|
|
قصص و روايات أسمهان وعبدالرحمن قصة أسرية هادفة بكل اجزاءها متتابعة روآية سعودية يوجد هنا أسمهان وعبدالرحمن قصة أسرية هادفة بكل اجزاءها متتابعة روآية سعودية روايات Novels و تحميل روايات و قصص روايات حب سعودية روايات احلام و عبير رومانسية عربية روايات عالمية كاملة للتحميل روايات رومانسيه احلام و عبير و قصص مضحكه قصص حزينه قصص رومانسيه حكايات عربية و قصص الانبياء افضل قصص مفيدة قصص سعودية خليجية |
|
#29 | |
|
رد: أسمهان وعبدالرحمن قصة أسرية هادفة بكل اجزاءها متتابعة روآية سعودية
صحيت اسمهان ثاني يوم من النوم على آذان الظهر ومالقت عبدالرحمن جنبها وفتشت عنه ولقيته قاعد بغرفة المكتب ومقابل اللاب توب طالعت بالشاشة وقرأت عنوان الموضوع اللي جالس يكتب فيه وكان بعنوان(تاريخنا الإسلامي والتأرجح بين الضعف والقوة!!) عبدالرحمن:بسم الله الرحمن الرحيم!!لا إحم ولادستور؟؟ اسمهان:قاعدة أطالع وش كاتب!بالله اش دَخَّل المراجيح بالتاريخ الإسلامي؟ عبدالرحمن:أقول يازين المطبخ!روحي اطبخي لنا غداء لذيذ من يدينك الحلوة! خرجت اسمهان من المكتب وهي تفكر بنفسها:متعب نفسه عبدالرحمن مدري هل هو يفهم اللي يكتبه والا يكتب اللي يفهمه؟ وطبخت اسمهان ايدام خضار+رز أبيض..ومعاها سلطة.. وقعدوا يتغدون..صار عبدالرحمن يطالع باستغراب في الإيدام.. اسمهان:خير؟أول مرة تشوف ايدام؟؟ عبدالرحمن:الصراحة خليتيني بـ حيرة!هذا ايدام ولا مرق لحم؟؟ اسمهان:لا إيدام! عبدالرحمن:ايه.. بس ياقلبي أنا شايف ماي مخلوط معاه صلصة والخضار قاعدة تسبح!! اسمهان:ياخي ماتعرف تمدح؟ عبدالرحمن:و ربي لو قدامي شي يستاهل المدح كان مدحته!يعني أقدر أقول لك السلطة طعمها حلو! اسمهان(باستهزاء):ههههههه وانتهوا من غداهم وراح عبدالرحمن يتجهز للعمل واسمهان تنظف المطبخ... عبدالرحمن:إذا شفتي نفسك زهقانة من البيت انزلي عند أمي تقهوي معاها.. اسمهان:ان شاء الله..بس تصدق إني مليت من القعدة بالبيت؟؟ عبدالرحمن:مايخالف..مدام بكرة الأربعاء بآخذك معاي وأنا رايح للعمل وأوديك عند أهلك وأنا راجع أمر آخذك... اسمهان(بحماس):خوش فكرة! وبعد ماراح عبدالرحمن للعمل دخلت اسمهان تنظف غرفة النوم ولقيت الدفتر السماوي على التسريحة ومكتوب بأول صفحة.. زوجتي العزيزة...مامعنى المصطلحات الآتية:الإحصار-الترجيع-الإضطباع-العج والثج؟؟؟ قالت اسمهان:يمه!وش هالكلمات الغريبة أول مرة تمر علي!أخاف أبحث عنها بالنت وتطلع لي مواقع للجن وأروح فيها!!! وبعد ماانتهت من شغل البيت قعدت على النت وبحثت عن معاني هالكلمات وكانت الإجابة: الإحصار:هو عدم التمكن من أداء أو إتمام مناسك الحج أو العمرة بسبب مرض ونحوه... الترجيع:أن يقول المرء الشهادتين سراً في نفسه ثم يقولها جهراً.. الاضطباع:هو طريقة لبس المحرم للرداء...بأن يلبسه تحت منكبه الأيمن ويلقيه على عاتقه الأيسر ويبقي كتفه الأيمن مكشوف.. العج:هو رفع الصوت بالتلبية باعتدال.. الثج:هو إسالة دماء الهدي(الذبح) ======= وعن طريق البحث في معاني الكلمات السابقة اكتشفت اسمهان انها قابلت كلمات كثيرة أول مرة تعرف معانيها.. بعد المغرب اتصلت أم اسمهان عليها وبعد السلام.. الأم:انتي ببيتك يااسمهان؟؟ اسمهان:ايه يمه.. الأم:وش قاعدة تسوين؟؟ اسمهان:أبد ..رتبت البيت..وقرأت مواضيع بالنت وهالحين دخلت المطبخ أسوي شاي وأجلس أشربه على رواق! الأم:طيب اش رايك لو نمر أنا وابتسام عليك؟..من العصر وحِنا بالسوق..وتونا خلصنا وشفنا نفسنا قريبين منك قلنا نمر عليك شوي! اسمهان:ياهلا ويامرحبا..تعالوا أنتظركم! الأم:خلاص ربع ساعة ونكون عندك.. وقامت اسمهان تبخر البيت وتسوي القهوة وتجهز الأكل والحلى اللي بقى من أمس... وغيرت ملابسها..وشوي ودق الجرس عليها... رحبت بأمها وابتسام وبناتها الصغار اللي من يوم مادخلوا قاموا يستكشفون البيت ويعيثون في الدنيا فساداً... واسمهان قاعدة مع أختها وأمها وقلبها على بيتها اللي قاعد ينعفس! وبعدالسواليف..قالت ابتسام:ماباركتي لي ياسوسو؟؟ اسمهان:مبروك..بس على إيش؟بتشترون بيت تمليك؟؟ ابتسام:لا..أنا حامل! اسمهان:مبررررررررروك... ابتسام:ادعولي بس أجيب ولد وأفتك من لسان أم زوجي!! أم اسمهان:يابنتي البنت والولد صاروا مثل بعض بهاالزمن أهم شي الصحة والعافية..والله يامحبة ولدي محمد ماتتخير عن محبتي لكم.. وشوي وسمعوا صوت تكسير!قامت اسمهان تركض ولقيت بنات ابتسام دخلوا غرفتها وكسروا لها لمبة الأبجورة اللي على الكومادينة!!! مسكتهم فرصت أذانيهم وطلعتهم من الغرفة!! ورجعت لابتسام وأمها تصب لهم القهوة إلا بنات ابتسام سحبوا كل الشوكولاتة اللي بالسَبَت وأكلوها!وناولت اسمهان أختها ابتسام فنجال القهوة اللي صبته بس بنات ابتسام كانوا يدورون بالغرفة فكبوا الفنجال على المفرش وتوسخ!وطاح الفنجال وانكسر... خاصمتهم اسمهان.. هيفاء:مالك شغل!نبغى نلعب! سارة:أنا أقول لبابا إنك قرصتي إذني قبل شوية!! اسمهان:وتبين تخلفين ياابتسام! اللي عنده عيال من هالشاكلة المفروض يسوي عملية ربط!!! ابتسام وأمها:ههههههه ابتسام:حرام عليك ياالظالمة والله هالعصفورتين هم نور البيت!! ودارت شوية سواليف وجاء زوج ابتسام وأخذهم ورجعوا البيت وقعدت اسمهان ترفع البيت من جديد...عقب بنات ابتسام مارموا الخداديات على الأرض ونزلوا التحف من أماكنها..وحالة!! قالت اسمهان بنفسها:مرة ثانية بأعلق لوحة على الباب مكتوب فيها(ممنوع اصطحاب الأطفال!) ومرت عدة ساعات وجاء عبدالرحمن من العمل وظل يتناقش مع اسمهان بمعاني المصطلحات اللي جمعتها... ===== اليوم الثاني وعبدالرحمن رايح للعمل في الظهر أخذ اسمهان معاه ووداها لأهلها وكانوا ينتظرونها تتغدى معاهم..أما عبدالرحمن تغدى في العمل.. وفي العصر جات أسماء واستمرت الجلسة بالسواليف إلى الساعة 11 بالليل وحكت لهم اسمهان يومياتها وعن فشلها في الطبخ.. الأم:وعلى ايش خليتينا نخسر ونشتري لك كتب بذيك الحسبة؟؟ ابتسام:صادقة أمي..لو تطبقين الوصفات بحذافيرها تنجح الطبخة معك.. أسماء:تستاهلين بقوووووووة!!ياما ترجيتك تدخلين المطبخ وتتعلمين لك شي مفيد وترفضين..البلا لو بكرة فكر زوجك يعزم أمه وأخوانه عندك كيف بتكون سواتك؟؟ اسمهان:تصدقون مافكرت فيها؟؟ ابتسام:وترى الرجَّال بيجاملك بأول شهرين وممكن يجيب من مطاعم بس عقبها بيمل وبيعطيك من النقد والخصام على راسك..بصراحة الواحد يحق له هو ماتزوج عشان يقعد ياكل من مطاعم ياعالم شلون نظافة أكلهم!!! أسماء:زيدي على كذا إنه أكل المطاعم مو بلذة أكل البيت أبداً..ببيتك تقدرين تتفننين بأحلى وصفات حلى وموالح..مو مثل الأكلات الجاهزة الخيارات محدودة وماهي بذاك الزود... الخ........ وبعد نهاية عمل عبدالرحمن أخذ اسمهان للبيت.. وقبل ماينامون قال عبدالرحمن: اش رايك بكرة الخميس نعزم أبوك وأخوك محمد وأزواج أخواتك وأهلي وأهلك عندنا..إلى الآن أبوك مادخل بيتنا! اسمهان:فكرة حلوة..بس أنا نفسي أطلع أتمشى.!!! عبدالرحمن:ملحوقة الخرجة ان شاء الله..نطلع الجمعة..وبكرة خلينا نسوي عزيمة بالمرة يفرح عبدالرحيم بمناسبة نقل عمله لجدة...اتفقنا؟؟ اسمهان:اتفقنا... جاء يوم الخميس واسمهان من أول اليوم وهي تفتح كتب الطبخ وتحوس بين الوصفات عشان تسوي حلى مع القهوة!! جاء عبدالرحمن وقال:كلمت الجميع وعزمتهم وبإذن الله بيجون بعد المغرب..وعلى فكرة أمي عرضت علي ترسل الشغالة لك عشان تساعدك في الشغل.. اسمهان:إيه تكفى أنا بحاجتها..حتى أمي كلمتني وقالت لو تبين كاتيا؟ نرسلها لك...بس انحرجت وقلت لها:شكراً الله يعطيك العافية.... عبدالرحمن:أهم شي عندنا بن وهيل وتمر ولوازم الشاي من سكر ونعناع وغيره؟؟ اسمهان:إيه..بس الورطة واش أطبخ على العشاء؟ماشاء الله أهلي وأهلك قبيلة!!! عبدالرحمن:ايش..ايش؟؟ماسمعت!انت ي من صدقك بتطبخين لهم العشا؟؟...حبيبتي هذول أهلنا وعزوتنا حرام نخليهم فيران تجارب لطباخك!!!أنا هالحين رايح أحجز كوزي فاخر في أحسن مطبخ ذبايح.. اسمهان:أشوى!الله يطمن قلبك!كنت شايلة هم من الليل..وماعرفت أنام زين!!إذن بأسوي كم صنف حلى مع القهوة وأقدم معاها سبتات الشوكولاته اللي عندنا...والتمر.. خرج عبدالرحمن..وجات (سيري) شغالة أم عبدالرحمن تساعد اسمهان..وكانت واقفة تغسل مواعين بالمطبخ وتنظف..وكانت الشغالة تراقب اسمهان وهي تسوي حلى وتخبص خبيص!! سيري:مدام اسمهان أنا يئرِف يسوي هلى كويس مرة!! اسمهان:صحيح؟