ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات > روايات مكتملة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
روايات مكتملة "قصة إنسان" يوجد هنا "قصة إنسان" هنا تنقل الروايات المكتملة فقط

فساتين العيد


 
قديم   #51

**اسيرة الحب**


رد: "قصة إنسان"


"قصة إنسان"

الله يعطيك العافية كان بارت روعة بالعكس ماحسينى بالملل بصراعه جدا رائع
باانتظار البارت القادم

 
قديم   #52

حكايةإحساس


رد: "قصة إنسان"


"قصة إنسان"

ياقلبي رووووعه جزاك الله خير
مافيه كلمه شكر توفيك حقك

 
قديم   #53

غسق الكويت@


رد: "قصة إنسان"


"قصة إنسان"

نـــــــــــــوار


سيـــــــــــرة الحب


مشرفتي ثلـــــــــــــوج



أشكركم من كل قلبي ع متابعتكم قصتي


وأشكركم إنكم عطيتوني من وقتكم الثمين

لقراءة أقرب رواياتي لقلبي


الحين بأنزل البارت الأخير

ويا رب يارب

اتكون القصه اتناسب مستوى هالمنتدى الراقي

أختكم غسق الكويت

 
قديم   #54

غسق الكويت@


رد: "قصة إنسان"


"قصة إنسان"

