ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات > روايات مكتملة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
روايات مكتملة رواية التبل إماراتيه روعة يوجد هنا رواية التبل إماراتيه روعة هنا تنقل الروايات المكتملة فقط

فساتين العيد


 
قديم   #11

جود ي الحلوه


رد: رواية التبل إماراتيه روعة


رواية التبل إماراتيه روعة

الج 12زء

.............................. .................

<<نزلت من السياره وانا مدوخه مب رايمه اشل عمري وغير جيه خايفه يطلع حل هالغز غلط...... ابا اسير لهلي بأي طريقه يعني ابا اسير ......يارب يطلع صح انتو ادعو لي بس
ساعدتني عفرا ونزلت من السياره طالع فيني راشد بتحدي ومد ايده عسب اعطيه الموبايل>>

......عطيته الموبايل بتردد ......

راشد فاج عيونه: يابنت الذينا!!!!!!!!!!!!! ربيعي ومارام يحله وانتي حليتيه صح!!!!

دورني من الفرحه خاطري اطير....
راشد: لاتصدقي عمرج الحينه

<<طلعو سهيل وخالتيه وهم فاجين حلوجهم >>

سهيل: وين كنتو؟؟؟
راشد يأشر علي: بنت عمك سوت لنا مسرحيه
عفرا تقطع كلامه ونقذتني: كانت تمشي ومانتبهت على عمرها وطاحت وطلع دم وخذينها المستشفى
خالتيه تي صوبي وتلوي علي: فديتج انتبهي على عمرج مره ثانيه

<<ماكنت وياهم ابد ابا اعرف بس راشد بوفي وعده لو لا.... طالعت فيه بعيوني وانا كلي رجاء ... وشكله فهم علي وابتسم لي وغمز لي من بعيد ..... الحمدلله محد انتبه فضيحه !!!
طمنتني نظراته وانا ماحيد الريايل يخلفو وعودهم
يودت خالتي ايدي عسب توصلني داخل ...عاده الحين مابتقصر الشيخه بتستلمني عدل
خليتهم وسرت فوق لجناحي مدت عمري على الشبريه وانا استرجع كل شي صار لي قبل لا اطيح >>

(( اكرهج تدري شو اكرهج؟؟؟ شعنه مامتي انتي بدل خليفه يالخايسه يالمعفنه الله ياخذ عمرج يالطرمه))

هذا مسج واحد من مسجات توصلني ....مادري من منو ..... بس كرهوني بنفسي ....يحسسوني اني انسانه ما استحق اعيش في هالدنيا ......آآآآآه ياليت اموت والحق امي وابويه ياليت

.............................. .................... ...

.............................. .................... ..

اخ ياحلات الماي قربو قربو تسبوحو ويايه هههههه
بصراحه وايد مروق ويالس اتسبح بالمسبح الي بزاويه البيت يعني اي حد يطلع من داخل البيت يشوف الي يالس يتسبح فيه
وبصراحه وايد ماخذ راحتي لان المسبح وايد كبير.... وبس انا الي يالس اتسبح فيه
.......كانو في غلاماتين يالسين على كرسي قريب نوعا ما من المسبح بس حسافه كانو
يتهامسون عسب لا اسمع شي امم اكيد عرفتوهن عفير اختيه وشميم الي شكلها تشتكي لها عن الي صار لان عفير يالسه تشاهق هههههههه


(خلاص حطيه حذالج هنا)

<<قلت هالجمله للبشكاره ونفذت الاوامر وحطت الموبايل والعصير والفواكه على فوطه كانت في حواف المسبح اونه يعني حركات امريكان هههه..........
رن موبايلي وكان المتصل سيفوه اخويه >>

سيف: شو بلاك تكلم جيه ؟؟؟
سهيل: فديتج لان في ناس حذالي الحينه
سيف: حوه ويوم يصير حذالك حد ترمسني جيه؟؟!!! اسميك تخبلت
سهيل: ههههه والله دمج خفيف بعدين بخبرج بكل شي
سيف ويمشي ويايه على الخط: ههههه هيه فهمت السالفه الحينه ..... فديتك والله حبيبي انته متى اشوفك؟
سهيل: فداج روحي انتي بس آمري بأي وقت

<<طبعن كنت متعمد اسوي عمري اهمس وحالتي لله وأوني ذايب .... حسيت بشمه تقوم
من الكرسي وتقرب مني .....نزلت من مستوى جسمها عسب تكون قريبه من ويهي .......وبحركه خفيفه ......مدت
ايدها وسحبت الموبايل وفرته بالمسبح..... وبرود عنيف سارت تدخل لداخل>>


<<<من صدمتي ايدي بعدها على اذني مثل ماكانت ....فريت ويهي لعفير الي يالسه تعفر من ضحكها >>>

سهيل: خيبه هاي غيره لو شو؟؟؟
عفرا: ههههههه ماروم وابويه بموت بموت هههههههه وابويه ماشفت شكلك ههههههه

<<طلعت من المسبح ورحت صوب عفير الي يالسه تضحك وتمصخر علي ...رفعتها من
ملابسها.... حركتي المعتاده وياها..... وطبعا عفير اخف من الريشه صار جسمها مرتفع عن الارض ورجولها تتحرك بالجو>>>

عفرا: ههههههه سهيل خوز عاده خلالاص ههههه الحينه بتغير موبايلك ورقمك هههههه
سهيل: وبعدها تضحك ماتوب
عفرا: ههههه ماروم اسكت والله
سهيل: انا اخليج الحين تنطبي

مايحتاي تفكرو شو سويت لاني عقيتها بالمسبح ويلست تشاهق من الصدمه بس من شافت الموبايل يسبح في المسبح ردت لضحكها الخبله
دخلت عنها ابدل ملابسي وانا افكر برده فعل شميم ههههه والله وحركات هالبنت عرفنا شلون نقايضها بس خيبه الحينه يبالي اشتري موبايل يديد ....... مايسوى علينا مقايض

.............................. ...............

.............................. .................... .

آآآآآآآآآآآآآآآآآآآآآآآآي

حوه منو هالدب الي صافعني بالمخده أأأأخ من الألم مب رايم افتح عيني

راشد: تستاهل ياحمار لا لشو رديت ايلس بعد تريق وياهم
خوزت ايدي عن خشمي الي يويعني من فلعه راشد الدب: يعور يالخايس عورتني حشى عليك
راشد: رايح تتغدا وترد الساعه 9 و انا مالي رب منقع بالميلس شو
سيف: وين سهيل؟
راشد: لا والله يعني اذا سهيل موجود ماتي تيلس جنبي هيه اصلا انت من تشوف ربعك تنساني
قلت وبتعود من غيره راشد: ههههه شو بلاك غادي جيه والله خذتنا السوالف
راشد حايس بوزه: خوز عني

<<دخل علينا سهيل بوزار وفانيله ويالس يحك شعره بأيد وباليد الثانيه يشرب كافي>>

سيف: حوه انت شو ماتستحي عندنا بنات بالبيت وطالع جيه؟
سهيل ومازال يحك شعره:ماروم عليك يالمحتشم
راشد وهو يضحك: تدرو من متى مالبست وزار؟؟
سهيل يلس قبال التيلفزون : متى؟؟؟
راشد: عشر سنين
سيف: خيبه اتوقع الحينه ماتروم تلبسه هههههههههه
راشد: هيه والله صدقت...... ابويه عصب عليه ذاج اليوم الا البس اونه شعنه دوم لابس شورتات ههههه والله ماجذب عليك طول الوقت ماسكه بيدي مستهم يطيح
سهيل يحك شعره: هههههههههه انا صحيح احب البس شورت بس اوقات يدق بعقليه البس وزار
قلت وانا احك شعري: حوه بسك تحك بهالشعر شو هاي يبت لي الحكه
راشد: هههههه عليك قمل شو
سهيل يطالعنا بنص عين: انطبو ...متسبح بالمسبح ونسيت افرك شعري بشامبو
سيف: يالخاين تسبح ولا تقول
راشد: انا الموجود بالبيت ماخبرني بخبرك انت؟
سهيل يتمد قبال التلفزون: ابا اخذ راحتيه
تذكرت يوم كلمني : هيه تعال بتخبرك شعنه تقطع السماعه بويهي؟ ( حركت حياتي لفوق وتحت على السريع) شو صار عسى ماذبوحك؟ ههههههه
سهيل : الله يرحمه
راشد: منو؟؟؟؟
سهيل: موبايلي
ضحكت عليه من الخاطر: هههههههههههههههههه لاتقول
سهيل: اقول ونص ....بعد سير شوفه مخيس ماي ....عقوه بالمسبح الله يسامحهم
راشد مب فاهم شي: حوه عن شو ترمسو
سيف: هههههههه يقولك اليوم كنت اكلمه ويلس يسوي عمره يكلم بنت عسب يقايض ناس وهالناس عصبو وعقو موبايله بالمسبح هههههه
راشد: ههههههههههه تستاهل عيل في حد يقايض بشموه؟؟؟؟
سهيل: اسكت والله ماتوقعت بسوي جيه قلت حدها حدها بتكب العصير وبتشرد ماشوفها الا خذت الموبايل وتعقه لي بالمسبح وبكل برود
راشد: هههههههههه تستاهل عسب لاتقايض بها مره ثانيه

دخلت علينا عفير الميلس وابتسمت اونه برائه: انتو هنا
سهيل: لا هناك شوفينا
عفرا: المهم انا حطيت لكم العشا بالصاله الصغيره سيرو تعشو
راشد: انت طابخته؟
عفرا: هيه انا وروضه فديتها
راشد: فديتكن انا علمو هالبقره الي وياكن تطبخ سو خير فينا........ من بعد ماضقنا اكلج كل يوم نلعن شمه
سهيل يفلع راشد بالمخده: احترم نفسك وبعدين انت ومنو تلعنو بشمه؟
راشد: ههههههههه انا وسلطان مسكين اخويه يبا يجي ويانا عسب ياكل من اكل عفور بس واحليله دوامه مايسمح
حطيت ايدي على بطني الي يطلع اصوات غريبه : اقول انا يوعان يالله نشو
راشد يخزني بنص عين: شعنه تتعشى ويانا سير سير لمحمد يعشيك

حطيت ايدي ورى ظهره وحبيته على خده اوني اراضيه وسرنا نتعشا...................

.............................. ..............


.............................. ..................

(اقولج عطيني رقمها لأصفعج)

عفرا: راشد ماروم شو تبا منها خبرني وانا بخبرها
راشد: عطيني رقمها انا ابا اتفاهم وياها وبعدين الا هي مسجات وبنتفاهم بشي محدد
انا مابيلس اغازلها
عفرا: مابا
راشد: ترى بخبر عليج سلطان

<<فجيت حلجي شو مدريه هاي بسالفه سلطان اويلي انفضحت>>

راشد يلوح بيده جبال ويهي: حوه وين الرقم
عفرا: راشد البنت يتيمه
راشد: شوفي ان ماصطلبتي بذبحج تراني قلت لج انا مابغازلها انا بتفق وياها عن الوعد
الي وعدتها به وبمسح الرقم
قلت بتملل: اللهم صبرج ياروح طيب باستأذن منها اول
راشد: سيري محد ماسكج
عفرا: لا شو اسير البنت الحينه نايمه
راشد: عفير بتعطيني الرقم لو شو؟؟؟
تأفت وانا افتح موبايلي: اسميك حشره يود هذا الرقم بس بذمتك ماتضايقها
مسك موبايله ونقل رقم ريوم: والله لو انج اختي جان بستج ............شاو

<<هههههه والله انه خبل هالانسان شعنه فرحان برقمها جيه
.........سرت صوب جناحي للبنات اليالسات بغرفتيه>>

روضه وهي متمده على الشبريه: عموه اسمعي عبير شو تقول اونه ياليت ابوها شرات ابويه عسب تي تسكن هنا شراتي
ضحكت على خبال عبير: والله انج بقره
شمه وعينها بالاب توب: أأأأأأأأخ في حد يعوف ابوج يالثوره
عبير: بسم الله منكن كليتوني بقشوري انا ماقصد جيه بس الاجواء وايد عيابتني هنا
عفرا: خبري أبوج انج بتنامي الليله هنا بس تعالي ماشي محل لج...... انا وروضه نتبادل كل ليله .....وحده تنام على الشبريه والثانيه تنام بالارض
شمه رافعه خشمها: وطبعا الليله الشبريه حقي
روضه: وايد واثقه مشاء الله
عبير: شقايل مستحملين نومه الارض؟؟
عفرا: الا هو شهر ونودع الحلوه ( واغمز لروضه)

......احمر ويه روضه ونكست راسها بطاري العرس...........

شمه: اويلي على اليستحون ماروم عليج
روضه: انطبن يالخايسات بيكن يوم واضحك عليكن.

......دخلت علينا الريم بأبتسامتها المعهوده بس التعب واضح على ويها ....

شمه وهي تفر الاب توب وتوايه الريم : يامرحبا يامرحبا هلا والله بالقمر ماتشوفي شر الغاليه
فريت ويهي لشميم: ياحماره لاب توبي شعنه تفريه جيه!!!!
شمه: الي يسمعج يقول لاب توب شرات الناس
عفرا: مب عايبنج شعنه يالسه عليه
شمه وهي تفر شعرها لورى وبخقه: مضطرين بس

<<رن موبايل ريومه يعلن عن مسج.... وكالعاده ارتبكت رويمه ....بس لما فتحته طالعت فيني بنظرات غريبه .... هاي اكيد راشد رسل لها .... ابتسمت لها وانا زايغه ابتسامه خفيفه احوم احوم ...>>

.............................. ..................

