 |
  |
|
|
|
|
#156 |
|
|
رد: رواية انا حر ما انهان والحر ما يرجع لشخص يهينه
التفت صوبي ..حسيت الروح ردت فيني يوم جفته افتر صوبي ... ابتسمت له و اشرت بيدي و صحت ..طاحت اعيوني بعيون مطر كان يطالعني بنظرات غامضه ..حسيت متضايج وايد و شايل بخاطره مني ...جفت سعود تجدم صوبي بس مدري شو قاله مطر فتم واقف يطالعني و يطالع مطر ..
صحت متجاهله الشرطي .. : مطر لا اتسافر .. بس سمعت ندااء الطياره المسافرين لبرلين ...اظلمت الدنيا بويهي يوم عطني ظهري و دزه طارق و لحقهم فهد .. تم سعود يطالعني عقب لحقهم ... طحت ع رويلي احس الم في بطني ..احس بضربات عايشه ..احس بجرح بقلبي ..ضيعت مطر مني سافر من غير ما يودعني ..خلني انا وولدي بروحنا و سافر .. وليد : عموه قومي .. صحت بصوت عالي يوم سمعت حس طياره غيرها تطيرو جنها تذكرني ان مطر سافر خلااص و خسرته للابد بعد ما رفضته ... حسيت ردت حياتي العزوبية عقب ميثه ..كنت يالس في العزبه ويا ربعي ..اتامل العكاز الي صار ونيسي بها الحياة ... عقب الكرسي المتحرك .. و الحمدلله عقب التمرين الطبيعي صارت حياتي احسن ...جرح عزوه فيني بعده ..و ميثه عذابها يهون لكن عزه خلااص ماتت بالنسبه لنا .. و اذا في يوم فكرت ترجع ما بتلاقي اهلها ابد ...تنهدت يوم اجوف طلال يستخف دمه و فهد و زايد ميتين عليه من الضحك ..عدلت بيلستي ... فهد: تدرون ان عبود بدورة في بوظبي .. اشرت بيدي : احسن يمكن يتسنع .. طلال: شراتك تحيد عمرك كيف كنت و وين صرت .. طالعته بنظرات بس زايد قال : ايه طلال صخ .. زايد فاهمني ع باله كلام طلال ياثر فيني بس انا طنشت و صار عادي عندي لاني مب نادم اني ودرت الزقاير و الشرب و عايش حياتي من دون علاقات محرمه ..بس ميثه ما اعرف شو اخبارها الحينه عقب ما صدتني ..وودرتني تخلت عني وقت ما احتجتها ..الله يسامحج ما توقعتها منج نقزت يوم ضربني فهد ع جتوفي : وين سرحت قلته : انت متى ناوي اتعرس ؟ فهد مبطل اعيونه مب متوقع كلام: هاه طلال: جي ما تسالني نفس السؤال قلته: انت خديه منو الخبله الي بتوافق عليك .. يير عني العكااز كنت بطيح عالارض بس تساندت ع اليدار طلال: خخخخخخ اندوك خذه طالعته بنظرات اهدده : طلال عن اللعبان فهد يضحك :هههههههههه يالله بدا طلال الحينه .. طلال: منو بدا بالاول زايد : طلال عطه العكاز لا اكسر راسك طلال ياشر عليه : اندوك زين خذه مديت ايدي بس بعده عني و كنت بطيح مره ثانيه ضحكوا علي انقهرت منه قلته : اصطلب طلال ..و عطني العكاز و الله اكسر فيه ظهرك .. طلال يظهر لسانه : جان فيك خير ...ولو في لحيتك خير قام له فهد و يير عنه العكاز: جان فيك خير استريل عليه يوم بيرد شرات قبل ... زايد يطالعني بنظرات عقب قال : عندي لكم مكان انروح له شو رايكم انغير نفسية مطر قلته من دون نفس: مالي بارض اظهر من العزبه وقف زايد : انت قوم و الله ما تندم و بتشكرني .. طلال سبقنا : انا بروح وياكم .. طالعتها بنظرات غيض و قلته: مدري ليش ا نا وايد اتحملك طلال يبتسم : اتحبني فديتك .. فهد : خخخخخخخخخ حبك برص ظهرنا كلنا من العزبه و ركبنا سيارة زايد الاستيشن ...