___الفصل الثامن عشر___
كان ناصر يكلم شيماء وهو بأمريكا_
ناصر: شيوم
شيماء: هلا
ناصر: وحشتيني
شيماء:---
ناصر: أموت عالحيا واللي يستحون
شيماء:---
ناصر: شيومتي عندج مسنجر
شيماء: إي ليش
ناصر: اشرايج تشبكين ودي أكلمج عالمسنجر أحسن
شيماء: أرسلي إيميلك
ناصر: إن شاء الله وأنتي أرسلي إيميلج عشان أضيفه عندي
شيماء: الحين أرسله
ناصر: الوعد عالمسنجر
شيماء: بس ناصر ترا الإيميل موحقي حق دلال أختي لأنها تدرس حاسب ولا أنا ماأعرف بهالسوالف
ناصر: ههههه فهمتج حياتي بس خليها تعلمج شلون تدخلين وتعلمج عليه
شيماء: إن شاء الله انتا انطرني _سكر التلفون وأرسلها إيميله _
شيماء: دلول أبيج تشبكيلي عالمسنجر
دلال: غريبه اشعندج
شيماء: نصور يبينا نسولف عالمسنجر أحسن
دلال: جم تدفعين
شيماء: يييو دلول عن الملاغه عاد تكفين
دلال: ههههه ماشي تعالي عندج إيميله
شيماء: إي كاهو بس أبي واحد من إيميلاتج ماتستعملينه
دلال: ماشي هاج هذا إيميل اكتبيه عندج_كتبت الإيميل وارسلته له _شبكة ودخلت معاه عالمسنجر وقعدو يسولفون كتابه بس_
ناصر: هلا حياتي هلا وغلا
شيماء: هلافيك
ناصر: حياتي برسلج إهداء وأبيج تقرينه بقلبج قبل عيونج
شيماء:--
ناصر: قد تظنين حلوتي أني أجاملك في بعض الكلمات أو أن عباراتي تخالطها المجاملات أوتتخلل نبراتي بعض الكذبات إذا كان هذا ماتظنين فاسمحيلي أن أصفك بالطفلة التي لاتدرك سبب وجودها في هذه الحياة *اسمحيلي حلوتي أن أصف لك مشاعري تجاهك إن كل نبضت في قلبي تنبض لأجلك وكل عبارة حب وإعجاب وغزل تخرج من شفتي هي بعض من حديث هذه النبضات أحبك ولاأعرف لماذا اختار قلبي حبك أحبك ولاأعرف من يناسب الأخر منكم آالحب يناسبك أم أنت من يفخر الحب بإنتسابه لكي...حبيبك ناصر
شيماء: ناصر ممكن أستأذنك بطلع
ناصر: ليش ياروحي
شيماء: ناصر كلامك روعه وخواطرك أروع
ناصر: يابعدي ياشيوم لأجلج صرت جذي وعشانج إنتي وبس
شيماء: ناصر متى ترجع
ناصر: اشتقتيلي
شيماء: تكفى ناصر متى
ناصر: يعني اشتقتيلي
شيماء: عندك شك
ناصر: ههههه عيل بشغل الكاميرا بخليج تشوفيني اشرايج
شيماء: ناصر عندك كاميرا تكفى شغلها ودي أشوفك
ناصر: أبشري _
شيماء: دلول بيشغل الكاميرا تعالي ضبطي المسنجر عشان تطلع صورته _جته دلال وضبطتها لها وطلعت صورت ناصر جدامها _
شيماء: وحشتني
ناصر: اشرايج فيني متغير
شيماء: ضعفان بس حلو _شافته قام يرقص(كان لابس شورت أخضر وبلوزه حفر أبيض وشعره كثران حيل وصايرله ذيل من ورا) وبعدها رد قعد_
ناصر: يافرحت قلبي حبيبتي تقولي حلو
شيماء: نصور ترا أطلع
ناصر: أقول حياتي مافي طلعه آنا توني قاعد من النوم ومصحصح وباجر عندنا ويكند يعني قاعدلج الليله
شيماء: أنتا بالشقه
ناصر: إي بالشقة وقاعد بحالي ياليتج عندي بس
شيماء: ليش اشبتسوي
ناصر: بعدين أقولج اشراح أسوي _كانت شيماء من النوع العبيط ولو إنا دلال موعندها جان أسألته أكثر_
شيماء: ناصر مارديت علي متى ترد من السفر
ناصر: باجيلي شهر ونص وأكون عندج وبعدها بشهر بكون أنا وياج ببيت واحد وتحت سقف واحد وبعدها محد يعكر علينا قعدتنا لاطلال ولاجلال ولاأحد أحبج والله أحبج
شيماء: وأنا بعد
ناصر: وأنتي شنو
شيماء: أنا وبس
ناصر: أففف حسبالي بتقولين أحبك
شيماء: ههههه _ظلو يسولفون مع بعض _ بعد أسبوعين _هنادي وسالم قاعدين بالصالة العصر_
هنادي: يابوناصر خلني أتصل بزياد يوديك أحسن لك أنتا تعبان
سالم: لاماله داعي أنا بروح بسيارتي
هنادي: تعوذ من ابليس وخلني أتصل بزياد
سالم: لاتشغلين باجر كلها عشر دقايق وأوصل المستوصف _ طلع سالم بسيارته وأول مالف وطلع من الشارع حس الدنيا ظلمت بعيونه وماصار يشوف اللي جدامه وفجأة_ طررااااااخ خ خ خ خ خ_ على صلاة العشا وماقدرت هنادي تصبر واتصلت بزياد_
زياد: هلا يمه
هنادي بخوف: زياد يمه وينك
زياد: أنا توني داخل المسيد ليش يمه في شي صوتج مايطمن
هنادي: إذا خلصت الصلاة تعالي على طول
زياد: أبشري يمه _سكر من أمه وبعد صلاة العشا راحلها _دخل الصاله ولقاها ماخذا الصاله طول بعرض رايحه راده_
زياد: السلام عليكم
هنادي: زياد الله يابك عمك سالم طلع من العصر ومارد للحين أنا خايفه عليه
زياد: يمه تعوذي من ابليس ماقالج وين رايح
هنادي: كان تعبان وراح المستوصف بس أهو تعبان حيل ومن اليوم أتصل جهازه مسكر _دق تلفون البيت _
هنادي: الله يستر آنا قلبي مومطمن
زياد: سمي بالرحمن خير إن شا الله _رد زياد عالتلفون_
زياد: ألو هلا
--: السلام عليكم أخوي هذا بيت سالم عبدالله
زياد: إي نعم من معاي
--: معاك المستشفى العم سالم عندنا سوا حادث ممكن تجون للمستشفى
زياد: بشرني عنه
--: بخير بس تفضلو عندنا بالمستشفى
زياد: إن شا الله _سكر زياد التلفون _
هنادي: بشر
زياد: تطمني يمه عمي بخير حادث بسيطه آنا بروح المستشفى
هنادي: خذني معاك
زياد: ماشي بسرعه يمه_ راحو للمستشفى ودخل زياد عالدكتور_
زياد: دكتور شخبار العم سالم عبدالله
الدكتور: استريح ياأخوي _قعد زياد_
الدكتور: ياأخوي أنت رجال مؤمن وتعرف إن لله ماأخذ وله ماأعطى والموت حق علينا العم سالم كان تعبان وساق السياره وهو دايخ وغاب عن الوعي وصدم بالشبه وصار عنده نزيف داخلي وبصراحه ماقدرنا نسويله شي لأنه نزف بكمية كبيره والله أخذ آمانته _طالع زياد أمه وشاف الصدمه بعيونها_فجأة طاحت _قاملها زياد_
زياد: يمه يمه قومي يمه_ جاه الدكتور وشالها زياد وودوها للملاحظه وعطوها ابرة مهدء_ عالساعة 9بالليل انتشر الخبر بالعايله وبدو الناس يجون يعزون _كانت حنين ونشميه عند هنادي وشيماء وريم ومضاوي وشيخه ودلال عند ندى ونوف بالبيت _محد بلغ ناصر وثاني يوم كان ناوي يسويلهم مفاجأة لأن عندهم إجازة أسبوع فقال يجي يقضيها عنده أهله _وصل البيت وانصدم بكثرة السيارات_ دخل وشاف الديوانيه مفتوحه وقال أكيد أبوي عنده قهوة العصر _انصدم لما شاف زياد وخواله وصقر واقفين وأشكالهم ماتطمن _
زياد: ناصر
صقر: هلا ناصر الحمدلله على سلامتك
ناصر: الله يسلمك ياعمي _سلم عليهم بس استغرب وجيه الناس ماتبشر بخير _دخل واحد وسلم على صقر_
الرجال: عظم الله أجركم يابوزياد _التفت ناصر_
ناصر بصرخه: بمنو تعزينا زياد منو متوفي قولو تحجو أبوي فيه شي عمي صقر قولي أبوي فيه شي خالي تحجا فواز منو قولو منو _قام يبجي وحضن زياد _خذاه زياد وصقر لبره وودوه للسرداب وقعدوه_ كان زياد طول هالوقت يصبر نفسه ويقويها_
صقر: ناصر هذا طريق كلنا ماشين فيه وأنا عمك ولله ماأخذ وله ماأعطى وحقه سبحانه يكتب الموت بأي وقت علينا ومانقدر نرده وربك أخذ أمانة أبوك وادعيله وأنا عمك تراه محتاي لدعواتك _قام ناصر وحضن صقر وقعد يبجي_
ناصر: يعني راح ياعمي راح الغالي وأنا كنت ياي عشان أسويله مفاجأة
صقر: ادعيله بالرحمه ياولدي ترا دعواتك تنفعه
ناصر: عمي لاتخليني أنا مالي بعد الله غيرك أنتا وزياد لاتخلوني ياعمي
زياد يبجي: أنا عندك عزوتك وماراح أخليك _هدا ناصر شوي _
صقر: اسمع ياناصر أنتا وزياد أمكم وخواتكم محتاجين لكم ولازم تصبرونهم بهالموقف وتكونون لأمكم ظهر يسندها فهتو ياعيال وإذا بغيتو شي أو احتجتو شي أنا موجود وترا مايردكم إلا لسانكم
ناصر: الله يطولنا بعمرك ياعمي ويخليك ذخر لنا