.............................. ...................
ابتسمت لي برائه مصطنعه عسب تخفي اجرامها بس كالعاده ماروم على هالبنت ابتسمت لها انا بعد
طالعت المسج العجيب من يديد

( هلا الشيخه ريم وياج الشيخ راشد ابن خاله ابناء عمومتك
المهم لاتفجين حلقج جيه كأنج بقره مكفخه انا اخذت الرقم من عفير
عسب اسألج ها متى ناويه على المشوار الي خبري خبرج انا انتظر ردج اوكي؟)

<<هالانسان شو يضحكني اسلوبه وايد عجيب الي يحبني بالتعامل وياه
ان يعاملني شرات الباقي يعني مايحسسني ان ناقصني شي .....>>

مسكت موبايلي اكتب له رد
(قبور هلي بدبي)
رد عليه بسرعه وجنه ينتظر الرد
( حلوعيل شو رايج تردين فيانا و نقول لهم انكن بتجهزن اعماركن لعرس جسوم وانتي بتي ويانا وناخذ عفرا بعد)

<<يالله وايد متولهه عليهم بخاطري اسير الحينه بس ماباليد حيله اكتفيت بالرد بكلمه>>

(طيب)

عفرا: شميم موبايلج مسوي حشره ردي
شمه ترفع : هاي اخوج سيف .... هلا سيفوه .... حوه سهيلوه هاي رقم سيف شو طلعك انت بالخط.... احسن تستاهل..... طيب شو تبا .... احللف .... الله .... دقايق وبتشوفونا عندكم ..... باي باي


عفرا: شو بلاج تباغمين جيه شرات البقر
شمه : واي بنات بنات يالله انتشرن سهيل يقول لكم الشباب عازمينكن على آي سكريم باسكن واي بتخبل بتخبل يالله تلبسن

<<ابتسمت على خبال شمه شو سالفتها كل هاي لانها بتطلع .... طالعتني عفرا ومسكت
ايدي>>

عفرا: اكيد بتسيرين فيانا دخيلج

<<شو بلاها عفير تدري بي اناماحب السياير مابا اروح ... اكتفيت بهز راسي بالنفي>>

عفرا: والله ان ماسرتي بزعل عليج هاي اناقولج

<<بهالحظه وصل مسج من الجني راشد يهدد>>

( بخبرج ان ماشفتج فيا البنات ماشي سيره لدبي تشاو)


طالعت عفير بدهشه.... ومديت لها الموبايل عسب تقرا المسج

عفرا: ههههههههههههههههه فديته والله تستاهلي التهديد

<<سحبت الموبايل عنها وسرت اتلبس مافيني لازم اسير اسميه راشد مذله >>

راشد اول ماشاف قروبنا قروب البنات حذال سيارته: خيبه سهيلوه عازم كل هايلا!!
سهيل شاق الحلج : هيه افا عليك بنات اخويه عبير ورويض مالي غنا عنهم واختيه الغاليه وبنت خالوه شمامي فديتهن طالع طالع شقايل هالوجيه بريئه
راشد بطنز : هيه بريئه وايد
سهيل يطالعني بستغراب: ريوم !!!! انت سايره فيانا؟!!!
راشد يطالعني هو الثاني: هيه طالعها بعد تبا تركب اول وحده حشى عليكم بنات زايغات على أي سكريم ( كمل كلامه وهو يصفق ) يالله بنات اركبن وحده وحده بشويش على سيارتيه لاتعور

ركبن البنات وهن ساكتات عن هالخقاق عسب يضمن الطلعه اما انا ساكته لان مالي رغبه بالطلعه اوبالاصح لان ماروم ارمس
سهيل ركب جدام ويا راشد اما انا وعفرا وسيف ورى ورنا يالسات شمه وعبير ورويض
يلست اطالع سياره راشد صحيح هب اول مره اركبها بس اول مره انتبه لها وايد فخمه وريحه الكلونيا فيها وايد حلوه .... انتبهت لراشد الي يالس يطالعني من الجامه.... عطيته نظره اعبر فيها عن عدم راحتي بهالطعه عسب يحس بتأنيب الضمير....وفريت ويهي عنه اطالع البنات وهن يرمسن وانا عاجزه اشاركهم حديثهم .....كنت اطالع بشفايفهن وهن يرمسن شو فيهن زود عني؟؟ ..... انا بعد فيني لسان شعنه ماينطق شعنه........ احس نفسي مخنوقه صعب يوم تعيش وانت ماتروم تعبر عن نفسك وعن رايك وايد صعب.......تكتم المصايب الي تنزل عليك في قلبك ولا حد يشاركك فيها غير نفسك الي من جهتها تتعب ولا تستحمل وتضعف في كل مصيبه تنزل عليها هيه يانفسي وايد ضعفتي .... مصايبي كثار وصدماتي اكثر...


.............................. .................... ..................

.............................. .................... ........

( والحينه وين بنسير؟)

قالتها لي شميم وهي ماسكه بثباني شرات اليهال

راشد: شو بعد وين بنسير..... آي سكريم واكلتي شو تبي بعد يالله على البيت
شمه تزاعج: لالالالالا شو نسير البيت مابا فديتك خذنا للمول فديتك اخويه
التفت لسهيل الي وهقنا: والحينه شو الحل ويا هالياهل تراك انت الي وهقتنا بهالطلعه بنات ماينعطن ويه

سهيل: بس ناخذهن المول نشرب كافي ونرد شو رايكن
تناقزن البنات شرات الخبيل: الله عاش سهيل مناصر البنات عاش عاش
راشد: اركبن وانتن ساكتات

<<طول الدرب وانا اطالع الريم من الجامه شكلها مب حابه الطلعه ابد ..... بس مادري شو بلاني عليها هي بالذات ........ خاطريه اطلعها من هالي فيه بس شكلها هالبنت صعبه وغامضه .... انتبهت لنظراتي فابتسمت لها تلقائي.... ولأول مره ماردت لي الابتسامه !!!!! وناظرتني بنظرات غريبه اشبه بالاحتقار!!>>

قلت بدون نفس وانا انزل من السياره: وصلنا

<<تقدمتهم وانا ضايج.... بلاها تناظرني جيه ... هاي يزاي يعني انا شو لي بهاي البنت
الطرمه اسميني متفيج .....قطع علي افكاري مسكت سيف لأيدي>>

 
قديم   #12

جود ي الحلوه


رد: رواية التبل إماراتيه روعة


رواية التبل إماراتيه روعة

الج 13زء

.............................. ................



<<طول الدرب وانا اطالع الريم من الجامه شكلها مب حابه الطلعه ابد ..... بس مادري شو بلاني عليها هي بالذات ........ خاطريه اطلعها من هالي فيه بس شكلها هالبنت صعبه وغامضه ....
انتبهت لنظراتي فابتسمت لها تلقائي.... ولأول مره ماردت لي الابتسامه !!!!! وناظرتني بنظرات غريبه اشبه بالاحتقار!!>>

قلت بدون نفس وانا انزل من السياره: وصلنا

<<تقدمتهم وانا ضايج.... بلاها تناظرني جيه ... هاي يزاي يعني انا شو لي بهاي البنت
الطرمه اسميني متفيج .....قطع علي افكاري مسكت سيف لأيدي>>

سيف يطالعني بنص عين: شو هاي حشى تركض ركيض سباق شو
راشد: لا بس ماني متفيج لحشره البنات
سيف: ههههههه واحليلهم والله سويتو فيهن خير يوم طلعتوهن

<<يلسنا كلنا على طاوله من الطاولات بالمول وكنت اتحاشا النظر بالريم عسب لاتتحسبني ميت عليها.....اصلا من تكون عسب اموت عليها ... هاي الي ناقصني بعد
يلسنا نشرب الكافي والحشره قايمه بسبه عبير على طاولتنا لدرجه الي بالطولات الثانيه يطالعن فينا مستغربين من الحفله الي عندنا .... وايد فنانه هالبنت>>

راشد: ههههههههههههه اسميج ياعبير سوالف
عبير: والله اقولك خلاص ويها صار شرات الطمامه مسكينه واحليلها
عفرا: هيه بعد الي سويتي فيها تقولي مسكينه حرام عليج قم للمعل وفه التبجيلا
عبير: سيري شو قالت قم للمعل
روضه تكلم سهيل: الشيخ ممكن طلب؟
سهيل: انت تطلبي عيوني
روضه شاقه الحلج: فديتك ابا موبايلك برسل لي جم صوره لك
سهيل وهو عافس ويهه ويطالع بشميم اختيه بطرف عينه: مايبته ويايه
عفرا: ههههههه هههههههه ههههههه اكيد مابتيبه وياك
شمه مسويه عمرها بريئه: ليش؟؟؟؟ شو فيه موبايله
عفرا: هههههه خلاص شموه والله اني ماسكت من الضحك الا بعد الموقف بخمس ساعات الشيمه لاتذكريني ههههههه
روضه: شو فهمونا السالفه عاده
سيف : ههههههه الله يرحمه موبايله طاح بالمسبح وهو يتسبح
شمه تسوي عمرها تشهق: لالا خساره كان موبايلك وايد جميل
روضه تلتفت على سهيل: افا ولا يهمك انا بيب لك ثاني
سهيل: لالا فديتج لاتكلفي على عمرج انا اقدر اشتري لي بدل الواحد عشره بس مقايض بناس مابشتري وموبايلي هاي بيتصلح وبرد استعمله
شمه وهي تطالع بصبيعاتها: حششى زطي عنبو اشتري موبايل يديد احسن لك
سهيل: مابا

<<لا ارادي رديت التفت لريم .... الكل يالس يسولف ويضحك.....
وهي ماتشاركهم حتى بأبتسامتها المعهوده.... ظلمتها يعني مب بس انا ماتبتسم لي .... كانت سرحانه ومب منتبهه لنظراتي ....فجأه طاحت دمعه من عينها ومحد انتبه لها غيري انا وعفرا الي يالسه حذالها >>

راشد: عفور انتي مو جنج من شوي قلتي تبي الحمام؟
عفرا وزين يوم فهمت شو اقصد: ها هيه أي ابا اسير ( ومسكت ايد الريم) قومي فيايا الريم

<<سرنا بعيد عنهم كنت امشي جدامهن وهن ورايه .... وقفت حذال مطعم صغير بالمول ...دخلنا ويلسنا على الطاوله ....اما الريم ظلت واقفه بمحلها
وقفت وسرت صوبها .... سحبتها بشويش ويلستها على الكرسي .... ويلست حذالهن هي وعفرا

راشد: انا اسف ان طلعتج غصبن عنج لان واضح من بدايه طلعتنا وانتي هب مرتاحه
عفرا وهي تمسك ايدها: شو بلاج ريومتي ؟حد ضيقج؟

<<ماردت علينا وغطت ويها بأيدينها ويلست تصيح بصوتها .... لوت عليها عفرا وهي تمسح على
راسها .....غمضتني وايد هالبنت مادري ليش ماقدر استحمل اشوف دموعها احس قلبي يويعني
يوم تطيح منها دمعه ... رفعت راسها عن صدر عفرا بعد ماهدت ... ويلست تمسح دموعها بأيدينها
وردت تطالع فيني بنظرات مامفهومه >>

راشد: الريم والله اسف بس حبيت اخليج تغيري جو بعد طيحتج لازم تفرفشي شويات
عفرا تمسح على راسها: ريومتي انتي وايد كنتي قويه شو صاير بج تغيرتي جيه
نكست راسي: ادري وايد ثقلت عليج بس مب قصدي اني اجبرج
عفرا تبتسم لي: لا الريومه اكيد ماتصيح عسب جيه
قلت لهم وانا انش: قومن خلاص بنسير البيت

<<لما قلت هالجمله طالعت فيني بسرعه .... بس هالمره كانت في نظراتها الفرح ....
خيبه لهالدرجه مب حابه الطلعه!!!! ... اخذت الفون ودقيت على سهيل عسب يطلعو وتلاقينا على الباب >>

ركبنا السياره بس هالمره سهيل يالس يسوق بدالي .... مسكت موبايلي عسب اكتب مسج لريم

(( الشيخه الحينه بعد مانرد خبري خالوه انكن انتي وعفير بتردن ويانا دبي اوكي؟))

سمعت صوت وصول مسجي لموبايلها ...

 
قديم   #13

جود ي الحلوه


رد: رواية التبل إماراتيه روعة


رواية التبل إماراتيه روعة

شويه واسمع صوت موبايلي يعلن عن وصول مسج

(( طيب))

مسكت موبايلي من يديد
(( اباكن جاهزات على الساعه 9 الصبح))

ابتسمت اول ماسمعت صوت وصول مسجي لها
ردت عليه بسرعه بنفس الكلمه شو ماعندها غيرها
(( طيب))

سهيل يتلفت لنا: شو سالفه هالمسجات ها؟؟
اسمينا رخوم يالسين نتراسل ولاكنه حد موجود شو اقوله الحينه: ها ماشي مسج مابعد افتحه
سهيل : لا والله حرمتك وهاي ويانا((يقصد سيف)) عيل تراسل منو
سيف يخزني بنص عين: اسكت انا بروحي ميود عمري من مساعه
طالعت سهيل بنص عين: شو تغار يوم يجيني مسجات؟ وانت لا
عفرا تبي تبعد الشبهه : ههههههههه شكله يغار اما انا تعودت على الريم دوم موبايلها يزاعج بهالمسجات
سهيل: فايج اغار منكم
شمه تزاعج بصوتها لانها بأخر السياره: هيه تغار لان موبايلك من اليوم ورايح مابتسمع حسه ههههههه
سهيل: سكت اختك لا اسوي بكم حادث
راشد: والخيبه هذا الي بنفذنا...


.............................. .................... ........

.............................. .................... .......
اصبحنا واصبح الملك لله
فريت موبايلي على الشبريه ويلست امشط بشعري ... الي يسمع من طول الشعر ههههههه وايد فرق بيني وبين سهيل خويه .....انا من النوع الي مايحب يطول شعره بس احب اخليه كثيف...... وهو مشاء الله شعره اوقات يوصل لكتوفه .... هيه صح ماخبرتكم اليوم انا وايد فرحان اتصل علي هاي الي خبرتكم عنه ذاج اليوم عبدالله يخبرني بنتايج ويقول لي ان شي علاج لحاله حمدانوه برع وماقصر بيتوسط لنا بلندن بعد ..

