ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات > روايات مكتملة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
روايات مكتملة لجل الوعد كامله يوجد هنا لجل الوعد كامله هنا تنقل الروايات المكتملة فقط

فساتين العيد


 
قديم 07-13-2010, 10:28 AM   #1

انا البنوتة

:: كاتبة مميزة ::

الملف الشخصي
رقم العضوية: 52917
تاريخ التسجيـل: Mar 2009
مجموع المشاركات: 669 
رصيد النقاط : 0

3897725811999611908 لجل الوعد كامله


لجل الوعد كامله

السلام عليكم / صباح الخير صبايا


جبت لكم رواية جديدة..لسى ماخلصت قرايتها ف..بقرآها معكم وأنا أحط الآجزاء

القصة" ل جْ ل الو عَ د " للكاتبة المبدعة " المحظوظة"

أتمنى تعجبكم..






(( ل جْ ل الو عَ د ))
**********


بعد أن أتمتُ قصتي (( دنيا الوله )) شعرتُ باندفاع كبير للخوض بتجربة جديدة وكتابة قصة أخرى .. خاصة بعدما لاقيتُ إعجابا وقبولا كبيرا على قصتي

قصتي الجديدة من نوع آخر
ليست متحررة وجريئة كما في قصتي الأولى

قصة تناقش الحب بجميع الظروف .. وبمختلف الأنواع
عندما يكون الحب ........ من طرف واحد
وعندما يكون الحب ...... مخفي بالقلوب

والأهم عندما يكون :
،، حب عصف بين قلبين ،، لتهب عليهم أشد العواصف ،، ويعاركوا أهوج التحديات ،،
حب ،، لا يعرف الانهتاء ... حب .. لا يقيده حدود .. حب .. وقع بالوقت ال خطأ ..
وبالمكان ال خطأ !
ولكن .. أصبح حلم السنين !!
وعذاب العاشقين !!
وأمنية مشتعلة .. ترجو أن تتحق ..
ولو
بعد
حين!

******

قصة تناقش قضايا بمجتمعنا :

وسط أحداث نجد عائلة تشتكي من .............. الزواج بالأجنبيات !! وفي عائلة أخرى فتاة تتدمر من .............قسوة أهل الزوج !!
وفي عائلة أخرى هناك أهل يبكون من ........... تعامل زوجة الإبن !!وفي عائلة أخرى أخوة يبكون من ............ زوجة الأب !!

بالمقابل

هناك عوائل تسودهم الأفراح

::

ويبقى * الحب* هو .. سيد الموقف .. !!

::

أريد أن أرى أكبر عدد من المتابعات
حتى أنزل مقدّمة قصتي :
(( ل جْ ل الو عَ د ))





مقدمة القصّة

في شركة الغفيل وشركاؤه الضخمة ،، دخل السكرتير على مدير الشركة وبإيده ظرف ،، مده للمدير الي استلمه منه واهو يقول : رسالة ؟؟؟
يوسف السكرتير : لا هالمره شريط كاسيت !!
اتأمل سعود الظرف لحظات وقال : زين مشكور يايوسف
يوسف : تامرني بشي ثاني ؟
سعود : لا مشكور اذا احتجت شي بناديك
يوسف : على امرك .. وطلع تارك سعود يقلب الظرف بإيدينه وهو مايدري وش يحوي هالشريط .. فتح الظرف بسرعه .. وطلع الشريط من داخله وأخذ مسجل صغير من الدرج ودخل الشريط فيه وشغله .. وثواني وبدت موسيقى عذبة يتخللها صوت أنثوي ناعم يلحن أغنية خفق لها قلب سعود بكل عنف وهو يسمع :

متخيل أنا راح أتحمل ؟؟ بُعدك عني مهما طول .. وقلبك لما عني يرحل ..
ينساني وأنساه ؟؟
متخيل أنسى أيامي ؟؟ حزني وفرحتي والآمي .. شوقي وضحكتي وأحلامي ..
وكل الي عشناه ؟؟
متخيل إني راح أقدر .. أصبر وأتحمل أكثر .. حتى لو جروحي تكبر ؟؟
لا حبيبي... لا !!

وانا ناطر حبيبي .. ترجع لي ياحبيبي ..وانا ناطر حبيبي . .
أنا ناطر

مهما حاولت أداري .. لهفة روحي وناري .. مهما طال انتظاري ..
أنا ناطر !

حرام .. تظلم أحبابك .. بغيابك وبعدك .. والله حرام .. ياحبيبي .. حرام يصير الحب في لحظة كلام !!
الله مايرضى ياظالم !

لكن لا .. انتَ أطيب .. وما يرضيك اني أتعب .. تبعد ولا تقرب ...
بابقى ناطر !!

يالله تعال لحناني .. لو تدري كم أعاني .. لاتخليني ثواني !! ..
وأنا ناطر !!

وما اظن هانت عليك .. تهدم حبنا بيديك .. وقلبي ناطر حبيبه ..
وأنا ناطر !!

يالله حبيبي كفاية .. طالت هذي الحكاية .. أنا محتاجك معايا ..
ياحبيبي

وانا ناطر حبيبي .. ترجع لي ياحبيبي ..وانا ناطر حبيبي .
.أنا ناطر
مانتهت الأغنيه الا ودمعة تنسكب من عين سعود مسحها بسرعه
ولم راسه بإيده وهويقول بألم : آآآآه ياوعَد .. بس ياوعَد .. ذبحتي قلبي يالوعَ د !!

*******

قصة حب منسية !!
من سنوات مرمية .. !!
وتاركه خلفها قلوب تحترق كل يوم !!
تتمنى .. نبضة .. من القلوب الرحيمة
ليردون لبعض .. وتردلهم الروح الي تمزقت طول السنين


شالي صار بالضبط .. ؟؟؟

::

أجزائنا حتبدأ بأحداث صارت من قبل سنتين !!
راح نتكلم فيها مع بداية الجزء الأول

أحداث قديمة صايرة تشرح هالمقطع الي قريتوه
وتشرح أشياء كثير راح تشوفونها

راح تلاحظون ان قصتي تعتمد على ع مهم
وهو ع التشويق

مواضيع ذات صلة
سعوديات بعروق ايطاليه للكاتبه شوق الماس
رواية خنقت الورد يا يمه وبيديني انكسر ذبلان
$$$ المرحلة الاولى من مسابقة "بصراحة أحلى"$$$
3 طرق جديدة ومبتكرة لعمل الجمبري
كن حقير .. قليل أدب .. وإحذر أن تكون ذا خلق ..!!
لكل من تبحث عن التميز...فساتين بتصاميم عجيبه للبيع وابسعار موغريه
لزوار مكة خلال الاجازة الي ساكنين بابراج المحمدية
الدكتور أحمد شلتوت .....البرمجة اللغوية العصبية هي تكنولوجيا النجاح



 
قديم 07-13-2010, 10:28 AM   #2

انا البنوتة


رد: ل جْ ل الو عَ د كامله


لجل الوعد كامله

الجزء الأول

((( قبل سنتين !!)))
أول شي نتعرق على سعود
سعود الغفيل .. هذا رجل أعمال عمره 27 سنة .. حلم ملاين البنات .. من وسامته ورجولته وطيب قلبه ويتأثر لاشاف بنت تبكي ولا حزينة .. مركزه راقي .. معاه شهادة دكتوراة بالهندسة الصناعية ,, و صفاته صارت رسم لفارس أحلام كل بنت ،،
عايش تحت ظل أبوه وأمه
واخوانه :

خالد 24 متخرج بكالريوس هندسة كامبيوتر .. ضحكوك ومرح ولا يحب يظهر مشاعره بسهولة .. وسيم مثل أخوه ويشتغل معاه بالشركة

عبير 20 تدرس بالجامعة قسم علوم .. شخصيتها هادية ودلوعه .. ونعومة وحلوة شعرها طويل وكيرلي وفاتح .. ملامحها وجمالها أجنبي .. رومانسية وحنونة وحالمة بأفكارها وخيالاتها وطموحها .

فتون .. حبيتها أنا مادري ليش .. !! توها متخرجة من الثانوي ومادخلت الجامعة انها تبي ترتاح شوي ..
شخصيتها تختلف عن اختها بشكل كبير .. مرحة ومصرقعة ومع هذا دلوعة وعنيدة .. فتون جمالها عربي شعرها دايم قصير بوي .. لكنه أسود فاحم ناعم وطالع روعه عليها مع بشرتها البيضا وعيونها السودا الواسعة .. وكل شي فيها حلو لكنها ماتهتم بالمكياج وزينة البنات ومن وهي صغيرة وهي تحب تلعب بالكورة مع أخوها خالد وتكره الحب وسوالف الحب !

