ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات > روايات مكتملة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
روايات مكتملة رواية خنقت الورد يا يمه وبيديني انكسر ذبلان يوجد هنا رواية خنقت الورد يا يمه وبيديني انكسر ذبلان هنا تنقل الروايات المكتملة فقط

فساتين العيد


 
قديم 05-31-2012, 04:30 AM   #106

مزاجي توب


رد: رواية خنقت الورد يا يمه وبيديني انكسر ذبلان


رواية خنقت الورد يا يمه وبيديني انكسر ذبلان

.
بسم الله الرحمن الرحيم
الجزء التاسع والأربعون
تُفَآحَـة ْ } - !
لِأَنَ قَلْبَهَا لَمْ يَكُنْ تُفَاحَةٌ حَمْرَاءْ
وَلِأَنَ خِنْجَرَكْ لَمْ يَكُنْ سِكِيْنًا جَائِعًا
كَانْ اَلْأَلَمْ أَعْمَقْ..
كَاْنَ اَلْدَمْ أَصْدَقْ.....!

علموه . . إنـي أحبـــہ ومآ سڪن قلبي سواهـ !
دق الباب
قمت عن السرير بتهالك جسمي متكسر حاسه بإرهاق مو طبيعي
فتحت الباب
ابتسمت لي لين وجنبها تاله
: ندخل ؟
شرعت الباب ادخلوا بس ما فيني اتكلم لأني تعبانة
تبادلوا النظرات ودخلوا
انسدحت ع السرير
شفتهم فوق راسي وحده عند رجولي والثانية عند راسي
: خير؟
لين بضحكة بنسويلك مساج عشان ترتاح أعصابك
انكمشت ع نفسي لا ما ابي
تاله تثبت رجولي بيدينها مو على كيفك
وبدأت تضغط ع رجولي ولين مستلمه كتوفي
حسيت باسترخاء للحظات
تنهدت بعمق شلون رمضان معكم
تاله وفجأة حطت يدها ع بطني حلو، وهـ شوفي بطنك صارت كبيرة
بعدت يدها تاله لو رجعتي حطيتي يدك بكسرها
ضحكت عقدة اللمس كلها مجتمعه في لتين
ما رديت
لين تخزها يعني انكتمي إلا صح توتا شرايك اليوم نروح السوق نقضي للعيد
أنا بنعس تقضون للعيد؟؟
اييه نروح فلورنسا
ضاق صدري من هالاسم مدري أشوف إذا أخوك ما سوى حكر كالعاده
تاله احمم توتا
لتين تجاوب الحمدلله عايش
عقدت حواجبها مين؟؟
ابتسمت لتين عبدالله
تاله بحالميه فديته ولو إنه حمـ##
ضربتها بخفه ع يدها ما غيرك الحمـ##
هههههههه والله قاهرني الحين بروح أغير شعري بسببه
لين بصدمة ليه؟؟
تاله تورطت وعينهم عليها
ااا شوفي عاد إنتي وهي تدرون بالسالفة كلها لا تسوون لي فيها
يوم جا شافني برا وقال لي مو حلو شعرك
وبإحباط لا وقال بعد كأني فلبينية وشيطان
ضحكوا الثنتين عليها
تاله تمسج رجول لتين بقهر اضحكوا وأنا المنكوبة
لتين بصرخة رجولي انهرست يا زفت
ههههههههه سكوزا
لين بتفكير وصيت لميرا كم قطعة من ميلان بتوصل لبابا لعمله هناك وبيجيبها معه
والباقي ماما قالت بتجيبه
تاله بهمس الحين لولو تتوقعين وش يصير ع عبدالله مع بسام
ولا شي وش بيصير يعني لو ما يبيه كان ما ورطه وقال إنه خطبك وهو ما كان خاطبك من الأساس لسى
تاله بخوف اييه صح بس قلبي مو متطمن
فجأة انفتح الباب
تيبسنا بأماكنّا وحنا نشوف بسام داخل
رجع اليوم بدري
اوبس نسيت إنه لتين صارت بالبيت
ناظرنا باستغراب شقاعدين تسوون؟؟
لين بابتسامة رقيقة مساج للتين لأنها تعبـ...
قطعت كلامي لما ناظرتها وكانت نايمه بسلام
يا حياتي
ظل يناظرها ثواني وبعدها أشر لنا نطلع
وقبل لا يقفل الباب همس شلون سمحت لكم تلمسونها
تاله بضحكة بالغصب ما عليك إنت
خزها بغيرة واضحه كان قلتوا لي ووفرتوا خدماتكم لأنفسكم
وسكر الباب وراه
ناظرت لين بغيض شفتي شلون ؟؟
ضحكت لين غبية إنتي يغار عليها ما يبينا حنا نسوي لها يمكن يشوف إنه هذا شغله
تاله برومانسيه يا قلبي عليك يا بسام والله لو صحيت لتين وشافته بدالنا بتروح عليه
ههههههههههههه امشي بس





منحت المسيئين لي مِنْ قَلبي الجُزء الأكبر ..
حيثُ يَكمُن التَسآمُح ..
لأسحَقُهُم ..
أثورُ جِداً حِينَ يُخطِئون فِي حقّي ..
ولكِنّني أقِف حيث تَنتَهِي بِي حمَآقآتُهُم ..
لأجِدُنِي هُنــآك في الأعلى ..
فَيصعُب عليّ آلنُزول خِشيَة الأ أعود حَيث كُنتْ ..
إن أصبَحتَ كَ هُم ..!

سجى وهي تفطر ع التمر جمون اليوم كلمتني ربى قالت إنه الكل عازمتهم هي ع تشيليز
جمانة تاكل بهدوء والله مدري
ميلت راسها شفيك هاجده
داليا بضحكة جموون وافي قالي بيوديني السوبر ماركت تبين تجين معنا
جمانة بابتسامة لا مو جاي على بالي إنتي روحي
سكتت داليا وسجى تتابع بدهشة شصاير في جمانة هاديه وموقفه هواش مع داليا لا وبتعاملها بكل حكمة بعد
رفعت حاجب باستغراب جموون !
دخلت أم ماهر بحب هاا شلون شوربة الفريك حلوه جمانة أول مره تذوقينها صح؟ سويتها عشانك
جمانة بابتسامة حلوه تسلم يدك يا ماما عجبتني مرا مشاء الله
بالعافيه يا قلبي ناظرت سجى سجوو قاعده أفكر آخذ حفيدي أخليه هنا وإنتي وزوجك ارجعوا لبيتكم
سجى بفجعة وشوو؟؟
هههههههههههه أمزح معك والله ياليت
سجى بضحكة والله صدقت يا قلبي عليه يزيد ما أقدر أعيش بلاه
الله يحفظه يا رب إلا رايحين اليوم التراويح
نقزت داليا أنا بروح ماما وطلعت تلبس من المغرب
سجى تناظر جمانة والله يمكن نروح بيت جدتي ومن هناك نروح معهم
قامت آهاا إن شاء الله خير
أول ما طلعت قربت من جمانة
جمانة وش صاير معك إنتِ من ذيك الليلة مو طبيعية
رفعت عينها بابتسامة شيطنة ولا شي بس بساير الغبية اقصد داليا عسان وافي
وتنهدت
سجى تدفها ما عندك سالفة على بالي في شي بس زين سويتي
يعني أقول لربى إننا بنروح؟؟
اوكيه ليه لا




آلحب لآ يعطي إلآ ذآته ولآ يأخذ إلآ من ذآته وهو لآ يَملِك
ولآ يُملك فحسبُـه أنّـه آلحب..!

صحيت قبل وقت الفطور بشوي
شباك غرفتنا العريض مفتوحه ستايره لكن الشمس بدت تغيب وعاطيه الغرفة لون الغروب
ناظرت جنبي
بسام نايم ويده ع بطني!!
عدلت جلستي وبعدت يده بحذر
زفرت ببكى يعني هو مبسوط بالولد ويبغاه طيب ليه أنا كذا أحس
فتح عيونه لفيت وجهي عنه بقوم
همس بنعس كم باقي ع المغرب؟؟
قلت بحده الساعة جنبك
ودخلت الحمام
غسلت وجهي وفرشت أسناني وطلعت لقيته ما بعد يقوم
دق الباب
فتحته وأنا البس شبشبي
جوليا
:سينيورا بريما كولوتسيونا
"سيدتي، الإفطار"
أومأت براسي إلورا
دخلت عنده بسام قوم الفطور
ما رد علي وما تحرك
زفرت مو ناقصه ومو طايقه نفسي بعد
جلست ع السرير بتعب بساااام
:........................
احتد صوتي بســـــــــــــــــام
مسك يدي وسحبني طحت عليه
هالحركة اللي أيام يسويها تقههههرني
همس بإذني أعلمك شلون تصحين زوجك.؟
بعدت بربكة
توترت لدرجة إني ما قدرت أرد
بعدت شعري ورآ إذني
قام وهو يتثاوب
فصخ قميصه ودخل الحمام أنا بدخل اتحمم
عقدت حواجبي بس وقت فطور الحين
رفع حاجب يعني يهمك فطرت أو لا اعتبريني مو صايم
وابتسم بخبث
حمر وجهي شديت على أسناني
: أنا بنزل
قبل لا يدخل قال بأمر انتظريني
جلست ع الكنبة وأنا أرص ع كفي بقهر يااارب ترحمني برحمتك..!




في حياتنا ـآلكثير من ـآلبشر ممكن أن ننصدم بهم
وَلَكِنْ.. لا تنصدم عند لحظه حدوثْ ـآلصَدمَهْ بل تمالكـْ نفسكـْ
وَلآ تسقط ـآٍلا وَاقفا..!

