عوده جديده لرواية عشاق من احفاد الشيطان كامله

بنفس هذا الوقت والحضات ..

سكرت شموخ القران بعد ماخلصت من جزء اليوم ونهايه الختمه الثانيه لها برمضان هذا ..

ام ريان كانت تتابع مع قناه المجد ختمتها وعلشان التجويد بعد ..

شموخ : من جد مشكورين قناه المجد ..وجزاهم الله خير تحست قراءتنا كثير

ام ريان هزت راسها تبغى تركز مع القران ..

اخذت شموخ روان وحطتها على سريرها نائمه من الزهق سامي مو فيع يلعب معها ولا هي عطتها وجه ..

ناظرت بروان ومشتاقه لريان .. فراغ كبيره تحسه بحياتها ..
كانت غبيه كثير ..
لما دعت عليه بالسجن وهددته تسجنه ..
نزلت الخشب المرتفع لسرير .. الانوار الرايقه مشغله لها والعابها تتحرك مع موسيقى هاديه ..
قالت بهمس وهي تقرب من وجه روان وعيونها مغرقه : رونو .. وين بابا .. كانه تاخر قولي له مشتاقين لك ..
البيت بدونك ظلام .. لك وحشه يانوره ..

ماردت عليها روان الا بتاوهات صغيره وحركه خفيفه ..: تعرفين من بابا والا ..اكيد تعرفيه لانك تنادي عمو سام بابا ..

ابتسمت وباستها بخدها ..: الله يحفظك ماما ..

عدلت وقفتها وسكرت السرير حست بتقلصات بطنها .. مسكته بالم .. وقفتها كانت غلط ..
:آآآه .. يا ماما ..

ضغطت على ظهرها يمكن يخف الالم .. جلست لى الكرسي تريح ..

اندق الباب ..: تفضل..

ام ريان : بتنومي ماتسحرتي ..

شموخ ابتسمت : لا مو نايمه ..بس احط رنو بسريرها ..

ام ريان جلست بجنب شموخ : يمه شموخ وش فيك .؟!

شموخ بنفس ابتسامتها : مافي شي

ام ريان : علي يابينك

شموخ تنهدت : يالله بينك من وين مطلعتها ماما

ام ريان : لاتغيري الموضوع وش حكايتك .؟!

شموخ : مادري احس من الحمل تجيني كائبه ..

ام ريان بسرعه بديهه: لا من امس لما رجعتي من بيت اهل ندى وانتي مو عاجبتني ابدا وطول اليوم متضايقه ..

شموخ امها كاشفه ومافي مجال للكذب .. ابتسمت : اوكي بقول وامري لله .. ام .. اختفت ابتسامتها بالتدريج وعيونها غرقه امس ماحسيت ندى تحبني .. وتضايقت من حشها هي ونور فيني وبروان ..

ام ريان استغرب: شموخ انتي واثقه من نفسك ليه تقولي كذا ..

شموخ : لا مو على ثقه .. حسيت بعيونها تقول انتي ارمله ومابغاك تقربي من زوجي معها حق ليه اجلس بالبيت وسامي فيه ..

ام ريان بجديه وعصبيه : تاكل تبن هي وغيرها انتي بنتي وعيالي خوانك ومحد يفتح فمه ..

شموخ ماتبغى تكره امها بندى قالت بسرعه : لا مو خواني ماما ليه تعذبينا كذا .. انا وريان مو اخوان .. مافي اخت تحس لاخوها بالي احسه .. مافي اخ يعامل اخته كذا ياماما ليه تعملي حالك مو شايفه ..

ام ريان بعناد : انا شايفه بس انتم تربيتوا مثل الاخوان ..

شموخ : مثل الاخوان لكن مو اخوان انا مو اختهم ..انا بنتك بس مو اختهم ..

ام ريان تنهدت : انا مابغاك تبعدي عني انتي بنتي ..

شموخ : وانتي ماما ضمت امها وسندت راسها على صدرها ولا اعرف ام غيرك ولو ماما عائشه ماحضنتها ولانديتها بماما لانك انتي ماما وبس ..

ام ريان مسحت على راسها وهي تحس بالضيقه هي وزوجها غلطوا ولحد هالحين مكمله الغلط .. ريان وشموخ عارفين انهم مو اخوان ومشاعر مثل اي ولد عم متربي مع بنت عمه .. ليه تكذب علشان تجمعهم .. هي تحطم قلبين بانانيتها ..

شموخ غرقه عيونها وهي على صدر امها : انا احب سامي مثل اخوي بس ريان لا .. بلعت ريقها مابغى اخسر سامي .. والسبب غيرة ندى .. انا ماعندي الا انتم مابغى افترق عنكم ..

ام ريان ضمتها بحنان وهي تمسح على شعرها : وماعاش من يفرقك ولاتخافي انتي ماتعرفي معزتك عند هالتوم .. انتي الوحيده الي بقيت لهم ..

شموخ رفعت راسها وناظرت بامها تجاعيدها كثرت وتعبها باين .. : وانتي معي ..

ام ريان ابتسمت : بس هذا الي مضايقك ..

شموخ : لا فيه مابغى اطلع لاي مكان وازور حد ..

ام ريان شهقت : ليه لاتخلي عقدتك انك ارمله تمنعك تزوري حد ..

شموخ : ولافكرت اصلا .. بس روان تخاف من اي احد وماحب حد يناظرها اقل من باقي البزارين ..

ام ريان ابتسمت شموخ فيها حنان تفجر فجاءه ..
سبحان الله من كان يصدق ان هذي نفسها شموخ ..
: لا لازم تختلط بالناس مو حل نحبسها ..

فتح الباب بقوه مثل العاده بدون استاذان ..: سام وصل ..

ام ريان بطفش : الباب ..

سامي دقه وهو مفتوح : وش هالاجواء الرومنسيه .. بليالي رمضان ..

شموخ ابتسمت له : حياك ..

سامي: بودي بس جايب لكم سحور ماحصل من الصيني واكلاته ..

شموخ : ياسلام عاد رونه تحبه ..

سامي : صحيها الدبه دائم تنوم ..

ام ريان : لالا حرام اتركها ترتاح ..

سامي : اوكي يله شموخه الاكل حار وطازه ... فرش

ابتسمت له وهي من جد ماتبغى تفقده وبتحاول كل الطرق تكسب ندى لها علشان ماتبعده عنهم ..

ام ريان بالم : كيف اخوك ..

سامي : لا ممتاز معه مرافق بالسجن جدواي شايب وشكله خويك يمه ..هههههههه

شموخ : هههههههههه ..

ام ريان : لا خوي من ليبيا غيره هههههههههههه

************
انتي صمتك عسل . . شلون لاذاب صوتك
اشغبته المسامع واحتوته المشاعر..
بس تكفى لاتذبحني ويكثر سكوتك ..

سجى كانت مع تركي تتسحر بالمطعم ..

بيعيشوا الخطوبه يوم بيوم مثل اي اثنين طبيعين ..

كان السكوت مالي الجو بينهم .. بس يناظروا بعض ..

كل ماجاء بيحكي واحد منهم ناظر بعيون الثاني وسكت ..

لمتى مايدروا واخر هالتامل والسكوت .. محد يدري متى ..؟

احلام تنبني بهالسكوت ..

وامال تنولد ..

*********
أنفه احمر ومتربع على السرير متغطي بالبطانيه حتى شعره مغطيه فيه .... متدفي بكم قطعه لبسته نور اجباري ..وهي معصبه ..ماقد شافها بمثل هالعصبيه وكانها وحده ثانيه ..

ناظر بغرفتها بالون السماوي والاخضر الوانها تزيد البرد بس الدفايه قباله وريحتها بالبطانيه تدفيه اكثر ..

كان مبتسم وعيونه تتحرك مع حركة نور ..الي طلعت من الحمام بالروب وتمشط شعرها بعصبيه ..
كان ياخذ نفس من شامبو ريحه الورد الي طلعت من الحمام ..

طول الحمام حاولت تهدي من عصبيتها وتروق اعصابيها .. المهم ان يزيد موجود ليه معصبه ..
لانها مقهوره منه .. يغيب ويرجع يبغاها تعطيه وجه ..خلصت كل دموعها بالحمام علشان ماتبكي قدامه ..

