قـــلـــوب تـــحـــت الـــمــجـــهــــر**

وبعد ما وصلوا البيت صعدت ريم على طول فوق اما نايف دش الصاله عند اهله .. دشت حجرتها وبطلت العباه .. دشت الحمام تبى تاخذلها دش بارد يبرد حرقتها اللي يتها اليوم..بعد ما خلصت يلست فصالة جناحهم شغلت التلفزيون لكن بالها فمكان ثاني.. كانت تفكر بالأمور اللي اتضحت الها اليوم .. تفكر فالايد اللي لطالما عانت منها وكأنه عقلها الباطني مجذب انه هاي سوايا ابوها .. تذكرت الموقف اللي صار بينها وبين ابوها برمته مع انها ياما حاولت من قبل انها تتذكر او انها تعرف شو سر هذي الايد اللي تقرب منها كل ما اييها صداع لكن ما عرفت السر.. واليوم بس .. قدرت توضح زوايا الصوره فبالها صح ..
من صدمتها فذاك اليوم ماقدرت تجمع انه اللي زغدها وكان ممكن يجتلها هو نفسه ابوها .. تذكرت لما عليا يت تركض وهي تسمع صراخ بنتها وتشوف سيف قابضنها من رقبتها من دون رحمه ..

عليا وهي تصرخ: اتخبلت انته !!!
سيف: شليها عني .. شليييييييهااا
عليا وهي دموعها تنهمر بغزاره: خاف ربك فعيالك يا سيف .. حرام اللي تسويه والله حرااام ..
كانت تسحب ريم من ايده اللي كانت ضاغطه ع رقبتها وهي تسعل ..
عليا: فج بنتي حسبي الله عليك ..

بعد ما بطلت ريم من ايده شلتها وهي تحاول انها تقوم .. لكن ما قدرت .. بطنها عورها .. وقفتها وسحبتها من ايدها .. كانت عليا تصيح بحرقه .. اول ما وصلت حجرة بناتها حطت ريم ع السرير ..ريم ماكانت مستوعبه اللي يصير .. تمت تسعل طول الوقت .. وعليا قلبها متقطع عليها ..

سعلت ريم بقو وهي حاطه ايدها على رقبتها .. حست بخنقه وقامت بسرعه للثلاجه وطلعتلها ماي .. صبتلها كوب ماي ورشفته مره وحده ..

دخل نايف الجناح واستغرب من عدم وجود ريم وزقر عليها .. طلعت ريم من المطبخ التحظيري .. ووقفت عند الباب..

ريم: هلا نايف ..
نايف: يسالون عنج تحت قلت لهم مصدعه .. ماخف راسج؟
ريم: لا
كان يبين الذبول على ويه ريم .. عينها وارمه وشكلها شاحب .. وتتحاشى النظر في ويه نايف ..
نايف: خذتي مسكن؟
ريم: هيه
نايف: اوديج المستشفى ؟
ريم: لا مايحتاي ظاري يستوي لي جيه
نايف: عيل مدام جيه لازم تسيرين العياده نشوف شو سالفه هالصداع؟انا ماصدقته يخف عنج اخر فتره ..
ريم: ماعليه..بيخف ان شاء الله ..
نايف: انزين يايبين لج عشا كلي عشان يخف عنج راسج شوي
ريم: شربت حليب نايف مابا بعد شي ماكله في بيت اهلي
قالت جيه عشان تتحاشى اصرار نايف الزايد عليها
ريم: نايف؟
نايف: آمري
ريم: باجر ابا اسير عند أميه عليا بسلم عليها ماشفتها
نايف: ليش ماتعزمينها عندنا ؟ البيت بيتج ريم لاتستحين
ريم: لا مب جيه بس ابا اسلم على اهليه اهناك كلهم ومابيون كلهم خصه امايه سلامه وابويه الشيبه ..
نايف: متى تبين اوديج؟
ريم: لا انا ابا اسير ويا خواتي من الصبح لانه هم بعد ماساروا عند امايه من يوم اول يوم عيد ..
نايف: خلاص على راحتج سلمي عليهم ..
ريم: الله يسلمك .. خلاص انا بقوم ارقد تامر ع شي؟
نايف: لا مايامر عليج عدو سيري ارتاحي .. انا بطالع التلفزيون شوي مافيني رقاد..
ريم: اوكي تصبح على خير
نايف: وانتي من اهله

روحت عنه ريم وهي تفكر شو بتسوي وشو بتقول باجر لامها .. رجعت تذكرت الموقف اللي صارلها معقوله هالسنين كلها ماقدرت تخليها تتذكر هالموقف ..ولا الصداع اللي اييها كان من نتاج التفكير الدايم لها الموضوع.. مالقت لاسالتها اجوبه.. وتريت باجر بفارغ الصبر عشان تشوف امها وتخبرها بكل اللي شافته فذاكرتها..ولا هو بس اوهام تخيلتها؟!

******************
(الخميس) 27 يناير 2005
******************

الصبح يت ريم عند خواتها ووداهن الدريول بيت امهن .. مي وساره .. وريم .. كل وحده مجهزه أسألتها اللي تفكر فيها من امس..
مهره ومها يالسات بكل هدوء وهن مب عارفات شو صاير على خواتهن .. جاسم الوحيد اللي كان له بارض للسوالف ومب محصل غير الدريول يسولف وياه..

بعد ما وصلوا وسلموا ع الكل .. التموا لمه جماعيه ع الضحى .... بو راشد كان فالصاله يالس وام راشد بعد ..وعليا وبناتها متحوطين بهم .. مانع كان ناش من رقاده وطلع من بيته وسار عندهم كعادته كل ضحى..
اما محمد كان بيطلع لكن لما شاف العايله بدت تلتم رد ويلس وياهم..
طلعت عبير ويلست ويا الموجودين فالصاله ..

ام راشد: مانع ابويه.. مخليلك ريوق
مانع: وينه.. انا اليوم ناش وصدق يوعاان
ام راشد: بشوف البشاكير
مي: يلسي امايه انا بقوم اييبه ..
مانع: نفعت بنت سيف
مي ابتسمت لخالها.. وتردد فبالها اسم ابوها .. نفخت بضجر .. يابت الريوق لخالها ويلست حذاله..

مانع: شو بتشاركيني؟!
مي: ليش ماتباني اكل وياك
مانع: بتخلصينه عني
مي: لاوالله شووو شايفني
مانع: ههههههههه فديت ها الحس .. تولهت ع مناقرج
مي: هيهي جان استحي ..
مانع: حطيلي عسل ..
مي: انا عسل شو تبى بالعسل بعد
مانع: يالله عاااد مانروم نقول شي .. خقت علينا
مي: ههههه ... بحطلك يبوك كلتني ..
مانع: رقيه وسبيجه وين عنكن
مي: منو احلام ومدوي
مانع: هيه
مي: رقود .. ما وعيتهن بسيرلهن عقب شويه ..
مانع وهو يلف على بنات عليا: بنات ماتبن اكل
ريم: تسلم خالي.. متريقين ..
مانع: ساروه؟
ساره: لا ماشتهي انا ..
مانع: عيل ها المفجوعه قوموها بتمتن ..
مي: خاالي عاااد .. والله صدق تراني بقوم
مانع: هههههههه بلاج ما تستحمليني انتي مستويه .. عنبو ماكملت وياكن كم اسبوع من ييت .. شو ماتولهتي عليه وعلى تغصيصي لج..
مي اطالعه وهي مبتسمه: فديت روحك امبلا تولهت ..

وتمت مي تسولف يا خالها .. ساره وريم كل شوي يصاصرن ع الخفيف .. اما مها ومهره فقامن هن ها المره يوعن بنات خالهن محمد .. ملن من يلسة الكبار ..

وتموا على ها اللمه لين صلاة الظهر .. ومن عقبها تيمعوا مره ثانيه عشان الغدى .. وعقب الغدى دخلن مي وساره غرفتهم و كانت احلام يالسه وياهم ..
كانن ساره ومي وريم متفقات ييلسن ويا امهن عقب الغدى.. بس احلام الحين يالسه وياهن ومب عارفات كيف يتملصن منها .. ما يبنها اتي وياهن عند امهن ..

مي: حلامي
احلام وهي تلتفت لمي: شو
مي: اقوولج .. الروايه اللي مسونها خالي وين؟
احلام: هناك فالحجره
مي: سيري هاتيها بنقرا شويه
احلام: قوم امايه رقود يمكن
مي: لا لا توهم متفرقين اللمه .. سيري لحقي عليها قبل ما ترقد
احلام: ميووه ماروم..لازم الحينه يعني
مي: هي هي
ساره: يلا حلاامي قومي بنشوفها ..

احلام وهي تتطالعهن بضجر .. قامت من مكانها وسارت تبى تيب الروايه .. اما ساره ومي من اول ما ظهرت احلام شلن بعمارهن وع طول توجهن لحجرة امهن اللي كانت مقفوله ..
دقن الباب ..

مي: امااايه..
عليا بهدوء: نعم..
ساره من ورا: امايه ريم اهنه ؟
عليا: هيه شو تبون
مي: بطلي بطلي نبى نرمسج

عليا اطالعت ريم وتنهدت .. عرفت بالسالفه من ريم وتدري انه بناتها ما بيسكتن ها المره .. وصلت لين عند الباب وفتحته ..
لقن ريم يالسه ع السرير متربعه وشكلها كانت تصيح ..سارن صوبها ويلسن حذالها..

عليا: ها بناتي تبن تستجوبني!
مي: اميه اذا سمحتي يعني
عليا:خبرتني ريم عن اللي صار امس
ساره: الحين دورج انتي تخبرينا
عليا: اخبركم شو ؟
مي: خلاص امايه لاتمين تماطلين خبرينا شو سبب طلاقج ريحونا
عليا: شو هالرمسه ميوه
ساره: صدق طفرنا اكثر عن جيه شو تبون تسووبنا
كانت العصبيه تبين من نبرة صوت البنات
عليا: انا مالي ذنب في أي شي صار .. ابوكم من تزوجته كان يشرب .. لكنه كان يحترمني .. مايشرب في البيت .. عشان جيه محد كان يعرف عنه الا انا..ايي وريحته تفوح من ها الوصخ ..
ساره: لييش ما حاولتي ويااه انزين ؟؟ ليش اطلقتوا ؟
عليا: ساره .. الطلاق كان انسب حل.. منو قالج ما حاولت وياه ..لكن ابوكن لين يومكن هذا وهو مب رايم يخلي ها السم .. ماكان يسمعلي ابدا .. ومحد كان يعرف غيري مثل ما قلتلكن شو كان بايدي اسوي لمنو بشكيه يعني!!
مي: كملي اميه .. يعني عشانه يشرب طلبتي الطلاق!!

عليا يلست ع طرف الشبريه وتحس بدقات قلبها تتسارع..يا اليوم اللي كانت تخاف منه .. سترت على ابوهن وايد وعلى افعاله .. لكن مب بايدها اليوم اذ كشفت الاوراق.. بناتها عاشن عمرهن فها السر ومب عارفات ليش امهن فجأه ومن غير سابق انذار كرهت ابوهن واطلقت منه ..

ريم: اميه تبين ماي؟
عليا: لا فديتج .. سمعن بناتي ..انا من عرفته ابوكن وهو يشرب بس استحملت .. حملت بريم وصبرت عليه وعقبه ساره وعقبه مي وعقبه التوم .. صرتن خمسه فرقبتيه انجبرت اتهاون ويا ابوكن ما دام انه محترم وجودي وما يسكر فالبيت .. يدتكن بغت الولد بغت ماايد..حنت ع راس ابوكن لين يوزته ..وانا سكت وصبرت عشانكم حملت انا وناعمه في نفس الوقت .. المفروض نربي مع بعض .. لكن هي ربت في الشهر السابع وسبقت ويابت مايد .. سارت عند اهلها وكنت انا بعدني باقيلي شهر واربي..كانت يدتكم سايره تبات عند مريم لانها مريضه .. وتم البيت خالي .. طبعا كان عبالي انه ابوكم محترم وجودنا كلنا فالبيت ويسكر برع البيت وايي متأخر .. لكن في اليوم اللي محد كان فيه دخل البيت علينا .. طلع الاحترام مب لي انا .. كان لامه وحرمته هاييج .. بعد سكت عنه.. لكن يوم انه ضرب ريم اختكم ماحقيتها على نفسي ولا عليكم .. شليتكم وطلعت من البيت وييت بيت اهليه..
ساره بدهشه: كيف ضرب ريم ؟؟
عليا صدت صوب بنتها ريم وردت اطالعتهم : كانت تبى اللي في ايده تتحسب انه عصير وضربها ..
ريم اهنه نزلت راسها وهلت دموعها ..
عليا: ابووكن كان بيجتلها وهي حيه ..
ريم: اميه خلاااص
عليا: كان زاغدنها لين ما زرقت ريم وقامت تسعل .. الحمدلله اني وصلت ع صريخها المتقطع .. ولا كان قضى عليها ..اختكم قامت تهلوس تعقدت كرهت الرياييل بسبة ابوكن .. قام الصداع اييها من كثر ما تفكر .. من كثر ما تتخيل ها الايد اللي ماتعرف مصدرها منو وتبى تزغدها... ابوكن ما هنااها حتى فرقادها.. حسبي الله عليه حسبي الله عليه

ونزلن دموع عليا بغزاره وصاحت بصوت يقطع القلب .. ريم ما تحملت وتجدمت صوب امها وحضنتها .. مي وساره كل وحده تقاوم دموعها لكن ما قدرن ..يتخيلن الموقف اللي كان .. ويتخيلن وحشية ابوهن ..

مي وهي تطالع ريم: ريمان .. يعني الصداع اللي ييج بسبة افعال ابويه!!
ساره: كنتي تتخيلين اييد تزغدج واييج الصدااع!!
ريم صدت عليهن: ابوكن كان سكران..مايعرف شو يسوي
مي: ولووو .. كيف تجرأ.. ريمان.. بسبته انتي عشتي تصارعين ها الصداع كيف تقولون عنه ها ابوو ..
عليا وهي تمسح دموعها وتطالع مي: هذا اللي ماكنت اباكن توصلله..لاتكرهن ابوكن بسبة الماضي.. بيتم ابوكن
ساره: ابونا قطع قلوبنا على امنا واختنا..
ريم: ساروه.. انا صاحبة الشان ومسامحتنه .. خلاص .. نحن الحين فاليوم ..من يومين بس عرفنا شو صار قبل.. مايحقلنا نعيش الماضي خلاص..

تم الكل صاخ .. صدى الماضي رجع لعليا .. اتذكرت ذاك اليوم .. من بعد سالفة ريم..من بعد ما خاز تأثير المشروب من على سيف.. فليل سارلها..

سيف: عليا شو اللي تبغيني اسويه .. انتي تعرفين اني
وقبل مايكمل كلامه قالتله عليا وهي تصرخ: روح عني رووووح
سيف: عليا فكري ..عشرت ثمان سنين ماتكفرلي !!
عليا ودموعها فعينها: لاااا..مستحيل..
سيف بصوت جبان: لكن....عليــ..علياااا
عليا: سيف ابعد عني وعن بنااااتي خلاص.. انا بشل اغراضي وبهج من البيت.. ماعاد لي وجود هنه من عقب اللي سويته اليوم
سيف: عليا .. كنت شارب
عليا وهي تتطالعه بكل بغض: خلك ويا شربك يا سيف..

طلعت عليا من الحجره وهي تقاوم دموعها وتثبت عمرها على ها الدرب ..ماتبى تتراجع فاتخاذ ها القرار .. زقرت ع نجمه عشان تشل البنات والأغراض وياها..

تنهدت عليا بيأس وهي تشوف بناتها اللي كانن صاخات يترينها ترد لارض الواقع.. ضغطت بايدها على ايد ريم ..