<<مسكت موبايلي من يديد وضربت رقم حمدان وتمدت على شبريتي براحه>>

سيف: هلالالالالا مليون مرحبا.............شحالك الشيخ

<<دخل علي راشد بها الوقت وانا ارمس وهو يشرب كافي .......... هههههههههه كان شكله وايد يضحك لابس بجامه نوم سماويه والمعاقم من فوق مفتوحه شرات السكرانين ههههه وشعره طالع معفوس بسم الله وبالله واضح ان توه ناش من نومته بس مب جنه يعري بمشيته؟!!!!>>

راشد يخزني بنص عين: ترمس منو؟
ابتسمت له: حمدان
( وكملت سوالف مع حمدان) :هيه والحينه انت شحالك؟؟...............ههههههه والله؟؟؟ ...........امم خلاص برد ويا راشد دبي وبخبرك بخبر وايد حلو............ هههههه يالساحر هيه طلعو والحمدلله في علاج لك برع يعني خلاص جهز عمرك ....امم لندن .... حمدانوه بعدين نتفاهم..... يالله فديتك باي

راشد يقلد صوتي يوم اعتذرت منه البارح: والله ماروم ارد وياك دبي عندي وايد اشغال ( ويكمل وهو يزاعج) ويوم حمدان كلمك تسبهت جنك بقره وتبا ترد دبي ها
دوم تضحكني غيره راشد عسب لاتلومو حد يوم يقول جنه ريال وحرمته ههههه: شو بلاك غادي جبريت كنت اجامله بس
راشد يلس على الكرسي: وايد تجامل مشاء الله وبعدين شو سالفه لندن هاي .......
هيه ماخذ عقلك حمدان بتسافر ولاتفكر تخبرني
عدلت يلستي وقلت بجديه يمكن يكسر خاطره : راشد بخبرك شي عن حمدان
راشد بدون نفس: شو بعد
سيف: امم حمدان في سرطان بالدم
راشد:!!!!!!!!!!!!!!
سيف: بس طرشنا اوراقه برع والحمدلله الرد يقول ان شي علاج هناك
راشد: ماحد خبرنا!!!
سيف: هيه حتى هله مايدرو عن شي
راشد يحط كوب الكافي على الطاوله: غمضني !!! حرام والله .... الله يشفيه يارب
ابتسمت دومه رشودي قلبه ابيض وحنون : طيب ماقلت لي متى بتردو دبي
راشد حايس بوزه: خيبه تبي الفكه .... على الساعه 10 ترى بتسير فيانا عفير اختك ورويض وعبير بنات اخوك وبنت عمك الريم
انصدمت شو هاي التطورات الريم مب بس قامت تطلع قامت تمسك درب: شو !!! الريم!!!
راشد مبتسم: هيه الريم شو بلاك جيه مستغرب بيسيرو يجهزو لعرس جسوم
سيف: ههههههه والله تطورات انا بروحي البارح مامصدق انها طالعه ويانا والحينه بتسير وياكم دبي مره وحده!!!!!
راشد اونه يتفلسف: ياريال محد يظل على حاله
تذكرت خيانته لي البارحه وطالعته بنص عين: شبعت ياحمار من النومه وياسهيل؟
راشد: تستاهل عسب ماتخليني ثاني مره متفيزر بالميلس و تسير عند ربعك عقاب لك انام ويا سهيل
حست بوزي واوني زعلان: وايد عقاباتك مشاء الله وبعدين تعال شو بلاك تعرج؟
قام عني وهو يضحك : مابلاني شي بس تويعني ريلي شويه وبعدين تستاهل الي يجيك مني ترى ماتسكر خاطريه وايد

<<<<ههههههه ياحليلك ياراشد اسميها الي بتضوي راسك امها داعيه لها وين يحصل الواحد حد شراتك .....
لاتخزوني جيه كيفي احب ولد خالتيه يه!!
اخليكم عبدالله يتصل بي!!.....>>>>
.............................. .................... .

.............................. ...................
( وانا بعد بتوله عليك ..... خلاص عاده سكر الخط بيلس ويا البنات ...... لالالا انت اول ....هههه اوكي 321 باي)
سكرت عن جسومي اونه متوله علي لان سرت عنه دبي .... بالموت طاع ارد دبي وياهم عسب اجهز عمري للعرس ... مصدقه عمري اوني عروس ....تصدقون عاد وايد ولهانه على ضرابه ابويه وامايه..... ماصدقو على الله اني طلعت من البيت حتى ماكلفو خاطرهم يرفعو السماعه يباركو لبنتهم ... وهم بعد ولهانه على اخويه هزاع فديته ماقصر ياني الملكه بدون ابويه يدري وبارك لي بس الحينه وايد مشغول بالبيت ... الله يعينه على امايه وابويه

شمه: حوه رويض وين طار عقلج كلاه جسوم؟
التفت لها : هههههه خسج الله ريلي فديته ماياكل عقول
عفرا تلبس عباتها: امم بنيات يالله نخليكن انا وريوم بنسير مكان
شمه تنط : وين بتسيرين!!!!!! اعترفي بسرعه
عفرا: ويعه بنسير محل خاص انا والريم بوصلنا راشد
عبير: ياحلالالالاوه خذوني وياكم مابخبر حد
شمه: ياسلام ياسلام البنت برقبتنا ماسمعتي توصيات ابوج
عفرا: ادري وعن الحشره اقول لكن ..... وبعدي هي انتي ما تأمني على اخوج؟
شمه حاطه ايدها على خصرها: وشعنه راشد يعرف ونحن لا
قلت لها معترضه: هيه صح شعنه راشد يعرف ونحن لا
عفرا تلتفت لريم الي يالسه تلبس شيلتها: شو اخبرهن هايلا الحشره؟

...........ابتسمت الريم وهزت راسها بالايجاب.........

عفرا: بنسير نزور قبر عمي
شهقت: شو!!!!!!!! تخبلتو؟
شمه: صدقهم تخبلو والمتخبل اكثر عنكم راشدوه
عبير: شو بلاكن حرارتكن مرتفعه شو؟
عفرا: بلا بقاره انتي وياها البنت بس تبا تشوف قبور هلها وبعدين لاتخلوني اندم اني خبرتكن ياويلكن ان حد درى بهاي الموضوع هاي انا احذركم حتى انتي يارويض لاتخبري جسوم بعدين يخبر ابوه وانتي شميم لاتخبري خالتيه فضيحه
شمه: حلفو بس يلسن محلكن واصطلبن وبلا هالمنكر

<<حسيت ان الريم اخذت بخاطرها من كلمنا ودلاله على هذا طلعت من غرفه شمه والضيقه بويها والدموع بعينها>>

عفرا وهي تلحق الريم: حسابكن لما ارد يالفاشلالالالالات
شمه تلتفت صوبي وصوب عبير: اويلي شكل البنت زعلت
عبير: براحتها نحن قلنا الحق بصراحه شو هالمنكر يسيرن للقبور
انصدمت من كلام عبير: !!!!!!!! عبير شو هالرمسه هاي ؟؟!!!!!
شمه: انا اتوقع بيتحسن حالها لما تسير وبتأقلم ويا الواقع
عبير: دخيلج سكتي بس وبعدين شو له اخوج يطيعهن؟
شمه تخزها بنص عين: اخويه ياحبيبتي يحب يسوي الخير
عبير: اها

<<<<استغربت من ردت فعل عبير وايد شو بلاها على الريم!!!>>>>>

.............................. .................... ..............

.............................. .................... ..................
<<<ركبن السياره بعد ما اخذت سلمان الي موكله زوج خالتيه على حراسه الفله براتب شهري يوصل له..... وايد طيب هالانسان وعلى قد حاله الي اسمعه ان يسير كل اسبوع لقبر ابو الريم ويسقيه ماي ويقرا القرآن ......... تحايلت على امايه اني ابا الغدا اليوم من ايدها واحليلها ماقصرت وسارت تعابل بالمطبخ وانشغلت به وطلعن البنات بدون ماتحس..... كانت الريم طول الوقت ساكته وعلى ملامحها الحزن حتى الهفه الي كانت بويها اختفت مادري شو بلاها يمكنها متوتره ... >>>

سلمان: من ذاج الصوب يالله

<<دخلننا المقبره وسرت ويا سلمان ........وعفرا والريم ورانا >>

سلمان يأشر على القبور : هاي قبر خليفه وهاي الوالده وهاي الوالد رحمه الله عليهم


<<التفتنا كلنا على الريم نتظر رده فعلها.... بس كانت بعيده عن القبور ومتيبسه بمحلها وضامه ايدينها لصدرها ..... حاولت اتناسا الم رجلي الي تويعني وتقدمت لريم>>>

راشد: الريم تقربي اقري عليهم الفاتحه
عفرا وهي تمسك بأيدها وتمشي فيها لصوب القبور: هاي طلبج وتحقق يالله حبيبتي

<<<احسها بعالم ثاني مب ويانا ابد .....كانت تطالع القبور بعيون مليانه دموع .... احس بالغصه في قلبها....... شو شعور الواحد يوم يفقد كل هله؟!! بيوم وليله .... اكيد شعور صعب ...حركت ايدها تتحس رمل قبر امها وابوها .........
الشي الوحيد الي ينسمع من الريم .... هو صوت بجيها .... كانت تصيح بصوت مسموع
يويع القلب .... يلست عفرا حذالها ولوت عليها تهديها ... خفت لايصير للبنت شي وأكون
انا السبب ......... ياربي انا يبتها لهالمكان لان متأكد ان بتتحسن نفسيتها ..... احفظها
بحفظك يارب>>>

سلمان: الريم انتي جيه تعذبيهم اقري الفاتحه وترحمي عليهم

<< بعد ماهدت من بجيها قامت من حضن عفرا وقرت الفاتحه عليهم .... بس الي لاحظته
انها ماقربت لقبر اخوها خليفه!!!!!... غريبه الي سمعته ان مات وهو على يدها ..... يعني
المفروض تكون اكثر شي متولهه عليه هو خليفه!!....... بعدت هالفكار عني يوم حسيت
ان ويع رجلي زاد وصار لايطاق >>

عفرا: عندك ماي راشد بالسياره ؟
راشد: هيه
عفرا: ناولني عسب ريوم

<< نوالتها الماي وكملت طريجي وانا حابس انفاسي عن لا اصرخ من الويع>>


.............................. .............


.............................. ................

عفرا: سلمان دخيلك تصرف
سلمان ماسك راشد: شو بلاك شو يويعك؟
راشد منكس كل جسمه من الويع ويصارخ بصوته: بموت خذني لأي مستشفى دخيلك سلمان ماروم اكثر عن جيه دخيلك

<< فتح سلمان الباب الي من صوب راشد وسنده وركبه الصوب الثاني .... طول الطريج مانسمع غير صوت صريخ راشد!!!..... ياربي انا شو سويت بليت الريال بي .... الله ياخذني وين ماروح لازم تصير مشاكل.... ياربي سترك صريخه وصياحه يويع القلب.... صدقو البنات يوم قالو طلعتنا منكر .... تجمعت الدموع بعيوني .......

وصل سلمان المستشفى واخذ راشد معاه وبسرعه دخلو لطوارئ .... اما انا وعفرا بالسياره ماندري شو بصير ..... >>

عفرا والدموع بعيونها: مسكين راشد شو بلالالاه جيه

<<<حسيت ان عفرا مستهمه وايد ولا حبيت ازيدها ............. فضلت السكوت او بالاصح ماروم اهون عليها لان مالي لسان مالي غير المصايب

رد سلمان بعد فتره لسياره وهو يمسح عرقه الي براسه>>

عفرا: شو فيه ؟؟ خبررني
سلمان يلتفت صوبنا مستغرب: شو انتو ماتدرو........

 
قديم   #14

جود ي الحلوه


رد: رواية التبل إماراتيه روعة


رواية التبل إماراتيه روعة

.............................. .................... ..........
الج 15 زء
.............................. .................... ..............








<<<حسيت ان عفرا مستهمه وايد ولا حبيت ازيدها ............. فضلت السكوت او بالاصح ماروم اهون عليها لان مالي لسان مالي غير المصايب

رد سلمان بعد فتره لسياره وهو يمسح عرقه الي براسه>>

عفرا: شو فيه ؟؟ خبررني
سلمان يلتفت صوبنا مستغرب: شو انتو ماتدرو ان عنده تكسر بالدم؟!!!!
عفرا تشهق: شو!!!!!!
سلمان وهو يسوق ويطالع الدرب: يعني فقر دم منجلي ان ماهتم بعمره تجي له الآآآم شرات جيه بريله ولا ايده ولا بطنه ..... الله يعينه على مابلاه
عفرا والدموع بعيونها: حرام ...... فديته والله مايستاهل والحينه شو حاله ؟
سلمان: طلعت عنه وهو بعده يتألم بس عطوه مغذي وخبرني الدكتور ان لازم يتنوم بالمستشفى

<<طالعت عفرا وانا عيوني تصب دموع....... يعني الريال يتألم بس حاب يوفي بوعده لي ..... الله ياخذني الله ياخذني الله ياخذني>>

عفرا ماسكه ايدي: ريوم مابصير الا كل خير صلي على النبي
سلمان : راشد خبرني اني اوصيكم ماتخبرو حد عن الي شي صار مادري شو يقصد بس قالي انكم بتفهمو .... وهو بيتصرف
عفرا: طيب
سلمان : يالله نزلن لان سيارته بتظل عندي وبياخذها من عندي يوم يطلع
عفرا: جزاك الله الف خير ياسلمان والله يعطيك على قد نيتك

وقفنا شوي بعيد عن البيت ونزلنا بسرعه لداخل ... ونحن نفكر شو بصير
اول مادخلت الغرفه يات شمه صوبي .....
شمه: آسف ريوم على الكلام الي مساع.... انتي من حقج تسيري لهم ... والله ماكنت اقصد

حاولت استجمع الاحداث الي طافت وتذكرت كلامهم واعتراضهم ....وتذكرت اهم شي .............
................تذكرت قبر امايه وابويه....وبلايا شعور نزلن دموعي رميت نفسي بحضن شمه .... يلست اصيح بصوت مسموع .... آآه يامايه قلبي وايد يويعني ابا اصرخ اقول وينكم عنيه .... شعنه تركتوني .... والله احتاي لكم وايد ... نفسي ضايعه بدونكم ... جيه تخليني ابويه وانا بنتك دلوعتك ؟؟ جيه تسوي فيني؟؟

عفرا تمسح على كتفي: ريوم حبيبتيه خلاص بسج ...... تراج خرعتي شمه
شمه تلوي علي زود: لا خليها تبجي وتطلع حراره فوادها ... صيحي حبيبتي

شو ابجي هو بقى لي دموع؟...... وين الريم الي قبل .... وين الي كانت مايهزها شي وشخصيتها اقوى من اليبل.... الحين مابقى الا الريم الي جسم بلايا شعور..... الريم الناقصه .... الريم الي على الاقل موقف طاحن دموعها.....الريم الي مافي حد يسمع صوتها وصوت قلبها المجروح .... آآآه ياليت ربي خذاني قبل ذاج اليوم ياليت.......
.............................. ..................

