رواية بعد كذبك لاترتجي مني نظره ترى لقيت الي يسواك الف مره بنت الخزاعي..

*×*البارت الثاني *×*

ماذبح قلبي سيوف ولاطعن جوفي رماح

ماذبحني غير واحد قال( احبك) ثم راح

*
*
*
خلصت من صلاتها.. ورتبت ملابسها على سريرها وجهزت العطر
الي راح تستخدمه واكسسوارات الشعر والملابس على تسريحتها..

طلعت من الغرفه متوجهه الى الدرج الي يكون بوسط الصاله..
وهي تنزل تذكرت موقفها مع رهف وشهد..يوم كانو بالفسحه..

رهف تهدي شهد الي معصبه: خلاص حبيبتي هذي اهلنا وش نسوي فيهم..

هيفاء تجلس وتعطي كل وحده باقي افلوسها واكلها: وش السالفه وشفيها شهد يارهف

رهف بعفويه: لابس شهد العلاقه الي بين شهد وامها
مظطربه شوي

هيفاء وشهد يناظرون بعض وفجاء يضحكون..

رهف تتبسم على ضحكهم: ضحكتم من سركم بلا قولو امين

شهد: جمعا ان شاء الله

هيفاء ترفع ضغط رهف: تصدقين رهف العلاقه الي بيني وبين زوجة اخوي
مظطربه شوي هههههههههههههههه

شهد تظرب يدها بيد هيفاء: مظطربه ياساتر ههههههههههههههههه

ومسرع ارجعت على واقعها على صوت اخوها فواز..

: هيه انتي ياعرب انا اتكلم

هيفاء تشد على حواجبها: نعم فقعت اذني

فواز يتخصر لها: وشفيك واقفه وتبسمين حد قال انو في احد يصورك هنا

هيفاء تاشر على راسها باصبعها: كيفي ابتسم اضحك انا حره انت شدخلك

فواز: دخلني اني ابي اعرف انت مجنونه ولا عاقله لان مستشفى الامل
قريب والله بس هو بالدمام وحنا هنا قريب حيل

هيفاء: هههههههههههههههه حسيت يلا طس بروح اشوف ماما

فواز: شايبه وتقول ماما .. يقولون امي يمه الماما للاطفال موالشياب

هيفاء: كيفي وما الشايب غيرك ..

فواز: هيفاء

هيفاء: نعم

فواز: جب بس جب

هيفاء: ههههههه الحمدلله وشكرا
وتروح عنه الى غرفة امه وهي تضحك..

بس..

ماسرع تحولت ضحكها الى بسمه الى ملامح حزينه.. وهي تمسع دعاء امها
الي معطيتها ظهرها وتدعي ربها..

تحس بخناجر تقطع قلبها.. (يمه ادعي لي بنسيان موبالزواج)..لمى شافت امها
خلصت وبتلف عليها امسحت الدمعه الي خانتها..

امها بعد مافصخت احجاب الصلاه : نعم بغيتي شي هيفاء

هيفاء : احم احم (تحس الصوت راح) ماما ابغى اروح لرهف تعبانه
ابغى اطمن عليها..

امها: ليه وشفيها؟

هيفاء: ماخده برد

امها: ماتشوف شر روحي وخلي فواز يوصلك

هيفاء :تيب ماما

طلعت وسكرت الباب وراحت الى غرفتها تركض .. اكثر من كذا ماتقدر تمسك نفسها
دخلت غرفتها وقفلت الباب ورمت نفسها على السرير وهي تبكي بحرقه..

(( ياعالم حسوا فيني وربي جرحي لسى مابرى وتبون تعرسوني.. يمه خفي علي
حسي فيني شوي..)) وبكت الين ماهدت من حالها ورفعت نفسهامن السرير..

وراحت الي دولابها وفتحته وطلعت منه ..ألبوم صور ورسايل مع صور..
وتناظر في صور وهي تبكي بهدوء..مره يضحك مر لابس ثوب مره لابس بدله

فكت الالبوم صور الخطوبه وطاحت الدبله اخذتها من الارض وضمتها لصدرها بقوه..

وبعدين قرات الي مكتوب الي بداخلها.. وليد وهيفاء 18\7/1429
هذا كان تاريخ الملكه بس كل شي انتهى بوفات وليد.. ضمت صوره له بقوه
وهي تقول بصوت شبه مسموع: فقدتك حبيبي لوتدري شكثر وحشتني
وليد والله اني احبك ليه ماخذتني معك ياحب الطفوله..

..فقدتك يا اعز الناس فقدت الحب والطيبه
انا من لي في هالدنيا سواك إن طالت الغيبه..

..رحلتو من بقى وياي يحس بضحكتي وبكاي
وحتى الجرح في بعدك يغزيني وهلي به..

انا من لي في هالدنيا سواك إن طالت الغيبه..

&&&&&&&&&&&&&&&&&&&&&&&&&&&&&& &
في الغرفه الي جداره مطليه بلون وردي وبنفسجي.. غرفه بناتيه لابعد درجه
مرتبه بشكل ناعم ..الدب في كل مكان مع صور لها وغير الابجورات الموزعه
صحيح الحياه متوسطه لكن الذوق راقي..اسحت كرسيها بعد مالبست ملابسها
وجلست تحط ميك اب على موسيقى هاديه.. وهي مندمجه بالحط ينفتح الباب بقوه..

رهف تلف وهي متورعه: وجع ان شاء الله روعتني

سعد يقلد الصوت : وجع روعتني (يعدل صوته) مقدر يا ياي اقول قومي انقلعي امي تبيك

رهف تلف وتكمل اليك اب: تيب بنزل بعد شوي..

