رد: "مال الهوى عندي عذر ".
"مال الهوى عندي عذر ".
حور بعد مامشت دانه واسيل راحت غرفتها تنام وتوها حاطه راسها سمعت احد يطق الباب
ودخل بعدها جاسم وفي يده كيس وجلس جنبها وعطاها الكيس
جاسم:سمي..افتكرت نايمه.
حور:لا صاحيه..بس شنو هذا؟
جاسم:فتحيه وشوفي شنو؟
حور فتحت الكيس ولقت فيه كرتون وكان كرتون جهاز جوال هي فرحت ولمت اخوها
وباست خده وهي طايره من الفرح وطلعت الجوال وشغلته وهي مستانسه
حور:مشكووور يااحلى اخو بالدنيا كلها.
جاسم:العفو كم حور عندنا؟وحده.
وقفت حور على طولها وفتحت كام جوالها
حور:انت اول واحد بصوره وبحطك خلفيه بعد.
جاسم:ههههههه تصوريني كذا بالبيجاما لا سارونه ماترضى.
حور:ليش تخاف عليك من البنات؟
جاسم:ههههه يقطع شرك بس ليه انا اول واحد وبتحطيني خلفيه؟
حور:اممم لانك انت الي شاريه فرد للجميل بحطك خلفيه.
جاسم:لا ياحلوه مو انا هذا هديه من اخوك علي شاريه لك مع دانه بس ماعطاك اياه.
حور:صحيح قول والله علي شاريه لي.
جاسم:ههه والله هو عرف انك لو شفتي دانه تبين مثلها وهذا هو شرا نفس الجهاز لك.
حور جلست جنب اخوها وهي تفكر وتقول بداخلها الله عوضني فيكم بدل ابوي الله يخليكم
لي يااارب وبالحييل استانست لان اخوها علي الي شرا لها ومانساها.
جاسم قام بيطلع عشان يروح ينام وترك حور تلعب بهالجوال وترسل لدانه واسيل وفطوم
والشله كلها وماكان هذيك الليله لها خاطر تنام من كثر فرحتها بالجوال.
......................
طلع الصباح والكل جلس مبكر حتى الي نام متاخر صحو لان بهاليوم الكل عنده شي
واول من صحى اسيل الي متغير نظامها كثيررر وعلى طول بس جلست وبدلت
وراحت تفطر مع ابوها الي مومصدق بنته تجلس تفطر وتاكل مثل الناس
بو اسيل:عسى دووم يابنيتي.
اسيل:هههه دوم اني افطر.
بواسيل:اايه تاكلين وتضحكين وتسولفين دووم يابنتي.
اسيل نادت الخدامه تشيل الفطور وطلعت هي مع ابوها لحديقة بيتهم وجلسو بره
وكان ابوها يشرب قهوته ويقراء الجريده اما هي كانت تشرب عصير ليمون
وهي جالسه اخذت الجوال وارسلت لعلي رساله وكانت الساعه 8 الصباح وهو في بيتهم
مابعد يروح الشغل وكان يفطر مع اهله سمع صوت المسج واستغرب مافي احد من ربعه
يرسل له الصباح اول مره تصير من الي مرسل من الصباح فتح الرساله وشافها من اسيل
كانت كاتبه حبيت اسبق سكان هالكون واقول حق احلى مافي الكون صباح الخير).
علي ابتسم وهو يقراء الرساله وتعجب من الرساله في نفس الوقت ودانه كانت تطالع
اخوها الي راح عنهم دنيا ثانيه وحبت تعرف من راسل له وهو يتبسم وهو يقراها
دانه:من راسلك من الصباح اعترف؟
علي:هاا لا رساله عاديه؟
دانه:عااديه وانت متشقق عليها وريني اياها.
علي:ماني موريك اسرار لاتدخلين فيها.
دانه:توك تقول عاديه استريح وجيب الجوال.
علي:ضفي عن خلقتي دووين لاتشوفين شر وعطيني جوالك بااخذ منه شي.
دانه:ليش شنو بتاخذ؟
علي:عطيني مسج للصباح.
دانه:لمن بترسله؟
علي:اووف ماابي هونت.
دانه:خلااص برسلك افتح بلوتوثك ولا بعد بتخسرني رصيد.
علي اخذ رساله من دانه وارسلها لاسيل بنفس الوقت وكان مكتوب فيها:
(ولهت في لحظه عليك وماارضى قلبي غير يصبح عليك..صباح النور ).
ودانه ماتركته الا لما شافت الرساله الي وصلت وبس قرتها قامت تضحك وتقول بخاطرها
الله يستر منك يا اسوول طلعتي راعيتها ماانتي بهينه وشكلك بتجيبين راس اخوي.
اسيل سمعت صوت المسج ونقزت من مكانها واخذت الجوال ابوها اخترع منها
بواسيل:بسم الله الرحمن الرحيم خرعتينا على رساله واصله لك.
اسيل:مااتدري يبه انتظرها وتعبتني على ماوصلت.
