 |
  |
|
|
|
|
#66 |
|
|
رد: رواية انا حر ما انهان والحر ما يرجع لشخص يهينه
الفصل السابع عشـر .
ابي اعرف متى تسكن رياحك.. وابي اعرف غرورك هو متى يطلق سراحك.. وابي اعرف متى تعصف، ومتى تعطف، متى تنزف جراحك.. وابي اعرف اذا باقي في بحرك موج اكسر فيه مجدافي.. وابي اعرف اذا باقي في همك هم ما شالته اكتافي.. وابي اعرف اذا باقي في هالدنيا حزن ما مرني واستوطن اطرافي.. غمضت اعيوني كنت اتمنى روحي تطلع دعيت ربي يحفظني منهم و اني اموت ولا واحد منهم يلمس شعره من راسي .. كنت افتح اعيوني و ارد اصكرها كنت اجوف اضرابه و صراع ظنيت انهم يتضاربون علي .. بس ارتحت يوم عرفت ان مطر الي كان بالسياره ما كنت رايمه ابطل اعيوني ..بس يوم شردوا شله الشباب عرفت انه ها مطر زخ ويهي ابدينه و قعد يهزني مطر: ميثه ميثه ... شلني ما اباك ولا اتمنى اعيش حياتي معاك .. تمنيت الانسان الي طلع لي هذيج الليل بغيته و حلمت فيه بس الله كاتب لي اني اعيش معاك انت ... حسيت شلني و يخلني بيتنا لويت ع رقبته لاني خفت اطيح .. حسيت ان جسمي ارتخى و ارتاح و ردت لي الحياه يوم حسيت الماي يبلل اعروقي زخيت الجلاس و يلست اشرب و اشرب خايفه ان الماي يخلص رديت حطيت راسي ع الشبريه .. غمضت اعيوني ..فتحتها يوم حسيت بيد اتزخ ايدي .حسيت بالامان ... زخني من لحيتي بكل رقه و هزني بدلع: وقته تطيحين علي ابتسمت له و انا مغمضه اعيوني عايبني احساس الامان عقب البهدله الي تبهدلتها ..انقذني ..هالانسان ..لحظه شو قال (وقته تطيحن علي ) فتحت اعيوني بسرعه ... جفت مطر يالس ع طرف الشبريه .. يلست اطالع انا وين استغربت المكان ..هاي مب هي الغرفه الي كنت يالسه فيها من ساعه انا و منيره و لا نفسها الي دش علي فيها مطر يوم قعد يدوخ .. لحظه لحظه طالعته خفت منه يوم جفته جريب مني بس طنشت و سالته : انا وين ؟ طالعني ورفع حياته : بالفندق !"و بنظرات مبهه" بنبدا اول ليله بحياتنا ويا بعض .. وقفت ابسرعه حسيت بدوخه فزخيت الكرسي الجريب مني كان يطالعني و تم مكانه ما تحرك حتى يساعدني قلته : وينهم الي حاولوا "سكت ما عرفت اعبر و خاصه نظراته منعتني فيلست و انا احس بالضياع " تم ساكت يراقبني فسالته من غير ما اطالعه : كيف ييت هني سمعته يقول : ما كنت اعرف انج تختنقين من ريحه الزقاير فطحتي علي .. رفعت راسي اطالعه شوو طحت يعني انا كنت احلم .. شهقت قلته مستانسه: احلم عقد حياته : هي بس اموت و اعرف بشو كنتي تحلمين ؟ قاعده اتصاريخ و تزقريني "ابتسم مستانس " عذبتيني و انتي تزقريني انحرجت فصديت عنه كمل كلامه : فشلتج و يبتج هني الفنندق طالعته مستغربه :: ما حسيت .. بطل اعيونه : فضحتيني شايلنج جنج وحده مجتوله مدخلنج الفندق ..انتي لو جفتي شكلج بتدفنين روحج بلعت ريجي اتخيل الموقف قلته: انت فضيحه ؟ رد علي: انت الي فضيحه انا ما همني شي ولا عروس اتسوي جي بليله عرسها !! سكت ما عرفت شو اقوله حسيت واحد مستعد لكل كلمه اقولها حتى قبل ما انطقها حشى .. كمل : و يبتج هني الفندق قلته: ليش من قال انا ابا........ قاطعني : عيل تبين تفضحيني جدام اهلي قاعده تصارخين و تزاعجين جن جفتي يني جدامج .. حمدت ربي الف مره اني كنت احلم ... الحمدلله بعدني ما تخبلت علشان اربع بالشوارع بنصوص الليالي انتبهت له يوم قال : اسف ثاني مره ما بدوخ جدامج .. ما كنت اعرف انج تتحسسين من ريحه الزقاير .. "نش من مكانه " و يلس عالارض وزخ ايدي " خربت ليله عرسج صح .. ييرت ايدي عنه ابسرعه ووقفت و قلته : انت شو تبا مني ..و ليش يايبني هني طالعني عقب قال يتمصخر : و الله شو رايج انتي ليش يايبنج هني انحرجت من كلامه بس طنشته و قلته : لو كنت اعرف انك انت نفس الشخص ما كنت وافقت عليك قال لي : ليش انتي اصلا حد خذ رايج ها الزطي ما صدق انخطبتي يبا يفتك .. حسيته وقح و كلامه وايد قوي صديت عنه ما ابا اتمادى معاه لانه لسا نه طويل ... ما سده كمل كلامه : زين منه ياه المحكمه جان ما ملجنا قلت بصوت واطي : يا ليته ما ياه " و طالعته " طالعتني فتره جنه يتذكر شي عقب قال : انتي الحينه زوجتي .. طااحت دموعي ع طول من قال هاي الكلمه ..تجدم مني فرديت ورا بس ما كان شي مجال انتي اتراجع اكثر لان لصقت باليدار صديت عنه يوم حسيت انه وايد جرب مني سالني بنبره عذبه : انتي ندمانه ؟؟ سكت ما ردت عليه شو يباني اقوله فـ ليله عرسي انا اصلا من اجوفك احسك شيطان واقف عدالي ...زخني من لحيتني و غصبني اطالعه قال : ما رديتي .. قلته : انته قلتها محد خذ رايي يعني شو فايده كلامي .. طالعني بنظرات و قال : بس يهمني ..وايد ...يعني انتي الحينه ما تبيني وما تبين اتعيش معاي متندمه ما كنتي تتوقعين انا الشخص الي دوم تحلمين فيه .. قلته : وايد تسال "زخيت ايده ابعدها عني " شل يدك .. بس طنشني ..طالعته و تم يطالعني ..همست يوم حسيت بحراره لمساته : انا ما اباك ..؟ رد علي ابسرعه : بس انا اباج ... "اررتجفت و طالعته ع طول حسيت كلامه طالع من خاطره و كانت نبره صوته جد غييييييييير علشان جي لفتتني ..بس صدمني عقب ما قال : ما تحبيني انا بعد ما احبج ... مدري ليش كرهته يوم قال : بس متاكد عقب بتحبيني و بتموتين عليه بس انا قلبي ....."وسكت بغيته يكمل بس سكت و ابتعد عني " رن موبايله راح صوبه ..تم يطالع الشاشه عقب حوله صامت ..راقبته شفته شل علبه الزقاير و ظهر برع الحجره جنه يبا يرمس بالموبايل .... .حسيت ابراحه يوم ظهر من الحجره .. هالانسان وايد مغرور و جايف نفسه عاد ما بغى يتخقق الا علي الا مالي خص بسوالف الدنيا .. . لفتتني شنطه صغيره محطايه ع زاويه الحجره .. رحت صوبها ..فتحتها جفت اشياء تخصني طلعت فودي و ملابسي رحت الحمام اتغسلت ... تذكرت الحلم صج عشت بموقف فضيع مالي سند بها الدنيا ولا بحس بالامان موليه .. ظهرت من الحمام ..جفته بعده برع .شكله بعده يسولف ع الموبايل . رحت صوب الشبريه .. و انسدحت ع الشبريه و من حطيت راسي رقدت و انا حاسه بصداع خفيف .. فتحت اعيوني بس غمضتها ع طول مب متحمله اشعه الشمس الي ضربت اعيوني .. تجلبت الصوب الثاني اداري نفسي عنها .فتحت اعيوني تفاجات بمطر منسدح جدامي ارتبكت ..نشيت بسرعه بس زخ ايدي طالعته حسبته راقد طالعته .. قال لي: ليش نشيتي جنج جفتي يني .. حاولت اهد ايدي : ماشي ع بالي كنت راقد .. مطر : كنت احاول بس ما ياني ارقاد متعود ارقد بهالحزه .. طالعته : كيف يعني ترقد بهالحزه فج ايدي و قال بكسل : يعني اسهر الليل و ارقد بنهار .. ابتعدت عنه : زين .. ارقد رحت الحمام اتغسل .. عقب ما ظهرت جفته حاضن المخده كنت بغطيه بس حمدت ربي اني ما تحركت ..لاني جفته يتحرك.. نش من مكانه و راح الحمام يتغسل .. بدلت ثيابي و يلست ع الكنبه .. ظهر من الحمام .جفته يمشط شعره : يوعانه استحيت اقوله هي .. التفت لي فهزيت راسي بمعنى هي .. قال لي : زين البسي بنظهر بنتريق برع .. لبست و جريب نطلع فاجئني : بظهرين جي ؟ انحرجت ما عرفت شو يقصد فقلته : شوه !!!! قال : زين حطي لج كحل عالاقل انتي عروس عضيت ع شفايفي بسرعه طالعني : شوه ؟؟ ما تحبين المكياج قلته : بصراحه ما اعرف احط مكياج .. |
|
|
#67 |
|
|
رد: رواية انا حر ما انهان والحر ما يرجع لشخص يهينه
جفته مستغرب بس قال : الي يجوف بيتكم يتوقع منج ما تعرفين كل شي ؟
قلته ابسرعه : شو قصدك .. ابتسم ابرود: سلامتج ع العموم انا احب اجوفج جي انتي احليوه من دون مكياج .. انحرجت من كلامه ..تجرب مني ارتبكت ما تحملت قربه همس : ميثه .. رفعت راسي اطاالعه نبره صوته اسرتني .. فاجاني يوم قال : اعيونج اتخبل بي .. ع كثر ما عيبني قربه ع كثر ما كنت ابا ابعد عنه تخبلت يوم تجرب مني اكثر فقلته ابسرعه : انا يو يو يوعانه حسيت ملامح ويهه انجلب و قال : ما احب الي يصدني و انا ولا بنيه طالعتني صدت عني حتى هاي بنت خـ "وسكت " استغربت ليش جي انجلب علي و ليش رمسته صارت جافه و بعدين ليش دوم يرمس بالالغاز .؟ كمل كلامه : بس صدقيني انا مب النوع الي يتحمل و يصبر وايد .. قلته : تصبر ع شو و بعدين نت وايد ترمس بالالغاز ...انا ما اعرف شو قصدك قال بحده : ولا بتعرفين لانج غبيه ما تفهمين ... طالعته بنظرات عتاب و لوم فسكت ع طول ذكرته : و هذا اول يوم لي معاك .. قال : ليش نسيتي شو سويتي البارحه عروس يغمى عليها من اول ليله ذكرته و قلت ابرووود : من الزقاير يا المعرس ولا المعاريس يظهرون من غرف نومهم باخر الليل يرمسون بالموبايلات اتمصخر علي : اتعرفين الموبايل بعد .. رديت عليه بنظرات استهزاء فقال : برودج يقهرني ما احب البنيه البارده .. قلته : شو تباني اسوي يعني افر روحي بالفرن يعني.. تجدم مني حسيت انه بلصق فيني و قال : و تعرفين تنكتيين بعد ..