شرب من الشوربة ورجع الملعقة
أخذ حبة من السمبوسة وقعد ياكلها بتأني وكأنه ما يبغا ياكل
نجد عبدالله شفيك ما تاكل
وهو يبلع اللقمة قاعد آكل
شربت مويه وتركت الكاسه ترى مو زين اللي مسوينه في أختكم
بندر بنرفزة يمه يعني اللي هي سوته يتسوى
عبدالله ساكت
نجد بأمومة يعني غلطت لأنها تحت الضغط بعدين هذا ما يعني إنكم قاطعينها ولا تكلمونها صار لكم كم يوم
بندر بغيض أنا ماني مستعد أكلمها لين تقول ليه كانت ناويه تسوي كذا يعني وش سوى بسام حتى تجازيه بهالطريقة
رمى الملعقة بعصبية وش سوى؟؟
إختي غلطت على عيني وراسي وغلط فادح بعد لمجرد التفكير بموضوع مثل كذا لكن لا تسأل ولد خالتك وش سوى لأنه ياما سوى وإنت أكثر واحد تعرف بهالشي يا بندر
بندر بصراخ بسام غلط بعد لأنه كان مضطر و قاعد يعدل غلطه وبيذوق المر عشان كذا
بعدين هي سامحته من أول وإنت اللي خربت كل شي لما قلت إنك بتاخذها معك ع الخبر وبسام طاوعك وشفت وش صار الحين ومع هذا ما قالك إنك إنت السبب أكل تبن وسكت وهو اللي طايحه براسه الشغلة إختك حاطه كل الغلط عليه كأنه هو اللي أذاها مو الحيوان رويد
ساكت بصدمة من الطعنات اللي بتجيه ما كان شايف الموضوع من هالناحية إنه هو السبب برجعة لتين!
بندر يكمل بعدين لا تقول إنها مـ...
قاطعته نجد برجفة خلاص إنت وياه هواشكم ما راح يحل المشكلة عبدالله ما عليك منه بندر مثل لتين إذا عصب ما يثمن كلامه
بندر بجنون لا يمه أنا قاصد كلامي كله حرف حرف خليه يعرف وش قاعد يقول
ووقف بعصبية دف الكرسي بيده وترك المكان

.
يتبع

 
قديم 05-31-2012, 04:31 AM   #107

مزاجي توب


رد: رواية خنقت الورد يا يمه وبيديني انكسر ذبلان


رواية خنقت الورد يا يمه وبيديني انكسر ذبلان

لهفة العششششاق | قايدها البعاد !
أنا قلت شرايكم اليوم نروح فلورنسا نقضي ونرجع
يلدا ما يمديكم اليوم متى بترجعون إلا إذا بتنامون هناك
" بالسابق كنت كاتبه مسافة بسيطة بين تورينو وفلورنسا والمسافة الصحيحة هي 4 ساعات بين المدينتين وبين تورينو وروما تقريبا 7 ساعات
أعتذر عن الخطأ "
تاله وراكان حلت لهم الفكرة
تاله وااااو صح عليك ماما نظل كم يوم نغير جو وبنفس الوقت نقضي
راكان بفرحة فلورنسا فضيييعه لتين نوريك هي
بسام يقاطعه بحزم لتين تعبانة ما تقدر تروح
أول مره أحس إني بسلم ع راسه لأنه قال شي أنا ابيه
ارتسم الإحباط على وجيههم
ابتسمت بوهن معليش والله بس الصيام متعبني مع الحمل
خالتي يلدا تشد ع يدي يا عمري أنا الله يقومك بالسلامة
آميين
لين بابتسامة ناعمه عادي يا قلبي تورينو مليانة أسواق نقضي منها هالمره ما صار شي
راكان بحقد يناظر بسام زفر اوووففف
بسام ببرود لف عليه حران الجو برا بارد ترى
تاله تخبي الضحكة وآآاك
خزها ها ها ها على بالك تنكتين إنتي وياه
: وش قلت ؟!
بلع ريقه وهو يبتسم أبد سلامتك ولا شي
ضحكت من قلبي يا حياتي ع راكان دايما أحلامه محطمه
انتبهت ع بسام عيونه عليّ
تحمحمت وأنا أعدل جلستي بإحراج
ابتسم ابتسامة خفيفة وهمس
: يا حلاة ضحكتك
مديت بوزي اتفـ...
: حتى كذا حلو.!
أخذت نفس ووجهي بدأ يحمر
وأنا آخذ ميرا من خالتي خالتو متى آخر موعد لميرو
خالتي اللي انتبهت علينا ابتسمت قبل ثلاث أسابيع تقريبا
آهاا يا حياتو اليوم شكلي بنيمها عندي
هههه بتكرهين حياتك عقارب ساعة لما تنام
ههههههههه تتحرك كثير؟
اييه والله بالأول كان سريرها له حواجز
قعدت العبها فجأة لفيت عليه بربكة ممكن تشيل عيونك
ابتسم وهز راسه لا
رصيت ع أسناني طيـ...
راكان جانا ينط بسام ياسمين متصله عليك
أخذ الجوال بسام ورد على طول
ارتخت أعصابي ونزلت عيوني لميرا اللي حاولت اللين نزلت من حضني
حسيت العيون عليّ قمت وأنا أخبي قهري بابتسامة أنا بروح أرتاح عشان نصلي التراويح سوا
يلدا بحب ارتاحي حبيبتي
طلعت لجناحي وأول ما دخلت قفلت الباب بالمفتاح
جلست ع الكنبة ودموعي نزلت
حاسه بنار داخلي
ليه يكلمها قدامي طيب
مسكت بطني بألم
غمضت عيوني أكتم صوتي وأنا ابكي بحرقه
لين متى بظل على هالحال يا رب...




سواليفك ~ تسافر بي | لدنيا كلهآ ذآتـك..!

قام من النوم ساكت وقبل لا ينام ساكت
واضح إنه معصب بس من ايش مو عارفه لأني سألته وقال الشغل هالكه بس وش المشكلة بالضبط ما حبيت أصر عليه ويعصب علي
هي مره وحده وتبت منها !
لبس ثوبه والشماغ تعطر وقرب مني يعني سكري لي أزراري
وأنا أسكرها
باس جبيني
ابتسمت له بحب
وكملت تسكيرها
طلال مو قلتي لي إنك اليوم عازمه البنات
أومأت براسي اييه
تبين أوصلك
هزيت راسي لا شكلك متضايق اليوم أنا بأجلها
ناظرني بنظرة ما لها معنى أنا قلت إني متضايق؟
لا بس بظل معك يمكن تحتاج شي
ابتسم ما يحتاج أنا رايح أصلي بمسجد النمران وما برجع بدري بقابل وافي وسلمان
تنهدت اوكيه مو مشكلة أجل أنا ما بتأخر
لفيت بروح أجيب له مويه قبل لا يخرج كالعاده
مسك يدي
ناظرته بتساؤل
ناظر عيوني إنتي متضايقه مني؟!
نفيت براسي لا إنت متضايق لما رجعت اليوم
جلسني وجلس أجل بقولك يمكن ترتاحي
الله يسلمك سالم كلفني بسفره...
وقبل لا يكمل كلامه غرقت عيوني بالدموع بترجع تسافر؟!
مسح دموعي بيده بتأثر لا تبكين هذا أول شي أنا تضاربت معاه وقدمت استقالتي!
بهت فيه شلوون؟!؟
ابتسم بغصة أحب البحر بس دامه بيحرمني من حبيبتي يلعنه ويلعن طوايفه
وضمني بحب لا تخافين ما بتموتين من الجوع بظل بأرامكو لكن بالإدراة
شلون وإنت قدمت استقالتك؟؟!
ما يقدر يقبلها هو تهديد لو جيتي للواقع لأنه متقعد
دفنت راسي بصدره وأنا ابكي بفرحه يعني خلاص ماعاد تسافر وتخليني
طلال يضحك بحب والله ما عاد أسافر وأخليك يا قلبي
بعدت عنه وأنا امسح دموعي طلال... أنا ما أقدر أعيش بدونك
بلع ريقه اوكيه حتى الحين ما تقدرين تجلسين بدوني صح
ابتسمت إلا لأنك لازم تروح الصلاة وأنا أروح لعزيمتي يا ويلي جوالي صار له ساعتين يدق بالصالة
ناظر ثوبه
شهقت وأنا أشوف روجي عادم كتفه وياقته
احمم
ابتسم بخبث شرايك اعطيه المغسلة يغسلوه اللين ما أروح الصلاة
قمت بضحكة لا حبيبي في ثياب غيره في الدولاب وفتحت الدولاب طلعت له واحد
زفر بعصبيه طيب
ضحكت بحب بسرعه
ناظرني ربى اخزي ابليس لأنه راكبني
كتمت ضحكتي وش أسوي فيك طيب إنت وقتك غلط
ناظرني بغيض روحي ردي على جوالك لأنه بيكون وقتي من جد غلط وقتها
طلعت بسرعه للصالة وأنا أضحك يا حبي لك يا طلال
شفت المكالمة من جمانة عضيت شفتي وأنا أرد
: آلوو




وش أسمي الحب اللي بينك وبيني وإنتي شي أكبر من الحب وجنونه..!

