 |
  |
|
|
|
|
#46 |
|
|
رد: رواية انا حر ما انهان والحر ما يرجع لشخص يهينه
زايد : تعال انمر ع فهد بالشقه
قلته : اوكى ...بس دق عليه جوفه بالشقه ولا تم زيوود يدقدق بس محد يرد عليه .. عقدت حياتي: غريبه ليش ما يرد زيود : مدري عنه .. مرينا ع شقته بركنا رفعت راسي : زيود جوف ليتات شقته مبنده يعني محد مش موجود ... زيوود: يمكن راح بيت اهله طالعته باستهزاء : دخيلك لا تضحكني .. ضربني زيوود ع جتوفي طالعته و اشر لي براسه جدام التفت فجيت اعيون ..جدمت راسي لا ارادي اطالع ..و انا مبطل اعيون مب مصدق زيود : يمكن اخته ما صدقت يوم جفت فهد امركب وحده بسيارته كانوا توهم ظاهرين من الشقه منو هاي ؟؟ فجيت باب السياره الحقه قبل لا يروح بس زخني زيود من ذراعي زايد : انت من صجك وين رايح ؟؟ طالعت زيود و انا مصدوم: منو هاي الي عند فهد.. زايد يبرر : يمكن وحده من اهله رراقبت سياره فهد تبتعد عنا طالعت زيود و قلته: ما عنده خوات .. و بعدين انا مره جفت خاتم و ساعه بشقته و يوم سالته حرج علي وزعل هز زايد راسه مب فاهم شي قال : زوجته ؟؟ قلت بانفعال : مستحيييييييييييييييييل و ليش ما يقول اذا كانت زوجته فهد كل شي يخبرني حسيت بنرة صوت زايد استهزاء: جان خبرك عن الخخاتم و الساعه خذت نفس طويل : تتمصخر زايد : مدري عنك حسيت بقهر و غييض مدري ليش منو هاي و ليش فهد يسوي جي و ليش اصلا ما يخبرني ... من متى فهد يسوي هالعلوم صح كلنا نشرب و ندوخ و نسكر بس محد يهتم بسوالف المغازله غيري و بعد انا من النوع الي اسوي علاقه يوم و يومين بس ... بس فهد وراه سالفه عوده و كبيره لازم اعرفها .. بس اذا صارحته .. .. بس اذا صارحته بزعل و بتضايج ... و يمكن متزوج ليش لا .. تذكرت مفتاح الشقه يلست ادور بسياتي زايد : شو ؟؟ قلته: مفتاح شقة فهود زايد : شو تبا فيهم قلته : بفتش شقته بجوف شو سالفته .. رفعت راسي اطالع زايد الي مستغرب : تعال صح عطيته مفتاحه يوم زعل مني هذاك اليوم زايد : بس عيل خلااص خلنا نمشي و خل الريال بحاله .. قلته : ما عليه ..يلا انروح العزبه احسن لنا .. و جريب نوصل كان بالي مشغول بـ فهد و الحرمه الي ظهرت معاه من الشقه ..نقزت يوم رن موبايلي جفت المتصل خال احمد بو فهد طالعت زايد : بو فهد متصل زايد :شو ..رد عليه زين رديت : الوووو .. خال احمد محرج : انت وينك لا بارك الله فيكم و في اليوم الي عرفتكم فيه مسكت اعصابي : شو مستوي خال احمد : اخوك وينه .. مطر: منو سعود زايد يوم سمع حس بو فهد طالع . و محتشر اشر لي انه بنزل من السياره بتريا داخل العزبه .. احمد : منو غيره الله يلعنه صرخت عليه ما قدرت امسك اعصابي : لا تقعد اتلعن و تحتشر شو تبا ...؟؟ خال احمد : ولدي محمد محد من الصبح ادوره و اكيد اخوك يعرف عنه شي و الله لاشتكي عليكم اذا ما رد ولدي قلته : ما عليه انا بتصرف "وصكرت اخط بويهه " ززقرت بصوت عالي : زيوووووووووووود زيووووووووود ظهر زيود قلته : انا بروح برجع عقب زين اشر لي بمعنى اتوكل .. حركت سيارتي اتصلت في بيتنا .. محد يرد ع تلفون البيت .. رديت اتصلت مره ثانيه بعد محد رد .. اتصلت ع طارق ..ما يرد شكله ها زعلان بعده ولد امه .. رديت و اتصلت بعزوه ردت عليه : الو طالعت الساعه و زاعجت عليها : شو مسهرنج بها الحزه انتي صخت عزوه ما ردت قلتها بصوت عالي : الووووووووووو ردت بخوف: ها قلته : التقعي حجرة سعود جوفيه داخل ولا .. عزوه بعناد: لحظه زيييييييييييين هاي طالعه قويه ما تخاف شراتي انا و سعود عكس منيره و طارق ...يالله .. شويه و قالت: سعوو د راقد قلتها : يلااا باي .. رحت صوب بيت خالوه .. نزلت افففففففففففف شكل هالليله ما بتمر ع خير ... انفج الباب و كانت الشغاله قلتها : وين بابا سمعت صوته محتشر من داخل و ابوي منو يبتلي بها العله البوتمبه .. و معاه خالوه بعد محتشره .. دشيت علشان عادي لو زاعج الفريج كلهم يطلعون من بيوتهم ... خالي احمد: وينه اخوك التعبان طالعت خالوه الي كانت اتصيح : ولدي محد ..للحين ما رد البيت قلتهم: هدي خالوه .. يمكن ويا ربعه سهران برع خالي احمد : لا ولدي ما يظهر من البيت و ما يرد الولد صابه شي "و اشر بيده بعصبيه" اخوك وينه ...؟؟ قلته : سعود ماله شغل ..اتصلت في البيت قالولي راقد ... ضربت خالوه ايده ع صدري :يمه عيل وين راح ولدي .. زقر خال احمد الشغاله : كيننننننننننننننندا تعالي يت الشغاله تربع : نعم بابا .. سالها بعصبيه: منوه دق الباب و قال وين محمد ؟؟ كيييندا: هداا يقول سعود ... ما عرفت شسوي ..؟؟ و لا ادري شو الي يصير اصلا ..ولا شو السالفه .. قلت: انتي اصلا تعرفين شكل سعود اخوي يمكن واحد من الشباب قاطعني خال احمد : اتعرفه ليش ما تعرفه .. سمعت صوت عبدالرحمن وراي : شو مستوي خالوه اتصيح: اخوك محد من طلع ما رد لحق فهد .. عبدالرحمن: ليش قلتلوه شي زعلتوه خال احمد: محد قاله شي "اشر علي" ياه اخوه زقره و للحينه ما رد البيت عبدالرحمن: زين انا اخر مره صالحتهم خال احمد: ها سعود جلب .. انا بتصل الشرطه و الله مسكت اعصابي كنت بعطيه كف ع ويهه بس عبدالرحمن زخ ابوه و قاله : لحظه لحظه يبه بنجوفه وين و يمكن طالع ويا ربعه يسهر شي ...عقب بنتصل للشرطه .. التفت صوبي عبدالرحمن : يلا مطر خلنا نجوفه وين .. يرني عبدالرحمن من ذرااعي و بالغصب تحركت كنت اطالع هالزفت بنظرات كرهه بغيت ازغته اخ لو كنت مداوم ... عبدالرحمن : يلا مطر . طلعت مع عبدالرحمن و قلته: صبر خلني بالاول اجوف سعود و اساله ..يمكن يطلع فعلا هو مسوي به شي هالمراهقين اتوقع منهم اي شي عبدالرحمن يهز راسه بمعنى لا : سعود و محمد عطوني كلمه يصفون قلوبهم ويا بعض يعني صدقني سعود ما يعرف شي قلته : خلنا نتاكد رحت بيتنا و عبدالرحمن يترياني برع ..