ازياء, فساتين سهرة


العودة   ازياء - فساتين سهرة و مكياج و طبخ > أقسام عامة > قصص و روايات > روايات مكتملة
تسريحات 2013 ذيل الحصان موضة و ازياءازياء فكتوريا بيكهام 2013متاجر ازياء فلانتينو في باريسمكياج العين ماكياج دخاني makeup
روايات مكتملة صفحة ألم.... رواية حزينة مؤثرة مشوقة رائعة كاملة يوجد هنا صفحة ألم.... رواية حزينة مؤثرة مشوقة رائعة كاملة هنا تنقل الروايات المكتملة فقط

فساتين العيد


 
قديم   #31

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

وصلنا في الجزء ياللي طاف يوم تلاقت القلوب .. وصلنا يوم تلاقت فيه اجساد انحرمت من بعض سنين .. وصلنا للحظه ياللي بدت فيها نهايه عذاب شوق ولدها .. وصلنا للحظه ياللي اخير بكت فيها العيون بدموع الفرح بعد ما جفت دموعهم من الدمع بسبب البكى والحزن .. مرت هذيج الليله وفارس وامه ما ناموا ..مرت هذيج الليله وشوق تخبر وتحكي عن العذاب ياللي مرت فيه .. بدت تخبر ولدها عن العذاب .. عن الدمع .. عن الاحزان ياللي عاشرتها بعده .. بدى فارس يخبر امه الجروح ياللي عاشها ..بدى يقولها عن الالام ياللي صارت له بدون الاهل والاخوان وكل شي .. بدا فارس او بالاحرى سعيد يخبر امه عن كل ياللي صارله .. بدى يقولها عن الصعوبات ياللي مر فيها وعاشها .. بدى كل واحد يحن للثاني .. بدت المشاعر تتدفق بين الاثنين .. بدت شوق تخبر سعيد او فارس بالاحاسيس الغريبه ياللي تملكها يوم تشوفه .. كيف تحس . وكيف تعيش .. كيف تحلم فيه وتشوف طيفه ما يفارقها ... بدى فارس يخبر امه بنفسه الشي .. بدى يخبرها عن الاحاسيس الغريبه ياللي يحسها لا من شافها ولا تلاقت عيونه بعيونها .. بدى يخبرها عن الاطياف ياللي كان يشوفها وهو صغير ..

سعيد وهو الارض موب شالته من الفرحه وهو في حضن امه ..: امي .. فديت هاي الكلمه .. والله ما يشبع منها فمي .. احس انه لها طعم خاص .. طعم ولا احلى منه ولا الذ ... فديت ياللي انتظرني سنين وهو متحمل

شوق وهي تمسح دموعها ..: انشاء الله ما تفدى احد .. وربي لا حرمني منك يا فارس ..

سعيد وهو يبستم ..: امي .. خلاصنا من كلمه فارس .. الحين اسمي سعيد .. انتهى زمن فارس .. خلاص .. انتها يا امي .. صار فارس بالنسبه ليه رمز .. رمز يدل على الحزن واليأس والمراره ياللي عشتها ..ابي احس اني انسان جديد .. انسان عاش معاج طول السنين ياللي طافت .. ما ابا اتذكر الوقت ياللي عشته بلاج يا بعد كلي ..

هني ابتسمت شوق وهي تمسح شعر ولدها سعيد ..: ادري يا وليدي .. وانا عارفه باللي في خاطرك .. وانا بعد ابا اسميك فارس .. لانه اسم سعيد تعاشر الحزن معاه .. سنين وانا انادي باسمه .. والحين جاني .. الحين عاش معاي .. الحين في حضني .. *وهني تبوس شوق جبين سعيد وهيه تبتسم *

سعيد وهو يبتسم ..: امي .. ليش سميتني سعيد .. ليش اخترتي اسمي .. هل هوه ابوي ياللي اختاره .. ولا منو .. وكيف مات ابوي .. ابا اعرف كل شي ..

هني تنهدت شوق لانه هذي ذكريات مر عليها الزمن .. : يا سعيد .. هذي صفحات تراكم عليها الغبار .. وشي وانتها .. ونحن عيال اليوم .. خلنا ننسا الماضي ونعيش حياتنا بصفحه جديده .. بعيده عن الالام والاحزان ..

كانت شوق ما تبي سعيد يسألها عن اهله الباقين .. ما تبى تقوله عن الماضي ياللي انظلمت فيه هيه وياه بسبب هلال وحصه .. ما كانت شوق تدري انه فارس كان يعرف عمه بس ما يعرف انه عمه الحقيقي .. ما كنت تدري انها ترجع لماضي بيخليها تعيش الحزن من اول وجديد وخاصه انها ما تبي تشوف حصه ياللي كانت السبب في مشاكلها مع هلال في الماضي ..

سعيد ..: امي .. كان هذا الشي يضايقج ما ابا اسمعه .. الزم ما عليه راحتج .. بس حبيت اني اعيش حياتي وانا اعرف كل شي .. اعرف كل ياللي ضاع عليه في السنين ياللي طافت .. ابا اعرف منو ياللي بقي من اهلي .. كل ياللي اعرفه من خليفه انج عايشه معاهم و انج فقدتي سعيد .. ما اعرف شي ثاني .. امي ابا اعرف بس ما ابا ازيد شجونج واحزانج .. وكوني صريحه معاي .. هل هذا الشي يحزنج ..

شوق .. وهيه تبتسم ..ولاهامها اي شي من هاي الدنيا ..كل ياللي همها انه سعيد ودها يكون سعيد وفرحان .. واذا كانت هاي رغبته ما كان عندها مانع انها تفتح جروحها ياللي سنين وهيه تعالج فيها ..: لا فديتك .. ما يضايقني .. بس لحظه خليني اشوّفك كل شي ..

وتجيب شوق البوم الصور .. وبدت تقلب فيه ..

شوق هيه تطلع الصور القديمه لامها والبوها .. : شوف يا فارس .. *وتأشر على صوره من الصور فيها ابوها * .. هذي صوره ابوي الله يرحمه يوم كان في لبنان .. ايام الحرب .. كان في الجيش ...

فارس ..وهو متحمس لانه شاف صوره يده ..: والله .. الحين هذا يدي الله يرحمه !! .. مشاء الله عليه . .مزيون .. ما قلتي لي انج تاخذين ملامح وايد منه ..

شوق وهي تضحك .. : هاهاها .. لا يا فارس .. انا اكثر الشي ماخذه من امي .. وعلى فكره . .يدتك الله يرحمها هيه ياللي مسميتك سعيد على يدك الله يرحمه ..وانته يا سعيد طحت قاصر .. ابو سبعه شهور ..