غسلت وجهي بالمويا كم مرا نشفته وطلعت
جلست قدام التسريحه
بظل زوجة بسام ولو عاندت
واعترف إني أحبه حتى لو كابرت لكني متضايقه منه هالفترة
بس هذا ما يعني إنه الحين يحق له يسوي اللي يبيه
مين فين طلعت هالبنت اللي اسمها ياسمين
ناظرت وجهي المصفر بالمرايا
حسيت برغبة إني اضبط شكلي
مو عشانه عشاني أنا حتى أزيد ثقتي بنفسي
حتى لو طالع غيري ما بتكون مثلي
قمت فتحت دولابي طلعت فستان قصير بحد الركبة
أكمامه قصيره منفوخه لونه وردي فاتح وأبيض
لبسته
تضايقت منه لأنه بطني كانت واضحه فيه
بس يللا شكلي يبغالي اقضي لبس جديد عشان الحمل
حطيت روج وردي بلمعة خفيفة
كحلت عيوني بكحل أزرق وشعري فتحته
شعري مسبب أزمه لي من يوم ما كنت بالجامعه
ابتسمت اذكر إنه ربى كان يعجبها وتقول اتمنى شعري مثلك وأنا كنت اعلق إنها مجنونة
حتى بسام يحبه !
لأنه ملفلف لفلفات صغيرة من بدايته ويتعبني بالسشوار بس الحلو إنه ملمسه ناعم
وعلى سرحاني بشعري تذكرت عبدالله
رجعت الذكريات ورى بعضها قويه قبل اسبوع لما صار اللي صار
للحين ما يكلمني لا هو ولا بندر
دمعت عيوني
يعني أنا من لي بهالدنيا مثل عبدالله كان معي بالحلوه والمره
هو أخوي وأبوي وأمي وكل شي
فجأة شفت بسام واقف قدامي
عقدت حواجبي بسم الله إنت شلون دخلت
جلس قدامي على بالك قفلتي الباب يعني خلصتي مني!
تذكرت ياسمين حسيت دخان يطلع من راسي
ناظرته بحقد
ابتسم انتي ليه لابسه كذا ؟
ناظرت لبسي ورجعت عيوني له وش قصدك؟؟
أخذ نفس بهدوء وأشر علي يعني إنتي لمين لابسه كذا
رجعت ظهري ع الكنبة
: للجني !
أشر ع نفسه يعني أنا جني بنظرك
صغرت عيوني وأحد قالك إني لابسه عشانك
ابتسم وحط يده ع خده متكي ع يد الكنبة
هزيت رجولي بتوتر وش قاعد تسوي ما بتروح لياسمين
: شعرك حلو
ما طلبت رأيك
: عيونك حلوين
افففف يا ربي مالك دخل فيني
: فمك وناظر السقف بتفكير اممم شهـ...
قلت بعصبيه بتوقف والا شلون
ناظرني ورمش نسيتي تسوين كذا
اخفيت ابتسامتي بصعوبة لدرجة حسيت بألم بفكي
ترى إنت رايق وأنا مو رايقة لك
عدل جلسته انزين وش قلتي توّ عن ياسمين ما كنت مستوعب
زفرت طبعا لأنه بالك راح لها على طول
هز راسه لأ، والله بس وش كنتي تقولين
سكت ما رديت من الغيض قطعت زر الفستان الفوقي
شاله من الأرض وحطه ع الطاولة قدامي
وعدل جلسته وقعد يناظر السقف
غمضت عيوني بقهر بســـــــــــــام
لف عليّ بهدوء
: عيونه
شديت ع أسناني مين هذي ياسمين
دف الكنبة حقتي بقوته اللين ما حطها قباله وتربع قدامي
أول شي ياسمين زميلة في الدراسة تخرجت قبلي والحين هي مو موجودة هنا في كندا
: وش أصلها؟؟
كندية من أم لبنانية
وليه حضرتك رحت ودعتها في المطار
لأنها كانت بتعطيني أوراق التقديم لأخوها
: تقديم وشو؟؟
بيدرس طيران هو بعد وهي ما بتكون هنا ولسى ما بعد يوصل أخوها
يعني ما في بالجامعه كلها إلا إنت
رفع حاجب ووين المشكلة لو كنت أنا أو غيري
سكتني جوابه
ما قدرت أرد ولا بفكر إني أرد حتى
لأنه فعلا وين المشكلة أعترف لنفسي قبل لا أعترف له بحقيقة كلنا عارفينها
حسيت بشي دافي
حضن كفوفي ورفعها له باسها
إنتي لو تتركين عنادك بنعيش بسلام
لمعت عيوني لو تتركني بحالي بعد بنعيش بسلام
ترك يدي وهو يقوم
أخذ البالطو حقه وطلع من غير لا ينطق بحرف
تنهدت وأنا ارمي نفسي ع السرير
اااه يا زمان ليتني مت بدالك يا جدتي كان ارتحت من كل هالهم..!




ليت لا هنا لي زماني يوقف ولا عاد يمشي..!

اطلبي لي لو سمحتي سفن بالكرز وناتشوز وماونتن كيك ووو
ربى بابتسامة كلها طلبتها جمون صار كم مره عدتي الطلب
جمانة تمسح ع بطنها بتأكد لأني جوعانه
وديم أشك إنك جوعانه شكلك متوتره كل شوي تناظرين الجوال
جمانة بتكشيرة أنا جوعانة
سارا بنعومة سجى داليا وش مسويه اليوم لجمانة موترتها لهالدرجة
ضحكت سجى لا جمانة كبرت بتفكيرها اتفقنا إنها تسايرها
فجأة ضربت الطاولة جمانة بغيض واضح بوجهها
وهي تترك الجوال
رفعت يدها يا رب بهالشهر الفضيل تخلصني من هالبنت يا رب تتزوج اليوم
ضحكت ربى ما في أمل توها ما دخلت الـ 15 بتزوجينها
ليه حبيبتي جدتي تزوجت عمرها 10 سنوات
سارا بضحكة قلتي جدتي وش دخل داليا
سجى سحبت الجوال
لقته مسج منها تقول فيه
تبين شي جوجو قبل لا نطلع من السيفوي؟؟
حرام عليك ما تقصد شي البنت
جمانة سجى رجاءًا خليني اطلع حرتي هنا لأني بالبيت بظل مبتسمة بوجهها اربع وعشرين ساعة
ضحكوا عليها البنات
وديم والله حالتك صعبة يا جمانة عطيني وافي خليني أكلمه أنا أخليه يعقل إخته
جمانة اييـ... وشووو؟؟؟ هالناقص بعد حبيبتي تظل على حركاتها ولا تكلمينه
هههههههههههههههههههه
وديم أجل خلاص حطي لسانك بفمك وغطي جا الطلب
دخلت يارا و لمار ماسكين يدين بعض
البنات بفرحه لمووو
جمانة تبوسها يا قلبي فيصل ونعم الزوج شلون اقتنع
يارا تدق على صدرها حطيته أمام الأمر الواقع قلت له اسمع خايف عليها جيب العيال وتعالوا تعشوا قريب مننا عشان إذا صار لها شي تكون موجود
المهم وهزأته قام وافق
لمار بتأنيب ضمير لأنك حمـ## حرام عليك
جلسوا بيناتهم
يارا تتحمحم عندي لكم خبر
ربى حتى أنا عندي خبر بس قولي إنتي أول
يارا بابتسامة احمم بكره بملك أنا وعبدالرحمن
وجيه البنات ما تتفسر إلا لمار اللي عارفه
وبدأت ردات الفعل
سارا بابتسامة مبروووك لكن شلون ؟
يارا لا تناظروني كذا بكره بعد التراويح بيجي المملك وبنملك لأنه زواجي بشوال ولازم يكون في فترة تدرون بين الملكة والفرح المهم إنه هذا اللي صار
قامت ربى حضنتها وتبعوها البنات يا قلبي تستاهلين كل خير
وديم اييه وش خبرك ربووه؟؟
امم طلال حبيبي بيستقيل يعني ما عاد يسافر ويخليني مثل أول
لمار بحب يا قلبي يا ربى كلمة يخليني حسستني بعذابك
ربى تبلع ريقها لا تخليني أبكي والله مرا تعذبت لما سافر
وديم بضحكة وااااااااو أحلى شي يعني ما بيصير كابتن طلال والله لأذله عليها
اليوم توصليني معك ربى لازم أشوفه
البنات ههههههههههههه
ربى فتحت عيونها والله أكلم ماجد
ما عليك أنا اضبطه
يمممه منك والله تخوفين بلد
ههههههههه ما أكون وديم أجل
دق الجارسون وحط الطلب وخرج
سارا بابتسامة والله مو ناقصنا إلا لمى وخالتي ليلى
ربى بحسرة صادقه لمى عندهم ضيوف من أهل أمها وخالتي ليلى تقول بابا عازمها ع الشيراتون
وديم بتفكير أجل موودي وين بيتسحر يالظالمين؟؟!!
يارا بضحكة خبي له من صحنك
هههههههههههههه
وديم لاااا جد والله ربى ما قالت لك
ربى وهي تاكل لاا يدبر نفسه أكيد
قامت بروح أكلمه وأرجع لا تخلصون الأكل
سجى الله يعينا على الرومانسيه الزايدة لا تتأخرين
طيب



كن في الحياة كشآرب القهوة ، يستمتع بهآ رغم سوآدهآ ومرآرتهآ..!

تمشيت ع رجولي بشوارع تورينو
مدخل يدي بجيوبي الجو بارد مرا
لكن الحره اللي بصدري مو محسستني بمدى برودته
ما ألوم بندر
وما ألوم لتين ولا بسام
ألوم نفسي على جزء من الخطأ
جلست ع الطاولة في أحد المقاهي المكشوفة
وطلبت لي دارك كوفي
أصلا أنا حاس إنه الوضع ملخبط يعني جلستي ببيت أهل بندر قويه
أمه طيبه مرا يشهد الله إنها أحن من أمي عليّ ما أدري شلون تركت بنتها في يوم من الأيام وراحت
لكن مع هذا احراج علي إني أظل عندهم
رجعت للموضوع اللي متضايق عشانه من يوم ما صارت المشكلة ما كلمت لتين أكيد متضايقه هي يكفي إنها راحت هناك بعدم رضاها
وقفت سيارة في الشارع قدامي ونزل منها
لما انتبهت عليه استغربت بداخلي بس ما أظهرت أي تعبير
سحب له كرسي وجلس
السلام عليكم
: وعليكم السلام
أخذت القهوة اللي جابتها الجارسونه أطلب لك
أشر بيده لا
شربت منها شوي وناظرته مين قالك إني هنا
: بندر
عقدت حواجبي وش دراه؟؟
ابتسم وهو يناظر وراي
لفيت لقيته واقف
رجعت لفيت وجهي وشربت من قهوتي ببرود
ضربني ع كتفي وهو يجلس يعني ما تعرف تقول تفضل
ما رديت
بسام شوف إنت وياه اللي قاعدين تسووه حاليا هو تدخل في اللي ما يخصكم
مشاكلي أنا وزوجتي نحلها بأنفسنا إنتوا وش دخلكم ممكن أفهم
بندر تعرف تسكت أنت
عبدالله ما كأنها اختنا يعني
مدامها زوجتي خلاص لا تشيلوا هم حنا نتفاهم
ناظروا بعض وضحكوا الثلاثه كلهم
بسام بجدية بعدين لتين تعرف إنها غلطت ما يحتاج كل هالقسوة ما صار شي
بداخلي ابتسمت سبحان الله حبه لها منعه يعتبر الجرم اللي كانت بتسويه إنه شي كبير الحين ما ألومك يا بندر ع اللي سويته اليوم
بندر يقوم يللا عازمكم على محل مشاوي قريب
عبدالله مشاوي هنا؟؟
اييه محل شامي
بسام أول شي دق على أمك طمنها شوي وتبكي لما كلمتني كل واحد منهم مثل المراهقين عصب مسك الباب وطلع
عبدالله أفهم إنه هذي تهزيئة يعني
بسام بغمزة تقدر تقول
دوت ضحكتهم وهم ماشيين ع حجر الرصيف البارز
في ليلة من ليالي تورينو الفارهة..!!
*
*
*
Good Friends are hard to find, harder to leave, and impossible to forget
الأصدقاء الحقيقون يصعب إيجادهم، يصعب تركهم، ويستحيل نسيانهم نهاية الجزء التاسع والأربعون .

