 |
  |
|
|
|
|
#21 |
|
|
رد: أجمل سنوات عمر .. بعد ال40
الجمال و الشخصية الإنطباعات الشخصية اللى بيكونها الناس عن أى إمرأة , لا تعتمد على : نحافتها أو جمال خطوط وجهها أو براعتها فى التجمل و الزينة أو ملابسها الباهظة الثمن ............. و لكنها تعتمد على الستارة الشفافة الرقيقة اللى بتغطى كلللللللللل دة اللى هى : الشخصية فشخصيتك اللى بتكتسبيها من خبرات السنين هى اللى بتتحكم فى الخطوط الموجودة على وجهك التعبير اللى باين فى عنيكى العبارات اللى بتردديها فى كلامك حركات جسمك و ردود أفعالك ............... و على قد ما تكون شخصيتك جميلة , على قد ما هيكون شكلك جميل و للأسف كلنا بنصرف كتير على مستحضرات التجميل و صالونات العناية بالبشرة , و بنجرى ورا وصفات الأقنعة و أخر صيحات الموضة فى الملابس و الماكياج ...... و مش عارفين إن الجمال نابع من الحالة النفسية طبعا كلنا هنقول : و نحسن الحالة النفسية دى إزاى ؟ هو بإيدينا ؟ أيوة بإيدينا و هأقولكم إزاى فى آخر الموضوع لما أتكلم بالتفصيل عن السعادة لكن دلوقتى عاوزة أقول لكم عن علم بيسموه " فن التعبير " العلم دة بيقول إن الإكتئاب و القلق و التوتر و الإرهاق بيخللوا : الرأس ينحنى و الظهر يتقوس و الوجه يكسوه العبوس و الحركة تتقل و الإنسان يبدو أكبر من سنه أما السعادة فبتخللى : الجسم يتشد و الحركة تبقى كلها حيوية و العين تلمع و الوجه ينوّر و التجاعيد تختفى و دى 4 نقاط ممكن تساعدك على إن تعبيراتك تبدو كلها سعادة , و تبعدك عن الإكتئاب : 1 لازم تؤمنى بحق أن الله هو أرحم الراحمين بمعنى أنه من المستحيل أن يصيبنا بلاء إلا لازم يكون أخرته خير لأن مافيش أرحم من ربنا علينا 2 خدى كل الأمور ببساطة .. و بمودة و إتخذى من قول الله " إن بعض الظن إثم " مثال لك فى علاقاتك بالناس فلا خير بيدوم , و لا شر بيدوم 3 خللى ذهنك دايما يقظ و دة مش هيتحقق إلا إذا رتبتى أولوياتك و ما تلخميش نفسك ب 100 حاجة و لازم تاخدى كفايتك من الإسترخاء 4 إبعدى عن المرايا شوية و ركزى جواكى أكتر فكل ما بعدنا عن تجميل الخارج بتجميل الداخل كل ما إتحررنا و التحرر دة بيقوى الثقة فى النفس و بيزيد الشخصية قوة *** و أخيرا جاء ميعاد التمرين : إجلسى فى هدؤ بإسترخاء تام و معاكى ورقة و قلم غمضى عنيكى و إرسمى بخيالك صورة لنفسك و إنتى سعيدة و نشيطة حسى بيها إكتبى الصورة اللى إنتى شايفاها : شكلك , كلامك , تصرفاتك , ردود أفعالك ............. إقرأيها عيشى فى السطور اللى كتبتيها كل ما كررتى التمرين كل ما تغللت الصورة دى فى عقلك الباطن و اللى بيدخل العقل الباطن بيخرج على شكل أفعال . |
|
|
#22 |
|
|
رد: أجمل سنوات عمر .. بعد ال40
