قـــلـــوب تـــحـــت الـــمــجـــهــــر**

مساء الورد

سووري على التأخير

عموما راح أكمل لكم

ام راشد: بلاج امايه؟
عليا: ولاشي افكر فريم .. المهم ردينا ع السالفه الاساسيه.. شو رايج بنايف الحين!
ام راشد: والله مادريبج يا عليا.. لكن ريم بنتنا مب بنتج بروحج ومانبى نعقها على أي حد
عليا: امايه انا ييتج اباج توقفين ويايه وقفتي ضدي .. انا اقولج انا اعرف عيال مريم زين..نايف ماشا الله عليه ريال وراشد اخويه يشهدله باخلاقه وتربيته ..
ام راشد: ياخوفي الا يطلع على خاله
عليا: امايه نايف ومريم غير صدقيني .. والا جان انا لزمت ع الرفض أول ما يو يخطبون ..
ام راشد: مادري والله .. بس الله يجدم اللي فيه الخير
عليا: اميـــن .. المهم امايه انا مب عارفه شقى ارمس ريم في السالفه
ام راشد: ليش؟
سكتت عليا شوي .. المشكله محد يعرف باللي يستوي حق ريم غيرها ..
عليا: امايه تدريبها ريم اول رفضت ولد خالتها واحين اخافها ترد نايف وكلهم زينين وماينعابون
ام راشد: ولد خالتها وقالت مثل اخويه وماعرف شو ؟ نايف وين تعرفه عشان تتعلث انها ماتباه
عليا: ترا لانها ماتعرفه بترفض
ام راشد: عيل شو تبى تتعرف عليه وخلاف تشوف جان تباه والا
عليا: مب جيه السالفه امايه .. بس ريم تدريبها ماتقارب الرياييل خوالها يالله تيلس وياهم وتخالطهم وهي متعقده من اهل ابوها من يوم صغرها واحين شوي لانت ويا يدتها ولو انها بعدها مب لين اهناك ويا ابوها .. شقى احين اقولها ياينج ولد عمتج

ام راشد: والله مادري شو بقولج ياعليا لكن اذا الولد مثل ماتقولين انه زين وماينعاب رمسيها حتى لو تجبرينها ترا هالشي الا في مصلحتها هي كم بتيلس ترد الريايل الزينين .. عقب بتم ومابييها حد زين الا جان بيون هذيل المطلقين والمعرسين..

عليا سكتت .. امها صعب تفهم شو اللي تقصده عليا وصعب تفهم طبيعه ريم وصعوبه اقناعها والتعامل وياها .. وها الوقت طلعت مديه من غرفتها وهي ناويه تلحق احلام اختها بيت عمها .. طلعت من الجناح ولقت عمتها وام راشد يسولفن ومب منتبهات لوجودها .. تمت واقفه مكانها تسمعهم ..

عليا: على خير ان شاء الله بس انتي لاترمسين حد ترا محد يعرف وانا يوم بتي ريم برمسها في السالفه
ام راشد: جان مابتخبرينها انتي طرشيها عندي انا بقنعها
عليا: لا امايه دخيلج انا بروحي برمسها وبتفاهم وياها..
ام راشد: زين ع كيفج
وتذكرت عليا شي ثاني واطالعت امها وهي مبتسمه..
عليا: وراشد كمل بعد على بناتي الباجيات
اطالعتها امها: المخابيل!!
عليا:هههه حرام عليج امايه.. والله انهن يبردن الفواد لاتقولون جي عنهن
ام راشد: ههههه الا نسوي سوالف انزين .. فديتهم كلنا مانرضى عليهن اصلا
مديه: عليهم بس ماترضووون ها اماايه
التفت عليا لورا وشافت مديه محطيه اديها ع خواصرها واطالعهم
عليا: مدوووي!! من متى انتي هنه؟ ليش انتي مب فبيت عمج؟
مديه: عموه سؤال سؤال انزين.. انا توي طالعه من الحجره.. والحين بسير بيت عمي..
ام راشد: هي زين .. سيري عيل
مديه اطالعتهم وابتسمت وروحت .. ماستوعبت شو كانوا يرمسون بس حطت فبالها تسأل احلام عن قصد عمتها بها الرمسه ..

عليا: ياخوفي سمعت
ام راشد: يالله يا عليا هاي ياهل ماتعرف بشو نرمس
عليا: الله يستر بس.
ام راشد: لا لا ماعليج ..انزين .. حرمه اخوج وينها عيل ؟
عليا: منو ؟
ام راشد: عبير بعد منو عندج انتي حرمة اخو فالبيت غيرها
عليا: هيه ..مادري من الظهر مالها شوفه
ام راشد: واحلام ماردت من بيت راشد ؟
عليا: لاااا ..
ام راشد: ولا حتى محمد رد البيت
عليا: هيه طرشتله الغدى العزبه قال بييلس اهناك
ام راشد: طفروبه يا امايه حتى البيت ماقام ييلس فيه
عليا: الله يعينه ..

قامت عليا من مكانها وتوجهت قسم محمد .. دقت باب حجرة عبير .. ودخلت .. يلست ترمس وياها ليش منعزله فالحجره طول اليوم .. خففت عنها شوي وحاولت تغير من مزاجها المتعكر .. وعقب طلعت من عندها وخذت تيلفونها واتصلت لمحمد تلومه ع اللي سواه.. كيف حرمته وام بناته فامس الحاجه له وهو البيت ماطاحه موول.. محمد تعذر انه ما كان يبى يرد لين يهدون الامور.. لانه مايبى يدخل فالسالفه والشي اللي سوته فجر مول ما يرضيه.. لكن بعد اقناع من عليا قرر محمد انه يرد البيت وييلس ويا حرمته يتفاهمون ..

****

سلطان توه انتبه وقام من نومه .. سار الصبح يداوم عشان خاطر امه اللي ماقامت ترمسه مثل اول وتبين له زعلها وعدم اهتمامها .. هالشي خلاه يظايج لو انه حشرتها كانت تظايجه بس اهون عن حقرانها له .. وبرودها تجاهه .. رجع من دوامه ورقد لين هالوقت .. فتح ليت الابجوره اللي حذاله وانتبه للساعه انها صارت 8 فليل ..
مسك تلفونه وشاف بدريه متصله فيه قبل 10 دقايق .. وابتسم وهو يتذكر شكلها
وايد اللي عرفهن حلوات واحلى منها بوايد .. بس هاي جذبته .. يمكن مب شكلها اللي يجذب وايد لكن حركاتها ودلعها .. وفوق هذا اللي تسويه عشان تسعى لرضاه
..حقق مراده وشافها .. لكن بعده في باله شي ثاني ولازم يوصله ومايضيع هالبنت من ايده ..
رجع عاد على رقمها واتصل فيها طولت لين ردت عليه ..
بدريه: الووه
سلطان: هلا بداري
بدريه: اهلين ..
سلطان: ليش طولتي لين رديتي ع التلفون؟
بدريه: كان عندي خط ثاني
سلطان: منوو ؟
بدريه: امم ريلي
سلطان: افف .. يلا ماعلينا ..المهم اشحالها البدر اليوم ؟
بدريه: الحمدالله.. حياتي انته وين اتصلتبك مارديت ليكون توك ناش ؟
سلطان: هيه توني ناش راسي يعورني سرت اداوم اليوم وتميت وايد يالس ع الكمبيوتر ..
بدريه: قوم انزين تعشى وارتاح ..
سلطان: انا مرتاح يوم اسمع صوتج ..
بدريه: تسلم الغالي
سلطان: بدريه تدرين توه حلمت فيج ؟
بدريه: صدق والله ؟ شو حلمت
سلطان(خلصت الاحلام احلم فيج): حلمت اني وياج يالسين ع البحر وانتي كنتي محلوووه وايد .. يالسه حذالي وتكتبيلي ع الرمل احبك .. وكنا بروحنا انا وانتي والمكان حلووو والهواء يطير شعرج ..
بدريه: ههههه .. حلووو وبعدين ؟
سلطان: بعدين قمت من النوم وقلت لازم الحلم يكون واقع
بدريه: ههههه
سلطان: شو فيج تظحكين ؟
بدريه: كيف بتسوي الحلم واقع
سلطان: يعني صعب تحقيقه ؟
بدريه: اممم شو تقصد ؟
سلطان: ولا شي .. ايلس انا وياج ع البحر في مكان هادي بروحنا
بدريه: وين هذا عاد ؟
سلطان: هذا خليه عليه انا
بدريه: كيف يعني ؟
سلطان(اووف اغبى وحده عرفتها .. افهميها ع الطاير وفكيني): يعني ابا اشوفج
بدريه: تراك شفتني
سلطان: لا لا ابا اشوفج نفس يوم كنتي في الحلم ..ابا اطلع وياج نسير نيلس ع البحر..
بدريه: سلطان وين تطلع ويايه ونيلس ع البحر
سلطان: في هاواي .. وين يعني اهنه
بدريه: لا سلطان شو انته تخبلت
سلطان عصب: هيه تخبلت خبله انا خبله ..
بدريه: سلطان ماقصد صدقني
سلطان يرجع يلين ..همه يسوي اللي في باله احين : لا انا خبله اصلا ..من يوم شفتج وانا تخبلت .. ماشوف جدامي الا انتي ..
بدريه: ياويلي ياسلطان لو ادري جان من زمان خليتك تشوفني عشان تقولي شي حلو ..
سلطان: ولو شفتج اكثر واكثر بتشوفين الاحلى من هذا كله .. بعيشج في عالم خاص.. عالم مافيه الا انا وانتي بس ..
بدريه: ياريــــــت
سلطان: سوي اللي اباه وبتحصلين اللي تبينه
بدريه: وانته شو تبى ؟
سلطان: اباج تطلعين ويايه
بدريه: سرت وياك السينما انزين
سلطان: لا لا ابا اكون وياج بروحنا .. نحوط في سيارتي .. تركبين حذالي واحس اني انا سلطان اللي اسوق وحذالي حرمتي ان شا الله مستقبلا عقب ماتفتكين من هذا اللي عندج
بدريه: ان شا الله اليوم قبل باجر
سلطان: هاه شو قلتي ؟
بدريه: ماعرف خلني افكر
سلطان: افا وهذي يبالها تفكير .. انا لو يقولون تشوف بدريه احين اسيرلج ازحف لين اوصلج واشوفج وانتي ماتبين تشوفيني!!!
بدريه لانت وايد .. والكلام وايد اثر فيها .. اعماها .. وخلاها تصدق .. تفتكر انه صدق شوفتها غيرته وهاللي لاحظته انه صار اوكي وياها عقب ماشافها الشي اللي خلاها تفكر انه لو شافته اكثر هالشي بيخليه يحبها اكثر ويتعلق فيها وبجيه بتكون وصلت لهدفها اللي هو "قلب سلطان" ..

سلطان حس من نبره صوتها انها بدت تخضع لكنه مازاد عليها بالكلام .. سكر عنها وخلاها تفكر .. وبيرجع يرمسها باحسن عن جيه وشوي شوي لازم بتقتنع ..

****

البنات ها الوقت يالسات ويا يدتهن .. يسولفون وياخذون مابخاطرها .. اما نايف نزلهم وروح عنهم ..
مريم: استانستوا في السفر ؟
مي: الحمدالله استانسنا ..
ام سيف: ونعوم شو مسويه وياكن ؟ انا ريمان خبرتني انكن ماقصرتن فيها
ساره: ههههه ماخبرناكم .. هذاك اليوم توهقت قالها ابويه قومي سوي العشا وقالت بسوي معكرونه .. والله يا امايه لوشفتيها ماتعرف شو تسوي .. ريمان تعطيها تقولها سوي جيه وسوي جيه ..
مريم: ههههه من استوت مرت ابوكن ماتدل المطبخ وماتعرف شكله بعد
ام سيف: وانتن شحقه ماتطبخن لعماركن تامات على تجلاها
مي: نحن نسوي امايه لكن يوم هي تروح نحن نطبخ عشان ماتاكل ويانا
لطيفه: حشى شريرات
مي: هيه عيل نحن نطبخ وهي تاكل ع البراد هي وريلها ..
اسما: ويه ويه ريلها تراه ابوج
مي: كله واحد ..
ضحك الكل ع مي اللي بكل ثقه بعد ترمس!
ام سيف: وينها عيل هي مايت وياكن اهنه ؟
ساره: اونها تعبانه بترتاح وبتي اليوم .. لكن شكلها مابتي لين تطلعين اعرفها هاي جذابه ..
ام سيف: مب لازم تي .. انتن تسدن ..
ريم: ساره اتصلي حق ابويه خل ايي يشلكم الفندق لانه خلاص الوقت تاخر وامايه لازم ترقد ترتاح ..
ام سيف: خليهم يا ريم انا ارتاح يوم اشوفهم
ريم: لا لا امايه شوفي انتي كيف من الصبح يالسات يسولفن وياج وانتي مب رايمه ترتاحين .. بييونج باجر ان شاء الله
ساره: وانتي مب سايره ويانا ؟
ريم: انا مسويه حسابي ويايبتلي ثياب ببات اهنه عند امايه وعموه بترجع وياكن
مريم: لا لا انا مب راجعه .. وانتي سيري ويا خواتج وتعالي باجر الصبح انا برجع
ريم: لا عموه انا اللي بيلس اهنه
مريم: ماعليه باجر تعالي انتي سيري ويا خواتج اليوم و انا اوعدج اخليج باجر تباتين ..
ريم سكتت .. مدام انه عمتها وعدتها اكيد بتخليها اتم عند يدتها باجر ..
مر عليهم ابوهم وروحوا وياه ونايف خذ خواته وتيمعوا كلهم في جناح سيف وعياله يتعشووون ..
ريم كانت طول الوقت نواري بنت عمتها يالسه ع ريولها وتلاعبها وتسولف وياها.. من ردوا من طلعتهم للغدى ونوره تفججت من نايف وقبضت بريم..

لطيفه: ماشا الله نواري تعلقت فيج
ريم: فديتها امووره .. سوالف
اسما: عاد احين هاي شو بيففجها من عندج .. من تلزق بحد ماتهده ..
ريم: ماعليه خلوها .. نواري بتباتين عندي اليوم ؟
نوره: اممم بقول حق ماماه
ريم: لا لا ماماه مابتقول شي .. انتي تمي عندي فليل انا بيلس اقولج قصه وبنسولف
نوره: قصه شووو ؟ انا ابا قصه حسن والسمكه
ريم: منو حسن والسمكه ؟
نوره: اوف انتي ماتعرفين هذي باباه نايف كله يقولي اياها
ريم: باباه نايف؟
اسما: تسمي نايف باباه
ريم: ليش ؟
اسما: بروحها متعلقتنه وايد وهو مدلعنها ..
ريم: اها .. انزين نواري انا ماعرف هالقصه
نوره: خلاص انا بقولج اياها
مي: ناويه ترقدج وتشرد عنج
ريم: ههههه شكلها جيه بتسوي .. يالله قومي نواري البسي بجامتج انا بسير افرش اسناني.. عاد برقد قبلكم اسمحولي تعبانه
لطيفه: مسموحه .. نحن بعد بنقوم نرقد.. ناشين اليوم من وقت..
ساره : لا لطوف مب ع كيفج انتي .. نحن نبى نسهر
لطيفه: شو عندكن ؟
مي: بنطالع التلفزيون وبنسولف، عن المصاخه لاترقدن لاحقات ع الرقاد ..
ريم: كيفكن انتن انا بقوم ارقد .. ساروه شوفي جسوم يوم بيي من عند عمار وعطيه الابره انزين ..
ساره: انزين ..

قامت ريم وشلت بنت عمتها الصغيره وياها .. ويلست تسولف وياها وتقص لها القصص .. حبتها وايد .. في بيت يدها ماكان عندهم يهال صغار .. اصغر وحده كانن ايمان ومديه بنات خوالها ..
واخر شي نامت نوره بحظن ريم ويلست ريم تتامل ملامحها .. تبى تعرف نواري منو تشبه ؟ اسما ولا لطيفه؟ والا نايف ؟
ورجع نايف لذاكرتها .. لكن عشان تتحاشى الصداع والتفكير .. قرت اذاكر النوم ورقدت ..

******************
(الجمعه) 6 اغسطس 2004
******************

الساعه 8 الصبح قاموا البنات عشان يرجعون راس الخيمه .. قرر سيف يرجع بعياله وخلفان بعد .. اما مريم ونايف بيتمون عند اليده اللي قالهم الدكتور انه
ان شاء الله بيرخصونها باجر ..

ريم: ساروه قومي الله يخليج ماشي وقت ..
ساره: انزين دقيقه دقيقه
ريم: ساره عن المصاخه حد يرقد دقيقه
ساره: اووف ريمان الله يخليج صبري شوووي احين بيخلص
ريم: شوهووو ؟
ساره سكتت وماردت على ريم ..
ريم طنشتها وسارت توعي مي

ريم: ميووه
مي: همم
ريم: مي قومي يالله بنسير
مي: مابا ريوق
ريم: بنسير راس الخيمه مب الريوق قومي
مي: اوكي قوليلهم
ريم: اقووول شووو ميووووه قووومي لاتخرفييين عليه
مي: هاه هاه
ريم مطت اللحاف عن ويها: ميوه قومي عاد غصصتوبي ..
مي: وعي ساروه قبل
ريم: ميوه قوومي بسكن كملن رقاد في الدرب ابويه يترياا
مي : ساروه الاكبر وعيها هي قبل ..
ريم ردت لساره توعيها : ساروووه قومي عاااد
ساره اعتدلت في يلستها وهي معصبه : اوف منج قلتلج صبري شوي بكمله وبقوم
ريم: شو تكملين ؟
ساره: الحلم
ريم وقفت مستغربه: عنبو فيلم هووو توقفينه وتكملينه
ساره: هي عادي انا انش وارد اكمل الحلم
ريم: وماشا لله شو عاد هالحلم اللي كنتي حلمانتنه
ساره: كنت حلمانه .. شدراني نسيت
ريم: احسن .. قومي يالله ابويه يتريا كلهم نشوا وحتى بنات عموه..يلا بنظهر رباعه
ساره: وبنتج نشت ؟
ريم: منو.. هي نواري .. فديتها من الصبح يالسه برع
ساره: شو رايج تتبنينها .. ترا انا وميوه بنسير عنج وبينقص العدد عندج..
ريم: انزين قومي .. قومي وعن ها الرمسات ..

طلعت ريم من عند البنات ..اما ساره نشت من الفراش وشلت المخده فرتها على مي وسارت الحمام تتغسل ..
ريم توجهت لخوانها اللي كانوا يالسين يتريقون..

ريم: ليش تريقتوا قبل عيال عموه
مايد: عمار يا توه وقال ما يبى
جاسم: ونحن يوعانين مانروم نترياكن
ريم: ماعليه انزين نحن مانبى.. يلا كلوا وتغسلو ونزلو عند ابويه..نواري وين
مهره: توها هنه
مها: لا روحت .. يوم يا عمار سارت وياه اونه تبى بابا نايف

ريم ابتسمت.. قبضت تيلفونها واتصلت بلطيفه تسألها اذ نوره عندهم واذ يبن ياكلن شي .. وماهي الا نص ساعه ونزل الجميع للسيارات وتوجهوا لبيوتهم..

****

عليا كانت ناشه من الصبح مستانسه انه عيالها بيونها اليوم .. معدله غرفتها ومدخنتها .. وتتريا فجر تقوم عشان تنظف الغرفه هذيج بعد ..
اما اللي كانت مرتبشه اكثر احلام .. اللي اصلا مارقدت من امس .. يالسه ويا عمتها وتساعدها ..

عليا: احلام قومي ارقدي شوووي قبل ما ايون بعدهم عن يوصلون
احلام: مافيني رقاااد عموووه فرحاااانه اخيرا بيون
عليا: هههه اليوم بتستوي الحشره في البيت
ام راشد: نباها الحشره يوم انها بتي من بناتج .. يالله مغلاهم اسميه البيت مايسوى بدونهن
احلام: مابزعل من هالرمسه ترا صدق البيت مايسوى بدونهم وبوجود بعض الناس غيرهم بعد ..
ام راشد: احلام يوزي عن النجره
احلام: انا بسير اوعيها بسها رقاد نبى انظف الغرفه
عليا: بعده وقت
احلام: لا ماشي وقت ساعتين والا ثلاث وبيوصلن .. يالله يمدينا
عليا: مادري عن تعصب عليج تريي امج توعيها
احلام: خل تولي ..

وسارت صوب غرفه فجر ودقت الباب ..
تمت واقفه احلام وادق دق متواصل.. بس محد يرد .. سكتت ودقت ع الخفيف.. تريت فتره لين قامت فجر وفتحت الباب..

فجر: نعم
احلام بابتسامه مصطنعه: صباح الخير خالتيه

فجر مستغربه من طلة احلام عليها .. من صارت الضرابه وهي ما ترمسها..شو عندا اليوم يايتنها من الصبح.. معقول يايه تتأسف!
حاست فجر بوزها وردت ع احلام

فجر: صباح النور
احلام: عندج خبر انه بنات عموه بيون اليوم ؟
فجر: لا .. ومايهمني اعرف .. شنو بسوي يعني بزفهم انا
احلام: لا بس بتقومين احين عشان عموه عليا تبى تنظف حجرتهم لانهم ساعتين وبيوصلون
فجر: اوووف .. اوكي بروح انام بغرفتكم
احلام: لا لانه غرفتنا توني منظفتنها ..
فجر: مو بكيفج ..