.
تحية لكل قارئ..
تحية معطره بعطر عشاقي...!
بائعة الورد

 
قديم 05-31-2012, 04:32 AM   #108

مزاجي توب


رد: رواية خنقت الورد يا يمه وبيديني انكسر ذبلان


رواية خنقت الورد يا يمه وبيديني انكسر ذبلان

بسم الله الرحمن الرحيم
الجزء الخمسون
علمًنيَ كَيفً آحبكً بلآ آلــــمً . .
وُ كَيفً آحبًكً بلآً ندمً !
كيَفً آحَبكً بلآَ نددَمً ؟!
كيَفً آحَبكً بلآَ نددَمً ؟!

شكرآ لـ ترككْ ( بعض ) الذكريآت آلتي ترآودنيْ عنْدمآ آشتآقُ إليِك
رجعنا للبيت متأخرين ع الساعة ثلاث تقريبا
البيت هادي وأنواره مطفيه ما عدا الصالة السفلية
ابتسمت بنعس أكيد هذي أمي تنتظرنا
ابتسمت تنتظرك تقصد
بندر عبدالله عن السخافة إلورا مو مصدقني شوف بعينك لا تجي معي طيب
عبدالله ما فهم وش بتسوي
أشر له تخبى أمي جايه
تخبى ورى الباب الخشبي العريض
جات نجد وهي لافه حجابها ع شعرها بندر حبيبي رجعت وين عبدالله؟؟
باس راسها يمه ا..
قاطعته بنبرة خوف واضحه بصوتها وينه أخوك؟؟؟
بندر ابتسم بهدوء يعني إنتي معتبرته أخوي من جد يمه!
نجد بعصبيه طبعا أخوك ما عشتوا مع بعض أكثر من ست شهور وأكلتوا وشربتوا سوآ وينه أقولك يا ويلك لو تكون مزعله بعد
حضنها وهويبوس راسها ويدها الله لا يحرمني منك
طلع عبدالله بصدره ألم وضيق هذي نجد اللي ما ربته ولا سهرت عليه ولا عاشت معه إلا هالكم أسبوع اعتربته ولدها وأخو ابنها من لحمها ودمها
وأمه؟؟!! وش بيده يقول..........؟!
عبدالله بإحراج لولا إنك محرمه علي يا خالتي كان بست راسك الله يخليك لعيالك يارب
نجد تلطف الجو بعد ما ارتاحت بوجوده آميين ويخليك يعني متفقين عليّ حضراتكم
بندر يضحك تقدرين تقولين
ابتسمت بحب طيب رحتوا للتين
عبدالله بتلقائية اتفقنا بكره نروح أنا وبندر بعد الفطور
الله يرضى عليكم آميين
آميين، نعسان حدي إذا أذن الفجر صحوني
عبدالله يدفه وهو يمشي من الحين بقولك ماني مصحيك لأنك بس تعبت تقول خيشة نوم ما تحس بشي
بندر يضحك أحسن منك إذا أحد عطس عنده قام
نجد بابتسامة إلورا ما بقى شي ع الأذان صلوا وناموا
بندر يلف نسيتي بكره عندي دوام والسيد عبدالله بعد بيبدا دوامه دلعناك كثير ترى بكره تجي معي ع المكتب أوريك شغلك
عبدالله بابتسامة يصير خير إن شاء الله أنا بظل هنا اللين يأذن وبطلع
وطلعت نجد وولدها
ظليت لحالي أفكر وسرحت بأمي
من يوم راحت الامارات ما سمعت صوتها أرسلت لها إني رايح لايطاليا وما ردت خاطري أعرف ليه بتتهرب مني في شي بعد ما أعرفه..؟!



أهو مؤلم حبهُ !
أنت الذي من بين الملايين انتقيتني لأكون لك !
هل سـ تحبني ؟
فركت يديني ببعض بتوتر كبير
أحس إني ببكي أول ما أطلع له
أمس أبوي جاب المملك وجا عبدالرحمن ملكنا ع الورق وطلع ما شافني ولا كلمني حتى
لأنه أبوه كان راجع من السفر
وقال إنه الصبح جاي
وهذا الصبح طلع وأنا قاعده انتظر
تذكرت خالد أمس دقيت ع خالتي ورد عليّ حسيت بصوته كلام لكني ما سمحت لنفسي أتذكر أيام حبي الخالية له وقفلت على طول
لأني لو ظليت أكثر بتألم أكثر
دقت الباب أمي يارو إذا خلصتي إنزلي بسرعه ابوك استقبل عبدالرحمن لأنه وصل
بلعت ريقي وأومأت براسي برعب طيب
ابتسمت وهي تبوسني لا تخافين ينحب شكله
ينحب!!
آآآه يا قلبي
عدلت شعري المموج قدام المرايا
رجعت بخيت عطر ونزلت بربكة واضحه بوجهي قبل أي جزء فيني
ناظرني ابوي ابتسم وأشر لي تعالي
دخلت واكتشفت إنه تركني لحالي
وقف ما شفت وجهه بس قرب مني مد يده يسلم
من ربكتي ما عرفت وش أسوي
سمعت ضحكته الخفيفه وبعدها مسك يدي برقة وحطها بيده
سلم عليّ بحرارة وجلسني ع الكنبة
بصوت غريب عليّ شلونك ؟
بلعت غصتي أحس جسمي كله يتصبب مويه
وبصوت مدري طلع أو لا الحمدلله
معليش اعذريني أمس ما قدرت أشوفك أبوي راجع من اليونان صار له شهرين مسافر
قلت بخاطري يعني ما حضر ملكته؟!
كمل وآسف بعد لأني جاي بالصبح وحنا برمضان بس تدرين أحسن
رفعت عيني له وكانت أول مره أشوفه فيها
بلمت يوم قال
: لأني كنت بخربها من أولها!
والله حسيت للحظة الدنيا مغبشه ما عاد أشوف من الحيا غمضت عيوني بقوة وفتحتها شفته جنبي
بعدت لا إراديا
ابتسم ابتسامة تطمن تدرين إنك حلوه ما توقعتك كذا
عقدت حواجبي بدون رد وش توقع أجل قرد مثلا!
ضحك ضحكته الخفيفة مره ثانية أدري راح خاطرك بعيد بس أهلي ما وصفوك لي كذا
سألت بتلقائية وفضول أهلك؟؟
أومأ براسه وهو يمسك كفي اييه وحده من خواتي شافتك بحفل تخرج الجامعه حق أخت زوجها
قلت بهدوء مين خواتك ؟
ابتسم بحب توين سمر وسحر وفي وحده بعد اسمها يارا على اسمك
ابتسمت لابتسامته يعني مو بس إنت توأم حتى خواتك
ضحك بخبث يعني في أمل إن شاء الله
عقدت حواجبي بتفكير أمل لايش؟؟
ويوم استوعبت حمر وجهي لدرجة حسيت إذني بتطيح من مكانها
سحبت يديني بهدوء إنت كنت عايش بأمريكا صح؟؟
: اييه
ليه طيب؟ إذا مو للدراسة !
تنهد وهو يناظر الساعة في رمضان تحسين بالجوع أكثر أو بالعطش
تصريفه واضحه عيني عينك مدري ليه خفت يكون شي بطال بس ابتسمت
أعطش
مسح ع بطنه وشكله ما في بطن من الأساس والله أنا الإثنين
ضحكت بحيا الله يعينك باقي كثير ع المغرب
هز راسه الله يعيني من جد
دق جواله طلعه من جيبه واعتذر هذا تلفون العمل اسمحي لي
مسموح
تأملته بخلسة وهو يكلم
مرتب واضح إنه ابن عيلة وناس
بس كبير !
ابتسمت يعني واضح فرق السن بيننا
وجريء ياويلي هم دايما كذا الرجال كل ما تقدم فيهم العمر تزيد جرأتهم
حسيت بشي غلط
شفته حاط جواله ع الطاولة ويناظر النجف بابتسامة
رجعت شعري ورا إذني بإحراج قلت شي؟؟
ناظرني بضحكة يخفيها وين وصلتي؟
هآآ لا كنت أفكر بـ..
ضغط ع أنفي بخفة ما عليك أنا لازم أروح الحين
اييه يارا بما إننا بنتزوج قريب إن شاء الله لازم تحطين ببالك
حنا عائلة كبيرة ومتماسكة يعني شفتي مثل أمس ما جيت عشان أبوي والحين مضطر أخرج عشان العمل ياليت تتفهمين الوضع
احترمت عقليته كثير لا مو مشكلة طبيعي هالشي في كل العوائل
ابتسمت باختصار لا تشيل همي ما عندي أي مشكلة
باس جبيني استحيت منه
ابتسم وهو يوقف هذي حوبة توأمي عبدالإله في يوم ملكته أبوي طاح تعبان واضطر يرجع البيت ويترك عروسته والظاهر إنه حظي مثله
ابتسمت حمستني أشوف عيلتك
قريب إن شاء الله
رجع دق جواله
عفس وجهه والله درينا يا صلووح ارحمني شوي
هههههه يللا مع السلامة
مع السلامة لا تنسين بدق عليك بعد الفطور
أومأت براسي إن شاء الله
جلست لحالي يوم طلع
حاسة براحة فضيعة تجاهه
تهيأ لي طيف خالد
طردته وأنا أقوم عبدالرحمن واضح إنه طيب يستاهل مني كل خير
وإن شاء الله ربي يقدرني أسعده


أَنْ تَسْتَغْرِقَ الأَنْفَاسُ الجَسَدْ ..