زياد: يعطيك العافيه يبه
صقر: اسمعو روحو الحين لأمكم وسلمو عليها وقولولها جم كلمه تصبرها ترا إذا شافتكم عندها بيخف حزنها وبيطمن قلبها
زياد: أبشر يبه _دق زياد على حنين وقالها تسويلهم درب _دخلو زياد وناصر على أمهم_ كانت هنادي قاعده بالصالة ودموعها على خدها وعندها حنين وشيماء متغطيات _وقفت لهم ومسحت دموعها وبانت علامات القوة على وجهها _وقفو قدامها _
هنادي بقوة: سالم مات وارتاح من هالدنيا بس خلا وراه ناصر وزياد اللي يعتبره مثل ولده وترك عندكم خواتكم ومالهن عزوه إلا أنتو سمعتو مالهم إلا أنتو خافو الله فيهن أبوكم ماعمره رفع صوته بويه وحده فيهن ولازعلها هذول يتيمات والله ورسوله وصا فيه والحين أنتو وليتو أمرهم هالله هالله فيهن يازياد وياناصر هالله هالله بخواتكم
زياد: تربيتج يمه ماراح تخيب ظنج
هنادي: قول إن شا الله يمه
زياد وناصر: إن شا الله
هنادي: أم عبدالرزاق نادي البنات خيسلمون على اخوانهم _راحت حنين_
هنادي: ناصر ماودك تسلم على أمك _جاها ناصر وسلم عليها_ دخلو ندى ونوف _راحت ندى لناصر وهي تبجي_
ندى: ناصر راح الغالي ياناصر راح _حضنها ناصر ومسح على شعرها_
ناصر: هذا اللي كاتبه الله هذا يومه ياندو ادعيله بدال لاتبجين _طالع زياد نوف واستغرب سكوتها _
زياد: نوف شخبارج _قامت تبجي وطاحت عالأرض وهي تبجي _راحلها زياد يركض ومسكها وحطها بحضنه _
نوف: زياد لاتتركنا احنا الحين مالنا غيرك أبونا مات يازياد وماراح يرد _هز كلامها زياد ودمعت عيونه وحس بالحمل اللي انحط على ظهره هذول خواته وأمه _
زياد: نوف كلنا عندج ياقلبي أنا وناصر وأمي وندى _ارفعت راسها _
نوف: لا ناصر تركنا يوم أبوي حيا وأكيد راح يتركنا بعد مامات أبوي _جاها ناصر وقعد عندها وحط إيده على راسها وقرب منها وهمس بإذنها بحنان _
ناصر: لايانوف آنا أوعدج إني ماراح أترككم وراح أقعد عندكم آنا وزياد المهم إنج ترضين عننا
نوف: ناصر لاتسافر مره ثانيه وتخليها
ناصر: وعد يانوفا ماراح أسافر مره ثانيه إلا وأنتي معاي _خذا زياد نوف وندى ونادى حنين وراحو للغرفه الثانيه وقعد معاهن عشان بيكلم خواته ويصبرهن ويوصيهن على أمه_ أما عند ناصر وهنادي وشيماء_ أول ماطلع زياد قطت شيماء غطوتها عن وجهها وكان ناصر طول الوقت مايدري إنها هي _وكان قاعد جنب أمه وحاط راسه على رجلها ويقاوم دموعه _وماشاف شيماء_ أرسلتله رساله_<عظم الله أجرك حبيبي>_<أجرنا وأجرج ياروحي آآآههه ياليتج عندي ياشيوم محتاجج بهالوقت أحس إني مخنوق ودي أرتمي بحضنج وأفرق كل حزن فيني>_<أنا عندك وقريبه منك أقرب من إنك تتخيل>_<وينج تكفين قوليلي إذا أقدر أجيج> _قامت شيماء ووقفت قباله_رفع راسه وشافها _فز من مكانه_
ناصر: شيماء _قامت هنادي وراحت عند زياد والبنات وتركت ناصر يآخذ راحته مع زوجته_
شيماء: قلتلك أنا أقرب من إنك تتخيل _وقف وصار يطالعها وده يفجر البركان اللي داخله وده يفرق ادموعه اللي حبسهم عشان مايضعف أمه _دمعت عيونه وحس أنه موقادر يصبر نفسه أكثر من جذي وزاد بجيه_طاح بحضنها وقام يبجي وعلا صوته وهو يبجي _قامت تبجي معاه _
شيماء: ناصر البجي ماراح يفيدك ولا يفيده ادعيله بالرحمه هو محتاج دعواتك الحين _زاد بجيه وبعدها هدة نفسيته _ عدت أيام العزا وأصرو خوات زياد عليه إنه يسكن عندهم ووافق أبوه وكان مايطلع إلا للمحكمه إذا عنده قضيه أو يروح لمكتبه _ مرت الشهور وطلعت هنادي من العدة وتأجل عرس ناصر لسنة جدام _وكان صقر دايم يجيهم ويتطمن عليهم ويزور أحفاده _ مر على وفاة سالم ثمان شهور _نزل زياد وكان كاشخ وجاء وقعد عند أمه وناصر وخواته بالصاله _
هنادي: أشوفك كاشخ على وين درب
زياد: ههههه والله ياالغاليه اليوم عرس رفيجي عبدالله
ناصر: عبدالله ياحليله اليوم عرسه عيل انطرني بروح أبدل وأروح معاك له حق علي هو وربعك ماتركوني طول أيام سفرتي لأمريكا وأيام العزا
زياد: عيل استعيل لأن راكان من اليوم يدق _دق تلفون زياد<واللهrغالي> يتصل بك_
زياد: الطيب عند ذكره
ناصر: وهذا مايصبر عنك
زياد: وأنتا اشحارك هلا ريكو
راكان: السلام عليكم زيود وينك تأخرت
زياد: وعليكم السلام آنا بالبيت أنطر نصور يخلص وأييكم
راكان: استعيل ترا طقت جبدي منهم حتى وأهو معرس طايحله ملاغه مع نسيبه بسوم والأخ خليفه انعدا منهم ونسيبك يضحك عليهم
زياد: هههههه خلهم يستانسون وأنا إن شا الله نص ساعه وأكون عندك
راكان: آآآهههه بصبر نص ساعه بس إذا ييت ومالقيتني اعرف إنا ضغطي ارتفع وودوني المستشفى
زياد: هههههههههههههههه معقوله شكلهم داشين ملاغتهم عدل
راكان: شوف الساعة جم وعبيد قاعد يتملغ وينسف مايل ولا يقلب البشت ولا منسف كوبرا ولابس بشته ولا فاتح ازراراته وكاشخ
زياد: هههههههه
راكان: المشكله الخبول طايحيله ضحك ومافي شي يضحك
زياد: هههه زين هدي أعصابك شوي وأيك فديتك تحملهم على شاني
راكان: عشانك بس _سكر راكان من زياد _نزل ناصر وراحو لعرس عبدالله _مرت الأيام ومافي شي جديد _وردت الحياة طبيعية وكان الكل يستعد لعرس ناصر وكان صقر دايم معاه ويجهز وياهم _ قبل العرس بيوم _دخل ناصر الصاله وكان جايب البشوت معاه _
ناصر: يمه يمه تعالي _جته هنادي وأول ماشافت البشوت بإيده _
هنادي: كللللللوووووش
ناصر: هههههه
هنادي: ألف ألف مبروك يايمه
ناصر: الله يبارك فيج _دخل زياد وهو شايل أكياس بيده_
زياد: أففف تعبت أغراضك وايد أنتا وويهك خذيت البشوت وخليتي أشيل باجي أغراضك _حط أغراضه بنص الصاله_
ناصر: أخو عالفاضي
زياد: عاد اهلكني شغل أنتا وويهك آنا أموت وأعرف أنتا مفصل أربع بشوت اشحقا ليش شالسبب
ناصر: اقعد وآنا أقولك _قعد زياد وكانت هنادي تضحك على نجرتهم مع بعض_
زياد: وهذي قعده تفضل عمي ناصر
ناصر: اسمع وأنا عمك هالبشوت واحد لي وواحد لك وواحد لخالي هاني وبشت بعدين أقولكم لمنو
زياد: نصور عن المصاخه اخلص الرابع لمنو
ناصر: الحين هذا يزاي بلبسك بشت وبرزك وأنتا تقول عني ماصخ أفا بس أفا موهذه هقوتي بك ياأبا عبدالرزاق أنا ماسخ
زياد: هههههه حقك علي أنا الماصخ بس قولي لمنو البشت الرابع
ناصر: قبلت اعتذارك وستعرف غدآ من صاحب البشت الرابع
زياد: تدري ناصر ياشينك لاقمت تتفلسف أقول أنا بروح لندو ونوفا أبركلي من مجابل ويهك عن أذنج يمه _خذا الكوشيه وطق ناصر فيها وراح فوق _
ناصر وهنادي: هههههههه
ناصر: يمه
هنادي: هلا يمه
ناصر: تدرين البشت الرابع حق منو
هنادي: لا حق منو _وقف _
ناصر: باجر أقولج هههه _انحاش وقطت عليه الكوشيه بس ماحاشته _قامت وخذت البشوت وخلت الخدامه تجيب باقي الأغراض وحطتهم بشقة ناصر _ يوم العرس _كان ناصر بالبيت وعنده زياد وفواز وخالد رفيجه ويوسف ويعقوب عيال خاله _لبس بشته _دق على <أبوي الثاني>_
ناصر: ألو السلام عليكم
صقر: وعليكم السلام هلا بمعرسنا شلونك وأنا عمك
ناصر: بخير دامك بخير ياغالي عمي أنتا وينك
صقر: بالطريج للصالة آمريني بغيت شي ياغالي
ناصر: سلامتك ياعمي بس حبيت أتطمن أنك بالصاله _سكر ناصر من صقر _لبس زياد البشت ومشو الصاله_ عند الباب_