وطلعت على طول وسارت غرفه قوم احلام لقت مديه راقده .. وكملت هي رقادها على سرير احلام .. اما احلام طنشت .. مايهمها انه فجر سارت غرفتهم لانها اصلا ماتيلس بغرفتهم وايد .. بس يهمها هالغرفه تفظى وترجع تلتم فيها ويا بنات عمتها .. من ظهرت فجر من الحجره .. استولن عليها احلام وعمتها والشغاله .. وتموا ينظفون الغرفه ويعدلونها ويدخنونها ..
دخلت عليهم عبير وشافتهم ..

عبير: صباح الخير
عليا: صباح النور

اما احلام تمت ملتزمه الصمت .. امها بعد من بعد الضرابه ماقامت احلام تكلمها وايد .. او تسولف وايد.. كانت شايله بخاطرها بس ما بغت تعكر مزاج امها أكثر..
عبير: ماشا الله بيون البنات ؟
عليا: هيه بيون ..
عبير: اشوفها احلام مرتبشه معاكم من الصبح قاعده
عليا: اصلا بنتج مارقدت من امس
عبير: ليش

احلام تمت ساكته ورغم محاولات امها في انها ترمس وياها الا انها مب راضيه تصد صوبها او ترد عليها .. عليا كانت تحاول تدارك الموضوع عشان مايكبر اكثر من جيه ..

عليا: مرتبشه اكثر من عمتها ..

عبير يأست من احلام من كم يوم وهي تحاول تتقرب منها او ترمسها بس احلام تتجنبها .. والي صار قبل شوي كان من ضمن محاولات عبير لارضاء بنتها واخذ ما بخاطرها .. لكنها عقب قررت انها تسكت لين ايون بنات عليا يمكن يتغير مزاجها وترجع وياها عادي واذا لا .. بتكلم مي اكيد بتقنعها وبتتفاهم وياها..
ماتبى تفاتح محمد في الموضوع مره ثانيه .. لانه بينجلب كل شي ضدها ..
وفالاخير انسحبت بهدوء وسارت المطبخ تسوي الكيك الي يحبونه البنات..

****

وصلوا الجماعه من بوظبي وكل سياره اتجهت لبيتها .. نزلوا عيال سيف من السياره وكل واحد منهم يمغط عمره وينقع مفاصله دليل على كثرة التعب من الجلوس .. صعدن البنات غرفهن ويلسن يرتبن اغراضهن ع السرير وخذوا الي يحتاجونه ورتبت ريم اغراض جاسم ..وخذوا بعد الهدايا اللي اشتروها لاهلهم اهناك ..
وتريوا ابوهم لين يرجع من الصلاه ويوديهم .. اما ناعمه كانت في البيت موجوده وتوها ناشه من النوم وسارت للبنات جناحهن ..

ناعمه: هاه ييتوا ؟
مهره: لا روحنا
ساره: هاي اللي بتي اليوم الثاني تسلم على عمتها
ناعمه يلست ع اول كرسي حصلته بدربها
ناعمه: قالولي انها بتطلع باجر
مي: وشعنه ماييتي قبل
ناعمه: مرضت وماقدرت اسير
ساره: وعليه عنج واحين خفيتي ؟
ناعمه: هيه احسن شوي
مي: ليش شو ياج ؟
ناعمه: احس بدوووخه وراسي كله يعورني
ساره تطالع ناعمه بنظره مكاره: اويه عن تكونين حامل؟
ناعمه اهنه تنرفزت: لااا مب حامل . فال الله ولا فالج
مي: ليش عاد ؟؟
ناعمه: بس انا عندي ميود وعفروه ومتغصصه وانتوا فوقهم .. بعد اييني ياهل
ساره: تحملي عاد عن تكونين مفتكره في هذيل الاثنين
ناعمه: ساره بس والله راسي يعورني
ساره: انزين بس بسكت ..

تسدحت ناعمه على الكرسي وتمت طايحه .. والبنات فاتحات الشنط في الصاله ويطلعون الاغراض اللي اشتروها لامهم وبنات خوالهم ..
طلعت ريم من غرفتها عقب مارتبت اغراضها واغراض جاسم ..

ريم: بلاها ناعمه ؟
مهره: تقول راسها يعورها
ريم تقربت منها ولقتها مغمظه عيونها
ريم: ناعمه ؟ ناعمه ؟
ناعمه فتحت عيونها وصدت صوب ريم
ناعمه: هاه
ريم: بلاج شو يعورج ؟
ناعمه: راسي يعورني .
ريم: انزين خذتيلج مسكن ؟
ناعمه: لااا
مي: اسير اييبلها ؟
ريم: مادري.. جنها مب ماكله شي .. ناعمه تريقتي ؟
ناعمه: لااا ماكلت شي
ريم: انزين عيل صبري بننزل نطالع جان نجمه خلصت الغدى بتاكليلج شي وعقب بتاخذين المسكن ..
ساره: ووويه هاي احين تعبانه ونحن بنسير عنها
ريم: ماعليه الصلاه بعدها شووي عن تخلص لين ايي ابويه بيوصلنا وبيرد يتم عندها..
تبرعت مي تسير تحت تسال نجمه عن الغدى اذا جهز ..
مي دخلت المطبخ بشكل سريع وقطعت على نجمه اندماجها
مي: سلامووو عليكووو
نجمه: مي انتي ليش صرخ
مي: حرام نجمه انا احين من متى محد عنج ماتولهتي على حشرتيه ؟
نجمه: مي مايسوي جيه مره ثانيه بعدين انا قلبي عورني انا يسوي مريض سيم سيم ماما كبير
مي: انزين انزين فكينا .. اقولج نجمه هذا كيس داخله هديتج اللي يبناها لج
نجمه : الله مشكوور واجد مي
فتحت نجمه الكيس ولقت البنات يايبات لها قميص صووف احمر للشتاء ..
نجمه: اووه مي قولي حق بنات مشكور واجد
مي: افا عليج .. يبتلج لون احمر عشان يوم تلبسينه تغدين جنج قوطي مالبورو ..ولا اقول احسن بابا نويل سيلاني ههههه
نجمه: شو يقوول؟
مي: ماشي .. انزين اقولج نجمه خلص الغدى؟
نجمه: ليش انتوا في سوي غدى منيه ؟
مي: لا بس حق ناعمه وحليلها شوي تعبانه .. تبى تتغدى عشان تاخذ دوا
نجمه: هي هذا مدام ناعمه مسكين من ثلاث يوم تعبان..
مي: اونه .. زين خلصتي الغدى انتي؟
نجمه: هيه انا في خلاص صبري انا يحطي داخل صحن ..

حطولها الغدى بصحن وشلت مي الصينيه وودتها فووق ..

مي: واحد عيش برياني وصلحووو
ريم: برياني مسوين ؟
مي: هيه .. وعيها بتاكل
ريم: ناعمه ايلسي عشان تاكلين
ناعمه: شوو ؟ ماروم ايلس خلوني طايحه
ساره: قومي تغدي عشان تاخذيلج دوا
ناعمه: مابا اكل
ساره: قومي عن الدلع نعووم .. كليلج شوي عشان تاخذين الدوا .. مافينا بعد انتي تموتين علينا تخربين وناستنا
ناعمه: اووف مابا
ساره: نعمة الله الغاليه اسولف وياج انا .. انتي مرت ابونا الغالي .. قومي اكلي يالله عاد

ناعمه فتحت عيونها شوي شوي ويلست وحطولها الصينيه وعطوها تاكل وسارن يتلبسن ويصلن لين تخلص غداها .. ورجعتلها مي تيلس عندها ..

مي: اييبلج عصير ؟
ناعمه: لا بس ابا ماي ..
سارت مي يابت ماي من ثلاجه الصاله وعطتها اياه ..

ناعمه: مشكوره ..

كلت ناعمه شوي من الغدى وردت يلست وهي متسنده ع الكرسي .. وشلت عنها مي الصينيه .. في هالوقت دخلوا مايد وجاسم الجناح واصلين من المسيد

جاسم: يالله ابويه يترياكم تحت ..
مايد: اميه بلاج ؟
مي: امك تعبانه
مايد تقرب من امه ويلس حذالها: شو فيج ؟
مي: راسها يعورها .. اقولج ناعمه قومي سيري طيحي في حجرتج وبييلج المسكن اهناك لانه نحن بنسير احين .. مايد وصل امك

نشت ناعمه ووصلها مايد لغرفتها .. والبنات كلهم نزلوا تحت الا مي سارت تودي المسكن حق مرت ابوها قبل ماتنزل .. دخلت الغرفه عندهم وسارت مكان ماطايحه ناعمه

مي: قومي ناعمه يبتلج الدوا
عطتها اياه وناولتها الماي .. شربت منه..
مي: اقولج ناعمه تلفونج وينه ؟
ناعمه: ماعرف ليش
مي: خليه حذالج عشان نتصلبج عقب
ناعمه: ليش
مي: نسال عنج.. مب تعبانه ؟
ناعمه: هيه .. انزين شوفيه يمكن في الشنطه فوق الطاوله هاتيه هالصوب
سارت مي طلعت التلفون وحطته حذال ناعمه
مي: انزين اقولج نحن مانعرف رقمج
ناعمه: خذوه عن ابوكم
مي: اوكيك بسجل ارقام خواتي في تلفونج .. ورقم بيتنا هناك بسجله باسمي.. يمكن ادقلج من البيت
ناعمه: انزين
سجلت مي ارقام خواتها ورقم البيت في تلفون مرت ابوهم .. وحطته حذالها ..
مي: سجلت رقم ريمان وساره اوكي
ناعمه: خلاص اوكي
مي: تبين شي ؟
ناعمه: لا مشكوره
مايد: ميوه .. انا قلت لجسوم اني بسير وياكم.. بس قوليله هونت خلاص
ناعمه: ليش!
مايد: اميه انتي تعبانه كيف تبيني اخليج

اطالعته مي ومسحت ع شعره وابتسمتله .. و بشكل لا ارادي وبدون تفكير .. تجدمت من مرت ابوها وحبتها على راسها وطلعت عنها وسكرت الباب ..
وقفت جدام الباب للحظه تفكر ..
انا ليش سويت جيه ؟؟ انا احب نعوم ؟ لا ماظن حب .. ولا اظن انه احترام .. هاي انسانيه .. مهما كان لو انها وغده بس نحن لازم نعاملها بالعكس عشان نكون احسن عنها و نكسبها في صفنا .. بس ليش نحتاج انها تكون في صفنا ؟ في شو بتنفع يعني ؟
ماعليه ع الاقل نفتك من المشاكل والصدعه .. ياترى ممكن انها تتغير ؟ مب لازم خلاص انا سويت اللي يملي عليه ضميري وهي كيفها ... ياخوفي تنش بخير وتطلع لسانها علينا .. الله يستر ..

اما ناعمه بعد يلست تفكر .. ليش هم جيه سووا وياها ؟ صح انه الكلام بينهم جاف ولازم يتخلله ظرابه .. بس بعد مافي شي يجبرهم انهم يوقفون وياها ..
صح خلوها وراحوا .. بس اهتموا لامرها ماطنشوها .. اقل شي خذوا رقمها عشان يسالون عنها .. ماقدرت تفكر زياده لانها تعبانه وطاحت رقدت ..

ومايد لحف امه زين وظهر من الحجره يحس بجدران البيت بتصح عليهم من كثر الصمت .. ويلس بروحه فغرفته يتأمل كل شي حواليه .. من الحين ظيجان كيف بيتحمل لين باجر..

****

ردوا محمد ومانع من الصلاه دخلوا البيت ماحصلوا حد فالصاله ويلسوا.. وشوي دش راشد عليهم الصاله ووياه نجليه مروان وفارس .. طلعت ام راشد من عقب ماصلت الجمعه وشافت عيالها فالصاله.. يلست وياهم وشوي شوي اكتملت العايله الكريمه .. يت ميره وبناتها عزه وايمان .. وخليفه ومنصور ويا امهم شيخه .. طلعت عبير وبناتها .. اما فجر كانت يالسه فحجرتها .. دخلت عليها عليا من بعد ما دقت الباب ..

عليا: شو فجر ماتبين تظهرين!!
فجر: شنو ها الصدعه كلها اللي برع؟
عليا ابتسمت: هاي عادة كل جمعه فبيتنا..العايله كلها تلتم فها الصاله الصغيره وتتعالى عاد الحسوس .
فجر: وانا كيف اطلعلهم .. ماعرفهم
عليا: بتعرفينهم ..
فجر: في شباب بعد برع!
عليا: هي مروان وفارس عيال راشد اخويه..وخليفه ومنصور عيال شيخه اختيه..ومانع اخويه ..
فجر: كيف بطلع جذي .. عبير بتزفني
عليا: ترا عبير مب يايبتلج كنادير!
فجر: ايه
عليا: انزين لبسي وحده ويلا تعالي
فجر: افف ماحب البس دراعه
عليا: ماعليه .. فها الاجواء حاولي تحبين

اطالعتها فجر وهي حايسه بوزها .. مب عايبنها الوضع بتاتا ..
حاولت تلطف من معاملتها شوي ويا عليا لانه محد افتكر ابها طول ها النهار غير عليا كل شوي يتها.. صح تنظف الحجره للبنات .. بس بعد يلست وياها شوي ..

فجر: خلاص ببدل الحين .. بس تعاليلي بعد شوي.. ماعرف اطلع بروحي
عليا: خلاص تم.. انا بسير احط الغدى للرياييل .. وبيي ان شاء الله
فجر: تقعدون وياهم ع الغدى؟
عليا: لا .. الرياييل بروحهم يتغدون..
فجر: وانتوا وين تقعدون؟
عليا: نيلس فحجرة اميه لانها تقريبا فاضيه.. ولين ما يخلصون الغدى وعقب نبدل الوضع نحن نتغدى وهم يشربون الجاي فغرفة اميه
فجر: اها .. عاداتكم غير عنا
عليا ابتسمت: لا ماعليج .. في وايد كويتيين نفسنا .. وفي وايد عايلات اماراتيه نفسكم.. يلا انزين انا بسير الحين
فجر: اوكي ..

طلعت عليا من الحجره .. توجهت للصاله وشافت العدد مكتمل .. بس ناقصات بناتها ليش تأخروا لين احين! .. سارت المطبخ ..
وتزامن الوقت اللي سارت فيه المطبخ يية البنات .. دخلن البيت ولقنه كعادته كل جمعه .. استحن صارلهم شهر ما شافوا ها الناس.. وطن اغراضهن وسلمن ع الجميع .. الكل استانس وهو يشوف البنات .. ودخلن داخل يعقن عبيهن وسارت وياهن احلام ومديه .. مي وساره فتحن باب حجرتهن لكن ماتبطل الباب وشافن احلام..

احلام: تعالن بدلن فحجرة عموه.. فجر شكلها قافله الحجره..
مي وساره اطالعن بعض ..
ساره: ييها من اولها عاد
احلام: يلا ساروه مافينا ع المشاكل

وتيمعن كلهن حجرة امهن .. ووصل خبر لعليا انه بناتها وصلن .. وطت اللي فايدها فالمطبخ وخلت شيخه وميره وعبير وردت البيت.. يوم ماحصلت البنات فالصاله خمنت انهن فالحجر .. وسارت ع طول حجرتها .. لقتهن كلهن يالسات .. غصبن عنها دمعت عينها .. وقامن بناتها يسلمن عليها .. ميوه من ولها ع امها تمت حاظنتنها وماتبى تتفجج وعليا تمسح ع شعرها وتحبها ع راسها..ومها ومهره كل وحده ميوده امها من صوب ويقوللها شكثر هن متولهات عليها.. ساره تمت مجتفه ايدها مب عايبنها الوضع وتنغز ميوه تباها تقوم .. وريم اطالعهن وتضحك عليهن.. دايما دورها ايي اخر الناس لكن تحصل الوقت الاكثر عشان جيه تمت هاديه..
اما احلام ومديه يطالعنهم وهن مستغبنات .. مب من شي .. الموقف كان صدق مؤثر وايد .. كيف الانسان يبعد عن امه مده ومايكون حاله جيه!!
احلام طلعت عطول من الحجره.. وهي تلوم نفسها .. كيف قدرت تكمل ها الايام وهي ماترمس امها .. ولو هاي بتظل امها .. ع الاقل بقولها كلمه .. كلمتين .. مابحرم عمري منها وانا اشوفها ليل نهار وغيرها مايتهنى بأمه الا كم يوم بالاسبوع..

العصر يلسن احلام ومي يسولفن في طرف الصاله عن كل شي استوى في هذي الفتره .. احلام رمست عن امها وفجر وبدت تطلع لمي اللي في خاطرها .. ومن الرمسه اللي سمعتها من احلام عن فجر قامت مي تقارن بين فجر وناعمه .. وتوازن بين الشخصيات وطلع ف الأخير لمعادلتها أنه ناعمه أرحم بوايد عن ها الفجر .. وفجأه شهقت مي وكأنها تذكرت شي ..

مي: ووووويه نسيت
احلام: شووو
مي: ماتصلت بنعوم
احلام: نعمه الله ..هههه
مي: هيه ترا قبل مانطلع كانت ميهوده ونسيت اسال عنها
احلام: تهمج يعني
مي: تبين الصدق ماعرف اذا تهمني والا مساعه كنت افكر في هالشي المهم قومي نشي خليني اتصلبها
نشن مي واحلام وسارن وين ماكانوا الحريم يالسين وشلت مي تلفون البيت..
عليا : منو بترمسين ؟
اشرت مي لامها بمعنى انها تصبر شوي واتصلت حق مرت ابوها
مي: الوووه
ناعمه: الوه
مي: هلا اشحالج ؟
ناعمه: الحمدلله
مي: شو تآنسين احين احسن عن مساعه ؟

ريم عرفت منو ترمس مي .. والتفتت تخبر امها ..
ريم: هاي ناعمه مرت ابويه
ام راشد: بلاها !
ريم: قبل مانظهر عنها كانت ميهوده ..
عليا: شو ياها ؟
ريم: مادري تقول راسها يعوورها تعبانه من كم يوم ..
مي كملت كلامها ويا مرت ابوها
مي: انزين ليش ماسرتي المستشفى
ناعمه: مايحتاي احس اني احسن شوي .. انتوا متى بتون ؟
مي: ليش تولهتي علينا .. ههه باجر بني اذا يت امايه عفرا
ناعمه: لا عادي البيت هادي وانا احتاج الهدوء
مي: بس عيل .. مب منج انتي من اللي يسأل
ناعمه: اووه بلاج ماتقهرين السوالف
مي: سوالفج ماصخه
ناعمه: حطيلها ملح عيل
مي: هههههههه والله عرفتي تنكتين بعد .. علمناج استخفاف الدم
ناعمه تقاوم ضحكتها: بس عيل علمتوني الفايده..
مي: والله ها الانسانه مادري شو يترس عينها من صوبنا ..
ناعمه: يالله عاد الواحد مايروم يسولف وياكن لازم يعني تعكرن عليه..خلاص ميوه لاترديلي عوقي
مي: هههههه بل عليج اذ انتي تسولفين ترا نحن اجداد السوالف .. انزين..يالله عيل بخليج اذا في شي دقيلنا اوكي
ناعمه: اوكي مع السلامه
مي: مع السلامه

الاغلب كان يسمع حس مي وهي ترمس لانه مرتفع نسبيا..وبعد ما سكرت مي التلفون .. يلست حذالها ريم اللي تبى تسأل عن الاتصال لكن بدون ماتسمع امهم الرمسه ..

ريم: هاه شو تقول احسن ؟
مي: هيه تقول احسن
ريم: عيل ليش قلتيلها تولهتي علينا وعقب تناقرتي وياها
مي: هههه تسالنا متى بتون والهرمه عقب قالت اونه البيت هادي زين حقها الهدوء.. وياراسها نسوي خير فيها ونطمن عليها وهي جي ههههههه
ريم: نعوم الا تعق رمسه جيه ..
مي: ادريبها.. ماتشوفين ما احرق دمي عليها..عيل ساروه وين ..
احلام: في الحجره
مي: خالتج اهناك ؟
احلام: اظن
مي : قومي قومي نطالعها اخاف يتناشبن..

نشن مي واحلام وسارن الحجره .. لقن فجر طايحه ع سريرها تجلب كتاب .. وساره منسدحه ع الغنفه ومحطيه التلفزيون ع قناه الاغاني وتدندن
يلسن وياهن مي واحلام ويوهم مديه ومهره ومها ..

اما ريم يلست ويا باجي اهلها يسولفون .. وبعد ماصلوا كلهم المغرب ريم يلست في الصاله كانت ترمس في التلفون ويتها امها يلست حذالها ..

وطت ريم سماعة التيلفون من بعد مارمست عمتها واطمنت ع يدتها .. ولفت ع صوب امها وويها منور ..