.............................. ................

( حياك ياسيف بن زايد)

دخلت بيت عبد الله الي عازمني على الغدا بدون مناسبه !!! أونه توله بالجلسه ويايه

سيف: يحيك ربي شو وين محمد؟ مايا؟
عبدالله يقدم لي الماي: خله عنك هاي عند حرمته يالس
تلفت على الصاله الي ميلسني فيها: شو ماعندك حد بالبيت ميلسني بالصاله؟!!
عبدالله مبتسم ويلس حذالي: هههههه انا وحيد ابويه..... وامايه عطتك عمرها من زمان
غمضني وايد : الله يرحمها يعني انت يالس بروحك بالبيت
عبدالله: هيه وابويه دوم منقع بدبي عسب شغله
ابتسمت له: الله يعينك لو انا محلك كان صرت مينون لان ماحب اليلسه بروحي
عبدالله: ههههه لا انا تعودت بس حاب اطلع من هالعزله شويه
سيف: شو ماعندك ربع انت؟
عبدالله: عندي واحد وكانت علاقتي به قويه بس للأسف توفا بحادث
قلت بأسف: لاحول ولا قوه الا بالله الله يرحمه
عبدالله: يوم توفا كل الدنيا اسودت بويهي ..............وتصدق عاد توني طالع من عزلتي عليه.......
ابتسمت له: الحمدلله زين والله
عبدالله: خلك ياريال من هالسوالف .. شو تحب تاكل ؟ سمج ولادياي اطلب شو
سيف: امم أي شي عادي
عبدالله: ياريال لاتستحي كل شي موجود
سيف: خلاص خله سمك
عبدالله وهو ينش: اوكي

سار عني من صوب وانا من الصوب الثاني يلست اطالع بيتهم .... وايد كبير وفخم حرام بس واحد ساكن فيه!!! .... الغريب من هاي ان للحين مامتزوج !!! ولا راغب بالزواج اصلا ... الي مثله الحينه عنده اربع وكل وحده منهن تدور رضاه .... شو ورى هالانسان الله العالم ... صحيح كنت مامرتاح له بالبدايه ....بس الحينه وايد غامضني وكالعاده طبعي ماحب اخلي حد اعرفه طايح بمشكله وانا متكتف بأيدي .....واهو قال حاب يطلع من هالعزله وان شاء الله راح اكون اول المساعدين له على هالشي.....

( حيالله من يانا)
قالها وهو يلس حذالي ويحط ايده ورى ظهري : شو اشوفك سرحان بالبيت اذا عايبينك مايغلا عليك والله
سيف: هههههههههههه لا بس يالس اقول حرام هالبيت وماساكن فيه حد غيرك
غمز لي وناظرني بنظرات غريبه: منو تبا يعني يسكن ويايه؟
سيف: امم مثلا زوجه
رد وهو يتأف: الله يخسك على هالطاري اسكت دخيلك شو قال زوجه
سيف: خيبه هههههههه عنبو

قطع كلامنا رنه موبايلي ... بسرعه طلعته من جيب كندورتي لاني كنت متحسب المتصل راشد .............من الصبح حارق موبايله ولا يرد علي هين ياراشدوه
صابتني خيبه امل يوم شفت المتصل رقم غريب حطيته على السايلانت وفريت الموبايل حذالي

عبدالله: شو؟؟ حد زاعجك بأتصالاته
ابتسمت: لالالا بس كنت اتحسب راشد ولد خالتيه متصل ... بس طلع رقم غريب
عبدالله: امم لهادجه تنتظره بشي مهم
سيف: ههههه لا بس لازم كل يوم نكلم بعض..... وان ماكلمنا بعض اعرف ان لازم تصير هوشه بيني وبينه أونه شعنه انشغل عنه
عبدالله: لهادرجه متعلق بك؟
سيف: هيه وانا متعلق به
عبدالله وهو يتنهد: ياحظه بك والله
سيف: هههههه تسلم فديتك
عبدالله: على جيه اكيد بعصب لانك الحينه منشغل عنه عندي
سيف: لالا ماعنده عذر لانيه حارق موبايله من الصبح ولا يرد علي يعني انا الي بعصب
سكتنا شويه بس قطع هالصمت عبدالله : امم سيف
التفت له: ياهلالالا
عبدالله بتردد: انا من شفتك ارتحت لك ..... بصراحه حاب اكون ربيعك اذا توافق
سيف: ههههههههه وابويه على الرسميات
عبدالله بنظرات مستغرب: شو مافهمت
حطيت ايدي على كتفه وابتسمت: اقصد بلا هالرسميات وان شاء الله الايام بتخلينا رباعه ومع بعض
عبدالله: يعني انت ماتعارض؟؟؟
سيف: عشو اعارض!!!! حد يعارض ان يرابع حد ؟ وانا ماسمعت عنك شي يخليني اعارض على مرابعتك
عبدالله : لا ما اقصد جيه بس يعني يمكن مثلا راشد
سيف: ههههههههههههههه لا عاد راشد مب لهادرجه بقولي لاترابع حد بالعكس راشد حتى على ربعي يتعرف
عبدالله: والله شي طيب ..... اقول يالله عن السوالف وتفضل الغدا جاهز ................

.............................. .................... .......

.............................. .................... ......
يلست حذال امايه الي يالسه تصيح وحالتها لله وانا ايدي على افادي واحليلك ياخويه تكسر بالدم!!!

شمه: ابويه متى ياه ؟!!
ابويه: مادري سرت له المستشفى بس راقد لان ماخذ ابره
امايه: واويلي على ولديه الحينه بيظل جيه شرات فيصل ولد يارنا صوت صريخه يوصل لنا و كل شهر منوم بالمستشفى
ابويه: استهدي بالله مب شرط يطلع شرات فيصل
امايه: ودني له ابا اشوفه
ابويه: بوديج بعد صلاه المغرب قومي توضي مابقى عليها شي صلي وادعي له

تركت امايه وابويه وسرت للبنات غرفتيه وخبرتهم بهالخبر الخايس
روضه: واحليله حرام والله
عبير: غمضني
عفرا: بدل ماتصبرو الحرمه يالسين حرام وغمضني ( يلست حذالي ولوت على ذراعي) ماعليه حبيبتي ان شاء الله يكون زين وايد ناس جيه شراته انتي ادعي له فديتج
ابتسمت لعفور دومها ترفع من معنوياتي: يعلني فداج ابا اسير له بس ابويه بشل امايه فياه..... شو رايكن نسير نحن رباعه؟
عبير: لالالالا اذا يتألم وايد مابا اخاف اشوف جيه مناظر
عفرا زامه على ضروسها: محد جابرج بس من باب الواجب نحن بنسير وانتي براحتج
طالعت عفرا: اخليكم انا بسير اكلم اليازيه بنت عمي عسب تي تاخذنا بسيارتها صوب المستشفى

<<كلمت اليايزيه ولما عرفت بالي براشد تأسفت وايد على حاله وخبرتنا انها بتينا بعد نص ساعه
يهزنا حالنا وطبعا عبير هالدلوعه هاي انجبرت انها تي فيانا لان محد بالبيت........>>

.............................. ............


.............................. .............

( اخويه فديتك عسى فيني ولا فيك)
قالتها شمه وهي تلوي عليه ..... ابتسم لها بس ابتسامته فيها تعب وذابله

كنا مستحيات وقفات حذال الباب

ابو سلطان: ادخلن بناتي لاتستحن انا طالع
عفرا ومادري من وين ياتها الجرأه: لا عمي ايلس حشى ماتقوم
ابو سلطان بأبتسامه كلها هيبه: لا والله لازم اسير عندي شغل بالشركه ضروري

قال جملته وطلع عنا .... تقدمنا حذال شيومه الي يالسه عسرير راشد

عفرا: اجر وعافيه راشد ماتشوف شر
روضه: والله روعتنا عليك ماتشوف شر الغالي
اليازيه: اجر وعافيه ولد العم
عبير برقه: معافه

اما انا لساني مانطق ........... خاطريه اتكلم واقوله مشكور ماتشوف شر...... جزاك الله الف خير...... أي شي اهم شي اكلمه واتشكره على معروفه ويايه

راشد بتعب: الله يعافيكم

قال جملته وطالعني .... نكست راسي احس نفسي متفشله وايد ... مابا عيني تطيح بعينه

راشد: شحالج الريم؟

رفعت راسي وطالعته.... من يومه وهو مايحب يحسسني اني ناقصه.... يمكن لاتحسيسي بالنقص كان اول تصرف تصرفه ويايه...... طالعته وكتفيت بهز راسي بالايجاب

ام سلطان: فديتج الريم تعالي يلسي حذالي

طبعن كلهم يلسو يطالعو فيني على اهتمام ام سلطان ........... حزتها حسيت نفسي مقفطه من نظراتهم وسرت ايلس حذالها

عفرا: شي حمام هنا؟؟؟
راشد يأشر: ذاج الصوب بسرعه لاتخيسي غرفتيه



الكل: هههههههههههه
عفرا: خسك الله حتى وانت تعبان يالس تتحرش بي
اليايزيه بعد ماسارت عفرا: تعرف شو ......هاي الي يالس تتحرش بها اخرتها بتصير حرمتك
ام سلطان تنط: لالالالا شو
اليايزيه: غريبه هاي بنت اختج!!!
ام سلطان: هيه مابتروح بعيد انا ابها لسلطان

قطع رمستنا فتحت الباب ........... اوف شو هاي الهيبه كلها ..... منو هاي؟!!......هاي شرطي!!! يعني هاي سلطان الي ترمس عنه عفير!!!! ......صدق هيبه شرات ماقالت مشاء الله عليه

اليازيه: عنبو طالع البنات شقا زاغوا بدخلتك ههههههه.....(تلتفت صوبنا) بنات ترى هاي ولد العم

سار صوب راشد وملامحه مازالت جديه سلم عليه ويلس يسأله عن احواله ....... شويه وفر ويها حذالنا نحن البنات ويلس يطالعنا

راشد يضربه عكتفه وبصوت مسموع: الي تدور لها بالحمام
تحولت ملامحه الجديه الا ملامح حنونه وابتسم: هههههه لا والله احلف بس انت هاي الي يقولو عنك مريض وتصارخ وحالتك لله ماشوف شي وبعدين شله يالسين تحشو فيني (يتلفت لامه) ها امايه
ام سلطان: حشى شو انا ماحشيت
سلطان يطالعها بنص عين: سمعت حسج يقول ابها لسلطان شو هاي؟
راشد: تقول انها تبا تيوزك عفرا بس انا قلت لها اني اباها لي حليلتي

حسيت من ويه سلطان تغير واحليله يعني هاي صج يحبها
سلطان بهمس: ان شاء الله

راشد : هي اكيد ان شاء الله غصب طيب باخذها هاي انا اقولك

عبير: ماتوقعت عموه مطلوبه جيه هههههه

بهالحزه طلعت عفرا من الحمام وهي تتحلطم: شو هاي حمامك ريح

قطعت كلامها يوم شافت سلطان وتيبست .....هاي مخبله اسميها تفضح عمرها

سلطان وهو يطالعها بنظرات وايد حلوه: شحالج عفرا؟
عفرا تحرك شيتلها بتوتر: بخير الحال يسرك ( وسارت صوب البنات وهي منكسه راسها )
سلطان يلتفت لراشد: متى ياك الألم؟
ام سلطان تقطاعه: من متى تدري عن اخوك ولا تخبرنا يالخايس
سلطان: هههههههههههه من يوم وهو يدرس برع ويقول ان فيه ويع ويوم وصفه لي قلت له صدقني ان تكسر دم سير افحص وماطاع الا قبل اسبوعين
راشد: امايه شو هو بشاره نيلس نبشر يعني
شمه شاقه الحلج: سلطون اخويه يالله خذنا البيت...... عفاري تبا تسوي العشا
اليازيه: يالخاينه
شمه: ههههههه مابا اكلف عليج حبيبتي خلاص دام سلطان موجود نسير معه
سلطان يوقف: يالله امايه شو انتي مابتسيري؟
ام سلطان: لا ابوك بي ياخذني وهو راد من شركته
سلطان يتقدمنا: بمان الله ماتشوف شر بو سنيده ... يالله بنات

بعد ماطلعنا قرصت عفرا بكتفها وغمزت لها ونحن نمشي ورى سلطان...... ومن جهتها هزت راسها بالايجاب يعني هيه هذا سلطان حبيب الألب ....

.............................. .................

.............................. .................... ......
اويلي على هالبنت اسميها خشعت قلبي تخشيع...... كنت اطالعها من الجامه وهي واحليلها مقفطه بس ماروم ماطلع فيها احس نفسي ولهان على المناظر بهالويه البريء

شمه: حوه سلطون حط لنا أي شي نسمعه عنبو !!
زميت على ضروسي لانها قطعت عني هوايه المناظر بعفور: شوفي تراني من الدوام للمستشفى يعني راسي مصدع لاتصدعيني ماني فايج
شمه تتأف: زطي
ضربتها على راسها بالخفيف: منو؟
شمه تمد لسانها : انت
قلت بتهديد: اسجنج؟
ردت بخقه: عندي اخو فديته يشتغل بالشرطه بطلعني بواسطه
عفرا واخيرا نطقت: شمامي موبايلي بشنطتج ناوليني
شمه: مابا
تدخلت انا: عطيها
شمه: شو يخصك انت
هاي مادري منو الي تقول بنت اخو عفرا: شمه عيب هاي اخوج الكبير
شمه تحشر راسها ورى: حوه عبيروه ادري ان اخويه ماخبرتيني بشي يديد
عبيروه عقوله شمه: عنبو اكلتيني اكال الله يعين عمي سهيل عليج

شمه حاست بوزها وانطبت ... اما انا لو هاي عبيروه اعرفها جان عطيتها نظره تخليها تصطلب ولا تعطي شمه من هاي التعليقات ... بنات اخر زمن صايعات
.... وصلنا البيت وعفرا رأسا على المطبخ .... هههه فديتها يوم بعرس عليها مابخليها تدل المطبخ ابد

شو!!!!!!!!!!!




!!!!!!!!!!!!

شو قلت انا!!!!

