رد: "مال الهوى عندي عذر ".
"مال الهوى عندي عذر ".
(4)
تلومني الدنيا إذا أحببتهُ
كأنني.. أنا خلقتُ الحبَّ واخترعتُهُ
كأنني أنا على خدودِ الوردِ قد رسمتهُ
كأنني أنا التي..
للطيرِ في السماءِ قد علّمتهُ
..
تلومُني الدنيا إذا..
سمّيتُ منْ أحبُّ.. أو ذكرتُهُ..
لو كنتُ أدري أنهُ..
نوعٌ منَ الإدمانِ.. ما أدمنتهُ
لو كنتُ أدري أنهُ..
بابٌ كثيرُ الريحِ.. ما فتحتهُ
لو كنتُ أدري أنهُ..
عودٌ من الكبريتِ.. ما أشعلتهُ
هذا الهوى.. أعنفُ حبٍّ عشته
وليتني من قبلِ أن يقتلَني.. قتلتُهُ..
أراهُ منقوشاً على مشاعري
لو أخبروني أنهُ
طفلٌ كثيرُ اللهوِ والضوضاءِ ما أدخلتهُ
وأنهُ سيكسرُ الزجاجَ في قلبي لما تركتهُ
فليتني حينَ أتاني زائراً
بالوردِ قد طوّقتهُ..
وليتني حينَ أتاني باكياً
فتحتُ أبوابي لهُ.. وبستهُ..
(نزار قباني).
لازم داايم نتذكر ان الحب مايفتح يدينه لنا كل وقت ولازم نعرف كيف نوصل لحضنه
وكيف نبقى في حضنه لان في أي لحظه ممكن يضيع منا ويضيع معه كل الدفا
وكل طعم للحياة وكل شعور بالحب وممكن حتى حنا نضيع معه ومانلقى نفسنا..
.............................. .................... ................
كانت نايمه وفي الحقيقه تحس نفسها ميته لان الانسان مايعيش الا بقلبه وكيف تعييش
وقلبها مذبوح؟؟ كل مابلعت ريقها تحس بطعم الموت بفمها والهوى الي يدخل صدرها
يخنقها بدل مايساعدها تحركت بتعب على سريرها كانت صاحيه بس مااحبت تفتح
عيونها ..الغرفه كانت ظلمه والنور يدخل من بين الستاير بصوره اثيريه وكانه اوتار تعزف حزنها
..خايفه شلون تجلس من حلم عاشته سنين غمضت عيونها بقووة
وبدت تصيح شوي شوي صوتها بدا يعلى وتحول للصراخ .
اسيل:لااااااااا لااااااا حرااام.
ابوها سمع صوتها وجاها يركض فتح الباب وشاف بنته على سريرها تصارخ
راح لعندها وضمها لصدره وهي مازالت تصارخ وتصيح
بو اسيل:بس بس حبيبتي.
اسيل:لااا.ليش ليش؟
بو اسيل:شنو الي ليش؟
اسيل:انا شسويت يبه عشان يصير فيني كذا؟
بو اسيل:شنو صاير فيك يايبه؟
اسيل جددت دموعها واحزانها ومااردت على ابوها الي حال بنته قطع قلبه
بو اسيل:انتي لو تقولين شنو صار فيك ؟ من وصلك لهالحال؟
اسيل سكتت وهدت ورجع الهدوء للغرفه مايكسره الا شهقات اسيل بين كل لحظه ولحظه
وصوت ابوها وهويسمي عليها كان راسها على صدر ابوها ومتعلقه بثوبه بيدينها
رفعت راسها وعيونها مثل البحور تشيل كل هموم الدنيا غارقه بدموعها
اسيل:انا ابيها الحين ليش راحت وخلتني؟
بو اسيل:من هي حبيبتي؟
اسيل:امي ووينها؟ انا ابي اقولها اتكلم معها.
بو اسيل توه يعرف كبر جرح اسيل هي مااذكرت امها من سنين ليش هالوقت بالتحديد؟
كان طاري زوجته المرحومه اصعب عليه من حال بنته الحين ضااع الكلام منه
شيقول لها شنو يجاوبها وهو بعد يبي احد يجاوبه مثلها
اسيل:انا احتاجها قولها تجي.