مثل إيش؟ سيري:ماما أم أبدورهمان لما في إيجي ديوف أنا أسوي كله هلى..أنا يئرف سوي(تشيزكيك-هلى كيري-هلى كورن فليكس-قوالب بسكوت بالتوفي-بسبوسة-كنافة)..... اسمهان:الله أكبر عليك!كل هذا تعرفين تسوينه ومخليتني أحوس من أول؟!!!زين افتحي دولاب المعلبات وسوي الحلى اللي تبينه ومقاديره متوفرة.. وبدأت الشغالة تسوي أكلات ودق تليفون اسمهان وراحت ترد..إلا طلعت المتصلة ابتسام... ابتسام:هلا سمهونة..شلونك؟ اسمهان:ماشي الحال... ابتسام:طبعاً من غير ماأسألك..أكيد حايسة؟؟ اسمهان:نوعاً ما... ابتسام:طيب بغيت أقول لك..اش تحتاجين مساعدة؟؟تبين أسوي لك حلى؟؟ اسمهان:لاتسلمين..دبرت نفسي ابتسام:زين..جهزتي السلطات؟؟ اسمهان:يووووه تصدقين ماخطر في بالي؟!! ابتسام:زين إني ذكرتك!بس انتي سوي على قد الخضار الموجودة عندك وأنا بأسوي نوعين سلطة وأجيبهم معاي..وعلى فكرة أسماء كلمتني بتجيب معاها ترمس قهوة وسماح بعد بتجيب..انتي سوي واحد بس... اسمهان:الله يسعدكم..تسلمون.. وبعد ماانتهت المكالمة راحت اسمهان بالخضار المتوفرة عندها سوت 3 أنواع سلطة.. ================ في بيت أبوعبير كان الأخوين سعد(بأول ثانوي) وسامي(بثاني متوسط) جالسين وهم بقمة الزهق والملل..ينتظرون أبوهم.. ولما رجع من عمله... سعد:أبوي نبي نتكلم معاك.. أبوسعد:تفضلوا اش عندكم؟؟ سعد:الصراحة يبه..إحنا مو مرتاحين لهذي الحياة في البيت! أبوسعد:و ليش؟؟ سعد:يبه كل يوم نتغدى ونتعشى من مطاعم وملابسنا نغسلهم ونكويهم برة..وانت طول اليوم برة البيت أو مسافر..ومافي أحد يراعي أمورنا!!! أبوسعد:والمطلوب؟؟ سامي:إنت أدرى يبه!!! أبوسعد:مو أمكم لو فيها خير كان صانت بيتها وحافظت عليه وماوصلتنا لهاالمواصيل!!! سامي:يبه اللي صار صار..إحنا نفكر باليوم... سعد:يبه..احنا قررنا إننا نروح الرياض ونعيش مع أمي وعبير!!! أبوسعد:ايـــــــش؟؟انتم ماتستحون؟أمكم وأختكم قاعدين ببيت خالكم عثمان..وخالكم عثمان عنده فرقة بنات!ناقصينه انتوا؟؟ سعد:يبه..إنت ربي فاتحها عليك وتقدر تجيب لنا أحسن بيت في الرياض! أبوسعد قام يطالع بـ سامي وقال:وإنت؟اش رايك بكلام أخوك؟ سامي:يبه..أنا رايي من رايه!إنت سفرياتك كثيرة ومافي أحد يداري أمورنا ويراعيها..ومومتفرغ لنا مثل أمي..يكفي إنها من يوم ماطلقتها ماوديتنا نزورها ولامرة!!!! أبوسعد:خلاص أفكر بالموضوع والله يعين!! ودخل أبوسعد ينام لكن الموضوع ظل شاغل باله..وقرر إنه يحزم الأمر ويكلم عثمان الأخ الأكبر لأم عبير! وبالفعل اتصل عليه وسلم... أبوسعد:الحقيقة ياعثمان أنا بغيتك بموضوع.. عثمان:تفضل ياأبوسعد.. أبوسعد:عمارتك اللي انت ساكن فيها..هل متوفر فيها شقة فاضية؟ عثمان:حالياً لا..بس عقب أسبوعين فيه شقة بيطلعون المستأجرين منها..بس إنت ليش تسأل؟؟ أبوسعد:الحقيقة أنا مقدر ان وضع أختك وبنتي عبير عندك بالبيت صعب! عثمان:أفا عليك وش هالكلام..أم عبير أختي ومن لحمي ودمي وعبير مثل بناتي بالضبط! أبوسعد:بس أنا محتاج الشقة عشان أولادي بعد يبون يعيشون مع أمهم..ومو معقول بأخليهم يشاركونكم بنفس البيت!وأجار الشقة بتاخذه مني مثلي مثل أي مستأجر يجيك!! وبعد أخذ وعطا وافق الخال عثمان على هالاقتراح ووعد أبوسعد إنه إذا طلعوا المستأجرين يكلمه عشان يجي يستأجر ويجيب الأثاث وراح الخال عثمان وفاتح أخته أم عبيربفكرة أبوسعد.. أم عبير:وسعد وسامي اش اللي يجيبهم يعيشون بالرياض؟؟أكيد هالخبيث سواها وراح خطب ووده يطردهم عشان يخلى له الجو!!! عثمان:اتقي الله ياشيخة..هالفكرة أصلاً مو فكرته!الأولاد هم اللي أصروا يجون هنا وبالذات إن أبوسعد سفراته كثيرة والأولاد لاتنسين انهم مراهقين ويبي لهم من يهتم بأمورهم!!! أم عبير:وهالأنذال توهم يعرفون قيمتي؟؟وأنا من يوم تطلقت وجيت الرياض ماواحد منهم رفع علي سماعة!!خلهم ينطقون ببيت أبوهم!أنا ماأبيهم!!! عثمان:لاحول ولاقوة إلابالله..الظفر عمره مايطلع من اللحم!وهذا بدل ماتفرحين إن شملكم بـيلتم مع عيالك؟؟ عبير:يمه...هذي فكرة زينة..وبيسير لنا بيت بروحنا وأبوي بيتكفل بكل شي من ايجار وأثاث واش تبين أحسن من كذا؟؟ أم عبير بداخلها صارت تفكر وتقول:شلون مافكرت فيها هذي؟فرصة أرجع كل قرش سحبه مني!!!! ========= بدأت عزيمة اسمهان بحضور الضيوف أخواتها+سماح+أم زوجها+أم تركي وهند والرجال أبوها وأخوها وأزواج أخواتها وأخوان زوجها وتركي... وأهلها كانوا جايين ومحملين بالهدايا لبيتها... ولما دخلوا بنات ابتسام مسكتهم اسمهان على جنب وأعطتهم كاتيا وقالت:هذول الثنتين تربطينهم جنبك ولو خربوا لي شي بالبيت انتي اللي بتتسطرين بدالهم!!! كاتيا:ههههه..أوكيه مدام.. أما سماح جات هي وهند من غير عيالهم لأنهم خلوهم بالبيت نايمين ومعاهم الشغالة... اسمهان:ليه ماجبتي أولادك ياسماح؟؟بنات ابتسام هنا خل يكمل الطقم مرة وحدة!!! سماح:لاياحبيبتي!أنا أدري إن العرايس يتضايقون دايماً من الأطفال الصغار!! وكانت الجلسة حلوة والكل يسولف وشافوا أهل اسمهان أنواع الحلى مزينة الصحون واستغربوا!! أما أم عبدالرحمن عرفت انه شغل خادمتها سيري!! أسماء وهي تهمس لاسمهان بوسط المجلس:بِس بِس! اسمهان:خير؟؟ أسماء(بصوت منخفض):هالحلى شغل مين؟؟ اسمهان:شغل إيدي طبعاً! أسماء:الله أكبر!والله لو تفحطين ماسويتي مثله!! اسمهان:عبدالرحمن سوَّاه!! أسماء:ياشيخة؟؟الرِجال حطيهم عند الشوي..وش فهمهم بالحلى؟ اسمهان:يختي شغالة خالتي سوت الحلى..ارتحتي؟؟ أسماء:آه يالخايبة!تعزمين خالتك أول مرة على أكل شغالتها؟؟ اسمهان:أوووف!!! وقامت تباشر على الضيوف.. وقبل العشاء راحت تعبي صحون الفاكهة وتغرف السلطات..وتجهز السُفر.. وانحطت تباسي الكوزي الفاخرة على السفرة وهي مزينة باللحم والمكرونة والمكسرات والبيض المسلوق والخضار..بالإضافة للسمبوسة..وصحون ايدام بامية وايدام رجلة من المطعم...والسلطات والفاكهة وقوارير موية الصحة والمشروبات الغازية... أم تركي:الله يعطيك العافية يابنتي..ماشاء الله بنات هالزمن مرتاحين بعزايمهم..مو مثلنا قبل كان أبوتركي يذبح الذبيحة في البيت ويصلخها ويعطيني اياها أطبخها!! أم عبدالرحمن:لاالحمدلله ماقد طبخت ذبايح بس أبوعبدالرحمن الله يرحمه زمان كان يطبخها بنفسه ومع الوقت صرنا مانجيبها إلا من برة..بيني وبينكم ألذ وأريح..الواحد وده يقابل ضيوفه لازاروه..مو يقضي ليله بالمطبخ! أم تركي:صدقتي ياوخيتي..أصلاً الناس اختلفوا وظروف الحياة ماهي بمثل أول..الناس تدور على الشي السريع والراحة..أنا لو يصير ببيتي عزيمة هالحين ماعرفت أتصرف من دون بناتي!ولاكأني ذيك اللي كنت أحط وأشيل من قبل!! أم اسمهان:ومين سمعك!بعد كل زواج أو ملكة لأحد من عيالي رجولي تظل تآلمني أسبوع..الصحة صايرة يارب لك الحمد..يالله حسن الختام بس! أم عبدالرحمن:صراحة مافي أزين من القعدة بشمس الصباح وشمس العصر...تنعش القلب وتشد العظم..والهوا الرباني أحسن من هواء المكيفات اللي يدخِل علينا غبار.. أم اسمهان:ماشاء الله تبارك الله ياأم عبدالرحمن إنتي أحسن مني ومن أم تركي!أنا حاطة حيلي بالأكل عشان كذا منتفخة!وأم تركي حارمة نفسها لين ماصارت مثل العود! أم تركي:أنا هذي طبيعتي أكلي قليل وجسمي ضعيف..ماتشوفين عيالي كلهم طلعوا لي.. وقاموا يتناقشون عن الأجسام والأكلات ولما انتهوا من الأكل وقاموا يرفعون السفرة جت سماح تساعد اسمهان في رفع تبسي الرز بس صاحت فيها هند:سمـــاح!لاتشيلين شي ثقيل حرام عليك!خلي الشغالات يشيلون! سماح:يوووه نسيت! اسمهان:خير؟اش السالفة؟ سماح:أنـــــــا...عقبال عندك حامل بشهرين.. اسمهان:مبروووك..اش سالفتك انتي وابتسام تتنافسون؟؟ سماح:لا تنافس ولاشي..السالفة جت كذا من غير تخطيط!وبيني وبين ابتسام أسابيع بس أناسابقتها.. اسمهان:يالله ان شاء الله ربي يرزقكم بنية حلوة مثلي!! سماح:هههه لو تدرين ياسمهونة عن أخوك محمد..أول ماعرف إني حامل قال ان كانت بنت بأسميها اسمهان!وإن ولد بأسميه عبدالرحمن!!! اسمهان:فدييييييته هالحمود كله ذوق.. ورجعت اسمهان خلت شغالة أهلها وشغالة أم عبدالرحمن يرتبون المطبخ وجلست مع ضيوفها!! وناداها عبدالرحمن.... اسمهان:نعم؟ عبدالرحمن:وين الشاي الله يهديك؟صار لنا ربع ساعة من يوم قمنا من فوق العشا!! اسمهان:ماسويت!!بس اش تبون؟شاي أخضر ولا أحمر؟؟ عبدالرحمن:الله يصلحك يااسمهان المفروض مويةالشاي تكون على النار من قبل العشا وعلى نار هادية ومواعين الشاي زاهبة بالصينية!!هيا بسرعة عجلي علينا! ودخلت تسوي الشاي للرجال والحريم ونست تحط سكر! وصب عبدالرحمن الشاي لضيوفه ويوم جاء يشرب لقي الشاي مُر! ودق على اسمهان وطلب سكرية! ومرت العزيمة على خير الأمهات الثلاث يسولفون سوى وهند وأسماء سوى واسمهان وسماح وابتسام سوى!! أما في مجلس الرجال كان الحوار يدور عن أشياء مختلفة منها... أبواسمهان:ياولدي ياتركي الشباب هالحين صاروا يتأخرون عن الزواج بسبب الظروف الاقتصادية والمعيشية الصعبة..بس انت ماشاء الله عليك مو قاصرك شي..ليش قاعد تِضيعْ الأيام؟؟خل أمك تفرح بعيالك على الأقل!! تركي:كل مافكرت بالموضوع تراجعت عنه..ان شاء الله الأيام الجاية بتتيسر! عبدالرحمن:مدري ليه عندي احساس إنه لاجانا بنت وكبرت بنلاقيك جاي تخطب!أخاف صدق يجي ذاك اليوم وإنت ماتزوجت! محمد:خله يصف جنب ناصر ولد عمه!مضرب عن الزواج ويبيله ضرب على أفكاره المتشائمة عن الحياة الزوجية!! الجميع:ههههههه محمد:إلا صدق وش أخباره ناصر ياتركي؟؟سوى جريمته بأشكالكم ولازدنا شفناه!! تركي:إلا جاء زواجنا بس كان متلثم! محمد:ليييييييش؟ تركي:لأني حلقت شنبه وسكسوكته!! الجميع:هههههههه =========== وخرجوا كل الضيوف وهم يدعون لاسمهان وعبدالرحمن بالبركة.. اسمهان:ها اش رايك في العزيمة يادحومتي؟؟ عبدالرحمن:حلوة..بس الشاي اللي جبتيه ماعرفنا الأخضر فيهم من الأحمر!كلهم نفس اللون!! كانت أم تركي حزينة على أم ناصر وتتذكرها وتتذكر أيامها بس الشغالة كانت متأثرة أكثر لأنها خدمت أم ناصر قرابة الـ8 سنوات والبكاء ذابحها..وفجأة تذكرت الشغالة إنه أم ناصر قبل مايغمى عليها في البيت وصتها تبلغ ناصر إن جرى لها شي..إنه يفتح الدرج المقفول اللي بغرفتها.. أم تركي:وأي دُرج مقفول كانت تقصد؟؟؟ الشغالة:أنا مافي معلوم.. أم تركي:ان شاء الله أبلغ ناصر.. وبالسيارة في طريق العودة للبيت كان تركي وناصر جالسين والحزن لاجم ألسنتهم... ناصر:توي اكتشفت وش كثر أنا أناني وقلبي قاسي؟؟ تركي:ليش هالكلام اللي ماله داعي؟؟ ناصر:لأني مقهور من نفسي كانت أمي تلح علي من يوم ماتخرجت من الجامعة إني أتزوج وأجيب معاي زوجتي تونسها وودها تفرح بعيالي..وبالرغم من أمانيها كنت أفتخر بعزوبيتي وأتطنز بأصحابي اللي يبون يتزوجون وأشوف إنه ماعندهم سالفة..ضارب بكلام أمي عرض الحايط!!! تركي:لاتندم على شي فات..الإنسان تتغير أفكاره مع الوقت.. ورجعوا تركي وناصر من المستشفى في الليل بعد يوم حافل بالأحداث وبعد ماانتهوا من بعض الاجراءات... أم تركي:عظَّم الله أجرك ياناصر.. ناصر:جزاك الله خير.. أم تركي:متى الصلاة عليها والدفن؟ ناصر:بإذن الله بعد صلاة الفجر.. قامت أم تركي حكت له عن موضوع الشغالة والدُرج المقفول.. ناصر:إذن لازم أرجع البيت الحين وأشوف وش سالفة الدُرج! تركي:أقول إقعد تعش معنا.. ونام والصباح رباح.. ناصر:تعشوا انتم بالعافية..أنا مالي نفس..تصبحون على خير.. وخرج من بيتهم وراح لبيته... ودخل غرفة أمه وحس بـ غصة والدموع ترقرقت بعينه وقام يتأمل جدران الغرفة وأثاثها..الغرفة بكل تفاصيلها تذَكره فيها.. وجلس على السرير ودفن وجهه بين كفوفه وقام يبكي... وتذكر كلمات تركي له وهو بالمستشفى يهزه ويقول له:وحِد الله ياناصر..البكاء مابيردها لك..كل ماتذكرتها ادعي لها.. وقال ناصر:الله يغفر لك ويجعل مسكنك الجنَّة... وقام يفتح الأدراج وكانت كلها مفتوحة ماعدا دُرج واحد حاول تركي يفتحه وماقدر..دَوَر مفاتيح ومالقى واضطر يستخدم آلة حادة وانفتح معاه الدُرج..ولقى بداخله صندوق قديم..فتحه وانبهر من الذهب اللي بداخله!! ذهب أمه القدييييم..(الأساور العريضة اللي يسمونها كاسات ولها مصك+رشرش+حزام+6بناجر+قلايد)وتذ كر نفسه زمان يوم كان يقول لها:يايمه وش هالـ تَنَك اللي صاكتن عليه؟؟هاتيه أبيعه وأشري لك أرض؟!!! وكانت ترد عليه وتقول:يانويصر هالذهب مخليته لأيامن سودا مقبلة!!! وغرقت عيونه بالدموع وهو يقول بنفسه:الله يرحمك يايمه..كنتي حاسبة حساب يوم بيجي وأصير فيه بروحي! ============ ثاني يوم بعد الانتهاء من الدفن والصلاة على الميتة وبعد ماشاع الخبر كان الاتفاق بين تركي وناصر إن عزاء الرِجال يكون قدام مسجد الحي اللي فيه بيت ناصر والحريم ببيت أم تركي... وبعد صلاة العصر بدأت وفود المعزين تقبل ومنهم الجيران والأهل والأقارب وأخوان ناصر والجماعة وزملاؤه بالعمل.... وراحت اسمهان وأهلها وأم عبدالرحمن يعزون...ودار كلام كثير بينهم وبين أم تركي...من ضمنه: أم تركي:والله محد كاسرن خاطري بعد ناصر..إلا الشغالة..تبكي عليها بكاء موب طبيعي.. أم اسمهان:ياحليلها صاينة العِشرة..تستهونين بـ 8سنوات مرت عليها وهي ساكنة معاها..يمكن أهلها ماتعلقت فيهم كثر ماتعلقت بأم ناصر.. أم تركي:صادقة ياوخيتي..وأم ناصر الله يرحمها ماكانت تقصر معاها أبد عادتها مثل بنتها..تكرمها وتعاملها أحسن معاملة... هند:مسكينة أكثر شي تفكر فيه الحين والسؤال اللي تسألنا اياه طول الوقت!أنا وين أروح؟؟لأنها تدري إننا كلنا عندنا شغالات ومانحتاجها.. ابتسام:ليش؟هي مالها أهل؟؟ أم تركي:لا..هي يتيمة..وتعودت على الحياة ببلادنا..ببلدها عايشة بقرية فقيرة جداً وجماعتها حتى هم كل واحد بديرة يشتغل ويسترزق.. أسماء:ياليت ياخالتي لو تكلمون ناصر يتنازل لي عنها وينقل كفالتها لنا والله لآخذها وأخليها تشتغل عندي.. أم اسمهان:ايه والله إنها فكرة وهذا انتم شايفين اسماء على وشك ولادة وتحتاج شغالة مخلصة مثل هذي تقوم فيها... أم تركي:ياليت تكونون كسبتوا فيها أجر..بإذن الله أكلم ناصر وأرد لكم خبر... =========== مرت الأيام وانتقلت الشغالة لبيت أسماء...وبعد أيام ولدت أسماء وجابت بنوتة حلوة... ملحوظة:لمعرفة كيفية الصلاة على الميت..يرجى الاطلاع على هذا الرابط للاستفادة: https://www.el3b.com/islam/islamic_school/FIQH/f3-1.html فديييييييتكم من أولكم لآخركم على الاطمئنان والسؤال..وهذا من طيب أصلكم.. ========= بتقولون شلون ولدت أسماء؟؟ السالفة ومافيها إنها حست ببوادر ولادة وراحت المستشفى ومعاها ولدها والشغالة وبعدالفحص تبين انه الرحم مفتوح بمقدار بسيط ونصحتها الدكتورة تمشي وبعدين ترجع لها.. وبالسيارة دار الحوار التالي: أسماء:أقول أحمد اش رايك توديني لبيت أهلي؟نحط الولد والشغالة وبالمرة أمشي في حوش أهلي..بدل ماأرجع للشقة وماألقى مكان أمشي فيه... أحمد:فكرة!وأنا بأروح أكمل أشغالي..ولو حسيتي بشي اتصلي فيني.. ونزلت أسماء بيت أهلها ولقيت أمها وأختها ابتسام يشربون قهوة العصرية..وحكت لهم قصتها... الأم:ماني تاركتك تمشين بس!إلا بأسوي لك قرفة وزنجبيل اشربيهم وقومي امشي!! ابتسام:ولاتنسين العسل الأصلي يمه.. خليها تاكل منه..أبي أفرح بولادتها قبل ماأرجع بيتي! أسماء:ليش؟بتسافرين؟؟ ابتسام:أبشرك..عجوزنا أم زوجي الود ودها تذبحني!مقهورة من جلستي كل هالمدة ببيت أهلي تبيني أرجع عشان تجي عندنا وترابط على قلوبنا!!قال إيش؟ليه ماحضرتي زواج أختك ورجعتي بيتك بسرعة؟؟لك شهر ونص عند أهلك!!الله أكبر عليها كيف تعد الأيام علي عد!! أسماء:موب على كيفها!اقعدي هنا لين ماأطلع من الأربعين!! الأم:يعني لازم من التحريش؟ الحرمة ومشتاقة لولدها وحفيداتها ليش زعلانين انتوا؟؟ ابتسام:أي مشتاقة يايمه؟لو مشتاقة كان قالت له تعال!لكن اتصلت فيني وهزأتني على بالها جارية أنا عندها!!وبعدين اشفيك واقفة بصفها؟؟أخاف يمه متمللة من وجودي عندكم؟؟ الأم:لااا حرام عليك..إلا عوضتيني عن غياب اسمهان عننا..والله مدري وش بأسوي لاسافرتي وتركتيني.. أسماء:لاتشيلين هم يايمه أنا ناوية أقعد فترة الأربعين كلها عندك!!. الأم:الله يحييك... ابتسام:وتقعدين بعيدة عن زوجك كل هالمدة؟؟ أسماء:وخير ياطير؟؟بيموت من الجوع؟والا بيطق من الزهق؟؟خليه يفتك مني وأفتك منه شوي!وبعدين بيت أهلي مفتوح وقت مايحب يزورني ماحد بـ يرده!! الأم:ههههه..خلها تجدد شهر العسل.. ابتسام:عاد يازينها بترجع له عروس وبيدها نونو يصيح فوق راسه ليل ونهار!!وكل شوي تعلق النونو بصدرها ترضعه!! أسماء:الله يخلي الشغالة لي..ماشاء الله عليها حليله مع ولدي..