*******

في غرفة عبير وفتون ..

فتون وهي تغطي راسها بالمخده : عبير سكري النور مو قادرة أنام !
عبير قاعد على السرير وساندة ظهرها تقرا قصة : اصبري فتون شوي وبخلص ..
فتون : لك ساعه تقولين شوي شوي .. خلاص طار النوم من عيني وانتي ماخلصتي
عبير باستهبال : حلو أجل قومي أمانة خل أسولفلك على القصة والله تجنن .. لو تشوفين شلون يوم اعترفلها بحبه بالآخر آآآآآآه روعه !
قعدت فتون وهي تضحك وتقول : ياربي ياعبير شرايك تبكين بعد أمانة !
عبير : انتي اصلا ماتفهمين بمشاعر الحب الي تخلي حتى الدموع لها طعم حلو
فتون : يخسى ويقطع هالحب الي أبكي عشانه .. لا عمري انا دموعي غاليه وماتنزل على هالخرابيط ..
عبير : تدرين عاد ..
فتون بملل : هاه وشو ..
عبير بحزن : انتي محظوظة الي قلبك قوي ومايهتم بسوالف الحب .. مو مثلي الي طايحة بحب واحد أتعذب اليل والنهار بحبه واهو مو داري عني ..
فتون : قايلتلك من زمان خليه عنك .. هذا غبي ومتبلد ولاراح يحس فيك أبد .. وانتي كل ماشفتيه ولا سمعتي سيرته اتصربعتي ! قلعتك انتي وياه
عبير : تتوقعين عادي أبعد عنه وأنا أحبه .. ؟
فتون : عادي .. لانك توك بالبداية ومابعد تعمقتي بمشاعرك
عبير : زين ليش فيصل ما قدر يبعد عنك واهو يحبك !
فتون بانفعال : وانتي مصدقة ان فيصل يحبني ؟؟ فيصل هذا وجه حب هذا ؟؟ هذا يكرهني مثل ما أكرهه .. ومدري مين حاط براسك هالفكرة
عبير بتنهيدة : الي نبيهم مايبونا والي يبونا عيت قلوبنا تبيهم !

دق الباب هالحظة وقامت فتون تفتح الا ولقت سعود واقف
سعود : ماشاء الله سهرانين مانمتوا ؟؟
فتون وهي تفتح الباب كله ليدخل : والله انا ذابحني النوم بس عبور أدوشتني بقرقها ومو مخليتني أنام
سعود : حالكم حالي مع هالخالد ساعة يحكيني عن فلم شافه وأنا أهز راسي وربي مافهمت كلمة وحدة
فتون : ههههههههههههاي رهيب انت ياخوي أبد مالك بهالسوالف
سعود : اي والله أبد وماصدقت نام سحبت نفسي وجيتكم
فتون : والله سويت خير على الأقل تفكني من سوالف عبور البايخة
عبير : أوريك يالجاحدة ان ماجافيتك اسبوع ماكلمك
فتون : ههههههههههههه أتحداك انتي تموتين فيني وماتقدرين على فراقي
سعود وهو يضحك : أقوك اركدي انتي وهالهبال واقعدي بقولكم سالفة
عبير باهتمام : شفيه ياسعود
سعود وهو يقعد : أنا مسافر ابريطانيا
فتون : واو خذني معاك !
سعود : وين آخذك معاي رايح شغل سنتين ..
عبير وفتون بصدمة : إيش ؟؟؟؟
سعود : بسم الله عليكم شفيكم .. عادي يابنات ..بروح أنا وصديقي أنس نشتغل بشركة ابريطانية ناخذ منهم خبرة لبعض الاقسام المتعلقة بالشركة ،،
فتون : ومتى السفر ان شاء الله ؟
سعود : بعد اسبوعين
عبير بذهول : سعود من جد ؟؟ ومنال !!
سعود بضيق : مو هذا الي جاي أكلمكم فيه .. مدري شلون أسافر وأنا ما تمت شي بينهم .. أبوي اتفاهم مع عمي وقاله عادي البنت تدرس الجامعة وسنتين وتخرج ويكون سعود رد ان شاء الله ويملكون .. بس مادري عنها إهي .. !
فتون الي انقلب وجهها من عرفت انه بيسافر وقالت بضيق : وشفيها إهي بعد تحمد ربها الي جيتها وخطبتها وتبوس ايدها وجه وقفا بعد !
سعود : وليه كل هذا .. ألف واحد غيري ممكن يجيها ويتقدملها ..
فتون : ومستحيل تلاقي بين هالألف واحد مثلك ! بهالمواصفات والزين ويخطبها إهي يوه تلقاها مستخفة الحين ..
سعود : بس فتون حاولي تتقربين منها بتصير مرة أخوك قريب وانتي ماتطيقينها
فتون : اي ماطيقها ياسعود هالمغرورة .. والله لو ما أبوي وعمي يزعلون ولا كان وقفت بوجيههم ..
عبير بضحك : وانتي من ضاحك عليك وقايل لك كلمة مسموعة !
فتون وهي تقلب عيونها : دلوعة العيلة أنا لازم يسمعون كلامي !
سعود : وأنا وين رحت ؟ انتي ماتبينها لكن أنا أبيها ..
فتون : لا تكذب على نفسك ..
سعود بتنهيدة : أكذب ولا ما أكذب صار الي صار وبازعل منك يافتون لو سمعتك تعيدين هالكلام .. خلاص منال بنت عمك وبتصير مرة أخوك حسني العلاقة لو مو عشانها عشان أخوك
فتون بهمس : اي بالاحلام !
سعود بصرامة : شقلتي ؟ ماسمعت !!
فتون بخوف من نظرة أخوها : قلت ان شاء الله ابشر
سعود : أشوى !
عبير وهي تكتم ضحكتها من شكل فتون وقالت لسعود : طيب والمطلوب ياخوي !
سعود : أبيك تكلمينها عبير .. وتأكدين انها راضية مو تزعل اني تاركها ورى ظهري ومسافر ومو معبرها ..
عبير : ابشر ياسعود .. بكرا بشوفها بالجامعة ان شاء الله وأكلمها
سعود : زين لا تنسين أمانة ..
عبير بابتسامة عذبة : مو ناسية ان شاء الله ..
سعود وهو يوقف : يلا اجل تصبحون على خير .. وطلع وهو يسكر النور ويقول : ناموا يلا ترا النوم يصفي البشرة
فتون : اي صح كلامك .. والباب بعد سكره وراك ياسعود

عبير أول ماتسكر الباب فتحت الأبجورة الي جمبها وهي تقول : انتي مو عيب عليك تتكلمين عن منال بهالشكل وأخوك بيتزوجها !
فتون : بس ياعبير بس يوه ما أتخيل هالانسانة مرة أخوي يع
عبير : والله انها حلوة مو يع
فتون : مايهمني حلوة ولا لاء .. المهم ان شخصيتها تجيب البلا مايعجنبي ولا شي فيها أبد ..
عبير : ومن زين شخصيتك انتي عاد
فتون بذهول : شفيك انتي قالبة علي معها .. لا يكون كله عشان تركي حبيب القلب الي مو داري عن كل الي تسوينه عشانه !
عبير بتنهيدة : درى ولا مادرى يظل ولد عمي ومنال بنت عمي ومايصير نتعامل معهم بهالشكل ..
فتون بضيق : إي طيب .. سكري بالله النور خليني أنام أبركلي من هالسوالف
سكرت عبير النور وهي تهز راسها بضيق من حال أختها ..
وفتون اتمدت وقلبها عورها من رجع على بالها .. سفر سعود .

هالاخوان لهم تمركز كبير بالقصة ..

::

وسمعنا اسم تركي ومنال .. ذولا عيال عمهم
أمهم اتوفت بعد ماجابت آخر ولد .. وأبوهم اتزوج زوجة ثانية ماجاب منها أطفال واكتفى بعياله الي من زوجته المرحومة .. وهم :

تركي الولد الأكبر بعمر خالد 24 ويشتغل بشركة الاتصالات .. درس الجامعة بأمريكا ويوم رجع لقى أمور كثيرة انقلبت وقلبت حياته معها

منال 20 .. تدرس بالجامعة مع عبير .. ماودي اتكلم عن شخصيتها وأبيكم انتم تحكمون عليها من خلال الأحداث .. تحب سعود زي ماكل بنت تحبه وتمناه ..