طلعت وهي تحس بنظراته يلاحقها .. تنرفزت اكثر و طنشته .. مشطت شعرها و لفت عليه معصبه : خير تناظر ..

يزيد ابتسم لها وهو يسحب منديل من الي قدامه بجنب الدفايه الي على السرير : مشتاق لك .. مسح انفه الاحمر - وش هالعصبيه الي انتي فيها ..؟! روقي ..

نور تقلده باستهزاء : روقي .. على ايش اروق ياحسره .. زوجي بجنبي اربع وعشرين ساعه .. والا انا مو غاثه اهلي ومزيده عليهم الحمل ..

يزيد : تعالي يابنت الحلال ولا تصيري كذا .. الي تبغيه بيصير ..

نور : الي ابغاه انت تعرف وش الي ابغ كح كح ..كح كح ..

كحه بقوه دخل صدرها هواء بارد ..

يزيد : نور تدفي .. بتمرضي كذا ياقلبي ..

نور قاهرها بروده : لف وجهك بدل ..

ابتسم لها بخبث : تحلمين ..

نور : يزيد مو ناقصتك انا... لف وخلصنا بردت ..

يزيد بجديه :نور انا مو وحده من صديقاتك او بنات عمتك لف بدل انا زوجك ومشتاق لك

نور تتريق : جد انت زوجي محد قالي ..

يزيد عصب منها :نور خلاص بتسمعيني والا كيف ..؟!

نور لما عصب منها غرقه عيونها : لا مراح اسمع كيفي .. انت تغيب براحتك وانا بعصب براحتي ..

حلقها كان يعورها من الالم .. مزكومه .. وبعد لانها تكتم دموعها .. وغصتها ..

يزيد متدفي ومايبغى يتحرك ونور معنده ..اذا قرب او حكى معها بتصرخ وترفض ..: اوكي اذا هديتي عطيني خبر ..

نور : مراح أهدى كي..
حطت ايدها على حلقها وفمها يالمها تبغى تبكي وتسكت ..
تالمت خلاص تبغى تبكي

يزيد نزل من السرير لعندها : طلعيها نور ابكي .. ليه معذبه نفسك كذا ..

نور بكت وكانها ماصدقت : لانك من اول ماتزوجنا ماهمك رافضني وماتبغاني .. اذا انت مو مقتنع فيني ليه اخذتني ..

يزيد بجديه جلس نور المرتجفه : نور انا مابغاك الله يسامحك ماتعرفي وش ذقت علشان اكون استاهلك ..

نور هزت راسها بالنفي : لا تضحك علي انت عارف اني احب....ك

يزيد باس ايدها وخدها : ياقلبي وانا ماناظر غيرك .. ها .. ناظري وين كنت رفع ايده وراها مكان الابر ماكنت العب .. ولا مسافر شغل مثل ماقلت لك .. كان معي فقر دم حاد وتعالجت منه..

نور فتحت فمها وهي تناظر ايده وتبكي ..
احساسها ماخاب .. يزيد مايبيعها يزيد شاريها ..

تحست ايده وهي تبكي : كنت عارفه من اول يوم .. الي فيك مو طبيعي .. ليه ماقلتلي ليه تعالجت لوحدك ..

يزيد ابتسم لها : علشان ماشوف هالنظره هذي بعيونك انا كويس والله لاتخافي علي ..

نور : يعن

قطعها فتحت الباب القويه وضحك هواجس وندى ..: لسحور يادموزيل ن

يزيد بعد عيونه بسرعه عنهم خواته .. اخت نور والله مايعتبرهم الا اخواته ..

سكروا الباب بسرعه واصواتهم واضحه : متى رجع ..؟
ليه محد عطانا خبر ..؟؟
يالفشله ..الخ ..

نور قامت وجلسته : انت مزكوم ارتاح هالحين ..وبجيب لك السحور هنا ..

يزيد حك راسه : ضروري بكره نصوم ..

نور : يزيد ..

يزيد تغطى : هههههه امزح معك ..وانتي مزكومه ارتاحي ..

نور : بدل واتسحر وارتاح .. بليز يزيد طلبتك ارتاح علشان خاطري ..

يزيد تاف : هذا الي ماكنت ابغاه بالسوري - "يان عنيا من جوا ".. يالله كاني مو شايفك من سبع سنوات ..

نور : شايف كيف ..؟!

************
(( قليلا من الرجال من يعشق ..
ولكن عندما يعشق الرجل ..
يكون للعشق معناه ..))

"هل رايتم اقوى من رجل عاشق .."

.

.. في اول ايام .. العيد..

الله اكبر الله اكبر ... الله اكبر كبيرا ...

كانت تكبيرات العيد ماليه الجو ...

والشوارع فيها فرحه .. البيوت تسكنها البسمه ..

ثياب جديده ..
صله رحم ..

كل شي غير بهذا اليوم ..

لانه باختصار يوم العيد ..

كان الحماس عند شموخ غير .. لبست فستانها الاسود الرايق من الصباح ..
وتركت شعرها براحته على كتفها ..

امها طلعت للمسجد تصلي العيد ..

تمنت تروح معها بس ماتقدر تعب عليها .. وروان مالها حد غيرها ..

صحت روان من نومها علشان تجهزها لبيت جدها ..

روان كانت معصبه ومتضايقه .. اخذتها شموخ اجباري للحما : يله سطوره بح ..

روان رافضه نهايا تدخل ..

اخذت شموخ نفس طويل وهي تضغط على بطنها بالم : انا اوريك عنيده مثل ابوك ههههههه ..

شموخ تحس بدقات قلبها اليوم سريعه وماتدري ليه ..؟! وش هالاحساس ماتعرف مصدره ..

.
.
.
.

دخل للبيت يجر رجله جر ..

ماتوقع ان اهله سكنوا بالبيت الي اعطاه لشموخ بيع وشراء من دون ماتدري ..
ضمان لها ولمستقبلها .. وكانه حاس ان ولا ريال بيكون له ..

اليوم العيد ..
عيد الفطر..
.. اخيرا طلع من السجن .. اخيرا جاء له الفرج بعد العذاب ...

دور على امه اي احد ..

مشى وناظر غرفه مفتوحه .. وقف لثواني ..

كانت شموخ تلبس روان .. وتضحك معها ..

ناظرها والكون من حوله جمد وكل شي وقف ..
بس فيه هيا .. هي وبس ..

بلع ريقه الجاف بصعوبه
كانت هي .. حلف بداخله..
.. والله هي ..
.. ضامه روان وهي تلعبها وتلبسها .. كانت روان ميته من الضحك وهي بحضنها ..

حس بغصه بحلقه .. غصه تخنقه ..وهو يسمع صوتها : ماما يله البسي .. شويه شويه بس ..

روان ترفع ايدها وهي تضحك وتناديها بماما ..

ماتوقع ان شموخ بتضم بنته وترفعها ..تلبسها وتناديها بماما ..

صفقت روان بحماس بعد مالبست وصفقت شموخ معها : شاطره الحلوه رنو ..

روان اشرت على ريان بحماس : بابا... بابا..

التفت شموخ مبتسمه واسنانها البيضاء بارزه .. : سام اليوم العيد

حست بقلبها تزيد دقاته اكثر وهي تمشي لعنده وتبوس راسه : كل عام وانت بخير..

ريان حس بالم يرتخي بجسمه وهي قريبه منه تبتسم .. حتى لو فكرته سام .. بس عيدت فيه .. قبل اي حد ..

كان جامد ماتحرك .. ماشافت منه اي حركه ..
ناظرت بثوبه المبهدل وكيف الكشره ماله وجهه .. ونحفان .. وعيونه تحتها اسود ..
ارتبكت وهي تتعوذ من الشيطان تتخيل ريان وش هالغباء هذا سامي .. بس النظره نظرته ..
بلعت ريقها تغطى افكارها المجنونه.. ريان بدري على محاكمته

قالت وهي تبعد بسرعه وتمسك بروان اكثر غباءها يصور لها اشياء مو بالواقع ..
قالت بارتباك : سامي ليه واقف بدل بسرعه وتحم هذا شكل حد معيد ..ويله علشان تلحق تاخذ ندوش للغداء .. اخترت لك مطعم خطير ..قل ايش ..؟! خلاص بقولك .. فرايديز ...

