قراءه ممتعه







بارت 31
والأخير







بيت اصاله




دخل محمد للبيت بكل تفائل وفرح بالإنجاز اللي حققه الليله..
تكلم مع امه اللي كانت تنتظره وخايفه عليه ..طمْنها وراح لزوجته اللي تنتظر بس تشوفه...



سمر وهي تقرب له: وين كنت؟؟وليه ماترد علي؟؟
محمد وهو بنفس حالة الفرح :اه ياسمر كنت بِحلم والله بحلم
سمر:...
محمد:وش فيك تناظريني كذا؟؟
سمر:قابلت من؟؟
محمد:تبين تعرفين قبل لا تقولين لي تعشى حبيبي؟!!تبي بارد؟؟تبي شي؟؟
سمر:الاكل قدامك تبي تاكل كل
محمد:لا لا انا شبعان ههه امزح معك
سمر وتعطيه العصير :اجل قول لي يله
محمد ويشوف فاتن بمخيلته: اه
سمر وهي على اعصابها: !!!!!!!!
محمد وهو يحط كاس العصير على الطاوله: انا كنت عند الحب وابشرك بكره راح اعيش قصة حبي اخيرا
سمر: ايش؟؟
محمد:بكره ان شاء الله انا و فاتن
سمر فتحت عينها:كيف؟؟
محمد بحاله مجنونه: فاتن اللي كنت متزوجها قبلك,انا خلاص عقدت عليها ولكن بكره ان شاء الله.. راح نكون بيت واحد .
سمر وتحاول تستوعب : انت وش ا يعني وش تقصد انت خلاص؟؟
محمد وهو يرمي نفسه على الفراش:اه ياسمر والله اني اسعد مخلوق بهالدنيا
سمر:قوم وكلمني اللحين من جدك بتزوج علي؟؟
محمد وهو يتغطى:امم
سمر:اقول لك قم كلمني بتزوج علي يامحمد؟؟؟
محمد وهو مرتاح مغمض عيونه ومبتسم :اشش
سمر وهي تقرب له اكثر: محمد ترى ماراح اسكت ,مو انا اللي زوجها يتزوج عليها سامعني
محمد:امم

"انقهرت سمر وحست النار تشب داخلها,والأفكار الشيطانيه بدت تدب بمخيلتها"

:::::::::::::::

مكالمه بين





داليا:ليه وش صار؟؟

داليا:لأ للآن ماجا
فاتن: يالله..الله يستر لايصير له شي
داليا:ليه وش صار عندكم؟؟
فاتن:تضارب مع محمد .. وابوي طرده
داليا:يوه
فاتن:اف طيب دقي عليه شوفيه هو بخير
داليا:اسمعي صوت الباب شكله وصل
فاتن: طيب الحمد لله اهم شي انه طيب
داليا:اكلمك بعدين
فاتن:اوكي

"دخل بدر لغرفة النوم وحط حرته بالباب ..ترددت داليا تدخل وله لأ..وفضلت تنتظر نص ساعه ثم دخلت له"



داليا: حبيبي
بدر وهو يناظر للجدار:ن لازم اوقْف هالمهزله.
داليا:...
بدر وهو يناظرها :لازم اسوي شي,ماراح اوقف وانتظرها لين تروح بيته
داليا وتقرب له بحب :بيبي قلبي انتَ..دامها وافقت وابوك وافق خلهم براحتهم
بدر وتجمع غيظه اللي هدا بالنص ساعه: وليه اسمح لأختي تاخذ واحد حقير,لاعنده دين ولا اخلاق؟؟
داليا:...
بدر:والله لأقتله ولا انه ياخذها
داليا بخوف :بيبي بليز اهدى وبعدين فكر باللي راح تسويه
بدر: ابي افهم كيف وافقت هالغبيه هذه عليه؟؟
داليا:....
بدر:اه يافاتن قهرتيني
داليا وتحاول تهديه: بيبي ..اقول لك شي انا ماكان ودي اقوله لك ,او اعلم فاتن به..
بدر:...
داليا:انت تدري ان الناس قامت تتكلم عن فاتن كثير
بدر:!!!
داليا: الكل يتكلم بأنها تتزوج كثير وتطلق كثير ,وقاموا يطلعون اشاعات مالها داعي عليها
بدر:وليه يعني؟؟
داليا:هذا مجتمعنا يابيبي عمرهم ماراح يقولون الرجال فيه العيب ,الكل يحطها براس المره وانا اشوف يعني ..انو ترجع لطليقها افضل من الغريب
بدر:مستحيل ماراح ترجع له .. مستحيل

"داليا وماتبيه يزيد بعصبيته سكت ..وقربت منه خذت ايده وضمتها بيدينها وضلت معه بصمت وعقلها يوديها يمين وشمال..لين تعب بدر من التفكير ونام ..ساعتها ارتاحت وحطت راسها على صدره ونامت"

:::::::::::::::::::



ولكن هنا..
بهاليوم الثاني..
وبهالمكان وبهاللحظه مافيه مستحيل





هنا..
وبهالثواني..
وبعد طول انتظار ..وبعد شوق وسهر وعتاب..
بيتحقق الحلم..




فاتن كانت مثل القمر..
بمكياجها الناعم وروجها اللي مثل التوت..وفستانها الزهر اللي يرسم جسمها مثل لوحة الفنان ..
كانت بسيطه ..وفاتنه ...وساحره
اما محمد كان كاشخ بشته والسعاده ماليه تفاصيل وجهه وكأنه بيتزوج للمره الاولى..
ماصدق ان الرجال تعشوا نادى عليها وركبوا سيارتهم واخذها لبيتهم..
واول مادخل محمد شال العبايه من على فاتن وضمها ودار بها لين حطها على السرير"


فاتن: مانت صاحي
محمد وهو يبتسم لها قعد على الارض..ويحوس بجيوبه لين لقى الخاتم وجلس مثل مايسون بالافلام وقال:تزوجيني؟؟
"قامت فاتن تضحك على عبطه,وملامح وجهه الغبيه "

ترى مابي غيرك بحياتي ..
ولا احد يسوى مثلك بحياتي ..
ولاحبيت قبلك بحياتي..
ولا يِعْني لي احد غيرك بحياتي..
تزوجيبني؟؟


""قربت منه فاتن وهي حاطه عينها بعينه.. إبتسمت ..
ومسكت بيدينها الدافيه وجهه وقالت""






::::::::::::::::::::::



اول ماجا الصباح دقت تهاني على عائشه, اللي كانت حاسه بأن
الموضوع اللي بتكلمها عنه مهم أو على قولة المثل (الغريق يتعلق بقشه)..






تهاني:ها حبيبتي كيف زواجكم
عائشه:ههههه من الف ليله وليه
تهاني:ماشاء الله ..ربي يسعدها
عائشه:ههههههه
تهاني:إيش بك؟؟
عائشه:قصص فاتن بتنتشر بالمجلات والمسلسلات ,ماصار العرس امس
تهاني:امانه !! ليه ايش بكم!!
عائشه: ابد كل شي انقلب لدراما
تهاني:لاحول ولاقوه الا بالله
عائشه:ههه والله من جد اختي هذه حظها يفلق الصخر
تهاني:...
عائشه: خير حبيبتي؟؟
تهاني: انا كنت ابغى اسئلك عن الموضوع اللي يخص خلود و جارح
عائشه:ايه صح..شوفي انا وصّاني بدر ماقوله ,ولكن بصراحه اشوف انه جا الوقت اللي لازم تعرفون فيه الحقيقه
تهاني:أي حقيقه!!
عائشه: انا والله مابقول هالشي الا بعد ما قلتي لي عن نذالة خميس وحالة خلود النفسيه
تهاني:ايش فيه ياعائشه خوفتيني
عائشه:صراحه جارح مو سَوي ولازم تاخذون هالشي ضده وتستغله عشان تتطلق المسكينه.
تهاني:ايش تقصدي؟؟انا ماني فاهمه حاجه
عائشه:انا احكي لك من البدايه

:::::::::::::::::::::


بيت اصاله
الساعه 12 الظهر







اصاله:هلا سمر وين رايحه بهالوقت؟!
سمر بإرتباك:ابروح ازور اهلي,اخوي بره ينتظرني
اصاله:اها معك الرحمن ..إلا سمر
سمر وقفت :نعم
اصاله:وين محمد؟؟
سمر:محمد ا راح مادري عنه..عموما انا قافله غرفتي مابي احد من الخدم يدخلها ..باي
اصاله: معك الرحمن ,, بس فوفو تعالي بوسي جده
جات لها فوفو وقالت: ثده ادولك ثر
اصاله:ههه ايه قولي لي سر
سمر:اخلصي بلا مصاخه
فوفو:اطب.. "وقالت باذن اصاله" ( اكدب فود)
اصاله:هههه طيب خلاص "وهي ماهي فاهمه شي"
ههههه يا سنتيا تعالي شيلي الفطور..ياحليلك يا فوفو اكدب فود وش اكدب فود؟؟هههه
الخدامه:ماما انا مافي شوف بابا مهمد ينزل اليوم
اصاله:كيف؟!
سنتيا:مافي انزل بابا مهمد
اصاله:طيب روحي شوفي سيارته بره؟؟
سنتيا:انا قبل شويا طلع زباله في شوف سيارة بابا بره