سعيد وهو متفاجئ ..: والله .. الحين انا قاصر !!! ..* وعلا شان يلطف الجو بدى يسوي سوالف عند امه ..* .. شفتي يا امي .. حتى وانا صغير ما احب اتعبج .. بس جلست في بطنج سبعه شهور .. ما زدت على شان اوفر عليج الوقت ..

شوق وهيه تضحك ..: هاهاهاها.. هيه قاصر .. بس التعب ياللي جاني منك ما حست به ام قبلي .. هاهاها.. اول شي في حملك .. وحتى قبل حملك .. * وهني خنقت العبره شوق لانها تذكرت حمد .. تذكرت السوالف القديمه يالي استوت لها ..* والسنين ياللي ضعتها مني .. بس الحمد لله انك رجت ليه ..*وهني بدت شوق تبكي لانها ما تحملت ..*

سعيد وهو انقلبت نظراته من مرحه لحزينه ..: امي .. فديت قلبج .. * ويقوم يحضن امه بكل حنان ..* اسمحيلي يا الغلا . والله ما كان ودي ازيد احزانج .. *وهني يبوس سعيد راس امه * .. امي .. واللي رفع سابع سما .. وياللي بنا سبع بوتات .. والله لا اكون لج الابن الصالح ياللي يدوس على قلبه بس على شان يعوضج دمعه نزلت بسببي . والله يا امي لا ادوس على العالم كرمالج .. واني افكر بسعادتج قبل سعادتي ..

هني لتفت شوق في ولدها وهيه تبتسم ..ومسكته وحضنته : لا يا ابوي .. سعاتك هيه سعادتي .. وانا والله يوم تفرح اني افرح معاك .. ويوم تحزن انا احزن معاك ..

وهني تمسح شوق دموعها وهيه تحاول تغير الموضوع .. طلعت صوره من الالبوم لسعيد .. وهيه تقوله ..

شوق وهيه تطلع هذيج الصوره ..: فارس .. شوف هاي الصوره .. تعرف منو هذا ..

سعيد وهو قلبه ينشرح لهذاك الانسان .. : والله يا امي ما اعرفه !! .. منو هذا لا يكون جدي من طرف ابوي وهو شاب !!

شوق وهي تضحك .: هاهاها.. لا يا سعيد.. هذي صوره ابوك الله يرحمه ..

سعيد وهو يضحك ..: والله ..هاها.. ابوي .. ما قلتي لي انه اكبر منج بكثير ..

شوق : ايوه .. كان اكبر عني .. ابوك يا فارس كان متزوج قبلي بوحده اسمها مريم ..

سعيد ..وهو متفاجئ ..: والله .. ابوي كان متزوج .. يعني عندي اخوان بالابو بعد !!!

شوق هيه تنزل راسها ..: لا يا سعيد .. ابوك كان متزوج من مريم من سنين .. كان يحبها .. وكان ابوك ما يجيب اعيال .. عقيم يعني .. بس مريم وقفت معاه السنين كلها لين مرضت ومات .. بس قبل لا تموت قالت له انه يتزوج .. وهذي هيه امنيتها قبل لا تموت .. وهو وفها لها ..و تزوجني .. وبعد مده حملت فيك ..

سعيد وهو متحمس لسماع ماضي اهله .: والله . .واكيد طار من الفرحه .. صح ..!!

شوق وهيه تنزل راسها ..: لا يا فارس .. ابوك ما فرح بالعكس .. ثار عليه .. وضربني .. وبسببه انا نتقلت للمستشفى .. انتهمني انه ما حملت منه .. واقسم لك يا فارس انك ولده . .من لحمه ودمه ..

سعيد وهو منصدم وحزين في نفس الوقت لانه عرف ماضي حزين مر على امه .... : وليش ما صدقج .. ليش ضربج .. وليش سوا جيه ..

شوق : ما ادري .. كل ياللي عرفته اني في المستشفى بعد الالام ياللي مريت فيها .. وامي مسكينه كانت مثل ياللي فقدت عقلها يوم كانت تشوفني بموت قدامها من الوجع بعد ما ضربني ابوك وشل السواق منا.. طلعت للشارع تصرخ وتنادي عسى يلبي عليها احد .. وما قصروا جيرانا .. ودوني للمستشفى .. وبعدها بمده بسيطه .. عرفت انه ابوك مات في حادث ..

هني صكرت شوق الالبوم وهيه تتنهد .. : يا سعيد .... هذي امور قديمه .. وخلاص .. انتها وقتها .. خلنا نعيش الحاضر .. والحاضر احلى تراه والله ..

سعيد .. : ادري ..بس امي .. ابوي ما له اهل .. ما له اخوان .. ما له بني عم .!!!

شوق ..: يا سعيد ابوك كان له اخو.. اخو طيب .. بس سبحان الله .. له زوجه شيطانه .. قلبت عقله وخلته يستغل التوكيل ياللي ابوك اعطاه اياه قبل لا يموت .. وسحب مني كل شي .. سحب مني الحلال .. حتى انه كان ناوي على الفيلا ياللي ابوك الله يرحمه مسجلها باسمي .. وهيه الشي الوحيد ياللي طلعت به من ورث ابوك الله يرحمه ..

سعيد ..: اعوذ بالله .. هذا ما يخاف الله .. ما يدري انه الدنيا فيها حساب .. والمال الحرام ما يدوم لراعيه ..

شوق ..: يا سعيد .. هوه كان يلين ليه .. بس حرمته ما كانت مخليتني في حالي .. حتى انها كانت تشرشه عليه .. *وهني تضايقت نفسيت شوق لانها تذكرت حصه .. وشافها سعيد وبس كان وده يعرف كل شي .. بس قال انه بسأل ميثا عن كل شي عن لا يضيج بامه * ..

سعيد ..: امي .. لا تضيقين بنفسيتج .. تراه الموضوع ما يسوى .. والحمدلله انه القلوب تلاقت على خير ..

شوق وهيه تبتسم وهيه مدمعه ..: الحمد لله يا سعيد .. الحمدلله انك رجعت ليه .. *وهني تحضن شوق سعيد بكل حنان وبدت تتمايل فيه كنه طفل صغير ...

مرت الساعات وسعيد يسولف عند امه لين صلى الفجر ورجع على شان يرتاح .. نام ولاول مره ينام سعيد ..لاول مره ينام فيها ويحلم احلى احلام لانه عنده السعد كله .. نام وطول فتره نومه كان يبتسم .. ابتسم ولاول مره تحس شوق انها مسكت همومها كلها ورمتها في عرض البحر .. بدت شوق تشوف همومها تغرق في مكان ما راح تطلع منه .. بدت شوق تشهد غرق همومها واحزانها في وجود سعيد من جديد جنبها .. نام الغالي بين احضانها وهيه تلعب بشعره .. بدت تشوفه كبير بعد ما ضاع منها وهو صغير .. مرت حدود ثلاث ساعاد وسعيد راقد .. واول ما صحي ولا بامه جنبه ومتغطيه بنفس البطانيه ياللي هوه متغطي فيها وتلعب بخصال شعره .. اول ما فتح بعينه انه بامه قدامه .. وارتسمت باتسامه حنونه في شفايفها الورديه ..