استانست يوم زايد شغل المسجل ع اغنيه حربي العامري ..كنت اطالع طلال الخديه يوم يضحك و يصفق ارتبش ع طول ..حتى زايد قلته: انتبه ع الشارع هاه طلال: ايوه عاشو عاشو .. حتى فهد شل غتره من ع راسه و قعد يخترش ..ضحكت عليهم احس من زمان ما ارتبشنا جي ولا تيمعنا جي .. يوم جفت زايد مرتبش : قلته انت تذكر وين المكان الي بتاخذه لنا .. هز راسه و قال : بأدب لك طلال .. طالعته و ابتسمت ..له ..كان الصوت عالي جنا ردينا مراهقين .. اخرتها طالعت زايد بنظرات يوم دشينا حديقه صقر قلته : الحينه هالمكان بغير نفسيتي هز راسه بمعنى هي طلال : ايه شو اتسوي هني ... فهد : ماشي زحمه ..خلونا نرتبش شويه طالعت زايد : ولا جنك ريال و صار عندك حرمه وولد زايد يضحك: ههههههههههه الدنيا حلوه ... نزلنا من السياره ... خذت نفس طويل يا سلااام الجو حلو و الطبيعه احلى بوايد .. قلت حق زايد: مدري بتييبني هني جان يبت ويانا سعود زايد: و الله توه خطرت ع بالي الفكره ... ما قدرت امشي وايد بالعكاز حسيت ا ني تعبت في البداية تألمت وايد يوم اطالع نظرات الناس لي بس عقب يوم تذكرت اني ودرت الكرسي المتحرك ها اهون بوايد ...بس ابصراحه حسيت بمتعه .. ضحكت وايد ع ضرابه فهد و طلال الخبله ... شرينا ايس كريم .. حسيت رديت ولد عشر سنين .. ابتعدت عنهم قعد ع الكرسي ..اطالع اليهالو يوم يلعبون .. اكيد ميثه بطنها صار عود الحينه .. تنهدت اتذكر يوم جفتها في المطار ..فديتها ...رغم اني اعتذرت و عرفت اني مظلوم بعد رفضت اتيي معاي طرشت لها اشكثر ما يتني كنت اترياها ع نار نقزت يوم دقني زايد: ارحم عمرك .. نزلت نظري بالارض: شسوي ..زايد ما اعرف عنها شي .. زايد : اسال طارق يمكن يعرف شي ... تنهدت : اكيد يعرف ..بس انا ما ابا اعرف عنها شي خلااص لاعت جبدي و انا اعتذر لها و هي تصدني شسوي لها اكثر .. زايد : روح لها صديت الصوب الثاني : علشان تصدني بعد تظن انها بترضى فيني و انا بها العكاز عاتبني زايد: مطر ..حرمتك اكبر من هالافكار وايد .. طالعته و قلته : خلني بعيد احسن ..اخاف تشفق علي .. قاطعني: و باجر يوم بتربي ..؟؟شو بتسوي ؟؟ صخيت ما اعرف ..بس انا احيها ..بس كل مره اروح لها و اتصدني ..شسوي زايد يذكرني: بعدها حرمتك و انت معلقنها روح لها اذا ما تبيك خلااص ودرها و خلها اتشوف حياتها .. همست : ها الظاهر الي بسويه .. نقزت يوم جفت ويه زايد تخيس ايس كريم عصب زايد من طلال بس انا انفجرت ضحكت ع شكل ويهه نش زايد من مكانه و ربع يلحق طلال الي ركض و تعثر و طاح ع طول و يلس زايد يفرك ويهه بالايس كريم بكل غيض و طلال يصارخ .. فهد : خخخخخخخ اخييييييييج جنكم يهالوو .. افتر فهد صوبي : مطور جوف طلال كيف يزااعج شرات الحريم ههههههه بطلت حلجي كنت بنبه ان طلال بخيسه ايس كريم بس ما لحقت ..ونقز فهد و تم يمش الايس كريم من ع ويهه و هو متجزز ..انفجرت عليه من الضحك ههههههههههههههههههههههههههههه من زمان ما ضحكت جي ... فهد: انا اراويك ما عليه .. زايد : خيست كندروتي كيف جي اظهر الله يخسك .. اختفى فهد فجاه .. نشيت من مكاني ابتعدت عنهم و عن خبالهم ..