"قامت اصاله دقت على جواله كم مره ولا رد عليها ..وتذكرت كلام فوفو وبدت تشك انه بخصوص ابوها ..
اقشعر جسم اصاله وخافت وهي تطلع على غرفة سمر وتدق الباب..وتشك بكل دقه ان فوفو تقول ""تكذب فوق""

:::::::::::::::

نرجع لجده





حمزه:اجل بشري خلود انوا كسبنا الطلاق من غير ماندفع ولا ريال
تهاني:كيف؟؟
حمزه:انا اصلا مجرد مادق عليه واقول لوا اننا عرفنا اخلاقوا واننا حنروح المحكمه نطلب الطلاق ,حيقولي انو حيطلق
تهاني:جد
حمزه:اكيد ..اصلا جارح يشتغل مع ناس صيتهم عالي ولا حيقبل على نفسوا السمعه البطاله او حتى المحاكم
تهاني بفرح :وربي فرْحتني لاتخليني انقل لخلود الخبر وهوا مو أكيد
حمزه:ياحبيبتي حتى لو ماطلق بإرادتوا المحكمه تجبروا على طلاقها لاتخافوا ولاتشيلوا هم
تهاني:انا حروح اقول لها




"طلعت تهاني وهي بقمة سعادتها ,,تدور على خلود ولقتها قاعده مثل عادتها بكل هدوء وحزن وعقلها شارد ..
قربت منها تهاني وجلست جنبها"


تهاني: خلود
خلود بعيونها التعبانه:نعم
تهاني:خلاص لقينا الورقه الكسبانه اللي حتجيب ورقَتك ,غصب عنوا مو برضاه
خلود:ليه ياتهاني
تهاني:ايش؟؟اللي ليه؟!!
خلود:ليه تفرحيني بحاجه صعبة زي كدا؟؟
تهاني:لأنها حقيقه ,دحين حمزه قاعد يكلم جارح وانا متأكده انوا حيجي ويأكد لك اللي قلتوا
خلود ودمعتها على خدها:انا تعبت
تهاني وهي تضمها:وربي حاسه فيكِ
خلود وتضمها اكثر: ياتهاني احس بالموت يُكتم على انفاسي ابغى اعيش ياتهاني ابغى اعيش
تهاني وبدت تدمع: صدقيني ياخلود انتي انسانه طيبه وعمرك مانسيتي ربك هانت, وحتشوفي ان الفرج قريب
خلود وصوت بكاها يعلى: يارب

:::::::::::::::::::::

نرجع لاصاله
عند الباب





اصاله وهي تدق بقوتها: محمد انت بالغرفه؟؟
"صوت الهدوء التام ولا فيه حس "
اصاله بعصبيه : وين راجو مو قلت لِك ناديه ؟؟
سنتيا: انا نادي هوا اللحين هوا إجي


""وفعلا خمس ثواني وطلع راجو كسر الباب ودخلت اصاله..
ولكن لقت ..

الغرفه مرتبه كثير ,الأشياء مكانها, ولا يظهر لمحمد أي اثر..
ارتاحت شوي..
و حبت تدخل بعد الحمام عشان تستريح..
دقته كم مره ثم فكته ..
واول مافتحت الباب شافت الدم بكل مكان , ومحمد طايح وهو ينزف ما يتحرك,ولا حاس بشي, ولا يسمع لصوتها تناديه...
قامت اصاله تصرخ وتصرخ وهي تبكي وتضمه..
وهي تنادي بإسمه..
وتردد تتمنى انه يفتح عيونه, يشوفها ,ويرد عليها..
اما الخدامه قامت ترجف وقف تفكيرها عن حسن التصرف.. فقام السواق شال محمد من حضن امه للمستشفى بسرعه ""..

:::::::::::::::

بيت اهل فاتن
العصر..





""بالبدايه ويوم قامت فاتن من النوم بدري ..اول شي سوته شافت جوالها وتوقعت انها بتلاقي اتصالات من محمد او مسجات كعادته..لكن استغربت انها مالقت له ولا مسج او اتصال..
تكدر خاطرها بس يوم تذكرت ليلة امس ابتسمت ورجع لها بعض الحماس لكن الخوف ضل بداخلها ..
ساعه ..
وساعتين..
وثلاث..
وزاد بها كل مامرت الساعات لين صيطر عليها.

وبنفس هالوقت دخلت عائشه لغرفتها""..


عائشه:سلام
فاتن : وعليك السلام
عائشه:بسم الله الرحمن الرحيم وش هالوجه المقلوب افرديها شوي وجع تراك عروس
فاتن:يا عيوش فيه شي مو طبيعي
عائشه:ليه وش صار؟؟
فاتن:ادق على محمد ولا يرد ,حتى اصاله اللي عمرها مازلبتني ماترد
عائشه:تعوذي من ابليس ,شوي وتلاقينهم دقوا عليك
فاتن:اف ياعيوش انا اصلا النحس بعينه عمري ماتزوجت ومرت ليلتي على خير
عائشه:ههههه تعوذي من ابليس وش فيك صايره تشائوميه ..قومي يله اجهزي ,امي تقول ملت منك وهي تقول لك اجهزي.
فاتن:لا ماراح اسوي شي لين يردون علي
عائشه:طيب دقي على بيتهم اكيد بترد الخدامه
فاتن:دقيت ولا احد يرد ,اقولك انا متاكده ان فيه شي
عائشه:لاحول ولاقوه الا بالله
فاتن: المشكله بدر كارهه وله كان هو الوحيد اللي بيجيب لي الخبر ويريحني


::::::::::::::::::::::::

بيت بدر وداليا






قام وشاف الساعه .. وعرف انها راحت عليه نومه ولاقومته داليا.. فاخذ له شور سريع وكان بيطلع

داليا: حبيبي وين رايح بهالوقت ؟؟
بدر:بروح لبيت ابوي
داليا وهي تمسك بيدينها بطنها اللي تحسها ثقيله: بيبي وش بتسوي هناك
قرب لها بدر: لاتقلقين راح احل الموضوع بهداوه
داليا:بس انا تعبانه
بدر بلهفه:وش تحسين بتولدين؟؟
داليا:مادري
بدر:يعني اوديك المستشفى؟؟
داليا:لا لكن ابيك تكون هنا اخاف اتعب اكثر
بدر: انا داري ان مافيك شي ,وخايفه علي من روحتي هناك لاتخافين
داليا:بيبي طيب ريحني وقول لي وش بتسوي؟؟
بدر:ولاشي بتكلم مع فاتن
داليا بنظرة تكذيب:بيبي
بدر:ههه صدقيني ماراح اسوي شي ,بعتذر من ابوي واتفاهم معه ,واتكلم مع فاتن وبس
داليا:...


::::::::::::::::::

المستشفى






اصاله كانت على اعصابها ..
اول ما جابوه دخلوه على طول لغرفة العمليات ..لأنه كان يحتاج لنقل دم..
وهي للآن على نار..ماتدري وش صار معهم ولا تعرف عن حالته ..
ماغير تأن بصوت مكبوت وكل من مر من عندها رثاء لحالها ودعا لها ..
وماصدقت اصاله تشوف الدكتور جرّت رجلها له جر وقالت وهي خايفه


- ها وش لون ولدي؟؟
الدكتور:انتي امه؟
اصاله اللي بقمة خوفها :ايه طمني الله يخليك وشلونه؟ قام ؟نجحت العمليه صح؟؟
الدكتور:لاتخافين يامي, الحمد لله تداركنا الوضع
"سجدت اصاله بالارض وتحمدت الله وشكرته"
الدكتور: طيب انا مظطر امشي بس ممكن ترسلين لي ابوه وله اخوه
اصاله:هو ماله احد غيري ليه وش فيه
الدكتور:طيب اعمامه ,خواله؟؟
اصاله:ليه وش فيه يادكتور خوفتني؟؟
الدكتور: انا طمنتك عن حالته,ولكن احتاج اتكلم مع اقاربه من الرجال
اصاله :و ليه تبيهم!
الدكتور:مجرد اجراءات
""وبعد ما خطى كم خطوه رجع وقال لها ..""
- على فكره انا بلّغت عن الحاله لانه الموضوع واضح ان فيه انتحار
اصاله:انتحار؟؟؟ مستحيل
الدكتور:الجرح كان قطع بالوريد وكأنه حاول ينتحر
اصاله:مستحيل محمد زواجه اليوم
الدكتور:لكن هذا اللي استنتجناه ,وهذا اللي قدامنا
اصاله وهي تفكر بحالة سمر الظهر:اقول دكتور ممكن اشوف محمد
الدكتور:اللحين مستحيل, لاتنسين يامي تخلين احد من اقاربه يجيني بمكتبي
اصاله: ان شاء الله بكره,بس انا ابي اشوف ولدي اليوم
الدكتور:يصير خير

"وفعلا يوم جات الساعه 8 الليل بسب اصرارها..سمحوا لها تمره و تشوفه..
وبدا يفوق محمد وهو يحس بالضعف والتعب"


محمد:يمه
اصاله: حبيب امك وقلبها وروحها
محمد:تعبان يمه
اصاله وتحس بقلبها يتقطع :سلامتك ياروح امك جعله فيني ولا فيك
محمد:وش صار؟؟ فاتن؟؟
اصاله:اهدا وانا امك لاتعب نفسك
محمد بصوت متقطع تعبان :انا تزوجت صح ؟؟ وينها ؟
اصاله:ايه ملكت بس توك ماخذتها من بيتهم
محمد:الا يمه الا امس..."ورجع نام "

عرفت اصاله انه كان يحلم..وتذكرت فاتن ودورت شنطتها اللي اكتشفت انها نستها ولاجابتها معها ..
ضمت ولدها وحبت راسه ..وراحت على البيت لأنهم منعوها تتنوم معه..وفكرت بانها اول ماتوصل لازم تدق وتعتذر لهم عن اليوم ..

