 |
  |
|
|
|
|
#91 |
|
|
رد: رواية انا حر ما انهان والحر ما يرجع لشخص يهينه
(((الحلقــــــــــــــــة 25 الخامسـة و العشــــــــــــــــــرون ))
لا قلت بكره بتمطر شاحت امطـــارك...غيري سكن جنتك واسكنتني نــــارك كنت احس بحزن و ضيجه .. حتى يوم حزة الغدا ..ما طعت اكل شي و مطر لا سال ولا نشد ولا اهتم كان في عالم ثاني ..كنت اتالم انه يعاملني بقسوه ..ما يراعي شعوري .. ولا عواطفي بس يحرج و يعصب يوم يجوفني ارمس سعود ولا طارق ... كنت احس مرات بقهر و غيض يوم احس حركاته طفوليه ..و يعاملني جي بس شسوي مالي حد بها الدنيا ولا لي مكان غير هاي الحجره الي يصبح مطر فيها يضربني و يمسي فيها يجرحني بكلامه .. يلست اجلب قنوات التلفزيون من قناه لقناه بس ما كنت منتبهه لاي شي حتى يوم دش علي مطر .. ما طلعته و هو بعد طنشني دش الحمام ... تميت ابمكاني ما تحركت يوم يطلع من الحمام .. سالني : شو فيج ؟؟ طالعته بنظرات عتب و لوم و رديت اطالع التلفزيون اوني مركزه ع مسلسل و انا بداخلي ارتجف من الخوف صار يخوفني هالانسان .. راقبته يوم عطاني ظهره و راح صوب التسريحه و شل علبه الزقاير بس هالي فالح فيه .. انا ابروحي مضايجه بعد اشم ريحة زقايره بختنق .. شليت شيلتي و كنت بطلع برع سالني : وين راييحه ..؟؟ قلته و انا افتح الباب : بطلع ريحة الزقاير تخنقني زخني من ذراعي و امرني : يلسي مكانج .."ويلس يدوخ جنه يغايضني " كنت ببعد ايده عني لاني صج هالانسان ينرفزني قلته : ما ابى .. شهقت يوم دزني وطرت ع طول فوق الكنبه بلعت ريجي كتمت ألامي و طالعته بخوف توقعت يتمادى اكثر علشان جي سكت عنه بس قال : انا الي بطلع وظهر من الحجره عدلت بيلستي ..سالت نفسي وايد متى بتغير علي .. ليش جي يعاملني ...فريت شيلتي بعيد عني و رحت ع الشبريه .. فكرت ارقد قبل لا يدش علي ..ما فيني اجابله ...بس كان مثل الساحر ع طول فج باب الحجره نقزت .. من ملامح ويهه و ابتسامته عرفت انه عارف اشكثر انا خايفه منه .. دش الحجره يطالعني عقب قال : العصر بوديج المستشفى قلته بسرعه : ما بروح هي باجر بتطلع يلست ع طرف الشبريه مجابلني و قال بهدوء و جنه يحذرنني : بتروحين قلته بغيض : انته شو تبا مني طالعني ابرود و قال : ولا شي ... دمعت اعيوني : عيل ليش اتعاملني جي طالعني و قال : لا اتلوميني الحينه زين .. نسيتي انتي الي بدت و حطت حواجز ع علاقتنا رغم انج زوجتي بلعت ريجي و قلته : لاني خفت منك ما ابا ............ قاطعني : ها مب عذر قلته بسرعه : انته اتقول ما اتحبني كيف تباني اعيش وياك مثل باجي الازواج.. وقف محرج و ما ادري اصلا ليش عصب علي : هي احبها و بتزوجها و جريب وايد صرخت بصوت عالي: انته ليش تزوجتني رفع اجتوفه و قال ابرود : عيبتيني صرخت من الغيض : انا اكرهك ما ادانييك طلقني قال : العصر ازهبي بوديج المستشفى عقب بنمر بيت منيره بنييب يدوه قلته بعصبيه : روح ابروحك انا ما بسير ويـ......... صخيت يوم ياه صوبي رفعت ايدي احمي نفسي بس حسيت انه وقف بعيد عني بمسافه رفعتت ايدي و طالعته فقال : لا تستفزيني اتعلميني امد ايدي عليج سكت عنه بس هو تم يطالعني و عقب لبس ثيابه و ظهر من الحجره حضنت المخده و يلست ارتجف من الخوف و مصير حياتي مع مطر ... فتحت اعيوني متروعه يوم حسيت بحركة جريبه مني بس ارتحت يوم جفت مطر يالس عدالي حاولت ابعد بس ما قدرت فاجأني يوم سالني : شو ها بويهج وحط أيده ع خدي صديت عنه تجرب مني و قال : جفتي كيف كل ما حاولت اتجرب منج صديتيني ..بعد تشكين من تصرفاتي قلته بصوت واطي : انا ما اباك تجرب مني اكثر و كانه يعاندني و قال : مب ع كيفج طالعته جفت التسليه بويهه قلته : انا ارمس جد رد علي : جد ولا عم صديت عنه يا ثجل دمك : مطر بس عاد رد علي يستخف دمه : عاد ولا ثمود .. نافخت مب متحمله سخافته فريت عني اللحاف بس صرخت يوم عفد علي و غطني مره ثاني حسيت انه يبا يجتلني يكتم انفاسي يلست ارافس من تحت اللحاف و اصارخ : بمووت بمووت فج عني و شل اللحاف يلست اتنفس بصوت عالي بس هو حضرته قعد يضحك علي بصوت عالي قال : جايفه ويهج كيف صار يلست ارتب شعري بعصبيه و قلته : ما اتضحك كنت بموت مطر رفع حياته يستهبل : قولي و الله طالعته بنظراته غضب بس فاجاني يوم ابتعد عني و قال : يالله قومي ورانا ظهره "وقال بكسل " يالله مب راقد من البارحه بدوخ عليج الحينه رديت انسدحت : من قال اني بروح معاك طالعني و قال : من قالج اني باخذ رايج مدري ليش تذكرت بيت ابوي يوم جفته رايق و يسولف فقلته : شو بتسوي في بيت ابوي رفع حياته مستغرب من سؤالي عقب قال : عقب بخبرج يالله قومي رن موبايله فراح صوبه قعد يرمس و جنه حد من ربعه و يأشر لي بيده ويسوي لي حركات بويهه بمعناة قومي يالله بس مدري ليش الشيطان ركب دماغي و انسدحت مره ثانيه ع الشبريه و تلحفت تغيرت ملامح ويهه حسيته عصب بس انا صدق ما ابا اجابل عايشه ما فيني ع المشاكل و هو اصلا ليش مصر اروح لها ... يلست ع طول وحضنت اللحاف و جني احمي نفسي منه يوم صكر الموبايل و ياه صوبي قلته : لحظه بس هو ما سمعني يير عني اللحاف . .قلته مره ثانيه : لحظه .. شهقت يوم شلني قلته : خلاص خلاص ببدل بس هو ولا جنه حد يرمسه ... فج باب الحمام حسبت بنزلني بس صرخت يوم دش الحمام و هو شايلني قلته : خلااص خلااص ...