لبست برمودا صفرا وبادي أبيض منقط بأصفر ينربط ع الكتف بفيونكا ناعمه
ربطت شعري ذيل حصان وحطيت لمسات خفيفه تناسب الصباح من الميك آب
ما أدري وش خلاني أتذكر لما كنا بصقليه أول أيام بعد عرسنا يوم جا بسام وجاب معه ساندوتشات وقعد يسويها يمكن لأني بعد كنت لابسه أصفر!
تنهدت بحزن كانت أيام حلوه ومو حلوه
طلع من الحمام
أشرت له بشويش لأنه ميرا نايمه
ناظرها وجلس بتكاسل ع الصوفا
همست ما بتروح الجامعه
هز راسه لا
وقفت قدامه ودنقت شوي وبتساؤل ليه؟
رفع عينه لي حسيت إني قريبه مرا بس ما حبيت أبين له إني متوتره
وظليت ع مكاني
وبعد تأمل لثانيتين قال ما نمت زين وما عندي شي مهم اليوم
آهاا
رفعت ظهري
مسك كفي وجلسني بحضنه
قرب مني زيادة ودفن وجهه بشعري
وبتنهيدة عميقة همس
: ورب الكعبة وحشتيني !
حطيت يدي ع رقبتي بتوتر وربكة واضحه
على قد ما إني بحالة نفسية ما تسمح لي أفكر فيه
بس أنا طول عمري ضعيفه قدام طيف بسام أجل وشلون وهو قدامي
دق الباب وفتحت موليا
وقفت ببجاحة سنيوري بسام لا آوتو إي برونتا
" سيد بسام سيارتك جاهزة"
بعدني بعصبيه عنه وقام
طلع وقفل الباب وراه
سمعت صراخه وأنا اروح له بسرعه
بسام بعصبيه وكأنه جني راكبه هزأها مسح فيها البلاط بالايطاليه
لأنها فتحت الباب بدون إذن !
كل خدم البيت يدقون الباب وما يدخلون إلا إذا انفتح بس هذي مدري وش جاها
وعلى صوته طلعت خالتي يلدا ولين
خالتي تناظرني وش صار؟
قلت بإحراج فتحت الباب قبل لا يأذن لها بسام
لين بهدوء من حقه أجل ماما
لف علينا شوفي يمه هالحيـ... ما أبي أشوف رقعتها هنا
يلدا تهديه طيب حبيبي لا تعصب إنت خليك صايم وناظرت الخدامة طلبت منها تكون مسؤولة عن الدور الأرضي ومالها دخل بجناح بسام مطلقا
ابتسمت له والحين صباح النور
زفر بضيق وهو يبوس راسها صباح الخير يمه
يلدا تهونها إلورا بدخل أشوف ميرا أكيد أزعجتكم
لتين بحب يا قلبي أنا والله ما حسيت عليها
ناظرتني لين بعد ما دخلت خالتي وبسام وابتسمت بخبث ليه مقهور لهالدرجة وش كان مسوي اعترفي
حمرت خدودي لا والله عادي بس مدري بسام إلا الخدم
يعني هو جريء قدامكم بس الخدم لا
لين بابتسامة وهي تربت ع كتفي اييه هو يخاف من الحسد
ضحكت بلا معنى يعني من حلاة العلاقة عشان يحسدونا عليها
لين بقهر تدرين لو ما انتي حامل كان عطيتك طراق يحلي العلاقة زين
ههههههههه الحمدلله أجل إني حامل
واستوعبت بعدها لكني اكتفيت بابتسامة مره مثل حياتي
طلعت خالتي يلدا وهي شايله ميرا توتا إذا خلصتي انزلي عندي لك مفاجأة
استغربت لكني قلت بابتسامة حب لهالإنسانة إن شاء الله



عندما لا تجد الحياة مغنيا يتغنى بقلبها تلد فيلسوفا يتكلم بعقلها
سمعت التلفون يدق بس كنت بالمطبخ وما مداني أرد اللين انقطع صوته
: نعم
جاني صوت بنت استغربته بالبداية
: احمم موجوده ربى
عقدت حواجبي لأني تذكرتها ابتسمت اييه موجوده مين أقول لها
بشبه حده صديقتها
قلت برواقة لا تكذبين حنا برمضان
شهقت بخفوت وإنت وش دخلك عطيني هي وإنت ساكت
طلال ببرود ماني معطيك كيفي حر زوجتي
وديم بغيض اللهم إني صائم
وأنا بعد صايم
إنت وش صاير فيك بتعطيني هي وإلا شلون
لا مو فاضيه قاعدة تطبخ
وطوط طوط ...
ضحك وهو يدخل المطبخ ربى بتصير حريقه اليوم
ابتسمت وهي تلف عليه ليه الله يجيرنا
هههههه وديم دقت هبلت فيها وقفلت بوجهها
ناظرتني وهي تترك الطماطم من يدها جد؟!
جلست ع الكرسي اييه
هههههههههههه حرام عليك طلال إنت من غير شي قاهرها
دق التلفون مره ثانية
غسلت يدي بسرعه
طلال مبتسم سلمي لي عليها ههههههه قولي لها الكابتن طلال يسلم عليك
ضحكت والله لتلعن خيري
ورديت آلوو
بعدت السماعة عن إذني من صوت صراخها
شلون يرد ع التلفون وقاعد يستهبل عليّ بعد والله لأنه قفل السماعة بوجهي والله ليشوف خليني أشوفه بس يتحمل وش بيجيه
طلال يضحك وهو داخل غرفتهم أنا بروح أنام إذا أذن صحيني
هزيت راسي إن شاء الله ورجعت لوديم
أول شي هدي أعصابك إنتي أنا وش دخلني كل هالهواش لي
لأنك متزوجة هالـ.. استغفر الله خرب لي صيامي الله يخرب ابليسه
اخفيت ابتسامتي اييه وش كنتي تبين
وديم بقهر ولا شي اتصلت أهزأ
ههههههههههه خلاص عاد ودوم إنتي لأنك تنقهرين هو يحب يعاندك
بس لازم يفرق ماني بزر قدامه
يعتبرك إخته صدقيني
يا زينه وهو ساكت بس
أخذت نفس حسبي الله على ابليسك يا طلال نكبتني نكبة بتظل شهرين تذلني عليها الحين
ويوم شافتني ساكته تنهدت لا تزعلين ربى بس والله زوجك يقهر
ابتسمت أدري خلينا منه الحين إنتي جد وش كنتي تبين
بس كنت بقولك صح لتين سحبت ملفها من الجامعه
أنا بحزن اييه خلاص طلال سحبه لها وأرسله
زفرت يا قلبي عليها الله يسعدها إن شاء الله
آميين
يللا روحي كملي طبختك أنا بروح أساعد أمي
سلمي لي عليها كثير
وديم بحده وكأنها تذكرت يوصل
ابتسمت باي
قفلت السماعة الله يعينك يا ماجد لو زعلت عليك ودووم !


مشكلتي إني أتظاهر بالفرح !

نزلت أنا وبسام سوآ وحنا نازلين
كانت تاله طالعه من الأصنصيل وهي لابسه
على وين؟؟
ارتبكت يوم وجه لها السؤال
ااا بروح المشغل
وقف باستفسار وش بتسوين بالمشغل توك ما صار لك اسبوعين فيه
احمم ما عجبني شكلي بغيره قبل العيد
ناظرها بنظرة يعني تراني فاهم عليك
إلورا اطلعي الحين لا تنزلين تحت بعد نص ساعة أنا أوصلك
إلورا
طلعت بسرعه كنت خايفه يكتشف إني بغيره عشان عبدالله وشكله عرف بس ليه ما يبيني انزل تحت اوففف ياربي
نزلنا للصالة السفلية كانت خالتي يلدا بس جالسه ومعها...
عضيت شفايفي يوم شفت عبدالله وبندر جالسين
ناظرني بسام
ابتسم وجلس ع الكنبة
انحرجت
في اللحظة هذي بالذات حسيت بمدى قبح اللي كنت بسويه
قربت من بندر اللي كان جالس ع اليمين
مديت يدي
صافحني وباسها
حاولت امنع نفسي من البكا
وقف عبدالله وحضني
تشبثت فيه وقعدت ابكي
هالإنسان الوحيد اللي أحس براحة تامه معاه
لا خوف ولا توتر ولا أي مشاعر غير الأخوة
يلدا بابتسامة كذا بكيتوا بنتنا
وأخذتني من حضنه حضنتني بحب وهي تمسح ع شعري
أنا مدري وش السالفة بس اللي أعرفه إنكم إخوان تزاعلتوا والحين تراضيتوا
مسحت أنفي وابتسمت اييه
بندر يوقف أجل حنا لازم نمشي اليوم أول دوام لعبوود وأشر عليه
عبدالله يناظره بطرف عينه من أمس ساكت وإنت ما في إلا تقول عبوود
بندر بضحكة أجل وش أقول عَبْدُاَلَلّهْ
عبدالله ميل فمه لا بس أنا بقولك بندورا من اليوم ورايح
لا دخيلك
ضحكت على مناقرهم
بندر بلطف يا حلوك وإنتي تضحكين يا لتين وهو يناظر عبدالله تحس شي غير كل ملامحها تنقلب
استحيت منهم
كمل عبدالله بحب اييه والله يوم تبتسم تحس الدنيا كلها تضحك ولما تزعل الله لا يوريك
بندر بنغزة وراني وخلصت الله يعين بس
كشرت شقصدكم يعني ترا بكل حالاتي حلوه
هز راسه بندر يصطنع الخوف اييه صح
يلدا بضحكة ههههه اييه هجديهم يا لتين العيال ما يجون إلا بالعين الحمرا
ههههههههههههههههههه
قام بسام مسك يدي بتملك طيب حتى حنا خارجين
بندر يخفي ابتسامته إلورا الله معكم
ناظرته بقهر ليه يخرب عليّ قعدتي صحيح هم الحين ماشيين بس كنا مبسوطين
وقفنا برا ننتظر تنزل تاله وتجيب لي جوليا البالطو حقي وحجابي
ناظرته بقهر وين رايحين
بنوصل تاله ونتمشى
بس أنا ما ابي اتمشى
رفع حاجب وأنا أبي..!
تخصرت روح لحالك طيب مو لازم تغصبني على شي ما أبيه
مسك راسه خلاص لتين مو لازم تسوين من الحبه قبه على كل شي
عصبت تنرفزت إلا جنيت الحين مين اللي بدأ المشكلة أنا وإلا أنت قلت لك ما أبي أروح معك مو غصب
أشر لي اشش بتجين وإنتي ساكته
سحبت البالطو من جوليا بعصبيه استغربتها بس خرجت وما علقت وهي تقدر بوجود الغول اللي حنبي!
لبسته فوق لبسي وأنا أزفر الله يعدي هالتمشيه على خير
ابتسم وهو يفتح لي الباب
مشيت قدامه وجات تاله جنبي همست لي شفيك معصبه
لفيت عليها بغيض لأني متزوجه أخوك
ابتسمت والله يا حظك أجل !
طنشتها وأنا أركب السيارة
شفت بسام يكلم السواق وبعدها دخل