افتريت لورا يوم جفت طلال يزاعج و فهود يلحق بالبيبسي و يرشه ..خيبه خيس ثيابه كلها بيبسي ..ياه زايد يربع صوبي قلته: ابوي خلكم بعيد عني ..جوفوا شكلكم و الله يفضح .. زايد : صبر شوف بسوي فيه بلعن خيره .. قلته: خله اجوفك استويت خبله شراته زايد: هي خبالي كله اليوم بطلعه .. قلته : ابا منال تجوف جي حالتك زايد: خخخخخخخ ما بدخلني البيت من تصالحت ويا اهلي و اهلها قامت تتغلى وايد مطر : ههههه خلها تجلع عينك زايد بنظرات : فديتها ما اتروم ع زعلي .. افترينا ورا يوم سمعنا فهد و طلال يزقرونا .. زايد : انا بلعب بهاي المريحانه منو بلعب معاي يلست ع اجرب كرسي و قلت : انا ما اروم فهد : انا انا بلعب احجز لي تذكره .. طلال: اممممم لا لا انا ما بلعب بحرس مطر بعد الريال تعبان .. زايد بنظرات : ها ها قول الا اتخااف ...اونك تحرس مطور ضحكت ههههههههههه اعرف ان طلال جبان ..بالقو فهد : لو انت ريال احجز تذكره و اركب الحينه طلال يقعد حذالي: ماشي مب لاعب زايد : تعال فهود ها دومه حرمه طلال محرج: ايخسي الا انت قلته: عيل تبا تحرسني هاه روح راويني قوتك طلال : الرجوله مب بالمريحانه فهود : ابوي زايد تعال بياذن المغرب تعال نلعب خله ها الحرمه .. طلال محرج: احجزوا لي انزين ..براويكم الحرمه .. زايد يرفع حياته لي ..ابتسم له .. يلست اراقبهم ... ركب زايد ووراه فهد و وراهم طلال .. طلال قبل ما تحرك المريحانه يقول الهندي : مافي يسوي وايد بس دقيقه فهود: ههههههههههه جبان زايد يوم تحركت المريحانه: طللول هههههههه علشان تتأدب يبتك هني يا الثور .. ضحكت عليهم ..فهود الخديه يلصق بزايد ..يضحكون بس طلال تم يزاعج متروع طلال: نزلووونييييييييييييييي رفيق وقف رفيييييييييييييق مطر: هههههههههههههههههههههههه فهود: رفيق زيد زيد ما في يوقف لووووووووووول طلال يصارخ : نزلوني بموووت نزلوني .. زايد: خخخخخخخخ تأدب ...يا القوي خخخخخخ طلال: مطور دخيلك خل الهندي يوقف راسي يدور بطيح بطييييييييييييح .. حسيت بروحي بنقع من الضحك و الله صار لي زماااااااااان ما ضحكت جي ...اول ما وقفت المريحانه ..نزل طلال ع طول يلحق زايد الي ربع بعيد ..و فهد تم يضحك حتى الهندي ميت ضحك ع طلال ..غمضني وايد خله زايد مصخره ... ظهرنا من الحديقه و طلال رابط راسه بالغتره اونه يعوره ..و كل حد قاله شي عصب و حرج .. عقب ما ظهرنا من المسيد ..شرينا لنا مشاوي علشان نتعشى ع البحر ...طلال ما طاع يتم ويانا قال بيروح البيت اونه مصدع من راسه و يحس بلوعه زايد : جفت مطور كيف ادبته لك .. قلته : يغمض يحليله .. فهود: خليه يولي باجر بييك شرات الحصان .. رن موبايل شليته كانت منور المتصله ...سمعتها اتصارخ خفت عليها وقفت ابسرعه متروع .. سالته : منور اهدي شو فيج ؟؟ فهد يطالعني رديت اطالعه و اقولها : شو السالفه ؟؟ليش اتزاعجين جي منيره اتزاعج: خلااص ما اروم اتحمل اخوك و حمود كل شويه يتضاربون و عبدالرحمن محد خذت نفس و انا ع بالي مستوي شي .. قلتها : زين اهدي ..وين سعود الحينه منيره شويه و بتصيح: شدراني ..