دشيت البيت و ع طول سرت صوب حجره سعود فتحت الباب كان راقد رحت صوبه و ييرت عنه اللحاف : نشش تجلب اسعود متضايج : شووووووو صرخت عليه : قوووووووووووم .. قعد و طالعني : شو .. شغلت ليت الحجره ..جتلني بروده : فعفدت عليه وزخيته من رقبته : قممم رمسني عدل تغير شكل سعود متفاجا و بنفس الوقت متروع قلته بنبره تهديد : وين محمد سعود: ماشي رد هزيته: و عليت صوتي : وييييييييين محمد سعود بخوف : منوه محمد كفخته بقووه يوم حسيته يستهبل علي جفت ادموعه تنزل قلته : محمد ولد خالوه وينه وين سار سعود و دموعه تنزل من عيونه : شعرفني فييييييييييه عفدت عليه مره ثانيه كنت خايف يكون سعود سوا به شي .. وايد هالفكره مسويه لي رعب ..زخيته من لحيته ورصيت عليه بقوه جفته يتالم كنت ابا اطلع منه الرمسه..حتى صراخ امايه الي كانت تزاعج من وراي : هد اخووووووووووك اقولك .. زختني ايد ع حتوفي و ابعدتني عن سعود التفت بسرعه و كان طارق ... ما صدقت يوم جفت طارق صبيت غياضي كله عليه دزيته عني فطار بعيد و طاح تجدمت مني امايه و حسيت انها بتصفعني : شو فيييييييييييك شارب شييي انت قلتها و انا اتنفس بصعوبه: ولدج ها التعبان"واشرت لسعود" مدري شو مسوي بمحمد ولد اختج ..اهله جالبين عليه الدنيا مب محصلينه .. سعود و هو يصيح : و الله ما اعرف عنه شي صرخت عليه : جــــــــــــــــــــــببببببب ببببب امايه متروعه : بس لا اتصارخ ع اخوك ..."طالعت سعود" يمه شو مسوي قول هزيت راسي باسف محد مضيع اخواني غير امايه و دلعها ..و طالعت طارق جفته مكانه منسدح عالارض و ها اكبر دليل طلعت من عندهم ..و رحتت عند عبدالرحمن عبدالرحمن متلههف : ها يعرف شي ..؟؟ هزيت راسي بمعنى لا : ماشي غير ا اندور عليه قبل لا يستخف ابوك و يبلغ عبدالرحمن : يلا انزين "و سالني" خبرت فهد تذكرت فهد و فقلت : خله فهد مب فايج عنده الي يشغله يلا سرينااا ... يلسنا انلف بسكيك ..و من فريج لفريج .. ماشي فايده طالعني عبدالرحمن باسف حطيت ايدي ع جتفه اوااسيه : ان شاء الله خير عبدالرحمن : ان شاء الله .. كانت امايه تتصل باستمرار تسالني و خال احمد يتصل بعبدالرحمن يساله و ماشي فايده .. عبدالرحمن : يلا نرجع البيت شنسوي .. قلته : مابجى شي ع الصبح ..انت روح البيت منيره وبدر ابروحهم و انا بروح حق ابوك و باجر بنروح الشرطه شنسوي بعد .. عبدالرحمن: ما عليه بروح معاك البيت علشان ابوي ما يعصب عليك ..اتعرف طبعه بعد من غير ما اقصد قلت : طبعه وصخ طالعني عبدالرحمن بسرعه و طالعته كنت بعتذر بس فجاه ضحكنا مع بعض هههههههههههههههههههههههه وصلنا بيت خالوه عبدالرحمن : الله يستر ..بس انا حاس ان محمد مب صايبنه شي و ابوي يبالغ قلته : ها الغلط نعتمد ع عواطفنا ..و بس ننسى الوواقع ... عبدالرحمن بخوف : الله يستر .."زخني من ايدي" دخيلك مطر جان ابوي عصب عليك اسكت عنه لا ترد عليه قلته: ها الي اقدر و احاول اسويه .. دشينا البيت كان صخه ..طالعنا بعض انا و عبدالرحمن ... عبدالرحمن : اكيد ابوي راح الشرطه ما فيه صبر .. دش عبدالرحمن الصاله و تميت واقف برع شويه وزقرني عبدالرحمن : تعال مطر دش دشيت الصاله : الســــــ صخيت يوم جفت محمد منسدح ع الكنبه يطالع التلفزيون خالوه منحرجه و تضحك : ههههههه الله يخس ابلس محمد سهران ويا ربعه ع البحر متعلم طبع يسهر وقت متاخر قلتها : لا و الله .. صديت صوب خال احمد حسيت به نحرج ها الثاني .. تذكرت سعود و كيف صارخت عليه .الحينه امايه يوم بتعرف ان محمد سهران ويا ربعه بتلعن ابو اسلافي ... خال احمد : السموحه منك مطر قلته: انت اتعرف شو سويت بـ سعود .. خال احمد: شنسوي شيطان و افكار تاخذك و توديك قلته بعصبيه : افكارك و شيطانك مب ع احساب اهلي .. تتبلى علينا يود ولدك و داري عليه بدال ما تتهم فلان و علان و الله بغيتك اتروح اتبلغ بغيييييييييييتك عبدالرحمن ينبهني : مطر صل ع النبي خالوه: خلاص يمه قلنا السموحه كرهت قوم خالوه كره بحياتي ما كرهته لحد ..طالعت خالي احمد بنظرات لدرجه انه نزل نظره بالارض متلوم مب عارف شو يسوي و طلعت عنهم ... لحقني عبدالرحمن يزقرني : مطر مطر التفت له ابسرعه : انت تعرف شو يفكني من لسان امايه الحينه عبدالرحمن: ماا عليه ..امسحها بويهي هالمره ... طالعته و قلته: انت الوحيد الي فيهم غيير صدق يعنني مكانك هني غلط رفع حياته مستغرب من كلامي ابتسمت له : يلا روح حرمتك و وولدك يتريوونك عبدالرحمن : ان شاء الله بروح بس لازم اهزب ها الي منسدح داخل ولا جنه مسوي شي ..و و كم يوم ان شاء الله ارد عليك بخبر يفرحك طالعته مش فاه قصده عبدالرحمن يضحك: ههههههههه خطوبتك مسرع نسيت ابتسمت : نتريا يلا مع السلاممه عبدالرحمن استغرب من برودي : الله يحفظك و طلعت من بيت قوم خالوه فكرت اروح العزبه لان لو رحت البيت امايه بتشل الدنيا عليه و بتقعدها ...خلني اروح العزبه احسن ..بس رن موبايلي و كانت المتصله امايه رديت و انا متاكد مليون بالميه انها درت عن محمد اكيد خالوه مخبرتنها قلت: هلا امايه امايه: ها شو اخبار ولد اختي قلتها : في البيت كان سهران ويا ربعه حسيت طبله اوذني بتنطر يوم زاعج علي: كنت عااااااااااااااااااااااارفه بس انت ما اتصدق تستوي سالفه علشان تقعد تضاررب ويا اخوانك كنت مبعد الموبايل عن اذوني قلتها و انا احس بتعب: امايه يعني ما تعرفين حشره ريل اختج..انتي شو ابوج ما لقى غير ها الريال يزوجه بنته امايه: ريل اختي انت طالع عليه عصبي قلت بانفعال : ايخسي و الله .. اتشبهييني بها لتعبان امايه بعصبيه : ما عليك من اختي و ريلها .. اتتتي البيت الحينه تعتذر من اخوك قلتها منصدم من طلبها : شووووووووووووووو اامايه : هيييييييييييي فالح بس تعفد علي و تروعه و تقومه من رقاده و تبهدله شو من قلب عليك بغيت افتك من حشرتها قلتها : زين يا الغاليه ياااااااااااااي ... انتي بس لا تعصبين جي اامايه : متى بس اتعرس و تعقل و الله مدري ع منو طالع وصكرت التلفون بويهي افففففففففففففففففففففففففف الله يغربل ها البوتميه الي سوا لي هالعلوم و عفس علينا هاليوم و الله لو اجوف فهد بالعزبه بطلع حرتي فيه و غيضي كله هالدب ..الثاني ما عليه انا ارااويك طلعت راعي حريم هاه رحت العزبه ..بس الظاهر محد موجود غريبه اليوم الكل مختفي محد سهر حتى طلال وينه عبود الي دوم يسكر بعد محد وينهم ..سمعت صوت ونين وقفت ابمكاني و بلعت ريجي بصعوبه ..بها الحزه من وين ياي ها الصوت . .التفت الصوب الثاني ببطيء لمحت شي لونه اسود قاعد صوب الباب العزبه تميت واقف ابمكاني اطالع بغرابه ...!! |
