وحنان حست الدنيا تدور فيها من طاري ساره وذكرى ذاك اليوم .. مسكت راسها وطاحت على صالح الي تلقفها بسرعه واهو يقول بخرعة : حنان شفيك .. ؟؟؟؟
حنان بوهن واهي تكابد دوختها : ماقدر أوقـ ـف .. دخلـ ـنـ ـي صـ ـالح
مسك صالح حنان من ذراعينها وخالد أسرع فتحلهم الباب ودخلوا ..

التفت خالد لمكان ماكان طلال واقف لقاه مختفي !
طالع بمشعل وقال واهو مضيق عيونه فيه : أهو الي قالك ؟؟؟؟؟؟
مشعل واهو يبكي : ايه .. الحيوان النذل ..
رفع خالد حاجب وطالع بمكان طلال واهو يتنهد بقهر !!! اتذكر اليوم الي شافه فيه وكانت معاه ساره والتهديد الوقح الي كان يهددهم فيه !!

رجع يطالع بمشعل وقال : ادخل يامشعل .. وأنا أوريكم فيه !!
مشعل : لا والله أنا بانتقم منه .. بانتقم لاختي !
خالد كان وده يضحك .. مشعل ماخذ الدعوة حرب وانتقام وأهو صغير وبهالعمر !!!
شسوت فيهم الدنيا ؟؟؟؟

مسكه من ايده وسحبه واهو يقول : بس يامشعل لاتبكي أفا عليك انت رجال ! خلاص انا وانت نوريه شغله قريب ..
مشعل هز راسه بحماس .. !

دخلوا البيت وسكروا الباب .. وكل واحد منهم ثايره بداخله أنواع المشاعر .. القهر والحزن والضيق .. ! هالمشاعر الي صارلهم كـــــم عنها ..
وهالمره جاتهم ضربة وحده هدت حيلهم هد !


دخلت حنان غرفتها بمعاونة صالح .. وعاونها تفسخ عبايتها وسدحها على السرير
قعد جبمها وقال بحنية ولم وجهها بين إيديه وقال بحنية : تشربين شي ..؟؟
هزت حنان راسها بالنفي واهي مسكرة عينها بكل تعب ..
مسح على شعرها بخفة .. وظل على هالحال يتأملها لين حس أنفاسها انتظمت .. ونامت ..
قام بهدوء وقلبه متقطع عليها .. وطلع من الغرفة وسكر الباب ..
اتنتحح قبل مايمشي عسى مايكون أحد البنات بدربه ..
ويوم ماسمع صوت نزل .. !

لقى مشعل وخالد قاعدين بالصالة قعد معاهم ..
حاولوا يهدون مشعل ويسلونه ومو سهلة على طفل صغير يعاني كل هالمعاناة ويفكر بالانتقام والحزن بهالشكل !!

بعد ساعه
دق خالد على مرام الي كانت معتكفة بغرفتها بين أحزانها ودموعها ..
ردت عليه واهي يالله تحكي : هلا ..
خالد : حياتي البسي عبايتك وانزلي ..
مرام : على وين ؟؟
خالد : باخذك تغيرين جو واذا ودك نبات بأوتيل ولا أي مكان برا نبات ..
مرام كانت بحاجة لتغير جو واهي ضااااايقة فيها الدنيا .. من صار الحادث واهي بهالبيت ماطلعت وخالد ماتركها ولا لحظة وكانت تنام بغرفتها وكان ينام عندها ..
بس هالمره حب يطلعها يغير عليها عساه يريح نفسيتها شوي ..

وقف خالد ووقف صالح معاه .. باللحظة الي نزلت مرام لابسة عبايتها .. ومسك خالد ايدها وطلعوا ..
صالح قبل مايطلع حب يروح يشوف حنان ويتطمن عليها ..

طلع الدرج ويوم وصل غرفتها سمع صوت !!!
صوت منبعث من غرفتها !!
فتح الباب باستغراب وطاح قلبه يوم شاف الصوت صادر منها !!
كانت دموعها تسيل بلاشعور منها وتقول بهذيان :
صالح امسكها .. لاتتركها
لا ياطلال لااااااااا ..
ليه يافيصل حرام عليك ؟؟ حرام عليك .. !

هز صالح راسه بضييق ومشى مسرع ناحيتها وقعد جمبها وهزها وأهو يناديها : حناااان .. حنان قلبي .. !
سكتت وصارت تون أنين قطع قلبه ..
مسح دموعها واهو ينادي : حنان .. افتحي عيونك حياتي ..
فتحت عيونها وطالعته وقالت بصوت متقطع : سـ ـاره بتمووت ياصـ ـالح .. أنا ليه خليتهـ ـا تطلع من البيت ؟؟ مو معقول أنـ ـا أكـ ـون السبـ ـب بالي صار فيهـ ـا !
صالح وأهو يلم وجهها : اسم الله عليك حنان شهالكلام .. ؟؟؟ ساره طيبة وبتقوم بالسلامة ان شاء الله وانتي مالك ذنب بشي ! هذا الشيطان يوسوس فيك ويلعب بمخك اتعوذي منه حياتي ..
حنان بصوت متقطع : رجعني لساره ياصالح مابي اتركها ..
صالح واهو يمحس على خدها ويقول بحنية : ياقلبي انتي .. تبين تطيحين وتتعبين ويصيبك شي بسبة هالارهاق !!
حنان بنفس الصوت : بُعدي عنها بيتعبني أكثر ..
صالح برجاء : هاليلة بس ياحنان .. نامي وارتاحي هاللية بس وقلتلك بكرا أول ماتصحين دقي علي أرجعك !
تنهدت حنان وسكتت .. رفعت ايدها ولمت راسها واهي مكشرة بألم !
صالح : راسك يوجعك !
حنان : ......... مصدعـة ..
صالح : ياعمري .. أكيد وانتي اسبوع كامل مانمتي ولا ارتحتي .. (( وقام وقعد جمبها ورفعها وحط راسها على رجوله .. وصار يسويلها مساج بجبينها وراسها فترة لييييييييين هدت وارتاحت ورجعت نامت ..
مسح على شعرها ورجع راسها للمخدة واهي مو حاسة فيه ..
اتأملها بحنية واسترجع كلامها الي كانت تهذي فيه !! صدمة مو هينة على قلبك يابعد قلبي انتي !! آآآآآآآخ ليت الأيام ترجع ولا يصير الي صار .. ليتني مسكتها ذاك اليوم ودخلتها البيت ليتني ما ..... آآآه أستغفر الله العظيم .. !! هذا وانا توني أنصح حنان وأقولها اتعوذي من الشيطان الي يوسوس فيك !! اعوذ بالله من ابليس اعوذ بالله !
طالع فيها وانحنى وباس جبينها !
شال هم يروح ويتركها واهي بهالحال .. وقف وسحب كنبة صغيرة كانت بغرفتها .. قربها من سريرها وقعد عليها وسند راسه وسكر عيونه .. !

\
/
\

بخضم هالصراعات كل واحـــــد يلوم نفسه ويرمي عليها الاتهام ..
بحيث ان الحقيقة إهي ان هذا قضاء وقدر !! ومحد له دخل بمجريات هالقدر .. لو بنلوم أنفسنا على كل مطب نواجهه كان صرنا أتعس ناس على وجه الأرض ..
بس يجب علينا الإيمـــــان بالقضاء والقدر
ويكفينا قول الحبيب عليه الصلاة والسلام : انما الصبر عند الصدمة الأولى !