و الله حتى يدوه يتها ضربه من دون قصد قلت : شوه شو صار فيها ؟؟ منيره باحباط: قاعده اتصيح مستويعه .. فهد يهزني : شسالفه؟ صكرت عن منيره عقب ما قلتها : خلي محمد يروح بيتهم و سعود بيي اخذه عقب شويه .. فهد : شبلااها حرمة اخوي ؟ قلته: سعود و محمد تضاربوا و يت الضربه حق يدوه و الحينه اتصيح مستويعه .. كتم ضحكته فهد طالعته ما قدر ايود روحه ضحكت فضحكت معااه ... فهد : هذيلا عمرهم ما بتصالحون .. يلست ابمكاني : لا عادي يا ما كفختك و هذا ها انت جدامي الحينه ضربني ع جتوفي : يا ريااال زايد : الظاهر محمد و سعود طالعين عليكم سكت .. مدري ليش تذكرت بليله ما التقيت بام اعيون كان نفس شيء ..كنت راد من السفر ..و اتصلت بي عزوه تضارب ويا سعود و الحينه منيره تتصل تشكي من سعود وحمود نقزت يوم ضربني زايد : فكر بكلامي قلته : أي كلام ذكرني : الي صار بالحديقه ..جرب و اذا ما صار خير ..انهي السالفه فهد : ايه لا ترمسون بالالغاز ... رن موبايلي مره ثاني جفت سعود رديت عليه : هلا سعود سعود : انا طفران من ها البيت .. انت محد و طارق من ملج بهاي السوده ودرني .. تنهدت قلته : تباني امر عليك انروح البيت صرخ: ما بدش البيت اذا ميثه ما ردت حذرته: لا اتصارخ .. سعود : انا طفرااان اووووف قلته: ميثه ما تبا ترجع سعود : تبا بس انت الي ما بغيت هذاك اليوم بالمطار ..ليش ما رديت لها يايتنك تربع مطر : اوكى ما عليه بمر عليك عقب اوكى سعود : زين يالله مع السلامه قلته : في امان الله ... وقفت ابسرعه ..رايح متخذ قراري الاخير ... فهد : وين رايح .. زايد يزقرني : مطر .. قلتهم: برجع .... ركبت السياره زايد : اتروم اتسوق اشرت له بيدي اني اقدر رحت صوب بيت ميثه ..ما انكر كنت خايف و ارتجف ...انها تصدني بس قلت هذي اخر مره افتك من حشره سعود و اجرب كلام زايد ...كانت الدنيا ظلاام ...و القمر منور في صفحة السما ..حتى النجوم كانت تبرق ..تفاءلت خير بها المنظر ... حطيت ايدي ع بطني ..ولدي يكبر يوم عن يوم في بطني ..و مطر ما عنده خبر عضيت ع شفايفي كل ما تذكرت كيف صدني في المطار قلبي يتقطع و ما اروم احبس دموعي ... تنهدت بعذاب .. رفعت راسي يوم يلست عدالي سلمى : الحينه لي متى بتمين جي همست : ما اعرف سلمى ..ما اعرف اذا كان بخير ولا لاء .. سلمى: طارق يقول قاطعتها : انا ما علي من كلاام طارق انا ابا اجوفه بعيوني اتاكد بروحي .. تنهدت سلمى: و تبين اسوي لج حدرت دموعي: حتى رجع من السفر ولا اتصل بي .. ولا سعود "طالعت سلمى" بس احسن علشان جي انا مرتاحه وايد سلمى تنطز : هي امبين وايد مرتاحه ... وقفت و قلتها : بتوصليني تاخر الوقت وايد سلمى: بس اتقولين وليد بتاخر الليله كيف بتمين بروحج هناك قلتها : الله معاي بتوصليني ولا اتصل بوليد وقفت ابسرعه : اووف عنيده بوصلج طوفي جدامي .. يوم عن يوم كنت احس حيلي ينهد بس الله يصبرني لين موعد الولاده .. سلمى : بتم وياج ؟؟ قلتها ابسرعه : ما يحتاي خالوه ابروحها بس بتصل بج .. ابتسمت لي : اوكى مع السلامه .. تحركت سلمى يوم دشيت و صكرت علي الباب ..كانت الدنيا ظلام حتى خفت ..