|
|
#47 |
|
|
رد: رواية انا حر ما انهان والحر ما يرجع لشخص يهينه
الفصل الحادي عشـر
تميت واقف ابمكاني اطالع منو هناك .. يلست اراقب .. قلت : منو هناااااااااااااااك ؟؟ بالاول ظنيت مقلب من مقالب طلال و الربع بس ..عقب شكيت بالسالفه ...يوم رمسة ما قمت اسمع الصوت ..اتلفت يمين و شماال ماحد موجوود هذي وحده ولابسه عبايه ..وقفت و كانت متروعه تجدمت منها ضمت نفسها بخوف يمكن الي كانت ويا فهد اكيد فرها عقب ما مل منها ... تجدمت : منو انتي سمعت صوتها بخوف : وين زايد؟ بطلت اعيوني مستغرب وحده يايه اتدور زايد و بها الحزه بآخر الليل وين اهلها هاي ؟؟ قلتها : محد موجود هني "ويلست اراقبها ابا اعرف منو هاي " بس كانت ملحفه ويها موليه مب ظاهر منها شي كل سواد و الدنيا ليل يعني موليه ما تنجاف ولا تنعرف منو هاي حسيت بنبره صوتها انها اتصيح : وين رااح قلتها : منو انتي ؟؟ و يلست اتصيح و اتقول كلام ابصراحه مش مفهوم موليه ما رمت اقبض منها كلمه كانت كل اتصح ... رفعت ايدي اهديها: خلاص خلااص انزين لا اتصيحين انا بتصل بزايد بجوفه وين حسيت مكانا غلط ووقفتنا برع العزبه و بها الوقت مب شي لو حد مر شو بيقول عنا قلتها : تعالي دشي داخل العزبه قالت بخوف: لا ابا زايد قلتها : يا بنت الناس ما بسوي بج شي انا ناقص بس عن حد يطوف و يجوقنا هني برع جنها مصره ع موقفها و تم واقفه بمكانها و قالت : اتصل بـ زايد قلتها : عيل ما يخصني كنت بساعدج بس تمي هني لي الصبح لين ما اييج زايد و عطيتها ظهري كنت برجع سيارتي اييب موبايلي بس سمعت صوتها اتصيح مره ثانيه يا الله هالحريم بس يصيحون حنه ورنه اووووف قلتها بطفره: زين تعالي دشي داخل العزبه فاضيه ما فيها حد و بتجوفين حجره دشيها و قفلي عليج الباب جان خايفه مني ...لي ما اتصل بها الزفت ناقص بلاوي انا قالت و هي تمسح دموعها : وين انزين .. رحت و فتحت لها باب العزبه وقفت بخوف ابتعدت عن الباب و قلتها : دشي شي حجره هناك قفلي عليج الباب .. وبجوف زايد وينه دشت راقبتها بطلت اعيوني يوم جفتها جنها حامل .. شييييييييييييييييت شو هالربع واحد اليوم منزل لي وحده من الشقه و الثاني وحده حامل ادوره الله يخسك زيوود مسوي روحك شريف مكه ملعون الصير خخخخخخخخخخخخخ ..فتحت باب سيارتي و اتصلت بـ زايد تم يرن موبايله اتصلت به اكثر عن الف مره الين ما رد علي بصوت كسلان: الووو صرخت عليه بصوت عالي متعمد : اييييييييييييييييييييييييييييي يييييييييييييييييه زايد : ويع مدري ليش تخيلت شكله انه نقز فيلست اضحك عليه : هههههههههههههههههههههههه زايد طفران : راقد انا قلته: شو مسوي ؟ زايد : شو ؟؟ قلته باصرار : انت شو مسسسسسسسسسسسوي زايد : مطر شو السالفه قلته: تعال ابسرعه الحينه اباك انا بالعزبه تعال زايد: و الله من البارحه راقد قلته بعناد: زيووود و الله جان ماييت بطب بيتكم و بشلك من فراشك و خلني ساتر عليك ..حامل هاه صخ زايد حتى ظنيت انه صكر فقلت : الووو زايد : يلا ياي دشيت العزبه ..مدري ليش ياني فضول اعرف منو هاي البنيه رحت صوب الحجره ..حاولت افتح الباب بس جفته مقفول هههههههه خوافه هالبنيه يعني طالعه بهاي الحزه ما خفتي الحينه خايفه مني ..عيل ما خفتي من زيود رديت طلعت برع علشان ما اروعها مني ... يلست بسيارتي ادوخ و افكر بالي صار اليوم اشياء كثيره صارت ..قرار خطبتي و سالفه محمد ولد خالوه و امايه محرجه مني و الحينه زيود مدري شو سالفته مع هاي الحامل ..يمكن تكون اخته !!ويييييييييي و انا كيف ارمسه نزلت من السياره يوم جفت سياره زيود بركنت جريب مني ...رحت صوبه ابسرعه و فريت الزقاره من ايدي زايد : شو بلاك ؟؟شو مستوي طالعته بحده : ليش مرتبك شو مسوي زايد منفعل: اووووووووووه ياخي لا تربكني زياده شو تبا فيني قلته و انا اطالعه بحده: مب انا الي اباك شي وحده تدور عليك "اشرت مكان كانت يالسه" كانت هناك يالسه و اتصيح زين اني ييت العزبه و جفتها زايد طالع مكان اشرت و رد طالعني : وين راحت اشرت لها براسي صوب العزبه فربع زايد داخل ويه انا قلت يكن اخته معقوله !! شو صاير كل يوم انصدم بواحد باجي طلال مدري شو يهبب و ع بالي انا الي فيهم مضيع عمري بسوالف البنات طلعوا كلهم من تحت لـ تحت .. الحينه ها شو سالفته بتم جي انا واقف برع زين هاي عزبتي ؟؟ شو هاي الحاله ..يلست بسيارتي اتريا زيود يطلع ..بس سمعت صوت الاذااان و زيود بعده داخل فكره ادخل ..بس قبلها اتصلت بزايد رد علي و كان منفعل : شووو رفع حياتي: شووو؟؟!! حبيبي هاي عزبتي و صار لي ساعه اتريا برع شو السالفه زايد: انا اسف و الله ..بس دخيلك روح انت و خلني هني حذرته: لا اتسوي لي مشاكل زايد : و الله ماشي اي مشكله و انت لا يروح فكرك بعيد شو تتحرا كل الناس شراتك قلته : نعم مب جنك تغلط علي زايد: مطور دخييييييييييييييلك قلته: زين خلااص و جان ييوا فهد و طلال و عبود زايد لا ما عليك بتم هني و بقفل العزبه تطنزت عليه : شو خالي لا يكون عزبتك و انا مدري زايد: اتذلني يعني ضحكت :ههههههههههههه اسولف و الله ..