يوم بعرس عليها !!!!!! لا صحيح هالبنت خشعتني من متى وانا افكر اني اعرس؟!!!....
من بعد الي صار لي مافكرت اني افكر بنت ... والحين يالس افكر لما اعرس بعفرا!!!!
هاي عفرا احسها حاله استثناء في حياتي !!! يارب مانصدم فيها..... اذا انصدمت اسميني بموت


.............................. .............


.............................. ...................
( شو بتطبخي لنا)
قلت هالجمله لعفير وانا ايلس على طاوله المطبخ
عفرا تقطع بصل: امم طبخه والله مالها اسم حصلتها بالنت
انا وانا اكل خيار : امم يعني تجربي علينا
عفرا: وين البنات؟
شمه: فوق يالسات على الاآآب يقرن قصه
عفرا: وريومه؟
شمه: ريومتج هم معاهم ....( وتذكرت شي فجأه وصرخت) عطاري الريم طالعتي رشود شقايل يطالع فيها!!!
ضحكت علي: هههههههههههه عادي
شمه: مالت عليج شو قالت عادي والله نظراته غيير
عفرا بنظرات هبله: يعني الحين انت تتوقعي من اخوج يعجب بالريم؟
كملت خيارتي وانا افكر: امم يمكن ليش لا بس شقايل يحبها وهي امم ... امم
عفرا: ادري قصدج ماترمس .... ياحبيبتي يوم الحب ينا مايعرف هاي ترمس ولا هاي ماتمشي ولا هاي ماتشوف
حركت حياتي فوق تحت بسرعه وقلت وانا اصارخ: أأأأأحلىىىىىىى وينك ياسلطون تسمع كلالالالام بعض الناس

( اصغر عيالج سلطون؟؟؟)
طالعت الباب وانا فاجه حلجي: شو انت تجس علينا؟؟؟؟
سلطان يطالعنا بنص عين: شو سالفتكم اليوم خلصتو لحمي من غيبتكم عني؟؟
شقيت الحلج: ها .........هي فديتك من المحبه والحب افا عليك
سلطان يتقدم مني وياخذ خيارتي من ايدي ويلس ياكل فيها: وأنتي بشو طرتيني ؟؟
حبيت ادبس الموضوع بعفرا كيفي جيه نذاله: امم بصراحه انا ماطريتك ناس هم الي طروك ( وأشرت بعيني على عفرا)
سلطان يلتفت لعفرا الي ويها احسه توزع من الفشله وناظرها شويه: اذا هالناس هم الي يطروني حلال عليهم لحمي فديتهم

قال جملته وطلع عنا .... احس عمري مصدومه!!!!!سلطون يقول هالكلام الغزلي الفاحش ههههههه !!!آآآآآآآآآآآآآآآآي شو هاي طاسه بويهي

عفرا بعد مافلعتني بالطاسه: يالحماره
ويعتني الخايسه: آآآآي تويع يا علج حمار يرفسج بليله عرسج
عفرا: ياربي شو بقول عني الحينه
شمه: هههههههههه اسميج خبله سمع صوتي يعني يعرف اني انا الي رمست عنه
عفرا مقفطه: اف
سرت صوبها وضربتها بكتفي في كتفها: احلىىى ياحلال ايوا ايوا
عفرا تخوزني: خوزي عني مارمسج يالخايسه
شمه: عفور تدري شو؟؟!!! احس عمري مصدومه سلطون يقول هالكلام الغزلي؟
عفرا: ليش تتحسبي يعني اخوج جماد؟؟
شمه: هههههههه الا سلطان مستحيل يكون جماد بلاج ماتدري عن شي
عفرا: شو مادري؟
شمه:امم اخاف اقولج وتغيري رايج
عفرا: شو خلصيني
شمه: مابا اكسر قلب اخويه مره ثالثه!!!
عفرا: مره ثالثه!!!!
قلت وانا مضطره اتكلم: احلفج بالله ان ماتطري الي بقوله لج جنب حد .... وانا بقولج بس عسب تعرفي طبيعه سلطان اخويه وتعرفي جيف تتعاملي معاه .... وحتى يوم يكون نصيب بينكم مابا يعرف انج تعرفي زين؟؟وعد؟؟؟
عفرا: زين وعد ....خرعتيني تكلمي
قلت لها وانا اهمس ومابا حد يسمع: انت طبعا تدري بسالفته ويا بنت عمي عذاري
عفرا بنفس مستوى الصوت: هيه على اساس محيره له وفكو الخطوبه من صوبهم ويوزها حد غيره
شمه: بس الي ماتعرفيه ان كان يرمسها بالموبايل وكان يحبها حب وايد كبير .... بس محد يدري غيري انا يوم خبرني ان يبا رقمها .. الكل تحسب ان بينسها بسرعه لان بس محيره ومايدرو بعلاقته وياها ... المهم مع الايام حليله اخويه حالته تأزمت ودوم يشكيلي عن نفسيته ... بس بعد جم سنه ياني ومعه رقم ومستانس وايد

سلطان: اندوج هالرقم
شمه: شو هاي؟!!
سلطان: بقولج بس لاتخبري حد مفهوم؟؟؟؟
شمه: امم مفهوم
سلطان: هاي وحده متعرف عليها اباج تتعرفي عليها وتصاحبيها وتعرفي كل شي عنها
شمه: شو!!!!!!!!
سلطان : شو؟ شو؟ بصراحه البنت عايبتني
شمه: وين شايفها!!!!!!!!!!!
سلطان: شفتها عند البحر لوحدها يالسه على سيارتها من برع تحرش بها واحد وسرت ادافع عنها و بعد هالموقف طلبت مني رقمي عسب تتشكرني .. هاي السالفه
شمه: اوكي هات الرقم
.
.

عفرا تشهق: شو!!!!!!!!!! بنت عمه يرمسها على انها محيره له بس هاي على أي صفه
شمه: بصفه ان يباها زوجه
عفرا: شو الي منعه؟؟؟؟؟
شمه: الي منعه ان البنت عرست هي الثانيه .... ومن بعدها اخويه مايداني طاري العرس ابد
عفرا متأثره: غمضني وايد
غمزت لها: شفتي ان العلاقه الغلط ماتدوم؟
عفرا: صدقتي... بس غريبه خالوه ماجبرته يعرس للحين!
شمه: تذكري يوم سلطان يسوي حادث ويتنوم بالمستشفى ؟؟؟؟
عفرا وجنها تذكر: هيه
شمه: الحادث كان من سبب هوشه بينه وبين امايه عسب يعرس وفول وطلع من البيت وصار الحادث ..........ومن بعدها امايه ماتيب طاري العرس ابد حذاله الا لما اهو يب طاريه
عفرا وعيونها كلها دموع: فديته
حركت ايدي قبال ويها: حوه يالرومانسيه .... اخبرج كملي كملي شغلج وخبرج ترى بعد باجر عيد ميلادي لاتنسي ابا هديه غاويه

سرت عنها لغرفتي صوب البنات ... وحصلتهم بعدهم يالسات يقرو قصه ... بس هالمره الريم مب صوبهم كانت يالسه حذال شبريتي وبيدها موبايلها ... يوم شافتني ابتسمت لي وسرت صوبها
شمه: اموت واعرف شو يشغلج بهالموبايل؟؟؟؟
ابتسمت ومدته لي .... وياليت مامدته حسيت بعمري غبيه ..... حليلها كانت تطالع صوره لامها وابوها مع بعض وشكله بدوله اروبيه ..... كان خاطري الوي عليها وايد غمضتني ....
قلت لها بأبتسامه خفيفه: الله يرحمهم برحمته ... امم طيب ريومه عندج صوره لخليفه؟؟؟

تغيرت ملامحها وفرت راسها عني بسرعه .... اويلي شو قلت انا
شمه: آآسفه ماقصد اني ازعلج والله
ردت تطالعني بس هالمره ابتسمت وكتبت لي بموبايلها: انا مازعلت بس تذكرت شي كدرني فديتج
بادلتها الابتسامه: لاتكدري عمرج غناتي الدنيا ماتسوى
عبير تقطعنا وتي صوبنا: شو شو غناتي اسمع
شمه: هيه شو فيها
عبير: مساع امج والحين انتي...... عيل ياليتني طرمه من زمان عسب تحبوني شراتها

شو غبيه هاي ..... تحسست الريم و قامت عنا ونزلت اكيد سارت لعفور .... اما انا ماقصرت شرشحت عبير عكلمتها السخيفه!!!

.............................. ...............

.............................. .................... ...
(بوه مفاجعه)
دخلت انا وسهيل على راشد اون نفاجأه
راشد يعدل يلسته على الشبريه وبصوت تعبان: اونه مفاجعه ياكثر مفاجعاتك الا قول ياي دبي لحمدان مب لي
سرت صوبه ولويت عليه: فديتك حرام عليك وايد ظالمني اسئل سهيل شو صار فيني لما تلقيت خبر تنويمك خبره خبره سهيل
سهيل اونه يمثل وحاط ايده عقلبه ويقلد صوتي: واويلي حرمتيه........ حرمتيه منومه بالمستشفى بتربي ههههههههه
راشد يخزه بنص عين: الحين انا ياسبال بربي ها
سهيل يلس حذاله: ياريال المهم شحالك الحينه ان شاء الله خوز الألم
راشد: الحمدلله
سيف: انت حمار عليك تحمل مب طبيعي حد يتحمل ويع التكسر 3 ايام
راشد: افا عليك هذا ان دل يدل على قوتي ورجولتي
سهيل: هيه رجولتك باكر يوم يك مضاعفات قول رجوله
سيف: وين سلطان؟
راشد: واحليله بالبيت ......ياني من الدوام لهنا..... هو الي خبركم شو؟
سيف: هيه
راشد: ياحيكم والله تصدقو عاده امايه توها طالعه يعني ان تبو تتقهو ذيج الدليل سيرو لها انا ماروم اتحرك
طالعته بنص عين: خقاق واحد درينا عاده انك تعبان ومريض
سهيل: يعني خلاص الكل عرف الحينه؟
راشد: هيه وسولي فلم هندي امايه الي يسمعها فيني سرطان دم مب تكسر دم
ضربته على كتفه: شو هالفال يالحمار
سهيل: هههههههههه اكيد حليلها خالتي وايد تحبك

( ويلاه ضاق الصدر وماذكر يسأل علي ويلاه نساه طول الهجر ولا الصبر من قسوته قساه)

طالعت موبايلي من جيبي وكان عبدالله المتصل بي

سيف: ياحيك والله ..............هيه الحمدلله............. هيه جنبه وتطمنت عليه هههههههه ..............لا والله حرام عليك هاك تبا تكلمه؟..........ههههه اونه طيب خلاص يوصل..... اوكي .... بحفظ الله......... خسك الله.......... لعنك الله ياعبدالله ههههههههه.... اوك باي باي

طالعني راشد: منو؟
سيف: هاي عبدالله ربيع يديد ماتعرفه
راشد: بعد منو هاي من وين طلع؟
شقيت حلجي: هاي الله يسلمك عرفته عن طريق ربعي محمد ال ...
راشد: اها هيه هيه
شقيت حلجي زود: ويسلم عليك ويتحمدلك السلامه
راشد: ربي يسلمه ويعافيك....

.............................. ........

.............................. ...........
طلعت من حمامي وانا الف الفوطه حولي ...... يلست اطالع حالي بالمرايه..... صحيح انا لين متى ماتزوج.... شعنه اخلي تجارب فاشله مرت بحياتي تعيقني اكمل مشوار الحياه ...... الي بعمري عرسو وعندهم عيال ومدخلين المدرسه بعد .... شو ناقصني .... الي احسها بتكملني وحصلتها ..... انا شو انطر .... تنطر ياسلطان بعد اي حد وياخذها منيك شرات الي قبلها.... واسكت وانطب شرات قبل ....
رفعت شعري المخرس ماي على الطاير ... ولبست شورت وفانيله حمرا على السريع

(اقولج نادي لي عفور)
شمه ترفع حياتها فوق وتحت: شو تبا بها
خزيتها بنص عين: لاتخليني اعصب عليج
شمه بجديه: احلف اخويه شو تبا .... تبا اي حد ويشوفك واقف فياها ؟؟ سير نام احسن لك
حبيت اكسر خاطرها شويه: شموم اختيه الغاليه والله اباها بشي ضروري ... دبريني فديتج
شمه: الغاليه... فديتج.... كل هذا عسب انادي عفور.... الحينه اهي فيا البنات شقايل اناديها سلطان يبيج ... والحين الحزه الناس نيام .... شو تبا يقولو عنها.... ترى بنت اخوها فيانا عييب بعدين تنحرف وتخترب اخلاقها
طالعتها بنص عين على تحليلها : مشاء الله عليج وصلتينا من نادي لي عفرا الين بنت اخوها تنحرف وتخترب انتي شقايل تحللي المواضيع عنبو سيري الجزيره احسن لج
شمه بخقه وترفع شعرها الاسود: طلبو مني بس انا ماطعت مب مستواي
قلت لها وانا اطالع شعرها: عفرا شعرها اسود جيه شراتج؟
طالعتني وهي ميوده عمرها لاتضحك: والله طحت ياخويه ومحد سما عليك
نعست عيوني وتسندت عباب جناحها: هاي انت موجوده سمي علي
شمه تمسح على كتفي: بسم الله عليك بالرحمن من عفرا
نقزت: مالت عليج .... ها شو قلتي الحينه بتدبريني لو لا
شمه تفكر: انت وراك دوام باكر؟
قلت لها بتأف: لا لشو تسألين؟
شمه: امم اسمع شو رايك باكر الصبح تاخذنا المول
قاطعتها: انا بشو وانت بشو طوفي لا افعلج الحين
شمه: صبر ياربيه صبر... بلاك جيه منحشر .....يوم نسير يافالح ونوصل المول نادي عفرا اونه عسب تاخذ رايها بشي
سلطان: زين وبعدين؟
شمه: هيه ويوم تسير فياها قول لها انك تبا تاخذ رايها بهديه لعيد ميلادي افا عليك وقول لها الي تبا
حكيت راسي وانا اتذكر ان عيد ميلادها بعد باجر: مشاء الله عليج ماتضيعي حقج
شمه: هههههههههههههه زين فهمتها على الطاير ... تعال مو جنه الباب يدق من مساع؟

.......... منو بكون ياينا هالحزه؟؟!!........... الله يستر لايكون رشود بلاه شي؟!!!!!!!!!!....