ربعت ابسرعه وفجيت باب الصاله ... ندمت الف مره ليش ما قلت سلمى اتم وياي لي ما يرجع وليد من برع ... اتصلت حق وليد و قلته ايي بسرعه قالي دقايق و بيكون في البيت ارتحت .. رحت الحمام اتغسل ..اول ما ظهرت سمعت دقات ع باب الصاله .. ربعت بسرعه عبالي وليد بطلت الباب فجيت اعيوني ارتجف بها الوقت ما صدقت اعيوني ...كنت بصكر باب الصاله بس تهجمت علي عايشه كنت بصكره و اقفله بس غلبتني بعد هالمره قلتها و انا ارتجف : انتي شو تبين حطيت ايدها بوسطها كان شكل ويها فضيع : تحرين بخليج قلتها : مطر و خليته لج شو تبين بعد طالعت بطني عقب طالعتني رديت لورا حسيت بنواياها انسانه حقوده و عادي اتسوي أي شي بسبب غيرتها عايشه: كنت اراقبج كل يوم ..حتى ها الملعون الي وياج ما يودرج لحظه لكن الحينه محد بخلصج مني .. شكيت انها اتكون ادمية ..خفت منها وايد ..رديت خطوات لورا ..حتى وقفتني الكنبه و يلست عليها تجدمت مني خطوه يلست اتطالع الصاله قلتها: عايشه ما بيني و بين مطر!! صرخت علي: بينكم ها الياهل انا لازم اخليج تعقينه شرات ما اسعود عق ولدي "حطت ايدها ع بطنها " بلعت ريجي اذكرها : كان الحمل مخترب نقزت يوم صرخت: سعود ضربني وعقه ..و الحينه خذتي عني مطر و طارق زوجتيه حق بنت خالتج و انا وين اروح ما عندي حد لا اهل ولا صاحب ولا سند ارتجفت غمضتني احس انها انسانه مريضه .. .شلت المخده بطلت اعيوني و تجربت مني صحت بخوف ..حاولت اتخنقني بالمخده ..ب س انا رفستها بكل قوتي .. حتى طارت عند الباب حجرت ع طول صرخت بصوت عالي .. تمنيت وليد يدخل الحينه ... بس هي ردت عفدت لي و يلست تصفعني ع ويهي حسيت ويهي احترق من كثر ما كانت تضربني ... حاولت ارفسها مره ثانيه و فعلا رفستها ..بس كانت الاقوى .. كانت اتقول : بحرمج مثل ما حرمتيني من كل شي .. دارت الدنيا فيني .. كانت تضربني بس ما كنت احس بضرباتها لاني كنت مدوخه و شكيت اني بولد ..يلست اتيرني من شعري حتى وصلتني حجرتي .. صرخت متالمه يوم فرتني ع الشبريه ..خذت نفس يوم سدت ويهي بالمخده .. اظلمت الدنيا بعيوني ...حسيت ابروحي طرت عالم ثاني .. ما توقعتها جي مستقويه ...مديت ايدي ع الابجوره الجريبه مني و ضربتها ع جتوفها صرخت عايشه مستويعه ابتعدت عني ..حاولت انش من ع الشبريه للحظه حسيت باليأس و اني مقدر اقاومها لانها الاقوى و انا محد عندي يساعدي .. كنت بطلع من حجرتي ..بس مسرعها نشت من مكانها و ردت ييرتني من شعري صحت بصوت عالي .. ترجيتها : عايشه خليني ..عايشه عفدت علي كانت بدوس ع بطني بس انا افتريت الصوب الثاني .و حضنت بطني .. حسيت اني مخنوقه يوم جفتها اتشيل المخده مره ثانيه و سدت ويهي ما في شي جريب مني هالمره علشان اضربها فيه استسلمت .. تالمت وايد و تعبت بحياتي ..بس تضايجت يوم اتكون نهايتي جي ونهاية ولدي و اني ما اجوفه .. بطلت اعيوني بسرعه و انا اكح و مب رايمه انتفس ..يوم سمعت صرخت عايشه ..و انها ابتعدت عني .. صحت و ابتعدت ابسرعه عنها احبي يوم جفتها بعيد عني ..بس اللي صدمني يوم جفت مطر بويهي ..دز عايشه بعيد ..