عليا: ها شخبارها ؟
ريم: الحمدلله .. تقول عموه باجر بيرخصونها
عليا: زين زين الحمدلله
ريم: على جيه لازم نقوم الصبح نسير اهناك
عليا: يالله بعدني ماشبعت من شوفكم توكم اليوم ياين
ريم: شو انسوي امايه عفرا تعبانه منو بيتم وياها .. بنسير ويوم بنشوفها استوت اوكي بنرجع اهنه
عليا : ع خير

سمعوا ضجه .. مصدرها كان من حجرة البنات .. حجرة مي وساره و..فجر..

عيا: بسم الله شو ها
ريم: يالله يا امايه ماتعرفينهن انتي بناتج دوم حشره
عليا: خس الله بليسهن بيأذن فجر
ريم: هههه صبري انتي عليهن هاذيل بيطفرنها من الحجره.. من ين يابن ربشتهن..
عليا: هههه فجيبهن ربشتهن هن ..
ريم: هههه عيل شو تتحرينهن.. بس تعرفين اميه نظرات فجر مول ماتطمن..شكلها قويه ما بيروملها خواتي .. ضاريات ع تسكيت نعوم الله يعين الحين جان ماتسكتهن ها الفجر..
عليا: يبوج يوم عبير ما تروملها .. واخوها مايروملها.. مافينا نحن ..
ريم: بسير اشوفهن وبيي
عليا: تسوين خير ..

قامت ريم من عند امها .. وتوجهت لغرفة البنات .. بطلت الباب بشوي شوي .. ودخلت بس راسها تشوف شو مستوي ..

شافت البنات اللي ع الشبريه واقف واللي فوق الكرسي واللي منسدحه تحت ويتفاررن بالخداديات.. دخلت الحجره وصرخت ..

ريم: شوووومستوي هنه.. الحرب العاالميه
ومن سكتت ريم ما شافت الا بخداديه مفروره صوبها وع طول دارت بويها ورا الباب ..
ريم: اييييييه انتن .. يعلكن ان شاااء الله
مها: هههههه ريموه فري فري المخده .. بسرعه
احلام: لا ريموه .. تعالي شوفيهن بيضربني ها التووم ومدوي

ريم تلفتت فالحجره وشافت فجر يالسه ع الغنفه اللي ع طرف ومن شكلها كاان امبين انها محرجه من اللي يستوي .. ومي وساره كانن متسلقيات ع الشبريه يتصفحن مجله كلها عن الازياء والميكاب ..
صرخت ريم وهدن البنات اللعب ..

ساره: بلاج ريموه؟
ريم: شو ها الصدعه؟
مي: تحيدينا دوم جيه
ها الوقت قامت فجر .. وتقربت من الشبريه.. واطالعت البنات بنظرات ..
فجر: كنتوا جي .. بس لازم تغيرون طبعكم وانتوا فغرفتي..احلام انا بروح عند عبير ولما برجع ابي اشوف الغرفه مرتبه ..

وطلعت فجر من عندهن وهي بتموت من الغصه .. ما قدرت من الاول تحتشر عليهم لانه توهن بنات عليا يايات يعني ما وحالها من يومين تقدر انها تاخذ وتعطي وياهن .. استغلت يية ريم وطلعت حرتها ولو شوي ..

اما البنات اتضايجن كلهن من رمسة فجر .. واحلام قالتلهن يطبنها لانهم وايد بيشوفن منها .. ماله داعي يحسسن من وحده شراتها .. بس مي وساره انقهرن أكثر.. هاي غرفتهن قبل ما تكون غرفتها .. كيف تتملكها بكل سهوله !!

وريم عقب طلعت من عندهن من بعد ماخففت على خواتها وسارت عند امها وخبرتها باللي استوى ..

عليا: هن قاللها شي
ريم: لا .. تمن ساكتات..
عليا: زين بعد .. ولا انه مب من عوايدهن يسكتن مي وساره
ريم: لا حليلهن كانن مصدومات هههه لو تشوفين ساروه كيف مطرطره بعيونها.. جنها تشوف جريمه جدامها..
عليا:هههههههه حليلهن..

وغيرن عقب الموضوع لانهن ما يبن يكبرن السالفه او انه عبير تدري عسب ما تضايج .. وطلعن عقب البنات من بعد مارتبن الغرفه .. ويلسن كلهن فالصاله ويا عليا .. ومي وساره امبين من شكلهن انهن امبوزات .. بس عليا طنشت .. ماتبى صدعة راس ويا فجر

وبما انه البنات باجر بيرجعن .. كان لازم عليا تفتح الموضوع ويا ريم خصوصا بعد ما تماثلت ام سيف للشفاء والحمدلله ..
قامت عليا من مكانها .. وزقرت ريم وقالتلها تباها فالحجره .. شوي وانسحبت ريم من اللمه ولحقت امها .. محد مستنكر الحركه لانه عليا دايما تحب تنفرد ويا ريم ..

و فحجرة عليا.. دشت ريم على امها ويلست حذالها وهي تطالعها..
ريم: ها امييه شو بغيتي
عليا: ماشي ابى اسولف وياج مثل كل مره
ريم: لاا بس احس ها المره ملامحج كانت غير يوم زقرتيني
عليا: لاا عادي
ريم: انزين عادي .. سولفي
عليا تمت ساكته .. ماعرفت شو بتقول .. مب مجهزه مقدمه للموضوع..
ريم: امييه
عليا: شوفي ريم .. بكل بساطه ومن غير لا لف ولا دوران ترا يايينج معرس
ريم:هاه
عليا: من قال هاه فقد سمع
ريم: اوكي سمعت .. بس عيدي
عليا: ريم يااينج معرس
لفت ريم بويها الصوب الثاني .. حست بحراره فضيعه تسري فجسمها

عليا: ريم
ريم: تعرفين رايي فها السالفه من قبل
عليا: بس رييم
ريم: اميه مابا اعرس .. ماابا .. مااابا .. تعرفين شو يعني ماابا
عليا: ريم عن المكر.. خلاص عاد دلعناج واايد .. ماله داعي عنادج هاا .. يا ريم الريال ستر للحرمه .. كم بتمين انتي اتردين اللي يخطبونج!
ريم اطالعت امها وعيونها تلامع من الدموع ورمست بصعوبه
ريم: امييه .. الله يخليج ماابا اعرس..
عليا: ليييش؟
ريم: بس ماابا
عليا: يا ريم خلي عنج ها العزله .. ادري انج ماتقاربين الرياييل .. لكن مب كل الريايل واحد .. اصابع ايدج مب وحده
ريم بحزم: بس الوصخ اللي تحتهن واحد
عليا: ريييم وغلااتي عندج يا ريم
ريم قامت من مكانها وحظنت عمرها بايدها .. ماتطيق ها السالفه .. امها ليش مصره على ها الشي يعني ..
ريم: ومنو ها اللي ياي احين!
عليا قامت من محلها ووقفت ورا بنتها ..
عليا: نايف
لفت ريم ع طول .. شافت امها .. وبدت دموعها تسيل
ريم: ولد عموه!
عليا: منو غيره يعني
ريم: رديييهم امييه .. ماباه مااباااه
عليا: الريال زين يا ريم
ريم: ادري .. بس انا مابا .. خلاص افهموني
عليا: فااهمينج يا ريم
ريم: حد يدري بالسالفه؟
عليا: لا .. امايه وامه بس
ريم:ولا تخبرون حد .. خلااص مابا ردييهم
عليا: يعني مالي خاطر عندج
ريم: اميييه.. لاتقولين جي.. الله يخليج سكري السالفه..
عليا: يا ريم
ريم: اميه مافي مجال لاتحاولين ..

وطلعت ريم من الحجره قبل ما تتفوه امها باي كلمه .. سارت ع طول الحمام عسب تغسل ويها .. تمت تشوف عمرها بالمنظره اللي ع المغسله ..
نايف.. يبوني لنايف.. ليش يا لطيفه ما قلتيلي لييش .. انتي تدرين!
اميه قالت محد يدري .. احسن لحد يدري .. مابا حد يصدعلي براسي ..
ياربي يا نايف .. اسبوع قضيته وياك ولا حسستني بها الشي.. ليش جي.. كنت تستغل وجودنا رباعه عسب تتقرب يعني .. عسب اوافق علييك ..
اناامابا اعرس .. مب بايدي .. انا ماطيق الطاري ها ..
مابا مصيري يكون نفس اميه .. ماابا ..
وردن دموعها ينهمرن ع ها التفكير .. وهي بس تتخيل انه ممكن يصيرلها اللي
صار لامها..

******************
(السبت) 7 اغسطس 2004
******************

الساعه ثمان الصبح .. كان فارس واقف مجابل المنظره الطويله اللي حذال باب الفله وهو يرتب تعصيمته .. رن تيلفونه وع طول رد " ها الحين بطلع.." سكر التيلفون .. ونادته امه ..

ميره: فارس ها اندوك الفلوس ..
فارس توجه لامه وخذ الفلوس..
فارس: مشكوره اميه .. ادعيلي بس انتي يقبلوني وادرس واخلص واكد على عمري
ميره: ان شاء الله يا وليدي.. الله ايسرلك امرك ..
فارس: يلا فمان الله .. خليفه واقف عند الباب
ميره: الله يحفظك الغالي.. وطمنا انزين
فارس: ان شاء الله ..
وطلع فارس من البيت بمشي سريع.. وبرع البيت حصل خليفه ولد عمته شيخه يترياه .. ركب وياه وتوجهوا للشارجه ..

خليفه: يبت كل اوراقك؟
فارس: هي هاذن ..
خليفه:زين عيل .. يلا ان شاء يطلع قبولك ..
فارس: الوظيفه مضمونه عاد؟
خليفه: شوف انا الحمدلله من تخرجت توظفت ع طول فالاتصالات .. الشهاده قويه .. ان شالله ما بيظيع تعبك ..
فارس: والدراسه شو؟
خليفه: يبالها يعني واحد يشد حيله.. لكن ماشالله عليك انته شاطر وبتمشي ..
فارس: ان شاء الله..

وعلى سوالفهم انقضى الوقت وهم فالدرب ووصلوا الكليه.. قدم فارس كل اوراقه وبيتريون المقابله وامتحانات تحديد المستوى ..

وبعد ماخلصوا كل شي .. نزلوا فارس وخليفه صحارى مول بما انه عندهم وقت .. وقالوا بياكللوهم شي.. ساروا فوق لمطعم وطلبولهم شي خفيف ياكلونه ع الصبح .. يلسوا ع وحده من الطاولات برع .. وقاموا يسولفون عن الدراسه أكثر والصعوبات اللي بيواجهها فارس .. وخليفه قام يخبره مواقف عنه وعن دراسته عل وعسى ياخذها فارس بعين الاعتبار .. يابولهم الطلبيه ويلسوا ياكلون ..

فارس: الا اقول .. ترا المقابله ورا باجر .. انته بتيبني ولا
خليفه: بييبك عادي شو ورايه من شغل
فارس: بعبل عليك عاد
خليفه: ما من عباله ..
فارس: يلا ان شاء الله بقدم لليسن الاسبوع الياي
خليفه: يحيك والله .. زين.. هاكم يابو الغدى .. بنتغدى وبندش السينما شو رايك
فارس: زين قلت تراك شو ورانا من شغل
خليفه: ههههه زين عيل ..

وعقب ما خلصوا أكل.. قرروا يدشون السينما يقضون وقت شوي قبل ما يردون راس الخيمه..

****

الظحى.. نشن بنات سيف ها الوقت عسب يردن البيت .. ريم كانت اول وحده ناشه ومن نشت وهي تتحاشى نظرات امها .. ماتبى حتى ترمس او تعطي نفسها فرصه انها تنفرد بها عشان ماترجع تكلمها بالموضوع .. كافي الصداع اللي رجعلها امس أما مي وساره من قامن من النوم وهن بعدهن مانشن من سرايرهن
طايحات متجابلات ..
فجر نايمه ع سريرها .. والبنات يسولفن بصوت واطي ..ساره قالت شي ضحك مي بصوت عالي ..

ساره : ميوووه اسكتي عن تنش احين هاي
مي: تولي .. هاللي قاصر .. امس اول مره نرقد بهدوء .. طلعنا ع الدنيا مارقدنا في هالحجره جيه الا جان حد فينا مريض .. عنبو حكم قرقوش .. سكرت عنا التلفزيون والليتات وطاحت ترقد لا وشو ماتبى صدعه ..
ساره: يعلني بلاها ..
مي: قومي قومي انتي عن نتأخر خلينا نتلبس ونسير برع .. تعرفين والله اني ماشبعت من اليلسه اهنه خاطريه اتم لكن حرام امايه عفرا بتي العصر
ساره: حليلها العيوز.. (وكأنها تذكرت شي) ويه تعالي نعوم اشحالها .. تدرين اول مره تكسر خاطريه امس
مي: حتى انا والله عقب ماعطيتها الدوا مادري شو ياني حبيتها ع راسها وظهرت
ساره: ههههه قوولي والله .. ومتى ها ؟
مي: والله تخاديت اظني من زود ما انا ولهانه ع امايه
ساره: عاد تشبهين نعوم بامايه
مي: لا بس حرام بعد تغمظني ساعات لو انها وغده وماتيوز عن لعانتها لكنها هبلى
ساره: وانا شو يعيبني فيها الا هالهبل
مي: هههه خسج الله ..قومي انزين انا بدش اتغسل وانتي طلعي الثياب
ساره: انزين ..

دخلت مي تتسبح لكن ساره كانت متعمده ترد الحركه لفجر بطريقه غير مباشره .. قاهرتنها من امس .. قامت تفتح الكبتات بصوت وتسكرنهن وتفتح الادراج كأنها تدور شي .. فجر بدت تتحرك وهي منزعجه من الصوت

فجر: اييه شنو ها الازعاااج
ساره: اسمحيلي ادور اغراضي لانه احين بنطلع بنروح بيت ابونا
فجر: زين لاتسوين صوت
ساره: ان شا الله فديتج .. اسمحيلي كلها نص ساعه او ساعه بالكثير وبنطلع
فجر تاففت وصدت الصوب الثاني ..
ساره في هالوقت يتها الظحكه ورجعت تكمل وتدور باجي اغراضها وهي تغني
فجر مارامت تتحمل ونشت من السرير طفرانه وتتحرطم بس ساره مب فاهمه عليها شو تقول وطلعت من الغرفه .. وسارت غرفه احلام ومديه ولقت احلام بعدها راقده ووعتها ..
فجر: هيه انتي قومي
احلام: شوووووو
فجر: قومي ابا انام
احلام: انا بعد ابا ارقد
فجر: قومي روحي اهناك انتي تعرفين تنامين بوجود بنات عمتج اما انا ماقدر وايد مزعجاااااات ..
احلام فتحت عيونها بتكاسل ونشت ماتبى تسويلها صدعه وياها خصوصا انه بنات عمتها اهنه .. نشت وسارت غرفه البنات ولقت ساره يالسه تجلب في قنوات التلفزيون ومي تنشف شعرها
ساره: اوه احلاموه نشيتي
احلام طاحت ع سرير مي وتلحفت: فجر وعتني شو مسويات بها
مي: هاي ساروه انا مايخصني كنت اتسبح
ساره: ههههههه ليش شو قالتلج
احلام: وعتني ورقدت بشبريتيه .. وقالت انكن مزعجات
ساره: ههههههههه تستاهل الازعاج الهرمه
احلام: انا بكمل رقادي اهنه ..
مي: قومي يالله ماشي رقاد .. نشي تريقي ويانا وعندج باقي اليوم رقدي فيه ع راحتج
احلام: اوف ليش بتروحون ماشبعنا منكم
مي: نحن 12 سنه ماشبعتي منا بتشبعين في يوم واحد
ساره: ياويلي ع الخقه ياربي
مي: الا اقولج حلامي
احلام: هاه
مي: ليش ماتين بيتنا ؟
احلام: بالمشمش
ساره: ليش؟
احلام : منو بيخليني ؟
مي: رمسي ابوج ما بيقولج شي .. ومنها تشوفين نعمه الله وامايه عفرا
ساره: هيه والله فكره
احلام: ماعرف والله.. بشوفه .. بس مب اليوم.. بشوف جي يوم يعم السلام فيه فالبيت وبرمسه ههههه
مي: المهم اتين وتشوفين كل شي فهاذاك البيت بعينج هههههه
احلام: يحتاي والله

عقب طلعن البنات من الحجره ويلسن ويا الحريم فالصاله.. وعقب البنات طلبن من امهن توصلهم البيت الحين لانه اليده بتي العصر ويبن يسيرن يجهزن البيت من ناحية التنظيف والاكل لان اكيد الناس بيون يتحمدولها بالسلامه.. طبعا وصلتهم عليا البيت .. ونزلن البنات الاغراض وسلمن ع امهم ودشن داخل .. وطن اغراضهن فالغرف ونزلن .. وقامت ريم تنظف غرفه يدتها وتدخنها وتعدلها .. وترتب البيت ويا الشغاله اليديده ونجمه .. وسارت عقب وياهن المطبخ ولحقتهن ساروه والتوم.. اما مي سارت عند نعوم فحجرتها واللي كانت صحتها شوي احسن اليوم..

ناعمه: ها ييتوا!
مي: لا مايينا مطرشيلج قرين كل واحد منا
ناعمه تأففت بس ماردت على ميوه: مابقولج شي لانج اكثر وحده اهتمت فيني
مي يلست حذالها ع الشبريه
مي: ومنو قالج انه اهتمام
ناعمه اطالعتها بنظره: عيل ليش اتيني؟
مي: بدافع الانسانيه
ناعمه: اوه خل عنج عاد يا ام الانسانيه
قامت ناعمه من الشبريه ويلست جدام التسريحه ..
ناعمه: يالله شقى غادي شكلي .. ميوه شوفي ويهي مب ضعفان ولونه باهت؟
مي: لا مب ضعفان غزوزج شكبرهن ..
ناعمه: سمي بالرحمن يا الهرمه
مي: يالله الحين انا عيني حاره
صدت ناعمه صوب مي وكأنها تذكرت شي
ناعمه: هي انتي عيونج حاره مب يايزلج.. ماتذكرين ذاك اليوم فاستراليا يوم كنا فالحديقه كنتي تقوليلي ركبج يعورنج ودعيتي عليه وتخرطفت!!!
هنه نقعت مي من الضحك تذكرت هاك الموقف ومارامت تيود عمرها وتمت تنكت ع ناعمه ..
ناعمه: هي اطنزي عليه
مي: والله شكلج شو كان قافط .. هو انتي صح ما طحتي بس يعني بغييتي اطيحيين هههههههههه ..
ناعمه: مالت عليج يا الماصخه
مي قامت من الشبريه ووقفت حذال ناعمه ومسويه عمرها محرجه
مي: اييه انتي بدال ماتقوليلي مشكوره طايحه فيني سب من ييت
ناعمه: بسم الله شو بلاج لبقتي
مي: هي لبقت .. جبريت تراني .. ان قلتيلي مالت عليج مره الثانيه ترا والله
ناعمه: شو والله .. بتظربيني يعني
مي تجدمت من نعوم وحطت ايدها ع جتفها..وكشرت بويها
مي: بشرب من دمج مب الا بظربج

صرخت ناعمه وبعدت مي عنها اللي يلست ع الارض وهي تضحك ع شكل ناعمه الغبي ويبين عليها الاحتراس من مي وكأنها كانت ترمس جد وخذت الرمسه بجديه وعقب ما هدت الحجره تمت مي متربعه فمكانها وهي تتحسس ركبها .. ذكرتها ناعمه بويع ركبها الي من خفت عنهن رضوض الطيحه خاز الالم عنها .. وسرحت وهي تذكر ذاك اليوم اللي طاحت فيه عليها ساروه وكسرتها تمت كم يوم تعري وابتسمت .. ناعمه كانت تشوفها وهي يالسه هاديه وسرحانه .. وتمت تتأمل ملامحها .. أول مره تحس انها تنجذب لوحده من بنات سيف .. غصبن عنها تمت تتطالع ميوه ويوم ابتسمت مي ع ذكرياتها ابتسمت نعوم ..

ناعمه: ها بلاج تتبسمين ..
مي انتبهت لناعمه
مي: شو؟
ناعمه: اشوفج تتبسمين
مي: لا ماشي .. انا بقوم الحين بسير افازع خواتي فالمطبخ
ناعمه: هيه .. زين سيري بلحقكم المطبخ
مي اطالعتها وهي رافعه حايب
مي: هه ماصدق نعمة الله بشحمها ولحمها تفكر تدخل المطبخ ..
ناعمه: ميووه عاد
مي: اوكي اوكي .. يلا انا بسير ونتريااج عاد

طلعت مي من عند ناعمه وهي تضحك عليها .. الحين نعوم بدش المطبخ لا ها الخبر لا يصدق .. ربعت عند خواتها تخبرهن .. لكن ناعمه أبطت عليهن ولا يت .. والكل تمصخر على ميوه يوم انها صدقت ناعمه .. وعقب ما رتبن الاكل سارن البنات حجرهن يتسبحن ..
اما ريم كانت طول الوقت تفكر في الموضوع اللي قالتلها اياه امها ووايد كانت مظايجه منه .. يلست تفكر وتفكر .. راسها عورها بس ما تتحمل اكثر ومالقت شي تفج حرتها وقهرها فيه غير التنظيف .. ونجلت حجرتها وتمت ترتبها وتنظفها..