::

في الفندق على أحد البلكونات المطلة على شاطئ البحر الأحمر ..
كانت مرام واقفة على السور وماسكة بإيدها صور كانت مصغرتها بمحفظتها لأنها من أروع الصور الي عجبتها ..
كانت صوره لمرام وخالد بيوم المـلاك .. وسار واقفة بالنص بينهم ماسكة إيد خالد وإيد مرام !! اغرورقت عينها بالدموع وإهي تتأملها بالصورة .. كانت دايم تبتسم واهي تشوف الصورة ماكانت تظن ان بيجي يوم بتشوف هالصورة وتبكي !!..
تطايرت قدامها صور .. لعبها .. مرحها .. ضحكتها الي ماتفارقها .. وكيف صارت تستحي منها بعد ماتزوجت ! وطلبها الي طلبته من مرام قبل ماتسافر وقعدت تضحك إهي وخالد من هالطلب !

####

كانت مرام لابسة عبايتهاوشايلة ساره وتمشي فيها للصالة وتقول : هاه حياتي ماقلتيلي شتبين أجيبلك معاي ؟؟؟
ساره بضحكة : مااااعرف وس عندهم ؟؟؟؟
مرام : عندهم كل شي .. انتي بس قولي الي تبين
ساره : امممممم .. عندهم عربية لعروستي ؟؟؟؟
مرام : ايه عندهم .. تبين عربية لفلة ؟؟؟
ساره : ايه .. وعربية ثانية لي أنا ..
مرام : ههههههههههه شتبين فيها انتي ؟؟
ساره : ههههههه زي فلة
مرام : بس فلة ماتمشي .. ماتتحرك .. انتي ماشاء الله عليك تمشين وتتحركين ..
ساره : يوووه انتي قلتي اجيبلك الي تبين ..
مرام : ههههههه يعني مصرة ..؟؟؟؟
هزت ساره راسها بقوة واهي تضحك ..
ضحكت مرام واهي تحضنها وقالت : ان شاء الله ياقلبي اذا لقيت بجيبلك ..

####

صحت من ذكرياتها ودموعها تسل بكل ألم .. ليه كنتي تبين العربية ياغلا روحي انتي ؟؟؟
مسحت دموعها واتنهدت واهي تمرر ايدينها على شعرها بضيق ..
وقبضت على سور البلكونة بقوة كنها بتطلع الي بخاطرها فيه ..

شوي الا سمعت صوت من وراها وقبل ماتلتفت حست بقرب أنفاس من رقبتها وبوسة خفيفة تنطبع عليها ..
دارت وجهها شافت خالد واقف وراها ولم خصرها بذراعينه وهمس : شصحاك ؟؟
مرام واهي تسند راسها على صدره : أصلا مانمت .. !
خالد : ليه ياقلبي .. جبتك هنا عشان تروقين وتحاولين تنامين ..
مرام : مو بايدي ياخالد .. صورتها مو راضية تغيب عن بالي ولا لحظة ..
ضمها خالد لصدره أكثر وقال : بتقوم بالسلامة ان شاء الله ويصير هذا كله حكايات يجي يوم نتذكرها ..
مرام : يارب .. الله يسمع منك ..
ساد الصمت بينهم .. وبعد شوي مسك خالد ذراعينها ودورها ناحيته .. قرص أنفها وابتسمت مرام بخفة ..
دخل ايده بجيبه وقال : غمضي عيونك وافتحي فمك ..
مرام : شعندك ؟؟
خالد : غمضي وافتحي فمك وتعرفين ..
غمضت مرام وفتحت فمها واهي مو مخمنة وش بيحط ..
طلع خالد حلاوة من جيبه وفتحها وحطها بفمها ..
سكرت مرام فمها وصارت تتذوق الحلاو بشويش واهي لازالت مغمضة عينها ..
اتنهد خالد واهو يراقب حركاتها وقال : بلاش من هالحركات وذوقيها زين
ضحكت مرام وفتحت عيونها وطالعت عيونه الي ذايبة فيها ..
قالت بدلع : اممممم يجنن ..
خالد : انتي الي تجننين .. يالله غمضي عينك مره ثانية وافتحي فمك !
مرام واهي تضحك : كم حلاوة معاك انت !
خالد : أشكال والوان يالله افتحي فمك ..
غمضت مرام عينها وفتحت فمها واهي تترقب حلاوته الثانية .. حست فيه يوم حط شي بفمها بس استغربت يوم حسته يغزغز لسانها وبعد ماسكرت فمها انتبهت انه مو حلاو!!
افتحت عيونها واهي تفتح فمها بسرعه وتطلع الي بداخله وشخص بصرها فيه !
خالد : هههههههههههههههههههههههههه شرايك بورقة الحلاو مافيها طعم ؟؟
مرام : ههههههههه يييييع هذا انت عمرك ماكملت احسانك !
خالد :ههههههههههههه وانتي بكل مره توقعين بالفخ عمرك مافهمتيني ..
مرام : من كثر مقالبك .. ههههههههههههههههه
ابتسم خالد واهو يتأملها بحـب .. ضحكت واهي صار لها كم ماضحكت ..
وضحكتها هالمره تسوى عنده الدنيا ومافيها
في الصباح ..
سكرت عبير الجوال بعد ماأنهت الاتصال من فتون وقالتلها ان فيصل جاهم وحكتها عن وضعه وحالته .. حزن خاطرها حيل عليه وعلى صدمته ووضعه ..

راحت لتركي شافته قاعد على مكتبه ويفتح بالأدراج كنه يدور على شي معين .. مشت له وأهو منحني ومررت صوبعها بشعره واهي تقول : شتدور ؟؟؟
رفع تركي راسه وقال: ريبورت عن القسم .. شتقول فتون ؟؟؟
عبير : فيصل جاء !!
تركي بفرح : صـــــــدق ؟؟؟؟؟؟؟
عبير : اي والله البارح .. ونفسيته عدم تقولي تعبت لين خلته يحكي !
تركي : والله مالومه لو انا مكانه انتحرت .. <<< مبالغة ..
عبير : الله يعينه ويعيننا معاه .. (( ومشت للكنب وقعدت عليه بميلان واهي تطالعه ..
تركي واهو يتأملها : أكلتي شي ؟؟؟
عبير : لا مابعد .. مشتيهة بيتزا !!
تركي بابتسامة : على صباح ربي ؟؟؟
عبير بضحكة : اي مادري شجاني لايكون أتوحم ؟؟

انقلب وجه تركي فجأة واختفت ضحكته ووقف ودار عنها وقال بصوت متغير : اذا تبينها دقي اطلبيها وماله داعي هالأوهام !
اتعدلت عبير بقعدتها وقالت وحواجبها معقودة : شفيك زعلت ؟
سكت تركي شوي كنه يحاول يضبط أعصابه .. وبعدها التفت وابتسم لها وقال : مازعلت وليه أزعل أصلا ؟؟
عبير : مادري حسيت وجهك اتغير فجأة ..
تركي يبي يضيع السالفة قال : تصدقين شهيتيني فيها .. يالله خلينا نطلبها سوى ..
ابتسمت عبير وحاولت تتناسي حركته ..