فتحتها وقرتها وتشققت يااربي شكله يحبني ونااسه امووت فيه احبببببببببببه ياعالم وقطعت
فرحتها نغمه الجوال(اجمل مافي الكون انا انا وهالمجنون..)وعرفت من متصل بس سمعتها
وقالت بخاطرها هذا وقتك يادووينه مالي خلق تقطعين فرحتي
اسيل:الوو.
دانه:هلا بالي ماخذه عقل اخوي.
اسيل قامت من عند ابوها تتمشى في الحديقه وعشان تقدر ترد زين على دانه
اسيل:جب يا سباله من قالك؟
دانه:علينا والرساله الي خلت اخوي يقوم من فطوره ويروح الشغل مبتسم.
اسيل استانست:صج..فددديته.
دانه:هههه طلعتي مانتي بهينه.
اسيل:هههه اعلمك بس.
دانه:شفتي حوير طلعت رقم.
اسيل:صح ذكرتيني ارسل لها امس رسلت لي وكان فيني النوم ماارديت عليها.
وجلسو يسولفون ويهذرون الى وقت متاخر وعن شنو بيسون في السوق واتفقو يروحون
لحور الساعه 5 عشان يتجهزون معها للسوق ويكونون موجودين من وقت في بيتهم.
.....................
حور جلست قريب صلاه الظهر وصلت وجلست على كمبيوترها ودخلت مسن تشيك
وكان عبدالرحمن اون لاين باسم(هامة العز)وهي مسجله باسم(مضيعه السالفه)
عبدالرحمن حاط نفسه اون لاين مع انه كان بشغل لكن كان فااضي وخلص صلاته وعنده
بريك للغداء وكان جوعان فطلب لنفسه ساندويش وجلس يااكل انتبه بالجهاز وحور تسجل دخولها
وشاف النك نيم وجلس يضحك عليه وعلى طول ترك الي في يده وكلمها
(هامة العز):ههههههههه سلام على المضيعه.
(مضيعه السالفه):هههه سلاموو حيهم حيهم رحمانوو.
(هامة العز):الله يحيك هاا شلون مضيعه السالفه.
(مضيعه..):جلست من النوم وهي ضاايعه المهم اخباروو؟
(هامه العز):بخير والحمدله انتي شعلومك ولا مضيعتها بعد؟؟هههه
(مضيعه..):هه لا انا تماموو بس بارك لي؟
(هامة العز):مبرووك بس على شنو؟
(مضيعه..):طلعت جوال ونااسه.
(هامة العز):مبرووك ومتى تعطيني الرقم؟
(مضيعه..):ههه الله يبارك فيك بس قلت لك مضيعه مو هبله اعطيك رقمي.
(هامة العز):لا محشومه بس افا عليك مافي ثقه؟
(مضيعه..):لا ماافيه.
(هانة العز):هههه قوويه ماتجاملين.
(مضيعه..):ههه الصراحه زينه..شتسوي انت الحين؟
(هامة العز):انا جوعان وجالس اكل.
(مضيعه..):انت في بيتكم.
(هامة العز):لا بالشغل وانتي شتسوين؟
(مضيعه..):ولا شي بس صحيح صديقتي خطبوها ووافقت وناسه.
(هامة العز):صحيح مبرووك عقبالك انا جلست احاتيها امس وحاتي خطبتها ههه.
(مضيعه..):هههه الله يبارك فيك وعقبالك انت بعد.
(هامة العز):الحمدلله دخلتي جالس ومتملل مافي شغل ودخلت المسن فااضي.
(مضيعه..):اها عارف بروح السوق اليوم انا والشله.
(هامة العز):صحيح حساافه امس اختي تبيني اوصلها السوق اليوم وماوفقت لو اني موافق
كان شفتك اليوم حساافه بس.
(مضيعه..):طيب وليش ماوفقت؟
(هامة العز):مشغوول مع الوالد بيجونه الرجال ولازم اجلس معه.
(مضيعه..):اجل بفوتك ههههههه.
(هامة العز):لا على كذا بترك ابوي واجيك.
(مضيعه..):ومن قال بخليك تشوفني استريح بس.
جا محمد ودخل عند حور وشافها قاعده على الكمبيوتر
محمد:يالله تعالي غداء.
حور:طيب بس شنو الغداء؟
محمد:وانا الي طابخه قومي خلصينا.
حور:طيب دقايق ونازله .
وراح محمد وتركها هي كان ودها تجلس مع عبدالرحمن بس كانت بتموت جووع
(مضيعه..):تامر شي انا طالعه؟
(هامة العز):ووين؟
(مضيعه.):غداء وانا جوعاانه.
(هامةالعز):وانا بكمل غداي عووافي عليك.
(مضيعه..):الله يعافيك بايووو.
(هامة العز):باي.