بو اسيل دموعه جاوبت بنته كل دمعه كانت تشيل معنى حتى هو يحتاجها لو كانت هنا
ماصار في اسيل كل هالشي؟
بو اسيل:امك عند ربها ترحمي عليها وبعدين انا مو جود قوليلي.
اسيل اسحبت نفسها من بين حضن ابوها ووقفت على طولها وهي تصرخ بوجهه
اسيل:لاااااا انت غير غيرر ابيها هي انت مااابيك مااااااابيك.
بو اسيل انصدم من بنته وخااف عليها بنفس الوقت شصار باسيل بنته مريضه وهو
مايعرف شيسوي ظل يناظرها وهي تصارخ وبعدها رجعت هدت ثاانيه وجلست
في الارض بزاويه سريرها وضمت رجولها لصدرها وغمضت عيونها قرب منها ابوها
وجلس عندها مسح على شعرها وهي بس تتأوه وتون وكانها بتفارق الدنيا من وجعها
قام بو اسيل من عند بنته وجلس بالصاله وهو محتار في حال بنته طرت على باله زوجته
وبللت الدموع وجهه مره ثاانيه محتار يصيح على بنته الي ماايدري شنو صار فيها؟
ولا على زوجته الي توفت وتركته وهو الحين يحتاجها جنبه؟
....................
في هذاك الوقت كان علي ياكل فطوره وباله مشغول بكل الي صار شفيها اسيل؟
حتى داانه من طيحت اسيل وهي متغيره وكلامها معي قليل ونظراتها تشيل
اتهامات لي يااربي شمسوي انا؟؟ انتبه فيه ابوه الي كان معه على الفطور
بو جاسم:علي.
علي:هاا امر يبه؟
بو جاسم:مايامر عليك ظالم..شفيك اليوم؟
علي:سلامتك ولا شي ليش تسال؟
بو جاسم:لا مافي شي بس انت جالس وبالك بعييد واختك داانه مو عوايدها
مااتفطر معي قوم شوفها وقول لها ابوي يبيك.
علي قام:ان شاء الله يبه.
راح لغرفه اخته وظل وااقف يفكر يسالها عن سبب الي صار ولا مو وقته طق الباب
علي:داانه داانه.
داانه كانت صاحيه وجالسه تجفف شعرها لانها كانت مااخذه شور وبس سمعت صوت
اخوها فتحت الباب وكان مالها خلق تشوف احد وخااصه علي
طالعته بضيق:نعم.
علي استغرب من اسلوب اخته:نعم الله عليك ليش تكلميني كذا؟
داانه ودها تذبح اخوها على كل الي صار بااسيل المسكينه بسببه ويسوي نفسه مايدري
علي:دووينه ردي؟شفيك انتي اليوم؟
دانه:ليش تشوف فيني شي؟شاكيه لك الحال.
علي عصب من اخته شفيها هذي مو اسلوبها ولا عوايدها تتكلم معي بهالطريقه لايكون
من السالفه اكيد متضاايقه على اسيل بس انا شدخلني تحط حرتها فيني؟
علي:المهم يالله تعالي ابوي يبيك تفطري معه.
داانه:مالي نفس.
علي:اقول قصري الشر ومالنا شدة ابوك ونزلي.
دانه:غصب يعني؟
علي:مو غصب بس اذا ماتبين قولي له بنفسك ويالله بلا هالحركات وتعالي.
دانه:اوووووف اوكي دقايق ونازله.
مشى علي عنها وهي واقفه عند بابها دخلت تكمل وهي تفكر علي اكييد مااعرف؟
لا لو عاارف ماسكت مو طبعه يسكت عن هالشي..يااربي يقطع الحب وسااعته
ومالت على هالغبيان يحبون وانا ابتلش اوووف وابوي شيبي هذا وقته؟
خلصت ونزلت لقت ابوها يقرا الجريده وعلي جالس معه وبعالم ثااني
داانه:صباح الخير.
بو جاسم:صباح النور هلا بالدانه.
دانه:هلا فيك يبه..امر شفيك يقولون بغيتني؟
بو جاسم حط الجريده الي بيده واشر على الكرسي الي جنبه
بو جاسم:سلامتك يبه بس تعالي جلسي فطري معي.