مشى تركي للتلفون وقال : اي نوع تبين ؟؟؟
عبير : اممممم .. تشيز ..
تركي : بس تشير ؟؟؟؟
عبير : ايه بس ..
تركي : اوكي ..
ودق على المطعم وشوي الا ردوا عليه وقالهم طلبها وطلب له أهو بيتزا ..
عبير فجأة : لحظة تركي ..
تركي يكلم الهندي : لحظة شوي .. (( والتفت عليها باستفهام .. وقالت : انت شطلبت ؟؟
تركي : بتيزا بالخضار ..
عبير : آه .. اوكي انا ابي معها بيبروني وخلها حجم وسط ..
هز تركي راسه ورجع يكلم الرجال وعدّل بالطلب .. الا شوي قال لعبير : يقول تبينها رفيعة ولا متينة ؟؟؟
عبير : رفيعة ..
وأول مارجع بيقول للهندي قالت عبير : متينه متينه ..!
تركي : عبير .. متينة ولا رفيعة .. ؟؟
عبير : متيييييييييييييييينة خلها تشبعني ..
تركي : مافيه متيييييييينة .. متينة وبس ماراح يمتنونها أكثر عشاننا ..
ورجع وقال للهندي ..
شوي الا عبير قالت : تركي تركي ..
التفت لها تركي واهو يقول للهندي : لحظة بالله .. (( وقال: ها ياعبير ؟
عبير : بيتزتك صغير ولا وسط ؟؟؟
تركي : صغير ..
عبير : لا خلها وسط بذوقها معاك ..
تركي : ههههههههه جوعك كفر .. (( ورجع للهندي وعدل بالطلب .. الا شوي عبير تقول : اسمع تركي !
وسع تركي عيونه فيها بطريقة خلتها تضحك وقالت : امانة قول لحظة ..
تركي يكلم الهندي : لحظة يالحبيب عندنا وحده تدلع علينا هنا .. .. شدخلك شتقول ؟؟
عبير : ههههههههههههههههههههه يسألك شقول ههههههههههههههه مب صاحي ..
تركي وأهو يضحك : شبغيتي ؟؟؟
عبير : دامك طلبت الخضار وسط خلاص خلي التشيز صغير لأن ماراح ناكله كله ..
تركي : زين ..
وأول مارجه للهندي قالت عبير : ولا أقولك .. !
أشر تركي بإيده لها تسكت وقال للهندي : أقول يالاخو .. كنسل الطلب ! اي كنسل كل شي .. كيفي يبه بطلت عاد .. يالله سلام ..
سكر السماعة والتفت لعبير الي تطالعه بصدمة وقال : قومي البسي ..
عبير : .... ليه ؟
تركي : باخذك للمطعم وهناك اتحيري واختاري زي ماتبين ..
عبير : ههههههههه تاخذني بس عشان نطلب خلاص قلتلك الي أبي ..
تركي : لا بنطلب ونقعد ناكل يمكن تشتهين شي ثاني مايندري انتي جوعك مستخف هالمره ..
ضحكت عبير وقامت بحماس وعيون تركي تتبعها .. أخذت عبايتها والتفتت تبي تقوله شي وبترت كلامها يوم شافته قاعد مكانه ويتأملها بطريقة استغربتها !!
قالت بضحكة : شعنده الأخ معجب ؟؟؟؟
تركي وأهو يسند ظهره على الكنب : آآآآآآه لو جت وراحت على الاعجاب كان احنا بخييييييير .. البلا لا صار قلبك ليل نهار متولع ..
ولع وجه عبير وقالت : ياقلبي لهالدرجة تحبني ؟؟؟
ضيق تركي عيونه فيها وقال : لا والله ؟؟ شرايك أجاوبك بتصرفاتي ؟؟
عبير بغباء : اي صح هذاك بتاخذني المطعم !
تركي : احلفي بس ..
عبير : هههههههههههههههههههههههههههههه هههه ..
ابتسم تركي ووقف واهو يغني :
القلب سلم لك أمـره في حالتي إنت أدرى
ياللي حنانك وطيبـك تنحط ع الجرح يبرى

شفـاف يانور عينـي حبوب قلبـك يبينـي
زهرة شبابي وسنيني تفداك ألفيـن مـره

الله لـمـا تّـكـلـم كنـك تغنـي ترنـم
الـورد منـك تعلـم والشاعر يضيع شِعره

حنون ربي يصونـك في طيبتك في عيونك
دنياك حبي وكونـك ياطيب عمري وعطره

فديت صوتك فديتـك شفتك عشقتك هويتك
ياليت تدري ياليتـك غلاك ياكبـر قـدره

تأملته عبير واهو يغني ويمشي ويفتح الدولاب ويطلع ثوب وفجأة التفت وقال : الحين مو من حسن التبعل انك تجهزين ملابس بعلك ؟؟؟؟
عبير : وشووووو ؟؟ بغلي ؟؟؟
تركي : عبيــــــــــــــــــر ؟؟؟؟؟؟؟؟؟؟؟؟؟؟
عبير : ههههههههههههههههههههه شطرالك على هالكلمة طيب .. (( وصارت تطالع وجهه واهو معصب وتضحك أكثر : ههههههههههههههههههههههههههههه توك تغني فيني شهالانقلاب ههههههههههههههههههههههههههههه
ضحك من ضحكها وهز راسه وأخذ ثوبه وراح للشماعة يلبس ..
عبير واهي تلف طرحتها عند المرايه وتقول : دامنا بنطلع تركي ودي أمر على الصيدلية أبي شوية أغراض ..
تركي وأهو يصك أزاريره : ان شاء الله ..
عبير : واذا ماكان عندك شي ودي أمر بعدين أشوف ساره ..
تركي : ابشري ..
عبير : بتروح تشوف فيصل ؟؟؟
تركي : ان شاء الله ..
عبير : زين خذني معاك خلني اقعد مع البنات ..
تركي : حاضر ..

سعود ابتسم والي يسلمك الليلة زواجك خلاص عيش اللحظة الي انت فيها وانسى .. ادعي الله يكتبلك الي فيه الخير ويفرجها .. طالع وجهك كنك رايح عزا مو زواج !!

: غريبة هذا كلامك انتي بعد يافتون ؟؟؟؟؟؟

###

طالعته بنظرة حزينة وقالت : ان كانك ماتبيني ياسعود أجل ليه اتزوجتني .. كنت قلتلي بيني وبينك وانا بانهي الزواج بطريقته ومن عندي ..
اتنهد بخفة ومشى وانحنى قدامها ومسك ايدها وقال بهدوء : محد يقدر يعترض على المكتوب .. بس صدقيني بحاااول أسعدك قد ما أقدر ..
حاولت ترسم ابتسامتها غصب عنها وقالت : وانا بعد .. بحاول أسعدك !

\
/
\
/
\


انتهـــــــــت الذكريــــــااااات

ذكريـــات من أوراق المـاضي ..
عشناها في 22 جـزء !!

وانتهت !

وتعالوا معي الآآآآآآن .............
لنهبـــــــــــــط على أرض الوااااااااااااقع ...
ونشوف شحال أبطالنا ... ؟؟

تمسكوا عدل * _ ^

\
/
\
/
\

في شركة الغفيل وشركاؤه الضخمـة ،، دخل السكرتير على مدير الشركة وبإيده ظرف ،، مده للمدير الي استلمه منه واهو يقول : رسالة ؟؟؟
يوسف السكرتير : لا هالمره شريط كاسيت !!
اتأمل سعود الظرف لحظات وقال : زين مشكور يايوسف
يوسف : تامرني بشي ثاني ؟
سعود : لا مشكور اذا احتجت شي بناديك
يوسف : على امرك .. وطلع تارك سعود يقلب الظرف بإيدينه وهو مايدري وش يحوي هالشريط .. فتح الظرف بسرعه .. وطلع الشريط من داخله وأخذ مسجل صغير من الدرج ودخل الشريط فيه وشغله .. وثواني وبدت موسيقى عذبة يتخللها صوت أنثوي ناعم يلحن أغنية خفق لها قلب سعود بكل عنف وهو يسمع :

متخيل أنا راح أتحمل ؟؟ بُعدك عني مهما طول .. وقلبك لما عني يرحل ..
ينساني وأنسااااه ؟؟
متخيل أنسى أيامي ؟؟ حزني وفرحتي والآمي .. شوقي وضحكتي وأحلامي ..
وكل الي عشنااااه ؟؟
متخيل إني راح أقدر .. أصبر وأتحمل أكثر .. حتى لو جروحي تكبر ؟؟
لا حبيبي... لااااا !!

وانا ناطر حبيبي .. ترجع لي ياحبيبي ..وانا ناطر حبيبي . .
أنا ناااااااطر

مهما حاولت أداري .. لهفة روحي وناري .. مهما طال انتظاري ..
أنا ناطر !

