"قصة إنسان"
"قصة إنسان"
___الفصل السابع____
مرت الأيام وكان في خبر ينطر بطلنا ياترى شنو راح تكون ردت فعله_ كان قاعد بغرفته يكلم خليفه_
خليفة: السلام عليكم
زياد: هلاوالله وعليكم السلام حياالله خوخه
خليفه: خوخه جابتها أمك ورع أنا عندك تقولي خوخه قول أبو خلي أبرك قال خوخه على باله قاعد بالشبره
زياد: ههههه أفا عليك ولاتزعل هلا بو خلي أخلص اشتبي داق ترى مو فاضيلك خليفه: الشرهه موبعليك الشرهه علي إني داقن عليك أنا جحشه اللي داق أقول أحمد ربك أني متكرم عليك أسمعك صوتي ولا أنت كفوا أصوات حلوه حدك صوت الريكو ويخب عليك
زياد: بس بس بس طبيت فيني وبعدين عاجبك صوتك أنتا وشكلك تتطنز على صوت راكان على راسي هو وصوته خليفه: أقول لايكثر بس مالت عليك أنت وياه أسمع أبي كشكولك الاجتماعيات كشكولي ناقص أبي أكمله اسمع نص ساعه وأنا عندك سمعت
زياد: أبشر ويا الله اقلب ويهك الحين
خليفه: أكيد راح أقلب وجهي أجل خبل أنا أسولف مع واحدن مثلك ياالله مع السلامه
زياد: مع السلامه ياخوخه_ سكر التلفون وهو يضحك قام وطلع كشكوله الاجتماعيات وهو رايح صوب الباب كانت في إيد أسرع من إيده افتحت الغرفه كانت سلمى هي اللي افتحت الباب غريبه صح _حاول زياد أنه يطلع بس هي دزته داخل الغرفه وسكرت الباب وراها وحاول زياد يسيطر على نفسه ويمسك أعصابه: هلا عمتي بغيتي شي
سلمى بكل حقد وهي صاكه سنونها: اسمع اليوم في ناس جايين يخطبون نشميه وأبيك تقنعها توافق وياويلك لو وقف بطريجها هالمره أنتا أمك مو داريه عنك تزوجت وخلت وأنا مو مستعده أشوف بنتي تعنس عندي عشان واحد مثلك
زياد كان يحاول يمسك أعصابه وماحب يقل أدبه عليها لأن هالشي مو من طبايعه: أنا مامنعت نشميه من الزواج والراي رايها وإذا تبيني أقنعها توافق أنا حاضر بس عشان تعرفين أني موثقل على قلبج أو إني أنا سبب رفض نشميه للزواج
سلمى تتصنع الطيبه: عاد ماوصيك حاول معاها بكل طريقه ويا الله من رخصتك_ وطلعت وسكرت الباب وقعد زياد عالكرسي القريب منه وهو يحاول يحبس دمعته بتنزل بس قطع تفكيره صوت موبايله ولما شاف المتصل نسى همه وابتسم كان المتصل<السنافي> رد عليه: هلا خليفه
خليفه: هلابعينك أنا وش قايلك لي ساعتن منلطع عند بابكم أنت وينك
زياد: ياالله يايك الحين بس كنت أدور الكشكول
خليفه: حجت الرفه ولدها يا الله عجل علي _ وسكر التلفون وقام زياد ونزله وقعد أهو وياه بالديوانيه وتقهوى خليفه وخذا الكشكول ومشى_طالع زياد ساعته كانت الساعه 5.10العصر خذا تلفونه واتصل على<واللهRغالي>_
زياد: ألو السلام عليكم
راكان: هلا والله وعليكم السلام هلابهالصوت
زياد:هلا فيك أكثر الريكو وينك الحين
راكان: أنا بالبيت آمرني
زياد: تقدر تييني
راكان: زوزو صوتك يقول إن فيك شي شفيك حبيبي في شي مضايقك
زياد: آآآه
راكان: ياويل قلبك يا راكان أنا جايك الحين_ وسكر التلفون طبعآ بيت زياد وراكان بنفس الفريج وعشان جذي ماخذا راكان إلا دقايق إلا وأهو عند زياد ودخل الديوانيه لأنه شاف زياد فيها
زياد: هلا والله ريكو حياك استريح
راكان: زوزو وقفت قلبي عسى ماشر اشفيك
زياد: تعبان ياريكو تعبان حاس هالدينا بكبرها سجن
راكان: أفا عليك بس قولي شاللي متعبك بس لاتقول عجوز النار لهاطرف بالقضيه
زياد: لي أهوفي غيرها يا الريكو غاثني وملوع جبدي بهالدنيا
راكان: اشتبي هالمره بعد
زياد: تخيل ياراكان تقول إني أنا سبب رفض أختي نشميه للزواج وإن أمي تزوجت ومادرت عني ولاتقول إني راح أكون سبب عنوسة نشميه أنا ياراكان أنا تقولي جذي
راكان: أياعجوز النار ماعليك منها ختولي وبعدين ليش ماتقول حق أبوك أهو يتصرف معاها بطريقته
زياد: لايا الريكو ماتوصل لهالدرجه وبعدين أنتا ماتعرف أبوي والله لو دري فيها مالها قعدا عنده بعدها وبصراحه أنا ماصدق على الله إن علاقتي تتعدل مع خواتي وبعدين يشوفون أمهم تنهان جدامهم بسبتي موحلو بحقي
راكان: عيل شلون يعني بتم ساكت جذي وهي كل يوم تغثك