ناصر: يعقوب واللي يعافيك نادلي عمي صقروخالي هاني خالد عطني البشتين اللي بسيارتك _جو صقر وهاني وسلمو على ناصر_ خذا ناصر البشت الأول وعطاه خاله هاني وخذا البشت الثاني ولبسه صقر_تفاجأ صقر وماتوقع هالشي أبدآ _التفت ناصر لزياد وابتسمله _
صقر: بس ياناصر خالك فواز أبدا مني
ناصر: محد أبدا منك ياعمي أقصد ياأبوي الثاني أنتا سويتلنا اللي مايسويه الأبو لعياله _باسه على راسه _دخلو مع بعض للصالة _ووقف صقر عن يسار ناصر وخاله عن يمينه وزياد عن يمين خاله _وكان فواز ويوسف ويعقوب وربع زياد ماسكين الاستقبال والإشراف عالصالة _وعند الحريم كانت هنادي وندى وحنين وخوات زياد أهم اللي ماسكين العرس _ كانت هنادي لابسه (ثوب كت بيج وفيه شغل خفيف من فوق بالبرتقالي وحزام كبير من عند الخصر برتقالي وعالثوب جاكيت طويل<صايه>برتقالي وله ذيل وكمه وسيع ومن تخت بيج ومن ورا كله شغل بيج ببرتقالي ومسوي شعرها تسريحه رافعته كله ومكياجها ناعم وأوفر) _أما ندى لابسه( ثوب رمادي فاتح حفر ومكسر كله ومفتوح من جهة الصدر دائري وداخله قطعة حمرا وفيها شغل أحمر ومن تحت الصدر حزام أحمر خام ومربوط فيونكه ومسون شعرها تسريحه من فوق ومنزلة عن جنب وحاطه ورده تحت أذنها ومكياجها سلفر ناعم وحمره حمره)_وحنين لابسه(ثوب ليموني ضيق من فوق ووسيع من تحت وكمه طويل منفوخ وفيه شغل من جدام بالأبيض والفضي وحزام أبيض من تحت الصدر عليه شوارفسكي أصفر ورافعه شعرها لفوق تسريحه وحاطه مكياج ناعم وحمره مشمشي) _جولهم حضور كثير من أهل ربعه وأهل أبوه وأهل ربع أبوه ورفيجات ندى وأهل راكان وأهل حنين_ جت دخلت العروس وكان جلال هو اللي بيدخلونها _دخلت شيماء وكانت لابسه( ثوب أبيض ثلجي خفر وفتحة الصدر مربعه ونافش من تحت بس موكبير حيل والشغل بالثوب كله شوارفسكي فضي ومن ورا كسره كبيره ونازل منها خامه كلها شوارفسكي لامع ومسويه شعرها كيرلي ولامته عن جنب ونازل لخصرها <لأن ناصر طلب منها تفتحه> وحاطه ورده ورديه فيه ومكياجها ناعم وماكانت لابسه طرحه ووردتها ورده كرستال وورقها سلفر)_ دخلت وكان ماسكها جلال وكانت دخلتها شعر مهديه لها ناصر وكانت مفاجأة منه لها _وصلت للكوشه وقعدت _
همس جلال بإذنه: ياويلج اليوم ناصر بيذبحج ياويلج _ارتبكت _
جلال: ههههه _طلع جلال _لاحظت حنين ارتباكها وخوفها اللي زاد_
حنين: شوشو حبيبتي اشفيج اشقالج هالخبل
شيماء: حنين هالخبل خوفني
حنين: ماعليج منه خيولي _ بعد ربع ساعة جت دخلت ناصر _عند باب الصاله_
ناصر: عمي حلفت عليك
صقر: بس ياناصر
ناصر: آنا حلفت ولايعني زياد ولدك وآنا موولدك أشوف لما بعرسه دخلته
صقر: ناصر اسمعني وأنا عمك أنا ماأقدر أدخل مايصير أدخل
ناصر: عيل حتى آنا ماراح أدخل
هاني: يابو زياد أنتا اش خسران إن دخلت ادخل وفرح قلب ناصر
صقر: يعني ملزم
ناصر: ومابذني ماي _طلعت هنادي عند الباب وهي لابسه عبايتها الكتف ولافه ملفعها وكاشفه وجهها_
هنادي: ناصر ياالله يمه ادخل
هاني: ولدج موراضي يدخل
هنادي: ليش نصور يمه ياالله ادخل
ناصر: أنا قلت ماأدخل إلا عمي صقر معاي _طالعت هنادي صقر_
هنادي: بو زياد عشان خاطري ادخل مع ناصر أنتا تعرفه عنيد وإذا قال إي ماقال لأ _طالعها صقر وقال بداخله: انتي أنتي ماتغير حلاج ولاجمالج ولأجل عين تكرم مدينة_
صقر: خاطرج على راسي ياأم زياد وأنت يا الله ادخل نطعت البنت داخل
فواز: تلاقيها الحين ارتبكت وخلص ارتباكها وأنتا للحين مادخلت _دخل ناصر وعن يمينه صقر وماسكه بيده ويمه زياد وعن يساره خاله هاني ووراه فواز _ وصلو للكوشه وأصر على صقر إلا يصور معاه وجابولهم عبدالرزاق وراكان وصورو معاهم _استأذنه صقر بيطلع _باسه ناصر على راسه وهمس بأذنه_
ناصر: الفال لك إن شا الله على أم غاليك _فهمه صقر وابتسم وقاله_
صقر: وأنت حاضر _طلع صقر وزياد وهاني وفواز _قعد ناصر شوي وكان كل شوي يقظ كلمه على شيماء _قرب منها ومسح أطراف حلقه بكلينكس _
ناصر: عيل أدق عليج اليوم وتصكين التلفون بويهي بس منو بيمنعج مني اليوم _خافت شيماء وحس ناصر إنها ترجف_
ناصر: فديت الخوف واللي يخافون خايفه صدقيني ماراح يشفعلج خوفج ماخذ حقي يعني ماخذ حقي _نادا أمه وقالها إنه بيطلع _طلع من الصاله وكان يجر شيماء جر _ كان جلال واقف عند السيارة _
ناصر: وخر مناك أشوف
جلال: ناصر اشفيك
ناصر: أم زياد ركبي شيماء جدام وأنتا عطني السويج ولأحد يلحقنا حتى المصورات سمعت_ ركبت شيماء جدام وركب ناصر_ شغل السيارة ومشا _
جلال: مينون بيظل طول عمره مينون
فواز: منو المينون
جلال بخوف: آنا آنا المينون
فواز: أشو على بالي بعد _ عند ناصر وشيماء _
ناصر: تتوقعين وين بنروح
شيماء:--
ناصر: ماتدرين عيل آنا تصكين التلفون بويهي هاه بوريج الشغل الحين والله والله ماراح أعديها لج_وصل للشاليهات _
ناصر: يا الله انزلي
شيماء: وين أنزل ناصر تكفى
ناصر بصرخه: أنزلي _ حاولت ننزل وهي خايفه_
ناصر: أنزلي
شيماء: ماأقدر ثوبي كبير _جاها ناصر وساعدها ونزلت وفتح دبت السيارة وطلع شنطتين _دخلو الشاليه وكانت شيماء تمشي بصعوبه _دخل الصالة وشغل اللمبه_وقط بشته عالكرسي وقط غترته وقعد _
ناصر: اشفيج واقفه تعالي قعدي _طالعته وقامت تبجي _
ناصر: ليش تبجين _زاد بجيها وماردت عليه_ قاملها ومسكها مع كتوفها وباسها على راسها وحط راسها على كتفه وحضنها _
ناصر: هههههههه خلاص سامحتج _زاد بجيه_
ناصر: هههههه خلاص ياروحي خلاص والله حبيبت ألعب بأعصابج مثل مالعبتي بأعصابي اليوم _قعدو ومسح دموعها _
ناصر: شيوم ياقلبي أنا حبيت تكون ليلتنا غير عن الكل
شيماء: بس أنتا قلت أننا بنروح للفندق موللشالية
ناصر: كانت جذبه مني لأني عارف إنا محد بيرضى إنا نروح الشالية الوحيد اللي يعرف هو زياد وندو _ نترك معاريسنا يرتاحون _ رد زياد البيت وكان تعبان _دخل الصالة وطاح عالغنفه وقط غترته جنبه _جوله عبدالرزاق وراكان_ جت ندى وقعدت جنبه وقطت شيلتها بس ماقطت عبايته احترامن لزياد_جتهم هنادي وقطت عبايتها وقعدت عند نوف _
زياد: هاه بشرو شخبار العرس
ندى: بصراحه روعه بس تعبنا حيل وأكثر شي تعبت أم زوزو _باس عبدالرزاق _
هنادي: والله أم زوزو ماقصرت شالت العرس على راسها
حنين: ماسويت شي ياخالتي وبعدين عرس حماي وأختي
زياد: والله التعب عندنا صج طاح خدي وأنا أسلم ماشا الله ياله حضور موطبيعي ولدج ماتوقعته مهم جذي
ندى: هذا نصور اشعبالك
زياد: آنا أموت وأعرف هالصحبه اللي طاقتها مع نصور اشوراها
نوف: آنا أقولك لأنها مليغه وهو مليغ فلايقين على بعض
زياد: ههههههه بصراحه يبتيها
ندى: أنا محترمتكم عشان أمي وحنين ولا عرفت اشلون أتصرف معاكم
نوف: ليش اشبتسوين يعني لولا مسألة الاحترام هذي
ندى: تبين اتعرفين شسوي
زياد: ورينا أفعالج _قامت وخذت عيال زياد وبعدتهم عنه_ وسحبت نوف وقطتها على زياد ومسكت الكوشيه وطاحت طق فيهم_
زياد: يمه وخري بنتج يمه
نوف: آآي شعر آآآآيييييي هديني ياحقيرا _
هنادي: ههههههه تستاهلون ليش تتحرشون فيها _ دق تلفون زياد _سحبه من جيبه غصب _وفتح السبيكر
زياد: ألو يوسف الحق علينا زوجتك اذبحتنا
يوسف: ههههههه حيلها فيكم _وقفت ندى لماسمعت صوت يوسف _
زياد: أف أشوا ياليتك من زمان داق أي ياإيدي أي
يوسف: شمسوين فيها زوجتي ماتغلط على أحد
زياد: تحرشنا فيها وقامت علينا تراها تسمعك