ريم: انتي بخير اميه
عليا: بخير فديتج.. عمر وانا اتحمل .. ماعليج ..
مي يا فبالها السؤال: انزين اميه نعوم تعرف انه يشرب؟
ساره: واماايه عفرااا؟؟
عليا بحسره: ناعمه اكيد تعرف بس هو يخاف منها من جيه مايسكر جدامها .. يسكر برع ويرجع البيت يتسبح عقب يسير لها .. وامكم عفرا يا غافلين لكم الله.. سيف يخاف عليها عن يصيرلها شي فمتستر ع السالفه ويمكن لانه كان يخاف منها ايام سلطتها وجبروتها..
ريم: حليلج يا امايه ..
عليا: المهم احين عرفتوا كل شي ولا مابا شي يتغير فيكم بيتمون اهلكم .. ماوصيكن اخوانكن لازم مايعرفون شي .. استروا على ابوكم ..وبما انه هو ييلس في الميلس وجاسم تجرا وسار اليوم .. يمكن يسير يوم ثاني .. عشان جيه انا بتفاهم ويا راشد اخويه .. وبتنحل المشكله .. ما بوصي وايد.. ابوكم ماباكم تتغيرون عليه .. مهما كان ها ابوكم .. ومب مقصر فيكم ..
ساره: يعني خالي راشد يعرف كل شي
مي: قلنا امس انه يعرف ..
عليا: راشد يعرف لكن ما قدر لسيف قبل.. بس الحين لازم يرد يتدخل فالموضوع .. وانتن ما برد اوصيكن.. الماضي انسنه ولا تردن تنبشن فيه.. استرن على ابوكن ..

ريم ومي وساره كانن يطالعن امهن وهي ترمس.. بعدها توصيهن على ابوهن!!
أي طيبه يشله ها القلب يا عليا.. ساكته ها الدهر ولا تكلمتي..واليوم ين بناتج يبن يطلعن السر المدفون فوق الـ 13 سنه .. وما يلقن منج غير طيبة القلب هذي والتسامح .. تمن ساكتات ويفكرن فموقف امهن .. اذا امهن هذا ردها .. هن شو ممكن يسون وشو ممكن يقولن!

الجزء الثالث والعشرون

******************
(الثلاثاء) 1 فبراير 2005
******************

من بعد حوار مطول بين عليا وراشد اخوها صار من يومين .. قرر اليوم راشد انه يسير يشوف سيف بدون سابق انذار.. دخل على مكتبه فالشركه من عقب ما دق الباب..

راشد: السلام عليكم
سيف وهو متفاجئ لها الزياره: مرحبا الساع وعليكم السلام شو هالمفاجاه
راشد: اشحالك بومايد ؟
سيف: الحمدلله استريح استريح .. اشحالك انته ؟
راشد: بخير وسهاله ..
سيف: وين دارك يا راشد..عنبو ما شفناك من نهار العيد..
راشد: ياخووك تحيد عاد .. الشركه والاشغال والعزبه .. كلن يبا مجابل..
سيف: الله يعينك يا ريال.. اقرب اقرب..

ويلسوا ع الغنفات اللي ع طرف .. وبدوا ياخذون علوم بعض ..لين ما فتح راشد الموضوع اللي ياي عشانه ..

راشد: عاد يا سيف انا ياينك وعندي رمسه..
سيف وهو مستغرب: خير ان شاء الله
راشد: بناتك مطرشيني لك
سيف استغرب أكثر: بناتي؟ بخصوص شو ؟ يبون يرجعون لامهم ؟
راشد: لا .. شوف يا سيف .. انا عيزت وانا اقولك احترس وحافظ على بيتك وعيالك .. ضيعت عليا ولاتضيع الباجين ..كم مره قلتلك سواياك هاي يوز عنها لاكنك ماطيع الشور .. سنين وانا احايل وياك .. والحين اتحمل اللي بييك عاد

سيف نش من مكانه وهو منفعل من الرمسه هاي .. ماعرف شو مقصد راشد من ها كله .. تعود يسمع منه ها الكلام .. لكن ها المره شكله الموضوع أكبر ..

سيف : شو مستوي انزين..شو الساالفه خبرني.. ليش تقول ها الرمسه الحين؟!
راشد: يا سيف عيالك دخلوا الميلس اللي برع .. وشافوا سواد الويه اللي اهناك

سيف انصعق من الرمسه اللي يسمعها .. جنه حد صب ماي بارد عليه .. ماقدر يتم واقف يلس محله وهو يطالع راشد بنظره مهزومه ..

سيف: دخلوا الميلس!! كييف؟
راشد: شو كيفه بعد .. من الباب بعد شقى بيدخلون..
سيف: انزين انا دوم اقول للبشكار يقفله
راشد: لابد انه نسى .. المهم مب موضوعنا قفل الباب .. بناتك عرفوا يا سيف
سيف بتوتر: منو منهم اللي عرف؟
راشد: جاسم اللي فتح الميلس بس ماعرف شو اللي داخل ..ماستوعب يعني ..ريم وساره ومي يوم دخلوا وراه شافوا وعرفوا .. وخبروا امهم .. ها الثلاث الي عرفن .. اما الباجي مادروا بشي ..

سيف ماكان قادر يتخيل الموقف .. بعد ها السنين من الستر .. انكشف وضعه جدام عياله .. شو بتكون صورته .. كيف هي نظرت عياله الحين صوبه؟؟ هو ماصدق على الله انهم يردون وياه عادي .. والحين !
قام سيف من مكانه وسار صوب المكتب .. خذ كوب الماي الي موطاي وبدى يرشفه .. يبى يبلل ريجه الي نشف من ها الخبر .. لف على راشد وهو يترياه يرمس يقول شي ..

راشد: ها يا سيف..
سيف: راشد.. شمعنى الحين يايين يشوفون سوايا ابوووهم!!!
راشد: يا سيف السر ما يتم مدفون طول عمره.. وانته الله يهداك يوم اخترت تسكر اخترت ميلس البيت .. بناتك كبار وفاهمات .. الا ما ايي يوم ويقولن ها الميلس شو خانته فها البيت .. الا ما ايي يوم ووحده منهن تقول بسير انظف الميلس بشوف شو فيه.. محد حط فباله انه جاسم بيسير يشوفه وبيكشف سرك اللي هدمت فيه بيتك وخسرت فيه ام عيالك ..
سيف: والحل يا رااشد
راشد: الحين خبرني كيف صورتك بتكون جدام بناتك ؟؟ هاا؟؟ عيزت وانا ارمسك قلت لك كم مره تحتذر .. لكن يوم يفوت الفوت ماينفع الصوت ..

تجدم سيف من راشد ويلس حذاله .. سند راسه بقبضة ادينه اللي كانت على ركبه
سيف: لا تزيدني يا راشد.. قولي شو الحل الحييين!!
راشد: ودر عنك هاللعبان ياسيف بسك عاد انته كبرت وبنتك عرست وباجر بتستوي يد .. لين متى بتم جيه .. كافي اللي ضيعته ياسيف..
سيف: شو تباني اسوي؟
راشد: عمال مقاولتيه بيونك السبت .. بهش الميلس كامل .. لانه لو خليته في كل لحظه بيتراولهم انه في شي حتى لو ماكان فيه شي.. ولو تم الميلس بيتمن البنات حاطات فبالهن انك بعدك تشرب..
سيف: بتهشه
راشد: هي بينهش.. الميلس ما بيتم يا سيف دام بنات اختيه فالبيت ..تربن فبيت نظيف خلهن يكملن حياتهن فبيت نظيف..
سيف: زين زين .. لكن البنات .. كيف اجابلهن ..
راشد: من سواد الويه ما بتروم تجابلهن
سيف: راشد بسك عاد .. اقصد كيف اقولهم .. كيف افاتحهم بالموضوع
راشد: تبى ترمسهم يعني ؟
سيف: لا لا شو بقولهم ..
راشد: خلاص يا سيف.. يوم انته بتشل الميلس بيعرفون بروحهم انك فهمت ويمكن يتحرون انك تغيرت..
سيف: هزرك؟ عيل يبالي اخذلي شقه ..
راشد: اسميك ما توب تحمل سواياك عاد
سيف: ياراشد لاتزيدني انته بعد
راشد بتأمل: خلاص يا خويه ودر عنك ها العلوم
سيف: شو ترمس انته .. حاولت تراني من قبل بس ما رمت..لكن الحينه الحمدلله خفيت.. احسن عن قبل ..
راشد بتضجر: كيفك عيزت منك انا مليت خلااص.. يالله اسمحلي انا بتخرص
سيف: وين؟
راشد: بسير البنك عندي شغل .. لاتنسى عمالي بيكونون عندك السبت ..
سيف: ماعليه ..
راشد: يالله فمان الله
سيف: يالله مع السلامه

طلع راشد من عند سيف وهو يدعي ربه انه يقدره ويخلي سيف يبطل ها العاده .. حاول وحاول وياه قبل لكن ما قدر .. والحين من بعد ماعرفن بنات اخته الماضي ما هانن عليه يتمن جذه .. لازم يتم ورا سيف ..

****

الظهر رجع سلطان من دوامه وتغدى ويا امه وابوه واخوانه.. وعقب الغدى خليفه نش عنهم وسار مكتبه اللي فالبيت.. اما منصور ياه فارس وركب وياه وساروا يهيتون.. وابوهم طلع يرقد ومحد تم غير سلطان وامه فالصاله ..

شيخه: فديتك قوم سير ارقد مارقدت من الفجر
سلطان: اخاف ارقد ومانش لصلاه العصر .. بصلي وبرقد
ابتسمت شيخه وهي تحمد ربها في خاطرها: ربي يباركلي فيك
سلطان وهو يتذكر شي: هيه صح امايه..
شيخه: ها ابويه
سلطان: انا ناوي على شي..
شيخه وهي تتطالع ولدها: خير
سلطان: كل الخير ان شاء الله..انا ناوي اكمل دراستيه.. بخذ الثانويه وبكمل..
شيخه ابتسمت لولدها بكل سرور: احسن لك يا بويه انته شاطر ومخك نظيف .. والثانويه احين سهلوها هب شرات قبل .. بتنجح ان شاء الله
سلطان: بقدم عليها من السنه اليايه .. هالسنه ضاعت عليه مابيقبلوني .. وعقب الثانويه بقدم على كلية التقنيه
شيخه: صدق والله ؟
سلطان وهو يراقب الدهشه على ويه امه ويرد عليها وهو مبتسم
سلطان: هيه صدق ..
شيخه: وشغل خالك ؟
سلطان: بشتغل عند خالي الصبح وبدرس العصر في التقنيه ..
شيخه: الحمدلله رب العالمين الحمدلله .. الله يوفقك فديتك ويطرح فيك البركه
سلطان: امين .. امايه
شيخه: ها فديتك
سلطان: امايه افكر عقب ماخذ الثانويه اعرس وعقب اكمل دراستيه فالتقنيه .. شو رايج؟!
شيخه : تعرس؟ هاي الساعه المباركه فديتك ليش لا .. معاشك عند خالك بيسدك لين تاخذ الشهاده وابوك بعد مابيقصر عليك فشي..
سلطان: انزين يالله عاد انتي شغلي رادارج و دوريلي الحرمه
شيخه: فالك طيب يوم بسير اعراس الفريج بطالع زين ..
سلطان: لا امايه
شيخه: لاتقولي في حد في بالك
سلطان: لا حشى .. بس انا مابا الا من الاهل
شيخه: منو تبى ؟
سلطان: ماعرف أي حد المهم من اهليه
شيخه: انزين حتى بنات ها الفريج نعرفهم ومن قرايبنا..
سلطان: لا امايه..
شيخه: ليش؟
سلطان: ما اثق ببنات من برع .. بس امايه انتي شوفيلي أي وحده ترتاحيلها وتكون من الاهل ..
شيخه: فالك طيب الغالي .. البنات موجودات ..
سلطان : يالله عيل بسير انا شوي بطالع علوم الكمبيوتر لين الاذان .. فمان الله
نش سلطان وحب امه ع راسها
شيخه: فمان الكريم

سار سلطان وتمت شيخه تحمد ربها على هذي النعمه .. وتفكر في البنت اللي بتخطبها لسلطان.. بنت خاله عرست .. والباقين صغار .. وبنات اختها .. عرست وحده والثانيه انخطبت رسمي .. ماتمت الا مي .. لكن هاي بعد راشد قايل يباها لفارس .. واحلام! يلست شيخه تحسب الفرق بين سلطان واحلام ..
7 سنين ! محمد بيشوف بنته صغيره على سلطان ..
الله بيسرها لين ذاك اليوم ..

****

العصر فجناح بنات سيف .. كانت مي يالسه فالصاله وتجلب مجله فايدها .. وتسمع العزف الصادر من حجرتها .. وطت المجله وسارت متملله عند ساره .. دخلت عليها الحجره ..

مي: سويره

لكن ما من مجيب .. سارت مي وبندت الكهربا عن ساره .. طالعتها ساره وهي معصبه..
ساره: لييش؟
مي: ازقرج ما توايبين .. جي بتعامل وياج غير مره يوم برمسج بمجع الفيشه اول
ساره: جلبه
مي: جلب ريل بيظويج ..
ساره اطالعت مي بنظره: بقوله
مي باستهزاء: زايغه منه ..
ساره: ميوه فكيني شو تبين؟
مي: انا ماخلصت اغراض الجامعه .. ابا اسير اخذلي بدل بعدني
ساره: بسج الاسبوع اللي طاف مشترين
مي: لا ما يكفي .. ابالي بعدني كم بيجامه وكم بدله ماخذت وايد ..
ساره: انزين قولي لابوج
مي: عفواا
ساره وهي تطالع مي: هي قولي لابوج .. جيه بنتم محاربينه نحن !!
مي: لاوالله
ساره: اميه بروحها قالت لا تغيرن على ابوكن ..
مي: انزين ادري .. بس انا مب عارفه ليش من اشوفه .. اتذكر اللي خبرتنا عنه امايه واتخيله وهو يضرب ريم .. احس ماروم اشوف شكله حتى .. ماحب ارمسه..
ساره: ميوه .. الماضي مضى خلاص.. وانتي بروحج تشوفين كيف ريم الي هي ريم ماتواطن الرياييل عادي الحين ويا ابويه ..
مي: ريم مب عايشه الحين ويانا فنفس البيت.. وبعدين ريم من يينا ها البيت وهي مواقفها ويا ابويه معدوده.. ماندمجت وياه كثرنا نحن الي خذنا وعطينا وياه
ساره: ميوه بسج انزين هذا ابوج لاتمين شاله فخاطرج عليه .. بيتم ابونا وحايتنا عنده ..
مي: هذا هو .. ماتبينه الا للحايه .. والله انج انتي مافيج احساس
ساره: ميوه انتي يايه تسولفين ولا تعطيني محاظره ف الادب والمشاعر .. ترمسون عني جني انا انسانه مافيها قلب ماتحس وماياثر فيها شي .. لازم يعني ابين لكم شكثر انا متأثره؟ انا اشوفني اعقل منكم من جيه ماخلي شي مثل هالاشيا تاثر ع حياتي دام انها مضت واهلها نفسهم ماعادت تعنيلهم الكثير .. انا عادي عندي ..
مي: افف .. خلاص دام عادي عندج .. قوليله انه نبى نسير السوق .. ابا اخلص اغراضي ..
ساره: توه انا الي ماباه الا للحايه.. ها اخت مي ..
مي: جب جب .. والله انا مافكرت بها المنظور .. وطلباتي ماتي شي حذال بحر طلباتج..
ساره: اف..ماعليه يوم بشوفه خلاف بقوله ..

طلعت مي من عند ساره اللي ردت لمعزوفاتها وانغامها.. نزلت تحت تشوف الباقين شو يسون .. حاولت تلملم فبالها صورة ابوها اللي تكسرت.. وايد ناس لهم ماضي شنيع لكنهم عدلوه وكسبوا احترام الناس.. لكن ابوها بعده فدنياه لاهي .. تم قلبها معورنها عليه .. ماتباه يتم جذيه ..
تذكرت سلطان ولد خالتها .. كان الكل كارهنه على افعاله معقوله كان له سوابق نفس ابوها .. لكن الحين هو شخص ثاني الكل يحترمه .. دعت من كل قلبها انه الله يهدي ابوها شرات ما هدى سلطان ..

