قـــلـــوب تـــحـــت الـــمــجـــهــــر**

ام سيف عقب ماصلت العشا .. يلست فالصاله ويابتلها نجمه عشاها.. بعد ما تعشت صدت صوب نجمه اللي كانت يالسه حذالها ..

ام سيف: نجموه قومي هاتي الورقه اللي فوق التلفزيون .. اتصليبي على رقم البنات ابا ارمسهن
نجمه: ماماه احين وقت في اخر مناك
ام سيف: لا انتي الا ماتعرفين امسات مرمسيني العصر
نجمه: ماماه احين فليل مناك هم في نوم
ام سيف: نيموه انتي مالج سنع هاتي الرقم واتصليبي على رقم ساروه
نجمه: اوهو ماما انتي مايسمع كلام .. انا بيسوي تلفون بس انتي مسؤول
ام سيف: سالت دموعج ان شا الله .. اوص يالله وهاتي الرقم اتصليلي
نجمه: جين جين

يابت نجمه الرقم واتصلت عليه .. كانوا البنات كاتبين ارقامهن لليده عشان تتصلبهن في أي وقت ..
اتصلت اليده .. وتم يرن التلفون .. ساره ماردت عليه كانت راقده بما انه الوقت عندهم 3 الفجر .. اتصلت مره ثانيه على رقم ريم وردت ع التلفون ..

ريم: الوه
ام سيف: ها امايه ريم اشحالكم ؟
ريم: هلا امايه شو فيكم ؟
ام سيف: مافيني شي انتوا رقود ؟
ريم: هيه امايه احين قريب الفجر عندنا
ام سيف: وييييه عيل وعيتكن ؟ وانا نجموه تقولي بس انا معاشتنها
ريم: فيج شي امايه ؟
ام سيف: لا فديتج مافيني شي .. الا ولهانه عليكن
ريم: فديتج امايه .. اخبارها عموه ؟
ام سيف: كلهم بخير انتي شحالج وخواتج شحالهم ؟ تولهت ع ضرايب ساروه ومي ريم: لاتحاتين هب مقصرات اهنه
ام سيف: مايكون يتنازعن ويا نعوم ؟
ريم: ع حالهن.. يتناقرن وياها تقول دياجه في كيسه
ام سيف: هههههه لاحوول ماعليه ضرن ع ها الشي..
ريم: شو بيسون ..
ام سيف: عيل انا غير الوديه متى اروم ادقلكم ؟
ريم: امايه لو تتصلين الظهر عندكم زين
ام سيف:هيه ان شا الله .. سلمي على خواتج امايه ولاتقولين حق قوم نعوم اني اتصلتبكم ..
ريم: ان شا الله امايه .. مع السلامه
ام سيف: فمان الله
وسكرت السماعه ..
نجمه: انا يقول هذا وقت اخر مناك
ام سيف: مايخصج هاكن رمسني وبردن فوادي .. فديتهن ونسن عليه وحدتي بدال مجابل ويهج .. الله يردهن بالسلامه ..

وتمت نجمه تهز الراس . شو بتسوي بام سيف.. عنيده ماتروم عليها .. بس موول ما تستغني عنها ولا ام سيف تقدر تستغني عن نجمه ..
****************
(الأحد)25 يوليو 2004
****************

الساعه 12 بتوقيت استراليا .. كانوا بناتنا يحوطن في حديقه
"Dream World"
لعبوا في الالعاب .. وعقب ساروا استيديو يتصورون فيه مع الكوالا..كل حد تصور وهو شال الكوالا فايده والصور اشكال وانواع اللي يضحك واللي يطالع الكوالا وخايف واللي مغمض عينه والي شاق الحلج..
.. تصورن البنات كلهن وابوهم ومرته .. واحين يا دور عفرا..

ناعمه: يالله عفاري قومي تصوري
عفرا: وع ماباه ريحته خايسه
جاسم: يعني انتي من زين ريحتج
ناعمه: جسوم اسكت انته مالك خص
سيف: يالله عفرا قومي بسرعه
عفرا: مابا مابا ..
ريم: خلاص يوم ماتبى لاتوقفونا خلونا نسير

تجدمت ريم وخواتها ودخلوا محميه الكنغر .. البنات يلسن يتصورن لكن جاسم ماخلاهم في حالهم كل مايشوف كنغر واقف يقوم يركض وراه .. واخر شي قام يناقز ورا الكنغر مثله .. ويقلده ..

ريم: هههههه ساروه صوريه بالفيديو بسرعه بنراويه امايه

ساره فتحت الكاميرا وقاموا يصورونه
ومايد يربع ورا جسوم يقلده .. كان المطر بادي يطيح هالوقت ..

ريم: يالله مايد وجاسم طوفوا مافينا نتوصخ

مشوا وركبوا التلفريك لين وصلوا الجهه الثانيه من الحديقه ..
لكن زاد عليهم المطر ويلسوا تحت المظله يتريونه يخف عشان يكملون جولتهم ...
بعد ماخف المطر كملوا العيال لعب الا مي .. يلست على واحد من الكراسي وقالتلهم بتترياهم .. في هالوقت يت ناعمه يلست وياها ..

ناعمه: ميوه ليش ماتلعبين وياهن ؟
مي: اولا اسمي مي .. واذا تحبين اقولج نعوم قوليلي ميوه
ناعمه: ياسلام يعني كلهم يقولولج ميوه ليش يعني انا غير
مي: مادري والله ليش انتي غير مخلوق فضائي والا شو بالضبط ماعرف.. بس المهم انتي غير..
ناعمه: انا غلطانه يالسه وياج
مي: يعني كنتي وين بتسيرين
ناعمه: اووف لاه بس اسكتي
مي يلست وتطالع ريولها : ريولي تعورني
ناعمه: من شو ؟
مي: ركبيه يعورني وايد .. احس وايد راكضت ومشيت اليوم وردلي العووق
ناعمه: مال شو انزين ؟
مي: اووف ماتفهمين .. ترا يوم طحت ذاك اليوم في البيت
ناعمه: يالله عاد اونه احين يعورج من ذاك اليوم لين احين
مي صدت صوب ناعمه بقهر: يعلج ان شا الله تطيحين نفس الطيحه عشان تحسين بالعوق
ناعمه: ويه شحقه تدعين عليه مالت على ويهج
مي: عليج انتي .. قومي قومي من اهنه فكيني

ناعمه نشت معصبه وهي تمشي بغت تخرطف بقوطي معقوق ع الارض بس اداركت الوضع ولفت على مي..

ناعمه: منج حسبي الله عليج

مي مارامت ترد عليها من الظحك .. اول مره تكتشف ان عينها قويه .. يمكن السر انه ناعمه اطنزت عليها وهي صدق ركبها يعورنها .. بس الله فوق ..
خطف عليهم الوقت وقارب عندهم الوقت ع العصر ..

****

الساعه 10 بتوقيت الامارات .. دخلت عبير الغرفه على بناتها .. فتحت الستاير وشغلت النوور .. مديه طلعت صوت انها منزعجه اما احلام نشت لامها

احلام: اميييه ليش؟
عبير: قوموا بسكم نوم
احلام : امايه حرام اجاااازه
عبير: اوكي ناموا انا بروح دبي مع ابوكم وانتوا تموا نايمين
احلام نطت من فراشها : صدق اميه ؟
مديه تتطالع امها وهيه تفرك عيونها
مديه: الحين بنسير؟
عبير: لا مو الحين ..
احلام: المهم نطلع .. بس كيف دقت فراسكم اليوم!
عبير: ايه مو توه فجر متصله وقالت بتي عقب يومين .. فقلت بروح اخذ اغراض لها وفراشات واشيا تحتاجها
احلام: اوهو شو اييبها من احين ؟
عبير: احلاااااام .. قايلتلج من قبل انها في غضون اسبوع اسبوعين بتكون امبينا!
احلام: ترااه سجلتلوها انتوا ؟ ليش ما تأخر ييتها!
عبير: بتي لان زادت هوشتها مع زوجه بشار ولانها بتقدم امتحانات القبول
احلام:ويايه تكمل هوشتها علينا .. الله يعيينا بس
عبير: المهم اذا تبون تسيرون معانا قوموا بعد الصلاه بنطلع
احلام: وين بتسيرون بالضبط ؟

لكن عبير كانت معصبه من احلام وطلعت بدون ماترد عليها ..وسارت عند محمد..

محمد: قامن البنات..
عبير: ايه ..
محمد: بلاج!
عبير: بنتك ما بتعديها ع خير
محمد: منووو
عبير: احلام .. وايد تتذمر من فجر .. خلاص تعبت يا محمد
محمد: بعدها ردت ترمس عن السالفه
عبير: ايه . قلتلها انه فجر بتوصل بعد يومين وحشرت الدنيا
محمد: ههههه والله احلام سالفه ..
عبير: ماكو شي يضحك فالسالفه
محمد: عبير غناتي لاتعصبين.. عاد انتي تعرفينها احلام اللي فقلبها ع لسانها.. معودينهن ع الصراحه من هن يهال .. ما بيين يجاملنج فشي ما يطيقنه
عبير: محمد بس احلام بنتي الكبيره اللي لازم تراعيني ع الاقل.. اختي فمحنه وانا لازم ما اخليها بروحها..يعني عايشه ويا مرت بشار اللي ما تواطنها.

محمد تقرب من عبير اللي كانت عينها تدمع وايدها ترجف وهيه كانت ترمس بانفعال.. قبض ايدها وتم ضاغط عليها .. يحاول يخفف من انفعالها هذا ..

****

في استراليا .. كانوا مايد وجاسم ومهره قابضين اوراق وقلامه ويلعبون فالبلكونه .. وساره متيلسه حذال جاسم وتعاونه ..

مايد: يالله حرف الميم
بدوا العيال يكتبون بسرعه
مهره: ستووووووووب
ساره: بسم الله مهروه بلاج تباغمين .. خفي حسج
مايد: جسوم غشاش مايستوي
ساره: لا لا جسوم مب غشاش .. انا يالسه اكتبله
مايد: انزين لانج انتي تكتبيله انتي اتعرفين اكثر عنا و النقاط تسير حقه هو
مهره: بسس اسكتوا يالله شوفوا النقاط
ساره: ويو انا الفايزه . يالله جسوم اختار حرف
جاسم: حرف .. حرف .. حرف الغين
مايد: مالت عليك ماتعرف تختار حروف سهله
جاسم: احسن عشان ماتعرف تلعب ..
ساره: اووووف شو بلد تبدى بحرف الغين
سمعوا صوت ياينهم من فوق : غينيا ..
ساره: هيه صح غينـــــ
والتفتت لاخوانها : منو قال غينيا؟

مهره اشرت على البلكونه اللي فوق وهي ساكته ..
ساره اطالعت فوق وبطلت عيونها ع الاخر وشهقت .. وردت داخل وزقرت خوانها وريم اللي كانت يالسه تقرا روايه انتبهت لليضه اللي مستويه ..

ريم: بلاكم شو مستوي!!
مهره: ريال فالبلكونه اللي فوق رد على ساروه
ريم: شووووو؟ ساروه شو قلتيله ؟
ساره: مارمسته والله ولا قلتله شي.. انا يالسه العب وياهم .. وقلت شو بلاد بحرف الغين
مهره: رد هو عليها وقالها غينيا
ريم: شفتوا الرياال؟
ساره: هيه هم فوق الشقه اللي حذالنا.. بلكونتهم تكشفنا
ريم: حسبي الله ع العدو ونحن اربعه وعشرين ساعه نجره وصريخ ولعب.. اكيد يسمعون حشرتنا.. ابوي من اليوم ورايح محد ييلس فالبلكوونه
ساره: ريمان عاد شو بتحبسينا
ريم: بس سكتي.. اللي اقوله يتنفذ فاهمه
جاسم: نحن ماعلينا بنيلس .. رياييل حالنا حالهم
ريم: انا اوجه الرمسه للبنات
مهره: ريموه نحن عادي بعد نيلس
ساره: هي يت علينا انا وميوه يعني

دشت مي الصاله ..
مي: ايه شو ها الحشره ..الواحد يبى يغفل شويه ما يروم من زعيجكن.. شومستوي
مهره: ميوه خلاص البلكونه محرمه عليكن انتي وساروه
مي مستغربه: ليش شو السالفه
ريم: هكم رياييل يطالعونا من بلكونتهم..مانبى رمسه والله لو درى ابويه بزوالنا
مي: ريم بلاج معصبه.. نحن ما سوينا منكر..يوم نظهر انا وساروه من البلكونه وقينا ع روسنا.. واللي فوق ما جد حتى حسينابهم
سكتت شوي مي وطالعت ساره وكأنها تتذكر شي .. فهمتها ساروه وضحكن ع طوول ..
مي: ساااارووه
ساره: الينون الاسترالين
مي: هههههههههههههه وانا اقوول بعد
ريم: شو السالفه
ساره: ماشي ماشي ..
ريم طنشتهن ..وكملت: المهم لو سمحتوا مانبى مشاكل ولا فضايح .. اللي يبى يلعب ويصرخ ييلس فالصاله .. حسوسكن انتن ماباها تعلى والبلكونه مفتوحه تفهمن..
مي: يصير خير

وسحبت مي ساروه اللي كانت يايه بتبطل حلجها وتتحرطم وودتها الحجره ..
ومهره سارت عند مها اللي كانت راقده ووعتها وخبرتها بالسالفه.. وريم ردت لروايتها والاولاد كل واحد قبضله القيم بوي مالته ويلسوا يلعبون بها..

****************
(الثلاثا) 27 يوليو 2004
****************

الصبح فمطار دبي .. كانت عبير سايره ويا محمد اييبون فجر من المطار ..وقفوا فوق وتموا يشوفون الواصلين من ورا الزجاج.. وما بين الناس قدرت عبير انها تميز اختها .. كانت واقفه اتدور ع شنطتها ..
وبعد ربع ساعه .. طلعت فجر فالصوره واضحه .. سلمت عليها عبير بحراره وفجر حست صدق انها متولهه على اختها ..
كانت فجر متحجبه ولابسه بنطلون جينز وبدي اخضر عليه قميص جنز يوصل لركبتها .. ملامحها نفس عبير بس هيه ابيض من اختها بواايد ..

ويوم ركبوا السياره .

محمد: فجر ما تبين شي ما شيات ..
فجر: مشكور محمد.. ما بي شي غير النوم .. من امس مو نايمه
عبير: ولييش عااد
فجر: مادري .. ميبي متحمسه للييه
محمد: هههههه زين والله .. حياج
فجر: عيل بناتكم وينهم ..
عبير: طلعنا من وقت وهن نايمات ..
محمد: الا المطار شو نبى نوديهن
فجر: اهاا .. وانا ها الشهر وين بقعده!
عبير: شدعوه وين بتقعدين .. فبيتنا بعد وين
فجر: جهزتولي غرفه بروحي
محمد اطالع عبير ..
محمد: جهزنالج غرفه لكن غير سريرج فيها سريرين زياده
فجر: كييف
عبير: فجر حبيبتي تعرفين انه البيت مو نحن بس اللي نسكنه .. بيكونن وياج فالغرفه مي وساره
فجر: مو عساس انهم ردوا بيت ابوهم؟
محمد: بس فالويكند البنات يكونن موجودات .. نحن شلنا الاسره اللي كانن فالغرفه وخذنا اثاث يديد الكم ..
عبير: محمد .. مها ومهره وين بينامون؟
محمد: ترا عليا خذت سرير وحطته فحجرتها بوطابقين عادي ماياخذ وسع فالحجره وايد..
عبير: والسرير الثاني
محمد: حطوه فالستور برع ..
عبير: متى هذا صار
محمد: امس يوم رقدتي يابو الاثاث ورتبت عليا الحجره
عبير: اهاا .. وحليلها عليا تعبناها

فجر تمت ساكته وهي تسمع الحوار الداير بين اختها وريلها .. ومتاففه من احين ومب عايبنها الوضع .. غير هالشي كان مظايجنها حجابها اللي اظطرت تلبسه عشان اختها بس ..

****

الدامر كما هو متعارف عليه عند مي واحلام ..
ها الوقت كان فسيارته متوجه للسينما .. قبض تيلفونه واتصل ع رقمها .. ردت عليه بكل رقه ..

سلطان: صبااااح العسل كله
بدريه: صبااح الورد كله
سلطان: ها بداري طلعتي من البيت
بدريه: هيه انا فالسياره الحين ..
سلطان: زين انا بنزل المنار احين ..
بدريه: انا احين بعد بوصل ..
سلطان: اخيرا بشوفج..الهرمه ريلج مروح من ست ايام وغطيتي غطه ولارديتي تتصلين
بدريه: اول شي ..بغيتك توله علي اكثر وبشوف بتسأل علي ولا لا .. وثانيا انا والله ما اقوى ع زعلك وشكله التغلي ما ينفع وياك فطرشتلك المسج اللي قلتلك فيه اني بشوفك اليوم..
سلطان: اهاا.. زين يوم ماتقوين ع زعليه .. بس تعالي بدريه كيف بعرفج؟
بدريه: ههههه انا بعرفك
سلطان: شايفه صوري تراج .. بس انتي شو لابسه كيف بعرفج
بدريه: يوم بتشوف وحده تضحلك ترا هاي انا
سلطان: اووه وايداات اللي يضحكلي
بدريه: شوو شوو
سلطان: هههههههه هي عيل شو عبالج
بدريه: والله يا سلطان ان شفتك تتلفت يمين يسار برد البيت ع طول
سلطان: انزين انزين يبوج ما بتلفت خلاص.. بس شوفي انا الحين بوصل السينما ما بدش قبلج بترياج وبندخل رباعه اوكي
بدريه: اووكي صار
سلطان: يلا باي حياتي
بدريه: باي حبيبي

ودقايق وصلت بدريه الموول .. ونزلت هي الثانيه سايره صوب السينما ..
شافته من بعيد وعرفته .. هو كان محطي ايده فجيبه ويطالع الساير والراد اختار عرض الساعه 11 وفي نص الاسبوع عشان الناس هالوقت يا مداومين او نايمين
قلبها تم يرف .. تشوف ها الشخص اللي خذ قلبها ونساها حتى وجود ريلها .. طول وعرض .. جذااااب لابعد حد .. وخصوصا حركاته تخلي الواحد غصبا عنه يشوفه..
مرت حذاله .. رمقته بنظره وهو انتبه لنظرتها وعرفها .. غير ها عرفها من ريحة العطر .. تستعمل نفس عطره ..
ابتسملها بكل جااذبيه .. عيبته بدريه .. دشت مزاجه .. حتى ماكان متخيلنها جذه .. دخلت السينما ودخل هو على طول وراها ..