ريان واقف مكانه وهو يصرخ بداخله من الضيقه .. حامل .. حامل ..
حامل ..
ياريان حامل ..
في بطنها ولد او بنت فيصل ..

مايدري وش تحكي بس عيونه تشملها ..
مشتاق لها .. مشتاق لطلتها ..
لصوتها ودلعها ..لعيونها ..

ناظر عيونها وآآآه من عيونها ..

شموخ لما ناظر عيونها تاكدت انه هو ..
هو ريان وماتكذبه ..
جف حلقها وثقل لسانها وكانه تبنج ..
ريان
ولو بايش راهنوها هو الي قدامها .. معقوله ماتعرفه ..
نزلت روان للارض ..
وين تهرب وين تروح فيه ..؟!

ريان ضل يناظرها وماقدر يحكي .. وش يقولها ..؟!
انا كنت مسجون ..
انا نصاب ..
وضحكت علي منى ..

ناظر للحركه برجله وصوت روان : بابا ..

رفع روان بايد وحده من ملابسها وهو يقول بصوته الفخم البطياء :.. كيفك شموخ ..؟!..

رفعته لروان بايد وحده تعرفها طريقته هو يرفع البزارين بايد وحده ..
وسواله عن حالها بصوته المميز عن سامي وضح لها كل شي ..

تردد صوته بذهنها " كيفك شموخ ؟! " ودورت له اجابه ماحصلت ..
يسال عن اخبارها وكانه مايعرف وش حصل معها ..
بعد كل هالغيبه برود يسال عن اخبارها وحالها .. طول وقته بارد اناني يكرها .. ومصيبتها تحبه وتعلق فيه امالها ..
قالت وهي ترفع الملابس بانشغال وماتناظره : كويسه ..

ريان رجله مارضيت تتحرك لايدخل ولايطلع .. وعيونه عليها.. زعلانه على فيصل والا لا ..
نسته والا لسه بالها ومفتقدته ..

انتبه بايدها الدافيه الصغيره تلمس ذقنه المقز براءه : بابا ..

ابتسم لبنته وبعد خصل قذلتها الطويله عن عيونها ..
طولت روان كثير وسمنت شوي .. ناظر بلبسها وريحتها .. شموخ .. الون البينك لونها .. وريحه الفراوله ريحتها ..
ابتسم : شموخ ..

شموخ قلبها دق بسرعه ومن زمان ماحست بحراره مثل كذا .. ((احترمي الي بطنك ياشموخ والميت الي ماجفت تربته ..صيري طبيعيه ..))
هو ريان هو ..
: نعم ..

ريان بضيقه وبحه : تعبتك معي عارف انك تعبانه من الحمل ..
سكت شوي ينتظرها تناظره ماناظرته وارتبكت زياده
استحملتي روان كثير .. ازمه وعدت ..

شموخ توترت وارتبكت قالت بسرعه علشان تكون طبيعيه : لا عادي مثل بن.. ..أاقص ..أأأأ..قصد .. مث.. م.. مثل اختي ..

ريان ناظرها بالم وبرقه عيونه بنظره غريبه قال بهدوء : باي شهر انتي ..؟!

شموخ جلست بالكرسي رجلها ماهي بشايلتها ..
وش هالاسلوب السخيف الي يستخدمه ..
يعذبها قاصد ..
تناظر كل شي حولها الا هو ..
غرقه عيونهاوارتجف صوتها : مادري ماحسبت ..

ريان نسى روان الي بيده وهو وين .. وضلت عيونه مركزه عليها ..
اشتاق لرجفتها ..لمكابرتها الي ماتقدر تخفيها عليه هو بالذات ..
رفع حاجبه : ماحسبتي ..اها .. بارتباك - تهقين تولدي متى ..؟

شموخ بلعت ريقها وهي شاده كل اعصابها برقبتها وتقاوم ماتلتفت له ...
على قد ماقدرت يطلع صوتها بارد : مادري ومايفرق ..

ريان ابتسم بضيقه : يمكن عندك بس عندي يفرق ..

شموخ التفت له مستغربه ..
وش هالاصرار انه يعرف متى تولد ..
حاولت تلف راسها عنه بعد ماتشابكت نظراتهم ..
ماقادرت تلف وجهها عنه ..يجذبها .. ومشتاقه له ..
تعبت بدونه وهي محرومه ماتناظره هالفتره الطويله
قالت بصعوبه : ليه انت طلعت ..؟!

ريان تنهد وهو يجلس على كرسي التسريحه بمسافه شبه كبيره بينه وبين كرسيها .. : تقريبا ايوه ..

روان اشرت بحماس لريان وهي تلف وجهه لشموخ يناظرها : بابا .. ماما ..ماما

شموخ ابتسمت لروان الي تاشر عليها وقلبها غاص بصدرها من كلمه ماما لها قدام ريان ..
قالت بصوت شبه باكي : بعد شهرين بكون ولدت وبالاربعين ..

ريان ابتسم براحه : يعني تطلعي من العده .. الله يريحك .. نزل روان روحي لماما بابا ..

ناظرته مصدومه و بقايا كلماته باذنها..
العده ..
الله يريحك ..
روحي لماما بابا ..

ريان ضغط جبينه وهو يحاول يركز النظر لانه حس بدوخه طبيعيه لتركه السجاير فجاءه ..
غمض عيونه لثواني يسترخي ويجمع قوته .. اخذ نفس طويل بعد ماعد للعشره بداخله ..

شموخ شغلت نفسها عن ريان بروان ..
كانت حاسه انه يقاوم تعب .. اكيد كان مسجون الشهور الي فات يبغى يرتاح ..

اندفع الدم لجسمها بقوه ودفعه وحده .. وكان عروقها بتفجر .. لما سمعت صوته يهمس بضعف وهو يضغط على راسه بيده الثنتين ..:.. شم ....وخ .. بي...ن ..ك

ياله مشتاقه لهالصوت والنبره ..
قالت بسرعه و بخوف عليه بس بمكانها ..: نعم ..

ريان رفع راسه وعيونه حمرت من الالم : جوعان وعطشان ..

شموخ نزلت روان وهي تترجم بمخها .. نزلتها لتحت تجهز له شي ياكله ..ماردت عليه من خوفها عليه ..
مشت بسرعه بتطلع من الغرفه مع ان حركتها ثقيله من الحمل ..
وقفتها ايده الدافيه الي مسكت ايدها البارده ..

التفت له بسرعه وهي تحس بالدموع تتجمع بعيونه وقريبه تنزا ..

ريان ابتسم لها : ابغى بندول وسجاير ..

شموخ بين ايوه ولا .. تجيب له سجاير والا لا..
ماحبت تناقشه لانها تبغى تهرب من قدامه هالحين ..
هز ت راسها ..

ريان يتدلع عليها .. يطلب منها الي يبغى ..
وهي مستغربه اكره ماعند ريان يطلب منها شي .. بس هالحين جالس يتدلع وكانه طفل ..

ريان سكت وضل يناظر بعيونها ...
اشتاق للونها الصافي .. الي يغرق بحره ..
انتبه على ارتباكها وشفايفها الي ترتجف بدايت بكيها ...
والدموع الي مغرقه عيونها ..
لا ياشموخ لاتبكي ..
لا داخل على الي ثم عليك ماتبكي قدامي هالحين .. الي فيني مكفيني ..

شموخ تحاول تتماسك .. اكثر ..
بس ايده الدافيه ماسكه ايدها وحاضنها بحنان ..
مشتاقه لهالايد الي ياما جرحتها وطبطبت جرحها بسرعه ..
حركت ايدها علشان يحس ريان ويتركها بس هو ماكان مع ايدها كان يناظرها بلهفه ..
ارتجف شفايفه بتبكي بس تماسكت اكثر ..
قالت تنبهه : ايدي ..

بس قالت الكلمه نزلت دموعها. .. وطلعت شهقاتها الي كتمتها ..
ليه نطقت .. ليه نفجرت ..

ريان ترك ايدها وقف مرتبك ..
لف عنها اعطاها ظهره وهو يناظر بروان المنشغله بالعبه الي بيدها وتحكي مع نفسها ..