علاقتك بأولادك سيدنا عمر بن الخطاب قال لنا ما نربيش أولادنا زى ما إحنا إتربينا لإنهم إتخلقوا لزمن غير زماننا لكن كل واحد فينا بيبقى له أحلامه الخاصة اللى ما حققهاش و بيحاول يحققها فى أولاده و بينسى قدراتهم , و ميولهم , و طاقاتهم , و أحلامهم الخاصة بيهم اللى من حقهم إنهم يحققوها هما كمان و بيختار لهم خط معين يمشوا عليه و بيشدهم له بكل قوته لدرجة ممكن تخنقهم و تهلكه و الأم بالذات بتتعب نفسيا لما ولادها بيكبروا و يبدأوا يستقلوا بحياتهم و تلاقى دورها بينحصر فى تحضير الأكل و غسيل الهدوم و بتشعر إن مكانتها عندهم راحت , و عرشها إتهز فبتشعر بإحباط و يجيلها إكتئاب و لكن تعالوا نفتكر كدة مع بعض إزاى علمنا أولادنا يخطوا أول خطوة : وقفناهم على أرض ممهدة و بعدنا عن طريقهم أى حاجة ممكن تؤذيهم حاوطناهم بإيدينا من غير ما نمسك فيهم علشان نحميهم و لما بيقعوا بنسيبهم يقوموا وحدهم مع قليل من المساعدة, و كثير من التشجيع و لما خطوا أول خطوة هللنا و فرحنا و غمرناهم بالحب و الحنان هو دة الأسلوب اللى لازم نفضل متبعينه طول العمر معاهم كل اللى عليكى كأم إنك تحطى حدود معينة ما يخرجوش عنها و بعد كدة سيبى الإختيارات فى إيديهم , و إنتى بترقبيهم من بعيد , علشان لو خرجوا عن الطريق , بلمسة صغيرة ترجعيهم سالمين و ثقى أن فى تحررهم حريتك و إنتهزى فرصة إستقلالهم بحياتهم فى مزيد من الإهتمام الشخصى و حياتك الزوجية و علاقاتك الإجتماعية و كدة المكسب هيبقى من كل ناحية |
|
|
#23 |
|
|
رد: أجمل سنوات عمر .. بعد ال40
العلاقة الزوجية (جينا للنقطة المهمة) فى القرآن الكريم نجد أن الله لما بيكلم المسلمين عن أمور دينهم ودنيتهم بيوجه كلامه للرجال و النساء معا و لما بيتكلم عن الرجال بيوجه كلامه للرجال فقط و لما بيتكلم عن النساء بيوجه كلامه ..... للرجال فقط هل دة مالوش معنى ؟ أكيد له معنى بس للأسف الشيطان عامى عنين المسلمين كلهم !! فى الحتة دى بالذات عموما أنا مش عاوزة أدخل فيها فى موضوعنا هنا و لكن اللى عاوزة أقوله أن بكل تأكيد الزوج وحده هو اللى فى إيده إنه يعدى بزوجته من هذه المرحلة بكل أمان و هدوء و طبعا دة ما بيحصلش بل للأسف الزوج هو اللى بيصعّب الأمر على زوجته و على نفسه أكتر و أكتر لكن هل معنى كدة نيأس و نستسلم ؟ لا طبعا و زى ما بأقول دايما : المعرفة بتكون نصف العلاج إيه اللى بيحصل للرجال و النساء فى سن ال 40 ؟ فيه هرمونين مهمين هما المسئولين عن كل اللخبطة دى هرمون الأستروجين عند النساء ( و إتكلمنا عنه قبل كدة ) و هرمون التيستوستيرون عند الرجال و الرجل فى سن ال40 بتبدأ نسبة هرمون التستوستيرون تنخفض عنده بنسبة1-2% كل عام . والهرمون دة هو المسئول عن الصفات الجنسية و إنخفاضه عند الرجل بيؤدى إلى ضعف الرغبة الجنسية و ضعف الإنتصاب التغيرات اللى بتحصل فى هرمونات و الرجل فى السن دة هى المسئول الأول عن إضطرابات الحياة الزوجية و هى السبب فى أن كل من الزوجين ينظر للآخر على إنه هو اللى مش فاهمه و مش مقدره و مش عارف يرضيه و مش