بروح نزلني و قال : من قال ابا رايج .. شهقت يوم قعد يغسلني كنت امنعه بس عقب حسيت ماشي فايده .. ظهرني من الحمام قلته : بصلي زين قال هو يفج باب لكبت : صليها مع المغرب قلته و انا امبطله اعيوني : شو ع كيفك .. طالعني رديت لورا بس هو رد و ظهر لي بدله و فرها ع الشبريه قلته بعناد : ما ابا البس هاي البدله مطر امرني: امبلى بتلبسينها قلته: انت شو تتحرا روحك قاعد بالدوام يالس تتأمر علي ..انا صدق ما اباك لا .. صخيت يوم تجرب مني رديت لورا و يلست ع لكنبه يوم جفته شل البدله و قال : مب فايج لسخافتج ترجيته : مطر لا اتسوي جي .. حسيت ابروده في جسمي يوم حاول زخ فص جلابيتي صحت بصمت و ترجيته مره ثانيه : خلااص بلبس ابروحي .."زخيت ايده بس بعد ايدي بقسوه " رفع راسه يطالعني يوم طاحت دمعتى ع ظهر ايده و حس اني برجفتي حسيت انه متفاجـأ عدل بوقفته و قال و جنه مصدوم : لها الدرجه كارهتني و كاره قربي .. ما قدرت اطالعه و احط اعيوني بعيونه فصديت لصوب الثاني بس حط ايده ع صدره يذكرني : انا ريلج همست : ما اباك التفت له اجوف ردت فعله جفته يمسح دمعتي من ع ظهر ايده بشكل دائري استغربت من حركته حتى شكيت للحظه انه سمعني يوم قلته ما اباك قال : انتي اول انسانه اتصدني "ورفع راسه و قال " اتصدني هالكثر مع انه انت الوحيده الي لج الحق بها الشيء سكت ليش كم وحده بحياتك ... يالله يا مطر ..ما عرفت شي فيك زين ..من تزوجتك و انا اجوف سلبياتك زقاير سهر لا صلاه ولا رحمه ولاشي قال بجديه : يالله لبسي ابسرعه خلنا انروح راقبته الين ما صكر باب الحجره ..لبست ثيابي و انا مغصوبه طبعا عقب ما صليت العصر و دعيت ربي يهديه ..يلست امشط شعري تذكرت اني ما تغديت و اني يوعانه بس طارت افكاري يوم دش مطر بس هالمره طنشني قام يلبس ثيابه قلته : انته ليش ما اتصلي قال : زاهبه رحت البس عبايتي و اطالعه ابا رده ففهم نظراتي فقال : جمعيتها مع الظهر شهقت: انته ع كيفك تبدع ؟؟ شل موبايله و سويج سيارته و قال : يلا طوفي لا تقعد تتفلسفين لي .. حزنت بداخلي كيف مطر جي مستهتر قلته : الله يهديك ظهرنا من الحجره .. التفت لا ارادي صوب حمام سعود جفته كالعاده قاعد يطعم حمامه .. حتى هو التفت لي ابتسمت له اليوم موليه ما جفته .. التفت لمطر يوم قال : سعود لا تطلع من البيت ؟؟ "سكت وقال " سمعتني ؟ سعود : هي سالني مطر : وايد عايبنج سعود التفت له قلته : شوه زخ ايدي و رص عليها بدفاشه حسيت انها تنخلع : لا تستعبطين عليه مدري ليش قلته ابسرعه : هي يعيبني لانه دوم يذكرني فيك اول مره اجوف ملامح ويه مطر جي تنجلب وجن حد صفعه ع ويهه ما توقع ردي قلته : سعود ترا قاعد يطالعنا زين فج عني و صخو سبقني للسياره حسيت بقلبي بوناسه و جني انتصرت عليه .. كنت بضحك ع ردت فعله بس انا بروحي مدري ليش قلت جي بس اهم شي رحمني منه .. في السياره سالته : و عزه بتخليها في البيت ابروحها مع سعود صخ ما رد علي .. كان يطالع الشارع و كانه في عالم ثاني .. سكت عنه فاجاني يوم قال : يوعانه طالعني فهزيت راسي بمعنى هيه قال : بمر لمطعم بطلبلج شي تاكلينه عقب بنروح المستشفى قلته : ع راحتك طالعني و قال : علشان بسد يوعج قلتي ع راحتك و من شويه ما تسمعين الرمسه تعاندين بكل شي بس اتصدقين قلته : شوه "و انا مستغربه توه سرحان بعالم ثاني و الحينه رد لطبيعته " كمل كلامه : كشخه يوم غسلت ويهج جنج ياهل ..كل مره جي بسوي فيج صديت برع و قلته : لا مشكور ما يحتاي .. قال : و انتي ع بالج قاعد اشاورج سكت عنه و يلست اطالع برع ..مرينا المطعم و طلبت لي وجبه و عقب مرينا المستشفى ..مدري ليش يوم وصلنا جريب الحجره لصقت بمطر طالعني و قال : بلااج قلته بصوت واطي : انا ما با ازورها بس انته تجبرني مطر : خل عنج "فج باب الحجره كنت بزخ أيده بس هو بعد ايده عني مدري اذا كان متعمد او ما انتبه لي ... بلعت ريجي .. اتذكرت ابوي الله يرحمه و اشكثر عاني من مستشفى لمستشفى .. مطر : السلام عليكم عدلت عايشه يلستها استغربت الغرفه فاضيه وينها ام مطر جفت مطر يطالعني فهمت انه يباني اسلم عليها .. لمحتها كان شكلها تعبان ..و مصفره .. غمضتني بيني و بينكم مهما كانت بعد مسكينه فقدت ظناها .. تجدمت اسلم عليها مدت ايدها لي قلتها : الحمدلله ع السلامه |
|
|
#92 |
|
|
رد: رواية انا حر ما انهان والحر ما يرجع لشخص يهينه
و تجربت علشان ابوسها بس بعدت ويها عني عدلت بوقفتي و طالعت مطر الي كان يراقب الموقف انحرجت بس ردت لورا ووقفت صوب مطر
سال مطر : وين امايه و طارق بس هي ردت بعصبيه : انته ليش يايبنها هني بطلت اعيوني شكلها تقصدني .. مطر يهديها : يايه تطمن عليج عايشه بنبرات حقد : تطمن علي ولا يايبنها تغايضني " شدت ع اللحاف بغيض " انت موليه ما بتتغير مطر مطر بنبره هاديه : عواش شو فيج و الله بغت تطمن عليج ما تحملت جي يرمسون شو يتحرون لعبه من بينهم فقلت بسسرعه ادافع عن نفسي كنت بقول هو اجبرني ايي هني ولا انا ما كنت ناويه ...بس انفتح باب الحجره و دش طارق و امه و عزوه .... رحت سلمت ع ام مطر و عزه طبعا طنشت طارق : هلا ميثه شخبارج ؟؟ قلته : ابخير الله يسلمك طارق : مشكوره و الله ع الزياره ... طالعت عاشه اباها تتعلم من ريلها كيف يحترمون الناس ... مطر : وين كنتوا ام مطر : سرنا تحت ناكل لنا شي ... ابشركم عاشه بتظهر اليوم المغرب عزه : زين احسن بعد البيت من دونج ا امايه ظلمه ام مطر : وينه سعود فديته مطر : مجابل طيوره ام مطر : تحملوا باخوكم ... فديتك مطر داومت اليووم مطر و جنه متضايج : هي و مب راقد من امس .. طارق: زين انته بداوم وانا بطلع اجازه ...