بس الي يجوف بيتكم ما يقول عندكم غاز ولا فرن ..ولو انا مش غلطان اظني التنور شي اساس في البيت صح ..؟؟ كرهت نظراته و اسلوبه الوقح هالريال موليه ما يعرف الادب لسانه متبري منه علشان جي المفروض اسكت عنه و ما ارد عليه .. زخ ايدي يرييتها بقوه و قلته : انا اشمئز منك وايد .. حسيت كلامي صدمه و ها الشيء بين من تعابير ويهه .. قال : انا الغلطااان الي مودر مخدتني و مجابلج علشان اسد يوعج و لاانت وحده ما تستاهل .. و ابتعد عني راقبته يفسخ كندورته و يفر غتره و عقاله ع الشماعه و طفى ليتات الغرفه و انخمد ع الشبريه ... تميت واقفه و انا بعدني لابسه عبايتي و شيلتي ..شو سالفته هالانسان من صجه بيرقد بها الحزه الصبح ؟؟؟ و بخليني جي يوعانه تميت واقفه يمكن يغير رايه بس شكله عنيد .. فريت شنطتي ع الطاوله و فسخت عباتي و شيلتي و يلست ع الكنبه اتمنظر بالطوفه ..شو ها الحياه .. شو بقول يعني انا مب متهنيه باول ايام زواجي ليش اصلا انا حسيت بعمري عروس ولا تزوجت شرات باجي البنيات .. جنهم ما صدقوا ابوي يموت كل واحد فصل و خيط ع كيفه .. طالعته جفته راااقد .. خذت نفس يعاملني بقسوه و كلامه لي شرات السم و ما اقوله كلمه الا رد عليه بعشره ..بس شو يباني ليش تزوجني ليش خطبني . .منيره هي الي اكيد اقترحت عليه لانها تعرفني بس اكيد هو ما يعرف اني انا هي نفسها الي كان يلاحقها يعني انصدم فيني شرات انا ما انصدمت فيه .. حسيت بيوع فضيع بتم جي يوعانه الين ما حضرته بنش من الرقاد ...نقزت من مكاني يوم جفت ثلاجه صوب باب الغرفه ربعت صوبها و فتحتها ما جفت فيها غير العصاير .. شليت لي عصير و يلست اشربه . .رديت مكاني شغلت التلفزيون بس ما عرفت كيف اشغل الرسيفر حاولت بس ما صار يلست ع الكنببه و حطيت ايدي ع خدي .. تميت طول نهار بس جي مره اراقب الشارع برع و مره اروح الثلاجه اشرب عصير ..كرهت حياتي و كنت اموت قهر يوم اجوفه يتجلب ع الفراش مرتاح ولا هامنه و انا ميته .. شو ها الحياه انا مو متعوده جي .. .ضميت نفسي ع الكنبه و غفلت نشيت ع اذان العصر قمت صليت و رديت مكاني معقوله ها ما بنش الحينه .. فكرت اقومه بس ما فيني ..خفت يعصب علي. .سلمت امري لله و يلست افكار تاخذني و اتيبني بحياتي و مستقبلي الياي فتحت اعيوني حسيت الحال مثل هو ما يتغير هو راقد و انا محبوسه و ميته يوع ..نشيت من مكاني و رحت صوب الدريشه يلست ع الارض تساندت اراقب الشوارع و الناس رايحه راده يلست اصيح .. ما تحمل اكثر حسيت بروحي بنفجر ..سكت يوم حسيت ان مطر نش و انفتحت ليتات الغرفه ... و كانه ياه صوبي فنزلت راسي اغطي ادموعي وقف ع راسي : ميثه ..؟ ما رديت عليه و الغبيه انا رجعت اصيح مره ثانيه .. نزل حاول يرفع راسي بس انا ما خليته قال: و الله انا ما قصدت ارقد كنت ابا اغايضج ..بس مدري كيف رقدت ع طول صحت اكثر مقهوره من معاملته لي من اولها يغايض و يسوي .. رفع راسي غصبن عني .. قال لي : لا اتصيحين ميثه ..لا اتصيحين و الله ما قصدت .. قلته : هذي حياتك ما بتغيرها رقاد طول نهار و سهر فليل لاصلاه ولا شي .. قال : لا تحاتين كل شي بتغير و خاصه يوم بداوم ..خلاص اجازتي بتخلص ع هالاسبوع .. سكت ما رديت عليه فاجاني يوم مسح ادموعي و قال : يالله انا من جفتج تخبلت ع اعيونج كيف الحينه اخليها تذرف هاي الدموع .. كلامه احرجني بس الي سواه فيني مب شويه سالني : يوعانه ع طول هزيت راسي ابتسم و قال : زين يلا نظهر بناكل لنا شي حتى انا ميت يوع .. وقف و يير ايدي وقفت معاه ...مستانسه لاني اخيرا بطلع من ها القفص و باكل اخيرا .. لبست و ظهرنا ركبت سيارته مستانسه قال لي : اكيد اول مره بحياتج تركبين سياره جي كشخه ؟ ما جذبت و قلته : هيه وايد مريحه ..معقوله ما حسيت البارحه يوم يبتني الفندق رد علي : طبعا ما بتحسين تدرين ليش ؟ عقدت حياتي : شو ؟؟ ابتسم : كنت يابنج بالاسعاف شهقت فضحك بصوت عالي : هههههههههههههههههههههههههههههه ه قلته : موليييييه ما فضحتني ..اكيد اتسولف اكيد قالي و هو يضحك : هههههههه تخيلي عادي عروس و يابنها الفندق باول ليله بالاسعاف ضحكت : هههههههه ما جذبت منيره يوم قال مطر بخليج تنسين المستحى صدق سوالف معاي غير عن الشخص الي كان البارحه حتى ترا انا بعد انلام .