:::::::::::::::::::


اما بيت اهل فاتن






بدر:شفتي هذا محمد اللي تبينه ؟؟حتى مادقوا يعتذرون
عائشه:خلاص يابدر مو وقتك اللحين
بدر: اصلا انا دعيت ان الله مايتمم هالعرس انا ماحبيت هالادمي ولا ارتحت له
عائشه :بدر خلاص كفايه,شف فاتن وشلون متضايقه لاتزيدها ضيقه
فاتن:خليه صادق انا اللي استاهل ,حتى اصاله مارفعت سماعه تعتذر عن ولدها
عائشه:اكيد صار لهم شي ياجماعه وش فيكم
بدر: لو سمحتي لاتدافعين عنهم
عائشه:يوه يابدر حنا مانعرف ضروف العالم
بدر بعصبيه: يعني وش صار لهم ماتوا موت جماعي مثلا ؟؟؟
فاتن وهي تقوم من عندهم : انا خلاص ماراح ارجع له لو يموت
عائشه:لاحول ولاقوه الا بالله
امه الي قاعده جنب ابوها: بعد شوي راح يجون اقاربنا بالله وش راح نقول لهم؟؟
ابوها:ابد ولا شي حياهم الله
عائشه:اشوه ان اللي عزمتوهم الرجال بس
بدر وهو يقرب ويجلس جنب ابوه:يبه
ابوه:..
بدر:يبه صدقني هالانسان هذا مايستاهل انك تزعل مني بسببه ,والله يايبه لو انه رجال كان شلته على راسي ,لكن فعايله مهي فعايل رجال
ابوه:يعني زينه كل شوي اختك ماخذه لها واحد؟؟
بدر:يايبه اختي ماغلطت ولا سوت شي بالحرام ,ليه نحط راسنا بالتراب وحنا ماغلطنا,الله اراد وكل شي صار لها مكتوب .
ابوه:استغفر الله العلي العظيم
بدر:يايبه فاتن مفروض انها ماترجع له
ابوه:وليه ماترجع له!! كل انسان بهذه الدنيا يغلط ,اهم شي انه يتوب ويتغير
بدر:يايبه وانت وش دراك انه تغير؟؟
ابوه:يعني انا ماعرف بالرجال؟؟
بدر:يابه انا ماقلت كذا ,بس انت حتى مانتظرت يسوي التحاليل ويطمّنا على صحته ,هذا وهو كان برا له كم سنه توه راجع
ابوه:....
امه: يله الجرس يدق شكلهم الرجال جو
بدر:....
ابوه: قم دخل الرجال ,مو وقته هالكلام.

::::::::::::::::::


ثاني يوم


وأول ماجا الصباح ..
دخل خال محمد عند الدكتور ..





خال محمد: طمني يادكتور كيف حاله اللحين؟؟
الدكتور: اتفضل ياخوي اقعد
خاله: خير ان شاء الله
الدكتور:بكل صراحه حالته للأسف سيئه جدا
خاله:ليه وش فيه؟؟وش صار؟؟؟
الدكتور: صِدق مهنيتي تفرض علي انقل لك خبر سيئ
خاله: الله يستر وش فيه؟؟
الدكتور:بصراحه ولدكم كان عنده "متلازمة نقص المناعه" بحاله حضانه من مده طويله
خاله:وشي!!!انت وش قاعد تقول!
الدكتور:اقول ان الايدز بدا يتنشط بجسمه بعد ماتعرض جسمه للظعف وفقد كميات الدم هذه كلها
خاله وهو مو مستوعب: تقصد ان ولدنا مريض؟؟
الدكتور:ايه بدا المرض ياخذ حاله نشطه بجسمه..ولكن تطمن
وقف خاله وهو يضرب بيده الطاوله: انت مهبول؟؟وله جاهل ؟؟ الدكتور:هذا الكلام نتيجة الفحوصات والتحاليل اللي اجريناها
خاله: والله انت شكلك حمار مو دكتور ..انت عارف حنا عائلة من؟؟؟
وشلون بتعرف وانت مجرد شخص قاعد على مكتبه مايعرف شي عن العالم الخارجي!!!
الدكتور وهو يناظر له بإستغراب:انا مقدّر الصدمه اللي انت فيها فلو سمحت لاتغلط وحاول تهدا لين ماخلص كلامي
خاله: لا والله شكلك ماتعرف بالطب شي
الدكتور: لو سمحت خلني اكمل كلامي
خاله:مابي اسمع زود ,اسمع انت .. التخاريف اللي قلتها قبل شوي لو قلتها لأحد إعرف انك حفرت لنهايتك

"وطلع وهو بقمة العصبيه يدق على اخوه عشان ينقلونه لمستشفى افضل ويسون له تحاليل جديده ..وخرج من المستشفى من غير حتى مايمر على اصاله "


::::::::::::::::::::

بيت
بدر وداليا





داليا تتألم :اه
بدر: وش فيك؟؟
داليا: بيبي اه
بدر:وشو بتولدين؟
داليا:ايه ايه اها وا
بدر: طيب يله
داليا: فوزيه قالت لاتروحين حتى يوم تتألمين ا
بدر:اللين متى؟؟
داليا: لين احس بالطلق انتظم وصار ورا بعضه عشان مايبهذلوني
بدر بتوتر : اها يعني فوزيه هذه دكتوره؟؟
داليا: ا لا لا
بدر منحاس :طيب يعني اوديك وله لا؟
داليا: ا ماني قادره خلاص ودني
بدر بربكه: عباتك عباتك يله
داليا:ماقدر ماقدر
بدر:ليه وش فيه؟
داليا:اه مويه مويه
بدر: اللحين وقتك تبين مويه
داليا:لا المويه نزلت ا

:::::::::::::::::::::


اما اصاله
كانت عند محمد...





اصاله: طيب فهمني وشلون صار هذا كله ؟؟
محمد:مادري يايمه كل اللي اذكره ,اني رجعت من بيت فاتن واول ماحطيت راسي على المخده نمت ومافقت الا هنا
اصاله:اكيد سمر سوت كل ذا اصلا هي للحين مادقت ولا سألت
محمد:وشلون ماحسيت فيها ,ولا حسيت بشي اصلا!!
اصاله:مادري عنها حسبي الله ونعم الوكيل,مع ذلك لاتجيب سيرتها للشرطه مانبي فضايح,امس كانوا بيستجوبونك لكن انت كنت بحاله مايعلم بها الا الله
محمد:انا بس اقوم وترجع لي صحتي بعرف اتصرف معها
اصاله: اه الحمد لله على سلامتك يا الغالي
محمد: الله يسلمك بس..يمه فوفو
اصاله:والله ان امها انجنت ولاهي سويه,انا بتصرف معهم واخذ البنت لاتشيل هم
محمد:اللحين يمه تكفه لاتخلينها عندهم
اصاله: اللحين؟؟
محمد:طلبتك يمه لاتخلينها عندهم
اصاله وهي تشوف وجهه التعبان :مثل ماتبي بروح لهم وامري لله

""وبعد ما طلعت دخل ابو بدر و فاتن اللي راحت توقف جنبه""



- : سلامتك
محمد وهو يبتسم:الله يسلمك ياكل الغلا
ابوها: اجر وعافيه ان شاء الله, وش صار لك ؟؟
محمد:الحمد لله انها جات على قد كذا
ابو فاتن: ماتشوف شر وانا ابوك
محمد:الشر مايجيك
ابوها:يله انا بخليكم شوي,وبروح اتطمن من الدكتور عن حالتك
محمد:الله يجزاك خير


فاتن وهي تمسك يده :ماتشوف شر يارب
محمد: الشر مايجيك ياحبي
فاتن: من يوم دقت علي اصاله امس بالليل وانا ماقدرت ارتاح ولا اغمض عيوني
محمد:اه يالحب اه
فاتن وهي شفقانه على لونه المخطوف والتعب اللي باين عليه : سلامتك من الاه

فاتن: هههع
محمد: لكن الضحكه ماتغيرت
فاتن:...
محمد: تدرين حلمت باننا تزوجنا ..و لبستي الزهر..وخليت زملائي يزفونا بسياراتهم وحتى يوم وصلنا البيت شفت تفاصيل كل شي..
فاتن: محمد اسكت ارتاح لاتكلم
محمد بتعب كمل: اول مادخلنا الشقه قدمت لك خاتم وسمعت من فمك كلمات هزت فيني كل شي يافاتن ..تصدقين
فاتن وهي تتأمل عيونه:.....
محمد:كانت لحظات مثل الحقيقه لمست فيها يدينك وشميت فيها عطرك
ههه حتى اني
فاتن وبدت تفوق من هيمانها: هي انت خلاص ها
محمد:ههه وش فيك بكمل
فاتن بعربجه: اقول خلاص لاتعميها ها, وارتاح لاتجهد نفسك
محمد:اه والله مو مصدق اللي صار, سمر هذه ماهي هينه
فاتن بإنزعاج: لاتذكرها لو سمحت
محمد: والله ماتستاهل انك تغارين منها
فاتن: ومن قال لك انها غيره ؟؟سمر هذه انسانه جاحده وخاينه ولاتستاهل الواحد يسوي لها حساب اصلا
محمد باستغراب: ليه انتي تعرفينها؟
فاتن وهي تناظر له بابتسامه: مو مهم اللحين ,لاقمت بالسلامه قلت لك كل شي