انزلت تتغدى وجلست تاكل وتسولف مع اهلها وشوي الا جوالها توصله مسج رقم غريب
فتحتها وكان مكتوب فيهاسلام يالغاليه اشوفك اليوم على خير اوكي حور.. وخلي جاسم
يكلم علي يبيه ضروري ) حور استغربت من هالرقم وقالت لجاسم وخلته يقراء الرساله
هو استغرب من رقمه هذا بس كانه يعرفه ومشبه عليه شافه محمد وقال
محمد:هذا رقم ابوي.
حور انصدمت ابوها راسل لها مايصير وبعدين ليش راسل لها هي ماارسل لجاسم
وشنو قصده بنلتقي اليوم وحتارت وانقلب حالها
جاسم:اقوم اتصل على علي اشوف شفيهم.
وقام وقامت من بعده حور الي انسدت نفسها من هالرساله
.............................. .......
بدور جا الليل وتجهزت هي واختها وحالتها حاله ومتوتره تبي تروح سريع ومحمد
كل شوي اتصل يسالها متى بتجي وهي تعصب على سمر بعدها مشت مع السواق وخلت سمر
يوصلها عبدالله وراحت لفطوم اول شي لان بيتهم اقرب شي واتصلت عليها وماترد قامت ونزلت
تدق الباب وهي متوتره اعصابها لان كلها دقايق وتشوف محمد كان زيد طالع من
البيت والتقى في بدور بوجهه وكان صدمت فيه بدور وقفت تطالع فيه وهو يطالعها
كان زيد طويل واسمر وعنده عقده بحواجبه وجسمه حلو لا دبدوب ولا معصقل
وشعره اسود بالحييل مثل فطوم ويلبس نظاره تعطيه ستايل رسمي بطابع حلو
اما هو متجمد مكانه بس شاف بدور الي كانت حاطه لثمه خفيفه وباينه عيونها بالكحل
تجنن ورفعت حواجبها موسعه عينها زياده وعبايتها وكشختها مطلعتها بستايل جناان
وخاصه لانها عصقوله فتخصيرت العبايه صايره عليها مووت وريحه العطر الي واصل لاخر الدنيا
هو فتح فمه وفها عليها وهي محتاره شتسوي لانها شافته وارتبكت
وخاصه ان جذبها شكله بالحيل تمت سااكته وهو يطالع فيها
بدور:فطوم موجوده.
زيد:هاا ايه موجوده انادي لها؟
بدور:اذا ممكن قول لها بدور تنتظرك بالسياره.
زيد:بدور؟
بدور:ايه.
وراحت للسياره وركبت وهي مستانسه من شكل زيد لما شافها كيف ذااب فيها وظل واقف
ياارب يصير محمد مثله حلو كذا وان شاء الله يذووب فيني مثله بس شكله عجيب وخااصه
لحيته كيف مسويها ياااربي حلوو.
زيد دخل وهو ضاايع من الي شافه قال لاخته تطلع وطلع ركب سيارته ومشى ومااعرف
وين بيروح نسى طريقه وظل يمشي على الفاضي وبعدها تذكر انه بيروح المكتبه
راحو فطوم و بدور لبيت حور الي انقلب مزاجها من المسج الي وصلها وكانت
متضايقه وكانت معها اسيل بدور عطت محمد مس كول وطلع عند الباب وهي نزلت له
وراحت عند الباب وتوه بتطق الباب فتحه وشافها وفتح عيوونه مو مصدق الي يشوفه
هذي بدور طلعت كلها جناان وانا مفتكرها أي شي بس صوتها قلبه طاح وهي كانت
تطالعه ومصدومه فيه متغير عن اول مره شفته فيها يوم اخذت رقمه كنت بسياره
وهوبسيارته مااشفته زين بس طلع رووعه لكن ليته طوويل مثل اخو فطوم كان بيكون احلى
بس يالله برضو حلو
محمد:حيالله القمر.
بدور:الله يحيك شخبارك؟
محمد:انا من بعد شوفتك مااظن ببقى صااحي .
بدور تضحك:ههههه محمد حنا في بيتكم بلا هالكلام ويالله نادي حور.
محمد:لااااا شنو حور وريني وجهك يالله عاد.
بدور:هذا شفتني.
محمد:لا شيلي اللثام عنك يالله.
بدور:محمددد لا عاد ويالله نادي حور.
محمد::ااه ياقلب محمد تامرين بس مااشبعت من شوفتك.
بدور:والله محمد خايفه نادي لحور.
وهم واقفين وصلت دانه لانها توه تجي متاخره وشافت بدور واقفه مع محمد عند الباب
وراحت لهم وهم بس شوفها تغيرت علومهم ثنينهم
دانه:سلامووو
ردو عليها:وعليكم السلام.
دانه:حياك بدور ليش واقفه.
بدور وهي مرتبكه:الله يحيك بس نادي لحور انا انتظركم بالسياره.
وراحت اما محمد خااف ان دانه تصير شافته وهو واقف من زمان مع بدور
محمد:نادي لحور انا بطلع.
وطلع وراح وراء بدور وكان يمشي جنبها ويكلمها
محمد:حساافه بتروحين.
بدور:اسكت ياشيخ وقف قلبي بشوفت دانه ويالله هذا نفذت طلبك بايوو.