نهى 14 تدرس بالمتوسط .. علاقتها مع فتون حلوة خاصة وقت الصرقعة والهبال

وائل : 11

******

من بكرا الخميس .. بعد فطور الصباح في مجلس أبو سعود

سعود : هاه عبير كلمتي منال ؟
عبير : اي كلمتها وتقول أبوها قالها عن سفرك واهي عادي بتستناك لين ترد ومنها تخلص دراستها بعد ..
فتون : ياعيني الي تسوي نفسها مو مهتمه .. والله تلقاها محترقة ليش تروح وتخليها بس ياويلاه ماتبين أبد !
سعود وهو يرمي عليها المخده : انتي وبعدين معاك ؟
فتون وهي تنط من مكانها : ولا قبلين .. خلاص تهبل منال .. يوه تجنن ومامثلها بهالدنيا حلو ؟؟؟
سعود : حلو وجنان بعد .. يلا ورينا مقفاك ..!!
طلعت فتون من عندهم وهي معصبة ومن وراها سعود يهمس لعبير : يختي هالبنت لو وش تسوي أموت فيها ومقدر أزعلها ..
عبير : اها .. ياناكر الجميل وانا الي خادمتك اليوم ماهميتك !
سعود : عن المذلة عاد .. غصب عليك تخدميني
عبير : لا موغصب ويالله مو قايلتلك وش قالتلي عنك وعن شعورها يوم شافتك يوم الخطبة !
سعود ماهتم لأنه ماكان يحبها .. ولا كان يكرهها .. عادي .. بس شافوها البنت المناسبة له وماعارضهم .. لذلك قال : صدقيني مايهمني أعرف !
عبير : ههههههههههههههههههههه أصلا ماقالت شي
سعود : هههههههههههههه آآآآآخ من حركاتكم يالبنات .. وقف يبي يطلع
الا عبير قالت : وين بتروح ؟
سعود : باطلع أنا وأنس نخلص أشغالنا قبل السفر .. ليه في شي ؟
عبير : لا بس بغيت أروح السوق وبخاطري أطلع معك انت ولا خالد نفسي يوم أروح السوق مع واحد منكم
سعود : لا فكيني أنا مو قد مصاريفك انتي واختك الي ماتشبع من السوق
عبير : ياخي واذ كثرت مصاريفنا هي مب كل مره تودينا.. مره وحده وبعدين لازم تتعود على الفرفرة بالاسواق مع الحريم
سعود : لا والي يسلمك مستعد اذا اتزوجت اسوي كل شي الا ان أودي زوجتي السوق
عبير وهي تبتسم بتعجب من اخوها الي عمره ماهتم لا بأسواق ولا بنات وقالت : يعني مره مافي أمل تودينا ؟
سعود : آسف والله ماقدر شوفي خالد ..
عبير : وينه خالد هذا من أمس بالبحر
سعود : لا رجع توني معاه اهو وفيصل تحت
عبير بملل : اه دام فيصل معاه أجل اغسل ايدك منه
ضحك سعود ومشى لغرفته واهي راحت تبدل ملابسها

 
قديم 07-13-2010, 10:30 AM   #3

انا البنوتة


رد: ل جْ ل الو عَ د كامله


لجل الوعد كامله

فتون بعد ماطلعت معصبة من عندهم .. نزلت الدرج بسرعه وكانت لابسة جينز وتيشرت فستقي مرسوم عليه نجوم وأنوار .. وشعرها كعادته سايح على وجهها وعند رقبتها .. كانت تنزل الدرج مسرعه وأول مارفعت عيونها اتسمرت مكانها وهي تشوف فيصل ولد خالتها واقف بالصالة ولابس شورت وبلوزة كت << ملابس بحر يعني

فيصل بابتسامة سخرية : شوي شوي لاتطيحين وتبلشينا فيك عاد
فتون بعصبية : انت شجايبك بيتنا ؟؟
فيصل : أفا .. هذا بدل ماتقولين حياك الله ياولد خالتي اتفضل .. تقعدين تصارخين فيني كذا ؟
فتون : إي أصارخ فيك يعني غصب نبيك ؟؟؟؟

دخل هالحظة خالد وهو يقول : معليه يافيصل اتأخرت عليك بس ك ... !
وقطع كلامه يوم انتبه لفتون واقفة بالدرج قبال فيصل .. فرصع عينه بدهشة وحمق وهو يقول : هي انتي شعندك واقفة هنا ؟؟
انتبهت فتون لنفسها أخيرا ودرات عنهم بسرعه وطلعت الدرج وهي تناقز فيه وفيصل من وراها يضحك عليها والتفت لخالد وهو يقول : مب صاحية اختك
خالد بعصبية : هذه هي يا فيصل دايم مصرقعة ومستخفة ولا تحسب حساب الي قدامها وبزر يافيصل تفهم وش يعني بزر ؟
فيصل : وخلها بزر ياخالد انتوا ماعندكم أطفال بالبيت زين تونسكم إهي
خالد بامتعاض : لا تكفى عاد مع حالتها هذي صاير الي يناشبها ولا يآذيها يشوف الويل من أبوي
فيصل بضحك : أتخيل شكلك تنظرب بسبتها
فيصل : يوه ياما صارت .. المهم اقعد انت هنا شوي وبروح أبدل بسرعه وأنزلك نطلع
فيصل : مين بيجي معنا ؟
خالد وهو يمشي للدرج : بنمر بيت جدي ناخذ صالح وتركي بس والباقين ينتظرونا هناك ..

وطلع الدرج تارك فيصل من وراه يسترجع شكل فتون ويضحك .. ياحلوها هالبنت كل شي فيها يعجبني حتى صراخها ودلعها وهبالها يجنن ..


طلع خالد وشاف عبير بعبايتها مستعدة للنزول وقال : على وين ؟
عبير بنعومتها المعتادة : باطلع أنا وفتون بنمر على مرام ونروح السوق
خالد : يوه لو أدري عنكم كان خليت فيصل يجيبها معاه ..
عبير : هو لسه موجود ؟
خالد : إي موجود ونزلت المرجوجة اختك قدامه ..
عبير : ههههههههه وأنا أقول شفيها ملخبطة أعيد عليها الكلام مرتين لتستوعب ..
خالد : والله ماظنيت ملخبطة من الحيا الا من غبائها الي عيى يخلص

" مخليه الذكاء لك حبيبي "

التفت خالد ليشوف فتون من وراه بالعباية والطرحة على اكتافها وطالعت فيه من فوق لتحت وقالت تكلم عبير : يلا عبير لا نتأخر
خالد : عدلي الطرحة على راسك ترا الرجال تحت
فتون بحمق : يوه وش يبي هذا للحين ماراح ؟؟
خالد : وانت وش حارقك ؟ الحين بالبس ونطلع للبحر
فتون وهي تعدل طرحتها بعشوائيه : اي بالله فكنا منه ..
عبير : خالد انتوا ماتعبتوا من هالبحر كل يوم والثاني صيد وسباحة وتركبون دبابات فيه بالله مامليتوا؟؟
خالد : لا والله وناسه وكل يوم غير اليوم الي قبل.. واليوم بعد بيكون غير بناخذ صالح وتركي وناوين نصيد سمك القرش بكبره
فتون بخوف : يماه والله منتوا صاحين تكفى لا تاخذون عمي صلوح يروح فيها عاد مراجيج انتوا أعرفكم
خالد: اصلا هي فكرة عمك صلوح
عبير بحماس : أمانة صوروا كل شي ياخالد
خالد وهو يمشي عنهم : أفا .. أكيد بنصور بطولاتنا هذه

ضحكوا ونزلوا الدرج لين وصلوا تحت وعبير وقفت وهي تبتسم لولد خالتها : هلا فيصل ..
فيصل وعيونه على فتون الي دارت وجهها عنه وكملت للبا : هلا عبير شلونك ؟
عبير : بخير الحمدلله .. لو ندري انك جاي كان قلنالك جيب مرام معاك بدل مانضرب مشوار لبيتها الحين وناخذها
فيصل : وانتوا وين رايحين ؟
عبير : ناقصتنا أغراض من السوق بنروح نجيبها
فيصل : ومنى بتجي معاكم ؟؟؟
عبير : لا من وين تفضى اختك هذه طول وقتها بالشغل
فيصل : اه صح وانتم أي سوق رايحين ؟
فتون من عند الباب : وانت وش دخلك تحق معانا وين رايحين وين جاين ومين معاكم ..؟
فيصل : من حقي أعرف مو اختي معاكم !
فتون : اي معانا وصدقني مو ماكلينها يوه ! .. يلا ياعبير تأخرنا
عبير : يلا باي فيصل
فيصل وهو يفترس فتون بنظراته : بايات ..