****

وصلت فجــر البيت ..
كانن بنات اختها وعمتهن ويدتهن و شيخه وميره حرمت راشد يالسين فالصاله يتريون وصول اخت عبير اللي راسمه فويوهم علامة استفهام كبيره من كثر ما يتذمرن البنات منها.. واول ما وصلوا استقبلوهم و يلسوا فالصاله .. وهي ملتزمه الصمت .. كانت بس تنقل نظرها من زاويه لزاوية فها البيت الصغير.. وكل ملامحها تنم عن الاستياء..
احلام ومديه كانن يشوفنها ويتهامسن فيما بينهن .. فجأه قامت فجر وهي تشوفهن .. خافن البنتين وسكتن على طول ..

فجر: من رخصتكم .. ابي ارتاح شوي ..
عليا: مرخوصه الغاليه ..
عبير: تعالي بدلج على غرفتج..
وتجدمتها عبير .. ووصلوا القسم الثاني من البيت اللي كان مجابل قسم محمد وزوجته ..
فجر: اي غرفه من هاذولا؟
عبير أشرتلها على غرفة مي وساره ..
عبير: تعالي حياج .. وياج ساره ومي بيكونن فالغرفه .. بنات عليا اللي شفتيها توه فالصاله يالسه حذال عمتي..
فجر: ايه .. اذكر مورتني صورهم قبل ..
عبير: اللــه حلو الأثاث اليديد .. ماشفته البارحه يوم حطوه
فجر: الغرفه ظيقه وايد وبعد محطين ثلاث اسره ويم بعض ملزقينهم
عبير: قلتي الغرفه صغيره وبتكفيكم ان شا الله
فجر: عبيير ! انا ماعرفهم ها البنات كيف برتاح بالنوم وياهم
عبير: يا فجر هم فبيت ابوهم وما راح ايوون الا فالويكند ..
فجر: لما ايون بروح انام غرفة احلام ومديه
عبير: البنات طيوبات وبتستانسين معاهم

فجر سكتت .. راسها يعورها من السفره .. ومالها خلق ترمس أكثر ..
قالت لعبير انها بترقد شوي ..عبير طلعت من عندها وسارت هي الثانيه غرفتها ..

أما فالصاله ..

احلام: فجر ما بتعديلنا ايامنا على خير .. وبتشوفون
عليا: وابويه .. احلااام هاي خالتج
مديه: تخلخلت ظلوعها
ام راشد: بسم الله الرحمن .. بلاكن على خالتكن؟
احلام: انتوا ماتعرفونها .. والله انها عووفه

عليا تطالع احلام وهي رافعه حياتها .. والحريم مستغربات من رمسة البنات ..

شيخه: احلام من كثر ما تقرضين فخالتج تخيلت شكلها يخوف
ميره: حليلها ماشالله عليها حلووه
احلام: الحلاه مب بالشكل .. بتشوفون انتوا ويا الايام
عليا: احلام حبيبتي حتى لو الواحد اطباعه وايد سيئه .. نقدر نحن نغيره .. صح ولا
شيخه: لالا مب صح
عليا اطالعت اختها مستنكره الجواب
عليا: شو لا
شيخه: هي لا .. ولا جان تغيرت اطباع ولديه
مديه: عموه انتي ولدج غير شكل
احلام: هههه هيه والله عموه .. هذا نتريا معجزه تستوي عشان يتغير
عليا: مديه واحلام عيب
شيخه: خليهن يرمسن ماقالن غير الصح ..
عليا: شيخه بعد مب عدله طول الوقت تتشكين منه ها الولد .. الرمسه ورمستها وياه لكن ولدج يسوي اللي فراسه .. طبيه خليه على هواه
ميره: الله يعينج يا شيخه .. لكنه كلام عليا صح ..
شيخه: شو يعني ما انصحه ولا امره يسوي الخير لعمره
عليا: شوفي شيخه انتي ما قصرتي .. والرسول صلى الله عليه وسلم قال " من رأى منكم منكرا فليغيره بيده فان لم يستطع فبلسانه فان لم يستطع فبقلبه وهذا اضعف الايمان" .. قاطعيه وخليه يحس بغلطه .. كوني بارده وياه بيحترق اكثر
شيخه: الله يعيني .. بس ولديه ماصبر عنه لو يطوف يوم مارمسه فيه..
كيف اقاطعه
عليا: خليه يحس بالغلط اللي يسويه
ام راشد: تمي ادعيله بالهدايه .. يا امايه مالج غير ربج تراج
شيخه: الله كريم..

وغيرن الحريم من موضوع فجر وموضوع سلطان وقامن يرمسن عن السياسه اللي هي الثانيه تسد النفس خصوصا ها الايام

******************
(الخميس) 29 يوليو 2004
******************

فالامارات ها الوقت.. نشت ام سيف الساعه 6 من نومها متاخر .. شافت الوقت ولقت انه الصلاه طافتها وهي ماحستبها .. حاولت تقوم لكن ايدها اليسرى كانت تعورها وايد ومب قادره تحركها ..
تحركت تدور الجهاز اللي تظغط عليه عشان تيها نجمه .. ابطت نجمه لين وصلت وتمت ام سيف طايحه..

نجمه : نعم ماما
ام سيف: نجمه ليش ماوعيتيني حق الصلاه ؟
نجمه: انا يجي ماماه انتي مافي قوم
ام سيف: انزين تعالي اطاعيلي اديه تعورني وايد وآانس شجات في صدري

يت نجمه وبدت تهوس على ايد ام سيف لكن الالم كل شوي يزيد ..
تمت ام سيف طايحه ومب رايمه تنش ..

ام سيف: هاتيلي مااي في طااسه بتيدد مب رايمه انش ابا اصلي

تيددت ام سيف وصلت فرضها اللي طافها وتمت طايحه .. تحاول تتحرك لكن ايدها اليسرى تعورها وايد.. طبت سالفة ايدها ورقدت شوي لين يتها نجمه توعيها حق الريوق.. وعقب قامت ام سيف تاكللها كم لقمه بس ما قدرت تاكل زين .. حاولت ام سيف انها تقوم وتنشط عمرها عشان تنسى عوق ايدها .. نشت من فراشها وهي متاكيه بايدها اليمين وسارت يلست في الحوي.. سارتلها نجمه اللي كانت زايغه عليها..

نجمه: ماما انتي في تعبان ليش يجلس برع؟
ام سيف: فكيني نيموه .. يلسة برع اخيرلي من الطيحه
نجمه: راس مال انتي ياابس
ام سيف: صه ولا كلمه

وردت نجمه البيت وهيه تحاتي ام سيف.. ومافكرت الا بمريم .. قبضت تيلفون البيت ودقت لبيت مريم .. اللي من شافت رقم بيت امها استغربت.. امها ما تتصل ضاريه مريم اللي اتدق بس مب ها الوقت ..
ردت ع التيلفون وسمعت صوت نجمه فالطرف الثاني..

مريم: ها نجمه شو مستوي
نجمه: ماما مريم .. ها ماما كبير تعبااانه
مريم: بسم الله جي شو فيهااا؟
نجمه: ايد مال هو في وجع
مريم: ايدها .. هيه زيغتيني عبالي شي جايد
نجمه: ماما ايد في وجع وفي الم قول داخل صدر.. انا مافي معلوم شو ها
مريم: شو عوق فصدرها! اول مره تتشكى من ها الشي .. قبل الا تقولي ايدها تعن وتعورها يوم ترقد وتأجب عليها..
نجمه: مافي معلوم.. حتى ريوق ما في ياكل شي
مريم: عطيني اياها انتي
نجمه: ها مااما راس مال هو يابس.. الحين في برع يجلس انا قول حق هو مافي زين حر موت برع
مريم: عنيده من يومها امايه.. انزين سمعي انا بدقلها ع موبايلها وديلها اياه انزين
نجمه: جين ماما ..

وسكرت نجمه التيلفون وردت داخل حجرة ام سيف.. حصلت الموبايل مفرور فالسده.. العيوز ماتشله الا جان سارت مكان .. وها الوقت كانت مريم تتصل وردت عليها نجمه وودته عند ام سيف..

نجمه: ماما.. ها ماما مريم يريد كلام انتي
ام سيف: جي داقه احين
نجمه عطت ام سيف التيلفون .. وردت على بنتها بصوت باين عليه التعب
ام سيف: الوو
مريم: السلام عليج امايه
ام سيف: وعليكم السلام والرحمه
مريم: ها امايه شو يعورج؟
ام سيف: مااشي يعورني انا بخير وسهاله
مريم: امايه نجمه متصله وخبرتني عنج
ام سيف تتطالع نجمه: غربلها الله من سودا .. لله مافيني شي .. الا هاي ايدي عانه نفس كل مره..
مريم: امايه ابوي ها ما ينسكت عنه .. لا تعاشينا المستشفى اليوم الا نوديج اياه
ام سيف: لله مافيني شي ما بسير الدختر ولا شي
مريم: امااايه نجموه تقول تآنسين بعوق فصدرج
ام سيف: لا لا جذب
مريم: سمعي امايه مب عكيفج .. بتسيرين بتسيرين.. والحينه انا وخلفان يايينج تزهبي ..
ام سيف: لاا حوول ولا قوه
مريم: يلا فمان الله .
ام سيف: فمان الله..

وردت العيوز داخل البيت ويابتلها نجمه عباتها .. وماهي الا دقايق ومريم واصله بيت امها .. وساروا صوب المستشفى..

****

الساعه اربع فاستراليا .. ساروا ناعمه وسيف يرقدون شوي .. وريم طاحت بعد تبى ترقد من بعد طلعتهم الصبح لمتحف الشمع .. مي وساره تيلسن فالصاله يلعبن اونو ومها ومهره وعفرا يطالعنهن.. اما مايد وجاسم نزلوا تحت ..

مها ملت من اليلسه وطلعت البلكونه .. وتمت واقفه ع الحد تشوف .. وجذبها منظر الناس تحت وتمت توايق وهي موخيه براسها .. وما سمعت الا حد يزاقر

" أيـــــه .. عن اطيييحييين"

لفت مها ع فوق تلقائي وشافت واحد واقف يضحكلها .. من شكله يبين انه شاب صغير.. ينعطى من سن مها ومهره ..

مها: عنبووه انتو لازم تراقبونا شو نسوي يعني؟
سعيد: هههه شو نسوي متمللين وييتوا انتوا ونستونا بصريخكم
مها: لا والله وشحقه ما تنزلوون تحوطون
سعيد: ننزل ونرد .. جيه طول الوقت بنتم برع؟؟
مها: ياخي اذيتونا .. حتى خواتي الكبار حرمتوهن من الطلعه فالبلكونه ماقامن يظهرن.. فجوا عنا
سعيد: بل بل بل .. شوي شوي علينا انزين .. انزين خبريني انتي مها ولا مهره
مها: بعد حافظ اسامينا!!
سعيد: ههههه انتوا مسويلنا مسلسل خيماوي فاستراليا.. لازم بنحفظكم
مها: وشدراك انه نحن من راس الخيمه؟
سعيد: يبوج من الرمسه تنعرفون .. وغير ها سوالفكم كلها عن راس الخيمه
مها: يعلكم كل شي تسمعونه
سعيد: ههههه ترا ان ماكنت انا يالس يكون حمود ولا عبود.. ويخبرونا سوالفكم
مها مدت لسانها وهيه تعيب عليه ..
سعيد: ها اللي علموج اياه .. تعيبين ع الرياييل عن تخليني انطلج واضربج
مها: تهبي الا انته
سعيد: عنلاتج وياها رمسه.. عيب حشمي
مها: جان حشمتونا انتوا عيل.. كله تصنتون علينا
سعيد: نحن ما تصنتنا .. حسوسكم انتوا عاليه

دشت ها اللحظه مهره البلكونه وهيه تشوف اختها تتحرطم شو ينت البنت ترمس بروحها .. لكنها عقب انتبهت للي يالس يرمسها فوق ..

مهره: مهوه ها سعود!!
سعيد: ههههههه انتي مهره يعني واللي كانت ترمسني مها
مها: وانتي شدراج به بعد
مهره: امس كانوا ثنينه فالبلكونه يرمسون مايد وجاسم.. ها ماكان امبينهم.. وقالوا انه ربيعهم الثالث سعود
سعيد: زين زين فرصه سعيده
مها: أيه ابا من هالجبس اللي ع طاولتكم
سعيد: اسمي سعييد
مها: انزين سعود هاتلي جبس .. البارحه خلصنا كل الكاكاو اللي عندنا
سعيد: اسمي سعييد
مها: اففف انزين سعيد
سار سعيد وياب وياه كيسه كاكاو متروسه و حط داخله الجبس اللي كان ع الطاوله وفره عليهن وقبضته مها
مها: قلتلك جبس واحد مب كييس
سعيد: بالعافيه عليكم ..
مهره: انتوا من متى هنه
سعيد: قبلكم باسبوع
مها: ومتى بتروحون؟
سعيد: ماعرف بالكثير ع الاسبوع الياي.. وانتوا؟
مهره: ماندري بس بعدنا تونا مكملين اسبوع من يينا ..
سعيد: والله ونستونا ع اخر ايامنا فاستراليا ههههه
مها: شو قالولك طاش ما طاش
سعيد: يبوج اقوى من طاش ماطاش انتوا .. كم تسوى سوالف جسوم وينه هوو
مهره: نزلوا هو مايد تحت ..
سعيد: عيل بنزللهم .. محمد وعبيد تأخروا ماردوا وانا ملاان ..
مها: انزين يلا باي بنرد داخل نحن وبنطلق سراح السجناء عقب مغادرتك الكريمه
سعيد: هههههه زين

ونزل سعيد تحت .. اما مها ومهره ردن الشقه ولقن ساروه وميوه مندمجات فاللعبه .. ويوم شافن الكيس فايد مها استغربن .. وخبرتهن مها عن السالفه وضحكن البنات لكن مي هزبتهن شوي واتفقن انهن ما يخبرن ريم لانها بتسويلهن سالفه.. وعقب ماشافوا سعيد روح طلعن يتيلسن في البلكونه

****

فطواري المستشفى كانت ام سيف يالسه ويا مريم بنتها .. اما خلفان كان يكلم الدكتور اللي قاله انه يشك في انه ام سيف تحتاج لعملية قسطره شرايين .. لكنه مب اكيد وبيتريون النتايج لين ما تظهر يوم السبت .. ومخافة من انه يصير شي بحكم انه ام سيف حرمه كبيره بينومونها فالمستشفى ..
خلفان رد للحريم وخبر مريم باللي قاله الدكتور ..

مريم: قسطرة!!
خلفان: هيه .. بس بعده مب اكيد
مريم: وشله ينومونها
خلفان: يعني يخافون تتويع ولا شي.. خصوصا انه اليوم الخميس وباجر الجمعه واجازه ومحد اهنه بيسوي شي لين السبت .. تعرفين انتي هالمستشفيات
مريم: مادري والله .. بقولها بس ها ان طاعت

ورمسوا ام سيف انه بينومونها لكنها ماطاعت والا ترد البيت .. وماراموا يقنعونها.. خصوصا انه مابيسولها شي لين السبت
وفالاخير مشت ام سيف رايها .. وردت البيت .. ومريم شلتلها اغراض من البيت وقالت بتبات عند امها ..

وع الغدى خلفان خبر عياله بسالفة يدتهم ..

نايف: ومن متى هي تعبااانه!!
خلفان: امك تقول من فتره ايدها تعورها لكن اليوم زادبها العوق.. ويدتكم عنيده مب طايعه تتنوم ف المستشفى
نايف: شو بيسوولها هاذيل .. ابويه بننقلها مستشفى خليفه احسن
لطيفه: هيه ابويه.. هنه حتى نتايج الفحوصات تكون مرات مب اكيده
خلفان: تشوفون جي يعني؟
نايف: هي امره حتى لاتتريون نتايج هذيل شلوها سيده اهناك ويفحصون عليها من اول ويديد يمكن ماتحتاج وهذيل يخربطون
اسما: حليلج يا امايه .. انزين ابويه ان طلع صدق تحتاج قسطره خطره هالعمليه؟
خلفان: ع حسب .. الحين نحن مانعرف شو فيها بالضبط انسداد شريان ولا شو..
نايف: ان شاء الله خير.. وقوم خالي ما بتخبرونهم؟
لطيفه: تراهم فسفر شو بيسوون
نايف: يقطعون سفرتهم بعد شو .. امايه تعبانه وخالي يتم برع عنها
خلفان: عيل تدرون انا برمس امكم وباجر ان شا الله عقب صلاه الجمعه بنطلعبها بوظبي .. وسيده بنوديها الطواري اهناك وان طلعت نتايجها وكل شي وكان شي مايطمن الله لاقدربتصل بسيف وبخبره
نايف: انا بسير وياكم
خلفان: لا لا تم انته اهنه محد ويا خواتك واذا في شي خلاف بتون كلكم بوظبي
نايف: على خير ان شا الله

العصر سار نايف صوب بيت خاله سيف يبى يطمن على يدته .. كانت ام سيف ومريم يالسات فالصاله .. ودش عليهن نايف .. سلم ويلس حذال يدته .. مريم ها الوقت دشت المطبخ بتسوي قهوه ..

ام سيف: ابويه عطني التيلفون ودقلي لبنات سيف
نايف: ليش؟
ام سيف: يابويه متولهه عليهن من ثلاثت ايام ما رمستهن
نايف: مايعرفن عن عوقج
ام سيف: له ما قلتلهم ماباهن يحاتني وهن فسفر .. انا بخير الحمدلله مافيني شي
نايف:ماعلينا من رمستج ترا بنوديج مستشفى خليفه في بوظبي
ام سيف: يالله شله بعد تفزعوبي لين هناك .. قالكم الدختور انا بخير مافيني شي
نايف: ماعليه عشان نطمن اكثر ..
ام سيف: الا انتوا تكبرون السالفه .. قم قم هاتلي التيلفون بتحصل حذاله ورقه في ارقام البنات هاتها وياك ..

وقام نايف وياب التيلفون لين عند ام سيف والورقه فايده ..

نايف: ها امايه تفضلي
ام سيف: انزين دقلي ع واحد من ها الارقام.. دق على اللي فوق ها مال ريم
نايف تم يطالع الرقم ويطالع يدته ..
نايف: والثاني؟
ام سيف: مال الخبله
نايف: هاه ؟ منو الخبله
ام سيف: ساروه
نايف: ههههه (وسكت شوي يبى يجس نبظ يدته) شحقه ريم زقرتيها باسمها وهاي سميتيها الخبله
ام سيف: تراها صدق خبله خريش يالله ماتيلس والا ريم فديتها عاقل ماتقول بينهن الا سنه .. دق دق انته ع الرقم احين
نايف رجع يطالع الورقه: ورقم خالي عيل وين ولا ما دقيله؟
ام سيف: رقم خالك حافظتنه نيموه ادقلي عليه هيه
نايف: اهاا .. والحين ادقلج لريم؟
ام سيف: هيه ان ماردت بتصل بالخبله .. بس كم الوقت احين عندهم
نايف: ممم متأخر شوي ..الساعه 11 بتي عندهم احين
ام سيف: ماعليه دق ما يرقدن هن ..