حرام .. تظلم أحبابك .. بغيابك وبعدكـ .. والله حرام .. ياحبيبي .. حرام يصير الحب في لحظة كلام !!
الله مايرضى ياظالم !

لكن لا .. انتَ أطيب .. وما يرضيك اني اتعب .. تبعد ولا تقرب ...
بابقى ناطر !!

يالله تعال لحناني .. لو تدري كم اعاني .. لاتخليني ثواني !! ..
وأنا ناطر !!

وما اظن هانت عليك .. تهدم حبنا بيديك .. وقلبي ناطر حبيبه ..
وأنا ناطر !!

يالله حببيبي كفاية .. طالت هذي الحكاية .. انا محتاجك معايا ..
ياحبيبي

وانا ناطر حبيبي .. ترجع لي ياحبيبي ..وانا ناطر حبيبي .
.أنا ناااااااطر

مانتهت الأغنيه الا ودمعة تنسكب من عين سعود مسحها بسرعه ولم راسه بإيده وهويقول بألم : آآآآه ياوعَـد .. بس ياوعَد .. ذبحتي قلبي يالوعَ ـــــــد !!

صارله كم شهر وأهو لاكلمها ولا رد عليها .. لين يئست من المكالمات وصارت ترسله ايميلات .. صارت ترسله رسايل .. تبي منه أي رد يطمن قلبها .. تبي تعرف اهو حي ولا ميت .. بخير ولا مو بخير .. !!
وأهو بداخله يموت باليوم عشرات المرات .. لا من شوقه ولا من عذابه ولا من صدمة الواقع الي يعيشه !!
يحس بالعجز واهو عمره ماحس ولا اعترف بهالشعور .. عجز على مواجهة ماضيه .. ومواجهتها .. !!
وش بإيده يسوي وأهو انصدم بحقيقة صعدت بروحه للسماء .. وهوت فيها للأرض !!
بأجمــــــــل أحلامه .. ماحلم انه يلقى الطريق ممهـّد .. والصدور ترحب بخبر زواجه وياخذونه بالأحضان ويهنونه ..
لكن بأبشــــــع كوابيسه .. ماحلم بهالهجوم الساحق على زواجه .. تعب جده .. تحطيم أهله .. انهيار عمه .. !
رفع راسه فوق واتنهد تنهيدة طلّعت النيران المشتعله بكيانه .. وقال بصوت مبحوح : يالله الفرج من عندك !

لم أوراقه وطالع الساعة وابتسم بسخرية .. منتهي الدوام من ساعتين ولا له خلق يتحرك !! شال بعضه وطلع .. ويحس روحه بتطلع معاه .. ركب سيارته ومشى للبيت وأهو يحاول يطرد طيفها .. عاهد نفسه يفصل خيالها وهواجسها عن بيته .. حاول يعيش طيفها لحاله .. يحاكيه وقت يكون منفصل عن بيته ..

كافي ظلم وحده .. مايبي يظلم الكل معاه !!

وصل البيت ونزل واهو ياخذ نفس عميق يحاول يعبي صدره ويزيح جزء من همومه ..
دخل جناحه .. وانتبه لمنال تكلم بالجوال وتدور بالجناح ويوم شافته ابتسمت وأنهت المكالمة .. وقالت : أهلييييين ..
سعود : هلابك .. شلونك ؟؟
منال : بخير الحمدلله .. انت شلونك شلون دوامك .. ؟؟
سعود : ماشي الحال .. (( أخذ ملابسه ودخل الحمام وسكر الباب .. شي مو غريب على منال لأنها اتعودت على أسلوبه .. أغلب الوقت ساكت بس عمـــــــره ماعصب عليها أو رفضلها طلب .. حنون معها وطيب بس مايحكي كثير !
تحس ان حبــــــــه يزداد بقلبها يوم بعد يوم .. تسحرها نظراته وان كان مايقصد فيها شي .. بس تهوسها ويهوسها كل شي يتعلق فيه .. حتى صمته .. شروده .. ملامحة لا ركز بشغله .. ابتسامته لا حكت معه .. كل شي فيه يعلقها فيه أكثــــــر ..
خلاها تنعمي عن أي مساوئ ثانية تتعلق بشخصه !

طلعت عصير من الثلاجة وصبت بكاسين واحد لها وواحد له .. وحطتهم على الطاولة وقعدت على الكنب وشوي الا طلع واهو ينشف شعره بالمنشفة ..
أبعد المنشفة وشافها جالسة وقدامها العصير ابتسم بخفة وقال : جا بوقته ..
منال : انا حاسة فيك وحاسة بالي تبي بدون ماتقول ..
سعود : مشكورة ياقلبي ماتقصرين .. (( وقعد جمبها وأخذ العصير ومسكت منال إيده الثانية واهي تقول : تبي الغدا الحين ولا بعد ماتنام .. !
سعود : فتون دقت علي تقول بتتغدا هنا .. فبطلع اتغدا مع أهلي ..

ولعت بخاطرها من هالفتــــون .. من اتزوجت واهم يكيدون لبعض من تحت لتحت بس محد حاس فيهم الا أهم الي فاهمين بعض .. والحين بيتركها ويتغدا برا عشان عدوتها اللدودة ؟؟

كيف تمنعه واهو بمره حس انها تحرشه على أهله انفعل وسكتها وحط حد لهالموضوع وقالها بصريح العبــــــــارة ..
أهلي .. بعدين انتي !!

ضاق صدرها عند هالخاطر وماعلقت .. وبعد ماخلص عصيره ترك إيدها ووقف وقال : بتجين ؟؟
منال : مادري أشوف ..
سعود واهو يمشي للباب : اوكي انا رايح وبتفرحيني لو جيتي ..
طلع وسكر الباب ومسكت منال جوالها وضغطت عليه شوي وتكسره .. ليه مايزن علي ليه مايطلبني برجاء ليه مايحسسني انه أهو يبيني ؟؟ بفرحك لو جيت بس لو ماجيت بتزعل ؟؟؟؟ ماراح تزعل هذا انت .. ودي لو تزعل مني ....... والله افرح ! أحس انك مازعلت الا لأني هميتك !!
آآآخ ليتني أقدر أدخل قلبك ياسعود وأغوص بأعماقه وأعرف شلون أقدر أعلقك فيني ؟؟

دخل سعود الصالة ولقى أبوه قاعد يقرا جريدة .. أبوه الي ماعاد أهو أبوه بتعامله معاه .. صحيح مرت على هالسالفة فتــــــــــــرة طـــــــويلة .. بس لازال أبوه منصدم من زواج ولده بدون علمه !!
انحنى وباس راسه واهو يقول : مساك الله بالخير
ابو سعود : مساك الله بالنور ..
قعد سعود وأبعد أبوه الجريدة عنه وقال : شلون الشغل معاك ..
سعود : من أحسن مايكون الحمدلله ..
أبو سعود : الحمدلله .. و وش صار على أوراق خالد نقلتوه ؟؟؟
سعود بتنهيدة : والله يبه أوراقه ماكتملت وأرسلت للقسم يرسلونها بس خالد نفسه لازم يتحرك ..
أبو سعود : طبعا لازم انت كلمته ؟؟؟
سعود : كلمته وقالي ان شاء الله عاد مادري عنه ..
ابو سعود : هالولد مادري متى يعقل !
سكت سعود وماعلق لأن هالمواضيع صارت حساسة مع أبوه .. لو نقص شي بقدر أخوه يمكن ينقلب الكلام عليه فيفضــل الصمت على الكلام !