طلعوا وركبوا السيارة وفتون تقول : كريه !
عبير : والله انتي الي كريهة ويبيلك طراق.. حرام عليك الي تسوينه فيه والله حرام !
فتون : عبير تكفين لا تكلميني عنه وخلينا نروح وانا مستانسة
عبير : براحتك بس صدقيني بتندمين
فتون : هههههههههه أنا أندم ؟؟ وعلى مين بعد ! فيصل ؟؟ ههههههههههه حلوة !
عبير وهي تهز راس اختها : آآآآآآآآخ من هالراس اليابس ..
فتون وهي تضحك : آآآآآآي راسي أحتاجه ترا
ضحكت عبير عليها ومشوا لوين ماياخذون مرام بنت خالتهم


في بيت الخالة الشخصيات غير :

حنان 22 سنة تصير خالة فتون وعبير وساكنة عند اختها وبحياتها واجد أسرار


فيصل 25 يشتغل بأرامكو .. من فتون صغيرة وهو يحبها ويحب شقاوتها لين كبرت واهو يحبها لكنها هي ماتحس تجاهه أي شعور الا بالعكس تتضايق منه لأنه دومه يناكفها ويضايقها ولأنها تسمعهم يلمحون دايم ان فتون لفيصل وهالشي كرها فيه لأن ماتبي تاخذ قريبها ولمجرد ان العيلة تبي هالشي !

منى 22 متخرجة من الجامعة وتشتغل ..

مرام 19 .. تدرس بالجامعة حلوة وطيبة وشخصيتها بين عبير وفتون ..

مشعل 11 سنة

ساره 4 سنوات
وصلوا البنات لبيت خالتهم ودقوا على مرام تنزل ..

مرام تنزل الدرج بسرعه وعبايتها بإيد وشنطتها بإيد : يماه يماه
ونزلت الصالة تدور أمها ماشافتها صارت تمشي بالبيت بسرعه تنادي : يماه وينك يماه
طلعت حنان من المطبخ على صوتها وقالت : بسم الله مرام شفيك تصارخين
مرام : وين امي من اول انادي عليها
حنان : امك بالمخزن هي والشغالة يرتبونه
مرام : ياربي ابي اروح
حنان وهي تطالع عبايتها : وين بتروحين؟
مرام : عبير وفتون ينتظروني برا بنروح السوق
حنان : اها خلاص اجل روحي وأنا أقولها اذا دخلت
مرام : زين الله يسعدك ياخالتي الجميلة
ابتسمت حنان ابتسامة باهتة كعادتها وقعدت قدام التلفزيون تقلب فيه بملل .. ومرام لبست عبايتها ولفت طرحتها ومشت للبا وقبل ماتطلع قالت كمحاولة تدري انها فاشلة : حنان ماودك تجين معانا ؟
حنان وعيونها على التلفزيون : لا والله ماودي
مرام : أوكي توصين على شي أجيبه معاي؟
حنان : لا مروم روحي انبسطي حبيبتي
مرام : اوكي ولاتنسين تبلغين امي
حنان : ان شاء الله
مرام : يلا باي ..

وطلعت مسرعه وأول مافتحت الباب تحركت سيارة البنات من قدام البيت مبتعدة !! اخترعت مرام وهي تمشي ورى السيارة وتأشر بإيدها .. وزادت من سرعتها شوي لتلحق على السيارة .. !! وقفت السيارة مكانها وارتاحت مرام ومشت بسرعه لين وصلتها ويوم جت تبي تفتح الباب مشت السيارة مره ثانية وتركتها .. ضربت مرام برجولها الأرض بعصبية وهي تمشي بسرعه ورى السيارة .. والسيارة لازالت تبتعد لين وقفت مرام مكانها واتكتفت بعجز عن الحاق ورى السيارة .. وشوي الا وقفت السيارة خلاص مكانها .. ومرام صارت تمشي بطء ياخوف تمشي السيارة بعد وتركها .. لين أخيرا وصلت وافتحت الباب بسرعه .. وأول مافتحته سمعت ضحكات عبير وفتون

عبير :ههههههههههههههههههههههههههههه هههه ليش مالحقتينا مره ثانية
مرام وهي تركب : اوريك ياحمارة انتي على اختك يالي ماتبطلون هالحركات
فتون راعية الفكرة:ههههههههههههههههههههههه ههههههههه هذا الي يلطعنا ساعه برا البيت ..
صكت مرام الباب ومشت السيارة وأول ماتعدلت بقعدتها مسكت ذراع عبير جمبها وقرصته وهي تقول : مو مرام الي تلعبون عليها تحت الحرر فاهمة
عبير:هههههههههههه آآآآآآآآي إيدي ياحمارة ههههههههههههههههههههههههههههه
تركتها مرام وقامت تجاوزتها لتوصل لفتون بشكل مضحك ومسكت ذراع فتون تبي تقرصها لكن مين الي يقدر على فتون هذه الي من تقدمت مرام لها صارت هي تقرص ايدينها وتقول: وخري بس اقعدي مكانك ..
مرام : ياحمارة انا الي باقرصك مو انتي .. وسحبت ايدها بسرعه وظربتها بقوة على ذراعها وفتون مسكت ايد مرام وظربتها بقوة أكثر
وعبير ماغير تتخبط منهم قالت وهي ميته من الضحك :ههههههههههههههههههههههههه بس اهجدوا يامهابيل خلوا السواق يقدر يسوق .. مرام ارجعي ياغبية
رجعت مرام بعد مابردت الي بقلبها وهي تقول : وانت يامصطفى بعد يبيلك ضرب
عبير وفتون :ههههههههههههههههههههههههههههه هههههههه
مصطفى : هدا فتون كل شوي كلام إمشي وقف إمشي وقف
مرام : فتون هذه بس لو تختفي من العالم كان عشنا بسلام
فتون : عسى شيخ العفاريت يجيك انتي ويخفيك قبلي يارب
مرام : يماه منها ومن دعاويها
ضحكوا وكملوا طريقهم للسوق


********

كانت حنان لازالت تقلب بالتلفزيون وإهي لابسة بلوزة أكمامها طويله .. وشاح يلف رقبتها مع إن الدنيا حر !! شافت اختها ام فيصل والخدامة داخلين وشايلين كارتون كبير وبالقوة يمشون فيه وحنان أول ماشافتهم قامت ومشت لهم وهي تقول : وش هذا وين بتودونه؟
أم فيصل : كلها قرمبعات مابيها .. بالله افتحي الباب ياحنان
أسرعت حنان وفتحت لهم باب الحوش وطلعوا الكارتون برا وادخلو وسكروا الباب ..
مشت ام فيصل وهي تقول : يوه ياهالحر ماينطاق والله مادري شلون فيصل متحمل هالحر بالبحر
حنان : لا الجو بالبحر غير ولا تنسين انهم يركبون قارب ويدخلون لنص البحر وهناك الجو يجنن
ام فيصل وهي تقعد بالصالة : حتى لوكان والله الشمس ماترحم أحد ..
ونادت على الخدامة : واتي صلحي ترمز شاهي .
حنان بضحك : ترمز مره وحده !
ام فيصل : اي والله صكني راسي وانا أرتب بهالمخزن .. وانتبهت للساعه وقالت : الا وين مرام لايكون للحين نايمة ؟
حنان : لا لا مرام قامت وطلعت
أم فيصل : طلعت !!!!! على وين ان شاء الله ومع مين ؟
حنان : مرو عليها فتون وعبير وراحوا السوق
ام فيصل : ايه .. ( وطالعت حنان بنظرة حنونة وقالت : وانتي حنان ليش مارحتي معاهم ؟
حنان بضيق : والله مالي خلق أطلع بالعكس يمكن أتنكد بعد لوطلعت
ام فيصل : ولمتى ياحنان بتعيشين نفسك بهالحالة !
حنان بتنهيدة : لين ربي يفرجها
ام فيصل : وانتِ وش قاصر عليك حبيبتي مافي شي مضيق عليك غير انتي الي مضيقة على عمرك ومكدره على نفسك بالتفكير الي ماراح يودي ولا يجيب
حنان وعيونها تلمع بالدموع : يعني وش تبيني اسوي يمه ؟ قسمتي أعيش بهالوحدة وبعيدة عن عيون الناس وأنظارهم !
ام فيصل بحنية : هالناس الي ماتبين تظهرينلهم صدقيني يدرون بطهارة قلبك وطيب أصلك ياحنان ..
حنان والدموع بدت تسيل منها : بس ولو .. انا فقدت الثقة بنفسي ..
أم فيصل انكسر خاطرها وحبت تلهي اختها الصغيرة الي هي بمثابة بنتها وقالت : بس ياحنان ياعمري لا تبكين ولافي شي يستاهل دموعك .. وقومي الحين كلمي نورة خليها تجي تتغدا عندنا مادام بناتها بيرجعون علينا
مسحت حنان دموعها وقامت للتلفون .. وأم فيصل طالعتها بحنية وهي تهمس بخاطرها : ماقول غير حسبي الله عليك يا نواف !! حسبي الله عليك !!