يوسف: ندوتي حيلج فيهم وإذا تبين فزعة ترا أنا حاضر أنتو هي والله اللي يزعل ندوتي مايلوم إلا نفسه
زياد: أقول اعقل ياصبي لاييك خبرها
يوسف: زياد لاتتحدا ترا أييكم الحين آخذها وماتشوفونها بعدها
زياد: بعدك اخلص اشعندك داق علي
يوسف: أفا بسيطه يابو عبدالرزاق مردوده اسمع أبوي يقولك قول لعمتي ترا باجر بيسافر لدبي إذا تبي شي
هنادي: قوله أبي سلامته وخي دير باله على نفسه
يوسف: الله يسلمج عمتي يا الله مع السلامه وقبل لاسكر ندوتي إذا أحد تحرش فيج عطيني دق بس يا الله سلام
زياد: مع السلامه _سكر زياد_
زياد: أيييييي من قدج عندج فزعه
نوف: انتي بس عطيه دقه وييج أهو وخالي والعايله كلها
الكل: ههههههههه
ندى تتصنع القوة: أي حبيبتي عندي فزعة مو زوجته ويفزعلي وأنتي موتي من الحرة
الكل: هههههههه _راحت ندى فوق وهي معصبه _ ثاني يوم العصر _كان زياد قاعد بالصالة وقاعد يقرا قرآن _ وقاعدين عنده أمه وحنين وعياله_ دق تلفونه_<عزوتيn> يتصل بك_
زياد: السلام عليكم يامرحبا يامرحبا
ناصر: وعليكم السلام يامرحبا فيك شخبارك
زياد: أنا بخير أنتا اللي شخبارك عساك صدقت كلامي لماقلتك الزواج مافي مثله
ناصر: بصراحه ماجذبت الزواج يينن والحمدلله الوضع تمام التمام شخبار ربعي والله مشتاقلهم بس شسوي خالتهم أشغلتنا
زياد: هههههه الحمدلله بخير كاهم قاعدين عند أمي حاطتلهم القهوة وتشرب أهي وياهم
ناصر: أمي عندك عطني بكلمها
زياد: أبشر يمه نصور بيكلمج
هنادي: هلا فيك وبنصور _خذت التلفون_
هنادي: هلا يمه هلا حبيبي شخبارك بشرني عنك
ناصر: هلا فيج يابعد راسي أنتي آنا بخير يا الغاليه وإن شا الله آنا وشيماء بنمرج المغرب
هنادي: حياكم الله يابعد أمك
ناصر: يمه حبيبتي أنتي بغيت أسألج جوازي عندج ولابداري
هنادي: جوازك عندي يمه تبيه
ناصر: إي والله يمه أبي عشان باجر الصبح طيارتنا لجدة
هنادي: إن شا الله الحين أطلعه لك عشان إذا ييت تآخذه
ناصر: يعطيج العافيه يا الغاليه
هنادي: هاك أخوك يبيك
زياد: هلا نصور هاه بشر شخبار المفاجأه
ناصر: هههه اسكت بس صكها خوف موطبيعي وقامت تبجي ساعه ياالله سكتت ههههه كله منك ومن خططك بس تصدق وناسه القعده بالشاليه
زياد: ههههه قلتلك من الأول صج باجر الساعة جم طيارتك
ناصر: الساعة 9 الصبح عاد زيود تييني الساعة 6.30أوكي
زياد: سواق عند أهلك آنا
ناصر: عيل منو بيودينا للمطار
زياد: دق على طلول ولا الدعله جلال
ناصر: زين وأنتا اشعندك
زياد: باجر ندو عندها موعد الساعة 8الصبح
ناصر: زين مرني وقطنا عالمطار وروح أنتا وياه للعيادة بعدين تعال قولي موعد حق شنو آنا ماخبرت ندو فيها شي
زياد: موعد حق أسنانها
ناصر: إي صج عاد طمنوني عليها
زياد: أبشر زين اسمعني باجر نمرك أنا وندى ونقطكم عالمطار وبعدها مالنا شغل فيكم
ناصر: ماشي بس الساعة6.30 اتكون عندي وصج قبل لا أنسى المغرب لاتطلع من البيت عشان بييكم
زياد: إن شا الله أوامر ثانيه
ناصر: زيود بلا سخافه أنا قاعد أتكلم من صجي وأنتا تتملغ بصراحه سخيف
زياد: ناصر قوي سخيف ترا
ناصر: زيود أسف إذا تجاوزت حدودي
زياد: أتمنى ماأسمعها منك مره ثانية
ناصر: أبشر وأسف مره ثانية بس صدقني ماكنت قاصد شي
زياد: عاد قاصد موقاصد ثمنها قبل لاتقول
ناصر: بوعبدالرزاق أنا أستأذنك
زياد: مع السلامه _سكر زياد من ناصر وطالع عياله وأمه _كانو قاعدين يسولفون على راسها وهي مركزه وتسمعهم _قال بداخله:يابعد عمري يايمه ياليتني عشت طفولتي عندج جان سويتيلي أكثر من جذي الله يجازي اللي كان السبب حرموني منج حسبي الله عليهم _نزلت دمعته _انتبهتله حنين وحست باللي داخله لأنها صارت تفهمه _حطت إيدها على كتفه_
حنين بصوت حنون: حبيبي انسى الماضي وسامح _انتبهتله هنادي وشافت الدموع اللي بدت تنزل بشكل واضح_
هنادي: زياد يمه اشفيك ليش تبجي _جاها وطاح بحضنها وقام يبجي ويشاهق _خافت هنادي عليه _
هنادي: زياد حبيبي اشفيك يمه بعد عيوني أنتا _زاد بجيه وارتفع صوت شهقاته _
هنادي: حنين اشفيه _اسكت حنين ونزلت راسها ونزلت دمعتها لأنها حاسه بهم زوجها وعارفه ليش يبجي _
زياد وهو يبجي: يمه احضنيني عوضني عن حنانج اللي ماحسيت فيه لماكبرت احضنيني يمه _دق تلفونه_شافته هنادي وردت_
هنادي: ناصر وينك يمه تعال الحين
ناصر: أبشري ياالغاليه بس زياد وينه _سمع صوت بجي زياد وهو يقول :يمه لاتخليني أنا مالي غيرج_
ناصر: يمه زياد اشفيه أنا يايج الحين _سكرت التلفون قبل لايسمع رد أمه وخذا سويجه ونادا شيماء وراحو لبيت أمه_أما زياد فكان حاط راسه بحضن أمه ويبجي _ انزلو ندى ونوف وشافو حالة زياد_
نوف: يمه اشفيه زياد _مسكتها حنين وقعدتها وهمست بأذنها_
حنين: متضايق شوي ويهدى _زاد بجي زياد وكانت أمه تبجي معاه _
زياد: يمه خليج معاي لاتخليني حرموني منج
هنادي: خلاص يايمه لاتعور قلبي _مر نص ساعة _ انفتح الباب ودخل ناصر يركض ووراه شيماء_ جاء وقعد عند زياد وأمه_
ناصربخوف: زياد اشفيك يمه اشفيه زياد _ناصر كان حاس باللي مضايق أخوه لأنه سمع كلامه_
هنادي تبجي: سأله يايمه _حط ناصر إيده على راس زياد وبدا يلعب بشعره_
ناصر: لهالدرجه كنت فاقد حنان أمي يابو عبدالرزاق
زياد: يمه ليش ماأخذتيني عندج ليش كانت تمر علي أيام أحتاجج وماألقاج خليتي غيرج يربيني
ناصر: زياد خلاص هذا اللي كاتبه ربك والحمدلله كنت دايم تييها وتنام عندها وماعمرك اشتقتلها إلا يابك عمي لها _رفع زياد راسه وقام يطالع أمه ووجهه كله دموع ولحيته امتلت بدموعه_
زياد: أنتا تقول هالكلام لأنك عشت بين أبوك وأمك ولماكنت صغير نمت بحضنها إهي اللي ربتك واسهرت معاك وكل مابغيت شي كانت أهي اللي تسويه أما أنا مانمت عندها ولا عشت بحضنها إلا ست شهور وبعدها احرموني منها كبرت ودخلت المدرسه وكبرت وكبرت وتزوجت وأنا بعيد عنها عارف ياناصر أنا أتمنى شي واحد بحياتي تدري شنو
ناصر: زياد
زياد: أتمنى أعيش يوم واحد بحضن أبوي وأمي هههه شفت أحلام بس دايم أحلم وعارف إنا هالأحلام مستحيل تحقيقها _قام ناصر وحس زياد فيه _
ناصر: والله وأنا عزوتك مايجي باجر إلا وأنا خالصلك هالموضوع
زياد: اشبيدك تسوي ياناصر
ناصر: أسوي كثير _طلع من البيت وركب سيارته _دق على <أبوي الثاني> _
صقر: هلا والله هلابناصر شخبارك وأنا عمك
ناصر: هلا فيك أكثر أنا بخير ياعمي
صقر: الحمدلله دامك بخير هذا المطلوب
ناصر: عمي وينك في
صقر: آنا بالبيت آمرني يابوي
ناصر: مايامر عليك ظالم آنا يايك الحين أبيك بموضوع ضروري
صقر: حياك أنا أنطرك _سكر التلفون وراح لبيت صقر_ دق الجرس وطلعله صقر من الديوانيه _
صقر: هلا والله هلا بناصر حياك ياعمي ادخل _سلم صقر على ناصر_
ناصر: الله يحييك _دخلو الديوانيه وقعدو _
ناصر: عمي أنا يايك بموضوع بخصوص زياد
صقر متفاجأ: زياد اشفيه
ناصر: عمي أنا تركت زياد يبجي بحضن أمي
صقربخوف: يبجي ليش اشفيه ناصر طمني الله يطمن قلبك على غاليك
ناصر: عمي زياد موقادر ينسى الحرمان اللي عاشه طول عمره زياد يحس بالنقص وأنه فرق عن كل الناس لأنه انحرم من أمي طول عمره
صقر: بس أنا ماحرمته من أمه دايم كنت أوديه لها
ناصر: عمي تدري شنو حلم زياد
صقر: شنو حلمه
ناصر: مستعد تحققه له