محمد:يالله بايو
وراحت للسياره وهي متوتره وسكتت ولاتكلمت ولاكلمه اما دانه دخلت البيت تنادي لحور
وشافتها متضايقه وخلقها معفوس وشكلها ماتبي تروح السوق
دانه:يالله جات بدور تنتظر بالسياره..شفيك حور؟
حور:مافيني شي يالله البسي اسيل عبايتك لانتاخر.
وراحت عنهم عشان تلبس عبايتها دانه استغربت واسالت اسيل عنها
اسيل:جاتها رساله من عمي واعتفست اليوم ..انتي معطته جوالها؟
دانه:هههههه هههههه لا وبعدين من قالكم ابوي الي مرسلها ههههههه
جات حور ودانه تضحك وحور معصبه وتبي تتهاوش وبس
حور:دووينه مالنا خلقك سكتي.
دانه:هههههه الحين انتي من صجك تفكرين الرساله من ابوي؟
حور:اجل من من؟
دانه:ههههه هذي انا راسلتها لك من جواله.
حور:يلعن شكلك ياشيخه قهرتيني.
اسيل:وليه كذا؟
دانه:رصيدي خلص ومااحد شحن لي وارسلت لك من جواله بس.
حور:كررريها امشي بس خل نروح لبدور.
وطلعو البنات وحور ارتاح بالها وهدت شووي يوم عرفت ان دانه الي راسله ركبو وسلمو
وفطوم شافتهم وجنت تسولف وتضحك معهم اما بدور خاايفه ان احد لاحظ شي فسااكته
حور:بدور وين سمر؟
بدور:هاا.. بتتاخر وبتجي مع اخوي هي وزوبا ونوره.
حور:طيب ونوف؟
بدور:ذكرتيني امرها.
وكلمت السواق وراحو لنوف بيتهم وهذيك كانت واقفه تنتظر واحمد طالع عند الباب
وصلو وركبت وهي معصبه عليهم ليش تاخرو؟
نوف:انا اوريكم تخلوني واقفه.
بدور:هههه لاتعصبين والله نسيناك.
حور:هههههههه انا تذكرتك.
دانه وفطوم يطالعون احمد ونفسهم يعرفون من هذا قلبهم يعورهم
دانه:ومن هالزين الي عند الباب؟
نوف:قصدك الشين لايغرك المنظر.
اسيل:هههههه حلوه منك.
بدور:دانه ماعليك منها هذاا احمد خطيب سمر.
دانه:يااحظك يا سمور بالحلوو.
فطوم:ههه راح علينا دووينه تتهنا فيه سمور.
بدور:ههههههه وينها عنكم تذبحكم لو تسمعكم كل شي ولا عريس الغفله.
نوف:جب يالله كلكم ماتستحون انا اخته قاعده جنبكم وتتكلمون فيه.
ووصلو السوق ونزلو مع بعض وهم سوالف وضحك وحالتهم حاله وجلسو في اول مطعم
لان حور ونوف جايعين وموراضين يمشون يقولون ماافيهم حيل بهالجوع
وجلسو كلهم عشان ياكلون هالثنتين ومنها ينتظرون سمر والباقي.
سمر خلصت وراحت قالت لعبدالله يوصلها وبالموت رضا وهي بالسياره اتصلت
على احمد تقوله على روحتها للسوق عشان مايعصب
سمر:الوو احمد.
احمد:هلا بسماسم...توني بمرك البيت.
سمر:صحيح حبيبي بس انا طالعه بروح السوق.
احمد عصب:وليش ماقلتي لي بسلامتك.
سمر:هذا انا قلت لك ماابعد اروح توني.
احمد:اجل رجعي لاني بمرك الحين.
سمر:حبيبي البنات وبدور كلهم ينتظروني في السوق انا افتكرتك تدري لان نوف معنا.
احمد:دامك تبين تروحين ليش متصله تقولين خلاص وانا الي متعب حالي ومفضي نفسي
عشان امرك ونتعشى مع بعض بس خلاص مايحتاج.
سمر:لاتقول كذاخلاص انا 11 عشانك بكون في البيت ونروح نتعشى شرايك؟
احمد:خلاص مايحتاج خليك بالسوق.
سمر:يووه حموود خلاص انا مشتهيه اتعشى معاك وعندي كلام نفسي اقوله لك.
احمد:طيب احاول.
سمر:فديتك احبك حموود.
احمد:هههه خلاص بمرك 11 وياويلك اذا ماكنتي موجوده باي.
سمر:بايوو.
عبدالله يسمع اخته ويضحك عليها هي وخطيبها وحركاتهم الي كانهم بزارين يتزاعلون
ويتراضون في نفس الوقت وكمل طريقه وهويضحك وسمر معصبه عليه.
وصلو ونزلت نادت لزوبا ونوره وارجعت نوره ركبت وسلمت اما زوبا متاخره شووي
وكانت تفكر سمر جايه مع السواق وبس ركبت السياره وهي تضحك وفتحت اللثامها
وسلمت على سمر
زوبا:ههه سلام سمور تصدقين وانا نازله كان طحت كل هذا بسببك.