سعيد : صبحج الله بالخير يا وجه الخير ..

شوق .: صبحك الله بالنور والسرور يا بعد قلبي ..

سعيد ..: امي ... شكلج ما نمتي ..

شوق : يا سعيد عفت النوم ... ابا املى عيوني بشوفتك ..

سعيد وهو يبتسم .: امي .. بتعيفيني وبتملين مني .. هاهاها... حتى مش غريبه انج تروغيني من البيت ..

شوق وهيه متأثر بكلام سعيد ..وهيه تدمع...: لا والله .. لا والله .. ما عاش من يمل منك ..

هني اول ما شاف سعيد دموع امه ... على طول قام من فارشه .. قام وحب راس امه .. : امي .. والله ما كان قصدي .. بس حبيت اني اسوي سوالف .......

وقبل لا تكمل شوق كلامها ولا بطرق على الباب ..

خليفه وهو يصيح من ورا الباب ..: بسكم .. بسكم نوم ... حشى .. موب نوم .. دورت الرقاد البارحه وقالوا لي انكم صارقينه .. اعطوني منه شوي ..

هني انفجرت شوق تضحك و بدموعها ياللي كانت قبل لا يدق عليهم الباب خليفه * الحشره * ..

سعيد وهو يبتسم ..: اما هذا صج هادم اللحظات .. ما لقي غير الحين يحشرنا ..

شوق ..: حرام عليك .. فديته . والله انه زينه البيت ..

سعيد ..: لا والله .. وانا شنو يوم هوه زينه البيت !!

شوق ..: بدينا بشغل الغيره ياللي ما لها معنا ...

سعيد .. : وليش ما اغار .. طول السنين ياللي طافت ماخذ كل حقي ... الحين ابا حقي كامل منه ..هاهاها

شوق ..وهيه تضحك .. : هاهاهاها .. لا والله .. سير عيل وخذه منه ..

وقبل لا يكملون كلامهم ولا بخليفه يدق الباب بعنف هاي المره .. : يا جماعه . .حرام عليكم .. امي مسويه ريوق ولا احلى منه .. ولا طاعت تخليني اكل لين تجون وتشرفون حضرتكم .. لي متا بتعذبونا معاكم .. يالله قوموا ..

وهني تصيح شوق من ورا الباب .. : خلاص .. قمنا .. قمنا .. بسك .. كسرت الباب ..

سعيد ..وهو يرفع صوته على شان خليفه يسمع : يا ذا الحشره .. الواحد في هذا البيت ما يقدر ينام ...

خليفه ومن ورا الباب ..: لا والله .. انته بس امس نمت عندنا .. وصرت الحين تتشكى .. اقول .. لا تخاف ..انته من اليوم مطرود .. يا انا في هذا البيت يا انته .. وحسلك ما تتغلى ..تره بس اسبوع وخالتي شوق بتمل منك .. اعرفها .. ما لها غير حبها القديم يالي هوه انا .. انا يا اخ متطفل ..هاهاهاهاها

وهني يبطل سعيد الباب وعلى طول ورا خليفه وخليفه مشاء الله عليه سريع .. وكل هذا نقدر نقول لانه تربيه ميثا ياللي طول اليوم تربع وراه يوم يعصب فيها .. فطلع خليفه رياضي لا اراديا .. يعني غصب عنه ....

وتمت شوق في الغرفه تضحك من الخاطر .. اول مره تضحك من خاطرها ... ضحكت ولاول مره تحس بانه صدرها صار خفيف من هموم الزمن .. هني رفعت راسها فوق .. هيه تدعي وتحمد الله .. تمت تدعي لين سجدت لله سجده شكر .. وقامت تتوضى على شان تصلي ركعتين شكر لله على الاعطيه ياللي منحها اياها ..

رجع سعيد وخليفه للصاله بعد ما طافت عليهم فتره التمارين الصباحيه وهم يركضون في البيت وقالبين الصاله فوق تحت .. وميثا محتشره على سعيد وخليفه ..

ميثا ..: حوه .. انتم بسكم .. ما كنه احد في البيت غيركم ..

خليفه ..وهو عيونه في فارس ويالله يالله يلقط النفس بعد الرقض : كله من هذا .. انا ما قلت شي.....

سعيد وهو يستم .. : انا ما قلت شي .. يالس يقولي اني متطفل ونسي انه ماكل حقي في السينين ياللي طافت .....

ميثا وهي تضحك ..: اقول .. سعيد ..هاهاها.. طلبتك ولا تردني ...

سعيد : وصلتي .. لو تطلبين عيوني تجيج ..خير ..

ميثا ..: سعيد .. لا ترفع علينا قضيه بسبب ياللي اخذه خليفه ..!!!

سعيد وهو على نياته ..: خير .. ليش ارفع عليكم قضيه ...

ميثا وهيه عيونها في خليفه ..: لانه ما فيه احد خرب ميزانيه شوق غيره .. كله جلكسي وفلوس على شان يلعب .. يعني لو تحسبها طول السنين ياللي طافت بنكون مديونين لكم طول العمر ندفع لكم ..هاهاهاهاها

وهني يضحك الكل لانه ميثا جابت الموضوع بطريقه حلوه ومرحه بالحيل ....

وهني تدخل عليهم روضه .. دخلت وكلها هدوء وخجل .. بدت تتقرب بخطوات هاديه ..دخلت بخطاوت وحده مستحيه.. اول ما وصلت لهم وهم ستغربين من حاله روضه انها متغيره ..

روضه وهيه بصوت جدا هادي .. : السلام عليكم ..

الكل .. : وعليكم السلام والرحمه...

هني روضه جلست مقبل سعيد *او فارس * ..

ميثا وهيه مستغربه ..: امي ..شنو فيج !! ..

روضه ..وهيه متغشيه وبصوت جدا هادي وحنون ..: ما شي .. ماشي ..

ميثا وهيه حاسه انه هاي حركه من حركات امها روضه ..: امي .. شي يعورج .. شي فيج .. تبيني اوصلج الدختر !!!

هني رفعت روضه صوتها بقوه وبصوت غليض قالت وهي تعق الغشوه ...: يعني الوحده يوم عند خطيبها و حبيب قلبها ما تقدر تاخذ راحتها !!! ... عنبو .,... موب حاله هاي ...*وترد بكل هدوء الغشوه على وجهها *

هني الكل سكت فجأه والكل ناظر في بعض مستغربين ..