جلست دانه وعلي قام طالعته ام علي وقالت
ام علي:ووين اختك تجلس وانت تقوم؟
علي:مشغول شووي.
بو جاسم:روح الله يوفقك.
علي:ان شاء الله يبه ..يالله تامرون شي.
ام علي:سلامتك ياوليدي.
بو جاسم:علي متى شفت عمك بو اسيل انت؟ من زماان مااشفته؟
علي طالع داانه وطالع ابوه وسكت ماايبي يقول لابوه عن اسيل لانها غاليه على ابوه
واكيد بيعصب وبيصير ازعاج وهو مابيعرف يرد عليه لانه ماايعرف شفيها اسيل.
علي:من كم يوم يبه.
داانه هنا تكلمت:شافه في المستشفى.
علي طالع اخته عشان تسكت لكنها مااطاعته بو جاسم انصدم المستشفى ؟؟
اخوه بالمستشفى ولااحد قاله؟وليش بالمستشفى؟.
بو جاسم:علي شفيه عمك؟
علي:عمي ماافيه شي ماافيه الا الخير لاتخاف يبه.
بو جاسم:اخوي شفيه قووول؟
دانه:يبه مو عمي الي مريض.
بو جاسم:من اجل من المريض؟
دانه:اسيل.
بو جاسم قام من الفطور:اسيل؟؟اسيل شفيها؟
دانه سكتت وطالعت علي بنظرات كلها عتاب ولوم وعلي نزل راسه شيقول مو عارف.
بو جاسم:تكلموا بنت اخوي شفيها؟
علي:ماافيها الا الخير يبه انت بس لاتعصب وتتعب حالك.
بوجاسم:شتقول انت هذي اسيل قولي شنو فيها؟
علي:انهيار عصبي بسيط طاحت علينا ووديناها المستشفى.
بوجاسم:وهي للحين بالمستشفى؟
علي:لا طلعها عمي.
بو جاسم اخذ اغراضه وقال لولده يشغل السياره على ماايجهز عشان يروح لاخوه وبنته
داانه قالت تبي تروح معهم وابوها وافق وركبوا السياره ومشوا وهم في الطريق
جوال علي يرن وهو يسوق ومايبي يرد لانه متوتر وبعدها رد على المتصل
علي:الوو.
حور:هلا علي
علي:هلا حور شفيك؟
بو جاسم بس سمع اسم حور التف على ولده وجلس يسمع له شفيها من الصباح ؟
الله يا بوجاسم رايح لبنت اخوك ومااتدري عن بنتك؟ بدل ماتتصل فيك تتصل باخوها؟
علي:بعدين ولاخلي جاسم يجيبك.
حور:علي يااالله عاد والله مانمت من امس وانا احاتيها ماراح تتاخر.
بو جاسم:شفيها اختك؟
علي:تبيني امرها عشان تروح لاسيل.
بو جاسم:خلاص نمرها.
علي:يالله حور تجهزي انا الحين جاي.
حور:مشكووور يااحلى اخو بايو.
سكر علي وغير طريقه للبيت عشان ياخذون حور معهم وهي تجهزت والبست عبايتها
ووقفت تنتظر بالشارع وبس وصلت السياره اركبت وشالت الغطى عن وجها وسلمت
حور:سلامووو صباح الخير.
الجميع:صباح النور.
بو جاسم:يالله علي لانتاخر.
حور انتبهت في ابوها وانصدمت ليش جاي معنا؟ شنو يبي ؟؟رايح لاسيل وانا بنته
ماافكر يوم يشوفني ويجلس معي؟وبوجاسم كل دقيقه يلتفت يطالع بنته وقلبه يتحسر
حتى ماقالت يبه شخبارك؟ الله ياحور تغيرتي؟وانا من متى شفتك زين عشان اقول
تغيرتي او ظليت مثل ماانتي؟ الله يعين الله يعين كان يسمع صوتها وهي تتكلم مع دانه
يحاول يحفظه لانه يدري بيغيب عنه مثل كل مره يبي يذكر شي ولو بسيط من بنته
داانه:تتوقعين شخبارها؟
حور:ماادري الحين نوصل ونشوفها.
دانه:كنت متوقعه بيصر فيها شي من هاالسالفه.
