رد: رواية انا حر ما انهان والحر ما يرجع لشخص يهينه
رواية انا حر ما انهان والحر ما يرجع لشخص يهينه
(( 2))
لاباس يالـي تشكـي البعـد لابـاس ذا لي شهر مهمـوم يـاراس مالـي واليوم جيتك بأكمل شعور وأحسـاس أحساس من غالي لأجل عين غالـي
نشيت من الصبح ... اتصلت حق طارق من تلفون سلمى سالته عن مطر قال انه بخير.. و يسولف عادي ..و سال عني وايد ...صكرت عنه ...ورحت حجره وليد ,,
دشيت جفته راقد يلست ع طرف الشبريه اقومه : وليد نش ..
تجلب ع الفراش بكسل ..عاتبته : انته متى ياي البارحه
وليد متضايج: اووووووووووووه يت الحينه ميثه خليني ارقد ...
يرريت عنه اللحاف : قووم اقولك
طالعني متضايج: شووو اتبين
بطلت اعيوني : راد متاخر صح
وليد : الحينه مقومتني من الصبح علشان تساليني هالسؤال
قلته بسرعه : لا نش علشان انروح بيت ابوي ..
نقز وليد: زين بعد انا منحرج وايد هني
طالعته بنظرات : منحرج و انت راد البيت متاخر ..لا اتسوي مشاكل ...
وليد يبتسم: عندي رفيج شرطي بظهرني من كل مشكله اطيح فيها بس تعبان يحليله ..
طنشته : قووم يالله شل اغراضك ..
طلعت من حجرته و رحت حجرتي ...شليت اغراضي الموجوده هني ..
دشت علي سلمى: مستعيله
قلتها : مشتاقه حق بيت ابوي ..
سلمى: مشتاقه ولا تبين تهربين
قلتها بعذاب: اهرب من شو خلااص هذا قدري ...ما بيدي شي ..
سلمى : ليش تسمحين لها تاخذ ريلج منها ..
صحت ع طول و قلتها : سلمى اول ما نش من العمليه قاعد ينادي باسمها و البارحه يزقرها يبا قربها شو اتبين اكثر جي.. يوم هو يباها انا ليش ادش من بينهم
سلمى: عيل ليش كل يسال عنج
طالعتها بنظرات : انتي شدراج ..اترمسين طارق صح
ارتبكت سلمى عقب قالت : كم مره اتصل يسال عنج و انتي راقده علشان يقول ريلج يسال عنج ..
عطيتها ظهري: مطر يباني علشان الي في بطني تخبل يوم عرف اني حامل ما يطيح و افتك منه بعد
شهقت سلمى: ما تسمعج امايه و الله لاتذبحج ..
طنشتها سالتني سلمى : تبين اوصلج
قلتها : وليد عنده سياره
سلمى : خلااص ما تبين خدماتنا ..
ابتسمت و حضنتها و قلتها : جمايلج ما انساها سلمووه يا رب ربي يوفقج مع طارق قولي امين
انحرجت سلمى فضحكت عليها ..
سلمى: اتزهبين الدواا قبل الفلعه
قلتها : لا و الله هو يباج باجي الدور عليج لولا الظروف اظني ملجتوا خلصتوا
بطلت سلمى اعيونها : هاااااااااااه
ضحكت عليها تذكرت فقلتها ع طول: لا اتحاولين توصلين لي أي خبر عن مطر اذا اتصل بج طارق زين ..
سلمى: احسج تبالغين
طنشتها ..رحت اعابل باغراضي ...ساعدتني شلت عني الشنطه .. كان وليد يترياني في الصاله ..اول ما جافنا انا و سلمى وقف وخذ عن سلمى الشنطه .. سلمت ع سلمى و قلتها اتزورني و ما تقطعني ...و اتسلم ع خالوه فديتها الا بحياتي ما بنسى جمايلها ....
رحنا انا ووليد بيت ابوي ..كان قلبي يدق .. لاني وايد مشتاقه لها البيت ما اتصورون اشكثر... احلى ايام عمري مع امايه و ابوي الله يرحمه
وليد : اول ما ييت هني ما عرفت البيت غيرتيه و عدلتيه ما شاء الله
سكت الله يخلي مطر ...فتح وليد الباب ..دشيت بخطوات متردده
وليد : شو فيج دشي..
قلته بصراحه : احسه مب بيتنا ..