هني روضه رجعت الهادي الطيبه الحبوبه .: سمحولي .. بس انا يوم اضيج ما ينسمع صوتي ..

هني انفجر الكل من الضحك ... وكانت حركه حلوه من روضه يوم سوتها .. وكانت بارعه في التمثيل بعد ..

خليفه وهو يضحك .: لا امبين . امبين تستحين .. وصوتج واطي ..مشاء الله .. مشاء الله .. عيل لو تصيحين شنو بتسوين .. اكيد بنبدل الدرايش كلها .. وبنلتقط ارسال من الاقمار الصناعيه تخبرنا انه استوى زلزال في مدينه العين بسبب صدى صوتج ..هاهاها

هني روضه وهيه تلعب بحيانها ..: خلوف .. لا تخليني اتكلم قدام خطيبي .. تراني ساكته لين الحين كرماله بس ..

سعيد وهو ميت من الضحك ..: لا عادي .. عادي .. خذي راحتج .. ما فيها مستحى .. صرت الحين واحد من العايله الكريمه .. موب خطيبج !! .. خلاص .. خذي راحتج ...

روضه ..وهيه فرحانه انه اعطاها سعيد الحريه ..: والله .. يعني ما فيه مستحى ..

سعيد وهو يضحك ..: لا ما فيه .. عادي ..

روضه : عيل اول شي بعق الغشوه .. اف .. نفسي ضاقت منها.. *وتعق روضه الغشوه ..وتلتفت على سعيد .وهيه تقوله * ما تباني اعق البرقع بعد !!! ..

سعيد وهو بينفجر من الضحك ..: هاهاها.. لا .. ما فيه داعي ..


خليفه وهو كنه بيطلع عشى امس من بطنه ..: لا واللي يرحم والديج .. كله ولا البركع .. اخاف اطلع حليب الاربعين من بطني ...

وهني تقوم روضه وبتضرب خليفه .. وخليفه يربع وروضه من الخاطر تروغه..

وسعيد وميثا يضحكون في الصاله .. وفي هاي اللحظه نزلت شوق ..... وترجع شوق وهيه ماسكه خليفه من رجله وهيه تسحبه كنه طريده ومقنوصه .. وخليفه يصيح ..

خليفه ..:لحقوا عليه .. العيوز بتاكلني ..

ميثا .. : تستاهل .. ما فيه احد قالك تتحرش فيها .. انا ما اقدر اتحرش في هاي العيوز .. انته من قالك تتحرش فيها ..

خليفه وهو يبكي بتمثيل .: وا.. وا .. والله ما كنت ادري انها سريعه .. حشى .. هيه يوم عيوز جيه .. عيل يوم شباب شنو تسوي .. هاهاها.. اكيد تمسك الغزلان بدل لا تصيدهم .. هاهاها

هني ما درى خليفه غير بالبروش على راسه من يدته روضه ..

خليفه ..وهو يتوجع وروضه قابضه لين الحين رجله .: اخ وجعتيني ... اخ .. والله انها تعور ..

روضه ..وهيه جالسه جنب فارس اونها خطيبته .: ما فيه احد قالك تتحرش فيني قدام خطيبي ...

فارس *سعيد* .. وبكل هداوه يشرب الشاي ..وعيونه مغمضه اونه عاقل .: تستاهل ما فيه احد قالك تتحرش فيها .. ليش شردت ..كان حاربت ودافعت عن نفسك ...!؟

خليفه وهو ينشد من الخاطر ..انشد وهو يقول .: انا في الحرب ما جربت نفسي ...ولكن في الهزيمه كالغزالي ..

هني انفجر الكل من الضحك على خليفه وقصيدته ياللي بين فيها موقفه كشجاع .. ..

ميثا ..: يا ماشاء الله .. صاير حكيم ..

روضه ..: اكيد حكيم .. تراه ضربه بروشي تخلي ياللي ينضرب به يكون حكيم ......

شوق وهيه مستغرب : والله .. من صدقج ...

روضه وبكل ثقه ..وبفصى بدت تتكلم .. : اي نعم .. وعندج الدليل ..

شوق .. : تقصدين خليفه.. !!!

روضه ...: لا لا .. انا اقصد هاذي * وتأشر روضه بالبروش على ميثا* .. خليفه حاله ميئوس منها ..هاهاهاه

هني عصبت ميثا ..: ومن متى بروشج يجيب الحكمه ..*هني مسكت ميثا راسها وبدت تحك فيه مثل ياللي يتذكر ضربات قديمه * .. والله يا بروشج ما يسوي غير انه يخرب تضاريس الراس ..ههاهاهاها.. شوفي راسي .. زين انه مطر ما شاف راسي قبل لا يتزوجني.. ولا كان ما اخذني .. السبب بروشج ...وعنست في بيت ابويه ..هاهاهاها

روضه .. : لا والله .. اصلا مطر اخذج بسبب راسج ..

خليفه وهو يقوم من مكانه ويعتدل في قعدته وهو يحق راسه ..: كيف يعني ..!! .. ما فهمت ..

روضه وبكل ثقه ..: مسكين غمضني .. يوم شاف راس امك كبير من ورا الشيله .. كان يحسبه شعرها .. ما درا انه كله ورمات من البروش ..هاهاهاهاها

هني الكل انفجر من الضحك .. ولا بمطر نازل .. نزل بدء وهدوء عن لا يزلق ويطيح .. اول ما شافوه سعيد وخليفه قاموا على طول يساعدونه ..

اول ما وصلوه مد مطر يده على خليفه .. وهو يقول .. :الله لا يهينكم .. *وهني يلتفت مطر على سعيد او فارس وهو يبستم .* يا حيالله بولدي فارس ...

 
قديم   #32

&هدف حياتي جنتي &


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

سعيد وهو يبستم ..: خالي .. خلاص من كلمه فارس .. اسمي الحين سعيد بن حمد .. انتها زمان اول .. ما راح اتسمى بفارس مني وغادي .. بسير وبقلب اسمي لسعيد ..



مطر وهو توه واصل لمكان وين الكل جالسين قام الكل وسلم عليه .. وجلس مطر على الكرسي لانه ما يقدر يقعد على الارض لانه لين الحين جسمه ما تعود على الحركه الكثيره بعد ما انكسر حوضه ...



ميثا وهيه تبتسم .: مطر تباني اصب علك قهوه ..



مطر وهو يبتسم .:لا ما ابا .. خلي روضه تصب ليه القهوه ..



ميثا وهيه مستغربه ...: ليش ... انا بصبلك .. ولا ما تبا شي مني خلاص !!