نوره تاشر لاختها ترجع لثمتها وهذيك ولامنتبها اما سمر مااعرفت شتقول سكتت
عبدالله مارفع عيونه عنها ظل يطالعها من المرايا ومبتسم على شكلها الطفولي وخااصه
زوبا شوي قصيره لكنها حلووه وملامحها طفوليه وكلها برائه.
نوره ضربت اختها على كتفها عشان تحس ان هذا مو السوااق
زوبا:ااه شفيك؟
نوره:ياغبيه حطي لثمتك هذا اخوها فشلتينا.
وعبدالله تنحنح:احم احم.
زوبا مسكينه الدنيا دارت فيها ودموع تجمعت في عيونها وغطت وجها سريع وسكتت
وتمت تسب وتلعن في نفسها على غباائها الحين شلون تقابل سمر يافشيلتها
سمر:عبدالله خلاص وصلنا السوق.
عبدالله:مااباقي احد.
سمر:لا .تقدر ترجع لي الساعه 11 وترجعني البيت؟
عبدالله:طيب انا بكون في السوق اخذك معي وانا مااشي بس اذا خلصتي عطيني مس كول
زوبا بتصيح من فشيلتها ونفسها ترجع البيت ومالها خاطر تتنفس عشان مااحد يسمع لها
أي حس بعد الي صار ويدق جوالها ويوهقها زيااده وكان على نغمه(صدفه)وكانت دانه المتصله
ردت عليها وصوتها رايح:الوو دندونه.
دانه:ياحماره وينك تعبنا ننتظركم حوير ونويف كلو المطعم كله.
زوبا:طيب حنا عند البوابه الحين بننزل باي.
دانه:طيب وحنا عند جلسات المطعم الي بالدور الاول باي.
تعدلت زوبا عشان تنزل بس توقف السياره وبس وقف عبدالله نزلت اول وحده وراحو
وهو يمشي قدامهم ودخل معهم من عند البوابه وبعدها هو راح في جها وهم في جها وشافو
البنات وجلسو معهم يسولفون ويضحكون الا زوبا الي فشيلتها مسكتتها
دانه:زوبا فااتك شفنا عنك احمد خطيب سموور ايش حلو.
سمر:احم احم هذا حقي لاتحطون عينكم عليه هههه.
دانه:يووه شوي شوي على حالك محمد اخوي على غفله يذب الطير من السما صح بدور؟
بدور بس جا طاري محمد ارتبكت:اايه صح حلو اخوها.
سمر:ياحمااره واحمد؟
بدور:ههه موقصدي بس حتى اخو فطوم حلو.
فطووم:فديتك كلك نظر زيد اخوي يجنن وانا قايله ماله الا زوبا الي ساكته ماادري شفيها؟
دانه:صحيح شفيك زوبا؟
نوره:خلوها الله يفشلها فشلتنا بالسياره ولا عاد اروح معها مكان.
حور:هههه شنو صار؟
زوبا:ماصار شي وانتي سكتي كل شي تقووله.
سمر:ههه زوبا اركبت السياره وافتحت لثمتها على بالها ان السواق ماتدري انه عبدالله
اخوي وانحرجت يوم عرفت انه اخووي ومنها وهي ساكته.
نوف:يووه ياحليلك عبدالله ومستحيه منه مااعليك انسي.
دانه:انسي اهم شي انتي كنتي مترتبه ولا غبااء؟
زوبا قطت الهم:لا كنت قمر اشووه ولا هذا الي بنقهر منه اكثر هههههه.
وضلو البنات شوي وبعدها قامو يحوسون بالسووق وحالتهم حاله من محل الى محل
ويشترون وناسين نفسهم اما عبدالله كان جالس مع سيف في المطعم وطالبين لهم
عشاء من الطازج الموجود بالمجمع وبعدها خلصو وقامو يتمشون وعبدالله يعلم سيف
عن الي صار وميتين ضحك من السالفه
عبدالله:هههههه بس ياشيخ تبي الحق ملااك ماشاء الله عليها حلووه وتنحب.
سيف:هههههه ماعلمتك محمد اليوم خويته بتجي بيتهم بيشوفها وبعدها بيسحب عليها
لانها صديقة اخته وتوه يعرف ومايبي يتوهق ماادري شنو صار معه؟
عبدالله:هههههههه صحيح تووهق والخبله هذي الي مطاوعته الحمدلله مالي بسوالفكم.
سيف:وانت من يبيك ؟كان من اول كلمه تخق يبا انت قلب رهيف.
عبدالله:ههههه طيب تعال ندخل هالمحل ودخلو وكانت زوبا مع دانه في نفس المحل
لانهم تاخرو عن الباقي وعبدالله بس شاف نوره اشر لسيف ان هذي هي وهذاك ضحك
وزوبا انتبهت فيه وانصدمت وقالت لدانه يمشون وعلمتها السالفه
دانه:ياقلبي انا صج عذااب بس تركي عنك الي جنبه ماعليه كلام.