،
يتبع

 
قديم 05-31-2012, 04:33 AM   #109

مزاجي توب


رد: رواية خنقت الورد يا يمه وبيديني انكسر ذبلان


رواية خنقت الورد يا يمه وبيديني انكسر ذبلان

من الغبــــــــآء جدا
أن تقضي وقتَ غيابهم مُكــــبّلاً
" بشوقك لهم "
بينما هم :
اختاروا البــعُـــد
لترتيب حياة أخرى خالية " منك "
أنت ترصف الشوقَ أشعاراً لعودتهم . .
وهم يختارون أكثر كلمات الاعتذار
بريقاً يُغطّي بشاعة أنانيـتهــــم
. !
أنانيتهم ='(

قفلت من جمانة اللي حابه تطمن على مستقبلي على قولتها
عدلت مكياجي كويس
هالمره لبست فستان سهره ناعم
أسود ع الجسم ما فيه أي شي يزينه غير عقد الملكة من الألماس الحر
رتبت شعري تعطرت من clou'e
لبست صندلي الكعب ونزلت تحت
انتظرته شوي قال بعد ربع ساعه بيكون هنا
مرت عشر دقايق
قمت عدلت التحفه ع الطاولة الكبيرة
فتحت طرف صحن الشوكلت
وشلت المبخره حطيتها ع المدخل
وع المدخل وقفت أناظر شكلي
أخذت نفس عميق وأنا أفكر
فقط بـ عبدالرحمن
حسيت بالاهتمام منه جا بنفس اليوم مرتين واعتذر لأنه خرج بدري الصبح عشان كذا جا الحين بعد التراويح
لفيت بحيا وأنا أشوفه من المرايا واقف عند الباب
ابتسم وهو يناظرني مساء النور
ابتسمت بخجل مساء الخير ... تفضل
دخل معي وعينه علي
بلعت ريقي بروح أجيب العـ..
جلسني لا تجيبين شي أنا جايب لك
وحط الكيس اللي معه بحضنه
ناظرني بخبث غمضي عيونك
ابتسمت لازم ؟
أومأ براسه اييه
غمضت عيوني ببطأ
ويديني بحضني
انتظرت ثواني مرت دقيقه يمكن ولا شفت شي
فتحت عيوني بضجر وش قـ...
سكت يوم شفته يتأملني
حمر وجهي
ابتسم سوري ما انتبهت ع نفسي أنا شكلي كل ما بجلس معك بلاحظ شي جديد
ابتسمت ع جنب وش لاحظت الحين
عض على شفاته غمضي مره ثانية عشان أقولك
رفضت بدلع تراك مصختها
ناظرني بصدمة نسيت نفسي
وبعدها ضحك عليّ بقوة
انحرجت
فتح الكيس وطلع علبة بحجم الكف من قزاز مموج
حطها قدامي وش تتوقعين فيها
صغرت عيوني وأنا أفكر اممم خاتم
: لا
شكلها علبة ساعة
بعد لا
ضميت يديني لصدري بإحباط أجل؟؟
بحماس اوكيه غمضي عيونك هالمره عشان تشوفين
غمضت عيوني بطاعة
حط اصبعه ع جفوني برقة فتحتها
اللي اكتشفته اليوم جفونك!
مساحتها كبيرة مشاء الله
ضحكت بحيا قوي ملاحظة مشاء الله عليك
واستوعبت أشرت ع العلبة ما فتحتها
ابتسم اوكيه أول وأشر ع خده
بلمت هآآآ بالأحلام السعيدة يا حبيبي
عبدالرحمن يخفي ابتسامته من أول يوم قلتي لي حبيبي وبوسه بخلانة فيها
راح وجهي بللت شفاتي وأنا أرص ع عيوني ما قدر
عبدالرحمن بمشاكسة رجع العلبة ع الكيس ما في أجل
ناظرته بقهر انزين ما في ومافي اللي تبيه بعد ولفيت بغيض
ضحك عليّ طيب ما ضيفتيني
قمت أخذت الدله وصبيت له وعطيته الفنجان وضيفته من الشوكلت
أشر لي أيه أحلى
هالسؤال كل الناس تسأله بس ضيفناها الشوكلت
أشرت له وأنا مقهورة على وحده بالبندق
ابتسم باستفزاز وإنتِ ما بتاكلين
هزيت راسي لا
ناظرني وهو يشرب القهوة ما غيرتي رأيك
قلت بهدوء لا
ضحك أجل خلاص أنا كل ما جيت بجيب هالعلبة معي وإذا وافقتي ع شرطي بعطيك هي
حقدت عليه زاد فضولي أعرف بس ما بسوي اللي يبيه ولو مات
ابتسمت ببرود أجل بتصبر كثير
عبدالرحمن برقة أصبر وش وراي كلها شهر وتكونين عندي بتسوين أكثر من هالطلب
يعني وافقي الحين أهون
شهقت وأنا أحط يدي ع فمي عبدالرحمـــــــــن
ناظرني ببراءة وشو؟؟
تخصرت وش قلت توك عيييب
ضحك من قلب
خزيته بعيوني ما يضحك
همس وهو يقرب مني وأنا وش قلت ما قلت إلا الواقع
بلعت ريقي وأنا أتخيل إني بعد شهر بكون مع هالإنسان
عقدت حواجبي بربكة
باسني ع خدي فاجأني
بعد وهو يرجع ظهره ع الكنبة لا تفكرين كثير خلي الأمور تمشي مثل ما هي
بعدت شعري لورى ومجرد مرور الفكرة ببالي أرعبني لدرجة إني ما حسيت بآثار الحركة اللي سواها




مَرآت ربگ ” يرزقگ ” خوْة إنـسـًآن وآحدٍ وْيسوى فيْ عيوْنگ » قبـآيـًل !!

في مكتبه الواسع قاعد يشرح له طبيعة العمل
سكت فجأة ورفع عيونه له عبدالله باختصار أنا قررت أحطك المدير العام
عبدالله بصدمة بندر أنا توي مبتدأ ما أعرف شي بالعمل أخاف هالشي يسبب خسارة كبيرة للعمل
بندر يعدل جلسته اسمعيني زين حنا عملنا لا هو مصنع ولا هو شركة عملنا تجارة ألماس
مناجم ألماس مسؤولين عنها نتاجر فيها من غير تحويل
يعني الموضوع ما فيه ربح وخسارة هذا أولا ثاني شي أنا أثق بدراسة جامعة البترول والمعادن وإنت خريج هالجامعة
بس دراستي ما لها دخل بالعمل هنا
بندر بتنهيدة يعني بالله في السعودية كنت بتلاقي عمل غير بشركات دوامها يهد الحيل ويشيب الواحد بدري
زفر انزين وبعدين
وشو بعدين من اليوم إنت المدير العام
لف عليه لحظة ومين كان قبلي
بندر يناظر السقف وهو متسند ع الكرسي الجلدي
أبوي كان مسؤول عن كل شي وأنا المدير العام بالإسم كنت أسافر أغلب الوقت عشان المبيعات والعقود والحين صرت صاحب هالتجارة وإنت مديري العام
ابتسم شرايك يا سنيوري عبدالله
ابتسمت بمرارة مدري وش أقول
إلا صح تعال بندر أنا سمعتك تقول عندكم فروع بالرياض ومدري وين
امم عندنا فرع مكتب مو محل بيع إنت فهمت عليّ قبل شوي
بإيطاليا في فرع بتورينو الأساسي اللي هو هذا وفي بجنوة وفينيسيا وروما وميلان
وفي واحد قاعد أدرس الخطة بفتحه يا بالرياض يا بالخبر
عبدالله بتفكير طيب ليه وحده من ذول
بندر لأنه الرياض العاصمة وبنفس الوقت أنا برأيي الخبر أحسن لأنه تعرف الرياض كبيرة ومتشعبة
الخبر لها حدود بعدين في كثير محلات بالخبر مو موجودة بالمملكة أو بالشرق الأوسط إلا فيها وقريبه ع مدن الخليج
أومأ براسه آهاا
قام من مقعده وراح جلس ع الكنب قدامه دنق عليه اسمع عبدالله أنا حولت لك راتب هالشهر مقدما وخلينا الحين نكتب العقد
قاطعه بندر هالراتب ماني ماخذه الحين يا تعاملني مثل باقي الموظفين يا إما الله يخلي شركات الشرقية
خزه بعيونه عن السخافة لا تسوي لي فيها أنا الحساس هذا شرطنا بالعمل دايما مع أي موظف
ناظره بعدم تصديق مو قادر أصدقك مدري ليه
ضحك بندر صدقني بعدين إنت الحين قدامك زواج وإلا مو ناوي تخطب البنت انحرقت وهي تنتظر حضرتك
ناظره بطرف عينه وإنت وش دراك
ابتسم لا تخاف ما كلمتها ولا شفتها بس توقع
اييه خلي توقعاتك لنفسك
ابتسم وهو ينادي السكرتير محمد مو ناوي توقع العقد؟
تنهد براحة يخالطها خوف من المستقبل إلا
دخل محمد وتفاجأ بقرار بندر الغير متوقع لكنه ما تجرأ يناقشه بالموضوع
هالإنسان إذا مشى بالمكتب الكل يوقف له إحترام وبالأحرى هيبة وراثها من أبوه
بعد ما وقعوا العقد استأذن محمد
شفيك تناظرني كذا كانك بنية بليلة عرسها
عبدالله ضحك غصب عنه حمـ##
قوم أجل خليني أعرفك للموظفين
عبدالله بابتسامة امتنان شكرا بندر
ناظره على وشو
على كل شي...كل شي من هذيك الليلة
كان يقصد الليلة اللي شافه فيها بسويسرا وتعرفوا على بعض
ربت ع كتفه بندر إنت أخوي والأخوان ما بينهم شكر ومره ثانية أقولك لا تسوي لي فيها أنا الحساس
ههههههههههه مسكت معك
هههههه شكلها