الصراحة جت بالوقت المناسب... وطلعوا الجميع للحوش يمشون وأسماء مجتهدة تاكل تمر بالعسل وتشرب قرفة بالزنجبيل وتمشي بسرعة... وأمها تضحك وتقول لابتسام:ياحليلها مستعجلة على الولادة!! أسماء:مو من زين الولادة حتى أستعجل عليها..إلا من زود الزهق والتعب اللي فيني من الحمل ودي أفك هالبقشة وأصير خفيفة مثل أول!!! ======== بعد المغرب والعائلة جالسة بالصالة بدأت أسماء تحس بالآلآم الطلق!!وأبوها ملاحظ إنها متغيرة شوي... الأب:أسماء؟عسى ماشر؟ أسماء:لا مغص بسيط ويروح! ابتسام:إلا هالنعايم اللي سففتيها يظهر إنها جابت نتيجة ! وأول ماقال العشاء الله أكبر... إلا موية الراس طقت!!وقامت أسماء تصيح:يمه شكلي بأولد عندكم بالبيت!! الأم:لا لا تكفين...خل أبوك ياخذك على طريقه وبأروح معك.. أسماء:لابأتصل على أحمد زوجي ياخذني.. الأم:يمكنه بآخر الدنيا هالحين ولين مايجيك تكونين ولدتي بمحلك!!أقول خلك من الدلع وأنا وأبوك بناخذك معانا... وبالفعل خلت ولدها وشغالتها عند ابتسام وراحت مع أمها وأبوها وحالتها صعبة وصلت للمستشفى وهي مو قادرة تمشي موية الراس بدت تتصفى!!! وعلى طول قعدت على الكرسي المتحرك ومن باب الطواريء ودوها لغرفة الولادة رأساً لما خبرتهم بأمر خروج الموية وكانت ولادتها متيسرة في خلال ربع ساعة تم كل شي!!! لأنها راحت على اللحظات الأخيرة... وأمها معاها تدعي لها وأبوها واقف بره وقلقان.. وشوي وطلعت أمها من الغرفة وبشرت أبوها إن أسماء جابت بنوتة... وسجد أبوها سجدة شكر من فرحته بسلامتها وسهولة ولادتها وقال:هالحين لازم نتصل على زوجها ونبشره بولادتها.. واتصل الأب.... الأب:السلام عليكم..شلونك ياأحمد؟؟ أحمد:الحمدلله بخير.. الأب:مبروك مبروك.. أحمد:وش عليه؟؟مالسه بدري؟ الأب:بدري من عمرك ياولدي.. زوجتك ولدت قبل شوي... أحمد:ههههه..ياحليلك ياعمي قاعد تنكت؟؟؟ الأب:وهذا وقت نكت؟إنت ووجهك؟ أسماء ولدت..ودك تشوفها تعال!ومع السلامة! طاااخ قفل الخط بوجه زوج اسماء الأم:وشفيك عليه؟يحق له الرجال مو مصدق!قبل كم ساعة ومرته عندنا وهي بعافية..مين يصدق إنها خلال كم ساعة ولدت؟؟ الأب:أنا ماودي هالحين إلا أشوف الصغيرة.. إلا والممرضة خارجة فيها وحاطتها بحضَّانة..وقام الأب يطالعها بفرحة.. أما أسماء بعد الخياطة حست بإرهاق ونامت شوي وظلت تحت الملاحظة وبعدين نقلوها لغرفة خاصة... ودقايق إلا زوجها واصل ومتصل على أبوها يسأله عنها..وقال أبوها:اطلع إحنا بغرفة 225 قسم الولادة... ويوم طلع سلم عليها وهو مو مصدق!! أحمد:الله يهديكم..كان دقيتوا علي أوديها المستشفى بنفسي! الأب:إلا رحمة إنَّا مادقينا عليك..والا كان مداها ولدت بالبيت! أحمد:يمين إنك صادق..أنا كنت بمنطقة بعيدة حيل..بس ماتوقعت إن هالأحداث مرت بسرعة..طيب وش جبتي؟؟ أسماء:جبت بنوتة..يعني توقعات الدكتورة بمحلها... أحمد:الحمدلله خير وبركة..ومبروك سلامتك ومبروك سلامة البنية..خليني أروح أشوفها بالحضانة... واتصلت الأم وقامت تبشر الجميع واقترحت عليهم ماحد يزور أسماء الا بكرة لأن الدنيا ليل وأسماء مرهقة....وظلت أمها مرافقة معاها.... اليوم الثاني زاروها أهلها من قبل العصر... سماح ومحمد واسمهان وابتسام.. اسمهان مسكت البنت وحضنتها وقالت:اش سميتوها ياأسومة؟؟ أسماء:لسه ماسميناها.. ابتسام:ياشينكم..اش تنتظرون؟ أسماء:أنا حاسة إنه في طبخة تنطبخ من وراي..من يوم ماأخوانه عزموه عندهم اليوم على الغدا!! الأم:ياشين سوء الظن يابنتي!عزموه لأنهم دروا إنه عزوبي وانتي والد.. أسماء:أدري..بس مو بعيدة إنهم بيسوون له غسيل مخ ويقنعونه يسميها على اسم أمهم الله يرحمها بماإنه أخوهم الكبير!!! سماح:ليش؟أمهم الله يرحمها وش كان اسمها؟؟ أسماء:فايقة!! محمد:عاد بتسير فايقة بنت المتضايقة!! الجميع:ههههههههه أسماء:ياويلكم من ربي..أنا ترى موب عصبية..بس الحمل كان مسوي فيني البطيط!! اسمهان:إلا انتي قَشْره من يومك! ابتسام:سميها اسمهان ياأسماء.. أسماء:هذا اللي ناقص؟!!(وتغمز بعينها) محمد:لا ماأسمح لك..هذا اسم بنتي اللي جاية ان شاء الله.. ودخل أبو اسمهان وكانت الجلسة كلها سوالف وضحك... وبعد ماجلسوا العائلة يتبادلون الأحاديث المختلفة مع أسماء.. جاء زوج أسماء(أحمد) ودق باب الغرفة فانتقلوا الجميع للجهة الثانية من الغرفة وهي جهة مخصصة للزوار..أما الجزء الآخر من الغرفة كان فيه سرير المريضة.. وجلس يتناقش معاها عن اختيار اسم للمولودة وانه هذا صار ثاني يوم لها ولسه ماصار لها اسم.. أسماء:اش رايك بــ وسن؟؟ أحمد:واش معناه؟ أسماء:بداية النعاس!! أحمد:ماشاء الله..تبين بنتنا تقعد نايمة24 ساعة..أحد يسمي بنته نعسانة؟؟!!! أسماء:طيب بلاش..وش رايك نسميها رواسن ؟أشوفه لايق مع اسم أخوها أنس! أحمد:طيب اش معناه؟ أسماء:له عدة معاني منهاالحبل المرتخي! أحمد:أنا بنتي أسميها الحبل المرتخي؟ليش عشان تطلع بنت مفتلتة؟وشفيك ياأسماء ماتسمعين لقالوا كل انسان له من اسمه نصيب؟؟ أسماء:خلاص بأحِط لساني بحلقي وأنطم!!وإنت سمي على كيفك! أحمد:الصراحة أنا خاطري أسمي أفنان معناه الغصون ومذكور بعد في القرآن ويبدأ بحرف الألف مثل أنس... أسماء:ولو إنه مو داخل مزاجي كثير.. بس يلا أحسن من غيره... وخرج أحمد من الغرفة ورجعوا أهلها قعدوا معاها(أمها وسماح وابتسام واسمهان) أسماء:أبشركم يقول يبي يسمي البنت أفنان! اسمهان:ونعم الاختيار!لو تطلع حلوة بعد وخلوقة مثل صاحبتي أفنان يكون ياحظك فيها.. وقامت اسمهان وأرسلت رسالة لرانية بخبر ولادة أسماء وتسميتها لبنتها بإسم أفنان.. وطبعاً رانية أرسلت البشارة بسرعة البرق لباقي الشلة..ز وبدأوا يتصلون على اسمهان ويكلمون أسماء يباركون لها.. اتصلت أفنان تبارك لاسمهان..وبعد السلام والسؤال عن الأحوال.. أفنان:مبروك على ولادة أسماء.. اسمهان:الله يبارك فيك.. أفنان:صحيح إنها سمَّت بنتها أفنان؟ اسمهان:ايه يالغالية صحيح وأنا أيدتها في الاختيار وياليتها تطلع مثلك... أفنان:هذا من ذوقك ياسوسو..ومادام الموضوع كذا إذن وجبت زيارتها.. اسمهان:صدق؟؟بتجين تزورينها بالمستشفى؟؟ أفنان:ايه إذا مايضايقكم بأجي أنا وأمي نبارك لها .. اسمهان:ليش يضايقنا؟إلا هذي الساعة المباركة..الله يحييكم.. ودق باب الغرفة وكانوا الحاضرين أم تركي وهند بنتها أخت سماح وشوي وبدأوا أهل زوج أسماء يجون يباركون..وناس تروح وناس تجي... وبعد ساعة حضرت أفنان وأمها ودخلوا بهداياهم معاهم..وسلموا على الحاضرين.. أم أفنان:مبروك المولودة..والله يجعلها من البارَّات الحافظات لكتاب الله... أسماء:اللهم آمين.. أم اسمهان:جزاك الله خير.. ودار حديث بين جميع الحضور أما هند وأم تركي جلسوا يناظرون طول الوقت بأفنان ويتهامسون!! أم تركي:ماشاء الله تبارك الله..البنت وهي على طبيعتها ومن غير أي مكياج وياحلاتها أجل شلون لاتزبرقت.. هند:طالعي يمه بهدوئها وثقلها ماهي أحسن من عبير المغرورة؟! أم تركي:شوفي عباتها وعباة أمها حشمة وستر ماشاء الله.. أما أفنان واسمهان جلسوا يتكلمون مع بعضهم وياخذون الأخبار والعلوم.. ولما قاموا أفنان وأمها بيروحون قالت أم أفنان:ياجميع الحاضرات الله يجزاكم الخير اللي تحب تفيد وتستفيد وتكسب أجر تزورني ببيتي كل يوم اثنين ما بين صلاة المغرب والعشاء..كل مرة أسوي محاضرة أو أستضيف بعض الداعيات وتلقي محاضرة...ولي ولكم الأجر ان شاء الله..وعنوان بيتي تلاقونه عند اسمهان.. الجميع:الله يكتب لكم الأجر وجزاكم الله خير... ولما خرجت قالت سماح بهمس لأمها وأختها:واشفيكم تناظرون البنت كذا؟أكلتوها بعيونكم!! أم تركي:ماشاء الله عليها..مناسبة لأخوك مرة..بس هو يرضى؟؟ سماح:ماعليك منه مصيره بيرضى! وشوي إلا دق الباب وقامت ابتسام تفتح إلا دخلت وحدة مليانة ومغطية وجهها وجايبة هدية كبيييرة وبس وطتها في الأرض كشفت وجهها... اسمهان(وهي متفاجئة):رانية الدبة؟؟؟؟ وحضنوا بعض..وقام الجميع يسلمون.. جلست رانية.... رانية:عاد أنا قلت هذي الغالية أخت الغالية ولدت ضروري أجي أبارك وأهني بنفسي.. أسماء:جزاك الله خير..مشكورة حبيبتي.. أم اسمهان:وشلونها أمك يارانية؟ رانية:مبسوطة ماعليها..هذا أنا صحيت البارح مالقيتها اتصلت فيها لقيتها سافرت هي وأبوي مكة يحضرون زواج ولد خالي!وبغى يجيني سكتة ليش إنهم ماخذوني معاهم..بس الله ستر!! الجميع:هههههه اسمهان:بلاكم ماتدرون الأخت رانية مافي عرس بالديرة ينعتق منها توَّجِبْ القاصي والداني!! سماح:ياحليلك والله إنك سويتي أجواء مو طبيعية بملكة اسمهان..