مطر وهو يبستم .. : لا .. بس



وقبل لا يكمل كلامه تقاطعه روضه وهيه تبتسم واتقول ..: لانه يدي احلى عن يدج .. والرجال ما يبي شي منج .. عبنو .. بالغصب !! .. هاتي الدله .. هاتي الدله ..



ميثا..: لا والله .. اقول .. نسيتي انه عندج خطيب ويغار عليج !!



مطر وهو ستغرب ..: لا والله !! .. روضه انخطبتي فوق شيبتج !! .. ما يصير يا بنت الحلال .. اطلقي قبل وبعدين تزوجي ..هاهاها



ميثا وهيه صايره مثل النفاخه ..: لا والله .. بعيد الشر .. فال الله ولا فالكم .. بسم الله على ابويه .. والله انه يخبل .. حتى وهو شيبه .. ين ..



شوق وهيه تضحك .. وتذكر كلمات ميثا يوم خبرتها برتها بسالفه الحمل : هاهاهاها.. لا والله .. موب امج كانت حارسته عن لا يعرس عليها يوم العالم كثر زواجها يوم تجي فلوس المزارع .. هاهاها.. اشوف امج ملت منه .. الظاهر السالفه فيها انا .. هاهاهاها



روضه ..وهيه تضحك ..: هاهاها.. عنبوا .. بنتي ثرها ما تكتم شي .. حشى .. نشره اخبار .. يا بنتي كنت اخاف انه يعرس عليه .. لين تطمنت الحين انه ولا بنت بتطلع فيه .. هاهاها...الحين هذا في المخبا ..*وتأشر روضه على مخباها ..* .. بس الحين انا ادور على الاحتياطي ..



ميثا ..: بسم الله على ابويه .. بعيد الشر عنه .. وغيروا الموضوع .. ما ابا اعرف شي عن العرس ولا غيره .. ابا افهم شي واحد الحين .. ليش انته ما تشرب القهوه من يدي ..* وتلتفت ميثا بزعل على مطر * .. ابا افهم ليش!!!!!!!



مطر وهو يبتسم .. : لانه لو لمست يدج القهوه بتطلع حلوه.... وانا ما اباها من يدج .. واخاف عليج....اخاف تندحج عليج القهوه وتحترقين ..



هني تقاطعه روضه ..: يعني صرت انا كبش الفدى .. !!! .. ما همك لو انحرقت وتميت عانس عندكم في البيت !!!!!!



هني لتفت عليها مطر وهو متفاجئ من ردها .. ولا بلحظات ولا بعاصفه من الضحك على روضه وهيه اهونها بتعنس ... ما كنه القطار ركبته وهيه في المقدمه واخذت نصيبها من الدنيا ...



وفي الوقت ياللي تموا يضحكون .. نزلت ساره بعد ما تسبحت وتلبست .. وترتبت لانه فارس او سعيد حبيب قلبها في الدار ..



ميثا وهيه ترحب ..: مرحبا والله . هلا بساره ..



وتسلم ساره على الكل .. ويقوم سعيد من مكانه وهو يسلم على ساره من بعيد ..



ساره وهيه تبتسم وهيه منور وجهها .. وجمالها يبتان من ورا الغشوه ..: السلام عليك يا فارس ..



سعيد وهو يبتسم ..: وعليكم السلام يا ساره .. خلاص .. انتها زمان فارس .. الحين اسمي سعيد ...



وقبل لا يكمل كلامه سعيد يقاطعه مطر .. : سعيد .. يا وليدي .. انته لازم تغير اوراقك الرسميه ..



سعيد يلتفت على مطر وهو يجلس ..: والله يا خالي اني افكر في الموضوع .. بس ما اعرف الاجرأات الازمه ..



مطر .. : بي راي .. احسن شي انك تقدم على الفحوصات اللازمه ياللي بتثبت شرعيا انك ولد شوق .. وهذا بيكون دليل لك ومني ما بتلعوز انهم بيطلبون منك امور كثيره ..



هني مسكت شوق على قلبها مثل ياللي كان خايف انه يخيب ضنها وحلمها وتطلع النتيجه غلط .. شافتها ميثا وبتسمت لانها عارفه انه شوق خايفه انه سعيد يضيع عليها مره ثانيه بعد ما لقته ..



ميثا ..: شوق .. تطمني .. ولا تمسكين على قلبج .. تراه ولدج .. والكل شهد عليه .. ومشاء الله .. كل الادله موجوده يا اختي .. ما فيه داعي للخوف ..



شوق : والله انه قلبي يعورني .. ما ابا افقده .. *وتلتفت شوق في سعيد * .. ما ابا اخسره .. *وهني تهل دمعه شوق غضب عنها يوم تحس انها بتفقد سعيد مره ثانيه لو خابت التحاليل ..*



ويلتفت فيها سعيد وهو يبتسم ..: امي .. ليش انتي خايفه .. ما توثقين في قلبج .. ما توثقين في شعورج .. اسألي قلبج .. تراه دليلج .. ما كنتي قبل لا تعرفين اني سعيد ما كان نبضه غير .. والحين شوفي نبضه .. ما كان اول بتقطع من الحزن .. وشوفيه الحين .. مشاء الله عليه .. من نور وجهج يا امي امبين انه مرتاح ولا شي يشغل باله ..



هني تطمنت شوق .. وارتاح بالها .. واطمأنت نفسيتها ...لانه كلام سعيد كان صحيح .. ما كان مخطي باي كلمه قالها لانها صحيح في الماضي كانت من تقوم تقوم على حزن .. على صور سعيد وحزن فقدانها اياه .. بس الحين اختفا وانمسح ذاك الحزن ..



التفت شوق وبكل ثقه تكلم مطر ..: مطر !! .. وين تبانا نسوي الفحص ..



مطر وهو يبتسم ..: والله يا شوق ما اعرف مكان .. بس احسن شي تسيرون لدبي .. مني تتكشتون انتي ولدج سعيد واتكونون بروحكم .. ولا فيه ازعاج ..*هني يلتفت مطر بطرف عينه على خليفه ياللي فهم الاشاره وانتفخ من الضيجه * ... ومني تفحصون وتغيرون جو وتراه المهرجان يمدحونه في دبي .. وهذا وقته تراه ... .. شنو رايج ..



شوق .. : والله فكره حلوه ..



ميثا : وليش ما نطلع معاهم يا عيوني .. مطر .. تعال عندنا .. ترانا نبي نطلع .. وانته بنفسك قلت .. المهرجان يمدحونه ..



مطر .. : والله يا ميثا ما فيني على طلعه .. انا يالله يالله اسير من الصاله للطابق الفوقي لغرفتي .. تبيني اتمشى في شوارع دبي ياللي كلها زحمه .. لا .. لا .. ما فيني ..