وليد : يالله عاد عن الافلاام الهنديه هاي دشي ..وينها حجرتي
ضحكت: احيدك تمسى و تصبح بالصاله مالك مكان ..
وليد: هي و الله ..
دشينا الصاله كان البيت نظيف و مرتب و يديد ..هني سكنت منال وولدها ... رحت حجره ابوي ..فديت ابوي .. استغربت يوم جفت مطر محافظ ع الصوره و بعدها معلق باليداار ..
وليد : عادي استخدم هاي الحجره
قلته و انا اطالع صورة ابوي : عادي فديتك ...
رحت حجرتي ..فديت حجرتي ... متفنن فيها مطر .. و مزيد حجره .. بطلت الدريشه .. طاحت اعيوني ع زاويه الي ................!!صكرت الدريشه ع طول وربعت برع ..صوب المطبخ ... جفت الزاويه وقفت ما مكان كنت واقفه هذيج الليله ..حزة الفير ... ياه الغريب و حضني من ورا .. للحينه اتذكر انفاسه .. راح ولا رجع و انا للحينه يطري ع بالي ...
تساندت ع اليدار و هاي الذكرى تلاعب مخيلتي .. نقزت يوم سمعت حس وليد : شو اتسوين
ارتبكت : ماشي انت مينون روعتني ...
وليد : اجوفج جنج تخبلتي راقده و اانتي واقفه ..
ابتسمت بألم ..قلته: وليد بتعيش وياي بس تحمل تسهر و اتسوي لي مشاكل بتصل بابوك ع طول
وليد : اوكيك صرت ريال انا و بتجوفين ..
يلسنا انرتب البيت انا ووليد ...ظهر وليد رايح ايب لنا ريوق ...بهالحزه اتصلت في بيت خالوه ..علشان ارمس خالوه لاني طلعت من غير ما اسلم عليها و انا اجوف هالشي مب حلو بحقها
اول ما رمستها هزبتني و عاتبتني وايد بس عقب شكلها تقبلت الامر عقب ما استوعبت ان ها البيت بيتي يعني مالي حايه اقعد في بيتهم ..
رد وليد من برع تريقنا ...عقب ظهر وليد اونه يبا يدور له وظيفه هني ... اندق باب الحوي ..رحت فتحته كان طارق تفاجات بس عقب دخلته
طارق: انا ياي اخذج المستشفى طفر بي مطر
سالته : شخباره ؟؟
طارق : الحمدلله بخير ..يالله ما بتيين
هزيت راسي بمعنى لا
طارق مستغرب: ليش ..ما يستوي جي كل مره ينشد عنج و ما يلاقيج
قلته بكل صراحه: انا سويت الي علي ..خلااص
طارق: شو يعني خلااص مب فاهم ..
قلته: انا ما ابى اخوك ..جرحني وايد و ما اقدر اتحمل اكثر
تم طارق ساكت يطالعني مستغر ب عقب قال : ليش شو الي تغير ..
سكت ما قدرت ارد عليه قلته : تقدر اتيب لي سعود عقب المغرب شكله متضايج مني ؟؟
طارق شكله بعده مستغرب من كلامي عن مطر بس هز راسه عقب قال : اذا سال عنج مطر
قلته : خبره اني ما ابا اجوفه ...و اني اتريا ورقه طلاقي ..
طارق: ميثه !!
قاطعته: طارق انت الوحيد المفروض اتحس بمعاناتي لانك جربت الخيانه كيف اتكون
ردي ها خل طارق يفهم و يستوعب عقب قال : ع راحتج بييب لج سعود بس انا مالي شغل
سالته :شو يعني ؟
طارق: مب تضاربين ويا مطر و اتشيلين علي و اتخربين زواجي من سلمى
ضحكت ع طول: ههههههههههه الله يسعدكم و يجمعكم ع خير..
ابتسم : تسلمين ..يالله مع السلامه
قلته : وداعة الله ..
اتصلت حق وليد من تلفون البيت و طلبت منه اييب لي صوف علشان اسوي شغلات حق ولدي ... اسلي روحي و اقضي وقتي ..
اشعرت اول ما طلعت من بيت ابوي و انا حرمة مطر و الحينه كان كله كابوس و نشيت منه بس كيف كابوس وانا حامل بولد مطر ..كيف !!