ياه صوبي ظنيت للحظه اني احلم ..زخ ايدي و هزني : ميثه ميثه .. بلعت ريجي كنت ابا اقوله انا بخير بس لساني انربط ..هزني بقوه : ميثه "نبره صوته تغيرت حسيت انه بيصيح" كنت اطالعه و مب مصدقه اعيوني ظهر موبايله بسرعه اتصل سمعته يقول : خليفه بسرعه تعال شي قضيه هات وياك الشرطه .."وخبرهم المكان" كيف يقولون مطر فشلت عمليته و الحينه بكرسي متحرك .. اجوفه واقف جدامي ساند طوله .. طارت كل افكاري ..يوم سمعت عايشه اتصارخ و تصارع مع مطر: ما بخليها تاخذك مني ..ما بخليهاا .. صحت بمراره يوم جفتها تحضن ويه مطر : قول انك تحبني انا قولها خلها تفهم .. ما قدرت اتحمل يلست عالارض اصيح هالزواج ما ياب لي الا المصايب .. رص مطر ع ويها وصك ع اسنانه : اطلعي من حياتنا .هدمتي حياتي ,,.و الحينه تبين تجتلين حرمتي وولدي عايشه ولا جنه مطر يرمس : قول انك تحبني قولها ... دزها مطر و كانه متجزز منها .. و ياه صوبي .. سالني بحنان : انتي بخير.. قلته بألم : كانت بتخنقني "وصحت بمراره حضني مطر رفعت راسي وقلته " تبا تجتل ولدي .. عايشه اتصيح بصوت عالي .. ارتجفت و خفت من ها الموقف بكبره مطر يلوم نفسه: انا الغلطان الي خليتج هني بروحج ...شفت عايشه تجرب من مطر شهقت : مطر.. افتر مطر ابسرعه و دزها طارت صوب الباب و طاحت ع ظهرها صرخت متالمه و طالعتنا بحقد بنفس الوقت رن موبايل مطر ما رمس بس ع طول صكر زخ عايشه من كندورتها باشمئزاز و يرها الين ما ظهرها برع حجرتي و كانت اتصارخ و اتقاومه و اتقوله : حبني حبني .. انسدحت ع الشبريه ..و انا متالمه و اصيح بعذاب ..مدري كم من الوقت مر .. حتى رجع مطر .. حسيت به يقعد عدالي زخ ايدي و باسها : ميثه قومي بوديج الطبيب ..بس لا اتصيحين .. بطلت اعيوني : ما توقعت بيوم اجوفك .. حاول يوقفني : قومي بوديج الطبيب عقب بنتفاهم .. دفنت ويهي بصدره مشتاقه لريحته و قلته : ما ابى انا بخير .. مطر بجديه : وينه وليد قلته و انا احس بتعب: قال بتاخر اليوم مطر محرج: ما يعرف انج بروحج .. شويه ودش وليد : شو مستوي هني وقف مطر : تم مع عمتك انا دقايق و برجع .. خفت لا يودرني مره صحت بحراره رد مطر و لوى علي : لا اتصيحين رفعت راسي : لا اتروح و تخليني مره ثانيه .. باسني ع راسي : برجع ..وليد بتم وياج .. ابتعد عني فصحت اكثر .. وليد متروع : عموه ليش اتصيحين مسحت دموعي و قلته : ابا ماي ..وليد شويه و ياب لي ماي بللت ريجي حسيت براحه .. وليد: انا اسف كل مني الظاهر حد تهجم عليج قلته: عايشه الي يتني هذاك اليوم كانت تراقبنا و اتعرف انك مب موجود "تذكرت الموقف وصحت" كانت بتجلتني ...الموقف كان فضيع وليد : انا اسف عموه كل مني .. تم وليد يالس معاي بس بالي ويا مطر وين راح ؟؟ تفاجات يوم يايب الدكتور لين بيت ابوي ..طالعته بنظرات عتاب ..بس هو طنشني ..فحصتني الممرضه الي كانت وياها .. نسيت كل شي بلحظه يوم جفت العكاز الي يتساند عليه مطر ...ليش ؟؟ كنت اعيونه بعيوني ..بلعت ريجي اشتقت له وايد .. حتى هو حسيته انه مشتاق لي .. الدكتور : الحمدلله مفيش حاجه بس بكره ضروري تعملي فحوصات علشان تطمني اكتر مطر : ان شاء الله دكتور مشكور ما صدقت ظهر الدكتور و الممرضه من حجرتي لحقهم مطر برع .. حطيت ايدي ع بطني احمدلله .