هني يلتفت سعيد على خليفه وهو يطلع لسانه مثل ياللي يضحك عليه انه بيجلس ..: مسكين يا خليفه .. حليلك .. اجلس . .اجلس ...



خليفه وهو زعلان ..: لا .. عنادن فيك بسير .. وبطّلع الكل معايه ..



ساره ..: وليش ما نستأجر في الشاليهات ونطلع كلنا .. مني ابوي بيكون معانا وتكون فتره نقاهه له ويطلع من بين هاي الجدران .. ولو خايف من كثر المشي .. بنطلعه بكرسي متحرك .. ولو بيجلس ولا بيطلع من الشاليهات بنكون كلنا في الشقه عنده ..



ميثا ..وهيه تصفق ..: الله يا ام الافكار .. والله ذكيه .. مشاء الله عليج .. طالعه على امج ..



مطر : لا .. كله ولا الكرسي .. بعدني ما شيبت .. يوم اشيب سو ياللي تبونه .. بعدين امج بدور على ريال ثاني لو شافتني على الكرسي ..



روضه وهيه تلتفت على ميثا وبزعل تقول : اما انج ما تستحين .. عندج الزين هذا كله .. وبدورين على غيره ..



ميثا وبكل بروده .. وهيه تحرك حيانها ..: ليش لا .. موب انتي امي .. والحَب يطلع على بذره .. انتي دورتي خطيب وابوي شايب .. وليش انا ما ادور خطيب على مطر وهو شايب .. كله منج يا امي..هاهاهاها



روضه ..: ابوج شايب ...خلاص .. دقت المكينه عنده .. والحين صار يستخدم السبير ياللي عنده .. مشاء الله عصى من النوع الثجيل بعد .. وكله الا يتعكز .. ما فيه خطوه ولا تخلطها ضربه عصى على الارض .. وهوه بنفسه اعترف قال انه شوب .. وانا بسم الله عليه .. قمر .. قمر وبعدني شابه .. ليش اضيع جمالي في انتضار هذاك الشايب ...



ميثا .. وهي بتنفجر من الضحك بس ماسكه عمرها ..: يعني حلال على غيرنا وحرام علينا ..



روضه ..: والله هذا اذا عجبج .. اذا ما عجبج .. عندك مليون جدار في العين .. لطمي راسج فيهن كلهن .. واذا ما عجبج الجدران ... عندج ولدج خليفه .. ركبي عنده .. وخليه يسرعبج على طريق المطار .. ويوم تشوفين السياره غدت طياره ... طلعي راسج من الدريشه ولطمي براسج في عوامد الكهربه على شان ترضين ..



خليفه وهو خايف ..: لا .. لا .. لا ..حرام .. عليكم .. والله ما اسويها ..



ميثا وهي بنظره حنونه على خليفه ..: فديته ... والله ما فيهمني في هذا البيت غيرك يا خليفه ..



خليفه وبنظره بليده يطلع في امه ..: طالع هذي .. انا موب حانج انتي ..



ميثا وهيه مستغربه .. عيل حان على منو .. !!!؟؟؟؟



خليفه وهو يبتسم ..: والله حان على ليتات الكهربه لانها بتنعوج وراسج ما بيه شي .. هاهاها.. مشاء الله صب ... وياسب .. وكله هذا من عنادج وضربات امج بالقب على راسج .. صار متعود ..



هني تقوم ميثا وهيه معصبه ..: يعني ما حنيت عليه يا الهرم .. انا عندي دواك ..



وتربع ميثا مثل خليفه مثل كل مره وخليفه كله يطلع لسانه وهو يربع على شان يغايض بامه .. وميثا وراه ..



هني الكل بدى يضحك ..



هني انتبه سعيد على انه ابو عبدالرقيب مش موجود .. وبدى يسأل عنه ..



سعيد .. : خالي .. وين ابو عبدالرقيب واهله !!!



مطر ..: والله يا ولدي ما طاعو يباتون عندنا .. من قاموا بالواجب طلعوا .. بس انا حلفت عليهم .... وانشاء الله رح تشوفهم قريب ..



سعيد وهو يبستم وعيونه صوب ابوظبي ...: الله يهل عليهم .. وجزيهم كل خير .. ويصلح امبينهم ..



ومر اليوم كله ضحك وسوالف .. في هذاك اليوم سعيد ما سار الدوام لانه امه شوق طلبت منه انه يجلس معاها على شان تملى عيونها منه .. وهو اصلا ما كان وده يسير للدوام لانه ما شبع من شوفه امه ياللي عمره ما بيمل منها..



مرت عده ايام .. وطلع الكل لدبي .. طلعوا بعد ما اقنعوا مطر انه يطلع وياخذ فتره نقاهه من جلسته في البيت ياللي صار له ايام وهو في البيت ما طلع مكان ... مرت الايام .. وكانت بالنسبه لشوق وفارس احلى ايام لهم .. في هاي الايام كثرت التصوير لانه شوق تريد تستبدل البوم صورها القديم بواحد جديد .. كانت تريد تبدل صور الموتا بصور ناس عايشين ويرسمون الامل في قلبها بدل الصور ياللي سنين وهيه ترسم الحزان على ماضي ما راح يعود .. على ماضي اخذ زهره شبابها ويه تحلم وتمنى انه الماضي يرجع ويحمل معاه احلى ذكرى لاغلى ناسها .. مرت الايام لين دخلت هذاك اليوم.. كان الوقت العصر .. وعلى ضربات الموج في الشاليهات شوق وهيه شاله في يدها صندوق وكنه هديه دخلت الصاله وسلمت على الكل ...



شوق تسلم على الكل .. : السلام عليكم ..



الكل ..: والعليكم السلام والرحمه ..



شوق .. وهيه تناظر في سعيد ..: سعيد .. تعال اباك في شي ..



سعيد .. وهو عيونه في خليفه ياللي كان عدال وخليفه يأشرله انه ما يعرف شي ..: تامرين يا امي ..



شوق وهيه في يدها صندوق..: سعيد .. هذي اول هديه اهديك اياها .. عسى بس تعجبك..



سعيد وهو يبستم ..: وليش ما تعجبني .. والله لو كانت ما كانت .. والله انها غاليه .. غاليه حتى قبل لا ابطلها ..



ويقوم سعيد ويحب راس امه على جبينا وهو يبتسم ..



شوق وهيه تبتسم : الله يرضى عليك يا وليدي .. افتحها وشوف ياللي فيها ..



سعيد وهو ملهف يعرف ياللي في الصندوق ..واول ما بطله حس بغرغره في حلقه ..: امي .. هذا ليه !! ..



شوق وهيه تبتسم ..: هيه لك .. والسموحه منك .. ادري انه المفروض تكون هديه محترمه .. بس انشاء الله الجايات احلى من الرايحات ..