الله يهنيك بـسعة صدرك رانية:آمين..يازين الوناسة والفرفشة ومشاركة الناس أفراحهم..وش نبي بالغثا وضيقة الصدر..خلي القلب شباب على طول.. وقامت رانية تهذر على الحاضرين وتحكي لهم عن مواقفها والكل ميتين ضحك عليها وعلى خفة دمها.. اسمهان:يازينك يارنو..مدري ليه ماأتخيلك بتصيرين عجوز! رانية:إن كنت بأصير عجوز مثل عجايزنا الملَّقفْ..فعساني أموت الليلة!! أم اسمهان:يوه اسم الله عليك.. رانية:لأنك ماتدرين ياخالتي عندنا نماذج للعجايز بجماعتنا يخرعون الجِن!!كل ماكبرت الوحدة بعمرها طال لسانها وزادت لقافتها وتدخلاتها ويعشقون النكد مثل عيونهم!!الوحدة منهم ناقصها عصا تقعد عليها وتطير بها مثل الساحرات!!! أسماء:ههههه..حرام عليك من يوم دخلتي وأنا أضحك وكل ماضحكت تنشد خياطتي.. رانية:بالعكس هذا وأنا قاعدة أعطيكم جرعات مخففة مراعاة لكبار السن اللي معانا!! قامت أم تركي تضحك وقالت:قولي آمين يابنتي! رانية:ماني بقايلة لين أسمع وش بتدعين!أخاف بتدعين علي؟!! أم تركي:هههه وش دعوى وانتي وسعتي صدري الله يسعدك..عسى الله يحفظك لأهلك ويرزقك كل ماتتمنين.. رانية:آمين.. اسمهان:بالله ادعي لها ياخالتي ربي يرزقها عريس..ترى هي ماتناقز في الأعراس من شوي!! رانية:وادعو لاسمهان ربي يرزقها بطفل وتصير أم وتعقل شوي وتفكنا من التهيبل والاستهبال... ومرت الجلسة بنكت وضحكات..إلى أن استأذنت رانية تمشي... ابتسام:باقي بدري اجلسي ونستينا والله... ر انية:خلني أرجع بيتي قبل ماتنفتق خياطة أختك!!! ============== ولما رجعت أم تركي وبناتها للبيت قاموا يسولفون عن ماحدث ودار بالمستشفى... أم تركي:تصدقون يابنات؟أنا عزمت أمري أخطب أفنان لتركي..أحسهم لايقين على بعض حيل..وعساه يوافق ومايردني.. سماح:يارب ياكريم... هند:ورانية يايمه؟؟ أم تركي:اشفيها رانية؟تقصدين نخطبها لتركي؟؟لا لا ماتصلح له! تركي ثقيل شوي ورانية راعية ضحك وتهريج ماتناسبه أبد!!!! هند:ايه هي ماتصلح لتركي أبد..بس يايمه تناسب ناصر مرررة! سماح:ايه والله شلون غابت هذي عن بالي؟؟فعلاً لايقين على بعض..ناصر من يومه راعي مقالب ودجة..طبعه مثل رانية..بس تهقون أهلها بيوافقون؟؟ أم تركي:ان شاء الله يوافقون..بس قولوا ناصر أساساً بيرضى يتزوج؟ ========= اليوم التالي من زيارة أسماء خرجت لبيت أهلها وراحت اسمهان تزورها... اسمهان:اش أخبار فنونة؟؟ أسماء:أي فنونة الله يهديك؟خلاص غيرنا اسمها! اسمهان:وش سميتوها؟ أسماء:لينة.. اسمهان:الله يقلع ابليسك..بعد ماقلت لأفنان انك مسمية بنتك عليها وجات مسكينة وأهدت فيها تغيرين اسمها..كأننا تعمدنا هالحركة عشان نشحت من الناس هدية!!! اسماء:ياحليلك أساساً ماسميناها أفنان على صاحبتك! وهي صاحبتك مابتجي تبارك إلا لادرت ان المولود بإسمها؟؟ =========== مرت الأيام واسمهان كل يوم ببيت أهلها مقابلة أخواتها والنونو وأم عبدالرحمن قد راحت معاها وباركت... لما قربت المدارس تفتح كان قد مر على زواج اسمهان تقريباً 3شهور.. اشتاقت شوق كبير إنها تحمل!! وبيوم وهي ببيت أهلها وكانت قاعدة مهمومة وحزينة... أم اسمهان:اشفيك ياسمهونة متضايقة؟موب عوايدك يعني! أسماء:يمكن متهاوشة مع دحوم يمه! اسمهان:لا متهاوشة ولاشي إلا مبسوطين الحمدلله..ومو مكدر خاطري إلا شي واحد! أم اسمهان:خير يابنتي؟ اسمهان:يمه صار لي 3شهور مِن تزوجت ولسه ماحملت!! أم اسمهان:بسم الله الرحمن الرحيم..تو الناس..وش عليه مستعجلة؟؟ أسماء:لايكون غرتي مني ومن ابتسام وسماح؟؟ اسمهان:ماني غيرانة بس اشتقت يكون عندي طفل يشغل وقتي! أم اسمهان:ماعليك بتجيك الدراسة وتشغل وقتك..وبعدين حِنا مانبيك تحملين هالحين وراك تخرج من صف ثالث ثانوي..الحمل بعد الشهادة ان شاء الله.. أسماء:ياحليلك ياسمهونة صدق إنه ماعندك صبر..نسيتي إني ماحملت إلا عقب زواجي بثلاث سنوات ونص؟!!وبغوا ياكلوني الناس بألسنتهم وأولهم خوات زوجي وسلايفي كل مرة يدقوني بالكلام!!بس أنا قوية أسمع من إذن وأطلع من الثانية!! أم اسمهان:أي قوية؟نسيتي ياأسوم يوم كنتي كل ماجيتيني تقطرين عيونك دموع وتقولين يمه ساعديني..لين ماوديتك عند أم جابر الممرخة ومرخت ظهرك وقالت عندك مشكلة مويات بالرحم وعطتك أعشاب وقعدت تمرخك فترة..لين ماحملتي؟؟؟؟ اسمهان:يمه تكفين وينها أم جابر؟دليني عليها! أم اسمهان:أقول اركدي!باقي بدري عليك..لايكون زوجك وأمه ودهم تحملين؟؟ اسمهان:لا حرام ماجابوا خبر بس أنا أحس عبدالرحمن كبير..تصدقين بعض زملاه اللي بعمره هالسنة سجلوا عيالهم بالصف الأول؟؟ أم اسمهان:طبيعي..هو تزوج متأخر...وإذا هو كبير فإنتي بعدك صغيرة... اسمهان:إلا اش أخبار ابتسام؟ من يوم ماسافرت ماسمعنا لها حس أسماء:سجلت بناتها التوأم بالمدرسة! اسمهان:ياااااااااه عقبال ماأجيب عيال أنا بعد وأسجلهم بالمدرسة! اسماء:انتي تخرجي من المدرسة أول يالفالحة..بزرة وتبي تجيب بزران!الحمدلله والشكر! بقي أيام قليلة على بداية الدراسة واسمهان مستغلة الاجازة بالطول والعرض... ضحك ووناسة وجري بالحوش مع عبدالرحمن وشَوِي وزيارات وروحات وجيات... واستعدادها للسنة الدراسية الجديدة كان غير!فصلت مراييل كشخة وشنطة ولوازم مدرسية من أحسن الأنواع!!وجزم غالية! عبدالرحمن:سمهونتي انتي رايحة تدرسين ولا تستعرضين؟؟ اسمهان:حبيبي هذي السنة غير!أنا صرت بنظر الكِل مدام!يعني لازم يبان علي أثر النعمة!!! عبدالرحمن:ههه..وش هالفلسفة؟يعني ببيت أهلك كان باين عليك أثر الجوع؟؟؟ اسمهان:لا طبعاً بس أنا بعدي عروس فالمفروض آثار الكشخة تكون واضحة علي!! عبدالرحمن:ولله في خلقه شئون! ============ وأول يوم بالدراسة راحت السمهونة والكل جاء يسلم ويبارك وتفاجئت اسمهان إنه أبلة جوهرة كانت موجودة... اسمهان:هلا أبلة جوهرة..الحمدلله على السلامة.. جوهرة:الله يسلمك..كيف حالكم كلكم؟؟ اسمهان:تمام..بس متى رجعتوا من السفر؟ مادرينا؟؟ جوهرة:لنا يومين بس..وبإذن الله ودي أزورك نهاية الأسبوع أبارك لك في بيتك.. اسمهان:الله يحييك... ============ وشلة الصاعقة فرحانين باسمهان نجلاء:تصدقين ياسوسو؟كنت حاطة يدي على قلبي!لاتتزوجين وتحملين بسرعة وتتركين الدراسة! مرام:فاولي خير ياشيخة..ان شاء الله مايبعدها عننا شي! أفنان:صعب الأحلام تتحقق!أحياناً أحلم أحلام اليقظة وأتخيل يابنات إننا ساكنين بعمارة وحدة! اسمهان:ههههه هذي من المعجزات السبع!! رانية:ولامعجزة ولا شي!أنا بس أتخرج من الثانوي بأسير سيدة أعمال وأشتري عمارة وأسكنكم كلكم فيها معاي!! نجلاء:واش أفلام الكرتون هذي يارانية؟؟قال سيدة أعمال!!سيدة أعمال بمرتبة طَقَّاقة!!! مرام:هههه يازينك يارنو.. ماتتحلمين إنك تطيرين بعد؟؟ رانية:إلا أتحلم إني أطير بطيارتي الخاصة..وكل شوي تنزل بي في بلد أتسوق وأرجع..وأنزل مرة ثانية ببلد ثاني وأتغدى وهكذا!!!!! أفنان:لاتضحكون علي أنا مرات أتحلم إني ساكنة بكوخ وأقطف الفواكه من الأشجار وآكل!! رانية:أقول ياشين أحلام الفقارى!ماتتحلمين بعد إنك ترعين غنم مع بيتر وتزحلقين من فوق الجبال مع هايدي؟ الجميع:هههههههههه اسمهان:ياااي ذكرتوني بالطفولة..كنت أتحلم يكون عندي قصر مصنوع من الآيس كريم والحلويات وأتزوج أمير يهديني عصا سحرية!! رانية:يعني ماابتعد حلمك عن الواقع كثير!!هذا انتي تزوجتي الأمير عبدالرحمن وعساه يهديك عصا حقيقية تهفك على قفاتك إن مافلحتي بشغلك!!! اسمهان:حرام عليك!مايستجري يمد إيده علي!! نجلاء:أما أنا أحلم أكون أخصائية نفسية.. رانية:عشان تتعقدين من بلاوي الناس وينبت لك قرون؟أقول انثبري وتزوجي ماجد وقري في بيتك!! اسمهان:أفاااا مخطوبة يانجول ولاتعلمينا؟؟؟ نجلاء:لسه كلام ماصار شي..خطبني ماجد ولد خالتي..بس لسه الزواج يمكن بعد سنتين!! الجميع:مبرررررروك.. مرام:أما أنا نفسي أتزوج وأفتح صالون خاص فيني!ويكونون زبايني من نخبة المجتمع!! رانية:وأنا أول زبونة من هالنخبة بتجي صالونك! مرام:زين إنك قلتي لي!كاشو بطلت أفتح صالون!! الجميع:ههههههههه اسمهان:من غير زعل يارنو مرات أتخيل إنك بتتزوجين شايب علة!!ينشب لك بحلقك ويربطك في البيت غصب عنك!ومو بس كذا يمكن بعد تشتغلين له ممرضة!! رانية:مالت عليك وعلى أحلامك وعلى نفسك الخايسة اللي تتمنى الزين لنفسها والشين لغيرها!!أنا حلمي إني أتزوج واحد فلاَّوي راعي فرفشة ودردشة ونعنشة..