كريمه تدخل الغرفه وهي حامله بنتها: تعبانه وغايبه امس وميته من التعب والحين ربعك بيجون

رهف ترمي المسكره بعصبيه: والله مالك دخل (تقوم من الكرسي)وع فكره ماما وبابا موجودين
فمالك دخل فيني تيب حبي همك في زوجك وبناتك..(تبعدها عن طريقها بكل غرور) بعدي اف قرفتيني
ونزلت لعند امها وطلعت الجوال من جيبها وجلست على الكنب: امري ماما

امها: عمتك بتجي نهاية الاسبوع شيلي عفستك الي بالغرفه..

رهف تاشر على عيونها: من عيوني بس ماما قلتي لشغاله تجهز الاغراض

امها: ايه

رهف: تيب ماما بليز بنات الثغه لايجون المجلس

هنا تدخل كريمه: والله محد الغثه غيرك انتي وربعك

رهف تلف عليها: انا ابغى افهم زوجك شلون مستحمل همجيتك..انا خبري البنت بعد الزواج تصير ناعمه وانتي عافانا الله..(توقف)بعدين انا عندي صديقات ..ربعك عند الشباب الي انت تشبهينهم..
هنا يرن جوال رهف وتطلع من الصاله.. وتروح ركض الى باب الخارجي..
*×* ترى عند رهف خدمة فتح الباب من الجرس بس هي تحب تفتح الباب لخوياتها بنفسها..
دخلت هيفاء:سلام في احد وابي اكشف

رهف تفتح الباب الداخلي :لا تعالي

هيفاء ماصدقت خبر عطول اكشفت: يوه حر رهوفه

رهف بعد ماولعت انوار امجلس ضمة هيفاء: وحشتيي حيل

هيفاء : حتى انا خلاص رهف اعتقيني خلاص

رهف تبعد عنها:ههههههههه وحشتيني

هيفاء: اشتاقي من بعيد يوه ذبحتيني

رهف تكش عليها: اجلسي بس اجلسي..

هيفاء: اخبار بطنك

رهف: تمام بس زعلانه شوي..

هيفاء: اكيد مشتاقه لشهد صح

رهف: ايه ياختي يطفشون اهلها

هيفاء: مافي حل الا نعرسها

رهف تتخيل شهد عروس: هههههههههههههههههه
اماعاد نعرسها وربي كان طلاقهايوم ثاني

هيفاء:ههههههههههههههه

رهف: يلاندق عليها..

ويدقون يطلع جاري انتظار

رهف: الحين تلافينها داقه على بقاله ولا صيدليه

هيفاء:ولا مدرس اخوها الصومالي هههههههههههههههه

رهف:ههههههههههههههههه

شهد: هلا

رهف وهيفاء :اهلين

شهد بصراخ: ابي ابي اجي معاكم

هيفاء تقهرها: الله يعرسك

شهد نست عمرها: اذا انتي زوجوك مات..انا بينتحر
هنا شهد تحسفت على قد شعر راسها..

اما رهف تمشي والوضع وتضحك وهي بداخلها تلعن شهد

اما شعور هيفاء يعجز القلم في وصفه..

شهد بحماس قليل لان عارفه هيفاء زعلانه:
ايه ماقلت لكم دقيت على بقاله قلته عندك خيشت بصل..
قال لا خلصت.. قلت حنا عندنا ويص ويص واقفل ههههههههههههه

هيفاء على الحزن الي فيها حبت تمشي الموضوع: انتي يوم بطحين في شر اعمالك وبتصير حالتك مظطربه حيل

شهد: والي عافيك كل شي ولا المظطربه

رهف: انطمي انتي وياها

وظلو على هالحال..

&&&&&&&&&&&&&&&&&&&&&&&&&&&&&& &

في حي راقي وهادي جدا..

في القصر.. في احد اجنحته الراقيه.. مطلي لونه بالازرق الغامق.. اثاث سماوي فاتح..تلفزيون بلازمه بالجدار.. دفيدي واسيريو على الطاوله.. مكتب في ركن والركن الثني اريكه وفي وسط الغرفه
سرير لشخصين..بالعربي الجناح في قمة الفخامه..

بعد ماخلص شور دخل غرفة الملابس ولبس بجامته..وراح لغرفته وهوميت تعب
: والله ماهي حاله ابوي طفشني
ويقطع كلامه او تعليقاته على ابوه صوت الباب

سعود: مفتوح الباب

زينه تدخل الغرفه: خالاتي تحت ماتبغى تشوفهم

سعود ينبطح ويرجع شعره على ورى: لاتعبان ابي انام
(يدق جواله وياشر لاخته تتطلع)

زينه تسكر الباب وهي تناظر..( تعبان وتكلم خوياتك ياربي متى بتعقل..) وتركته
وقفت شوي تعدل شكلها وراحت تنزل من الدرج وقبل ماتوصل
درجه الاخير .. سمعت سعود يرحب بخالاته..

زينه بدهشه: سعود؟!

سعود بتسامه :ياعيونه بعدي بسلم على خالاتي..

زينه تناظر فيه وهويمر من قدامها بذهول ..(( الكشخه عند سعود ماتاخذ عنده ثواني حق البنات..
الله يهداك ياخوي))..

سعود يلف عليها: زوزي تعالي ليه واقفه وساكته

زينه تمشي معه وهي ساكته:................

ام سالم خالته: هلا بولد اختي الي ماينشاف

سعود يجلس وعيونه تقز كل بنات خالاته: انتم ماتجون ياكون مسافر او طالع او نايم

امه تخزه: سعود كانك بتطلع؟!

سعود بتسامه: ايه

لينا بنت خالته تدلع تبغى سعود يحبها زي ماتحبه: انت كله طالع احس لويوم ماطتلع تحك رجلك

سعود ((يالله بموت ضحك ع سخافه)) ابتسم بدون نفس: هذا انا موجود معك ومع خالاتي..

خالته ام عيسى: وين معنا الحين بتطلع..

سعود بتسامه تسدح البنات:لازم ياخاله عشان خالاته ياخذون الراحه اذا انا جلست بظلون متغطيات..
ويناظر في البنات.. الي داقه لثمه والي قاطه على وجهها الغطه والغطه شفاف..وقف
وعيون الكل عليه..يلا سلام..