سعيد ..وهو مش مصدق من الفرحه : بالعكس يا امي .. والله انها اغلى هديه وصلتني .. انتي ما تعرفين وش كثر كانت احلم انه يكون عندي تلفون خاص ..



شوق ..وهيه فرحانه انه الهديه عجبت سعيد..: الحمدلله انها عجبتك ..



سعيد .. : امي وليش ما تعجبني .. انتي اغلى هديه ياللي المستحيل انه الواحد يمل منها ..



وهني يتقرب سعيد ويحب راس امه مره ثانيه ..



وهني هلت دمعه من شوق ولمحها سعيد ...



سعيد ..وبنظره حنونه يحط عيونه في عيون امه بعد ما مسك وجه امه من تحت ورفعه لانه مستحيل ينزل هالراس من الحزن مني وغادي لبسبب من اسباب الدنيا .. حب سعيد يشوف راس امه دومه مرفوع .. دومه شامخ مثل الجبال ...



سعيد وهو يمسح دموع امه ..: خير يا الغلا .. ليش كل هذي الدموع ..



شوق .. وهيه قريب لا تصيح .. وبصوت مبحوح .. : وليش ما اصيح .. ليش ما ابكي .. سعيد ... س .. س .. *وهني ترتمي شوف في صدر ولدها .. وهيه بتكي .* .. وليش ما ابكي .. وليش ما ابكي .. سعيد .. انته ما تعرف وش كثر كنت تعنيلي .. سعيد .. لو كنت تدري بخوفي منك وكثر خوفي عليك ما كنت لمتني على دموعي ..



سعيد وهو متفاجئ ..: خوفج مني !!! .. ليش يا امي .. انا قد سويت شي خفتي منه ...



شوق ..وهيه بعدها تبكي .. : لا والله يا سعيد .. بس كنت خايفه من اني اكتشف انه ما ليه مكان في قلبك .. كنت خايفه انه ما يكون ليه اي حنان في قلبك .. كنت خايف تكون معصي ... كنت خايفه تكون عنيف .. قاسي القلب .. كنت خايفه تكون من النوع ياللي ما همه غير انه يرضي نفسه وبس .. كنت خايفه انه الاشياء البسيطه مثل التلفون تخليك تطير من الفرح مثل ما انا شايفه .. سعيد انته ما تعرف وش كثر كنت خايفه منك قد ماني مشتاقه اضمك باحضاني مثل ما انا اسوي الحين.. *وهني بدت شوق تبكي بحراره ... وسعيد او فارس مستغرب من خوف شوق .. بس كان يحس انه كلامها كله صح .. انه كلامها كله حقيقه .. ويا كثر من اعصى والديه وهم مربينه وتاعبين معاه العمر كله .. فما بالك بواحد جا غريب لحياتها وقال انها ولدها .. او انثبت انه ولدها ..*





هني ابتسم سعيد وبوجه حنون ضم امه صدره بقوه على شان يخليها تحس انه كل هذا الكلام ياللي كانت خايفه منه مش موجود غير في خيالها .. وانه مستحيل في يوم انه بيكون معصي لها .. او بيكون السبب في شقاها .. ضمها .. وبدى يتمايل بها مثل ما تتمايل الام الحنون بطفلها على شان ينام ويدخل في احلامه الورديه ياللي بتكون له لذه في منامه .. بدى يتمايل فيها وهو يكلمها بكل حنان وطيبه ..



سعيد وهو يتمايل بامه ياللي في حضنه ..: امي .. مهما كان .. انتي ليه اغلى هديه الله منحني اياها بعد كل سنيني .. يا امي لا تخلين مخاوفج تلعب بعواطفج .. امي .. انا لج وانتي لي .. وعمر القدر ما بيفرقنا ... تعرفين ليش .. *وهني مسك سعيد امه من كتوفها وابعدها من صدره على شان يخلي بذرو هاي الكلمات تنغرز في قلبها بدل المخاوف ياللي غرست اشوافها في كل جدران قلبها .. بدى سعيد يبدى في زرع بذور تعطي الخير وراحه البال بدل بذرو الدمع ياللي غرق به قلب شوق ..* .. امي .. تعرفين ليش عمر القدر ما بيفرقنا ... لانه عادل .. لانه القدر عادل يا امي .. لو ياخذ منك شي .. يعوضك في شي .. ولو اخذ منك الزين صدقيني يعوضج بالزين لو تصبرين عليه .. وانتي يا امي صبرتي ... وانا صبرت .. وصدقيني .. الله كريم .. بس وين القلوب المؤمنه ياللي بتراضا بالقضاء والقدر .. وتذكري يا امي .. انته الايمان بالقضاء والقدر ركن اساسي من اركان الايمان .. ويا سعد ياللي ثبت .. يا سعد ياللي ثبت .. وانتي صبرتي .. والله بيعوضج باللي يفرحج .. بس دعواتج ليه يا امي انه الله يعني واكون احسن عن جيه .. *وهني يضم سعيد امه مره ثانيه بحنان بكل قوه على شان تخف موجه البكي ياللي بدت فيها ..* ..



في هاي اللحظه يدخل عليهم خليفه ..



خليفه وهو ومستغرب انه شوق تبكي .. بس حس انه لازم يغير جو الغرفه مثل عادته .. : بل بل بل .. وانا اقول شنو سبب تسرب مياه البحر في بيتنا .. طلع خالتي شوق تبكي .. خالتي خافي الله فينا .. لنا ساعه ندور هذا التسرب ياللي دخل منه ماي البحر .. طلعتي انتي تبكين ..هاهاهاها



هني شوق تضحك وهيه تمسح دموعها .. : هاهاها.. الله يقطع بليسك .. والله اني صدقت .. لا خلاص .. سدينا التسرب بفلينه .. ما راح يتسرب مره ثانيه ..



هني ابتسم سعيد وهو عيونه بعيون امه .. : بس فلينه .. ما اسرع ما تنجر وتزيد التسرب ..



هني ابتسم شوق وهيه تضحك وتمسح دموعها بصعوبه بعد البكي ياللي بكته ..: لا خلاص .. ما عاد فيه تسرب .. ولا فلينه .. المكنيكي ياللي جبتوه قام بالواجب ..



خليفه وهو يستغل ضحك شوق .. وبكل فضول يسأل ..: عيل ليش تبكين .. وليش سعيد عندج بروحه .. وليش انا ما اكون موجود ..*وهني يلحظ خليفه التلفون الجديد في الغرفه عند سعيد * .. الله .. تلفون .. قولوا انه السالفه فيها تلفونات جديده .. يا حسره عليه .. من جيت انته يا ذا اللقفه ما شفت انا خير .. كل الحب لك .. وطلعت انا محروم من كل شي ... وكل شي على راس خليفه ياللي مسكين ما وقف من المكده .. انتهى زمان الدلع .. اه يا زمان الدلع .. انتهيت ورحلت عني .. *وهني يتنهد خليفه مثل ياللي على البحر ويشتكي من ثقل الهموم ..* ..