وقبض نايف التيلفون واتصل ع رقم ريم .. خلى السماعه على اذنه ..
مايعرف هو ليش جي سوى بس اللي يعرفه انه كان يبى يسمع حسها ..
اول ما سمعها تقول " هلا وغلا بطويلة العمر.." عطى يدته السماعه ..

نايف: ها امايه ردت هاذي
ام سيف: السلام عليكم
ريم : وعليكم السلام والرحمه .. شحااالج اامايه؟
ام سيف: بخير وسهاله انتي اشحالج؟ واشحال خوانج؟
ريم: الحمدلله كلنا بخير .. تولهنا عليج يا امايه
ام سيف: فديتكم والله انا الي متولهه عليكم.. البيت تام فاضي عليه
ريم: فديتج والله .. ها امايه هاذن ساروه وميوه يبن يرمسنج كلني
ام سيف: ههههه هاتيهن انزين

ام سيف رمست مي وساره... ونايف يشوف يدته اللي كانت وايد مستانسه وهي ترمس عيالها .. طمنتهم عليها واطمنت عليهم .. ونايف ها الوقت يشوف الورقه وغصبن عنه خزن رقم ريم في ذاكرته وصوتها يتردد فاذنه..

********************
(السبت)31 يوليو 2004
********************

فاسترليا كان الوقت 12 فليل ..والجو بطبيعته بااارد خصوصا هالوقت .. طلعن مها ومهره البلكونه وياهن جسوم ومايد .. وتموا يسولفون ويصرخون .. بس عسب يسمعونهم اللي فوق ! صارلهم يومين ماشافوهم

بس محد ظهرلهم ..

وماهي الا دقايق وبطلعة سعيد فالبلكونه اللي كان قابض جدر فايده .. يوم شاف العيال فالبلكونه ضحكلهم ..

مايد: شو ها فاييدك؟
سعيد: شوفوا شو بسوي الحين

كان يطالع تحت بلكونتهم ضحك ضحكه خبيثه وماهي الا ثواني و انجب الماي البارد اللي في الجدر ..
اما نظرات العيال اللي كانت بين سعيد والجدر الي فايده اتوجهت للمكان اللي انصب فيه الماي وسمعوا صرييخ من تحت شال الدنيا..
كانوا ربع سعيد محمد وعبيد نازلين تحت بشورتات وتيشيرتات بلا كم فها الجو الباارد اما سعيد رفض ينزل وياهم عشان يسوي فيهم هالمقلب ..
العيال تموا يظحكون عليهم وهذيلاك محتشرين ويسبون سعيد عقب ماتجمدوا من البرد..
واللي زاد ظحكهم السيكيورتي اللي طلع من الفندق يزيد ربع سعيد فوق البرد هزاااب ..
مايد: زين سويت فيهم
جاسم: هههه احين تلاحق عمرك دورلك طاسه انخش فيهااا بيونك
سعيد: عادي اطب بلكونتكم ؟
مهره: هاللي قاصر بعد .. حط ريولك انته ان ماحشيتها لك
سعيد: خيبه خيبه انتي ليش جيه
مهره: احسن
سعيد: الحين عبود اخويه وحمود ربيعه بييووون وبيكفخووني
جاسم: ههههه عيل تصب عليهم ما بارد وماتباهم يكفخونك

سعيد كان ياي بيرد عليهم لكن سمع صوب الباب ينفتح وبدى الزعيج عندهم وعفدوا الشباب على سعيد فالبلكونه يضربونه وهو يضحك عليهم ..

كانت الاصوات فها البلكونتين واايد عاليه .. ظهرت ريم من حجرتها تشوف شو السالفه وحصلت خوانها فالبلكونه ووقفت عند الباب ..

ريم: شوو مستوي عندكم؟؟
مها: هههههه هاذيل سواالف
وشافت ريم مايد وجاسم وهم يطالعون الشباب ويرمسونهم وهاذيلاك يتمصخرون ع بعض
ريم: اللي فوووق؟
مهره: هيه سعيد جب ما بارد ع ربعه واحين يتضاربون داخل ويطلعون البلكونه ..
ريم: وانتن شو موقفنكن وياهم ؟
مها: شو نسوي ملل.. نتسمع ضرابتهم ونشوفهم يوم يظهرون البلكونه
ريم: وخواتكن وين؟
مها: داخل حجرتهن اظن

ردت ريم وسكرت باب البلكونه .. وسارت عند خواتها فالحجره .. ولقتهن منسدحات يسولفن ..

ريم: اسميييهم رابشين ها الشباب ..
ساره: جيه بلاهم
ريم: احسهم وايد يتمصخروون توه واحد منهم صاب ع ربعه ماي بارد من فوق
مي: اويه فها الجو .. اسميهم هلكوا
ساره:ههههههه مهابيل هاذيلا بس سواالف.. ميود يقول بيسافرون عقب كم يوم
ريم: زين يبوكن بنروم نظهر البلكونه ع راحتنا عقب
مي: حلييلهم
ريم: انا بسير اوطي راسي.. طالعن ع خوانكن ولااااتظهرن البلكونه
ساره: انزين انزين .. يلا تصبحين ع خير
ريم: وانتو من اهله

وسارت عنهن ريم عسب ترقد .. طاحت ع السرير وافكار توديها وتيبها .. اليوم يدتها ما تصلتلهم .. تحس انها افتقدت صوتها اليوم .. قبضت كتيب الاذكار اللي تحت مخدتها وقرته وغمضت عينها تبى ترقد..

****

بعد وصول فجر للبيت .. قامت عبير تسوي اي شي بس عسب ترضي اختها الوحيده .. ما ودها تتذمر من المعيشه هنه او انها تحس بالقصور ..
احلام ومديه كانن وايد ينقهرن .. خصوصا لما عبير تنازعهن والسبه فجر ..
كانن بس يتمنن اليوم اللي تبدى فيها الدوامات .. مب فرحانات بالدراسه لا.. بس عسب يفتكن من فجر .. ومن تسلطها ..

كانت احلام يالسه في حجرتها بسلام وماتبى تظهر الصاله لانها تحيد فجر يالسه هناك.. سمعت دق ع الباب .. ودشت البشكاره على طول صوب التلفزيون ..
قامت تمجع الوايرات وشلته واحلام تطالعها ..

احلام: اييه وين تبيبه ..
البشكاره: مدام يريد ودي حجرة مال هي اوختي
احلام: نععععم .. شو يعني ...
وخوزت احلام اللحاف عنها وطلعت حتى قبل ما تظهر البشكاره على طوول للصاله..
احلام كانت تتطالع فجر اللي محطيه ريل ع ريل وتلعب باظافرها .. واطالعت امها اللي تسولف ويا عليا .. انتبهت عبير لاحلام وهي واقفه ومكتفه باديها وتطالع بغيظ..
عبير: احلام يمه شفيج
احلام: مافيني شي .. بكامل صحتيه ولله الحمد ..
عبير: عيل شفيج معصبه..
ولفت احلام على ورا والبشكاره تشل التيلفزيون بتثاقل .. عبير فهمت السالفه .. اما فجر قامت من مكانها وقالت للبشكاره تلحقها ..
عبير: احلام حبيبتي تعالي ..
احلام: هي يايه عندنا ضيفه مب يايه تنقص علينا حياتنا ..
عليا: احلام غناتي بتم خالتج واكبر عنج .. ماعليه لو ضحينا بوناستنا شوي لغيرنا
احلام: لا علييه .. عنبوه .. من يت واميه كله دايره فصفها..
عبير: احلام شو ها الكلام
احلام: هاذي رمستيه .. والتلفزيون احين سايره اخذه
عبير قامت : احلام روحي غرفتج
احلام: امييه .. تلفزيونا ونباه .. نحن ويا التلفزيون بنموت من الملل بعد بتاخذونه عنا ..
عبير: احلام .. خالتج كله تقعد فالحجره .. انتي ع الاقل تظهرين وتردين من بيت عمج لبيت عمتج ..
احلام: امييه .. هاي ظهره تسمينها .. خل تاخذلها بروحها تلفزيون ..
عبير: احلام يوم تبين التلفزيون موجود فالصاله .. عادي ..
احلام: ابا فحجرتيه ..
عليا: احلام حبيبتي كلنا ماعندنا تيلفزيون فحجرنا ..
احلام: بس غير يوم يكون عندج ويشلونه غصب عنج
احلام حست بغصه فحلجها .. استغبنت وانقهرت .. طلعت من الصاله وسارت ع طول حجرتها وقفلت الباب .. وشوي حد دق عليها الباب ويوم فتحته ..

البشكاره: فجر يريد رسيفر مال دوش
احلام: اوووهوووو .. خذيه هاكوه وذلفي عن ويهي

وعقب رضت بالباب بالقو وطاحت ع شبريتها .. وهي بتموووت من القهر ..
لا وبكل بروود مطرشه البشكاره بعد تبى الرسيفر ..

ومن سمعت حد داش الحجره مشت دموعها ع طول وتمت ع طيحتها ..

مديه: شو بلاج ..؟
احلام لفت ع مديه.. وقامت من مكانها تبى تسير الحمام تغسل ويها ..
مديه: اكيد السالفه فيها فجر
احلام: منو غيرها هاي محراث النار.. انتي وين كنتي
مديه: بيت عمي ويا ايمانوه ..
احلام: مروان هناك؟
مديه: توه ظاهر .. ليش شو تبينه
احلام: بس اسال ..

ودشت احلام الحمام تغسل ويها .. ومديه يلست ع شبريتها وقبضت ريموت التلفزيون اللي نسوا يشلونه.. ويوم رفعت راسها ماشافت التلفزيون .. وعقب ما ظهرت احلام قالتلها انه فجر خذته حجرتها ..
مديه انقهرت أكثر .. وطلعت ع طول للصاله وتعالى حسها بعد هي وعبير هزبتها ..
اما احلام يوم شافت الريموت .. قهقهت بسخريه .. وطلعت من الحجره متوجهه لحجرة فجر .. دقت الباب ودشت ..

فجر: نعم .. شتبين!
احلام: نسيتي هاا الشي ..
فرته ع فجر من بعيد .. وطاح الريموت ع السرير ..
احلام: سهرات ممتعه ان شاء الله ويا.. تلفزيووني ..

وطلعت احلام من الحجره وهي تدعي ربها انه يخترب ها التيلفزيون .. اليوم قبل باجر ولا تتهنابه فجر ..

****

نزل سلطان من حجرته بعد صلاة العشى.. كان يتلفت فالبيت مب محصل حد .. وشكله يبين عليه انه معصب .. تم يزاقر على امه بس محد توايب له .. سمع حس ابوه فالصاله ودخل عنده يسأله عن امه وقاله انها في بيت بوراشد ..
طلع من الصاله وتم يزقر ع البشكاره وهو متنرفز ..
من سمعت البشكاره حس سلطان تبريدت وركضت الفله .. شافته واقف عند الباب

البشكاره: نعم .. شو يريد ..
سلطان وهو محرج : انا كم مره قايللج الغتره يوم بتكوينها حطيلها ماريتوو ها مال نشاا .. شوو ها انتي ماافي معلووم غبييه ..
البشكاره: بابا سلطان والله انا في حطي ..
سلطان: وين حطيتي .. مب واقفه هنه هاا تشوووفيين مب يابسه .. كيف تبيني اتغتر بها
البشكاره: زين بابا مافي جنجال.. انا بيسوي الحين ..
سلطان: يباالج ضرب انتي
البشكاره: بابا كله جنجال كله جنجال
سلطان: جب ولااااكلمه .. عنبو كل ما نسير الاسواق انييبلج واحد مستبخله على الغتره وراشه شويه شوو دوا عن الموت هو ..

وعلى ها الضجه اللي مسونها سلطان دخلت شيخه البيت .. ومن سمعت ها الحشره زاغت .. تمت تمشي فالحوي وهي عينها على سلطان .. ويوم وصلت عنده ..

شيخه: يالله يا سلطان زعيجك واصل اخر الفريج
سلطان: كله من بشكارتج الغبيه
شيخه: ليش شو سوتلك
سلطان: مالت على ها البشاكير ما يفهمن بقر ..
شيخه تشوف البشكاره وهي قابضه الغتره فايدها وشكلها كان وايد خايف ..
شيخه وهي ترمس البشكاره: سيري سوي اللي قالج اياه سلطان.. وانته ادخل داخل فضحتنا عنبووك .. ما تحشم حد .. حليلها الفقيره يزاتها تشتغللكم وانته جي تعاملها..
سلطان: هي تسبب لعمرها ..

فها اللحظه رن تيلفون سلطان اللي كان بايده .. شاف الرقم .. ورد يطالع امه .. روح عنها يبى يرد ع الاتصال .. وشيخه تطالعه وهي مستعجبه منه .. كان بركاااان مشتعل والحين كتلة جليد .. يمشي ويرمس بالتلفون ..

سلطان: ها شو مسويه اليوم ..
بدريه: والله ماشي .. ملل ..
سلطان: اها .. عيل يبالنا طلعه ثانيه وياج
بدريه: لا لا شووو تخبلت.. يكفي المره اللي طافت .. والله قلبي كان فبطني من كثر الخوف .. ماتعرف يعني حد يمر يعرفني ولا يعرفك ويشوفنا ..
سلطان: يالله عااد .. من الله كنا فالسينما .. منو بينتبه علينا..
بدريه: ربك بعد .. الصراحه خووف ..
سلطان: عدت على خير المهم ..
بدريه: انزين انته اخبارك .. ولهت عليك اليوم ماسمعت حسك
سلطان: ان شاءالله دووم تولهين عليه
بدريه: يالله عاد اللي يسمعك يقول امره مول ما اوله عليك وانته اللي مقطع عمرك
سلطان: عندج شك اني ما اوله عليج
بدريه: ماعرف
سلطان: لو كنت ما اوله عليج جان ما قلتلج ابا اشوفج

سكتت بدريه وهي تتأمل فكلامه اللي يمر جدام عينها وهي مغمضتنها .. ها الانسان ياخذها بكل احاسيسها ويوديها لعالم ثاني .. عالم ما درت عنه من قبل .. او يمكن ما قدرته .. تتناسى كل شخص فحياتها وهي تكلم سلطان.. كلامه حلو ع قلبها .. تستانس عليه وايد ..

وسلطان.. من بعد حالة الهياج والضجه اللي كان مسونها فالبيت .. روق على الاخر وهو يكلم بدريه .. وتم يسولف وياها لين ما يته البشكاره وهي يايبتله الغتره .. خذها عنها وهو يطالعها بنص عين .. كمل كشخته وظهر عند ربعه القهوه ..

*******************
(الأحد)1 اغسطس 2004
*******************

ام سيف في مستشفى خليفه رقدوها ونتايجها بالأمس اكدت انه عندها 3 شرايين منسده منها اللي توصل لايدها عشان جيه تحس بالم .. وقرروا اليوم يسولها القسطره خصوصا انه حالتها بدت تستاء وتحس بالام زياده .. في هالوقت كان نايف شال خواته ومتوجهين لبوظبي عشان يكونون موجودين مع يدتهم وقت القسطره..
اما خلفان بالأمس كان متصل بسيف يخبره .. اللي احتشر عليهم عشان ماخبروه اول ماتعبت واتريوا لين يزيد عوقها .. لكن مابيده يسوي شي الوقت كان عنده متاخر ومابيقدر يروح ايجدم الحجز لكن اليوم الصبح طلع من وقت صوب السفاره عسب يجدم الحجز .. تكتم على الموضوع وماخبر حد من عياله ولا حتى ناعمه .. لين رد من السفاره وخبر الجماعه بانه حاليا يدتهم فغرفة العمليات يسوولها عملية قسطره ..

ريم: ونحن شو ايلسنا هنه .. ابووويه خلنا نرد
سيف: انا سرت وجدمت الحجز.. اليوم المغرب تزهبوا بنرد البلاد.. طيارتنا الساعه 11 فليل
ناعمه: انزين ليش جي مستعيل .. امك ان شالله بتقوم بالسلامه وهناك مريم وريلها وياها والقسطره مايبالها شي
ساره: انزين نحن عادي عندنا جان بتمين بروحج هنه.. ولا اقول بنخلي عفروه وياج حرام اتمين بروحج..
مي: هي حلو الاقتراح.. اما عنا نحن نبى نشوف يدتنا ..
ساره ها المره رمست جد: عنبوج عمتج تعبانه وانتي تبين تستانسين هنه
مي اطالع خواتها ولافه بويها عن ناعمه: شعليها هيه عمرها ما حاتت امايه..اللهم نفسي ..
ناعمه وهي اطالع سيف: هيي بناتك محتشرات عليه وانته ساكت عنهن
سيف يطالع البنات وهو بدى عليه الضجر ..
سيف: بس عاد..مب وقته النجره
ريم: اووه فكونا من الصدعه الحين .. امايه متى بتظهر من غرفة العمليات.. انا لازم ادق لعموه .. ابا اطمن والله قلبي ناغزني ..
سيف: ان شا الله مامن شر انا كلمت الدكتور .. وطمني انها بسيطه لاتخافين
ريم بتعجب: كيف ماخاف ونحن بعيد عنها ..
ساره: كله من هالسوسه نعوم مابغتها تسير ويانا .. وخليناها بروحها

سيف يأس من عياله وتم ساكت ماله خلق نجرتهم .. اما ناعمه تمت تطالع ساره بغيض وساره من غيظها طلعتلها لسانها وصدت الصوب الثاني عنها ..
قامت ريم من مكانها وتمت تمشي بتوتر وهي مجتفه ايدها .. جنها واقفه جدام باب غرفة العمليات .. وساره ومي يطالعنها ويحسن هن بعد توترن وياها
وكل وحده يدور في ذهنها افكار وايده .. كيف هالانسانه اللي كان لها جبروووت على الكل ..اللي شتتت عيال ولدها وطالما فرقت فمعاملتها قبل .. طايحه في غرفه العمليات الحين لاحول لها ولا قوه !!
كيف الانسانه اللي يوم رجعوا البيت كانوا مب حابينها ويراددونها ويحملونها ذنب كل شي استوالهم الحين تاخذ نصيب كبير من قلوبهم ومرضها يشغل تفكيرهم! .. شو اللي يخليهم جيه ؟ اكيد تربيه امهم اللي علمتهم يسامحون ويتحابون .. فوق كل اللي استوى كانت تذكر ام سيف بالخير جدامهم وتأكد الهم انه يديتهم ع الرغم من انها يوزت ابوهم بس ماكان الها دور فالطلاق
ومادام صاحبه المشكله الاساسيه وهي امهم مسامحه الكل .. كيف هم!
في الاخير كانت محاولات ام سيف لتصليح الماضي تشفعلها عندهم وتقربهم منها..