لا لاتقرب منها ياريان ...
لا تمسح دمعها ..
اذا قربت بتضيع علوم ..
هي حامل .. احترم الي بطنها ..
وتذكر وعدك بالسجن ..

ناظرت بظهره وارتباكه .. يضرب اصابع ايده بعض ..
يفتح القلاب ويسكره ..

تمسح دموعها الي تنزل بغزاره ..
ضيقه كاتمتها كثير .. من وهي باسبانيا ..
من يوم مابعدت عنه ..
خلاص تبغى تفجرها وترتاح ..
تبغى ترمي همها عليه ..

ريان التفت عليها بعصبيه
وهو يمر اصابعه المرتجفه بشعره الطولان لاخر رقبته ..
قال بشبه صراخ : خلاص اسكتي .. شموخ اسكتي ..

شموخ من عصبيته بكت اكثر وبقهر ..

ريان رجع لورى خطوتين وهو يتمنى يرجع لسجن ..
قوي .. صارم ..قاسي ..
بس قدامها .. مايقدر ..
يضيع كل شي قدام هالانسانه ..
هي نقطه ضعفه ..
وعشقه الابدي ..
صرخ بقوه وعصبيه : بتسكتين والا كيف ..؟!

شموخ هزت راسها لا ..
مو قادره تحكي تبغى تبكي وبس ..
كيف تفوت عليها الفرصه وماتحكي لريان عن معاناتها م فيصل بدموعها ..

شموخ ناظرته مستغربه وحاولت تجمع شتات نفسها بس مو قادره قالت بصوت مرتجف : ريان انا
ماقدرت تكمل لانها رجعت تبكي ..

ريان ضغط على راسه : اطلعي بره .. شموخ ابعدي هالحين

شموخ شهقت اكثر.... : ليه كذا دايم تطردني ليه تكرهني ..؟؟!

تركت روان الي بيدها من صرخت شموخ وخافت ..

ركضت لعند شموخ وضمتها برجلها وهي تبكي : ماما ..

راحت لعند ريان معصبه وضربته برجله مقهوره لانه باختصار زعل شموخ ..

ريان رفع روان وسكتها : خلاص بابا .. هي بتبكي شوي وتسكت ..

شموخ ناظرته معصبه يقصد انها دلوعته تبكي على اي شي ..

تركت الغرفه وطلعت..

دخلت غرفتها وقفلت الباب ..

جلست على السرير تبكي ..

رجعت من جديد لنفس النقطه ..
مع ريان ..

.
.
.

ريان حاول يسكت روان ..
علشان يرتاح ..
راسه يالمه ..وبعد روان تصرخ عند راسه ..

فتحت الباب بقوه امه : سامي الله يهديك تاركها تبكي ..

ريان حط روان على الارض وفتح ذراعه : يمه بعدي .. وحشتيني ..

ام ريان : ريان ..؟!!!

بعد فتره ... بعد عن امه الي دموعها غرقته .. : يمه خلالاص انا قدامك ..

ام ريان تمسح عليه بحنان : البيت بدونك مايسوا ..

ريان ابتسم لامه وهو اول مره يحس بحنانها : ماعليك يمه مالي طلعه من هنا ..

ام ريان : يمه وش حصل معك .. كيف كنت عايش هناك م

ريان : يمه خلاص انا عندك ..

ام ريان : ت

وقبل لاتنطق امه .. رفع روان.. ورماها بحضن امه : تفهمي معها ..انا بروح لبنتي الاصليه ..هههههه..

ام ريان ابتسمت له : طيب وبطريقك قلها تتجهز علشان نعيد بيت جدك ..

ريان عقد حواجبه : وين تطلع .. مو هي بالعده ..

ام ريان بلامبالاه : ايوه بس عادي تطلع ..

ريان : من قالك .. لحد ماتولد تطلع ...يمه لاتبتدعي على كيفك ..؟!

ام ريان : اجل تجلس وتحبس نفسه ..

ريان رفع حاجبه مستغرب : من جدك يمه .. حبك لشموخ بيكفرك ..

ام ريان بارتباك : مو كفر في فتوى تحلل لمعتده تطلع ..

ريان بعصبيه خفيفه يعرف حركات امه اذا تبغى تعمل شي : يمه استغفر الله لمين هالفتوى ..

ام ريان : ها .. لشيخ مصري ...

ريان : استغفر الله يمه استغفري وحرام عليك ... ذنب شموخ برقبتك ..

ام ريان سكت ماعندها رد ..وهي تردد بداخلها (( رجع وبدى يتحكم ..ياحليله سام .. ))

ريان : روحي بس روحي عيدي .. وحرام عليك شموخ ..

ام ريان طنشته مو عاجبها الحكي .. بس هذا ريان ماتوهق معه ..
اخذ نفس طويل ودق الباب ..

شموخ صرخت: ماما مابغى اشوف حد ..

ريان ابتسم هذي شموخ .. وهذا وضعها حتى لو هي حامل ..
فتح الباب وناظرها وهي مقطعه نفسها بالبكي ..

وقفت شموخ والتفت كانت بتصرخ .. بس اسكت وهي تشوف ريان ..
: نعم .. خير ...

ريان .. قدم لعنده بخطوه وحده واسعه ..
ودفها بقوه لصدره ..
ضمها بقوه وهو يقول بين اسنانه : ياغبيه ماقدر ..على دموعك .. ماتفهمي انتي .. انتي .. انتي همس كلي ..

شموخ هنا جد بدت مناحه مانتهت ..صارت مثل البزر الفاقد حنان امه ..
وهي جد كذا ..
ريان ابوها .. وامها .. واخوها .. وحبيبها .. وحياتها ..

***********
هواجس مع ملاك جالسين بالحديقه ويناظروا الغيوم ..

ملاك : ياشين العيد بدون نور ..

هواجس : ههههه نور مو فاضيه لنا مع اهل زوجها ..

ملاك : حتى نواف مو حلو العيد بدونه ..

هواجس تنهدت : وانتي صادقه مو حلو العيد بدون بنات عمتي ..

ملاك : ياليت جماعتنا بالرياض عندهم .. مو هنا ..

هواجس التفت : الا انتي ليه مارحتي معهم لبيت عمامي ..

ملاك : وع من زينهم عاد ..حتى ابوي مايزورهم ..

هواجس : ليه في حد يبي ابوي لانه اذاهم قبل مايبونه ..

ملاك : طيب وامي ليه تعيد لعندهم

هواجس اخذت نفس : لانهم اهل زوجها ..

ملاك :الحمدلله ان اهل زوجي وعود وندى ..

هواجس تنرفزت : ملوك لاتعتمدي انك تتزوجي نواف ..

ملاك بغرور : ليه ان شاء الله .. نواف قالي بيخطبني اذا كبرت ..

هواجس لفت وجهها بتاف : صدق بزر

ملاك : ومالك الا هالبزر ترى ..

اندق الجرس ..

هواجس : غريبه شكل امي رجعت ..

ملاك ركضت لعند الباب: يمه يمه ..

هواجس دخلت للبيت علشان امها ماتعصب جالسين بالحديقه بالبرد ..

دخلت وراها ملاك تركض وجهها متغير : هوجد هوجد ..

هواجس : خير ..

ملاك غيرت ملامحها مو عاجبها : في وحده عجوز مسويه نفسها كشخه وانها بنت .. تبغاك بره وتق

قبل ماتكمل ملاك حكيها كانت المراء عند الباب الداخلي تبتسم : هاي ..

هواجس فتحت عيونها : ام فهد ..؟!

ام فهد : ممكن ادخل ..

هواجس ارتبكت وش مجيبها ذي : هلا حياك تفضلي ..

دخلتها لمقلط الحريم وهي تبتسم بارتباك لانها سمعت صوت فهد مع ابوها بالحوش..

مانتبهت وش تحكي ام فهد بس هزت راسها ..

ملاك ضربتها بخفيف : تقولك كل عام وانتي بخير ردي عليها ..

هواجس انحرجت : وانتي بخير .. ملاك جيبي عصير همست لها دقي على امي بسرعه ..تجي ..

ملاك هزت راسها وركضت لبره ..عند ابوها ..

هواجس : حياك الله ..