يوم انصدمت فيه ..يلا بس اتمنى يطلع انسان يحترمني و يقدرني .. وصلنا المطعم تغشيت و نزلت من السياره تم واقف يترياني رحت صوبه .. و دشينا المطعم .. رفعت غشوتي سالني : كم مره جفتج ما كنتي متغشيه اشمعنى الحينه قلته: اذا ما تباني اتغشى عادي .. حسيته يطالعني باعجاب و خاصه يوم قال : لا تغشي ما ابا حد يجوف ها القمر غيري انحرجت من كلامه .. فغيرت المووضوع : اممممممم يلا ما بناكل .. شل اللسته : شو تبين انزين .. خلني اجوف ذوقج بالاكل .."وطالعني " ولا اول مره تدشين بحياتج مطاعم يستوي ترا .. حسيت من نبره صوته يتطنز علي بس طنشته و قلته : ابصراحه هالمطعم يته اكثر عن مره مع بنت خالوه طالعني بنظرات غريبه و قال : منو هاي شسمها ؟؟ قلته: سلمى ليش ؟؟ حسيته بغى يغير الموضوع و قال : زين شو رايج تطلبين لي ع ذوقج قلته: يمكن ما يعيبك .. تجدم مني و قال لي بصوت واطي : كل شي منج يعيبني .. شليت اللسته و انا مرتبكه من قربه .. جفته مصخها يوم تقرب اكثر فقلته بصوت واطي : مطر ما خلني اكمل كلامي : لا تحتجين ع شي انا ريلج و ليله البارحه بعديها عليج . ارتجف و من غير قصد طاحت اللسته من ايدي .. نزلت نظراتي بالارض شو قصده .. يتحراني اتعمدت اسوي روحي طايحه ... شل اللسته و عطاني اياها .. قلته باستسلام : انت ليش تزوجتني .. طالعته فقال : ليش الريييل يتزوجون بعد ؟ سكت و حاولت اركز ع قايمه الاكل .الي بطلبه علشان بس ما ارد عليه لاني اظني يبا يوصلني لكلام ما ابا اقوله .. |
|
|
#68 |
|
|
رد: رواية انا حر ما انهان والحر ما يرجع لشخص يهينه
قال : شو ما خلصتي بعدج تختارين ..
خلصت عمري و طلبت حسيت بيوع فضيع .. بس يودت روحي و يلست اكل عادي و انا خاطري احط الصحن بحلجي بعد بس كنت احس بنظراته لي يراقبني .. مدري انا بحياتي ما تخيلت اني برتبط بمثل هالانسان ..بس الظاهر ها نصيبي .. رن موبايله .. حوله ع السايلنت و رن اكثر عن مره .. سالته: ليش ما ترد قال لي من غير ما يطالعني : ربيعي برمسه عقب .. سالته: تطمنت ع اهلك احيدها امك كانت تعبانه قال : برمسهم عقب .. قلته : زين اتريا لي نروح البيت مره وحده .. رد علي : ما بنسير البيت .. بنروح دبي بقعد يومين هناك .. شهقت متفاجاه: بس انا ما عندي ملابس .ملابسي في البيت كان يرمسني من غير ما يطالعني استغربت من حركاته رد علي : ابرايه بنروح نشتري شي وايد مراكز هناك في دبي .."رفع راسه و طالعني و قال يتمصخر" ما اظن قد رحتي لهاا طنشته و كملت اكلي .. وايد يتطنز علي شو يعني صح يمكن انا وحده ع قد حالها و مستوى حياتي اقل من مستوى حياته بوايد بس ها ما يعطيه الحق يتمصخر علي ..انا الحينه حرمته يعني ماشي فرق من بينا اذا هو فعلا يجوف زواجنا مثل باجي الناس ... طوال يلسنا بالمطعم سكت عنه و حتى هو ما حاول يرمسني .. ظهرنا . و رحنا صوب الفندق دشينا متاخر جفته يشل موبايله و يظهر برع الحجره يمكن يرمس اهله .. رحت صليت المغرب ويا العشى .. و زهبت شنطتي علشان بنظهر من ا الفندق .. حسيت ان مرهقه و ثجيله يمكن من كثر الاكل .. انسدحت ع الشبريه اريح .. كنت اراقب الساعه و بالي بعالم ثاني .. مره حياتي مع ابوي و مره .. لقاءاتي ويا مطر و كيف كان يتحرش فيني و يستفزني .. و مره ضرابتي مع وليد ولد اخوي .. ابتسمت اتذكر كيف كان يكره حياته يوم انصحه افتقده من عقب سالفته ويا الباكستانيين الي تهجموا عليه ما جفته انجلبت ع بطني و غمضت اعيوني هذيج الليله جفت فارس احلامي للحينه مرات اشك انه حلم ..صدق حسيته ريال بمعنى الكلمه .. عاتبت نفسي المفروض خلاص ما افكر بها الانسان موليه لاني صرت ع ذمة ريال و لكن الله العالم كيف حياتي معاه للحينه بس كم ساعه قضيتها وياه كل يوم اجوف له شخصيه .شكله متقلب .... نقزت يوم حسيت بثجل ع الشبريه نشيت من مكاني و يلست ع طرف الشبريه .. ارتبكت يوم جفت مطر يالس ع الطرف الثاني عدلت شعري بس كان امبين علي مرتبكه ..كان يطالعني .. كنت منزله راسي اطالع الارض ... سمعته يقول : انتي بتمن جي اتخافين مني .. عضيت ع شفايفي ما عرفت شو ارد عليه رد قال : بعدج منصدمه اني انا ريلج .. رفعت راسي و قلته: بديت اتقبل الموضوع .."