*×* سعود عمره22 سنه يدرس في الجامعه مثل ماعرفتوا مغازلجتي درجه اولى..
والباقي راح تعرفونه بعدين..

&&&&&&&&&&&&&&&&&&&&&&&&&&&&&& &

: مامي الله يخليك بس بشتري جكيت واحد

امها :مايصلح بنات يرحون لحالهم السوق

رهف بكذب: موالسوق ماما ..انتي تعرفين المحلات الي لحالها
هذا المحل لحاله بروح اشتري وارجع

امها: اف طفشتيني بس ماطولين

رهف : ياروحي والله ماراح اطول(وتبوسه امها بقوه)

امها تبعدها: عندك فلوس

رهف وهي تاخذ عباتها من الشغاله : ايواه يلا باي مامي

وتدخل المجلس وهي مبسوطه..

هيفاء: ها وافقت

رهف: ايه يلا

هيفاء تتلثم: يلا اخلصي

وطلعوا من البيت في السياره بعد مابعدوا من البيت رهف تفصخ النقاب وتلمث..
وتعطي السواق: مية ريال..

هيفاء تشهق: على وين الدجه

رهف تناظر عيونها في المرايه: الراشد طبعا اليوم الخميس

هيفاء: وصلني البيت بعدين روحي مالي خلق هياط

رهف برجا: هيوف الله يخليك عن السخافه بس بشتري ونشفى شي عدل اخذنا (وتغمز لها)

هيفاء تاف: اف تيب ربع ساعه اكثر من كذا برجع بيتنا بتاكسي

رهف: من عيوني..(تكلم السواق) الراشد عبد القدوس

وكلها ثواني.. وتوقف السياره.. عند مجمع الراشد..

*

*

*
رافع جواله ويكلم: انا بدور الثاني انتي وينك.. خلاص لاجيتي دقي لاطولين
ويسكر ..يلف على صديقه.. ابراهيم خلينا نجلس على هالكراسي

ابراهيم: من جدك سعود ياكثر الكافي هنا نجلس ع الكراسي

سعود : ربع ساعه ماجات نروح الشقه

ابراهيم: ماتبي جديد

سعود: ودي بس تعبان

ابراهيم: الا الاخت حلوه

سعود: ماشفتها

ابراهيم: ياخوفي شينه

سعود: عاتي نوسع الصدر ههههههه

ابراهيم: هههههههههههه

*

*

*
في مكان ثاني بالراشد..
هيفاء: خلاص رهف خلينا نمشي وربي طفشت وامي الحين بتدق

رهف : تيب خلينا ندخل هذا المحل واشتري اي شي منه عشان اسكت امي..وجع محد حلو كلهم شيون

هيفاء تستهبل ع رهف: حرام شوفي هالرجال يهبل( تاشر على رجال شايب)

رهف تناظر فيه: ههههههههه ياحماره انا صدقت بعد اناظر فيه

ومروا قدام ثنين شباب ولا حسوا فيهم..

سعود كان بيقوم بس يوم شافهم جلس وناظر ابراهيم: شفت الي انا شفته

ابراهيم: صواريخ

سعود ياشر بيده يلا: قوم قوم وراهم..

ابراهيم : وخويتك

سعود : تنقلع اهم شي ذول

ويدخلون المحل..

رهف تنزل الجكت: هذا حلو صح

هيفاء : هذا بعد

رهف : خلاص ناخذه لشهد وانا هذا يلا انتي اختاري

هيفاء : لا خلينا نسوي طقم ناخذ ثلاث نفس بعض

رهف: على قولتها تخم هههههههه

هيفاء: فديتها ههههههه

رهف تلف تدور على هندي عشان يطلع لهم مقاس.. وتناظر في شباب يناظرون ويبتسمون لها..
رهف تهمس لهيفاء: شكل ماراح نطلع فاضين

هيفاء تلف وتناظر فيهم وتهمي لرهف: قصدك ذول

رهف: ايه

هيفاء:هههههههه اصبري لا اخسرهم الحين لك

رهف: هههه كيف؟

هيفاء: الي اخترته انا ب150 ريال وانتي اشوف كم 180 وحنا راح نشتري من كل واحد ثلاث يعني المجموع 990ريال..

هيفاء :جاريني بالكلام..(تعلي صوتها) يوه نسيت فلوسي ياربي وش هالورطه

رهف : خلاص خلاص الحين اكلم اخوي يجي

سعود يروح لهم: ولو حنا نخدمكم

هيفاء ماسكه روحها لاتضحك: شنو يعني بتدفع لنا مثلا

ابراهيم: لوتبين المجل نشتريه

رهف: بليز لاتعطلونا

سعود :هذا مقاسكم

رهف: ياخي انا بشتري لي ولخوتي ولوحده ثانيه

سعود : ولو لجل هالعيون اشتري الراشد

هيفاء (نشوف).. تاخذ الجكت من يد رهف : خذهم نبغى من كل واحد ثلاثه
واحد اكس سمول واحد سمول واحد ميديم
وثلاث سن توب هع >>>>>

سعود : طيب ..

ابراهيم: هالمره ع حساب سعود المره الجايه علي انا

هيفاء صوت بشبه مسوع: هذا اذا صار مره جايه

ابراهيم :هلا ماسمعتك

هيفاء: اقول ان شاء الله

راح ابراهيم جنب سعود..

رهف تهمس لهيفاء: اغبيه مرره

هيفاء: حيل ولا ويقول مره ثانيه انا زين ماجاني صرع من جبهته

رهف : ههههههههههههههههههه متحمسه اشوف الصدمه على وجيهم

هيفاء : ايه لو ماخذين اغلى مواحسن

رهف : سكتي الحين بيدفع..

سعود : كم الحساب

الكاشير: 990

سعود يطلع المبلغ من المحفظه: خذ

رهف وهيفاء انصموا..