بس عاشه اترد البيت و اسوي هذيج العزيمه عاشه بنفس خايسه : انا ما برجع بيت اهلك دور لي بيت ابروحي ولا بروح بيت خالتي "وطالعت مطر جنه تغايضه" نقزت طارق و يلس ع طرف الشبريه جريب منها و زخ ايدها طالعت مطر جفت ملامح ويهه تغيرت .. ام مطر : شو ها الرمسه بعد مثل ما طلعتي من بيت ريلج تردين له عايشه : لا و الله اليوم طيحتوا ولدي باجر شو بتسون فيني عزه : كل من سعوود ام مطر : جب انتي ... سعود تاج راسكم و الله وقف مطر جنه مب عايبنه الجو : يلا ميثه انروح ام مطر : وين ..؟ مطر : بروح ايييب يدوه ام مطر : شو تبا فيها ..خلها يالسه عند اختك مطر مطنش الكل مدري شو بلاه : يلا ميثه " و لوى علي " قلتهم و انا متلومه من حركة مطر : مع السلامه قبل ما نظهر سمعنا صوت عايشه اتصيح بصوت عالي كنت بلتفت لها اجوفها شو بلاها يمكن عورها شي بس مطر ييرني و ظهرني من الحجره ... سالته : ليش اتصيح قال بغيض : شدراني انا اكيد معصب لان امه قالت لا اتيب يدتك طالعته كان سرحان بعالم ثاني ... فاجاني يوم رص ع ايدي و قال بتملك : انتي بتمين لي استغربت من كلالامه شو صابه ؟؟؟ ما رديت عليه لانه كان يقول كلامه و هو بعالم ثاني .. ركبنا السياره فقلته : جفت كيف عاملتني قلتلك ما بروح لها لاني اعرف كيف بتستقبلني مطر يحرك السياره و مب مهتم لكلامي و لاكانه يسمعني دقيته بجتوفه : مطر طالعني ابرود و قلته : انا ارمسك و انته سرحان بعالم ثاني مطر يركز ع الشارع : شو تبين قلته : كل هاه علشان امك قالتك خل يدتك عند اختك مطر مب مهتم : لا قلته : عيل قال لي بغيض : صخي مالي بارض ارد عليج بشيء رفعت حياتي : انت ليش معصب مطر ينافخ بغيض فرديت لورا و صخيت اطالع الدرب برع شكله مب رايق هالانسان فيه حالات مدري شو صابه .. قلته : مر صوب بيت ابوي ابا اجوفه لو من برع .. ما سمعني دقيته بجتوفه مره ثانيه : مطر انكمشت ابمكاني يوم صرخ علي بصوت علي : انت بس ذبحتيني شو تبين طالعته بخوف .. و جفته وايد محرج ... شو السالفه شو مستو ي ..؟؟؟سكت عنه بس كان قلبي متعلق بجوفة بيت ابوي .. رن موبايل مطر ..يلست اطالع برع و انا اسمعه يوم يرد ع الموبايل حتى بدون نفس يرمس الناس ما يستحي ...التفت ابسرعه ويوم يقول : ولييييييد !! طالعني مطر بنظرات و قال : لحظه مد لي موبايله قلته : منوه فر الموبايل فوقي و قال : ارمس ولد اخوج شلبيت الموبايل ابسرعه فديت وليد توه بس تذكرني .. قلته بشوق و لهفه : ولييييييييييييييييد وليد : انتي وينج عرستي و نسيتيني قلته : يا بعد قلبي و الله ما نسيتك بس انت ما اتعرف ظروفي فديتك لمحت مطر يطالعني بس تجاهلت و كملت : شخبارك شو كبر عقلك ولا بعدك معذب اخوي وليد : عموه ..انا متبري من اخوج لانه حرمني منج رصيت ع الموبايل : فديتك لا اتقول جي ترا ازعل وليد: عيييييييييييل ليش حرمني منج و من راس الخيمه يقول ما عنده اخت ليش ليش لش كنت بصيح بس يودت روحي و قلته : ابرايه المهم انا و انته ... مطر جنه طفران : يلا وصلنا صكري طالعت مطر بنظرات عتب و كملت : وليد لا اتعور براس ابوك باجر يوم بتكبر تعال زورني بيتي مفتوح لك وليد : زين انتي ما عندج موبايل قلته : ما عندي بس يوم بيصير بتصل بك ما نسيت رقمك وقف مطر عدال باب بيت منيره و يلس يضرب هرن متعمد علشان ما اسمع وليد طالعته بنظرات لوم بس هو ابتسم و تم يضرب هرن قلت : وليد بتصل بك مره ثانيه تحمل ع روحك وليد : زين ما عليه مع السلامه وصكر ع طول حطيت الموبايل جريب منه و قلت : انت ما عندك اسلوب سالني ع طول بنبره جاده : كيف عرف رقمي ؟ تذكرت يوم اول ما ردينا من البحر و اتصلت لوليد علشان يخبر جمال يتصل فيني تجرب مني مطر و قال : كيف عرف رقمي رفعت اجتوفي وقلته : ما اعرف طالعني بنظرات انه مب مصدقني فقلته : اخوي يعرف قاطعني بحده : اخوج يبا يفتك منج بروح يعطي رقمي حق ولده ؟؟؟ الامني كلامه نزلت راسسي مطر وايد جاسي ..بس هو طنش ولا اهتم بجرحه لي ..بند السياره و نزل .. نزلت وراه .. دشينا بيت منيره كنا نسمع صياح ولدها بدر دق مطر باب الصاله سمعنا حس منيره : الباب مفتووح .. دشينا يدوه من جافت مطر تغشت ع طول بشيلتها و صدت الصوب الثاني .. يتنتي الضحكه من حركتها رغم جرحي .. مطر رايح صوبها : ع بالج ما بجوفج تتغشين عني منيره : ههههههههههههههه يدوه تاشر بيدها : خوز عني ما بروح وياك مطر يبوسها فوق راسها : افااااااااااااا يدوه تعاند : هني انا مرتاحه سلمت ع يدوه و منيره الي طالعتني مبتسمه و جنها تذكرني بحالتي البارحه رديت و ابتسمت مطر: البيت من دونج ولاشي يدوه : لا مييه انتوا بيتكم كله ضرابه هذيج حرمة اخوك البارحه ضاربينها و عاقين ولددها شو بتسون فيني و انا ريولي و القبر منيره : خلها دام مرتاحه عندي يدوه : و فديتج انتي ..و انتي ميثه ما حملتي فجيت حلجي ما توقعت هالسؤال ع طول طالعت مطر الي ابتسم و جنه عيبه شكلي و انا منحرجه .. يدوه : وصمخ .. قلتها ابسرعه : لا بعددني يدوه اتكلم مطر : عيل يمه حبيبي يوم بتحمل ودها بعيد عن بيت ابوك ..ترا بسون فيها شرات حرمة طارق هاي عزه شيطانه الله اكبر عليها .. مطر يطالعني بنظرات احرجتني : ما يهمج بحطها في عيوني ضربتني منيره و قالت : هاه صدقتي يوم اقولج يحبج و يباج تغيرت ملامح مطر : شو السالفه .. منيره : البارحه اتصلت فيني اتصيح قاطعتها ترجيتها : منيره بس خلااص منيره : لا علشان اتعرفين ان مطر يحبج و يباج طالعت مطر بنظرات خوف و هو طالعني بنظرات حده .. بس نقزنا يوم يدوه ضربت مطر بعصاتها : ايه انته مطر و اعيونه علي : هاه فديتج ..