:::::::::::::::::::


بيت اهل سمر





ام سمر: انتي وش قاعده تقولين ,انا بنتي متربيه وبنت اصول وماتسويها
اصاله: هذا اللي صار يام سمر,وانا لازم اخذ فاتن معي
ابو سمر: سمر ماشفناها من بعد ماسلمنا عليها يوم وصلت
ام سمر: اصلا اليوم داقه علي وتقول لي انها زينه
اصاله: معقول ما تدرون وين بنتكم؟؟
ابو سمر: ...
اصاله: يابو سمر فاتن لازم اخذها, ولاراح اخليها مع سمر دقيقه وحده
ابوها وهو يفكر : خلاص يصير خير
اصاله: ومتى راح ترد لي خبر فاتن لو جرا لها شي ماراح نسكت لا انا ولا ابوها
ابو سمر : يصير خير
اصاله: راح انتظر اتصالك


"وبعد ماطلعت"
ام سمر: انت تدري وين بنتك وله لا؟؟؟
ابوها : دقت علي امس وقالت انها بتروح لعمها ولاتبي احد يدري عنها
امها:يعني معقول هي سوت مثل ماقالت ام محمد؟؟
ابوها: الله يستر من بنتك وسواد وجهها
امها :لا مو معقول انا بنتي ماتسويها
ابوها :لاحول ولاقوه الا بالله..الله يستر بس.

::::::::::::::::::::::::::


وبهذا الوقت كان المحقق
بغرفة محمد اللي
بالمستشفى






المحقق: انت لو ما تعاونت معنا وقلت لنا وش صار بالظبط صدقني بنسجل الحادث عليك كعملية انتحار
محمد:بس انا مانتحرت
المحقق: اجل وش صار؟؟ التحاليل تقول ان بجسمك كان منوم ومخدِر وشلون دخل لجسمك ؟؟
محمد:...
المحقق: انت ليه رافض تتعاون معنا؟؟
محمد: مابي الموضوع يكبر ويمس عائلتي
المحقق: مافيه شي بيظرك اذا تعاونت,ولكن اذا حبيت تكتم الحقيقه ما اوعدك وقتها ان الموضوع يكون تحت تصرفنا.
محمد:لكن انا ماذكر شي

محمد:انا رجعت البيت وشربت عصير قدمت لِي اياه زوجتي وبعدها مادريت بنفسي الا بالمستشفى

::::::::::::::::::


بيت عم سمر





امها:الله ياخذك تبين تنعدمين يعني؟؟
سمر بعصبيه: وليه يتزوج علي؟؟ ليه انا وش ناقصني ؟؟ليه دائما يبديها ليه يحبها وانا لا؟؟
ابوها: يعني انتي اللي مسويه بالرجال كذا؟؟
سمر: ايه وكنت ابيه يموت يموت
امها: يالله على المصيبه اللي حطيتي نفسك فيها
سمر: ماراح ياخذ فوفو مستحيل ,بنتي ماراح اتخلى عنها خله يموت لوحده بعيد عن بنتي
ابوها: اللحين انتي فكري بنفسك ,بالورطه اللي حطيتي نفسك فيها وخلي بنتك بحالها
سمر: انا ماراح اعترف وراح اقول انه هو اللي منتحر,واصلا لو داريه انه ماراح يموت كان قطعته قبل لاطلع
ابوها: وليه هذا كله؟!!! الشرع حلّل له بدل الوحده ثلاث ,اللحين كل ماوحده اعرس عليها رجلها تقتله؟؟؟
سمر وبدت تنجن ازود: ايه تقتله انا بروح له واقتله ..بقتله
عمها وهو يمسكها : انتي انجنيتي وله انهبلتي اقعدي لاقتلك اللحين انا .. واعقلي
امها: حسبي الله عليك بنت بتفضحينا حسبي الله عليك بنت

""قام ابوها وهو بقمة توتره ينادي فوفو اللي كانت تصيح من صريخ امها""

سمر: يبه ماراح تاخذ بنتي ,ماراح اخليها لهم ماراح تاخذها
امها: خله يوديها ويترجاهم انهم مايبلغون عنك
سمر: ماراح اعترف بشي خلوا بنتي لاتاخذونها

"زادت فوفو من بكاها وهي تنادي على امها وتشوف ..عمها ماسك بسمر عشان ماتجيها..
واخذ ابوها فوفو لجدتها وهو يتأمل انهم على الاقل يتنازلون عن حقهم
بالقضيه"

::::::::::::::::








وبعد مامرت 20 سنه





















في لبنان
وبمنتجع على البحر ...





كانت تشوف منظر الطبيعه وتستنشق الهوى بهدوء وقاطعها صوت احمد وهو يقول: خلود
خلود: ايوا
احمد:انا رايح اجيب اغراض من السوبر ماركت اجيب لك حاجه؟؟
خلود:لا شكرا
احمد:اوكي
"الا ويجيها اسامه"

اسامه:اقول لِك
خلود:ايش عندك؟
اسامه: انا خلاص ماني قادر اكتر من كدا على العزاب
خلود: ايش بك؟؟
اسامه: اخطُبوا لي ياهو
خلود:ههههه ياواد اعقل اول ,وبعدين فكر بالزواج
اسامه:والله يامي انا عاقل بس انتوا ماتعطوني فرصه
خلود:هههه بالله عليك من فين جاي؟
اسامه:وليه ياخلود تبغي تعرفي ليه؟؟
خلود:انت بس جاوبني
اسامه وهو يحك ضهره:من حمام السباحه
خلود:بس انت ماتُحب تسبح
اسامه:ايوا انا كنت بس اشرِف واشوف اللي تعرف تسبح واللي تحتاج مساعده تعرفي انا جنتل ,والصبايا هون رئيئات كتير
خلود: رئيئات !! هيا فارق عن وجهي
اسامه بوجه غبي:ههههه وربي يامي انتي ما انتي فاهمتني
خلود:هههههه قلت لك فارق
اسامه:طيب انا رايح اشوف ازا احد يبغى مساعده على البحر ,تبغي حاجه ياخلود
خلود:هههه روح الله يستر عليك روح,بس اسمع فين اختك؟؟
اسامه:اه اختي مع حبيبة القلب بنت عمي الغالي ,اختي مع القطعه حقتي
خلود:وربي انك صايع ,هيا انقلع
اسامه: هههههههههههههههههههههه انتبهي على نفسك ياخلود ها, وعلى فكره ابويا كان بيسئل عنك
خلود: دحين حروح عندوا,هوا فين؟؟
اسامه:بالجلسات اللي فوق

:::::::::::::::::::::::


اما هنا
بالرياض وبيت اصاله
قامت من النوم بكل كسل..





وراحت مثل كل يوم بهذا الوقت لِدرجها الخاص بالصور.. وطلّعت البوم صور محمد..
وخذت لها صورة كان يضحك بها ضمتها ثم باستها ..ورجّعتها مكانها..
وراحت لدولابها بعد مثل كل يوم..
وخذت فنيلته الي كل ماخف عطره منها .. كل مارشتها من جديد ..
ضمتها وتذكرت صوته وكأنها تسمعه..
وتذكرت جنونه ..
وحبه..
وخفة دمه ..
وتمنت انها تسمع ولو لمره وحده بس كلمة "امي" من لسانه..
وماقدرت تمنع عينها من الدموع اللي ماجفت ولا راح تجف من فرقاه
إلا يوم سمعت الباب يدق بقوه..
مسحت دموعها ومامداها تلتفت إلا دخلت "


فوفو تقول: هلو ام محمد يسعد صباحك
اصاله:صباح النور..وكم مره اقول لك قولي ياجده
فوفو: هههه ام محمد ماعجزتي من هالجمله؟
اصاله:يالله صباح الخير
فوفو:الملخص ياقلبي لانك تعرفين انا مره busy
اصاله:استغفر الله يابزي وش تبين يابنت ولدي؟؟
فوفو:ابي اقول لك اني اليوم بسوي party
اصاله:لالا مافيه حفلات لأ
فوفو تكمل:وترى عازمه تقريباً .. امم 17 بنت
اصاله:قلت لأ
فوفو:وتراني عازمه ناس هاي
اصاله:قلت لك مافيه حفله
فوفو:وخلاص لاتشيلين هم تراني طلبت الكيك والمعجنات وكل شي جاهز وتمام
اصاله:يابنت انتِ تسمعين انا وش اقول!!
فوفو بحماس: واو لو تنزلين تحت وتشوفين التحظيرات والاشياء الي قلت للخدم يسونها تنبهرين كل شي ..جنان.. perfect
اصاله:!!!!!!
فوفو وهي طالعه:اوه على فكره ..لا أشوفك تنزلين بالحفله ,تراها خاصه بالصبايا اوكي"وطلعت"
واصاله على وقفتها من جنون فوفو..فدخلت فوفو مره ثانيه وهي تعطيها كيس: نسيت هذا لك ياقلبي لأني داريه انك بتنزلين الحفل وصراحه مابيك تفشلينا قدام الصبايا
"وطعت وابتسمت اصاله على عفوية فوفو اللي تذكّرها بمحمد"


:::::::::::::::::::::

اما هنا
بحديقة البيت الكبير..
وبعد ماروت فاتن لولدها وبنتها تفاصيل معينه بالروايه
كان هالحوار ..