****

ردت احلام لعزلتها من بعد ما روحن بنات عمتها .. ها الوقت من كل يوم اتم احلام ملانه بكل ما للكلمة من معنى .. ماتعرف شو تسوي الظهر.. الكل راقد .. ومدوي مجابله تيلفزيون الصاله .. وفجر مستحيل تسيرلها وتيلس وياها .. ماتعرف شو تسوي بالضبط.. يلست فحجرتها .. تذكرت اوراق ابوها .. من يت فجر وهو مول مايابلهم اوراق يديده ولا كمل الروايه الهم .. طلعت مفتاح الدرج من كبتها وخذت الاوراق وردت تقراها من اول ويديد ..

احلام: غريبه ابويه فها الاوراق ما ذكر فجر مول .. هين يا فجروه ان ماخليت ابويه يكتب عنج .. لا شوو ابويه .. انا بكتب الجزء الثاني من ها الروايه وبوصف شقى يوم نحن كبرنا وبنات عموه ويانا ويتنا ها الساحره فجر .. لازم اقول لابويه يكتب عنها .. يبين الجانب الشرير فيها ..

دشت مديه الحجره وهي تسمع احلام ترمس عمرها بكل قهر وتجلب فالاوراق .. ضحكت عليها ..

مديه: شو تخبلتي؟
احلام لفت ع مديه ورجفت ايدها ..
احلام: الله يغربلج زيغتيني قفلي الباب عن تنش امايه وتشوف سر ابويه
مديه ع طول قفلت الباب.. ويلست حذال اختها
مديه: تعالي ابويه من زمان ماقرالنا شي
احلام: ترا من يت ها البومه البيت طفر ابويه وماقام ييلس ويانا وايد.. يتحرانا بنيلس وياها ..
مديه: فديت ابويه صدق متولهه عليه ..
احلام: يوم بيقوم العصر بنذكره عن سالفة الروايه .. بس عاد هب ترمسين جدام اميه
مديه: انزين ادري شو قالولج غبيه..
احلام: يمكن ليش لا ..
مديه: جب غبيه انتي مب انا

طاحت احلام ع السرير والاوراق فايدها .. وتمت تقرى بسرها .. اما مديه طلعت بوكس العابها وتمت ادور شي تلعبه .. طلعت لعبة الثعبان والسلم ..

مديه: احلااام ماشفتي الزهر وين
احلام: اي زهر بعد
مديه: ها مال اللعبه اللي يفرونه
احلام: مادري .. دوريه فكرتونج

مديه تمت ادور بعدها لين حصلت وحده .. وسارت عند احلام
مديه: ماحصلت غير زهره وحده .. عادي .. يلا نلعب
اطالعتها احلام وردت تتطالع الاوراق المأساويه اللي فايدها ..
احلام: انزين صبري برد الاوراق فالدرج.. ماروم اقرى اكثر .. ها الجزئيه كلها فيها عن الحرب .. قلبي عورني ..
مديه: يلا انزين ..

وفرشت مديه اللعبه ع سرير احلام وتمت يالسه ع الارض واحلام طاحت ع بطنها فوق السرير وبدن يلعبن ويسولفن .. وهنه تذكرت مديه شي سامعتنه قبل كم يوم ..
مديه وهيه تفر الزهره: تعرفين احلام مره سمعت عموه عليا ترمس عن شي بس مافهمته زين
احلام: شو هو
مديه: ماعرف كانت ترمس امايه سلامه .. تقولها اون هي بتخبر ريم بروحها ومحد يعرف وامايه قالتلها خل اتي عندي بقنعها
احلام كان دور اللعب عندها .. وطت الزهره وتمت تشوف مديه بتركيز
احلام: انزين وعقب
مديه: ماشي عقب .. ماعرفت شو يرمسون
احلام: ماقالو شي بعد
مديه: امبلا.. بس ما عرف شو بالضبط لكن عموه عليا قالت انه عمي راشد شي سوا فبناتها الباجيات
احلام: شو بيسوي يعني؟؟؟؟
مديه: ماعرف والله .. هي قالت راشد كمل ع بناتي
احلام قامت من طيحتها ويلست ع السرير متربعه..
احلام: شو يعني؟
مديه: ماعرف
احلام عقدت حياتها .. وتمت تفكر ..
احلام: انزين يبون يقنعون ريم .. وعمي راشد بيكمل ع البنات .. شو لغز هوو
مديه: شدراني .. يلا انتي لعبي

قبضت احلام الزهر وفرته وحركت ع العدد اللي طلع فالزهر وبالها مب عندها .. تفكر فالرمسه اللي قالتها مديه .. شو ممكن تكون .. مديه صغيره مابتستوعب كل كلمه قالوها .. اكيد جزء من النص مفقود من بين اللي وصلته لاحلام .. بس احلام تبى تعرف شو ها المفقود .. وشو السالفه بالضبط ..

****

ع الساعه 5 العصر وصلت ام سيف البيت و اللي كان يايبنها نايف وامه ..
كل البنات طلعوا يستقبلونها الا ريم .. اللي اول ماشافت سياره نايف داخله ركبت على طول وسارت غرفتها .. تمت يالسه في الغرفه واقفه عند الدريشه وتشوف بيت عمتها .. اللي كانت غرفتها تطل عليه .. صح البيت بعيد نسبيا بالنسبه للي بيروحله مشي لكن البيت ينشاف لانه مافي بيوت تخبي الرؤيه ما بين البيتين اللهم ند مرتفع ومن بعده هيّل وهو مكان نازل شوي من الند يقطعه شارع ومن بعده بيت مريم .. تمت ريم تتطالع البيت ودموعها تطيح لا ارادي لمجرد فكره الخطبه بس ..
وطت عيونها ولقت تحت في الحوي سيارة نايف واقفة .. وأهنه بدت دموعها في التزايد ..

دخلت ام سيف البيت وطاحت في غرفتها والتمن البنات حواليها .. كان نايف واقف بعيد ويشوفهن وهن يسولفن وياها .. نزلت ناعمة هالوقت ودخلت عليها الغرفة تسلم ..
ناعمة: هلا والله عمتي اجر وعافيه ماتشوفين شر
ام سيف: الشر ماييج
كان ويه ام سيف وهي ترد على ناعمه زعلان .. عتبانه عليها انها ماسالت عنها ولافكرت فيها .. لكن في نفس الوقت ماتلومها .. مرت ولدها من استوت وهي جيه عيالها ماتسال عنهم بتسال عن عمتها!! ..
مريم: اشحالج ام مايد قالولي البنات انج تعبانه
ناعمة: هي والله يا مريم تعبانه من ييت كله احس بدووخه
مريم:يبين اصلا ويهج مصفر
ناعمة: هو اليوم انا شوي احسن الحمدلله بس من ييت وانا تعبانه
ام سيف: الله يعافيج ان شا الله .. عيل وين ريم ماشوفها؟
مهره: اكيد سارت تتسبح لانها من الصبح فالمطبخ وعقب يلست تنظف وتعابل في البيت وحجرتها ..
ام سيف: فديتها الغالية
ابتسم نايف ع طاريها وهالمره مي لاحظته .. بس ماعرفت تفسر هالشي ..
مريم: انزين نايف قوم سير البيت انته انا بيلس ويا امك
ام سيف: لا لا قومي سيري انتي وياه بس موازرتني فالدختر.. انا ماعليه شر ان شاء الله ..بناتي عندي
مريم: لا امايه مايستوي لازم اتم عندج
ام سيف: و بناتج مابيون ؟
مريم: لا لا انتي يايه بترتاحين باجر ان شا الله بيونج ..
ام سيف: عيل قومي انتي سيري ويا ولدج ولاتحاتيني
مريم: بس يا امايه
ساره: عموووه لاتحاتين خلاص .. انا بيلس عند راسها مابخليها تحتاج شي
مي: الا انتي بتيلسين عند راسها تصدعيبها من الرمسه

اضحكت مريم ع بنات سيف .. وضحكت اليده .. اما نايف ماكان منتبه للحوار كان يلعب بتيلفونه وذهنه شارد ..

ساره: امايه عفرا تحبني اصلا وماعورها قلبها ذاك اليوم الا لانها مارمستني
مي: يالله عاد انتي ..
مريم: هههه خلاص اطمنت عيل امايه .. بناتج بيونسنج اكثر مني ..خلاص عيل بقوم اسير ..
ام سيف ابتسمت: سيري بيتج وتوكلي على الله
مريم: يالله عيل نايف .. ان شا الله باجر بييج امايه
ام سيف: ع خير ان شا الله
مريم: يالله عيل في امان الله ..

طلع نايف يشغل السياره .. وطلعت مريم ووياها مي توصلها عند الباب ..
مريم: مي فديتج ردوا ع تلفون البيت يوم بتصل لاتخلونه يدق ومحد يرد عليه بتم احاتي
مي: ان شا الله عموه لاتحاتين ويوم محد بيرد خلي البنات يدقلج ع تيلفون وحده من خواتي
مريم: خلاص عيل ..
مي: عموه سلمي ع البنات
مريم: الله يسلمج .. فمان الله
مي: الله يحفظكم

طلعت سيارة نايف من البيت ويا الافراج لريم اللي بعد ماتاكدت انهم روحوا دشت تتسبح ع السريع ولبست ونزلت ع طول عند يدتها تسلم عليها وتتحمدلها بالسلامه وتمن البنات ملتمات ع يدتهن ويسولفلها وناعمه ها المره مشاركتنهن اليلسه .. ويا سيف قبل المغرب وكمل وياهم اليلسه والسوالف..

****

كان يتجول بسيارته فالحاره .. مب طايق ها الروتين اللي فحياته .. قبض التيلفون واتصل على شركة الطيران يشوف الحجوزات عندهم .. فكر فسفره للبحرين ويا ربعه يقضون فيها كم يوم دام عندهم كلهم اجازات ..
من غير ما يحس بعمره شاف انه بركن السياره فكراج البيت .. دش البيت ويلس شوي ويا امه وابوه .. مل من سوالفهم .. وقال بالمره بيمر على يده ويدته يسلم عليهم لانه حدد السفره بالثلاثا وما بيتفيج يخطف عليهم ..

سار بيت بوراشد .. مالقى حد فالحوي..اطالع ساعته اللي كانت تشير لثمان فليل .. طبيعي الكل داخل البيت .. وتجدم بخطوات رزينه وهاديه .. ويوم ياي بيركب الدري اللي جدام البيت .. انتبه لشخص عاطنه ظهره ..

تحنحن يبى يلفت نظر ها الشخص .. ولما التفتت .. رفع سلطان حياته ..

سطان: هيلوو
فجر اطالعته ومعقده بحياتها .. كانت يالسه ببجامتها وفاتحه شعرها الاشقر اللي يوصل لين جتوفها ..
سلطان تم اكثر مركز بعيونه: هاي
فجر ها المره رفعت حياتها باستغراب
سلطان: heah you..do u know speak arabic
فجر ابتسمت .. ودار فبالها شي يمكن يغير من مزاجها المتعكر شوي ..
فجر: ooh..no sir I don’t
سلطان قام يمسح ع يبهته : ولييه هاي شقى بفهمها .. انا بروحي يالله يالله اطلعلي كم جمله بالانجليزي .. شو بقولها الحين
فجر: sir can I help u?
سلطان يرمس عمره" وين لقوها هاي قوم خالي .. اسميها حلوه .. "
سلطان:I want my uncle
فجر: whose ur uncle?
سلطان: محمد .. ها محمد brother ماما
فجر:..so you are sheikha`s son
سلطان: مادري شو تخربطين .. بس قلتي اسم اميه .. yes yes شيخه my mother ..
فجر فطست من الضحك .. وسلطان يطالعها وهو مستغرب ..
سلطان: الله يغربلها قامت تضحك عليه .. قومي قومي عن ويهي .. سيري قوليلهم اني برع
فجر: هيي انت ليش تسب
سلطان تلفت على ورا ..
فجر: ايه شوفني لما اكلمك
سلطان رد يشوف فجر
سلطان: هاا
فجر: ليش تسب؟
سلطان: وانتي منوووو
فجر: موو شغلك
سلطان: وليش قاصه عليه؟
فجر: بس حبيت اغير جو شوي
سلطان: لاوالله .. انتي منوو.؟ شو تشتغلين عند قوم خالي ولا شو بالضبط؟
فجر ضحكت
سلطان: ما بتقولين؟
فجر: هههه اوكي انا فجر اخت عبير زوجة محمد ..
سلطان تم يطالعها من فوق لتحت .. مستغرب من حالها .. هي وين وعبير وين !
صح فيه شبه .. بس هاي انسانه كشفه لييش!!
فجر: شفييك اطالعني جذيه
سلطان: لاا ماشي ..
فجر: انت منو؟
سلطان: انا سلطان بن سالم
فجر: انزين وشعرفني بسالم
سلطان: هي صح .. سالم ابويه
فجر اطالعته وهي رافعه حايب: شو تستعبط
سلطان: هههه لا ..
فجر: الي فهمته منك انك ولد شيخه ..
سلطان: هيييه عليج نور .. ها سالم ريل شيخه .. ابويه وامايه .. تشرفنا ..
فجر بتملل: دمك خفيف ..
سلطان: ماعليه .. لزوم ترطيب الجو ..
فجر: شدعوه ..
سلطان: ماعليه .. ماتنلامين .. ماتعرفيني ..
فجر استغربت من جرأته ..
سلطان: انتي من متى هنه؟
فجر: يعني صارلي مده ..
ماعرفت فجر ليش حدسها نبهها من انها ما اطول أكثر ..
اطالعته وابتسمت: تشرفت بمعرفتك .. الحين بروح .. عن اذنك
سلطان تم يطالعها وهي مروحه : اذنج معااج ..
وردت توقف واطالعته: لا تقول لحد انك كلمتني
سلطان تم ساكت ..
فجر: اشفيييك!
سلطان: لا ماشي .. اوكي ما بقول لحد ..

وروحت عنه فجر .. وهو تم واقف عند الباب .. ورد يتشاور يدش ولا لا ..
لا .. ما بدش .. كافي اللي شفته اليوم .. قبل السفر بييهم ..
وطلع سلطان من البيت .. وركب سيارته وسار القهوه عند ربعه ..

******************
(الثلاثا) 10اغسطس 2004
******************

العيال كانوا كلهم ملتمين عند يدتهم يتريقون وياها.. تعودوا ينشون من وقت لانه خلال ها الايام العرب كانوا اييونهم حد الظحى وحد العصر وحد فليل فعشان جي ما كانن يطولن فرقادهن وراحتهن..حتى ناعمه قامت تشاركهم ها الايام فاليلسه بس عشان تستعطف اللي كانت طالعه من العمليه وراده البيت وهي شاله فخاطرها من ناعمه..صح عادي عند ناعمه بس شافت انه المديح كله يسير لبنات عليا وهي مالها شي مول.. فلازم كان تبين دورها خلال ها الايام لين ماتخف ييت الناس ..

ومن بين سوالفهم ..

جاسم: ريييموه انتي متى بتردين ترقدين فوق
ريم اطالعته: لييش؟
جاسم: بس انتي قولي
ريم: ماعرف .. يوم بتصح امايه
ام سيف: انزين ريم انا بخير الحين الحمدلله .. ردي رقدي ويا خوانج يبوج.. ونجمه بترد ترقد عندي ..
ريم: لا لا ماعليه خلها نجمه انا ابا اتم وياج ..
مايد: جسوم انته شو تباها ريمان .. تراك ترقد عندي
جاسم: انته تعفن رقاد وماتنش اذ انا عورني شي
ريم وهي زايغه: ليش شي عورك !!
ساره: جسوم ترانا نحن كنا وياك ..
ريم: ساروه شو بلاه جسوم
مي: ماشي بلاج جي منطره عيونج.. ياه هبوط سكر خفيف فليل ..يانا الحجره وعطيناه الدوا..
ريم حطت ايدها ع قلبها وهي متوتره .
مايد: متى ها
جاسم: قلتلك كنت منخمد
ام سيف: ريمان امايه ردي رقدي عند اخوج هو يحتاجلج اكثر عني
جاسم كان مطنش الرمسه ويلس ياكل ويسولف ويا مايد ويخبره كيف تعب وتم يوعيه وميود ما كان حتى يحس بأنه جاسم كان تعبان..
ام سيف: خلاص ريمان ردي رقدي عند خوانج
ريم: لا امايه.. برقد عندج .. لكن جاسم من اليوم بيرقد فالحجره وبترقد وياه ساره
ساره: هي امايه عادي عندي .. انتي بعد فحاية ريم
ناعمه: انزين عموه انا برقد وياج عادي
ام سيف: لا لا لا خل عنج .. انتي الا اشد من ولدج .. نجمه ابركلي منج
حاست ناعمه بوزها وهي منقهره .. وطنشوا الكل السالفه وتموا يسولفون فامور ثانيه..
ساره: الا اقول نعوم .. عفروه بنتج وين مالها شوف من امس
ناعمه: سارت تيلس عند بنات خالتها كبرها وتتونس وياهن
مايد: فكه
ناعمه: ميووود
ساره: بس بس انزين خلاص ..
ام سيف صدت ع مي اللي كانت قابضه بيضه بايدها وتقشرها
ام سيف: ميوه انتي متى بتسيرين الجامعه ؟
مي: ليش دار عبالج ها السؤال يعني
ام سيف: سمعت ابوج مساعه الصبح يقول انج طالبتنه فلوس تبين تتشرين للجامعه..
مي: هييه نسيت.. خلالي فلوس عاد؟
ام سيف: هي بتلقينهن فالسده هناك فحجرتيه
مي: هي زين يوم مانسانا.. امس فليل يلست وياه ويالله يالله رمت اطلبه فلوس
ام سيف: وشحقه بعد ماترومين .. مب ابوج هو والمفروض يكد عليكن
ساره: هيه والله .. المفرووض .. الا ميوه اونها تتلوم تطلبه.. انا كنت بقوله عادي بس انا مخلصه اغراضي ..
ريم: انتي ماتنسين عمرج تراج مول
مهره: عيل نحن بعد بنقوله يودينا نتشرى للمدرسه
ام سيف: زين قولن له ما بيردكن هو .. انزين ميوه ما رديتي متى بتروحين الجامعه؟
مي:عقب اسبوعين امايه
ساره: امايه ترا انا بسير وياها
ام سيف: ليش بعد تسيرين
ساره: بس جيه وحليلها ماتدل بسير وياها حرام اختيه الصغيره اخليها بروحها
ام سيف: يالله يا انتي .. ماعليها شر هيه بتيلس ويا ربايعها انتي يلسي هنه
طنشتها ساروه وتمت تطالع مي وتقولها بسير ماعليج.. بالنظرات طبعا..
ام سيف: انزين ميوه انتي شو بتدرسين
مي: انا باخذ اداره نفس ساروه
ام سيف: هيه زين الله يوفجكن
ساره: انا سنتين بالكثير وبخلص.. و ريمان بتفتك هالسنه اخر سنه وبتخلص..صدق الايام تربع
ناعمه اطالعت ريم: اقول ريم بتشتغلين عقب ؟
ريم: ماعرف بس انا كنت اتريا اللحظه اللي اخلص فيها عشان اشتغل واعاون امايه واردلها شي من اللي عطتنا اياه
ناعمه: وامج بتتقاعد ؟
مي: اميه بعدها ماوصلت سن التقاعد
ام سيف: هي في أي مدرسه تدرس
مهره: اللي انا ومها فيها ..
ام سيف: زين زين عيل بتلقنها كل يوم
مي: هي والله يا حظهن

حست ام سيف بنغزه ففوادها وهي تتطالع مي اللي كانت صدق ترمس من خاطرها.. ويبين من ويها شكثر هم يشتاقون لامهم.. اللي هي ام سيف حرمتهم منها .. ما تبى تحس بتأنيب الضمير لانه هي يدتهم ومن حقها بعد تحظابهم على اخر عمرها .. قامت من السفره تبى تسير حجرتها وريم قامت وياها تعاونها ع المشي .. اما البنات حد سار يشوف التيلفزيون وحد تم يالس يغصص بنعوم..

ومي .. ماعرفت ليش ها الوقت حست انه في داخلها شي .. اشتياق رهيب لامها ولاحلام .. كل ما تيها ها الاحاسيس تحب تنعزل بروحها .. سارت عنهم فوق ودخلت حجرتها ويلست ع السرير .. اطالعت الكوميدينو .. طلعت منه النوته مالتها .. تمت تجلب فيها وتقرى خواطرها اللي تكتبهن من فتره لفتره ..
قبضت القلم وطلعت شي فخاطرها..

في لحظة
بدت من ظلام وليل
بـ ريحة عطر وفوعة هيل
وهدوءٍ مسكنه في الطير
غرقت بين بحر وسيل

في لحظة
تناظر عيني القمره
سما ونجوم في السهره
وصوت أعيش على ذكره
وسود عيون فدى نظره

في لحظة
بدت سهرة أحلامي
من بقايا ذكرى أيامي
بديت أغمض أجفاني
تغطيني رموش العين
أراجع ذكريات أمسي

في لحظة
بين ذكريات ليلي واحزاني
بين دمع بلل أعياني واجفاني
ودمع سال من عيني على هـ الخد
وبين ذكرى مرّت على بالي ولمسة يد
وبين دمعة حسبت "في لحظة"
إنها ...... إنها .. حد*

ختمت مي خاطرتها بتنهيده .. في ها اللحظات ما فارقتها امها من بالها ولا احلام .. تمنت الأيام تردها لورى .. عاشت احلى الذكريات بين أهل أمها ..
لكن الحين .. فبيت ابوها .. ماتعرف شو المجهول يترياهم .. تمنت من الله انها تستانس فها البيت أكثر .. ع الاقل تقدر تتناسى ايامها القبليه ومرحها الدايم ويا أحلام ..اللي مالها غنى عنها ..