قادر يحتويه ... الخ و طبعا غرور الرجل الشرقى بيصور له إن زوجته هى السبب فى تراجع قدرته الجنسية لأنها أهملت فى نفسها و ملخومة بالمطبخ و الأولاد و كبرت و ما بتتقنش فنون الإغراء و باردة ...... و باقى التهم اللى كلنا حفظناها ....... و فى نفس الوقت بتتصور الزوجة إن ضعف الرغبة الجنسية عند جوزها تجاهها سببه وجود إمرأة أخرى فى حياته .. و يبدأ شبح الزوجة التانية فى خيال كل منهما يهدد الأسرة و فى المرحلة دى البشر بينقسموا لفريقين : الفريق الأول بيحاول جاهدا يتمسك بالعلاقة دى و يوطدها .. و دة بيحتاج لشوية تضحيات و تنازلات و الفريق التانى بيفضّل الإرتباط بشخص آخر .. و دة معناه هدم أسرة لتبنى على أنقاضها أسرة أخرى أكثر هشاشة ... طيب نحل المشكلة دى إزاى ؟ 1 لازم نعرف إن الشعور بالإستقرار و السعادة ممكن نستمده من جوانب كتير فى الحياة , مش من الزوج أو الزواج فقط طبعا دى مش دعوة للطلاق ( و العياذ بالله ) و لكن بأفكركم بس باللى قلناه فى الأول و دايما بنقوله : لا شئ فى الدنيا يمثل كل شئ 2 لازم كل إمرأة تحدد طبيعة علاقتها بزوجها بالضبط هل اللى بيربطك بزوجك هو : المسئولية المال الحب و الرومانسية الأولاد الشكل الإجتماعى المكانة الإجتماعية العرف و التقاليد .......... طبعا اللى بيربط كل واحدة بجوزها الحاجات دى كلها مع بعض ( أو أكترها ) لكن عليكى إنك ترتبى الكلام دة حسب الأهم فالمهم بالنسبة لك ليه ؟ لأن العاطفة هى دايما نمرة 1 عند و لما بيوصل الأزواج للسن دة , بيدخل الفتور و الملل لعلاقتهم الزوجية , فبتثور ثائرة الزوجة و تبدأ تتخبط فى تصرفاتها , و يتهيألها ساعات إنها هى نفسها مش عارفة هى عاوزة منه إيه أو حتى متضايقة منه ليه ..! فلما ترتب أولياتها , هيبدأ إحتياجها العاطفى يتراجع ساعتها هتلاقى إنه مش مقصر زى ما كانت متصورة , و إنه قايم بباقى أدواره كما ينبغى ساعتها هيسهل عليها إنها تعيد هذه العلاقة لمسارها الطبيعى و ترجع العاطفة لمركز الصدارة تانى |
|
|
#24 |
|
|
رد: أجمل سنوات عمر .. بعد ال40
العلاقات الإجتماعية نمى علاقاتك الإجتماعية إهتمى أكتر بباباكى و مامتك و ودى إخواتك أكتر من الأول إتصلى بأهلك اللى نسيتيهم فى زحمة الحياة إعملى صداقات جديدة و لازم نعرف إن مافيش إنسان بيكون صورة طبق الأصل من التانى من حيث الإهتمامات و الأولويات لذلك لازم الأصدقاء يكونوا متنوعين فليكن لك أصدقاء يشجعوكى على الرياضة و المشى و المحافظة على الصحة و أصدقاء ليهم نفس هواياتك و أصدقاء تقدرى تفضفضى لهم و تاخدى منهم المشورة .... و هكذا و بكدة حبيباتى يبقى مافيش فاضل فى الرحلة إلا المحطة الأخيرة و هى السعادة و دى هتكون فى موضوع منفصل إن شاء الله |
|
|
#25 |
|
|
رد: أجمل سنوات عمر .. بعد ال40
تسلم يدك ياارب ويعطيكي ربي الف عاافيه
وربي طلعت عيووني وانا اقرا بس جد ابدااع تقبلي مروري |