خلااص ابوي بروح البيت انا و برقد و باجر بعرف شو سالفتك زايد ممتن : مشكووووووووووور مطور قلته و اانا مستغرب : العفو .. حركت بسيارتي و رحت البيت اريح راسي من صدعة اليوم حمدت ربي الف مره ان امايه مب سهرانه تترياني يالله باجر تعال تحمل القنبله الي بتنفجر باجر لاحـوول .. دشيت البيت و انا اسمع صوت الامام يصلي نزلت فكرت اروح المسيد بس كنت عيزان ... و متكاسل و تعبان ..صادفني طارق طالع من البيت مستعيل شكله يبا يلحق الصلاه يبا يثبت للكل انه احس مني ..طالعني و طالعته حسيت انه كان يبا يقول لي شي بس طنشته فسكت و كمل دربه ..و دشيت انا داخل ما صدقت اجوف شبريتي ع طول انسدحت و رقدت بساااااااااابع نومه .. نشيت ع ضربات خفيفه فوق راسي تجلبت بكسل : آآآآآآآآآآآآآآآآآآآآآآآآآآآي سمعت حس امايه : نش اقولك فتحت اعيوني بالغصب جفتها زاخه المخده و تضربني ع راسي قلت بنبرة تعب: امايه امايه : قوووم يالي مطلع اعيوني هذا انت الكبير و جي امخبل فيني قوووووووووووم "وضربني بالمخدهه" نافخت و يلست و قلتها بغيض: شووووووو يعني ارقد برع البيت علشان ارقد مرتاح يعني امايه: شوو انت ما تشبع ارقاد ..متى بتباشر دوامك علشان اتودر عنك هالسهر قلتها : لا تذكريني بالدوام شو بغيتي خالتك يت بيتنا الصبح تستسمح منا قلتها و انا ادور الساعه : جي شو الحينه امايه: لا حول ولا قوة الا بالله ..الحينه بياذن العصر فديتك طالعتها: لا و الله شيييييييييييت شو رقدت ارقااد .. يلست ع طرف الشبريه سالتها : بتروح اليوم بتجوفين العروس امايه: لا بروح ولا بتعنا عيبتني ولا ما عيبتني تزوجها و فكيناا يمكن تعقل قلتها: امايه شفيج علي ..يعني ليش ما تدانيني امايه : حركاتك مع اخوانك و ابوك موصنك عليهم قلتها: يعني انتي الحينه ما بتلوميني بلي سويته بسعود عقب ما يات اختج هاي امايه تعاتبيني: تأدب هـا خالتك هاي وقفت و انا ادور فودتي بقهر : الله ياخذهم من اهل ..و الله كنت احاتي انج تقعدين تحتشرين علي بالي سويته بـ سعود ادري ظلمته بسبب ها البوتمبه اامايه تتمصخر علي: هي ترا من زود ما تحاتي ... رقدت لهاي الحزه ولا تدري نحن باي وقت طالعتها : امايه انا وايد تعبان كل يوم سالفه كل يوم مشكله شو تبيني اسوي .. انا ماخذ اجازه ارتاح امايه: توك راد من السفر ما ارتحت ذكرتها: تدري حتى سفري كان شغل ..يالله متى اموت و ارتاح امايه وقفت و يت صوبي : بسم الله عليك.. ابتسمت لها: هاااا يعني لازم كل مره اتمنى ع روحي لموت علشان تحبيني ضربتني بجتوفي : هاي الرمسه ما تعيدها مره ثانيه كلكم عيالي و اخاف عليكم .. قلتها: لا ابوي الا طارق ترا مولود و بيده خاشوقه ذهب طالعتني امايه بنظرات ما فهمتها حسستني جني احرجتها مع اني ما قلت شي محرج ... قالت بصوت واطي : روح طيب خاطر سعود ...وانا خبرت اختك منيره تطرش عبدالرحمن يخطب لبنت لك .. و عطتني ظهرها لحقتها : امايه حياتي شو فيج انا قلت شي يزعلج طالعتني بنفس النظرات و ظهرت من حجرتي ..عقدت حياتي شو السالفه ..ما قلت شي يزعل انا!! ظهرت من الحمام جفت الغدا محطوط بوسط الحجره نشفت شعري و يلست اتغدا ... احداث البارحه ما نسيتها .. و الي في بالي زيود و فهد ...صدمه تكتشف كل واحد له علاقه و من غير محد يدري .. خلصت غداي زقرت الشغاله و طلعت برع الحجره امرتها اتشيل الغدا رحت صوب الصاله ..كنت ابا اسلم ع يدووه احس من زمان ما يلست معاها ..دشيت الصاله جفت فاضيه محد فيها ... رحت صوب حجرة يدووه بعد مش موجوده ..!! مريت صوب حجره عزوه وزقرتها ماشي رد توه امايه كانت عندي وين راحـوا ...تذكرت اسعود دشيت حجرته جفته قاعد يدور شي و اشرطة بلاي ستين متناثره عالارض اشكثرها كنت اراقبه ما انتبه لوجودي اول مره احس ان سعود صدق واول مره يشبهني ...ووايد .. زقرته بهدوء: سعود رفع راسه طالعني ووقف و تم يطالعني قعدنا نطالع بعض غمضني بالي سويته به البارحه بس ماا ابا ابرر موقفي علشان ما افتح اعيونه ع اشياء مثل الجرايم و هالسوالف قلته : شخبارك ؟ قال بصوت واطي : بخير "وفر شريط البلاي ستين من ايده " دخلت حجرته كنت اابا الطف الجو بس مب عارف كيف سالته: ووينهم امك و يدتك و اختك محد موجود ؟ قال : طلعوا مع طارق عقدت حياتي مستغرب فكمل : عايشه البارحه كانت زعلانه من طارق راحوا يراضونها غلطت و قلت : و ليش ما اتصلت "انتبهت لروحي فصخيييييييت كنت بقوله ليش ما اتصلت بي " حسيت نظرات سعود غير شو حتى هو شاك فينا ؟؟ قلت: عيل امايه ما طرت !! رفع جتوفه مش مهتم : مدري انا ما يخصني بهالسوالف طالعت الارض افكر شو استوا قالت لي تبا اتراضي طارق بس زعلانه ؟؟ رفعت راسي جفت اسعود رد يعابل بالاشرطه سالته: دريت عن ولد خالتك محمد قال باشمئزاز : يلتعن كتمت ضحكتني و قلت: ليش احيد عبدالرحمن راضاكم ما توقعت سعود يقول : عيل ليش البارحه ييت تدوره عندي خذت نفس و قلته : جوف سعود ..سالفة البارحه انساها .. طالعني جنه ما توقع كلامي بس طنشته و قلته : ادري ظلمتك ..بس انت عارف كيف علاقتا بها الدب ..كان ببلغ الشرطه و يسوي علوم ...المهم انا ابا تفهم شي واحد بس لا تتوقع مني براضيك ولا بقعد اعتذر لك ... جفت نظرات سعود غيير فقلته : ما اباك تطلع شرات طارق جايف امايه كيف مدلعتنه حتى ما يتحمل الضربه ...يربع يصيح عندها !! سعود بانفعال : انا ما يهمني حد و انا رياااااااال ابتسمت له: ادري بك ريال "وضربته ع جتوفه " يوم كنا نصغار ابوي كان يضربني ضرب يجتلني حتى يربطني بالحديده ..و اشكثر كنت مظلوم فيها ..بس كان عندي عادي ..ما تهتز شخصيتي ولا تنزل دمعه من اعيوني .. تفاجات من ابتسامة سعود يوم قلته : هي جي خلك ريال هب شرات محمد ولد خالتك ولا طارق ..خل شخصيتك قوية انظلمت ربك بياخذ بحقك ... قلته : ليش ما تظهر ويا ربعك ..حزة العصر الحينه سعود رد يعابل بالاشرطه يشيلها عن الارض : توني من اشويه راد البيت .. قلته: عيل خلااص ماشي ظهره ..ما فينا ع مشاكل ولد خالوتك .. و طلعت عنه ...و طلعت من الصاله لمحت الشغاله اتخم الحوي فصفرت بصوت عالي التفت لي ابتسمت لها و اشرت بيدي لها اونها استحت و صدت الصوب الثاني ضحكت عليها هههههههههه مالت عليج ما تنعطين ويه مصدقه روحج فجيت باب الحوي .. وقفت فجاه يوم جفت عايشه واقفه بويهي .. و ملامح ويها مبهمه تميت اطالعها و تطالعني ... بغيت احضنها امسح الحزن من اعيونها بس انتبهت ان طارق و امايه و عزه واقفين وراااها |