يلست فالصاله .. كانوا مايد وجاسم مخلين الصاله فوق حدر من كثر ركيضهم ولعبهم .. يتفاررون بالخداديات اونهم يسوون حرب .. ومي كل شوي اتيها ضربه ع راسها بالمخدات ..

مي: ميووووود جسووم .. اصطلبوو
مايد: هههههه والله ها جسوم بدى .. ما يخصني
جاسم: انا بديت.. ولد امك انته .. اندووك ها

يت المخده ها المره على ويه سيف اللي كان توه داش الصاله .. تم جاسم واقف متيبس .. كيف ظهر ابوه فجأه فالصاله .. ومايد يطالع جاسم ويرد يطالع الابو .. مي اللي كانت يالسه ع الغنفه وتتطالعهم ليش صخوا .. لفت على ورا لمحل انظار مايد وجاسم وشافت ابوها ماسك الخداديه فايده ومعقد حياته ..

سيف: شو ها اللعبااان ها
جاسم: ها .. ماشي ماشي كنت اروغ ذبابه ملعوزتي
سيف: ذبابه هاا
مي ماقدرت تكتم ضحكتها وظحكت ع الخفيف ..
سيف: شو مسوين انتوا هنه .. والله لو تشوف ناعمه بطيح واقفه.. خربتولها البيت.. قوموا يلا عدلو ..
مايد: انزين ابويه بنعدل كل شي الحين ..
سيف: مي انتي يالسه وساكته عنهم

مي اطالعت ابوها وسكتت .. مسكت مجلة الشعر اللي يايه هديه ويا مجله ثانيه وتمت تجلبها وتقرى فيها .. سيف تنهد وسكت عنها .. ويلس مجابلنها ..
مي تمت تقرى مندمجه وطاحت عينها ع قصيده وايد استانست عليها.. وابتسمت ..

سيف: ها شو قريتي ..
مي: لا ماشي ..

قامت مي وهي قابضه المجله .. ووجهت كلامها لمايد وجاسم اللي يالسين يرتبون..

مي: نظفوا زين من بعد ها المزبله .. الحين امايه بتي تيلس هنه شلو المخاد من ع الارض عن تعثر بهن
جاسم: انزين انزين ..حشرتينا

طلعت مي من الصاله وهي مخليه وراها ابوها فحيرته .. وصعدت فوق وهي تركض.. دخلت جناحهم وع طول توجهت لساره ..

مي: ساروه ساروه ساروه
ساره: ها ميوه ميوه ميوه .. تعلمتي الدرس اشكر فنج
مي: هههه سخيفه
ساره: بلاج مبسوطه توج ظاهره من عندي متغصصه!
مي: ماشي غيرت جو ويا العبايط جسوم وميود وييت
ساره: زين والله .. الحمدلله مزاجج بسرعه يتحسن انتي ..
مي: سخيفه.. انزين شوفي .. اقري ها القصيدة ..
ساره: افف يتنا بقصايدها..بس هلكتينا من الشعر
مي: اقري اقري انتي ..

قبضت ساره المجله وتمت تقرى .. لكن مي ماعيبها القاء ساره ومطت منها المجله وبدت مي تلقي الشعر بكل احساس..

"مـن كـتب الحب العتاق ؛؛ وتاريخ الفراق
وســتـايـر الــدمـع الــرقـاق
جـمعت قـلبي غـبار ؛؛ وقـطع فخار
ومــن عـلـى الـمـرمر الـبـارد
ومن ما نسته النار ؛؛ من غيمي المحروق
وحملت عيوني وركبت أول سفينه تبحر
عـلى وجـهي الاصفر ؛؛ خريفٍ طال
وســـلال مـــن رذاذ ومــلـح
وفـي صـدري حـجارة نسيوها بحاره
مــــروا عــلــي ف يـــوم
وقـالوا تـعال مـعنا ؛؛ وما كان يجمعنا
إلا الــضــيــاع والـــريــح
راجـع مـن الايـام ؛؛ مـن الاحـلام
ومـن الـف سـناره ؛؛ مغروسة بقلبي
لـقيت لـي بشارة ؛؛ ما اغلى عطا ربي
أثـر الـعمر ساره ؛؛ وموج البحر ساره
وكــــل الــمــدى ســــاره
سـافرت كل العمر ؛؛ وراجع احب سارة "

ساره وهي مستانسه حدها: راجع احب ساااره .. الله الله .. يااسلام .. وقوووف .. تصفييق ..
مي: هي هي .. توج تلومين ام الشعر
ساره: عجييبه ميووه
مي: هاي كلمات الامير بدر بن عبدالمحسن ..
ساره: تخبريني انا عن الشعرا .. ماعرف ماعرف .. المهم عيبتني
مي: يلا يلسي لحنيها وغنيها لنا ..
ساره: خخخ يبالي والله .. خلاص فضولي جو بيلس الحن
مي: مالت عليج .. صدق صدق ساروه عن يكون تحرين عمرج..بتهوفن..لا لا خلنا من هذيل.. عن يكون تحرين عمرج محمد عبدو ولا فايز السعيد ..
ساره: عدااال عاد يا نزار قباني
مي: ههههههههه ويا ها الويه ..

وتمن الخوات كعادتهن يسولف ويتضاربن وينكتن ع بعض.. ساره التهت باللحن اللي تبى تألفه ومي تتطالعها وتعطيها مقترحات .. وكل شوي يصرخن فويه بعض..
وتستمر الحياه عندهم .. عادي ..

الساعه 10 ونص فليل كان نايف يالس ويا ريم في غرفتهم ويسولفون عن ذكرياتهم ويا بعض .. وكل شوي يتذكرون سالفه استوت قبل ويضحكون .. تذكر نايف الصور اللي عطنه اياهن خواته ويابهن لريم وتموا يعلقون ع الصور..
و شوي اندق الباب عليهم .. وطى نايف الصور من ايده ع الطاوله..

نايف: منو ها
ريم: ماعرف اطالع
نايف تجدم من الباب: منووو
نوره: انا بطل الباب
نايف: ههههه شو تبين ؟
نوره: بطل الباااااب
نايف بطل لها الباب: نعم
دخلت نوره ببجامتها وسارت على طول عند ريم وطاحت ع السرير
نايف: لحظه.. شو وكاله من غير بواب وين تبين ؟
ريم كانت تظحك وهي لاويه على نوره
نوره: برقد عندكم
تجدم نايف منها: نعم ؟ منو قال
نوره: انا ابا ارقد عند العروسه
نايف: يالله يالله قومي سيري عند امج..هاللي ناقص
نوره وهي متمسكه بريم: مابا مابا برقد اهنه
نايف: قومي نوروه سيري عند ماماه يالله تعالي باجر
نوره صاحت: مابا ابا اتم انا هنه
ريم: ماعليه نايف خلها حليلها
نايف: لا .. بتعيبها السالفه وكل يوم بتي
ريم: انزين انته خلها برقدها وشلها ودها
نايف: اوف انزين ..
نوره: انزين ليش انته تقول اوف
نايف: عشان انتي غصصتيبي
ريم: ههه حرام عليك
نوره عقدت حياتها وهي تتطالع نايف ..
نايف: ها بلاج ..
نوره: انزين انته ليش تحب ريمان ماتحبني
ريم: ههههههه ويه نواري شو ها الاسئله
نايف: حبيبي انا احبج واحب ريم .. زين جي
نوره: انزين ليش تحب ريم
ريم: عاااد نواري واسئلتها
نايف اطالع ريم وابتسملها ..
نايف: احبها لانها حرمتي
لفت نوره على ريم وضحكت بدلع ..
نايف: ياربي انا كيف اموت على ها البنت

وبدى يتحرش نايف بنوره ويقرقطها ع بطنها وهي تضحك .. مالقت مفر من نايف غير حضن ريم .. تمت لاويه عليها وريم تمسح ع راسها .. نايف ابتسم لريم وهو يتخيل شي ثاني .. يتخيل الياهل اللي بيملي حياتهم فرح .. لف ع الابجوره وسكرها وتغطى باللحاف وهو يدعي من ربه انه يرزقه بنوته شرات اخته ..
وتم فكره سرحان .. وريم اطبطب على نوره تباها ترقد ..
كسر الهدوء وسألها..

نايف: ريمان هالكورس عندج تدريب صح ؟
ريم: هيه
نايف: وين ؟
ريم: ماعرف وين بيودونا بس انا قايلتلهم مابا مكان فيه وايد ريايل
نايف: هيه احسن هاللي كنت بقولج اياه
نوره: اوف اسكتوا وايد حشره انا ماقدر ارقد
ريم: ههههههه
نايف: بجتلها انا هاي
ريم: اسكت عنها بترقد احين
نوره: نايف مافي مكان سير ارقد ع الارض
نايف: والله انج ماتنعطين ويه
ريم: خلها بترقد اصلا هي مسطله اسكت عنها انته بس

سكت نايف وتمت ريم تقول لنوره قصه وتسمح على شعرها لين رقدت .. تمت تتطالعها ريم وباستها ع يبهتها .. و زقرت ع نايف تقوله انه نوره رقدت عشان يشلها ويوديها عند امه..صدت عليه ولقته هو الثاني رقد .. ابتسمت .. وسكرت الابجوره عشان هي بعد ترقد ..

بعد مرور شهر وعشرة ايام

*******************
(الخميس) 10 مارس 2005
*******************

اليوم من تسع الصبح البنات ناشات من رقادهن .. طبعا بينشن من وقت .. وراهن سيرة لبيت امهن يقيلن فيها لين فليل .. بعد ما تجهز الكل نزلوا تحت يتريقون
ام سيف كانت يالسه وتعدل جلابيه جاسم الطويله بمكينة الخياطة.. من قبل كانت ام سيف تحب تخيط لكن مكينتها من اختربت ماردت اتصلحها .. والحين البنات خذلها وحده يديده ويابوها لها عشان تتسلابها .. وقامت ام سيف من تشوف شي فالكنادير مب عدل بروحها تعبلت وعدلت.. سلمن البنات ويلسن فالصاله محاوطات بامهن يتريقن ..

ساره: حشى حشى الواحد ينش من الصبح ع تقرقيع هالكيرخانه
مي: ولا في بالج هي ..ولا تسمعج
ام سيف: اسمع اسمع جيه ماسمع
ساره: ههههههه امايه شو تبينها هالمكينه الخيايط مكودين
ام سيف: لو مب هالمكينه انا ماعيشت ابوكن وعمتكن عقب ما مات أبوهم
مي: ليش يعني ؟ يدي ماخلف شي
ام سيف: خلف النا البيت بس والا غيره ماكان عندنا .. قمت انا اخيط وافصل وابيع عقب طلع لي ورث ابويه ماكان وايد لكني طرشت به ابوكن مصر يدرس .. والا مريم من استوى عمرها 15 يوزتها .. مارمت ع المصاريف .. لين اتخرج ابوكم والحمدلله يانا الخير
ساره: قصة كفاح هاي
ام سيف: عيل مثلكم يانا كل شي ع البارد .. انا يوم مات يدكم بعدني بنت 23 سنه..
مي: ويه امايه وايد صغيره كنتي
ام سيف: هيه لكن شو نسوي
ساره: انزين امايه .. كيف توفى يدي !
ام سيف غمضت عينها لها الذكرى الأليمه وطلعت صوت تنهيده تدل على بعد الذكرى وبعد ذاك الزمن اللي ولى ...
ام سيف: يدكن كان يسقي الزرع ومسك الديلمه مال الماي وايده خرسانه .. مسكته الكهربا .. وصار اللي صار .. كان يومه ..رحمة الله عليه
مي بأسى: الله يرحمه ان شاء الله
ام سيف: الله يرحمه ويغمد روحه الجنه..كان ونعم الريال
ساره: انزين امايه انتي ماعندج اخوان والا خوات ؟
ام سيف: لا ماعندي انا ربيت بروحي لكن يدكم عنده اخوان
ساره: عمومة ابويه يعني ؟
ام سيف:هيه لكن كلهم ساروا بوظبي من سنييين وماعاد حد منهم اهنه
مي: مايونكم ؟
ام سيف: لا مايون توفوا وعيالهم مايعرفونا ذاك الزود
ساره: اها والله سالفه .. ميوه صبيلي حليب
مي: بسج خلص الحليب
ام سيف: دقوا جرس لنجموه تسويلكم احين بينش ابوكم بعد بيقول يبى حليب..
مي : انا بسيرلها.. ايه cut cut .. لا تكملون السالفه لين ما ارد ..
ام سيف: ماشي سالفه يا امج .. قلتلكم كل شي
مي: هي زين .. بسير اودي الدله

نشت مي وسارت صوب نجمه في المطبخ اللي كانت يالسه تتريق وتتسمع الراديو

مي: نجموووه ..طحت عليييج شو تسويين
نجمه قفزت وهي تلتفت ع ورا بسرعه تشوف الي عند الباب..
نجمه: مافي فايده هذا بنت .. كم مره انا يقولي سوي شوي شوي كلام انا في خوف
مي: ماتعولين .. اقولج هذي دله الحليب سوي زياده حليب
نجمه: انا سوي اثنين مره الحين
مي: انزين برايه سوي زياده انتي ثره شو عندج من الشغله غير ميلسه وتسمعين هالرادوو وتزطين ..
نجمه: جين جين..مافي سوي حشره..

يلست مي تغصص ع نجمه لين خلصت الحليب .. وشلت وياها الدله .. رجعت الصاله ولقت ابوها يالس ع الطاوله يتريق.. حطت مي الدله ع الطاوله وما تكلمت
وقبل لا تلف وقفها سلام ابوها ..

سيف: صباح الخير
مي: صباح النور
سيف: منو مسوي الحليب انتي والا نجمه ؟
مي: نجمه
سيف: يالله قلت بنتي بتشربنا من دلتها..
تحركت مي عشان تروح تيلس ويا خواتها لكن ابوها زقرها
سيف: مي..وين سايره يلسي تريقي
مي: تريقت
سيف: انزين يلسي بسولف وياج
مي يلست ع الطاوله ويا ابوها وهي تتحاشى تطالع في عيونه ..
سيف: اخبار الدراسه ؟
مي: زينه
سيف: شو معدلج الكورس الاول ؟
مي: الحمدالله..
سيف: هاا ابا امتياز انا
مي: ان شا الله خير
سيف: بتسيرون عند امكم ؟
مي: هيه
سيف: بتريق وبوديكم
مي : ريم بتخطف علينا

سيف سكت عن مي ها حالها وياه من فتره طويله من ذاك اليوم المشؤوم بالنسبه للبنات وسيف.. قامت مي تتحاشى اليلسه وياه في مكان واحد .. او ترد عليه باجابات مختصره .. ريم اوريدي كان تعاملها ويا ابوها عادي.. وساره ما بينت شي لابوها .. لكن ردة فعل مي مب قادر سيف انه يبلعها.. تخليه يحترق من حقرانها له.. الميلس وانهش .. ومن يومها وهو يحاول يكسر الصمت الي صاير بس مي تصده ومب قادر الها .. شو ممكن يسويلها مايعرف!

بعد ما رد الهدوء يعم ع الطاوله بينها وبين ابوها .. شلت مي بعمرها وترخصت من ابوها وسارت تيلس حذال سارة اللي كانت يالسه تقرا جريدة اليوم بانتظار ريم اختهم اللي قالت لهم من امس انها بتمر عليهم وبيروحون عند امهم ..

مي: اتصلي فريم شوفيها ..
ساره: بنأذيها الفقيره كم مره متصلين
مي: انا بدقلها ..

شلت مي تيلفونها واتصلت بريم ..

ريم: اليوم متنشطات واعيات من وقت انتن ..
مي: هي نبى نسير يلا قبل ابويه ما يرد لاقتراحه
ريم: أي اقتراح
مي: قال توه بيودينا قلتله ريم بتودينا
ريم:اها.. لا ماعليج.. احين بنش بتلبس
مي: انتي بعدج مااانشيتي
ريم: خذتني رقده .. نايف مادري من متى ناش .. بتلبس وبنزل اشوفه
مي: يلا استعيلوا
ريم: اوكي..