شكيت الي في بطني ممكن يعيش لحظه ..عقب الي صار له .. الحمدلله ع كل حال كنت بموت اليوم لو ما ياه مطر ..تنفست بعمق ..حاولت ايلس يوم دش مطر دق قلبي بقوه ..بلعت ريجي و انا اطالع العكاز سالته : لي متى بتم ع ها الع......... .يلس ع طول جريب مني ..طالعته زخ ايدي و قال : اذا تبيني و انا ع حال انا موجود جدامج الحينه ..و اذا ما تبين قاطعته : مطر كمل متجاهلني: و اذا ما تبيني ما بعلقج اكثر بخليج تجوفين حياتج .. يلست وواجهته و قلته : انا الي مفروض اسالك انت تباني ولا لاء..اذا كنت تباني مره انا اباك مليون مره شهقت يوم عفد علي و حضني بقوه : يا المينونه عيل ليش ودرتيني وقت ما كنت محتاجنج ابتعد عني و حضن ويهي بكف ايده : ليش تركتيني رفعت راسي و انا متذكره الموقف صحت: كنت ياييتنك بس جفت عايشه وياك ابتعد عني و راح بعيد رفع شعره و نافخ طالعني بغيض و قال: انا ما قلتلج اني احبج و عايشه انتهت من زمان من حياتي ..انتي ليش ما اتصدقيني وقفت ورحت جريب منه قلته : بس سمعتك تزقرها تبا قربها .. مطر منقهر مني: انتي دومج غبيه اانتي تذكرين كيف حالتي كانت بالمستشفى ؟؟ انا ما اتذكر شي ابد ..الا قبل العمليه بيوم بس ...يمكن كانت هي بس كنت اجوفج انتي و ازقرج باسمج .. تجربت منه و طحت بحضنه : كانت بتذبحني لو ما ييت مطر : هاي مريضه ما جفتي كيف حالتها .. لصقت فيه ارتجف و انا اتذكر: حتى اليوم الي سافرت فيه يتني البيت و تهجمت علي بس وليدد كان موجود لوى علي: فديتج ميثه ذكرتيني حسابي جايد مع الي اسمه وليد علشان مره ثانيه ما يهدج بروحج حدرت دموعي: ليش عطيتني ظهرك بالمطار "ضربته ع صدره ع الخفيف " ما تدري اني تعبت لي ما وصلت لك زخ ايدي و باسها برقه و قال : انا اصلا ما سافرت بطلت اعيوني متفاجأه من كلامه كمل : ردينا ع طول .. همست : عيل كيف اجوفك واقف عدالي مب ع اساس عمليتك فشلت صدمني مره ثانيه يوم قال: عمليتي نجحت بس انا وصلنا لج انها فشلت يمكن قلبج يحن و اتييني بس انتي بعد طنشتي صحت و قلت بحزن: قصيتوا علي .."رفعت راسي اطالعه " حتى سلمى ابتسمت بحنان : فديتج ميثه عذبتج واايد بس انتي بعد ما رحمتيني زخيت ايده و قلته : عيل ليش كنت ناوي اتسافر .. مطر: كنت ابا اشرد من هني يوم ما بغيتيني قلت اسافر اغير جو ..بس عقب ما جفتج في المطار رديت لج بس خفت لا اتصديني علشان جي تميت بعيد عنج حتى بعدت سعود مطفرني رد ميثه وردها لويت عليه و صحت: انت ما تعرف اشكثر انا تعذبت مطر يحط ايده ع بطني : ميثه ما بتودريني مره ثانيه هزيت راسي بمعنى لا و انا متفائله بحياه يديده و طاهره مع ابو ولدي .. همس مره ثانيه : انا بتم طول حياتي بعكاز ..عزه جرحتني جرحين ما يبرا ..بالنسبه لنا ماتت خلااص حضنته و قلته : انسى عزه و انسى جرحها اهم شي انك عايش معاي قريب مني .. طالعني بنظرات حب ..اخر شي كنت اتوقعه اني ارجع و اعيش مع مطر ..