ام فهد ابتسمت بصدق : الله يحيك .. مادريت ان السعوديه شتاء الا لما نزلت من المطار ..

هواجس : اها ..

ام فهد : الله يهديه فهد ..ماحكالي شي ..

هواجس ارتبكت اكثر من طاري اسمه ..واكتفت بابتسامه بسيطه ..

ام فهد : بسم الله عليك ياهواجس حلويتي اكثر ..

هواجس قلبها وصل بلعومها عارفه انها مقدمات لشي .. قالت بنفسها (( احلفي حلويت ..))

.
.

ملاك دخلت عند ابوها بسرعه ومانتبهت لفهد الي جالس : يبه يبه في مراءه عند هواجس وتقول تبغى الطوارى بسرعه ..دق على امي وقلها تجي هالحين ..

بو هواجس ضحك مع فهد على ملاك : هههههه خلاص بدق عليها ..

فهد بخبث : قولي لامك جاين خطاب لهواجس ..

التفت ملاك وتوها تنتبه فيه ..: ان شاء الله بقولها ..

رجعت لداخل ..عند هواجس بسرعه ..
همست باذنها بصوت عالي : في واحد حلو مع ابوي بالمجلس يقول جاي لك خطاب ..

هواجس تمنت تحفر قبر وتحط فيه ملاك بهالحضه ..
قالت بين اسنانها : زين ضفي وجهك ..
عن اذنك ام استحت تقول فهد قالت - .. خالتي شوي ..

طلعت وسحبت ملاك معها .. وهي متوعدتها ..

*********

اما الجو بالرياض غير..

كان العيد باوجه ..

والرقص والاحتفال ..

وبالذات ان المناسبه مناسبتين ..

حفله زواج سجى وتركي ... ومتعب وروابي باول ايام العيد ..

سجى كانت بفستانها الابيض .. مغطى من الصدر .. والباقي شفاف بطنها وظهرها .. والقطع الي تحت من الفستان ناعم وطويل مره ذيل ..

كانت ماسكه ورد .. وردي رايق مره ..

مكياجها وردي ..
ورافعه شعرها شنيون بدون اي خصله تنزل ..مع تاج كرستالي فخم ...

كانت ماسكه بايد تركي وتدبك معه والمصورات حولهم يصورون ..

كانت مبسوط مره والفرحه واضحه من عيونها ...

تركي يناظرها وعيونه تبرق بحب واعجاب .. كانوا لبعض مو لحد ثاني حولهم ..

همس لها تركي : دنيتي انتي ...
***الحب ممكن يحي قلوب مات وينهي قلوب عاشت

ندى جالسه بالثمه مع وعود اختها وربى ..

سرحانه مو معهم ماتدري وش القرار الي ممكن تعمله ..

تضل مع سامي والحب الي هم عايشين ..
والا تدور على الامومه والحضن الي تفرغ فيه فطرتها ..

نفسها تسال حد .. تستشير ..
بس ماتبغى لانها اذا فكرت ترجع له تبغى العيب مو منه منها هي علشان ماتهتز رجولته قدام حد ...

لكن احاسيس الامومه تداعب احلامها من صغرها ..

مادق عليها بعد هذاك اليوم مايبغى يتذل لها ..
بس ارسلها امس وهم بالقطار توصل بالسلامه ..
فتحت جواله وناظرت بالمسج للمره السابعه ..
من هذاك اليوم مارسل الا هذي ..

(( توصلي بالسلامه حبيبتي ..
الشرقيه بدونك شينه ..
وحياتي بدونك ماتسوى ..
اي قرار بتقريه انا معك فيه .. بس لاتنسي ..
حياتي بدونك ماتسوى .. ))

وش هالجحيم الي هي عايشه فيه ..

يا كلمه ماما من طفلها ..
او كلمه حبيبتي من الي تعشقه ..

ابتسمت بالم لحركه سجى لتركي ..وهي تاكله الفراوله ..

ربى : غريبه سجى جرياءه مو بطبعها ..

وعود : ههههه .. يمكن لانه كان زوجها وكل هالاحتفالات شكليات ..

مادخلت مع نقاشات وعود وربى ..
ضلت ساكته ..
مالها خلق تحكي ..

دق جوالها مسج ..
عارفه من مين بدون لاتناظر ..

ضغطت على جواله بقوه تقاوم ماتناظره ..
او تفتح المسج ..
لكن ماتقدر .. باصابع مرتجفه فتحتها ..

(( مساء الخير ..
حبيبت اخبرك ريان طلع اليوم ..
ولله الحمد بانت برائته ..
وقدروا يرجعوا زوجته لهنا ..تاخذ جزاها ..

مادري يهمك والا مايهمك ..
بس حبيت اخبرك ان هذا شي فرحني ..
وحبيتك تشاركي فرحتي ..))

بلعت ريقها .. وحست بالم بحلقها ..
لانها كاتمه دموعها ..

هي ما تبغى غير فرحته وسعادته ..

ناظرت بخلفية شاشه جوالها وهي تكتم دموعها اكثر ..
شكل سامي وهو لابس الصعيدي بمصر

نبهتها ايد وعود : ندوش تعالي نطلع .. انكتمت من البرقع ..

ندى ماتبغى تنفرد بوعود.. قالت بصعوبه : لا هنا وناسه ..

وعود : ندوش بلا سخافه قومي ابغى اوريك جناحي ..

ندى ماحبت ترد وعود مره ثانيه هزت راسها ومشيت مع اختها ..

وعود حالفه تعرف ايش فيها ندى .. مو على طبيعتها من بعد زياره اهل زوجها لها بمصر ..

خافت ام شموخ قالت لها كلمه وزعلتها ..

فتحت باب جناحها وهي تركي البرقع من وجهها : ياشين الحركه ذي ..

ندى برود : اي حركه ..؟!

وعود : اذا اهل زوجك مختلط اربع وعشرين ساعه الحمدلله وشكر بوين جالسين مادري ..

ندى ابتسمت لوعود وبالها سرح بعيد .. والغيره مشيت بدمها ..
اكيد هالحين سامي جالس مع شموخ ويحتفلوا بالعيد ..

قالت بانفعال : الملعونه وجهها يكفي بعد ماتغطى ابد ..

وعود استغربت : من ..؟!

ندى: ها .. ولا شي ..

وعود : ندوش وش فيك مو على بعضك ..

ندى تصرف الموضوع وهي ترفع تحفه من الزجاج : ياي جنان هذي - رعت بصرها للجناح كله مشاء الله يجنن جناحك .. عقبال البيت ..

وعود سحبت منها التحفه ومسكت بايدها تجلسها : تسلمي ..

ندى غمضت عيونها واخذت نفس هالحين جد بتحكي لوعود .. لان وعود مراح تتركها ..

وعود بحنان وهي جالسه قبالها : ندوش وش فيك ايش الي مضايقك ..؟!

ندى تحاول تكون طبيعيه مع ان عيونها غرقه : ولاشي عادي ..

وعود : ندى انا وعيد واعرفك .. ماتصير حالتك كذا الا لشي مضايقك ..

ندى بنفس الصوت : مافي شي ..

وعود : شموخ ضايقت قالت لك شي ..

ندى هزت راسها بلا ماهي قادره ترد ...

وعود بحنان اكثر : ندوش قلبي يعورني عليك احكي لي لاتكتمي بصدرك ..

ندى اخذت نفس طويل وشفايفها ترتجف ..: س .. ا م ..ي ..

وعود : سامي ايش فيه ضايقك زعلك .. ندى طبيعي بين الزوجين تصير خلافات انتي مو نونو اعلمك ..

ندى : لا بس انا احبه ..

دفنت وجهها بمخده الكنبه الصغيره وبكت ..

وعود ضحكت عليها .. توقعتها اكبر من كذا ..: ههه ههه الله يرجك حتى بهالسواليف مرجوجه .. م

ندى قاطعتها وراسها بالمخده قالت بصوت مخنوق : ماتفهميني انا اموت فيه .. رفعت راسها وجهها احمر ودموعها ماليته ..- انا مابغى اعيش مع غيره ..

وعود استغربت وابتسمت : اوكي حد ماسك اعشقيه ولو تاكليه ماحد له عند شي ..