سكرت ريم التيلفون وطته ع جنب .. وقامت من نومها بتثاقل . طلعت ثيابها من الكبت ودخلت الحمام تتسبح .. تلبست ويلست جدام التسريحه تمشط شعرها.. جحلت عينها ع الخفيف وحطت بودره خفيفه .. لبست عباتها وشيلتها وشلت شنطتها ونزلت تشوف نايف..
لقته يالس فالصاله بجلابيته مال النوم .. استغربت ليش للحين مالبس..

ريم: السلام عليكم
مريم: وعليكم السلام
نايف صد على ريم واستغرب انها بشيلتها وعباتها ! وين بتسير!
نايف: هلا ريمان وين سايره!
ريم: نايف كيف وين سايره اكيد عند اميه .. ليش انته مالبست للحين !
نايف: انا مادريبج بتسيرين الحين .. انا كنت
وماكمل كلامه لانه تلفون ريم قاطعه
ردت ريم على ساره اللي كانت متصله فيها: الوه .. ها ساره .. جاهزين انتوا؟ خلاص انزين انا جاهزه جيه 10 دقايق وبمر عليكم .. يالله مع السلامه

كان نايف يسمع كلامها ويا اختها .. ترمس كأنها مخططه للسيرة من قبل ..
ريم: يالله نايف مابتتلبس؟ خواتي يترين عشان تودينا اهناك
نايف : انزين خلهن يسيرن ويا الدريول انا بوديج فليل
ريم: لا عاد انا قلت لهن الحين .. وهن يترينا
نايف: ريم ماروم الحين ..
يلست ريم حذال نايف ..
ريم: كيف ماتروم من امس تراك قايللي بتوديني اليوم..وانا قلت لخواتي عساس نحن بنمر عليهم ..
مريم: قم ابويه يوم انك واعد حرمتك ..
نايف اطالع ريم وابتسم من ورا خاطره : ماعليه ..

نش نايف من مكانه وصعد غرفته .. يبدل ثيابه وهو متظايج من هالوضع .. لكنه ماحب يحرجها جدام امه .. هو صح متفق وياها يوديها عند امها .. لكن ماحددوا الوقت .. كيف تصرفت جي على هواها !!
الخميس اجازته وياها لكنه مايقضيها وياها .. ما عيبه ها الحال ..
سكت عن السالفه ولبس ثيابه عشان يسير ياخذ بنات خاله ويوديهم بيت امهم
طلع من قسمهم ونزل تحت وهو فايده سويج السياره يفره ويمسكه فايده .. وقف عند باب الصاله .. زقر ع ريم عسب تقوم .. نشت حبت عمتها ع راسها ولحقت ريلها .. ركبوا السياره .. ونايف قام يسولف وياها ويتجاهل أي مشاعر استياء تنتابه .. وصلوا بيت سيف وشلوا البنات وساروا عند امهم ..

اول ما نزلن البنات من السياره شلن اغراضهن وتوجهن لداخل البيت .. اما ريم تمت فالسياره ويا نايف ..

ريم: ما بتنزل تسلم ..
نايف: لا .. يوم بمر عليج عقب بسلم
ريم: همم زين
نايف: متى تبين تروحين؟
ريم اطالعته وهي مستغربه .. يعني تعودت انها ها اليوم تقضيه عند امها .. ليش اليوم شو صاير فيه!
ريم: مب لين فليل!!
نايف: والله يا ريم مادريبج..
ريم: انزين.. أي وقت تباه تعال عادي
نايف: مب اييج الظهر وتضايجين ماتبين تردين
ريم ابتسمت لريلها: ليش ها الكثر ماتروم تفارقني
نايف: حرمتي وماصبر عنها ثواني
ريم: خل عنك
نايف: والله جد ماسولف
ريم وهي يايه بتنزل ..
نايف: بمرج العصر
ريم اطالعته وسكتت ..
نايف: هاا؟
ريم: اللي تشوفه حبيبي
وغمز نايف لريم .. سكرت ريم باب السياره وهي تبتسم له .. اما نايف ريوس بسيارته وطلع من البيت ..

دخلت ريم البيت .. محد كان فالصاله ها المره .. ع طول توجهت لغرفة امها .. شافت امها يالسه وجدامها اوراق تصلحهم .. سلمت ع امها وفصخت عباتها ويلست حذال امها ع الشبريه..

ريم: ليش البنات وينهن؟
عليا: قبل شويه ظهرن .. سارن حجرتهن يعقن عبيهن ..
ريم: اها .. شو ماشالله بديتي تمتحنين؟
عليا: كملنا شهر فالدوام.. يبون الدرجات بيعطون الشهايد..
ريم: هيه.. الله يعينج .. والله التدريس صعب وعباله
عليا: كل شي عشان خاطركم تحملته يا ريم
ريم: فديتج والله يا امايه ماقصرتي موول ويانا..
عليا: عيالي .. لازم مابقصرعليكم في شي.. يوم الله بيرزقج انتي بعد بالعيال..بتحسين كيف الام تبى تضحي بكل شي بس عشان ترسم البسمه ع ويوه عيالها

ريم ابتسمت لامها بخجل .. وعليا تمت تسولف ويا ريم عن امورها العائليه والزوجيه واذ كانت تبى أي نصح من امها تراها مستعده لكل شي ..

شوي طب عليهم جاسم يزاقر ..

عليا: ها ابويه بلاك ..
جاسم تجدم ويلس حذال امه ع الشبريه .. وتم يناقز وهو يالس ..
عليا: جسوم بلاك .. يلس زين
ريم: مايهدى ها فمكان.. لازم يرتبش
جاسم: انزين انزين .. اميه سمعي ..
عليا: ها ابويه .. قول شو تبى
جاسم: خخخ مابا شي ..
عليا: الا جي يعني ..
جاسم وطى راسه وشاف اوراق الامتحانات اللي محطتنهن امه جدامها
يلس وقبض الاوراق في ايده يطالعهن ..

عليا: شو تباهن بتخربط الشعب خلهن
جاسم: بشوف الا .. الاسم: خوله سعيد .. اميه هاي حلوه
عليا: وابويه عليك .. شو تباها حلوه ولا ..
بدل جاسم ع الورقه الي ورا.. وقرى اسم البنت ..
جاسم: كيف شكلها هاي ..
ريم: ههههههه استخف جسوم
عليا: يلا جاسم هات الاوراق
جاسم : انزين انزين ..
قرى اسم البنت صاحبة الورقه الي عقب ..
عليا: ها شو بعد ..
جاسم: لا هاي كسلانه .. ماباها ..
ريم: طاعو انتووو
جاسم متلهف وهو يشوف الورقه الي ورا علامتها كامله ..
جاسم: هاااي اكيد حلوه .. يايبه درجه كامله ..
سحبت عليا الاوراق من ايد جاسم وهي تضحك عليه..
عليا: هههه ها من الحينه عيونك قامت تزيغ
جاسم:ماداني البنات انا .. ماغازلهن .. اسويلهن طااف
وطى جاسم الاوراق من ايده ويا بيطلع من الحجره لكنه تذكر شي ورد..
جاسم: هي صح نسيت ..
عليا: ها حبيبي شو نسيت بعد
جاسم: امج واخوج برع .. قايليلي ازقرج
عليا: ههههههه يدتك وخالك يا الهريم ..
ريم: يالله انزين بني الحين ..
جاسم: كلهم برع .. يتريونكم تلتمون
عليا: انزين يلا .. ها وطينا الاوراق .. قومي ريم ..

طلعوا هم الثلاثه برع فالصاله .. كانوا ام راشد وحفيداتها يالسات ووياهم مانع ..
يلست عليا ع الارض حذال صينية القهوه .. وصبت الها ولامها ولمانع وريم ..

عليا: ليش محمد وعبير وينهم
احلام: سايرين السوق ..
ساره: يالله انا فخاطريه اسير السوووق
عليا: صخي انتي اللي ماتجنعين من السوق.. لو نفجج من اليوم لباجر ما بتشبعين
مي: ههههههه وييو ..
ساره اطالعت مي بنظره وسكتت عنها ..
مانع: يالله بنتيه ميوه ماتتطلب ماتقول تبى شي .. اترياها بس تقول ابا عشان اسويلها ..
عليا: هي امره .. الا مي وساره لاتقول عنهن شي .. كل شي يبنه
مي: هههه امييه دخيلج لا تحاملين عليه.. خلي خالي دام انه متكفل فيني
ساره: انته تبناها يوم انه ماتحق عليها ولا كلمه
مي: شو بدت الغيره يعني
احلام: لا صدق .. عمي مانع كله فصف ميوه .. شو مسوتله ساحرتنه انتي
مانع: هههههههه حليلها ميوه.. تعرفون شو اللي يعيبني فميوه..
احلام: شووو
مي: خالي لا تمدحني وايد .. انني اخجل ..
مانع: لا صدق ارمس.. ميوه انسانه لا لها ولا عليها .. شفافه وايد.. اللي فقلبها ماتروم تجاهله ولو شاله بخاطرها من حد ماتقدر تتصرف وياه ..

مي كانت تتطالع خالها وهي تسمع تعليقه عليها وانتقاده .. سرحت في آخر شي قاله .. وسكتت .. كيف قدر خالها يفسر ها الشي .. صح يعني !

ساره: وينها ميووه
مانع: شو وينها هاذيه ماتشوفينها
ساره: لا تراها شفافه ههااااي

كل اللي فالصاله تموا يضحكون ع تعليق ساره ومانع ماقدر يمسك عمره فر ساروه بتيلفونه وهي تضحك ..
مانع: تمصخرين حضرتج ..
ساره:ههههه اخ رقعتني بها الطابوقه حشى ..

وعلى ضحكهم وسوالفهم .. سمعوا دق ع باب الصاله .. تبطل الباب من بعد ما حطن البنات شيلهن ع روسهم .. دخلت ميره الصاله ونبهت الموجودين انه مروان وفارس بيدخلون ..
وتموا يسولفون ويناقشون امور وايده كعادتهم .. ساره توترت وايد من ها الجو..تحس الانظار عليها .. كل ماترفع راسها تشوف الموجودين ماتبى تحط عينها بعين مروان .. تشوف الكل الا مروان .. ماتلف صوبه ابدا ..
تمت تلعب باظافرها تلتهي بشي ..
ومي كانت حذال مانع تتعبل بتيلفونه .. وهو كل شوي يمطه من ايدها .. شغلت البلوتوث تبى تلقط الموجودين فالصاله .. ومانع يشوفها ويضحك عليها..

مي: شوف شوف .. ارقام بعد ..
مانع: هي انتي هب تشغلين البلوتوث فمكان
مي: يا حسره تيلفوني كحيان مال بنات جامعة العين .. شو تتحرا عندي بلوتوث وكيمرا
مانع: احسلكن انزين ..
مي: لا مايخصني ابا تيلفون يديد .. ها هدية من احلام حق الجامعة وابا ثاني للبيت .. ليش ساروه عندها ..
مانع: توني اقول مي ما تتطلب ..
مي: خلاص الحينه اطلب انا .. يلا هاتلي ..
مانع: هههههههه انزين انزين ..

غيرت مي نيم خالها وحطت " حيوا مانع بن سلطان"

وتمت تلقط اجهزه .. ميزت رقم مروان .. وطرشتله شي يضحك من تيلفون خالها .. استقبل مروان وهو يقرى النك نيم وضحك ..

مروان: مصدق عمرك انته .. حيوا مانع
بس انتبه انه التيلفون فايد مي مب مانع ..
مي: استقبل انته ..
مروان: هههههههه والله انتي حركات
مانع: شو تطرشيله
مي: ماعرف ها فيديو يضحك طرشته .. بنقالي يرقص
مانع: هههههههههه

والكل عيبته السالفه اللي بدتها مي وقاموا يراسلون بعض بالبلوتوث ويسولفون وهم ينكتون ع نيمات بعض .. ومي كل شوي تغير نيم خالها باسم يظحك .. وتم ها حالهم لين اذن الظهر وتفرقت اللمه للصلاه.. قبل ما يظهر مروان .. لف على ورا .. بعدها محافظه على هدوءها ويلستها .. ترمس ع الخفيف بس .. كل البنات ملاحظات حياها .. موقفها لايحسد عليه.. لكن مروان ماتمنى ها الشي .. يباها ع طبيعتها .. يباها تسولف .. يبى يكسر الحاجز هذا .. تنهد وظهر برع البيت..
عقب مارجعوا من الصلاة تغدوا الريايل وعقبهم الحريم وكل حد سار في صوب ..
مانع سار العزبه ويا محمد .. عبير دخلت ترقد . وريم سارت الغرفه تسولف ويا امها اللي رجعت تكمل تصحيح الاوراق.. مها ومهره ومديه كانوا في غرفتهم
واللي بقوا في الصاله ..ام راشد وشيخه وميره.. ووياهم مي وساره .. ومروان فضل انه ييلس وياهم دام انه الصاله خلت من اللمه القبليه ..
كان مروان متساند ع الغنفه وقابض جهاز التلفزيون فايده ..
ومي قابظه عدة ترتيب الاظافر وتعابل ظفورها .. وساره قابظه تلفونها وتلعب فيه..
اما ام راشد و شيخه وميرة فيسولفون..

مي: مروان افتر راسي اثبت لك ع قناة ..
مروان: مافي شي يتشاهد فالتلفزيون ..
مي: ها مروان .. صبر صبر رد ع هالاغنيه
مروان: أي وحده ؟
مي: توه خطفت عنها.. في نجووم

رد مروان ع قناة نجوم وكانت الاغنيه اللي تباها مي اغنية حمد العامري.. احبك لو بعيد الدار ..

مي: ياسلام بس خلها
ابتسم مروان لمي اللي تمت تتطالع الفيديو كليب.. رفع راسه صوب ساره ع السريع يبى يشوفها شو تسوي .. كانت مندمجه فالتلفون .. شو يعني تبى تتهرب من الاجواء ولا مب قادره انها ترفع راسها ..
مروان مب ناوي يعدي ها اليوم على ساره ..
يت فباله فكره وهو يسمع الاغنيه طويله بعض الشي لكن يبى يغير جو.. وع طول طرش مسج لساره..
وصل المسج لساره وقرته " انتبهي للمسجات ع التلفزيون"
ارفعت ساره عينها للتلفزيون بينما كانت تنقل نظرها لمي والتلفزيون عشان تتاكد من انشغال مي اللي كانت تتسمع الاغنيه وترتب اظافرها ..
شوي وانعرض المسج ع الشاشه ..
" غلاج في خافقي تحت الضلوعي يا ساره"

ساره تمت متلومه وهي تقرى ها المسج ومروان يالسه فنفس المكان اللي هيه فيه.. محادثتهم من تحت لتحت ولا حد حاس باللي يصير .. تشجعت انها تكمل ويا مروان .. وبحركه لا اراديه منها رفعت راسها طاحت عينها بعين مروان وعلى طول لفت ع التلفزيون وكأنها تبى تقوله كمل قراية المسجات..
قبضت تيلفونها وردت على مروان من نفس مقطع ها الاغنيه وطرشت المسج ع الرقم المعروض..
" مروان.. عسى الأيام مني يقربنك فلا يبقى لها الفرقى رجوعي"

ابتسم مروان للي قراه ابتسامة واحد مب مصدق اللي يصير.. اما ساره من بعد ما طرشت المسج وهي تحس بألم فمعدتها من كثر الفشله.. اول مره تتجرأ تسوي ها الشي .. لا وجدامه .. شلت بعمرها تبى تدش داخل .. تتوارى عن نظرات مروان اللي توترها ..
مي: وين سايرة؟
ساره: بسير شوي الحجره
مروان فهم انه ساره استحت لكنه ها كله مايهمه .. يهمه اللي سوته .. البادره الطيبه منها اللي بردت على فواده المتشفق ..
سارت سارة عنهم وتم مروان يراقب تحركات ساره لين ما دشت .. ومي تشوفه وتضحك عليه ..
مي: ايه بو الشباب.. نحن هنا
مروان: ها
مي: خخخ لا ماشي..
مروان ضحك وهو مفتشل..
مروان: يالله عيل انا بقوم بسير بعد

قالها بس الحريم ما سمعنه من كثر السوالف الي عندهن ..لكن مي ردت عليه..