ها اللحظات كان سيف متوتر بس يحاول يبين انه هادي جدام بناته ..
تم ساكت وكل شوي يدق لمريم يطمن على امه ظهرت من غرفة العمليات ولا لا ..
اما ناعمه سارت حجرتها ولبست تبى تظهر تغير جو بما انه اخر يوم الهم اهنه ..

ويوم نشوا باقي اخوانهم خبروهم عن يدتهم .. تم الكل مويم وزعلان ع اليده .. والكل ماتوقع ردت فعل جاسم اللي تم يصيح اول ماقالوله عن عملية يدته .. الكل استغبن وهو يشوف جاسم يصيح وريم حاظنتنه ..

ريم: جاسم حبيبي امايه بتكون بخير ان شاء الله خلاص لا تصيح
جاسم: ريمان ها العيوز انا احبها..ماباها تموت عنا
ابتسمت ريم وهزت براسها .. ها جسوم ما يوز عن سوالفه ع الرغم من انه يصيح..
ريم: بعيد الشر يا جاسم.. ان شاء الله امايه بتقوم وبتغدي بخير
مايد: جسوم بس لاتصيح .. قلبي عورني
جاسم ابتعد شوي من حظن ريم ودمعته ماجفت وهو يطالع مايد ..
جاسم: شو بلاه بعد قلبك .. لاتقول جيه الحين بيسولك قسطره نفس امايه
مايد: جان سوولي انته السبب .. خلاص لا تصيح
ريم: بسم الله عليك يا مايد .. لاترمسون جي الله يمن عليكم بالصحه دوم ان شاء الله ..
مي: ابويه رد دق لعموه شوفها طلعوها ولا والله بطني عورني من التفكير
ساره: ليش انتي عقلج في بطنج ؟
مي: سخيفه ياربي مول مب وقته

سيف واللي كان سرحان بالحوار اللي يدور بين عياله مانتبه لمي وهي ترمس.. بس تقربت منه ودقته ع جتفه وردت تقوله يدق لعمتها ..
وقبض التيلفون وعاد الرقم .. وها المره طمنتهم مريم انه ام سيف طلعوها من غرفة العمليات.. والعمليه الحمدلله كانت ناجحه .. وام سيف طبعا راقده بسبة المخدر..ومايعرفون بالضبط متى بتقوم..وحاليا هي في غرفه العنايه لين تقوم وبعدين بينقلونها لغرفه عاديه..

****

عليا كانت يالسه ومحطيه ايدها على خدها .. وام راشد تطالع بنتها اللي ذهنها كان شارد ومب مركزه وياها فالرمسه ..

ام راشد: عليا امايه شو بلاج؟

عليا وسط افكارها غرقانه ولا سمعت سؤال امها..

ام راشد: انزين بناتج متى بيوصلن.؟.. عليا بسج تفكير .. ردي عليه عنبوه شو ارمس الييدار انا
عليا: هاا اماايه .. شوو؟
ام راشد: سألتج متى بيوصلن بناتج؟
عليا: بيوصلون الصبح ان شاء الله
ام راشد: اتصلي لريم انزين اسأليها شو عفرا احين ؟
عليا: امايه مسكرات تلفوناتهن مادري جان سارن المطار.. ماقالتلي متى طيارتهم بالضبط بس قالت فليل
ام راشد: هييه .. انزين دقي لراشد تنشديه عن عفرا شخبارها احين.. يمكن رمس خلفان نسيبهم ..
عليا: انا بروحي احاتيها .. ما بدقله بسيرله بيته وبشوفه جان عنده خبر..
ام راشد: زين قومي عيل بسير وياج ..

وطلعن عليا وامها من البيت .. وسارن للبيت اللي حذالهم .. بيت راشد .. ويوم دخلن البيت .. زقرن على ام مروان .. بس محد توايبلهن ..

ام راشد: اندووج ميره يمكن سايره الشارجه قالت بتسير السوق..
عليا: جنه الا جيه.. عنبو الدار خلا ..

ويوم دشن الصاله شافن مروان منسدح ع الغنفه ومحطي الجريده فوق راسه .. شكله كان غافل .. تقربت منه عليا .. ويلست ع نفس الغنفه ع الطرف .. وقبضت الجريده وضربته بها ع راسه.. فز مروان وشاف عمته فويهه ..
تخيلها شخص ثاني كان زايرنه فالحلم.. ولأول مره يحس بالشبه الكبير بين اللي فالحلم والشخص اللي جدامه .. ابتسم وهو يتمنى يكون بالفعل ها الشخص مجابلنه حاليا ..

عليا: بلاك تبتسم
مروان: لا ماشي.. من متى انتي هنه عموه؟
عليا: توي ها داشه وشفتك راقد قلت بغصصبك
مروان قام من طيحته ويلس وهو حاط ايده ع ويهه وكان شعره منسدل ع يبهته
عليا: تعبان !
مروان: جسمي منهد ..
ام راشد: بسم الله وليدي بلاك؟
مروان: مضارب ..
ام راشد: ياكافي الشر .. ويا منوو؟
مروان: سلطان ولد عموه شيخه
عليا وهي مبطله عيونها : ليش شو استوا ؟
مروان: تحيدين عموه دوم تجات ويا بعض .. اليوم ماقهرته رفعلي الضغط
ام راشد: وشو سويتبه؟
مروان: هههه قولي شو سوابي
عليا: قول انزين شو استوى
مروان: ماشي .. ماذكر بالضبط شو الرمسه اللي خلتني اعصب .. وتسابيت وتفاتنت وياه وعاد هو شري دزني بكل قوته ع الييدار ..هههه ظهري راح
عليا: لا حووول ولا قوه .. شو تباه انته سلطان .. تحيده من يوم يومه مشكلجي
ام راشد: اخيه عليه من ولد .. اسميكم يا سالم وشيخه ماعرفتوا تربون
عليا: امايه هم شو ذنبهم .. طالعي تربية اخوانه .. ولا سلطان الله يهديه بروحه دمر اللي علموه اياه اهله
مروان: هذا اصلا خساره وياه الرمسه
عليا: الله يهديه ان شاء الله
ام راشد: يالله يا شيخه والله انها دومها تصيح منه وتتشكى .. لكن الواحد شو بايده
مروان: ماعليه .. بس الله يخليكم لا تخبرون حد باللي استوى .. بعد بيقول ها سار وشخل ..
عليا: لا ماعليك ..
مروان: الا انتوا غريبه يايين القايله
ام راشد: يالله حتى نسينا شله يايين
عليا: ابوك وين؟
مروان: مادله .. البيت كله فاضي امايه وبناتها سايرين الشارجه وفارس فالعزبه ..
ام راشد: هي قلت انا بعد .. انزين الغالي دق لابوك وتخبره عن ام سيف
مروان: يدت البنااات؟
عليا: هيي
مروان: ليش بلاها؟
عليا: ريم تقولنا انه تعبت وبيسوولها قسطره
مروان: حليلها .. بطالع ابويه

ودق مروان لابوه .. اللي خبرهم انه اللي يعرفه من خلفان ريل مريم انه ام سيف سوولها القسطره ونجحت العمليه بحمد الله وسيف راجع ويا العيال .. وبعد ما سكر مروان التيلفون طمن عمته ويدته انه ام سيف بخير ..

عليا: الحمدلله .. ربي يعافييهاا .. بدق لمريم عيل اتشكرلها سلامة امها
ام راشد: هي صدقج ..
عليا: يلا امايه قومي نرد البيت عيل
مروان: تموا ويايه انزين
عليا: هههه شو خايف اتم بروحك
مروان: ههههههههههه لا مب جي .. بس الدنيا صخه ماداني
ام راشد: تعال تغدنا عندنا انته وابوك .. امك وخواتك بيقلين فالشارجه شكلهن
عليا: بدق لراشد اقوله ..
مروان: خلاص عيل ..

وعقب طلعن عليا وامها من بيت راشد متوجهات لبيتهم ..
اما مروان رد يتسدح .. وهو يفكر بسالفته ويا سلطان .. نرفزه اليوم وايد فالمكتب.. ماقدر يتحمله ويتحمل غلاسته لا ويغلط على ابوه اللي صابر عليه ومشغلنه عنده ..

"الخايس كسرلي ظهري .. انته مب ولد عمه .. عنبو الشر بكبره فيك .. متبري منك ومن الدم اللي بينا يا سلطان .. لاعرفك ولاتعرفني ولساني حتى ما بيطيح فلسانك يا الخايس..
أعوذ بالله منك يا بليس .. ربي يهديه ان شاء الله .."

تمتم مروان بآخر جملتين كم مره .. وحاول انه ينسى سالفته ويا سلطان لأنها مب أول مره تستوي .. بس يأمل انها تكون آخر مره .. لأنه سلطان يباله اللي يطنشه ومايرد عليه

****

فالمستشفى .. من بعد ماطلعوا ام سيف من غرفة العمليات حطوها فغرفة العنايه .. كانت مريم يالسه فواحد من الكراسي اللي برع الغرفه وياها لطيفه واسما بناتها.. ونايف وخلفان يراكضون فالمستشفى يدورون غرفه خاصه لام سيف ..
ومن بعد ماحصلولها .. قالهم الدكتور انه مالهم لزمه يتمون لانه ام سيف فغرفة العنايه ومحد بيتم عندها .. رجعوا كلهم الفندق اللي كانوا حاجزين فيه شقه لهم .. و مريم رجعت وياهم عسب ترتاح ساعتين وبتاخذ اغراضها وبتسيرمره ثانيه للمستشفى .. بتيلس في غرفه امها اللي حجزوها لين اييبونها ..
في طريقهم للفندق كان خلفان يكلم زوجته مريم

خلفان: الحين سيف ع طول بيي هنه؟
مريم: هي سيف وعياله بيون
نايف: عيل يبالنا نحجزلهم شقه ويانا
لطيفه: انزين هم متى بيوصلون؟
مريم: هم اليوم طيارتهم لكن اكيد باجر الصبح بيوصلون
نايف: اسميهم بيهلكون
مريم: ماعليهم شر بيسلمون ع امايه اول مايوصلون وعقب بيردون الفندق يرتاحون
لطيفه: عاد امايه تحب اللمه حولها وفوق هذا متعلقتنهن وايد يعني حتى عادي يلزمن يتمن فالمستشفى ولا يرتاحن
اسما: يالله بيموتن من التعب .. بيسلمن وبيروحن يرتاحن
نايف: انزين انتن شحقى مشتطات..يوم بيين هن بيسون اللي يبنه
مريم: هههههه عاد خواتك الا يحللن الموقف..

وصلوا الفندق ونزل نايف يحجز لقوم خاله .. واهله ساروا شقتهم .. ومريم انعزلت عن عيالها تيددت ويلست ع سيادتها رافعه ايدها لربها تدعي انه يقوم امها بالسلامه..

****

اما في استراليا كانوا العيال يالسين في كافتيريا المطار ياكلولهم شي قبل موعد الطياره اللي كان قريب .. واهناك

جاسم: ميووود .. شووف منو هنااك
مايد: وين؟
جاسم: هاكم ع الطاوله هاذيج
مايد شهق ورد يشوف جاسم: قووم سعوود
انتبهن البنات لخوانهم وهم يتراكضون عنهن صوب الشباب ..
ساره: اندووكن هاذيل مب جنهم ربعنا
مي: هيي هم
مها: اكيييد فطيااارتنا
مهره: صح هم قايلين بيسافرون ها الاسبوع
ساره: سبحان الله.. الله رايد انكون وياهم يوم يردون ههههه
ريم: هي انتن هب اطالعن صوبهم ..
ساره: ريموه حليلهم حشام واظن انهم مب كبار يعني حد منهم يمكن اصغر عني .. وبعدين مب امبينين نحن لهم ..
مي: ريم غناتي اهم شي لا تعصبين انتي ..
ريم: من تصرفاتكن انتن الواحد لازم بيعصب..
مي: انزين ماسوينا شي نحن ريييم
ساره: ماعليج منها .. ريموه دايما تكبر السوالف
ريم: انا اكبر السواالف!! ساروه انتن ماتحاسبن تراكن .. تسون الشي وعقب يطيح ع راسي انا ..
ساره: ريم عاااد .. الحين نحن ماسرنا ودقينا سوالف وياهم .. من الله نشوفهم بس يوم اخوانا وياهم لاتمين تسويلنا سالفه ترا مب من كبرج عشان تتفلسفين عليه الا سنه بيني وبينج لاتنسين
مي: خلاص ساروه عن التحرطيم.. ريم هم ما يشوفنا ولا جان انتبهوا انه نحن يالسين هنه
ريم: كيفكن .. مايخصني لو ابويه يا وشافكن بها المنظر انا غاسله ايدي منكن
ساره حطت ايدها ع راسها: استغفر الله العلي العظيم أي منظر ها اللي بيشوفنا فيه ابويه ..يوم انتي مادانين الجنس الذكري نحن شو ذنبنا .. من الله يالسين بعيد ومايشوفونا .. شو نسوي يعني يوم عيونا تفتر صوبهم .. ياخي يضحكونا.. نبى نضحك بسنا هم وصياح من اصبحنا ..

ريم سكتت عنهن وقامت من الطاوله وسارت يلست بعيد عنهم وهي عاطتنهم الظهر .. تحسست من رمسه ساره .. لكن ما هتمت لانه ها الكلام صح ..اما مي سحبت ساره من ايدها ويلسن ع الكراسي بحيث يعطن الشباب ظهورهن . ماتبى حشره اكثر لا من ريم ولا من ساره ..
والتوم تمن يطالعن شو يستوي بين الشباب وقوم ميود وخاطرهن يعرفن شو يسولفون...

******************
(الاثنين)2 اغسطس 2004
******************

وصلت الطياره الصبح .. وع طول من طلعوا من المطار كان الدريول يترياهم وسارت وياه ناعمه وبنتها عفرا وشلوا كل الشنط ورجعوا البيت ماعدا شنطه كانن البنات عاملات حسابهن ومجهزاتنها لسيرة بوظبي وشنطه صغيره لسيف ومايد وجاسم.. اما سيف وعياله فكان ياينهم راشد خال البنات ومروان ولده .. سيف ومها ومهره ومايد ركبوا ويا راشد .. اما مروان شل مي وساره وريم وجاسم فسيارته وتوجهوا ع طول لبوظبي ..

فسيارة راشد ..

راشد: عيل حرمك شله ردت؟ ماتبى تسلم على امك؟
سيف: تعبانه اونها .. بييبها اخوها باجر اتسلم على امايه
راشد: هييه .. ولا بنياتك امره هلكانات
سيف: بعد لو بقولهن ردن راس الخيمه ما بيطيعن..قلت خلهن ع هواهن
راشد: عاد تعلقن بامك هن .. لازم بيحاتنها
سيف: حتى امايه والله متعلقتهن ..
راشد: ها الشهر وجي استوو .. عيل لو رابيات عندها شو بتسوي امك
سيف: ربك عاد ماراد
راشد: اسميها امك كانت متسلطه مابغتهن فالبدايه الا تيوزك عسب الولد
سيف: الله يهداك يا راشد.. خلاص لاتنبش فالماضي .. نحن عيال اليوم..
راشد: الله كريم يا خوك ..
سيف: الحمدلله العيال يحبون يدتهم .. ولو اني احسهم ما ينجذبون لي بس ان شاء الله ويا الايام يتعودون عليه
راشد: ان شاء الله يا سيف.. بس انته يوز
سيف: راشد واللي يسلمك لا تيب ها الطاري
راشد: والله لولا الربعه اللي امبينا جان من زمان انا متبري منك
سيف: رااشد الله يهداك العيال هنه لاتنسى ..
راشد وهو يطالع ع ورا : هههه حليلهم رقود ..

في سيارة مروان .. كان جاسم يالس جدام ومتاكي ع الكرسي وراقد .. مي وساره وريم يالسات ورا والكل باين عليه التعب من عقب اكثر من 14 ساعه بالطياره .. ساره كانت غافله اما ريم كانت متاكيه ع الباب وتظغط ع راسها اللي كان يعورها .. مي الي يالسه فالنص كانت واعيه ومتجدمه شوي عشان خواتها ياخذن راحتهن في اليلسه وتشوف مروان من المنظره الصغيره .. ومروان يبادلها النظرات ويسويلها حركات بعيونه ..

مي: سخيف مروان
مروان: ههههه بلاج!
مي: ليش جي تطالعني
مروان: هههه ابا ازيغج
مي: بسم الله .. انا عادي عندي ما ازيغ من ها النظرات .. زيّغ ابها غيري
مروان: الا ايي يوم وازيغج بشي ماعليه
ريم التفتت لمي : يالله يا ميوه انتي مب تعبانه
مي: امبلا
ريم: عيل ليش ماطبين حلجج .. من ركبتي وانتي تهذربين .. تعب منج مروان
مروان: ههههههه لا والله عادي.. انتوا امره كلكم مطيحين ابا حد يونسني بعد فالدرب
ريم: هي جان جي عيل برايج ميوه .. انا خفت تصدع من الهذربه وياها

ويوم وصلوا اول بوظبي .. قامت ساره وتمت تتمغط وتنقع مفاصل ايدها بتعب .. الكل صاخ وهي تتلفت عليهم .. كانت يالسه ورا جاسم.. ولفت صوب اللي يسوق .. جدمت راسها وحطته ع السيت الجدامي .. وعينها بعدها تتأمل مروان ..
مروان اصلا كان منتبه لساره اول مانشت .. ويحس بنظراتها .. يبى يلف لكن استحى .. يمكن هي صح تطالعه لكن يمكن تركيزها مب عليه .. بس تجرأ شوي ولف .. شافها وهي محطيه راسها ع السيت .. ابتسملها ..

مروان: نشيتي؟
ساره استحت ونزلت عينها: هيي نشيت
مروان: وليش جيه يالسه؟
ساره: ظهري يعورني
مروان: يلا ماعليه الحين بنوصل
ساره وهي تتطالع اللي حذالها باليسار : من متى رقود هاذيل؟
مروان: مادريبهم والله .. يرقدون شوي ويقومون.. بس ميوه قبل شوي غافله ولا امبونها مونستني فالدرب
ساره: اونه.. يـــالـله والله تعب ..
مروان: بتسلمون ع يدتكم وبنردكم الفندق
ساره: اي فندق؟
مروان: ابويه يقول نايف ولد عمتكن حجزلكن وياهم ففندق .. بتمون هنه لين تظهر يدتكن
ساره: اونــه
مروان ابتسم: انتي منو معلمنج ها الاونه
ساره: هاا..محد بروحي..
مروان: يا حيج ..