جا لهم..سعود وعليه اجمل ابتسامه: خذوا الكيس وطلع لهم كرتين

اخذوا الكيس وطلعوا من المحل.. ومن الراشد بكبره..

بس اركبو السياره اشافوا الكروت..

رهف تشهق: هيفاء.. اقري الاسم

هيفاء: اشوف(تاخذ الكرت) وجع طلعوا بطرا وانا اقول ليه ما تاثر بالمبلغ

رهف : وين بوجبهه..

هيفاء: رميته ياختي شين

رهف: الهم نضمن واحد لرصيد هههههههههههههههه

هيفاء: لاتنسين تراني صاحبة الفكره

رهف : فديتك

هيفاء بعد ماوقفت السياره قدام بيتهم:لاتنسي الرصيد ههههههه يلا باي

رهف : تيب ههههههههه باي

وتسكر هيفاء الباب.. ويحرك السواق ..

رهف بعصبيه: انت هيه وقف

السواق وقف السياره وهويتكلم بلغته

رهف لمى شافت هيفاء دخلت البيت : حرك وعن الهذره

&&&&&&&&&&&&&&&&&&&&&&&&&&&
وش موقف شهد من السالفه؟؟

رهف لوين طريقها بيوصلها؟؟

هيفاء ليه زعلانه ؟؟

واحداث كثير في الجزء الجاي..
تحياتي..

*×* البارت الثالث *×*

بعد يوم متعب جدا صحت على ساعه وحده الظهر..ومتعكر مزاجها..

من كثر دقات جوالها ..رفعت الجوال وعطت الي يدق مشغول ورجعته ع الطاوله..

(ياربي متى افتك وارتاح من هالحياه الي انا عايشتها)..لفت على الجهه الثانيه

وشافت اختها منيره.. عوجة فمها( ربي عافني من هالوجه)..

منيره وهي تمشط شعرها وتناظر شهد في المرايا: اول مره تشوفيني

شهد وهي منسدحه على سريرها وبنفسيه ترد: لا اتامل فيه جمال البعارين الي تملكينه

منيره تلف عليها وتناظرها بحتقار: خليت لك جمال الخرفان

شهد ترفع نفسها وتحط ورى ظهرها مخده وبدون ماتناظر اختها:اجل جمالي جمال خرفان

سبحان الله حتى الخرفان لهم جمال.. شكلك من نفس الفصيله

منيره من القهر اخذت المشط ورمته على شهد بس ماجاها..

شهد كاتمه الضحكه: موفوق شينك بعد حولا.. الله يعين الي بياخذك

في هالوقت رن جوال شهد.. وتعطيه رفض

منيره تقوم من مكانها وتروح لشهد..

شهد لمى شافتها جات لها عقدة حواجبها : خير نعم شتبين

منيره تتخصر( تحط يدها على خصرها وتهز): من الي عطيته مشغول ها مين

شهد تلف يمن ويسار: للاسف مالقيت شي ارن راسك فيه مالت عليك..وش يخصك انتي ها

منيره: بتقولين ولا اصارخ واخلي البيت يدري..

ضاحي يدخل بدون مايدق الباب: شهوده صديقتك دقت وامي قالت لها انك نايمه

ويرجع يدق جوال شهد وتعطيه مشغول..

منيره تخز فيها: بتقولين منو ولا اقول لضاحي..

ضاحي يناظر فيهم الثنتين :شسالفه

منيره تكتف يدها: يلا قولي..( ويرجع جوال شهد يدق).. هات الجوال اشوف من الي متصل

شهد تكش عليها وترد على الجوال وهي تصارخ: انتي شبلاك ها شبلاك اعطيك مشغول ترجعين تدقين
ازعجتيني

وتطلع من الغرفه..

شهد: الو وجعه رهيف وينك..

رهف :خلصت صراخ عشان اقرب السماعه..

شهد: شنو اضحك الحين؟..

رهف :لا ابتسمي ..(تصارخ عليها)يالخايسه انا متحمسه وعندي لك موضوع ضروري
وانتي نايمه نومة اهل الكهف ان شاء الله..

شهد : وشو

رهف:طحنا على ناس ياشهيد راهين

شهد بدهشه: بالله

رهف: والله

شهد بحماس: وش اسمايهم

رهف :واحد اسمه سعود والثاني ابراهيم
بس ابراهيم رمته هيوف رقمه

شهد: ليه ان شاء الله ماتبي انا ابي اهايط

رهف: عاتي لادقيت بقولها طاح رقم خويك ولا عطاني برسله لك

شهد: طيب شنو الاعوايل

رهف: سعود عايلته ال........
وبوجبه عايلته ال .........

شهد: ياويل حالي حرام

رهف : عصفور باليد ولا عشره على شجره ..ياشيخه اهم شي الرصيد
كلمنا واحد اثنين اهم شي الرصيد..

شهد: وين شفتهم..

رهف: على طاري الشوفه ادفعوا لنا قيمة الجكت

شهد: عسى شايفينكم في سنتر بوينت

رهف :سنتر بوينت تشوفين فيها صاحب الصيدليه والبقاله والمدرس الصومالي
مو ذول

شهد بهبال: وشفيه المدرس الصومالي والله يجنن يالبى جمال الصومال بس انتي شكلك تغارين
لان جمالك جمال بنغالي

رهف طنشت كلامها: ولاكاني سمعت شي بكره بجيب الجكيتات
لاتلبسي جكت تيب

شهد : هههه طيب كيف طيحيهم..

رهف بغرور: العيون ..عيوني من حلاها تسدح
توم كروز نفسه..

شهد: قصدك محمد عبدو اقول بس انطمي لاتاخذي مقلب في نفسك

رهف بدلع :شهد ليه تغارين مني

شهد: لانك شينه فكذا اغار

رهف بهبال: اف طفشت من الي يغارون مني

شهد: اقول انقلعي بس ..تعالي متى بتكلمينه..