دق الجرس ويوم فتحوا الا دخلت فتـون وفيصل ..
فتون بمرح : سلااااااااااام باااابي I miss yooooooooooou
أبو سعود بابتسامة : وعليكم السلام ورحمة الله وبركاته .. ميس يو وما ميس ولك كم ماكلمتي أبوك ؟؟ عن الحكي الفاضي أشوف ..
ضحكت فتون وسلمت على ابوها وعلى سعود وجا فيصل بعدها سلم ..
قعدت فتون جمب أبوها واهي تقول : افا عليك يبه انا حكيي فاضي .. والله حتى اسأل فيصل ماعندي سالفة غيييييييرك .. حتى اني دايم احقر فيصل واقوله ليتك تجي ربع أبوي !!
وسع ابو سعود عيونه فيها وقال : تحقرين بزوجك يالمهبولة !!
فتون ببرائة : عشاااانك !
ابو سعود : بلا عشاني بلا طل .. زوجك تحطينه فوق راسك بعيوبه وبمحاسنه وماتقعدين تقولين ليتك ربع ابوي وهالخرابيط .. تحبين ابوك كلميه زوريه ولا على بالك لا حكيتي فيني بافرح وأقول عفية على بنيتي تحبني والله !!
فتون : شوف شوف شوف !!! الحين كل هالتهزيئة عشاني أحبك والله انتوا الرجال ماتنحبون كلش ..
ضرب ابو سعود فخذها واهو يقول : قطع هالسان الي كل ماله يطول ..
فتون : ههههههههههههههههههههههه (( وضمت ابوها وقالت : صدق من قال ضرب الحبيب زي أكل الزبيب ..
ضحكوا سعود وفيصل الي كانوا قبالهم وفيصل يتوعد فتون بنظراته واهي تقلب عيونها وماسكة ايد ابوها انها محتمية فيه ..

نزلت أم سعود الدرج واهي تقول السلام .. وردوا عليها السلام وفتون قامت تسلم عليها وقالت وإهي تضحك : شهالنوم ياكافي ؟؟؟
ام سعود بابتسامة : انقلعي انتي آخر من يحكي عن النوم ..
فتون : ههههههههههههههههه ذا كان أووووووووول .. الحين طاير مني أدوره دوراه ماحصله ..
فيصل : الحين كل النوم الي تنامين وهذا يقاله طاير ؟؟؟؟؟؟؟؟؟
فتون : ايه كلها ثمان تسع ساعات بس ! الله يرحم ايام اول كنت بالثنعش ساعه أنام !
ام سعود : ذاك أول يوم ماوراك شي وكلنا كنا كذا بس الحين الي تنام بهالشكل ووراها مسؤليات عسى نومتها مابعدها قومة ..
فتون : ههههههههههههههههههههههههه شوفي انتي توك قايمة طيب !
ام سعود : هذي الي بتجنني !! قاعدة تحاسبيني على نومتي على بالك نايمة من البارح للحين ؟؟؟
فتون واهي تضحك : أجل ؟؟؟
ام سعود : لا ياقلبي قايمة من الصبح ورحت لخالتك عشان مراجعة ساره وطولنا بالمستشفى لين صدع راسي ..
فتون : ياقلللللللبي ظلمتك .. لا أجل والله سلامات ..
فيصل : كلتها بقشورها عقب تقول سلامات ..
ام سعود مسوية حزينة : شفت يافيصل .. ظالميني عيالي ..
سعود : شدعوووووة !
ام سعود : هههههه لا عاد سعودي هذا غير عن الكل ..
ابتسم سعود واهو الي رضى أمــه وأبــوه عنده بالدنيـا ولو على حسـاب نفسه وحساب الكـل !

حطوا الغدا على الطاولة وقعدوا عليها وبدوا ياكلون ..
وأثناء ماهم ياكلون ومندمجين بالحكي والسوالف .. انفتح الباب الي يفصل بين البيت وبين جناح سعود .. ودخلت منال لابسة جينز وبلوزة وردي ومنزلة طرحتها على كتوفها .. !!
ضربت فتون بكوعها فيصل واهي موسعة عيونها بمنال وقالت : لاترفع راسك ..
ووقفت واهي تقول : لحظــــة منال !
التفت سعود وشاف منال مقبلة عليهم وجا بيقوم بس يوم شاف فتون راحت ترك المهمة لها ..
مشت فتون لها ومنال راحت خلف الباب .. وصلتها فتون وقالت : اهلين منال .. في شي ؟؟؟
منال : سعود لزّم علي أجي اتغدا وماقالي ان حضرة زوجك موجود !!
فتون واهي رافعة حاجب : ايه ! يمكن مايدري .. بس خلاص عرفتي الحين انه موجود تبين شي ؟؟؟
منال بحمق : لا مشكورة كلك ذووووق .. مابي شي ..
وجت بتدور الا سمعت صوت ام سعود ورى فتون تقول : يمه منال ..
وقفت منال مكانها والتفتت تطالعها باستفهام ..
ام سعود بابتسامة : تبين أرسلك غدا ولا تتحجبين وتقعدين معانا ؟؟
فتون طالعت لبس منال ولا ارتاح خاطرها تقعد معاهم بهاللبس وقالت : يمه شوي واروح انا وفيصل وبعدين خليها تجي تاخذ راحتها ..
منال : أساسا انا جاية اقعد بس مو جاية اتغدا .. خلاص خالتي اذا طلعوا كلميني ..
ام سعود واهي دارية بعدم الاتفاق بين منال وفتون من زمان وقالت : على راحتك ياقلبي ..
تركتهم منال ورجعت الجناح واهي شوي وتهد الارض بقوة القهـر بداخلها ..!!

رجعت أم سعود وفتون للطاولة وماخفى على فيصل ملامح فتون المولعـة
عقد حواجبه بابتسامة واهو يهز راسه بخفـة يستفهم !
رفعت فتون حاجب واهي تتنهد من أنفها وهزت راسها بالنفي ..
فهم ان مافيها تحكي الحين وسكت وكملوا غداهم ..

بعد الغدا اتوجه كل واحد لمطرحه .. وفتون طلعت اهي وفيصل ..

وبالسيارة ..
فيصل : شفيه القمر معصب .. ؟؟
فتون : باسألك أمــــــــــانة فيصل .. شفتها ؟؟؟
فيصل كان حاس ان هذا الي قاهرها وقال يبي يناكفها : بصراحة إهي طلعت علينا فجأة وغصب وقعت عيني عليها !!
فتون : قلتلك لااااااا ترفع راسك !
فيصل : ياقلبي من قبل ماتقوليلي قيدني رفعت راسي وشفتها !!
فتون بقهــــر : وش شفت فيها ؟؟
فيصل الحقيقة ماشافها .. واتورّط بسؤال فتون ورد : اممممم .. ماذكر عاد ماتمقلتها انا بس شفت طرف فستانها ..
فتون : فستان !! أي فستان ؟؟
فيصل : فستانها الي عليها أي فستان بعد !
فتون سكتت شوي وبعدها : ههههههههههههههههههههههه فستان مره وحده ليه داخلة عرس إهي ؟؟ هههههههههههههههههههههههههه
فيصل : ههههههههههه والفستان بس بالعرس يعني ؟؟
فتون : وش بيلبسها فستان بالبيت يالنصااااااااااب .. (( واتنهدت بارتياح !

فيصل ضيق عيونه فيها وقال : هذا شسموونه الحين ؟؟
فتون : مدري .. بس ماكنت متقبلة فكرة انك تشوفها او تشوف أي أحد غيري ..
فيصل : ياوييييييييل قلبي .. وتقول ماتحبني هذا شمعناه ياعمري ؟؟
فتون عضت شفتها وهي تضحك وأبعدت عينها عنه ..
فيصل : العبي يافتون .. وانا بالعب معاك ..
فتون : نلعــــب يبه واحنا شورانا !
فيصل : ابد ماورنا شي .. الدنيا كلها ماشية بمزاجنا ..