****

فجر كانت يالسه فحجرتها .. وطايحه ع السرير وتجلب فايدها مجله .. ويدور فبالها الموقف اللي كان ويا سلطان من ثلاث ايام.. شكله رايقلها وايد.. طبيعته وهيئته حلوه .. بس شخصيته كيف ! ..
الكل اهنه يشوفها بعدها غريبه .. وما يرمسون وياها .. شبابهم حتى من يشوفونها يروحون .. بس ها خذ وعطى وياها ..
يا ترى انته منو ..
غير انك سلطان .. انت منوووو!!
من ذاك اليوم ماطبيت ها البيت .. ليش انته بعد تتجنب اتي هنه مثل الباجين نفس ماتقول احلام!

وطت المجله اللي كانت بايدها .. ووقفت جدام التسريحه ترتب نفسها ولبسها .. وشعرها .. وطلعت من الحجره .. توجهت للصاله وشافت عبير اختها ويا عليا .. يلست وياهم ..

عبير: فجر محمد بعد شوي بيي
فجر: اوكي.. شنو اسوي
عبير: روحي لبسي حجابج وغيري ها اللبس..خلاص عاد..
فجر: عبير انتي تعرفين اني مو متحجبه .. ولزمتي علي البس الحجاب وانا فالمطار ولبسته .. خلاص خليني ع راحتي بلبسي ..
عليا: فجر حبيبتي .. نحن بعد نبغي نصونج ..

فجر اطالعت عليا بنص عين وقامت من مكانها وردت غرفتها ومبين ع شكلها انها معصبه.. اما عليا تلومت وعبير موطيه راسها ..

عليا: عبير .. انا ماقصدت شي .. شبالاها اختج ماتتحمل..مره زينه ويايه وعشره لا..
عبير: ماعليج منها يا عليا .. فجر غلطانه .. وانا خلاص مو قادره اتحمل اكثر
عليا: الصبر يا عبير مالج غير الصبر.. سيري طالعيها
عبير: لا .. خليها .. مو كل شي تبيه بتسويه ..
عليا: هي جي من صغرها! ها طبعها
عبير: اييه .. مشوبتلنا روسنا ها الفجر من هي ياهل
عليا: الله يعينكم ..
عبير: شو بنسوي .. بتظل اختنا الصغيره .. هي الحين عايشه ويانا وانا مابا اقصر عليها فشي .. والله حتى ابديها على بناتي بس عشان ماتحس بالتقصير
عليا: عبير بس بعد بناتج يبن اهتمامج .. لا تصرفينه كله لراحة فجر.. بناتج اشوف حالهن مايسر .. متمللات من الوضع .. وانتي جي بتكرهينهن خالتهن
عبير: زين انا شسوي .. فجر ماقدرلها .. واحلام الله يهديها ماتقدر اللي انا اسويه..
عليا: ترا يشوفن قمتي تفضلينها بكل شي وهي بعد ماتقصر فيهن ..
عبير: الله يعيني على ما بلاني .. ماعليه .. كلهن كم اسبوع وتروح الجامعه.. بس واللي يسلمج يا عليا رمسي احلام ومدوي .. قوليلهن لا يتحرشن بخالتهن .. هي يوم الواحد يطنشها يفتك من شرها.. طفروني والله من كثر مناجرهم من اسبوعين وانا اكبت فصدري .. بس خلاص ماقدر اتحمل..
عليا: ماعليج يا عبير.. لو اني دوم ارمسهن بس ها المره بحاول وياهن بشوفهن
عبير: مشكوره الغاليه
عليا: ولو .. هاذيل بناتي بعد

ابتسمت عبير لعليا .. ودها حد يشاركها الهم اللي هي فيه ويشل عنها شوي من الحمل .. ماتقدر توفق بين بناتها واختها .. كلهن متمردات عليها ومب عارفه شو تسوي ..يمكن عليا الها تأثير ع البنات .. وتقدر تخليهن يهدن شوي ..

****

سلطان راد البيت من العصر.. صعد ع طول حجرته .. السفره الساعه عشر وهو بعده ماجهز شنطته .. طلع شنطة السفر من الكبت وحطها ع الشبريه .. طلع كم كندوره وطلعله بناطلين وقمصان .. طلع من الحجره وسار يزاقر على امه

شيخه كانت فالصاله تحت وتسمع مزاقر حد من عيالها .. ووقت ماهي كانت بتقوم دش عليها سلطان الصاله

سلطان: يالله ماتسمعيني ازاقر
شيخه: امبلا وييت بقوم انته دشيت
سلطان: المهم اميه انا بسافر اليوم تراني
شيخه: بتسااافر!!
سلطان: هي بسير البحرين
شيخه: كم يوم
سلطان: اسبوع بالكثير .. المهم امايه.. بتلقين ثيابي محطوطه ع الشبريه.. رتبيلي الشنطه وحطيلي الاغراض اللي بحتايهن فالسفر
شيخه: خلاص وليدي ما يهمك.. متى طيارتك
سلطان: الساعه عشر
شيخه: والحين وين بتسير
سلطان: بسير اسلم على شوابج وعقب بسير عند ربيعي

شيخه ابتسمتله .. طلع سلطان من البيت .. اما شيخه صعدت فوق وهي مستانسه ع الاقل بدى سلطان شوي يفتكر بأهله ويخبرهم عن سفره ويسلم بعد .. شي طيب والله ..
اما سلطان ركب سيارته ووقف جدام بيت بو راشد .. نزل يشوف منو فالبيت .. حصل يدته وعليا يالسات فالحوي يتقهوين.. سلم عليهن وسأل عن يده بس مايدروبه وين .. وصى يسلمون على يده لانه بيسافر وشربله فنيان قهوه وطلع من البيت وركب سياته مره ثانيه ..
قبض تيلفونه واتصل ع رقم بدريه ..

بدريه: هلا والله
سلطان: اهلين عمري .. شخبارج
بدريه بصوت واطي: الحمدلله تمام .. انت شخبارك
سلطان: الحمدلله .. بلاج تصاصرين جي
بدريه:ممم ترا ريلي فالحمام
سلطان: ويوم ريلج عندج شله رديتي ع التيلفون
بدريه: ولهانه عليك كيف ماتباني ارد.. وبعدين هو داش يتسبح يعني مطول
سلطان: تخاطرين واايد تراج
بدريه: كل شي لاجلك يهون
سلطان: والله
بدريه: عندك شك ..
سلطان: ههههه لا ماعندي.. بس ريلج متى يا؟
بدريه بضجر: امس ياي ..
سلطان: اها.. الا نسيت اقولج اليوم تراني مسافر
بدريه: بتسااافر .. من متى ها الكلام؟
سلطان: من كم يوم
بدريه: والحين ياي تقولي
سلطان: يعني لو قلتلج من قبل شو بتسوين .. بتين تسلمين عليه
بدريه : هي ليش لا
سلطان: والله!
بدريه بتردد: مادري مادري
سلطان: ماعليه عقب اسبوعين برد من السفر وبشوفج عاد بتين تسلمين عليه ولا
بدريه: هاا..
سلطان: اللي سمعتيه
سمعت بدريه انه صوت الرشاش وقف .. واداركت عمرها

بدريه: حبيبي شكله عدنان خلص سبوح يلا بخليك
سلطان: خلاص يلا باي

سكر سلطان التيلفون وفره حذاله سار القهوه عند ربعه اللي كان متواعد وياهم ويلسوا شوي يسولفون .. وعقب رد البيت يلس شوي ويا امه ..

****

فليل في بيت بو راشد .. عليا كانت يالسه فحجرتها من بعد ما سكرت عن ساره ومي..

يلست تشوف صور عيالها .. وهي تبتسم .. وبعدين يلست تشوف الصوره اللي كانوا متصورينها جماعيه في استراليا وتمت تضحك ع حركاتهم فالصوره ..
وركزت على الكبيره امبينهم ..
ريم ها اليومين ماترمس امها وايد .. اللهم السلام وتسكر وتتعلث بيدتها والشغل..تتهرب من الرمسه ويا امها ..
عليا هامتنها وايد ها البنت وخصوصا عقب ما رفضت ولد عمتها .. ماقدرت عليا تقنعها .. ولا حد يقدر يقنعها الا هي نفسها تقدر تقنع عمرها بنايف .. للحين ما ردت خبر ع مريم .. والسالفه كملت شهر .. وعليا مستحيه وايد من مريم.. اللي ردت تتصللها وقالتها عليا انها ماحصلت الوقت المناسب تقول لبنتها..

تمت تفكر شو موقف مريم يوم بتقولها انه ماشي نصيب..شكلها شاريه بنتها وولدها يباها.. بس ريم ..
ليش يا ريم يا بنتي تقطعين نصيبج .. خليفه ولد اختيه رفضتيه من قبل وقلتي حسبة اخوج ومشيناها لج .. بس نايف ليش !
نايف مايخصه فسيف وانتي تدرين بها الشي ..
يالله يا رب تصلح حالها وترزقها الريل الصالح.. يالله يا رب..

طاحت دمعه محرووقه من عينها .. فيها كل اليأس والضيج على الحال اللي وصلتله ريم .. ريم بنتها البجر .. اللي عندها فالدنيا ..

" يا ريم نايف شارنج ويباج .. ليش مب مقتنعه به .. ولا اصلا العرس بكبره شايلتنه من بالها ها البنت .. يا ربي شو اسوي .. "

كانت كلمات عليا هاي تجول بينها وبين نفسها .. لكنها كانت بصوت مسموع .. بصوت سمعته أحلام الي كانت واقفه عند الباب ..

أحلام: عموووه ..
عليا بسرعه التفتت لاحلام ومشت دمعتها ..
قربت منها أحلام ويلست حذالها ..
أحلام: اوه هاذي صورة النساء الصغيرات ويا اخوهن المصون
عليا: ههههه هيه .. ها فاستراليا
أحلام: الخايسات ما راوني صورهن
عليا: حليلهن ردن ع طول للمستشفيات .. زين منهن ينا الجمعه اللي طافت..
أحلام: هي حليلهن .. بس زين يوم الله سلم عيوزهن ..
عليا: هيه حليلها ..
أحلام: عموه شو فيج مكتأبه؟
عليا: ها .. لا ماشي ..
أحلام: عموه ايبين ع شكلج
عليا: لا غناتي مافيني شي .. بس كنت احاتي ميوه
احلام: ليش بلاها ميووه؟
عليا: لا ماشي .. بس توها تقولي انه عقب اسبوعين بتسير الجامعه..مب اسبوعين بعد 11 يوم بالضبط
احلام: فديت ميوه .. بس ماعليج ساروه واسما بنت عمتهن وياها ..
عليا: هي .. ها اللي مريحني شوي
احلام: لا ماعليج هاي ميوه والاجر على الله .. بتمشي عمرها هناك حتى بدون ساروه
عليا: هههه فديتهن.. بس صدق زايغه عليهن من ها البني الخايسات..وايد نسمع رمسه عن بنات الجامعه ..
احلام: عموه الجامعه فيها الزين والشين .. فيها من امثال بناتج وفيها من امثال غيرهن .. لاتشلين هم انتي .. وشرا ما يقولون الطيور على اشكالها تقع ..

عليا اطالعت احلام ومسحت ع شعرها وضمتها الها بحنان .. واحلام وهي فحضن عمتها يتردد فبالها كلام عمتها أول ما دشت الحجره ..

السالفه مثل ما شكت فيها من اول ماقالتلها مدوي عن اللي سمعته .. وتأكدلها الخبر .. نايف ولد مريم يبى ريم .. واللي ماكانت تعرفه احلام انه ريم رافضه ها الخطبه ..
من متى ها السالفه ! والبنات يدرن والا؟ لا ماعتقد يدرن كانت مي ع الاقل لمحت او قالتلي شي ..! اسأل ميوه ولا ؟
بس ليش ريم مب طايعه .. من رمسة البنات عن ولد عمتهن .. الريال شكله وايد طيب واوكي ..
انا مابروم اسوي اي شي .. خواتها بيقدرن يقنعنها ! هاي ريم محد يقدر يأثر عليها.. بس لازم اخبر مي قبل ما عموه تردهم .. عموه شاله الهم بروحها.. لازم نريحها شوي ..

قطع عليها حبل ها الافكار صوت عليا ..

عليا: احلام قومي بنسير عند امايه
احلام: مم عموه صبري .. بغيت اقولج شي
عليا: شو الغاليه
احلام: عموه هدية ميوه خاست عندنا .. من متى شارينها وما وديناها
عليا: ههههه انزين يوم كانن هنه ليش ما عطيتيها
احلام: لا عموه انا حسبتها صح .. ميوه اقترحت عليه اسير عندهم .. وانا قلت ابويه يمكن ما بيخليني .. وتذكرت سالفة الهديه .. وجي بقول لابويه يوديني عند ميوه عسب الهديه
عليا: زين حلوه الفكره
احلام: هزرج بيطييع؟
عليا: متى ابوج ردكن فشي يعني
احلام:هههه عاد انا قلت يمكن ما يخليا نسير بيت سيف عسب جي
عليا: لا ماعليج وان ماطاع انا برمسه
احلام: اوووكي .. يلا عيل خلنا نقوم نسير عند امج
عليا: يا الشيطانه مب امج يعني
احلام: خخخ فديتها عيوزنا .. بناتج الحين عندهن عيوز غير عيوزنا .. يلا نسير

ضحكت عليا ع رمسة احلام وطلعن من الحجره وسارن عند ام راشد وتيلسن وياها..

****

مي وساره يالسات فالصاله تحت يلعبن ورقه.. يتهن ريم اللي كانت طالعه من حجرة يدتها من بعد ما عطتها ادويتها ولحفتها عسب ترقد ..
يلست شوي ويا خواتها وتمت تضحك عليهن وهن يجادلن بسبب الورقه .. يتهم نعوم وشافتهن يلعبن ويلست تشوفهن ..

مي: ها ناعمه ماتبين تلعبين؟
ناعمه: لااااحشى عليه .. مره لعبت وتبت من عقبها
ساره: جي قمار ثرج لعبتي عسب اتوبين
مي: هههههههه شكلها جي
ناعمه: لله مب قمار .. لعبتني غش والغش شرا القمار
ساره: الله واكبر ..
ريم: ياالله دوري نعوم بنلعب وياهن
ناعمه: مافيها حكم
ساره: لا مافيها تعالي.. نلعب كريزي..
ناعمه: شو ها كريزي بعد
ريم: الكرت العادي نعوم .. له عدت تسميات
مي: ههههه وحليلج يا ناعمه ..
ناعمه: حلج حلول.. يلا يلا انزين وزعن ..

ويلسن ثنينتهم ع الارض ووسعن مي وساره الدايره وقامن يلعبن .. نزلن مها ومهره وشافن البنات يلعبن ويلسن حذالهن مها يلست ورا نعوم تشوف اوراقها ومهره حذال مي .. تقوم مها وتخبر خواتها عن الاوراق اللي عند نعوم وبجي تعاونن ثلاثتهن وكله يغلبن ناعمه لانه ورقتها مكشوفه الهن ..

وعقب حطوا العشى ويلسوا البنات ع السفره يتعشون .. ريم شبعت بسرعه وترخصت من اليالسين وسارت حجرة يدتها .. يلست ع طرف الشبريه وهي تشوف يدتها .. ولهت على امها من متى مارمستها وايد .. قبضت تيلفونها وقالت بتتصل فيها واذ فتحت الموضوع ما بترمس عنه .. بس تبى تسمع سوالف امها ع الاقل ..

عليا: هلا والله بريمان..
ريم: اهلين اميه .. شحالج
عليا: الحمدلله بخير غناتي
ريم: شو مسوييين
عليا: والله ماشي .. يالسين.. انتوا اخباركم واخبار اخوانج ويدتج
ريم: الحمدلله كلنا بخير ..

ريم ماعرفت شو تسولف ويا امها .. بيظل الموضوع عالق امبينهن وغصبن عنها لازم تفتحه ويا امها .. ام سيف انتبهت وهي تسمع حس ريم .. لفت ع ينبها اليسار .. وردت تلف ع ينبها اليمين .. ريم كل شوي تطالع يدتها .. لكن ام سيف تمت هاديه وماصدرت اي صوت .. اللي خلى ريم تظن انها راقده ..

عليا: ليش ساكته ريمان؟
ريم: ها .. ماشي .. ولهانه عليج
عليا: وانا بعد فديتج..
ريم: انتي ليش ماتسولفين مثل عادتج!
عليا بتردد: مم ماعرف.. بيظل بينا موضوع
ريم: اميه
عليا: يا ريم يومين امهلتج فيهن تفكرين ع راحتج.. لازم ننهي الموضوع..
ريم: وانا نهيته وقلتلج مب موافقه
عليا: يا ريم .. الريال ما يعيبه شي
ريم: اميه خلاص الله يخليج ريحيني ..مابا الصداع يردلي..
عليا: شو يعني بتمين كل مره تتحججين بالصداع.. انتي لازم ارد اسويلج موعد ويا دكتورج ..
ريم: يوم تيبون طاري العرس اييني الصداع والا يوم تفكوني من ها السوالف ترا انا بخير
عليا: ريم.. حطي الرحمن بصدرج وانا مابا الا مصلحتج.. ولد عمتج شارنج.. وعمتج ماتبى غيرج حرمه لولدها.. ليش تضيعينهم؟؟
ريم: اميه الله يخليج خلاص قولي لعموه اني مابا ولدها لاتعشمينهم بموافقتيه..انا مابا العرس.. انا احاتي جسوم .. منو بيرعاه لو انا عرست .. وبعدين خواتي هنه انا مسؤوله عنهن.. خلاص لاترمسوني فالسالفه
عليا: الله يهديج يا ريم ..
ريم: خلاص اميه .. بخليج انا الحين.. ويليت مره ثانيه يوم برمسج ماتفتحيلي ها السالفه
عليا: كيفج .. يلا فمان الله
ريم: مع السلامه ..

سكرت ريم التيلفون .. وطاحت حذال يدتها اللي لين احين ماصدرت اي صوت يدل على انها مب راقده .. تمت تفكر فامها وفالسالفه .. طاحن دموعها .. خلاص مب قادره تتحمل اصرار امها .. هي ماتبى .. ماتبى تعذب نايف وياها ليش جي امها مصره .. ام سيف ما علقت بس هي الثانيه ادور فبالها رمسة ريم وشكلها فهمت الموضوع بكبره ..

الحين السالفه تستوي ومحد يعرف عنها.. ولا يعرفون وداسين .. افا يا ريم ماتخبرين يدتج .. ومريم .. سارت تخطب من غير ما تشاورني .. البنت شكلها مضايجه .. باجر برمسها .. ومن اصبح افلح ..

******************
(الأربعا) 11اغسطس 2004
******************

الصبح قامت عليا من نومها متكدره ..طول الوقت كانت يالسه مكتأبه.. مب عارفه كيف تتصرف ويا سالفه ريم لكن خلاص الظاهر ماشي فايده ولازم تحسم الموضوع .. كم بتخلي مريم تتريا وتعشمها .. شلت تلفونها ودخلت غرفتها .. ماتبى حد يسمعها ..
اتصلت ع رقم مريم .. وردت عليها نواري..