زوبا:دووينه مو فاضيه لك والله احسه عرفني .
وحاسبو وطلعو وبرضو سيف كان شاري وحاسب وطلع مع عبدالله دانه فتحت الكيس
بس طلعت ومالقيت فيه الي شرت لقت غيرر ورجعت بسرعه وسيف توه طالع
كلمه راعي المحل وطلع سيف اخذ غرضها طلعت وشاافته واقف عند المحل الثاني
زوبا:دووينه شنسوي؟
دانه:نروح ونقوله شصار يعني؟
زوبا:لا فشله خليه يولي.
دانه ماسمعت الكلام وراحت لعند سيف وعبدالله بس شافها مقبله استغرب وقال لسيف
دانه:لو سمحت.
سيف شافها وتزلزلت الارض من تحته ااخ ياقلبي شنو هذا هالقمر تكلمني ماصدق
سيف:يالبيه.
دانه:الغرض الي في كيستك حقي وهذا حقك
ومدت له الكيس الي بيدها وسيف راعي غزل ماخلاها تمشي بدون كلام
سيف:صحيح ااسف بس الكيس وراعيه تحت امرك في أي وقت.
دانه:ممكن غرضي لو سمحت.
سيف:شدعوه كل هذا مالك خلق وقفتنا انتظري شووي.
عبدالله:سيف عط البنت الكيس وخلينا نمشي.
سيف:طيب سمي.
دانه اخذت الكيس وقالت قبل لاتمشي:مشكور.
سيف:العفو حيااك في كل وقت.
عبدالله:سيفوو الله يرجك احرجت البنت وبعدين يمكن تكون تقرب لهذي صديقه سمر
سيف:عاادي شنو صار؟
عبدالله:ياسلام عليك ماادري شنو؟
دانه علمت زوبا بكل الي صار وهذيك جنت على عبدالله وموقفه الحلو
زوبا:جد صحيح رجال مو هذاك البايخ.
دانه:ياشيخه كلامه عسسسسسسل ولا اسمه سيف.
زوبا:وانتي من قالك.
دانه:سمعت عبدالله يناديه امشي بس خلينا نلحق على البنات.
...............
سعد مااخلى ابوه في حاله الا يقوم يتصل في ابو سيف يساله شنو صار معه
بوسعد:اركد ياولدي .
سعد:يالله يبا والله قلبي يعورني.
بوسعد:بسم الله عليك الحين اكلمه ولا اقولك قوم نروح اكيد موجود .
وقامو راحو بيتهم طقو الباب ولمياء هي الي كانت ماره وسمعت صوت الباب وردت عليهم
لمياء:مين عند الباب.
بوسعد:بوسيف موجود؟
لمياء:اايه دقايق بس.
سعد حب يحرج لميااء وتكلم:قولي له بوسعد وولده سعد.
لمياء سمعت صوت سعد وانحرجت جد منه لانها عارفه ليه هو جااي.
نادت لابوها وقام فتح الباب ودخلهم المجلس وجاب القهوه لهم وظل يرحب فيهم
بوسعد:والله اني فشلان فيك بس هالولد ماارضى الا اجي واعرف ردكم.
بوسيف:لا يااخوي حياك في أي وقت وان شاء الله حنا نسايب بنصير.
سعد:هاا شقلتو ياعمي؟
بوسيف:هههه صدق مستعجل..بس خير ياولدي موافقين وحياكم في أي وقت البنت بنتكم.
بوسعد:مبروك ياسعد ومبروك يا بوسيف.
بوسيف:الله يبارك فيك.
سعد:الله يبارك فيك..ويالله الملكه يوم الخميس.
بوسيف:ههههههه يقطع شرك ياسعد بس ولاتزعل يوم الخميس.
بوسعد:الله يعينك عليه يا بوسيف.
وقامو راحو بعد ماتفقو على كل شي للملكه وبوسيف قال للمياء الي عصبت على سعد
وبعدها رضت بس كلمها وفهمها انه مو قادر ينتظر اكثر .
..............
نرجع للبنات في السوق الي جات الساعه11 وهم ماخلصو اما سمر بس انتبهت للوقت اتصلت
في اخوها وقالت له يوصلها وزوبا كانت تبي هي بعد تروح معها لانها تعبت
من الحواسه جا سيف وعبدالله للمكان الي فيه البنات وبس دانه شافت سيف قالت
دانه:بنات شوفو هذا من شووي جنني عشان يرجع اغراضي.
نوف وفطوم:ااخ هذا حركاات.
اسيل:تدرون من هذا؟
دانه:لا بس اسمه سيف.
نوره:اسمه جناان.
حور:هذا اخو لمياء سيف.
نوره:هههه بذمتك هذا ولد خالتي سيف.
دانه:مالت عليك ماتعرفينه.
نوره:هههه مااعرفه لان مانزورهم ومن زماان ماشفته.
فطوم:يااحظك فيه يانوير.