حور:وانا.. بس شنسوي معها؟
وصلوا ونزل الكل طق علي الباب ومااحد فتح اتصل على عمه عشان يفتح وشوي الا
بو اسيل فتح الباب ودخلهم وهو يرحب في اخوه الكبير وعياله
بو اسيل:هلا حيا الله من جانا.
الكل:هلا فيك الله يحيك.
راحت حور وحبت راس عمها وسالته شخباره؟ وبو جاسم يطالعها وداخله يقول
الحين انا مااسلمتي علي؟ وتسلمين على عمك؟انا ابووك نسيتيني؟
حور:عمو وينها اسيل؟
بو اسيل:بغرفتها فوق.
دانه:نايمه ولاعادي نروح لها.
بو اسيل:لا يبه قوموا روحو لها شفوها.
وقاموا يروحون لها وعلي كان سااكت من دخل لاتكلم ولا علق وبو جاسم بس قامو بناته
قال:ماتشوف شر يااخوي وان شاء الله بتقوم لك بالسلامه.
بو اسيل تذكر حال بنته وتهدج صوته:الله كريم يااخوي بس البنت مريضه..مريضه .
بو جاسم:لاتحاتي ماافيها الا العافيه.
بو اسيل:اول مره تذكر امها مانامت وهي تصارخ وتنادي امها قطعت قلبي يااخوي.
بو جاسم:اذكر الله يااخوي اذكر الله.
دانه وحور دخلوا لاسيل وشفوها في الظلمه وجالسه بزاوية غرفتها وعلى حالها تصيح
دانه شغلت النور وحور راحت لعند بنت عمها الي حالها يكسر الخاطر جلست عندها
حور:اسوول شفيك ؟
واسيل مااترد بس تطالع في بنات عمها وساكته حور و دانه يسالونها وهي ابدد ماترد
بعدها حضنت حور وقامت تصيح وهذيك ماتحملت وبدت تصيح معها
اسيل:حور شسوي احبه؟
حور:انسيه في غيره لازم هو؟
اسيل:شتقولين انتي؟مااقدر انساه مااقدر.
دانه تمسح على راس بنت عمها:بس هو ماقال ماايبيك او ماايحبك؟
اسيل:قال مثل اختي مثل اختي مااتفهموون.
حور:مايعني شي ليش انتي متعبه نفسك؟
اسيل:علي ماايبيني ماايبيني وتقولين ليش؟
دانه:يابنت الحلال وقفت الدنيا عليه وبعدين كم مره نقولك ماقال مايبيك قال مثل اختي.
اسيل:شاايفه مثل اخته يعني مستحيل في يوم يفكر فيني او اصير حبيبته.
حور:ومن قال يمكن قال كذا لانه مستحي انتي تعرفين علي وطبايعه.
دانه:صح اكيد استحى يقول قدامنا ..ايه ابيها.
اسيل اقتنعت بكلام بنات عمها وسكتت وهدت حالها وحطت في بالها ان علي يمكن
يكون لها وانها للحين تقدر تخليه يحبها هي ماقالت له اكيد اذا قالت له بيحبها.
حور:يالله قومي اخذي شور وروقي وبلا حركات الافلام.
دانه مسكت يد اسيل وقومتها من مكانها
دانه:يالله ابوي جاي عشانك ويبي يشوفك .
اسيل: اوكي .
حور سمعت طاري ابوها وضااق خاطرها شلون بتجلس تحت معهم وهو موجود
والله سالفه شسوي الحين انا؟اجلس هنا وبعدين اخلي عمي يوصلني ولا علي يرجع لي؟
وجلست متحيره ودانه شافت المرايه ونست نفسها وهي تلعب شعرها وتنتظر اسيل تخلص
وهذيك تااخذ شور وهي كلها اصرار ان علي رجع لها وماعمره بيكون لغيرها
بس لازم تطنشه وبعدين تبين حبها له لازم يحبها ولا اذا مااحبها بتموت.
طلعت ولبست وراحت مع بنات عمها الي رموا عباياتهم في غرفتها وتوها بتطلع تذكرت
حور ان علي تحت مايصير تنزل اسيل كذا شلون نسوا يقولون لها الحين شلون يعلمونها
حور:اسوول.
اسيل:هلا وشفيك؟.
حور:اسيل لبسي شيلتك لان علي تحت .