داليا: طيب وبعدين يمه وش صار كشفتوا على فوفو؟؟
فاتن:ايه اول ماعَرفت اصاله كشفت عليها وتطمنت انها الحمد لله سليمه
عبد العزيز وهو يفكر بمنطقه ثانيه بالروايه : يمه
فاتن:هلا
عبد العزيز :خلاص انا قررت اتزوج وحده مثل داليا مو داليا اختي لا خاله داليا
داليا: وليه وش فيني انا يالتعبان؟؟
عبد العزيز: ابي وحده دلوعه,مو مثلك انتي وخشتك..بس قسم لو تكشف وجهها علوم
داليا:ههه اقول اقلب وجهك بس
عبد العزيز:ياحول يابنت العربجيه ,ولد انتي؟!!
فاتن:ياولد استح على وجهك
عبد العزيز: تدرين يمه صديقي صالح يوم وصلناك ذاك اليوم وش يقول؟؟
فاتن:وش يقول ياحسره
عبد العزيز:يقول ممكن اصاحب امك دخلت مزاجي
فاتن: والله اني داريه لو مارحت عن وجهي بأَفقع راسك بهالبياله,انت وهالشله اللي ماشي معها
عبد العزيز:هههه لا بروح الله يخليك ,ابي احافظ على وسامتي .
داليا: والله لو سمعك خالي بدر تقول "وسامتي" هو اللي بيفقع وجهك
عزوز من بعيد: انتي بس قولي له ,وشوفي وش يصير لك
داليا:ههههههههههههههههه
"فاتن وهي تقول بنفسها يا الله ياعيالي ماخذتوا مني الا الهبال"

داليا وهي تقرب لأمها :يمه دام ذكرنا خالي بدر ممكن اسئلك سؤال تجاوبيني بصراحه عليه
فاتن:قولي والله يستر من اسئلتك
داليا:بعد ماعرفتي ان خالي بدر هو السبب بتعجيل طلاقك من محمد زعلتي منه؟؟
فاتن:انا كل ماتذكرت حمدت الله وشكرته ان عندي اخ مثل بدر
داليا:معقول!!
فاتن:ماما داليا ..انسان مثل محمد ما كان يقدر يعطي من كل قلبه..كان انسان ضعيف.. اندفاعه وزلاته مصيطره على عقله.
داليا:الله يسامحه
فاتن:قولي الله يرحمه ويغفر له
داليا:وابوي..وش يعني لك بعد هالسنين؟
فاتن:ابوك بعدهم كلهم..ابوك نبض قلبي ,وهدية الله لي..واحد مثله كان قال دامها رفضتني وفشلتني قدام اهلي وخربت ليلتنا مستحيل اجي واطلبها مره ثانيه..


إلا على جيته ..قرب منها وحب راسها وقال : الله على هالكلام فاتنتي
داليا:ماشاء الله بابا متى جيت ؟؟اسمع اجل الله جابك تع
ناصر: لا بابا ولا ماما قومي من هنا يله ولا يكثر
داليا:تؤ تؤ عاتي تكلموا وانا بسوي اني ماسمع
ناصر:قومي لارميك بهالبياله
فاتن:ههههههههههههههههههههههههع
داليا: تؤتؤ حتى انت عدتك امي!!
ناصر:هههه امك هذه اه منها بس ,قومي يله روحي شوفي لك شغله
داليا:ههه طيب ممكن اروح اجيب هديه لحفلة الليله
ناصر:مع من؟
داليا:بشوف وين عزوز قبل لا يطس
فاتن: خلها تروح نصور
ناصر:خلاص اجل احطي
داليا:هههههههههههههههههههههههه ههههه



::::::::::::::::::::::::::




نرجع للبنان





راحت خلود للإنسا اللي تعشقه وشافته كعادته ماسك الجريده ويقرا بإندماج..

خلود: حبيبي قالوا لي انك سئلت عني
سالم:صحيح ..اصلاً انا ماقدر اقعد من غيرك
خلود وتبتسم له: يابكاش
سالم:ههههه حرام عليك
خلود:ياشيخ!!
سالم"وبصوت عالي وشين" : شايفي البحر شو كبير ..اد البحر بحبك
خلود:هههه خلاص اسكت فضحتنا
سالم: ايش اسوي عشان اثبت لك هههه
خلود وهي تناظر لملامحه اللي تحبها :حبيبي
سالم: ياعيونوا
خلود:وشايف السما شو بعيدي بعد السما بحبك "بس هالمره بصوتها اللي كله انوثه مافقد مع السنين دفاوته وصدقه "


د/احمد:عيني ياعيني ايش الحب دا ؟؟عيني عينك كدا قدام الناس!!
خلود:هههههه
سالم اللي هو اخو احمد من ابوه :عارف ايش احسن شي سويتوا بحياتك ياحمد
احمد وهو يقعد معهم : اني عرفّتك على خلود وانك تزوجتها
خلود:هههههه
احمد: مليون مره تقولي هالجمله ,ومليون مره اقول لك ازعجتنا
سالم وخلود: ههههههههههه
احمد: اقول لكم انا على شي اول مره اقولوا
خلود:اكيد
احمد: عارف انوا اخت خلود ,الله يرحمها هي السبب بسعادتي دحين
خلود باهتمام:كيف؟؟
احمد:انا عمري ماكنت افكر ارجع من الرياض او حتى ارجع لام العيال سارا ,ولكن كانت دائما تجيني انين باحلامي .. وتعطيني رموز وكلام ماكنت اعرف تقصد مين بكلامها ..
ومره جاتني غير كل مره, وقالت لي انو ساره تُحبني وتنتظرني وتبغاني واني لازم اعطي لعلاقتنا مجال يتصلح, وجابت ايدها اللي كانت بيضاء وتلمع بشكل غريب وحطتها على قلبي وقرت صور من القران متنوعه ..وبعدها حسيت انوا كل الحقد والكره اللي كان بقلبي خف.. وبديت اشوف الحياه قدامي اسهل ..فقررت ارجع جده لام عيالي اللي تحمَلت انانيتي كتير ,واخلي الماضِ ورايا.
"دمعت خلود وقام سالم جلس جنبها وضمها"
احمد: الله يرحمها
خلود وسالم:امين

:::::::::::::::::::::::

جده

كانت بيتها وكعادتها تخيط ..لأنها الممول لهذا البيت ولأنها الرجل والمراءه فيه ,ولأنها مُجبره تصرف على رجالين ماكلين ..شاربين ..من غير ماتقدر تعترض..





الآء وهي توها داخله للبيت: وربي اف خلاص ماعاد حروح المدرسه
عبد الرحمن اللي جابها مشي: قلعتك على الاقل توفري علي َّالمشورا والمشي في الشمس
هناء:هههه تستاهلي ماحد قال لك ماتنجحي.. العالم مأجزه ومرتاحه وانتي تعيدي الامتحان
الآء: اقول لك بلا قرف واسكتي ها
عبد الرحمن يكلم امه : هي انتي فين الفلوس اللي قلت لك ابغاها
هناء: بلا قلة حيا واتكلم مع ماما زي الناس
عبد الرحمن: انتي اخر وحده تتكلم ,وبعدين متى ان شاء الله حتديني حق الأشياء دي اللي تبيعيها ؟؟ ترى فلست
سميره: بس انت وياها تراني مصدعه
الآء بإستحقار : قاعده طول وقتك على دي المكينه ليه حتصدعي !!
عبد الرحمن: من جد لا بتطلعي بالشمس ولا بتعملي حاجه بحياتك جالسه ومتهنيه
هناء: انتوا وبعدين معاكم بلا قلة حيا
الآء: على فكره انا لو رسبت كمان ..خلاص ماحكمل دراسه
عبد الرحمن رجع يناظر امه: اقول لك هاتي فلوس خلصينا
سميره: امس اديتَك
عبد الرحمن: انتي حتْمني عليَّ بكم الريال اللي اديتيني اياهم
هناء: ازا مو عاجبك اشتغل واصرف قد ماتبغى
عبد الرحمن:انتي حتنطمي وله اجي امد ايدي عليك
سميره: لاحول ولاقوه الا بالله,ياولدي انا يادوب اللي معايا يمشينا ثلاث ايام قدام
عبد الرحمن: والله مو زنبي هاتي خلصينا اللي معاك
هناء: واحنا ايش نسوي ساعتها نشحت؟؟!!
الآء:ههههههههههههههههههههههههه ههههههههههههه اه ياقلبي مو احنا طول عمرنا بنشحت,وطول عمرنا بنفتح الباب نلاقي كرتون تونه وكرتون مناديل وكيس رز!!ايش فرقت؟؟
عبدر الرحمن: خلصي يانتي طلعي اللي عندك
سميره:قلت لك ماحديك حاجه