صقر: ماعندي أغلى منه
ناصر: إنا يعيش يوم واحد بينك أنتا وأمي _صقر نزل راسه وماعرف شنو يقول _
ناصر: أنا لايمكن أشوف عزوتي جذي وأتم ساكت
صقر: اشبيدنا نسوي ياناصر
ناصر: بيدك تسوي كثير وأعتقد أنتا فاهم قصدي _استانس صقر بس أخفا وناسته وتصنع الجديه_
صقر: اشراي أمك بالموضوع
ناصر: أمي خلها علي بس انتا اشرايك
صقر: أنا علشان زياد مستعد أسوي أي شي _اتصل ناصر على أمه _
ناصر: ألو هلا يمه
هنادي: هلا ناصر وينك يمه
ناصر: أنا عند عمي صقر يمه زياد لازم يعيش باجي عمره بينكم
هنادي: ناصر اشقاعد تقول
ناصر بعصبيه: يمه أنا وعدته أني أخلص الموضوع زياد عاش ضايع بينكم وأنا لايمكن أشوف أخوي بهالحاله وأتم ساكت يمه إذا تغلين زياد صج خليه يعيش بينكم
هنادي: اشراي عمك
ناصر: ماعنده مانع
هنادي: عشان زياد كل شي يهون
ناصر: بالمبارك يمه وباجر إن شا الله بخلص الموضوع
هنادي: الله يخليكم لي يايمه
ناصر: ويخليج لنا أنتي وعمي _سكر التلفون _
ناصذ: بالمبارك ياعمي
صقر: الله يبارك فيك
ناصر: باجر إن شا الله الملجه
صقر: أنا أشهد إن أمك يابت ريال
ناصر: ياعمي زياد أخوي وأنا ودي أشوفه مستانس أنا عشت بين أبوي وأمي 22سنة وعرفت قيمة هالشي لما سافرت لأمريكا ولماتوفا أبوي وودي عزوتي يعيش بينكم وتعوضونه عن الحنان اللي فقده طول هالسنين
صقر: والنعم والله ياناصر _قام ناصر بيمشي_
ناصر: عمي أستأذنك بروح أبشر زياد والوعد باجر
صقر: حافظك ربي بس خلنا نصلي المغرب وبعدها توكل على الله
ناصر: يا الله عيل خنلحق قبل لايقيم _راحو المسجد وصلو المغرب وراح ناصر البيت _ دخل البيت وكانو حنين وشيماء ونوف وندى قاعدين ولقا زياد لابس دشداشته ومتلثم بشماغه وحاط راسه على رجل أمه عالغنفه وباين التعب على عيونه_ قربله ناصر وباسه على راسه وقعد على ركبه وصار قباله _
ناصر: زياد لامابي أشوف هالهم على ويك وأنا أخوك
زياد: آآآآآهههههه
ناصر: فيني ولافيك _غمض زياد عيونه _
ناصر: بو عبدالرزاق عندي لك مفاجأه وأتمنى تعجبك مفاجأه يمكن تكون حلمت فيها بس كنت تظن إنا صعب تحقيقها
زياد بصوت تعبان: صعب تحقيقها شنو ياناصر
ناصر: قوم معاي برا _مسك إيد زياد وقومه والتفت لأمه وابتسم وردتله الابتسامه _راحو للحديقه وقعدو عالكراسي _ حط ناصر إيده على فخذ زياد _
ناصر: زياد باجر عندك قضايا
زياد: لاباجر ماعندي بس بروح المكتب العصر لأن عندي موعد مع واحد بيرفع قضية
ناصر: عيل الصبح بتكون فاضي
زياد: الصبح عندي موعد نوف وبوديك للمطار
ناصر: وملجت أبوك وأمي
زياد تفاجأ: شنو
ناصربابتسامه: اللي سمعته
زياد: ناصر هالموضوع مو موضوع ملاغه ولامقالب
ناصر: زياد اشفيك والله مومقلب باجر ملجتهم
زياد طالعه بنظره: ناصر أنتا من صجك ترا لوطلعت جذاب ماراح تلوم إلا نفسك
ناصر: خلاص لاتصدق بس أنا وعدتك إني أخلص الموضوع وأنتا بكيفك _وقف زياد_
زياد: وشاللي خلاك تسوي هالشي
ناصر: مااعتقد إنا هذا سؤال تسأله
زياد: ناصر ليش حطيتهم بموقف أهما موناقصينه
ناصر بصراخ: لأني ماتحملت أشوفك جذي أنا مو أناني يازياد ولماشفت حالك اليوم ماكان جدامي أسوي إلا اللي لازم يصير أبوي كان دايم يقولي هذا أخوك ومالكم إلابعض وأخوي وعزوتي عنده حلم شاللي يمنعني أحقق وغير هذا أمي لهاحق تعيش مع الإنسان اللي حبته أكثر من نفسها ومن هالدنيا كلها
زياد: ناصر انتا اشقاعد تقول أمي تحب أبوي هذا كلام كبير يابوسالم
ناصر: بس هذا الواقع ماشفت نظراتهم لبعض أمي كانت دايم تسولفلي عن حياتها مع أبوك وعن حبها له وتقول الحمدلله اللي رزقني ولد من صقر هذا شنو دليله تكلم وأعتقذ إنك شفت من أبوك أشيا أكثر من جذي هاه شمعناة هالشي
زياد يتأتأ: مادري بس مومثل ماأنتا فاهم
ناصر: يازياد الكتاب باين من عنوانه وهالشي مومحتاي ذكاء عشان نفهم أنتا لوشايف فرحت كل واحد فيهم لمااقترحت عليهم الموضوع ويخفون فرحتهم بس اعيونهم افضحتهم
زياد: يابعد راسي ياناصر والله مدري شقولك شلون أشكرك
ناصر: بدعوة حلوه أحسها طالعه من قلبك
زياد: الله يجزاك الفردوس الأعلى ويرزقك النظر لوجهه الكريم
ناصر: آمين وإياك ياغالي _ احضنو بعض وبعدها_
ناصر: ياالله امش داخل ترا مشتاق لربعي
زياد: ههههه ياالله توكلنا على الله _ادخلو البيت وهم يضحكون _
هنادي: الله لايفرقكم ولايحرمني منكم وأشوفكم دايم مستانسين
زياد وناصر: آمـيـــــن
نوف: اشتغلت دعوات الحاجه زكيه وبعدين لماتدعين لعيالج اذكرينا بدعوه وحده ماطلبنا غيرها
ناصر: اشتغل الحسد
هنادي: هههه الله يهديج يانوفا ويكملج بعقلج
ناصر وزياد: آمـيـــــن
الكل: ههههههههههه
نوف بزعل: لاوالله ليش شايفتني مينونه _طلعت من الصالة_
زياد: نوف نوف تعالي زعلتي
ندى: لاتخاف عليها تزعل وترضى بسرعة
ناصر: ندو تعالي أبيج شوي _قامو وراحو لنوف بغرفتها _فتحو الباب_
ناصر: فوفو ممكن ندخل
نوف: اشتبون اخلصو
ندى: ناصر يبينا بموضوع مهم ودج تسمعينه ولاخلاص إذا رضيتي نقوله لج
نوف: شنو موضوع مهم من قالكم إني زعلانه أصلنآ آنا ماأعرف الزعل نصور حياتي شنو الموضوع _دخلو ندى وناصر وقعدو عالسرير _
ناصر: ندى نوف اسمعوني عدل وأبيكم تفتحون أذانكم بسألكم سؤال يمكن تقولون ناصر غبي وهذا سؤال ينسأل بس أنا بعرف جوابه بعدين أنتو تحبون زياد _كانت نوف بتتكلم بس ناصر سبقها_
ناصر: أنا قلت ماأبي الجواب الحين _سكت شوي وطالع فيهن وشاف التساؤلات بعيونهن_
ناصر: أنا وأنتي ياندى وأنتي يانوف جربنا نعيش بين أبوي وأمي لماكنا صغار إلى إن مات أبوي وشفنا اشلون فقدناه وقتها بس بسأل نفسي أول وبعدها أسألكم مافكرتو بزياد مافكرتو اشلون عايش زياد عاش طول24 سنة ضايع بين أبوه وأمي وموعارف منو يرضي وكل واحد يبيه عنده ولوكان عايش بينهم ماكنا شفنا دموعه حتى بعد ماكبر
ندى: ناصر شاللي تبي توصله بالضبط
ناصر: اللي بوصله إنا زياد وده أبوه يتزوج أمي بس يبي موافقتكم
نوف: شنو أمي تتزوج لامستحيل
ندى: ناصر أنتا اشقاعد تقول لايمكن نرضى إنا أمي تتزوج بعد أبوي
ناصر: الحين عرفت الجواب أنتو أنانيات مافكرتم إلا بنفسكم أما زياد ولاوحده فكرت فيه لما مات أبوي مالقيتم إلا زياد عندكم وماتردد إنا يترك شقته ويسحب بزوجته وعياله بس علشان يكون قريب منكن والحين لماطلب إنا يعيش بين أبوه وأمه على طول وقفتم ضده ونعم والله هذا اللي قدرتم تجازونه فيه ونعم الخوات هذا أكبر دليل على حبكم لزياد_قام بيطلع والتفت عليهن_
ناصر: باجر ملجت أمي على عمي صقر وأبي وحده فيكم تبطل حلجها بكلمه قسمن بالله لتكون هذي أخر كلمه تنطقها بحياتها فهمتم _طلع وسكر الباب بقوة_ نزل تحت وكانت أمه قاعده مع زياد وحنين وشيماء يتقهون _جا وقعد عند شيماء _
زياد: بوسالم وين البنات
ناصر: فوق بغرفة نوف خلنا نفتك اشوي من شرهم
زياد: ياحياتي أهما وشرهم أصلنا هالثنتين مايي منهم إلا كل خير فديتهم _ابتسم ناصر وقال بداخله والله مايستاهن غلاتك لهم هالخايسات _همس بإذن شيماء_
ناصر: وحشتيني _ابتسمت شيماء واستحت _قعد عند أمه لليل وتعشا عندها وبعدها رد الشاليه _ صعد زياد لغرفة نوف ولقاها قاعده عالسرير وتفكر بالكلام اللي قاله لها ناصر_دخل وقعد قبالها_
زياد: فوفه ليش مانزلتي تتعشين