مي: ايلس يا غبي بيقولون من روحت ساروه روح هو بعد
مروان: انا غبي
مي: هيه نعم
مروان: خاطري اظربج بها الريموت ع راسك
مي رفعت راسها: بشخط لك ويهك بها المسحت
مروان: خيبه مجرمه
مي: هيه عيل شو تحرى
رفع مروان تيلفونه واتصل فسلطان يشوف وين هو ..
مروان: هلا سلطان .. الحمدلله اخبارك انته ؟ انا اهنه بيت امايه .. انته في العزبه ويا مانع ؟ يالله عيل ياينكم انا .. اوكي فمان الله
ميره انتبهت لولدها : هاه بتسير العزبه انته ؟
مروان: هيه توني مسكر عن سلطان يقول يالسين اهناك ويا مانع والشباب
ميره:زين برايك عن السرعه
مروان: ان شاء الله يالله فمان الله

ضحكت مي وهي تشوف مروان طالع.. صدقها لو ساره تمت ميلسه ما بيفكر يطلع .. قامت مي هي الثانيه ودشت داخل عند ساره .. لقتها طايحه ع السرير وتيلفونها فايدها تقرا شي فيه ..

مي: منو مطرشلج مسج؟
ساره: محد .. يالسه اقرى المسجات المرسله..
مي: اها.. ليش تراجعين حساباتج فيهن؟؟
ساره قامت من طيحتها: اي حسابات
مي: بسم الله بلاج..
ساره: لا ماشي .. بس شو تقصدين
مي: ههه خيبه ماشي .. بس انا جيه دايما ارد اقرى شو انا مطرشه عن اكون مخربطه فشي..
ساره: هيه .. اتحرى ..
وهي فخاطرها" مالت عليج يا ميوه.. عبالي عرفتي بالحركه اللي سويناها.. طيحتي قلبي.."
مي: بسير اشوف حلامي

طلعت مي من الحجره وتمت ساره بروحها .. وكل شوي تتراوالها نظرة مروان..يتراوالها المسج اللي طرشه .. واللي هيه طرشته .. شو ها الاكشن اللي صار بينهم اليوم .. بدى خافقها يهيج .. ليش تمنع ها المشاعر من انها تظهر.. ليش ماتقدر انها تعيش الحب ويا مروان دام كل شي امبينهم واضح وكل حد يدري انهم لبعض..
بس ردت وحطت فبالها .. قيمها اللي ربت عليها .. هي ماتقدر انها تكلم مروان او حتى تفظح مشاعرها جدامه الا لما يكون حلها وحلالها .. ترا الدنيا دواره.. تشوف انه علاقتها ويا مروان تظل جذي احسن لهم

******************
(الاربعا) 16 مارس 2005
******************

كان مروان في سيارته راد من العين .. ومشغل الاغاني ويسمع وسرحان .. وأكيد محد غيرها ماخذ باله وتفكيره .. بس مل من الصبر مايقدر يتريا اكثر لازم اليوم يرمس ابوه ويقوله على اللي ناوي عليه .. كم مره قبل حاول انه يقوله بس مايدري شو الي يوقف فويهه ومايخليه يكمل اللي يباه .. بس اليوم معزم خلاص .. وبيرمس ابوه باللي يباه ..
وصل البيت الساعه 1 ونص .. لقاهم متيمعين ع الغدى سلم عليهم وسار حجرته بدل ثيابه وتغسل ونزل عندهم ويلس يتغدى وياهم..

مروان: فارس وينه مايا؟
ميره: لا يقول عليه امتحانات بييلس يذاكر مابينزل
مروان: مصري ولدج ها مادري ع منو طالع
ميره: قول لا اله الا الله بتحسده
ايمان: طالع عليه انا طبعا شاطره
مروان: عدال عاد ..
راشد: مروان بترقد انته الظهر ؟
مروان: لا.. ليش
راشد: اباك توديني العزبه..موتريه مودنه الكراج

مروان ابتسم لابوه..فرصه يته من السما انه يلس ويا وابوه بروحهم ويكون ابوه متفضي وما عنده شغل .. يعني بيقدر يتفاهم وياه ..
مروان: فاااالك طيب بو مروان ..
راشد: فالك ما يخيب..

بعد ما شربوا الجاي وسولفوا شوي عن امورهم وقروا الجريده .. قام راشد ويا مروان سايرين صوب العزبه .. وفالدرب..

مروان: ابويه
راشد: نعم
مروان: ابويه ابا ارمسك في موضوع
راشد: خير !
مروان: ابويه انا ابا املج
راشد صد على ولده: خبيل انته ؟ خطبه وخطبنالك رسمي شو تبى بعد اصبر.. البنت بعدها تدرس.. مابتطير عنك بلاك مستلغث
مروان: ابويه من الله دوامي فالعين وطول الاسبوع انا هناك وحتى لو عرست مابيضرها شي هي بتسير جامعتها وبترد البيت ما بمنعها من الدراسه بالعكس بشجعها اكثر ..هاكيه اختها عرست وهي بعدها تدرس..
راشد: اختها بتخلص احين الا تدريب عندها ..وساره بعدها
مروان: برايه ماتفرق ترا كلها دراسه .. بعدين انا قلت بملج مابعرس
راشد: شو تباها الملجه
مروان: ابا اقدم ع صندوق الزواج احين فيصل من متى مالج على عزوه وخذها ولين احين ماطلع له .. بقدم ع صندوق الزواج وقرض الاسكان .. لين يطلع لي ابويه يباله وقت..
راشد: انته عليك قاصر؟
مروان: هيه عليه .. ومعاشي مابيسدني .. وانا مابا منك.. ابويه ابا اعتمد ع عمري
راشد: انا ابوك ولازم ايوزك وايوز اخوك
مروان: بتيوزني لكن بتبنيلي بيت بعد ؟ بعيش عندك لكن لين متى لازم بطلع وبستقل.. من جيه لازم اخطط وارتب من احين .. ابويه انته ماقصرت ولا بتقصر علينا لكن انا حاب اني اعتمد ع عمري ..

راشد سكت وما علق .. حس انه ولده يرمس فأمور واقعيه وصحيحه لأي شاب يخطط انه يعرس.. من داخله استانس على رمسة ولده ومحاولاته في اقناع ابوه..ولكن ما يخفى عليه انه هو متعلق فساره وفخاطره اليوم قبل باجر انه يملج بها ..

مروان: ابويه بملج الا انا ..مابسوي شي وهاي بنت عمتيه مب وحده غريبه ..
راشد: انا ماعندي مانع لكن رمس امك ورمس عمتك انته انا مابرمسهم .. فالخطبه رمسناهم لك .. لكن الحين تبى تعتمد على عمرك سر انته ورمس عمتك..
مروان: يالله يابويه شحقه عاد .. رمس انته عموه هاي شغلاتكم انتو ما يخصها فالاعتماد ع النفس..
راشد: لا انته اللي تبى تملج انته ترمسها..مافيني اقولها يبى يملج وبنتها بعدها تدرس وتم عليا متولمه مني.. انته رمسها عن مرادك وفهمها ..

راشد كان يحاول يعجز مروان لكن مروان كان مصر على السالفه..صدق طفح الكيل عنده وساره مب مسوتله سالفه..كل ما حاول يقرب منها كونه خطيبها رسمي هي تصده.. فخاطره ياخذ راحته وياها فالرمسه ويقولها عن اللي بقلبه من صوبها.. لكن ها المشاعر ما بتظهر كلها الا اذ كان وثاق يربط امبينهم..كل يوم والثاني تكبر فعينه ويحاول يوصللها .. يحاول انه يستميلها يكلمها يمسجها عقب طلعة الروح تتجاوب وياه .. واذا تجاوبت تتجاوب فشي بسيط..
اخر موقف جمعها وياه خلاه صدق يفكر ويعزم على ها القرار.. يباها تكون طبيعيه وياه.. يبا يسمع ضحكتها.. صوتها.. يباها ساره الي يحبها.. يبى يعيش الحب ..

مروان: خلاص انا برمسها ماعندي مانع ..
راشد هز راسه: يوم تبى الشي ماترد عنه ..
مروان:ابويه قولي الله يوفقك وادعالي..
راشد ضرب على جتف ولده وهو صاد صوبه: الله يوفقك ويرزقك الخير يا بويه..

ابتسم مروان لابوه وحس باساريره شوي بدت تنفرج.. اول مطبه وتخطاها .. ويحس انه قدر يقنع ابوه .. بيتحمل كل شي عشان ساره .. وبيتحمل الاحراج وبيكلم عمته هو بنفسه ها المره ..

****

" اسأل الله لي ولكم علما نافعا وقلبا خاشعا وبارك الله لكم جمعكم هذا وسدد خطاكم لما يحب ويرضى ,, لقائنا الاسبوع القادم ان شاء الله في نفس الموعد لاكمال الدرس"
ختمت بدريه درس الفقه اللي كانت تلقيه في بيتها .. من بعد مادرست الفقه في الصلاه وخذت الاجازه فيه خلال شهرين عشان تعطي هي بعد الدروس هاي لمن يحب انه يستفيد .. وبتواصل دراستها في الفقه ان شا الله ..

طلعوا الموجودات من بعد ماسلموا على بدريه واهل زوجها اللي كانت تعطي الدروس في بيتهم .. وروحت هي بعد غرفتها ..
كانت تحس براحه كبيره .. وقفت عند المرايه .. شافت ويها ..
كانت تحس انها حلوه قبل .. بس حلاتها كانت مظلمه .. ماتنورت الا بنور الايمان ..
اندق الباب ودخل عليها زوجها هالوقت ..

عدنان: السلام عليكم
بدريه ابتسمت له: وعليكم السلام
عدنان: ماشالله شو ها الحريم الي ظاهرات من البيت
بدريه: كنت القي عليهن درس..
عدنان: هييه.. يزاج الله خير .. بتسوين خير فها العيايز
بدريه وهي تيلس ع الشبريه: هي وحليلهن ..

تجدم عدنان ويلس حذالها .. فخاطره كلام من كم يوم يبى يقولها اياه .. بس ما يتشجع..ماتهون على حرمته .. لكن لابد منه ها الامر ..

عدنان وهو متردد: بدريه بغيتج شوي في رمسه ..
بدريه : امر
عدنان: بدريه ماباج تحسسين من الموضوع عشان خاطري
بدريه بدى قلبها يدق..حست انه في شي .. بس ما تبها تصدق حدسها..
بدريه: شو انزين
عدنان: بدريه .. انا ابا اتزوج ..

نبض قلبها زااد أكثر وتمت تتامل ملامح زوجها كانها اول مره تشوفها ..

عدنان: بدريه انتي زوجتي وانا احبج واقدرج وايد وكل يوم احبج اكثر من اللي قبله .. ومابحصل احسن عنج لكن الشرع حلل اربع عند وجود سبب .. والسبب انتي تعرفينه .. انا اتمنى انه الله يرزقني بذريه وانتي تعرفين هالشي من بعد ماكان ممكن انه يصير وصبرنا عليه .. اصبح مستحيل .. بتمين انتي ع ذمتي وبوفيج حقج على اكمل وجه ..

بدريه سكتت ووطت راسها .. وعدنان كان يطالعها .. يتريا أي ردت فعل من صوبها ..

عدنان: بدريه رمسي لاتمين ساكته.. بدريه .. انا ابا ياهل يشل اسمي..

ها كان مصيرها حتميا وهي تعرفه من قبل بس تحاول تتجاهله .. هي امنت بقضاء الله وقدره .. وها نصيبها .. لو طلبت الطلاق ماشي فايده .. محد بيتزوج مطلقه وماتيب عيال .. واهلها مابيدومون لها .. اتم عند ريلها احسن .. ع الاقل سند لها في هالدنيا .. ماتخلى عنها طالب الاحتفاظ فيها واعترف بحبه لها .. وهي هالشي تعرفه من قبل .. لكن هذا بعد حقه وماتقدر تحرمه منه ..

بدريه رفعت راسها وعينها تلمع: هذا حقك عدنان الله يوفقك ان شاء الله
عدنان انفرجت اساريره وارتاح انها موافقه ..
عدنان: انتي خطبيلي ع شورج
بدريه وهي تحاول تصطنع الابتسامه: برمس عمتي وبشوف ان شا الله
عدنان: الله لايحرمني منج ان شا الله .. ويقدرني اني ما قصر وياج فشي ابدا..
بدريه: انته ما قصرت ويايه يا عدنان.. وعيالك اللي بتيبهم من الحرمه الثانيه بروحي بحطهم فعيوني الثنتين وبعدهم عيالي الي نحرمت منهم .. عيال الغالي لازم بيكونون غاليين..

عدنان ما هانت عليه بدريه موول.. تجدم منها وحضنها .. غمضه حالها اللي هيه فيه.. وحده حلوه وفعز شبابها تنحرم من العيال.. تنحرم من الامومه .. حبها ع راسها بكل ود .. ويدعي من ربه انه يسعد بدريه وماييب الحزن لقلبها..

****

كان نايف مار بيت يدته فليل ياخذ ريم اللي تعود عليها من بعد المغرب تسير عند اخوانها يوميا.. اخر فتره جاسم وايد تدنى مستواه الدراسي وردت ريم تستحرص عليه أكثر عن قبل..واليوم كانت سايره عشان تسلم على خواتها..

نايف: اشحالهم اخوانج ؟
ريم: تمام الحمدلله ..
نايف: انزين ريمان شو رايج نسير باجر دبي ؟ نتكشت
ريم: حلوو .. بقول حق اخواني جان بيون ويانا بيستانسون

نايف رفع حايب وهو يطالع ريم .. تم ساكت ..
ريم استغربت..ريم: شو بلاك
نايف: ريم.. سمعيني فديتج ..انا بسألج
ريم: اسأل
نايف: انا ماخذنج والا ماخذ اخوانج؟
ريم: نايف!!
نايف: ريم انا ماقولج قصري عليهم لكن خلي شوي لحياتنا خصوصيه .. من خذتج وانتي دوم عند اخوانج والا عند اخواني .. وانا وين من حياتج ؟
ريم: نايف شو هالرمسه
وقف نايف سيارته في حوي بيت ابوه .. وكمل كلامه

نايف: ريم اخوانج اخواني والعكس .. لكن انا لازم اكون مميز عنهم بشي انا ريلج ولي حق عليج .. انتي من الصبح لين الظهر في الكليه ..اتردين تعبانه مالج بارض.. بتيلسين شويه العصر وعقب يا تسيرين تدرسين اخوانج او هم ايونج .. وعقب لين تخلصين اللي عليج يتاخر الوقت ولازم ترقدين لانه عندج دوام .. وانا وين من جدولج ها ؟ انا كنت ساكت اقول يمكن تحس .. قلت بوديج السوق الاسبوع اللي طاف عزمتي خواتي ويانا.. قلت بستانس وياج بخميس واجازه وجي قلتي بسير عند اميه .. قلت بوديج دبي باجر قلتي بقول لاخواني .. انزين خلينا نسوي شي مره وحده بروحنا ..في وقت لطلعتنا ووقت للطلعات الجماعيه .. مب حاله هاي ..

بند السياره ونزل منها .. وهي على طول نزلت قفلها وروح عنها ..
وهي بعدها واقفه ومنصدمه من اسلوبه .. انتبهت لنفسها انها بعدها في الحوي ودخلت .. مالقت في الصاله الا عمار يالس يطالع التلفزيون..