اتصلت حنان بيت اختها وبعد فترة رد التلفون : الو
حنان : هلا السلام عليكم
سعود : وعليكم السلام هلا بالغالية هلا
حنان بمرح : هلا سعود حبيبي شلونك؟
سعود : والله تمام .. انتِ شلونك حنان بشرينا عنك؟
حنان بتنهيدة :......... الحمدلله على كل حال
سعود : اشتقنا لمرحك حنان وضحك وسوالفك
حنان : صدقني ياسعود مو بايدي الي يصير فيني
سعود : انتي الي معيشة نفسك بهالهموم ياحنان ولا كل الي تفكرين فيه ماله أي صلة بالواقع ..
حنان : والله مادري .. انا تعبت من هالتفكير .. المهم
سعود : شالمهم ؟
حنان :ههههههه بغيت أكلم اختي وينها ؟
سعود : والله مادري ياحنان انا توني داخل البيت الا ورن التلفون تبيني أشوفها لك الحين ؟
حنان : لا بس بلغها تجي تتغدا عندنا
سعود : شالمناسبة ؟
حنان : مافي مناسبة ولا شي ماغير خواتك بيرجعون علينا وحبيناها تجي معاهم وانت تعال بعد سعود ..
سعود : انا ماظنيت ياحنان وراي سفر بعد كم يوم وباقي أشغال الدنيا بسويها
حنان : ياعمري الله يعينك طيب مايصير نبي نشبع منك احنا قبل ما تروح
سعود من محبته لخالته الصغيرة وحزنه عشانها قال عشان يفرحها : خلاص بجي عشان خاطر عيونك بس والشغل بالطقاق يطقه
حنان بضحك : يسعدلي اياك يارب
سعود : آمين وياك .. خلاص بلغ أمي ان شاء الله ونجيكم
حنان : أوكي نتظركم .. سلام
سعود : عليكم السلام

وسكر السماعة وطلع لغرفته وهو يفكر بالاشغال الي لازم يسويها ويخلصها قبل مايسافر .. مايدري ليه حس بهم كبير من ورى هالسفرة .. يمكن لأنه خطب بنت عمه وبيسافر قبل مايتم شي بينهم .. وبيقعد هناك سنتين ويمكن أكثر .. وحز بخاطره يترك منال بهالشكل بلا ملاك ولا شي .. منال .. ردد هالاسم بخاطره وضحك واهو يرمي شماغه على السرير .. مايدري ليه مايحس بأي شعور تجاه منال .. هو مايكرهها ولا يحبها وحتى يوم الخطبة شافها وقعد معها ولا حرك هالشي بخاطره أي شعور .. تضايق من نفسه ليه بهالبرود .. البنت مبين مبسوطة بهالخطوبة وظاهر الفرح بعيونها .. ليه هو بارد بهالشكل .. اتنهد وهو يلبس ملابس البيت وقر إنه يحاول يلين قلبه بأي شكل .. ولا يظهر أي ضيق من هالخطوبة لأن الكل فرحان فيها أبوه وعمه وحتى جده !!

طلع من الغرفة واتوجه لغرفة امه وأبوه ومن ورى الباب نادى على أمه
سمعت امه صوته وردت عليه : هلا سعود تعال يبه تعال
دخل سعود الغرفة ولقى امه قاعدة بجلستها الي بالغرفة وفاتحة الاب توب ما خلى سعود يضحك وهو يقول : شعندها أم سعود تأنتر ؟
ام سعود : اي أأنتر ولا بس انتم ياهالجيل تأنترون لاحتى احنا نتطور معاكم
ضحك سعود وقرب منها يبي يشوف وش تطالع فيه ولقاها فاتحة منتدى نسائي تكتب فيه : ماشاء الله منتديات وحركات
ام سعود : ههههههه مسجلة بمنتدى خواتك وأرد عليهم ويردون علي ولايدرون انها أنا
سعود :هههههههههههههههههه والله راعية مقالب امي
ام سعود : ههههههههه بس لايدرون خواتك ..
سعود : مو معلمهم بخيلك تهبلين فيهم
سكرت ام سعود الاب توب وطالعت ولدها وهي تقول : هاه خلصت شغلك وأمورك ترا مابقى على سفرك شي
سعود : ايه داري الله يعين وكل يوم يعطلني شي
ام سعود : ليه وش معطلك اليوم بعد
سعود : حنان توها داقة تبينا نجي نتغدا عندهم ولزمت علي أجي .. وتعرفين مابي أزعلها أبد وبروح عشانها والله
ام سعود : ياعمري ياختي الي مادري متى بتعيش حياتها وتنسى الي صارلها وترتاح
سعود : الله يعينها بعد الي صارلها مو شي سهل أبد !!
ام سعود : اي والله توها صغيرة وذاقت الهم والويل
سعود : الله يعوضها ويسعدها يارب
أم سعود : آمين .. خلاص أجل بنروحلهم وزين اليوم خميس ابوك صايم يعني مانشيل هم غداه
وقف سعود وهو يقول : أوكي يمه انا بروح أريحلي شوي ومتى ماجهزتي دقي علي
ام سعود : ان شاء الله يبه انت بس روح ارتاح
طلع سعود وراح لغرفته وعجز لاينام براحة وهو يفكر بالشغل والسفر وبعد ساعتين دقت امه الباب وقام ولبس وطلع اهو وياها لبيت الخالة


::

اتعرفنا من خلال هالجزء على الشخصيات المهمة بالقصة
وأكيد فهمتوا من الأحداث كل شخص له علاقة بمين ويفكر بمين

 
قديم 07-13-2010, 10:32 AM   #4

انا البنوتة


رد: لجل الوعد كامله


لجل الوعد كامله

الجزء الثاني

رجعوا البنات من السوق ودخلوا البيت الا لقوا كل العيلة مجتمعة ..
فتون : سعودي حبيبي هنا شهالمفاجأة الحلوة
سعود : ههههههههه ما اقدر على فراقك انا شفتي شلون
فتون وهي ترمي نفسها جمبه وتلمه وهي تقول : فديت هالأخو بعد عمري
ضحكوا عليها وهي من يوم هي صغيرة متعلقة بسعود يمكن أكثر من ابوها وسعود يشوفها بنته أكثر من أخته لذا ماخذه راحتها عنده وتدلع عليه مثل ماتبي ..

أم سعود : هاه قشيتوا السوق كله معاكم ؟
عبير : انا شريت المكياج الي ناقصني وبس
أم سعود تطالع فتون : وانتي وش شريتي
فتون : والله ماشريت شي حر موت هالسوق تكيفهم خايس
سعود : وش دخل الحر بانك ماتشرين شي؟
فتون : خلاص ماصرت طايقة اشوف شي ولا أتأمل شي قعدت بس انتظر هالسلحفات يخلصون
مرام : وجع انتي السلحفاة ياتمساح
فتون :ههههههههه حدي عاد سلحفاة ولا تمساح؟
أم فيصل تطالع مرام : وانتي ياهانم وش شريتي ؟
مرام تخبي الكيس ورى ظهرها وتصطنع البرائة : ماشريت شي !
أم فيصل : والكيس الي وراك وشو ؟؟
مرام : هذه اكسسورات بس .. بعدين اوريك اياها
عبير بمكر : مادخلنا محل اكسسورات يامرام

ومانتبهت مرام للي سحبت الكيس من وراها وهي تصرخ : أفلام !!!
اخترعت مرام وهي تلتفت بسرعه لتشوف منى بعابيتها توها داخلة من الدوام وشافت مرام وهي مخبية الكيس وراها
مرام : وجع ياحمارة فضحتيني
ضحكت منى ومشت لهم وسلمت عليهم وقعدت بعبايتها والطرحة لوجود سعود

أم فيصل : أفلام يابنت ؟؟ انتي ماتشبعين من هالأفلام كل فلوسك تف عليها !
مرام : يمه شسوي طيب تونس هالافلام
أم فيصل : وش الي يونس فيها ماغير رعب وحوش ودمامين وقرف
فتون :هههههههههههههه هذي افلام فيصل وخالد خالتي مو افلامنا احنا
سعود : وش افلامكم انتوا بعد؟؟
فتون وهي تضحك :حب ومحبوب
سعود : هههههه وتصدقون الحب والخرابيط الي بالافلام
فتون : انا لا وألف لا بس هالمخابيل عبير ومرام ومنى يعيشون جو ودموع وصياح ومناحة
التفت سعود للبنات الي كانوا قاعدين جمب بعض وهو مبتسم باستغراب وهم اتفشلوا من هالفضيحة وعبير قالت : شسوي طيب والله تقطع القلب لاصارت النهاية فراق ولا موت
سعود : اي بس مالهالخرابيط أي صلة بالواقع
عبير : الا الفراق والموت موجود بالواقع
سعود : لا أقصد الحب المصور بطريقة الأفلام .. كله تمثيل وعمره مايكون واقعي

حنان : وأنا اشهد !!