اسيل رجعت الدموع لعيونها شلون تجلس معه؟ هي صحيح قررت تقوله عن كل شي
بس مو الحين وماطاب جرحها مااتقدر تقابله بنات عمها يطالعونها وينتظرون ردها
اسيل:اوكي بالبسها.
دانه:يعني بتنزلين تجلسين معنا؟
اسيل:ايه.
دانه:ياااعمري انتي تعالي اعطيك بوسه.
وراحت لعندها وباستها على خدها والبست اسيل شيلتها ونزلوا تحت عشان عمها
وبس دخلوا راحت وسلمت على عمها وابوها وجلست هي وحور ودانه جنب بعض
اما علي بس دخلت نزل عيونه وماارفعها وظل على سكوته الي من جا وهو عليه
بوجاسم:شخبارك خوفتي ابوك عليك؟
اسيل وصووتها ماينسمع:الحمدلله.
بو جاسم:الحمدلله لاتحاتيها يااخوي ماقلت لك مافيها الا الخير بس تدلع.
دانه:ايه خليها تدلع بو جاسم عمها.
بو جاسم واخوه:هههههههههههههههه هههه
دانه:شفيكم اتكلم جد يحق لها الدلع بو جاسم عمها والدانه بنته.
بو جاسم:ههه في هذي صدقتي من عندنا غير الدانه كلنا نتدلع فيها.
كلامه كان سكاكين تقطع حور وقلبها الي من جلست وهو يدق بقووه قامت من مكانها
اسيل عرفت بحال بنت عمها وليش متغير والي سببه بو جاسم.
بو اسيل:ووين حور؟
طالعت عمها والتقت عيونها في ابوها الي ماتكلم معها من شاافته ولا كلمه حتى
قومتها مااعلق عليها ويتكلم كان ماعنده بنت غير دانه وانا يبه ولا مو بنتك؟
حور:بس بروح اخذ عبايتي..علي و صلني البيت؟
علي رفع راسه وشاف اسيل تطالعه بنظرات عتاب ولوم التف على اخته الواقفه
علي:يالله روحي لبسي عبايتك.
بو اسيل:لاا يبه جلسي تغدي معنا مااصدقنا تجون بيتنا وتمشين بسرعه.
حور:مشكور عمي بس انا مااقلت لامي واخوي جااسم بيعصب ماايرضى اتاخر.
بو جاسم يسمع كلام حور ويقول الحين معاي وخايفه من امك واخوك وانا شنو شغلي
طالعه مع غريب تتاخرين والله مايمشي كلام امك واخوك واول مره يكلم حور
بو جاسم وبلهجت امر:جلسي نتغدى وبعدين نوصلك ومااحد بيعصب.
حور طالعت ابوها وكلها خوف ارتعبت بس كلمها وجلست مكانها وسكتت ولا ردت
علي:اسيل شخبارك؟
التفت حور واسيل ودانه كلهم مره وحده على علي ومستغربين من سؤاله
اسيل:الحمدلله.
علي ارتبك من نظراتهم له ومااكثر على الكلام رجع سكت ومنزل عيونه ماايبي يشوف
نظرات بنت عمه وخواته الي منقلبه عليه وصايره نظرات قاسيه.
ظلوا للغدى وجلسوا على الغدى والجوكله توتر بين حور وبو جاسم وعلي واسيل
خلصوا وقاموا وحور تحاول في اخوها يوديها بيتهم لانها تاخرت واذا عرفت امها
ان ابوها معهم بتعصب وتسوي لها سالفه وهي الي فيها مكفيها وزياده. راحت اسيل معهم
مشوا ووصلوا حور عند بيتهم وكان محمد واقف مع سعد وسيف عند الباب هي نزلت
مع اسيل حور:يعطيكم العافيه مع السلامه.
وسكرت الباب ومروا من عند اخوها وربعه ومحمد بس شاف ابوه في السياره راح له
اما سيف شاف اسيل الي كانت بس متحجبه وتعلقت عيونه عليها وظل يطالعها انتبه فيه سعد
وضربه عشان يوخر عيونه عن البنت
سعد:انت ماتستحي.
سيف:ياعم مااصدق هذي بنت ملااك.
سعد:سيف هذي قريبه محمد مايصير عيب عليك.