فتون : ههههههههههههههه زين فيصل قلبي وين بتلف انت مابي أروح البيت ..
عدل فيصل السيارة وأهو يقول : هاه وين تبين ؟؟
فتون : خذني بيت أهلك حنان بتجيهم اليوم وبشوفها ..
فيصل : أوكي بس عاد نوم مافيه من الحين أقولك !
فتون : حاضر قلبي .. انا كم فيصل عندي ؟؟؟
فيصل : واحد ويخب عليك
فتون : مالت هههههههههههههههههههههههههههههه

::

طلعت منال من الجناح بعد مانام سعود .. الجوع قارصها وتبي تاكل أي شي ومو عاجبها شي من جناحها .. راحت للصالة لقت أم سعود قاعدة وفاتحة اللاب توب قدامها ..
حاولت تغصب نفسها على الابتسامة .. حاولت حاولت عجزت تطلع معها !! تجاهلتها ومشت للمطبخ ..
رفعت أم سعود راسها باستغراب !! شعندها جاية وبدون سلام ولا كلام !! ما اشغلت بالها كثير فيها لأنهـا ماتحب تدخل نفسها ولا تدقق بصغائر الأمور ورجعت تطالع بالشاشة ..
بعد دقايق طلعت منال من المطبخ وقالت : خالتي ..
رفعت ام سعود راسها وطالعتها باستفهام ..
منال : عندكم توصيلة زايدة ؟؟
ام سعود وإهي تفكر : والله ياعمري فيه وحده عند عمك خلي يصحى وأشوف اذا مو محتاجها أرسلتها لك ..
منال : ممممم لا خلاص مو مشكلة لأنه على مايصحى بكون طلعت !
ام سعود بتقائية : رايحة لأهلك ؟
منال : لا رايحة مشوار باشتري غرض ..
هزت ام سعود راسها ورجعت تطالع بالشاشة ومنال تركتها ورحت لجناحها ..
طالعت أم سعود بمكان ماراحت واهي تبتسم بسخرية وتقول : مشوار .. وغرض !! شدعوة ياكافي مالهم أسامي ؟؟؟ ........ آآآه وبس .. !
غيرت منال ملابسها وجهزت شنطتها عشان أول مايصحى سعود تقوله تبي تطلع ..
وهي تحوس دق جوالها .. أخذته من على الطاولة وطالعت لقت نهى اختها ..
ردت بهدوء : هلا حبيبتي ..
نهى : هلااااااابك شلونك منال ؟؟
منال : تمام الحمدلله انتي شلونك ؟؟
نهى : بخير الحمدلله اسمعي ..
منال : هلا ..
نهى : بشاير ووجدان بيجونا اليوم تجين ؟؟؟
منال : اممممم والله ياقلبي ناوية اروح السوق ..
نهى برجاء : خلي السوق بكرا تكفين وتعالي اليوم نتونس سوى ..
منال : بشوف يانهى .. خلي سعود يصحى واشوف
نهى : حااااااااااولي ..
منال : ان شاء الله ياعمري ..
نهى : اوكي سلااااام
منال : مع السلامة ..

سكرت الجوال ولعبت الفكرة براسها .. وانا شوراي ؟؟ أروح لأهلي اليوم وبكرا السوق .. أحسن خلني أطلع من البيت الواحد مسرع مايمل فيه ..
رجعت بدلت ملابسها من جديد وانتظرت سعود يصحى ..
أول ماصحى جابتله قهوته وطلبت منه يوصلها وكان رده بالموافقة مثل كل مره اتعودتها منه!

طلعوا وراحـوا لبيت أبو تركي ..
دخلوا الحوش وشاف سعود وائل أهو وولد الجيران يطرطعون طراطيع " ألعاب نارية "
ابتسم واهو يطالعهم ويطالع الحماس بعيونهم ..

وائل : هلااااااااااااا سعود تعال إلحق شوف شلووون تولع الطرطييييييعة ..
مشى سعود بهدوء وراح يشوفهم ..
عمره ماهتم بهالأشياء مايدري ليه انقضت طفولته بسرعه مايذكر انه مر بكل هالمغامرات الي يشوفها بدنيا الأطفال هالزمن !
وائل بحماس : شووووووف كيف تدوووووووووور طااااااااارت طاااااااااارت
سعود : هههههههههههههههههه حلوة والله ..
وائل : تجنن ! اصبر اوريك الثانية
ابتسم سعود وماحب يكسر خاطره .. وحط طرف إيده بجيبه واهو واقف على رجل ومرخي رجل ..
ولع وائل الطرطيعة واهو يصارخ بحماس وسعود يشاركه الضحك لين شاف ابو تركي واقف عن باب البيت يطالعهم وقال : سعوووود ؟؟؟ والله على بالي رحت وانت هنا تطرطع معاهم؟؟
انتبه سعود انه واقف من فترة ومنال دخلت من زمان .. مشى لعمه واهو يضحـك ويقول : عشت لحظات طفولة ماعشتها قبل ياعمي ..
ابو تركي : ههههههههههه كبرناك من صغرك انا اشهد ..!
ضحك سعود وسلم على أبو تركي ولزّم عليه أبو تركي يدخل بس اعتذر سعود وأهو الي ماله خلق يقعد ويحكي ويجامل وأهو يدري ان أبو تركي شايل عليه !

طلع سعود ولاشعوريا ضربت عينه بشباك الصالة وانتبه لشخص يطالع بس مسرع ما أبعد عينه وطلع وسكر الباب .. لكنه عقد حواجبه واهو يسترجع النظرات !!

حسها نظرات لو تصوّب كان صابت كل جزء بكيانه .. !!

استغرب منها والي استغرب منه أكثر انها طالعة من بنت يعرفها زين ..
لأنها الأخت الوحيدة لمنال !!
نهى !! ....... ليه تطالعني كذا ؟؟ ......... شفيها ؟؟
معقول ................... ؟؟

********


للمره العشرين تطلع حنان الهدية من الكيس وتتأملها بحب وترجعها مكانها ..

طلع صالح من الغرفة واتأمل ملامحها وابتهجت روحه للفرح المرتسم على ملامحها .. قال بمرح : ليتني أنا الكيس .. ليتني أنا الهدية .. ليتني .......... آآآخ بس !
حنان : هههههههههههههه شلون تكون هدية أهديك لغيري .. بالعكس خلك جمبي وذي أحلى هدية بحياتي ..
ابتسم صالح وقال وأهو يمشي ناحيتها : أهم شي أحظى بهالتأمل والابتسامة الي من اليوم واهو من نصيب الهدية ..
حنان : ولاتزعل حبيبي اليوم بتروح الهديه لصاحبتها وماراح تشوف عيون حنانك غيرك !
مسك صالح يدها وقعدها وقعد قبالها وأهو يقول : ماقول غير ياحظي انا وابو الشباب بحناني ..
حنان : هههههههههههههههههههههههه ابو الشباب مره وحده حبووووووه
ضحك صالح وأهو يتحسس بطنها .. وقرب فمه لبطنها وصرخ : انت يالحلوو متى بتطلع تراك آذيت حناني يالله عاد خلصنا ..
حنان وعيونها موسعة بصدمة : هههههههههههههههه حرام عليييييييك خله ياخذ راحته شنبي فيه لاطلع قبل وقته وحطوه بالحضانة لاااااااا والي يسلمك خله يقعد ضعف المدة بعد!
صالح : هذا وانا ابي راااااحتك ؟؟؟
حنان : لا مو على حساب ولدي !!
صالح : قالت ولدي آآآآآآآآآآآآه ياناس مو مصدق بصير أبووووووووووووو
حنان : هههههههههههههههه سبع شهور وانت للحين مو مصدق ..؟؟
صالح وأهو يوقف : يمكن مصدق بس مو مستوعب لين أشوفه بعيوني وأشيله بإيديني !
حنان بابتسامة ناعمة : الله يجيب هاليوم على خير ..
صالح : آمين يارب .. يالله الحين مجننتنا على هالهدية وقاعدة ساعه ماقمتي !
حنان : ههههههههه انت الي قعدتني مالت عليك ..