نوف:بخلي زوبا ماتخليه يروح منها.
دانه:يووه هذا مايصلح لزوبا راعي كلام حده.
راحت زوبا مع سمر عشان يمشون البيت وركبو مع عبدالله الي طلع مع سيف بنفس الوقت
سيف:شعليك حبيبة القلب معك.
عبدالله:هههه حبيبه القلب عاد ..
وركب السياره وجلس يسولف عن السوق مع سمر وزوبا سااكته وصلها بيتهم وهي قلبها
يدق كل ماتكلم
سمر:بايوو زوبا وخلينا نشوفك.
زوبا:طيب .
سمر:واذا رجعوالبنات عطيني مس كول من جوالك.
زوبا:ليش هم بيجون بيتنا؟
سمر:ايه يالله بايووو.
ومشو بعد ماادخلت بيتهم وعبدالله وصل سمر البيت الي بس نزلت الا احمد جاها وركبت معه
حتى ماادخلت البيت عشان تحط اغراضها الي شرتهم من السوق
البنات بعد ماحاسو وتعبو رجعو مع بعض وكلهم نزلو بيت نوره الا بدور ماارضت
وراحت بيتهم وقبل ماتفصخ عبايتها كلمت محمد
بدور:الوو.
محمد:هلا بدور.
بدور:اخبارك حبيبي؟
محمد كان يتكلم بسلوب جد ورسمي:بخير انتي اخبارك؟
بدور:الحمدلله..شفيك حبيبي لايكون مااعجبتك؟
محمد:لا ماشاء الله عليك قمر.
بدور:عارفه اني قمر بس بعيونك صرت احلى وانت بعد جناان شكلك رهيب.
محمد:مشكوره من ذوقك.
بدور:يووه محمد وشفيك تتكلم بهالبرود فيك شي؟
محمد:بدور انا بقولك حاجه وياليت ماتزعلين او تعصبين وانا ماكان قصدي اسوي فيك
كذا بس خلاص لازم اقولك.
بدور:محمدانت شنو شفيك؟
محمد:بدور انا اسف ماعمري حبيتك وكنت اتسلى وااسف واتمنى تسامحيني
والله يستر عليك وعلى الجميع وابيك تنسين هالرقم ولاتتصلين محمد اعتبريه انتهى.
بدور مااصدقت الي سمعته وقامت دموعها تنزل وشوي شوي قامت تبكي وتشهق بقوه
ومحمد يهدي فيها وهي تبكي
بدور:محمد شتقول انا احبك وسويت كل شي عشانك ليش محمد؟
محمد:صدقيني يابدور لانك طيبه مااحبيت العب عليك والله بيوفقك باحسن مني.
بدور:لااا انا ابيك انت ماابي غيرك احبك انت.
محمد:انا مااستاهلك وان شاء الله بتحبين غيري بتلقين الي يحبك وتحبينه ويستاهلك.
بدور شوي وتموت روحها وهي تبكي وتشهق وتترجى محمد وهو محتار معها ومايبي يطول
لانها كسرت خااطره وحس نفسه نذل وكره نفسه بالي سواه فيها
محمد:مع السلامه بدور.
بدور:محمد لااا لاترووح محمد.
قفل الخط وضرب سيارته برجله بكل قوه وجلس عند صخره قريب من البحر ولام نفسه
على الي سواه حس نفسه نذل وحقير واتصل فيه سيف وعلمه بمكانه وجا له
سيف:شفتها؟
محمد:اايه.
سيف:ايوووه من قدك وها حلوة او لا؟
محمد:سيف البنت مثل القمر وانا خلاص قطعت علاقتي فيها من ساعه.
سيف:وشفيك الحين ندماان انك قطعت علاقتك فيها.
محمد:لاا بس حرام كانت تحبني شقد انا نذل ياسيف ومااستاهلها.
سيف:اذكر ربك ليش كل هالعصبيه والهم الي انت فيه.
محمد:انت ماسمعتها وهي تترجاني وهي تصيح انا مستحيل اتعرف على بنات او اكلمهم ثااني
خلاص تووبه ولو يصير شي في بدور يا سيف والله مااسامح نفسي انا غلطاان غلطان
رحمتك وعفوك ياارب.
سيف تاثر بحال صديقه وكيف تغير كل هذا بسبب بدور الي كان يتسلى فيها
محمد:اسمعني ياسيف من اليوم ماافي بنات ولا طاريهم واذا بتكلمهم اوبتتحرش فيهم
لاانت صديقي ولا انا اعرفك فااهم.
سيف:اووف اووف هدي حالك وتامر يااخوي ماالنا بالبنات والله يستر عليهم وصحيح
الي نسويه غلط بس لاتعصب انت وصدقني هذا جوالي وشوف.
واخذ جواله وفتحه وقط الشريحه من الجوال في البحر واخذ شريحة محمد ورماها بعد
سيف:شرايك بدايه جديده..بس انت قوم وهونها وماراح يصير في البنت شي.
محمد:ان شاء الله.
سيف:يالله نروح بيتنا.