ورد الهدووء يسود السياره .. وساره ردت تتاكى ع ورا وتطالع الشارع من برع وهي متلومه من عمرها .. اكيد انتبه لنظراتها .. ولا ماكان بيلف ..
اما مروان حب يكسر ها الهدوء .. هو بروحه متملل من رقدت عنه مي..

مروان: انزين ..وشو السفره كانت؟
ساره رفعت راسها: ممم.. ونااسه.. وايد حلوه استراليا
مروان: هي .. زين زين
ساره:الحين انته بتوطينا الفندق وبترد راس الخيمه ع طول
مروان: هييه .. ليش شي بغيتي؟
ساره: لا لا .. بس مب تعب عليك قابضلك درب ساير راد
مروان:هههه عادي متعودين
ساره: بتوطينا المستشفى وبتم تتريانا
مروان: ليش ماتبيني اترياكم؟
ساره: لا ماقلت جي.. بس يعني كم بتتريانا انته!
مروان: ماعليه انا بيلس فالكافتيريا.. واول ماتبن تردن دقلي.. ولا قولن لابويه يدقلي لانه بيصعد هو بعد يسلم ع يدتكن وشكله بيتم ويا سيف..
ساره: لا اتلوم من ابوك .. وبعدين ماعندي رقمك انزين
مروان لف على ساره وابتسملها .. مسك تيلفونه
مروان:عطيني رقمج

ملته ساره الرقم وعطاها مروان رنه عسب تعرف رقمه وسيفته عندها.. وهو الثاني بعد خزن الرقم عنده ..
وشوي انتبهت ريم اللي رقادها كان متقطع.. وعقب قومت اللي فالسياره لانه ماشي باقي عن يوصلون المستشفى..

****

فالمستشفى الظهر من بعد ماردوا العيال الفندق ويا ولد خالهم تمت ريم ويا عمتها مريم .. وسيف نزل ويا راشد ياكلولهم شي .. وام سيف كانت راقده تحت تاثير المسكن..
ريم يالسه ع الكرسي وشكلها كان وايد تعبان .. من يوم قالولها عن يدتها وهي تحاتيها وايد وماترقد زين ..

مريم: امايه ريم انتي وايد تعبانه جي مارديتي ويا خوانج الفندق ترقدين؟
ريم: لا عموه مافيني شي .. بيلس وياج .. ابا اشوف امايه يوم بتوعى
مريم: اليوم قبل ماتوصلون نشت رمسناها الحمدلله بخير هيه ..بس ردوا عطوها ابرة مسكن..
ريم: فديتج يا امايه..صدق ماياها خير
مريم: قومي انزين طيحي ع الغنفه ريحي جسمج من عقب ها السفر ..
ريم: خلاص عيل عموه .. بطيح بس اذ حد يا وعيني فشله اتم طايحه
مريم: ماعليج طيحي محد بيي الحين..عيالي واخوهم فالفندق..وخلفان رد راس الخيمه..

وقامت ريم من على الكرسي وطاحت ع الغنفه وماهي الا دقايق وغطت فالنوم من كثر التعب اللي فيها .. مريم كانت تتطالعها وتبتسم .. عايبتنها ريم واايد وماتبى ولدها ياخذ غير ها البنت ..

سيف من عقب ما ودع راشد اللي كان بيرد بيته صعد غرفة امه .. انتبه لريم طايحه راقده ومريم يالسه ع الكرسي تشوف التيلفزيون ..

سيف: رقدت ريمان؟
مريم: هيه فديتها باين عليها وايد تعبانه
سيف: اظني حتى فالطياره ما رقدت .. تحاتي امايه وتحاتي جاسم تخاف عليه يتعب نفس يوم سرنا..
مريم: ليش شو ياه جاسم ؟
سيف: هبط السكر عنده وتم تعبان علينا لو كان ويايه بروحي مابعرف شو اسوي لكن هي ماشا الله عليها عرفتله
مريم: حليلها والله هاي من غيرها مادري شو بتسوون
سيف: شاله اخوانها شل عكس ساره مول ماتحب المسؤوليه..ولا ميوه ماخذه من ريم ومن ساروه ههههه
مريم: حليلهن.. ها الشهر خلاك تعرف اطباعهن
سيف: شفتي عاد كيف

ريم انتبهت على حسهم وبطلت عينها لقت ابوها يالس حذال عمتها .. قامت على الرغم من انه مريم قالتلها ترقد .. بس سارت الحمام تغسل ويها .. ويلست ع الكرسي بتعب .. يتريون امهم تقوم لكن بعدها ماقامت وقرر سيف انه يسير يرقد شوي ولين تقوم يتصلون يوعونه .. اما ريم رفضت انها تسير وياه وعاندت وتمت ورجعت تطيح ع الغنفه لين تنش يدتها بس عسب تريح جسمها ولا هي مب يايينها نوم ..

وعقب مامرت ساعه انتبهت ريم لحركه يدتها ونشت على طول صوبها .. وتمت ماسكه ايدها تحبها
ريم: الحمدالله ع سلامتج امايه شو تانسين ؟
ام سيف بتعب: فديتكم متى ييتوا
مريم: وصلوا قبل الظهر ..
ريم: شو انتي احين امايه؟
ام سيف: اهون امايه الحمدالله .. ليش قطعتوا وناستكم وييتوا انا ماعليه شر
ريم: وناستنا يوم نشوفج جدامنا صاحيه وبخير
ام سيف: فديتكم يالغاليين .. الا خواتج وينهم ؟
ريم: يوج وكنتي راقده وردوا الفندق يرتاحون عقب السفر .. بيون خلاف ان شاء الله..
ام سيف:وانتي امايه بلاه ويهج جيه غادي اصفر
مريم: امايه بنتج تراها مب راقده من امس .. وغير ها هلكانه من الطياره وما طاعت ترد الفندق ترقد
ام سيف: جي امايه
ريم: ابا اطمن عليج
ام سيف: انا بخير مافيني شي ..

وها الوقت سمعوا دق ع الباب .. ودخل نايف .. ريم عدلت تحجيبتها وقامت من ع سرير يدتها ووقفت .. سلم على يدته .. وشاف ريم اللي كانت موخيه ومد ايده يسلم ريم ماعرفت كيف تتصرف ولا ارادي غطت ايدها بكم عباتها وسلمت عليه من غير ماترفع راسها .. وابتعدت عنهم .. اما نايف شاف امه باستغراب ..ليش يعني تبتعد عنهم اول مادخل! هذا وهي ماتعرف اللي مستوي وجي تصرفها!
سكت ويلس حذال يدته .. اما امه حاولت ماتعطي المووضوع اهميه جدامه احين ..

مريم: جي ما يبت خواتك؟؟
نايف: فالفندق ويا بنات خالي ..
مريم: جي ما رقدواا؟
نايف: ماعرف الصغار كلهم راقدين .. بس سمعت اسوم تقول بتسير لمي وساره اون واعيات ..
مريم وهي تطالع ريم اللي يالسه بعيد وموطيه براسها تلعب بطرف شيلتها
مريم: بغينا ريم ترد بس ماطاعت ..
ريم لفت ع عمتها
ام سيف: نايف ابويه رد ريم عند خواتها .. وايد تعبانه
ريم ردت لفت ع طول ليدتها وهي متوتره
نايف: حاضرين ..
ريم قالت باندفاع : لا مابا
ام سيف: فديتج ريم عشان خاطريه ردي ارتاحي
ريم: انا مرتاحه هنه
ام سيف: والله تردين .. انا حلفت يلا قومي الغاليه دام نايف هنه بيردج
نايف قام ع طول عشان ما يسمع اعتراضات من ريم وقالها ..
نايف: انا بتريا عند اللفتات برع
طلع عنهم وماكان لريم أي حجه انها تيلس وغير ها يدتها حلفت ومابيدها تسوي شي .. اما مريم كان هالشي مونسنها وفي صالحهم ..
قامت ريم بضيج .. سلمت ع يدتها وطلعت ..

****

في الفندق.. ساره ومي ولطيفه واسما كانن متيمعات في الصاله .. ساره طايحه ومحطيه راسها ع ريل اسما وميوه متسلقيه ع بطنها ولطيفه يالسه ..

مي: جسمي متكسر خاطريه بحد يناقزعلى ظهري
لطيفه: ما طلبتي
مي: وين وين استريحي انتي.. قصدت حد ضعيف مب تريلا..
لطيفه: يا الخايسه التريلا محد غيرج .. ها يزاتي بسويلج خدمه
ساره: لطوف عيل يبالها حد يأدبها قومي انا وانتي بناقز ع ظهرها
أسما: اسمييج بتروحين يا مي
مي: تريلا وحده بتحطمني وين ثنتين بستوي عيين.. بقوم اسنفر بحياتي ع قولتهم
وضحك الكل ..
مي بيأس: بس والله متكسره
لطيفه: من هالدرب يبوكن لازم بتهلكن
ساره: اغلب الوقت انا كنت راقده .. ههه ماتشوفوني مصحصحه
لطيفه: ريموه فديتها يبين عليها انها مول مب راقده
مي: مووول مارقدت انزين هيه .. والحينه فالمستشفى ماتعايا انقولها نحن بنتم وانتي ردي ارتاحي ماطاعت
لطيفه: حليلها.. الدنيا صخه خوانكم كلهم مرقدين
مي: هي من روح مروان عنا طاحوا يرقدوون .. انا بعد رقدت ونشيت لانه الاخت ساره وايد هاديه وتخلي الواحد ياخذ راحته بالنوم .. خصوصا اذا كانت هي شبعانه
لطيفه تطالع ساروه وتضحك
اسما: عاد ساروه اللهم نفسي
ساره: جب جب جي قالولج نعوم ..
لطيفه: تعاالو ناعمه ليش ما يت
مي: اونها تعبانه عاد وردت البيت .. الا اقول اخوانكم وينهم عيل
لطيفه :عمار يالس ويانواري في السويت يشوفون التلفزيون
اسما: حليلهم اخواني مستوحدين.. ياخي ملل .. لو حد ايي يودينا المستشفى
ساره: ابويه راقد واخوج محد..منو عندنا بيودينا يعني
لطيفه: بدق لنايف بشوفه وين ..
اسما: ما بيطيع ايي توه مروح عنا ..
لطيفه: لا ماعليج ..

دقت لطيفه لنايف لكن شافته مغلق .. وتمت حايسه بوزها وهي متملله ..
ساره: اقوول بنات .. ماتشريتن للجامعه؟
لطيفه: امبلا شوي ..
اسما: باجي شهر .. بعده وقت
مي: انتوا باجلكم شهر .. انا 21 من الشهر بسير عنكم العين
ساره: ليش اسبوع المستجدات يوم 21
مي: هيي .. عاد طبعا ساره الحلوه بتسير ويايه
ساره: بفكر
اسما: يالله ساروه ما يبالها تفكير .. بنسير يبوج نقزر وقت ويا المستجدات
ساره: هزرج .. ممم بس لا بعد يبالها تفكير ..
وتطالع مي وتعيب عليها
مي: ترومين انتي ما تسيرين .. الخايسه انا وين اعرف الا بلطم بعمري هناااك
لطيفه: ميوه غناتي لازم تعتمدين ع عمرج هنااك
مي: انزين بعتمد بس بعد اول اسبوع غير..العام انتي سرتي وياهن عيل
لطيفه: انزين انا الفقيره بروحي سايره محد ويايه ..
مي: عاد شو نسويبج
اسما: لا ماعليج ميوه انا وساروه بنسير وياج .. هههه بنلعب ع المستجدات
مي: يالله يا نتن عاد يا القدامى .. دواهي تراكن ..

وبدن يتناقشن عن المشاري لانه مي وساره خذن نص اغراضهن تقريبا من استراليا .. وباجلهن شوي .. وفكرن يستغلن يلستهن هنه.. طبعا من بعد ماتقوم يدتهن بالسلامه و يسيرن يتسوقن..

وبعد ما عم الهدووء امبينهم .. كلن سرح فتفكيره .. وانتبهوا بعدين لضحك .. كان مصدره ساره ..اطالعنها البنات مستغربات ..

مي: سكنهم في مساكنهم شو بلاج ساروه
ساره: اتذكرت قوم سعيد..ههههه سبحان الله ردوا ويانا وبنفس الطياره
مي: هيه حليلهم .. يلسوا يسولفون ويا ابويه فالمطار وجسوم وميود متعلقينهم .. ساره: الا جسوم من شافهم فالكافتيريا شقت الابتسامه حلجه.. وميود ماقصر خذ ارقامهم..
اسما: يااا حاافظ .. ومنو هاذيلا
مي: هاذيل شباب عرفناهم فاستراليا
لطيفه: شقى عرفتوهم بعد
ساره:ههههه كانوا فالشقه اللي فوق ..

وبدن مي وساره يحكن للبنات قصة ها الشباب وتوغلوا اكثر لسوالفهم فالسفر ومواقفهم اللي تضحك .. لطيفه واسما يضحكن على سوالفهن ويتمنن لو كانن وياهن فها السفره ..

****

احلام كانت فبيت عمها راشد ويالسه ويا خالتها ميره وعزه بنتها.. اما مدوي كانت ويا ايمان يالسات ع ينب يرمسن .. نص ساعه من سوالفهم .. ودخل مروان البيت وهو محطي سفرته ع جتفه .. وشكله مرهق من الدرب ..

ميره: وصلت وليدي .. الحمدلله ع السلامه ..
مروان تجدم ويلس ع الغنفه: الله يسلمج امايه
ميره: عزوه قومي هاتي ماي لاخوج
مروان: لا لا مابا .. بقوم اتسبح انا
احلام: مروااان شحاالهن بنات عموه وشخبار يدتهن؟
مروان اطالعها وابتسملها بتعب: الحمدلله كلهم بخير .. وصلتهم عند يدتهم ورديتهم الفندق عسب يرتاحون..
ميره: وابوك وينه؟
مروان: فالدرب ياي
احلام: بسير عيل اطمن عموه
مروان: اكيد رمسنها بناتها .. بس صبري بتسبح وبسير وياج بالمره بشوف عموه..
احلام: خلاص يلا بسرعه
مروان: اوكي ..

وطلع عنهم مروان وصعد حجرته .. دش يتسبح يبى يعق كل التعب .. والتفكير .. طول اليوم يفكر .. ياترى تحس باللي يحسه ولا !
مايبى يتوهم باشياء .. او يتخيل النهايه السعيده .. لكن يبى يتحرك ويبوح للي بخاطره .. مب لاي انسان .. بس الها .. ويشوف ردت فعلها ..
كل شي سهل بالنسبه له .. متعودين ع بعض .. ويقدر يوصللها و يصارح فأي وقت .. لكن مايعرف متى الوقت المناسب!!

بعد ما خلص مروان سبوح .. نزل تحت وهو يحاول يفصم عقم كندورته .. ودش الصاله ..

مروان: عزوووه تعالي فصميهن
عزه: يووهو مروان متى بتروم تفصمهن انته..
مروان: مب لازم اروم انتي بتفصميلي
عزه: جي بتم عندك دوم انا
مروان: برايج عقب حرمتيه بتفصمهن
ميره: هههههه الله يسمع منك يا مروان واشوفك معرس
مروان: اااميين
احلام:ههههه ها يعرس .. ماتخيله معرس
مروان: بسم الله جي ياااهل تشوفيني
احلام: لا بس خبيل
مروان: طالعوا هاي انتو
عزه: ههههه صدقها
ميره: الله يسعدكم كلكم ان شاء الله واشوفكم ويا عيالكم
مروان: الا تعالي عزيكه
عزه: عزيكه فعينك
مروان: انزين عنزووه
عزه: اماايه شوفيه .. ماعليه انته والله لخبر عليك فيصل
مروان: بس عيل بخاف تراني .. انزيين متى حددتوا العرس؟
عزه: عقب رمضان ان شا الله
مروان: اها.. زين زين .. بالبركه ان شاء الله .. يلا احلام خلنا نسير عند عموه ..

وقامت احلام وركبت السياره ويا مروان لانه ناوي يسير العزبه عقب ما يطلع من عند عمته ولحقتهم مدوي وركبت ورا .. طلعوا من بيت راشد ودخلوا بيت محمد ..
ويوم نزلوا .. دخلوا الصاله ع طول مثل مامتعودين لانه مرت خالهم دوم تيلس بشيلتها في البيت .. كانت هناك فجر يالسه ببجامتها ويا اختها ..
عبير خزتها بعين عساس تدخل داخل .. وقامت فجر بتثاقل .. اما مروان من اول ماشاف فجر يالسه ع طول وطى راسه .. قفط جدام عبير انه يشوف اختها جيه.. وحس بالغلط انه ماتريى شوي قبل ما يدخل.. البيت ماعاد مثل قبل ..
احلام اطالعته .. ورمست بصوت واطي..

احلام: مروان هاي دوم جي .. لاتستحي
مروان: ها
احلام: ما اتحجب عادي عندها
مروان: فشله ..
احلام: دش تعال .. بزقر عموه عليا ..

ودخل مروان ويلس ويا عبير وآثار القفطه بعدها باينه ع ويهه .. وشوي يت عليا ويلست ويا مروان اللي حكالها كل شي من اول ما شل البنات لين وطاهن المستشفى وتفارق عنهن عقب ما ظهر من شقتهم فالفندق..

****

بعد ماطلعت ريم من عند يدتها مشت بضيجتها لين وصلت اللفتات لقت نايف واقف اهناك .. ماعرفها لانها متغشيه بس يوم تقربت عرفها .. ابتسملها .. لكن ماشاف أي تعبير بسبب الغشايه وكانت موطيه راسها ..

نايف: يالله روحنا
مشى قبلها وهي تلحقه .. وصل سيارته وفتح الباب الجدامي.. كان يفتكر انه ريم بتيلس جدام لكنه تفاجأ يوم شافها وراه تفتح الباب الخلفي .. ركب وهو ساكت اما هي كانت تحس انه قلبها بيطلع من صدرها من الخوف لكن تعوذت من الشيطان وركبت السياره ..

نايف: ريم الباب مب مسكر زين ..
فتحت الباب ورجعت سكرته مره ثانيه ..

نايف كان يسوق بهدوووء وببطء بنفس الوقت .. وده ما تمر ها اللحظات بسرعه ..كان يحاول يشوفها من الجامه جدامه لكن شكلها ماكان يساعد .. كانت لافه صوب الجامه ومتاكيه براسها عليها .. وانتبه نايف لصوت تأويه من ريم .. وشافها من الجامه ..