"مل عبد الرحمن وقرب لأمه يدور بجيوبها ويوم جات هناء تبي توخره عنها دفها وصقعت بالجدار وتعورت ..واما سميره عطته الفلوس اللي مخبيتها بصدرها وراحت تقوّم هناء من الارض وتشوف الآء اللي تضحك داخله غرفتها"

هناء وهي تدمع :اه يامي لمتى الوضع دا وربي تعبت
سميره وهي تشوف بملامح بنتها ملامح خلود وبرائتها :...
هناء: دحين حيجي ابويا وازا مالقى فلوس ايش حيسوي فينا كمان؟
سميره وهي تكشف عن ساقها المورمه من الضرب ومزرقه:حنضرب منوا كالعاده وممكن يطردني كالعاده وبعدين يرجعني من عند جارتي عشان اشتغل واجيب لوا فلوس
هناء وهي عاطفه على وجه امها الا مبالي: ليش ساكته ليه ماتشتكيه ياماما ,انتي ماشفتي امس ازا ماكنتي لحقتي علي كان دحين انا من ضحاياه ومعتدي عليَّ
سميره وتبلع غصتها: اه يابنتي دوبوا طالع من السجن
هناء: كنا مرتاحين وبأمان من غيروا,ياماما كلمي احد من خيلاني يساعدنا يشوف لنا دبره انا وانتي
سميره: ههههه خيلانك!! ايش اللي فكّرك فيهم دحين
هناء: لأنو مابقى لنا الا هما نلجئ لهم
سميره بعيونها الحمرا من التعب : ياحبيبتي خيلانك بعد مامات بابا رموني على ابوكِ مع انو كان مطلقني ,هههه قالوا ماعلينا فيكِ وطليقك اولى بك
هناء وهي تمسك فمها: ايش؟؟
سميره: هأ..قومي قومي ادخلي سوي حلويات وحلي فم العالم وخلينا نجمع لنا كم ريال قبل لا ابوك يجي ويطلب فلوس للسم الهاري اللي ياخدو.

::::::::::::::::

بحفله فوفو



ناظرت اصاله للساعه وناظرت حولها وحست بالملل ..
و صوت الازعاج والحياه اللي بحديقة البيت مغري بالنسبه لها .. فقررت تنزل..
لبست الفستان اللي جابته لها فوفو وحست انه ما يليق بعمرها فصخته ولبست من عندها اللي ترتاح فيه ..ونزلت للحديقه ..

واول ماشافوها ..
سمعت الكل يقول
Happy birthday to you
Happy birthday to asala happy birthday to you


مسكت بيدها فمها وناظرت حولها لقت مو بس صديقات فوفو اللي حاظرين ..
لقت فاتن..داليا.. فوزيه ..اريج بين الحظور يناظرونها بحب وهم يصفقون وبعيونهم حب وحنان لها ..
دمعت اصاله وقربت منها فوفو وحظنتها وقالت..
- كل عام وانتي معي.. كل عام وانتي امي وابوي واهلي
"بكت بعدها اصاله ودمعت عيون دالي وهي تشوف هالمنظر"
فاتن:خلاص ياجماعه بتقلبونها مناحه
فوزيه: اقول اقطعوا الكيك وخلونا ندخل من هالازعاج نسولف شوي
يوه ياخاله مابغيتي تطلعين من غرفتك ,شوي وكنت بخرب عليك المفاجئه واطلع اجيبك
"كل الصبايا ضحكوا على حماس فوز وهي تتكلم "

اريج وهي تقرب لداليا وتقولها بصوت واطي: دالي
داليا:هلا
اريج:وين سمر ليه ماحظرت؟؟
داليا:زوجها مانعها تقابل بنتها غير بالاماكن العامه
اريج:وليه يعني؟؟
داليا: انا مادري اسئلي فاتن او الجزيره ,صراحه ماعندي التفاصيل
فوزيه : كأني اسمع الجزيره
اريج: اباي سمعتي تو؟؟
فوزيه: ههه ايه سامعه كل شي مو بس الجزيره
داليا:هههه اجل جاوبيها
فوزيه وهي تقرب عندهم :ياقلبي سمر عندها زوج ماشفت اغبى منه بحياتي
اريج:ههه ليه؟؟
فوزيه:مايبيها تطلع ولا تستقبل احد بيتهم ولا يبها تسوي شي بالحياه غير خدمته
اريج: طيب وش ذنب بنتها ماتشوفها؟؟
فوزيه: انا ادري ؟؟ هو انسان يفكر كذا
اريج:مسكينه فوفو من جد كاسره خاطري
فوزيه: انتي بلا لقافه ويله ندخل جوه ,سبحان الله حتى بنتك طالعه مثلك ملقوفه
اريج: لا والله؟!! اللحين انا وبنتي الملقوفات ؟؟إلا انتي اللي جايبه بنتين وحده العربيه والثانيه..سي ان ان
داليا: هههههههه


فاتن وهي ماسكه يد اصاله :كل عام وانتي بخير يالغاليه
اصاله:وانتي بخير ياقلبي
فاتن: طلعت مو هينه فوفو
فوفو: ههه كم جده عندي؟؟
اصاله وهي تمسك خدودها: مع انك تعرفيني ماحب هالأعياد
فوفو وهي تبتسم: ادري ولأن اليوم اصلا مو عيد ميلادك انا سويت هالحفله..بس عشان يجيبون لك هدايا وبخور وقماش ودلع ,قلت لهم انه عيد ميلادك ههههه
اصاله بحب:يابعدي والله
فوفو:كان ودي اشوفك سعيده مثل كذا وتضحكين
اصاله وهي تضمها :والله ان وجودك هو اكبر سعاده لي ياقلبي

:::::::::::::::::::

بشوارع الرياض..
وبالسياره






جابر:اقول جارح الله لايهينك اوقف هنا ابي انزل احوّل فلوس
جارح: ايه مافي مشكله ...تفضل
جابر:ماراح اتاخر ها
جارح:خذ راحتك

رفع التكيف جارح ,وقام يناظر للشارع إلا ويشوف خدامه طالعه من البقاله وماسكه ولد صغير عمره مابين السبع والثمان سنوات وهي تضربه على راسه وتقوله :

"اسمع الكلام يله ماما قول بسرعه مافي ابغى اسمع جن جان"

نزل جارح من السياره وهو بقمة غضبه قرب للخدامه وقال لها: هي انتي
الخدامه:خير ؟؟
جارح وهو يتمالك اعصابه :ليه تعاملين الولد كذا ليه تضربينه؟؟
الخدامه:هوا مافي اسمع كلام
جارح وهو يناظر للصغير: لاتخاف يابوي..اسمعي انتي
الخدامه:ايش تبغى؟؟
جارح:تبين كل نهاية شهر اعطيك 500 ريال فوق راتبك
الخدامه فتحت عينها:ايوا بابا
جارح:خلاص عامليه زين وانا اعطيك كل نهايه شهر هالمبلغ
الخدامه:خلاص انا مافي اضرب
قرب جارح لمستوى الولد وقال:انت وش اسمك
- انا فهد
جارح:خلاص فهد انا امرك كل فتره للمدرسه وانت قول لي اذا كانت تغلط عليك او تضربك ,ساعتها ما راح اعطيها الفلوس
فهد:...
جارح:واعطيك ال500 انت تعطيها هي وش رائيك
فهد: ايه
جارح:وين مدرستك؟
فهد وهو يأشر: هذيك
جا رح: اتفقنا
فهد: يعني خلاص مابتضربني ولاتقول لي غبي؟
جارح: لا ماحد راح يضربك ,وان ضربتك انا بجي لبيتكم واضربها وش رائيك؟

""ضم فهد جارح وابتسم وراح يكمل طريقه مع خدامتهم لبيتهم..
اما جارح بدا الضيق يرجع لصدره ركب سيارته ومشى ناسي حتى صديقه اللي ينتظره..
مشى وذاكرته راحت لشكله وهو صغير..
لبيتهم الكبير اللي كان فيه وحيد وكلٍ بعالمه بعيد عنه ..
راحت ذاكرته لأمه وابوه يوم يطلعون من البيت يخلونه مع الخدامه اللي يتذكر كل تفاصيلها..
عيونها ..طولها .. قوتها.. نبرة صوتها ..ريحتها .. تذكَرها وهي تقول


- حبيبي يله بسرئه بسرعه
جارح اللي بعمر الست سنوات:اخاف
الخدامه:يو انت ماسمع الكلام انا في اضرب موت انت
جارح ومتجمعه بعيونه الدموع:وش اسوي؟؟
الخدامه:يله بسرعه انت في فسخ هدوم
جارح:لأ اخاف
قامت الخدامه وضربته على راسه: انت تبغى ضرب؟؟
جارح:لا
الخدامه:خلاص اسمع كلام انا بسرعه
وكان جارح من الخوف ينفذ كل اللي تطلبه منه..
كسير وحيد..حزين ..خائف
وهي ..
جباره وكافره وماعندها قلب..
اعتدت على طفولته على برائته على انسانيته ..اعتدت على روحه كل ما سمح لها الوقت وكل ماجات لها الفرصه..
وضل هالشي سر.. مايعرف فيه الا هو وهي ..
ماحس جارح بأي شي بسبب ذاكرته اللي خذت عقله وهو يسوق وصدم بشاحنه كبيره كانت قدامه..
كان ينزف ومع ذلك صورة الخدامه بذاكرته ماهي راضيه تروح..
كان يسمع صوت مثل الصدى يقول




- قل لا اله الا الله.., ياخوي قل اشهد ان لا اله الا الله
وجارح ساكت مربوط على لسانه مو قادر..
كان يسمع
ويبي يقول
كل ماجا ينطقها .. يتذكر امل ..ساره.. يتذكر خلود وبكاها,,
كل ماجا ينطقها.. يتذكر تعذيبه لهم
وكل ماجا ينطقها..
كل ماتذكر افعاله المشينه مع الرجال وعصيانه لربه وخوفه من الناس ..وبرود قلبه من الخوف من الله ..