يغديني ضحك ويعشيني وناسة!!! نجلاء:و نسيتي تقولين يمشيك في قصور الأفراح وكل يوم يرميك بعرس لين ماالجنانوة اللي براسك يهمدون!! الشلة:هههههههههههه وكملوا سوالفهم عن الأحلام والآمال وضحك بضحك.. ================= ومرت أيام الأسبوع بسرعة وكان عبدالمجيد تتأثر نفسيته لما يشوف اسمهان رايحة مع عبدالرحمن للمدرسة وحاطين أياديهم بأيادي بعض ويسولفون ويضحكون,,ويفتح لها باب السيارة ويتمنى اللحظة اللي تجي وزوجته بيده يمازحها وتمازحه!!! وبيوم من الأيام بعد ماراح لعمله دخلت أمه غرفته هي وشغالتها ينظفونها... ولقت أم عبدالرحمن على مكتب عبدالمجيد ظرف وفيه ورقة... فتحتها ولقيت بداخلها هذي السطور بخط عبدالمجيد: إلى مجلتي الرائعة(...؟...) أحببت أن أنقل إليكم أحاسيسي عبر سطور متوجة بالدموع..أنا شخص مصاب بإعاقة سمعية منعتني من النطق ولاحول لي فيها ولاقوة!حيث إني أتيت لهذه الدنيا كشخصٍ طبيعي ولكن علةً ألمت بجهازي السمعي ففقدت إثرها السمع وبالتالي القدرة على النطق... ماذنبي أنا؟عندما ينظرون إلي الناس بأني شخص مختلف!!! ماذنبي أنا؟إذا اتجهت للخطبة وأواجَه بالرفض دائماً؟ ماذنبي أنا؟ وأنا أمتلك كل مقومات الإنسان الطبيعي ولدي قدرة على التواصل مع من حولي بلغة الإشارة وقراءة الشفاه والكتابة وبالرغم من ذلك أجد من يعتبرني شخص ناقص؟؟ أنا شخص مبتلى..ولكن من الذي سيقدرني؟إلى متى سيظل المجتمع يرفضني كزوجٍ صالح له حق الحياة مع انسانة طبيعية؟؟ أخط لكم سطوري والعبرات تترقرق بمقلتي باحثةً عمن يمسحها!! المخلص:ضحية الصمت!! قامت أم عبدالرحمن تبكي بصوتها وجلست على الكرسي من انهيارها!!ومسكتها الشغالة تهَدِيها ولكنها صارت تقول:الله يرزقك ياولدي باللي تتمناه وأزود..الله يعجل بنصيبك ويسخر لك من يحبك ويخاف الله فيك... وهي تبكي بمرارة.... ================ وبنفس اليوم جاء المغرب وقعد عبدالرحيم الولد الأصغر يتقهوى مع أمه... وقال:يمه..بغيت أفاتحك بموضوع! أم عبدالرحمن:هات ماعندك.. عبدالرحيم:يمه..أنا صرت أفكر جدياً بالزواج.. أم عبدالرحمن:أجِل هذا الموضوع شوي الله يخليك!! عبدالرحيم:ليش يمه؟عمري صار 26 سنة..وعندي كل مايأهلني للزواج والحمدلله.... أم عبدالرحمن:أنا بإذن الله ناوية أزوجك إنت وعبدالمجيد بليلة وحدة عبدالرحيم:ومنهي هذي اللي بترضى فيه؟؟ أم عبدالرحمن:اتفل من فمك!هذا كلام تقوله عن أخوك ياللي ماتستحي؟؟؟ عبدالرحيم:بالهداوة يمه واشفيك معصبة؟أنا قصدت إنه ياما خطب والناس يردونه بسبب الصمم والخرس اللي فيه..أجل شلون بتلقين له عروس بكل سهولة؟؟ أم عبدالرحمن:الله يسخِّر له إن شاء الله مثل ماسخَّر لغيره.. ======== ونهاية الأسبوع جات جوهرة تزور اسمهان ببيتها وزوجها هو اللي جابها وتفاجأ عبدالرحمن واخوانه بأن زوج خالتهم جوهرة رجع يمشي على عكازين بدل الكرسي المتحرك ونفسيته متحسنة!!! واجتمعت أحلام وأم عبدالرحمن وجوهرة ببيت اسمهان... وكانت أحلام استقرت بـجدة مع زوجها وأطفالها.. أحلام:ماشاء الله يااسمهان..أحس الدنيا اضحكت لي فجأة طول عمري وأنا عايشة وحيدة بين أولاد وأتمنى يكون لي أخت..وأخيراً ربي رزقني بإخت مثلك..صدق المثل اللي يقول(رُب أخٍ لك..لم تلده أمك) اسمهان:تسلمين يالغالية على كلامك الحلو..عساني أكون عند حسن ظنك بس... جوهرة:ماشاء الله يااسمهان إن كان هاالحلى انتي مسويته فأنا أشهد إنك شاطرة بالمطبخ! اسمهان:هي تجارب..مرات تصيب ومرات تخيب!ومازلت أتعلم! أحلام:هههه ذكرتيني بنفسي..كنت البنت الوحيدة والدلوعة بين أخواني وخذاني زوجي عقب الزواج وعلى أمريكا طيران..لاتعلمت ولاغيره..ومخالطتي للأمريكيات زادتني خيبة..كل أكلهم مجمدات ومثلجات يقلونها بالزيت أو يحطونها بالميكرويف أو يشرونها من مطاعم التوصيل..وزوجي صبووور..بس النت ماخلى الوحدة تغفل عن شي..كنت أقعد ليل ونهار أتعلم وأبهر جاراتي الأجنبيات لدرجة إنهم قالولي ليش ماتفتحين مطعم؟؟؟ جوهرة:ايه الخواجات هذولي كل شي جديد يبهرهم.. أم عبدالرحمن:وكيف كانت رحلتكم لأمريكا ياجوهرة؟؟ جوهرة:الحمدلله من أفضل مايكون سووا لزوجي كم عملية جراحية وبعد النقاهة بدأ مرحلة العلاج الطبيعي وتحسن كثير..ماتخيلت إنه بيرجع يوقف على رجليه.. اسمهان:ماشاء الله يوقف على رجليه؟؟ جوهرة:بمساعدة العكازات طبعاً..بس على الأقل ارتاحت نفسيته وصار يسوق السيارة ويدخل دورة المياه بنفسه..وصرت أحسن بكثير من أول ممكن أطلع براحتي مو مثل قبل مربوطة فيه. وقضوا الجميع سهرة ممتعة... دخلت أم عبدالرحمن المطبخ مع اسمهان وهي تجهز العشا.. وقالت لها:اسمهان ودي أفاتحك بموضوع بس طلبتك خليه بيني وبينك! اسمهان(باندهاش):خير ياخالتي؟ أم عبدالرحمن:ودي أخطب لعبدالمجيد وأبيك تساعديني! اسمهان:من عيوني لو قدرت مابأقصر.. أم عبدالرحمن:صديقتك مشاعل! اسمهان:تقصدين خالة أفنان؟؟ أم عبدالرحمن:ايه..تهقين ترفض؟؟ اسمهان:لا هذي بالذات ماأتوقع ترفض أبد!!! أم عبدالرحمن:وانتي اش دراك؟ اسمهان:لأنه أفنان حكت لي قبل مدة إنه تقدم لخالتها مشاعل رجَّال أعمى وكانت بتوافق عليه بس أخوانها(أخوال أفنان)رفضوه!! أم عبدالرحمن:الله يبشرك بالخير..بس كلامك مايطمن مثل مارفضوا الأعمى بيرفضون ولدي! اسمهان:ماأظن ياخالتي ..أنا متفائلة بالموضوع ولاتنسين بعد إنها تشتغل سنين بمعهد الأمل وتتقن لغة الصم والبكم.يعني مابتواجه أي مشاكل... المهم انتي لاتقلقين أنا بأتصل بكرة عليها وأجس نبضها لو لقيت بوادر موافقة بأعطيك خبر.. أم عبدالرحمن:الله يوفقك يابنتي ويجعل الخير دربك..بس لاتقولين لها إن العريس ولدي بس لمحي لها انه لو تقدم لها عريس بنفس مواصفات ولدي واش بيكون ردها اسمهان:ان شاء الله ابشري.. في الرياض كان أبوعبير عند وعده واستأجر لعبيروأخوانها وأمها شقة في عمارة خالها...وأمورهم ماشية...وبدأت الدراسة ... أم عبير:المفروض تكلمين أبوك يرسل لك مبلغ ونسجلك بمدرسة خاصة...!!! عبير:وليش المدرسة الخاصة يايمه؟بأدخل المدرسة الحكومي اللي قريبة من البيت مع بنات خالي.. أم عبير:طول عمرك وجه فقر!إنتي بنت أبوسعد يعني مو شوية!لازم نكون أحسن من قرايبنا ونكشخ! عبير:يايمه أي كشخة وأي كلام؟الوضع اللي إحنا فيه مايسمح لنا نشوف نفسنا على أحد!! أم عبير:وش قصدك يابنت؟؟ عبير:يعني أنا مطلقة وانتي مطلقة والكل عارف السبب!!وزين انه باقي لنا وجه نقابل أحد! أم عبير:استحي على وجهك ولاعد أسمع منك هالكلام!ماكأن اللي إحنا فيه كله من تحت راسك!!! عبير:وأنا اللي قلت لك ياأمي اضحكي على ولد الناس واسحبي فلوسه وكثري طلباتك؟؟كل اللي إحنا فيه منك انتي! انتي اللي حسستيني من يوم وأنا صغيرة إني انسانة مشوهة ولازم أخبي حروقي عن الناس وإن الناس لو شافوا حقيقتي بيكرهوني وينفرون مني!!لين ماصار قلبي أسود!أحقد على كل انسانة أحسن مني!! أم عبير:انتي فعلاً حقودة..من يوم إن هذا كلامك..بعد كل اللي سويته عشانك تقابلين فعايلي بالنكران؟؟شبيهة أبوك ماتنلامين!ناكر فضلي وجاحد!! عبير:يايمه لاتغالطين نفسك..انتي اش سويتي عشاني؟كل اللي كنتي تسوينه عشان نفسك!بالعكس انتي فضحتينا بين الناس وجماعتك ووصلت الفضيحة للشرطة ورميتينا بدرب السحر لولا إن الله ستر ولطف!!! مدت أم عبير يدها ولطشت عبير كف على وجهها... بكت عبير بمرارة وخرجت من الغرفة!! ============== طبعاً مرت الأيام واسمهان لاهية بدراستها وبيوم طلبت من أفنان في المدرسة رقم جوال خالتها مشاعل.... أفنان:اش تبين فيها؟؟ اسمهان:أبداً..أعرف وحدة تبي تستفسر عن معهد الأمل..وفكرت أتصل بخالتك أسألها شوية أسئلة!!(وطبعاً اسمهان كان تخطيطها تجس نبض مشاعل من غير علم أفنان!عشان إن ماكان فيه نصيب ماتتأثر علاقتهم ببعض!!) وأعطتها أفنان الرقم... اتصلت اسمهان بعد المغرب بمشاعل... مشاعل:هلا.. اسمهان:هلا مشاعل أنا اسمهان. مشاعل:مين اسمهان؟صاحبة أفنان؟؟ اسمهان:ايه مضبوط.. مشاعل:ياهلا ويامرحبا شلونك ياقمر؟؟ اسمهان:تمام وأنشد عن أحوالك.. مشاعل:أنا بخير وماعندي جديد من المعهد للبيت ومن البيت للمعهد..وقاعدة أفكر حالياً أحضر رسالة ماجستير.. اسمهان:مبروك..مبروك مقدماً..وعن ايش بتكون رسالتك ياترى؟؟ مشاعل:من صميم تخصصي أكيد!عن نظرة المجتمع لذوي الاحتياجات الخاصة!! فرحت اسمهان وقالت بداخلها(الحمدلله اختصرت مشاعل علي نص الطريق!!!) اسمهان:وياترى تشوفين مجتمعنا واقف بصف الشخص المعاق؟؟ مشاعل:أولاً أرفض اطلاق اسم معاق على الشخص المبتلى.. ثانياً:مجتمعنا مازال بحاجة إلى اعادة نظر في تعامله مع ذوي الاحتياجات الخاصة في توظيفهم وتزويجهم واعتبارههم أشخاص لهم دور وموب عالة وعبء على المجتمع... اسمهان:وتعتقدين لو تقدم لك شخص منهم بيكون سهل عليك توافقين؟؟؟؟ مشاعل:وليش لا؟أنا شخصياً تقدم لي قبل مدة شخص أعمى وكنت موافقة بس اخواني رفضوا..بس مو عشانه فاقد نعمة البصر! لأنه كان متزوج وعنده عيال!!وقالوا لسه في فرص قدامك ويجيك أحسن منه.... اسمهان:طيب لو فرضاً خطبك شخص أصم وأخرس هل بتوافقين عليه؟؟ مشاعل:طبعاً..ذنبه يعني انه يعاني من علة بالسمع؟؟بالعكس ماتصدقين قدر ايش حبي لكل الحالات اللي أدرسها بالمعهد..سبحان الله فيهم براءة وطيب أخلاق أحسن منَّا إحنا الطبيعين...وربي مايحرم الانسان من شي إلا ويعوضه باللي أحسن منه....المهم أحس إني طولت بكلامي عليك..اش سر اتصالك ياترى؟؟؟؟؟؟ اسمهان:هاه؟؟ لا بس كنت بأسألك عن موقع المركز ورقم هاتفهم وحدة أعرفها تبيه.... مشاعل:الرقم....؟....الموقع.... .؟.. وأنهت اسمهان المكالمة..واتصلت بأم عبدالرحمن وقالت:مساء الخير خالتي..وش رايك تطلعين تتقهوين معي؟؟ أم عبدالرحمن:مساء النور..انزلي انتي يابنتي أنا قهوتي زاهبة وودي أقعد بالحوش أشربها الجو حلو اليوم..والأولاد مو موجودين.. اسمهان:خلاص بأنزل لك..أنا زهقانة وعبدالرحمن مداوم موب راجع إلا 11 بالليل.. نزلت اسمهان وتبادلت بعض السواليف هي وأم زوجها وحكت لها عن مكالمتها مع مشاعل.. أم عبدالرحمن:الله يبشرك بالخير قولي آمين..كنت حاطة يدي على قلبي..عبدالرحيم بعد وده يتزوج وماودي أدور له عروس وأخلي عبدالمجيد..ان شاء الله أهلها يطلعون متفاهمين مثلها ويرضون اسمهان:ان شاء الله..انتي توكلي على الله وعساه تطلع من نصيبه أم عبدالرحمن(بخجل):أقول يابنتي؟ اسمهان:تفضلي ياخالتي.. أم عبدالرحمن:فيه وحدة تعرفينها وودي أخطبها لعبدالرحيم.. اسمهان:مين؟لاتقولين رانية؟ترى بتجيب أجله من أول أسبوع!هذا أنا قلت لك!!! أم عبدالرحمن:لا وش رانية؟أنا عيالي مثلي يحبون المرة الهادية الرزينة..ورانية الله يحفظها لأهلها! اللي أقصدها زميلتك مرام!! اسمهان:ايــــــــش؟مــــــرام؟ ؟؟ أم عبدالرحمن:ايه اشفيها؟لايكون البنت فيها شي؟؟ اسمهان:لا بالعكس..بس مرام أحس ذوقها صعب شوي!! أم عبدالرحمن:ياسلام!وأنا اشفيه ولدي عاد؟ حسب ونسب ومتوظف بأحسن وظيفة وراتبه زين وأخلاقه الكل يشهد له فيها..وعمره مناسب لعمرها..والبيت جاهز بس يبي له تأثيث..... اسمهان:ماشاء الله عليه أنا ماقلت شي..بس ماودي تتقدمين ياخالتي لهم ويردونك..أخاف مرام تقعد تتشرط ولا شي!! أم عبدالرحمن:انتي ماعليك..هاتي رقمهم وأنا بأتصل على أمها وأكلمها وأشوف بيرحبون فينا ولا لا؟؟ وأعطت اسمهان رقم أهل مرام لأم عبدالرحمن ورقم أهل مشاعل .. ======== ولما جاء عبدالرحمن من العمل خبرته اسمهان بالسالفة ونزل لأمه..وبعد ماسلم عليها بدأ يعاتبها عبدالرحمن:يايمه..واشفيك تخطبين من صاحبات اسمهان؟قلة بنات بهالديرة؟؟ أم عبدالرحمن:لقيت غيرهم وقلت لا؟؟ عبدالرحمن:اللي بيفتش بيلقى! أم عبدالرحمن:وهذا أنا فتشت ولقيت..واللي نعرفه أحسن من اللي مانعرفه!يكفي اني لقيت بنت موافقة مبدئياً على علة عبدالمجيد..فإشهو المانع عندك؟؟ عبدالرحمن:يمه انتي تتذكرين الناس اللي خطبنا لعبدالمجيد عندهم وبنتهم صاحبة اسمهان رفضهم يسبب توتر بالعلاقات..وأخاف بكرة تطلع وحدة من البنات فيها عيوب وتحطين السبب على زوجتي!!!!! أم عبدالرحمن:تطمن ياحبيبي..زوجتك بأحطها على راسي ومالها علاقة أكثر من إنها وسيط..هالبنات أنا اللي اخترتهم بنفسي ماحد جبرني عليهم..ان صار نصيب فخير وبركة وإن ماحصل فالله كريم يعوضنا باللي أحسن منهم...وبعدين لاتكون أناني! عبدالرحمن:حرام عليك..أنا أناني؟ أم عبدالرحمن:طبعاً تصرفك يقول كذا..تطمنت على مستقبلك وهالحين قاعد تتدخل بمستقبل اخوانك؟؟ عبدالرحمن:آسف حقك علي!بس كنت أبي أوضح لك نقطة وغلبتيني في الرد.!!! ================= مرت الأيام ورجعت اسماء لبيتها بعد انتهاء الأربعين وأم عبدالرحمن تعرفت بأهل مشاعل ولما شافت منهم بوادر موافقة جابت أولادها وأعمامهم يتقدمون رسمي,, وخطبت مرام وراحت لهم هي وبنتها أحلام واسمهان ووافقوا مبدئياً بشرط انه مايصير شي إلا عقب التخرج من الثانوي!!!! ============== وبالمدرسة.... مرام:هلا بسلفتي سمهونة.. آثاريك حاطة عينك علي وتبيني أصير سلفتك؟؟ اسمهان:لا لاتفرحين مرة!ترى خالتي هي اللي اختارتك.. مرام:طلبتك لاترديني! اسمهان:جاك! مرام:ودي أشوف صورته! اسمهان:صدق إنك خفيفة!النظرة الشرعية عقب أسبوعين مافيك صبر؟!!! مرام:الفضول ذابحني حيل! اسمهان:خلاص بكرة بأسرق لك وحدة من مكتب عبدالرحمن وأجيبها لك..بس بشرط؟!! مرام:اشرطي مثل ماتبين.. اسمهان:أنا معزومة نهاية الأسبوع على زواج بنت عمة عبدالرحمن وأبي أجي مشغلكم بس تضبطوني بلاش!!! مرام:إخس يالمصالح!ابشري تم! بس عقب ماأتزوج أخو زوجك بأطلع الفلوس من قفاتك!!!! ======= اليوم الثاني جابت اسمهان الصورة للمدرسة..وورتها مرام.. مرام(وهي متفاجئة):واااااي هذا أعرفه!!!!!!! اسمهان:أفا ياللعينة!طلعتي تعرفين شباب؟؟ مرام:واخزيااااه!وش هالهرج..؟ أقصد شايفته من قبل! اسمهان:وين؟علميني؟ مرام:يوم جيتك ببيتك زمان..بس كنت أحسبه أخو زوجك الأبكم ماهقيت إنه عبدالرحيم!! اسمهان:وهو شافك؟؟ مرام:كان مبقق عيونه وشافني من راسي لرجولي!أشوى إني لابسة عباتي وجهي بس اللي كان مو مغطى! اسمهان:آهااااا آثاري المسألة مخطط لها!عجبتيه يوم شافك عشان كذا خطبك!!أجل ماله داعي الشوفة من الأساس!أنا رافضتها! مرام:وانتي اش دخلك يالنسرة؟هو تمقل فيني ذاك اليوم هالحين دوري أتمقل فيه!!وبعدين الغرض مو بس نشوف بعض!إلا عشان نختبر مدى الارتياح اللي بيننا ونشوف فيه نصيب ولا لا! اسمهان:طيب ياخالتي!هالحين فهمت ليش اتصلت فيني عقب مارحتي ذاك اليوم!آثاري عشان تبي تعرف مين هي اللي عجبت ولدها..!! مرام:عاد تكفين لايدرون باقي الشلة عن سالفة الخطبة خليها بيني وبينك.. اسمهان:وليش عاد؟هذا هم يدرون بخطبة عبدالمجيد لمشاعل وماصار شي إلا فرحوا لها.. مرام:الصراحة...أخاف من العين!! اسمهان:ماااااالت عليك بقوة!هذا أنا تزوجت عبدالرحمن عين السيح وماحد طقني بعين إلا فرحتوا معاي وماقصرتوا..بيجون هالحين يعينونك انتي؟؟أقول اذكري الله والله يعينني عليك شكلك بتكونين سلفة غثيثة على قلبي!!! حسبي الله عليك ياعبدالرحيم ماتعرف تختار!!!! اتصلت سماح على أمها وبلغتها بمجريات الأحداث في بيت أم عبدالرحمن وانها خطبت لأولادها الاثنين أم تركي:حسرة على تركي وناصر اللي ذبحهم السهر لأنصاص الليالي والنوم والكسل طول النهار!!كل يوم وتركي يزور ناصر ويسهر عنده أو ناصر يجينا ويسهر عند تركي..وان طلعوا راحوا دواماتهم..وغير كذا مافي.. سماح:يايمه الحق عليك تاركتهم براحتهم.. أم تركي:وش تبيني أسوي يابنتي؟أتوطى في بطونهم؟خلاص هم رجال بشنبات وأدرى بمصلحتهم! سماح:إلا مثل البزران الصغار اللي تعلمينهم على الحمام لازم كل شوي تذكرينه بموعد الحمام والا سووا لك البحر طحين!! أم تركي:ههههه..صادقة يابنتي بأكلمهم لعل وعسى أحد يسمع.. =====وشوي وحضروا ناصر وتركي من العمل يتغدون.. دخلت عليهم أم ناصر المجلس وهي متلثمة...وسلمت.. أم تركي:هلا بمعازيب العيلة! تركي:هاه؟أشم بكلامك ريحة موب زينة أم تركي:ايه..قولوا آمين.. تركي وناصر:آمين أم تركي:الله يقطع العزوبية من كل بيت! ناصر:وش دعوى ياأم تركي؟أشوف كأنك متملله مني! أم تركي:إلا متملله منكم ثنيناتكم! تركي:أفاااا ليش يالغالية؟؟ أم تركي:لأني لو غالية كان أرضيتوني مرة بالعمر!اللي مثلكم عياله يلعبون بحضنه وانتم الواحد قاعد يضيع عمره قدامه وهو فاغر فمه!!! تركي:يايمه انصدت نفسي عن الزواج أم تركي:وانت الزواج اللي تزوجته تسميه زواج؟؟كلها 5 أيام بين أربع جدران ورديت البنت لأهلها!!أنا أكلمك عن اليوم لابد تتزوج البنت اللي تصونك وتحبك.. تركي:موب كل مرة تسلم الجرة! أم تركي:مو صحيح كلامك إلا إن كنت نحيس!! وإنت يانصور أمك قبل لاتموت وصتني عليك وقالت:اللي تتمنينه وتحبينه لتركي حبيه لولدي ناصر..وهذا أنا أتمنى لك كل خير وإنك تصير رجال ينشد فيك الظهر وتفتح لك بيت..