نايف: ريم شي فيج؟
ريم حطت ايدها ع راسها .. وتأوهت اكثر ..
ريم: لاا .. ياربي مب الحين ايي ها الويع .. اخ..
نايف: ريم شوو بلااج؟

غمضت ريم عينها .. ورجعت تخيلت الايد اللي تخنقهااا.. حطت اديها ع ويها ماتبى تشوف اكثر من ها اللي تشوفه وصرخت ..
نايف زاغ ماعرف شو يسوي ووقف عند محطه بترول لقاها ع دربه ..
نزل اشترى ماي .. وفتح الباب اللي من الجهه الثانيه عشان ريم كانت متسنده ع بابها .. عطاها الماي لكن ايدها كانت بعدها ع ويها وتصيح ..
.. نايف ماعرف شو يسويلها
نايف: ريم ؟ ريم شو فييج ؟ بطلي ايديج انزين اندوج اشربي الماي

لكنها ماترد عليه .. اضطر انه يمسك ايدها .. قبض ايدها وخوزها من ويها .. كانت محمره واايد .. فتح غطاة الدبه وعطاها الماي تشرب

نايف: ريم شو فيج.. خوفتيني عليج .. ريم .. انزين ردي عليه شو فيج؟

ريم بعد ما استوعبت انه ايدها فايده .. اطالعته .. وردت تشوف ايدها وسحبتها ع طول ..
نايف: اردج المستشفى ؟ تعبانه شي يعورج ؟؟
ريم: ردني وين بتردني .. المهم انت بعيد
نايف عقد بحياته شو بلاها هاي ..
نايف عدل بيلسته: اانا اسف .. بس والله شوفي شكلج كيف .. والله خفت انه صايرلج شي
ريم وخت براسها .. ورجعت تطيح دموعها وهيه تتنفس بسرعه ..
ماتدري ليش ها الوقت بالذات تذكرت الايد ..
ريم: ماشي .. بس راسي يعورني واايد
نايف: يبين عليج وايد تعبانه
ريم: ابا اروح ارتاح
نايف: خلاص انزين مسحي دموعج ..
ريم: ردني الفندق بسرعه
نايف : ان شاء الله ..

نزل من السياره وركب يسوق مره ثانيه وهو خايف ومستغرب في نفس الوقت .. تم يسوق وكل شوي يشوف ويها من الجامه ويسمع صوتها كل شوي وهي تصيح
الشي اللي خلاه يتوتر وايد وفي نفس الوقت قلبه عوره ع شكلها ...

وصلوا الفندق وريم نزلت قبله لكن تلاقى وياها عند اللفت لين فتح وركبوا وبعد كانت واقفه بخووف ومتسنده لين وصلوا .. ودموعها بعدها ماوقفت ..

دقت باب جناحهم اللي كان حذال جناح قوم نايف .. وفتحت لها الباب ساره ..
دخلت ريم وشافوا ويها احمر من الصياح .. ونايف وراها

ساره: بسم الله ريموه شو بلاج ؟
دخلت ريم الغرفه عنهم وهي تصيح
مي شهقت : لايكون امايه فيها شي ؟
ساره بطلت عيونها وهي تشوف البنات: لاااا ..لااا ..
لطيفه تجدمت لأخوها تبى تعرف شو صاير .. أما البنات ترابعن صوب حجره ريم وهن خايفات من اللي بتقوله ريم .. خايفات انه شكوكهن تكون صايبه وتقولهن انه يدتهن عطتهن عمرها ..
لكن حمدن ربهن انها بخير وكل وحده حاطه ايدها ع قلبها من كثر الزيغه ..

وبرع فالصاله .. بعد ما طمنت لطيفه على يدتها..

لطيفه : شو مستوي نايف ؟ دام امايه مافيها الا كل خير شحقه ريم جيه؟
نايف: مااشي
لطيفه: يلا عاد نايفه ها كله وماشي
نايف بتردد : ممم تعالي جناحنا بخبرج .. اسوم وين ؟
لطيفه: توها سايره اهناك تطالع نواري
نايف: طوفي انزين

ريم كانت طايحه ع السرير بعباتها وشيلتها ومتاكيه ع المخده ..وخوتها يالسات حذالها ومب عارفات شو فيها ..
ساره: انزين خبرينا شوووفيج
ريم بتعب: ماشي
مي: قولي ريم والله تقولين دام امايه بخير ليش شكلج جي.؟
ساره: مايكون تقصون علينا وفيها شي امايه!!!
ريم: والله مافيها شي نشت رمستني عادي
ساره: عيل ليش تصيحين ؟
ريم: لاني تعبانه ومصدعه
مي: قولي والله عشان هالشي بس وامايه مافيها شي
ريم: اوووف قلتلكم والله مافيها شي والله.. فكوني عاد
ساره: وليش يايه ويا نايف
ريم اهنه حست بالم مره ثانيه في راسها ورجعت تصيح
مي تقربت منها وشلت عنها وقايتها وساره يابتلها ماي وهم مايعرفون شو فيها
شربت ريم الماي وفصخت عباتها وطاحت .. لحفوها وعطتها مي مسكن وسكروا عنها الليتات عشان ترقد وترتاح

دخل نايف جناحهم ويلس ويا خواته في الصاله

لطيفه: انته يايب ريم ؟؟
نايف: هيه
اسما: ايواا يا وااد
لطيفه: اسوم سكتي ويا راسج خوانج بيسمعون
نايف: اسموه سيري هاتيلي كوب ماي
اسما: قولي اسموه روحي.. ادريبك تبى ترمس لطوف
نايف اطالعها وابتسم: انزين روحي وهاتيلي ماي بعد
وقامت اسما من عندهم ورد نايف يشوف لطيفه اخته وفعينه اسئله .. ورمسوا بصوت واطي ..
لطيفه: شو بلاك نايف .. وليش انته رادنها شو السالفه بلاها تصيح
نايف: ماشي .. امايه قالتلي اردها لانها كانت تعبانه .. بس
لطيفه: بس شوو
نايف: لطيفه .. ونحن فالسياره ..
لطيفه: شووو سويت
نايف: بسم الله شو بسوي يعني .. ماشي .. ريم ياها صداع احمر ويها وصرخت زغت عليها مادري شياها

يت اسما وهي فايدها كوب الماي عطته اخوها وردت الحجره والانظار عليها لين اختفت وبعدين لطيفه لفت ع نايف ..

لطيفه: ردلها ها الصداع؟؟!
نايف: ليش هي شو بلاها؟
لطيفه: ماعرف يا نايف.. مادري مرات ونادر ها الشي اتم ريم جي يعني اييها صداع هي بروحها ماتعرف من اشو ..
نايف: لطييفه كان شكلها غيير .. مثل وحده مرعوبه وتصيح ومحطيه ايدها ع ويها
لطيفه: اكيد لانها كانت بروحها وياك
نايف: وهذا شو يخصه ؟
لطيفه: ريم ماتقارب الرياييل وساعات تخاف منهم.. الا اللي تعودت عليهم
نايف: كيف يعني ؟!
لطيفه: اممم ريم من هي صغيره .. وخص من خالي وامها اطلقوا .. تكره الرياييل .. يعني ماتحب تقااربهم مووول
نايف: عشان جي يعني اييها ها الصداع؟
لطيفه: والله مادري يا نايف .. ماطاعت تخبرني ليش ها الصداع اييها ..
نايف: عيل كيف بتوافق عليه يوم هي ماتقاااارب موول
لطيفه: عاد انته وشطارتك .. اتقرب منها وبتكسبها .. ريم قلبها رهيف وايد .. بالطيبه صدقني بتكسبها
نايف: مادري والله .. بس لطوف بيني وبينج
لطيفه: شوو
نايف: ريم عايبتني ..
لطيفه ابتسمت: قلتلك بتعيبك
نايف: بس غامظني حالها .. والله خالي ما سوى خير فيهم .. انا اتذكره يوم طلق امهم .. احس ظلمهم وايد
لطيفه: وانا وريم بعد نتذكر ها السوالف .. عشان جي تلقاها هي متأثره وايد .. بس فديتها ع كل اللي شافته من ابوها .. الحين عادي وجنه شي ما ستوى.. صح ما ترمسه وايد .. بس احس قلبها مب حااقد
نايف: يوم ريم جي عيل مابالج بامهم ..
لطيفه: طالعه على امها هيه ..
نايف: حليلهم .. خلاص عيل انا بقوم ارد المستشفى .. محد هناك عندهم .. وخلوا ريم ترتاح وعقب يوم خالي بيي المستشفى تعالن انتن وياه
لطيفه: خلاص اوكي ..
نايف: طمنيني عليها انزين
لطيفه: خلاص صار..

وطلع نايف من الشقه .. ولطيفه ردت للبنات .. بس شافتهن في الصاله يالسات لانه ريم طاحت بترقد ..

********************
(الثلاثاء) 3 أغسطس 2004
********************

الساعه 12 الظهر دخلت عبير ويا بناتها الصاله .. القت التحيه على ام راشد وعليا اللي كانن يالسات فالصاله يسولفن ..
يلست عبير وحطت الاغراض حذالها.. احلام بعد فرت الاكياس وع طول طاحت ع الغنفه ومدوي تربعت تحت تبطل الجوتي..

ام راشد: ماشا الله شو متشرين هالكثر ؟
عبير: رحت خذت قطع المدارس للبنات وجواتي..
احلام:اففف يا الحر .. هلاك برع ..
عليا: هههه اشوفج منبطحه تحت ضربة المكيف..
احلام: سكتي يا عموووه هلكت من هالوقايه والعباه
عبير: وان شاء الله تبين تفصخين العباه
احلام: لا ماقلت انا امبوني من لبستها ميوه وأعزر عليكم تفصلولي عباه
عليا: هههه قنوعه حلامي.. فديتها والله..مها ومهره اباهن يلبسن الوقايه ومب طايعات..
عبير: انزين التوم بعدهن صغار
عليا: يالله وين صغار .. سايرات ثالث اعدادي بس دلعتهن وايد ..
عبير: هههههه فديتهن والله احجامهن صغيره اللي يشوفهن يقول انهن اصغر عن مدوي ..
عليا: ترا عشان جي يشوفن الناس معتبرينهن صغار .. بس انا شارطه عليهن خلاص من عقب ها الصيف يبدن يتعودن ع الشيل
احلام: مدوي والتوم مدلعات انا متحجبه من اول مادخلت ثاني اعدادي
عبير: انتي بروحج عزرتي تبين وقايه وعباه نفس ميوه
احلام: ههههههه حليلي ..

ونقزت احلام من بعد ما تبردت وشلت اكياسها ويلست حذال عمتها عليا عسب تراويها شو خذت ..
عليا: زين والله خلصتوا شي ع الاقل.. مها ومهره ماخذتلهن شي..
مديه: عموه يوم بيون بنسير نتشرى بعد كلنا .. اباهم ياخذون مثلي
عليا: ههههه لازم يعني
مديه: هي كل سنه نطقم نحن وعاد هاي اخر سنه الهن فمدرستنا عقب بيسيرن ثانويه ويا احلاموه..
احلام: هي بين عندي عقب.. يالله يا الدنيا انا كنت اطقم ويا ميوه حتى لو كنا مب نفس المدرسه.. عاد تخرجت محد عندي اطقم وياه
عبير: طقمي ويا اختج ومها ومهره
احلام: لا حشى عليه ماطقم ويا يهال
ام راشد: يالله مها ومهره اصغر منج بسنه .. وين يوا يهال
عبير: هيه الا هاي احلام تكبر عمرها
احلام: ههههه والله مب من شي .. اللي مرابعتنهن اكبر بثلاث واربع سنين عني ..
عليا: ههههه عاد منو مرابعه مي وساره المخبل
ام راشد: حليلهن تولهنا ع خراشتهن..
عليا: بيون ان شاء الله جريب..
ام راشد: زين زين ..عليا صبيلي فنيان قهوه .. بشربلي فنيان وبقوم اتيدد
عليا: ان شاء الله اميه ..
وعبير ها الوقت سألت عليا..
عبير: فجر مايت الصاله عندكم ؟
مديه: ليش تي ؟ تلفزيون وثلاجه في الحجره شو تبى تطلع منها بعد ..
عبير التفتت صوب مديه واطالعتها بنظره ومديه طنشت وقامت ترجع الاغراض اللي طلعتها من الاكياس ..
عليا: لا مول ماظهرت
عبير:اها.. انزين احلام قومي ودي هذا الكيس لفجر
ام راشد: ماشا الله شو شاريلها ؟
احلام: ستر
ام راشد: هاه ؟
عبير: عمتي هذي دراريع لفجر ..

عليا ابتسمت لاحلام.. عرفت شو تقصد بالستر .. تقصد شي طويل وواسع وساتر تلبسه فجر في البيت .. شلت احلام الكيس وسارت توديه وهي قاصده انها تنرفز فجر ..
دقت باب الحجره ودخلت لقت فجر واعيه وتوها طالعه من السبوح يالسه تنشف شعرها ..

احلام: سلملم
فجر: خير
احلام يلست ع الغنفه وشلت جهاز التلفزيون وشغلته
فجر التفت لها معصبه : خير اشعندج .. وليش قاعده ماقلتلج قعدي
احلام: اعرف .. بس الغرفه غرفه بنات عمتي والتلفزيون تلفزيوني
فجر: احلاموه توني قاعده من النوم مالي خلقج
احلام: وانا بعد يايه من السوق حرانه والشمس ظاربه في خمرت راسي ومب فاضتلج ..
فجر وطت السشوار من ايدها وتجدمت من احلام ..
فجر: شعندج في هذا الكيس ؟
احلام: هذي هديه شارينها لج لكن شكلج ماتبينها فاقوم اشلها واروح احسن
قامت احلام وفي ايدها اكياسها
فجر: شو فيج احلاموه زعلتي ؟ انا اتغشمر معاج
احلام: والله ؟ تعرفين اتغشمرين انتي ؟
فجر: احلامووه
احلام: خلاص خلاص طالعه ولا ايمهج
لحقتها فجر : خلاص عاد بلا ملاقه .. شنو بالكيس
احلام وهي تطالعها : هذا طال عمرج اسمه ستـــر
فجر: شنو؟ شنو هذا بعد ؟
احلام: انا بعد قلت اكيد انتي ماتعرفينه .. بس لازم تعرفينه مدام انج موجوده اهنه
فجر: انزين شنو هذا اكل اماراتي والا شنو بالضبط
احلام: تعالي يلسي بخبرج .. هذا طال عمرج مب بس في الامارات هذا منتشر في كل مكان للي يبى .. لكن يوم تين الامارات وخصوصا هالبيت تكونين غصبن عنج تبينه مب بكيفج
فجر يرت الكيس من ايد احلام اللي كانت تبين ملامحها عاديه وفي داخلها بتموت من الظحك ..
فتحت فجر الكيس ولقت فيه كنادير و شيل بيت
فجر: هذي دراريع ؟
احلام: وهذيج شيل بيت نفس لون الكنادير .. عشان تكشخين وتطقمين يا خالتي العزيزه
فجر: نعم ؟ هذي لي انا ؟
احلام: هيه نعم هذا الستر اللي الله امرنا فيه .. تستري مب بكيفج غصبن عنج مدامج انتي في هالبيت.. ويوم بتزولين بيتكم والا أي مكان سوي اللي تبينه نحن عندنا ريايل في البيت وحشام مب على اخر عمرهم تي وحده مثلج تفتنهم ويستاثمون من وراها .. واولهم ابويه ..
فجر من غيظها فرت احلام بالكيس اللي في ايدها و نشعتنها من شعرها وهيه تصارخ عليها
فجر: اذا اهلج ماعرفوا يربونج انا بربيج ياقليله الادب .. هذا الحجي تقولينه لغيري مو لي انا تسمعين
احلام: جب يالخااايسه فجي شعري الله ياخذج
وبدن فجر واحلام يتظاربن لين تعالت حسوسهن ووصلت للصاله
عبير: يمه شنو هذا الصوت ؟
عليا: تلاحقي بنتج مايكون تظاربت ويا خالتها

ركضن مديه وعليا وعبير صوب الغرفه وشافوا احلام تضرب فجر والعكس..
عبير حاولت تحايز بينهم ودزت احلام على عليا

عبير: شو فيكم شو صاير
فجر: هذي بنتج قليله ادب وماعرفتوا تربونها
عبير: فجر بنتي انا مربيتها زين لاتقولين هالكلام شنو سوت لج؟
فجر: خليها تقولج هاي اللي يبيلها قص لسان
عليا: استهدوا بالله ياجماعه الخير لاتمون جيه .. فجر فديتج شو مستوي شو مسويه احلام
فجر: مو شغلج ..

عليا اطالعت فجر وهي معقده حياتها من كثر ما هي مستغربه من رد فعلها.. ماحبت انها تقول اي كلمه لانها مب عوايدها تسب او تشتم

عليا: يزاج الله خير ..

وخذت بنت اخوها احلام اللي كانت تصيح في حظنها وودتها وياها الحجره وسارت وياهم مديه .. اما عبير تمت ويا اختها
وفجر سارت طلعتلها ماي من ثلاجتها وشربت تبى تبرد على عمرها .. وتمت يالسه على الكرسي

عبير : هذا رد تردينه على عليا يا فجر ؟
فجر: انا ماقلت شي غلط صج اهي مالها شغل تتدخل بينا ان شا الله اكسر راس بنتج اهي مالها دخل
عبير: لا ماتكسرين راس بنتي ..اهي شنو مسويتلج .. يا فجر انا تعبت خلاص .. دايما احاول اسوي اللي يرضيج واهملت بناتي بس عشانج ليش ماتحسين عاد وتخلينهم في حالهم ..
فجر: وليش اهما مايخلوني في حالي .. ليش يايبيلي هالدراريع والشيل اللي معاهم وتقولي بنتج والله نحن شرينالج ستر .. هذا كلام تقوله
عبير: فجر مابي ازيد في الكلام لاني صدعت لكن هذي الملابس لازم تلبسينها مدام انتي في هذا البيت لكن برع البيت سوي اللي تبينه والله يهديج

طلعت عبير ومافكرت حتى تمر تشوف احلام سارت غرفتها وتمت تصيح اللي كانت تخاف منه.. يستوي جدامها وماتعرف تتصرف فيه .. شلت تلفونها واتصلت بمحمد

محمد: الوووه ؟
عبير: وين انت ؟
محمد: انا في الدوام شو فيكم
عبير: تعال شوفلك صرفه انا تعبت وانته مشغول عنا ومالك شغل بشي
محمد: شو مستوي ؟
عبير: فجر واحلام متهاوشات
محمد: مب شي يديد
عبير: هالمره فيها طق يا محمد واحلام اللي انطقت
محمد: نعم ؟؟ وفجر ليش تضرب احلام ؟
عبير: لانه بنتك ماتسكت تتحرش فيها
محمد وهو مغيض: انا بنتي ما مديت عليها ايدي يوم صغيره.. ايي حد ايمد ايده عليها احين يوم كبرت!!
عبير: انا مو عارفه شسوي هذيج اختي وهذي بنتي وانا بنتي ماحب انه يصير فيها هالشي وفي نفس الوقت ماحبها تطول لسانها ع اللي اكبر منها
محمد: عبير حلي هالمشكله بعيد عني الله يخليج لاني والله ان تدخلت مابيصير خير وانا من احين اقولج .. الدنيا كلها في صوووب وبناتي في صوووب ثاني ..