رهف : مدري لادقيت بقول لك ..

شهد: طيب انا الحين بسكر لان الحين بيحطون الغدا..

رهف: تيب

شهد: رهف لا اوصيك علقيه نبغى نغرق رصيد ههههههههههه

رهف : من عيوني هههههههههههههههههه

وتسكر شهد من رهف وتروح غرفتها.. لمى جات بتسكر باب غرفتها

شافت اختها سوسن جايه لها ..ابتسم لها ابتسامه عريضه ولمى قربة حيل سكرت

في وجهها الباب وقفلته وجلست تضحك على صراخ اختها..

*×* اليوم يارهف وياشهد..نضحك بكر نبكي..الى وين طرقيكم بيوصلكم الى وين؟؟!!*×*

&&&&&&&&&&&&&&&&&&&&&&&&&&&&&& &&&&&

في الحي الراقي..

في القصر الواسع..

على طاولة الاكل..

الخدم تحط الاكل وترتب عشان اصحاب العز ياكلون>>حسره علينا سفره على الارض ويخب

ام رياض: متى رجعت البيت ياسعود؟؟

سعود منشغل بصحنه: على الوحده..

ابو رياض يرمي الشوكه والسكين: من بكره او ليه بكره من اليوم ان شاء الله
باب القصر بعد 12 يتقفل وماينفتح ..والي يجي بعدها(يناظر سعود) يدور له مكان
ينام فيه..
(ويرجع يكمل اكله)

سعود يحط السكين وشوكه ويمسح فمه بمنديل ويقوم: الحمدلله

ابو رياض:اجلس انا ماخلصت اكلي

سعود يشدعلى سنونه: طيب (ويجلس)

ام رياض تصرف السالفه عن دلوعها سعود:وش بتسوي في عزومة رياض مابقى عليها شي

سعود يهمس لزينه: متى راح يجي؟؟

زينه: بعد بكره

ابو رياض يناظر سعود: اسمع اخوك بيجي فض نفسك له..وجيبه من المطار
ياليتك طالع على اخوك الكبير..

سعود يمسك اعصابه: متى طيارته؟

ابورياض: الساعه 6المغرب طيارته توصل..خمس ونص انت بالمطار..

زينه بدلع : تيب باباتي حبي ممكن طلب

ابو رياض يبتسم لبنته ودلوعته : هلا ياعيون بابا امري..

سعود يناظر فيه وفيها..(جعل عيونك البط)

زينه بتسامه: فديت عيونك ابغى فلوس ابي اشتري لي فستان لحفلة رياض

ابو رياض: ليه يا بابا من هنا ..هنا مو زين ليه ماتطلبي من برى
احسن..

زينه: ان شاء الله بزواجه ..الحين راح تعطيني ولا لا

ابو رياض: اكيد يا بابا بس اخلص غداي نطلع سوى للمكتب.
واعطيك عساك راضيه بس..

زينه تقوم وتبوس راس ابوها: دام راضي علي اكيد راضيه..

ابو رياض يناظر سعود الي وجهه صار احمر من العصبيه: ليتك كل الناس زيك..

رفع سعود عيونه وهو يناظر ابوه ولمى شاف ابوه يناظر فيه نزلها..(اكرهك يايبه اكرهك)

*×* سعود اخوانه: اخو واحد اكبر منه ..
واخت وحده زينه
وترتيبهم كذا..
رياض عمره 29سنه.. سعود..زينه 19 سنه..

&&&&&&&&&&&&&&&&&&&&&&&&&&&&&& &&&&&

في شقه صغيره في بيت عايله متواضع..
في العصر..

بدر بياس : ماظن توافق

منى تمشط شعر بنتها: طيب الى متى بظل كذا يابدر ارمله..

بدر بنفعال: ماهي بارمله..

منى تكلم بنتها: ماما روحي العبي ((توقف وتجلس جنب بدر على السرير)) بدر لاتستهبل
اختك ملكة وطلعت ودخلت معه ومدري ايش ابي اعرف انتم ليه مخلينها على راحتها كذا..

بدر:تبغين نزوجها وبكره تتطلق ..يامنى الزواج بالغصب موزين..

منى تتاف: بيعني وش اقول لاخوي.. وبعدين تعال اختك ليه ترفض كل من جاء لها

بدر: لاتها تحب وليد؟؟

منى بخبث: شدعوه لهدرجه تحبه ..ولا كل من جا لها خطيب سوت لها فلم وصياح ونياح
مومعقوله بدر كل هذا عشان تحبه..

بدر: وشقصدك

منى :مدري انت افهمها انت شفتها اول ماجا لها الخبر اغمى عليها
وجاها انهيار عصبي ..بالعين ماشفنا بس بالعقل عرفنا..
واخوي شاري يابدر..

بدر عقد حواجبه وبدا السواس يلعب فيه..وكلام منى يرن في راسه..وبدات الافكار توديه وتجيبه..

منى بشبه ابتسامه: بدر بدر

بدر:هلا

منى :وش تفكر فيه

بدر: ولا شي انا بروح اكلم امي تكلمها.. وان ارفضت لي كلام مع هيفاء ثاني..

منى ابتسمة بشماته: طيب وانا بقول لاخوي ينتظر لاسبوع الجاي..

بدر يهز راسه ويطلع من الغرفه.. الى برى الشقه..

&&&&&&&&&&&&&&&&&&&&&&&&&&&&&& &&&&&&

حل الظلام.. ونور الشمس ودع اراضي السعوديه .. وهل عليها نور القمر

ولمعان النجوم يسطع.. الساعه 9باليل..

صعدت فوق غرفتها على اساس راح تنام وهي نشاطها زايد.. دخلت وسكرت الباب

عدل وشغلت التكيف ونبطحت على السرير وهي تتحسب على اختها الي اخذت مفتاح الغرفه..