ظهرت مع سلمى العصر...رحت السوق اغير جو مع ان الوقت ابد مش مناسب بس..استانست وايد .. احس من زمان ما طلعت ولا جفت الدنيا بس كل ها و الله ما نساني حزني و خسارتي لمطر و كيف نهايه علاقتنا جي اتكون ...
رديت البيت هلكانه ..عقب ما دشيت .. تفاجات بـ سعود داخل البيت ووليد موجود
استانست : سعود
عاتبني : علشان جي ودرتيني جفتي هاه وياج
وليد: ايه شو هاه .."طالعني" ميثوه منو ها الدفش
سعود محرج : و الله ما اسامحج ميثه
تجدمت منه و ابتسمت له : متى ييت
وليد : توه داش
سعود: طارق يابني ما كنت بيي
قلته :افا يعني ما تبا اتم معاي
وليد: حق شو يتم و انا موجود منو هاه ؟؟
قلته: ها سعود اخو ريلي ..."طالعت سعود" ها وليد ولد اخوي يعني انا عمته
وليد: اوووووووووهو هاي الي ما ادانيه عمته و عمته
قلته بغيض: شو بعد اوهوو عمتك شو بعد ...
سعود : عيل خلااص بتم هني انا ...
ابتسمت مستانسه سالت وليد: شريت لي الاغراض الي قلتلك عنها ؟؟
وليد : هي و شريت لي بلاستسشن
شهقت : حتى انت افتك من سعود
نقز سعود مستانس: تتحدا يالله
وليد: يالله و الله اتحدااك
ضحكت: زين انا بسوي لكم عشى خفيف .و.لا اتسون حشره ..
حسيت بوناسه ...و اني لي عايله صغيره بس ما بدووم سعود باجر بروحح بيتهم عقب ما يظهر مطربالسلامه و وليد اكيد ابوه بيي ياخذه اذا مب اليوم باجر ...
ما استبعد ان سعود عرف اني ودرت مطر خلااص لانه ابد ما يسال ليش ما اتروحين له المستشفى ..
اتصلت بي منيره هذاك اليوم تترجاني اروح المستشفى و ان مطر متخبل الا يبا يجوفني ..
قلتها : منيره لا اتخليني اقطع مكالماتي معاج علشان بس ما تحشرين بمطر
صخت منيره شويه عقب قالت : ليش اتسوين جي شو ضرج مطر
سكت منيره : علشان عايشه ..
عصبت بسرعه : ما يهمني شي ..
منيره: عايشه الحينه بعيد ..
كنت بقولها وين بعيد و هي كل يوم ناقزه المستشفى عند مطر بس يودت اعصابي ...
قلتها : انا بصكر يالله باي
منيره: ميثه باجر بجوفون اذا مطر يروم يمشي ولا لا حرام عليج لا تكسرينه
ارتجفت ما ابا اضعف ندمت لاني رديت ع مكالمتها
قلتها : يوم بجوف عايشه بمشي انا ما بنفعه بشي "وصكرت التلفون ع ويها" صحت لاني سويت بمنيره جي بس كان غصبن علي ..و الله افهموني ما ابا حد يقنعني اني اروح لمطر الي بينا انتهى خلااااص ...
احس براحه كبيره و انا عايشه في بيت ابوي و مع وليد و سعود ...
في اليوم الثاني .. نشيت جفت وليد محد ظاهر من البيت غمضني كل يوم ينش من وقت يدور ع وظيفه ..صعب الواحد يلاقي وظيفه بها الزمن ...
جفت سعود لابس سالته: وين بنتروح
شرب حليبه وقال : اتريا طارق بيي ياخذني المستشفى حق مطر ...اليوم بجوفون اذا نجحت عمليته او لا
سكت ..دعيت بقلبي ان ربي يقومه بالسلامه ...
سمعنا هرن سياره طارق نش سعود من مكانه قال : برجع هني انا وايد مرتاح وياكم ..
ابتسمت له لحقته حتى وصل عند باب الحوي ...التفت فجاه و قال : ادري تبين اتقولين طمني ع مطر
زين بطمنج و ببشر جان عمليته نجحت
ضحكت: هههههههه انت تفهمني بسرعه ..ان شاء الله خير
وقف جنه يفكر: ما بتيين
هزيت راسي بمعنى لا
سعود يبتسم: احسن ..قلتلج بالاخير انا بتزوجج
دزيته و فتحت باب الحوي: يالله روح برع بعد اذا يبت بنوته ما انتاسبك بتكون عمها ..