ندى نزلت راسها وضلت تبكي بدون رد ..وش تقولها ابغى اكون ام وابغى اكون مع حبيبي ..

متشته ضايعه ..

وعود : اها فهمت انتي تحبيه بزيده عنه حبتين ..

ندى كت ماردت ..
مراح تفهمها وعود الا اذا حكت لها ..

بعد فتره هدت ندى .. لان دموعها مراح تغير شي ..

وعود : ها ارتحتي ..

ندى بهمس : اسالك ممكن ..

وعود ابتسمت لها ..: اكيد ..

ندى رفعت صوره رياض الي على الطاوله بجنب الكنبه ..
واعطتها وعود ..: ناظريه

وعود استغربت منها : ايش فيه ..شبعانه منه ...

ندى برجاء: بليز وعود ناظريه كويس ..دققي بملامحه عيونه انفه ..فمه .. ذقنه .. كل شي فيه ..

وعود ناظرت برياض بتدقيق وغصب عنها ابتسمت .. تحبه وتحب ملامحه ..

ندى بضعف : ناظريه تتخيل تصبحي بوجه حد غيره .. تتخيل رجال ثاني بحياتي.. يصرخ عليك ويزعلك .. بعدين بحنيه يعتذر منك او يحاول يضحك ..

وعود ابتسمت من قلبها .. وهي تدقق فيه وتسمع حكي ندى الغريب : لا .. اكيد لا .. هذا رياض .. بس وش س

ندى قاطعتها : وانا ماتخيل يكون غير سامي بحياتي .. علشان كذا ..مابغى اعيش بدونه ..

وعود : ياحبيبتي مو من اول مشكله تتخلى عني .. صحيح رياض يقول ان سمعته كانت مو حلوه .. بس ماعليك كثير عندهم حركات بس يتزوجوا يتركوا حركاتهم ..

ندى ابتسمت لوعود : مراح استعجل بفكر ..

وعود : تفكري بايش ياحضي ه

قاطعها صوت رياض من بعيد : وعوده .. وعودتي حياتي ...تعالي بسرعه ساعديني ..

وعود بسرعه راحت لرياض علشان مايدخل وندى فيه ..

ندى تتحرش فيها : اركضي بسرعه لايطير ..

وعود : هههههه بايخه ..

فتحت لرياض الباب : ندوش هنا ..

رياض كان رافع كيس صغير وكيكه بكرتونتها ..: كل عام وانتي بخير

وعود ابتسمت : وانت بخير .. ليه متعب نفسك تحت مليان كيك ..

رياض : افا مافيه شي من واجبك .. يله اجهزي نعيد بره ..

ندى ابتسمت على وعود ورياض .. وارسلت لسامي (( الحمدلله على سلامته حبيبي.. تقر عيونكم فيه ..
اليوم خطوبه بنت عمي عقبال زواجنا ..

كل عام وانت بخير ..
قل لامي شيخه .. ولصغيرونه ..))

ارسلت له .. ثواني ودق الجوال ..

ردت بهدوء : آلو ..

سامي بصوت هادي مره وهو مو قادر يفسر الموجود بالمسج هي واقفت ترجع والا لا ..

والا هي تلعب عليه وباعصابه ..: كل عام وانتي بخير ..

ندى ابتسمت اشتاقت لصوته : وانت بخير ..كيفك ؟!

سامي بتشاؤم : كويس وش بيصير لي يعني ..

وعود اخذت عبايتها : ندوش اذا بتطلعي اقفلي الباب الخدامات مابغاهم يدخلوا واذا ماعليك امر حبيبتي دخلي الكيكه لثلاثه ولاتفتحي الهديه بلا لقافه ..

ندى : هههههههه .. لاتخافي مرح افتحها ..

قفلت ندى على نفسها الباب وردت على سامي : هلا وش كنا نحكي ..

سامي : بالله تو تذكرتي اني بالسماعه ..

سكر السماعه معصب تلعب فيه ..

ندى ناظرت جوالها يسكر عليها السماعه .. دقت عليه بسرعه معصبه ..
: الو .. انت قدها ..

سامي بجديه : ندى مو بزر عندك تلعبي فيني.. وش هالرساله وش قصدك بزواجنا .. اذا تمزحي ترى مر مو حلوه ..

ندى : انا مامزح .. وقرت بهدوء قريب للهمس ماتخيل اعيش بدونك ..

سامي ابتسم بعدها ضحك : هههههههههههههه ...

ندى زعلت : انا ماقلت شي يضحك ..

سامي : لا ياقلبي ماضحك عليك .. بس ماني مستوعب .. ندى من جدك تبغيني بعد كل الي سمعتيه ..

ندى تنهدت: ايوه ..
****
ام هواجس تبتسم بحب : والله حا نتشرف بنسكم .. ولدك معروف وماعليه حكي .. بس تعرفين نسال .. وابوها .. وهالسواليف ..

ام فهد : حقكم .. وترى فهد شاريها ..

هواجس ..
كانت مخنوقه بالجلسه ..
وتحس مالها حق تحكي او ترفع راسها ..

مطلقه ومحروقه ..
وتشرط ..

مفروض تبوس ايدها وجه وظهر انها انخطبت ..

وبالذات منه هو ... هو فهد ..

مو هو الي كان معها بيوم الحادث لازم توافق عليه ..

ناظرت ام فهد وهي تقول بحنان : بحطها بعيوني .. باخذها عندي لايطاليا لان شغل فهد هناك ..وكانها عندك يام هواجس ..

قامت من مكانها بضيق وطلعت لغرفتها بسرعه ..

قفلت الباب ورمت نفسها بالسرير ..

مايحق لها تعيش مثل اي بنت ..

هي محروقه .. يعني مشوهه ..

حتى لما حبت تفرح مثل اٌي البنات وتنخطب رسمي ..
فرحتها ناقصه ..

عمرها 25 وكانها بالثلاثين ..

فقدته شبابها .. وحياتها ..

فجاءه سكت ..

ليه النظره التشاؤميه ..

بتعيش مع فهد بايطاليا وين مالتقوا وحبوا بعض ...
اول مابدت خيانتهم هناك وانتهت بسوريا ..

ناظرت الحروق الي بيدها

هو عارف حجمها وشكلها وماخطب الا مستعد لها..

كان تفكيره بداخل الفيلا الصغيره ..

عند الانسانه الي جوا ..

مبسوطه انه خطبها .. والا متضايقه ...
********************
السبت ..

الاثنين ..

الجمعه ..

ايام طويله .. عدت ..
شوال ..

ذي الحجه ..

ربيع اول ...

غيرها من الشهور الي مرت بسرعه البرق ..
مابين سعاده وتوتر بسيط ..
يقتله الحب ..

.

.

بعد سنوات طويله ..

الشمس مشرقه باشعتها الذهبيه على اراضي مملكتنا الحبيبه ..
.
.
.

سامي بالكنبه يتمد ..ويناظر باب الغرفه امس طردته ندى منها ..

: آآآآآآآآف ..

تاف وهو يرمي البطانيه ويعدل جلسته ..

ماهي بحاله معها ابدا ..كل يوم عامله لها حركه من حركاتها وكانها بزر ..

وتطلعه الغلطان وهي الصح ..

يحمد ربه ماسكن مع اهله بيتهم كان فضحته ..

اندق جرس الباب .. ناظر ساعته ..
2 الظهر من بيجي هالوقت ..

تكاسل يتحرك ويفتحه .. : من القرف الغثيث الي جائي هالوقت ..

فتح مكشر ..شاف بوجهه اهله ..
قال بكسل : لو ادري طريت مليون ..

ريان وهو رافع بنته: ليه حاش فينا ..

سامي اخذ منه البنت : ياهلا بلميس مافي بوسه لعموا ..

لميس رمشت بعيونها العسليه وهي تضحك : هههههههه

دخلت شموخ وهي ماسكه روان .. اشرت على المفارش بالصاله ..
: اوه سام مطرود ..ههههههههه

ريان ضحك مع شموخ : الظاهر .. ههههههه

سامي اخلاقه مقفله : هاها هاي .. وين امي ..؟!

ريان جلس بالكنبه .. : بالسياره مع التوم ..