(حسبي عليك من اخت طفشتني ماخذه مفتاح الغرفه)..انبطحت على السرير وغطت نفسها

عن تبرد.. دقت على الارقام الي في الكرت..رنه رنتين ثلاث

الى لايوجد رد..سلامات الاخ مايرد دقت على شهد..

رهف : شهوده مايرد

شهد: الرصيد

رهف: ايه

شهد: عطيني رقمه

رهف: انا مارد انتي بيرد

شهد:حسبي عليها هيفوه التبن قطت الرقم

رهف: مالت والله شين

شهد: فلوسه تحليه

رهف: عاد هذا الي صار هيوف رمته

شهد:مالت ع الحظ تيب انتي دقي وازعجي دين ام الرصيد
الين مايرد

رهف: تيب يلا سلام..

سكرت من شهد ورجعت دقت على سعود ع قولتهم الرصيد الين ماجاها مقفل

رهف : مالت عليك زين قفل الجوال..

رمت الجوال على الطاوله ونامت..

&&&&&&&&&&&&&&&&&&&&&&&&&&&&&& &&&&&&

سعود يناظر الساعه 12ونص:يلا جدتي مع السلامه ويلا عماتي العزيزات الى لقاء

جدته: الله يحفظك ويبعد عيونك عن الحريم..

الكل :هههههههههههههههههههههههه

سعود بتسامه: ماغازل انا

جدته تناظر فيه: ايه عارفه انت ماتغازل حتى البنات هم الي يلزقون فيك..(تضربه بعصاته)
عنبو دارك من جلست جوالك موراضي يسكت..

سعود يصرف يوقف ويحب راسها: الله يخليك لي بس
يلا مع السلامه ..

ويطلع من القصر..

وصل الى قصرهم وناظر الباب الكبير مسكر..عوج فمه وراح الى الباب الخلفي..

دخل وشاف المسبح..(والله الجو يساعد بس انا حدي تعبان يازين المويه)ورسم على وجه ابتسامه

دخل البيت وعلى الاصنصير الى الغرفه وصل غرفته على ساعه وحده بالظبط.. فتح الجوال..

وشاف المس كول من رقم غريب فوق 13 مره داق ومن ارقام مسجله عنده كم رنه..

سعود يرمي شماغه ويجلس على سريره: اوف 13 مره من ذي
..وعلى طول دق على الرقم.. وشغل التكيف بجهاز التحكم من بعد..

رنه رنتين ثلاث الين لايوجد رد.. لكن سعود مومن الي يطفش بسرعه

جلس يدق ويدق الين مارد صاحب الرقم..

*

*

*

كانت نايمه وجوالها يدق ويدق بشكل مزعج رفعت الجوال بدون ماتشوف المتصل منو

رفعت الجوال وهي شبه صاحيه : الو

المتصل بصوت رومنس: مساء اليل

رهف تفتح عين وتسكر عين وتناظر الساعه وحده: قصدك صباح الخير وش تبي

المتصل: انا سعود

رهف ناسيه السالفه وردت بنفس خايسه: والله على بالي وائل كفوري ..تيب وسعود شسوي لك

سعود ياخذ نفس: انتي الي داقه موانا

رهف على نفس النفسيه: انت منسم شي اقول لك انا مادقيت وبعدين حاب تحقق لاتدق هذا الوقت دق بوقت ثاني وراي دوام انا

سعود عصب لان مومتعود على السب بالعاده كله مياعه ودلع ..يعرف يختار البنات..
بس شكل رهف حطمته رد عليها وهو معصب: انتي هيه عدلي اسلوبك موسعود ولد زايد ال...
يتعامل معه..

رهف من الاسم صحصحت رفعت الجوال شافت الرصيد..انصدمت ورجعت وهي ترقع السالفه
بدلعها:الله يهداك كان قلت انك صاحب الجكت..

سعود كان مضيع شي ولقاه على فرحته: هذا انتي ام شنطه فوشيه

رهف اسكت شوي(توه معصب امداه رضى): واذا طلعت الرماديه بتركني

سعود بكذب: لابس خوي يبغاك شسوي

رهف:هههههههه امزح معك انا ام شنطه الفوشيه

سعودبفرحه: ياهلا فيك اخبارك

رهف: فيني النوم والله هذي اخباري..
وكملت بداخلها(ياليتك تسكر بنام)

سعود:شفت دقاتك كثيره قلت ادق عليك لو داري انك انتي كان رديت من زمان والله

رهف:داقه اشكرك على الجكت..

سعود: لا شدعوه هذا قليل

رهف بهبال: اجل اشحن لي ب 100دامه قليل ههههههههههه

سعود : لجل هالضحكه اشحن بالف

رهف (ياحبيبي مطول شكله الاخ ابي انام انا):لاشكرا امزح معك

سعود يسوي روحه زعلان : قوليها مره ثالثه وربي بزعل

رهف (دخيلك ياشيخ) وقالت بعناد: شكرا ههههههههههه

سعود :زعلت

رهف تعدل المخده عشان تسند ظهرها عدل: انت في شقه ولا بيت ولا وين بالظبط

سعود بفخروغرور: انا في جناحي بالقصر

رهف: اجل الله يعينك ترقع راسك في كل جدار في القصر

سعود انصدم: نعم

رهف ولاهمها احد: ياخي ابي انام انا

سعود عصب: في مليون طريقه تقولينها موكذا عاد

رهف كسر خاطرها من دق وهي تسفل فيه..قالت بصوت اقرب من الهمس: اسفه

سعود ياخذ له نفس ((يالبى هالبنت)): لاتتاسفين سؤال وبقفل

رهف تحسفت جد كسر خاطرها: سامحني سعود بس ارحم حالي بكره وراي دوام
والحين ساعه 2

سعود :لا عاتي انتي شنو جامعه ثنوي شنو؟؟

رهف: لاثنوي

سعود: ياصغنونه

رهف : ههههههههه وانت

سعود: جامعي

رهف بصدمه: احلف

سعود: والله

رهف: موباين عليك

سعود :هههههههههه الكل يقول اني اكبر

رهف: الله يحفظك

سعود رحم حالها:خلاص روحي نامي

رهف ماصدقت خبر: يلا باي ..وسكرت بدون ماتسمع رده وقفلت الجوال ونامت

*
*
اما من الطرف الثاني.. سعود نزل الجوال وهو متنرفز من حركتها: اشفيها ذي هالخبله وانا ليه ماسالتها عن اسمها عمرها يلا بكره ادق وادبها على هالحركه..