عليا: الووه
نوره: الووه منووو
عليا: منو انتي نوره ؟
نوره: هيه
عليا: اشحالج حبيبتي
نوره: زينه
عليا: وين ماماتج ؟
نوره: انتي منو
عليا: انا خالوه عليا
نوره: خالوه عليا منوو
عليا: ام جاسم .. تعرفينه
نوره: انزين منو جاسم
عليا ابتسمت على أسئلة ها الطفله ..
عليا: تعرفين ريمان
نوره وهي تضحك: عرفيييتهاا ريمان
عليا: انا مامات ريمان
نوره: انا احب ريمان..
عليا: فدييتج انا.. ريمان بعد تحبج.. يلا انزين وين ماماه مريم..
نوره: ممم صبري شوي ..
سارت نوره تزقر امها .. في هالوقت اسما شافت سماعه التلفون طايحه وشلتها
اسما: الوه
عليا: الوه منو؟
اسما: انا اسما
عليا: هلا امايه اشحالج ؟
اسما: بخير الحمدالله
عليا: امج وينها ؟ ردت عليه نواري وقالت بتزقرها
اسما: ان شا الله بسير اطالعها منو اقولها ؟
عليا: ماعرفتيني ؟ انا عليا ام بنات خالج
اسما: هلا والله خالوه اسمحيلي ماعرفتج ..
عليا: مسموحه فديتج
اسما: اكيه امي يت لحظه
يت مريم وشلت السماعه من عند اسما
اسما: هذي خالوه عليا
مريم ابتسمت حست انه اكيد عليا متصله ترد عليهم خبر ..
ونفس الشي كان احساس اسما عشان جيه تمت يالسه حذال امها ..
مريم: مرحبا
عليا: مرحبتين حيا الله ام نايف اشحالج ؟
مريم: بخير ربي يسلمج اشحالج انتي واشحال البنات؟
عليا: البنات انا اسالكم عن حالهم تراهم عندكم
مريم: هيه ههه فديتهم والله ياعليا بناتج حبوبات .. سوالف ولا ساره ومي فديتهن يونسن اليلسه ويقصرن الدوب وياك ..
عليا: وفي هالبيت منو يفتقدون الا هالثنتين ..
مريم: الله يخليهم لج ان شاء الله وتفرحين فيهم
عليا حست بنغزه في قلبها .. خصه من اسمعتها تقول تفرحين فيهم .. حست انه مريم تتريا الرد .. وعليا مب هاين عليها تردهم بس شو تسوي
مريم: عليا
عليا: آمري
مريم: مارمستي ريمان ؟
اسما تقربت من امها تبى تعرف الرد .. وفي هالوقت كانت لطيفه يايه ويا اختها نوره ويسولفون .. لكن اسما سكتتها وقالتلها انه امها ترمس ام ريم ..
عليا: والله يامريم رمستها .. لكن البنت ماطاعت
مريم: ليش ؟
عليا: تعرفين مريم .. ريمان تراعي خواتها وتخاف وايد ع جاسم .. وتحس انهم بيضيعون بلاها خصه انهم مب عندي انا احين ..
مريم: انزين ماعليهم شر والبيت الا هذوه حذال البيت .. متى ماتبى بتسير لو كل يوم عادي..
عليا: والله يا مريم ترا ريم عنيده وكل مارمستها طافت عني وروحت .. هي عندكم ورمسوها لو بتقدرون تقنعونها .. واخطبوها من ابوها اما عني انا تراني اتمنى القرب منكم والله اني ادعي ليل نهار انه الله يسخرها وترضى ..
مريم: يالله ان شا الله خير
عليا: رمسي يدتها انتي وهي بترمسها بتطمنها انه هي عند خواتها وماعليهم شر
مريم: اخاف تجبرها وانا مابا البنت تنغصب خصه اني رمستج انتي قبل
عليا: ماعرف يا مريم والله اني متلومه منج لكنج ادرى بالحال
مريم: لا تتلومين اختي افا عليج
عليا: خلاص عيل انا بخليج احين .. واسمحيلي الغاليه
مريم: مسموحه فديتج .. فمان الله
سكرت مريم تلفونها وصدت حذال اسما
اسما: شووو ؟
مريم: ماطاعت
اسما: ليــــــش ؟
مريم : تقول امها انها ماطاعت عشان اخوانها محد عندهم وجسوم مريض محد بيرعاه ..
اسما: علثه الا
لطيفه: حرام لاتخلين في ذمتج .. انتوا بروحكم تشوفون بعيونكم كيف ريم ويا اخوانها .. تخاف عليهم من الهوا.. وشي طبيعي ماتقدر تطمن اذا هم بعيد عنها وبعيد عن امها .. خصوصا انه ساره ومي بيسيرن الجامعه ومابيتمون الا الصغار .. مها ومهره ماعليه بيمشون امورهم لكن جاسم مريض ..

مريم سكتت .. كان الشك يسري بدمها من كلام عليا لكن كلام لطيفه اكدلها صدق نيه ريم .. هي تراها تشوفها بعينها شو تسوي يعني مب جذب ..

اسما: واخر شي شو قالتلج سمعتج ترمسينها زياده ؟
مريم: تقول انا موافقه واباكم لكن خطبوها من ابوها جان يدتها بتروم تقنعها
اسما: يوم امها مارامت لها امايه عفرا بتروم ؟
لطيفه: امايه عفرا بتقنع ريم انه اخوانها بيكونون في امان عندها
مريم: صح نفس الكلام اللي قالته عليا
لطيفه: امي صح نحن ابتعدنا عنهم وماربينا وياهم بس انا تمت علاقتي بريم اوكي وانتي تعرفين هالشي .. وكانت ويايه بالمدرسه واعرف كيف تفكيرهم .. انا مابا افرط في ريم ولازم نسوي أي شي نقنعها
اسما: لا فديتج اخونا مابنعقه ع وحده ماتباه
لطيفه: ريم ماتبى أي حد .. ماخصت اخوج .. لانها اصلا كانت رافضه ولد خالتها من قبل
مريم: منو قالج هالكلام
لطيفه سكتت .. حست انه لسانها زل .. ريم كانت مخبرتنها بس قايلتلها لاتقولين لحد ..
لطيفه: ريمان .. بس قالتلي ماقول لحد وانا زل لساني وقلتلكم .. بليز لاتسيرون ترمسون
اسما: يوم اقولج اميه هاي كاتم اسرار ريم ..
مريم: بس انتي عن التعليقات.. انزين لطوف وليش رفضته ؟
لطيفه: قلتلج امايه هي ماتبى حد شكلها ماتبى العرس امره .. تحاتي اخوانها
مريم: وحليلها ..
اسما: هاه الوالده اشوفج لنتي ؟؟ لاتنسين ولدج بعد
لطيفه: اسوووم لاتيلسين تخربين افكار امي .. قومي من اهنه خليني اتفاهم وياها ع راحتي
اسما: شو بتقوليلها سيري قولي لامايه عفرا عشان تجبرها ع اخونا ؟ ليش طايح حظه هوو ؟ نايف الف من يتمناه ولو بياشر لوحده من بنات عمي بتيه ركض
لطيفه: بس انتي تعرفين تربيه بنات عمي وتعرفين تربيه بنات خالي ؟ تبين اخوج ياخذ أي حد ؟
مريم: بسكم عاد راسي عورني منكم انا في حاله وانتوا في حاله
نشت عنهم مريم ودخلت غرفتها .. ولطيفه صدت صوب اسما بعصبيه
لطيفه: كله منج يالسوسه .. انا بدخل عند امي ارمسها لكن انتي ان تدخلتي في الموضوع او نايف وصله شي من هالكلام مابتلومين الا نفسج

ونشت لطيفه دخلت عند امها ترمسها .. اذا الله كاتب نصيب فها الزواج ان شاء الله بيصير ولو انهد بلد .. واذا مافي نصيب ترا حكمه من الله ..
حست مريم انه كلام بنتها لطيفه عين الصواب.. ودعت من الله انه ايسر السالفه ويكتب ها النصيب بين ولدها وبنت اخوها..

****
الظحى يلست ام سيف ويا البنات اللي كانن لابسات عبيهن ويالسات في الصاله يتريون ناعمه اللي تبرعت توديهن السوق .. الا ريم ماطاعت تسير لانه محد بيتم ويا يدتها .. وقالت انها باجر بتطلع تكمل اغراضها وبتخلي حد من البنات ييلس ويا يدتها ..

ريم: اقولج ساروه خذوا قياس عباتي وسولي عباه ساده وياكم
ساره: شليت عباه قياس حقج
ريم: زين سويتي ..
مي: ياربي هاي نعمه الله اخرتنا متى بنسير نحن ..انا وايد عندي شغل وابا ارجع عشان حلامي بتي
مها: قلتلج خل نقول حق اميه تودينا
ام سيف: نعوم بتوديكم شو غادي عليها .. وبترجعن قبل ماتي بنت خالكن .. وان يت قبلكن بتيلس ويا ريمان ..
ناعمه نزلت من فوق : يالله قومن
مي: مابغيتي
ناعمه: شو مابغيت بعد
ساره: ماشي ماشي يالله قومن ..
نشن البنات وطلعن ويا مرت ابوهن وتموا في البيت جاسم ومايد يلعبون بها السوني .. وريم ويدتها ..
يلست ام سيف تتامل ريم .. تبى تفاتحها بالموضوع اللي سمعته امس .. قبل ماترمس مريم .. جدمت ام سيف صينيه القهوه والجاهي منها .. وانتبهت لها ريم

ريم: امايه لاتسحبينها ماتروميلها شو تبين انا بصبلج
ام سيف: ابا قهوه
ريم: ان شا الله
صبت ريم القهوه ليدتها وعطتها اياها ورجعت اتسندت وشلت الروايه اللي يالسه تقراها ..
ام سيف: انتي شو ها اللي تقرينه هالكثر ؟ من ييتي هالبيت وانتي الا كله موازره هالورق .. وين ماتسيرين خاشه هالكتب في مخباج شو هاي
ريم: امايه هذي قصص
ام سيف: خرابيط الا .. لو تقريلج قران بدالها جان كل يومين ختمتي
ريم: امايه اقرا القران انا .. بس بعد اقرا هالقصص .. تعيبني
ام سيف: انزين ودري عنج هالخرابيط وتعالي ابا ارمسج
ريم سكرت روايتها وركزت نظرها في يدتها .. تبى تعرف شو تبى تقولها ..
ام سيف: ريم انتي ليش ماتبين نايف ؟
ريم: هاه ؟ كيف
ام سيف: سمعتج البارحه يوم كنتي تكلمين امج .. ماكنت متعمده اتسمعج بس انا نشيت ع صوتج .. وسمعتج وانتي ترمسينها وتقوليلها عن نايف وانج ماتبينه
ريم تمت مرتبكه مب عارفه شو تقول
ام سيف: ريم ترا عمتج ماخبرتني عن أي شي من هالموضوع .. وها الشي الثاني اللي زعلني .. لكن الشي الاول اللي زعلت منه انتي .. انا وايد احبج وانتي قريبه مني وتحريتج بتين تقوليلي وتشاوريني .. لكنج تدارين ع الموضوع وفوق هذا ترفضين ؟ ليش ؟ نايف مامدحه عشانه ولد بنتي لكن نايف فديته ريال والنعم فيه

ريم: امايه انا امي عليا فاتحتني بالموضوع عقب ماييت من السفر يوم رجعنا بيتنا يوم الجمعه وانا مابا اعرس .. وتميت مارمس اميه عليا والسبه انها تبى تجبرني ع هالسالفه .. وامي سمعتي كل شي يوم اني رمستها ورفضت ..
ام سيف: وانتي ليش رفضتي ؟!
ريم التفتت الصوب الثاني : مابا اعرس وخلاص
ام سيف: سمعت ساروه تقول باجتلج سنه وبتخلصين دراستج شو بعد تبين
ريم: اخواني يبوني
ام سيف: انتي مابتسيرين تسكنين بعيد انتي اهنه قريبه تراج ومتى ماتبين تعاليلهم وانا تراني عندهم ومابقصر..
ريم: امايه سمعتي انتي بعد يوم قالوا انه جاسم تعب واحين ساروه وميوه بيسيرن الجامعه .. منو بيتم عنده ؟
ام سيف: مرت ابوه اهنه وانا موجوده .. وبخليه ايي يبات عندي ..
ريم: امايه مابا اعرس مابا نايف والله يرزقه ببنت الحلال اللي تناسبه
ام سيف: نايف مابياخذ غيرج يا ريم
ريم: امايه لاتجبريني انا مابا اعرس
ام سيف: ريم يا امايه .. الخيره في ما اختاره الله .. انتي قومي احين تيددي وصليلج ركعتين واستخيري ربج
ريم: مابا
ام سيف: عشاني يا ريم .. قومي استخيري وماخاب من استخار .. انتي استخيري ربج لاتعاندين .. ولاتقطعين نصيبج

ريم سكتت وقامت من عند يدتها وهي تصيح ..

ياربي ليش يجبروني ليش ؟ انا شو اللي خلاني ارمس وهي موجوده زين جيه احين سمعت كل شي واعرف انه امايه عفرا مابتسكت عني .. ياربي شو هالحاله .. مابا العرس.. ومحد بيجبرني لا اليده ولا الوالده..

****

فبيت بوراشد.. بعد مالبسن احلام ومديه وتجهزن عسب يسيرن بيت سيف.. طلعت احلام من حجرتها وتوجهت للصاله وفايدها كيس كبير مصنوع من القش القوي وحاطه داخله الاغراض اللي ماخذتنهن لمي ومرتبتنهن بشكل حلو ..
لقت عماتها فالصاله وامها وخالتها فجر .. وطت الكيس عن باب البيت وردت تيلس وياهم ..

فجر: شنو ها اللي كان بايدج؟
احلام اطالعتها بنظره: هذي هدية شيخة البنات كلهن
عليا: هههههه يالله شيختي بنتيه..
فجر اطالعتهم وطلعت صوت استهزاء وسكتت عن السالفه اما احلام طنشتها ولفت صوب امها ..
احلام: امييه وينه ابويه تأخر علينا
عبير: توه مكلمني يقول فالدرب
احلام: يلا عاد ماشي وقت الحين الساعه 12 الا ربع
شيخه: مستعيله ها الكثر انتي
احلام: هي عيل شو.. ابا اتم وياهن واايد
ميره: هاكوه فارس فالبيت بدقله بخليه ايوديكن
عبير: لا لا محمد ياي مافي داعي اتعبينه
ميره: لا تعب ولا شي عادي
احلام: هي عموه دقيله خل ايي .. ابويه يقول فالدرب وبيوصل عقب ساعه
عليا: خلاص عيل ميره اتصليله طالعيه جان بيوديهن..

عبير اطالعت بنتها وضحكت عليها .. احلام ماتريت امها توافق.. عطول ركضت الحجره تزقر مديه .. ودقايق سمعوا هرن فالحوي.. طلعن احلام ومديه وهن شالات الكيس وتلاقفن ويا فارس عند باب البيت.. كان يبى يدش يسلم على عماته ويدته ..
لفت احلام ع طول صوب الحريم..

احلام: فجر سيري داخل فارس ولد عمي بيدش
فجر انتبهت لاحلام واطالعت الحريم .. بس تمت يالسه ولا قامت .. اما فارس من سمع رمسة احلام رد ع ورى على طول ..

مديه: تعال بترد داخل هيه
فارس: لا برايه .. هاتن الكيس ماترومله

وخذ عنهن الكيس وحطه جدام .. ورد يركب السياره .. ويحس بويهه حاار من كثر الاحراج .. مايحب ها المواقف ابدا ..

ركبن البنات ورا .. وهن مستانسات انهن بيسيرن عند بنات عمتهن .. وتمن يقرضن ففجر كيف كان تصرفها بايخ وقت ماكان فارس يبى يدش .. كان بامكانها تروح من الصاله لين يسلم ويظهر .. بس فجر شو مشكلتها .. شو يعني تبى تجبر الكل يشوفها كشفه !
فارس كان ملتزم الصمت طول الدرب .. لكن يوم كان بيدش المنطقه اللي فيها بيت سيف ضيّع فدخلات الشوارع .. ماعرف وين بالضبط بيتهم .. اتصل بأبوه يتخبره عن الدرب لين دلاه ووصل البنات ..
احلام يوم شافت البيت تمت تتأمله وهم بعدهم برع مادخلوا .. تشوف السور وعايبنها تصميم البوابه ..

فارس: عادي ادخل السياره؟!
احلام: ماعرف والله .. ممم اقولك عطني تيلفونك شوي بتصل بساروه اسالها

فارس عطاها التيلفون .. ودقت احلام ع الرقم واتصلت بساره.. ساره استغربت من الرقم الغريب وماردت .. لكن احلام عاودت الاتصال .. ها المره ردت ساره لكن تمت ساكته
احلام: ساروه انا حلااام .. اقولج وصلنا البيت ندش بالسياره داخل ولا شووو
ساره نقعت من الضحك مول ماعطتها احلام فرصه انها ترمس..
ساره: هي دشو .. هرنوا وبيفتحولكم الباب .. المسافه بعيده عليكن من الدروازه لباب الفله ..
احلام: خلاص اوكي . فارس هرن وبيفتحون الباب
ساره: فارس يايبنكن
مي اطالعتها .. لكن ماعلقت ..
ساره: نحن فالسياره عقب شوي بنرد من السوق .. بتلقن ريم داخل اوكي
احلام: خسكن الله انا يايتنكن وانتن شاردات يا الطفسات
ساره: الحين بني ..
احلام: خلاص انزين اتصلي بريم وقوليلها انه نحن عند الباب
ساره: اوكي بس دشوا انتوا عادي .. محد فالبيت
احلام: خلاص يلا باي .. هاذو فتحوا الباب
انفتح باب الدروازه .. ودخل فارس بالسياره داخل .. احلام ومديه تمن الا يطالعن البيت وعايبنهن واايد .. وفارس بعد ..
نزلن البنات من السياره وكانت ريم واقفه عند باب الفله تترياهن من بعد ما اتصلتلها ساره .. فتحت احلام الباب الجدامي وسحبت الكيس .. وساعدتها مديه ..

مديه: انزين ليش ماتشل وياانا
فارس: ماروم انزل .. يلا ماتعولن شلنه ثنتيناتكن
احلام: يالله مافيك خير
فارس تم يطالعها وميود ابتسامته ..
احلام: لو قلنا لمروان اييبنا احسن .. بس ماعليه .. المهم وصلنا عند بنات عموه مشكور..

وعقب ما سكرت احلام الباب طلع فارس ضحكته المكبوته .. وحرك سيارته وظهر من البيت .. اما البنات ركبن دري الفله وشافن ريم سلمن عليها ودخلوا كلهم البيت..

****

من بعد ما طلعن احلام ومديه من البيت .. وصل ابوهن .. دخل البيت وشاف لمة خواته تفرقت.. محد كان فالصاله غير حرمته تترياه ..

محمد: وين البنات يلا بوصلهن
عبير: راحن
محمد : منو وداااهن!!
عبير: فارس ولد راشد..
محمد: ليش .. تراني قاييلكم ياي
عبير: يالله يا محمد نحن مكلمينك من ساعه وتقول ياي فالدرب .. تعبن البنات من كثر ما يترين
محمد: والله شو اسوي راد من دبي ولازم بنتأخر فالزحمه والدريول بعد ما يسرع
عبير: ماعليه مو مشكله ..
محمد: بدش اتسبح
عبير: الحين؟
محمد: هي تعبان باخذلي دش ههه..ابا مااا بارد يصب عليه
عبير: تكفى عاد .. بتفتح الرشاش بيطلعلك نار مو ماي
محمد: هههههه يبوج ها الشمس تثور الما فالخزانات
عبير: هههههه ايه والله ..
محمد: باخذلي دبه ما بارده من الثلاجه بتبرد عليه ماعليج
عبير: نعيما مقدما
محمد: الله ينعم عليج غناتي ..
ابتسملها محمد وروح عنها الحجره .. اما عبير .. سارت بتسوي مدخن لريلها كعادتها كل صلاة ظهر.. وبعد ماخلصته .. لفت ع فجر .. دقت الباب ودخلت ..
عبير: شو تسوين
فجر: شو تشوفين .. اقرى مجله
عبير: بدال ماتروحين تتوضين وتستعدين للصلاه
فجر طنشت عبير وماسوت للموضوع اهميه ..
عبير: ما كان له داعي اليوم اطنشين احلام وهي تقولج انه ولد عمها بيدخل يسلم..فشلتيني فميره يا فجر.. خلاص يووزي ..
فجر: محد قاله ما يدخل

عبير اطالعت فجر بنظره وقلبها يدق بقو ماتعرف ليش بس اللي تعرفه انه مقهوووره وايد من فجر.. طلعت من الحجره وهي تضرب كفها اليمين بالشمال.. ماشي فايده ميأوس من ها البنت ..
تعوذت من بليس وردت ادخن ريلها فالحجره وبعد ماطلع صوب المسيد تمت بروحها فالغرفه والمدخن فايدها خوزت العود وحطت دخون للحجره وتمت ادخنها وهي بالها مب وياها .. ملعوزتنها فجر ومب عارفه شو بيصير فالايام اليايه

****

العصر فبيت سيف.. فقسم البنات بالتحديد .. وكعادتهن البنات يوم يتيمعن .. رابشات وسوالف وضحك .. احلام مستانسه ع اليلسه وياهن وايد .. وتوصفلهن كيف شعورها اول ما شافت ام سيف وناعمه ونجمه وكلهن يتضاحكن عليها

ريم: يالله حلامي الحين يتج الضحكه يوم شفتي نعوم
احلام: هي والله تذكرت الآنسه مينشن ع طول
ساره: ههههههههه الآنسه مينشن عصبيه نعوم هبلى
ريم: ساروه خس الله بليسج سكتي عن تسمعج
مي: هههههه وشعليها ساروه من نعوم.. ساروه بتسويلها سالفه ثرها
ساره: هي والله ما عليه منها
ريم: الله يعين منكن انتن
احلام: بس يدتكن وحليلها يبين عليها انها طيبه .. يعني مب شرات ماقلتن متسلطه
مي: يبوج يدوه غدابها الدهر وخلى تسلطها يخف شرا مايقولون اكل عليها الدهر وشرب ..
احلام: وحليلها ويها شكله تعبان
ريم: هي من عقب العمليه ضعفت وذبل ويها
مي: عندالله يا الدنيا يا عيوزنا .. انا بروحي ماتحمل اشوفها ضعيفه.. جبروتها غير كان قبل والحين طايحه فالسرير لاحول ولاقوه
ريم: ترا ها الدنيا شو بنسوي .. انتي وساروا الحين مخبل ويوم بتعيزن بيقولون عيالكن يالله يا الدنيا يداتنا كانن مخابيل والحين مطيحات فالشبريه لاحول ولاقوه
احلام: ههههههههههه ماتخيل
ساره: ايه عاد عن الغلط علينا ..
مي: ماعليج منهن ساروه متغايضات.. اصلن اللي ماخذ حياته سهله ما يعيز بسرعه لكن ها يدوه ع كثر ماكانت تعصب شوفوا حتى قلبها انسد
ريم: ميووه ههههه شو ها الرمسه بعد..
احلام: ماعليج هاي شوي من خراريف ميوه
ساره: وين البنات سارن؟
احلام: مدوي والتوم عند عفرا يغصصن عليها
ريم: ويه تحاسبن شو يبنها مافينا ع حلجها هاي بتربع ع طول عند نعوم
مي: مها ومهروه سحبن مدوي وقاللها تعالي بنوديج عند صخلة البيت اللي دوم فاجه حلجها ههههههه
ساره: صدقهن خواتي ما جذبن.. لا وبعد يسمنها مسيلمه الكذاب
احلام: هههههه ها كله عفرا ؟
مي: هيييه.. والله يوم نقولها مسيلمه الكذاب اتم تصرخ .. هي ماتعرف منو ها بس تعرف انه فيه سالفة جذب..
ريم: انزين وماشالله عليها ع طول عند امها تخبرها كل شي .. ذاك اليوم نعوم هزبت التوم بسبة ها التعيوره الي مظهراتنها ع عفرا
مي: هههههههه شو بيسوبها حليلهن كل ما تسولفلهن عن شي جذبت!!