|
|
#48 |
|
|
رد: رواية انا حر ما انهان والحر ما يرجع لشخص يهينه
فابتعدت عن الباب ..دشت بسرعه راقبتها راحت سيده صوب الصاله ودش وراها طارق يلحقها ..حسيت بقهر ها شكله موليه ما بطلقها الي يجوفه جي يربع وراها ...افففففففف يخوفي بس ابتلش بخطبتي بام اعيون
دشت امايه مطنشتني خطفتني وراحت داخل و دشت عزوه زخيتها من ايدها .... طالعتني بخوف : شووو سالتها : وين يدووه ؟؟ ما اجوفها معاكم ؟؟ عزوه بخوف : ودينها بيت منيره سالتها : ليش شو بلاها عزه: ممدري مسكت اعصابي : انتي شو فيج خايفه ما باكلج انا ..عزووه اصطلبي شبلاج عزوه : ما سويت شي زين بطلت اعيوني لها: زين انا قلتج سويتي شي ..لا تخافين امج داخل بداري عليج ما بضربج .."يلست اطيب خاطرها" يلا حبيبي شو مستوي هني فاجأتني ابتسامتها : زين طلعني مكان بالاول قلتها: ما تنعطين ويه و الله ابتسمت و الله الي يجوف ابتسامة عزوه ينسى العصبيه جنها ابتسامة اطفال كلها براءه قلتها : بس بمر بج المطعم و بطلب لج عصير عزوه مستانس : عادي و الله تطنزت: ولا تبين غووزي عزوه تضحك : هههههههههههه لا بس ايا عصير و اممممممممم و كيكة كوفي يريتها من ايدها :زين تعالي ركبي معاي السياره .. وديتها السياره ...جفتها مستانسه .. جنها ياهل هالبنيه ... سالتها : من شو زعلانه يدوه ؟ عزوه ترفع جتوفها: ولا شي بس قالت تبا تتعشى بيت منيره علشان البارحه انت و امايه ما وديتوها ضحكت بصوت عالي : هههههههههههههههههههههههههههههه هه و الله هالعيوز راعية سوالف عزوه تضحك: ههههههههههه هي حتى امايه قالت كل تغار تذكرت يدووه فضحكت مره ثانيه : هههههههههههههههه وصلنا الكافتيريا .. و طلبت لها عصير فراوله ... عقب مرينا و نزلتها معاي و اختارت الكيكه الي تباها قلتها و انا اتذكر عايشه: شو رايج ناخذ وحده كبيره حق اللي في البيت كلهم عزوه: اوكى .. زين طيبنا خاطر عزوه و شرينا لها الي تباه ..الحينه عادي بتخبرني سالفه عايشه  ركبنا السياره و سالتها: عزوه ."طالعتني" شو سالفتها حرمة اخوج !! عزوه : مطر خاطري اروح باريس غاليري و اشتري لي عطور طالعتها ورفعت حياتي : لاااااااااا و الله ما تنعطين ويه عزوه ماده بوزها شبرين : محد يدلعني امايه بس عنددها طارق و انا استحي كل مره تاخذني منيره ورا عبدالرحمن فشله قلتها : هالفتره ما افتشلتي الا الحينه زين ما عليج لو تبين القمر بييبله لج بس يوم افضى اوكى عفدت صوبي : و الله ابتسمت يوم جفتها مستانس : هي كل شي تبينه خبريني ..و بناخذ سعود بعد عزوه: افففففففففففففففففف الحينه سعود ليش ادخله بالسالفه يستاهل البارحه يوم ضربته سوا لنا مشاكل طالعتها : شو قصدج عزوه: ترا البارحه قعد يقرض عايشه يوم كنت انت و امايه بيت منيره قلتها : زييييييييييين كملي عزوه : ماشي ..يعني عايشه كانت اتسولف حتى سعود بس سعود مصخها و عايشه ما تحملت قلتها : كملي شو صار ؟؟ عزوه : تعرف عقب عايشه حرجت عليه و اتصلت بطارق تطنزت : هي البطل .. عزوه: ههههههههههههه هي ياه طارق من برع و قعد يقنع عايشه ان سعود يسولف ..عايشه حرجت يوم جافت طارق ما سوا لها سالفها لزعلها ..بالعكس بدال ما يضارب سعود قعد يقنعها ان سعود قصده يسولف عرفت ان عايشه بالغت و جنها تعمدت تبا اتسوي مشكله الظاهر جي .. قلتها : زين وسعود شو سوا عزوه:ولا جنه سوا شي راح حجرته و تمت عايشه تحتشر ع طارق ما تستحي جدامي ما تحشم اخوي قلتها باندفاااع: و انا وين كنت عزوه مستغربه بس ردت : كنت في بيت منيره انت و امايه .."سالتني" صج خطبت ؟؟ شهقت وبطلت اعيوني : شدرااااااااااااج ؟؟؟ عزوه ضحكت علي خذت راحتها وايد الاخت: هههههههههههههه سالتها مره كنت بكفخها : شدراااج ؟؟ عزوه: امايه قالت لنا ضربت ايدي ع يبهتي اووهوو كنت ناوي ابروحي افهم السالفه حق عايشه خربت بيتي امايه سالتها باستلام : و منو عرف بعد عزوه : كلهم يدوه و عايشه و طارق الكـــــــــــــــل خذت نفس يالله الحينه شو بتقولها يوم بغيت اخبرها هاك اليوم عفدت علينا امايه المطبخ و خربت علينا اففففففففففففففففففف عزوه: تعرف يوم يت امايه البارحه من بيت منيره و جافت عايشه محتشره حق طارق شرشحت عايشه و غسلت شراعها و طارق يحليله بين نارين ابتسمت ها المطلوب قلتها : شو قالت امايه عزوه: سبت عايشه سب و غلطة عليها حتى قالتها يلي مب متربيه جان فيج خير ما ربعتي ورا الرياييل و انتي معرسه رفعت حياتي مب مصدق : شووو عزوه:هييي و يدتي تمت تحتشر ع امايه قلت: بييل يعني البارحه البيت نار و جي ما اتصلتوا فيني طالعتني عزوه مستغربه فقلت ابرر موقفي : هههههههههه اتسلى شراتج عزوه : هييييييييي ابصراحه البارحه طمااشه المهم اخر شي عايشه شلت ابعمرها و طلعت من البيت يدوه تمت اتقول حق طارق روح ييب حرمتك ..وطارق كان بلحقها بس امايه قالت اذا شبرت برع باب الصاله لا انت ولدي ولا اعرفك ... ما صدقت فقلت : ول عزوه تضحك: هههههههههههه يدوه تمت تضرب طارق بالعصايه نش الحق حرمتك يا ديايه امك .. ما رمت ايود روحي : هههههههههههههههههههههههههههه عزوه : تعرف شو سوا طارق ؟؟ سالتها : شو ؟؟