محمد سلم على ابوه ورجع لهم وسيف عقله راح مع الي دخلت البيت شلوون حلوه كذا
محمد:شفيك سيفووو؟
سيف:هاا بس الي دخلوا من شوي من ؟
محمد:اختي وبنت عمي ليش؟ سيفوو حاسب على نفسك لاتشوف.
سيف:مااقلنا شي يبه بس سالنا شفيك علينا؟
محمد:سيف انا عارفك وعارف حركاتك.
سيف:ان لله وانا اليه راجعون شسويت الحين انا؟
سعد:بسكم انتم الاثنين ومحمد خلااص ماصار الا الخير.
قطع كلام سعد صوت جواله على نغمه(يسالوني ليه احبك حب مااحبه بشر؟......)
شاف الرقم وتغيرت ملامحه ومشى بعييد شوي عن ربعه ورد
سعد:حي هالصوت وراعيته.
لمياء:هلا سعد.
سعد:هلا بقلبي وليش سعد بس؟.
لمياء:يااكذاب انا قلبك؟
سعد:قلبي وروحي وكل شي؟عندك شك تعالي شوفي نفسك داخل قلبي؟
لمياء:ياااكذاب ووينك اتصل عليك واررسل لك من كم يوم ومااترد؟
سعد:يااعمري والله كنت مشغوول وبعدين الغايب عذره معاه.
لمياء:وشنو عذرك؟
سعد:اتغلى على حبيبتي ولا مايحق لي؟
لمياء:يااربيه منك امووت عليك ياالشين.
سيف توتر الجوو بينه وبين محمد وظل سااكت وتملل ويطالع في سعد الي يضحك
ولا همه شي وماايبي يكلم محمد لانه عارف انه معصب عليه مالقى الا انه ينادي سعد
سيف:سعددد سعدد.
وسعد سوالف مع لمياء ولا معطيه خلق ولايرد راح سيف له وهو معصب لانه مارد عليه
سعد:هههههههه من عيووني من عيووني.
سيف:سعد ووجع بسك ضحك.
سعد:ثواني ثواني...هاا شنو تبي؟
سيف:يالله خل نمشي قفل هالجوال.
سعد:وانت شنو عاجلك؟ ولا عاارف بغلطك ومفتشل؟
سيف:اقول لا يكثر وخلصنا.
سعد:طيب انت روح عني الحين.
رجع سيف مره ثاانيه لمحمد وسعد رجع يكلم لمياء الي خاافت من سمعت صوت اخوها
سعد:ايه حبيبتي شنو كنتي تقولين؟
لمياء:كنت اقولك اني بطلع الليله.
سعد:اها
لمياء:سعد اخوي سيف الي كان جنبك من شوي؟
سعد:هو.. ليش في شي؟
لمياء:اووه تصدق مت من الخوف بس سمع صوته؟
سعد:الله الله ليه الخوف؟
لمياء:شرايك؟ اخوي لو يدري اني كنت اكلمك يذبحني.
سعد:مااحد له دخل فيك وماايقدر انتي حبيبه سعد وقريب زوجته.
لمياء:سعددد.
سعد:هههههه قلب سعد انتي.
لمياء:خلاص حبيبي انتبه على نفسك وانا بعدين اكلمك اوكي؟
سعد:اوكي اتفقنا.
لمياء:بشتاق لك.
سعد:وانا اكثر بنتظر اتصالك على جمر.
لمياء:بايو .
سكر الخط وراح لمحمد وسيف الي كانوا متضايقين من بعض شاف حالهم وضحك عليهم
سعد:انتو من صجكم زعلانين على بعض؟
سيف:ومن قال زعلانين وبعدين هو مايتحمل كلمه.
محمد:انا..شوف نفسك واسالتك.
سيف:بس ماقلت شي سؤال.
محمد:لاتسالني كذا انا مااحب هالاسئله.
سيف:السموحه ماادريت بيضايقك لهدرجه.
سعد:محمد سيف يالله اتركو عنكم الفضاوه انت وياه وامشوا نروح الاستراحه لانتاخر.
ومشوا مع بعض وحور مع اسيل من دخلوا البيت وهم خايفين ام جاسم تدري وتعصب
التعديل الأخير تم بواسطة هوازم ; 10-23-2014 الساعة 01:11 AM.
سبب آخر: خطاء في الترتيب
|