وضحكن كلهن ع السوالف الي تسويها عفرا .. ريم قامت من عندهن لانها بتسير عند يدتها تحت .. وساروه سارت الحجره تبى ترتب اغراضها اللي خذتهن اليوم ع الرغم من انها مخلصه مشاري للجامعه ..

وهنه التفتت احلام لمي .. وفعينها كلام وايد .. مي كانت تشوف التيلفزيون ومب منتبه لنظرات احلام.. كيف بتبدى احلام موضوعها .. قالت بتمهد شوي ..

احلام: يااا ميه
مي التفت لاحلام وهي تزقرها بها الاسم اللي ينرفزها وتمت ساكته ولا ردت على احلام..
احلام: ميّـــه ..
مي: ويعه تقولج ميه ..
احلام: ههههههههه بلاج
مي: كم مره متضاربه وياج بسبة ها الميه ..
احلام: ادري ادري .. لان الميّه صغير القرد هههههه خلاص اسفين
لفت مي على احلام اللي كانت حذالها ع الغنفه وتقربت منها اكثر وقبضت احلام من شعرها ..
مي: يعني لازم تشرحين اكثر بعد
احلام:هههههههه فجي خسج الله بطلي شعري
مي: هههههههه يا الهرمه من زمان ما تضاربت وياج

فجت مي شعرها وهي تضحك عليها .. وتمت تتطالع ايدها وتسوي حركه انها تنزع بقايا شعر احلام من ايدها واحلام تطالعها وتضحك على ها الحركه..

احلام: انزين ميوه والله نسيتيني شو كنت بسألج
مي اطالعتها: شو عندج
احلام: ماشي .. متى بيظهرولج الرقم؟؟
مي: الرقم ! هيييه ماعرف التهينا يبوج ولا قلت لابويه
احلام: انزين متى بتقوليله؟
احلام: ماعرف والله .. مب محتايتنه احين قبل ما اسير الجامعه بقول لابويه يطلعلي رقم وياخذلي التيلفون
اطالعتها احلام وابتسمت وفخاطرها يا الهرمه ناسيه اني قايلتلج باخذلج التيلفون
مي: بلاج تتبسمين!
احلام: ماشي ..
سكتن مره ثانيه وهن يشوفن التيلفزيون..احلام للحين مب قادره كيف بتفاتحها..تمن ساكتات فتره لين بدت احلام ترمس ..

احلام: ميووتي
مي من غير ما تلف ع احلام: هي هاي الزقره ..ها حلومتي آمري
احلام: لا قوليلي حلامي
مي: ههه لا حلومتي عسب الوزن ..
لفت مي صوب احلام ..
مي: ها شو عندج؟
احلام: عندي رمسه
مي: رمسه!!
احلام: عن ريم
مي: اختييه؟؟
احلام: عيل كم ريم عندنا ..هي اختج
مي بحماس: شو السالفه؟
احلام: ريم خطبها ولد عمتكن وشكلها ردته
مي بطلت عيونها ع الاخر
مي: شو تقولين؟
احلام: اللي سمعتيه ..
مي: منو خبرج؟
احلام: محد خبرني بس بقولج السالفه.. مديه مره سمعت عموه عليا ترمس امايه سلامه عن سالفة وذكرت اسم ريم وقالت امايه انا بقنعها وجي
مي: انزين
احلام: المهم ماعرفت السالفه بالضبط بس مره انا دشيت على عموه الحجره وهي تصيح وسمعتها ترمس عمرها.. يعني جي تشكي من رفض ريم لنايف وربطت عاد انا المواقف واكتمل النصف الثاني للصوره عندي
مي: ريم ترفض نايف!!!
احلام: هيي ..كانوا يرمسون عن خطبة ريم ونايف يوم سمعتهم مدوي.. ويوم انا سمعت عموه كان رد ريم ع الخطبه..
مي: بس ليش ترفضه نايف وايد اووكي
احلام: وانا شعرفني ..
مي: لا ابوي ما ينسكت عن ها السالفه .. يعني نايف يباها؟؟
احلام: هي .. عموه قالت يوم انه نايف شارنج ويباج ليش رفضتيه
مي: حرام عليها جان بترده والله انه ريال والنعم
احلام: عاد مادري .. انا امبوني مالي خص ما بخبرج لانه حسيت انه محد يدري بالسالفه ولا جان خبرتيني بس عقب قلت لازم ترمسنها انتن
مي: هي ترومين انتي ماتخبريني..
احلام: انزين وخليني اخبرج اللغز الثاني اللي قالته مدوي
مي: شو بعد شي ثاني
احلام: السالفه فيها عمي راشد وانتن
مي باستغراب: خالي!! .. ونحن.!
احلام: هيه
مي: ليش شو السالفه
احلام: مدوي قالتلي عقب مارمسوا عن ريم.. انه عموه عليا قالت اون راشد كمل على بناتي الباجيات
مي بطلت عيونها ..
احلام: فهمتي اللي فهتمه ولا شو
مي: حلفي حلاام
احلام: والله .. انا استوعبت ها الامر عقب ماتأكدت من سالفة ريم وخطبتها
مي: يعني خالي خطبنا نحن؟؟ بس منو نحن
احلام: اكيد انتي وساروه .. الكبير للكبيره والصغير للصغيره
مي: ماتخيل
احلام: ليش ماتخيلين ..
مي: انزين نقول يعني مروان لساره .. وانا شلي
احلام: وانتي بعد
مي: شو انا بعد
احلام: يعني متوقعين يكون ها الشي ..
مي: ماعرف يا حلاام .. انا وفاارس!!
احلام: ليش لا.. واصلا تنغيزات عموه ميره واضحه.. يعني من قبل وهي حاطه العين عليكن ..
مي: مادري مادري

احلام تمت تتطالع ميوه اللي وردن خدودها .. ضحكت عليها .. يعني ها الشي كان فالحسبان من قبل .. بس الرمسه أكدت لهم ها الشي .. مي انحرجت وايد.. من قبل وهي مبتعده عن فارس عشان تفتك من معايرة ساروه لان مي من صغيره وهي وايد ويا فارس.. فوق الخمس سنين الحين ومي ما تتخالط وايد ويا فارس.. والحين اتيها احلام وتقولها ها الرمسه .. ها الفتره اصلا كانت اطنش وجود ها الشخص وحتى انها نست وجوده .. ماكان يهمها.. بس الرمسه هاي حركت فداخلها شي ماتعرفه.. معقول شي مانعتنه من الظهور طول ها الفتره والحين قام ينغزها! بس هيه متأكده من مشاعرها .. مايا فبالها ها الشي .. سابق لأوانه..

احلام: ايي وين سرتي
مي: هاا ..
احلام: شو بلاج؟
مي: ماشي.. بس ساروه ومروان .. هههه تذكرين يوم نعلق عليها
احلام: هي هههه اسمينا كنا نقطعها
مي: والله ايام كانت.. عايشين مراهقتنا نألف قصص ع كيفنا ونربط فلانه ب فلان..
احلام: وعيشتني وياكن المراهقه ع صغر
مي: ههههههه محد قالج تتعلقين ببنات اكبر عنج ..
احلام: هيهيهي .. مايهم السن المهم التفكير ..
مي: بس تعرفين .. انا ادري انه مروان يباها
احلام: شدراج انتي
مي: اعرف .. احس بعيونه.. مروان اقرب واحد لي من عيال خوالي .. وياما فضيتلهم الجو ها الاثنينه من غير ما احسسهم بشي
احلام: ياويلي عليج
مي: قبل كنت اقول لساروه انتي تهمين مروان بس كانت اطنشني ..
احلام: خلها الحين يوم بتسمع ها الرمسه مستحيل اطنشج ههههه
مي: الهرمه هيه ماتصدق حدسي يعني .. بحرقصها مابقولها السالفه.. ولا اقولج كل يوم بخبرها حرف
احلام: هههههه والخيبه اسميها نذاااله عاد
مي: عادي .. وتذكرين يوم اقولج.. يوم كان فبيت خالي مانع انظفه
احلام: شو
مي: يوم اقولج قصة ساندريلا .. وحب من طرف ..
احلام: هييه
مي: خخخ كنت اقصد ساروه ومروان .. صح لين الحين مانشوف شي وااقع .. بس والله احساسي يقول .. انه مروان يحبها .. ولو انه ساره تكابر وايد.. بعد هيه تميل له ..
احلام: من كم سنه وانا ميال ميال
مي: هههه وبحبك انا مشغول البال ..
احلام: خخخخخ تكمل بعد هيه .. بس صدق سالفه

وتمن يتمصخرن ع ساروه ومي تحاول تتناسى الموضوع وتشله من مخها .. طلعتلهن ساروه وهي تسمع الضحك وبغتهن يخبرنها شو عندهن بس محد منهن رمس يبن يشوفن فضول ها البنيه لوين بيوصل..

****

فجر فغرفتها يالسه .. كانت تبى تدخل ع موقع الجامعه الامريكيه .. تبى تشوف التخصصات اللي عندهم وتبى تشوف صور الكليه تاخذ فكره عنها.. ظهرت من حجرتها ادور على عبير .. حصلت عليا وامها فالصاله.. سألتهم عن عبير بس مايعرفون وينها .. سارت حجرة البنات.. لقت الكمبيوتر فزاويه مركون .. فتحته وشغلت النت .. ويلست ادور على اللي تباه .. ودشلها المسن مال احلام ع طول بطلته واستغربت هي ما فتحت مالها .. وعرفت عقب انه لوحده من بنات عبير ومخليه الدخول تلقائي.. يلست تتطالع منو موجود فاللسته اون لاين ..
شافت كم شخص .. وطبعا شي طبيعي ماتعرف منو هاذيل .. تلقت رساله من شخص موجود اون لاين .. شافت الصوره وعرفت الشخص من الصوره ..

(M) says:
حلامي شو راايج بالصووره بسرعه

وينهم أحباب قلبي وينهم! says :
نعم!

(M) says:
شو رايج فصورتيه اليديده .. امسات تذمين الصور القبليه .. هاي الحين مب احلى؟

وينهم أحباب قلبي وينهم! says :
انا مو حلامي

(M) says:
عيل منو مدوي؟

وينهم أحباب قلبي وينهم! says :
لا فجر

(M) says:
اها .. خلاص عيل .. حيااج

وينهم أحباب قلبي وينهم! says :
ليش ع وين

(M) says:
نعم!

وينهم أحباب قلبي وينهم! says :
ليش تطلع؟ انا ملانه اقعد سولف معاي

(M) says:
لاولله! انا عندي أشغال مب فاضلج

بند عنها مروان وهو متغصص هاي شو تبى حتى فالنت مأذتنهم .. اما فجر تمت تتطالع الصوره .. واستفزتها الحركه وايد .. شو مفتكر نفسه هو .. مب اول مره يبين انه ما يطيقني .. منو تكون يعني انته عشان جي تسوي ..
ورد يدور فبالها سلطان.. ليش سلطان غير عنهم!
صح من ذاك اليوم ما شافته .. بس يعني ما تنيحس عليها مثل الباجين ..
سلطان كان كول وياها .. لكن مروان .. ماتدري ليش جي يتصرف.. تمت مقهوره من تصرفاته وياها .. وباجي شباب ها العايله .. نفس الحاله .. مايحبون يلسون فمكان هي موجوده فيه .. ماتعودت من نفور الناس منها جذه ..

ماستوعبت فجر الأمر..

نست انها فبيت غير بيتها.. نست انها فمكان غير مكانها .. نست انها تتعامل ويا اشخاص تحتم عليهم اعرافهم وعاداتهم معرفة الحدود .. الدين واحد.. ودرجات الالتزام مختلفه .. وعادات ها البيت وحده .. كيف هيه اتي وتبى كل التوازن يختل بتصرفاتها هاي..
بتظل تربية شباب ها العايله تلزمهم باحترام اهل البيت هذا .. وشي طبيعي انهم ما بيتعاملون وياها على هواها هيه .. بالأصل هم بنات عايلتهم الهن قدر وما يتطاولون وايد الا فحدود السوالف البسيطه .. ولو الواحد فيهم يبى يطلع الي فخاطره بيظل ملتزم بكل شي وبكل كلمه وبكل خطوه..
كيف ويا ها الانسانه الي يتهم غريبه .. مب متعودين عليها .. تبى تفرض وجودها وتجلب حياة ها البيت فوق تحت!
هي ماتنكر انه اهلها الي فالكويت .. فيه منهم الي له نفس التزامات ها البيت .. لكن هي ماتعودت على ها الشي.. وماتقدر تتعود عليه بسهوله ..

سكرت الكمبيوتر على طول وردت تيلس فالصاله ويا الموجودين.. وهي اطنش كل الافكار الي تتوارد عليها ..

****

بعد ما روحت احلام واختها من عند بنات عمتها.. كانت الساعه تسع تقريبا.. واللي كان ياينهن محمد.. طبعا هو مادش فالبيت لكن البنات كلهن ظهرن من الحوي يسلمن على خالهن وهن مستانسات بشوفته ..وبعد ماروحوا ردن البنات داخل .. ريم ع طول صعدت فوق من بعد حديثها ويا يدتها قامت حتى تتجنب اليلسه ويا اليده .. اللهم اتي تعطيها الدوا وتروح .. ها حالها طول اليوم .. اما الباجي التموا كلهم فالصاله وكان سيف ها المره راد من وقت البيت ..

ناعمه: ياي من وقت اليوم
سيف: هي ماسرت القهوه تراني
مهره: ابويه .. اليوم حرمتك ما خلتنا نتشرى باجي اغراضنا .. يبالنا سيره ثانيه
ناعمه: يا مسودة الويه انا ماخليتكن والا انتن مستعيلات ع الرده عسبة بنات خالكن
مها: نحن مستعيلييين .. انتي شو تقولين .. بنات خالي ما بيطيرن
ساره: ههههههه هيه عاد تصدق ابويه .. نعوم كانت عايفه عمرها وهي تحوط ويانا.. يوم انها ماتبى تودينا شحقه ماتعذرت من قبل
سيف تم يطالعهن وهو يبتسم .. وناعمه اطالعهن وهي محرجه
ناعمه: يا الجذابات .. عن يطيح السقف عاد
ساره: ابووويه اسمع اسمع باذنك .. شو انته ترضى ع بناتك يقولولهن الجذابات
مي كانت تسمع الحوار اللي يدور لكن بالها مب وياهم .. تبى تسير تلحق ريم اختها .. بس مب عارفه كيف تنسحب من اليلسه من غير ما تنتبلها ساروه .. ماتبى حد يلحقها ..
سيف: لا ما ارضى .. بس بعد ما ارضى ع ناعمه
ناعمه : واايعلني ما خلا ..
واطالع ساره اونها تبى تحرها ..
مها يلست حذال مهره وقامت تقلد ناعمه وهي تتصنع الدلع لسيف .. الكل تم يضحك .. وملتهيين بالتنكيت .. وفها الاجواء انسحبت مي من غير ما ينتبهلها حد .. ظهرت من الصاله تبى تسير عند ريم .. وهي تصعد الدري تلاقفت ويا مايد وجاسم اللي كانوا نازلين عقب ماتلبسوا جلابيات النوم ..

مايد: وين الجماعه؟
مي: كلهم فالصاله
جاسم: وانتي وين مروحه
مي: اا.. بسير اتسبح ..
جاسم وهو يقلد مي اللي كانت مرتبكه: اا..وانا بسير الصاله
مي: جسسوم
جاسم: ميووه
مايد: هههه تعال تعال ميوه شكلها مستعيله
مي: هي صدق .. يلا سيروا

وطبتهم وميوه وكملت صعود الدري وهي تركض .. ويوم وصلت قسمهم .. دشت ع طول حجرة ريم .. ما لقتها موجوده .. خاب ظنها .. يايه بتظهر بس سمعت صوت باب الحمام ينفتح وردت الحجره

مي: نعييما
ريم: الله ينعم عليج.. ها خير شو عندج يايه؟
مي: ماشي مليت.. ييت بسولف وياج ممنووع!
يلست ريم جدام التسريحه وهي تسحي شعرها ..
ريم: لا مب ممنوع ..

تجدمت منها مي .. تبى تفاتحها بالموضوع بس مب عارفه كيف ..
يلست ع الشبريه وحصلت روايه وتمت تجلبها .. ريم استنكرت حال مي اكيد فخاطرها شي .. قامت وسارت تيلس حذال مي ..

ريم: شو فخاطرج
مي رفعت نظرها لريم ..
ريم: ها شو بلاج
مي: لو قلتلج ما بتزعلين مني
ريم: ليش الموضوع يزعل يعني؟
مي: مايزعلني بس مادري عنج انتي
ريم: انزين شو رمسي ..
مي تمت تتطالعها بنظرات ريم مافهمت مغزاها .. ماعرفت مي تلف ودور فالموضوع.. وعلى طول رمست ..

مي: ليش رافضه نايف؟؟؟
ريم: شوو
مي: ليش ماتبين نايف
قامت ريم من الشبريه وهي منفعله ..
ريم:شو .. شدراكن انتن بعد ..
مي: شدراني انا بعد
ريم اطالعتها: حد يدري غيرج؟؟
مي: هيه
ريم: لاتقولين الحلج ساروه
مي: لا .. حلامي

ريم تمت تتنفس بصعوبه .. قامت تير نصخها بصوت مسموع .. حست مي انه ريم عصبت .. ما عرفت شو بتقول عشان تنقذ موقفها ..

مي: ريم بلاج
ريم: ميوه مابا ارمس فالسالفه .. ظهري برع خليني ارتاح .. خلاص صدعتوووبي من اميه لامايه عفرا والحين انتي .. خبروني منو مادرى يعني الحين..
مي: ريم بلاج ماخذه الموضوع بحساسيه.. السالفه مايبالها ها كله
ريم: ميوه مالج شغل فالسالفه
مي: ريم كيف مالي شغل .. انا اختج واتهمني مصلحتج .. عنبو شو ناويه تمين عانس طول عمرج يعني.. انتي الحين صغيره والكل يباج والا كل مره تردين حد .. عقب محد بييج..
ريم: وها المطلوب .. خلاص حلوا عن سماي مابا اعرس .. انا مابا خلاص عاد

مي قامت من على شبريه وهي تتطالع ريم اللي ويها مستوي احمر .. حست مي انه ريم خلاص معصبه .. وما ينفع وياها الرمسه اكثر .. روحت مي ويوم وصلت عند الباب..

مي: فكري عدل يا ريم .. شكل الريال يباج من كل خاطره واذا صليتي الاستخاره انتي مب خسرانه شي .. ع الاقل حزتها كلنا مانقدر نقولج خذيه ان صليتي ومارتحتي ...

سكرت مي الباب من غير ما تتفوه باي كلمه زياده .. وسارت الحجره وهي متغصصه من ريم .. اما ريم .. مالقت غير حضن السرير يواسيها.. انخرطت فصياح فضيع.. ماقدرت تهدي عمرها .. عليا وام سيف واحين مي والكل يأكد مصداقية نايف وجوهره الطيب ..
شو الحل يا ريم . شو بتسوين .. وكأنه الرب مكتب انه الكل ايي يبى يقنعج .. بس انتي ليش تعاندين .. ليش ما تبين ..
ام سيف بتزعل منها لو مارضت وريم ماتقدر ع زعل ام سيف .. ام سيف بعدها مريضه وتحت العلاج وماتتحمل الصدمات.. ماتعرف شو تسوي غير انها تفكر وتذرف من ها الدموع ..
وجمله مي الاخيره خوفتها .. لو قامت وصلت الاستخاره .. وظهرلها نايف من نصيبها هذيج الساعه مجبوره تاخذه .. فكرت انها تصلي وتتوكل ع ربها .. بس بنفس الوقت خافت من كون انه يطلع من نصيبها .. وتنجبر تاخذه ..