ارمسي عزوه : ربع صوب اامايه و حط راسه ع ركب امايه يترجاها انها اتروح معاه علشان ايبون عايشه خذت نفس: عادي ما استغرب من موقف طارق "وتذكرت البارحه يوم طلع يصلي الفير كان يبا يقولي كلام اثري السالفه جايده و انا ما عندي خبر " عزوه : امايه قالت له باجر بنروح انييبها و الحينه خلها تتأدب ... حسيت باليأس: يعني ما قالت بطلقه منه عزوه: امبلىىىىىىىىىى اسكت مطور امايه قالت حق طارق بس انا اقولك من الحينه هالحرمه ما بتم وياك .. ابتسمت بس ع طول ضميت شفايفي علشان عزوه ما اتشك بشيء .. قلتها : وعقب عزوه : ولاشي و اليوم من الصبح طارق حاشر امايه يلاا انروح انييبها و انروح انييبها هيي انت لا اتخبر امايه قالت لا تطرون حق مطر ليش ما يوصلني شي غريبه !! حتى اليوم يوم يت حجرتي ما طرت لي اها علشان جي نظراتها الحزينه علشان طارق متضايج هزيت جتوفي يمكن قلت حق عزوه: بروح بيت منيره بسلم ع يدوه بتيين معاي ردت ابسرعه: لالالا بروح البيت ... قلتها: زين مب مشكله سالتني: متى بتاخذني ال...... قاطعتها: باخذج بس يوم بفضى اووكى انتي و اسعود لا تيلسين تحشريني عزوه: زين مب مشكله مشكور ع الطلعه قلت بقلبي و مشكوره ع الاخبار الحلوه ...نزلتها عند باب بيتنا و اتريتها تدخل ...عقب حركة سيارتي صوب بيت منيره ..قبلها خطفت صوب بيت ام اعيون و انا بالي مشغول بالكلام الي قالته عزوه كل ها مستوي ..بس ليش امايه ما خبرتني و ليش قالت لا تخبرون مطر .. ممكن يدتي اتخبرني عادي ..شو السالفه ..محد غامضني بالسالفه غير عايشه فديتها ..بس انا و انتي نجتمع تحت سقف واحد و انسييج كل احزانج فديتج و الله ..وقفت عدال بيت ام اعيون ..جفت هدووء و صخه ..اترييت شويه قلت يمكن تظهر من البيت بس ماشي .. مدري كيف عايشين ..البيت كله مظلم مب رايمين يشترون لهم ليتات عنبوه .حياة شو عايشتنها هذي البنيه ويا ابوها ... لفيت صوب بيت منيره نزلت و دقيت الباب و دشيت عليت صوتي : منييييييييييييييييييييره انفتح باب الصاله بس تفاجات يوم سمعت حس يدوه اتصيح و اول مره اسمع جي صياحها .و تشكى بعد .. |
|
|
#49 |
|
|
رد: رواية انا حر ما انهان والحر ما يرجع لشخص يهينه
الفصل الثاني عشـر
كل مالمته هوى قلبي شفع ..ذا حبيبي كيف محبوبي يِــــــــلام ...لو تمادى بالتّغلي والدلــــع ...ماتمادى بالقطيعـــــه والخصـــام طالعت منيره الي بطلت باب الصاله و كانت مرتبكه كنت اوايج داخل و اسالها : شبلاها يدتي اتصيح منيره : مدري طالعتها: شو ما تدرين ليش اتصيح بصوت عالي وسعت لي و فتحت الباب : دش دشيت و سلمت : السلام عليكم رفعت راسها وتمت اتطالع يوم سمعت حسي و تتاكدت اني مطر قلتها : شبلاج عيوزي صدت الصوب الثاني و يلست اتصيح بصوت عالي الحينه عرفت ان صياحها مبالغ فيه بس حتى اني ابتسمت ع حركتها طالعت منيره الي رفعت حياتها مستغربه من يدتها ..يلست جريب منها و لويت عليها : افااا منو الي سوا فيج جي يدوه تبعدني عنها : خووز عني خوز ضحكت عليها ههههههههه اول مره احس يدووه تتغلى و اتسوي حركات يهال ... سالت منيره : شو فيها ما قالت لج شي منيره شكلها طفرانه : و الله عيززت ابا اخذ منها جلمه ما رمت ...بروح اسويي عشاي جوفها انته يدوه تمسح دموعها بشيلتها : انا بتم هني برقد اليوم قلتها : افا ليش و بيتنا طالعتني: مالي مكان هناك " و ردت اتصيح افففففففففففففففففففف شو بعد ناقصنج انا ..راقبت منيره لين ما ظهرت من الصاله .. قلت: يدوه انا الحينه ياي و متعب روحي ابا اسلم عليج و انتي جي اتسوين فيني ..اتصدين عني عاتبتني : من زينك ..مجابل امك طلعات و روحات و انا ؟؟ مودريني و مخليني بروحي في البيت مع هذي الساحره عزوه استغربت : عزوه يدوه : هي عزوه اليوم بغت تحرقني بالدخون ماصدقنت قلت و انا اهز راسي بمعنى لا : لالالالالا نقزت يوم فاجاتني ضربتها الي يت ع ذراعي : اقص عليك انا يعني ..انتوا ما بتصدقوني الا يوم بتجتلني هذي البنيه خبله و الله انها خبله طالعه ع امك نحيسه قلتها مب مصدق : عزوه تبا تحرقج؟؟ يدوه تعلي صوتها : هيييي تبا تحرقني و امك واقفه تضحك معاها عقب صارخت علي .. تذكرت سالفه عايشه و طارق سالتها : طارق تضارب مع عايشه يدوه : اقولك امك نحيسه هي الي تضاربت مع عايشه وزعلتها و الله مسكينه هالبنيه شراتي مظلومه ومحد حاس فيها قلتها : وريلها يدوه: ريال ها تسمينه ولد............. كملت عنهاا: امه يدوه: هي هي امه سالتها: شو السالفه "كان فيني فضول " يدوه : امك طاحت بعايشه اتسبها و انا ادافع عنها ما رضت و طاحت بي بعد يزولون المهم انا بتم هني ما بروح بيتكم تباني تعال لي هني زورني قلتها : الله يهداج اتهدين بيت ولدج و تيلسييين هني شو بيقولون الناس يدوه معانده : مالي مكان هناك .. قلتها اههديها: خلااص بييب عزوه تعتذر لج و بكسرها جدامج شو تبين بعد قالت لي: امك بعد سالتها مستغرب: بلاها يدوه: كسر عظامها شرات عزوه "علت صوتها" جان تباني ارد البيت قلتها بصوت هادي: الله يهداج كيف تبيني اضرب امايه حرام و الله حرام دزتني بقوه: انت شكلك لاحق طارق بتسستوي شراته يربع ورا امه ضحكت عليها: ههههههههههههه ما عرفتيني زين ..انا محد يروم لي فديتج يدوه : ريااااااااااااال ولد رياااااااااااااااال هب شرات بعض الناس........."سكتت عقب قالت" استغفر الله طالعتها مستغرب: شووو كملي يدوه: ماشي الستر يمدحونه قلتها: زين نشي يلا بوصلج البيت دشت منيره: لا وين بتتعشى هني يدوه: وبرقد بعد ها اجوفج تبين تروغني منيره فيها ضحكه : فديتج و الله لو ما يشيلج البيت تشيلج اعيوني يدوه : خلااص عيل بتم هني قلتها: كيييييييييييف و بيتنا صدت عني: ما عندي بيت وقفت و قلتها : زين اليوم تمي هني بس باجر بيي اخذج رضيتي ولا لاء يدوه تمت صاده عني الصوب الثاني ضحكنا انا و منيره على حركتها ... سلمت عليها و طلعت من الصاله ولحقتني منيره سالتها: شو يسون فيها فالبيت بديت اشك ان كلام يدوه صحيح و ما تبالغ منيره متشككه: و الله ما ادري .. قلتها: المهم جوفيها زين و جان تعبت ولاشي ولا تبا اترد البيت اتصلي بي منيره: ان شاء الله ما بترجع تتعشى قلتها: بتعشى برع مع الربع الا بسالج عبدالرحمن شو سوا في سالفه خطبتي منيره دزتني : اسكت عن تسممعك عيوزك زين نست السالفه ولا بتاككلك لانك ما خبرتها ضحكت: ههههههههههه قوليها تو الناس منيره: قلتها المهم ان شاء الله باجر برمسهم قلتها :اوكى عيل بس لا تراوينهاصورتي منيره: ما عليك ادري بتشرد رفعت حياتي اتطنز عليها و قلتها : يلا باي .. و ظهرت عنها ..