ريم: السلام عليكم
عمار: وعليكم السلاام
ريم: عيل عموه والبنات وين ؟
عمار: فوق يالسين ..
ريم: اها.. خلاص عيل بسيرلهم..
عمار: اقولج ريم ..قوم جسوم باجر بسيرون بيت امج ؟
ريم: مادريبهم اتصل اسالهم..
عمار:اوكي

روحت عنه ريم ولقت عمتها والبنات يالسات في الصاله اللي فوق ..

ريم: السلام عليكم
مريم: هلا امايه وعليج السلام.. اشحالج ؟
ريم: الحمدلله عموه
مريم: شخبارها امايه اليوم ؟ مارمستها من الصبح ..
ريم: الحمدلله
اسما: لازم مابترمسج العصر عندها ساروه وميوه شاغلينها
ريم ابتسمت : اسمحولي بسير بطالع نايف
مريم: يانا هو سلم ودخل بلاه ؟
ريم ماعرفت شو تقول: لا ماشي عموه بس اظن عنده مشكله في شغله بسير اطالعه
مريم: سيري امايه

دخلت ريم جناحهم .. ماحصلت نايف فالصاله وسارت غرفة النوم وبعد ماحصلته .. فصخت عباتها وشيلتها ..شافت باب الحمام مقفول .. اكيد دش يتسبح .. طلعت الصاله وفتحت التلفزيون..وعقب ربع ساعه سمعت صوت فالحجره ورجعت غرفه النوم لقته واقف وينشف شعره..
شافها وكان يبين على ويهه انه متضيج .. تجاهل وجودها وطلع من الحجره ..

ريم: نايف
وقف وصد صوبها
تجدمت منه ريم: نايف وين بتسير ؟
نايف: هنه..الصاله
ريم: عمتيه سالتني عنك قلت لها عنده مشكله في الدوام .. عن تسالك
نايف: اوكي

وروح عنها الصاله .. ماعرفت ريم شو تسوي .. دخلت تتسبح وصلت العشا.. يايه بتطلع تمت واقفه عند الباب اطالعت نايف الي عاطنها الظهر .. ماتشجعت ردت يلست ع شبريتها وخذت الروايه الي كانت موطايه ع الكميدينو .. فحتها للصفحه الي كانت واصلتنها .. ماقدرت تركز فقرايتها وطتها وهي تتنهد ..وتعوذت من ابليس وسارت له الصاله ويلست في الغنفه اللي حذاله

ريم: نايف
نايف بدون مايصد لها: همم
ريم: نايف انا اسفه

نايف صد عليها وتم ساكت .. اما هي وطت راسها

ريم: ماكنت منتبهه لتصرفاتي .. انا عشت حياتي جيه بين اخواني .. اهتم بهم واهتم بالكل بشكل عام
نايف: وانا ؟
ريم: انته تهمني نايف صدقني .. انا اسفه ع اللي صار وان شا الله بحاسب ع تصرفاتي اكثر ومابقصر ..

نايف ابتسم لها وهز راسه بالايجاب .. واشر ع المكان اللي حذاله عشان تيلس عنده ..مايحق انه حد يزعلها كيف هو !!.. لو كان ها الشي بخاطره وطلعه كله مره وحده من غير سابق انذار.. بس تم متضيج انه هو الي خلاها تتضايج..
قامت من مكانها ويلست حذاله وهي تحس بهم وانزاح عن نفسها ..حط ايده ورا جتفها وقربها منه أكثر..

نايف: باجر 10 الصبح بنسير دبي لين فليل اوكي.. انا وانتي بس
ريم وهي تطالعه وتبتسم: ان شاء الله ..

خذت ريم الريموت من ايده وبدلت ع قناة الامارات ..

نايف: الله فيلم هندي
ريم: ههههه ادريبك بتستانس عشان جي حطيتلك الامارات.. احيدهم اييبون افلام هنديه ها اليوم ..

وطت ريم الريموت حذالها وتقربت من نايف وهي تحس بدفوة وحنان ريال ناقصتنها من يوم ما كانت ياهل .. نايف ارتاحت نفسه واستانس ع الجو اكثر من الفيلم..

عيدكم مبارك
الجزء الرابع والعشرين

******************
(الجمعه) 18 مارس 2005
******************
على الغدى كانوا الكل متيعين ع نفس السفره .. قامت اسما بسرعه وسارت فوق تلبس عباتها لانها متأخره عن الباصات .. اما لطيفه فكانت جاهزه وتاكل براحتها تتريا اختها لين ما تخلص..

ريم: اسوم وساروه ياخذن من اطباع بعض
مريم: هذيل طالعات على حياة يدوه .. باردات ..
نايف: ماعطتهن امايه عفرا عيل هههههههه
ريم: فديتها امايه.. لانت يبوك الحين .. مب شرات قبل ..
مريم: الله يطولي بعمرها..
الكل: امين ..
خلفان: نايف شو سويت بالسالفه اللي قلتلك عنها
مريم وياها الفضول: أي سالفه؟
خلفان ضحك على فضول حرمته بس تجاهلها.
نايف: أي وحده ابويه؟
مريم: بس فيه سوالف وايده ثرها
خلفان: هاذيج .. اللي موصنك عليها
نايف وهو يغمز لابوه : هييه .. الــ
خلفان: خلاص عقب عقب
مريم: نايف قول قول .. شو داسين عني
نايف ضحك .. وكمل ويا ابوه..
نايف: هي امايه .. الصراحه انا ما ابا اخبي أكثر ..
خلفان: نايف غد ريال عااد
نايف: ابويه انا ريال .. بس ها السالفه ما ينسكت عنها
مريم: يالله طيحتولي قلبي.. شو مستوي؟
نايف: امايه ترا ريلج يبا يعرس عليج.. عايبتنه سكرتيرة خالي سيف ويباها
مريم وهي تطالع نايف وعلامات التوتر باينه على ويها ..
خلفان: وشحقه ترمس انته .. انا بروحي بشاور حرمتيه وبخليها تخطبلي اياها
مريم فولت ولفت على خلفان: الا على قص رقبتيه ها الي قاصر..تيبلي لبنانيه ف البيت تتميعلي .. والله ثم والله مـا
نايف: بل بل بدت تهدد الواالده ..
خلفان: هههههههههه عن يرتفعلج الضغط
البنات كانن يسمعن ويشوفن ملامح الويوه ومب مستوعبات وفنفس الوقت بدن يتحاملن على خلفان ..
نايف: ههههههههههههه امااايه هدي هدي كنتي في برنامج صادوه
مريم وهي تطالع نايف: سود الله ها الويه.. عنبو زين ما نطرت ميته..شو بتستفيدون عقب
خلفان: يالله .. ها الكثر تغارين؟
مريم: لا هب غيره ..
ريم: ههههه والله انكم خوفتونا نحن بعد .. امره على الخط نايف ويا عمي
لطيفه: هههه حليلج يا امايه..
مريم: عيل ..
خلفان ونايف تموا يضحكون ..
خلفان: انزين لا صدق .. شتريت الاسهم اللي قلتلك عنهن
نايف: لا ابويه بعدني.. بسير ان شاء الله باجر وبشتريهن ..
مريم: الا سالفة اسهم هيه
ريم: وشو شغلهم الشاغل ها الايام غير الاسهم يا عمتيه ..

من بعد الغدى .. ركب لطيفه واسما ويا نايف اللي سار يوصلهم موقف الباصات .. نزل نايف وياهن الاغراض وسلم عليهن وعقب ركب سيارته بيروح ..

****

العصر قبل مايسير مروان العين طلع سيارته من حوي البيت ووقفها جدام بيت يده نزل عسب يسلم عليهم .. لقى يدته وامه يالسين في الحوي مع مرت عمه وبناته.. سلم عليهم ويلس يشرب قهوه ..

احلام: عاش من شافك
مروان: هههههه عاشت ايامج بنت محمد
احلام: بطرت علينا احين ماتي تسلم شرات قبل
مروان: لا افا .. انا ابطر ع خواتي مايستوي
احلام: هيه قص عليه انته
مروان: ههه عموه عليا وينها ؟
ميره: داخل .. سيرلها

كان مروان مرمس امه .. اللي ما مانعت بالعكس استانست وايد وحثته انه يقنع عمته جان بترضى..
دخل مروان الصاله لقى عمته يالسه اتابع مسلسل..

مروان : السلاام علييكم العمه ..
عليا وهي تطالع اللي ياي.. ابتسمت: وعليك السلام..هلا فديتك اشحالك؟
مروان: الحمدلله اشحالج انتي عموه؟
عليا: الحمدلله .. شو شكلك ناوي الجنوب..
مروان: هييي يا العمه ..والله مليت من الدرب..
عليا: يالله شو بتسوي
مروان: الحمدلله على كل حال..
عليا: الحمدلله .. ملازم ومتخرج من كلية الطيران .. نعمه يا وليدي ..
مروان:الله يديمها ان شاء الله
عليا: ان شاء الله..

مروان ماعرف شو يقول بس يخاف ياذن المغرب وكل الحريم يدخلون ويخربون عليه..
مروان: ويديمها على حرمتيه ان شاء الله
عليا ابتسمت : حرمتك بعد ان شاءالله بتخلص وبتتوظف وبتعاونك..
مروان: ان شاء الله ..
عليا يت فبالها بنتها وهي تشوف مروان .. وحمدت ربها على ها النعمه وانه ريال مثل مروان خطب بنتها ويباها..

مروان: عموه طلبتج
عليا: امر فديتك
مروان دش فالموضوع ع طول: عموه انا بغيت املج ع ساره
عليا بدهشه: تملج عليها ؟ ليش فديتك مستعيل.. بعدها ساره باقلها سنتين
مروان: عموه انتي تشوفين كيف صندوق الزواج ياخر الطلبات .. الناس يعرسون واييبون ولدهم الثاني عقب يطلع لهم .. هذا غير قرض الاسكان اللي يباله وقت وايد .. وانا على معاشي بس مابقدر .. ابويه مابيقصر بس انا احب اعتمد على عمري ..
عليا سكتت كلام مروان مقنع بس بعد الوقت طويل : انزين اذا ملجت احين متى تبى تعرس !
مروان: ماعرف عموه متى ما يناسبكم .. انا عايش في العين ولو عرست ساره بتكون في البيت وبتسير كليتها وبترد ما بيأثر عليها شي .. بالعكس بتكمل دراستها وانا بشجعها أكثر.. ولو ما بغت العرس معليه بصبر لين ما تتخرج.. المهم املج الحين ..
عليا وهي تضحك: بتصبر..
مروان: هي.. ليش
عليا: الريال من عقب ما يملج خلاص..بيستعيل على العرس.. وانته ما مداك خطبت والحين تقول تبى تملج..
مروان: انزين.. مادري.. عموه انا ابا املج.. ماروم اتريا ..

عليا ابتسمت .. مروان يبين عليه متستعيل.. ما ينلام .. متخرج من الكليه من سنه ويبى يستقر..

عليا: والله انا ماقدر ارد عليك لكن برمسها وبشوفها شو رايها
مروان: عموه انتي شو رايج ؟
عليا: لو كنت واحد غريب ماكنت برضى بس انته ولد اخويه والثقه فيك قبل غيرك ويسعدني انك حاب تعتمد على عمرك وهالشي يطمني اكثر ع مستقبل ساره .. الله يوفقك وياها فديتك.. انا موافقه وان شاء الله هي توافق بعد

مروان نش حب عمته ع راسها
عليا: بارك الله فيك وليدي ..
مروان: يالله عيل عموه.. ورايه درب بترخص منج
عليا: درب السلامه فديتك.. الله الله فالمعرس عاد
مروان وهو مستانس حده: لا ماعليج .. بس خلها توافق هيه..
عليا: اللي رايده ربك بيصير..

سلم مروان على عمته وظهر من عندها متوجه صوب سيارته نسى حتى يمر على الي يالسين فالحوي .. زقرته امه .. وانته الهم وسار صوبهم..

احلام: وين تبى طار السكه..تعال سلم وروح..
مروان: ههههه اسمحيلي بنت محمد

سلم عليهم مروان وغمز لامه عشان تفهم انه عمته وافقت .. لكن هي فهمت من قبل حتى هالحركه.. لاحظت ابتسامته وعرفت انه عمته وافقت .. وروح مروان عقب ماسلم عليهم ..
الحين باقي دوره ويا ساره وكل شي بيمشي ان شا الله ..
طلع عنهم مروان واتصل باخوه فارس اللي ماشافه هالاسبوع ..

فارس: الوه
مروان: هلا والله بالدحيح
فارس: متصل تحسد انته ؟ الله واكبر عليك
مروان: ههههه عنبوك مابتطير الكتب عنك هاتها وتعال اهنه ادرس
فارس: ياخي ان رديت مايلست في البيت .. تباني اجابل ملعب الكره وايلس
مروان: ياخي مايركب دحيح ولاعب كوره ..
فارس: يوز عني مروانوه
مروان: انزين اخر سؤال
فارس : تفضل
مروان: ماحيد انا امك سميره وابوك مدحت عشان تطلع جيه مصري
فارس حاول ايود عمره لكنه ظحك: ههههههه الله يقطع شرك .. بلاك عليه بقوم اقرالي في ماي بتاكلني
مروان: ههههه اسولف وياك الا ..
فارس: وين انته ؟
مروان: ع الخط ساير العين
فارس: مابتخطف صوبي الشارجه شوي
مروان: ليش ؟
فارس: بطلع بحوط وياك
مروان: زين والله ..انا رايق ع الاخر .. خلاص انا من اوصل جريب منك بتصل بك
فارس: اووووكي
مروان: يالله باي
فارس: مع السلامه

سكر فارس عن اخوه وهو يضحك عليه .. شكله مستانس وايد .. وطى فارس التيلفون ع طرف وقبض الكتاب يفصص المسأله يبى يحلها وهي مستعصيه وياه ..
ويوم انقهر .. رفع التيلفون واتصل فربيعه ..

فارس: الوو
مبارك: ها
فارس: هب هباك.. حد اييه اتصال يقول ها ..
مبارك: شو تباني اقولك
فارس: بلااك انته
مبارك: ماشي
فارس: بسم الله شوفيه حسك؟؟
مبارك: ولا شي..
فارس: يلااا عاد لا تستهبل
مبارك: تعبان مرقد فالمستشفى
فارس وهو مصدوم: من متى؟؟؟
مبارك: من يومين
فارس: اووه..الحمدلله ع السلامه.. ليش شو استوى فيك؟؟
مبارك: الله يسلمك طحت عليهم محموم
فارس: يالله الحمى جيه تهد حيلك وتنومك فالدختر
مبارك: حمى قويه يتني والله يا اني اهاذي طول الوقت..
فارس: انزين وشو هباتك الحين؟
مبارك: والله اليوم الحمدلله احسن بواايد عن امس.. رمت ارمس ع الاقل..
فارس: اسمييك.. اسمحلي الشيخ محد خبرني..
مبارك: لازم محد بيخبرك .. ثرك مرابع حد انته؟
فارس: هههه هيه مرابعنك انته
مبارك: بس عليك.. انا ما تم حد ماعرفني وانته ما تعامل غير ويايه
فارس: ماعلينا.. انا انسان ملتزم فدراستيه الحين مب متفيج لخربطان الشباب.. ولو بغيت استانس منصور ولد عمتيه مايقصر دومه ويايه.. وانته بعد ماتقصر
مبارك: هههه هي مابقصر.. بس يوم اقولك بنسير ميلس قوم فلان ما طيع ولا يوم بقولك بنسير معزومين عند شلة فلان ماطيع
فارس: مشكلتك اتي فأوقات صدق متأزم فيها وماشي وقت اني اطلع..والله الدراسه تهد الحيل وها نحن فأول سنه ..
مبارك: الله يعينا يا خوك .. يلا بتعدي ها الكم سنه
فارس: ياحيك .. عيل بروك طايح تعبان ..
مبارك: هي يا فروس
فارس: طحت عليهم فويكند .. ماطافك شي ولا سويتلك شغلك
مبارك: هي مداوم لين الاربعا ومخلص .. جان الا بتسويلي اشغال الاسبوع الياي
فارس: ههههههه يلا اجلب ويهك.. بتقوم شرات الحصان وبتسوي لعمرك..
مبارك: يا المصري
فارس: عدال عاد..
مبارك ضحك على فارس .. لأنه يدري انه الكل يعلق عليه بها الكلمه .. وطايحين فيه لمجرد انه انسان مفرغ عمره لدراسته..
فارس: يلا ابويه .. انا بكمل حل ها المسأله الكريهه .. وعقب بييني مروان اخويه.. وان شاءالله بنخطف عليك .. بدقلك عقب ودلني ع مستشفاك
مبارك: خلاص اوكي .. اترياكم
فارس: اوكي.. يلا فمان الله ..