محمد:انا جاايع وابي اتعشى مافيني حيل.
سيف:طيب بس انا تعشيت مع عبوود بس ولاتزعل اتعشى معك.
وراحوثنينهم لاقرب مطعم واخذو العشاء وراحو لبيت سيف واتصلو على سعد يجيهم
وجا لهم عشان يتعشى معهم ورجع محمد على طبيعته لكن قلبه يعوره على بدور
سعد:هاا حمود مطوول هنا؟
محمد:وانت شعليك مني بيتك؟؟وبعدين انا ناوي اخذ بنتهم.
سعد:هههه الا تخسي انت .
سيف:يبه ماعندنا بنات والحين سعد نسيبي.
محمد رفع حاجبه:ومن متى بالله؟
سعد:من اليوم والملكه الخميس الجاي.
سيف:مااحد قالي عن الملكه.
محمد:هههههههه خوش اخو بالله.
سعد:ماعليك منه اليوم حددنا انا وابوك.
وظلو يسولفون ومن بعدها مشى كل واحد بيته عالساعه 1 وحده من الليل
......................
البنات رجعو كل وحده بيتهم ونامو واسيل قبل لاتنام ارسلت لعلي رساله قبل النوم
وهو شافها ورد عليها وبعدها نام .
وسمر تعشت احلى عشاء مع احمد وكان غيرر يضحك ويتغزل فيها ومايناديه الا حبيبتي
على غير عاادته وكان انسان ثااني بهالليله وسمر مااصدقت رجعت البيت وراحت لعبدالرحمن
تدوره ومالقته في غرفته وشافها خالد وهي طالعه من غرفه عبدالرحمن
سمر:ووين رحمانو؟
خالد:توني جاي من عنده بالمزرعه وقال بينام هناك.
سمر:يووه حساافه.
خالد:ليش شعندك؟
سمر:سلامتك.
وراحت لبدور تعلمها وبس فتحت الباب انصدمت بدور كانت على سريرها وعبايتها عليها
وتصيح وتشهق بقوه وتقول بصوت يقطع القلب:لا لا .
سمر راحت لعند اختها ولمتها وسالتها شفيه بهالحال بدور شالت نفسها واخذت الجوال
وضربت فيه بالجداروتكسر قطعه قطعه ورجعت تصيح بين يدين اختها وهذيك متعجبه
من حالها شفيها بدور؟؟
سمر:بدور بسم الله عليك شفيك؟؟احد زعلك؟تهاوشتي مع احد؟احد صار فيه شي؟
بدور:اكره شي اسمه محمد مااحبه ذبحني محمد ذبحني.
سمر مستغربه:من محمد ؟؟بدور جاوبيني من محمد؟
بدور:محمد كان كل شي والحين ولا شي محمد ولاشي.
سمر:تكلمي فهميني شسالفه؟
بدور جلست ومسحت دموعها واخذت نفسي قووي وبعدها طالعت اختها بنظره غريبه
وقالت:ماافيني شي بس تعباانه خليني بروحي.
سمر:من محمد؟
بدور:ولاشي انا تعباانه وهلوست شوي هههه.
سمر:هههه خوفتيني افتكرت فيك شي.
وقامت سمر عشان تطلع من الغرفه ونادتها بدور ثاني
بدور:سمر.
سمر:امري.
بدور:ماابيك تكلمين حور ولا اسيل ولا دانه فاهمه.
سمر:ليش؟؟شفيك معهم توك اليوم مااخذتهم معنا السوق وحالتك حاله والحين ماتبيني اكلمهم
ليش شنو صاير؟؟تهاوشتي معهم؟
بدور:سمر خلاص انا مااحبيتهم وماابيك تكلمينهم.
سمر:اسفه انا عاجبيني ومااشوف فيهم شي ماتبين تكلمينهم انتي براحتك.
بدور:يووه خلاص براحتك اما عني ماحبهم ولابي اكلمهم.
طلعت سمر وهي متعجبه من الي صار من شوي شفيها بدور جنت؟؟وهي تفكر على سريرها
اتصل فيها احمد ونست بدور وطاريها بعد دام حبيب القلب يكلمها
اما بدور رجعت تبكي وبعدها مسحت دموعها طيب يا محمد مو بدور الي تتسلى بقلبها
انا بكون لك غيرر الي تسليت فيهم وجرحتهم وانا الي بعلمك الجرح الحقيقي.
.............................. .................... .............
لمياء وسعد>>بتم ملكتهم ولا بيصير شي ياخرها او ينهيها ؟؟
بدور ومحمد>>شنو بيصير بينهم وشنو ناويه بدور عليه؟؟
حور وعبدالرحمن؟؟؟؟؟؟؟؟؟>>في شي ؟؟
علي اسيل>>هل من الممكن يكون علي ابتداء يحب اسيل؟؟
زوبا ـ عبدالله ـ سيف ـ دانه ـ والباقي كلهم شنو بيصير لهم؟؟
والسؤال المهم زيد شنو دوره في البارت الجاي؟؟
|