التفتولها كلهم وسعود حس انه نقش جرح حنان بهالكلام واتضايق حيل من الموقف وابتسلملها بكل حنية وقال : وانا اشهد ان قلبك راح ينسى كل الي صار حنان !
ضاعت عيون حنان بوجه سعود وهي تجاهد دموعها لاتنزل وتخرب عليهم قعدتهم الحلوة .. لكنها ماقدرت تمنع تنهيدة ألم تطلع من صدرها وبالقوة ابتسمت لسعود الي ظل مبتسم بوجهها ..
وأم فيصل حبت تلطف الجو وقالت : يلا يابنات قوموا معاي على المطبخ مبدعة لكم حركات اليوم عشان خاطر سعود
سعود : ماكان له داعي تتعبين نفسك ياخالتي
أم فيصل : لا تعب ولا شي ياعمري احنا كم سعود عندنا
فتون بصوت عالي : واحد وفديت هالواحد
قرص سعود خدها وهم ضحكوا عليها وقاموا للمطبخ مع أم فيصل ومرام صارت تفتح القدور وتشم الريحة وتقول : الاه والله جعت من الريحة بس ..
ركضت فتون لعندها وصارت تشم معها وتقول : الاه تجنن ريحته بس عاد وش يطلع
مرام : ههههه مادري شكله خضار صيني ..
فتون وهي تشم مره ثانيه : خلينا نكتشف من الريحة

أم فيصل : وجع انتي وياها كنكم مدمنات ! صكوا القدر لا يبرد
فتون : ههههههه اعترفي ياخالة وش حاطة بالقدر
مرام : اي والله شي يدوخ
ام فيصل : وش حاطة يعني هذا صوص الصويا بس لأن ولاوحدة منكم فالحة بالمطبخ ماعرفتوه
مرام : ايه انا فلاحتي أكنزها للدراسة فقط
فتون : ومن زين دراستك بعد عمرك ماطلعتي من الأوائل
مرام : انتي بالذات ولا كلمة الي قاعدة عطالة بطالة لا دراسة ولاشغل
فتون : اجمع طاقاتي ههههههههه

أم فيصل : اقول قومي انتي وياها زينوا الطاولة ورصوا الصحون بلا الحكي الفاضي

مرام : وين واتي مختفية ماتجي تشتغل
فتون : تستهبلين انتي ؟
مرام : لا والله جد حنا نشتغل وهي ترتاح !
فتون : يماه وش هالعمى الي فيك!
مرام : أي عمى ؟
فتون تأشر على الخدامة : وهذي منهي الي واقفة تقطع السلطة ؟
التفت مرام لتشوف واتي وراها وطارت عيونها وهي تضحك : بسم الله انتي من وين طلعتي
واتي : انتي مافي عيون مافي شوف
مرام : هههههههههههههههه وتلاسن بعد؟؟

أم فيصل : الحين بتتحركين انتي وياها ولا بهالملعقة على روسكم
فتون : يالله ياخالتي ولا تزعلين .. ((وشالت الصحون ومرام شالت الكاسات ودوها للطاولة

ومنى وعبير كانوا يغرفون الأكل ويوم خلصوا قالت منى : يمه انا مابي غدا الحين وبروح أنام شوي
أم فيصل : بكيفك خلاص اجل بقيلك لا تغرفين القدر كله
منى : لا عادي خليه بالعافية عليهم وأكيد بيبقى بعد مايخلصون
أم فيصل : يلا أجل ياعمري روحي ارتاحي وشيلي بالله معك ساره شوفيها نايمة بالصالة حطيها بسريرها تكفين

منى : ان شاء الله .. والتفت لعبير وهي تقول : يالله تعالي معاي
أم فيصل : وين تجي معاك خليها تتغدا
منى : بس بوريها شي بسرعه وتنزل
أم فيصل : بسرعه عاد لايبرد الغدا
عبير : ان شاء الله
وطلعوا فوق بعد ماشالت منى اختها الصفيرة الي كنها ريشة بنحفها

قعدوا على الطاولة كلهم ومرام الوحيدة الي بالطرحة مع ان سعود مايشوفها الا هي وفتون واحد وياما لاعبهم اثنينهم وهم صغار وشالهم ومشاهم وداهم ..

قعدوا يتغدون وبعد شوي دخل مشعل عليهم وهو ينفض ملابسه المغبرة ..
أم فيصل من شافته : هلا يامشعل وش جابك ؟
مشعل بحمق : وشو يعني ماتبوني !!
أم فيصل : ياعمري شالي مانبيك بس انت قايلي بتقعد عند جارك هاني وتغدا عندهم
مشعل : خلاص مليت ورجعت

سعود : هلا مشعل حبيبي شلونك

مشعل استحى منهم لأن ملابسه كلها تراب وحوسة وقال بهدوء : طيب الحمدلله
أم فيصل وهي تطالع ملابس ولدها شلون صارت : روح حبيبي غسل وغير وتعال

طلع مشعل من غير مايرد وأم سعود استغربت من حالته وقالت : شفيه مشعل ؟
ام فيصل : أكيد تضارب مع العيال هذا حاله هو وهالجيران دايم
سعود بابتسامة : والله وكبرت يامشعل وصارلك اخويا ومغامرات
أم سعود : اي ياسعود ترا يوم تروح تدرس بامريكا كان مشعل عمره سنتين
سعود : صح ! مسرع مرت ذيك السنين
فتون وعيونها بالصحن : وهذه هي بترجع مره ثانية وتسافر
سعود بحنية : شسوي حبيبي والله ماودي بس الشغل وظروفه
فتون ماتحملت ودمعت عيونها وقامت من الطاولة
وأم سعود تأثرت وتركت الملعقة وغطت عيونها تبكي ..

كانت حنان جمبها ولمت اختها من اكتوفها وهي تقول : بس ياختي عاد لو كان سعود صغير تخافون عليه هذا هو رجال وسافر قبل هالمرة أكثر من مره ورجعلنا الحمدلله
أم سعود : ولو كان رجال بيظل بعيوني صغير وأشيل همه
سعود بضيق : يمه يعني شلون .. تبوني أبكي معاكم الحين يعني؟
أم سعود : لاياعمري لا تبكي ولا شي بس والله يعز علينا فراقك
سعود : وانا بعد عاز علي فراقكم بس شسوي دامني أنا الي متحمل كل شي بالشغل !
أم سعود : أدري ياولدي أدري انك متحمل كل شي ولاعمرك قصرت بشي
سعود وهو يمدلها المناديل : طيب يالله يام سعود امسحي دموعك واتغدي لاتخلوني أزعل الحين وأقوم بلا غدا
أخذت أم سعود المناديل ومسحت دموعها وسعود التفت لفتون الي قاعدة على الكنب ورافعة رجولها ودافنة وجهها بين ركبها وتبكي بصمت
سعود : فتون
فتون : .........
قام سعود ومشى وقعد جمبها ومسح على شعرها وهو يناديها : فتون ارفعي راسك
فتون وهي تبكي : مابي ياسعود خلاص روح اتغدا
سعود : حلوة الي اتغدا وانت هنا تبكين علي .. قومي يلا ولا ترا بازعل
فتون : .........
سعود حب يضاحكها ونغزها من جمب بطنها الا هي نطت ورفعت راسها .. ضحك سعود وعاد لها الحركة مره ثانية وثالثة لين ضحكت غصب وهي تقول بدموعها : بس ياسعود بس
سعود وهو يضحك : يلا قومي غسلي وجهك وتعالي
فتون : مابي خلاص راح الجوع
سعود : اول ماتقعدين على الطاولة بيرجع
فتون : اوكي خلاص انت روح الحين
سعود : وانتي قدامي على المغسلة اغسلي وجهك ومابي اشوف دموع مره ثانية لين اسافر واذا سافرت افلتيها مثل ماتبين
ضحكت فتون وهو مسح على راسها بحنان وقام للطاولة وهي قامت غسلت ورجعت مكانها بصمت ..
شوي الا نزلت عبير ولاحظت وجيههم المتغيرة وقالت وهي تقعد على الكرسي : شفيكم ؟
حنان : مافيهم شي بس تكفون لا تفتحون السالفة من جديد
عبير : أي سالفة ؟
مرام باستهبال : سالفتك انتي ومنى الي مخبينها علينا
عبير بعدم فهم : أنا ومنى ؟
مرام : ايه انتي ومنى شعندكم تتسرون ماتبونا نسمع وتطلعون الغرفة بدوني انا وفتون
عبير وهي ترفع حاجب : والله ياحلوة ماعمري اتدخلت انا ومنى باسرارك انتي وفتون
مرام : اوريك انتي ياناكرة المعروف اذا انشغلت منى جيتيني واذا فضت كنك ماتعرفيني
سعود : والله مرام طلعلك لسان !
مرام : هههههههههههههههههه توك تدري ؟ لا وفم وخشم وعيون بعد
ضحكوا عليها وكملوا غداهم بسوالف وضحك لين قاموا من الطاولة وقعوا بالصالة للعصر ..