سكر فارس التيلفون .. سرح شويه بفكره.. صحيح هو مبعد عن الكل .. بس مستانس باللي هو فيه !
يعرف انه طبعه صعب بعض الشيء..وانه ما يندمج وأي حد .. بس بعد مايعير ها الأشيا أي اهتمام .. ركز اهتمامه فالكراس الي جدامه ..
واخيرا بعد ما حل ها المسأله ارتاح نفسيا وقام بيتسبح وبيتزهب لين ما يوصل اخوه..

****

فليل في سكن البنات .. وبالتحديد فالجناح .. كانت مي طالعه من حجرتها عقب ما خلصت لبس.. جيكت ع تيلفونها وشافت مكالمه .. ردت اتصلت ..

عبير: مرحبا
مي: مرحبتيين.. شحالج عبير..
عبير: الحمدلله تمام .. اخبارج انتي؟
مي: والله تمام .. شخبار خالي والبنات
عبير: كلهم بخير الحمدلله.. ها فالسكن
مي: هي يبوج .. عيل حلام وين؟
عبير: هي هيه دقتلج وما رديتي تقول
مي: هي كنت راقده..
عبير: اها .. خلاص بناديها لج ..

خذت احلام تيلفون امها وسارت حجرتها ترمس مي..

احلام: شحقه كنتي راقده
مي: مادري راسي يعورني .. اول ما وصلت وطيت راسي وقبل شويه واعيه
احلام: اها ..وساروه اخبارها
مي: الحمدلله .. هي بروحها منطبه راقده
احلام: ههههه حليلها .. اليوم يانا مروان وشكله متشقق .. لا ويلس ويا عموه عليا بعد بروحهم .. احس وراهم شي
مي: يالله يا انتي يا ام الدواهي.. شو بيكون وراهم
احلام: شدراني خخخ
مي: يا حليله مروان..
احلام: شكله مستااانس واايد من عقب ما خطب
مي: وعاده هيه مب مسويه سالفه..جامده ها البنت..
احلام: ما عطيناها من رومانسيتنا
مي: ههههههه مالت علينا ..جان حصلنالنا اللي يحبنا عيل
احلام: ماعليج ماعليج .. فالدرب يايين ..
مي: هههههه مستخفه..

وفنص السوالف انتبهت مي لوحده من بنات الجناح يايه صوبها وفايدها كيس .. عطته اياها ..

مي: من منو؟
منى: فطوم
مي اطالعت منى بنظرة يأس
منى: ياخي اذيتينا وياها انتي.. بتم وراج لين تكلوزينها هاي
مي: تهبي الا هيه .. ما لقت غيري انا
منى: هههه على بابا يا ماما
مي: لاوالله
منى: صدق مستجده مستعصيه انتي ههههههه
مي: منووه عاد.. كم مره قايلتلكم لاتسوولي سوالف وياها.. بس وايد طرشت اهداءات وتشوفني اني مب معبرتنها .. شو تبى هاي
احلام: بل عليج يا ميوه..
مي: صخي انتي بعد
منى: هههههه والله ما يخصني .. شو ذنبي اني وياها فالباص .. كل اسبوع تحملني اغراض حقج
مي: هاي محد غير ساروه مخلتنها تكمل .. بأدبها انا ساروه
احلام: عاد ساروه تستانس على ها السوالف
مي: والله مب مريحتني .. كل ماتشوفني تطالعني بنظرات جني مجرمه.. شو تباني اسوي تعاملت وياها عادي حالها حال أي وحده من ربع ساروه وتمت تتشره.. خذت وعطيت وياها بغت أكثر.. بس خلاص عاد..
منى: ههههههههههه قسم بالله انج تحفه ..
مي: منوه الله يخليج .. رمسيها انتي.. انا مب ويه تكلويز .. ادورلها وحده تسايرها فها السوالف ..

منى يلست حذال مي وهي تشوفها انها صدق متغصصه .. مي بتكمل وياهم كورسين .. عرفوا كيف طبعها المخاالف لطبع ساره .. استانسو بعشرتها .. وبسوالفها .. ومايرضون عليها شي .. اسلوب مي يجذب وايد من البنات صوبها .. واللي تشوفهم مي انهم كفو ترابعهم تمشي وياهم ك ربيعه ويستانسون وايد عليها.. لكن اللي تشوف انه غرضها شي ثاني على طول تتجاهل مي وجودها..

منى:حبيبتي والله ميوه .. شورايج تحبيني واحبج
احلام: خيييبه شو تقول هاي
مي: هههههههههه فديييت منووه والله وين بحصل حبيبه شراتج ..
منى: هيه ما شي انا خريجه ما بتحصلون شراتي عقب..

ميوه حضنت بنت جناحها وباستها ع خدها ..

منى: ميوه خلاص بنمثل دور الكلوز .. واوني بغار عليج ومحد بيقرب صوبج
مي: هههههههه لا حبيبتي مابا سوقي يطيح
منى: شوف شوف مابا مابا دزوني عليه
مي: هههه استعبط فديتني
منى: خلاص كلووزي.. انا الخرييجه منى .. اكلوز المستجده مي
مي: هههههههه ايه وايد مصدقه عمرج..بلاهن المستجداااات
منى: بل عليكن حلوج مانروم الكن ..

احلام عصبت من ميوه اللي مخلتنها ع الخط وتسولف ويا بنت جناحها .. سكرت في ويها

مي: ابييه حلامي عصبت ..
منى: هههههههه ما تنلام مسوتلها طاف
مي: يالله انتي يايه ترمسيني تبيني اطنشج
منى: خخخ يعني مني الغلط
مي: نص نص
منى: الا تعالي اقولج..ماخبرووج عن بنات جناحنا شو صارلهم اليوم؟؟
مي:شووو
منى: ميوه ماتدرين انه جناحنا مسكوون!!
مي: ويه بسم الله
منى: هي والله.. يقولج امون كانت سابحه ويوم طلعت شافت انه ايدها مشمخه مع انها تقول مافيها ظفور
مي: وييييه سمعنا وسلمنا
منى: وسعادوه بعد وسمة فرقبتها اليوم انتبهنالها..ماكانت فيها
مي: ايه منوه لاتخوفيني ..
منى: مادري شياهم ها الينانوه
مي: امييييه بنشغل قرآن فالجناح يابوج
منى: يبالنا والله.. الشي مب من فراغ ياي..
مي:يالله ماحصلوا الا جناحنا يسكنونه ..ايه انا اخاف
منى: بيني وبينج هو عادي نحن من يينا الجناح قايليلنا ترا ها الجناح ثجيل شوي وتخيلي مره سمعنا ركيض فالممر واصلا محد كان فيه..ومره سمعنا صوت ياهل يصيح ..
مي: ويه ويه ويه لا ترمسين اكثر عن يشرفونا
منى: ههههه يلا تعودنا عليهم من سكنا ها الجناح .. صاروا ربعنا عادي
مي: شياهم عيل اليوم اعتدوا ع البنات
منى: انا ادري!
مي: الله يقفع بليسج الحين كيف برقد .. قبل تقولي ساروه سوالف بس ما صدقها لكن اليوووم السالفه فيها اعتداااء.. ما بنسكت عنهم
منى: وين تبييين .. شو بتسويلهم بتحاربينهم يعني
مي: بنمزر الجناح بالغام ومتفجرات ههه
منى وهي تضحك: والله انج تحفه.. بعدين بيعصبون عليج
مي وهي حايسه بوزها: وييين الا رمسه .. ولا انا ديايوه ما أيسر خخخ
منى: الله يكفينا شرهم
مي وهي ترفع ايدها للسما ومغيره ملامح ويها: امييين

وضحكوا ثنتيناتهم .. وعقب ما روحت منى تذكرت مي انه احلام سكرت فويها.. شلت تيلفونها وردت تتصل فأحلام..اللي خلته يرن وما ردت .. بس فالاخير ما قاومت وردت وهي ماده بوزها .. وتمت تحايل فيها ميوه عسب ترضى.. وفالأخير قردنتها ميوه ومشت وياها أحلام كالمعتاد..

******************
(الاثنين) 21 مارس 2005
******************

كانت ام سيف الظحى يالسه مجابله مكينه الخياطه وتعدل كندورتها اللي كانت طويلها عليها .. وقالت بتقصرها ع قياسها ..
رن التلفون اللي محطتنه حذالها ووقفت مكينتها .. ردت ع التيلفون ..

ام سيف: مرحبا
الريال: مرحبتين .. هذا بيت جاسم سيف
ام سيف: هي نعم بلاه جاسم ؟
الريال: انا اخصائي المدرسه .. عسى ماشر جاسم اليوم ماداوم ؟
ام سيف: جاسم ماداوم ؟ كيف ؟ انا بروحي موعتنه وشفته وهو ظاهر من الباب
الريال: بس وصلني توه الملف وهو غايب ..سألنا طلاب الصف اذا شافوه والا لا قالوا لا ..
ام سيف: ومايد اخوه ؟ والا صح مايد هب وياه في نفس المدرسه .. دوروه ابويه ترى عنده السكري هالولد وساعات يطيح علينا .. انا مريقتنه عيل قبل مايظهر
الريال: اعرف الوالده ولكن هو مايانا .. تاكدي من السايق اوالشخص اللي اييبه اذا هو يا المدرسه والا لا
ام سيف: ان شا الله .. فمان الله ..

سكرت ام سيف وهي خايفه مب عارفه تتصرف .. وين سار جاسم ؟ اتصلت لولدها تستنجد به ..

ام سيف: الوه سيف
سيف: مرحبا امايه
ام سيف: مرحبتين.. ابويه ها الاخصائي مال مدرسة جسوم متصل يقول جسوم ماسار المدرسه اليوم ..مادري وين ولدك قوم اطالعه
سيف: امايه يمكن سار فوق رقد
ام سيف: انا جدامي شايفتنه يوم متريق وشال شنطته بيسير المدرسه
سيف : انزين انزين بتصل بالدريول بطالعه
سكر سيف التلفون واتصل للسايق اللي اكد له انه جاسم ماركب وياه .. لانه متعود يودي جاسم قبل البنات .. اما مايد يسير ويا عمار ولد عمته ..
طلب سيف من الدريول يدور عليه جان في الحجره اللي برع والا أي مكان .. لين يوصل البيت .. اما ام سيف كانت تحاتي وكل شوي تطرش نجمه تدوره في مكان ..
قبل مايرجع سيف البيت .. انفتح باب الصاله ودخل جاسم

ام سيف: جسوووووم انته وين سرت
جاسم وهو يحج عيونه : شووو
ام سيف: بلاك ابويه شي يعورك؟ وين سرت انته ليش ماسرت المدرسه
جاسم: سرت ارقد انا تعبان.. قلت لج الصبح انا تعبان انتي ماتخليني ارقد
ام سيف: وين سرت ترقد
جاسم: في المسيد عقب يا ها المطوع وعاني حشره ها بعد
ام سيف: حسبي الله على بليسك جانك خليتني الا احاتي واخاف ولا خليت حد ماخبرته حتى ريم اتصلت بها
جاسم: اوهو امايه انتي ليش جيه وشايه ماتعرفين تسكتين
ام سيف: صه يالله .. مسود العين ..

قامت ام سيف واتصلت تلفون لسيف ولدها .. وخبرته .. واول ماسكرت ياها اتصال من ريم
ريم: ها امايه
ام سيف: لاتخافين هاذوه ها مسود العين ميلس اهنه
ريم: وين كان ؟
ام سيف: سار يرقد في المسيد اونه ماشبع رقاد الصبح يوم اني وعيته
ريم: حسبي الله ع بليسك يا جسوم .. وقفتوا قلبي والله
ام سيف: شدراني انا بعد شحقه اتصلت بج .. من خدايتي ماعرفت منو ارمس
ريم: لا ماعليه امايه الحمدلله انه بخير انا يوم برجع دواه عندي
ام سيف: عندج اياه .. يالله برايج بقوم اشرب لي ماي نشف ريجي
ريم: يالله فمان الله

سكرت ام سيف عن ريم..و ردت لمكينتها من عقب ما تطمنت على جاسم ..
اما جاسم خلى يدته وروح فوق يكمل رقاد في حجره ريم..

وريم من عقب ما تطمنت على اخوها طمنت ربيعتها ..

سميه: وين لقووه؟؟
ريم: ههههه والله سالفه جسوم.. اونه ماشبع رقاد وسار المسيد يكمل رقاده .. اتمرد من طلعت عنهم امبونه ماييسر يقول مابسير المدرسه .. الا امايه حليلها هب رايمتله..
سميه: يالله المهم انه هو بخير .. قومي انسير الكافتيريا مدام الكلاس بدى وبعدنا مادخلنا اكيد بيحسبنا غياب طافت ربع ساعه ..
ريم: يالله عيل ..

تذكرت ريم شي..

ريم: كم التاريخ .؟
شافت تيلفونها ع الكلندر..
سميه: ليش؟؟
ريم: اليوووم عييد الأم .. والله فبالي من كم يوم .. نسيت السالفه.. بتصل فاميه ..

سميه اطالعت ريم وابتسمت .. مازالت سميه تتمنى تكون شرات ريم فاهتمامها لامها ..
ريم: اتصلي لامج انتي بعد
سميه: ها.. هي بدقلها ..

اطالعاتها ريم وفخاطرها ترمسها عن وضعها هيه وامها ..ريم كانت تشغل بالها من تشوفها تستعر من امها .. امها ما سوتلها شي شو ذنبها يعني انها مب مواطنه! تراها بتم امها .. لكن ريم ما اقحمت نفسها فالموضوع .. عل وعسى سميه بروحها من نفسها تحن على امها ..

اتصلت ريم فامها عليا وهنتها بها اليوم .. وعقب اتصلت فيدتها ..

ام سيف: ها امايه
ريم: ههههه امايه .. ترا اليوم يوم الام .. وانا نسيت مساعه ما اهنيج ..كل عام وانتي بخير
ام سيف: فدييت روحج .. وانتي بخير يا اميه.. الا عاد انا شدراني بها السوالف
ريم: ههههه يلا ماعليه المهم نهنيج .. سموه تراهم يوم الام ..

وسكرت عن امها .. وما نست ناعمه .. قالت اكيد انها راقده .. طرشتلها ع تيلفونها تهنيها .. وطرشت مسج لخواتها مي وساره تذكرهن بها المناسبه ..
وكملت دربها ويا ربيعتها للكافتيريا..

اما ساره فها الوقت كانت راقده .. انتبهت ع المسج الي مطرشتنه ريم .. ابتسمت وعلى طول طرشت مسج لامها تهنيها .. شافت انه الساعه وصلت 10 .. دوامها اليوم يبدى 12 .. تمت تجلب ع السرير وعقب قامت .. طار عنها الرقاد..
وعقب ما تغسلت ردت الغرفه .. شغلت الليتات وفتحت الكبت اطلعلها لبس..

انتبهت لميوه انه بدت تجلب .. ونشت ..
مي: ساروه احترمي نفسج وسكري الليت
ساره: اف قومي بسج انزين انتي
مي: والله انا انسانه ماعندي دوام لين الظهر
ساره: بتلبس وبتعدل وبظهر عنج
مي: والله انج سخيفه..
ساره: قلتلج بخلص وبظهر
مي: لاتقرقعين الكباته انزين..ادريبه الا شغل مغايض
ساره: ميوووه لاتسوينهاا سالفه..
مي: مالت عليج صدق حقوق الغير مهضومه عندج.. بتشوفين انزين.. وحده بوحده
ساره: انتي الي تبين تغايضين..
مي: اوكي انزين

غطت مي نفسها باللحاف وحاولت ترقد .. لكنها جيكت ع تيلفونها تشوف الساعه وشافت انه واصلنها مسج قرته .. خوزت اللحاف ..