وسكر التلفون ورجعت عبير تصيح
بغته عون صارلها فرعون .. محمد طيب فوق الحدود لكن طيبته توصل حدها اذا كانت ضد بناته .. كله ولا ها البنتين .. ما بغى يتدخل فالموضوع لانه مايبى يجرح عبير بأي فعل أو بأي قول بسبب اختها فجر ..

أما احلام من بعد ما طلعتها عليا من عنج خالتها يلستها عندها فحجرتها .. يتهم ام راشد الي كانت خايفه ومب عارفه شو مستوي .. طمنتها عليا انه مافي شي .. وسارت ام راشد تصلي فرضها .. وتمت عليا تربت على ظهر احلام اللي كانت تناهي من صياحها ..

عليا: بسج احلام قطعتي فوادي
احلام: يعلني بلاها ها الخايسه
عليا: احلام لاتمين تسوين جيه خبريني شو استوى
احلام : وديت لها الثياب اللي اشتريناها لها وقلتلها مدام انتي في البيت لازم تحترمين اللي فيه وتحتشمين بلبسج غصبن عنج
عليا: يعني انتي تحرشتي فيها
احلام: انا ماتحرشت فيها بس انا استحي من اهلي والسبه هي .. هاي فظيحه مروان والشباب كلهم قطعوا ييه البيت اهنه والسبه انها تيلس متكشفه تتحراها وكاله من غير بواب .. حتى عمي مانع اللي نترياه اربعا وخميس أيي عسب نشوفه وييلس ويانا خفف من يلساته ف البيت.. ايسير بيته ع طول ولا ييلس هنه ويانا.. شو تبى تحرمهم من اليلسه ويا اهلهم هيي..
عليا: مديه قومي هاتي لاختج ماي
مديه: ان شا الله
نشت مديه يابت ماي لاحلام وعطتها اياه .. رشفته احلام مره وحده من كثر عطشها ..
عليا: بس خلاص يا احلام .. هدي ..
احلام: شو بس عموه.. هاي اليوم مدت ايدها وظربتني .. باجر مادري شو بتسوي
عليا: احلام لو في خاطرج شي قولي لامج تقولها ولاتسيرين انتي الها ولا تسببيلها
احلام: اميه ؟ وين ثرها اميه تسمعلنا احين ؟ كله لفجر ولاتقولون لفجر وسوو لفجر..والله عفنا السالفه .. هذا وهي بعدها من اسبوع يايه ..
عليا: شو بنسوي .. ترا امج لازم تعتنيبها اهنه.. محد وياها..
احلام: و بعدين اميه قالت اوديلها الكيس
عليا: احلام هي قالت ودي الكيس ماقالت تحرشيبها
احلام: الله يغربلها الخايسه قطعت شعري ... بس وين بتسير والله لاراويها
عليا: احلاااام بس عاد
احلام: والله ياعموه هاي شو بتسوي يوم بيون بناتج بتفظحنا يعلها ان شا الله
عليا: تبين الصدق احلام انا بناتي ممكن اضمن انهن يطنشنها ومايردن عليها لكن الخوف من ساروه وميوه اللي بييلسن وياها في الحجره .. ادريبهن مايسكتن عن حد يوم يدتهم ما سلمت منهم اول ما نتقلوا عندهم .. ومرت ابوهم مب سالمه منهن.. وين فجر ..
مديه: احسن خل يروانها
عليا: هذا بدال ماتقولن بننصحهن مايخصن بها تقولن جيه انا هالحجره ماعاد فيها مكان من الاسره والا كنت بييبهم اهنه .. بس انتوا ادرى البيت صغير ومايكفي
مديه: لاتيبنهن ولا شي هذيج غرفتهن من طلعنا نحن ع الدنيا مابتي احين هاي تاخذها عنهن ع البراد
عليا: اخ يابنات محمد عنيدات ماينقدرلكن .. قومن تعوذن من بليس وتيددن للصلاه احين اذن الظهر .. ولاتقولن لابوكن شي من احين اقولكن.. مافينا يتم معصب ويعق حرته على امكن هالفقيره كم بتتحمل ..

سكتن البنات ونشن سارن غرفتهن وكملت احلام مناحتها اهناك من كثر ماهي مقهوره .. وقررت تلبس ثيابها وتسير بيت عمها راشد تيلس عندهم لانها عايفه يلست البيت ..

****

هالوقت كانوا الكل يالسين في المستشفى عند يدتهم .. ناموا البنات طول الليل لين الظحى وعوضوا التعب اللي ياهم من عقب اليلسه فالطياره .. واول ماقاموا كلهم يوا المستشفى عند يدتهم .. سيف ودى بناته ونايف لحقهم بخواته..

في غرفه اليده كانوا كلهم يالسين وياها ما عدى مهره ومها وجاسم ومايد اللي كانوا يالسين في الصاله يسولفون ويا عمار لانهم امس ما يلسوا وايد مع بعض ..

ساره يلست على سرير يدتها والباجين كانوا ع الكراسي ..
ساره: هاه امايه شو انتي احين ؟
ام سيف: مادامني اشوفكم انا بخير
لطيفه: يـيه يالدنيا .. اليديد حبه شديد .. ولينا نحن .. ولى زمن عيال مريم الغالين
ساره: لو سمحتي انسه لطيفه .. نحن عيال الولد .. في فرق .. خصوصا عند امايه عفرا .. الولد عندها اهم لو تنهد بلد ..
ريم: ساروه مب وقته هالرمسات احين ..
ساره صدت على يدتها وهي تظحك : امايه امايه ... امايه
ام سيف: ياويلي انا هالزقره مادانيها
ساره: انزين امايه .. ههه .. بسالج .. انتي فيج عرج من ايام الجاهليه ؟
مريم: هههه بس ساروه يوزي عنها حرام عليج
ساره ردت تشوف يدتها اللي كانت تظحك عليها : زعلتي العيوز ؟
مي: فقتج يا ساروه .. بالله عليكم قوموها .. عنبو من يينا وانتي موازره امايه .. خوزي خلينا نيلس نحن شوي نسولف وياها..

ام سيف ومريم يظحكون عليهم .. مريم ماتعرف طبايع بنات اخوها زين وكل يوم تكتشف فيهم الاشيا اللي خلت امها تتعلق بهم .. شفافات واللي في قلبهم على لسانهم .. وطيبات وايد .. هي نفسها تعلقت فيهم..
نشت ريم وسارت المطبخ اتييب الهم عصير .. ولحقتها على طول لطيفه ..

لطيفه: شو تسوين ؟
ريم: بودي عصير حقهم .. الثلاجه ممزوره عصاير
لطيفه : منو يايبنها ؟
ريم: المستشفى بروحهم ..
لطيفه: هيه ماشا الله .. انزين شو انتي احين؟.. اهون عنج الصداع الامسي ..

ريم كانت موخيه تطلع العصاير من الثلاجه وتحطهم في الصينيه .. لكن وقفت يوم سالتها لطيفه وعقدت حواجبها كأنها تذكرت شي ..
ريم: بخير
لطيفه: انزين ليش رجعلج الصداع
ريم: كنت تعبانه
لطيفه: بس عشان تعبانه !
ريم نشت وشلت الصينيه وحطتها ع الطاوله : هيه بس ..

وطلعت على طول من المطبخ وسارت تودي العصاير حق اخوانها اللي كانوا فالصاله ويسولفون .. وعقب ودت الباقي ليدتها وعمتها والبنات.. وفي نفس الوقت دخلت النيرس وهي يايبه غدى ام سيف ووجبتين زياده.. ويلست حذالها ريم ..

ام سيف: بسني امايه ريم شليه انا ماداني الدياي وايد ..
ساره: شو بسج امايه الله يهداج عاد من زود اللي يايبينه .. لقمه صغيره وقطعه ديايه .. قااصين عليج بها .. شو رايج انا اسير اييبلج مجبووس سمج من برع تاكلين صبوعج وراه
مي: من ويين بتيبينه ؟
ساره: من المطعم
ام سيف: لا لا اذا انتي بتطبخينه انا اباه والا غير جيه مابا
ساره: هاه ؟ اسوي مجبوس سمج .. تدرين امايه يقولون العيش والدياي هذا احسن لصحتج ..
مريم: هههه انتي لمنو طالعه جيه
اسما: مب بروحها هاي جيه .. (وتطالع مي ) هذيج لاحقتنها بس شكلها مسطله احين
مي اللي كانت متربعه ع الكرسي انتبهت انه الرمسه عنها وضحكت
مي: يبووج انا مب مسطله.. بس تبون الصدق يوعانه
لطيفه: ييتي ع العوق انا توني بقول ميته يوع
مريم: انزين سيروا تغدوا
اسما: وين نتغدى بعد
هالوقت دخل جااسم الغرفه على يدته وشافها تتغدى
جاسم: ايييه
ريم: بلاك ؟
جاسم: ليش تاكلون عني انا يوعان
ساره: هكوه ياكم هذا بعد
ريم: قوم سير كل فطاير بتلقاها في المطبخ صبر عمرك لين تسير الفندق وهناك بتاكل
جاسم: انزين نسيت اقولكم .. نايف برع بيدخل
مريم: خل يدخل محد اهنه ..

طلع جاسم يزقر نايف .. وكل الانظار من اسما ولطيفه ومريم كانت متوجهه على ريم .. اللي تمت عاطيه الباب ظهرها وتعطي يدتها الاكل .. بهدوء ..

نايف: السلام عليكم ..
تقرب من يدته بيسلم عليها.. بالعمد وقف حذال ريم وهوى على يدته وحبها ع راسها الشي اللي خلا ريم ترتبك وايد بسبب قرب نايف منها ..من توترها طاحت الشوكه من ايديها ..
نايف ماحاول يوخي واييب الشوكه بس قالها " سلمتي "
وابتعد عنها عشان تيبها بروحها وصد للبنات
نايف: اشحالكن بنات خالي ؟
مي: بخير الله يسلمك ..
ريم قامت تغسل الشوكه ورجعت تعطي يدتها الاكل وهي بعدها ملتزمه هدوءها
مريم: من وين ياي انته ؟
نايف: سرت شوي الاقي واحد من الشباب ..
اسما: عيل ابويه وين؟
نايف: ويا خالي سيف .. مادريبهم وين ..
مريم: انزين زين يوم انك ييت قوم شل خواتك وعيال خالك ودهم يتغدون يواعى
نايف: جان قلتولي انزين بييبلكم غدى
اسما: لا لا مانبى .. نبى نتغدى برع ..
نايف: هيه عاد انتي تبينها من الله..
مريم: قوم ودهم فديتك .. ماكلوا من اصبحوا حليلهم ..
نايف: انزين بتضمهم السياره ؟
مريم: هيه ماعليه بيرتصوون .. سيارتك عوده ..
نايف: وين اوديهم انزين ؟
لطيفه: نبى نسير قصر الهند
نايف: تتشرطين بعد ؟ لا ماشي بوديكم الفندق وبييبلكم انا غدى
ام سيف: ودهم شوي بيتفرجون عن خاطرهم ..
لطيفه: هيه حليلنا نحن ماسرنا مكان هالاجازه ..
بنات سيف كانن ملتزمات الصمت .. مستحيات من ولد عمتهم وما جد تعاملوا وياه على عكس عيال اهل امهم ..
نايف: انزين قوموا يالله .. يلا نواري تعالي
وربعت نواري لنايف ويلسها ع ريوله وتمت متعلقه برقبته وترمسه..
مريم: قومن ساره ومي وريم يالله قولوا لاخوانكم وسيروا كلكم..
ريم: انا مابا اسير بيلس اهنه
نايف اهنه رفع نظره لها .. وهي ماصدت صوبهم ابدن ..
مريم: بزعل منج ياريم ان ماسرتي
ريم: انا مب يوعانه خواتي بس خل يسيرن
لطيفه: شو كلتي بعد عشان تشبعين .. ماشي يالله قومي ويانا
ريم: مابا اسير انا مب يوعانه ..
مريم: ماعليه يعني انا ازعل ؟
ريم: عموه ماباج تزعلين بس والله مابا اسير
لطيفه: ان مانشيتي تسيرين ويانا نحن كلنا مب سايرين

ريم شلت الصينيه من عند يدتها عقب ماخلصت اكل وسارت توديها المطبخ وهي متضايجه .. لحقنها مي ولطيفه..

لطيفه: ريم تعالي ويانا ليش ماتين
ريم: انا مابا اسير هاكم يايبين اهنه وجبتين زياده لي ولعموه ..
مي: قومي عاد ريم ما بنتاخر بنتغدى وبنرجع لامايه ..وهي بخير الحمدلله ماعليها شر ..
دخلت مريم عليهم المطبخ هاللحظه: يالله قوموا هاكم طلعوا الباجين وانتي يالله وياهم يا ريم والا صدقيني بزعل منج ..
سكتت ريم وماقدرت تجادل اكثر .. طلعت من المطبخ قبلهم ولبست عباتها..لحقنها لطيفه ومي ولبسن هن بعد عبيهن ولحقوا الباجين اللي كانوا عند اللفتات يتريون..
و ركبوا كلهم في سياره نايف .. وتوجهوا للمطعم..
اسما: نايف طول .. طول على هاي الاغنيه احبها ..
نايف قام وقصر على الصوت ..
اسما: نااايف عاد
وغير نايف الاذاعه وطلعت اغنيه ثانيه ..
اسما: اووف بدل عنها هاي لوعه جبد
قام نايف وطول على الصوت زياده .. وتظاحكوا كل اللي في السياره على نايف وحركاته ويا اخته .. الا ريم اكتفت بابتسامه وهاي كانت بشاره خير بالنسبه للطيفه اللي كانت تراقبها بوجود نايف ..

****

هالوقت كانت احلام يالسه بيت عمها راشد .. فالصاله كانت ميره يالسه ويا عيالها.. مروان يقرى الجريده وفارس طايح ويلعب بتيلفونه.. كانوا يتريون ابوهم ايي عسب يحطون الغدى..
اما احلام فكانت فحجرة عزه .. وتشكي الحال لعزه عن السبب اللي خلاها تطفر من البيت..
عزه: انزين انتي شو تبين تحطين راسج براسها
احلام: ياربي شو احط راسي براسها حد يروم يحط راسه براس هاي .. والله انها تقهر..
عزه: مادري والله.. بس اتعرفين انا ماسرت بيتكم من يت هيه الا مرتين واشوفها عادي ساكته ماترمس.. اصلا ماتي تيلس ويانا!
احلام: ماعليج منها والله انها عقرب بس صدق انا ماتهمني هيه كثر ماهامتني اميه .. ماتعرفين كيف اميه مستويه .. نحن اللي دوم غلطانات .. نحن اللي لسانا طويل ونحن اللي مانحترم اللي اكبر منا.. لدرجه انها قامت تشوفني انظرب وماتقول شي ..
عزه: وعمي محمد مايدري بشي؟
احلام: اميه بتزعل منا اذ قلناله شي .. تدري انه ابويه مابيسكت عن الوضع
عزه: بس بعد عبير لازم ماتسوي جيه ..
احلام: شو بتسوي يعني.. ابسط شي اليوم كفختني فجر ولا قالت شي .. انا والله لو بنات عموه اهنه جان انا مافتكرت فيها مووول لكن شو اسوي يوم انهن محد
عزه: انزين انتي تعالي ايلسي عندنا ها اليومين لين اين بنات عموه.. وباتي عندنا
احلام: ماعرف.. اصلا هي ماترقد ويانا فالحجره عادي يعني .. بس انه وجودها في البيت يقهرني .. واللي يقهر اكثر انها تطلع جدام ابويه لا شيله ولا شي .. انا اغااار عليه ..
عزه: هههههه.. شو بعد تغارين على ابوج.. المفروض عبير اللي تغار
احلام: انا اغار على ابويه وعمامي وحتى على اخوانج وعيال عموه شيخه..هاي غيره اخويه
عزه: هههه عاشت والله احلام
احلام: هي والله صدق .. مابا هاي على اخر العمر تي تخرب شي في هالبيت
عزه: احلام شو هاي الافكار بعد..انتي شو فبالج بالضبط!
كانت احلام ناويه ترمس .. بس سكتت وتراجعت ..
احلام: ماشي انا من غيظي بروحي اخربط ..تعرفين يبالي ابات عندج اليوم عادي؟؟ ابا احسس اميه بالذنب شوي عالاقل..
عزه: هيه اكيد تعالي حياج الله انا بروحي تراني اتيلس ..
احلام رمست بخبث وهي تضحك: عاد يبالي اييب سدادات اذن ويايه
عزه: ليش بعد ؟
احلام:ههههه اكيد تهذربين طول الليل ويا ريلج..يعني اسد اذني وافتك من الصدعه احسلي ..
عزه: هههههه يا الهرمه .. اويه ذكرتيني الريال مرقد لين الحين وقايللي اوعيه حق الصلاه ونسيييت
احلام: ويين الحين بتي الساعه وحده .. الا هو شو مرقدنه ماعنده دوام ؟
عزه: لا اجازه كان قابض زام البارحه ..
احلام: تلاحقي عمرج عيل

وقامت عزه ادق لفيصل تشوفه وعى ولا .. ولقته واعي ومسوي عمره زعلان منها .. واحلام تشوف بنت عمها وهي ترمس ريلها وتضحك عليها .. مستوي لونها احمر من القفطه كيف انها نست ماتوعيه ومتلومه منه وايد ..
وردت فبالها سالفتها ويا فجر وردت ضيجتها اللي تحرتها بتفارقها وهي بعيد عن بيتهم .. وظهرت عن عزه وسارت الصاله .. ويلست ويا الموجودين..