جفت نظراته تغيرت فحاولت اغير الموضوع" كنت اترمس اهلك .. فاجاني رده الحاد : هي رمستهم شو فيج .. كل تسالين هالسؤال .. هزيت جتفي : شو فيها جفتك طولت برع .. وقف ابسرعه و رفع يده يبعد شعره من ع يبهته و عقب قال : كنت ادوخ انتي ما تحبين ريحه الزقاير ..يلا خلنا نطلع من هني .. سالته : وين ؟؟ طالعني بنظرات مبهمه وقال جملته شويه شويه : نبدأا حياتنا برع راس الخيمه .. خذت نفس طويل متجاهله ننظراته و احاول اسيطر ع نفسي و جسمي الي بدا يرتجف بشكل فضيع .. لبست عباتي و شيلتي ...و طالعت الشنطه رفعت راسي اطالعه جفته معطني ظهره يبدل ملابسه قلته: ما بنمر بيتكم رد ابسرعه: لا استغربت من ردت فعله ؟؟؟ سالته : و ملابسي رد علي و جنه طفر: قلنالج بنمر بنشري لج سالته : و انته ؟؟ راح صوب التسريحه و طالعني من الجامه : انتي دوم جي تسالين هالكثر يعني ؟؟ هزيت جتوفي و قلته: ما لاحظت .."تذكرت شي" بس اتصدق سلمى مره قالت لي انتي وايد تسالين ؟ الفتف صوبي عقب ما عدل لبس غترته و عقاله و تجدم صوبي لدرجه اني رديت لورا و قال بنبره ما فهمت قصده : انتي ما عندج غير بنت خالتج انا موليه ما ارتاح لها عقدت حياتي مستغربه : انت من وين تعرفها اصلا علشان ما ترتاح لها .. ابتسم ابتسامه باهته و خذ نفس طويل : يلا انروح .. خطفني و لحقته و قلته : انت ليش دوم جي .. رد من غير ما يطالع : شو جي ..يعني شو قصدج قلته: دايما اتخلي اجاباتك مبهمه طنشي لحقته الين ما وصلنا السياره .. ركبت معاه حط الشنطه الصغيره في السيت الي ورا .. ركبت حسيت هالمره بشعور غيير .. و خاصه ان الجو ليل .. شغل سيارته و حرك .. حسيت بخوف مدري من شو .. سالت نفسي .. لو كان مطر ما كن يضايجني قبل ما نتزوج ..جي بيكون حالي معاه ...سندت راسي افكر .. جفته مركز ع الشارع ..لاحظت عليه كل ما يرمس ع الموبايل ..ينجلب و يتم ساكت و يسرح .. قلته : اهلك بخير .. رد : هي الحمدلله ..ليش تسالين قلته : من ترمس ع الموبايل اجوفك تنجلب التفت لي ابسرعه بطل حلجه كان بيقول لي شي بس شكله تراجع و سكت وركز ع الدرب استغربت من تصرفه بس وكلت امري لله .. حسيت بالملل سندت راسي ع السيت اترياا متى بنوصل دبي وايد بعيده الظاهر .. .. صدقه مطر اول مره بدشها ابتسمت اصلا اول مره اطلع من راس الخيمه ... تفاجات يوم حسيت بيد مطر اتزخ ايدي .. نقزت بس عقب يودت عمري يوم حسيت ايده دافيه ..رصيت ع ايده و جني ادور الامان سالني بهدوء : خايفه التفت صوبه . حسيت الوضع مش غريب اني انا متسانده ع السيت و هو جريب مني و خاصه يوم بطء سرعه السياره .فعدلت بيلستتي و قلته بنفس النبره: شويه طلعني : من شوه .. هزيت جتوفي : مدري .. حرك حياته مستغرب عيبتني حركته فابتسمت له صدقت منيره اخوها بيخليني اتعود عليه ابلحظات رص ع ايدي و قال : شو فيج بشو سرحانه قلته : ماشي "يييرت ايدي مدري ليش ما عيبني الوضع بس هو ما عارض ع العكس عدل بيلسته و تم يراقب الشارع " سالته : متى بنوصل انا تعبت من اليلسه .. فاجاتني ضحكته: ههههههههه تعبتي !! و هذي دبي قمنا نوصلها بنص ساعه تعبتي عيل لو قبل ما يسون شارع الاماارات شو كنتي سويتي ساعتين لي ما توصلين قلته : شسوي اول مره اطلع من راس الخيمه طالعني مب مصدق : و الله قلته : هي .."التفت يوم سمعت صوت الاذان بس سمعته يوم قال: انتي صج بنت فقر .. التفت له ابسرعه طالعته بنظرات عتب ..وايد وقـح و ها الي ما عيبني فيه كمل كلامه ولا جنه جرحني : عيل انتي شو بتقولين عني كل صيف اسافر مره ومرتين .. صديت عنه و قلت بلهجه جافه : ما اتهمني هالسوالف ما بتوقف عند مسيد انصلي العشى ؟؟ رد علي : دقايق و بنوصل بتصلين بالفندق عقدت حياتي : ليش ماشي مسايد .. خذ نفس : امبلى بس بنصلي بالفندق افضل سكت عنه ..و تم هو ساكت ..كنت وايد مضايجه منه لاني احس وايد مسوي فرق بيني و بينه و كيف جي بنعيش ويا بعض ما يستوي ... كل ما قلته شي جرحني و دفش معايه بالرمسه .. ما عليه الله يسامحه .. شسوي ها رزقي في الدنيا اعترض علي يعني .. الحمدلله ع كل حال .. وصلنا الفندق تمنيت اقول للعمال يوم يسال مطر كم غرفه تبا كنت بقوله غرفتين بس تلومت و خفته لا يحرج علي واو اني احرجه جدام الموظف علشان جي سكت ما ابا اعيش معاه انا وايد متضايجه منه ... خذت نفس طويل و دشينا الغرفه جفت صاله كبيره و عقب شي غرفه و شي حمام .. طالعت المكان ابسرعه جناااااااااااااااااان قلت بصوت عالي : جنه قصر .. فاجاني يوم قال: الحينه ها قصر ؟؟ عيل ما جفتي الفخامه رفعت حياتي : افخم عن جي ما اصدق ؟؟ طالعني بنظرات استهزاء انتبهت لروحي يوم قال : ما تنلامين الي يجوف بيتكم الخرابه "تجدم مني رفعت راسي اطالعه بنظرات غيض بس هو كمل كلامه " معذوره توج بتعيشين حياتج رفع خصله من شعري و كان يطالعني بنظرررررررات غريبه و هو يقول : بس مب جدام أي حد اتعلقين ها التعليقات جنج مب جايفه خير عقب بيقول حرمه مطر عايشه بالعصر الحجري .. كرهته و كرهت يوم يصغرني وايد ..هالانسان ما اادري كيف .. بس يفكر بالاشياء الماديه ..ابتعدت عنه و عطيته ظهري متجاهله نظراته ..مدري مرات احس يتعمد يجرحني .. عضيت ع شفايفي امنع دموعي تنزل ..و شكلي عرفت شوو حياتي بتكون مع هالانسان ..بس اهم شي احاسب ع كل كلمه ممكن انطقها .. دشيت الحمام اتيددت و ظهرت جفته يالس ع الكنبه يتعبث بالتلفزيون طنشته دشيت الحجره شهقت يوم جفت روعتها صج خبال حطيت ايدي ابسرعه ع حلجي خفت لا يسمع شهقتي عقب بعد يتطنز علي .. صكرت الباب وراي و يلست اتامل بكل ركن الغرفه شو روعه و خبال خاصه لون العنابي الله معطي الحجره جو رومانسي .. سمعت صوت فربعت ادور اتجاه القبله وبديت اصلي عقب ما خلصت صلاتي .. فكرت اظهر من الحجره بس غيرت رايي ما ابى ارمسه كارهه تعليقاته و ثجل دمه ... بلعت ريجي ورحت صوب الدريشه فجيت الستاره و يلست اطالع برع .. شو خبال حسيت باللحظه اني بدوله اوربيه يلست اطالع المناظر حلوه دبي في الليل جنان ... ما انتبهت لـ مطر يوم دش علي الحجره ..نقزت يوم جفت ايده اتصكر ع الستاير تروعت رديت لورا جفته محرج: يعني انتي ما تدرين انج تنجافين برع .. هزيت راسي بمعنى لا و رديت اطالع الدريشه اتاكد تم يطالعني عقب قال بجد: فليل لا تفتحين الستاير ترا تنجافين .. شهقت : كيف و الله طالعني بنظرات استهزا و قال : انتي من وين يايبنج ؟؟ صديت عنه ابتعدت زخ ايدي قلته بنبره ضعف : هدني .. سالني : شو فيج ؟؟ حاولت ايير ايدي فهدني طلعت برع و يلست في الصاله ع الكنبه ..لحقني و قال : يالله تعالي نظهر قلته : تعبانه ردد كلمتي باستغراب: تعبانه ؟؟ عيل مره ثانيه بنييج بطياره انتي مو متعوده ع الخط |
|
|
#69 |
|
|
رد: رواية انا حر ما انهان والحر ما يرجع لشخص يهينه
قلته : تعبانه
ردد كلمتي باستغراب: تعبانه ؟؟ عيل مره ثانيه بنييج بطياره انتي مو متعوده ع الخط صديت عنه و بداخلي نار ما اعرف كيف ارد ع اهاناته سكت عنه يلس عدالي ابتعدت عنه شو يتحراني ما احس .. قال : نشي يلا بنرح نشتري لج ملابس قلته بعناد : ما بطلع عقد حياته: شو بتمين بعبايتج ما رديت عليه عقب قال : يلا نشي .. قلته: انت يايب لك ملابس ليش ما اتيب لي معاك انا ما ابا طلع مالي خاطر رد عليه: و الله محد قالج اتطيحين شليت ثيابي و انا شو دراني شو تبين تلبسين .. قلته باصرار: انا ما بظهر .. زخني من ايدي وقفني غضبن علي : يلا قومي عن الهبل شو بتلبسين يلا نشي .. ترجيته: مطر ما ابا حط عينه بعيوني : ليش ؟ ما تحملت صحت و انا اقوله : علشان ما تقعد تتمصخر علي تراني ما اعرف شو اليديد وشو الموضه فاجاني يوم قال: ادري انج ما تعرفين شي انا بساعدج طالعته بغيض هالانسان ما يحس دورت شي بملامحه انه يمكن يسولف معاي بس ملامحه كانت جاده صديت عنه و عنادته : ما بروح معاك هد ايدي : كيفج تمي بعبايتج .. جفته يظهر من الباب فيلست ع الكنبه اصيييييييييح طلعت كل الي بخاطري من الغيض الي فيني دشيت الحجره و قفلت علي الباب انسدحت ع الشبريه تخيلت اشياء كثيره خوفتني منها ان مطر يهدني هني بروحي .. او يختفي و اتم اتهوه ابروحي اندسيت تحت اللحاف يوم تذكرت حلمي الي حلمته البارحه غمضت اعيوني خايفه ...وزين باخر لحظات رقدت من غير ما احس بعمري .. .يا ليل خبرني عن أمر المعاناة ..هي من صميم الذات ولا أجنبية هي هاجس يسهر عيـونـي و لا بات أو خفقة تجمح في قلبي عصـية هي صرخة تـمردت فوق الأصـــوات أو ونة وسـط الضمايـر خفـية |
|
|
#70 |
|
|
رد: رواية انا حر ما انهان والحر ما يرجع لشخص يهينه
الفصل الثامن عشـر.