ابتسمت و طحت بحضنه و انا احس بحركة الياهل في بطني ... ((النهــــــــــــــــــــــــ ـــــــــــــــااية )) فتحت اعيوني ع اذان الفير ... حسيت ان جسمي كله يعورني ...الحينه بس بدت تظهر اثر ضربات عايشه ..هم و انزاح من حياتي حطيت ايدي ع صدري متروعه يوم تذكرتها البارحه شو سوت فيني ...صديت الصوب الثاني يوم حسيت بحركه جدامي .. جفت مطر راقد .ما صدقت اجوفه جريب مني يلست العب بشعره بحب شكله تضايج و تجلب الصوب الثاني .. ابتسمت له بسته ع راسه ...ايام مره كانت صعبه علي و صدق اني كنت قويه اني تحملتها ..نشيت من مكاني ... ظهرت من حجرتي و انا احس براحه ... رحت صوب حجره وليد اتطمن عليه ..جفته راقد .. تنهدت .. براحه .. فجيت باب الصاله و ظهرت قادتني اريولي صوب اول مكان التقي فيه اانا و الغريب اقصد مطر ...دق قلبي بقوه يوم حسيت بيدي تزخني من را شهقت افتريت بسرعه .. ابتسمت يوم ياني حس مطر : اول مره جفتج فيها بها المكان مثل ها الصوره الحينه بس اعيونج فديت هالعيون تعلقت فيه : كنت خايفه منك بس الحين ابا قربك عاتبني بلطف: شو اتسوين ظاهره بهالحزه طالعته بحب و قلته: اشتقت لهالمكان حبيت الانسان الي ما اعرفه ولا يعرفني بس كان يحضني حطت ايده ع خدي و قال : كنت تعرفين اني انا مطر هزيت راسي بمعنى لا : عرفت عن طريق وليد همس باذوني: اول ما جفتج تخبلت عليج بغيتج من كل خاطري همست: ربي ما يحرمني منك .. زخ ايدي : تعالي انروح داخل ..و مره ثانيه لا تظهرين بها الوقت ابروحج .." داعب خدي برقه" مفهوم هزيت راسي و قلته: زين خلنا شويه هني محد يجوفنا الدنيا بعدها ظلاام لوى علي و جربني منه : جوفي هناك رفعت راسي مكان اشر .. جفت القمر مجابلنا مره سمعته يقول: ما ابا حد يجوفنا حتى القمر تراه يغار منا ابتسمت و انا مستانسه ..حضن ويهي و قال : اتحبيني ميثوه .. هزيت راسي و انا اعيوني اترد ع اعيونه تدري اني موت أحبك و ان مالي غير حبك والي ينبض في ضلوعي..... ماهو قلبي هذا قلبك تدري يا فرحي وهمي..... من كثر مانت في دمي كل ما تنظرك عيني ...... عيني من عيني تسمي عيني من عيني تسمي تدري من عشقي لشفوك..... ما تفراقني طيوفك صرت انا مثل المرايا..... ما أرى نفسي وشوفك ما أرى نفسي وشوفك تمت مهما كتبت من كلمات ...و مهما انتقيت من الحروف ..مهما نسجت من الجمل في النهاية ..سأريق حبر دمي ..و ستبقى ذكرى عالقة في قلبي للأبد ..معاني .. .gif "التفت صوبي ..حسيت الروح ردت فيني يوم جفته افتر صوبي") |
|
|
#157 |
|
|
رد: رواية انا حر ما انهان والحر ما يرجع لشخص يهينه
يسلمووووووووووو
حبيبتي على الرواية الأكثر من رئعة |
|
|
#158 |
|
|
مشكورة ننتظر الجزء القادم |
|
|
#159 |
|
|
رد: رواية انا حر ما انهان والحر ما يرجع لشخص يهينه
يسلمو يالغلا ..
دوم مميزه .. |
|
|
#160 |
|
|
رد: رواية انا حر ما انهان والحر ما يرجع لشخص يهينه
الروايه عشت مع احداثها اسبوع وزيادة ومشاعري تتحرك مع الاحداث وبرغم من ان بعض الكلمات صعبة في فهمها لكنها حلوة و في قمة الروعه وقيمتك عليها قبل ما اكملها يعطيكي العافيه |
رد: رواية انا حر ما انهان والحر ما يرجع لشخص يهينه