مسك صالح ايدها وعاونها على الوقوف ومشوا سوى لباب الشقة وطلعوا ..
نزلوا الدرج وصالح يغني جمب اذنها :
على هونك على هونك تراني ضايع بدونك
على هونك بعد عمري وقلبي بالهوى يصونك ..

ضحكت حنان ومسكت إيده وعاونها حبه حبه تنزل .. حبه حبه تمشي .. لين ركبها السيارة وسكرلها الباب واهي تضحك على حركاته وخاطرها ميته فيه وعليه ..

ركب السيارة ومشى واهو يقول : ياجعلي فدوة هالضحكة .. حنان لاتبكين اليوم تكفين ..
حنان : ياعمري بحاول.. كل مره اقول ماراح ابكي بس أشوفها ماتحمل وأبكي ..
صالح : بس إهي أحسن الحين بكثيـــــر .. صار تحكي وتتفاعل شوي معانا يعني احمدي ربك وين كنا ووين صرنا .. !
حنان : الا والله الحمممممممد لله يارب ..


من جهة ثانية ..

فتح مشعل باب المدخل الخشبي بقوة وحط جزمة وانتو بكرامة عشان يمنعه لا يتسكر .. وبعدها رجع داخل البيت واهو ينادي بصوته الي بدا يكبر : يممممممممه .. يالله يممممممممه ..
طلعت أم فيصل من المطبخ واهي تقول : شوي شوي يامشعل وش هالصراخ ؟؟
مشعل : لا بسرعه يمه قبل تمل وتغير رايها ..

مشت أم فيصل لوين مازهرتنا الحلوة قاعدة بالكرسي المتحــرك عند باب المدخل ..
انحنت وباستها وقالت بحنية : تبين تطلعين الحوش مع مشعل ؟؟؟
هزت ساره راسها بصمت .. مثل ماكان الصمت أهو أغلب ردودها ..

باستها أمها ورفعت العربيه من قدام ومشعل من ورى واهو عاقد حواجبه بحماس ..
نزلوا العربية من الدرج الصغير الي عند المدخل .. وحطوا العربية بالحوش ..

أم فيصل : انتبه لها مشعل ولاتسرع فيها فاهم ؟؟
مشعل : يمه لاتوصين حريص ..

دخلت ام فيصل البيت وقلبها خايف على بنتها الي ماصدقت طلعت بالسلامة .. وقالت للخدامة تروح الحوش تراقبهم بس بدون ماينبته مشعل ويعصب .. !

طلعت الخدامة وظلت أم فيصل مكانها تتفكر بذاك اليــــــــــوم
الي أبرقت فيه الدنيا ..
شعت شعاعها بأرجاء حياتهم الي أعتمت مـــدة طويلة ..
أمطرت مطر ماشافته غير عيونهم .. بعد الجفاف الي عاشته نفوسهم ..
هبت هبوب ماحستها غير أرواحهم .. كنها دنيا جددت أفراحهم
اليوم الي ملكوا كنوز الدنيا .. في السنة عيدين بس الله أهداهم عيد ثالث

يوم خرجت ساره من المستشفى

بعد مادمرهم الحزن تدمير .. وحرقهم الشوق والوله .. فـــــــاقت أخيرا .. بس انكسرت خواطرهم يوم اكتشفوا انها .....................
" فقدت الذاكرة "
طلعت حاملينها بإيدينهم ومالتئمت رجولها التئام كامل !
مثل جروح قلبهم الي مالتئمت ولاندملت ..
لكنها خرجت وكيفما خرجت !
لله منهم شكــــــــر وحمد مايحصونه ..
وأهم الي وصلوا بلحظات من حياتهم لليأس من انها تطلع ولاتصحى ولاترجعلهم !
ودام الله أكرمهم بهالكــــــــــرم
قادر سبحانه يرجعها لهم مثل ماكانت وأحسن ..

قالت من خاطر قلب منفطر : ياااالله يارب ان أمرك بين الكاف والنون .. وأنت على كل شي قدير .. يالله انت قلتك بكتابك تحيي العضام وهي رميم .. يالله انك تشفي بنيتي وترجعها لنا كامله قواها طيبة وسليمة ومتعافية يارب انك جواد كريم ..

مشى مشعل بالحوش وأهو يدف ساره بالعربية ويتأمل جسمها الضعيف .. وشعرها القصير الي ياما شده بإيده وقت كانوا يتهاوشون ..
راح الشعر الطويل وصار طول شعره أهو أو أقصر .. من العملية والبنج الي عانته طول فترة علاجها ..
اتأملها بحزن وقلبه متقطع عليها ..

وقف العربية عند شتلات ورود آخر الحوش .. وجا قدامها وقال بمرح : شوفي الورد ياساره شلون طالعه ألوانه تجنن .. تبين أقطفلك ؟؟؟؟
هزت ساره راسها وعيونها ضايعه بالورد ..
مشى مشعل للورد وقطفلها من كل الألون ورجع لها وأعطاها .. أخذت ساره الورد واهي تبسم بنعومة .. وقربتها من وجهها وشمتها وقالت بنعومة : حلو ..
مشعل : مرررررررره حلووووو .. (( واتلفت بالحوش يدوّر شي يسليها فيه انتبه لكورة اسفنجية صغيرة .. فرح وركض وأخذها ونفضها من الغبار الا سمع واتي تقول : لالالالالالا مشعل بعد ساره تـأوّر !
مشعل : انت شجايبك هنا .. انا اعرف شلون ألعب معها وهذي اسفنجية مو مآذيتها ..
ومشى لين قعد قبالها يفصل بينهم مترين .. وقال : يالله سوسو انا أرمي عليك وانتي امسكيها زين طيب ؟؟؟ وارميها علي
هزت ساره راسها بحماس ..

رمى مشعل الكورة عليها ومسكتها وضحكت .. ورمتها عليه وصاروا يترامونها واهي تضحك مبسوطة ومشعل ميت من الفرحة لضحكها ..

سمعوا صوت الباب ينفتح يوم التفتوا لقوا فيصل يدخل ووراه فتون ..
شافوا ساره واهي تضحك ومعها الكورة وضحكت الدنيا كلها بوجيههم هاللحظة ..

مشى فيصل ناحيتهم واهو يقول بمرح : تلعبوووووووون كورة بدووووني ؟؟
ساره : ههههه تعال إلعب ..
وقف فيصل عندها وقال : مين الي يلعب ؟؟؟؟؟؟
ساره : انتَ ..
فيصل : وأنا مييييييييين ؟؟؟
ضحكت ساره بحيا وماردت ..
انحتى فيصل قدامها وقال : انا فيصل ياسوسو ..
هزت ساره راسها وهي تقول : فيصل ..
ابتسم فيصل وأشر على فتون وقال : وهذي مين ..؟؟
ابتسمت فتون وإهي تميل راسها على الجمب ..
ساره بدلع : فتوووون ..
فتون واهي تنحني جمب فيصل : ههههههههههههههههه ياروووح فتون انتي ..
فيصل : شدعوة تعرفك وانا لاء !
فتون : من كثر ماقابلها ليل نهار وأعيد عليها اسمي ..
فيصل : أجل ملت منك وتبي تفتك ههههههههههههه
فتون : ههههههههه انقلع ..
فيصل مسوي معصب : وشوووووووو ؟؟ مين الي ينقلع !!
فتون مسوية خايفة : مشعل مشعل ..
مشعل : لا والله شايفتني مخفة عندكم ..
فتون: ههههههههههههههههههههه أحلى وأروع مخفة ..
مشعل : فيصل قوم عليها ..
فيصل : يالله قوم معاي ..
نطت فتون عنهم ودارت حول عربية ساره ومسكت العربية وسحبتها على ورى مسرعة واهي تقول : ساااااااره شوفي بيضربوني
ساره : هههههههههههههههه ياويلكم ...
فتون : ههههههههههه شفتوا ساره بتوريكم لو لمستوني ..