امريني التفت لمنيره اطالعها بنظرات رجاء انها اتصخ ... يدوه : شو مسوي بحرمتك يتيمه هاي محد لها بالدنيا مطر يبوس راس يدوته : ماشي فديتج ... منيره واقفه: بروح احطلكم شي تاكلونه مطر : لا لا مروحين نحن ....يلا يدوه يدووه تتجتف جنها ياهل : قلتلك خوز عن ويهي تباني تعال زورني هني تجرب منها و قال بنبره و جنها تهديد : ترا بشلج ..صدقيني اسالي ميثه شو سويت فيها اليوم انحرجت منه تتعليقه يدوه : زين باجر بيي يالله .. مطر : وعد يدوه : هي يالله طوووف منيره : ما كلتوا شي زخني مطر من ايدي : مره ثانيه . ظهرنا و قبل ما نطلع من البيت لصقني باليدار ع طول قلت : شوه سالني بعصبيه : شو قايله حق مينره |
|
|
#93 |
|
|
رد: رواية انا حر ما انهان والحر ما يرجع لشخص يهينه
دق قلبي بقوه حسيت انه بيسمع صوته تميت اطالعه نظراته خوفتي هزني : بتسكتين وايد
قلته بعذاب : انته معذبني و كارهني بعد تبا تحرمني من اني افضفض ويا أي حد رص علي و قال : ما اسمحلج ترمسين بشي يخص حياتنا كم مره نبهتج ؟؟ تعانديني شو صديت عنه و سكت ما كان عندي أي رد كنت احارب عبراتي انها اتهل .. تجرب مني و قال بصوت واطي : سمعتيني تميت صاده عنه و قلته مستسلمه : سمعتك .. عدل بوقفته و امرني : يلا طوفي .. انقهرت بداخلي حسيت اني بموت باي لحظه من غيضي بس سكت عنه ..نزلني. قبل ما اصكر الباب قال : مشكوره طالعته فكمل: لانج رحتي المستشفى ذكرته : بالغصب ..و جوف كيف عصبت علي .. مطر : المهم سرتي و سويتي الواجب قلته : العفو .. صكرت باب السياره رحت داخل قبل ما ادش جفته واقف يطالعني دشيت و صكرت باب الحوي ..تذكرت اني ابا اقوله يشتري لي موبايل و يظهر لي بطاقه لاني ما صارت .. رجعت و فجيت الباب جفته اختفى .. حسيت بخيبة امل ..رجعت و صكرت البا ب ... سمعت صوت سياره .. رديت فتحت الباب كان ع بالي مطر .. بس جفت لونها حمره فرديت ع طول صكرت الباب و يلست اوايق .. منو ها .؟؟ تميت السياره واقفه فتره .. عقدت حياتي ؟؟ رفعت اجتوفي و ما اهتميت كنت بصكر الباب بس ياني فضول .. فوقفت اوايق .. حسيت بملل طولت محد نزل منها وهي واقفه ابمكانها ؟ اخيرا قررت اني اصكر الباب شكله واحد مضيع الدرب ..بس تيبست ابمكاني و جنه حد صب لي ماي بارد يوم جفت عزه تنزل من السياره بسرعه و تركض صوب الباب ما عرفت شسوي حاولت اهرب بس ما يتني فرصه بس وقفت عزه يوم زقرها الي بسياره ردت صوبه بسرعه بطلت اعيوني منو ها الشيبه .. الي راكبه وياه عزوه .. و عطاها موبايلها جنه نسته ..هني انا كنت بربع داخل بس عزه فتحت و دعمتني فطحت عالارض و طاحت فوقي ... صرخت عزه متفاجأه من وجودي ووقفت ابسرعه اتوااايق برع و صكرت الباب .. اما انا وقفت مرتبكه و خايفه عزه راكبه ويا منوه ؟؟؟ عزه مرتبكه : انتي شو اتسوين واقفه هني ...؟؟ سالتها بغرابه : منو هاه ؟؟ عزه حرجت علي : منوه .. قلتها : تسأليني انا .. انا جفتج نازله من سياره شيبه منو هاه .. عزه اتصارخ علي : ما يخصج ..لا تدخلين نقزنا انا و عزه يوم سمعنا حس سعود من ورانا : لا اتصارخين ع شيختج طالعتني عزه بنظرات توسل جنها ما تباني ارمس .. طبعا شو تباني اقول حق اهلها .. انا مالي خص فيها .. عزه بصوت خايف : محد رمسك تجرب منا سعود ... شكله با يضارب فزخيته من ذراعه : سعود دخيلك ربعت عزه داخل يوم جافتني منعت سعود سعود محرج: الحينه بتقول حق ريلج اني انا ادافع عنج ... ترجيته : سعود بسك مشاكل مب ملاححظ انك قمت اتسوي مشاكل سعود بنبره اسف: علشان جي انتي لابستني صح عطيته ظهري و تحركت داخل رايحه صوب حجرتي لحقني سعود : ميثه قلته : يوم بتعقل برمسك سعود : زين وعد وعد التفت له : وعد شوه ؟؟ سعود : شدراني علشان اترمسيني عقدت حياتي بس بعدني مب مستوعبه موقفي ويا عزه قلته : تستهبل علي سعود سعود جنه بريء : شو تبين بسويه بس لا تزعلين علي ابتسمت له : زين انك ما اتسوي مشاكل سعود : انا مظلوم و الله غمضني بس قلت : تحمل بس لا اتسوي مشاكل يا اخي طنشهم سعود : زين اوعدج ما اسوي مشاكل قلته : الحينه خلااص سامحتك سعود : زين عزوه ليش اتصارخ عليج من شويه تبين ادبها لج عليت صوتي و حطيت ايدي بوسطي : سعووووووووووود ..انت موليه ما بتتغير صديت عنه لحقني ووقف بويهي : اسف اسف و الله اسف ضحكت : هههههههههههه زين ..يأذن المغرب ..بروح اصلي سعود : بروح اصكر بيت الحمام قلته : قبل روح صلي سعود : عقب لاحق ع الصلاه سالته : سعود انته اتصلي سعود مرتبك : مرات في البيت .. ما يخلوني اروح برع اتجوفين مطر يمنعني دوم قلته : زين روح المسيد الحينه ...ما حد بيقولك شي .. سعود : لا ما فيني .. قلته : سعود روح صلي و اذا حد قالك شي خله يحاسبني سعود طالعني مستغرب عقب قال : زين بروح اصلي و برد ع طول .. ابتسمت : اوكى سعود وايد طيب محد يعرف كبر قلبه حتى امه ..ربي يحفظه و يخليه لو عندي اخت صغيره جنه زوجته له .. ربع سعود داخل الفله يبدل ملابسه علشان يلحق للصلاه اما انا رحت حجرتي و صليت .. بس صورة عزه و الشيبه ما راحت عني شكله يلوع بالجبد منو هاه ..يمكن ابو ربيعتها ..بس بروحهم بالسياره .. ووقفتهم فتره طويله عدال باب البيت ... عفاني الله ..الله يستر علينا ..ظهرت من حجرتي رايحه الصاله .. كانت فاضية البيت هدوء محد فيه ... رحت المطبخ ياني خاطر اطبخ اليوم و اسوي عشى .. و كثرت الكميه لان قوم طارق و حرمته بظهرون من لمستشفى اليوم ...