سعود :فديتهاا بزوجها ولدي بس بتستوي عانس اذا اتريت ولدي ..
ضحكت عليه :ههههههههههه روح قبل لا اتخرف علي..
صكرت الباب ...ربعت حجرتي ع طول و يلست اصيح .. خايفه ع مطر ..اخاف يستوي شي ..و يتم ع طول اسير كرسي متحرك .دعيت ربي انه يعافيه و يرده لبيته سالم ..و احسن عن قبل ..
سويت الغدا .. ترييت وليد لين ما رجع من برع بس سعود تاخر ..فكرت ما اتصل به علشان يمكن يروح بيت اخته يتغدا بس قلبي ياكلني شو صار ع مطر ..نجحت عمليته ولا لا ؟؟؟ مدري اتصل اسال طارق بس اخاف انصدم ...خايفه وايد ...
اتصل بي وليد و قال لي انه بتغدا برع ويا ربعه ...
فاتصلت بسلمى ردت علي : هلا ميثه
قلتها: تعالي انتي و خالوه تغدوا عندي
سلمى: ما قلتي قبل امايه سوت الغدا عادد
قلتها : مب مشكله يبوا غداكم و تعالوا ..
سلمى: شو فيج ليش ترمسين جي
قلتها شويه بصيح: خايفه ما اعرف شو صار بمطر
سلمى: شو تبين به مطر ما تقولين بتودرينه
قلتها : بس قلبي ياكلني غصبن علي
سلمى: امم الحاله الطارئه عيل بيي اتغدا في بيتكم اجوفني اخاف يستوي بج شي
استانست : تسلمين حبيبتي ..
اول ما يت سلمى .. حطيت الغدا .. ما كنت اكل بالي كان مشغول في مطر ..محد اتصل يطمني عليه
سلمى : ما تاكلين
قلتها خايفه : قلبي مب مرتاح
سلمى اتصل بـ طارق
قلتها : ها تعودتي تتصلين فيه اجوف الريال متعلق فيج
سلمى: زولي ها الي يسوي فيج خير ..
ترجيتها : لا خلااص اتصلي ..دخيلج
ظهرت موبايلها : هي جي تادبي من اول
صخيت عنها علشان ما تغير رايها ..وقفت ابسرعه ابتعدت عن سلمى اول مما رد عليها طارق حسيت روحي خبله .. قلبي كان يدق بقوه و كنت ارتجف عادي اموت و او يستوي فيني أي شي ..
سلمى اطالعني مستغربه من حركاتي جني وحده خديه ..
سلمى: بس ما اقدر اسوي جي ..؟؟
تجدمت منها و قلت شو ..سلمى تبتعد عني : ماشي ..ماشي
ييريت الموبايل عن سلمى و قلت بسرعه : طارق شو شو صار ؟؟
طارق: ميثه
قلته بسرعه : شو ؟؟
طارق بنبره جديه : مطر فشلت عمليه ما رام يحرك ريوله ولا يحس فيها
دارت الددنيا فيني و طاح الموبايل من ايدي ..عفدت سلمى علي :ميثه انتي بخير
قعدت اتهزني قلتها بتعب: انا زينه "رفعت راسي اطالع سلمى و اقولها":ما اصدق ما اصدق
صحت بمراره فشلت عمليه مطر يعني ما يروم يمشي خلااص ..
حضنت سلمى و قلتها : كل من عزوه كل منها ..
سلمى: قضاء و قدر خلااص ميثه لا اتسوين بروحج جي ..
رفعت راسي ودموعي تحدر: سلمى كنت اتمنى قربه كنت ابا حبه بس اختار عايشه يبا عايشه ..اهيه الي بتم معاه
سلمى محرجه: من عينها الحينه بتودره و بتجوفين
دفنت ويهي بصدرها : ما اقدر اتحمل خلاص ...تعبت ..
خذتني سلمى حجرتي انسدحت ع الشبريه .. يلست اطالع السقف ..حطيت اييد ي ع بطني لا ارادي ..بظهر ع الدنيا بجوف ابوه انسان مريض حراام ..و الله حراااااااااااام ..