مي: ايه السودا
ساره: ريلن بياخذج
مي: جب.. هنيتي اميه؟
ساره: هيه ..
مي: بدقلها عيل
ساره: يمكن عندها حصه
مي: بدق بشوف..

اتصلت مي بامها .. بس ماردت .. فطرشتلها مسج ..

مي: بطرش اهني نعوم بعد
ساره: هههه نسيتها هاي
مي: تعالي اندقلها عيل..

اتصلت مي فناعمه وحطته سبيكر ..

ساره ومي فنفس الوقت: مبرووووك .. كل عام وانتي بخير
مي: بل عليج بدق الخشب
ساره: لاحبيبتي مخطوبه انا شو عبالج
ناعمه وهي تثاوب: شو صاير؟
ساره: ايه انتي راقده.. قومي قومي .. اليوم يوم الام .. لا ترقدين
ناعمه ابتسمت : هي نسيت .. الله يبارك فيكن ..
مي: ليش مرقده لين احين؟
ناعمه: قمت الصبح وعيت العيال وركبتهم السياره ورديت ارقد .. احس بتعب
مي: ياويلي عليج.. ماياج خير انتي من ها الحمال..
ساره: سكتي لا تذكرينها .. بتلوعنا بوحامها الحين
مي: هههههه حليلج يا نعوم
ساره: حليل الياعده لله ..
ناعمه: يا مسودة الويه ..
ساره: هههههه فديتني بيضا ..

انتبهت ساره لتيلفونها يرن .. وربعتله .. اما مي كملت سوالف ويا نعوم .. انتبهت لملامح ساره .. استغربت ليش مخلتنه يرن وماترد.. وشكلها امبين انه مختبص..
وبعد ما سكرت عن ناعمه ..

مي: شو بلاج صاخه
ساره: ها
مي: منو يدق؟
ساره: منو
مي: بلاااج مضيعه
ساره: لا .. بس غريبه .. ليش يتصل؟!
مي قامت من الفراش ويلست تستوعب..
مي: مروااان؟
ساره: في غيره!
مي: ليش مارديتي
ساره: ميوه تبين تسويلنا سوالف انتي!!
مي: انزين عادي خطيبج تراه
ساره: انا ما يعيبني جيه.. اذا الحين بنطلع كل اللي فخواطرنا شو خلينا لعقب العرس!!!

مي قامت من سريرها وتوجهت لكبتها .. طلعت فودة ويها وفرشاتها ومعجونها وغسول للويه.. طلعت من الحجره وخلت ساره فحيرتها ..

مروان ما يأس ورد يتصل مره ثانيه لكن ساره مب طايعه ترد .. وشوي وصلها مسج من مروان ..

" صباح الخير ..

ساره لو كنتي واعيه ردي عليه .. ابا ارمسج ضروري .."
عقت التيلفون من ايدها ولحقت مي اختها الحمام .. شافتها يالسه تفرش اسنانها..

ساره: ميووه .. مروان طرش مسج يبا يرمسني ضروري اونه
مي هزت راسها بالايجاب
ساره: افف بسرعه خلصي ..

بعد ما تغسلت مي وهي تنشف ويها ..
ساره: شو الحل الحينه
مي: رمسيه شوفيه شو يبا انزين
ساره: ميوووه استحي ..كيف برمسه
مي: اللـــه وأكبر ..ساروه البليوت تستحي
ساره: اف ميووه لاتمين تغصصيبي
مي: صخي انزين تعالي الحجره فضحتينا ..

ردن الغرفه .. وساره قبضت التيلفون وشافت مس كول ..

مي: دقيله ساروه ما بتخسرين شي
ساره: مي انتي تحبين تسوين شي من ورا اميه؟؟
مي: طبعا لا .. بس جبري بخاطره ها الفقير وشوفيه شو يبا.. بيتم ولد خالج تراه
ساره: ماعرف
مي: هاتي تيلفونج انا برمسه ..
ساره : هزرج؟
مي: هيه هاتي ..

زخت مي التيلفون .. اول ما بغت ادق ع رقمه اتصل ع طول ..

مي: يالله تستر علينا.. اسميه متخبل ها الريال ..
ردت مي: الوو
مروان: السلام عليكم
مي: وعليكم السلااام والرحمه
مروان وهو متردد: شحالج ساره!
مي: ههه انا مي .. وانا الحمدلله بخير
مروان وهو حايس بوزه: ثرج انتي
مي: ها بديينا
مروان: راقدات انتن؟
مي: هي .. قبل شويه ناشين.. عاد تعرف دواماتنا متأخره
مروان: اهاا.. عيل ساره وين؟!
مي: ممم
مروان: ها؟
مي وهي تتطالع ساره تباها ترمس . وساره متردده ..
مي: هاذيه هاه .. اندوك اياها شكلها تتغلى عليك ..

فرت مي التيلفون على ساره وخلتها فالامر الواقع .. رفعت ساره التيلفون .. حست بأنفاس مروان فالتيلفون وبدت تتوتر.. سحبت مي من بدي البيجامه من ورا وظهرتها برع الحجره وميوه تصرخ عليها .. قفلت الباب ويلست ع الشبريه ..

ساره: الو
مروان: اخيرا تكرمتي علينا!!
ساره: ها.. لا سوري كانت ميوه مسويه حشره
مروان: هي.. شخبارج
ساره: الحمدلله تمام.. شحالك انته
مروان: يهمج حالي!
ساره تمت ساكته يبين على لهجته انه عتباان واايد.. لكن هيه شو بايدها تسوي ..
مروان: ساره انا داقلج وابا اقولج سالفه
ساره: شو مستوي؟
مروان: سمعيني زين .. ماباج تاخذين قرار متسرع.. ساره الصراحه بيني وبينج انا عيزت من صدودج الدايم .. خلاص ماروم اصبر ابا املج ..
ساره انصدمت من قرار مروان وتمت ساكته ولا تنطقت بشي..
مروان: ساره الله يخليج لاترديني .. انا محتاجنج..بس ماروم اصبر بدونج.. فخاطريه اخذ واعطي وياج بدون قيود.. انتي تحججين انه ما في بينا شي رسمي .. وانا الحين بسوي ها الرسمي وبملج .. قولي شو رايج
ساره: مروان
مروان: عوون مروان
ساره وبدى صوتها يتغير ومب قادره انها تتمالك اعصابها
ساره: انا بعدني .. كيف تبى تملج
مروان: ساره قلت ملجه هب عرس
ساره: ولو
مروان: يا ساره فهميني
ساره تمت ساكته
مروان: ساره لا ترديني ..
ساره: مروان لو انا وافقت عبالك الاهل بيوافقوون!!
مروان: لا تحاتين الاهل ولاتاخذينهم علثه.. انا رمست الكل عن ها السالفه .. حاولت قد ما اقدر اني اقنعهم .. وقلتلهم اني بقدم لصندوق الزواج وقرض الاسكان وشكلهم مقتنعين لانهم يعرفون كيف ها الامور تبطي.. ساره خلي كل حد عنج .. سمعي لقلبج يا ساره .. بتريا منج الرد ..
ساره: بس
مروان: اكيد امج بتشاورج .. وانا بتريا ردج لين هذاك اليوم .. خلاص مابضغط عليج اكثر وما بقنعج اكثر.. اذ وافقتي تراه يوم عيدي واذ لا تراني مالي غير الصبر .. فكل الحالات تراج لي ..
ساره حست بحراره تسري فويها .. استحت وايد .. ماتوقعت ها الجرأه كلها من مروان .. وما ردت عليه بشي ..
مروان: خلاص انا بخليج الحين.. وسلمي على ميوه ..
ساره: يوصل ..
مروان: فمان الله
ساره: الله يحفظك
سكر مروان عن ساره .. وهو مب مطمن ابدا .. شكلها مب مقتنعه بالملجه مول..
اما ساره بدت الافكار تسيطر عليها.. سمعت دق ع الباب .. فتحته وردت طاحت ع الشبريه..

مي: سكرتي؟
ساره: هي
مي: شو يبا؟؟
ساره: يسلم عليج
مي: لا والله . يبى يسلم عليه
ساره: غبيه.. لاتميلي زنه..انا برقد
مي: غربلج الله .. والدواام
ساره: مالي بارض..
مي: مادري شو قالج خلاج مختبصه جذه ..

ما ردت عليها ساره .. وغطت نفسها باللحاف .. رمسة مروان تمت ترن فاذنها.. هو شاور الكل واقنعهم .. رمسها وحاول وياها .. لكن هي ما تبى تملج الحين.. بعدها تحس عمرها صغيره على ها الخطوه.. ما تبى تلتزم من الحين ..
لكنه يحبها.. يباها.. ويحس بتصرفاتها انها تصده ..هي ما تقصد تصد حبه .. لكن بالنسبه الها سابق لاوانه .. كل شي في وقته حلو .. ليش هو مستعيل..
حست بنفسها ضعيفه فوسط ها التفكير .. بدون ما تحس دمعت عينها .. مسحتها على طول وقاومت مشاعرها اللي تقصف بها ..

أما مي.. فطنشت الموضوع ولبست للدوام وطلعت من الحجره .. كانت تمشي وهي عيونها ع التيلفون تقرى المسجات الي واصلتنها .. تأففت من خاطرها .. رفعت تيلفونها واتصلت فأسما بنت عمتها..

مي: مرحب
أسما: مراحب
مي: وينج انتي؟
اسما: فالمبنى اليديد
مي: ومنو وياج
اسما: ربعنا..
مي: منو انزين
اسما: قوم عواش العين
مي: اهاا.. زين بمر عليكم اسلم.. انا طالعه قبل دوامي بوقت
اسما: زين تعالي
مي: يلا حبيبتي طلبيلي شي اكله لين ما اوصل
اسما: لاااوالله
مي: خخخ يلا ماشي.. ماعندي وقت اطلب .. بيي باكل وبسير اداوم
اسما: اف منج.. يلا انزين تعالي..

كملت مي دربها لين وصلت مبنى80 ودشت صوب الانشطه الطلابيه وهي عباره عن مطاعم وكافتيريات .. اتصلت فاسما تبى تعرف وين هي يالسه .. دلتها ع الطاوله اللي يالسه عليها وسارت صوبهم ..

مي: سلامو علييكو ..
عايشه: وعليج السلااام والرحمه .. مرحباااا السااع مرحبا ملايين فذمتيه ولايسدن..
مي: هيهي اخجلتي تواضعي ..
أسما: قربي حياج..
مي: وين ربعكم عيل ..
اسما: من شوي مروحين كلاساتهم ومحد تم غيرنا انا وعواش
مي: اهاا.. واشحالج يا عواش؟
عايشه: الحمدلله بخير وسهاله الغاليه.. انتي اخبارج؟
مي: والله تمام .. من متى مخلصين دوامات
اسما: من ساعه تقريبا
مي: زين يحظكم .. مب انا توي ببدى دواماتي
عايشه: والله بنات السكن ما يبن الا الرقاد.. مريحات عمارهن كله ياخذن دوام مسائي
مي: خخخ مب من شي .. نسهر الليل ونرقد النهار
عايشه: والله ماعرف كيف عيشتكم فالسكن..
اسما: وناسه السكن والله
مي: مب للكل اسوم..
اسما: صح انزين .. بس بعد لمة البنات وناسه
عايشه: يا انه فخاطريه اتم ليله وحده بس فها السكن.. لكن بينقدون عليه
مي وهي تتطالع عايشه باستغراب..
مي: وليش ينقدون علييج؟؟؟
عايشه: عاده تعرفين انتي.. اهلنا ما يواطنون السكن
اسما: وليش ها الكثر متحاملين ع السكن؟؟ شوفيه ثره ينانوه؟؟
عايشه: شدراااني يا اسوم .. تخيلي في وحده من ربعي اخوها ضربها ضرب يوم عرف انها سارت السكن عند ربيعتها
مي: حشى .. وليش ها كله..
عايشه: ماخذين فكره عن السكن والبنات اللي فيه
مي: شو الفكره عاد
عايشه: يعني
مي وهي تستعبط: هو صح السكن مسكوووون بس بناته زينات ماعليج
عايشه: ههههههه الا مسكونات بناته
مي: حرااام فديتنا والله..
اسما: بسم الله علينا.. الا جناحهم هاذيل ولا نحن الحمدلله مرتاحين
مي: يلا عاد فكل مكان تراهم متواجدين..المهم ردينا للسالفه..ليش ماخذين فكره؟
عايشه: عاد تعرفينهم عبالهم انه بنات السكن مب اوكي
مي: بس لاه .. والله ماعندهم سالفه بنات السكن حالهم حال البنات اللي برع السكن يسد انهن متغربات عن اهاليهن ومتحملين معاناة السكن عشان الدراسه
اسما: ترا اللي ما يعرفك ما يثمنك
عايشه: اجل اجل
اسما: هههههههه هاي مالتي اجل اجل
عايشه: بس والله من رابعتكم بالعكس وايد حببتوني فالسكن.. احس صدق فرق بين افكارنا قبل والحين ..
مي: احم احم شي طبيعي.. عرفتي بنات مو حيالله
عايشه: يالله عاد..
مي:هههههه
عايشه: الا تعالي ميوه بتخبرج
مي: هاه
عايشه: شحالها فطيم وياج..؟؟
مي: فطييم؟!
اسما وهي تتطالع مي وتبتسم..
اسما: هي فطييم
مي: اي فطيم؟
عايشه: اونج عاد الحين
مي وهي تطالع اسما.. وكأنها فهمت منو يقصدن ..
مي: فاطمه؟!
اسما: هي فاطمه
مي: بلاها
عايشه: ماشي نقولج اخبارج وياها
مي: عادي
اسما: والله ميوه تجلط الواحد من برودها..
مي: ليش شو سويت
اسما: الحين البنت متخبله الا تكون وياج وانتي طااااف
مي: اسموه كم مره بقولكم اني مب مال ها السوالف
عايشه: انزين ميوه البنيه الا تبى تكون ربيعتج
مي: لاوالله.. عادي انزين من الله امشيه وياها ربع عادي.. بس هي وايد تبالغ..بس طفرتني مسجات كل شوي وينج وين سرتي وين ييتي شو سويتي.. تيلفونات ماتوقف.. والله شي يطفر الواحد
عايشه: خيييبه يا ميوه ..
مي: هي والله.. انا من قبل قايله لساروه واسوم ربيعتكن لاتعطنها أمل اني بكون وياها قو
اسما: انزين ميوه ليش يعني ماتكونين وياها ربيعه قو
مي: ليش هو بالغصب؟!
اسما: لا مب جيه.. بس فطوم وااايد اووكي
مي: اف اسوم بس لاتلعوزوني.. انا الكل عندي ربعي وكلهم نفس الشي..
عايشه: الا ماتحتايين تكون عندج وحده وااايد وياها فالسكن
مي: مب لازم ..
اسما: راسها يابس هذي
مي: خخخ شو بسوي ..

اطالعت مي ساعتها وصرخت ع البنات ..

مي: كله منكن اتأخرت
اسما: وين كلاسج؟
مي: هنه فوق..
اسما: يلا سيري سيري يا الدحدح
مي: الله واكبر.. يلا سي يو .. بباي عواش
عايشه: تبيني اوصلج غناتي
مي: لا فديتج تسلمين.. خلج ويا بنت العمه
عايشه: خلاص عيل..
مي: باي
عايشه: الله يحفظج

وسارت مي صوب القاعه اللي فيها محاظرتها .. وهي فبالها الرمسه اللي دارت امبينهم توه.. بس حاولت تتجاهل الموضوع وكملت دربها ..