سامي ابتسم : صح وينهم المفاعيص ..ههههههه

شموخ تافت وهي تجلس روان بجنب ريان : زعلانين حضراتهم مشتهين ينزلوا الرياض لاهل ابوهم ..

سامي بجديه : حقهم .. عماتهم وجدتهم مشتاقين لهم ..

شموخ شهقت : وانا .. ماقدر اعيش بدون هيثم وهشام ..

ام ريان وهي تاخذ نفسها
وماسكه بالتوم من كل جهه : عاجبك كذا شموخ مايبغونك ..

شموخ ناظرت بريان ورفعت حاجبها ..: رد ..

ريان ابتسم : لا رجال هم وماعندهم هالحركات ..

روان كانت هاديه مره وماتحب تحكي
دايم بجنب ابوها ..او شموخ ..

سامي يرفع غطاءه والمخده : يله يالحضانه العبوا بالبيت على راحتكم عمتكم ندى تحب التنظيف ..

شموخ ابتسمت ورفعت حاجبها لريان .. مثل العاده ندى وسامي متازم عندهم الوضع ..

يتقاتلون وباخر اليوم سمن وعسل ..
لان باختصار ماعندهم عيال تشغلهم ..

سامي دخل للمر بعيد عنهم .. ودق الباب : افتحي اهلي هنا ..

ندى فتحت الباب وهي لابسه ومتجهزه : عارفه عطوني خبر ..

سامي: لا ياشيخه وليه ماحكيتي ..

ندى تافت ..: ماكلمك ايش فيك نسيت ..؟!

سامي تنهد وناظرها بطرف عيونه : ندى والله مقفله عندي .. طفشت من حركاتك ..

ندى ابتسمت بدلع : جد طفشت مني ..

سامي : ايوه وبنفجر ..

ندى بدلع : اهون عليك ..

ناظرها سامي بطرف عيونه : ندى اكرهك اذا استقليتي حبي لك ..

ندى قربت منه بدلال : يعني تحبني ..

سامي غمض عيونه .. تعشق تعذبه .. وتذله ..
عارفه نقطه ضعفه
وانها متفضله عليه ومتحملته ..
قال بحه : ندى ابعدي عني .. طفشت من حركاتك ..

ندى عورها قلبها عليه ..
بس كذا تطلع عندها
تحط حركاتها فيه ..
تطفش ..
ماعندها شي تعمله ..الا هو
: اوكي بطلع عند أهلك .. بس صوت اخوك بره ..

سامي : ندى اخوي مراح ياكلك ..

ندى بجديه : عند موقفي ..سامو .. لو سمحت خذه بعيد والا مو طالعه ..

سامي عصب : ندى لازم تعقديها

ندى : ها انت الي تصرخ شايف كيف ..؟!

سامي اخذ نفس طويل : اوكي بتروش واطلع مع ريان للمجلس ..

ندى : اوك بطلع لك ملابس على ماتروش ..

سامي باس جبهتها من قلب وغمض عيونه .. : اوكي حبيبتي ..

ندى حست انها حقيره بمعاملتها له .. ابتسمت ..

دخل للحما يتروش .. وتركها ..
(( كل الي عملته في بنات خلق الله ..
يطلع علي .. من البزر هذي ..))

ندى جهزت ملابسه وانتظرته يطلع..
سمعت صوت البزارين يلعبون ..

مقهوره ..مره مقهوره ..

تبغى طفل مرت سنين وهي تقاوم ..

اختها وعود .. الله اعطاها ولدين ..مثل القمر ..

ونور..عندها بنوته تاخذ العقل .. ..

وهواجس .. ولد وبنت بايطاليا ..

الا هي .. ماعندها حد يونسها .. واخوه عنده بنتين ولدين ..

الا هي وش معنا ..

تحاول ما تحمل سامي الذنب بس ماتقدر ..

تكره حياتها اذا شافت البزارين وماتطيق ترفعهم ..
ولا تلاطفهم صارت تكره البزارين وتقسى عليهم ..

مع ان سامي يحاول يحتويها ويكون حنون معها لانه يحس بالذنب ..

طلع من الحمام وهو يجفف شعره بالمنشفه ..
ناظر الثوب الي مطلعته ..واول ماشافها ابتسم : ليه الثوب تعرفي ماطيق الثياب ..

ندى حست بالنرفزه ..
ليه متنرفزه ماتدري ..
يمكن من صوت البزارين الي بره ..
: البس ثوب والا بدله ..كيفك .. انا ابغى اطلع وارتاح ..

سامي اختفت ابتسامته .. واخذ الثوب لبسه بسرعه وطلع ..

ناظر بامه وشموخ و البزارين ..: افا وين ريان ..؟!

شموخ : نسيت ريان بيطلع لشغل ..

سامي رفع صوته بطفش وهو يرمي جسمه بالكنبه : ندى تعالي مافيه حد ..

ندى طلعت من الغرفه وتافت لما صدمت بلميس الي تلعب عند المر : اف حبيبتي روحي لامك ..

ام ريان صرخت : ياعيال اجلسوا بلا ازعاج .. ندى كيفك ..؟!

ندى بهدوء: الحمدلله كويسه كيفك يمه ..؟!

ام ريان : مرتاحه ..

شموخ بتود : ازعجناك ندى ..

ندى بدون نفس : لا عادي ..

سامي هز راسه بطفش .. مافي منها فائده ..
: كويس جئيتوا تتغدوا .. وجبتوا الكتاكيت معكم ..

فتح ذراعاته ..: يله شباب لحضن عموا .. هيه هيثوم هيشوم تعالوا ..

ركضوا له هيثم وهشام وهم مبسوطين ..

رفعهم سامي ولعبهم ..

كانت ندى تحكي مع ام ريان وماتطيق شموخ .. وبالذات انها ماتغطي عن سامي لهالحين ..

سامي : ها من اي مطعم تبون ياحلوين ..

ام رياض : انا بدون ملح ولابهارات ..

ندى : ماعليه يمه اطبخ لك شي حنا بس من المطعم ..

شموخ : لا لاتعبي حالك ماما مطعمها دال الطريق .. انا باخذ مع ندى
..

ندى ابتسامه صفراء : انا من كنتاكي ..انتي ماتحبيه ..

شموخ بتردد : اها .. معك حق بس البزارين وجبه اطفال .. سام خذ لي معك الي تبغاه ..

سامي : انا ا مالي نفس مثقل بالعشاء بس بطلب لك من برجر كنج .. وش رايك ..

شموخ : اوكي ..

سامي طلع للحوش يطلب بدون ازعاج ..

اما ندى ارتاحت لانه مو فيه تتضايق اذا لعب البزارين ..

ام ريان : بشري وعود طلع زوجها من المستشفى .. امك تقول .. معه الزايده ..

ندى : هههههه من زمان ..

التفت لنافذه وناظرت بسامي وهو يحكي ..

كان ماسك لميس ويلعبها .. فجاءه حطها بالارض وتغير وجهه لضيقه ..
ضيقه تكتمه .. وتعرفها كويس ..

كان يمسح على شعر لميس وايده ترتجف ..

حست بالغصه .. هو بعد يتالم ..

هو المه اثنين مو واحد ..

هو المتضر قبل الكل ..

هو الي يتقلب كل ليله ويحاول يكابر الي يحسه ..

حست بانانيتها .. كبيره ..

بس ماتقدر تلومه قبل الكل .. احيانا تندم انها وافقت لانها تعذبه اكثر ..

شموخ ناظرت النافذه ..ورجعت ناظرت ندى ..

احيانا .. تشك ان ندى تحب سامي من تصرفاتها ..
لكن هالحين تناظر العكس ..

ندى تحب سامي وتموت فيه اذا غاب تسرح معه .. لكن وهو موجود ماتناظره ومتنرفزه منه طوال الوقت ...

اكيد لانها ماتجيب عيال تحس بالذنب
لكن تصرفاتها تدل العكس ..

(( ياليت وعود الي تزوجته مو انتي ..
سام مايستاهل الي يحصل له ..))

ام ريان التفت لشموخ : شموخ ارفعي لميس بيقتلها هشام ..

شموخ انتبهت : اوكي ..

ندى : يمه .. مافي اخبار عن ام روان ..

ام ريان غمزت لندى لان روان تفهم : لالهالحين مسافره ..