بعدها استأذن منهم سعود يطلع يكمل اشغاله .. وماحبوا يعطلونه أكثر ..
وراح عنهم .

 
قديم 07-13-2010, 10:33 AM   #5

انا البنوتة


رد: لجل الوعد كامله


لجل الوعد كامله

هناك بالبحر عند الشباب
كان القارب واقف فيهم بنص البحر .. " وناصر ولؤي " أخوياهم نزلوا البحر بالدبابات .. أما الباقين كانوا رامين السنارة بوسط البحر ليصيدون .. وجمبهم شبكة سمك مليانة كلها نتيجة صيدهم ولا اكتفوا لان طموحهم يصيدون القرش ماشاء الله وهم واقفين ينتظرون الا اهتزت السنارة وغطس الطُعم بدليل ان في سمكة عالقة
نط أول واحد منهم كان فيصل وهو يقول : الحقوا بسرعه ..
ومسك السنارة بقوة وسحبها وحس بصعوبة وهو يسحب وقال : اسحبوا معاي شكلها كبيرة مره
صالح مسك السنارة معاه يسحب وهو يصرخ : يالله يا قرش بابو الكرش اطلع ..
خالد : يراقب السنارة شلون شوي وبتنكسر وقال : والله شكله هو ابن اللذين اتركوا السنارة تكفون لايطلع علينا
صالح وهو يشدها بكل قوته : لا بنصيده غصب عليه
تركي من وراهم : ارخيها وارجع اسحبها بسرعه
فيصل وهو عاصر ايدينه بقوة على السنارة ويسحب : جهزو مكان له الحين اهم شي
خالد : لا تطلعونه مانبيه تكفون الا القرش عاد
صالح : مهو قرش لا تخاف ولا كان انكسرت السنارة من اول
جهز تركي المكان للسمك وخالد اتذكر وصية خواته بالتصوير ونقز للكامر وأخذها وشغلها بسرعه وصور البحر والسنارة واهي منحنية وصور صالح وفيصل وهم يشدون السنارة وخالد ضحك واهو يصور ويقول : اسحبوا بقوة خلوني أصور هالقطات قسم بالله اشكالكم ماتفوت
وأخير مع الشد والسحب استسلمت السمكة المعلقة واتجاوبت معهم وفيصل وصالح يسحبون السنارة ويبتعدون على ورى أكثر وأكثر لين وصلو لآخر القارب وصالح يصرخ : اطلع
وكن السمكة سمعت هالنداء واستجابت فاجأة طار خيط السمكة بالجو متعلق بسمكة كبيرة وخالد ابتعد وهو يصورها شلون عالقة لين سحبوها لداخل القارب وهم يصارخون وفرحانين ويضحكون بانتصار وفورا حطوها بالشبك وهي تنازع تبي الحياة .. وخالد استمر يصورها فترة لين هجدت السمكة
تركي : أكبر سمكة صدناها
فيصل : قول صدتها يافيصل مو صدناها
صالح : وانا ويني عنك لولا الله ثم انا ماقدرت تصيدها
رمى فيصل نفسه على الارض متمد بتعب ومسكر عيونه وهو يحس ان عضلاته بذلت مجهود جبار هاليوم .. وكل واحد منهم شارك بالصيد خلال اليوم .. وبعد مارتاحو شوي كملوا بالقارب لمنطقة ماتركوا أخوياهم يلعبون بدبابات البحر وتركي قال : انا بانزل بالدباب
صالح : لحالك ؟
تركي : كيفكم بتنزلون معاي هاتوا دباباتكم
فيصل : انا تعبان والله مافيني
خالد : والله كلنا تعبنا ولو فيني حيل بانزل اسبح
تركي : اجل انا بانزل اشوف الشباب ونتطارد شوي ونرجع
ونزل دبابه وانطلق مصدر صجة بين الامواج خلت خالد يبتسم وهو يسمعها لعشقه اهو واخوياه للبحر وضجة البحر والأمواج ..

كان خالد وفيصل رامين أنفسهم على أرض القارب ومسكرين عيونهم بتعب .. وصالح قرب من فيصل وقعد جمبه وقال : باسألك فيصل
فيصل وهو مسكر عيونه : شعندك
صالح : وش اخبار خالتك ؟
فتح فيصل عيونه وهو عاقد حواجبه باستغراب : اي خالة ؟
صالح : ومن غيرها يعني خالتك حنان ..
فيصل : تمام الحمدلله ..
صالح : شلونها الحين ان شاء الله تحسنت نفسيتها
فيصل : والله زي ماهي ماتحسن فيها شي ولا هي راضية تساعد نفسها .. كم مره عرضت عليها تشتغل وتلهى برضها معارضة وماتبي
صالح بضيق : لاحول ولاقوة الا بالله
فيصل : وش جابها على بالك ؟
صالح : أمس شفت نواف !!!!!
اتعدل خالد بقعدته فاجأة وقال باهتمام : شفته ؟؟؟ وين وكيف ؟؟
صالح : بمعرض السيارت رحت انا وابوي نشوف السيارات عندهم الا وانتبه لواحد ينزل من سيارة كان يجربها .. ويوم طالعت لقيته هو نواف ماغيره !!
خالد بحمق : الله ياخذه .. طيب ماشافك ؟ مادار بينكم كلام !!
صالح : لا قلتلك كان ابوي معاي ولا كان ودي اورح اسلم عليه وأسمعه كم كلمة أخليه يكره نفسه ويكره اليوم الي طلع فيه على الدنيا
فيصل : وانت ليه كارهه بهالشكل؟؟
صالح بارتباك : لا بس عشانها .. عشان خالتكم .. يعني الي سمعته منكم عن معانتها يخلي اي واحد غيري يحزن عليها ويكره هالشخص الي دمرها
اتنهد فيصل من قلبه وقال : زين مو أنا الي شفته .. لأني حالفله أنا لو عاد التقت عيوننا مو سالم مني وش ماكان المكان الي التقينا فيه !
انتبه لهم خالد وهو يتكلمون بهمس وجاهم وهو يقول : شعندكم تتسارون ؟
صالح : وانت كل شي تبي تعرفه .. روح نام اريحلك
خالد : يالنذل الحين انا ولد اخوك ولا هذا
صالح : انت ولد اخوي بس هذا صديقي من قبلك
فيصل :هههههههههههههههه جبتها ياصالح
خالد : أوريك ياخاين العشرة
صالح بسخرية : وش بتسوي انت وهالخدود المحترقة
فيصل :هههههههههههههههههه اي والله ماسوت فيك الشمس خير
خالد : الحين انتم تضحكون ماتشوفون اشكالم قسم بالله كل واحد منكم طالع أفحم من الثاني
صالح وهو يمسح على وجهه : اي والله أحس اني مسخن
فاجأة نط خالد وهو يقول : قوم نسبح قوم
صالح وهو منزل راسه ويمسح عليه بتعب : والله مافيني تعبان
غمز خالد لفيصل الي فهم الحركة وقف فاجأة وشال صالح من ذراعه ورجله وخالد نفس الشي وهو يصارخ : اتركوني وجع
أسرعوا الشباب وهم يضحكون ورموه من القارب لوسط البحر وصاروا يراقبونه لحظات لين طلع من وسط البحر يصارخ عليهم : يلا انزلوا الحين لا أوريكم ياحمير
فيصل : ههههههه يلا انا جاي
وصعد على حافة القارب يبي ينط الا جا خالد ودفه من وراه وفيصل رفرفت ايدينه بالهوا لكن البحر كان أجذب وغطس فيه وظل خالد المنتصر
ولحظات وطلع فيصل من وسط البحر يصرخ : مردودة يالنذل
ضحك خالد عليهم و وقف هو على حافة القارب وانحنى ونط مثل الصاروخ لوسط البحر .