******************
(الجمعه) 13اغسطس 2004
******************

فحجرة ام سيف..مي يالسه ويا يدتها الظحى .. وترمسها عن سالفة ريم .. بالأمس كانت مي مخططه لشي تبى تسويه لكن ام سيف ما ساعدتها .. والحين مي الا تسوي ها السالفه وتحاول فاليده ..

مي: امايه لازم ترمسينها مره ثانيه بحزم
ام سيف: ياميوه تبيني اغصبها يعني
مي: امايه ها مب غصب .. اعتبريها خدمه انسانيه..
ام سيف: شو خدمته ما خدمه بعد هاا.. قومي عني ميوه..
مي: امايه .. ريم خلاص تراها مب وافقه .. ماعليها من حد هي ..
ام سيف: كيفها
مي:شو كيفها .. امايه ريم غشيم تراها ماعليج مسويه عمرها عوووده وهي ماتفهم شي .. لازم نخطط مستقبلها باجر محد بييها صدقيني
ام سيف: لاتفاولين ع اختج .. انا اباها لنايف تراه بعد ولدي لكن شو نسويبها
مي: انزين امايه حبيبتي .. انا بسير عند ريموه وبقولها انتي تبينها ظروري .. ويوم بتيج قوليلها انج من امس مب رايمه ترقدين وايد تفكرين في نايف وفيها
ام سيف: عنبوج اليوم الجمعه وتبيني اجذب
مي:هاي مب جذبه .. بالذمه يعني انتي ما فكرتي فيهم ..مب فخاطرج توافق
ام سيف: امبلا بس انا فليل وطيت راسي ورقدت ما فكرت فحد
مي: اماايه عاد . طوفيها انتي .. وعاد عقب قومي يري الرمسه من ريم خليها تلين وتوافق عشانج..
ام سيف: ونحن شو نستفيد يوم نيوزها بالغصب؟
مي: امايه هاي ريم خبيل ماتبى مول تعرس شو فايدة الندم عقب.. ولد عمتها ريال طيب ومتخرج من برع ومتوظف الحين فاحسن الشركات شو تبى اكثر هيه..
ام سيف: شدراني باختج
مي: سمعي الرمسه يا امايه وانا متأكده اللي بنسويه له فايده.. انا بسيرلها الحين وبطرشها صوبج وانتي رمسيها بحنيه بيلين قلبها ماعليج .. انا بعد مرمستنها تراني وبتلين ان شا الله
ام سيف: الله يعيني على زنتج هاي ياميوه انا بسوي احين هالسالفه وبزقرها برمسها اخر مره امبوني قايله مابرمس لكن ماعليه برمسها بعد مره بس مابغصبها وان ماطاعت لاتين تقوليلي ردي رمسيها مره ثانيه مابرمس بس
مي:انزين لاتهددين الله يهداج .. اضبطي كل شي بالتمام وهالله هالله بالحنيه مب تقومين تهازبين ترا تيج حالات انتي بعد امايه وان شاااء الله بتفرحين بريم

شردت مي وهي تظحك قبل ماتيها ظربه من يدتها وسارت حجره ريم اللي كانت يالسه تقرا قران .. قاطعتها مي وهي واقفه حذالها ..

مي: ريمان امايه تباج
ريم: شو تبى
مي: ماعرف ماقالت بس قالت ازقري ريم ضروري
ريم: اووف اكيد تبى ترمسني في السالفه
مي سوت عمرها ماكانها تعرف شي: اظن انها ماتدري وين دواها وماخذته
ريم: انا حاطتلها اياه شقى ما خذته
مي: ماعرف
ريم: بقوم بطالعها

نزلت ريم عند يدتها اللي كانت طايحه ع سريرها في غرفتها

ام سيف: ريم فديتج وين كنتي من الصبح
ريم: امايه شوفيج؟؟ ميوه تقولي تدورين دواج
ام سيف: هاه .. لا ميوه ماعرفتلي انا يا امايه قابظني صداع ادور دوا حق الراس
ريم: بسم الله عليج من شوو؟
ام سيف: مادري .. يمكن لاني مارقدت امس زين
ريم: امايه تراني راقده حذالج .. كل مره اقوم القاج راقده الحمدلله

صخت ام سيف وهي فخاطرها تضرب ميوه .. يلست تتامل ويه بنتها..
نست سالفة مي بالمره .. نست شو قالتلها مي تقول .. حكمت احاسيسها بروحها ويلست تفكر فريم وهي تشوفها .. ريم مب عارفه شو بلاها يدتها سرحانه وهي تطالعها ..

ام سيف: ريمان غناتي ابا افرح فيج قبل ماموت
ريم: بسم الله عليج امايه شو ها الرمسه لا تفاولين ع عمرج .. بتخرج ان شاء الله وبتفرحيبي
ام سيف: لا ريمان.. انا ماتفاول بس انتي تشوفين صحتيه.. هاي مب اول طيحه .. ومن طول الاسقام ماقام
ريم تمت ساكته ولا علقت وقبضت ايد يدتها وتمت تمسحها ..
ام سيف: يا ريم .. انتي الغاليه امبين الكل والله يا ريم اني اخاف عليج من نسمة الهوا.. البنت مردها لبيت ريلها وانتي يا امايه ماتبين ولد عمتج! ليش عاد
ريم بيأس: اماااايه
ام سيف: ريم الغاليه .. نايف انا مابمدحه لانه ولد بنتي قايلتلج ها الرمسه من قبل.. بس والله انه ريااال .. حتى مريم ربته احسن من تربيتي انا لسيف.. شو تبين اكثر من جي
ريم: ماعرف ماعرف يا امايه
ام سيف اطالعها وتبتسملها: وافقي وفرحي قلبي .. انا قلبي الا تعب من كثرة الهموم والغصه..

ريم وخت براسها .. خلاص مب قادره تتطالع عين يدتها اللي لو تمت اكثر وياها اكيد بتقنعها .. بتقنعها انها توافق .. طاحت دمعتها من عينها .. ام سيف رفعت ويه ريم بايدها .. ومسحت دمعتها ..

ام سيف: انا مابا ها الدموع .. ابا اسمع رايج
ريم: قلت من قبل
ام سيف: ما سمعتج من قبل .. الحين ابى رايج .. جان انا عزيزه عندج وغاليه بتسمعيني اللي يفرح قلبي مب يكدره.. يلا قولي رايج

قامت ريم من يلستها وتمت واقفه وهي تتطالع يدتها .. خلاص طاح الفاس فالراس ماتقدر غير انها تبرد خاطر يدتها وهي تشوفها تترجاها وهي بها الحال
ورجعت تذكرت نصيحه مي .. سوت نصيحتها وصلت الاستخاره عشان تقولهم انها مارتاحت .. لكنها تشوف عمرها ساكته وماحست بظيجها القبلي من كلام يدتها .. خصوصا هالموقف خلاها تحس انه خلاص هذي هي علامه ودليل استخارتها ..

قالت ريم وبتسرع : سوو اللي تبونه ..
ام سيف: اللي نباه فيه مصلحتج .. لكن انا ابا رايج انتي
ريم صخت .. وطلعت كلماتها بصعوبه قبل ما تظهر من عند يدتها ..
ريم: خلاص موافقه ..
ماتريت تشوف ردت فعل يدتها اللي انشقت الابتسامه فويها .. على طول ظهرت .. وسارت حجرتها اطلع المكبوت فصدرها .. اما اللي كانت واقفه عند الباب تتصنت اندست اول ما سمعت خطوات ريم يايه صوب الباب وعقب دخلت الحجره ع طوول..

مي: الله الله الله عليج يا سعاد حسني .. انتي بروحج يبتي مسرحيه غير عن اللي انا مألفتنها
ام سيف: خس الله بليسج ثرج انتي واقفه تتسمعين
مي: هي عيل شوو ..
ام سيف: فديتها والله يابت رمستج فايده ياميوه.. بردت فوادي .. ماعليه لو انها مب حابه ها الشي بس ويا الايام بتقول انه اختيارنا صح
مي: انا اقول جي بعد .. خل نرص عليها لين توافق ولا تضيع نايف من ايدها ..
وتجدمت مي ويلست حذال يدتها ع السرير ..
مي: يا امايه كثرن الحريم وقلو الرياييل فها الزمن.. الوحده من اييها الريال مب الا تقبضبه باديها الا تقبضه بظروسها والا خلاص ما بتعرس مول
ام سيف: هههههه شو ها الرمسه ميوه
مي: هي صدق.. اكبر مثل عندج بيتنا .. ماشالله ها نص درزن بنات وولدين
ام سيف: هههههههههه خس الله عدوج يا ميوه..
مي: انزين امايه الحين خلاص نعتمد الموافقه اسير ارمس امايه وابشرها
ام سيف: لا لا صبري .. انا برمس مريم اول شي ..
مي: كيف ترمسين عموه .. عساس محد يدري بالسالفه
ام سيف: عيل شوفي عليا .. وقوليلها ريم وافقت وخل تقول لمريم ايون يخطبونها من عندي ها المره وعقب انا لي رمسه ثانيه ويا مريووم
مي: شو يعني بتهزبينها لانها ماخطبت عندج على طووول
ام سيف: مالج شغل انتي
مي: ماعليه انزين يا العيوز .. الحين انا اللي انطبخ وانشوي من كم يوم بسبة السالفه وفالاخير تقوليلي مالي شغل
ام سيف: هيه هاي سوالف كبار.. يالله سيري رمسي امج وقوليلها انه ريم وافقت
مي: لاوالله.. عيل انتي رمسي امايه وقوليلها دام انها سوالف كبار
ام سيف: ميوه بضربج تراني.. يلا قومي لا تنقصين عليه فرحتي
مي: ههههههه خلاص بقوم كرماال موافقه ريمان مب عشان شي ثاني

وطلعت مي من الحجره وقبضت تيلفون الصاله تتصل بامها .. دقت على الموبايل ع طول .. ردت امها .. ومي عقب السلام والاخبار فتحت الموضوع عطول.. عليا استغربت كيف درت مي ودرت اليده.. اما مي خبرتها كيف اليده درت لانه ام سيف خبرتها كيف سمعت ريم وهي ترمس بس ما قالتلها كيف هي درت .. عليا حطت فبالها انه ام سيف يمكن زل لسانها ويا مي .. طنشت ماهمها .. لانها استانست ع موافقة ريم .. بس هي ردت على مريم .. كيف بترد ترمسها وتقولها ريم وافقت.. اكيد بيحطون فبالهم انه حد غصبها.. اخر شي رفضت عليا انها ترمس مريم .. وقالت حق مي تخلي يدتها ترمس مريم ..

ومي من عقب ما سكرت عن عليا ردت عند يدتها ..

ام سيف: ها رمستيها
مي: هيه رمستها .. استانست بس في نفس الوقت ماطاعت تتصل بعموه
ام سيف: ليش؟
مي: تقول هي تتلوم لانها اصلا رمستها قبل يومين وقالتلها انه ريم مب موافقه
ام سيف: وشعنه امج تستعيل وتقولها ريم ماتبا
مي: بعد امي شو بتسوي .. تدري بريم عنيده وكم بتيلس تتحجج حق عموه
ام سيف: لا حول ولا قوه .. واحين
مي: شو بعد احين ... بييبلج التلفون واتصلي بعموه رمسيها مالج الا جيه ..
ام سيف: قومي هاتيه ..
مي نشت يابت تلفون البيت صوب يدتها .. واتصلت ام سيف بمريم ..

مريم شافت رقم امها وشلته ع طول ..
ام سيف: السلام عليكم
مريم: وعليكم السلام والرحمه ..
ام سيف: شحاالكم
مريم: بخير وسهاله .. اشحالج انتي امايه؟
ام سيف: بخير الحمدالله ..
مريم: وبنات سيف اشحالهن؟
ام سيف: الحمدالله ..
مريم: تغديتوا؟
ام سيف: هيه الحمدالله .. نايف اشحاله ؟
مريم: نايف؟ بخير فديته
ام سيف: يالله مب ناويه تخطبيله وتيوزينه ؟ نبى نفرح به
مريم: هاه ؟ هيه ان شا الله
ام سيف: رمسيه انتي وانا بييبله الحرمه السنعه
مريم توترت : منو تطرين
ام سيف: ريم بنت خاله ..
مريم: لا
ام سيف: شو لا ؟
مريم: لا ماظن يبى حد من بنات خاله
ام سيف: ليش بلاهن بنات خاله ؟ مب انتوا اللي ربعتوا لامهم تخطبون ريم وانا ياغافلين لكم الله .. لا جني امج ويدته ويحتاي اعرف .. لكن شغلج كله سويتيه بالدس ..
مريم ارتبكت .. كيف امها عرفت .. خصوصا بعد ما انحسم الموضوع ..
ام سيف: يحتاي يا بنت مايد .. تين تخطبين البنت من ابوها
مريم: امايه فديتج .. انا خفت انه امها ماترضى او انها هي ماترضى وقلت بدال ماكبر الموضوع واخاف انه سيف يجبرها .. ارمس امها قبل وان طاعت بخبركم ..
ام سيف: درينا بدون ماترمسين
مريم: منو خبركم؟
ام سيف: مايحتاي تعرفين .. المهم متى بتون تخطبونها من ابوها عشان اقوله
مريم: نخطبها ؟ شقى بعد ني نرمس ابوها .. البنت تراها ماوافقت
ام سيف: خبرتوا نايف انه ريم مب موافقه ؟
مريم: ماخبرناه .. الكل يدري الا هو.. مب عارفين كيف نفاتحه
ام سيف: خلاص لاتخبرينه مايحتاي .. ريم وافقت
مريم عقدت بحياتها: من يومين تراها مب موافقه.. ليكون جبرتيها امايه
ام سيف: انا مب خبله اجبر البنت .. صح انه هذاك ولد بنتي وهي بنت ولدي وابا لهم الخير وانه الله يجمع بينهم بس ماتوصل لاني اجبرها .. انا رمستها واقنعتها ..
ريم تحاتي اخوانها .. وجسوم والبنات .. وانا طمنتها انهم بيتمون عندي وهي تروم تيهم كل يوم لين تتعود .. واقتنعت
مريم وهيه مستانسه: والله فرحتيني يا امايه .. بقوم ابشر البنات .. لا لا بقوم اخبر نايف .. ولا اقولج بقول لخلفان احسن وهو بيخبر نايف
ام سيف غصبن عنها رغم العتاب اللي في خاطرها على بنتها اظحكت
ام سيف: ماعرفنالج شو بتسوين ..
مريم: والله من وناستي .. نحن شارين ريم ونباها مب الا نايف يباها .. كلنا نباها حرمه لنايف ..
ام سيف: خلاص انا برمس سيف اليوم .. وبخبره .. وانتي خبري خلفان وهم بيتفاهمون ..
مريم: ان شا الله وقولي لريم أي شي تباه نحن حاظرين مابنقصر عليها بشي ..

ارتاحت ام سيف لها الكلام .. هي ماتعلم بالغيب لكن حست انه الله بيعوض ريم عن كل المسؤوليات اللي حملتها رغم صغر سنها ..
سكرت ام سيف عن بنتها والتفتت لمي اللي كانت ملزقه اذنها ع السماعه وتسمع كل شي رغم انه يدتها كل شوي اتدزها بس مي ترجع تسمع ..

ام سيف: غثيتيني مارمت اهزب مريوم زين
مي: تهازبي وياها عقب ع راحتج المهم انه اللي اباه انا استوى وبس ..
ام سيف: يالله انزين قومي عني بطيح شوي برتاح وخلاف يوم بينش ابوج برمسه ولاتخبرين خواتج بشي .. لين ارمس ابوكم وعقب انشروا الخبر ع راحتكم
مي: انزين ..

طلعت مي من الحجره وسارت فوق عند خواتها وتيلست وياهم يتابعن فيلم هندي بالفيديو.. وكل شوي تتطالع باب حجرة ريم.. خلاص ريم مزاجها تعكر ومستحيل تظهر وتيلس وياهم .. وفالاخير اندمجت فالفيلم وكل شوي تسأل ليش ها استوى وشو قالو وشو استوى فالبدايه .. وجاسم يرد يخبرها شو استوا والتوم يصححن له فهمه للفيلم .. وساره تطالعهن وتتحلفلهم وتتوعد اذ ما سكتوا ..

****

أما مريم .. قالت للطيفه الحوار اللي دار بينها وبين أمها .. لطيفه استانست واايد ومشتطه تبى هي تسير تخبر نايف..

مريم: قومي كلنا نسيرله .. وينه هو فحجرته؟
لطيفه: هي تغدى وسار حجرته ..

سارن ثنتيناتهم فوق عند نايف لقن باب حجرته مفتوح .. و اسما يالسه متربعه ع السرير ونايف مجابلنها على مسافه وهو يالس ع الكرسي و يقرى الجريده..اسما ترمس ونايف مب مستوعب اللي تقوله ويركز بنظره على الجريده ..

اسما: انزين انته بلاك ..
نايف: شو بلايه بعد .. خلاص ما تباني شو يعني تبيني اسوي
اسما: برايه اللي خلق ريم خلق مليون مثلها ..

نايف حزت فخاطره ها الرمسه اللي سمعها .. ليش ريم مب موافقه عليه .. ليش ما تباه .. رفع راسه وشاف امه ولطيفه عند الباب..
لطيفه سارت ع طول عند أسما ومطتها من شعرها ..

أسما: اي اي يعلج فجي .. عورتيني
لطيفه: قومي اشوفج ..
اسما: شو تبين ..
لطيفه: قومي وياي بسرعه ..
اسما: انزين بقوم بس فجي شعري
لطيفه: يا السوووسه بسرعه قومي ..

قامت اسما من على الشبريه وهي تتطالع لطيفه بنظرات .. لطيفه طنشتها وسحبتها من ايدها برع الحجره وقفلت عنها الباب .. اما مريم تجدمت صوب نايف ويلست ع الكرسي اللي حذاله وسحبت الجريده من ايده وحطتها ع الطاوله الصغيره اللي جدام الكرسيين.. ولطيفه يلست ع السرير وهي تتطالعهم ..

نايف: ليش ماخبرتوني من أول ماعرفتوا؟
مريم: ماله داعي نخبرك
نايف يطالع امه باستغراب: كيف ماله داعي .. مب أنا اللي بخطب وبعرس
لطيفه: ماله داعي لانه ها ماكان القرار النهائي
نايف: لطوف بعد ها الرمسه تتحمل قرار نهائي واولي.. خلاص ها رايها وحسم الموضوع ..
مريم: نايف ريم موافقه
نايف تم يطالعهن باستغراب .. كيف موافقه واسما توها تقوله ريم مب موافقه ..
نايف: شو اميه انتوا ماخذيني مهزله .. توها اسوم تقولي ريم مب موافقه وانتن تقولن موافقه.
مريم: انته تبى الصراحه؟
نايف: قولن اللي عندكن .. عنبو نشفتولي ريجي مره موافقه ومره لا
لطيفه: شوف نايف.. انا قايلتلك من قبل عن حالة ريم وانته بنفسك قلت ماعليك من ها الشي وريم عايبتنك وتباها وبتكسبها صح ولا
نايف: صح انزين وعقب
مريم: الله يسلمك .. ريم فالبدايه ماطاعت.. قالت اخوانها منو بيراعيهم وبيتم وياهم
نايف: انزين بيتنا هاذوه مب فالمريخ..
لطيفه: انزين .. وانا اعتقد حالتها هي اللي خلتها ما توافق .. لازم بتنصدم فالبدايه وتتفاجأ.. بس احمد ربك انته انه الكل اقنعها والحمدلله وافقت
نايف: وافقت مغصووبه قولي
مريم: والله يا وليدي محد غصبها .. توه يدتك قالتلي انها اليوم غيرت رايها ..ربك استخارت البنت وطمنت من صوبك
نايف: ماعرف والله
لطيفه: نايف حكم عقلك مب قلبك.. لاتاخذك عزت نفسك وانته تعرف انه ريم ما رفضتك انته.. هي رفضت فكرة العرس والابتعاد عن خوانها ..
نايف وخى براسه وتم شابك ايده الثنتين ببعض .. مب عارف شو يقول ..
مريم: أمايه تبانا نسير نخطبها من ابوها
لطيفه: ها شرايك ..
نايف: خلاص توكلوا وخطبوها..
وقام من مكانه وحب راس امه وهو يبتسملها .. ولطيفه قامت وحضت اخوها من الفرحه ..
نايف: هههه لطوف شياج.. هههههههه اول مره اشوف ها الحب كله
لطيفه: فديتك يا خويه .. والله اني احبك واموت فيك
كان نايف طويل نسبيا .. خازت عنه وتمت رافعه عينها تتطالعه وهي مبتسمه..
لطيفه: بخليك ويا عيوزك عيل .. أنا بسير أنشر الخبر فالبيت وبسير أأدب أسموه السوسه ..
نايف: ههههه حرام عليج .. هي خبرتني بزلة لسان ويلست تواسيني عقب أونها
لطيفه: الا أأدبها .. هاي مادري متى بتيود لسانها
نايف: ليش خلوها تخبرني ولا تم على عمايه
لطيفه: هههههههه يلا بسير عيل انا ..