مروان: انتن شله متخبيات داخل
احلام: حرام يعني نسولف
ميره: شتبابهن انته
مروان: هههه ماشي بس احب اغصص على احلاموه
احلام: هي ناقصتنك انا
ميره: جي بلاج
احلام: لا ماشي .. عمي مايا لين احين
مروان: بعده

ورد الهدوء فالصاله .. بس انفتح موضوع .. واللي فتحه ها المره فارس.. رمس فارس لكنه كلامه كان موجه لامه يرمسها عن سالفة الدراسه وانه الاسبوع الياي بيسير ويا خليفه يسجل فكلية الاتصالات..احلام كانت تسمع مناقشه فارس وامه ومداخلات مروان وهي ساكته ..
يلست تنقل نظرها من مروان لفارس .. ملامحهم مايخصها فبعض.. شخصياتهم بعد .. مروان اجتماعي وحبوب .. فارس مايخصه بالناس.. خجول .. حتى اليلسه ويا بنات اهله ما يلسها الا نادر ..
وردتلها الذاكره ليوم هم الصغار.. ماتذكر زين .. لكن اللي تذكره انه كانوا وايد يلعبون ويا فارس ومنصور ..
وتذكرت مروان كيف كان.. مايحب البنات يلعبن وياهم .. ودايما يتزعم الاولاد ..
يت فبالها مي .. متى تعلقت هيه فمي! من دشت مي الاعدادي ماقامت وايد تيلس ويا فارس ومنصور .. ها الفتره تمت فيها احلام متعلقه مي ..
ابتسمت على ها الذكريات اللي يت فبالها .. وتزامن رجوعها لارض الواقع ييت عمها راشد ..

****

في المطعم كانوا العيال في غرفه فيها طاوله دائريه كبيره تظم عدد كبير من الكراسي .. طلبوا الاكل وييلسوا ياكلون المقبلات لين توصل طلبيتهم .. ولطيفه في هالوقت كانت يالسه حذال نايف .. وتنغزه عشان يبدى يسولف ويا بنات خاله عشان ياخذون عليه ومنها يحاول يجذب ريم شوي ع الاقل بس عشان ترفع راسها صوبهم .. من يلست ونظرها كان بس ينتقل على اخونها وعلى الصحن اللي جدامها .. نايف رمس اخته بصوت واطي .. يقولها صبري عليه لين ما افتح سالفه ارمسهم فيها.. ماعرف شو يقول لكن دارت فباله كم نكته ..

نايف: جاسم
جاسم: هاه
نايف: بقولك .. واحد ميت ميت من اليوع شو سوى ؟
جاسم: شووو ؟
نايف: كلى ..
جاسم : ها ها ها بايخه ..
نايف: انزين انزين بقولكم نكته لين يوصل الاكل..
مايد: يالله قول ..
وارتبشن البنات ..
نايف: في مره واحد كان يالس ويا ابوه وهو يحتضر .. وصاه وعطاه ورقه وقاله لاتقراها الا يوم تحس نفسك بتموت ..
جاسم: انزين
نايف: المهم الولد وعد ابوه .. ومات ابوه .. وروح الولد عند حرمته ..
اسما: وعقب
نايف: قالها ابويه توفى وعطاني هالوصيه وقالي ماتقراها الا يوم تحس نفسك بتموت وانا وعدته لكن انا فيني فظول ابا اعرف شو فيها ..
قالتله زوجته انا بقراها وبقولك شو فيها .. وانته بجي تكون صدق ماقريتها
عمار: اوكي وعقب
وكمل نايف وهو يبتسم ويشوف انه شاد انتباه البنات كلهم حتى ريم ولو انها ماتشوفه لكن ترفع نظرها ع الاقل شوي صوبه ..
نايف: قرت حرمته الوصيه بروحها وعقب ماخلصت قالتله احين احين تطلقني
قالها ريلها شو فيها الوصيه قالت مايخصني اقولك الحين تطلقني ..
لطيفه: ليش شو السالفه
نايف: المهم يا اخو حرمته .. وقرا الورقه .. وقاله الحين الحين تطلق اختي اقولك بسرعه .. وطلق حرمته وروحت ..
مهره: شوفيها الورقه ؟
نايف وهو يبتسم بمكر: نزل الريال حزين عند راعي البقاله .. ساله قاله شو فيك ؟ قاله ابويه توفى وعطاني وصيه قالي لاتقراها الا يوم تحس نفسك بتموت .. وانا عطيتها زوجتي تقراها وطلبت الطلاق .. ابا اعرف شو في الورقه لكني وعدت ابويه ماقراها ..
عمار: انزين
نايف: قاله راعي البقاله .. انا صديقك من سنين واعرفك زين وبحفظ سرك .. عطني اقراها وبخبرك شو فيها .. عطاه الريال الورقه .. واول ماقراها راعي البقاله قاله الحين الحين تعطيني الفلوس اللي على حساب الدكان بسرعه
قاله الريال شو فيها قاله راعي البقاله مايخصني احين تعطيني الفلوس اقولك والا ببلغ عليك الشرطه ..
لطيفه بانفعال: خبلتبنا شو فيها الورقه ؟
نايف: صبري انزين .. المهم يا الشرطي وسلم الريال الفلوس اللي عليه حق راعي الدكان وساله الشرطي شو السالفه ؟ قاله ابويه توفى وعطاني وصيه قالي لاتقراها الا يوم تحس نفسك بتموت .. وانا عطيتها زوجتي تقراها وطلبت الطلاق وعطيتها راعي البقاله وطلب حسابه واشتكى عليه .. ابا اعرف شو في الورقه لكني وعدت ابويه ماقراها ..
مهره: اوووف انزين وعقب
نايف: قاله الشرطي انا بقرالك شو في الورقه وبخبرك .. اول ماقرا الشرطي شو في الورقه .. قاله انته ماتيلس دقيقه وحده اهنه .. لازم تتحول للنيابه الحين
اسما: ليــش ؟
نايف كان يظحك وكمل : حولوا الريال للنيابه .. وساله الضابط انته شو سالفتك ؟
مي وهي متغصصه: قاله انا ابويه توفى وعطاني وصيه قالي لاتقراها الا يوم تحس انك بتموت .. وعطيتها حرمتي تقراها وطلبت الطلاق وعطيتها راعي البقاله وطلب حسابه وعطيتها الشرطي وحولني النيابه وانا ابا اعرف شو في الورقه لكن وعدت ابويه ماقراها ..
نايف: هههههههههههه .. زين زين ماشا الله حفظتوا ..
اسما: يالله نايف عاد كمل
يابوا الاكل في هالوقت وحطوه .. وبدوا العيال ياكلون لكن بعدهم يتريون نايف يكمل .. كمل نايف في هالوقت ورفعت ريم راسها تطالع وكانها بدت تنشد اكثر للكلام لكنه ماحاول يلتفت لها ابدا عشان ماترجع تنزل راسها .. او ماتحس بشي
نايف: كلوا..بعدين بكمل
ساره: لااا حرام والله شبعت قبل ماكل بس ابا اعرف شو السالفه
مي: عاد هاي ام الفظوول ..يلا نايف كمل
ساره: جب انتي .. يلا كمل .. نبى نعرف شو استوى
نايف: ان شا الله .. المهم الظابط خذ الورقه وقراها .. واول ماقراها قال انته الحين الحين تتحول المحكمه ماتبات الليله اهنه ..
مايد: حشى مب نكته هاي لغز .. شو فيها الورقه
نايف وهو ميت من الظحك عليهم: حولوه المحكمه قاله القاضي انته شو سالفتك ؟ قاله انا ابويه توفى وقبل مايموت عطاني ورقه و وصاني اني ماقراها لين احس عمري بموت وانا عطيتها زوجتي تقراها واتطلقت مني .. وعطيتها راعي البقاله واشتكى عليه وخذ حسابه مني .. وعطيتها الشرطي حولني النيابه وعطيتها الضابط حولني المحكمه .. خلاص تعبت ابا اعرف شو في الورقه ؟
ساره: حتى انا تعبت ابا اعرف شو فيها
نايف: هههههه المهم خذها القاضي وقراها .. قال هذا الشخص ماييلس لحظه وحده في البلاد لازم الحين يتسفر ويبعدونه عن البلاد خلاص ..
شلوا الريال مسكين وابعدوه عن البلاد بمركب .. وتم يائس فقير ومظايج مب عارف شو يسوي .. وشو سر هالورقه .. ساله قبطان المركب وقاله شو فيك
مي: قاله انا ابويه مات وعطاني وصيه وكلهم رفضوه لين راغوه من البلاد المهم عقب ؟
نايف: هههههه انزين ماعليه هالمره سماح بطوفها لج.. لانه الاكل برد .. قاله قبطان السفينه هاتها انا بقراها لك وبقولك شو فيها .. خذها القبطان واول ماقراها قاله انته ماتم دقيقه على سطح السفينه هاي .. قاله شو قريت انزين قاله احين لازم تنزل قاله الريال وين انزل ونحن في نص البحر .. المهم فروه في الماي
اسما: وحليله وعقب ..
نايف: حصل لوح خشب صغير وتعلق فيه وركب عليه وتم في وسط البحر .. واحين خلاص حس انه بين الحياه والموت وبما انه ماعنده حد وفي عرض البحر يعني هالمرحله اللي يقدر يقرا شو في الورقه لانه قرب من الموت ..
(كان يقول هالكلام وانتبه انه ريم انشدت اكثر ويالسه تشوفه عشان تعرف شو في الورقه وهو يتحاشى يحط عينه بعينها)
جاسم: وشو طلع في الورقه ؟؟
نايف: فتح الريال الورقه عشان يقراها لكن يت رياااح وشلت الورقه وطارت عنه .. وخلاص ..
ريم كان انفعالها اسرع انفعااال على طول اظحكت بصوت عالي اما الباجين اللي شل السجين واللي شل الشوكه بيظربوبها نايف وهو يظحك عليهم .. اما ريم اللي ظحكها انفعالات اخوانها ويا النكته وتركيزهم وخيبه املهم اخر شي .. خصوصا ساره الفظوليه ..
مي: يالله عنبو مايسوى علينا برد الاكل ونحن نتريا شو في الورقه ولا عرفنا
لطيفه: هههههه كله صوب ونواري اختي صوب اطاعوها
التفتوا لنوره اختهم الصغيره ولقوها راقده ع الكرسي .. وظحكوا عليها ..
ريم رجعت استحت من نفسها ومن رده فعلها بس ماقاومت شكل خواتها اللي يلسن يتحرطمن .. خصوصا ساره اللي ماسكتت يلست بعدها تفكر شو ممكن يكون مكتوب في الورقه !! ..
****

المغرب عقب ماصلت عليا يلست ويا امها في الصاله .. البيت كان هادي من عقب ضرابه الظهر .. احلام سارت بيت عمها ومارجعت لين احين .. وفجر ماطلعت من غرفتها ولا حتى عبير .. اما محمد عشان يتحاشى المشاكل مارجع البيت طلع من الدوام على طول وسار العزبه ..

يلست عليا في الصاله وهي تفكر في ريم .. ومب عارفه كيف تفاتح امها بالموضوع .. لكن الوقت مناسب .. محد موجود عندهم احين ..

عليا: امايه
ام راشد: ها امايه
عليا: امايه ابا اخذ رايج في شي ..
ام راشد: سمي !
عليا:سم الله عدوينج.. شوفي امايه انا مب عارفه كيف اقولج.. بس ترا ريمان بنتي خطبها ولد عمتها
ام راشد: ولد مريم؟
عليا: هيه نايف
ام راشد: عنبو امهم مسويه عمليه وطايحه وهم يخطبون
عليا: لا امايه .. هم خطبوا يوم البنات سافرن قبل ماتتعب ام سيف
ام راشد: وليش ماقلتيلي ؟
عليا: قلت بتريا وبرمس ريم يوم بترجع وبشوف رايها .. ماقدر استعيل وارمس والبنت ما عرف رايها..
ام راشد: انا ماعرفهم عيال مريم لكنج انتي تعرفينهم زين
عليا: نايف ماعليه كلام يا امايه وهاللي خلاني اقتنع بالموضوع واتريا راي ريم ورايكم بعد
ام راشد: ماكفاج اللي ياج من هالعايله بعدج بتعقين بنتج عندهم
عليا: امايه ترا بناتي عندهم احين .. هذيل اهلهم مالهم بد منهم .. وعيال مريم غير .. مريم نفسها غير وتحيدينها انتي ..
ام راشد: ليش نسيتي يوم وقفت ويا امها وسارت تخطب لسيف
عليا: امايه مريم ماتقدر تقول لا لامها وحاولت تقنعها لكن ماتروملها وبعد ماتروم تعصي امرها وطلبها ان قالتلها سيري ويايه او سوي شي .. ام سيف تعرفينها وتعرفين تسلطها عليها ..
ام سيف: ويوم طلاقج مول ما دخلت فالموضوع
عليا: اماااايه .. اتحيدين اني انا اللي طالبه الطلاق..ومريم منو قالج ما حاولت تردني.. بس انا اللي تميت ع موقفي..ومريم مايخصها.. السالفه بيني وبين سيف وانا اللي طفرت من البيت..حتى حرمته الثانيه ما يخصها ولا ام سيف حتى لو كانوا هم السبب الاساسي لكن الطلاق سببه شي ثاني..
ام راشد: وها السبب الثاني لين احين مب رايمين لج تقولينه
عليا: اميه عااد .. مب حالفين انكم ماتحنون عليه اقولكم السبب!! خلاص ماضي وراح
ام راشد: خلاص انزين يا بنتي.. ع كيفج .. ماشي فايده اصلا نعرف الحين السبب

سرحت عليا بطلاقها وماضيها ويا سيف ورجعتبها ذاكرتها لليوم اللي طلعت فيه من بيت ريلها .. تذكرت كيف طلعت من البيت ويا عيالها ووقفت التاكسي وركبته وردت بيت اهلها ودموعها ماتوقف من كثر التعب والعنا اللي شافته ..تذكرت ردت فعل اهلها كيف كانت.. وتذكرت صباح اليوم اللي عقبه وييت سيف بيت اهلها عشان يتفاهم وياها ..

كانت عليا يالسه في غرفتها وشاله مهره اللي كانت مكمله سنه وتصيح ومب رايمتلها تسكت ..
دخل عليها راشد ولقاها واقفه وهي شاله بنتها تباها تسكت.. وشيخه اختها يالسه وياها ..
راشد: ها عليا
عليا: هلا راشد
راشد بانفعال: ليش شاله بنتج ؟ وين تروميلها بروحج انتي حامل .. عطيها شيخه تيودها عنج ..
عليا:تسمع صياحها كيف ..تعزيرتها غير شكل لازم تنشل عسب تسكت
راشد: ماعليه الثانيه ساكته وطيها عنج شيخه وشلي اللي تصيح
عليا:يالله ماتعرف هاي من هاي
شيخه: بالله عليج يوم انا ماعرف اميز امبينهن وين راشد
راشد:هههههه تعاتبيني انا عيل.. ماعليه يوم بيكبرن بنميز امبينهن..يلا انزين عليا الغاليه تعالي يلسي وخلي بالج عندي مب عند صياح بنتج
عليا عطت شيخه اختها البنت .. ويلست
راشد: ترا سيف برع ..
وقفت عليا من مكانها وصرخت : شو يبى ؟
راشد بكل هداوه: يبى حرمته وعياله
عليا: وحرمته وعياله مايبونه
راشد: عليا قومي شوفي ريلج يبى يرمسج
عليا: وانا ماباه .. مابا ارمسه
شيخه: اسمعيه انزين شو بيقولج يعني انتي لاطايعه تخبرينا شو بلاكم ولا طايعه ترمسينه!! ماصارت هاي يا عليا!
راشد بتوسل: عشان خاطريه يا عليا عشان هاليهال قومي شوفيه شو يبى

سكتت عليا..ماحبت انه اخوها يترجاها ويطلبها اكثر .. لبست شيلتها وطلعت الميلس اللي برع ..وقفت عند الباب.. لقته يالس وصاد ع الباب كأنه يترقب وصولها..دخلت الميلس وكانت تعابيرها حاده وجافه ..
تجدمت واول ماشافها سيف وقف لها .. مد ايده بالسلام لكنها طنشته ويلست على كرسي بعيد منه ..

عليا وهي تطالعه بكل قوه: خير ؟
سيف: عليا شو فيج !
عليا: مافيني شي .. عندك شي ياي تبى تقوله قوله وخلص
سيف: اباج تردين البيت ويايه
عليا: وانا مب راده هذاك البيت
سيف: ياعليا خلاص لاتكبرين الموضوع
عليا: سيف .. قلتلك مابا منك الا ورقه الطلاق وتخليني في حالي .. حتى المؤخر ماباه خله لك .. اباك تطلقني وتخليني انا وعيالي في حالنا
سيف: عليا انا ماطلقت قبل احين ياي بطلق! .. مابفرط فيج انتي حرمتي ..
عليا: اللي مايعرف يحترم حرمته وعياله .. مايستاهل ينعاش وياه دقيقه وحده
سيف: عليا تعوذي من ابليس لاتخلين الشيطان يدخل بينا
عليا: عاد انا اليوم بكون هذا الشيطان وقلتلك مابا شي الا الطلاق ..
سيف: وعيالنا ؟ عندنا 5 وياي في الدرب واحد مادري اثنين ..
عليا اطالعته بنظره تكسر الحجر من كثر حدتها: انا بربيهم .. انا وعيالي مب فلزمتك .. بسدهم ومابقصر عليهم بشي.. مانتريا ابدا منك شي..
سيف: يا بنت الحلال شو هالرمسه
عليا وقفت وهي معصبه : شوف سيف عشان تحافظ على سمعتك وتحافظ على ناعمه وولدها .. طلقني بهدوء لانه لو عاندت مابيحصلك خير ومب بس بتخسرني انا .. بتخسر حتى عايلتك الثانيه .. وانا اقولك اياها من احين ..
ورقتي اباها توصلني عقب ماربي ومب بس الطلاق .. ورقه التنازل عن تربيه العيال .. والا برفع عليك قضيه وانا اللي بكسبها اكيد ..
سيف: يا عليا تعوذي من بليس
عليا: عوذ بالله منك .. خلاص ماعندي رمسه ثانيه
سيف وهو كله يأسان: على هواج .. العيال بيتربون عندج من غير ورقة التنازل..
عليا: امبونك مب قد المسؤوليه
سيف: راجعي نفسج لين ما تربين .. يمكن تغيرين رايج
عليا: لين اندفن تحت التراب ما بغيره رايي ..

ام راشد: عليا عليا
عليا ردت على طول لارض الواقع .. امها لاحظت شرودها وماحبت تزعج ذكرياتها الأليمه من المرور فها الدقايق .. رفعت عليا راسها صوب امها وتوايبت الها ..

أنتظروني يومين

أن شاء الله وأكمل لكم الروايه

جودي

	#20
جود ي الحلوه	رد: قـــلـــوب تـــحـــت الـــمــجـــهــــر قـــلـــوب تـــحـــت الـــمــجـــهــــر أنتظروني يومين أن شاء الله وأكمل لكم الروايه جودي