فصخ جزمته.. ورفع غطاه وغطه نفسه بدون ان يفصخ ثوبه..ودق على وحده من خوياته

&&&&&&&&&&&&&&&&&&&&&&&&&&&&&& &&&&&&

بعدظلام دامس جاء نور الشمس ليعلن عن يوم جديد ..على اهل السعوديه..

في احد مدارس المملكه..

شهد:ههههههههههههه الله يرجك

رهف بتسامه: هو قال روحي وانا على طول قلت باي

شهد بحماس: ابي استهبل اعطيني رقمه..ابغى استهبل عليه

رهف: موحافظته اعطيك لا دقيت عليك

شهد:والثاني هيفوه رمته ودي اذبحها

رهف: تبين من الي عندي

شهد: هاتي ياختي زهقت وانا بس بقاله صيدليه ولا المدرس هالصومالي

رهف: اوكيك ..ها حلو الجكت

شهد :كثير والله

رهف تلف وتصرخ: لا

شهد: ياساتر مابي رياضيات من اول حصه

رهف : انا شكلي بخاوي زوج المديره عشان يقنع المديره
تفصلها

شهد: انا ايدك في هالراي

&&&&&&&&&&&&&&&&&&&&&&&&&&&&&& &&&&&&

في الجامعه..

بالكفتيريا..

ابراهيم ياشر: هنا يا الحلو

سعود يجلس: سلام

ابراهيم: كالعاده سهران مع البنات

سعود:ايه على فكره دقت علي ذيك ام الجكت

ابراهيم :جد متى

سعود: على هالوحده

ابراهيم: انا مادقت علي الخايسه

سعود: هههههه مدري بس لاتخاف مردهم بيجون ويحبون اتراب ارجولنا

ابراهيم: ابعدي والله

سعود بتسامه:افا عليك انا سعود صديق برهوم هههههه

&&&&&&&&&&&&&&&&&&&&&&&&&&&&&& &&&&&&

بعيد عن اجواء الدراسه .. نروح لحي متوسط بالتحديد

في شقة بدر..

منى تفتح الباب: هلا يمه حياك

امها: هلا بك

منى : اجلسي لحظه اجيب لك الفطور

وثواني جات منى بالفطور..

امها تساعدها وتفرش السفره:ها شصار على خطبت اخوك

منى بتسامه وتعطيها الشاهي:انا كلمت بدر وخليته يشك فيها

امها بضحكه: كيف؟؟

منى:يمه انتي متوقعتها بنت ست شهور تطلع وتدخل
ويجلوس لحالهم بساعات ولا اذا بيسافر ينام
معقوله بتظل بنت

امها: خس الله العدو ..جد لاجا يسافر يبنام

منى:ايه

امها: ورى ماقلتي لي

منى: بدر محلفني بس يمه لاتعلمين لايطلقني

امها: لا ماوفقت وكسرت بخاطر ولدي اعذريني

منى بعصبيه: يمه شهالكلام قلت لاتقولين يعني لاتقولين

امها بخوف: طيب طيب لاتعصبين

منى: ياربي متى تفكنا وربي ودي ارتاح

امها:انتي بشقتك شعليك منهم

منى:انا مابغى الشقه انا ابي البيت الكبير

امها: عرسي فواز اختك مشاعل..وهذي اخوك
والعبي بحسبت الشياب

منى بضحكه: اي والله جبتيها يايمه

*×*الى وين بتوديك خطك يا منى.. الى وين*×*

&&&&&&&&&&&&&&&&&&&&&&&&&&&&&& &&&&&&

مرت الساعات..وجاء وقت الخروج من المدارس بدق الجرس نهاية الدوام..

جنب الباب الاخضر..

شهد بحماس: رهف رهف شوفي

رهف:وين

شهد:هذا الولد الي حاط طوق

رهف: ههههههههههههههههههه منيره وشجابها

شهد: من جد لايق عليه هههههههههههههه تعالي نستهبل عليه

وراحوا له..الولد بس شافهم فتح النافذه..

شهد: وراك لابس طوق اختك

الولد يضحك:موضه

رهف تشهق :وجع صوته انعم من صوتي

شهد: من جد منيره

الولد بتسامه: وانتي فوزيه ههههههههه

رهف: ياخفة الدم

شهد: عن المياعه وافصخ طوق اختك لا امحطك بنعال ابوي

طبعا هيفاء كانت تراقب من بعيد..

هيفاء ترفع الصوت: عرب الباص حقكم جاء..

رهف وشهد بس سمعوا كلام هيفاء مشوا عنه..

الى باص..
*

*

*
على ساعه وخده الظهر دخلت هيفاء البيت..

ابوها: حيا الله من جا

هيفاء بتسامه: فديتك بابا

ابوها: من عيوني يالغالي

فواز يا شر على ساعته: تتاخري خمس دقايق ماراح تشوفين شي

هيفاء وهي تصعد الى الدرج بدون ماتشوفه: شعدوه مفجوع
ماعمرك اكلت شي

فواز: روحي خلصي ابي اتغدى وراي شغل

هفياء تتحرك بطئ عناد فيه: يالله الدرج حد متعب

فواز: ان شاء الله نعالي مايتعب

هيفاء تلف عليه تشوفه ماسك نعاله بيرميه..

هيفاء بصارخ:لا ياغبي وهاتك نحشه الى غرفتها..