الرجال:لا حول ولاقوه الا بالله مات الرجال ياجماعه دقوا بسرعه على الاسعاف ..
لاحول ولاقوه الا بالله
انا لله وانا اليه لراجعون.. انا لله وانا اليه لراجعون


::::::::::::::::::::

ثاني يوم
بدر واولاده الثلاث
طالعين من المسجد





بدر: دام امكم تزور اهلها وش رائيكم نروح نتعشى بمطعم
فيصل 20 سنه: والله ودي بمندي يبه
بدر: براسك والله مندي مندي
خالد7سنوات : لا مابي مندي ,ابي من ماكدونلز
سلطان 15 سنه: شب بس واحد مثلك مفروض مايقول ابي
خالد:ليه يعني؟؟
سلطان: حنا وإنَّا بعمرك حافضين ثمانية اجزاء من القران وانت للحين بالخامس يالزلابه
بدر:صادق اخوك
خالد: تؤ تؤ طيب ماقدر
بدر:وليه ماتقدر انت ذكي
خالد وهو يناظر بحقد لسلطان: ايه صح
فيصل: خلاص يبه مو وقته اللحين نبي نوسع صدورنا اليوم إعتقوا ذا المسكين.
بدر: اذا برّد قلبي بجوابه اللحين ,بعديها له
سلطان: هذا وجه واحد يبرد القلب ههه ؟
فيصل: سلطان وش فيك ياخي !! حرام عليك
سلطان: اقول بلا ميوعه وش حرام علي اصلا وضعه كله مو عاجبني يتدلع ويبي ومايبي ليه مو رجال هو؟؟
بدر بحزم : سلطان خلاص اسكت
سلطان: ابشر
بدر: ها خالد وش تبي تصير لاكبرت؟
خالد وهو يحك راسه ويناظر لسلطان اللي يبتسم شماتان فيه:...
فيصل: ها خلّود وش بتصير؟
سلطان: اكيد يبي يصير لاعب هذا اللي فالح فيه
خالد وقف قدام سلطان وربع يدنه ورفع راسه وقال : ابي اصير امام الحرم
بلع ريقه سلطان:...
بدر:كفو كفو والله ولدي اللي فيكم ..واحد يدرس طب والثاني يبي هندسه هذا هو اللي فيكم والله
فيصل: هههه وين صوتك ياسلطان يامهندس الزمان؟؟اشوف ماعلّقت
سلطان: عاد انتم صدقتم ذا الزلابه !! خله يحفظ اللي عليه بالاول
بدر: لا ان شاء الله انه بيجتهد ويحفظ واللي يبيه يامر عليه
خالد وماصدق : يبه ودي بايبود
بدر:اللحين نروح ونجيب لك واحد
سلطان: يبه تراك مدلعه زياده عن اللزوم
بدر: دامه بيصير إمام والله لو يبي المستحيل سويته له ..اركبوا السياره انتظروني ..بكلم امكم


وفعلا دق بدر عليها..

داليا:هلا
بدر:ها رحتوا؟
داليا:لا اللحين بنطلع
بدر:طيب اسمعي دامك بتروحين تشوفين عروسة اخوك شوفي لي انا بعد عروس
داليا وفتحت عينها:نعم؟؟
بدر:وش فيك ابي اجدد شبابي يام العيال
داليا:وينك؟؟
بدر:هه انا وش اقول وانتي وش تسئلين!!
داليا:بدر انت وين؟؟
بدر:ههه انا قدام المسجد
داليا:تعال ابي اشوفك
بدر:ليه؟؟
داليا برقتها :ابي اشوف عيونك وانت تقولها
بدر:هههه لا اجل من اللحين اقول لك ان عيوني بتقول لك "تراه كذاب"
داليا:...
بدر:اما انا افكر اعرس عليك ؟؟ليه انجنيت
داليا:...
بدر:دالي..
داليا:....
بدر:ام فيصل...يالحب؟؟

"قفلت داليا السماعه وقعد يضحك بدر عليها لين ركب السياره"

وقال: تعرفون ياشباب وش اكثر شي امكم تحبه؟
خالد:ايه تحب تجيب الكوفيرات بالبيت وتحط مره اصفر ومره احمر بشعرها
سلطان:هههههههههه يازينك وانت ساكت
فيصل:امي اكثر شي تحبه الورد
بدر:لا امك ماتحب الورد
فيصل:إلا.. بس انت يوم تجيب لها اياه تكون متضايقه منك وترميه ,ومن وراك تروح تجيبه وتقطف اوراقه وتحطها بعلبه عندها
خالد:ايه امي دائم تفتح علبه الورد وتشمها
بدر: والله مانتم هينين
فيصل: اكيد حنا عيال بدر
بدر: كفو والله كفو.


::::::::::::::::

جده





شاف الساعه لقاها 10 الليل ..طلع من البيت الهادي اللي امه واخواته نايمات فيه ومشى لبداية الحاره وشاف صديقه مرزوق اللي قاعد يدخن ..
مرزوق: ها يادحوم ايش الموضوع لك فتره ما دلعتنا معاك ؟؟
عبد الرحمن:قولك ادق عليها؟
مرزوق: طبعا دق عليها
عبد الرحمن وهو يشوف ابوه اللي رايح على البيت وهو يترنح من الشرب:براسك دحين ادق بس عطيني جوالك
مرزوق: بس جوالي ؟؟عيوني لك ياواد
عبد الرحمن :المصالح يامرزوق اجل عيونك ليَّ هأ..
مرزوق:ههههه


عبد الرحمن: الو
خلود: الو!
عبد الرحمن:سلام ياعمه
خلود:اهلين ..مين عبد الرحمن؟
عبد الرحمن:ايوا ياعمه من غيري يسئل عنك
خلود:تسئل عنك العافيه حبيبي ,طمني كيف حال ابوك واخواتك؟؟
عبد الرحمن:اه ياعمه ايش اقول لك؟؟
خلود:ليه ايش فيه؟؟
عبد الرحمن:ابويا دخل السجن مرا تانيه وامي ضهرها يوجعها ماتشتغل وانا ادرس ولا قادر اشتغل لأنو اخر سنه لي جامعه والحاله حاله
خلود:لاحول ولا قوه الا بالله ..خلاص انا حزيد المبلغ اللي ارسلوا لك كل شهر حلو؟؟
عبد الرحمن: الله يجزاك خير ياعمه من غيرك وربي نضيع
خلود:لاتقول كدا حبيبي انا بمثابة امك
عبد الرحمن:طيب ياعمه ادق عليك ان شاء الله بوقت تاني
خلود:ان شاء الله حبيبي مع السلامه
مرزوق:هههههههههههههههههههههههه هههههههههههه
عبد الرحمن:ايش يضحك امك؟؟
مرزوق: انت حتى المتوسطه ماكملتها هههههههههههههههههههههههه في اخر سنه جامعه مره وحده؟؟

بهالوقت...
دخل خميس اللي كان بقمة سُكره وانانيته.. لغرفة هناء والآء اللي عطاها 50 ريال عشان يستفرد بقمة الجمال والأنوثه هناء..
طلعت وخلت اختها اللي خدرتها لأبوها ..
خلتها وهو ماقصر بدناءته اعتدى على عرضه..اعتدى على شرفه ..اعتدى على الجسم اللي ماحس ولا هو بوعيه يشوف هالجريمه اللي تصير به..
بمقابل خمسين ريال خلت ابوها يدمر اختها اللي كانت عون لها طول حياتها..


قامت سميره من النوم وكأن احد خانقها ,راحت تشرب مويه وسمعت لحركه غريبه بغرفة البنات فتحت الباب وفتحت النور وشافت ابشع منظر ممكن يمر على أي ام ..وابشع منظر ممكن تشوفه عين..
راحت للمطبخ مثل المجنونه تدور على احدّ سكينه عندها وراحت تجري عليه وهو مثل ماهو مستمتع بعرضه ..وطعنته بظهره مره واثنين وثلاث واربع..
ولا برد قلبها ..
اعتدى على احب بنت لها..اعتدى على اطيب عياله وانظفهم قلب..اعتدى على اللي ماترضى لها الأذى ..اعتدى على برائتها وانوثتها وضيعها..
جلست سميره تصرخ وتصرخ وتصرخ وحست ان كل اللي صار بحياتها من اذى وذل وقهر وظلم بكوم ..واللي صار مع بنتها اليوم كوم ثاني..