استانست من زمان ما طبخت زقرت الشغاله و قلتها : تعالي يندي ع النار عقب شويه هزت لي راسها .. ظهرت من المطبخ جفت مطر ابويهي ... وقفت سالني : دورت عليج بكل مكان ؟؟ ابتسمت له : سويت لكم عشى .. افتر رايح صوب الحجره لحقته سمعته يقول: زين سويتي ابا اكل أي شي و ارقد تعبان مب راقده من امس مواصل غمضني قلته : زين صلي العشى و ارقد مطر : زين حشرتينا "طالعني " شو تتحريني ياهل انا كل شويه صلي و صلي ... سكت عنه ..شويه و قلته : بروح اسبح ... يلس ع الكنبه يجلب قنوات التلفزيون ... عقب ما ظهرت من الحمام .. جفته مش موجود .. احترت اخبره عن عزه ولا اسكت و اشيل ايدي من الموضوع ... اخرتها خفت لـ كل شي ينجلب ضدي فقررت اني اسكت احسن لي ... عقب ما لبست و خلصت .. رحت الصاله سمعتهم محتشرين الظظاهر قوم طارق ظهروا من المستشفى ...دشيت الصاله جفت سعود و عزه و ام مطر و طارق و منيره و حتى مطر كان يالس وياهم .. سلمت عليهم .. عزه من جافتني حسيتها ارتبكت و تحولت ملامح ويها لخوف بس انا طنشتها بس نقزت ع طول : بروح حجرتي .. ام مطر: ما شاء الله مسويه عشى اليوم ابتسمت : هي قلت اسوي لكم طارق : ما كان لازم اتعبين روحج كنت بيب عشى من برع .. منيره : ما يحتاي ترا باجر بتسوي لنا غدا شو بعد ام مطر تتمصخر : ترا ها ي لغاليه الي ما يستغنى عنها ... التفت لا ارادي صوب مطر جفته يطالعني بنظرات صديت عنه ووقفت : بخبر الشغاله اتحطي العشى .. منيره : يلسي يلسي خبرناها ...ما تبين هالحشره ؟؟ ابتسمت خذت عنها بدر : يحليله "بسته ع خده جفته يتنقز مستانس ." منيره : غريبه ما صاح عندج سعود : ميثه طيبه كل حد يحبها .. طالعت سعود و ابتسمت له منيره : دام سعود ما غيره الي قال هاي الرمسه يعني صج انتي طيبه .. سمعت مطر يقول : انت وينك لمغرب يت البيت ما جفتك سعود : رحت لمسيد اصلي مطر بعصبيه : علي هاي الرمسه .. ام مطر: خله شو تباه ..قالك راح المسيد .. نفتك من حشره العيوز انتييي انته ... مطر : باجر بتيي العيوز ..ابشرج .. ام مطر : يا شينه من خبر .. وقف طارق : بروح اججوف عايشه يمكن تبا شي ام مطر : تعال اقعد طارق طارق : امايه تعبانه البنيه خلني اتطمن عليها .. ام مطر : منيره روحي طالعيها ... وقفت منيره : بالمره بسلم عليها .. عيبه طارق شخصته ضعيفه واايد .. ام مطر : الحينه دام طاح الولد طلقها .. طارق : شو اتقولين امايه هذي حرمتي .. ام مطر: انت نسيت شو سوت لنا من مشاكل .. حتى الحينه ياييبينها بالغصب البيت ما تباك البنيه خلااص .. ما عيبني الكلام وقفت ع طول رايحه حجرتي وخذت معاي بدر ما ابا اسمع زياده .. بس وقفت عند باب الصاله يوم مطر قال : صدق هي ما تباك ..؟؟ طارق بصوت حزين : ليش منو قالكم انها ما تباني هي اتحبني .. سعود : انا اقول بعد طلقها .. طالعت سعود بنظرات و ظهرت من الصاله .. ليش جي صح عايشه نفسها خاايسه بس طارق يحبها حرام عليهم....بس اللوم عليه لانه ما يتمسك ب |
|
|
#94 |
|
|
رد: رواية انا حر ما انهان والحر ما يرجع لشخص يهينه
عليهم....بس اللوم عليه لانه ما يتمسك بقرارته ...
دشيت حجرتي و شايله معي بدر .. سدحته جريب مني ع الشبريه ويلست الاعبه ..استانست منه حتى يتني منيره و رحنا نتعشى عقب ظهرت مع مطر و رحنا حجرتنا انسدح ع الشبريه شكله كان تعبان و اعيونه محمره.. يلست جريب منه و قلته : اعيونك محمره بس شكله كان في عالم ثاني ..تجربت منه و همست : مطر .. التفت لي و قال : اتصوري طارق يطلق عايشه قلته ابسرعه : عايشه صح ما تنطاق بس حرام طارق يحبها مدري ليش انفعل و قال : لا تخرطين رمسه رفعت حياتي مستغربه من ردت فعله : ها الي اجوفه .. ابتسم : انتي ما اتعرفين شو بيصير يوم بطلقها طارق سالته : شو بيصير يعني ؟؟ انجلب الصوب الثاني و تغطى و قال : عقب بتعرفين ...بندي الليت خليني ارقد باجر علي دوام لصقت فيه و قلته : مطر قال من غير ما يلتفت لي : شو بغيتي قلته : ابا موبايل و بطاقة قال : دو ولا اتصالات قلته : ابا اتصالات .. التفت صوبي و قال يتمصخر : نوكيا ولا سوني اركسون طنشت و فكرت : اممممممممممم نوكيا ارساله اقوى.. طالعني فتره ابتسمت له عقب قال : زين تبين رقم ازقرت شرات رقمي ابتسمت مستانسه و هزت راسي و قلته : بس اخر رقمين مختلفين ابتسم عقب ضحك بصوت عالي : هههههههههههههههههههه دزيته بدلع : مطرررررررر ارمس جد مطر : يا بوي وشلج اني انت باخر رقيمين مختلف قلته : زين ابرايه أي رقم المهم ابا موبايل مطر : شو تبين فيه قلته : احتاجه ..ارمسك و ارمس منور و عموه كمل عني : و سعود و طارق و مب بعيده فهد و غيره وقفت محرجه منه شو يتحراني مب متربيه ارمس فهد ولا غيره بس زخني من ايدي حاولت ايير ايدي منه قلته بعصبيه : هدني .. يييرني صوبه فنسدحت ع الشبريه خفت منه يوم عفد فوقي و قال بخشونه : حق شو تبين الموبايل حبست انفاسي و تميت اطالعه بنظرات خوف مطر : شو تبين فيه قلته : احتاجه صرخ علي : صار لج فتره ما عندج موبايل شو الي تغير الحينه ولا يوم سمعتي حس وليد قلته بصوت واطي : ابا اتكلم مع اهلي غمضت اعيوني يوم صرخ : اهلج متبرين منج محد يباج افهمي ما تحملت كلماته الجاسيه صحت بصوت عالي قلته : انا اباهم غطيت ويهي بيدي احمي نفسي يوم تجرب مني ع بالي بضربني بس قال بقسوه : و انا اباج لي وحدي زخ ايدين الاثنينه و رص عليهم و كمل : لي وحدي تفهمين عليت صوتي و قلته و انا اصيح: انا ما اباك انت تعذبني شهقت يوم ييرني من ايديني ووقفني دزني لورا الين ما لصقت باليدار و قلته بخوف: انت مينون مطر بنبره جافه : توج تدرين من خوفي ما رمت اطالعه نزلت نظري بالارض بس هو زخني من لحيتي و اجببرني اجوفه و قال لي باصرار : ما اباج تجوفين بها العالم كله الا مطر مطر و بس ارتجف يوم حسيت نبره التملك فيه هزني : سمعتي ؟؟ سكت ما رديت عليه مدري كيف انجلب مره وحده هزني بقوه حسيت اعظامي تكسر : سمعتي صحت : هيييييييي سمعتك فج عني ابتعد و راح بند ليت الحجره عقب راح صوب الشبريه و ذكرني : لا تحلمين بالموبايل خلج جي غبيه و متخلفه شرات اول ما عرفتج .. يلست ابمكاني عالارض حضنت نفسي اخفف عن نفسي انا غبيه و متخلفه .. انا بلا اخلاق .. ما جاف اخته اليوم نازله من عند منوه ... مسحت دموعي ع ظهر كفي ..و طلعت من الحجره لاني حسيت مخنوقه .. يلست في الحوي .. سرحت بعالم ثانيه .. مطر يحبني ؟؟ يباني ؟؟ عيل ليش يباني اكون له بروحه ؟؟ عيل كيف يقول يحب غيري و بتزوج علي ..؟؟انا مب فاهمه هالانسان ....ولا عمري بفهمه ..؟ نقزت يوم انفج باب الحجره ياني صوت مطر : شسوين يالسه هني برع وقفت ابسرعه اطالعه فقال : تعالي دشي ارقدي .. طعته و انا بداخلي نيران اتشب في يوفي مب عارفه كيف اطفيها .. الظهر كان غير عن باجي الايام و البيت كان مربوش .. طارق كان مسوي عزيمه ..لـ سلامة عايشه .. كن متيمعين .. الرياااييل في الميلس و الحريم في الميلس الي داخل الصاله احلى ما في اليوم يدوه ردت البيت ..لاحظت عزوه كانت تتحاشني باستمرار ما تحط عيني بعيونها خطر ع بالي اخبر منيره بس بعدت الموضوع .. رحت المطبخ اعابل ويا ام مطر .و اعاونها كانت محتشره و متضايجه من طارق الا تباه يطلق عايشه .. سكت ابد ما علقت ما فيني اقول كلمه و ما اتعجبها عقب تنجلب علي ... ظهرت من المطبخ رايحه الصاله قبل ما ادش زقرني مطر دق قلبي ... التفت صوبه اشر لي بيده تخبلت عليه ولا جنه البارحه مضايجني ابسرعه انسى قسوته صوبي لان يمكن انا بعد اباه ...تجربت منه بلعت ريجي من بعد الي صار فليل ما جفته ولا رمسته .. مطر : شبلاج انا ما اكل ترا.. سكت مالي خاطر ارمسه .. حط ايده ع خدي و قال : انتي حاره ..محمومه شوه بعدت ايده عن خدي و قلته : لا بس مطر خلني بحالي مطر : اسف رفعت راسي اطالعه مستغربه اندوكم منو يعتذر مطر: البارحه كنت وايد جاسي عليج اعتذر لج .. خذت نفس و قلته : تعودت دزني بيبهتي ع الخفيف : يالله عاد لا تزودينها . قلته : انا ما اقدر افهمك زخني من اجتوفي و جربني صوبه : ها الي اباه ابا اخبل فيج تجربت منه اكثر و لصقت فيهه مستانسه من قربه ... سالني بصوت واطي و نظراته تحرقني : تبيني صح هزيت راسي بمعنى هي ..مدري شو بلاني جنه سحرني بنظراته .. شهقت نقزنا يوم ام مطر واقفه عند باب الصاله وقالت بصوت عالي : ايه انتوا انجلعوا حجرتكم تبون تفضحونا جدام المعازيم حسيت ويهي احترق بس مطر : هههههههههههههههههه ام مطر : و انا اقول وين راحت ميثه قلت بصوت واطي : مطر روح و الله اني مفتشله مطر : ام مطر دشي داخل عيب عليج اتراقبينا ام مطر : سود الله ويهك .... ما اتجوفك يدوتك الحينه بخبرها ..يمكن ترد بيت منيره و نفتك منهاا حاولت ابتعد عن مطر بس هو مصخها و لف ذراعه ع جتوفي و جربني منه حسيت اني بتخبل من قربه بس ما قدرت ابتعد اباه جريب مني طول العمر اول مره احس اني ابا مطر ابا قربه ابا ناره و ابا ظلمه ابا كل شي حلو و مر فيه مطر : ها عنااااااااااااااد يالله خبري العيوز تراها ما اتغار من ام اعيون رفعت راسي اترجاه: مطر دخيلك بلا هالحركات مطر بنفس نبره صوتي : انتي جب .. ترجيته : لاتحرجني بعد انفتح باب الصاله و كانت عايشه تزقر الشغاله بس يوم جافتني انا و مطر بها الموقف ردت دشت ع طول داخل و صكرت باب الصاله بقوه ام مطر : يعل ايدج الكسر .. "ودشت المطبخ " ابتعد عني مطر ابسرعه مدري ليش استوا رسمي و جاد قلته و انا بعدني متلومه منه : اتحب تحرجني دوم ابتسم ابتسامه باهته و قال : كنت ابا اغايض الوالده ..يلا روحي دشي داخل .. و عطاني ظهره و راح ... شبلاه ؟؟ شو صار ؟؟ اتلوم من عايشه ؟؟ هزيت اجتوفي الي شاغل بالي المشاعر الخاينه الي حسيت فيها من شويه ويا مطر ... رحت الصاله و يلست ويا الحريم كنت منحرجه بس يوم جفت عايشه محد ارتحت .. منيره : بلاج محمره شو بلاج ؟؟ يلست جريب منها و قلتها بارتباك : ماشي .. ساسرتني : كنتي عند مطر زخيت ايدها و رصيت عليها دزتني منيره و قالت : راعيه حركات انتي هههههههههههه حطينا الغدا و يلسنا نتغدا و طبعا ضرابة ام مطر و يدوه كانت ماخذه الجو كله ... عايشه طوال الوقت كانت معصبه و محرجه و منتفخه موليه ما ترمس ...غمضتني يمكن لانها عرفت ان اهل طارق يبون يطلقونها منها ..و كانت كل اتطالعني بنظرات بس مدري ليش تطالعني جي .. عقب الغدا فكرت اروح حجرتي ارتاح ...شويه ..و يمكن الاقي مطر هناك بعد بالحجره .. ما حسيت بعايشه لحقتني لـ برع كنت متعاطفه وياها بسبب الظروف الي مرت فيها طالعتها : بغيتي شي عايشه : ابا ارمسج بموضوع قلتها : قولي ؟؟ عايشه : ما ابا حد يسمعنا عقدت حياتي فقالت : تعالي انروح فوق سالتها : فوق وين ؟؟ عايشه : السطح .. ما ابى حد يسمع رمستنا ما اترييت جوابي زختني من ايدي وودتني صوب الدري الي يوصلنا السطح ...!!!!عمر الفرح والألـــــــــــم..ما يستمر طول الابـــــــد..والحظ لو مهما قعــــــــد ...ما دامت الدنيا لحـــــــــد |