كرهت اتصل بفهد ولا بـ زايد الي ما اتصل ولا قال لي شو سالفته و مدري وين ودى حرمته ...اتصلت بطلال رد علي : تعال صوب البحر يلاا قلته: سلم عنبوه طلال: يوم بجوفك قلته: وينك انته البارحه طلال: رقدت كنت تعبان .. سالته: و ليش ما اتروحون العزبه طلال: تغييير كررت كلمته و انا افكر : تغييير طلال: هي تغير يلا باي "وصكر الباب .. طالعت موبايلي :شبلاه هاخدية اليوم .. المهم شليت ابعمري و رحت صوب البحر ..ادرو عليهم ..خليني انسى همومي الي مرت عليه ..هاليومين الي طافت .. و بنجوف ام اعيون شو رايها .. انا متاكد لو عرفتني ما بتوافق عليه احسن يوم قلت حق منيره ما تراويها صورتي ... اخر شي جفت سياره فهد وزيود و طلال ..رحت وبركنت جريب ممنهم .. نزلت من السياره و سلمت عليهم مطر: السلام عليكم الكل : عليكم السلام .. طنشت فهد ما بغيت اطالع شيفته وايد متضايج منه تراني ليش ما يخبرني عن سالفه الحرمه الي ماشي معاها ...يلست جفتهم قاعدين يشوووون سمج ... فهد: شحالك مطور وينك من يومين ما تنجاف طالعت زيود الي طالعني و رديت عليه : انا المشغول و انته ؟؟ فهد : يا رييال بشو يعني مشغول طنشته و قلت طلال: شفيك انته طلال ماشي رد طالعت زايد جفته قاعد يلعب بالنار و سرحان سالتهم: شو مستوي ..؟؟ زيود: ماشي كل واحد عنده هم يفكر فيه طالعت زايد بنظرات اذكره بالحرمه الي جفتها البارحه عند باب العزبه يمكن بعدها هناك ولا ليش اليوم يالسين هني .. نشيت من مكاني و رحت صوب سيارتي ..طلعت لي باكيت زقاير .و يلست ع سيارتي .. خذت نفس طويل ..يا سلالاااام حلو جو البحر و ريحة السمج المشوي ..حسيت بمتتعه ....طلعت لي زقاره و يلست ادوخهاا . خطرت في بالي عايشه اكيد درت عن سالفه خطبتي ...فديتها مدري شو بتظن ..شي مؤكد بتحرج علي و بتزعل بس يوم بغيت افهمها البارحه دشت علينا امايه المطبخ شسوي .. .انا لازم ارمسها .و افهمها بس طارق مفتح اعيونه زين هاليومين ..كل منها كم مره قلتها لا اتيين حجرتي .. ما تسمع الرمسه ... نقزت يوم حسيت حد يضرب ع جتوفي ....فريت الزقاره من ايدي ... فهد يتساند ع سيارتي : بشو سرحان ؟؟ قلته: ماشي افكر .. فهد: شو فيكم اليوم انت بوادي وزايد بوادي و طلال مدري شو بلاه اول مره اجوفه جي صاخ و عبود مدري وين راح سالته اتطنز عليه: و انته .. رفع ايده : الحمدلله مرتاح مافي شي مكدرني .. قلته بحذر: منو هاي الي مريحتنك طالعني مستغربه فدزيت ويهه الصوب الثاني : لا تطالعني بها النظرات مب علي فهود فهد دز ايدي : حتى لو كانت وحده بحياتي انت شو يخصك ؟ طالعته: الحينه شو يخصني مب جنك اربيعي وولد خالوتي ..انت للاسف وايد تغيرت من هذاك اليوم "وسكت" فهد: كمل ليش سكت ..اي يوم قصدك يوم تزاعلنا هزيت راسي بمعنى هي .. طلع زقاره من قعد يدوخ كنت اراقبه تم ساكت سرحان ...كنت بقوم من عنده و بروح صوب طلال و زيوود بس سمعته يقول : يعني انت الي اتقول لي كل شي طالعته بسرعه و قلته: ليش شو سمعت عني ؟؟و انا ما خبرتك .. فهد شبه ابتساممه مرسومه ع شفايفه: ادريبك لوتي عود تغازل ما يحتاي تخبرني تمصخرت عليه: عالاقل انت تعرف حتى امايه تعرف .كل الناس يعرفون مطر "طالعته بنظرات استهزاء" مب شرات بعض الناس من تحت لتحت و مسوي روحي شريف مكه .."وواجههته يوم صد عني " لالا بعد شو مسوي روحي متضارب ويا اهلي و طالع بشقه بروحي علشان ادخل فلانه و اططلع علانه ع راحتي فاجأني البكس الي ياني من فهد ..حسيت ان فكي تكسر .. طحت عالارض ...حطيت ايدي بقوه مكان ضربته ضغطت مكان الويع حسيت بألم فضيييييييييع لهاي الدرجه احرجته ..ما توقعت ردت فعله ابد ابد كنت بوقف ارد له ضربته و اكسر ايده ... بس عفد عليه زخيت ايده حاولت ازخ ايده الثانيه بس سبقني و لكمني مره ثانيه ع نفس المكان تالمت بصوت عالي .. حسيت بطعم الدم بحلجي ... رفعت اريولي رفسته بقوه فطار عني بعيد ... وقفت ابسرعه حسيت الدنيا تلف فيني بس ...مسكت اعصابي ..و عفدت عليه ..كنت بعطيه بكس بحلجه علشان اطيح ضرسه بس واحد من الشباب زخني و ابعدني عنه .. زايد: مـطوور بس ..ايـه حاولت ادز زاد صرخت عليه: وخررررررررررر وقف فهد و كان بيضربني مره ثانيه خاصه انه استغل زايد ميودني هو محد ماسكنه بس زايد تم بالوسط زايد: بسكم ايه اصطلبوا حاول يدز فهد و انا كنت احاول اوصل لفهد بس زايد مخرب علي .. زايد يعلي صوته: طلالالالالالالالالالالالالالال اال تعال ساعدني طلالال سمعت صوت طلال من بعيد : ما يخصني ما يخصني حلو مشاكلكم بروحكم .. صرخ علينا زايد بعصبيه: بس عااااااااااااااد "ودز فهد بعيد .. فهد ممحرج: ما عليه مطور ما عليه . .وشل غتره من عالارض و ركب سيارته تجدمت صوبه و صرخت بصوت عالي : انا الي براويك ..ما عليه زايد يعاتبي : مطر دزيته ابعده عني: مب فايجلك انت بعد ابتعدت عنه ورحت صوب البحر رفعت راسي اتنفس بعمق حسيت ان نفسي انقطع ..سمعت صوت زايد و فهد ..يتناقشون بصوت عالي ما كنت مركز ... ادري انا الي غلطت بحق فهد ..بس مهما صار ماله حق يمد ايده علي ...يلست اتفل اجوف الدم يظهر من حلجي سبيت فهد سب ... سمعت صوت سيارته و حرك بعيد ...رحت انا بعد صوب سيارتي ظهرت كلينكس و حاولت اوقف الدم الي ينزل مني .. ياه زايد وقعد جريب مني : شويه شويه انطفت النار .. وصار ظلااام ... زايد: معقوله انت و فهد .. تفلت بعصبيه بعيد و قلته: يلتعن .. |
|
|
#50 |
|
|
رد: رواية انا حر ما انهان والحر ما يرجع لشخص يهينه
تفلت بعصبيه بعيد و قلته: يلتعن ..
