|
#56
|
|
لجل الوعد كامله
حكتها عهود شلون ما صدق انها ذيك البزر الي شافها مره او مرتين وهي صغيرة
وفتون ابتسمت ابتسامة صفراء وبعدها نزلت اهي وعهود واتوادعوا وطلعت وركبت سيارتها ..
وأول ما مشت السيارة انتبهت فتون للسيارة الي تطلع من الفة الي جمب بيت عهود ومشت السيارة بجمبهم ..
فتون عرفت شكل الي يسوق وهي خلاص بعد الموقف الي طاحت فيه صارت حافظة شكله عن ظهر غيب .. ! وانتبهتله يوم طالعها بطرف عين وبعدها شخط مسرع بالسيارة ..
وحست فتون كن الهواء فاجأة اختفى من حولها !
صباح الخميس
نزلت منال الصالة بيت جدها .. هالصالة الي شالت أمة محمد بالاعياد والمناسبات من كبرها .. ماتشوفها الحين الا جحر ضيق بعينها وكاتم على صدرها .. كل شي تشوفه ضدها .. تحجرت دموعها بعيونها وبالقوة حبستها .. مابي أضعف وأبكي .. ليه الناس والدنيا علي؟؟ بس قلبي هذا لازم يقسى ويرد الصاع صاعين لكل من يآذيه .. لازم أعض الدنيا باسناني وأتغدا فيها قبل ماتعشابي .. تعبت وخلاص ماعاد فيني أتحمل جروح أكثر ..
وضاق صدرها يوم اتذكرت ان اليوم خميس وعادة الخميس كل العيلة تجتمع بهالبيت بيت العز .. !
رن التلفون بجمبها وطالعته بضيق .. مستحيل يكون أبوي هذا ان بغى يكلم أكيد بتمنعه ست الحسن الي عنده ..
ردت بصمت : ..............
: الو !
كلمة وحده نفضت كيانها وخفقت قلبها بقوة !! سعود .. هذا انت سعود .. هنا استسلمت العيون للدموع المحبوسة وسالت على خدها بانكسار
: الو .. الو
آه ياسعود حتى انت قاسي .. عمري ماحسيت بنظرتك حب ولا بكلامك حنان .. حتى انت مايبيلي أضعف معاك .. انت الي ماهتميت بمشاعري مستحيل أحسك بحبي لين انت تجيني برجليك ..
: الو (( سكر الخط
زين سكرت لأني مو مستعدة أسمع نبرة الجفا بصوتك ..
رن التلفون مره ثانية ونادت الشغالة ترد عليه
الشغالة : الو
سعود : السلام عليكم
الشغالة : أليكم سلام
سعود : ماما فيه ؟؟؟
الشغالة بغباء : لا ماما نوم بس فيه هنا منال !!
خبطت منال جبهتها بقوة واهي ودها تنتف الشغالة تنتيف .. شوي الا مدت الشغالة السماعة لها
منال بهمس : شفيه ؟؟
الشغالة : في قول هاتي منال !!
منال انصدمت .. معقولة يطلبني بنفسه ويبي يكلمني ؟؟
ترددت إيدها لحظات بعدها أخذت السماعة وقالت بهمس : هلا
سعود : هلا والله منال ..
منال سوت نفسها توها تدري عنه : سعود !! هلابك شلونك؟؟
سعود : بخير الحمدلله .. شلونكم انتوا وأخباركم
كشرت وجهها بقهر .. هذا اهو دايم مايسأل عني بخصوصية .. فرق بين " شلونك " وبين " شلونكم صح ولا لاء ؟؟؟ <<< وافقوها ولا ترا بتذبحكم !
منال : احنا بخير الحمدلله ..
سعود : شفيه صوتك منال كنك تعبانة فيك شي !!
منال والعبرة خنقتها : أبد سلامتك بس توني صاحية
سعود : اه .. بايته بيت جدي ؟؟
منال بلعثمة : امم ايه امس سهرت عندهم ونمت << مادرت ان فتون موصلة الأخبار لسعود أول بأول !
حس سعود انها ماتبيه يدري بشي وماحب يضايقها بس قال بحنية : وسعي صدرك يامنال ..
استغربت منال منه هالكلمة ليه يقولها كذا أكيد داري عن شي وقالت بشوية نفخة : أنا ماضيقت صدري على أحد !!!
سعود : وانا ماقلت كذا .. انا اقول وسعي صدرك وانبسطي عشانك انتي مو عشان أحد ..
منال : وانا مرتاحة الحمدلله ماشكيت بشي !
استغرب سعود منها هالكلام ! وين منال الوديعة الي يشوف بنظرتها الخجل والحب ! شفيها تكلمه بهالطريقة وبهالنفعال ! قال يبي يفتك منها : عسى الراحة دوم .. أجل نايمة أمي؟؟ << جدته
منال : ايه ..
سعود : زين لو سمحتي وصليلهم سلامي وباتصل عليهم مره ثانية
منال : ان شاء الله
سعود : مع السلامة
منال : مع السلامة (( وسكرت
مسك سعود السماعة بايده مستغرب ! هذي شفيها تكلمني بهالطريقة ؟؟ هذا جزاي أهون عليها .. والا هي من النوع الي لاعصبت تحط حرتها بغيرها وهم مالهم ذنب ؟؟ شكلها واصلة حدها من الهموم وبالتمسلها هالعذر لين الله يفرجها !