ڵـۈ آهـڊېـڪ زهـۈر آڵـڪـۈن ڪـڵــہ ,, حـبـې ڵـڪ مـآ ېـنـۈصـڣ ♥ ♥ ♥

وصلنا تاله ومشينا وبسام ما رضى ينطق بحرف
وأنا أعصابي زاد تلفها
وقف السيارة عند مبنى شكله غريب شوي سوره مرتفع ومافي مباني كثير جنبه
نزل من السيارة وفتح لي الباب
نزلت بضيق قلت له ألف مره أكره شي عندي أكون مثل الأطرش بالزفة
مسك يدي سحبتها
لف ذقني له وناظر عيوني بإصرار وحط يدي بيده وكأنه يقول بلا عناد لأنه اللي براسي بيصير
رصيت ع أسناني وأنا امشي معه مجبره
من يوم ما شافه الحارس فتح لنا البوابة على طول
دخلنا كانت مساحة خضرا كبيرة
ما فيها شي غير الخضار المكان غريب يعني ما في شي جا ببالي ممكن يكون هو
ناظرته باستفسار
كمل مشيه وهو ماسك يدي مشينا مسافة صغيرة وبعدها وقفنا
مساحة كبيرة كلها ورد
مزروع بشكل هندسي على شكل مربع وبالنص كوخ صغير
صغير مره يعني أعتقد ثلاث أمتار في ثلاثة بالكثير
يوم شفت الورد تركت يده
رحت بعالم آخر
نزلت له جلست ع ركبي وأنا اشمه
تنهدت بعمق وأنا ألف عليه
: ما أعتقد إني أعشق شي أكثر من الورد
ابتسم حتى أنا...؟!
ناظرته ولفيت وجهي عنه وأنا أقوم
رجع مسك يدي تعالي بوريك شي
ومشينا بممر مزفلت ضيق بين الورد باتجاه الكوخ
طلع مفتاح من جيبه وفتحه
.....و لاشي !
فاضيه ما فيها إلا جلسة صغيرة
بس المكان آسر خاصة المنظر من الشبابيك الصغيرة اللي تطل ع الورد من كل اتجاه
ناظرته بابتسامة يجنن
بسام بنظرة وهو يتأمل المكان هالمكان جاهز من سنين
لفيت عليه بفضول حقك؟
أومأ براسه اييه
زاد فضولي من متى موجود؟
ناظر عيوني وأنا واقفه مقابله تماما وبيني وبينه مسافة واضحه بالطول
: من يوم ما عرفت إنك تحبين الورد !
ظليت أناظره بصمت
حكاية غريبة مزيج من الغموض ما سألته لأني أدري لو سألته ما بيجاوب
حفظت الدرس زين
بسام يفاجأني وأنا ما علي إلا إني اعبر عن ردة فعلي بدون انتظار أي جواب منه
بس لين متى ؟؟!
الله أعلم!!
حضني من الجنب يللا مشينا
طلعنا منه بصمت
اللحظات ساكنة والورد يتمايل مدري هو يلوح لنا موّدِع أو يرتجف من نسمة هوا بارده هبت علينا كأنها تذكرنا ببرودة حياتنا وصقيعها..!
*
*
*
Nobody is perfect until you fall in love with them
لا أحد كامل في نظرك، حتى تقع في حبه !
[ كلمة تعبيريه فالكمال لله وحده ]

نهاية الجزء الخمسون
آرفيدرتشي لكل من مر من هنا
على أن ألقاكم قريبا بإذن الله

جوري وياسمين..!
بائعة الورد

 
قديم 05-31-2012, 04:34 AM   #110

مزاجي توب


رد: رواية خنقت الورد يا يمه وبيديني انكسر ذبلان


رواية خنقت الورد يا يمه وبيديني انكسر ذبلان

مشاء الله تبارك الله لا حول ولا قوة إلا بالله ولا تضره
بسم الله الرحمن الرحيم
الجزء الواحد الخمسون

[ بـَصْــمَـه ]
آثار قدميه
تتجه
.. إلى الأمام
وآثار قدميها تتجه إلى الخلف
وتقصي الآثار يبوح بحكاية فراق
فمن هنا مرّت امرأة
ومن هنا مرّ رجل
ومضى كلاهما في طريق
و .. انكسر شيء

كل ملامح الفرح اللي رسمتها بداخلي}~ اختفت....!
مر آخر اسبوع من رمضان بسرعة البرق ما حسينا فيه
شهر رمضان من أحلى الشهور عندي يمكن مو بس أنا كل المسلمين
أحلى شي لما نروح لمسجد في تورينو ونشوف المسلمين الايطاليين مجتمعين فيه
رجال ونساء حتى الاطفال وكبار السن
بس في هاللحظات أحس إني بنت مسلمه عربية عايشه بايطاليا وأفتخر بهالشي
وحدة الإسلام أقوى من أي وحدة في العالم
بسام خلص أوراق عبدالله وتاله في السفارة وملكوا فيها
بس إلى الآن ما حصل شي على أساس سابع يوم من أيام العيد يصير فرحهم هو فرح وملكة بنفس الوقت
تاله تفكيرها غربي بحت مو معترفه بالملكة من الأساس
تبغا فرح على طول!!
انتبهت على ماما
حطت الصحن قدامي شرايك
أنا بإعجاب وااااااااااو
صحن شوكلاته كبيييير يغلب عليه الذهبي والتركوزا ع الخفيف
مراا شكله حلوو ماما
ابتسمت وهي تحطه ع الطاولة
خالك بشير جابه قال ماحد يلمسه أبدا قبل العيد بس لين إذا تبي تاخذه تحطه بغرفتها بعد حلالها
ابتسمت يا قلبي عليه
صح رجع !
ماما وهي تعدل البراويز وتتأكد من تجهيزات العيد كلها اييه رجع
ونونا..
لفت علي بحذر وبهمس جلست جنبي لو عرف بسام أو لتين مو حلوه
جدتك بألمانيا
عقدت حواجبي بألمانيا!! بس بكره عيد بعدين وش قاعده تسوي بألمانيا
تنهدت وهي تعدل حلقها راحت لرويد ومؤيد
عضيت على شفتي شلون تسوي كذا؟؟
ما أدري تدرين ما حد يقدر يقولها شي
هزيت رجولي بنرفزة والله يا ماما ماحد مخرب رويد إلا جدتي وكل اللي صار بسبب مصاخته والدلع الزايد اللي عايش فيه
اففف ياربي نكد علي فرحة العيد بطاريه
مسحت ع شعري شلون بنخلي بسام ما يحس
ابتسمت بسخريه هه هذا إذا ما كان يعرف قبلي وقبلك بعد..



مآ وحششني لييلة الباآرح سسووآك ،، كنههآ من طوولهآ صآاررت دهرر


تركت الفستان معلق ع الدولاب من برآ ولفيت على فوني اللي رن
أخذته وانسدحت ع السرير
رقم غريب
رديت بعفويه
: تشآآو
سمعت صوت رجال استغربت ورجعت شفت الرقم ورديت
بينفونوتي
: ما اتفقنا نتكلم مع كل ناس بلغتها
شهقت عبدالله!!
: بلحمه وعظمه
عضيت على شفتي وأنا أقوم أقفل باب غرفتي بالمفتاح دخلت الحمام وفتحت المويا
عبدالله باستغراب شقاعده تسوين؟؟
أنا بخوف أخاف بسام يشوفني والله ليزكي فيني
ابتسم ما له دخل خلاص إنتي الحين زوجتي
تاله بحب حياتي إنتا
عبدالله بتوتر تجذبه بجرأتها وعفويتها معاه
ابتسم أُونياني إي سيستا بيني
" كل سنة وأنت بخير "
حفظتها عشان هاللحظة
ضحكت بحب يا قلبي هذي أول جملة ايطاليه تقولها
عبدالله وهو يفتح شباك غرفته اييه حسيت إنه لابد منها مدامي بعيش هنا
إنتي متجهزة عشان بكره
أومأت براسي اييه بكره أكيد بتجي ع الفطور عندنا
مدري أنا لسى ما أعرف شلون عيدكم هنا
أخذت نفس وأنا أتربع ع السرير شوف أنا بفهمك عادة نروح نفطر عند جدتي وبعدين نعيد على خالتي نجد وبالليل نجتمع ببيتنا
بس هالمره جدتي مو موجوده فبيصير الفطور عندنا
آهاا يا حظي أجل بفطر معاك بكره
ههاي والله عشان بسام يخنقني معاك
عبدالله بعصبيه ممكن لا عاد تجيبين سيرة هالآدمي
تاله تراه أخوي هاا
بحده ويعني مو أنا زوجك ؟؟ كل ما قلت لك كلمة قلتي بسام وش بيسوي يعني
تاله اييه كمل شرايك نتضارب بليلة العيد وبكره ما نكلم بعض
عبدالله بنرفزة أنا أدري عنك
تاله بغيض ممكن أسكر الحين
ولع لا مو ممكن
زفرت إلورا وش كنت بتقول
عبدالله وهدأ وبصوت رقيق كنت بقول إني أمس تمنيت نظل سوآ طول الليل نتمشى ونعيش ليلتنا
لعبت بشعرها معليش حياتي كلها أسبوع وأصير لك
ابتسم بخبث مين بيفكك مني وقتها
ضحكت بدلع ولا أحد...