|
|
#95 |
|
|
رد: رواية انا حر ما انهان والحر ما يرجع لشخص يهينه
الجـــــــــــــــــــــزء السـادس و العشــــــــــــــــــرين
اخيرا وضحة الصورة .. و بانت لعبة الايام ...يا قلبي خلها مستورة .. خلااص اصحى من الاوهام .. قبل ما نركب قلتها : اترومين تركبين توج ظاهره من المستشفى .. قالت بغيض و جن صبرها نفذ : هي اقدر تعالي انتي بسرعه .. ركبت معاها مدري ليش قلبي ما كان مرتاح بس طنشت و قلت يمكن محتاجه اكلمها لان الكل بهل البيت واقف ضدها ... لفحني الهواء ع خدي .. رغم حزة الظهر الا ان الجو كان حلو ...رفعت راسي مستانسه ع الجو بس وقفت يوم وقفت عايشه و جابلتني ويه بويه سالتها : اتكلمي اسمعج ... تمت اطالعني و انا اطالعها جنها اول مره اتشوفني .. هزيت راسي مستغربه : شو فيج ..؟؟ سالتني : شو تتوقعين اباج ؟؟ هزيت اجتوفي و قلتها : ما اعرف قالت : لا اتعرفين بس احسج تستهبلين علي وايد .. قلتها بصدق : في بالي شي واحد قالت ابسرعه : شو ؟؟؟ سكت بس هي اصرت : يلا قولي شو في بالج قلتها : انتي غريبه قالت ولا جني رمستها : شو في بالج ؟؟؟ بلعت ريجي و قلتها : اهل ريلج يبون يطلقونج من طارق صخت اطالعني عقب ابتسمت : ها الخبر جديم بلعت ريجي و قلتها : بس طارق معاندهم .."ابتسمت اطمنها " لا تضايجين طارق متمسك فيج و اشك انه بيوقف ضد اهله علشانج رفعت حياتها : و من قالج ابا طارق يتمسك فيني .. طالعتها مستغربه و كملت : انا ما ابا طارق .."سكتت شويه و قالت " انا ابا مطر رديت لورا لا ارادي اتهيأ لي اني سمعت مطر ولا هي صج قالت مطر .. دارت الدنيا فيني بس يودت روحي كملت بوقاحه : انتي فرقتيني عن مطر ... انا و مطر ننحب بعض ما كنت ابا اسمعها عايشه استخفت من اجهضت ولا تتكلم جد ... عطيتها ظهري كنت ابا اروح حجرتي اتم ابروحي .. ما اتحمل خلااص ... كل يوم حد يطري لي سالفه عايشه و مطر .. زختني من اجتوفي : تعالي ما خلصنا كلامنا افتريت صوبها و قلتها باحتقار : شو تبين تقولين اكثر ما سدج حسيت بها بتصيح : انا و مطر نحب بعض و ما تزوجج الا علشان يبعد شك طارق و امه عن حبنا غضمت اعيوني بعذاب صح صح مطر كذا مره يلمح لي بس ما كنت افهم قصده .. قلتها و انا بعدني مغمضه اعيوني : هديني مب طايقتنج ... بس هي رصت ع اجتوفي و قالت : لا بتسمعين كل كلمه في خاطري فتحت اعيوني اطالعها و قلتها : انتي ما تستحين ع ويهج ... عايشه بدت تهاجمني : قولي الي بتقولينه عني انا خلااص ما اتحمل قرب مطر منج يوم جفتكم من ساعه في الحوي كنت بتخبل تذكرت امس فقلت : علشان جي صحتي البارحه في لمستشفى بكل وقاحه قالت : هي ما اطيقه اجوفه قربج ... لاعت جبدي منها و الله لو رجعت برجع بويهاا.. لان هاي الانسان وايد وصخه ماشي فرق بينها و بين الحقاره و الزباله قلتها بكل احتقار : و الله انج ما تستاهلين طارق ..هالانسان صدق شيخج .. قالت بكل جرأه : دام عايبنج طارق خذيه شو تبين في مطر .. ارتجفت من الغيض من كلامها الي كان شرات لسعة نار حرقتني ...افكارها وصخه ..رفعت ايدي و عطيتها كف من الخاطر و يا ليته بردت النار الي شبت في قلبي ..ما توقعت ردت فعلي لانها صرخت متألمه و حطت ايدها ع خدها ...يودت روحي من اتفل عليها بس انا ما اوصخ روحي بوحده شراتها افتريت عنها كنت بنزل بس لحقتني و زختني من شيلتي و قالت بعصبيه : تعالي ما خلصت كلامي حاولت ايير شيلتي بس ما قدرت لاني كنت بموقف الاضعف ... دزتني لليدار وواجهتني و قالت : مطر ما يحبج افهمي صرخت عليها : وخري عن دربي .. عايشه بانفعال : مطر يحبني و انتي فرقتي من بينا .. قلتها بنبره هاديه اغايضها : يوم مطر بيقول ابعد عن دروبه هذيج الساعه ببعد .. عايشه و جنه استفزتها نبره صوتي دزتني مره بقوه ع ليدار و قالت : تدرين انه ما بقولج قلتها بنفس النبره اغايضها : لانه يحبني و يباني "واشرت ع روحي " انـــــــــــــــــــــــا حسيت ان عايشه فولت زختني من اجتوفي و حاولت ادزني عرفت انها اتبا اتفرني من فوق السطح طالعتها بخوف يوم جفت شيطان الغيره بعيونها قلتها بخوف : يا المينونه بطيح حاولت اتمسك بها بس هي كانت تبعدني عنها تبا اتدزني و صرخت علي : هدي مطر ودريه.... صديت لورا دارت الدنيا فيني يوم جفت الارض رديت اطالعها بس هي كانت مصره : ودري مطر ودزتني اكثر غمضت اعيوني و قلت : عايشه اعقلي عايشه معانده : لا ودري مطر حسيت صج بطيح حاولت ابعدها عني بس ما قدرت عنبوه توها ظاهره من المستشفى و جي قوتها حاولت ادزها بس ما قدرت كنت بصيح بس يودت روحي هزتني و كأني خلااص بطيح : بتودرين مطر ما عرفت شو اقولها اسكتها و اقولها هي خلااص بودره و هو فعلا انا شو ابا بمطر اذا صج الي يباها عايشه ما جذبت دوم يقول بتزوج الي احبها ..يعني طلعت عايشه .. حسيت بطعم الخيانه و الغدر .. حسيت بألم بصدري ..شسوي شو الحل فتحت اعيوني اصرخ يوم هزتني حسيت خلااص اني بطيح باي لحظه علشان جي سكت ما رديت عليها هي اتقول بهستيريه : ودري مطر ودرييييييييييييييييييه .. نقزنا انا و عايشه يوم سمعنا حس مطر : عايشه صحت من جفت مطر بس هي كانت بتفرني تحت عفد صوبنا مطر و دزها بعيد ما صدقت مطر جريب مني دفنت ويهي بصدره اصيح و ارتجف من الخوف و صدق حسيت بالامان يوم لوى عليه حتى عايشه من جافت مطر صاحت مطر يسكتني : انتي بخير هزيت راسي بمعنى هي و قلته : كانت بتفرني المينونه عايشه اتصيح : ليش تبا اتزيد عذابي مطر : مب بهاي الطريقه نحن ما اتفجنا جي عايشه بغيض اول مره اخاف من شكل ويها : ما اتحمل اكثر ..