وبعد السباحة والوناسة بدت الشمس تغيب وهم ذبحهم الجوع .. فأول مارجعلهم تركي والشباب .. انطلقوا بالقارب راجعين .. وثبتوه مكانه لأنه ملكهم وكل واحد وقف بملابسه تحت دش صغير من الدشوش المعلقة جمب البحر وكانوا مستمتعين بالموية الحلوة الباردة الي تصب عليهم بعد عناء الصيد والشمس والسباحة..
خلصوا وتنشفوا وطلبولهم عشان بنفس المكان واتعشوا .. وبعد مانشفت ملابسهم اتوادعوا هم وناصر ولؤي .. وركبوا سياراتهم متفقين على موعد ثاني بالبحر ..
خالد وفيصل كانوا بنفس السيارة معاهم تركي وصالح .. وصلوهم لبيت الجد .. وبعدها انطلق خالد مع فيصل لبيت ابو فيصل .. وين ماكل العيلة مجتمعة ..

********
صحت منى ونزلت لقت البنات قاعدين يتفرجون على فلم .. وبالجهة المقابلة أمها وخالتها نورة وحنان يشربون شاهي ويسولفون
مشت لهم واهي تقول : في شاهي ولا مخلص ؟
ام فيصل : الا فيه بس روحي اتغدي قبل الشاهي
منى وهي تقعد : مو مشتهية الحين والله .. وصبتلها كاس شاهي وهي تقول : ماطلعتوا ؟
أم فيصل : لا وين نطلع تو مكلمنا فيصل يقول جاين بالطريق
منى بابتسامة : بالله ؟ زين خلينا نشوف وش عندهم مغامرات اليوم بعد
أم سعود : مغامرات وهبال وبالآخر يجونا ميتين من التعب
ام فيصل : والله انك صادقة بس تصدقين ازينلهم من التسكع بالشوارع
أم سعود : طبعا من هالناحية احمد ربي واشكره الي خلى جنونهم البحر والعب بالبحر

" للا اء "

أم سعود : فتون وجع شهالصراخ ؟؟

قامت فتون معصبة وصكت التلفزيون وهي تقول : أصلنها حماره خلاص مابي اشوف ..
عبير وهي تمسح دموعها : شغليه يافتون بسرعه خليني اشوف وش بيصير على لويس
مرام : وش بيصير يعني أكيد بتقتلها مثل جانيت
فتون : لاعمركم تقولولي تابعي معنا أي فلم دامه بيصير مثل هذا .. ((ومشت بحمق عند أمها وخالاتها وأمها تقول : الحين كل هالصراخ عشان الفلم !
فتون : تقهر يمه اتخيلي قتلتها عشان توصل لحبيبها !! كنه الحب غصب يجي
مرام من وراها جاية : ماتدري ان الحب بيظل بالقلب حتى بعد الموت
منى + حنان : هههههههههههههههههههههههههههههه ههه
أم فيصل : حبكن برص انتي وياها أدوشتونا بهالخرابيط
عبير وهي تقعد : شنسويلكم طيب نبي نطلع حاجرينا بالبيت
أم سعود : ومو كنتوا اليوم بالسوق ؟
عبير : الله هذاك الصبح !!!
أم سعود : والي يسمع يقول الصبح كان قبل شهر .. توكم قبل كم ساعه
منى : قومي بس نقعد بالحديقة برا
مرام وهي تقوم : اي وحنا معاكم قومي يافتون
قامت فتون .. أما عبير مسكت ايد حنان بدون ماتشاورها وقالت : قومي اقعدي معانا
حنان : اتركيني امانة والله مالي خلق
فتون مسكت ايد حنان الثانية وسحبتها وهي تقول : ومن قال اننا مشاورينك بتجين معانا غصب
حنان : ياربي والله انكم نشبة
عبير : معليه احنا مو دايم عندكم واذا جينا نبيك تقعدين معانا
حنان : طيب اتركوا إيدي وانا بامشي

تركوها وهي ضبطت وشاحها على رقبتها زين .. وابتسمولها بحنان وهم يدرون وش سر هالوشاح !! ومشت معهم إلا أم فيصل من وراهم تقول : خذوا طرحكم يابنات لا يدخلون عليكم فيصل وخالد تراهم بالطريق جاين
فتون : يوه أجل مني طالعة
حنان : زين أجل ولا أنا
منى : شفيكم انتوا الحمدلله ؟ خذي طرحتك يافتون واقعدي لاتبلسينها الا اذا جو
مرام : اي بعدين هم بيروحون داخل
فتون بضيق : طيب انا باطلع وانتوا جيبوا طرحكم وجيبولي طرحة معاكم

وطلعت هي ومعها حنان وبعد شوي جوهم البنات ومرام شافت ساره وهي تلعب بالحوش ومعها بنت الجيران سميرة وقالت : ساره وسميرة العبوا ورى لا تزعجونا
منى : اتركيهم مب حولنا
مرام : مابي اشوفهم بالذات سميرة اذا شفتها انقهر
فتون : ليش ياكافي؟
مرام : يقهروني أهلها يتركونها عندنا ويطلعون يتمشون ولايجون ياخذونها الا آخر اليل
منى تكمل عليها : واذا جينا نطلع ناخذها معنا بعد
عبير : حرام عليهم والله انها تهبل وباين هادية ونعومة
مرام : أكيد من كثر ما شافتني حاولت تقلدني
فتون :هههههههههههههههههههههههههه مادح نفسه كذاب
مرام بجدية : لا عاد تنكرون اني حلوة ونعومة ؟؟
فتون : وش تبين تمدحين عمرك
عبير : وش ماكنتي ماراح تغطين علي .. ( ومدت لسانها
مرام : يالله حنان انتي الخالة انتي الحكم قولي من أحلى وحده فينا
حنان :هههههه كلكم شينات ولا وحدة حلوة
منى :هههههههههههه حرام عليك استثنيني على الاقل
فتون : لا والله جد حنان قولي كل وحده شالحلو فيها وش الشين
حنان : طيب ومحد يزعل ؟
عبير : اي اي محد يزعل يلا قولي
حنان : نبدا بمنى .. (( وتأملتها شوي وقالت : شعرها ناعم وكثير ورسمة عيونها ناعسة ورموشها حلوة وأحلى شي فيها طولها
منى : احم احم الطول عز .. طيب والشين
حنان بنظرة سريعة على البنات : والله كلكم مافيكم شين ماشاء الله بس كل وحده يميزها شكل
مرام بحماس : طيب يلا دوري
حنان : ام انتي !
مرام : ايه ايه وشو
حنان :هههههه الصراحة الصراحة .. انتي احلى من منى
مرام : ياهوه ..
منى : هههههههههههه والله دايم أقول انك أحلى مني
حنان : بس مع هذا منى تهبل .. بس انتي ماشاء الله عليك ملكة
مرام وجهها حمر : طيب خلاص
فتون : استحت مرام هههههههههههههههههههههههههههههه هههه
حنان : ماشاء الله شعرك فاتح وناعم وبشرتك صافية وناعمة .. وملامحك دقيقة وهذا أحلى شي فيك وعيونك بني تهبل يعني من جد من جد حللوة
مرام : طيب والشين
حنان : نحفك الزايد
مرام : بالعكس حلو النحف
حنان : اي حلو بس انتي بزيادة يعني حتى المواهب بدت تختفي
مرام : هههههههههههه لالا عاد الا مواهبي أحتاجها
حنان :ههههههههههههههههههههههههههههه ه خبله
عبير : يلا وانا ياحنان
حنان : انتي آه منك انتي
عبير : يماه ليش
حنان : ماشاء الله عليك كنك أجنبية مو عربية .. عيونك عسلية فاتحة شعرك أشقر ماشاء الله وذهبي بعد من قدام .. وتجعيداته تجنن .. وجهك دائري مره حلو .. وحزري وش احلى شي فيك
فتون : صوتها
حنان :هههههههه صح
عبير : هههههههههه ليه عاد صوتي شفيه؟؟
منى : الا صح صوتك من الاصوات الي تنعد حتى طريقة حكيك وكلامك يوه يجنن

 

أدوات الموضوع



الساعة الآن توقيت السعودية الرياض و الدمام و القصيم و جدة 10:20 AM.


 
Powered by vBulletin® Copyright ©2000 - 2019,
vBulletin Optimisation provided by vB Optimise (Pro) - vBulletin Mods & Addons Copyright © 2019 DragonByte Technologies Ltd.

Search Engine Optimization by vBSEO 3.6.0