بَآحط قلَبي ., بين آيدينك .,‘هدييه .,
سكرت لاب توبي
اليوم الصبح كلمت لتين
يا قلبي عليها تعبانة صحيح راح الوحام تقريبا والغثيان بس جسمها مو متحمل الحمل
قمت أتأكد من أغراض طلال
الثوب، الشماغ، العقال، الجزمة " القارئ بكرامة "، العطر، الكبك
اممم كل شي جاهز
سكرت الدولاب ولبست روب النوم حقي لونه أبيض على سكري اليوم ليلة عيد
وحضرة السيد طلال مو موجود
خاطري أعرف وين راح وما يرد
والأحسن إني ما ألح بالاتصال
دقيت ع ماجد أبارك له
هلا وغلا والله بست الكل
هلا فيك مجوودي كيفك؟؟
الحمدلله بخير إنتي شلونك وشلون طلال
كلنا بخير كل عام وإنت بخير
وإنتي بخير وصحة وسلامة يارب إذا طلال جنبك عطيني ياه أبارك له
سكرت الأنوار وأنا أفتح الأباجورة لا والله مو موجود طلع ولسى ما رجع
آهاا خلاص أنا اتصل عليه خلينا نشوفك بكره
إن شاء الله
قفلت منه حطيت الجوال ع الكمدينة
تثاوبت بنعس وانسدحت ع السرير
فاتحه عيوني بنتظر طلال لين يجي اليوم أول ليلة عيد نقضيها سوآ
تغمضت عيوني ورجعت فتحتها بصعوبة
شفته دخل
فتح قلاب ثوبه وهو يقرب مني
باسني برقة نعسانه..؟
فركت عيوني وأنا أقوم لا
قومني معه تعالي بوريك شي
طلعت معه للصالة
شفت علبة كبيرة موقفها ع السيراميك
ابتسمت وش هذا؟؟
ناظرني بابتسامة افتحيه
حاولت افتحه بس ما فيني حيل مع النعس
فتحه معي
ضميته بحب يا قلبي يا طلال ليش تعبت نفسك
لخبط شعري وهو يبوسني الغالي ما يستاهل إلا غالي
وكل سنة وإنتي طيبة يا عمري
كل سنة وإنت أغلى وأعز إنسان على قلبي الله لا يحرمني منك
همس وهو يقوم آميين
مسك يدي تعالي ننام ورانا قومه بكره
تركت اللاب الجديد ورآي ورحت أقاوم النوم معه...!



مع صباح يوم جديد
البيت كله حركة
ما كنت أتوقع العيد كذا في تورينو
بيتنا أو بيت أهل بسام مليان الكل جايين يعايدون علينا وفي ناس ما أعرفهم
حتى في بعض اللي يتعاملوا مع داما بيانكا جو !
ابتسمت وأنا أشرب كاسة العصير تلوو كلمتي عبدالله
ناظرت حولها وابتسمت بخبث لما تأكدت من عدم وجود بسام اييه أمس كلمني والحين هو برا مع الرجال أخاف بسام يشوفني معاه
تركت العصير وأنا آخذ حبة الشوكلت اللي عطاني ياها راكان ما عليك منه صار زوجك
تنهدت والله أمس كنا راح نتضارب أنا وعبدالله بسبب هالموضوع هو يقول نفس كلامك وأنا خايفه من بسام
ناظرتها بنظرة طبعا راح تخافين اللي ع راسه بطحه إنتي عارفه وش سويتي
بلعت ريقها ويعني إني جدية التوبة تذب ما قبلها
بلمت وفجأة صرت أضحك بقوة
حاولت امسك نفسي تجب مو تذب وين حنا
تاله برجة ابتسمت المهم إنه الفكرة وصلت
ما في المهم يا حبيبي هذا حديث
ضربتني بخفه تعرفي تاكلي هوآآ
هزيت راسي ببراءة لا شلون؟؟
آهاا روحي لراكان يعلمك
راكان اللي صار له خمس دقايق واقف وأنا مو معاه
رص على أسنانه يا لابيلا لو سمحتي تلفونك يدق صار له ساعتين بغرفتك
وإنت وش دراك؟؟
وأنا نازل سمعته
قمت بتكاسل انزين راكان ؟؟
وهو يدخل الأصنصيل معي كوالي؟؟
"ماذا؟؟"
ابتسمت شرايك اليوم نروح نتعشا سوآ
رفع حاجب أنا وإنتي
ضربته ع راسه نو شور كلنا سوآ
ابتسم وش يعني شور؟؟
ضحكت وأنا أطلع من الأصنصيل يعني أكيد بالانجليزي
آهاا اوكيه قولي لداد وما بيرفض لك طلب مع إننا عادة نتعشى في العيد في البيت كلنا مع بعض
هزيت راسي شفت إنت قلت اوكيه تأثرت فيني
ابتسم بحالميه وفي أحد ما تأثر عليه هالفوشيا وأشر علي
قلت بصوت مسموع بساااااااااام
تحول وجهه لرعب خلاص بروح أعوذ بالله منك ما تخلي الواحد ياخذ راحته مع إنه بسام مو هنا
ضحكت وأنا أدخل جناحي
كان الجوال فعلا يدق للحين
استغربت وش هالمكالمة المهمه
أخذت جوالي كان رقم خارجي يعني مو من ايطاليا
يمكن سعـ...
رديت قبل لا أكمل تفكير
آلوو
: لتين لا تقفلي أنا كنت بقولك بسام ما بيرجع لك سوانو إذا ما وافقتي تتركيه وتجين لي
"سليم"
عقدت حواجبي لما ميزت صوته إنت معتوه أصلا
بسخرية مو مصدقتني دقي ع تلفونه بتحصليه بلوكّاتو ومو موجود في بيتكم لأني ايوا سولو اللي أدري وينه
"مقفل, أنا الوحيد"
تذكرت كلمة راكان توه
تقفل الخط
ارتجفت بخوف بسام ماحد يقدر يسوي له شي أكيد يكذب
مسكت بطني بألم قوي اجتاحني
آخر مره شفته تضاربنا بسبب موضوع دراستي
اليوم الصبح بالعيد وطلع وجلسنا كلنا تحت من غير لاحد يحس بشي وبعدها طلع يوم جوو الرجال
رصيت ع نفسي
وقمت بنزل أشوف وينه




محظۈۈظ من هۈــﮱ ڷه آنڛآن يهۈآه ۈمحظۈظ من خڷه يرآعيــﮱ شعۈره ,,

في مجلس بيت خالتي
طلعوا ماهر وسجى يعايدون
وجلست مع وافي شوي وبعدها نروح لأهلي ونرجع ننام عشان زيارات الليل
صراحة ما صدقت !
داليا بجلالة قدرها قاعده تضيفني شوكلت
لا وماسكه الدله بتصب قهوة
ابتسم لي وافي وكأنه يقول شوفي مشاء الله عليها
جاملته بابتسامة وما لحقت أكمل ابتسامتي إلا وصرخت
كبت القهوة عليّ بالغلط
قلت بقهر انحرقت التنورة!!
وافي وهو يمسح رجولي بالمنديل ناظرها جيبي ثلج بسرعه
حزنت عليها واضح إنها بالخطأ انكبت مو قاصده
أخذ منها الثلج وهو يحطه ع رجولي
معليش حبيبتي استحمليه شوي
مسحت الدمعتين اللي نزلوا لأنه الفنجان صغير وما انكب كثير
ناظرني بحنان راح الألم
برمت شفايفي الحين بتتشوه فخوذي
ابتسم وناظر داليا لا تخافين دلوو ما صار شي
داليا شوي وتبكي آسفة جوجو ما قصدي والله
والله العظيم ما قصدي اكبها عليك
ناظرتها بطرف عيني لا حبيبتي ما صار شي عادي
همس بإذني وافي
: حتى لو تشوهتِ بعيوني أحلى إنسانة
توردت خدودي وأنا أنزل التنورة
ناظرت داليا اللي جالسه بصمت وتأنيب ضمير
ابتسمت دلوووي حبيبتي عادي والله ما انحرقت كثير شوفيني لو انحرقت كان شفتي جمانة الأصلية
وفتحت عيوني على وسعها
داليا ووافي هههههههههههههه
رفع يده الحمدلله أجل إنك ما انحرقتي
صغرت عيوني
ابتسم ورمى لي بوسه وهو يقوم أنا بطلع أعيد مع أبوي وأدق عليك عشان نروح لأهلك اتفقنا
هزيت راسي اييه اتفقنا هربت يا خوااف
داليا تضحك واااافي تخاف من جمانة!!
وافي بإنكار أناا
رفعت حاجب لا جدتي
ضحك وهو يخرج أنا أخاف بس أخاف على نفسي صراحة وغمز لي
ابتسمت لداليا ببراءة أصرفها أنا بطلع ارتاح شرايك تجين معنا الليلة عند جدتي
نقزت بفرحه جد؟!!
أومأت براسي اييه إذا هذا يسعدك ويسعد أخوك..!
.
يتبع

 

أدوات الموضوع



الساعة الآن توقيت السعودية الرياض و الدمام و القصيم و جدة 04:43 PM.


 
Powered by vBulletin® Copyright ©2000 - 2020,
vBulletin Optimisation provided by vB Optimise (Pro) - vBulletin Mods & Addons Copyright © 2020 DragonByte Technologies Ltd.

Search Engine Optimization by vBSEO 3.6.0