال وراح!!
أبواسمهان(بعصبية):خوش تربية والله..بدل ماتقولين له..ماأقدر أسوي شي إلا بعلم أبوي؟وأخوك محمد هذا حسابه عندي بعدين!
إلا أم اسمهان سمعت الهواش وكانت طالعة تنام وجت ركض لغرفة اسمهان..
الأم:خير؟؟وشفيكم تتهاوشون بنص الليل؟؟
أبو اسمهان:تعالي شوفي يامدام بنتك المصون تستقبل عريس الغفلة ببيتي ومن وراي وأنا آخر من يعلم!!!
الأم:أعوذ بالله! مين قال؟؟
أبواسمهان:لاتقولين..إنك حتى انتي ماتدرين؟؟
الأم:إيه وربي ماأدري!متى وكيف؟ وبعدين جوال مين هذا اللي بيدك يابنت؟؟
أبواسمهان:كملت!يعني من ورا ظهورنا طبختيها انتي ومحمد؟؟مايخالف حسابه عندي بعدين هاالمحمد!وخطيبك لو اتصل فيك مرة ثانية قولي له أبوي زعلان عليك!!!
وخرج الأب من الغرفة وهو زعلان.
.....الأم:الله يهديك يابنتي..لازم تجيبين لنا الكلام؟ترى أبوك بكل كلفة وافق إن ملكتك تصير الحين..لأنه مايبي كثر الكلام والزيارات!!
اسمهان(وهي تبكي):يمه.انتوا تحسسوني كأني قاعدة أكلم واحد من الشارع!ماكأن اللي أكلمه هذا زوجي شرعاً وبكرة بيضمني معه بيت واحد!
الأم:بس الوحدة تثقل..ترى كثر الكلام يجيب وراه غلطات ومشاكل تخليه يمل منك بعد وقت..يازين الثقل اللي يخليه هو اللي يتمنى يسمع منك كلمة! وش عليه مستعجلين؟قدامكم سنة وأشهر!
وخرجت الأم من الغرفة وهي متضايقة..لأنها دارية ان الأب بيرجع ويكمل معها الموشح!!!!
واسمهان قعدت تذرف دموعها لين غلبها النعاس..وعبدالرحمن بما إنه سمع أبوها يوم صاح فيها حس إنه في شي...وفضل إنه مايتصل إلا باليوم الثاني..
|
|
|