سهيل: لا شو خلنا بعد على الباب اكثر عن جيه

ضحكت على اشكالهم لان الجو حر ومبين عليهم انهم خاسو برع
سيف: طالع يضحك بعد خيسك الله مثل ماخيستنا
خوزت عن الباب: حيا الله من يانا ..... شو عرفني انكم بتيو هالوقت انتو قلتو عالمغرب بتكونو واصلين تحسبتكم غيرتو رايكم
سهيل: لا بس على طول سرنا لراشد وجلسنا عنده
سلطان: خيبه لهالوقت؟؟؟
سيف: هههههههههه هيه بواسطه واحد من ربعه
دخلنا الميلس: مايطوفكم شي
سهيل: مخيسنا على الباب ومب نايم ... ماعندك دوام شو؟؟؟؟
شقيت الحلج: لالالالاع
سيف فاج حلجه: الاخ مستانس على غير العاده؟
عدلت يلستي:امم بخبركم انتو متى بتسيرو؟
سهيل: خيبه طالع يروغنا ولد الذينا
سلطان: فايج والله.... يعني يوم اسئل اطلع اروغكم
سيف: باجر المغرب ............ تعال شو حال البنات هههههههههه اسميهم تحطمو يوم تنوم راشد ههههههه اونه بياخذهم يتسوقو عسب العرس واحليلهم
سلطان: حرام عليك تشمت فيهم .... انا باخذهم باجر الصبح
سيف: الصبح عاده؟
سلطان: هيه هذا طلب شمه
سيف: وهاي بعدها تحب تسير المولات بالصبح اسميها متفيجه ... الناس بهالوقت شخير وهاي تفرفر بالمولات
سهيل: عيل قوم سير نام وراك يلسه وحواطه
سلطان: قومو ويايه عسب تنامو
سيف: لا انا واحد ابا اطالع التيلفزون
سلطان: براحتكم .... يالله فمان الله

سرت عنهم .... صوب غرفتيه وتمدت على شبريتي براحه... وانا افكر باكر وشو بقول لعفرا .... يلست ارتب كلامي .... بس بعدها استسلمت وقلت اخلي كل شي يطلع بروحه وعفوي احلى.....

 
قديم   #15

جود ي الحلوه


رد: رواية التبل إماراتيه روعة


رواية التبل إماراتيه روعة

الج 16 زء

.............................. ..............

.............................. ............


.............................. .................... .......


.............................. .................... ......

ياحلات الصبح وياحلات كل نفحه هوى فيه ............... احب الصبح واحب هدوئه
يلست على حواف مسبح بيت خالتيه وانا اشرب بالكافي ....ماشاء الله وايد كبير واحلى عن مسبحنا بالعين بوايد.....
فريت ويهي اطالع بيتنا اليديد لان حذال بيت خالتيه اليدار باليدار يعني اقدر اشوفه بسهوله..... البيت ومشاء الله خلص شعنه ماني ونفك اعمارنا عن الحواطه بين دبي والعين

( صباحج صباح الورد)
بهالحظه
كل شي توقف من حولي ..... وانصمت اذني عن كل شي .... وما اسمع الا هالحس الغاوي
فديت روحه ..

سلطان: ههههه خرعتج؟
قلت وانا مقفطه : ههه شويه.... صباحك النور
سلطان ياخذ الكافي من ايدي ويشرب منه: شو اسوي بج اذا انتي دومج سرحانه .......... يالسه تطالعي بيتكم شو؟
عفرا: هيه ماشاء الله ماتوقعت بيطلع جيه
سلطان : شو رايج قبل لاتسيرو العين اخذج تشوفينه من داخل تراه وايد غاوي
قلت وانا فرحانه بالاقتراح: ياليت ...........خاطريه اشوفه من داخل والله
سلطان: انتي تظمني نفسج تسكني بهالبيت؟
شهقت: بسم الله علي هيه اسكن شعنه ما اسكن؟
سلطان: امم لاسباب شخصيه مثلا
عفرا: مثل شو يعني؟
سلطان: امم مثلا.......

(عموه)

اهئ اهئ الله ياخذج وياخذني يوم انضرب على راسي وصرت عمتج دوم جيه تخرب علي اللحضات الحلوه

عبير وهي واقفه حذال باب الصاله وتزاعج لي وانا بالحوش وجنها بيتهم: عموه
التفت على سلطان: اترخص فشلتني هالبقره تتحسب عمرها بيتهم
مشيت عنه بس استوقفني : آآآآ عفرا
طالعته: هلا
سلطان وهو يناولني كوب الكافي حقي: قولي للبنات يهزو اعمارهم عسب المول ........... واذا ماعليج كلافه ابا كافي شرات حقج
ابتسمت له : ماطلبت اوكي

سرت عنه لصوب البقره عبير وانا نافخه ويهي عليها
عفرا: بلالالاج تباقمين شرات البقر
عبير: عموه تخبلتي شو .... يالسه ويا سلطان برع انتي ماتدري ان عمومي بالميلس؟
خزيتها بنص عين وانا يالسه ابعد التوتر عني: هيه يالبقره اولا انا مب يالسه انا كنت واقفه وبعدين هو شافني واقفه وبس حب اخبركم ان تيهزو اعماركم هو مادق سوالف ويايه


<<اويلي جان انفضحت صحيح لو طلع حد منهم شو راح اسوي هههههه اسميني خبله من اشوفه اتيبس ........سمعنا حس صوت باب ... طلعت خالوه والعم بو سلطان >>


خالتيه : هلا بناتي هلا صباحكم صباح الخير
سرنا صوبها وحبينا راسها: صباح النور خالتيه شحالج اليوم؟
خالتيه : والله لو يخوز الم هالقلب جان اصير بخير
ابتسمت لها: ماتشوفي شر الغاليه .... شحالك عمي
ابو سلطان يبتسم لي: الحال يسرج فديتج
عفرا: امم شو تشربو حليب لو شاي ؟
خالتيه: يلسي بنتيه ماله لزوم تعابلي
عفرا: لالاخالوه شو هالرمسه.......... شو تشربو ؟
ابو سلطان: شاي وحليب
خالتيه : حليب فديتج

سرت صوب الدليل وصبيت لهم .... كنت حابه ايلس اسولف وياهم زود لان وايد احب سوالف عمي بو سلطان ... الي يطالعه من بعيد يقول هاي واحد متكبر ومغرور بسبه الهيبه الي فيه... بس الي يلس وياه يقول هاي انسان ثاني

فديته وفديت روحه وايد يشابه ابوه
قلت هاي الجمله بنفسي وانا اطالع سلطان الي مره يلس يشرب كافي من الي سويته له ومره يعدل سفرته من جامه السياره ومرره يضارب وياشمه الي يالسه تعابل بالمسجله
...... وصلنا المول وطالع وايد روعه بهالوقت لان ماشي زحمه
يلسنا نتحواط ولأول مره سلطان يالس يتحوط معنا ... لان بالعاده يلس ينتظرنا بأي كافي
وشمه متونسه ويالسه تاخذ ذوقه بالفستاين الي تختارها ..دومها جيه تحب تاخذ ذوق اخوانها وابوها ... اما انا ماتخيل نفسي اخذ ذوق سهيل لان حليله اخويه ذوقه بالملابس وايد مب حلو ههههه...

عفرا: هاي حلو عليج ريومه بتطلعين عذاب

تبسمت الريم بس هزت راسها بالرفض معترضه على لونه الاصفر ههههه شكله مب بس سهيل ماعنده ذوق حتى انا
يا سلطان صوبنا انا وريوم: ها عفرا ماشريتي هاي ثالث محل ندخله وانتي ماشلتي شي اوديج مول ثاني؟
تبسمت له: ههه لالا شو مول ثاني نحن البنات جيه لازم ناخذ جوله على كل المحلات بعدين نتشرى
سلطان : ههههه انتو طالعو شمه شلت المحل كله
عفرا: عليها بالعافيه ان شاء الله



سلطان: طيب عفور اباج بخدمه
عفرا: آمر
سلطان: ما يآمر عليج عدو بس اباج تسيري ويايه صوب ذاج المحل عسب اشتري هديه ل( ويأشر على شمه بعينه عسب لاتنتبه)
عفرا: هيه فهمت اوكيك
سلطان يسير صوب شمه: شميم نحن بنسير ذاج الصوب انا وعفرا عسب اخذ ذوقها بهديه لسهيل زين؟
شمه: اوكي بتشوفنا بهاي المحلات الي بهالصوب

طلعنا عنهم وكانت عبير تبي تي فيانا بس شمه سحبتها وياها المحل الثاني ...

سلطان : ابا اخذ ذوقج بهديه لشميم عسب عيد ميلادها
ابتسمت له من ورى غطوتي الشفافه: حتى انا حبيت اشتري لها بدون ماتشوف الهديه
سلطان : تدري شو؟
عفرا: شو؟
سلطان: ابتسامتج
نكست راسي: شو بلاها؟
سلطان وهو يمد كلمته: حلوه

لاتسألوني عن حالتي .... احس كل حراره المول تيمعو بخدودي ...... واحس الدم مايتحرك الا بعروق ويهي اويل حالي عليك ياسلطان حتما بيغمي علي الحينه .....
يلسنا نتحاوط بكذا محل لان سلطان مامحدد نوع الهديه بس اخر شي قر يشتري لها خاتم الماس ... دخلنا المحل وطلع لنا كذا نوع
سلطان: هذا حلو صح؟
ذوقه وايد حلوه شعنه يايبني معاه: هيه وايد روعه يصلح لادينها لانهم شويات كبيرات
سلطان : اوكي وانتي شو بتشتري لها

يلست افكر شو اشتري ساعه وشريت لها السنه الي طافت امم طقم ملابس لالالا بمناسبه تخرجها شريت ملابس
سلطان: الو وين سارو
عفرا: ها ههه لا ما سرت محل بس متحيره شو اشتري
سلطان: امم شو رايج تشتري هاي السلسال عسب يطلع طقم
قلت وانا خايفه يطلع مبلغها اكثر عن الي عندي واقفط يدامه: امم اوكي

يلست اخذ لي جوله بالمحل نفسه لان ماشاء الله اشياء وايد جميله عنده بس ماتوقع عندي بيزات تكفي اني اشتري لي شي من هايلا ...
مديت ايدي اطلع البيزات بس في ايد اقوى عني مسكتها حسيت بكل جسمي انتفظ من مسكته ...
طالعته بعين زايغه: بسم الله شو بلاك؟
سلطان انتبه لحركته وشل ايده: ابد بس ماشي تدفعي خلاص دفعت عنج
عفرا: مايستوي هاي الهديه بأسمي ولا غيرت رايك شو؟
سلطان وهو يسحبني برع المحل: لا ماغيرت راي بس ماشي كيفي انا الي بدفع
عفرا: وابويه عليك
سلطان: شو رايج قبل لانسير لهم نحط الهديه بالسياره عن لاتشوفها شمه
عفرا: اوكي

سرنا صوب السياره وركب جدام .. اما انا انتظرته برع

سطان يطلع راسه من جامه السياره: شو بلاج واقفه شرات عواميد علبك تعالي ركبي تعالي
عفرا: لا شو مالي حايه
ناظرني بجد : شو بلاج تعالي

سرت صوبه بس فتح لي الباب الجدامي .. هاي صحيح تخبل يباني اركب حذاله
يعني لو سهيل ولا سيف يشوفوني بيذبحوني

سلطان يطالعني وهو داخل السياره: شو تبيني انزل اشلج؟
ركبت وانا زايغه منه : لالا خلاص ركبت
سلطان شاق الحلج: شحالج؟
والله متفيج انا شويه واصيح وهو شحالج.... مسك الجيس وطلع منه علبه .......هاي خاتم شمامي !!!! ... قايله لكم والله متفيج هالريال
سلطان : تتوقعي حلو على ايدج صح؟
رديت وانا منكسه راسي: احلى على ايد شمه
سلطان: شمه لها خاتمها خلينا بخاتمج انتي

كنت منكسه راسي وماشوف غير ايدي وايده يوم انمدت تلبسني الخاتم ... الي دقايق وايدي تزينت به ... مد ايده ورفع راسي

سلطان: عفرا انا اباج لي تتزوجين؟


.
.
.
.............................. ................


.............................. ....................
وايد فرحانه هاي شعوري من اشتري لي ملابس هههههه ....اهم حايه اني شريت لي فستان لحفله عيد ميلادي بس تعالو ماتلاحظو شي ... هاي شو سالفتها عفير انطرمت مره وحده من ردو................. امم شو قال لها سلطان مثلا
احبج ؟ ولالا امم عطاها رقم موبايله ولا ولاشو ماعندي سالفه يوم نوصل بسحب الكلام من عفير وبسوي فياها تحقيق............ طالع هذا الثاني بعد مويم اسميه بنفذنا هههههههه
روضه: بسم الله شو بلاج شميم تضحكين بروحج
التفت لها: ههههه ماشي بس تذكرت نكته
عبير : تعالي صح ماقلتي متى بيوج ربيعاتج الي واعدتيهم؟
اختفت الضحكه من ويهي اسميني بقره !!!!!! انا شلون نسيت موعد ربيعاتي اويلي الحينه هم اكيد بالبيت

التفت على سلطان: اويلي سلطون بليز اسرع
سلطان : اسف
شمه: سلطان دخيلك
طالعني بنص عين: الحينه رزقي على هالناس الي امسكهم من مخلافاتهم اي الحينه انا اخالف لا وابويه مايصير
روضه: هيه لاتسرع انا ورايه عرس
سلطان : هيه وانا ورايه عرس
شقيت حلجي : شو قلت!!!!!!!!!!!!!!!!!!
سلطان: الله يلوع جبدج انا كم مره اقول لج هالحلج لاتشقينه جبالي ويا هالتقويم حقج
عناد به فتحته زود :آآآآآآآآآآآآآآآ
سلطان: الحمدلله والشكر على نعمه العقل يالله بس نزلن بسرعه بسير لراشد

دخلت البيت وعلى السريع يهزت عمري وعفور ماقصرت قالت لي تركي الفواله علي وانتي سيري يهزي عمرج وريومه فديتها هم ماقصرت يلست ترتب جناحي على السريع وبشكارتنا فديتها ههههه بخرتني
والحمدلله وصلن ربيعاتي بالوقت المناسب ....

.............................. .................... ......