قام ودخل الحمام واستعد للدوام .. وطلع لقى أنس لابس ويصك أزاريره ويغني :
"مذهلة .. ماهي بس قصة حسن .. رغم ان الحسن فيها بحد ذاته مشكله"
سعود : منهي هذي؟؟
أنس : آآآآآآآآآه أمي ولاحدن بالعرب غير أمي..
سعود بابتسامة : تصدق عاد كنت قبل أسمع هالاغنية وأنا أتأمل صورة أمي .. ماحسيت كلماتها تنطبق على أحد غيرها فديتها
أنس بحزن : بس ياسعود ترا بصيح
سعود : يالله نصيح أنا وياك !
أنس : والله فيني الصيحة خلاص مشتاقلهم
(( يخس ابليسك ياأنس انت على سعود صيحتوني جد الحين مو قادرة أكمل من دموعي ))
سعود : شفت صيحتها ؟؟
أنس : شسوي طيب والله مو قادر أصبر أكثر يمكن انت تتحمل لانك متعود لكن أنا قلبي رهيف وحساس مايتحمل كل هالفراق
سعود : ههههههههههههههههه رهيف وحساس .. اقول من زين قلبك تغزّل فيه ولا انا الي قلبي حجر مايحس والله اتمنى ارجع اشوفهم اليوم قبل بكرا
أنس : زين شرايك نروحلهم باجازة الكريسمس
سعود : لا والله انا ناوي أروح على رمضان والعيد << سعود لاتلقد !
أنس واهو يفكر : امم .. يالخبل !!!
سعود بصدمة : وجع شفيك !
أنس وهو يضحك : اجازة الكريسمس هالسنة توافق رمضان ! << سنتهم اهم مو سنتنا هذي
سعود : من جدك ؟؟؟
أنس : جدي وعمي وخالي بعد احسبها وشوف
حسبها سعود بسرعه وقال : اي والله
أنس : يعني نضرب عصفورين بحجر اجازة طويلة ونلحق على رمضان والعيد
سعود باستهبال : ومره وحده نقضي ملابس العيد من هنا
أنس بصدمة : شملابسه ؟؟؟؟
سعود وهو يضحك : اتذكرت سوالف خواتي اذا جا العيد وانحاسوا بملابسه ..
أنس : على طاري خواتك انت تكلمهم ويكلمونك ولا تدق على اهلك والي يرد تكلمه؟؟
سعود : ادق على بيتنا اكلم امي وابوي واذا عبير وخالد حولهم كلمتهم
أنس : غريبة وين فتون الي ناشبة فيك ؟
سعود : هذا انت قلت ناشبة فيني .. مايمر يومين الا وهي داقة ..
أنس بضحكة : شتدق تقولك بالله !
سعود بتكشيرة يقلدها : ضايق صدري .. ابعيش عندك .. وطبعا الاخبار كلها .. عبير تعورت .. خالد خطب .. لا وقبل فترة داقة تقولي انا بالسوق ومحتارة بين بلوزتين شرايك أختار أي لون؟؟؟
أنس : هههههههههههههههههههههههههههه والله انها بزر
سعود بضحكة : متعلقة فيني حيل وماتبيني اسأل عن غيرها وهذا طبعها هي اذا اتعلقت باحد الله يعين الي بياخذها..
أنس : شكلها يوم تدق عليك كانت مع اختي يومها
سعود : جد ؟
أنس : ايه ودقيت انا على اختي بكلمها الا ترد بنت خالتك ملخبطة بجوالها وتلج علي وتهاوش ومسحت فيني البلاط
سعود : هههههههههههههههههههههههههههههه ه شكلها منى هذي دامها ملخبطة بجوال لينا ..
أنس : يمكن .. (( وسأل واهو يحاول يخفي اهتمامه : بس ماظنيت أحد من هالشلة متزوج مو ؟؟
سعود : لا محد منهم الا مرام الملسونة خطبها خالد الحين عسى الله يتمملهم بالخير
أنس حس بارتياح وقال : آمين .. (( وبداخله يتذكر منى صديقة اخته الروح بالروح .. ياما هاوشها اهي ولينا واهم صغار بس كان يضرب لينا ومايقدر يضرب منى مو عشانها غريبة لاء .. شي بداخله كان يمنعه يآذيها بأي شكل من الاشكال .. كان اذا هاوشهم لينا ترد عليه وتخانق .. أما منى كانت تخاف وتخبي نفسها ورى لينا !! ضحك واهو يتذكر انفعالها عليه بالجوال .. ههههه صارلك لسان و كبرتي يامنى !
###
فاصل
يمكن تستغبرون شلون سعود وأنس يسولفون عن خواتهم بكل بساطة ويا بعض !! اهو لو كان أحد منهم يسولف مع غير الثاني لأختلف الوضع تماما .. لكن سعود وأنس بالذات متربين ويا بعض من وهم صغار .. خوات أنس ياما لعبهم سعود وشالهم .. ونفس الوضع مع أنس ياما اختلط حتى بنات خالة سعود .. لكن مو شرط المشاعر تكون أخوية << تفهمون قصدي من خلال الأحداث الجاية
####
|
|
|