طالعوا بعبدالرحمن وأخوانه نعم التربية والله تزوج عبدالرحمن والاثنين الباقيين في الطريق!! تركي وناصر:صـــــــــــــدق؟؟؟ أم تركي:ايه صدق..على بالكم ماحد صاحي بهالديرة الا انتوا؟تخسون! وخرجت من الغرفة تحضِّر الغداء.. تركي:ياحليلها أمي مافي شي شاغلها بهالدنيا إلا هالسيرة!!! ناصر:صحيح إن قلوبنا قاسية وما نحس! أمي لآخر لحظة بحياتها كانت تتمنى لو اني تزوجت..وكانت وصيتها اني أتزوج وهذا أنا بمكاني لاتقدمت خطوة ولاشي!!ياليت أمي عايشة وأرضيها.. تركي:أشوف كأن كلام أمي أثر عليك؟؟ ناصر:والله الوحدة ذابحتني بالبيت كل يوم وأنا عايش لحالي لو أموت ماحد درى عني كأني يتيم لاأهل ولاجيران وتلومني لابديت أفكر بجد بالزواج؟؟ دخلت أم تركي وحطت الغدا.. ناصر:ياعمة لو بغيت أخطب..ألاقي عندك عروس؟؟ أم تركي:عرايسكم موجودات انتوا بس قولوا توكلنا على الله... ناصر:توكلت على الله.... أم تركي:ماودك ياتركي تتنازل انت بعد وتتزوج مع ولد عمك بليلة وحدة؟؟ تركي:يايمه انتي... قاطعته أمه وقالت:عاد لاتكون أثول وتتغلى!حِنا يوم نبيك تتزوج فترى إنت اللي بتفرح أكثر منَّا تلاقي زوجة تآنسك وتلاطفك وتخاف عليك وتجيب منها عيال لا مِت بكرة يظلون يدعون لك وتكسب من وراهم أجر! دمعت عيون ناصر..وتذكر أمه.. أم تركي تكلم تركي: قطيعة تقطعك !ورى قلبك مو رهيف مثل ولد عمك؟؟ تركي:أنا بأتوكل على الله وأخطب بنت الناس اللي كلمتوني عنها!ولكن إن طلع فيها عيب فلا تلومون إلا نفسكم توقعوا إني بأسوي أي شيء!!! سماح:تفاءل بالخير..الله يسامحك إشفيك صرت معقد من تجربة وحدة؟؟ هند:وبعدين أنا متأكدة إنك لو تشوفها بتعجبك مرة..أخلاقها وهدوئها أحلى شي فيها.. تركي:مدري أحس الحماس مقتول فيني! أم تركي:ناصر اللي هو ناصر..تغير رايه وصار وده يخطب اليوم قبل بكرة..وإنت باقي راسك يابس مدري اش تنتظر!! تركي:زين من هي بنته؟؟وكم عمرها؟ أم تركي:عمرها 18 سنة وتدرس بالثانوية العامة وأزيدك من الشعر بيت صاحبة اسمهان..وهي بنت فلان بن فلان الفلاني!! تركي:ايــــــــــــــش؟؟أبوها يشتغل بوزارة الحج والأوقاف؟؟ أم تركي:ايه صحيح..وإنت اش دراك؟؟ تركي:يمه..هذا الرَّجال اللي حجيت معاه قبل سنتين! سماح:يامحاسن الصدف!هذا إنتوا طلعتوا تعرفون بعض..يعني متسهلة المسائل ان شاء الله... تركي:الصراحة كان نعم الرجال كان كل يوم بالمخيم يسوي لنا محاضرة..وقبل لانفترق عطاني كرته عشان كذا مازلت ذاكر اسمه وشغله...سبحان الله من يصدق إنه بيجي يوم وأخطب فيه بنته؟! هند:يعني نتوكل على الله ثم نكلم الجماعة ونتفق معاهم على موعد؟؟ تركي:على بركة الله.... أم تركي:أجل خلاص بأكلمهم..وإن عطونا موعد قريب رحنا لهم أول بعدين نكلم أهل البنت اللي بنخطبها لناصر.. تركي:إلا هي وش اسمها؟؟ سماح وهند:أفنـــــــــــــان تركي:ياســــــــــــلام!! =============== وبالفعل تم الاتصال على أهل أفنان ورحبوا بأم تركي....وراحوا يتقدمون رسمي وراح تركي واستقبله أبو أفنان بالأحضان بعد ماتذكره مباشرة... عند الحريم أم تركي كانت صريحة من البداية وحكت لأم أفنان قصة تركي مع عبير.. أم أفنان:لاحول ولاقوة إلا بالله يارب..بعض الناس صارت ذممهم واسعة..بس توصل الدرجة للسحر؟هذا اللي مو معقول بناس مسلمين..الله يهديهم ويغفر لهم والحمدلله اللي نجى ولدك من كيدهم.. أم تركي:الحمدلله.. أم أفنان:أما انتم والنعم فيكم يكفي انكم مناسبين أم اسمهان الله يحفظها ناس راعيين دين وأخلاق ومحبوبين من الناس ماشاء الله... سماح:جزاك الله خير... أم أفنان:مدري إن كان عندكم فكرة عن بنتي سندس؟ سماح:ايه سبق وكلمتنا اسمهان عنها الله يشفيها ويعافيها.. أم أفنان:تدرون السبب في أمراض ضمور الدماغ راجع في معظم الأحيان بعد ارادة الله لزواج الأقارب..عشان كذا أنا ضد إني أزوج أفنان لأحد من القرايب..وربي يكتب لها اللي فيه الخير. واستمروا سماح وهند وأم أفنان وأم تركي في سواليفهم المختلفة وأفنان جالسة بصمت تصب القهوة والشاي.. ======= وفي مجلس الرِجال كان تركي وأبوأفنان واخوانها جالسين.. يسولفون في مختلف الكلام..ومن ضمنه... أبوأفنان:والله والنعم فيك ياتركي..عاشرتك 6أيام بالحج وكنت فيها نعم الرجل..لكن ودي أقول لك إن الزواج قسمة ونصيب إحنا بنشاور البنت ونخليها تستخير وعقبها يصير خير ان شاء الله... تركي:وأنا لو أدور الدنيا وأدور عن عائلة فاضلة وشخص مثلك بأخلاقك وسماحتك فما ظنتي بألقى!! أبوأفنان:هههه وش دعوى ياتركي؟لو تدور بتلقى اللي أحسن مني..أنا ماني أحسن الناس أبد... تركي:والله هذا من تواضعك بس ====وتمت الزيارة والوعود بالتفكير ثم الرد في أقرب فرصة.. ================= وراحت أفنان ثاني يوم المدرسة وهي بتطير من الفرحة!! وبشرت الكل بخطبتها البارح... الكل:مبرررررررروك مرام:أجل جاء دوري أصارحكم!ترى عن قريب ان شاء الله بأصير سلفة اسمهان!! الكل:لاااااااااااااا م معقول... اسمهان:إلا صحيح..مشاعل لعبدالمجيد ومرام لعبدالرحيم.. وأفنان لتركي ان شاء الله.... نجلاء:وشوفتك صارت يامرام؟؟ مرام:لا بإذن الله نهاية هالأسبوع..ادعوا لي!! أفنان:عاد اسمهان بتسوي فيها حركات وتجي تزوركم على إنها زوجة الكبير!! اسمهان:طبعاً زوجة الكبير دايماً أحسن من زوجة الصغير في كل عيلة!!! الشلة:هههههههههه أما رانية انسحبت من الشلة وراحت للحمام وعيونها مبتلة دموع! وقامت تتساءل بينها وبين نفسها:ياترى بإيش قصرت مع اسمهان؟فكَرَت بمستقبل كل الشلة إلا أنا!!!معقولة تشوفني شينة لهذي الدرجة؟؟ولا يعني عشان وزني زايد شوي؟؟ وقررت رانية إنها تبدأ بنظام حمية قاسي!!(بيني وبينكم البنت ودها تلحق على عمرها!!!!) ============== ورجعت اسمهان من المدرسة للبيت وكانت كالعادة لما يكون دوام عبدالرحمن صباحي لازم تروح يومياً لأختها اسماء وتزورها لمدة نص ساعة إلى ساعة مخصوص عشان تشيل النونو الصغيرة لينا!! كان عندها تعلق غير طبيعي بهذي البنت وبدأت تتعلق بكل طفل تشوفه!لأنها من وجهة نظرها متأخرة بالحمل!! ومرة من المرات.... اسمهان:عبدالرحمن بأسألك سؤال وأبيك تجاوبني بصراحة؟؟ عبدالرحمن:تفضلي... اسمهان:وش أكثر شي يعجبك فيني؟؟ عبدالرحمن: يعجبني فيك إنت الدلع حنون وفيك رقــــة طبع وأحلى شي يمـــيزك طبيعي ومنته مصطنع! اسمهان(بحزن):أنا أكلمك بجد ياعبدالرحمن..ماقلت لك اكتب فيني قصيدة.. عبدالرحمن:ياحياتي أوقات الشعر يكون أبلغ من الكلام..عموماً تعجبيني بكل شي فيك من راسك لرجولك!والطباع حتى الشين منها أحبه لأنه منك انتي!! اسمهان:يعني انت مو متضايق إني أنقص من غيري؟؟ عبدالرحمن:وشهو؟أنقص من غيرك؟ ماعاش من يقول هالحكي!ليش ياعيوني تقولين إنك ناقصة؟أنا زوجتي أحب إنها تكون انسانة عندها ثقة بنفسها وقدراتها وماتصدق هالحكي عن نفسها أبد!!!!!!! اسمهان_(بصوت باكي):بس أنا إلا الآن ماحملت!اللي بسنك عندهم أطفال بالمدارس بس انت محروم لسه وش ذنبك؟؟ عبدالرحمن:ردينا على نفس الموضوع ياسمهونة؟يابنت الحلال أنا اللي غلطان إني ماتزوجت بدري وجبت عيال!انتي ليش زعلانة؟وبعدين إحنا ماصار لنا إلا 6 شهور متزوجين.تبين على طول يصير عندنا عيال؟؟وين صارت هذي؟؟ اسمهان:طيب اش تبيني أسوي أنا مليت مليت! عبدالرحمن:ليش مليتي وانتي أساساً ماعندك وقت تمِلين فيه؟كل يوم أجيبك من المدرسة الساعة 2 الظهر وأروح دوامي الساعة 3 الظهر وماأجي البيت إلا الساعة11 بالليل وألقاك بسابع نومة!!!ويومك كله ضايع بين النوم أو شغل البيت أو المذاكرة أو التليفونات والنت! اسمهان:بس أنا أحس إن عندي مشكلة وماني مثل غيري!كل اللي أعرفهم تزوجوا بنفس الفترة اللي أنا تزوجت فيها حملوا إلا أنا!! عبدالرحمن:اسمهان كل شي مقدَّر ومكتوب وبيصير في وقته..بس انتي لاتشغلين بالك وفكري بدراستك وبس..وعقب التخرج من الثانوي يحلها حلاَّل! =============== وكانت رانية قاعدة مع أمها بالبيت رانية:يمه..أنا لازم أسوي موعد عند أخصائية تغذية!! أم رانية:ليش؟خير؟ رانية:يمه وزني زايد ولازم أشوف لي حل! أم رانية:مبررررررروك..بس صح النوم!لي سنين وأنا أتحايل عليك وأقول لك استحي على وجهك مرة وارحمي نفسك من الأكل وماكنتي تسمعين!هالحين اش اللي استجد؟؟؟ رانية:اعتبريها صحوة ضمير! آسفة يآحلوآت هذآ اللي قدرت عليـه اليوم بكرة بعد العشآء إن شآء الله نكمـل.. |