نوف: ماكنت مشتهيه أتعشى
زياد: نوف اشفيج يابعد أخوج أنتي في أحد مزعلج
نوف: زياد صج أمي بتتزوج عمي صقر
زياد بابتسامه: إن شا الله وباجر ملجتهم _دخلت ندى وهي تتصنع ابتسامه _
ندى: ألف مبروك إن شا الله فعلنآ أبوك قدر يسوي اللي براسه وتصنع دور الطيب وكان مع ناصر طول فترة العزا وكان دايم يينا ويشوف اشنبي وشنو محتاجين ووقف مع ناصر بعرسه وقفه مايوقفها أبو لولده _صفقت بيدها_
ندى: أنا أهنيه على نجاح هالمسرحيه وبصراحه قدر يخدع ناصر وأمي علشان يسوي اللي كان يخططله _ماحست إلا بكف على وجهها طيحها عالأرض من قوته_
زياد بصراخ: أنا ماأسمحلج تتكلمين عن أبوي بهالطريقه فاهمه _طلع برا ووقف عند الباب ومن غير مايلتفت_
زياد: توقعتم بتفرحولي ماتخيلتم أنانيات لهالدرجه _صعد لشقته _دخل غرفته وكانت حنين تغطي عيالها _رفعت راسها لما دخل وشافت الهم بوجهه _ماطالعها _بدل ملابسه ولبس بجامته وجاء قعد عالسرير _جت وقعدت جنبه _
حنين: هاه بشر اشقالو البنات
زياد بعصبيه: أنانيات حقيرات ماتوقعتهم جذي توقعت بيفرحولي بس خيبو ظني _حطت إيدها على كتفه _
حنين: حبيبي لاتلومهم صعبه عليه يشوفون ريال ثاني يآخذ مكان أبوهم
زياد: بس آنا أخوهم ليش مافكرو فيني
حنين: هدي نفسك هذول بنات وتفكيرهم مومثل تفكيرك أنتا وناصر أنتا بعد فكر فيهم قبل لاتفكر بنفسك
زياد: بس ياحنين أنا من حقي أعيش مثل الناس بين أبو وأم
حنين: اللي كنت تحس فيه خواتك يعيشونه الحين
زياد: يعني اشتبيني أسوي
حنين: لاتسوي شي باجر روحلهم وراضيهم وكلها أيام بيتعودون عالوضع اليديد أنتا نام الحين ومن أصبح أفلح _حط زياد راسه عالمخده بس ماقدر ينام وكان طول الليل يفكر _دق منبه تلفونه _قام وتوضا وقعد حنين عشان تصلي قيام الليل وتوتر _صلى القيام ودعا ربه أنه ييسرله أموره وإنا خواته يتقبلون الوضع ويوفق أبوه وأمه في حياتهم الجديده _الساعة 6الصبح قعد وقال لحنين تروح تقعد ندآ عشان بيوديها لمراجعتها _ راحتلها حنين وقعدتها وردت _قام وتسبح ولبس دشداشته البزمه وغترته وعقاله ونسف وخذا تلفونه وطلع _لقاها توها طالعه من غرفتها ولابسه عبايتها الكتف وملفعها وباين أثر الكف على خدها_أول ماشافته نزلت راسها _جاها ولوا ايده عليها وباسها على راسها _
زياد: يا الله مشينا _طلعو وركبو السيارة ومشا_
زياد: الحين بنروح نآخذ نصور وزوجته ونوديهم المطار وبعدها نروح العياده
ندى: زياد
زياد: هلا
ندى: أنا أسفه عاللي صار أمس بس صدقني الخبر كان قوي علي آنا ونوف
زياد: بس أنتي قلتي كلام أكبر منج _سكت ندى ماعرفت شتقول _
زياد: ندى ماأبي اللي صار يوصل لناصر لأنج تعرفين ناصر واشراح يسوي لو درا_ ندى منزله راسها_
ندى: ناصر قالنا اللي تتكلم بأذبحها
زياد: عشان جذي ماأبيه يدري بشي _وصل الشالية _دق على ناصر_
ناصر: هلا زياد حياكم
زياد: اخلصني اطلع
ناصر: طالبين ريوق انزل تريق أنتا وندو
زياد: شنو ريوقكم
ناصر: انزل وتلاقي كل خير
زياد: ماشي الحين ياينكم بس افتح البوابه _سكر التلفون_
زياد: نصور عازمنا عالريوق
ندى: بتنزل
زياد: اشرايج ننزل _نزلو ودخلو الشاليه وكان ناصر قاعد يتريق _جو وقعدو معاه عالطاولة_
ناصر: زيود يبت شناطنا
زياد: إي يبتهم بالدبه
ناصر: هاه ندو شخبارج
ندى: بخير
ناصر: اشعندج بالأسنان اليوم
ندى: موعد عشان التقويم
ناصر: وأنتي متى بتقطينه وتفتكين
ندى: بعد ثلاث شهور
ناصر: قبل عرسج ولابعده
ندى: قبل العرس بأسبوع عشان أسوي التبييض
ناصر: كل هذا عشان أبوعيون
زياد: ههههه ناصر لاتعيب على بعلها
ندى: خلا يعيب أنتا عاجبك ويهك بالأول عدل خشتك وبعدها تعال تطنز
زياد: أوووو دخن كتفها وينك يايوسف تسمع هالحجي
ناصر: الحين آنا أعدك خشتي هاه ماشي ياندو حسابج معاي بعدين إن مامصخرتج بعرسج ماأكون أنا ناصر ولد سالم
زياد: ماعليج منه ماييي عرسج إلا أهو ناسي وبعدين مايقدر يحاجيج وأنا أخوج
ندى: ياحبيبي يازياد _تريقوا وراحو للمطار قطو ناصر وشيماء وراحو لعيادة الأسنان_ عالساعه 10طلعو من العيادة وراحو البيت _خذا زياد أمه وراحو للمحكمه _ دخلو المحكمه وكان صقر قاعد ينطرهم _جاه زياد وسلم عليه وباسه على راسه _
زياد: شخبارك يبه
صقر مبتسم: بخير يابعد أبوك انتا
زياد: يبت الشهود يبه
صقر: إي داخل عند القاضي داخل
زياد: عيل توكلنا على الله يا الله يمه تعالي _كانت لابسه عبايتها الكتف ولافه ملفعها ومومتغطيه _طالعها صقر _
صقر: ام زياد شلونج
هنادي بحيا: الحمدلله بخير
صقر: عسى دوم إن شا الله
زياد: مطولين ياالحبايب يا الله القاضي ينطركم داخل _دخلو وملجو وماطلبت مهر بس كان شرطها تظل ساكنه عند اعيالها _وقف زياد بعد ماصكر القاضي الدفتر _دمعت عيونه _وقف أبوه وابتسمله _طاح زياد عالكتف أبوه وقام يبجي_طلعو برا وطلعت وراهم هنادي _حطت هنادي إيدها على ظهر زياد وقالت بصوتها الحنون _
هنادي: احنا اتفقنا إنا مافي دموع من اليوم ورايح _التفت زياد لأمه ومسح دموعه وابتسم_
زياد: من فرحتي يمه
هنادي: افرح من غير هالدموع _باسها على راسه_
زياد: ياالله يبه ياالله يمه مشينا البيت
صقر: انتا روح بسيارتك وأنا بآخذ أمك معاي
زياد: من الحين بتآخذ أمي مني هههههه ماشي آنا سابقكم
هنادي: حافظك ربي _طلع زياد وركب سيارته شغلها واسترخى لورا _
زياد: الحمدلله يارب على كل حال _خذا تلفونه ودق على_<واللهrغالي>_
زياد: السلام عليكم
راكان: وعليكم السلام ورحمة الله وبركاته يامرحبا يامرحبا وينك ياشيخ قاطعنا لاتدق ولاترسل اشدعوه يبا كل هذي قطاعه
زياد: هههههههه شوي شوي حبه حبه خلني أخذ نفس بالأول أنا بخير بس شسوي مثلك عارف مشغول مع الوالده والأهل والشله المرحه اللي عندي
راكان: هههه معذور يا الغالي وشخبار نسيبي إن شا الله بخير
زياد: الحمدلله نسيبك ونسيب بدر كلهم بخير ريكو عندي لك خبر طازج بكرتونه
راكان: خبر فريش شنو خير إن شا الله
زياد: أبوي وأمي
راكان: اشفيهم
زياد: قبل شوي كانت ملجتهم على بعض
راكان: صج زياد احلف
زياد: قسمن بالله
راكان: ألف ألف ألف مليون عشر تعش مبروك وأخيرآ يازوزو وأخيرآ
زياد: الحمدلله على كل حال
راكان: صج تعال واخوانك اشرايهم
زياد: بعدين أقولك كل شي المهم أشوفك على خير
راكان: زيود بتروح اليوم لمكتبك
زياد: العصر إن شا الله
راكان: عيل انطرني بمرك
زياد: حياك الله _سكر من راكان _شاف أبوه وأمه طالعين من المحكمه وبعدها اركبو السيارة _حرك سيارته وراح للبيت_ دخل ولقى ناصر وزوجته وحنين وندى ونوف قاعدين بالصالة_
زياد: ناصر أنتا ماسافرت
ناصر: ليش قالولك أهبل أسافر وماأشارك أخوي فرحته
زياد: فديتك
ناصر: فداك اللاش عيل وين أمي
زياد: راحت مع أبوي والحين يايين بالطريج
ناصر: من أولها ياأم زياد
زياد: هههه شفت شلون _قعدو ينطرون أمهم_ أما صقر وهنادي من طلعو من المحكمه _بالسيارة_
صقر: بالمبارك ياأم زياد
هنادي: الله يبارك فيك
صقر: آآآهههه هذا أنتي ماتغير حلاج هذي نعومتج ورقتج وحنانج هوهو ماتغير_استحت هنادي_
هنادي: صقر خالتي شمسه شخبارها
صقر: بخير الحمدلله أمس الظهر كنت متغدي عندها
هنادي: أهي درت بزواجنا
صقر: لا الحين بنروح نعلمها