ندى : اها شكلها مطوله ..

سامي دخل وهو مبتسم يكابر ..: ثواي ويكون الغداء واصل .. يله انا طالع لدوام .. اقسم بالله يمه شمو خ اذا طلعتوا قبل مارجع ..ابزعل ..

شموخ سكت لان ندى ماتطيق حكيها مع سامي ..

ام ريان : هههههههه لا لاتخاف بنجلس ..

ندى لحقت سامي .. وهي تدور طريقه تعتذر فيها ..

سامي وهي يطلع له بدله : ندى ليه تركتيهم ..

ندى ارتبكت : ها .. ولاشي .. بس بتتاخر ..

سامي وهو يكمل لبسه عند الدولاب : مثل كل يوم ليه ..؟!

ندى بتردد : ام .. سام ..انا .. انا ..

سامي هز راسه : ايوه ..بتطلع ..

ندى : انا ابغى روان ..

سامي ناظرها مو فاهم : اوكي خذيها ..

ندى بتردد اكبر وهي تناظر ايدها : لا أقصد ابغاه ابغاه ..
يعني ام ابغاها على طول ..

سامي التفت عليها ..ورفع حاجبه اليمين بعصبيه وهو يكتم اعصابه : يعني كيف على طول ..

ندى ارتبكت وخافت من نظرته .. بعدت عيونها عنه : ايوه ابغاها تكون عندنا شموخ عندها عيالها من فيصل وبنتها .. وروان امها بالسجن .. انا اقول ناخ

قاطعها سامي بصوت شبه يصرخ : ندى طفح الكيل خلاص .. انتي لاتطاقين ..

ندى عصبت : انا ماقلت شي .. بس اقتراح ..

سامي قرب منها
وجهه يزيد قسوه وكانه انساس ثاني : دامك كذا ليه جالسه لهالحين ..
- اشر على راسها بسبابته افهمي انا مافيني عيال ماقدر .. وانا خيرتك يابنت ابوك وانتي اخترتي ..
وهالحين ابغى ارجع للبيت وماشوف خشتك روحي لبيت اهلك اذا كان موعاجبك الوضع لهالحين ..

طلع وسكر الباب بقوه ..

ندى قفزت مع صوت تسكيرت الباب ..

.
.
.

وهذا وضع ندى مع سامي ..

وحال الحياه كذا ..

.
.
.

لحقته بسرعه ..

سام سام ..

سامي طنشها وطلع للحوش ..

وقفته وهي تمسك ايده : والله اسفه سام سامحني .. قسم بالله ماقصد .. والله ماعيدها ..

سامي ناظرها .. وناظر بامه وشموخ الي واقفين عند الباب مستغربين وخايفين وش هالصراخ ..
: وبعدين ترجعي لحركاتك ..

ندى حست بالرعب لان سامي اول مره يهددها .. : حبيبي اقسم بالله اسفه بكت غصب عني والله ماقصد ..

سامي اخذ نفس : اوك حبيبي خلاص لاتبكي عارف ..

ندى ضلت عيونها بعيونه وهي تصغر اكثر قدام حنانه ..

ابتسم وخربط لها شعرها : ندوش خلاص ..
*****
القصر المظلم ..

مليان حياه ..

القصر الخالي .. صار مليان ..

اربع عوايل تسكنه غير ام رياض وزوجها ...

لمت كل عيالها حولها ..

بنات وشباب .. كلهم حولها مع عيالهم ..

.
.
.

سجى جالسه بجنب روابي وتهمس باذنها ..

وروابي تهز راسها بانصياع .. وهي مبتسمه ..

وعود : خير انتي معها .. وش تحكون فيه ..؟!

سجى : مالكم دخل .. اكمل لك روابي ..

ربى : ياشيخه سجى بسرعه اخلصي ..

روابي : لحضه سوسو .. والله حنا عندنا بكره سفره سوا يعني بيننا عشره انتم وش تبون ..

وعود : ربى ماعليك منهم يخطون على رجالهم ..

ربى وهي تسند ايدها على ظهرها .. بشهورها الاولى : وانتي صادقه هذولاء بلاء مايجتمعوا الا لمصيبه ..

سمعوا صراخ ام رياض من بعيد ..: انتي معها ميري .. ورفوعه ... ارفعوا العيال .. انا شاريه راحتي .. ومالي خلق مبزره ..

روابي : آآف امي مقفله ..

سجى : والله انا عيالي عند ابوهم .. ماني غاثه احد ..

وعود : كلها بنيه وتقولي عيال ..

سجى : هاه انتبهي لايسمعك تركان تراه يبغى يغثني بغير رنيم ..

ربى : انا استغرب كيف ساكت لك لهالحين ..

روابي بانفعال:: انتبهي لاتعطيه متعب وجه سطر لي ثلاثه ويبغى زياده ..

ضحكوا عليها ... متاذيه ..

دقت جوال سجى .. ردت : الو هلا حبيبي ..

تركي مستعجل : هلا نانه اسمعي جهزوا للبر حنا طالعين قنص ..

سجى شهقت : والسفر بكره ..

تركي : المره الجائيه حبيبتي .. خذي رنيم وارسلي الشنطه ..

سجى ناظرت بوعود وربى الشمتانات ..: اوك حبيبي ترجعوا بالسلامه ..

سكرت والتفت لروابي : سمعتي صح ..؟!

روابي : حركات متعب ترى هذا هو بكره نسافر واذا قنص ينسى حاله

وعود بطريقه استفزازيه : هههههه فديت رياض الله يحفظه لي قول وفعل ..

ربى بنفس الطريقه : وانتي صادقه الله رزقنا برجال مايطيقوا البر .

سجى وروابي : هاها هاها ها ..

وعود وروابي : ههههههههههههههههههههههه ..

في اجمل من المه ..

في احلى من قصور لامه عوايل ..

في افضل من حياه كل احبابك حولك فيها ..
****************

وهكذا تكون انتهت احداث الروايه والروايه للكاتبه المنحوسه او متكحله بدم خاينها.....

الروايه منقوله اتمنى انها تكون عجبتكم واتمنى انكم تستمتعوا ......

انا بعتذر للجميع على التاخير فى الروايه نظرا لانشغالى بالدراسه والامتحانات اتمنى ان تلتمسوا لى العذر ....

شكرا للجميع.

روعه

روعه

روعه

مسموحه حياتي

روايتك روعه للمره الرابعه هع

يثبت

ونتظر جديدك ياحياتي

عوافي ع طرحك يالغلا

حلوه كثير هالروايه...

قراءتها قبل اسبوعين...

بس مشكلتها طويله مره...

يسلمو الغلا...

روعة ياقمر تسلمي
واحلي تقيم لعيونك

	#82
emanromance	رد: عوده جديده لرواية عشاق من احفاد الشيطان كامله عوده جديده لرواية عشاق من احفاد الشيطان كامله وهكذا تكون انتهت احداث الروايه والروايه للكاتبه المنحوسه او متكحله بدم خاينها..... الروايه منقوله اتمنى انها تكون عجبتكم واتمنى انكم تستمتعوا ...... انا بعتذر للجميع على التاخير فى الروايه نظرا لانشغالى بالدراسه والامتحانات اتمنى ان تلتمسوا لى العذر .... شكرا للجميع.

	#83
زٍحَ’ـمةَ حَ’ـڪيّ..\|\|≈	رد: عوده جديده لرواية عشاق من احفاد الشيطان كامله عوده جديده لرواية عشاق من احفاد الشيطان كامله روعه روعه روعه مسموحه حياتي روايتك روعه للمره الرابعه هع يثبت ونتظر جديدك ياحياتي عوافي ع طرحك يالغلا

	#84
~طمووحي عآآآلي~	رد: عوده جديده لرواية عشاق من احفاد الشيطان كامله عوده جديده لرواية عشاق من احفاد الشيطان كامله حلوه كثير هالروايه... قراءتها قبل اسبوعين... بس مشكلتها طويله مره... يسلمو الغلا...

	#85
سارة احمد صالح	رد: عوده جديده لرواية عشاق من احفاد الشيطان كامله عوده جديده لرواية عشاق من احفاد الشيطان كامله روعة ياقمر تسلمي واحلي تقيم لعيونك