.............................. .................... .....

(موافق بس بعد شهر)


قالها لي حمدان وانا مفول
سيف: انت وعدتني هالشهر جيف الحين تغير رايك لشهر الياي؟؟!!!
حمدان : سيف انا قلت لك انا مامعارض على السيره انا معارض على الوقت ....ابويه يحتايني هالشهر مايستوي اسافر بهالوقت واتركه بهاي الحاله
قلت له وانا اطالع ويهيه الذبلالالان وعينه المورمه من التعب: ابوك يحتايك طول العمرر مب بس هالشهر ياحمدان
حمدان : ابويه يحتايني هالمره اكثر عن كل مره لشركه لان حالها مدهور وايد
سيف: مب مشكله افهم زوج خالتيه الموضوع ويساعدنا بجم واحد من عنده لين مانرد من برع
حمدان: وابويه شو عذري عنده؟
سيف: خبره بالموضوع خلاص بس اهم شي تتعالج
حمدان: تباني اخبره وهو بهاي الضروف !!!! اناني انا شو؟؟
سيف: حشى مب اناني بس ياحمدان والله خايف عليك انت طالعت شكلك ؟؟ بذمتك بهالاسبوع بس قولي كم نزل وزنك؟ انت ياحمدان تبا تموت بس تبا تموت موته بطيئه

نكس راسه حمدان لان عارف ان كلامي صح .... جسمه طالع ضعيف واضح ان نازل وزنه نزول غير صحي وغير طبيعي ويهه المصافر والسواد الي تحت عينه . .. راح حمدان ايام زمان لما يمازحني بس يويعني لدرجه مره انكسرت ايدي بسبته ... والحينه يدامي واحد بدون روح

قلت له وانا انش: انا مابضغط عليك وانت براحتك
يود حمدان ايدي: دخيلك صحيح لاتضغط عليه سيف انت سمعت بضروفي والله ما اروم انت تدري اني اقتنعت من البدايه بس لو ما الضروف جان ماصار هالي صار
سيف: والشهر الياي بيطلع لك ضروف بعد وبتقول لي مابسير
حمدان:لالالا لو شو يصير بنسافر
طالعته بنص عين: شو الضمان؟ ماوثق فيك
حمدان: كلام ريايل وعد مني والله حتى لو انت تموت الشهر الياي بسافر هههههههه
سيف: متأكد؟
حمدان : هيه
سيف: والمواعيد الي عندك بمالمستشفيات هنا
حمدان: أي مواعيد؟؟!!
سيف: مايحتاي اذكرك ان الي فيك مب زجام يعني اكيد عندك مواعيد
حمدان : ولا يهمك بسير
سيف: اكيد؟
حمدان: اكيدين
ابتسمت له: ناس ماتي الا بالعين الحمرا
حمدان يرد يمسك ايدي: طيب ايلس
سيف: لا شو ايلس تأخرت وايد على راشد بالمستشفى
حمدان : شو بالمستشفى عسى ماشر؟
سيف: ماشر بس حليله يايه فقر دم حاد
حمدان: افا مايشوف شر الغالي
سيف: شو رايك تي ويايه؟
حمدان: طيب تنتظرني على ما ابدل كندورتي؟
سيف: هيه يالله

توكلنا انا وحمدان للمستشفى ويوم دخلنا على راشد ...

راشد: والله مايلس ولا دقيقه ها انا حلفت حشى احس نفسي خاست
سهيل : صل على النبي
سلطان: هاي يباله راشدي على ظهره عسب يصلبه

تحمحمت عسب ينتبهو ان ويايه حد ... طالعني راشد وتحول ويهه المنفوخ الى ابتسامه يستقبل بها حمدان

راشد: يامرحبا الساع يامرحبا يعني لو مايبك سيف كان ماتي
سار حمدان يسلم عليه: هههه لا والله ياريال تو ادري شحالك ان شاء الله بخير؟
راشد: مانشتكي باس ها انا ابا اطلع مافيني شي
سلطان: شحالك حمدان ؟
حمدان يسلم عسلطان: الحال يسرك الشيخ
سهيل: شقايل غادي جيه عنبو مسوي رجيم؟
حمدان: هههههههه هيه ياريال خلاص لاعت جبدي قلت لازم اضعف
التفت على راشد: شو بلاك محتشر قبل لا ادخل؟
راشد رد نفخ ويهه: لاعت جبدي من المستشفى وقررت اطلع وقعت على مسؤليتي
طالعته هاي تخبل واضح ان للحينه تعبان !!: شقايل تطلع ويهك للحينه غادي اصفر شرات الليمونه
راشد: لاتبالغ عاده
سيف: والله ماجذب عليك ولا شتقول حمدان
حمدان: هيه والله التعب واضح عليك شقايل تطلع
راشد: بس مابي يالله انت وياه لمو قشاري اشوف
سلطان: وايد ماخذ جو انك طالع
سهيل: ايلس بس ايلس
حمدان: هههههههه حليله ارحمو حاله مسكين
طالعته: نبيك عون تطلع لنا فرعون تشجعه على الطلعه
سهيل يحط ريل على ريل: والله اليلسه بهالمستشفى مش بطاله ولا شو تقول سلطان
سلطان يتمد على كرسيه: هيه والله مادري شعنه ناس محتشرين عليه
كملت انا وياهم مغايض وانا اخوز براشد: خوز لي شوي بنام وياك على الشبريه

شافنا راشد ان نحن مب ناوين نقوم فاقام بروحه وهو طفران ..... واضطريت ايوده لان اصلا مايروم يمشي بس هالولد شرات عناده مابحصل

سلطان: طالع طالع حتى ماتروم تمشي شقايل تطلع
راشد: والله ماخلي هالاسبوع يطوف وانا منقع بهالمستشفى هالاسبوع مب كل مره بيتكرر
طالعته بنص عين: شو عندك ؟
راشد: ماشي بس ابا اطلع يالله لمو قشاري
سلطان: والله لأخبر ابويه عليك
سهيل : والله لأخبر خالتيه عليك
سيف: امم وانا اخبر منو
خوزني راشد عنه : خوز خوز بعد يبو يفتنو
يودته: هههههههه امزح وياك

كل واحد منهم خذا شي حتى حمدان حليله عبلنا عليه ... وطبعا انا ساندت راشد علي لان ماطايع يتوسد على غيري ... طالع شكلنا مضحك لاني وايد قصير وهو وايد طويل

.............................. .................... ......

.............................. .................... ............


( منو هالرحيم)
قالتها فطيم ربيعه شمه وهي توايج من نافذه الغرفه ... سرت صوبها هاي سواف وسهيل طالع رشود متى طلع من المستشفى !!!!

قلت لها وانا اطالع على الشخص الي تأشر عليه : هههههه هاي سيف اخويه
فطيم: اويل حالي عندج اخو جيه ... بس تصدقي يشابهج وايد نفس الملامح ماشاء الله
نوال تي هي الثانيه تطالع: منو أي واحد؟
فطيم : هاي طالعي الي بسير صوب الميلس
نوال : خوزي طيب شويه ماشوف .......... هيه والله رحيم ومنو هاي الثاني اويل حالي عليه ( قالتها وهي تأشر على سهيل)
عفرا: هههههههههه لا هاي محجوز اقصد حاجز
فطيم: والله؟ لمنو؟
عفرا: هههه بعدين بتعرفن لان للحين ماصار شي رسمي
روضه: من يومه شيخي سهيل رحيم
نوال: ربي يحفظه لكن ان شاء الله وايد يشابه سلطان اخو شمامي
فطيم: بس سلطان حليله شو بلاه ضعف زود عن قبل طالعتيه يوم لقانا على الباب؟

حسيت بشي يالس يحترق بداخلي ماشاء الله حافظه شكل سلطان ويعه تويعها فاصخه الحيا

روضه: هههه حتى هاي حاجز بس الله العالم من هي
فطيم: والله!!!!!!!!!!!!!!
روضه: هيه تو اليوم يقول ان بعرس
فطيم: الي سمعته من شمه انه ضارب عن الزواج
روضه: ههههه هاي كان ايام قبل الحينه قرشوبه خذت قلبه
فطيم: خساره يعني ما بقى لنا الا راشد بس ههههههههههه

دخلت علينا شمامي وبأيدها الفواله ... ورها البشكاره

شمه: شو تسو عند النافذه بسرعه اعترفن
روضه: جاري البحث عن معرس هههههههههه
عفرا: شمامي شفتي راشد؟
شمه: راشد!!!!!
عفرا: هيه تو داخل اهو وسهيل وسواف
شمه: حللفي!!!!!!!
عفرا: هههههه هيه
قالت وهي تناقز: اترخصكن بنات بسير لاخويه

طبعن انا مايحتاي اترخص طلعت وراها على طول .... وشفنا المهرجان الي سوته شمه وخالتيه ههههههه

شمه تسحب راشد من حضن امها: فديتك اخويه ولهت عليك
راشد: ههههه توله عليج العافيه شحالج
شمه تبوسه على خده: بشوفتك انا بخير
سيف: بس الحينه لزقت بك شرات صمغ الفيران شو يهدها

طول هالوقت واخويه سهيل حليله ساكت ومبين على ويهه العصبيه لان شمامي كان لبسها شوي فري يعني برمودا وقميص كات هههه حليله اخويه شويه وبينفجر ويهه الله يعينك

خالتيه تكلم راشد: تعال امايه تعال ولهت على يلستك بحضني فديتك
سلطان يتأف: انا الحينه طاح كرتي....... لما كنت انت منوم بالمستشفى ياويه النحس امايه كل يوم تحضني وتبوسني خلاص راحت علي الحينه
راشد: ياربي هالمتقايض سير سير دوامك احسن لك
سلطان: عناد بك باخذ لي اجازه وايلس على راسك
راشد يلس على الارض: الله لايقول تاخذ اجازه خل عنك بعدين امن البلد بصير فوضى بدونك هههههههههههه
شمه: هههههههههههههههه عيبتني هاي فوضى
سلطان يطالعها بنص عين: انتي ماقلتي ان عندج ربيعاتج؟
شمه: هيه
سلطان: عيل يالله انجلعي فوق
خالتيه: يالبقره في حد يهد ضيوفه يالله سيري لهم
نفخت ويها ويات صوبي : يالله عفور قومي ويايه
سلطان: مايخصج بعفرا خليها يالسه حذال اخوانها ماشافتهم من زمان
شمه: ياربي انت مايخصك اف

وانا اخيرا نطقت من بعد مانطرمت بشوفت سلطان : لا مابسير لا لهم ولا بيلس ......بسير لريومه حليلها يالسه بروحها بالغرفه
خالتيه تشهق: ويعه شقايل تاركين البنت روحها مايستوي
شمه: امايه انتي تدري ان البنت ماتحب تيلس جنب حد غريب وماحبينا نضغط عليها وسارت تيلس بالغرفه الثانيه
خالتيه: ولو سيرو ازقروها لي تيلس حذالي حليلها البنت ماتروم ترمس وانتو تاركينها روحها يوم يستوي فيها شي محد بيسمعها

ترتكهم وسرت لريومه الي حصلتها يالسه على الاب توب ولا حاسه بشي ....

.............................. .................... .


.............................. .................... ...........


يلست حذالها وانا اوني مستحيه من ترحيبها ومن شي ثاني

( مرحبا هلا بنتيه الغاليه شقايل تيلسي بروحج يوم ماتحبي تيلسي وياهم تعالي يلسي عندي فديتج)

راشد: انزين يمكن ماتحب تيلس حذال عيايز
ام سلطان: والله لو ما انت مريض ولا كان رديت عليك
سيف: ههههههههههه والله حاله الا قولي ماترومي على لسان راشد

طالعني راشد الي يالس بحضن امه وبما اني يلست حذال ام سلطان كانت نظراته مسويه لي ربكه شوي لاني قريبه منه

راشد: شحالج الريم والله انا الحمدلله بخير الحال يسرج مانشتكي باس والله!!! ههههه ياحيج
سلطان:!!!!! ترمس منو!

سيف: بسم الله
ام سلطان: عنبو كليت البنت وهي ماقالت شي
راشد اون يتفلسف: انا ادري امايه........... اقرا الي داخل القلوب اهي الحينه تقول بقلبها الحمدلله عسلامتك ياراشد وماتشوف شر

ههههه ضحكني اسلوبه صحيح كان خاطري اتحمد له السلامه شيطان هالولد

ام سلطان: هيه
سيف يسوي عمره متفاجأ: والله تعرف الي بداخل القلوب؟؟!!!!!
راشد: هيه افا عليك تباني اقول الي بقلب سلطان؟؟ الحينه بدقايق اخبرك
سيف: هيه والله قول خبرنا
راشد يطالع بصدر سلطان: امم
سلطان يحرك كندورته وينزل راسه يطالع بنفس المحل: بسم الله كليت صدري بمناضرك
راشد يتأف: حوه لاتكلم عن لايختض قلبك
سيف: ههههههههههه هيه بعدين تداخل الكلمات بعضها وماتروم تقرى الي بقلبه
راشد يعدل يلسته: هيه يقولك ياطويل العمر ان الي بقلب سلطان الحينه وبهاي الدقيقه خاطره يسير فوق
سيف: فوق!!!
راشد: وبالعلامه بعد خاطره يسير على الجناح الي على ايدك اليمين

يلست افكر الجناج الي على الايد اليمين هاي جناج شمامي ههههههه خسك الله ياراشد شكله يعرف بسالفه سلطان وعفرا

سيف: خيبه شوعنده بالجناح الي على ايدك اليمين؟ خبرني خبرني
راشد: خاطره عسب ناس ( ويحرك حياته فوق تحت)
يخزه سلطان: وخاطريه يك الحينه راشدي على ويهك يصلبك
راشد يتمسكن: طالعي امايه انا توني طالع من المستشفى وجسميه مكسر وهو شقا يقولي
ام سلطان: فديتك سلطان شقايل تقول جيه بسم الله عليه ولدي مصلوب

انتبهت لسهيل حليله مويم وحايس بوزه......... شو بلاه...... يمكن شمامي عطته كلام من كلامها الجارح بس اهو متعود حليله يعني مب اول مره!!!