زياد: شتبيني أسوي يعني خلها على الله بس
راكان: زوزو اشرايك نطلع نتمشى تغيير جو شوي
زياد: إي والله ودي أطلع حاس إني مخنوق
راكان: خلاص قوم بدل ملابسك وخلنا نصلي المغرب بمسيدنا وبعدين نطلع نتمشى
زياد: صار معلوم دقايق أبدل ملابسي وأييك لاتروح_ طلع من الديوانيه وحصل السايق قاعد بالحديقه_
زياد: سليم جهز سياره بعد صلاة المغرب بنطلع
سليم: حازر زياد أناجيب سياره عند مسجد
زياد: Ok
_ دخل زياد البيت ودخل غرفته وطلعه بلوزه خضرا نص جم وجينز <ديرتي> وقميص أبيض مخطط بأخضر خطوط اصغيره وجوتي أبيض 90بالأخضر وراح توضاولبس ومشط شعره بشكل يبين أنه اكثير ولبس ساعته وخذا موبايله وأهو نازل كان أذان المغرب يأذن وحصل نشميه قاعده بالصاله_
زياد: قوا يمه
نشميه: هلا زيود أشوفك كاشخ جنا عندك طلعه
زياد: إي والله بطلع أنا وراكان نتمشى تبين شي يمه أنا ماشي
نشمي: لاسلامتك بس دير بالك على نفسك
زياد: إن شا الله يمه سلام _ طلع زياد وراح أهو وراكان للمسجد وصلوا المغرب وحصلوا سليم ينتظرهم بعد ماخلص صلاة اركبو السياره_ سليم: وين يبي يروح
راكان: اطلع المارينا
زياد: لايبا مالنا خلق المارينا وازعاجها
راكان: خلنا نستانس اطلع مارينا سليم
سليم: إن شا الله زياد يتلع مارينا
راكان: طع هذا أنا أقولك روح مارينا تقول زياد شنو سمنديقا عندك
زياد: هههه اطلع مارينا_ وصلوا المارينا وصاروا يتمشون وراكان ماخلا بنت ماتحرش فيها وزياد قاعد يضحك عليه لأن مافي ولا وحده ترد عليه أوتعطيه وجه_راكان: زوزو شوف هذيك تطالعنا شكلي عجبتها
زياد: هههه يمكن أقول أمش أحسلك ترى مالي خلق هالمصخره
راكان: تكفى زوزو بس شوي عشان خاطري
زياد بعصبيه: راكااان
راكان: خلاص خلاص حتى الواحد مايقدر يتأمل بخلق الله زياد:اللي يتأمل بخلق الله يتأمل بالسما يتأمل بالكون مو يتأمل بالبنات وبعدين باجر تتزوج وتأمل بزوجتك لما تشبع
راكان: آف أنا غلطان اللي ياي معاك _ وظلوا يتمشون ويسولفون_ ترن ترن ترن ترن _ راكان: منو داق عليك_ طالع زياد تلفونه<شاعرAزمانه>_
زياد: أنور... هلا والله هلا بهالصوت
أنور: هلافيك أكثر شلونك شخبارك
زياد: الحمدلله تمام بشرنا عنك
أنور: والله الحمدلله بخير زيود حبيبي
زياد: هلا
أنور: باجر إن شا الله بطلع شاليهات الخيران مع الربع ودي أنك أتيي أنت والريكو
زياد: منو من الربع بيطلع
أنور: خليفه وميشو والبسمي وعبود وسلوم وطلول وبدور ومجود
زياد: مدام جذي عيل أنا بكون أول الحاضرين
أنور: حياك بس بنقعد لي السبت أوكيك
زياد: أوكيك يا الغالي
أنور: بلغ الريكو يا الله سلام
زياد: سلام _
راكان: اشعندا النوري
زياد: مسوي قعدا للشباب بالشاليه
راكان: ياسلام بصراحه يت بوقتها
زياد: خلاص باجر بعد مانرد من المدرسا نبدل ونطلع الشاليه خلاص
راكان: أوكيك يا الله خنروح المسيد لأن العشا أذن
زياد: توكلنا على الله _ وراحوا للمسجد وصلوا وردوا يتمشون بالمارينا_
راكان: زوزو تصدق مالي خلق أداوم باجر اشرايك نغيب
أكيد الشباب باجر غايبين
زياد: لاوالله صج ضحكتني أقول داوم وأنتا ساكت
راكان: ياخي دوام الخميس متعب حيل ويغث
زياد: بس أرحم أول اليمعه كانت ثجيله الحين صارت خفيفه حتى الواحد يرتاح فيها _ترن ترن _ راكان: منو بعد
زياد: أبوي..هلا يبا
صقر: هلازيود شلونك حبيبي زياد: الحمدلله تمام أمرني يبا
صقر: وينك في ييت البيت ماحصلتك
زياد: والله يبا ضاق خلقي وقلت أطلع أتمشى شوي وخذيت راكان وطلعنا المارينا
صقر: راكان معاك لابالله ربحنا
زياد: ههههه شفت شلون
صقر: هههه أوكي حبيبي ديرو بالكم على أرواحكم زين يبا
زياد: تآمر يا الغالي سلام
صقر: فمان الله_ سكر زياد من أبوه وشاف وجه راكان معصب: شنو أخر الإهانات
زياد: هههه لايبا لاإهانه ولاشي بس يقول دام راكان معاك لابالله ربحنا
راكان: صج والله يا الله ماعليه مقبوله __ وظلوا يتمشون وعالساعه 10.30طلعوا من المارينا ومروا ماكدونالدز وخذو وجبات وردو للبيت
|