:::::::::::::::::

بعيد عن هالعالم المتوحش ..بعيد عن جده..
وبالرياض تحديدا..
جات فوفو تزور فاتن





فوفو:خاله فتون
فاتن: هلا وغلا ومرحبا
فوفو:ممكن اتكلم معك شوي
فاتن: اكيد تعالي ندخل غرفتي قبل لاتطب علينا دلول
فوفو: هههههه


فاتن:ها حبيبتي خير ان شاء الله
فوفو: انتي تعرفين ياخاله قد ايش انا اعزك واحب دلول وتعرفين انها اختي اللي كبرت وتربيت معها وكل وقتنا مع بعض
فاتن:حبيبتي قولي لي وش فيه من غير مقدمات افا عليك بس
فوفو:ابيك اول تعرفين اني انا ودلو واحد وصراحه مابيك تزعلين منها
فاتن:الله يستر وش فيه؟؟وش سوت؟؟
فوفو:ا دلول قالت لي عن ابوي واللي صار معكم
فاتن:ايش؟؟وش قالت لك هالملقوفه؟؟
فوفو:انا اللي سئلتها
فاتن:وليه؟؟
فوفو: كنت محتاجه اعرف عن ابوي اكثر وكنت ابي اعرف تصرفاته وسبب اشياء كثير مارضت جدتي تقولي عنها
فاتن: اللئيمه وانا اقول ليه تسئلني عن حياتي واللي صار معي وخلتني احكي لها كل شي
فوفو بوجه حزين:ذاكرتي ياخاله صارت ماتِحمِل له الا ذكريات بسيطه, متمسكه فيها وتبي تروح عن خيالي
فاتن وهي تناظر عيونها اللي تشبه عيون ابوها:وش قالت لك عن ابوك؟؟
فوفو:كل شي انتي قلتي لها اياه
فاتن وهي تمسك بيدينها ذراع فوفو: تبين تعرفين عن ابوك
"هزت راسها فوفو"
فاتن: ابوك مثل كل البشر يافوفو فيه الصفات الزينه وفيه الشينه..
فوفو:....
فاتن:اللي مفروض تعرفينه ان ابوك كان انسان طيب عمره ماجبرني على شي..وقدم لي تضحيه وحب وسعاده..
ابوك يافوفو حاول قد مايقدر انه يحافظ على سمعة عائلتكم,وحتى لو كان غلط فهو كان يقدّر امه ويحترمها ,وبسبب خاطرها ضحى بيوم من الايام فيني
فوفو ودموعها بعينها: يعني انتي ماتكرهينه؟
فاتن:ابوك يافوفو من اجمل ذكرياتي ,ومن الاشياء اللي لاذكرتها ابتسمت
فوفو:سامحتيه؟
فاتن:من زمان
فوفو:جد
فاتن:فوفو حبيبتي ..لا تفكرين بالماض خلاص .. فكري بمستقبلك وبحياتك
فوفو:وشلون مافكر بالماض؟؟وشلون وانا اشوف اهل جدتي متبرين منها بسبب ابوي؟؟
وشلون مافكر بالماض وانا من غير ام .. ومن غير عزوه بسبب ابوي؟؟وشلون مافكر بالماض وهو حاظري اللي عائشه بتأثيره
فاتن:لا يافوفو لاتصيرين انانيه..لاتجحدين اللي قدمته لك والي اصاله قدمته لك ,فكري بهالإنسانه اللي قدمت لك عمرها وحبها وحنانها واحترامها..
فوفو: و انتي
فاتن:وش انا؟؟
فوفو:انا خسرت ناس كثير بسبب فعائل ابوي وسُمعته ,مابي اخسرك انتي ولا ابيك تتخلين عني ,خاله فتون انتي امي والله انتي امي
فاتن وهي تضمها : حبيبة قلبي انا امك واللي تغليك وتخاف عليك وتبي تشوفك باحسن حال
فوفو: احبك
فاتن وهي تضمها اكثر :وانا بعد احبك ياسميتي
فوفو وتمسح دموعها:ههههه جد ابوي مجنون
فاتن:هههه ليه
فوفو:وشلون قدر يسميني بإسمك؟؟
فاتن: ههههع كان متفق هو وامك على اسم ,ويوم راح يسجلك حطك من وراها فاتن ,ولا قال لها الا بعد اربع شهور وهي كانت تناديك بالاسم اللي اختارته
فوفو:ههههههههههههههه
فاتن: اضحكي ياقلبي اضحكي..ترى الدنيا ماتسوى

::::::::::::::::::::


هذه هي الحياه ..تاخذ وتعطي..
فيها الحلو..وفيها المر..
فيها الذكريات اللي تخليك ياتخطي لقدام بتفائل..ياتوقف مكانك وترجع لورا..
هذه روايتي اللي كتبتها من بعد ماستفزني ظلم بعض العالم..
من بعد مامريت بشي من احداثها..من بعد ما حسيت بمعناة اشخاص وشخصيات فيها..


- كان ودي اقول لكل بنت تفكر قبل لاترتبط بإنسان وتهتم بمعرفه دينه واخلاقه ..
- كان ودي اقول لكل رجل لاتظلم ولاتقسى ولا تتجبر لأن اللي خالقك موجود..
- كان ودي اوضح ان الخيارات بالحياة موجوده وحنا اللي نختار الطريق بإرادتنا ..

هذه روايتي اللي اتمنى نالت إستحسان البعض..
تمت


:::::::::::::::::::::::::::::: ::::::::::::














اسمحوا لي اخذكم لهذياني الخاص بالروايه...
اسمحوا لي ..اخذكم بأعماقي.. واعبر عن بعض الصعوبات واحساسي.



الفتره اللي كنت انزل فيها الأجزاء كانت فتره صعبه وكنت بعض الاحيان يوم اشوف البارت اقول يا الله ناقصه كثير واشيل همه واتمنى الوقت يطول عشان اقدر ارتبه.
وقت النوم..وش اقولكم عن وقت النوم؟؟
كان ممكن تخطر لي فكره وانا بنام اقوم واكتبها بسرعه ويوم ابي اغمض عيوني اشوف تفاصيلها قدامي ..كانت تمر علي ايام ماقدر انام فيها غير كم ساعه متفرقه

**من اصعب الأحداث علي كان..

1- بالبدايه موت انين..
تخيلته قبل لاكتبه وكان وصفه ثقيل على قلبي باللذات ان هالانسانه انا اعرفها ,,لكن ابشركم بسم الله عليها عائشه هههه ..لكن لكل شخصيه اضفت لأحداثها من مخيلتي الكثير وبلورته مع الروايه ..



2- ثاني موقف يوم درت فاتن بزواج محمد من سمر..وكأنها لقت طعنتين بدون سابق إنذار

4- اما اصعب شي فعلا بالروايه ..كان بكل مره اكتب الحوار بين..
خلود وجارح,يالله كنت اكتب وانقهر ودمي يغلي لأن قصة خلود ومعاناتها حقيقيه بتعامله بأخلاقه الدنيئه وتصرفاته .. ولكن بعد ماتطلقوا بديت بإضافة خيالي لنهايته


** كنت يوم اقرا عن ادوار الشر اقول انا مستحيل اقدر اكتب دور شرير,,ولكن كتبت دور سمر ,واتوقع أي كاتب راح يقرا دورها بروايتي يدري انه ممكن كنت اكتب عنها اكثر ولكن ماقدرت..


** وقبل لاكتب الروايه كنت اتمنى اقدر اكتب شخصيه نحبها ونكرهها ثم نحبها..وماتكون برتم واحد واتمنى اني قدرت اجسده بمحمد



** كان الكثير يرسل يلوم ويسئل ليه التاخير,زيدي بليز البارت ,فتو ليه كتبتي
كذا؟؟ و
كنت افرح لكن بنفس الوقت احس بالظغط لانهم يتوقعون بان اربع او خمس او اسبوع هو كثير لكتابة وطرح بارت .. مع ذلك اقول لكم اياها كان ترتيب البارت يحتاج لدقه وقت كبير جدا
مابين ترتيب الاحداث وتنسيقها
مابين الاهتمام بالتفاصيل ..
والوقت والزمن مابين ليل ونهار مابين بلده وبلده مابين حدث وحدث
كان اخر تعديل ممكن يكون وانا كاتبته بالموضوع الجديد لتفادي أي خطا,ولكن انا اكيده انه في اخطاء لأن أي انسان مو معصوم منها السموحه قرائي..



وبالنهايه..
شاكره متابعتكم..دعمكم..وقتكم ..وحروفكم اللي عنت لي الكثير.. وان تصل نسبه المشاهده بعض المنتديات لأكثر من 30,000 فهو فعلا شي كبير بالنسبه لي


البعض انتقد والبعض ارسل لي امسحها والبعض ارسل انزعاجه من تفاصيل فيها والبعض ارسل لي يمدح او يشجع..
لكل من ارسل لي رائيه ..او نقده
كل الإحترام والتقدير والشكر ..
وشكر خاص لصديقاتي على ارض الواقع اللي دعموني وكانوا على تواصل دائم معي..
اتمنى اني كنت عند حسن الظن ,واتمنى اكون وفْقت بطرح
"ضمني وخبني بين اضلعك".

اختكم
فتومه





** لمن يريد قرائتها كامله..قريباً بإذن الله بنزلها txt

المشاركة الأصلية كتبت بواسطة مايا الدلوعة حبيبة قلبي انتي تجنن تحفة رائعة بكل معنى الكلمة صحيح ضغطنا عليكي بالاول بس من شوقنا لمعرفة التفاصيل انا عن نفسي بقلك انتي موهبة و بصراحة الله يوفقك و نشوف جديدك واخيرا بقلك مبروك لانك انتهيتي من الكتابة عنجد تعبناكى يسلمو ايديكي روعة