&&&&&&&&&&&&&&&&&&&&&&&&&&&&&& &&&&&&

دخل الغرفه بسرعه والشر يطلع من عيونه..رفع الحاف بقوه ..
وهو يصارخ: قوم قامت قيامتك قوم

سعود بخوف يفز مكانه: خير وش فيه؟؟

ابوه بصوت عالي يدل على شدة الغصب والعصبيه: انا قلت جب اخوك الساعه
خمس.. والحين ست الا ربع..ولابعد لاصلاه ولا شي

سعود بخوف برجفه: انا.. انا راحت علي نومه

ابوه الى الان بعصبيته: نومه بلا قعده يلا قم فز رح جب اخوك بسرعه

وطلع وسكر الباب بقوه ماعنده..

سعودبس طلع ابوه شال اقرب مخده من العصبيه ورماها على الباب ..وهومعصب

(..اكرهك وربي اكرهك..)

وبعد نص ساعه طلع من القصر وهو معصب .. وكلها ربع ساعه واصل المطار..وهويحاول
يهدي من عصبيته شوي..

جا صوت من وراه: تاخرت علي واجد ياخوي..

يلف سعود ويضم اخوه الكبير بحنان: رياض

رياض بضحكه: فديتك من اخو وحشتني ياخي الصغير

سعود:هههههههههه وانت اكثر يالدب تغيرت

رياض بهبال: لاتقول صرت اشقربس وعيوني زرقه

سعود: لا فكتك واحد صومالي ههههههههههههههههه

رياض ينقال عصب يبعد عنه: وخر بس وخر ياشين الي يغار
اصلا تو وحده نادتني قالت لي مهند مهند
قلت لها لالا انا رياض

سعود:ههههههههههههههههههههههههه هه

رياض يناظر فيه: غريبه موكاشخ وجاي متاخر

سعود يصرف : يلا رياض الاهل مشتاقين لك حيل..

رياض: يلا يلا

واركبوا في سياره بي bmwالحوت..

سعود يرن على جواله: حبي انا مشغول اكلمك بعدين ويسكر وهويضحك..

رياض وهو يطلع البكت ويولع له زقاره: انت لسى ماتركت حركاتك

سعود يطلع له الطفايه: وانت ماتركت السم هذا الى الان

رياض يطفي الزقاره: سمي على روحي ياسعود ماعذب قلوب البنات

سعود يوقف على جنب: رياض حدي قافل من ابوك لاتزيد علي
اتركني في حالي اله يخليك..

رياض: انا خايف عليك لايجيك شي

سعود: ماراح يجيني شي ان شاء الله

رياض يلف عليه: انت شكلك يوم الله بيعاقبك وبطيح في وحده
وتفرك فر مثل البنات الي تفرهم

سعود: زوجتي الي بتفرني رياض ممكن تقفل السالفه..

رياض سكت ولف وجهه الى الجهه الثانيه الكلام مع اخوه ضايع..طلع زقاه ثانيه ويولعها..

تعب من اخوه الكل يعرف عنه انه مغازلجي ومشهور انه انسان لعاب وكذا مره ينكشف..

لف وناظر اخوه ورجع ناظر الشارع( متى ياخوي تعقل متى)

&&&&&&&&&&&&&&&&&&&&&&&&&&&&&& &&&&&&

في صالة بيتهم جالسه وهي مقهوره ماسكه نفسها لاتبكي:
انا قلت لك يمه من زمان زواج ماني متزوجه

امها بحنيه: هو قال اخوك لي وانا فرحت لك وبعدين يايمه
انا وابوك نتمنى لك سعاده

هيفاء: سعادتي هنا يمه ..

دخل بدر الصاله ومنى وعيالهم معاهم: خير وش هالصراخ..

امهم اسكت وتناظر هيفاء برجع ماتبغى مشاكل..

هيفاء تمسح دموعها الي تخونها قامت من مكانها وهي تناظر زوجة اخوها:
اسمعي اخوك ماني متزوجته فاهمه..

منى: اخوي موميت عليك اصلا شفتك ارمله رحمت حالك قلت ازوجك

هيفاء فتحت عيونها على الاخر من قوة الصدمه.. جرحها هالكلام حيل

طلعت من الصاله وهي مقهوره حيل.. صدمت في اخوها فواز

وبعدت عنه وراحت.. الى غرفتها وهي تبكي..

&&&&&&&&&&&&&&&&&&&&&&&&&&&&&& &&&&&&

ابي توقعاتكم للجزء الجاي..

وحبيت اشكر بنت الخزاعي ع روايتهها الجميله

الله يوفقهآآآآ

نوروني بنات بردودكم

تحياتي :: زحومه

يالبى زحومتي بس

ما قريت الروايه بس اوعدك اذا فضيت

اقتباس:

المشاركة الأصلية كتبت بواسطة شوق كلي حلى وذوق

يالبى زحومتي بس

ما قريت الروايه بس اوعدك اذا فضيت

لباك كلك والله ..

اوك انتظر رأيك .. في الرواية

نورتي ياعممري

	#13
زٍحَ’ـمةَ حَ’ـڪيّ..\|\|≈	رد: رواية بعد كذبك لاترتجي مني نظره ترى لقيت الي يسواك الف مره م_ن رواية بعد كذبك لاترتجي مني نظره ترى لقيت الي يسواك الف مره بنت الخزاعي.. وحبيت اشكر بنت الخزاعي ع روايتهها الجميله الله يوفقهآآآآ نوروني بنات بردودكم تحياتي :: زحومه

	#14
شوق كلي حلى وذوق	رد: رواية بعد كذبك لاترتجي مني نظره ترى لقيت الي يسواك الف مره م_ن رواية بعد كذبك لاترتجي مني نظره ترى لقيت الي يسواك الف مره بنت الخزاعي.. يالبى زحومتي بس ما قريت الروايه بس اوعدك اذا فضيت