رغم اني كنت مع وليد بنفس البيت الا اني ما قمت اجوفه وايد حبست روحي بالحجره كرهت الدنيا و عفتها .. خلااص .. ما عاد تعنى لي الدنيا بشي...سلمى كل تضارب معاي ..ع سالفه اكل ولا ما اكل ...
قالت بغيض: الحينه انتي ما تبينه حق شو مسويه بروحج جي
قلتها: لا تنسين ابو ولدي
سلمى: لا و الله ابو ولدج ولا لانج تحبينه
تنهدت وصديت الصوب الثاني ...اطالع من الدريشه طاحت اعيوني ع الزاويه ما ارتاح الا بها المكان الي جفت فيه سعادتي لو كانت دقايق ..
سلمى: الي تفكرين فيه وهم
قلتها: لو كان الغريب الي تزوجته ما كان حالي جي ..
سلمى: دوري عليه جان تبينه
عاتبتها: انتي متفيجه تستهبلين علي ..
سلمى ييرت عني اللحاف: قومي عيشي حياتج علشان خاطر الي في بطنج ..
حسيت ان كلام سلمى صحيح مطر صار الي صار له و اختار حياته و انا خلني اعيش حياتي ..كل الي اقدر اسويه اني ادعي ربي يعافيه ..و يسهل عليه حياته ..
ما قمت اجوف سعود و منيره من صكرت بوييها ما اتصلت بي ابد ..بس اكيد مثل ما قال منشغل ويا مطر و يهتم فيه و يداري عليه يا ما كان يدعي انه يموت و يفتك من شره بس الحينه سعود الي تم ويا مطر يساعده و يهتم فيه ..
طارت كل افكاري يوم اندق باب الحوي ..ما اعرف منو ياييني لو وليد بروحه بدش و سلمى كانت اتصلت ..
سالت منو ردت الروح فيني يوم سمعت حس سعود
بطلت الباب : سعود ..وينك من زمان ما جفتكك
سعود مبتسم : شخبارج ؟؟
قلته : ابخير..ليش ما تسال ولا ادق
سعود: تدرين مشغول
حسيت سعود كبر بعيوني عشرين سنه
قلته : دش
قال : لا بس بغيت اطلب منج طلب و ما ترديني
ابتسمت له: تدري اني ما ارو م اردك امر شو بغيت ؟
جفته يبلع ريجه عقب قال : مطر باجر بسافر ؟؟
طالعته مصدومه كمل: انا بسافر وياه ...
ابتسمت : وايد زين .. "بس بداخلي حزن ما يعلم فيه الا رب العالمين "
سعود: ميثه تعالي ويانا مطر بتعالج برع عل و عسى
هزيت راسي : ما اقدر مستحيل ...
سعود رد علي : ليش مستحيل انتي حرمته
رديت خطوه لورا و اتذكر صورة مطر و عايشه ويا بعض: بسوي لك كل الي تباه الا هالطلب ..
سعود يترجاني: دخيلج ميثه مطر محتاجنج قسم بالله
قلته بسرعه : لا لا اسفه ما اقدر
عطيته ظهري و كملت : لا اتحاول سعود انا ما اقدر اسوي الي تباه مني اسفه
سمعته يقول بصوت واطي : انسي اني طلبت منج شي
اول ما سمعت صوت الباب يتصكر ..عضيت ع شفايفي امنع دموعي تحدر بس ما قدرت اقاومها مطر قلبه و حياته مع حد ثاني ليش ادز بويهي ..
كنت تعبانه و مب طايقه حياتي شكيت اني بتم محتفظه بالي في بطني و انا بهالحاله بس وعدت مطر اني احافظ عليه و اصلا شو الي بقى و يربطني بمطر غير ها الولد ...
تنهدت بعذاب ..رحت برع وقفت بزاويه الي احس براحه بها المكان الي جفت فيه اعيون الغريب ..تميت يالسه وقت طويل ..احاول انسى احزاني بس ما قدرت ..تمنيت لو الزمن يرد لورا و اتم باحضان ها الغريب ..اهون من حضن مطر الي قلبه مع انسانه ثانيه انسانه شويه عليها كلمة ه ..باجر بسافر و الله العالم متى بيرد ولا كيف بيكون ؟؟ دمعت اعيوني و انا اتذكر كيف كنت مستانسه معاه يوم ردينا من المحكمه بهذاك اليوم و كيف يطلع عذره و يحلف لي ان منال مب حرمته فديتك مطر ...
|