أقــرب الـنــاس, إنت يا نـظـر عيني, و أبـعـد النـاس, إنت و إنت في عيني. منـك أحـلى محبة,عــاشــهـا قـلـبـي, و منك جرح الهوى,يـامـا تـلاعــب بـي. أقرب الناس إنـت, وأبعد النـاس, إنت فتحت اعيوني ابكسل استغربت المكان عقب تذكرت انا وين نقزت من مكاني يوم جفت ابروحي راقده في الغرفه ربعت برع ..تذكرت اني قافله الباب ع روحي فتحته جفت مطر منسدح ع الكنبه غمضني وايد .. ما قدرت اتجرب منه تميت واقفه ابمكاني كان مغطي اعيونه بذراعه ...احترت اروح اقومه يصلي الفير ويرقد داخل ولا اخليه راقد ابمكانه ...نقزت يوم سمعت صوته يقول لي : شو اتطالعين غامضج وايد يعني . . حطيت ايدي ع حلجي متفاجاه منه رفع ذراعه من ع وييهه و طالعني ... قلته بارتباك: ع بالي رقدت .. يلس فجاه و قال جنه طفران : قلتلج انا ارقد الصبح .. بطلت اعيوني يوم طاحت اعيوني ع الساعه و كانت خمس ونص الصبح . .قلته: الحينه بترقد و ما بتنش غير المغرب شرات البارحه رد انسدح و جنه يغايضني و قال بكسل : هي ..عيل انتي خليتني ابروحي طوال اللليل "رد رفع ذراعه ع اعيونه و شكله كان متضايج مني " لااا و بعد قافله عليها الباب .. قلته: كنت خايفه ..ليش ما دقيت الباب يوم رجعت شو سويت طول الليل ؟؟ نش من مكانه تروعت حسبته ياي صوبي بس جفته ايروح صوب التلفزيون و يشيل علبه الزقاير من ع التلفزيون و راح صوب البلكونه و قال ابرود : رديت راس الخيمه سهرت ويا ربعي بلعت ريجي : شووووو ؟؟ كيف ب ليله عرسك طالعني باستهزاء عقب رد طاالع برع شفته ولع الزقاير .. طنشته رحت الحمام اتغسلت و توضيت ..ظهرت جفته واقف ابمكانه يطالع برع و كان سرحان رحت حجرتي .. صليت الفير .. عقب ظهرت .. جفته يجلب قنوات التلفزيون بلعت ريجي ..طاحت اعيوني ع اجياس متواجده جريب باب الصاله محطايه بشكل عشوائي .. همست: انا اسفه .. انسدح ع الكنبه و قال بصوت واطي : ع شو ؟ يلست مجابلتنه : احسك مضايج ..انا ما احب اجوف حد متضايج مني . طالعني و قال : تدرين ما توقعتج جي ابتسمت مستانسه ع بالي بيقول لي طيبه بس فاجاني يوم قال : انسانه ممله خذت نفس و سكت ...وقف فوقفت معاه جفته يروح صوب الاجياس الي كانت مبعثره صوب باب الصاله شلها و حطها ع الكنبه جريب مني .. وقال من غير ما يطالعني : جوفي ها الملابس ع قياسج ولا شهقت: انته رحت تشتري لي قال : ما بغيتي اتيين و اتقولين ما عندج ملابس شسوي "حط ايده بوسطه" معرس رايح يحاوط في المراكز يدور لعروسه ملابس و هي منخمده داخل الحجره و قافله عليها الباب .. قلته بندم: خلاص مطر انا اسفه ما يحتاي اتذكرني كل مره امرني : جوفيهم ع قياسج .. فتحت الاجياس ابتسمت : الوان رهيبه رد علي: طبعا... ذوقي علشان جي ما خذتج معاي ما يندرى شو ذوقج ردينا ع التجريح و الكلام الي يغث .. طنشته و طلعت اول شي طاح بيدي شهقت : تباني البس هاه رفع حياته يتطنز علي:شو رايج ؟؟ لا يكون تبيني انا البس جي طنشته و قلته: انا ما احب البس هالملابس " صديت عنه متلومه " تجدم مني و رفعت راسي اطالعه حسيت ويهي يحرقني من الاحراج قال بجديه : بتلبسينها و اذا ما تحبين بخليج تحبينها و اذا ما اتعرفين بتتعلمين .. رديت لورا كارهه نبراته الي كانت وايد جافه ..فريت القطعه الي كنت شايلتنها من ايدي و قلته بغيض : ما ابا منك شي . . شهقت يوم زخني من ذراعي بقوه و تم يهزني و قال محرج: انتي تتحرين بتحمل حركاتج هاي وايد طالعته بخوف ما قدرت اقوله شي ها جانب يديد اجوفه من شخصيته بس خلال يومين كيف يعاملني عيل باجر شو بسوي فيني كمل كلامه : ولا تقعدين تستهبيلن علي مسويه روحج مب عايشه في الدنيا... انا ما احب ها و انا ما ابا ...ها عيل ليش متزوجنج ؟؟؟ انا مستغربه للحينه شو بلاه منجلب علي بس حسيت ان كل ها اصلا متضايج لاني قفلت الباب البارحه ع روحي و رقدت و خليته يرقد بالصاله ابروحه .. ما تحملت نظرات الغضب الي كانت ظاهره من اعيونه فصديت عنه بس هو شكله ما يرحم كم كلامه و قال : هاي الصايعه الضايعه الي تقربلج ما علمتج ان الحياه عقب الزواج غير عن يوم تكونين بنيه ولا بعد شراتج ما تعرف ها شي ؟؟؟ ما اعرف من كان يقصد حطيت ايدي ع اعيوني و صحت يوم جفت الفاظه جي استوت فدزني ع الكنبه فيلست بقوه .. صحت بصوت عالي يوم سمعت باب الحجره يتصكر بصوت عالي ... ما اعرف شو اسوي يطلب مني اشياء انا صج ما اعرف شو يبا بالضبط ؟؟ شو قصده بصايعه ضايعه منو هاي ؟؟ زين انا توني اعرفه كيف يباني البس جي جدامه كيف يباني ارمسه هو اصلا كيف كلامه معاي كله تجريح بتجريح يعني ليش ما يحاسب روحه ...و يحاسبني انا .!! الحينه بيرقد للفير و بتم انا بيوعي لو اصوم احسن لي .. مسحت دموعي بظهر ايدي و شليت الاشياء الي شراها لي ورتبتها ورديتها بالجيس . .رديت يلست ع الكنبه حسيت بصداع جفت الساعه كانت ست الصبح الحينه بس بتم اطالع الساعه و لي ما حضرته ينش . .وقت ورحت صوب البلكونه اطالع العالم و الدنيا حسيت بنتعاش فكرت ارجع ارقد بس كيف و هو راقد داخل الحجره الحينه .. سندت راسي بالدريشه محتاره كيف اتكيف مع حياته ..انا حياتي تختلف عن حياته ..الله يهداه اخوي ..وافق حتى قبل ما يعرف شو اسمه و شو طينته و كيف طبعه يبا الفكه مني .. ذرفت دمعه يوم حسيت اني ابروحي بها العالم و ما عندي شخص يحسسني بالامان ..و ها مطر امبين عليه مب قادر يتحملني دقااايق ...حطيت ايدي ع الدريشه ..تميت واقفه .. مب عارفه شسوي .. سمعت صوت باب الحجره ينفتح غمضت اعيوني و ارتجفت بداخلي ما رقد انا ع بالي رااقد .. حسيت بخطواته جريبه منه ..تميت واقفه ابمكاني حسيت بانفاسه جريبه مني عضيت ع شفايفي الحينه لو تحركت من مكاني بياكلني و بتضايج ... غمضت اعيوني اكثر و اكثر يوم همس باسمي : ميثه .. تجرب مني اكثرغطيت ويهي بكف ايديو اجبرني اني التفت صوبه و اجوفه .. طالعني بنظرات خبلت فيني بصراحه علقت اعيوني به و نسيت دموعي سالني : اتصيحين ما يودت روحي حطيت راسي ع جفته وصحت بصوت عالي و قلته بصراحه: ما احس بالامان .. حضني و قال بصوت عذب: افاا مطر موجود و ما تحسيين بالامان دفنت ويهي اكثر بصدره ويلست اصيح ..ابتعد عني و حضن ويهي بيدينه ورفع راسي خلاني اطالعه و قال : لا اتصيحين بللت شفايفي بطرف لساني و قلته : انا انا ..... عضيت ع شفايفي مب عارفه شو اقوله سكت و تم يطالعني فرفعت نظراتي و طالعته جفته يطالعني باهتمام قلته : انا ما اعرف كيف ارضيك انت تتحراني استهبل علييك .. قاطعني : ميثه ميثه خلينا من هاي الرمسه و خلينا نستانس عاالاقل يوم واحد ..مب معقوله جي .. زخيت ايده و قلته: بس انت مب راقد ابتسم لي : ابرايه ..بتم وياج يمكن اتعلم منج ارقد من وقت استانست اول مره يمدحني فابتسمت دزني بطرف صبعه ع الخفيف ع خدي وقال مبتسم: شووووو قلته : اول مره تمدحني ضحك : هههههههههههه و ها مديح الحينه ويا ويهج .. ضحكت و انا احس براحه : ههههههههه حبست انفاسي يوم جرب ويه من ويهي وحط يبهته بيبهتي و قال بهدوء : ما يحتاي امدح انا من اول مره جفتج حطيتج في بالي ... غمضت اعيوني مستانسه من كلامه ابتعد عني و طالعني : اترومين الحينه تظهرين معايه و ما نرجع البيت الا الساعه عشر فليل مدري ليش هالمره انا الي تجربت منه و قلته : هي بس بشرط جفته ممستانس من حركتي يوم تجرب منه وقال : امريني تدللي قلته : من دون تعليقات جارحه وايد تجرحني .. صرخت يوم شلني فجاه و ضحك علي : ههههههههههههههههه كنت متروعه بس مستانسه ضحكت جني ياهل و من زمان ما ضحكت جي \\ : قلته : ما قلت تم .. مطر: ما بقول حرررررره ابتسمت له الظاهر منه فايده يتغير معاي ..نزلني و قال : يلا بدلي و انا بروح اسبح .. قلته : ان شاء الله ... دخلنا مركز فخم ..ورحنا صوب المقاهي ..طلبنا لنا ريوق ... يلسنا نتريق كنت مستانسه مدري يمكن احس من اليوم بتبدا حياتي ويا مطر .. رفعت راسي اطالعه جفته يطالعني |