ضحكوا وانبتهوا لدخول أحد من الباب يوم التفتوا لقوا صالح وحنان ..

دخلت حنان وبإيدها كيس الهدية ومشت وقالت بمرح وإهي ترفع الكيس : سوووووووسوووووووووو جبتلك دووورااااا ..
ساره صفقت وهي تقول : شكرااااااااااااااا ..
ضحكت حنان وجت لعندها وحضنتها وباستها وقالت : بس أول تقولين أنا مين ؟؟؟؟
ساره بمرح : ماما حنان .. !
حنان : ياعيوووووووون وروووووووح ماما حنان .. (( وطلعتلها العروسة وأعطتها اياها واهي تتمنى بخاطرها لو ان ساره تذكر شكلها .. وتذكر ماضيها .. وتذكر منهي فعلا ماما حنان ..
مو مجرد اسامي تتردد قدامها وتحفظها وتردد زي مالكل يرددها ..
همست بخاطرها واهي تتأمل ساره .. " الله كريم "


******
()
()

خوفِي أنسأل عنكـ وتفضحـ عيني دمعاتي ..
واذا قالوا حبيبكـ وين ؟؟؟
يضيع الرد بشفاتي !

خوفي أنكشفـ بعدكـ وتحس الناس بجروحي
بعد ما كنت انا وياكـ ...
يشوفوني أنا بروحي !

قلبي ما يطاوعني بيدي أكشف أحزاني
واقول ان أعز الناس خلاني !

تعال سكّت العذّال حبيبي لاتخليني
تعبت أتحمل فراقكـ
ترا الي فيني يكفيني ..

()
()

كنها طيف الي يمشي .. كنها بقايا إنسان .. تعيش وحيده بهالدنيا .. تكابد لوعة الحرمان .. ! دخلت البيت بعد ماقضت يوم كامل واهي برا .. صعب عليها تقضي يوم كامل بين جدران هالبيت .. وكل شي فيه يذكرها فيه ..
هنا كنا ناكل .. هنا كنا نضحك .. هنا كنا نحتفل ..
ويالوعة الخاطر لا قالت .. كنا وكنا وكنا ... !!
ليتك رحت وأخذت معاك الشوق .. تركتني بحالي بين عذاب الشوق .. ورجاء الوعد !!
ليتك ماتركت عندي شي .. ليتك أخذت معاااك كل شي .. حتى أغراضك .. ملابسك .. عطورك .. ليتك ماضاعفت عذابي بشوفة طيفك .. وبقايا الأشياء !

كثيــــــر علي فراق اثنين أهم كل حياتي وسعادتي بوقت قصيــر !!
أهم سبب ضحكتي ووجودي ..

رمت نفسها على الكنب وتحسسته بإيدها المرتعشة ..
ياولي منهاااااااارة ومحد حولي ..
ضاااقت فيني الدنيا بوسعها ..
تعبت .. طحت محد سندني ..
محد رحم ضعفي ..
حتى انتي .. يا شهــد .. رجعتي مصر وتركتيني .. حسبتيني عايشة بالأمان ويا سعود .. تعالي وشوفي حالي بس لاتسخري .. لحد يسخر .. لأني أستاهل كل الي جرالي !

أنا الي عشقتك .. وهويتك .. وصدقتك .. وبكل حب ودعتك .. وانتظرتك .. وانتظرتك .. وانتظرتك .................. !

رمت حجابها وجاكيتها بإهمال على الكنب ..
كل شي صار مُهمل عندها .. حياتها بكبرها أهملتها .. ماعاد لها طعم ولا لون .. والدنيا مكشرة أنيابها بوجهها .. شالي بيكون له طعم بعد ماخسرت أغلى من سكن قلبها .. !!

فتحت لابوتبها مثل ماتفتحه كل مره ترجع البيت .. واهي تبتسم بسخرية على بوادر الخيبة الي ترتسملها ..

Inbox 0

كالعادة ماتدري عنه ولا شي .. لو ماتت بيكون هجرانه سبب موتها !!

ياعالم هذا مو بس حبيبي وحياتي ودنيتي ..
هذا زوجي .. حلالي .. شريكي ..!!

بس لايكون .............. طلقني .. ؟؟؟

لا مو سعود الي يسويها !!
لازالتْ مأمله فيه طيب .. مو سعود الي ماكنت أتوقع ولا بأسوأ التوقعات يرميني بهالشكل .. ؟؟ وسواها .......... ليه مايكون طلقني ؟؟

بس لازم يبلغني .. يوصلي .. أشوف حياتي على الأقل !!
هههههه أشوف حياتي ؟؟ ليه اهو شبقى بحياتي شي أشوفه فيها ؟؟؟؟

فتحت على قسم الرسايل وكتبت .. مثل ماتكتب بكل مره .. يقراها مايقراها ماتدري .. بس تطلع الي بخاطرها وترسله ..
توصله ماتوصله ماتدري .. بس تسوي الي عليها والي تقدر عليه ..

كتبت .. كلمات .. مجرد كلمات .. أصمة المظهر .. مقتولة الجوف .. عديمة الاحساس ..
هذا اهو شعورها ناحية هالكلمات ..

كتبت :

كنتُ أعتقد أن حبنا لايساويه حب بهذه الدنيا ..

ولكني أخفقتُ حين فكرتُ بذلك .. فلو كنتَ تحبني حقا .. لكنتَ أقدر على الوقوف بوجه التيار .. لما توانيتَ لحظة عن ترك روحي جريحة وسط النار .. لعرفتَ كيف تخاف على من تعول ! على من تحب !

كنتَ لن تتردد بالبقاء معي وبقربي ..
فلا تلوم خواطري .. اذ لستُ أعلم عنكَ أي شئ!

لو كنتُ أسكن بين جنبات فؤادك .. لما استطعتَ طعن فؤادي ببُعدك وهجرك وصدك !
أُعذر انهياري وصدمتي وجروحي .. فلستُ أقدر على تحمل الدموع أكثر ..
وقد انتظرتُ طويلا وأنا باكية جريحة .. !!

غلطتي هو اخلاصي .. غلطتي عشقي .. ولعي وغرامي وهيامي !
ويظل نصيبي أن أعيش دوما أبكيك وأبكي عذابك طول عمري ..

احساسُ يصدمني .. يفتكُ بي .. يقتلني .. يدمرني ..

أنكَ لم تكون لي .. ولن تكون !

أنكَ ياحبي الأول وعشقي الغدار .. من تسبب بدموعي وجروحي وأنك من طعن روحي .. وأنكَ من قتل فؤادي .. ولم ترحمني وترحم ضعفي ..
أنك لم تقف .. معي .. وبجواري وبصفي ..

حين انهـــــــــــار كياني .. وتمزقت روحي .. وتبعثرت جوارحي ..

حيــــــن غرقتُ في همـّـي .. حيـــــن تبعثرتُ في غمـّـي

حيــــــــن ... ماتت أمـّي !

مسحت دموعها بطرف كمها واهي تبلع ريقها بصعوبة .. صارلها قريب الساعتين وإهي تكتب .. بالقوة تجمع الكلمات وتشكّل الأحرف .. مابين شهقات وأنين ودموع جرّحت جفنها ..
وأرسلتها ......... من عداد الرسايل الي ترسلها ..
والي توصله في غضون ثوووااااني ..
عكس أرواحهم الي كتبت عليهم الدنيا تبعدهم ............... سنين وسنين .. !