سطان: طيب امايه انا اباج بكلمه راس
راشد: قول محد غريب
سيف: هيه محد غريب في حد غريب؟؟
سلطان نفذ صبره: ياربيه امايه انا ابا اعرف انت وخالتيه عشنو كنتو تتوحم قبل لاتيبو هالسبالين
سيف اون يتفلسف وينصح: بسم الله شقايل بسرعه تعصب جيه!! حذاري ياسلطان انصحك نصيحه لوجه الله ماريد منها لاجزا ولا شكورا............. يالغالي حذاري مايستوي تعامل المواطنين جيه يوم يخالفو المرور ها حبيبي؟ لاتعصب عليهم شرات ماتعصب علينا
سلطان ينش: انا طالع الحوش احسن لي لا اسوي جريمه الحينه
ام سلطان: هههههههه تعال فديتك لاتعصب يمازحوك بس
سلطان حايس بوزه : بعدين يوم ماشوف فيه حد بخبرج ..... سهيل تي ويايه؟
سهيل وخلقه ضايج: طيب

طلعو من صوب ونقعو سيف وراشد ضحك من الصوب الثاني

ام سلطان: زين جيه زعلتو ولدي
سيف: ههههههه لا خالتيه مازعل اعرفه انا سلطان حليله
راشد: لالا امايه اهو بس يبا يسر للجناح الي على ايدي اليمين
سيف: ههههههههه خلاص رشود والله ماروم تعبت ضحك على طاري ايدك اليمين صحيح شقا خاطره يسير هناك؟
راشد: هههه بعدين بتعرف بروحك
سيف: اها كأني شاك
راشد يسكته: بعدين بعدين لاتفضحنا حذال امايه
ام سلطان: انا ادري يامسود الويه تقصد منو
راشد: ههههههههه حليلي امايه برريء
ام سلطان: بس مب جنه سهيل مويم ونافخ ويهه
راشد: هيه امايه
ام سلطان: سيف شو بلاه اخوك؟
سيف: عشقان خالتيه عشقان

قطعت رمستنا نزلت ربيعات شمامي وكانت وحده منهم تطالع سيف بقوه عين حتى حليله قفط والثانيه تطالع راشد فاصخات حيه

وحده منهن وقفت: شحالك راشد ماتشوف شر والله
راشد يشق الحلج لها: هلا هلا نوالوه شحالج انتي وين عنج من زمان ماشفنا رقعه ويهج
نوال: هههههههههه وانت سافرت ورديت وماتيوز عن سوالفك
راشد: هاي حال الدنيا والله تعالي بخبرج هاي ربيعتج الي تو طالعه معجبه بسواف لو شو؟
نوال:!!!!!!!!!!
راشد يغمز لها: تراني شفتها وهي تطالع سيف بس خبريها ان هو خلاص باكر بعرس يعني ماشي امل فيه
نوال: والله!!
ام سلطان: هههههه ماعليج منه بنتيه
نوال: لا عادي الغاليه اعرفه واعرف سوالفه يالله اخليكم تأخرت على البنوتات تشاو
راشد يسوي لها بأيده باي: تشاوين
تلتفت له ام سلطان: ويعه انا كم مره اخبرك لاتاخذ راحتك بسوالف ويا البنات
راشد: امايه هايلا شرات خواتي
ام سلطان: حتى لو صارو شرات اختك لاترمسهم جيه
راشد: لحول حد منهن شكا لج عني؟
ام سلطان: والله ان لسانك طويل
راشد: انزين امايه عن هالحشره وقومي سوي لي قيمات
سيف: خيبه قيمات هالحزه
راشد ايده على بطنه: والله خاطريه فيه اريده الحينه

ضحكت على شكل راشد ههههه جنه حرمه تتوحم

سيف: قومي خالتيه بسرعه عن لاتصير شامه بالبيبي البطنه
راشد: لو فيني حيل اقوم لك...... جان قمت لك من مساع
سيف: الحمدلله ان ماشي فيك قوه

قامت عنا ام سلطان تنفذ اوامر الشيخ راشد ومن قامت التفت عليه راشد يتغيلس علي

راشد: ها الشيخه الريم شحالج بعد الخبري خبرج ( ويغمز لي)

خيبه هاي الي بيفضحنا ... طالعته بعين زايغه

راشد: هههههههههه شقا تخافين خيبه عادي مابسوي بج شي سواف .....انتي في ايدي امينه
سيف: امينه لو احلام ههههههاي

لالا اشك ان هايلا شاربين شي اقوم احسن لي عن لا يحوشني شي منهم

سيف: طالع طالع قامت
راشد: وين ؟؟؟
سيف: على حمر عين هههههههاي

سويت بأيدي حركه تعني الحمدلله والشكر....... وسرت عنهم....... هههههه صدق مخابيل هالاثنينه ولا هاي الثاني اونه بعد تعبان

.............................. ...................

.............................. ...................

يلسنا على اطراف المسبح شرات اليهال رافعين الكندوره ومادين ريولنا بالماي

التفت له: سهيل شو بلاك مويم؟


انتبه له لي اني ناديته: هلا
لا هاي صحيح عقله مو وياه: امم اقولك شو بلاك ؟
سهيل: ماشي والله بس شوي ضايج
سلطان: الله شوي ضايج وكل هذا ........عيل لو واجد ضايج شقا بتطلع
ابتسم غصب عنه: والله مادري

........مستحيل بيتكلم ويايه انا عارف ان ماخذ بخاطره مني من يوم نازعته بذاج اليوم ........

( انت مالك حق توقف ويا اختيه بهاي المكان)
سهيل: سلطان هاي بحسبه خطيبتي وانا بس يالس اتفاهم وياها عن موضوع
سلطان يزاعج: سير وياها بعد بغرفه نومها وقول اتفاهم وياها بموضوع
سهيل: انت فاهم الموضوع غلط لشو كل هاي العصبيه
سلطان: اسمعني سهلوه انت صحيح ولد خالتيه بس مايعني توقف وياها روحكم مفهوم؟؟
سهيل والدموع بعينه ويطلع من الميلس: مفهوم ياربعي مفهوم

..... هاي اخر منازع كان بيني وبين سهيل سبب بيني وبينه فجوه كبيره بس الله يعلم بحالي ذاج اليوم شكان والله يعلم بنيتي شو كانت.....


رديت التفت له من جديد: سهيل
سهيل: هلا الغالي
سلطان: انت معصب من لبس شمه وهاي المضايجك صح
سهيل مرتبك: لا شو انا بس ضايج بسبب عمال مكتبي ماسو الي ابا
سلطان: يعني المطلوب مني اقتنع بهاي الكلام؟
سهيل فر ويهه الصوب الثاني: هيه
سلطان: اعتبرني اقتنعت بس ياوبني على سؤالي انت يعيبك لبس شمه؟
سهيل: انا مايحق لي ان .....
قاطعته: يحق لك ياسهيل
طالعني بنظرات حايره : مايحق لي
سلطان: سهيل انا عارف انك للحينه ماخذ بخاطرك على منازعي الي كان بيني وبينك بذيج السنه بس ياسهيل
قاطعني: لاتقول شي انا ماماخذ خاطري بشي هاي اختك وكلامك صحيح انا شو يخصني يوم اعرس عليها بذاج الوقت ايلس ارمسها

حسيت نفسي بهاي الوقت اني انناي بالي سويته لهم نكست راسي وانا ارد بذاكرتي لورى: سهيل انت وشمه الوحيدين الي كنتو تدرو بسالفتي ويا بنت عمي وعن حبي الكبير لها .... يعلم الله ياسهيل بذاج الوقت كنت مابا يستوي لا لأختي ولا لربيعي نفس ماستوى بي .....خفت تتعلقو بعض ومايستوي نصيب من بينكم شرات ماصار لي.. انا اعترف اني تصرفت بأنانيه بذاج الوقت ... بس انت تقول انك ماخذت بخاطرك...... وانا اشوفك تمسك وتضغط على مشاعرك يوم اكون موجود..... أي حد يب طاريها تسكت وماترمس وكأن يايبين طاري لجماد وانا عارف ان بداخلك شي ثاني............... يحز بخاطري هالشي

سهيل يعدل يلسته: انا صحيح مثل ماقلت امسك مشاعري بس مايعني هذا اني ماخذ بخاطري بس انا ابا احقق رقبتك ومابا اتعداها قبال عينك
سلطان: من اليوم اعتبر هالرمسه كلام وراح .... وشمه هاي عندك تفاهمو مع بعض قبل لاتعرسو ويطيح الفاس بالراس يا انت تقنعها برايك ياهي تقنعك ......اهي خطيبتك ويحق لكم ترمسو وتفاهمو مع بعض
تبسم لي: الي يسمعك يقول ان بكلامك ولا بدون كلامك بتسمعني
سلطان: هههههههه هيه صحيح عنيده بس شمامي الي تحبه تسمع كلامه يوم يتفاهم وياها بس الي يعاندها تعانده الف مره
سهيل: ماعليه ياريال الحينه اهي وتسوي بي جيه وتنقع بي بدل ماتستحي مني..... شقايل بعد افاتحها بمواضيع جيه والله تسدحني وتدوس بطني
سلطان: هههههههه اعرفها اختيه دفشه بالاسلوب بس انت وشطارتك
سهيل: هيه خلها على الله
سلطان: قوم نسير داخل حر وايد
سهيل: ههههههه حتى انت جلدك رهيف مايروم على الحر؟
سلطان: ههههههههههه دخيلك لايسمعك راشد نحن ماصدقنا نسى هالجمله

.............................. ...........


.............................. ..............
على اد ماعشت وشفت وايه
قربت اكتر من الي نفسي فيه
قيتي انتي بسرعه يابنت الايه
بساطه كده البي ادرتي عليه
بحبك اه بحبك ودايب فيكي
وبحلف من الليله دى هعيش انا ليكي

ياحلاوه صدق جني داخل مرقص .. ولي يالس اشوفها جنها روبي ترقص بس على اغنيه تامر حسني... ههههه ياحليلج ياشمه اسميها رقاصه ... طالع طالع عفرا وهاي الي اتحسب اختي عاقل ولا بنات اخويه اسميهن البنات ناقصات عقل ودين

سلطان يطالعنا: خيبه!!! شمسويه بعمرها هالخبله هاي ... شو عندهن على هالرقص
سيف: ههههههه دخيلك اسكت عن يسمعونا خلنا نشوف من فيهن ترقص زين ( قلت هالجمله وانا اطالع فيهن)
سلطان يطالعني بنص عين: والله انك خربان وهاي الي اتخبرك عاقل

عاد لاتسئلوني عن حال سهيل لان كان مفول حده لان شمه لابسه جيه شرات المصريات مادري شو يقولو عنه اهم شي شرات الرقاصات المصريات !!! والحلوات وين يالسات يرقصن؟!!!........... بصاله الدور الثاني ههههههه يعني أي حد يصعد ممكن يشوفهن

سلطان ايده على كتف سهيل: صل على النبي
سيف: هههههههه سهيل فرصتك خذ راحتك طالع زين ( واحرك حياتي فوق تحت)
سلطان: لالالا انت صحيح فيك شي اليوم .... انا قلت راشد بسبه المغذي حشش علينا بس انت بسبه شو؟

فجأه خلصت الاغنيه ... بصراحه مارمت وقفت اصفق لهن

سيف: برافو بصراحه ابداع تستحقن ان تتوضفن بأكبر ملهى ليلي
شمه:!!!!!!!!!!!!!!!
عفرا:!!!!!!!!!!
روضه وعبير يشاهقن:!!!!
سلطان : احم شموه بسرعه على غرفتج
شمه: آآآآ نحن تحسبناكم طلعتو
سلطان: شمه على غرفتج
استوقفتها يوم شفتها بتسير: آآآآ شمه لحظه بسألج من وين شري.....

قطع علي رمستي سلطان وهو يسحبني لجناحه .....

يلست على الارض وانا ناقع ضحك: ههههههههه والله ماروم ياسلطان خخخخخخ قلت اطفر بها شوي حليلها اول مره اشوف شمه تخاف وتستحي

سلطان يطالع سهيل: سهيل شو بلاه اخوك اليوم والله مب صاحي!!!!
سهيل يلس على الكرسي بعصبيه: ماخلصت ضحك؟؟؟؟؟
طالعته وانا اضحك: شو بلاك؟ بدل ماتفرح ان ضمنت بالمستقبل في حد بيرقص لك( ويلست اقلد شمه وهي ترقص)
سلطان: خسك الله وين راشد عنك
سيف: يالس ينتظر القيمات
سلطان: طيب سير له عندي كلمه راس ويا سهيل
سيف: يالله علينا ويا كلمه هالرس وين مانسير قال كلمه راس المهم تكلم عادي ماشي حد غريب
سلطان يمسكني من ملابسي ويروغني برع : يالله سير لربيعك
طالعته بنص عين وغمزت له بتهديد: تراني بسير للجناح الي على ايدي اليمين

عطاني كف على ويهي وغفل الباب ... خيبه!!! الحين سلطان قد هالحركه هين هين!! ... ههههه بس اسميني اليوم ضارب عقلي مادري شو بلاني الله يهديني ان شاء الله
... اول يلست ارقص شرات البنات وبعدين ونزلت ههههه

طالع طالع هذا الثاني بعد..... يحق له يخق بعمره يوم ابو سلطان بكل هيبته يالس يقطع له فواكه وامه يالسه تلقمه لقيمات وانا اقول الولد شقا طالع دلوع

سيف: هيه من قدك بو سنيده جنك الامير والجواري من حولك
خالتيه: تعال القمك فديتك
يلست حذالهم: لالا وابويه انا ماني دلوع .. انا ريال اروم اكل بروحي
راشد بنص عين: يعني شو قصدك؟؟؟؟
وانا اكل لقيمات: حشى ماقصدي شي ... بو سلطان بذمتك قلت شي؟
بو سلطان: لاحشى عليك
سيف: هيه بس انت دوم تفهمني غلط
بو سلطان: شحال ابوك؟
قلت وانا مستغرب: بخير!!!!

هيه لازم استغرب من بعد سنين ولاول مره يالس بو سلطان يسأل عن اخبار ابويه ... هاي سالفتهم طويله ولازم اخبركم عنها يوم ان بو سلطان وخالتيه مشغولين مع هالدلوع خلني اخبركم ...

 

أدوات الموضوع



الساعة الآن توقيت السعودية الرياض و الدمام و القصيم و جدة 08:35 PM.


 
Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.

Search Engine Optimization by vBSEO 3.6.0