تعبت خلااص و يلست اطالعني باحتقار و جنها بتجتلني ارتجفت فحطيت راسي ع صدر مطر قلته اترجاه : خلنا ننزل عايشه تجدمت منا : مطر انت خلااص ما تقدر تستغنى عنها مطر : عايشه بس عاد مب وقته عايشه : قولها كيف علاقتنا كبيره شهقت هاي ما تستحي يا ليتها بعد مب معرسه مطر يرني صوبه : يلا ميثه انروح حسيت براحه كنت متاكده ان مطر ما بتخلى عني و ان مطر عقله مب صغير يربع ورا هاي الي مب متربيه ... بس عايشه وقفت بطريجنا قلت حق مطر : خبر عليها زوجها بس مطر طنشني و عايشه بعد عايشه : الحينه تختار بيني و بينها مطر جنه يكتم غيضه : بس عايشه مب وقته عايشه معانده : لا تباني ولا ما تباني خبرها تراها مب مصدقه .. رصيت ع ايد مطر بس مطر تم جامد ابمكانه و قال : عايشه انزلي يلا عايشه معانده : تباني ولا لاء خوفتني ملامح مطر الجامده ما اعرف شو يدور في باله .. عايشه و جنها بتصيح : تباني ولا لاء ..قول ليش سكت مطر بصوت واطي : بس عايشه عايشه : لا قولها انك تحبني قولها ولا خايف منها قلت : مطر خلنا ننزل عايشه : ليش خايفه من انه يسمعج قلتها : من شو اخاف انتي وحده مريضه ..مطر يباني و انا اباه مطر بنبره جاده : لا ميثه انا ما اصبر عن عايشه حسيت جنه حد صفعني ع ويهي ..حسيت بالم بجرح كبير في قلبي ..ييرت ايدي من حضن ايده و طالعت عايشه جفتها تبتسم بانتصار بس مطر ما سده السجاجين الي طعني فيها بقلبي ما سده لانه كمل و قال ببطيء : و انا ناوي ارتبط فيها .. رجعت وخاطري مطعون يحر الجرح لما يكون على ايدك يا اغلى الناس نزلت راسي بالارض عيل ليش تزوجتني .. شو تبا فيني ...ليش تبا اتضرني ..انا بشو ضريتك .. عمري ما بنسى لك هالموقف يا مطر ..احتقرتهم اثنينتهم حسيت بثجل بريولي و انسحبت يلست ايير ريولي بالصعوبه مدري كيف وصلت حجرتي قفلت علي الباب و انا بداخلي مجروحه مهمومه .. شسوي اصيح ..؟؟ شو الي بتغير ؟؟ من تزوجته و بالاول الايام و هو محتشر علي ..احب غيرج و بتزوج غيرج .. حضنت لمخده و صحت بصوت عالي جني ياهل .. يلست اصيح منهاره ..مب علشان مطر يحب غيري ..علشان كرامتي الي هانها جدام عايشه .. كانت بتذبحني ..بس علشان اودر مطر .. حلال عليج اشبعي فيه مسحت دموعي حسيت بالتعب من كثر ما اصيح .. تنهدت بعذاب حاولت ارقد بس متى العيون المتعبات يغمض لها جفن .. حسيت راسي بنفجر ...نشيت من مكاني و رحت الحمام اتغسلت ..و كأن الموقف الي مر علي جنه كان حلم ... بس صدق انا غبيه ..كل شي واضح .. و عزه و مطر و تصرفات عايشه و تنغيزاتها كلها اتلمح انهم يحبون بعض يحبون بعض عضيت ع شفايفي امنع دموعي اتهل .. و كان عقلي رافض الفكره علشان جي كنت اتجاهل .. بس اليوم كل شي وضح .. حسيت اني انا و طارق ضحية خيانه ...تنهدت بعذاب .. شو الي يهم الحينه ..مطر من اولها قال انه يحب غيري حق شو اصيح و اتعب روحي ... رحت صوب المنظره .. بلعت ريجي شكل ويهي فضيع ..كيف برد اطلع لهم ما اقدر ملامح ويهي فضيعه .. سمعت اصوات برع ربعت الحمام و قفلت علي الباب بسرعه .. ما لي خاطر اجابل ويهه ابد .. يضربني و خذ عني بيت ابوي و فوق هاه كله امبهدلني شهقت امنع دموعي اتهل مره ثانيه حسيت انه سمع شهقتي نقزت يوم جفت مقبض الباب يتحرك ... ياني صوته : ميثه ما رديت عليه حسيت اني بحياتي ما كرهت انسان كثر ما كرهت هالمطر ... دق الباب : افتحيي قلته بكل غيض : انجلع صخ شويه عقب قال : افتحي بكسر الباب ترا قلته بسرعه : اكسره شو تبا فيني ..يا ال .. مطر تم يحرك مقبض الباب بقوه : افتحي اقولج صرخت و يلست اتناقز و اصيح يوم تذكرت الموقف : انجلع من ويهي انجلع ... يلست اصيح بصوت عالي ...يلست فتره طويله في الحمام ما اعرف كم من مده .. عقب حسيت اني بختنق ..و مب رايمه اتنفس علشان جي ظهرت من الحمام ... كانت الغرفه فاضيه .. ارتحت يوم جفته محد .. يلست اتسحب لين ما وصلت شبريتي ... غمضت اعيوني .. حسيت ابروده ..خفت لا امرض .. يلست ادور لي ادول بين الادراج .. خذت لي حبتين .. و غمضت اعيوني .. سمعت صوت من ورا الدريشه الي ورا شبريتي .. مدري ليش تذككرت الليالي الي مرت علي يوم كنت اسمع اصوات .. غريزتي قالت لي انها عايشه و لان اليوم الي ترقدت فيه بالمستشفى ابد محد روعني ... غمضت اعيوني يوم سمعت ضربه مره ثانيه طنشت كنت بايعه الدنيا و ما فيها ... شو بيصير فيني بعد اكثر ما صار لي بس رديت و فجيت اعيوني يوم سمعت حس سعود يزرقرني : ميثه اني راقده ..؟؟ عضيت ع شفايفي حتى سعود يعرف بس ما بغى يقول لي حضنت المخده و دفنت نفسي تحت اللحاف و يلست اصيح بصوت عالي ..متألمه ... نشيت عقب نص ساعه متروعه .. حسيت بروحي بطيح بحفره ...يلست ابسرعه ... بعده حزة العصر ... نشيت من مكاني مب عارفه شسوي ولا وين اروح .. رديت الحمام تغسلت و طلعت فكرت اطلع من الحجره ما ابا اتم بهاي الحجره ... شليت البودره علشان اخفي الحزن الي ظاهر بملامح ويهي بس ما اعرف استخدم هالسوالف .. انا اشكثر مشتريه مكياج ما استخدمته غير مره ويا منيره فريت البودره بعصبيه ... شليت شيلتي و طلعت من حجرتي ... صديت لا ارادي صوب قفص الحمام مال سعود من جافني سعود فر الي بيده و ربع صوبي .. صديت عنه الصوب الثاني و يلست ع عتبة باب حجرتي سعود : ميثه كنتي راقده ؟؟ ما رديت عليه تميت صاده قال باسف : زعلانه مني ؟؟ بعد ما رديت خفت اذا تكلمت بصيح ...فتميت ساكته ... |