هنادي: لاصقر واللي يخليلنا زياد أنا ماأروحلها إذا بتروح روحلها بروحك بس أنا لا
صقر: هنادي ماعهدتج ضعيفه جذي
هنادي: صقر تكفى أنتا تقدر تتفاهم معاها بس آنا أخاف
صقر: شتخافين منه طلاق ماراح أطلقج لويطلع أبوي من قبره أنا لايمكن أفرط فيج وأضيعج بعد ماصرتي لي _وصلو لبيت أم صقر _نزل صقر _
صقر: ياالله نزلي
هنادي: صقر لأ تكفى خلني بالسيارة وروح قولها وتعال
صقر: أقول انزلي وتعوذي من ابليس ماراح يصير إلا كل خير _نزلت هنادي وكانت خايفه من مواجهة شمسه _دق صقر الجرس وفتحت الخدامه_
صقر: ماما كبير موجود
الخدامه: إي موزود إندها ماما سلمى _طالع صقر هنادي_
صقر: اكملت _دخل وشاف أمه قاعده بالصالة وعندها سلمى _
صقر: السلام عليكم _التفتو سلمى وشمسه وانصدمو لماشافو صقر وهنادي معاه _
صقر بابتسامه: باركولي ملجت اليوم على أم زياد _طالعته شمسه وكأن عيونها بيطلعون برا_
شمسه: سويتها ياصقر ورديت تكسر كلمتي واتحداني والله ثم والله
قاطعها صقر: يمه طلاق لهنادي ماراح أطلق اكفايه السنين اللي عاشها زياد بضياع بسبب عنادج مثل ماآنا ولدج وعلى قولتج تخافين علي هم بعد زياد ولدي وأخاف عليه
شمسه: أنتي هي أنتي ماامداه زوجج مات على طول تزوجتي ماقدرتي تصبرين_ كانت هنادي ماسكه ذراع صقر وتكلمت بكل حنيه وأدب_
هنادي: ياخالتي أنتي فاهمه غلط أنا تزوجت أبوزياد علشان زياد علشان زياد وبس
شمسه: زياد كبر وماعاد محتايلكم
هنادي: لاياخالتي زياد محتاي لنا للحين موقادر ينسى اللي صار ودموعه لأمس ماوقفت زياد يحس بضياع بسبب عناد يدته أخذتيه مني وحرمتيني منه _دمعت عيونها_
هنادي: حرام عليج خلي الناس تذكرج بخير
صقر: هنادي انطريني بالسيارة _خذت سويجه وطلعت وهي تبجي وحاطه إيدها على حلقها_جا صقر وقعد عند رجول أمه_
صقر: يمه عشان خاطري كفايه يتعذب زياد كفاية أشوف الدموع بعيونه وماليه لحيته يمه خليهم كلهم مالج شغل فيهم فكري فيني آنا آنا ولدج يرضيج تشوفين ولدج يتعذب علشان ولده يرضيج يايمه
شمسه: صقر قوم عني ومابي أشوف ويهك معاها مره ثانيه
صقر: يمه آنا ولدج
شمسه: أفففف خلاص يابوزياد علشانك أنتا بس اسمع ماأبي أشوفها تعتب باب بيتي لاإهي ولاولدها _قام صقر وباسها على راسها_
صقر: تسلميلي يمه _طلع من أمه وركب السيارة وهو مستانس وشاق الضحكه_طالعته هنادي ودموعها بعينها_
هنادي: ويهك يبشر بخير
صقر: اقتنعت بس سمعي ماأبيج لاأنتي ولازياد تيونها هالفتره لماتهدا نفسيتها وبعدها ربج يحلها
هنادي: الحمدلله المهم إنها رضت
صقر: الحمدلله _دق تلفون صقر_<الغالي> يتصل بك_
صقر: ألو
زياد: السلام عليكم
صقر: وعليكم السلام هلا زيود
زياد: هلافيك يبه وينكم تأخرتو _حرك صقر السيارة ومشا_
صقر: الحين يايين بس كان عندنا شغل مسافة السكه ونكون عندكم
زياد: حياكم الله _سكر صقر من زياد وطالع هنادي_
صقر: أم زياد ودي أطلبج طلب
هنادي: آمرني يابوزياد
صقر: مايامر عليج عدو بس ماودي أحد يشوف هالزين والحلا غيري
هنادي: تآمر ياأبوزياد_خذت طرف ملفعها وغطت وجهها فيه_
صقر: الحين يتطمن قلبي _وصلو البيت وكان الكل قاعد بالصالة ينطرهم _دخلو الصالة وتغطت شيماء_
ناصر: هلا وغلا ومرحبا بأحلى معاريس بالدنيا
زياد: والله مومصدق أبوي وأمي مع بعض الحمدلله يارب
صقر: ههههه ولو طلبت الغالي يابوعبدالرزاق يرخصلك
زياد: الله لايحرمنا منكم
هنادي: ولامنك ياروح أمك أنتا_ جو نوف وندى وحنين وسلمو عليهم وباركولهم وقعدو_
صقر: زياد عبدالرزاق وراكان وين
زياد: حنين وي شلتي
حنين: للحين ماقعدو المراهقين من مشيت الصبح قعدو وتوهم نامو
صقر: قومي قعديهم لي مشتاقلهم
حنين: حاضر عمي
صقر: نوف تعالي وأنا عمج عندي_قامت نوف وقعدت يم صقر_
صقر: هلا هلا بنوف تدرين من كثر ماكان يسولفولي عنج أبوج الله يرحمه وزياد كنت أتمنى أشوفج وأسمع سوالفج اللي يقولون ماينمل منها _استحت نوف_
زياد: تعجبك فوفه يبه اخذ منها سوالف وعلوم تطيب الخاطر
ناصر: آخ منها أم لسانين عمي ماعليك منهم هذا أم لسانين وسوالفها مثل ويها
نوف: عمي شوفا كل يطنز علي
صقر: ناصر مااسمحلك عاد هذي نوفا بنتي وإذا سوالفها مثل ويها ويها يهبل قابلها ربها
نوف: يابعد راسي ياعمي موت يانويصر عندي فزعتين ضدك
ناصر: بسيطه أيب فزعه ضدج ياالعوبه _دق تلفون زياد<أبوخلي> يتصل بك_
زياد: السلام عليكم ورحمة الله يامرحبا يامرحبا
خليفه: هههه وعليكم السلام ورحمة الله وبركاته وهلا ومرحبا فيك بشرني عن حالك
زياد: والله الحمدلله بخير ونعمه أنتا بشرني عنك
خليفه: الحمدلله بخير صدق الخبر اللي ارسله لي راكان بالمبارك إن شا الله باركلهم بالنيابه عني
زياد: الله يبارك بعمرك وبعلمك
يبه يمه خليفه يباركلكم
هنادي وصقر: الله يبارك فيه
زياد: إي بوخلي شخبارك بعد
خليفه: أبشرك زوجتي حامل
زياد: صــــــج ألف ألف مبروك الله يثبته إن شا الله يصلحه لك
خليفه: الله يبارك فيك يا الله خلني أبشر باقي الشباب
زياد: حياك الله سلملي عليهم
خليفه: يوصل إن شا الله _قعد زياد بين أبوه وأمه _حط راسه على كتف أبوه وخذته النومه وماحس بنفسه _نام بين أبوه وأمه وتحقق حلمه اللي كان يتمناه طول عمره _صار يمشي بين الناس وراسه مرفوع ويحس إنه خلاص ماعاد يفرق عنهم بشي انتهت قصة الحرمان من حنان الأم والأبو مع بعض انتهت قصة الضياع وعاش كل واحد من أبطال قصتنا حياته _(بطلنا عاش بين أبوه وأمه ورزقه ربه ببنت سماها أبوه وسن )_(ناصر حملت شيماء وجابت بنتين وولدين سالم وسلطان والجوهرة وجواهر)_(ندى تزوجت يوسف وجابت بنت سمتها بتول)_(خليفه ولدت شذى وجابت ولد سماه حمد)_(تزوج أنور من بنات عمه وتزوج مشاري بدور أخت خليفه وتزوج بسام بنت خالته داعيه وملتزمه)_(عبدالله حملت تهاني وجابت ولد وثلاث بنات خالد وأريج وأثير وأروى)_(راكان جاله ولدين وسماهم عبدالسلام وزياد)_(بدر عاش مع شوق أحلى عيشه وربا بناتها وبنته وجاله ولد سماه أنور)_ هذي قصة إنسان عشت معاها لحظه بلحظه وتخيلت أبطالها ناس من الواقع أتعامل معاه _عشتو معاي لحظاتها وأشكركم على كل دقيقه من وقتكم مضيتوها بقراءة القصة وأشكر كل من ساعدني باقتراحاته وأفكاره _بديت كتابت هالقصة بشهر7سنة2007 وانتهيت منها بشهر 1سنة2009 _مع تحياتي الكاتبه <غـــســـhــق>

 
قديم   #55

غسق الكويت@


رد: "قصة إنسان"


"قصة إنسان"

هذي قصتي بين إيدينكم


أتمنى اعجبتكم

هذي من أول القصص اللي كتبتها

عشت معاها أيام حلوه ومره

كتبت فصولها في أكثر من مكان

غرفتي

البحر

السياره

قاعات الكليه

باص الكليه

وأماكن كثيره



أنا الحين أكتب ثلاث قصص غيرها لكن للأسف ما انهيت ولا وحده




شكراً لكل من عطاني من وقته

شكراٍ لكل من فادني بآرائه واقتراحاته وتشجيعه


,اخص بالشكر والدي وجوري رفيجتي

وشكر خاااااص لمشرفتي

ثلــــوج

كان لها الفضل بعد الله في تشجيعي ومساعدتي ونصحي

الله يجزاها الجنة

ويرزقها صحبة نبيه صلى الله عليه وسلم



تقبلوا تحياتي

أختكم غسق الكويت


 

أدوات الموضوع



الساعة الآن توقيت السعودية الرياض و الدمام و القصيم و جدة 06:24 PM.


 
Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.

Search Engine Optimization by vBSEO 3.6.0