سعيد وهو يبتسم ..: لا والله .. نسيت السنين ياللي تخرم مخبا امي على شان الجلكسي حقك ..



خليفه وهو يحط كفه بينه وبين فارس مثل ياللي ما يبي يتذكر .. وبالعربيه الفصحا يقول ..: ارجوك .. ارجوك .. لا تذكرني ... *وهني انقلب يغني ..* لا تذكرني بحبك يا غناتي .. ولا تذكرني بماضيك الجميل .. في صدى ذكراك بقزر حياتي .. مستحيل احب غيرك مستحيل .. *وهني بدى خليفه يحن للايام الخوالي * .. اني انتي يا ايام العز .. اين انتي يا ايام الجلكسي ..



هني ضحك سعيد واضحكت شوق .. ضحكت وهيه ترمي بهمومها بعرض البحر .. رمتها وهيه تبتسم .. رمتها وهيه خلاص .. بدى حبل الاحزان يتفت في خاطرها .. وانتها زمانه يوم انه يجرها لهاويه الاحزان ياللي سنين وهيه تحاول تطلع منها .. ياللي سنين وهيه تبكي تتمنا تطلع منها ..



في اللحظه ياللي بدى سعيد يسولف عند خليفه .. مسك خليفه التلفون وهو شرد به .. وسعيد من شاف خليفه يسرق تلفونه على طول وراه .. وطلعوا من الغرفه بكل مرح وسوالف .. وشوق واقفه مكانها تتأمل احلى لحظات في عمرها .. وهني هلت ولاول مره في حياتها دمعه فرح بعد ما لقت سعيد .. بدت تحس انها حياتها انقلبت غير عن الماضي ياللي عاشته .. بدت كلمات سعيد تسوي رنين حنون ومعزوفه رقيقه في قلبها انه القدر مهما اخذ عنك راح يعوضك لو صبرت .. أنه القدر راح يعوضك بس امن باللي الله رزقك اياه .. ولا تتسرع على رزقك ..



تموا الشباب يسون سوالف لين صلوا المغرب .. ويوم صلوا المغرب قروا الكل يطلع للمهرجان على شان يتبضعون بعض الاغراض ما داموا في دبي ..طلع الكل ما عدا مطرياللي قالهم انه ما له نفس يطلع .. وهم ما اصروا عليه على شان راحته .... طلعوا ميثا وشوق وروضه وساره وخليفه وسعيد ... الكل طلع على شان يفرح ويخف من نفسته تعب الايام ياللي طافت .. كانت شوق ما تفارق سعيد ... وكله ماسكه في يده .. كانت ما ودها انه يدها تفلت من يد سعيد ...وقفوا سياره خليفه في وحده من المواقف وطلعوا يتمشون كلهم مع بعض .. تموا يمشون لين انتبه خليفه على واحد من المحلات ..



خليفه .. وهو متلهف ..: يا جماعه خلونا ندخل هذا المحل .. والله عنده اشياء روعه ..



سعيد .. : خليفه !! .. تونا مارين على الوكاله حقته .. ليش ما تقول تبا شي منه .. تعال خلنا نسير صوبه ..



في الوقت ياللي سعيد وخليفه يتكلمون ويقرون وين يسيرون... لمحت ساره من بعيد في وحده من المحلات ياللي تعرض ساعات فاخره ساعه رجاليه روعه كانت الساعه معروضه على عارضه المحل الزجاجيه .. وهيه اصلا كانت تفكر انها تشتري هديه لسعيد .. كانت تشوف الساعه البلاستيكيه ياللي في يده .. فقررت انها تشتري له ساعه .. بس ساعه معتبره .. اول ما لتفت بتقول لخليفه انها تبا تدخل هذا المحل ولا الكل مختفي ..



ساره وهيه تنادي وهيه خايفه انه الكل اختفى ..: خليفه .. سعيد .. خالتي .. امي .. وينكم .. يدوه..



هني غرغرت عين ساره بالدمعه لانها كانت خايفه .. كانت اول مره تطلع بورحها وتضيع .. كانت اول مره تضيع وخاصه بعد الازمه ياللي مرته فيها وحرمتها نعمه الكلام .. هني بدت ترتجف ساره يوم تشوف عيون الشباب ياللي تتمشى فيها ..



بدت ساره تسير بعكس الاتجاه ياللي ساروا فيه سعيد والكل .. بدت تمشي بدون لا تنتبه لنفسها لانها خايفه من تجمعات الشباب ياللي بدت تلاحظ مشي ساره بروحها في شوارع دبي ....



مرت فتره لين وقفوا خليفه وهله في واحد من المحلات ..



خليفه .: شنو رايكم ندخل هذا المحل .. لا تقولون انا قد مرينا عليه .. والله الاشياء ياللي فيه شكلها

رهيبه ..



سعيد .. : وانته ليش تقر حضرتك .. ما كنه عندك احد ..



خليفه .. : لا عندي احد يوافقني الراي مثل كل مره ..



سعيد وهو يتحدى ..: منو هذا ياللي يوافك الراي.... انته بروحك تقول هذا الكلام ..



خليفه وهو يبتسم ..: اكيد .. من غيرها توأم الروح والجسد.. ساره ..



وهني يتلتفت الكل على ورا ولا بساره مختفيه .. اول ما انتبو لهذا الموضوع بدى قلب ميثا ينبض بشده وخوف ..



ميثا وهيه خايفه وقريب لا يزل عقلها .. بربكه في صوتها بدت تنادي ..: ساره .. ساره .. *وبدت تتلفت * .. ساره .. وينج .. تراه موب وقت السوالف!!!



بس ساره ما تجاوب ..

 
قديم   #33

فدو أزياء


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة


 
قديم   #34

Rose~


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

يسلمو

 
قديم   #35

احلى لمسة


رد: صفحة ألم.... رواية حزينة مؤثرة مشوقة رائعة كاملة


صفحة ألم.... رواية حزينة مؤثرة مشوقة رائعة كاملة

من جد مؤثرة ومشوقة

 

أدوات الموضوع



الساعة الآن توقيت السعودية الرياض و الدمام و القصيم و جدة 11:22 AM.


 
Powered by vBulletin® Copyright ©2000 - 2024,
vBulletin Optimisation provided by vB Optimise (Pro) - vBulletin Mods & Addons Copyright © 2024 DragonByte Technologies Ltd.

Search Engine Optimization by vBSEO 3.6.0