زايد: انت اتغار منه طالعته بسرعه متفاجا من كلامه و مب عايبني بس زايد تكلم بسرعه: بتضربني بعد مسكت اعصابي لاني فعلا كنت بقوم و اضربه : زايد انته جفته كيف عفد علي جفت منو الي بدا زايد: اكيد انت استفزيته و خبرته يوم جفناه و هو ظاهر من الشقه مع الحرمه قلت بانفعال : هييييييييي خبرته شو مسوي روحه شريف مكه زايد يحرج علي : اشلك بالريااااااااااااااااااااال مب مسؤل عنه حرجت ع زايد و انا بروحي مش طايج نفسي: يقهر ..هو اصلا تغير ما تجوف حركاته مستوي ع الكلمه يمد ايده و الله لاكسره له زايد: انت الي مستوي ع الكلمه اتحرج جوف تصرفاتك ... طالعته زايد كلامه جنها صفعه لي سالته :انا الي الحينه متغير ؟.. زايد باصرار : هي انت ع الدقه اتعصب و اتحرج ليش كل ها شو مستوي ما خليت حد ما تضاربت معاه ..فهد و اخوك و الله يستر باجر منوه .. وقفت متضايج من كلامه : مشكور حتى انت زايد ورحت وقفت بعيد عنه حطيت ايدي ع فكي احرك بسرعه لاني حسيت بالم فضيع ..معقوله كلام زايد صج انا متغير انا الي مستوي ما اتحمل حد انا !! غمضت اعيوني .. .يعني الحينه انا الي طلعت غلطان مع كل شخص ..للحظه حسيت اني ضايع ...تم زايد يالس ابمكانه و انا واقف ع البحر افكاري تضارب مع بعضها ... الكل استوا يكرهني ...يعني ؟؟؟ حسيت بخطوات زايد جريبه مني حط ايده ع جتوفي بعدت ايده عني وابتعدت عنه كاره قربه مني زايد: ما كان قصدي احرجك قلته باسف: انت احرجتني خلاص "طالعته بحزن" ع العموم الكل يحسسني بهالشي مب بس انته .....زايد : حاول تمسك اعصابك يعني فهد قاطعته: فهد هو الي صااير ما يتحمل اي كلمه ..حرج بس يوم فضحته مع الي كانت معاه زايد يحاول يقنعني :مطور هاي حياته كل واحد له سره يعني هو ما يحاسبك ع افعالك سكت كلام زايد صحيح يمكن اكون غيران من فهد ..يولي من زينه قلته : يولي باجر هو الي بيي يعتذر مني "حاولت اغير السالفه فسالته" و انت بعد شو سالفتك البارحه مع هاي الحامل تغيرت ملامح ويهه فسكت ...عقب قال : مستوي وايد تحرج مب جنا كنا ربع ..و نتحمل مقالب بعض .. صخيت حسيت ان كلام زايد احرجني يعني الحينه انا سبب المشاكل الي اتصير من بينا ... قلته باسف: اسف ما اقصد .. زايد : مره قلتلك .و هاي ثاني مره اقولك خلافاتك مع اهلك لا تدخلنا فيها و تظهر حرتك فينا و تضارب ويا ربعك جي بتخسر كل الي حوليك .. صخيت بس زايد كمل : المهم مطور ما ابا حد يعرف سالفه الحرمه البارحه دخيلك .. سالته : منو هاااي ؟؟ سكت زايد شويه كان متردد عقب قال : الرضيعه بطلت حلجي مب مصدقنه: هاه ... بس سكت يوم حسيت انه منحرج ..و دام طلعت اخته انا ما يخصني ولا برمس عن هاي السالفه موليه .. بس سالته: هي بالعزبه مكانها زايد: لا وديتها بيت اهلي ... مطر: ع بالي بعدها هناك علشان جي غيرتوا و يتوا صوب البحر زايد: لا طلال بغى ايي هني مصنف اليوم التفت يمين و شمال : وينه طلال زايد: هههههههه من جافكم انتوا و فهد زخ سيارته و لا يحوووشك ضكنا عليه انا وزايد هههههههههههههههههههههههههههههه ههههههههه قلته : طلال طول عمره بتم جبان ... زايد : ههههههههههه الحينه بيقول ما احب المشاكل ... قلته: اتصل به جوفه وين .. قعد زاايد يتصل به :ههههههههههههه ما يرد ... قلته : خله باجر بيي بسوي ابروحه عنتر زمانه الا هو و بلاه بعد زايد : مدري بس سمعته يضارب بالتلفون اظني مع امه قلته: ها ما يستحي مستقوي ع امه زايد :شدرااني ..بتصل بـ فهد بجوفه وين رااح .. ما رديت عليه يلست اراقبه يوم يدقدق ع ارقامه ... تم يرن ..الموبايل ...بس ما رد .. قلت زايد: ما خليتني اضربه ابرد دمي فيه زايد يصكر عنه: يا رياال خله بحاله انتوا اهل قلته: عييل ما تجوفه كسر ضرسي الله يكسر راسه رن موبايل زايد فقلته علي ع الصوت ابا اسمع شو يقول ..عل زايد ع الصوت ...و رمس زايد: هلا بو الفهود .. فهد بغييض : هاه زايد: وينك ..تعال فهد: مب ياييي .. طالعني زايد الي قال : خلااص عاد انتهت السالفه و انتوا عيال خاله حرج فهد: لا عيال خاله ولا شي قوله ..ما له شغل فيني و خبره حتى انا مالي شرف ارابع واحد من امثاله خمير مب مخلي بنيه بحالهاا .. زايد يوم جافني حرجت حاول يهدي فهد : فهد فهد اسمعني فهد يعلي صوته اكثر : قوله انا الي مسوي روحي شريف مكه هو لو فيه خير ما يااه اخوه طارق يتشكى لي عنه وعن حرمته ما تحملت كلام فهد و غير ان زايد قاعد يسمع الرمسه فعفدت ع موبايل زايد و رمست بصوت عالي و قلته : انت يا الخنزير تعال ارمس بويهي مب بس زايد ير عني موبايله و صكر بويه فهد .....حسيت الدنيا اسودت بعيوني اكثر ما هي ظلام ... زايد: مطر . صرخت بعصبيه: طارق الحيووان مب مخلي حد مب مرمسنه .. فاضحني و الله لاقص لسانه زخني زايد: ايه وين رايح اعقل شوووو بيقولون اهلك عافد ع اخوك بتحرونك سكران ابتعدت عن زايد: يقولون الي يقولونه تم شي ما انقال ... زايد يمنعني من اركب سيارتي : مطوووور اثجل ..لا تسوي شي بتندم عليه ...مطورر دزيته بعععيد عني وركبت سيارتي و انا بعيون الشر و يا ذابح يا مذبوح يا طارق .. ركبت سيارتي وحركت و خليت زايد ابروحه ..يلستنا عن قبل تغيرت وايد ...كنت نقعد للفير و نودع بعض و الحينه كل واحد يشرد من الثاني ... اتذكرت كلام فهد فطارت الشيطان جدام اعيوني ..وو الله لاقطعك يا طارق علشان مره ثانيه تثمن رمستك و ما تطرني جدام فلان و علان ... بعده كان الوقت ليل . .بس ماشي باجي ع اذان الفير ...الحينه بطلع وقت الصلاه ها التعبان ..تميت بالسياره ..يلست ادووخ ..لين ما حسيت صدري بنقع من الدخان فريت الزقااير و نزلت من السياره ..رحت صوب حجرتي ..بتريا طارق لي ما يطلع و بكسر راسه ... دشيت حجرتي ..طالعت عمري بالمنظره جفت اثار دم ع شفايفي حطيت ايدي حسيت بالالم ..دشيت الحمام تغسلت .. و عقب ما ظهرت .. شغلت التلفزيون اجلب القنوات و بالي مشغوله في شي ثاني ...ما لقيت شي حلو يتابعونه . .رحت صوب اشرطة الفيديو و طلعت شريط لمصارعه ...شغلته .. و من جفته ...شريط ضرابتي مع فهد ما وقفت ..خطر ع بالي ..اقطع اجازتي و اباشر دوامي علشان افتك من هالاشكال الي كل يوم اطالعها ... شويه شويه اندمج بالمصارعه ..ما حسيت بالوقت الا يوم باب حجرتي يندق ..نقزت شفت الساعه اربع و نص متى اذن ؟؟!!! يعني طارق ظهر عاد مدري كيف نسيت الوقت بندت الفيديو يوم اندق الباب مره ثانيه ... قلته بغيض : زيييييييييييييييييييييييين "ظنيت انها امايه " فتحت باب الحجره ..قبل ما انطق باسم عايشه ..يتني صفعه منها مكاان ضربني فهد أأأأأأأأأأأأأأأأأأأأأأأأأأأأأأ أي حسيت صج ويهي بيطيح اليوم هذيلا ناوين عليه .. حطيت ايدي مكان صفعتني .. حسيت بنار تطلع من ويهي .. .طالعتها بعصبيه و غيض و هي كانت تطالعني بنفس النظرات بعصبيه ..و غضب .. |
